المكتوب فرزقي الجزء السادس

من تأليف Ghazal trust
2019

محتوى القصة

رواية الربطة زغبية

دخلها لغرفة نومه المضوية بأضواء خفاف وسد الباب بشوية ودار عندها بلا مقدمات عنقها بقوة حتى تكندو عضامها وبعد شوية شاف فيها بابتسانة كيتأمل وقال

- توحشتك القنيصة ديالي

ردت بخجل : حتى انا توحشتك 

عاود عنقها وقال: بفيت غير نهضر معاك فراحتي مالقيت كي ندير ههه الواليدة حاااضياني 

شد ليها فيدها ومشا جلس هوا وياها فوق كنبي صفير... هزات رجليها فوقو ودارت يدها على خدها بسعادة كتشوف فيه وقالت 

- توحشتيني بصح ولا غير هضرة 

هز حاجبو فيها وجر يدها شدها كيداعبها 

- شنو بان ليك نتي؟ 

اميرة : مانعرف ... فالتيليفون كتلوح ليا جوج كلمات وتمشي

محمد : نتي بعد المرات كتعصبيني ... علاش مابغيتيناش نتلاقاو ؟ 

اميرة : راه قلت ليك كنت مشغولة

محمد: مشغولة ولا خفتي مني؟ 

قالت ببرودة: لااالا مخفتش

محمد : خفتي .... ومدايراش فيا التيقة ... ولاكن ماعليش .. من حقك 

هبط راسو وسكت كيشوف فيها فيدها وهي ساهية كتشوف فيه وقالت 

- تبدلتي بزااااف ...لدرجة مابقيتش عارفة كفاش نقدر نتفاهم معاك 

هو عينيه فيها وقال: شنو اللي بان ليك تبدل ؟

تنهدات وقالت:كلشي ... مابقيتيش كما كنتي .. مافهمتش 

بقا ساكت شحال مهبط راسو كيلعب فصبعانها وقال

- راه مانبدلتش .. ماعرفتش فين بان ليك التغيير؟ 

تنهدات : كن تخطبنا فديك الوقت كنتي غتكون فرحان 

ضحك بسخرية : شكون قال ليك انا دابا مافرحانش؟

اميرة : مابايناش فيك ... عرفتي راك تبدلتي لواحد الدرجة مكتصورش ... يقدر كن تلاقيتك لأول مرة وحنا فهاد اللاج ماكنتش غنقبل بهاد العلاقة 

هز عينو شاف فيها مطولا وقال: ياك 

اميرة : غيمشي بالك بعيد .... ولاكن ماقصدتش داكشي اللي فهمتي نتا ... المهم خلينا من هاد الهضرة .... وحيد هاد الجدية شوية راه الحياة غترجع مملة 

بقا ساكت كيحرك راسو وشاف فيها بابتسامة وقال

- سيري تنعسي ...ترتاحي شوية ... وغدا نهار جديد .. وحياة جديدة 

ناضت كتبتاسم بمجاملة وقالت : اوك ... يالاه تصبح على خير 

ناضت خرجات وشافت موراها بابتسامة ورجعات لبلاصتها نعسات

صباح جديد تجمعو كاملين فطبلة ديال الفطور من غير محمد .. كانت اميرة وباها وعدوزتها وحنان وراجلها وولادهم كيتجمعو على العقد وباها ساكت غير كيسمع حيت ماقالو حتى عيب .. ناضت حنان بابتسامة يالاه وصلات جهة الدروج وهوا يدخل محمد مع الباب شاف فيهم بابتسامة وصبح عليهم وطلع تبع حنان .. بقات اميرة غير ساكتة كتشوف بعينيها وناضت كتجمع الطبلة مع العدوزة للكوزينة وبقا باها مع راجل حنان ساكتين كيشوفو فالتلفزة حتى واحد مكيفهم لاخر . دخل محمد للكوزينة على غفلة وقال

- اميرة ..طلعي تكلمي حنان بغات توريك شي حاجة 

استغربات اميرة وحركات راسها وطلعات كتقلب بين البيوت حتى عيطات حنان من بيتو وقالت 

- هانا هنا اجي لهنا 

رجعات اميرة لبيت محمد والفضول واكلها . دخلات لقات كارطونة كبيرة بيضاء منقوشة وقدامها حنان كضحك 

اميرة : شنو قال ليا تكلمي 

حنان : اجي 

شافت فيها اميرة بتشكيك وابتسامة مخفية وحنان كضحك 

- اجي مالكي ههه 

قربات ليها اميرة كتستفسر وهي تجبد ليها حنان كسوة بيضاء ديال العرايسات من العلبة وقالت 

- ماباغاش تزوجي ؟؟؟

تضهشرات اميرة مافهمات والو بقات كتشوف فديك الكسوة قدام عنيها مصدومة وبدات ترسم ابتسامة على وجهها ومدات يدها للكسوة لمساتها وقالت 

- ديالاش.. ششنو ... مم؟؟؟؟؟!!!!

حنان: الكسوة ديالك هادي باش تمشي تسني العقد نتي ومحمد ... دايرين واحد الحفلة صغيرة ... غيجيو صحابو .. وشي صحابو وحدين اخرين خدامين معاه عرفوه غيتزوج ... قلنا نديرو حفلة هنا نجمعو لحباب والصحاب ... حتى الى مامشاوش لللمغرب للعرس مايبقاش فيهم الحال 

قالت اميرة مصدومة: دايرين حفلة ؟؟؟!

حنان: غير لافامي ديال راجلي وصحابنا ... ماشي بزاف متخلعيش .. حنا هنا كنديرو حفل بالنهار فيه 3 ديال السوايع وكل واحد كيمشي بلاش ... راه عاد دابا كان هنا قال ليا غيهبط يقولها لباباك يعلمو 

اميرة : فين غتكون هاد الحفلة؟

حنان: هنا فالدار 

اميرة : هناااا! غيجيو لهنا !

حنان:باقي الحال ... نتوما غتمشيو باش تعقدو وانا غنبقا هنا نقاد الامور انا وراجلي ونستقبلو الناس حتى تجيو نتوما 

اميرة : غنمشيو دابا؟؟! هادشي صدمني ههههه 

حنان : هههه عرس النصارة هوا هادا كلشي خفيف ضريف ... يالاه اجي تلبسي باش ماعطلوش

اميرة: بلاتي نمشي ندوش بالزربة ونجي 

خرجات كتجري بالفرحة مكانتش متوقعة هاد المفاجأة ... اخر حاجة كانت تقدر تخطر على بالها هي هاد الحفلة ... مشات للحمام كطير دوشات بالزربة اما المسائل جات مقاداهم من المغرب . خرجات لبسات حوايجها ودارت عليها بينوار ومشات لبيتو عند حنان .. دفعات الباب وهي تلقاه واقف مع حنان لابس سروال توب اسود ولأول مرة غتشوف محمد بالكلاص.. من نهار عرفاتو وهوا بالدجين ديما سبورتيف الى طلع كراد يلبس قميجة . لقاتو واقف بقميجة بيضاء والسروال البذلة مخيطة على فصالتو هي هاديك وحنان محنية عند رجليه كتحل الخياطة وتنكر 

حنان : نتا فاش كنا غاديين ديك الساعة عطينا العبار فالطول جاب الله متني يصلاح يتحل ويتحدد 

تلفتو بجوج لقاو اميرة كتشوف فيهم مزنكة وجلسات فوق الكنبي .. بقا كيضحك فاش شافها هوا وحنان وغمز الاخيرة وقال حاني راسو جيهت رجلو 

- فكرتي مزيان ... عنداك تندمي 

حنان : بعد من البنت راه مخلوعة اصلا ... ماديهاش فيه انا معاك فأي حاجة درتيها 

- سكت بقا كضحك وناضت حنان سخفانة كتنهج 

- ناري طيحت 6 كيلو مع هاد السروال .. حتى نتي بقيتي طوال حتى وصلتي للسقف .. واش دير لكرافاطة 

مداتها ليه شدها وقال: ماشي دابا بلاتي شوية .... صافي غير شوفي معاها وحاولو متعطلوش راه اصلا مشا الحال 

شافت فيه اميرة وقالت : واش هضرتي مع بابا؟ 

تلفت عندها بابتسامة وقال: هضرت معاه غير سربي شوي متعطليش 

مشا جيهتها وهي كتسرط فالريق حشمانة من حنان ... باسها فحنكها وخرج بالتقاشر هاز الصباط فيدو ... شافت فيه حنان وقالت 

- يالاه اجي قدامي دغيا نبالي بيك 

جلسات قدامها اميرة نشفات ليها الشعر وبدات دورو بالبابيليز وطلق حتى دخلات عليهم العدوزة طلات من الباب وضحكات 

- الله يكمل بلخير 

قالت اميرة بابتسامة حانية راسها : امين 

العدوزة : فين السمطة ديالو ؟؟ قالك عطيه السمطة 

حنان: السمطة دالسروال ؟

العدوزة : ومانعرف شنو اخر قالم عطيه كيسد بيهم الكمام دالقميجة 

حنان: اااه ..صافي بلاتي شدي هاما اميرة هانا جايا


اخيرا لبسات كسوتها البيضاء وموراها حنان كتزير ليها لخيوط من الضهر والعدوزة حداها لابسة عباية بالحجر بيضاء وكتمد ليها الفنايت تقاد التوب من اللور وطلقو وكتحنا تحيد منو الخيوط اللي لاسقين فوقو وتمسحو بيدها ... دارت مع التوب كتسرحو ومع هزات راسها لقات اميرة كتنخصص بوحدها وقالت فدهشة 

- علاش ابنتي كتبكي ؟
عنقاتها ودارت حنان باستغراب كطل

- وصاااافي دااابا نمشيو للمغرب ونديرة للعرس تما مع لافامييي وتكون ماماك وختك ... ياك باباك معاك وحنا معاك 

تنهدات العدوزة كطبطب عليها وقالت : راه ماشي شي حااااجة هادشي ... دابا تمشي عند ماماك وختك ونفرحو كاملين ونديرو العرس ديال بصح 

حركات راسها كتنخصص وبدات تمسح خدودها ... زيرات ليها حنان الكسوة وبدات تفسخ ليها شعرها خصلة خصلة ... حطات مكياج خفيف ناعم راسها كأنها محاطة والو ودارت عندهم بابتسامة صدرها كيطلع ويهبط مخلوعة وكضحك ... بقات العكوزة كتصلي على النبي ومشات خرجات كتقاد حجابها .. وقفات قدامها حنان وقالت باعجاب

- مشاااااء الله جيي اميرة اسم على مسمى 

ردت اميرة بخجل وهي عرةسة فالكسوة البيضاء والتاج رقيق بحال الاميرة وهازة الورد ...فديك الاثناء تفتح الباب ودخل محمد ببذلة العرسان كيضحك وكيطلع يهبط فيها باعجاب ، هزات حنان صندالتها وقالت 

- هانا لتحت نشوف ماما شنو بغات 

خرجات وخلاتهم بجوج كيقرب بخطوات بطيئة واعجاب كبير وهي كتحط يدها على نيفها وضحك 

- محمد: اووووووه !!!!!....

قبل ميكمل دورات وجهها حمر وقالت

- وصاااافي ولا مغنزلش 

محمد: عاااادي ماتنزليش ياك الفاتحة قريناها ..صاااافي العقد راه غا ورقة 

اميرة : وصااااافي يااااه ههه

بغات دور وهي تعكل حتا كانت غطيح وشدها كيضحك 

- غيي بشوية هانتي خطيحي (شدها من خصرها ) دوري نشوف .... دوري دوري والله تادوري نشوف قنيصة ديالي 

دفعاتة بكتفها : بعد مني منزلش انا كاااع 

باسها فحنكها ومع البوسة دخلات مو حصلاتهم وبدات تصفار وتخضار وهوا يبعد دار يدو على نيفو 

محمد : احممم ... واش صافي نزلو 

العدوزة : اييه . يالاه ... بلاتي فين داك الكاب الابيض ديرو عليها غيضربها البرد ... صافي هاهوا 

شد ليها فيدها كيضحك وهي حمرا .. خرجو من البيت والام هازة فورور ابيض غليض فيدها لاحتو عليها غطاتها ونزلو مع الدروج هازين ليها الجلايل ومحمد كيهبط درجة ويهز ليها التوب باش تزيد ... لقات باها جالس لابس كوستيم وعاقد حجبانو كيشوف بنص عين معبس وجامع يديه عندو كيشوف فيها كطير من بين يديه وهي فرحانة والكل فرحان الا هوا اللي كيسوط ويزفر تخنق وبغا يبكي وناض سبقهم لبرا خرج


طلعات فالطموبيل اللور هي والعدوزة وباها حدا محمد ومعاهم بنت حنان لكبيرة بغات تمشي تحضر وماحرموهاش وجلسات حدا اميرة فرحانة . وصلو لعين المكان ودخلو لمكتب كبير لقاوهم فالاستقبال ودخلو جلسو . 

وقعات اميرة وباها مربع فالقنت كيشوف بنص عين ووقع محمد حتى هوا وحط الستيلو وشاف فيها بابتسامة .. تلفت عبد الاله عند العدوزة وقال

واش صافي تزوجو ؟؟؟

حركات العدوزة راسها بسعادة: صافي وقعو الله يكمل عليهم بلخير.

عبد الاله : صافي نمشيو بحالنا؟

العدوزة: صافي يالاع نمشيو 

خرج عبد الاله لبرا عاد خرجات اميرة كضحك وتجر الكسوة لقات باها طالع ليه الدم وشدات فيه من اللور

اميرة : بابا.... مالك ؟

شاف فيها : صافي سنيتو ؟ وايالاه نمشيو 

اميرة : مالك واش مقلق

عبد الاله: نتي منين جيتي ونتي غير كضحكي معاهم . . . بحال الى جاية بوحدك 

خشات يدها فيدو عنقاتها وقالت : هههه اويلي واش انا حمقا نسا بابا هههه

سمحات فمحمد وشدات فباها وركب معاها اللور ... ورجعو للدار لقاو الاصدقاء مجموعين كاملين نصارا ... بالبذلات والبنات والنساء بالفساتين ... دخلات لقات الكل قدامها وكيرميو عليهم الورد وتعرضو لمحمد كيضحكو معاه ويتعانقو ... تقلبات الدعوة عبد الاله تلف ما بقا عارف اش يدير مشا نيشان شد واحد الكرسي وجلس كيتفرج منفخ ... سلمات اميرة على كلشي وخدات الهدايا ومشات حدا باها جلسات باش ميحيش بالنقص وعطاتو الوقت كامل ومناضتش من حداها .. طلقو البوفي وكل واحد شنو مشا كلا وشرب ..دازت عشية زوينة فالدار تعرفات فيها اميرة على اصدقائو وطبعا كانت دايرة كاميرا لسميرة وسلوى كيتفرجو من ساعة ما خرجات من الدار حتى سالات الحفلة ومن ديك الساعة وسميرة كتبكي وتنخصص وتمسح وسلوى كتفجر فرحانة وكل مرة تشد فباها وضحك معاه . 

انتهت الحفلة وخوات الدار وطلعات اميرة مع حنان حيدات الكسوة وجلسو كيفتحو فالكادوات حتى دخل عليهم محمد كيحل صدايف القميجة مخنوق

- اووففف تسخسخت

حنان : باااقي ماشفتي التسخسيخ ديال بصح ... التسخسيخة هي فاش ديرو العرس فالمغرب

محمد : بااااااركة الله يجعل لبركة مكاين لا عرس لا والو 

حنان : اويلي والبنت ماديرش نهار مع عائلتها ؟ !!!

محمد: دير اللي بغات انا ماتجيييوش تقولو ليا دير ... 

حنان : واخا تستا هه!

اميرة : فين خليتي بابا؟

محمد: دخل لبيتو يرتاح 

اميرة : انا نمشي عندو 

ناضت خرجات يالاه وصلات للباب قبل مادور سمعاتو قال لحنان 

- هضري مع الواليدة متباتش معاها اميرة فالبيت تجي تبات هنا 

حنان : اوييلي حشووومة وباااها!!!

محمد: فين كاين المشكل؟؟؟ تزوجنا

حنان: لا واخا هاكاك راه باااقي تزوجو فالمغرب وكولشي يسيق الخبار ... حنا حتى العائلة مافراسها والو 

محمد : وشنو دابا ؟؟؟ 

حنان: صبر حتى لغدا وخرج نتا وياها دورو شوية ماجاتش وباها كاين 

كملات اميرة طريقها ومشات دخلات عند باها لقاتو يالاه تكا وهي تعنقو وباستو فراسو 

عبد لاله : الله يرضي عليك ابنتي . . . اجي تباتي هنا بلاصتي انا غنفرش شي حاجة فالارض 

اميرة : لا راه غنبات حدا خالتي 

عبد الاله : لا ... اجي لهنا تنعسي 

ناض طلق الكاشة فالارض حدا البلاكار و طيح عليها المخدة و تكا . . شافت حتى عيات وغطاتو وبغات تخرج 

عبد الاله: فين غادية ؟

اميرة : نجيب شارجور 

عبد الاله: خلي دابا الشارجور الليل هادا حتى للصباح واجي تنعسي بحالك الله يرضي عليك .... خيطي زيطي فالليل راه مامزياناش

تندهات و ردات الباب ميلاتها وطفات لضوء وطاحت فوق الناموسية نعسات .

العدوزة : فين اميرة ؟

حنان: مشات طل على باها قالك محمد تمشي لبيتها تنعس

العدوزة: بيناتكم انا ماشي شغلي

حنان : بغا مرتو شنديرو ليه ... راه تزوج صافي

العدوزة: انا من سعفني يخلي حتى للعرس حسن 

حنان: وصافي حتى نتي اماما ... تزوج صافي ييي.. خ ليه ..ييي ليهم ... ماعرفت اش كيتقال فهادشي اففف... انا نقولها ليها الى بغات تبات فبيتها هي حرة

مشات حنان جيهة بيت باها لقات الباب مايل والضو طافي وطلات بنص عين لقات باها ناعس فالارض كيشخر وهي فوق الناموسية ناعسة و دورات راسها ومشات لبيت سي محمد دقات ودخلات لقاتو يالاه دوش لابس شورط مقطن وكيمسح شعرو 

حنان:: نعسااات اميرة 

عقد حجبانو وقال: فين نعسات؟؟

حنان: فالبيت مع باباها عطاها الناموسية ونعس مسكين فالارض

بقا محمد ساكت غيركيشوف فيها ولاح الفوطة ... هزات حنان كتافها بمعنى ماعندي مندير ليك وقالت

- بون وي ...يالاه هانا مشيت


صباح جديد الكل جالس كيفطر والفطور محطوط منوع ... هبط محمد بالدجين وقميجة كيطوي الكمام والشعر كيبري والروايح ناوي يمشي للخدمة .. جلس معاهم بابتسامة وحجبنانو معقودين وحطات ليه مو قهوى حداه وبدا يفطر ويشوف قدامو فصمت . اما اميرة شادة الكاس ديال الحليب بالشكلاط وحاضياه شنو لابس وشنو داير وكفاش خارج ... جاتها الغيرة من الشياكة ديالو وبدات تخزر فيه من تحت لتحت حتى نطق وقال

- اميرة : ماخصك والو ؟ مغتقداي حتى حاجة من هنا ؟

شافت فيه اميرة مافهمات والو وشافت فحنان وقالت 

- نتقدا ؟؟

حنان: تشري داكشي اللي خاصك ... الى بغيتي شي حاجة تشريها 

محمد : فلعشية وجدي راسك نخرجو تقداي داكشي اللي خاصك 

قال عبد الاله ببرودة : ايوا حتااا لعشية .. واش دابا نتا غادي للخدمة 

محمد : اه ... غنرجع بكري باش تشري داكشي اللي خاصها 

عبد الاله: ايوا مزيان ... نشوفو نيت الدنيا كي دايرة هنا ... واخا البرد ...وراه عندنا غير سيمانة هاهي مشات منها 3 ايام اش بقا ..4 ايام ! الايام كطير

حط محمد الكاس وتنهد وقال : يالاه الله يعاونكم ... لعشية نتشاوفو نشاء الله ... الدار دارك اعمي عبد الاله خود راحتك 

شاف فأميرة بصرانة ومشا خرج خلاهم كيفطرو . 

مشات اميرة مع حنان للدار شافتها ودربات دورة معاها فالحي ورجعو بحالهم لقاو غير لعدوزة فلكوزينة بوحدها 

بتاسمات اميرة وقالت : خالتي .. فيت بابا واش مابانش ليك ؟

ردت العدوزة بابتسامة وقالت: خرج موراكم فاش خرجتو 

تخلعات اميرة وقالت : وباقي مرجع ؟؟؟ اويييلي 

خرجات هي وحنان كيقلبو ويسولو وخايفين عليه يتجلى وهوا معارف لا لغة لا والو من غير العربية ولفرونسي اللي ماخدامينش ليه تما . . . سخفو بالتقلاب العشية كاملة حتى بانت ليهم طموبيل ديال محمد جاية مع الشارع ووقفو ليه فالطريق يالاه بغاو يحلو عليه الباب وهما يلاو عبد الاله جالس حداه ... فتحات عليه اميرة لباب سخفانة وقالت 

- الله يا بابا خليتيني غنحماق عليك فين مشيتي ؟ شحال وانا نقلب عليك 

عبد الاله: مشيت غير لهنا سرحت رجلي شوية وصافي حتى كلاكصونا عليا محمد فاش كنت راجع بحالي 

اميرة : حطات يدها على قلبها ) نااري خلعتيني 

شاف فيها محمد وقال : واش لابسة نخرجو ؟

اميرة : اه لابسة 

محمد : يلاه طلعو ... نوصلهم للدار ونخرجو 

عبد الاله : بلاااش متعدب راسك حتى للدار يالاه نمشيو 

تنهدات حنان : صافي اسي محمد غير سيرو نتوما .. انا غنرجع راسي 

اميرة : علاش متمشيش معانا 

تنهد محمد بنفاد الصبر وقال : صافي طلعي تا نتي يالاه 

طلعات للور حدا ميرة ومشاو كاملين كيتجمعو فالطريق وعبد الاله راشقة ليه .. جلس هوا ومحمد فواحد القهوة ومشات اميرة وحنان دخلو لمول كبير تقدات منو لوازم العروسة بالكرط ديال محمد وكل مايخص العروس من دهاز .. بقا ليها غير داكشي البلدي المغربي خلاتو حتى ترجع ورجعات هي وحنان للطموبيل للور جلسو . عيطو لمحمد وعبد الاله رجعو ومشاو للدار كاملين . دوزات اميرة وقتها كطوي الحوايج وتستف فالباليزة وباها كيتفرج حتى دخل عليها محمد على غفلة لقاها جالسة وقال

- اش هاد الفعايل؟؟؟

اميرة : اينا فعايل ؟؟؟

محمد: شوفي نتي شنو كديري؟؟

اميرة : مالي شنو درت ؟ 

محمد: مادرتي والو ؟؟؟!!! 

اميرة : مافهمتش ؟ شنو درت ؟؟

هز حاجبو وقال : مافهمتيش !! اوك تا تفهمي واجي نتفاهمو 

خرج وخلاها جالسة مستغربة مافهمات منو حتى كلمة . مال هادا شنو خاصو عاد كان مزيان ؟ 

خلاتو على خاطرو وحتى هوا رجع كيهضر معاهها هضرة ناقصة حتى بدا كيطلع ليها الدم ... كتشوف الاسبوع قرب يسالي وموعد السفر قرب وهوا مزال هاز شوكتو


سلوى : توحشنا بابا واميرة يكونو دابا ركبو ؟

سميرة : ماعيطوش ليك ؟

سلوى: الصباح عيطات ليا قالت ليا راهم فالمطار ... يكونو طلعو فالطيارة 

سميرة : هادي قرن وزمار باش عيطات ليك ... اففف مغيوصلو حتى يسكت ليا القلب.

جلسات سميرة دايرة يدها على خدها النهار كامل فدار سلوى كتسنا حتى دخلات عليها سلوى وقالت 

- نوضي يالاه راه طيارتهم بقات ليها نص ساعة توصل ... يالاه نتعرضو ليهم 

ناضت سميرة كتجري لاحت عليها الجلابة ومشات مع سلوى فالطموبيل مباشرة للمطار وجلسو كيتستاو . اخيييييرا بان ليهم عبد الاله كيدفع البكاج جاي كيضك وموراه اميرة بدجين قصير وتيشرط بيضاء كتجمع الاوراق المرونين فيديها .. مشات سلوى كتجري تعرضات ليهم بتعنيقة وتبعاتها سميرة كطير عنقات اميرة وبدات كتبكي وتنخصص واميرة كتسكتها 

- وصافي اماما ها حنا جينا ... هانا جيت علاش كتبكي دابا 

تنخصصات سميرة كتمسح عينيها وعبد الاله كيضحك 

- هاي هاي هاي كاع هادي معززة زعما!!

عنقاتها سلوى وقالت : ايوا مبرووووك والله يكمل بلخير ... داكشي داز غزاااال تبارك الله 

اميرة: الله يبارك فيك بقات بلاصتكم 

سميرة : غندير لبنتي واحد العرس هنا مطرطق دابا تشوفي

اميرة : هههه نشاء الله 

رجعو للدار كاملين وتشبح عبد الاله بسورفيت كيرتاح ... خلاوه بوحدو مع براد ديال اتاي ومشاو مع اميرة لدارها هازين معاها البكاج . 

دخلو كلشي للدار وبداو يحلو ويشوفو شنو شرات وشنو ماشراتش ويطويو معاها ويستفو والباليزات محلولين قدامهم 

سلوى: حسن خديتي كلشي من تما 

سميرة : غيبقاو ليك تفاصل وداكشي لاخر حتى نشريوه ... فوقاش غيجيو لهنا باش نضربو الصداق

سلوى: وداكشي اللي ضربو ليها طلاق!

سميرة : راه هناااا خاصنا نضربو الصداق وتحضر معانا العائلة

قالت اميرة : راه مرت عمي ماخلات لمن قالتها ... وكل مرة شكون كيعط ليا يسولني على العرس فوقاش

سميرة : واش باقا شي حاجة كتخبا !!! انا جيران قالو ليا فاش خدام خطيبها اويلي الفقصة دخول الصحة 

اميرة : قال ليا غيشوف شي وقت ويجي هوا وماماه 

سميرة : شحال ديال الوقت؟

اميرة : راه مكرهش اماما يجي معايا راه خدام ... غياخد كونجي ويجي نديرو ضريب الصداق هنا بشي حفلة صغيرة .. وديك الساعة لعرس حتى لعام جاي ماشي مشكل

سميرة : ايوا الى كان هاكا مزيان .. ( جراتها) احمم... عنداك تكوني درتي شي حاجة 

بعدات : اويلي اماما واش كتهضري بصح !!!! 

سميرة : غتمشيو نديرو شهادة طبية غدا انا ونتي .... الزمان دوار ماتعرف شو يخرج من كحل الراس

سلوى: هضرة قديمة اماما شهاد التخربيق

سميرة : انا مكنتيقش فكحل الراس... غنمشيو نديروها راه الناس


مزالين كيديروها ... تحمي بيها راسها 

اميرة : وصافي صافي نشاء الله غير تهناي 

جمعو معاها الحوايج وسدو عليهم وبقا الساروت عند سميرة وجعو للدار تعشاو وسط جو عائلي وباتو مجموعين . الصباح مشات اميرة وسميرة عند طبيبة اخصائية ودخلات بكل تقة فالنفس فحصاتها وخرجات عند مها للبيرو دارت رجل فوق رجل 

الطبيبة: الله يكمل بلخير. . . والله يجعل كلشي مبارك ومسعود 

شدات سميرة الورقة وقالت : ياك كلشي هوا هاداك 

الطبيبة: كووولشي هوا هاداك الله يكمل بلخير عليها (ابتاسمات لأميرة ) تبارك الله عليك احبيبة الله يسخر 

اميرة : شكرا ... (عطاتها كارط ديالها) انا طبيبة اسنان خصاتك شي حاجة مرحبا بيك 

خدات الطبيبة الكارط وقالت فدهشة : اااه متشرفييين .... نشاء غنجي ندير عندك تقويم 

اميرة : مرحبا ... بون جوغني

خرجو وسميرة فرحانة ومرتاحة على الاخر ... بدات توجد وتسارا من قيصارية لقيصارية كتوجد فالدهاز واميرة خدامة كيعيطو ليها فير فالوقيتة اللي كتمشي تقيس وترجع بحالها ... التيليفون مع محمد كل ليلة مكيتقطعش وكل مرة يتقلق ولا يبغي يغضب كتخلي على خاطرو حتى يبرد وشوية بشوية بدات كتقلب الاية ورجعات هي اللي كتغضب منو وتقطع عليه فوجهه وتخليه وبدا كيطلع ليها الدم وطلع ليها حتى الزواج والتوجاد فراسها والملل بدا كيدخل . جلسات واحد النهار دايرة يدها على خدها بوحدها فالصالة كتخمم وسلوى غادية جاية قدامها 

سلوى : باركة من التخمام راه غتشرفي

تنهدات وقالت : بان ليا واقيلا زربت .... هادشي بدا كيطلع ليا فراسي اسلوى

سلوى: اويييلي يالاه قلتو بسم الله 

اميرة : واخا هاكاك هادشي بدا كيطلع ليا فراسي ... هبالو مابغاش يسالي وعلى والو كيتعصب ويغضب وانا شحال قدني نهز ليه فحماقو ... انا منكدبش عليه هادشي رجع كيمرضمني وغادي يكرهني فالزواج 

سلوى: حتى هادشي الصراحة طول ... الحاجة فاش كطول بزاف كتحماض... هادي شهرايين باش رجعتو من الامانيا وهوا مابغاش يجي ديرو ضريب الصداق قدام العائلة ... على الاقل غير تشهرو زواجكم ... وزدتي كملتيها نتي بديك الصورة اللي حطيتي فالانستا جالسة معنقاه بيدك كولشي كيسول شكون هاداك 

اميرة : انا غنحط تصويرتي بالكسوة ديال العرس انا وياه وحدانا بابا نسكت ليهم لفام ونتهنا .. انا اللي كيعصبني هوا كل مرة نقول ليه اجي كيقول ليا راه مزاااااايرة عندهم الدعوة فالخدمة وخدامين على شي قضية... وقضيتي انا كاع مامسوق ليها .... طلع ليا فراسي والله مابقيتش كاع كنبغي نهضر معاه فتيليفون غير باش منتعصبش

سلوى: خلي بابا هوا يهضر معاه 

اميرة : ان غنتفاهم معاه هاد الليلة فاش يعيط ... راني على سبة كنقلب غير على نقشة نتفركع عليه والله تا نرونها معاه ... صافي طلع ليا هادشي فراسي بناقص من شي زواج يخ ... الحرية حسن ليا ... ندمت اللي قبلت 

سلوى: هيييه هيييه هيييه كالما كالما شفتك كسيريتي مالكي ياك لاباس .... راه قصوحية الراس كترجع بالبرودة 

اميرة : اختي مليت من هادشي.. ورجع كيتحكم . فين مشيتي فين جيتي علاش مجاوبتيش شنو درتي شنو مادرتيش ... نهار كامل وانا فالعيادة خدامة وكنجي فشلانة كنلقاه هوا كييبدا يسول ويبحث ويقلب على المشكل من والو .. بزااف عييت والله بناقص منو ومن شي زواح


صونا ليها فديك الاثناء وناضت دخلات للبيت فتحات الخط وردت بنرفزة

- الو وي

محمد: مالكي ياك لباس ؟ اش هاد الو وي رجعات عندك 

اميرة : شوف الى كنتي غادي تعصبني بلا متهضرني اصلا مافيا اللي يهضر 

رد باستغرب: مالك شنو كاين علاش كتهضري هاكا شنو واقع ؟

تنفسات بغضب : والو 

محمد: ومالكي مزال حتى ماهضرت تقلبتي 

اميرة : واخا هانا ساكتة .. شنو بغيتي ؟

محمد: كفاش شنو بغيتي واعرة عندك هادي ... واش باغا طلع ليا دم اكسبخي 

اميرة : شوف يطلع ليك اكسبخي ولا اسكبور انا مافيا اللي يتعصب ومافيا لي يهضر وهضرتك مابقيتش كنقد عليها ولا نقدر نسمعها والعلاقة بدات كتمرض وانا هادشي طلع ليا فراسي .. ديك فين مشيتي شنو درتي علاش درتي علاش مادرتيش مابقيتش كنحمل نسمعها 

رد بنرفزة : راك مرتي الحاجة واش حساب ليك باقا ديال راسك ديري لي بغيتي وتمشي فين مابغيتي ومعانت بغيتي !!! واش مممم ...مالكي مريضة غامرضي ديلمي سبحاتو لله 

تنهدات : شوووف انا هادشي طلع ليا فراسي... الهضرة كاملة مابقات فيها حتى كلمة زوينة حسن ما تعيط ليا مانعيط ليك 

رد بغضب : واش نتي خليتينا نقولو هاد الكلمة الزوينة صافي سيييري ... مرض كيداير ....

قطع عليها وهوا كيهضر خلاها شادة تيليفون فودنها ... تعصبات وسخن دمها ودخلات بالفقصة بلوكاتو وبغات وخلاتو ماعندو فاش يعيط . خليه يتفقص حتى هوا مالها تفقص بوحدها . 

لاحت تيليفون ومشات ضرباتها بنعسة ولا على بالها كأنه ما ماقع والو ماحساتش براسها حتى فيقاتها الساعة تمشي للخدمة وناضت لقات راسها شبعات نعاس واستغربات جلسات كتهضر بوحدها وتقارن اميرة ديال الحاضر مع اميرة ديال الماضي. كان الى قطع عليها ماتنعس ما تشوفو دابا نعسات بحال الى لاحت تقل كبير ... ياكما فعلا طلع ليها فراسها ... ياكما بصح مابقاتش كتبغيه وكانت مجرد نزوة وفاقت منها مللي وصلات لمرادها ... ياكما هي من النوع اللي كيمل الحاجة فاش كيوصل ليها . . لقات راسها بدون مشاعر بودت احاسيس فاش قطع ومتحرك فيها حتى حاجة ... يمكن بصح مكاين لا حب لا والو ... نزوة وحلم حققاتو وبرد قلبها من جيهتو ... رجعات كتشوف فيه غير لعيوب ... فين كانو مخبيين هاد العيوب قبل متزوج بيه ... اولا حيت كان بينها وبينو حاجز كان مغطي العيوب فاش تحيد الحاج بانو ؟ ولا هوا اللي منو الغلط ومابقاش كيعرف يتعامل معاها كانه كيهضر مع وحدة اخرى غيرها ... يمكن داك الاهتمام ديالو والحب والكلام الزوين فالصغر اللي كان كغديها بيه هوا اللي خلاها تبغيه وتعلق بيه ويبقا اسمو محفور فقلبها ، وفاش تبدل وكبر على داكشي مابقاش معمر ليها العين ومابقات حتى حاجة كتجرها ليه ..فقط المشاكل والجدية و المعقول اللي هي اصلا ماعندها ما دير بيهم وباغا تبقا صغيرة لا عقل لا مسؤولية ومهنية فبالها ولاقيا راحتها


رجعات للخدمة وقررات دير داكشي اللي مرتاحة فيه فقط وماشغلها فحتى واحد اخر ... حيدات كا لحوايج اللي عندها فالماريو قدام صدقاتهم وروايحها اللي كترش طلعو ليها فراسها ومابقاتش حاملاهم عطاتهم لسلوى كاملين .. حتى من الدار بدلات ليها الفراش والالوان باش تبدا حياة جديدة وهاد المرة حياة جديدة بقلب مطمأن ماشي بحال قبل كانت ناقصاها شي حاجة ومامرتاحاش واخا عايشة عيشة تمناها كل بنت .

داز اسبوع بلا اتصال يجمعها مع محمد وحتى هي ماعطاتش اهتمام للموضوع ... بدات كتقلب على اصدقاء جدد تخرج معاهم من غير سلوى اللي مابقاتش كطيقها وطيق نكيرها وكلامها ونصائحها ... بغات شي حد جديد مكتعرفو مكيعرفها مايجبد ليها لا قديم لا جديد .. فكرات حتى عيات وتاصلات بسيدة كتجي دير عندها التقويم من عائلة محترمة وخدمة محترمة كتلقا راحتها معاها فاش كتكون خدامة ليها وكيبقاة يتجمعو ويضحكو حتى كيساليو ... تافقو يشربو قهوة مع بعضياتهم وخرجو لمقهى راقي وجلسو كيتجمعو . . . فجأة وقف عليهم شاب وسلم عليهم بجوج وبدا يهضر مع الصديقة الجديدة ويسولها على الاحوال والغيبة اللي غابت وتطور الاحداث واميرة كتشوف فيهم بابتسامة ... عرضات عليه الصديقة وماعارضاتش حتى اميرة وجلس معاهم فالطاولة ... كان شاب انيق نقي بدا كيتبادل معاهم اطراف الحديث . دخل فديك الاثناء هشام مع واحد البنت و جلسو فالطاولة المجاورة ... بقا هشام كيشوف فيها ويتأكد لانه عمرو تلاقاها مباشرة او حصل ليه الشرف هضر معاها ... مكانش حتى هوا من العاكزين وجبد تيليفون صونا على محمد فالواتساب 

هشام : فين العود ... كي دايرين .. مالين دار لاباس ..... هانا خويا لقيتيني يالاه دخلت لواحد الكافي انا واحد البنت وهي تبان ليا اميرة ... ماجاتش نسلم عليها وهي مكتعرفنيش ومامتأكدش منها مية فلمية واش هي . . . . . . جالسة مع واحد البنت وواحد السيد ...... نصور ليك!!!! ااهاه نصور اخاي علاش لا


شربات قهوة على خاطرها وكلات جوج حلوات ديال لاكريم وتيليفون فالصاك كيصوني ويعاود ... حتى لحسات المعلقة عاد ردات ليه البال وجبداتو لقات نمرة من المانيا شكات تكون مو بغات تسول فيها ولا حنان ... هزات صاكها وناضت خرجات من بعد ما ستأدنات وفتحات الخط برا حدا المقهى ... يالاه قالت الو جاوبها بصوت غامض وهادىء

- الو اميرة .... سافا ؟

تنهدات وقالت : اممم سااافا الحمد لله 

محمد : بلوكيتيني زعما 

اميرة : ههه عاد عرفتيها دبا يمكن حتى بغيتي تعيط ليا عاد لقيتيها مبلوكيا 

رد بهدوء: امم... شكاديري دابا .... فينك ؟

اميرة : والو 

محمد : فينك فلخدمة ؟

ساطت من مناخرها : اه 

رد بهدوء: مزيان ... بقيتي فلاكابين حتى لهاد الوقت ؟

اميرة : عاد خرجت ... ساليتي لونكيط ديالك يالاه بسلامة راني مشغولة

محمد : مشغولة .... وشنو شاغلك ؟

اميرة : داكشي كيخصني 

رد بنفس الهدوء : كيخصني حتى انا ولالا

اميرة : شوف عفاك ... انا مابقيتش كنبغي نهضر معاك ... صافي ماتبقاش تعيط ليا 

محمد: علاش لقيتي لبديل ولا شنو؟ 

اميرة : شوف هاد الهضرة ماعندي ماندير بيها ... دابا بسلامة راني مشغولة حتى نسالي ونعيط ليك 

محمد: واخا لاللة ... الله يعاونك على شغلك 

قطعات كتسوط ورجعات طلعات للقهوى ودازت حدا عينين هشام كضحك وجلسات بلاصتها طلبات حلوى اخرى وهشام قدامها كيهضر فتيليفون ... بدات تجمع وضحك وتناقش معاهم بحال كاع الناس المحترمين حتى وصلها مسج من نفس النمرة وهي كتهضر وضحك وفتحاتو

بدات تقرا وضحك شوية بدات تعقد حجبانها وتفاعل مع المسج 

"كان كيحساب ليا بنت الناس وقلت كانت صغيرة تربية يدي عارفها اش كتسوا .. ودرت تاج فوق راسي وبغيتك من قلبي والله شاهد عليا عمرني نسيتك ولا جات بلاصتك شي وحدة . طلعتي بحالك بحال كاع اللي دازو قبل منك ... ونتي كفس منهم .. هما بعدا راضيين بالواقع ديالهم ماشي بحالك ماعرفتش لاياش باغا توصلي بالضبط و شنو الهدف ديالك من هادشي كامل .. مللي نتي ما ديال زواج ما ديال معقول ديال اللي يدوز بيك الوقت شوية ويعطيك لواحد اخر ينسي بيك لهموم . علاش قبلتي تزوجي بيا ؟ هه!! طلعت انا اللي حمار طرت تا عيت وجيتي البرهوشة درتيها بيه هادشي علاش بغيتي ترجعي للمغرب باش تسماي مزوجة وديري اللي بغيتي ولاكن معامن طحتي .. كن ماحشمت والله حتى ندمك على نهار اللي عرفتيني فيه ... ولاكن مكاينش علاش نطلع شماتة فاللخر ونفرج فيك عباد الله . ودابا انا اللي غنقول ليك الله يعاونك كل واحد كيلقا فعلو ونتي ماشي ديال العشرة وكنت غالط فيك... وعلم الله شحال من مرة كدبتي وتيقتك وربي فضحك حيت مشيت معاك بالنية وربي اللي غيجازيك ... تقتك فيك بزاف وصدمتيني فيك بزاف ومتلثي عليا دور البرائة .. هنا سالا الفيلم الله يجيب ليك معامن ... طلاقك غنسيفطو ليك من هنا بلا متعدبي راسك تجي حتى لهنا غير كملي قهوتك على خاطرك . هادا اخر مسج بيناتن ونشاء الله يكون اللخر . مابقيتش باغي نسمع عليك شي حاجة ولا نعرف عليك شي حاجة الله يعاون


تصدمات وناضت من تما ماقالت حتى بسلامة غادية وكتصوني عليه وتعاود حتى تعصبات .. وصلات للدار عند بدات دق بالجهد وفتحات ليها سلوى مخلوعة ... يالاه دخلات ضرباتها ريحة الكارو وبدات تغوت 

اميرة : واش نتي مكاتعياااايش واش ماباغااا تهدي الدار كتخنق بريحة الكارو 

سلوى: اويلي مالكي .. صدري هادا نعطيه حتى الجمر واش كنجبد شي واحد 

مدات ليها اميرة تيليفون كترعد وقالت 

- شوفي... شوفي شنو كتب ليا ... على سبة 

شدات سلوى التيليفون قرات المسج تصدمات وخرجات عينيها فيها 

- وعلاش اش درتي شنو وقع ؟؟؟

بدات اميرة تعاود وتمسح نيفها ووحناكها بتوثر وتعاود حتى سالات وهي تطرطق عليها سلوى

- اوييييلي واش حماقيتيي .... واش تسطيتي واش نتي كادبة عليه وهوا عايق بيك .... هاهوا فين كتبها ليك كتب ليك شربي قهوتك سافوديغ عاااارفك فين نتي ومعامن وكادبة عليه .... اويييييلي نتي لواحد غيضرب معاك الشقوفة ماشي غير لكارو بهاد الفقصة 

ربعات اميرة يديها وقالت بتمرد : انا اصلا مابقيتش مرتاحة معاه طلع ليا فراسي 

زعفات سلوى وقالت : واش حمااااقيتي.... راه هادشي داخلة فيه العائلة واش هوا يالاه مات باه مشافوش نعار حا فالربعين يطل على قبر باه اللي مشافش جا عندك جايب مو مريضة ولابسة الابيض ومامقصرش من جهدو ... واش هادشي فيه اللعب واش مكتفكريش بعقلك ولا مالك 

بقات اميرة ساكتة جالسة مربعة يديها كتسمع لسلوى اللي مابغاتش تسكت .. طلع ليها الدم تاني من كلام سلوى وناضت خرجات مشات بحالها لدارها ودازت خدات العشاء . تعشات ومشات لبيتها حطات راسها على المخدة كتخمم الليل كامل وتنهد ..بزز باش داز عليها النعاس . 

الصباح صبحات النفسية مريضة ومأزمة وعندها رغبة فالبكاء . . شدات واحد المخدة وجلسات كتبكي عليها واخا معارفاش علاش كتبكي... ياك رجع زايد ناقص عندها صافي علاش تبكي . 

بقات تبكي وتنحط حتى تقجات وردات كاع داكشي اللي فجوفها وصفار وجهها وبدات ترعد .. خافت ترجع ليها الحالة من جديد وناضت بزز هزات تيليفون عيطات لسلوى 

اميرة : الو سلوى ... سلوى اجي عندي دابا ديك الحالة بدات كترجع ليا... اجي عندي عفاك دغيا خايفة توقع ليا شي حاجة وانا بوحدي ... عفاك سربي 

قطعات مع سلوى وجلسات شادة قرعة ديال الماء كتنهج وتشرب وتسوط سخفانة وتسنا حتى جات عندها سلوى ومشات حلات ليها الباب كتجر فالبانطوفة 

سلوى: مالكي شنو واقع جبتيني من البيرو شنو وقع ياك لاباس

قالت اميرة كترعد ووجها صفر: عنداك يشوهني... عنداك يحط تصاوري ويفضحني 

سلوى: وعلى اشمن تصاور كتهضري!!! واش عندو ششي تصاور ماشي تا لهيه؟؟

دارت اميرة دفارها ففمها وبدات تشوف فالارض هنا ولهيه مخلوعة ... شافت فيه سلوى بتشكيك وخرجات عينيها

- ياكما عندو تصاورك مفضوحين.... ياكما كنتي كتسيفطي ليه تصاورك المسخوطة 

ربعات يديها على بينوارها اللي لابسة حد الركبة وقالت بخوف

- عندو تصاوري قدام وراهم ليا ... وشي تصاور جداد ... انا تقت فيه قلت صافي مللي مابينش تصاوري لقدام راه مغيبينش حتى تصاوري الجداد 

شدات سلوى راسها وقالت: اوييييلي وحدي ناس كيكبرو ونتي كتبرهشي... شوفي .. لبسي حوايجك سيري نوصلك عند سميرة للدار انا غنرجع للخدمة حتى نرجع ونتفاهمو 

اميرة : ماما باااقا عند فالدار

سلوى : بااااقا بابا مشا للعروبية ... يالاه زيدي 

مشات اميرة لبسات حوايجها و وصلاتها سلوى للدار لقاو سميرة كتوجد لكيكة . دخلو مخبيين الحقيقة وكيضحكو بزز ومشات سلوى للخدمة وجلسات اميرة مربعة يديها وساكتة ... شكات سميرة فالصمت ديالها وقالت 

- مالكي ساكتة ياك لاباس 

اميرة : والو .... بغيت نعس مانعستش اللي كامل 

سميرة : بلاتي حتى دوقي من الحلوى اللي درت 

قالت اميرة باشمأزاز: مفياش معدتي مقلوبة كضرني 

مشات اميرة للبيت وبقات سميرة متبعة ليها العين وكطلع وتهبط فيها . وصل وقت العشا ودخلات عندها للبيت لقاتها ناعسة بدجنها والبودي طالع ليها على الكرش ... بقات كتشوف فيها مطولا بتشكيك وفيقاتها بشوية ناضت دايخة وتقيلة بزز باش جلسات معاهم على الطبلة ... عياو فيها تاكل مابغاتش وخدات ديسير وكلات منو بزاف ومشات للطواليط رداتو كامل وهما شادينها ومخلوعين ... بقات تقيا حتى خرجو مسارنها وداوها سخفانة حطوها فوق الناموسية وخلاوها نعسات . 

صباح مع 8 حلات سلوى الباب واحدة تمشي للخدمة وتلاقات مع سميرة داخلة 

سلوى: فين كنتي فهاد الصباح 

سميرة : مشيت شريت لختك الدواء وجيت

سلوى: فهاد النبوري!!

سميرة : صافي سيري مشا عليك الحال . 

سدات موراها الباب وحيدات الجلابة ومشات عند اميرة فيقاتها بشوية 

سميرة : اميرة ... نوضي ... نوضي يالاه .

اميرة : اممم ... مغنمشيش للعيادة 

سميرة : نوضي نعطيك شي دواء ورجعي نعسي يالاه 

جراتها من يدها نوضاتها دايخة وعطاتها تيست ديال الحمل وقالت 

- دخلي لطواليط ديري ليا هادا راه نشوف

استغربات اميرة وقالت : علاش غندير ليك هادا !! راه عاد كنا عند طبيبة 

سميرة : واش غتفهمي حسن مني انا اللي دوزت عمري كامل فلكلينيك !! دخلي ديري ليا تيست وجبيه 

ناضت اميرة كتأفاف دخلات طواليط وسميرة جالسة وسط الدار يدها على خدها عاقدة حجبانها كتسنا ... بان ليها خيال حداها وهي دور لقات اميرة جايا شادة تيست فيديها مصدومة وكتشوف فيه . . .وقفات سميرة شداتو لقاتها حاملة وضربات فخدها وقالت 

- ها اللي قلت !!!


جلسات مصدومة وقالت : ميمكنش

شافت فيها سميرة مخرجة عينيها وقالت 

- كفاش ميمكنش ؟ شنووووو اللي هنا مييمكنش

اميرة : انا فييغج اماما شنو زعما حملت وانا فييغج!!!!

سميرة : ومالكي اللي متحملي ونتي فييغج شنو اللي صعيب تما !!! شحال من وحدة حملات فيييغج (دارت يدها على حنكها ) هادشي اللي كان ناقصنا غير لحمل .... فوقاش درتي وكي درتي ؟؟؟

تنهدات اميرة وتكمشات ساكتة ويدها على خدها ... تنهدات سميرة ويدها على جبهتها وقالت 

- غتعيطي ليه دابا .... داااابا عيطي ليه يجي نضربو الصداق هنا ونديرو العرس دغيا .. اجي نتي واش ماجاتك عادة ... ماجاك والو !!!! هادي علاين 3 شهور باش رجعتي من تما 

اميرة : لا بعكس ... كل شهر كتجي وتمشي ولاكن كتقطع بحال الى كتجي نهار وغير شوية وتمشي ... قلت يمكن تخربقات ولا ... 

سميرة : ويييلي على فضيحاااا .... عيطي ليه دغيا شنو كتسناي يالاه 

قالت اميرة بخوف وتردد : دابا نعيط ليه اماما صافي خلييني دابا حتى نستوعب 

ناضت من حدا سميرة اللي كتبركم ودور راسها : اتسوعبي اختي ستوعبي ... ستوعبي نتي الي جات معاك 

سدات عليها اميرة الباب ووقفات موراها لاسقة كتشوف قدامها مصدومة ... حطات يدها على كرشها بشوية وسهات .

-هادا اخر مسج ونشاء الله يكون اللخر ...
-نتي ماشي ديال للمعقول نتي ديال اللي يدوز بيك الوقت ويعطيك لواحد اخر ينسي بيك لهموم ..

- كن ماحشمت والله حتى ندمك على النهار اللي عرفتيني فيه

-طلاقك غنسيفطو ليك من هنا بلا متعدبي راسك...

دارت بيها الدنيا وطاحت دمعة خدها وهي كتفكر المسج .. زادت خطوة للفراش وكل خطوة بوزن قنطار ... كتجر رجليها بزز 

حطات راسها على المخدة وتسرحات على ضهرها ... حطات يدها على كرشها ومشا بالها 

همس فودنها : حداش لعام ... وكل لعام كنقول هاد العام نشوفها .... كنفهمك فاش كنشوف فعينيك ... وشحال تمنيت نعنقك ... ونشوف ضحيكة من فمك وهي خارجة من نبرات صوتك ... وريحتك واخا كان كيحساب ليك نسيتك (باس عنقها بلطف) قداش توحشتني؟

هزات كتفها بابتسامة وقالت وراسها مايل للجنب

- توحشتك ..قد من هنا للسما 

عنقها من كرشها وقال : ماشي بزاف 

دورات راسها عندو شافت فيه وسط الضلام والضوء الخفيف فوق الناموسية وهوا جالسين وقالت

- وشنو لي بزاف 

تأمل ملامحها بابتسامة وقال: ها اللي بزاف

جرها للخلف عندو وقبلها من شفتيها ومال هوا وياه على السرير . 

اميرة : حتى نمشيو للمغرب

محمد: تيقي فيا وماتخافيش

الصوت كيتردد بخفوت : تايقة فيك 

محمد : وانا كنبغيك ... وتوحشتك .. صافي منقدرش نزيد نصبر . 

اميرة : غنتعطل . . . الى فاق بابا ومالقانيش حداها غيشك فيا 

محمد : شووو... مرتي ... وديالي ... وحبيبتي حتى واحد ما من حقو يمنع هادشي

اميرة : خايفة 

ضحك بخفوت : مني!!! .... اخر واحد تخافي منو هوا انا ... تخافي من واحد كيبغيك . . وكيخاف عليك من لهوا ... غتمشي غدا .. وانا مساخيش بيك 

بقات ساكتة وضحكات بخفوت : غنتوحشك 

ضحك بخفوت : غناكلك ومغتمشيش.

غمضات عينيها وهبطو الدموع من الجناب وهي كتذكر لقطات من اخر يوم بقا ليها فألمانيا .. واخا مكانش العلاقة كاملة لانها عارضات ودارت ليها خاطرها وكلشي داز بسرعة و وسط الضلام ولا يمكن هما اللي ماحسوش بالوقت وكان الاشتياق والرغبة غالبين فديك الاثناء .. كانت كتسمع فقط للهيب انفاسه وتبع لمسات يدو ... حتى اهاتها مكانتش كتسمعهم كأنها مخضرة حتى كيحط صبعو على شايفها باش يخفف من حدة الصوت . . كان لحمها كيتكال اكل ولو لا الوعد اللي قطع ليها قبل بداية العلاقة لكان رضا رغبتو الهياشة فكسر الحاجر وقطع الشريط الاحمر اللي بينو وبينها وهي مستسلمة كليا كلمة لا مابقاتش خرجات من فمها . 

رجعات سلوى من الخدمة ودخلات عليها للبيت لقاتها ناعسة على جنبها كتنخصص وتبكي بوحدها .... جلسات حداها فالجنب وقالت 

- وعلاش دابا كتبكي ؟ مالكي ؟؟ ياك مزوجين وبرضاة الواليدين ... فين كاين المشكل ... انا كنت حاسة بيك ... كنت عارفك فاش تلاقاي نتي وياه مغتقدريش تردعي راسك لا نتي لا وهوا ... حداش لعام راه ماشي ساهلة ... راه حب الطفولة هادا والشوق كبر وغيغلب عليكم عليكم . 

قالت اميرة وهي كتنخصص: انا مكنبكيش على هادشي... كنبكي على المسج اللي سيفط ليا والهضرة اللي قال ليا .... ندمني ... كرهت راسي 

سلوى: وعلاش غتكرهي راسك راكي مزوجة .. وزايدون ديك الهضرة غير جات مع داك سوء تفاهم وصافي . 

ردت اميرة كتنخصص : كن كنتي بلاصتي عاد غتحسي بيا ... نتي معارفاش كفاش كان معايا ديك الساعة .. وكفاش عايرني دابا بداكشي .. 

سلوى : انا غنهضر معاه نوصلها ليه سخونة 

اميرة : ماهضريش معاه انا عمرني نسمح ليه على ديك الهضرة .. انا نيت حمارة تقت تيقة عميا حتى رجع كيقول ليا كن ما حشمت كن نشرت تصاورك ... تقت فيه وتصورت معاه بغا يخليهم عندو دكرى صدق كيهددني بيهم .. واصلا مغيتيقش دابا واخا تحلفي ليه فاش ما بغا

سلوى: بنادم كيمشي بالضد هانتي غتعرفي كفاش غنوصلها ليه تسنطي وقطعي الحس

اميرة : غتسمعك ماما 

سلوى: ماما خرجات تسخر ... اري ليا نمرتو 

عطاتها اميرة تيليفون صونات ليه ودارت مكبر الصوت ... صونا المرة الاولى والثانية عاد رد 

-محمد : الو؟؟ 

سلوى: الو سي محمد ... معاك سلوى 

تنهظ وقال : ااه سلوى 

سلوى: اه عيطت غير باش نسول على طلاق اميرة فوقاش غيوصلها 

ضحك بسخرية : مالها زربانة ولا..؟

سلوى : زربانة .... اميرة حاملة بشهراين ونص بالحساب...... وبغينا الطلاق فأقرب وقت نشروه بلاصت الزواج فهمتي دابا 

رد باستفسرار: كفاش كفاش ؟؟؟ مافهمتش كفاش الطلاق بلاصت الزواج عاودي هضري بشوية باش نفهمك 

تنهدات بميوعة : وااخا السي محمد . . . قلتي غاتسيفط ليها الطلاق ياك ..

قاطعها : وعلاش نتي اللي تعيطي طلبي الطلاق ماشي هي ؟ انا مزوج بيها هي ولا بيك نتي؟ سلوى خلينا مزيانين ومدخليس راسك فهاد المشاكل يكون يحسن 

تنهدات وشافت فاميرة اللي دورات وجهها للجهة الاخرى كتبكي

- سلوى : انا ماخصني صداع السي محمد عيطت ليك كنسول على الطلاق حيت واقفين عليه هادشي اللي كاين 

محمد : علاش مالها هي ماعندهاش لسانها ؟؟؟ عرفتي شنو ادابا مشغول مامساليش راني فلخدمة 

سلوى: واش سمعتي شنو قلت ليك فالاول ولا ماسمعتيش؟؟

قال بعدم تركيز: ماسمعتش شنو قلتي .. المهم غنخرج ونهضرو ماشي دابا 

سلوى : واخا نشاء الله ... يالاه الله عاون 

قطعات ودارت كتسوط عند اميرة 

اميرة : راه مابقاش مسالي صافي مابقاش عندو الوقت لينا .... يمشي يخرا من عندي انا انا تزوجت بيه وبابا وماما عارفين العائلة تمشي تعاود راسها ... مدايرين حتى حاجة فحياتهم خدمتهم يحضيوني انا شنو كندير تفو 

سلوى: انا غنعيط لحنان ... حنان اللي غتفهمني 

تاصلات بحنان وجلسات كتسنى الرد 

سلوى : الو حنان كي دايرة حبيبة لاباس عليك 

تدخلات اميرة بسرعة : سي محمد كيعيط ليا !!! 

تلفتات سلوى بسرعة سكتاتها وشارت ليها بيدها ماتجاوبش

سلوى : وي حبيبة كي دايرة وكي دايرين لوليدات 

حنان : الحمد لله اش خبارك واش خبار مالين دار ... كي دايرة اميرة 

تنهدات سلوى وقالت: ايوا جمعي كولشي وقولي الحمد لله ... عيطت ليك على اميرة احنان 

حنان : مالها ياكما واقعة شي حاجة 

تنهدات سلوى بعمق: شغادي نقول ليك ... اميرة راه حااااملة

ردت حنان فدهشة : واش حاااملة !!! 

سلوى : اه اختي راها حاملة ... وراكي عارفة العائلة دابا النص ماعارفش واش مزوجة غيبقاو يهضرو فشرفها والوقت قصير . دابا عندها تقريبا شي 3 شهور اش بقا للكرش تبدا بان ومحمد دابز معاها قال ليها غنسيفط ليك الطلاق ديالك من تما 

تصدمات حنان وقالت: هييييه!!! اويلي هادشي فيه الطلاق واش تسطا !!! فوقاش عرفات راسها حاملة علاش بقيتو ساكتين ماقلتوهاش لينا ؟؟؟ اويييلي صدمتيني 

سلوى : هاد الصباح عرفناها والمشكلة راها مزالة فييغج يعني اللي وقع وقع سطحي وتصيدات فيها فهمتي 

حنان : ويييييلي هادي صدمة اخرى !!!!! شنو دابا انا تلفت طيحتي ليا ليد مع الرجل ... اويييلي على 3 شهور مالها مكانتش حاسة براسها 

سلوى: اختي ماعرفتش انا عمري جربت قالت لينا راه كانت كتجيها ليغيكل زعما عادي وكتقطع فهمتي ... دابا عاد غتمشي مع ماما عند جينيكولوك هي اللي غتقول ليها كلشي بالضبط ... عرفتي راه رجعات حاااالتها كنشوفو البنت مريضة وغير كتنكر ومأزمة .. راكي عارفة اختي الوحم كي كيكون وتتاقشات هي ومحمد وقال ليها غنطلقك 

حنان : واش هوا عارف ؟ عارفها حاملة

سلوى: لا راه تناقشو شي سيمانة هادي وحتى هي مكانتش عارفة ... مع الوحم ما عرفتش اش قالت ليه تعصب وقلب عليها .. دابا قالت ليك يعطيها غير براتها هي ضبر راسها 

حنان : اوييييلي على يعطيها براتها وصلنا حتى لهادشي حشومة راحنا رجعنا عائلة زعما ونتوما مالين لعقل . . القضية دابا فيها بيبي ... بغينا نفرحو ونديرو شي عرس .... ماتقوليش ليا اختي سلوى لا طلاق لا والو هضري معاها ول عرفتي انا غنعيط ليها ... اويلي على الطلاق !!!! ويييلي على اميرة لاااااعب عليها الوحم نيييت 

سلوى : وااالو اختي قالت ليك يطلقها ولا تشنق راسها خلعاتنا وعايرها ماعرفت اش قال ليها مارضاتش ومرضات ... دابا قالت ليك يطلقها وهي غتمشي عند الطبيبة ماحد الحال باقي دير اوبغاسيو تحيد داكشي ... عيييت نهضر معاها 

ردت حنان مخلوعة : لالالالا اوييييلي واش حماقت لالا انا غنهضر معاه داااااابا ونرد عليك 

سلوى: بلاش غير خليه ... قولي ليه غير يسيفط ليها براتها 

تعصبات حنان وقالت بانفعال : شنو قال ليها شنوووو؟ ششنو قال ليها غيقتلني بالفقصة شنو اللي قال خلاها تنفر 

سلوى: ماعرفتش قالت ليك عايرها بشرفها وصافي قالت ليك هوا اللي مترجعش ليه وغتحيد داكشي فأقرب وقت 

قالت خنان بتوثر: صافي صافي صافي قطعي قطعي حتى نعيط انااااا دابا غادا عندهم للدار داااابا غير نتي اختي حاولي معاها عنداك دير ش حاجة انا دابا غنمشي عندو وغنقولها حتى لماما 

سلوى: واخا ختي وسمحي ليا على ديرونجمو 

حنان : اويلي اشمت ديرونجمو مزياااااااان اللي قلتيها ليا يالاه يالاه حتى نعيط ليك 

قطعات سلوى ودارت بابتسامة شافت فأميرة لقاتها معنقة واحد المخدة وهازة راسها كتشوف فيها مخلوعة وحاللة فمها فصدمة 

اميرة : بسم الله الرحمان الرحيم


ناضت اميرة جلسات وخرجات عينيها فيها 

- اويلي على كورطاج واش تسطيتي غيحساب ليهم مولفة بيه!!! 

سلوى: راه قلت ليييييها مريضة ومأزنة يعني نتي دابا مريضة ومأزنى مكتعرفيش اش كديري وحنا شادينك باش متغلطيش حيت حنا ناس مزياين وكنسواو فهمتي

اميرة : هوا مغيفهماش هاكا حساب ليك نتي فاهماه هاكا حتا هوا بحالك! هوا غيقول هادو مولفين بهادشي وعندهم عادي .

قالت سلوى ببرودة: الى فهم غلط غنقول ليه راه ماشي هوا اللي بغات تحيد راه البكرة اللي غدير عليها اوبغاسيو 

اميرة : واش حساب ليك هوا عجل!!! حساب ليك غير نتي ديتي وجبتي راه مكاينش اللي كيفهم قدك .!!! هاداك راه يقريك و نيتو دييييييما عوجة يعني كيفكر سلبي وغيجلس دابا يدي وسجيب فدماغو 

سلوى: شوفي ... التقة فالنفس هي كلشي. نتي تيقي فراسك ... قلت قلت .. ماقلتش ماقلتش... وماتجاوبيهش واخا يعيط حتى يشبع ... الهضرة بينك وبينو غير كتعقد الامور خليه دابا منو لسميرة ومو وختو 

دخلات عليهم سميرة على غفلة بالجلابة وقالت 

- عيطتي ليه ؟؟؟

هزات اميرة كتفها : اه ... 

سميرة : وشنو قال ليك غيجي ديرو العقد ؟

سلوى: اه اويلي مال هادشي فيه اللعب 

سميرة : نوضي يالاه نمشيو نديرو التحاليل ونشوفو الطبيبة اش غتقول لينا فهادشي .... الدري كبر وبدا يلعب ونتي عاد سقتي ليه الخبار 

اميرة : وشنو غنمشية نديرو عند الطبيبة مافيا اللي يمشي 

سميرة : زيدي وغتعرفي ...يالاه نوضي . 

ناضت اميرة كتسوط لبسات جينو وتيشورط وصندالة دسلوى وخرجات معاهم بجوج مشاو مباشرة للطبيبة اللي مشاو عندها من قبل 

اميرة بخجل: بغيت نن ... نشوف 

تدخلات سميرة وهي جالسة فوق الكرسي 

دابا هي حاملة ... بغينا فير نعرفو الاحوال ... دير كونطرول وصافي 

ناضت الطبيبة بابتسامة : واخا اجي معايا 

دخلاتها فحصاتها وسلوى حداها هي وسميرة واقفين والطبيبة كتوريهم الجنين بابتسامة فالشاشة 

-الطبيبة : هوا هادا .... بلاتي غيبان مزيان ... هاهوا شفتيه 

شافت اميرة جيهة الشاشة فطرف ديال اللحم صغير كيبان فالضلام وبقات ساكتة معرية على كرشها بدون حركة ومها وختها ساكتين كيشوفو فيه بابتسامة 

سلوى: كتحسي بيه كتحسي!!!! 

حركات اميرة راسها بالنفي: ما كنحس بوالو 

الطبيبة : مغتحسيش بيه دابا حتى يدير واحد خمس شهور ولا ست شهور ويبدا يتحرك عاد غتحسي ... غيجيك واحد الشعور غريب فاش يتحرك فكرشك ... راه شي حاجة زوينة تحسي بكرشك فيها روح وكتحرك .. غترجعي تخافي عليه بزاااف لدرجة تخافي عليه حتى من لحركات اللي كيدير

ردت اميرة بعفوية: مازال مامصدقاش ... واقيلا غير كنتخايلو ... راه مكاين لا حمل لا والو 

ضحكات الطبيبة وقالت: ماكنتيش متوقعاه يمكن غفلك 

اميرة: لا حيت ما ... ماا ... مارعفتش ؟...عمري تخيلتها 

الطبيبة : دابا تستوعبي شوية بشوية ... (مسحات ليها كرشها) مبروك عليك يتربا فعزكم نشاء الله 

سميرة : امين 

ناضو خرجو للبيرو جلسو فالبيرو والطبيبة كتناقش معاهم موضوع الوحم وسميرة كتحك ودنها وترد شعرها اللور 

سميرة :بتردد ) دابا كاين واحد المشكل ادكتورة

شافت فيها الطبيبة باستفسار : اما هوا ؟

سميرة : دابا المشكل .. هي باقا فييغج وحملات ... ولاكن راه مزوجة غير زعما ماكرهناش حتى نديررو العرس عاد نننن.... زعما نن.. تمشي معاه . . .. ساعا كتاب و ..وشربات وهي مزالة عزبة .

الطبيبة : فهاد الحالة !!! خاصها ضارروري تفض غشاء البكرة ... ولاكن ماشي دابا حتى يشد الجنين راسو شوية ديك الساعة ضاروري من فض غشاء البكرة ... حيت ضاروري غدير فحوصات من لتحت ...

سميرة : ايه يييه راني عارفة راني كنت ساج فام وجلست دابا راني فاهمة 

قالت اميرة بخوف وتردد : و ووهاد غشاء البكرة كفاش كيتفض واش خاصو شي اوبغاسيو ؟؟؟

الطبيبة : نتي وراجلك . . . 

قاطعاتها سلوى: والى كان راجلها بعيد ؟

الطبيبة : فهاد الحالة غديرو اوبيغاسيو ... دابا عندك 3 شهور ...بقا ليك شي شهر ولا شهر ونص وتجي عندي نفضوه 

اميرة : و وو ...واش هاد لوبيغاسيو صعيبة ؟

الطبييبة : لا عادي داكشي اللي غديري فالدخلة غنديره حنا ... ماعندك مناش تخافي .. عملية صغيرة ومغضرك لا نتي لا الجنين ديالك

سميرة : ايكون خير ... 

ناضو توادعو مع الطبيبة وخرجو وخرجات اميرة بابتسامة كتهضر مع الطبيبة

- صافي فاش يوصل لغونديفو اللي عطيتني نجي ندير لوبيغاسيو .شكرا


وقفات الطموبيل بسياقة سلوى حدا العمارة ونزلات سميرة . يالاه نزلو بغاو يتبعوها وعوا يصوني لاميرة تيليفون ونخزات سلوى

- كيصوني عليا ... الرقم الماني حست بلوكيت نمرتو 

دارت سميرة : زيدو!! مغطلعوش؟

سلوى: غير سيري ها حنا غنطلعو 

طلعات سميرة خلاتهم ورجعو هما طلعو فالطموبيل وجلسو كيشوفو فتيليفون

سلوى: جاوبي تقدر تكون حنان

اميرة : والى مكانتش حنان وكان هوا ؟

سلوى: قطعي عليه ...ياك قالك اخر مسج بيناتكم .. صافي ديريها ليه على قد دلقوشو 

تنهدات اميرة وفتحات الخط ...يالاه سمعات صوتو قال " الو " قطعات بسرعة 

اميرة : هوا حسيت بيه غيكون هوا ... تكون حنان وصلات ليه الهضرة ... 

سلوى: ضاروري توصلها ليه 

اميرة : ديني اختي عفاك شي بلاصة مفوهة .. شي قهوى على البحر نشرب شي غصير حاسة براسي مخنوقة بحال الى كنحلم 

سلوى : يالاه نديك . نديو معاك الاجر

مشاو بجوج فالطريق وتيلفون كيصوني حتى وصلو للقهوى وجلسو مقابلين مع البحر كيشمو الهوا ... ترن ! وصل مسج وهزات تيليفون بسرعة شافتو وقالت 

- سيفط مسج .... مافيا اللي يقرا ولا يتعصب ... اصلا غير نمرتو اللي كتصوني راه كتعصبني

سلوى: اريه نقراه انا ونمسحو ماعندك ماديري نتي بيه .... ديها فير فراسك وفالبيبي ديالك 

خدات سلوى تيليفون قرات المسج وحدفاتو .. اما اميرة دورات وجهها كتنهد بعمق ساهيا فالامواج

قالت سلوى ببرودة : ماندمتيش ؟

اميرة : علاياش غندم؟

سلوى: على علاقتك بسي محمد 

اميرة : ماعرفتش ... شي مرات كنحس براسي ندمانة وشي مرات كنحس لا كنقول كنت فرحانة . . . ولاكن كندم حيت كنحس براسي دابا بحال الى راني مع شي واحد اخر ماشي محمد ! 

سلوى: ياكما عاملك خايب 

اميرة : خايب !!! (دورات وجهها جهة البحر بابتسامة وقالت فهدوء وصوت حنين) احسن من سي محمد مكاينش .... عمرو مكان خايب فبحال دوك الاوقات ... بلعكس ... كيكون حنين ... خايف عليا بحال شي بيضة غتهرس .... بحال شي واحد كيلعب فشعر شي قطة زويينة ...حسيت بيه متملكني .. بحال شي ولد صغير كيشري ليه باباه لعبة عاجباه .. كيخبيها ومكيبغي يعطيها لحتى واحد . وكيشدها وهوا فقمة السعادة باغي يعرف محتواها فدقة وحدة بلا صبر ... بحال هاكاك سي محمد ... ماعرفتش واش غيكون دابا فرحان ... ولا غضبان ؟ مابغيتش نعرف اصلا حيت شك فيا واخا عارفني اشنو كنسوا (تنهدات ) حط يدو على كرشي ديك المرة وقال ليا .... امنيتي يكون عندي بيبي منك نتي ... ويكون كيشبه ليك نتي .... وهاد الهضرة قالها ليا حتى فاش كنا مزالين صغار... قال ليا واحد المرة بغيت فاش نتزوجو يكونو ولادي كيشبهو ليك نتي .... قلت ليه علاش ميشهوش ليك نتا ! ..قالي ليا باش يالاه نشبع منك وتكون عندي منك بكية هه كنتفكر ديك الهضرة كتجيني الضحكة .... ولاكن فاش كنتفكر هضرة اخرى كتجيني البكية .... كان قال ليا عمرني نخليك تغضبي . . . ولا تقلقي مني . . . عمرني نخليك تنعسي مقلقة ..... قلت ليه والى تقلقلت ! قاليا مغنخليكش .... قلت ليه والى تقلبت للجهة الاخرى ؟؟ قاليا ندور لجهتك .... قلت ليه والى عاودت تقلبت للجهة الاخرى؟ .... قاليا غنوض وندور جيهتك حتى تصالحي معايا ...... ولاكن دابا متخيليش راسك غضبانة ومقلقلة .... تخيلي راسك ناعسة وراسك على صدري .... غمضت عيني وتخيلت راسي ناعسة على صدرو حتى طاح تيليفون من ودني وداني نعاس ..... (تلفتات بعينيها مغرغرين ) وفاش فقت لقيت كولشي كدوب .... كولشي غير هضرة ... غير احلام تيقتهم وبنيت عليهم احلامي .... حتى حاجة من ديك الهضرة ماشفتها .... هاحنا تزوجنا .. ها حنا كبرنا .... فيك داكشي كامل اللي قال ليا ؟ فين داكشي كامل اللي خلاني منبغي حتى شي جنس اخر من غيرو .... كلشي مشا السنين اللي دازت ... كلشي تبدل ! كبر هوا وكبرت انا ... ولاكن واخا كبرت انا باقا عاقلة وبقيت كنتسنا فداكشي اللي قال ليا .... نعيطك عينيا الى بغيتيهم ... انا كنبغيك كتر من راسي ... انا منقدرش نبغي وحدة اخرى من غيرك ! نتي حياتي .. نتي كلشي بالنسبة ليا . . . نعطي عمري ومانعطيكش .... ومكاينش اللي يبغيك من بحالي .... كولشي غير هضرة .... علقت اماال عليه وعلى هضرتو كاملة وبقيت كنتسنا يطبقها .... انا مابغيتش نكبر .... مابغيتش .... متبغيت لا عقل لا والو كنت مرتاحة وانا صغيرة ابسط الامور كتفرحني واخا غير كلمة .... كنت كنشوف الدنيا منورة وهوا معايا ... كنت فرحانة .... (تنخصصات ) انا مافرحاناش اسلوى .... مافرحاناش واخا رجع . . . رجوعو برد النار اللي فقلبي من جيهتو وصافي ... و وجودو حدايا ما بردش شوقي ليه وماكرهتش كون بقيت صغيرة انا وياه كنت اسعد وحدة ... حسيت بيه محمد اللي كنعرف فاش دوزت معاه ديك الليلة وبسبابها انا حاملة دابا ... جيت من تما باغا نبكي ماكرهتش كن بقيت معاه .... ولاكن فاش جيت رجع هوا كي كان بحال الى ماحس معايا بوالو .... بحال الى ماشي انا اميرة الل كنت معاه تما .. نسا شنو وقع بيناتنا ورجع للعصبية ديالو والغضيب والنفخة .. وزاد عايرني بداكشي اللي درت معاه ! وتقت فيه وخليتو صورني وانا معاه باش زعما يبقاو عندو ... ودرت فيه التقة حيت اصلا سبق وصورني فاش كنا صغار ... عايرني بالسعادة ديالي معاه و والضعف ديالي .... وحيت كنبغيه سمحت لراسي وخديت راحتي معاه . . . وعلى والو سبني بحال زعما راني كندير داكشي مع اي واحد .... عرفتي اسلوى ... كنت كنتفكر ديك الليلة كنقول فوقاش غير نعاودو نتجمعو .... دابا رجعت كنتفكرها كنمرض فخاطري وكنبغي نتسطا ... باغا نمحييييها باغا نحححيدها باغا نخرجها من عقلي ونرتاح .... كنكرهو من قلبي اسلوى .... مابغيتش نشوفو ومابغيتش نشوفو وجهه .... مابغيتش عيني تجي فعينو ( هبطات وجهها على يديها ) ياربي نكون غير كنحلم ... ياربي نفيق من هاد الحلمة .. نرجع لفرنسا ونحيدو من قدامي فمرة وعمري نعاود نفكر فيه واخا يشللوه بالذهب . . . نعيش غير حياتي كي كنت ونرتاح


وقفات سلوى تسجيل الأوديو بتخبية فتيليفونها في حين كانت اميرة كتشكي وتبكي وبعتاتو لمحمد عبر الواتساب وطبطبات على ضهر اميرة وقالت 

غير الوحم أثر عليك احبيبة .... شربي العصير ديالك . . يالاه خودي 

سكتات اميرة كتنخصص ورجع تيليفونها كيصوني من جديد حتى عيا وقطع .. شوية صونا تيليفون سلوى وفتحات الخط من بعد ما ناضت من حداها 

سلوى: الو .. وي ؟ انا جاوبتك على المسج اللي سيفطتي 

محمد : اري ليا اميرة .

سلوى : اميرة مريضة . . . تيليفونها عندي والمسج اللي سيفطتيه انا جاوبتك عليه .... بغيتي تيق تيق . . مابغيتش نتا حر 

محمد: تنهد بنفاد الصبر) اري ليا اميرة اسلوى 

سلوى: مابغاتش واش نعطيه ليها بزز! .... ياك سولتي قلتي بغيتي تعرف امتا وقع هاد الحمل حيت سيادتكم كتشوف فيها شوفة ديال شي وحدة بنت الزنقة ... واخا ها نتا قريتي الجواب .... بغيتي علاش خبات عليك الحمل ديالها هادي شهر ونص .... هانتا عرفتيه بلسانها .... تسنط لأوديو غتعرف كولشي ...

قاطعها بنرفزة : انا مكنشوفش فيها بنضرة خايبة .... من حقي نعرف ولدي شحال عندو وفوقاش عرفات راسها حاملة وعلاش مقالتهاش... اسئلة مافيها حتى عيب 

سلوى : راه هاد الاسئلة هما العيب نفسهم . 

ساط بنفاد الصبر : واااااييييليييي مشكيلة هادي.. واش منسولش ؟ .... واش نتوما مكتقبلو حتى سؤاااال!!!! واش نبقا ساكت .... عطيني اميرة نهضر معاها 

سلوى: ااا سي محمد اخويا راه اللي مابغااتش.... راه داكشي اللي سمعتي وداك البكا .. هوا اللي كضل فيه بالليل وبالنهار .. هاديك هي حالتها 

تنهد بنفاد الصبر وخفف من حدة صوتو وقال

- افف واخا .... واخا ديري ليا شي حل . . . ديري ليا معاها شي حل نهضر معاها ....

قالت سلوى بهدوء : والله ماعرفت. . . .. راها عيانة و شي مرات كتبدا ضرب كرشها بالفقصة وكنشدوها غي... 

قاطعها بغضب: واش باغيين تحمقوني واش مالو جايباه من الزنقة ضربو مالو ماعندوش باه !!!!! شوفي توقع ليه شي حاجة راه مغنتفاكش معاكم اسلوى فهمتي .... راه مغنتفاكش راه لحد لآن باقي زوين وكنهضر زوين ونساوي .. غتهضري معاها دير عقلها وتبت مللي مابغاتش تهضر معايا ... خليها تبت حسن ليها 

سلوى : واش انا كنقول ليك معصبة ... وباغا تنتاحر

ساط بعمق وقال : اووووووووف اريها ليا انا خاصني نهضر معاها ضاروري .... اريها ليا 

سلوى: راه كنشدوها وحاضيينها مابغيناهاش دير شي حاجة فالبيبي ولا فراسها .. راه نفسيتها منقولش ليك كي دايرة واش مالك مكتعرفهاش كي دايرة ؟ 

محمد : عارف عارف عارف .... دابا دوزيها ليا 

قالت سلوى بتردد: امم .. واخا هانا غنكبر ليك الصوت تسمع باش ماتقولش انا اللي واقفة ليك ... تسنا نمشي عندها 

مشات وقفات عليها وهي عاطية وجهها جيهت البحر كتبكي وتمسح بكلينيكس وقالت 

- اميرة ... سي محمد بغا يهضر معاك 

ااميرة: حيدي عليا داك تيليفون ولا غنهسرو .....

تدخل بسرعة : ااميرااااا شدي تيليفون ونعلي شيطان خلينا نهضرو 

اميرة : ماتهضر معايا منهضر معاك 

ناضت من الكرسي وخلاتو كيهضر بوحدو 

سلوى : مشات ...شتي شنو قلت ليك 

تنهد بتعب: شفتي ختك شكادير .... شفتي وكتقول انا اللي خايب ومنسواااش وكنعاملها خايب 

تنهدات: وراه كتوحم راه الصكعة جاها الوحم عليك غاصبر ماعندك مادير ... 

محمد : وا نتي مولات العقل هضري معايا بلاتي هي احسن ... قوليها ليها راه ميكون غييييير خاطرها الاللة انا اللي غالط واخا ... انا اللي غالط وكنت معصب سيفطت ليها مسج ماشي هوا هاداك اوك .... واهضري معاها ختي سلوى تبت شوية .... راني فرحاااان فرحاااان والله تا فرحاااان وفااااااهم باش متشميش هيا غالطة . . وا هضري معاها الل هيحفضك وهضري مع ماماك ترد ليها البال انا غنجي فأقرب وقت واخا نعرف نجي غير دو جوغ 

سلوى: صافي اخويا سي محمد انا غنهضر معاها غير كون هاني .... وسمح ليا الى قللت معاك الاحترام 

محمد : هاااانيا بنادم هادا ... المهم ديري ليها عقلها ... ديري ليها شوية العقل وتجاوبني نحلو هاد المشكل 

سلوى: واخا كون هاني ضربها على حسابي... الله يعاونك اخويا

يتبع ...
الجزء الأخير

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.