يامنة الجزء 84

من تأليف Sana mina
2019

محتوى القصة

رواية يامنة

بعد راحة ايام للاستجمام الي دارها من اجل نقاهة من بعد مرض دام اسبوع ...رجل فسن متقدم شوية مصاب بارتفاع فالضغط الغير منتضم عندو ...رجع لموسكو من بعد ما دوز اسبوع ونصف ف ارمينيا ...في المكتب ديالو بالضبط ..كيشوف فلابتوب قدامو وسيگار مخاطيهش ابدا من اجود الانواع وخا يكون فيه كونصير ...دق باب المكتب ....اذن بالدخول حتى دخل لعندو ...لابس كوملي كحل وجنب فالجيب مشوار مزوق بالمارون والبيج وشال صغير نفس الوان المشوار ملوي على عنقو ...عليه ملامح الايرانيين حجبان غلاض ولحية كتيفة لكن يكسوهم شيب ...عينيه مشفرين ....
ايشان : رفاييل ...على سلامة ...
رفاييل "سد لابتوب وشاف فيه " : كاين شي جديد فما يخص الصفقة جديدة ؟ 
ايشان : لا مكاين والو هاد ساعة حالها حال باقي الصفقات ...حتى نشوفو مختص وعليها نبداو ...
رفاييل : مزيان ...شنو اخر الاخبار على هذاك الفلسطيني ...
ايشان "تكا مرفقو وجمع ايديه شابكهم ببعضياتهم حتى طرطق صباعو " : نتا غاتكون عارف ردة الفعل ديالو ....هضر معايا ...
رفاييل : خاصو يتعلم من داكشي الي وقع لصاحبو كيف كتشوف اهم عضو عندنا وميمكنش يتفرط فيه لكن هانتا كتشوف شنو جرا ليه ...خليه يكمل البحث تيعيا ...وجيبو لعندي باش نتفاهمو معاه تاهو ....
ايشان "حك لحيتو " : احم رفاييل سمعني مزيان ...هادشي االي درتي فعل خاطئ بزاااااف ...ميمكنش يتغفر ولا يتنسا ...واش عرفتي شنو هو فؤاد رمسيس بالنسبة ليا ؟ اااا 
رفاييل : ربيتيه ولكن الغلط الي درتي عاونتيه تا دخل وهاهو تحاسب حالو حال اي واحد فكر يدير فحالو ...
خبط ايشان المكتب تا عقد لاخور غوباشتو ...ناض كيشالي ويكشكش ويسب فيه ...
ايشان : وخااااااا يكوووون الي كان الا فؤاااااااد ارفايييل واش عرفتي شنو درتي ؟ اااا مقاااااااالش ليك غادي يخرج عطا حل مناسب نتااااااا "كيشير ليه بصبعو " ....مااااااشي سوووقك فيه يربح ولا لا ....
رفاييل : ايشان متعداش حدودك ...
ايشان "شاف فيه بتخنزيرة " : حدودي فحال حدودك متنساش عندنا نفس رتبة ويمكن انا زايد عليك ...بلا منهضر مع خوليو ا. رفاايييل ..."عض شفايفو طالق ليه تخنزيرة تقتل " ...
رفاييل "سمع اسم خوليو وهو يكمش ايدو " : فاش عينك ايشان ؟؟
ايشان "ضار تكا على البيرو بايديه بزوج كيخبط فيه بشوي بشوي بشوييييي حتى خبطو بجهد على اثرها تهز لابتوب " : حفرتي قبرك ا رفايييل ....هادشي مغنساااهش ليك ...
رفاييل : شنو قصذك ؟ 
ايشان : فؤاد انا الي عندي الحق ندير فيه مابغيت ...انا ربيتو عاونتو ...وحسبتو ولدي حيث معنديش ولاد ...كبر على ايدي وخا من بعيد ...الولاد عندك ياك ؟ 
رفاييل : عارف بالي عندنا فالقانون ديال مجموعتنا عائلة العضو محضورة ؟ 
ايشان : الى وصلت هضرتي لخوليو وتحركت ا رفاييل غادي نبدل هاد القانون ونطبقو عليك ...متنساش انا الي عطيتك هاد المنصب لانك تستحقو ...متخلينيش ندخل ونحيدو منك ...
لو كان فؤاد قدامي وقدامك مكانش غايخليك عايش ...."هز ايديه بزوج " وشكون عرف الى خرجت من دابا ساعة اش غادي يوقع ليك ...
رفاييل : "خبط فوق المكتب " : ايييييشاااان ...
ايشان : الي عندي قلتو نتا ضلمتي غادي تاخذ جزاتك لانك تعديتي الحدود بزاف طول هادشي دير الي قلت ليك حيث سكت ليك بزااف ...
ضار ضورة وخلاه بغا يتبخ دم ...اصلا ايشان اعلى من رفاييل بحيث ايشان دراع ليمنى وصديق خوليو وخوليو هو شاف ديالهم كاملين ورفاييل عطاه ايشان هاد الرتبة نضرا لكفائتو وخا ايشان كيبان اقل من رفاييل لكن الى فات تتحرك فلحضة يطيرو .....

شحال قاصحة تشوف عينين باك باكيين شحال قاصحة تشوف دوك نقطات ديال دموع على طرف عينيه باغيين يطيحو محروق مشوي على كبدتو ...اقصى احساس ممكن تحسو وهو من تشوف واحد فوالديك عليه دمعة حزن ...خاصة تكون شاقة طريقها وهابطة مرورا بحناكو ...
رفع فيه عينيه الي بداو يتسدو ....
الحاج : شنو وقع ليه اولدي ؟ اا ؟ 
صهيب "خلعو وجهو ماعرف اش يدير " : الوليذ م موقع والو ...يوسف ...
يوسف "باقي كيهضر مع ايلاف ...راحة تسللات ليه لذاتو تعطاه امل كبييير انه عايش " : يعنييييي عاااايش يااك ...
ايلاف : ايييه غالبا "كيمسح دموعو من الفرحة وخا غير نسبيا مهم كاين امل " : ايييييييه لو كان لا قدر الله ميت كانو لقاوه يلقاوه فكلا الاحوال ...
يوسف : وعلاش مبانش 
ايلاف "تاكدو شكوكو انه ممكن يكون الي فبالو ممكن وليس مؤكد ...": احم يمكن مشكلة مع الشغل ...لا يبين بنشوف ....
يوسف : وغانبقاو نتسناو ...؟ 
ايلاف : كل شي راح يبين سواء موت او حياة ...
يوسف بغا ينفي الكلمة اللولة حتى سمع غوات صهيب ضور الي ضار لقا باه بغا يغمض عينيه مشعرش حتى طار نقز الكراسا الي تما ومشا كيجرييييي لعندو ...
يوسف : الوليد ؟ م م مالك ؟ "شاف فصهسب الي غمزو " ...
صهيب : الوليد موقع لفؤاد والو ها يوسف هاهو عادي شفتيه ؟ 
يوسف "شاف فصهيب غمزو ودار ليه اشارة بصبعو لوذنيه بمعنى راه سمعك ...خبط يوسف جبهتو " : الوليد موقع ليه والو والله هانتا توگض معايا وسمعني شنو غادي نقوليك ...
صهيب "عيط لمو فتيليفون تجيب ليه دوا ديال ضغط " : دغيا الوليدة ...
تعاون صهيب ويوسف تا وقفوه وجلسوه فوق الكرسي ...قبط ليه يوسف ايدو باسها ليه وشاف فيه ..
الحاج "كيمسح دموعو الي تجاهدو حتى مبقاش قدر كيبانو كتافو كيتهزو ويتحطو " : ولديييي ايوسف خوك اش وقع ليه ...
يوسف : موقع ليه والو هانتا ها الوليدة تجيب دواك شربو وهاني نجلس حداك نعاود ليك كلشي ...
داكشي الي كان جات تجري تابعاها سارة وراوية الي كانو معاها حتى عطات لصهيب الدوا ومدت ليه كاس الما شربوه ليه بعدو من حداه شوي تتنفس ورجع طبيعي شوية ...
الحاج : ريح ليا خاطري ايوسف ...
يوسف "شاف فيهم بما انهم مجموعين اللهم يقولها ويهني راسو بغا الي يهز عليه هو وصهيب الحمل " : كنت كنهضر معاه وسمعت شي حاجة طرطق "عاود ليهم كلشي " ...
الحاج : وفينهو ؟ 
يوسف : الي قاليا ايلاف بالي ملقاوهش فالواد وعطاو احتمال كبير انه عايش وفعلا عايش الوليد انا متاكد ...غير هو راك عارف كيبغي تيسالي ويرجع ...عقلتي دارها لينا شحال من مرة ياك اصهيب هاا "شاف فصهيب " 
صهيب : ايه الوليد عايش ومتاكدين غير يسالي ويرجع حنا كنا خايفين لا يكون طاح فالواد ساعاك لا مكاين والو ...
نجود : واش متاكدين ايوسف مكتكدبوش علينا ياك ؟ 
يوسف "هز فيها راسو " : دابا حالتي بانت ليك ديال لكدوب كون واقعة شي حاجة اميميتي غاتلقايني واقف كنشرح وبالخاطر ؟ غاتلقايني واقف اميمتي ؟
الحاج "مسح دموعو بطرف كمايمو " : كان يدير هادشي كااان اولدي دابا يراعي لي الفوق والي قريب تولد ...
يوسف : تاواحد مالخاطرو الوليد تاوااحد ...لا جات علينا حنا العبد نخليو كلشي حي ...نتسالوك دعاء الوليد محتاجينك معانا فهاد الوقت ...اما لا جات على فؤاد راه من بعدك هو راس الكبيرة....
بعيد علينا وجناحو مغطينا هيبتو غير من تحنحينة تخلينا نديرو الف حساب لتصرفاتنا...قدر يدير هادشي معانا وفينا ...ميقدرش يخلينا الوليد حتى ميكونش فؤاد ...
الحاج : ميقدرش والى كانت ارادة الله العبد معندو ميدير "هز عينيه لسما " يااربي الى درت ذنب فحياتي نقص من حياتي انا ولا توريني شر فولادي تتديني عندك ياااربي بجاه نبيك الحبيب ...

الكل عرف اشنو وقع بالضبط لكن شخص واحد الي معرفش ولكن احساسو خلاه يعرف ...هاهي عرفات ...هاهي ساقت الخبار ...لا البكا ولا نواح غادي يرجعو ليها الي مشا ...نسا قبل منها عاناو ما كثر منها ومرجعش ليهم الغالي ...ام فقدات ولدها كبدتها ماعوضو ليها بكا ...ابن فقد واحد فواليديه مرجعوش ليه البكا ...طفلة فقدات واليديها مرجعهمش ليها البكا ....الحياة ماهي الا امتحان من عند الله لينا تعلمنا فيها اهم درس وهو تاحد مدايم لحد من غير الله ولا دايم غير الله هذا درس وخا كنتعلموه وكنعيشوه بزاف 
الا انه فكل تجربة ديال فقدان شخص مثلا كمثال فقط انه كنعاودو نفس شيء هو اننا مكنتقبلوش ...هادشي علاش خاصنا نعتامدو على راسنا ونتعلمو انه في المستقبل ممكن شخص الي عولما عليه يمشي ممكن يموت ممكن يغيب مدة طويلة ممكن ميبقاش معانا ...هادشي الي بغا يوصل يوسف ليامنة ....
فؤاد ولفو عليه غيبات كثيييييرة حتى كل واحد فيهم تعلم يعتامد على راسو ...يوسف هادشي الي تعلم من فؤاد انه يعتامد على راسو وخا هو حاضر لكن هو مدايمش ليه قرا وكافح تا استحق منصب فشركة خوه بدا شوي بشوي حتى تاكد انه قادر على المسؤلية وعطاه زمام الامور ....
جالسة حداها نجود وسارة وراوية كيهضرو معاها وخا كتجاوب لكن مرة تجاوب مرة لا مرة تسرح ...
راوية "شافتها سارحة " : يامنة حبيبة فين سارحة ؟ 
يامنة "حولت نضرها ليها ونطقات " : هاا تا فين ...
نجود : ياكما عيانة بنتي ...
يامنة : لا ...
سارة : بغيتي تهبطي لجردة تنفسي شوي وتبدلي جو البيت ؟ 
نجود : ايه فكرة زوينة ...يلاه ابنتي هبطي معانا ...
يامنة : غيير خليوني يقدر يعيط فؤاد وميلقانيش ...
راوية "عضت فشفايفها " ...
نجود : وها الكرسي غادي نهبطوك فيه "جابو ليها كرشي متحرك بطلب من يسرى باش تبقى تحرك بلا متمشي بزاف وفاش تهبط من دروج تهبط بشوي وتركب فيه نيشان باش متفورصيش على راسها ...بزاف ديال تريتمون عطاتها تبعهم لان نفسيتها الي تعاونها زفت بهاد المصطلح ..." ....
راوية : واصلا عندك تيليفون شديه فايدك وقت الي صونا غايعيط ليك ....
يامنة : تعطل بزاااف ...جايا لخمسطاش ليوم ...ماشي بزاف اماما ؟ "بوجه حزين " 
نجود : قد ما جلس يعيط يعيط هادشي ولفناه فيه ...يامنة بنتي لو واقعة ليه شي حاجة خبارو توصل توصل محدو معيطش اذن راه لباس عليه ...عارفك وراه وعارفك غادي تولدي ميمكنش يفلت هادشي 
سارة : عندها صح ونتي باش يجي يلقاك موگضة وحافضتي على ولدكم ماشي ضيعتيه ...
نجود"حطت ايدها على كرش يامنة ونطقات " : ولدك هو ونيسك دابا هو راجل الي معاك فغياب باه ...حاولي توگضي وفيقي مع راسك باش لا جا يفرح ماتزيديش عليه متنسايش راه مريض بغيتيه يطيح ثاني بشي كريز ؟ 
يامنة "بنفي " : لا لا مبغيتش ...
نجود : ايوى نوضي وتوگضي فصحتك وفنفسك راه الحاجة ميمتك بدات ترد ليك البال ومتقدرش كل نهار طلع عندك راه عيانة وجالسة بزز عليها تسناك تتولدي فرحيها بيك وفرحينا معاك تهلاي فصحتك وولدك راه محتاجينك نتي وياه وفؤاد ...
يامنة "زيرات على ايدها " : وااااخا ...
نجود : طال زمان ولا قصار خبار فؤاد تبان تبان ...هذا امتحان من عند الله ليك ...نجحي فيه وخلي الغالي الى رجع يفرح وترجع ضحكة لفيلا كيف دخلتيها خليها متسحبيهاش منا ...
بعد تفكير ...وافقات باش تهبط معاهم لجردة منها تبدل جو والحيوط ومنها نفسيتها تنتاعش وتسمح لراسها باش يفكر ويشوف من هنا لقدام ...ونفسيتها ترتاح هادشي كلو فصالحها وفصالح الولد الي فكرشها ...تقريبا دخلات لشهر سادس ...كرشها زادت كبرات ...لبسوها بيجامة عريضة ديال لقطن طويييلة ديال الحوامل خذاتها ليها غير نجود ...كانت كتمنى يخرجها وياخذو حوايج الحمل ليها وحوايج البيبي ويتقداو شنو خاصها لكن انت تريد وانا اريد والله يفعل ما يريد...المميز والجميل فالامر انه الكل فالفيلا كيوليو ايد وحدة...تاحد مكيخرج على الخط ويدير الي قاليه راسو ....
يوسف وصهيب فاش وصاوهم يكونو ايد وحدة ويوقفو جنب مرات فؤاد اولا لانها في فترة حساسة دايرين ليها كي الما القليل وهادشي من الاسباب الي عاونتها فالحمل مخلين الجو نوعا ما مبهج غير على قبلها ...كل نهار كيدخلو عندها يضحكو معاها ...الياس شي مرات كيخلي توجادو 
وانشغالو باطروحتو الي ملي ساق الخبار كان بغا يدير بناقص لكن يوسف مخلاهش حتى هو عطاه امل انه يرجع باش يلقاه حقق ليه رغبتو ان خوه ينجح فالماستر بنقطة مشرفة حتى هو شجعو وعطاه حماس فحال يامنة ....حتى الياس كيخصص سويعات من وقتو باش يجي يشوفها ويضحك معاها ...باش يعطيوها شوية الامل ....الحاصول دايرين كتر من جهدهم وضاغطين على نفسيتهم على حسابها هي ...
كيف ما كان الحال كتبقى حامل والحامل كيف كنقولو بهاد المعنى رجل فدنيا ورجل فالاخرة ...لانها كتعطي طاقتها ونفسيتها كيستهلكها بنادم الي فكرشها ....ماشين معاها دقة بدقة ....
نوضوها معاونين معاها ...
راوية : وتقاليتي ايامنة حاملة ولا محملة هههه 
سارة : هاد البرهوش باينة راسو كبير خههههه 
يامنة "غوبشات فيهم " : يسمعك فؤاد ميعجبو حال ...
سارة "صرطات ريقها " : اتنضحك اناري اش جابنا لشي فؤاد ...

راوية : تخافي متحشمي ...
نجود : براكة من الهضرة فوتو عليكم حفيدي ...سيد رجال هذاك ...
راوية : حبيب عميتو راااجل وولد راجل ...
يامنة "ابتسامة خافتة " ....
وحدة معاها هنا ولاخرا من هنا مشات سارة سبقات جابت كرسي وقفاتو عند دروج لتحت هبطوها شوي بشوي حتى عاونوها جلسات فيه ...يلاه غاتسوق بيها وحدة فيهم حتى تحطات ايد الياس على ايد راوية ...ودفعها 
الياس : انا نخرج مرات خويا العاطيني علاش نقلب لجردةراوية : وهاا ..."خنزر فيها وهي تكحاز " حگاااار يجي راجلي نقولها ليه ...
الياس : يجي هو وفؤاد نعطيك دقة قدامهم ..
نجود "شافت فيامنة الي حدرت راسها بحزن " : الياااس ...
الياس "شاف فيامنة ورجع شاف فنجود " : مااالك مااالك "هبط لعند يامنة " شوفي نهار يساليو غايجيو واري صبعك ..."شدو ليها " نعطيك العاهد ابتي يا يامنة تنعطيها تبربيقة قدامهم اش قلتي ...
يامنة : حتاااااا يجيو حتااااا ...
الياس : تي راه جايين ...حيدي عليك الغمة اختي "تم غادي بيها ....
هما اصلا مقالوش ليها راه ايلاف كيعيط موصيين حتى راوية حيث لا عرفاتو كيعيط غادي تاكد مية بالمية ان فؤاد واقعة ليه شي حاجة ....هادشي علاش الضغط عليهم كاااملين والاكثرية يوسف اما ايلاف ....
داها حتى لجردة ووقفها قدام صال مونجي الي تما وجلس هو فوق الكرسي مقابل معاها ....
الياس : يامنة ...قد ما غاب غادي يبان ...يمكن غاب فترة طويلة باش يصفي حساباتو الي تما ويرجع يبقى مدة طويلة ...كيما كتعرفي خدمتو مكتخليهش يبقا شهور كانت سيمانة بزز كيبقاها ...لو جات عليه يديك معاه لكن شوفي نتي ؟ متقدريش تحركي جوج خطوات لما كان هاد الكرسي ....
يامنة : علاش مكيعيطش ...
الياس : واخا وايلاف عيط لمرتو ؟ هاهي فحالك صابرة وضاحكة ...عرفتي علاش حيث مشا تاهو يقاد امورو ومضطرين ينقاطعو علينا ...باش يرجع فؤاد يبقا معاك تتولدي وباش ايلاف يرجع يمشي مع راوية لفرنسا حيث باقي ليها شهر وترجع تعطيهم تقرير سطاج الي دارت هنا ويبقى معاها تدوز امتحان الي عندها فاخر شهر ...
يامنة "حدرت راسها حتى حط ايدو على ايدها هزت فيه عينيها ونطق " ...
الياس : كيف مانتي كتحافضي على ولدكم بصبر باش يرجع يلقاك تهليتي فراسك وولدكم ويفرح حتى انا كنوجد ناخذ الماستر ديالي ونفرحو بالنقطة الي بغا ....فرحيني وحضري معايا تانتي بعد غذا فاش نستالم شهادة ...
يامنة : الياس ..."قاطعها وزير على ايدها " يمكن نتي صغيرة ولكن راكي الغالية وبلاصتك كبيرة مرات الكبير ...كوني بلاصة الغالي وحضري مع خوتي ....
شافت فيه كيفاش قالها عينيه فيهم ترجي كبيييير ليها ...نجود والبنات مشاو لكوزينة يوجدو كاسكروط فديك العشية باش يتجمعو عليه معاها مجموعين بينما جاي يوسف وصهسب والحاج تاهو مسكين داير كتر من جهدو وخا طقتو عالم بيها غير الله ....
الياس : الى مكانش هو حضري نتي ...نتي وياه فحال فحال ...خليني نفرح وخليه يفرح ملي يرجع يلقاك فبلاصتو متحملة مسؤلية وراه ويعول عليك في حياتكم ...
يامنة "حدرات راسها بقات مدة وهي حادراه مشابكة صبيعاتها وتلعب بيهم وفمها تغزز فيه حابسة البكية حيث هي اصلا عطاتو وعد تهلا فراسها عاد تدير شنو كيقولو ليها وتاخذ بنصيحتهم ورايهم ...هزات. راسها فيه بشوفة طوييييييلة ونطقات " : ان شاء الله ...
الياس "بفرحتو ضحك من قلبو " : ههههههه الله ...صافي بعد غذا غانجي بنفسي نديك معايا فطموبيل بربي لا داك شي عتي فيهم ...
يامنة "ابتسامة باهتة " : هه واخا صافي ....
بالفرحة باس ليها راسها زوج المرات ....ابتي لهلا يخطيك وخلاص الفجلة ...
تم جاي يوسف داير ايديه فجيابو شافها مبتاسمة مع الياس ابتاسم حتى هو ...حتى وصل عليهم ...
يوسف : اش تما "باس ليامنة راسها " ...
الياس : مرات خويا غانديها انا فطوموبيل معايا غادي تحضر معانا ...
يوسف : وايلي "شاف فيامنة " ايوى شتيييي هادي خبار زينة ...
الياس : غادي تنوب على الخوادري هههه 
يوسف "صمقلو لقرفادتو " : لخوادري لمك الى سمعك يجي يعاود لملتك الطهارة ...شمكار معاك هو فراس درب ؟ 
الياس : لا كنا تنضربو جوانات عند عبيقة ....
يامنة "ضحكات " : هههههه 
يوسف والياس ضارو شافو فيها ....يااا خيري الفجلة ضحكت ...
يوسف : سكااااات ليماك خليها ضحك ...
يامنة : ضحكتوني هههه 
الياس : حنا اش بغينا لموت غا ضحك فين تجلا علينا ....
يوسف : داك شعيبة لعطاس ؟ "صهيب ههه " 
الياس : حسب من واحد تال خمسة ونتا مغمض عينيك تلقاه عند راسك ...
يامنة "بان ليها جاي " : هههه 
يوسف "رفع حاجبو " : وااايلي زمعاكين (زعماكين ) 
الياس / على رقبتي من هنا وهنا ...
يوسف "غمض عينيه وبدا يحسب تاهو " : اييييوى اولها شرّط وثاني لا تفرط وثالث لا تشرط ورابع لا تصنط ايييييوى والخامس عندااااك تهرط 
حتى وقف صهيب وحدر راسو عند ودنيه وغوت تا طار يوسف ورجعة الي بغا يرجع تشقلب تا جاو رجليه الفوق ....واااالحميشة توحشني
صهيب : ويلي ويليييي هههه
الياس "تفرشخ بضحك " 
يامنة : هههههههه "دارت ايدها على فمها " ويييلي ههههه 
يوسف : الله ياربي بنااادم طاح اخوتي ..."شاف فيه مشربن حتى كحز صهيب بغا يفرتح " شفتي جيتي مع كلمة يهرط حيث حمار يالحمار 🙂

في الصباح الي غاياخذ فيه الياس الشهادة ديالو من احسن الجامعات ...قرا ردمر وحط بين عينيه فؤاد الي خاصو يفرحو بداكشي الي تمناه فيه ...دخل سوق راسو بعد على دوك الشلة الفاسدة رفقاء السوء وداها فقرايتو صلاتو مكتخطاهش شد طريق وحدة وخدام كيحقق فالاهداف ديالو ....واليوم غادي ياخذ الماستر في الاقتصاد تخصص ادارة الاعمال ...بحيث الى خذا نقطة مشرفة غادي يرسلو لامريكا لاتمام دراسة الى بغا والى بغا ياخذ بوسط ديالو لكن بشرط حتى يدوز من سطاجات وتكوينات وبوسط تابع بوسط حتى يتبت كفائتو فالعمل عاد ياخذ ترقية وخا هو اخ صاحب الشركة لكن كيبقا الكفاءة والوسطية والاعتدال مع كلشي كاع الموضفين سواسية معاهم فالشركة تواحد ماحسن من لاخور الفرق فقط فالصلاحيات الممنوحة لكل موضف ....
من بعد ما لبسات جلابة مخزانية فالخزي فيها شوشات فالكمايم والقب ...واسعة على ود كريشتها وجاتها هي هاديك عطاتها جمالية خاصة كتبان كيوووت صغيورة وام فنفس الوقت ...لو شافها فؤاد فديك اللحضة يسد عليها هههه ...مشطات شعرها وجمعاتو كعكة مهملة مبغاتش طلقو حيث صهد وهي مصهادة وزادها تعب الحمل مع كرشها كبيرة مثقلاها وخا داخلة فسادس ....
حتى دق الباب ودخلات يسرى الي تاهي عرض عليها الياس كضيفة شرف زعما هههه ...كانت تاهي لابسة جليليبة فحال يامنة غير هي فالبيج ...
يسرى : حبيبة نعاونك فشي حاجة ؟ 
يامنة "ابتاسمت ليها شدات فكرشها من تحت وفناموسية حتى ناضت بشوي " : بغيت نسولك ...فيا حاشاك البول بزاف شنو ندير ...
يسرى : هههه فينما حسيتي براسك مزيرة عيطي ليا نجرك ونديك لطواليط ...عادي حيث ضاغط ليك على النبولة احبيبة داكشي باش مع ثقل دابا متخافيش عليه شد بلاصتو مبقاش شي خطر ديال الاجهاض لانك فتي هاد المرحلة دابا راه ولا راجل هههه ...
يامنة : هههههه ..واش نمشيو ...
يسرى : وي جيت غير نشوفك بما انني هنا وغاديا معاكم منها نيت نطمئن عليك ونعرف باش كتحسي ...اي حاجة حسيتي بيها قوليها ليا ...
قبطات ايدها وتما غاديا معاها متابطة دراعها ...حتى وقفات يسرى ونطقات ...خاصك ديري شي حاجة لوجهك ورشي بارفان ...غاتمشي هاكا وجهك بيض ...
يامنة "بامتناع " : لا بلاش غير خليني ...
مسمعتش ليها وقفات ومشات جابت ليها بارفان وركزات اختيارها على بارفان فيه ريحة الفريز الخاص الي خذاه ليها فروسيا ( تعقلو ههه ) وجابت ليها گلوص ...دارتو ليها بزز وغير شوي ورشت ليه بارفان ...تمو غادين وهي توقفها ...
يامنة : عفاك وخا تجيبي ليا هذاك شال ...
يسرى : واخا ...مشات جابتو ليها وهي تلويه على عنقها كان قريب لون جلابة شوي كيف مكيبغيها دير ديما لا لبسن جلابة تلوي شال على عنقها ...خضات رجليها فبليغة كبيرة عليها ولكن مع رجيلاتها تنفخو بالجلسة والحمل يلاه ترتاح فيها ....
خرجو من البيت وهبطات معاها بشوي وصلت عند دروج لتحت لقات الياس واقف قدام الكرسي ...باس ليها راسها وجلسات فيه سلم على يسرى الي مشات سبقاتو وركبات مع يوسف والبقية ...وخذاها هو لسيارة ركبات ودار الكرسي من بعد ما طراه فالكوف ركب وانطالقو مباشرة لافران لعين المكان ....
في واحد القاعة كبيييرة ...فيها مجموعة من طلاب الماستر واجدين بلباسهم باش غايستالمو الشهادة 👨🏻‍🎓👨🏻‍🎓👨🏻‍🎓...جاو معاهم الاهل ديالهم ...كان داك اليوم عددهم ماشي كثير كانو شي خمسة ....من بعد ما وصلو كان الحاج يوسف صهيب والبقية ...وصلو ودخلو لداخل جلسو لقدام لقاو الياس سبقهم حط يامنة فبلاصتها مع الحضور كانت لور بعيييدة على ناس حيث لور تقريبا كلو خاوي …لكن كتشوف وقريبة لممر فين كيدي لطواليط ...جلسات يسرى قريبة ليها 
بحكم هي عندها كرسي متحرك ...شوي حتى بداو طلاب يقدمو ...واحد تلوى الاخر ....
يسرى : يامنة انا غادي نوض نهضر فتيليفون مغاديش نتعطل وخا ...
يامنة : وخاا ...شابكات صبيعاتها مع بعضهم وحادرة راسها ....حست بشي حد جلس تما بلاصة يسرى مهزاتش. راسها تشوف شكون ...حدها دخلت معاها ريحة خاصة كل مكيقرب كل مكتزيد دخل مع نيوفها وتحس بيها قريبة مهزتش راسها عند بالها شي حد من الحضور حيث ريحة جديدة مكتعرفهاش ...حتى حست بايد ورا كتفها مجات فين تهز راسها تشوف حتى زيرها من كتافها وقربها ليه وخشا وجهو فعنقها باسها فيه وطلع نطق ليها فودنها ...
فؤاد "ايد داير ليها الباندة هازها فيها بلاكة ووجهو فيه سبارادرا جنب حاجبو ...لابس قميجة گري مفتوح حال ليها صدايف لفوقانيين مبينين زغيبات صدرو ...وكمايمها طاويهم وسروال كحل ...نطق بنفس خلاها تخرج عينيها ممصدقاااش " : صدري وصدر ولادي الحنين ورضاهم ...مادهشي ماتخلعي ..حياتي بيك وفيك ومعاك لا بغا الله… عمرك تشكي فهادشي ......aimer jusqu'a l'impossible (إعشقي لحدود المستحيل ) ...والمستحيل درتو معاك اعمارة داري ورفيقة الدرب فالشدة والفرح ..."باسها فوذنها بوسة طوييييييييلة وحط راسو على راسها وايدو فوق ايدها لي فوق كريشتها كيتلمس فيها "....

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.