جبل نورسين الجزء الثامن

🔙🔙فلاش باك 

واحد البنت واقفة فطريق تكون فعمرها ست سنين آية فالجمال عويناتها فرمادي و بيوضة و خدودها حومر لابسة واحد اللبيسة فالاحمر حد الركبة ومن فوق منها واحد السلهام فلون الاحمر و هازة واحد نونوس قديم و بالي و كتبكي بحرقة و كتمسح دموعها بيديها و كتشوف فطريق و خايفة لا يمشي ياكلها شي ديب و لا يخرجلها شي غول بحال الحكايات اللي كيحكي لها جدها فاش كتبغي تنعس بنت ما عندها لا حول و لا قوة كتمنى يجي شي ملاك ينزل من السما و ينقدها من الوحش اللي يقدر يخرجلها فأي لحظة طاحت لارض و حطات يديها على قلبها وكتطلب النجدة من سيدي ربي حيت من ديما كان كيقولها جدها الا بغينا شي حاجة كنطلبوها من الله سبحانه و تعالى هو اللي قادر يدير لينا طريق فوسط البحر هو اللي قادر يخلي العافية باردة ما تقيسناش هو اللي قادر يورينا طريق اللي فيها نور فاش نكونو فظلام

-ياربي عاوني ياربي ما عندي حتى واحد من غيرك عفاك يا ربي ما بغيتش ياكلني الغول ولا ديب عفاك ا ربي عفاك أهئ اهئ اهئ 

فنفس الاثناء واحد سيارة من نوع مرسيديس فلون الاسود كانت دايزة فجنب طريق سايقها جبل بهدوء و مركز فطريق حيت كان عاد شد البيرمي ديالو حيت كان يلاه فعمرو تمنطاش العام و خايف يمشي يدير أكسيدون كان عاد جا من أمريكا حيت جدو و جداتو صيفطوه يقرا مع رفيق دربو يعقوب و كل صيف كيجي فيه لمغرب يشوف جدو و جداتو اللي لقا فيهم الامان و الحنان و العطف اللي كيقلب عليه منين تزاد كانو بمثابة أطباء نفسيين فحياتو خلاوه يشوف الحياة بطريقة أخرى و علموه بزااف د الحوايجو رباوه أحسن تربية كانو الحضن الدافئ من بعدليلى الله يرحمها 

كان جبل سايق و كيفكر فملاكو الطاهر اكيد غادي تكون كبرات و بما انه بيناتهم خمس سنين د الفرق غادي تكون فعمرها دابا 13 العام زعما تكون عاقلة على دبدوبها كيفما سماتو تبسم ابتسامة خفيفة على أفكارو و على تعلقو شديد بطفلة سلبات عقلو و قلبو اكيد هو ماشي انسان طبيعي حط صبعو صغير على فمو وهو يلمح شي طفلة جالسة فالارض كتبكي ماحس براسو حتى فرانة فجنب طريق و حل الطوموبيل و نزل تمشى بخطوات ثابتة حتى وصل حداها و قال بصوت خافت 

جبل: سلام 

هزات ديك البنيتة عويناتها فيه و داتها كلها كترجف بالخوف 

-عفاك ما تاأدينيش *شداتها الهيستيرية د البكا* 

جبل حنا عندها و قرب ليها باش يحسسها بالامان 

جبل: بالعكس انا نقدر نعاونك شنو كدير بنت زوينة بحالك فالخلا بوحدها 

بعدات ديك البنيتة من حداه 

-عفاك بعد مني قالي جدي ما نهدر مع حتى واحد 

جبل: *عرفها مخلوعة منو* وشنو نقدر ندير باش ثيقي بيا 

هزات عينيها و شافت فيه بوجهها الاحمر و كتمسح دموع من عينيها و خناينها هابطين 

-عطيني شكلاط و نثيق بيك

جبل تبسم على برائتها و عفويتها للحظات سها فيها حيت فكراتو فنورسين مرر يدو على شعرها الطويل وقال 

جبل: شنو سميتك 

-حتى تجيبلي شكلاط و نقولك 

وقف جبل من الارض و مشا لطوموبيل ديالو و حل لفاليز ديالو اللي كان جايب فيها ليكادو لجدو و جداتو 

حيت هادي هي عادتو فكل سفر ديما خاصو يدخل بيديه عامرين جبد واحد الباكية د الشوكولا وحلها و مشا رجع وقف حداها و حنا على ركابيه و عطاهالها 

جبل: ها هو الشوكولا الي بغيتي 

ديك البنيتة حلات عويناتها بفرح حيت عرفات بلي هاد الشخص اللي وقف حداها هو اللي غادي يعاونها حيت ديما كانت كتسمع واحد البنت صاحبتها كتقولها اللي كيعطيك الشوكولا هو اللي كايكون ملاك و يقدر يعاونك و ينقدك تفكير طفولي بامتياز 

-وااااو شكرا *خدات من عندو الشوكولا و بدات كتاكل فيه حتى جخطنات وجهها كامل* 

جبل كان جالس حداها ساهي فيها كتفكروا غير فملاكو طاهر و فعفويتها *تنهد وقال* 

جبل: اوا ها شكولا كليتيها ما غاديش تقوليلي شنو سميتك و شنو كديري هنا بوحدك فين واليديك ولا عائلتك 

- انا اسميتي جوهرة 

جبل:*ابتاسم ليها * امم جوهرة صاحبة الرداء الاحمر 

جوهرة: ما فهمتش 

جبل: فين عائلتك علاش خالينك بوحدك هنا 

جوهرة: *كتنخصص بالبكا*انا بابا و ماما ميتين و مخليني مع جدي كنا ساكنين فواحد العروبية ومرض مسكين و مات وخلاني بوحدي مع خالتي *كتبكي* اهئ اهئ و حيت هي شريرة بحال داك الغول اللي بغا ياكول هاينة اهئ اهئ 

جبل ما عرفهاش علاش كتهدر كاع المهم خاليها تهدر على هواها و تفهموا شنو كديرفهاد الخلا بوحدها 

جبل: كملي 

جوهرة: اهئ اهئ جابتني و حطاتني فهاد الخلا و مشات اهئ اهئ عفاك عاوني ما عندي حتى واحد

سهى فيها للحظات ووجعوا قلبوا من كلامها يا لصدفة القدر حتى هي تخلاو عليها عائلتها اكيد خاصها يد اللي تمد ليها باش تعاونها و اكيد غادي يكون هو داك طوق النجاة اللي غادي يحميها من الغرق فمشاكل الحياة و غادي يساندها حتى توقف على رجليها شاف فيها بنتو و ختو جرها عندو بكل حنية و دوز يدو على شعرها برفق 

جبل: شوووت ما تبكيش أجوهرتي صاحبة الرداء الاحمر انا غادي نديك معايا و نقريك و نشريلك اللي بغيتي و غادي نحميك من شر الخلق اللي غادي يبغي يوصلي ليك و يآديك *بعد عليها و شد ليها فحنيكاتها* من هاد نهار اعتابريني باباك و انتي بنتي اللي بغيتيها طلبيها مني انا نحضرهالك غير ما تبكيش عفاك 

جوهرة كتشوف فيه و تبتاسم و ربعات يديها و قالت 

جوهرة: انت ملاك 

جبل:كيفاش 

جوهرة:*عنقاتو و باستو فخدو* نتا اللي غادي تعاوني كنت عارفة ربي غادي يصيفط ليا اللي يعاوني حيت كيبغيني ياك 

جبل ابتاسم ليها و عنكشها فشعرها و هزها من الارض و دخلها لطوموبيل و ديمارا و زاد

جبل: امم شنو باغا تولي فاش تكبري 

جوهرة:*بفرحة و بريق فعينيها* بغيت نولي شيخة 

جبل تصدم و فران طوموبيل و شاف فيها 

جبل: quoi ?? كيفاش شيخة 

جوهرة:*هزات كتافها * زعما نهز الميكرو و نغني بحال شيخات 

جبل حط راسو على الفولون ديال طموبيلتو و شاف فيها و ضحك حتى بانو الغمازات و سنينات مستفين مقادين 

جبل: ههه زوينة عندك هاد شيخة امم وعندك صوت د شيخات بعدا و لا فيك غير جبهة 

جوهرة: عندي ديما كنت كنغني فالعراسات فالعروبية عندنا 

جبل: غنيلي شي حاجة نسمع صوتك الزوين بحالك 

جوهرة: *غطسات وجهها بين يديها و بدات كتضحك* لااا كنحشم 

جبل: وانتي كتغني فالعراسات كاع و جيتي حتى ليا و حشمتي *رد راسو لور و بدا كيشوف فيها و قال* فسفس جوهرتي واااا جوهرتي 

هزات راسها جوهرة و شافت فيه اول مرة شي حد يعاونها بلطف و عطف من بعد جدها وهو ثاني واحد من مور جدها عيط ليها بالاسم دلعها اللي كتحماق عليه # جوهرتي 

خالتها كانت ديما كتخليها بجوع و كتضربها حيت ما فحالهومش و كتبرد الغدايد فهاد البنيتة صغيورة اللي لاحول لها و لا قوة 

جوهرة: نعام 

جبل: فخبارك نتي زوينة بحال سميتك 

جوهرة: شكرا أعمي 

جبل: توتو قوليلي غير جبل *جمع يدو على شكل لكمة وقربها ليها وحتى هي ابتاسمات و صافحتو بنفس الطريقة 👊* انا وياك صحاب دابا ياك 

جوهرة حركات راسها بالايجاب بكل فرح و سرور 

جبل: وادابا ما هداكش الله تغنيلي شي مقطع شوفي غمضي عويناتك و غني وانا نسمعك 

جوهرة: وما تضحكش عليا 

جبل: اوا شفتي دابا علاش غادي نضحك عليك ثيقي فراسك و قدراتك *بدا كيصفق ليها بحب و كيشجعها و كيقول بصوت مرتفع* اولي اولي جوهرة اولي اولي جوهرة هههه

جوهرة: ههه صافي غادي نغنيلك 

غمضات عويناتها و ربعات يديها و بدات كتغني الاغنية اللي حافظة او بالاحرى اللي ديما كتسمعهوم كيغنيوها عيالات الفيلاج 

جوهرة: تيست ! تيست ! ايه ! الله ! واحد! ثنين –

وا العالي ياه كي دايرة الميمة وا الله يا الله

وا العلي ياه كي دايرة الحنينة وا الله يا الله

وا مريضة بزاف و شادة الفراش و باغا نشوفها

وا الله يا الله !

وا لا مشات ليا مي و شكون بقا عندي وا حن يا العالي

وا الله يا الله !

فعلا كانت كل كلمة كتخرج من فمها بصوتها شجي كتخليك تنسجم معاها لدرجة انه جبل فكراتو فليلي اللي كانت بمثابة الام ديالو الحنينة بصح كانت مريضة و ماقدش يودعها بصح كانت شادة الفراش و ماكانش قادر يشوفها حس بهاد الاغنية كتعبر على حالتو واخا داز على موتها ثمان سنين و لكن دكراها و صورتها مزال محفورة فقلبو قبل من عقلو نزلت دمعة خفيفة من عينو و بقا ساهي فنقطة وحدة حتى قاطعو صوت جوهرة 

جوهرة: جبل عجباتك الاغنية 

دور و جهو و شاف فيها و ابتاسم بحزن حس بهاد الطفلة كتعيش نفس معاناتو حتى هي ماتو ليها واليديها بحالو فسن صغيرة بزاف حتى هي تحرمات من اعز ناس ليها و اللي هي الام ديالها واعد نفسو بلي ما عمرو يخليها تحس بنفس الحرمان اللي حس بيه هو 

جبل: كلمات الاغنية جميلة و صوتك أجمل 

تفكر جبل بلي كاين واحد المول ديال الالعاب كان ديما كيدوز عليه فطريقو وهاهي جات الفرصة باش يستاغلو 

ديمارا طوموبيل و زاد حتى وصل لديك البلاصة و حبس اللوطو وشاف فجوهرة اللي كانت غير مربعة يديها و كتشوف امامها بحزن واضح على ملاميحها 

نزل جبل من اللوطو و خرج حل ليها الباب و نزلات 

دخلها لداك المول وقالها تختار اللي بغات من ألعاب الاطفال دورات وجهها وشافت فيه و ترسمات ابتسامة عرييييييضة على وجها البريئ و قالت 

جوهرة: شكرا ملاكي 

♤♤♤♤♤♤♤ 

ما أجمل ان ترسم الابتسامة على وجه اليتيم لا شيء أجمل في الدنيا من أن ترسم ابتسامة على وجه طفل اليتيم ...

ابتسامتهم تمنحك شعوراً بالسعادة لا حدود له ....

بل وتمنحك طاقةً لا نهاية لها .....

وكأن في ابتسامتهم سحر من نوع خاص قادر على منحك الكثير من الأشياء الجميلة .....رغم أن كل ما قدمته لهم كان شيئاً صغيراً جداً !!!ما أجمل أن ترسم الابتسامة.....

ما أجمل أن ترى السرور في أعين الآخرين ...والأجمل أن تكون أنت من صنع شيء من هذا السرور...كيف هو شعورك عندها!!!! ..لايوصف بالكلمات.

♤♤♤♤♤♤

جبل دا معاه جوهرة لدار عند جدو و جداتو عاودلهم قصتها كاملة و رحبوا بيها أحسن ترحيب و قرروا يتكفلوا بيها و ما ينقصها حتى خير معاهم كانو مفشينها بزااف حيت بصح ملئات داك الفراغ اللي كان عندهم من جيهة بنتهم نورسين ام جبل اللي توفات حسوا بلي ربي عوضهوم بطفلة باش ينساو شوية الحرقة د بنتهم 

مرت سنين و الاعوام و جوهرة ما حدها كتكبر ما حدها كتعلق بجبل اكثر و اكثر لدرجة انه فالمدرسة فاش كيقولولها خوك زوين كتنوض تدابز و ترايش كيف شي عيشورية و كتردد كلمة وحدة جبل ماشي خويا كان مغرقها جبل بلي كادو الحاجة قبل ما تنطقها تجيها حتى لبين يديها و لصغر سنها و مراهقتها توهمات بلي كيعشقها و كيبغيها بحالها بحال أي بنت غادي تكون فبلاصتها هاكا غادي تفهم الامور ولكن جبل كان كيحاول ما امكن يخليها ما تشعرش بنقص من جيهة عائلتها و ما تشوفهومش بلي ناس غرباء عليها ولكن جبل كان عارف بلي تعلقات بيه و بلي ولات كتبغيه كان فاهمها من شوفة العين حيت كن كان الحب يدرس غادي يكون جبل هو الاكثر خبرة بين المدرسين و كن كان الحب ينحت غادي يكون جبل أمهر ناحتين وكن كان الحب يرسم كان غادي يكون جبل من أروع الرسامين هو اللي جرب المعنى الحقيقي للحب من طرف واحد حقا جبل هو اكثر واحد حاس بجوهرة و معاناتها 

🔚🔚نهاية الفلاش باك

جوهرة مسحات دموعها و سمعات مضيفة طائرة كتطلب منهم يربطوا الاحزمة ديالهم باش تقلع طائرة و تغادر بلاد حبيبها و عشقها من طفولة #موسيو جبل الابراهيمي جبدات الصاكادو ديالها و هزات دفتر دكريات اللي كان فيه عندها مجموعة من الصور مع ياسمين و عبد المالك و جبل كان ديما فاش كيجي من لاميريك كيديروا صور هبيلة و ضاحكين و مجموعين جبل بصح كان هو الاخ و الصديق و الاب في بعض الاحيان بقدر ما كانت كتعشقوا بقدر ما كانت كتحتارموا لشخصيتو المميزة اللي كتخلي كل بنت مبهوضة فيه كان كيعجبها كيفاش كيفرض هيبتو فالمكان اللي جالس فيه و الشيئ اللي خلاها تزيد تبغيه فاش كان كيعاملها بحنية و كيتصرف معاها على انها صديقتو كيفاش كان كيغير شخصيتو معاها و مع عائلتو كانت كتعجبها بزاف طريقة هدرتو و مشيتو حتى أدق التفاصيل فيه كانو كيسطيوها و مازال كيسطيوها حلات الصاكادو ديالها و جبدات واحد القرعة د العطر ديال جبل اللي كانت خازنها عندها و شماتها و استنشقات عبيرها حيت فالصباح قبل ما تمشي دخلات لغرفة ديالو و هزاتها معاها بلا ما يشوفها حد وما تفضحش امامهم 

(من عجائب عائلة جبل الابراهيمي كلهم كيعانيو من طرف الحب الواحد تقول خارجة فيهم دعوة 🤦‍♀️🤦‍♀️) 

عند جبل 

جبل: جدي غادي نخليكم هنا شيفور غادي يوصل عندكم انا عندي شي شغال خاصني نمشي نقضيه

عبد المالك: واخا أولدي 

باس ليهم راسهم و يديهم 

ياسمين: الله يرضي عليكم 

غمز يعقوب و تبعوا طلعوا فاللوطو و ديمارا جبل و انطلقوا 

يعقوب: فين غادي نمشيو أصاحبي 

جبل: انا براسي ما عارف فين غادي المهم خاصني ندير شي حاجة حيت دماغي غادي يطرطق بقوة التفكير 

بعقوب: الله يا خويا و مالك كتهزها منين ثقالت 

جبل: اودي مشاكل ما كاينش اللي مرضني و معصبني قد داك الز*** ديال دا كوسطا و لا ما نعرفت شنو سمية مو 

يعقوب: راه رجالنا دابا يصيفطو الضوسي ديالو مالك على حالك معصب و طالعلك دم 

جبل:انا ما دخليش داك خينا لدماغي 

يعقوب: كيفاش؟ 

جبل: ماجاتكش غريبة قضيتو طاح علينا كي الباطل لواه باغي نخطب و ما مشا غير لنورسين علاش زعما ما فهمتش الواحد فاش كيبغي يخطب شي وحدة خاصو يعرفها بعدا واش مرتابطة ولالا ياك كانت معانا حتى سلمى علاش ما قالهالهاش * ضرب يدو فالفولون ديال طوموبيل* ادن القضية فيها شي إن شي حد مسيفطوا واخا تقولي حتى تعيا انا ماشي دمدومة باش يديرها بيا داك الق*** 

يعقوب : وشكون غادي يصيفطوا زعما ولاش غادي يسيفطوا ما فهمتش انا 

جبل: صراحة شخص واحد اللي فبالي ولكن خاصني نتأكد ان بعض الظن إثم 

زنزن التيليفون د يعقوب وصل شي ميساج فالجيمايل ديالو هزو قراها و ما حدو كيقرا و ما حد عينو كيوساعو بصدمة 😲😲😲 

يعقوب: بشااااخ الضوسي ديالو واجد أصاحبي 

جبل: هدر ولا غادي نلوحك من داك سرجم 

يعقوب: سميتو الحقيقية سيف وملقب بداكوسطا الام ديالو من كولومبيا و باه مغربي 

جبل: *كيهدر ضاغط على سنانو* واش انا رب د مك غادي نصوبلو الحالة المدنية دخل فالمفيد 

يعقوب: وا غير صبر أصاحبي دوز طفولة ديالو كاملة فالمغرب و فاش وصل 18 العام انتاقلو لكولومبيا و تعرف على أحد رؤوس المافيا اللي كاينين تماك و خدم معاهم وولا كيبيع و كيصدر أخطر انواع لدروك فالعالم ولكن هو مستقر فأمريكا و ماشي فكولومبيا و ... 

جبل: *سعر عليه و ضرب الفولون ديال طوموبيل وكيهدر بالغوات* وااااااااش كتخلص على الهدرة جالس كتلوحلي الهدرة بالغرام هدر الا غادي تهدر 

يعقوب: كتربطوا علاقة مع كاميليا بنت خالك حيت كانت كتشري منو لدروك 

حبس جبل طوموبيل و ضرب دوميتوطر عينو ولاو حوووووومر كيخلعوا و العروق ديال يدو تنفخوا مزياااااان القاميجة اللي كان لابس غادي تطرطق عليه بقوة ما تنخوا عضلاتو بالاعصاب 

جبل: كننننننت عااااااااااارف داااااك القح*** غاااااااااادي تكووووون من موراااااااه ولاااااااات تصيفط الخطاااااااب *كسيرا بجهد* هاااااانا غادي نوري رب د مهاااااا شنوووو هوووو لعب مع جبل الابراهيمي اناااااا غاااااادي نوريييها اللعب على أصوووولوووو 

يعقوب : تهدن أصاحبي ولكن علاش غادي تصيفطوا 

جبل: هاااااااديك زم** و خااااااص الللللي يربيهاااااا هدرنااااا معااااااها بالخاااااطر هدرناااااا معاهااااا بالكلام القااااااصح وهي واااااالوووو ما بغااااتش تفهم الاصل دمهاااااا ماااابغاتش تفهم بلي اناااااا ملك لانسانة أخرى كن كااااانت حمارة غادي تفهم ولكن معامن انا مع أكببببر ضبعة على وجه الكون *دارت الكيتمان د البلوتوت فودنيها و بدا كيهضر*دااااااااابااااااا غااااااادي تصيفطو لوكاليزسايون (الموقع) ديال كاميليا دااااابا خمس دقايق تكون عندي *لاح داك الكيتمان*

يعقوب : واغير برد دابا هاد الاعصاب ما عندهوم فاش ينفعوك راه كتبقا بنت خالك يدك منك واخا تكون مجدااامة 

جبل:انااااا نقطع بووووها هاد اليد الله يقطع بووووها عائلة أ والله وخا تنوض مي من القبوور ا والله ما يفكها مني فكاك بغااااات تلعب وراه حنااااا مالين اللعب 

من بعد خمس دقايق صيفطولو لوكاليزاسيون ديال كاميليا 

جبل كان قريب لموقعها بزاف استغرق اربع ساعة باش يوصل ليها فرانة طوموبيل بجهد حتى تحكو روايضها حدا واحد الفيلا 

جبل: صيفطلي جوج من رجالي أ يعقوب 

يعقوب: جبل علايش ناوي أ صاحبي نعل الشيطان 

جبل: الشيطان هو كاميليا دير داكشي اللي قلتلك و الا تبعتيني نسا العشرة اللي بيناتنا 

نزل جبل من اللوطو و زدح الباب بقوة و طرطق عنقو و مشا سرسر فالباب حلات واحد البنت باينة عليها هي الخدامة 

-نعام أسيدي 

جبل داز فيها و دخل تبعاتو من اللور كتعيطلو حتى دخل لداخل لمح كاميليا جالسة فالسيجور و عاطياه بضهر 

تقدم حتى وصل لعندها ووقف على راسها كاميليا حسات بشي واحد واقف على راسها بالهزة باش كتهز عينيها شهقات ووقفات قربات حتى و صلات ليه و حطات يديها على خدودو و ضحكات وقالت 

كاميليا: واش انا كنحلم 

جبل: *ابتسامة شر* كنبغيك 

كاميليا تدهشرات تصدمات تشوكات جميع الكلمات الدالة على الصدمة كيعبرو على حالتها فهاد اللحظة حسات بصهدة طالعة معاها و قلبها كيضرب فالالفين قالت بصوت متقطع وكلها كترعد 

كاميليا: عاود شنو قلتي 

جبل:كنبغيك 

كاميليا فشلات و طاحت لارض بعد سماعها هاد الكلمة اللي من ديماكانت كتحلم يقولهالها جبل فيوم من الايام شدات على راسها حسات بالارض كتدور بيها و دمعوا عينيها و هزات راسها شافت فيه ما قدرتش تجوابو لسانها تربط و عقلها وقف غير صوت نبضات قلبها 

اللي كيتسارع غادي يوقف 

حنى عندها جبل و دوز يدو على شعرها

جبل: فرحتي ياك ماعمرك كنتي كتوقعي تسمعي هاد الكلمة مني 

كاميليا هزات فيه عينيها المدمعين و كتحرك راسها بنفي 

جبل : توتو علاش كتبكي *دار يدو من تحت دقنو* مازال غادي تحتاجيهم *غمض عينو و زير على شعرها حتى تأوهات بقوة الالم و زدحلها راسها على واحد الطبلة د زاج كانت حداه حتى بدا يسيل ليها الدم من راسها * كلمة كنبغيك عمررررك غادي تسمعيها مني عمرررررررررك حيت هاد الكلمة ما كتقالش لبنات القح** المقطرييين و المدلولات بحاااالك *هزلها راسها و دورها جات اونفاص ليه و قريبة لوجهو و دم نازل من راسها ورجع وجهها احمر و دموع هابطين من عينيها بغزارة*وصلااااات بيك الوقاحة تصيفطلي الخطاااااب يا بنت الكلبة *نزل عليها بطرشة تسمع صداها فالفيلا كاملة * مصيفطالي شمكاااار يا بنت الق*** شمكاااار د الخلا واش بنت لاصل مك دمدومة و لا بالودنين و لا مكلخ يصحابلك ما غانعرفش بلي نتي اللي مصيفطاه 

كاميليا:*كتهدر بصوت متقطع و كتحاول تبعد عليه*بعد مني بببببعد 

جبل: شنو وقعلك ياك نتي اللي باغاني و دابا كتقوليلي بعد مني *وقف و جرها من شعرها حتى نوضها من الارض و دماياتها كتشرشر* فاش عينيك لااااش مصيفطااااه لاااااش لاااا وجاي لواااه نخطب بغيتي تلعبي و ما كتعرفيش اجي عندي غير انا نعلمك شنو ديري راني طاااااايب بهاد التخربيق دياااالك أ كاااميليا واش ما كتقااااديش كل نهار خارجالي ببلان 

كاميليا:اااااااه انااااااا لي صيفطتووووا أنااااااا اهئ اهئ اهئ 

جبل: علااااااش تقااااداولي معااااك انا بالله غادي تهضري و لا غادي نكمل على دين مك 

كاميليا: اهئ اهئ خرررررج بعددد عليا

جبل زاد زير ليها على شعرها 

جبل:شفتي اليوم و الله لا فكك مني فكاك برب الجليل حتى نفركعوا هاد رمانة جد بوها ليوم غادي نقولك لآخر مرة لاااااش مصيفطااأاه ولا غادي نعرف بطريقتي اللي ما نصحكش بيها أبدا يا الله هدررررري 

كاميليا خافت منو و تخلعات بزاف و بدات كتسرسر لو بكلشي بلا هواها 

كاميليا:اهئ اهئ انا صيفطتوا قال ديك الهدرة باش نشوفك واش بصح كتبغي ديك البنت اهئ اهئ ومنين شفت ردة فعلك ...

جبل جاتو الهيستيرية ديال ضحك 

جبل: هههه لاااااا واش من نيتك *دوز يدو على وجهو كدليل على الفقصة* دابا زدت تأكدت بلي نتي بلاااا عقل و اكببببر مكلخة على وجه الارض * وقف اونفاص ليها وهزلها راسها بيدو* الاااااا كنتي باغا تعرفي اجي سولني بلا ما تخممي و تعدبي و تصيفطيلي شمكار كيبيعليك لدروك باش تشوفي ردة فعلي انا غادي نجاوبك داااابا باش نساليو من هادشي كامل اناااااا كنبغي نورسييييين لااااااااا كنحمااااااااااااق علييييها لاااااااا كنعشقهااااااا لاااااا هي الهواء اللي كنتنفسوا لييييها بوحدها هاااااد القلب اللي فصدري كينبض نتمنى نكون جاوبتك *هز صبعو كتهديد * ملللللليت منك أ كااااميليا كل نهار خارجة ببلان جديد نتي درتي خطأ غادي تعاقبي

جلس من فوق الفوطوي جبد كلينيكس من جيبو و لاحو ليها على وجهها 

جبل:مسحي داك دم اللي كيسيل من راسك 

كاميليا: اهئ اهئ علاش ديما كتعدبني بحال هاكا 

جبل:*جبد كارو من جيبو و شعلو و صاط دخان* انا ما عمري عدبتك نتي اللي كتعدبي راسك براسك شفتي انا المشاكل اللي عندي راه العفو الله ما مساليش لحماقك كل مرة فاش ما كتلقاي ما تديري نبانليك انا فالبلان 

كاميليا: اهئ اهئ ولكن راه ...

هز يدو بمعنى سطوب 🙋‍♂️🙋‍♂️

جبل: شوفي داك انا كنبغيك و كنحماق عليك و كنبانليك فنجوم و كنشوفك فالقمر بحال محمد الخامس طاااايب بيه و عاااارف هدرتك اللي وليت حافضها عن ضهر قلب جيت عندك حتى لاميريك وقلتلك أبنت خالي راني ما نصلاحش ليك قلتليك نسايني و نتي مقصحة راسك وكتقولي لااا ما نقدرش نساك قدرت ضروفك حيت انا وياك كنعانيو من نفس الحاجة هدرت معاك بالخاطر و بالسياسة هزيت عليك يدي و ضربتك وانتي مازال كتقولي بلي منك نخلاق ولكن باش تديري خطأ بحال هادا و تصيفطيلي شمكار باش يخطب نورسين باش سيادتكم تأكد من حبي لنورسين هنا انا ما غاديش نبقا نهدر غادي نطبق 

كاميليا حسات بالخطر 

كاميليا:*كتمسح دموعها* كيفاش غادي طبق شنو باغي دير 

جبل: *كيتكلم ببرود رجع راسو لور و دار صبعو صغير ففمو* مال صبرك قليل عقوبتك زوينة ما تخافيش *هز التيليفون و صيفط ميساج ليعقوب يصيفطلو داك رجال داياولو و رجعوا لجيبو* استمتعي بلحظات الاخيرة دياولك و متعي عويناتك *كيشوف فالفيلا* واعرة عندك هاد الفيلا بشحال خديتيها امم نقدر نجي نسكن فيها مع نورسين عجباتني 

كاميليا الغيرة و الحسد عما لها قلبها كل ما كتسمعوا كينطق بسميتها 

كاميليا: علاااااش هي مااااشي انا علاااااش باش أحسن مني باااااااش 

جبل:*كيتكلم ببرودة دم رهييبة* فايت قلتلك من قبل داكشي اللي بيني و بين نورسين صعيييب عليك تفهميه و محاااال واش تفهميه 

دخلو واحد الرجال صحاح و طوال ولونهوم أسمر غير من شوفة العين كيبانو كي الوحوش 

دور جهو شاف فيهم و حناو راسهم 

جبل: *ناض من فوق الفوتوي* امم كاميليا بنيس أروع مصممة أزياء فالعالم و أجمل ميكاب أرتيست و تكون كتعاطى المخدرات توتو ما نرضاهلكش أبنت الخال 

كاميليا: جبل شكون هادو و شنو كتقصد بهضرتك خلعتيني 

جبل قرب حتى وصل ليها وهز ليها راسها بصبعانو 

جبل:*غمزها* انا مازال مادرت والو و بديتي تخلعي اوكي كيبانلي غادي نفهمك شنو واقع العقوبة ديالك غادي نفيك بكل بساطة وغادي نحرمك من لدروك و المخدرات اللي كتقيلي تعاطاي ليهم شفتي شحال ظريف ولد عمتك غادي نضرب عصفورين بحجر واحد أولا غادي نتهنا من كمارتك و ثانيا غادي نحرمك من أكثر حاجة كتحماقي عليها 

كاميليا بعدات عليه وبدات كترعد 

كاميليا: ما يمكنش دير فيا هادشي أجبل لااااااااا لااااااااا *طاحت على رجلو* عفااااااك ما عمرني نتبعك و غادي نتخلا عليك و غادي نساك غير لادروك لااااا عفاااك * بدا كتحك نيفها كي الحمقة و داتها بمجرد انها كتفكر غادي تقطع المخدرات كتبغي تحماق* عفااااك *ناضت وبغات تهرب وهوما يشدوها دوك جوج درجال بقوة و بدات كتفركل ليهم فيديهم و كتغوت* جبببببل اهئ اهئ ما تديرش فيا هادشي عفاااااك بليييييز بليييييز اهئ اهئ اهئ 

جبل شاف فدوك رجال و انصارفو خرجوا كل واحد فيهم شاد كاميليا من يد و جبل تابعهم من اللور و هي كتفركل كي المجنونة حتى دخلوها لواحد السيارة سوداء( بحال ديال عمي عثمان كوزان😂😂😂 ) 

نزل يعقوب من طوموبيل و بدا كيصفر و كيصفق 

يعقوب: ها العار شنو ناوي ديرلها ضرني راسي 

جبل: غادي نفي دين مها حتى تربي و غادي نقطع عليها لادروك 

يعقوب: *كيصفق* أحسن عقوبة درتيهالها هي هادي وتستاهل نيت حتى هي شحال لصقة انا مرضاتني أرى داك راس نبوسو على أفكارك 

جبل خنزر فيه 

يعقوب: شنو غادي دير مع واليدين كاميليا الا ساقوا الخبار 

جبل: باها و مها ما تسوقوا غير ليها كنظن راه ناسيين واقيلا بلي راه عندهم بنت

يعقوب: قبل ما نسا دا كوسطا مشا لكولومبيا ما كاينش فالمغرب 

جبل: اللي كان عندي معاها الحساب تهنيت منها اما داك داكوسطا البارح عطيتو علاش كيقلب مافيا اللي يحفي ك** مع بنادم

عند نورسين 

سلمى: قتلني الملل أصاحبتي نورسين فيقي خرجي معايا 

نورسين : بعدي مني خليني نعس راه كرشي كضرني 

سلمى: اوووف منك ناس كيتصاحبو مع البنات وانا مصاحبة مع خطية وانوضي الله يرحملك الواليدين 

نورسين:*دارت عندها شافت فيها* هانا أش بغيتيني 

سلمى: وانوضي نخرجوا عفااااك 

نورسين: اوووف واخا 

ناضت نورسين لبسات حوايجها و خرجوا تساراو بلمزياااان نيت حتى وصلات ثمنية د الليل 

نورسين: ياختي رجلي طابوا ما عييتيش 

سلمى: نورسين شوفي لهيه *كتشير ليها بصبعها لجيهة واحد سينيما* يالاه ندخلوا نتفرجوا

نورسين: حتى انا نيت عمري دخلت لسينيما ولكن اينا فيلم غادي يكون بادي 

سلمى: ويالاه ندخلوا و نعرفوا 

جرات سلمى نورسين من يديها و دخلوا خلصوا و شراو تيشبسات و دخلوا جلسوا فلصال بعد عدة دقائق بدا الفيلم اللي كان من نوع أفلام رعب 

نورسين: *قبطات فيد سلمى* الميمة يالاه نمشيو بحالنا راه انا اكبر خوافة ما كنقدرش نتفرج فيهم 

سلمى: جلسي لارض قال نمشيو شوفي هاد الفيلم راه قصة حقيقية ههه والله حتى واعر 

نورسين دايرة يديها على وجهها و جالسة مخلوعة كتسمع غير الغوات على شاشة سينيما مرة مرة كطل تلقا شي حاجة كتخلع و تعاود تغمض عينيها 

سلمى شافتها مخلوعة قربات حتى لحدا و دنيها و بدات كتهدر 

سلمى:وا غير تفرجي أصاحبتي ماشي مخلصة عليك باش تجلسي مخبية و جهك 

نورسين: بعدي مني 

سلمى:*كتضحك* هانتي هاد القصة قالك وقعات فأمريكا واحد البنت كرات دار و لقاتها مسكونة و بداو كيخرجولها الاشباااااااح وفينما مشااات كيتبعوها واخا بغات تهرب منهم كيخرج ليها شي حد فيهم من شي قنت ههه

نورسين دارت يديها على ودنيها 

نورسين: ما بغيتش نسمع تفرجي غير نتي وااابعدي مني 

سلمى:*كتفقصها* هانتي حتى تلاقات بواحد راجل سكنها معاه عاد إختافاو 

نورسين: سلمى بعدي مني 

اوا ما تسالا داك الفيلم حتى بغا نورسين يسكت ليها القلب ناضوا خرجوا و نورسين كتنقز غير هي و عضامها كتخايل يمشيو لدار و يخرجوا ليهم الاشباح نعلات الشيطان و نفضات هاد الافكار من راسها 

سلمى: مالك مخلوعة غير نتي وراسك ههههه وا صدقتي خوافة 

نورسين: كن غير ما جيتش معاك كان غادي يسكتلي القلب حراام عليك بالله 

سلمى: كتزيدي فيه حتى نتي واخا صراحة هي قصة حقيقية نخاف يوقع لينا بحالها ههههه 

شدو طاكسي وصلهم حتى للعمارة ونورسين قلبها مقبوط عليها و خايفة كانت و صلات العشرة د الليل و كلشي ساهت و طافيين ضو فالعمارة نورسين شدات فيد سلمى 

سلمى: وا طلقي مني أ زمرة هادا كولو خوف 

نورسين: اشداني نمشي معاك كنت هانية مهنية حتى سلاطيتي عليا 

دخلوا العمارة و شعلات سلمى ضو اللي كان حدا الباب و طلعوا فالاسانسور فجأة طفا الضو و وقف بيهم الاسانسور

نورسين غوتات بجهد و شدات فسلمى و ناضت كتبكي 

نورسين : واااااااع اهئ اهئ شنو هادشي 

سلمى : تهدني أصاحبتي انا و خلعتيني 

نورسين: اهئ اهئ ياكما هاد العمارة مسكونة اهئ اهئ سلمى ديري شي حاجة عفااك 

سلمى:*شداتها الهيستيرية ديال ضحك* هههههههههه اش عندي ما ندير كاع واش عاودولك عليا فقيه تبتي راسك أ زمرة راه غير وقع ليهم عطب دابا يصلحوه 

نورسين بدات كتحس بالخنقة و الدموع هابطين من عينيها و الخلعة فشلاتها ولا و جهها صفر و شنايفها بويض 

سلمى حسات بالخطر على نورسين هزات تيليفونها صيفطات ليعقوب ميساج باش يفتحوه دغيا 

ما كاملاش دقيقة تفتح لاسانسور 

سلمى: غير كتزيد ي فيه هاهو تحل 

نورسين خرجات و تبعاتها سلمى 

نورسين:*شادة فقلبها * ما كنزيدش فيه أصاحبتي هادشي ماشي طبيعي اشداني نتفرج فشي فيلم دالخلعة 

سلمى: وا حتى تكوني تفرجتي بعدا نتي مشيتي غير طليتي على الفيلم و جيتي 

حلات نورسين الباب ديال الابارطمون ديالها و يديها كترجف و العرق كيتصبب منها و تبعاتها سلمى دخلو لداخل وشعلات نورسين ضو و دخلات لصالون و جلسات شادة على قلبها 

نورسين: غادي نمشي نعس باش نسا هاد الخلعة 

بالوقفة باش كتوقف تطفا عليهم الضو و هي ترجع تجلس نورسين وشدات على قلبها و غوتات 

نورسين: ظلااااام أسلمى اهئ اهئ فييينك ما كايبانلي والو سلللللمى اهئ اهئ 

دارت يديها على ودنيها و غمضات عينيها وبدات كتقرا ماتيسر من آيات القرآن الكريم حتى حسات بضو رجع حلات عينيها و هي تسمع سلمى كتغوت فالكوزينة ناضت كتطير عندها و هي تفشل بقوة الخلعة و طاحت لارض لقاو قطة سوداء واقفة من فوق البوطاجي و مكتوب فالحيط بلون أحمر ( ما عمركم غادي ترتاحوا ديما غادي نتبعوكوم الا ما خرجتولينا من دارنا)

نورسين ما قدراتش تحمل غيبات فخطرة وحدة سلمى بدات ضرب ففخاضها 

سلمى: اويلي هاد المصيبة غادي تمشي تموتلي فيدي 

*مشات عمرات الكاس بلما و بدات ترش فيها باش تفيق* نووورسين فيقي غير لاعبين معاااك نووورسين *بدات تضرب على وجهها وهو يصونيلها تيليفون لقاتو يعقوب و دوزات الخط* 

يعقوب: أمدرا تخلعات 

سلمى:وا هاد الزمر غيبات كاع ماشي غير تخلعات فين هو جبل 

يعقوب: هاهو معايا 

جبل خطف تيليفون من يد يعقوب 

جبل: شنو واقع 

سلمى: *كتفتف* احم ما واقع والو 

جبل قطع تيليفون ولاحو ليعقوب و خرجوا من واحد الغرفة كانت لتحت فالعمارة كان معاهم لي طيكنيسيان اللي مكلفين بالمصعد و العمارات هما اللي كانو كيلعبوا فالاضواء و فالمصعد و طلعوا فالاسانسور حتى وصلو لابارطمون دق جبل بسرعة و فتحاتلو سلمى داز فيها ودخل لقا نورسين طايحة فالارض مغيبة ماحس براسو حتى حنى لارض وهز ليها راسها على ركابيه حتى هو تخلع عليها بزاف هزها من الارض بسرعة و خرج من الابارطمون و تبعوا يعقوب و سلمى 

جبل حس بدنب فهاد اللحظة ما غاديش يسامح راسوا الا وقعات ليها شي حاجة كيشوف فيها بأسف وهي بين أحضانو قلبو تزير عليه ما بغاش يوصلها لهاد الحالة ولكن الغاية تبرر الوسيلة بغا يخلعها باش ما تقدرش تعيش فشي دار بوحدها و بالتالي غادي تبقا ديما فجنبو كان أناني فتصرفوا طبعا ولكن هدا هو الحل الوحيد باش تبقى محبوبتو فجنبوا 

طلعوا فالطوموبيل يعقوب و سلمى ركبو لقدام و جبل طلع نورسين لمقعد الخلفي و جلس حداها وبدا كيمرر يدو على خدها 

جبل: سمحيلي عفااك *هز يديها باسها* 

يعقوب:*كيشوف فجبل بأسف من المرآة الامامية ديال سيارة* جبل فين غادي نمشيو 

جبل: *كيهدر و عينو على نورسين*لفيرمة 

تنهد يعقوب وشاف فسلمى وديمارا الطوموبيل عم الصمت لدقائق حتى هدرات سلمى 

سلمى :فنظركم هادشي اللي درنا هو الحل

يعقوب: انا مابقيت عارف والو و مابقيت فاهم والو 

جبل:*كيهدر و عينيه حومر * مااااااتزيدونييش حتى نتوما هااااادشي الللي فيااااااا مكفيييني 

نورسين بدات كتوعى حلات عينيها شوية بشوية و هي تلقا حداها جبل جالس فجنبها ماحسات براسها حتى عنقاتو و بدات كتبكي و تشهق الخلعة مازال فيها ولا وجهها صفر 

جبل بحال ضربتيه بضو فهاد اللحظة حس بداتو كترجف عقلو وقف قلبو هو العضو الوحيد اللي بقا خدام و كينبض بكل قوة العرق كينزل من جبينو بغزارة ماعرفش واش يفرح ولا يحزن على الحالة اللي وصلها ليها هز يدو بتثاقل ومررها على شعرها الابتسامة شقات طريقو بسرعة و هو كيلامس خصلات شعرها زاد ضمها ليه وحشا راسو فعنقها كيشم ريحة عطرها ناعمة و دافئة بحال شخصيتها ما كرهش كن توقع معجزة و توقف ساعة فهاد اللحظة و فهاد المكان و فهاد الزمان نورسين بين أحضانو كانت هادي هي اقصى امنياتو وها هي تحققات للحظات فكر كيفاش غادي يكون ملمس شفاهها اكيد الا لامسهوم غادي يكون وصل لجنة و ديك ساعة كيفما كنقولو الا بغات تجي لموت غير تجي غمض عينو و بدا كيتخايلها بفستانها الابيض اكيييدغادي تطلع 

أميرة الأميرااات شحال كيتمنى يشوفها بهاد الفستان و يكون هو حبيبها و زوجها و سندها فالحياة واش يقدر شي نهار يصارحها بالحقيقة اللي هاز من سنين فقلبو حتى لامتى غادي يبقى صابر وهي بعيدة عليه فيقوا من احلامو صوت شهقات نورسين اللي كتعلى و كتحاول تبعد عليه حل عينو و بعد عليها وشاف فيها بعينين هايمين فتفاصيلها بحال شي واحد كان كيحلم حلم جمييل ما كانش كيتمنى يفيق منو

يعقوب وقف الطوموبيل و سلمى نزلات من الكرسي الأمامي و طلعات حداها عنقاتها جنب ونورسين كتبكي و تشهق أخيب حاجة هي الخلعة اللي كتفشل ليك الركابي صراحة هي في موقف لا تحسد عليه 

نورسين: اهئ اهئ ما عمري غادي نسكن بوحدي فشي دار ديوني معاكم عفاااك أسلمى عفاااك 

نورسين شداتها الهيستيرية د البكا ووجهها ولا حمر و رموشها فازكين و شنيفاتها حومر 

سلمى:*كتدوز يديها على شعرها * شوووت ما عمرني غادي نخليك بوحدك غير تهدني دابا 

نورسين: كن غير بقيت مع جدي و جدتي ما عمر غادي يوقعلي هادشي أهئ اهئ وليت كنخاف أسلمى بزااااف اهئ اهئ عاونيني 

جبل مع كل كلمة كتنطقها كيزيد يحس بدنب و كيتعصب حيت كطلب من سلمى المساعدة وهو بحال شي حيط حداها ما تسوقاتش ليه وهو اللي كان غادي يسكتلو القلب و مخلوعة عليه جمع يدو على شكل لكمة و قال بصوت خشن 

جبل:نوورسيين شوفي فيا 

دارت نورسين شافت فيه 

جبل: علاش دايرة فراسك هاد الحالة 

نورسين: دار اللي كريتيلي مسكونة اهئ اهئ ندمت علاش فكرت نعيش بوحدي اهئ اهئ 

جبل فرح بزااااف منين سمع هاد الهدرة ادن ماعمرها غادي تقدر تبعد عليه ادن خطة ديالو نجحات مية فالمية و ماعمرها غادي تفكر تسكن بوحدها مزال وهنا غادي يدوز لخطة ثانية اللي موجد ليها واكيد حتى هي غادي تنجح ابتاسم و حس براسو طاير فالسما فهاد اللحظة الحظ بدا كيوقف لجيهتو من جديد و القدر بدا كيقربها منو خطوة بخطوة واخييييرا الدنيا بدات كتضحك ليه و ربما كتعوضوا على البعد عليها من عشرين عام 

نعسات نورسين على كتف سلمى و جبل حاضيها بعينيه و كيفكر فالخطوة الموالية اللي غادي تزيد تقربها منو أكثر و أكثر 

وصلو لفيرمة حبس يعقوب اللوطو قفزات نورسين و فاقت ولات مخلوعة من أبسط الاشياء 

سلمى: بسم الله عليك هاحنا وصلنا 

نزلو من الطوموبيل كلهم و دخلو لدار لقاو غير الظلام حيت كانت الوحدة د الليل و كلشي ناعس 

نورسين شدات فيد جبل بقوة الخلعة 

جبل: تهدني أنا حداك ما عندك مناش تخافي يعقوب شعل الضو دغيا 

تقدم يعقوب بسرعة و شعلوا الانوار عاد إرتاحت و تهدنات 

جبل: خاصك ترتاحي طلعي لبيتك تنعسي و نساي داكشي لي شفتي واخا 

نورسين دارت شافت فسلمى كانت من موراها 

نورسين: سلمى عفاااك نعسي معايا هاد الليلة 

سلمى كتحس بدنب ندمات كاع علاش شاركت معاهم فهاد اللعب الباسل حركات ليها راسها بالايجاب و طلعوا لبيت بدلوا حوايجهم و نعسوا فوق الناموسية و سلمى معنقاها عندها وهي مزال فيها رجفة و الخلعة و غير كتخايل داكشي اللي شافت كتنوض تبكي 

سلمى: صااافي أنورسين طيبتي عينيك بالبكا و الله نساي شوية ياك حتى انا كنت معاك و شفنا داكشي و ما درتش هاد الحالة اللي دايرة نتي فراسك 

نورسين: ما قدرتش أسلمى راه داكشي كيخلع أصاحبتي اهئ اهئ وانا كنخاف غير انا و راسي بقا غير نشوفهوم قدامي اهئ اهئ 

سلمى: اوا صافي حتى نتي ماشي نتي اللولة و لا لخرة اللي وقع ليك هادشي راه فكل دار عندها ماليها غير كاينين ضريفين اللي مخبعين و كاين اللي كايبانو عادي وحنا مسلمين و عارفين داكشي كاين ياك مدكور فالقرآن حمدي الله اللي غير شفناهم و ما صيفطوناش لثلث الخالي هههه 

ابتاسمت نورسين و بدات كتضحك فوسط دموعها 

سلمى: اوا هاكاك ضحكي و نساي شوية و نعسي راه هادي الوحدة د الليل واش بغيتي يخرجونا عاود هنا ههه 

نورسين: الله يستر هاهي غادي تنعس و لكن ما طفيش ضو عفاك خليه مشعول 

سلمى: واخا غير غمضي عويناتك و رتاحي دابا ما تفكري فحتى حاجة 

عند جبل 

جالس فالبيرو ديالو و معاه يعقوب راد راسو اللور و كيفكر فالخطة و المرحلة الجاية اللي غادي تقلب حياة نورسين رأسا على عقب كيدرس الخطة من جميع نواحي باش يلعبها مزياااان و ما تشك فحتى حاجة و هادشي فصالحو الهوس ديالو و لا كيدفعوا يخطط شي خطط جهنمية اللي ممكن يكون أناني فيها ولكن جبل كيآمن بحاجة وحدة اللي هي نورسين خاصها تبقا تحت عينيه و حداه 

جبل: يعقوب عرفتي شنو هو أصعب إبتلاء 

يعقوب: الله و أعلم

جبل: يكون شي شخص ماشي نصيب ديالك ولكن كيعيش هنا *كيضربوا فصدرو* فقلبك عرفتي فاش كتكون مدمن على شي شخص ما كتقدرش تبعد عليه 

يعقوب:*كيشوف فيه بشك* جبل علايش ناوي بنتيلي جالس و ساكت و كتخمم و دابا كتقول هاد الهدرة فشكل *سكت لثواني وقال* ديك نورسين مسكينة بقات فيا داكشي اللي درنالها غادي يدير ليها الفوبيا من ظلام و من انها تسكن بوحدها من بعد واش فنظرك هادشي اللي درتي هو الحاجة صحيحة 

جبل: كلشي مباح فالحب و الحر٠ب نقدر نقتل بنادم باش تبقا حداية ما يهمنيش شنو كندير ولا شنو غادي ندير يكفيني تكون فجنبي و حدايا حتى واحد ما حاس بيا حيت بصح كن كنتي فبلاصتي غادي تفهمني 

يعقوب: انا كن كنت فبلاصتك نوقف عليها و نقولها راني باغيك أبنت الناس ما نبقاش خاليها فقلبي 

جبل: وشكون قالك انا غادي نبقا خاليها فقلبي 

يعقوب وقف و عاود جلس 

يعقوب: كيفاش ؟ يعني غادي تقولها ليها و فوقاش؟ 

جبل: غير بشوية عليك يقدر غدا يقدر بعدو يقدرمن هنا لصيمانة من هنا لشهر او لا من هنا لعام المهم فاش غادي نحس بالوقت المناسب غادي نصارحها 

يعقوب: جبل هانتا أصاحبي غير تشجع و قولها ما غادي تخسر والو الا كنتي خايف ما تقبلش بيك حيت دخلتي لحبس فالصغر حتى انا تحبست و هاهي سلمى فخبارها كلشي و قابلة بيا والا كنتي خايف ما تبغيكش حاول غير تقرب ليها و لصقها بحال بنت خالك كاميليا و شوف ديك ساعة و الله حتى تبغيك انا راك شيبتيني بالله صاافي باركة هاد العداب اللي معيش فيه راسك أصاحبي راه كنشك بلي نتا ماشي طبيعي واش من عشرين عام ونتا كتبغيها ومااا عمرك ماشفتي فشي بنت المرا على قبلها و مخبي هاد الاحاسيس فقلبك هاد المدة كاااملة بالله الا الحماق معاك 

جبل: يعقوب ما تدخلش الله يرحم والديك خليك بعيد على هادشي صاحبي اييه ولكن ما دخلش فقرارتي و اموري شخصية 

يعقوب:*ضرب على فمو* هاهو ساكت حتى نشوفو حريرتك فين غادي توصل على الله غير تكون الفايدة 

جبل: غدا غادي تجمع حوايجك نتا وسلمى و غادي تمشيو 

يعقوب:*وسع عينيه فيه* لا واش دابا كتجري عليا ولا غير جابولي ودني 

جبل: دير داكشي اللي قلتليك و سد حلقك 

يعقوب: شي فكرة جديدة هادي عاود 

جبل: بحال داكشي 

🌤🌤🌤🌤🌤 أصبح يوم جديد سيشهد على أحداث لا تخطر على البال 

بدات كتقبح نورسين و جهها حيت زعجاتها أشعة شمس اللي داخلة من نافدة الزجاجية ديال البيت حلات عينيها و بدات كتحكهم بصبعانها و كتفوه ناضت كتجبد و تكسل دورات وجهها لجيهة اللي حداها مالقاتش سلمى هزات عينيها تشوف شحال الوقت فساعة الحائطية اللي معلقة أونفاص ليها لقاتها تسعود د صباح دخلات لطواليط قضات حاجتها و خرجات لبسات سورفيت فالبيض مع سروال ديال تجينز و كلاكيطة فرجليها و هبطات لتحت تقلب على سلمى سمعات شي صداع مجهد لتحت ما عرفات راسها باش تبلات سرعات فخطاويها حتى نزلات لسفلي و حلات عينيها بقوة الصدمة من داكشي اللي شافت 😳😳😳

كانو مجموعة من الشوانط وسلمى لابسة كسيوة فالحمر حد الركبة غير السماطي و دايرة عليها بوليرو فنفس اللون ودايرة قبعة شمسية و حداها يعقوب لابس سروال فالبيض وقميجة فزرق وحتى ياسمين و عبد المالك لابسين ومقادين باينة عوالين يسافروا و جبل هاز سارة كيلعب معاها و كيهرها صوت ضحكاتها مالية المكان باينة جبل ناشط 

نورسين: صباح الخير 

كلهم إلتافتوا عندها وشافو فيها ناضت سلمى لعندها كضحك معاها 

سلمى: صباح النور زين كي صبحتي 

ياسمين: بنتي كي بقيتي 

نورسين: حمد الله يسول فيكم الخير ولكن فين غاديين على صباح 

سلمى: ماما و بابا جاو من السفر و يعقوب إقتارح علينا نمشيو نخيموا فتركيا انا و ياه و ماما و بابا و جدي و جداتي و سارة جبل ما بغاش يمشي معانا حيت عندو الخدمة 

نورسين تشوكات و تصدمات فهاد اللحظة حسات براسها بحال غير زايدة ناقصة حتى من صاحبتها اللي قالت غادي تديها معاها لدارهم و تخدم و تعيش معاهم هاهي غادي تمشي لتركيا و تخليها خصوصا أنها ما بقاتش كتقد تعيش بوحدها بسباب داكشي اللي عاشت خلاها كتخاف بزاف غير هي وراسها 

نورسين: *تغرغروا عينيها*طريق سلامة نتمنالك رحلة ممتعة 

دارت و طلعات فدروج لبيتها و زدحات الباب بجهد و جلسات لارض كتبكي كتحس براسها بصح ما بقالها حد فهاد دنيا الا كان باها لاحها و ما حنش فيها بقات غير صاحبتها اللي عاد عرفتها ولكن ما توقعاتش منها غادي تمشي و تخليها بوحدها و حتى من ياسمين و عبد المالك غاديين معاهم أش هاد الزهر يعني غادي تبقى غير مع جبل فنفس الدار و هي ما كتربطها معاه حتى علاقة و كيفما قالتلها سلمى غادي يكون حتى هو خدام محال واش يجلس معاها فدار ادن غادي تضطر تبقى جالسة بوحدها فهاد الدار اللي كبيرة بزاف ولات عندها فوبيا من أنها تبقى بوحدها فدار ولات كتخاف تمشي تخرجلها شي حاجة دارت يديها على ودنها وبدات كترعد غير هي و راسها 

عند جبل 

جبل: كلشي غادي هو هداك 

سلمى: ولكن هاكا غادي تاخد مني موقف أجبل حرام عليك ديما كتخليوني نبان أنا اللي ما مزياناش 

جبل: طلعي هدري معاها باش تكمل الخطة اللي راسم فبالي 

سارة:*كتشوف فيهم بتشكيك* علايش كتهدروا ما فهمتش إينا خطة هادي

جبل:**جرها من نيفها* هادشي د الكبار ماشي قدك تفاهمنا 

ناضت سلمى طلعات فدروج عند نورسين دقات فالباب ما بغاتش تحل ليها الباب 

سلمى: نورسين حلي أصاحبتي 

نورسين ناضت من الرض و مسحات دموعها و حلات ليها الباب 

نورسين: نعام 

سلمى: لا واش كتبكي مالكي أ صاحبتي 

نورسين: لاااا ما ماليش غير غاااادي تخليوني بوحدي فهاد الدار ما توقعتهاش منك أ سلمى من مور داكشي اللي وقع البارح ما بقيتش كنقدر نجلس بوحدي فهمتي وليت كنخاف من ظلي *شدات فيديها بترجي* عفاااك بقاي معايا أ سلمى راه ما نقدرش نبقا بوحدي 

سلمى: ولكن جبل غادي يبقى معاك ما عندك مناش تخافي 

نورسين: واش باغا تحمقيني عرفت جبل غادي يبقا معايا فدار ولكن هنا المشكل واش أصاحبتي حنا كفار ولا مسلمين جاوبيني ما نقدرش نبقا فدار مع راجل ما كتربطني بيه حتى علاقة راه الحماق هادا راه ما كدخليش لعقل كن بقات جداتي ياسمين و جدي 

عبد المالك واخا حتى بقيت معاه ولكن راه ما نقدرش أ صاحبتي والله ما نقدر لقاي لي شي حل عفاك اهئ اهئ 

سلمى : واخا أجي معايا نهبطوا لتحت 

نورسين: اش غادي نديروا لتحت واش انا كنقولك لقاي لي شي حل و نتي كاتقولي لواه نهبطوا لتحت 

سلمى: وادابا غير زيدي قدامي بلا ما تزيدي الهضرة 

سلمى هبطات و تبعاتها نورسين حتى وصلو لسفلي 

كلهم إلتافتوا ليهم بإستثناء جبل اللي ما دارش و بقا كيضحك و متأكد مليون فالمية بلي غادي تقبل العرض ديالو و بدا كيلعب مع سارة بحال ما واقع والو 

سلمى: قالتلكم نورسين ما بغاتش تبقا مع جبل بوحدها حيت ما كتربطها بيه حتى علاقة لقاو ليها شي حل 

قالت سلمى هاد الكلمات و مشات جلسات حدا جبل دار شاف فيها و ابتاسم ليها و دار ليها لايك بيدو 👍👍 

نورسين مسكينة بقات غير مطرطقة عينيها و كتحاول تستوعب واش بصح سلمى فرشاتها و لا غير جابولها و دنيها وجهها ولا أحمر و حنات عينيها لارض كن صابت الارض تشق و تبلعها فهاد اللحظة ما تكرهش 

سارة: لاااا عمو جبل زوين علاش ما بغيتيش أخالتو نورسين تبقاي معاه 

جبل: شفتي أبنتي شفتي الظلم تقول شافتني بوعو ياك * بدا كيهر سارة و هي كتضحك*

ياسمين: علاش أبنتي ما بغيتيش تبقاي مع جبل راكي عارفاه بعقلو كن كان شي حد طايش او لا باقي صغير انا براسي ما نخليكش معاه

يعقوب:لا أجدة صراحة ما بقات ثيقة فهاد الزمان هههه ياك أجبل 

جبل هز راسو شاف فيه و غلباتو ضحكة 

عبد المالك: نكريولك أبنتي شي دار بوحدك وهاكا ترتاحي 

هزات نورسين راسها شافت فعبد المالك و حركات راسها بنفي 

نورسين: كنخاف نبقا بوحدي أجدي 

ياسمين: ولكن أبنتي حنا ضروري خاصنا نمشيو نشوفو العائلة ديالنا الاغلبية ديالهم ساكنين فتركيا و سلمى و يعقوب بغاو يخيموا تما ما كاين حتى حل 

نورسين تغرغروا عينيها بدموع 

نورسين: من بعد الله عندي غير نتوما كيفما كتعرفوا عائلتي لاحتني ونتوما اللي فتحتولي باباكم الله يجازيكم بخير خيركم كبير عليا الا بغيتو تمشيوا صافي غير سيروا نقدر نرجع عند ماما و بابا لدار على الله يسمحولي و نرجع نعيش معاهم 

وقف جبل و كرز على يدو و قال بصوت زعزعهم كاملين 

جبل: الا هاداك الحل أنورسين 

دار شاف فيها و مشا وقف حداها 

جبل: الا كانت عائلتك لاحتك حنا عمرنا نتخلاو عليك ولا نلوحوك انا عندي الحل اللي غادي يرضيك مؤقتا تفضلي معايا لبيرو نهدر معاك 

تقدمات نورسين لامام و هو تابعها من اللور و كيضحك و كيبتاسم من هادشي اللي غادي يدير و اكيد خطة ديالو غادي تصدق غير كيتفكر بلي غادي تبقا بقربو ويشوفها ليل و نهار قادر يتخلى على ممتلاكاتو كلها باش يعيش مثل هاد اللحظات 

وصلو لبيرو وحلو جبل و نورسين عينيها فالارض 

جبل: تفضلي كتسنايني نعرض عليك دابا راك وليتي مولات الدار هه تفضلي 

دخلات نورسين كتبتاسم جلس جبل من فوق البيرو 

جبل: واش انا كل مرة نقولك شنو خاصك ديري جلسي أنورسين باش نهدر معاك 

جلسات نورسين وجهها غادي يطرطق بالحمورية و الحشمة من بعد ما فرشاتها سلمى قدامو ما كرهاتش طير عليها تقجها 

نورسين: *هزات راسها شافت فيه* نعام 

جبل:*رد راسو اللور و هز واحد الستيلو كيلعب بيه و بقا ساكت لعدة ثواني عاد هدر* كلشي غادي يخويفي الدار و عائلتك مستحيل ترجعي ليهم حيت نحلف بحلوفي باك ما غاديش يقبل يدخلك وحتى الا سمحوليك غادي يعاملوك كي جفاف ترضايها لراسك 

أ نورسين 

حركات راسها بنفي و كتفرك يديها بقوة التوتر 

نورسين: لا 

جبل: و داكشي اللي وقعلك البارح فدارك كون عندك فوبيا من الاماكن اللي كتبقاي فيهم بوحدك *وقف و كمل هدرتو* غادي نبقا غير انا وياك راس فراس و هادشي ما غادي يبغيه لا ربي لا عبدو كنبقى رجل أجنبي بالنسبة ليك وحيت انا كنخاف على شرفك اكثر منك انا ما غادي نخلي حتى واحد ينعت فيك اولا يشوف فيك شي شوفة ناقصة 

هزات راسها و شافت فيه بعينين كتلمع بالفرحة عجبها تفكيرو و كيفاش كيخاف على شرفها و كيفاش ما باغي يشوف فيها حتى شي حد نظرة خايبة حقا جبل إنسان رائع كل مرة كيدير شي حاجة كيزيد يكبر فعينيها أكثرمن قبل ولكن غير كتفكر بلي هو على علاقة بكاميليا كتعبس وجهها حقا ولا كيعجبها بزاااف بأفكارو رائعة و كلامو الموزون و شخصيتو و جسمو الجداب فاش كتكون معاه قلبها كيبدا يضرب بجهد الحب بدا كيطرق باب قلبها شوية بشوية و كيتسلل لو فرحات حيت مازال رجال فالدنيا اللي عندهم النفس على بنات ناس 

نورسين: شكرا 

تمشى جبل بخطوات موزونة و ثابتة حتى و صل لحدها من فوق راسها و جا أونفاص ليها 

جبل: الحل الوحيد اللي عندنا هو تزوجي بيا هاكا غغدي تولي عندنا علاقة شرعا وما عند حتى حد الحق يدخل فينا و هاكا غادي تعيش معايا و انتي مرتاحة

جملة (تزوجي بيا ) بدات كتكرر فمساميع نورسين عدة مرات الجملة اللي ما عمرها حلمات تسمع بيها الجملة اللي خلات قلبها يضرب فالالف الجملة اللي تصدمات و تشوكات و هي كتسمعها واش حقا السيد جبل الابراهيمي بجلالة قدره كيطلب يتزوج بها عمرها حلمات بلي غادي يجي واحد النهار غادي تسمع هاد الجملة و السبب د هادشي كامل راجع لاخت الفاضلة كنزة اللي كانت ديما كتقولها هاد الجملة ما عمرك تحلمي تسمعي بيها وما عمر ولد المرة يجي يطلب يديك عمرها تصورات بلي شي نهار غادي تحط فهاد الموقف لسانها تربط فهاد اللحظة تزيزنات بحال كبيتي عليها سطل د الما بارد و مثلج قالت بصوت ما مسموعش 

نورسين:كيفاش ؟ 

جبل حنى لنفس المستوى ديالها 

جبل: سمعيني مزياااان عرفتك تصدمتي و ما كنتيش متوقعة مني نقولها ولكن هاد الزواج غادي يكون لمصلاحتك من درجة الاولى هدا هو الحل الوحيد باش نقدرو نعيشوا فدار وحدة و انا مطمن بلي حتى وحد ما غادي يقدر يقول عليك شيى كلمة د العيب شنو قلتي موافقة ولالا 

نورسين: ولكن انا وياك زعما كيفاش غادي نقدرو نتزوجوا و حنا ...*حنات راسها* 

جبل:*كيهدر بألم* حنا غادي نكونو غير أصدقاء ماشي الزواج اللي فبالك تقدري تقولي حنا غادي نكونو مزوجين غير فالوراق نتي غادي تنعسي فبيت وانا فبيت و ما عمري غادي ندير شي حاجة اللي تقلقك او لا تقلل من قيمتك حنا غادي نكونو امام ناس كنبغيو بعضياتنا ولكن بيناتنا أصدقاء فقط *زير على يديه و كمل هضرتو ضاغط على سنانو* وإلا بغيتي تطلقي مني وتعيشي حياتك غادي نطلقوا بسهولة فهمتي 

نورسين غير كتشوف فيه ما عرفات باش غادي تجاوبوا و كتفكر الا كانت ياسمين و عبد المالك هازين دوك شوانط كلهم يعني غادي يطولو الجلسة فتركيا و واخا ترجع سلمى ما تقدرش تعيش معاها يقدر واليديها ما يبغيوش ادن الحل الوحيد اللي بقا قدامها هو جبل و ما تقدرش تعيش معاه الا ما كانت بيناتهم حتى علاقة والزواج هو الحل الامثل لحالتها واش كيدير هادشي غير باش يحميها ولات كتحس بلي ربي حطلها جبل باش يحلها المشاكل اللي عندها فحياتها 

صمتات نورسين لعدة دقائق و أفكار تديها و أفكار تجيبها جبل كينتاضر كلمة {قابلة} تخرج من فمها كيحس بيها بلي كتختابر صبرو قلبو بدا كيضرب بجهد واخا متأكد مليون فالمية بقبولها ولكن كيبقا عندو داك تخوف ديال تقدر ما تقبلش و تبغي ترجع لعائلتها 

نورسين: موافقة 

جبل غمض عينو و حمد الله فنفسو واش بصح غادي تولي ملكو بوحدو قدام الله و قدام العباد حقا ما متيقش ما كرهش يكون هاد الزواج حقيقي ولكن على الاقل غادي تبقا معاه فدار وحدة و تقدر تحبو و تبغيه ما حس بالبتسامة حتى شقات وجهو تنهد تنهيدة حارة خارجة من أعماقو كان عارف بلي غادي توافق ولكن توتر حيت شافها سكتت مدة طويلة عاد عطاتو جوابها كان قلبو غادي يسكت فديك لحظة 

💓💓💓💓 

إخسر ماشئت لكن إياك أن تخسر قلبا 

يحاول أن يفعل الكثير ليسعدك 

فهناك قلوب لا تعوض أبدا 

💓💓💓💓💓💓

جبل: سووووبر دابا غادي نوضوا نقولوها ليهم باش هاكا حتى هوما يرتاحو 

نورسين: عندي واحد الشرط عفاك 

جبل: تفضلي ما يكون غير خاطرك 

نورسين: فاش غادي نقولوهالهوم اكيد جدي و جدتي غادي يبغيو يديروا شي حفل صغير عفاك انا مابغيت والو غادي نمشيو عند العدول نتكاتبو و نجيو هاكا غادي يكون أحسن حيت كيبقى غير زواج مزيف 

جبل ما عجبوش الحال فاش قالت زواج مزيف شنو كتقصد بكلامها يعني عمرو غادي يكون حقيقي واش بصح ما كتحس بحتى نغزة إعجاب من جيهتو شحال خايب فاش كتيق واحد الحلم الجميل و لكن الواقع كيفيقك منو بتصرفاتها كيجيبلو بالو بحال عندها زايد ناقص ما كتقدرش حتى شوية من المجهودات اللي كيدير على قبلها واش حتى لهاد درجة قلبها قاصح واش حتى لهاد درجة ما كتشوفش كيفاش كيهتم بيها ومعاملتو الخاصة اللي كايعاملها بيها هز راسو شاف فسقف و غمض عينو و كرز يدو وشاف فيها

جبل: مايكون غير خاطرك 

نورسين : شكرا 

جبل: تفضلي 

خرجات نورسين و جبل تابعها من اللور و كيخمم كيفاش غادي يقدر يرطب قلبها من جيهتو باش نهار يعتارف ليها تقبلو بصدر رحب و تقبل بيه ااااااخ شحال كيناتظر نهار اللي تبادلو فيه إحساسها عندو أفكاااار كثيرة شحاااال من حاجة بااغي يعيشها معاها و شي بنيتة كتكوتة بحااالها باغيها تخرج كتشبهلها فكولشي اااااخ نورسين كن تعرف شنو مخبي ليها فقلبو من أحاسيس و مشاعر تخجل من تصرفاتها معاه حط جبل يدو على قلبو و عينو كيتأملو خطواتها و مشيتها و حراكاتها كتحمقو فاش كترد شعرها لجنب و هي غادة و لا فاش كيولي وجهها حمر فاش كيهدر معاها كيتمنى كن كان هاد زواج حقيقي ولكن أكيد غادي يجي واحد نهار و غادي يكون حقيقي عارف ربي عمرو ما غادي يضيع سنين ديال تعب و دعاء باش تكونو ملكو حقا حب ديال جبل غريب و نااااادر صعيب تلقا اللي يبغيك لروحك ماشي لجمالك او المايكاب اللي كدير او لا حبت عندك صدر كبير و طرمة لاااااا حب جبل لنورسين جد بريئ تعلق بيها حقا حيت هي ملاكو طاهر و فعينو ما كاينش بحالها نسااااء الكون واخا يتجمعوا كاملين ما غاديش يوصلو لربع من جمالها عينو كتشوفها أجمل الجميلات

وصلو لسفلي لقاوهم كلهم مجموعين نطق جبل بصوت باينة فيه فرحان 

جبل: غادي نتزوج بنورسين على سنة الله و رسوله 

نورسين حنات راسها و خدودها غادي يطرطقوا بالحشمة واخا غير زواج مزيف كيبقى إحساس جديد عليها مزال ما متيقاش بلي بصح غادي تزوج 

سلمى ناضت عند نورسين كتطير 

سلمى: اويلي كي درتو ليها 

ياسمين: *بابتسامة* مبروك عليكم 

عبد المالك: امتى حتى بغيتوا بعضياتكم جبل وليتي تخبي علينا 

يعقوب وقف و ناض عند جبل 

يعقوب: زربتوا علينا كيفاش عاوتاني غادي نتزوجوا 

سلمى جرات نورسين و طلعوا لبيتها و سدات سلمى لبيت وبدات كتشوف فنورسين بتشكيك 

سلمى: صدقتي ما ساهلش يا بنتي يا نورسين 

نورسين هزات راسها شافت فيها وقالت 

نورسين: لا والله ما هاكاك راه غير... 

سلمى: سكتي ما تقولي حتى حاجة صدقتي بخبيزتك نتي على علاقة بجبل و ما قلتيهاليش حشومة عليك *ضرباتها بقرصة لنورسين حتى تأوهات* دوي يا جنية يا شويطينة كيفاش وقع هادشي بيناتكم كنتوا كتساينو غير نخويو دار و ديروا ما بغيتو 

نورسين : وا ماشي هاكاك خليني نشرحلك *كتحك بلاصة القرصة*يدك شحال مسمومة يا صاحبتي 

سلمى: *زادتها قرصة وحدة أخرى*هانا غادي نوريك سم ياك ديما كنت كنقولك أنورسين واش كيعجبك جبل كتبقاي لالالا جبل بحال خويا و حقة و الواد ما عمري نشوف فيه شي نظرة ماشي هي هاديك انا ما عمري غادي نتزوج بيه دوي شنو تغير دابا 

نورسين: واااااا سكتي اوووف طلعتيلي فراسي لوك لوك لوك و ماكتساليش من الهدرة تقول صارطة كاسيطة هانا غادي نفهمك غير سدي حلقك 

سلمى: اوا شرحيلي شنو كاين 

نورسين: دابا نتوما كلكم غادي تسافروا ياك و انا ما نقدرش نبقا فدار بوحدي و فاش مشينا لبيرو قالي جبل غادي نتزوجوا زواج مؤقت باش على الاقل تربطنا واحد العلاقة مع بعضياتنا كيفما كان الحال انا كنبقى انسانة محافظة و عارفة حدودي و من فوق هادشي كامل أش غادي يقولو ناس الا شافوني عايشة مع واحد فدار ما كنعرفوا ما كيعرفني وحتى جبل قالي بلي ما عمرو غادي يخلي شي حد يحل عليا فمو بشي كلمة د العيب يا ختي زاااد كبر فعيني بهاد تصرف 

سلمى : امم دابا فهمت و انتي موافقة بعدا 

نورسين: اكيد موافقة ربي جابلي راجل وانا نقول لا دجاجة بكامونها و ملحتها ههههه 

سلمى: ههههههه والله حتى سعداتك شحال و نتي جالسة حتى جاك راجل على مزيناتو طاح عليك من السما حسدتك فهاد اللحظة

نورسين: ههه غير كنضحك صراحة قبلت حيت هادا هو الحل الوحيد اللي عندي راكي عارفة ما بقيتش كنقدر نبقا فشي دار بوحدي ولات عندي فوبيا و الله ونتي غادي تسافري و تخليني اللهم نوافق حتى نلقا شي حل لراسي و لهاد الفوبيا اللي ولات عندي 

سلمى: وشحال غادي تبقاو مزوجين 

نورسين: قالي جبل نهار تبغي تعيشي حياتك قوليهالي نعطيك طلاقك 

سلمى بدات كتبتاسم بشر 

سلمى: دابا الا تزوجتي بجبل ما غادي ديروا زعما والو واخا نتوما فدار وحدة 

نورسين: أش غادي نديروا 

سلمى: هزو البندير و طلعوا لاكادير أش غادي ديروا دارلي نيت انا اللي جالسة نسول فيك 

نورسين: *غمزاتها* مال تفكيرك منحرف أصاحبتي راه انا غادي نعس فبيت و هو فبيت واش ما كتفهميش بلي غير زواج مؤقت هو أصلن قالي حنا غادي نكونو غير أصدقاء بيناتنا فهمتي 

سلمى : ونتي شنو إحساسك أ المصيبة كيعجبك اولا يكما بديت تحبيه و مخلياها فقلبك 

نورسين شافت فيها و مشات جلسات من فوق الناموسية 

نورسين: الله يهديك هاهو حتى عجبني و بغيتو واش هو غادي يبغيني كيفما قلتي داك المرة هو البنات كيحماقو عليه و كيعرف غير شكون و شكون وابسط مثال كاميليا بنيس أشهر ميكاب أرتيست بنت خالو كتحماق عليه و باينة حتى هو كيبغيها انا كنبقى غير بنت بسيطة لاحوها عائلتها بنت فقيرة ما لاقية حتى فين نعيش كن ما كنتوا نتوما كن راني مليوحة فزنقة *دمعوا عينيها*من الاحسن ما نتعلقش بيه باش ما يخيبش أملي كانت ماما كتقولي ما تبقايش تشوفي لفوق حيت تقدري تعكلي و تجي مزدوحة على راسك ما نكدبش عليك انا جبل كيعجبني و ما يمكنش ما يعجبنيش بشخصيتو و حنيتو و ظرافة اللي فيه و كلشي كيجدب أي بنت تحبو و تبغيه ولكن الفرق اللي اللي بيني و بينو كي الارض مع السما محال واش يشوف شي نهار فوحدة بحالي شي بعض المرات كنقول ربما يكون غير كيشفق عليا حيت عائلتي لاحتني بسبابو المهم الهدرة بزاف و سكات أحسن 

سلمى دورات وجهها ما بغاتش تشوف فيها حيت دمعوا عينيها داكشي اللي عاشت نورسين صعيب عليها بزاااف تحملو بالعكس سلمى مفتاخرة بنورسين حيت واخا لاحتها عائلتها مازال صابرة و كتضحك كتخليك تحس بلي الحياة ما كتوقفش فاش كنطيحوا فشي مشكل لاا ضروري خاصنا نقاوموا حيت الحياة هي عبارة عن مجموعة ضربات ديما كتحاول تطيحك ولكن خاصك ديما تكون قوي و تكون مناعة سلمى كيبقا فيها جبل و نورسين حيت بصح عاناو و مازال كيعانيو شحال من مرة سلمى كتبغي تقول لنورسين بالحقيقة اللي مخبعها جبل فقلبو ولكن ما تقدرش حيت واحد نهار جبل حلفها هي و يعقوب ما يفشيوش السر ديالو ولا يحاولو يلمحوا لنورسين ان جبل كيحس بشي حاجة من جيهتها سلمى كتحس بدنب فهاد اللحظة حيت ما قادرة دير والو ليهم بجوج بيهم كيبغيو بعضياتهم واخا نورسين ما باغاش تعتارف مسحات سلمى دموع من عينيها و تنهدات و مشات جلسات حدا نورسين 

سلمى: دابا خاصنا نوجدوا دهازك أصاحبتي و نديروا العرس أ اللله حتى انا كانت شهوتي فشي عرس 

نورسين: واش بانليك نديروا الجوق و نعيطوا لشيخة تسونامي تقولينا الحلاوة فين كاينة ههه اولا عرفتي شنو نعيطوا لحميد القصري ينشط لينا طرح مزيان و نوضوا نجدبوا اولا نعيطوا لاومكيل ولا أحوزار و يجيبوا شيخات أحسن 

سلمى: كلهم نجيبهم إنشاء الله وشنو نديروا فالماكلة 

نورسين: نديروا نص حولي مشوي و بسطيلة د الكلامار وعشرة ديال دجاجات فطبلة و سوشي ياك فكريني الا نسيت شي حاجة 

سلمى: اه نديروا هادشي كولو و ديسير شنو نديروا فيه 

نورسين: نديروا لاغلاص و جميع أنواع الفواكه اللي تقدر تطيحلك على بالك اناناس كيوي فريز ليمون كاكي البنان اللي حبيتي 

سلمى:*عينيها كيبريو بالفرحة* الله شحال متشوقة لعرس ديالك و اجي شنو نديروا فالتكاشط و نكافة 

نورسين: الله يا ودي نعيطوا لاغلى نكافة كاينة فالمغرب و نوضو نبداو نخيطوا تكاشط و نشري لي شوميز دو نوي و العطور و الماكياج و صبابط هادشي كامل غادي نشريه 

سلمى: اوا نوضي نبداو نوجدوا شنو كتسناي 

نورسين: *كتشوف فيها ديك شوفة ديال من نيتك* لا واش دابا كتفلاي و لا كطنزي و لا كتضحكي ولا شنو كديري 

سلمى: علاش 

نورسين: واش هبيلة شفتك تيقتي بلي غاد نتزوج بصح وراه هاد زواج غير مؤقت شوفي شحال من مرة قلتها وانا شرطت على جبل ما نديروا حتى حفلة غادي نتكاتبو و صافي وهو وافق 

سلمى: اويلي على غدايدي حتى قلت غادي نشط واخيرا ربي جابلي عرس ندك و ندردك و نتي تحرميها عليا دعيتك لله 

نورسين: ياك نتوما غادي تمشيو لتركيا و اصلن هاد زواج بسبابكم حيت غادي تسافرو و تخليوني ياكما درتي بناقص 

سلمى: احم لا غادي نسافروا و نتوما الله يكمل عليكم بالخير ياكما باقا مقلقة مني 

نورسين: لا بالعكس سيري سافري و نشطي مع راسك و متعيلي عويناتك بتيتيز تركي ياختي شحال كيحمقني كمال اللي كيبغي منار فداك المسلسل ديال سامحيني 

سلمى: واش نتي فينما كان شي حد سميتو كمال كتزعطي فيه عيقتي

عند جبل 

جالس من فوق الفوطوي راد راسو لور كيبتاسم غير هو و راسو 

يعقوب: الخطة ديالنا نجحات مية فالمية ما عندي مايسالك أبا جبل أطلعتي شيطان مع راسك 

جبل: *ضربو بواحد المخدة لوجهو* لقيتيني ناشط اما انا نجي نوريك شيطان شنو كيدير 

ياسمين ناضت و جلسات حداها و شداتلو فيدو 

ياسمين: جبل الفرصة جات حتى لبين يديك باش 

تبغيك نورسين و تقربوا لبعضياتكم نتا دابا بحال غادي دوز اختبار الا عرفتي كيفاش غادي تخليها تبغيك واخا غادي تعاود ليها قصتك غادي تقبلك و غادي تبغيك و ما عمرها فحياتها ما غادي تخلى عليك نورسين قلبها بيض كي الحليب وحتى نتا أولدي أطيب خلق الله نتمنى من ربي يكمل ليكم بالخير و يولي هاد الزواج حقيقي 

جبل هز يد جداتو باسها و حركلها راسو بالايجاب 

جبل: دعيوا معايا يحن قلبها عليا 

عبد المالك: ما تيأسش أولدي كلشي غادي يكون مزيان انشاء الله دابا غادي تولي حلالك و حتى واحد ما غادي يدخل فيكم حنا غادي نطولو تماك فتركيا و من بعد غادي نمشيو لاميريك عند جوهرة نشوفوها شي نهار أجي لعندنا غادي نتوحشوك 

جبل: دابا نجي ما تخافش أجدي غادي نبقى نجي مرة مرة 

ياسمين: الا تصاوبو لوراق لنورسين بقا تجيبها معاك حتى هي 

جبل: ضروري ما نقدرش نخلي حبيبتي بوحدها 

يعقوب: هاي هاي على حبيبتي تطور ملحوظ ما زال ما درتو فطاجين ما يتحرق أ با الحاج مازال ما عقدتي عليها هههه 

جبل: يعقوب كتقلب عليا واقيلة بحال بانلي عظامك كاياكلوك 

ياسمين و عبد المالك كيضحكوا عليهم من صغرهم و هما هاكا علاقتهم زوينة بزاااف صداقتهم بدات من طفولة وما عمرهم تقلقوا من بعضياتهوم ديما ضاحكين و ناشطين خالقين سعادة غير مع راسهم رغم إختلاف شخصيتهوم يعقوب إنسان ناشط و ضاحك خاصو يخلق سعادة من لاشيئ خصوصا الا تلاقا مع سلمى اللي حمقة أكثر منو غير هو فاش كيتقلب كيولي عصبي بزاف و لكن دغيا كيبرد اما جبل شخصيتو بوحدها حنيين بزاااف و رومانسي ما كيعجبوش يضحك معامن ما كان حتى هو شخصيتو مرحة و كيضحك و لكن ماشي مع كلشي غير مع المقربين ليه بزاااف ولكن الا تعصب رعدة و لا هو عصبيتو أقبح من يعقوب ولكن واخا يكون معصب لاقصى درجة غير يسمع كلمة نورسين كيتكالما و يتهدن بحال شي مهدئ اما الا شافها قدامو كيولي غير كيضحك ما كيحسش براسو العشق ديالها داير فيه حالة 

جبل: يعقوب شنو درتي فداكشي 

يعقوب: العدول راه جاي فطريق 

ياسمين: *ضربات على فخادها* علاش واش ما غاديش ديروا شي حفلة صغيرة على الاقل حشومة كاع 

جبل: ما بغاتش وانا كنحتارم رغاباتها اللي بغاتها نديرها على راس و العين ما عنديش مشكل 

ياسمين: زربتي على البنت أولدي 

جبل: ههه ما عندي ما ندير باغي غير امتى نسني داك العقد د زواج نرتاااح و تبقاا حداية مدى الحياة و نتوما عندكم طيارة من دابا ثلاثة د سوايع خاصنا نزربوا او لا 

يعقوب: زرب أخويا على رزقك اجي بعدا نتا غادي تزوج وانا اللي كنت مواعدك نديروا عرس واحد دابا غادي تخليني معلق مانا مزوج مانا مطلق هه

جبل: وحتى انا مزال عند وعدي انشاء الله غادي نديروا انا وياك عرس واحد ولكن ما تنساش هادا غير زواج مزور نهار غادي يكتب الله و نتزوجوا د بصح 

و تكون كتبغيني ديك ساعة نديروا أكبر عرس كلشي يهدر عليه 

يعقوب:انشاءالله على الله يرجع عليك هاد الزواج بالفايدة 

جبل:نتمنى *شاف فياسمين* جدة طلعي عند نورسين قولها توجد راسها حيت ما بقا والو و يوصل العدول 

ياسمين ناضت غير بشوية عليها و طلعات فدروج حتى وصلات لبيت ديال نورسين دقات و دخلات لقات سلمى جالسة كتصاوب لنورسين وجهها 

ياسمين: بنيتاتي أش تاديروا 

سلمى: دخلي أجدة كنصاوب لنورسين لمايكب صيفطلي يعقوب ميساج قالي ما بقا والو و يوصل لعدول 

دخلات ياسمين و جلسات كتشوف بابتسامة فنورسين 

سلمى: *كتصوبلها عينيها * انشاء الله غادي طلعي أجمل عروسة 

نورسين: اودي أشمن عروسة الله يهديك 

ياسمين: علاش أبنتي جبل قالنا باغي يتزوج بيك حيت ما بغيتيش تعيشي معاه حيت ما بيناتكم حتى علاقة صراحة برافو عليك انا مفتاخرة بيك أبنتي حيت متشبثة بدينك و ما قبلتيش تعيشي مع راجل براني بوحدكم واخا كايبقا غير زواج مؤقت ولكن فرحي و عيشي لحظة 

سلمى: عندك الحق أجدة 

ياسمين:*بابتسامة*شنو غادي تلبس نورسين 

سلمى:واحد الكسيوة خديتهالها داك المرة غادي تجيها واعرة هي اللي تصلاح لهاد المناسبة 

سلمى كملات ليها عينيها و حلاتهم جاو قتاااالين واااعرين بزاااف دارت نورسين شافت راسها فالمراية بقات غير مصدمومة 

ياسمين:*حطات يديها على فمها *مشاء الله عليك أبنتي الله يحفظك من العين 

نورسين:*حنات راسها * شكرا بزاف 

سلمى مشات قربات حدا ودن ياسمين 

سلمى: جبل يشوفها يدوخ برب الجليل حتى يسخف ليكم فوق الطبلة هو كيحماق عليها بلاشي اما الا شافها هاكا غادي يسخف هههه 

ياسمين:*كتهدر غير بشوية* داكشي اللي بانلي حتى انا 

مشات سلمى كملات لنورسين لمسات الاخيرة 

سلمى هزات تيليفونها قرات شي ميساج و صلها من يعقوب 

سلمى:العدول وصل قالي يعقوب سربيو راسكوم 

نورسين حسات بقلبها كيضرب بجهد بقوة الخلعة و توتر سبحان الله ما عمرها ضنات غادي تزوج بهاد طريقة العجيبة الغريبة و بهاد السرعة كلشي تعرم عليها الخلعة و توتر حياتها تقلبات رأسا على عقب نزلات دمعة من عينيها حيت حسات براسها بوحدها لا مها لا باها لا عائلتها بجنبها حسات براسها مقطوعة من شجرة واخا واليديها بالحياة ولكن كن كان ما سمحوش فيها واليديها ما كانتش غادي تكون فهاد اللحظة هنا و ما كانتش غادي تعرف على هاد العائلة الرائعة و ماكانتش غادي تزوج بموسيو جبل الابراهيمي حقا كلشي كيوقع فحياتنا عندو حكمة كبييييرة بزاف ربي بوحدو اللي عارف بيها و حنا ما كتبانلنا من بعد مدة داكشي علاش الواحد ديما يحمد الله على شنو ما وقعلو و كيفما كنقولو ما كتعرف الخير فين كاين جبل وقف معاها بزاف فشحال من موقف و كان معاها راااااااجل شحال ما شكراتو ما غاديش توفيه حقو نورسين سهات فنقطة وحدة كتفكر فكاع ليجيسط اللي كان كيدير معاها جبل اللي كانو مواقف رجولية بامتياز من ديما كان واقف بجنبها و ما عمرو تخلى عليها 

♤♤♤♤♤♤♤♤♤♤♤♤ 

ويحدث أن الله يزرع في طريقك وردة على هيئة إنسان 

تسكن في روحك ترتب نبضات قلبك تروي ما جف من عروق نفسك فإذا وجدتها فحافظ عليها 

♤♤♤♤♤♤♤♤♤♤♤♤♤

سلمى: حبيبة نوضي لبسي لاغوب ديالك راه ما بقاش الوقت 

ناضت نورسين دخلات لحمام و لبسات لغوب اللي كانت جد راااااااااائعة و راقية بحال د الاميرات ويديها مشبكين فلون الاخضر الملكي نورسين جاتها لبسة شي حاجة طووووب هي براسها فاش شافت كي جات فالمراية قرات على راسها المعودتين باش ما تقيسهاش العين 

سلمى كتدق عليها فالباب 

سلمى:خرجي نشوفوك مال حسك تقطع ياكما نقزتي من شرجم هههه 

تحل الباب بشوية و خرجات عندهم سلمى و ياسمين بقاو غير مفهرين فيها و مصدومين أش هاد الجمال وأش هاد الاناقة جات كتحمق 

سلمى: تبارك تبارك الله حجاب الله كل بيضة فيها فلوس و كل فلوس يقول تبارك الله مشاء الله فين كنتي مخبية هاد الجمال لا نتي ناوية طيري لجبل العقل اليوم هههه 

ناضت ياسمين وقفات اونفاص لنورسين و حطات يديها على خدها 

ياسمين : مشاء الله عليك أبنتي طالعة بحال القمر *دمعوا عويناتها* عفاك تهلاي فجبل عفاك هو اللي بقالي من ريحة المرحومة قاسى فحياتو بزااف ومن ديما كنت كانتمنالو شي بنت الناس اللي تهلا فيه و تقدروا 

و توقف جنبوا هو من ديما كان محروم من الحنان عفاك حاولي تهلاي فيه عوينة وحدة اللي عندي هو جبل قلبو بيض ما عمروا حقد على شي حد ديما كيدير الخير ما عمروا بخل على شي حد اللي جا عندو كيعاونوا وحتى نتي إنسانة طيبة ما كرهتش كن كان هاد زواج حقيقي حيت نتي اللي غادي تناسبي طبع ديالو *تنهدات* نتمنى من قلبي يولي هاد زواج حقيقي 

نورسين كتسمع ليها و الدموع من عينيها نازلين شلال حتى هي محرومة من الحنان حتى هي محتاجة اللي يتهلا فيها كيفاش غادي تقدر تعطي لشي حد الحنان اللي ما عندهاش هي أصلن فاقد الشيئ لا يعطيه حتى نورسين عايشة فصراع داخلي قلبها كيقولها بلي ما تكرهش يكون هاد الزواج حقيقي و تعيش معاه د بصح و تمنى حتى هو يبغيها حيت شافت فيه عائلتها و عاونها فشحااال من حاجة و طيبوبتو معاها ولا كيعجبها بلا هواها و لكن عقلها كيقولها بلي خاصها تفيق من الاحلام جبل عمرو ما غادي يشوف فوحدة بحالها و هو على علاقة بكاميليا بنيس و اجمل بنت فالعالم يجيبها حتى لبين يديه هي كتبقى غير ديك البنت البسيطة اللي عمرها حلمات تزوج بشي حد بحال جبل السلطة و المال و الجاه ولكن فالاخر كتستسلم لداكشي اللي كيمليه عليها عقلها و كتحاول تخلق أعدار لراسها باش نهار يتفارقوا ما تمرضش وما تدمرش و ما تأزمش 

سلمى: اووووف باركة من البكا عفاكم راكم طيبتوا لي قلبي اكثر ما راها طايب 

جبدات تيليفونها و طلقات واحد الاغنية مناسبة لهاد الجو 

🎵🎵🎵🎵 

جذبني ماشفت مثله قلب عقلي عقل طفله صرت اتبع اثر رجله وابوسه

تمنيته رجل بيتي، واموتن يمه تاليتي يزفوني اله امنيتي عروسة

جذبني ماشفت مثله قلب عقلي عقل طفله صرت اتبع اثر رجله وابوسه

تمنيته رجل بيتي، واموتن يمه تاليتي يزفوني اله امنيتي عروسة

ثگيل ومايباوعلي، ولا هزه رسم كحلي، ولا يسمع طبل حجلي قهرني

ألمحله فلا همه ثلج قطبي طلع دمه عنيده لكن الزلمه غلبني

جذبني ماشفت مثله قلب عقلي عقل طفله صرت اتبع اثر رجله وابوسه

🎶🎶🎶🎶

جرات سلمى نورسين وجلسوا يشطحوا مع إيقاع الاغنية و ياسمين كتصفق ليهم و تبتاسم حتى سمعوا الدقان فالباب 

يعقوب: سلمى 

حلاتلو ياسمين الباب 

ياسمين: نعام أولدي 

يعقوب: تبارك الله عليك أ الحاجة صيفطناك تعيطي ليهم جلستي حتى نتي معاهم شادالهم الميزان ما عندي ما يتسالك هاكا نبغيك اللي ترجينا باركتو دخل لجامعة ببلغتو 

ضرباتو ياسمين لقرفادتو 

ياسمين: مابقيتي تحشم 

يعقوب: عيطي على لالة سلطانة باش تلقا بمولاي سلطان راه كيتسنا على ناااار علاين يشعل فينا العافية 

هههه 

سلمى خرجات عندو حتى هي لابسة واحد لكسيوة مزيونة مع مكياج خفيف 

سلمى:مالك نتا داير لينا الفرطة مالك نتا هو الوزير 

يعقوب: توتو انا الملك 

سلمى: ديال اينا بلاد بسلامة 

يعقوب:ديال قلبك أبيبي 

ياسمين: قرود ما بقيتو تحشموا خرجوا عليا من هنا غادي نهبط انا وبنتي نورسين جبل بعدا واجد 

يعقوب: وااااجد أ الحاجة أغلى كوستيم عندو لبسوا و قاد لحية ولا وحدا أخور 

سلمى: وا جبل ديما مقاد فين عمرك شفتيه خارج ما مقادش و بالخصوص هادا نهار مميز بالنسبة ليه 

يعقوب: عندك تسمعك نورسين 

سلمى: لا راها فالحمام ما تخافش 

صونا ليعقوب تيليفون فيدو 

يعقوب: الو 

جبل: واش انا اللي صيفطتوا كيسكن تماك هبطوا دغيا عصبتوني دايرليكم لصقة ولا شنو 

يعقوب: لواه لواه برد أسي العريس 

جبل: يعقوووووب هبطوا دغيا بغيت نشوف نورسين علاش تعطلتوا ياكما واقعة ليها شي حاجة ياكما مريضة ولا ضراتها كرشها راه مزال مريضة ياكما كتبكي ولا بدلت رأيها هدر دغيااااااا أ يعقوب جاوبني 

يعقوب: غير بشوية عليك أ صاحبي شهيق زفير تكالما مالك على حالك هاهي غير تخرج و غادي نجيو راك عارف البنات بعكاكات عاد كتستعد نفسيا باش تخرج من العزوبية و تدخل لقفص دهبي هههه معاك أ مولاي سلطان 

جبل: ناشط لاصل مك و جالس كطنز عندكم جوج دقايق هبطتوا هي هاديك ما هبطوتش غادي نطلع انا 

فنفس الاثناء خرجات نورسين اولا نقدر نقول عليها الاميرة نورسين حقا جات فنة بزاف هزات راسها فيهم 

يعقوب: احم شكون هادي نتي نورسين أختي ولا هربتي من شي حكاية ديال الاميرات *شاف فسلمى و ياسمين * امم عاد عرفت علاش نتوما هنا من صباح بدلتو العروسة 

نورسين غير كتبتاسم و حشمانة قبطات سلمى فيديها وتقدموا لامام و بدات كتعشق عليها وتزغرت 

و يعقوب و ياسمين كانو من موراهم 

يعقوب: ما كانش يصحابلي واخد نكافة 

ياسمين: بعد من البنت 

هبطوا حتى وصلو لسفلي اللي فيه العدول جالسين من فوق الطبلة جبل كان واقف عاطيهم بضهر كيمشي و يجي كينتاضرهم على أحر من الجمر غير سمع خطواتهم دار شاف فيهم وياااااااريتو ما دار بقا غير كيرمش فنورسين ما تيقش هادشي اللي كتشوفو عينو ما قدرش يبقا يشوف فيها حيت غادي يتهور و يمشي يعنقها او لا ييوسها قدامهم ما غاديش يقدر يتحكم فمشاعرو دور و جهو و غمض عينو ولكن صورتها تحفرات فقلبو واخا يعيا ما يخبي مشاعرو كيفضحوه حمقاتو لا نقدروا نقول اصلن العقل مابقاش عندو جمالها قتال فتان خصوصا عينيها البنيين اللي كيحمقوه وهي زادت بيناتهوم بالمايكب الجمال كيوقف حداها و كيخجل لجمالها حروف اللغة الثمانية و العشرين كتعجز عن وصف جمالها نورسين ببساطة هي أروع ماشافت عينو نورسين ببساطة عبارة عن ملاك ترسل لجبل باش تنسيه معاناتو نورسين ببساطة هي نعمة اللي كيحمد الله عليها صباح و عشية كيفاش غادي يقدر يصبر يشوفها قدامو و ما يعنقهاش ولا ما يدوقش من رحيق شفاهها كيفاش غادي يقدر تسارعت أنفاسو قلبو كيضرب بقوة كأنو كيزيد كيتراقص على ألحان العشق و الحب 

♤♤♤♤ 

يا أميرتي 

أخبريني من أين خرجت لي ؟

وكيف إستوطنت قلبي و روحي 

بل كيف إحتَليتِ كياني 

وأنا بهدا الاحتلال جد سعيد 

♤♤♤♤

جلسات نورسين فوق المقعد المخصص ليها و بقا جبل واقف عاطيهم بضهر كيحاول يصبر راسو باش ما يطيرش عليها فهاد اللحظة 

ياسمين: جبل ولدي 

سلمى حدا يعقوب كتهدر فودنو 

سلمى: نحلف بحلوفي بلي سيد داخ حيت شافها 

يعقوب: أش بانلك نعطيوه البصلة يشمها على الله طير دوخة 

نورسين حسات بالاحراج حيت شافتو واقف ما بغاش يجلس بداو كيطيحولها الافكار سلبية فراسها بكثرة ياكما ندم على قرارو و مابقاش باغي ياكما ساقت الخبار كاميليا و منعاتو يتزوج بيها ياكما غير كان كيضحك عليها وهي كي الهبيلة تيقاتو 

عبد المالك واقف حدا جبل اللي كان مغمض عينو ماباغيش يفتحهوم وعاض على شنايفو حتى بدا يسيل منهم دم 

عبد المالك: جبل مالك أولدي واش عندك شي مشكل كلنا كنتسناوك غير نتا ياكما بغيتي دير بناقص

فتح جبل عينو وشاف فيه ما هدر ما تكلم دار و مشا جلس حدا نورسين مدور عينو عليها حيت الا شاف فيها غادي يدير شي حاجة ما هياش مصبر راسو غير بزز وشنايفو كلاهم بالعضان كيبرد فيهم الحر قال بصوت مرتفع و باينة فيه معصب 

- واااااش ماااااا عواليييينش تبداااو كتسناوني نعرضكم ديروا خدمتكم و لا سيروا بحالكم 

رد راسو اللور و بدا كيفسخ صدايف د القميجة من الفوق حس براسو تخنق 

نورسين قفزات من بلاصتها فاش سمعاتو كيغوت عمرها شافتو بهاد الحالة بقات غير مصدومة و كتشوف بعويناتها و فنفس الوقت ترجمات تصرفاتو كأنه غير مجبور على هاد الزواج ياك هو اللي طلب منها هاد طلب علاش دابا تقلب ولا واحد أخور حسات بالبكية و لكن كمداتها فقلبها و سكتتات 

يعقوب و سلمى و ياسمين و عبد المالك براسهوم صدمهوم ما عرفوش مالو تقلب 360 درجة و لاحظوا بلي ما كيشوفش لجيهتها ما بقاو فاهمين فيه والو هدا هو أكثر مثال كيبين أن ناس ديما كيحكموا عليك غير بداكشي اللي كيشوفو ولكن كن يطلو على حالتك من لداخل عاد غادي يفهموك و يعرفوا بلي نتا حالتك عالم بيها غير الله

العدول براسو قفز من بلاصتو بقوة الخلعة من صوتو خدا من عندهم ليكار ط ناسيونال و كتب شي حاجة فواحد الكتاب و شاف فنورسين

- واش عندك أ بنتي شي شروط 

نورسين حركات راسها بنفي 

- واش توصلتي بصداقك 

جبل: عاد غادي توصل بيه غير فكنا دغيا 

-احم سي جبل الابراهيمي ولد سي سعيد الابراهيمي واش قابل نورسين بنت محمد زوجة لك على سنة الله و رسوله 

جبل : *تنهد * قااااااابل 

- نورسين بنت محمد واش قابلة بسي جبل الابراهيمي زوجا ليك على سنة الله و رسوله 

نورسين بقات ساكتة و كتحول عينيها عليهم واحد واحد واش بصح هاد القرار غادي يكون صائب واش غادي تقبل تربط حياتها مع شخص جمعاتها بيه غير الاقدار و كن ماشي كتخاف تبقا بوحدها ما توافقش على هاد الزواج من أساسو واش غادي تقدر تساير الحياة الزوجية مع موسيو جبل الابراهيمي واش هي تليق بمقام موسيو جبل الابراهيمي افكار تديها و افكار تجيبها جبل بدا كيتسلل الخوف لقلبو فاش ما سمعش صوتها

نورسين:*غمضات عينيها * موافقة 

عطاهم العدول الكتاب باش يسنيو ناض العدول سلم على جبل و انصارف 

كلهم وقفوا كيصفقوا عليهم 

الكل: مبروووك عليكم 

نورسين: * بابتسامة* الله يبارك فيكم

جبل وقف بلا ما يقول لا كلمة لا جوج إنصارف و خلاهم ما فهمنيش شنو سر هاد تصرفات المفاجئة

عند جبل 

طلع فالدروج حتى وصل لبيتو و حلو و دخل مشا للحمام حل روبيني و بدا كيضرب وجهو بالما بارد على الله تبرد ديك الحرارة اللي شاعلة فأعماق قلبو فهاد اللحظة تكا على الحيط و كيطلع نفس بصعوبة بحال شي حد مخنوق كيقلب على أكبر كمية د الاوكسجين اللي تملأ رئتين ديالو غمض عينيه و هي تبانلو صورة نورسين بفستانها الاخضر قدامو ابتاسم حشا يدو فجيبو وجبد صورتها اللي عندو منين كانت صغيورة و بقا كيشوف فيها بتمعن كبير و قال 

جبل: كن غير كانت عندي شجاعة نشوف فيك كن غير كانت و لكن ما قدرتش ما قدرتش مازال ما متيق بلي وليتي مرتي و الله ما مصدق كنواعدك غادي تعيشي معايا اجمل أيام حياتك كنواعدك أملاكي وجبل فاش كيواعد ما كيخلفش * قرب صورتها لفمو و حط عليها شفايفو وبقا عدة ثواني بهاد الوضعية و رجع صورة لجيبو و مشا توضا * 

خرج من البيت و اتاجه حدا واحد الغرفة مكتوبة على بابها مسجد حل الباب و دخل كانت الغرفة بسيطة و مكتوب على الجدار *الله * و فالرض سجادة غالية فلون الاسود و المصحف محطوط حداها و ريحة العود و زهر معطرة المكان دخل جبل صلى جوج ركعات كشكر و حمد على أجمل نعمة تعطاتلو اللي هي #نورسين 

هز كفوفو لله سبحانه و تعالى اللي من ديما كيلتاجئ لو و يدعيه يجمعوا مع نورسين و هاهو تحققات أمنيتو هو ما كيعتابرش بأن زفافهم مزيف لا بالعكس بما انها ولات #نورسين الابراهيمي فراه مراتو حقا و تا ما باقي ما كيهموش بقات الخطوة الاصعب عندو هي كيفاش يرطاب قلبها ليه و تبغيه و هنا غادي يكون عندو أصعب إختبار حيت بغا فاش يصارحها تقتانع بحبو ليها واخا يعواد ليها على الماضي ديالو الغير مشرف بين قوسين بالنسبة ليه لدلك خاصو ضروري يدعي باش يدخل لارض المعركة و هو متأكد و مقتانع بلي غادي يربح حيت فاش كتكون عندك ثقة بالله حتى حاجة ما كتهزمك كتخليك قوي من لداخل 

جبل: اللهم إني أحبها حبا و أعشقها عشقا تجهله هي و تعلمه أنت ربي إني أحببتها وأنت وحدك من حببني فيها

اللهم بقدر حبي لها وفقها ويسر أمرها و أسعدها و حقق أمنياتها و إحفظها لي ولا تريني فيها بأسا يبكيني اللهم إني أعود بك من قهر يؤلمها ومن هم يحزنها ومن فكر يقلقها ومن شخص يحمل خبثا لها اللهم إنصرني و جعلها تحب هدا العبد الضعيف أنت تقدر و انا لا أقدر يا من تجيب المضطر إدا دعاها 

🤲🤲🤲🤲🤲🤲 

ثم إننا لم نلتقي صدفة 

أحدنا جاء به الحب 

والآخر جاءت به دعوة بظهر غيب 

🤲🤲🤲🤲🤲🤲

ختم دعاء ديالو و هز القرآن اللي كان بجنبو كيقراه بتمعن كبير و بخشوع و بتلاوة جد رائعة صوتو خطير جدا فقراءة القرآن الكريم بعدما قرا ما تيسر من قراءة القرآن حطوا وخرج فاتجاه البيت ديالو حيد داك الكوستيم اللي كان لابس و لبس كيطمة فلون الرمادي مكتوبة فضهر ديالها king *الملك* جاتو روعة بينات العضلات اللي عندو فصحتو و جات معاه لبس الماكانة فلون الاسود اللي كانت راقية جدا من تصميمو و دار كاسكيط فالاسود و نضارات فنفس اللون ورش العطر ديالوو هز مفاتيح سيارتو وجبد التيليفون من جيبو دوز الرقم د سلمى 

سلمى: ألو 

جبل: أجي عندي محتاجك 

سلمى: واخا 

قطعات سلمى و شافت فيعقوب 

سلمى: غادي نطلع عند جبل ما عرف شنو بغاني 

يعقوب: غادي يكون بغاك غير على ود نورسين سيري هدري معاه 

طلعات سلمى لعند جبل ودقات فبيتو 

جبل:دخل 

حلات الباب سلمى و دخلات 

سلمى: نعام 

كان عاطيها بضهر كيطل من النافدة الزجاجية اللي عندو فبيتو سمع صوتها و التافت عندها و تقدم عندها بخطوات موزونة ووقف أونفاص ليها 

جبل: بغيت نطلب منك واحد الطلب و ما ترديهش فوجهي 

سلمى: على راس و العين 

جبل: نورسين كيفما كاتعرفي ما عندهاش عائلتها و انا ما باغي نورسين تكون مخصوصة من حتى شي حاجة ما بغيتهاش تحس بنقص عارف البنات مثل هاد نهار كيكون عندهم مميز انا بغيت نخلي هاد زواج حقيقي و تحس بيه نورسين داكشي علاش *جبد لاكارط بونكير من جيبو *غادي نصيفط معاكم شيفور يديكم لمول شري لنورسين أي حاجة بغاتها 

سلمى: راني قلتهالها قبيلة ما بغاتش قالتلي عندي الحوايج ما كاين لاش 

جبل: *شاف فساعتو* من دابا ساعتين خاصكم تمشيو لمطار *شاف فيها * حاولي معاها انا عارفها مقربة ليك و عارفك قادرة تقنعيها واخا تشري أي حاجة المهم ما تبقاش بلاش واخا * هز ليها يديها و حطلها لكارط بونكير فيديها و ابتاسم ليها * و ما تعطلوش بزاف باش ما تمشيش عليك طيارة اه و حاجة أخرى كنشكرك على المايكاب اللي درتيه لنورسين واخا قصحني فقلبي ماشي مشكل المهم هي تكون فرحانة 

سلمى: كيفاش قصحك فقلبك اه بعدا و علاش تعصبتي قبايلة غير نتا و راسك خليتينا غير مصدومين نورسين ما عجبهاش الحال من داك تصرفات اللي درتي قبايلة 

جبل:*تنهد* ماشي لخاطري أسلمى و الله ما لخاطري شي حاجة أقوى مني المهم ما باغيش ندخل فتفاصيل ديري داكشي اللي قلتلك و ما تخسريلهاش خطرها الله يرضي عليك 

سلمى: واخا غادي نحاول معاها 

جبل: شكرا 

خرج من البيت و سلمى انتابهات لكيطمة اللي لابس جاتها واحد الفكرة و ابتاسمات بشر و مشات دخلات عند نورسين لقاتها كتحيد لاغوب صهداتها 

سلمى: اوا يا لالا مبروك عليك دابا وليتي نورسين الابراهيمي رسميا 

نورسين: لواه الزمر ما عرفت مال جبل قبيلة كان معصب ياكما ندم وبغا يدير بناقص 

سلمى: غير شي حاجة عندهم فشركة راه حتى يعقوب مقلق منها ماشي على زواج أ الهبيلة 

نورسين حيدات لاغوب و حطاتها فوق الناموسية و بغات تلبس شي حاجة ديال دار 

سلمى: لالا لبسي حوايج الخروج غادي نخرجوا ندوروا نشريلك شي حاجة 

نورسين:ما بغيتش أ سلمى غير عفيني 

سلمى : قلتلك زيدي قدامي و سكتي اصلن خاصني نرجع لدار دغيا راه ما بقاش بزاف باش نمشيو لمطار اجي بعدا جامعة حوايجك فلي فاليز 

نورسين : اه ولكن علاش ما غاديش نبقاو هنا 

سلمى : *كتبتاسم بشر*لا أحوبااااي جبل عندو دارو أصلن هو كان هنا غير حيت جا يشوف جدو و جداتو و ماجاتش يديك معاه لدارو من قبل فاش ما كانت بيناتكم حتى علااااقة أ زين 

نورسين: ولكن انا ما فخباريش 

سلمى: اوا هانا قلتهالك وفكينا خلاص باش نمشيو و نرجعوا دغيا مالك ثقيلة 

عند جبل 

كان سايق طوموبيل ديالو من نوع فيراري سوداء بسرعة حتى وصل لواحد المكان اللي عندو فيه أغلى إنسانة على قلبو الانسانة اللي كتبغيه بلا مقابل الانسانة اللي كانت ديما تسهر على راحتو باش يكون هو فرحان وعايش بخير الانسانة اللي عندها دور كبير فشخصيتو الانسانة اللي رباتو و كبراتو و عطاتو الحنان الكافي اللي كانت معتابراها أكثر من ولدها حبس اللوطو جنب طريق و نزل حيد نضاضر ديالو ديال الشمس و رجليه قادوه لبلاصتها اللي حافضها بقوة ما كيجي يترحم عليها شكون من غيرها ليلى اللي ما يقدرش ما يزورهاش خصوصا فنهار مميز بحال هدا حنى على ركابيه و باس راس د قبرها و عينيه حمارو حط راسو على قبرها توحشها بزاااف هز كمية ديال تراب اللي كانت من فوق قبرها و استنشقها كأنو كيشم عطرها 

جبل: توحشتك بزاف تمنيت كن كنتي معايا فمثل هاد نهار اكيد غادي تفرحي لولدك توحشت نحط راسي على صدرك و نقولك شنو ضارني نتي اللي كنتي داويني بهدرتك واخا نشكي همي لمن ما كان ما غاديش يقدر يعاوني بحال كيفما نتي كنتي كتعاوني داك طفل اليتيم (كيقصد راسو ) مشيتي و خليتيني وانا مزال متعطش لحنانك و صوتك و رضاك عليا *نزلات دمعة من عينيه*جيت نقولك بلي هاد نهار تزوجت بنورسين حب قلبي و ملاكي طاهر حاس بيك غادي تكوني فرحانة ليا كنت محتاج نلقاك فمثل هاد نهار ولكن ربي بغاك *مسح دمعة من عينيه* كنبغيك بزاااف *باس راس د قبرها * 

قرا عليها ما تيسر من آيات القرآن و دعالها برحمة و رجع لطوموبيلتو و شد طريق فاتجاه لفيرمة

وصل و حل الباب ديال دار و دخل لقا كلشي جالس مجموع فالصالون حتى من نورسين و سلمى لي كانو خرجوا تقداو شي حوايج و رجعوا و لكن الغريب فالامر ان نورسين كانت لابسة نفس الكيطمة اللي لابس هو غير هي فضهرها Queen ( ملكة) حط يدو على فمو و ابتاسم عرف هادشي أكيد من راس سلمى 

التافتو لعندو و شافو فيه لقاوه كيضحك غير هو و عضامو 

يعقوب: ياك لابس كيهروك ملائكتك اولا ياكما زواج وافقك 

كلهم بداو كيضحكوا الا نورسين اللي حانية راسها و حشمانة 

تقدم جبل و مشا جلس بجنب نورسين شاف فيها لقاها مهبطة عويناتها لارض و واحد السر نازل عليها من عند الله طلق يدو من مور ضهرها و عينو غادي ياكلوها ما حيدش عينو عليها و كيتنهد تنهيدة مور لخرى 

سلمى: أووو لابسين نفس الكيطمة بحال متافقين *غمزات جبل* 

نورسين عاد ردات البال هزات راسها شافت فيه و فيها و طرطقات عينيها بصدمة عرفات سلمى دارتها بيها حيت هي اللي شرتهالها و قالتلها والو تلبسيها وبقات تشكر ليها فيها حتى قناعتها تلبسها دورات وجهها شافت فسلمى وهي بدات كتطلع فحجبانها كتفقصها دارتها بيها 

جبل مابقاش قادر يصبر بغا غير إمتى يبقى غير هو و ياها راس فراس طلعلو البشر فراسو شاف فنورسين ووقف 

جبل:نورسين موجدة حوايجك

نورسين كتحرك راسها بالايجاب 

نورسين: اه كلشي موجداه 

لاحظ جبل شعرها مطلوق و هي كتنش بيديها بقوة الصهد 

جبل: نورسين وقفي 

نورسين بقات غير كتشوف فيه ومستغربة ووقفات 

نورسين : نعام 

جبل جبد وحد القلم كان فجيبو و جا من موراها و وربطلها شعرها غير بشوية و ثبتو ليها بداك القلم بطريقة محترفة هي بقات غيرمصدومة من هاد التصرف تمنات تشق الارض و تبلعها هي حشمانة و هو زاد حشمها بتصرف اللي دار معاها اما واحد سلمى كتخنزر فيعقوب بحال كتقولو تعلم من جبل اما ياسمين و عبد المالك كيشوفو فيهم بحب و كيبتاسموا 

جبل : دابا مزيان 

دور وجهوا شاف فيعقوب و مشا عنقوا عناق رجولي و هو يهمس لو فودنو يعقوب 

يعقوب: اوا هانتا تزوجتي بنورسين تهلا فيها راه انا بحال خوها تقلقها نخسر انا وياك 

جبل : *طلق منو و غمزوا* ما تحتاجش توصيني 

مشا باس لجدو و جداتو يديهم و تمنالهم طريق سلامة رضاو عليه وقالتلو ياسمين 

ياسمبن:تهلاو فبعضياتكم أولدي الله يرضي عليك ما تقلقهاش 

جبل حرك ليها راسو بالايجاب و مشا سلم على سلمى 

جبل: طريق سلامة تهلاي لي فداك الكائن المسمى بيعقوب ههه راني محتاجو من مور ما يجي 

سلمى: الله يا ودي كن هاني 

جبل:سارة ناعسة بوسيهالي بزاف و قولها قالك عمو جبل بلي كيبغيك يالاه تهلاو 

دار شاف فنورسين اللي كانت حالة فمها فيه كي ضبعة 

جبل:نورسين هانا كنساينك فطوموبيل ما تعطليش اه و لي فاليز فين هما 

نورسين: راهم الفوق فبيتي هانا نطلع نجيبهم 

جبل: غير جلسي هانا نجيبهوم بلا ما تعدبي راسك 

ناضت نورسين كتسلم عليهم و بدات بسلمى عنقاتها بجهد 

نورسين: شكرااااا بزاف أسلمى على وقفتك معايا لهلا يخطيك 

سلمى ناضت تبكي وتشهق وتنوح 

سلمى : الله على صحيبتي الله غادي نتوحشك أهئ اهئ 

نورسين: ويلي باركة من البكا ما حنا على فالك انا اللي خاصني نبكي اللي جالسة فالمغرب اما انتي غادي تمشي لتركيا تمتعي غير عويناتك ههه 

سلمى : اوا حتى نتي ضربتيها بتزويجة شكون بحالك جيتي مورانا و كليتي عشانا 

نورسين كتحرك راسها بلا حول و مشات باست لياسمين و عبد المالك يديهم و راسهم 

نورسين: الله يجازيكم بخير رحبتو بيا الله يكثر خيركم 

عبد المالك: دابا نتي وليتي من العائلة أبنتي اللي ثقالت عليك خففات علينا 

نورسين : لهلا يخطيك أجدي 

ياسمين: تهلاو فبعضياتكم أبنتي الله يرضي عليكم و يسر ليكم والله ينقيلكم طريقكم من الشوك 

نورسين: اللهم أمين 

قاطعهوم صوت جبل اللي كان جار لي فاليز 

جبل: نورسين حان وقت الرحيل

نورسين ابتاسمت ليهم و صيفطات ليهم بوسة فالهواء وخرجات تبعات جبل اللي حط لي فاليز فالكوفر ديال طموبيل اللي كانت من نوع رانج روفر فالاسود فاش سالة مشا حل ليها الباب الامامي و طلعات بعدما شكراتو و مشا هو لمكان القيادة بقات نورسين مدورة و جهها كتشوف فالفيرمة اللي عاشت فيها شحال من حاجة لقات فهاد ناس الحضن الدافئ و العائلة اللي تحرمات منها حمدات الله اللي مازال الخير فدنيا و مازال اللي يرحمك فالوقت اللي أقرب الناس ما رحموكش ما حسات بدمعة حتى نزلات من عينيها حيت تفكرات عائلتها واخا ما كانتش مثالية كتبقى هي الاصل د يالها تربات بينهم و ضحكات فوسطهم وتعلمات تهدر معاهم و تعلمات تمشي معاهم ديما غادي تكون حياتها ناقصة بلا بيهم شحال توحشت أيامها مع ماماها فاش كانت كتفيق و كتلقاها موجدالها الفطور ولا فاش كتصبح ناعسة و تبدا تعايرها باش تفيق او لا فاش كتنوض تعايرها و تقولها نوضي تقضي شغال باش تلقاي ما تدي فدراعك ربما هادشي ما كانش عندو قيمة فاش كانت معاهم ولكن دابا كتمنى ترجع غير نهار تعيش فيه مع ميمتها بصح ما كنحسوا بقيمة الحاجة حتى كنفقدوها و كتضيع من بين يدينا 

♤♤♤♤♤♤♤ 

العائلة هي الوطن الصغير الذي نأوى إليه في كلّ وقت بالحياة والعائلة هي السور المنيع الذي يستند إليه المتعبون فيُفرغون همّهم كلما أرهقتهم الحياة والعائلة أكبر من مجرّد كلمة وأكثر من أن تحتويَها عباراتٌ صغيرة والعائلة أعظم من مجرّد أشخاصٍ تجمع بينهم رابطة الدّم والقرابة بل العائلة هي حبٌ ينبع من الأعماق بشكلٍ فطريّ لا يستطيع الإنسان أن يُفسّره أو يتخلّص منه والعائلة هي الكيان الذي يحتوى الإنسان بكل ما فيه.

جبل ديمارا وشد طريق فإتجاه الفيلا ديالو اللي كتبعد على الفيرمة بثلاثة د سوايع فاتجاه الحياة الجديدة اللي غادي يبداها مع ملاكو الطاهر يا ترى شنو غادي يكون مخبيلهم القدر جبل كيحس براسو غادي يطير بالفرحة نورسين ولات مرتو و غادي تعيش بقربوا غادي يقدر يشوفها صباح و عشية شي حاجة فوق الخيال دار شاف فيها لقاها حاطة راسها على زاجة و ساهية 

جبل: نورسين واش كضرك شي حاجة 

دارت شافت فيه وتقدات فالجلسة 

نورسين: لا غير غادي نتوحشهوم و صافي 

جبل: هادي هي دنيا لابد من الفراق 

نورسين: كاينة 

جبل: شنو هو اللون اللي كيعجبك 

نورسين إستغربات من هاد السؤال وشافت فيه 

نورسين: اللون الاحمر 

جبل: علاش 

نورسين: ما عرفتش ربما حيت كيرمز للون العشاق و الحب ولون الدم اللي كيعني تضحية 

جبل: كتقراي روايات رومانسية بكثرة ادن 

نورسين: كنحس بيهم كيلامسوا قلبي صراحة ما يمكنش يدوز عندي نهار الا ما قريتهومش ولكن هاد الآونة الاخيرة مع الضغط و المشاكيل ما بقيتش كنقرا 

جبل: وشنو هي أكثر قصة حب عجباتك 

نورسين كيعجبها اللي يجبد ليها الهدرة على الروايات و الكتب خاصة الرومانسية جاوبات بواحد البريق فعينيها 

نورسين: صراحة عجبوني بزاف بحال قصة ديال روميو و جولييت و قصة قيس وليلى هادو كلهم عجبوني بزاف كتحس بلي حقا الحب تضحية صراحة كنظن الحب هو أجمل حاجة ممكن يعيشها الانسان احساس جميل كيرفعك لعالم واحد أخور 

نورسين فاش وعات على راسها شنو قالت حنات راسها و دورات و جهها لسرجم كتعض على شنايفها و تدعي فنفسها على هاد الجرأة اللي نزلات عليها دقة وحدة 

جبل: والا كان الحب كيعدب الانسان اللي كيعيشوا واش بصح غادي يبقا إحساس جميل الا كان الحب كيخليك تمنى الموت فنهار ألف مرة باش تهنا من العداب واش بصح كيبقا إحساس رائع 

نورسين: كيفاش ؟ 

جبل: أنا غير كنهدر و صافي ما تديش عليا 

نورسين:ونتا كتقرا روايات و الكتب 

جبل:وي حتى انا كنقرا الكتب الرومانسية بعض المرات و لكن ما عرفتش علاش ديما كنضربوا المثل فالحب بقيس و ليلى و روميوو جولييت رغم أن النهايات كانت مأساوية و حنا كنعتبروها قمة الحب خاصنا نشوفو قصة حب علي و فاطمة الزهراء بنت الرسول صلى الله عليه وسلم شحال كان كيبغيها وكيغير عليها حتى من السواك اللي كانت كديروا لفمها لدرجة أنه واحد نهار دخل لدار ولقا السواك ففمها قال :{ظفرت يا عود الأرك بثغرها ،أما خفت يا عود الأرك أراك لو كنت من أهل القتال قتلتك} *عض على شنايفو *الللله على حب كان بيناتهم كتحس بيه صادق 

نورسين :*ابتاسمت *وواحد نهار قالت ليه {ضاق صدري يا علي} وبدا كيقرا لها القرآن حتى غفات حقا قصة حبهم رائعة

جبل تنهد وشعل الراديو 

🎵🎵🎵🎵🎵 

أمر وأنا نغامر حبيبي عليك نخاطر

حُبك مسهرني وإنت اللي في الخاطر

خلّيني غنشوفك تَرتاح لي يا عُيوني

تحكِيلي على ظروفك نشكيلك هَمومي

طال علي غيابك ناوي تجنّني

أنا من أحبابكِ وإنت اللي تفهَمني

مَحبُوبي يستاهل على عَيني على رأسي

والله يستاهل قلّبي والإحساس “إحساسي”

هو اللي في بالي عمري ولا نسيته

عندي عزيز وغالي ولا يوم خليته

أمر وانا نغامر حبيبي عليك نخاطر حُبك مسهرني وانت اللي في الخاطر

🎶🎶🎶🎶🎶🎶🎶🎶 

الاغاني ديال دوزي كتحماق عليهم نورسين ما تكرهش تبدا تغني معاه بجهد ولكن كتحشم بقات كتردد الاغنية فنفسها و كتصفق بيديها غير بشوية و مع الاغنية شوية حماسية دارت فيها الهوايش ما كرهاتش تجدب و تشطح 

جبل كان كيخطف نضرات و كيشوف فيها وقال 

جبل: كيعجبوك الاغاني ديال هاد المغني واقيلة 

نورسين:*ابتاسمت* اه بزاااااف سميتو عبد الحفيظ الدوزي أغانيه زوينين بزاااف بحالو 

نورسين عضات على شنايفها و دورات وجهها لسرجم وبدات كضرب راسها غير بشوية مع زاجة ديما لسانها خارجة عليها خصوصا فاش كيكون الموضوع كيعجبها كتبدا تهضر بعفوية تامة و خصوصا الدوزي اللي كتحماق عليه و كان حلمها من صغر تحضر لشي سهرة ديالو و تلاقاه مباشرة 

جبل حتى هو بدورو زير على فكو و عض على شنايفو بقوة ما تعصب و زاد من سرعة سيارة واش هادي باغا تحمقوا جالسة كتشكر شخص أخور حدا عينو تعصب وعينو حمارو بجهد ماحس براسو حتى قلب لاداعة أخرى غار من مغني حقا جبل إنسان ماشي طبيعي ولكن علاش قالت عليه زوين يعني كيعجبها لاااا باغا طرطقلو هاد نورسين مرارتو شي نهار هو مغيااار بزاف وهي كتزيد تشعل فيه العافية بهدرتها ولكن الزهر الكافر اللي عندو عاود كانت أغنية ديالو فالاداعة اللي قلب ليها 

🎵🎵🎵

عمري لغيرك منكون وخا يجيبو بنات الكون

معاك انتيا باغي نعيش كلشي على ودك يهون

حبتك ولت مجنون غيرك انت معنديش

انتي أول حب انتي آخر حب انتي اجمل حكاية

‎سكنت قلبي عقلي وروحي خليك ديما معيا

اُنْتِي أَوَّلَ حُبَّ اُنْتِي آخر حُبَّ اُنْتِي اُجْمُلْ حِكَايَةَ

سَكَّنَتْ قُلَّبُي عَقْلِيَّ وَرَوْحَي خَلِيَّكَ دِيمَا مُعِيَا

ملي دخلتي في حياتي ملكتني يا مولاتي

‎حالي معاك مفهمتوش نشوف راسي في مرايا

نقول واش هذا انيا ولا واحد منعرفوش

اُنْتِي أَوَّلَ حُبَّ اُنْتِي آخر حُبَّ اُنْتِي اُجْمُلْ حِكَايَةَ

سَكَّنَتْ قُلَّبُي عَقْلِيَّ وَرَوْحَي خَلِيَّكَ دِيمَا مُعِيَا

عُمَرُي لَغَيْرَكِ منكون وخا يجيبو بناتَ الْكَوْنِ

معاك انتيا بَاغِي نعيش كلشي عَلَى وَدَكِ يَهُونُ

حَبَّتُكَ وَلَتَّ مَجْنُونُ غَيْرَكِ اُنْتُ معنديش

🎶🎶🎶🎶🎶🎶

جبل تكره بلمزيان و هو يطفي الراديو فخطرة وحدة نورسين بقا فيها الحال حيت طفاه هي كيعجبوها اغانيه خصوصا هادي اللي كانت بادية حشمات تقولو شعل راديو و هي تسكت و دورات و جهها لسرجم مقلقة 

خيم صمت لعدة دقائق حتى قال جبل 

جبل: احم أصلن صوتو ما زوينش بزاااف 

نورسين غلباتها ضحكة و شافت فيه 

نورسين:لا واش من نيتك 

جبل: كاين مغنيين أحسن منو هادا بانلي غير كيخربق حتى طبقات ما ضابطهومش مزيان 

نورسين: سمحلي و لكن دوزي أحسن مغني لا من ناحية الاداء ولا من ناحية الاخلاق 

جبل:*زير على الفولون بيدو* ونتي فين عرفتيه باش تعرفي أخلاقو كي دايرة 

نورسين: واحد نهار إستاضفو رشيد شو فالبرنامج طريقة د هدرتو متواضعة و حتى واحد عمتي ساكنة فوجدة فايتلها شافتو و سلمات عليه حيت هو اصلو من شرق و عوداتلنا عليه كلشي تماك كيهدر بالخير عليه 

حتى انا ما كرهتش نحضر لشي سهرة ديالو مباشرة 

ضرب جبل واحد الفران سيك حتى مشات نورسين و جات ما فهماتش مالو حبس اللوطو على جنب و خرج منها يضربوا شوية د الهوا حيت خناقاتو بهدرتها مشا خدا قرعة د الما من واحد الحانوت كان تماك شرب و كب على راسو الما باش يبرد و حط يدو على قلبو 

جبل: قالك بغيت نشوفو مباشرة و الله لا كانت ليك لواه كيعجبني لواه صوتو زوين او انا ما عجبتكش ياك حتى انا زوين و عندي صوت زوين غير زهر ما كاين *ضرب واحد الحجرة برجلو كانت قدامو * تفوو غادي ترديني نضرب بالحجر حق لا اله الا الله الا غادي نولي نضرب بالحجر

مشا طلع لطوموبيل و كان فيدو واحد الساشي حطو فالمقعد الخلفي ديال اللوطو

نورسين غير كتشوف فيه مصدومة ما عرفات مالو شافتو كلو فازك 

نورسين: شنو واقع علاش حبستي طوموبيل و مالك كلك فازك غادي تمرض هاكا 

جبل: *كيديماري الطوموبيل* ماماليش غير جاني صهد و خرجت شريت قرعة د الما 

نورسين: اه صافي يصحابلي واش واقعالك شي حاجة 

جبل: هزي ساشي اللي كاين اللور 

هزات نورسين داك الساشي و حلاتها لقات غير بيمويات د الفريع و دانونات و العواصر على الاشكال 

نورسين: لمن هادشي 

جبل: يقدر يجيك جوع ديباني بداكشي على ما نوصلو واخا 

نورسين ابتاسمت ليه وشكراتو و سهات فيه للحظات بحال هاد الشي البسيط اللي كيدير كتحماق عليه ديما كيفكر فيها و ديما ما كيخليها تحتاج لحتى شي حاجة ابتاسمت فاش تفكرات راهم مزوجين ولكن غير تفكرات بلي زواجهم غير على الوراق عبسات و جهها و هزات واحد بيمو دشكلاط و حلاتو تاكلو تبرد فيه غدايدها 

دور جبل وجهو شاف فيها لقا وجهها عامر شكلاط ما قدرش يحبس ضحكة حبس اللوطو على جنب و حط راسوا على الفولون كيشوف فيها و كيموووت عليها بضحك نورسين مسكينة ما عرفات راسها باش تبلات 

نورسين: مالك كضحك 

جبل : على واحد البنيتة صغيرة جالسة قدامي ما كتعرفش تاكل الشوكولا 

نورسين : بسم الله الرحمان الرحيم اينا بنيتة ما كاين حتى واحد معانا اويلي ياكما تشيرتي حيت جيتي عندنا داك نهار لدار قول أعود بالله من شيطان رجيم تسليم لرجال المكان 

جبل زادت فشلاتو بضحك رد راسو لور و بقا كيضحك مد يدو لحدا شنايفها وبدا يمسح الشوكولا لي عندها فجنب فمها بصبعو لكبير و عينو كتشوف فشفايفها وداك شكلاط اللي مسح ليها دار ففموا و لحسوا و ديمارا الطوموبيل و زاد 

جبل:لديد بزاف هاد الشوكولا *دار يدو ففمو كيبتاسم* 

نورسين وجهها تزنك عرفاتو قصد بديك البينيتة صغيرة هي نيت بدات تهضر مع راسها 

نورسين: ويلي ميمتي على تحشيمة ديما مشوهة راسي اشنو درت فحياتي 

وأخيرا وصلو للفيلا دجبل بعد مساااافة ديال طريق نورسين عيات بلمزيان بغات غير فين تحط راسها تنعس 

وقف جبل الطوموبيل حدا الفيلا ديالو دورات نورسين راسها باش تستكشف المكان تبهرات من ديكور ديال الفيلا غير من برا واعرة اما من لداخل كي غادي تكون عمرها توقعات تشوف هاد الثراء و هاد البدخ قدامها ادن موسيو جبل الابراهيمي مليونير على هاد الحساب و هي دابا ولات مرتو ما دخلاتش ليها لدماغها هي اللي طول حياتها كانت كتحلم انها غادي تزوج بشي راجل بسيط و غادي تعيش غير فشي دار صغيرة فشي حي شعبي عمرها توقعات شي نهار غادي تعيش ففيلا بحال هادي يا لروعة الاقدار ربي حنين كريم يقول لشيئ كن فيكون شكون كان يقول بلي نورسين بنت محمد و فاطمة تعيش فهاد الثراء و يكون زوج ديالها هو موسيو جبل الابراهيمي بصح دنيا ما كتعرفها شنو مخبية ليك نورسين هي البنت طيبة اللي ما عمرها حقدات على شي حد من ديما كانت راضية بشنو عطاها سيدي ربي رغم أنها كانت ختها ديما كتسممها بهدرتها عمرها حقدات عليها روحها لطيفة و نية اللي فقلبها على لسانها و ربي كيعطيها على قد نيتها 

♤♤♤♤♤ 

ثم ينظر إليك فيجدك أنك ترضى

بما أنت فيه فيعطيك عطاء يليق 

بقلبك و رضاك💓 

♤♤♤♤♤ 

جبل شاف فيها لقاها ساهية كتخمم نزل من طوموبيل و مشا حل ليها الباب باش تنزل شافت فيه مدة عاد نزلات 

نورسين: شكرا 

جبل: كيفما كاتعرفي حنا دابا مزوجين على سنة الله و الرسوله و من شروط الزواج المهر ديالك خاصني نعطيهلك 

نورسين: شنو هو المهر 

جبل: *بابتسامة* زعما الصداق ديالك ضروري خاصنا نكملو مراسم الزواج باش يكون زواجنا كامل مكمول ياكي 

نورسين: اه ولكن واخا تعطيني اللي عطيتيني الصداق غير حاجة رمزية و صافي 

جبل: لا بالعكس الصداق هو الحاجة اللي كتبين إكرام الله عزوجل تعالى للمرأة ومن الواجب عليا نعطيك المهر اللي تستاحقي داكشي علاش قررت نعطيك *أشار ليها بصبعو من موراها * بامكانك تشوفي راسك الصداق ديالك من موراك 

دورات نورسين وجهها و شافت شنو عطاها تصدمات دارت يديها على فمها و شهقات دموع قربو ينزلولها فهاد اللحظة 

جبل: نتمنى تعجبك 

دورات وجهها شافت فيه و عينيها مغرغرين بدموع واش بصح هي فالواقع او لا كتحلم واش هاد جبل إنسان حقيقي ما عمرها توقعات غادي تاخد فصداقها بحال هاد الكادو 

جبل:*مسحلها دمعة بيدو* ما تبكيش عفاك تستاهلي أكثر 

نورسين:شكرا 

جبل: بصحتك 

كانت سيارة من نوع رانج روفر فلون الاحمر لونها المفضل معقول يكون سولها باش يختار ليها سيارة اللي غادي تنال إعجابها قد ماشكراتو ما غاديش توفيه حقو 

يتبع...