صورة مصغرة لـقصة الربطة زغبية

قصة الربطة زغبية

qisat 9isat
رواية الربطة زغبية

الابطال اولاد الشعب و مستوحات من قصة حقيييييقية 😍😍😍 اللي قال الحب كدبة نكدبو فوجهو وشحال من مرة كنقول نحطها .يالاه انا نلمح ليكم شوية .. القصة غالب عليها الحب ... العروووق ديال الحب خلينا من اللعب ولاكن هاد الحب سم قاتل لهاد الابطال اللي غنكتب عليهم ... درامية بامتياز وكوميدية لاننا غنشوفو نوع اخر من الابطال .. هادو بشر ماشي ملائكة يعني شاااابعين اخطاء وعيوب وبلخصوووووص البطل شخصية نادرة بكترة ما هوا جدي فبعض الاحيان ديك الجدية ديالو كضحك بزاااف و جررييئ مكيخافش غتعرفو على شخصيتو عن قرب فالقصة . اما البطلة جامعة الدنيا وضارباها بركلة كولشي عندها خضرة فوق الطعام مكتفكركش لا لمستقبل ولا فماضي ههه عايشة لحاضر و اللحضة فقط

...

يالاه يالاه سربيو البنات مابقا والو مشا الحال ... يالاه سربيو دغيا ... اشنو سميتك احبيبة 
ابتاسمات بخجل لابسة غوب بيضاء وشعرها الاشقر المتموج مطلوق .، حاطة التاج والمكياج عيونها كتبري بالفرحة 
- اميرة 
ضحكات النكافة بابتسامة وهي لابسة جلابة خفيفة وطالون طالقة شعرها حتى هي وقالت 
- اسم على مسمى ..الصلاة على النبي ... يالاه خليك كما نتي باش متخسريش شعرك ومكياجك ... هدى يالاه لبسي بالزربة ... كاتنسايش الطالون ... نتي اللولة غتهبطي تصوري وموراك ماريا عاد اميرة هي اللخرة . 
تلفتات كتسوط وسط البيت والبنات كل وحدة كتشوف راسها واش خاصها تصلح شي حاجة .
النكافة : تعطل هادا اش هاد الوقت فوقاش غنبداو وفوقاش غنساليو اووووف 
هزات تيليفون وربطات الخط بتوثر : الووو فينك ؟ اش هاد التعطيلة ؟ ... اويييلي على تقلب بيك الموطو !!! اوييلي وشنو دابا ؟ كوسطا ! تما بقيتي ... ويلي ويلي ويلي !!! وصافي صافي انا نشوف شنو ندير .
قطعات وتلفتات عند البنات مفقوصة وقالت : الفوطوغراف دخل فيه الطاكسي ولا ماعرفت هوا اللي دحل فالطاكسي ودايرين كوسطا وقالك الكاميرا تقاست ااااش هاد النهااار كولشي واجد واللي غيصور مواجدش اش نديرو دابا 
هضرات ماريا شعرها اشقر حتى هي دايرة مشطة والتاج والمكياج وقالت 
- نشوفو شي مصور اخر عطاهم الله غير هما 
النكافة: غيطلبو التمااااان هادوك مالي معارفاهمش... 
قالت هدى بسرعة : كنعرف واحد الدري يقدر يجي حتى هوا عندو مع التصاور
النكافة: عندو لابو؟ 
هدى: لا عندو كاميرا برو وكيصور ليشوتينغ وكيعرف حتى المشاهير ... ضريييف مايقول والو الى عيطت ليه 
النكافة: عتقينا بيه بالزربة مشا الحال 
هدى: انشوف واش يكون مسالي ... انا نعيط ليه 
هزات هدى التيليفون وهي كتهز وتحط فالتكشيطة اللي عامرة عقيق وربطات الخط كتهضر بصوت انتوي لطيف 
- الو سيمو ... كيداير لاباس عليك ... الحمد لله ونتا .. اااش كتعااود فين غبرتي 
ضربات النكافة حناكها وقالت : اوييلي كتجمع ليا والحال مشا ... سربي دغيا غيجي ولا ميجيش
حركات هدى عينيها كترمش وقالت : ااه ههه ... ايوا فالدنيا .. شووف واش نتا مسالي دابا ؟ دايرين شوتينغ والمشكلة لفوطوغراف وقع ليه مشكل وبقينا حاصلين فلوتيل بلا مصور ... عاااافاك اسيمو شوف كي دير راحنا واحلين ... الله يحن علييك ... واخا يالاه رد عليا انا كنتسنا 
قطعات : قالك عندو شي شغل غيشوف واش يقدر يجي ويرد عليا 
النكافة : اااوياي هنا بقينا ... فين هوا واش بعيد ولا قريب؟ 
هدى: فالعين سلوكي ساكن ... هاهوا غيرد عليا ..مهم حنا واجدين بعدا التصاور دغيا كيتصورو 
النكافة: غيتعطااال ... واش موجوغيزي بعدا؟
هدى: لا مااا عندوش طموبيل ... يقدر يجي فديال باه .. كيهزها بعد المرات 
بقاو جالسين كيهضرو شوية صونا تيليفون لهدى وفتحات الخط بسرعة 
- الو سيمو ... . بصااااح سير الله يفرررحك ... حنا فقصر العراقي متعطلش الله يسر ليك ...شكرا 
قطعات : هاهوا جاي ... قلت ليكم ضريف وعزيزة عليه انا ... صافي نتسناو هاهوا جاي
النكافة : اوووف الحمد لله ... ماشي مشكل نتسناو المهم غير يجي 
تلفتات اميرة عندها وقالت : مكنعرفش نتبوزا ههه كي ندير ؟ وخلاتني انا اللخرة مغنشوفش حتى كي كاديرو 
هدى: عادي اصاحبتي نتي اصلا لابسة غوب غتوقفي عادي وصافي ... ماتبوزايش هوا غيعرف كيفاش يصورك 
النكافة: واش اول مرة غاديري شوتينغ؟
اميرة : ههه واييه ومكنعرفش 
هدى: راه مابغاتش تجي حشمات جبتها غير بزز 
هزات كاميليا كتفها بتكبر وقالت : عاادي داكشي غير ولف ... درنا اكبر ديفيلي و ماتخلعناش بحال هاكا 
قلبات هدى وجهها بميوعة وقالت بصوت خافت لأميرة
- ناااري شحال متبكرة ... يخخخ ... قالت ليك اكبر ديفيلي ... من ديما معنديش معاها وزدت تلاقيتها حتى هنا يخ ... مكتعياش من لفوحان 
كاميليا : زوينة هاد القاعة ... صراحة بوجي واعر ... كنفكر ندير بحالو الى كان كيدخل لفلوس
تنهدات هدى وقالت بصوت خافت: اممم .. عندك فلوسها ! ياربي شحال تقيلة على القلب مكتنفسش اوووف (تيلي كيصوني)... الو سيمو وصلتي؟ اااه دخل دخل لداخل غير دخل 
هبطات النكافة كتجري وتعيط بالجهد : كاميييليا ... غير نعيط ليك هبطي

ءبقاو غير البنات جالسين فالغرفة ومعاهم اميرة كتسول كي دير وكي ماديرش .. وقفات قدام المرايا كترد شعرها المتومج للور وتقاد التاج حسات بشي حاجة كتنخرها من رجلها وتلفتات لقات كاميليا اللي جالسة دايرة رجل على رجل وكتكلمها برجلها 

كاميليا : واش مسمعتينيش شنو قلت؟

عبسات اميرة وقالت : لا !

كاميليا : قلت ليك واش كتقراي؟

اميرة: اه 

كاميليا: اممم .. فاش؟ 

النكافة : كاميييليا .... ياالاه سربي هبطي دغياااا 

ناضت كاميليا وقفات شافت راسها فالمرايا وهبطات كتر جلايلها بطولها وفصالتها كعارضات الازياء وبقات هدى واميرة مجمعين بجوج كيضحكو عليها وعلى تكبرها وجبهتها القاصحة حتى وصل دور هدى ونزلات وطلعات النكافة عند اميرة فاش وصلات نوبتها هزات معاها توب الكسوة البيضاء المرصعة بالاحجار والدنتيل وهبطاتها مع الدروج حشمانة وهي كتشوف البنات مودعين الحشمة وكيتحركو كي يغاو قدام الكاميرا تلفتات شافت فلفوطوغراف لقاتو شاب فنصف العشرينات من عمرو وسيم وشعرو اسود ناعم كيلمع بمثبت الشعر ولحية خفيييفة على وجهه مبعثرة .. جسم رياضي متناسق مع طولو لابس تيشورط بيضاء لاسقة على صدرو ويديه ودجينز ازرق وحداء رياضي .. فيدو ساعة يدوية وخيط اسود رقيق وفعنقو خيط اسود داخل فالتيشورط وشاد العدسة وهاز واحد الحاجب كيشير بصيعانو بجوج لكاميليا ويقول بهدوء

- كحزي شوية لوسط ... هزي راسك شوية ... ابتسامة .. براااافو (تشك ... تشك ..تشيك ) .. صافي ... باقي شي حد اخر 

تكلمات النكافة كضحك : باااقيا لعروسة ديالي 

تلفت بابتسامة وعفوية شاف اميرة هابطة والدروج وراها مغطيين بالتوب الابيض ... وقفاتها النكافة لوسط وقادات ليها التوب في حين مشاو البنات يجلسو وبقات غير هي بوحدها بابتسامة ماعرفات اشمن حركة دير ... هز لفوطوغراق العدسة كيشوف فيها بعين وحدة وخدا ليها صور وقال بابتسامة 

- بدلي الوضعية 

دورات وجهها للجنب وقالت: هاكا؟ 

ضحك وقال : صافي خليك هاكاك 

قالت هدى كضحك بالجهد: ديري يدك على وجهك اصاحبتي وبدلي لبوز هههه ... هادو راه ماشي تصاور لاكارط 

حمار وجهه اميرة وبقات ساكتة ... ضحك الفوطوغراف وقال

- غير خليوها ههه

ضحكات النكافة وبدات توريها وكل شوية تردد ..شوفي لتحت ... هزي راسك شوية لفوق ... هزي الورد شوية ... يدك على شعرها ... قادي تاج ... ضحي لفوق ... بيني سنينات ، واميرة متبعة معاها وكتطلق شوية بشوية وتحرك قدام الكاميرا ... مرة تعطيها بالضهر ... مرة تهز كتفها .. مرة تجلس بحال الوردة وسط التوب الابيض والفوطوغراف كيصور كل حركة واخا تكون عفوية ... كيقرب ويبعد مركز معاها وكيضحك فاش كتلف مكتعرف توقف ولا تجلس ... كانت هي اكثر وحدة خدات صور كثيرة كيوت حتى عيات وسالا الشوتينغ وطلعو البنات بقا غير الفوطوغراف واقف كينقي التصاور ويخلي اللي غيخدم عليهم والنكافة واقفة عليه 

- شحال حسبتي ليا؟؟

قال بابتسامة كيشوف فالكاميرا : الدنيا هاانيا ماجيتش باش نتخلص 

النكافة : واغير قول .. راك ضيعتي حتى نتا وقتك معانا

سيمو : لالا مكاين حتى مشكل ... نتسالك كافي مزيانة ؟ 

النكافة: تستااهل هههه الله يسهل عليك 

تمو البنات هابطين لابسين حوايجهم وكل وحدة هازة فيدها لكسوة اللي كانت لابسة وكيضحكو معاونين النكافة فالرحيل ... ضحك الفوطوغراف وقال 

- يالاه خلصو ... اللي بغات تصاورها تخلص عليهم 

ضحكات هدى وقالت : ههه عير خليهم عندك 

سيمو : نتي ديالنا هانية وكاميليا هانيا ... لخرا اللي غتخلص الى بغات تصاورها 

شافت فيهم اميرة باحراج وقالت : انا ؟

هدى: هههه ناري اميرة لاكارط عندو الى بغيني تصاورك خلصي عليهم 

قالت اميرة بابتسامة مجاملة : واخا ... شحال ؟ 

شاف فيها سيمو وقال : مليون .

اميرة : اويلي بزاف !

سيمو : مليون للصورة 

ضحكات وقالت : ههه نقص شوية 

سيمو : كنهضر بصح .. حساب ليك كنضحك ! (خز حاجبو)

هزات اميرة كتفها وقالت وهي خارجة بجدية صافي ... خليهم عندك ... مابغيتهمش 

مشات خرجات وقالت هدى من وراها بصوت خافت 

- اويييلي تقلقاات . 

سيمو : كنضحك معاها واش تيقتي !

هدى: وا عرفت ولاكن حسيت بيها تقلقات . تيقاتك 

سيمو : وايلي على تقلق!

هدى: اه راه دغيا كتقلق مكتعرفش ضحك ... انا عرفتها غتقلق فاش قالت ليك شحال ... راني عاارفها كي دايرة 

سيمو : غنهضر معاها باش ميحسابش ليها بصح ههه 

هدى: والله ماتهضرك ههه... انا كنعرفهاااا كي دايرة توريني فيها ... بلا ماتمشي عندها 

خرجو كيتجمعو لبرا حدا طموبيل ديال نكافة .. بغا سيمو يتفارق معاهم تما لاكن شداتو النكافة 

- الاا غنمشيو ناكلو شي حاجة مجموعين ... انا عارضة عليكم 

سيمو : بصحة .. انا عندي شي شغل ضاروري خاصني نمشي ... حتى نسيفط ليكم ليفوطو ... تلفت للور فين راكبة اميرة فالقنت حدا الزاج وقال بابتسامة 

- عطيني نمرتك نسيفط ليك تصاور 

قلبات وجهها كتبرم فعينيها وخا على خدها وسكتات مجاوباتوش ، قاطعاتو النكافة وقالت 

- والله ماتمشي حتى نعرض عليك ... نتا جاي سامح فشغلك وما تشري حتى كاس ديال القهوة ... يالاه طلع 

طلع حداها لقدام واميرة للور حدا هدى ... اما كاميليا ركبات فسيارتها الصغيرة وزادت قدامهم كتبين ليهم مهارتها فااسوقان حتى دخلات فالطروطوار وعوجات ليها الرويضة وبقاو كيضحكو عليها من الطموبيل 

هدى: وناااري حتى هيا كطييير .. دوز من هنا ودوز من هنا اناااري 

حرك سيمو راسو بتتاقل وقال كيتأسف : ماااكتعرفش تسوق 

النكافة : سرها ... حتى هي قهراتنا بالعياقة


وقفو حداها يشوفو شنو وقع لقاو الرويضة عواجت وكاميليا مارضاتش وطلعات فسيارتها بسرعة وقالت 

- صافي ماشي مشكل غادي نديها هاكا لميكانيسان 

النكافة : عوجة؟!

كاميليا: ماشي مشكل نقدر نديها ميغسي... غير سيرو نتوما بصحتكم 

طلعات كاميليا فالسيارة والرويضة كتلعب فبلاصتها ومشات وحتى النكافة كملات طريقها لمطعم وجلسو مجموعين فالطبلة كيضحكو واكثر وحدة كتقتل بالضحك هي النكافة ... راشقة ليها والشوتينغ طلع ليها بسيف ماضحك ويعجبها الحال ... اما سيمو كل شوية يدور يشوف فأميرة اللي جالسة مامرتاحاش وغير كتسوط .. تحطات الماكلة و غلقات النكافة وهدى اما اميرة حشمانة حيت مكتعرف حتى واحد ...
مكتهضر مكتنطق . جات الهضرة فالهضرة وقالت النكافة 

-كون درتي عقلك اميرة فهادشي غتمشي فيه بعيد ... تبارك الله عندك مقومات المودل ... فيه الفلوووس غتولي مرفححة ... ويطلبووووك نتي ماتبقايش كاع تلقاي الوقت فين تجلسي فداركم 

هدى: قلتهااا ليها ... هي كتحشم ... كتعصبني 

النكافة : تبغي تمشي فهاد الميدان ؟

اميرة : بخجل) ماعرفتش هه 

النكافة: جربي جربي ماتخسري والو ... ماتعرفي تصدق ليك ... سيمحمد .. عنداك تنساني فالتصاور 

سيمو : فوقاش بغيتيهم؟ 

النكافة : ماكرهتش نحطهم لييلة ... بطا عليا امنى نحطهم 

سيمو : نصايب ليك شي وحدين حطيهم حتى نسيفط ليك لخرين .. غتحطيهم دقة وحدة؟

النكافة: لالا كل مرة نزل وحدة

سيمو : صافي غنصايب ليك ديال شي وحدة فيهم ونسيفطهم ليك 

شاف فأميرة بابتسامة وهي دور وجهها لجهة اخرى ماشركاتش معاهم الهضرة حتى سالاو وتوادع معاهم سيمو تما ومشا .

دخلات لبيتها كتجبد جامعة شعرها الاشقر باقي مموج مصايب ولابسة بيجامة وسدات الباب وتكات فوق النموسية طالقة الموسيقى وكتلعب فتيليفون وداهنة كريم مرطب لوجهها ، دخلات عندها مها كطل وقالت

- ماتعشايش؟ 

اميرة : كليت مع لبنات فالزنقة

الام: فالشوتينغ؟

اميرة : اه ... عرضات علينا النكافة

الام: ايوا بالصحة .. نعسي دابا غتفيقي بكري راك داخلة مع 8 ... يالاه نعسي هانا درت ليك خاطرك خليتك تمشي للشوتينع ... وا ديري ليا خاطري مانبقايش سهرانة مع تيليفون 

اميرة : لا صافي غنعس .. غير طفي الضوء 

ابتاسمات الام وقالت : يالاه تصبحي على خير ... ختك راه بايتة مع خالتك حتى لغدا وتجي 

اميرة: اوك 

تقلبات على جنبها فالضلام حالة السرجم كتفوه وتذكر احداث اليوم حتى سمعات " تيت تيت " وهزات تيليفون لقات مسج من عند سيمو 

" bsr amira cv ... c'est simo .. passe ton fb nsift lik les photos "

قراتو ومكانش عندها الصولد باش ترد ومع الاسف فديك الوقت كان غير لفايس بوك اللي يالاه بان وكلشي تطلا بيه ... اما حتى هي مازال مادارتوش باش تعرف اش واقع فيه ... كتعرف الامسن تشاطي فقط . عرفات باللي صاحبتها هدى اللي عطاتو نمرتها .. حطات تيلي وغطسات فالنعاس

سررررررر..... كولشي داخل لليسي وحتى اميرة معاهم ... لابسة دجين وتيشورط وطالقة شعرها مزالة فرحانة بيه حيت باقي مصايب .. طلاقات هدى وتسالمو بالحناك كيضحكو 

هدى: شفتي تصاور !!! وااااعرين عرفتي طلعو فنيييين 

اميرة : فين شفتيهم؟ 

هدى: سيفطهم ليا سيمو ... دار ليهم ترونسفير لينا كاملين .. راه عطيتو نمرتك واش هضر معاك؟

اميرة : اه سيفط ليا مسج بالليل ولاكن مجاوبتوش ماعنديش الصولد ... واش النكافة غتحطهم فالمجلات؟

هدى: المجلات! هههه ناري قداش... وغتحطهم غا فالفايس بوك ... اشهار اصاحبتي 

اميرة : صايبي ليا فايس بوك ماعنديش 

هدى : شحال هادي كنقول ليك ديريه ... راه فيه مايدار .. ونتي لاسقة ليا فامسن اش درتي بيه ... دخلي فايس بوك تشوفي غير تصاور بعدا ديال البنات 

هدى : حتى نتي غتحطي تصاورك ؟

هدى: عادي اصاحبتي كولشي دابا رجع كيحط ... حتى نتي حطيهم مالكي اكسيبطي غير بنادم اللي نقي

اميرة : وصافي حتى تصايبيه ليا وتوريني كي ندير ليه ههه ..

هدى: فاش نرجع للدار غنصايبو ليك . 

دخلو دوزو الحصة وخرجو بحالهم كل وحدة مشات لدارهم . كالعادة جلسات اميرة دايرة الكاسك قدام البيسي مكونيكطية حتى دخلات عليها هدى فالامسن وسيفطات ليها فايس بوك جديد دخلات ليها فيه الاصدقاء اللي كتعرف وحتى سيمو معاهم وعطاتو ليها عامر شوية وحاطة ليها فيه الورد والمحابق ومزوقاه ليها ، بدات توريها وتفهمها اي حاجة معارفتهاش على بيدمن تعلم وتولف شوية ... دخلات اميرة للفايس لقات عالم اخر كبير كولو الوان وصور وحيوية ونشاط ... البنات اللي كانو يخافو يحطو تصاورهم رجعو كاملين كيحطو وكولشي باغي يولي مودل وناشر زينو ... تحمسات حتى هي وناضت كتجري عند ختها لكبيرة طلباتها تصورها ولبات ليها الطلب .. شدات نونوس فيدها عنقاتو فوق الناموسية بابتسامة وتصورات طالقة شعرها وبسرعة نشراتها على الفايس بوك .. لقات صورة تفاعل كبير من الاصدقاء وبداو كيجيوها مساجات بكثرة ... تزادت عندها التقة فالنفس اكثر وبدات تزعم حطات صورة اخرى بكاميرا الحاسبو وهي دايرة كاسكيطة بابتسامة ... بدات تقرا التعاليق متحمسة حتى وصلها مسج من عند سيمو مسيفط ليها تصاور ديالها اللي صورها مصايبين كاملين ... صور فغاااية الجمال ... كانت غتحط وحدة فيهم وكانت غتكون قنبلة على الفايس بوك بحكم ان قليل من البنات اللي كيحطو صور احترافية وبكسوة بحال هاديك .. من غير عارضات الازياء اللي معروفات شوية ومطلوبات . 

سيمو : ماتحطيهاش دابا حتى تحطها الستيليست اللولة باش متحرقيش الشوتينغ 

ابتاسمات بسعادة وقالت : اوك شكرا بزاااف 

سيمو : مرحبا ... الى بغيتي شي حاجة انا فالخدمة 

اميرة: اوك شكرا 

سيمو : حسيت بيك تقلقتي داك النهار ... غير كنضحك وصافي ماديريش فبالك 

اميرة : ماشي مشكل .

سيمو : اول مرة ديري شوتينغ ؟

اميرة : اه اول مرة 

سيمو : عجبك الحال؟ غتعاودي ديري الى جاتك فرصة ؟ 

اميرة : اه علاش لا 

سيمو : الى بغيتي تصوري قوليها ليا ... ولا الى بغيتي معاونك فشي حاجة 

اميرة : اوك نشاء الله شكرا 

سيمو : مرحبا 

وقفات الهضرة وكملات رحلتهت فالفايس بوك كتعرف كل مرة على واحد ودردرش شوية .. دازت 3 ايام وكل مرة يسيفط ليها سيمو مسج فالفايس فاش كيلقاها مكونيكطيا .. وديما نفس الهضرة .. سافا بيخير .. الحمد الله ونتا ... الحمد شكرا . نفس الروتين حتى حطات النكافة صورتها وهي طير حطات تصاور فحسابها ... بسرعة البرق نتشرو وشي كيبارطاجي لشي والفايس بوك عندها كيعمر بالناس والمساجات كتكتر وطلب الصداقة مبلوكي بعباد الله اما اميرة ناعسة شابعة نعاس مجايبة للدنيا خبار مافراسهاش تصاورها نتاشرو وتحلو بيهم حسابات وهمية وصورها حطوهم البنات فحساباتهم ووصلو حتى للعائلة وطبعا العائلة ماطلعاتش من العاكزين تاصلو فالبلاصة بباها قبل ماتفيق هي وتعرف اش واقع فالدنيا


حلات عينيها الصباح دايخة بالنعاس .. تقلبات على جنبها كتخمم فالمستقبل ساهية حتى دخلات عليها مها بوجه صارم 

- صباح الخير ... نوضي نهضر معاك 

اميرة : مالكي شنو واقع؟

الام: نوضي وغتعرفي شنو واقع 

خرجات الام وناضت انيرة بالزربة ممخلوعة شعرها و دازت على بانطوفتها كتجري مشات للدوش ديال الدار غسلات وجهها وتمات راجعة لقات باها جالس فالصالون ومها والصينية ديال الفطور محطوطة 

الام : اجي ... جلسي هنا 

جلسات اميرة قدامهم عينيها منفوخين بالنعاس باقا مستوعبات مزيان وقالت 

- شنو كاين ؟ 

تلفت عندها باها بصرامة وقال : اش داكشي درتيه ؟ اش ديك الفضيحة اللي كولشي ساق ليها الخبار الا انا 

اميرة: اويلي شنو درت ؟!!

الام : تصاورك منشورين فالفايسبوك كامل ... هادي ماشي فضيحة ! معيط لينا عمك كيقول لينا اش هادشي واش البنت سابت!!

استغربات اميرة وقالت : وعلاش شنو فيها !!! واش هادي هي السيبة ؟

الاب: من هادي للمايو ... واش ماحشمتيش !! مزال كتهضري بوجهك حمر 

كحزات اميرة لور ساكتة دايرة يدها على خدها حانية الراس كتسمع ليهم بلا متهضر وهما كيعاتبوها .. بقات تسمع ليهم حتى بدات كتبكي وقالت 

- انا اصلا قلت لماما نمشي للشوتينغ مع النكافة مامشيتش مني راسي ... وانا ماحسابنيش غادي دير بووم وتوصل للعائلة ... واصلا لبست كسوة طويلة علاش مالها لعروسة مكتلبسهاش وتصور حدا عائلتها .. مالهم علاش ميقولوش ليها تحشم !

الام: انا قلتي نمشي للشوتينغ ماقلتيش ليا غادي يحطو التصاور فاليوتوب و يهزوهم البنات يلعبو بيهم ويهضرو بوجهك مع الناس ... ماقلتيش ليا هادشي وماتفقناش عليه 

الاب: اااخر مرة تعاوديها ... نعاود نلقا شي تصويرة ديالك فشي بلاصة نتفاهم معاك 

قالت بتمرد : وشنو فيهااا واش غير انا بوحدي فهاد الدنيا .. مالي انا اش درت واش انا قلت ليهم نشروني ... وانا اصلا كاع ماشفت هادشي اللي كاهضرو عليه 

الاب: ماشفتيهش!!! وعلاش كيدار عمك حتى شافها !! ومنين غتجيه لوكان ماتشتتوش تصاورك بقا ليك غير دوزي فالاخبار 

اميرة : بتمرد ) ماشي بووحدي ... كاع البنات كيتصورو مالي انا واش قتلت روح كاع !!! حتى لبنات اللي كانو معايا راهم تصورو علاش زعما غير انا (كتبكي) انا ماعندي زهر فهاد الدنيا ... حسن كن ما ولدوتونيش كاع ولا مت انا كاع 

دارت الام يدها على جبهتها والاب كيسوط 

- الاب: راه عندك الباك هاد العام ... والله وسقطتي فيه حتى نصفيها ليك ... وداك البيسي غنحيدو ليك هوا وتيليفون حتى تسالي القراية 

تهزات من بلاصتها مصدومة وقالت : علااااش انااا علاااش قتلوني حسن قتلوني وتهناوووو ... انا شي نهار نقتل راسي مالي واش قتلت روح !!

مشات للبيت كتبكي ومها كتسوط من وراها 

الام: ومادزش فيه حتى نتا !! مالها اش دارت عندها الحق راه تصورات بالكسوة دالعروسة واش فيها شي عيب 

دار الاب رجل على رجل قالب وجهو وقال

- من هادي لهاديك ... حتى تخرج من يدينا منقدروش كاع نتحكمو فيها ... وزايدون هاد العام خاصها تركز مع قرايتها ماشي تخربيق ... تشد الباك بنقطة مزيانة وديك الساعة دير اللي بغات ... انا تجيب ليا غير لباك نشدو فيدي نرتاح 

الام: راه غتبقا عليها بهاد الزيار حتى طج ... وزايدون مكدير والو .... راك كتعرفها خبز ربي فطبقو نية وحدة اللي عندها وماتستاهلش هادشي اللي درتي ليها ... بحالها بحال البنات حتى هي .. باغا تعيش باغا تسارا مع صحاباتها باغا تلبس وباغا تصور ... مافيها والو .. لعيب الى خرجات طريق ... اما دابا راه كتقرا .. كتجيب نقط مزيانين .. صحاباتها كنعرفهم ... مرة مرة تفوج ماشي غير لقرايا لقرايا حتى تسطا ليا وتعقد 

الاب: حضي بنتك .. وعلميها ووريها ماتخليهاش فدار غفلون ... اللي جا يضحك عليها ... هاهما داوها و لبسوها وصوروها ونشروها ... شكون اللي مستافد ... هما ... اما هي اش ستافدات ... كن بعدا غير خلصوها وماتمشيش بلاش يستاغلوها وهي عاجبها الحال وحالة فمها 

الام : مامحتاجاش لفلوسهم راه بخيرها وخميرها ...تجربة وبغات دوزها وصافي دوزاتها 

الاب: واعلمي بنتك تكون مطورة وماتكونش هبيلة يستاغلوها ... لوقت صعابت وحنا مدايمينش ليها ... خاصها تعتامد على راسها وتفيق شوية ... نتي كتشوفي غير قدامك انا كنشوف بعييييد ... باغي بنتي تكون كابابل ... ميتفلا عليها حتى واحد ... تكون موكضة ماشي ديما نبقا حاضيها وتابعها ... شوفي بنات الناس كي مجبدين ... بقينا عليها بلفشوش حتى نونخناها 

الام: مامنونخاش بزاف عليك قالك منونخة ... واش خاصها طير من المقلة باش تبقا على خاطرك ! لبنت تقيلة وكتحشم .. وكتخاااف اصلا خوافة ... تشوف شي حاجة ماشي هي هاديك تهرب بلا متشوف وراها راني عاارفاها ... ديتها معايا غير لطبيب دسنان وبغينا نطلعو فلاسانسور ... شافت الضوء نقص وهي تهرب سمحات فيا لداخل ... كنقول ليها راه هوا هاكا غير اجي .. مشااات البنت ضرباتها كعيبة على رجليها فالدروج كاع ماداتها فيا

الاب: المهم ... البيسي ممنوع وحتى تيليفون ممنوع.. غتبقاي تعطيه ليها يوماين فالاسبوع.. الجمعة فلعشية والسبت .. والاحد الصباح يتحيدو ليها .. باش تديها فقرايتها اللي غتنفعها


دخلات اميرة تركنات فواحد القنت كتبكي بوحدها ودور فعييها ومها قدامها كتحيد الكابل للحاسوب وخدات لاسوغي والكلافيي ودارت عندها قالت 

- معاياش داخلة؟ 

دورات اميرة وجهها وقالت : مع الربعة 

الام : اري لهنا 

اميرة : شنو ؟

الام : تيليفون

اميرة : علاااش!!! 

الام : فلويكاند نعطيه ليك 

عطاتو ليها اميرة بالزعفة وقلبات وجهها غضبانة كتنكر بوحدها فالبيت .. تسكت شوية وتنكر شوية طاوية رجليها وكدور صبعها الصغير بيدها وطرطقو مابغاتش تسكت وباها ومها برا داخلين خارجين كيسمعو ليها بلا ميرد عليها تا واحد فيهم .

غادية هازة شكارة بسالوبيط دجين وسبرديلة وتيشورط بيضاء .. كيوت .. طالقة شعرها وعاقدة غوباشتها مكتشوف لهاكا لهاكا .. ومنين مادازت كيشيرو ليها الاصابع ونكان الدراري تابعها حتى وقفها واحد بكل ثقة فالنفس طبعا لانه البوكوص ديال الليسي مولف يتصاحب ويعاود مزال ماسمع لا .. لسوء حضو تصادف مع اميرة طالعة ليها عويشة مع بونجوغ مع ردات عليه مدرمة 

- حيد من قدامي الزمر كي داير 

خلاتو بلاكة وزادت .. مارضاش قدام صحابو والعينين اللي حاضياهم وبلعخا فحلقو بحال الشوكة مابغاتش تهبط ليه ومشا جلس فالركنة مع صحبتو بواحد الكاسكيطة وحداه بركمان ديالو جديد مطلع ليه النيفو طبعا .. ضحك واحد فصحابو وقال 

- وااع قمعاتك اعشيري هه مايبقاش فيك الحال راه السيدة مودل واش غير اجي ودوي مع مودل هههه

قال واحد اخر : زربتي اصاحبتي ولاكن ... دوماج كوكانت الكرعة فرماج ههه 

طرطق واحد العود فيدو وقال بنرفزة 

- سمع ... هااديك .. عشيييرتي من ليوم ... سمعتي ... يقرب ليها شي ***** نحي **** من الدنيا .

- وا تا تقبل عليك بعدا 

زعف على صاحبو وقال : قلت ليك عشييرتي هي عشيرتي ... واسمع الهضرة وخلينا صحاب 

ضرب فوق البركمان بيدو كيخمم ويمشي ويجي .. بانت ليه بنت واقفة كتكركر مع البنات وعيط ليها جات عندو كتراشق 

- وافين العود 

غمزها وقال : زعما ماتشوفيش لينا مع ختنا 

البنت: شكون ختنا !!

- اميرة 

ضحكات وقالت: ولا داتها فيك ها وجهي ... البنت قرااية ماعندهاش مع داكشي 

- كتقرا معاك ياك 

البنت : اه ... ومافيا اللي يدخل ليوم ... قلت نجلس نعصر مع البنات .

- وا شوفي ليا مع بنت قيسمك 

البنت : واسية !! شغادير معاها ؟!! ناااري وتسيق ليك لخبار راك عارفها 

- اشمن اسية ولا **** حسابك معارفهاش كتهز البلايص !! منين كيجيوها الفلوس وداك اللبس اللي كضرب ! تجي تقول ليا انا لا كاتصاحبش ... نتي ماشي سوقك ... نني شوفي ليا مع صاحبتك ... عرفتي نعرفك بريكااادة الى طيحتيها ليا


حاطة يدها على حنكها فالطاولة كتخمم وهدى حداها كتحط الدفاتر 

هدى : مالكي طالع ليك الدم ؟

اميرة : بابا حرم عليا البيسي والتيليفون ... وغيبقا يخليه ليا غير فلويكاند ودار ليا حالة على التصاور 

هدى : اوييلي !! 

جلسات قدامهم البنت اللي كانت كتهضر مع نجم الليسي وقالت كضحك 

- واااو جيتي فننة مشاء الله ... شفت تصاورك طلعتي كتحمقي 

ابتاسمات اميرة وقالت : شكرا 

عصرات هدى الحامض مطايقاش لخرى ودورات وجهها للجنب 

البنت : يالاع تمشي معانا للزدحة غدا 

اميرة : اينا زدحة؟

البنت: الزدحة اصاحبتي دايرينها فالدار عند واحد الولد ... كل مرة كيدبرها واحد وكيتجمعو فيها الدراري والبنات كينشطو 

اميرة : اه اه عرفت مالي جايا من زمردة ... راه عرااافت علاش كتهضري 

البنت : وايلاه تمشي معانا ... طيحي البق على البنات كايجيو واحد الطبقة شابعين عياقة 

اميرة : لاالا اختي غير سيري مكيعجبنيش داكشي 

البنت : واغير يالاه وشوفي عاد حكمي ... راه مشات هدى شحال من مرة 

هدى : انا كنكره نتلاقا دوك الويلات مابقيتش ككاع كنبغي نمشي

اميرة : لالا مافيااش .. عاد نقلب على مانلبس ها الكسوة ها الطالون ها الشعر خاصني نصايبو وشنو نقول لماما حافضة ليا التوقيت ... وااصلا مكمرتاحش فدوك الزدوح كل واحد شابع عياقة غيتفركع يخخخ 

هدى : وانتي جسن من شحال من وحدة ... يالاه نمشيو يالاه فقصي ليا ديك الطبقة لعااار اميرة ... معيحملوووكش ومع تصاورك دارو بببوووم ... وييلي غتشتتي ليهم الشمل خهه 

اميرة : ومانعرف 

هدى: انا نعطيك كسوة وصندالة ويالاه نمشيو عااافاك 

اميرة : وا حتا لغدا ويحن الله 

البنت : علموني نمشيو كاملين 

الاستاذ: انتباااااه ...


رجعات للدار غتموت بالقنط ... باغا غير طل تشوف شنو واقع وتشوف تصاورها فين وصلو وتقرا التعاليق لاكن ماتقدرش .. تعشات ومشات راجعات شوية وطاحت نعسات مافاقتش حتى صبح الحال وصبحات غادية تقرا كالعادة . جلسات فالطاولة هي وهدى كيتجمعو وموراهم البنت ( نسرين ) 

هدى : شوفي هاد اللبسة ... زوينة ؟ 

اميرة : انشوف؟ 

طلات شافتها وقالت : زوينة فنة

هدى: هاهيا خليها عندك 

نسرين : الزدحة غتبدا مع الجوج حتى للستة 

اميرة : ماعندي كي ندير ماتخلينيش ماما 

عيباتها نسرين : ما تخلينيش ماما نكغااا مومو .. غنخطفوك حنا ياك .. الفقصة 

هدى: وا اصلا عندنا الفيزيك هاد العشية واخا مندخلوش هانيا الدرس غدا نقلوه وخارجين مع الربعة ونتي عندك السوايع .. غيبي هاد المرة مافها اش فيها

اميرة : بعد تفكير) اوك ... مهم خلي الكسوة عندك حتى للجوج

هدى : نزغررت ... 

رجعو الدرس كملوه وخرجو كيتافقو باش يمشيو .. تفرقو كل وحدة فين مشات لاكن اميرة مامشاتش للدار .. كلاها الفضول ودازت للسيبير حلات الفايس وهي تصدم بهاجوج وماجوج اللي تكبو عليها .. شحال قدها تقبل وشحال قدها تقراا فالتعاليق وشحال قدها تقرا ديال المساجات ... الفايسبوك مقلوب بتصاورها .. مشات تشوف المساجات لقات سيمو مسيفط ليها مسج كيطمن عليها وعلى غيابها .. ابتاسمات وردات 

- الحمد لله غير مع الامتحانات وصافي شكرا. 

بقات كدور وتشوف شوية رد عليها 

- اهلا لاللة اميرة ...نهار كبير هادا اللي جاوبتي فيه

ردت : ههه راه قلت ليك شنو كاين 

سيمو : الله يسهل عليك ... حتى نمرتك طافية ؟

اميرة: ااه راه قلت ليك مع الامتخانات حيدت كولشي

سيمو : اوك مزيان ... ماعندك حتى وقت خاوي ؟

اميرة : والو ..لحفاضة والتوجاد ... دايرة السوتيان معمر ليا اوقات الفراغ ديالي 

سيمو : ماشي مشكل ... كنت بغيت نجلسو شوية ونديرو شي كافي ... كاين شوتينغ يقدر يعجبك ... وفكرت فيك نتي 

اميرة : ديالاش هاد الشوتينغ؟

سيمو : ديال واحد الستيليست مشهورة وتقدري ديري معاها ديفيلي ... لبنات راه كيقلبو على هاد الفرصة آميرة 

اميرة : انا هاد السيمانة كااملة عندي عامرة ماعندي كي ندير 

سيمو: ماتقدريش ديري شي وقيتة نديرو كافي ونهضرو فيها حسن 

اميرة: ماعنديش .

سيمو:واخا غير ساعة ؟ نوريك التصاور ونشرح ليك شنو كاين 

اميرة : بعد تفكير) وا عرفتي شنو... عندك شي وقيتة هاد العشية ؟

سيمو : ليوم ؟ اوك ماشي مشكل واخا كان عندي شي شغل مي نأجلو .. معاياش؟

اميرة : مع الجوج حيت حتى انا عندي شي شغل خاصني نرجع ليه 

سيمو : اوك مزيان تافقنا .. جوج نعيط ليك 

اميرة: تيلي طافي ... نتا غير قول ليا فين انا نجي نيشان 

سيمو : فين كاينة نتي بالضبط

اميرة : حمرية 

سيمو : انا غنجي عندك لتما ونديرو كافي مزيانة ؟

اميرة : اوك ... يالاه انا غنسد باي باي


سدات اميرة ومشات للدار تغدات .. قادات شعرها طلقاتو ولبسات تجينز وتيشورط وكونفيرس فالابيض.. هزات صاكها فيه دفاترها وريحة خفيفة وشوية ديال المكياج ماباينش وخرجات مشات مباشرة للقهوة اللي قال ليها السيمو وطلعات كتقلب عليها بعينيها... شافتو جالس متكي على ركابيه شاد فيدو سامسونغ سكة كحل يالاه خرج .. لابس قميجة بيضاء محلولة من الصدر وداير طانكة صغيرة فودنو .. التشاوك .. الكمام مطويين والسنسلة دالنقرة فاليد وجينز ازرق متوتز مع راسو .. مشاتو عندو بابتسامة وقفات عليه وقالت

- السلام 

هز راسو ووقف بابتسامة مافاجأ ومد يدو سلم عليها 

- اهلا الزين . . . مرحباااا ههه

جلسات كضحك وتلوح شعرها للور حشمانة وقالت 

- ياكما تعطلت عليك 

قال وهوا كيسرق نضرات الاعجاب 

- حتى انا يالاه وصلت ... نهار كبير هادا الاللة اميرة ... اسم على مسمى 

دارت يدها على فمها كتعوج وقالت : هههه متحشميينش هههه 

سيمو : هههه نكدبو ... واخا فالللول حسيت بيك محملتينيش 

اميرة: لالا بلعكس .. حساب ليا واش بصح وصافي 

سيمو : وااايلي على بصح هه! ... ايوا اش كتعاودي ... فين غبورك ... اشمن شغل عندك واش قاريا مع 3؟

اميرة: لاااا غير بغيت نمشي مع البنات لواحد الزدحة وصافي 

سيمو : الزدحة !! فين ؟

اميرة : عند واحد الدري ... مكنعرفوش انا غير غنمشي مع البنات وصافي 

سيمو : غير هنا فحمرية ؟

اميرة : اه غير هنا راه معروف سميتو رشدي 

استغرب سيمو وقال : رشدي ؟ !!! رشدي الوافي !

اميرة: معرفتش المهم هوا دايرها فالدار عندو 

دار سيمو ابتسامة خفيفة وقال : رشدي كنعرفو قرا معايا ... ساكن بوحدو ... الى كان هوا بعدا 

اميرة : ماعرفتش

يدا كيضحك ودار تيلي فودنو وقال : انا نشوف واش هوا ههه مسخووط ... وافين اخاي رشدي .... اش كتعاود ؟ ... ها حنا نتا اللي رجعتي كتزدح مع راسك وماكتعرضش ههه... اييوا شفتي غتخلص الحق ... وا مزياان مزيان نشط ليا مع راسك ... مرة اخرى نشاء الله بغينا نسولو فيك واش باقي حي البشار هههه ... يالاه تهلا بالصحة (قطع) عرفتو هوا وميكون غير هوا 

اميرة : هههه الدنيا شحال صغيرة ... ويالاه تمشي حتى نتا 

سيمو : لالا غير سيري حتى لمرا اخرى 

اميرة: ياك صاحبك كتعرفو !

سيمو : نتي غادية مع صحاباتك ولا معاك شي حد اخر ؟

اميرة: غير مع البنات ... واصلا خلييتهم ماقلتش ليهم كاع غنتعطل غيكونو سبقوني ومكنعرفش الطريق ... قلت حتى نبغي نمشي وندوز تيلي بوتيك نعيط ليهم يتلقاو ليا 

سيمو : صافي بلا متعطي ليهم انا غنمشي معاك .. نشوف نيت هاد الدري صاحبي شحال ما شفتو.

اميرة: واش نتا خدام مصور كتصور ؟ حيت كتعرف الناس بزاف فهاد الدومين ديال الفن وعروض الازياء

سيمو : لالا مزال كنقرا ... عندي الماستر ف الانفوغماتيك ... الصاور وداكشي غير هواية وصافي 

اميرة: اممم .. الله يسهل عليك ... حسابني خدام 

ابتاسم وقال: كنقرا وكنخدم فنفس الوقت ... المهم دور الحركة حسن من والو ولالا ؟

اميرة : بصح عندك الحق هه ... 

سيمو : شنو تشربي ؟ 

اميرة: لالا غنتعطلو حسن نمشيو ... وتما نكملو الهضرة

سيمو: وا خودي شي حاجة شربيها بعدا مزاال الحال 

حشمات اميرة وبدات تبركم فاللخر طلبات ليمون وجلسات كتنتقش معاه موضوع الشوتينغ وهوا كيشرح ليها ومؤة مرا يسها فيها حتى ضربات الربعة عاد ناضو خرجو من القهوة .. شار لطاكسي صغير وقف ليهم طلعو فيها ومشاو مباشرة لدار رشدي .. بغات تنزل ودارت يدها فالصاك جبدات 10 دراهم تخلص الطاكسي .. شافها سيمو وجاتو الضحكة وهوا كيجبد الصرف من جيبو وقال 

- ولاااا .. لاا ماشي تا لديك الدرجة ههه

بدات كضحك وردات فلوسها للصاك وطلعات معاه فالدروج للطبقة الثانية ديال الدار فين كان الباب محلول والزدحة نيت لداخل والدعوة مخلطة وعامرة بنات و اولاد كولشي مقزب وشي جالس شاد العصير وشي كيتعارف ويتصاحب وشي واقف كيشطح وقوة البنات واازين كيتشاير بالمكياج . تقدم سيمو هوا الاول وهي موراه كتشوف بابتسامة ومتفاجأة ... وسط البشر ... تلفت شاف واش باقا موراه ومد يدو وراه بمعنى اري يدسك وكيشير ليها بعينيه بجدية شد ليها فيدها جرها معاه كأنه عارف بالدراري غيتبسلو عليها


شدات فيدو بخجل كدور فعينيها وراه كتحس بيها دافية وتمو غاديين تحت انضار نجم المدرسة اللي جالس فصالون دايرين بيه صحابو كيتشتتو بالضحك 

س : عشيرتك جايبا معاها عشيرها اعشيري ههههههههه

س : تا نوض راه عشيرتك مع عشيرها ههههههه

س : وراه هوا يمكن اللي جايبها ماشي هي اللي جايباه هههههه

شافوهم واقفين مع رشدي اللي كيتعانق هوا وسيمو ويدو وراه مابغاش يطلق من يد اميرة حتى مد رشدي و ليها عاد طلقات منو سلمات عليه 

رشدي: درتيها واااعرة اصاحبي 

سيمو : جامع عندك صحاب الباك ولافاك و روينة بقاو ليك غا زطايلية ... دير لينا شي جلسة بعقلها اصاحبي 

اميرة : ومالهم صحاب الباك مالهم 

شاف فيها كيضحك بضحيكة ظوينة وسنينات بويض وقال كيرتب على ضهرها 

- كنضحك عنداك تقلقي عاوتاني ... (قلبها جدية ) والله تا كنضحك 

رشدي: اميرة ياك ؟ 

استغربات وقالت بابتسامة : كتعرفني؟

رشدي : وااايلي ... المودل ديالنا ومنعرفهاش ههه ... مالك اصاحبي ساكت على رزقك (غمزو) نتا هاكا الساط ... مابغيتيش تعرفنا ولا شنو ؟

غمزو سيمو نص غمزو بابتسامة وقال: من بعد من بعد ... كتقلب تشري لسا الصداع نتا باينة هه... شنو داابا غنبقاو واقفين منجلسوش 

رشدي: وقف اصاحبي وشطح مع راسك 

سيمو : وا ورينا فينا نجلسو البنت بغات تجلس 

طول يدو كيهضر شد ليها فيدها وجرها معاه لصالون صغير جالسين فيه بنات و اولاد وبلاصة فالقنت خاوية .. تخطاتهم اميرة ومشات جلسات و جلس حداها السيمو 

سيمو : كي جاك هادشي 

اميرة : زوين ههه 

سيمو : غتبداي تجي ليه 

اميرة : ماعرفتش ههه ... بغيت نمشي طواليط حشاك . . . فين جات 

سيمو : اجي 

مد يدو ليها داها كيسول على المرحاض حتى دخلات وخرج بالزربة من الدار كيهضر فتيلي في حين ناض نجم المدرسة كيجري جهة الطواليط تصادف مع نسرين فلكولوار ووقفها بالزربة 

- زهير: فين لكاس؟ دغيا فين لكاس؟

نسرين : سكت الخرا كتفضحنا ... مزال ماجات .

زهير: جات راها فطواليط ... سربي دغيا فين هوا 

دخل كيتفتف للكوزينة دغيا عمر كاس ودار فيه غيرة خلطو باازربة وقال كينفض حوايجو 

- عطيه ليها فاش تخرج من طواليط وشديها هنا شوية بالهضرة 

نسرين وصافي صافي سير سير دغيا وعنداك يشوفك شي واحد 

زوهير : انا اصلا غادي غير نصورها بالخف وصافي مغنتعطلش نتي شديها بالهضرة هنا وعطيها اللعوب.. نعول عليك 

خرج ويالاه فات الباب خرجات موراه اميرة من المرحاض ... يالاه بغات دوز وهي تعيط ليها نسرين كضحك من الكوزينة 

- اميراااا 

تلفتات اميرة بابتسامة ودخلات للكوزينة كضحك 

نسرين : جيييتي تباارك الله عليك ... وناااري شحاا خليتينا كنتستاو (مدات ليها الكاس ) 

اميرة : فين هدى؟

نسرين : ماجاتش .. بقات اصاحبتي كتسنا 

داقت من الكاس : انا نعيط ليها باش تجي مسكينة نسيتها 

نسرين: ايوا نتي فين تعطلتي؟ .. شربي شربي بردي على قلبك الصهد


اميرة: امم .. ماعنديش معاه بزاف 

شربات اميرة منو النص وهي كتهضر مع نسرين ..رجع سيمو يتفقد الوضع لقاها فلكوزينة واقفة شادة العصير كتجمع وابتاسم ليها وقال

- اميرة.. انا غير فالباب كنهضر فتيلي 

حركات راسها بالايجاب: اوك (تلفتات عند نسرين) صافي براكة غير كمليه ... عطيني شي كرسي نجلس حاسة براسي عييت 

نسرين: مالكي ؟ واش جاك الصهد ؟

شدات فجبهتها : قلبي كيضرب بالجهد .. طونسيو واقيلا ... نااري هادشي كيتمجهد واقيلا غنسخف 

نسرين: اجي معايا لحمام غسلي وجهك راه الدوخة ديال الجوع واقيلا 

شدات فيها اميرة كتلهت ودخلات للحمام تكات على لافابو وعينيها كيتقلبو بزز باش كتوقف 

نسرين : غسلي وجهك انا نجيب ليك الفوطة 

خرجات نسرين سدات الباب وبقات اميرة محنية وراسها كيتمايل .. هزات راسها فالمرايا كيبان ليها غير الضباب وشي حد وراها صورتو ماواضحاش .. تلفتات وقالت بصعوبة 

- شدي فيا نسرين ... شدي فيا غنطيح .. غنموت 

جبد صاحب دعوتها اليتيلفون من جيبو وكيشوف فيها بشهوة وقال 

- مغاتموتيش اكبيدة 

عنقها وهي كترمي يدها باغا تبعد وبدا كيبوس فيها وهاز تيلي فيدو كيصور فيديو ويضحك في حين رجع سيمو للكوزينة كيقلب مالقا تا واحد وبدا كيدور بلاصتو ويقلب بعينيه وشط بنادم .. طل على البيوت كيلقا بنت مع ولد عاطيينها للتقبيل ... مالقا شكون يسول ورجه اادوش دق جوج خطرات كيعيط 

اميرااا؟ ... اميرااا؟

سمعات صوت كينادي عليها وهي مزيرة فيدين الوحش مقادراش تهز الوقفة وخرجات اهات بتعب وارهاق سمعهم سيمو وتخطف فيه اللون فوجهو ودفع الباب بقوة تا تزدح وهوا مخلوع شافها دابلة بسن يدين الوحش اللي مبزز عليها وكيصورها ... طار عليه جرو من هضرو بقوة تا طاح فالارض وبقا عليه بالركيل .. كيهز رجلو مغزف ويسب ويعطيه حتى كيتلوى فبلاصتو ... تحنا حيط ليه تيلي وضربو مع الحيط تا تشتت وهبط هز كارط ميموار منو ولاحو وتلفت لقا اميرة مقلوبة شادة فلافابو بزز ولاسقة مع الحيط بغات طيح ورجليها لاويين والصاك مرمي حداها ... مشا بغا يهزها كيتفتف ويشد فيها ورجع طلق منها ورجع للوحش شدو من لكول وجلس عليه بالبونية الوجه وحد مسايق الخبار مع الضجيج والصدع والزديح . تخطاه كيجري ويقلب واش دار ليهت شي حاجة .. ساعة لقاها صحة سلام لاكن مافهم والو .. مالها مرخية مالها هاكا دايرة؟ ... شافها ماقدراش توقف وتحنا هزها من تحت يديها بزز وهي تقيلة تا وقفات شوية عاد هزها هزة وحدة بين يديها وجر الصاك ديالها وخرجها من تما تالف معارف مايدير .. شافو رشدي جاي بيها كيجري ووقف عليه مخلوع 

- رشدي اش واقع ؟ مالها ؟

سيمو : بارتباك وغضب ) ماعرفتش ... داك ولد **** غنرجع لديلمو ... مزال غنرجع ليه 

رشدي: شكون ؟ شنو وقع اصاحبي.. بلاتي بلاتي فين غادي صبر نطلعوها لفوق .. سبقني هانا جايب سوارت دار لفوق 

سبقو سيمو هازها مخرجها وبنادم مخرج عينيه كولشي كيسول مالها .. طلع سيمو للطبقة لفوقانية ولحق عليه رشدي كيجري ويتفتف فتح ليه الباب ودخلها حطها حدا اقرب سداري كتقلب فعينيها


جلات عينيها بتتاقل كتقلب وتشقلب فيهم و سيمو كيضرب فوجهها تفيق وصاحبو رشدي واقف ليه عند راسو خاز القرعة وكيرشو 

رشدي: واش كلات شي لعبة؟ واش كتعاطا لشي لعبة ولا شنو؟

رد سيمو وهوا كيضرب فحناكها تفيق

- ماعرفتش واقيلا كلات شي حاجة .. خليتها فطواليط رجعت لقيتها هاكا مافهمتش!!! يمكن شي واحد عطاها شي حاجة كلاتها 

رشدي: و ااا البنت راه واكلة قرقوبية ولا ليكسطة ولا شي سخط اخر ... ولا شمات 

سيمو: ماعرفتش ماعرفتش... امييرة .... اميرة حللي عينيك ... فيقي اميييرة

تيييت تووووون

تلفت سيمو : ماتخلي تا واحد يدخل 

مشا رشدي فتح الباب والقرعة فيدو لقا وحدة واقفة قدامو وعينيها لداخل كتسول وباغا دخل 

- مالكم شنو واقع ؟ واش وقعات شي حاجة ؟

وقف ليها رشدي فالباب وقال : لا والو غير هبطي لتحت هانا هابط 
البنت : ياكما كاينة شي حاجة نعاونكم؟ 

رشدي : وا والو البنت جات مع جمها سخفات وصافي فاقت هانا جاي غا هبطي 

كيميل الباب فوجهها باغي يسدو وهي دايرة فيها البرائة وعينيها فالتين بغات تعرف وترضي فضولها حتى سدو عليها رشدي فوجهها ورجع كيبركم 

- تعاونيني عاوني غا راسك ونتي .... تا طالون معارفة توقفي بيه 

سيمو : شكون ؟

رشدي: واحد البرهوشة بغات تعرف شنو واقع صدرتها ... بدات تفيق؟

سيمو: اه شوية ... ارا داك الماء .. الستة هادي وكانت قالت ليا خاصها ترجع لدارهم .... مشكيييلة بغيت غا نعرف اش كلات .. ما هوا معجوون .. مات ماهوا مانعرف مافهمتش... شو شو تا عينيها ماقدرات تحلهم ... اميرة واش كتسمعيني؟ 

حركات راسها وكتحل عينيها وتسدهم فشلانة 

سيمو : وافيقي باش تمشي لداركم ... حلي عينيك 

رشدي: عرفتي شنو ... نصايب ليها شي اكسبريسو بالخف هي اللي غتحل ليها عينيها 

مشا رشدي للكوزينة كيجري ورجع جايب معاه كاس ديال القهوة لقاها جالسة وراسها متكي فشلانة كترمش بزز 

رشدي: عطيها هادي تفيقها 

سيمو : شربي هادي ...شربيها دغيا مشا عليك الحال 

حطها ليها حدا فمها وهربات وجهها للجنب مابغاتش ... ردها السيمو جغم منها وعاود عطاها ليها بزز شرباتها وجلسات شوية عاد بدات توكض... ماخلاهاش حتى تستوعب ونوضها بالزربة وهز ليها الصاك وقال 

- يالاه دغيا السبعة لاروب .

رشدي : واش تقدر تمشي بعدا بانت ليا ماتقدرش

سيمو : غتفيق فالطريق فاش يضربها البرد ... يالاه 
.. نوضي 

وقفها بزز دايخة وشدها من خصرها كيمشيها 

رشدي: واش بعيدة ولا قريبة ؟ 

سيمو : على عجلة ) بعيدة شوية فحمرية ... غنشد ليها طاكسي .. بالزربة 

رشدي: واهاك سوارت الطموبيل وصلها 

جبد السوارت من يدو عطاهم ليه وتمو مهبطينها فالدروج .. يالاه بغات تجلس ليهم وهوا يهزها سيمو على عجلة وهبط كيجري تا كان غايطيح 

سيمو : غنبقا عاااد كنمشي فيها عام باش توصل ... حل حل دغيا الباب حل 

حل رشدي الباب وطلعها السيمو حداع فسيارة حكلة كوبي وطلع كيطير ديمارا الطموبيل وهبط الزاج .. غادي كيحرك فيها وهي متكية وكيسولها 

- سيمو شنو كليني؟؟ ... واش كليتي شي حاجة ؟ واش عطاك شي واحد شي حاجة ؟ ... وا هضري قولي شنو كليتي ؟ ... واش كتعرفي هاداك اللي كان معاك فالطواليط 

دارت يدها على جبهتها وقالت بتمرد 

- ماعرفتش ماعرفتش... كنحس بقلبي كيضرب بالجهد 

سيمو : كميتي شي حاجة ؟ عطاك شي واحد شي جوان ؟؟؟ 

اميرة : ولااا راه ماكميت والو 

رد في حيرة وهوا كيسوق بسرعة : يااا جوان يا ليكسطة ... هادو اللي كيديرة بحال هاكا .... وانا خلييتك مع صاحبتك كفاش درتي رجعتي للطواليط .... وبالخف ضهشرتي مابغاتش تفهم ليا .... دوي شنو كليتي ؟

اميرة : بتمرد ) اووق هننننخنن... والله ماكليت شي حاجة 

سيمو : سيييغ ماكليتي والو !!! وشنو زعما ضربو ليك ابرة !!!

اميرة : بصوت تقيل ) وا حتا واحد ما عطاني شي حاجة 

سيمو : تفكري مزياااان ... فكري ديك الوقيتى اللي رجعت قلت ليك انا برا كنهضر فتيلي ... شنو كليتي من مورايا تفك...... هدااا هدااا ... 

اميرة: والله ماكليت شي حاتتجة هننننهنن ناري تعطلت 

سيمو : بتركيز ) شووو .. بلاتي ... انا فاش رجعت لقيتك كتشربي فداك العصير ... (تلفت عندها) واش العصير بوووحدو اللي شربتي ؟ ماكليتي وراه تا لعبة .... ولا فاش دخلنا ماكليتي تاااوزةةة وا تفكككري 

اميرة : لعصير بوحدو ... ليشربت 

سيمو : ضرب لفولون ) هواااا ... هوا اللي فيه شي حاجة ... دارو ليك بلان بغاو يصيدوك ولاد **** لقوالب بحال هادوك معروووفين ... وانا كنقول مالها مرخية وشكايدير داك ولد &**** معاها ... وكيصور ينعل جد اصل حياة مو ... ها حومتك واش هي هادي؟

شافت يمين يسار وقالت : اه هيا ... صاكي... فين صاكي

جبدو من اللور : ها صاكك واش تقدري تمشي؟

اميرة : بارتباك وتوتر وتعب ) نقدر ... تعطلت قفرتها بابا غيقتلني (نزلات)

سيمو : غنعيط ليك شعلي تليفونك 
.. ضاروري تجاوبيني اوكي؟ 

شارت بيدها : صافي صافي واخا بسلامة 

مشات كتجري دايخة وهوا كيطل عليها من الزاج حتى غبرات ودور المقود بسرعة كيزفر 

- الله يحرق **** اولد**** بلاااتي


حلات باب دارهم فالعمارة بشوية ودخلات كتسلت وترعد ... يالاه ردات الباب وبغات تسلت وهي تسمع صوت باها 

- اش هاد الوقت ؟ 

دارت لقاتو واقف ويديه وراه مخرج فيها عينيه ومها كطل من الكوزينة وعاضة على شنايفها .. عرفات القصية حامضة وقالت كتفتف

- ااا .. آااانااا.. انا .. كنت ... كنت غير ف.. فسيبير 

الاب : فالسيبير !!!

دقات قلبها كتسارع وحلقها نشف : غير فسيبير .. خ.. خرجت .. واحد الموضوع 

الاب: الموضوع؟ اري نشوف هاد الموضوع 

بدات تلوي رجليها ممع بعضياتهم وجاتها البولة وقالت : راه .. عطيتو لللواحد صاحبتي ... غدا غاتجيبو معاها 

قرب منها باها وخرج عينيه فيها ومها عاضة على صبعانها كتولول وتشير ليها تسكت 

الاب بصوت فزعها من بلاصتها : وااااش كضحكيييي عليياااا ؟ كي كنجيك انا هاا ? ... كي كنجيك واش حمار ؟؟؟

دارت يدها على فمها كدخل وتخرج فالهضرة وقالت بارتباك 

- لالا ابابا... لا 

هز يدو تا لسما وسرفقها خلا ليها حنكها فيه جوج صبعان وقال 

- دزززت للمدرسة ... وقالو ليا مخلتيييش هاد العشية..... فين مشيتي لعشية كاملة .... شووو عينيك كي حوومر .... هضري .... والله مانطلق منك حتى نعرف فين كنتي هاد العشية.... ولا غندبك ونحرم عليك ديك القراية اللي مابغيتيش تقرايها 

داخت اميرة وبدات ترعد فبلاصتها مخلوعة كتبكي وقالت 

- كككك نت ... فواحد الزدحة


الاب: شنووو؟ ... كفاش الزدحة ؟؟

اميرة: بارتباك وبكاء) الحفلة ... مشيت مع لبنات لواحد الحفلة .... اول مرة واخر مرة ... عمرني نعاود والله عمرني نعاود 

هز الاب راسو كيشوف فيه من بعد ماكان غيعضها بالفقصة وقال

- خليتي لقرايا ومشيتي تحتافلي؟ باش حتافلتي؟؟ بالنجاح ديالك هااا؟

اميرة : الصمت 

هبجات راسها الارض كترجف ومشا ليها النطق ... وجهها صفار بقا غير الحنك اللي منفوخ حمر ... اما حتى دوخة اللي كانت شادتها طيرها ليها باها بالخلعة وتوكضات بلعلا يطريه ليها 

الاب: شكون كان فديك الحفلة ؟ مخلطة 

حركات راسها كترعد 

الاب: تباارك الله 
..تبارك الله ... ايوا .. وشنو درتو ؟ ... تجمعتو تما تفسدوووو؟

هزات راسها مصدومة وقالت : اااا لاا ... لا والله مادرت شي حاجة ... واحق الله 

خزر فيها وقال : شوووفي ... مغنزيدش نهضر .. معاك دابا ... ولاااااااكن .. والله وعاودتيها حنى نحيدك من الحالة المدنية ... والى ماجبتيش 17 فالباك غادي نقطع الورقة ديالك فالحالة المدنية ونتفكر عندك الجديد والقديم سمعتي ... نوريك تسلكيط والسليت ... بغاو يخرجو رجليك الشواري... تحركي من قدامي ولا غنننن 

طارت من قدامو دايرة يدها ورها خايفة يهزها بشي ركلة ومشات كتجري للبيت ... يالاه دخلات لحقات عليها مها تكمل عليها 

الام : هادو هما ترابيناااا ... هااا؟ ماكدبش باااك اللي قالك من هادي للمايو ... والله ماكدب .. ولاكن غادي نتحزم ليك ولا عاليك نوريك زدوح كي دايرين ... مزيان تبارك الله 

تكمشات اميرة مع الحيط ساكتة حتى سالات مها وخرجات خلاتها عاد جلسات فجنب الناموسية حاطة يدها على فكها كتخمم . 

دخلات مها عندها لقاتها ناعسة غارقة فالنعاس بالبيجامة ... مشات كتسلت لصاكها وحلاتو كتقلب فيه وتبقشش لقاتها هازة المكياج ... بدات مها دور فراسها وحطات الصاك كما كان ومشات لسروالها كتبقشش فجيابها وتشم وحلات ليه رجليه وخشات نيفها لداخل كتشمشم ورجعات حطاتو كي وهزات تيشورط ... شماتها كاملة وحسات بريحة رجولية فيه وهي تقندش ورجعات كتشم بحال الى كتشمكر باش تأكد ومشات حتى لريحتها اللي كترش شماتها 

الام: لااالا .. هاد الريحة ... (رجعات شمات تيشورط) مااااشي هي هاد ريحة ... ريحة الدراري هادي مااااشي ريحة البنات ... اش كدير هاد البنت ... اش كدير غادي تسطيني. 

حطات لحوايج ومشات ليها : اميرة ...نوضي تعشاي ... نوضي

ردات عليها : مابغييتش ... غير خليني 

الام : مووضي تعشاااي باك ميبغيش الى منضتيش

اميرة : واغير خليني فيا النعاس

الام: ضبري راسك ... 

خرجات الام شوية و رجعات اميرة فالنعاس .. شوية تسمع صوت الاب بالجهد

امييييرااااااا 

تهزات من بلاصتها جات واقفة كترد شعرها للور وخرجات كتجري حنكها منفوووخ وزراق وتورم حدا عينها وجلسات بلا متفنفن معاهم فالطبلة قاطعة الحس


تعشات حادرة الراس ويدها على وجهها مخبية .. ماهزاتش عينيها حتى سالات ومشات للبيت .. تكات تنعس وهي دخل عليها مها وجلسات فالجنب حداها وقالت 

- نوضي نهضر معاك 

جلسات اميرة مقنتة مع الحيط وقالت باتشكيك 
- فاش؟

الام : واش كتعرفي شي واحد ؟ 

اميرة : شنو؟ 

الام: واش كتعرفي شي ولد ؟ غير عاودي ليا انا مك نبغي ليك غير لخير ... والله منغوت عليك .. واش دايرة الصاحب؟

استغربات اميرة وقالت : لا والله مدايرة شي صاحب

الام: وشكون هاداك اللي كنتي معاه ليوم ؟ اش بينك وبينو حتى عنقكك؟

تصدمات اميرة وقالت : شنووو؟؟؟ لالا ...
قاطعاتها مها : ماتكدبييش عليا ... انا راني عاااارفة كولشي غير مكنبغيش نحرجك ... فين عرفتيه ؟

اميرة: ماعنقني تا حد 

الام : وفين كتعرفيه؟

اميرة : غير صديق عادي ... مابيني وبينو حتى حاجة ... وضريف مسكين 

الام: واش مصاحبة معاه؟؟؟

اميرة: لا والله مامصاحبة معاه ... غير صديق ... راه واقيلا عندو صاحبتو ماشي شغلي انا 

الام: وقين مشيتو؟ عاودي ليا كولشي ماتخبيش على ماماك ... غيبقا بيناتنا هادشي يالاه قولي

اميرة : وراني قلت ليك اماما

الام : واعاودي ليا بالتفاصيل

اميرة : مشينا الحفلة ... وصافي ... جلسنا مع الاصدقاء و.. و .. ومالقيتش فاش نجي داكشي علاش تعطلت

الام : امم .. بعدتي على حمرية ... فين كانت ها الحفلة 

اميرة : بخجل) فالدار ديال واحد الولد ... فيها البنات والدراري.... اخر مرة نمشي ... 

الام: ايوا وشنو درتو فهاد الدار ؟

اميرة: كانو كيشطحو وصافي ... انا غير جلست كنتفرج ... ورجعت بحالي ... واخليني نعس هاني عاودت ليك كولشي 

الام : اممم .. نعسي .. يالاه نعسي ... ماتعاوديش تخبي على ماماك لعزيزة ... الى كان عندك شي مشكل عاوديها ليها ... الله يرضي عليك ابنتي 

نعسات اميرة على جنبها جيهت الحيط مكمشة كدور فعينيها ومها كتغطيها .. ناضت طفات ضو وخرجات شدات الباب ومشات كتلول

- اوييلي وحدي على الدار البنت رجعات كدخل لديور ... اويلي وحدي مرارتي منفوخة وبغات طرطقها ليا


صابحة قدام المرايا كتبرد الضربة فحنكها وماحاملاش تمشي بيها ، ولاكن ماعندها مادير ... بزز منها خاصها تمشي ... باها مشا للخدمة وبقات غير مها فالدار كتوجد راسها تمشي للسبيطار كونها ممرضة .. لبسات جلابتها الكحلة وجمعات شعرها الاشقر الشبيه بشعر بنتها وهزات صاكها مع موكاسان وبدات تعيط اميراااا اميرااا 

مشات عندها اميرة لابسة كومبينيزو مورد بلغوز سروالو فضفاض وفوقانس ديالو مقزب مشدود بالخيوط من الكتاف ودتيرة عليه فيستة ديال دجين قصيرة بيضاء وصندالة بلا ... طالقة شعرها وقالباه جيهة الدقة مغطياها وشكارتها على كتفها ومشات لحقات على مها ... تفارقو حدا الطاكسيات ... البنت مشات تقرا والام مشات جيهة الطاكسي باش تمشي للسبيطار . 

كالعادة جالسة فالقسم متبعية وراسها مايل للجنب مخبية الضربة ... وعينين من بعيد مراقبينها وكيسوطو محاملينهاش ... هدى حداها قاطعة الحس غضبانة عليها وكل شوية كتسوط ، خرجو مع 12 كاملين ومشات كتجري عند هدى اعتادرات ليها على تحنسيرة .. قبلات هدى اعتذارها وخرجو كيضحكو مع الباب ... يالاه تفارقو وكل وحدة شدات شاريع سمعات اميرة سميتها وتلفتات لقات سيمو وراها بتيشورط زرقا ودجين ويدو ورة عليها فاصمة بيضاء . شاف فيها بدون ابنسامة عكسها هي اللي ابتاسمات فاش شافتو ... قبل ماتهضر هضر بجدية وقال

- علاش مابنتيش لبارح ... وقبت ليك زعما شعلي تيليفونك 

اميرة : بأسف ) بابا حيد ليا تيلي ... هادشي اللي كاين 

شاف فيها باستغراب كيحقق ورع ليها شعرها بشوية لور بملامح كتألم مصدوم وقال 

- فففف ... شكون دار ليك هادشي؟ باباك ؟ 

بعدات وجهها بسرعة وقالت : لا غير دخلت فلباب 

هز راسهو كيحركو وقال : ااه دخلتي فلباب !

سطت وبقا حاضي غير ديك الضربة اللي عندها فحنكها زاد معاها فالطريق وقال

- عاقلة على شنو طرا لبارح ولالا ؟

اميرة : الصمت 

سيمو : عرفتي لبارح .. كانت غتوقع شي حاجة خاااايبة ... وماشي غير خااايبة ... شي حاجة اللي غدمر ليك حياتك وحيات عائتك ومستقبلك... وكووولشي كووولشي 

اميرة : الله يستر ... شنو وقع 

سيمو : بلااا منكوليك شنو وقع ... حيت كن وقع بصح كانت غتكون موصيبة ونقطة سوداء فحياتك ... اميرة ... ضربي على صحاباتك ... عيشي بووووحدك ... كتأبي ومرضي حتى بالتوحد ... كواشي ليه الدواء وبعدي من كاع اللي كتعرفي ... حيت ديك الفضيحة اللي كانت غتوقع راه كنتي غتمشي فيها نتي وباك ومك وخوتك وعائلتك ومغيفكك غير الانتحار ديك الساعة ..... عقلتي على ديك البنت اللي كان شوهها صاحبها ... نشر تصاورها وفيديو ديالها ... شوهها وكولشي بدا كيشير عليها منين مادازت وفاللخر هربات من دارهم مابقاتش بانت لدابا ... دارهم رحلو ومرضو ومالقاوش الوجه باش يشوفو فالناس .. وحتى لعائلات... واهاااكاك كان غيوقع ليك 

اميرة : اويييلي خلعتيني .. الله ينجيني ... شنو اللي واقع وانا معارفاش؟

خشا يدو بجدية فالجيب كيجبد تيلي ويردد 

- اصلا خاصني نوريه ليك ... باش تزتزعي شوية وتعرفي راسك معامن 

حل ليها تيليفون وراها الفيديو .. شافتو كانت غتسخف ليه .. كتافها طاحو ورجليها فشلو بقات كتهبط شوية بشوية حتى جلسات فوق طروطوار وقالت 

- اوييلي ... اويلي شهادي !!! اويلي ... ماا مفهمتش ...؟ كفاش واش هادشي فوطو شوب 

سيمو : لاواه فوطو كوبي ... هادشي بصح الى شافو باك ماشي غيزرق ليك حنكك ... غيطير ليك الراس وينتاحر من موراك... ونتي بنت زويونة ونقية .. وقراية اش داك لهاد لهيت ... فلاااول كنت غنكولها وكلت وانا مالي يمكن هي مولفة تمشي تزدح مع راسها ... ندخل سوق راسي حسن ... (هز حاجبو) عرفتي شنو ... عندك الززززهر ... فالدقيقة 90 دخلت عليك ... اما كن كنتي بوحدك كوراه بفففف ... (حط يدو على راسو ) ناااري على زهر 

هوا كيهضر واميرة مخرجة عينيها مصدومة فالارض كترعد 

- وعلااش ؟ كفااش انا ماقدرتش نفهم 

حط رجلو على طروطوار وهوا واقف قدامها كيهضر ويشالي بتيليفونو وقال

- شربووك لعصيير ماعرفتش اش كانو ناويين يديرو ليك ... شتي هاديك صاحبتك اللي كنتي واقفة معاها فكوزينة ... راه هي دايرة يد مع داك لكلب ... (ضرب بونية وسط راحة يدو ) ولاكن عطيييت لمو ... تكااال سنانو طاحو


وقفات فجأة كتعلق فيه وقالت بلهفة 

- حيدووو مسحو الله يعطيك الستر اخويا والله انا مدايرا شي حاجة ( بدلت تبكي) والله مكنجبد شي واحد ولا عمرني آديت شي واحد ... الله يحن عليك مسحو راه بابا غيقتلني شوف غير لبارح تعطلت شوف شنو دار ليا .... والله حتى يصفيها ليا وحنا ماقادينش على صدع 

هز يدو بعد تيلي كيهدنها وقال : وااصلا خليتو باش تشوفيه وغنمسحو ... 
قاطعاتو : دااابا دابا قدامي الله يعطيك مانويتي ... الله يخلي ليك ما عز عليك 

ابتاسم وقال : تعاودي ؟ تعاودي تمشي للزدوح ؟ 

حطات يديها على فمها وقالت : عمرررني مانعاود هادي والتوبة ... مسح مسح مسح دغياااا 

قال كيبتاسم وهي كتطلب وتزواك وشد تيلي كيوريها فيه 

- هانتي .. شوفي ... هاهوا ...... تسمح صافي ... تهناي دابا ... اصلا ماخاصوش يبقا ليا فتيليفون حيت يقدر يطيح ولا يتسرق ... وانا كنت ناوي نمسحو فاش نوريه ليك .... بقيتي على خاطرك دابا ؟ 

هزات عينيها فيه وقالت بخوف : زعما مابقاش عندك فشي بلاصة ... ولا بقا عندو فتيلفون 

شاف فعينيها ساكت كيتأمل وقال بابتسامة 

-لا 

اميرة : حلف

سيمو : تهرس تيليفونو ... وصافي لفيديو مشا مغيعاودش يرجع ... غير رتاحي 

قالت بأسى : عنداك تنتاقم مني وتشوهني ... انا راه والله ما هاكا 

ابتاسم كيتأمل عينيها وقال : هادشي كاامل ونشوهك ! مزال غتعرفيني وتعرفي سيمو اش كيسوا ... و واخا تكون بلاصتك وحدة اخرى كنت غندير معاها بحال هاكا ... راحنا ولاد الناس اميرة ماشي ولاد لحرام 

تلفتات كتنهد شافت زوهير خارج حتى هوا من باب الليسي مع صحابو هاز يدو بالجبص وفاصمة على نيفو وبقات ساهية كتشوف فيه بكره .. تلفت شيمو شاف فين كتشوف وقال 

- بلاتي هانا جاي 

تقدم غادي عاطيها بالضهر وهي واقفة كتشوف حتى حسات بيد جراتها من لور ودارت لقات مها 

الام: هادا هوا اللي نتي مصاحبة معاه ومن قبيلة ونتي واقفة معاه وكتعلقي فيه هاااه ؟؟؟ زيييدي ... زيدي قدامي 

تصدمات اميرة ماعرفات مها منين خرجات ليها وتخلعات جراتها مها داتها كتنكر .

حط سيمو يدو على زوهير من اللور كأنه صاحبو وقال

- فين اعشيري ... كي بقيتي...شوية ؟ واحد دقيقة نهضر معاك 

خز زوهير راسو مخلوع شافو والسنة طايحة ليه ... سايسو وبعد معاه على صحابو ووقف سيمو معنقو كيقول

- بغيت نكول ليك ... كارط ميموار ديالك بااقا عندي ... وغنخليها سوفونير .. وحتى الذكرايات ديالك غيبقاو فيها ... باش نفكرك الى فكرتي تقرب من جمتي ودور بيها ... ولا تعاود نفس القالب لشي بنت اخرى فهمتي اعشيري .... تأ.. مالك على هاد الغعايل دابا و***** موجودين ميكولوش ليك لا ... كتمشي غير عندك بنات الناس ... تبت اصاحبي (ضربو لكتفو) تبت ولا راك غتبت بزز منك سمعتي

زوهير: وا عيبنا واحد اخويا .. والشيطان ولد احرام غرني ... اما انا راه كمحسبها بحال ختي ... ومن اليوم اللي قرب ليها نفرشخ مو 

سيمو : هه ... عندها اللي يطاكي عليها الصهد اعشيري فهمتي .. يالاه سير ... (بعد منو ) الله يشافي . 

دار وراها لقا اميرة طارت من بلاصتها


دخلاتها للدار كتقرص فيها واميرة كتنقز من بلاصتها 

-الام : زييييييدي هااااا والديك ... هااااا اللي يوقف مع الدراري ويتعلق فيهم .. بقا ليك شوية وتبوسيه ينعل طاسيلتك ... هاااااااا الللي يتصاااحب ... واللي يدير الصاحب ... واقفة ليا معاه قدو قداااش اش طان كيقوليك ؟ دوييييييي (قرصاتها ) اش كان كيوريييييك ... علاااااش مصاحبين هاااا .. علااااش على الموعضة ؟ ولا على تبرتيش يابنت الحرام .. بغيتي تفضحيني .. انا غنصفيها ليك قبل ماطيحي ليا وجهي فتراب 

هي كطلع معاها القريص واميرة كتجبد وتغوت وعينيها خارجين قربات توصل السقف. فلتات من يديها زرقا بالقريص وهربات للبيت كتجري وسدات عليها الباب ومها واقفة برا كتحلف وتشالي بيدها . هااي هاااي هاييي .... بغات تولي ليا مراااا السيدة بغات تكبر دغيااااا ... بغيتي طيييري ... كلاوك جنابك وبديتي تحسي براسك . انا وريك والديك 

مكمشة فالبيت شادة المخدة مخبية فيها وجهها وكتشهق وتبكي وتحط فخادها تا شبعات وطاحت نعسات . 

بحال العادة فاقت الصباح طالع ليها الدم .. جامعة شعرها ولابسة توني ديال الرياضة ابيض وسبرديلة وهازة شكراتها . يالاه بغات تنزل لقات مها واقفة ليها بالجلابة وجامعة شعرها بقراصة 

- الام : زيدي نمشي معاك 

خرجات اميرة عينيها : فيين اماما غتمشي واش انا باقة درية صغيرة؟

الام: غتحركي ولا نتفاهم معاك ... زيدي 

اميرة : عيطيني بعدا تيليفوني ليوم السبت ... وبابا قالك الجمعة فلعشية عطيه ليا 

الام: بقا ليك غا تيليفون ... زيدي تحركي 

زفرات اميرة بتمرد ومشات كتنكر ... مالي غير انا اللي كديرو معايا هاكا ... علاش سلوى مكاديروش معاها هاكا وكدير اللي بغات وتمشي فين ما بغات ... علاش غير انا زعما علاش 

غادية الطريقة كاملة كتنكر حتى لباب الليسي ووقفات مربعة يديها مع الحيط والتلاميد كيدخلو

اميرة : والله مندخل يالاه 

الام : واش غدخلي تقراي ولا نشطب بيك الارض ونفرج فيك عباد الله 

اميرة : عطيني تيليفلوني ولا مداخلاش

الام: واش غدخلي ولا نشوهك هنايا 

اميرة : شوهيني .. (كتبكي) اصلا نتي ديما مشوهاني ... شي نهار نهز شكارتي وماتعرفيتي فين زدتي 

سكتات مها كتزفر من مناخرها وجبدات تيلي عطاتو ليها 

- يالاه دخلي تحركي بداو عليك السبور 

شداتو اميرة دارتو فجيبها ودخلات كتسوط هازة راسها نيشان للساحة وبدات الرياضة ومن الرياضة دخلات للحصة ديال الفرنسية .. بداو كيكتبو وكيتجمعو بجوج هي وهدى هضرة تجبد هضرة حتى قالت هدى فجأة 

- ااجي ماقلتش ليك 

هزات اميرة راسها : شنو؟!!

هدى : خو سيمو غيدير واحد ديفيلي واعر وغيكونو فيه الصحافة وحتى تصاور غيتحطو فالمجلات وقاليا سيمو نجي انا ونتي نشاركو ... قاليا قوليها لأميرة تجي 

اميرة : بصح!!! وخوه شنو كيدير؟

هدى : خوه اصاحبتي مصمم ... وسيمو هوا اللي كيصور ليه بعد المرات ليموديل ... اللي كيحط ... خوه ابنتي راه مصمم واااعر راه المجلات ديال الموضة والجلالب والتكاشط اللي كيكونو عند الخياطة دياولو .. وكيدير ديفيليات واعرين وداكشي كبير وكيعرض على مشاهير ... معروف فالوسط الفني. عمر سيمو ماقال ليا نشارك حتى لهاد المرة ماعرفت كي طرا ...وهوه كيجيب عارضات زعما واعرين لعجب عيط لينا نشاركو !!


اميرة : هي دارهم لاباااس عليهم!!!

هدى: لاالا عاااديين ... ساكن فلعين سلوكي عندهم دار عادية فيها كراجات لتحت فاتح فيهم باه هري كبير وعندهم ثلاتة ديال الطبقات لفوق وحدة كاريينها وجوج ساكنين فيهم ومو جالسة فالدار ... عندو خوتو تا هوا شي كيقرا شي خدام وشي مزوج ... وهاد خوه صدقات ليه فلخياطة والتصميم دار بلاصتو .. صافي هادشي اللي كاين ... اه حقا ... باه عندو طاكسي كبير ديالو ... كريمة وخدام فيه واحد خوه 

اميرة : ايوا مزيان . . . حتى سيمو ضريف 

هدى : الصراحة ضرييف ديك المرة فاش عيطت ليه يجس يصور قاليا على وجهك العزيز اما راه كان مشغول .. كان غادي يجيب السلعة مع باه 

اميرة: ايوا الله يسهل عليه 

سررررررر ....

سلات القرايا وخرجو .. يالاه خرجات برا لقات مها واقفة فالباب كتسناها مربعة يديها ... شافتها اميرة كحلات بالعمى ومشات عندها كتسوط 

- واش ماخداماش؟ ... واش ماعندك مايدار؟؟ 

الام: زيدي تمشي بحالك ... غنبقا نديك ونجيبك ... ونهار نكون فاخدمة يديك باك ويجيبك 

زفرات اميرة بتمرد ومشات لمها كتنكر وتشالي بيدها فالطريق ومها غادية موراها بالجلابة ويدها على جبنها ساكتة كتجر فالشبشب .. وحتى هي طويلة ماغليضاش وعصرية .. خلاتها كتنكر الطريق كاملة حتى للدار . وقفات اميرة فالبيت وبدات تعيط 

- ردي ليا لكلافيي ... ليوم السبت 

ردت مها من بيت النعاس : اجي عندووو 

مشات اميرة بالخف هزاتو ورداتو وجلسات ... اخيرا غتشوف حسابها ... متشوقة وكتزرب باغا تعرف شنو واقع ... وتحييه من جديد. دخلات كتشوف وهي تصدم ... شايلاه امولاي دريس... مكناس كاملة مشيقطا ليها طلب صداقة بثا غير الشيخ الكامل وتكمل الباهية


بدات كدور تشوف شكون وجلسات كتقبل كل واحد على حسب تصويرتو واش زوين ولا خايب .. وكل وحدة على حساب بروفايلها .. والاغلبية كاملين عندهم صديق مشترك .. قبل هادا ومسح هادا .. قبل هادي ومسح هادي وهي غادية حتى عيات والمساجات كيتكبو اما بروفايلها عمر بشكرا على قبلو الدعوة . تكات ترتاح وهوا يوصلها مسج من عند سيمو .. فتحاتو وبدات كضحك 

- واخا فيك الهرابة 

اميرة: خخههه 

سيمو : كضحكي ... علاش هربتي ؟ ياك الفيدو مسحناه ؟ 

اميرة : لا مشيت بحالي وصافي ماهربتش 

سيمو : مشيتي بحالك! بهاد البرودة!!

اميرة : نتا مشيتي صافي حتى انا مشيت .. نبقا تما واقفة

سيمو : لا سيري من حقك !! ... ماعلينا ... قالت ليك هدى على ديفيلي 

اميرة : اه 

سيمو : غتجي ؟

اميرة : ماعرفتش؟

سيمو : خاصك تجي ضاروري ... هادي فرصة الى ضيعتيها غتندمي 

اميرة : واش بصح غيكونو المشاهير معروضين؟

سيمو : غيجيو شي ممثلين وشي مغنيين ... عادي بحال اي ديفيلي كيحضرو ... وتصاورك راه غيتحطو فمجلة .. عرفتي شنو هي يتحطو فمجلة وفزهرة الخليج تاهيا ! راه الشهرة اميرة وطلعة صاروخية ... هدى قلتها تجيو ماعطلاتنيش راها كتوجد 

بداو عينيها كيبريو وقالت : اه اخ نجي ... فوقاش ؟

سيمو : لخميس الجاي فأوتيل ... انا ندوز عليك نديك اوك .... نتي وهدى 

اميرة : ونتا غتكون مشغول 

سيمو : الى كنت مشغول غيجي عندك رشدي ... مهم غنسيفط ليك اللي يجيبك كوني هانية ... مي قبل ضاروري نتلاقاو وتدربي شي شوية مع لكوتش اللي كدرب لبنات تعرفي كيفاش داير داكشي 

اميرة : صافي واخا فوقاش يبداو ؟ 

سيمو : تنين .. غنسيفط ليك لادريس ديال لاصال 

اميرة : لالا مانقدرش نمشي بوحدي ... يالا معايا نتا وقول ليهم عليا 

سيمو : ههه واخا لاللة نمشي معاك ... وهربي اوك 

اميرة : لالا منهربش

سيمو: بوحدك ؟

اميرة : اه علاش؟ 

سيمو : نعيط ليك ابيل نهضر معاك 

اميرة : منقدرش ماما كدخل عليا على غفلة 

سيمو : ماتقدريش تفتحي لاكام ؟ 

اميرة : منين كتفتح !!! 

سيمو : سيري لواحد للعيبة .... 
بدا كيوريها وينعت حتى عرفاتها وقالت 

- اوك...مي ماشي دابا . غنمشي نتعشا ... ونرجع عاد نديرها 

سيمو : اوك بصحة 

ناضت مشات تعشات تحت نضرات مها ورجعات لبيتها تكمشات حتى مشا كولشي ينعس وضفاو الضواو وسقطات الباب وجلسات كتقاد حالتها باش متخلعش السيد فلكاميرا عاد سيفطات ليه مسج ورد عليها فالحين 

سيمو : انا غنسيفطها ليك .. وقبليها 

اميرة : اوك

دارت الكاسك وفتحات الكميرة وهي جالسة لابسة بيجامة حد الركبة زرقاء فسميطات وجامعة شعرها كعكة عشوائية وكضحك 

شافها سيمو وقال بابتسامة : تبوكيصة هه

عوجات كتفها وهوا كيبان ليها جالس بعفوية وسط الضلام لابس تيشورط بسماطي كحلة والعضلات مفتولة وقالت

- مالك جالس وسط الضلام خلعتيني 

سيمو : نشعلو ؟

اميرة ة صافي تخلعت غير خليه 

سيمو : ههه .. اش كديري ؟

اميرة: والو هانتا كتشوف

ابتاسم وقال : معامن كتهضري زعما ... كنشوفك كتكتي ونازلة على لكلافي 

اميرة : كنقل واحد الموضوع غادي نأمبريميه غدا صباح ضاروري باش نتهنا 

سيمو : الانسة علمية ولا ادبية؟

قالت وهي كتكتب : علمية ماطيماتيك ههه ... خاصني نجيب المعدل ضاروري بابا بغاني نكون دونتسيت ولا يتسطا


قال بإعجاب : هي سنانو ضارينو وعاجباك هاد المهنة ؟!

قالت بدون مبالات : السنة لوحيدة اللي كتعطيه لحريق هي انا هههه و انا المهم نجيب المعدل ... اي مهنة جات بسم الله يكونو فيها غير لفلوس ... المهم هوا قاليا خاصني نجيب فوق 16 .. ماشي حتى 16 ... وغادي نكمل لقارايا فهادشي وفاش نتخرج غادي يفتح ليا عيادة ... كل مرة كيقول ليا راني كنجمع ليك فلوس لعيادة هههههههه 

سيمو : الله يخلي ليك باباك 

اميرة : ونتا شنو ناوي دير فاش تسالي 

حك راسو وقال : انا دابا كنبريكولي مرة مرا ... كنصايب ليسيت للشركات ... كنحل المشاكل اللي كتعلق بهادشي ... المهم اس حاجة خاصة بالبيسي وتخربيق وصافي ... وفاتح واحد السيت خدام بيه وفيه كنتواصل مع الشركات .. بحال الى قلتي فاتح شركة باش نفتح بيها شركات عباد الله ههههه مغتفهمش هادشي ... المهم قاضي حاجة حتى نسالي لقارايا ونشوف اش ندير

اميرة : وشنو غدير؟ ماعندك حتى حاجة فراسك؟

سيمو : تنهد كيضحك) كان عندي بلان الصراحة ... مي فاش شفتك مشيتي بعيد تضرب ليا لبلان فزيرو خههه .. غنعيد النضر فداكشي اللي باغي ندير ... مهم نسالي بعدا ويحن الله بقا ليا هاد العام نتهنا 

اميرة : الله يعاونك ... ايوا فين ما ضرك شي ضرسة اجي عندي مرحبااااا بيك 

سيمو : انا عارف راسي ... فاش غتفتحي غينوض عليا فمي كامل غير تهناي.. وبحال والو نقلبها حتى انا طبيب ديال لعيالات .. وفين ما صرك شي حاجة اجي مرحباااااا بيك هخ


ضحكات وقالت : فات عليك الحال دابا .. اجي شحال فعمرك ؟

سيمو : 24 ونتي؟ 

اميرة : 18 

سيمو : نتي دابا واش باغا ترجعي مودل ولا طبيبة ديال السنان ؟

اميرة : انا ماكرهتش صراحة نكون مودل ... امنيتي 

سيمو : مودل ماشي هي طبيبة ديال السنان ... مودل قيمتها نازلة قدام طبيبة ... بحال دابا تقدري ضربي طلة على الدومين وتراجعي ديك الساعة ماشي تمشي فيه .. وكملي قرايتك حسن ليك 

اميرة : داكشي اللي بغيت ... بغيت غير نبرد فضولي وصافي 

سيمو : نقدر نعاونك مثلا وتجربي الشهرة ... ديري بوم واحد الفترة من بعد نساحبي ... والله ما ديالك اميرة ... لا علاااقة غير نتي مزال ماجربتيش كيبان ليك شي حااااجة

لمخيرة فيهم ماكرهاتش كون كانت دونتيست 

اميرة : بحماس ) وكتعرفهم؟ زعما كي دايرين ؟ انا كنشوفهم كيحمقوني ... داكشي اللي كيلبسو !!! وديك الحياة كفاش عايشينها ! وااعر 

هز حاجبو ويدو على خدو كيشوف فيها وقال 

- من نيتك !!! ماعارفاش منين كيجبو داكشي؟ دابا دوك البنات اللي غيجيو كاملين حساب ليكخويا غيعطيهم مليون للوحدة؟ !!! ميفوتش معاهم 3000 درهم ولا 2000 درهم .. هادشي الاااا خلصهم اصلا ... راه لبنات كتاااااار اgووgوو غير مكركرين اللي سوليتها كتكوليك باغاترجع مانكا ! راه كيقلبو علر الشهرة وصافي باش يجي شي واحد يديها يبات معاها ويخلصها ...هادشي اللي كاين بلاميكدب عليك راسك 

اميرة: اوييلي!!! ... وابلاش بناقص كاع الله خنوزية الفام ولا خنوزية شي حاجة اخرى .. 
ضحك وقال : وادابا عجبتيني 
اميرة : ولاكن نجرب الشهرة وصافي ههه... اجي كتعرف شي مودل؟
سيمو : علاش؟
اميرة : عاود ليا كفاش كتعيش ... ماكرهتش نتصاحب مع شي مودل
سيمو : كنت مصاحب مع وحدة كبيرة عليا بعام ... لعياقة و لفوحان راك عارفة ... وانا عااارف المخبي اش فيه 
اميرة: اممم 
ابتاسم وقال: اييه هادشي اللي كاين ... (غمزها ) ايوا ونتي .. كاين شي (عاود غمزها )
ابتاسمات وقالت : لااالا 
قال بابتسامة جدابة : زعماا 
اميرة : لاالا مكاينش ههه
سيمو : و قبل ؟
اميرة : لا قبل ولا بعد 
سيمو : مزيان 
اميرة : انا غنعس ... تصبح على خير عيت جالسة 
سيمو : طفي بيسي انا غنعيط ليا فتيليفون .. خلي الخط تا تنعسي 
اميرة : تيلي طااافي 
سيمو : اوك ماشي مشكل ... تقدري تخرجي غدا نشوفك ؟ 
اميرة : غدا؟
سيمو : اه غدا 
اميرة : ماعرفتش ؟ غدا الحد ... حتى لغدا ونشوف 
سيمو : وا شعلي تيليفونك باش نهضر معاك غدا 
اميرة : نشاء الله..يالاه بون وي 
ابتسام وقال : بون وي ما بيل

يتبع..