الكاغيط الجزء السابع

من تأليف Sousou Idrissi
2019

محتوى القصة

رواية الكاغيط

...يازراع الخير حبة و يازراع الخير ياسْرْ

مول الخير يْنْجى و مول الشر خااسر..

...حليمة الفكانسية !! حليمة لي كانت جلابتها على ظهرها و يقولو الناس عليها مراءة براجل !! حليمة لي كان الناس دوار يتبهاو بيها..و دايرين بحسابها ..حليمة زرعاات الشر وحصدات الذل ..حليمة نسات لي خلقها و عطاها و تقلات بذنب الولية و ضناية و خيرات ولدها بسن السخط و الضناية ...حليمة كانت مغشوشة نهار تحكات بان عيبهاا ..

🔙 قبل الجنازة بالساعات ...

..فإحدى العمارات بالمدينة داخل برطمة مفرشة بفراش زوفري قاضي حاجة ..من داخل البيت نعاس حليمة لابسة سوميج دونوي كحل و طالقة شعر ..شرفات و هرفات و باعت شرفها ووشرف ولدها بناتها على ود اللعاقة ..ماهيا مخصوصة ولا محتاجة..لاكن النملة فاش تتبغي تتعذب تعيطيها ربي جنااح ..

...: واا حليمة يااا حليمة (لابس شورط و جسدو الكبير بكرش قدامو و فتح كينة لونها ازرق شربها و تبعها بالما) عاااكوولي لياا اش درتي ليا لي تابعك تتاهناا

حليمة: اويلي خوويي تا عا لقيتي طيارة رخيصة ..تزيدش فيه ..

: تستاهلي احلووومة ديالي ..

حليمة: حلومة خاصها تزلج الدار ..و الفاهم يفهم 

: مايكون عاخطرك ...

..شيطان مزين ليهم ملذات الدنياا ..و نغمسو فالمعاشرة ..قمة القرف ماحترمو سنهم ولا اولادهم ...الشخص لي معاها زوج جارتها فرنسا و بنسابو و حفايذو لاكن العين زايغة جابت ليهم تمام..

..فغفلة ..راجل طاح تيخرخر ..و حليمة ماعرفات باش تبلات ..تتحاول تنوضو هو كشاكش خارجين من فموو و عينيه تقلبوو ..ناضت تتغوت و تضرب فجنابهاا لمسات داك سوميج و رمات عليها جلابة و لبساتو شورط و نزلات تطير تحت مرفعة مالقات غير. مرات كونسيج تتجفف دروج

حليمة: عتقيني ..راجلي سخف ..جي هزيه معايا

: اهياا ناري ....

..دخلو تيتجارو ..حليمة غادة تهزو باش يهبطوه تشوف طاكسي تهزو ..قربات ليه مراة يلاه جات تحط يديها عليا و هيا تطلق حلووقهاا

: وامااات مااات وومااات

حليمة وجها تخطف وركاابي فشلوو ..مرات كونسيج هبطات تترعرع جاكونسيج و تجمعو جيران ..السيد توفى ....ناض احد جيران تصل بالبوليس من شدة منكر ..

..بسرعة الحلم ...دخلو بوليس معاهم الاسعاف هزوه المرحوم و مينطو حليمة لي تتحس بقلبها يوقف و شمعو الدار و اتجهو الكوميسارية ...خير لي دارت فيها مرت كونسيج تصلت بختهاا

....واحد مات منو خالقو و حليمة خبارها دااعت تا فين بغاات ..لي كمل عليها فاش ساقت خبار موت ملاك كانت ضربة قااضية ..

***بعد تلاة ااياام

..تقدمات حليمة وكيل ملك ...تشريح بين ان المرحوم توفي بسبب جرعة فياكرا و تذفن بكفن الغريب العائلتو رفضات تخضر للجنازة و ذفن بسبب موتو ..حليمة تهمة بالفساد و تحكمات بالتمانية اشهر ...بناتها تصدمو كتر منهااا و رفضو ينزلو مغرب لتجنب شوهة ..و خواتاتها استسلمو من طلوع الهبووط...اماا رضى فص ملح و ذاااب ...

...راجعين للدار من القبور ترحمو على الملاك .....نورا لي وكلات امرها لله و اكتفت بالدعااء و الرحمة على بنتها..كؤوس الحياة المرة..كاس الفراق و الموت و الظلم و الغذاب هم اشذ مرارة للنفس الانسان..دخلو الدار لي ماتتزيد تعمر الناس جايبين ليهم الفطور قاعدتهم فالدوار نهار تلتياام ...

..خبار حليمة وصلاتهم ..نورا نارها بردات شوية ..مافتحات فمها بحتى كلمة بعكس حمدات الله لي بين الحق من الباطل..العزاية ماعندهم حتى موضوع من غير حليمة ..

****:..الله يعطينا حسن خاتمة !! مشات ميمتها الحبيبيس و تخرج تبيع بطاطا يموتو لها وراق ..

***:ممم بغات طير عاا هيا لي فخاريج..ذرية صغيرة ماتت من فقصة مها فكرشها 

****:وووفين ولدها ؟ يجي يرجع مراتو ..

..قيل و القال ..الشفاية و النميمة ! واقعنا المر...وصل المساء و حميدو جاب الطلبة و تقامت صدقة للملاك الله يرحمها و عشاو الناس و نورا و هجر بحال توام ملاصقين وحدة محشية وحدة ..اما حليمة واقفة بقدرة الله ....

🌄🌄🌄

حميدو : الله يرحمها ماشي بت الدنيا....

جمعة: وااهااجااار هااجااار ..

سيمو: (تيفطر ) راها تتبوع فطواليط ..

حميدو: تا شتك جالس اااه !! ماخدامش !!

سيمو: كنت كونجي !! مابقيتش نضرب ضربة فديك لا كريي ..تبيع ميكا عشرة دريال ولا ديك تمارة بلا فلوس

حميدو: (شاف جمعة) دبا هداا آش خااصو ؟؟ عا كولي لياا !!

..سيمو ناض لا ينوضها معاه و دخل عند نورا لي متكية و معنقة ملاية بنتها ... : ختي نوضي تفطري !!

نورا: ماشفتيش تلفوني ؟

سيمو: راه عند طامو ..وانوضي ختي !!

..ناضت جالسة تتحس براسهاا تيزدح ..جوع و سخفة و طونسيون كمل عليها تفش تتطلعها بتنخسيسة ..خرجات جلساات معاهم فالبيت على طبلة فطور ......خوات ليها جمعة كاس لحليب و تتكابر شراباتو ..تادخلات هجر..

حميدو: شيفرونة ..اليوم عووكبي دار راجلك لاتزيديش فيه !!

هجر: تقلت عليك !

حميدو : شووو جوااب كدااير ..انا لي دويت معاه يلصق ..

جمعة: نووض يحموالديك قضي حاجة راسك ونت داير كي بوليس شاريع .

...الله نعم علينا بنعمة نسيان رئفا بقلوبنا ..المسلم هو لي يآمن بالقدر وقل لن يصيبنا الا مااكتبه الله لنا...

..بعد مورو ايام ...الحياة تستمر ..من غير نورا لي ابنتها عايشة فقلبها وروحهاا ....موضوع حليمة ديمودا و جات مواضيع اخرى و السؤال محير نورا و الشعب اين هو رضى ؟؟ 

..رضا من بعد تلتيام وصلو خبار حكم حليمة على حسب الناس شافوه آخر مرة خارج من روضة من تما اترو تمسح..ماشي غريب عليه طول عمرو ضعيف شخصية و اناني ..يمكن مالقاش وجه يواجه حتى حليمة يمكن كره حياتو و مالقا حق يطلب سماحة من نورا ولو غير يودعها لان قبل كل شيء شااركو الدم ..نفضات هاد افكاار من مخها وفتحات بلاكار جبدات باسبورها و باسبور ملاك شافتهم و قبلات صورة بنتها و تآكدات من فلوس راها مزالة ..

..شعلات تلفون من بعد ماشارجاتو ..مع شعلة نهالة عليها ميساجات مكالمات فائتة من واتساب ولاكارط..تاقرب يتبلووكا ..ناضت سدات الباب و دوزت خط نيشان كوسطا..

نورا: الو

كوسطا: الو نوراا !!

نورا: اممم

كوسطا: آااش تتساليني ابنت حميدو ؟ خرجتي على ديلمي سوطيتي ليا مخ ديالي..بقا ليا نجي عندك غير الدار ..

نورا: (تبكي و تشهق بالم) ماتت ليا ابنتي !! 

كوسطا: (شاد بين عينيها حاس بالامها لانه ضعيف فمواساة و كلام طيب ) بركة فراسك ..حضرت ذفن ...بغاها الله انورا ..

نورا: هيييء اااه ...الله يرحمها هدا مانكول..

كوسطا: نورا !! انا غادي نمشي اسبانيا كاوري طلبني نجي اسرع وقت ...شدتيني غير نتي!!

نورا: كفااش !! تمشي 

كوسطا: راه معاود ليك كلشي !! ماخبعت ليك والو ..تبغي نصيفط الواليدة تجي نخطبك ؟؟

نورا: صمت 

كوسطا: نوررا !! ماتجهليش اصلمي !! نطقي نسمعك !!

نورا: انت مقرر !!

كوسطا: نضيع كونطرا !! 

نورا: تلفات شدات ارض جالسة ...موت بنتها تلفها و نسات مخططها ...سير الله يعااونك

كوسطا : ماشي هضرتك هادي اخر مرة !! كلتي ليا عطيني وقت تبيني ليا !! كنتي تتكذبي غليا نوراا !؟

نورا: الله يعاونك ...

كوسطا: هاناا مبررد انورا و حاط اعصابي فريكوو معاك..عندي من هنا يومين نطلع طنجة رصي خويا فالخدمة و من تما نقطع..فكررري فكررررري نورا ماضيعيناش انوراا ! مانستاهلش منك الله يعاون ..


...دوزات نهار كلو فبيتها بحال المبلجة ...موت بنتها هو الوحيد لي هرسهاا و بالنسبة ليها الحياة توقفات ...صورة وحدة تتجيها بالها هي قبر ملاك..الحي أبقى من الميت..تعذبات و استحملت على ود بنتها و طلعات رضى اكبر قالب على ود كوسطا ..لاكن سبحانه قدر ماشاس فعل ....

فعمرها 19 العام يلاه كالت باسم الله شحطااتها الدنياا...واش تعاود تلقى بحال كوسطا ؟؟ لاكن هو طلب الخطبة و زواج !! نفس سيناريو تتيتعاود ..تموت ماتعاودوش ، تزوجات عزبة بالعذريتها ماطلعاتش ليها جرية !! بقر غير تزوج هيا هجالة و ميتة ليها بنت..تقدر تكون تتبغي كوسطا و تتيق فيه لاكن ماتيقش فالزمان و الظروف و فالعكوزات مرة اخرى..الا كانت مو خاطبة ليه للي تديه خاريج طمعا بالوراق تقبل بنوراا ..

..على برا تتسمع غوات حميدو و سيموو ..زفرات تتستغفر ....بغات غير معامن تشاور و ينصحها مالقات ..البو عمروو يتبدل ..كانت عزبة و مزوجة و فيه نكير بقا غير هجالة يصبر لها..اللهم تغبر كمارتها البكا فيه فيه و اللهم تبكي فين اتراتاح ...و جمعة غشيمة و شيفرونة تعرف تدي غير الخبار ..فكرات فسيمو هو لي بقى ليهاا...

🌄🌄🌄

..فاقت صبااح بكري اليوم الجمعة مشات ترحمات على بنتها و خرجات الصدقة للمحتاجين لي فالروضة ...رجعات الدار تتفيق سيمو شاف فيها مخنزر فاتح عين و ساد عين 

: مالنا صباح الله 

نورا: نوض غسل كمارتك ..بغيتك

سيمو: رجع غمض ..شوية و نوض..

..مشات بيتها بدلات حوايجها ..هزات صاك اضو ديالها دارت فيه شي حويجات خفاف و باسبورها و هزات مليون و نص و خلات 5000 درهم مع نسخة طلاقها ..بقات تتدور فداك بيت تتبكي ووتعاود و صوت بنتها تايجيها البال تتصبر راسها بالدعاء تاوقف عليها سيمو.

: فين سايرة ؟؟

نورا: جمع حوايجك نمشيو طنجة ...

سيمو: ولاااش !! كلتيها باك و مك

نورا: عاابشوية ازمر..تعاوني مرحبا !! تعاونيش زم علياا

..شاف تاعياا و جمع حوايجو قلال و بدل حوايجو ....طلات على مها لقاتها ناعسة حدا طامو فالصالون هبطات باست ليهم رجليهم و تتنخصص خرجوو..

نورا: ماكرهتش نشوف هجر ..

سيمو: حنا هاربين تتكولي ليا هجرر..شيفرونة عا بووق ..

نورا: سكتات..غادة طريق كلها تتودع حومتهاا ...شدو طاكسي ...حطهم فالسونطر مشاو تران قطعو تكيات و ركبوو منطلقين طنجة !!


...طريق كلهاا وهيا كوسطا مساجات ،بمجرد خباراتو انها غادة طنجة..هز صاكو لي كان مجموع و سلم على امو و بااه و جر خوه و خلص صاحبو مازوط و شدو طريق...حاس بيها متألمة و تالفة و ماعليه غير بالصبر..حب ديالها ستعمرو مالقى عليها لاين !! كاين حسن منها !! حرين راسهم لا تابع ولا متبوع ..لاكن القلب مايريد ...

..وقف تران ..و بداو المسافرين ينزلوو ..ناض سيمو هاز صاكو نورا مورا ..تانزلو و ضرب فيهم الريح مصحوب بريحة البحر ..

سيمو: (شاف تلفون ) الجووج اخويتي !!

نورا: يلاه نمشيو شي بلاصة نواكلو !

سيمو: توواكلي !! انا عارف فين نديك ؟؟ طلقي مشية تا نشوفو شي سنااك ..

..طلقو خطوة و سيمو اول مرة يشوف طنجة الشوارع كبار و المباني شاهقة علوو تيشوف هنا و لهيه..نورا شادة فذراعو ماهمها لا طنجة لا سبنيول ..همها كفاش توصل خوها مساج ...

...دخلو سناك عادي لي يفهموه و يفهمم ..و تلفون سيمو تيصوني من حميدو و هجر و نورا كدالك ..

نورا: كلهم راه حنا فالمدينة !

سيمو: راه كلتها ليه فالكار ..واش ماعارفاش باك ! ...كولي كولي 

..سدات جوعها اما شهية الله يجيب...ناضت خلصات و خرجات برا تكلم مع كوسطا ..

كوسطا: الله يحرق جدك جددماااين ماين مك..اش كاليك عقلك؟! 

نورا: وراه غير سبقتك و صاافي!!

كوسطا: انا فدخلة طنجة !! فين راكي !! تفرعين جاية بووحدك !

نورا: مع سيموو!! 

كوسطا: انا ماافعمتش اش تتخوري!؟ لاش جبتي سيمو ؟

نورا: بغيتي يسخطوو عليا ؟!

كوسطا: صبري عليا نوصل عنددك..

ااقطع ..بقاات واقفة تتتفكر تا سمعات صوت سيمو

سيمو: طنجية زينة ؟؟

نورا: سيمو خويا..سمع اش نكول ليك ؟!

سيمو؛ تنسمعك...

نورا: كي شتي اخويي ! ابنتي ماتت و ربي داها دوزت عذاب وذل ..وتا رضى نهار طبعت فيزتي انا ة ملاك الله يرحمها ! نفس نهار طلقنا و عطاني جوج مليون باش تنازلت بيه عليه ستة .

سيمو: وعلاش عليك !! طلاق

نورا: راه خويا شماتة و مايسواش فاسد !! حرمتو علياا..شفتي عاقبتهم كي خرجات !! كما العادة زاد خلفة 

سيمو: هادشي فهمناه و طنجة لاش ؟؟

نورا: دبا واحد السيد خدام مع كاوري فاسبانيا نمشي معاه نقذ راسي و نخدم و نستافد من فيزا !!

سيمو: اااهاد سيد منين عرفتيه ؟ فوقااش تافقتي معاااه؟ 

نورا: ختو تتعرف نزهة غير صدفة ..

سيمو: (طانسيو تيشنن ) واااانوووضي تقاوودي !! يلله خويا !! زيد اسيمو !! نووض اسيمو !! سيدة دايرا برامج رمضانية !! (قرب وجها تيغوت ) زاااامل اناا !! جايب ختي صاحبها ؟؟


....كما عادتها منين تتفيق صباح و هي فالشقا ..طيب و تجفف و طالعة نازلة من فاق تحت....يلاه تتحط الغدا و تم لعربي داخل ..من دخلة شافها مغوبشة يلاه ردات سلام و رجعات كوزينة ..

حفيظة: وليدي !! على سلامة..عيتي

لعربي: (قبل راسها ويديها) الله يسلمك الواليدة ..عيت واليدة رموك هدني مع صهد...

حفيظة: الله يسهل عليك ..

لعربي: امين الواليدة !! احم واش تناقشتو مع هجر نتي ولا مريم !!

خفيظة: الااا !! وليدي مرتك الفم ساكت و ذراع الحامي !! ختك تتحفظ و هيا مقابلة شغلها..

لعربي : (تيحك وذنيه) اوا الساعة الله ...

..حطات ليهم الغذا متول..طاجين لذيذ تربية جمعة و شلايض مستفين ..كما عادتها عينيها ماتتهزهمش ..ماكلة بتقالة و ساكتة...غير هما تيهضرو ...ناضت مريم هزات طبلة و هجر طلعات بيتها حتى الحق عليها ..

لعربي: مال هجر ديالي !!

هجر: نورا و سيمو مشاو مدينة مزال مارجعو ! داونيش معاهم ماكالوش ليا كاع ..

لعربي: نتي فوق ما نسولوك !! ختي و خويا و مي و اباا 

هجر: عا ئلتي يااه

لعربي: سمحينا ..حنا جيرانك ..

هجر: ديني دبا ..

لعربي: حيد تيشورط بقا مبودر ...اجي نتحاسبو و نديك ..

لعربي: (قربات عندو تا جلسها فحجرو ) شحال تنسالك ؟،

هجر: عمممرك سلفتني !!

لعربي: (جبد ليها شنايفها) تنسالك حقققي شرعي..تووحشتك هجر واش ضروري خاصني نفكرك ؟؟ 

هجر.: صمت (اخر همها فراش) 

لعربي: وقيلا نديك عندك مك !! ونسيها ديمااا

هجر: لا ديما الا و الله تا يجري عليا حميدو 

لعربي: تخافي من حميدو وراجلك الا!! 

هجر: صافي سمحلي !

لعربي ..ماعطلهاش من وحشها جرها عندو تيقبل فشفتيهاا و تيحيد ليهاا حوايجها..مدة هيا بعيدة عليه مع كترة مشاكل و جنازة ملاك ..ولا تيشوفها كي مخطوبين ديما راغباه تبات فدارهم من معزتها تيخليهاا..مايبغيها تقلق ولا تحزن ..لاكن فنفس الوقت صارم معاها ..ولو عارفها نقرة طيبة لاكن تيقول متل سد تلقى ماتحل ...

هجر: تتنهج...براكا عفااك اننن

لعربي: نشم ليك ريحة ؟؟

هجر: الاء ندوش !!

لعربي: من ناموسية ماتحركي تنشوفك تترعدي بين يدي .....اهجوورة

هجر: جرات ليزار و تترد فنفس..مزال ما تتقبل العلاقة جنسية ولا تتحس بديك حلاوة و لعربي حاس بيها و داير جهدو معاها يقربها منو ..


...ايتها ناس دايزة غير تتشوف فسيمو هو تيحيح و نورا شادة على حنكهاا و تتويل فخاطرهاا

سيمو: اااه حكاا !! سيموو تنعرف واحد ولد !! وناااااا لااااش جاااايباااني معاك ؟؟ شاهد ؟؟

نورا: واانقص من غوات !! جبتك شاهد ااه ! غادي نقطع البحر و نمشي نخدم على راسي و مسيري رجع عندكم !! عند جمعة و حميدو هجر و طامو و بنتي لي ذفنتها تحت التراب ...تااا عارف حميدو الا عرفني مشيت وحدي يشرك ورقتي من حالة مدنية !! كنت عزبة و مالقيت سلاك رجعت بتي و يوميا يشكي و يبكي هاا ليكوش هاا لحليب ..يصبر عليا ونا هجالة ؟! خليني خويي نمشي نخدم على رااسي 

سيمو؛ عاارف عاارف حميدو مايسواش بصلة و يضرب حجرة و يصحابو ريالة...لاكن تيا تشدي طيارتك و نا مسيري رجع ..

نورا: عليها جبتك انت جلس هنا !! الولد تاهو غادي كونطرا سبانيا يخدم لاكن بلاصتو هنا يحط فيها خوه !! تانت يضبر ليك خدم على راسك ..

سيمو: باش نجلس !! نمد يدي البشار فباب جامع؟!-اللهما لاكريي ولا عسل براني !!

نورا: ماااعدك فين ترجع اخوياا..جلس طنجة كبيرة تلقا تلقا!! انا نصْيْرْ عْلْكْ

سيمو: شوفي ماتهربيش ليا من واد الواد !! انا هضرني باينة هاد سيد اش بينك و بينو !! تيا ختي و دوزتي فريضة و دوزتي عذاب مابقيتش تتحكم فيك !! للكن ختي الحرام تيرجع على مولاه بالخايب ...

نورا: لاتوصينيش خوياا ...هاد سيد كن بغيت كن جبتو الدار يخطب ! لاكن لي هربت منو نطيح فيه..نعكب الخاريج نخدم و ندبر علاش رجع و الراجل ملحوق 

سيمو: عيطي ليه يجي هْنْ نذاكرو ..انا من جهتي عاا خوي البلاد لاكن من اول عيطيني راس خيط ماشي تجريني كي نعجة !!

نورا: ناا برااسي تالفة ليا حلوفة و ماعرفت ماندير !!..مهم انا نتصل بيه ..

سيمو : صافي..

...لاولا الظروف لاما سمح ليها!! خوتاتو عندو من شرفو !! لاكن للضرورة احكام الا هو لي راجل و خدام مع باه بعرق كتافو و فاللاميرد معاه ..ايصبر على نورا !!؟ اخرتها ينوض يزوجها تاني و يطبق مقلولتو شهرية #دارت_كاغطها_تعكوب_خيمتهاا..

..وقفات السيارة صاحب كوسطا و فتح الباب نزل قاصدهم ...لمح وجه نورا صفر و سيمو مخنزر عرف شي نقاش وقع ..لقى سلام على نورا بالفم و سيمو باليد 

كوسطا: (ماعرف مايسبق ولا ينطق ) ققرتي تمشي؟!

نورا: صمت 

سيمو: اا سمية ؟؟

كوسطا: كريم اخويا

سيمو: ينورك!! خوادرية عاودات ليا علك باغي تعاونها !؟

كوسطا: (حقق فنورا و سرط هضرة) مرحبا خويا ...انا غادي غادي ..لقا فاش نعاون مرحبا بلاد غربة و هيا معارفة والو ..

سيمو: من جهتي باغي نشدها من يدها رجعها دار باها ..لاكن يلعن بو الوقت..انت اسمية و ضميرك !!

كوسطا: ماغادي نحلف ليك ولا نضمن ليك !! راها داخلة بفيزتها باغة تخدم نضبر لها و ربي شاهد على نيتي !!

نورا: واش قطعتي !؟

كوسطا: لا اركب من طنجة طرونسبور موجود ..اري نشوف باسبورك !!

..مدااات ليه باسبور شاف فيزا !

كوسطا: ممنوع دخل طيارة و هيا باغة دخل تستقر فاسبانيا ...فيزا عندك حق فرنسا !!

سيمو: هيا اش !

كوسطا: دخل باطو غير تقطع ديوانة تجلس فاسبانيا ماشي مشكل ..

نورا: صافي ندخل ..

كوسطا: نتحركو نشوفو كار !؟،

نورا: كولي عفاك !! خوك جبتيه يخدم؟!

كوسطا: ضروري تا الا لقينا منين نقذوه يكون قريب

نورا: تا سيمو ماكرهتش ليه يخدم ..ماعندو مايدير يرجع فالدوار 

كوسطا: موجودة خدمة اخوياا ..

سيمو: فالريسطو نيت !؟

كوسطا: نتحركو و نذاكرو وقت تيمشي ..


....وصلو لاجونس الاسفار و دخل كوسطا موراه نورا و سيمو ...لقاو كار خارج مع اربعة صبااح ...سبقات نورا خلصات على راسها و كوسطا مصبر راسو مابقى قد مافات و سيمو ولاو فيه جوج نصوصة واحد تيكوليه جرها و ردهاا و احد نص تيكوليه خليها تهرب من فقر و القهرة ..خلصو و شداو التكيت و تحركو من تما اتجاه الريسطو مقر عمل كوسطا..

...طنجة كبيرة و عالية سيمو جالس حدا نورا رادها من جهة سرجم هو الوسط و خو كوسطا حداهو...وصلو و نزلو تيعاينو المطعم كان كبير و مختص بالبيتزا و سندويشات ..نزل كوسطا دخل عند مول شي سلم عليه و بقى مدة تيكلم معاه ..تاشير لسيمو و خوه تبعوه نورا بقات فطموبيل و عقلهاا سرح عند جمعة و هجر .....

****
حميدو: لااااتكوووليش لياااا ! (كشاكشو خارجين معصب) اااه دارونا الكلاب انااا والد تريكة ناقصة !! 

جمعة: (مربعة يديها تتبكي) ديااااالاش هاد فلووس ديالاشش (تيقربها تاوجها ) هااد كااغط لي ديالااش ؟!!

جمعة: ونااا عاارفة !! قاارية !

حميدو: انااااا لي مشا لايرجعش عدددي !! ميات الاف او كاغط !! يكون ديال زواج ؟؟

جمعة: شتي و الله وكان تا هربو بجوج لاجلست لك هْنْ

حميدو: لاااش تا يهربوو !! درووك تكعدي جمعي شطايطك !! هادشي الا عددك شي شطايط ..ااه بغيتو تقتلووني !! 

...غادي جاي يديه مور ظهرو بمشيتو بحال تيعبر الطريق و يسب و ينكر ..تا دخلات هجر ..

هجر: السلام !

حميدو: مااساالمشااي !! تيا ماعدك مَحْلْ تبركي فيه ؟ 

هجر: عدددي !! 

جمعة: ازززيدي اهجااار زيدي راه ماشاربش دوااه

حميدو: (بغا يطير عليها) راااني شاارب رههعج معاكم !! نوووضي جيبي ليا الولد و بتي نوووضي ..

جمعة: اااه كوون شاورووني علياا بليمين تانتبعهم ...لي كنت صابرة عليهم طجووو !! سدات مدام 

حميدو: (جبد ورقة مدها هجر) شيفروونة قراي ليا هاادي

شدات هجر الوقة بدات تقرا ...

هجر: هاد طلاق نورا ولد حليمة ..اتفاقي

حميدو: كي دايرا هاد تفاقي ؟؟

هجر: وشكون عررف ..واش جاو مزال ماجاو من مدينة !!؟

جمعة: اويلللي على طلقققت 

حميدو: نوضي تا تياا الله يجيبك على خير شمن مدينة ولا دوار !! راهم هربووو بجوج ..

هجر: 😢😢😢

حميدو: لااا دمعيش علياا ..الواحد هو لي ينتحر ..ولد و ربي و علف ولبس و فالافان يسمحو فك ..(دار عند جمعة) تيي تتيي سبب متافقة معاهم ! انوضي اختي ولدي ليا انا ماجالسش بلا اولاد ..

جمعة: نوض تزوج ولد تا فرقة كرة

هجر: وامااما فين هربو !! 

جمعة: انا عارفة ..تواحد مايجاوب .


نورا: شنو درتوو

سيمو: صافي غدا نبداو خدمة !!

نورا: شنو خدمتك !!

سيمو: نسربي نغسل ماعن نقي خضرة علامن نشد الحرفة 

نورا: فين تسكن ؟؟

كوسطا: (دخل فالحوار) يسكن فداري لكنت كاري مع جوج دراري نيت ..(شاف سيمو) نوصيك اخا سيمو !! خدم المعقول !! 

سيمو: وايلي لاتوصيش !! راه تنهز غير صنادق الخضرة على كتافي !! هادشي كي والو ..

كوسطا: مهم مع الوقت بنادم تيولي يشوف و يعرف ..شي تيزعم شي من ضحك تتولي فمشاكل..انا راه كنت تنخدم ليل ونهار الحاجة لي تجبذ ليا صداع تنميك عليها ...

سيمو: الله يسهل عليك اخوياا..يكون خير..

كوسطا: نزيدك !! يغوتو عليك و تسمع هضرة لاكن باش تعلم حرفة خاصك تصبر!! خوادري لي جايبو راه مايصبرش لاكن درت لي عليا باقي عليه ..

نورا: فين جات هاد دار !!

كوسطا: يبقاو يشدو طوبيس واحد تلت ساعة على ريسطو...مع وقت شري سكوتور هني مخك ..

سيمو: نشوفو الوقت آش جايبة ..

نورا: (شافت ساعة بانت ليها الستة ) وصلا عشية !!

كوسطا: اش ناقصك ؟

نورا: غير حوايج ماهزيت والو ...خويا تاهو ..

كوسطا: دار مفرشة ماعندو مايشري ..

نورا: ولو خاصو ..

كوسطا: عايني نصيفط دراري و نتحركو ...

..رجع عند خوه والود صيفطهم ..و رجع عند نورا و سيمو تحركو المكازات ...نورا بدات براسها خدات باليزة صغيرة و تقدات داكشي خفيف الحوايج و فوطة و بخودي ..و تقضات سيمو مخدة و ملاية و ليزار و داكشي لي يحتاج ....الوقت تتيمشى و العد العكسي بداا ....تجهو للمطعم شراو العشا و تحركو الدار ..

...سيمو: اسير اخاا مايمكنش نطلع ختي و دار عامرة زوافرية ..

كوسطا: احم..راه غير خوادري لي كاين ..دراري عندهم خدمة ليل ..

...سيمو تزير وافق فلاخير مغاديش يجلسو ليل فالزنقة ..دخلو الدار من شوفة باينة عيشة زوافرية كلشي مزلع و ممرون...دخلو جلسو فالجلسة فوطوي و سيمو ختو حداه ...

كوسطا: هانت خا سيمو (شير بيت) هنا تنعس نت خوادري !! باقي كلشي مشروك و فلوس كرا مكلف بيها سانديك تجيكم 500 واحد فيها ضو و ما ..

سيمو: صاافي ..

..دخل كوسطا عند خوه خلاهم على خاطرهم ..

نورا: جبدات فلوس لي بقات ..هانت خويا هز شحال تحتاج ..

سيمو: خلصي ليا غير كرا هاد شهر و طرنسبور ..باقي صرفيه اورو وديه تحتاجي 

نورا: تقدك 80 الف اخويا !؟

سيمو: تي الا بزاااف !! مالي كونجي اري غير اربعين الف ..

نورا: حسبااتها و عطااتها ليه..هانت خويا بعد من بلية و صداع و خدم انا الا لقيت ليك كونطرا نشريها ليك شحال ما كانت !!

سيمو: (تزير تيحك عينيه) اودي سيري نقذي راسك !! وديري علاش ترجعي اختي 

نورا: انشاء الله خويا !! غير نوصل تما كولهم راني قطعت 

سيمو: لاتفكريش بزااف..تتبقى فيا غير جمعة وهجر ..

نورا: امي مانفوتهااش و ختي راها مع داك ولد ناس صدق راجل ..


الوقت الوداع ...نورا معنقة صاك اضو ديالها و كوسطا فلاجونس دفع الباكاج و شد تيكيت ديالهم و راجع عندهم

كوسطا: هذا الوقت ..(سلم على خوه معنقو) دير عقلك اصااحبي و خدم على راسك الا مكتاب ليك لخاريج توصلو نشاء لله تهلا فحنان منين تنزل عندها

خوه : (بادلو عناق بحزن ) الله يوصلك على خير اخوويا و يسهل عليكم ..كون هاني 

كوسطا: (طلق من خوه تجه سيمو) اسميه هه !! تهلا و خدمو على راسكم و بعدو من المشاكل ..

سيمو: الله يحفظك و شكرا على كولشي و تهلا معاك فالخواادرية راها ماتتقفل والو !

كوسطا: كوون هاني و لهلا يحشمنها..

..قرب منها سيمو لي معمرو عنقها ولا سلم عليها تا بالوجه ماعندهمش فتقافتهم ولا محيطهم معزتهم فالشكل ولو طول وقت معيور و دباز لاكن الوقت صح يبان معدنهم ..عنقها تيقبل فراسها و هيا تتبكي

سيمو: حظي راسك ختي !! و ديري علاش تولي ..الله يسهل عليك ختي 

نورا: سمحلي اخوويا بزاااف !! و سلم على ماما وهجر و طامو بزاااف غير نوصل ندير نمرة نعيط لك ..واباا الله يهديه علينا ماكرهشت نجلس حدا ميمتي 

سيمو: سيرر ختي ماكتبها ليك الله فيها خير...

..تفارقو بالدموع هما خرجو من الباب متجهين الدار يشدو طاكسي و اخرين طلعو الكار..

كوسطا: براكا من البكا ! طريق طويلة و يضرك رااسك ..

نورا: (جالسة جهة شرجم ) هيء هيء كرهت هاد دنياا و الله ..

كوسطا: حمد الله طلعتي بفيزا تخوي مغرب !! راه بالفلوس ملقاوهلش ناس !!

نورا: هاد فيزا خسرت فيها ابنتي !! الله ياخد الحق

كوسطا: ابنتك بغاها الله خداها !! دوك قماقم ربي جزاهم !! شوفي حيااتك نتي .

نورا: (تتمسح دموعها ) دااكشي لي كااين نشوف حياتي

كوسطا: ومحيني منها ، كما نكرتيني اليوم قدام خووك 

نورا: لاصافي داكشي لي بقا!! نكول خويا ها صاحب دعوتي 

كوسطا: تديري لي فرااسك و قصوحية راس غير معايا انا ..غير جبدت ليك زواج نضتي طرتي طنجة !!

نورا: (تتشوف كار تحرك ) مغاديش نطيح فالنفس الغلط !!

كوسطا: (قرب لها وجهو فوجها ) انا وااعدت نفسي مانعااودش نجبد لك المااضي ولا داك بنادم لي كان راجلك هادي اول مرة وااخر مرة !! انا عاارف حتى امي بخبيزتها وغادي دير ليا للعصا فالرويدة ولاكن انا راه كوسطا !! 

نورا : وخ تكون انت هو فاندام !! انا لي شفت و عشت !! وحتى انا اول مرة واخر مرة نهضر على زواجي !! السيد لي كنت معاه سبابو امو !! كان ممكن كلشي يتصلح ..اي الراجل تيسبق مو على مرتو نصرطها لاكن على اولادو هنا شدو الرضى الوالدين بالمقلوب .. ياك انا وياك تفرقنا و ها حنا تلاقينا وشكون كال نشدو طريق طويلة ؟! الا تفاهمنا نكملوو !

كوسطا: بسييييف على دنممممك نتفااهموو !! نوصلو ويكون خير دباا تكمشي ..أ اول مرة واخرة مرة !! 

..ماعرفتش علاش تعصب ولا منين تعصب !! بعض احيان خلال العلاقة تلمسو حقائق او المؤشرات تتشير للاستحالة تتمة العلاقة او تتدمر علاقة مع ذالك تنغطيو الشمس بالغربال او تناخدو موقف من الشريك لي واجهنا بالحقيقة بكمية من الغضب و فالاخير تنوصلو نفس تتيجة سواء تقبلنا اولا الا ..


...نص ساعة دخلو الباطو ونورا غير تتشوف بعويناتها بين الحلم و اليقظة ..مامصدقاش صدفة الاقدار فين جراتها....دازو على ديوانة ساعة هما فلانتظار ..تاتطبعو الباسبورات ...طلب منها كوسطا تنزل ضرب دورة فالباطو لاكن رفضات شداتها دوخة و عينيها تقلبو و رفضات تاكل ....

..مرو ساعتين فالعرض البحر تاوصلو الاسبانيا دوزو ديوانة تاني و شدو الطريق ...طلع نهار و شمس تتشرق و نورا نعسات جرها عندو كوسطا متكية عليه و تبعها تاهو فالنعاس معذبين و معنقين بعضيااتهم ....تا حبس الكار تيعلن عن دخولو المحطة ..فيقها تتحل عوينااتها هزو صيكانهم نازلين ...من خرجة كار تتسمع للغة الاسبانية تتشاير ..هزو صيكانهم و دخلو المحطة كليماتيزي ..

نورا: كريم بغيت طواليط !!

كوسطا: وخ ..

هز عينو تيقلب تالقاهم ...حط صيكان تما و داها ..عين معاها و عين مع صيكان تاخرجات و دخل هو ..و هيا حالة فمها فالمحطة فيها قهوة تما ..مكاين زعرات و الباكص و الكارو فاليد ..

كوسطا: زيدي باراكا من تحنزيز..فيك جوع ؟!

نورا: ااه مصارني يزغرتو !! خاصني نعيط سييمو !!

كوسطا: من البارح ما كاليتي عيت نفيق فيك !! نجلسو و نعيط ليه...

..شدو طبلة حداهم صيكانهم ...طلب ليهم الفطور ..دوز رقم خوه خبرهم بلي وصلو و رجع حول اتصال باطرون خبرو انه تيتنظرو فالمحطة ..جابو ليهم الفطور نزلو فيه عيوار ..و نورا عينيها تالفين مع ناس كوسطا مخليها على راحتها ....

..كوسطا: (شاف كاوري ) نوضي هاباطرون جاا 

نورا: نغسل يدي

كوسطا: (تيحط فلوس فوق طبلة) ...مسحي و زيدي قدامي شمن غسيل ..

..جرو صيكانهم و سلمو على كاوري لي هضرتو مغربية مهرسة من صغرو عايش فالمغرب ..ركبو معاه فالطموبيل متجهين للسكنة لي وجد ليه و تيذاكر مع كوسطا..نورا نسات شوفة اوربا نساتها راسها شوراع و و مباني مزخرفة غير طوبيسات تيشعلو ....

كاوري: نوو روطار فالطريق 

كوسطا: نو مزيان !! حمد الله 

كاوري: كِي لا شيكا !! (شكون بنت)

كوسطا: اايه مااا (تيشير لصبع يدو ) ماافيونسي

كاوري: ااا !! طو نوفيا !!؟؟ (خطيبتك )

كوسطا: سي ..

كاوري: اووك 

..كملو طريقهم و نورا مرفوعة ..تاوقفو ..امام الحي السكني وبلاصة لوطو داك كاوري حرام واش يسكت دوودوو ..دخلو العمارة ركبو فالسانسور طاج 25 ..نورا شادة فاليد كوسطا ...

جبد سوارت فتح الباب ..كانت استوديو فالدخلة تتلقى كوزينة مفتوحة وقبالتها بيت نعاس حداه الحمام و سيجور صغير مفرشة فراش عادي...دخلو صيكانهم و كوسطا خلا نورا تما وخرج ساقطة الباب و خرج هو كاوري تيهضرو برااا ..

..نورا حيدات سبرديلتها و تقاشر و تتمنظر دويرة صغيورة مصبوغة بالابيض و الفراش عادي فيها شرجم فالسيجور حلاتو ضربها ريح سرحات عينيها تتشوف البنايات دايرين بيهم عالين ارتاحت نسبيا سدات شرجم ..دخلات بيت نعاس فيه فيه بلاكار فالحيط و ناموسية عادية كوافوز حداها ..مفرشة بلاكويط ...رجعات كوزينة بلا باب مفتوحة فيها تلاجة و بوطة لاصقة فالبوطاجي و ماكينة صابون شي ماعن قلال ...تتهندس و تخطط منين تبدا جاتها ريحة غبرة فنيفها ..تا تفتح الباب و دخل كوسطا تيسوط

نورا: زوينة هاد الدار !!

كوسطا: تا تمانين الف زوينة !! 

نورا: هيا نااري !! ياك تخدم عندو ؟! 

كوسطا: جلس تيحيد سبرديلتو !! واش انورا كاوري عمي ..جابك كونطرا راه تخدم عندو و ضبر راسك مع لكرا وضو و الما !!

نورا: فوقاش تبدا خدمة!؟

كوسطا: من هنا يومامين ...

نورا: خاص نسيق !! دار موسخا مغبرة !!

كوسطا: اناا مسخسخ عيااان !! نعس و يكون خير ..تانتي رتااحي ..

نورا: كاينة عالبيت واحد..

كوسطا: شديه نعسي فيه ..براكا عليا هاد فوطوي فالسيجور ..(وسد مخدة و نعس) 


سيموو: الووو جمعة !!

جمعة: ولييدي وليدي حبيبي توووحشتك !!

حميدو: (تيهضر فوذنها) كولوو فينكم وقتاش تجيو !؟

جمعة: (تلفون فوذنها و تتهرب عليه) اوليدي فين نورا !؟

سيمو: لواليدة نورا وصلات خاريج !! انا رااني خدام فطنجة و كاري مع دراري ..

جمعة: وهيااا ناري على بنيتي حْرْكْتْ !!؟

سيمو: ودخلات بفيزتها كلاك !!؟ ومهم راها وصلات على خير و بخير و تتقلب على خدمة !!

جمعة: يااااوهاادي نورااا !؟ منين تبداه بنيتي !؟؟ 

سيمو: ياااهاد هضرة هيا لي خلاتنا بحال دجاج نخافو ..مهم انا لي وصلتها و قفت معاها و طحنا فشي ناس يعاونوها تما ..دعي معانا الواليدة و سلمى على طامو و هجر ..

..قطع تلفون و هيا دمعة و خنونة ....ناضت تعد 

يااويلها هيا ولادها تفرقوو ! ياا ويلها نويرة ديالها مشات بلاد البراني و يحكروها ياا ويلها عوينة لي عندها جلس فطنجة يضرب تمارة ..بكات و عدات تا تسالا جهد و حميدو ظيم طاح عليه ساكت

حميدو: اااااايه ولدددد الولاد و يسمحو فْك و مايسولوش تاا فْكْ ..

جمعة: اولااااادي اناا ..انا لي صبرت و سهرت و راقبت و حنيت وهزيتهم بسناني..يْحْنووو فياا وليدااتي ..

حميدو: اممم انا ابو لهب !! اناا بووووخنشة ...اناا مساامح ليهم عايديرو علاش يرجعووو...ياك خوها كان معاها الله يسهل عليهم ..

جمعة: اباارد الكْلْبْ ااااا الحناان ماتكسااابو ..

حميدو: نوووضي طلي على كوزينة ديك دلاحة خمسة عشرين كيلو شكون يواكلها ..

جمعة: نوص فرقها فجامع صدقة ..

حميدو: نووضي جيبي طامو من عند ختك ..انا الالة موولف دار عامرة هادشي مامسلكش ..

جمعة: اناا نيت نوض نعكب عند ممي ..مابقا معاك كْعَاد 

حميدو: هاادي هيا العشرة اجميعة (تيحرك راسو بلوم) كانو شادينك عااولاد انا لهلا يقلب ؟! راك مرتي و مات والادي و الله مانفوتك 

جمعة: ياانووض اااه !! مزيناتك هضرة !! 

حميدو: نوضي جيبي طامو و نوض نتقضى خلي دار تعمر ..ولادنا يسهل عليهم الله هدا ماكان ..ها شيفرونة حدانا تْعْكوب علينا و طل علينا ..

جمعة: امم شيفرونة !! معنزها كل مرة تجري عليها !! 

حميدو: ماننعااودش !! تجي دارهم هادي .. غير ماتعيقش ..نوضي نجيبو طامو !!

..ماعندها عليه لاين ماعندو عليها لاين..العشرة و الدم الطعام يحكمو ..ماشي هو زوج المنشوذ ولا الاب المثالي ...حميدو حس بالخطر و جبر بخاطر جمعة عارف مايلقاش بحالها ولا فصبرها..مكملين تا اليوم الممات..


...الخبار وصلات فين بغاات...الا غير جمعة ماتعرف لا تخبي ولا تستر ..شيفرونة وصلها الخبار بكات حتي نشفو دموعها منزلاتش من بيتها مع لعربي خدام ليل عكوزتها خلاتها على راحتهاا..

🌄🌄🌄

..ضربات فيقها بايتة تحلم تتمضغ ..مبوقلة بنعاس هزات زيف عكدات راسها و دخلات حمام توضات و صلات صبح و هيا تسمع صونيت التلفون ..بانت لها نمرة لعربي حلفات لا جاوبات ...ناضت نزلات تحت..

حفيظة: صباح خير ابنتي !! صبحتي شوية ؟

هجر: حمد الله !! خالتي بغيت كعبة !!

حفيظة: الله ابنيتي منين نجيبها لك ؟؟ صوني على لعربي !

هجر : مابغيتش زنقة بغيت نصاوبها بيدي وناكلها !!

حفيظة: ووا وحم هدا !! هداي عليا بتي انا كاطويا بيضة و طوب مانفهم فالحلوة للوز !! 

هجر: كاين للوز اخالتي !!

حفيظة: كاين للوز ...(ناضت بيتها تجبدو من بلاكار ورجعات حطاتو ليها) هااهو ...

..هزاتو هجر و دخلات كوزينة وجدات الفطور حطاتو لهم ..و رجعات يوتيب تتشوف حلوة كي تتصاوب ..ناقصها زهر و كلاصي خرجات عند عكوزتها..

هجر: خاالتي !! خاصني ماء زهر و سكر كلاصي !! نخرج نجيبهم ..

حفيظة: لا بنيتي !! لعربي مايبغيش اناا ندير جلابتي و نخرج تتسخر ..

..رجعات كوزينة تنصب الغدا عل ما توصلها سخرة ..وعقلها مع كعبة تفكر وتعاود ..وصلاتها سخرة ودارت فواطة بذات بفسيخ للوز و خلاتو يتقطر دازت عجينة و متبعة فيديو ، بقات دلك فيها تا قربات تسخف ..و جبدات مولينكس طحن لوز ...وصل وقت الغدا بدات توجد و تحط تا دخل لعربي ..

لعربي: سلام اختي لباس !! فين تلفونك 

هجر: فوق 

حفيظة: وليدي عالسلامة !! 

لعربي: قبل راسها ..يسلمك الواليدة ..(شاف هجر) طلعي وجدي ليا دوش 

هجر: وجدو راسك انا مشغولة !!

لعربي: اش تديري كاع ؟؟

هجر: صمت ..مشات كوزينة 

حفيظة: اولدي سلللك ..راها صبحات ماشي على برجها ..صابحة تهترف الكعبة و من صباح هيا معاها ..

لعربي: واش كعبة !! ديك كاطو !!

حفيظة؛ ايااه 

لعربي : علااش ماتصلش بيا نجيب لها تا جوج كيلو !! اش داها شي تمارة !!

خفيظة: تشهاتها من يديها ...زيد تعتق من جوع و طلع دوش و ارتاح و خليها على راحتها ..

لعربي: الواليدة انا تتهمني غير راحتها !! ولاكن ماضسرش تاني !! وحم لي غادي يخرج ليا برجي بناقص 

حفيظة: وانت مول عقل ...صبببر اولدي

لعربي سكت ماعلقش...تغدا هو امو و طلع بيتو مقلق !! تايرجع من تمارة طامع فيها تريحو ..للتلفون تجاوب لا جواب مصواب ، ماتيبغيهاش ضرب تمارة ..دخل دوش من تعب طريق و لبس حوايجو و تكا ينعس ..


...مالطقات من ديك عجينة تاكملاتها ولو اول مرة متبعة فيديو بقات مضاربة معاها تا صدقات ..كملات و خلاتها ترتاح ، ضربات غسلة لماعن و كوزينة و عاد جلسات تغذا بوحدهاا ..

مريم: هاي هاي على هجر !! درتي كعبة راسك ..

هجر: شافت فيها و الله ماجاوبتاها ..

مريم: مالكي ختي مخاصمة معانا ..

هجر: صمت .

..مريم ضربات دورة و خرجات اول مرة هجر تتعامل معاها بهاد طريقة تجاهل ..شعلاات هجر الفران ودخلات كعبة طيب و حاضية معاها ..تاطابت من شكلها باين مبتدئة ..حطاتها فطبسيل و غطاتها بزيف و طلعات بيتها ..

مريم: واش هادي ماذوقناش ؟؟

حفيظة: اسكتي عليا مانااقصني صداع ..بنت خوطرها وحم ..

مريم: هههه تعصب ولدك يشعل معاها بشي دقة 

حفيظة: عمروو ضربك ؟؟

مريم: صوتو تيخلع بقا يضرب ...

....داخلة بيت هازة داك كاطو و جلسات فنموسية و لعربي جايد عليها بنعسة و هزات وحدة تتاكلها شوية بذات دمع ..

فيقاتو من نعاسو ودار يشوفها ..

: ماالكي !!

هجر: 😭😭😭 نسيت سوووكْرْ ..جات مسوووسة 

لعربي: (مسح وجهو من فقصة) صافي ماتبكيش !! انا نجيب ليك حلوة !! 

هجر: 😭😭😭 ضربت فيها تمارة من صبااح ..

لعربي: وعاادي تانتي تطرا !! نوضي لبسي جلابتك نشريها لك و نديك عند مك !!

هجر: مابقيتش نمشي عندهم صافي! 

لعربي: لواااه لوااه !! واش مقلقك شي احد !!؟ ياكما على نورا و خوك ! راه اهجر رزقك عيط لهم

هجر: هوو لاش غادي معاها ؟ 

لعربي: ياك هدا سيمو لي مان يضربك فزنقة و يغوت عليك ؟،

هجر: وووخوووويااا ..

لعربي: دبا يجيو و تشوفيهم !! ماديرش فبالك عصب مامزيان لاليك لا فكرشك ..نوضي نخرجو تشريو كعبة !!

هجر: لاء ديال زنقة موسخة ..نهبط نجيب سنيدة و دردرها عليهاا ..

لعربي: صاافي !! رجع نعس انا ؟

هجر: عااركوود ..

..نزلات طلعات طبسيل فيه سنيدة و رجعات بلاصتها و بدات تفنذ فديك كعبة فسنيدة و تاكل تاحبسات ...و تجبدات تنعس حدا لعربي و دموع فعينيها على ختها و خووها تتحس براسها بحال حنش مقطوع رااسو ..


...🌄🌄🌄

..فايقة بلاصتها تترد ستنا من البارح شداتها بنعسة...تتفوه و تحك شعرهاا، مولفة ما تتنعس تاطيبو و تفكر ة تعاود و تخطط و تعيش و تبني و تريب هذا حال المهوم الليل ملاذو لاخير لافكار السرية ..ومع موت بنتها زادت كملات لي خاصها...حيدااات عليها لاكويط ناضت متجهة الحمام لي برا كاين لقات كوسطا مزال ناعس ...

..غسلات وجها و قضات حاجتها ..رجعات بيت جبدات فوطة تمسح و بدلات بيجامتها ...

نورا: كررريم !! وااا كررريم 

كوسطا: (بصووت ناعس)راااني فايق غير متكيى!!

نورا: (تتشوف فالكوزينة) انوض جيب الفطوور .

كوسطا: ااحخخخ (تيتفوه ..ناض جالس تيمسح وجهوو) صباح خير !! 

نورا: هههه ارتاحيت فنعسة ..زوينة هاد اوربا و لهيلا .

كوسطا: (نايض غادي حمام ) ممم عنداك غير ديري علينا ديس ..

نورا: ههههههه 

..لبس حوايجو تاهو و دار كاسكيط و سدوا الدار و خرجو و نورا غير حالة فمها فوق ما تشوف شي كاورية ولا كاوري تبقى تشوف ..

كوسطا: الا بقينا متبعين قهاوي و ريسطورات نديرو زيزي !! نمشي نتقضاو المهم و كل نهار حاجة ..

نورا: انا جايبة معايا مليون زايادة مغربية!

كوسطا: (شاف فيها) منين جاتك فلوس ؟؟

نورا: فلوس طلاقي !

كوسطا: نتي وااحد بنت طييط !! فيزتك فيديك و فلوس مسخنة جيبك ياا ربحة ياا ذبحة !!

نورا: دبا مالنا على هاد عصير !! 

كوسطا جرها تحت باطو قاجهاا :ديال لي يشد دنمك فشي بيت و يبقى عليك هاك بلااك ...

نورا: طللق طلللق ..لي يمد عليا يدو نهرسها لموو !! جمع زمرررك عندك 

كوسطا غير تيضحك...دخلو سوبير مارشي كبير و نورا عنينيها تقشقشو كبير بحال مرجان علامن ما قلبتي فيه ..بداو يتقضاو مرة ضاحكين مرة مزافطين ..و لي شافتها تفكر جمعة و هجر ..شرات ادوت تنظيف و لوازم مطبخ و مرو بالمواد الغدائية و كوسطا لي حطات عليها يدها تهزهاا ..مشتاقة فشيبس و شكلاط و عواصر وهنا كلشي رخيص ....خلصو و جلسو تما فدوك كراسة مع تقضية و هزو منها يفطرو كي زوافرية .. 

نورا: ونااري هاادشي تقيل !

كوسطا: تي متبعة سقاطة هزززيها ..

نورا: كون عا عطاونا داك شاريو تا ردوه ليهم 

كوسطا: هههههههههه نيشان ..

نورا: خاصني لاكارط نمرة ..

كوسطا: وووواااخاااا ...شي حاجة اخرى ؟؟

نورا: لهلا يخطيك عليا اكوسطاا ههه شكون كال نمشيو انا وياك خاريج هههههه 

كوسطا: حق الرب المكتاب فشكل ...

..وصلو الدار متعاونين...نورا كفضات و بدات تجمع و تمسح الغبرة و جافيل قربات تسبق بيه تربية جمعة ..و كوسطا تيقاد معاها و تيشوف شنو ناقص فالدار باش يجهزها ..ردات داك ستوديو تيشعل و ردات الغدا غير فمقلة ...

كوسطا: براكا عليك كل نهار ديري شوية !!

نورا: هااناري هاد جوج متر كاع مانحير فيها ! خاصنا طاجين و كوكوط و مقلة خبيز و كصعة ..

كوسطا: حطي نعالج دبا !! لي خاصك يجينا من المغرب طرونسيور موجوود 

نورا: ههههن يااا والخبز نسينااه .

كوسطا: ناكل بموس فرشيطة عاا عطيني ..

نورا: نووص جيب خبز من لعكز !

كوسطا: ايه نووض ! موحماد تحت عمارة !! حططي بلا زمر ..


..و هكذا الاياام !! كوسطا بدا الخدمة و تمارة مع كاوري ولو مستغلو الا كريم صابر تيشد وراقو العامين ..اما نورا فكانت لالة ومولاتي الدار ديما نقية و الطياب منوع مقابلاه و مريحااه ..هادي مدة دخلها تعلم تقرا فالسونطر ..

...من خلال داك سونطر تعلمات للغة ولو شوية مهم تجاوب و تفهم ..تعرفات على بنات مغربيات كلهاو قصتها لاكن نورا تكتفي تقول انها مزوجة فقط ماضيها ذفناتو و فقدات التقة فالبشرية ...تدوز اوقات زوينة معاهم قنعات من سقاطة و ماكلة مابقاش تيعجبها اي شيء ..زادت غلاضت و داك شعر مزاد طوال وتاها الخاريج ولات بيضة و زينها طبيعي ديما تابعها واحد ولاجوج ....اما اتصالها مع عائلتها يومياا واتساب مع جمعة وهجر لي قربات ولادتهااا..

كوسطا: (معصب ورجع على غفلة دار مالقهاش ...) دباا هاادي دنمهاا ماشي ترجعها تجلس حدا حنان !! آووو زاادت فيه !! خررووج خرووج يخرج ليك مرارة ابنتي ..(هز تلفون دوز ليها الخط ) 

نورا: hola !!

كوسطا: فين رااكي !!

نورا: فدار !!

كوسطا: فدااار ابنت قحبة !! بربي المعبووود ماترجعي دباا تانجي نخلي داربوك فين ماا كنتي ...

نورا: كالماا !! مالك تتغوت 

كوسطا: نوووراااا ماتتتجهليش عدوو ربي !! الا نتي فدار انا فين !!

نورا: انا جاية ...

قطع تيطلع نفس و يهبطها...ولات تخرج بليل و نهار !! فين نورا لي كان تخاف تخرج بوحدها و تبقى حالة فمها فالكاورين ولا تفرحها شيبس ولا اكلاص ..ولات مخيطة ماكازات ها زارا ها كوتشي ...هبط على كاس الما تا دخلات طالقة شعر نظاظر شمي فوق راس و ضاربة ليك حطة مقوودة ..

نورا: (حطات صاك و تتحيد فسبرديلة) ماالك !! 

كوسطا: (حط كاس بجهد و تيمسح فموو) ياك هضرنا و عااودنا على هاد خرووج ؟!! عاجبك كررك مسركلة فالشوارع ماشبعتيش !! ماعيتيش !!

نورا: اش نجلس ندير !! قنط ..

كوسطا: انااا ماتنحسش بالقنط !! ولا انا غير كوسطا حمار !! عارفاني هابل عليك !! اما مخير فهاد الشهورة ياكلك للحم و يرميك عظم !! غاطس فتمارة على ود وراق !! نتي لي تخافي و تحشمي لا وراق لانمي !! الفيزا ماتت لك !! نخاف انا بلاصتك !!

نورا: اش درت !! خرجت مع لبنات !! مولفة تنخرج !! 

كوسطا: هاادشي مامسلكش !! نتي ماشي دفعتي ديس !! دفعتي الملياار !! هضري مع خوك يصيفط ليك طلاقك نعقدو فالقنصلية .. (دخل حمام )

نورا: كرريييم !! كفاش طلاق و قنصلية !! (تابعاه حمام لقاتو تيحسن بطوندوز مركز فالمراية) ياك تافقنا !! 

كوسطا: سمعي نتي دخلتي فيزا و حركتيها عندك جوج حلول يا اما تولدي !! ولا تزوجي !! انا بجوج منااسبيني

نورا: انت شديتي اقامة !؟

كوسطا: لاش جاي تنطير دار !! باش نفرحك !! ساعة اخت مشغولة ..واش نكملوها هكا!؟؟ راني راجل و صبرت عاااارفة اش تتعني بنت لي تنبغي عايشة معايا مكملها بوسان و تعناق راه هباال بعينيه !!

نورا: ومممممك اتقبل بياا !!

كوسطا كمل و حل الما غسل وجهو و مسح بالفوطة و رماها على وجها ..

كوسطا: نديرو #كذبة_بيضاا 


.....من الدوار مسقط رأس عائلة حميدو من بعد ماخوات الدار عليه ..ماتقبلش السكنة بوحدو و طامو رفضات تهبط عندهم ..سدو دارهم و هبطو عاشو مع طامو فدويرتها عايشين مجموعين ..ولا يخدم قليل و نقص من العصب و ردان الهضرة الا مع جمعة بحال فطموه عليها ..الدوار ريحة الحمري و الكوارة و الصوت الفروج والحمام لي يفيقك بلاساعة ...العين ترتاح فالخضورية و الما خارج من العين و الخضرا و فواكه بيوو ...

جمعة ماكاينش نهار لي يدوز ماتبكيش على ولادها خصوصا نورا ..لي مبردة الكية انها يوميا معاها فالواتساب تصور و تصيفط لها ..اشتياقها بنتها عماها لاكن تتحمد الله فكل صلاة انه ربي نجاها من تريك ناقصة ..
ا
اللهم لاشماتة لاكن خبار تتداول ديرها زوينة توصل توصل...حليمة تحكمات بستة شهور و الوراق الخاريج ضاعو و ابناتها ضربوها بنكرة ماناقصين فضايح اما ولدها رضى ليومنا هذا من المختفون ....تنسمعو فلان و فلتران غبر ! علاش غبر !! كفاش سمح فناسو وبلادو!! كما تنقولو الغايب حجة معاه لاكن رضى مصيبتو معاه...

الصدمة كانت قوية على حليمة و اخر خبار داعت فدوار انها تزنزنات فالدماغ و دايرة تسعى فشوارع المدينة ..

حميدو : ااااجمعاااا وااااا لمرااااا

جمعة: (خاجة من كوزينة عندو ) اش باغي !! ااش كاين !!

حميدو: (ماد لها صاك مارساي ) شددي ها صاك وصل ..

جمعة: (فرحانة ) هاتا مول فوركو وصل دغياااا ..عيط شيفرونة راه فيه حوايج تربية ليهاا 

حميدو: كفرتوني بهاد شراوط ..ديك صاك جيب صاك ..(جبذ تلفون يدوز خط ) اما داك زعااك ماناويش يجي!!

جمعة: الولد راااه خداام ماشي كونجي ...

حميدو: (خنزر فيها ) الووو شيفرونة بْنيتي !!

هجر: انعام ابا !

حميدو: عوكبي ابتي عدنا راه خيتْكْ مصيفطة لك حوايج...

هجر: نصيبش اباا !! تا يمشيو ضياف ..او نعكب عدكم ..

حميدو: على خير ...(قطع..و تيهضر بحسرة) وااشوووف شفرووونة لي كنت نزْكي (نجري ) عليها تعكب خيمتها ولات بضياف !! ااودي ماتماشااي ..

جمعة: انت راك خووترتي ...زيد تحنجر زيد ..

حميدو: مقفولة ليا مذاق !! عابصحة ..

جمعة: سْمْها شاااهية كالك مذاق!! ...

جرات داك صاك داخل ماحلاتوش تتوصل هجر ....نورا فين ما كين شي صولد ولا همزة تشرب و تعمر ماخلات شكلاط ولا زبدة ولا عطرية كيتشوب شمبوان ماكاين غير نقل وصيفط لمغرب ..مادازش عليهم قليل من فقر ..يامات حمام بلا سليب و حوت فالغذا و رفيسة لعشاا ..

طامو: ااجمعة ..

جمعة: نعاام ااامي !!

طامو: تي هداك زعيرة وقتاش تبدا !!

جمعة: واش كمال !!¿

طامو: ايه هداك ..ديري راه يعاوده مع جوج ..

جمعة: عمري تسالا داك مسلسل ما بغى يسالي ..

طامو: و يعداوو فيه مسابيقة و كوولشي..

جمعة: عااكذوب اطامو لا ربح لا مسابقة ..

طامو: اااه اااه وبقيتي بلا ولاده ااه ...

جمعة: لاتويليش ااااامي ...بطووول عمرهم ..زيديني لي نااقصني 


...شهور لي مرو على هجر اعتادت على غياب خوتها و بقات لها جمعة لي تتزورها و حميدو ولو معاملتو تغيرات لااحسن معاها ...االا هجر مانساتش و فخاطرها تتحملو سبب هجرة خوتها وخصوصا سيمو لي ولو كان يعصيها و يسبها وعامل ليها ارهاب توحشاتو اكتر !! 

عيشتها مع ناسها فالتحسن نقصات من خجل رجعات تتشارك الكلام و تعطي رأيها لاكن وحمها طلع على لوستها مريم اما لعربي مرة طالع مرة هابط كأي زوجين ..محترماه و مأدية واجباتها و تتسمع هضرة غالبا ما تتعكس معاه و لي طرأ جديد عليها انها نخرطت فالجمعية امامهم الباب لباب تتعلم الحلوياات لي تتعشقهم ...

..هجر: (جاية مدوشة و تتخلف بسيف) مريم طفيتي على لعسل ؟

مريم: اويليي نسيت ...

ناضت تتجري لكوزينة و هجر تابعاها ..هزات معلقة عود حركات عسل لقاتها قصحات و ضربات ديك معلقة فلافابو ...

هجر: بغيت نعرف اش تديري نهار كامل !؟ من صباح ونا واقفة ضياف غذيتههم و حطيت كاسكروط و غسلت ماعن و جمعت دنيا و صيتك على لعسل غير خمسة دقايق و طفي عليه نسيتيه !! تديريها بلعاني !!

مريم: واغير سمحيلي لعقل والو!! انا نشري ليك مقادير عاوديه!! ماتعصبيش ختي ..

هجر: خير لي ديري ماتهضريش معايا لا انا عاودت هضرتك يعطيني الموت ..

لعربي : (دخل مع حوار من بعد ما وصل ضياف راس درب و رجع) مالكم !؟؟

هجر : مااامااالنااش !! 

لعربي: ااجي ضربيني حسن !! نقصصصي صووتك !

مريم: بعد منها اخويا! انا لي نسيت ليها عسل تاقصاح ..

هجر: درتيها بلعااني !! تكوليش نسيت 

مريم: يرزيني اختي مادرتها بلعاني ! 

لعربي: هاادشي وكان !! نشريه ليك مااتعصبيش !!

هجر: سير شرري لوسخ من برا وعطيه ختك تغمس فيه ....

..ضربات فيهم وخرجات طالعة برطمتها فوق لي فرشاتها مؤخرا و غدايد لعسل تيخدمو فيها ..خلاتهم شي تيشوف فشي تاجلسو حدا مهم ..

حفيظة: (تتطوي سجادة) صوتكم وصلني انا تنصلي !! اماالكم !

مريم: انا نمشي عند خالتي ! تتولد مراتك ويلي ماتتحملنيش !!

لعربي: (جلس مربع يديه) دووزي تجلسي اشمن خالتك ولا عمتك !! تنكوليك مْيْكِي عليها راها ماشي على برجها !! واش موالفة هيا تغوت ولا تغضب ؟؟

خفيظة: الاا وليدي عروستي زينة و متبتة ..هياا مرات عمك لي خرجات عجابتها و سولاتني واش عدها شي ختها !!؟

لعربي: (تقااد فالجلسة) ياك الواليدة تتكوليها فوجهي !! هيا جايبا ولدها معاها و شاف ولادي!!

حفيظة: حاافظ الله !! فين شافها اولدي !! مرات عمك لي دخلات سلمات عليها فالكوزينة ....

لعربي: واامنعرفت ....

حفيظة: والله اوليدي...كولي موجد شي فلوس الاسبوع !؟

لعربي: فلوس موجودة حمد الله !!لاكن الواليدة تتفك هجر لي فكرشها على خير و بخير عااد نشوف اسبوع !!

مريم: الله يفكها على خير اخويا .

لعربي: اامين ...

حفيظة: انت تعرف اوليدي ...نوض شوفها نوووض ..

...ناض تيتنهد طالع طالع فوق ...دخل عليها لقاها تهضر مع نورا فيديو دخل دوش و خلاهم ...

نورا: اتقنبلتي اشيفرونة هههه عدك بت ؟

هجر: مابغاش يبان واش بنت ولا ولد ..احقا جاو فك خطاب ههههه مرات عم لعربي كالت عكوزتي واش ماعدهاش ختها ههههه 

نورا: (طلعات عينيها فكوسطا دخل مع هضرة ) هههه براكا من ضحك ..

هجر: حق الله اختي ماتنكذب ..بغاو يخطبوووك و حق القرآن 

نورا: سيري راه لعربي جا ..عمرك اشيفرونة تبدلي


نورا: هيهي راديو متنقل شيفرونة ...عاداوياا مسكينة ..

كوسطا: واانوووضي براكا من قوالب دوالو ..حطي ليا لعشا ..

..مزادتش هضرة منين خرج قبيلة رمى لها هضرة عاد دخل ..سخنات حريرة معاها ملوي معمر وحطات ليه هو شاعل تلفزة مع اخبار ......كمل و سالا عاد دار عندها ..

كوسطا: آشنو درنا !! وراق هانا شديتهم !! ولا يكما عجبوك خطاب نسيبكم ؟

نورا: وااشحال رجع فيك طنز !! نت لي كلتي ليا كذبة بيضة كفاش؟

كوسطا: راها باينة لعور ..يوصلنا طلاق نشدو رونديفو فالقنصلية نعقدو ها حنا مزوجين فالحلال لانا معذب معاك فالعيشة و لا نتي لي تتقيلي ضربي سوايع فنوار خدمي بواراقك و بفلوسك زايدة !!

نورا: دبا تتنقز من هنا لهيه !! ماشديت معاك والو ...انا باغة نخدم نهز بامي و خوتي و بغيت العرس لي مادرتش و الخطبة و الحنة ..نت كاعد عليا عذاب ما كذبة بيضة ...

كوسطا: انوورا !! جيبي طلاق نعقدو نقادو وريقات ندخلو نديرو عرس ولي بغيتي 

نورا: تااكداير هاد زوااج بلا خبار والديا !!؟

كوسطا: نصيفط واليدة تخطب و دير لي تيدار ..تندخلو مغرب نديرو عرس .....

نورا: مك ماتتعرفش طامو ؟؟ راها تتعرفها و لي تيعرف طامو راه فخبارو بنت بتها راها ماتت ليها بنت و مطلقة و عكوزتها اولى فالحبس بسبب الفساد ..

كوسطا: مااتبقاايش تجبدي ليا دوك قمامقم ...دوزتي فريضتك فالحلال و كنتي مظلومة سدينا هاد موضوع !! اوا حادى غادي نكولها لقيت لي دير ليا الوراق ...

نورا: وراااه تاا لي غادي دير ليا وراق !!

كوسطا: باش بغيتي حدى تجي تخطبك و تكبر بيك ...بالوراق !! نكذبو #كذبة_بيضا لاعين شافت لاقلب وجع

نورا: (طولات فيه شوفة) منعرفت هاذ كذبة فين تخرجنا !! 

كوسطا: نورا واش الواليدة من الباب تكولهم جيت نخطب بنتكم ولدي لي تصاوب ليه وراق ؟؟ والديك واش يستقبلوها غير محيت اناندير ليك وراق ..حنا حسابنا فراسنا هما حسابهم فراسهم ..مغاربة معروفين

...ناضت تتجمع ديك طبلة و عقلها ياخذ و يجيب ..بغاات تشاور مع ختها لاكن راها راديو تشاور مع سيمو تحشم !! هيا تتكولو كارية بوحدي !! غسلات ماعن و مسحت يديها و دخلات بيتها تتدهن كريم ..شدات تلفون تتلف تاوصلها مساج 

📨 )كوسطا) "ديريش شي بلاصة حداك 😍 )


...لعربي: نصلي لعشا و نرجع عندك ! 

هجر: وااخاا ...

..نزلات تتعكز تقلات بزاف و العمر مزال صغير لابسة عباية تترتاح فيها ..تدخلات على عليهم ..

هجر: السلام عليكم ..

جمعة: السلام ..اتعطلتي ابنتي !!

هجر سلماات عليهم الا حميدو ماتتقربش جهتو !! 

هجر : اوووف ..عاد كملت شغالي

طامو: اقْبْلْتي اشيفرونة ..كحزي عْددي هْنْ نشوف ..

هجر: (شافت حميدو لي ممسوقش) خليني ارتااح اطاامو ..

جمعة: ابنيتي نحط لك حريرة !؟

هجر: كرش و حريرة خاصني ديباناج نتهز ...نوضي جيبي صاك راه لعربي شوية و يجي ..

حميدو: وااكوليه يخلك مقصرة معانا !!

هجر: الصمت ..

..ناضت جمعة جابت صاك مارساي عادفعاه تتنهج ..

جمعة: ويلي ختي تقيل ..(شافت حميدو) انووض توضا عشا راه يوذن 

حميدو: مصليه هنا ..

هجر غير تتسوط و شوفة ماتتشوفهاش فيه و جمعة عارفاها بسيف تتهضر ..

جمعة: نوووض فرق عليك مجمع العيالات ..

حميدو: بنتي و مرتي و نسيبتي ..

طامو: اتااا نوض تصلي عشا خوي المجمع اهياا ناري ..

..بسيف باش ناض ..عاد هجر حيدات شال و عباية و بقات بيجامة قصيرة و كريشة قدامها و ريحة جل دوش و شمبوان تتعطي منها ...فتحات صاك من فوق فيه فوطة و بنت فوطة ها طويلة ها قصيرة ها وجه ..و ميكة عامرة شمبوانات و جيل دوش و فيه صاك بيبي و عامر حوايج بيبي للون محايد ماعرفرينش واش بنت ولا ولد لاتخوز منظفات خااصة بيبي و شي بيجامات و شوميز و دوبياس هجر و لمها و طامو حتى من الويز مصيفطها اما ماكياج ميكة عامرة ...ها اتاي ها قهوة ها العطرية حبوب تامن جيكس فالبواطات مصيفطاه 

جمعة تهز حوايج و تعنقهم و دموعها هابطين ...طامو فرحانة بحفيذتها مفكراها ..

جمعة: سيري ياا نورا راااني مفرشااك بالرضى و مغطياك بالرضى و يسهل عليك و تخلفي الرزق 

طامو: هانتي على بريطلتي هازة بينا و مفكرانا ..وفين هو دوا لي وصيتها عله!؟

هجر: (مزال حاشية راسها فصاك ) هاهوو اطامو ...

جمعة: (دارت يدها على فمها تتهضر بهمس) يااااو حميدو !!

هجر: (بنترة ) ياااو و تمووتي عليه ..(مدات لها ميكة مكتوب فيها سمية حميدو وحدة فيها لعربي) هاا ميكتو و هادي رااجلي !!

جمعة: (شداتها ) وووحشوومة راه بووها !! 

هجر: ورااع عارفين بوها ! كالنا ليك راجل منا ..

جمعة: وعاريتي اشفرونة !!

هجر: (دارت يدها على خصرها تتسوط) سكتي مشكلة !! هضرتي مشكلة !!

طامو: جي اشيفرونة نشوف لك ..

...ردات حوايجها فصاك و قربات عند طامو تتقلبها فكرشها و تغمض عينيها و هجر غير تتسوط ...

طامو: هادي راها مقبلة و بزااف ...مافيكش الوجع ؟!

هجر: فيا عا ثقل !! عيت الله يفكني على خير !

جمعة: دبا تفكي و ندير لبتي الرفيسة و تلتيام دازها الكلام..نوجد لك سلو و الحلوة !

هجر: الصمت ...

..جلسو مجمعين تادخل لعربي اسلم عليهم و تعشاو من غير هجر لي تتحس براسها تزيرات و شي حاجة تتضرب تحت و غير تتشوف بعينيها ..جاو وقت يمشيو ناض لعربي دخل صاك طموبيل مديماري تخرج هجر ...تاركبات حداه و دموع فعينيها ..

لعربي: (قلع ) ماتعشتيش !! ناخد ليك شي حاجة !!

هجر: لا ..

لعربي: واامااالكي رجعتي هاكا !!؟ اش خصر خاطرك. احبيبة!! 

هجر: الصمت ...

..شاف تاعيا و سكت يلاه يقلب رومبوان دورة و هيا بدات تبكي .

هجر: 😢😢😢 بلت فحوابجي ويلي بلت فحوايجي ..


..وقف فهاديك رومبوان براك على فران و مفافي ...

هجر: هيء هيء 😢😢

لعربي: اختي بولي و خراي (مخلوع) ماتبكيش ...

هجر: (منزلة عينيها تحت تتشوف مياهات نازلين و هبطات يديها قاست و شمات) لالا لاااا ماشي بول انا تنولد تنولد 

لعربي: (مافيقو غير واحد كلاكصون ..و كسيرا) صاافي صاافي لانمشي نقلب هاد طموبيل ..هانا دايك طبيب 

هجر: 😭😭😭 دينيش داك طبيب فين ولدات ختي 😭😭😭 

لعربي: ماانديكش (خلعة لعبات عليه) فيك وجع !؟

هجر: مافياااش 😭😭😭😭 اويلي مافيااش الوجع ..

لعربي: صافي اش ديري بيه ..

..داخ و دوخاتو ...كل ليلة تيفكر فليلة الولادة و يخطك لها لاكن ربي لي عالم طريق كلها و هيا تبكي و تميل تاوصلها كلينيك و رجع هزها بين يديه كلها تتقطر شدوها من عندو دخلوها تا خلطات عليه المسؤولة تفضل .

..مشى معاها استقبال عطاها معلومات و رجع ينتظر اش يقولو ليه !! واقف تالف و عينيه فارض و قلبو تيضرب احساس بخوف رهيب و نفسو تدعي ليها بالفكاك...تاخرجات عندو طبيبة ..

: مساء خير !! انت زوج الحالة هجر البوري؟

لعربي: اياه الدكتورة !!

: الوغ ! عندها سيزاغيان البيبي سخفان و الوجع مكاينش الا نتظرنا توجع و تولد طبيعي واحد فيهم ايضيع ..

لعربي: وي دكتورة غير ولديها ...

: اوك تبعني مكتب ..

دخلو المكتب و تفاصلو على ثمن طلبات ليه 10000درهم لان حالة صعيبة و مكانتش متبعة معاها هو عارف بلي التأمين مايغطيش كلشي مكانش من العاكزين و تشطر معاها تا نزلات ليه ثمن 7000 درهم ....خرج هز طمويل طاير الكيشي خرج الفلوس و رجع خلص و عمر شي وراق عاد طبيبة دخلات تولدها ...اتصل بحليمة و جمعة و قليل من الوقت. كانو معاه.....ساعة هما جالسن فالممر الطبيب و مافيديهم غير دعاء ليها !! 

.تخرجات الفرملية عندهم و بشراتهم بزيادة المولود الذكر وطلبات لهم حوايج ...لعربي جلس فالكرسي تيرد النفس و حليمة و جمعة تيتباركو و فرحانين ..

جمعة: مبروك عليك اوليدي ...نوض وليدي سير جيب لها حوايج 

لعربي: و مي جمعة راها صاك فطموبيل ..

جمعة: ويلاه نهز لها اي تحتاج ..

...جمعة فرحانة بالزيادو و هزات الحوايج لهجر و البيبي ورجعو عطاوهم ليهم ..تاشوية مخرجين بيبي فالناموسية تتجر طار عندو لعربي تيضحك من عينيه ..

الوليد كان شعرو كثيف و بيبيض و عينين مشفرين سبحان لي خلقو قبل ليه راسو و يديه و دور مع فرملية 100رهم تزيد تقابلو و شافوه جداتو اما حميدو راه فلاكريي بايت ..

خرجات طبيبة طمناتهم عليها خلاوها تتفيق من بلج و صباح يطلعوها بيتها ..وطلبات منهم يمشيو يرتاحو تا الصباح ....لعربي منين ماشافش هجر مشى مقلق و صل جمعة دوار و رجع هو مو الدار ...لي من دخلة ترمى فالصالون ماقدرش ينعس فبيتهم ..

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.