حبيبي الأصم الجزء 353

اسبرو : ( حط كاسو كيشوف معاهم وعلا يدو جيهة ودنو كاايضورها بمعنى واش حماقيتو ) بلااااا متسطااووو عليا دابا .... كيييفاش هاديك شيماء 

رتاج : وااش طانز علينا !? البنت كلسات حداه وسلماات عليه كاع وهضرات معاه وجاوبها ودابا قاليك واش هي شيماء تاماك فلاشاوك شينووا ولا مال والديك 

اسبو غي كيشوف مالقا مايقووول كاااع صدموووه 

لامار : حلف بالله ماعرفتييييها 

اسبرو : وكيييفاش تا بغيتو نعرفها والبنت تميزاجورات كاع قد هاكاك ... ورا تلت سنين انا ماشفتها ندخل الانسطا كالقا غا تصاور عداب القبر والكتوبا وكيسان دالقهوووة ... ااش عرررفني انا راها هناا وهادا وقت الامتحانات 

لامار : اوا هي سمعاتك غاتجي وقالت تاهي تجي تشوفك ... ونتا قاااامعها بخختي 

اسبرو : ورا اااقسسسم بالله ماااعرفتها .... وماااشفتش تاافيهااا اصلااا مكااانش عقلي كاع تماا ... حسابتني غير شي بنت وصاااافي والله ماطولت فيها شوفة بااش تعرفوني ديال العععشرررة ... فيينااهي دابا فيييين

اريج : ورا مسكينة سمعات خختي وهي تطلع ... درتي ليها قبح من شنو دازت منو ختها ... 

اسبرو : ( بضحكة كيشير جيهة دروج ) ملييييهيه 

رتاج : وي من تما غير سير عتق لي غايتعتق حششوما عليك ... 

مشاا ببزززربة ضاااحك كيتفكر كانت كالسة حداه كاع وماعرفهاش كتجيه الهيستيرية ... 

لامار : مقسح تاهو ... غاضلمناه يمكن 

اريج : ودابا حنا كنشوفوها ديما مغاتبدلش علينا ... هو راه من داك ساع ماشافها والبنت غلاضت وتبدلات بزاف ... 

رتاج : واش زعما غايكون باقي شاد فقلبو من داك الهضرة لي كانت قالت لينا قالتهالو قبل مايسافر ! 

لامار : والله ماعرفت ... اسبرو بقوة متايبان لييك راه واااااضح ... وهو راه والله ماتعرفي شنو فداك الطمييسة عندو ... كييغدرك بداك الضضحكة باش مايبانش شنو عنو لداخل .. فين عمركم شفتوه نتوما شكا شي نهار ولا قاليكم باش كيييحس !!!!! 

اريج : ولاكن صبرو صبروووو .. لاكانت داك الهضرة ديالها هي لي درات منو هاد الشخصية وراه براااافو ليها ... راه تغيير جدري .... الى لاحظتو حتى نبرة دصوتو و هضضضرتو تبدلات

رتاج : نوضي نوضي راه ولا يكمي بسيييف يحراشليه الصوت راه دعدع داك الصدر ... وزايدون هو كان صغيير وداكشي كيديررو غير معانا ... وتاهو دابا هاهو هجرو لينا كااااع هزيتي وحطيي واحد 

لامار : وزعما غايكون على ود داك الهضرة لي قطع علينا تلت سنين 

اريج : هاداك خصنااا معا واحد الكلسة بالقهوة و يعاود لينا كوووولشي من طاق طاق تا لسلام وعليكم ...

* لفوق

حياة : وداابا صافي جمعي خناينك .. يمشي واحد يجيو عشرة 

شيماء : علاش نتي ماقلتيهاش نهار كنتي تخاصمي مع سفيان !!!! .. اشمن عشرة اشمن .. القلب لابغا ليك واحد والله وتجيبيليه حتى ستين 

حياة : شيماء نتي راك ختي صغيرة وانا راه مانبغيش لي يبكييك ولا نششوف الدموع فعينيك ... لا كان مكتاب ليك وباغيك كيفما نتي باغياه راه مايحييدو ليك حد... والى كان سيد عجباتو الشهرة ونسا الماضي .... علاش نتي غاتبقاي تعدبي ها ?! 

شيماء : ماعرفتش احياة .... مزالة كانلوم فراسي ... خايفة تكون هضرتي هي السبب رغم اني ماقصدت والو غير كنت معصبة .... ( كضرب بصبعها لصدرها ) سعيييد كان كيبغيني اخخختي ... والله تاكان كايدير ليا شي حوايج مادارتوهمش ليا تا مِّي ... عرفتي حسيت بواحد الحككرررة فاااش شفتو .. واش واااحد لي كنت كتخرجي نتي وياه ... نتعسي وتفيقي نتي وياه ... تخاصمو شكون يشد طيليكوموند ترجو تحت الشتا كتصب ويغطيك بجاكيتو ويخلي راسو ... لي يطيب ليك ويحرق كولشي ... لي يمرض وتبقاي عند راسو ... لي تراجعو بجوج وتفرحو لنجاحكم .... ليكان كولشي فحياتك وكنتي كولشي فحياتو ... تشوفيه داخل بشششكل اخوررر ... نااااس كاملة كتعرفو الا نتي !!!!!! والله تاحسيييت بالحككررررة ( كتمسح دموعها ) انا اول وحدة كان خصو يسسووول عليها اختي .... انا 

حياة : ففففف ... ويااك نتي لي بغيتيه يتبدل !!! 

شيماء : ايييه ييتبدل ماشييي يقد الداكرة وييتكككبرررر وينساني واش كاينة !!!

حياة : واش نتي متأكدة ماعررفكش !!!! ... عنداك يكون غير دارها ليك العاني 

شيماء : واش تورنييي فعينيه اختي الله يهديك ... 

حياة : ورااا تانتي تبدلتي عاااوتاني ... وتصوري نت كون مكنتيش كتشوفي لي فوطو ديالو فهاد المدة واش غاتعرفيه لاوقف حداك ليوم !! والله ماتعرفيييه .... 

شيماء : اضعف الايمان غير يسول فياااا ...( شدات على راسها كتبكي ) اوووووووف صاافي صااافي خليني ...يممممشي يعييييش حياتو صافي..... 

حياة : ( جبداتها عندها عنقاتها) باااركا من البكاااا صافي ....راا المقسمة فالارزاق غادي تجيك

شيماء : بغيييييتوووو هو اختي ...بغيتو بهبااالو بكيفما بغا يكوووون ....

حياة : ونتي مسيتييلوو رجولتو كاااع ..نقول انا داك الهضرة لسفيان غايلوحني من السررررجم ماشي غير يغبر ... دابا غير قولي ليا واش نتي فعلا كتي كتشكي فروجلتو !!!

شيماء : واش حماااقيتي ..لااا طبعا انا عارفاه طبيييعي .. حيييت .. حييت ( بقات كتفرك فصبعانها وضور فعينيها ) حيت اصلا ... واحد نهار . راا .. ك كنا 

حياة : نعستو !!!!!!!! 

شيماء : لااا ... ت .. تراجعت فآخر لحظة .. ومابغيتش ... وتاهو تقبل واعتدر ليا ... ق قال انو ماتحكمش فراسو ... وهربت ليه ...

حياة : (ربعات فوق كرشها )وهاااادشي عاد غاااكنتو براااهش .... دابا علم الله شغاديرو .... اوا زيييد !!!!

شيماء : انا متأكدة هووو راه طبيعي ......ولاكن نااس لوخرين بداك الحركات لي كان كيدير وهضرتو وستيلووو ديما كاااانو كيشككو فرجلتو ويحرجوووني ... وهو راه غير عزيز عليه الضحك .. حيت انا كنعرف مزيان هو من داخل كيداير ... كايبغي يضضحك ويستهبل باش يخفي شحاااال من حاجة عندو لداااخل .... انا مايخفاش عليا ... ولاكن بغييتوو يتقاااااد ويتصرررف عادي ....مابغيت تاحد يقول عليه شي كلمة لي ماهياش ... 

حياة : اوا هاهو ماشي غير تقاد ....تقااادد وتجججبد ... ولااا كيعجب ناس كاملين وتاحد مايزعم دابا يقول فيه شي حاجة ماهياش .. هاهو دار ليك الخاطر ورضا الناس .. ولاكن ونتي !!!! مارضاااكش ...ووليتي بغيتي ديك القديم هذا قلتي مكتعرفيهش ... ملول مكانش عليك تديها فاناس يقولو ليبغاو مهم نتي عااااجبك وتايقة فرجلتووو سوقك فيهم ! هاعو تغرب تلت سنين خدم على اسو رضا ناس ....ونتي سيري قلبي على لقديم فدكراياتك عيشي معاه .... 

شيماء: معرفت علاااش تاحد فيكم مابغا يفهمني!!! .... ايه فعلا صصصدمني فيييه لهاد التغييير ... واخا كنت عارفة شي نهار غايحقق احلامو سواء قتليه انا شي حاجة ولا لا ... ولاكن مابغيتش يتبدل عليا انا اختي .... 

حياة : هادشي خصكم تهضرو فيه بجوح اشيماا ... انا ماقدش نقوليك شي حاجة وانا ماعارفاش هو شنو تحت راسو ... وديري فراسك انك دابا خصك تأضبطاي مع حيااة نجم اسيوي وكيشق طريقو للعالمية ... فيستيفالات معجبات اجوندا عامرة طوغناااج اشهااارات ... غايتنقل ويسافر بزاااف ... 

شيماء : كيفمااااهوووو انا بغييييتووو ... 

حياة : دونك خصكم تهضرو بجوج وتحطو كولشي أطابل ... ياك هو مزال هنا اوا غدا هضرو نتي وياه وشرحو لبعضاتكم كولشي ... الى كان باغيك راه مغايخليش...ويلا كان لعكس غاتنسايه وتمشي تعيشي حياتك وبني مستقبلك تانتي بحالو 

شيماء : مستحييييييل ... مستحيييل مزال نهضر معاه من بعد داك القممممعة ...ايييه كااانبغيييييييه وكنحلم بيه كل نهااار وقالب ليا حياتي هاد تلت سنين كاملة لي تسنيتو فيها بلاا مااا نمل ... ولاكن كرامتي فوق كووووولش ..... ملي يبغيني يجي هو يهضر معايا ماشي انا ... واصلا لي عليا راه درررتووو ....

حياة : اوا صافي تاهذا نظر ... 

شيماء : والله لاااهضرتو ولا ديتها فيه .... غير التعفااارر والتكببرررر انا نوريييه كتر من داكشي ...مالو غير هو لي عندو معجججبيييين ... 

حياة : هههههه طلعتي ببخبيزتك تانتي اشيطانة .... 

يلاه كيهضرو وسارة خرجات هازة بنتها 

سارة : اش كتوشوشوو تمااا ( اسبرو كان فالكولوار كييسمع كوولشي ... غي بانت ليها سارة ورجع هبط فدروج ضاحك كييضور فرااااسو وكيهضر مع فصمت غير مع راسو ) 

اسلرو : ماباغاش تهههضري ... الحمقة ...

زاد كيضحك لعند لبنات

حياة : ههه والو اختي والو .. ( باست ماجدة ) لكتووووكتة سكتاااات شوووية 

سارة : وي ... انا غانقوليكم بسلامة عمران غايجي لدار يلقاها خاوووية ...راه عيط ليا راه فطريق ...

حياة : اوا صافي قولو يلحق عليك لهنا 

سارة : لا غاييكون عيان زايدوون الافتتاح قرب يسالي تالغدا ان شاء الله ويدوز .. 

حياة : ان شاااء الله احبيبة تهلاي فراسك وفالكتووووكتة ( رجعات باستها وسارة هبطات ) 

*لتحت 

اريج : اوا هضررتو !!!! 

اسبرو : مالقييييتهاااش 

رتاج : اواااا ددخل لبيييرو 

اسبرو : ماااعرفت إينااا بيرو خفت نحل شي باب على شي مومياء ولا شي فرعون محنط نمشي صفر بالخلعة كتر منا صفر ... ماشي مشششكل منبعد ونهضرو..

اريج : نعيط ليها تهبط!!!! 

اسبرو : واااااش مغاااتخرجوش سووقي اهاااد الطوووبااات ... بعععدوووو مني .... غانبغيها غانهضر معاها رااسي ..

لامار : ( ببرود كتجغم من كاسها وتهضر بثقااااالة وثقة فالنفس ) هضر معاها ...ولا متهضرش معاها .... طلع عنها .... ولا تهبط عندك ...تهضرررو ليوم ....ولا غدا.... انا مااااسوووقيش مووووووهيم العرس يكوووون... نلقا مك مع شي عوجة اخرى ولا شي مجبدة العينين تتقبهم ليك .....المشاكيل طلعولنا فراسنا وتحراميات كاملين حافضينهم... 

اسبرو : واش نتي مغاترتاحي تاتزوجي امة سيدنا محمد كاملة ولا شنو !!!! ... نتي را مرابحين معاك غالعدووول ...( شاف عند البنات ) انا نقول ونتوما قولو الله يحفظ .. هاهي غاتزوجني ... مغاتلقا تاحد فرادي قدامها غاتبدا تاني تزوج فراجلكم بالواحد تاتعمر ليهم طااابلو ...ربعة لواااحد عاد تهنا ... 

لامار: ( جبداتو من ودنو ) خليييينا دابا من الطططنزز .... قوووليا شنو تحت رااااسك 

اسبرو : ععنننقي اش غااايكووون تحتو ... انا ماعرفت اشمن ريح جاب ديييييلمي لعندكم اصلا ...تاااااططبگت فحالي وتهنيت من خناشششكم راااجع لييييكم 

لامار : ( دايرة يديها على حنكها كتفرج فيه) خلاتها جارتنا لكبيرة .... واخا الكاس يولي كساس .. عمر الثامل يوووولي ولد اناااااس ....

اسبرو : ياااك الالة مراات اسيدي !!!! آ لي كنت نحررق دمي معاها ترجع لطرييييق ... آلي قطعات ليا الشعر لتحت الودن ومشات تلاقا بداك ناارووتوو كون مكنت انا كون داك قباط الارواح ديالك دابا سيفطك لارض السابعة .... وتابعها كنهلل ونحفي فكري ونعطي فدروس ... يالي كانت غاتسبب فالكارثة العضمى لراسها ومجاو فيا غير انا ... انا لي كلييييت الدق فضلوووعي ... تحححل ليك الفم دابا !!!! دزتي ليااااا ... دابا علمناهم يشعلو الضووو طفااااه عليييينا 

لامار : قوووولها لراسك ... انا درتي ليااا عقلي ..ونتا خررررجتيييييه .....

اسبرو : واش نفكركم براسكم ولا نسكت ... ونتي وهادي كنتو كي سطل المتقوب والجفنة بلاقااااع ... ونتي كنتي كضلي تااابعاه مشلقمة ليه يديه كي النقاااااشة .... اما وحدة لفوووق غاااخليي سااااكت مزال نشدهااا عندي معاها شي حسااااابات .....بانليكم دابا اسبروووو تجيو تعطيوه الدروس ...درووووسكم زيييدوهم فرااااسكم ..ما تاكركم مافيه مااايتزاد عااااد ... لاجيت نتبع دروسكم غانخرج على راسي .. وحدة مشات كزات شعرها ووحدة مشات تزوجات *امل وحدة شدات فيد الاخرى وقصدو اللبييرااان ... جاييين تنصحو فيا انا ..باغين تخرجو عليا ....

رتاج : انا حسابتني طواليتي غير فالهيئة ساعة تاللسان باليا دا حقووو ....

اسبرو : ويلا ماعطيتوش لديلمي تيقاااررر تخليوني بيني وبييييين معشوووووقتي ...غانورييكم شي حوايج اخريييييين طوااااالو تاهوووما .... ( قرب ليها راسو وهي ديرة فيه داك النظرة ديال شو كيدار ) واااااازمييييييه ... ولي لقيتها قربات لشيماء تعطيها فالدروووس نهرس عليها الصبروة .. بعدوووو منها لاتفلسووووهاااا نصدق جامعها من البيران على خر يامي ..

رتاج : احترمممنا راحنا كبارين علييييك 

اسبرو : ( كايشوف معاهم ) نجججمعكم كاملين وللله ماتعطيو تاعشر سنين مقادة يلاه تخرج منكم بنت باقي ماحق عليها الصيااااام ...

يتبع...