جنازة حفل زواج الجزء الثاني

من تأليف Ghazal trust
2019

محتوى القصة

رواية جنازة حفل زواج

صبح الحال وصبحات الفرحة منتاشرة فالدار . حسنا مشات عند عائلتها تعيد معاهم .. ورانيا صبحات كتقلب ودور على شي صالون وبزز باش لقاتو فداك الصباح دالعيد .. قطعات لبنتها شوية من شعرها وصيبات حتى هي شعرها بوكلي نازل حتى للخصر ولبسات جلابتها الجديدة مع صباط طالون ازرق وطلقات شعرها ولبسات لبنتها حوايج جديدة ورشات الريحة ومشات لدارهم .. حلات ليها امها الباب لابسة قميص رقيق وتعجبات للتغيير اللي بان على رانيا وعلى بنتها . الجلالب فالشيبي نعام اسيدي بالتحتية مشبكة والطالون ازرق
بقات مها معجبة ورحبات بيها فالصراحة ودخلات فطرات معاهم وتغدات وتجمعو عادي بحال كاع الناس فاللخر ناضت وخلات بنتها لمها وقالت

- انا خدامة هاد نص نهار حتى لعشية ونجي 

الام : عندك شي ربعالاف ؟ جاي عمك ومرتو يتعشاو معانا 

جبداتها رانيا عطاتها ليها ومشات كنوصي على بنتها . 

جلسات فالبيرو بوحدها ما معاها حد وبقات تحسب وتعاود .. شوية دخلات عندها مرا وراجلها ويدات تشرح ليهم وتعاود والخلعة شاداها وهي بوحدها فالاخير ناضت عيطات للعساس طلعهم يوريهم الشونتيو .. يالاه بغات دخل للمكتب وهي توقف قدامها سيارة فاخرة ونزل منها السي بناني داير النضاضر و لابس دراعية فالزرق والبلغة والساعة فاليد والروايح كيعطعطو .. وقف بابتسامة سلم عليها باليد وقال 

- عيد مبارك سعيد ... باللي كتمناي 

خطفات يدها بسرعة وقالت : علينا وعليك السي بناني 

دخل كيسرح عينيه وهي موراها كتفتف ومشات جلسات بلاصتها نيشان بأدب ..تلفت وقال 

- بوحدك هنا ؟

رانيا: بوحدي .. حيت اللي معايا بعاد مشاو يعيدو مع عائلاتهم وجات فيا النوبة نخدم 

جلس قدامها على الكرسي ودار رجل على رجل 

رانيا: شخبار المدام والعزري 

محمد : الحمد لله ... البنية لاباس عليها 

رانيا : الحمد لله 

حيد النضاضر وبقا كيشوف فيها وقال 

- ولفتي شوية ...: كي جاتك الخدمة ؟ 

رانيا : الحمد الله شكرا بزااف... دابا نيت جاو شي ناس كيشوفو سيفطتهم يشوفو الديور 

ابتاسم وهز واحد الورقة وستيلو كيوريها وقال : هانتي شوفي .. الى بعتي ليهم عندك 10% ديال الربح ... يالاه اري ماعندك

حلات رانيا عينيها بابتسامة وقالت : شنوو؟

ضحك وقال : يالاه تحركي خدمي ... الى بعتي لهاد الناس عندك 10%ديال الربح 

رانيا : بدهشة : شحال هي عشرة فالمية؟

محمد : واشوفي نتي شنو غتبيعي ليهم .. بشحال ما بعتي عندك 10 فالمية 

ناضت وقفات بحماس وقالت : صافي واخا انا غادي نلحق عليهم بالزربة ونجي ..

محمد : سيري يالاه هاني هنا جالس 

مشات كتجري بالطالون قدامو هازة واحد الورقة وطلعات كتقلب عليهم فالديور حتى لقاتهم وبدات تخدم جمييع انواع التلحليح و الزواق وتشكر ليهم وتعاود وخرجاتهم من ديك الدار الصغيرة داتهم لوحدة كبيرة وبدات عليهم بالهضرة مصرة انها تبيع وربي كبير . وراتهم كولشي ورجعات معاهم للبيرو فين جالس السي بناني كيشوف الاوراق وبدات طير من هنا ومن لهيه وتجبد ليهم فالاوراق والعروض وهوا كيتفرج وكتحاول تقنعهم وضحك معاهم وترحب .. تسرح ليها اللسان وجلساتهم فالبيرو دايرة كل مافجهدها .. ناض هوا خرج كيهضر فتيليفون ورجع لقاها محنية كتعمر ليهم فالاوراق والضحكة كتبين ليها ضراس العقل بالفرحة . مامشاو حتى دفعو الطلب ووقعوه عاد خرجو وجلسات هي كضحك بوحدها وتكمل الاجرائات فالحاسوب . 

جلس فالكرسي قدامها وقال : ايوا شنو درتي ؟ 

شافت فيه بابتسامة وقالت : صافي غادي يمشيو غدا للبنكة يدفعو الضوسي ديال لكريدي ويسيفطوه لينا باش نتكاتبو ... راني سفطت كولشي للنوطير دابا يتكلف هوا 

محمد : الاللة ماعندي مانتسالك ... ايوا .. اشمن دار بعتي ليهم؟ 

قربات ليه الورقة كتوريه : هادي ديال 120 متر كاري .

هز حجبانو وقال : نهار مبارك هادا اللي بعتي لكبيرة فالديور اللي بقاو هنا .

رانيا : ههه شكرا 

محمد : نهار يتكاتبو غدوز ليك 10 فالمية ديالك (شاف فالساعة ) معاياش كتخرجي ؟

رانيا : صافي غنمشي بحالي دابا 

محمد : يالاه نوصلك 

رانيا: لالا بلاش غناخد طاكسي 

محمد : يالاه نوصلك بحال بحال 

بقات ساكتة حشمانة وحنات راسها وخرجات .. طرق العساس من وراها ومشات ركبات حدا السي بناني وهي مزيرة بالحشمة وكتقاد فجلايلها وديمارا السيارة طالق الطرب الاندلسي وهي كتشوف قدامها فصمت .. كسر داك الصمت وقال 

- شحال عندك من عام رانيا ؟

رانيا: دخلت ف 24 عام 

تعجب وقال : 24 !!! تباارك الله وعند بنية ! على شحال تزوجتي؟

رانيا: ايوا ... هادشي اللي عطا الله .. تزوجت صغيرة على 17 

محمد : 17 لعام !!! تباااارك الله ..17 لعام ... هي زواج الحب والمراهقة وداكشي ... ياك 

ضحكات بمجاملة : عقل الصغر وصافي 

بقا ساكت شحال وقال : راجلك...بغيت نقول طليقك مكيسولش فبنتو ؟ 

رانيا : واش اللي راجل بعقلو كيمشي يعيش حياتو ... ويسمح فبنتو ... ماعارفهاش واش واكلة ولا شاربة .. كاع مامسوق وعقلو باقي صغير باغي يلعب ويتفلا ماعندوش حس المسؤولية 

محمد : وخلاك تهزي المسؤولية بوحدك ... قلااال دابا اللي كيقدرو على المسؤولية وكتر الطلاق

تنهدات وقالت : اصلا لواحد ماخاصو يتزوج حتى يكون دا وجاب فالدنيا وكبر شوية عاد يتزوج ويكون قنع باغي يدير دارو ويستاقر ماشي يالاه حلي عينيه حلهم فالزواج .. بدا بالمسؤولية هي اللولة ودار الدراري عاد بغا يعيش الحياة ويجرب اللي عمرو ما جربو . 

ابتاسم وهوا كيشوف قدامو وقال : عندك الحق ... ولاكن حتى واحد مالقاها كي بغاها ..شد ماعطاك الله وصافي ... كاين مكيبغيش يدخل لدارو غير باش ميسمهش النكير وفريع الراس ... وكاينة المرا اللي كيحساب ليها دارت الراجل فكرشها ... حتى لمور الزواج عاد كتبدا تبين الحقيقة ديالها وكتبغي تسلط وتآمر 

رانيا: لالا بلعكس .. تقدر تكون كتبغي راجلها كتر من لقياس وصافي 

وقف فالسطوب داير يدو على الفولو وتلفت عندها وقال بسخرية

- واش المرا اللي كتعاود الصغيرة والكبيرة لدارهم ... وكتقول ليهم كيخاف مني .. وكتبين القوة ديالها زعما والحكام .. خواتاتها زايدين ليها فيه .. هادي مرا . 

رانيا: لالا مينكمش هادي مكايناش حتى وحدة ماتبغي طيح من راجلها بلعكس 

ضحك بسخرية وقال : هي نتي مزااال ماديتي ماجبتي فالدنيا .

رانيا: زعما كاينين؟

محمد: موجوودين .. كتبغي كلمتها هي اللي تمشي ... وخصوصا صحابات المناصب ... كطلع كراد وكتزادها التقة فالنفس ... (ضحك بسخرية ) واش العلاقة اللي كتكون بين المرا وراجلها كتمشي تعاودها وضحك بيها مع صحباتها وخواتاتها ... هادي مرا هادي اللي كتوصف داكشي خلينا ساكتين 

سكتات راينا وحشمات من الموضوع .. سكت حتى هوا وبقا كيشوف قدامو وقال 

- منين غندوز دابا ؟

رانيا: دور على ليمن ؟

محمد : ساكنة هنا ؟ 

رانيا: هنا فهاد الدار ..صافي وقف غير هنا شكرا السي بناني سمح ليا عدبتك

ابتاسم وقال : ماشي مشكل مرحبا 

رانيا : بسلامة عليك . 

مشات تالفة ونسات باللي خاصها تمشي عند مها للعشا صدقات راجعة للدار .. والزوينة نسات الصاك فالطموبيل ومشات حتى غبرات على الطموبيل عاد شدات طاكسي عند مها


واش ضاروري نعلم نتشاور باش نمشي لدارنا نشوفهم ؟ اجي نتا بعدا فين مشيتي وخليتيني تما جالسة على اعصابي انا اصلا مكنرتاحش فدراكم زدتي خلتيني تما بوحدي

محمد : مكترتاحيش فدارنا ؟ هادي هضرة دابا كتقال ماحشمتيش؟ 

اسماء : شوف اعاالي متبداش النكير ديالك عليا دابا الله يعطيك الستر... راشقة ليا مافيا اللي يسمع نكيرك لعيد هادا 

محمد : لعيد هادا ... خليتي فيها شي عيد دابا ... واخا خليك مع داركم بالصحة والراحة انا نيت مافيا اللي نتعصب 

قطع عليها ودخل للكوزينة كيدور بحال العادة وسط الخداما والحاجة مو اللي لابسة قفطان ومقطعة شعرها دايرا ليه ليميش ونضيضرات 

محمد : كاين ش عشا راه بغينا نعسو 

الحاجة : هاهوا اوليدي واجد بلاتي تجي اسماء

محمد : حطو لينا نتعشاو مكاين لا اسماء لا والو 

الحاجة : لاواه راه مشات طل على دارهم وترجع 

محمد : وا قلت ليك حطي لينا نتعشاو راه اسماء مجاياش

الحاجة : وا عيط ليها بعدا ماشي تجي تلقانا تعشينا وخليناها 

-محمد حطي لينا حطي راه قلت ليك اسماء مجاياش وغتبات فدارهم ... الصريؤة عامرة وباش تعاودها كاملة خصها الليل كامل

خرج من الكوزينة مشا جلس مع العائلة .. قولها وضحك عليها حتى سالاو لعشا وهز ولدو ناعس حطو فالطموبيل وداه للدار

واش ضاروري نعلم نتشاور باش نمشي لدارنا نشوفهم ؟ اجي نتا بعدا فين مشيتي وخليتيني تما جالسة على اعصابي انا اصلا مكنرتاحش فدراكم زدتي خلتيني تما بوحدي

محمد : مكترتاحيش فدارنا ؟ هادي هضرة دابا كتقال ماحشمتيش؟ 

اسماء : شوف اعاالي متبداش النكير ديالك عليا دابا الله يعطيك الستر... راشقة ليا مافيا اللي يسمع نكيرك لعيد هادا 

محمد : لعيد هادا ... خليتي فيها شي عيد دابا ... واخا خليك مع داركم بالصحة والراحة انا نيت مافيا اللي نتعصب 

قطع عليها ودخل للكوزينة كيدور بحال العادة وسط الخداما والحاجة مو اللي لابسة قفطان ومقطعة شعرها دايرا ليه ليميش ونضيضرات 

محمد : كاين ش عشا راه بغينا نعسو 

الحاجة : هاهوا اوليدي واجد بلاتي تجي اسماء

محمد : حطو لينا نتعشاو مكاين لا اسماء لا والو 

الحاجة : لاواه راه مشات طل على دارهم وترجع 

محمد : وا قلت ليك حطي لينا نتعشاو راه اسماء مجاياش

الحاجة : وا عيط ليها بعدا ماشي تجي تلقانا تعشينا وخليناها 

-محمد حطي لينا حطي راه قلت ليك اسماء مجاياش وغتبات فدارهم ... الصريؤة عامرة وباش تعاودها كاملة خصها الليل كامل

خرج من الكوزينة مشا جلس مع العائلة .. قولها وضحك عليها حتى سالاو لعشا وهز ولدو ناعس حطو فالطموبيل وداه للدار


طلعات فالطاكسي مشات لدارهم .. حتى نزلات عاد تفكرات الصاك وهي تحط يدها على جبهتها وقالت 

- اويلي نسيت الصاك فالطاكسي ... ويييلي الصاك مشا بتيليفون ولاكارط ناسيونال والسوارت ديال الدار وكولشي جامعو داك الصاك .. خسر المورال وطلع ليها الدم وكعات وطلعات للدار كتنكر وتشكي .. فين السوارت باش تحل باب الدار وشنو غادي دير . خرجات هي وباها لبوسط ديال الطاكسيات ديكلاراو ورجعات كتسمع فالراب الغربي من عند باها . فين كان عقلك ؟ مالكي حالة فمك ؟ واش مابغيتي تفيقي وتوكضي مال لعيالات موكضين ونتي منونخة 

تفقص باها وتفقصات هي ورجعات لدارهم باتت معاهم . 

* دخل لفيلا بلدية شاعلة بالاضواء على برا .. داخل وكيسمع صوت البز والهرج لداخل . وصل لوسط الفيلا كانت العائلة مجموعة كاملة كل طبقة فين مجموعة .. لقا السلام ومشا جلس حدا باه اللس لابس فوقية بيضاء وشعرو ابيض وكيتجمع مع خوتو و ولادو .. مشا عندو جود كيجري طلع عليه جلسو على حجرو وباسو فحناكو 

محمد : شكادير ؟ كاين شي بسالة ؟ كاين مضاربة ؟

ضحك جود وقال: لالا مادرتش بسالة 

محمد : شوف حالتك كي رجعات شنو كنتي كدير؟

جود : كنت فالزردة كلعب مع عيثة 

عنقو محمد وقال : فين ماماك ؟

جود: مساات عند ميمة 

محمد : فين مشات ؟ عند ميمة!

باسو فحنكو حطو حداه وناض خرج للجردة جبد تيليفون ربط الخط معصب

محمد: معامن تشاورتي ؟ خليتك مع العائلة وخرجتي بلا متعلمي 

اسماء:
 دازت الايام من مور العيد عادية .. شدات لينا العطلة وحال رانيا المادي تحسن .. تهنات من خلاص الدار والضو والماء كتفرقو هي و حسنا .. رجعات كتصرف فلوسها على راسها وعلى بنتها وبرداات لغدايد الحوايج اللي كانت مشتاقة ليهم .. شرات تسليفون جديد على سعدها ووعدها وخرجات الويكاند هي واسماء كيتساراو ويدورو 

حسنا : واش بغيتي تشري شي حوايج ؟

رانيا : اه باش نبقا نبدل كل نهار 

حسنا : وا بدلي الستيل شوية 

رانيا : وماعرفتش اشمن ستيل نشد ... انا كيحمقني البلدي اللي كيكون مستيلي 

حسنا : وغنبقاي تمشي بالبلدي للخدمة !! 

رانيا: وشنو نلبس حرت 

حسنا: زيدي غنديك راه ليماكازا دايرين الصولد نوريك .. راكي خدامة دابا بقاي تلبسي شوية ليشوميز كلاص وليطالون ولعبي بالالوان ... الزرق الاصفر الاحمر بدلي شوية ... لبسي كسيوات نتي عندك فورمة زوينة اللي لبستيها تجي معاك 

رانيا : وايالاه نشوفو شنو كاين 

لينا : ماما عييت هزيني 

رانيا: هانتي مشيتي شوية عيتي وانا معييتش؟ صافي مغنبقاش نخرجك معايا 

لينا: صافي صافي هاني ماعييتش 

رانيا: يالاه سكتي باش نشري ليك نونوس احمر . 

لينا : صافي هاني 

مشاو كيدورو ويقلبو ورانيا كتبدل وتقيس وفكل لبسة كتبان فشكل وكتبان مختالفة وكتعطيها اشراقة جديدة . شرات حتى هي اساسيات المكياج ورجعات للدار محملة بالحوايج وجلسات دارت اليوتوب وبدات تعلم دير المكياج وتجبد الآيلاينر ولينا كدور بيها بغات تسطا على المكياج 

رانيا: جلسي غتهرسي ليا العكر شارياه ب 100 درهم 

لينا : ندير شوية عفااكي

تنهدات رانيا وشداتها عكرات ليها وطلات ليها وجهها وقالت 

- يالاه تفرقي معايا شوية ... ناري الضرة صافي واطلبي شي حاجة اخرى 

لينا : مدات صبعها وهي مزوقة : شوية ديال هادا البريو 

غمضات رانيا عينيها والآيلاينر عوج واحد فالسما واحد فالارض وتنفسات الصعداء وبدات ترش ليها شوية على وجهها 

رانيا: شنو بغيتي نلسق ليك حتى شفار ؟ 

حركات لينا راسها بالنفي وناضت قدام المرايا ديال الماريو وبدا تعوج وطلق فشعرها وتهضر بوحدها وتبوزت بواحد الكولون وتيشورط ومشات للطالون الجديد ديال رانيا جبداتو ولبساتو وجلسات تجرجر فيه ورانيا مغمضة عين وحالة عين كتسطر طيبات عينيها تمسح وتعاود 

رانيا: حطي الصباط غاطيحي 

لينا : لا رد 

رانيا : غاتجي على فمك حطي الصباط 

لينا : لا رد 

رانيا: مكتسمعيش

درااف ... طاحت لينا جات على وجهها وهي تلفت رانيا وقالت 

يالاه نوضي جمعي الوقفة تبكي عليا نزل عليك بداك الصباط نيت .. من الصباح وانا نهضر ماخليتيني تظير حتى حاجة فخاطري 

ناضت لينا غضبات شوية فواحد القنت ورجعات مرة اخرى جبدات وتحد الكسوة جديدة لبساتها ديال مها ولبسات الصباط كبر منها وبدات تعوج قدام المرايا ورانيا دايرة سكوتش فجناب عينيها وتسطر

رانيا : وااااخا .. بلاااتي مرمديها مزيااان زيييدي مرمديها بلاتي نسالي ليك 

بقات هاكا حتى سمعتها قطعات الحس وتلفتات لقاتها ناعسة فالارض بديك الكسوة والصباط وناضت عندها هزاتها ومسحات ليها وجهها وغطاتها ورجعات لليوتوب كتنقل وتمسح وتعاود وتبع معاهم حتى تقناتو عاد نعسات . 

صباح جديد بحبة جديدة واخر صيحة لرانيا . مشات لبنكة طل واش دازت ليها 10% وهي تفاجأ فاش لقات باللي السي بناني دوزها ليها من حسابو الشخصي ماشي من حساب الشركة . ماقداتها فرحة ومشات كطير للخدمة وتقرب بالطالون ودخلات على حسنا 

رانيا : داااازت ليا 10 % دااازت .. دازت ليااااا هههه 

حسنا: ديالاش 10 % ؟

رانيا: علاش مافراسكش؟ بعت الدار 

حسنا : فراسي ولاكن قلتي ليا عشرة فالمية دازت ليك ! ديالاش؟


وعات رانيا وفهمات باللي مافراسهاش .. ويمكن مافراس حتى واحد بما ان السي بناني دوزها ليها من حسابو الشخصي . ...: ارتابكات رانيا وقالت بابتسامة خدخل وتخرج فالهضرة 

- ااه .. حيت ..الخدمة اللي كنت خدامة من قبل فيها .. كنت كنتسناهم يعطيوني تعويض وصافي دابا جاني التعويض 

حسنا : ااااه بصاااح ههههه مبرووووك هي غاديري لينا الزردة هاد الليلة 

رانيا: نديرهاااا هخهه ... اجي جا شي كليان ليوم ؟ 

حسنا : كيجيو يشوفو ويمشيو .. صافي عمار مغبقاش غيمشي لبلاصة اخرى لمكتب اخر الديور صافي تباعو بقاو شي ثلاتة صغار غنبقا غير ونتي ... ايوا شفتي هانتي عاد رجعات ليك الانوثة جاتك اللبسة طوووب 

رانيا: قتلللني الصباااط ... يا إما صباط والطموبيل يا إما البلا وطاكسي .. واصلا ماوصلت حتى كرهت حياتي .. منين مادزت الطموبيلات تابعيني والنكان وكلشي حاضيني تففو

حسنا: وا شري شي طموبيل صغيرة ولبسي اللي بغيتي ماشافك حد 

رانيا : بحماس ) ماكرهتش غنحماق ونشريها 

حسنا واشريها راه غير 4 تجيب ليك طموبيل فنة .. عندك بيرمي؟

رانيا: عندي البيرمي هادي قرن وزمار فااش تزوجت دوزتو انا وداك ولد الكلبة 

حسنا : ايوا شريها 

رانيا : وراني ناسيا على كولشي مابقيت عاقلة على والو 

حسنا : واتعلمي فيها حتى نتي كما كيديرو الناس 

جلسات حداها رانيا ودخلو لآفيطو بجوج كيقلبو ويشوفو النهار كامل وخرجو فلعشية ..حسنا مشات للدار ورانيا مشات عند بنتها اللي كتخلي مع مها .. جلسات كدير كاسكروط فالصالون وترمش وهي تقول 

- بابا .. بغيت نشري طموبيل 

حل باها عينيه بجوج وقال : طنوبيل!!! هي جامعة شي فلوس !

رانيا: شي شوية وصافي من ديك البركة ديال الحاجة 

الاب: شحاال جهدك كااع 

رانيا: 4 صافي .. نتعلم فيها اصلا نسيت على كولشي 

الاب: ياك الفلوس واجدين ..ماشي حتى نجيب الطموبيل وتقولي ليا معنديش

رانيا: واش حنا كنلعبو ابابا ... بغيت نشري طموبيل ياه !

الام: وشري بعدا الدار هي المهمة 

رانيا: دابا الطموبيل هي المهمة ... كنتعدب فالطاكسيات غادية جايا من عندك لعندي للخدمة ... الطموبيل دابا مهمة بزااف 

الاب: على بركة الله .. ارا نشووفو داك افيتو شنو فيه 

دخل باها كيقلي ويعيط لماليهم يسول وداير جهدو .. صبح الصباح خارج كيقلب ويدور على كاع الطموبيلات اللي شاف وكيعيط لرانيا فلخدمة وهي كل مرة تجاوب 

رانيا: الو بابا 

الاب: راه لقيت واخد i10 زويينة نقية ولاكن كيطلب فيها مولاها 6 

رانيا: لالا 6 بزااف 

الاب: ولاكن نقية 

رانيا: شوف الى بغا يهبط لديك 5 انا منفوتش فيها 5 

الاب: وابلاتي ونرد عليك 

قطع شوية وعاود عيط ليها 

رانيا: الو صافي تافقتو 

الاب: يالاه اجي شوفيها سربي راسك 

رانيا : بفرحة ) هانا جايا دابا (ناضت ) حسنااا انا نمشي نشوف واحد الطموبيل ونرجع بالخف.

دازت يوماين وحطات رانيا الطموبيل حدا باب الدار .. سيارة صغيرة ومجموعة بيضاء ديال البنات .. بالفرحة شداتها رانية دوشات ليها وحلقات ليها وطلعات وجابت ليها لينا كتنقز فتحات ليها الباب طبعاتها كتنقز 

لينا : ديالنا دياالنا ؟؟؟؟

رانيا : ديااالنا ونتي هههه عجباتك 

طلات عليها حسنا من السرجم : ايوا مبروووووك عليك بصحتك 

هزات رانيا عينها : الله يعطيك الصحة الزين 

حسنا : غزاااالة تبارك الله منين شريتيها 

طلات عليها لينا من السرجم وقالت كتعوج 

- ياه!! مينين شريتيها !! راه شريناها من عند رسييد 

حسنا : شكون!!

رانيا: ههههه رشيد مول الحانوت ديالنا اللي كنشريو من عندو كولشي 

حسنا : اااه اسوا صافي حتى انا غنمشي عند رشيد نشري وحدة بيضاء بحالكم 

جمعات لينا الضحكة وقالت : هااه!!! لااا ماتسريييهاش ... هوا صافي مابقاش عندو ليفواتيغ زوينين بثاو عندو غي لخايبين 

رانيا : واش نتي غتشريها خايبة اصاحبتي ياااه! ياك عندك ديالك صافي علاش تمشي عند رشيد .. يالاه ابنتي نطلعو بحالنا 

لينا : ونطلعوها معانا 

رانيا : لا غنخليوها هنا 

لينا : غيسرقوها! 

رانيا : لا ميسرقوهاش دايرة ليها زوااكة اللي قرب ليها غتبدا تغوت غير يالاه 

طبعو للدار ينعسو والليل كامل ولينا حاللة عينيعا فين ما تسمع شي طموبيل كتزوي كتنوض وتبدا تجر فرانيا .. واماما راع طموبيل كتغوت .. واماما راه غيسرقوها .. مانعسات ماشافتو حتى تلسقو عينيها .


صبحات لابسة حوايجها اللوينات كتفتح الشهية ... وقفات حدا الطموبيل وقالت لحسنا 

- يالاه شكو غيسوقها دابا ؟ انا كنركب كنبدا نقفقف غي بوحدي 

حسنا : انا غنسوقها ليوم وغنمشيو فيها باش فلعشية ندور معاك طلقي يدك شوية 

رانيا: راني بايتة كنحفظ فالكود ونراجع اللي كامل 

لينا : ميتة بالنعاس) ماما واش غنمشيو فالطموبيل؟

رانيا: اه غنمشي فيه عند ماما باش تبقاي معاها ونمشي انا للخدمة 

طلعو وبدات حسنا تسوق ولينا كتشوف فيها بنص عين وتنخز رانيا وتوشوش ليها فودنا 

لينا: علاش عطيتيها طنوبيلتنا؟ 

رانيا : كنتعلم الكبيدة باش نديك نساريك 

حطات لينا ومشات للخدمة وفاعشية دوزاتها دوران كتسوق وتسكت ليها ومقاتلة معاها وحسنا كتوريها وشي مرات كتفقص كتبغي تبكي .. شدات شوية من داكشي اللي وراتها رانيا ورجعات بحالها كطلق يدها مع باها اللي نهار ومطال وهوا واخدها كيدور بيها . 

داز اسبوع وصبحات لينا مريضة وجلسات معاها رانيا داك نص النهار ديال الصباح حتى فاتها الحال وجا باها هزهم بالطموبيل داتها لمها ونزلات لابسة دجين وصباطها الازرق العالي متلت من القدام وقميجة شيبية باردة وجامعة شعرها كوتشوفال وصاك ومكياج خفيف باؤد جات انيقة وجميلة وزادت جبدات رموشها السوداء وبقات كتشوف فالطموبيل ويدها على جنبها 

رانيا: شتي ليوم انا اللي غنسوقها واللي ليها ليها 

الاب: واش حماقيتي مزال ما طلقتي يدك مزيان 

_ .رانيا : تفقصت واش غنبقا هاكا !!

الام : بغيتي دخلي فشي واحد تقتليه 

رانيا: غنبقا غاديا غير بدوزيام حتى نوصل 

هزات مها يديها فوق راسها وباها طلب التسليم .. عيا يهضر فاللخر دارت اللي فراسها ، علقات جوج ديال ا90 اللور وعلقاتهم حتى فالسراجم بالجناب ومشات لاسقة مع الفولون كتسوق بشوية وتقفقف .. رونات حركة السير ووصلات حتى للرومبوان ودازت هي اللي بلا حق قبل كولشي ووقفات الوسط مخلوعة .. اما البوليسي بقا غير كيشير ليها ويقوليها سيري سيري كملي سيري غاا سيري .. شافها معلقة دوك تسعينات عرفها يالاه بادية وسلك معاها ومشات وصلات اخيرا من بعد ما ركبات الاغصاب والسكر لكاع اللي كانو موراها .. غادية بشوية والصف كيصوني وهي مامسوقاش اللي بغا يطير يطير المهم هي توصل . اخيرا وصلات للشارع اللي فيه المكتب ووقفات الطمويبل وسط الشانطي و حصلات تما ونزلات خلات كولشي كيكلاصوني وبدات تغوت 

رانيا : واش مكتشوفوش معلقة 90 ؟؟؟ بلاااتي نسطاسيووووني 

رجع وجهها حمر وبان ليها العساس واقف حاضي . وجا عندها بالزربة 

رانيا: فين حسنا؟ تجي تسطاسيوني ليا

العساس : مشات تغدا وانا ابنتي مكنعرفش 

دارت يدها على جنبها وبدلت تسوط ورجعات طلعات .. كاين اللي دار بجنابها ضوبلها وهي وسط الطريق ومشا وكاين اللي بقا حاصل كيتسنا تحرك .. كملاتها وجملاتها دورات الطموبيل باش تسطاسيوني وخلاها واقفة عرض فالوسط حتى اللي باغي يضوبل بقا حاصل وبدات تمشي وتجي بلاصتها ترجع خطو للور وخطوة لقدام كدوح فاللخر خرجات كتزفر بغات تبكي مارضاتش وهي تغوت للعساس

رانيا: دابا مال هاد الطموبيلات كيوقفو مزاحمين فين غندخل انا ؟

قال واحد الراجل فالسياارة موراها : وراه داااخلة غا سيري 

دارت رانيا راسها ماسمعاتوش وهوا يعاودها المرة الثانية وهي دور معبصة كتشالي بشعرها المجموع كوتشوفال 

- فين غندخل نطلع فوقها!!! افففففففف ياربي

دخلات عاوتاني للطموبيل وحيدات الصباط وبدات كدوح فبلاصتها وكل شوية تلبس الصباط تخرج وتعاود تحيدو فاش دخل حتى تحل عليها باب الطموبيل وهزات راسها لقات محمد واقف عليها كيضحك وقال 

- بلاتي بلاتي ههه .. بلاتي نزلي 

حمارو ودنيها مارضااتش ولبسات الصباط ونزلات سبقاتو حدا الطموبيل اللي حط فالجنب ومادارتش كاع تشوف واش دخلها ولا باقي


بقات كنسوط وتقاد جناب شعرها حتى نزل عندها كيضحك ضارب السبور .. سروال توني مجموع من لتحت كحل والسربديلة بيضاء ونضاضر ديال الشمس وكاسكيت وتيشورط كحلة . اسود قي اسود يسلب الانضار والمشية ياسلام .. عود وكيتمشا ، دارت عندو بابتسامة مجاملة وقالت

- شكرا 

مد ليها السوارت وقال بمزحة : مالك على ديك التسعين كاملة هازة لعروسة ؟ 

ضحكات وقالت : راه يالاه بديت هههه

محمد : بااينة يالاه بديتي .. مبروك الطموبيل

رانيا: الله يبارك فيك 

محمد : علاش ماقلتيش ليا باغا تشري طموبيل كن قلبت معاك على شي حاجة مزيانة 

رانيا: حتى هادي مزيانة وعلى قدي يالاه نتعلم فيها 

محمد : ايوا بالصحة 

كتضهر وتشوف فيه معارفاه فين كيشوف تحت النضاضر .. ابتاسمات وقالت 

-لمدام لاباس عليها ؟

قال بابتسامة باردة : فين ما نتلاقا بيك تسولني لمدام واش لاباس عليها .. مكايناش شي لاباس عليك ليا 

ضحكات وقالت : ايوا من باب الصواب وصافي 

محمد : من باب الصواب ... واخا الاللة رانية ... البنية مزيانة ؟ 

رانيا: الحمد لله .. مرضات ليا هاظ الصباح وبقيت معاها ماقدرتش نجي للخدمة عاد جيت 

محمد : ميكون باس عندها ... ياكما عيانة بزاف ؟ 

رانيا: شوية .. كطلع ليها السخانة بعد المرات ... عادي الوليدات هما هادو 

محمد : الله يجيب الشيفة ... انا كنت دايز من هنا وصافي بنتي ليا حاصلة ... (شاف فااساعة ) معاياش كتسالي؟

رانيا: عند واحد الساعتاين ونخرج 

محمد : تسنايني حتى نرجع غنعطيك شي حاجة ديالك 

استغربات رانيا وقالت: شنو هي ؟

محمد: شي حاجة ديالك حتى للعشية و تعرفيها . يالاه نهارك مبروك 

مشا خلاها كتفكر شنو هي هاظ الحاجة ؟ دخلات جلسات وعاودات تحشيمتها لحسنا من اللول حتى للخر فاش رجعات 

حسنا: هيييه!!! اويلي السي بناني جا لهنا ! 

رانيا: كان غير دايز مع الطريق لقاني واقفة فالشارع ديال با محرماها على كولشي و دخل ليا الطموبيل ومشا .. حشممممت تمنيت كن تشاق الارض وندخل فيها 

حسنا: ماغوتش عليك؟

رانيا: لا بلعكس ماغوتش .. صافي مشا بحالو ... عييت نقلب عليك حرام واش بغيتي تباني تعتقيني 

حسنا : ونتي مسطية جايا بوحدك كوراه قربلتيها فطريق 

رانيا: قريلتها بالضوبل هههه

حسنا: كتغاامري الصكعة ... اااه حقا المكتب غيتسد 

رانيا: علاش؟ ..حسنا : صافي سالينا البيع بقاو غير شي حوانت هادشي اللي قالو لينا .. غيرجع عمار وحنا غنتحولو . 

رانيا : فين ؟ 

*** الكونطابل : وحدة فيكم غتمشي لمراكش دابا يا نتي يا نتي يالاه تافقو 

رانيا : اويييلي على مراكش!! سيري نتي احسنا انا ماعندي كي ندير

الكونطابل : لخرى غتمشي لطنجة 

رانيا: صافي نمشي انا لمراكش .. بعدا بعدا الجو تما زوين يوافق بنتي 

حسنا :ةشنة غاديري مع الرهين ؟ 

حنات رانيا راسها على البيرو وقالت : مشكييلة هادي منين خرج لينا هاظ السفر فهاد الوقت 

الكونطابل : هادي هي الخدمات البنات ... البيع هنا صافي سالا ... طنجة بدا فيها مشروع سياحي ديال الديور حدا البحر باقييتن فالبلان .. غيتباعو فالبلان ... ومراكش راه صونطر كوميرسيال كيتبنا والخدمة تما كثيرة خاص واحد يعاون 

رانيا : صافي نمشي انا ... واخا ماعندي كي ندير فالرهين . 

** رقية : ياااشوفي ابنتي .. راه لكونطرا ديال الرهين بااقا فيها ربع شهووور عااااد طلبي فلوسك ... العام باقي مدار 

رانيا: ونخويها انا ونخليها خاوية مامستافدة والو ارقية 

هزات رقية يديديها وهي جالسة وسط دارها : ماعندي ماندير ليك ... فلوسك ماواجدينش ابنييتي .. حتى لربع شهور و نضبر ليك في ستة ديالك 

رانيا : بجدية ) على هاد الحساب ارقية غادي نكريها بلاصتس لشي واحد ونستافد منها بعدا ماشي راهنة ونخلص 600 درهم فالشهر وانا مساكناش 

رقية: ها صاحبتك جالسة فيها وكتخلص

حسنا حتا انا غادية لطنجة 

رقية : ايوا ماعندي ماندير ليكم


فآخر المطاف خواو الدار بزوج ولاكن حلفات رانيا لا حط فيها شي واحد رجليه وفراشها غيبقا تما . هبطو للدار هي وحسنا كيهضرو وناضت فالاخير ركبات فالطموبيل وحسنا كضرب فخادها 

حسنا : اوييلي عاوتاني عتسوقيها بوحدك 

رانيا: ماشي شغلي الى مدرتش هاكا منتعلمش واصلا دارنت غير قريبة راه كنهبط ليها على رجلي 

مشات لدارهم مقاتلة فالطريق خبرات واليديها وعطاتهم السوارت الضوبل ديال الدار
ورجعات بحالها بدات تستاعد للسفر . حطات كولشي فلكوفر وسدات عليه وطلعات بنتها لور وركبات هي لقدام حدا باها وشدو الطريق مباشرة لمراكش . 

الله يا مراااكش الحمراء ... يا سبعة رجال ... هبطات الزاج ضربها هواء مراكش وتنهدات مغمضة عينيها والريح كيضرب وجهها .. تكات بابتسامة كتأمل البني الحمر والنخر المصاف على الطريق .. المطار شي داخل وشي خارج والصهد كيدوب العضام . اول حاجة دارتها مشات مباشرة لعنوان المكتب ووقفات بعيد بان ليها البيرو عامر فيه 5 ديال المكاتب فكراج كبير على الشانطي ورجعات ركبات حدا باها ومشاو كيقلبو على شي سكنة قريبة من الخدمة . نهار كامل ديال التقلاب لقا ليها السمسار دار مع واحد المرا باغا اللي يسكن معاها ويخلص ليها الكرا . وحتى هي صالحة ليها حيت مفرشة مغتشري فراش ما تشري ماعن غير دخل وتسكن . 

داكشي اللي دارت . دخلات للدار اللي بحال الرياض لاكن قديمة مافيها لا اصلاح لا والو . محسوبة على الرياض حيت كبيرة وفيها وسعة كبيرة معرية الوسط عامرة بالشجر والماء المتدفق من النافورة . خدات بيت صغير مرتب حطات فيه حوايجها وخرجات مع باها للشارع باش يرجع بحال فالتران وبقات ليها الطموبيل هي . 

سرررر سررر...سررررسررر. 

هزات تيليفون كتمسح شعرها لابسة بينوار ديال الحمام وفتحات الخط 

رانيا: الو ماما ... وصل؟ ايوا على سلامتو ... صافي مزيان الحمد لله .... لالا ماما منقدرش نخليها معاك مغنرتاحش وحتى هي مولفاني متقدرش تفرق عليا ... مرا مرا سيري طلي على الدار عنداك تكون رقية كراتها لشي واحد راني مخلصة ليها كولشي و ماساكناش فيها ... وا عنداك ... يالاه بسلامة عليك 

قطعات و نزلات شادة فبنتها كتكتاشف المكان لقات مزلات الدار جالسة كتشرب اتاي بوحدها وجلسات حداها بابتسامة 

رانيا: السلام عليكم لاللة حادة

لالة حادة : اوعاليكم السلام ... نكب ليك ابنيتي شي كاس داتاي ؟

رانيا: واخا الاللة حادة 

لاللة حادة : ايوا بنيتي .. هادي بنتك ؟
رانيا : اه بنتي لينا . تشربي اتاي اماما؟

حركات لينا راسها وهي كتخشا فمها وشدات الكاس حشمانة كتشرب وتسوط عليه 

قالت لاللة حادة لكبيرة فلعمر وصمراء البشرة مراكشية ابا عن جد 

- فين راجلك ... ماجاش معاك؟

رانيا: لا ماجاش ... ساكنة بوحدك هنا الاللة حادة ؟

لاللة حادة : بوووحديتي .. بنية وحدة اللي عندجي عتيطها ومشاط مع راجلها للخاريج .. الله يصلح ليك لبنية 

ابتاسمات رانيا وقالت : امين الاللة حادة ... لينا بغيني تلعبي؟ نوضي لعبي

ناضت لينا كتلعب ودور قدامها ومشات لاللة حادة للسطح وبقات رانيا جالسة دايرة يدها على خدها وساهية كتخمم وتشووف فبنتها .. زعما تكبر وتسمح فيها وتمشي عند باها ؟ تنسا زعما التعب اللي كضرب عليها دابا ... يجي شي نهار وتقلب عليها بنتها ... اكيد غتسطا الى وقع هادشي وهي علامن كتخدم وضرب تمارة ... علامن كتشقا ... كولشي على قبلها باش ماتبقاش تحس بالنقص .. وتعيش بحالها بحال كاع لوليدات .. تنهدات رانيا وكتشوف فبنتها الصغيرة اللي كتبقا فيها حيت ماشي بحالها بحال باقي الاطفال . عندها نقص والنقص كتحاول تعوضو ليها رانيا بأي طريقة .. والحمد لله اللي رزقها بهاد الخدمة جاتها فالوقت المناسب وهزاتها هي وبنتها ، و إلا راه كانت غادي تكرفس تكرفيس ديال بص لا هي لا بنتها . 

صباح جديد فاقت رانيا مع النبوري مشات شرات لبنتها لفطور وطلعاتو للدار .. لحسن الحظ ان مولات الدار دايرة فنفس البيت طواليط معزولة باش ميشركوش معاها الكراايا طواليطها . لبسات رانيا حوايجها عبارة على كسوة حد الركبة صفراء فيها الوريدات فالغوز ولبسات معاها صندالة وصبغات دفارها دفرات شعرها مع شوية ديال المكياج . يحلف عليها الواحد عمرها تزوجات


هزات صاك صغير وفيقات بنتها قبل ماتمشي وجلسات كتوصيها 

رانيا: هانتي اماما ... انا غادية للخدمة ... ها الفطور ديالك فطري وخليه بلاصتو ... ونعسي الى بغيتي تنعسي .. ولا خودي الاوراق اللي شريت ليك لعبي فيهم ... انا شوية ونرجع ليك صافي .

لينا : نمشيي معاااك اماما 

رانيا: انا غادية للخدمة ... صبري غير ليوم نشوف ديك الخدمة كيدايرة بعدا . صافي ابنتي ... يالاه نوضي ديري كاكا باش نغسل 

نوضاتها للطواليط قضات حاجتها و غسلات ليها ورداتها للفراش 

رانيا: نعسي بااقي الحال . . فاش تفيقي ها لعاصير فوق الطبيبة وكيكة ... فطري ورجعي نعسي ولا رسمي فالوراق يالاه هانا مشيت الله يرضي عليك ابنتي عاونيني شوية .. ماعندي كي ندير فاش نجي نجيب ليك شي حاجة زوينة 

لينا : بدلع )جيبي ليا معاك شي حاجة 

رانيا: وااخا نجيبو ماشي مشكل ابنتي يالاه ماديريش بسالة الله يرضي 

باستها وناضت سدات الماريوات بالسوارت وبعدات عليها اي حاجة خطار وحطات ليها تيليفون حداها 

رانيا: ياك وريتك كفاش تصوني عليا 

حركات لينا راسها بالايجاب

رانيا: صوني عليا نشوف 

شدات لينا تيليفون وصونات عليها 

رانيا : مزيييان ... يالاه هاني مشيت الكبيدة . يا لحبيييبة ديالي راه كولشي على قبلك اما انا مابقيتش كاع مسوقة راسي .. رجعي تنعسي ابنتي يالاه نعسي باقي لحال حتى تفيقي وفطري 

رداتها فالنعاس وخرجات طرقات عليها بالسوارت ومشات للخدمة كتجري .. فالطاكسي صغير . 

دخلات للبيرو حشمانة لقات السلام و استقبلها شاب كان قدها فالطول تقريبا وضعيف وداير واحد الكويديمة خفييفة وراها البيرو وجلسات بدلت خدمتها .. من الساعة اللي جلسات فيها وهي مبرزطة مع مول الكادومة اللي غير خاضيها كيفرنس .. ماقدرات تحك نيفها فخاطرها .. ماقدرات تفوه وتحل فمها . بدات غير كتسوط معصبة حتى وصل وثت الغدا وناضت بالزربة بفات تخرج 

- انسة رانيا .

تلفتات لقات مول الكادومة : نعام السي خالد ؟ 

السي خالد : يالاه تمشي تغداي معانا كنتغداو فالريسطو قريبة من هنا 

رانيا: لالا شكرا غنتغدا مع بنتي 

جمع الضحكة بسرعة وقال باستغراب وابتسامة اخرى

- بنتك ! عندك بنية !! تبارك الله عليك الاللة مابايناش فيك 

شافت فيه شوفة ناقصة حسات بيه بحال الى بغا يدخلها شي دخلة صحيحة تحت ما يسما زميلته في العمل . لاكن بسرعة حداتها ليه وقالت بجدية 

- الله يعاود السي خالد 

مشات وخلاتو واقف مصدوم متبع ليها العين . شدات طاكسي كطير للدار وطلعات بالجرا فالدروج ودخلات قلبها غيسكت بالخلعة وهي توقف فبلاصتها كترد النفس . لقات بنتها مزالة ناعسة والبلاطو حداها .. شربات العصير وكلات وطاحت على لاتروسة ديال المكياج اللي نسات رانيا و شتتاتها وزوقات وجهها ورجعات تنعس . 

ضحكات رانيا وجمعات الروينة وجلشات حداها فيقاتها 

رانيا: نوضي شوفي شنو جبت ليك ... يالاه نوضي 

ناضت لينا كتكسل حالتها بالمكياج ، حلات ليها رانيا الكارطونة فيها كفيتة مشوية وفريت ولاصوص 

رانيا: هاني جبت ليك كفيييتة يالاه نوضي نتغداو بجوج 

جلساتها تغدات معاها وناضت زربات على الروينة بالخف وهزات صاكها 

لينا : عااود غتمشي ونبقا بووحديي هننهنننهنن

رانيا: باش نجيب ليك فلعشية عاوتاني شي حاجة اخرى زوينة ... يالاه جلسي .. هانا غنخلي ليك المكياج كاع ديري بيه اللي بغيتي ... وفلعشية نشري ليك واحد المونيكة عكري ليها حتى هي . يالاه جلسي وصوني عليا الى بغيتي شي حاجة 

خرجات للخدمة وسدات عليها . مشات كطير معطلة لقاتهم كاملين جالسين وجلسات كتسوط بابتسامة .
- ههه تعطلت


وسط الفيلا جالسة اسماء دايرة رجل على رجل كتجمع فالتيليفون والخدامة غادية جايا 

اسماء : ويلي تعطلتو فينكم ... الصالون عمر البنات بقيتو غير نتوما ... وياك الاللة النوبة فيا ... انا واااجدة غير سربيو راسكم ... يالاع بيزو 

قطعات وناضت وسط اصوات الموسيقى الشعبية كتجر فقفطانها وتقرقب دخلات للصالون فين مجموعين صحاباتها كاملين و وسط منهم راجل لابس قفطان وداير الحلقات والمكياج وكيشطح ويدردك فوق الطبلة .. الحلاوي كتفرق والنشاط والشطيح والرديح وجلسات معاهم دارت رجل على رجل كضحك . 

فالجردة جهة الباب واقفة بنت بققطان قصير فوق الركبة كتهضر فالتيليفون .. شافت سيارة دفع رباعي دخلات مع الباب كتبومبا وتلفتات بابتسامة حتى نزل عاقد حجبانو وطير النضاضر من عينيه بسرعة وتم طالع لابس قميجة وسروال التوب .. يالاع بغا يدخل وهي تمد ليه الفتاة الحسناء يدها وقالت بدلع وابتسامة ودهشة من شوفتو

- عااالي!! صافا عليييك غبووورات هاادي شحااال ماشفناااك 

سلم عليها بيدو حشم يخليها بلاكا وحرك راسو وقال " الحمد لله " ودخل تصادف مع الخدامة جايا كتجري لابسة كولشي ابيض وهازة الصينية 

عالي: شوااقع هنا شهادشي عندي فداري ؟ 

الخدامة كانت مرا كبيرة شوية فالسن قالت بابتسامة كتهدئ الوضع 

- غير حفيلة وصافي محموعين فيها العيالات 

محمد : عيطي ليا على اسماء دابا 

مشا طالع ليه الدم طلع لفوق ومشات الخدامة كتجري عند اسماء وتحنات عندها كتوشوش ليها فودنها . ناضت اسماء ودارت ابتسامة لصحتباتها وطلعات لفوق عندو للبيرو كتقرقب .. دخلات طالع ليها الدم وسدات الباب وراها 

.- اش هادشي واش منفرحوووش حنا فهاد الدار 

تلفت وطفا الكارو اللي كان فيدو وقال بعصبية

- عرس ؟ سبووع ؟، شنو عندنا باش دايرة هاد الصدع كامل ؟ معاامن تشاورتي اصلا

اسماء : ماشي ضااروري يكون عرس ولا شي حاجة باش حنا نفرحو ... وديما انا كنمشي نحضر مع البنات فديورهم ودابا جات نوبتي حتى انا ندير حفلة فالدار 

تنهد مغمض عينيه وقال : علاااش مكااتشااوريييش ... علااش ؟ علاش ندخل انا لدراي ونلقا فيها هاد الروينة على غفلة ... واش هاد الدار ماعندها راجل كديري اللي قال ليك راسك ولا شنو ؟

اسماء: وصافي ا عاالي نعل الشيطان اش فيها الى فرحنا مرة فشحاال 

محمد : ولاكن علمي. على الاقل تشاااوري ماشي نجي تعرض ليا وحدة باغا طيح بالشيكي فالباب ونلقا وانا مافراسي ميتعاود 

اسماء : عااادي هادشي .. مالنا اش درنا.... نتا اللي معقد مابغيتيش تفهم ليا 

هز حاجبو وقال : انا معقد دابا؟ كنقول ليك تشاوري نعرف شنو كيوقع فداري رجعت معقد 

قربات منو كتبرد وقالت : وصافي دابا متشدش فالهضرة ... سير ضرب ضورة ورجع الى بغيتيش تبقا هنا ... ونتا اصلا ليوم جيتي بكري علاش ماعيطتيش ليا فاش كنتي راجع 

محمد : بسخرية ) واخا المرة جايا نعلمك قبل منجي ... فين هوا جود 

بلعات ريقها وقالت : نااعس فبيتو مع ماما 

صغر عينيه فيها وقال : هادي قت النعاس! الربعة دلعشية وناعس! 

اسماء : راه بقا كيلعب حتى عيا ونعس وحسن نعس باش مانبقاش انا حاضياه بهدا راصا

هز حاجبو وقال : لا ... خوودي راحتك ... بلاصت ما تخرجيه يشوف الناس جيبيهم ليه للدار نتي 

اسماء : وشنو ندير راه بزااف عليا .. ها الخدمة هاا التربية ديال الولد واش نتا متحملش المسؤولية شوية عييت انا اااو بزااف بغيت نبدل الجو والمورال

محمد : شنو بغيتي نديه معايا للشركة باش تلقاي الحرية ديالك ؟ الولد محتااج مووو واش ماباغاش تفهمي ... محتاج مو ماشي مك نتي ... والمسؤولية ديال بصح ماشي هي اللي هازة نتي .. اللي هازين المسؤولية راه ماعندهمش الوقت يديرو هادشي اللي نتي دايرة ... ومع ذلك مسامحينش فولادهم وكيدمرو بالليل وبالنهار باش ولادهم ميحسوش بالنقص... اشمن مسؤولية كتهضري عليها ... هاا؟ جااوبي اشمن مسؤولية ... ولدك عندو كوولشي وديماش كيشكي فين ماما فين ماما ... ديما لايحاه وغادية 

خرج مشا لبيت ولدو لقاه ناعس بوحدو وجلس حداه دوز يدو غلى شعرو .. شوية دخلتت الحاجة مها بقفطان خفيف لقاتو تما وسلمات 

الخاجة : محمد علي .. لاباس اولدي

محمد : الحاجة لاباس 
الحاجة : غير خليه ينعس راه شبع لعب .. حرك راسو بالايجاب وخرجات الحاجة لبرا تلاقات مع اسماء لتحت وجراتها على انفراد 

الحاجة: ... المسخوطة راه جا محمد لقا جود ناعس واش غيفيق؟

اس: لا غير خليه .

الح : غادي ديري راسك المشاكل المسخوطة 

اس: ياك عطيتيه غير معلقة وحدة

الح: وحدة وصغييرة 

اس: صافي خليه كن ماعطيناهش دوا النعاس مغيرصاش من البسالة .


محمد : جووود ... جوود فيق ابابا نخرجو .. فيق يالاه .. جود 

هزو ناعس كيفيق فيه وجود كيحل عينيه ويسدهم بزز 

محمد : يالاه نوض نخرجو يالاه براكة من النعاس 

هزو للدوش غسل ليه وجهه وفيقو بزز دايخ و لبس ليه حوايجو وهزو خرجو من الفيلا طالع ليه الدم ركبو للور . دوزو على ماكدو شرا ليك كلاص وداه كيدور بيه وجلسو معاه فالقهوة تفرجو فالماتش حتى طاح الضلام وداز لدار مو جلس معاها وخلا ولدو كيلعب فالجردة وهوا مع باه كيتجمع فالصالون حتى عيا بلجلاس ورجع بحال لقا الجو شاخد . جود حدو دخل مشا كيجري وسط الناس باغي يلعب وجراتو اسماء .. هزات راسها لقات محمد واقف قدامها 

اسماء : طلعو معاك عفاك غيشوهني قدام الناس 

محمد : فررقي عليا هاد المجمع باغي نرتاح ... جاي
منسمعش حس الموسيقا هانا علمتك 

- رجعات رانيا بحالهافطاكسي ، يالاه نزلات شاقت واحد الشمكار حاضيها وكيشوف فيها ؟ حنات راسها وزادت ولقاتو تابعها كيبسبس عليها حتى وصلات للدار وزدحاتها ليه على وجهه ، طلعات لبيتها كتجري وحلات الباب لقات بنتها واقفة قدام المرايا كتهضر بوحدها ضاربة الماكياج وجارا ليزار مغلفة فيه كتجرو من قنت لقنت وتجمع مع المخاد اللي مستفة قدامها . طارت عليها رانيا عضاتها من حنكها وهزاتها كتبوس فيها بغات تاكلها 

رانيا: ناكلك انا ... ناكلك كاااملة 

لينا : اييي هههههه ... ايييي خنخخخخخههههخ

رانيا: يالاه نخرجك الزين ديالي .. خليتك بوحدك ابنتي سمحي ليا (باستها ) يالاه نخرجو ندورو ونشري ليك مونيكة اللي بغيتي 

لبساتها وخرجات .. وصلات للدرب لقات الشمكار واقف .. غير شافها تبعها .. هي غادية وهوا موراها باغي يتصاحب قاليك ماتفكات منو حتى عنقاتها طاكسي هزاتها . وصلات للمدينة كدور شادة فبنتها ودوزاتها شرات ليها مونيكة وعطاتها ليها تهزها فرحانة بيها ساعة طيروها ليهت فالزحام وسط جامع لفنا .. جلسات تعشا هي وبنتها دارت هاكا مالقاتش المونيكة وهي تخرج عينيها 

رانيا: اوييلي فيت مونيكة ؟؟

لينا : داها !! 

رانيا : اوييلي شكون داها ؟؟

لينا : ماعلفتش!

رانيا : ماعرفتييهش كفاش داها ليك ؟

لينا : ماعلفتش ! كك ككنت ..ساداها بحال هاكا ومشات !!

رانيا : وييلي على مشات ... مونيكة كتمشي (دارت يدها على حنكها) ويلي على المونيكة داوها شاريينها ب 140 درهم !!! 

لينا : سري ليا وحدا خرى 

تنهدات رانيا وقالت : واخا يالاه نتعشاو بعدا ويحن الله 

تحط ليهم العشا يالاه قالت بسم الله جلس واحد الغليض وقفها ليها 

- الزين بالصحة والراحة .. الجمال منور 

تنهدات بعصبية كتعشى

الشخص: متعرضيش علينا .. ولا نعرض عليك انا يستاهل الزين 

ماخلاهاش تاكل فخاطرها لاسق لسقة وكيخشي وجههو بقا ليه شوية يدخل فيها .. مسحات يديها وسالات العشا وناضت بغات تخلص وسبقها الشخص يالاه بغايخلص وهي دور فيه خرجات فيه عينيها 

رانيا: واش كتعرفني باش تخلص عليا ؟ واش بنت ليك كنطلب انا هنايا جمع عليا اسيدي فلوسك ماشكيتش عليك 

خلصات وزادت وتبعها كيتبسل وهي كدور معصبة .. باش تفك منو دخلات لواحد لحانوت ديال الصبابط بدلت تقيس وتعاود حتى عيات وخرجات مشات شرات منيكة اهرى على سعدها ووعدها ورجعات فطاكسي للدار لقات الشمكار واقف حدو شافها تبعها مرة اخرى حتى للدار


نهار جديد . ناض الصباح بالبيجامة ديال النعاس كيدور فالدار والفوطة على كتافو .. هز كارو كماه فالجردة ورجع لبيتو .. هز تيلي لقاه طافي وبدا يقلب على الشارجور فالبيت . فتح واحد المجر حداه كيقلب وهوا يطيح على قرعة صغيرة ديال السيرو مكتوب عليها ديال الاطفال.. تزنك وبدا يصفار ويخضار وهز راسو كيشوف فيه مصدوم وفنفس الوقت خرجات اسماء من الدريسينغ لابسة حوايجها 

اسماء: انا غادية للخدمة وصل معاك جود عند ماماك حتى للعشية وندوز عليه نجيبو.

تلفت كيسوط وقرب منها مصدوم 
- شهادشي؟ شكايدير هادشي فداري؟

اسماء : دارك دارك دارك مالك كل مرة داري داري ... اش كاين 

هز ليها القرعة قدام وجهها وقال بصراخ: شهااادشي هادا شكايدير عندي هنااا

اسماء: ديالي كنشربو فاش مكيبغيش يجيني النعاس

محمد : ديااالك ؟؟؟ اااخر مرة نسولك ... اش هااادشي هادا وشنو كيدييير هناااا هضرييي

اسماء: بتوثر) ديالي راه ديالي 

بعد اللور بخطوة وقال : هادشي اللي باغي نعرف .. كتقفقفي وكتكدبي عليا وسط وجهي .. وانا كنقول مال الولد كينعس بلا وقت (جمع النفس) شوفي مغنزيدش معاك الهضرة ... غتهزي حوايجك من هنا ومنعاودش نشوفك تحركي 

حلات عينيها وقالت: كتجري عليا !!! لا واش كتجري عليا بصحح! 

محمد : بصرامة مخرج عينيه ) غتحرركي دااابا ... ولا غادي نهز هاد الدواء وندير بيك شكاية لجمعية حقوق الطفل... نشوف هاد الطبيبة هادي اللي كتعطي لولدها السيرو دنعاس باش تقصر ليا مع صاحابها .. يالاه تحركي . 

* نهار جديد عند رانيا .. نفس الروتين كيتعاود .. ولفات زملاءها فالعمل الا السي خالد الوحيد اللي مكتحملوش وكيدايقوها نضراتو ليها فالخدمة . 

خرجات فوقت الغدا تغدا وبقات سميرة كتجمع مع الدراري دالخدمة هضرة تجيب هضرة حتى قالت

- الوقت صعيبة ... 

حميد: ماشي مرة ماشي جوج كنقول لرانيا راكي كتمشي وكتعطلي ... ماعرفتش شنو غندير معاه 

سميرة : راه مسكينة عاوداات ليا ... راه عندها البنية ومطلقة و ماعندها لمن تخليها . كتجي للخدمة وتخليها بوحديتها 

حميد : اواااه رانيا مطلقة !!!

خالد: وااايلي !! شكون يطلق بحال هاديك والبنت عاد من لفوق 

سميرة : ايوا هادشي اللي عطا الله .. الله يكون فالعوان 

رجعات رانيا للخدمة ولقات استقبال اخر من عند حميد و خالد كل مرة ينوض عندها واحد داير السبة بشي ورقة باش يجبد معاها الهضرة وهي كتفادا الضسارة حتى قربات تخرج وهوا يوقف عليها خالد 

- رانيا يالاه نوصلك معايا 

رانيا: لالا غنشد طاكسي شكرا 

خالد : وعلاش غتشدي طاكسي انا نوصلك .. نديرو شي قهيوة ونجلسو نتجمعو شوية 

رانيا : لالا شكرا ماعنديش الوقت الله يعاون 

مشات وخلاتو واقف .. ووقفات كتسنا طاكسي وهوا يوقف عليها حميد بالطموبيل 

- رانيا ... كتسناي طاكسي؟

رانيا: ااه 

حميد: يالاه نوصلك مشا بحال غيوقف عليك شي وواحد 

رانيا: لالا بلاش راه كاينين طاكسيات

حميد : واغير يالاه اش فيها 

بقات ساكتة ودارت ابتسامة وركبات معاه . مللس ركبات وهوا كيهضر مابغاش يسكت حتى وصلا للحومة ديالها 

حميد: ساكنة هنا 

رانيا: اه هنا وعندي طموبيلتي غير كنخاف من السوكان هنا وصافي شكرا (حلات الباب)

حميد: مرحبا الله اودي . ايلا كنتي مساليا ندوز عليك بالليل نخرجو نمشيو لشي بلاصة نشطو شوية شبان ليك 

جمعات الضحكة ونزلات : ايه نشاء الله الله يعاون 

سدات الباب وتمات داخلة للدرب .. قشعها الشمكار فاش نزلات وهوا يقنتها مع الحيط حتى بغا يسكت ليها القلب بالخلعة 

الش: تتهزي البلايص وحنا دافعاه علينا كبير الزين


تحيدها الطالون الزرق من رجلها بالخلعة ووقفات رجل لابسة الطالون رجل لا ومعنقة الصاك كترعد وقالت

- خدام معايا والله حتى خدام معايا ووصلني ها نتا اخويا راه جايا من الخدمة عرقانة 

الشمكار: عرقان بال**** ابنت **** جايبك الشيفور عامرة فلوس .. 

رانيا : والله ماعندي الريال اخويا 20 درهم ديال الطاكسي هاهيا الى بغيتيها خودها 

الش: 20 درهم تاع الطاكسي.. وازيدي معايا نتي نهضر معاك باغي نكول ليك شي حاجة 

بدات ترعد من لداخل وهي تقول : شوف .. صافي انا عرفتك شنو باغي .. هانتا ... انا نطلع غير للدار نطل على مي تشوفني وصلت بعدا ونطرف حالتي ونرجع صافي 

الش: والى مارجعتيش

رانيا : وانا غا حداك ساكنة فين غنمشي نطير من السطوحة 

الش: واخا يالاه سيري انا هنا تا نتسنا 

رانيا: تسناني عنداك تحرك من هنا 

اش: منهنا ما محرك ختى تجي

تكا على الحيط بواحد الرجل وجيد جوان شعلو . طلعات دخلات رانيا للدار هازة الفردة لخرى فيديها كتشطح بالخلعة ودخلات لبيتها سدات عليها وبدات كتبكي وتمسح وجهها من المكياج وبنتها كدور بيها 

لينا: ماما نخرجو .. غنخرجو ؟ 

رانيا: حتى نجي تسنايني هنا انا غنهبط لتحت بالزربة ونرجع.


حيدات حوايجها ولبسات جلابة ودارت اللثام وخرجات طلات من باب الدار بان ليها وااقف كيتحشش بواحد الجوان و واقف معاه واحد كيشري من عندو الحشيش .. بان ليها ملهي وهي تكفض جلايلها وقلبات الطريق للجهة الاخرى كطير وتجري خلفة هنا خلفة لهيه بالصندالة كبر منها حتى وصلات للبوسط ديال البوليس وحيدات اللثام وطاحت ليهم فالباب كتبكي باغا تسخف وتغوت 

- عتقوووني بغا يتعدااا عليااا اهىء اهىء.. عتقوووني بغا يتكرفص عليياااا اهىءاهىء 

دوروها البوليس كيسولوها وهي كتبكي وتشكي وتعاود 

- كيتبعني ديما وانا كنجي من الخدمة وليوم بغا يكريسيني فاش مالقا عندي والو جرني بزز بغا يتكرفص عليا الشاف اهىء اهىء .. بزز باش فلت وهز زيزوار بغا يخسر ليا وجهي 

الشاف: حرك ديك الستاافيط نشوفو هاد الحريرة .. واش طاطعرفييه فين كااين دابا

رانيا: اه اشاف راه حالف عليا قاليا غنبقا واقف ليك هنا حتى نشدك 

طلعات معاهم فالسطافيط كتبكي حتى لراس الدرب ودخلات مع البوليس سيفيل كل واحد قداش وكتخبا موراهم . شافتو وشارت بيدها 

- راه هو هوا مول لحمر الشاف 

مشاو ليه البوليس حصلوه قطي هاز طرف كيبيع فيه . شافهم وبغا يهرب وهما يشدوه وهي تخوي مع الحيط كتسلت . صافي بروصي جابو الله من غير التحرش . مشا فيها مع الحشيش مابقا ليها مادعي ولا تشكي لقليلة بعدا واحد 5 سنين .


طلعات للدار سخفانة وجلسات تبكي حدا بنتها حتى بردات وطاحت نعسات . 

الصباح ناضت كالعادة لبسات لبسة كاملة عبارة على سروال توب قصير فيها مربعات فالابيض والاسود ولافيست ديالو مسدودة طويلة شوية حتى لجياب السروال ودايرا ليها حزام صفر وصباط صفر وطالقة شعرها وهزات صاك اسورد .. مشات للطموبيل وهي كتشوف فجنابها خايفة ووقفات حداها .. اليوم غنركب فيك وفين مابغات توصل توصل بيا ولابيك . مغنبقاش انا نتسنا طاكسي والطموبيل عندي والكلاب كيوقفو عليا .. حطات الصاك لداخل وجبدات التسعينات لسقات جوج كبار اللور وجوج فالجناب وطلعات حيدات الطالون 

رانيا : بسم الله .. يا اما نوصل .. يا اما نوصل وحدة فجوج .. اللي بغا يوقع يوقع 

خرجات الطموبيل كتعصر فيها قاجة ليها الكسيراتور وكتزحم .. رجعات لور وهي توحل كيدير دور .. عيات تشوف وعيطات للعساس دورها ليها 

لعساس : مزال ماططعرفي تسوكي ؟؟ وبيتي تمشي فيها !

رانيا: مكنعرفش ندور كنعرف نمشي نيشان ونوقف ونديماري .

العساس: واهي بشوية عليك لا ضربي شي وااحد 

رانيا: شكرا 

ركبات وزادت الطريق كوولها ولكلاكصون موراها بحال الى هازة عروسة ... اشمنك يا سطوبات حرقاتهم .. اشمنك يا حق اسبقية دازت فيه .. اشمنك يا ليمن شداتو بوحدها غادية ب 30 والهدية موراها .. صف ديال الطنوبيلات كيكلاصونيو .. اما الماطر حتى كتقول صافي غدخل فشي موطور وكيحفضها الله .. مامرة ما جوج تخلعات وهزات يديها ورجليها وطلقات من كولشي وبلوكات الطريق ... واشمنك يا دموع هبطاتهم على البوليس باش يطلقوها .. وكاين اللي كيدير ليها الطريق تزيد باش يفك خريرة لومبوطياج . وصلات للخدمة وهي تقدنش .. كي غادير تسطاسيوني دابا وهي مكتعرفش! .. شافت السيارة الفاخرة ديال سي بناني قدامها وشكات واش هي .. لالا موحال كتشبه ليها .. مالها غير بورش كحلة وحدة اللي كاينة . وشنو غيجي يدير تما اصلا .. بانت ليها بلاصة حدا ديك الطموبيل عرييضة وخاوية وقالت صافي غنتخشا هنا .. رجعات باللور حتى هربات على الطريق وزادت القدام حتى زلقات بيها الطموبيل وهي ..""" بااااااق " دخلات فالبوش تا تهزات بيها الطموبيل فبلاصتها وتقلبو عينيها بالخلعة وسكت ليها القلب .. 

كان جالس كيهضر فالسيارة ما بيه ماعليه داير النضاضر حتى حس بالطموبيل تحركات وسمع الصوت وهوا ينزل بالزربة لقا i10 ديال رانية مزوقة بالتسعين وتعوج ليها الجنب وخرج عينيه فيها وودرا عندها


هبطات وسدات عينيها فاش شافتو نازل عندها وبدات تمتم

- ناري ناري ميمتي السي بناني ناري ميمتي ضربت طموبيل السي بناني ... ناري قفرتيها يا رانيا البولة بوحدها ساوية مليون نبقا نخلص فيها تا تشرف . حل عليها الباب وقال

- رانيا!!
هزات فيه عينيها حومر وودنيها حومر وحناكها حومر الابتسامة ففمها كترعد .. ماعرفات ضحك معاه ولا تبكي عليه .

رانيا : السي بناني ! 

نزلات حفيانة نسات راسها ووقفات فالشانطي وهوا كيطلع فيها ويهبط وقال

- شنو وقع ليك ارانيا .. لبسي فرجليك بعدا 

رانيا: اه ههه.. سمح ليا 

خشات راسها وجمعات الضحكة جبدات صباطها ورجعات هزات راسها بابتسامة كتفتف مالقات ماتقول . خرجات سميرة .. رقيقة ولاكن عندهاااا واااحد المؤخرة ياسلام كتقل عليها فالمشي وكتزيد تلبس سراول مطرطقين عليها . وخرج حتى حميد و خالد مصدومين وقفو عليهم شافو الفضيحة اللي وقعات وماحسابش ليهم واش السي بناني كان جالس تما .. اما رانيا مارضاتش وتمنا كن جا الريح وطيرها من ديك البلاصة جابها فالصحرا اللهم الرملة ولا ديك الوقفة ماعرفات مادير 

خالد : السي بناني 

حميد : السي بناني؟؟

سميرة : سلام سي بناني .. (ساطت من مناخرها ) وييلي شنو درتي ارانيا واش مكتعرفيش تسوكي؟ 

ابتاسمات رانيا بارتباك كتفتف : لا . كنعرف غير الفران ماب.. مبغاش يخدم .. ماعرفتش شنو وقع ... 

حميد: ضربة خاايبة ارانيا درتي كن قلتيها ليا نعلمك بعدا تسوكي هانياتون 

خالد : متأ.. مشكييلة هادي دابا 

سميرة: هزات حاجبها ) على الاقل كن عيطتي ليا غير انا نبلاصي ليك وماديريش هاد الفضيخة حشومة 

عقدات رانيا حجبانها مارضاتش وضارت فيها قدام كولشي 

- كتعرفي بعدا تسوكي عاد البارح قلت ليك عندي الطموبيل قلتي هسا غتعلميني نسوق باز !!!

تصدمات سميرة من ردة فعل رانيا قدامهم وكولشي حشم بلاصتها 

السي بناني: صافي ..يالاه كل واحد يمشي يشوف شغلو .. هادشي كيوقع 

سميرة: سمح لينا السي بناني

مشاو وتلفت السي بناني لقا رانيا كتبكي وتشهق وتقطعها فيها وتعوج فرجليها وتعصر بوحدها فحال الى فيها البولة .. هز حجبانو ويدو وقال 

- صافي هادشي كيوقع الله يحد الباس تجي فالحديد وماتجيش فبنادم ياك نتي لاباس بعدا

قالت كتشهق وتنخصص وتنفس بزز والدموع كيجريو

- مادرتهاش بلعاني السي بناني والله فلت ليا لفران ماعرفتش كي وقع حتى بركت على كسيراتور حساب ليا لفران اهىء اهىء اعىء... سمح ليا السي بناني سمح ليا نديرو كوسطا راني مخلصة لاسيرونص اما انا طموبيلتي صافي اخر مرة نهزها اهىء اهىء


تنهد وقال : صافي دات الباس ... هادشي كيوقع ... غنفكوها بلا كوسطا ... عطيني باش غنصلحها بيني وبينك وها حنا فكيناها صافي 

مسحات عينيها كطل على الطموبيلات بجوج وتلفتات عندو وقالت 

- شحال دابا غيتقام هادشي اسي بناني ؟ 

صغر عينيه وبقا كيشووف فيها وقال 

- لقليلة واحد 3 ديال المليون 

خرجات عينيها وقالت : 3 وصافي !!! .. واخا صبر عليا غير حتى نن.. نشوف كي ندير ليها وونخلصها ليك السي بناني ... صبر عليا شوية الله يرحم لواليدين ..راك عارفني مزيرة وماعنديش ووو... حتى ديك 10 فلمية طرقتها كاملة .. شريت الطموبيل وخلصت تسبيق ديال لكرا وطقاطق من هانا ومن هنا .. الفلوس كطير ووو

قاطعها : رانيا ... راني عارف .. بالاتي نبلاصي ليك الطموبيل 

ركب قاد ليها الطموبيل ونزل عندها وهي حشمانة من داكشي اللي وقع 

محمد : يالاه معايا عندي شي هضرة بغيت نكولها ليك 

رانيا: ليا انا الشي بناني؟؟!

محمد : اه نتي ... (حل ليها الباب) يالاه طلعي 

طلعات حشمانة وطلع ركب حداها .. تلفتات عندو وقالت

- والخدمة ؟؟

السي بناني: نتي معايا وكتسولي على الخدمة ! ههه عجيب أمرك ارنيا 

سكتات وحنات راسها ومشات معاه لاوتيل راقي .. وقف السيارة فالباب وتلفت عندها وقال

- اخر مرة درتي معايا وماوفيتيش ... قلت ليك فاش تخرجي باغي نعطيك شي حاجة ومشيتي من تما ماخليتي لا نمرة لا تيليفون

شدات فجبهتها وقالت: نسييييت ... سمح ليا السي بناني 

تلفت اللور وجر الصاك مدو ليها : ها صاكك .. نسيتيه نهار العيد عندي ومشيتي

حلات عينيها وقالت: اااه الصاك ديالي 

محمد : اييه الصاك ديالك ... هاهوا 

رانيا: شكرا السي بناني ..شكرا بزاف 

ابتاسم ونزل كيهضر : يالاه نزلو 

نزلات معاه بابتسامة ودخلات هازة صاكها غير تابعاه معارفاش فين غادية اللي عارفة هوا انها مول الشيء ماخصهاش تبقا تكتر الاسئلة .. يمكن عندو شي شغل فهاد الاوتيل . 

شافتو خدا الكارط من الاستقبال وهي تنوا وبدا الشك كيدخلها وقلبها كيضرب ..شوية خافت تسيئ الضن و تبعاتو حتى لباب الغرفة .. يدا كيوضاح ليها شنو كيوقع وبدا وجهها كيصفار .. تحل الباب ودخل ووقف قدامها بابتسامة خفيفة ومرة مرة يصغر عينيه .. بقات برا واقفة صدرهت كيطلع ويهبط حتى تكلم 

محمد : دخلي... مالكي واقفة 

رانيا: بحذر) فين غندخل السي بناني 

محمد : دخلي بعدا وغتفهمي

بلعات ريقها وسبقات رجلها بحذر كدور فعيننيها لقات راسها وسط سويت ملكي وبدات كدور فبلاصتها .. بانن ليها النموسية فجهة بيضاء وهي تلفت عندو وقالت بالخلعة فعينيها 

- شنو ك..كنديرو هنا السي بناني؟ 

محمد: حيدي الرسميات دابا وعيطي ليا بسميتي عادي 

استغربات رانيا وتأكد ليها شنو كيدور فراسها وقالت

- مافهمتش اسي بناني ؟!!

محمد : قلنا غتخلصي الضربة ديال الطموبيل ... مابغيتهاش فلوس (غمزها ) 

حلات عينيها وقالت : كفاش ؟ 

قرب خطوة منها وهي ترجع باللور مخلوعة ... هز يدو بعد ليها زغبة على عينيها وقال بهدوء

- انا بغيتك نتي 

تصدمات وهي تهز يدها حتى للسما وعطاتو طرشة مابعدها طرشة واخا متحركش من بلاصتو وغززات سنانها كترعد وقالت 

- هادي هي اللي عمررها تكون لا ليك ولا لغيرك .. اااسسسي .. بناني 

حلات الباب بالجهد وهوا متبع ليها العين وخرجات زدحاتو بقوة ومشات فالكولوار كتجري وتبكي بالطالون ويدها على نيفها


نزلات كتبكي من الاوتيل وتشهق وشدات طاكسي مشات فيه كدمع ورجعات للخدمة عينيها حومر . مللي جلسات و زملارها كيشوفو فيها حتى بغات تخرج ووقف عليها خالد بابتسامة 

- ايوا شنو درتي مع السي بناني فكيتيها ولا سمح ليك 

شافت فيه بصرامة وقالت : علاش غيسمح ليا بصفتي شكون ؟ غنخلص ليه بطبيعة الحال السي خاالد ... انا ماشي من النوع اللي كيفكها فالنوار فهمتي

تصدم من جوابها وقال: وا شغانقول ليك .. راه قاصحة فااصراحة تحطيهم صحاح دقة وحدة ... شوفي معاه يدير ليك لكريدي 

رانيا: لا مامحتاجاش .. عندي شي براكة الحمد لله كنت مخبياها لدواير الزمان .... وها الزمان دار . 

خرجات وخلاتو واقف .. هاد المرة قصحات معاه الهضرة بالمعقول وخرجات مشات طلات على بنتها هي اللولة ودازت للبنكة شطبات داكشي اللي مخبية فيها وخرجات . تحصرات على الزهر اللي عندها .. وعلى الفلوس اللي مكاملاش وشكون غيكملهم ليها .. رجعات للخدمة وبدات كتحاول تقرب من حميد من بعد ما كانت نافخة عليه .. حتى هوا رطاب ولاكن مكانش عارف باللي الابتسامة ديالها موراها شي حاجة . فاش بغاو يخرجو وقفات معاه غير بوحدو وبدات 

- السي حميد .. راك عارف المشكل اللي وقع ليا الصباح ... خاصني نخلص وانا مادرتش كوسطا ... واش تقدر تسلفني واحد المليون ونبدا نرجعو ليك بالتقسيط ... مكاينش من غيرك اللي يقدر يوقف معايا 

السي حميد: وا هوا مليون شوية بزاف .. ولاكن ..

قاطعاتو : نعطيك شيك ضمانة غير عتقني

السي حميد: واخا صافي صبري عليا شي يامات حيت راني غارق فالكريدي .

رانيا: صافي ماشي مشكل ... انا غنشوف مع السي خالد ..

قاطعها : لالا صافي عطيني يوماين نوجدها ليك 

رانيا: نعول عليك 

حميد: عولي عليا 

رانيا: شكرا السي حميد 

حميد" نوصلك معايا؟

رانيا: لا بلاش غنمشي فطموبيل .. ندوزها نصلحها مغنخليهاش هنا 

حميد: ويالاه نمشي معاك فيها لا ديري شي كارتة اخرى 

قبلات رانيا على قبل السلف ومشا معاها الطريق كاملة وهوا نافخ ليها راسها ومستحملها .. حطات طموبيل تصلح ومشات بحالها للدار عنظ بنتها . غير دخلات تكات عليها عنقاتها وبقات كتبكي تبكي تبكي وتشكي عليها حتى طابت ونعسات .

دازت 3 ايام ورانيا متأثرة بداكشي اللي وقع وخايفة تطرد من الخدمة ... كل نهار كتقول ليوم يطردوني ونمشي نتلاح فالزنقة . اخيرا جاب ليها محمد الفلوس وماعطاهم ليها حتى شحفها وكيبين ليها باللي هوا الراجل ومفتاخر براسو وعاجبو لحال . . . عطاها لفلوس وعطاتو الشيك ومشات كتقلب على المقر ديال الشركة وكتسول فين تقدر تلقا السي بناني بلا ما تتاصل بيه فالتيليفون... اخيرا عرفات بلاصتو ومشات للفرع ديال الشركة اللي كان عبارة على مبنا عادي فيه 3 الطبقات اللي تما فمراكش وطلعات كتقلب حتى وصلات عند السكريتيرة ووقفات عليها 

رانيا: الله يخليك بغيت نشوف السي بناني واش كاين ؟

السكريتيرة : يالاه جا ليوم ... عندك موعد معاه 

رانيا: لا قولي ليه مدام رانيا الله يخليك 

دخلات السكريتيرة ورجعات خرجات 

- تفضلي 

تزنك وجهه رانيا وحشمات وبدات ترعد لاكن جمعات النفس وحلات الباب بيدها وتقدمات بنفس الجلابة الشيبية ديالها وصباطها ولاكن هاد المرة كانت المفاجأة كبيرة . دايرة الحجاب وشاداه على الطريقة التركية ونقصات من المكياج .. بانت فوجها واحد البرائة وطاح عليها واحد السر وبانت اكثر انوثة وهي حادرة عينيها وكتقدم جهة البيرو .. بقات ساكتة كتشوف فالغلاف اللي فيدها وحطاتو فوق الطبلة بلا متهز عينها فيه ولا تشوفو وقالت بارتباك 

- هادو الفلوس ديال الحادثة السي بناني اللي قدرتي ليا . 

درات بشوية مشافتش فييه وتمات غادية تخرج وهي تسمعو عيط 

- مدام رانيا

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.