صورة مصغرة لـقصة إنها زوجتي

قصة إنها زوجتي

qisat 9isat
رواية إنها زوجتي

قصة من نوع دراما رومنسية بطابع كوميدي كتحكي عن الموضوع الشائع في كل المجتمعات و هو الـزواج.... انها زوجتي.....القصة لها من كل طرب فن ...رومنسية❤... حب💑.... بعض من تفرشيخ👊 ...عبرة👂... تقاليد👰... كوميديا😂... بعض من الدراما👵👴.... عائلية👪......

قصة تحكي على بطلة لي بي اختصااار شديييد ابليس 👿يتعلم منها... ما لقاها ربي غير بي ابليس شخصياً👹ً وهو البطل لي ايحدهم لباباها و ما زاد الطين بلة هي لعكوز لي قبيحة وقالت ليها البطلة ما قلتي ولو في القباح و الوحيد لي كيحدها ليهم هو البطل لي غيير خيالو كيزرع فيهم رعب..... مع توالي الاحداث اتوقع كارثة ما بين البطل و البطلة اتقلب ليهم سفاهم على علاهم.........

💥💥انـها زوجــتي💥💥

شكون فينا لي مكيحلمش بي ليلة العمر و لقاء بشريك الحياة... نقدرو نكونو كنعرفوه و نقدرو لا....لأن كل الأشياء المسيرة في هذا العالم هو قسمة ونصيب، كلها بأمر الله، كلها بإذن الله، كلها مقدرة... بقول جل وعلا"إنَّا كُلَّ شَيْءٍ خَلَقْنَاهُ بِقَدَرٍ"...و الزواج كذالك هو قدر ترتبط فيه مع الشريك المقدر لك..... 

🌟🌟🌟🌟🌟🌟

اشعة الشمس بي خيوطها تشع في ارجاء شوارع العاصمة الرباط.... وفي احد الاحياء الشعبية كتواجد "دار العسكري" المعروف في تلك المنطقة من صغيرها تال لكبيرها كلشي عارفو و عطينو احترام كبير لأنه من رجال المخزن رغم انه تقاعد سنوات لكن بقا داك اللقب مرتابط بيه و اي واحد يشير ليه ولا بد ما يضيف معاه لقب "العسكري"...

واقفة امرأة باين فيها لكبر ولكن شادة في راسها و صحيحة.. بيضة كتشعل و عينوها مخلطين بين لعسلي و لخضر و نضراتها قاصحين باينة من شوفة لالة و مالي حازمة راسها بي زيف و لابسة بيجامة مغطية و واسعة على قد عمرها.. هازة صينية ديال اتاي و راسمة ابتسامة كتزيد تبينها اكثر جمالاً... حطات صينية فوق طبلة لي فصالون دو طابع بلدي تقليدي... كترحب بي المرأة لي جات عندها .... 

-مرحبا بيك اختي هنية و الله نهار كبير هادا من تفكرتيني.... 

هنية:الله اودي اختي حليمة راكي ديما في لبال غير لوقت لي مكيناش و اليوم قلت والو نتي لولة نجي نشوفك عاد نشوف شغالي... 

حليمة كتكب اتاي: ربي خليك ليا الحبيبة كيف داير مول دار سي لكبير و لولاد لباس عليهم... 

هنية: كلشي مزيان و كيسلم عليكم نتي و سي حميد لعسكري سلام عزيز راه كان ايجي معايا غير الخدمة في داك لمحل مكتخليه فين يزيد... 

حليمة: اواالخدمة هي هادي ولا بد ما تزيرك... قربات ليها اتاي و الحلوى.. خودي متحشميش دار دارك بلا منوصيك. ..

هنية: عارفة لي كاين فين واحد دراري مبنوش ليا... 

حليمة: جواد راه شاد خدمتو في اكادير كيجي غير في الكونحي اما سمية راه فدارها واحد لبنت عندها مخرجة ليها لعقل اما لبزاقل ديال دار راهم في المدرسة مزال مغدي يخرجو. ...

هنية: امدرا واحد هاجر مزال مغدي نفرحو بيها تا هي... 

حليمة مكفدة بيجامتها و كاس اتاي في يديها.. تنهدات تنهيدة طويلة:شغادي نقولك اختي هنية راك نتي مولات دار و معندي منخبي عليك البنت لي جا يخطبها كتكحل بي لعما و تدير لينا نهار تا كنديرو مناقص ونردوهم عاد كتبرد ...اما واحد ولد عمها باغي يتسطى عليها و بغيها وخا قبيحة و شيطانة و مخلينا ما قلنا ليه باش يبعد منها و والو لصق فيها لصقة و هي ما كتحمل فيه شعرة لجا عدنا هنا هي كتخوي دار تا كيبشي عاد كترجع ..عيت معاها و تقول واش لقيت ليها راس لخيط... 

هنية: اوا لبنات هما هادو دابا تكبر و دير عقلها و تزوج... 

حليمة: فين اختي هاد لعقل راه عندها 18 لعام و ختها في عمرها راه تزوجات و انا من كنت قدها كنت والدة خوها لكبير اودي لي عندو لعقل عندو مكاين لي خارج عليها قد باها من نهار خرج تقاعد و هو فين ما يخرج يجرها معاه تا خدات طبعو الصعيب و جات من فوقو و جلسات و هو باش يربي و يزير سمطة زايد فرحان بيها و لا بشيت تا غوت عليها نهاري يولي كحل.... 

هنية: تقدر تكون باغية تكمل قرايتها و مكتفكرش في زواج راه بنات ليوم هما هادو ...

حليمة: شمن قراية الله يهديك راه العام تاني عندها في لباك و يا ربي غير تجيب ديك عشرة مقادة باش طلع راها سطل بلا تقرقيب اختي.... دوزات يدها على وجها... خاااوي راها بنتي ونشهد فيها قبيحة بزاف و فمها مبري منها.... 

هنية: غير صبري و تعافري معاها ديريها صاحبتك و خليها تعاود ليك ما عرفتي تكون مخبية شي حاجة.... 

حليمة كدور في راسها: معامن نتي ا هنية هديك حن لكحل متعرفي شنو تحت راسها شحال من مرة كنبغي ندخل معاها غير بالحوار بحال ناس تا كنساليوها بالمدابزة ..و هضرت مع ختها سمية ما ربنا تجيب فائدة و تعاود ليها ..ساعة تقول واش خرجات حاجة... لي عندها شاداه لراسها و مكدير تيقة تا فيا انا لي مها من غير واحد خالتها لي هي وياها سمن على العسل ضل تعاود معاها في تليفون...

هنية: اوا بعدا ختك مغديش ضرها راه اتحسبها من بناتها نيت و غير رخفي معاها تكبر ودير عقلها نشالله و يجيب ليها الله ولد ناس... 

حليمة حطات لكاس من يديها وهزات كفوفها لسما: يا ربي وراك عالم بكلشي انا بغيت ليها راجل لي كلمة وحدة منو تهبط لبوها لما فركابي.... 

هنية شداتها ضحكة: و الله ا حليمة تا ضحكتيني يا نتي دعي دعوة مقادة شبغيتي بشي راجل يتكرفص على بنتك.... 

حليمة:.هادي لي عندي ميصلاحش ليها الضريف و رطب خاصها حرش بحالها باش يالله تشد معاه طريق..... 


دايرة يديها تحت دقنها جالسة في طاولتها و عنيها على شارع لي مقابل شرجم لي جالسة حداه ...ساهية في عالمها الخاص وناسيا راسها انها و سط القسم ...محسات الا و ضربة جاتها لراسها قفزاتها من بلاصتها...خرجات عنيها في الاستاذ لي واقف عليها.... 

الاستاذ مخنزر فيها و من تحت سنانو:نوضي لصبوورة... 

ناضت و هي ما فاهمة والو و زيد نعاس غالبها كتشوف في القسم كلشي كيشوف فيها ..خنزرات فيهم: كولوني حسن 😠

الاستاد عروق جبهتو خرجو ليه..ضرب يدو مع لبيرو: هااااجر صبوووووورة...

هاجر تا هي مخنزرة كثر منو غير قربات حدا صبورة جاتها دوخة دورات عنيها لأستاد حالة فمها: شنو هادشي....

الاستاذ : كون كنتي منتتبهة معايا من صباح كون عرفتي داك شي منين جا... مد ليها كتاب.. خرجي سؤال ثالت من تمرين.... 

خدات منو لكتاب ما فاهمة والو قرات سؤال و رجعات كتشوف في صبورة مقشبلات تا لعبة... شافت في صحابها لقاتهم تا هما حالين فمهم فيها مزلجين كثر منها....دورات في عنيها تا عيات و هي تشوف في الاستاد 

هاجر: مفهمتش.... نثر منها لكتاب و عنيه كيطلق منهم شرر باين باغي غير منين يدوز ليها... 

الاستاذ : اش جابك لشي شعبة فيزيك و نتي مكتعرفي تا معادلة تفاضلية تصاوبيها بحال ناس واش عارفة شحال جتي في لفرض الاول ولا لا... هز يدو على شكل صفر.... ها لي جبتي سؤال واحد معندكش صحيح فداك الورقة ...

هاجر ممصوقاش ليه مخلياه يطرطق غا وحدو. خلاتو تا سالة المحاضرة الطويلة ديالو عاد هزات فيه عنيها : لكان غير شفنج راني مولفة بيه غير رخف على راسك راه ماشي غا هاجر لي فالقسم دور دور و ما نبان ليك غير انا تطبخ ليا راسي.... 

الاستاد راسو بدا كيطبخ:خرجيييييي علياااا دااابا... خرجيييييي.... 

بشات هزات شكارتها مخنزرة مكتحشمش خارجة و كتشوف في لقسم: ها انا خارحة و قراو دابا تصنعو منو نووي اتريكت بوعقروش.. شافت في جماعتها... دراري نطلقاو في لبلاصة.... 

كيف خرجات زدح الاستاد من وراها لباب مجهد.. ضارت مخنزرة كطل عليه من شرجم... 

هاجر: طيرو نتا كاع راه مشريهش باك راه فلوسنا لي محطوطين هنا..... كيف شافتو جاي ليها و هي تهبط كتجري مع دروج و كتكركر غير وحدها ....

خرجات من ليسي بانتليها جميعة ديال ناس مجمعين ...بقات كنشوف فيهم و كتلعب في جيب طبلية ديالها تا بان ليها واحد من صحاب خوها جاي عندها كيجري......

_هاجر ختيي عتقيييي خوك كيدابز مع ولد المدير.... 

هاجر خرجات فيها عنيها : شنهوااااا...

رمات ليه شكارة و بشات كتجري لجهة لي مجمعين فيها بلكشيفة باش دخلات لوسط بان ليها ولد لمدير طالع فوق خوها كيضرب فيه.. ما بانت ليها غير عصى هزاتها و ضربات ولد مدير لراس دمغاتو.... 

طاح شاد راسو كيغوت و دميات هابطة... جرات خوها و عطاو رجليهم لريح مكيشوفوش وراهم ...

ايوب "خوها صغير": وناااري المسخووطة دمغتييه....

هاجر: وديلمك من مقادش على لمدابزة اش داك ليها واش انا كنشوفو كيخشي فيك لبونيات و انبقى نتفرج فيه.... 

ايوب دور راسو تا بانو ليه مزال تابعينهم: واااجريييي صحاابو تابعينا ليوم يرجعو منا سوصيط.... 

هاجر: ليها ليها المسخوط لمدروهاش هادو اديرها حليمة فدار غير طلب سلامة و هرب.... 


بقاو كيجريو تا نفس تقطعات ليهم بانت ليهم واحد لخوية مضلمة تخشاو فيها مخبيين.. تا دازو من حداهم دراري و فاتوهم عاد طلقو نفس... 

ايوب صدرو كيطلع و يهبط: ناري فكرتيني فحليمة ليوم تكتفنا و تبيتنا في سطح.... 

هاجر جلسات في الارض كتلهت: متخافش كاين لوليد ميخليهاش تضربنا و زيد لخويلة جايا ليوم.... 

ايوب جلس حداها: وايلي هي ادوز معانا هاد العطلة... 

هاجر : هادشي لي قالت راجلها مسافر و اتجي دوزها معانا و نيت جينا مع العطلة منشفوش هاد وجه نحس واحد جوج سيمانات.... 

ايوب: زعمة ميعرفش دارنا و يجيب لينا باه راه ولد المدير... 

هاجر مخنزرة ضرباتو بركلة زواتو: من عارفو ولد لمدير اش داك ليه يالله طلعتي لسنكيام و بديتي كدابز مزال مسخنتي تا بلاصتك... 

ايوب: راه هو لي جبدني قالي نتا ماشي راجل بغيتيني نبقا ساكت ليه.... 

هاجر: نيت دمغت مو باش يعرف فين هي رجلة.... وقفات كتنفض حوايجها... نوض نوض نسلتو لدارنا بعضامنا صحاح قبل ما يرجعو هدوك.... 

وصلو لدار واحد كيتخشى في لخر و عنيهم كدور.... 
هاجر بشوي كتهضر في ودن خوها: هتلر مبانش ليا يكما يكون خارج.... سمعو لباب تزدح من وراهم هما يضورو بزربة... بانت ليهم حليمة واقفة في لباب هازة مدلك غليض و مقفضة قشابتها و رابطاها على الخسر ديالها.... 

حليمة:هتلر هو لي انسيفطكم ليه ليوم اولاد
لعسكري.... 

هاجر كتفتف: ممما مممامااااا ....شافتها جايا ليها و هي طيح على ركابيها... واااع والله يرحم لبزيزيلة ما نعااااود و الله يرحم باك لي تحت تراب.... 

حليمة هازة لمدلك كتلوح بيه و هاجر هي خوها حامينها غير لغوات دقة تجي فيها و دقة تجي فخوها.... 

حليمة كضرب و كتقرص و تخاصم: شاااطو عليكم يديكم اولاد كرشي دزتو من كلشي بقا ليكم غير ولد لمدير تفلقو ليه راسو.... 

ايوب كيشطح في بلاصتو و كيحك في فخاضو: وحق مولانا ما انا لي فلقتو و والله تا هاجر..... 

هاجر طارت عليه بالفقصة مها كضرب فيها و هي كضرب فخوها شي محامي على شي: يا ولد لحرام انا علامن حلييت ليه راسو ....

حليمة صعروها شركاتهم بجوج كضرب بحالي كضرب في هيضورة تا عيات و سخفات بضرب عاد بعدات منهم.... 

حليمة: يا والله و ما تشدو معايا طريق يا تنصور ليكم هاد لمدلك في كمامركم..... 

هاجر مقصحة : و انا شنو درت اهي اهئ زرقتي ليا لحمي.... 

حليمة:دار ليك نشالله نوضي جمعي حوايجك زيدي قدامي لحمام.... 

هاجر: نتي مزوقة ليا لحمي و نبشي معاك لحمام يضحكو عليا تم.. زوينة هادي سيري اختي غير وحدك... 

حليمة هزات لمدلك ..غير شافتها وهي تجمع لوقفة كتجري لبيتها تجمع حوايجها بحالي ماشي هي لي كانت كتاكل لعصى.... 

حليمة: تخافي ما تحشمي.... ودوزي لكوزينة هزي لعشوب لي طابخة ليك تم لحمك و تبعيني هاني سابقاك.... 


غادة كتجر في رجليها لابسة جلابة هازاها من جناب تحت باطها و عاكسة راسها و دايرة في رجليها كلكيطة كتجرها مع الارض.. هازة صاكها ديال لحمام.....دخلات لحنوت ديال باها معرفها منين نزلات عليه.... 

حميد رجل كبير و علامة شرف ضاهرة عليه لكن مزال شاد صحتو.. هز راسو في بنتو شاد ضحكة: بنتي هاجر اش جابك لهنا... 

هاجر دلات شفاها لتحتانية بحال دري صغير وهادشي مولفو ليها باها و خوها لكبير مدللينها بلا قياس وخا جات حرشة و واعرة بحالهم لكن معاهم كتصرف كيف دري صغير عكس طبيعتها: ياك ابا خويتي دار و خليتيني مني لهتلر... 

حميد هز حجبانو: يكما... 

هاجر : منقولكش زوقات ليا لحمي و باين اتزيدني في لحمام بداك لحكان ديالها و لحمي كلو كيضرني اتفدي فيا جديد و القديم.... 

حميد هز راسو كيضحك جر بنتو في جنب كيعنق فيها و يبوس ليها راسها عزيزة عندو و غالية بزاف: وراها مك ابنتي ضربك و ما تخلي لي يضربك و نتي مكديريهاش زوينة راه غير انا كنغطي عليك لكن تال هادي لي درتي ليوم ملقيت جهد قدام مك... 

هاجر : اودي خليني نبشي نتبعها قبل ما نزيد وكلها فعضامي.. حلات ثلاجة... هانا اندي واحد لعصير نبرد بيه..... 

خرجات خلات باها غير كيضحك هي لوحيدة لي قريبة ليه و كتفوج عليه بزاف و علاقتهم كثر من صحاب..... 

دخلات لحمام حيدات حوايجها و طلات لحمها كامل بلعشوب لي كدير ليها مها جمعات شعرها لفوق بعد ما دهناتو بزيت اركان لي كيجيبو ليها خوها من اكادير.... بشات جلسات حدا مها مناضتش من حداها تا لما حليمة لي كتبشي تصقي حيت عارفة هاجر جلاخة و لا بشا تا شي حد خدا ليها بلاصتها في تعمار اتنوضها نيت... هادشي علاش حليمة رادة معاها لبال و مخليها حداها متحركش.... 

هاجر :اففف ا اماما هاد لعشوب لي كديري كيخرجو ليا لوسخ بزاف شوفي مبغاش يتقاضة عيت بالحكان.... 

حليمة كتحك سنانها بسواك: حكي و سكتي راه غير عشوب مزيانين شوفي لحمك كيف بيض كيشعل و زغبة وحدة منيضاش فيه.... 

هاجر : اصلا لحمي ممزغبش اماما غير كتعدبيني بهاد لعشوب و كيحرقني و الله كديري فيه ديك شبة و الحامض كتشعل فيا العافية.... 

حليمة:دابا تولفي غير زربي خلاص نخرجو توجدي ليا شي كسكروط قبل ما توصل خالتك و تا ختك اتجي دوز معانا هاد ليامات.... 

هاجر كتشوف فيها بنص عين: متقوليش ليا انا لي انوجدو بوحدي... 

حليمة: علاه انوجدو انا باركة خملت دار صباح مبقا عندي جهد لديك كوزينة و زيد خالتك كيعجبها طيابك..... 

هاجر : اوا غسلي ليا شعري نخرح انا لولة... 

غسلات ليها مها شعرها مزيان و ضفراتو لواتو ليها على راسها و جابت ليها سطل فين تشلل لحمها تا سالات حالتها... لوات عليها فوطة و خرجات كتضوي و تشعل بحال شي وردة حنيكاتها مطبزين و حومر و فمها منفوخ و صغير و حمر و شعرها كحل و طويل ديما مخبياه تحت زيف و فورمتها عادية ما غليضة ما رقيقة و طولها متوسط.. زينها زين لبلادي الحر..... لبسات حوايجها و دارت من فوقهم جلابة و زيف لواتو على راسها.. هزات لعصير شربات منو نص و خلات لمها نص....
خرجات دازت عند باها هزات منو تقضية لي خاصها و طلعات لدار دخلات نيشن لكوزينة.. حيدات عليها جلابة و قفدات على يديها... كتصاوب كاع شهيوات لي عزازين عند خالتها و ختها.... 

هاجر و خا راسها قاصح و قبيحة و لكن قلبها بيض دغيا كتنسى و ضحك معاك بحالي تا حاجة ما وقعات غير متشدش معاها ضد اتكون معاك فوق بخير شديتي معاها ضد راه اترجع ليك حياتك جحيم.. هادشي علاش كاع لي فدار كيديرو ليها خاطرها وحيت باها شد تقاعد و هي مزال صغيرة رباها بينات يدو بحال شي عسكري تا خرجات ليه واعرة بزااف و وخا تحرميات لي فيها بزز باش دخلاتها حليمة لكوزينة تعلم طياب لي ينفعوها في دارها و فعلاً تعلمات كاع شهيوات لبلاد تا ولات كتصاوبهم حسن من مها و كلشي عارف البنة لي في يديها معند غيرها و كون مكانت خالتها لي عزيزة عندها بزاف جايا و الله ما دخل ليهم لكوزينة وهي عاد خارجة من لحمام.... 

بقات مخشية تا شافت مها دخلات... هزات صينية بي اتاي مشحر وجداتو بي يديها حطاتو في طبلة و كبات كاس لمها حيت عارفها كتبغي اتاي ورا لحمام.... رجعات تخشات في لكوزينة تا سمعات الهضرة في دروج طلات و هي تبان ليها خالتها رمات كلشي لي فيديها و بشات عندها كتجري... 

هاجر كتعنق فيها: خااالتي الحبيييبة الكبيييدة توحششششتك.... 

خالتها كتعنق فيها تا هيا عزيزة عليها: تا انا توحشتك الحبيبة وخا مقلقة منك... 

هاجر كضحك:وينو زين مقلق مني انا عاود... هبطات فيها عنيها... ويتك على العصري نعام اسي شهاد الاناقة كلها ا سلوى... 

سلوى:هههه مزال مبغيتي ديري عقلك اهاد المصيبة.... 

هاجر: دخلي بعدا وحنا كنتحابو في لباب.. دخلات خالتها لصالون تسلم على ختها حليمة... و باها هو وايوب كيطلعو شوانط لي جابت خالتها... 

دخلات لكوزينة بدات كتخرج و تحط كاع شهيوات لي وجدات من كيك و بغرير و مسمن و حلاوى لي كانت مصاوباها من قبل و طارط ديسير.... 

سلوى:اممم هادشي لديد الله اعطيك صحة ابنتي... 

جلسات حداها معنقاها: باش تعرفي راسك شحال عزيزة جيت من لحمام نيشن لكوزينة كنوجد ليك... 

سلوى: الله يا بنتي الله مالكي على هاد تمارة كلها و تا انا منسيتكش.. هزات من صاكها باواطة حمرة حلاتها و هزات منها سنسلة ذهب ديال ليدين كتوسطها جوهرة في الالوان.. ركباتها لهاجر في يديها... 

هاجر : ناري اعمتي شحال كتجيبي ليا من هادشي لبشيت تا بعت كل داكلشي لي عندي راه اندير لباس باركة غير تكي نشوفك راه هادا احسن كادو... 

سلوى: راكي في متابت بنتي الحبيبة ماشي غير بنت ختي متصوريش بلاصتك شحال عندي عزيزة.....

هاجر باست خالتها و عنقاتها بجهد: تا انا الحبيبة بلاصتك كبييرة عندي و شحال من مرة كنقوليهم راني بنت خالتي غير سارقيني ليك... 

حليمة حطات كاس ديال انتي قدام ختها كضحك على كلام بنتها: كيف داير واحد لحاج بعدا لباس عليه... 

سلوى:حمدلله اختي كان عندو شي خدمة خارج لبلاد و ما قديت نسافر معاه قلت نجي ندوزو معاكم هنا... 

حليمة: احسن ما درتي و الله دوزي معايا العطلة و تشدي ديك المسخوطة قبل ما تقلب ليا راسي سفاه على علاه.... 
شافو بجوح فهاجر كيضحكو.. بقاو كيتعاودو تا دخلات عليهم سمية اخت هاجر لكبيرة هازة بنتها صغيرة اريج .... سلمات عليهم و جلسات بيناتهم و هاجر شادة اريج كتبوس فيها بغيا تاكلها كتحماااق عليه من كضحك و كيبانو سنينات لقدامين لي عاد ناضو... 

هاجر:وينو على حبيبة خالتو كبرات و نوضات سنان... 

سومية: كون تشوفي من كترضع و تبدا تعضني كتمحني نيت.... 

سلوى: غير صبري راه دغيا تكبر... 

سمية هازة طرف الحلوى كتاكل: امضرا اخالتي كيف خرجو ليك تحاليل.... 

سلوى: قالو لي ما عندك والو و ها حنا صابرين على ما اتانا به سيدي ربي... 

حليمة: نشالله دابا تحملي و تولدي غير دعي الله و نيت موجدة واحد دجاجة معشبة انديرها ليك فرفيسة تسخن ليك لوالدة راه كلشي كيشكرها و جابت البركة... 

هاجر: اشمن دجاجة تا نتي ا ماما واش خالتو ضارت على اطباء العالم كامل ملقاو عندها والو واتجي دجاجة عندها شهر و نص في فريكو اتخليها تحمل فين لوجيك ..عنقات خالتها.... وزيد انا بنت خالتي بوحدي شبغات بشي ولاد و انا هنا....... 


بقاو كيضحكو و يتجمعو تا وصلات لعشية دخل باهم جلس في صالون مع حليمة و سلوى كيتعاودو و سومية هي وهاجر دخلو لكوزينة كيوجدو لعشا.... 

هاجر كتشرمل دجاج ديرو يتبخر و سومية شادة بنتها كترضعها و كتفرج في تليفونها تا خرجات فيه عنيها.... 

سمية:نااااري المساخط قفروها... 

هاجر ضارت عندها عاقدة حجبانها: مالكي ياك لباس... 

سومية : عرفتي ديك قناة ناوس الالكترونية لي دايرة بحال شوف تيفي... 

هاجر: اه عرفتها مالها... 

شي حد دعاهم حيت سرحو بشي خبر كيخصو و مخداوش الادن منو و دابا راه مهددة باش تسد... ناري شوفي غير واحد وشنو دار فيهم غير حيت هضرو عليه بلا ميخدو منو الادن... 

هاجر هزات كتافها: سرهم نيت هما لي فين ما كانت شي مصيبة كحلة كيشهروها و الله ما تسد انا بعدا عجبني فيهم يا ربي يدوز تا لديك شوف تيفي يسدها لمهم... 

سومية: ها هما كاتبين اعتذار في صفحة ديالهم و حاطين تا سميتو عصام بن جلول ... بشااااخ اميمتي معدرتو سدها ليهم... 

هاجر :علاش مالو.... 

سمية:.السيد صدق من ناس الواعرين الحبيبة واحد في تعليقات حاط معلومات ديالو قالك كان مدير المهندسين في شركة مرسديس في المانيا و حاليا هو صاحب شركة "ميوز روان" للمجوهرات في افريقيا الجنوبية و عندو تا فروع ليه في المغرب و الخليج و اروبا بففف سيد مرفح... 

هاجر عاقدة حجبانها هزات يديها في سنسلة ديال ذهب لي جابت ليها خالتها كتقلب بعنيها تا بانت ليها طبعة "ميوز روان" عرفاتها من الشركة ديالو شافت في ختها: قلتي سميتو عصام بن جلول.... حركات سومية راسها بي اه... 

هاجر زادت عقدات حجبانها :معرفتش فين سمعت هاد سمية.. 

سومية: كتهضري من نيتك اختي فين اتعرفي نتي هاد سيد... شافت في تليفونها و هي تخرج عنيها بجهد.. اجي اجي شووووفي كيف دااااير المسخوووطة زين زين و الله تا بكووووص... 

هاجر: بسم الله عليك اختي راكي مزوجة تبتي شوي و منين جبتي نتي تصاورو... 

سومية: كتبتها في قوقل و خرجات ليا هاكي شوفي تيتيز كي داير .... 

شدات منها تليفون كتشوف في صورة تا خرجات عنيها في ختها: ناااري واااش هادا كنعرفوووو.... 


القدر.... كل شخص في هاد لكون مرتبط بي قدر مند ولادته... هادي هي الحياة كنعيشو غير لي مكتاب لينا... فور ما شافت صورتو خرجات عنيها بجهد و بؤبؤ عنيها وساع من كثرة صدمة... هزات عنيها في ختها حالة فمها... 

هاجر: واااش هادا هو عصااااام بن جلول راني كنعرفووو... 

سومية حالة فمها فيها: منين كتعرفيه المسخوطة.... 

هاجر تنهدات بجهد و شقلبات عنيها :مدة طويييلة هادي باش تلاقيتو ...حطات صبعها على فمها...كنضن من كان عندي 13 لعام..... 

سومية وقفات حداها و حجبانها معقودين: 13 لعام و فين تلقيتيه.... 

هاجر : عقلتي نهار جات عندي خالتي و داتني نجلس معاها سيمنة.... 

سومية:اممم ايييه مزال عاقلة كنتي بشيتي معاها لشي عرس و جاتك دم اول مرة تم و نتي معرفاش شنو واقع.. 

هاجر كضحك غير وحدها من عقلها بشا لداك نهار: اوا الالة تم فين تلاقيتو و هداك كان عرسو لي بشيت ليه.... 

سومية حالة فمها :متقوليش هو لعريس لي وسختي ليه حوايجو الكارثة....

هاجر:و الله القسم .. مبقيتش عاقلة عليه مزيان ولكن سميتو شفتها مكتوبة في بابا لقاعة "عصام بن جلول "....

سومية: نارييي و مسكين سمح في عرسو و داك تا لكلنيك مخلوع كيصحابهم تعداو عليك و نتي غير يالله بلغتي و جاتك مجهدة سرسطاتك من لتحت.... 

هاجر بزز منها ضحكات: ههههه كون تشوفي من فقت و الله ما قدرت نشوف في وجهو غير خالتي لي شرحات ليه لموقف و ناري شحال عاف من عرف داكشي لي فحوايجو دم ديال شهر هههههه كون كانو عنيه قرطاس كون قتلني تم نيت صدقت مخسرة ليه لعرس كامل لي خاسر فيه زبالة فلوس.... 

سومية جبداتها بواحد ضحكة تا خلعات بنتها لي بينات يديها: ناااااري ضروووري هاد ليلة منتفاكش معاك تا تعاودي ليا القصة كاملة راه معرفاش كيف وقع هادشي بعدا.... 

هاجر : سيري حطي بنت في بيتي و اجي عونيني ديري معايا شي شلادة.... 

بشات ختها تحط بنتها و هاجر بقات كل مرة كضحك غير وحدها.. عندها ضحكة زوينة و برئية و حنيكاتها مطبزين غير كضحك كيتهزو لفوق و يتسدو ليها عويناتها بحال شي دري صغير.. و ديما عاكسة راسها بفولار مكيخطاهاش و خا كتغطي شعرها لكن ماشي حجاب غير ولفات و صافي خاصها ضروري تعكس راسها و خا تكون في دار.... 

دخلات عليها ختها و مزال تليفون بينات يديها مخرجة فيه عنيها... 

سومية: عرفتي اش قريت دبا عاد عرفت علاش ناض لديك قناة ناوس بغا يسدها ليهم حيت خرجو مقال على طلاق ديالو و بشاو هجمو على دار طليقتو و هو ينوض ليهم سد عليهم لما و وضو و هادشي باين غير لبداية.... 

هاجر : واش نفس لمرا لي تزوج بيها فلعرس لي حضرت ليه... 

سومية: على ما قريت كانو مزوجين ست سنين و عاد اسبوع دابا باش طلقو... اوا مني انا الله اعطيها الويل كاين لي عندو هاد لفريز و يسمح فيه انا نكون بلاصتها نشدو بيدي و رجلي و سناني .نديرو ديكور في دار كاع .... 

هاجر : طلبي شتا الحبيبة و دوزي عاونيني قبل ما نخلي زمر كامل و نبشي حدا خالتي راني عيت....

سومية؛ هانا الحبيبة غير متنوضيش تاني ...


صبح يوم جديد... مغاير عن العادة.. فاقت كتكسل في بلاصتها و دورات عنيها في لبيت لقات ختها و خالتها لي نعسو معاها مكينينش حداها.. هزات تليفون ديالها بانت ليها 11 ديال نهار... بزربة جمعات الوقفة خلات فراشها هكاك مشقلب جمعات شعرها على شكل شفنجة و عكسات راسها بي شال ..طلعات لفوق كتجر في رجليها وعنيها مزالين كيتلصقو... غير دخلات عليهم صالون و هما يسكتو كيشوفو فيها..... 

هاجر: مالكم كتشوفو فيا هاكا... 

سومية بتوتر: لا والو الحبيبة غير تعطلتي في نعاس و صافي.... 

سلوى: سهرنا لبارح بزاف و من شفتك صباح مزال شاد فيك نعاس مقدرتش نفيقك... 

هاجر : ماشي مشكل اخالتو.. شافت في حليمة.. ماما مزال شي فطور..... 

حليمة:هدا راه غدا ماشي فطور سيري لكوزينة شوفي واش مزال اتاي لميكون داز عليه داك صكع ديال خوك... 

خلاتهم و دخلات لكوزينة كتكسل تشوف اش تاكل... بقاو هما في صالون شي كيشوف فشي.... 

سومية: دابا شكون ايقول ليها داك شي.... 

حليمة؛ انا ما نقدر عليها شيباتني خليها منها لباها هو يعرف ليها و لا تيجي خوها و يشرح ليها بعدا راه كتسمع ليه مزيان.... 

سلوى: انا هادشي معجبنيش هي مكتبغيهش و مكتحملش فيه شعرة علاش مزال لاصق فيها.... 

حليمة: على ربي يهديها الله عليه هو بعدا كنعرفوه من كان صغير و دري الله يعمر ليها دار و كيعرفها نيت كيف دايرة و قابل عليها و خا عينا معاه راه عاود تاصل بحميد لبارح قاليه والو انجي نخطبها و تا تكمل الباك ديالها و يدير العرس... 

سلوى: اوا هادا زواج بزز... نتفكو من واحد يخرج لينا واحد اخر ..نجيك من لخر اختي راه لا ناضت ليكم و الله ما نبردها نخليها تدردك عليكم كيف بغات حيت شحال من مرة وهي كتبرا منكم مبغاتش تزوج و نتوما قاجينها تقولو راها متقلة عليكم.... 

سومية: الله يا خالتي وشهاد لكلام حنا بغينا ليها غير لخير و ما عرفتي هاد لمرة ترطاب و تقبل بيه... 

سلوى: اممم عولتو عليها ترطاب بكري هذا ولد عمها دوزناه و داك لحمار ديال الاستاذ ديالها لي من نهار رفضاتو وهو شاد معاها العكس في المدرسة و ديما مخرجها و داير بيها تقرير و كون ما دخل راجلي لي كيعرف لمدير كون جراو عليها من المدرسة شحال هادي .... 

حليمة: غييير سكتي على داك الاستاذ مشحفنا فين ما دخل عندو كتنوضها هي وياه صباط في الاول مكانتش كترض عليه الهضرة اما دابا ولات كلمة منو و عشرة منها و غير مسايسة معاها بزز متقول لخوها والو ولا بشا تا سمع شنو واقع عرفي شي روح اتهبط.... 

سلوى رجعات شعرها لور انيقة في لبسها و مزالة شباب و زوينة بزاف مزوجة براجل لباس عليه : اوا شلا لكانو رجال بحال هدوك سرهم لموت نيت انا مشيطاش عليا بنت ختي نعطيها لمن كان خاص يكون راجل و سيد رجال لي يسخن ليها كتافها اما هادو لي كيتفتفو علينا هنا كون نهار جاي واحد ميصلحوش ليها... اوا صافي راجل لي ترفضو و يبقى تابعك و يبزز عليك راسو ما راجل ما تا لعبة.... 

سومية: سكتو قبل ما تسمعنا ها هي جايا.... 

دخلات جلسات حداهم هازة كاس اتاي و خبز فيه فرماج و لكشير... فمها عامر كتشوف في خالتها.... 

هاجر: خويلة جبتي معاك طنوبيل... حركات ليها سلوى راسها.... نخرجو هاد لعشية نضربو شي دورة شحال ما خرجت انا و ياك راس في راس.... 

حليمة كتدور في عنيها و كتغمز ختها تسكت: منها نيت تخرجو دورو و تاخدو شي بيجامة زوينة و تصاوبو حالتكم عند شي كوافور.... 

هاجر هازة حجبانها : وعلاش ... 

سومية: غدا ايجيو شي ضياف و ضروري ندورو شوي بالحالة تا انا انبشي معاكم.... 

حركات هاجر راسها و بقات ساكتة تا طلع عندها خوها هاز في يدو شكارتها رماها ليها... 

ايوب: هاكي شكارة خلتيها عند منعيم لبارح عاد جابها ليك...... 


وصلات لعشيا راكبين في طنوبيل شادين طريق ....هاجر لابسة كسوة حمرة طويلة عندها حزام من لوسط و كمامها واسعين و دايرة زيف على شعرها غير مدوراه و مخليا جناب هابطين... خالتها جالسة حداها كتسوق و ختها لور شادين فيها... 

سومية: اوا دابا عاد نقولك راكي وليتي بنت شفتي الكسوة كيف جاتك و طلعاتك غزالة و انوثة.... 

سلوى: انا معرفتش كنضل نرسل ليك فحوايج غير لواعرين و مكتلبسيهمش و كتبقاي غير بداك سروال تجين واسع و قبية مكيبان فيك لور من لقدام.... 

سومية: هداكشي كاع لي كترسليه ليها نتي كتعاود ترسلو ليا انا راه مكتلبس منهم والو شحال من مرة حصلتها كتلبس لكيطمات دياول ايوب وخا صغر منها تجبد و طوال عليها... 

هاجر : وراه مكنلقاش راحتي فهاد الحوايج كيعجبني الواسع نكون مرتاحة فيه اما لمزير لي كيبين ليا فصالتي كنحس براسي مقجوجة و مكيجيش معايا... 

سلوى: سكتي قالك مكيجيش معاك نتي اي حاجة كتجي معاك و هاد لبس كيزيد يبين الانوثة ديالك و فصالتك متبقايش غير مكبطة بحال مي لعكوز تهلاي فراسك شوي اصاحبتي ....

سومية: قولي حمدلله من ماما كدير ليها دوك لعشوب كينقي ليها حالتها و انا كل سيمنة كندوز عندها نحيد ليها داك الموسطاج اما لكان منها كون رباتو بحال راجل.... 

سلوى كضحك :اوا تا انا غادي نديها فين تنقي حالتها مزيان .....

وقفو طنوبيل في باركينغ و خرجو مشادين في بعض و كلهم لابسين لبسة وحدة مختالفين غير في الالوان وحدة تنسيك في الاخرى.... دخلو لصالون كبير ديال ناس لهاي متكون من جوج طاج و كل طاج مخصص لحاجة... 

قربات ليهم وحدة مبتاسمة كتعرف سلوى بما انها كليان مهم عندهم:مدام سلوى مرحبة بيك نورتينا بوجودك.... 

سلوى سلمات عليها : شكرا حبيبة لهلا يخطيك.. ضارت عند هاجر.. الله يخليك بغيتك تهلاي ليا فهادي مزيان و منوصيكش راها بحال بنتي بغيت شغل يكون متقون و منكرهش تبداي بي طابق الفوقاني هو الاول و تركزي على المناطق الحساسة لمكان تا شي مشكل و غير بشوي عليها راه اول مرة ليها..... 

-كوني هانية الالة ميكون غير خاطر خاطرك... 

هاكر ما فاهمة والو كتشوف في خالتها بتساؤل و خالتها كتشير ليها غير تبشي مع البنت و هما ايتسناوها في لبيت لي حداها.... 

طلعات معاهم لفوق عطاوها فوطة و طلبو منها تحيد حوايجها كاملين يالله اتبدا تعرعر عليهم و هي دخل خالتها حافضاها و عارفة فعايلها... 
سلوى: غير حيديهم ابنتي راه ايحيدو ليك غير زغب.... 

دارت داك شي لي قالو ليها و جلسوها فوق واحد لبياص و كول رجل كتحطيها فجيه.. هاجر تزنكات و حشمات مقدراتش... فرقو ليها رجليها بزز و بالحشمة جاتها لقوة و عنيها كيرمشو بزربة... حسات بشي حاجة سخونة تحطات عليها من لتحت كمشات حجبانها ما فاهمة والو تا حسات شي حد جر ليها جلدة ديالها بجهد.. طلقات حلوقها بكل نفس لي عطها سيدي ربي.... 

دخلات عليها سومية و سلوى مخلوعين: امالكي على هاد الغوتة طيحتي منا نص.... 

هاجر دموع هبطو ليها و بالخلعة فشلات بقا ليها غير لسان لي ماضي : ولاد الحرام طيرو ليا جلدة قولي ليهم يبعدو مني ولا انركل شي حمارة فيهم.... 

وحدة من لبنات: غير صبري غادي تقصحي غير شوي حيت اول مرة عندك و لكن من بعد و تولفي و اتلاحضي زغب ايولي يخرج ليك رطب ماشي حرش.... 

هاجر : يا بنت الحراااام شكيت عليييك ويكون عندي تا قنفوووض مشوك خليه اختي عاجبني هكاك..... 

بغات تنوض تجمع الوقفة و هي طير عليها سلوى شداتها من يد و سومية من ليد لأخرى تبتوها و عطاو لأدن لبنات يكملو شغلهم.. و ختنا في الله حماتها لغوات و لبكا و الخناين كلشي تخلط ...غير كتحس بيهم ايطيرو زغب كتزحم بجهد بحالي اتولد و ترجع تسوط بجهد كلها عرقات ....
سومية كتمسح ليها لعرق : غير صبري راه مبقاش بزااف... 

هاجر كتزحم بالخلعة كلشي تخلط عليها: اعععععع و الله لبقات فيكم اولاد لحرااام اععععععع واااااااع واااحبسي الله اعطي لمك جهل راك صلختيه و الله اعطيني موصيبة اش جابني لييييكم اااش درت في حياااتي تا يدوز عليا هادشي.... واااا حليمة اجي طلي على بنتك ناس يتريشو من لفوق و انا ريشوني من لتحت....

بدات كتنهج بجهد صخفات عاد سلاو ليها و خلاوها تبرد و سومية هي و سلوى محبسوش من ضحك.. بغاو يوقفوها مقدراتش فشلات ليهم ولات صفرة.. غير لموسطاج لبغات تحيدو ليها ختها كدير ليها حالة بقا غير لبلاصة حساسة لي جابت ليها تماما ما سكتات ليهم من لبكا تا دخلوها لصونا كيديرو ليها مساج لحمها و كيحاولو يرطبو معاها و شادين ليها لخاطر فوق لقياس و خالتها محيداتش من حداها خافتها دير شي موصيبة ليهم و دير ليهم ما دارو ليها..... 


بريق ناشف باش وافقات ليهم تكمل معاهم لخرجة ... دخلو لمول كبير ديال لحوايج و خالتها معنقاها و هي كتعرج مزال مقصحة من لتحت و خالتها كدير ليها لخاطر كثر من لقياس ...وهي بحال لولد صغير مدلية شفاها لتحنانية دايرة راسها مقلقة...دخلو لجهة ديال بيجامات ياخدوهم ليها و يكونو زوينين و على قياسها حيت هي مولفة كتشري غير كطمات معندهاش مع لبيجامات بزااف...بقات سومية و خالتها كيختارو في الالوان لي يناسبوها على حسب عمرها و يقيصو ليها و هي غير واقفة هازة حاحب و مهبطة لخر..بداو كيدخلو ليها شك...

هاجر كتشوف في خالتها : كاينة شي حاجة ا اخالتو مخبياها عليا....

سلوى ضرباتها بنكرة و خا بقا فيها لحال مبغاتش تخبي عليها: مكاين والو ازين ديالي غير ناخدو ليك بيجامات ديال لبنات تلبسيهم فهاد العطلة حيدي عليك دوك الكيطمات الله يرضي عليك و بعدي من بيجمات مك راه ماضثشي قدك خودي قدك يواتيك...

هاجر هزات كتافها: اودي غير كتصدعو راسكم معايا و صافي....

سومية وجها تخطف منو لون كتصحابها فراسها شي حاجة : ش شششنو لللي منصدعوش بيه راسنا...

هاجر عاقدة حجبانها: كندوي على لحاويج راه فلخر مغديش نلبسهم و غادي ديهم غير نتي....

سومية و سلوى تنهدو بجهد قلبهم بغا يسكت مبغاوهاش تعرف من دابا و يصبرو غير يجي جواد خوها لكبير يهضر معاها في الموضوع بعدا هو الوحيد لي كتسمع ليه و مكتردش عليه الهضرة عارفة حدودها مع ناس لي كبر منها و خاصهم يتحتارمو غير ميفوتوش لخط الاحمر معاها راه اتكون معاك مزيان و تهزك فوق راسها .....

دخلو لمطعم لي متواجد في لمول كيتعشاو حيت تعطلو في زنقة.....

وقفات سلوى كتمسح فمها: تسنانوي هنا انبشي جوايه المكياج ناخد شي حاجة و نرجع...

سومية تا هي جمعات الوقفة: تسناي نبشي معاك تا انا خاصني ناخد شي حاجة من ديك لبلاصة...شافت في هاجر...تسناي هنا تا نرجع....

خلاوها جالسة و بشاو يتقداو لي خاصاهم لخطوبة غدا مبغاوش يتقداو كلشي قدامها باش متعيق بوالو هادشي علاش خلاوها و دارو سبة بالمكياج....

بقات جالسة في بلاصتها كتلعب في تليفونها تا عيات ..تعطلو عليها بزاف ..جمعات الوقفة كتدور في راسها مبانش ليها خيالهم...تمشات في جهة لي بشاو منها غادة ساهية في طابلو لي معلق كيبينو فيه تخفيضات لي دايرين.. 

مع دورة مع تساطحات مع شي حاجة بحال لحيط غير هي رطبة تأوهات بجهد مغمضة عنيها كتسنى طيح تا حسات بيد حوطاتها من خسرها و هزاتها تا لعندو صدرها على صدرو .... طلعات معاها ريحة رجولية مميزة بحال شي منسم هادئ و مثير في ان واحد.... شعرات بي انفاس كتدغد وجها ...حلات عنيها بشوي في شخص لي شادها... كيف جات عنيها مع عنيه لي غامقين ومخنزرين و حجبانو معقودين ... وجهو قريب لوجها و انفاسو كضرب في وجها ... خرجات عنيها بجهد و بدون ما تحس نطقات سميتو.....عصاااام......


في مطار سلا الرباط...تحطات طائرة كانت جايا من دبي .. جالس في كرسي الخاص بيه بكل تكبر و تعالي في ملامح ديالو حاط رجل فوق رجل و شاد تليفون بينات يديه....كان واخد درجة كاملة ديال رجال الاعمال لذا طول سفر ديالو كان وحدو و معاه سكريتيرو الخاص...دائما كيبغي لكالم في سفر ديالو باش يستف افكارو....جمع الوقفة كيدوز يدو على شعرو دور عينو لمساعد ديالو لي كيجمع لوراق خلاه و هز تجاكيط ديالو لبسها و هبط بكل شموخ كيتمشى بنخوة رجولية و عاقد حجبانو لوسط غير مخنزر و ملامحو جامدة...خلا المساعد ديالو يتكلف بي الاجراءات و هو خرج نيشن لقا شيفور كيتسناه حل ليه لباب لوراني... دخل بلا حرف بلا جوج معندوش مع قوة الهضرة و كلهم عارفين طبعو و حيت خدامين معاه سنين ولاو كيفهموه غير من عنيه و من خلال نضراتو باين معصب بزاف...جلس في بلاصتو و هز كارو حطو في فمو و شعلو خدا منو نترة طويلو عاد ساطها في لجو 
...حط راسو على لكرسي مغمض عنيه و عروق راسو منفوخين... دوز عليهم يدو حاس براسو غادي يطرطق بحالي فيه شقيقة..بلا ميقول والو لشيفور عرفو فين غادي يبشي....كان واضح فيه لعيا و تمارة ديال سفر ..هز تيليفونو دور نمرة و رما لكارو من جاج مخنزر وومعصب لأقصى حد...
عصام من تحت سنانو: لقيييتو المشكل منين كاين...

الطرف الاخر بتوتر: لحد الان مزال معرفنا شكون رسل هاد لمجوهرات مزورة...

عصام الشرر كيطير ليه من عنيه: من هنا ربع ساعة نلقا مول الفعلة قدامي ولا كلكم ادوزوه حبس منعقل تا على حمار فيكم....

قطع وهو كيتنفس بجهد من منخارو معصب.. كان سبب لي خلاه يضرب هاد سفر كلو هو المحل لي عندو هنا في لمول تابع لشركة ديالو و كتعرض المجوهرات لي كتصمم شاركتو البارح علموه ان سلعة لي دخلات كلها مزورة ..هنا بداو لقرودة كيلعبو ليه فوق راس... يعرف شكون هدا لي غشو يحفر ليه قبرو بيديه....

وقفات سيارتو قدام لمول خرج بسرعة معندوش وقت لي يضيعو...لابس بدلة انيقة بطاقم كلو اسود و بلاصت قرافط ديار سنسلة ذهبية ديال ناس استقراطيين عطاتو مضهر اكثر اثارة...كيتمشى بسرعة مع ايضور مع دخلات فيه وحدة غمض عينو بجهد كيسوط بنفاد صبر .. بغا يفوتها و هو يشوفها طايحة لأرض بسرعة مد يدو دورها على خسرها و جرها عندو بحهد..و بقوة جرة طار ليها زيف و طاح في الارض و تحل ليها شعرها غطا ليها نص في وجها و بعض شعيرات لصقات في فمها...صدرها لسق مع صدرو و حجبانو معقودين و عنيه عليها بحال شي صقر...كانت مغمضة عنيها و عاضة شفاه ديالها تحتانية و مخصرة ملامحها بحال شي طفلة صغيرة خافت طيح و في اخر لحضة عتقها ....

فور ما حسات بيدين كيحيطو خسرها حلات عنيها بشوي تا خرجاتهم فيه و بدون ما تحس نطقات اسمو: عصاااااام...

هز حاجب و هبط حاحب كيشوف فيها و في الاسم لي نطقات ...هبطها بشوي حيت كان ملصقها معاه بجهد تا نطقات اسمو عاد عاق براسو..حيد يدو من خسرها كيشوف في عنيها و هي حالة فمها فيه...

عصام نحنح بشوي و عينو كيفحصوها وبصوت غليض نطق: تقصحتي....

غمضات عنيها و رجعات حلاتهم كتشوف فيه كيف سمعات سؤال ديالو دورات راسها بي معنى.."لا"

حرك راسو بي خفة و كمل طريقو ..كيف خطا خطوة بعيد منها .. شاف زيف لي طاح ليها من فوق راسها...هبط بشوي هزو بينات يدو و رجع عندها ما نطق تا بشي حرف دار ليها زيف فوق راسها و دورو على عنقها بحال الحجاب عكس شدة لي كانت دايرة من قبل...شاف بعض من شعرها خارج من جبهتها دخلو بصبعو و غطاه تا دور عينو مزيان ما بانت ليه تا زغبة خارجة عاد ضرب دورة بشا بحالاتو بلا ميقول والو خلاها جامدة في بلاصتها بحالي ضربها ضو بقاو عنيها عليه كتشوف في ضهرو لعريض كيتحرك مع حركات يديه تا غبر من قدامها و مبقاش كيبان ليها عاد هبطات عنيها بشوي سااكتة عن غير عادتها تا حسات بيد كتحركها....


خالتها كتحركها بشوي: رجوع الله ابنتي مالكي واقفة هاد لوقفة...

هاجر هزات فيها عنيها عاد توكضات: لا 
...لا والو غير لقيتيني كنفكر و صافي...شافت فيهم..امدرا خديتو لي بغيتو..

سومية:اه خدينا و دينا كلشي لطنوبيل و من رجعنا عندك لريسطورو ملقيناكش فين كنتي...

هاجر : غير تعطلتو عليا و بشيت كنقلب عليكم مهم يالله نمشيو بحالتنا راه ضروني رجلي بكثرة ما تمشينا...

سلوى بتسائل: مالكي بدلتي شدة ديال زيف..بانت ليها شي حاجة كتبري في عنقها..شنو داكشي لي فعنقك ا هاجر...

هاحر حالة فمها:فعنقي مكاين والو...حطات يديها في عنقها حسات بشي حاجة رقيقة و قاصحة جبداتها تا خرجات عنيها فيها كنت سنسلة لاصقة في الكول ديال لكسوة ديالها....

سومية: منين جاتك هاد سنسلة انا عمري شفتها عندك...

هاجر عاقدة حجبانها: تا انا معرفتش ..سكتات شوي...يمكن تكون ديال سيد لي دخل فيا قبيلة..مقدراتش تقول ليهم سميتو..

سلوى: اوا صافي خليها عندك و لا رميها سيد فين انلقاوه فهاد لمول قد سخط ..شافت في ساعتها..و نيت راه بشا لحال علينا خاصنا نرجعو لدار...

سومية: عندك الحق اخالتي بنتي اتكون خرجات لماما عقلها...

جرو معاهم هاجر ركبو في طنوبيلتهم و شدو طريق لدار...طول طريق وهي حاطة راسها على زاج ساكتة و كتشوف في سنسلة لي دوراتها على يديها بحال شكل بارصلي..
بعد كا وصلو دخلات نيشن لبيتها هزات حوايجها دخلاتهم معاها لحمام..دوش من لعرق و لعيا لي دوزاتو ليوم ..دغيا ضارت براسها و نقات حالتها ... لبسات حوايحها و دخلات لبيتها كتنشف شعرها ....حيدات سنسلة من يديها اتخبيها مع المجوهرات ديالها لي كتجيب ليها خالتها ...تا دوراتها في راسها و هزات كتافها و رجعات سنسلة لبساتها و خلاتها في يديها...مكانتش عارفة ان ديك سنسلة من ذهب الخالص و الحجرات صغار لي فيها من الالماس الاخضر النادر....

طلعات لفوق دخلات لكوزينة كتشوف في مها بشك من شافت تقضية لي فالكوزينة: شهاد دجاج كامل ا ماما و شكون ايجي عدنا غدا تا بديتي كتوجدي من دابا...

حليمة كتقطع في لحامض ترقض بيه دجاج و كدور في عنيها : غير عائلة باك ابنتي و تا خوك جواد ايجي غدا...بزربة زربات عليها بخوها باش مادي ما تجيب...

هاجر بفرحة: حلفي تا ايجي غدا ما قالي والو....

سومية هازة بنتها كترضعها: راه عندو غير يومين كونجي من عرف خالتي كاينة قال ايجي يدوزهم معانا...

هاجر: احسن ما غادي يدير منها نيت يروض داك الحلوف ديال ايوب ما بقاش كيحشم ..قربات حدا حليمة كتشوفها اش كدير...ماما عطيني كبيدة عافك نسوطها مع البصلة و ناكلها جاني جوع و غالبني نعاس مقداش نصبر تا يطيب لعشا...

حليمة: دوزي هزي لي ايكفيك و ديري لي بغيتي....

خلاوه على خاطرها دير لي بغات و من اتنعس بكري راه دارت معاهم فوق بخير يوجدو كلشي على خاطرهم....

صوبات ليها عشاها مع كاس اتاي و جلسات في طبلة كتاكل و توكل بنت ختها اريج تا شبعات و هبطات لبيتها مع بنت ختها تنعسها حداها بقات كضور بيها تا نعسات ليها بينات يديها حطاتها في بلاصتها و بشات غسلات سنانها و عكسات راسها وتلاحت فوق نموسيتها كيف غمضات عنيها نعسات يحال الميتة....


جالسة في صالون منفخة و مربعة يديها لصدرها ... مدلية شفاها لتحتانية مقلقلة على سبة كتهبط دمعة....

خوها دخل هاز ميكات فيهم ديسير تا شافها هكاك كان جا مع الفجر و خا سلم عليها و شحال هضر معاها لكن مزال مقدر يدخل معاها في الموضوع لي مخصوص ليها اليوم..شافها مقلقلة هو يقلب دورة دخل عند مو عاقد حجبانو كان وسيم بشكل مثالي و شهب عنيه خضرين بحال هاجر و شعرو قهوي مدايرش لحية و طويل مكلضم و صحيح...

جواد:لوليدة مال هاجر ...

حليمة: هديك شيباتني اولدي شافت بنات عمها دايرين مكياج و خالتها هي و سومية بشاو لصالون يقادو وجهم و بغات تبشي معاهم تا هي و مخليتهاش... دابا راها منفخة خليها تا تفش بوحدها و الله لا خليتها ديرو....

دخلات عليهم هاجر كضرضدك برجليها و عنيها مدمعين حاسة بالحكرة: نتي ديما هكا فين مكنبغي ندير شي حاجة كتوقفي ليا بحال عزرين شوفي كلشي مقاد حالتو الا انا علاش معلياش الله...

حليمة هزات عليها مغرف معصبة من صباح و هي هكا تا قلبات ليها راس: اديك بنت الحرام راه لا جيت ليك انزوق ليك لحمك سيري عطيني تيقار خليني مرونة مع هادشي لي فيدي...

هاجر معصبة: ا والله تا نديرو و دابا تشوفي بغيتيهم يضحكو عليا ..هما مزوقات و انا نجلس حداهم بوجهي صفر بحالي فيا بوصفير كلشي واخد قفطان بحالي عدنا عرس و نتي كتقولي ليا لبسي بيجامة مالي انحضر لجنازة ..ياك لي ايحضرو ليه لبنات انحضر ليه تا انا..

حليمة: دابا ادرقي عليا زلافتك لا و لا ليوم يحضرو في جنازتك نشالله...

هبطات هاجر لبيتها كتنكر معصبة و حاسة بالحكرة حيت ديما مها كدير ليها هاد الافعال مكتخليها تلبس بحال لبنات و لا دير مكياج ..حابسة عليها لما و ضو فهاد القضية وخا هي معندهاش مع لحوايج بزاف لكن كنبقى انثى و من كتشوف لبنات فشي فرح مصاوبين حالتهم كتبغي تا تي تكون مقادة لحالة بحالهم ماشي تبان بحال جداتهم...

جواد بقا غير كيشوف فيهم و مربع يدو لصدرو هادا طبع فيه مكيدخلش في مو من كتهضر مع البنات بنسبة ليه لبنت ما تفهماها غير مها هادشي علاش فين ما ناضت ليهم حليمة مكيهضر ما كيفك ...خلاها تا هبطات عاد قرب حدا مو باس ليها راسها...

جواد:رخفي عليها الوليدة شوي بغات دير ما فيها باس و زعمة هدا نهارها حشومة البنات يقادو حالتهم و هي لا راه مجاتش وخا هي اتكون زوينة عليهم لكن ما فيها باس ترخفي القضية هاد نهار...

حليمة: اولدي راني خايفة عليها من لعين راه غير ديك لمرة دارت لكحل بينو ليها عنيها و كلشي كيشكر فيهم تا ناض فيهم لحبوب تا قلنا لبنت بشاو ليها عنيها ما بقاتش كتشوف. و الله ما تبقا كيف خلقها ربي و تسلم من عنين عباد الله و لا تجيبها فضلوعها....

جواد: عنين بنادم الميمة ديما تابعاك غير ديري بوجهي و خليها دير ما بغات هاد نهار راه اتزيري معاها دابا و من نقولو ليها شنو كاين تقصح راسها تا هي و دير لينا شي شوهة ....

حليمة: متقول ليها والو خليني مني ليها تا يجي سيد و نحطوها امام الامر الواقع اما لبقينا دايرين بحسابها و بفشوشها راه غير ما غادي تزيد فيه

جواد باس ليها يديها: اوا نتي لي تعرفي...

بقات في بيتها طول الوقت لابسة بيجامة من لي شرات ليها خالتها طويلة دايرة بحال لقفطان بي الابيض و داخل فيها شريطات بالغوز و عاكسة راسها و كتاكل في ضفارها معصبة و الله ما خرجات ليهم و خا سمعات صداع و صوت ناس جهاد..

دخلات عليها ختها مقادة لحالة وطالقة شعرها لابسة جوهرة براندة بدهبي..حلات فمها في هاجر: المصيبة مالكي مزال ما لبستي حوايجك و ما قاضيتي حالتك...

هاجر مخنزرة :سيري سولي مك و مالكم دايرين هاد الحالة واش دايرين حفلة بلا خباري و لا شنو....

سومية وجها صفر: طلعي بعدا سلمي على العائلة و مرت عمي كتسول عليك شوفي شنو بغات...

هاجر عقدات حجبانها كيف دكرات ليها سومية مرت عمها دخل ليها شك لراسها ..لبسات بانطوفتها و قدات زيفها مزيان و طلعات لفوق تا كتفاجئ بصالون عامر بالعائلة... عنيها بشاو نيشن لخاواتم لي محطوطين فوق طبلة مع لحلوى و تمر و كادويات ديال الخطبة ..هزات عنيها نيشن في شخص لي كيشوف فيها و كيضحك و هو ولد عمها......قربات ليها مرت عمها كتعنق و تبوس فيها ....

مرت عمها:تبارك الله على عروستنا شحال زيانت...

كيف قالت هاد لكلمة بحالي ضربتيها بطرشة تا ودنها بداو كيعطيو صداع و صفير....و الاعصاب بداو كيلعبو عليها قربات حدا طبلة ساكتة تا جرات لقلع ديالها شتات كاع الكدويات ديال خطوبتها مزيرة على سنانها و عنيها حومر و مدمعني...
كلشي غوت من شافها شنو دارت بينما هي هزات عنيها فولد عمها من تحت سنانها كتفيبري : ععععمري نقبل بيك ولااا تحلم بيااااا...


في كثير من الاحيان الولدين كياخدو قرار مهم في حياة ابنائهم كيضنو ان بي هاد القرار اتكون حياة اولادهم احسن و في بعض الاحيان كيضطر انهم يحطوك امام الامر الواقع باش تقبل القرار ديالهم كما كيقول المثل "كبرها تصغار"...

كانت جالسة ما بيها ما عليها ما جايبة لدنيا خبار و معرفاش اش كيتخطط ورا ضهرها كانت كضن ان العائلة جيين فقط يتجمعو معاهم و يضحو كيف مولفين ..ناسية راسها و فقط مقلقة من جيهة ماماها لي مخلاتهاش دير بحال لبنات و ادا بيها كتصدم في ناس لي قدامها و بالخواتم ديال الخطبة ..عقلها تحبس و كتحاول تفهم شنو هادشي لي قدامها وخا شافت ولد عمها لكن عقلها ممتقبلش هادشي و كتقول والديا ميديروهاش بيا ..لكن كلشي تهرس وقت ما قربات ليها مرت عمها لي قالت...

مرت عمها:تبارك الله على عروستنا شحال زيانت.......

خرجات عنيها بجهد كتشوف فيها وديك كلمة "عروستنا" كتردد ليها فودنها..بدات كتنفس بجهد و صدرها كيطلع و يهبط بحالي الاكسجين مبقاش كيوصل لرئة ديالها بصدمة لي تصدمات...قربات حدا طبلة معصبة و وجها حمر و نضراتها قاصحين فلخواتم لي محطوطين فوق طبلة...جرات القلع شتات كلشي ..

هاجر كارزة على سنانها كتشوف في ولد عمها: عمممرك تحلم بياااااا و عمريييي نقبل بشماااتة بحااالك ..خرااااااج علياااا من هنااا خرااااااج....

كلشي وقف مصدوم من غواتها و وجهم حمر...دخلات حليمة وجها صفر من سمعات صداع

حليمة: اش واقع ..شافت في بنتها..هاجر مالكي شهاد روينة كديري واش هادا هو ترحاب بناس لي جااو يطلبو يدييك....

هاجر دارت عند مها كتغوت معقلات علي تا واحد: شكوووون قااالك قابلة بييه واش جيتو سولتوووني و قلت اه... ياااك ما مرة ما جوج قلت ليكم كلمة زواج ضربووو عليييها...هزات صبعها فولد عمها..و بضبط هااادااا عمرييي نقبل بيييه...هزات كراطن الحلوى رماتهم عليهم....قلت ليكم خرجووو عليااا من هنااا ...

مرت عمها بشات كتجر ولدها يخرجو و وجها حمر: اوا مزيان نهزو بيك و نحمرو ليك وجهك و نجيو تال عندك نطلبو يديك مكبرين بيك و نتي ابنتي هاجر كتجري علينا هادا هو المضمون فيك و فتربيتك ما درتي بوجهنا و لا بوجه دم لي جامعنا....

هاجر اعصابها بدااو كيخرجو على سيطرة و من كتعصب كتبقى غير تخرج في الهضرة بلا متعيق: نتي ا مرت عمي فوق راسي و عيني معزتك في القلب مايقلعها حد و كاع العائلة شاهدة بهادشي لا نتي لا عمي لكن ولدك ما مرة ما جوج و قدام والديا قلت ليه مبغيااااكش زواج رااه ماشي بزز......

باها و خوها جواد هو و ايوب بقاو بعاد غير كيشوفو ما قربو ليها ما حبسوها عارفينها مزيان و مكنوش بغاو يوصلو لهادشي لكن كلشي جا من راس حليمة خلاوها منها ليها تا من خالتها بعدات و ماعجبها حال من هادشي لي دارت ختها في بنتها...

حليمةقربات لهاجر كتحاول تكالميها: نعلي شيطان ابنتي سي عبدلله منا و كنعرفوه من كان صغير و بغيك من لفوق عطيه فرصة الله يرضي عليك ابنتي متحشميناش...

هاكر: نتي بضبط كلشييي منك نتيي لي كاان عليك بحال اي ام تجي عند بنتك و تقولي ليها شنو كاين و توقفي في صف بنتك ماشي تبززي عليها واحد ما بغياااهش و محملااااهش...

عبدللة ولد عمها قرب ليها: هاجر غير عطيني فرصة و الله تا.....

قاطعاتو: نتااا متهضرش حيييت ماااشي راااجل كون كنتي راجل بحاال سياااادك كووون درتييي نفس و بعدتيييي مني و متبقاااش لاااصق فيااا كيف لولية...


مرت عمها جرات ولدها و هزات لخواتم و الكادويات هي و العائلة لي جات معاهم: زييد اولدي نخرجو هادي ولات كتسب في اعراض ناس حمدلله بينات وجها لينا و رحمنا الله من لفعة بحااالها خليها تا تبور و تعرف بحق لي خلاات....

هاجر جهلات: ما بغييت نعطيك خوو كلاامك و نحدر لمقامك و لدك لي قد لبعرة و دايرة ليه همة وشان ما يسوا تا صبع رجلي صغيير و بزاااف عليه و لهلا يحييه تا يجي بوجهو حمر يطلب يدي و هو ريحتو عطات و مكاين لي معارف خبااارو عندااكو تصحابوني راني ناعسة على ودني رااني هاجر العسكري و لي مكتعرفوها سيرو سولو عليها ..خبارك عندي اولد لعميم و ديك لي ضحكتي عليها و خليتيها مليوحة في زناقي كنعرفا مزياااان وجاي بوجهك حمر لعندي..خنزرات فيه مزااان و هو وجهو حمر ولا غير كيضور في عنيها... سير ستر غا راسك عاد ستر عباد الله ...لعنة الله و عليك تفووو ..

كلشي هبط كيدردك و وجهم حمر ...كيف خرجو ناضت خالتها كتشوف في ختها لي حاطة صبعها على حناكها و ساكتة: شتي اختي اش قلت ليك ياك من لبارح و نا كنقولك سيري سولي بنتك و نتي كتقولي ليا كبيرها تصغار اوا هاهي كبرات اوا صغريها دابا....شتي الولد لي بغيتي تلصقيه لبنتك شكايسوااا... سمعتي اش قالت بفمها سيد ضاحك على لبنات وجاي بوجهو حمر يخطبها بالماسخ لاخر....

سومية : وهادي ما كانت فراسي و لا عمري شكيت بداك ولد عمي ضريف لي من دار لجماع يكون تحت منو هادشي كامل و تا مو عمرها جبدات لينا هادشي...شافت في هاجر..ونتي منين جبتي هادشي كامل عاد عرفت علاش مكنتيش كتحملي منو شعرة....

حميد قرب لبنتو بغا يعنقها تا خرج عينو فيها ...هبط راسو يشوف ملامحها لقاها كتبكي في صمت...هز راسو في حليمة معصب: من ليوووم عمرك تدكري ليها زواج على فمك .......

هاجر مسحات دموعها بزربة هزات فيهم عنيها لي ولاو حمرين: تال هاد درجة تقاليت عليكم و وليتو تخبيو عليا ..ياك بغيتوني غير نتزوج ونضرق زلافتي عليكم ..حركات راسها و دموع هابطين و تخنسيسة كتحبس ليها الهضرة... صافي ندير ليكم لي بغيتو و اول واحد ايجي يخطبني من هنا لقدام انقبل بيه وخا يكون شمكااار قاابلة بييه مهم نخفف عليكم حيت تقلت بزااف....

تخطاتهم بغا يشدها خوها و هيا تنتر يديها منو معصبة هبطات كتجري لبيتها و دموع شلال بقا فيها الحال بزااف....


سلوى تنهدات بجهد: اوا ها نتوما خلصتو ما درتو اوا من حدها تقلات عليكم انديها معايا لفيلة...

حليمة : شمن تقلات علينا ا سلوى شكتخربقي انا بغيت غير مصلاحتها و فين كنت عارفة هادشي كامل و هي فراسها كاع هادشي و مقالت ليا والو شحال من مرة كنسولها مالكي معاه و هي كتقول ليا والو ....

سلوى نسات راسها راها كاين سي حميد و ولادو : اوا اختي انا بعدا من هادشي لي شفت راه بانت لي متقلة عليكم واش البنت اعباد الله غزالة على مزويناتها بحال شي نوارة و زيد صغيرة في سن عندها 18 لعام و بغيتي تزوجيها و ليمن بداك زامل لحمار لمكبوث لي رجلو تالثة خارجة عليه يضل يدير رقية في بنات ناس تلقايه مدوز ها كبيرة ها صغيرة ها مزوجة ها مطلقة واقيلة كاع فات داك لفقيه البركاني....

خدامة كتولول نسات راسها و سومية كتنغز فيها و جها ولا حمر حشمات قدام باها و تقول واش خالتها بغات تسكت عيات متنغز وهي تنوض هزات بنتها و غبرات من قدام باها و خوها حشمانة....

سلوى مبغاتش تقاضة: هو قد لغول غير شاف البنت مزال لحمها طري و فتي بغا يزرب بيها انا هداك منقولش ليه كاع راجل و ما عرفتي يكون كاع من تريكت ادومة..

حليمة خرجات فيها عنيها وحاطة صبعها على حناكها..و سلوى هزات حجبانها بجوج كطلع في راسها و تهبط...ايييه و قولي الله و اعلم واش راجل لي يكحل و يسوك بحال لمرا تفرحي ليه يا ختي يهديك الله فين كنتي مسيفطة بنتك يا حليمة .....

سمعات حميد كيحنحن عاد عاقت براسها .... هبطات عنيها لأرض و الوان طيف دازو في وجها 
اما حميد بقا غير كيكحب وخا سلوى قريبة ليه بحال ختو لكن بيناتهم احترام كبير و معمرو سمع منها شي كلمة ماشي تال لهيه تال ليوم طبزات ليها العين..

جواد جالس حدا باه حابس ضحكة بزز هو اصلا عندو حدود مع العائلة بيناتهم غير سلام مكيبغيش يدصر عليه تا واحد وتا ولد عمو مكانش عارف عليه هادشي كامل من غير انه ولد ملتزم بزاف ...

كلشي جالس في دار الفوقنية و تا حد ما قدر يهبط عند هاجر لتحت حيت عارفينها لا بشا طل عليها شي حد اتعاود تنوض من الاول و حمدلله اليوم مزادتش فيه كيف مولفة ربما حيت حسات بالحكرة من جيهت عائلتها لي مخبين عليها هادشي كامل ..هادشي علاش سكتات و هبطات بحالها و زيد هي من الاشخاص لي قليل فين كيبكيو ولا بكات مكتقدرش تسكت و كتزيد تخنسيسة لي كتشدها كتحبس ليها الكلام ....


جواد: الحاصول ما درنا فيها ما يصلاح البنت كان علينا نقولو ليها اش كاين راه هي لي كانت اتعيش معاه و اتزوج بيه ماشي حنا و زيد ها هي قالتها في وجهكم قالت اول واحد ايجي يخطبني انقبل بيه اوا سيرو حيدوها ليها دابا من فمها راه ما حدها قالتها راه اتقد بيها...

سومية رجعات جلسات حداهم: اناري يا خويا متقولهاش و غير سكت عليها دابا من درنا ليها هادشي تا هي اتبغي ترجع لينا دقة وخا حنا منقبلوش بدري هي اتقبل بيه ...اففف اش دانا لهادشي تقول عقلنا مكانش من لبارح و حنا نخطوطو و ها نتيجة بانت ...

حليمة : اوا الغلط الاول منا و لكن تا هي غالطة اش فيها لقالت لينا من نهار الاول اش كاين علاش تخبي علينا لا مقدرات تقولها ليا تقولها ليك و لا لخالتها...

سلوى: اوا سولي راسك نتي نيت اختي هاد لبنت من كانت صغيرة و نتي كتخدمي معاها لعصى بلاصت الكلام اييه عارفة كان راجلك عسكري و بعيد عليك و نتي بوحدك دايرة دور لمرا و راجل ولكن لا اختي البنت عارفاها من صغرها جايا واعرة و قبيحة و زدتي عليها لعصا ... باش تشوفي علاش هاد العكس فيها كنتي كضربيها مسكينة تا لحمها كيزراق ليها عنداكي تصحابي لولاد كينساو راه كلشي كيبقا ليهم فراس وخا يكبرو ايبقا ليهم داك الخوف فراس و يقولو لبشيت وقلت لماما هادشي باينة اضربني حسن نسكت و منقول والو يا ختي راه كلشي من تربية و كنقولها و نعاودها انا راه خالتها كنهضر معاها في امور اخرى و نوعيها كا اي بنت تعرف اش دير و تحافض على راسها و متخليش لي يضحك عليها واش هادشي نتي عمرك جريتي بنتك و قلتي ليها اجي ابنتي ها شنو اديري و ها شنو مغديش ديري....نتي دابا و لا ناضت كتنوضيها معاها ..شبغيتيها دير طج ليك من هاد دار و زايدة قاجاها مديرش بحالها بحال لبنات تبغي تقاد وجها لا ..تبغي تلبس بحال لبنات لا ...و تشري ليها دوك حوايج قد سخط و تقولي ليها تكبري فيهم شمن تربية هادي اختي و زيدي ها ليوم تاني كلشي لابس لقفاطن و نتي جريتي عليها تبشي تلبس بيجامة كتحسسيها ان لبنات لخرين حسن منها و خا هي زوينة و تا حد ما يوصل ليها لكن كتبقى مسألة انها انثى كتبغي تهلا فراسها و هي مزال فسن المراهقة و نتي كتزيري عليها من كل جهة كتبقى مخبية داكشي في قلبها و بزز باش كتعاودو ليا في تليفون و مزال الان لبغيت غير نديها نصاوب ليها شعرها و لا شي حاجة كنلقاها خايفة و كتقولي سولي ماما هي لولة..ايه متافقة معاك تربية مزيانة و لكن تربية لبنات ماشي هيا ديال دراري اختي...

كلشي بقا ساكت كيسمعو لخالتهم اش كتقول فعلا هادشي كلو صحيح حليمة كانت واعرة في تربيتها و حيت هاجر جات واعرة و قبيحة كانت هي اكثر وحدة كتاكل لعصا منها وخا مزال مكتحشمش لكن كتحس براسها مقموعة بزاف وماشي بحال لبنات لخرين....


وقفات سومية مع تنهيدة طويلة: هاني انهبط عندها نحاول نهضر معاها و نديها معايا شي يمات تا تفش و ميبقاش فيها لحال و نرجعها ليكم...

هبطات و دخلات عندها لبيت لقاتها ناعسة و مغطية راسها كامل..و صوت تخنسيسها مسموع...بلا متهضر معاها خالتها ناضت هزات ليها حوايجها دارتهم في شانطة صغيرة و حطات ليها لكاب فوق ناموسية ..جلسات حداها في طرف ناموسية ..حيدات ليها لغطا من فوق راسها و دوزات يديها على شعرها بحنية بقات فيها بزااف خصوصا مزال صوت بكاها مسموع...

سلوى:نوضي الحبيبة ديالي انديك معايا لفيلا...

هاجر بصوت باكي: لا غير خليني اهئ معندي فين نبشي..

سلوى باست ليها راسها و يديها: الله يرضي عليك ابنتي لما ديري ليا خاطري واش تبغيني نبقى بوحدي.. يالله معايا و نبشيو انا و بنيتي فين ما بغات نطلعو لشمال نتساراو فيه و نبشيو لبحر اصيلة و ناكلو الحوت لي كيعجبك و ندوزو لشفشاون ياك هادو كيعجبوك بزاف يالله الحبيبة نوضي خلاص ....

هاجر بزز باش كتخرج الهضرة بتخنسيسة لي كطلع معاها: تا نتي ا خالتو خبيتي عليا يااك.. اهئ😢 ..هادي هي تيقتي فيك و كنعاود ليك كلشي بحال صاحبيتي و نتي كتخبي عليا...

سلوى: عارفة رامي غالطة ابنتي و انتحاسب عليها غير نوضي تبشي معايا و نخليك ديري لي بغيتي...

هاجر هزات راسها و مدلية شفاه ديالها بحال شي بنت صغيرة: و تعلميني نسوق و نبشيو فين ما بغيت انا...

سلوى عنقاتها: الفنكوشة ديالي نعلمك لي بغيتي غير نوضي ديري عليك غير هاد لكاب فوق البيجامة راني جمعت ليك حوايجك و طنوبيل قدام دار اتركبي فيها نيشن تال لفيلا بلا ما تبدلي ...

وقفات هاجر بزربة بشات لدوش غسلات و جها و قدات زيف و رجعات لبسات صندالتها و دارت عليها الكاب و تبعات خالتها لطنوبيل...وخا قلبها طايب لكن مرضتهاش فوجه خالتها لي كطلب فيها و تبوسها و منها نيت باغيا تغير الجو بلا ما تبقى غير تبكي فدار...

كيف ركبات ودورات عليها سمطة تحل عليها الباب شافت في خوها لكبير جواد لي تحنى عندها باسها في جبهتها و حط ليها شي حاجة فوق رجليها...سد الباب و طل عليها من شرجم....

جواد: متقلقيش من خوك راكي عارفة كلشي ..هز يديه بجوج و غمزها ...تا حد ما يقدر يجي فوجه هتلر..

هبطات راسها لتحت ضحكها ..عاود باسها فراسها و عطا اشارة لخالتو تحرك....

هبطات عنيها لعلبة بي الاحمر لي حط ليها فوق رجليها ..هزاتها بين يديها كتحلها تا خرجات عنيها و بدات كضحك غير وحدها دغيا نسات همها ..هزات لبواطة بينات يديها فرحانة بيها دغيا حلاتها و هزات تليفون لي كان ايفون اخر ما كيان بغات طير بالفرحة..وراتو لخالتها عاجبها لحال ..دغيا نسات شنو وقع و رسمات ليها ضحكة في وجها و عنيها كيبريو ايطيرو بالفرحة شحال و هي كطلبو يشريه ليها و ليوم باين جابو ليها من اكادير و كان مخبيه تا يعطيها ليها...

دغيا شعلاتو و دارت فيه لكارط ديالها و دخلات فيه بزربة فيسبوك ديالها و سناب شات بقات كتصور هي وخالتها و تلوح عاجبها راسها و خالتها وخداها على قد عقلها عارفاها قلبها بيض و خا تنوض و تغوت و تعاير و تعصب لكن دغيا كترجع بحالي ما وقع والو .....


بعد مرور اسبوع..هابطة من دروج كدردك عاكسة شعرها كيف مولفة و لابسة بيجامة طويلة ديال خالتها بلأخضر فاتح دايرة بحال لفراشة و عندها حزام من تحت صدر و لون جلدها سمر شوي على لونها لحقيقي...دخلات لصالون عند خالتها لي كتفرج...

سلوى: لحبية ديالي فقتي نقوليهم يجيبو ليك لفطور...

هاجر جلسات حداها و دايرة مخدة قدامها متكية عليها: لا بلاش اصلا تعطلت على الفطور و نعست بزااف من رجعنا من سفر كيف دوشت هديك هي نعستي...

سلوى: عرفتك اتكوني عيانة هادشي علاش قلت لزهور"خدامة" ما تفيقكش و ما ديرش صداع حدا بيتك....

هاجر: اححح معمري درت بحال هاد تسافيرة مخلينا تا قنت انا و ياك في شمال ايجي راجلك و يشوف دوك الفلوس لي خسرتي يجري عليا انا و ياك هههه....

سلوى: اوا يمشي يلعب دوك لفلوس لي كيجمع فيهم شكون ايخسرهم من غيري..غمزات هاجر..و اصلا عارفة ليه و كلمة وحدة مني ترضيه...

هاجر هزات راسها كضحك: ههه لعار اخالتي عاودي ليا غا شوي نتقف معاك شوي...

سلوى: اول حاجة راجل كيبغي لسان لحلو و صراحة كل راجل و طبعو اما ديالي بعدا كيبغي تفششي عليه كيف بغيتي و تهلاي فيه من لفوق بكلشي لا من شهيوات لا من راسك و زيد نهار كيجي من سفر كيلقاني موجدة ليه دوش و كندير ليه مساج خفيف كنبقى غير نلعب في ضهرو مكنوركش عليه يعني مساج حنين ههه و زيد لا تقلقل مني كنوض نشطح ليه شرقي ...

هاجر حالة فمها فيها: يا خالتي راكي مسهالاااش غا قولي ليا مال ماما ماشي بحالك تقولي ماشي خوت شقيقات...

سلوى كدور فراسها: يا نوضي ابنتي هديك راه مسخوطة انا ختها و نشهد فيها لا هيا طيحات باك على زنافرو غير هكاك راه كانت واحد العودة منها ما كاين و كان عندها سالف كيتجرجر مع الارض كحل كيف سواد ليل كيبري تبارك الله ..نهار شافها باك كانت كتحضر بيه فواحد لعرس ديال العائلة خلات كلشي حال فمو فيها و كانت بيضة كتشعل و عنيها ملونين بلعسلي و لخضر كانت بحال شي فريزة لي شافها يحل فمو فيها...نتي اصلا نعاسك تقيل تلقايها مهليا فسي حميد و ماكاين غير الله يعطيك صحيحتك....

هاجر كتمرغ بضحك: وشوفي ليك الوليدة تا هي هههه ..عرفتي شنو انبشي نوجد واحد بسطيلة بدجاج و لوز مشهياها من لبارح نتغداو بيها....

سلوى : غير جلسي انقول لزهور تعملها نتي غير رتاحي ليا....

هاجر وقفات: لا غير خليني نيت بغيت ندير واحد طبخة لحمي راه ولا كحل بالملحة ديال لبحر...

سلوى: اوا تا نتي شتي لبحر مبغتيش تخرجي منو ديري ليا معاك تا انا و خليها تا لعشيا و نبشيو لحمام....


دخلات لكوزينة مكفدة على يديها وصات على كلشي جابو ليها لعساس....حطات تليفون قدامها دايرة لايف في لكروب مع البنات كتوريهم كيف يصاوبو لبسطيلة ديال دجاح و منها مجمعة معاهم....

عند خالتها جالسة كتهضر في تليفون مع حليمة لي كتسول في بنتها تا دخلات عليها لخدامة ديالها: لالة سلوى مدام بن جلول جات عندك....

سلوى قطعات الاتصال: وشنو كتسناي دخليها خلاص...

وقفات كتصاوب في لجوهرة لي لابسة و كتقاد شعرها لي كانت طالقاه واصل لخسرها...شافتها داخلة و هي تبسم ليها...

سلوى فاتحة يديها: لالة الياقوت نهار كبير هدا جيتي فيه تشوفيني....سلمات عليها

لالة الياقوت: يا لحبيبة علمت راكي كاينة غير وحدك قلت ندوز نونسك شوي...

سلوى: دخول بعدا و متبقايش في لباب ..يونسك الخير يا لالة الياقوت...جلسو في صالون لكبير مفرش بفراش عصري مغريبي....

لالة الياقوت جلسات دايرة رجل فوق رجل طالقة شعورات واصل ليها لحد كتافها و لابسة لبسة عصرية هضرتها مخلطة بين الشمالية و العادية؛ اوا شخبارك و شكتعملي مع الوقت ياك امور مزيونة...

سلوى: حمدلله راكي عارفة الحاج نهار و مطال وهو الخدمة و انا عيت من داك سفر و ليت كنفضل نبقى في داري و لا نبشي عند ختي نبقى معاها شي يمات ...

لالة الياقوت: اوا فيها خير تا انا كنت غير في المحل و عرفتك كنتي تم خديتي منو شي سنسلة و قلت والو ندوز نشوفك اش عاملة ...

سلوى: ربي خليك كيف داير واحد سي عصام لباس عليه شحال هادي ما شفتوو كيف بقا من ديك القضية ديال طلاق...

لالة الياقوت: اواا تمشي قالك يبقا فيه الحال شنو انعملو بيها حنايا فيها غير كثرة صداع و الغوات وتا لولاد مبغات تولدهم و قالك بغات تبشي امريكا تولي عارضة ازياء ولا منعرف اوا شووفي لعب كي عامل...

سلوى: ياك هيا لي دفعات طلاق و زعمة كانو كيبغيو بعضهم غير شيطان غرهم و صافي...

لالة الياقوت: يعطيها لغما نشالله ..شنو فيها ما يتعجب ديك العوجة فيها عود واحد كيتحرك شي نهار تعمل فيا سكر تقولي واش كتعرف كاس اتاي تعملو دراعها وااالو يا لحبيبة فقصاتني و خرجات لي مرارتي...

سلوى: اوا ها نتي بقيتي وحدك دابا و محال سي عصام يعاود يتزوج...

لالة الياقوت: اهووو يا لحبيبة ولدي انا لي انزوجو و نختار ليه لالها دابا تشوفي على عينيك ميدوز هاد شهر تا نعرض ليك لعرسو...

سلوى جاتها ضحكة: ههه لواه يا لياقوت سي عصام ماشي ديال هاد زربة....

لالة الياقوت: اهووو يا لحبيبة كان عامل هايدا نهار طلق غير ندكر ليها زواج يتهرب مني و تشوفي شنو عملت لو انا وختو بقيت واقفة عليه فوق راسو وعملت موتة حمار خليتو ولا صفر كيقفق عاد وافق نختار ليه عروسة على دوقي و كيف ما كانت هو قابل ...

سلوى كتكب اتاي: اوا امدرا لقيتي هاد لعروسة ولا مزال...

لالة الياقوت: بنات اليوم ما فيهم ما يتعجب و انا مابغيتش بحال ديك سلك ضو لي كانت عندو انا بغيتها تكون مطبزة شوي وعامرة تعمر ليه تا عينو و تكون حارة وحادكة في شغلها تهلا ليا فولدي و تكون ضريفة متردشي الهضرة و اهم حاجة تكون كتسمع الهضرة و ميكونشي راسها قاصح....

كيف كملات كلامها دخلات عليهم هاجر..هزات لالة الياقوت عنيها و هي تخرجهم بجوج فيها...

سلوى مبتاسمة : دخلي احبيبة و سلمي على خالتك و اجي حدايا شربي كاس اتاي اتكوني عيتي بديك البسطيلة لي كتوجدي...

بشات هاجر مبتاسمة و حنيكاتها مطبزين و حومر بالفران لي كانت كطيب فيه ... سلمات على اليقوت لي كطلع فيها و تهبط كدير ليها سكانير....

لالة الياقوت: مشاء الله عليك ابنتي و ربي يحجبك..هبطات مضيضرات ديال شوف و هزات عنيها في سلوى..شكون هاد البنيتة لي معاك...

سلوى مبتاسمة: هادي بنت ختي سميتها هاجر و نيت جيتي في وقيتك تبقاي تغداي معانا راها عاملة واحد بسطيلة بدجاج بيدياتها تاكلي عليهم صبيعاتك ...

لالة الياقوت: تبارك الله حادكة و غزالة يكما مزوجة...

سلوى كضحك:هههه لا لا راه وخا تشوفيها وافية تبارك الله راه يالله عندها 18 لعام...

لالة الياقوت بقات غير حاطة عنيها على هاجر ..خصوصا هاجر من كيتزاد عليها زايد و مكتكونش عارفاه كتحشم منو و كتبقا غير مهبطة راسها لأرض كتبان برئية و ضريفة و سكوتية..جات لالة ياقوت على كانتها....

يتبع...