شدات طريق لكازا من جديد غادية فالليل وكتبكي مابغاتش تكشي لدارهم ولا هما عارفينها جات . المهم بغات تنفارد فين تبكي على خاطرها بالفقصة وتبرد على راسها بلا مايقاطعها حتى واحد ... غادية وكتبكي وتشهق بوحدها حتى شدها رادار ووقفوها البوليس حيدو ليها الاوراق... ماقدراتش تهضر ولا تنطق بقات غير كتنخصص وطاحت فبوليسي باقي شاب مابغاش يزير عليها وشافها بنت زوينة تساهل معاها لاكن طلب ليها النمرة ... هنا تعصبات عليه وجبدات لفلوس حطاتهم وبدات تنكر حتى ردو ليها وراقها وزادت كتبكي.. انا ماعندي زهر... انا ماعندي نفس... انا ماعمرني نفرح ... انا مكتوب عليا نعيش حياتي هاكا حتى دخلات فواحد السيارة وهي فلوتوروت وتقلبات بيها الطموبيل للجنب حتى تقلبو عينيها وتخلعات بغا يسكت ليها القلب ولحسن الحظ ما وقع ليها والو وكانت غادية بشوية يالاه فاتت البوليس مزال ما زادت فالسرعة ، لاكن فاش خرجوها الناس من السيارة ماقدراتش توقف على رجليها بلخلعة وبدات كترعد وتقفقف وكاملة كترجف
- واش مات شي واحد فديك الطموبيل.. واش تقاس شي واحد .؟؟؟
طمنوها باللي متآدا حتى واحد وهي اللي تقلبات ليها الطموبيل اما هما تعجنات لهم من اللور لاكن ماتقاسش مولاها اللي كان تما وخرج عندها لقاها فديك الحالة كتغزل وجالسة فالارض كتبكي وتقفقف . ماقدرش يزيد يعاتبها وبداو كيهدنوها ... جاتها الضبابةة على عينيها بالدوخة وتخلعات بزاف مابقاتش عارفة شكادير وفالخلا والضلام والناس واقفين معاها وكاين اللي مشا بحالو بقات غير هي واللي ضربات وشي عائلة قليلة نزلات من واحد السيارة مابغاوش يخليوها بوحدها حتى يجي عندها شي حد . جابو ليها تيليفونها من الطنوبيل وهي متوترة ومرتابكة وكتنخصص . شدات وبدات تصوني وتعاود على نفس النمرة بدون انتباه على امل تجاوبها سلوى والرد مكاينش ... تعصبات وبدات تصوني بلا تركيز حاى تحل الخط ونهارت هي اولا بالبكاء والصوت كيتقطع
جرها عندو عنقها وديمارا الطموبيل وهي كتبكي فحضنو وهوا كيطبطب عليها ويبوس راسها ودوزها لباحة استراحة خدا ليها عصير وميكة ديال الحلوى ورجع عطاها ليها ... وسط ديك الخلعة وديك البكا جاتها الضحكة حسات بيه مزال كيحسبها درية صغيرة وشاري ليها السقاطة كما كان كيدير...حسات بمحمد اللي كتعرف فديك اللحضة وشافت الاهتمام فعينيه وحتى الخوف وكل شوية يسولها واش خاصك شي حاجة .. واش كضرك شي حاجة وهوا غادي ومعنقها وهي معنقة ديك الميكة وساكتة يكفي تكا على صدرو هاداك هوا الشكلاط ولكلينيك عندها
وصلها للكلينيك ونزل شاد فيها وهي شادة فجنبها دخلها ودخل معاها دارو ليها فحص بالاشعة وقلبو ليها البلاصة لقاو عندها تقصيحة فقط ماشي شي حاجة خطيرة وخرجها ردها للطموبيل تكات وطلع حداها كل شوية يقيس ليها وجهها ويسولها كيف بقات . داز على ماكدو هز العشا وكريم من الصيدلية دهن ديك البلاصة ومشا وصلها للدار ... بلعاني حتى هي بقات كتوجع وتشد فجنبها وهوا كيشوف فيها ويسول
- كضرك بزااف؟ راه خاصك دهني ليها هادي اللي عطاوك باش تكالمي لي دولوغ
اميرة : اه عرفت
شد ليها فيدها كتمشا وقال: واش نطلع معاك ؟
هبطات راسها مايلة بيه للجنب كتألم وقالت بصوت خافت
- لي بغيتي
طلع معاها للدار ودخل كيشوف فأرجاء المكان ... دار زوينة ونقية وكبيرة وفراش جديد كل حاجة فالمكان ديالها وكلشي عصري ... ماعندهاش صالون بلدي .. عندها صالون رومي كبير فيه اريكة ديال الجلد ابيض مرمي فوقها توب رطب كبير وقدامها تلفازة كبيرة بالطبلة ديالها بيضاء وحداهم بالكون كيطل على الزنقة وفواحد الكوان جيهة الباب ديال الدار فالقنت دايرة زربية ناعمة كبيرة مزغبة فالرمادي وعليها ارجوحة على شكل عش وفيها مخدة لداخل وحداها خزانة من الرفوف مستفين فيهم الكتب وطبلة صغيرة فيها بلاطو صغير وكاس ديال الهوى منسي .. شعلات الاضواء الخافتة ديال الدار ومشات جلسات فوق الاريكة المريحة كتنهج وجلس حتى هوا حداها فصمت من بعد ما حيد سبرديلة بقا بتقاشر بيضين ... جلس وبدا كيدور عينو فالدار وفالطبلوات المعلقة ويشم الرائحة الزكية اللي فيها وقال
- دارك زوينة...
ابتاسمات بمجاملة: شكرا
ابتاسم وقال : كتحس فيها بالراحة (تلفت شاف فيها ) مزال كضرك ؟ كفاش وقع ليك
تكات على ضهرها كتشكي وتعاود ليه وكتحسسو بتأنيب الضمير... حتى هوا حدر راسو وسكت ومالقا ميقول
محمد: فيين حطيتي الدواء ديالك
شارت ليه بعينها جهة الطبلة الزجاجية وهزو
- اري ندهم ليك ديك البلاصة
هزات راسها : بلاتي نبدل حوايجي
مشات لبيت النعاس عوجة شادة فحنبها حتى دخلات وهي تقاد فالمشية كأنه مافيها حتى ضربة وحلات الماريو متقلب على واحد البيجامة عندها عزيزة وكتعجبها كتجيها زوينة مع جسمها ... روناتو كامل عاد لقاتها وجبداتها لبساتها عبارة على سروال ناعم اببيض فيه وردات كبار ززهريين وقميجة ديالو حتى هي ناعمة نص كم ... تعرات كاملة ودخلات للحمام بسرعة جمعات شعرها وخوات عليها الماء وصابونة وخرجات كتجري مسحات بالفوطة وجرات واحد المجر فيه جميع مساحيق دجونسو وهزات زيت دهنات راسها كاملة وتبعات ليه طالك دردراتو على صدرها والابط والفخاد وبدت تسرحو بيدها ومسحات وجهها بكريم دجونسو ويديها ورجليها رجعات البشرة ناااعمة وشربات داكشي كامل ورشات ريحة خفييييفة غير فالهواء ودازت فيها .. خشات بانطوفة فرجليها باقا جديدة حيدات ليها تيكيتة ... طبعات السروال ولبسات حمالات صدر جداد عمراتهم من لداخل بالطالك ونقضاتهم ولبسات عليهم القميجة مبشاؤة منها للحم وبدات تقاد لكول ديال القميجة الواسع باش تبين شوية المفاتن وتوريه يسمح فيها شناهيا ..غير اجي وسمح مالها زرقة ولا قردة ! بغاتو يشوفها على طبيعتها وبدون مكياج . . . شافت راسها فالمراية عاجبها وجهها اللس كيلمع بالنقا وشفايفها وخدودها الموردة وطلقات الشعر وقاداتو وخرجات شادة جنبها كتألم
شافتو جالس وهز واحد الكتاب كيشوف فيه ... هز عينيه بعفوية شافها جايا وتصدم ... بقا ساكت كياكلها بعينيه وهي دايرة راسها ماشايفاهش وباللي الامر عادي ... جلسات حداه وتكات على جنبها فوق الاريكة وهوا كيشوف فيها باعجاب
- مزالة كضرك ؟
اميرة : امم
فتح ديك لبومادة وناض عندها جلس القرفصاء قدامها وسرح الكريم فيدو وعلى ليها على جنبها حتى بانت كرشها كاملة وهي خاشية وجهها فيدها زعما كتألم وشي الم مابقات كتحس بيه بمجرد ما دوز يدو على البلاصة ستحلاتها وعجبها الحال وبقات مدرقة وجهها .. بدا كيمسد ليها ديك البلاصة كاملة حتى كيضرب فحمتلات الصدر ويرجع يهبط يدو .. هبط ليها البيجامة بشوية وقرب من وجهها بابتسامة كيبعد ليها الشعر للور وقال
- شوية دابا ؟
بينات وجهها زعما راه كانت صابرة وقالت
- شوية ... سخون هاد لكريم
جبد كلينيكس من جيبو مسح يديه ورجع ليها بابتسامة كيداعب شعرها وقال
رد بهدوء بحال الى كيشرح لبنت 4 سنين: على سبة وي ... حيت معارفاش فين كنت ... وشنو واقع ؟ ... معارفة حتى حاجة ؟ امم... مسولتينيش .... ما خلتينيش نهضر ... شنو بغيتي ندير معاك .... الواليدة مسكينة مريضة .... وقلتها لييييك وقلت ليك معولة عليا .. نسيت واش عندها رونديفو مع الطبيب حتى عيطات ليا الصباح ... وكنصوني عليك تيليفوك طافي ... ومابغييتش نزير معاك فقضية تيليفون اللي كطفيي عليا وكتقولي ليا ديشارجا
هزات كتفها : مطيفيتوش ... نتا اللي مكتبغيش تجاوب
رد بهدوء وابتسامة : غادي نسلخك الى عاودتيها ... نهار كامل وانا مع الواليدة فلاكلينيك ... فديك الساعة اللي قلت ليك حتى نعيط ليك راه كنت مع الطبيب فالبيرو ... راه الواليدة مريضة احبيبة ديالي راه مأزمة وخايف عليها
تنهدات وقالت وهي مكمشة فحضنو : الله يشافيها ... ماماك عزيزة عليا بزاف .. نتا اللي فيك المشكل
اميرة : حشيتي ليا الهضرة ... نتا فاش هضرت معاك على الحرية حساب ليك انا شب عاهرة ولا سبق درت شي حاجة
باسها فحنكها وقال: انا معاتبتكش على الماضي ... درتي شي حاجة .. ولا مدرتيش انا مسولتكش ... وماعندي ماندير بشي حاجة دازت ماكنتش فيها انا اوك
هزات راسها شافت فيه بابتسامة وقالت
- وكن درت شي حاجة ... غتزوج بيا زعما
بقا ساكت كيشوف فيها وسملل عينيه وقال
- واخا درتي ديك الحاجة ... نتزوج بيك ونساو ديك الحاجة
دارت ابتسامة عريضة وقالت : ايوا انا راه عمررررني فحياتي درت شي حاجة ... وبعيدة بعيد البعد على دوك العلاقات ... واخا كنت ففرنسا ماكانتش عندي الحرية فداك الاتجاه اصلا
بقا ساكت كيشوف فيها وهي بين احضانو وقال بابتسامة
- صافي ؟ وراه مسولتكش
تستغربات وقالت : والله مادرت شي حاجة ... الى متقتيش نمشي انا ونتا عند طبيبة ... انا حسيت بيك فهمتيني غلط
بقا على نفس الوضعية كيشوف فيها بنقس الابتسامة وقال
تنهدات بتعب: والله اولدي كن خليتيني هنا مانقدرش نمشي
محمد : ماعندك ماديييري هنا اللي جا يبقا يمرض فيك لبارح كنسمع فهاديك كتجبد ليك فالضواسة واش مالها تسطات واش بنادم باغي ينسا وهي كتحك على الضبرة
الام : والناس كل واحد وفمو شغاندير ليها نجري عليها ؟
هزات اميرة راسها كتحل عينيها وقالت دايخة حدا فمو
- معامن كتهضر ؟؟
هرب راسو بالزربة وشد ليها فمها وقال بارتباك
- صافي الواليدة صافي انا غنشوف التحاليل ونجي
الام : الله يرضي عليك ... كي دايرة اميرة لاباس عليها ؟؟
رد بارتباك كبر : الحمد لله ماشفتهاش من ديك المرة
الام : امم . . . ايوا الى شفتيها سلم عليها .. يالاه الله يعاون
قطع وعض على شنايفو ودار عندها وقال
- تفرشت مع الواليدة تفوووو هه
اميرة: علاش؟
محمد : كنتي ناعسة علاش فقتي هه
اميرة : واش سمعاتني !!!
محمد : بيان سيغ غتكون سمعاتك
عضات شنايفها وقالت : واش عرفاتني معاك
محمد : صافي دابا ماشي مشكل .
جرها قبلها من شفايفها حتى ماشبعاتش وناض هوا وياها يشوفو شغلهم... هي تابعها توق مصيبة الطموبيل ماحدو معاها يديها ويوقف ليها على الشغل وهوا تابعو شغل كثير مع اقتراب موعد السفر .
رجع محمد بحالو وبقات هي فكازا مع العيادة ... تشغلات وتشغل حتى هوا لاكن بقا الاتصال بيناتهم .. كيدابزو 10 ديال المرات فالنهار ويتصالحو على اتفه الاشياء .. هي كتغضب الى غير حسات بهضرتو تقيلة وهوا كيتعصب فاش كتغضب على لخوا الخاوي... مرة تحسو تبدل كيبقا غير ساكت ومرا كيشد معاها الهضرة وكيعجبها الحال . المهم النهار مكديوز بلا دباز وصلح .
وصل موعد السفر وتقبط قلبها بحال اللي تقبط عليها فاش اول مرة .. تخنقات ورجعات عندها عقدة من السفر ... صبحات مخلوعة ومعلقة بحال الى دايرة شي مصيبة ماعندها حل .. كارهة الوداع .. كارهة البعد كارها كلشي وخايفة يتكرر نفس الشيء ويمشي فخطرة وترجع لايامها السوداء .
صونا ليها تيليفون وردات بسرعة
- الو
محمد : بوحدك ؟
اميرة : اه بوحدي
محمد : هانا طالع
اميرة : اوك
قطعات معاه ووقفات وسط الدار كتمشي وتجي وجهها صفر ومتوثرة وعينيها معلقين .. دق وفتحات ليه لقاتو مبتاسم ابتسامة حصرة كتوحي على انه ماباغيش حتى هوا الوداع لاكن كيبين على انه عادي وكيضحك معاها بلا ميدير ليها فيلم درامي ويحسسها باللي غادي وباللي مغيشوفهاش مدة طويلة .. عكسها هي باينة فوجهها مامرتاحاش وشادة البكية فحلقها واخا دايرة ابتسامة مزوقة بيها المنضر
عنقها كيضحك وقال : قنيصة ديالي ...
ابتاسمات بمجاملة وقالت : صافي غتمشيو ؟
لاسها فخدها وقال : صافي غنمشي ... مي غادي تجي عندي ... بلا متجي لألمانيا غنتلاقا انا ونتي فتركيا اوك
اميرة : نشاء الله
جبد الخاتم من جيبو ركبو ليها فصبعها وقال : ماتعاوديش تحيديه من يدك .
ابتاسمات وقالت : اوك ... حتى ماماك غتمشي ؟
محمد : غتمشي . ماعندها مادير هنا بوحدها ... سمير ساكن بوحدو وهشام كيعصبها كيجي سكراان بالليل .. غير هي وياه فالدار تبقا مقابلاه بحال لخدامة تصبن ليه وتوكلو وتهز ليه هبالو وهوا مسااالي
اميرة : ياك عندك شي ختك وحدة اخرى
محمد: وي مساكناش معاهم .. خدامة فطنجة قليل فين كتجي ... حسن نديها معايا حداها حنان و الدراري يونسوها .. تهرب من البشار شوية
اميرة : الله يكون معاها يا ربي ... يالاه نمشي معاك للمطار نسلم عليها
محمد : يالاه
لبسات حوايجها ونزلات هي وياه لطموبيلتها وقالت
- فاش جيتي؟
محمد : فطاكسي ... طموبيل راه غير كنت كاريها وصافي رديتها (شاف طموبيلتها ) تصايبات ليك مزيان ... على سلامتك
اميرة : الله يسلمك
محمد : الحديد كيتعوض الصحة اللي مكتعوضش
طلع معاها ومشات سايقة حتى للمطار ودخلات معاه لقات مو لابسة جلابة بيضاء وفولار وصابو وجالسة بحال الامانة ... مقبولة فوجهها وباقيين حروف الزين باينين وباينة فوجهها مرة طيبة ماشي شرانية .. حداها حنان لابسة سورفيت وسبرديلة ومحرفة بواحد الصاك صغير فيه الاوراق ديالها هي و اولادها .. معولة على السفر والتكرفيس وحداها ولادها جوج بنات كبارات فسن 14 سنة تقريبا شهبات بالشعر بوكلي والعوينات باين منتوج اوروبي و الولد صغير عليهم فسن 10 سنوات
جالسين فمقهى وحداهم البكاج .
وقفات عليهم اميرة بابتسامة فاجآتهم وبدات كتسلم
حنان : وااااو مفاجأة هادي
اميرة : هههه .
مشات باست اليد لعدوزتها وعنقاتها تعنيقة حارة وجلسات حداها
العدوزة : الله يرضي عليك ابنتي ... عدبتي راسك
اميرة : لاااالا مكاين لا عداب لا حتى حاجة
جلس حداها محمد كيشوق فيهم ويضحك والعدوزة كتسول عليها وعلى احوالها واحوال عائلتها وانيرة جالسة معنقاها وكتجمع معاها والوليدات كيضحكو . تنهدات العدوزة بأسى وقالت
- ايوا كن مكانت الموت ديال الحاج كوراه درنا ليكم العرس عاد مشينا كاملين
تنهدات اميرة وقالت : راه باااقي كاين مشاكل على الاوراق خاص يقبلو ليه ...
هز محمد حاجبو فيها تسكت عاد انتابهات لراسها وبدات دخل وتخرج فالهضرة
- يقبلو ليه ... ليا الفيزا
دارت حنان يدها على فمها كضحك وحاضياهم كفاش كيهضرو بالعينين
العدوزة : ايوا دغيا غيدير ليك الفيزا راه حتى انا دغيا دارها ليا
ابتاسمات اميرة بمجاملة ويأس وقالت : نشاء الله اخالتي ..نشاء الله
شافت فيها مة بنضرات حنينى وقالت
- الله يسخر ليكم ابنتي ... كنحمد الله اللي ختار بنت الناس .. كنت خايفة يجيب شي وحدة
دار بونية على فمو كيرمش وبدا يحنحن .. شافت فيه اميرة بنص حسات بيه مابغاش مو تكمل باش تزبلهاش وهما فالوداع ماعندهش حتى الوقت اللي يتصالحو فيه وقال
- الواليدة ... راك عيانة ماتجاهديش راسك
تنهدات مو وسكتات نسات اش بغات تقول
وصل وقت الرحيل وناضو وقفو ووقفات معاهم حتى اميرة كتفرد صبعانها مع بعضياتهم وتشوف فيهم واللي شاف فيها كتبتاسم ليه بمجاملة واخا قلبها محروق وباغا تبكي ... تفكرات اخر وداع بناتهم فاش كانو صغار وتزيرات بدات كتخس بقلبها كيضرب وماكرهاتش تمشي معاهم ... نفس الاحساس اللي حساتو كيتعاود .. موقفة الدمعة فعينيها قدامهم وكزيد معاهم تابعاهم بلا متشعر ... دفعو الشنط وقطعو البيي وبغاو يقطعو الحدود الممنوع عليها تفوتو وتلفتو يسلمو عليها يالاه دارو عندها لقاوها حاطة يدها على نيفها وعينيها محجرين بالدموع كتقاوم .. لاكن فاش شافوها طيحاتهم حجر كتبكي .. تفاجأو وعنقاتها حنان وقالت
عنقاتها العدوزة متفاجأة وقالت بأسى كتسكتها وتبوسها ودارو بيها بجوج كل وحدة منين تبوس وتعنق وتراري بيها ومحمد ساكت مهبط راسو كيشوف فالارض ومتكي بيدو على يد الباليزة اللي جار
العدوزة : يبكي عدوك ابنتي ... يبكي يعدوك ... غنرجعو نشاء الله ونديرو عرس لبنتي دايزو لكلام ... شوفي .. والله ودار ليم شي حاحة وسكتي ماقولتيها مانسمح ليك ... راني كنعرفو كيتعصب على نقشة... الى مشا حتى قال ليك شي كلمة ولا قلقك
شهقات اميرة كتنخصص ومربعة يديها كشوف فالارض بحال اليتيمة ماقالت حتى كلمة ... بقاو معاها حتى بداو يشيرو ليهم ليهم يدوزو وعنقوها ودازو كيدورو عندها بأسى ويشوفو فيها ومحمد كيشير براسو ليهم
- صافي سيرو سبقوني ... انا غنلحق عليكم
دازو مشاو وتلفت عندها جرها من حدا الناس مور واحد الحيط وعنقها بقوة بلا مقدمات ولا مأخرات وجلسات كتبكي وتشد ليه فالقميجة حتى كمشاتها ... باس جبتها بكل جوارحو ورجع عنقها مرة اخرى وقال
- مزال غنتشاوفو ... دابا عندك الحق تسافري مابقيتيش صغيرة .. وغادي نحاول باش نوجد الاوراق ... اوك
حركات راسها كتشهق .. شاف فوجهها بأسى وعاود عنقها وقال
سلوى: راه ماشي تمتيل ... راه خاصك تبدليه شوية راكي كبرتي مابقيتيش برهوشة باش يبقا هاز ليك فلخاطر عيقتي ... من نهار مشا لألمانيا ونتي خايفة ومرعودة غير بوحدك ... مالك اش واقع
سلوى: تفائلي بلخير ... ونساي كولشي حسبي راسك ييالاه تعرفتي عليه ... حسبي راسك تخطبتي لواحد كتبغيه ولاكن مكتعرفيهش وطبعو هاكا داير ... بنادم راه كيكبر وكيتبدل و كيعيش تجارب ... راه تكون عندو دابا شي 34 ولا ياك ؟ راه محمد ديال 24 ماشي هوا ديال 34 ... زايدون راه تحول من بلاد لبلاد وخدام ديك الخدمة حساسة ودازو شحال من عام وهوا على برا كفاش مابغيتيش يتبدل ... كن كان خايب كاااع ميجي يخطبك راه ماشي غير نتي اللي زوينة وماشي غير نتي اللي طبيبة ... ياك وفا بالوعد ديالو وختار يعيش حياتو كاملة معاك .. صافي كافي و وافي ماشي ضاروري الى معيطش راه كيتفلا ولا مدابز معاك ولا مابقيتيش كتعجبيه. وخاصك تعرفي واحد الحاجة ... دوك التصرفات ديال المراهقة نسااايهم حيت كان هاز ليك هبالك فاش كان مسالي مقابلك غير نتي وجالس لا خدمة لا ردمة وراسو خاوي ... اما دابا لا راه مليون مطرقة تخلي ليه الخاطر يهرب.. و حتى الواحد فاش كيموت ليه باه ولا مو اللي اغلى انسان عندو فهاد الدنيا ماكتبقا تحلى ليه حتى حاجة وموت الواليدين راه كيأثر فالشخصية دالانسان بزااااف واخا يكون هبيل راه يحس
اميرة : ماعرفتش.. حرت .
سلوى: ياك كيعيط ليك يوميا اش بغيتي تكددي؟؟
اميرة : قا ليا نسيفط ليه معلومات على الكلية اللي كنت كنقرا فيها ففرنسا
سلوى : سيفطيها ليه راه ضارروري غيسولو ويبحثو عليك ... يكون حط ليهم الضوسي ديال الزواج
اميرة : اه حطو قالها ليا ... وعطيتو المعلومات .. قالي يمكن غادي يوافقو ليه بالزربة مللي غيعطيهم لمعلومات ديالي والكلية اللي قريت فيها غيسهال عليهم البحث حيت شخصية مكشوفة واضحة
سلوى: اه بصح . . . غيسهال عندهم البحث ماشي بحالي كن كنت بلاصتك يبقاو ينبشو حتى يخرج ليهم الحنش ههه
اميرة : والو ... لقيتيني كنراجع شي دروس وصافي ... كي غادي مع الخدمة كولشي هوا هاداك
محمد : مزيان ... صافي راه مابقا والو نشاء الله ونساليو هاد طلع وهبط ... سيفطت هشام يطلع ليا شي وراق تما ... ساعا عصبني وتقيييل الى كنتي مساليا سيري نتي
اميرة : ماشي مشكل ... ديالاه هاد الاوراق
محمد : ديال الزواج نيت ديالاش غيكونو فنضرك ... مرض هادشي والله تا مرض ... طلع نزل جيب هادي سيفط هادا .. ورقة وحدة باش طلعها خاصك عليها سربيس و60 ورقة تخرجها وتجمعهم يالاه يعطيوك ديك الورقة بففف
اميرة : غير بشوية بلا متعصب راسك ... شوية بشوية كلشي غيكون هوا هاداك
محمد : كنتمناو . . شنو درتي دابا غتمشي لتركيا ؟ . .. . نتلاقاو تما نبدلو شوية الجو ..قبل ميبرد الحال
سمعاتو سلوى اللي لاسقة حدا ودنها وخرجات عينيها فيها
ابتاسمات اميرة وقالت : ماعنديش كي ندير دابا راك عارف بديت الخدمة فكازا وشديت مع الناس وعندي ليغونديفو مينكنش ليا نترحك
محمد: امم ... و دو جوغ ؟
اميرة : صعيب عليا بزاف .. بعيد الحال ومنقدر نجي على يوماين ونرجع ... السفر خصو نهار وتركيا بعيدة ... نهار غير ديال السفر وليسكال راك عارفة
رجعا اميرة للعمل وهي كتنسنا منو يتاصل بيها فكل لحضة وفكل ثانية بلا جدوى وفكل مرة كتفكر تتاصل هي كتراجع . وحتى من الاوراق اللي طلب منها حتى لواحد النهار تاصل بيها وردت عليه وهي يالاه فايقة دايخة وكتقاد حالتها فوق الناموسية بحال الى غتلاقا بيه وردت بسرعة وسعادة
- الو !!
رد ببرودة: الو وي اميرة ... سافا؟
اميرة : الحمد لله ونتا ؟
محمد: الحمد لله ... عيطت بيك باش نقول ليك راه واحد السيدة من عندنا غتجي عندك ... ديك اللي قلت ليك عليها
اميرة : اااه صافي فين غنالاقاها ؟
محمد: غتلاقايها فالقنصلية ... ولا سياج ديالهم راه تما فيه بزاف ديال الدول كيدفعو ليه لباسبور دابا بلاتي غنسيفط ليك المعلمات فالميل وناخد ليك رونديفو من هنا سيمانة باش تمشي
تصدمات بقات غير كتشوف فهاد الجرأة اللي رجعات فيه وهاد التصرفات اللي رجع كيدير معاها بحال الى مزوج بيها بزز ماشي بلخاطر ! ماشي مشكل ماعندهاش علاش تعصب ولا تكبر الموضوع وحسن تساعف .. ماشي حتى قربات توصل لمبتغاها عاد ضيع كلشي على اتف الاسباب.. ماعليش المهم راه ماناسيش وكيجري تما باش يتزوج بيها واخا مقصح راسو معاها بتصرفاتو ولاكن كيشفع ليه المعقول ديالو .
وصل اليوم الموعود ومشات ومشات هي وسلوى مونساها باش متخلعش .. حلقات على الحالة بامتياز ودخلات فالوقت لقات النضام والمراقبة وكلشي فالوقت ودخلات لمكتب لقات فيه مرى اجنبية انيقة ببذلة رسمية عبارة على ثنورة قصيرة وفيست ديالها فالباج وقميجة وشعر اشقر مع بعض الشيبات مرتب ومكياج مرتب ... ابتاسمات اميرة ليها وجلسات بلباقة وحداها سلوى .. من بعد مالقاو التحية . بدات السيدة كتطرح عليها بعض الاسئلة بلطافة وكتدون فالمذكرة ديالها واميرة كترد بطلاقة بالانجليزية . كانت خايفة من الاسئلة لاكن لقاتهم بساط فقط باش تدرس الشخصية ديالها وتشوف ردات الفعل ديالها واش طبيعية او لا . اخيرا تسالات المقابلة وناضت اميرة ودعات السيدة بلطافة وخرجات مشات بحالها فرحانة كضحك هي وسلوى
اميرة : تخلعت ... كان كيحساب ليا غتسولني شي اسئلة صعيييبة ساغة غي غير تجمعات معايا وصافي .
اميرة : نتي راكي حمقة واش هي جاية فمهمة رسمية ولا جايا طلع فالجبال ! راه حتى هما كيهتمو بالمضهر عنداك يحساب ليك ! تشوفي هادوك اللي كيجيو لهنا تقولي راه كاملين بحال بحال راه اللي كيجيو لهنا غير مزاليط بحال شي مغربي مشا لكينيا ولا غينيا ولا بوركينا فاصو يدوز الصيف مع شنيولة ! انا اللي كنت ففرنسا وكنعرف الناس كي دايرين وحتى هما كيلاحضو و كيشريو ماركات غالية وعندهم بوزبال اللي كيدخل فالدرابل ويزيد وحتى هما طبقات وكيشوفوك شنو لابسة الى دزتي من حداهم غير هما كياخدو نضرة خفيفة وصافي ماشي بحال هنا مكاينش .. دوزي حدا شي وحدة ولا شي واحد كيبقاو يفليوك بعينيهم حتى كيقربو يضربو الدورة على الراس
سلوى: وصافي صافي عطيتني درس
اميرة : وا نتي كتقولي غتجي حالتها علاه مال هادوك اللي كانو كيقراو معايا الطب كانو حالتهم ! كيلبس ليك غير الحاجة الزوينة وماتلقايهش كيدور ماعندو مايدار ... بغيتي تلاقايهم سيري ليمول لكبار غتشوفي الناس كي عايشين ماتشوفيش غير الزنقة ... راه الناس تمشي بليكارد كورد فباغي وتخلص بشيكات فلوي فيتو
اميرة : والله مانعيشها ايوا صافي على فعايلو الزينة والله تانجي فحالي اللهم نبور فبورش ولا نصبر على الدل .. الى طلع ليا فراسي غنخليه ونجي . مالي اختي علا نسمح فالعز ونمشي للدل ! مالي ! حياة وحدة غنعيشها نضيعها فالمشاكل لاصغر يتعوض لا خاطر لازين ونزيدو نتشواو فجهنم حتى هي
ضحكات سلوى حتى شبعات وقالت : الله ياختي مالكي على جهنم اش درنا
اميرة : وماتعرفي شكون يدخل الجنة نتي عالمة عليها !
سلوى : مكنآدي حتى حد مكندير كبائر كنخطأ بحال ايها الناس
اميرة : ومالي انا شفتيني كندير شي كبائر! ... كنخطأ ونستغفر وكنصلي ...راه غير الهضرة جات فالهضرة ماعرفنا شكون داخل جهنم وشكون داخل الجنة كل واحد بينو بين للي خلقو غير قلت ليك منصبرش على جهنم هنا ههه
طلعات فطموبيل وجبدات تليفونها ربطت الخط مع محمد
اميرة : الو ... سي محمد ...
نخزاتها سلوى : محمد صافي اشمن سسسييي محمد كتحليها ليه
ماحاوباتوش وخلاتو حتى قطع .. اما سلوى جالسة كتفقص حداها وتفور
سلوى: اوييييييلي كن كنت انا كن ربيتو والله تا نربيه يهضر معايا هاكا والله حتى نوريه
اميرة : بلا مبالات ) وصاافي ... والله مابقا عندي الجهد لشي مشاكل .. المهم راه كيجري ومنفخ خليه نشوفو اخرت هاد البالون غيطرطق ولا يتفش
سلوى: بااااز ليك ... بااااز
اميرة : تنهدات ) والله مابغيتش نضيع كولشي ... مابغيتش نشد العكس ... خلي حتى نشدو وتشوفي الى ما نقزت عليه كي بغيت ... دابا ماشي مشكل راه عارفني غنموت ونتزوج بيه .. داير فيا اللي بغا . فاش يتشد عاد غنتفاهمو المهم يلسق ماشي يطير ...بحال ديك المرة كان غيطير ليا كن ما ديك الكسيدة جات فاطريق
سلوى: ناري ياختي تبدل بزاااف
سهات اميرة قدامها وقالت : تبدااااال سي محمد ... تبدل رجعت كنشوف فيه شي حوايج .... غير الله يهديه وصافي ..... رجع ضارب الدينا بركلة.... بحال الى مابقا عندو ميخسر ولا صافي تحجر مابقات الدنيا كتسوى عندو والو ... من غير مو اللي هاز ليها الهم ... حتى حاجة اخرى مكتهمو .... حتى لببعد (تنهدات) حتى لبعد كيبرد ويقوي المشاكل ويطفي كلشي .
تنهدات بعمق وحركات السيارة مشات بحالها هي وسلوى ورجعات لخدمتها وهازة الهم لهاد الزواج ... يوم يشبه يوم ومحمد قاطع الهضرة معاها وهي كتسنا ... داز شهر والزيادة وهي مهمومة كتشوف هاد التصرف ديالو معاها .. واش خطيبتو ومتوحشها ما بغا يسمع صوتها ما قال نسول فيها واش مريضة ولا شنو واقع ليها ... والو كاع هادي غضبة غضبها عليها . خلاها كتحط راسها وتخمم وتبكي بوحدها وتبرد جرحها فالبكا حسن ماتنفاجر عليه شي انفجار خايب وضيع كلشي وتندم من بعد . تصبر وتسايس حتى يعرف راسو هوا الل غالط فحقها ... اللهم يندم هوا ولا تندهم هيا .
فعشية جالسة فيها مع عائلتها الصغيرة مجموعين على كسكسو و كيضحكو جاها اتصال منو .. طلات شافت تيلفون تخلعات عرفاتو معيط الا باش يرد عليها .. قبل متحل الخط طاح منها النص وناضت مت الطبلة مشات لكوزينة جاوبات
اميرة : الو ... سي محمد
محمد : وي الو ... هانيا كولشي مزيان
اميرة : مات اللي مات وتزاد اللي تزاد
محمد : شنو شكون مات ؟؟!
اميرة : غير قلت زعما راه ايام كثيرة دازت وقعو فيها احداث
محمد كفاش مهفمتش شنو وقع
اميرة : صافي ولو موقع والو .. نتا لاباس عليك ... خالتي وحنان لاباس عليهم ؟
محمد : صافي ليوم تسنات وخديتها دابا خاصك تجي عندي لهنا نتزوجو فالقنصلية ... زواج هنا هوا المهم باش يعتارفو بينا مزوجين و ديك الساعة نشوف شي وقت نهبطو فيه للمغرب نديرو عقد تما و داكشي اللي كيدار
خفق قلبها بقوة وحسات بالفرحة مع الخلعة تخلطو عليها العرارم وبقات ساكتة كتردد
- نشاء الله .. نشاء الله
محمد : صافي غنتسناك تجي لهنا
اميرة : فوقاش ؟
محمد : واشوفي نتي دابا فوقاش باغا ... ولا بغيتي تزيدي واحد العام اخر ؟
اميرة : انا غير سولتك فوقاش !
محمد : انا مكرهتش تجي غدا
اميرة : يعني وقت ما جيت
محمد : ماشي وقت ما جيتي راه انا مافيا اللي يتسنا باااااركة هاد العام مرضني هاد الضوسي
سميرة : غير سيري راه كندعيو ممعاك وباك كتر باغي غير يتفك منو
تنهدات وقالت: اويييلي حرام عليك ..نتي اكتر وحدة كتعرفي محمد
سميرة : كنضحك غير سيري .. الله يكون معاك
اميرة : حاسة براسي غندخل قفص مسدود
سلوى: قفص دهبي من بعد كيتصدا ههه
اميرة : الله ينجيني
عبد الاله : يااالاه الطيارة غتمشي مشا الحال
شارت ليهم ببيدها بسرعة ومشات لحقات على باها لابسة سورفيت كحلة وحداء رياضي وجامعة شعرها ديل حصان .. عارفة السفر وعذابو خاصو ملابس مريحة تصلاح ليه .
جلسات حدا باها فالطيارة وهوا خايف منها تقلع وكيدعي وجبد واحد المصحف من جيبو كيقرا القرأن والطيارة طالعة .. اما اميرة سهية فالزاج قلبها كيخفق بسرعة .. اخيرا وبعد غياب ... وعذاب وانتضار غتجمع معاه ... اخيرا بعد طول انتضار غادي ترتاح وتستقر واخا خايفة من هاد الخطوة ومعارفاش اشنو كيتسناها معاه
حطات الطيارة بالديار الالمانيا وخرجو جارين الشنط .. عبد الاله غير تالف واميرة كتعيط ليه يتبعها وباغي يبين باللي هوا المسؤول وهوا اللي يطبع فالديوانة لاكن حصل فاللغة وماعندوش الانجليزية مقادة ورجع اللور خلى اميرة تكلف . دوزات الاجرائات وخرجات هيا وياه وبدات ترش الريحة وتقاد لباها حوايجو ... فاتو الحاجز وهوا يبان ليهم محمد واقف كيشوف فيهم بابتسامة ويتسناهم بحينز وجاكيط دودون كحلة .. استقبل عبد الاله بالاحضان كيرحب بيه وداز لأميرة كيشوف فيها ويطلع ويهبط بضحكة عريضة .. مدات ليه يدها ورجعات اللور حدا باها قبل مايبوسها قدامو ولا ينسا راسو .. بدا كيرحب ويسول على الاحوال وهما خارجين جيهة الباب وتلفت شاف فأميرة وقال بصوت منخفض
- ماجبتيش معاك شي حاجة ديريها عليك البرد برا
قالت بأدب : بصاااح كاين البرد ! ماجبتش!
حل الجاكيط وهما خارجين ماشافتوش حيت بقا موراها ماحساتش بيه حتى دارها ليها على ضهرها سخونة وتلفتات فدهشة متوقعاتش منو هاد الجونتيلمانيا وقالت بخجل
- شكرا ... ونتا
رد بعفوية : ماشي مشكل لابس تريكو سخون
خرجو لبرا وهوا يضربهم واحد الريح قوي بارد بحال الى راها فافران وكمشات الجايكط عندها بسرعة وشافت فباها
- بابا هاك الجاكيط لبرد غيضربك
عبد الاله : وا البرررد هنا اه اه اه
سبقهم محمد بسسرعة وقال : راه جبت طموبيل جبتها
فتح بابا لسيارة سوداء " اودي " كتبري موديل جديد وماكريكيل المانيا وطلع الشنط للور بسرعة من بعد ما فتح ليهم البيبان طلعو وسبق عبد الاله ركب لقدام بالنفخة وتعنكر . اما اميرة كضحك بوحدها فرحانة وغير كشتوف فيه وتقارن تصرفاتو ديال دابا مع ديال قبل .. كان كيتخيل ليها غتلاقاه عاقد دوك الحجبان كما كانت كتخيلو فاش كان كيهضر معاها بديك الطريقة ... لاكن تفاجآت وعجبها الحال مشا داك الخوف والتوثر اللي كان فيها وجلسات ساهية فيه وفضحكتو الجدابة باينة فيه فرحان وكل شوية يهز راسو فالمرايا يضحك معاها .. طلق ليهم كليمة سخنو وبدا كيسول على الاحوال واجواء المغرب وعبد الاله كيتجمع معاه ويتعاود واميرة غير كتشوف فيه .. زيان وطاييح عليه السر ولا يمكن البرد ضربة للنيف حمرو ليه ودمع ليه العينين .. اما الفصالة ماعليها هضرة حتى الى بغات تسخن كتافها كاين الصدر والضلوع والكتاف اللي يخبيوها
وقفات الطموبيل فحي فيه منازل مستقلة بالخشب بحال شكل فيلات صغيرة بدون جذار دايري بيهم الكازو والبط والوز كيدور ونزلو معاه .. صونا فباب خشبي كبير كحل مخبي فالجنب وفتحات ليهم حنان بكل سرور وسعادة كترحب .. سلمات على عبد الاله ودخل هوا ومحمد وتعانقات هي واميرة
حنان : مرحبااااا مرحباااا والف مرحباااا
اميرة : ههه ترحب بيك الجنة احبيبة
دخلات مع حنان لداخل تصادفات مع ان محمد كتسلم على باها بيدها لابسة سورقيت بالسروال كويلة حد الركبة فلكرونة ودايرة لفولار ديالها ... شافت اميرة وضحكات ليها ومشات عندها .. عنقاتها الاخيرة بقوة كدوز يدها على ضهرها
اميرة : توووووحشتك توحشتتتك تووووحششتك
ردات العدوزة : الله يرضي عليك ابنتي حتى حنا توحشناك الله شاهد
اميرة : لاباس عليك كي بقيتي شوية فاتك الحال
العدوزة : الحمد الله ابنتي .. المرض مكيخطا حتى دار .. جلسي مرحبا بيك الدار دارك
جلسات فوق كنبي كحل ديال الجلد كبير حدا باها وبدات تسرح عينيها فالدار.. دار كبيرة محلولة كاملة على بعضياتها بتصميم غربي بحال المنازل الغربية واثات غربي كامل .. الخشب فالارض والدروج باركي حتى هنا فواحد الجهة كيطلعو للطابق الثاني وصالون مقابل مع الصالون فيه جالسين كتوسطهم مضخة من الرخام بيضاء شاعلة وغادي ليها كلب صغير كينقز تا غوت محمد من بلاصتو جرا عليه من حداها باللغة الالمانيا عاد نتابهات ليه اميرة وهرب تخبا تحت واخد الكرسي .
الدار سخونة ماشي بحال الزنقة ومعمرينها اولاد حنان اللي جاو بأدب سلمو وجلسو معاهم .. تحطات الحلوى ديال الدار واتاي بحال راهم فالمغرب ونالو ترحيب مكانش عبد الاله متوقعو لدرجة حشم بقا غير ساكت ومحمد كيتجمع معاه ويشوف فأميرة كل شوية
تجمعو كاملين جلسو كيهضرو بطلاقة ولقا عبد الاله العائلة كاملة مطلوقة كيضحكو ويهضرو بيناتهم بعفوية مكاين لا غميز لا قمع لا حتى حاجة حتى الالمانيا حيدوها بيناتهم وفكل مرة يهضر بيها شي واحد مع الدراري كيشرحوها بلطافة باش الضيوف يبقاو مرتاحين .
حطات حنان دجاج محمر بالشلايض والكتف مشوي وكل مرة يرحب واحد بقا ليهم شوية يهزوهم فوق الراس بالصواب .
دارو الصواب واكثر وتعشاو الضيوف وجلسو تجمعو شوية وناضت حنان لبسات مونطو فوق حوايجها وتكبطوو ولادها و دازت حدا اميرة كتشوف فيها بحب حتى انتابهات الاخيرة ووقالت بابتسامة
-فين غادية ؟
حنان: غنمشي للدار راه راجلي غيجي هاد الليلة..كان مسافر
اميرة : بعيدة ؟
حنان: هانا غير هنا مابعيداش غير مع الشارع اللي جيتو منو غدا نجي ..ها ماما غتبقا معاكم
اميرة : ااه ههه صافي
حنان : ترتاحو حتى نتوما .. الى خصاتك شي خاجة عيطي ليا صافي راه كاين الفيكس
اميرة : صافي واخا ..شكرا بزاف
حنان : مكاينش علاش تشكريني نتي بحال ختي بلعكس
خرجات حنان مشات وبقات اميرة جالسة حدا عبد الاله وهوا كيشوف فالتلفازة وراسو كيمشي ويجي وقال عينيه حومر العيا
- عيطتي لماماك قلتيها ليها راه وصلنا ؟
اميرة : عيطت ليها فاش وصلنا بطبيعة الحال
عبد الاله : ايوا صافي ...خفت تبقا تسنا متنعس ماتشوفو
مشا محمد وصل حنان ورجع شاف عبد الاله دايخ راسو كيمشي ويجي وقال بابتسامة
- واقيلا بغيتي تنعس الى عيتي طلع ترتاح
عبد الاله : هادا الجهد .. نمشيو نرتاحو شوية
محمد : اجي ترتاح مع راسك ... اميرة راه كايتة بلاصتها مع الواليدة فالبيت
عبد الاله : ايوا تصبحو على غير
ناض طلعو محمد لبيت الضياف فيه ناموسية وبلاكار لقا الشنط ديالو تما ووراه الحمام وكلشي واجد الفوطات والصابون والشامبو وحتى شيتو ديال السنان محطوطة جديدة فبلاصيكتها. سد عليه الباب وهبط لقا مو كدوز سبيراتو للزربية وقال
ناضت اميرة بابتسامة شافت فمحمد وطلعات مع مو لغرفة بسريرين صغار واحد حدا واحد و عطاتها كاشة جديدة وخلاتها فالحمام غسلات لحمها ولبسات بيجامة سروال وتيشورط وصلات صلواتها دخلات فالفراش نعسات . طفات العدوزة الضوء ونعسات حداها فااسرير وقطعات حتى بدات كتشخر .. عطات اميرة بوجهها للحيط يالاه بدا النعاس كيديها وهي تحس بيد على كتفها وسط الضلام وشوية ديال الضوء داخل من البالكون .. تلفتات بان ليها محمد واقف لابس تيشورط كحلة وسروال رمادي دالقطن وكيهضر بشوية
- شوووو... غير انا شوت
شد ليها فيدها بشوية نوضها وهي شادة الضحكة وخرجها من البيت بلا حس
المكتوب فرزقي الجزء الخامس
محتوى القصة
التنقل بين الأجزاء