جبل نورسين الجزء 20

من تأليف Fatima zahra ouba
2019

محتوى القصة

رواية جبل نورسين

رشيد : صباح الخير سي جبل 
نورسين : جبل شكون اللي جا 
تقدمات بخطوات مسرعة و قفات حدا الباب لقات رشيد واقف بكامل أناقتو لابس كوستيم و مقاد شعر و الريحة د العطر كتشم منو على بعد امتار 
جبل :اش جابك تاني ؟ 
نورسين ضربات جبل بمرفقها باش يسكت 
نورسين : مرحبا مرحبا بسي العريس 
رشيد مهبط راسو و حشمان هو من طبعو انسان خجووول بزاااف 
رشيد : شكرا ختي 
نورسين : تفضل تفطر معانا 
رشيد كيهدرحاني راسو 
رشيد :انا جيت على قبل العنوان ديال دار د خالتي فاطمة 
نورسين : اه نسيت البارح ما عطيتوش ليك عرفتي شنو دخل تفطر و من بعد نمشيو كلنا لعندها 
رشيد :غير خليني نتسناكم هنا عادي بلا مانزعجكم 
نورسين :اويلي لا حشومة دخل تفطر على الاقل 
رشيد : واخا اختي 
دخل رشيد حاني راسو و جلس فالصالون نورسين دورات وجهها شافت فجبل لقاتو مكررره و معصب لاقصى درجة 
جبل : واش اللي ما لقا مايدير يتم جاي لعندي 
نورسين :*كتضحك * هاااا الغيرة د جبيلو بدات عاود 
جبل : كيفاش بعدا نمشيو كلنا عند ماماك 
نورسين : نتا ما توحشتيش نسيبتك 
جبل : نووورسين ما تخلطيش الامور غادي نمشي للمزرعة و مازال عندي طريق طويلة ا الله نوصلو 
نورسين ربعات يديها 
نورسين : اجي بعدا نتا جوهرة واش كاينة فالمغرب ولا كدبت 
جبل : جات البارح 
نورسين : ومااا قلتيهاليش اوا باااااز بااااز اوا و هوما بعدا فخبارهم ولا غير غادي نمشيو نهجموا عليهم 
جبل : عيطت ليهم فصباح قلتها ليهم 
نورسين : انا غادي نمشي مع ماما و ربيع و سلمى و يعقوب للمزرعة سير نتا بوحدك 
جبل دوز يدو على لحيتو و خنزر فيها و عطاها بضهر و مشا يعني بدون تعليق 😂
نورسين :*ضربات الارض بالفقصة * مال هادا عاود تفو ديما طالع ليه دم 
مشات تبعاتو مالقاتوش مع جوري 
نورسين : جوري عفاك مشفتيش واحد بو لحية ميستر نوفيخة 
جوري كانت كتشرب العصير بزقاتو كامل و شافت فيها 
جوري : what ? *مادا* 
نورسين :صافي نساي 
مشات كتجري طلعات فدروج حلات الباب لقاتو واقف فالبالكون و هاز كارو فيدو كايكميه مشات كطير حيداتولو ولاحتو 
نورسين : واااش باغي تقتل راسك صحة هاد الويل الكحل آخر مرة نشوفك كدور بيه هاداك راه غير سم كدخلو لصحتك 
جبل : *شاف فيها و دور و جهو * سيري عند ماماك أ الله توصلو انا ماسوقكش فيا 
نورسين :*ربعات يديها * لاااا واش من نيتك كتهدر واش باغي طرطق ليا مرارتي عاد ترتاح 
جبل شاف فيها و خنزر 
جبل : ونتي غادي توقفيلي القلب عاد ترتاحي 
نورسين : علاه انا شنو درت ليك 
جبل : سير عند ماماك و ربيع 
عطاها بضهر و مشا جلس من فوق السرير وهي تبعو 
نورسين : لا دابا واش بقا فيك الحال حيت بغيت نمشي معاهم 
جبل : مفضلاهم عليا واخا على راحتك 
نورسين : ماشي هاكاك والله غير حيت كنمشيو كنغنيو و ناشطين فطريق داكشي علاش 
جبل : نفهم من هدرتك بلي انا انسان ممل 
نورسين : حاشا شكون كدب عليك و قالها ليك 
جبل : واخا سيري و لكن نساي عليك شي حد سميتو جبل 
نورسين : ولا و ما ديرش هاكا شنو فيها الا مشيت معاهم 
جبل بقا كيشوف فيها مدة ووقف و مشا لبس ماكانتو و شاف فيها 
جبل : منين القضية هاكا غانمشي مع جوري 
نورسين ضربات الوقفة و مشات وقفات حداها كتقاد ليه الكول د القاميجة
نورسين :اصلن انا غير كنضحك غانمشي معاك 
جبل :*بابتسامة * حسيتي بالخطر واقيلة داكشي علاش 
نورسين :اينا خطر 
جبل :*غمزها *جووري 
نورسين : اش بانلك نمشيو كلنا مجموعين والله حتى فكرة زوينة 
جبل : ما عنديش مع الصداع و قوة البشر 
نورسين : حرااام عليك عفاااك و الله حتى كيكون واحد الجو زوين خصوصا مع ربيعة

جبل : شكون هاد ربيعة عاود؟ 
نورسين : ههه ربيع كانعيطولو ربيعة 
جبل : انا عارفك غير كتشوفي داك ربيع كتلصقي فيه 
نورسين : وا دابا بقا ليك غير ربيع تغير منو هاداك راه بحال ختنا ههه اصلن كيخاف منك بزاف 
جبل : الا مشينا كلنا غاتكوني فرحانة ياك 
نورسين : صراحة بزااااف و الله ما كاين ما احسن من العائلة فاش كتكون مجموعة 
جبل : واخا 
نورسين طارت عليها بتعنيقة و بالبوسان 
نورسين : نتا راك الكبدة و الرية و الكانصة تنموووت عليك أدعشوشي ديالي 
جبل حط يدو عى خدودها بجوج و قربها لعندو و حط شنيفاتو على شنيفاتها و هي دورات يديها على عنقو وهو كيجرها لعندو اكثر و اكثر ما كرهش يخبيها فضلوعو فكل مرة كيقبلها كينين باسمها بحروف متقطعة كانو مامصدقش بلي صافي نورسين ولات ملكو مازال لحد الان ما مستوعبش بلي نورسين بصح ديالو بصح لقا ملاكو طاهر اللي سنين و سنين و هو يقلب عليها ياااا لروعة الاقدار سنين من الالحاح فدعاء بصح ربي ما خيبوش وهاه دابا حداه و كتحماق عليه شحال من مرة يأس و لكن ربي كبير 
💚💚💚💚💚💚💚💚 
و ما الحب الا إختيار 
وما الاختيار الا أنتي 
وما أنتي زوجتي أمام اله و الملأ
أرى العفاف و العفة فيك 
💚💚💚💚💚💚💚💚💚 

بعد عليها كينهج و حط جبينو على جبينها 
جبل : اهم حاجة عندي تكوني فرحانة 
نورسين بعدات عليه و قبطاتلو فيدو بجوج و شافت فيه و ابتاسمت 
نورسين : انا بكلمة منك نترمى من الجنة الى نار 
جبل : *بابتسامة * وانا بنظرة منك أنساب من النار الى الجنة 😍😍😍 
نورسين : هبط عندهم انا غادي نلبس حوايجي و نجي باش نمشيو عند ماما 
جبل : واخا لبسي شي حاجة مقادة ما فيا اللي يخسر معاك الله يرضي على بنتي 
نورسين : هاااح على جبيلو حسيت بيك فهاد اللحظة بحال تشرملتي لا ههه 
جبل : *غمض عينو و ابتاسم و حنا باسها فعنقها * تشا را برب الا تنتسطا على الحب ديالي 
نورسين طرطقات فيه عينيها و بعدات شافت فيه ودارت يديها على فمها بصدمة 
نورسين : اويلي واش كنحلم 
جرها لعندو و عضها فعنقها حتى تاوهات بالم 
جبل : *بابتسامة *لا أالعسيلة فايقة كي جاك جبل بنكهة تشرميل 
نورسين : ههههه لا و الله حتى نتا هبيل كنتي كاتبان ليا بعقلك 
جبل هز راسو شاف فيها 
جبل : بغيت نعيش كلشي معاك ياك حلالي او لا *باسلها راسها * عرفتي و تمشي تلبسي شي حاجة ماشي هي هاديك اولا تبقاي تهدري مع داك رشيد غادي تشوفي تشرميل ديااال بصح 
عطاها بضهرو حل الباب و هبط 
نورسين لبسات سوفيطمة فالكحل مع سروال تجين مقطع شوية و زادت من فوق منو مونطو فالغري مع لبوط فالكحل و طلقات شعرها جات كيوت بزاف وقفات حدا المراية دير لميكاب و هو يبانلها عنقها احمر من اثر العضة 🙈🙈🙈 
نورسين : تفوووو تفوووو دارها بلعاني باش نغطي عنقي واااع شحال فيه ديال تحرميات باسل كيداير اللي شافني يقول هادي الليل كامل و هي ...استغفر الله العلي العظيم تفووو خاصني ضروري ندير كاشكول على عنقي و لكن غانبان بحال شي عروبية اوووف أجبل اوووف 

دارت واحد الشان فالاسود على عنقها و قادات مايكاب خفيف ضريف هزات صاكها دارت فيه تيليفون و سوارت و معقم و لاطروس د الماكياج و لكن تفكرات بلي غايكون الخطبة و خاصها ضروري تلبسي شي حاجة بلدية مغربية حرة 
نورسين : خاصني نقول لماما تجبدلي داك قفطان د جوهرة الغرونة و ندير شي مايكاب واعر احسن 
دارت صاكها فكتافها و خرجات هبطات لتحت لقات جبل جالس مع جوري فسيجور و خالين رشيد بوحدو فالصالون نورسين ضربات على فخادها و شافت فجبل 
نورسين : هاويلي خاليين ضيف بوحدو 
جبل هز راسو شاف فيها طلعها و هبطها ووقف و جا اونفاص ليها و دار يدو فجيابو 
جبل : بقا فيك الحال خلينا صديق طفولتك بوحدو 
نورسين :*دارت يديها فجنابها * اجبل و فعوط ما تجلس مع راجل جالس ليا مع جوري واش باغي تخرجلي العقل 
جبل :*ببرود * بقا فيك 
نورسين :انا كنهدر فشرق و انت كتهدر فالغرب 
بغات تمشي لعندو و هو يشدها من دراعها 
جبل : فين غادة 
نورسين : غادة عند رشيد نقولو ينوض باش نمشيو 
جبل :*كيديرليها سكانير بعينيه*هادا هو لباس اللي قلتلك لبسي 
نورسين :ياك كولي مستورة شنو بغيتي 
جبل : دابا هادي عندك سترة ابنتي شوفي داك سروال كولو مشردل بحال عضوك الكلاب 
نورسين : جبببل 
جبل : كتعجبك سميتي أحبيبة

نورسين نترات يديها من يدو 
نورسين :نتا بالله الا مسطي و باغي تسطيني معاك 
جبل : دوماج عرفتيها معطلة ابنت قلبي 
جوري :*بابتسامة * الله يخليكم لبعضياتكم كنحس براسي بحال كنتفرج ففيلم نتوما بصح كوبل زوين بزاف 
نورسين مكرهة و معصبة دارت شافت فيها و دارتلها ابتسامة صفرا 
نورسين :اوا هاهي طلعات الكتابة نتي غتمشي معانا 
جبل : اه غاتمشي معانا 
جوري: انا كنعرف جوهرة و جدي و جداتي حيت كنت كنمشي عندهم بزاف و ما نقدرش ما نحضرش فنهار بحال هادا 
نورسين :*كتشوف فجبل * اهاه يعني كانت بيناتكم علاقة قوية الله يدومها محبة 
بغات تمشي عند رشيد و هو يطلق ليها جبل يدو 
جبل : انا اللي غادي نمشي لعندو خرجي نتي و جوري تسناوني برا على ما نجي 
نورسين خنزرات فيه و عطاتو بضهر و حلات الباب بنطرة و خرجات وقفات برا حدا الفيراري حتى خرجوا كلهم جبل زاد عليه مونطو فلخضر و دار نضيضرات فلكحل جاه كيووت بزاف و باين فيه همة و شان نورسين شافت فيه و بدات تعض فضفارها و تغزز فسنانها عجبها بقات غير كتشوف فيه 
جبل مشا و قف حدا نورسين و جرها لعندو بجنب 
جبل : مالنا على دوك شوفات أ العسيلة 
نورسين : بحال تعطلنا ما غانمشيوش 
جبل :غانتسنا الكارد يجيب الهامر 
نورسين : و علاش الهامر 
جبل : واقيلة غاديين مجموعين و هي اللي كتهز العائلة فهمتي أنورسين دكية *جر ليها خدها * 
نورسين : واش رشيد غايمشي معانا 
جبل : * خنزر فيها و هدر بنبرة فيها تهديد و كيحك فلحيتو * اش بانلك نعرضو عليه 
نورسين : لا انا غير قلت و صافي 
جبل : غادي يتبعنا فطوموبيلتو راه هي و جوري حتى هي 
نورسين : وانا ما نتبعكش فطوموبيلتي هه 
جبل :*باسلها راسها * نتي بلاصتك حدا راجلك ما عندك فين تمشي 
نورسين تخشات فيه كي البخيخيشة كتضحك جاب لكارد الهامر حطها تماك و نزل عطا سوارت لجبل و مشا بحالو 
جبل مشا حل ليها الباب باش طلع و بقات كتشوف فيه 
نورسين : فاش ما كناش مع بعضياتنا حتى واحد ما عمرو حل ليا الباب ديال طوموبيل شي تصرفات كديرهم نتا واخا بساط عندهم قيمة كبيرة بزااف فحياتي 
جبل ابتاسم ليها و طلعات و طلع حتى هو حداها و ديمارا و زاد و تبعوا رشيد.بطوموبيلتو اللي كانت من نوع كاط كاط فلبيض و حتى جوري تابعهم بطوموبيل ديكابوطابل فالاحمر 
نورسين : شوف المكاتيب دابا شكون كان يقول رشيد غايتزوج بجوهرة و شكون كان يقول رشيد يولي حتى هو بطوموبيل و كدا زعما سبحان الله فخبارك بلي رشيد مسكين كانت عائلتو فقيرة بزاااف كان ديما كيلبس حوايج مقطعين و دراري د الحومة كيضحكوا عليه حيت كانو حاكرينو بزاااف كنت ديما كنلعب معاه و كندافع عليه 
جبل هز يديها باسها و حطها حدا قلبو و قال 
جبل : نتي فوقتما كان شي طفل فاقد الامل كاتهدري معاه 
نورسين : ههه لا ما كتعجبنيش الحكرة 
جبل : ماماك كانت قالتلي عليك زهوانية من صغر زعما كنتي كاتهدري غير مع رشيد عاوديلي على طفولة ديالك 
نورسين : وا لا صراحة كنت كنلعب مع رشيد و معاد و احمد و سمير و عصام و كريم و فؤاد

جبل :*دوز يدو على لحيتو * تبارك الله عليك زعما واش ما كانوش بنيتات تلعبي معاهم و لا كيفاش 
نورسين :* عوجات فمها * كانو كيعايروني كانو قبااااح بزااااف كيقولولو المشعككة و الفاظ اخرى داكشي علاش كان كيعجبني نلعب مع دراري و حتى بابا ما كانش كيخليني نلعب مع البنات و شحال من مرة كان كيبغي يقطعلي شعر بحال الولد ما كانش باغينا حيت بنات المهم الهدرة بزاااف و سكات احسن 
جبل : حتى لهادا درجة بنادم كينكر فضل الله عليه 
نورسين : بابا كان باغي دراري و ربي ما عطهوملوش و اوا كان باغي يردنا ولاد صحة ما كانش كيبغي يشريلي العاب د البنات بحال مونيكات و كوزينة واحد نهار ماما شراتها لي مشا دكدها كلها و قالها مرة اخرى تشريلها شي لعبة بحال هاكا نطلقك 
جبل بقا مصدوم 
جبل : واش حتى لهاد درجة 
نورسين : المهم ما تفكرنيش فالماضي الاليم 
جبل هز يديها و باسها من جوج جوايه و قال 
جبل : انا نشري لبنتي اللي بغات les poupées كاملين اي نوع بغيتي 
نورسين ردات راسها اللور و كتشوف فيه و كضحك 
نورسين :و حتى رسوم ما كانش كيبغي يخليني نتفرج فيهم المهم عشت واحد الطفولة فشكل و لكن الحمد الله على كلشي 
جبل : هاكا نبغي بنتي خاصك تحمدي الله على أي حاجة سواء خايبة سواء زوينة كل حاجة فيها امتحان ليك خاصك تصبري و انا انشاء الله نعوض بنتي بلي بغات 
نورسين كضحك و كتشوف فيه 
نورسين : انشاء الله أبابا هه و نتا كي دازت طفولتك عمرك عاودتيلي عليها 
ضرب واحد الفران سيك و حيد سمطة 
جبل :وصلنا 
هبط من اللوطو و مشا حل ليها الباب و نزلات و تبعهم رشيد و جوري حتى هوما نزلو طلعوا فالعمارة دقوا فالباب وهي تحل ليهم سارة الباب و حطات يديها على فمها و بقات مصدومة كتشوف فجبل 
سارة : عموووووووووو جبل 
جبل هزها من الارض و عنقها لعندو 
جبل: سرسورتي 
صوت فاطمة كيتسمع من لداخل 
فاطمة : ياااااا ديك العفريتة شكون جاااا كطيري دغيا حلات الباب 
وصلات فاطمة لباب و بقات غير كتشوف فيهم 
فاطمة : يااااااو مرحبا مرحبا ما تبقاوشاي واقفين فالباب يااااو مرحبا بنسيبي مرحبا 
دخل جبل و سارة معنقها ما بغات ترخي منو و تبعتو نورسين و رشيد و جوري 
جبل هز يد فاطمة باسها و ابتاسم ليها 
جبل : الحاجة لابسة عليك 
فاطمة : يااااو الحمد الله اوليدي اللي شفتكم رجعتوا لبعضياااتكم هاديك هي دنيا و ما فيها يااااديك جدرة نزلي خليه بعدا غايرد نفس يا و تشبطي فيه كي بغيتي تلاقاتلكم يا وليدي فطريق 
سارة بعدات عليه و دموع فعينيها 
سارة : توحشتك اعمو جبل علاش ما كنتيش كتجي لعندنا اهئ اهئ 
جبل : وما تبكيش ابنتي هانا جيت لعندك دابا حتى انا توحشتك بزاف جبت لسرسورتي بزاااف د لكادو اللي كيعجبوك 
نورسين : اهاه هي عرفتي تجيبلها لكادو و انا اللي مرتك حرام واش جبتيلي حتى ريحة ديال ربعميا غير كدب عليا بيها 
فاطمة : ياااونتي مالك سايرة تهزي غير نتي و عظامك هو كيهدر مع البنت و نتي اش حشاك خلاوها ماليها دجاجي كتقاقي و الفروج اش حرك شطاتو 
سارة : ولهيلا ديما كتغير مني ما عرفت علاش

فاطمة حولات عينيها شافت فرشيد و جوري 
فاطمة : ياااوتي شكون داك طفل و شكون ديك صفيفرة اللي حداه 
نورسين دارت كراخ بضحك اما جبل حابس ضحكة بزز و كيقول فنفسو عليها نورسين حمقة قول كتشبه لمها 
نورسين : هاداك هو رشيد اللي كان جارنا جا باغيك تخطبيلو 
فاطمة : ياااااااو نتا هو رشيد ولد ختي صفية الله يرحمها 
رشيد : هو انا 
فاطمة طلقاتلو يديها 
فاطمة : تعالا اوليدي تعالا ما تديشاي عليا راه ما عرفتكش تعالا اوليدي نشم فيك ريحة ختي تعالا 
مشا عندها رشيد و عنقاتو 
فاطمة : ياو غير ريحة مك مسيكينة الله الله يا و كبرتي و زيانتي يا و تبارك الله وليتي راجل و غاتزوج تباااارك الله يا و انا اللي غنخطبلك نيت ياااو ما تصورش فرحتي قداااش 
رشيد باسلها راسها 
رشيد : نتي راك فمقام الوليدة 
فاطمة كتمسح دموع من عينيها و شافت فيها نورسين 
نورسين : يااو باركة باااركة ما تزيديش فيه بالدموع كاع 
فاطمة: نتي اشتتعرفي يا باردة القلب اش تتعرفي فالمحنة 
نورسين : جبل كتعايرني قدامك و ساكت 
جبل :ماماك هاديك واخا تعصيك قدامي ما سوقيش *غمزها * 
فاطمة : يا و الله يرضي عليك اوليدي ياو شكون ديك صفيفرة اللي واقفة تما و كتشوف فينا ياكما جيناها بحال ليزانديان 
نورسين :*كتندب * اويييلي يامي هاديك راها صديقة ديال جبل بحال ختو 
فاطمة : ياو مالها ما كتسلمش مالها دايرة كيف شي غاورية 
تقدمات جوري و الابتسامة فوجهعا و سلمات على فاطمة بالوجه 
فاطمة :يااااو تباااارك الله على جمال سبحان من صورك ابنيتي يااااو ما نعرف علايش كانت توحم مك انا بعدا كنت نتوحم غير على الفاخر و التراب حتى ولدت هاد المشعككة اللي كتشوفي قدامك

نورسين : ماما اش هاد الهدرة كتقولي زعما كل خنفوس فعين مو غزال 
جبل حط سارة و عنق نورسين جنب و همس ليها فودنيها 
جبل : ماماك غير كضحك معاك نتي اجمل نساء الكون ما يبقاش فيك الحال ابنتي واخا 
نورسين دارت عندو و ابتاسمت ليه 
فاطمة :*دايرة يديها فجنبها* ياااو مالي كدبت قلت الحق ياااواخا كنت نتفرج فدوك المكسيكيين اللي كان يدوزو فالتلفازة ياو كنت نتوحم عليهم مرة مرة يااا واااالو يا بنيتي طلعتي كتشبهي غير لداك طنفوس د باك ياو مالي كدبت 
جوري : لا بالعكس نورسين زوينة بزاااف و اللون ديالها راه كيخسروا عليه ناس بزااف د الفلوس باش يوليو بحالها 
نورسين : الله يجيب من يقول الحق الحمد الله ياربي الحمد الله اوا سمعي يا فاطمة على ودنك سمعي سيري يا جوري لهلا يحرق فيك شي عظم 
فاطمة :*شافت فجبل * يااو سمحلي يا وليدي راه مرة مرة يعجبني نتمازح معاها بحال ما هاكا ياااو مايبقاش فيك الحال حيت كنعيبلك فمرتك راه حنا هاكا دايرين ديما 
جبل :*بابتسامة * عادي أ الحاجة بنتك هادي و كن ما كنتيش كتبغيها ما تكونش علاقتكم زوينة هاكا 
فاطمة : يااو دخلو لداخل ما تبقاوشاي واقفين فالباب راه كاينة سلمى و يعقوب ياااوداك ربيع من صبااااح وانا نعيطلو فالتيليفون حرااااام واش بغا يجي 
نورسين : ياكما ما غايجيش لا ما تقوليهاش 
فاطمة : لا غايجي غير على ما يقضي شي شغال
دخلو لداخل لقاو سلمى و يعقوب جالسين معانقين و كيهدروا 
نورسين : العرسان لابس عليكم 
سلمى :*شافت فنورسين * نتي بعدا ما معاك هدرة
نورسين : علاش اختي اش درتلك 
سلمى : غير شفتي جبل ضربتي عليا ما بقيتي تهدري معابا فواتساب ما بقيتي تهدري معايا فانستغرام 
يعقوب : *شاف فنورسين * صراحة ما توقعتهاش منك أشعيبية دغيا قلبتي وجهك علينا شفتي زوجك و نسيتي صحابك و حبابك شكون اللي غايدوم ليك حنا ولا هو امم 
شافت نورسين فجبل و ابتاسمت 
نورسين : صراحة هو اللي غايدوم لي 
يعقوب ضرب الوقفة 
يعقوب : عييييب و حشووووومة هادشي عيييب ها اللي قلتلك اسلمى نساي عليك هاد نورسين ما عندها فاش تنفعك 
سلمى : هاديك راه دخلاتها العياقة ولات عاااايقة بلا قياس 
يعقوب : اش بانلك نديروا بناقص ما بقيناش عارضين عليها 
سلمى : داكشي اللي بانليا صافي بناقص منها بلاصتها ندير فيها جوج قطات ناخد فيهم الاجر 
يعقوب : ولهيلا يضربو اللحم و دجاج و خليها هي و لا عرفتي شنو على ود داكشي اللي دوزنا نديرولها تاكل مع البراااااهش احسن ياك 
جبل هز مخدة ضربها بيها لوجهو 
جبل : بعدوا منها و لا نتوما اللي غادي نقطعكم طراف طراف و نعطيكم لبراهش و القطوط 
نورسين : هااح عبر عليكم

مشات جلسات حداه و تحشات فيه و باستو فخدو 
نورسين : تنحماق عليك انا 
سلمى : شو كيدايرين 
يعقوب : حنا ما سوقناااش فيهم ابيبي ياك حنا غادي نديروا عرس مطرطق كلشي يهضر عليه و خليهم هوما يتفقصوا 
سلمى : خسارة هوما كاع ما دارو العرس 
جبل : راه انوض ليكم 
سارة : غير نوض ليهم يهنيونا من صداعهم ياااه على براهش عمو جبل بعدا بعقلو ما يديرش راسو فاطفال صغار بحالكم دابا نتوما غاتزوجوا و ديروا دراري صراااحة كنشفق على ولادكم من دابا 
نورسين : سااارة هاكاك برديلي جنوني فيهم 
سارة : نتي بعدا براسك خاصك تسكتي ما دويش ولا نوض نبرد فيك جنوني 
نورسين : شنو درت ليك اختي 
سارة : بسبااابك عمو جبل غبر و ما عاود رجع يحسن عوانو معاك المهم انا غانوض نمشي عند خالتي فاطمة اما نتوما غادي تحمقوني 
نورسين : شوفلك البرهوشة راه غانوض نريشها 
جبل كايدوز يدو على دراعها 
جبل : واش غديري راسك فسارة 
نورسين : واااما سمعتيش شنو كتقول 
جبل : فمها هاداك بلا ما تعصبي على والو الله يرضي على بنتي 
يعقوب : نورسين سمعي هاد صاحبتك اش كاتقول 
نورسين : مالها 
يعقوب : قالتلك فدفوع بغات جوج جوج من الحاجة مالي شفتها فالقمرة زوينة هادي 
جابت فاطمة براد ديال اتاي و حطاتو 
فاطمة : مالها اوليدي شنو بغات 
يعقوب : قالتلك بغات جوج جوج من الحاجة 
فاطمة : لواه لواه ابنيتي توما مال هاد بنات اليوم هاكا دايرين *جلسات كتكب فاتاي * يااو ها ميمتك فاطمة رااجلي أ الله جابلي فصداق جوج زيوفة د الحمام ياو واحد السواك اوا و عكار ديال اربعة و عشرين ساعة ياو مزال نعقل حتى على شنو كان لابس كاع كان لابس كوستيم فصفر كبيير عليه جا فيه كي الخنشة و مع غرافطة فالحمر و سروال د قطيفة فالكحل ياو عطاني فصداق غير شي اربعمية واقيلا ولكن داك زمان راه كان ليها همة و شان يااو مالي هانا تزوجت وولدت بنيتاتي ابنيتي راه كلشي يفوت يبقا غير لفوت ياو حاولي عليه مسيكين يا ماتكونيش عاود مبدرة بلا قياس 
يعقوب : اوا هانتي تشوفي يا خالتي باغا تخليني على ضس 
سلمى ضرباتو لكرشو 
سلمى : اوا الله ينعل اللي ما يحشم 
فاطمة : تي كوني تحشمي و زكاي على راجل سايرة ضربي فيه نتي اللي والداه 
يعقوب كيضحك 
يعقوب : حاااكرة عليا صراحة بزاااف خايف نعاني من العنف ضد الرجال 
فاطمة : ياااويلي دابا هاد البجقولة تخلعك و تضربك سمحلي اوليدي الا دارتها غير كرط داك اللحية و دير الماكياج 
سلمى دارت كراخ بضحك 
سلمى : عطيه العصير سمعتي غير كرط داك اللحية و دير الماكياج 
فاطمة : لا اوليدي كون حرش راه قالك راجل ساهل بحالو بحال السلعة دليلة تعيا ما تزوق عليها محال واش تدوز تابالقنديل و الفتيلة 
حطات فاطمة كاس ديال اتاي حدا جبل 
فاطمة : يا وليدي تا مالك خاشي راسك فتيليفون راه تيضر العينين شرب بعدا كويس تاع اتاي هانتا راه برزتو 
جبل : شكرا أ الحاجة و لكن ...
نورسين : ماما جبل ما كايشربش اتاي حلو عليه بزاف 
فاطمة : هاااويلي ياكما فيه سكر مسيكين 
نورسين : لا الله يحفضو غير كيقلل من الحلاوة 
فاطمة :*كضحك *هاااي هااااي على الله يحفضو مسكين نسيتي نهار كنتي تسطفيلو دعاااوي ولا نفكرك 
نورسين تصدمات بقات مشوكية و كتحرك راسها بنفي 
نورسين : احم ماما بلا فرشة الله يرحم الواليدين الا ما ردي لسانك اللور و سكتي شوية ها العار 
جبل :*كيشوف فنورسين * كيفاش واش كانت كتدعي فيا زعما ؟ كملي كلامك أ الحاجة 
نورسين :لا اجبل لا ماما غير عزيز عليها ضحك ياك اماما 
فاطمة : لالا ابنيتي انا ما عزيزش عليا المزاح انا عندي نيشان نيشان اوا اش غنقولك اوليدي يا جبل كنا فوقتما نهدرو عليك تنوض تدعي فيك سير الله يديرلك سير الله يفعلك انا كنقولها يا بنيتي تي نعلي شيطان السيد ما داير والو يااو معامن كتهضر ياو تكملها و تجملها فالتالي كاع منين كتسالي دعاوي تطيح لارض و تنوض تبكي لينا و تقولك الله يحفضو ليا ياااو هبلاتنا حمقااااتنا يحسن عوانك معاااها 
جبل مرر يدو على شعرها و لوا خصلة من شعرها فيدو و همس فودنيها 
جبل : كنتي تدعي فيا ياك من بعد و نتفاهموا 
نورسين : و لا و الله ما هاكاك 
جبل : الحساب من بعد ماشي دابا 
فاطمة : اش غانقولك اوليدي راه واخا تشوفها هاكاك راه قلبها حليب و لكن غير تغفل عليه يفيض ما نشكرلكش بنتي راه مرضية واخا هبيلة و اللي جا يديرها بيها واخا شي بعض المرات طرطق فيك عينيها و تبينلك راها شديدة راه والو خلاوها ماليها زعامتها بحال زعامة الجرو كثرة نبيح و ركلة وحدة تلصقو مع الحيط و تحيدو من الطريق

نورسين : اوا الله يخلف عليك اماما الله يخلف عليك دابا فعوط ما تشكري فيا جالسة تعايرني واش نتي مي ولا مرة با 
همس ليها جبل فودنيها 
جبل : حشومة أنورسين ماماك غير كضحك معاك ما تهدريش معاها هاكاك 
فاطمة : وليدي رشيد كول غويطويات كول تبارك الله على مولاي السلطان ياو شكون هاد البنت اللي غانخطبو لك بعدا شي زين شي حداكة 
رشيد :*كيضحك * سميتها جوهرة اخالتي فاطمة ضريفة و مزيانة الله يعمرها سلعة 
فاطمة : اوا الله يكمل بالخير برفاه و البنين انشاء الله ولكن خاصها تجي لعندي نشوفها واش تعرف تطيب ولا والو بحال هاد الخطية اللي عطاني الله 
جبل : احم لا أ الحاجة نورسين انا قابل عليها كيفما كانت انا نعلمها كولشي انا ما تزوجتهاش باش تطيبلي لا انا بغيتها حيت هي البنت اللي بغا قلبي 
فاطمة : اوليدي راه غير نتا متفهم وصافي اما كاين شي رجال الا ما كانتش تعرف تطيب و الله لا داها و نتي ابنتي شنو سميتك بعدا جوري واقيلة كولي غويطويات مالكي جالسة و ساكتة تحطي عين و تهزي لوخرى 
جوري : عفاك فين كاين الحمام 
فاطمة : ياو غادي تخرجي و تمشي طول غايبانلك اونفاص معاك ابنيتي 
ناضت جوري خرجات و سمعات دقان خفيف فالباب تقدمات بخطوات بطيئة و حلات الباب 
جوري : hello 
ربيع شد فقلبو و تكا على الحافة د الباب وقال بصوت متقطع 
ربيع : h...e...l...l...o واش هنا كتسنا خالتي فاطمة و رباعتها و لا انا غالط 
جوري :*بابتسامة * what ? *مادا * 
ربيع : ش...ش...شكون نتي واش انا متت و مشيت للجنة ولا كدبت 
جوري : What do you say I did not understand you * ماذا تقول لم افهمك * 
ربيع : نتي اش كديري هنا بلاصتك ماشي فهاد دار شنو سميتك 
جوري: *ربعات يديها * جوري 
ربيع : *شد على قلبو و غمض عينو * الله الله الله سميتك غزالة بحالك 
دخل ربيع و سد الباب ووقف حداها كيطلع فيها و يهبط 
ربيع : واش كديري فهاد دار المنحوسة 
جوري: انا صديقة د جبل و يعقوب 
ربيع كان غايطيح فاش سمع سمية جبل 
ربيع : ك...كيفاش نتي صديقة د جبل واش نتي اللي كانت تغير منك ديك كحلة العفطة د نورسين 
جوري : ادن حتى نتا كتعرفها 
ربيع : الله يا ودي هاديك غنية على التعريف * طلقلها يدو *انا سميتي ربيع و كيعيطولي ربيعة كح كح بغيت نقول خريف دعيتهوم لله فاطمة و رباعتها لصقوا فيا كلمة ربيعة خزيت 
جوري :*بابتسامة * متشرفين 
ربيع : دابا نمر فاش كيبغي يخطب نمرة اش كيقول لباباها 
جوري : what ? 
ربيع : هاويلي تي مالك اللي سولتك عليها تقولي what احم كيقولو عطيني نمرتك *غمزها * 
جوري : Do you want my number * هل تريد رقمي * 
ربيع : الا جات على خاطرك غير نقرقبوا ناب مرة مرة 
جوري : عطيني تيليفونك 
ربيع عطاهالها و قيدات نمرتها عندو و رداتو ليه 
ربيع : *شد على قلبو و كيشوف فيها باعجاب * واتي فين كنتي غابرة شحال و انا نقلب عليك زين و الادب و الصواب صراحة طحت فيك عكلتني يا بنت اللدينة هادشي اللي قلتلك يبقا بيناتنا عنداك تمشي تقولي لجبل بلي عطيتيني نمرتك نتي اش كديري فحياتك 
جوري : طبيبة الامراض السرطانية ونتا 
ربيع : جوايقي 
جوري: what ? كيفاش جوايقي 
ربيع : احم بغيت نقول فنان 
جوري : واش نتا رسام 
ربيع :*كيندب فحناكو * فقصتينيو لكن غزالة نصبروا لا انا ماشي رسام مغني و ما يكاب ارتيست 
جوري : اوووو مايكود برافو عليك 
ربيع : هانتي سيري فين كنتي غادة عنداك غير يشوفني واقف معاك برج ايفل يكددني زهري و انا عارفو 
ربيع دخل لداخل و خلا جوري كتشوف و تضحك ما فهمت والو 
ربيع : ها واحد السلام عليكم 
فاطمة : ياو دخل يا وليدي مرحبا مرحبا بسي ربيع 
ربيع كيشوف فجبل و خايف دخل سلم عليهم و جلس حدا فاطمة
جبل : je pense خاصنا نمشيو دابا تعطلنا بزااف 
فاطمة : واخا اوليدي 
ربيع : *هز فقاصة و جلس * علاه فين غاديين 
فاطمة : ياو غاديين نخطبوا لداك لوليد مسكين ولد ختي صفية الله يرحمها 
ربيع شاف فرشيد و ضحك 
ربيع : نتا هو العريس ياك 
رشيد : الا كتاب 
ربيع : نهار تدير العرس عيطلي نخدملك فيه نطلعلك ليلة من داكشي الرفيع غير هو بحال نتا مازال صغير علاش باغي تزرب مزال الحال باينة فيك ضريف و نسا جنس حاااار 
فاطمة : ياو تا سكت بعد من الولد 
ربيع : خليني نهدر و نوريه قالك باغي يتزوج زعما طفروه هادوك اللي تزوجوا خلاوها ماليها كاينة المراة اللي تعليك و كاينة المراة اللي تعريك كبي اخالتي فاطمة شي كاس كبي

فاطمة : راه خاصنا نمشيو غادي نوض نلبس جلابيتي 
نورسين : ماما غا نجي معاك 
جبل زير عليها و همس فودنيها 
جبل : فين باغا تمشي احبيبي امم 
نورسين : غير شي حاجة غادي نعاود نرجع 
انصارفت مورسين و فاطمة و نوضوا معاهم حتى سلمى 
ربيع كحز حدا رشيد 
ربيع : هاد المراة اللي ناوي تخطب قصيرة و لا طويلة 
رشيد : عادية متوسطة طول 
ربيع : اوا قالك لهلا يعميلك بصيرة ولا ينعسك على حصيرة و لا يسلط عليك مراة قصيرة انا غير فاعل خير سمعني غادي نصحك لوجه الله حيت دخلتيلي لخاطري اللي دا المراة على زينها مات بصير الزين و الزواق مامنوش اسي رشيد غير الخوا الخاوي و اللي داها على مالها مات فقير داك طمع ما مزيانش و اللي داها فاهمة و لبيبة مات مشموت تطلعك و تنزلك على جغيمة د الما حتى لقاع لبير هادشي اللي قالو سيادنا لوالة وانا غير كنقولك شنو قالوا 
رشيد بقا كيشوف فيه و ناض بعد عليه بانلو بحال احمق شوية 
ربيع : هارب مني مالي فيا جدام لقيتي اللي يعطيك النصائح 
جبل : ربيع 
ربيع غير سمع سميتوا من فم جبل بدا كولو كيترعد هز راسو شاف فيه 
ربيع : نعام اسي جبل 
جبل : كيف غادي مع الخدمة 
ربيع :مزيان اسي جبل مزيان يسول فيك الخير 
جبل : علاش مزال كتغني فالعراسات و نتا عندك دكتوراه فالتسيير و ادارة المقاولات 
ربيع تفافا بدا غير كيصرط فريقو هز راسو شاف فيه 
ربيع : باااش عرفتيها 
جبل : ما كنجاوبوش على سؤال بسؤال 
ربيع : انا غير كيعجبني نغني كهواية 
يعقوب كان كيلعب فالتيليفون غير سمع بلي ربيع قاري و عندو دكتوراه فالتسيير و هو يطيحلو التيلفون من يدو 
يعقوب :واااايلي على ربيعة الحمقة عندها دكتوراه حلف بالله 
ربيع : *كيخنزر فيه * غير جيتيني كاين سي جبل اما نوريك ربيعة الحمقة شحال كتسوا الا ما نوض نشير عليك بالحجر ما نتسماش 
جبل : عندي ليك واحد الاقتراح الا قبلتي بيه طبعا 
ربيع : اما هو ؟ 

عند نورسين 
نورسين : ماما جبديلي قفطاني الغرونة ديال جوهرة 
فاطمة : ياولاش باغا تلبسيه 
نورسين : واغير جبديه غادي نلبسوا فالخطبة 
سلمى :وفخبار جبل ولالا 
نورسين : اوا نتشاور معاه فحتى شنو غادي نلبس ماشي زدتو فيه 
فاطمة : ياو انا ماسوقيش اللي دخل بين المرا و راجلها بحال اللي دخل بين العما و عصاتو اللي عليا انا نجبدو ليك و بيناتكم *شافت فسلمى * شفتك نتي ما كتخيطي جلالب ما كتخيطي تكاشط 
سلمى : واكلشي كنشريه واجد 
فاطمة :اوا ابنيتي حنا فزمانا ...
نورسين : ماما راك عيقتي اي كلمة قلنها تجبدي لينا زمانكم صافي داكشي فات و مات حنا ولاد اليوم 
فاطمة : ياااو سيري الله يعطيك لوبة ما بقيتي تحشمي يا المشعككة اجي يا بنيتي سلمى حنتك من دابا ثلثيام يا وشفتك جالسة ديك مك ما داتك لحمام ما كتوجدوا ما عيطتوا لطباخة ما والو 
سلمى : واا خالتي كلشي واااجد ماما و بابا تكلفوا بكلشي 
فاطمة : امم اوا انا ما عرفتش هادشي ديالكم اراو ليا جلابيتي اراو 
نورسين : فين هي واحد كنيزة 
فاطمة : ياو من نهار عطاها ربيع نمرة د خوه و هي سادة عليها فبيتها مشات خدمات فصباح و جات 

ناضت نورسين عطاتها ليها و حشات قفطانها فواحد الصاك كبير د ماماها و خرجوا من البيت و دخلو لصالون 
نورسين : حبيبو حنا واجدين الا بغيتي نمشيو 
وقف جبل 
جبل : على بركة الله 
ناض حتى وصل حداها و عنقها جنب و مشاو حلو الباب و خرجوا معانقين فالدروج و نورسين كتشوف فيه و ضحك 
جبل : انا زوين حتى لهاد درجة *دار عندها و حط نيفو على نيفها * 
نورسين : بزاااف كاع ياريت كن كنت نقدر نحتفظ بيك فشي بلاصة حتى واحد مايشوفك من غيري نقدر نكون انانية و لكن انت جزء مني وانا اعشق ما املك 
جبل : مانوصلش لبنتي فالجمال فخبارك بلي ربيع بانلي بحال حاط العين على جوري منين دخلات قبيلة و هو كيشوف فيها شي شوفات فشكل 
نورسين : اويييلي ربيعة حتى هي ولات كتحب ههههه لا غير جابلك الله داك البجقول محال واش تقبل عليه جوري هي تبارك الله باينة واصلة وهو غير جوايقي حتى الباك ما يكونش عندو 
جبل : تعلمي واحد الحاجة ابنتي عمرك تحكري بنادم

جبل بقا ساكت وصلوا لتحت و حل ليها الباب و بقا واقف كيساين لاخرين حتى تموا هابطين كلهم و دايرين صداع فدروج حتى لعمارة كلها ساقت ليهم الخبار بلي خارجين حل ليهم جبل الباب لوراني و طلعوا 
باستثناء يعقوب و سلمى و سارة مشاو فطوموبيلتهم و جوري و رشيد هزو طومبيل ديالهم يعني طلعات غير فاطمة و ربيع و كنزة سد الباب و مشا لمكان سياقة ديمارا وزاد 
نورسين دارت عندهم 
نورسين : مالكم ساكتين دويو الا غادي دويو ربيعة نشطي طرح شوية 
ربيع : بعدي مني الله يرحم الواليدين دوري قدامك مسالي ليك انا واخر مرة تعيطيلي ربيعة و الله حتى نوض ....
جبل : اش غادي دير كاع وشنو فشلك ما دير اصلن 
ربيع :*صرط ريقو *غ...غير كنضحك معاها اسي جبل ما عندي ما نديرلها كح كح حنا عزيز علينا ضحك 
ياك انورسين قولي شي حاجة 
نورسين كتهز حجبانها ليه 
جبل : *هز ليها يديها و باسها *الا كان كيدير لك شي حاجة نزل دابا نعصيه 
نورسين : ربيعة ما عندها مادير ههه باركة عليه مسكين شوف كي ولا صفر كولو كيترعد 
ربيع : بسيف مانترعد تبارك سي جبل طول و العرض و الارتفاع يدخل فيا غير براسو نسا سميتي 
فاطمة : ياااو قول تبارك الله لا تمشي تقوسلي على نسيبي ياو تبارك الله هاد طوموبيل ركبة فيها غزااالة يااو عالية كتحسي براسك طالعة فالعمارية 
ربيع : اش بانلك نجيبوا دقايقية و نديرولك البرزة 
فاطمة : ياو مالي مازال صغيرة حتى انا ما نستاهلش 
جبل كيسمع و كيضحك و كيشوف فنورسين مرة مرة 
جبل : الحاجة 
فاطمة : نعام اوليدي بغيتي شي حاجة 
جبل : عقلتي على ليلى اللي كانت ساكنة تحت منكم فداركم القديمة 
نورسين شافت فجبل و خنزرات فيه 
نورسين : شكوون هاد ليلى عاود 
فاطمة بقات ساكتة مدة و تغرغروا عينيها بدموع 
فاطمة : اييه اوليدي نتا فين كتعرفها هاديك كانت بحال ختي ربي بغاه الله يرحمها كانت كتحماااااق على نورسين واحد نهار باقا كنعقل طلباتلي تصويرتها ياو امراة طيبة الله يرحمها كانت مربية واحد الولد عند واحد ناس كان عزيز عليها كانت ديما تعاودلي عليه 
كان باه مدوز عليه الحراااير حتى كره الولد فعيشتو واحد نهار كنا فجردة باقا نعقل بحال عاد البارح كان بيطيز و شعر هابطلو على عويناتو ياو كان شهوة منو نسيت على سميتو ياو صورتو ما بغاتش تحيدلي من عيني نورسين راه فايتلك لعبتي معاه ما عقلتيش عليه ياو كنتي صغيرة محال واش تعقلي 
نورسين بقات مصدومة و كتشوف فجبل اللي حمارو عويناتو نقطة ضعف عندو هي الماضي الاليم اللي عاشو 
عرفات ماماها كتهدر عليه هو نيت بقا فيها بزااااف حيت بدات تربط الاحداث مع بعضياتها و لقات بلي جبيلو بصح عانى بزاااف فصغرو هزات يدو و دار شاف فيها و باستهالو و ابتاسمت ليه و حتى هو ابتاسم ليها فوق خاطرو 
ربيع : هو سولك على المراة و نتي جبدتيلو ضوسيها كامل 
فاطمة : هههه سمعي ابنيتي سمعي نتي محال تعقلي على هادشي عارفة عندك العقل ضعيف تقول فيك زمايمر كان قالك داك الولد نيت ملاكي طاهر ياو كانت عجباتني هاد سمية كان صغير و لكن بعقلو تبارك الله 
نورسين ما حسات بدموع حتى نزلو من عينيها و دورات وجهها كتشوف فزاجة و كتحاول تحبس شهقة د البكا 
فاطمة : يا ونتي يا بنتي كرشي فعوط ما تقوليلي شي كلمة تفرح بحال زميلي و لا صديقي الحبيب عرفتي شقلتيلو يا بنت كرشي 
ربيع : اش قالتلو اوا طلقي كملينا القصة و نتي كتزيدي و توقفي كي طوموبيل الخاسرة 
فاطمة : ياو قالتلو دبدوبي 💓💓 
نورسين مسحات دموعها دارت شافت فمها و عاودت شافت فجبل اللي كان ساهي و فنفس الوقت مركز على طريق 
ربيع : هاااويلي على دبدوبي هاد البنت عندك طايحة على مخها من صغر و ما لقيتي شنو تعاودينا غير تخربيق ديال بنتك 
فاطمة : ياااو داك الوليد مسيكين يعلم الله فين تلات بيه ليام اييه ولهيلا مرة مرة كيزورني و كيوقف عليا فالمنام 
ربيع : وا فاطيمة و تي ربطي سلوكية شوية راه عندك كتعض

فاطمة :*شافت فبنتها كنزة لقاتها حاشية راسها فالتيليفون و كضحك * ياااااو تبارررك الله على شيخة تبارك الله تي حطي داك تيليفون من يدك و لا عرفتي شنو ارايه هي مليار 
كنزة : كنهدر اماما غير مع فهد عفاك راه بغا يجي يخطب 
ربيع : كثروا الخطابات هاد ليام حتى انا ناوي نخطب اخالتي فاطمة 
فاطمة : نعاااام يا و نتا بعدا هوما خاصهم يخطبوك داك سوالف اللي داير تخالط ليهم مع العيالات 
ربيع : خالتي فاطمة خليني محتارمك الله يعطيك ستر انا ناوي الحلال 
كنزة : شكون هاد تعيسة الحظ 
ربيع : نتي ها عار الله لا ماسكتي كتبقاي ساكتة ساكتة حتى كتقولي شي هدرة ما هياش و انا مراتي ما غانوريهاش ليكم غير رتاحو 
فاطمة : هي شي خنفوسة دميمة هههه 
ربيع : لا زهر لا ميمون ينعل بو الزين 
جبل كان مدور وجهو و مرفوع غير كيتفكر شنو عاش و نورسين حاسة بقلبها كيتقطع فاش سمعات شنو قالت ماماها عليه واخا ما عاوداتش على معاناتو كاملة و لكن لمحات بعض شيئ نورسين طريق كاملة و هي كتشوف فجبل حتى نعسات مسافة طريق كانت طويلة و اخيرا وصلو جبل ضرب فران سيك حتى مشيت طونوبيل و جات دار لقا كلشي سااهط و كلشي عيان بطريق شاف فنورسين لقاها ناعسة مرر يدو فوق و جهها و حيد سمطة حنى و باسها بوسة خفيفة فشنيفاتها حسات بيه و فاقت 
جبل : صباح الخير أميرتي 
نورسين طارت عليه بتعنيقة و باستو فعنقو و بعدات من عليه مبوقة بنعاس 
نورسين : صباح الخير دبدوبي 
كلمة دبدوبي شعلات بركان فداخل ديالو بدات كتكرر فمساميعو كيف شي لحن ديال موسيقى رائع ما مصدقش بلي بصح نورسين قالتلو دبدوبي اااااخ شحال تمني يسمعها من فمها اااااخ كانو حلم مستحيل و تحقق واش حتى لهاد درجة ربي كيستاجب دعاء شحال من مرة فصلاتو كان كيدعي يسمع هاد الكلمة منها قبل ما يموت و هاهي دابا كاتقولهالو بكل حب بقا غير حال فمو فيها كانو ما مصدقش شنو كتقول واش بصح مساميعو خانوه ولا بصح قالتها جرها لعندو و جلسها من فوق حجرو و حط يدو على خداها و دمعة نزلات من عينو حط جبينو على جبينها و قال بصوت متقطع 
جبل : عاوديها أحبيبة عاوديها عفاااك 
نورسين : *كتمرر يديها على لحيتو * شنو هي 
جبل : شنو قلتي دابا أ ملاكي طاهر 
نورسين : *بابتسامة *دبدوبي 
بعد عليها و حط يدو على خدها كيتحسسوا كانو جوهرة غالية ما حس براسو حتى طار على شنيفاتها كيرتوي بيهم كيف شي عطشان كان فصحراء قاحلة نورسين هي داه و دواه نورسين شي حاجة عظيمة دازت فحياتو نورسين فاش كانت صغيرة دارت خير كبير فجبل وهو ما نساهاش هي ما عرفاتش شنو زرعات فداك طفل صغير بهدرتها زرعات فيه حب كبير هي اللي عطاتو امل انو يقدر يحب و يتحب شحال من مرة بكلمة منا نقدرو نغيرو مسار شخص لاحسن و لدلك قال رسول صلى الله عليه و سلم {و الكلمة الطيبة صدقة } 

🔙🔙🔙🔙🔙فلاش باك 

جبل: ملاكي غير صبري دابا يجيو 
نورسين : سكون هاد ملاكي 
جبل: هي انتي 
نورسين : امم عجباتتي هاد السمية حتى رسيد غادي نقولو يبدا يقولهالي 
جبل تعصب و ضرب رجلو مع الارض
جبل: انا اللي غادي نقولهالك و ما غادي يقولهالك حتى واحد 
نورسين : وانا غادي نقولك دبدوبي صافي 
جبل: *بابتسامة* زوينة صافي ولكن ما تقوليهاش لرشيد قوليهالي غير انا 

🔚🔚🔚 نهاية الفلاش باك 

جبل بعد عليها كينهج و حط راسو على جبينها و الدموع فعينيه ما قادرش يحبسهم هاديك هي طريقة الوحيدة باش يقدر يعبر على المشاعر اللي فقلبو و الفرحة ديالو ما كتوصفش بقا غير ساكت نورسين بعدات عليه و قبطاتلو فخدودو و هو يدور وجهو ما بغاهاش تشوف دموعو 
نورسين :*كتهدر بهمس باش ما تفيقش رباعة اللي من موراهم * جبييلو شوف فيا أحبيبي وااا شوف ما تعصبش ماما دبدوبي الغزال 
جبل دور و جهو و شاف فيها و نورسين حطات يديها كتمسح دموعو 
نورسين : اووو مايكاد جبيلو تاتبكي أكبيدة ديالي يبكي عدوك و اللي ما يبغيك *باستو فخدودو بجوج * هاااح على الدعشوشي ديالي هادا كولو حب أ العمر راه نتا غاتسطيني شي نهار 
جبل : دموع الفرحة هاد الكلمة بضبط شحال و انا كنتسناك تقوليها توحشت نسمعها خارجة من فمك *هز صبعو الكبير كيضغط على شنيفاتها تنهد و حط راسو على صدرها كيف شي طفل صغير * محتاج نحط راسي على صدرك أ ملاكي محتاج نحس بأنفاسك قرابين ليا ما كرهتش شي غيبوبة وانا حاطة راسي على صدرك محتاج نسمع نبضك اللي كيقولي كنبغيك 
نورسين مررات يديها عل شعرو و حنات باستلو راسو 
نورسين : ماكرهتش نبقاو هاكا العمر كامل و لكن احبيبي غادي يمشيو يفيقوا و يشوفونا 
جبل هز راسو و شاف فيها بعينيه معسلين 
جبل : نتي مرتي امام الله و الملا و ما سوق حتى واحد فينا فهمتي ما تبقايش تضحكي بزاااف و نتي حدا العائلة هانا علمتك 
نورسين :*بدلع * وعلاش 
جبل : نقدر نطير على شنيفاتك حداهم عارفاني نديرها 
نورسين :مقزدر مع راسك 
جبل : مقزدر مع حلالي من حقي او لا 
نورسين :*كتنداب فحناكها * ويلي يا جبل هادو راه ماشي ناعسين ميتين سمعتيهم كيشخروا *دارت بانلها ربيع حال فمو و ناعس * شوف ربيعة كي منشورة تماك ههه كيضحكني داك البرهوش حق الله 
جبل :*كيمرر يدو على شعرها * ما تبقايش تعيطلو بديك سمية حشومة 
نورسين : غير كنضحكو معاه عادي حتى هو كيضحك معانا و كيبان راشقة ليه هو اصلن هبيل 
جبل : شحال من مرة كتكون المضاهر خداعة ماشي حيت هو كيتصرف معاكم بعفوية و ضريف تضسروا عليه حتى لهاد درجة كتطيحوا بروجلتو بديك طريقة 
نورسين : لا واش من نيتك هو كيبان ناشط معانا واخا كيبقا يتعصب مرة مرة و لكن راه فالتالي كيقلبها ضحك 
قلبو زوين و انسان مرح و ضحوكي شحال من مرة كان كايكون طالعلي دم غيركنشوف وجهو كنضحك من عند الله ما عرفتش علاش حتى هو مازال صغير و عااايش الحياة 
جبل : نتي اللي باقا صغيرة اما هو راه ما صغيرش 
نورسين : اشمن مازال صغير انا راني اكبر منو هو راه أ الله فعمرو ثلاثة و عشرين عام 
جبل :*كيمرر يدو على شعرها * هو فعمرو ثلاثين عام 
نورسين دارت يديها على فمها باش ما تضحكش بصوت مجهد 
نورسين : لا واش هبيل نتا ولا مسطي اش كتخرف عليا شوف غير وجهو يعطيك الخبار و نتا باش عرفتيها يالاه 
جبل : مازال ما كثيقيش بكلامي 
نورسين : لا كنثيق ولكن كيفاش فعمرو ثلاثين عام عاود 
جبل :*حط نيفو على نيفها * كنقولك أبنتي نتي غير نية و اللي جا يديرها بيك 
نورسين : ودابا فهمني عفاااك كيفاش نتا كتعرف على ربيع هادشي كاامل 
جبل : من اول نهار شفتو معاك قلبت عليه و حفرت بطبيعة الحال ما نقدرش نخليك و نؤمن عليك مع شخص ما كنعرفوش عنداك تشوفيني عاطيك تيساع و خليك تهدري معاه غير هاكاك *باسها بوسة خفيفة فشنايفها *ما نقدرش نخلي بنتي فيد دياب ولكن ربيع ماشي ديب ما تخافيش

نورسين :*شدات على راسها *لا والله حتى دوختيني بهدرتك دابا غايبقا بالي مشطون عفاك فهمني و قولي عليه كولشي 
جبل : راني قلتلك هو فعمرو ثلاثين عام ماشي ثلاثة و عشرين عام 
نورسين : صافي غير هادشي اللي كتعرف عليه 
جبل :كنظن تعطلنا خاصنا نزلو 
سمعوا دقان فالسرجم اللي كان حداهم نزل زاجة اوطوماتيكمون لقا يعقوب و سلمى و موراهم رشيد و جوري 
يعقوب : تبارك الله معاوالينش تنزلو جالسين مجمعين 
سلمى : كيتسناو اتاي و الغاطو 
جبل حل الباب و نزل و نزلات معاه نورسين وهي تقرصها سلمى و جراتها لعندها 
سلمى: ياك أ شيطانة نتي جالسة عايشة الحياة و انا مسكينة اللي عاد ضاربة العقد ما عايشاش هادشي اللي عايشة الظلم و الحكرة هادي 
نورسين : قل اعود برب الفلق قل اعود برب الناس يا لطيف لطيف تابعة الله يستر و حضيني دابا تربحي روبيني 
سلمى : و مصاب كن كنت نربح روبيني و معاك نتي كنربح غير الفقصة 
نورسين : ياك كاين عندك يعقوب اوا فرقينا عليك اختي 
سلمى : امم شكون خلاك ديك العفريتة د سارة جالسة مورانا و حرام واش غمضات عينيها نديروا غير شي باركة و تعنيقة هي لخر ة ما لحقتهاش كنقول هنا تنعس الجدرة هنا تنعس فالاخر نعست انا و بقات هي مبلقة عينيها كي جرانة 
نورسين : اوا نتي خارجة ليك سارة فعودك اش غاندير ليك انا 
سلمى : اودي دارتلي اش عندك ما تديريلي 
جبل : بنتي 
دارت نورسين شافت فيه 
نورسين : وي حبيبو 
جبل : فيقي ماماك و ختك و ربيع راه مشا الحال جدي و جداتي من قبيلة و هوما يتسناونا
نورسين : واخا 
حلات الباب و هي تطلقها بواحد الغوتة 
نورسين :وا فييييييييقو 
ناضو طافجين كيحكوا فعينهم ربيع تخلع و شد على قلبو و كيشوف فيهم كلهم واقفين 
ربيع : شحال فساعة ؟ فين انا ؟ وشكون نتوما ؟ 
فاطمة :*كتفوه * ياو بغيتلك سعر تي مالك سايرة تغوتي راه غير كنا مغمضين عينينا 
نورسين : نتوما كنتوا ميتين ماشي مغمضين عينكم نوضو راه وصلنا 
كنزة كتكسل 
كنزة: على سلامتنا 
خرجوا كلهم من الطوموبيل وجبل جر نورسين من يديها و سبقهم 
نورسين : واش هدرتي مع جوهرة موافقة هي 
جبل :موافقة أحبيبي موافقة و لكن خاصني مزال نهدر معاها 
دق جبل فالباب و فتحاتلهم الخدامة بابتسامة دخلوا كلهم دقة وحدة جبل حيد المونطو و عطاه للخدامة 
جبل : فين هوما 
سمعوا شي خطوات هابطين فالدروج جبل هز راسو شاف جدو و جداتو هابطين شادين فبعضياتهم و عبد المالك مسند على ياسمين ابتاسم تلقائيا كيحس بلي حبهم لبعضياتهم صادق بحال حبو هو لنورسين تقدم عندهم بخطوات مسرعة و عنقهم بجوج و باس ليهم راسهم فاطمة كحزات حدا نورسين و نغزاتها 
فاطمة : ياو هادوك هوما جدو و جداتو 
نورسين حركات ليها راسها بالايجاب
فاطمة : ياو صلى على نبي لاااابس عليهم شوفي على فيرمة و على دار كتخردل ياو دفلي فشونك ما دفلي فيها ياو ديك جداتو واخا شاارفة كتبان زينة احسن مني انا نيت اللي شارفة ياو تي سيري سلمي عليهم و نتي حالة فمك كي ضبعة 
نورسين تقدمات بخطوات مسرعة 
نورسين : وااااشحال توحشتكم 
ياسمين و عبد المالك ابتاسموا ليها و عنقوها 
ياسمين : مرحباااا بيكم ابنتي و مبروك عليكم رجوع لبعضياتكم ما تصوريش شحال فرحت ليكم .
عبد المالك :*قرصها من ودنيها * تعاودي تفرقي معاه نتفاهموا معاك 
نورسين : واخا و الله ما نعاود * قبطات فيد جبل * اصلن الا تفرقت عليه نموت 
ياسمين : الله يخليكم لبعضياتكم 
جبل : اللهم اميين فين هي جوهرة 
عبد المالك : راها لفوق اولدي فبيتها 
جبل شد فيد نورسين و طلعوا للفوق 
نورسين : فين غادي واش غاتهدر مع جوهرة 
جبل بقا ساكت حتى وصل لبيتها و دق سمحتلهم بالدخول و حل الباب و دخل 
جوهرة :اووو جيتو مرحبا بيكم 
مشات كطير عنقات جبل و دمعوا عويناتها و ناضت تبكي و تشهق جبل بعد عليها و قبطلها فدرعانها بجوج و مسح ليها دمعوها بصبعو 
نورسين : هاءو دابا علاش كتبكي بغيت نفهم ؟خاصك تكوني فرحانة هاد نهار يوم مميز فحياتك 
جوهرة هزات عويناتها وشافت فيها 
جوهرة : غير دموع الفرحة شكرا ليكم على كلشي كن ما نتوما كن راني فزنقة دابا 
جبل عنقها جنب و داها جلسها فسرير و جا اونفاص معاها و حنا على ركابيه و شدلها فيديها 
جبل : واش متاكدة بلي غاتكوني فرحانة مع رشيد انا ما نقدر ندير والو بلا موافقة ديالك 
جوهرة : هو صراحة رشيد انسان ضريف و حنين بزااف و كيبغيني 
نورسين : اوا هادشي عرفناه و نتي ؟ 
جوهرة : *بخجل *حتى انا.. 
جبل : نتي امانة فرقبتي أجوهرة و نسولك و جاوبيني بصراحة واش عمر رشيد قلل عليك الاحترام فاش كنتي فلاميريك 
جوهرة : لا بالعكس كيتكلم ديما معايا باحترام 
جبل : *تنهد * الله يكمل عليكم بالخير حتى رشيد انسان ضريف سنين و انا خدام معاه و عارف طينتو تهلاو فبعضياتكم الله يرضي على بنتي و تدكري ديما دار ديال باباك ديما بابها محلول ليك *قرصها فخدها و ابتاسم ليها * بارك الله لكما و بارك عليكما و جمع بينكما في خير 
وقف جبل و شاف فنورسين و مشا باسها فراسها و هز يديها حطها من تحت خدو 
جبل : مال العسيلة ديالي ساكتة ما كتهدرش 
نورسين : مالقيت مانقول غير الله يكمل عليهم بالخير فرحت ليهم و الله يخليهم لبعضياتهم

جبل : انا غادي نهبط بقاي معاها 
انصارف جبل و بقات غير نورسين مع جوهرة 
نورسين :اوا نوضي تلبسي باش نهبطو 
جوهرة : ما عرفتش شنو غانلبس 
نورسين : نتي ما عندك حتى حاجة 
جوهرة : واحد الكسيوة طويلة دايرة كيف د الاميرات فالكحل 
نورسين: هاااويلي على الكحل نتي من اللولة باغا تكحليها واش هبيلة ما تلبسيهاش ما عندكش شي قفطان 
جوهرة : لا 
نورسين: هاد صاك اللي فيدي فيه قفطان د جوهرة تلبسيه زوين فالغرونة و انا نلبس ديك الكسوة 
جوهرة : واخا نشوف 
نورسين جبدات قميصها الغرونة و عطاتلها تلبسوا داكشي اللي دارت جوهرة ناضت و لبساتو ومع هي بيوضة جاها كيحمق و طلقات شعر جاها غزال 
نورسين : تبارك تبارك الله داك العفريت د رشيد دا عرف اش دا 
جوهرة :كتهدري عليه بحال كتعرفيه من زمان 
نورسين: حيت كنا اصدقاء فصغر نورمال نعرفو 
جوهرة : امم مزيان 
نورسين : انشوف لاغوب اللي غنلبس انا 
جوهرة : راهي معلقة من موراك 
دارت نورسين شافت لاغوب بقات غير مصدومة من شدة الروعة ديالها تقدمات بخطوات بطيئة حتى وصلات لفستان و هزاتو 
جوهرة : زوين بزاف عايجي معاك 
نورسين : ياك بالقلب صافي واخا نلبسها 
جوهرة : بطبيعة الحال انا عجبني هادا اللي عطيتيني جاني احسن و مناسب لهاد المناسبة 
نورسين : غادي نلبسوا و نقاد المايكاب و نطلق شعري ياك 
جوهرة :*بابتسامة * باغا تحمقي جبل ههه 
نورسين : هه بطبيعة الحال الا ما حمقوتش انا شكون غايحمقوا مثلا 
جوهرة : سعداتكم اختي صراحة بغيت نقولك بلي نتي و جبل جيتوا مع بعضياتكم و جبل باينة كيبغيك بزاااف هو حنين و ضريف ما تسمعيش من فمو كلمة د العيب هو نقدني من زنقة فضلو و خيروا عليا عمري نساه 
نورسين : كان كيعجبك واقيلة ؟
جوهرة شافت فيها بصدمة 
جوهرة :*كتصرط ريقها * ك..ك...كيفاش عرفتيها ؟ 
نورسين : ما نكدبش عليك من اول نهار جيت لعندكم بنتيلي كديري فيه شي شوفات فشكل كتبقاي ساهية فيه و كضحكي ياكما مازال ....
جوهرة : لا لا لا اختي لاااا بصح من شحال هادي كان كيجيني فشكل مع هو كان ضريف و كيحن فيا و كيعاملني زوين كان كيصحابلي بلي معجب بيا بحال كدبت كدبة و تيقتها و لكن الحقيقة انا اللي كان كيعجبني و لكن دابا منين كبرت ووعيت و عرفت بلي فقط كان كيعاملني كبنتو قررت انني نشوف فيه على اساس خويا و بابا و خصوصا منين تلاقيت برشيد اللي عوضني على داك الحنان اللي كنت محتاجاه و لقيت فعلا بلي رشيد كيستحق نبغيه و زاد كبر فعيني منين جا للمغرب و طلب مني عنوان د جبل باش يخطبني و هادشي اللي خلاني نتمسك برشيد و نبغيه 
نورسين :*بابتسامة * فرحت ليك و الله *طلقات يديها و عنقاتها * انا اللي غادي نخدم ليك فعرسك المايكاب ههه 
جوهرة : بطبيعة الحال على انا لقا بحالك 
سمعوا دقان فالباب و تحل وهي دخل سلمى 
سلمى : جوهرة واش ما عوالاش تنزلي راه من قبيلة و حنا نساينوك بلاتي بلاتي نشوفك هاي هاي على قفطان جوهرة فالغرونة جاك كيحمق تبارك الله عليك و نتي اديك الشيطانة ما تنزليش جبل بانلي بحال جالس على شوك كل ساعة يدور وجهوا يشوفك واش هبطتي 
نورسين : هاويلي حتى لهاد درجة ههه توحشني دغيا 
سلمى : ما نكدبش عليك جبل يقولولو تلاح فالعافية على قبلك يتلاح و تصوري كايبغي يعطيلي كايعطلي بسميتك وداك سيد ولا مسكون بشي حاجة سميتها نورسين ها عار الله شنو درتي فيه واش سحرتيلو واش موكلالو سبرديلة و بزاااف على الحب 
نورسين : ياااربي الله يحفظنا من العين ياربي و بعدي مني ياك عندك يعقوب ديها فيه حتى هو حنين و رومانسي و كيتجوانطا عليك و زيدي عليها روفيكس اش بغيتي واما انا احبيبة داكشي اللي بيني و بين جبل هاااح صعيييب عليكم تفهموه 
سلمى : اوا باز ياختي وجهك صحيح جوهرة دوزي تهبطي قداامي راه داك سيهم رشيد من قبيلة و هو يسول فيك وجالس و كيترعد بحال فيه السخانة 
جوهرة : بصح توحشتو حتى انا حشمانة نهبط و الله 
سلمى دخلات و جراتها من يديها 
سلمى :زيدي قدامي قالك حشمانة كوني مقزدرة بحالنا اللي حشموا ماتو *شافت فنورسين * و نتي ما عوالاش تهبطي
نورسين : هانا جاية غير سبقوني 
سلمى : و غادي يسولني عليك داك راجل اللي عطاك الله 
نورسين : قولو دابا تجي غير سيري نتي جوهرة 
انصارفت سلمى و جوهرة و بقات نورسين فالبيت كتشوف فديك الكسوة اللي فيديها و كضحك جاية نازلة على الكتاف وواسعة و مشبكة جاي ستيلها واعر بحال ديال الاميرات لبساتها نورسين و دارت شافت راسها فالمراية جاتها فنة و جاتها مع وجهها طلقات شعرها و دارت مايكاب خفيف كيفما ديما ما فيها اللي يجبد صداع مع جبل 
نورسين : *دارت يديها على فمها * ما نعرفت كيفاش غادي تكون ردة فعلو فاش يشوفني تيتيز ديالي عنداك يمشي يغوت عليا لا لا جبيلو ما عمرو رفع صوتو عليا لا واقيلة غانعجبوا و دابا كي ندير نهبط اوووف كنحشم اشداني نلبس هاد الكسوة كاع 🙈🙈🙈🙈 
حلات الباب غير بشوية و هازة صباط ديال طالون فرجليها باش ما تديرش صداع هبطات بخطوات بطيئة حتى وصلات لسفلي و تخبعات من مور الحيط كيبانلها جبل جالس و داير رجل على رجل و كيتكلم بكل ثقة فالنفس و هوما كيستامعو ليه و باينة فيهم كلهم كيحتارموه و كيقدروه فكل مرة كتزيد تفتاخر بيه و كتزيد تفرح حيت عطاها الله شخص بحالو كاامل مكمول قالت بهمس و الابتسامة فوجهها 
نورسين : دبدوبي 💓💓

دورات وجهها و دخلات للكوزينة باش تشرب وهي تلقا سلمى جالسة كتصوب القهوة 
نورسين : سلمى 
سلمى دورات وجهها شافت فيها و حطات يديها على فمها و شهقات 
سلمى : لا لا لا اش هاد الجمال اختي مشاء الله تبارك الله عليك 
نورسين : ههههه *كدور بكسوتها عاجبها راسها * كيف جيتك 
سلمى : جيتي كاتحمقي ياختي تيتييزة مع راسك ههه 
نورسين : طلعتيلي المعنويات 
سلمى : جبل الا شافك اليوم يحماق ههه و فاش هبطنا بلا بيك دارنا الاستنطاق قالنا ياكما كضرها شي حاجة ياكما عندها شي مشكل ياكما محتاجة شي حاجة يا ختي ياختي على عصافير الحب جايين مع بعضياتكم كنحماق عليكم انا 
نورسين : حتى انا كنحماق عليك نتي و داك روفيكس ديال يعقوب اجي بعدا اش كديري نتي فالكوزينة علاش كتصوبي القهوة على حد علمي حنا مغاربة كنشربوا اتاي اولا 
سلمى : اوا يا ختي كلشي بغا القهوة نضت على سعدي ووعدي كنصوبها حيت بعقوب كتعجبوا من يدي ما بغيتش نخلي الخدامة تقيص فيها 
نورسين : انا كنشوف تواركة اللي كيديروا هاد القضية*بقات ساكتة و كتشوف فسلمى و حتى سلمى بقات كتشوف فيها و طلقوها بضحكة شريرة* هل تفكرين فيما افكر يا عزيزتي 
سلمى : بطبيعة الحال غادي نديروها لرشيد 
نورسين : صافي مشات 👌👌
بعد عدة دقائق 
خرجات نورسين بالبلاطو فيه القهوة فلي طاس و سلمى من موراه تقدمات نورسين بخطوات بطيئة و دخلات لصالون كلشي هز راسو شاف فيها و بقاو كيطلعو فيها و يهبطوا كتبان مميزة بداك الفستان اللي حقا بينها اميرة الاميرات و لونها الاسمر اللي كيعطيها جادبية خاصة حولات عينيها لبلاصة جبل ما بانلهاش عرفاتو غايكون لحق عليها للبيت بدات كتدور فناجين القهوة عليهم و مها وربيع شادين فيها نميمة حيت كانو جالسين حدا بعضياتهم 
فاطمة : يااو شوفلك المكفسة شنو لابسة ما نعرف منين طاحت على ديك الكسوة 
ربيع : وااا فطيطيمة هاديك راها لاغوووب لاغووووب اشمن كسوة يهديك الله 
فاطمة : ياااو ولات تقلد نصارة جبتلها قفطان د جوهرة على مزيناتو لبساتولها ديك جوهرة شوف كي جاها كي الخير و بنت كرشي جالسة كتدور بهاد لاروب تقولنا جالسين فلالمان 
ربيع : بقات ليا غير بنتك فالحساب *تنهد * خليني نخضر عويناتو فلي كيستحقوا شوفي زين شوفي الحمام ديك البنت شحال كتحمق *كيوريها جوري بعينو * 
فاطمة : ههه ياااو عندك الحق اوليدي ديك البنيتة تشها تحطاها غير منيظر تشوف فيها 
ربيع :*دار شاف ففاطمة * عار اللله لا ماشربي قهوتك و هنينا قالك منيضر 
نورسين دورات الفناجن كلهم عليهم و بقا رشيد هو التالي هز الكاس ديالو و ابتاسم ليها 
رشيد : شكرا اختي سمحيلنا عدبناك معانا 
نورسين : حشومة تقول هاد الهضرة بصحتك اسي رشيد 
فنفس الاثناء دخل جبل و جلس و جبد تيليفونو كيخندش فيه ما انتابهش بلي نورسين اللي عاطياه بضهر 
رشيد : ختي نورسين عطي لسي جبل كاس د القهوة راه عاد جا 
نورسين ابتاسمت ليه و دورات وجهها شافت فجبل لقاتو جالس حاني راسو فالتيليفون كيقاد شي امور د الخدمة تمشات لعندو بخطوات بطيئة و حنات بالبلاطو د القهوة جبل رد تيليفون لجيبو و حط يدو على الكاس د القهوة هز عينو شاف فيها بقا غير مصدوم و كيحس بقلبو كيضرب بسرعة فائقة و باش زادتها و كملاتها نورسين ردات شعرها جنب و ابتاسمت ليه و غمزاتو و عضات على شنايفها و قالت بصوت زوين حتى تبورش جبل كاامل 
نورسين : بصحتك دبدوبي 💓💓 
جبل بقا ساهي فيها و الكاس د القهوة كيتزعزع فيدو حتى طاح على رجلو

نورسين طرطقات فيه عينيها و غوتات 
نورسين : جببببل تحرقتي 
فنفس الاثناء رشيد شرب جغمة لولة من الكاس و بزقو كاملو بدا يكح يكح و ناض بسرعة للحمام كلشي وقف 
فاطمة : اويلي اش واقع 
نورسين : واش كضرك رجليك راه تكفحات عليك القهوة سخونة اهئ اهئ انا سبااااب اووف 
جبل ما حسش بالحريق بقوة اللي كان ساهي فنورسين و فتافاصيلها 
فاطمة : عوينة و صابتكم أوليدي 
جوهرة ناضت للحمام تبعات رشيد واما سلمى كتموت بضحك وقف جبل و قبط لنورسين فيديها و جرها معاه 
حتى طلعها لبيت و حل الباب و دخل بسرعة و تكاها مع الحيط و مرر يدو على خدها نورسين كتبكي و تشهق 
نورسين : اهئ اهئ جبيلو و اش كضرك رجليك أحبيبي راه القهوة كانت سخونة خاصك دير ليها الما بارد اوووف *حطات يديها على خدودو بجوج * امم جاوبني عفاك مالك ساكت بحال هاكا ... 
جبل بقا كيشوف فيها مدة و بعد عليها و حول عينو لرجليها و بقا كيشوف فيها حتى وصل لعويناتها و حك لحيتو و قرب ليها و جرها من خصرها لعندو بجهد حتى ضربات فصدرو و حشا راسو فعنقها كيهدر بصوت خطير حتى كيبورشها 
جبل : ماكدبتش فاش قلتلك أميرتي انتي بحال شي جوهرة نادرة خاصها تحط فمتحف و حتى واحد ما خاصو يقيسها غير اللي صنعها *كيمرر يدو على درعانها غير بشوية بطريقة محترفة حتى كتقفز * اااخ انورسين دخلتي لحياتي و رونتيها حداك ما بقيتش كنعرفك شكون انا اروع حاجة دخلات لحياتي هي نتي كيفاش نقدر نحيد عيني عليك و نتي فكل ثانية كتزيدي تولي أجمل من قبل اااخ انورسين ااااخ انا ماتعمدتش نعشقك و لكن قلبي سكنتيه شنو دنبي انا *باسها فعنقها حتى تبورشات و هزات يديها حشاتها فشعرو الاسود الكثيف * انتي بحال عيني اللي ما نقدرش نشوف بلا بيهم و بحال دقات قلبي اللي مانقدرش نعيش بلا بيهم كنقسم ليك بلي خلقني و خلقك كنبغيك لواحد الدرجة اللي ما يقدرش يستوعبها عقلك 
تنهد و بعد عليها و هز راسو شاف فعينيها لقاها كتبتاسم و مغمضة عينيها حسات بيه بعد و هي تفتحهم و هبطات راسها ووجها ولا احمر طاح عليها سر د الحشمة 🙈🙈🙈🙈 
جبل : خايف عليك أحبيبة *هز يديها باسها * 
نورسين هزات راسها شافت فيه باستغراب 
نورسين : مناش خايف عليا 
جبل قرب ليها و حط يدو على خدودها باسها فراسها و هبط باسها فعويناتها بجوج وقال 
جبل : خايف يشوف فيك شي حد و ما يقولش تبارك الله مشاء الله و يصلي على نبي العين علينا حق و ما يمكنش يسلم منها الواحد داكشي علاش أحبيبة بقاي ديما تقراي المعودتين و تقولي الادعية فنفسك ولا عرفتي شنو * جرها من خصرها حتى ضربات فصدرو * غادي نجيب ماء زمزم و نقرا عليه القرآن و نعطيك تبقاي تشربي منو هاكا افضل 
نورسين :*كضحك * حتى لهاد درجة كتخاف عليا *كتمرر يديها على لحيتو و حطات نيفها على نيفو * الله يحفظك ليا و يخليك ديما تاج فوق راسي بلا بيك ما نقدرش نعيش ما نقدرش حاول على راسك على قبلي عفاك *حطات يديها على قلبو * قلبك ضعيف احبيبي واعدني بلي ما تقلقش راسك و ما تعصبش عفاك راه اصلن خاصك تدير الرياضة و تاكل الاكل الصحي باش تولي مزيان 
جبل دار يدو من مور شعرها و قربها ليه اكثر و اكثر لدرجة انفاسها كيحس بيه وقال بصوت همس 
جبل : القلب اللي فيه نورسين عمرو يضعاف 
جرها لعندو و طار على شنيفاتها كيقبل فيها بكل حب و شغف و تملك و حتى هي تجاوبات معاه بطريقة رهيبة مع جبل تعلمات فن التقبيل على اصولو كيخليها هي اللي تحكم بقاو كيقبلو بعضياتهم حتى قربوا لسرير و طاحو عليه بجوج بيهم جبل كان لتحت و نورسين فوق منو بعدات عليه و ضحكات و حتى هو بادلها الابتسامة كيشوف فيها بعينين معسلين بقاو ساكتين مدة و هو يهز جبل يد نورسين و قبلها و شاف فيها 
جبل : ما تقوليليش مزال مريضة أنورسين 
نورسين دلات شنيفاتها و حركات راسها بالايجاب 
نورسين : مازال مع الاسف 
جبل ضحك و بحركة سريعة منو جا هو من فوقها وهي من لتحت و غمزها 
جبل : امم يعني حتى نتي باغا 
نورسين حنيكاتها ولاو حومر و شافت فيه و حنات عينيها و دارت يديها على وجهها 
نورسين : و صافي ما تزيدش تحشمني اكثر من هاكا 
جبل : *حيد يديها من وجهها * انا بنتي ما كتحشمش من باباها ياك * باسها بوسة خفيفة فشنيفاتها * شنو دابا مرتي و مرة وحدة اللي نعست معاك فيها واخا نكون يهودي هادا هو جهد و المشكل ماشي هنا دغيا سخفتي بحال مادرنا والو واش ما بقيتش فيك امم 
نورسين دارت كراااخ بضحك حتى دمعوا عويناتها 
نورسين : هههههه واشنو غادي نديرلك انا هادشي اللي عطا الله صبر معانا صبر مالك أصاحبي نتا ما عندك زهر اش غادي نديرلك انا مازال الخير لقدام هههههه 
جبل : *حط يدو على صدرو * حياتي كلها و انا صابر نزيدوا نصبروا واحد اليوماين و لا ثلثيام ماشي مشكل

نورسين : جبيلو نتا باغي الولاد ياك 
جبل : بطبيعة الحال باغي بنيتة منك تشبهلك فكلشي 
نورسين : و انا باغا ولد منك يكون كيشبه ليك فكولشي 
جبل :*هبط حاجب و هبط لاخور * الا ولدتي ولد غادي تنسايني انا و تبقاي داياه فيه غير هو و من فوق هادشي كامل غاتبقاي تفششيه و تعطيه يرضع منك و انا هادشي اللي ما باغيش ابنت قلبي نتي ديالي و انا اللي عندي الحق فيك واخا يكون غير طفل صغير غاتقولي احمق هاد السيد مسطي مغيااااار مريض اه انا هاكا داير 
نورسين ناضت و ربعات يديها 
نورسين : والا عطاك الله سبحانه غير الولاد شنو غادير ديك ساعة 
جبل : *ابتاسم ليها و قرب ليها و ضمها لصدرو بجهد * نعطيوهم لجداهم تربيهم و انا وياك نسافروا لبلاصة بعيدة عليهم ياك أملاكي 
نورسين بدا كيجيها أنورمال و بعدات عليه و خنزرات فيه
نورسين: واش كتهضر من نيتك اجبل ولا كتفلا 
جبل : انا ما كنتفلاش فبحال هاد الامور 
نورسين ضربات الوقفة و خنزرات فيه مزياااان بقات ساكتة و كتشوف فيه 
نورسين : نتا مريض خاصك طبيب نفساني على هاد الحساب 
جبل وقف بغا يشد فيديها و بعدات عليه 
نورسين : ما تقيصنيش اجبل بعد مني عفاك نتا عندك عقدة من دراري صغار و انا بديت كنخاف على ولادي من دابا واش اللي يقولك ولد صغير مسكين ما عندو لا حول و لا قوة ما يرضعش منك راه هادا الحماق بعينيه داك طفل راه غيكون محتاجني اكثر من اي واحد و خاصو يرضع و خاصو اللي يهتم بيه اجبل فهمتي هاد الهدرة اللي كتقول راه ماشي منطقية وانا ما نكدبش عليك فهاد اللحظة كنتمنى مانولد لا بنت ولا ولد حيت انا بدا كيبانلي بلي نتا معقد و مريض و خاصك تعالج فلول كان كيصحابلي غير كتضحك و لكن منين ولا الامر جدي و كتقولها و تكررها و تعاودها هنا عرفتك بلي ما كضحكش و انما كتهدر من جدر عقلك 
جبل قرب ليها و هي كتبعد عليه 
نورسين : قلتلك بقا فبلاصتك ما تجيش حدايا انا غانهبط لتحت و من بعد انمشي بحالي 
مشات حتى وصلات الباب و هي تحس بيدين جبل محاوطينها من خصرها و كيبوس فضهرها غير بشوية غمضات عينيها و ترخات 
نورسين : ج..ج..جبل طلق مني عفاك خليني نمشي 
كتفك يديه وهو مزير عليها ما خلاهاش تخرج 
جبل : علاش كتحكمي على الواحد بلا ما تسمعيه و تفهميه 
نورسين :*كتفك يديه من على خصرها * قلتلك رخي ما باغا نسمع والو هدرتك ولات كتدخلي من هاد الودن و تخرج من اللوخرا حيت جيتيني بديتي كتخرف 
جبل بقا ساكت و مزير على خصرها ما بغاش يطلق و عم الصمت بيناتهم لعدة ثواني نورسين منين فقدات الامل و عرفاتو ما غايرخيش منها دارت عندو و هز راسو شاف فيها و عويناتو حووومر و بحال عامرين دموع اللي ما بغاوش يهبطوا نورسين بقات غير مصدومة و كتشوف فيه ما فهماتش كاع اش واقع ليه ضرها قلبها على حالتو حطات يديها على لحيتو و تخلعات عليه 
نورسين : ج..جبل مالك احبيبي جاوبني امم كضرك شي حاجة امم جااااوبني ماتبقاش تخلعني عليك بحال هاكا 
جبل بقا ساكت مدة و كيحس براسو عيااان و قال بصوت مخنوق 
جبل : ما كاينش اللي كيآديني قدك أنورسين 
نورسين بقات مصدومة و كتشوف فيه باستغراب حسات بتأنيب ضمير و خصوصا من مور الكلام الجارح اللي سمماتو بيه كتحكم عليه قبل ما تعرف شنو فقلبو ياااخسارة ديما لسانها سابقها للعيب سريعة الحكم مثلها مثل الكثير من البشر 
نورسين : ج..جبل واش تقلقتي من هدرتي شوف سمحليا عفاك انا عارفة راسي ديما كانكحلها بهدرتي شوف انا معاك أحبيبي اللي بغيتيها غادي تكون غير ما تعصبش راسك راك مريض *تعلات على ريوس صبعانها و باستو فراسو * شنو ندير باش تسمحلي 
شاف فيها بعيون فيهم حزن كبيييير و قال بصوت مكسوور و كيحرك راسو يمين شمال 
جبل :انا ما عمري ما كرهت الولاد انورسين ديري هاد الهدرة فبالك

جبل :انا ما عمري ما كرهت الولاد انورسين ديري هاد الهدرة فبالك 
حل الباب و هو يلقا سلمى واقفة باغا تدق شاف فيها و كمل طريقو و هبط 
نورسين تبعاتو لقاتو مشا 
سلمى : نورسين مالك شنو واقع ليكم عاود 
نورسين بقات كتبكي بحرقة و عنقات سلمى 
نورسين : مافهمتش واش انا اللي ديما كيكون مني الخطأ اهئ اهئ علاش هو ديما مزيان و انا ديما قبيحة اهئ اهى ما فهمتوش باغي يحمقني اهى اهئ 
سلمى بعدات عليها و قبطتلها فدرعانها 
سلمى : راك دوختيني بهدرتك ما فهمت والو واش مدابزين عاود 
نورسين حركات ليها راسها بالايجاب و حطات راسها على صدرها و سلمى مررات يديها على شعرها 
سلمى : ما تقلقيش جبل ما عمرو يتقلق منك هو راه كيقول نموت وما نتقلقش منها راه غير لحظة غضب و صافي مالكوم بعدا واش قلتيلو شي حاجة ما عجباتوش 
نورسين بعدات عليها و مسحات دموعها 
نورسين : لا والو علاش جيتي 
سلمى : جيت باش نعيطلكم تهبطوا تعشاو راه كلشي محطوط فوق الطبلة بقيتو ناقصينا غير نتوما 
نورسين :*كتمسح دموعها * غادي نلبس حوايجي و نجي 
سلمى :حرام عليك علاش غاتحيدي لاغوب جاتك فنة 
نورسين :هاداك اللي لبستها على قبلو مخاصم معايا اللهم نحيدها 
سلمى : على خاطرك هاحنا كنساينوك 
نورسين مشات لبيت جوهرة باش تبدل حوايجها و سلمى هبطات لتحت بعدما لبسات نورسين حوايجها هبطات لتحت لقاتهوم جالسين فوق طابلة كيسينوها غير هي بانلها جبل مقلق و ما عاجبو حال ما كيشوفش لجيهتها كاع شاد فتيليفون كيخندش فيه وهي كتزيد تجنن اكثر و اكثر 
ياسمين :جلسي ابنتي كنا كانساينوك تجي 
نورسين جرات الكرسي اللي حدا جبل و جلسات عليه و كتشوف فيه بنص عين 
فاطمة : ياااو فين بطيتي شحال وحنا نساينو فيك دابا تهبطي دابا تهبطي سكنتي اش كنتي سايرة ديري 
نورسين ما جاوبتهاش حيت ما سمعتهاش اصلن دارت يديها تحت خدها و حاضية جبل وهو متجاهلها حولات عينيها لتيليفون بانلها كيقرا شي ايمايلات وصلوه كانو حاطين بسطيلة فوق لطابل و جات الخدامة قطعاتلهم طراف كبار و كتحطهوم ليهم فطبيسلات مع شلايض و داكشي راقي 
نورسين :ج..جبل علاش ما كاتاكولش 
جبل رد تيليفون لجيبو و دار شاف فيها 
جبل : ما عندي منين يدوز غير كولي نتي بصحة وراحة 
رشيد :*شاف فنورسين *نتي اللي درتيلي الملحة فالقهوة 
نورسين غلباتها ضحكة و دارت شافت فيه 
نورسين : لا غير ...
جوهرة : كنتي باغيا تقتلي ليا راجل مازال حتى ما فرحت بيه ههه 
ربيع : امم غير راجلها قاتلاه بالفقصة و حتى نتي بغات تقتلوليك هاديك ما فيها ثقة كي عقرب جامع كتضرب من تحت الحصيرة و تخبع يا لطيف ما فيها ثقة 
نورسين : ربيييع غاتسد حلقك ولا غانوض نضربك نوريك عقرب جامع 
ربيع : مااالي كدبت اختي اوا المهم اختي جوهرة بغيت نقولك فاش ديري العرس عرضيني راني نطلعوا ليك من داكشي 
جوري: اووو نتا كتغني ف العراسات واااو كتعرف تغني شعبي 
ربيع بدا يصرط ريقو عجبو الحال وبدا يقاد فشعرو و دار شاف فيها 
ربيع : وي هاديك هي خدمتي اصلن تسمعي شي موال 
فاطمة :*هزات الموس * ياااو سد حلقك غاتصدع الحاج و الحاجة ما يقدو على صداع قالك نسمعك موال نتا اش عرفك فشي موال تعرف غير للعيوط خلي الموال لماليه مزيان تبارك الله كل الا غادي تاكل

ربيع خنزر فيها حيت قمعاتو و كمل مااكلتو و كملت هدرتها فاطمة 
فاطمة : وليدي جبل طبسيلك عامر ما كليتي والو 
جبل هز راسو شاف فيها 
جبل : شبعان أ الحاجة بصحة و راحة 
نورسين ما قداتش تاكل غير كتنقب و عينيها كيشوفو فجبل حطات الفرشيطة و حطات يديها على خدها و بقات كتشوف فيه باش يدور يشوف فيها حرام واش داها فيها عوجات فمها و ابتاسمات بشر حطات يديها على فخدو و بقات كترسم فيهم على شكل دوائر و رجليها حطاتها على رجلو و كتدير ضحكة شريرة جبل دور وجهو شاف فيها و خنزر و هي تحول عينيها و طلقات لسانها 😜😜😜 جا شكلها مضحك جدا لدرجة ان جبل حبس ضحكة غير بزز دور وجهو و هز تيليفونو نورسين ساطت على شعرها و دورات وجهها فقدات الامل سالاو العشا و جمعات الخدامة طبلة 
فاطمة : اواااا يا سيادنا البنت إما رجلها وإما قبرها خلاوها ماليها و اللي نطولوه نقصروه كيفما كتعرفو وليدي رويشييد يتيم و حطني انا فمقام ميمتو باش نجي نخطبلو يااااو اللي نطولوه نقصروه اليوم جينا طالبين راغبين فيد بنتكم المصونة لالة البنات جوهرة لولدنا سيدي رشيد ياااو ما نكدبش عليكم الدين و الأدب و الصواب ياو ما تختاري فرجال غير هو اوا اش قلتو .
ياسمين : الدراري راهم متافقين مع بعضهم و حتى جوهرة بنتنا انسانة طيبة انا من عندي الله يكمل عليهم بالخير و لكن القرار الاول و الاخير كيبقا د سيدي عبد المالك و د ولدي جبل 
عبد المالك :جوهرة غانسولك ابنتي قدامهم واش نتي موافقة و لالا 
جوهرة حركات راسها بالايجاب و حنات راسها و طاح عليها واحد السر من عند الله و رشيد غاياكلها بعينو و باينة فيه فرحاان وبريق جميل فعينيه 
عبد المالك : الله يكمل عليكم بالخير اولدي و لكن بشرط تحطها فعينيك نتا ولد معقول كنعرفوك من زمان و ما نكدبش عليك حتى انا حتى الا مت غانموت مرتاح منين تهنيت على جوهرة اللي هي بنتي 
جبل : *شاف فرشيد * ما نبغيش نشوف دمعة وحدة نزلات من عينيها بسبابك كن راااجل معاها ديرها فقلبك قبل عينيك حيت اللي فالقلب ما كيخرجش منو بغيها بصدق حيت تستحق جوهرة بنتنا كاملين تربية يدي انسانة مخلقة و ما تلقاش ما احسن منها و انا من عندي الا كنتي متافقين الله يكمل ليكم بالخير و من الافضل تعجلوا و تديروا لاكط باش هاكا نكون مرتاح 
رشيد : بطبيعة الحال 
هز جبل كفوفو و بدا يقرا سورة الفاتحة بصوت جميييل جدا لدرجة ان كلهم بقاو مصدومين من خامة صوتو و بدا يدعي معاهم 
فاطمة : ياااوليدي و على صويت عندك تبااارك الله عليك الله يحفظك و يحجبك من العين 
نورسين كتشوف فيه و عينيها كيبريو و فخورة بيه لواحد درجة ما تصورش 
نورسين : اللهم امين 
ناضت فاطمة 
فاطمة : سيادنا الله يهنيكم ما سخيناش بيكم و لكن خاصنا نمشيو 
ياسمين : جلسوا تباتو حتى لغدا و سيروا 
فاطمة : لا ا الحاجة ما نصيبش الواحد مايلقا راحتو غير فخيمتو رشيد نوض دينا اوليدي 
ناضت كنزة و ربيع و رشيد كلهم وقفوا 
فاطمة : يا ونتي ما غاداش اديك نورسين 
جبل شاف فيها بمعنى تمشي نخسر انا وياك حمر فيها مزيان 
نورسين : لا غير سيروا نتوما غانبقا مع جبل حتى نجيو من بعد 
فاطمة : اوا دوزو بخير الله يعاونكم 
سلموا عليهم و انصارفو نورسين قبطات فيد جبل و هو ينوض وباس على راس جدو وجداتو 
جبل : تصبحو بخير 
ياسمين : تصبح بخير اولدي 
قال هاد الكلمات و طلع و تبعاتو نورسين لفوق 
نورسين :جبل علاش كاتصرف معايا هاكا 
جبل : معايا كتهضري 
نورسين : واقيلة كاينة غير انا وياك هنا 
جبل : قلتيلي بعد مني هانا بعدت شنو بغيتي اكثر على العموم تصبحي بخير 

حط يدو على البواني دالباب و مشات عنقاتو من خصرو 
نورسين : فين غادي 
جبل حل الباب و خرج و خلاها بلاكة بقات تغدد و تضرب فالحيط برجليها حسات بالخنقة و بشمتة و بالبكا كلشي بقا فيها الحال مشات تكات من فوق السرير و بقات تقلب يمين شمال حتى نعسات و دموع فعينيها 

🌥🌥🌥🌥اصبح يوم جديد 
فاقت نورسين على اثر شي دقات فالباب ناضت كتفوه و كتحك فعويناتها ناضت حلات الباب لقاتها جوهرة 
نورسين : جوهرة *كتفوه * صباح الخير 
جوهرة : صباح نور هبطي تفطري 
نورسين كتكسل 
نورسين : شكرا بغيت نسولك عفاك جبل فين بات 
جوهرة : احم انا شفتو البارح دخل لبيتو لي كاين الفوق واش مخاصمين 
نورسين : *دلات شنايفها *شوية 
جوهرة تأسفات و حنات راسها و هبطات نورسين دخلات غسلات وجهها و حكات سنانها بزربة خرجات طلعات لطابق الفوقاني حلات الباب دبيتو وهي تضربها ريحتو استنشقاتها و ابتاسمت و لكن ما كانش هو لداخل زدحات الباب بالفقصة و دخلات 
نورسين : يااالاه اوا زيدي معاه ميستر نوفيخة اووف اوووف اشداني نسول على شي ولاد كن غير شديت حلقي تفوووو اوا هاهو غضب اوا شدي انورسين على قلبك حتى انا جرحتو بهدرتي اووف انورسين اووف 
دخلات و بدات تبقش حلات الماريو ديالو و هزات واحد القاميجة كتشم فريحتها بانلها واحد المجر حدا راسو حلاتو و لقات واحد المدكرة مكتوب عليها 《My angel *ملاكي 》 بانتلها قديمة شوية استغربات حلاتها و ادا بها تنصدم 😳😳😳😳😳😳 
ماحداها كتقلب أوراقها و كتقرا شنو مكتوب عليها ما حد دموعها كينزلو بغزارة مدكرة عامرة بالماضي الاليم ديال جبل طفل صغير اللي تعدب بزاااااف فحياتو تزاد و ماتت ماماها و باباها عقدو فحياتو شحال من مرة حاول يقتلو حيت كان كيعتاقد بلي هو سبب فموت زوجة ديالو طفل صغير كان كيعاني من التنمر فالمدرسة بسبب شكلو انسانة وحدة اللي كانت كتحن فيه هي ليلى المربية ديالو و داكشي علاش قتل عمو اللي كان باغي يتعدا عليها و طفلة وحدة اللي قدرات تخرجوا من هادشي كامل هي ملاكو طاهر او بمعنى آخر هي نورسين كانت مدكرة عامرة بطفولة قاسية كتبها جبل بخط يديه فيها أحاسيسو اللي كان كيحس بيها فكل لحظة باباه كيقولو بلي كنكرهك شحال من مرة بغا ينتاحر و لكن جبل من صغرو كان كيعرف بينو و بين الله كان هو اللول على صعيد مؤسستو و القران و الاحاديث و الادعية كان حافضهم عن ضهر قلب و هادشي كامل كيرجع الفضل لبعد الله سبحانه و تعالى لمربية ليلى اللي لعبات دور كبير فحياتو كانت بمثابة نور اللي كيبان فوسط ظلام كانت بمثابة قطرة ماء في صحراء قاحلة كانت هي الامل فوسط جو عامر باليأس نورسين كتقرا و تبكي خصوصا فاش وصلات لجزء اللي كان كيوصفها فيه و كيفاش تلاقاها و كيفاش حتى سكنات قلبو بلا ما يحس حب بريئ صادق كان كيحس بيه جبل من جيهة نورسين حتى تحول لهوس و مرض و غيرة مفرطة شنو دنبو هو قلبو بغاها و تعلق بيها حتى ولات تبان لو فكل بلاصة كيبغي يهرب لنوم كتبان ليه فأحلامو عشقو لنورسين كبير و كبير بزاااف لدرجة كيغير عليها من نسمة د الهوا اللي كتلامس وجهها ااااخ جبل شحال عانى و شحال مازال كيعاني وصلات لاخر ورقة لقاتو كاتب عدة أشعار ليها كيوصفوها بطريقة خلات نورسين يرجف قلبها بقوة الحب اللي كيحس بيه من جيهتها الزغب ديال داتها وقف حطات يديها على جبهتها و بدات تقرا فشعر بصوت مرتفع و مرفوعة و ساهية و كل حرف كتعطيه حقو 
نورسين : أعوام تمضي و أعوام تُقْبِل و مازلت أنتي يا ملاكي وحدك من يستوطن عقلي و فكري دمتي أميرة قلبي و ملكة فكري و حلم حياتي ليس لانوثتك مثيل ناعمة أنتي كغصن ياسمين ....
سمعات صوت جبل و هزات راسها لقاتو واقف حدا الباب و لابس سوفيطمة كتقطر عليه و شورط و هاز قرعة د الما فيدو و شعويراتو هابطين على عينيه و كمل شعر اللي كانت كتقراه نورسين قال بصوت خشن و مع كل كلمة كيقولها كيخطي خطوة لامام 
جبل : ناعمة أنتي كغصن ياسمين مدهشة كعين طفل صغير ومتفردة بجمال كحور عين فمن أين آتي بالبديل ؟ أموت إشتياقا أموت إحتراقا وشنقا أموت و دبحا أموت و لكنني لا أقول حبنا مضى وإنقضى حبنا لا يموت أنت جميلة و الحديث معك أشبه بحكاية خيالية و صوتك مهدئ عجيب وباقي التفاصيل أحتفظ بها خوفا عليك منهم 

نورسين وقفات و طاحت لاجوندا من يديها و بقات غير حاطة يديها على فمها و مصدومة كتبكي و تشهق قرباتلو و حطات يديها على خدودو بجوج و جبينها على على جبينو و قالت بصوت متقطع 
نورسين : س....سمحليا اهئ اهئ س...سمحليا جرحتك بزاف و عدبتك معايا بز...بزاااف فعوط ما نعوضك على شنو فات كم...كملت على ما بيك انا ...انا ما نستاهلش شخص بحالك نتا اهى اهئ انت تستاهل بنت أحسن مني انا انا غ...غير كنألمك عند ب...بالي بلي كنخفف على مابيك وان..اناا غير كنزيد نكمل عليك ...اهئ اهئ ع...علاش نتا وقع ليك هادشي اهئ اهئ علاش نتا اللي تحرم من ماماك و باباك يبغي يقتلك علاش اهى اهئ نتا ضريف و ماكينش ب..بحالك أحبيبي ماااك...كاينش .. نتا ما تستاهلش نتا ما تستاهلش وانا ...انا عاد عرفت علاش ما بغ ...بغيتش الولاد اهئ اهئ و البارح قل..قلتلك كلامك خايب بزاف و انا ....و انا مستعدة ندير اللي بغيتي و لكن ع...عفاك سمحليا على السنين اللي ضلمتك فيهم اهئ اهئ * طاحت على ركابيها و شداتلو فرجلو و هو غير مغمض عينو و جامع يدو على شكل لكمة خاليها تخرج شنو فقلبها * اهئ اهئ ح..حتى انا ضريفة و الله اهئ اهئ انا براسي تنموت على تراب اللي كتحط عليه رجل..رجليك اهئ اهئ راك نتا هدية من عند الله ليا اهئ اهئ نتا هو سباب سعادتي نتا هو كلشي فحياتي واخا كنغلط معاك اهئ اهئ و لكن ربي بوحدو اللي عارف شحال ك...كنبغييييييييك اهئ اهئ * كتمسح دموعها * ع...عفاك سمحلي ع...على كلشي درتو فيي..فيك أجبيلو سمحلي ما نعاودش ضلمتك و قلتلك قت...قتال و مجرم ووحش و طلعات انا هي أكبر وح...وحش اهئ اهئ تقت بكلام ناس و خليتك نتا الي كاتدير كل...كلشي باش ترضيني انا ما كر...كرهتش نمووت فهاد اللحظة شعور بدنب كياااكلني من لدااخل واخا نبقا حياتي نطلبلك سماحة ما نملش 
وقفات و حطات راسها على صدرو و كتهدر بصوت منغنغ بالبكا و حاطة يديها على قلبو 
نورسين : واش نتا بصح كتبغيني واخا كنت قبيحة و ماكان كيديها فيا حد اهئ اهئ كنتي كتبغيني واخا كنت كنقولك كلام مسمووم انا و الله ما قبيحة انا و الله ما قبيحة اجبل انا بنتك وتربية يدك ما نقدرش نكون قبيحة بعدات عليه كتحرك راسها يمين شمال و بقات راجعة بلور و كتردد انا ما نستهلكش اجبيلو ما نستاهلكش طاحت لارض و حشات وجهها ما بين يديها كتبكي و تشهق و جبل قلبو كيتقطع فاش كيشوفها فهاد الحالة عارفها قلبها ابيض عارفها حتى هي غير مقدمة فهادشي كامل عارف بنتو و ملاكو طاهر كيف داير الجوهر ديالها عارفها غير نية و يمكن هادشي اللي وقع بيناتهم وقع لسبب معين جبل انسان مؤمن و كيعرف بلي كلشي كيحدث فالحياة عندو هدف معين و اللي عارفو غير الله و هو غمض عينو و كيحس بقلبو كيتسارعو نبضاتو كلما سمع بكاءها و تنخصيصها اللي كيتسلل لمساميع قلبو قبل و دنيه شنو دنبها الا كانت ضحية انسانة كدبات عليها و جبتلها أدلة على كلامها شنو دنبها الا لعبات عليها و تقنات الدور و عرفات كيفاش تخلي نورسين تكره جبل شنو دنب نورسين من هادشي كامل من غير انها تاقت بشخص الخاطئ ربي و كيسامح فشكون حنا اللي ما نسامحوش يقولون أن الرحمة أعمق و أطهر و أصفى من الحب فيها الحب فيها التضحية وفيها إنكار الدات و تسامح و العطف و العفو و فيها الكرم هنيئا لفتاة لديها شخص عاشق رحيم 
ماشي كلشي كيقدر يرحمك من غير اللي كيبغيك بصدق 
نورسين عيبها ديما كتضلم جبل عن غير قصد اللي فقلبها على لسانها ياما كاين بشر من هاد النوع اللي جات فبالو كيقولها ما عارفش شنو تقدر تخلي فقلب داك شخص جبل شخص رحيييييم بزااااف قلبو كيضرو عليها بزاااف ما كدبش فاش قالها نتي بنتي جبل رااااجل مايخليش دمعة وحدة تنزل منها و يكون هو سباب ما نكرش بلي ضلماتو و جرحاتو و لكن هو ما عمرو ما كينسا الخير اللي دارت فيه نورسين من صغر الانسانة اللي لعبات معاه و تحدثات معاه بدون أي مقابل ديك.طفلة صغيرة اللي طلقات عليه لقب كلما كيسمعوا او لا كيتفكروا كيبغي قلبو يخرج من بلاصتو حتى نورسين معدورة حتى هي ما كانت عارفة والو على الماضي الاليم ديالو وهو حس هاد بيها هاد المرة ندمات أكثر من القياس لدرجة انها قالتلو انت ما تستاهلش انسانة بحالي قبيحة لدرجة انها عطات لراسها لقب 《وحش》
♤♤♤♤♤♤♤♤♤♤♤ 
عندما تقرري أن تعشقي إعشقي رجلا لا يعرف كيف يبكي عيانكي إلا فرحا لا يكسر قلبك رجلا همه إسعادك رجلا لايرى أنثى غيرك 
♤♤♤♤♤♤♤♤♤♤ 
جبل ما حس براسو حتى نزل و جلس حداها و حيدلها يديها من على وجهها هزات عويناتها عاااامرين دموع و حومر و كتبان فيها ندمانة بزاااف جبل كيمسح دموع من عينيها بصبعو الكبير و ابتاسم ليها و قال 
جبل : ياااارب إرحم عيونا بالدمع فاضت فلن يجفف دموعها سواك يااارب 
نورسين بقات كتشوف فيه باستغراب كيفاش شخص ضلماتو حتى لهاد درجة و مازال كيدعي معاها ما حدو كيتكلم و دموع ما باغيينش يحبسوا هبطات عينيها ما عندهاش لوجه اللي تشوف فيه 😓😓😓😓

جبل : شكون أنا أنورسين ؟ 
نورسين هزات راسها شافت فيه 
نورسين : نتا ج..جبل 
جبل :*بابتسامة * ونتي شكون ؟ 
نورسين :*باستغراب * انا نورسين 
جبل حط يدو على خدودها و قال بهمس 
جبل : و جبل ما عمرو يتقلق من نورسين واخا يوقع لي وقع ما عمرك تقولي بلي نتي ما تستهلينيش بالعكس انورسين بالعكس انا عمري ما غانتخلى عليك ماااعمري انا غادي نبقا معاك و كل نهار غادي نبغيك أكثر من قبل *شبك يدو مع يديها * هاد اليد عمرها ما غاترخي منك انا باباك و حبيبك انا هو سعادة ديالك 
نورسين :*حطات صبعها على شنايفو و حطات جبهتها على جبهتو و دموع كيتساقطو بغزارة 
نورسين : شوووت عفاك شووت علاش أجبل نتا هاكا علاش نتا قلبك بيض حتى لهاد الدرجة علاش انت نتا مقلق مني اهئ اهئ غير كتقول هاد الهدرة باش ما نديرش فراسي شي حاجة اهئ اهئ بغيت نموت 
جبل :*كيمسح دموعها * شووووت ما تدكريش هاد الكلمة على فمك مزال شوووت الا درتي شي حاجة فراسك عاد غانتقلق منك د بصح و ما عمري نهدر معاك غانقولك واحد الحاجة و سمعيني مزيااان واخا كنتقلق منك بلا ما نحس كنبتاسم فاش كنشوفك و كنحس بقلبي كيضرب بسرعة بحال باغي ينقز من صدري و يجي لعندك كيجري * بعد عليها و تنهد و حشا راسو فعنقها كيتكلم و يدو حشاها فشعرها * أنا في غضبي عليك أخفي الكثير من الشوق لابتسامتك في حزني منك يصالحني معكي حبي الكبير و قلبي صغير أنتي لا تعلمين أنه عندما تحزنينني بداخلي جيش كبييير يصالحني معكي 💓💓 *باسها فعنقها بوسة حنينة و بعد عليها قرب وجهو لوجهها لدرجة أنفاسها كتضرب فانفاسو * انا ما كنلومكش ابنت قلبي هاد شي اللي وصلنا ليه انا سبابو نتي ما كنتي عارفة والو على الماضي ديالي و انا ما عمري عاودت ليك عليه نورمال تكون ردة فعلك بداك شكل نتي ما كدبتيش بصح انا مريض و احمق و معقد حيت مايمكنش نعيش داكشي و نبقا طبيعي بصح شحال من مرة مشيت عند أطباء نفسيين باش نتعالج شحال شربت ديال الادوية باش نبقا واقف على رجلي و بصحة مزيانة انا عشت شي حوايج اللي ربما ما تقدريش تستوعبيهم ماكدبتيش فاش قلتي انا قتال بصح انا قتلت عمي فاش كنت صغير و لكن ما تعمدتش نقتلو اكيد غاتكوني قريتي كلشي فالمدكرة ماما ماتت و هي كتولدني داكشي علاش مابغيتش ولد عندي عقدة من انكي تولدي ولد و كنقولك ما باغيهش يرضع منك باش ماتبغيهش اكثر مني انا هاكا داير انا عارف أفكاري غالطة وماشي منطقية و لكن انا كنغير عليك من كلشي و فاش كنشوف فشي ولد صغير كنتفكر شنو داز عليا و ما نقدرش نربيه مزيان *مرر يدو على لحيتو * اي طفل صغير كيفكرني فالماضي خايف حتى انا نمشي نتعامل معاه بحال كيف كان كيعاملني داك سيد اللي حاشا واش يكون أب *ضمها لعندو بقوة * أنتي معايا و هادشي اللي كيهمني و حتى الا ما رزقناش الله الاطفال نتي كافياني نتي فيك كلشي ابنتي حتى حاجة ما كتهمني فدنيا غير راحتك عندي أغلى من دنيا و ما فيها 
نورسين زادت تحشات فيه و قالت 
نورسين : كنواعدك بلي غادي نبعد عليك أي حاجة كتألمك غادي نبقا معاك لاخر نفس نضحي بروحي على قبلك و غادي نحمد ربي الف مرة كل نهار حيت لقيت شخص بحالك غادي يجي واحد نهار اللي غانكونوا عائلة زوينة بحالك عندي إحساس 
جبل بعد عليها و بقا كيضحك و لوا ليها خصلة من شعرها بين يدو حتى تأوهات بالم 
نورسين : جبل شعري ااااح طلق 
جبل : *بابتسامة * آخر مرة تفكري الماضي آآخر مرة اللي فات مات 
نورسين : *قابطة فشعرها * منين نتا كتحبني و كتحماق عليا فين كنتي غابر سنييين هادي 
جبل طلق من شعرها و هز راسها بصبعانو 
جبل : ما لقيتكش ؟ 
نورسين :*قادات الجلسة * كيفاش عاود 
جبل : شحال قلبت على داركم حتى حماقيت و من بعد اكتاشفت بلي المربية ديالي كانت ساكنة تحت منكم و دار بسميتي و جيت و سكنت تحت من داركم باش نشوفك كل نهار و كل ساعة و كل دقيقة و كل ثانية نتي كنتي كتنعسي مرتاحة و انا كنبات حاضيك كي الاحمق

نورسين :*باستغراب * كيفاش حاضيني 
جبل قربها ليه اكثر و اكثر و كيدوز يدو على شنيفاتها و عينيه عليهم 
جبل : كنت مراقبك فداركم كنت داير ليك كاميرات ابنت قلبي شفتي شنو درتي فيا 
نورسين :*شهقات و حطات يديها على فمها *واش كتهدر من جدر عقلك واش نتا مسطي 
جبل :*شاف ليها فعينيها و غمزها * شكون محمقني منغيرك ابنتي شكووون 
نورسين كضحك و حطات يديها على فمها 
نورسين : الحمد الله يااربي اللي هدرت معاك من تحت ديك شجرة اول مرة فحياتي كيوقف معايا زهر هو نهار هدرت معاك شنو كنت قلتلك فاش هدرتي معايا 
جبل : *تنهد * قلتي بزااف د الحاجات اللي ما قدرتش نساهم و لكن اهم كلمة هي دبدوبي و فاش قلتيلي انا ماماك 
نورسين عضات على شنيفاتها و حطات راسها على صدرو و هزات عينيها شافت فيه و كتمرر يديها على عنقو حتى كيتبورش كديرهالو بالعاني كتعرف عندو نقطة ضعف تماك 
نورسين : اوا شفتي انا كنت كنبغيك منين كنت صغيرة حتى انا علاش كضلمني 
جبل :*مغمض عينو و العرق كيتصبب منو و حرارة جسمو و لات مرتافعة * نورسين ر..رصاي ابنتي ر..رصاي 
نورسين :*مصغرة فيه عينيها و كتبتاسم بشر * علاش ما بغيتيش نلعب معاك 
جبل ما حس براسو حتى قلبها و جا من فوق منها 
جبل :رحميني انورسين رحميني ربي و كيرحم 
نورسين :*كتضحك بدلع * علاش شنو درت ليك أدبدوووووووبي 
جبل بدا كيحل ليها فالصدايف ديال البيجامة اللي لابسة و هي تطرطق فيه عينيها و بغات تنوض و هو يجي فوق منها حاصرها بيديه بجوح فالارض 
نورسين : ج...جبل حرااام اجبل و الله حتى حرام انا مزال مريضة شنو باغي دير 
جبل: باغي ناخد حقي 
نورسين :واش حماقيتي رااااه حرااام و الله حتى حرام زعما نتا كتقرا القرآن و حافظ الادكار و الادعية و انسان مومن و كتصلي شوف اللحية ديالك فين واصلة و باغي تمارس الرديلة لاااا اجبل لااااا 
جبل حشا راسو فعنقها كيتنهد فيه 
جبل : صافي هادشي للي عارفة نتي فدين 
نورسين :دابا واش باغي ديرلي محاضرة ماشي وقتها و الله نوض اجبل انا عارفك فاش كتبدا ما كتساليش 
جبل : *هز راسو شاف فيها بعيون معسلين * نتي اللي حلوة دنب ماشي دنبي 
ناض من عليها و مد ليها يدو حتى ناضت كتسوس فحوايجها و تحلات ليها البيجامة من لفوق كانت لابسة من تحت منها سوتيان فالاسود الفرقة د صدرها كتبان منهم 
جلس جبل من فوق السرير و بقات نورسين واقفة كتسد صدابف و هو يجرها من يديها جلسها على حجرو و قال بصوت فيه نبرة تهديد
جبل : رصاي ما تسديهمش 
نورسين : و علاش 
جبل بقا كيشوف فيها مدة و حنا باسها فالفرقة د صدرها حتى قفزات بين يديه و قالت بهمس 
نورسين :جبل 
جبل هز راسو شاف فيها و حط يدو على خدها و عينيه معسليييين باينة فيه واصلة ليه لعظم 
جبل : اعتازلي ابنتي ما بقيتش بغيت نشوفك.فداك دومين الله يرضي عليك

نورسين :*باستغراب * و علاش 
جبل : *عضها فشنايفها حتى بدات كتفركلو فيدو و بعد عليها * داكشي حرام ابنت قلبي انا باغيك تكوني مزيانة و تمشي فطريق الله انا براسي كنت كنغلط و لكن الحمد الله باب التوبة ديما مفتوح ما حدنا كنطلعوا النفس و نهبطوها باقي الحال ابنت قلبي تفكري نهار توقفي امام الله و نتي مايكاب ارتيست ونتي عارفة بلي تبرج حرام و المشكل فهادا نتي اللي كاديري ليهم داكشي لوجههم شنو احساسك فاش يقولك الله كنتي عارفاه حرام و مشيتي درتيه امم انا ما بغيتش نحرمك عرفتك كتحماقي على داك دومين داكشي علاش خليتك و لكن باركة عليك أ أميرتي من داكشي 
نورسين :*دلات شنايفها * عارفة و لكن لا بغيتي نتخلى على كلشي صافي ما نبقاش فداك دومين 
جبل :*حط يدو على قلبها * انا بغيتك نتي تكوني مقتنعة خاصك ترضي الله هو اللول عاد أنا خلي اللي خلقك هو أهم أولوياتك فهمتي أ ملاكي 
نورسين حركات راسها بالايجاب و قالت
نورسين : واخا اجي بعدا ما بقيتش كنسمع حسهم لتحت ياكما خرجوا 
جبل : مشاو لايفران داهم يعقوب كاااملين فصباح بكري و جوهرة حتى هي خرجات مشات عند صاحبتها يعني كاينين غير انا و نتي 
نورسين : اوووو و علاش ما دوناش معاهم حرام عليهم 
جبل وصلو ميساج لتيليفونو وقف هزو و قرا الرسالة و ابتاسم و شاف فيها 
نورسين : مالك ؟ 
جبل وقف حداها و سدلها صدايف كلهم و باسها فخدها و جرها من يديها و هي ما فهمة والو 
نورسين : فين غاديين جبل 
جبل حل الباب و هبط فدروج و قابط ليها يديها حتى وصل الباب دبرا و دار ليها يدو على عينيها و حل الباب غير بشوية 
نورسين : شنو واقع هنا واش شي مفاجئة 
جبل حل الباب كامل و حاط يدو على عينيها و همس فودنيها 
جبل : مستعدة 
حيد ليها يدو من عينيها و هي تطلقها بواحد مولاتي غوتة و دارت و عنقاتو بجهد و همسات فودنو
بالاسبانية 
نورسين :Te amo cariño * أحبك يا حبيبي * 

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.