- مدام رانيا ... كنتمى تنساي شنو وقع ... وطوي الصفحة ونبداو وحدا اخرى ... يقدر اي واحد بلاصتي كان ممكن يتصرف بنفس التصرف .. ونتي عارفة قصدي
هزات عينها شافت فيه مصدومة وقالت
- عندك الحق ... حيت انا اللي كنعطي فرصة للرجال باش يزعمو عليا ... (غرغرو عينيها ) مرا مطلقة .. ساكنة بوحدها ... كولشي عندها يجوز ...
محمد : هادي نضرة المجتمع ... واللي بغيت نوصل ليك ... هوا اي واحد فبلاصتي كان غيدير نفس الشيء ... يمكن حيت جدبتيه بطريقة اللباس ديالك .. ولا شعرك . ولا بارفان ولا مكياج مثلا ... المجتمع هاكا كيفهم .. مرى مطلقة مثلا وكتلبس بطريقة جدابة ... سافوديغ راه كتقلب على راسها ونيتها تجذب الرجال ليها ... واخا هي نيتها فشكل ...
جمعات النفس كتنخصص من لداخل والدمعة محجرة فعينيها وقالت
دارت خرجات بالزربة مع الباب وخلاتو واقف فبلاصتو ومشات
رجعات لخدمتها مكتهضر مع حتى واحد ... عيا خالد يتقرب منها وهي كتهرب وتحاول تبعد وحتى طريقتها فاللبس تبدلات ... مؤخرتها مابقاتش كتبينها بمرة وصدرها ديما مغطي وكتعجب باللباس ديال الحجاب وتقناتو .. والحقيقة تقال جا معاها احسن بألف درجة من وحتى هوا عندو ستيلو خاص غير اللي يعرف ليه ... لبسات الجلابة واحد الويكاند وخرجات هي وبنتها مشات قيلات النهار كامل فالبال كتعزل وتجبد ليها ولبنتها فالحوايج وتسارا وتقلب ودازت حتى للمجوهرات فالبال وبدات تجبد وتقيس ... لقات بعض الاشياء احسن بألف درجة من الجديد وطاحت على واحد الصندوق وسط واحد الروينة فواحد الخيمة ديال البال وبدات تبقش فيه ... اش منك يا مجوهرات كتحمق مغبرة قيمتها كبيرة لاكن حتى واحد معارفها .. وطاحت على واحد الساعة يدوية زوينة وحتى هي عندها قيمة ومغبرة ومقطعة ليها السمطة .. بدات تجمع من هنا ومن لهيه .. ها السماطي ها الصنيدلات ها الحوايج وغطسات فوق واحد الخشبة فيها الشيلان بدرهم اشكال وانواع وجلسات تعزل فالالوان والزواق .. ها الشال صغير ها الشال طويل ودازت للصيكان وبدات تقلب وتشاطر ، خدات الصيكان بجلد رفيع فيهم لكبار والصغار ورجعات للشيلان بدات تختار لكل صاك شالو اللي يجي معاه حتى تعاشات لعشية وخرجات من تما جامعة شحال من ميكة عامرة بالحوايج ورجعات بحالها للدار . طلعات للسطح حطات واحد البانيو صبنات فيه الحوايج كاملين ونشرات 4 ديال السلوكة وجلسات تصبن فالصيكان اللي يتصبنو وتمسح اللي يتمسحو هما وليزاكسيسوار .. خرجات فلعشية بالليل عند مالين المكياج شرات بورطكليات فالانواع والمزغبين بالالوان .. صايبات السمطة للساعة ودارت ليها الحجرة ورجعات بحالها طلبات المصلوح لمولات الدار وجلسات تقصر على الحوايج كطوي وتحدد فداك البيت. .شي تعلق وتستف وشي تطوا وتحط فالمرايو دالخشب القديم اللي لقات تما فاش جات .
اسبوع جديد فالخدمة ناضت الصباح جلسات قدام المرايا ..دارت ريسيل وكلوز ورشات ريحة خفيفة وناضت وقفات كتشوف اللبسة كيجاتها .. جاتها كتحمق الالوان كتفتح الشهية واخا كل لون من جهة جاو زوينين .. صايبة عريضة طويلة عندها شبكة رقيقة من لفوق مكتوصلش للارض صفراء .. دارت ليها سميطة رقيقة خضراء ولبسات ليها شوميز فالشيبي باارد غادي للابيض ودارت فولار باج بارد ولبسات فرجلها صباطها الازرق ديال الدان بالطالون وهزات صاك بني دارت بيني لوات على سديه شال فالارونج والازرق ولسقات ليها لعيبات المزغبين وبدات دور بلاصتها ... شلا الوان صيفية باردة القليل اللي يقدر يزعم يخلط بيناتهم . لاكن فالاخير عطاو لوحة فنية جميلة .. جرات بنتها ملبساها صايبة ديال الكوير وقميجة ودايرة ليها كرينات والفلايل وسبرديلة وخرجات . يالاه خرجات وهي غادية كتسمع فالهضرة والبسالة وحتى من الطموبيلات تابعينها وهي غادية حتى طلعات فالطاكسي كتسب بوحدها . نزلات وشرات لبنتها مصاصة ودخلات للمكتب فين خدامة ... يالاه دخلات ناضو زعما عندها كيرحبو ببنتها ويبوسوها وهي كتجرها .. امم الصواب زعما باااز
هزها وهي تقندش رانيا ماصلاحش ليها تقول ليها حطها وطلع ليها الدم .. جلسات بلاصتها فالبيرو وجلسات بنتها فوق الكرسي حداها وحيدات ليها سكادو على ضهرها وجبدات ليها كتاب فيه الرسوم والالوان
رانيا: يالاه جلسي ماديريش لبسالة لوني هنا باش نبقا نجيبك معايا منسدش عليك فالبيت
حركات لينا راسها وجلسات كتلون . وصل وقت الغدا وناض كلشي بغا يخرج يتغدا .. جبدات رانيا واحد الطاسة فيها ليباط طيباتهم مع النبوري وشلاضة وعطات لبنتها .. جلس قدامها حميد بغا يتجمع وبدا يشكي بخالد .. شفتي شنو دار لينا على قالب .. درنا راسنا مفاهمينش اسيد زاد فيه ... شوية قالك سلفني مالي عندي بنكة .. واش قلتي ليه عطيتك شي حاجة ؟ حيت السيد بحال الى بان ليا فراسو شي لعبة
خرجات عينيها ووقفات كتغوت حتى دخل لعساس كيجري لقاها محيحة بغات ضرب حميد وتدخل كيفك عاد بردو السوق وجلس كل واحد فيهم كيشوف بنص عين فلاخر .. دخل خالد وسميرة وهما مافراسهم مايتعاود وجلسو . شوية بدا حميد يعضر وهما مفاهمين والو وكل مرة ينفض ورقة
حمدد: عطي رزقك وسلف وتكلف ... فاللخر سمع الهضرة ... فهاد الوقت اللي بغا يدير شي خير يديرو فراسو بشار كي داير كيحسب فراسو ماعرفت شكون
حم: اودي خلينا ساكتين الى جات على 100 درهم راه والو .. بنادم نكار لخير ولاكن انا عارف حسابي معاه
سمعات رانيا كولشي على ودنيها ومجاوباتوش ..سالات خدمتها ومشات لدارها وكل نهار نفس الروتين كتدي بنتها معاها يوميا خصوصا انها كتجلس وتكمش مكتحركش من بلاصتها .
وصل اللخر ديال الشهر وناضت رانيا من النعاس دايخة على صوت التيليفون كيصوني لقات باها وفتحات الخط
رانيا : الو بابا ...
الاب: الو رانيا ... شوف ابنتي راه وصلو الاوراق ديال البنكة اللي دايرة على عنوان ديالنا .. وصلونا فيهم شي حاجة فشكل ..
رانيا: تخلعات ) بحالاش ؟ شنو ههي هاد الحاجة صور ليا داكشي
الاب : وحدة فيها ...باللي خرجات واحد المليون من الحساب ديال خرجها شي حد سميتو حميد مسناوي..
الاب: وا بلاتي ...راه عاوتاني جات ورقة اخرى ... فيها . باللي دخلات ليك واحد 3 ديال الملاين فالحساب ديالك بالسمية ديال محمد علي بناني ... هادي التاريخ ديالها قبل من لخرى
رانيا : بصدمة : صور ليا نشوف صور
صور ليها باها كولشي باش تأكد وفعلا تأكدات وتصدمات ... السي بناني حط ليها الفلوس فاليوم التالي اللي عطاتهم ليه ... وحميد مشا دفع الشيك منو راسو ... كفاش قدر يبيعها وبلا خبارها ... واش كان باغي يدخلها للحبس ولا ينتاقم منها ... هي اصلا حسابها خاوي كان الحبس كيتسناها ... ولد الحرام هادا ماعندوش ضرة ديال الرحمة . مافكرش فالحبس اللي كانت غدخل ليه على والو .. على جوج دريال بغا يخرج عليها . وعلاش هادشي اش دارت ليه ؟ حطات يدها على قلبها كان غيسكت بالخلعة وتفشو ليها الركابي حسات براسها ماتت وحياة .. ناضت بلا متشعر لبسات جلابتها الحكلة ولاحت شال كحل على راسها وبلغتها ولبسات بنتها وخرجات كتجري تعرضات لطاكسي
مشات كطير هي وبنتها للمكتب مع الصباح ودخلات عليهم بحال الموجة مشات نيشان قلبات على حميد البيرو وكمشات ليه الوراق وبدات كتغوت
رانيا: الله ياخد فيك الحق الحيواااان ... الله ياخد فيك الحق باغي تسيفطني للحبس...باغي تخرج عليا حسبي الله ونعم الوكيييل
سميرة : اوييلي راانيا مالكي ؟ شنو واقع علاش كتغوتي؟
رانيا: بجنون : بغا يسيفطنس لاحبس ولد الحرام دفع الشيك بدون رصيد بغا يخرج عليا
حميد: واسيري عاوديها ليهم الكدابة الحساب عندك يعلم الله شحال فيه وكادبة عليا بدون رصيد .. انا النهاااار اللول عقت بيك وقلت ليك بلااا مطبقيها عليا
شنقات عليه والبقية كيفكو .. مالقات ليه جهد من غير دعي فيه وخرجات حمرا كتنهج مشات لأقرب سيبير خرجات ورقة فيها الاستقالة ورجعات لاحتها ليه على وجهه وبزقات عليه .. كانو غيتشادو وبغا يضربها .. فلتات ليه وجمعها بنص وشنق عليها وهي كترعد وبنتها كتغوت
فكوها منو وجهها حمر والشال هبط اللور والجلابة تقطعات ليها ... وقفات كتنهج ومشات هاكاك كتبكي جارة بنتها وتجري للكوميسارية ودخلات كتبكي وتشهق فديك الحالة شكات بيه ومشات دارت سرتافيكا ديال الضرب والجرح وزادت عطات لراسها بونية للحنك قبل ماتوصل عند البوليس حتى طوش الدم من فمها . غرقات ليه الضوسي مزيان بالتحرش ومحاولة الاغتصاب والضرب والجرح اثناء مزاولة عملها ورجعات بحالها للدار بكات حتى شبعات .
دازت 3 ايام وعيطو ليها البوليس خرجات جارة بنتها ودخلات لقاتو جالس حاني راسو ... بغا يشدها بالشيك فالاول لاكت فكات راسها وقالت باللي ماعطاتش الشيك بدون رصيد وخرج فلوسو خداهم . وحل حميد وحلة ديال الفار وبدا كيرغب فيها تسمح ليه وهي جالسة كتسوط مابغاتش تشوف فكمارتو ... دارت جهدها كامل باش غرقاتو ورفضات تسمح ليه وخلاتو كيطلع ويهبط فالمحاكم مجرجر وشد المحامي وبقات معاه فالدعوة مابغاتش تسمح ليه ورجعات بحالها لكازا لدارها اللي راهنة جلسات فيها .. على الاقل مكتخلص والو .. وفكل جلسة تمشي لمراكش تقابلو .. وفكل مرة يسولها القاضي واش كاينة شي محاولة صبح كتقول " لا سيدي القاضي " وترجع بحالها لكازا دور وتسارا وتقلب على خدمة على الاقل تقري بنتها اللي الدخول المدررسي على الابواب . فآخر المطاف سهل عليها الله فمدرسة بنتها نيت .. مشات غير على الله تسول وتجرب ساعة صدقات ليها وحتى المدير اللي عارف قصتها كاملة وكيعرف الحاجة شاف من حالتها ودخلها تخدم فالحضانة تقابل الوليدات الصغار وفنفس الوقت دارو ليها تخفيض بحال جميع الموضفين اللي تما .. تقري بنتها بتمن اقل على اللي كان واخا الثمن بقا عالي عليها ... الخلصة كاملة غتحطها فالقرايا .. فكرات مزيان وشافت حتى عيات وخلصات ليها الشهور الاولى بداكشي اللي عندها فالبنكة باش تهنا شوية وصلحات الطموبيل وبدات تعلم فيها ومقاتلة حتى طلقات يديها ، اما السي حميد شد الطريق حتى لعندها وقلب عليها فين كاينة يطلب منها السماحة ومشا حتى لعند واليديها كيشكي باش تسمح .. تدخل باها حيت معارفش التفاصيل ديال الحادثة . عياو فيها تسمح مابغاتش فاللخر طالبها ب 1000 درهم وتسمح ليه زادت طلعات النيفو وطلبات ليه 3 وحلفات من غير 3 دالملاين ما تسمح ليه . وعرفاتو غيتشوا فالفلوس حيت مساهلاش عليه يحطها ليها بسبب مشكل بسيط بالنسبة ليه هوا . اييوا السي حميد سخونية الراس كترجع بالبرودة وطحتي مع وحدة ما همهاش كاع تحبس .. كما بديتي المشكيل بالفلوس غتساليه بالفلوس ويديك فوق راسك وسير كمدها باش تعلم الرجلة على العيالات بشحال كطلع .
عيا رغب باش تنقص مابغاتش ... عيا يشكي بالمشاكيل وعام ديال الخدمة غيخدمو فابور الى عطاها دوك الفلوش كاملين .. لاكن رانيا ماتسنطاتش ليه كاع وبقات شادة فكلمتها . بغا فعايل بنات الحرام .. طبقهم معاه اصلا هما اللي غيردعوه ويربيوه ويتعلم التربية كي دايرة . ونيت هي محتاجة للفلوس فهاد الوقيتة مع الدخول المدرسي والدفاتر والحوايج والادوات . ميزانية عندها جاب لييها الله اللي يخلص كولشي .
حط حميد الملينات وهوا باغي يبكي فالحساب ديالها وتنازلات ليه هي على الدعوة وسالات معاه فخطرة .. هادا هوا الزمان .. كيخليك طلع واكل وتنزل واكل كي المنشار .. ولا راك نتا اللي غتكال الى ماكليتيش.
نهار جديد خرجات بنتها فالطموبيل كساتها وشرات ليها الكتب والادوات اللي طالبين ليها باش تبدا القرايا .. هاد العام عندها التحضيري .. ومابقاتش فالروض بحال قبل .. دابا عندها القرايا نيشان ...يا اما تنجح يا اما تسقط .
وهي فالسوق وسط الزحام كتشري فالكومة والميسطارة والستيلوات و لينا واقفة عليها .. لا بغيت ديال الحوتة .. لا بغيت ديال نونوس .. ورانيا معصبة نهار كامل وهي دور وكتحاول دير ليها فالخاطر ... صونا ليها تيليفون وشدات فبنتها من الرقبة قدامها باش ماتلهاش عليها وتلف ليها وفتحات الخط
رانيا: الو ؟؟
محمد : الو .. مدام رانيا
رانيا: اه شكون ؟
تعمدات تقولها واخا عرفات شكون
محمد: معاك السي بناني ... علاش مابقيتيش فالبيرو ؟ علاش ستاقليتي ؟ اينا ليوم عاد سقت الخبار باللي شهر والزيادة ونتي خارجة من الخدمة ؟
رجعات الدار هازة جبل ديال الكتوبة واللدوات وجلسات عند الطبلة مربعة رجليها وبدات تغلف فيهم واحد واحد ولينا كتلسق فالسكوتش هنا ولهيه
رانيا : هاااي هاااي هاااي الناس كبرو غيدخلو للمدرسة هاد المرة كباار... شوفي .. راه كنحط عليك دم جوووفي باش تقراي ... الى ماجيتيش نتي اللولة فالمدرسة صافي غنتخاصم معاك
لينا : شنو تشري ليا؟
رانيا: حضي غير شنو نشري ليك ... واشوفي شنو كندير على قبلك باش تقراي ... واسيري وبداي تلعبي ... الى متجيتيش نتي اللولة غير ماتهضريش معايا ومانشري ليك حتى حاجة ... اما الى جيتي نتي اللولة راه غنشري ليك كازا كاملة واخا نعرف نسعاهم
لينا : خليني ماما نلبس ديك اللبسة
رانيا: حتى لغدا باش تمشي تقراي ونلبسها ليك ... يالاه خلي هادشي ونوضي ندوش ليك باش تصبحي نقية .
صباح جديد صبحات رانيا شادة لينا كتمشط ليها ودفر ليها لكرينات وتزوق ليها بالمقابط... لبسات ليها صاية وردية وليبة وصباط وقميجة كيوت كما مولفة تلبس لبنتها غير الحويجات الزوينين .. رشات ليها الريحة ودارت ليها الشكارة وخرجات هي وياها بجوج .. وحدة غتمشي تقرا ووحدة غتمشي تخدم . دخلو بجوج للمدرسة فداك الصباح لقاو كل بعلوك جايين معاه واليديه وكيتصورو معاه .. شداتها رانيا دخلاتها وسط الجردة فرحانة بيها ووقفاتها وبعدات كتصور فيها .. فجأة نزل عليها جود بناني من السماء كيضحك ويعيط " لينا ..لينا " وقف حداها وهي كتصور وتبوزا قدام رانيا بالكرينات ... تصدمات رانيا و وقفات تلفتات لقات السي بناني واقف كيشوف فيها وهي دور وجهها بالزربة بحال الى مشافتوش ودات بنتها للصف ديالها ساعا لقات حتى جود بناني معاها فالصف
شدات جود بناني وتحنات عندو بابتسامة كضحك معاه
- البطل ديالنا غتقرا مع لينا عاوتاني
جود : اه
رانيا: واااو باش تبقا تحامي عليها ياك اللي ضربها عطيه ... دابا صافي تصالحتو
جود : اه اللي ضربها نضربو
رانيا : برافو اصلا نتا بطل .. شوف هي مسيكينة شحال زوينة وضريفة .. بحال ختك
شافتو رانيا حداها وهي تبعد عند بنتها كتوصيها ووقفات كتفرج فيها وهي داخلة
محمد : مدام رانيا .. واحد الدقيقة بغيت نخضر معاك
تلفتات بسرعة غادية وقالت : سمح ليا مشا عليا الحال
مشات وخلاتو واقف متبع ليها العين ودارت للجهة ديال الحضانة وبقات كطل من بعيد حتى بان ليها خارج مع الباب ودخلات لخدمتها لبسات طبليتها وجلسات تقابل الدراري الصغار . فديك الايام اللولة كانت كتشوف غير مدام بناني كتجي عند جود وكانت كتحاول تفادتها وماتلاقاش بيها .. اما السي بناني غير واحد المدة حتى بدا كيبرد الحال شوية عاد بان ليها داخل مع الباب لابس دجين وكويرة محلولة كحلة وسبرديلة وتعرض لجود هزو ورجع خرج جهة السيارة . شدات حتى هي بنتها سدات ليها الجاكيطة وكانت هي لابسة دجين زرق فاتح وبوط "ug" باج وتريكو شيبي من لداخل ديال لخيط فيه رسوم بالطرز فااصدر ومونطو كري سامبل محلول ودايرة شال بلون كاصي على راسها .. خرجات كضحك مع لينا وطلعاتها للور فالسيارة .. يالاه سدات عليها وهي تسمع
اسماء: واش حساب ليك دابا تيقتها تا نتي اماما ... انا عاارفة علي كيموت عليا .. واخا ندير ليه اللي درت عمرو يسمح فيا ... عسااك يشوف فجهة اخرى من غيري ... يخلي اللي دايرة العز راسها ويمشي عند المسخات والمدلولات ... ايوا صافي كملات ههه
الام : راه بغاو يجبدو ليك الصدع مع راجلك ... ونتي رطبي شوية بارامة من النكير .. كل مرة الو فينك ..شكادير .. فين مشيتي فين جيتي خنقتي السيد غير تابعها بالتيليفون خلي ودنيه يرتاحو
اسماء : هههه عرفتي شنو .. لبارح عيطت ليه قلت ليه فينك قاليا فاجتماع ههه .. قلت ليه جتماع ولا مع شي وحدة ... طلع ليه الدم وهوا يقول ليا كتقلبي نديرها ليك على قد فمك هههه فاللخر عاد بديت كنضحك وقلت ليه راه بغيت نعصبك وصافي . ولاكن عارفاه غير كيهضر وصافي
الام : رخفي شوية ... راك طبيبة ةاش مكتعرفيش حتى تهضري معاه ... ديما تابعاه فينك .. الى جا للدار فين كمتي معامن كنتي علاش تعطلتي ... والى تعطل غير شوية تبقاي عليه فين تعطلتي وتبقاي عليه بالهضرة
اسماء : وراني عارفة فين كيكون غير كنبغي نبقا نسول .. مكدوزش عليا الراحة الى مسولتش هههه ... المهم انا نخليك نعيط ليه نشوف فين راه
قطعات وبدات تتاصل بيه وتعاود وهوا مكيردش .. تعصبات وعاودات الاتصال واخيرا فتح الخط ومع الفتحة غوتات فالتيليقون
- علاااش من الصبااح وانا نعيط فينك علاااش مكتجاوبش
محمد : مشغوول دابا شنو بغيتي؟
اسماء : معامن مشغول شنو كدييير كاااع ..ينعل مها هاد الخدمة اللي ماتخليكش تجاوبني وتعصبني ... فينك دابا؟ ... الو ... الو ...الو .. واللهلايلا قطع !!! (حمار وجهها ) والله ماتبقا فيك .. انا تقطع ليا على وجهي واخا
عقد حجبانو وقال : هادا تيليفون شخصي شكايدير عندها ؟ واش نتي خدامة سكريتيرة ولا جاسوسة ؟ يالاه الله يعاون
حنا راسو على التصاور معصب كيشوف وكل مرة يسها ويتوقف على الحركة وتجي قدامو الصورة ديال رانيا كدير ليه التنويم المغنطيسي وكيرجع يفيق .. بقا هاكاك مقادرش يركز وكل مرة يسها فاللخر هز تيليفون كيصوني عليها ... الخط مشدود ولاكن مكاينش الرد ...جا يصوني للمرة الثانية وهوا يلقاها بلوكاتو .. تنهد وبدا يردد " ماعرفتش فين كان الحمار ديال عقلك حتى ديتيها لوتيل .. فين كان عقلك وفين كانو عينيك "
حط تيليفون فوق المجر ودخل للحمام يدوش . شدات تيليفون بغات دخل ليه وهي تلقا الكود وحطاتو معصبة وجلسات كتسوط بغات طرطق
خرج لقاها ناعسة ولبس شورط قصير وهز تيليفوناتو بجوج ونزل لتحت للجردة كيتمشا وربط الخط مع رانيا لاكن لقاها مزالة مبلوكياه .. تحصر وبدا كيشوف فالتيليفون وخشاه فجيبو وصونا برقم اخر وردات عليه بصوت دايخ بالنعاس
رانيا: الو؟ شكوون؟ ... الووو ... الوو
قطع الخط وبقا جالس شحال فالجردة ورجع طلع لبيتو حط تيليفونات بجوج وتكا كيخمم حتى داه النعاس . ناضت من موراه اسماء ومشات لتيليفونو التاني ودخلات ليه لقاتو مفتوح وبدات تقلب وخدات اخر نمرة حيت مامكتوباش فيها السمية وعمرو عيط من داك التيليفون . هزاتها وناضت كطير ردات الباب بشوية وخرجات للجردة ربطات الخط من تيليفونها من بعد ما خفات الرقم ديالها . وسمعات صوت رانيا بحال صوت شي بنت صغيرة ..صوت حنين وكتهضر بالشوية .. شعلات العافية فأسماء وبدات كتخيلو فاش كيهضر معاها وكيسمع لداك الصوت وهوا عاجبو الحال كيضحك .. بسرعة ردات بغضب وقالت
- خطااافت الرجاااال الكلبة يا ***** تابعة الراجل مزوج بولادو يا *****
رانيا: اوييلي شكون معايا!!!
اسماء: شكون معااك ! انا مراااتو يا لكلبة يا خطاااافت الرجاااال ... شوفي .. والله وما بعدتي منو حتى نخرج عليك كتسمعيييي...
طير ليها التيليفون من ودنها وحطو فودنو معصب ومخرج عينيه فيها سمع
كان ناعس فاش خدات الرقم وهوا يفيقو ميساج من عند رانيا كيزنزن مكتوب عليه " واش ماتخليوناش نعسو البشاااار"
قراه وتلفت مالقاش اسماء ... حل عينيه بجوج وشك لا تكون قلبات ليه تيليفونو لاخر اللي مدايرش ليه الكود ... مجرد شك نوضو كيقلب عليها وسط الفيلا بسرعة وزاد شك فحوايج اخرين اللي منوضينها من بلاصتها من غير موضوع رانيا . سمع الهضرة برا وخرج ماحساتش بسه حتى طيرو ليها من ودنها
شافت فيه كترعد عليه وقالت : شكووون هادي؟؟؟؟ جاااوبني شكووون هادي
اسماء : مقااادراااش نتييق ... مستحييل علي يكوون كيخووني
قالت وحدة فخواتاتها مهمومة بحالها وجالسة متمية على المخدة
- مقاادراااش نتيق
الام : ايوا التصاااور شفنااهم ... السيد عاااين باين مخشي مع السلكوطة تحت المضلة كيحتحت هوا وياها ! ... اللي شافو كيفاش كيهضر .. ويجي من الحق .. والسيد كيبان معقووول يقول هادا عمرو يفكر حتى فيها
سلمى الاخت : لااا والزوينة دار فيها !! علاااش تعيط ليها
مسحات اسماء نيفها وقالت : صدمني ..برد ليا الماء فالركااابي ... انا حسااب ليا غينكر ولا يبدا يحلف ليا . ولا يطلبني عمرو يعااود !! صدق مخرررج فيا عينيه صدمني واحد الصدمااااا ..واحد الصدماااا مقادراش لدابا نتيق شنو واقع .. يجي دابا عندي يقول ليا راه مكابنش هادشي اللي شفتي نبرد ونرتاح ... قاااالك علاااااش تعيطي ليهااا .. علاااااش تعيطي ليهاااا ... السيد طرطق فيااا عينيه مخاف ندير فضيحة . مخاف نهز حوايجي ونخوي .. مخاف نطلب طلاااق حسيييت براسي بحال الى مكنعرفوووش ... خاصكم تشوووفوه كفاش هضر معايا خاصكم تشوووفوه .. كن شفتوووه كفاش تعصب بغا يضربني اويييلي مقادراش نتيق مقااادراش ... وقالك هااودني منك الى عاودتي عيطتي ليها يعني راه كيهضر معاها ونعرف ولا منعرفش ماسوقوش المهم منوصلش ليها .. ولاكن انا غنوصل ليهاااا وغادي ندمها نوريها تسرق الرجااال
الام : لالالا هادشي ماشي هوا هاداك ... السيد بان ليا نن عادشي اللي عاودتي ضاربها فسطاش ... خاصنا نعرفو هاد خيييتي (كتشالي بصبعانها وتحلف) خاااصنا نعرفو شكووون هااادي اللي لوات على السيد حتى مابقاش يعقل على مراتو كاااع . . هااادي متكون غا دايرة ليه شي سحوووور .. فقيها صحيييييح نيت اللي طيحات الراجل بشلاغمو وميكد عليه غا اللي خلقو ... يتم داخل الحيوووط كيتزعزعو ... السيد حاكم قوم ومسير شااركاات وكيبني عمااارات ... الراااجل مهيييب كوولشي كيتخلع منو طيحو مراا وتخليه يتعصب كااع على قبلها !! ... اوييلي وحدي
اسماء : بغااا ياكلني بغا ياكلني ماشفتوهش لبارح كي دار فيا .. وكملها وجملها مشا ينعس وخلاني غنطرطق الليل كامل مانعستش ماشفت نعاس .
سلمى " كوراه معاها دابا
اسماء : صافي سكتي متزيديش تكملي عليا حاسة براسي غنموت ... مقااادراااش نتيق ماقادراااش عمرني ضنيت غادي يخوني ولا يشوف فشي وحدة من غيري ... عمرنييي توقعت يوقع ليا هادشي...
سلمى : اويييلي محمد علي !!!! محمد علي خرج منو هادشي
الاخت الاخرى : عطينا نمرتها غادي نجيبها نجيبها
اسماء : كي غاديري ليها ؟
الاخت : غادي نقلبو ليها على شي بلان حتى نشدوها بعدا ... غادي نعيطو ليها ونقولو ليها تجي تشري شي حاجة ولا نجيبو ليها شي حاجة مهم نستدرجوها حتى نشدوها ونعطيوها شي قتلة ديال العصااا باش تخاف وتخلع
اسماء : انا بغيت غير نشوفها فوجهها بعدا كي دايرة فوجهها ... شنو كدير وشنو عجبو فيها .. شنو اللي فيهاااا مافيااااش
رانيا: شوفي فين كتزطمي ها نتي زطمتي فالغيس
لينا : وا ماشفتووش
رانيا : يالاه نزلي بشوية
شداتها خرجاتها من المدرسة وتمات غادية جهة الطموبيل فين موقفاها .. حلات ليها الباب طلعاتها وحلات راسها الباب الباب بغات طلع وهوا يجرها من يدها مصدومة
الشاف : حل عينيه ) دابا شغنكتب ليك انا هنا !! كنتي خدامة عندو وديكلاريتي بيه حيت تعرض ليك وكريساك
رانيا: لا اشاف راه تحرش بيا وداني لوتيل ووو
بدات تعاود من اللول حتى للخر ..فاللخر فاش عرفو السمية بقاو كيشوفو فيها وباش يخرجو من باب واسع دوزو الملف لوكيل الملك يتكلف ورجعات هي بحالها .
فالبيرو كبير وزوين موراها الراية ديال المغرب جالس كيضحك بسخرية وقال
وكيل الملك : واش اصاحبي ماعندك عقل !!! وحتى هي دارتها ليك على قد فمك ديكلارات بيك يالاه ... اه وماشي هادي اول مرة ديكلاري فهاد الكوميسارية .. جايا لشي 8 ديال المرات وهي كتجي ديكلاري هنا ... ولاكن هاد اللخرة راه جابت ليا التمام .. واقيلا كن كانت كتعرف تسيفط برية لوكيل الملك كوراه هاد البيرو عامر بالشكاوي ديالها ... اللولة مع شي وحدة اسيدي على شي فاز هرساتو ليها ..الثانية مع شي خضار ... الثالتة فالطاكسي ... الرابعة على قبل الحلوة ديال لاكريم تاهمات مول باتيسري بالنصب والاحتيال حيت مصايبش ليها الحلوة وصايب ليها وحدا خرا يالاه زيد معاها .
ضحك محمد وهوا حاط يدو على جبهتو وقال .
- انا والله ماحساب ليا غادي ديكلاري بيا هههه.. زعما هاد السيدة ولاهيلا بزاف .
رانيا: ديما كيتحرش بيا ويحكر عليا ... انا كنت خدامة عندو ودار ليا واحد اللعبة وداني لوتيل بزز مني ... وخرجت مابقيتش خدامة عندو ودابا ديما كنلقاه حدا الباب فاش كنخرج وكيتعرض ليا والمرة اللخرة خدا ليا التيليفون ديالي
لينا : والطارطة هرسها
الوكيل : شنو هرس !!
رانيا: الكارطة
الوكيل : اش كتقول اسي بناني ؟؟
هز محمد راسو وقال : واخا ... الى سمحتي خليني معاها واحد الدقيقة
تنهد الوكيل وناض خرج خلاهم وسد الباب
محمد : ماشي لخاطري تعاملت معاك بديك الطريقة ارانيا ... قلت ليك نهضرو ... ومابغيتيش تعطيني وقت
رانيا: انا راه شكيت بيك لجمعية حقوق المرأة حتى هي ... حساب ليك غتحكرني ... انا ماعندي منخسر غندير شي فيديو نشوهك فيه ..... اصلا كولشي كيعرف التجزآت ديالك وغير غيسمعو سميتك غادي ينشرووه ونفضحك يالاه ... حساب ليك انا حيط قصير اللي جا ينقز عليه !
محمد : اااش وصلنا لهادشي كاامل ... شنو درت ليك كاااع ارانيا ... واخا هانا غلطت معاك فمراكش ... عناذرت ليك شحال من مرة ..
محمد : مغاديش يكفيك الصالير اللي دايرين ليك هنا ... شوفي انا عندي ليك واحد الحل .. البيرو اللي هنا خوا .. اللي كنتي خدامة فيه عقلتي .. بقا فيه غير واحد ... هاداك الواحد يمشي لبلاصتك فمراكش ونتي شدي بلاصتك .. (جمع يديه بزوج) الله يرحم ليك الواليدين ارانيا ... تيقي بيا غير هاد المرة
بقات ساكتة كتفكر واش ترجع للخدمة ولا تبقا فالمدرسة ... الصالير ديال المدرسة مغيكفيهاش... 1500 اللي دايرين ليها ماعندها ما تقضي ليها ... ماشي بحال 5000 درهم ... على الاقل غادي توسع شوية ماتبقاش مزيرة مع المتطلبات ديال بنتها اللي مكيتسالاوش . شافها ساكتة كتفكر ورجع كيرغبها باش تقبل ... تنهدات وقالت
.- شوف اسي بناني . غنرجع حيت حتى انا محتاجة .. راك عارف الوقت مزيرة الله يحسن العوان ... ولاكن الى عاودتي جيتي عندي ولا دار ليا شي واحد شي حاجة هاد المرة غادي نرفع عليكم دعوة فالمحمة وندير ليكم الشوهة ونجمع عليكم جمعية حقوق المرأة و...
قاطعها : الااالللة يهديك الله اااش وصلنا لهاد المواصل. حنا بغينا نصلحو القضية ولا نزييدو نغرقووها ... الى تحرش بيك شي واحد سيفطي ليا غير مسج عطيني السمية و انا غنعرف اش ندير معاه ومغاتشوفيينيش اصلا ...صافي؟ نعلي الشيطان وخلينا نبداو صفحة جديدة
خرجات من السبيطار كتقرقب وطلعات فالطموبيل حالفة حتى تعرف شكون مولات النمرة ... مشات دازت على ختها ومشاو مباشرة لشركة الاتصالات ودخلات عند المسؤوالة مباشرة دورات معاها وجبدات ليها اسم صاحب الرقم
المسؤولة : صاحبة الاسم سميتها سعاد الراضي... من اسفي امدام
اسماء : اييه من اسفي كاع واخا شكرا
خرجات خدات الرقم والعنوان وطلعات فالطموبيل هي وختها وقالت باصرار
- غنمشيو دااابا لأسفي نشوف هاد الكلبة اللي مابان ليها غير راجل مزوج دور بيه
سلمى : راه قالت ليك ماما الى بغيتي تمشي عيطي ليها تمشي معاك
مشات دازت على مها نزلات هازة ماهاز الجبل بالغلض وطلعات اللور حتى هبطات الطموبيل ، وصلو لأسفي لحي شعبي كيقلبو على العنوان حتى لقاوه وطلعو للدار كيدقو هازين السكر والحلوة .. حلات ليهم مرة كبيرة واستغربات من شوفتهم
ام اسماء: حنا الاللة جايين طالبين راغبين فبنتكم سعاد لودي الى قبلتو علينا
ضحكات المرا وقالت : مرحبااا الاللة مرحبااا
ام اسماء: الله يكبر بيك الاللة . . . ايوا راه الولد شاف البنت وعجبااتو ... وبغاها فالحلال الى قبلتو علينا
فالبيت ديال الدار المتواضعة كانت مجبدة بنت فوق الناموسية دفار رجليها طوال وغليضة وكدامها مسخين .. طالقة يدها مصبغاهم بلكحل ولابسة ديباردور مقزب والصدر مدلي والكحول سايح تحت عينيها والحجبان بالطاطواج مطرااسيين خوضر . واقفة على راسها بنت اخرى كتفيقها من النعاس
الاخت : مانعرف بان ليا من لباسهم مرفحيين نوضي نوضي وتعرفي شكون
ناضت سعاد بالزربة باغا تعرف شكون ودخلات للطواليط غسلات وجهها دغيا واخا بقا منفوج وعينيهت مدليين بالسهير ... لبسات واحد البيجامة مزيرة نص كم حتى تفصل اللحم فيها وخرجات عندهم بابتسامة صفراء وبدات تسلم عليهم
الام : سعاد .. جلسي ابنتي هاد الناس راه جاو يدويو فيك
سعاد : مرحبااا
جلسات ودارت رجل على رجل عاد ما بانو الدفار حالتهم شي طويل شي قصير صوفر خلات خواتات اسماء مخلوعيين ومها كتر .. بدات سلمى كتصور بالتخبية وتسيفط لأسماء ودارو الصواب على اساس جايين يخطبو باش يعرفوها عن قرب
شافت اسماء التصاور وحلات فمها حتى للارض وبقات مصدومة كتشوف وختها كتسيفط ليها حتى دقو عليها من الزاج وحلات ليهم مصدومة
جلس فالصالون مهبط راسو غيتفركع .. ناض باه حتى هوا بفوقية خفيفة ديال النعاس لقاه شاد راسو بين يديه
الحاج : اش كاااين اش وااقع فهاد الليل مال راسك سخوون
محمد : صااافي سطوووب ... مايجيش شي وااحد دابا يقول ليا ردها ولا تردك ... هاد الزواج ساليناااه .. حتا لهنا و حبس
الحاجة : غير قول لينا مالكم ... شنو اللي وقع شنو اللي كاين ؟ مالك جاي فهاد الحالة وفهاد الليل
محمد : جاي لداارنا .. جاي باغي نعس الواليدة حيت مكنرتاااشفحتى بلاصة من غير هنا ...
الحاج : مرحباا بيك اولدي الدار دارك ... بررد بررد .. عطيه شي كاس ديال الماء يشرب ويطلع يرتاح
عطاتو مو كاس ديال الماء شرب وناض وقف كينجهج قال .
- الصباح ميعادنا عند القاضي مابقيتش قادر ..
الحاج : يصبح ويفتح ... يصبح ويفتح اويدي طلع تنعس طلع ... راك عياان
طلعات معاه الحاجة حتى للبيت وبقات واقفة عليه حتى نعس وهبطات بحالها .
الصباح صبحات العائلة مجموعة كاملة على دعوة الطلاق اللي رفع محمد .. اسماء جالسة وسط الفيلا فين عايشاه معاه كتبكي ومعاها شيخها وعكوزتها ولوايسها كاملين ومها وخواتاتها الا محمد اللي مكاينش .. المهم اجتماع عائلي مزودج .كيتناقشو فيه وكتعاود ليهم شنو واقع و حطات ليهم حتى التصاور ديالو فاش كان واقف كيهضر معاها تحت المضل والتصاور ديال سعاد اللي كيحساب ليها نفس المرا ووراتهم كولشي وعاودات كولشي من غير المشية ديالها لفاس بوحدها اللي معاوداتهاش
اسماء: راه حاااملة منووو ... واش مابغيتوش تفهمو حاملة منو اعباد الله ... انا مغنطلقش ومغنخرجش من داري هنا غنبقااا.. هوا الى متفرقش عليها غندير شي موصيبة . طرطق فيا عينيه هاااكا وحلف ليا الى عاوت صونيت ليها ميعقلش عليا .. وماعقلش عليا نييت فاش حصلتو ... السيد ماتخلع بحال الناس ... ما خااف ... ما حتى حاجة بحال الى كمت عارفاه كيخوني من شحال هادي وقابلة !!!
الحاج : لا حولة ولا قوة الا بالله ... واش نتي متأكدة باللي حاملة منو هادشي راه ميتقبلوش العقل وماشي ديال محمد نهائيا
ام اسماء: الله اودي يا الحاج الرجال مافيهم تيقة ... واش هوا كيخونها مع مسخة ديال الخلى و حاملة منو من الفوق وزايد باغي يطلق على قبل معفووةنة
الحاج : الااللة .. انا براسي مقابلش هادشي الى كان بصح ... ولاكن حتى نهضرو معاااه ونسمعو منو حتى هوا ... هاد الفضيحة راه منبغيهاش فالعائلة ومانرضا حتى واحد ينعت فيا و فولادي
اسماء : بغيييت غير نعرف انا شنو درت ليه ... فاش ضريتو حتى مشا كيخوني مع وحدة و فآسفي
الحاجة : انا هادشي مابغاش يدخل ليا راسي ... محمد كنعرفو وترابي يدي ... ماايمشيش يخونك ابنتي شي حاجة ماشي هي هاديك
سلمى : اخالتي راه عوت عليها فاش حصلاتو .. يعني أكد ليها شنو كاين .. ماتقتيش سوليه
اسماء: انا مقااادراش نتيق ... مقااادراش اعباد الله ... كما صحة سلام وبيخير حتى تقلبات حيااتنا
فالفيلا دالحاج *______ الحاج بصرامة : كفااااش واش البنت غتكدب عليك !! واش كاين هادشي ولا مكاين
رد محمد معصب كيمشي ويجي : مكاااينش ... والله مكاين ... ماخنتهاااش ومكنعرف حتى وحدة ولا داير شي علاقة اخرى ... مشووهاااني وسط العائلة اش هاد المرااا هادي اااش!! هادي راه مريضة هي اللي خصها تعالج ماشي تعالج الناس
الحاجة : ايوا والتصاور اللي شفنا !
محمد: هاديك اللي كنت واقف معاها كنعرفها .. كان بيناتنا سوء تغاهم وصافي .. لخرى معرمني شفتها .
الحاج : شوف اولدي ... صارحني ... الى بصح غلطتي .. صبح الغلط وراك مادرتي فيها مايصلاح .. اما باش طلق مرتك هادي منقبلهاش ومامبغيش شملك يتشتت ... سمع لباك الله يرضي عليك
تنهد محمد وقال : شوف الحاج ... نتا على راسي وعيني ... ولاكن العيشة معاها راه مرارت . والى لقيت معاها عاد غانخونها بصح ... اللهم تمشي تعيش حياتها ونعيش حياتي قبل ماتوقع شي موصيبة اخرى كبرمن هادي ويمشي فيها شي واحد ضحية ...
الحاجة : الله يرضي عليك الى مانعل الشيطان .. الله يرضي عليك
الحاجة : ايوا زعما نهار اللول بغيتيها وتزوجتو وكنتو مزيااانين..
قاطعها : كنااا الحاجة فاش كانت هي بعقلها .. ولا يمكن كانت كتمتل عليا العقل حتى تزوجنا وتبدلات .. انا مكنبغيش نخيشكم فالمشاكل ديالي ولاكن مللي تخشيتو تخشيتو حسن تعرفو باش تعرفو شكون الضالم من المضلوم .
الايام عند رانيا كطير مكتحسش كاع بيها . . . هانيا فمخها مكاين اللي يصدعها وحتى التحرش نقص مللي رجعات تمشي فطموبيلتها وتجي فيها ... قررات تبيعها حيت صافي تعلمات فيها ودكدكاتها بالمعقول ورجعات كتوقف بيها فالطريق . علقات ليها البلاكة وحطاتها حدا البيرو حتى بان ليها واحد كيقيظ النمرة وخرجات عندو بابتسامة
رانيا: السلام اسيدي ... واش باغي تشري ؟
الشخص: ايه ماكرهناش .. ختي كتقلب تشري طموبيل
رانيا: مرحبا انا مولاتها واش باغي تشوفها؟
الشخص علاش لا
حلات ليه البيبان ودخل كيقلب ويشوف ويفلي وهي كتشرح ليه شنو فيها وشنو مافيهاش حتى وصلو للتمن وقال
- شحال عطاوك فيها ؟
رانيا: عطاوني 5 وبغيت نبيعها ب 5 ونص
الشخص: ولاكن راه واكلة الدق
رانيا: ايوا ايلا صلحتها غنرجع نطلب فيها 6 ... وانا مافيا اللي يصلح.. راه غير شي ضريبات وصافي يتغطاو بالصباغة اما الموطوور نحيلة
الشخص : واخا انا نعيط لختي تجي
رانيا: واخا
وقفات كتهضر معاه على الطموبيل حتى وصلات ختو .. غير شافتها لسقات عليها وبقاو مجابدين على التمن حتى باعتها ليهم .. سدات وقت الغدا الباب ديال الزاج ومشات معاهم تاكتبو وخدات فلوسها دوزاتهم للبكنة وركبات معاهم وصلوها لخدمتها من باب الصواب .. نزلات ومع النزلة لقات السي بناني فالطموبيل واقف كيشوف فيها ... شارت ليهم بيدها ومشا الشاب حيت هوا اللي كاين سايق وغير بوحدو فطموبيل .. وقفات ام السي بناني اللي شاف فيها بنضرة غريبة بحال الى معاجبوش الحال وقالت بابتسامة
محمد : جود ولد خويا . . . مات خويا فاكسيدو هوا ومرتو وبقا جود ربيتو انا ... هوا ماشي ولدي ولاكن راه بحال ولدي وحتى بنتك غتكون بنتي بحال جود
تصدمات رانيا وبقات شحااال وهي كتشووف فيه وقالت
- ولاكن ... كيشبه ليك بزاف !!!
محمد : حيت خويا كيشبه ليا بزااف وجود كيرتاح معايا انا اكثر ... وحتى انا ربيت عليه الكبدة
رانيا: ولاكن واخا هاكاك اسي بناني .. (شدات جبهتها ) الصراحة صدمتيني ... ما .. منقدرش نتزوج بشي واحد مزوج
محمد : انا ااصلا عندي مشاكل مع المرى والدعوة فالمحكمة ديال الطلاق ... باش نشرح ليك كثر ... انا ماجيتش نتزوج بيك غير هاكاك ... انا كنبغيييك ارانيا
زادت الصدمة ديال رانيا وبقات غير ساكتة كتشوف فيه ... هبط راسو وبدا يحك جبهتو ويتنهد
رانيا: كفاش السي بناني كتبغيني ونتا مزوج
محمد : ماعرفتش ... لقيت راسي كنبغيك .. اشنو غندير ماشي بيدي ... كنبغيك بصح ارانيا مكنكدبش عليك ... النعاس مكيبغيش يجيني ... الخدمة متبقيتش مركز فيها عقلي كامل معاك اشنو الحل .. الحل هوا تزوجي بيا
رانيا: ولاكن ...
السي بناني : مكاين ما ولاكن .. غتقبلي تزوجي بيا حيت انا مابقيتش هوا انا .. وكاينة غير نتي بين عينيا ... اللي بغيتيها نجيبها ليك ... واللي مابغيتيهاش نحيدها فخطرة ... كنواعدك مايخصك حتى خير معايا نتي وبنتك وحتى واليديك ... شنو قلتي؟
تنهدات وهي مزالة تحت تأثير الصدمة وبقات يابسة فبلاصتها
*_____ فالدار (الصالون )
رانيا : تصدمت
ناضت مها من بلاصتها وجلساتها حداها وقالت
- وعلااش تصدمي يا لحمقة .... واش بحال هادا كيردوه الناس! واش تسطيتي ربي جاب ليك اللي يسترك وقابل عليك نتي وبنتك ... وغيعجيك بحال الملكة ونتي عاد كتفكري
رانيا: ولاكن راه مزوج !!
الام: ويتزوج نتي مااالك .. الى كنتي غتعيشي مرتاحة يتزوج حتى عشرة ... بلاصت ماتبقاي ضربي تمارة جلسي فدارك .. براجلك ... القفة توصل ليك حتى للدار ... مكاين اللي يتنفخ عليك ... والعااائلة العااائلة كترجع تحتارمك والبلاصة المخيرة يجلسوك فيها يا الحمقة .. واش بغيتي تبقاي ديما كتسمعي فالهضرة !! كل واحد يلوح هضرة من جهة ... مالو الراجل مالو ! برزقو ... وكيطلق ... وكاع لا يطلق اش داك ليها كااع المهم راااجلك
رانيا: ايوا ! الى مشا تزوج عليا حتى انا
الام : وا يتزوج ولا يجلس ... راها طبيبة وبغا يتزوج عليها كااع .. نتي المهم هوا دارك جلسي فيها . راهم مزوجين بربعة وعايشين حسن منا حنا اش ناقصهم !! نتي جاب ليك الله ولد بلادك .. برزقو .. وغتعيشي حداانا وبنتك معاك وكتشرطي!! مالهم هادوك اللي مشاو للخليج على 3 ديال الضرات وتزوجو بيهم مافيهم مايتشاف ومخليين ولادهم هنا ... مالهم اش ناقصهم راهم كيجيو بحال الاميرات ... ونتي بنتك غتعيش معاك اش بغيتي
رانيا: ولاكن راه باها غيطيرها ليا
الام : اش سيق لباها لخبااار ... شكون غيقولها ليك كاااع ... حمدي الله جاب ليك ربي راجل باغيك وبخيرو وخميرو ... اشووووفي والله لا خليتك ضيعيييه سمعتي .. مكاين لا ضرة لا زمرة مغنتبعكش فهبالك سمعتي
جلسات كتفكر فدارها بوحدها وتنهد الليل كامل ..
فالصباح صبحات عند المحامية كتسول على قضية بنتها مع باها
رانيا: انا دابا الى تزوجت .. و طليقي عرف بزواجي يقدر ياخد ليا البنت ...مابغيتش نضيع بنتي
المحامية: شوفي ... عندك حل واحد وشوية صعيب... القانون كيقول ... الى تزوجتي وداز عام و 24 ساعة ... ماعند طليقك مايدير ديك الساعة ومغياخدش ليك بنت
رانيا: كفاش زعما ؟
المحامية: الى داز عام وراجللك مطالبش ببنتو حيت تزوجتي .. ماعندو مايقضي ديك الساعة... اولا مكينفقش عليها . تانيا دااز عام كامل وهوا عارفك مزوجة ومطالبش بيها ... والى طالب بيها منبعد عام و 24 ساعة المحكمة فهاد الحالة ماعندها مادير ليه وميقدرش ياخد ليك بنتك هادي من الناحية القانونية
رانيا: ولاكن ميمكنش يبغي ... الى ساق ليا الخبار من النهار اللول غيجي يبغي ياخدها
المحامية: خبي زواجك حتى يدوز عام ديك الساعة اللي بغا يعرف يعرف تكوني ضمنتي بنتك من الناحية القانونية كما كيديرو كاع العيالات ... هادي هي الطريقة اللي كيديرو كاع العيالات اللي خايفين ولادهم يمشيو من بين يديهم .
رانيا : وزعما كتصدق ؟
المحامية: طبعا واش حنا كنلعبو هنا .. سولي اي وحدة مطلقة وتزوجات غادي تقول ليك نفس الشىء ... المهم هوا مخاصوش يعرفك مزوجة حتى يدور العام . هادا هوا القانون... والقاضي براسو عادي يقولليه واش حتى داز العام عاد فقتي وجاي باغي بنتك ! وفهاد العام كيبان واش البنت عايشة مزيان ولالا... الى مطالبش بيها راه ماعندو ميصور منك
رانيا: واخا شكرا. بزاف على الارشادات
ناضت خرجات من مكتب المحامية ومشات لدارهم لقات باها جالس كيتناقش مع مها وشدوها بيناتهم بجوج كيقنعوها ويديرو ليها الراس العشية كاملة ...وحتى دارها مابقاوش كيخليوها تمشي ليها وتجلس فيها بوحدها .
الحاجة : ويل الشيطان على بغيتي تزوج !
الحاج : واش بصح كتهضر ولا كتفلا
محمد : مكنتفلاش ... غنتزوج وحدا اخرى
الحاجة : شكون هادي اللي باغي تزوج ؟
ربع الحاج يديه وهوا جالس فوق ناموسيتو مصدوم وقال
- هادشي علاش جمعتينا هنا !! ... باغي تزوج ! شكون هادي ؟ شنو كدير ومنين هي
بقا محمد ساكت كيلوي فلاسنو ويشوفهم وقال
- واحد السيدة خدامة عندي ... بنت الناس ... عجباتني ... وبغيت نتزوج بيها فين كاين المشكل
الحاج : نعل الشيطان اولدي وسير رد مراتك ... هادشي اللي كدير فيه ماشي هوا هاداك
محمد : انا الحاج راه كنت باغي نتزوج بلا نقول لحد ... ولاكن مجاتش نتزوج بلا منعلمكم ... ماشي كنتشاور راه كنعلم ... انا غادي نتزوج .. الى بغيتو تمشي معايا يالاه .. مابغيتوش ماغنبززش عليكم
الحاجة : تلفات بالصدمة ) و .. و لاكن حنا مكنعرفوش هاد البنت
محمد : انا كنعرفها ...وباغي نتزوج بيها
الحاج : هي اسماء عندها الحق فكاع داكشي اللي قالت
.محمد : لا ... هادي واحد البنت خدامة عندي وكنعرفها مزيان وعارف المعدن ديالها كيداير .... وبغيت نتزوج بيها من حقي.. (تيليفون كيصوني)
طل لقا رانيا كتصوني ... ابتاسم وخرج من البيت رد الباب موراه وفتح الخط
محمد : الو رانيا
رانيا: احم... راني ... فكرت وو... ولاكن حتى طلق بعدا
.ابتاسم بسعادة وقال : صافي غنجي نخطبك فهاد اليوماين
رانيا: لا حتى طلق بعدا
محمد : نتي بعيييدة على المشاكل ديالي اش بينك وبينهم .. انا مكدبتش عليك ... قلت ليك راني كنطلق هي كنطلق
رانيا: حسن خلي حتى طلق وعاد نتزوجو
محمد : نديرو العقد بعدا ... خير البر عاجله
رانيا: الى درنا العقد راه صافي تزوجنا
محمد : انا باغي نتزوج بيك فأقرب وقت ارانيا شنو الفرق الى تزوجنا دابا ولا من بعد ... اش دخل طلاقي انا فزواجنا ... مهم عطيني النمرة ديال باباك نهضر معاه ويكون خير
رانيا: وحاجة اخرى ... مابغيت حتى واحد يعرف باللي راني مزوجة ... على قبل بنتي حتى يدور العام ... هاكا قالت ليا المحامية ومن بعد نشرح ليك ... المهم حتى واحد ميعرف وصافي
رجع دخل عند واليديه كيسوط بقرار جديد ووقف بهدوء وقال
- المهم... زواجي غيبقا غير بيناتنا حتى واحد ميعرف .. وحتى خوتي مابغيتهمش يعرفو حيت كل واحد كيسرسر لمرتو ..
الحاجة : واش فيها مالك كتسرق
محمد : لا مابغيت حتى واحد يعرف من غيركم ... نتوما واليديا .. ومكنخبي عليكم حتى حاجة
باس راسهم بجوج وهاكا سالا معاهم كما ديما حتى كيطيح ليهم اليد مع الرجل غير بالخاطر وكيسايروه فأي حاجة كتخص العائلة .
بدات رانيا كتوجد للخطوبة وترعد بحال الى اول مرة غتخطب ... كتفتف وترعد وكدور فبلاصتها وتشوف شنو موجود وشنو ما واجدش . سمعات الدقان ومشات تخبات فالكوزينة كترعد على مها .. فتح باها الباب واستقبل السي بناني بمشمون ديال الورد والحلوى و واليديه معاه لابسين البلدي .. دخلو جلسو فالصالون ومشات رانيا عند لينا جلساتها حدا خوها فالبيسي وقالت
- عطيها تلعب باش مدخلش دوخنا ... خليها تلعب شوية هنا يالاه لعبي هاهوا عطاك
خلات بنتها ودخلات عندهم لابسة قندورة وردية مطروزة ولايحة الشال على راسها والبلغة ومكياج خفيف والسر طايح عليها ... سلمات ومشات جلسات حدا مها حشمانة .. بقات العكوزة غير كتشوف فيها بابتسامة وشارت ليها بيدها
- اجي ابنتي جلسي هنا حدانا .. اجي
ناضت رانيا جلسات بينها وبين محمد اللي من الساعة اللي دخل فيها والضحكة مافرقاتش شفاهه وعينيه كيبريو بقات رانيا ساكتة حشمانة غير كتبتاسم .. حطات مها الخواتم فالصينية وركبو الخواتم وشربو الحليب والتمر وبدا كيناقشو موضوع العقد وهوا ينطق محمد
فرحاانة حيت غتزوج بواحد معمر ليها العين .. اما القلب مزال مامتأكداش منو حيت كولشي جاها على غفلة غصها حتى تستوعب بعدا .. الوقت كامل وهي مرفوعة مامتيقاش راسها غتزوج ...حاسة براسها كتجري فزواج شي وحدة اخرى .
وجد ليها باها الاوراق وتافق مع السي بناني على النهار ووجد ليها الدار اللي غتعيش فيها بلا متعب بلا ما دير مجهود وقررو فيها نشاء الله يديرو العقد . وفعلا جمعات رانيا حوايجها وحوايج بنتها ولحق عليها السي بناني نهار العقد ركبات معاه هي و والدييها .. ركب باها لقدام وهي مع مها اللور ومشاو مباشرة للدار الجديدة عبارة على دوبليكس بسميتها فعمارة من العمرات الراقية اللي كانت كتبع فيهم ..
كانت الحاجة والخدامة موجدة العشا ورحبات بيهم وجلسات رانيا فصالون من صالونات الدار الراقية بالجلابة بيضاء والحنة فيديها وجلسات مها حداها وباها والحاج والحاجة والعدول حتى هما . كتبو كتابهم وبدات مها تزغرت فرحاانة ... مشاو العدول من بعدا العشا ناض محمد يوصل واليديها للدار وبقات الحاجة مستغربة ل لينا اللي بقات معاهم
ابتاسمات وقالت لرانيا : شكون هاد البنية وشا بنت ختك ؟؟؟
جنازة حفل زواج الجزء الثالث
محتوى القصة
التنقل بين الأجزاء