جنازة حفل زواج الجزء الخامس والأخير

من تأليف Ghazal trust
2019

محتوى القصة

رواية جنازة حفل زواج

فبيت النعاس متكية بملابس النوم ومها معاها جالسة والدار كل مرة يجي ليها شي واحد من عائلة محمد يطل . . . تنهدات بتعب وقالت 

- داازت عليا اماما دازت عليا ... ماحسابش ليا غنكون حاملة .. الله ياخد فيهم الحق

الام : حتى نتي علاااش كتجري تحلي الباب ونتي معارفاش شكون 

رانيا: هجمو عليا كانو غيقتلووني ... مانسمحش ليهم لا دنيا ولا أخرة 

الام : ضيعتي الولد اللي كان فكرشك .. لا حولة ولا قوة الا بالله 

رانيا: محمد بغاا يموووت بقا فيه مسكين ... ماكلا والو النهار كامل 

الام : مسدودة ليه الشهية ...حطيت ليه العشا وناض خلاه وخرج 

رانيا: صافي بلا مضغطي عليه خليه على خاطرو .. ردي لبال لجود ولينا وصافي

الام : نعسوو ... بقاو كينقزو حتى نعسو فالارض ... والحاجة مشات قبيلا قبل العشا

تحل عليهم الباب ودخل محمد للدار عينيه حومر تقال .. ناضت ام رانيا خرجات سدات الباب وحيد هوا لافيست وتكا سخفان حدا رانيا .. حطات يدها على شعرو قوالت بحنان

- ماكليتي والو من الصباح 

قال مغمض عينيه: مافيا اللي ياكل 

لاح السبرديلة برجليه فالارض وتخشا حداها 

محمد : حيدي ليا تيشورط جاني الصهر 

تقلبات جيهتو طلعات ليه التيشورط حيداتها ليه وشمات فيه ريحت الكارو وقالت

رانيا: تحششتي عاوتاني ياك قلتي ليا ماتعاودش تكميه

محمد : بتتاقل) واغيير وااحد 

حيدات ليه السمطة كتنكر وقالت : كيطفييك هاد الزبل فوقاش تقطعو يخخ... اللي شافك يقول شارب ماشي محشش

ضحك وقال : والشراب مكيديررش ليا هادشي ... لحشيش انا كيفرفرني 

رانيا: شبغيتي بيه قطع الزمر فمك زوين غادي يزراق ليك 

جرها وقال : بوسيني 

بعدات وقالت : ريحت الكارو فيك كدوخ مانبوسك ما تبوسني . . . شي نهار توقع ليك شي موصيبة بسبابو

محمد: وا عادي كيعجبني 

هزات حاجبها وقالت: كيعجبك!! بااز .. شوف خوك اللي بعقلو واش كيقرب ليه . خايف على صحتو

محمد: شكون ؟؟ رشييد!!! رشيد تعطيه جوان يموت ليك !.. نتر غير نترة واحد الخطرة سخف بدا كيشهد .. خلعني وطير ليا التبويقة

حيدات ليه السروال وقالت كضحك 

- كيبهدلك الحشيش ... عرفتي دابا ندير فيك اللي بغيت 

قال كيضحك وهوا منشور فوق الناموسية 

- هوا اللي كيجي معايا .. حتى حاجة مكطير ليا الفرخ من غيرو ... (حد يدو على راسو ) هادا .. عرفتي هادا كيطفاا ... مكيبقاش يفكر كااع ... عندي واحد الساعة بعدا مور الجوان ... مكنبقاش نفكر .. كولشي كيدير سطوب 

رانيا: ههه ويييلي عينيك كي دايرين . . . حمارو ... عرفتي كي كتهضر تقييل 

محمد : واحيت مافيا اللي يهضر ونتي كتهضريني بزز منني وا خليني نتسنط لعضامي 

رانيا: الهضرة كتخرج ليك من النيف ههه سخفان هههه

محمد : انا لحشيش راه كيخلط ليا لآلي مع الروتور 

رانيا : هههههههه زوينة هادي

محمد : واييه ... مكنبقش عارف راسي .. واش غادي .. ولا جاي .. واش داخل ولا خارج ... اري ليا حبيبة شي بوسة 

رانيا: هاااني ..ههه 

باستو وتكات حداه كتفرج فيه وضحك 

رانيا: شنو درتي مع اسماء فين وصلات الدعوة 

محمد : صاافي الدعوة فيها ... غنسيفطها لخريزو ..

رانيا: لالا واخا هاكاك كن غير طلقتيها وصافي بلا مدخلها للحبس 

محمد : واش هي قاتلة ليك لولد مافرحنا بيه تا نهار ... وهاجمة علينا . ضسرااااات وحساااب راسها غنبقا صابر ليها ... وعيقااات وزادت فيه بزااااف 

رانيا : انا كن جات عليا عطيها براتها وسيفطها فحالها

محمد: خليني دابا منها واجي نشوف كي بقيتي 

دفعاتو كضحك: وااسييير بعد مني 

هز حاجبو كيضحك : واري نشوف كي بقيتي .. نديرو شي ولد اخر 

رانيا: يخرج مبوق بحالك .. لا 

محمد : ومالي انا ماعلياش الله .. عرفتي شنو ... كنت شاك فرااسي كنكول واش انا اللي مكنولدش !!!! كانت غتحمقني بنت ل**** وهي كضرب فالكينات بالتخبية .... حتى جيتي نتي ... نهار اللول ضربات لسقات ههه

رانيا: وا قوس عليا بسم الله رحمان الرحيم ههه 

محمد : واجي دابا خلينا نننن ...


فالصالون مجموعة العائلة كاملة جالسين فدار رانيا وهي ومحمد معاهم فنقاش حاد على الدعوة المرفوعة . 

الاخ الاكبر لمحمد : هوا اسماء مشاات فيها مشاات ... غير هوا حشووما من بعد هاد العشرة توصلو للحبس كااع 

محمد : هي قلباات عليه ... واش ضلمتها ؟ من الاول كنقول ليكم حيااتي بقاو بعاد عليها متدخلوووش فيها .. انا اللي عايشها وانا اللي عارفها ... ندرنا بوجهكم شحال من مرة ... وهانتوما شفتو فين وصلنا .. دابا ميقول ليا حتى واحد لا نعل الشيطان ولا حتى حاجة 

الاخ الاكبر : راه جااو حتى لعندنا للدار كيطلبو السماحة ندمانين .. مها جلسات شحال كتبكي .. ايوا صافي اللي غلب يعف ... مابقيتيش باغيها طلقها و الله يعاون علاش الحبس ... راعيو للعشرة ... هضر الحاج قول شي حاجة 

الحاج : الهضرة كاملة قلتيها ... وانا واخا نهضر هضرتي مكتعجبهمش 

محمد : الحاج ... درت بريك حتى عييت ... دابا خليوني مني لمشاكيلي ... وحتى واحد ميهضر مع رانيا ولا يضغط عليها بشي حاجة 

الحاجة : لااالا .. هاهي ... سولها واش كنضغطو عليها 

محمد : وصافي دابا سدو علينا هاظ الموضوع 

الاخ : راه هاد الموضوع علاش جينا امحمد 

بقاو كيناقشو لعشية كاملة ويحالو معاه باللتي هي احسن يطلقها حبيا ويسايسو حتى قنعوه وباش يهدنو الانور قتارحو عليه يجيو يطلبو السماحة من رانيا شخصيا لاكن محمد رفض اللقاء معاهم بصفة نهائية وقرر يطلقها ويتنازل ليها على الدعوة وداكشي اللي كان .. تم الطلاق والتنازل على الدعو اللي كانت غتسيفطهم مكتفين للحبس وتفارق محمد هوا واسماء وسمح ليها تاخد حوايجها من الفيلا اللي كانت عايشة فيها وتمشي بحالها . 

ووسط الفيلا واقفة مغددة هي ومها وخواتاتها .. جمعو الفراش كاامل والاتات وشطبو الدار باللي فيها وهزو كلشي فالكاميو وبداو يرحلو بالزربة فالكاميوات .. العساس شاف الكاميو اللول عمر مشا .. والتاني كيعمر غيمشي دخلو الشك ... واش هادي غتاخد حوايجها ولا تهز الرحيل كاع وتمشي !! .. هز تيليفون تاصل بمحمد خبرو في حين هازة اسماء واحد المطرقة كضرب بيها الجاكوزي من الجناب بالزربة حتى قلعاتو من بلاصتو وعيطات للدراري هزوه .. قلعات الروبينيات والبيبان ديال الزاج حتى هما ولافابويات واي حتجة زوينة فديك الدار طيراتها وحتى من لاشاص قلعاتو داتو والكوزينة حيدات ليها البيبان والزواق ماخلات وراها حتى شنتوفة .. كملاتها وجملاتها وماكفاهاش الخراب اللي خلات فداكشي اللي قلعات من بلاصتو .. شدات واحد المقدة ومشات للخشب اللي فالسق وبدات تعطيه طيرات داك الزواق خرباتو هي ومها اللي شادة جنوية كتشرط فالخشب اللي مديكوري فالحيد .. شرطاتو كامل .. قضاو الغرض بالزربة فالدار وخرجو كيجريو هازين الرحيل ودازو على النافورة عطاتها مها بواحد الحجرة شقاتها كاملة بدا الماء كيسيح منها ومشاو هربو بحالهم . 

وصل محمد ونزل لقا العساس فالباب سبق ليه بالمعاودة على شنو شافت عينو ودخل معاه للفيلا.. حدو وصل للباب تصدم ... الباب لخشب ديالو كامل مقشر بالضرابي مابقا فيه ميتشاف.. داخل وكيشوف فداكشي قدامو مصدوم . السلوكة من الخيوط خارجين والحيوط مضروبين بالمطارق والصباغة مقشرة وبلاصت التلفازة خاوية فيها السلوكة منتوفين ... السقف حالتو والخشب كيطيح منو ... اما الرخام اللي فالارض بين الخلفة والخلفة كاسنة شقة .. مضروب لاهوا لا الزليج ديال الحمامات ... لاشاص طارت والزليج مقلع من بلاصتو ولافابو مدكدك والبلاكارت مريبين ومصروبين .. الكوزينة طارت واللي بقا لاسق فيها كامل مضروب بالمواس ... الحاصول ... مابقا فالدار مينفع ... حتى من الزاج والمرايات مهرسين ... اما بيت النعاس كامل مقشر حالتو حالة .. واللي زاد صدمو كتر هوا الخرا لقاه مطلي فالحيوط منين ماداز .. بقا كيدور فبلاصتو ويشوف مخلوع والعساس كيردد " لا حولة ولا قوة الا بالله " 

محمد : شفتي ... شفتي العيالات علاش قادين ... خليناها تاخد حوايجها اللي كتلبس وداكشي ديالها بحرية. صدقات هازة الدار كاملة ودايرة فيها هاد الفضيحة ... دابا هادي شنو دير معاها .(ربط الخط فالهاتف ) الو الحاج ... اجيو اجيو تشوفو الفيلا كيرجعات ... اجيو تشوفو بعينيكم


وصلو الطموبيلات للدار ودخل باه ومو وشي خوتو وخواتاتو لقاوه برا واقف كيشوف فالجردة ويتحصر بوحدو 

الحاج : ياك لاباس ؟؟؟!... اش كاين ياك هزات حوايجها مشات بحالها 

محمد : زيدو زيدو . . دخلو تشوفو الفيلا ... الخربة هادي رجعات ماشي فيلا... الفيلا اللي خاسر عليها انا 200 مليون غير اصلاح وديكوراسيو وحدو ... رجعات خربة ... اما الفراش ...بففف... بيت النعاس جايبو راكب . من الطاليان ساوي 12 لمليون باش تنعس عليه هيا .. والصالونات كل واحد منين جاي غير الفراش المخيير ... درت ليها الدار زعما وكبرت بيها ... حساب ليا بنت الناس ساعة هيا وجها وجه هاد لل

شاف جهة واحد الخرية مضروبة فالحيط ... هوا كيهضر مفقوس وهما داخلين شادين حناكهم مصدومين ... داخلين لخربة ماشي فيلا. وهوا موراهم كيشوف ويوريهم برجلو ويلوح فالسلوكة للجنب

- شووف .. شوف .. السلوكة ماكرهاتش تديهم ... فاش مالقات كي دير للسقف بدات عليه بالتهراس ... (بسخرية ) ولاكن نعذرهااا... نعذرهااا ما عرفاتش فلوسهم منين جاو ... ماسهرات عليهم ماخدمات فيهم ... ما عرقات عليهم ... تشرطات ليا النهار اللول كي بغات ... بغيت السقف تركي .. درناه ليها حنا هيندي كاع ... بغات بيت النعاس .. جبناه من الطليان ... باش تنعس عليه مسخة ... ولاكن بزااف عليها تعرف لهادشي ... بزااف عليها الفيلا ... دخلاتني بالتمسكين النهار الاول .. قلت البنت باينة فيها بنت الناس .. يالاه تخرجات وتستاهل نعاونها ... دخلتها تخدم من نهارها ... الناس كيضربو السطاجات وانا دخلتها بسمية طبيبة من النهار اللول للسبيطار ... كمت كنقول ليها غير ولفي الخدمة وتطلقي شوية ندير ليك كليينيك كااع غير كوني بنت الناس ... ساعة السيدة تبدلات حساب راسها وصلات .. نسات شكون وقف معاها ... عطيتها قيمة وعطيتها سميتي ومنين مادزات يحتارموها الناس ... كيسمعو مدام بناني كيوقفو ليها ... عيشتها بحال الاميرة ... فاللخر هانتا تشوف ... شوف شنو دارت . . . لخرا طالتو باش تعرف اللي موسخ موسخ واخا تلبسو الذهب. 

الحاجة : لاا حولة ولا قوة الا بالله 

محمد : اييه (حرك راسو وتنهد ) كان كيحساب ليها نهار تخرج طبيبة غادي تلقا بلاصتها ... مافراسها باللي حتى الطب خصو الركيزة صحيحة ... ولا فلوس صحييحة باش تفتح عيادة ... كانت عتخدم فسبيطار حالتو الصالير للخر 7000 درهم ومكرفسة .. مافراسهاش باللي الطبيب اللي كيسوق كاطكاط عندو بودجي صحيح نهار تخرج فتح عيادة ماشي ترما فالسبيطارات خانزين حتى بيطادين مكاين ... (تنهد) وا دخلها تخدم ... وهضر عليها يعطيوها بوسط الاطباء كيتقاتلو عليه ... ودير ليها الطموبيل .. تكبرات على النعمة ... دابا نشوفو اخرتها فين غتوصل ... حتى دام البوسط اللي شادة الى خليتها فيه مانسواش


شافو الفيلا وخرجو كيتحصرو عليها وهوا معاهم كيخرج الفقسة بالهضرة ... حتى واحد فخوتو ماعجبو الحال وكولشي وقف ضدها .. وحتى واليديه ماعجبهمش الحال 

الحاج : الله ياخد فيها الحق هادشي اللي غنقول

الحاجة : زعما درنا بوجه العشرة ... حسبتها وحدة من بناتي ... صدقات المطلقة اللي مابغيتش النهار اللول حسن منها 

محمد : وراه داكشي اللي درنا حتى حنا ... درنا بوجه العشرة قلت السيدة باااركة تزوجت عليها غير هادي كاافياها بلا منزيدها الحبس .. طارت حتى عيات بقات ليها جلسة يحكم القاضي ... وتنازلت ... كما كان الحال كتبقا مرا اللي فيها كافيها 

الاخ : اودي واخا دير لي درتي راه والله لا بردات العافية اللي شاعلة فيها ... غير زواجك راه غيركب فيها القلب .. بلااا متزيد الحبس حتى هوا ... اما الطلاق راه غيسكت ليها القلب وبالغدايد دارت هادشي 

محمد : ايوا خليها ... بغيت دوك الغدايد يبقاو فيها ... ياك خربات الفيلا ... واخا سيدي المهم تفكيت منها الخليفة على الله ... ارا نشوفو هي واش غتبرد ولا طرطق .. وبيني وبينك .. واللهيلا الى كتبقا فيا .. مكرهتهاش حيت عارفها كتحك وكتموت دابا . النعاس ميجيهاش .. وكن شعلات فيها العافية والله ما تبرد ... هاد التزويجة هادي وزيد عليها التطليقة .. غتعيشها واحد العام بعدا فالجحيم ... ماعليش اللي وقع وقع دابا ... المهم هادا هوا النهار اللخر معاها ... دات الحوايج ... نحسبها خطية وخلصتها وتفكيت منها الله يجيب ليها معامن .

سد الباب وراه ودخل للدار عند رانيا لقاها جالسة قدام التلفازة .. جلس حداها وقال 

- جمعي حوايجك يالا نسافرو 

رانيا: فين؟!!

محمد: وانوضي جمعي حوايجك .. دابا تعرفي فين 

رانيا: واقول ليا فيين عاافاك 

محمد : وا نوضي ومن بعد تعرفي فين ... يالاه نوضي ... وقبل بعدا ماتجمعيهم .... شوفي ماماك تشوف ليك شي جوج عيالات يجمعو معاك الرحيل .. غنرحلو من هنا 

رانيا: اوييلي وهادي !!! ياك كتبتيها ليا !!

محمد : خليها خاوية ولا كريها ولا ضبري راسك ... المهم حنا غنرحلو مغنبقاوش هنا 

رانيا: وعلاش غنرحلو شنو كاين ؟

محمد: حسن نرحلو من هنا ... كحل الراس ماتعرف اش يدير ليك ... وبحال والو تعاود تجي عندك ديك المسطية تخلعك ولا تسيفط ليك شي واحد ... وحتا انا مابقيتش مرتاح هنا وكنحاول نتفادا الصدع 

رانيا: وعلاش غتجي ياك صافي سالينا 
.محمد : سالينا حنا ... اما هي مانتيقش فيها ماتعرف شنو يطيح ليها فراسها 

رانيا: هاد المرة الى دارت شي حاجة دير معاها اللازم 

محمد : وهاد الحاجة عرفتي نتي شنو هي ! .. نتسناو حتى ديرها عاد نديرو معاها اللازم ... الاللة هاد المرة الى مشات حتى وصلاتنا غادي نخرج عليها وهي عاارفاني اش كنسوا ... درناااا بوجه العشرة ... اما دابا والله منعقل عليها ... ولاكن انا معنخليهاش حتى دير شنو بغات ويطيح الفاس فالراس عاد نتصرف ... ديك الساعة فات الفوت . اللهم نوضي هزي حوايجك نبدلو البلاصة .. راه تبدال العتابي زوين


جمعات رانيا رحيلها كامل وهي غادية معارفة راسها فين غادية ... الطريق طولات شافت راسها خرجات من كازا بزاف ودخلات فلابيست .. تلفتات شافت فيه باستغراب وقالت 

- فين حنا 

محمد : بلاتي وغتعرفي 

شوية بدا كيبان ليها الصور مدلي عليه الربيع ... وصوار طويلة كما غاديين مع الطريق ومقابلة مع بعضياتها ... دخل مع باب ديال الحديد كبير فوق الكياس ابيض ووقف السيارة قدام دار كبيرة بتصميم قديم مغربي .. تلفتات رانيا وقالت 

فين حنا ؟ 

تلفت بابتسامة وقال : حنا فالفيرما ... هاد البلاصة فيها غير الفيرمات ملاسقين مع بعضياتهم وكتااار وساكنين فيهم ماليهم .. يالاه نزلي .. ماعجباتكش البلاصة ؟ 

رانيا: لا بلعكس

نزلات وهي تشوف لابيسين فالجمب كبير وسيقيفة حداه ديال شالشواية و اروجوحة وكلب مربوط .. الفيرما على شكل فيلا كبيرة بالصور كبير ... بقات تالفة رانيا غير كتشوف ودخلات للدار معاه اما البراهش مشاو كيجريو فوق الربيع كينقزو 

رانيا: واااو ... بلدية !! غزاااالة تبارك الله 

محمد : عجباتك؟

رانيا: فننننة 

محمد : هنا بعاااد على الصدع ... الكااالم والطبيعة وحتى واحد معارف بلاصتنا ... هنا فين يعيش الواحد ويتسنط لعضامو ويرتاحو ودنيه من الصدع 

رانيا: كبيييرة الدار تبارك الله 

محمد : طلعي لفوق تشوفي البيوت وتشوفي كولشي . 

رانيا: حمقاااتني .. فكراتني فواحد الفيلا كبيييرة كنت شفتها فواحد السلسلة مغربية 

محمد : اشمن سلسلة؟

رانيا: سميتها .. بلاتي نتفكر..اااه دواير الزمان ههه دوك الفيلات لكبار اللي كانو كيبانو فديك السلسلة ... كنت كنحماااق عليهم وكنقول يااه الناس فين عايشين وكي عايشين .. كنت كنشوف الطموبيل داخلة لديك الفيلا وسط الشجر والنافورات وتوقف فالباب .. سبحااان الله جاب ليا الله بحالها وبلدية ههه كما كنت كنشوفها ... خاصها الفراش يكون زوين وصافي 

محمد : دخلي عليها فراش جديد مودرن مع هاد الستيل اللي فيها وتشوفي كي غترجع .. بحال الى راكي فاوتيل سامك اتوال مراكشي 

رانيا: نااااري حمقاااتني ... ارا متجري فيها ههه... علاش خبيتيها عليا؟

محمد : لااالا عاد هادي شي شهر باش شريتها ... صلحت فيها شي حوايج وزدت ليها شي لعيبات جداد . صلحت الكوزينة ردتها بحال هاديك اللي عندك فالدار .. والطواليطات حتى هما ... والحمامات كوووولشي جديد حتى الزليج بدلتو ليهم ... عاود دت ليهم الاصلاح من اللول لابيسين كان فيه زليج كحل جاني مضلم بدلتو حتى هوا . . صلحت فيها شحاا ل من حاجة الصراحة ومزاال ... مزااال غنزيد ليها شي حوايج غير حتى نكون مسالي 

رانيا: لالالا ماتزيد والو هاكا وااعرة (لسقات فيه)

محمد: وافاش نزيد لها دوك لحوايج غترجع تبان ليك حسن بزااااف من هاكا 

رانيا: واش فيها شي شجر وشي ارض كتلود 

محمد : فيييها الخير والبركة ... خاص غير اللي يقابلها . الارض كاينة خاوية 

رانيا: ايوا والبز كي نديرو ليه فالقراية؟

محمد : غيبقا يديهم الشيفور بحال كاع الناس اللي هنا ... حتى هما كيقريو ولادهم ... مابعيدش الحال بزاف على المدينة 

رانيا: ونتا غتبقا غادي جاي!!

تلفت وقال : راه الناس اللي لاباس عليهم الهبيلة كيهربو من المدينة ويسكنو بعااد باش يتسنطو لعضامهم ... الطموبيل كتقرب كولشي دابا


اسماء : انا بغيت نحمممقو ... ونخرج عليها ... بدلني بوخدة مطلقة وفوق هادشي عندها بنت ... انا اللي طبيبة يسمح فيا وياخد قردة والدة !! لالا منقدرش نتيق 

الام: ايوا هاحنا غانشوفو هاد الفقيه هادا اش غيدير ... مشينا عندو حتى لآكادير وكولشي كيقول وااعر مكاينش بحالو ... ضربنا الطريق حتى لطرف الدنيا . 

اسماء: واش هادشي كيتعطل!!

الام : ايوا ها حنا غنشوفو ... خاص دابا اللي يمشي ويزلع ليهم هادشي عند باب الدار .. وخاصو الشهر كامل يبقا يمشي ورا العشا 

اسماء : حنا كيعرفونا تما الجيران .. شي وحدة من البنات اللي تمشي انا اللي غنبقا نديها ونتسناها حتى ترجع

ضلام الحال وخرجات اسماء ومها وختها وحدا اخرى ومشاو للدار ديال رانيا فالعمارة .. طلعات ختها كتسلت حتى للعنوات وبقات ترمي اما السحور ورجعات كتجري عند اسماء

اسماء: ماشافك حتى واحد ؟

الاخت : لا ... السكات 

اسماء : مزيان ... غدا عاوتاني نجيو .. عندنا شهر ديال الرشان ... غنبقا موراه حتى نفرتك ليه العش الى مافرتكنوش ها وجهي ها وجهوو .

داز الشهر ورانيا فالفيرما عايشة الحياة ... بعيدة على الصدع وحتى واحد مكيوصلها وكاعرفينش حتى واش رحلات ولا مزالة تما . 

دخل للدار كيدور يمين يسار ويعيط 

- رااانيا ... وا فيينك المرا 

مزلات كتفرنس مع الدروج لقاتو كيودور فبلاصتو زربان 

رانيا: هااني .. شنو كاين 

محمد : ما فراسك والو ؟؟

رانيا: باستغراب ) لا شنو !!

محمد : داك .. خيينا .. بات لينا 

رانيا: مالو !!

محمد : تزوج 

رانيا: حلللف

محمد : تزواااج واحد الشارفة ومشا للطاليان ... يالاه فرحي هانتي تهنيتي 

دارت يديها على فمها كضحك وقالت : اويييلي هههه شااارفة كااع !!

محمد : لعقبة لخرى حتى هي تزوج وتحيدني من دماغها 

رانيا: وراه كاع ماواصلانا 

محمد : اييه يا كاع ماواصلانا ... عيطو ليا الجيران قالك شافو شي وحدة فالباب كترش ماعرفتش اش داكشي.. وما مرة ماجوج شافو تما داكشي 

رانيا: هييييه!!!! ويييلي شبغات دير 

محمد : كتسحر ... اش كدير ... المهم نتي اللي سولك ماتقوليش ليه كاع فين ساكنين ... الى مشينا عنظ الواليدين قولي ليهم فطنجة حيت سولوني قالو ليا فين رحلتي قلت ليهم طنجة .. ونيت ميجي عندما تاواحد مابغينا زيارة ... كولشي فيه النفاق ... الى بغيتي مك نديك عندها وسالينا حسن متبعنا لخرا ونرتاكب فيها شي جريمة 

رانيا : الله يستر... شتي انا غير مللي تهنيت من داك الموصيبة بابات لينا حاشا واش يكون باها ... عمرو سول عليها حست عااارفني نهزها بسناني واخا تكون فيا الموت 

محمد : شنو كديري دبا؟؟

رانيا: والو علاش

محمد : يالاه نخرجو شوية ... الى فيك ما يركب على العود نشوفو الطبيعة قبل ميجيو البراهش من المدرسة

رانيا: ههههه يالاه


طلعات فوق العود بالمساعدة ديالو وركبات كضحك 

رانيا: راه مكنعرف نركب عليه 

محمد : شدي مزيان .. انا غنطلع معاك يالاه 

طلع وراها وشدها بين يديه وشد اللجام وقال كيضحك 

- عجباتك هادي ههه

رانيا : خفت يطيحني 

محمد : دابا مزيان 

رانيا: حسن ههه 

ضرب العود برجلو ومشا هوا وياها كيتساراو فالاراضي الخضراء ويتجمعو 

رانيا: زعما هادشي كامل خرج منها 

محمد : ايوا بنادم هوا هادا 

رانيا: ماجراوش عليها من السبيطار ؟

محمد : لا ... حسن تبقا تما ... غنعيط للكبير ديالهم .. صاحبي . . . كيسيفطو الاطباء للخارج بزاف غنشوف معاه يسيفطها لبرا ضرب واحد العام ولا عماين .. تنساني فيها ونتهناو من المشاكل 

رانيا هاكا حسن 

محمد : مللي وصلات القضية للسحور ... غادي نعيط ليه يسيفطها فأقرب وقت 

رانيا: عيط ليه دابا .

محمد : وا انا دابا معاك ... باغي نعمر راسي بيك ... حتى نجلس ونعيط ليه 

رانيا: سيمو 

محمد : نعام .

رانيا: شفت ليغيكل ماجاوش هادي شهراين ورا الربعين ديال الاجهاض ... خاصني نمشي للطبيب 

محمد : وااايلي !!!! ... وساكتى وراكبة فوق العود !! 

وقف العود وشدها هبطها : هبطي هبطي ... وبشوية 

رانيا: شنو زعما نقدر نكون حاملة 

محمد : يالاه داابا نيت نشووفو واش حاملة . لبسي حوايجك يالاه


دخلو عند الطبيبة كيضحكو ويهضرو ... خلاتو جالس ومشات دير الفحص وهوا كيحك يديه مع بعضياتهم ويضحك بوحدو كيتسنا ، خرجو عندو بجوج .. جلسات رانيا حداه والطبيبة فالبيرو ساكتين 

الطبيبة : غنخرج ليها هاد الدواء... تشربو ونشاء الله يتقادو الهرمونات عندها 

جمع الضحكة وقال : علاش واش ماحاملاش؟؟؟!

الطبيبة : الهرمونات ديالها ما مقادينش .. ونشاء الله غادي يتقادو الى تبعات الدواء ورتاحت شوية 

رانيا: شكرا 

هبط محمد راسو مابقاش كاع كيسمع للدكتورة .. شد الورقة وخرج ساكت الطريق كاملة ورانيا حداه حتى هي ساكتة .. مشا شرا الدواء ووصلها للدار وقال قبل ميهبط 

محمد : انا غنمشي .. عندي مايدار 

قالت بابتسامة ونزلات :مالك تبدلتي ؟؟؟ 

ابتاسم وقال : اييوا الساعة لله ... دابا نرجع فلعشية رتاحي وشربي الدواء ديالك 

رانيا: صافي .. متعطلش 

محمد : ها الشيفور ... الى خصاتك شي حاجة يجيبها ليك 

رانيا: اوك 

باستو ومشات دخلات .. خرج السيارة وضرب الدورة قوق الكياس ورجع مشا . كيهضر فالتيليفون 

محمد : الحمد لله .. كي داير مع شي خدمة ؟ كلشي مزيان ؟.... هانيا هاد الساعة ... صافي مابقيناش وعلى هادشي عيطت ليك ... ماكرهتش الى كان شي واحد غادي لبرا سيفطها بلاصتو ... راك عارف العيالات .... اه كاين هاد الشهر ؟؟ ... مزيااان كاااع ماكرهتش فهاد السيمانة انا كاع ... الله يحفضك الحبيب ... تهلا ليا فراسك ... مع السلامة 

الضلام فالدار كولشي ناعس ... بيت رانيا الوحيد اللي مزال شاعل فيه الضوء .. حل عليها بيت النعاس وهوا يتفاجأ بالسلك اللي معلقة رانيا من للحيط للحيط وناشرة عليه حوايج البيبي صغيور .. رد الباب موراه وقال باستغراب كيشوف فالسلك 

- شنو هادشي؟!!

رانيا: ماعرفتيش !

بقا ساكت شحال وقال بابتسامة : لااا... 

رانيا: ههههه ايييه 

طار عليها هزها فالسماء كيضحك وقال 

- كداااابة... علاش تفليتي عليا نتي وطبيبة 

رانيا: باش ندير ليك هاد المفاجأة 

محمد : شفت الضوء شاعل قلت شي مفاجأة هادي بحال ديما ... يا أما شي عشا رمنسي من دوك العشاوات ديالك ... يا اما شي قصارة هادي وكتسناني نجي ... شافتني مقلق بغات تبدل ليا الجو

رانيا: ايوا كي جاك تبدال الجو 

محمد : واااعر ... كنت حاس بشي حاجة ومتأكد غتكوني حاملة كنتسنا غير الطبيبة تقولها ... داكشي علاش طاح عليا الضيم حيت متوقعتش تقول لا ..شحال خايب يحبطك الواحد ... وسبحان الله انا فاش كيحكمني احساسي مكيخلينيش نفكر فالعكس .. كتصدق ومكيخيبش . 

رانيا: يالاه وجد ليا راسك للأبوة نوريك الترابي كي دايرين ... حساب ليك غير اجي و ولد 

محمد : وااايلي .. واغير ولديه ليا وخوي الطريق ماديري والو 

رانيا: انممم .. مزال ماجربتي باش تعرف .. ولاكن الى مادرتها ليك على قد فمك هانا هانتا . 

فرح محمد بالحمل حتى شاطت عليه الفرحة .. ولاكن هجراتو ليه رانيا فالحمل فاش بدات توحم ... مابقاتش كتحمل تشوف وجهه غير كيدخل مع الباب كتنوض ليه واخا ميدير والو ... عندو على سبة خاصو غير يهضر بالجهد وتلسق فيه بحال عدوها .. فالاول كان كيتقلق حيت جاه داكشي جديد ... لاكن مع الوقت بدا يولف خصوصا فاش مرضات وضعافت ومابقاتش كتبغي تاكل .. وكتعصب على ابسط الاشياء... ما دوزات مرحلة الوحم حتى غفر ليها الله الدنوب .. اما محمد عجباتو الكريشة ويدور يدور ويبوسها .. يصبح عليها ويمسي عليها حتى ولدات ليه بنية فوطو كوبي ديالو سماوها " شادن" فرح بيها هوا والعائلة كاملة اللي كانو كيتسناوه يولد وبالخصوص واليديه ... وحتى

هاد التربية زادت حسنات العلاقة بين رانيا وبين واليديه وتأكد ليهم انه باغيها وباغي يكمل حياتو معاها وماعندو حتى مشكل فبنتها ... بلعكس كيدير مجهود كبير عليها وعلى جود حيت بجوج عندهم قاسم مشترك وكيحاول قدر الامكان يربيهم تربية حسنة .. وحتى هما كيشوفو فيه الاب اللي فقدوه .. واحد فقد باه ومو ومشاو عند الله .. و وحدة فقدات باها واخا كاين فالحياة ؟ كذلك رانيا ... الفرق عندها بين لينا وجود مكاينش ... وكتحن فجود اكثر حيت كيبقا فيها وكتقول لينا بنتي الى ضربتها ولا غوت عليها كتبقا بنتي وتكبر وتنسا .. ولاكن جود ! جود لا .. حالة خاصةة .. الى غوتات عليه يبات ضميرها كيأنبها وكتقول بينها وبين راسها .. يمكن كن كان ولدي منغوتش عليه ... ولا متستاهلش ديك الحاجة نغوت عليها ... يمكن حيت ماشي ولدي غوت عليه مع العلم ان لينا كتغوت عليها فأي وقت وفأي حين بلا متفكر . لاكن جود كيخليها مريضة ومترتاح حتى تصالحو وتشوفو كيضحك عاد تبرد وترجع فيها الروح .. هوا اول واحد يشريو ليه عاد يتبعو البنات بجوج باش يحسسوه باللي المفضل عندهم لأنه عارف الحقيقة .. عارف ان واليديه ماتو وخا ولف برانيا ومحمد بزاف وبدا كيكبر ويستوهب كثر وبالخص فاش وصل لقسم السادس .

رانيا : جوود ... جود 

هبط عندها من البيت مبوق بالنعاس 

- نعام اماما 

رانيا: ماعندك قرايا ؟ صابح ناعس ؟ 

رانيا: ماشي غير انا حتى لينا 

خرجات عينيها : اويييلي لينا باقا ناعسة حتى هي!! انا غنمشي ليها نوريها حساب ليا فايقة مزيااان تبارك الله 

جلس جود دايخ بالنعاس شاد تيليكوموند فيدو فشلان كيتفرج فالرسوم حتى وقف عليه محمد 

محمد : فيك مايدير شوية السبور؟؟

جود : لا مافياش ... انا هاد النهار باغي غير نعس 

محمد : وعلاش بالضبط هاد النهار!

ناض جود وقف : هاكاك .. بغيت غير نعس حتى يدوز 

محمد : ونوض براكة من العكز ... اشمن حتى يدوز وارا ليا داك التيليفون 

جود : علاش؟

محمد: ممنوع التيليفون ... يالاه ارا

عطاه جود تيايفون وزاد التقليقة على ختهاو خرجو يديرو السبور ومن موراهم مباشرة نزلات رانيا كطير جارة البنات معاها وخرجات للجردة كتعيط فالتيليفونات وتقطع وطير وتنزل كتوجد وتوصي بناتها يشدو فمهم .

على جنب الشاطئ كيجري محمد وجار معاه جود بزز منو والمورال خاسر ليه .. شحفو وجاه العطش والجوع وبغا ماكدو ..داكشي اللي دار ليه محمد ... داه لماكدو ودخل معاه على رجليهم يجلسو شوية ... يالاه جلسو وهي تبان ليهم اسماء جالسة مع راجل شادة ليه فيدو وكتوكلو الفريت ودير ليه الخاطر ... تلفتات بعفوية شافت جود وهي تفاجأة وناضت وقفات شيرات ليه .. شاف فيه محمد وقال 

- نوض سير عندها 

جود : شكون ؟!!!

محمد : نوض ابابا سير عندها وغتعرف شكون .. يالاه نوض 

ناض جود مستغرب غادي عندها وكيشوف فيها عاد بدات توضاح ليه الصورة وتفكرها وهوا يعنقها بقوة كيضحك وسلم على الراجل اللي معاها وجلس معاهم فالطبلة تحت انضار محمد اللي كيشوف فيه بابتسامة وكيشوف فأسماء كتسولو وضحك معاه ..باينة كتسولو على احوالو.. ناض وقف سلم عليهم وعنقها ورجع عند محمد جلس 

محمد : قعلتي عليها دابا ؟

جود : بأسى اه 

محمد : توحشتيها ؟

جود : لا رد 

محمد : يالاه الى ساليتي يالاه نمشيو 

ناض جود بلا ميهضر خرج طلع فالطموبيل ساكت ومحمد كل مرة يشوف فيه حتى قربو للدار ووقف السيارة فالطريق قريبة وتلفت عندو قال 

- محمد : مالك اجود هاد النهار ماشي حتى لهيه ياك لاباس؟ واش توحشتي اسماء ؟

جود: تفركع ) هي بعدا حسن منكم نتوما ... هي واخا مشات مابقيتش كاع شفتها بقات عاقلة على لانيف ديالي وقالت ليا جوايوزانيفغسيس وقالت ليا كن حساب ليا غنشوفك كن جابت ليا الكادو ديالي 

محمد : متفاجأ ) اااااه .. نسييييينا ليوم لانيف ديالك ؟؟؟؟!!! واش بصح ليوم 

ربع جود يديه : مانعرف .. باغي نمشي بحالي ديني للدار 

محمد : تأ... كيفاااش نسينا كيفاش ... اوووف 

جود: كتفكرو غير لانيف ديال لينا وشادن صافي 

محمد : اوه سمح ليا ولدي نسيناك ... يالاه يالاه نرجعو بحالنا . 

ديمارا السيارة للفيرما ودخل لقا بزاف ديال السيارات تما .. نزل جود مستغرب ودخل للدار قدام محمد اللي تابعو باغي يخرجو من الباب اللوراني الجردة لكبيرة على لابسين 

محمد : جداتك يمكن جات سير غتكون جالسة تما برا 

بدا جود كيقرب من بيبان الزاج وعينيه كيتحلو حتى وقف فالباب حال فمو قدام العائلة وصاحبو والنفاخات والزواق والروينة وكولشي كيهتف بسميتو .. تصدم وحل فمو كيغوت وينقز بلاصتو وبدا يدور كيجري ومشا تلاح على محمد كام غيطيحو عنقو بقوة كيضحك ونزل مشا ترما على رانيا كيبوس ويعنق ودخل وسط صحابو فرحان كينقز في حين جالس محمد ورانيا ساهيين كيشوفو ولادهم 

رانيا: الله على راحة 

محمد : ايوا دابا كبرو لوليدات .. شنو متزيديش شي بيبي اخر 

شافت فيه مصدومة وقالت : دابا !! مافياااش 

محمد : وهادا هوا الوقت باش تزيدي ... صافي دراري كبرو وانا باغي نولد .

رانيا: وا صبر حتى لمن بعد ونن

محمد ؛ ونن هههه.. وجدي راسك نشاء الله هاد العام تولدي ليا بنية اخرى ولا وليد 

رانيا: ههه نشاء الله .

النهاية 😍

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.