جنازة حفل زواج الجزء الرابع

من تأليف Ghazal trust
2019

محتوى القصة

رواية جنازة حفل زواج

ابتاسمات وقالت لرانيا : شكون هاد البنية وشا بنت ختك ؟؟؟
ابتاسمات رانيا وشداتها عندها وقالت
- لا ماعنديش ختي ... هادي بنتي ههه
ضربات الحاجة فخادها : اوييييلي بنتك!!!!!°° كيفااااش بنتك على نتينا ماشي عزباااااا

كحزات رانيا اللور مخلوعة من ردت فعلها وقالت 

- اييه الحاجة بنتي وانا ولدتها .. راه متشي بنت الزنقة راني تزوجت على سنة الله ورسوله وطلقت بالبنية علاش نتي مافراسكش!

وقفات الحاجة مصدومة : اويييلي على مطلقاااا!!! الحااااج ... الحاااااج اجي تشمع ولدك اش دار ... اش تشوف هاد الفضييييحاااااا 

وقفات رانيا شادة بنتها قدامها وقالت : اشمن فضيحة الحاجة مالي جيت من الزنقة !! علاش واش مكنتيش عارفة !!!

الحاج : اش واقع مالكم ياك لاباس

الحاجة : اجييي تشووووف اجي تشووووف ولدك مول العقل ... اجي تشوف جاب مرى مطلقة وعندها بنت وحنا يحساب لينا عمرها تزوجات !!! ... اجي تشووووف ولدك اللي خلاااا مراااتو كيطلق فيها ومشا تزوج بوحدة وااالدة كاااااع يربي ليها فولادها وهوا مزال عمرو ولد 

الحاج : كيفاش هادشي انا راه مافهمت والو 

الحاجة : بدات كترعد ) طلع ليا السكر ... طلع ليا السكر غادي نموووت ... تزوج بيها وهي مطلقة وببنتها 

الحاج : ببنتها !!! ... واش هاد البنت بنتك ؟ 

رانيا: بنتي علاش السي لحاج فيها شي عيب !! 

الحاج : وعلاااش ماقلتوعاش لينا فاللول خلبتونا حتى ضربنا العقد ... (شد فراسو )

رانيا: انا يحساب ليا راكم عارفين 

دخل عليهم محمد علي فديك الاثناء لابس جبادور خفيفة والبلغة لقا الروينة ومو طايحة كتلهت فوق الفوطوي ... تخلع وقبل ميهضر دخل فيه باه طول وعرض ماخلا ليه غير اللي نساه اما مو ماقدراتش تهضر .. وحتى رانيا سكتات وبعدات بنتها ومشات وقفات فالكوزينة بقات كتسمع غير الهضرة

محمد : اشنو فيها الحاج الى كانت مطلقة ووالدة واش ماشي منحقها تعاود تزوج وتستاقر!!! واكثر وحدة خصها تستاقر هي المطلقة اللي عندها الاولاد فين كاين المشكل 

الحاج : بغضب* نتا ضحكتي علييينا ... ديتينا خطبنا ليك و زوجناك وحنا معارفين اصلها من فصلها ... فضحتينا وبغيتي ضحك فينا الناس .. هادشي علاش سمحتي فمرتك باش تزوج بهادي نعلة الله عليك 

رد محمد بصرامة : انا بغيييتها ... انا باااغيها واش حراام ؟ لا وااااش حرام الى كان حرااام نسيفطها ... درت شي حاجة مكتدراش باش تلعني بحال هاكا !! ... انا درت فيها حسنة ... وبغيتها وبغيت نتزوج بيها وببنتها وماشي انا اللي طلقت اسماء ولا سمحت فيها هي اللي درات علاش ماشي ضلمتها . . . نتا اكتر واحد كتعرفني الواليد مكنبغيش الضلم وكما ربيت جود غنربي بنتها حتى هي 

الحاجة : حسبي الله.. ونعم الوكيل فيها ... حسبي الله .. ونعم الوكيل ... طلقها ... طلقهااا ولا غنمووت ليك هنا

بقات كتسمع فصوتهم كيتزاد شوية طلات لقاتهم هازين الحاجة كيجريو بيها .. تخلعات وبقات بوحدها فالدار شادة بنتها وجالسة كتبكي ولينا كتشوف فيها وتسكتها 

لينا : ماما واش درت شي جاحة ؟؟ .. ماما واش درت البسالة ؟

عنقاتها رانيا بقوة وبدات تبكي : مادرتي والو ابنتي مادرتي وااالو... مامكتابش لينا نفرحو انا ونتي مامكتابش ابنتي ... هاد النهار اللي خاصنا نفرحو هاحنا كنبكيو 

لينا : بصوت طفولي ) وعلاش اماما ياك هاد النهار لعرس ياكي ... علاش كنبكيو !!!

تنهدات رانيا كتنخصص وقالت : ماعرفناه عرس ولا كنازة .. كنبكيو على الزهر اللي عندنا انا ونتي فهاد فهاد الدنيا ابنتي 

شبعات بكا الليلة كاملة ... فعوض ماضحك وتفرح بالاستقرار ديالها اخيرا .. كتبكي وتشكي .. وعلامن على بنتها جيت ماعندهاش علامن تشكي من غيرها . بجوجهم ماعندهمش من غير بعضياتهم ... ماحلاتش ليها حتى الجلسة فديك الدار واخا فالاتات والديكور كترخي الاعصاب .. ولاكن اعصاب رانيا باش يترخاو خاصهم الوقت . 

تكات راسها وبكات حتى بردات وداها النعاس هي وبنتها . ماحلتت عينيها حتى حسات بشي يد كتحركها وهي تنوض مخلوعة باقا بالجلابة ديالها لقات محمد جالس القرفصاء كيشوف فيها بابتسامة 

محمد : غير انا ماتخلعيش ... مالكي منعستيش فبيتك 

حدشافت فيه بعينيها حومر ومنفوخين بكترة البكا وقالت 

- كي بقات الحاجة ؟؟

محمد : سافا الحمد ديناها للدار... طلع ليها الضغط شوية وصافي .. كولشي مزيان 

رانيا: بصوت منخفض ) علاش ماقلتيش ليها عندي بنت .. حشمت ماعرفتش باش تبليت فاش قلتها ليها 

شاف فلينا اللي غارقة فالنعاس كتشخر عوجة وقال 

- كل واحد كيعرف عائلتو ارانيا ... وانا عارف عائلتي وعارف كفاش خاصني نتعامل معاهم ... هاهما تقبلوها دابا .. هاكا حسن (غمزها وهز لينا ) اريها نديها للبيت تنعس ... بدلي عليك ورتاحي ونساي شنو وقع ... نتي بعيدة على هادشي خليني مني ليهم

رانيا: ولاكن كان عليك تقولها ليهم غيحساب ليهم انا خطفتك منهم 

شاف فيها بنضرات حب وقال : الاللة خطفتيني وخديتني ومن بعد اللي بغا يفهمها عوجة خليه ... كلت ليك نتي بعيدة عليهم حتى واحد مغيوصلك 

رانيا: والى مشا كولشي ساق الخبار !!! هادشي راه ماشي هوا هااك 

محمد : حتى واحد مغيعرف تيقي بيا ... واليديا وانا عارف ليهم ... شوية وغيبردو ويولفو غير خوي راسك وحتى حاجة مغتوقع تيقي بيا 

رانيا: انا راه ماناقصني مشاكل السي بناني مافيا اللي يطيح فشي مشكل مقاداش عليه 

عقد حجبانو بابتسامة خفيفة وقال : واش مغتحيديش هاد الشي بناني !!

قالت بتوثر : راني مقادراش نستوعب مزالة كنحسبك المدير ديالي وعقلي مزالة مرسخة فيه الصورة ديالك كمدير 

ضحك وقال: ودابا متبقيتش المدير ديالك امدام رانيا راه رجعت راجلك شنو غتبقاي تشوفيني ديما مدير!!

تنهدات وقالت : دخت 

محمد : دابا تحيد هاد الدوخة ....سيري بدلي حوايجك ورتاحي وحتى انا عندي شغل برا غنقضيه ونرجع دغيا 

ابتاسمات بمجاملة وقالت : لالا غير راحتك السي ... المهم غير خود راحتك بلا منزرب راسك 

مشا كيحرك راسو يمين يسار ويضحك وطلع حط لينا وهبط لابس قميجة بيضاء وسروال زرق لقاها مزالة جالسة دايرة يدها على خدها وتخمم وخوا يطرطق صبعانو فيقها 

محمد : برااكة من قوة التفكير ... هانتي بوووحدك هنا حتى واحد مايغوصلك خودي راحتك 

ناضت وقفات كتفرك يديها مع بعضياتهم وقالت بابتسامة 

- شكرا 
استغرب وابتاسم فنفس الوقت وقال وهوا كيقرب منها 

- شكرا ! ... لالا خاصك تحيدي هادشي 

بعدات حاللة عينيها فيه وقالت بارتباك 

- وو .. ووو . واخا نشاء الله 

شافها كترعد غير بوحدها وبعد قبل ميوصل عندها وقال مع لمسة فنيفها

- هانا راجع ... يالاه بسلامة

خرج وسد الباب عاد ارتاحت وتنفسات الصعداء وهزات عينيها كتشوف فالدار وتسرح فعينيها بإعجاب ... كيدااااايرة الدار بقا ليها شوية وتهضر وتقول انا زوينة انا فننة كنحمق .. الفصالة اخر مكاين والسقف حتى هوا اخر مكاين فالتصاميم ... الفراش بقا ليه شوية ينطق .. الالوان متناسقة مع بعضياتها وفتوحة .. والدار حتى هي مفوهة ومحلولة والبالكونات دايرين بيها والتريات مدلين ... التلفازة قدها قداش وسط الدار .. بدات كدور ودوز يدها بابتسامة وكتسارا وتشوف على خاطرها .. كولشي باقي منفوخ ورطب وجديد وريحت الجديد منتاشرة .. دازت للكوزينة وبدات تشوف وتقلب البلاكارات .. كولشي هوا هاداك والكوزينة كتفتح الشهية للشهويات .. كبيرة ولون فاتح والطبيلة بالكراسة والطابلة قدو قداش فالحيط .. اما الحمامات ماعليهم هضرة ... جوج حمامات عصرية من داكشي الرفيع .. طلعات مع الدروج الخشبية وكأنها كتمشي فالخوى مافهماتش دوك الخشبات علاياش واقفين .. طلعات لفوق كدور فالبيوت ... لقات بيت الاطفال وفاللون الوردي مفرش ومقاد لبنتها بالبيرو ديال والخزانة ومونيكات وبنتها ناعسة فوق الناموسية .. غير شافتها وهي طلع ليها واحد الفرحة والابتسامة من القلب .. اكيد فاش غتفيق غتبغي تسطا ليها بالفرحة ... كاع داكشي اللي كيبغيو الوليدات داير بيها .. ردات الباب وهي تحل باب اخر ... غير طلات طرب قلبها بحال المدفع .. اييه بيت النعاس ديالها ... ولاكن ماااشي ديالها بوحدها هه.. الديكور حصري ياسلام والناموسية ملمطة وليزور رطب فالموف بمخادو .. الزربية فالارض والطبلو فالحيط والطبلة بمرايتها بيضاء جديدة محطوطة فوقها شمعة .. الدريسينغ فالقنت بوحدو مخشي دتير بالبلاكارات ريحت الخشب مزالة كتعطعط منو خاوي كيسفر والزربية والفوطوي الوسط والمرايا فالقنت كبيرة ... وفالباب ديالو نيت فالدخلة باب اخر بلا باب واسع ... دخلات لقات المرايات ولافابو وحيط ديال الزاج مقابل معاهم . دفعاتو للجنب وهي تصدم لقات جاكوزي كبييير ازرق مضلم خاوي شلا بوطونوات فيه ومقابل معاه الرشاشات معزولين بالزاج .. حلات فمها ماتيقاتش راسها واش غتعيش فداك الخير كامل ... اخر حاجة توقعاتها هي دار بحال هادي واخا عمرها حلمات بيها ... ومالها ماشي بشر ! ربي عطاها الله يعطي لكل واحد مايتمنا .. غير الدورة الشرفية اللي دارت فالدار نساتها فالهم والغم والمشاكل كاملة وفتحات ليها النفس على شي تدويشة فاعلة تاركة


بدات تبتاسم بوحدها كأنها فشي حلمة زوييينة وتقول " ياربي منفيقش ... يا ربي مانفيقش " هادشي علاش الانسان مقاتل .. كيقرا عمرو مكامل باش يخدم ويوصل لهادشي اللي عطاها الله ... تكدب وتقول مافرحاتش ! فرحاات حتا برقو عينيها وخرجات كدور وتشوف موراها مزال ماشبعاتش عينيها من الشوفة .. لقات الباليزة ديالها واقفة حدا الدريسينغ وهزاتها طلقاتعا فالارض وحلاتها ، حتى هي شرات الحوايج جداد بحال اي عروسة... الدهاز كامل شراتو كأنها اول مرة تزوج .. جبدات البينوار جديد ابيض مطروز وبانطوفتو والفوطة والملابس الداخيلة فالابيض ومشات للدوش هازة لاكروسة دورات بيها مساحيقها ومشات للجاكوزي دخلات فيه وبدات تخربق فيه وتقرا شنو مكتوب فالازرار.. حلفات حتى تخدمو وخداماتو بدا كيتعرد بلا ماء خلعها ونقزات بغات تهرب حتى بان ليها الماء كيتدفق راسو الوسط عاد تنفسات 

رانيا: راني كنت غندير شي شوهة ولا يطير بيا هاد العجب . 

دخلات الوسط تسرحات عاجبها الحال ونساااات راسها غاطسة بشعرها واستحلاتها وسط الرغوة كتغسل شعرها بشوية وتعاود حتى سمعات صوت محمد جاي مند الريسينك قري 

محمد : رانياااا؟؟؟

تخلعات وناضت وقفات كتقطر : هاانا جاااايا بلاتي 

محمد : نتي هنا ... صافي خليك 

تقطع صوتو لاكن خافت يتحل عليها الباب وهي مرقدة فيه كي الحوتة ومشات للرشاشة بدات تشلل وتعطر ... ماتعرف تكون شي حاجة على غفلة .. يلقاها مولاي الشطان مقردنة ! 

سالات وخرجات لبسات البينوار حد الركبة والحنيكات حمرين والبانطوفة ولوات شعرها فالفوطة وبدات ترش فواحد القرعة فيها معطر الجلد وخرجات كتلوي فالحزام بالزربة


خرجات من الحمام للبيت لقاتو عاطيها بالضهر ملوي عليه الفوطة من لتحت وكيمسح شعرو ويشوف فتيليفونو ... شافتو واقف قدامها والضهر عريض والكتاف واقفين والخصر منحوت وعاد ملابس وهي ترجع اللور بالزربة للحمام وربعات يديها مخلوعة كتسوط .. 

محمد : راانيا ... 

سمعاتو جاي جيهتها وهي دخل للدوش دردات الباب بالوربة وقالت كتفتف

- ه ه هانا جاياااا عفاك شوف واش لينا فاقت 

قطع الصوت .. حسات بيه مشا وخرجات من الدوش كتجري جرات الباليزة كاملة مع الارض وهي محلولة للدريسينك تبدل فالحمام وهي تسمعو 

محمد : مزالة ناعسة 

هزات عينها لقاتو قدامها .. على الاقل لابس شورط .. ولاكن واخا هاكاك داخت فالصدر والفخاد ..السيد متريني .. فصالة الرجال نيشان . دورات وجهها بالزربة كتفتف وسط الباليزة وهوا يقرب منها بابتسامة وحط يدو حلى ضهرها وهي محنية 

- محمد : بالصحة 

وقفات شافت فيه بارتباك وقالت : الله يعطيك الصحة ... تكون واقيلا لينا فاقت غنمشي نشوف
.بغات دوز وهوا يردها كيضحك 

محمد : واخلي لينا دابا راها ناعسة 

شد فيها من خصرها حسات بالصهد والعرق بغا يخرج وبدات ترعد من لداخل 

رانيا: غير نبدل حوايجي صافي 

قرب كتر حتى لسقات مع البلاكار وقال

- بلاش ... 

جرها عندو ولمس لدرقبتها بيدو وحيد ليها الفوطة على راسها وطلق ليها شعرها 

محمد : توحشت نشوف شعرك 

رانيا: هه شكرا 

ضحك وقال : فين خليتي السي بناني؟ (دوز يدو على خدها ) ها السي بناني حداك دابا 

ابتاسمات بمجاملة كدور فعينيها وتميل فراسها وهوا كيدور بيها ويقرب .. طبع قبلة على عنقها بشوية حتى تشوات وحسات بالعرق كيخرج ... من ديما كانت كطلب اللع يصبرها من بعد الطلاق باش مطيحش فالحرام وتغلبها الغريزة والرغبة .. فكل مرة كانت كتحس براسها محتاجة كانت كدعي الله يبعد عليها الشياطين .. لاكن هاد المرة فاقو عليها الرغبات المكبوتة اللي كانت كتكبت واستحلات لمسات السي بناني وهوا كيقبل هنا وهنا وتجاوبات معاه بسهولة ويدات تبادل هي وياه القبل .. سخن عليها وبدا يحل فالبينوار وهزها وسط النهار الكهار للناموسية وبدا فقبل ساخنة الهتات كيخرجو مع اهات .. يالاه بغا ينوي .وهما يسمعو 

لينا : ماااما ماااما


هزات رانيا راسها كتلهت وضهرها غيتقسم بالتقل وقالت 

- بنتي فاقت بلاتي 

هز راسو شاف فيها عينيه دابلين بحال الى يالاه فاق من النعاس وقال 

-قوليها بلاتي شوية 

رانيا : لالا غتمشي طيح من الدروج خطار ... واخاااا ماما هانا جااايا 

زيرها وقال : فين غتمشي دابا! 

رانيا: غطييح من الدروج ... بلاتي نشوفها ونرجع 

محمد : تنهد) ففف... متعطليش انا كنتسناك 

حركات راسها شادة الضحكة وناضت بالزربة جرات البينوار دوراتو عليها ومشات بلا كتشوف موراها 

محمد : ماتعطليش 

خرجات وردات الباب لقات لينا كدور فلكولوار بوحدها باعت تبكي وهي تجري عندها هزاتها باستها وعنقاتها 

رانيا: هانا ماما معاك مالكي تخلعتي ... ماشفتيش بيتك الجديد كي داير ... اجي نورييه ليك 

داتها لبيتها كدورها بابتسامة : شوفي بيتك ... شوفي ابنتي شحال زوييين ... شفتي كي داير 

لينا : ديالي!!!

رانيا: ديالك ... غنكتب ليك هنا فهاد الحيط .. ليييناااا هههه شوفي حال ديال الالعاب عندك . شفتي ... شوفي شوفي على طموبيل شحال كبيرة وزوينة .. ركبي ركبي 

ركباتها كدور بيها وتوريها ولينا كضحك عاجبها الحال .. هبطاتها للكوزينة وحلات التلاجة لقات فيها غير شي حاجة خفيفة .. فيضات الحليب ودارت ليها فطور بالزربة وجلسات معاها كتاكل حتى بان ليها محمد جاي بالشورط كيجر بانطوفة مصغر عينيه كيرمش فالارض ويحك رقبتو .. وقف قدامها باغي يضحك وقال

.- ايوا فينك .

قالت والضحكة كتمشي وتجي فشفايفها حشمانة : كندير غير لفطور لينا 

ربع يديه كيشوف فيها بابتسامة وقال : خليتني كنتسناك .. واخا عليييك واخا 

رانيا : غلباتها الضحكة ) راه ماعندي كي ندير 

قرب من الطاولة العالية علاش كيفطرو فوق كراسة عاليين حمرين وتكا ببيديه كيشوف عن قرب فلينا وقال 

- نتي تفطري وانا لا 

مدات ليه المعلقة وقالت : هاك 

محمد : انا بغيت ماماك 

دورات رانيا راسها للجمب مزنكة من بعد ماداقت القبولات والنضرات حتى مابقاتش قادرة تشوف فيه مباشرة .. فكل مرة تشوف فيه كتبدا تفكر داكشي اللي فبالو وبالها 

لينا : لا .. ماما ديالي 

محمد : ديااالك ولاكن خرجتي لينا فالاجتماع وحنا مخشعين 

لينا : انتيماان!!! 

محمد : ااايه ههه ... 

قاطعاتو رانيا : نوجد ليك الفطور الس

شاف فيها معجب وهي تقلبها بزربة شاظة الضحكة وقالت 

- امحمد علي صافي!!! (هزات حاجبها )

محمد : مافيا اللي يفطر ... غير عطيها هي تفطر ... خليها تفطر كتعرف تاكل راسها 

لينا : اه كااانعلف 

محمد : نتي وااعرة نتي ... (جر رانيا ) اجي خليها تعتامد على راسها 

رانيا: اوييلي لا خطاار نخليها بوحدها طيح ولا توقع ليها شي حاجة ... الدار جديدة عليها غتبدات تنبش وتكتاشف 

تنهد وقال : علاش ماخليتيهاش لماماك 

شافت فيه رانيا شوفة ناقصة وقالت بنبرة بحال الى تقلقات وهي مهبطة راسها كتوكل بنتها 

- مولفاني بنتي متقدرش تعيش بلا بيا .. الى تقلات عليك غير قولها الدنيا هانيا 

حل عينيه وقال: لا والله مامتقلة عليا بلعكس علاش فهمتيها هاكا!! 

رانيا: لا رد 

دار من جيهتها ووقف حداها كيلعب فشعرها وقال 

- قلت ليك النهار اللول بجوج بيكم على عيني و راسي ... وراها بحال بنتي . ماتفمينيش غلط الكبيدة ديالي 

باسها فعنقها وهي تبعد مخلوعة 
.- اوييلي كتشووف فينا مامولفااش بهادشي 

محمد : هانا يالاه .. وشوفي مي ديري ربطيني انا منضمنش ليك راسي خليها تولف علينا 

رانيا: بخجل) وصاافي دابا حشوومة 

قلدها : حشوومااا .. (تنهد .. ؛وشاف فالتلاجة) خاصنا نتقداو الزين ديالي 

رانيا : واخا 

محمد : انا غنبدل .. وبدلي حوايجك حتى نتي نخرجو نتقداو للدار باش نردك ونمشي للشركة دغيا .. يالاه 

رانيا: واخا


فالسيارو جالسة حداه لابسة الجلابة ديالها ديال الزواج والفولار باج رطب على راسها وراميا جنابو على كتافها وبلغة ونضاضر ديال الشمس وهوا حداها كيسوك بالدجين وتيشورط كحلة ونضاضر كوحل ولينا اللور جالسة .. وصلو للسوبر ودخل معاها شاد ليها فيديها كيتقداو وهي كدور وتهز بكل حرية .. احساس لا متيل له كتحس بيه لاول مرة .. بلا مضرب حساب للفلوس.. اللي عجباتها كتهزها ومحمد موراها كيشوف الحلوى مع لينا .. تقدات جميع مستلزمات الدار ورجعات معاه فالطموبيل وهوا شاد ليها فيدها .. شكون قال غتجلس حداه شي نهار بصفتها مراتو . حطها فقلب الدار وباسها من حنكها وتحنا عند لينا هزها كيضحط معاها وباسها وخرج مشا 

فالدار لابسة بيجامة خفيفة فرحانة بدارها ومقاداها فرحة ترتب فيها وتعاد وخا مرتبة وتستف فالكوزينة وطالعة نازلة غادية جايا والتلفازة مشعولة .. دخلات للكوزينة كتوجد فالشهيوات وتحط العشية كاملة حتى طاح الليل وعشات بنتها على بكري وجلسات تلعب معاها فالبيت حتى عيات وطاحت نعسات ورتاحت رانيا اخيرا . خدات دوش خفيف وتعطرات حيت عارفة راسها تابعها التابع .. لبسات سوميج خفيفة برونز وطلقات شعرها الاسود الداكن على راحتو ودارت مكياج خفيف ومشات جلسات فالصالوت الرومي قدام التلفزة دايرة رجل على رجل كتفرج والعشا مبررع محطوط كتسناه فيه يدخل وعقلها معاه حتى سمعات الساروت كيدور وهي دير ابتسامة خفيفة ورجعات جمعاتها فاش دخل عندها بابتسامة وتقدم كيشوف فالطبلة . لاحضات حتى نضاراتو ليها وكيفاش شاف فيها وجلس حداها دار يدو ورا ضهرها وباسها فعنقها 

محمد : نتي وجدتي هادشي كامل 

قالت بابتسامة : وشكون وجدو ! 

محمد : تبارك الله عليه ... حادمة على هاد الحساب! 

رانيا: ههه 

محمد تكا على ضهرو : اااحح ... عندك واحد الراحة فهاد الدار . مكاينش بحالها فشي بلاصة ... يرتاح فيها الواحد واخا يكون هاز الجبال ديال الهم على ضهرو 

رانيا: الصمت 
.تلفت كيتأمل فيها وفعنقها وصدرهت الباين بنضرات اعجاب وباتسامة وقال مع غميزة 

- لينا نعسات ؟

رانيا: امم .. تعشا 

جرها عندو وغطس فعنقها بقبلة وقال 

- اجي عندي توحشتك 

بدا هوا وياها فالقبل هاك بالاك وبشراسة وناض هزها طلعها للبيت لفوق وسد الباب. 

صبح الحال وصبحات فلكوزينة كالعادة مع بنتها ناشطة ضاحكة وعنقها كامل طبايع لابسة بينوار قصير كتفطر .. جمعات الطبلة اللي فطر فيها هوا وبدات دور مرتااحة ورااشقة ليها وتهضر مع امها وتعاود ليها الاحوال ... رجع محمد كيرجع للدار كل ليلة ... الضحكة مكتغيبش على فمو ... ورجع كيتكا ليها وسط الدار فالارض ويتفرج فالكورة بلاصة ما يمشي ليها للقهوة .. يدور يدور ويهرها من شي جهة ومقابلها غير هي كل مرة يوشوش ليها فودنها فرحاان ... حتى لواحد النهار كانت مفرشة ليه بونجة خفيفة فالارض والمخدة ومسرح فيها كيتفرج فالتلفازة وهوا يصوني الباب ... جات بالزربة مستغربة وقالت 

- شكون كيصوني؟؟!

ناض وقف بالبيجامة وقال : انا غنشوف شكون ... غير سيري ماتبقايش بلاسوميج يشوفك شي حد


ناض حل الباب لقا مو وباه .. شافه وتفاجأ وقال بابتسامة 

- اهلااا .. مرحباااا..مرحبااا 

دخلو هازين مناخرفهم وبدا يشوفو فالدار وريحة الطياب جايا من الكوزينة عمرهم شموها عندو فحياتهم حتى شموها فهاد الدار . جلسو فالصالون وشافو الفراش فوق الزربية عرفاتو مو كان متكي فيها كما كيعجبو ديما يتكا فالارض . 

الحاج : كي غادي مع الخدمة ... وهاد الزواج 

ابتاسم محمد وهوا كيبان عليه مرتاح وقال 

- الحمد لله هانتوما كتشوفو 

الحاجة : ايوا مالك مابقيتي كطل علينا ... ياكما حتى حنا نسيتينا 

محمد : حاشا الحاجة واش ننساكم ...الله اودي 

جات رانيا بابتسامة لابسة قميص اخضر خفيف وشال على راسها بابتسامة مترددة وبدات تسلم عليهم .. باست للحاجة يدها وباست للحاج يدو وهما عاقدين حجبانهم كيشوفو فيها .. اما محمد عجبو الحال وكيشوف فيها بافتخار بحال الى كيقول ليهم ها مراتي اللي مابغيتوهاش طلعات بنت الناس 

جلسات حدا محمد بابتسامة وقالت 

- الحاجة لاباس ؟ كي بقيتي شوية ديما كنسول عليك محمد 

زفرات الحاجة وقالت : الحمد لله . الى وقعات ليا شي حاجة راه غير بالسبة ديالو 

الحاج : سمعو .. حنا جينا على واحد الهضرة اخرااا سمعتووو .. غنقولها ماحدكم مجموعين . . . هاد الزواج مقابلينش عليه نهااائيا ومغنقبلوووش عليه ومااراضيينش 

تنهد محمد وقال : ياك هضرنا فهادشي الحاج .. هادي مسؤووليتي وانا نتحملها 

الحاجة : حتا حنا منحمليينها معاكم ومقاادين عليها ... قلتي نسكتو مانقولو لحد ها حنا سكتنا ... والى بغيتي ارضا وراحت البال .. تنازل على الدعوة وخلي اسماء حتى هي وماديرش الفرق بيناتهم وجود محتاج ليها و ولفها وهي اللي كتعرف ليه بووحدها والدري كبر كيعرف غيير اسماء 

تقاد محمد فالجلسة وقال : هادي حيااتي انا حر فيها الواليدة الله يهديكم 

رانيا تصدمات بقات غير ساكتة كتشوف ماتدخلات ما قالت حتى كلمة 

الحاج : شووف اولدي .. التعدد حللو الله .. ولاكن ماطلقش مرتك باش تزوج وحدة اخرى.. انا نقولها ليك قدامها ... يا اما ترد مرتك ولا نضرب ليك الطرر سالينا 

محمد : الحاااج الله يهديكك

الحاج : الله يهديك نتا على مرتك وولد خوك ... راه تشتات ليه العائلة .. بغيتي تشتت ليه حتى هادي !! مافكرتيش فيه !! بزز باش ولف واش بغيتي تعقد الولد يكبر مريض ... فكرتي غير فراسك 

ناضت رانيا مغرغرة طلعات للبيت وجرات بنتها وجلسات كتبكي وقت طويل حتى دخل عليها محمد .. هزات عينها شافت فيه قرات فيهم الجواب وقالت قبل مينطق 

- صاافي ... صافي من حقهم .. انا اللي غلطت .. من اللول ماكنتش نقبل حتى تسالي الاجرائات ديالك 

جرها من يدها يتنهد ونوضها ضمها بقوة وحتى هي عنقاتو وبدات كتبكي ولينا واقفة كتشوف فيهم بجوج 

تنهد وقال كيدوز يدو على ضهرها : حتى نتي مرتي هادي هي الحقيقة وكنبغيك .. منقدرش من بعد ما حربت العيشة معاك نخليك ارانيا ... سمعتي احبيبة ديالي


بحال كاع الايام كدوز الروتين ديالها اليومي ... من نهار جا عندها الحاج الحاجة عمروشي واحد اخر وصلها .. جالسة فدارها معززة مكرمة وكل ليلة كيجي يبات معاها ويفطر معاها عاد يمشي للخدمة ... 

حلات عينيها الصباح ودارت لقاتو معنقها وبدات كدوز يدها على شعرو الاسود حتى حل عينيه 

محمد : صباح نور حبيبة ديالي 

رانيا: صباح الخير ... ماعندك مايدار ؟؟ شفتك صبحتي ناعس

محمد : عندييي ميدار ... انا هوا اللي عمرك تلقايه مسالي 

ضحكات وهبطات راسها عندو وقالت 

- ايوا مالك صبحتي ناعس 

محمد : بيييخير معاك ههه 

رانيا: هههه الله يمسخك 

عنقها بيدو وقال : اجي ... شفتك مابقيتيش كتحشمي مني بحال اللول !!

هزات كتفها وقالت : وعلاش غنحمش يااه ! راجلي ... ولالا !

باسها فنيفها : رااجلك ميحدهاش الطبيب الغزالة ديالي ونتي مرتي ميحيدكش ليا شي واحد 

ابتاسمات كتعوج وقالت : اممم ... زعما وعما كتبغيني!!

باسها من شفايفها وهوا متكي على ضهرو وهي ومتكية عليه وقال

- شنو بان ليك نتي ؟ كنبغيك ولا مكنبغيكش 

رانيا: مااااانعرف خههه

محمد : وافكري مزياان غتعرفي واش كنبغيك ولالا ... واش بزاف ولا شوية 

رانيا: ههه ماعرفتش ... قول ليا . نسولك وجاوبني 

تنهد وقال : الى كانت شي حاجة زوينة مرحبا .. الى كانت شي حاجة خايبة بلااااش خلي ليا المورال طالع 

رانيا: والاكن جاوبني .. 

تنهد بابتسامة وقال : واخا الاللة هانا كنسمعك

رانيا: رجعتي كتعطل بالليل ..ياكما طلعت ليك فراسك 

جرها منراسها وضربها بجبهتو وقال بجدية

- من جدك كتهضري !! انا كل ليلة كنجي نبات عندك هنا وكنصبح ناعس بزز باش كنقدر نمشي ونتي كتقولي ليا طلعت ليك فراسك ! 

رانيا: زعمااا.. حيت كتجي معطل وصافي 

محمد : حيت كنكون مشغوول 

رانيا: زعما مكتمشيش لدارك لخرا !

محمد: مكنمشيش .. عاد باغي نمشي نشوف جود توحشتو 

حطات يدها على صدرو كدوزها وقالت 

- جيبو معاك الى بغا 

محمد : بغيتي نجيبو ؟

رانيا: اه 

محمد : نشاء الله علاش لا 

هبط وجهها عندو بابتسامة وباسها وحتى هي غرقات فيه بوسان وبداو يتمايلو فالفراش ويجبدو فبعضياتهم حتى سنهو صوت لينا وبعدو وجوههم 

رانيا: لينا هههه

محمد : لينا يا لينا الحرب اليومية معاك 

رانيا : نوض دوش يالاه انا غنوجد ليك الحمام 

محمد : خاصنا نسافرو شوية انا ونتي نبدلو الجو 

رانيا: فين غنمشيو؟

محمد : فين ما عجبك المهم انا باغي نسافر غنتمشي معايا 

رانيا : فين غتمشي؟؟

محمد: المانيا ... وغندوز لبلجيكا .. عندي شي شغل 

رانيا: اممم ههه زعما غتديني معاك واخا عندك الشغل 

جرها كيضحك ويعض شفاهو وقال

- واخا عندي الشغل . نسالي شغلي ونمشيو من تما فين بغيتي 

رانيا: نشاء الله ... يالاه نوض احبيب ديالي باش نفطرو كاملين


مشا للدوش دوش وهبط لابس حوايجو كيسد فكمام القميجة ورانيا موراه تابعاه بالساعة دياليد والريحة .. تلفت عندها بحال العادة وهي مقزبة بسوميج دو نوي ركبات ليه الساعة فاليد وبدات ترش ليه الريحة 

رانيا: انا مغنبقاش نخلي الشيفور هوا يدي بنتي ليكول غنديها راسي 

قال كيمسح على وجهه بالريحة : صبري حتى نجيب ليك شي طوموبيل وديها 

رانيا: راه مكنرتاحش خصوصا الشيفور جديد 

محمد : واش واجدة دابا ؟ 

رانيا: وااجدة . 

محمد : جيبيها نوصلها 

رانيا: لا غير سير غيشوفك شي واحد يوقعو لينا مشاكل ... انا غنمشي معاها وندوز نجلس مع ماما هاد العشية 

محمد : خلي شيفور يوصلكم .. غنلقا شي وقيتة نديك تشوفي الطموبيلات .

رانيا: نشاء الله ههه اجي مغتفطرش؟

محمد: حطي ليا قهوتي وصافي 

رانيا: صايبت ليك شي حليوات تبقا تشربهم مع القهوة فنييين ههه 

ضحك وهوا متبعها بعينيه غادية كطير ورجات حطات ليه البلاطو وبنتو تابعها 

رانيا: اجي ... فطرتي مغتجلسيش تما تصدعيه 

محمد : خليها .. اجي ابنتي جلسي 

رانيا: غدوخك خليها فطر على خاطرك 

محمد : الاللة خلي البنت تحرك كي بغات مالكي معاها 

لينا : نبقا مع بابا ميميت 

جرها عندو جلسها حداه وقال : ها باباك ميميت حتى هوا بغي يفطر معاك


خرج محمد مشا للخدمة فرحان .. المورال طالع وراشقة ليه حتى مع الناس اللي خدامين عندو .. اما رانيا دارت داكشي اللي قالت ورجعات بحالها فلعشية لدارها مرتاحة فراسها . 

فالطريق وهوا راجع بالليل عند رانيا جاه اتصال فالطموبيل وفتح الخط 

محمد : الو وي 

اسماء : الو علي فينك ؟

محمد : قلت ليك راه مسافر 

اسماء : ورجعتي من السفر علاش كتكدب 

محمد : من بعد شنو بغيتي؟ 

اسماء : لا فامي غيتعشاو معانا اليوم كاملين 

محمد : شكون هاد كاميلن ؟ 

اسماء: لافامي ديالك وديالي 

محمد : واخا يالاه انا شوية ونجي 

قطع وتاصل برانيا : الو حبيبة سافا 

رانيا: الحمد الله راك جاي؟

محمد : غنتعطل شوية داكشي علاش عيطت باش متسناينيش للعشا 

رانيا : واش كولشي مزيان ؟ ياكما كاينة شي حاجة ؟

محمد : لا مكاين والو انا غنجي شوية معطل وصافي 

رانيا: واخا نشاء الله .. يالاه تهلا فراسك مغنعسشش حتى تجي 

محمد : نعسي حتى نجي ونفيقك اكبيدة يالاه بيزو 

رانيا: يالاه بسلامة الله يسهل الامور 

قطع وعقد حجبانو غادي بزز للفيلا .. وصل لقا الضواو شاعلين والهراج لداخل .. لقا العائلة كاملة مجموعة وبدا كيرحب ويضحك مع كولشي .. جات عندو اسماء قدام لافامي فرحانة كتبين باللي المياه رجعات لمجاريها وسلمات عليك بالوجه وشدات ليه فيديو.. اما هوا بقا عقلو مع جود كيسول عليه ويقلب بعينيه حتى شافو جود وجا كيدردك ترما عليه وهزو محمد كيضحك معاه وجلس بيه وسط الصالون وحداه اسماء

اسماء: كي داز السفر مزيان 

هز عينيه بتتاقل عرف واليديه غيخنزرو فيه ورجع شاف فجود كيضحك معاه 

- مزيان الحمد لله 

اسماء : متقلتيش ليا كنتي مسافر ! 

الحاجة : ايوا راك عارفة ابنتي السفر كيجيه على غفلة .. ومزيان اللي رجع يحضر لعرس بنت خوه 

اسماء: نشاء الله الحاجة ماكرهناش شي عراسية فاعلة تاركة 

اخت اسماء: غير المشاكل والقنط والهم ماكرهناش 

الحاج : مشاءوالله غنديرو لبنتي هدى شي عرس فاعل تارك فهاظ العائلة 

ضحكات هدى وقالت : ههه نشاءالله ابا سيدي 

جلس كيتجمع معاهم وتعشاو وبقا حتى خوات الدار وناض خرج مع خوه شد الطريق عند رانيا نيشان لقاها ناعسة غارقة فالنعاس والعشا محطوط مغطي فوق الطبلة .. طفا التيليفونات ومشا دوش ودخل حداها عنقها ونعس . 

نفس الروتين الصباحي ... صبح غادي للخدمة وقبل مينسا تلقت عندها وقال

- اه ..رانيا .. تفكرت .. بنت خويا عندها العرس نشاء الله غدا ... غنمشي . تمشي ؟

تكات على الحيط كتشوف فيه وقالت 

- وشنو غنقول ليهم ؟ شكون انا 

محمد : غنهضر مع الواليدة تديك معاها الى بغيتي 

رانيا: ماكرهتش نتعرف على عائلتك 

محمد : المهم الى بغيتي تمشي غنهضر مع الواليدة .
رانيا: خاصني ندي لينا عند ماما ... ونوجد ... قلتيها ليا معطل

محمد : لبارح كنت غنقولها ليك ولقيتك ناعسة 
رانيا: صافي ... انا نوجد راسي 

محمد : الى بغيتي شي حاجة راه لا كراط كيشي عندك
رانيا : صافي واخا 

باسها وخرج خلاها كطير وتنزل بوحدها باغا تمشي للعرس وتشوف حتى وجه اسماء على الاقل يبرد قلبها من جيهتها وتنسا نهار حتاقراتها فالمستشفا .. على الاقل توقف حداها وتشوف راسها فمقامها 

بدات توجد وتعاود وتقلب فكوكل على كفاش تلبس وشنو تناسق ... رجع عندها فلعشية وبات الليل كامل كيعاود ليها على عائلتو وكفاش دايرين وخبرها باللي مو وافقات دوز عليها بالطموبيل وفرحات حيت بدات كتقرب من العكوزة شوية بشوية . 

وصلات الساعة ديال العرس .. سبقها محمد خلاها فالدار حتى وصلات الطموبيل اللي فيها مو وشي خواتاتو ونزلات عندهم رانيا لابسة تكشيطة زيتية فااتحة ديال الموبرة مخزانية بالطرز والعقيق والسباط عالي وليزاكسيسوار خفاف والشال مرخوف على عنقها والمكياج بارد خفيف مع الرموش والعكر والروايح كتعطعط . حلات باب الطموبيل حشمانة ولقات السلام وطلعات اللور حدا الحاجة سلمات عليها وعلى ختو اللي كتشوف فيها بابتسامة مستغربة معرفاتها وسدات الباب بأدب . 

جلسات وسط القاعة مع الناس فطبلة ديال عائلة العريس بوحدها وبعدات على العائلة كاملة وتهنات باغا تشوف غير محمد وتبقا حاضياه .. شوية بانت ليها اسماء كتجر فالتكشيطة زرقا وسط القاعة والورد مدلي ماجلسات كل مرة تمشي تجلس فالطبلة شوية وتنوض تمشي لطبلة اخرى .. حسات بيد تحطات على كتفها وريحة مألوفة وتلفتات لقات محمد واقف حداها ومحني مقاد الشعر والكوستيم والكلاص

محمد : الزين ... شرفتينا 

بدات كضحك وقالت : فين كنتي ... فين بدلتي خلعتيني 

محمد : مشيت للدار بدلت وجيت كنت مشعول العشية كاملة ... عنداك تنوضي من بلاصتك الى بغيتي شي حاجة شيري ليا ولا صوني ليا فتيليفون 

رانيا: وصافي حيد ههه غيشوفك شي واحد 

محمد : احح ماكرهتش نبوسك .. ولاكن انا معاك هنا تا تبغي تمشي 

دورات وجهها كضحك ومشا قدامها كيفرنس عاطيها بالضهر تعرض ليه واحد من العائلة كيضحك معاه وتعرضات ليه حتى اسماء كضحك بصوت وخشات يدها فيدو وحطات اليد لهرى على صدرو وبدات تهضر معاه وتفرنس وجاراه جيهت طبلة ديال العائلة .. اما رانيا غير شافت داك المنضر سخن ليها الوجه وتزنكات وبظا قلبها كيضرب بسرعة .. تلفت شاف فيها وهوا كيحاول يتفادا تصرفات اسماء لقاها وجهها حمر وصفر وكتشوفيه بطريقة كتوحي للغيرة وباغا طرطق فبلاصتها وباغا تبكي وحابساها


تزيرات رانيا وناضت مابقاتش قادرة تزيد تجلس دقيقة وهي كتشوف اسماء كتصور معاها فبوزات قدام ناس وتشد فيه بحال الى عمر شي مشكل مكان . وقفات برا القاعة كترعد والدموع واقفين فعينيها وبدات تقلب بعينيها على الشيفور .. يالاع طلعات طلعات فالطموبيل وسدات الباب تحل عليها فالبلاصة ونزلها كيجر فيها كتبكي 

رانيا: انا ندمت اللي جيت .. جيت باغا نعرف عائلتك صدقت كنتفرج فيك نتا ومراتك 

محمد : حتى نتي مرتي .. نزلي والله تا تزلي 

رانيا: مغاانمشيييش طلق مني نرجع لداري 

محمد : نتي اللي بغيتي نتزوجو فالسر حتى واحد ميعرف ... جاتك قاصحة دابا !!

رانيا: دفعاتو ) طلق مني سير عند مراتك وضحك حتى تسالي ضحكك واجي تبعني ديك الساعة 

خرجها من الطموبيل بزز وحاضي معاها طيح بالطالون وبدا كيدافع هوا وياها حتى شافهم خوه وجا كيجري 

الاخ: مالكم شنو واقع امحمد طلق من المرا 

محمد : بجدية ) حيد هادشي شغلي انا وانا قاد بيه 

رانيا: طلق مني فين باغي تديني 

محمد : هانتي غتشوفي فين غنديك 

جرها بزز شافت راسها داخلة لللقاعة وخوه موراهم تابعهم مافاعم والو .. مسحات دموعها بالزربة قدام الناس وخرجات عينيها مافهمات والو حتى لقات راسها وسط القاعة قدام كولشي وهوا شاد ليها فيدها وكيرد السلام على الناس 

رانيا: بصوت منخفض) شنو كدير غتشوهنا 

محمد : شووو زيدي وسكتي 

تلفتات اسماء اللي جالسة فالطبلة مع العائلة وكولشي رد البال مافهمو والو وهوا غادي برانيا حتى للمنصة جلسها وجلس حداها بابتسامة وقال لبنت خوه 

- هدى ... الله يكمل بلخير 

هدى : شكرا احبيبو 

ابتاسمات رانيا باحراج وقالت : مبروك عليك احبيبة 

ابتاسمات هدى وقالت باستغراب : شكرا 

محمد : هدى ... هادي رانيا مرتي 

حشمات رانيا وتصدمات هدى بقات غير حاللة فمها وكضحك بزز .. تصور هوا وياها قدام كولشي وشد ليها فيدها نزلها كتفتف بالطالون وشاد ليها فيدها بزز .. وقفاتو عمتو بابتسامة باغا تعرف شنو كاين و حتى هوا ابتاسم وقال 

محمد : رانيا مراتي 

تصدمات العمة وبقات مخرجة عينيها وقالت دايخة : مرحبا ابنتي .. مرحبا بيك ابنتي 

رانيا: ربي يخليك 

تم غادي بيها جيهت الطبلة بجدية وهي مرعودة كتجر فالتكشيطة وللي وقفو كيقول ليه مراتي حتى وصلها للطبلة حدا واليديه اللي مخلوعين وجلسها وجلس حداها .. انا اسماء طلعات لواحد البيت غبرات كتغوت ومعاها خواتاتها 

اسماء: شكووون هاااديك ... انا بحالالى شفتها فشي بلاصة ... اويلي شكون هادي شاد فيها وغادي جاي بيها 
.الخواتات حتى هما تصدمو كنر منها وكيسولو نفس السؤوال حتى طلعات وحدة من خواتاتو عندهم وجهها صفر وقالت 

- اويييلي محمد تزوج واش فراسكم !!!!


تقلب لعرس لكنازة بين العائلة واخا ماخسرش بالفهوم ديال لعرس ضاع للعروسة حيت كاين اللي عارف وكاين الي معارفش وتالف وسط العرس .. اما اللي عرف تصدم وتسوطا وجلس بقا غير حاضيهم كيشوف فيهم مامتييقش بللي مزوج الثانية . والكنازة لكبيرة هي اللي وقعات فالبيت حيت كلشي اللي قريب وعرف طلع عند اسماء لقاوها طايحة فالارض سخفانة وخواتاتها كيغوتو بغاو يخسرو العرس وغضبو حيدو حوايجهم كاع وماعاودوش هبطو للقاعة .. تدخلات الحاجة والحاج بخيط ابيض كيبردو السوق وهبط الحاج عند محمد وتحنا ليه على ودنو 

الحاج : طلع القيامة نايضة لفوق سير فك لحريرة اللي درتي 

ناض وقف وقال : رانيا ... يالاه تمشي بحالك 

ناضت معاوداتش الهضرة مشات للطموبيل حساب ليها غيركب لاكن سد عليها الباب وقال من النافدة

- سيري انا شوية ونجي موراك 

سكتات ماقالت والو ومشات الطموبيل داتها انا هوا تنفس وجمع النفس حيت غيواجه عائلة على قدها وطلع للبيت لفوق يالاه دخل هجمات عليه مها وخواتاتها بغاو يصربو ونزلو عليه بالسبان يا الشمااتة يا لحمااار يا الفاعل ياااالتارك وحتى اسماء ناضت ليه هجمات عليه كتغوت ماخلات فالمعيور غير اللي نسات والخوت كيفكو . 

محمد : هاديك مرتي وجبتهت بحالها بحال اسماء ... واللي ماعجبوش الحال يضرب راسو مع الحيط 

اسماء : بهستيرية ) شنووووة درت لييييك علاااااش درتي فيااا هادشي... علااااااش .. علاااااش تزوجتي عليااااا انا موافقتش ليك ومغنوافقش ليك المووت ولا الموااافقة وحرااام عليك هاد الزواااج 

محمد : ماشي نتي اللي تحرمي عليا وتحللي .. انا وياك وصلنا للطلاق... الدعوة وصلاتك وتقابلنا ونتي مابغيتيش الطلاق معكسة .. ماشي بززز مني نخضع ليك ولا لغيرك سمعتي .. وباش ماتمشيش غاالطة .. انا تزوجت فاش كنتي نتي كطلقي ماعندي ماندير بموافاقتك اصلا ولا موافقة شي واحد اخر ... عيييت منك ا اسمااااء عيييت ومابقيتش باغي نشوووفك 

مها : بزاااااف علييييك ... بزااااف عليك ولهلا يحيييييك بنتي حساااابك شاااايطة سيد سيييدك يتمنااااها نتا اللي كيتك قبلات عليك شكووون نتا فملك الله الشماااتة 

محمد : جيتيني مرا انا نهرس ليك الفم على هاد الكلمة ... الشماااتة وهوا اللي يجلس حادر الراس لبنتك .. مااعرفتش انا الراجل ولا هي ... بغينا نسافرو حتى تبت هي النهار ... بغينا نولدو ! لا حتى تشوف مستقبالخا ودير الكلينيك ديالها باش سيادتها ماتجلسش فالدار شهوور تربي ... السيدة بغات حتى تلون حياتها كاااملة وتشوفها زوينة عاد تولد وعاد ضحك لينا حنا . ماحدها ماوصلاتش لشنو بغات حتى واحد ميهضر معاها ولا يقول ليها شي كلمة ... هادشي شوبة من بزاااف .. فاش تعصب تعرس البلاكار... تهرس الكوزينة ... هرسات تلفااازة ... مانهضروووش معاها اللي هضر معاها تفركع عليه ... قطعات عليا القميجة مامرة ماجوج .. مافعرفتش واش كتقلب تشوف الطوب ديالي ولا شنو ... واش كتبغي تبرد بداكشي اللي كدير ولا كفاش! واش باغاني نضربها !!! مافهمتش انا هاظ السيدة كتشوفني صابر لهبالها كتزييد طلع .. بدات بالمعاان كملاتها بحوايجي مشات كتقطعهم واش سافا با ولا ... طبيبة جاهلة .. بنادم مقاريش وواعي عليها بقات فالقراية والجهل معشعش ليها فالبصلة السيسائية .


تفركع عليهم محمد علي واخا مافشش قلبو مزيان ولا الرمانة طرطقها وخلاهم غينتفو شعرهم .. ماخلاو فيه غير اللي نساو .. كولشي باغي يوقفو يعرف منو اش كاين وكفاش تزوج .. كي طرا وجراااا !! اويلي تزوج كااع !! فين عرفها وفين شافها وفوقاش تزوجو ! ماوقف لحتا واحد وهبط هز جود وزاد خلفة مشا بحالو .. دخل هاز جود للدار وطلع ليه الدم مابغاش يرخي حجبانو .. لقاها جالسة فالبينوار والبنطوفة كتسناه حتى دخل وهي تنوض كتجري 

رانيا: شنو وقع ؟ ياكما تقلب لعرس . ياك قلت ليك ما تهضرش امحمد هانتا غادي تفرشني 

محمد : شكووون اللي كتعرف بات لينا اصلا ! ومنين غيعرفوه وهما اصلا مكيعرفوكش وبعاااد على عائلتك ... واصلا مغيديهاش واخا يجي ليها .. وبان ليا هاداك بعدا مقاد على مسؤولية .. كن بغا بنتو على الاقل يسول فيها اودي غير تهناي 

رانيا : خايفة راه منقدرش نعيش بلا بنتي 

محمد : واش انا معاك ونتي خايفة ... قلت ليك مغاديش يجي وحتى الى جا مغيديهاش .. واصلا ميقدرش على المسؤولية ... ها جود جبتو يبقا معانا الى مكانش عندك مشكل 

رانيا: ماعندي حتى مشكل بلعكس .. على الله يولف عليا شوية
بغات تشد جود لاكم مابغاش يمشي عندها لسق فمحمد .. تنهد محمد وقال بأسى

- تهلاي فيه وسايسي معاه ... راه يتيم ارانيا تاخدي فالاجر .. وانا والله حتى نتهلا فيك غير تهلاي فيه 

تعجبات من كلامو وقالت : اوييلي بلا متوصي راه عندي بنتي وحاسة بيه ...بلا متخاف عليه كون هاني 

محمد : غنطلع نرتاح شوية ...جود ؟؟ نعسو ؟

حرك جود راسو 

رانيا: طلع ترتاح . انا جايا 

طلع محمد لبيتو هاز جود وتيليفون كيصوني وكل مرة يقطع فاللخر طفاه فخطرا وتكا ففراشو كيحك لجود فشعرو وهوا مجبد حداه غير بسليب .. طلعات رانيا وحطات ليهم بلاطو حداهم ومدات كاس لمحمد

رانيا: هاك هاد الكاس ديال اللويزة شربو حسن يهدن ليك اعصابك .... وهادا كاس ديال الحليب بمازهر لجود .. كنعطيه لينا ديما قبل ماتنعس


جالسة فالطموبيل كترعد وعينيها على باب الشركة هي ومها وختها 

اسماء : هاحنا غنشوفو الكلبة شكون وفين ساكنة ليوووم ... نشوف هاد ال**** باش بدلني 

الام : واقيلا مكاينش فالشركة يكون معاها 

اسماء : لا طموبيلتو هنا مغنتحركووش حتى يخرج 

الاخت : ولد الحرااام ... انا الى بعدا الى مشيت حتى شديتها نااااكلها والله حتى ناكلها 

بقاو عاسيين من بعيد حتى خرج داير نضاضر الشمس .. زادت اسماء بغات طرطق وبدات تبكي فاش شافتو ... 

اسماء: اويييلي راااجلي راااجلي ... وا راااجلي اعباد الله هادا اللي قدام وغادي يضيع من بين يدي الدنيا كنشوفها كحلة .

تحركات سيارتو وتحركات سيارة اسماء حتى هي .. بقات تابعاع من بعيد وطبعا بسيارة ديال صاحبتها حمرا صغيرة مكيعرفهاش محمد .. مشات وراه حتى للعمارة فين ساكن وتبعاتو هي ومها وختها حسي مسي ... طلع فالمصعد وطلعو هما عازمين يعرفو الدار .. بقاو طالعين ورادين الباب يتصادفو معاه وطالقين ودنيهم على صوت الباب فين غيتخل واشمن طاج حتى دخل للدار وسد وراه الباب وطلعو هما وقفو قدامها كيوشوشو بشوية 

الام دايرة يدها على جنبها : بلاتي نسمع اش كيقولو 

الاخت : لا غيسمعونا نتفضحو ... 

اسماء : بالخلعة ) تخباااو تخباااو واقيلا خارج 

سمعو صوتو كيهضر وهوا كيقرب من الباب وطلعو مع الدروج تخباو قاطعين الحس .. فتح الباب كيهضر وقال 

- وااش صاافي هادشي اللي خصك ؟

ردات عليه من لداخل : صاافي ومتعطلش 

تبعو جود : بابا نمشي معااااك عاافاك 

لسقات فيه لينا : بابا ميميت حتى انا نمشي 

جود : لا بابا انا 

لينا : بابا انااااا اااااهنننهننننن

محمد : وصاافي يالاه خرجو قدااامي يدير شي واحد فيكم البسالة منعاودش نخرجو ... والى دابزتو ليا فالزنقة قدام الناس غنرجع ونخليك مايبقا لا بابا لا جدي 

ضربات اسماء فخادها كتقرس فراسها وتندب فصمت ومها وجهها حكر وختها كتحلف فصمت حتى هبط محمد فالاسانسو وتأكدو انه خرج وهما ينزلو بغات اسماء تلاح على الباب وجراتها مها 
- جلسي بلاتي غتعرفنا ماتبغيش تحل .. جلسي انا غندق 

كانت رانيا لداخل فلكوزينة سمعات الصونيت ومشات للباب طلات من العوينة لقات مرى واقفة بوحدها 

رانيا: شكوون؟؟؟

- انا جارتك ابنتي غير حلي 

رانيا : واخا ختي بلاتي


لبسات بينوار ودارت شال على راسها وهبطات حلات الباب لقات المرة قدامها يالاه شافت فيها وهي تبان اسماء وختها طارو عليها .. بالزربة بغات ترد الباب ودفعوه .. هي دفع وهما يدفعو وتغوت 

-رانيا : واااااكواااااااااك اعباااااد الله ... وااااااااااعغغغغغغغو . عتقووووووو الروووووووح اعباااااااد الله 

بدات تغوت بالجهد لاكن غلبو عليها ودفعو الباب حتى لسق مع الحيد وطارت عليها الام من شعرها هبطاتها لتحت حتى رجعات كتبان ليه غير الارض وبداو عليها بالعصا بتلاثة والعضان وهي كتغوت .. الركيل والقميش والنتيق بحال الى كيريشو دجاجة 

الام : عطييييها الكرش... عطييييها الى كلن بنادم تما يهبط عطيييها 

رانيا: واااااااااغغغغغغووو .. عتقووونييي .. عتقووووني 

بقات شادة غير فشعرها وتغوت وكدفع وتلقا الضربات من كل جهة .. مشات ليها اسماء للوجه قمشاتو ليها 

- الكلباااااا ... خطااافت الرجال ..خطاااافت الرجال 

خرجو الجيران يطلو لقاو مناتفة وتدخلو كيفكو .. لقات رانيا شعر مها جراتو بواحد اليد هبطاتها من الجنب وكتهز راسها وتنهج وهما كيعاودو يهبطوها ويعطيوها ليدها باش طلق وعضوها حتى طلقات منو وفكوهم الناس .. بقا الشعر ديالها فيد ام اسماء وطاحت ليهم سخفات فالارض . واخا فكوها الناس بدات كترما عليها كل وحدة من جهة والناس كيجروهم وشوهوها فالعمارة بالغوات وحتى العمارات اللي مقابلين خرجو كيطلو وناضت الروينة فالعمارة .. بغات اسماء و تابعيها يهبطو وهما يشدهم واحد الراجل حبسهم 

- مغاااتحركووووش من هناااا .. السيبة هادي ... مغتحركووزو حتى يجيو البوليس 

الجار لاخر: شد لخرى بغات تهرب .. شدها انا نعيط لمول الدار يجي 

اسماء: بالغوات ) طلااااق مني.. ماتشدش فيااااا غنسيفطك ادللحبس ... طلق منيبي 

الام : شنقات عليه ) شدخل اصل مك فييينا ... اشد دخل جد بوووووك الكلب 

تشادو مع الجيران ونوضوها و بقاو هابطين كيدافعو ويسبو حتى وصلو لتحت وهربو كيجريو للطموبيل ومشاو . 

عيط واحد الجار لمحمد اللي كان فالرومبوان واقف باغي يدوز خبرو بالمشكل وداز كيطير وسط الرومبوان قلب الدورة ورجع باش غادي باش دار دخل للعمارة وطل فالدروج بلا ميحس ... طالع وكيلقا الناس والجيران حدا باب دارو مجموعين على رانيا المقموشة وشعرها فالسماء والبانطوفات كل وحدة فجهة كيشربوها فالماء ويفيقوها .. حالتها حالة ترفسات وكلات ماكلا الطبل نهار العيد والشعر شايب فيدها لاسق بين صبعانها .. ترما عليها محمد مخلوع كيترعد ويشول شنو واقع والناس كيعاودو ليه ... رجع وجهه حمر وهو رانيا كيجري بيها للطموبيل وتبعاتو واحد الجارة وراجلها موراه فالطموبيل داو رانيا للسبيطار وبقاو الجيران حاضيين ليه الولاد .. دخلو رانيا فديك الحالة للكلينيك غايبة ومحمد كيمشي ويجس حداها ويعيط فتيليفون يدو على جنبو كيسوط 

محمد : لالالالا غاتجيي دااااابا انا واقف كنتسنا وجيب اللي يشهد ويصور هادشي .. انا هنا كنتسنا 

تلفت عند الفرملية والطبيب وقال : لا حتى واحد ميقيسها هاكاك غتخليوها البوليس جايين دابا .. خليها كما هي


وصل وكيل الملك معاه البوليس وخرج محمد تعرض ليهم كيسوط كي التور دخلهم عندها وهي فشلانة كتبكي وصبعها عوج مهرس كتغوت بيه ووجها مقموش بالدم وشنايفها منفوخين كيسيلو بالدم و وحالتها حالة .. صوروها هاكاك ومشاو خلاوها كتعالج اما محمد عيط لمها ومو وباه قاليهم على شنو وقع جاو للكلينيك كيجريو وخرج هوا مع وكيل الملك يغرق الشقف لأسماء وعائلتها . 

داز نص نهار ورانيا ناعسة .. فيقها وجع الدم وحلات عينيها كتوجع لقات مها والشيخ والعكوزة وحتى خواتات محمد تما باغيين يعرفوها ويحضرو لشنو واقع ماشي يغبرو كأنه ماوقع والو . 

ناضت بغات تجلس شادة فكرشها وهي تلقا الدم سايح .. تخلعات حساب ليها الدم .. لاكن فاش وقفات ومشات للطواليط شافت الطروفة بحال اللحم كيهبطو ويطيحو . عمرها شافت داك المنضر وبدات تغوت وتعيط للفرمليات جاو كيجري نوضوها وردوها لبلاصتها وجات الطبيبة تفحص لقات حالة اجهاض . وبدات تهضر مع الطبيب فالغرفة على الحالة.. دخل فديك الاثناء محمد لقاهم كيهضرو اجهاض ما اجهاض وبدا يسول

محمد : شنو كاين ؟ سمعت شي حاجة 

الطبيب: المدام جهضات السي بناني 

محمد : جهضات !!! علاش هي كانت حاملة بعدا ؟

الطبيبة: عندها حالة اجهاض. . . هي براسها ماعرفاتش حساب ليها ليغيكل .. ولاكن الحقيقة المدام كانت حاملة 

غمض عينيه كيعضر فيهم وقال : اجهاض .. ايه اجهاض واخا .. اررا ليا دتك الضوسي دابا 

الطبيب : تقدر تصبر واحد الدقيقة ..
قاطعو : لالا واقف عليه ... اراه ليا دابا قبل ما يطلع الضوسي ديالها .. 

عطاه الطبيب الوراق كاملة وخرج كيسوط باغي يطرطق لقا باه ومو وخوتو واقفين وشاف فيهم عينيه حومر ووقفات عليه الحاجة كترغب

- الله يرضي عليك اوليدي راه الصدع كيوقع فالعائلات 

محمد : الصدع كيوقع فالعائلات ... وراااه طيحااات ليا ولدي ... الى ماسيفطت ديلمها للحبس جنايات راني ولد الكلاب ماشي ولدكم نتوما ... انا طيح ليا ولدي وضرب ليا مرتي وتهجم عليا وسط داااري .... هاااا الورااااق كلشي عندي بغيتيها تبعيها للحبس وماتوقفييييش قداااامي مانشوووفكش دابا 

الحاجة : ااااوليدي 

جراتها ختو : وصااافي قالك بعدي منو بعدي منو ماكتشوفيهش كي داير كاتسناي يضربك !!! علاااش تهجم عليهم عندو الحق واش السيبة السيدة بسيكوباط خلييه يدطبق معاها القانون 

الحاجة : واااسكتيناااا كتزيدي تشعلييه 

محمد : سييييري لدااارك وااسيري لدااارك ماتبقااايش هنااا .

الاخ : انا غنمشي معاك .. عنداك تمشي عندها تخرج على راسك 

محمد : كيينهج ) انا غنمشي معاها قانووونيا ... وعااارف راسي شكاندير ومغنحطش فيها يدي ... غنطبق معاها القانون باستيلو حمر والمسطرة نوريها تهجم على مرتي وطيح ليا ولدي هي وطاسيلتها و20 درا شاهدة فيها و بالبوليس كل واحد فيه 12 لشاهد والوكيل حاضر وبالتصااور و نوريها حتى السيرو دالنعاس اللي كتعطي للولد والاهمال وكولشي عندي مسجل بالنهار والوقت والدلائل .. الى ماكراهات سميت محمد علي بناني فين ما تسمعاها تجيها كريز راني ماشي راجل 

الحاجة : نعل الشيطان الله يهديك اا....

محمد : واااشنو كديييري هنا سيري فحالك لدااارد .. واسيري فحالك 

جرها خوه : يالاه تمشي يالاه 

الحاجة : حيد عليا مانمشيش... خليني 

الاخ : وامااابغيش يشوقك كيشووفك كيبدا يترعد كتعصبيه يالاه تمشي 

جرها بزز منها وهي كترغب باغا تبقا داها .. اومشا محمد خرج هاز الملف اما الحاج سكت وجلس فبلاصة وحدة مابغاش يبان ومالقا ميقول اللي جلس حداه كيبدا يشكي عليه ويبين بللي هوا فصف ولدو باش كيدور فيه حتى واحد كما دارو لاحاجة

يتبع..
الجزء الأخير

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.