إنها زوجتي الجزء الثالث

من تأليف Fatima Z-F
2019

محتوى القصة

رواية إنها زوجتي

ربما اعجاب او ربما حب...لحد اللحضة غير معروف شعور عصام غير ان افعالو كلهم كيضهرو اهتمام واضح بيها و من خلال معاملتو ليها تقدر تفهم منهم بزاف الحوايج ..لكن واش هاجر لي عمرها عرفات شي نهار معنى الحب و الاهتمام او علاقة بين الطرفين ..

هي بكل وضوح ورقة بيضاء بما يخص العلاقات مع الجنس الاخر و كل علاقتها مع ولاد قسمها الا وكلها مدابزة و تخراج لعنين هي مكتحشمش و لي جا قدامها متعقلش عليه ..تعاير ليه طواسلو كاملين دمها سخون و حار مغيارة بزاااف و حاجتها متبغيش لي يقيصها تا من حوايجها هما لخرين مكتبغيش لي يقرب ليهم فكيف لشخص يكون قريب لقلب ...سريعة في رد فعلها و مكتحسبش العواقب ورا افعالها بخط عريض ضاربة دنيا بركلة وعايشاها بطول و لعرض و كيف بغات هي ماشي لي يبزز عليها....

اما هو عكسها تماًاااما شخص جد مسؤل و واضح في قراراته معندوش مع البسالة و كيبغي الشخص يشد معاه طريق نيشن و لا ايعوجو من شي جيه وخا كيبان صارم لكنه شخص كيتحكم في اعصابو و افعالو و تا مشاعر ديالو مكيضهروش على وجهو ديما ملامحو جامدة و ضحكو قليل او ربما منعدم...خدا مسؤولية و هو صغير بعد ما مات باه وشاف مو لي تعدبات على ودهم قرا بليل و بنهار باش يوصل لمكانة لي هو فيها دابا مكيبغيش لي يدير معاه العكس و يلعب ورا ضهرو حيت رد فعلو ايكون خايب و بزاااف .. دمو حار و الغيرة كتكلو و كترجعو شخص اخر على لي معروف هو طبعو جد هادئ مكيهضرش بزااف و مخلص لدرجة كبيرة و معندوش مع دخول و لخريج في الهضرة لأنه دائما كيدخل نيشن لصلب الموضوع بلا زواق...لمكانة لي وصل ليها و لفلوس لي دار و سمعة ديالو لي سبقاه و خصوصا في القسوة ديالو كثيير من ناس كيضنوه انه من ناس لي كيعجبهم الحياة اليلية بي معنى زيارة النوادي و شراب الى اخره ..الا و انه هو العكس تماما شخص شاد في دين ديالو بززاف ماشي متشدد لكن دينو كيبقى شيئ اساسي و مهم في حياتو اليومية....

داير يديه ورا ضهرو مقربها ليه بزاف و غادي معاها بشوي على حساب خطواتها و زيد لابسة طالون خايفة طيح كتمشى غير بشوي..مهبطة راسها و مشبكة يديها....دخلو لصالون متسوط و في جوانب ديالو فيه مكتابة مليئة بالكتب العربية بقات كتشوف فيهم تا حسات بيه جرها لبيت كان مفتوح على صالون ..دفعها بشوي بقدام...

عصام : هدا هو لبيت لي اتعيشي فيه بعد زواج..

هزات فيه عنيها و فمها محلول شوي دورات عنيها على البيت لي كان كبير بزاف و مفرش بطريقة جد راقية و زوينة بزاف..دغيا هبطات راسها و مجوباتش...

وقف حداها ديار يدو في جيبو و كيشوف غير في زيف لي دايرة حيت كانت مهبطة راسها بزاف مكيبانش وجها ليه و هو واقف حداها طويل منها ...هز ليها وجها بصبعو و هي حناكها قربو يطرطقو و هما لي كيبانو في وجها....

عصام عينو في عنيها: عجبك....

هاجر بزز باش خرجو ليها الحروف جاتها حشمة في شكل عمرها وقعات ليها و زيد لخلعة فشلاتها قدامو: اااه زوين بززاف...

عصام: مابغيتي تبدلي فيه والو على دوقك...

هاجر كتحاول تبعد عنيها من عينو و تشوف في جهة الاخرى : لا عجبني كلشي هكا...

عصام عاض فمومن لداخل: شوفي فيا....رجعات عنيها ليه..بقى كيشوف فيها عاد نطق...مالكي....

هاجر جاتها ضحكة و بزز باش حبساتها..و من حبساتها جات مبتاسمة و حرف زين بان ليها كثر و حنيكاتها طلعو و غمضو ليها عنيها ..عضات طرف لسانها بشوي : ماملي والو غير...حطات يديها على حنكها و كتشوف فيه ببرائة....صراحة جاتني لحشمة بزاااف و معرفتش علاش اول مرة كنحشم من شي حد لدرجة منقدرش نهز عيني فيك ....

بقا كيشوف فيها و كفاش كتهضر و حركات طفولية ديالها خلاتو مبهور بيها بدون ما يحس ترسمات ليه شبه ابتسامة في ملامحو و لأول مرة عصام بن جلول كيبتاسم بهاد طريقة لي زادتو وسامة كثر ما هو وسيم....حط يدو بجوج على حناكها و عينو في عنيها هبط راسو بشوي باسها في جبهتها بوسة طويلة كتحمل بزاف و اولها الامان و تانيهم وعوود كثيرة عطاها لنفسو تجاه هاد لبنت لي قدامو و لي اتولي مراتو ....

عصام بهمس : اتولي مراتي و ديالي و سميتك اتحمل سميتي مبغيتكش تحشمي مني او تخافي مني مع الايام اتعرفيني مزيان...عاود باسها في جبهتها مع كلمات...الله ارضي عليك....

خرجو من باب كبير ملاصق مع الجناح ديالو و كيخرج نيشن لجردة مفرشة بكراسةطوال و متوسطهم لابسين و في جهة الاخرى كاين لصال ديالو كلو كيبان حيت مبني بجاج...

مشبك يدو مع يديها جلسها فوق كرسي مقابل معاه و فوق طبلة كان محطوط ديجا عواصر و لحلويات المغربية في الاشكال مستفة في بلاطو...هي بالحشمة لي جاتها و عنيها لي مبغاتش تجي مع عينو ولات باغية غير فين تلها بان ليها داكشي فوق طبلة بدات غير كتسلح ناسية راسها...

وهو حاط صباعو تحت دقنو و غير كيشوف فيها كتعمر فمها كامل و تبدا تمضغ بحال شي همستر صغير تا خوات بلاطو كامل من لحلوى عاد هزات عصير كتبرد بيه...

عصام دار اشارة لخدم لي جاو يصاوبو لعشا هاد ليلة يجبو ليها بلاطو اخر و من نفس نوع لي كلات منو دابا و بلاطو اخر فيه كيك كلاص....

غير شافت داكشي تحط ليها تاني و هو يوحل ليها لعاصير كتكحب مخرجة عنيها..حط يدو ورا ضهرها كيطبطب عليها و مد ليها كاس لما تشربو...

هاجر و جها حمر خدات منو لما: صافي شبعت و الله شكراً....

عصام بقا غير كيشوف فيها تا حشمات في بلاصتها و هبطات عنيها جاتها اللقوة باغيا غير وقتاش تهرب قدامو و تبشي حدا مها ...

تحل صمت في لمكان لمدة طويلة غير كيشوف فيها حاضي جميع تفاصيلها و حفض كلشي فيها و هي ساكتة تا نطق كيف عادتو نيشن لموضوع بلا زواق.....

عصام: غدا انديرو خطبة و العقد...

هاجر هزات فيه راسها مصدومة: غداااا و لكن انا ما مم...سكتات مقدراتش تكمل هضرتها قدامو....

عصام حط يدو على يديها و ورك عليها مزيات تا عودات هزات عنيها فيه: بعد غدا خاصني نسافر ضرووي و غادي نبقى تم 15 ليوم عاد انرجع لمغرب غدا لي بقا ليا انديرو فيه خطبة و عقد وهاد 15 ليوم وجدو فيها لعرس على خاطركم....

هاجر تصدمات و معرفات ما تقول: و قرايتي شنو اندير معاها....

عصام: مغديش نحبسك عليها و اتكملي في نفس لييسي لي كتقراي فيه و لبغيتي تكملي تا من بعد لباك معنديش مشكل ...

هاجر كدور في عنيها جاتو زرب عليها بزاف و هي يا ربي مزال ما عرفاتو تا مزيان : ولكن نتا ما كاملة تا شهر باش طلقتي و دابا ادير عرس بهاد سرعة كلشي ايقول اني كنت معاك و انا سباب طلاقك....

عصام عاقد حجبانو لوسط: طلاقي ما عندو تا علاقة بزواجي و تا حد ما يقدر يهضر عليك ما حدي انا كاين و نتي عروسة اتبغي تفرحي بنهار ديالك وخا نكون طلقت لبارح اندير ليك عرس كيف بغيتي....

عصام جاها نيشن ضنا منه انها اتفهمو لكن هاجر عقلها تبلوكة فقط انها تفكر تزوج قلبها كيبشي و يجي ما عرفات ما تقول من غير: سول بابا هو لول ..

حرك راسو مصغر عنيه فيها شافها بحالي تزيارات بزاف من دكر ليها لعرس...عض فمو من لتحت .....شد ليها يديها و جرها عندو بجهد تا جلسات فوق حجرو هو جالس و هي فوق منو بصدمة لس جاتها بقات غير كتشوف فيه وجهو حدا وجها و انفاسهم تخلطات واحد كيستنشق انفاس الاخر....

هز يدو بشوي بعد شعرة لي كانت لاصقة على فمها..كيف حط يديه على حناكها غمضات عنيها بجهد...ركز عينو مع فمها لي منفوخ و حنيكاتها لمطبزين و حمرين و عيونها لي سحروه مغمضين..

دوز الابهام ديالو بشوي على شفاه ديالها و حط يدو كاملة على حنكها و صبعو كيطلع و يهبط على حنكها....حركاتو جابو ليها تبوريشة و دقات قلبها تزادو ...حلات عنيها بشوي لقاتو كيشوف فيها ماشي مغوبش و حجبانو ممعقودينش كان فقط كيوشوف فيها بهدوء و تا هي كتشوف فيها بهدوء احاسيس مختلطة تملاكاتهم بجوج مشاعر غريبة على كيانهم....دور يدو على عنقها و جرها لعندو بشوي حط جبهتها على جبهتو و نطق بصوت تقييييل قريب لهمس ما كيسمعو تا حد من غيرو هو و ياها....

عصام: قابلة تزوجي بيا...

رددات بشوي و دمعة هابطة من حنكها: خايفة...


حط شفاه ديلو على دمعة لي نازلة على خدها..بقا فمو محطوط على خدها ...دور يدو ورا خسرها و جرها ليه اكثر خشاها في احضانو و فمو حدا ودنها همس ليها...

عصام: شنو لي خالعك....

حطات راسها على كثفو كيهبطو ليها دموع قد لحجر: خالعني زواج اهئ اهئ انا مكنعرف والو في زواج....

عصام هز ليها راسها كيمسح ليها دموع: ششش متبكيش ...هز مشوار كيمسح ليها لخنونة لي هبطات كيف مسحها و هي تجيها ضحكة و ما حبساتهاش هاد لمرة خلاتها و رسمات ابتسامة كبيرة على وجها و مع عنيها مدمعين و الابتسامة جات بحال شي صورو فنية خلابة و جميلة في ان واحد

هاجر كضحك و كتبكي في نفس الوقت : من كنبكي نيفي تا هو كيبكي معايا هههه

عصام حط يدو على حنكها كيحرك ابهامو بشوي و ساكت خلاها تا رتاحت شوي عاد نطق : الخوف او الخلعة كتجي قبل زواج هو امر عادي و كيجي لأي واحد و لا نتي خايفة حيت انا كبر منك بزااف.....

هاجر شافت فيه مزيان و حركات راسها بشوي بي "اه" حاتو لصراحة و مكدباتش عليه....

عصام هبط يدو ليديها و شبك صبعانهم مع بعض: كنواعدك مغاديش نقرب ليك تا تكوني نتي مستعدة و باغية مغادي نبزز عليك تا حاجة طول فترة زواجنا تفقنا....

هبطات عنيها ليديه لي مشابكة مع يديها و حنيكاتها حومر تبسمات بشوي و حركات راسها بي " واخا" كتبان بحال شي فريزة....

كيف حركات راسها بي الاجاب زاد ورك على يديها كثر كأن جوابها كيعني انها ولات ديالو بوحدو....

دخلو لفيلا وهو شاد ليها في يديها بغات تبشي تجلس حدا مها ..ساعة ما لقات فين تحرك جلسها حدا ملاصقة معاه و كيهضر عادي مع حليمة لي عجبها عصام بزااف و لقات فيه كل ما كتحلم بيه الام لبنتها و زيد انه متواضع بزاف و خا مكيضحكش و مافيهش قوة الهضرة لكن غير دوك جوج كلمات لي كيخرج كيكونو بحال سمن مع العسل كيفتحو لواحد شهية وخا حليمة قوات عليه بي الاسئلة لكن عطاها لخاطر و بزايد و تعامل معاها كيف كيتعامل مع مو لالة ياقوت....

حطو ليهم لعشا و كلشي راد لبال غير مع عصام و معاملتو الفريدة لهاجر لي جابت لحليمة و سومية شك بهاد الحشمة و التباتة لي جاتها ....عصام قطع لحم مرصوات صغار فطبسيل و حطهم قدام هاجر بلا ميتكلم او ينطق بي حرف واحد ....تصرفاتو كيكونو هادئين و مكتضربيش ليهم لحساب ابداً...

وصلهم قدام دار ديالهم و حيت حي شعبي و مع صيف كلشي كتلقايه جالس قدام باب دارو كيتبدر...كيف شافو طنوبيل ديال عصام و جالسة حداه هاجر خرجو عنيهم من نزل بطولتو و تجريدتو و الجمال الرباني لي فيه...

فضيلة جالسة وسط لعيالات: ميمتي على زلزال بنت حليمة بمن تزوجات...

وحدة من لعيالات: هادي كطير من لمقلة جنون ما يوصلوها و جها سعدها تال بين يديها و بناتنا لي ديما دار و صواب كيجيهم غير لبطالي على خوه...

فضيلة: يا ختي راه لبنات لي بحال هاجر هما لي عندهم زهر و كيضربوها بتزويجة فاعلة تاركة ماشي بحالنا....

وحدة من لعيالات مزال صغيرة شوي دايرة لحجاب:اوا قولو مشاءلله متعينوش البنت و هي عاد مادة يديها لحنة و زيد هاجر كلشي يشهد فيها بنت الاصل و العائلة لكبيرة ضريفة و حااادكة بدراعها تبارك الله و زيد ضريفة غير ناس مكيخليوهاش في تيقار و حيت زينة كيبغيو يتبسلو عليها ساعة كيلقاوها لالة و مالي لي قرب جيهتها تعطيه علاش يدور راه البنت المحترمة مكتعنيش البنت لي تبقا قاجة عليها في دارهم و انما البنت لي تعطي حدود مع ناس لخرين و تحافظ على نفسها و هاجر خير متال على ذالك و بلاصت دويو فيها طلبو سعدها لبناتكم....


اصبحنا و اصبح الملك لله يوم جديد عن غير الايام لي دازو في حياة هاجر....

هاجر و من لا يعرفها فكل لحومة تدكر ليهم هاجر يردو عليك واش زلزال....ليوم لي عمرها فكرات توصل ليه او طاح ليها في لبال ها هي ليوم وصلات ليه ماشي مجرد خطوبة و انما مرافقة بي العقد لي اتولي فيه على سنة الله و رسوله زوجة عصام بن جلول...مشاعر مخربقة متملكينها و لكن اكثرهم الخوف حاسة بالخلعة طالعة من كرشها و لي كلاتها كترجعها تم نيت بالخوف لي تملكها....

كلشي داخل خارج كيوجدو في الخطوبة لي اتكون فليل... خوها جواد ليل كامل و هو شاد طريق مزال بلا نعاس و خا هكاك مجلسش كل مرة تسيفطو حليمة لبلاصة يجيب منها تقضية.....

حليمة جالسة في لمرح كتخلط لحنا: و الله ما توقعت هاد زربة مزال ما موجدين تا حاجة....

سومية كتنشف لكيسان: اوا سيد زربان و قالك ايسافر راه معندوش الوقت و زيد تباركالله ما خلا لينا ما نقلولو كلشي تكلف بيه شفتي بعدا دوك لحوالة لي رسل صباح...

هاجر حالة فمها فيها : شمن حوالة تاني هادو...

حليمة:حوالة رسلهم عصام صباح و نتي كنتي ناعسة ما جيبا دنيا خبار و داهم باك لفران يتشواو تا من طورطات و لحلوا و العاواصر كلشي ايوصلنا تال باب دار....

هاجر : ومالو على هادشي...

سومية: يا لعوجة راجل هازك فوق راسو و باغيك ...غير نتي لبغيتي تجري على سعدك بيديك و زيد لبارح هضر مع لواليد و قاليه هاجر على حسابي من نهار جيت دويت فيها و درنا الفاتحة....

حليمة:.اوا ربي يسهل عليه فهاد نهار مسكين من دابا و انا هازة ليه هم لهاد لعفريت لي ايدي وخا لبارح قلت ليه راه قبيحة قالي مزال صغيرة تكبر و دير عقلها.....

هاجر مخرجة عنيها : يااك امي وليتي تعايريني ورا ضهري...

حليمة: ومالي كدبت راجل جانا لصراحة تا حنا نجيوه لصراحة ديك الحشمة لي درتي البارح ماااشي ديالك ا بنت كرشي انا نيشن قلت ليه بنتي قبيحة و هو رضا بيها اللومة حيدتها عليا هاد ساعة و منكم لبعضياتكم ....

سومية: نوضي احبيبة تنقشي ها هي نقاشة طالعة تنقش ليك واحد جوج صبعان باش دوشي و تبشي لكوافورة تقاد ليك ....

ناضت دارت ما قالت ختها ما شدات عكس ما والو لي قالوه ليها كديرو..قدات ليها نقاشة نقش و زيناتو ليها خلاتو تا نشف عاد دخلات لدوش طرف حالتها و حليمة غير تابعها بي لملحة فين ما تحط رجلها ترش شوي......

وصل لعشا جالسة في بيتها مقادة و مصاوبة لحالة لابسة قفضان بي الابيض و مطرز بي دهبي دايرة فولار نفس شدة لي كدير ديما و سنسلة هابطة على جبهتها ..جات غزالة كتحمق بزين.....تهز قلبها تال سما و تخبط من سمعات تطبال قدام دارهم و المعنى ان عريسها و صل....


"انت قدري المدسوس بي بقايا فنجان قهوتي....وانا امية تقية لا اقرأ الفنجان...." 

كل شخص في يوم خطوبته لا بد ما يكون فرحان و سعيد انه اخيرا ايولي من نصيب شريك العمر..الا ان هاجر حالة خاصة ....اليوم كانت مهزوزة و عقلها مرفوع فقط كدير لي كيقولوه ليها...مشاعرها متناقضين بين القبول و الرفض ...عقلها مرفوع وزادت الخلعة فشلاتها...

وقفات كتشوف راسها في لمراية و كتعوج في صباعها بتوتر كتسمع لهضرة برا و العائلة مجموعة و تطبال نايض...غمضات عنيها كتحاول تهدن و ترجع تنفسها طبيعي بعد ما بدا كيتسارعو دقات قلبها...

تحل عليها لباب بشوي و دخلات عندها خالتها كضحك فرحانة بيها...

سلوى : مشالله على بنتي لحبيبة كيف طلعتي غزااالة كتحمقي ....

هاجر: فين كنتي من صباح اخالتي...

سلوى كضحك :اوا راني وليت محسوبة من عائلة لعريس و عاد جيت معاهم..

هاجر جاتها دوخة: افففف قلبي كيضرب بجهد بحالي كنتخنق...

سلوى: عادي الحبيبة كل واحد و كيف كتجيه الخطوبة و لكن تبارك الله جيتي واعرة كتحمقي خاصك تزيدي غير شوي ديال لعكر حمر يطراسي ليك فمك....

هاجر مدات ليها لعكر :هاكي صاوبيه ليا نتي.....

صوبات ليها خالتها و عودات قدات ليها شدة فرحانة بيها كثر من لقياس بحالي خطبة ديال بنتها ماشي بنت ختها....

سلوى كتهضر و تقاد ليها: نوصيك من دابا ابنتي من طلعي ضروري ايسولوك واش خديتي صداق قولي ليهم داكشي بيني و بين راجلي بلا متشرطي راه عصام يدو صخية بزاف و مغديش يحبسها عليك نتي لي اتولي مراتو ..حطات يديها على كثفها...و الله يرضي عليك نقصي من لعصبية ديالك شوي و ديري عائلتو في مقام عائلتك و خصوصا مو حتارميها و قدريها و بعدي من المشاكل....

هاجر : اوا على حساب هما و معاملتهم لقيتهم سكر راني انولي معاهم كثر من لعسل ..لقيتهم قطران راني انولي معاهم عافية كحلة....


سلوى: يا بنتي و مالكي طلبي لخير تلقايه و دابا تعاشري عصام و تزيدي تعرفي بيه و اتشوفي لا ما وليتي تبغيه و تحماقي عليه....

مرضاتش على خالتها و بقات ساكتة تا دخلات عليها سلوى يطلعوها لفوق ناس كيتسناوها...

تنهدات بشوي و قدات سمطة ديال لقفطان و سندالة مدهبة ديال طالون ...طلعات بشوي مع دروج و لقفطان كيتجرجر من لور و لحنة لي في يديها ولات حمرة هي لي كتبان زادت عطاتها سر و جمال خاص....كلشي وقف كيصلي على نبي ...

هز عصام عينو بشوي كيشوف فيها تا دخلات لصالون لي هو فيه عاد وقف و قرب ليها و هي حادرة عنيها...باسها في جبهتها و جلسها حداه ....

هزات عنيها في ناس لي حاضرين بانو ليها عائلتها كاملين موجودين تبسمات ليهم و حاسة بحناكها سخان و حومر ايطيرو من بلاصتهم....

شد ليها في يديها وهي دور عندو ...جات مع عنيها مع عينو...

كان مدور شعرو لور و لابس بدلة سوداء ملتفة على الجسد ديالو بشكل راقي ..لأول مرة كتركز في لون عيونو الازرق بحال لون البحر صافي و تقاسيم وجهو الحادة و المثالية كلشي فيه زوين كيخليك بدون شعور تحلي فمك فيه و متسخايش تبعدي عينك منو....

قرب ليها بشوي حط حنكو على حنكها و فمو قريب لودنها....

عصام همس ليها بشوي: جيتي زوينة بزاف....

هاجر معرفات باش ترد عليه و هي ضربها بسكتة بقاو غير عنيها لي كيدورو بين لحضور دايرة رجل فوق رجل و دافعة صدرها لقدام وراسمة ابتسامة صغيرة على محيا وجها من شافت سومية جرات باها يشطح معاهم ....

كلشي ناض كيشطح و يدردك على الحان شعبي لي مكيخطاناش في جميع المناسبات ...تا وقفات وحدة زغبها الله قربات لعند هاجر شدات ليها في يديها و جراتها وسط لعائلة تشطح كانو غير عائلتها ...عمامها و بناتهم و ولاودهم وجواد هو و ايوب.... شدات في يدين باها كتشطح بي كتفها و كضحك عاجبها لحال...

بقا غير هو لي جالس في بلاصتو مشبك صباعو و عينو كيدورو مرة يشوف فيها هي مرة يشوف فولاد عمامها لي كيشطحو حداها....


اسماء نايضة كتشطح و ضرب بيديها و رجليها...

كلشي وقف كيشطح الا هو و اكيد تا حد ما يقدر يتجرأ و يقرب ليه ينوضو حيت غير من عنيه عرفوه معندوش مع هادشي.....

دورات عنيها بشوي لخوها وهي تلقاه مخنزر و عاقد حجبانو لوسط خلعها...دغيا ضربات دورة هضرات مع سلوى في ودنها...حركات ليها سلوى راسها و دخلات لوسط جرات هاجر كتنهج مسكينة شطحات من نيتها ...

داتها حدا عصام جلساتها...كيف عطاتهم ضهر شد ليها في يديها و و ورك عليها مزيان تا تقصحات دارت عندو عاقدة حجبانها....

هاجر: اااي غيير بشوييي راك كتقصحني من نهار شديتي هاد ليدين و هما كيتعدبو....

هز فيها حجبانو و عاض فمو من لداخل ...قرب ليها حدا و دنها كيهضر بشوي و كل كلمة موزونة عند ختها...

عصام: شطحي في دارك اه ...قدام ناس لا ...تفاهمنا ...

هاجر هزات فيه عنيها وهي ترجع لعكسها تاني وردات عليه بكلمة وحدة: لا ممفاهمينش....

دور يدو على خسرها و لصقها معاه كثر و بقا ساكت مجوبهاش...

بقات هي كدور في عنيها و سكتات لمدة طويلة كان قريب ليها بزاااف و يدو كطلع و تهبط بشوي على خسرها تا تنهدات بشوي و نطقات بلا متشوف فيه: واخا مفاهمين.....

كيف سمعها رسم شبه ابتسامة على وجهو و دغيا ختافات....باسها بشوي فراسها و عاود هبط لودنها دار بحالي ايهضر معاها لكن مهضرش و انما باسها بشوي و بعد بحالي ما دار والو ..

خلاها حمرة كيف المطيشة و الحشمة قتلاتها... قدامو كيتسلاو ليها و بلا ما توعي بنفسها كتلقى راسها غادة معاه في الخط ربما شخصيتو او طريقة كيفاش كيتملكها بلا متشعر بنفسها كيتقضاو ليها معاه ...


مكرهش ينوض يجرها من تم و يعطي سلخة لدوك لي كانو كيشطحو حداها ...لكن فقط ليها هي بوحدها و ضحكتها لي كيسمعها بحال شي لحن موسيقي فودنو مبغاش يخسر ليها خطبتها و بغا ديك ضحكة تبقى ديما مرسومة على ملامحها .....

بزز باش تحكم في راسو و بقا جالس...مكانش متوقع انها تفهم راسها و ترجع تجلس حداه ..لأنه واخدها على حساب سنها عارفها صغيرة و كدير لحاجة بلا مضرب ليها لحسبة و في سنها اديرها بنية صافية ما ناضتش تشطح باش تخليه يغير اوتبين ليه شطيحها و انما ناضت فرحانة مع باها شادة ليه في يديها بحال شي طفلة صغيرة كتشطح معاه ...

هو كان عارف هادشي لدا تحكم في راسو و خلاها تا جلسات حداه عاد هضر معاها نيشن "شطيح قدام ناس لا"...شخصيتو رزينة و هادئة و كيخلي كلشي بلاتي هي احسن مكيتسرعش في افعالو وهادشي لي كيخلي شخصيتو متميزة....

شافتو جبد تليفون و هي تخرج عينها كان اخر ما كاين في سوق و شكل ديالو واعر بزاف حمقها ...

خشات راسها معاه سابقاه كتشوفو اش كيبقشش فيه ناسية راسها و هو عين في تليفون و عين فيها كيشوف كفاش كطل عليه بحال شي بنية صغيرة و بهاد تصرفات عاد كتزيد تعجبو كثر و كثر....

هاجر هزات فيه عنيها مدلية شافاه تحتانية ديالها بحالي كطلبو و عنيها كيبريو : صورني....

لصقها معاه و هز تيلفوة دار معاها سيلفي و هي كضحك.من لودن تال لودن ....دواها هو تصاور و كيعجبها بزاف تصور جميع لحضات ديالها وتا من الفيس لي حيدو ليها كان عامر غير بتصاورها ....بزربة هرفات ليه على تليفون كتصور و هو خلاها دير ما بغات عاطي لخاطر ليها من كتبغي تصور معاه ..

وخا هو من نوع لي مكيتصورش لكن معاها هي كيهبط من لوعارة ديالو شوي و غادي معاها على حسب سنها....

تحطات طبلة قدامهم عامرة بي لورد الاحمر ووالابيض و فوق منها جميع لكولي ديال ذهب لي كان ختار ليها بسبعة و لوسط كاين بواطة ديال خاتم مارياج ديالها و خاتم ديالو ابيض....

كلشي وقف كيصورو حالين فمهم في لهدية و دهوبات لي جاب ليها حمر ليها وجها قدام كلشي و بين على مستواه الاجتماعي ..... 

ركب ليها لخاتم و باس ليها يديها خلاها كتلون بوحدها بالحشمة خصوصا من باها و خوها كيشوفو فيها...بالحشمة لي جاتها تلفات دغيا هزات لخاتم ديالو و ركباتو ليه بزربة خلات كلشي كيضحك عليها...

ايوب داير فيدو كيضحك عليها و: ناري زلزال ديالنا ولا كيحشم هههه

مزال ما فاقت من صدمة ديال لخطبة منزلة راسها كتشوف في الخاتم ساهية تا سمعات راجل جالس حداا بها كيهضر معاه...

راكل:عندك ابنتي شي شروط لهاد سيد بغيتيهوم يكونو مكتوبين في العقد...

شافت في عصام و عاود شافت في راجل:لا معندي تا شروط....

راجل: خديتي ابنتي صداقك....

هاجر قالت ما وصاتها خالتها وبلا نا تحس نطقات ديك الكلمة: بيني و بين راجلي...

عصام شاف فيها و ديك كلمة لي خرجات من فمها "راجلي" خلاتو لمرة تانية يتبسم بلا ما يشعر ..هز ليها يديها لي كانت مشبكة مع يديها باسها بهدوء قدام كلشي ...

دخل يدو في جيبو جبد منو شيك حطو قدامها...هزو راجل يشوف ثمن باش يكتبو في العقد....شاف ثمن و هو يخرج عنيه و لا كيكحب بجهد...مد شيك لسي حميد و هبط على لورقة كيكتب بلا ميدكر تمن لي كان في شيك...

سي حميد شاف فشيك مصدوم دار عند عصام : لكن اولدي...

هز عصام يدو قاطعو بلا كلمة .....سي حميد سكت و حط شيك قدام بنتو بلا ميزيد الهضرة ...وحيت كان مطوي مشافتش ثمن لي فيه.....

حطو ليهم لكتاب قدامهم ..عصام بلا ميتردد دغيا سينا و عطا لقلم لهاجر لي ولات كتعرق و حمارة و قلبها كيضرب بجهد...هزات لقلم كترعد مخلوعة...غمضات عنيها بجهد و في نفسها كطلب الله...دارت رجاها عند الله و سينات على الورقة مع زغاريت الاحباب و دكر النبي و عناق بين العائلتين و قبلة راضية حنينة و دافئة على جبينها من طرف زوجها...... 

اليوم ولات هاجر من نصيب عصام و حملات اسمو و ولات تحت دمتو .....اليوم اصبحت انها زوجته هاجر بن جلول ....


الزواج...كلمة لها من المعنى الكثير ..كتعني جوج اشخاص... جوج اجساد.. جوج ارواح ...تاحدو مع بعضهم و رسمو طريقهم بالاحترام اولا و الحب تانياً...فإن لم يكن الاحترام لا جدوى من ضهور الحب فلا قيمة للحب بدون احترام..... كل مراهقة كتحلم بزوج المستقبل و كتغوص في خيالها لترسم فتى احلامها بأجمل صورة.. يشبه النبي يوسف عليه السلام شكلا.. و يشبه النبي محمد صلى الله عليه وسلم خُلقاً ..و يشبه النبي سليمان عليه السلام في ملكه العريض و الجن تخدمه و تخدمها.. و صوته يشبه صوت النبي داود عليه السلام.. و علاقته بها تشبه علاقة الامام علي عليه السلام بالزهراء عليها السلام ........ 

وهكذا الى ما لا نهاية من صفات الكمال
هذا اذا كانت البنت مؤمنة اما ادا مكانتش فهي كتخيل زوج المستقبل كيشبه لشخصيات القصص و المسلسلات و الافلام، المهم انها تنسج شخصية خيالية متكاملة قريبة لشخصية المعصوم ، وتنسى او تتناسى انه لا يوجد انسان معصوم الا من اختارهم الله عليهم افضل الصلاة والسلام 
ثم تأتي فترة الخطوبة .. هده الفترة التي يكون فيها الشاب و الفتاة في حالة تطبيق الحلم الذي حلموا به طول حياتهم فيحاولا قدر الامكان ان يجسدا الحلم فيحاول كل منهما التخلق بأخلاق الشخصية الخيالية التي عاش معها في احلام اليقظة... 

ولكن هل يستمر هذا الحلم طويلا ؟
كلا بل ان اصوات طبول العرس و زغاريد الاحباب ستوقظهم ..
لينتبهوا ان الزواج ليس عالما خياليا وردي 
بل الزواج حياة فكما الحياة فيها كل الالوان كذالك الزواج فيه كل الالوان ، و ان كل واحد من الزوجين هو بشر تؤثر عليه المؤثرات الخارجية و الجسدية و النفسية فتؤثر عليه حرارة الجو و برودته و يؤثر عليه المرض و التعب و تؤثر عليه مشاكل الحياة و همومها فيهتم بشريك حياته من جانب و يغفل عن جوانب اخرى ،فاذا لم يسامح كل منهما الأخر و يتفهم ظروفه لن تستمر الحياة
و لن يستطيعا ان يذوقا طعم السعادة ....

هاجر لي كل لي طلب يديها رفضاتهم واحد مور الاخر كان زواج هو اخر حاجة كتفكر فيها ..دائما كتشوف نفسها ديك طفلة صغيرة المدللة ديال دار و انها عمرها تكبر و اي حاجة دارتها اتلقا والديها في جنبها لي يحميوها و لا دارت موصيبة عارفة ان حليمة اضربها و تغوت عليها و في الاخير ايهضرو عادي لأنها ببساطة الام ديالها ..لهدا كانت دائما افعالها و تصرفاتهم مكضربش ليهم حساب كدير ما بغات ماهماش شنو ايوقع ورا هادشي
....لكن لي تقبل عليه عائلتك ما يقبلوهش فيك عائلة ناس و لو سماوك عائلتك مفششة ديالهم ..ايسميوك ناس قليلة تربية و عديمة الاصل ... 

تحركات في بلاصتها بشوي شافت ساعة قدامها لقاتها لخمسة ديال صباح.. تنهدات بشوي و هزات يديها لي فيها الخاتم.. بقات كتشوف فيه مطولا و كتنهد تنهيدات طوال....جاها كلشي مزروب...وحاسة بالخوف كيتملكها.... تكلمات بينها و بين راسها... 

هاجر : ايييه ا هاجر شكون قال تزوجي بهاد سرعة هانتي و ليتي مرات سيد..يا هاجر راك مكتعرفي تسكدي هضرة ما تعرفي تحكمي لسانك و ما قادرة على حمل زواج اش داك لهادشي و اش داك تقولي ليهم لي جا الاول نتزوجو....افففف يا ربي راني موكلة امري ليك و لي فيها الخير ديرها يا ربي ....


غمضات عنيها بجهد كدور في راسها نعاس طار ليها...جمعات الوقفة لبسات بينوار ديالها وخرجات بشوي طلعات لكوزينة كتبقشش فيها عمرات كاس اتاي مشحر و حطات ليها شوي ديال لحلوى.....

كلشي حطاتو فوق طبلة لي فالكوزينة و جلسات هزات كاس اتاي كتشرب منو بشوي ساهية و كتهضر غير مع عقلها لي كل مرة كيترفع من كتكون مع عصام...حسات بيدين دافئين تحطو فوق كتفها هزات راسها بانت ليها حليمة...

حليمة جلسات قدامها : ما نعستيش ولا عاد فقتي....

هاجر: ما نعساش ا ماما نعاس طار ليا يومين هادي....

حليمة: هضرتي مع عصام بعدا و لامزال....

هاجر: من ول لبارح ديال الخطبة ما عاودت شفتو ولا هضرت معاه...

حليمة: اوا ايكون مسكين وصل عيان من سفر و زيد تبارك الله عليه حمر لينا وجهنا مع ناس بديك لهدية لي جاب و تا مو و ختو بانو ليا فرحانين بزاف ما جلسوش كاع و دارو معانا يديهم فكلشي....

هاجر تنهدات بجهد : يا ماما في لفرح كلشي كيفرح معاك وخا يكون عدوك اما الهدية راه مديماش و انا كون علمني نقوليه ما تجيب والو راكي عارفة بنتك معندهاش مع الفوحان و نبان على ناس و كون مني انا بلا داك العرس كاع ....

حليمة:لواه ابنتي راجل كبر بيك الله يرضي عليه و يزيدو فخيرو يا رب و زيد عصام شارب عقلو و متبت كثر من القياس و تا هضرتو بالعبار راه راجل و سيد رجال تبارك الله...

هاجر بقات ساكتة وخا الام ديالها مقريباش ليها لكن حسات براسها بغات تخرج مافقلبها ليها هي لي تفهمها: نجيك لصراحة ا ماما انا مانقدرش على مسؤولية زواج...

حليمة : بالعكس راكي تبارك الله حادكة و قادة و...

قطعاتها هاجر: ماما انا كنهضر على العلاقة الزوجية سيد كبر مني بزاف و زيد فايت ليه تزوج و انا حضرت ليه لعرسو لول كاع ..و يعرفني انا مولات ديك الحالة يقطعني طراف و يرميني في البحر بديك طلية لي درت ليه فنهار عرسو ..

حليمة جاتها ضحكة و حبساتها بزز: هههه ولله يابنتي راه عادي و اصلا كلشي كيديرو راجل غير تهناي نتي و لا عرفليك راه مغادي تقصحي ما والو وهادشي راه عادي بين اي زوجين....

هاجر دوزات يديها على شعرها و هبطاتها مع خصلات الطويلة : هاد تقصاح بضبط هو لي داير لي مركب فيا بوصفير في لمعدة .. وليت كنفكر فهادشي بزاف .. يومين و نعاس مكنشوفوش من نهار الخطبة و انا حاسة بالخنقة و شي حاجة مزيرة عليا ....

حليمة كبات ليها اتاي و كتشوف في بنتها: نوضي توضاي و صلي ابنتي لفجر و طلبي الله يسر ليك راه عاديي تخلعي واش كتصحابيني انا مكنتش بحالك نهار تزوجت بي باباك..

هاجر خرجات عنيها: تا نتي حسيتي بحالي نهار لي تزوجتي...

حليمة: و كثر كاع من كنت صغيرة كنت كنحشم بزاف مكنتش بحالك تبارك الله شخصيتك قوية و مكتسكتيش لواحد لا جبدك ... ..انا كنت العكس ديالك كنت كنخاف من خيالي و حيت كنت الكبيرة في دار كان شقا و تمارة كلشي على ضهري و نهار تزوجت باك متصوريش لمرضة لي مرضت و الخلعة لي شداتني تا ركبات فيا الاعصاب في المعدة و زيد باك كان عسكري كيبشي و يخليني مع جداك الله يرحمها فهاد نهار و خا دوزات عليا جهنم الكحلة هي و بناتها كانو مرجعيني بحال لخدامة و من كيقرب باك يجي كانو كيبدلو تعاملهم معايا و يبقاو هما يشقاو و غير نوض تقولي عكوزتي غير جلسي قابلي راجلك ها هما لبنات يشقاو عليك ...كانو كيبينو ليه لعكس و هو من كيشوف داكشي كيقول راه مهلين فيا و انا مكنقدر نقول ليه والو تال واحد نهار كنت حاملة بي جواد .....


تال واحد نهار كنت حاملة بي جواد .....و كرشي واصلة لفمي و عمك صغير عطاني حوايجو قالك نصبنهم ليه ....من ما بغيتش ناضو ليا كاملين تحماو عليا شي كيعض و شي كيقرص و شي كيريش تا دخل عليهم و هما محامين عليا من تم هديك هي الاخيرة معاهم هزني و خرجني من دار ما هزيت تا حوايج هما الاخرين مخلانيش و من عرف كنت كنصبن لخوتو كان بغا يموت بالفقصة و شحال وهو غاضب عليا حيت مكنت كنقوليه والو مع الايام صاوب ليا دار و فرشها ليا و حيت وليت وحدي و راجل ما كاينش كان عليا نولي انا هي راجل و لمرا نربي دراري وحدي وليت تا انا واعرة و نجيب حقي من فم سبع ما بقيت كنتسرط لتا حد ولي دار بيا كتعطيه علاش يدور ..و هادشي لي نقولك ابنتي ما ترضاي بدل لراسك و لي هاجمك ما تحدري راس و عطيهم علاش يدورو و لا قاصوك ما تسكتي و تم نيت وصليها لراجلك...سكتات حليمة كضحك....ههههه شوفي تا انا فين بشيت و جايا نوصي في بنت ابليس على ابليس....

هاجر جاتها ضحكة :ههههه ما كاين لا عصام لا جوح لي دار بيا نعطي لوالديه علاش كيقلب راه موت وحدة لي كاينة...

حليمة: الله يا ربي و شنو عاطية ..ناس يعطيو لبنات و انا عاطيا العافية لكحلة هههه نسيت راسي و كنوصي زعمة ساعة معامن يا ربي انا مك و شيبتيني غير الله يرضي عليك نقصي من لوعارة ديالك.....

هاجر: راني قلتها و نعاود نقولها لي زرعوه ايحصدوه و سلام....

حليمة: اوا الله يرضي عليك نوضي عجني ليا شي بطبوطات راه بايت كمال راجل ختك معانا و كيعجبو لبطبوط مع صباح....

هاجر جمعات الوقفة : ههههه سيد هرفنا ليه على لمرة اصاحبتي ليل كامل و هما فايقين ....

حليمة: ههههه الله يمسخك ابنت كرشي.....

خوات راسها من كلشي و عمراتو بشغل دار من دخلات لكوزينة و هي غير كتوجد في شهيوات و كتحط حداها...

وصلات لعشية مفرشين في سطح و دايرن طبلة لوسط فيها كسكروط و سومية هازة دفتر تيقيدو شنو خاص لعرس تا تفكرات واحد الحاجة و هي تهز راسها لهاجر لي شادة اريج عندها....

سومية: اجي بعدا فكرتيني شحال عطاك راجل في صداق....

هاجر: كتب ليا في شيك مية مليون.....

سومية خرجات عنيهت و حلات فمها تصدمات بزز باش خرجات لكلمة: مممم مممييية مليييييون و فييين درتي شيك المسخوطة....

هاجر: عطيتو لبابا يفتح بيه شي مشروع ولا يدير بيه شي حاجة....

سومية بقات كتشوف فيها: زعمة قبل ياخدو منك راكي عارفة لواليد مكيرضاش....

هاجر تنهدات: البارح نهار كامل و انا معاه كنطلب و نعاود عاد قبل و بشرط نولي معاه شريكة الالة اوا شوفي لواليد تا هو....

سومية: صراحة نقولها ليك اختي و الله تا تواتيتي نتي و عصام خاصك غير تهبطي ريشك شوي معاه هو بان لي متواضع بزاف و خا داير رزق ممنفوخش بحالك على والو ....

هاجر: ياك الزبلة كتعايريني فوجهي ا ديبة نسيتي يامك مع كمال و شحال تنفختي عليه بحالي غير نتي لي كاينة و كون ما كنت انا لي كنوصل ليه لهضرة لي كنتي كتقولي ليا شحال كتبغيه و كتمثلي عليه العكس كون شحال هادي ضرب عليك و تزوج بديك بنت شوافة و يخلي مك بايرة....

سومية: يا بنت لحرام تا كنسا و كتفكريني انا كنت كنعاود ليك دايرة فيك نية و نتي كدوزي ورا ضهري و تبشي ديري ليه شونطاج تا كيخلصك عاد كتعاودي ليه من لول تال الاخير ....

هاجر كضحك:هههه اييه على دوك ليام درت لباس على ضهركم....

سومية: اوا ضحكي غير نتي اما انا هجرتو معاكم.....تلفتيني فشنو بغيت نقيد فشمن قاعة بعدا بغيتي ديري لعرس...

هاجر بقات ساكتة كتشوف في ختها بصمت تا نطقات بشوي و بصوت واثق: ما كاين لا عرس لا جوج....


سومية: كفاش ما كاين لا عرس لا جوج...

هاجر: كيف سمعتي مغديش نديرو اندير غير حفلة صغيرة في دارنا و نهز حوايجي و يجيو يديوني ....

سومية: واش كتهضري من نيتك و لا كضحكي عليا راكي نتي لبنت لي بقات خاصنا نفرحو بيك و زيد راجلك ايتكلف بكلشي....

هاجر: وعلى هادشي مغاديش ندير داك العرس ....

سومية:مافهمتش....

هاجر: يا ختي ا سومية كتكلخي غير وقت لي بغيتي راجل عاطيني مية مليون اصاحبتي واش عرفتي شنو كيعني هاد لمبلغ راه غير لفم لي يجمعها و زيد شرط على بابا العرس على حسابو راه بحالي شاريني بفلوسو و انا طامعة فيه ...

سومية: نتي لمك ديما معكسة و فين ما جا لخير كترديه راجل بخيرو و بغا يشتو عليك اش بشا ليك ا ختي و زيد نشرطو عليهم تا حنا نديرو عرسنا راسنا مالنا ما عدنا فلوس الالة نعيط على حليمة دابا طلع نفرتكو هاد لحريرة ايوا قالك لعرس لا من نيتك كتهضري....

هاجر: شوفي اديك العوجة انا راه و الله ما نبرز ليكم و امة البشر حاضياني بحالي اتاكلني و كل مرة نبدل لبسة و نبقا غير غادا جايا بحالي شداني سرسرة راه و الله لكانت ليكم و زيد ما فيا لي يسمع هضرات ناس شي يقولك مجاتش معاها المشطة و شي يقول دارت عكر مفروش و لا مضحكتيش يقولك واخدينها معقدة اما لا ضحكتي ايقولك داو هبيلة بلا عقل اما لشافوك شطحتي صافي بشيت فيها خلة ..اما لبسات هدوك هما فين كيشدو الهضرة اما واحد لماكلة بلا منقولك اش ايقولو عليها.....اوا اختي مالي على حالتي يبقاو ينقطو عليا ناس اش بغيت بهاد لعرس كاع ندير حفلة فدار با يجي راجل يديني بسكات مهنية مع راسي...

سومية: هادشي عادي فلعراسات راه ناس واخا ديري ليهم عرس في جزر المالديف ايضحكو عليك فبلا ما تعكسي و خلينا نفرحو بيك...

هاجر: كلمة وحدة قالتها ما كاينش العرس و صلاة على النبي ...

سومية: ياك المدلولة تبشي عند راجل بلا عرس...

هاجر: ما كاين لمدلولة قدك اما انا غير خطبتي و صداق يعطيوك لخبار.....

سومية طلعات ليها دم و عصباتها و عارفها و خا تبقى معاها نهار كامل ادير غير لي فراسها..تنهدات بشوي كدور في عنيها تا بان ليها تليفون هاجر محطوط فوق طبلة ....

هزاتو و دخلات لجهة ديال نوامر قلبات مزيان تا بانت ليها سمية و هي دوز لسكايب صونات عليه فيدو و كتشوف في هاجر شادة ضحكة....

رمات ليها تليفون و هزات بنتها خلات هاجر كتشوف ما فاهمة والو دارت عندها سومية و هي هابطة في دروج...

سومية: اوا دابا قولي ليه ما بغيتش العرس....هبطات و خلاتها بوحدها ما فاهمة والو....

هاجر هزات تيليفون لي رماتو ليها ختها و كتشرب اتاي غير بانت ليه سمية و هي تشتت كاع اتاي لي ففمها يالله بغات تقطع و هو يتشد الخط و بان ليها عصام فشاشة...خرجات عنيها و سرطات ريقها بصعوبة من شافت صدرو عريان و حجبانو معقودين كيشوف فيها و شعرو هابط على حبهتو باين عاد خرج من دوش و فيدو كاس ديال لقهوة....

هاحر كترمش بزربة و بزز باش نطقات: عصام....


اشعة الشمس كتضرب في وجهو المنحوت والرجولي و لون عنيه كيلمعو مع الضوء ...واقف على جاج لي كيطل على لبحر لي قدامو و في يدو كاس قهوة كحلة كيشرب منها بشوي ولابس سروال كيطمة و صدرو عريان و شعرو مزال فازك هابط على جبهتو كيبان صغير على السن يالو ....

هز باكية لكارو ديالو هز منها واحد حطو في فمو و شعلو .... بقا حاطو في فمو و هو يعاود يحيدو كيشوف فيه بحجبان معقودين عاود طفاه و رماه هو و الباكية و البريكة لي كان كيشعل بيها....كانت هاد لحركة كافية بالنسبة ليه انه مغاديش يعاود يحطو في فمو او يقرب لجهة ًيال لكارو....

شاف لكاس ديالو خوا و هو يضرب دورة لكوزينة لي كانت مجهزة بكل ما كيحتاج ليه عاود عمر كاسو متكي على لبوطاحي كيشرب بشوي و بهدوء كيف عادتو ....هبط لكاس بشوي من فمو من شاف لخاتم لي فيدو كيلمع مع شمس....حيدو من صبعو و هزو قدام عنيه عاقد حجبانو كيشوف الاسم لي منقوش في خاتمو...

عصام ردد بشوي الاسم : هاجر...بقا مدة طويلة وهو كيشوف فيه عاد رجعو لصبعو....

جبد تيليفون لي كان كيصوني في جيبو غير شاف سميتها طالعة و هو يهز حاجب و هبط لخر قبل الاتصال وهي تبان ليه فشاشة مخرجة فيه عنيها و حالة فمها نصف حلة....

هاجر كترمش بزربة و بزز باش نطقات:عصاام.....

عصام حرك ليها راسو و بقا ساكت كيشوف فيها...

هاجر جاتها لقوة حرف مابغاش يخرج ليها قدامو و بلا ما تحس عنيها كيبشيو نيشن جيهت صدرو المنحوت...صرطات ريقها بصعوبة و لي جا في بالها قالتو: غييير غلطت في نمرة و صافي.....

عصام حط تيليفون قدامو فوق طبلة ولا كيبان ليها كامل..حشمات و ولات حمرة حيت كان عريان من لفوق و عضلاتو مطراصين و باينين ....

عصام ديما دوك لحجبان مربوطين لوسط: لمن كنتي باغية تعيطي.....

هاجر كتشوف فيه تالفة ما فهماتوش عاد تفكرات راه قالت ليه غلطت في نمرة ..غمضات عنيها و رجعات حلاتهم دوخها....

هاجر لي جا في فمها كتقولو ولات باغية غير وقتاش تقطع عليه: كنت بغيت غير نعيط على خويا نبشي عندو لأكادير....

عصام بقا كيشوف فيها عاد نطق: هاجر واش عيطتي عليا غالط ولا عيطتي عليا باش تقولي ليا بغيت نبشي عند خويا لأكادير...

هاجر: لا عيطت ليك غالط...

عصام : امممم ادا خوك لي اتشاوري معاه اما راجلك لا....

هاجر بقات كدور في عنيها و حنيكاتها ولااو حمرييين من قال ليها راجلك جاتها حشمة فشكل قدامو..هبطات راسها حشمانة ساكتة و هو كيشوف فيها ...

عصام مبغاش يقوي عليها و هو يرخف : شنو بغيتي ديري في اكادير....

هاجر مهبطة راسها و تليفون قدامها بدات كتسرسب كلشي: ما بغيتش ندير لعرس هادشي علاش انبشي عند خويا نبقى معاه تا تجي نتا.....

عصام هز حجبانو فيها: وعلاش ما بغيتيش لعرس....

هاجر ببرائة جوباتو: معنديش مع داكشي ديال لبنات....

عصام بقا كيشوف فيها مبهوض حس براسو تقلب ليه فهاد لحضة و لكن بشا معاها في لخط: وشنو بغيتي...

هاجر : بغيت غير حفلة صغيرة نديرها بين العائلة داكشي يكون بسيط و نرتاح فيها و مافيهش ناس بزااف...

عصام غادي معاه غير بشوي وعاطيها لخاطر و خا تبعاه لخدمة دايرها هي لواة قبل كلشي: و شنو قالت ليك عائلتك.....

هاجر كتشوف فيه ولي في بالها قالتو : ها نتا هضر معاهم نتا قوليهم انديرو غير حفلة صغيرة و تا نولدو ولدنا لول وعاد نديرو حفلة كبيرة يجيو فيها ناس لي مقدروش يجيو لعرس....

مسكينة هي جاوباتو بداكشي لي كتشوف عند جيران و العائلة لي مكيديروش لعرس كيعوضها راجل في سبوع ولدها كيدير ليها فرح كبير هي هكا فكرات و جوباتو ببرائة ...فور ما كملات هضرتها لقاتو راسم ابتسامة على وجهو لأن ديك كلمة "ولدنا" عنات ليه بزااف لحوايج و فكر في حوايج لي مطاحوش في بال هاحر من خرجات داك لكلام....

عصام حرك راسو بشوي: انهضر مع لوليد ديالك هاد لعشية و من هنا سيمنة انكون في لمغرب و جدي راسك....

قطعات عليه عاد تنهدات بجهد بحالي كان الهوا محبوس عليها...كتكون مزيانة تال قدامو و كتبدل كتولي وحدة خرا هي براسها و كيدخل ليها شك و تقول واش هادي انا ولا غير تشابهات لياااا..

جمعات الوقفة مخنزرة هبطات كتجري كتقلب على ختها وهي تشوفها حليمة...

حليمة: اديك بنت لحرام مالكي هابطة كتجري تاني...

هاجر: فين ديك بنتك ديال سومية....

حليمة: بشات لدارها قبلة علاش اش بغيتيها....

هاجر:بنت لكلبة دارتها بيا.... ما كملات هضرتها تا جاتها دقة من حليمة بتيو شحطاتها...

حليمة: ما كاين لكلبة قد مك يا لخانزة...

هاجر هاربة و كتحك في ضربة : وها نتي كتشهدي فراسك نتي نيت و كتضربي فيا مالي اش درت ....هربات من حدا حليمة لبيتها سدات عليها و خبات ساروت عارفة راسها اش دارت......

وصل وقت لعشا و هي مخشية في بيتها تا سمعات درديك فدروج

حليمة كتغوت و دق عليها في لباب: يا ديك لعافية لكحلة حلي لباب ولا نهرسو على مك هاد نهار....

هاجر: وعلاش بغيتي دخلي عندي اختي...

حليمة: عارفة والديك اش درتي هادسي علاش سادة عليك لباب ياك ابنت كرشي تخلي راجل يهضر مع باك و يقولك هاجر مبغاتش لعرس....

هاجر: ومالو كدب عيت ما نقولها ليكم ما بغيتوش تسمعو و الله ما نوصلها لراجلي هو يتفاهم معاكم....

حليمة: ياااك الخانزة تا نتي ولا عندك راجل و يتفاهم معانا ما بقيتيش كتحشمي و ديري بوجهنا حنا لي والديك ما عرفتي نتحاشمو مع سيد ما عرفتي يقول حنا لي بززنا عليك و ما بغيناش لعرس غير لي جا ليك فداك راس تقوليها واش مغاديش ديري عقلك و تحكمي لسانك شوي....

هاجر: اشوفي ا حليمة انا هضرت معاك نتي لولة و مابغيتيش ما بقا ليا غير هو... هو بعدا صدق عليكم من جا في صفي و مخلانيش ماشي بحالكم و زيد ياك شحال شكرتي ليا فهاد عصام اوا هانا ديراه راجلي من لفوق و كنتشاور معاه اش بغيتي تاني احليمة.....

حليمة تفقصات: يااا ربي انا بغيتو يحدهم ليك ..انا بغيت هاد عصام يعاود ليك تربية و فين ما يقول لكلمة تهبطي راس و تزيدي عليها بوااخة اسيدي عصام...

هاجر مخشية في بيتها و كتراد مع مها: اواسيري قالك سيدي ما قلتها تا لي كبرني و رباني و فششني بقا غير لي جا لبارح نسميه سيدي هادشي لي بقا..سيري الوليدة رتاحي ليك من صداع شي عرس و خليني نرتاح تا انا....

حليمة: حلي لباب بعدا نهضر معاك....

هاجر: يا حليمة سيري عند راجلك خليني نعس بعضامي صحاح هاد ليلة ما فيا لي يتهرس من شي قنت و انا رايحة من هنا سيمنة....

حليمة هازة يديها فوق راسها: اوا يا بنتي دعوة فيك لله هو لي يخرجهم فيك يا كِما فقصانا الله يجيب لي يفقصك فهاد ليلة ويحدهم ليك تا طلبي غير سلاك و مطلقايهش....

هاجر: لباب لي يجيب لبرد نسدو الوليدة غير كوني هانية و طلعي تنعسي راه لباب مغديش نحلو كوني هانية....


دازو ليام غير توجاد لجهز ديال هاجر كلشي محامي عليها تا كتصخفهم عاد كتوافق على الحاجة.....شرات كل لي يخصها و عمتها مكتبعدش من حداها حيت بوحدها لي كتقدر عليها اما حليمة و سومية كيطلبو سلاك معاها ...بقات يومين يرجع عصام و في نفس نهار لي ايرجع فيه ايدير لحفلة باش تبشي لدار راجلها..كلشي داير لواجب تا من اسماء و لالة الياقوت لي كل نهار راسلين حوايج مخيطين لهاجر و خا بغاو لعرس لكن سكتو و مقالو والو خصوصاً ان عصام عاد طلق و ينوض يدير لعرس شوي مجاتش لعائلة وخا هو ممصوق لحد ....

جالسية في بيت نعاس ديالها كلشي مجموع حاطين كاع لي شراوه قدامهم كيطويوه و يقادوه في كراطن مزينين بذهبي و شكلهم بحال لوردة كيحطو فيه زهاج لعروسة....

سلوى : عرفتي ا ابنتي هاجر ايطلع معاك هاد لقفطان غزاااال خصوصا مزير من جيهة ديال لخسر ايبين ليك طاي ديالك واعرة....

هاجر جالسة كتاكل في تفاح و كتشوف فداكشي هي اصلا معندهاش معاه: اودي اخالتي داكشي خاصني نلبس معاه لبونج عاد نبان فيه خاصني ندير بحال دنيا باطمة كل لبسة نشري معاها بونج ديالها ....

سلوى: لواه ابنتي تا نتي عندك حقك و فورمتك زوينة كتحمق و زيد زينك بلدي ديال لبلاد اي حاحة تلبسيها يجي معاك.....

هاجر كضحك و تشوف في ختها: الله يجيب لي يقول الحق راه عارفة راسي زينة غير كنتواضع مع البشر وهو حاس براسو....

سومية: اوا الله يمسخك يا ختي كضربي ليا فوجهي نيشن بلا حشمة بلا حية غير جيتيني عروسة اما كون شحطتها معاك.....

سلوى كضحك:ايييه و شكون قال صغيرة ديالنا المرجلة تزوج شي نهار و بشكون بعصام غير سميتو تقولك مناش مصنوع....

سومية: راجل ما فيه عيب اخالتي عيبهم هو جيبهم اما عصام غا لي بغا يعيبو لي خاص يكون في راجل فيه .....هزات صبعها لهاجر..ها لي سميت لعيب تخلق ليها من ساسها تال لراسها كلها عيوب يا ربي سلامة....

هاجر حالة فمها: ومالي اختي شمن عيب هادا لي فيا ....

سومية ربعات و قدات لجلسة مزيان: منين انبدا ليك يا لعافية لكحلة.. لول فمك سخون و ماضي من جوج جوايه تقتلي و تحي بيه بنادم ... و تاني ما عرفنا هاد راجل واخد مرا و لا واخد عزري ......هزات فيها عنيها و هبطاتهم......غير قولي ليا واش كاين شي عروسة يالله ضربات لعقد تلبس كيطمة ديال خوها و تخرج بيها تشري جهازها بوجها حمر و ديك لعكاسة لي دايرة و كتعقديها لقدام بحال وحيد لقرن خاصك غير معامن و تبداي تناطحي .....افففف خليني ساكتة راكي فقصتيني و الله لعضيم....

هاجر : اوا هاد لعزري لي فقصك الحبيبة بلا منقولك شحال من واحد طلب يديها و رجعاتهم و مزال لأن كيتسناو غير اه من فمي يجيو كيتجراو و زيد عاجبني راسي هكا ....

سلوى: لواه ابنتي لمرا هي لي تهلا فراسها و تلبس حوايج لي يناسبوها و يبينو لأنوثة ديالها قدام راجلها راكي في لول كتكوني عزيزة و من كيولفك ديك ساعة عاد كيبداو يبانو ليهم ديفوات ديالنا هادشي علاش نوصيك تهلاااي فرااسك مزيااان و ديما سكر يكون في فمك لكلمة الحلوة هي لي تخرج الله يرضي عليك....

هاجر بقات ساكتة مرداتش على خالتها..بقات كدور في عنيها تا دخل عليهم ايوب كينهج صدرو كيطلع و يهبط سخفان....

ايوب كيشوف فهاجر: نااااري اختي و شنو درتي لهاد سيد...

هاجر بتسائل: علامن كتهضر......

ايوب: وا عبدلله ولد عمنا لي جا يخطبك و يجري عليك معرفت شكون قاليه هاجر تزوجات دار حالة فدارهم و كان جاي ليك غير مو لي وقفات ليه في لباب قالت ليه انا ساخطة عليك لا خرجتي من هاد لباب....

سومية حالة فمها: واش هدا حماق و لا مالو لبنت تزوجات شنو بغا مزال يدير بيها...

ايوب هز يدو بجوج: الله و اعلم ا بعدا صاحبي ساكن حداهم هو لي قالها ليا و قالي من صباح و هو كيعرعر غير بهاجر ما هاجر قالك علاش رفضتيه لي هو ولد لعائلة وشحال تسنا فيك و ماقبلتيش بيه و دابا تزوجتي بواحد اخر....

سلوى: اعود بالله هادا رزق ديالها مكتابها جا ليها هي ممكتاباش ليه و زعمة راح حافظ كتاب الله يبشي يستغفر مولانا و يحمد سيدي ربي تا يجيب ليه شي نقرة فين يغيب نحاسو....

هاجر غير ساكتة تا سمعات كلام خالتها عاد هضرات: هداك اخالتي ما بينو و بين كتاب الله غير الخير و الاحسان راه شيطان بعنيه هداك انا كنت كنحتارمو من شفتو اخواني قلت هنا نبات ساعة جابو ليا خبارو عارفتي صحابي دوك جوج دراري توام هما لي عارفين كلشي عليه ومن عرفوه ولد عمي وحاط عليا العين و هما يقولو ليا بعدي منو راه كيتزوج لبنات لي خارجات على طريق كيقوليهم انستركم اوا كيتزوج بيهم تا كيفرغ كبتو فيهم و كيطلقهم و يبشي لوحدة خرا...بنت وحدة لي كنعرفها مزيان حملات منو و رماها لزنقة و من بشات لدارهم داتها مو لواحد لقابلة جهضات ليها لولد من تم ما بقيت كنحمل فيه شعرة وليت كنشوف شيطان في سيفتو اعود بالله....

سومية: اعود بالله من شيطان رجيم و هادا غير ولد لعائلة وجاي يضحك علينا حنا بوجهو حمر تفو...

هاجر: تا يكون قاد بيا عادا باش يضحك عليا بحالو ندوزو بحال لما ساهل غير ماكنبغيش نقرب لعائلة و كنفضل نبقا بعيدة و لا عاود دار بيا اندم جد بوه....

سلوى: لا بنتي نتي و ليتي مرات راجل عطيه تيقار و ديها غير فراجلك...

ايوب : كوني هانية الخوادرية عصام راجل عليه و ميقدرش عليه اصلا ...و زيد خوتك هنا يقرب لجيهتك نعيط على كونان ما كين غير لحجر هههه...

هاجر كضحك: هههه ناري على كونان شحال توحشتو لمسخوط ايكون مزال غضبان عليا....

ايوب: دابا يتفش خاص غير دراري ميعمروش ليه راسو بيك و يعطيوه تيقار .....

بقاو مجموعين و كيصاوبو في نفس الوقت هاحر مرة يطيح عليها ديم من كتفكر اتبشي من دارهم مرة تنسا و تبقى غير ضحك.....

صبح صباح لبسات جلابتها وبشات هي وخالتها لعند طبيب دارت شهادة طبية فيها 15 ليوم دفعها ليسي باش ميتقيدش عليها الغياب...داز داك نهار غير توجاد في دار حليمة و كلشي كيجري غير سلوى لي ممفرقاش مع هاجر لي شافتها بدات كتحمار غير و حدها و كل مرة تشدها البكية و تبدا تبكي تا كتبكي معاها كلشي....حسات براسها ما بقا ليها و الو و تبشي لدار راجلها ...مشاعر مختلطة في داتها و كيانها و اهم حاجة انها اتوادع مع اهلها و تبشي لدار اخرى تعيش فيها عكس دار لي كبرات فيها و دوزات فيها دكريات لا تنسى...


هادا حال لبنت شحال ما كبرات في دار باها ايجي يوم تولي محسوبة على شخص اخر و يتبدل مكانها من دار باها الى دار راجلها......

اصبحنا و اصبح الملك لله ....كلشي فايق مع لفجر و صداع نايض فسطح كيوجدو ....من غير هاجر لي ناعسة...كيف فاقت قابلاتها خالتها بفطورها و حوايجها تبشي هي و ياها لحمام.....

لبسات جلابة بيضة مع بليغة و دارت عليها زيف..خرجات من لباب نيشن ركبات في طونوبيل ما شافت حد ما شافها حد .....

كانت كضن انها اتبشي لحمام تا لقات راسها في صالون لي جات ليه ديك لمرة هي وخالتها غير شافت دوك لي نتفوها جاها شلل في رجليها ولات باغية غير منين تهرب....

هاجر: خالتي علاش جتيني لهادو تاني و الله ما قادة على شي نتيف هاد نهار راه منقدرش نمشي لا تقصحت و زيد والله تا مزال ما ناض ليا ....

سلوى: يالهبيلة هادا صالون ديال كلشي ايديرو ليك بعدا صونا و يدلكو ليك لحمك و يرطبوه بزيوت مزيان و عاد يصاوبو ليك لمكياج و تلبسي لبسة لخضرة ديال لحنة راه انقشو ليك و نتي بازرة و عائلة لعريس ايجبو لهدية ....

هاجر ما فهمات والو بزز باش طلقات من خالتها و تبعاتهم دخلوها لواحد بيت سخون و كيطلع منو لبخار غطاو ليها لحمها بفوطة و بداو كيدهنو ليها لحمها و يديرو ليها مساج تا ترخات مزيان عاد بداو كيديرو ليها لوصفات لوجها تا ولاو حنيكاتها و فمها كيبانو حمريين كيف شي فريزة محقونين بدم.....

خرجوها من تم عاد غفلوها كما طلباتهم سلوى و بداو في نتيف خلاوها كتغوت و طلب و تزاوك فيهم ساعة مرحموهاش ما طلقوها تا رجعوها بحال دجاجة لمسلوخة نفس كطلعها بزز...خلاوها ترتاح شوي و سلوى حداها كتطلب و تعاود باش تبقى في بلاصتها و متنوضش....

دخلوها لحمام عادي غسلو ليها لحمها كامل مزيان هو و شعرها عاد خرجوها ...منها لدو بياس بيضين جابتهم معاها و بينوار ديال صالون...جلسوها فوق كرسي كبير فيه راجل مبنت كيصاوب ليها شعرها و واحد اخر كيصاوب ليها مكياج لوجها و جوج بنات كيصاوبو ليها دفارها كلهم تحماو عليها باش يساليوها مع لوقت.....

لبسوها ساري بالاخضر منبت بالحجر و مخيط بدهبي طلعها غزاالة دارت معاه صندالة عالية بدهبي و زينوها بي مجوهرات دهبية لشعرها لي جمعوه من لقدام على شكل وريدة لور و خلاو بعد لخصلات نازلين على طول ضهرها جات غزالة كتحمق بزين و لبلدي زاد وتاها كثر غطاوها بي زيف مشبك على وجها و تبتوه بتاج فوق من راسها....

لبسات معاها تا خالتها ساري طويل بالاحمر مخيط بلأسود مقادة وجها و شعرها كتبان صغر من سنها مهلية فراسها و زوينة بزااف ....

هاجر شادة في يدين خالتها باش يخرجو و حيت ديارة زيف على وجها مكيبانش ليها طريق مزيان كيف و صلات لباب سمعات صداع ديال طونوبيلات و تطبال و من وراها تابعينها نكافات بصلاة وصلاة على النبي بقات متفاجئة تا خرجات لقات طونوبيلات مصافين قدامها و كلشي مجموع كيشطح على لعروسة قرب ليها خوها باسها في راسها و ركبها في طونوبيلتو لور و حداه راكبة ختو سومية تحرك هو لول بطونوبيل لي زوقها مزيان على ود ختو.... لابس كوستيم اسود و قاميجة بيضة و مرجع شعرو لور مقاد لحالة تا هو ... غادي و كيطوط و طونوبيلات من وراه ديال العائلة و جيران تابعينه و كيطوطو معاه ...حبسو قدام دارهم كلشي خارح مصاوب لحالة ولابسين لقفطان كيتسناو لعروسة غير وصلات بداو بزغاريت و تطبال...خرجوها مسكينة اتسخف ما فاهمة والو ...قربو ليها نكافات طلعوها بصلاة على النبي تال سطح عاد خرجات عنيها مصدومة من شافت لقاعة مبنية في سطحهم و لجوق حاضر كيغني عليها و طوابل مصافين في لجوانب و برزة محطوطة ليها هي و عصام لوسط .....


جلسوها فوق لعمارية و هزوها كيدرور بيها على الحان لالة العروسة كلشي داير بيها كيرشو عليها لورد و فرحانين بيها تا من ولاد قسمها و صحابها كلشي حادر ليها و كيصورو و يحطو في كروب ديال لقسم لي محدرش ليها يشوفهم .....

هيبقوة صدمة و لعمارية لي كيديوها و يجيبوها بيها شداتها دوخة ما رتاحت تا هبطوها و جلس ها في بلاصتها و نقاشة جالسة قدامها بدات ليها برجلين كتنقشهم...كلشي داروه بزربة زربو عليها 
.....هزات راسها كتشوف كاع ناس لي كتعرف حاضرين و كلشي نايض كيشط و يزغرت فرحانين ليها...تنهدات بشوي و سكتات عرفاتها حليمة لي دارتها بيها....

قربات ليها سومية طالقة شعرها لي غير كتحضر بيه و لابسة قفطان بلغوز على شكل فراشة جايا كضحك : يا لحبيبة و كيف طلعتي كتحمقي ....

هاجر جراتها من ليد لي مزال ما فيهاش لحنة: ياك ابنت لحرام درتو غير لي فراسكم ....

سومية: راه حليمة هديك و اجرك على الله ...ليل كلو نتي ناعسة و هي بايتة سهرانة كتوجد فهادشي حيت باغية تفرح بي بنتنا صغيرة و الله يرضي على ختي سكتي غير على وجه لوليد و الواليدة....

هاجر تنهدات بشوي : ما غادي ندير والو غير حيدي ليا هاد زيف رات قاجني و الله....

سومية : زيف ايحيدو ليك راجلك.....سمعو صداع لتحت و كلشي هبط كيجري...جمعات سومية لوقفة....ها هما جاو...

خلات هاجر و هبطات كتجري لتحت خلاوها غير هي بوحدها مع نقاشة و كتسمع تطبال لتحت ...قلبها بدا كيضرب بجهد و سخونية طلعات معاها حسات بشي حاجة غريبة في كيانها لدرجة ان دمعة تجمعات على طرف عنيها و هبطات بشوي على خدها تا غبرات....

شداتها تخنسيسة و حابسة لبكية بزز و نقاشة حداها حسات بيها و بدات كتطبط ليها على يديها
...

نقاشة: شششش اختي متبكيش راه هدا هو حال لبنات بلاصتنا ماشي في دار بانا بلاصتنا هي دار راجلنا غيير صبري اختي و فرحي براسك و خلي دموع لوقتهم....

هاجر كتحاول ترخي راسها و متبقاش مزيرة و قلبها لي كيضرب في كل مرة كتمسع صداع ديال تطبال غادي و كيقرب ليها
.....

حط رجلو في لعتبة ديال لباب سطح و ختو حداه هازة لورد 
..عينو نيشن بشات لعندها هي بقفطانها الاخضر و برزتها و مكانو لخاوي لي حداها و كاع ناس كتشوف فيه في وقفتو و وسامتو و تجريدتو و لبسو البلدي المغريبي لي جا معاهو زادو جمال على جمالو ...

كان لابس جابدور بيضة و داخل فيه الطرز بلون الاصفر مرجع شعرو لور و ريحتو سابقاه مكاينش لي مشمهاش فالقاعة تا من هاجر طلعات ريحتو مع منخارها هزات عينها بشوي كتشوف فيه كيقرب ليها و لموسيقى خدامة .....جلس حداها و عينو عليها...حيد ليها لخمار بشوي من على وجها و لكاميرة كتصور فيهم و كلشي مجمعوع عليهم ...جات عينو مع عنيها...كانو عنيها مبتلين و مزال اتار دموع باين فيهم...قرب ليها بشوي باسها في جبهتها و هبط بشوي لخداها باسها و قرب فمو حدا و دنها ....

عصام همس ليها بشوي: مالكي....

كيف سولها حسات بدموع كيهبطو ليها كيجريو مقدراتش تحبسهم و هي دور راسها لعندو و خبات وجها في عنقو كتبكي.....دور يدو بشوي على خسرها قربها ليه كثر و كيهضر معاها بحنية كبيرة على غير عادتو....

عصام: ششش متبكيش وقت ما بغيتي تجي عندهم انجيبك ليهم و شحال ما بغيتي تجلسي انخليك و كما عشتي فدار باك اتعيشي فدارك و كثر ما كتصوري غير متبكيش.....

حركات راسها وسط عنقو و كتخنسس بشوي كتحاول تحبس البكية و هو مزال معنقها مطلقهاش و مخليها على راحتها و عطيها لخاطر بزااف ....

بعدات منو بشوي تقدات في لجلسة و حادرة راسها و نيفها حمر....جبد مشوار من حيبو و هز ليها راسها بشوي لعندو كيمسح ليها دموع و يدو مشابكة مع يديها لي مزال ما فيهاش نقيش.....

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.