سميرة : حرااام الشاف واش يحشمو ... انا يبعد ليا غير على بنتي
الضابط : وطحتي مع هادا بعدا راه قالك جاي ... كن شي واحد اخر راه يتخلع يبات مايصبح .. قالك راه فطريق لمكناس واش ميقدرش يخلي حتى لغدا ويجي هه! وايلاه ماعرفنا راسنا بوليس ولا جمعية
تنهدات سميرة جلسات كتسنى وتشوف الكوارت اللي كدخل عند الضابط مكاين غير الضرب والجرح والدمايات ... واحد شوية شافت محمد داخل و حال بزطام كيجبد لاكارط ناسيونال ووقف سول واحد البوليسي على المكتب شار ليه بيدو وتم جاي .. يالاه بغا يدخل شاف سميرة جالسة وحل عينيه بجوج مصدوم عرفها شكات بيه ودق دخل للبيرو وعيطو على سميرة دخلات تقابلات معاه
توبيخ
هز الضابط اللي كان راجل كبير راسو شاف فمحمد اللي واقف ساكت سميرة جالسة فالبيرو كتشوف فيه وتنخزر وهوا كيشوف فيها بنص عين .
طلع فيه الضابط وهبط وقال : ومالك باغي تخرج على راسك ؟؟؟ عندك الماسطر مالك ماتمشي تقلب ليك على شي خدمة وكون راجل ... بعد من الزبل ودير شي حاجة تنفعك .. اش كدير هنا فكازا ؟؟؟ اش جابك من مكناس لهنا هاا ؟!!!! باغي توسخ الضوسي ديالك عاد تهنا ؟
بقا محمد ساكت قالب وجهه وكيتنهد كيتسنا الضابط يسالي هضرتو باش يمشي بحالو .. حرك الضابط راسو وقال كيشوف فيه بصرامة
- سير يالاه رجع لمدينتك ... دير شي حاجة تنفعك فمستقبلك ... مانعاودش نشوفك هنا هاني علمتك ... سمعتي ... يالاه شد لاكارط ديالك ورجع بحالك ... ودير عقلك ... دير عقلك قبل ماتندم .
هز محمد لاكارط عاقدهم : شكرا الشاف
خرج مع الباب وركب فوق موطور نبرفزة غير كيسوط ودار الكاسك ديالو ومشا بحالو
محمد : تنهد )عاد رتاحيت ... واخا جيت ليوم غنعاود نجي حتى غدا ... ندير المستحيل على قبل كبيدة ديالي
صبحات اميرة فرحانة ... اسعد فتاة على وجه الارض .. بين ليلة ونهار تبدلات من ديك البنت التعيسة الكئيبة و اللي عاطياها غير للبكا والنعاس وقلة الماكلة .. لبنت كلها حيوية ونشاط وشهية فتوحة متفائلة ومتحمسة لنهار جديد .. خلات امها سميرة تستغرب وتتعجب لهاد التغيير كامل .. كتشوفها كتاكل بلا متشبع وكضحك على ابسط الامور وغير ناشطة وكدور قدام المرايا .. كل مرة شنو كتقيس وتنسق فالحوايج ... وكل مرة تجرب مشيطة جديدة . خرجات مشات تقرا بكسيوة موردة فالازرق غامق حد الركبة وسبيبيط وشعر مطلوق وعوينات كيبريو مرمشين ...الوجه مشرق مراية كيبري والفرحة نورات وجهها الجميل .. فوسط القسم تاصل بيها خبرها خبرها انه وصل وكيتسناها ... وكانت فنبرة صوتو ابتسامة ورزانة .. حسبات الوقت دقيقة بدقيقة حتى خرجات ومشات كتقلب بعينيها وضحك بوحدها حتى قفزها من اللور وهي دور عندو عنقاتو بقوة حتى غرغرو عينيها .
اميرة : توحشتك
عنقها بقوة مغمض عينيه وقال : انا كتر ... واخا توحشيني ماتكونيش قدي
شافت فيه بكل حب وقالت : جيتي على قبلي ياك ... باش تشوفني
شد وجهها وقال : وعلى قبل من جيت القنيصة ديالي
باسها فحنكها وداها ركبها موراه غطير بالفرحة ... كالعادة داها فدا ليها كاع داك البكا و الحرقة اللي دازت منهم ... ماخلا فين ساراها ...شرا ليها السقاطة دكازا كاملة وداها جيهت البحر وجلسو على الصخر ... هوا فوق حجرة وهي قدام بين رجليه فحجرة نازلة شوية ... عنقها وشد ليها فيديها بجوج وضمهم لصدرها وقال بحب وصوت خافت
- كي دوزتي هاد الايام بلا بيا ؟؟
تنهدات وهي كتاكل فالشكلاك ومتكية بضهرها على صدرو وقالت ساهية فالبحر
- جهنم الكحلة ... دازت عليا كحلة حسيت بالموت كدق عليا ... حساب ليا صافي مشيتي عمرني نشوفك مرة اخرى
ضحك وقال فودنها وهوا مغمض عينيه
- و كضني باللي نقدر نسمح فيك ونخليك ؟ الى كنتي كتنوي فيا بحال هاكا راك مزال مكتعرفينيش
تنهدات : نتا عدبتيني ... عرفتي صدمتيني ... كااااع ديك الهضرة اللي كنتي كتقول ليا ضربتيها فالزيرو ... بقا عقلي كيقول ليا راه غييير كان كيدوز بيك الوقت بحال هادوك اللي كيعاود ليك عليهم ... ودابا راه مع وحدى اخرى كيعاود ليها عليك
ضمها عندو وتنهدد تنهيدة طويلة خاشي وجهه فشعرها وقال
- مزااااال معارفة وااااالو .... الى كنتي كتفكري بحال هاكا راكي مكتعرفينيش كااع .... طلبي عينيا نعطيهم لييك اميرتي ... (تنهد) طااااااحت واللي عطا الله عطاه ... وحتى انا هاد الايام كاملة دازت عليا كحلاااا .
اميرة : وعلاش مكنتيش كتجاوبني
محمد : كنت معصب ... واخا معصب جيت باغي غير نشوفك من بعيد وبقيت شحال مابنتيش ليا ... حتى رجعت المرة الثانية عاد شفتك
اميرة : اخر مرة ديرها ليا ... المرة جايا منهضرش معاك
هي كتغوت وتعاود وهوا ساهي فيها فصمت وفعينيه حزن كبير وهم كبر من عمرو .
حطها فالحومة فين ساكنة وهي فقمة السعادة ... خرجات اي حاجة كضرها بداك الغوات وهي قريبة منو ... عنقاتو بقوة وباسها فحنكها ودخلات للعمارة فرحانة كدير ليه باي باي ... ركب على موطور مشا وخرجات سميرة من مور واحد الشجيرة حاطة يدها على فمها فقمة الصدمة
دخلات سميرة للدار مصدومة ... غير ساكتة مكتهضر مكتنطق ... ساهية واللي هضرات معاها فالبنات مكتردش عليها ... شافوها كتجمع حوايجها بالليل واستغربو .. وقفات عليها اميرة وقالت
- واش غتمشي؟؟؟
سميرة : اه بعد غدا غنبدا الخدمة ... الصباح خصني نرجع ... المهم اللي نوصيكم ردو البال البوطة ... والباب ... وتوكضو شوية
جمعات سميرة حوايجها كتوصي وتعاود وطاحو نعسو كل وحدة عطات وجهها للحيط . الصباح مشات اميرة تقرا من بعد ما ودعات امها وحتى سميرة هزات حوايجها ووصات سلوى على اميرة ترد ليها البال حتى عيات ومشات شدات تران .. غادية وييها على كتفها كتخمم وتنهد ... وصلات ومشات للدار حطات الحوايج وخرجات عيطات لهدى فتيليفون وهي راكبة فالطاكسي
سميرة : الو هدى ... انا مامات اميرة ... بغيت نسولك على واحد الولد سميتو محمد كيعرف اميرة مللي كانت فالباك ... ونتي كنتي صاحبتها غتكوني كتعرفيه ...... ايييييه هوا هاداك اللي عندو الموطور ... لالا مكاين والو غير بغيت نعررف فين كيسكن وصافي ... ااااه العين السلوكي ... اييه .. صافي عرفت ديك البلاصة... قلتي باه عندو هريات تحت الدار ... صافي غنشوف شكرا ابنتي .. الله يعاونك
زواج
وصلات سميرة للحي وبدات تسول حتى لقات الدار وطلعات دقات فتحات ليها مرا بالبيجامة نقية دايرة نضاضر وشعرها كحل فيه شوية دااشيب لقدام
سميرة : السلام وعليكم الاللة ... سمحي ليا واش نتي ام محمد
سميرة : لاللة نجاة سمحي ليا على هاد الدخلة ... انا جيت غير نهضر معاك على ولدك محمد ... راه مابغاش يتفرق ليا على بنتي .. نتي باينة فوجهك الله يعمرها دار ... راكي عندك البنات وغتفهميني
فديك اللحضة خرج الاب من الحمام موضي باغي يصلي .. سمع الهضرة ودخل عندهم قال باستغراب
- السلام وعليكم ...
نجاة : ها باه الاللة .. قولي ليه حتى هوا يسمع
الاب: ياك مكاين باس
بدات سميرة تبكي وقالت متأثرة : ولدك السي لحاج ... مابغاش يتفرق ليا على بنتي ... هادي شي عام دابا وهوا كيتبعها وكيلهيها على قرايتها ومستقبلها ... والبنت باقا صغيرة وكيوهمها بالهضور الخاوية وهي فسن المراهقة .. وهاد العام عندها العام اللول فالطب وسيفطناها حتى لكازا ومشا حتى لعندها ... كل مرة نحصلو كيدور حدا الدار فدار البيضاء ... هضرت معاه ... ومشيت شكيت بيه ووقع ليا الاتزام ... و والو حتى حاجة ماقضات ... بقاو ليا غير واليديه هاني جيت عندهم وماعارفة فين نخبي وجههي .. راه وقع ليا التزام والى عاودت شكيت بيه غادي يأدبوه
دارت نجاة يدها على خدها مصدومة وكتشوف مخلوعة وقالت
قال الاب بصرامة : صافي الشريفة ... غير كوني هانيا معمرو يعاود يدور بيها ... ولاكن حتى بنتك خاصك تحكميها ... محمد راه غاااادي لالمان وراه كنجريو ليه فالاوراق يتزوج ... صافي قربنت نطرقو هاد المسمار .
تنهدات سميرة من بعد ما سمعات كلامهم وناضت خرجات تلاقات بمحمد طالع مع الدروج ... غير شافها صفار وجهه وطلع كيجري للدار ماهضرش معاها .. وحتى هي هزات راسها فالسما ونزلات
دخل محمد للدار لقا باه واقف كينكر ومو حاطة يدها على خدها ساكتة كتخمم ... شاف فيهم بتشكيك وقال
الاب بجدية : راه لكريدي بسميتي ... واش نتا عطاتك البنكة شي ريال ؟ واش كتعرفك ؟ انا اللي جريت وجاريت باش هزيت لكريدي عليك ... باش تمشي لتما تحرك وتجمع راسك وتخلصو ... وتكون راجل
محمد : مامرتاحش لهاد الزواج ... كن مشيت غير شي يامات عند حنان حتى نضبر على راسي ولا نشوف اش ندير حسن من هاد التزويجة
نجاة : ومالك مزوج بيهت بصح راه مخلصة باش دير معاك الويل عليه مارياج بلو ولا اش يقولو ليه وبالفلوس .
هبط راسو مزير ساكت ورجع شاف فباه وقال
- شنو دابا ؟! واش صافي غير نجمع حوايجي !! صافي !
مجاة : ايوا يالاه يالاه باش تمشي وتعرف بعدا غير ديك اللي غتديك كي دايرة
رد بنرفزة : تكون كما بغات تكون ... وحدة مساليا بغات فلوس
الاب : ونتا خاصك الاوراق .. ويالاه الله يرضي عليك ... سير شوف المستقبل ديالك ... ماعندك ماير هنا .
بقا محمد ساكت شحال وناض بسرعة نزل طلع فالموطور ومشا مباشرة لدار اميرة سبق سميرة وبقا واقف كيتسناها حتى بانت ليه ومشا عندها مباشرة
لحضة وداع
تلفتات سميرة شافتو وهي تعبس .. وقف قدامها وقال بسرعة وجدية
- عارفك جيتي عندي للدار تشكيتي مني ... ويمكم قالو ليك شي حاجة فشكل ... شوفي اخالتي ديك الهضرة مامنها واااالو ... زواج مزور وكولشي مزور وكولشي بفلوس .... حاجة وحدة اللي حقيييقية خاصك تعرفيها ... كولشي على قبل اميرة ... هادشي كامل على قبلها ... (بدا كيترعد وفمو نشف ) انا مكنضحكش عليها ... ومابغيتها تعرف وااااالو .. صافي خليها تعرف باللي انا مشيت لألمانيا نقرا ولا نخدم حسن ... مابغيتهاش تصدم ... مابغيتش نتسبب ليها فشي حاجة خايبة الله يرحم ليك الواليدين ... ماتقولي ليها والو .. متبغيتهاش تعرف ... وياك هادشي اللي بغيتي .. بغيتي غير نبعد منها .. هانا غنبعد ... ولاكن خلي الامور هانيا ومغتعاوديش دابا تشوفيني
بقات سميرة ساكتة كتشوفيه وفالطريقة باش كيهضر .. كامل كيترعد ومبورش بحال الى فيه السخانة ولا كيقفقق بالبرد والهضرة كتخرج مدرجة ... تنهدات وقالت
انا مابغيتش ليك المضرة اولدي ... انا عندي بنت باقا صغيرة ونية وكنخاف عليها ... سير الله يسهل عليك اولدي
تنهدات وطلعات وبقا هووا وقف كيشوف فيها بنضرات غريبة ورجع مشا بحالو
وككل ليلة كتبات اميرة مجمعة هي ومحمد فالتياليفون وهي فقمة السعادة مكتسمع منو غير الكلام الزوين وكل مرة كيمهد ليها ويقربها من موعد السفر ديالو ويبسط ليها الامور باش متخلعش ومتصدمش .. حتى رجعات كتسولو شحال باقي ليك .. وشنو درتي وشنو وجدتي ببساطة .. وحتى فاش خبرها بتاريخ السفر متصدماش .. جاتها قاصحة وبكات باليل حتى شبعات .. لاكن كانت مجهزة لهاد النهار وعارفاه غيجي .
وصل اليوم الموعود ... وباتت اميرة فايقة كتهضر معاه فتيليفون بدون انقطاع ... كيعاود ليها شنو كيدير .. باللي داير الكيت كيهضر معاها وكيلبس و يخرج باليزاتو .. باللي شد الطريق للمطار للدار البيضاء وباللي وصل لللمطار وباللي بغا يوشفها قبل ميمشي .. حتى هي فديك الاثناء كانت كتلبس و تزرب و تزرب حتى فسلوى اللي غتديها تشوفو ... طلعو فالسيارة بجوج مباشرة بلمطار... كانت لابسة دجين وصبط خفيف وتيشورط ... دخلات للمطار كتقلب حتى شافتو واقف هوا وباه وخوه ومو ... شافها وتسل من بينهم وجا عندها بابتسامة عنقها بقوة بلا ميعير انتباه لحتى واحد وزير عليها ... بدات كتبكي وتنخصص وسلوى كطبطب عليها وتسكتها وضحك وهوا كيضحك من القرجوطة للفوق وعينيه مزيرين . فجأة جبد علبة صغيرة من جيبو ديال الكويرة وقال
- هادا واحد السفونير خفيف باش تبقاي تفكريني
حلاتها لقات فيها سنسلة رقيقة ديال النقرة فيها الوسط حبة صغيوة كتبري فالازرق وعنقاتو مرة اخرى وهوا كذلك .. فديك التعنيقة حيد ليها مقبط من شعرها وقال كيضحط معاها
- هادت غنديه معايا ... ماشي باش نتفكرك بيه حيت اصلا مغنساهش .. ولاكن باش ناخد شي حاجة منك معايا
مشا محمد وخلا وراه اميرة كتبكي باغا تسخف ... دار بالعرض البطيئ وهوا كيشوف فيها وغادي ... مع الدورة دور وجهه ورمش ... مع الرمشة هبطو الدموع اللي كانو واقفين على الحافة وزير على عينيه بصبعانو ومشا ، بقات واقفة فالمطار والحركة متوقفة قدامها ... خرجاتها سلوى من تما جامدة مكتحركش وبقات واقفة برا والدموع نازلين حتى بانت ليها الطيارة طالعة فالسماء وبقات متبعة ليها العين شحال عاد رمشات بتنهدية عميقة جدا طالعة من الاعماق.
مشا الونيس .. مشا الروح ... مشا اللي كان كيسوا عندها الدنيا ومافيها ... مشا اللي كان بسمة والفرحة بالنسبة ليها ... بقات وحيدة والدنيا كحلة فعينيها ... كتحاول تخرج من دائرة السهو والتفكير والتخمام بالقراية ، وكملات مسيرتها بوحدها وهي فبالها انه غيرجع اكيد ومأكد . . . بقات من المدرسة للدار من الدار للمدرسة وكل ليلة كدخل للفاييس بوك تهضر معاه .. كتشوفو ويشوفها وتعاود ليه على نشاطاتها اليومية .. وهوا كذلك .. كل ليلة كيعاود ليها على نهارو ... ومنو هوا عرفات باللي بدا خدمة كمساعد لاكن لقا راسو باش يخدم خدمة حسن خاصو ديبلوم اخر احسن وتما وقرر يبدا فالدكتورة ويخدم فنفس الوقت .. عجبها الحال واخا حسات بهادشي غيطول بزاف ... مزال غيزيد يجلس كتر حتى يسالي لقرايا ويخدم ويدير علاش يرجع عندها .. مكانتش تقدر تنعس شي ليلة بلا متشوفو عبر الفايس بوك وحتى هوا كاان كيجلس يتسناها دخل وفكل مرة كدخل كتلقاها جالس كيتسنى وكتبدا الدردشة بيناتهم حتى كينعسو . لاكن هادشي مكافيش بالنسبة لأميرة اللي رجع كيتعطل وبعد المرات مكيدخلش كاع بسبب ديق الوقت والقراية اللي بدا والخدمة ... ودائما كيعطيخا مبرر التعب والارهاق اللي كيطيو طيحة وحدة وبلا مياكل كاع . رجعات اميرة كدخل فحالات الاكتأب بسبب هاد التغير الشىء اللي خلاها تنفاجر عليها فواحد الليلة بالبكا باش يرجع فأقرب وقت .
ضغطات اميرة على محمد بما فيه الكفاية حتى فعلا صارحها وقرر يرجع ويسمح فكولشي وحجز عبر الانترنت فالطيارة استعدادا للعودة .. ارتاحت طبعا ورجعات ليها الروح . وفاقت فرحانة كتوجد تمشي تقرا حتى فاجأها اتصال برقم الماني وفتحات الخط ردات
اميرة : الو ؟؟
صوت مرى : اميرة ؟!
قالت امرة باسغراب: اه شكون معايا؟
قالت المرى بصوت هادئ لطيف : انا حنان اخت محمد ... كي دايرة لباس عليك ؟ كي غادية مع الدراسة
ابتاسمات اميرة وقالت : الحمد لله .. متشرفين
حنان : نتي مكتعرفينيش حيت مكنضنش عاود ليك محمد عليا ... ولاكن انا كنعرف بطبيعة الحال .. حيت عاود ليا عليك ... وعلاش جا لألمانية وشنو الهدف ديالو من هادشي كامل ... المهم احبيبة انا رتاحيت ليك من خلال الهضرة اللي قاليا عليك ... ولاكن بغيت نهضر معاك فواحد الموضوع وكنتمنى تخلييه بيناتنا بلا متقولي ليه حتى حاجة
اميرة بخوف : واخا .. شنو هوا الموضوع ؟؟
حنان : لبارح هضر معايا محمد وصدمني باللي قطع البيي للمغرب ... تصدمت وحاولت معاه حتى عييت .. فالاول كان كيحساب ليا غير كيضحك .. ولاكن فاش شفت صور ليا البيي صدمني وعرفتو بغا يرجع على قبلك نتي ... ولاكن بغيت نهضر معاك انا وحسبيني بحال ختك الكبيرة . راه ماشي من مصلاحتكم بجوج يرجع ويغامر هاد المغامرة هادي كاملة ويسمح فكلشي من بعد ما رصا امورو واستقر يضرب كولشي فالزيرو
تدخلات اميرة : لا ماشي مشكل غير خليه يرجع .. يخدم هنا بحال هنا بحال تما
حنان : لا ماشي بحال بحال احبيبة باش نكونو واضحين ... هنا راه غيدير مستقبل كيحلم بيه اي واحد ... ويقدر يرجع عندك نتي ... علا بيدمن تقراي وتخرجي يكون هوا دار شي حاجة فحياتو حتى هوا ... انا مكنعارضش هاد العلاقة بلعكس فاش عاود ليا عليك ووراني صورتك فالفايس بوك دخلتي ليا لخاطري وتبارك الله عليك حتى نتي راكي مجتهدة مشاء الله وعندم مستقبل زوين وغتخرجي طبيبة .. خليه احبيبة حتى هوا يدير شي حاجة فحياتو .. مضيعيهش راه باه هاز على قبلو كريدي ومو طاحت ليهم فالدار فاش سمعاتو بغا يرجع .. راه مشاااكيل غادي يوقعو دابا الى رجع
اميرة : يرجع وانا راه غنقرا ونخدم وانا نعاونو
تنهدات حنان : علاش ميعاونكش هوا ... ولا تعاونو بجوج ..راكي نتي معارفاش اش داز علينا حتى جبناه لهنا ... الله يعطيك الستر احبيبة فهميني ومتخليهش يضيع مستقبلو راه فرصة وحدة اللي عندو الى ضيعها غيضيع حتى عائلتو معاه
حاولات حنان قدر الامكان مع اميرة حتى قدرات بطريقتها ولطافتها تقنعها وبنات ليها احلام لانها عرفاتها مراهقة كتأمل كل ماهوا جميل .. رسمات ليها دار ساكنة فيها مع محمد وهما فقمة السعادة وعرس اسطوري كتحلم بيه اي وحدة .. وكولشي فرحان ليها عائلتو وعائلتها و كملات قصة حبهم بزواج ومستقبل جميل .. تغيرات نضرة اميرة وحسات براسها مقبولة وسط عائلتو ومحبوبة عند ختو وهادشي فرحها وحسسها بأنها قريبة منهم ووحدة منهم ماشي برانية . اخيرا تقبلات اميرة كلامها وقطعات معاها بكل فرح وسرور ومشات لقرايتها قرات ورجعات للدار جلسات كتسناه حتى دخل بالليل وفتح ليها لاكام عينيه تقال وشعرو منكوش وجالس فوق الناموسية كيتفوه عريان لابس شورط مقطن رمادي وصدر رياضي رجولي .. بقات ساهية فيه بابتسامة وقالتورهي مربعة رجليها قدام البيسي بايجامة
- شنو كنتي كدير ؟
تكا على ركابيه وقرب للكاميرة وقال مبوق
- كنت ناعس . . . عاد دخلتي بالسلامة ولا كفاش؟
اميرة : لا دخلت قبييييلات حساب ليا غتكون مزال فالخدمة
محمد: رجعت بكري ليوم شوية تكيت نحفض صدقت ناعس .. اصلا مابقات قراية مابقا لا مساعد لا سعاد
هز واحد الحاجب ونيت دايخ يالاه فايق وقرب للكاميرة بدا وجهه كيبان طويييل وعينو خارجة وقال
- واش كتسطاي عليا دابا نتي ولا شنو ؟؟؟ مرة اجي مرة لا جلس !!!
بقات ساكتة شوية مخلوعة وقالت بتردد : صافي بقا حتى تكمل قرايتك ... انا غنتسناك حتى تسالي
بعد كيشوف فيها عاد تقادات الصورة وبان وجهه ومقاد وهوا داير يدو على خدو كيشوف فيها متلقا ميقول
محمد : دابا كفاش !!!! واش باغا تصعريني ولا شنو ؟ شوفي اميرة والله مافيا اللي يتعصب واصلا معااااصب الواليدة مرضات حيت عارفاني جاي والواليد غير غنوصل عندو غيلوح ليا ورقتي دالحالة المدنية ... كنت كتسناك تباني غير نبدل معاك الجو طلعتي نتي الاي غتنوضي ليا لقوق !
بطريقة هادئة خلات اميرة محمد يتراجع على قرارو بعدوته لارض الوطن واخا مكانتش مقتانعة مية فالمية بهاد التراجع وكانت مترددة .
رجع محمد لقرايتو وشغلو وحتى هي رجعات لقرايتها وبقا بينتهم الفايس بوك هوا الوحيد اللي كيجمعهم وهوا الوحيد سبب المشاكل اللي كتنوض بيناتهم بحيت فكل مرة كتحط اميرة شي صورة ليها كينوض موراها الصدع وبحت جويل وسين وجيم ومعامن مشيتي ومعاياش جيتي و شكون هادا اللي كيعلق ليك وشكون هادا اللي قبلتي وعلاش قبلتيه .. كترو المشاكل ومع كل تأخيرة على الوقت اللي مولفين كيتلاقاو فيه كينوض فيه مشكل كبير . وكالعادة وككل ليلة دخلات اميرة للفايس لقاتو غابر . . . بقات كتسناه وحطات صورة ليها وهي فالسيارة سايقة الطموبيل فالطريق ولاحتها فالفايس وبقات تابعة التعاليق كتقرى وتجمجم حتى سيفط محمد لاكام ماعرفاتو كيفاش دخل وهي كانت عاسة عليه كاتسناه ... يالاه فتحات لاكام وهوا يبان ليها شاعل ماشي هوا هاداك عرفاتو فاق من النعاس ومخسر ومطلع دوك الحجبان فالسما بحال ديما . . بلا سلام بلا كلام دخل نيشان وقال
- فين كنتي غادة بالطموبيل ؟؟؟؟
اميرة : مالك ؟؟؟ ياك لاباس ؟
محمد : سولتك جاوبيني فين كنتي غادة بالطموبيل
وثرها وقالت : مشيت غير ندور شوية
محمد : بوحدك ولا معاك سلوى ؟؟
اميرة : بوحدي
هز حاجبو وقال : مامعاكش سلوى
اميرة : لا
محمد : وشكون اللي مصورك جنون ؟؟؟
صفار وجهها وقالت : قبت ليك بوحدي ياه!!!
قرب للكاميرة معصب وقال : دابا نتي بوووحدك !!! واخا نتي بوحدك هادي فهمناها ... و الجن اللي حداااااك ... الجن اللي هز تيليفون وصورك شنو سميتو
اميرة : اشمن جن واش مالك تسطيتي
محمد : يااك قلتي بووووحدك ... وتيليفون شكون هازو !!!! تهز بوحدو ... الى ماهزو تا واحد راه جن اللي هزو !
سلوى: قولي ليه دير ليا كاميرا حسن ... نتي مالك شداك لهادشي كامل ... بقاي حرة عيشي كي بغيتي لا تابع لا متبوع... تهنيتي من سميرة وعبد الاله جاك هادا تابعك كي خيالك
تنهدات اميرة: والله الى كي خيالي بابا ومدايرش ليا هاكا
مسحات كولشي وبلوكات كلشي وسيفطات ليه لاكام قبلها وقال
- حيدتي داكشي؟
اميرة : مالك عور ... راه كولشي قدامك
محمد : امم اوك (حط كاس ديال القهوى ) ودابا اجي نتفهامو ... شكون اللي كان معاك فطموبيل
اميرة : راه قلت ليك سلوى
محمد : شوفي بلااا ماتقولي ليا لا سلوى لا سللو .. غتجيني نيييشان وتقولي ليا شكون هاداك ولا حتى انا غنخرج دابا واحسن كاورية نجيبها عندي للدار .. تانسالي ودير لاكام ونغمزها طفي الضو و نقول ليك راه هشام اللي طفاه ... بغيتي هاد الفعايل ؟
تصدمات وقالت: يااااك ؟؟؟ نتا اصلا على سبة ويعلم الله شنو راك كدير تما
هز الكاس شرب منو وحطو ببرودة وقال
- يالاه قولي ليا شكون اللي كان معاك ... وحيدي سلوى من القائمة حيت ماشي هي اللي كانت ... وعلاش تكدبي عليا
تنهدات وقالت: وراه سلوى واش مكتيقش فيا
غوت بغضب وضرب الطبلة بديو تا تهزات مخلوعة وقال
- ماشي سلوى بلا متصعريييي ديلمي فهاد الليل ... غتجيني نيشان ولا نسد مو هاد الفايس عمرك تشوفي وجهي
رجعات عقدات حجبانها من بعد ما طارت الخلعة وقالت
- سدوو !!! بغيتي تسدو سدو نتا كتقلب على السبة اصلا هادشي اللي بان ليا
بقا ساكت كيشوف فيها شحال ورجع قال
- كادبة عليا ... وخارجة ماعارفكش كاع شكاديري وماعرفت كاع شنو مخبية عليا .. وكنخرجي فيا عينيك ... فاللول كنتي بوووحدك فطموبيل ... وبفمك قلتي مكانش معاك سولى... فاش سولت قلتي ليا سلوى اللي صوراتك ! سلوى طولات يدها حتى لعندك باش نتي تصوري (سكت كيشوف فيها بخيبة امل ) بديتي كتبدلي عليا آااميرة ... انا هنا على قبلك نتي والله مكنعس كي الناس ... كنقرا ونخدم باش نرجع عندك ... ونتي تما عايشة حياتك كي بغيتي وكتخبي عليا ... شنو زعما انا عندك زايد ناقص ....... هادا هوا سيمو ... صافي سيمو بدا كيتنسا
بقات ساكتة حادرة راسها وقالت : مكنكدبش عليك ... انا قلت ليك سلوى ... فالاول مابغيتش نقولك سلوى حيت غيحساب ليك دالعين ... والله حتى سلوى اللي كانت معايا
اميرة : بتمرد ) وشنو بغيتي ندير باش تيق ؟ حتى نتا راك كتخبي عليا شحال من حاجة
هز حجبامو لفوق وقال: اااانا كنخبي عليييك !!! نتي عارفاني معاياش كندخل ومعاياش كنخرج ... انا هنا وسط الكاوريات وحتى حدة ماعمرات ليا لعين ومزال شاد معاك الخط ... نتي تما مع وجوه *** ودغيا قلبتي عليا وجهك
اميرة : حاشاك
محمد : شوفي انا هاد المبرر ديالك مدايزش ليك باش نكونو مفاهمين ... غتصارحيني بشنو كاين ولا جيني من اللخر باش منبقاش انا شاد شي حاجة ماشي ديالي .
نخزاتها سلوى برجلها وقالت بصوت منخفض
- قطعي عليه قطعي ... قطعي برامة من الدل والله الدل لا قضا ليك شي حاجة .. صدميه وقطعي عليه
بقات عليها سلوى بالنخيز حتى كيداتها وقالت
اميرة : كتقلب على السبة ... صافي سير الله يعاونك مع الكاوريات ديالك
قطعات عليه ودارت مربعة يديها قبل ميجاوبها .. جلسات كتسنى يعاود يعيط لاكن خرج فخطرة وهي دور عند سلوى
- ندمت اللي كدبت عليه
سلوى : دابا يعيط .. تكمشي خليه تا يبرد وغيعيط ليك
اميرة : والى معيطش؟
سلوى: هوا اصلا فالماااانيا ... واش كيحساب ليك مداير والو ... حساب ليك مراهش كيدوز وقتو تا هوا ... شتي واخا ميكونش كيبغيها راه غيديها يدوز معاها الوقت .. واخا كيبغيك ويموت عليك ضاروري ميدوز مع البنات . المهم وحدة فالقلب والشي لاخر دوز حيد
قطعات اميرة الاتصال وكتسنا منو هوا يتاصل وتجي المبادرة منو ... كل ليلة كدخل وتسنا يبان لاكن مابانش ليها بالمرة من نهار قطعات عليه .. كل ليلة كتجلس تفكر واش منو الغلط ولا منها ... فالاول مكانتش كتقدر تصبر على غيابو .. لاكن اللقاء عبر الشاشة فقط خلاها تصبر اسبوع ... والاسبوع رجع جوج اسابيع ... وجوج اسابيع رجعو شهر .. وكل مرة تجلس تسناه وبعد المرات كتردد باش تسيفط ليه مسج تسول فيه لاكن كتمنع راسها وتسناه هوا يسول.. ومع الاسف مكيدخلش اصلا . ققرات تسيفط ليه نقطة فقط وتشوف واش كيدخل .. واش كيطل عليها . وفعلا سيفطاتها وبقات عاسة عليها اسبوع بدون جدوى ... مادخلش فمرة وحتى المساجات مافتحهمش. تسنات وتسنات حتى داز شهر نص عاد تفاجآة بمسج جاها ودخلات فتخات المحادثة مالقاتوش لاكن سيقط ليها نقطة حتى هوااا.. فرحات وفرحوو جميع حواسها وبدات تنقز بوحدها وخلاتو مارداتش عليه .. خليه بما انه رد ليها النقطة فراه مهتم ليها .. والا مكانش يردها ويشوفها ويخليها
الايام كدوز واميرة كل ليلة تسنا منو يجبدها .. من النقطة اللي رد ليها معاودش سيفط شي حاجة .. قررات مرة اخرى تسيفط شي حاجة وسيفطات ليه ابتسامة .. وتسنات يمكن يقول ليها شي حاجة .. فاليوم التالي رد ليها نفس الابتسامة وهي تبتاسم وبقات كتفكر شنو دير ... اشنو غادير دابا؟ سيفطات ليه قلب وهي حشمانة ومترددة ومنعساتش باتت كتسنا تشوف شنو يدير حتى صبح الحال ديال الاحد ولقات مسج ودخلات ليه بسرعة وقلبها غيسكت لقاتو مسيفط ليها قالب مهرس
تأثرات بداك القلب ولقاتو داخل .. اذا كاين .. شنو كيدير ؟ كفاش دوز هاد المدة كاملة وشنو دار فيها ... واش كيتفكرها كل ليللة كما كتفكرو هي ؟ جلسات بوحدها كتخمم وسيفطات ليه مسج
تلفت شاف فيها وهي تزنك ... تمنات فديك اللحضة تشق الارض ومايديرش فيها ديك الشوفة ... عرفات راسها مزبلاها معاه وبقات ساكتة ... أكتفت تشوف فيه وتسكت وهوا فكوزينة مرتبة وراه ونقية بلاكارات فالابيض وهوا كيمشي ويجي بالشوررط والصدر معري والضهر عريض .. لاحضات شي حاجة جديدة فيديو شكات فيها وقالت
- شنو عندك فيدك؟ !!
قال وهوا عاطيها بالضهر كيجبد السكر من البلاكار
- والو
اميرة : واش تحرقتي ؟
رد : اه تحرقت
اميرة: اوييلي شمو وقع ليك
جاب السكر وقال بلا ميشوف جيهتها
- ماوقع والو..
سكتات شوية كتنهد ويدها على خدها متبعاه بالعين كتأمل فيه وكلها شوق تعنقو وتكا على الصدر الاي ضايع من بين يديها .. ماكرهاتش كوم كانت معاه وكضحط هي وياه .. كانت غتكون الحياة جميلة .... تنهدات فاش فاقت من سهوتها ورجعات الحقيقة المرة وبقات غير تشوف بعويناتها وباغا تجبد معاه الهضرو .. مالقات متقول وقالت
- كي داير الجو عندكم ؟
قلب الحاسوب جهة نافدة خشبها بني فيه الزاج وقال
- التلج على برا
تصدمات وقالت: واااو تلج كااع!!!
شافت الدنيا بيضاء على برا والديور خشبية بالقرمود كيبانو ليها مغطيين بالثلج وشجرر الصفاف طياح عليهم التلج ..
محمد : التلج برا واصل لنص باب الدار ... كل صباح كنخرج الكراطة ندفع فيه
اميرة : .. تحولتي من ديك الدار اللي كنتي فيها ؟
محمد : مابقتيش فيها
اميرة: هاد الدار بانت ليا كبيرة .. ماشي فعمارة !! حيت دوك ديور اللي حداك متشابهين ومستقلين
محمد: اه .. هادي بوحدي .. ديال الخشب هاد الديور
اميرة: علاش مابقيتيش فلخرى ؟
محمد : مت راجل ختي كانت عايشة هنا بوحدها .. مرى كبيرة ومرضات وداوها لسبيطار كتعالج.. شحال وهي تما فاللخر ماتت مسكينة وبقات دار خاوية ... بقات عليا ختي اجي اجي اجي وجيت ليها
اميرة : ختك مزوجة كاوري
محمد: اه
اميرة: اااه ... ايوا مزيان الدار اصلا خاوية حسن سكن فيها
محمد: بعيدة ليا شوية على الخدمة
اميرة: بزاااف؟
محمد : شوية ...ولا يمكم انا ولفت فالدار لخرى جوج خطوات هانا وصلت
اميرة: هاد المرى مسكينة ماعندهاش لبنات ؟
محمد: عندها ولد واحد هوا راجل ختي .. وكبير ماشي صغير وحتى هي كبرات مسكينة وماتت
اميرة: الله يرحمها ... دور ليا لكاميرا علاش خليتيني كنشوف فالحيط
محمد : كنحيد حوايجي .. غندوش
سكتات وهي كتسنا حتى رجع وقلب البيسي جيهتو بالزربة بلا ميهضر خلعها .. لقانو لابس نص كم كحل وشورط قصير رمادي وشعرو فازك بقا ليها غير ريحة الشمبوان تشمها .. كيضوي بقات غير ساكتة حشمانة منو
اميرة : بلاتي هانا جاية
ناضت البيت بدلات لبسات بيجامة وردية سخونة حيت البرد ودارت طاقية وطلقات الشعر وشوية ديال الريسيل وكلوز ورجعات جلسات قدامو مقادة لقاتو هاز عينيه فالتلفازة ومتكي على ركابيه كيتفرج فالكورة وقدامو اتاي والحلوة ديال الدار
اميرة : منين جبتي ديك الحلوى المغربية
هبط عينو شاف فيها وبقا كيشوف شحال عينيه ضاحكين وقال
بقاو ساكتين شحال وهوا كيشرب اتاي ويشوف فالتلفاز وقال
- مازال مابغيتي تقولي ليا شكون كان معاك فطموبيل
زفرات من من مناخرها وناضت جابت ليه المصحف وحلفات عليه قدامو وباللي مكتعرف حتى واحد من غيرو وردات المصحف ورجعات غضبانة جلسات بالزعفة قدام الحاسوب مقلقة وحابسة البكية ماعجبهاش البرود ديالو
- صافي انا غنسد دابا .. بصحة
تقاد فالجلسة قدامها وقال : بلاتي نوريك واحد الحاجة
هز حاجبو وداير ابتسامة جدابة ووراها يدو اللي قال عليها محروقة واشم فيها سميتها : اميرة " بالخط العربي منقوش وفوق الالف موشوم تاج صغير بلاصة الهمزة .. الوشمة جات فيلاصة باينة الى ابس نص كم تبان كاملة .. بقات كتحقق وتأكد منها مزيان وهي مصدومة وهوا كيهضر مطلع حاجبو بلا ميضحك
- وا قولي راني ناسيك
خرجات عينيها فدهشة وقالت بابتسامة وسرور
- سميتي!!!
رجع اللور وربع يديه كيسملل فعينيه بقرف وقال
- ونتي جالسة كتمرضي فيا وطلعي ليا فالسكر... شتي الى ضربني السكر ؤاه غير منك نتي (تنهد كيشوف فالارض فين طايح تيليكوموند وقال ) ينعل بو شي .. زعطة تفو
طلقات واحد الضحكة على حر جهدها وهوا كيضحك معاها ومدوزين الليلة بالهضرة والضح حتى داها النعاس قدام الكاميرة .
صبحات الصباح على الحاسوب بغات طفيه وهي تلقا مسج من اسم مجهول وجاها فضول ودخلات فتحاتو
-سلام اميرة انا نور الهدى عارفاك بلوكيتينس فالفايس . المهم نتي دابزتي معايا على قبل دري وقلبتي عليا وجهك ولاكن انا مقلتبتش عليك وجهي ... المهم بغيت غير نقول ليك راه تزوج ومشا لألمانيا .. تلاقيت خوه وهوا اللي قالها ليا .. باش تعرفي باللي انا ونتي ضيعنا عشرة ديال سنين على قبل دري . المهم بغيتي تبقاي مبلوكياني خليك مبلوكياني .
قرات اميرة المسج وبقات كتشوف فيه مصدومة مقادراتش تستوعب .. دخلات سيفطات ليه مسج تشوف واش يجاوبها لاكن مردش وناضت مشات للمدرسة تقرا وعقلها مشطون مامتيقاش كلام هدى . رجعات بالليل كتسناه يدخل وكتسارا فالبروفايل ديالو على انل يبان ليها شي دليل لاكن مالقات والو .. حتى حاجة مكدل على انه مزوج او كيعرف شي وحدة وحتى اون كوبل اللي كاين داير باش يفقصها حيدها قبل كاع متشوفها وغير سلوى اللي شافتها .
اخيرا دخل وسيفط ليها لكاميرا وحلاتها ... شافها مكضحكش ووجها صفر خايفة يكون الكلام صحيح وبادر بالقول
- مالكي ؟ جيتني فشكل ليوم
تنهدات بتردد خايفة تكون الهضرة بصح وتصدم وقالت بجدية
- محمد ... غنسولك ... وجاوبني بصراحة اوك
صفار وجهه وكبر بؤبؤ العين ديالو من الجملة اللي قالت والطريقة باش قالتها وهي كتنهج وترعد خايفة وحس بيها غتجبدي ليه موضوع الزواج حيت مكاينش من غيرو سر مخبي عليها . .. بقا ساكت لحضة وقال كيخبي التوثر ديالو
- المهم ... قبل متسوليني . . . خاصك تعرفي باللي كلشي على قبلك ... انا هنا على قبلك نتي...
قاطعاتو مغمضة عينيها : غنسولك وجاوبني ... اه ... لا ... ماتقول ليا حتى حاجة ومغنهضر فحتى حاجة اخرى
تدخل: اميرة صبري واحد الدقيقة ... حتى انا من حقي نعطي مبرر وندافع على راسي... معرفتش شنو سؤالك بالضبط ولاكن واخا يكون كما بغا يكون خاصك تسمعيني وتفهمني ...
قاطعاتو بنفس الطريقة مغمضة عينيها كتمجع القوة وخوفها وشكها زاد كبر وحسات بيه من طريقة هضرتو فعلا مخبي عليها شي سر وماشي بعيد تكون الهضرة ديال هدى بصح وكتمنى من اعماق قلبها متكوونش بصح حيت بدات الدنيا ور بيها غير بسبب الشك مزال حتى ما سمعات منو
تدخل: على قبل الاوراق ... والاه مابيني وبينها شي حاجة انا فقنت وهي فقنت .....
هوا كيهضر بسرعة ومتوتر ماكرهش يخرج عندها من الشاشة ... اما هي فشلات وحطات راسها على الطبلة بهدوء فوق يديها وحتى هضرة من داكشي مدخلات ليها لودنها ... عيا يهضر ويتهز ويشرح ويفسر و هي مهبطة راسها بحال الى مبنجة ... شوية هزات راسها عينيها حومر وفمها ناشف ماهبطات حتى دمعة وبغات تنوض .. شافها هاكاك و تخلع وبدا يضرب فالطبلة ويعيط
- اميراااا... جاوبيني اميراااا ... وا اميرا راه مزوج على قبل لوارق ... توقيع فورقة واصلا هادي هي خدمتها كتزوج وتشد لفلوس وتبقا معاك حتى دير وراقيك والله يعاون وتمشي تقلب على راسها فبلاصة اخرى واش هادا عندك زواج ؟؟ واش كتفهميني علاش كنهضر اااميرااااا جاوبيييييييني
شارت ليه بيدها كتحرك راسها بمعنى ماقدراتش تجاوبو وناضت من قدام الحاسوب مرفوعة خلاتو كيعيط غيحماق ومشات للبيت سدات عليها وجلسات فالارض ... كاع الهضرة اللي كان كيقول ليها بدات تخيلها وهوا كيقولها لوحدة اخرى .
دخلات سلوى سمعات الغوات جاي من البيسي وحطات الصاك ولاحت
الصباط ومشات كتجري طلات على الحاسوب لقات محمد جالس عاطيه بالجنب وكيهضر بالتيليفون ويغوت .. تلفت على غفلة لقا سلوى كطل عليه وقطع وشدها
-محمد: سلوااا شوفي اميرة راه تكون واقعة ليها شي حاجة شوفيها بالزربة
ردت عليه بارتباك : فين مالها ؟ مالكم ؟؟؟ شنو واقع
محمد: شوفيها بعدا سربي راه مشات للبيت وخلي لاكام هاكا
مشات سلوى كتجري بغات تحل لباب لقاتو مسدود وبدات دق لاكن لا مجيب ورجعات عند محمد كتجري
سلوى: مالكم شنو كاين راه سادة الباب مالكم
رد بتوتر: فرعي الباب عنداك تكون واقعة ليها شي حاجة
سلوى: واش دابزتو؟
محمد: وا شوفي ختك هي اللولة .... (ضرب الطبلة) المرض تفوووووو
جلسات تسنا حتى طابت بالجلاس عاد وصل عبد الاله وسميرة كيتجاراو ويسولو وسلوى ماعارفة باش تجاوب حتى جا الطبيب وجلسهم معاه فالبيرو مخلوعين
- مكاين علاش تخلعو... واش هاد الحالة سبق وجاتها ؟
ترددات سميرة وقالت : جاتها واحد المرة
عبد الاله : علاش ماقلتيهاش ليا !!!!
الطبيب: واش عمرها شافت طبيب ولا دوزات ؟
شميرة : لا عمرها دوزات ... انا غير ختها لللي قالت ليا جاتتها هاد الحالة مأخرا .. قبل ماعمرها ماكانت كتجيها
الطبيب: درنا ليها بعض الفحوصات ... بينو باللي عندها اختناق فالرئتين كيمنع دخول الاكسجين ... فاش مكيدخلش الاكسجين للجسم ديالها و الدماغ ديالها كيجيوها بحال هاد الحالات .طديال الاغماء ...
تخلعو الواليدين وقالو : واش هادشي خطير ؟؟؟
الطبيب: بطبعية الحال ... راه اي مجهود كديرو قوي بحال الجرا بحال الرياضة ... اي حاجة كتخلي الانسان يتنفس بسرعة راه غتسبب ليها الاغماء فأي لحضة... تقدر تنفس عادي بشوية ولاكن الى دارت مجهود راه كتخنق ودماغها مكيوصلوش الاكسجين ...
فالمانيا وبالضبط فدار محمد اللي كيضهر فتيليفون ويمشي ويجي ويجي من قنت لقنت
محمد : شكون غيوصلها ليها ؟؟؟ شكوووون الى ماوصلتوهاش ليها نتوما .. بربي وماتمشي عند مها حتى نخلي كولشي ونجي .... وماشي شغلي سيري عند مها ولا هضرو معاها ولا شوفو اش ديرو الهضرة خرجات من عندكم نتوما ماشي مني ... كَلنا هاد الزواج لكحل يبقا بيناتنا ماشي كولشي يسيق ليه خباااار نتوما عجبكم الحال نبقا مزوج كاورية انا جاااااي
قطع وجلس فواحد الركنة شاد وجهه معارف مايدير والوقت كيطير وهوا مرفوع محاسش بيه حتى سمع حس الطموبيل حدا الباب وطل لقا حنان نزلات ومعاها جوج بنات توام شعرهم سعر وعينيهم زرقين كيضهرو الالمانية وهي مكبطة فمونجو وليبوط وشعرها مزعراه . دخلات كتجري دفعات الباب وطلات لقاتو جالس مغمض عينيه وراسو بين يديه
سمعات سميرة توشويش حداها وصوت بحال الى كيقول ليها تقول شي حاجة
حنان : شوفي ..راه اميرة .. شي حد قاليها باللي محمد تزوج وماشرحش ليها خلاها هاكاك وهي فهمات كولشي بالمقلوب
حلات سميرة عينيها مصدومة عاد عرفات سبب هاد المرضة والبكا اللي طيحو بنتها فالسبيطار كتلوى بحال الى شاربة السم .
حنان : الله يعطيك الستر راه محمد باغي يجي عندها ويسمح فكولشي غير باش يشرح ليها ... نتي عارفة اللي كاين غتعرفي كيفاش تفهميها
سميرة : واخا ختي كوني هانية انا غنفهمها كولشي
حنان : راه يقدر الواليدة تجي عندك حيت عيط ليها قاليها تجي تهضر معاك ....
قاطعاتها : االا لا مكاين حتى مشكل غير خليها بلا متعدب راسها انا غنهضر معاها ... دوزيه ليا الى كان حداك
حنان: واخا ختي هاكي
محمد: الو
سميرة : غادي نقول ليك غير واحد الهضرة عقل عليها مزيان .... شفتي اميرة هي اللي مغتديش ... واخا تبقا غير نتا اللي راجل فهاد الدنيا مغاديهاش ... وبلا متجي غير بقا متجي حثت مغتستافد حتى حاجة .. ودابا من ليوم غتفرق عليك اميرة و انا دابا عنفهمها مزياااان داكشي خاصها تفهمو باش دير عليك كروة حمرا وسير كما خرجتي ليا على بنتي انا بغيت ربي ينتاقم منك (قطعات)
قطعات عليه سميرة مفقوصة ومشات للبيت جلسات حدا بنتها فوق البياص وعنقاتها بحال شي بنت صغيرة كتبوس ليها فراسها وتراري بيها وتهز عليها الالم اللي حاسة بيه وتخفف عليها واخا صعيب بزاف على اميرة تنسا بين ليلة ونهار او دير فبالها كأنه شيء لم يكن . قطعات الماكلة وحتى الدواء كتردو فكل مرة شرباتو .. جلسات معاها سميرة مقابلاها فلكلينيك وعجلو بيها فالعلاج كيسرحو ليها الرية بالانابيب ويعطيوها فالمهدئات باش تبقا ناعسة . على الاقل جات هاد المرضة فوقتها سهطاتها ماخلاتها تحل عينيها ولا تبكي ولا حتى تفكر . ديما شاربة الدواء وناعسة ومها وباها واقفين معاها طيلة هاد الفترة حتى بدات تبرى شوية بشوية ومها حداها كضحك معاها وتنسيها واخا بانت ليها باللي مزال عاد غتبالي بالقضية ديال الزواج والفقصة مللي تفيق كي الناس ماتبقاش مجبدة وناعسة
داز شهر على اميرة فالكلينيك حتى كرهات ريحة الدوايات والسيستيم ديال المستشفى كل صباح واخا كانت كترتاح فالهدوء والكالم اللي كانت كتنعم بيهم وهي ناعسة... مكاينش الصوت .. مكاينش حس التقرقيب.. الممرضات كيدخلو عندها يبدلو ليها ليباري ويخرجو فهدوء بلا متحس بيهم .
اخيرا خرجات من لكلينيك ... ولاكن خرجات ضعيفة كتموت بقاو فيها غير العضام والرية ديالها كضرها وتنفس عندها مديق .. اضطرات دير شواهد طبيبة للمدرسة وتمشي مع واليديها حتى تصح شوية واخا باقين تابعينها حصص كثيرة ديال التصفية والدوايات كتيرة غتبعهم لمدة طويلة ... رجعات كتمشي جوج خطوات كتسخف وتبغي تجلس وحتى الهضرة كتعييها بزاف وكتفضل تبقا ساكتة .
رجعات بحالها لدار واليديها واول م دخلات لبيتها وشافت حاسوبها جاها الحنين وبدات كتبكي بوحدها .. جلسات فيه بشوية وشعلاتو ودخلات للفايس ديالو مباشرة بلا متشعر ... يالاه طلعات ليها الصفحة ديالو لقاتو حاط صورة ديال الوشمة ديدو " اميرة " قدام العالم وكولشي كيعلق عليها ويسول وصحابو شاديين فيه واللي سميتها اميرة دخلات دير ليه قلب .. فديك اللحضة لقاتها مها كتشوف فالشاشة والدموع كيجريو بوحدها ووقفات بشوية موراها وقالت
حيدات اميرة الفايس بوك فمرة وبدلات ليه لكود ودارتو طويل مخربق بلا متحفضو او تقيدو باش واخا تبغي تحلو مستحلش ليها .. بقات سميرة حداها حتى حيداتو وعنقاتها كتسكت فيها
- انا اللي حاسة بيك ... انا كنت حاسة بهادشي غيوقع .. سبحان الله خاطري مكانش مرتاح كاع واخا مكنبغيش نهضر معاك فهادشي ... دابا فكري فينا حنا اللي كنديرو المستحيل باش نوصلوك ونشوفوك احسن منا وحسن من كلشي ... هادشي اللي نتي عايشاه غادي يدوز وغيجي واحد الوقت اللي غتلقاي راسك وصلتي وكلشي يبقا غير تعاويد ... وغتبقاي ضحكي على راسك ... اما الى ضيعتي صحتك وقرايتك وخسرتي والديك عمرك ماترتاحي ... وغتندميي فاش يفوت الفوت .. انا معاك ابنتي وغنوقف معاك حتى تخطاي هاد الازمة (تنهدات) حتى واحد ميستاهل تبكي عليه من غير واليديك ... شوفي غير وجه باك مسكين كي رجع فاش مرضتي .. مينعس لا بنهار لا بالليل . شوفي شكايدير عليك وشوفي انا كي كنتحرق فاش كنشوفك كتبكي .. حنا اللي خاصك تبكي علينا اما شي حد اخر ماعندك ماديري بيه ... صافي ياك خديتي تجربة ... جربتي حتى نتي وعرفتي باللي هادشي راه كيجي منو غير المرض . وادابا صافي كبري عقلك شوية باش ترجعي صحتك دغيا وترجعي لقرايتك ولينا ونسااااااي عليك هادشي كامل ... بداي من جديد ... بداي حياة جديدة وطوي الصفحة راه اللي خلقو خلق غيرو شكون يكون هاد محمد كاع !
تلفتاة اميرة كتبكي وتكمدها وقالت بصوت مبحوح
- منقدرش منقدرش حاسة بالشوك فقلبي (شدات فصدرها )
تنهدات سميرة بأسى : عارفة .. ولاكن هادشي اللي عطا الله ... ميستاهلش ... صافي كما ختار حياتو حتى نتي خاصك تختاري حياتك
تكات راسها عند مها وقالت فشلانة ومريضة
- راه منقداااارش اماما راكي غير كتقولي ... راه حاسة براسي كنمووووت ... كنمووووت اماما كنموووت وقلبي كيضرني
الربطة زغبية الجزء الخامس والأخير
محتوى القصة
التنقل بين الأجزاء