صورة مصغرة لـالفلاح الوسيم الجزء الثاني

الفلاح الوسيم الجزء الثاني

tani 
رواية الفلاح الوسيم

حلات باب البيت وهو ينقز ولدها المعطي شاب فاواخر العشرينات قصير وغليوض هبيل بكل ما تحمله الكلمة من معنى مقطع الوراق معروف بالمعيطي فالدوار
المعطي: حويييييه هاهوما جايين ايخطفوها ، حوييييييه هاهوما جايين جايين يالله نحلو ليهم
لالة فاطنة (شدات المكحلة بواحد الليد وطلعاتها معاه بقرصة فالترمة بليد لوخرة): الله ايقلل حياك المسخوط ديما كنقول ليك متبقاش تگول هاد الكلمة شناهية حويه دروگ شناهية 
المعيطي(كينقز وايحك فترمتو): اح اح اح قرصتيني ااااححح هاهوما جايين ايحووونا

خرجات بنت فالرابعة والعشرين من عمرها زوينة وجمالها هادئ نازل عليها واحد السر فشيشكل شعرها طويل ومقطعة القصيصة جاتها كيوت كلشي فيها هو هداك رقيقة وكل حاجة عندها بالقياس طويلة شوية وشكلها عموما كيوت وغزال عزيزة علي كلشي وكيحتارمها وكتحتارم ملشي كلشي
اسماء (كتحك فعويناتها): ماما شنو كاين سمعت جلول كينبح
لالة فاطنة : شي اعداء الله جايين ايعجمو علينا تاني ولكن بيا ولا بيهم
اسماء(شافت المكحلة): ناري ا ماما جبدتيها تاني علاش راه لقد الله تيري فشي حد بالغلط فين نصدقو
المعيطي: نصدقو لهييه هههههه ويالله نحلو ليهم باش ايسرقونا يالله (وكيجر فاسماء)
اسماء: ششش شكون قال ليكم اصلا الشفارة هادو ايمكن شي حد محتاج العوين (شافت فلالة فاطنة) ياكما خالتي نعيمة غتولد 
لالة فاطنة: اوهوووي باقي ليها سيمانة وتولد و جلول مينبحش علي لي من والى هادا شي حد غريب دوزو هك دوزو مورايا يق دوز يهاد الحتروف شمخرج بيا عينيك
المعيطي: ويلي ويلي ايحوييييهني هو اللول وايحويييهك نتي التانية و اسماء ايحويييئهاا هي الرابعة 
لالة فاطنة : اعود بالله شهاد الهضرة الناقصة والله يولد كرشي حتي لي ندير فيك تيحيرو فيه فرمليات الفيلاج

طار المعطي هبط مع الدروج ايجري حتى زلق فاخر ربعة الدرجات هبط علي وجهو ديريكت تدوخ ولكن دغية جمع النوضة وكمل للباب ايعرج وفاطنة تابعاه وتغوت عليه واسماء موراهم تجري تابعاهم ليزبلوها وشعرها معنكشها كيطيح علي عينيها وتبعد فيه كل ساعة . غير حل المعيطي الباب وهي تجي خديجة مجبدة للارض مسرحة علي ضهرها وتبعها مبارك طاح جالس علي كرشها طلقات غوتة سمعوها فاخر الدوار زينب غير سمعت الغوتة ديال مها وهي تطيح تضرب وتعض فالمختار لي طلع للطوموبيل وقفل عليهم منك الموت لمولاك 
زينب (تضرب فيه وتقمش): حل الطوموبيل حاااااال نهبط نشوف ماماتي حااااال 
المختار (مكالي باديه): ان لله وان اليه راجعون ماتت صافي ماتت جلسي واش بغيتي تتبعيها
زينب (طارت عليه من اللور قجاتو): حل اعدو سيدي ربي الحبيب حل ابابا حل قبل نهرس عليك ضفاري حاااااااال 
بقات محاربة معاه حتي دغطات علي الزر لي حل ليها البيبان اللور هبطات بالزربة كتجري وتتعطر بالطالون الكلب غير شافها وهو ايزيد اينبح بالجهد فاطنة تخلعات معرفاات باش تبلات هزات المكحلة لسما وطلقات رصاصة تسمعات طرااااااااااااااااخ

كلشي جالس فالصالون البلدي زربية ووسايد فالارض وشي كيشوف فشي وشي محامل شي وشي اصلا مفاهم حتى لعبة وشي لاسق فزينب وكيشم ليها كي السلوگي فشعرها هي تدفع وتقرص بالجهد وهو ايهرب ايحكها وايرجع لعندها حمقاتو هبلاتو شكون من غير خونا المعيطي لي لسق لسقة العما فالضلمة فزينب 
المعيطي (كسر صمت المكان): بما انو العروسة موافقة نقراو الفاتحة ونحوييييييييه 
كلشي كرج عينيه من هول الصدمة فاطنة صفارت ودابت فارضها من بعد مكانت مخنزرة فخوها لي بعد سينين ومنين جاي هاجم عليها فدارها بلا موجب شرع ولحد الان معارفاش السبب ، خديجة ايد شادة بيها كرشها لي سحقها ليها مبارك وليد الاخرى شنقات بيها علي المختار لي هاد الاخير بدا ايحك فودنو بحالا مسمعش مزيان اما مبارك حدر راسو حشمان ولالة اسماء هي الوحيدة لي مكايناش مشات تربط الكلب مزيان

زينب (وشوشات لمها): ماما شنو هي حويه؟
خديجة: طيور الجنة نتي ابنتي معارفاش شنو هو الحوى الي جينا نسولوك نلقاوك نتي لي عاطية الديبلوم لميا خليفة
زينب: لهلا يحيي الزمان حتى تشبهوني بديك زرقة الطبون
خديجة(وركات علي كلامها وهي كتوشوش): الطبون عرفتيه المسخوطة والحوى معرفتيه سكتي سكتي الليلة نباتو فالمستعجلات وكلت فيك الله المختار
المختار (حتي هو ايوشوش وحاضي مع المعيطي لي غير كتشوف فزينب وغادي وايزحف حداها): مدوش عليه راه هبيل معندو عقل
خديجة: وحق ربي الحبيب حتى هو عندو العقل عليا واش لي عايش معاك ومع بنتك ايبقا عند جد طواسلو شي عقل
فاطنة (غوتات): سكاااااات براكة من الصباح ونتوما وش وش وش شكاين شاركونا معاكم كلامهم
بغا يدوي المعطي وخنزرات فيه: وديني وما اعبد تدوي نتا حتي نتفك ونبيت مك حدى جلول 
مبارك: لالة فاطنة خويا المختار تاقاو الله شوية بشوية جايين باش ندويو ونحلوها بيناتنا 
المعيطي(حشمان): ايه الواليدة انا قابل ومنتشرطش لي قلتوهاا انا معاكم فيها
زينب بقات غير مخرجة عينيها فيه مصدومة وخديجة حتي هي قالت ليها متعرفيش
فاطنة (شافت فالمختار متسوقاتش لولدها عارفاه هبيل): لاش جاي بعد هاد السنين هاااا؟! لاش جاااااي الشلاهبي عاد تفكرتي بلي عندك ختك
المختار: اختي راه كنت مشطون والله تا كنت مشطون وحالتي مانها حالة وعيشتي مانها عيشة
فاطنة (طلعات فيه حاحب ممتيقاهش): المختاااااااار راحنا الخووووت وهادشي لي فعروقنا ماشي زيت اركان راه الدم حافضاك وهاضماك
المختار (بدا ايدمع وايمتل): والله اختي الحبيبة حتي ربي لي عالم بحالتي عايش فالجحيم اش غنقول ومنين غنبدا وكيفاش نعبر (جات اسماء تكات علي الباب كتشوف فيهم وفالمعطي لي كيقرب من زينب وتضرب ليه ايدو حتى يضور وايرجع تاني ايقرب) والله اختي مانك عارفة حالي 
فاطنة (بغضب): شمن حاااال هااا؟! شمن حال هدا لي ايخليك تنكر ختك من لحمك ودمك تسمح فيها من بعد متشد حقك فالورت وتزيد ؟ دوي علاش ساكت يالله هضر!!!
المختار (عرف راسو وحل معندو باش ايعبر شوية دور راسو كيبان ليه كلشي حاضي جوابو ما عدى المعيطي لي ممساليش) احم انا.. انا... فالصراحة
فاطنة: دوي نتا اااااش هااا ااااش..؟!!!!
المختار (غمض عينيه وطلقها): انا كنت خايف لنخسر مراتي وام ولادي لالة خديجة حيت كانت مريضة بسرطان القلب 
خديجة وزينب حطو ايديهم علي فامهم مخرجين عينيهم لي علي شوية وايطيحو حداهم خديجة مبقاتش قدرات تدوي 
المختار (كان ولا بد عليه ايكمل فالتمتيل): انا قاسيت وعانيت النص اختي فالورت واش مشا علي عيلاجها شنو ندير وشنو نعمل وبنتي بعد عناء كبير تزادت و كانت عندها اعاقة كانت رجل كتمشي بيها ورجل ترجع بيها كانو مزاگلين اختي والعملية كان خاصها تديرها فالميريكان والمصارين والوقت اهى اهئ اهئ انا عيييت انا مضلوم انا

خديجة عين وحدة لي بدات ترمش بيها ممتيقاش شنو سمعات عليها ومن شكون من راجلها دورات راسها بوشة لزينب لقاتها كتاااااار منها شافو فبعضياتهم وحركو راسهم فالايجاب ودارو شافو فيه وهوما ساكتين وكيتبسمو المختار شافهم هكاك عرف واش ليلتو ليلة مستحيل ايخرج منها سالم ولكن شنو ايدير ضروري ايطرق مسمار ختو وايضمن انها اتخليهم ايسكنو عندها، فاطنة ملقات متقول اسماء بقاو فيها تأترات وعينيها غرغرو شافت ف فاطنة حيت هي شافت فيها وشافو فالمعيطي لقاوه مسرح ومقابل رجلين زينب : حوييييييه وشحال زوينين 😍😍
جمعاتها معاه زينب عطاتو برجلها للكمارة دوخاتو لاحتو للجهة الاخرى صافي النقطة التي افاضت الكأس
زينب (شعلات وناضت ليه): اجي لهنا اولد الحرام اجي وانا من صبح مغددة عليك طارت عليه تقج وتقمش وتدفل
المختار تدخل باش ايفك خديجة هنا بانت ليها الوجيبة باش ترد ليه صرف السرطان لي ركب فيها وهي صحة سلام تدگ وتدردگ خلطاتو معا المعطي دقة فهادى ودقة فالاخر الغوات والعياط فالسما العالي اسماء وفاطنة ايفكو الروح غطيح زينب شدات فالمعطي تعطيه وتضرب وتقمش وتعض بحر جهدها و واحد عاطيها العيااااااط واكواااااك عتقو الروح هادا المختار اما المعيطي هي تضرب فيه وهو ايقول ليها ضربي هنا عضي هنا باقي معضيتيه الشئ لي مخليها غتحماق وتزيد تضرب وتنتف مبارك ملقا ميقول ناض بالشوية سلت هز البالز دخلهم لعتبة الباب ركب فطوموبيلتو وزاد خلفة مع الطريق هاد العائلة هبيلة ومسطية من صغيرها لكبيرها فيها سيركوي مستحيل ايتصلح ، حلفت المدابزة والعياط لحبس فاطنة تلفت معرفت مدير حتى هي جات فيها رجل المختار للكرش جابتها طايحة مزوية مرضش ليها الباب فاش ضربها كانت خديجة كتشحطو بصمت السروال لهضرو وهو ايتركل وايتمرغ فالارض

فاطنة(كتنهز ): بغيتو غير العصا الكفرة بالله وخا هي الاولي اصلا كنت محلفة عليك المختار نتا وهاد العاقسة 
مشاات بالزربة هزات واحد الكابل ديال الضو طوييييل موالفة تسلخ بيه المعيطي الي دار شي زبلة وجات تنهج شدات اسماء لي ريشوها وهي مليها دنب مسكينات دخلات اباش تفك كحزاتها للجنب عينات علي المختار هزات الكابل تال السما وطاحت تشحط فينما جات الدقة
كلاو هاد الليلة مكلا الطبل نهار العيد بداو ايشطحو السامبا و فاطنة تابعة خديجة والمختار وتشطح اما زينب مدارت ليها والو وحتي المعيطي خلطاتو معاهم منشفها وموريها النجوم فعز النهار خرج ليها علي صحتها بكترت زبايلو لي حلفو لا تقاداو عيات مدير ليه ووالو حلف هو لا شد الطريق واليوم كلى عزاه نيييييت من عندها ومن عند زينب ، سالا طرح العصى فاش عيات فاطنة وطاحت تنهج سخفات خديجة ولات كيف الدجاجة المريشة والمسلوقة اما المختار بقا غير ايتنخصص وايبكي زينب شادة راسها بين ايديها والمعيطي حال السنسلة دالسروال ايسوط علي مسائلو ايبردو تاهوما كلاو الشحط وايهرنن اسماء طلعات لبيتها فحالاتها مبقات فاهمة تا لعبة 
فاطنة (شافت فيهم كاملين): غنخليك تسكن معاية اعدو الله علي وجه هاد البنت لي معارفة والو ومليها دنب وليني بشرط

خديجة: حماقيتي اديك الشارفة ااااييي(شدات فايدها كضرها) شنو غنخدمو هنا فهاد الحفرة شنووو؟! 
فاطنة (دارت شافت فزينب ورجعات شافت فالمختار): نتي غتبقاي تشقاي معاية فالدار ونديرو الزرابي ونمشو للجمعية نطحو ارگان ونتا اداك الحتروف غادي تخدم نتا وبنتك فالفيرمة ديال ولدي زكرياء انا مطلبو لعلى واعسا ايلقا ليكم شي بلاصة وشووووف تشوف
المختار: عندك ولد اخر؟!!!
فاطنة: ونتا سوقك اداك الحتروف هاااا؟؛!! لا اسيدي ماشي ولدي من لحمي ودمي وليني انا لي مربياه مومو عينيا والي طلبتو ميرضهاش فوجهي ولكن والله تما والله وديرو شي زبلة اخرى حتي نلوحكم فالزنقة وديك الساعة تشردو ديال بالصح مفهوووووم
مجاوبها حد زينب تحت تاتير صدمة انها تخدم ففيرمة ممتيقاش شنو كتسمع الاحدات كيجو مجموعين عليها وخديجة ولات غير كضحك صافي حماقت
فاطنة: مفهوووووووم؟!؟!؟!؟
المختار: مفهوم مفهوووم اختي والله تا فهمنا من اليوم مكاين ا السمع والطاعة 
المعيطي: مفمهووووم صافي من غدة نحوييييوه

فصباح اليوم والموالي ومعا صياح الديك لالة فاطنة سدات باب الدار غادة خارجة وتبرگم اوحدها عكاز فايدها عاقدة 11 طالع ليها الدم للراس هبطات مع الطريق غادة فداك الضلام شوية النور لي كيبان الحال بدا ايصباح ولي داز من حداها ايلقي عليها السلام وايسولها علي حالها معروووفة فالدوار والدواور المجاورة طيبة حقانية وبنت الاصل والمفصل ، كانت الطريق شوية بشوية كتعمر العمال غاديين فطريق وحدة للفيرما الكاميونات دالحليب و شي وحدين دالعلف ووحدين اخرين ديال زريعة الفواكه الخدمة فالفيرمة كتيرة بزاف ومكتساليش والعمال فهاد الفيرمة لي كتعتبر الاكبر فجنوب المغرب كلو كيتعدو بالالاف شي حاجة كتيرة بزاااااف لانو هدا اكتر من مجرد فيرمة ، بقات غادة حتى وصلات لسور الفيرمة الكبير دخلات ليها اول دورة علي ايدها ليمنية شداتها وطلعات طريق طويييييلة شي 400 متر عاد دخلات مع سور اخر لكن هاد المرة سور من نوع اخر بواسطة جهاز التعرف علي الوجوه تحل ليها الباب لانو هي من الناس القلال لي مسموح ليهم ايقربو لهاد البلاصة ، دخلات وتوجهات لباب الفيلة بديعة التصميم شي حاجة خيالية زوينة بزااااف كتحمق مكونة من زوج الطوابق جات وسط جردة كبيييرة كلها خضرة عامرة بالاشجار والورد بانواعو بالاضافة لمسبح كبييير فير بار بالجليسات ديولو وسط الماء وشلال صغير فالجنب ، اقل ما يقال علي هاد الفيلة انها لوحة تضاهي جمال لوحات ليوناردو دافينشي دقة فالتصميم وتوضيف الالوان فالطلاء سواء الخارجي او الداخلي شي حاجة خطيييييرة ، طنـــــــــطن طنـــــــــطن صوت رنين الجرس تسمع فالفيلة بقوة ، حل عينيه ببطئ وناض شوية شاف فوق الطبيلة بانت ليه فالساعة ل5 بيل حك عينيه وناض مستغرب فاش سمع الصونيت تاني والدقان فالباب عرف شكون كيدق هكا اكيد الحنانة هي لي كدقر وتصوني ولكن لي ستغرب منو انو هي عندها السوارت علاش محلاتش ودخلات ، ناض جمع الوقفة توجه للدريسينغ هز تيشورت لبسو ايستر بيه صدرو العاري لانو كان لابس فقط سروال كيطمة وحل الباب هبط بالزربة مشا لباب الدار حلو وبانت ليه فاطنة گالسة فعتبة الباب وتلعب بالعكاز فالارض 
زكرياء (باستغراب): مي فاطنة ؟!

فاطنة (ناضت جمعات الوقفة وشافت فيه): ولدي لاباس؟!
زكرياء (باس ليها راسها): الحمد لله الحنانة ونتي لاباس؟!
فاطنة: لاباس لاباس 
زكرياء(شدها من دراعها): اجي اجي دخلي 
دخلات معاه سد الباب شوية وهو يجي دراكر الكلب لي مربي كيجري ايتمسح ف فاطنة 
فاطنة(حكات ليه علي راسو): نتا هنا تاني (شافت فزكرياء): الف مرة قلت ليك متبقاش تدخلو للدار خليه فالجردة راه ربعين يوم اولدي الملائكة مكدخلش للدار 
زكرياء: مشفتوش ايمتا دخل كلسي اميمتي وعاوديلي شواقع شكاين ياك لاباس
جلسات فاطنة وهو مشا جاب ليها كاس دالما هبطات عليه دقة وحدة وهو جالس قدامها وهاز حاجب ومهبط الاخر والفضول واكلو علي غير عادتو خايف لتكون واقعة شي حاجة : ياك لاباس ؟ خلعتيني ياكما المعطي دار شي حاجة ؟
فاطنة: هداك المسخوط شاكة ليكونو بدلوه ليا فالسبيطار نهار ولدتو حرام واش ايكون ولدي اوووهو شاكة اولدي شاكة (وتدور فراسها)
زكرياء: حاط ايديه علي ركابيه وكيشوف فيها باستغراب : مفهمت والو اميمتي شكاين ؟!
فاطنة: لحقتك قبل تمشي للفيرمة عارفاك 6 كتخرج ، هجمو عليا اوليدي هجمو عليا الكفرة بالله 
زكرياء (تصدم من كلامها دغية طلعات ليه اصلا هو دمو سخون من ناحية الناس لي عزاز عليه غير تقيصهم بمضرة ايدخل فيك طول وعرض ) شنوووو؟! شكون هادو كيفاش هجمو عليك ولاد لحرام دويش كوووون والله تا نصفيها ليهم 
فاطنة: عجم عليا هو ومرتو وبنتو فنصاصات الليل خرجها مني عدو الله
زكرياء (ناض جاعر ): شكووووون هدا واش كتعرفيه الي شتيه تعرفيه شنو دار ياكما قاصك نتي ولا اسماء ولا دارو. شي حاجة لمعطي؟؟ دوي امي هضري شكوووون نمشي لوالديه دابة
فاطنة (جراتو تجلسو حلف لتزحزح ليها صحيح وعريض وخا تبات تجر متزحزحو): جلس اولدي جلس ندويو بالعقل راه ماشي لي فبالك
زكرياء: كيفاش بغيتي نجلس ونتي كتقولي هاجمين عليك
فاطنة : وراه خوياااا لي جااا
زكرياء : شناااااهوااا خووووك 🤨🤨
فاطنة : ايه اولدي داك لي فالدار البيضة دار فاييض وتلاح للزنقة وتسدو البيبان فوجهو وجا عدي
زكرياء (جعر بالصح): وهاد خوك مبنتي ليه غير حتي مبقا عندو والو هاااا؟ مبنتي ليه وتفكر بلي عندو ختو غير حتي تسدو البيبان فوجعوووو واش بنادم هدا ولا شنووووو؟!
فاطنة: هالعار اولدي لما جلس وسمعني راه الليل كلو مغمضت عيني وانا نخمم معندي مندير واش نسمح فيه كون كان وحدو والله معندي سوق ويني راه بمرتو وخا منحملها وبنتو تبارك الله عروس واش لوحهم للزنقة ايتكرفصو عليهم
زكرياء (جلس وقرب ليها وهو عاد مزايد ايشعل): واش حمقة امي ولا بغا تحمقيني واش هو سامح فيك ومعارفك ميتة ولا حية وتجي تقولي ليا راه بقا فيك ، علاه نهار خدى الورت ديالو هو وداك خوك لاخر وحاشة واش ايكونو الخوت واش عقلو عليك مزال هاااا؟ جاوبي ياك خلاوك فديك الخربة كانت غطيح عليك تصفيها ليك ومشاو وخلاوك دوي امي دوي ، واش قالو الله اينعلك اشيطان هادي ختنا واجي وخا غير نتاصلو فيها وخا غير من العيد العيد نسولو فيها ، ياك العياد كلهم نلقاك مخشية فشي بيت سادة عليك وتبكي كلشي العائلات مجموعين ونتي خوتك لي بقاو ليك معارفة عليهم والو واش ميتين ولا حيين كلها عايش حياتو وناسيييك

فاطنة: عااااارفة هادشي اولدي عارفة وليني الي هو قليل اصل انا لا ومنسمحش فلي من لحمي ودمي وخا يكون عدويا ونتا عارفني مزيان قلبي ميهنينيش وزايدون انا لي عارفة ليهم شرطها معاهم تلت شهور وايجمعو عليا قشاوشهم علين ما لقاو حل لراسهم 
زكرياء (ورك علي ايديه وغمض عينيه بالجهد كيحاول ايكتم غضبو عارف راسو وخا ايبات ايدوي معاها مغيقدرش ايبدل رأيها داكشي باش تهدن حل عينيه ودوي ): ودابة شنو المطلوب مني دابة 🤨
فاطنة(شدات فايديه وحطاتهم علي فخضها كتشوف فعينيه وكدوي): قاصداك اوليدي والمقصود الله عارفاك مترضهاش فوجهي
زكرياء: غير قولي الحنانة طلباتك اوامر 
فاطنة: بغيتك تخدم خويا وبنتو عندك فالفيرمة
زكرياء بقا كيشوف فيها ممتيقش شنو كيسمع لهاد الدرجة هاد المرى طيبة وقلبها بيض خوها لي سنين وهو هاجرها هاهو جا علي غفلة وبمرتو وبنتو من الفوق غيسكنو عندها ومن فوق هادشي هازة ليه الهم وتقلب ليه علي خدمة فين ايشد شوية الفلوس ، حط ايدو علي فكو وكيدوز بصباعو علي شنوفتو التحتانية حركة لا ارادية منو كيديرها فاش كيكون كيفكر فالحل لشي كارتة سمعها ،

فاطنة: عفا ولدي راه البنت تبارك الله كبيرة قد بنتي اسماء وقااااارية حتى تقادات القراية اش منك يزين واش منك يرزانة وتباتة وحداگة طالعة ليا باينة امن عويناتها لي كيف البلار ودكية اولدي والله دكية تبارك الله عليها واحد الدكاوة ممنهاش حطها علي الجرح ايبرى و..
قاطعها زكرياء : صافي الحنانة صافي فهمت المهم انا مغنواعدك بوالو البنت خاصني نعرف تخصصها باش نشوف واش انقدر نوضفها فالادارة اكيييد من بعد السطاج وخووووك (ورك عليها مخنزر) سيفطيه عند العربي انا نوصيه عليه هو ايشوف ليه خدمة انا مباغيش نشوف وجهو انصدق غير ضاربو وهو كبر مني منقدرش نتحكم فاعصابي ، هادشي اليووووم اميمتي سمعتي سيفطيها مع (شاف فالساعة الكبيرة لي فالحيط) مع 8 نيشان تكون فالفيرمة قدام الادارة معا لي سطاجير الاخرين حيت شحال من واحد دفع cv ديالو باش نختارو لي ايليق للمناصب الخاوية 
فاطنة (عنقاتو):الله ايطول ليا فعمرك اولدي لهلي يخطيك سير كيف ما مكبر بيا الله ايكبر بيك الله ايحفضك من ولاد الحرام احبيبي انا رااااضية عليك بغيتو الي فالسما ايهبط ليك والي فالارض ايطلع ليك
زكرياء (تبسم): دعاويك ديما واقفين معاية نهار زين هادة لي مصبح علي دعاويك هههه
فاطنة (فخاطرها): نهار كحل زحل اولدي باينة مع دوك المساخيط لي عندي فالدار(ضحكات ليه) الله ايرضي عليك ههه (سمعو الصونيت) هادي اتكون غير السعدية جات توجد ليك الفطور اولدي انا خاصني نيت نمشي باش نفيق هادوك الحرايمية لي عندي فالدار خامرين ليا سمح ليا جيت اوليدي فهاد الوقت 
زكرياء (ناض معاها للباب): تجي فاي وقت بغيتي اميمتي عندك السوارت لاش تصوني اصلا!
فاطنة: لاواه اوليدي هادي ماشي وقيتة ايجو فيها الناس حشومة ندخل عليك للدار هوكاك بلا موجب شرع (حلات الباب بانت ليها مرى كبر منها فالعمر هي لي مكلفة فشؤون الفيلة ) خيتي السعدية لاباس؟
السعدية (تسالمات معاها بالوجه): ختي فاطنة ياك لاباس؟
فاطنة: لواه اجيت هضرت مع وليدي شوية وصافي تادوزي عندي ونعاود ليك يالله خليت ليكم الراحة 
زكرياء و السعدية: بسلامة
زكرياء (شاف فالسعدية): خالتي السعدية عفاك وجديلي الفطور بالزربة انطلع ندوش ونلبس تعطلت
السعدية (طبطبات علي ضهرو): وخاا اولدي هي لولة غير طلع

سلكات نفس الطريق رجعات بيها لدارها اصلا هاديك هي الطريق الوحيدة لي كاينة فهاد الجهة فيها دار الحنانة والقدام فيها فيرمة الراشيدي داكية باش معروفة بطريق الراشيدي مسميها علي لقبو ومحطوطة فالاوراق بهاد الاسم ، دخلات للدار بانت ليها اسماء كتحط فالفطور فبيت الگلاس دخلات للكوزينة عليها 
فاطنة (مطلعة شوكتها): دوك الحتارف باقي مفاقو؟
اسماء: حشومة امي تقولي هكا دبا ايسمعوك وايتقلقو
فاطنة: علاه فيهم شي نفس بعدة 
اسماء: فين مشيتي مع الصباح فقت ملقيتكش فالدار ولا حتي فالجردة تشوشت عليك
فاطنة ؛ مشيت عندك خوك زكرياء طلبتو ايلقا خدمة لهداك عدو الله و زينب 
اسماء (هزات شبكة الخبز وقربات ليها من بعد مسمعات سيرت زكرياء وحمارو خدودها وتسارعو دقات قلبها): وشنو قال زكرياء ؟!
فاطنة: قبل گالي قوليهم ايجو مع 8
اسماء: وشنو كيعرفو ايديرو راه الخدمة فالفيرمة صعيبة عليهم ممولفينش بيها
فاطنة: هداك الخانز سرو. هداك ايعرف بحق الوقت وبنتي زينب راه دويت معاه قالي السطاج مت السطاج مفهمت والو مهم قالي تمشي لادارة
اسماء: ااااه اليوم ايجو دي سطاجير جداد قدمو CV ديالهم علي وديت الخدمة راه السطاج فالفيرمة عنا مطلوب بزااااف كل مرة جايين لينا ناس من مدون بعيييييدة 
فاطنة: مشتو المهم نتي فاش تكون غادية ديها معاك
اسماء: ميمكنش اماما انا كندخل ف 7 للخدمة وانا خدامة فقس الحسابات فالادارة وهي عاد سطاجيرة وقال ليك حتال 8 ماشي 7 شغدير معاية
فاطنة: تي الدي معاك البنت راه معارفاش الطريق ومالها تتسنا تما حتي توصل 8 مالها غتشير 
اسماء: وفينها بعدا هي راه باقة ناعسة
فاطنة: شناااهو النعاس فوق 6 الصباح معنديش انا فالدار هاني طالعا ليهم

منحتاجش نعاود ليكم علي الطريقة باش نوضات بيها فاطنة المختار و خديجة وزينب لي نعسو فبيت واحد كبير كلها شد قنت وتخشا نعس رغم انو اول مرة زينب تنعس فالارض فحيااااتها اما خديجة كانت مجرباهاش ومولفة عليها قبل تتزوج المختار وتا المختار كان ولف بيها الا انو العيا خلاهم ميعقلوش نعسو موتة وحدة ، طلعت ليهم بسطلة ديال الما بااااارد كبتو عليهم جابو النوضة وهوما عوجين مكوانسيين عاد ايبداو ايتغاوتو خنزرات فيهم فاطنة العصا ديال البارح باقي مبردات عاد ايزيدو وحدة خرى خديجة حالتها كيف كل صباح تخلع الموتي وزينب غير تبرگم وتسب بغات گاع هي تنتاحر حلات الشرجم باش تلوح راسها شافت حد متسوق ليها كلها خرج ايقلب ميحنجر ومدوخ بالنعاس وطلات علي الارض بانت ليها بعيدة عاود دورات وجها للبيت لقات فاطنة متكية علي الحيط وجامعة ايديها تشوف فيها : يالله الي سميتك مرى نقزي
زينب: الله اينعلها عيشة معاكم انا مستحيل نعيش هنا نفضل نموت علي اني نعيش هنا اهئ اهئ شنو درت اربي مولاي الحبيب حتى نتجازا بحال هكا
فاطنة: علم الله شمن اتم درتي بالحق وجهك ابنت خويا اتاع المصايب باينة وليني اقسم بلي خلقني ونفخ فيا الروح ومتشدي معانة الطريق وتنقسي من هاد الفشوش الخاوي ديالك وتواضعي وترضاي باش قسم ليك الله حتى نعاود ليك الترابي ودروك دوزي هوك تفطري وبدلي عليا هاد نص ميترو دالشراوط علي قلتهم ولبسي حوايج كي الناس وسيري للفيرمة تخدمي كي قرانك
زينب : كوااااااا؟؛؟!؟!
المعيطي (نقز عليهم من البلاكار الليل كلو وهو مخبي فيه حاضي زينب): الحواااااا صباح الخير
فاطنة (خرجات فيه عينيها): شكنتي الدير هنا المسخوط هااا؟ (فسخات صندالتها هزاتها وتقرب ليه وتدوي )
المعيطي: كنت نشوف فزينب ناعسة ههههههه

مزادتش معاه الهضرة سيفطات ليه الصندالة للكمارة نيشان خلطات لوالديه الملامح هرب منها ايحك فوجهو وهي تابعاه وتغوت 
زينب: لا لا انا كنحلم شي كابوس هادى غرجع ننعس باش نفيق منو
فاطنة (گالسة تسلخ فالمعطي لتحت بحلى علمها الله زينب اترجع تنعس غوتات هزات حلوقها للسما): زييييييييييينب والله يا والديك وتنعسي حتى نطلالالالالاع ليييييييك
زينب (غوتات): وااااااالحبس ا بنادم تفوووووو
ضربات برجلها مع الارض ومشات للطوليت لي البارح بليل حلفا مدخل ليها ولكن تزيرات ودخلات اليوم بقات كتشوف فيها ومترددة هي مزيرة وعاد خاصها تدوش وشحاااال طلعات النفس و زفراتها باستسلام شافت ودخلات سدات عليها ، دازت اكتر من ساعة وهي فالطواليت عيات فاطنة تدقر وتتحلف فيها لتكون رجعات تنعس فالطواليت حتى جات خديجة : شوفي افاطنة زينب بنتي وانا عارفاها شتي تقدري تحكمي عليها بالاعدام گاع ومتسمحش فراسها تدخلي فكلشي الا فلبسها ومكياجها تيقي بيا تقتل الروح وهالامارة (عرات ليها علي دراعها) هاد العضة عطاتها ليا فاش واحد النهار هرست ليها قرعة الريحة لي عزيزة عليها بنتي مجعووووورة وانا لي عارفاها شوفي انا مها وشدارت محساك نتي لي غير عمتها 
فاطنة رجعات اللور وخلات زينب علي خاطرها خرجات من الطواليت لاوية الفوطة عليها جاب الله فاطنة دايرة الشوفو ديال الضو الما السخون كاين اما كون نوضات الحرب العالمية التالتة زينب تسمح فاي حاجة تقدر تسمح فوالديها ولكن نضافتها الشخصية واهتمامها براسها ابدا مستحيييييل، مشات للبيت بان ليها المختار مجبد شافت فيه بنص عين جمع النوضة خرج فحالو ومشات للبلاكار حلاتو جبدات المعيطي لي كان مخبي فيه حاضيها تا تخرج باش ايشوفها تبدل وخا عاد كلى قتلة ديال العصى مبقاتش كتأتر فيه لاحتو تاهو برى وسدات عليها باش تبدل علي خاطرها

خرجات من البيت من بعد مقادات راسها مزيان هبطات للتحت لقاتهم كلهم فطرو وفاطنة تتغاوت مع خديجة باش تمشي تعجب وخديجة منوضاها فالسما لعالي كيفاش غتعجن هي بنت شكون وشكون وتعجن المهم المضاربة شوية وتبدى شافت فيهم زينب وهي هازة حاجب ولاخر مهبطاه : شنو قلتي نتي قبيلة فين فغنمشي
فاطنة (دارت عندها): هاد نتي عندها سمية السلگوطة فااااطنة وعمري بيها فمك هضرت مع ولدي باش ايلقا ليك خدمة راه اليوم بيجو سطاجير جداد وتانتي اتمشي معاهم اتلقايهم تم راه 7:45 هادي يالله فين توصلي ولدي ميحمل التعطال عدووووه يالله سيري 
المختار: وانا ؟؟؟
فاطنة : نتا انا لي بنديك ، المعطييييييييييي
هبط طاااااير كان فالسطح كيوكل الحمام زگلو بيه رجليه ضربها طيحة من الفوق للتحت جا مفرش عند رجلين زينب ضربتها بغوتة ونقزات شدات فمها: اااااااااا ماما ماااات ماااات
المعيطي (ناض ايسوس فحوايجو): نعام امي
خديجة وزينب بقاو غير كيشوفو فيه
فاطنة: بشوية اطايرة بگر بغيت ليك غبارة وكون تهرستي دروووك هاااا وكون تهرستي (شاداه من ودنو) سير وصل زينب للفيرمة ورجع باش تمشي معاية للسوق
المعيطي: ههههه السوق السوق صافي نحوييييهاا ونرجع نمشو للسووووق
فاطنة: والله يوالديك وتتعطل
زينب: ماما ماما لا لا سمعتيه شقال نحويها لا لا عفاك منمشيش معاك
فاطنة: اسماء مشات بكريييي ونتي معارفاش الطريق سيري هو ايوريك وهاكي (عطاتها عصى) ايقرب ليك شحطيها معاه راه ميدير ليك والو ماشي داكشي لي فبالك هو معارف تا داكشي لي وسط رجليه شناهو اسيري
قنعوها بالكشايف عاد مشات هو سابقها وهي تابعاه بعيدة عليه بامتار حاضية مع الطالون والحجر لي دازت من حداه اخليه تالف ومعارف القبلة من بحر

المعيطي من بعد مشقة طويلة وفالطىريق شحال من مرة نزلات عليه بديك العصي وهو لي فراسو فراسو وصلها للفيرمة وطار راجع للدار جنتو يمشي للسوق غير دكر ليه السوق تديه بحوايجو اما كون بقا لاسق فزينب هاد الاخير لي مشات 
داخلة مع باب الفيرمة الكبييييىر وهي حالة فمها فالعدد الهائل من العمال والكاميونات والسلعة لي داخلة خارجة هدا باب الفيرمة الاول لي كيدخلو منو العمال والباب لي حداه ملاصق معاه هو مناش كيخرجو الكاميونات وكتدخل منو السلعة والالات الحصاد والزراعة وزيد وزيد... دورات وجها يمين وشمال كلشي كان حال فمو فيها وفلباسها الدراري كلمن هاز شي حاجة ولا واش لاحها وحل فمو فيها دخلو ليها الشك فراسها طلعات حاجب وهبطات لاخر وحنات راسها كتشوف فحوايجها ياكما موسخين ولا شي حاجة كانت لابسة

تأفأفات ومشات هازة راسها لسما ونافخة ريشها بحال الطاووس مراضياش بالبلاصة لي هيا فيها رغم انو المكان اقل ما يقال عنه جنة فوق الارض هادي اكتر من مجرد فيرمة هادي راها فيرمات كتييييرة مجموعة فوحدة وكل قسم او جناح من هاد الفيرمة متخصص بحاجة معينة ، العمال كتار بزااااف تقريبا كل ولاد الدوار والدواو المجاورة خدامين فهاد الفيرمة العضيييمة ، وقفات قدام واحد البلاكة كبيرة كتبين تصميم الفيرمة بانت ليها الادارة خاصها تمشي فواحد الطريق اخر تبعاتو كان زوين ومخالف علي الطرقان الاخرين كلو شجال وخضورة والطريق مقادة ماشي الحجر والتراب علاش كانت كتمشى ، لي دازت من حداه كتخليه مخرج عينيه وريوگو سايلين روبلات ليهم الخدمة حتي واحد مقدر ايكمل داكشي لي كان كيدير وبقاو غير تابعينها وحاضينها، وصلات قدام باب الادارة وهوما يبانو ليها مجموعة كتكون من دراري وبنات باينة حتي هوما جايين بحالها باش ايسطاجيو فالفيرمة ميلات شنوفتها مراضياش بالشئ لي كتشوفو وكتعيشو غير قربات ليهم ولاحضو وجودها

بداو ايوشوشو ودغية حكمو علي انو هادي هي المسؤولة لي قالو ليهم تسناوها باينة من حوايجها وشكلها مسؤولة بل شي حاجة كتر قربات ليهم وسمعاتهم كيوشوشو الباطرونة الباطرونة جات تقادو المسؤولة جات ، علات حاجبها فيهم وهي واقفة قدامهم مفاهما والو عاد غتقول ليهم شمن مسؤولة ولا زمر وهي تسكت دوراتها فراسها مزيان وتبسمات : صباح الخير علي الجميع
الكل : صباح الخير

زينب (بمكر): احم بلا شك عرفتو شكون انا 
بالزربة واحد نطق: اااه امادموازيل نتي هي المسؤولة علينا ونتي هي اليد اليمنى لمسيو زكرياء 
زينب (شكيقول هاد الويل ): احم انا اكتر من هادشي انا حبيبة صاحب هاد المزرعة 
كلشي خرج عينيه كتشوف فيها ممتيقينش شسمعو
زينب: علاش تصدمتو هايدا خاصكم تعرفو بلي هو مبقاش قاد علي هاد المسؤولة كلها وحيت انا دكية وعاقلة ومحل تقة الجميع قرر انو ايكتب ليا النص فهاد المزرعة بالاضافة الي ادارة اعمالو وبزاااف وبزاااف 
كلشي خرج عينيه وبدا ايوشوش شكون هادي لي ولات حبيبة مول الشئ وهو معروف عليه الاحترام والوقار وزايدها كاتب ليها النص روبلاتهم فعقولهم بقاو اكيشوفو 
زينب : منبغيش التهاون فالعمل والانضباط اكيد التأخر ممنووووع واي حاجة وقعات خاصني نكون علي علم بيها حيت انا المسؤولة هنا وانا هي كلشي
هاد المرة بالصح خرجو عينيهم فاش بان ليهم سي السيد واقف موراها جامع ايديه وكيسمع لهاد التخاريف الجمييييلة خنزر فيهم باش ايسكتو وايخلوها تحلم علي خاطرها ، كانت عاطياه بالضهر وجالسة تخلع فيهم بلي غتطردهم الي مداروش خدمتهم مزيان وبلي مول الشئ لي هو حبيبها شحال وهو تابعها وايطلب فيها باش تكون بجنبو وتساعدو فاعمالو وتوافق عليه ايتقرب منها وهي مكانتش قابلة ، هو كان كيسمع وحادر راسو ومرة مرة كيجمع شنايفو للجنب فاش كيسمع شي سلوگية تطلقات مجهدة علي الخرين 
زينب: واخيرا هانا قبلت بيه وكيف كتشوفو تواضعي شي نهار ايخرج عليا 
....(بصوت رجولي خشن): مكاين لي غيخرج عليك قدي 
دورات راسها بالزربة وهي تجي عينها فعينو مباشرة وخرجاتهم حتى غيطيحو من هول الصدمة ممتيقاش شكون كتشوف بزز نطقات : نن..نتااااا؟!!!!!!!
....(تبسم ليها بجنب فمو فقط): قباض روحك اااه انا ....

زينب : واش نتا فين ما مشيت نلقاك قبالت وجهي ديك النهار عطيتك جزاؤك شنو باقي باغي
زكرياء: يسعدنا النضر الي وجهكم الكريم الالة 
كلشي تطرطق بالضحك وحتى هو تبسم ليها وهي مرضاااااتش 
زينب: واحد مكيسواش قول نتا خدام هنااااا منستغربش من الحالة لي شفتك اول مرة فيها ودابة غادي تحتارم راسك وتحتارمني ولا غادي نطردك 
زكرياء (قرب ليها ): اوووه بالصح لمن غتشكيني وبصفتك شكون اصلا
زينب (بغرور وعجرفة): بصفتي مالكة النص فهاد المشروع وانا هي حبيبة سيدك زكرياء
زكرياء (قرب حتال وجها كلشي تخلع عرفو شي حاجة اتوقع): ههه مفراسيش بلي انا عندي حبيبة وبلي كاتب ليك النص فالفيرمة
خرجات عينيها وتسارعو دقات قلبها ممتيقاش شنو سمعات هداك لي هانت وسبات وحتاقرات داك النهار فقط بالحكم علي مضهرو لي كان موسخ واليوم طالقاها عليهم بلي هي مرت مول الشئ وهانتو تاني وهدداتو بالطرد هاهو واقف قدامها وطلع هو مول الشئ بنفسو فين تحط راسها وفين تمشي مرضاااااتش بقات غير كتشوف فيه وكتسرط فريقها وفبالها فكرة وحدة كترددها مشيتي فيها ازينب غتحطمي الرقم الاول فالطرد عالميا ومن اول دقيقة تبسمات ليه وهي مفقوصة معارفة مدير هو غير هاد الشوفة لي دارت وحركاتها الدالة علي انها تصدمات عرف راسو عندو تأتير عليها وبلي كتخاف رغم انو لسانها سليط والايام الجاية ايستغل اي فرصة جات قدامو باش اينتاقم منها وايروضها مزيااااااان 
هو بقا كيشوف فيها عينو فعينها ونطق بالجهد حتي تهزات من بلاصتها: مرحبا بيكم كاااااملين فمزرعة الراشيدي اكبر مزرعة فجنوب المغرب والمزود الاول وطنيا للحليب ولحوم الاغنام والابقار (بعد عينيه عليها وشاف فلي سطاجير لي راضين البال معاه تحرك من قدامها وهي باقة جامدة بلاصتها وكأنو دار ليها سطوووب من شدة الصدمة كيفاش هدا هو نفسو هداك ديال ديك النهار هدا لابس مزيان ضارب لاكوس وكيشعل بالنقاوة ريحتو كدوخ ووسامتو كتهبل لا مجال للمقارنة بين هداك وهدا ولكن الحقيقة انهم نفس الشخص المضاهر واللبس كيلعب دور كبيييير فالحكم الاول والمسبق علي الناس بغينا ولا كرهنا كيبقا اول انطباع مرسخ فبالنا

زكرياء (وقف قدامهم ربع ايديه وكيشوف فيهم بنضرات قاصحين وخصوصا فزينب لي رجعات اللور ووقفات): كيف سمعتو هاد الفيرمة هي الاكبر والاحسن من نوعها مستحيل تلقاو احسن من التقنيات لي كاينين هنا والتجهيزات والمواد والعلف المستعمل هادشي اتعرفو عليه مزيان مع المرشدة ديالكم لي غترافقكم وتوريكم جميع مرافق الفيرمة من اصغرها لاكبرها ، غتقسمو علي زوج مجموعات وحدة غتشتاغل فالادارة فالحسابات والانفورمتيك كيف شادين الشهادات ديولكم والمجموعة التانية الضعيفة غتكون متعددة التخصصات او بالاحرى المهام تيقو بيا مغتبغوش تطيحو فالمجموعة التانية لانو فيها التكرفيص بزااااف اي قطاع من قطاعات المزرعة محتاج للدعم خاصهم تمشو تقدمو المساعدة وتقومو بمجموعة الحوايج فدقة وحدة وحتي فالادارة ان تطلب الامر ، غنديرو ليكم اختبار غتكون مدتو يومين انعطوكم معطيات ونطلبو منكم انكم تحسبو شي حاجة او تنجزو شي حاجة والاحسن ايضمن بلاصتو كسطاجير والاسوء كيف قلت غيعيش ايام صعيبة ليه هنا وشحال من واحد مقدرش يتحمل ورجع فحالو خصوصا واحد النوع من البشر (وشاف فزينب وكلشي دار شاف فيها عرفوه قصدها بالهضرة اما هي غير كتخنزر فيه مقدراتش تدوي ) من بعد ساعة لي اتكون مخصصة للجولة فالمزرعة باش تعرفو علاش كندوي وحجم المسؤولية لي غادي تتحط علي عاتقكم من هنا القدام نتلاقاو فغرفة الاجتماعات فالادارة تما نكمل معاكم 
جات المسؤولة علي لي سطاجير بنت فالتاسعة والعشرين من عمرها ولكن مهتمة براسها زينب عند بالها لي خدامين هنا كلهم ولاد الدوار وحالتهم اتكون حالة ولكن لدابة باقة كتصدم هادي ماشي الصورة لي كانت راسمة للفيرمة ولا للعمال هادي راها شركة كبيييرة وقايمة براسها فهاد الضروووف كلها وبالاضافة لهادشي مديرها والمالك ديالها باقي صغير شاب ف الخامسة والتلاتين من عمرو هادشي كلو كيزيد ايدهشها ، بانو ليها سبقوها وداك خينا غبر معرفاتو فين طار تنهدات كتحاول متعصبش وتبعاتهم فالجولة علي الفيرمة

المسؤولة مخلات بيهم شي بلاصة موراتهاش ليهم حتي طابو رجليهم عيااااو دياب ديال بالصح وديك الفيرمة حلفات لكملات فاتت ساعة ودخلو فالتانية دازت نص ساعة فيها عاد سالاو وكلهم خرجو بنتيجة وحدة ايديرو ما فجهدهم باش ايتفاداو ايكونو متعددي المهام حيت كيف قال الباطرون ايضربو التكرفيص عدد الابقار والاغنام بزاااااااف وبزاااف وبزاااف شي حاجة كتيييييرة و الهكتاراااات ديال الخضر والفواكه والزيتوت وزيد وزيد ، زينب غير غادة وكتحاول تحسب شحال تقريبا ايكون تقام هادشي وشحال تكون فتروة هاد صعصع اما هي ممسوقاش لا لخدمة لا والو غير جاية هنا ودايرة الخاطر لفاطنة لي حالفة فيهم ، مشاو الادارة كانت حاجة خرى خاااالص وعالم وحدووووو نقية كتشعل البيروات كل واحد معزول علي الاخر الزليج تشوف فيه وجهك المرايات فكل بلاصة الاشجار زايدين لمسة خاصة للمكان المهم بلاصة نقية وزوينة بزااااف وتصميمها خاص حتي الطريق لي كتدي ليها مزينة ونقية اصلا الفيرمة كلها نقية وكل بلاصة معزولة علي الاخرى وليها طريق خاص كيدي ليها ، دخلو لعاقة الاجتماعات كان زكرياء واسماء جالسين خدامين علي شي وراق خداو الادن وكلها جلس بلاصتو حول طاولة كبييييرة لاجتماعات
زكرياء شاف فيهم وخنزر فزينب لي جالسة فراس الطاولة مقابلة معاه نيشان حنحن وكلشي سكت كيشوف فيه 
زكرياء: كنخدم بنفسي كعامل متعدد التخصصاات مكنشدش كرسي ونبقا جالس ونراقب من بعيد كنبغي نخدم ونضرب التكرفيص بااش نعرف بحق الوقت (كيشوف فزينب وكيدوي) واي واحد حتاج شي حاجة من العمال كيفما بغا ايكون كيجي وايسول عليها ومنبخلش عليه باي حاجة نقدر نعاونو فيها سواء كانت معلومة او معروف وكنتسني منهم نفس الشئ حتارمو بعضياتكم وعاونو بعضياتكم باش نزيدو بالخدمة للقدام ممنوع المشاكل وممنوع التأخر علي الخدمة اكتر حاجة كنكرها ، من اليوم غتبداو فالاختبارات باش نعرفو فاش نصنفوكم وبما انو دفعتو وراقكم وعارفكم كلكم شمن تخصصات دايرين باش ايسهال عليا الخدمة الا شخص واحد (شاف فزينب لي كانت حانية راسها كتشوف فتحت الطبلة كانت هازة تيليفونها كتدور فالانسطا وتشوف ليكونو منزلين عليها شي خبار الالاف المساجات وصلوها مقدرات تجاوب علي والو مزال ملقات الكدبة المناسبة لي تطلقها عليهم ) الاخت مشغولة (الصمت مسمعاتوش كلشي دار ايشوف فيها وهي مكايناش فهاد العالم) احم احمممم (ورك علي ايديه تعصب وهي والو حلفات لهزات راسها مغيبة علي الوجود فاش شافت وحدة من صحاباتها علنات خطوبتها علي واحد رجل اعمال لباس عليه ، هو طلعات ليه القرينة لراسو وغوت) ااااااا الاخت كيرداشن ياكما برزطناك
هزات راسها اخيرا كلشي كان كيشوف فيها اسماء و زكرياء والمسؤولة سميتها ليلي ولي سطاجير ب 10 بيهم بنات ودراري شورات حتي طفات التيلي وحطاتو فوق الطبلة وهي كتشوف فعينيه بعدم اهتمام: سميتي زينب ماشي كرداشن وميشرفنيش تشبهني بيهم هادي اولا مسيوووو (وركات عليها) زكرياء وتانيا هنا كنسمعك شنو بغيتي
اسماء دابت بلاصتها بقات ليها غير تندب حنوكها لي سطاجير تصدمو من مدى وقاحتها وكيفاش كتجاوب معاه وهو لحد الان مجاوبهاش ومخليها علي راحتها فعلا لي سمعو عليه هاهوما كيشوفوه مرزن ومتبت وكيحسبها بالعقل كون شي واحد اخر كون جندخها

زكرياء (زير علي ايديه كيضبط اعصابو هادشي كلو علي وديت فاطنة لي كيحتارمها فوق القياس وبمتابة ام ليه ): وخا مقلتي عيب ولكن حتى انا نقول ليك حاجة مرة اخرى نلقاك هازة التيلي فالخدمة نهرسو علي راسك ونحطو قدامك تنحطي عليه هادي لولة والتانية غتحتارمي المقامات والتراتبية لي فهاد الخدمة خاصك تتعلمي تدوي مع لي هوما اعلي منك مرتبة من الان فصاعدا والا غتلقاي راسك مرمية فالزنقة وحد ميتوسط ليك (وغمزها خلاها غارقة فحوايجها عطاها القاصح ضربها بكلامو بحال القرطاس للقلب نيشان ولات حمرة وكتترعد بالاعصاب عاد غتدوي وهو ايسبقها) ودابة بلا هضرة خاوية متعطليناش شنو هوما الشهادات لي عندك؟
زينب (بغات تنوض تقلب عليه الطبلة تغوت وتزعرط تسي وتضرب متخليش حقها عمر شي حد تجاوب معاها ولا حتاقرها او نقص منها وخا غير بالغلط اما هدا كيعطيها للوجه نيشان شديها ولا خليها ، بعد صمت طويل نطقات ) : باك ميزة ممتاز شعبة اقتصاد والاجازة كدالك ممتاز والان الماستر ادارة الاعمال 
زكرياء (عوج شنوفتو للجنب): همم مزيان علي الاقل حاجة وحدة فيك مزيانة 
زينب: اكيد مزيانة نتحداك تلقا شي حد فهاد الحفرة قاري بحالي
زكرياء (كان قال سكتات ودارت عقلها شوية الساعة هي عاد مزايدة فيه وكتدوي بفخر وتكبر هز راسو فيها وتكي علي الكرسي كيشوف فيها ): مبغيتش نصدمك ولكن لاسف نتي ادني وحدة هنا فالمستوي الدراسي هادو لي حداك(لي سطاجير) كلهم وخادين شهادات وديبلومات وكاين حتي لي خدا الدكتوراه من معاهد ومدارس معروفة علي الصعيد الوطني والعالمي ، قدامك خريج جامعة اكسفورد فادارة الاعمال حاصل علي دكتوراه بميزة ممتاز وعمر شي حد عرف هادشي حيت مكنبغيش نبان عكس حضرتك صراحة لحد الان معرفتش معدنك ولكن تيقي بيا قريب نلقاه وديك الساعة ايكون ليا تعامل خاص معاه 
تبسم ليها وخلاها حالة فمها من جديد كيكلاشيها وكيصدمها وايطيح من قيمتها قدام كلشي 
زكرياء (تقاد فالجلسة): انعطيك سؤال واحد سؤال واحد تجاوبيني عليه وتضمني بلاصتك فمجموعة الادارة وهدا وعد مني قدام الحضور
زينب: كنسمعك 
زكرياء: فحالة كانت عندنا ازمة نسبة الواردات كتر من الصادرات بمعني اخر كندخلو كتر من منخرجو ، العمال شهور متخلصوش وكيطالبو بحقهم ابضرائب متراكمة والديون تزادت علينا شنو غنديرو؟
هدا اصعب سؤال ايقدر ايتطرح عليك فهاد الحالة كلشي تصدم وكون سولهم مغيعرفوش ايجاوبو حيت فعلا هادشي خاصو تخطيط وتدبير تبسمات وشافت فيه: عند بالي اتسولني شي حاجة فالمستوى ، الجواب باين غتبيع الفيرمة تخلص الديون والي شاطت ليك شي حاجة مزيان مشاطتش معندكشي مدير
حلو عينيهم من هول ما سمعو واش من نيتها قالت هاد الجواب المزفت اسماء حدرات راسها باستسلام وليلي فلتات ليها الضحكة ودورات راسها هو بقا كيشوف فيها شحاااال وفالاخير تبسم ليها ونطق: كيف توقعت 
جمع النوضة وناضت حتي اسماء وليلي ولي سطاجير الاخرين بقات هي فقط لي جالسة ومفتاخرة بالجواب لي عطات وكتشوف فيه بتحدي ، مشا حدى ودن ليلي وعاطي زينب بالضهر نطق وخلى ليلي كتشوف فزينب : متعددة التخصصات 

زينب(بصدمة): شنووووووو؟!؟!؟
ليلي: كيف كتسمعي هادشي لي قالي مسيو زكرياء قبيلة
زينب (طلعو ليها الجنون للراس): واش عارفة راسك شكتقولي ااااانا نخدم مع البقر والماعز اااانا نمشي للجنانات نقطف الليمون ولا نجني الزيتون واش عارفة ضفر واحد من ضفاري شحال خاسرة عليه ولا لا بغيتي ايدي تولي حالتهم ، انا اعلى من هادشي عيطولي عليه فيناهو نتفاهم معاه فيناهو نوريه انا نخدم مع البقر والمااااعز 
طارت بغاات تخرج تقلب عليه وتغوت وتنتف فلي سطاجير مشاو شدوها كلشي الموضفين وقفو ايشوفو فيها جهلات كتغوت وتسب وتضرب وحلفو لا طلقوها تمشي تقلب عليه 
ليلي(غوتات عليه): ايييييييه اش يسحاب ليك راسك گالسين فزريبة احتارمي راسك الالة ولا نرموك برة (وجاو وقفو رجال الامن تلاتة حداهم كيشوفو فيهم ايتسناو اوامر ليلي ) 
زينب (مشات حدى وجها): باقي ترفعي عليا صوتك نقطع ليك حبالك الصوتية كتسمعي ومرة اخرى جمعي راسك معاية كندوي مع مديرك ماشي معاك 
ليلي (تقرصات مرضاتش حيت دقراتها): نتي شنو حاسبة راسك فملك الرحمان الصباح كلو ونتي معاجبك العجب وكتبندري علينا تقولي كتخرجيهم لويز تواضعي معانة راه كلنا ولاد تسعة
زينب (قربات ليها وعينيها ناااار): انا بنت واااحد ا بب ماشي تسعة ، وحاسبة راسي الكل فالكل والي عندك شي اعتراض قوليه متخليهش ايحرق فقلبك لتطفاي ليا بسمك هنا ومرة اخرى خليك بعيدة باش متسمعيش لي مايرضيييكش (وخنزرات فيها ، المطايفة كانت ناااار وعلي نقشة ايديرو لدين دمهم سخون زينب شعلات ديال بالصح وكون طاحت فيها كون شرشماتها مجعورة وتديرها اصلا مريضة بالاعصاب وعروقها غير كتتعصب كيتنفخو وميكالميها غير دواها لي ساوي زبابل دالفلوس ، تدخلات اسماء وجرات ليلي للجنب)
اسماء: هالعار علي وجهي ا ختي ليلي علي وجه الحنانة صافي مسحيها فيا هاد المرة
ليلي: علاش حتى نمسحها فيك ونتي مدرتي والو هاد قليلت الترابي لي خاصها تعاود تتفورماطا
زينب: قليلت الترابي هي نتي الخانزة كتسمعي والي فيك شوية الجهد اجي لهنا نوريك متسواي
خالد(مدير قسم الاعلان فالشركة هو لي مكلف ايقاد ايعلانات لمنتوجات الفيرمة ): اااااا الشيخات شكااااين مالنا

كلشي دار شاف فيه كان شاب فالتلاتين من عمرو زوين وانيق لابس سروال جينز وتيشورت فالاسود طويل داير نضاضر الشوف وباينة فيه قاصح
خالد(بصرامة): ليلي شكاين معامن كتخاسمي تاني 🤨
ليلي: مسيو خالد المشكل ماشي مني من هاد خيتي لي عند بالها شادة ملك الرحمان فايدها
زينب (شافت فيها ورجعات شافت فيه): سمعتيها بودنيك شنو قالت كاين واحد المتل معرووووف قالك لا تجادل الاحمق فقد يخطئ الناس في التفريق بينكما 
مشات وخلاتهم واقفين كيشوفو فبعضياتهم ضرباتها غير بالمعني اسماء شدات علي راسها مقدراتش تدوي ليلي مشات شادة الدموع فعينيها وخالد ساط بغضب (وشاف فاسماء لي كانت واقفة بعيد وشادة فراسها ) : اسماء الديهم وريهم باش غيبداو شوية ونجي 
اسماء: وخا مسيو خالد ، تفضلو معاية 
مشاو معاها وهو خرج بالزربة كيقلب علي زينب بانت ليه غادة خارجة كتعتر فطالونها مع الحجر مشا بالزربة لحق عليها وكيعيط عليها : دموازيييل مدموازيييييل 
وقفات زينب بلاصتها عاطياه بالضهر تنهدات كتحاول متتعصبش حتي وقف قدامها كيشوف فيها 
خالد: شنو هادشي وقع الداخل ممكن تشرحيلي 
زينب: سير عندك ايشرحو ليك كيف بغاو ممدطراش نشرح لشي حد تصرفاتي 
خالد: مدام نتي هنا وفممتلكاتنا ادن مدطرة تشرحي وتدافعي علي راسك 
زينب: لمن اندافع علي راسي هاااا لمن ؟!؟! انا جاية باش نسطاجي بحال عباد الله وديك شنيولة جالسة كترطي عليا فاش مقبلتش بالمهمة لي عطاوني واش انا غنخدم متعددة المهام الحماق هدا

خالد (باستغراب): وايلي علي متعددة المهام شكون عطاك هاد البوسط انا ندوي مع زكرياء اكيد معندوش خبر بهادشي 
زينب: هااا قلتي معندوش خبر ايوا اسيدي خليني نعلمك بلي هاد زكرياء الزفت ديالكم هو لي عطا هاد القرار
خالد (بصدمة): زكريااااء؟!؟! ميمكنش بالعكس زكرياء كيحسن ايتسغل الفرص ونتي خاصك تكوني فالعلاقات العامة للشركة اولا وجه اعلاني لمنتوجات المزرعة
زينب (رفعات صوتها حتي كلشي دار شاف فيها) : اوهوووو واخيرا شي واحد كيفهم فيكم اقوم لووووط
خالد (ضحك من قلبو): هههههههههه علالالام نتي والله لداخل مشيتي تقتلي البنت بالقرطاس لي كتعطيها للقلب ودابة قوم لوط عرفتي وتلامو عليك هادو والله تا يهنشروك
زينب: قول لشي حد ايقرب وتشوف شندير ليه 
خالد : الهضرة كتيييرة معاك اجي بعدا شكون نتي سميتك وفين كتسكني باينة ماشي من هنا
زينب: فرعتيلي راسي بأسئلتك مفيا ميدوي عييت من بعد ونشوفو هاد ركن التعارف 
خالد (تبسم): ههه مقبولة منك الالة سيري دابة رتاحي وغدة رجعي علي متكون الاوضاع تهدنات ونوريك شنو تديري فاش تجي طلعي عندي ديريكت البيرو ديالي فالطابق التاني اخر وتحد علي ايدك ليسر الي حبسك شي حد قولي ليه انا لي بغيتك
زينب: احسن حاجة نخرج من هاد الحفرة يالله باي (دارت عاطياه بالضهر بعدات عليه بخطوات وهو حاضيها وكيتبسم)
خالد (رفع صوتو باش تسمعو): شنو سمييييتك
بقات غادة متسوقاتش ليه حتي وقف عليه زكرياء مربع ايديه وكيشوف فيها غادة كتنخوى فمشيتها وتضرب بشعرها تقول حمامة كتمشي وكتلوي فداك الخير عندها وكلشي حال فمو
زكرياء: اسبحان الله الحاج
خالد (دار كيتبسم لعندو): فشكاااال هاد البنت
زكرياء: مسخوطة هاديك لعنة ربي نازلة عليها صبا صبا 
خالد: ههههههههههههههه مالها شدارت 
زكرياء : قول شنو مدارت

خالد: كانت الداخل كتغوت وتقلب عليك وتخاسمات مع ليلي شوية وتقتلها بالسم ليلي بقات غير كترعد
زكرياء (دور راسو كيشوف فيها بعادااااات حتي مبقاتش تبان): منستغربش تديرها وتفوتها ولكن شنو بغاتني مالها كتقلب علي لي ايخلي ليها دار بوها؟!؟!
خالد: لا واش من نيتك اصاحبي حاطها فمتعددة المهام واش هادي ايحطوها الناس فداك البوسط كلو تكرفيص حشومة حتي فالمعاودة
زكرياء: سر بوها تتعلم ترفع صوتها وتتعفر علي عباد الله وديني وما اعبد الي مخليتها تكره عيشتها منتسماش زكرياء اندوز علي والديها الكحط انروضها كيف روضت zak وديك الساعة تأرى معندها 
خالد(بدهشة) : وايلي اصاحبي مالك علي هادشي كلو
زكرياء: انا لي عارف انا
خالد: فين كتعرفها نتا بعدا؟!؟ شفت بحالي بيناتكم شي حساب قديم
زكرياء (تحرك كيتمشي وخالد غادي فجنبو): عقلتي علي نهار رجعت من casa فاش تقادا العلف ومشيت جبتو علي بين ميوصلو لينا الدفعة لي طالبين 
خالد (بتدارك): اااه بالامارة قلتي درتي شي كسيدة والبيكوب تبجغات جيتي معصب داك النهار بزااااف وايدك كلها دمايات ومبغيتيش تعاود شنو وقع بالضبط
زكرياء (شير بايدو اللور): راه شنو وقع 
خالد (فهم البلان بالزربة): واااايلي متقولش هيا لي دخلات فيك 
زكرياء : هي وزايداها بالهضور الخاوية
خالد: ههههههههههه وايدك؟
زكرياء: دخلت مها فالزاج دالطوموبيل فاش عصباتني 
خالد: واااايلي ههههه اهاه وشنو جابها لهنا هي باينة فيها لاباس عليها مكتنتاميش لهاد المنطقة
زكرياء: بنت الفشوش كابرة بفلوس باها لي شد ورتو ومبقاش عاقل علي ختو 
خالد: شكووون؟!
زكرياء: زينب بنت خو الحنانة اخالد
خالد (بصدمة) ؛ شنوووو؟!؟! من نيتك داوي 
زكرياء: كيف كتسمع
خالد: وشنو فكرو فيها بعد هاد السنين
زكرياء: دارو فاييط( مد ايديه كيقلب فصنادق مطيشة لي غيمشو لومبالاج ) مزيان ديوهم دابة لومبالاج الكاميونات فالعشية غيدوزو
خالد: واه واه واه گاع هادشي هي هاد زينب بالسيف كانت كترعبط الداخل البنت من حقها فين كانت وفين ولات فليلة وضحاها تخيل راسك تكون مالك كلشي وفرمشة عين تخسر كلشي زكرياء: وغتزيد تخسر كون اكيد
خالد: عمرني شفتك حاقد بحال هكا اصاحبي
زكرياء: كنكره هاد النوع لي كيحتاقر لي قل منو وانا غندير فيها خير ونعاود ليها الترابي ونوريها قيمتها ونتا متدخلش خليك بعيد علي هادشي

خالد: دبر الراسك انا غندير خدمتي معاها وصافي
شير ليه زكرياء بايدو ومشا ايعاون شي وحدين ايطلعو السلعة فشي كاميونات ، اسماء كانت دايزة من تما لمحها خالد تبسم وبقا حاضيها تنهد بعمق وتمتم: اخخخ وشكديري فيا اسمائي 
دار مشا ايشوف خدمتو ومرة مرة ايتلفت ايشوف فيها حتي غابت عن انضارو ، ندوزو لاخت كرداشن كيف سماها زكرياء بقات غادة فنفس الطريق مناش جات حتى خرجات فالدار نيشان شافت فيها مدة طوييلة تنهدات ومشات دخلات جا الكلب ايتمسح فيها هبطات علي ركابيها كتبسم ليا وتحك ليه 
زينب: نتا هو جلول ياك (كتحك ليه وعاجبو الحال) شوف غير السمية لي عاطيينك شعب جااهل لدين مو ، اخخخ اجلول حتى واحد مكيفهمني عمري فحياتي لقيت راحتي مع البشر دائما كنقول بلي الحيوانات كتفهم الانسان كتر من اي واحد اخر ولكن اوهوووو شكون ايفهم ليك (كيلهت وايشوف فيها وايلعب بديلو عاجبو الحال تبسمات ) ايمكن غتكون صاحبي فهاد الحفرة لي جابنا ليها المختار 
المعطي (نقز قدامها): حويناااااااااه وجينااااا
بشدة الخلعة طاحت علي ترمتها مخرجة عينيها قلبها مشا ايسكت 
زينب (كتغوت وتهز فالتراب والحجر وتلوح عليه): الله ايمسخك الحماااار الله ايلقيها ليك خلعتيني وااااع بعد مني وعطيني بتيساااااااااع وفرقني علييييك ولا اقسم بالله حتى نحرقك حي فديك الفيرمة الكحلة الزحلة تموتو عليا دقة وحدة الله ايلقيها ليكم تريكت الغادي والجاي بلا نفع بلا فايدة وعطوني بتيساااااااااااع واكواااااك هاحجر العافية فوتوني عليكم شوفو المصطلحات باش وليت كندوي سوقية ومنحطة بحالكم القرووووووود وفرقوووووووني عليكم ودعيتكم لله وبعدووووووو وسيرو فحاااااااالكم
جهلت ولاات غير كتشير علي المعيطي بالحجر خديجة وفاطنة كانو تابعين المعطي جايين من السوق حتى بان ليهم طار وسمعو الغوات فاطنة كانت غادة تشوف شنو حتي شداتها خديجة تخباو وكيشوفو خافو ايبانو ليها تصدق مخلطاهم عرقات وتعصبااااات ديال بالصح ولات كتهز وتتحط كتنهج والنفس ممنتاضمش ناضت وقفت بزز خاصها تغبر والا غتقتلو ومتعقلش علي راسها طلعات للدار للبيت الفوق بزز وهي شادة فالحيط بزز كتحرك حالتها حالة كلشي توسخات وتغبرات المعيطي شد واحد القنت خلعاتو وجلس ايشوف

خديجة وفاطنة خرجو ايجرو عند المعيطي 
خديجة (بغضب): فاطنة شدي ولدك علي بنتي والله اختي وتمشي حتي تدير ليه شي حاجة منشدها ولا نحبسها زينب مريضة بالاعصاب وكتشرب الدوى تمشي تدير ليه شي دقة مهياش نتي لي غتوحلي فيه
فاطنة(كتشالي بايديها): ومالها مجعورة ولا مجعورة حتي الضربو والله يا حسها حتى نوريها 
خديجة: حربوووووووش تقيسيها وتشوفي ماشي انا مكبراها وعمري حطيت ايدي عليها تجي نتي تضربيها راه انصدقو مخرجين العيب
فاطنة: وهو باقي شي عيب كتر من هدا غتجمعي نتي وبنتك ولا ميعجبكم حال
خديجة (لاحت الميكات الارض): بزااااااف هادشي لا والله بزااااف كل ساعة ميعجبكم الحال ومعيشانا علي هواك ماشي حيت حتاجينا ليك غتولي تتحكمي فينا
فاطنة: داري هادي وندير فيها ماااااا بغيت كتسمعي الدري هبيل ومعندو عقل البنت بحال ختو و زايدون مقال عيب هيا لي حاسة براسها معرفت شنو وطرطقات عليه بحال الكاربون اربي بنتك الالة ربيها

خديجة عينيها عمرو بالدموع ودخلات تجري للدار فاطنة دارت معصبة شافت فالمعطي : والله يا حسك نتا حتي نوريك غير بلاتي جبدتي الصداع صافي تهنيتي..
زينب كانت سادة عليها فالبيت وكتبكي سمعات غواتهم كامل وسمعات الاحتقار والدل لي كيعيشوه و مزال غيعيشوه هي مختارتش تتربي هكا ومختارتش تعيش فهاديك الضروف كلشي كان موفر ليها وكبرات فمجتمع ليه قواعيد صااارمة وبزاااف رغم الرفاهية لي كانو عايشين ، بقات حاطة ايديها علي وجها وكتبكي وتتنخصص حتي فقدات السيطرة علي راسها وبدات كتضرب فراسها وتنتف فشعرها جاها انهيار ، دخلات عليها خديجة لقاتها هكاك تخلعات مشات بالزربة كتحاول تشدها ووالو حلفات لا تشدات ليها كتغوت علي حر جهدها وصدرها داق عليها بغات تقطع حوايجها قلبها كتحس بيه ايخرج من بلاصتو ، فاطنة سمعات العياط وطلعات تجري مخلوعة شافتها هكاك طاح منها النص وصفارت مشات بالزربة تشدها هي وخديجة وكيحاولو ايهدنوها
فاطنة: صافي ابنتي صافي ستغفري الله زينب زينب فيقي ابنتي حبسي لا لا مقمشيش وجهك ، الماااااااعطيييييييييييي
طلع ايجري عندهم
فاطنة: جري جري امسخوط الوالدين عيط علي المختار راه فالفيرمة جريييييي
مشا طاااااير ضرب اسماء فباب الجردة ومشا ايجري خلاها كتعيط عليه مفاهمة والو شوية سمعات الغوات وطلعات تجري لقاتهم محاربين مع زينب ايشدوها
خديجة (كتبكي): اهئ اهئ زينب زينب اهئ براااااكة مضربي فراسك برااااكة 
اسماء تخلعات بقات جامدة بلاصتها
زينب(كتركل وتغوت بحر جهدها): وبعدوووووو مناااااااي وعطوووووني بتيسااااااع شبغيتو عندي اهئ اهئ وواااااااااااااااااااا اهئ اهئ بعدووووو
خديجة: اهئ اسماء اسمااااء الشانطة الشانطة فيها واحد لبرا وسيروم عمري عمري 15 بالزربة ابنتي زربيييي
مشات اسماء بالزربة عمراتها وعطاتها لخديجة عاد غتدگها ليها شدها من عندها المختار لي جا فاخر لحضة تبتوها باش متحركش ودگوها ليها بعد مدة صغيرة بدات كتكالما شوية بشوية وتمتم بعدو مني شنو درت ليكم بعدووو مني كنكرهكم 
حتي غفات ومبقاتش عاقلة علي والو ، هادي هي زينب فاش كيتراكمو عليها الضغوطات وكتعصب والطبيب وصف ليها هاد ليباري مهدئات قوية فقط لهاد الحالات من الانهيارات العصبية

يتبع...