صباح جديد والايام كطير .. اميرة كتوجد راسها بالفرحة ومامقصراش من جهدها ... كالعادة حيدات ليها مها تيليفون وخلاتها كدور كي الحمقة باغا غير تعرف الاحوال من عند سيمو و والو .. كتسلت للسيبير مرة مرة لاكن مكتلقاهش داخل فديك الوقيتة ، ماقاداها فرحة ... غطير بالفرحة وكل ليلة تحط راسها على المخدة كتحلم براسها لابسة تكشيطة قدام الاضواء وتصاورها فالمجلات ... عارفة راسها غتاكل قتلة ديال لعصى ... ولاكن ماعليش المهم دير اللي بغات وديك الساعة تاكلها وتبردها مايسيق ليها حد الخبار كلاتها . فيوم من ايام الاسبوع غيبات هدى ماجاتش وفالساعتاين ديال العشية مجاش حتى استاذ الفيزيك ... خرجات اميرة من الليسي ومشات لتيلي بوتيك مقابل معاها وهي لابسة نيشورط ودجين وسبرديلة وخاشية الطابلية فالشكارة ودايرة لشعرها دفيرة مرخية فالجنب .. كانت عندها درهم فراسها مالها .. دخلة وكتخمم .. عنداك تشدها بواط فوكال ... خصها ضاروري تقول ديك جوج كلمات بالخف قبل ماتسالي درهم .. لاحتها وفتحات الخط مخلوعة وماعرفاس علاش غتخلع كاع مالو اش غيوقع الى مشات ليها درهم فوالو ورجعات بحالها للدار دوز ساعتاين فدارهم .. ولاكن لا مابغاتش ترجع للدار ومستحيل ترجع ليها وهي ماصدقاتش عندها ساعتاين خاوية تنفس فيها ، دخلات لتيلي بوتيك لاحت ديك درهم وبدات كتسمع فيه كيصوني .. تيييت ! .. تفتح الخط وقالت بسرعة البرق . الو سيمو انا اميرة ماقرياش اجي عندي على لي... تيت تيت تيت
حطات السماعة بأسى وتكات عليها كتسوط حتى تفشات وخرجات كتنهد ... هضرات وسمعات منو " الو " لاكن ما كملاتش هضرتها ... بقات واقفة حدا الباب مربعة يديها كتخمم .. واش ترجع للدار ولا شنو دير ... ماعندها فين تمشي اصلا بقات جالسة كتخمم شي نص ساعة فاللخر ناضت قبل ميضسر عليها شي واحد بغات ترجع بحالها للدار ... يالاه بغات تقطع الشانطي وهي توقف قدامها سيارة كحلة ميرسيديس 190 كحلة وقبطات الفران عليها تا قفزات ورجعات لور حاطة يدها على قلبها .. نزل منها سيمو كيضحك وقال
- فين غادا؟
قالت متافجأة : سيمووو!!!
مد يدو ليها ومدات يدها تسلم .. جرها سلم عليها بالوجه وقال
فتح ليها الباب لور وهي معجبة ماقدراتش تفهم علاش هدى زعما مانزلاتش تسلم عليها ؟؟ ... علاش ماقالتش ليها راه غتلاقا بيه وغيبات وهما كيتعاودو كولشي ! جلسات اميرة لور زابتاسمات فوجه هدى اللي تلفتات عندها وابتاسمات ليها حتى هي لاكن ماهضراتش معاها كما موالفة واخا اميرة كتهضر معاها عادي وتسولها ومستغربة ليها ! حسات بيها كتهضر ناقصة وكتجاملها فقط بحال الى مدابزين .
اميرة : علاش ماجيتيش ليوم ؟
هدى : كنت مشغولة ... ودرت مع امين نتلاقاو
اميرة : اصلا ماقريناش
هز سيمو عينو فالمراية وقال بابتسامة كيشوف فيها
- خاصك تيليفون ضاروري اميرة
اميرة : راني قلت ليك شنو كاين
تأسف سيمو ومشا كيسوق السيارة واميرة ساكتة حاسة براسها مامرتاحاش وكأنها متطفلة عليهم .. بلخصوص انها كتشوف هدى مقادة الحالة ودايرة مكياج ولابسة دجين مزير وبودي مثير وطالقة الشعر . حسات بيها ماشي هي نفس البنت صاحبتها ! كأنها وحدة اخرى ماحملاش وجودها
وقفات السيارة حدا كاراج كبير بواجهة زوينة فيه جوج طبلات برا جالسين فيهم الدراري وموكيط خضر بحال الجردة زعما ، نزلات اميرة و بقات اللور كتفادا تمشي معاهم فصف واحد وكتفضى تبقا اللور تابعاهم واخا سيمو كيضحك معاها ويجرها قدامو وهي كضحك وتتهرب منو حشمانة من تصاروفاتو قدام هدى حيت كيبان ضاسر معاها ومتقرب منها بزاف عكس تصرفاتو مع هدى . دخلو وكان مكان كبير بالموسيقى .. قهوة وبيار فنفس الوقت مجموعين فيه غير الشباب بنات ودراري .. شي جالس فالطبالي وشي كيلعب وشي ضاسر مع شي حيت الاغلبية كيعرفو بعضياتهم ووجوهم مألوفة لبعضياتهم .. كانت نضرات الحضور جيهة الباب كيشوفو فأميرة و عرفوها جديدة وتارت انتباههم وهي حشمانة وشادة شكراتها قدامها وسيمو كل مرة يحط و ورا ضهرها كيبعدها على الطبالي ولا الى داز قدامها شي واحد ... جلسوها فطبلة فيها الاصدقاء بنات و اولاد وجلسات معاهم هدى وبدات تراشق كضحك .. اما اميرة كتحس براسها غريبة عليهم وغير ساكتة وكدور عينيها فبلاصتها وتشوف فالبنات كي لابسين ... كولشي مقزي ومزيير ... واخا المقزب فيه وفيه .. فيه المأدب والنقي فنفس الوقت .. بحال كسيوات ديال البنات و شورطات بسميطة كما كتلبس اميرة مع قويميجة ولا تيشورط ، ماشي شورط لاسق على اللحم ومحكوك كامل والطروفة كيطلو منو وبودسديات منمرين ومنبتين ورباطي بحال الدبالج جامعين الخيوط حدى العنق والحوالق مدورين كبار كي سيديات والمكياج ديال العراسات ... بلا منهضرو على صحاب الشعر لكحل لمزيت بورشينغ 15 ليوم هابط كي لخشبة والنفخة كي لقبة بحال الفران ديال التراب فوق الجبهة بحال اللي دايريين اغلبية ديال لبنات فالبيار .
بقات تشوف فيهم بنص عين وحتى هما كيشوفو فيها بنص عين .. اما ى قلبات وجهها عليها داتها فالبنات لخرين ونسات صاحبتها ... بقا فأميرة لحال بزاف من جهة صاحبتها وشدات شكارتها بهدوء عندها وهمسات لسيمو فودنو
- اميرة: انا غنمشي
تلفت وقال بشوية : علاش ؟ مزال لحال؟
اميرة : لالا غنمشي والله ... حتى لخطرة اخرى
سيمو : ماعجبكش لجو ؟؟؟
اميرة : بتردد) لاا ... ماشي هاكاك ...
ماخلاهاش تكمل وناض وقف : اجي معايا اجي
ناضت وقفات والعين تابعاها .. رد يدو اللور شد ليها فيدها وهي تبعدها وشافت بنص عين جهة هدى وخرجات لبرا .. جر ليها كرسي حدا الباب جلسات وجلس حداها وهدى كتشوف فيهم من لداخل .. كيبان ليها سيمو مربع يديه فوق الطبلة داخل سخون فالحوار مع اميرة اللي غير عاقدة حجبانها كتسوط وقالبة وجهها وقدامها قرعة ديال الموناضة ... اش كيقولو وشنو نوع الحوار الحامي اللي بيناتهم ؟؟؟
بدات كضحك ومشات معاه داها جيهة الطبيعة فلعروبية وسط الربيع الاخضر والورد ودخلات كدور وهوا موراها بابتسامة .. جلسات ربعات رجليها وضحكات باش يصورها .. خدا ليها تصيورات زوينين وتكات على ضهرها وسط الربيع ناشرة شعرها وهوا كيصورها من لفوق ومن جناب ... رجعات جلسات وقرب منها جالس القرفصاء كيصورخا عن قرب وهي كتشوف فالسماء وعينيها كيبريو .. بعد الكاميرة وجلس حداها متكي على جنبو بابتسامة جدابة وخدا صورة ليهم بجوج .. ضحكات وتقلبات جيهتو مخرجة لسانها وهوا كيصور .. جلس حداها كيوريها التصاور وكل شوية يهز عينيه فيها بإعجاب .. عطاها الكاميرة كتشوف راسها واكتفى هوا بالنضر ليها .. سهى فيها وقرب منها بشوية بغفلة منها وباسها على خدها بوسة حنينة وبعد كيشوف فيها اما هي بقات كارمة وودنيها حمارو وتزنكات لاكن كملات مشاهدة الصور بلا متحرج الموقف كأن شيء لم يكن حتى تبدلات الساعة عاد شافت فيه وقالت
- نمشيو ؟ ماخصنيش نتعطل
رد بسرعة : يالاه نمشيو
ناض وقف كينفض سروالو وشد ليه فيدها نوضها ومشاااااو وسط الطبيعة و اميرة كتهز الكاميرة فالسماء وتصور بيها و تشادو فليدين فواحد اللحضة واميرة كتجبد عاطياه يدها وتبعد وتمايل كضحك وهوا كيرجها .. شوية هزها كي ريشة وبدا كيدور بيها فبلاصتو بالجهد وقهقاهاتها كتسمع حتى تلاحو واحد فوق وواحد طايحين .. مع الزدحة وسط سنابل القمح تسمع صوت كيعيط
- اااااااهيااااا ... عاااين عااااين .. واش تخرجو ليا من الزرع ولا نجي ليكم ... اهييييياااا
حطها قريبة من حومتها و هزات شكارتها بغات تنزل ، جرها بابتسامة وقال
- مكتسلميش ؟
دارت كضحك وقالت : قلت ليك بسلامة
سيمو : ما كافياش
ضحكات بخجل وقالت: وشنو بغيتي؟
قرب عندها وباسها فحنكها وهي تنزل مزنكة
سيمو : غدا يقدر منشوفكش ... غنمشي مع الواليد يجيب شي سلعة حتى لنهار الخميس وندوز عليك نديك للديفيلي اوك
اميرة : صافي واخا
سيمو: متكونيكطايش بالليل؟
اميرة : حتى للويكاند ... راك عارف بابا قطع عليا كولشي ... المهم اجي عندي ليكول صافي؟
سيمو : اوك حبيبة ... يالاه بيزو
مشات كضحك دخلات لدارهم كالعادة وفبيتها سدات عليها وتكمشات فيه كتحفض وكل شوية ضحك وهي كتفكر اللحضات الجميلة مع سيمو فالحقل ... لاحضات انها بدات كتسهى بزاف و تفكر فيه بزاف .. احساس غريب كينتابها عمرها حسات بيه ... فرحة وسعادة وراحة كتحس بيها اكثر من اي وقت اخر .. وحتى شوقها للقاء مرة اخرى زاد كبر و زاد حماسها كثر للديفيلي وباغا تكون اكثر جمالا على المشاركات اللي معاها. صبح عليها الحال وهي متفائلة راشقة ليها وكتخس براحة نفسية لا مثيل لها .. اول ما حلات عينها تفكراتو وناضت فرحانة بابتسامة فطرات وهزات شكارتها مشات تقرا . جلسات حداها بنفس التصرفات ديال الليلة الماضية ... الهضرة بالعبار والضحك بالقياس الشىء اللي خلى اميرة منزاعجة ومامرتاحاش طول مدة الحصة حتى خرجو ومشات اميرة وقفاتها برا وقالت بانزعاج
اميرة : لالالا اختي انا مكنهضر معاه فحتى حاجة ... ومابيني وبينو والو واصلا ماعنديش علاش نتشاور معاك !!! واخا نتي اللي عرفتيني عليه معانجيش ونتشاور معاك انا حرة ندير اللي بغيت ونتشاور مع راسي ومامنحق حتى واحد يقولي علاش ولا يتدخل فيا .. انا حرة .. وشفتي اصلا هاد ديفيلي اللي نايض عليه الصدع انا مابقيتش باغاه وهوا اللي لاسقني ... ونزيدك واحد الحاجة اخرى... شفتي كن ما انا والله مادوزي فداك ديفيلي وفنيتي انا اللي نتي معارفاهاش... قبلت غير باش ماتحرمش عليك حيت نتي صاحبتي الوحيدة و بغيتي دوزي فيه ومغندابز معاك لا على سيمو لا على غيرو
هدى: انا الى بغيت ندوز فديفيلي ماغاديش نتسناك نتي دوزيني وحتى انا
اميرة: ناري مسكييين ...دابا بغيت نسول فيه ... ماعنديش حتى باش تفوووو على زهر... عندك شي خمسة دراهم ؟
هدى: خمسة دراهم كن لقيتها كوراني فطايلوند
جلسات اميرة في حيرة كتخمم حتى سالات الحصة ومشات للدار كطلب وتزواك فمها تعطيها خمسة دراهم وبعد استنطاق عاد عطاتها ليها بحجة تخرج موضوع كتباتو فالسيبير وترجع بالزربة ، خرجات كتسابق مع الريح مشات كطير لتيليبوتيك صرفات ديك الخمسة ديال الدراهم وخلات جوج دراهم تخرج بيهم شي ورقة باش متلقاش مشكل مع مها فاش ترجع ... بدات تصوني عليه وتعاود وتعاود شي خمسة ديال المرات عاد شد ليها وقالت بسرعة قبل ميمشيو لفلوس
اميرة : لاباس الحمد لله عرفتي بقااا فيا الحال من هادشي اللي وقع ... كي بقا خوك شوية؟
سيمو : غير رعف وصافي راه ناض ... نتي هانيا الامور هانيا .. تيييت تيييت تيييت
تفقصات على جوج كلمات اللي ماكملاتش معاه ولفلوس تقاداو وحطات السماعة طالع ليها الدم وخرجات مشات لسيبير خرجات داكشي ورجعات الدار هازة هم كبر منها وجالسة وتخمم
غدر
صباح جديد ... صباح اللي كان من المفروض تكون فيه فالديفيلي ... صبحات ناعسة لانه مع الاسف تلغى .. فاقت يائسة فطرات ومشات كتحفظ وتخمم على بيدمن توصل الجوج وتمشي تقرا ...داكشي اللي دارت .. مشات بحال العادة ودخلات للقسم جلسات وهي كتستغرب لغياب هدى مرة اخرى .. مالها ماجاتش ؟ علاش كترات من الغياب هاد الايام ؟ لسوء الحظ جاهم فرض مفاجأ مكانوش متوقعينو عند الماط وفجأة خرج ليهم بفرض و هدى ماحاضراش ... نأسفات اميرة لغيابها وعدم حضورها للامتحان لاكن ماعندها مادير ... دوزات الفرض وخرجات الورقة كاملة وحطاتها وناضت تمشي بحالها فاش ضربات الستة .. دخلات لدارهم دارت كاسكروط وعطاتها مها 2 دراهم تمشي واحد نصف ساعة فيها للسيبير تخرج موضوع عطتو ليهم الفرونسي ومشات لقاتها من الجنة والناس .. فتحات حتى الفايس ديالها طلات عليه وجلسات كتخرج فالموضوع وكل شوية ضرب طلة على الفايس حتى قربات تخرج و لقات نضرة اخيرة على حسابها فإذا بها كتصدم وقلبها كيضرب بحال المدفع من قوة الصدمة ! صور لهدى ناشراهم على حسابها وهي حاجة مكياج وموراها عارضات وشعرها مصايب زائد صور اخرى ليها مع المشاهير وتصاور الخشبة والمقدمين و صفوف ديال التكاشط ... كانت اميرة غتجيها الجلطى من داكشي اللي شافت عينيها ... تحجرو الدموع فعينيها وبقات كارمة وألم كبير فقلبها .. الم الخيانة والغدر من اقرب الناس ليها .. ماقدراتش تفسر الاحساس اللي كتحس بيه فديك اللحضة وهي كتشوف قدامها دوك الصور وداك الكم الهائل ديال التعاليق اللي كيجيوها... واخر منشور قضا عليها كان مكتوب فيه " انتضرو صور العرض " تأكد ليها انه تلعب بيها وتضحك عليها .. زاد تشوش تفكيرها كثر ماقدراتش تستوعب او تفهم شنو وقع ؟ علاااش؟ وكفاش ؟ واش حتى سيمو ضحك عليها ؟؟ مللي الحفل ماتلغاش علاش كدبو عليها ؟ وعلاش طمعوها و وهموها وخلاوها كتسنا وتحلم ! فلحضة تقلب عليها كولشي وطاح منها النص ودارت بيها الدنيا ماعرفاتش شنو كدير... كتبكي والناس كيشوفو فيها وهي مرفوعة مكايناش فداك العالم ! سدات داك الحساب وناضت سمحات فالموضوع وفكلشي ومشات لدارهم بحال الحمقة كتبكي بدون شعور
بدات اميرة تبكي حتى تقجات وعطاتها مها تشرب وجلسات كتمسح ليها وجهها بالماء واميرة كتشهق وتعاود ليها بالتفاصيل كلشي من الاول حتى سالات وحطات راسها على حجر مها كتبكي ومها كتمسح ليها على راسها وتنهد بأسى
- ياك كنقول ليك بعدي من الصحابات .. راه غايرين منك وحاسدينك ... راه غير كيضحكو ليك فوجهك ومكرهوش السم يشربوه ليك ... انا علاش كنتبعك ومكتحملينيش نتبعك وكتكرهيني وتغوتي عليا ... حساب ليك كنكرهك داكشي علاش كنتعامل معاك هاكا ؟ راه خايفة عليييك والكبدة مامهنيانيش... راكي بنتي والى وقعات ليك شي حاجة نموت ... وكنقولي ليا علاش سلوى كنخليوها دير اللي بغات ... سلوى فاش كانت قدك راه كنا دايرين ليها كتر من هاكا ... هاهيا دابا خدات الباك ديالها مزيان ومشات تقرا فكازا وساكنة مع صحاباتها .. حيت صافي فاتت ديك المرحلة ديال الطيش ... ودابا عارفة راسها شنو كدير وخاصها تبني مستقبالها .. وحتى الى غلطات تحمل مسؤوليتها ... كنااا حاضييننا ومراقبينها دابا كبرات مغاديش ندومو ليها حنا ... كبرات ووصلات وغنخدم على راسها وتهز راسها وتسكن كاع بوحدها الى بغات حيت صاافي مابقاش برهوشة ... راه بعقلها ... والبنت خدامة راه كتكون مستقلة ماشي بحال جالسة فالدار مكادير والو ... داكشي علاش بغاك باك تقرااااي وتجيبي المعدل ويسيفطك تقراي فشي مدرسة زوينة وكيجمع ليك افلوس باش يفتح ليك العيادة ويقريك ... وديك الساعة نتي حرة ديالي راسك ... بخلصتك وبدارك حتى واحد ميهضر معاك ديري اللي بغيتي ... اما دابا راكي مزالة تحت مسؤوليتنا وخايفين عليك ... علاش مقلتيش ليا على ديفيلي ؟ علاش خبيتي عليا بغيتي حتى نشوفو تصاورك عاد نوضو نغوتو ! دار فيها ربي خير مللي مامشيتيش ... دابا من ليوم بقاي تسمعي هضرتي راه بغيت ليك غير لخير .. بعدي من صحابات و المصاحبة راه غير غيتفلاو عليك وتسنطي لواليديك اللي بغاو يهزوك ويكبرو بيك . سمعتي
تهديد
حركات اميرة راسها كتنخصص ولخناين نازلين وخلاتها مها كتبكي على خاطرها حتى بردات ومشات
صايبات ليها بطاطة مقلية اللي كتبغي وشلاضة وجابتهم ليها واخا مابغاتش النعمة تهبط ليها ومزالة مابرادتش ليها الصدمة والحرقة . وكلاتها بزز منها وبقات متكية حداها حتى تنصص ليل وناضت اميرة كتقلب وتشقلب بالوجع ديال الدم اللي كمل عليها وسهرها الليل كامل هي ومها كتبكي وتندب بحال الى غتولد ومها حتى كن غا تسخر وتسكت .. كل مرة دوي . ياك كنقول ليك لبسي ... ياك كنقوليك ماتمشيش حفيانة ... ياك كنقول ليك تغطاي من البرد .. ياك ياك ياك ياك .. واميرة كتقطع وتعرق وترد وسريسرة داياها جايباها للطواليط حتى صبح الحال وصبحات مها نايضة دير ليها شهادة طبية باش ماتمشيش تقرا داك النهار خوفا من شي فرض يخرج ليها على غفلة وتغيب .. دارت ليها فيها يوماين .. الجمعة والسبت اما الحد راه عطلة حتى لاتنين وتمشي تقرا تكون ردات شوية الصحة .
حطاتها ليهم فالادارة وخرجات تلاقات مع هدى واقفة فرحاانة كتجمع مع البنات .. دازت حداها الام مخنزرة شافتها ووقفات ليها
الام : سمعي ... غنقول ليك جوج كلمات سمعتي ... ااااخر مرة تجي دقي على اميرة ولا دوري بيها سمعتي ... نعاود نلقاك قريبة منها نشطب بيك الارض فهاد الليسي هاني علمتك وا شوفي فيااا
زادت وخلات هدى غير واقفة كتشوف وساكتة .. يالاه قطعات الشانطي وهوا يبان ليها ولد وقف واحد الروت (موطور كبير ديروه فقوقل يطلع ليكم ) روت كحل كبير جديد كيبري عليه ولد لابس شورط وسبرديلة نقيقي وداير كاسك كحل... سكت الروت وحيد الكاسك وبدا يشوف جهة الليسي بحال الى كيقلب على شي حد .. شافتو الام وعقلاتو !!! .. ايييه هادا اللي كان واقف معاها واللي ضحك عليها .. الكلب لاخور .. مشات ليه نيشان جامعة شعرها الاشقر بقراسة ولابسة دجين مفضفض و سبرديلة تاهيا وقميجة ودايرة نضاضر الشمس وهازة الصاك حيت عوالة دوز من تما للكلينيك فين خدامة . وقفات عليه وهزات النضاضر شافت فيه بغضب وهوا كيشوف فيها باستغراب
الام : سمع نقول ليك ... غادي تفوووت عليك اميرة ... ولا راه مغيفكني معاك غير المخزن سمعتي ... غادي تبعد ليا من بنتي ولا والله حتى نحرش عليك خوالها يعاودو ليك الترابي
قال باستغراب : كفاش؟ علاش واش هي عاودات ليك عليا ؟
الام: انا بنتي مكتخبي عليا حتى حاجة ... الشادة والفادة وحتى معامن كتوقف وفين كتمشي كوووولشي كتعاودو ليا ... باش ميحسابش ليك غادي ضحك عليها بجوج كلمات ... وقر عليك اميرة وقلب ليك على شي وحدة اخرى تفلا معاها وبعد على بنات الناس .
رد فدهشة : والله مكنتفلا عليها بلعكس فهمتيني غلط واميرة عارفاني مكنتفلاش عليها وكما نتي خايفة عليها حتى انا كنخاف عليها
قالت الام بجدية : اميرة عندهااا باها يخااف عليها غيييير بعد منها ها العااااار ... (تنهدات ) شوف اولدي ... واش عندك خواتاتك ؟
حما راسو وقال: عندي اخالتي
الام: ومتبغيش اللي يضحك عليهم ويبكيهم ... ايوا حسب اميرة وحدة منهم وعطيها التيساع خليها تديها فقرايتها ... بعد منها الله يرحم ليك الواليدين .
مارداتش عليه ومشات خلاتو واقف كيشوف فجنابو مفاهم والو اصلا وكفاش مها كتعرفو .. يقدر اميرة مكتخبي على مها حتى حاجة ماشي بحال البنات اللي سبق وعرف ... اميرة هادي حالة خاصة وزاد تأكد انها بنت مها وباها ونية وحدة اللي عندها . رد الكاسك ديالو على راسو بغا ويالاه بغا يدور الروت وقفات عليه هدى كتجري وضحك بأعجاب
سيمو: بصحة الروت !!! ... وااااو واااعر باقي جديد ... شنو كدير هنا ؟
حيد الكاسك وملامح الانزعاج والقلق على وجهه ورد عليها
- كنت دايز ... يالاه بسلامة عليك
خشا الكاسك ومشا فففففففننننن طلق داك الصوت ديال الروت مجهد كيشق الاذان خلا كلشي هاز راسو كيشوف شكون وزاد خلاها واقفة قبل متقوليه ضرب دويرة فيه
رد الاعتبار
دخل الاب للدار كيدور ويعيط ويقلب بعدما خبراتو الام بتعب ومرض اميرة وبغا يطمن عليها وهاز معاه الشكلاط .. دخل لقاها مجبدة فوق الناموسية معنقة واحد نونوس وساهية وشعرها مشعكك .. ابتاسم وقال بمزحة
- مالكي ياك لاباس ههه داز عليك الحال شوية
تنهدات وقالت كتهز راسها جلسات : شوية
الاب: هاكي شوية ديال الشكلاط ... خودي الكلافيي ديالك الى بغيتي .. تلهاي فيه .
حركات راسها بالايجاب وشدات الشكلاط كتحل فيه وطل على الميكة وتشوف شنو فيها اخر.. مشا بنفسو جاب ليها الكلافيي وركبو وشعل ليها البيسي حيت عارفها كتموت عليه وقال
- هاهوا الى بغيتي تجلسي تلعبي فيه شوية
اميرة : واخا
خرج خلاها وناضت مشات خوات عليها الماء وخلات شعرها مافزكاتوش .. دارت صابونة باش ترتاح وتحيد منها ريحة العرق.. بدلات حوايجها ومشات جلسات فالحاسوب وبدات تقلب على تصاور هدى وجلسات كتشووف فيهم ... حتى واحد مداخل فديك الوقيتة لا سيمو لا هدى .. طلقات اغاني فالجنب وبدات تقرا دوك المساجات لمكركرين عليها حتى طاحت فواحد مسيفط ليها جرائد ديال الكتابة وكيتسنا الرد من لفوق وكل شوية يقول ليها كنتسناك جاوبيني بليز . بقات تقرا وفهمات من كلامو انه معجب بيها و بالصور ديال الشوتينغ اللي حطات وبغاها تصور معاهم كوليكشن الجلالب ويخلصوها عليهم ... ردات عليه حتى هي كتسول على التفاصيل ولقاتهم غير فمكناس حتى هما .. بدات تهضر معاه وفقلبها جمرة باغا طفيها بهاد الشوتينغ وتفقص بيها سيمو و هدى اللي حساب ليهم صافي غير حيت سمحو فيها مكاينش اللي يديها فيها ولا يصورها بحال الى غير هما اللي كيصورو فهاد الدنيا ... بقات كتبان ليها غير الضربة تردها ليهم بجوج وتبين ليهم باللي راها بيخير وعندها نشاطات حسن منهم كاع وباللي عليها الطلب فين ييانو هما . قبلات بلعرض وتحمسات للساعة للي تنزل فيها التصاور بالجلالب وتوريهم النشاط ديالها بعيدا عنهم وتشوف ردة فعلهم حتى هما .. جلسات تجمع مع الولد وشافت لاباج ديالو فيها عارضات مصورين وبنات كيقراو فالليسي لخرى فجهتها فيها بنات حاسين براسهم و كيتعاندو فاللباس وشكون تاخد لقب اجمل وحدة وكاملات دافعين كبير ومكيهضروش مع اي واحد .. غير شافت تصاورهم عندو وهي تحمس بغات حتى هي ترجع وحدة منهم وحسن كاع ويتحطو تصاورها وتولي همة وشان
الشوتينغ
دوزات العشية كاملة قدام البيسي حتى ل 11 ديال الليل .. ناضت تعشات ورجعات لقات سيمو مسيفط
ليها عرام ديال المساجات . ومزال كيكتب ليها .. شفتو وهوا يفيق عليها الجرح وتبدل عليها الجوج وبدات تمسح فداكشي اللي كيكتب بلا ماتقرا فاللخر خلات مساجاتو كيطلعو وقلباتها لليوتوب باش تلف وفنفس الوقت يشوفها كاينة ومكتجاوبش على مساجاتو .. لاكن سيمو مافاوهش الميساجات بوحدهم بدا كيسيفط ليها لاكام كل شوية وهي كتحيدها .. هوا كيسيفطها وهي كتهبطها ... بقاو هاكاك كي القط مع الفار فاللخر طفاتو وناضت شربات الدواء ومشات تكات فبلاصتها كتخمم ... مغاديش تجاوبو ومعتهضرش معاه ... غتبقا بعيدة عليه مايشوفها ماتشوفو حتى تحط ليه التصاور يكحل بيهم عينيه ... وجاو فوقتهم ولحسن الحظ قرات دوك الميساجات اما كان غيفوتها الشوتينغ اللي دايرين نهار الحد .. هادشي علاش بقا الولد كل شوية يطلبها تجاوبو حست متبقاش الوقت وبينها وبين الشوتيغ غير نهار.
صبح الحال وصبحات اميرة كترغب مها باش تقبل ليها على الشوتينغ وتبوس يديديها وراسها ... تقبل ليها غير باش ترجع اعتبار راسها وترتاح على الاقل .. شافت مها حتى عيات وعارفة تفكير بنتها فديك السن كيفكر بهاد الطريقة وغير فالتفاهات فبلاصة ما تنسا عليها كلشي وتديها فقرايتها . قبلات فاللخر حيت ميمكنش دخل طريقة تفكيرها العقلانية فراس اميرة الصغير .. لاكن بشرط تمشي معاها نهار الاحد لهاد لشوتينغ . تافقو اخيرا وناضت اميرة نهار الحد صباح ضرباتها بفركة ولوات شعرها بالبابيليز كامل هبط مدرج ولبسات كسوة حد الركبة ومشات مع مها طلاقاو بالمصور اللي كان قصير القامة شوية تلاتيني عندو سيارة صغيرة ... رحب بيهم وركبو معاه داهم لحديقة الحيوانات فين دايرين الشوتنيغ .. عرفهم على ستيليست والبنات بثلاتة اللي لابسين جلالب كيتصور فالطبيعة .. دخلو اميرة لواحد الخيمة صغيورة وقفوها باش يبدلو فيها ودارو ليها مكياج وقادو ليها الشعر ولبسات جلابة حمرا وطالون بني وخرجات بابتسامة كتشوف فمها وكتصور وتعوج وتبدل الوضعيات حتى هي ... ضربات 3 ديال الجلالب بصور مختالفة وصورة حدا باباغاء ملون بجلابة صفراء جاتها رااائعة ، سالات الشوتينغ ديالها و عطاوها علاف فيه القلوس وطلبات المصور يسيفط ليها تصاور بالليل من بعد مايصايبهم باش تشوفهم وتحطهم . ودعاتهم ورجعات مع مها فطاكسي دازو تعشاو برا من دوك الفلوس ورجعو بحالهم للدار من بعد ما طيرات ليها مها الجوا باش متخسرهمش وتشري ليها بيهم حويجات جداد تلبسهم
القنبلة 💣
زاوكات فمها تخلي ليها البيسي شاعل غير حتى تشوف التصاور وتحيدو ليها على الاقل . قبلات مها حست عارفاها مقصحة وكتشوف ان علاجها فداكشي اللي بغات دير ... مابغاتش تزيد ضغط ليها كثر وخلاتها على خاطرها بشرط ضرب 12 طيرو ليها باش تنعس وتصبح قارية الصباح بكري . عسات اميرة على المصور مور العشا كتسنا يسيفط ليها وكل شوية دير ليه الضجيج وهوا كقول ليها راه خدام فيهم .. شافت 12 قربات ضرب وبدلت تضغط على المصور
اميرة : واش باااقي معطل؟ عطيني غير صورة وحدة نحطها
المصور: راني خداام فيهم داابا غير صبري شوية
اميرة : راه غنسد البيسي وبغيت نحطها قبل منعس هاد الليلة
المصور : ههه واقيلا جديدة فالفايس ... المهم غير كوني هااانية ياك بغيتي غير يشوفوهم
اميرة : قبل غدا
المصور : وصافي غيشوفوهم هاد الليلة .. بتصاورك بديت وغنحطهم عاد نكمل الخدمة لخرى
اميرة : حط هاديك ديال الكناري فوق يدي وانا لابسة الجلابة الصفرا .. هاديك عجباااتني هي اللولة حطها وبارطاجيها معايا
المصور: صافي واحد 10 دقايق ونحطها
اميرة : انا غسد دابا فالصباح نشوفهم
المصور: اوك ختي غير كوني هانية
طلات على سيمو لقاتو كاين مي من بعد الكمية ديال المساجات اللي سيفط ليها وخلاتو بلاكة مجاوباتوش وهوا كيشوف فيها حاضرة صافي ماعاودش بعت ليها شي مسج . طلات حتى على هدى لقاتها حاضرة ناضرة وكل مرة تلوح تصويرة جديدة .. الفايسبوك كامل فايق فديك اللحضة وحتى مها ناضت عندها تحيدو ليها
اميرة : دقيييقة دقيييقة عااافاك غييير دقيقة نشوف غير التصويرة
الام : درت معاك 12 صافي متندمينيش نوضي تنعسي
اميرة : غييير دقيقة والله منزيدها
تلاحت الصورة قدامها وهي كترغب مها وطلعات ليها بارطاجاها المصور ديال الكناري نيت والشعر زعر ملوي طويل والابتسامة والزين والوقفة كيوت كتشوف فالكناري .. صورة جد جميلة بدات طرطق ليها فلايكات فوور ماتحطات واميرة كتشوف وعينيها كيبرقو بريق كتشوفو لايكات طالعين طلعة صاروخية والصورة تبارطاجات جوج مرات من ناس اخرين فديك اللحضة وزادت حتى الستيليست بارطاجاتها عندها وبدات الصورة فالانتشار بسرعة هائلة و الصور اخرين نازلين كيبارطاجيهم المصور معاها ومع الستيليست بالجلالب وحدة كتنسي فلخرى .. الحمرا والزهرية وتاج الورد على راسها
لقاء...
هزات شكارتها على كتفها وطلقات
شعرها كامل حرير نازل مع ضهرها .. لبسات مينية دسال جينز قصيصرة ولبسات معاها كولون تحت الركبة شوية ابيض مزير وسبرديلة بيضاء وتيشورط بيضاء فيها قلب حمر مخشية فالميني . وصلات معاها مها حتى للباب وهي كتوصي فيها وتعاود وخلاتها دخلات تبدا يوم جديد من اسبوع جديد كلو تحضيرات للامتحانات اللي على الابواب . دخلات لقسمها هازة راسها بصرامة مكتشوفش جهة هدى ابدا اللي مهبطة راسها ويدها على خدها كطقطق فالطبلة بواحد الستيلو وتشوف فيها . بعدات اميرة قدر الامكان وتفاجآت هدى من تغييرها لطاولتها .. خلات ليها البلاصة خاوية حداها وجلسات حدا ولد فالطاولة الاولى من الاولاد المجتهدين . . . ابتاسمات ليه اميرة وحتى هوا عجبو الحال مللي جلسات حداه
اميرة : واخا نجلس حداك هانيا ا فيصل ؟؟؟
ابتاسم فيصل وهوا داير النضاضر شوف ورقيق لابس قميجة مسدودة حتى للعنق وساعة فاليد كيحشم من خيالو
- لاا غير جلسي ... تبقاي تجلسي حدايا حتى فالحصص لخرين الى بغيتي
ابتاسمات وقالت : صافي من ليوم حداك غنبدا نجلس اوكي .. وحتى فلحصص لخرين حضي ليا بلاصتي ههه
هي كضحك معاه وهدى كتشوف فيها من اللور فالصف لاخر وتزفر مارضاتش . وقف الاستاذ وكانت حصة ديال الرياضيات وقال
- تبارك الله عليكم ... لمن انا كنشرح ونبح فحلقي مللي بدا العام !! فاللخر جايبسن ليا السفنج فالفرض اللي فات هااا !! وا حلو ودنيكم تسنطو للنقط الكحلة ديالكم
- عصاام زروال : 5 ... تبارك الله حساب راسك فالثالت ... مزياان حتى خمسة مزيانة ياك كافياك ولا نزيدك ؟؟؟ (خزر فيه)
- نجوى الراضي : 7 ... ماعرفتش انا واش كنقري الباك ولا ابتدائي الله ينعل اللي ميحشم
- سلمى الناجي: 10 ... على سلامتك وقفتيها على رجليها
- هدى 0 ... النقط جيبيهم فعرض الازياء داكشي اللي يصلاح ليك اما القرايا ماعندها باش تفيدك
قالت هدى: لا استاذ كنت مريضة وو ...
قاطعها : مريضة بصباط الطالون ولا بالشعا ديال التصاور اللي عما ليك العينين ... الله يمسخك .
جلسات هدى حادرة الراس كتزفر ماحاملاش راسها وبدات تشوف بنص عين فأميرة اللي كضحك هي وفيصل على رد الاستاذ
- اميرة بلحاج: 19: 78 .. هادو هما البنات ... حتى الى تصورو وتبوزاو جاو معاهم .. ماشي بحال اللي جايب السفنج وزايدها بالتصاور .
- نسرين سليماني : 2 ... حتى جوج مزيانة واحد ليك و واحد اللي عزيز عليك ... تاشيياخت هي اللي تلقيك ليك
حدرات راسها اميرة كضحك ماقدراتش تشد الضحكة وهدى فالقنت كتحمار وتصفار بغات تفركع والقسم كيكركر والاستاذ كيعطي القاصح للكوسلا حتى سالا وبدا يصحح معاهم الفرض و كانت اميرة وفيصل هما اللي كيصحو .. دوزو الحصة في سلم وسلام وخرجات اميرة كضحك هي وفيصل من القسم حيت اصلا الاستاذ ديال الماط عندهم مسالي عندو شي هضور كيضحكو .خرجو لبرا مع العشرة يضربهم البرد باش يرجعو يكملو الحصة ساعتاين لخرى اللي بقات عند الفرنسية وهي دوز هدى كي الرعدة ضربات اميرة بكتفها من اللور تا دخلات ففيصل وخرجات عوالة دابز مع شي حد وغير على سبة . شافت جهتها اميرة باشمأزاز وكملات طريقها ناوية تمشي للحانوت تشري شي بيمو وترجع .. يالاه خرجات وسط الزحام شي داخل شي خارج و واحد المرايشة بين البنات كيتسارا فيها الصبع الوسطاني ديالي الدراري والهراج وبنادم طويل بللحية باقي فالباك والبنات باللبس عاصرين وشير رباعة بنات و ولاد فباب واحد العمارة كيتحششو وكاين اللي باغي يبان .. الدعوة مخلطة .. فاتت الزحام شوية وهي تبان ليها هدى واقفة مع سيمو فوق وحداهم الروت ومعاهم جوج دراري اخرين بالماطر كبار شعلو الزلزال فالليسي خلاو صحابات الدودة غير غاديين جايين حداهم وو حدة دفع لخرى كيضحكو ووحدة تحكر على وحدة قدامهم واخا صحابات والطالبية محلووولة والصدر مزلع اما صحابات الشعكوك حدث ةلا تحرج .. السوالف بحال الى راهم فغينوة والمعاندة وكيشاليو .. وحتى لي شعرها مزيت كيبري لاسق مع ودنيها طلقاتو تشالي بيه .. خسارة مولفة ضرب البروشينغ فنص نهار ديال العشية وتبان زوينة ماضرباتش حساب الصباح والشمس اللي كتشرق وتنشر التيتيز جديد فباب الليسي .
شافتهم اميرة وعقدات حجبانها وفيصل كيهضر على الخبز فيه البيض والكاشير باغي يفطر .. شافتو كيهضر بعفوية ومع هز راسو شافها ناض بالزربة سمح فهدى واقفة حدا الروت وتم جاي عند اميرة .. شافتو شافها وهي تقلب وجهها وجرات فيصل كتزرب جهة المحلبة وتفتف
- البيض والزيت والكاشير
فيصل : والفرماج كيجي زوين كنشريه كل صباح
اميرة: بنين ياك يالاه سربي سربي غيسدو الباب سربي
بدات تخشى وسط بنادم وبسس بس الزين .. الجلالب والقوالب منين مادازت كيبسلو عليها وتخا يكونو معاهم بنات .. ماحساتش براسها حتى جرها من يدها بالجهد وتلفتات بسرعة ودار معاها حتى شعرها فالهواء وشافت فيه
مشاجرة
خزرات فيه ونترات يدها وسط بنادم وقالت
- شنو بغيتي ؟ طلق مني
حدر راسو عاقد حجبانو وقال : اجي واحد الدقيقة نهضر معاك
شافوه دراري الليسي باغي يجرها وناضو بغاو يبينو الرجولة ووقف عليه واحد بينو وبين اميرة وقال
- شكاين اخاي مانخافوش ؟؟
الدري: طلق منها كتعرفها ؟؟ واش كيعرفك اميرة ؟
شافت فيه اميرة بارتباك واخا اصلا مكتعرفش داك الدري .. ولاكن الدراري حتى حاجة مكتخفا عليهم وبلخصوص هي كتحط التصاور كولشي رجع كيعرفها فالمنطقة كاملة
اميرة : لا اخويا مكنعرفووش؟
نترات يديها هربات وتدخل دري اخر وقال
- باغي لبنت الصحة الساط ولا شنو
طلع سيمو واحد الموس من جيبو رمادي كيبري حلو وقال كيخزر فيه
- غتحيد ولا نفس موك
شافو الدراري الموس طلع وتجمعو صحاب المضاربة اللي موالفين بالصدع دوروه وهربو البنات والخوافة .. وحتى صحاب سيمو شافو القضية حماضت جبدو الزراوط من الماطر وتدخلو وهي تنوض بيناتهم مضاربة مكاين غير عطيني نعيط ولسوء الحظ كان دم سيمو سخون وطاح فيدو واحد بحالو تاهوا مخبي موس وجبدو عليه وبدا واحد كيهد على لاخر وكلشي كيهرب من قنت لقنت .. كان واحد فيهم غتجي فيه الضربة يا سيمو يا لاخر .... وجاات الضربة فلاخر ... ضربو سيمو بالموس شرط ليه عنقو وطوش الدم وحتى هوا جات فيه دقة فالجبهة تفلح ليه اللحم .. هربو الدراري من بعد ما رونوها مضاربة قبل ميوصلو البوليس وطارو فوق الماطر واحد مور لاخر قلعو الغبار ونوضو الزلزال بداك الصوت من بعد ما تحلف فيهم السيمو باللي باقي يرجع ومعاه المحمية كما تحماو عليهم ويرد ليهم خو صرفهم واخا ماخلاش من جهدو ومامشا حتى خلا الطابع
خوف..
تقربلات فالليسي.. وعلامن ؟ على اميرة اللي مكتهضر مع حتى واحد .. وحتى اللي مكيعرفش رجع كيقلب عليها باش يعرف شكون هاد اميرة ! دخلات للحصة ديال الفرنسية كترجف .. مابقاش ليها العقل اللي يقرا اما هدى مادخلاتش كاع .. كولشي فالسم تجوق عليها فلخروج كيسولوها وهي كتنكر واش كتعرفو . رجعات بحالها للدار وفالجوج مابغاتش تمشي تقرا خافت تمشي بوحدها ... بقات تزاوك فواحد خالتها ساكنة قريبة حست مها وباها فالخدمة عاد وصلات معاها ودخلات تقرا وحتى فديك الحصة مادخلاتش اميرة .. قرات ساعة وخرجات مع الثلاتة تبدل الحصة .. يالاه وصلات لاكولوار هي وفيصل وهوا يجي واحد الدري كيجري عندها ويلهت باين طلع كيجري جوج ديال الطبقات باش يوصل عندها
الولد : اميراااا .. اميراااا .
تلفتات مخلوعة : شنو ؟؟
الولد : واااااناااااري .. واشااابكة برااااا بالسواطر ... والرويييينة داك خونا رجع وجاب معاه فرك ديال صحابو كاااملين بالماطر وكل واحد قد السخط وتلاقاو لولاد الزيتون اللي تحاماو عليهم الصباح وناضت مطااايفة ... وناااااري الحرب
صفار وجهها وبدات ترعد : اويييلي واش بصح !!
فيصل جاتو الدوخة جلس فواحد الدرجة واميرة ماعرفات تمشي طل تشوف غير اش كاين ولا تبت للارض حسن مايشوفها سيمو يجي ليها .. فضلات تدخل للقسم حسن ليها و كالعادة تكجكجو عليها كي الدبان مخلوعين كيسولوها وهي مهبطة راسها كتبكي
استغربات الاستاذة لان هاد الفعايل ماشي ديالها وقالت
- واش بصح اميرة ؟؟
هزات اميرة راسها كتبكي وقالت : لاا انا مكنعرفوش هوا اللي تعرض ليا و حماو عليها دوك الدراري .. حتى واحد فيهم مكنعرفو
الاستادة : عيطي لماماك تجي تديك فلعشية ماتمشيش بوحد (دورات راسها) الموت نايضة برا راه عيط المدير للبوليس ... وييلي اش هاد الحالة ماعرفنا راسنا فمؤسسة ولا فحبس !
غفلة
خرجات من الحصة مخلوعة كتزاوك ففيصل اللي ماهز تاراسو يوصل معاها غير شوية ، و واخا هاكاك قرب معاها وتعرضو ليها بنات اخرين كبارات من صحاب الشاليلي وضاااسرات وقالت وحدة فيهم دايرة سمطة غليييضة فيها درع ماشي بزيم !
- فين كتعرفي داك الدري؟؟؟ واش جمك
اميرة : لا اختي عمرني شفتو
قالت وحدة اخرى: باركة من الكدوب ياك كان معاك فالزدحة .. راه كتكدب عليكم جمها هاداك
قالت الباطرونة ديالهم اللي حاسبة راسها مليحة العرب
مشات اميرة للدار... ودارت السبة بموضوع تخرجو ومشات للسيبير بالبيجامة جلسات حلات الفايس بسرعة كتشوف الجديد ... واهلي تصارها فين وصلو وشحال ديال التعاليق .. طلات على حساب سيمو لقاتو كما هوا مازاد فيه حتى صورة وعيطات لمول سيبير
اميرة : عفاك اخويا بغيت نبلوكي هاد الكونت كي ندير؟
- ساهلة غدخلي هنا وتمشي لهادي وديري ليه بلوك
اميرة : اااه صافي شكرا
بلوكاتو هوا وهدى وناضت رجعات بحالها .
دازت يوماين والموضوع مابغاش يتسد منين مادازت كتسمع على المضاربة .. سمعات باللي شدوهم البوليس وداوهم كاملين ... رتاحت نسبيا واخا تزخزات فقلبلها من جهة السيمو وتحصرات على شنو وقع .. ماكرهاتش كون ماوقعش اللي وقع وبقات علاقتها مع سيمو زوينة .. على الاقل كان شي حاجة زوينة دخلات لحياتها وعمراتها وخلاتها تحس باحساس جميل معمرها حسات بيه من قبل .
دازو اليوماين والاسطوانة كتكرر ونضرات هدى ليها كيزيدو كره وحقد .. وحدة مكتهضر على مع وحدة .. واخا بعد المرات كتبدا تحشي ليها هدى الهضؤة فاش كتكوم جالسة فشي درروج ولا مجمعة فشي ثنت ودوز حداها اميرة .
النهار الثالت مشات اميرة لبسة جديدة للمدرسة شراتها ليها مها .. كسوة مودرة حد الركبة بالحزام ديالها وصندالة ديال الصبع بالسميطات فالحمر وطالقة شعرها وهازة صاك مجنب فيه كتوبة ديالها .. ومع الدورة ديال الشارع وكلشي طالع غادي يقرا وكاين اللي كيتفلى وغادي يتقنت وكاين اللي غادي كيسارا عند مالين المكياج ويشفر ويخشي فالصاك . دارت مع الشارع وهي تسمع صوت مجهد كيتقب الودنين بحال الى غيدوز فيها .. تلفتات وراها شافت الروت قرب ليها ووقف قدامها ونزل من فوقو بجدية لابس دجين نقي وتيشورط كحلة مزيرة على العضلات وسبرديلة بيضاء كتشعل شعيل وفاصمة لاسقة فوق حاجبو .. مابقات لا طانكة ولا بوندو حيد كلشي ونزل عندها اللي شافو يك النقاوة والريحة والوسامة يحلف ماهوا اللي دابز بديك الطريقة المرة الفايتة .. وقف عليها خلعها وهاد المرة هضر بشوية ناقص من الحدة واخا ماامح وجهو مشابكة وقال
حركات راسها ومشات كتزرب وتخشا وسط الناس ودخلات كترعد وتقفقف .. مكان عندها لا فرض لا حتى حاجة لقات هاد الكدبة غتسلكها وطلقاتها عليه ومشات .
خرجات مع الستة وخايفة وكترعد عارفة راسها غتخرج تلقاه كيتسناها فالباب .. بغات تأكد حيت ميمكنش يالاه دابز فديك البلاصة وغيجي مرة اخرى يوقف تما .. هي مخايفش يدوروه بوحدو عاوتاني ويفديوها فيه .
وصلات للباب وسط الخروج ديال التلاميذ وطلات لقاتو واقف فالجهة من الشارع مقابل مع الباب مربع يديه وعاقدوك الحجبان واللي داز حداه كيبعد عليه .. اما لبنات خلاص غير غاديين جايين جيهتو كيضحكو وشي وحدات بغاو يدابزو بيناتهم وكل وحدة تبان على لخرى . المهم يتبتو الحضور بأي طريقة . غير قشعاتو اميرة وهي ترجع اللور كتفتف .. ناري كيتسناها .. ناري اش بغا منها ! .. تخلعات وبقات دور فبلاصتها .. اش دير مادير .. اه تمشي تنقز من الصور من الجهة لخرى حسن ليها .. مشات كطير جهة الرياضة ولقات الحجر مستفين واجدين حيت مولفين ينقزو من تما ونقزات بلا هواها وزادت مع المرر كتزرب وتبعد والخلعة شاداها ومشات بحالها
نقاش ..
وصلات لدارهم اخيرا وطلعات ردات
النفس .. كلات شوية ولبسات سورفيت كحلة مزيرة وجمعات شعرها ديل حصان ولبسات سبرديلتها وهزات شكارتها وخرجات من الدار باش تمشي للمراجعة .. فاتت الحومة ومع الدورة وهي غادية بشوية عليها خرج ليها ماعرفاتو منين مزل حتى وقف قدامها ودار يدو على الحيط كيشوف فيها مصغر عينيه وهي جامدة فبلاصتها
- سيمو : حساب ليك هربتي !! هانا شديتك
بدا صدرها كيطلع ويهبط بالخلعة وهي كتشوف فيه واقف باقي بحوايجو .. شداتها القفقافة وقالت
تكا على الحيط والضلام كيطيح وربع يديه كيشوف فيها وقال
- مالكي معايا ؟ علاش بالزربة تقلبتي شنو كاين ا أميرة ... كنا مزيانين حتى تقلبتي بوحدك مادرت ليك حتى شي حاجة ... واش شي واحد كالك عليا شي هضرة ؟
هبطات راسها الجنب معبسة وقالت : ماهضر معايا تا واحد .. انا اصلا عندي امتحانات و مركزة معاهم
شاف فيها بأسى وقال : واش انا كنلهيك على الامتحانات ديالك ؟
شافت فالجنب ساكنة مارداتش
سيمو : انا بغيت نفهم غير حاجة ... تقلبتي عليا بين ليلة ونهار .. علاش؟
اميرة : ماتقلبتش عليك
قال بجدية: لا قلبتي عليا .. ياك درنا نمشيو لاديفيلي بجوج .. ونهار ديفيلي خليتني واقف 4 (دار ربعة بيدو ) ديال السواييع كنتسنا فيك ... وبقيتى كتنستا حتى دازت ساعتاين فالديفيلي ... مابغيتيش تشاركي قوليها ... علاش خليتيني كنتسناك .. وخويا تا هوا حط الكسوة ديالك وكيعيط ليا كنقوليه ماتعطيها لتا وحدة هانا غنجيبها .. فاللخر مشيتي درتي شوتينع مع واحد اخر ولونصيتي تصاور عااادي بحال الى مكاين والو !! ... علاش ؟ علاش من اللول ماقلتيش ليا راك باغا ديري شوتينغ وماباغاش ديري معانا ديفيلي ؟؟؟ علاش خليتني كنتسنا
بقات ساكتة كتشوف فيه وهوا كيهضر وملامحو كتعبر على الحزن .. باين باللي بقا فيه الحال وتقرص من تصرفها
سيمو : متبغيتيش ديريه معايا قوليها عااادي مكاين حتى مشكل ... وحتى الى بغيتي ديري شوتينع كنتي تقوليها ليا ونديروه ... مشيتي عند (شار بيدو للجنب باشمأزاز ) ربيع درتي معاه شوتينع ... تا هداك دابا دولة يديرو معاه الناس شوتينع
اميرة : بلعكس هوا الله يعمرها دار
حط صبعانو على صدرو : وانا ولد لحرام !!! فاش طلعت معاك ولد لحرام ؟؟ دوي فاش طلعت معاك انا ولد لحرام ... (قال في حيرة وجنون ) مالكي اميرة تقلبتي بحال هاكا ... الى درت ليك شي حاجة قوليها ليا ماشي تهربي مني وتبلوكيني فالفايس
اميرة : بتهكم ) نتا اللي قلتي ليا جاوكم السلطات وصافي مابقا لا ديفيلي لا والو
هز حاجبو فهدشة وقال : انا قلت ليك مابقا لا ديفيلي لا والو !!! فوقاش سمعتيها مني ؟ فوقاش قلت ليك راه مابقا لا ديفيلي لا والو !!! (تعجب) نقول ليك مابقا لا ديفيلي لا والو ولغد ليه يتنشرو تصاورو ودير بوم !!! كن غير كانت بعدا شي حاجة اللي تستر !
جراتو من دراعو كترغب وهوا قاصح كي الحجرة بزز باش كيتململ ليها ورداتو بلاصتو مخلوعة
- راه حمق حمق ... اصلا هوا . وو وو مممعروف عندنا فالدرب حمق حتى واحد مكيدي عليه
سيمو : تنهد ) شوفي انا غدا غنجيب ليك هدى ... تسمعي بودنيك شنو قلت ليها ... والى كانت كدبات عليك بصح و دارت لينا هاد المشاكل .. بالرب تا نتسيف عليها قدامك
قالت اميرة كتساوي : نشاء الله .. نشاء الله ... انا غنمشي
سيمو : يالاه نجر معاك
سكتات وكمل معاها الطريق ساكتين بجوج ... دخلات دارت السوايع وخرجات لقاتو باقي عاصر عليها حدا الباب واقف مع واحد الحيط وهاز واحد الرجل كيلعب فتيليفون .. استغربات وقالت
شافت فيه بنص عين ومشات ساكتة وهوا ساكت واحد مكيهضر مع لاخر تا قربها للدار وهي تحني راسها بالزربة وقالت غادية كتجري
- شكرا بسلامة .
فرض
سررررر داخلة كتجري والباب كيتسد مشات مطير دخلات للقسم خايفة يكونو الوراق ديال الفرض تفرقو .. جلسات كتلهت سخفانة حدا فيصل ونيت لقات الاوراق كيتفرقو .. شدات ورقتها ساكتة هبطات عليها قراتها .. حط الاستاذ الكرسي فوق المكتب وطلع جلس عليه داير رجل على رجل بواحد الكوستيم قديم وكملها بنضاضر الشمس باش يحضيهم مايفلت ليه حتى واحد ... فيصل محني على الورقة مكيتنفسش واميرة حتى هي هابطة عليها مكتهزش الراس .. اما هدى حانية راسها كدور ستيلو فيدها ودور فعينيها كتشوف شكون يعتقها ... شي كيشوف فشي وشي كيلوح الورقة لشي تحت الطاولة والفراغ كيتعمر باللي كان المهم يتعمر ... هزات اميرة راسها اخيرا وجلسات كتقرا وتعاود داكشي اللي كتبتات فورقة ديال الوساخ وتصحح اخطاءها عاد نقلات كلشي فورقة الامتحان وناضت حطاتها هي اللولة قدام الاستاذ وتبعها فيصل حط ورقتو ... فيصل رجع كيتعاند مع اميرة فلقراية وحتى هي حسات بيه معاند معاها وتحداتو فصمت . جلسو فالطاولة كيتجمعو وكل واحد كيقول لاخر ها شنو درت فالسؤال .. اما لخرين باقين حاصلين .. وواحد مور اميرة تقب ليها ضهرها بالنخيز وكيوشوش ليها ويبكي عليها وهي كتهرب
- بوشوشة : سؤال الخامس اميرة الله يحفضك ... غير السؤال الخامس ... عفااك اختي الله يسهل عليك .
دورات عينيها هاكا وهاكا ورجعات للورقة ديالها ديال الوساخ اللي خرجات فيها شافت السؤال وقطعات طرف صغير منها كتبات فيه الجواب الصحيح بطريقة اخرى من غير اللي دارت هي وكمشاتها فيدها مزيان مخلوعة وبدات تحك عنقها ودور راسها ولاحتها ليه ... شوية حسات باللي حداه تقب ليها كتفها بالستيلو ومحني كيزحف على الطاولة ويرغب
- السؤال اللول الله يحن عليك ... غير السؤال اللول
هربات كتفها كتهزو وناض حتى لي حداه كيزاوك فيها ويبكيو بجوج وعطاتهم التخراج مرة اخرى بنفس الطريقة .. صونا التيليفون للاستاذ وهز كيهضر وهوا مقلز فوق البيرو .. يالاه قال الو بصوت خافت بدات الوشوشة من الجناب وكلشي كيعيط اميرا اميراا اميراا السؤال الثاني .. السؤال الثالت ... الله يحفضك اميرااا ... السؤال اللخر
تلفتات كتفتف ودور فعينيها خايفة تحصل وقالت بسرعة كتشير براسها اللي موراها
- عطيه نتا اللي عطيت ليك .. عطيه
اللي وراها : واخا عطيني السؤال اللخر الله ينورك
عطاتو ليه بالزربة ولاحتو ليه ولاحو لوحدة فجنبها ولخرين بغاو يزحفو مع الارض كيزاوكو .. طاحت الورقة ديال التخراج فالارض وهما يطيحو عليها كيتخاطفو كاع اللي فداك الصف تسمعات فصمت زدردلاف جوج ولاد وبنت وهوا يهز لاستاذ راسو وقال
- شكاااين ؟؟
رجع كل واحد بلاصتو كيلهت سخفان والجواب تقسم فالنص كل واحد كتب نص وتبادلو الاوراق كملو التتمة .. تساراو الاجوبة على القسم كامل وحتى هدى بدات ترغب فواحد يعطيها الجواب واخا عارفاه ديال اميرة ولاح ليها الورقة ... شي خرج النص شي لحق جواب واحد وشي لحق الاجوبة كاملين بحال هادوك اللي جالسن وراها وكاين اللي مالحق والو . خرجو من ديك الحصة وخلو الفرض الثاني فالحصة ديال العلوم ... ياله جلسات فالبوطاجي وفيصل حداها مفارقين كولشي بدا يتخاطف على البلايص اللي قراب ليها وناضت مضاربة وسط القسم بين بنت ولد وهوا يجر وهي دفع شكون يجلس وراها وبداو يتحالفو حتى دخلات ليهم الاستاذة مخنزة قفزاتهم وكانت استاذة قبيييحة مكترحمش كلمة جوج تحط الزيروات وتخرج مع الباب .. اللي جلس ورا اميرة فرحاان عوال عليها اما فيصل مكيعتق مكيرحم حتى بحرف . خرجات ورقتها وخلات الوساخ .. شافتها الاستاذة سالات وكتراجع ووقفات عليها بصرامة
الربطة زغبية الجزء الثاني
محتوى القصة
التنقل بين الأجزاء