على صوت الله و اكبر حل عنيه بشوي....لقا راسو ناعس و هي وسطو ناعسة مكمشة...قاص ليها وجها بشوي لقاها مفيهاش سخانة و هو يتنهد براحة...كان خايف لا تمرض ليه و لا يوقع ليها شي حاجة ..لكن فور ما عنقها و دخلها في احضانو نعسات بدموعها...
باسها في جبهتها و قادها في بلاصتها غطاها مزيان و جمع الوقفة كيدور يدو على شعرو....قرب حدا رجليها شاف شوي ديال دم هابط منها و ملطخ ليزار ....
بقات فيه بزاف لكن ماعندو ما يدير كل بنت لا بد ما دوز من هادشي و مع المدة اتعود... خلاها و دخل نيشن لبس سروال و دار سبرديلة بقا عريان من لفوق و خرج كيجري في جناب لبحر و كيفكر في ليلة لبارح لي كانت مستسلمة ليه و عودات ليه كل ما فقلبها...بقا كيجري تا ولا كلو كيقطر بالعرق و شعرو نازل على جبهتو و سدرو كيطلع و يهبط....
رجع لفيلا دخل نيشن لدوش غسل مزيان و خرج بدل حوايجو لسروال ابيض و قامجة زرقة ..و هز صلاية حطها في مواجهة القبلة و بدا صلاة ديالو بكل خشوع و في كل سجدة كيدعي ليها فقط ..دعوات من قلبو لخالص للخالق...دعاء لزوجته التي حفضت نفسها و سلمت نفسها له ..دعاء يحمل الكثير من الحب و العشق لها فقط....
جمع صلاية و كيردد دعاء في نفسو ..رجع عندها لقاها مزال ناعسة و هو يهز سوارت طونوبيل و خرج.....
بعد مرور ساعتين رجع هاز ثلاتة ديال ميكات في يدو جوج حطهم في لكوزينة و ثالتة طلعها معاه لبيت.....جلس حداها في طرف ناموسية. كيحرك يدو فوق حناكها تا كمشات حجبانها بي انزعاج و حلاتهم...
هاجر: اممم بغيت ناس....
عصام: نوضي احبيبة نعاس بزاف ايمرضك....
هاجر: غير شوي و نوض عافك...بغات دور و هي تخسر وجها و خرجات صوت بحال مشة مقصحة...امممم هئ هئ كيضرني لتحت....
عصام قرب ليها: انشوف...
غير سمعاتو قال انشوف وهي تخرج عنيها بجهد نعاس طار ليها و كترمش عنيها بسرعة فيه لاوية على راسها يزار و شعرها مخربق نازل على وجها....
هاجر بصوت مترعد: للل للا غغغير مممجرووح ببلا مممتشوفو...
عصام كيشوق فيها و هي كتحاول تبعد كتجنب نضراتو بالخجل لي طلع معاها و تصبغ وجها بي الحمر...قرب ليها كثر و هي تزير على راسها....
هاجر:انننننن
عصام جابت ليه ضحكة: مالكي كتبعدي مني قلت غير نشوف فين قصحتك و نداويك.....
هاجر بغات تغرق في حوايجها بالحشمة: للللا لا غغغير خلييه دابا يبراا بوحدووو...
هاجر بغا غير تفك: ها نتا غيير خرج و انوض نتمشا عادي و الله العضيم انا لحمي دغيا كيبرا وحق الله....
مبغاش يكثر عليها و هو يجمع الوقفة وبشوي هبط عندها باسها في فمها....
عصام: هاد لميكة فيها دوا وكاين ورقة كيفاش كيستعملوه و حوايج خرين ...
خرج خلاها مصدومة في بلاصتها مخرجة فيه عنيه....كيف خرج خشات وجها في ناموسية بغات تطرطق بالحشمة من كتفكر شنو وقع بيناتهم لبارح ..الشوفة هي لخرة مقدراتش تشوفها فيه...
وخا مقصحة و التحت ديالها عطيها لحريق حطات رجلها في لأرض غطات حالتها بي بينوار ديال نعاس و بزز باش جمعات الوقفة كتكالي مع الحيط و عاضة فمها من لتحت باش متغوتش حسات بشي حاجة كتهبط منها و هي تهبط عنيها لبينات رجليها لقات قطراة ديال دم كينزلو على فخاضها و هي تخسر ملامح وجها...
هاجر وخا وكلاها مزال لسانها ماضي و كيمضى غير من مكيكونش عصام اما من كيكون قدامها كتهبط عليها الحشمة و البراءة و ضرفات من سما تا ليه هو و كتبدل 180 درجة ...
هاجر: ولد لحرام شرشمني هئ اهئ قسمني على زوج و قالك بلا حشمة بلا حية عطيني نشوف احححح ايما و شهاد مشية لبطة وليت كنديرها محال نهبط قدامو بهاد المشية انتشوه كثر ما انا مشوهة... سكتات شوي و هي ترجع تهضر غير مع راسها... اييه عليك اهاجر تقزدرتي ما بقيتي تحشمي طرتي على دري ...كتعيب في راسها...بغيت نولي مراتك فالفراش...يفرشو على جد بوك نشالله ما تصلاح لمك غير حليمة تمخدك بداك لمدلك... قهروني بعدا غير فداك الفيسيوك لي سخن عليها راسها تجي تقولك الحلوة ما لحلوة نهار قلبت عليها تتقبت 😢 ....
قربات لحدا لميكة كتعرج و مفركة بحال دري من كيختنوه وخا كتبغي تجمعهم مكتقدرش حيت كتقصح و لقات راحتها فهاد لمشية.....
قربات لجهة ديال لميكة حلاتها و هي تبدا ترمش كانت فيها بواطة ديال جاج بيض عامرة شكلاط و مزوقة بي شريط دهبي...حلاتها بشوي كضحك عاجبها لحال هزات وحدة منها حطاتها في فمها و رجعات لميكة كتقلب بانت ليه بواطة مخملية سوداء حلاتها بشوي وهي تخرج عنيها من بانت ليها سنسلة ديال ذهب و لوسط كاين اسمها هي وحلقات مدهبة صغار و خفاف كتوسطهم جوهرة بيضة و شكلها سامبل.....
بسرعة تقلب ليها لمزاج و عجبها الحال بقات غير كتبتاسم...حطاتهم حدا بواطة ديال شكلاط و لقات لتحت دوا كامل لي اتحتاج و ورقة فيها كيفية الاستعمال و معاهم فوطة صحية بيضة ديال فارمسي كتحط من لتحت و معاهم ملابس داخلية قطنية....
دخلات معاها كلشي لدوش و محاولة على راسها باش متزيدش تقصح....لقاتو معمر ليها بانيو بالما سخون و رائحة الفانيلا لي كديرها عاطية و الورد الاحمر مشتت فوق لما....حنيكاتها ولاو حمرين عرفاتو هو لي دار هادشي كامل ...فكل حاجة كيديرها كتزيد تعلق بيه كثر و تعطيه مقام كبير في عنيها و قلبها....لقاتو مختالف على شخص لي ضنات في الاول انه ايكون عليه.... لقاتو حنين و كيشد لخاطر و ضريف و ولد ناس....كيعامل كلشي سواسية وخا قليل الكلام و الهضرة لكن ولفاتو هكا بشخصيتو كاملة حمقها انسان متلقايش يحالو فهاد زمان...
دخلات جسدها في لما دافي لي تغلغل في انحاء جسدها عاد حسات براحة و كل تعب لي كانت كتحسب بيه تبدد...بقات مدة طويلة وهي مخشية في لبانيو تا حسات بالتحت ديالها خفاف من لحريق ..عاد بزز باش جمعات الوقفة محاولة على راسها...تخشات تحت رشاشة غسلات شعرها و لحمها..دارت من لتحت ما ديال لوضو بزز مقدراتش تقيص حيت كيعكرها بزاااف....
لوات عليها الفوطة و نشفات شعرها كامل ..دارت دوا كيف مكتوب و خرجات لبسات حوايجها لي متكونين من تريكو ابيض كيتوسطو وجه دب بي الاصفر و سروال تجين زرق قصير من جهة رجلين بزز باش طلعاتو معاها مسكينة تا روح بغات تزهق ليها و وجها ولا حمر عاد طلع ليها....دارت زيف اسود كيف مولفة مع سندالة بي الاصفر ....
هزات لزار لي فيه دم طواتو مزيان و خباتو في الفاليز لي جابتو معاها ..دارت سنسلة و الحلقات لي جاب ليها و هبطات عندو لتحت بشوي مكالية راسها في جناب دروج مزيرة على فمها و كل درجة كتهبط كتغمض عنيها مسكينة كتحاول تمشى عادية وخا مقدراش...
هبطات لتحت و هي طلع معاها ريحة ديال القهوة..كمشات حجبانها و هي دخل لكوزينة لقاتو واقف مقفد على يدو و عاقد حجبانو لوسط كيوجد لفطور و يحط في بلاطو يطلعو ليها....طلعات معاه ريحتها و هو يدور متفاجئ...
عصام: هبطتييي.....
هاجر طايح عليها سر و حنيكاتها مطبزين و حومر مكتشوفش فيه: شنو كدير....
مجوبهاش بقا غير كيطلع فيها و يهبط مكانش معول انها اتهبط بوحدها تال لهنا و هي مقصحة ..لكن فور ما تعمق في ملامحها شاف حجبانها مكمشين عرفها مقصحة و غير صابرة...قرب ليها و هي هزات فيه عنيها حشمانة...
عصام دور يدو بشوي على خدها باسها فوق نيفها : كيف صبحات لعروسة ديالي...
هاجر تبسمات من لودن تا لودن ومع كيطلعو ليها خدودها كيسدو ليها عنيها كيولي شكلها كيوت كيحمق : مقصحة غييير شوي و صاافي...
عصام: درتي دوا لي خديت ليك ....
هاجر: اه درت كيف مكتوب في لورقة ....
حرك راسو بشوي و حط يدو بجوج على حناكها مركز مع عنيها لي كيبريو بلونهم الاخضر لجميل كيزيد يطيح فيهم كثر و كثر...
هاجر مسحورة في تقاسيم وجهو الوسيمة و لحيتو لي خفيفة مكيطولهاش بحال ولاد ليوم و مخليها خفيفة.كتبرز تقاسيم وجهو الرجولية...
حطات يديها بشوي على شعرو و هبطات ليه راسو بشوي لعندو، باست ليه جبهتو بكل حنية و حب و صدق و قالت من كل اعماق قلبها....
هاجر: كنبغيك....
تكوانسة في بلاصتو بي القبلة لي عطاتو في جبهتو و زادتو كلمة "نبغيك" لي خلات قلبو يضرب بجهد في بلاصتو ....
فهاد اللحضة الكلمات نقارضو ليه و عبر ليها فقط بي الافعال ...قربها ليه كثر و حط فمو فوق فمها بشوي.. كيبوسها بكل حنية و حب و كل شفاه كيعطيها حقها...كيتنفس انفاسها لي تغلغلات في اعماق روحو و سكنات بين شريين قلبه كيعاملها بين يديه بحال شي الماسة نادرة خايف عليها من لهوا....
هزها بين يدو و حطها فوق لكرسي ديال طبلة لفطور...هبط قدامها جلس على ركابيه وحط يدو على سمطة سروالها و هي تخرج عنيها تصدمات...
هاجر:شش شششكاديير...
عصام شاف فيها و هي تبعد يديها حطاتها على جنابها و سرطات ريقها بصعوبة فلبها بدا كيشطح في بلاصتو.... حيد ليها سروال بشوي خلاها منها لسليب وهي عاضة فمها من لتحت كترمش بسرعة و سخونية طلعات معاها....غطا ليها رجليها بيزار و هز عينو فيها...
عصام: سروال ايزيد يقصحك متلبسيهش تا تبراي اوكي...
حركات ليه راسها بي "اه"...
عصام كيشوف في سنسلة: عجباتك....
هاجر شافت فيه و رجعات هبطات عنيها و بسرعة قربات منو باستو في فمو و بعدات حشمانة: عجبوني شكراً....
تبسم ليها و جمع الوقفة عاض فمو من لتحت ...شافتو كيحط لفطور بغات تنوض تعاونو ...وهو يهز صبعو بتحدير مخلاهاش تزحزح من بلاصتها ..هو لي وجد كلشي و حطو قدامها....
هاجر كتشوف في طبلة: نتا لي وجدتي هادشي كامل...
عصام: لا كلشي خديتو من برا انا صاوبت غير عاصير و القهوة ...تبسم ليها و قرب ليها طاجين حلو قدامها و كمل هضرتو...ولبيض بالخليع لي كيعجبك....
هاجر كضحك: مزال عاقل عليه....
عصام: ميمكنش نسا ان اول حاجة قالتها مراتي نهار فاقت في لكلنيك هو بغيت لبيض بالخليع.... غمزها وحط ليها كاس عصير ديال ليمون ....
بقات كضحك عاجبها الحال كيتصرف معاها بحال شي ملكة و زاد من بدا كيوكلها بيدو و داير معاها كثر من لخاطر ....
كملات لفطور و هزها خرجها لصالون شعل ليها تلفازة و حط pc حداها و دخل لكوزينة جمع طبلة و غسل لماعن و طرف كلشي رجعو لبلاصتو مخلاها دير والو كاس هو لخر مخلاهاش تهزو ... و هي غير حاضياه بي اعجاب ضاهر....
هاجر: عمري ضنيت انك تقدر دخل لكوزينة و طيب فيها او تجمعها...
دور ليها راسو وهو في لكوزينة هاز حاجبو فيها: وعلاش ....
هاجر هزات كتافها كضحك: غير هكاك و صافي نهار لي شتك اول مرة كنتي كتبان صارم و معقد معندكش مع ضحك و الهضرة بزاف....
عصام جلس حداها دور يدو على عنقها : اممم هادشي كلو عندك فيه الحق و لكن هادشي مكيعنيش ان نفس الوجه لي كنوري ناس هو الوجه لي انوري لعائلتي...ناس ديال برا كنعاملهم كعصام بن جلول رجل اعمال...اما مع العائلة كنتعامل فقط كعصام الابن و الاخ و الزوج....
هاجر: دابا من انرجعو لرباط مغديش تبقا معايا اتمشي تخدم و تخليني بوحدي....
عصام شاد معاها الخاطر و كيجاوب على كل اسئلتها: شركة ديالي متركزة في افريقيا الجنوبية و لبغيت نقلها لمغرب انلقا مشاكل كثار هادشي علاش حطيت فروع في لمغرب لي يمكن ليا نتحكم فكلشي وخا انا في لمغرب و لكن ضروري خاص على الاقل نمشي لشركة مرة في شهر....
هاجر بعيون لامعة: نمشي معاك....
عصام قرصها بشوي في خدها: سالي لباك ديالك و نديك معايا لا بغيتي...
هاجر غير فكرها فالقراية وهي تجيها ديقة من تفكرات لوطني لي مبقا ليه والو بقات غير كدور في عنيها: غير خليني نمشي معاك ما عندي ما ندير بشي قراية....
عصام هز فيها حاجب و هبط لخر: ياك نتي نهار لول شرطتي عليا بغيتي تكملي قرايتك وتا نهار بغيت نسافر نتي مبغيتيش على حساب قرايتك...
هاجر تفرشات فهاد اللحضة وهي تكمل على الفرشة : اودي منيضاش منيضاش لي قراو طفروه....
عصام كيشوف فيها داير راسو معاها و كيشرح ليها بالخاطر كيعاملها بحال بنتو وهو باها لي كينصح فيها : كل واحد و كفاش شخصيتو انا وقفت على رجلي و بقرايتي كنت عارف مستقبلي ماشي في لمغرب هادشي علاش كنت كنسهر ليالي باش نجي انا لول و في لباك جيت انا الاول على صعيد لوطني وهادشي لي خلاهم يعطيوني منحة لألمانية تم لقيت عالم اخر و لكن عرفت فيه انوصل و حمدلله ربي مخيبنيش...
هاجر: ولكن نتا راه كنتي قراي و كتجي ديما الاول و ذكي اما انا ماشي من هاد نوع راه هادا لعام تاني لي كنعاود فيه لباك...
عصام حك لحيتو بشوي مكمش حجبانو: كيقولو حلاوة لباك في عامين .. ديري غير مجهود بسيط و مراجعة و غادي تنجحي شحال جتي في لجهوي بعدا ...
هاجر شافت فيه بنص عين و تكمشات ف بلاصتها والله ما جوباتو.....
عصام: غير هضري معندك علاش تحشمي وانا لي انراجع معاك من نوصلو لدار ولكن خاص نعرف نقطة الجهوي..بقات سادة فمها مجوبتوش و هو يقدر من راسو .....جبتي 10...
حركات راسها بشوي بمعنى لا...
عصام: اذا 9....عاودات حركات راسها بي لا..وهو يكمش حجبانو لوسط...8....
هاجر : قسمها على جوج.....
عصام خرج عينو فيها و حل فمو عقلو طار فهاد اللحضة و ردد بشوي : 4.....
بقا كيشوف فيها وهي متبتة و مرزنة بحالي مقالت والو ما عرف راسو باش تبلا تكا فوق سداري كيموت بضحك... عيا ما يحبسها و مقدرش بقا كيضحك كيف لمسطي...وهي مخنزرة فيه و مدورة راسها لجهة خرا مرضااااتش يضحك عليها على شوي اتبدا تبكي ليه....
بقا كيشوف فيها بصدمة ضاهرة على ملامح وجهو ممتيقش ديك قسمها على جوج لي خرجات من فمها بكل سهولة ....مشعرش براسو تا طاح فوق صداري كيمووت بضحك ما قدرش يصبر عيا ما يكبح فيها لكن جوابها مكانش داير ليه فراااس ....
هز راسو كيمسح دموع لي فطرف عينو وهي كتشوف فيه مخنزرة و مادة شفاه تحتانية ديالها جاتها البكية و الفقصة و وجها ولا حمر...
عصام كيتنفس بجهد من كثرة ضحك و دموع كيهبطو ليه تا كيقول هانا حبستها و يرجع يطرطق بضحك ....
هاجر ما عجبهاش الحال :وصااافي تا نتا قلتي ما نخبيش عليك و ها نتا ندمتيني تا قلت ليك... تفو كتخرجو بنادم على طوعو...
جمعات الوقفة معصبة و مزالة غير بسليب و رجليها عريانين..غير شافها نايضة و هو يشدها من يديها رجعها لبلاصتها عاض فمو من لتحت و عنيه كيبريو بدموع و راسو مزير عليه بكثرة ضحك و شعرو مخربق ولا كيبان بحال شي دري صغير كيحاول يحبس الضحكة...شكلو الطفولي جاب ليها ضحكة وخا مقصحة شوفة و مرضياش قدامو ... بزز باش جلسات....
هاجر هزات صبعها: تعاود ضحك نوض و نخليك وحدك ضحك مع الحيوط....
عصام حاط يدو على شكل قبضة فوق فمو كيكحب: دابا غير قولي ليا بيناتنا باش حسيتي نهار شرطتي عليا انك باغيا تكملي قرايتك...
هاجر: باش بغيتيني نحس عادي علاه منكملش قرايتي و لا شنو...
عصام هز فيها حاجب و هبط لخر: زعمة ما حسيتي لا بتأنيب ضمير لا والو و ديك تسافيرة لي حرمتي عليها راسك و قايلة ليا لا اخويا انا تابعاني قرايتي و عندي الباك زعمة ما حشمتي تا شوي ....
هاجر هزات كتافها بجوج: اصلا كون سافرت معاك كنت انبقا انا وياك غير راس فراس و ينوض بيناتنا المشاكل حيت كل مرة انرفضك هادشي علاش قلت حسن كل واحد يبقى فجيه باش نبقاو مزيانين و زيد قرايتي مهمة بزااف ا خويا...
هاجر شافت فيه بنص عين مرضاااتش ولات حمرة: اصلا نجيب غير 10 في لوطني و نجح حيت جبت 17 في لمراقبة دورة الاولى....
عصام قرب ليها كيهز حجبانو فيها: هي قولي ليا كتقراي مزيان واش كنتي مريضة نهار الجهوي باش تجيبي ديك 4...
هاجر من حصلات حصلات بدات كتسرسب كلشي: لا ديك 4 جبتها على دراعي اما ديك 17 جبتها بنقلة...
شافت فيه ببرائة بحال لمشة و هو بقا غير كيشوف فيها ما عرف يضحك و لا يندب حناكو على هادي لي في خر يامو اطير ليه عقلو و يبقا بلاش....
غير شافتو ايضحك و هي تحط يديها على فمو مخنزرة: ضحكتي الله يجعل الباركة تعاود ضحك نمشي بحالاتي....
جرها من خسرها نعس فوق سدراي و جبدها معاه نعسات فوق صدرو كيدور يدو على شعرها....
عصام: كسولة و عاجباني كما نتي و باغيك بديك ربعة ديالك.....
هاجر : حيد يديك بعد مني نمشي بحالاتي قالك كسولة بزاف عليك كتصحاب راسك غا نتا لي كتعرف تقرا....
عصام شاد معاها الخاطر و كضحكو بتصرفاتها..شاد ليها وجها و هي باغيا غير منين تعضو مجننة...ما حسات براسها تا هزها بحال لمشة و طلع بيها لبيت و هي كتركل.....
عصام: بدلي حوايجك لبسي شي حاجة طويلة باش متقصحيش و نخرجك.....
خلاها و مشا كيبدل حوايجو و هي منفخة كدور في عنيها كتسناه يجي يحزرها ..ساعة تقول واش قرب جيهتها كيبدل حوايجو قدامها بضوي مع راسو مدارش يشوف فيها كاع....
تنهدات وبلا جداها مشات بدلات حوايجها لبسات كسوة طويلة هابطة و مستورة مع صندالة بلا و دارت زيف على شكل لي مولفة ديرو.....
بقا عصام كيشوف فيها غير بجناب عينو و مبتاسم.. ايولي يبرضها غير بشوي تا تولي تسمع كلامو و دير بيه في لول كان داير معاها الخاطر فوق القياس و بشوي ولا كيزير سمطة معاها تا تشد معاه طريق وخا هو عاجبو لحال هكدا لكن عرف هاجر من نوع لي كيف كتعامل في دارها كتعامل ناس لي برا و هو هادشي مكيعجبوش باغيها تفرق ما بين راجلها و بين ناس لخرين و متيبنش ليهم نفس الوجه لي كتبين ليه هو....هادشي علاش ولا كيزير معاها شوي بشوي تا تقاد بلا جداها و غير بسياسة...
ركبو في طونوبيل وهو كيشوف فيها غير بنص عين عاض فمو من لتحت و مصغر عنيه...
شدو طريق ساكتين هي كتشوف في جاج و مرة مرة تحرك من بلاصتها كيضرها تحتها ...شدها لحريق بكثرة لجلاس....حس بيها و هو يوقف طونوبيل قدام كافي مقابل مع البحر و فيها ناس قلال و شكلها زوين كتفتح نفس داير بيها لورد في الاشكال و ريحتو عاطية في لجو....
خرج حيد لفيستة خلاها في طونوبيل و دار عندها شدها من خسرها و غادي معاها غير بشوي باش متقصحش من شاف وجها ولاحمر و حبات عرق تكونو على جبهتها خلعاتو...جلسها فوق كرسي مدرقين على ناس...
عصام جلس على راكبيه قدامها كيلمس ليها وجها لي حمر: واش مقصحة بزااف بغيتي ترتاحي شوي و ونديك لطبيب و لا نرجعك لدار....
هاجر شادة راسها مزيان مقصحة بي المعقول وخا هكاك صابرة: لا ما واقع والو غير تحركت بزاف في صباح و جرحة مزال فيا جديدة و صافي ...
عصام مكمش حجبانو كيفحصها غير من عنيها عرف راسو كرفسها نيت بديك طلعة المجهدة لي طلعو معاها و هي مزال صغيرة متقدرش على ديالو كامل...باسها في يديها كيحرك صبعو على حناكها....
عصام: متأكدة منرجعوش لدار....
هاجر حاسة بشي حاجة كتهبط معاها و لحريق مع وجع خفيف : اه غير مقصحة شوي و صافي و نيت هاد بلاصة زوينة غير خلينا نبقاو فيها بلا ما نرجعو لدار و نخسرو هاد لخرجة......
شاف فيها تا عيا و هو يجر لكرسي و جلس حداها حط ليها راسها فوق كثفو ودور يدو على خسرها كيطلعها بشوي و يهبطها بحال مساج ..
طلب ليها كاس لويزة يهدأ ليها شوي لحريق و هو طلب كافي مع كيك شكلاط في الانواع ليها.....
حسات براحة بكاس ديال لويزية و الوجع بدا كيخفاف ليها ..حاطة راسها على كثف عصام و كيشوفو في لبحر و امواجو تا فجأتو بسؤال....
هاجر بلا متحس هضرات: شحال من وحدة عرفتي في حياتك من غيري اعصام ....
عصام كمش حجبانو متوقعش هاد سؤال: علاش كتسولي مهم نتي لي كاينة دابا ..حوايج لماضي ماعندك ما ديري بيهم...
عضات فمها من لتحت هي فلول مكانتش متسوقة لكن من ملك قلبها ولا عندها فضول كبير تجاه الماضي ديالو...
هاجر: غير سولتك و صافي تا نتا سولتيني و جاوبتك و جاوبني تا نتا...
عصام: انا سولتك انطلاقا من تصرفاتك اما انا راه كلشي بان ليك من نهار الاول انك الوحيدة في حياتي....
هاجر هزات راسها فيه : ودابا غير جاوب عااافك....
تنهد بشوي ما عرف ما يدير معاها عارفها مغاديش تفارق معاه تا تاخد خو جوابها....
عصام: وحدة لي كانت في حياتك قبل منك...
هاجر خرجات فيه عنيها ممتيقاش: انوض براكة من لكدوب زعمة كانت عندك غير وحدة و زعمة راك زين و بوكوص و زعر و لباس عليك باين ايكونو شلا بنات دارو بيك و نتا هنا كتقول ليا غير وحدة....
عصام: نتي سولتي على حياتي كانت فيها مرأة وحدة اما لي كانو دايرين بيا كانو بزاف لكن مكانش عندي وقت لداك تخربيق ديال تصاحيب و العلاقات و زيد راه متولدتش لباس عليا هادشي كلو لي كتشوفي عندي دابا راني خدمت عليه بدراعي باش نوصل ليه...
هاجر: هادشي انا عرفاه و لكن بنت وحدة جاتني في شي شكل....
عصام بقا ساكت كيشوف بعيد في لبحر و ردد بشوي: كانت الوحيدة في حياتي و ولات مراتي لكن مكتابش نكملو و طلقنا....
كيف قال هاد لكلمة و شافتو كيف ساهي جاتها دقة في قلبها بحال شي حد طرشها بجهد و هي تردد بصوت مترعد و شفاه ديالها كيترعدو....
هاجر: كنتي كتبغيها.....
مردش عليها بقا ساكت و ساهي في نفس النقطة...وكان سكاتو هو جوابها..
فهاد اللحضة قلبها تشوا و تغرس فيه كثر من سهم حولات متبينش لكن وجها ولا حمر و مزيرة.....
حس بيها وهو يزير يدو على طرف خسرها و خشا راسو في عنقها نيفو كيداعب خدها بشوي....
عصام: كنت كنبغيها اما دابا لا....حط فمو على ودنها و همس ليها بأنفاس ساخنة....في قلبي كاين غير نتي عمرتي قلبي و عيني و حياتي و فراشي و داري و من غيرك عمرها تكون ...
كل جسدها رجف تحت تأتير كلامتو لي دخلو بحال شي بلسم كيداوي الجرح لي تحط فوق قلبها..بكلمة منو يقدر يفرحها او يقدر يألمها و يبكيها و خا هكاك لي فيها ما هناها جاها فضول خايب بزاااف و خا عارفة اتجرح حيت هو ماشي من الاشخاص لي كيزورو مشاعرهم ولي كان ايجاوبو بيها بصراحة معندوش مع زواق الهضرة....
هاجر: عاود ليا كفاش تلاقيتي بيها....
عصام عرفها اتبقا تسولو تا تعرف كاع لي بغات هز قهوة شرب منها جغمة سرح بيها حلقو و هي كتشوف فيه بنص عين و شابكة يديها لوسط حطاهم على فخاضها مزيرة عليهم كتسناه يهضر....
عصام: مور لباك مشيت لألمانيا نكمل قرايتي و تم تعرفت عليها بحكم كنا بجوج لي مغاربة في تخصص وخا هي تزادت في المانيا عمرها جات لمغرب مكتعرفش تقاليد لبلاد و تا دين مشداهش مزيان مهم بقينا بجوج كانت كتبقى فيا بزاف حيت يتيمة و رباتها غير خالتها و انا اكثر واحد حاس باليتيم حيت الوليد الله يرحمو خلاني صغير بزااف...مهم خليتها ديما فجنبي و طورات العلاقة بيناتنا .....
شافت فيه مصدومة مخرجة فيه عنيها و هو دغيا فهمها فاش فكرات.. حط يدو على حناكها قرصها بشوي اصلا كاره يهضر معاها في الماضي ديالو لأنها بالنسبة ليه حاليا هي كلشي لكن الفضول لي جاها عليه هاد ساعة خاصو ضروري يقول ليها كلشي باش يريح قلبها.....
عصام: ماشي داكشي لي فبالك ...عمري قربت ليها قبل زواج.. طورات علاقتنا هو كنا بحال اصدقاء و مع المدة عترفات ليا و قبلت بيها و قتحت ليها قلبي و عاملتها كوحدة من العائلة بديت كنخدم ليل و نهار باش تا هي نعوضها ولو شوي بطفولتها لي تحرمات منها ..كنت حاط في بالي ثلاتة ناس نعوضهم فهاد دنيا و لي كنت حاطهم بين عينيا اولا الوليدة و تانيا ختي و تالتا هي....قريت و خدمت مخليتهاش تخدم كنت بغيتها ترتاح و انا لي ندير كلشي وخا مكنتش كنبين ليها مشاعري لكن كنحاول نبين بي الافعال ..ساليت قرايتي و خدمة في شركة مرسديس كيف وليت مدير لمهندسين قلت صافي نقدر نعوض كلشي بخدمتي الحالية طلبتها لزواج و وفقات و ديتها معايا لمغرب تعرف على الوليدة و ختي...قبلوها وسطهم و داروها بنتهم ومن داك نهار تبدل كلشي...
كمش حجبانو و صغر عنيه عاض فمو من الجنب كأن عقلو بشا لسنوات قبل.....
هاجر بتوتر: شمن نهار.....
عصام عاض فمو و حجبانو لوسط: نهار عرسنا كنا دايرينه في لقاعة و انا كان عليا ندخل عندها حيت كانت كتسناني نهبطو قدام ناس كيف التقاليد و لكن قبل ما ندخل عندها رجعت خرجت برا لطونوبيل ناخد واحد لوراق منها ...قلت نجيبهم معايا حيت كنا معولين نسافرو مور لعرس مباشرة هادشي علاش جبت معايا وراق الخدمة....من كنت راجع سمعت صوت ديال بنت كتوجع و كتبكي...قربت ليها نعرف شكون لقيت بنت صغيرة يكون عمرها داك ساعة شي 12 ولا 13 لعام عامرة دم و طايحة في لارض كتغوت بالوجع و كطلبني بي عنيها لي كانو مدمعين تا غيبات قدامي ..هداك نهار كان اول مرة كيوقف ليا شعر لحمي بداك لمنضر ديالها ركبني لخوف ضنيت انهم تعداو عليها وهي يالله مزال صغيرة بلا منشعر هزيتها بدمها و ديتها لكلنيك ناسي لعرس ورايا و كلشي.. عقلي كان محصور غير فديك لبنت لي بينات درعاني وشي حاجة خرا طارت من لبال لدرجة اني نسيت عرسي لي هو مهم و ركزت غير فديك البنت لي مغيبا بينات يدي.....
هاجر كتسمعو و كتسرط ريقها بصعوبة و كدور في عنيها و قلبها كيضرب بجهد عرفاتو كيهضر عليها و باين معرفهاش...
هاحر قطعات لحس و عنيها خارجين كتحركهم هنا و لهيه و بصوت يشبه الهمس قالت...
هاجر: كتعرف هاد البنت....
عصام مخسر سيفتو و حجبانو معقودين مخنزر:لا مكنعرفهاش شفتها بديك الحالة و هي مزال صغيرة عقلي بشا بعيد ضنيت انها تعرضات لإغتصاب وهاد ضن هو لي خلاني نطير بيها لكلنيك و نسا كلشي ورايا.....
عضات فمها من لتحت كتحاول تحكم في تعابير وجها باش ميعيقش بيها وحيت هو كيشوف في لبحر مدا مجاب اما من نضرة وحدة منو يعرف شي حاجة مخبياها...
هاجر :ايييه مسكينة و شنو درتي معاها واش بصح لقيتيهم معدين عليها.....
سكتات حابسة ضحكة....وهو دور يدو على راسو رجع شعر لور مخنزر....
عصام كأنه تفكر داك لمنضر قدامو ...كاع سيفتو عوجها كاره المنضر لي جا ليه بينات عنيه
عصام: معندك علاش تعرفي اش وقع ليها مهم مكان والو من داكشي لي فراسي والبنت صبحات بخير و على خير ....كمش حجبانو و دور عينو فيها كيتحقق من ملامحها....
هاجر بتوتر: ممم ممالك...
عصام مكمش حجبانو : داك نهار كانت جات خالتك سلوى لعندها وهي لي فسرات ليا شنو واقع و قالت لي راها من العائلة....
هاجر: وكيف دايرة هاد لبنت و صفها ليا....
عصام: معرفتش بضبط من لقيتها كان ضلام و نص شعرها مغطي وجها كان همي في دم لي فيها اما حوايج خرا مكانوش هاميني و غد ليه من جات سلوى كتشرح ليا و بغيت نشوفها تخبات في سلوى مبغاتش تشوف فيا كاع.. مكان عليا غير نبارك ليها ونحط ليها صواب و نخرج بحالاتي وخا كرهت كلشي فديك اللحضة لكن لي صغر سنها ما قلت والو...
هاجر عضات طرف لسانها و كتفكر داك نهار من كانت خالتها كتشرح ليه بانها عاد وصلات وداكشي غير حق شهر جاتها مجهدة بزاف.. كيف شافت ملامحو لمخنزرة و معصب و هي تخشا في خالتها خلعها و حشمات منو مقدراتش تزيد تشوف فيه ..
وهو قرب ليها باسها في راسها و بارك ليها نهارها وحيد خاتم ديالو ديال ذهب و حطو بينات يديها صغيورين كهدية على بلوغها و خرج بحالاتو كان داك اول مرة و اخر مرة شافتو.....
هاجر بشوي : كنضن انها من عائلة فؤاد راجل خالتي حيت عائلتنا مكانش عدنا بنات صغار....
عصام حرك راسو و بقا ساكت ساهي في لبحر معرفش علاش تفكر ديك البنت بضبط حاليا وخا داك نهار تعصب بزااف لكن دابا من تفكرها شداتو ضحكة..بلا ميحس بتاسم بهدواء تا بانو لغمزات ديالو و سنانو لي بيضين كيشعلو....
هاجر شبكات يديها في يدو عاجبها الحال حطات راسها على كثفو : كمل ليا شنو وقع....
عصام تنهد بجهد و حط راسو فوق راسها: من رجعت لقيت كلشي مشا و ناض بزاف صداع معندك ما تعرفي فيهم و هي وخا شرحت ليها الوضع و شنو وقع متيقاتش و بقا همها غير لعرس لي مشا و ناس و صحابها لي تشوهات معاهم.....من تم تبدلات بزاف على البنت لي عرفت صبرت معاها بزااف وخا مبغاتش تولد خليتها على خاطرها لكن زادت فيه وكان عليا نوقف علاقتي بيها و نعطيها طلاق لي رفعاتو عليا و مستحقاتها و مشات بحالها....
هاجر: شحال دابا باش طلقتي منها...
عصام: تقريبا 3 اشهر....
هاجر: زعمة قدرتي تنساها و تبغيني فهاد المدة لقصيرة......
عصام باسها في جبهتها: حبي ليها وقف في لعام تاني ديال زواجنا من بعد بقاو غير لمشاكل وفكل مرة نهضر معها كتجبد ليا قضية اليتيم و كنضطر نصبر و نعطي محاولة لزواجنا لكن كنت انا بوحدي لي كنحارب فداك زواج وهي لي كانت كدمر كلشي وفي الاخير كان ضروري نتفارقو ولا واحد فينا كان ايمشي لحبس و لخر لقبر....
هاجر خرجات فيه عنيها : ولكن نتا كنتي نضتي لديك قناة دعيتيهم حيت هضرو عليها...
عصام: هي كتبقى طليقتي و تا حد ما عندو حق يكتب على موضوع كيخصنا بجوح وكان عليا نوقفهم عند حدهم...
هاجر كترمش عويناتها : دابا قولي واش ديك البنت هي سباب دياول مشكل ديالكم...
عصام هز حاجب و هبط لخر فيها:
لبنت عمرها 13 لعام شمن مشاكل اتجيب ليا ...صداع كان اينوض بيها و لا بلا بيها....
بقات ساكتة كدور في عنيها و هو عنقها زير عليها مزيان مدخلها في صدرو ...باسها في راسها...
عصام: هادشي وقع و نسيتو مبقا كيهمني تا حاجة و نتي لي عندي دابا ..غمزها..نربيك و نكبرك .....
بقات كضحك باستو فوق نيفو و جمع الوقفة بعد ما حسات براحة و الحريق تهدن عليها....
شبكات يديها مع يدو وتمشات هي وياه قدام لبحر و ريح كيضربهم..ساكتين و غير كيتمشاو وهي لاصقة فيه و عاحبها لحال و معمر ليها عنيها خصوصا من كتشوف لبنات لي كيدوزو من حداهم كيف حالين فمهم فيه وفي وسامتو وطولتو وكيفاش هو ممصوق لتا حد و داير خاطرو غير ليها و عنيه ما كيشوفو غيرها...عجبها راسها و حسات انه فعلا ديالها راجلها لي عطاها كثر من لي عطاتو.....
وهما كيتمشاو بي صمت تنهدات بشوي من تفكرات الياقوت لي كتسنا فيها...دورات يديها على دراع عصام مخشيا فيه و كتشوف فيه كفاش خلا كلشي و راه باش يبقا معاها و يفرحها و داير خاطرها فوق خاطرو.....
عرفاتو مو عندو عزيزة و غالية بزاااف ميبغيش لي يوصلها ولو بنصف كلمة هادشي علاش وعدات راسها انها كيف اتوصل لفيلا اتحاول تصلح جرة مع الياقوت لي من نهار تلاقاو و هما كيف المش مع لفار ....
وصلو لطونوبيل حل ليها لباب دخل و هو يصوني تليفون ديالو ...شاف الواليدة ديالو و هو يقبل الاتصال....
عصام:الو.....
خرج عينو لي ولاو حمرين مزير على سنانو و عروق يديه تنغخو ليه ..قفزات من بلاصتها من غوت بجهد....
عصام:كفاااااااش.....
في بعض الاحيان تا كنقولو الامور تقدات و عادت المياه لمجرياتها فإدا كنلقاو العكس تماما و انما المشاكل عاد ايبداو و يكثرو .....
اسبوع دوزاتو رفقة عصام لي فششها و عطاها و قتو الكامل... تقربات منو و بغاتو لحنيتو و تصرفاتو و رجولتو لي كيتضرب بيها لمثال...
كفاش ميتضربش بيها لمثال و هو حقق نفسو و وصل راسو...بي دراعو باش دار هادشي لي عندو ليوم...رجل كامل لمواصفات... لا من ناحية الاخلاق و لا من ناحية المضهر او الشخصية....طبعاً ليس مثالي وليس معصوماً من الخطأ فنحن مجرد بشر....لكن في زماننا هادا عندها يصبح الرجل يتشبه بالمرأة و تختفي نخوة الرجولة و معالمها و تذهب الغيرة عن الاعراض و الكبرياء عن المدلة...نجد كلمة الرجل بكل ما تعنيه الكلمة في عصام نخوة الاسم تكفي و تزييد....
كبريائه لا يعلا عليه متسلط و جبار على من يتخطى الحدود معه....حنين و مخلص لمن يسكن قلبه و ينبض به....متدين و محب لمن اعطاه كل شيء سبحانه تعالى...قوي كالصخر لا يهاب شيئاً..كتوم و قليل الكلام و كثييير العطاء ..عندما تجدين كل هادا في رجل واحد فكيف يا سيدتي لا تقعين له و امثاله نادرون في هاذا العالم .....
مع ادان صلاة العشاء تحل باب الامامي ديال الفيلا...دخل بسيارتو بهدوء كارز على فلون طونوبيل و فمو داير خط من كثر ما زير عليه لكثرة الغيض لي متملكو..ملامحو كيضهرو غضب شديد و عنيه مخنزرين و حجبانو عاقدين لوسط بحال شي نسر كيستعد ينقد على الفريسة ديالو......
وقف طونوبيل و هي تحل هاجر عنيها وجها صفر و ضايخة ...دورات عنيها بانت ليها الفيلا يعنى وصلو عاد رتاحت....دارت عند عصام مكمشة حجبانها.....
هاجر: عصام واش واقعة شي حاجة...
عصام بدون رد....
هاجر حطات يديها فوق يديه: من جاك اتصال و نتا ساكت ما بغيتي تقول ليا والو و انا من شتك هكاك مبغيتش نسولك ونتا حاجة وحدة لي خرجتي من فمك خاصنا نرجعو..دابا ها حنا وصلنا شنو كاين....
عصام باسها في جبهتها: ما واقع والو كيف بقيتي نتي مزال فيك دوخة....
هاجر: كانت فيا غير في الاول من شدينا طريق لكن من جبتي ليا ديك كينا غير شربتها نعست و فاتني الحال.....
حرك راسو بشوي و بقا ساكت دخل ليها شك في راسها....حيدات سمطة و دارت لباب تحلو تخرج و هو يشدها من يديها زير عليها بجهد تا قصحها و هي دور عندو ما فاهمة والو....
عصام كيشوف فيها مزيان...هز ليها يديها بهدوء باسها ومن قلبو خرجها :كنبغيك....
هاجر تقدات في لجلسة مواجهة ليه مرتاحتش لنضراتو حساتو مخبي عليها شي حاجة لكن تايقة فيه و كلمة لي خرج خلا قلبها يفرفر في سما العالية.....تبسمات ليه بهدوء غارقة في ملامحو الرجولية بينما هو دور يدو على خسرها و قربها ليه كثر عنقها و دخل وجهو في عنقها كيقبلها قبلات متفرقة و كيستنشق رائحتها بحب.....
عصام بي انفاس ساخنة على عنقها : يوقع لي وقع عمري نتخلا عليك.. نتي ديالي و انا ديالك حاجة خرا مكيناش و عمرها غادي تكون.....
عضات فمها بشوي من همس ليها هاد لكلمات لي دخلو مباشرة لقلبها...حنيكاتها تزنكو بالحمورية لي طلعات معاها ..مطبزين وطالعين مغطين ليها عنيها لي تسدو.....
بعدات منو مهبطة عنيها لتحت حشمانة..باسها في جبهتها و خرجو بجوج دار اشارة لعساس لي جا كيسلم عليهم يدخل لحوايج لي فطونوبيل لجناح ديالو......شبك يدو مع يديها و دخلو بشوي بحكم ولات كتعرج كثر بلحريق لي كتعطيها جرحة لي فيها....
كمشات حجبانها من سمعات الهضرة ديال اسماء و الياقوت و وحدة خرا معرفتهاش....
فور ما دخلو كلهم دارو عندهم ..اسماء كتشوف في هاجر بحزن..بينما الياقوت كتشوف في ولدها بخوف و هو واقف كيف ملاك الموت و حداه هاجر لي عنيها مشات مباشرة لمرأة لي مبتاسمة و عنيها فقط على عصام محيداتش عينيها منو...لابسة كسوة قصيرة حد لفخاد ودايرة من فوق كتافها تجاكيط جلد بي الاسود و شعرها قهوي....
هاجر هزات عنيها في عصام بان ليها مخنزر و داير شوفة ديال القتيلة فديك البنت.....كيف حلات فمها تهضر و هي تشوف البنت جاية عندهم كتجري تلاحت على عصام بتعنيقة خاشية وجها في عنقو و دموع هابطين ليها كتنخسس و ضحك وتبكي وسط عنقو وفي كل مرة كتزيد تزير عليه و تنطق اسمو مرارا و تكرارا..كانها كتعلمو انها رجعات لبين دراعو مرة اخرى.....
هاجر دنيا دارت بيها مخرجة عنيها ولات كتقفقف في بلاصتها بحال شي حد ضربها بطرشة تا تسمكو ليها لودنين و بداو كيعطيو طنين ...
حدرات عنيها بشوي ليد ديال عصام لي حيدها من وسط يديها وحطها على ضهر البنت لي معنقاه...هاد الحركة فقط كافية يتقطع قلبها لأطراف و يهبطو ليها دموع بحال حجرة سخان على خدها وهي كتشوف راجلها معنقاه وحدة خرا تا القوة باش تهضر ما بقاتش عندها بكثرة صدمة........
عصام حط يدو على ضهر لبنت مخنزر و معصب محاملش جرها بجهد بعدها منو مخنزر .....
عصام: علاش جيتي ا ميار....
ميار دموع في عنيها بغات تحط يديها على وجهو وهو يبعدو كيسوط شد ليها يديها مغزف خلخدها في بلاصتها من تحت سنانو....
عصام: ياك عطيتك ما بغيتي علاش راجعة تاني....
دفعها بجهد و عروق جبهتو تنفخو ليه و هو يدور عند هاجر لي كانت مصدومة كتبكي في بلاصتها...غمض عينو و جرها لصدرو خبا ليها وجها في صدرو كيبوس ليها راسها و مزير عليها...
عصام: ششش ما كاين والو ..مكاين والو....كلشي فااات......
دورات يديها على خسرو وزادت في صوت بكاها بحال شي بنية صغيرة محملاتش شي حد يعنقو ولا يقرب ليه و لا تا يقيصو ..شداتها الغيرة لي حرقات قلبها عليه....
طاح قلبها بينات رجليها بحال شي حد كب عليها لما سخون حرقها كاااملة من سمعات كلام ميار....
ميار: كفاااش كلشي فااات...قربات لعصام بغات طير على هاجر و هو يرجعها ورا ضهرو مخنزر في ميار لي سم باين على وجها كتشوف في هاجر لي مخشية ورا عصام....
ميار: لي بيني و بينو عمرو يتساااالة حيييت انا حاااملة بولدووووو....
دنيا ضارت بيها فهاد اللحضة وهي مكمشة ورا ضهر عصام لونها مخطوف و ملامحها مصدومة كتسد عنيها و تعاود تحلهم و كلمة "انا حمالة بولدو" كتردد في ودنها...مرفوعة هاد ساعة محساش كاع بناس لي معاها..جاتها دقة خااايبة و بزاف ...
شحال رفضاتو و دفعات عليه كبير و جرحاتو بكلامها لمسموم و هبطات من قيمتو و هو رغم كل هاد عاملها احسن معاملة خلاها في راحتها و عطاها لخاطر و حاول يتبدل حسب شخصية ديالها مقالش ليها نتي لي تبدلي ..بل هو لي تبدل على ودها ..كان سكوتي و كلام ششو قليل و معاها كثر من كلامو و حنيتو.....كان قليل فين يضحك او يبتاسم و معاها طول الوقت ضاحك.....
معاها كان شخص اخر غير عن شخص لي هو عليه...معاها دخل لكوزينة و دار لي ما عمرو دارو في حياتو فقط لراحتها ....معاها بين حبو ليها بي الاقوال و الافعال......و بلا ما تحس بدات كتغرق فيه يوم بعد يوم تا غرقات في اعماق حبو ...قلبها لي كان عذري اخيرا ملكو و ولا ديالو...اخيرا داقت الحب و بغات من كل قلبها...نهار لي زادت خطوة لقدام تجاه زوجها تدمر كلشي بضهورها هي......
شعلات نار في قلبها و دموع دارو خط على حناكها مغيبة عن الوجود...بينما عصام واقف مكوانسي في بلاصتو كيشوف في ميار بدون فهم مركز مع ملامح وجها كيقرا علاش جايا و شنو مخبية....
عصام: حاملة....بولدييي انااااا؟؟؟؟
ميار : ااااه حاااملة بولدك ونتا عارفني نكدب على كلشي الا نتا ا عصام.....
شافت في هاجر لي دايرها عصام وراه و هي تغدد معجبهاش لحال حيت هديك بلاصتها هي لولة و مستحيل تكون لغيرها ..بغات تقرب ليها معصبة وهو يهز عصام صبعو في وجها مخنزر.....
كلشي خرجو عنيهم في هاجر لي معرفو كي دارت و لا كفاش نقزات من ورا عصام ولا منين جاها هاد جهد و هي كانت شبه مغيبة ...
تا حد ما عرف كي دارت تا تلاحت على ميار من شعرها نزلاتها لأرض وجلسات فوق منها مجننة كتنتف و ضرب ليها راس مع الارض محساش بشنو كدير ....فهاد اللحضة بان زلزال ديال هاجر لي مكيوقفو حد ولي جا يفكها اتشركو معاها...
بي الاعصاب لي شدوها كتجر شعر تا كيطرطق في يديها..نتفاتها نتيف دجاجة و ميار حمياها غير لغوات..عصام باش يفك بقا مصدوم في بلاصتو جماد...اما الياقوت و اسماء مكرهوش يشدوها مع هاجر و يصلوخها صليخ الحولي....
ميار كتغوت و تنهج و تبكي: وااااع عتقوووني اهي اهئ بعديييي منييي متوحشة لبقرة طلقيييي مني هئ هي عصاااام....
هاجر و الله ما بغات تفاك عنيها حمرين شاعلة: البقرة هي لي اتنطح مك ليوووم ....جيتيي تال عندييي القحبة و بغيتي تحلي فمك...
طارت عليها بعضة تا غوتات ميار ربي لي خلقها كتركل....عصام دور يدو على هاجر جرها بحال ريشة بعدها من ميار.. عرفها معصبة وخاصها فين تبرد غدايدها هادشي علاش خلاها تبرد شوي عاد يفك تا هو كثر من مو عجباتو زلزال وخا مبينش لكن رضا عليها دينا و اخرة ....
هاجر كتركل و عنيها خارجين في ميار لي كتجمع في شعرها و تبكي عليه وعلى وجها لي عمر قميش و عضان....
هاجر: كتبكييي القحبة مزاال عندك الوجه فييين تبكيييي...دخلات ضفارها في عصام غرساتهم فيه بغاتو يطلقها ترجع تبرد جنونها فيها...طلاااااااق ليووم نقتل مهااا طلااااق.....
ميار كتبكي شادة كرشها: اهي اهئ عصااام خرج هادي هي هئ بغاات تقتل لينا ولدنا المتوحشة...
هاجر: الله يلعن طواسل مك يا لحمارة منيييييين اتجيبي هاد لولد منييييين تلت شهوور و نتي غاااابرة القحبة تااال دابا عاااد باااان ليييك عصااام علاااش مجيتييش شهر لول لي هو مزاال ديال راااسو تا تزوج بيا انا عااد جايا بكرش الحرااام القحبة..منين هاد عصااام ايحطو فيييك منييين ولا عندو داكشي بي بلوتوووت ازاااملة دغيا وصلك ....هاجر سعرات و كتركل و تغوت.. زيف طاح ليها و شعرها تطلق و لحريق لي فيها نساااتو .....
عصام عرفها صافي وصلات ليها لعضم..هزها بين يدو وخا كتركل معطهاش فين دور شاف في ميار مخنزر مدهاش كاع فيها ولا في لحالة لي دارت فيها هاجر..
عصام: تسنايني في لبيرو.....
طلع لجناح ديالو ..دخلها لبيت و سد عليه لباب من وراها و هي في صدرو كتنهج و شعرها لاصق على وجها بكثرة ما عرقات و لحمرة معليا وجها و يديها بداو كيبانو فيهم عروق زرقين منفوخين...عرفهم عصام ديال الاعصاب...
غمض عينو و عنقها بشوي كيطبطب على ضهرها ...
عصام؛شش صافي تهدني لي بغيتي هو لي ايكون....
بدلاتو العناق مزيرة عليه و كتبكي بصوت مرتافع وهو مزير عليها في احضانو عرفها تقصحات بزااف هو بنفسو عقلو داخ و تكوانسة من قالت ليه ميار حاملة بولدك....
هاجر بصوت باكي: قولي غير كتكدب اعصام عاااافك قولي هادشي مكاينش......
عصام باسها في راسها : وخا يكون بصح ما غادي يتبدل والو....
هاجر بي الاعصاب دفعااتو كتغوت: لااا ايتبدل اعصاااام ايتبدل هي حاااملة بولدك..بولداااااااك...قربات ليه حطات يديها على حناكو و فمها كيترعد...قلتي ليا مكنتييش كتقييسها و مبقيتيش كتبغيها علاااش دبا كتكدب عليا علاااش ....
عصام شدها قربها منو كيحاول يهدأها و هي كيف تسونامي: هاجر هي كانت مراتي كانو بيناتنا المشاكل و هادشي مكيعنيش اني كنت حارمها تا من حقها الشرعي و انا ماشي من نوع الى كانو عندي مشاكل في داري انمشي نقلب برا...اااه شحال من مرة تفارقنا لكن من كتجي طلبني وهي مراتي معنديش حق نرفضها ...
هاجر هادشي مقبلوش عقلها و سنها صغير اتفكر فقط في حدود ديالها ماشي بحال عصام لي كبير وعارف شرع اش كيقول ....بينما هي نسات انها كانت مراتو وهو كان حقها كما هو دايا حقها هي...
فقط تفكر ان عصام كان كيبوس و يلمس مرأة اخرى كما كيلمسها هي ..فقط تفكيرها لي مشا في هاد ناحية تقلب عالمها كلو فهاد اللحضة....
خلاتو واقف في بلاصتو و دخلات لحمام سدات عليها و هو كيدق عليها و يحل لباب لي سورتاتو...
عصام دور يدو على راسو مزير و معصب حط راسو على لباب: هاجر حلي نهضر معاك و نتفاهمو......
هاحر بدون رد...
عصام: لي بغيتيه هو لي ايكون ا هاجر متقصحيش راسك هي كانت ااه و دابا لااا و عمرها غادي ترجع..قلت لك قبل ما ندخلو نتي ديالي و انا ديالك حاجة خرا مكيناش..لمبغيتيش تشوفيني انخرج دابا نخليك تا تبردي و نرجع نهضرو....
تسنا شوي محلاتش ليه لباب و هو يسوط بجهد و درب دورة خرج من الجناح ديالو كامل خلاها تبرد على خاطرها بلا ميزيد لما على زيت وهي شاعلة دابا مغديش تفاهم معاه....
كتشوف راسها في بمراية عنيها حمرين محملاااش راسها في هاد اللحضة و دموع لي كتهبط زادو جعروها...محملاتش طيح فهااد الوضع ...و فهاد اللحضة تمنات عصام يكون بحال رجال لخرين يكدب و يقول ماكنتش كنقرب ليها باش على الاقل يبردها من هاد الجرح لي تغرس في قلبها...
لكن للأسف عصام ماشي من هاد نوع هو معندوش مع زواق الهضرة و كيجيك نيشن بلا تعواج و لا زيادة كيقول المفيد و كيحبس.....
من سولاتو عطاها الحقيقة كما هي ان ميار كانت مراتو وكما شرع عطا راجل حقوق ديالو تا المرأة عندها حقوق ديالها و من تكون باغيا زوج ديالها في لفراش وخا يكونو مخاصمين فلازم يلبي ليها رغبة ديالها تجاهو....
وهادشي لي كان كيديرو عصام مع ميار مكانش كيصدها من كطلبو في لفراش و خا قلبو برد من جيهتها لكن عمرو خانها او حتا فكر فيها طول فترة زواجهم و خا ديما المشاكل عمرو هجرها في لفراش..
عارف بينو و بين الله و كان كيصبر نفسو انها يتيمة معندها حد من غيرو وان ربي غادي يهديها ما زيرش عليها بزااف بحكم عاشت حياتها كلها في لخاريج وجابها معاه لمغرب تكمل معاه حياتو في بلد جديد و تقافة غريبة عليها ...هدا لي خلاه متساهل معاها بزااف لكن مع سنوات عرف انها عمرها تبدل و خا يدير لي دار معاها اتبقى ميار هي ميار....
ونهار تصورات بي البكيني و بغات تشهر كعارة ازياء و جميع صورها تنشرو في مجلة نيويورك ..كان هداك هو لي فيض كاس صبرو تجاها و في ديك اللحضة عطاها طلاقها وكل لي طلبات منو و بعد منها كانها عمرها كانت في حياتو...
و لي كثرة صبر لي صبر طول ست سنوات في زواج فاشل ربي جزاه في نفس نهار بي رسالة من هاجر لي مكانش عارف انها هي....شاف تصاورها لي كانو في لفيسبوك وتارت انتباهو ملامحها البريئة كان جمالها بلدي عربي ...
صورتها ترسخات في راسو و بينات عنيه بقات وخا بلوكاها لكن دخلة لي دخلات بيها عندو خلاتها ليه متورخة عمرو ينساها ...لدرجة انه فور ما شافها من كان في طونوبيل عرفها هي ومن داك نهار وهي ديما في راسو بغاها من اول نضرة سكنات قلبو و تمناها ديالو ونهار شافها هي لبنت لي ختارت ليه مو عرفها ليه و مكتوبة ليه و ما كاين لي يديها من غيرو ....
خرجات من دوش كتقطر بي العرق و صدرها كيطلع و يهبط خلات لحمام كلو مشتت مكاينش شي حاجة لي ملحتهاش و هرساتها....بردات جنونها و غضبها عاد خرجات محطمة و لحريق كينهب جسدها من لتحت فيبلاصت جرحة و سخانة لعبات بيها....
جرات رجليها بشوي من جناح ديالو و مشات نيشن لبيت لي كانت فيه تلاحت فوق ناموسية و وجها صفر حالتها حالة وكتحس بشي حاجة سخونة هابطة منها من لتحت....وهي بلا حولة ولا قوة لها..غيبات في لبلاصة و ضاية ديال دم تحت منها...
في لمكتب واقف مخنزر و نضرة ديالو مكترحمش كيشوف فيها ببرود ..بينما هي كل جزء في جسدها ترعد خوفا من شكلو لي خلعها مقدراتش تا تقرب ليه....
عصام بغضب: شجووون بات الولد....
ميار صدمها ولات كتمتم: كككيفاش ششكون باه ....
عصام شاد راسو بزز مابغيش يحط يدو عليها لانه لا مشا تا هز يدو ايسيفطها لقبر ديريكت...
عصام: شهرين قبل ما نطلقو ما قربتش ليك فيه كاع ادا هادا لي قلتي ولدي منين جا....
ميار ضربها ضو فهاد اللحضة : واش نسيتي من مشيت عندك لجنوب افريقيا و جلست معاك داك نهار اسبوع قبل ما نطلقو....
كمش حجبانو لوسط ... رجع ليه عقلو لداك نهار لي جات عندو و رغباتو ينعس معاها...هز راسو لفوق كيصوط بجهد.....
عصام: علاش مجيتيش عندي قبل علاش تال دابا....
قربات ليه كترعد خافت منو جاها مبدل بزااف على عصام لي كتعرف و هو لي عمرو تعصب منها ولا شاف فيها بحال هاد نضرة وخا كانت كدير لمشاكل كان كيحلهم بهدوء و كيهضر معاها بشوي كان مفششها بزاف و عمرو هز صوتو عليها ولا حط يدو عليها ...
ميار كتبكي و كترعد في بلاصتها : سمح ليا ا عصااام عافك و عطيني فورصة داكشي درتو بلا خاطري نتا عارف وخا ندير لي درت نغديش نمشي نصور راس عريانة في لمجلات نتا عارفني مزيان انا ماشي ديال هادشي...انا كنت كنتوحم و وحمي جا عليك كرهتك و مبقيتش حملاك وليت باغيا غير نجبدك باش تفارق معايا..وخا تفارقنا متصوقتش و فرحت من عرفت راسي حاملة قلت عمرو يحلم بيه لكن فور نما مشا مني لوحم عرفت راسي غلطت غلطة كبيير ا عصااااام حاولت منجيش عندك من عرفتك تزوحتي و كملتي حياتك لكن مقدرتش مقدرتش نبقا مخبيا عليك حملي بولدك خلينا نرجعو ا عصام كيف كنا عافك سمح ليا...
عصام كيشوف فيها بهدوء دموعها لي كانو كيأترو فيه ليوم مهزوش منو شعرة وحدة هي لأخيرة لدرجة انه كيشوفها وحدة غرييبة عليه بحالي عمرهم جمعاتهم علاقة ...عقلو دابا كيفكر غير في هاجر لي خلا وراه...
بغات تقرب ليه تعننقو وهو يهز يدو مخنزر....
عصام: لي كان بيناتنا عمرو يرجع اميار و بلاصتك مبقاتش معايا و ولدي مغديش نكرو غادي يحمل اسمي و يتربا بينات يدي وشي حاجة خرا مغديش تكون....
ميار وجها ولا صفر شدات ليه في يدو كطلب: لا عفاك ا عصام ندمت و الله تا ندمت على كلشي لي درت متحرمنييش منك كثر نتا عارف انا يتيمة ما عندي تا حد من غيرك....
عصام حيد يدو من يدها كيشوف فيها بهدوء هز صبعو لي فيه خاتم زواجو: انا مزوج عندي مراتي و من غيرها عمر تكون شي وحدة خرا ...شاف فيها مزياان...ميار انا عمري نجيب وحدة خرا على مراتي وخا تكوني حاملة بولدي عمري غادي نرجعك....
كلامو ضربها بحال ضو ولات كتهضر بلا متعيق عمرها ضنات ان عصام يقدر يبدلها بهاد سهولة مستحيل تيق داك راجل لي كان كيبغيها و صبر لكلشي على ودها يبدلها بهاد سرعة....
ميار: لا لااااا ا عصااام نتا كتبغيييني انااااا ..مستحيييل تقدر تنساااني في ثلت شهوور و تزوج بوحدة خرا من غييري .....لااا نتا درتي هاادشيي باش تحرق قلبي و تخليني نغيير عليك باش نرجع لييك ...نتا كتبغييييني انااا ا عصاااام انااااا.. هدييك لهمجية ماشي من مستواك موسخة و كلبة مكتسو......
مزال ما كملات كلامها جاتها طرشة لحنك جمع ليها حنك و ودن و عنق طاحت على وقفتها بحالي ضربها رموك حاطة يدها على حنكها كتشوف فيه مصدومة عمرو حط يدو عليها تا نهار لي شافها نصف عريانة محطش يدو عليها ....
مزال ما ستوعبت دقة جاتها دقة تانية في لحنك لخر تا طوش دم من نيفها وصفير في ودنيها...
هبط عندها و ملامحو سوداء كيخلع غرس يد في شعرها تا طرطق بينات يدو ....
عصام: هديك لالاااك ما توصلي تال ترااب رجليها و عمرك توقفي في نفس مقااامها ...حط يدو على قلبو....ولا فنفس القيمة لي عندها في القلب ...زاد ورك عليك تا ولات كتفيبري بالخلعة...هديك ملكات و نتي خسرتي...تعاودي تخرجي داك لكلام انقتلك بيدي و منعقلش عليك...دفعها بجهد و غوت بصوت بحال رعد قفزها من بلاصتها...تفاااهمنااااااا....
إنها زوجتي الجزء السابع
محتوى القصة
التنقل بين الأجزاء