المكتوب فرزقي الجزء الثاني

من تأليف Ghazal trust
2019

محتوى القصة

رواية الربطة زغبية

هزات راسها فدهشة ماعرفات ماتقول

اميرة : شكون!!!

ردت حنان بابتسامة : اخت سي محمد ...متعقلتيش عليا؟

ابتاسمات بمجاملة: مرحبا ... كي دايرة مدام لاباس ؟ وليدات مزيانين؟

حنان: الحمد لله نتي لاباس عليك ؟

اميرة : الحمد البرامة فراسك 

حنان : مامشا معاك باس احبيبة . . . هادي هي الدينا 

بقات اميرة ساكتة وكتقلب فالاوراق قدامها وتلف وحنان كتشوف فيها بنضرات غريبة 

حنان : صدفة زوينة هادي !

قالت بمجاملة: بصح صدفة زوينة 

قالت حنان بتردد: شكون قال غادي نتلاقاو شي نهار

اميرة :الدنيا صغيرة بزاف كتر من اللي كنتوقعو 

حنان : بصح .. انا سمعت مشيتي لفرنسا وستقريتي فيها 

حركات راسها: بصح... مشيت لفرنسا مدة طويلة ... ووماشي بزاف باش رجعت 

ضحكات حنان بعفوية وقالت بسعادة: عاقلة عليك صغيييورة مشاء الله كبرتي ... تبدلتي ... شكيت فالاول واش نتي ولا ماشي نتي ولاكن كان عندي احساس باللي نتي وغير الناس اللي نصحوني نجي قالو ليا واحد الطبيبة زوينة جات من فرنسا وفباااالي باللي حتى نتي مشيتي لفرنسا .. وفاش جيت قريت سميتك شكيت واش تكوني نتي ... عرفتي فرحت بزااااف اللي شفتك 

ابتاسمات اميرة بخجل من الطريقة اللي كتهضر بيها حنان والفرحة اللي غتخرج من عينيها وكتهضر بالزربة وتوثر 

اميرة: الله يكبر بيك احبيبة حتى انا تشرفت بمعرفتك 

حطات حنان يدها على خدها كتنهج : واااو ... عرفتي راه مفاجأة هادي ... (حطات يدها على صدرها كتشوف فيها من راسها لرجليها ) معمرني تخيلت غنتلاقا بيك

بقات اميرة ساكتة غير كضحك بمجاملة وتقلب فالاوراق بلا شعور .. هزات حنان صاكها وقالت بحماس

- عطيني رقمك الشخصي نبقا انا ونتي على تواصل... ماتعرفيش شحال فرحت 

داخت اميرة وبدات تحك فودنها وعطاتها الرقم وودعاتها حنان بسعادة وخرجات خلاتها جالسة مصدومة فالبيرو وحاللة فمها . يالاه فاتت العيادة وهي تجبد تيليفون 

حنان : الو ... سي محمد ... كي بقيتي شوية؟ ... دازت عليك ديك الدرسة ولا باقي .... اممم شربتي عليها الدواء... انا يالاه خرجت من عند الطبيبة حيدات ليه السنة ... عرفتي تبارك الله ماحسش بيها كن سعفتيني كن حيدتيها ورتاحيتي ... تخاف تنوض عليك فالطيارة فاض تبغي تمشي وماتلقا ليها حل ... حيدها وتهنى .... والله غير ساعفني انا نمشي معاك عندها يدها زوينة وكتعرف تعامل . . المهم حتى نجي يالاه بسلامة عليك . 

دخلات المساعدة عند اميرة لقاتها جالسة وشادة راسها ومغمضة عينيها 

اميرة : اري ليا شي كاس ديال الماء ... شكون باقي برا 

المساعدة: جوج ديال الناس

اميرة : صافي ماتزيدي تشدي حتى واحد ... دخليهم يالاه سربي ...راسي كيضرني بغيت نسالي ونمشي بحالي

كملات لدوك المرضى وهي مرفوعة تالفة كل مرة تنسا على حاجة وسدات العيادة مشات بحالها مكتهضر مع حتى واحد . دخلات للدار لقات باها جالس فالصالة متكي 

اميرة : بابا!!! فوقاش جيتي!

عبد الاله : جيت قبيلة .... صااافي العيادة ناضية ... بقا غير داكشي ديالك يوصل 

اميرة: لإكس راي وصل ؟

عبد الاله: وصل ... خرجتو من الدوانة بمشقة الانفس 

اميرة : هاداك هوا المهم عندي... ندير بعدا غير سكانير للناس نعرف شنو عندهم 

محمد : ديريه لينا حنا بعدا سنانا كيضرونا شوفي لينا شي دوا ... ديك المرة مشيت عند واحد الطبيب فاس ماكنتيش سلم عليا وقاليا سير دير الصكانير... ومشيت كنقلب فين نديرو داروه ليا ب 1000 درهم ماكملاش جوج دقايق حطيتها وجيت 

اميرة : المهم خاصني نمشي نشوف ديك العيادة غدا 
دخلات لبيتها تكمشات فيه وعقلها مع حنان الليل كامل حتى صبح الحال وصبحات شادة طريق للدار البيضاء . مشات شافت العيادة وعجباتها ... اجهزة حديثة واخا شي وصل شي باقي لاكن كولشي نقي وجديد و الزاج كيفصل والخشب .. بحال شي كلينيك وريحة الصباغة مزالة كضرب وسط العيادة ... رضات عليها وعجباتها ويالاه خرجات منها جاها اتصال من رقم غريب


حلات باب السيارة وهي كتجااوب

اميرة: الو وي؟؟

حنان : انا حنان ... كي دايرة لاباس عليك 

خفق ققلبها ووقفات : لاباس الحمد لله 

حنان : بغيت نجي نعمر واحد الدرسة واش ممكن ناخد موعد 

اميرة: اوك مرحبا ... فوقاش

حنان : غدا نشاء الله 

اميرة : مرحبا 

حنان: غدا مع الربعة نجي ... بلا منشدك شكرا بزاف احبيبة 

اميرة: هادا واجب 

قطعات معاه وهي مزالة تحت تأثير الصدمة وعقلها كيدي ويجيب ... واش محمد فخبارو بهادشي اللي كيوقع ؟ قداش يكون دابا ؟ شنو هي ردة فعلو الى قالت ليه باللي تلتقاتها .. بقات كتخمم وهي شادة طرق العودة حتى ضرها راسها .. وصلات لحدا باب دارهم ووقفات السيارة ونزلات وفديك اللحضة صونا الهاتف

اميرة : الو 

- كيفك حبيبتي نشاء الله تكوني منيحة ... شتأتلك يا عمري 

تنهدات بميوعة وحسات بيه تقل ليها على القلب وردت 

- الحمد الله وانتا؟ 

سامر: والله ماني منيح ياعمري

اميرة : ليش؟ شوفي بالسلامة ؟

تنهد: كنت بدي ايجي شوفك بس صارت عندي مشكلة مادية.

اميرة : الله يفكك على خير 

قال بتردد: كنت بدي اسألك يا عمري ... اذا ما عندك مشكلة ممكن تبعتي لي 1000 اورو اذا حبيتي .. والله مافي غيرك حبيبتي ياللي توقف حدي وتساعدني بها المشكلة . وببعت لك ياها اخر الشهر ياحبي 

تنهدات وقالت : اوك نشاء الله يكون خير

سامر : والله خجلان منك يا عمري مابعرف شو بدي احكي 

اميرة : اوك صافي قلت ليك يكون خير 

تنهدات بميوعة وقطعات .. فجأة رجعة كنحس بيه تقيل على قلبها
حتى الهضرة مكتقدرش تهضر معاه وزاد كملها ليها بمشاكلو الشخصية وكيطلب منها تعاونو وهي اعدا حاجة عندها راجل يتوسل لشي مرى ماديا ومزال حتى مدارو خطبة رسمية . 

دخلات للدار راسها عامر مابقاتش قادرة تفكر فشي حاجة اخرى من غير حنان اللي غتجي غدا تصايب الضرسة . 

صباح جديد تعمدات فيه اميرة تكون انيقة باش تعطي لحنان ما توصل لخوها وتفقصو ... صايبات شعرها فصالون مدرج وحطات ايلاينر جبدات بيه عيونها اللوزية وماسكارا وعطر جداب ودجين قصير مع صنيدلة دارجة على الموضة وقميجة بلون كاصي ومشات هازة صاكها للعيادة وهي كلها شوق تقابل حنان وتشم فيها ريحة محمد او على الاقل تعرف غير شنو دار فحياتو .. كتعيا تخيلو كي غيكون رجع ومكتقدرش .. بقات غير الصورة ديالو وهوا فسن 24 سنة فبالها ... واش الايام قدرات تغير فيه شي حاجة ؟ واش باقي عاقل عليها كما هي عاقلة عليه واخا دازت عشر سنين كاملة على فراقهم .. 10 سنين كافية باش تنساه وينساها ... ولاكن واش نسا اللي وقع بيناتهم كما نسات هي وتأسفات لفشل العلاقة اللي كانت بيناتهم ... و واش رغم نسيانو لكلشي واش باقية صورتها مرسخة فبالو وأثار الحب فقلبو كما بقاو فبالها وقلبها . مابقاش كيهمها تكمل معاه او لا حيت ولفات الحياة بلا بيه لاكن عندها فضول تعرف شنو دار فحياتو وتشوفو من بعد السنوات كاملة وتشوف شنو ممكن يوقع ليها الى شافتو لان لحد الان كلشي غير مجرد هضرة بينها وبين نفسها وتوقعات كتوقعها ومزال معارفاش كفاش غادي تكون ردة فعلها حين داك 

بقات تخمم وهي خدامة حتى دخلات عندها الممرضة وقالت اميرة وهي كتكتب مهبطة وجهها على الورقة ونضاصر فوق شعرها 

- شكون التالي؟

الممرضة : واحد السيد عندو الضرسة ديال العقل 

هزات راسها : هادي اخر مرة نقول ليك سيفطي ليا لكيستبونيغ ديال المرضى من الحاسوب عندك ... الى مقدرتيش تعلمي خلي فاطمة تكلف

الممرضة : كنت جايباها ليك فورقة وو

اميرة : مكنخدمش بالاوراق ... انا حاطة تما بيسي باش تيسفطيه ليا من تما وكلشي يبقا عندي مسجل .. ماشي ورقة تلف ليا اوك ... يالاه دخلي السيد وسيفطيها ليا انا غنشوفها 

الممرضة : واخا دكتورة

خرجات الممرضة وبقات اميرة محنية بالوزرة خضراء نص كم كتعمر فالاوراق طالع ليها الدم .. سمعات الباب تحل وهزات راسها بعفوية بان ليها راجل بدجين وحداء رياضي وقميجة زرقاء نص كم بجسم رياضي وملامح ماغريباش عليها .. صغرات عينيها فيه وقلبها كيضرب بسرعة ودرجة الحرارة كترتافع وهي كتشوفو داخل عندها .. حدو شاف فيها من الباب وبنفس الملامح ديالها شاف فيها حتى هوا مركز حتى تأكد وهز راسو فالسماء فصدمة وحط يديه بجوج على شعرو ممصدقش وتقلب جيهة الباب هاز راسو شاهق في حين وقفات بتتاقل ممصدقاش وعينيها خارجين نسات فين هي وشكون هي ورجع بيها الزمان 10 سنوات اللور وبدات تردد فودنها الاغنية ...

بيننا معاد .. لو حنا بعااد .. اكيد راجع و لو بيني وبينو بلاد ... وبيننا وعوود .. دا بينا وعود .. وفي غيابو اكيد لس الامل موجود 

قصد عيني .. في كل مكان


جااتها البكية واادهشة و الصدمة ووقفات حتى عاطياه بالضهر جيهة الحيط حدا البيرو وكتسوط على راسها قاطعة الحس اما هوا بقا فبلاصتو عاطي وجهه للحيط وفتح الباب بسرعة وخرج خلاها فشلانة كتفتف بيدها باش تشد فشي حاجة .. دخلات المساعدة على غفلة لقاتها شادة فصدرها والدموع واقفين وكاملة كترعد وشداتها بسرعة جلساتها 

المساعدة: واش عيتي ... وتش جاتك السخفة ؟ 

شارت بيدها وكتسد عينيها وتحلهم ماقدراتش تهضر.. مشات المساعدة جابت ليها الماء شربات وتكات ععلة ضهرها كتنهج وتسوط باغا تسخف 

المساعدة: شنو وقع ليك جاتك الدوخة ؟ واش كتقدري تنفسي 

حركات اميرة يدها والدموع كينزلو وكتشهق 

- صافي ... خليني بوحدي .. خليني بوحدي بغيت نبقا بوحدي 

تأسفات المساعدة وخرجات خلاتها بوحدها ... طلقات العنان لدموعها وهي مهبطة رراسها على البيرو فشلانة والصورة كتعاود وتكرر قدامها .. دارت بيها الدنيا وداخت كأنه زلزال ضرب فقلبها شتت اعضائها كاملة ماخلاهاش تجمع حتى النفس .

بقات نصف ساعة على داك الحال مبلوكية كتسوط وتزفر باش يتسرح ليها التنفس حتى دخلات عندها الممرضة

-دكتورة . . . كي بقيتي ؟

حركات اميرة راسها وهي مغمضة عينيها كتنفس بحال الى طلعات 90 درجة على رجليها 

الممرضة: باقيين المرضى برا كيتسناو نوبتهم ... 

تنهدات اميرة وقالت بصوت متقطع

- الراجل اللي دخل دابت وخرج مشا بحالو؟

الممرضة : خرج برا وعاود رجع جلس وقال ليا واش ممكن يدخل يحيد الضرسة

بقات اميرة ساكتة في حيرة وحزن وقالت بتردد

واخا .. دخليه 

خرجات الممرضة وجلسات اميرة كتسوط على وجهها وعينيها وجبدات مرايا قادات راسها بسرعة كانه ماواقع والو وكتبين باللي راها قوية وماشي نفس البنت المراهقة اللي كانت من قبل والاهم انها جميلة احسن بألف مرة من الصغر . جلسات كتسنى وتخريق فالاوراق بمعنى راها مشغولة ومتشوقة تعاود تشوفو و تحقق فيه وكلها كترعد حتى تحل الباب وتحلو معاه ابواب القلب .. ومع ذلك بقات محافضة على الهدوء ديالها ومهبطة راسها حتى حسات بيه جلس قدامها وريحتو كاسرة المكان وقالت بصوت منخفض وجدية مقادراش تهز عينيها 

-اشنو .... المشكل اللي عندك اسيدي

بقا ساكت ماردش .. هزات راسها لقاتو جالس متكي على ركابيه شابك يديه ومحني بضهرو لقدام كيشوف فيها بحزن وشوق ويأس .. نضرات كتحمل معاني كثيرة .. نضرات كتشوف التغير الجذري اللي حول اميرة من بنت صغيرة لمرى ناضجة فعقلها و جسم متكامل و مستوى عالي .. جامعة بين التقافة والجمال والانوثة وبرائة الوجه اللي رافقاتها طيلة هاد السنوات . نضرات كتخترقها كأنها كتحفض كل نقطة فيها او يمكن مكانش متوقع يلقاها بهاد الشكل وسمكن حنى هوا خدا عليها صورة البنت المراهقة فعقلو ومقدرش يتصور كفاش غتكون رجعات .. بعد صمت طويل هبط راسو قدامو ساكت وجات نوبتها تختارقو بنضراتها من تحت جبهتها .. وهي كلها شوق وحزن واشتياق ودهشة .. تبدل بزاف وتحول من فتى شقي لرجل بعلامات رجولية ونضرات جدية كتفرض الاحترام يحشم الواحد يضحك معاه .. للحضة حسات براسها كأنها جالسة فاستنطاق مع شي ضابط وغير مرعودة منو وخايفة وحشمانة وكتختلس النضرات . شتت نضرها بسرعة ورجعات للجدية فاش قال بصوت رجولي جاد 

- بغيت نحيد الضرسة 

ردت بارتباك وهي نايضة كتشتت النضر

- واخا .. تفضل معايا هنا 

ناض حتى هوا كيتنهد تنهيدة عميقة وكيدور وجهه لجميع الجهات الت جهتها وجلس فوق الكرسي الابيض شدو كامل بحال الى جلس عليه مصارع وغمض عينه وربع يديه
جلسات حداه فوق الكرسي تالفة والمساعدة كتعاونها ومنتبهة معاها حيت حسات بيها مريضة وكتكمل الخدمة بزز وناسية على الادوات باش كتخدم حتى سمية مابغات تخرج ليها من فمها .. قربات الكرسي عندو كترعد بيدها وقالت 

- حل فمك الله يخليك 

فتح فمو وعينيه مسدين وبدات تقلب ليه الضرسة بدون وعي .. بغات دور عند الممرضة وهي تشتت كاع الادوات بيدها اللي محطوطين فالجنب وتخلعات مارضاتش والمنرضة كتلقطهم واحد واحد .. زاد توثرها بالخصوص مللي سد عينيه ماتحركش وخلاها دير اللي بغات .. قربات مرة اخرى شافت الضرسة ديال العقل اللي مريضة وقالت 

- مامريضاش بزاف .. تقدر تخليها شرب عليها الثلج ..اااا الدواء

رد بنفس الوضعية: لا غير حيديها 

زادت عصبها توثرها ودخول ولخروج فااهضرة وسكتات وبدات الممرضة تعمر ليها الابرة ديال البنج وعطاتها ليها ليدها .. جمعات اميرة النفس وهي دايرة القفازات باش تبدا الخدمة وكل شوية تسها فملامح وجهه ويتخيل ليها نفسها عنقاتو وترجع تنعل الشيطان ووسط السهوة وعدم التركيز ضربات ليه الابرة فاللسان فبلاصة لحم الضرسة


هرب وجهه وحل عينيه وحط يدو على فمو وهي تبعد مخلوعة ماراضياش كتعتذر 

- سمح ليا سمح ليا ... سمح ليا 

هز وجهه عاقد حجبانو و شاف فيها كيتأمل وقال : دكيتيها ليا فاللسان !

قالت بتوثر : لالا عير قصتك ماشي بلعاني ... راه بغيت ندكها من لداخل ا.اااا...ا اصلا ماخرج البنج 

سكت مقال والو ورجع تكا ولاكم مسدش عينيه هاد المرة وبقا كيشوف فيها وهي خدامة فالضرسة وحاسة بيه كيفليها ويحدق فالسنسلة ! اه السنسلة ديالو اللي هداها تفكرات باللي محيداتهاش وزاد توثرها ... شنو غيقول فراسو دابا ؟ شنو راه كيدور فراسو 

بنجات ليه الضرسة وخلاتو يرتاح وناضت الحمام سدات عليها وبدات ترش على راسها الماء باش تفيق شوية وتيحد منها التوثر والارتباك وتهدن شوية قبل متسخف عليه .. حلات شعرها نفضاتو باش تفوه و رجعات عندو مرة اخرى نسات ماجمعاتو وشدات الادوات بدات تهرس الضرسة وتقسمها وسط اللحم وهوا حاضيها وشعرها كل مرة يهبط على وجهه وكترجعو ليها الممرضة اللور وهوا كيرجع يهبط ويديها مشغولين ماعندها كي دير ترجعو ، لحضة مشات الممرضة تجيب ليها ادات تخدم بيها وطاح الشعر على عينيه وهوا كيشوف فيها وهز يدو ردو ليها ورا ودنيها حتى صفرو ليها ودارت بيها الدنيا بدات تعرق بوحدها وبعدات يدها دايخة كتشوف فجنابها حتى وقفات عليها الممرضة ... ماحليتها البرستيج ديالها قدامو ولا لبرسيج ديالها قدام المساعدة ... عيات تقاوم وكل مرة طيح شي حاجة وتلف مكتعرف راسها فين وصلات حتى نطق وقال بهدوء

- غيير بشوية عليك 

بلعات ريقها مجاوباتوش وبدات تحيد الضرسة طريفات باش مضروش وهوا كل شوية يبعد الشعر على وجهه ويردو ليها ورا ودنيها قدام الممرضة اللي هازة البلاطو حداها وحالة فمها كنشوف فيه وتشوف فيها


اخيرا حيدات ليه الضرسة وخيطات اللحم وهي على اعصابها ماسلات حتى عرقات ونشفات عاد ناضت رجعات اللور وحيدات القفازات وناض حتى هوا حط منديل على فمو وجلس فالبيرو قدامها في حين خرجات الممرضة وخلاتهم جالسين واميرة كتكتب ليه الدواء

اميرة : عنعطيك مسكن شربو دابا ... قبل ميمشي البنج وتنوض عليك 

شاف فيها بابتسامة مخفية وقال : ماعندكش شي مسكن كيسكت القلب؟

بقات ساكتة دارت راسها ماسمعات والو وعطاتو الورقة .. شدها وقال بمجاملة

- شكرا ... بغيت نقول ليك ... باللي يدك حنينة 

ابتاسمات بمجاملة كتأمل فيه خلسة وقالت 

- شكرا 

تسناتو ينوض باش تقدر تنفس لاكن بقا جالس وبدا كيدور عينيه فالعيادة وقال 

- زوينة العيادة ديالك 

ابتاسمات وهي كتخفي تووترها وقالت

- شكرا 

رجع شاف فيها وقال بابتسامة كيضحك بسخرية 

- عشر سنين دغياااا دازت... بحال الى غير لبارح 

تنهدات وقالت : حنا اللي كنكبرو .

تنهد : بصح ... حنا اللي كنكبرو 

اميرة : ماخصكش تهضر .. الجرح مزال جديد 

شاف فالجنب كيتنهد وقال : وفين عمر الجرح قدام (رجع شاف فيها ) تبدلتي 

هبطات عينيها ساكتة وبدات ترجع الشعر اللور ...هزات نص عينيها وبان ليها نص فسميتها خارج من تحت الكم ديال القميجة جيهة العضلة فين واشمها .. تنهدات بعمق كتنخصص ورجعات هبطات عينيها قدامها . . . شاف خاتم فصبعها وقال بابتسامة مصطنعة 

- مبروك 

هزات عينيها باستغراب وقالت : علاش؟

شار بعينو لجهة الخاتم : الزواج 

جمعات يديها وقالت بمجاملة : الله يبارك فيك ..شكرا 

بقا ساكت كيتأملها بعينيه وهي متوثرة وقال 

- درتي شي وليدات ؟ 

شافت فيه بابتسامة : امم ... جوج توام 

جمع فمو فدهشة وقال بتردد: جوج ! كي درتي ليهم ؟

عقدات حجبانها : علاش فين كاين المشكل!

ارتابك وقال: غير قلت .. زعما ... كي درتي ولدتي .. بغيت نقول مابايناش عليك 

اميرة : هادشي اللي عطا الله .. ونتا ... عندك شي وليدات 

حرك راسو بالايجاب وابتسامة : وي .. عندي ولد 

شدات جبهتها وحسات بالدوخة ماكرهاتش تموت فديك اللحضة .. خانوها دموعها وتراكمو فعينيها حجبو عليها الرؤية ومع ذلك بقات صابرة ومحافضة على ابتسامتها وقالت

- الله يخليك ليك 

هبط راسو : امين 

اميرة : رجعتي استقريتي فالمغرب نتا والمدام ؟

شاف قدامو وقال : لا ... هادي ثاني مرة نجي لامغرب فهاد السنين كاملة ... والمغرب اصلا مشا مع ماليه .

حركات راسها : يعني استقريتي فألمانيا 

حرك راسو بالايجاب

بلعات ريقها وقالت بابتسامة : شنو درتي ... درتي شي بروجي تما ؟

حرك راسو بالنفي وقال معبس :لا ... خدمت مع الدولة ... داكشي علاش اتسقريت تما 

اميرة ة امم.. مزيان كان كيحسابني درتي شي حاجة ديالك 

حرك راسو بالنفي: كنت كنفكر ندير شي حاجة راسي فاش كان لعقل صغير... ولاكن الاقدار بدلات المنحى

اميرة : وشنو درتي؟

شاف فيها وقال : خديت دكتورة ودفعت لدائرة الاستخبارات الاتحادية الالمانية 

تفاجآت وقالت : ااه بصح !!! الله يوفقك 

حرك راسو : امين ... الزهر وصافي 

ابتاسمات: لانفوغماتيك كتنفع بزاف فهاد المجال ... التجسس والمراقبة ... تهكر اي نضام مثلا مزيان الله يفوقك ف... فخدمتك و ف فزواجك حتى هوا

ابتاسم بمجاملة : امين ... وحتى نتي الله يفوقك 

ابتاسمات امين 

ناض وقف يالاه وصل للباب ورجع قال 

- الى معندك حتى مشكل ..نقدرو نشربو كافي اونسوبل ... منها نيت تجيبي معاك توينز نتعرف عليهم 

جاتها الجلطة ماعرفات مادير وكفاش ترفض وهي مابغاش ترفض تقول اه ولا تقول ات ماحساتش براسها حتى لقات راسها كتعطيه كارط فيزيت وتبتاسم

- نشاء الله


خرج وخلاها جالسة شادة راسها كترجف .. دخلات عندها الممرضة مرة اخرى وقالت 

- ندخل المريض....

قاطعاتها بارتجاف : لالا منقدرش... منقدرش نكمل جاتني دوخة ... اعتاذري ليهم ولا ديري اي حاجة . 

خرجات الممرضة وخلاتها حانية راسها منهار ممصدقاش شنو وقع ... مكانتش متوقعة تشوفو من بعد هاد السنين كاملة . ومكانتش متوقعة يكون عندو ولد ... علاش هوا ر يكمل حياتو وهي لا ... علاش ماقدراتش تكمل علاش ؟ بكات حتى شبعات وهي تحت تأثير الصدمة ومشات خرجات من العيادة . تاصلات بامها خبراتها باللي غتمشي للدار البيضاء وفعلا شدات الطريق للدار البيضاء ... محتاجة تبقا بوحدها ... محتاجة تجلس مع راسها على انفراد بلا متسمع حتى واحد او تشوف شي واحد اخر .. يكفي الاحداث الغير متوقعة اللي عاشتها هادي بحد داتها خصها مدة طويلة علد تقدر تستوعبها . 

مشات لدارها بالدار البيضاء وجلسات فيها كتفكر وتربط الاحداث .. طلقات الاغنية (بيننا معاد) اللي كتفكرها فاجمل لحضات حياتها معاه وجلسات حداها كتبكي وتشهق وتنخصص وفكل مرة تسالا كتعاودها باش تبكي وتذكر الماضي حتى قاطعها صوت تيليفون فديك الحالة المنهارة وفنحات الخط بصوت مجروح 

اميرة : الو 

سامر: كيفك حبيبتي... شو الاخبار ... نطرتك اليوم كله الضاعر نسيتني 

اميرة : لا رد

سامر : بتمنى مااكون زعجتك يا روحي بس بتعرفي الازمة اللي....

قاطعاتو مغمضة عينيها وفرغات فيه الغضب كامل

- شوف ... ضرب على هاد الرقم سمعتي ... انا ماشي اميرة وماتبقاش تعيط ليا فهاد النمرة الله يرحم ليك الواليدين والى مزير سير للبنك يسلفك اوك باي . 

قطعات وبلوكات الرقم وتاصلات بعبد الاله فلحين 

- الو بابا

عبد الاله: الو يالاه لقتيني غنعيط .. واش مدزتيش عند ختك 

اميرة : لا جيت لدراي نيشان ... المهم بغيت نقول ليك داك اللبناني اللي كان جالس ليك على قلبك صافي راه مابقا منو والو مابقات لا خطبة لا زواج 

رد عبد الاله بسعادة : ااااااااا واللله مااااااا لايق ليك ... وا تهنييييييييتي سيري الله يرضي عليك ... دابا نتي اش بغيتي بشي زواج ؟ ها؟ واش انا مانع عليك تسافري... واش مانع عليك شي حاجة ؟ واش طلعنا ليك فالراس ؟ اش بغيتي بشي راجل يحرر فيك العيشة 

تنهدات بحزن: انا اصلا ماعندي زهر فهاد الدنيا 

عبد الاله : عندك الزهر اشمن ... سيري عيشي حياتك ... دوزتي حياتك فالقراية وتمارة وفاللخر يجي واحد ياكل ليك رزقك ويتبرع ليك بفلوسك ويجلش يحكم فيك ... بناقص من هاد الزواج خليك مع مك وباك وهانتي كتبني مستقبلك ومرتاحة وحنا حتى حنا مرتاحين ... دابا حنا شنو بغينا بشي نسيب اا؟؟؟ شنو بغينا بيه انا ميجي عندي حد مانمشي عند حد التيقااااار .... يعطيوني التيساع والى تزوجتي مغتبقايش عزيزة عليا 

تنهدات : اصلا مكاين زواج غير رتاح 

عبد الاله: وا ما عندك ماديري بييييه يخ منو 

سمعات سميرة كتعيط : وا بعد من البنت واش حمااااقيتي ؟؟؟ كبرتي وتسطيتي واش هي مادير دار مادير ولاد فاش غينفعوها هاد الفلوس!! لا عساااااك متسنطيش عندو 

عبد الاله: سيري بعدي ليا من بناتي نتي باغا تهججيهم ... سيري تزوجي نتي يالاه ! 

سميرة : لا نتا والله حتى تسطيتي!

عبد الاله : اشوفي .... الو اميرة.

اميرة : كنسمعك ابابا 

عبد الاله: يالاه تمشي معايا للعروبية واحد السيمانة ... يالاه تشبعي غير لبن و زيت مع راسك ... كن شفتي الدار كي صلحوها مابقااااتش بالتراب دارو ليها الحيوط والسدادر... يالاه تمشي عند زهرة وحليمة يتهلاو فيك وتبدلي الجو واحد الشوية... انا غنمشي يالاه معايا 

اميرة : نشاء الله ابابا ... يالاه انا غنقطع 

عبد الاله: وا الله يرضي عليك... عنداك ياكل ليك شي حمار مخك بالزواج راه غير غيضحكو عليك ...ياك ابنتي؟

اميرة : صافي كون هاني ... يالاه بسلامة عليك

عبد الاله : يالاه الله يعاون ... عنداك تسنطي لشي واحد يضحك عليك ... الله يرضي عليك بسلامة ... ماعندك ماديري بشي زواج ... يالاه بسلامة


قطعات كتنهد وتكات يالاه نشفو دموعها وهوا يصوني ليها تيلي مع 12 ديال الليل وفتحات الخط بصوت تقيل 

- الو وي؟

رد عليها صوت غارق غليض هادىء : اميرة... لاباس عليك 

حلات عينيها وخفق قلبها وجلسات فراس الناموسية جامعة رجليها عندها 

- الحمد لله ... شكون معايا؟

محمد: محمد 

اميرة : الصمت 

محمد: هانية ؟ ياكما صدعتك 

قالت بمجاملة : لالا 

محمد: بغيت نقول ... الى كان عندك شي ووقت غدا نديرو كافي؟ ممكن ؟

بقات ساكتة كتمص فشنايفها بتردد وقالت

ماعرفتش ... غدا مشغولة ... انا اصلا فكازة 

محمد : ماشي مشكل ... نجي عندك لكازا 

اميرة : الصمت 

محمد: اوك ؟ نجي غدا عندك شوفي الوقيتة اللي تكوني مسالية فيها 

اميرة : خلي لمرة اخرى حسن 

محمد : انا غادي فحالي مابقاش ليا بزاف هنا ... بغيت نشوفك غدا ونهضر معاك ضاروري

بقات ساكتة شوية وقالت: اوك نشاء الله 

محمد: صافي .. غدا نتشاوفو نشاء الله ... يالله تصبحي على خير 

اميرة: تصبح على خير 

قطعات وقلبها كيرفرف ماكرهاتش فوقاش يوصل غدا تشبع فيه غير شوفات ... ولاكن خصها تبتبت دابا ماتنساش شنو دار فيها ... الى قبلات تلاقا بيه وكتعامل ببرودة راه غير باش تبين باللي نساتو مابقاتش متأثرة او كيهمهتطا شنو وقع ... ولاحت كلشي موراها كأنه شيئا لم يكن 

ناضت للماريو بحماس كتجبد الحوايج تشوف باش غادي تلاقا بيه لاكن ماقنعاتها حتى لبسة ومشات تنعس كتخيل لقاء الغد .


صبح الحال وفاقت نشيطة فطرات بشهية وخدات دوش فاعل تارك وخرجات للصالون مباشرة بدات تقاد ومتحمسة للقاء باش تبان فأبهى حلة ويندم على شنو خسر وشنو ضيع من يديه . بدات باليدين والرجلين والشعر ... شي كيصبغ ليها الدفار وشي كيلوي ليها الشعر وشي كيصايب ليها مكياج خفيف يليق بملامحها لانه غير شوية ديال المكياج الى دارتو كتبان كي الطعريجة . يكفي تبرز ملامح وجهها فقط . خرجات من تما هازة يديها خايفة تخسرهم وطلعات فسيارتها تشري لبسة جديدة باش تزيدها التقة فالنفس وتكون مرتاحة .. مشات كتسارا وتقلب وتقيس ... هادي جاتني هادي ماجاتنيش ... هادي ديال النهار هادي ديال الليل .. قلبها غيتشق بالفرحة وكتخيل كفاش غتصرف معاه وكفاش غتجلس وكيفاش غيكون اللقاء . داز النهار كامل فالتوجاد وفالمشتريات وطلعات فسيارتها لابسة ومقادة الحالة .. فديك اللحضة جاها اتصال وفتحات الخط قبل ماديماري السيارة 

اميرة : الو 

محمد : الو اميرة ... انا وصلت لكازا دابا ... نتلاقاو فمروكو مول نديرو كافي تما ؟

اميرة : اوك نشاء الله 

محمد : ندوز عليك ؟

اميرة : لا انا باقا يالاه فقت ... حتى نجي راسي

محمد : اوك ... يالاه انا غنتسناك تما 

قطعات كتفتف بالفرحة وشدات الطريق مباشرة لمروكو مول ودخلات كتسارا على الحوايج وحرام واش داكشي اللي بغات ما بغا يبان . 

اخيرا من بعد ساعة ونص ديال التقلاب خرجات جاهزة ولابسة تما و مشات جهة القهاوي كتقلب بعينيها وتاصلات بيه 

اميرة : الو .. اينا بلاصة نتا 

رد بسرعة : فينك نتي نجي عندك 

اميرة : لا غير قول ليا فينك 

نعت ليها المكان ومشات لابسة صاية موردة حد الركبة وموكاسان زرق وتيشورط داخلة فالصاية بيضاء وشعرها مطلوق والصاك حتى قربات ليه وناض وقف بابتسامة كيشوف فيها بملابس رياضية ... تيشورط لاكوسط ودجين واء رياضي ... شافتو بالابيض مبهج ماكرهاتش تعنقو تفدي فيه داك الشوق لاكن ميستاهلش داكشي اللي دار فيها ماشي قليل... ولاكن هانية اللي فات مات وتنسا ودفناتو عشر سنين ودابا عصر جديد خصها تمشي مع الوقت كما غادية وتبين انها عايشة السعادة بيه ولا بلا بيه


الشوق وعزة النفس

وقف ليها بابتسامة ومد يدو سلم عليها حتى جلسات وجلس حداها .. ابتاسمات ببرودة وقالت 

- تعطلت ؟

بقا ساكت كيشوف فيها بابتسامة وقال

- شوية ... شنو تشربي؟

اميرة : بغيت شي حاجة باردة . شي كلاص 

قال بسعادة : مرحبا 

حطو ليها كلاص ودارت رجل على رجل وقالت 

- قلت تقدر تجيب معاك المدام حتى هي 

هز حاجبو وقال: وعلاش عنجيبها ؟

قالت بمزحة : مغربية بعدا ؟؟

حرك راسو بالنفي كيشوف فيها بابتسامة مخفية 

دارت ابتسامة صفراء وقالت : ايوا عندك الزهر ... طحت فيها ماشي مغربية ... اما كن كانت مغربية كن راها تابعاك توريك الخيانة 

استغرب من كلامها وجاتو الضحكة سكتات ليه الفم مالقا مايقول بقا غير كيشوف فيها ويضحك عاد قال

- ونتي ؟ 

قالت كتحرك بعفوية او كتدعي العفوية باش تبرد على الحرقة اللي فيها وترضي فضولها بتصرفاتها باش تعرف كولشي عن طريق الدنيا هانية اللي فات مات

...: اميرة : انا مالي؟

بقا كيضحك بوحدو ويحك فجبهته وقال

- والو ... المهم نتي لاباس عليك ؟ اش كتعاودي

هزات كتفها وهي كتاكل لكلاص وتهبطو بارد بزز منو وقالت

- بييخير ... حسن من اي وقت الحمد لله 

هبط راسو كيشوف قدامو وقال : الحمد لله 

شاف فيه بابتسامة صفرا وقالت : كي بقات الضرسة ؟ 

رد بهدوء: شوية ... تهنيت منها 

اميرة : دابا طارت ليك الضرسة ديال العقل ودات معاها حتى العقل داكشي علاش خليتي المدام بوحدها وجيتي ... (هزات كتفها كتحرك لكلاص بمعقلة ) عرفتي كنهضر بصح كن غير جبتيها معاك 

شاف فيها مدة طويلة بابتسامة مخفية وقال

- راه غنديرها بصح 

هزات كتفها: وشنو فيها ... ديرها 

محمد: وجيبي حتى نتي راجلك ... علاش مجبتيش معاك توينز ؟

شاف فيه بابتسامة صفرا وقالت : فلاكخيش ... مرة تخرى نجيبهم ليك... ايوا ... وولدك فين خليتيه ؟ مع المدام ؟

هبط راسو كيحرك القهوة : اه 

اميرة : متأ... عرفتي نتوما الرجال مافيكمش التيقة ابدا .... دابا خلييتيها مسكينة قنطانة وخرجتي تفوج . كن انا بلاصتها والله ماتفوت الباب ... (تنهدات) اييوا ولاكن هي عقلية اروبية حتى للقاع دوماج كتيق مسكينة 

هي كتهضر وتعيب وهوا مبعد داير يدو على لحيتو وساهي كيشوف فيها باعجاب وفدهشة فنفس الوقت 

محمد: باقا نتي هي نتي 

ضحكات بسخرية : لالا تبدلت .... عرفتي وليت عارفة باللي الدنيا متسوى والو الله نضحكو عليها كما كضحك علينا ... علاش اصلا غناخدو الانور بجدية وهي اصلا ماشي جدية ! صافي ليس طومبي 

سكتاتو ماعرفش يضحك معاها ولا يعضر معاها بصح .. اكتفا يشوف فيها وفحركاتها الساخرة وقال 

- بدلاتك فرنسا يمكن !

هزات راسها كضحك والدمعة واقفة فعينها وقالت : 

بزاااف كتر مللي كتصور ... (تنهدات ) غنمشي لمرحاض سمح ليا وشد ليا بلاصتي ههه عندتك تجلس فيها شي وحدة 

خلاتو غير كيشوف وناضت مشات كضحك .. يالاه بعدات وهي تهبطهم حجر على خدها خلات سدات عليها ووقفات قدام المراية كتبكي وتشهق وتشلل فمها حتى سخفات وتكات على لافابو بيديها كترتاح وناضت وقفات شاف فالمراية بجدية ونضرات قاصية .. كارهة ضعفها وعينيها اللي كل شوية يتزيرو ... صايبات شعرها وبردات وجهها وخرجات من المرحاض مشات عند كضحك وجلسات 

اميرة : بمزحة ) حساب ليا غنلقا شي وحدة جالسة بلاصتي 

هبط راسو كيحرك القهوة مضحكش و معجباتوش المزحة وسكت مجاوبهاش ... حتى هي سكتات وبدات تهبط لاكلاص بزز منها .. طول الصمت وبغات تهضر تكسر الهدوء لاكن جمعات فمها حتى هضر بعقلانية وقال

- واش فيك الجوع ؟

حركات راسها: لا تغديت ..شكرا ... لكلاص عندهم زوين ...

قاطعها تيليفونها وهزات تشوف شكون ... لقات سامر المتصل وتكوانسات كتشوف فتيليفون وتشوف فمحمد بنص عين وهوا كيشرب قهوة فهدوء .. زيرات على سنانها وفتحات الخط وتعمدات يسمعها عاد ناضت من قدامو 

- اميرة : وي شيغي... (شافت فيه) واحد الدقيقة 

ناضت من حداه خلاتو غير معلق عينيه فيها ومتبعها وهي غادية قدامو كتهضر وضحك ووقفات بعيدة مقابلة معاه باش يشوفها وهي كتهضر بسعادة وناسياه واش جالس معاها


اميرة : شنو بغيتي؟

سامر : ليش عملتي لي حضر بالواتساب انا شو سويت ليك يا روحي 

اميرة : شوف سامر... الى كنتي بتحبني اجي عندي للمغرب 

سامر: بجي يا روحي ليش لا... بس مصاريف الطيارة و ...

قاطعاتو : انا غنحجز ليك على اول طيارة اوك ... اذا كنت بتحبني اجي عندي

سامر : ماشي يا روحي بيجي... انت حجزي لاكان 

اميرة : اوك ... انا غنحيد ليك بلوك 

سامر: شو؟

تنهدات : انا راه شيل الحضر اوك ... يالاه بشوفك ففهاد الايام بالمغرب .. انا الليلة غنحجز ليك من باريس للمغرب بس بلا متجيب الشنط الكبيرة جيب شنطة اللي طلع معاك للطيارة ... يالاه مع السلامة 

قطعات ورجعات لبلاصتها بابتسامة وجلسات حداه وهوا ساكت كيحرك فديك القهوى وكيكمي ...شافتو كيكمي وتصدمات وقالت باستغراب ودهشة 

- رجعتي كتكمي؟

شاف فيها ببرودة وقال: وفين كاين المشكل

اميرة: ماكنتيش كتكمي !

محمد: ماتبليناش فالمراهقة ها حنا تبلينا على شرفنا ... البلية ماعندهاش سن محدد 

بعدات وجهها مخنوقة وقالت: الله يعفو 

ساط للجهة الاخرى وقال : راجلك ؟

اميرة : اه 

بقا ساكت وهي قالبة وجهها من ريحة الكارو حيت باقا كتشرب الدواء على الرية ومزالة كتخنق .. شاف فيها وقال

- خنقاتك الريحة ؟

حركات يدها فالهوى كتنش وقالت: خود راحتك 

طفا وقال بهدوء : راجلك مكيغيرش عليك؟ 

استغربات وقالت : بحالاش؟

شاف فيها شحال وقال: زعما عندو الدنيا هانيا هاد الجلسة هادي ؟

قالت ببرودة وابتسامة: عادي ...قلت ليه غنشوف واحد صديق الطفولة وصافي عادي

ضحك بسخرية للجنب وقال : صديق الطفولة ! ...مزيان ... كان عليه يجي معاك يتعرف حتى هوا على صديق الطفولة 

اميرة : كيتيق فيا ... وعارف نيتي كيفاش دايرة ... انا بعدا خرجت بالعلم ديالو .. ونتا خرجتي بالعلم ديال مراتك

هز حاجبو: وراااجل عندك تبارك الله

اميرة : وا مرااا عندك تبارك الله ... كن كنت بلاصتها كن وريتك 

محمد: حتى انا كن كنت بلاصت هاد راجلك هادا كن وريتك.... (صغر عينيه) عندو مرا بحالك ومكيغريش عليها ...راه ما رجلة ما والو 

ابتاسمات وقالت بكل تقة : وكن نتا فبلاصتو شنو كنتي غدير

رد بتلقائية: مغتخرجيش تلاقاي با صديق طفولة لا حب طفولة ... ونتي عارفة اللي كاين بلا منشرح ليك 

بقات ساكتة وساهية فيه وقالت : كن كنتي بلاصتو بصح غدير هاكا؟؟ ... وعلاش مكتغيرش على مراتك ؟

ربع يديه فوق الطبلة وقال: باش عرفتيني مكنغيرش على مرتي؟

دورات وجهها للجنب مجروحة وقالت

- وشنو ندير ... الى مكانش راجلي كيغير عليا ؟ هادا تفكيرو ... ويمكن كيتيق فيا كتر من القياس .. وحتى انا كنغير عليه 

قال بجدية وهوا كيشوف فيها : اميرة ... غنضهرو دابا نيشان ... نتي مامزوجة ... ما والدة 

شافت فيه بسخرية وقالت: باش عرفتيني؟!!

محمد: حيت اميرة اللي كنعرف ... كن فعلا كانت مزوجة .. و والدة ... مكانتش غادي تجي تشوفني ... كاينين شي حوايج اللي باييينين مكيتخباوش ... الا الى كنتي تزوجتي وطلقتي ولا ولدتي ومافراس حتى واحد ... انا من اللول عارفك كتفلاي

قلباتها ضحك وبدات ضحك وقالت: وشنو فيها الى عشت الدور شوية ههههه المهم اسيدي انا مامزوجة ما والدة ... ولاكن ماكرهتش نجرب الزواج بحالك هههه

بقا ساكت كيشوف فيها مطولا وهي كضحك وقال

- مامزوجش انا ااميرة ... وماعندي لا ولاد لابنات


صدمها خلاها كتشوف فيه مبلوكية .. استوعبت وغمضات عينيها وحلاتهم وقالت بعقلانية 

- وفين كاين المشكل؟ كنتي مزوج ... ولا والد ... فين غيكون المشكل ... الله يكمل عليك بلخير 

تنهد وقال : كنهضر معاك بصح اميرة ... انا مامزوجش ... وماعندي لا ولاد لا حتى حاجة ... فاش قلتي ليا فالعيادة باللي عندك توام ... قلت ليك حتى انا عندي ولد ... ضحك وصافي 

قلبات وجهها وقالت بهدوء : ماعنديش مشكل اصلا تكون مزوج ... ولا مامزوش ... نتا حر ... وكل واحد حر فراسو 

هبط راسو قدامو ساكت ورجع شاف فيها كيتأمل ملامحها ولباسها وهي ساهية فالجنب جهة النخل اللي قدامهم على برا والهواء كيضرب فيها .. بقاو مدة طويلة هاكاك وتلفتات بهدوء قالت 

- خاصني نمشي دابا .. 

شد ليها فيدها فوق الطبلة بغا يوقفها وهي تجرها بسرعة عندها وقالت بلا ماشوق فيه بجدية 

- ماتحاولش

وقف : باقي ماهضرنا ا اميرة .. وباقي عندنا فاش غنهضرو 

هزات صاكها بهدوء: حتى حاجة مكتستاهل نهضرو عليها (شاقت فيه بكل تقة ) بغيتي الصراحة امحمد ... انا نسيت كولشي ... بديت صفحة جديدة ... ومابغيتش نجبد الصفحة دالماضي .... جيت نشوفك حيت فعلا خاصني نشوفك ... حيت كنعرفك وعشر سنين ما شفتك ... ماشي شي حاجة اللي ساهلة ... ودابا كنحس براسي مكنعرفكش .. ماعفتش علاش كنحس براسي مكنعرفكش ... سمح ليا خاصني نمشي 

شد ليها راعها : اميرة ... وقفي بلاتي ... انا باقي هوا انا .... نقدر نكون تبدلت عليك شكلا ... ولاكن راه ...

قاطعاتو وبعدات يدها : شنو الفائدة دابا ؟ ... تكون نتا .. ولا ماشي نتا ... حياتك فألمانية ... وانا حياتي هنا ... تأملت اللي ماشي ليا وتصدمت .. وتعلمت ... انا مابقيتش صغيرة 

تدخل بسرعة: كتعاودي نفس الغلط ... نفس الغلط ا اميرة ... على الاقل غير سمعيني 

حطات الصاك وجلسات : اوك ... هانا غنسمعك واخا ماعندكش علاش تبرر حيت اصلا مكاينش علاش تبرر ليا .. واخا هضر انا كنسمع


لم اكن عدوتك ... لاكنك حملتني من العذاب ما لا يحمل الا ... العدو

ربعات يدها وجلس قدامها فحيرة وجدية 

- واش مابغيتيش نشرح ليك 

اميرة : يالاه شرح

محمد : وعلاش كتهضري هاكا؟

اميرة : كنتسناك نشوف شنو غتقول

تنهد كيسوط وجلس مهبط راسو : اولا انا مخنتكش؟

اميرة : كفاش خنتيني؟؟؟ 

محمد: انا متزوجتش كما نتي كان كيحساب ليك ... انا طلقت مباشرة فاش درت الاوراق ... انا تزوجت على قبل الاوراق 

قاطعاتو : المشكل ماشي فالاوراق... المشكل فيك نتا علاش خبيتي عليااا؟

غمض عينيه: خليني نكمل 

دورات وجهها وسكتات

محمد: ماكنتيش غتيقي بيا ... واش كنتي غتيقي ونتي فداك اللاج ... كنت باغي نقول ليك راه غندير مارياج بلو ... ولاكن قبت البنت باقا صغيرة اش كتعرف على المارياج بلون ولا غوز !! كتعرف مارياج واااحد هوا اللي دايرين واليدينا ... صافي ... مشيت لألمانيا وسكنت بوحدي ... كنعرف بنت وحدة هي نتي ... نهار عرفتي كنت غنتسطا ... ماعرفتش شنو ندير ... نرجع ولا نبقا ولا شنو غندير

غرغرو عينيها وقالت : واش عارف شنو داز عليا ؟؟؟ واش عارف باللي بسبابك نعست فالسبيطار شهر والانابيب فحلقي كيضروني ... واش عارف باللي نجيت من الموت ... وباللي دخلت فاكتآب حاد ... وباللي كرهت العالم .. وكرهت حياتي ... واش عارف باللي مكنتش كندوق النعمة ... وكل مرة غادية لسبيطار ... كل مرة مخنوقة .... كنبات كنصلي وكنبكي حتى كيصبح الحال وكنعس فوق السجادة حيت عيييت تقهرت مالقيتش من غير سيدي ربي اللي يهز عليا شوية ويخفف عليا ... واش عارف باللي كل مرة كنعس فيها فوق السجادة ونفيق كنرجع للبكا والصلاة ... عارف باللي رجعت كنوزن 44 ... عارف باللي واليديا مرضو معايا ... سهرو معايا ... واش عارف باللي مرضت بالاعصاب بسبااابك رجعت كنتعصب ونشرب الدواء .... وتبوشيت فاارية ورجعت كنطيح بكريز ... واش عارف باللي سقطت داك العام واخا بابا كيخلص عليا الزبابل ديال الفلوس باش نقرا


حساب ليك ساهلة عليا ؟؟؟ حساب ليك كنت عايشة بيخير ؟؟ حساب ليك جاتني عادية ؟ ... انا اللي غلطت ... اما وحدة بحالي فداك السن اش كتعرف لشي علاقات .. ولا شي حب .... باباا مسكين مكان فهاهم والو ... كيشوفني كنموت وماعرفش مالي ... كنت كنسمع على الناس نتاحرو .. وماتو ... وتسطاو وكنت كنضحك ماخسابش ليا هادشي قاصح حتى لهاد الدرجة ... لدرجة كتغيب مكتبقا عارف والو ... لا نعمة كتهبط ليا لا ما كنشربو ... نتا معارفش شنو اللي داز عليا من موراك ... معارفش اصلا شنو كنتي بالنسبة ليا باش تعرف اشنو داز عليا .... مللي عارف راسك غادي تمشي علاش علقتيني بيك بديك الطريقة ؟ علاش خليتني نشوف فيك الجنة ... علاش باش تمشي وتقول ليا من تما انا تزوجت على الاوراق... اشمن وراق ؟ اشمن زواج ؟ اش غنعرغ انا اصلا فداك الزواج كما قلتي نتا؟ وزدتي خبييتي عليا حتى عرفتها انا من جهة اخرى 

بقا شاد فراسو ومهبط وجهه على الطبلة وهي كتنخصص .. تصدم مكانش متوقع غيكون داز عليها هادشي كامل .. سكت فخطرة وهي كترعد والناس كاملين كيشوفو فيهم 

اميرة : نتا عارفني ماكنتش كنتصاحب ... ماكنتش كنخرج بحال البنات باش نعرف نبغي شوية ونتيق شوية ... كنتي عارفني كنتيق اي حاجة ولعبتي بيا كي بغيتي وجاي دابا كتقول ليا هادشي ... هادشي ماعندو ميقضي ليا انا ... هادا ماشي مبرر قوي بالنسبة ليا 

هز عينيه فيها حومر وقال بصوت متقطع 
- ماكنتش عارف (مسح على وجهه) صدمتيني !

ضحكات بسخرية : صدمتك !! باش ؟ حيت مرضت وحيت دازت عليا ... نتا راك قتلتيني ... ولاكن كنحمد الله صباح وعشية حيت ازمة ودازت ومغتعاودش ... وتعلمت منها بزاف وبردت ... بردت ودابا بردت كتر .. ماتستاهلش ... والله ماتستاهل ... وخسارة ديك الايام اللي دوزت معاك ا محمد ... نتوما هاكا دايرين كتبقاو تقتلو فالبنات حتى كيرجعو كي لحجر وتردو ليينا اللومة 

قال بأسى وصدمة : مابقا ليا منقول... اي حاجة قلتيها عندك فيها الحق ... عندك الحق ... انا اللي منستاهلكش .. انا اللي مشيت وخليتك ... انا اللي علقتك بيا ... ولاكن اميرة ماعمرني نافقتك ... عمري كدبت عليك .. ومشيت باش ندير مستقبل ونجي ...وجيت .... 

هبط راسو وسكت 

اميرة : جيتي حتى دازت عشر سنين!!! ... جيتي باش تلاقا بيا صدفة ؟ جيتي باش تقول ليا هاد التخربيق ونتيقو انا بحال الحمقة ؟


تنهد وقال شاد راسو : سمحي ليا ... سمحي ليا بزاااااف ... (شاف فيها) بغيتك تعرفي حاجة وحدة ... عمري نسيتك ... عمري بغيت شي وحدة ... عمري تهنيت ولا عرفت الراحة ... ومزال غنأكد ليك هادشي ... وكل حاجة فوقتها ... ومغنمشي من هنا حتى نصفي هادشي 

وقفات كتمسح عينيها: عرفتي ... كتزيد تصدمني فيك والله ... قلت ليك ماشي هادا هوا محمد ... تبدلتي بزاف وخسارة حتى هاد البكا اللي بكست دابا ... بسلامة عليك 

هزات صاكها ومشات كتبكي خلاتو جالس ... دارت موراها على امل يتبعها لاكن ماتبعهاش ... تفقصات ورجعات بالزربة كتبكي لقاتو جالس كيهضر فتيليفون ونزلات علي بالصاك قدام الناس وكتغوت بهستيرية 

- الله ياخد فيك الحق ... عمرني نسمح ليك ... عمرني نسمح ليك فحياتي ... حسبي الله ونعم الوكيل فيك 

قلبات عليه الطبلة ومشات كتجري وتبكي ومع ذلك بقا واقف كيغوت فتيليفون والطبلة مقلوبة قدامو . ومشات طلعات فطموبيل كدعي فيه .. يالاه بغات ديماري وهوا يحل عليها الباب ودفعاتو كتبكي

- بعد مني 

محمد: نزلي مغتمشيش فهاد الحالة 

قالت مبحبحة: انا اللي نستااهل ... نستاهل ... سير بعد مني 

محمد : وا غير نزلي بعدا 

هبطها من السيارة وجلسات فوق الطرورطوار مابقا كيهمها حتى واحد يشوف فيها .. جاب ليه الكارديان قرعة ديت الماء حيت تقجات ومشان ليها الصوت وجلس حداها بغا يشربها وهي دفعها خواتها عليه 

- سير بعد مني ... بعد مني ... مالقيتي ماتقول هاا؟ مالقيتي ماتقول ... كرهتيني فيك ... كرهتيني ندمت اللي جيت 

بقا ساكت في حيرة وهي كتغوت عليه وفين ما يقرب ليها كضربو و عينيها خارجين بالبكا 

بكات حتى شبعات فاللخر هبطات راسها على ركابيها ودوراتو بيديها وبقات هاكاك مطولا ساكتة كتنخصص .. هزات راسها على غفلة ولقاتو قدامها جالس القرفصاء وكيشوف فيها بأسى وحزن كبير .. شاف فيه بنفس النضرة وقالت 

- مالك كتشوف فيا ؟ بقيت فيك ؟ انا مكنبكيش عليك ... انا كنبكي على راسي اللي تقت فواحد مكيسواش بحالك ... تقت فواحد دون المستوى .

حنا راسو وسكت مجاوبهاش ... عايرات فيه كيف بغات وهوا ساكت حتى بردات وناضت طلعات فسيارتها عاد هضر

- واش تقدري تسوقي ؟

دارت عندو شافت فيه مطولا عصبها كأنه كيقول ليها غير سيري بلا حزارة ولاكن ردي بالك .. ماكرهاتش ضربو بشي حاجة فديك اللحضة وقالت 

- سير بعد مني ... بببععبعبد مني حسن ليك 

سدات الباب عليها ومشات بحالها كتنخصص .. هزات راسها فالمراية بانت ليها كاط كاط بيضاء تابعاها من اللور .. حققات فيها مزيان وتأكد ليها انه تابعها .. كسيرات وكسيرا موراها .. مشات كتبكي نيشان للدار ودخلات السيارة للباركينغ فلاكاف وطلعات بحالها لدارها فالاسانسور... بالغدايد اللي فيها ضرباتو بالتليفون وماشافتوش تهرس حتى لاحت الصاك وجبداتو عاد لقاتو مهرس كامل وكملات عليه ومشات غسلات وجهها وشربات الماء .. غادية كتنخصص جايا كتنخصص ومزال الفقصة ما بردات .. مشات نيشان للحاسوب قطعات البيي ديال الطيارة لسامر ب 400 درهم بلاا باكاج ف ريان إر ذهابا وإيابا وهي كتنكر.. واش ماعندو حتى 400 درهم يقطع بيها فطيارة واش هادي هي السفارة ! حتى 40 اورو تديه وتجيبو ماعندو يخ .. قطعات ليه وبعتات ليه مسج على الفايس باش يشد الطيارة الصباح وسدات الحاسوب ومشات تكمشات فوق الناموسية كتنخصص حتى داها النعاس

صبح الحال وصبحات خارجة برا شرات تيليفون دارت فيه الكارطة باش تعرف سامر فين وصل ... والصباح عندها هي هوا 12 ديال النهار . تاصلات بيه وهي فالطموبيل 

- الو سامر ؟ وصلتي؟

سامر : اييه حبيبتي انا بالاوتيل في كازا ... بس مثل ما نك عارفة مو عندي مصاري مشان ادفع الاوتيل .

ساطت من من مناخرها وقالت : اوك نتا فين بالضبط

سامر: بهاد الاوتيل ..شو اسمو .. شي....شيراطون 

حلات عينيها: شيراطون !!! مالقيتيش من غيرو تجلس فيه 

سامر: سألت على شي اوتيل منيح ونصحوني بها الاوتيل يا عمري .. تجي عندي ولا ش؟

اميرة : شوف انا مشغولة دابا ماعنديش كي ندير نجي انا غنعطيك العنوان وخد طاكسي اجي عندي انت نعطيك المصاري فك بيهم حريرتك وخرج من داك الاوتيل غالي مكاينش غير هوا 

سامر: ماني فهمان عليكي ؟

اميرة : اجي عندي لهاد العنوان انا ببعتو لك .

قطعات وسيفطات ليه لا دريسة ديال الدار ورجعات بحالها معصبة غير بوحدها ... يالاه دخلات للدار جاها اتصال من رقم فرنسي وفتحات الخط 

اميرة : الو ؟ 

الحوار بالفرنسية

صوت امرأة: اميرة ؟ انا حبيبة سامر بحالي بحالك ... بغيت نقول ليك ردي بالك منو ... هوا اكبر نصاب وقالي لبارح غيمشي للمغرب على خدمة مهمة ودرت راسي تيقتو وهزيت رقمك من تيليفونو ... غياخد ليك فلوسك وينصب عليك باسم الحب كما دار لشحال من وحدة ... انا نصحتك ... ونتي حرة مع السلامة 

قطعات عليها خلاتها مصدومة فبلاصتها والهضرة كدور ليها فراسها 

- ااه ... عليها بدا علي بالكريدي والشيكات والمشاكل وسلفيني ولد الحرام !! قالك السفارة ! باز 

قطع تفكيرها اتصال اخر وفتحات الخط 

- الو ... وي ؟

محمد : انا لتحت باغيك فشي حاجة هبطي عندي 

اميرة : مامسالياش

محمد: انا طالع 

اميرة : شنو بغيتي مني دابا ؟ عطيني تيساع باش عرفتي فين ساكنة . 

محمد : هبطي انا كنتسناك لتحت ونهضرو 

اميرة : عندك بعدا ماتقول ؟

محمد: واهبطي يالاه 

قطعات عليه و هبطات بييجامة وكلاكيطة جامعة شعرها لقاتو برا كيكمي لابس تيشورط كحلة وجينز عاطيها بضهرو المزدوج وكمشي ويجي بلاصتو 

ربعات يديها قدامو وقالت: نعام ؟

محمد: علاش طفيتي تيليفونك لبارح ...

ضحكات بسخرية: هادشي علاش جاي ؟ خفتي عليا ولا شنو ؟؟؟. . . شوف عفاك (وراتو الخاتم ) انا مخطوبة ... وخطيبي جاي عندي دابا .. مابغيتش يشوفني معاك (تيليفون كيصوني ) عمرو طويل ... الو سامر ... وصلتي ؟ انا حدا الباب كنتسناك فنفس العنوان .. باي 

قطعات وهزات راسها بابتسامة صفرا لقاتو مربع يديه وعاقد حجبانو كيشوف فيها 

- خطيبك هادا؟

اميرة : اه ... والى سمحتي سير بحالك مابغيتش يشوفني معاك ... غدير ليا مشاكل 

محمد: امم ... ندير ليك مشاكل ... متأكدة باللي خطيبك !

اميرة : والله حنى خطيبي ... حساب ليك انا كدابة بحالك ... هانا حلفت 

حرك راسو : اوكي ... مزيان 

تلفتات بان ليها سامر بحال شكل وائل كفوري جاي يحلف عليه الواحد ما نصاب ولاكن مع الاسف المضاهر خداعة ولاعب على الشكل ديالو بامتياز 

ابتاسمات وقالت : فوالا ها خاطيبي .. يالاه باي 

يالاه دارت بغات تمشي وهوا يجرها من يدها وشدها من خصرها وقبلها بقوة من فمها وهي مصدومة قدام سامر اللي حل فمو مصدوم

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.