ربيع : طلقييي أ المسعووورة طلقي وااااايدي أعباد الله
نورسين : ههههههه عطيه علاش كيقلب ما كيحشم ما كيرمش
رجاء: اللي بغيتي نديروا فيها أ لالا نديروا نتي غير آمري و انا نفد
كنزة : ههههه نتي اللي تصلاحي ليه أختي ما طلقيش منو ما كرهتكش تزرقيلو عينيه
ربيع : وااااعتقو روح أعباد الله توما شكون هاد جاكي شان اللي جايبين معاكم و دابا رخي من يدي راكي كرضتيهالي الله يعطيك الكرض انشاء الله
نورسين : و الله ما كتحشم تستاهل نتا اللي كضسر عليها بحال هاد نوع هو الي يصلاحو لبحالكم فينما لقيتو شي بنت تزللو عليها الله يقلل حياكم خلاتها فاطمة
ربيع :*كيغمض عينو بقوة الالم * و آخر مرة هادي و توبة و غير قولها تبعد مني وااايدي ما بقيتش كنحس بيها دعيتها لله
نورسين : صافي ا رجاء غير بعدي منو ما يعاودش
رجاء طلقات منو و رجعات اللور كتشوف فيه و هو يدور و خنزر فيها و قرب حدا وجهها وقال
ربيع : و رااكي ضاسرة مع راسك بلا قياس غير جيتني بنت اما كن نصور ليك كمارتك فالحيط
رجاء : ها أنا أش كتسنا الا سميتك راااجل و مزغرتة عليك مك قرب لساحتي الا ما نطيرو ليك من جدر ما نتسماش رجاء
ربيع : * طلع فيها و هبط * بهاد القلدة و لا بقلدة أخرى
رجاء :*قربات حدا وجهو و غمزاتو * بهاد القلدة مالها كي جاتك ؟
ربيع :*شاف فنورسين * منين دبرتي على هاد الماركة عاود عويقة بلا قياس
رجاء: اما نتا ربح الا كنت انا عويقة نتا لسانك سليط و انا اللي غانقطعو لوالديك
ربيع : *حط يدو على كتفها * سير أ ماما لعبي مع قرانك اما انا بزاف عليك
رجاء حولات عينيها و شافت فديك اليد اللي حاطها على كتفها و قالت ببرودة
رجاء: غاتجمع يدك و لا غاتكرض عندك حد 3
ربيع : ههه 1 2 3
ما جا فين يكمل ثلاثة حتى طرطقاتلو صبعانو ربيع بقوة الحريق غوت على حر جهدو
رجاء : عطيتك اندار نتا ما سمعتيش ما عندي ما ندير لك و فالقانون ديالي اللي دار دنب يستاهل العقوبة
ربيع :*شد فيدو و جلس يعاير * انا بغيتلك الساحق و الماحق و الوجع المتلاحق انا بغيتك تخرجي من ضيق و تدخلي في ضيق انا بغيتك تولي كي الفكرون ما ينبت ليك شعر ما تقدري تحكي ضهر يا المشة المجراابة يا عيفة نسا تفووو على جنس انا بغيتلك البطل
نورسين و كنزة كيتفرشخوا بضحك على ربيع عجباتهم فيه حتى هو ما كيحشمش هي اللي غاتواطيه
رجاء :*ربعات يديها و ابتاسمت باستهزاء * خسارة صراحة ماماك هزاتك فكرشها تسع أشهور يعني أربعين أسبوع يعني 270 يوم يعني 6480 ساعة يعني 388 880 دقيقة و في الاخير تطلع ماشي راجل و داير بحال الولية صعيبة شوية
نورسين : هههههه أبصحة العصير اودي يا ربيع
ربيع بدا غير كيصرط فريقو ما تصرطاتلوش القمعة اللي كدير ليه و زيد عليه يدو اللي كضرو بسبابها
ربيع : غاندمك غير بلاتي
رجاء: جري طوالك المخير فعودك سرجوا و ركبوا هادشي الا كان عندك
كنزة : ههههه باركة من الكلاشات أرجاء راه و الله حتى بزااف
ربيع : عاجبكم الحال أتريكة ربعمية مكمشة الله يخليكم بالخلا جالسين كتفرنسوا عندي الحلقة هنا غانطلع عند خالتي فاطمة اما نتوما ما بقات معاكم هدرة و خصوصا منين جبتي هاد الضاسرة
نورسين غير سمعات سمية ديال فاطمة و هي تضرب فحناكها
كنزة : و انا مازال حتى ما قاديت و قربو يجيو العفووو
ربيع : *طلع و هبط فرجاءو قال * اش غانقولك لا تكبر شان اللي ما عندو قيمة يحسب روحو فلان و هو غير بهيمة
رجاء : * بدات كتعصب و عضات على شفايفها و ربعات يديها و قالت* كاين الرجال الشداد و كاين اللي على رجولة بعاد و كاين اللي سميتو فالحالة المدنية عماد و فعايلو فعايل سعاد *ضربات فصدرو بجهد * الرجولة راها بحر ماشي تخراج العينين و الصدر و السروال طايح و ترطيبة للشعر زمان قلالو فيه الرجال و كثروا فيه عنيبات الله يستر
ربيع :*دوز يدو على شعر بالفقايص و صدرو بدا يطلع و ينزل و قرب ليها و قال * شلا ناس فدنيا تلفو تسمعهم تقول العفو تشوفهم تقول تفو
رجاء : * جمعات يديها على شكل لكمة و زادت قربات لوجهو حتى ما بقات كتفصلها عليه والو و عينيها كتشوف فعينيه ديريكت * لي كرهني جابها فراسو انا ناعس هاني وهو محروم من نعاسو
ربيع :*تعصب و عينيه حمارو و قال بصوت خشن * لي حسدنا عمرو ما يوصلنا و لي عاشرنا ديما يتفكرنا الزين و العياقة خليناها ليكم عندنا العقلية صعيبة عليكم
رجاء: شحال قدك تطير و تدفع كبير اخرتها قبر يجمع بين الغني و الفقير و كاتبقا غير الكلمة د الخير
نورسين غوتات بجهد و قبطات فراسها
نورسين : وا براااااكة بااااااااركة ها العار اوووف ما كتقاداوش
نورسين جرات ربيع من يديه
نورسين : زيد نتا قدامي
ربيع : بهيمة انا باش نزيد قدامك تفو *كيقاد فالكوستيم * آخر مرة تجيبي معاك بحال هاد الكنس
نورسين جراتو و بقات كضحك و تبعاتها كنزة و رجاء حلات نورسين غير بشوية الباب ديال دار حيت تعطلوا بلا قياس و فاطمة اليوم الا شفتهم تعطيهم العصا
نورسين : شوووت ما ديروش الحس
ربيع : علاه مالنا كانشفروا زوينة هادي عاود
نورسين : واااا المريض سمع الهدرة
دخلوا كلهم غير بشوية و نورسين ردات الباب غير بشوية بانلها ضو ديال الكوزينة شاعل و كيسمعوا صوت ديال ضحك
ربيع : خالتي فاطمة جااالسة كتكركر ياكما كتخون محمد * دار يدو على فمو * c'est pas possible
كنزة ضرباتو لقرفادتو
كنزة : انا ماما بزاف عليك يا الحيماري
نورسين : ها عار ربي لا ما سدو حلقكم
تقدمات نورسين بخطوات بطيئة حتى وصلات للكوزينة
لقات محمد باباها جالس شاد لفاطمة فيديها و كيضحكوا و كيشوفو فبعضياتهم نورسين بقات غير مصدومة حنحنات
نورسين : احم بابا
التافتو عندها بجوج و فاطمة ضربات الوقفة و حيدات صندالتها السلاح الفتاك ديال كل أم مغربية و شيرات عليها بيها خوات نورسين جات فربيع لكمارة نيشان حيت كان من موراها كلهم دارو كراااخ بضحك ربيع ما عجبوش الحال بقا غير كينفخ و خصوصا وقعلو هاد البلان حدا رجاء اللي ما كيحملش
ربيع : ياك كانقولكم وجهي وجه وردة و زهري زهر قردة
فاطمة : ياااااااو نتوما فين كنتو يا رباعة العيور دويو حتى لعشرة د الليل عاد جايين
نورسين : و راه اماما ا الله سالينا و خدينا لحوايج
فاطمة : ياااواخا تكونو خيطتوهم و فصلتوهم هادا هو جهد ياو ناس ما بقا والو و يجيو ما عونتوني فشقا ما والو منين حليتو عينيكم و نتوما سايرين تخيطوا و تفصلو فدروبة كن ماشي موبيكم اللي عاوني كن راه تقسملي ضهر الله يخليكم بالخلا
نورسين : ماما و الله حتى حشومة راني جبت معايا واحد الضيفة سميتها رجاء
فاطمة : ياو شكون هادي تاني
نورسين : صاحبتي اجي تسلمي عليها
ناضت فاطمة بلا عكز عليها و شفتها و بقات طلعها فيها و تهبط و قالت
فاطمة : ياو ماشي هادي هي ديك جوري لا
نورسين : لا غير كتشبه ليها هادي رجاء
فاطمة سلمات عليها و رجعات اللور
فاطمة: ياو زينة تبارك الله نتي ابنتي مزوجة
رجاء حركات راسها بنفي و ابتاسمت و هبطات راسها
رجاء: مازال أ الحاجة
فاطمة : ياو عندي واحد الوليد الا بغيتي تزوجي بيه غزااال ياو ما تختاري من رجال غير هو
نورسين :*طرطقات فيها عينيها * ماما نتي اش سايرة تخربقي عندك ولد و حنا ما فراسناش و لا شنو و زايدون بعدي من البنت شوف كي حشمتيها
فاطمة :*دارت شان على فمها كضحك * قوليلي ابنتي رجا كانهدر معاك بالمعقول زعما نتي تبارك الله زينة و انا حسبني بحال ميمتك باينة فيك معقولة و بغيت نخطبك لولدي الا كتاب
نورسين : ماما
فاطمة : يا و نتي سكتي يعطيك غمة خليني نربط الولد شفتي الا ما درتلوش هاكا عمرو ما يجمع راسو
نورسين : و نتي علامن كتهضري بعدا
فاطمة :*دارت يديها على راسها * و يااااا العالي قولي كيف ندير مع هاد المنونخة انا داوية على ربيع
نورسين و رجاء بقاو غير مصدومين و حلوا عينيهم كيشوفو فيها و تشاوفو فبعضياتهم
رجاء: خالتي ا...أنا ما باغا زواج الحمد الله عايشة بخير كنصرف عل ميمتي ما عندي ما ندي بشي زواج خصوصا من ر...ربيع
فاطمة : يا و نتي كوني تحشمي راه و ليدي يتهلا فيك و يسترك أش بغيتي و دنيا خيابت و الواحد غادي و كيكبر ماشي كايصغر اللهم ضربي البيض فالكحل و تزوجي و ديري دارك
نورسين جرات رجاء معاها لبيت و خلات فاطمة كتهدر غير و هي عضامها
نورسين : ما تديش عليها ماما هاكاك دايرة
رجاء: ماشي مشكل أ لالا
نورسين :اليوم غايجيو عند ختي الخطاب و دابا انا غانلبس شي حاجة خفيفة تبغي نعطيك شي كسيوة و نقاد ليك وجهك و لا تبقاي بحال هاكا
رجاء: كنفضل نبقا هاكا انا ماكيعجبني نلبس لا كساوي ما كايعجبني ندير مايكاب كنرتاح هاكا
نورسين حيدات جلابتها و مشات حلات الماريو باش تجبد شنو تلبس
رجاء: غير انا اللي عند ماما بابا مات العام اللي فات الله يرحمو و هو اللي حببني فهاد الدومين و هو اللي كان كيدربني العام اللي فات دار أكسيدون فطريق و مات وهو مازال صغير جاتنا واحد الصدمة لدرجة انني لحد الان ما مصدقاش بلي مات هو كان خدام مع موسيو جبل و انا كنت فتدريبات ديك ساعة كان بابا ديما كيهدرلو عليا و على الكفاءات ديالي فاش مات جا عندنا موسيو جبل لدار و تكلم معايا و صبرنا و عاونا عمري نسا خيرو كان كل شهر كيصيفط لينا الفلوس و مرة مرة كيجي يشوفنا انا مرضت و دخلت فاكتئاب و ماما حتى هي كان خاصها دير عملية هو اللي تكلف بمصاريفها دازت ستة اشهر و جا واحد نهار لعندنا قالي باغي بوديكارد شخصي لزوجة ديالو و انا اللي جيتو مناسبة حيت كان كيشوفني فاش كنت كندرب و كلشي و اقتارح عليا نخدم معاه و داكشي نيت اللي كان عطاني العنوان ديالك و كنت مراقبك
نورسين : الله يرحم باباك و الله يبدل محبتو بصبر و الله ما كان فخباري بلي دايرلي جبل بوديكارد صدمني بالله
لبسات نورسين واحد الكسيوة فالاخضر طويلة بالكمام و قادات مايكاب خفيف و خرجات من البيت هي و رجاء
نورسين : سيري جلسي فصالون ما بقا والو و يجيو
رجاء: دابا غانبقا بوحدي مع هاداك
نورسين : راه ضريف بالله ما فهمتش علاش دايرين كي المش مع الفار ههههه اصلن هاداك داكشي ما كيعرف غير يدابز
رجاء: الا بغا الحرب انا مولاتها
نورسين : تكايسي على هداك راه داير كي الباسطة عندك تمشي تقيسيه راك غاتوحلي فيه
انصارفت نورسين و دخلات رجاء و جلسات فالصالون كان ربيع هاز تيليفون كيخندش فيه و داير رجل على رجل
رجاء: أفيين أ رويجل
ربيع رد تيليفون لجيبو و قاد الجلسة و شبك يدو مع بعضهم و خنزر فيها
ربيع : نتي ما زال ما بغا يعفو عليك الله من هاد البلية ديال تصياد رجال قوالبك عرفناهم كتحاولي تغريني ولكن انا ما شي من هادوك غير تهناي
رجاء: دابا انا غانغريك نتا سمحلي و لكن الا بغيت نغري شي حد غانغري راجل ماشي بنت بحالي بحالها
ربيع :*عض على شنايفو كيبرد القمعة * نتي واش ما غاتحشميش
ربيع : ا لالا تفرقي عليا انا قاديتيهوم ليا انا ما كنعرفكش اشداني نهدر معاك نهار اللول هانتي غانقولك واحد اللعيبة عندك السما و عندك الارض ضربي طول فالعرض و قسميه على الارتفاع داكشي اللي عطاك عطيني بيه تيساع الله يرحم الواليدين
رجاء: خسارة ما عنديش مع الماط ما عرفتش علاش جيتيني على كانتي ياكما طلعلي الوحم عليك
ربيع طرطق فيها عينو
ربيع : هي نتي مزوجة
رجاء: ممكن
ربيع : يحسن عوااان راجلك مسكين خرجتي فيه بطول و العرض و الارتفاع واش بصح مزوجة و لا كتفلاي
رجاء: اش بانلك
ربيع : و نتي صراحة ما بايناش عليك مزوجة نتي خاصك تبقاي غير بايرة
رجاء: اوا كل فولة خامجة كيجيب ليها ربي فروج عور
ربيع : اوا هادي ما كدبتيش فيها نتي نيت فولة خامجة و ما يطيح فيك غير فروج عور حيت محال يديك اللي بعينيه صحاح فصاح
رجاء: عجبتك ياك؟
ربيع طرطق فيها عينو و قاد قميجتو
ربيع : واش نتي عااايقة بلا قياس و لا انا اللي ما كنفهمش مزيااان واش نتي شوية لابس
رجاء: حمد الله نتا بخير
ربيع : انا ما غانديرش فيك راسي حيت نتي راك غير هاربة ليهم من شي سبيطار و انا داير فيك راسي اللي دار راسو فنخالة ينقبوه الدجاج
عند نورسين
جالسة كتقاد لختها المايكاب كنزة كانت لابسة واحد الكسيوة فالبوردو جاتها مزيونة و حتى المايكاب اللي قادت ليها نورسين جاها غزال
نورسين : باش تعرفي راسك عزيزة عليا جبل حلف ليا ما نعاود نقاد لشي وحظة و هانا جالسة نقاد ليك فكمارتك
كنزة : اوا لهلا يخطيك أ زين و لكن علاش ما بغاكش تبقاي فهاد دومين ياك كان مشجعك من اللول
نورسين : عرفتي شحال من عروسة مسكينة كاتصيفطلي ميساجات باش نصوب ليها لكن صافي اختي منين جبيلو ما بغاش انا تخليت على هاد المجال وفاش فكرت اختي عندو صح هو باغي ليا غير الخير و انا ندير اي حاجة على قبلو غير يكون فرحان ليا زينديالي ما تصوريش شحال توحشتو حوبينو
كنزة: صراحة داك راجى ضريف مصاب يكون فهد كيبغيني بحال جبل
نورسين :كل واحد و طريقتو فالحب مثلا جبل هو راجل رومانسي بلا قياس يقدر يدير عليا شي حوايج فشكل وهو من الرجال اللي كيعبرو على الحب ديالهم و كاين راجل عاوتاني اللي كتلقايه كيبغيك بزااف و لكن ما يقدرش يقولك شنو فقلبو يعني بحال كيبين ليك بالافعال أكثر و كاين اللي ما كيعبر ما كيزمر كيعرف غير ياكول و ينعس و هاد الرجال ماااا أكثرهم فالمغرب هههه و انا كنحمد الله ربي بليل و بنهار اللي رزقني بشخص بحال جبل ما عمري شفت بحالو
كنزة : الله يخليكم لبعضياتكم و الله يبعد عليكم ولاد الحرام
نورسين بقات ساكتة مدة و تفكرات باه اللي بان من بدا و جديد و قالت بحزن
نورسين : هاداك غير حمار ما سوقيش فيه الله يغبر لدينمو شقف هو سبابنا فعدابنا
كنزة : ما عيطتيش لجبل
نورسين : عيطتلو شحال من مرة ما كيجاو...
ما جات فين تكملها حتى سمعات تيليفونها كيصوني هزاتو و هي تحل عينيها على وسعهم فاش شافت مكتوب فشاشة 《my love ❤》 و ابيل فيديو من الفوق فرحة لا توصف دوزات لابيل و هو يبانلها جبل واقف فالكوزينة ديال دارو و مالابس والو من الفوق و كيصاوب فالقهوة و موقف التيليفون و كيبتاسم ليها غمزها و قال
جبل : Buenas tardes bebe * مسا الخير حبيبتي *
نورسين كتحس بقلبها كيضرب بجهد و يديها كيترعدو ما قدراتش تشد تيليفون بقوة الفرحة و الشوق لحبيب قلبها جبل توحشات تشوفو تسمع صوتو إحساس فشكل كتحس بيه فداخل ديالها لدرجة دموعها بداو كيتساقطو و لكن الابتسامة مرسومة على وجهها و قالت بصوت فيه نبرة حزن و دلات شنيفاتها كيف شي درية صغيرة
نورسين :جبيلو 😭😭
جبل :*دوز يدو عل شعرو و هز عينو شاف فسقف و غمض عينو و عاود هبط راسو شاف فيها و عض على شنايفو و تنهد مطولا و قال بصوت حنين * مال بنتي مقلقة
نورسين : توحشتك أ كبيدتي فين مشيتي و خليتي بنت قلبك حتى واحد ما كيفهمني من غيرك
جبل : ما بقا والو و نجي الا بقيتي كاتبكي غادي نقطع انا عيطتلك باش نرتاح أحبيبي و نتي كاتقطعيلي قلبي بدموعك مسحيهم الله يرضي عليك راني قابط راسي غير بزز باش ما نجيش لعندك
جبل : ما مزياناش ليك ما عندك ما ديري بيها *تنهد * نتي بخير ابنتي
نورسين :*كتحرك راسها بنفي * عايشة و صافي حتى تجي عاد ترجع فيا روح
جبل :*بابتسامة * مزال ست ايام و تلقايني حداك
نورسين : كيف غادي مع الخدمة عيتي
جبل : الخدمة بزاااف عاد دخلت لدار نهار كامل و انا فشركات غاناخد واحد الساعتين ديال راحة و نمشي لاميريك نقاد شي حاجة ما بقيتش كنلقا الوقت سمحيلي الا قصرت معاك لقيتك عيطتي ليا بزاف د المرات لقيت بزااف د المشاكل عندي هنا داكشي علاش عندي الخدمة مزيرة شوية
نورسين : الله يعاونك أ حبيبي
نورسين حسات بردة شدات على فمها و لاحت التيليفون و مشات كطير دخلات للحمام و بدات كترد جبل بقا غير مصدوم عرف واقعة ليها شي حاجة ماشي هي هاديك بقا كيغوت بصوت فيه نوع من الخوف
جبل : نووووورسين
كنزة مشات كتطير هزات التيليفون
جبل: فين هي نورسين جااااااااوبي
كنزة : دخلات للحمام كترد واقيلة من الغلاص اللي كلينا قبيلة هو اللي ضرها
مشات كنزة كطير حلات الباب د الحمام لقاتها حاطة راسها على الحيط ووجها أصفر و كلها كترعد و شادة فكرشها كتعطيها الحريق كنزة حطات يديها على فمها و دورات تيليفون لعند نورسين
جبل :*بخوف * نوووورسين ماااالك جاااوبيني واش كتحسي بالحريق نووورسين هزي راسك هدري قولي شي حاجة
نورسين هزات عينيها و شافت فيه و قالت بصوت فيه نوع من التعب
نورسين : انا بخير أجبل غير ضربني البرد واقيلة
جبل :*كيتكلم بصوت خشن *مااايكونش داك الغلاص اللي تشهات سيادتكم فالبرد واش انورسين عندك العقل و لالا
نورسين : لا أجبل وا عادي واش لغلاص غايديرلي التقية راه غير البرد انا متأكدة
جبل : و منين عارفة البرد علاش ما كتلبسيش حوايجك غبرت عليك نهار أنورسين نهاااار واحد
نورسين : واش دابا انا ربي اللي عالم بيا و نتا كتزيدني
جبل : *كيعض على شنايفو و كيحاول يتكالما * غدا غانجي عندك باش نتفاهموا مزيااان
نورسين : واش أجبل ما خاصنيش نمرض راه عادي اي واحد كيضربوا البرد و علاش غاتجي لعندي و نتا عندك الخدمة مزيرة ما كاين لاش غير سالي خدمتك انا و الله حتى مزيان
جبل : نتي أنورسين أهم ليا من هاد الزبل كاااامل هاد شركات و هاد التخربيق ما يسوا والو قدامك أحبيبتي الا مشيتي حتى مرضتي ليا نتي و لا وقعت ليك شي حاجة نحماق أ بنتي و الله حتى نتسطا ما عرفت كيفاش غانقدر نخدم من بعدما شفتك بهاد الحالة كيبانلي نجي ما نقدرش نخليك هاكا غانجي نديك لطبيب بيدي
نورسين : و صااافي و الله حتى زدتي فيه غدا غانمشي لعندو انا و ماما يالاه غير ارتاح
جبل : غدا انشاء الله غاتجي لاسبانيا ياك عندك الوراق و عندك كلشي هانا غادي نقطعلك بيي و اجي غدا غادي نتسناك
نورسين طرطقات فيه عينيها
نورسين :واش نتا شوية لابس كيفاش اجي عندي غدا وانا ما بغيتش نشطنك على خدمتك
جبل : اصلن انا توحشتك بزاف و كنت مصبر راسي حيت يصحابلي مهلية فراسك و لكن على ما بانلي ما كاينش اللي غادي يهتم بيك بحالي
نورسين عجبها الحال و فرحااات و حسات بقلبها كيضرب فالالف عضات على شنايفها
نورسين : لقيتي سبة دابا ياك هههه
جبل : ما كنضحكش انورسين مااا كنضحكش شوف حالتك كي دايرة واش عاجبك الحال تشوفي راسك مريضة و عياانة تهلاي فراسك على قبلي انا أنورسين انا ما كنبغيش نشوفك فهاد الحالة ما كنقدرش نستحمل
نورسين : غانجي غدا عندك انا بالفرحات عليا و الله حتى مزيانة هاد المرضة
جبل :*دوز يدو على حلقو و صرط ريقو * غاتحمقيني برب الكعبة حتى موتي على يديك ابنت قلبي كي داز عندك نهار
نورسين : حتى نجي عندك و نعاود ليك كلشي
جبل : كنضن اليوم الخطوبة د ختك
نورسين : اه ما زال ما جاو
جبل : تهلاي فراسك و تغطاي مزيان وجدي وراقك قبل ما تجي و عنداك تنساي شي حاجة واش تبغي نجي لعندك
قطع جبل الخط و هزات راسها شافت فكنزة لقاتها حاطة يديها على قلبها و ساهية فيها
كنزة : هااااح على كنبغيك و انا أكثر ومنين جبتيه ها العار شرشمتولي المشاعر تصوري عندو الخدمة كثيرة و قالك نديك أنا عند طبيب لا و من الفوق قالك اجي عندي حيت توحشك لا و من فوق هادشي كامل كيوصي عليك و يعاود *عضات على شنايفها * أما فاش قالك الشركات ما يسواو والو قدام صحتك الا مرضتي نحماق واااااش متأكدة هاد سيد مغربي
نورسين عوجات فمها و شافت فيها
نورسين : شوفي فيا نتي و بقاي حاااضياني قل اعود برب الفلق قل اعود برب الناس الله يحفضنا من العين
كنزة : اختي بسيف ما تبكي عليه و تقيل تهترفي بيه
نورسين : سمعي سمعي بحال جاو الخطاب ماما كتسلم عليهم و الله حتى جاو ههه
نورسين : مالك وليتي دجاجة باش دخلي لقفص هانا غادي نخرج نسلم عليهم بقاي نتي هنا و ثقلي و رزني عنداك فاش تشوفيه يسيلو ريوكك و تبقاي حالة فيه فمك كي ضبعة تو تو تو يا حبيبتي دفعي كبييير و نفخي صدرك و طلعي خنافرك لسما تبارك الله عليك راك زينة ماشي غير هو اللي زوين كني واثق بنفسك
كنزة : مخلوعة شوفي يدي كيف كترعد
نورسين : راه داكشي عادي غادي نمشي نجلس معاهم شوية باش نجي نجمع حوااايجي حيت غدا غادي نمشي عند كبيدتي هاااح و شحال فرحانة كن نلقا نطلع لسما نبوسها و نعاود نهبط
خرجات نورسين من البيت و دخلات لصالون بانلها فهد جالس و لابس الكوستيم فالاسود و مقاد شعرو و جالسة حداه واحد البنت مزيونة باينة ختهم حيت كتشبه لفهد حتى هي زعرة حولات عينيها بانلها ربيع جالس كيبكي و حاط راسو على كتف واحد المراة عرفاتها بلي غاتكون ماماه حتى هي زعرة و دايرة درة و لابسة جليلبة فالاحمر باينة ضريفة و كيوت و هازة كلينيكس كتمسح دموعها اللي نازلين شلال من عويناتها
نورسين ربعات يديها و بقات كتشوف فهاد المنضر اللي أثر فيها فكروها نهار لقات ماماها و تصالحات معاها إحساس فشكل ما كيعرف بقيمتو غير اللي مجربو
♤♤♤♤♤♤♤♤♤♤♤
الإشتياق موجع يا أمي
كوجع أم مشلولة ترى طفلها يغرق 😭😭
♤♤♤♤♤♤♤♤♤♤♤
نورسين ألقات تحية و سلمات عليهم و مشات جلسات فجنب
ربيع : توحشتك أ الواليدة بزااف *كيمسح دموع من عينو * شنو درت باش نتعدب بحال هاكا و نبعد عليك علاش بابا حرمني منك
ماماه قبطات فيدو و زيرات عليه
- ها أنا دابا حداك أولدي كلشي فات *باستلو راسو * ربي اللي عالم شنو دوزت فاش بعدتي عليا اولدي الله يسمح لباك هو سباب
دخلات فاطمة الصينية ديال أتاي و تابعها محمد من اللور كيعاونها و جلس حتى هو و جلسات فاطمة كتكب فأتاي
فاطمة : ياااو مرحبااااا بيكم ياو نورتو دار بوجهوكم يا و جوه الخير لالة جميلة *أم ربيع * نوضي قربي لطبلة
جميلة ابتاسمت ليه و ناضت و ربيع غير تابعها فينما مشات و مرة مرة يهز يديها يبوسها
جميلة : لهلا يخطيك أ ختي الله يجازيكم بخير كيفما تهليتو فولدي فغيابي الله يخليلكم صحيحكتم
فاطمة : ياااااو ما تقوليشااي هاكاك راه وليدي هاداك ماشي أي وااحد ربيع معزتو بوحدها ياو مسيكين قطعلي قلبي فاش عاودليا شنو صرا ليكم و تفارقتو بسباب داك باه
جميلة : اوا اش غانديروا باباه قاصح بلا قياس و ما بغاش يخليه يدير شنو بغا الله يسمح ليه
فاطمة : ياو شفتو نيت كاع ما جا معاكم
جميلة : ما قدرش يجي يشوف ولدو الله يهديه
ربيع :*تنهد و حط يدو على جبهتو * ما زال شاد فخاطرو ما نعرف شكون اللي خاصو يغضب واش انا ولا هو جالس كيتفشش عليا
فاطمة : يا و نتا كن تحشم ما تهدرش هاكاك على باك واخا الله يغبر ليه الشقف ما يحشم ما يرمش
نورسين كتندب فحناكها و كتشوف فماماها باش تسكت
فاطمة : ياو هز أ نسيبي العزيز غويطويات راني مصاوباهم فدار عنداك يصحابلك بحال داك المعكازات اللي كيشريو من الحوانت
ربيع : اوا أخالتي فاطمة محمد راجلك حداك شفتك جالسة كتشكري فراسك راه ما غنزوجوك لحد
فاطمة : هههه هاد العفريت د ربيع عزيز عليه يشد فيا
ربيع :*شاف فمحمد * لا و الله ما كنشد فيها زوينة هادي الا ضلم ما يبغيه لا ربي لا عبدو
رجاء كانت هازة كاس د أتاي و كطلع فربيع و تهبط كتعجبها شخصيتو بلا قياس من ديما كانت كتحلم تلقا شي حد بحال ربيع ما كينافق ما كيكدب كيعطيها لوجه نيشان انسان ضحوكي و ضارب دنيا بركلة و خصوصا فاش شافتو كيفاش كيتعامل مع ماماه و هي من نوع اللي كتقدر رجال اللي كيحتارمو ماماهم و كيبغيوها و زيد عليها ربيع لابس كوستيم و مقاد شعرو جاي معاه باينة فيه شخصية وجاي مع وجهو طبيعي يعجبها من اول نظرة
فهد: احم خالتي كنزة فين هي
فاطمة : نورسين سير ابنيتي غوتي لها 《عيطي ليها》 راه ما نعرف فين تلقايها محشية
نورسين :واخا
ناضت نورسين عيطات لكنزة و جابتها سلمات و جلسات و دازو مراسم الخطوبة بطريقة جدية فجو لا يخلو من تدخلات سي ربيع كانت خطوبة مميزة جا وقت العشا تعشاو و نورسين دخلات طول و عرض فديك بسطيلة عيات تغمزها فاطمة و هي والو حرام واش بغات تنوض من فوق الطبلة
ربيع : واااا الهيشة واااا براكة عليك بقا ليك غير الزواق ديال طبسيل تاكليه
جميلة : حشومة أ ربيع لي عساك ابنتي كولي بصحتك و راحتك
نورسين : غير خليه يهدر حنا موالفين بهضرتو
فاطمة :*كتعض فشنايفها و تغمزها * ياااو معدر ربيع ابنتي وا باركة خاصنا نجمعوا الطبلة ونتي تقوليك عمرك دقتي بسطيلة طحتي فيها عورة *كضحك ضحكة صفرة *
نورسين : وانتي نيت شحال هادي ما درتيها لينا الله يعطيك صحة أ الواليدة
جميلة :*بابتسامة * نتي مزوجة ابنتي ياك
نورسين : اه مزوجة
جميلة : فكرتيني فايامي حتى انا فاش كنت حاملة بربيع كنت كنتوحم على بسطيلة
نورسين وقفات ليها بدات كتكح و هبطات على واحد الكاس د الما حداها و ساست يديها و رجعات لور
ربيع : وا عليها طلعت تيتيز قولي سر كاين فبسطيلة
نورسين : أ لا غير تشهيتها و صافي عادي ما كاين لا وحم لا ستة حمص اصلن ما يمكنش
ربيع : ههه تودر علاه مالها ولات إبرة هاد بنتك تلف قبيلة اصلن حتى الا قدر الله و خطفوها غايردوها ليكم غير هني بالك
نورسين ناضت و ساست يديها و مشات لبيتها كتحس براسها غايطرطق عليها بالحريق
دخلات و بدات تجمع فحوايجها فينما كانت شي حاجة مقزبة عندها جمعاتها و هزات روايحها و مايكاب و كريماتها حتى من السشوار جمعاتو وقفات الباليزة فطرف و تسطحات فوق السرير كتفكر فموضوع أب جبل شاطنها فبالها و شاغلها بالها بنسبة كبيرة حارت ما عرفات واش تقول ولا تسكت و لكن غير تفكرات بلي غاتمشي عند جبيلو حسات بقلبها كيضرب بجهد غمضات عينيها و قالت بهمس
نورسين : دبدوبي ❤
حسات بتيليفون كيزنزن حدا راسها هزاتو لقات جبل كيعيط ليها من بدا و جديد دوزات الخط بسرعة و علامات الفرحة واضحة على وجهها بشكل كبير
نورسين : حوبينو
جبل كان حتى هو مسطح فوق السرير و موقف التيليفون و كيبتسم
جبل : توحشتك ابنت قلبي شنو كديري
نورسين : تعشيت و جمعت لفاليز دياولي و جلست نرتاح
جبل : عييتي أحبيبي
نورسين حركات راسها بالايجاب
جبل :*كيمرر يد على شاشة كيقيس فوجهها * قريب تجي عند حبيبك اللي كيتهلا فيك
نورسين :*بابتسامة * كن ديتيني معاك فلول
جبل : كان كيصحابلي غادي تهتمي براسك ولكن فاش مرضتي ما نقدرش نخليك تبقاي بوحدك واخا يوقع اللي يوقع غادي تجي عندي ما دامني حي ماخاصني نخليك حتى عند شي واحد واخا ماماك *تنهد * نتي الجوهرة ديالي ويلا خليتك عند شي حد نخاف يسرقك ليا
نورسين : *كتفوه * ما مشيتيش للخدمة شفتك جالس
جبل : غانمشي دابا فاش غاتوصلي ل aéroport *المطار * غادي تلقاي الشيفور غايوصلك
نورسين ضربات الجلسة و طرطقات عينيها فيها
نورسين : شناااهو و نتا أ البلار صاافي ما غاتجيش عندي
جبل : انا غانمشي لاميريك و مصاب غير نسالي فالوقت و نجي لدار نيشان و كنضن فاش غانجي غانلقاك
نورسين :* عوجات فمها * و نتا معاياش قطعتلي هاد البيي فاينا وقت
جبل : مع تسعود د صباح
نورسين : اوكي نتلاقاو غدا بيزو 💋
جبل : انا بغيتها د بصح
نورسين :*عضات على شنيفاتها * اوا هانا جاية عندك يالاه طريق سلامة أ دبدوبي
جبل :*غمزها * قبل ما تنعسي تفكري بلي كنبغيك و غدا إنشاء الله غانبغيك أكثر
نورسين اكتفات انها تبتاسم ليه و قالت
نورسين : ما بغاش يجيني نعاس
جبل : حداك les écouteur
نورسين :*باستغراب * و علاش بغيتيهم اه حدايا بلاتي نجيبهم *حلات المجر و حشاتهم فالتيليفون * هانا درتهم فالتيليفون شنو بغيتي دير
جبل : دايراهم فودنيك ياك
نورسين : وي
جبل : bien غادي تكاي و غادي تغمضي عينيك و غاتسمعي هادشي اللي غانقولك
نورسين إكتفات أنها تضحك و تطبق داكشي اللي قال ليها بالحرف
نورسين : واخا هانا غمضت عين شنو آخر ههه واش قاسك الحماق فهاد الليل
جبل : حاولي تسترخي و تنفسي مزيان نبغي نسمعك أنفاسك توحشتهم
نورسين ضحكات و بدات تطلع نفس و تهبطوا حتى حسات براسها بدات كتسترخي شوي بشوي
جبل حس بيها بدات كتسترخي و هنا جات أهم مرحلة بدا كيجود ليها القرآن الكريم بصوت رائع و كيقرا ليها آيات الكرسي و الاخلاص و المعودتين و آخر آيات سورة البقرة بصوت رائع ما تقدرش ما تخشعش معاه الا سمعتيه نورسين ما حسات براسها حتى نعسات وهو كيقرا ليها القرآن فودنيها أعظم شيئ يمكن يوقع ليك فالحياة هو تمتلكي زوج صالح كتحسي بطعم السعادة الحقيقة
⛅⛅⛅⛅⛅ أصبح يوم جديد
فاقت نورسين على إثر صوت المنبه اللي مطلوق بجهد فالفون ديالها هزاتو لقات ستة د صباح وهي عندها طيارة مع تسعود ناضت كطير دوشات بالخف و خرجات نشفات شعرها بالبلاك و دارت غرينات على شكل ضفيرات و لبسات سالوبيط ديال تجينز بانت كيف شي بريهيشة و قادات مايكاب خفيف ضريف هزات صاكادو ديالها دارتو فضهرها و هزات لبابيي دياولها جرات فاليزتها و مشات كدق على مها فالباب د بيتها حتى ناضت لعندها حلات الباب مبوقة بنعاس و كتحزم درتها
فاطمة : ياااو صبحنا على الله و ملائكة الرحمان تي مالك جاية كدقي فالباب كي المخزن مصبحة عليا تي واش بايتة تحلمي بيا
نورسين : جيت نقولك بسلامة و دعي معايا غانمشي للمطار
فاطمة : ياو غاتمشي بوحدك ابنيتي ياو ما خفتي ما والو
نورسين : أ ماما واش فيك الزهايمر شحال من مرة سافرت بوحدي
فاطمة : ياو سيري الله يفرشك و يغطيك بالرضا و عندك تبقاي حالة فمك تقوليك واكلة مخ ضبع حلي عينيك وودنيك تي مالك دايرة الغرون كي البراهش بقا ليكغير المصاصة و تكملي لي خاصك
نورسين : بديتي أماما عاود فوقاش مشاو لخطاب
فاطمة : ياو مشاو من موراك غير بشوية نضت نعيط ليك باش تسلمي عليهم ساعة لقيتك ناعسة
فاطمة : ياو البارح نيت وصلها ربيع لدارهم مع كانت دنيا خاوية و قالتلك بغات تمشي بوحدها قلتلها لا والو ربيع اللي يديك واخا ما بغاش فلول ولكن مسكين ميمتو غير كتشوف فيه عينيها يبداو يدمعوا ياو قطعولي في قلبي و داك باه و الله ما بغا يتصالح حتى من الخطوبة ما جاش ليها على قبل ربيع انا بغيتلو غي مصيبة
فاطمة : ياو باينة فيك غاتطيري بالفرحة حيت غادا عند داك راجل الغزال ياو سلمي عليه ياو بوسيهلي منين توصلي
نورسين بقات كضحك و دارتلها باي باي بيديها و لبسات مونطو غرونة و خرجات بلفاليز ديالها و دوك الكرينات اللي شافها يقول هاربة ليهم من الروض قبطات طاكسي و اتاجهت نيشان للمطار بقات كتسنا حتى جات نوبتها قادات الوراق و كلشي و طلعات لطيارة و قلبها كيضرب بجهد حاسة بواحد الفرحة فشكل يقولون ما أجمل اللقاء ..
عندما نلتقي بمن نحب نشعر وكان الدنيا كلها لنا سعيدة لسعادتنا و تقاسمنا فرحتنا .. نشعر وكأننا ملكنا الدنيا وما فيها .
وكأن الدنيا لنا وحدنا وليس عليها سوانا ..نشعر بالأمن والاستقرار وراحة البال
جلسات فالمكان المخصص ليها و من حسن حظها جات حدا نافدة طائرة أحسن بلاصة كتحمقها و كتسطا عليها ردات راسها اللور و غمضات عويناتها حسات بشي حد جلس حداها ما داتهاش فيه بقات مغمضة عينيها حتى سمعات المضيفة كتطلب منهم باش يربطوا حزام السلامة حلات عينيها و تقادات فالجلسة و بدات كتربطوا و نورسين من طبيعتها كتخاااف منين طيارة كتحلق فالسما ما حسات براسها حتى قبطات فيد شخص اللي حداها و غمضات عويناتها حتى حسات بطيارة إستقرات فالسما عاد رجعات فيها الروح و حلات عينيها و ردات راسها اللور و كتنفس بصعوبة بقات مدة كتطلع نفس و تعاود تهبطوا حتى تكالمات حسات بشي يد تحطات فوق كتفها دورات وجهها شافت شخص اللي جالس حداه و بسرعة حيدات يديها من يديه و قالت
نورسين : سمحلي عفاك
كتنش بيديها على وجهها باش تهدن داك شخص بقا كيشوف فيها وساهي حس بلي فايت شافها فشي بلاصة
-نتي بخير
نورسين: احم الحمد الله شكرا
أشار بيدو لمضيفة طيران و طلبها تجيبلو قرعة د الما و داكشي اللي كان جابتلو قرعة د الما و مدها ليها و ابتاسم
-تفضلي
نورسين :شكرا
هبطات نورسين على ديك القرعة د الما و حطاتها و هو يسولها
- أول مرة غا طلعي لطيارة واقيلة ؟
نورسين حركات راسها بنفي و دورات و جهها لسرجم ما بغاتش تعطيه فرصة باش يبقا يدي و يجيب معاها فالهدرة حيت تعلمات من جبل بلي ما خاصها ثيق فحتى واحد و خصوصا الانسان الغريب عليها
- ممكن نعرف شنو سميتك ؟ الا سمحتي بطبيعة الحال
نورسين غمضات عينيها و عاودت فتحاتهم و شافت فيه و قالت بصوت خشن و هبطات حاجب و نزلات لاخور
ردات راسها اللور و جبدات من صاكها واحد اللعيبات كايدارو على العينين و حطات يديها على كرشها و دارت ليزيكوطور فودنيها فيهم صوت ديال جبل كيغني كلما كتسمعوا كتبتاسم بلا هواها
كانت غافلة على العيون اللي كتختارقها الشخص اللي حداها غير سمع الكنية ديال 《الابراهيمي》 كره راسو الاسم اللي عندو معاه حساب عسير من زمااان وهاهو جا الوقت اللي يفديه و لكن واش فهاد اللحظة و لا فلحظة أخرى شكون عرف ؟
بعد مرور ساعات ودقائق حطات الطائرة فمطار برشلونة الدولي نزلوا المسافرين و كانت نورسين من بينهم قادات الوراق ديالها و هزات لفاليز ديالها و خرجات من المطار و بقات واقفة كتساين حتى بانتلها واحد لافتة فيها 《 نورسين الابراهيمي 》 هازها شي شخص يكون شارف شوية مشات لعندو كطير وقفات عليه و قالت بابتسامة
نورسين : Hola tio( مرحبا عمي )
داك راجل شارف قال ليها بابتسامة
- نتي هي زوجة ديال سي جبل
نورسين بقات كتشوف فيه و قالت باستغراب
نورسين : اه هي أنا حتى نتا مغربي ادن
داك راجل الشارف عنقها لعندو و ضمها بقوة نورسين بقات غير طالقة يديها ما عرفات باش تبلات بعد عليها و مرر يدو على شعرها
- نتي لابس أمورك بخير ابنتي
نورسين :حمد الله
جر شانطة ديالها و قال
-تفضلي أ بنتي
تقدمات نورسين بخطوات بطيئة و من موراها شيفور و حل ليها الباب و دخلات و حط شانطتها فالكوفر و تقدم ومشا لمكان سياقة و ديمارا و زاد
- مرحبا بيك فبرشلونة
نورسين : ترحب بيك جنة أعمي لهلا يخطيك
- مشاء الله عليك ابنتي غزالة و مؤدبة و تستاحقي شخص بحال سي جبل الله يدومها محبة بيناتكم
نورسين : واش نتا كتجيه شي حاجة من العائلة حيت شفتك كتهدر عليه بحال كتعرفو
-*٠تنهد و قال * كانعرفو منين كان هبيرة صغيورة فالكماط انا اللي جبتو من اللوبيطال مع ليلى الله يرحمها كان ولد غزال و طايح على وجهو شعر كان تبارك الله وافي من صغر مشاءالله عليه من صغرو و هو ولد خلوق مؤدب ما كيآدي حد داخل سوق راسو و كيمشي جنب الحيط كيفما كنقولو انا كنت عساس عندهم فالفيلا ديال باباه
نورسين :* بابتسامة * عندك شي تصويرة ديالو و هو صغيور أعمي
- اش غادي نقولك بقوة ما كنت كانبغيه من صغر صورتو و خليت تصويرتو عندي لحد الان فالبزطام محتافظ بيها كنعتابروا ولدي و حتى هو كيعتابرني بحال باباه
نورسين :*بفرحة * واش ممكن تعطيهالي انا ما عندي حتى تصويرة ديالو الا جات على خاطرك
- معلوم ابنتي نعطيهالك و لكن بشرط
نورسين : شنو هو
- تحتافضي عليها حيت هاد الصورة سنين و هي عندي و ما بغيتيش يوقع ليها شي حاجة الله يرضي عليك
نورسين : غانديرها فعيني أعمي
وقف فالسطوب و جبد بزطامو و حيد منو تصويرة ديال جبل و عطها ليها و ديمارا و كمل طريقو
نورسين كتشوف فتصويرتوا وهو صغير و كتحس بواحد الاحساس فشكل داخل ديالها إحساس زوين تشوفي راجلك و حبيبك و سندك فالحياة و هو طفل صغير قالت و عينيها كيبريو بالفرحة و كتشوف فصورة بحب كبير
نورسين : كان كيحمق الحبيب ديالي
قربات تصويرة لحدا فمها و حطات شفايفها عليها و بقات هاكاك واحد المدة و تنهدات و قالت
نورسين : ياااربي ترزقني بشي ولد كيشبهلو يااربي ما تحرمنيش من شي نسخة مصغرة عليه ياااربي حبيبي
حطات صورة على قلبها و غمضات عينيها و شيفور كيشوف فيها من المراية و كيضحك
- أمين أبنتي نسأل الله تبارك و تعالى أن يرزقكم بدرية صاالحة
نورسين : اللهم أمين عاودلي عليه شنو كان كيعجبوا فصغر شنو كان كيبغي بغيت نعرف عليه كلشي
- *تنهد و قال *هو ما دوزش الطفولة ديالو كيفما خاصها تكون كان ابنتي ما كيديها فيه حد عاقل عليه واحد نهار كان جا من المدرسة ووقف عليا كان داير شكيكيرتو على ضهرو و حط راسو على كتفي و بقا كيبكي و قالي حتى واحد ما كايبغيني حتى من بابا باغي يقتلني و حتى من دراري صغار ما كيلعبوش معايا اييه مسكين جابلي دموع مازال داك المنضر صورتو ما بين عيني كانت المربية ديالو ليلى صراحة هي اللي كتحن فيه و مقابلاه و لكن شاءت الاقدار ماتت و خلاتو فالحبس مكتاب الله كيتصرف كيقولك ما تمشي غير فين مشاك الله و لكن ربي حنين كريم شكون كان كيقول ولد سي سعيد الابراهيمي يولي كيملك نص فاسبانيا عندو شركات فانحاء العالم و كلشي كيهدر عليه مشاءالله عليه داكشي اللي داز منو و مازال بداك القوة و الثبات صراحة برافو عليه
نورسين أثر فيها كلامو عارفة حبيبها داكشي اللي داز منو ماشي ساهل كتحس بحال داك الحنان اللي كان هو مفتاقدو كيعطيه ليها جبل كسر ديك المقولة ديال فاقد الشيئ لا يعطيه هو بتصرفاتو بين بلي واخا الواحد ما يكونش حظى بالحنان الكافي بامكانو يعطيهلك عضات على شفايفها و زيرات على تصويرتو مابين يديها باغا تنسيه ديك طفولة المريرة اللي عاشها باغا تعيشها هي وياه حتى هي ما عاشتش طفولة زوينة ما كرهتش تخلق شي جو ديال سعادة فدار باغا تخلي حياتو كلها ألوان كيفما دخل هو لحياتها و خلا حياتها فشكل أخور نورسين عرفات مع جبل شنو المعنى الحقيقي ديال أنثى جبل بتصرفاتو معاها خلاها تثيق فراسها خلاها ما تخاف من حتى مخلوق على وجه الارض خلاها تكون شخصية واثقة من نفسها كن ما كانش فحياتها واش كانت غاتوصل لهاد النيفو لي هي فيه هدا هو سؤال اللي كيطرح نفسو كن ما كانش فحياتها أكيد كانت غاتزوج باول واحد تقدم ليها باش تهنا من الهدرة د باباها و ديال ختها و ديال ناس كن ما كانش جبل ماكانتش غاتوصل لهاد الشهرة اللي ولات فيها حقا نورسين بلا بيه ما تسوا والو كل نهار كتزيد تعرف قيمتو فحياتها كل نهار كتزيد تعلق بيه اكثر من نهار اللي قبل بقات حاطة راسها على زاجة و ساهية فطريق حتى بانلها واحد المحل ديال ألعاب الاطفال قالت بسرعة لشيفور
نورسين : عفاك حبس
حبس شيفور و دار شاف فيها
- كاين شي مشكل
نورسين : عفاك بغيت نسولك واش جبل فاش كان صغير كان كايعجبوا يلعب بشي حاجة معينة
بقا كيضحك و حك على لحيتو و قال
- هو كان عزيز عليه طوموبيلات بزااف كان كيجي لعندي مرة مرة كنت كنديرلو خاطرو و كنلعب معاه بيهم و لكن نتي اش بغيتي بهادشي
نورسين : شكرا أعمي تسناني واحد الدقيقة هانا غادي نجي دابا
خرجات كطير من الطوموبيل و دخلات لداك المحل ديال الاطفال خدات منو واحد جوج طوموبيلات وحدة فالاسود و الاخرى فالوردي بامكانك تحكم فيهم عن بعد و مشات دخلات لطوموبيل و خبعاتهم فصاكادو ديالها
نورسين : صافي بامكانك تمشي دابا
ديمارا شيفور و زاد حتى وصلو للفيلا ديال جبل نزل شيفور كيطير حل ليها الباب و نزلات
نورسين :كاين جبل لداخل
- ما عندي حتى فكرة
تقدمات نورسين بخطوات مسرعة و دقات فالباب وهو يتحل الباب حلات عينيها على وسعهم بقوة الفرحة و ما حسات براسها حتى غوتات
نورسين : جبيييييلو
طارت عليه بتعنيقة حتى تعلات من على الارض دورات يديها على عنقو و خشات نيفها فعنقو كتستنشق عطرو و قالت بهمس
نورسين : توحشتك
جبل حس بدقات قلبو تسارعو ما زال ما مستوعبش بلي كيشوفها قدامو من بعدما ما غبرات عليه أكثر من أربعة و عشرين ساعة كل ساعة كدوز عندو بحال العام هز يدو بتثاقل و بادلها العناق و هو زير عليها أكثر ما هي مزيرة عليه ربما إشتياقو و إحتياجو ليها أكثر من احتياج نورسين ليه هو كيشوف فيها عائلتو كاملة نورسين بمثابة حبيبتو و ماماه و ختو و صديقتو نورسين هي اللي ملئات داك الفراغ اللي كان عندو فحياتو
بعد عليه و بحركة سريعة منو لصقها مع الحيط و دفع الباب سدو وحط يدو على خدها و عينيه كيتساراو على وجهها كامل كأنو كيحفضو نورسين كتعض على شفايفها و كتبتاسم جبل حنى عندها و سرق قبلة خفيفة من شفايفها و قال
جبل : توحشتك ابنتي
ما خلالهاش الفرصة فين تهدر و قاطعها بقبلة خفيفة أخرى و بعد و قال
جبل :Te extraño mi amor ( توحشتك أحبيبتي )
نورسين : حت...
ماخلاهاش تكمل هدرتها و قاطعها بقبلة اخرى و كيشوف فيها بعيون معسلة
جبل :Tu me manques mon amour (توحشتك )
نورسين : جبل و بااركة ههه و الله حتى عرفتك توحشتيني
جبل ما داهاش فيها زاد جرها لعندو حتى ضربات فصدرو و حنى و باسها فعينيها بجوج وقال بصوت حنين كيبورش
جبل : فكل مرة كتبعدي عليا كاتخدي معاك طرف مني
نورسين ابتاسمت ليه و تعلات و باستو فخدو
نورسين : ماشي انا اللي بعدت هاد المرة و لكن نتا اللي بعدتي و قلتي عندك الخدمة
جبل : سمحيلي ابنتي و لكن هادشي لابد منو عيتي بطريق امم *باسها بوسات خفاف فعنقها * فيك جوع احبيبي امم *حط. يدو على كرشها * ما بقاتش كضرك.ياك *بعد و بدا كيقلب فعينيها بحال الطبيب * عينيك صوفر من لتحت *حط يدو على جبينها * كيضرك راسك كتحسي بالحريق فشي بلاصة
نورسين كتحرك راسها بنفي
نورسين : كنت مريضة حيت دوا ديالي ما كانش حدايا و لكن دابا خديت واحد الجرعة كبيييرة من دوا ديالي ولدلك ما بقيتش كنحس بالالم
جبل :*عض على شنايفو و ابتاسم * انا هو دوا ادن خاصهم يبعوني فلفارماسي على هاد الحساب
نورسين : *غمزاتو و حطات يديها على قلبو * نتا دوا اللي كيليق بيا انا بوحدي و الا تجرأ شي واحد و خدا جرعة منك غايموت
جبل: واش كتحسي بشي حاجة حيت البارح كنت مريضة
نورسين حطات راسها على صدر جبل
نورسين : لا
جبل كيمرر يدو على شعرها و قال
جبل : غادي نمشيو دابا أحبيبي عند طبيبة باش تشوف شنو عندك
نورسين بعدات عليه و عوجات فمها شافت فيه
نورسين : اوا نفطر بعدا راه فيا واحد جوع رهيب
جبل :*رد.شعرها من مور ودنيها * لا ما غاتفطريش دابا يقدرو يطلبو منك les analyses
نورسين : اوكي
جبل حل الباب و جرها من يديها و طلعوا فطوموبيلتهم مسافة طريق كان وصلو لعند عيادة ديال إحدى الاطباء المعروفين فاسبانيا نزل و حل ليها الباب و قبط فيديها و طلعوا فواحد العمارة لقاو باب العيادة مفتوح مشا جبل و هضر مع السكريتيرة
جبل : Ayer tomé una cita con un doctor *البارح أخدت موعد عند طبيبة *
ديك سكريتيرة هزات راسها شافت فيه و هي ضرب الوقفة و بدات ترعد و شدات فقلبها
- Señor brahimi (السيد الابراهيمي)
نورسين بقات كتخنزر فيها و شافتها كترعد غير هي و عظامها علاين تسخف جبل ابتاسم ليها و قال بلطف
جبل :Existe el doctor* واش كاينة طبيبة *
-Quiero tomar una foto contigo por favor *بغيت ناخد معاك صورة عفاك *
نورسين بدات كتدور لسانها ما بين سنانها و زيرات على يديه و قالت و خنزرات فيها
نورسين :Estamos aquí para ver al Dr. y no para tomar fotos.(حنا هنا باش نشوفو طبيبة ماشي باش ناخدو تصاور )
ديك السكريتيرة حنات راسها و قالت
-Disculpe las molestias *أسفة على الازعاج *
Puedes entrar ( بامكانكم تفضلو)
جبل :*بابتسامة * Gracias (شكرا )
جبل جر نورسين و عنقها جنب و جر ليها حناكها و قال بهمس فودنيه
جبل : علاش تصرفتي معاها هاكاك
نورسين : قالك باغا تصور معاك مالك وليتي برج ايفل مزيان تبارك الله
جبل : هادي هي ضريبة شهرة و ناس كيبغيو يتصورو معاك غير حيت كيبغيوك
حل الباب و دخلو عند الطبيبة استقبلاتهم بابتسامة و شرح ليها جبل الوضع ديالها طلبات منها تدخل معاها لواحد البلاصة باش تفحصها و بقا جبل جالس حدا البيرو
طبيبة دارت لنورسي واحد الدهنة لكرشها و بقات كشوف فواحد تلفازة حداها و نورسين حتى هي كتشوف معاها واخا ما فاهمة حتى وزة بقات طبيبة هاكاك واحد عشرة دقايق ووقفات و طلبات منها تلبس حوايجها و تلتاحق تجلس حداهم داكشي اللي دارت نورسين فاش كملات خرجات لقات الطبيبة حانية راسها كتكب فشي ورقة و جبل جالس على أعصابو مشات جلسات فالكرسي و قبطات فيدو طبيبة حيدات نظاظر و حطاتهم فوق البيرو و شافت فيهم و بقات ساكتة مدة حتى ضرب جبل فوق البير بعصبية و قال
جبل: Habla por favor ( هدري )
الدكتورة خدات نفس عميق و قالت
- Tu esposa......... (زوجتك.....)
خرجوا من عند الطبيبة و جبل حل ليها الباب و مشا هو لمكان السياقة و ديمارا و زاد و نورسين بدات تضحك غير و هي عضامها
نورسين: دابا جيت من المغرب حتى لاسبانيا باش نشوف طبيبة باش فالتالي تقولي عندك المعدة منفوخة ههههه فهم تسطى
جبل : من الاسباب ديال هدا الانتفاخ هو كاتاكلي شي حاجة اللي ماشي مفيدة للجسم ديالك و بكثرة ما فهمتش فاش كانكون معاك كنرغبك باش تاكلي و فاش ما كانكونش عاد كاتلقاي راحتك فالماكلة كاتبغي ديري البريستيج و الاتيكيت قدامي و لا شنو
نورسين : هههه ولا أصاحبي مؤخرا ولات كتعجبني بسطيلة ووليت كنغلق فيها بلا قياس و زيد عليها البرد كنعترف انا ما كنلبسش مزيان داكشي علاش
جبل : و حتى داك الغلاص اللي كليته راه ضرك آخر مرة تاكلي داك زبل فالبرد اولا غاتمرضي بالحلاقم ثانيا غادي يضرك فكرشك و ثالثا ما عندو حتى فائدة لصحتك من غير انو يضرك دونك المساوئ ديالو أكثر من ديك اللدة اللي كتحسي بيها فاش كاتكليه داكشي علاش الله يرضي على بنتي آخر مرة نشوفك كاتكليه و بالخصوص فالبرد
نورسين : وا غير حيت تشهيتو مؤخرا داكشي علاش واش ما منحقيش نتشهى
جبل : واش أنا أ بنت قلبي قلتلك ما تشهايش فهمي شنو بغيت نوصلك تشهاي بالعقل كن كنتي كليتيه فصيف ما غانهدرش معاك و لكن راه البرد ابنت قلبي بقاي تردي البال لراسك الله يرضي عليك
نورسين :*بابتسامة * انشاء الله لا و الوااااااعرة كااااااع هي فاش ماما قالتلي شكيت فيك واش حااملة ابنتي ههههه
جبل : *بابتسامة * عاد ثلثيام باش قستك و تحملي وليتي نتي هي مريم العدراء
نورسين : هههه وحشمت نقولها ليهم والله كنقولهم غير ما يمكنش على هاد الحساب الا قستي فيا و حملت و بداو كيبانو عليا الاعراض خاصهم يديروا عليك شي سيد و يكتبو عليه شااايلاه أ مولاي جبل هههه
جبل :* بابتسامة * ما تخافيش نهار غاتحملي غانعيق بيك انا اللول و انا بيدي غانديك عند طبيبة
نورسين : هادي هي اللي كيقولولها ثقة بنفس
جبل : بقوة ما باغي تكون عندي بنت قريت بزاف على كتب كيفاش تعرف على الاعراض ديال الحمل و كيفاش تصرف مع الاطفال و مع الزوجة ديالك الا كانت حاملة تقدري تقولي بلي انا من ناس اللي كنبحث على الحوايج اللي كانكون باغيهم من قلبي
نورسين : امم برافو عليك صراحة *جراتو من نيفو * انشاء الله و الا كتاب ولادك غايكونو فخورين بأب بحالك زين و ثباتة و رزانة و صلاة و العبادة
جبل : *عض على شفايفو و قال * على دكر الصلاة بنتيلي ما بقيتيش كتصلي شحال هدرت معاك فهاد الموضوع ا حبيبة امم
نورسين حدرات راسها و دورات وجهها شافت فسرجم
نورسين : الله يهدينا كنصلي و نقطع واخا عارفة راسي غالطة و لكن الشيطان ولد الحرام
جبل : تبغي ولادك يشوفك ما كتصليش و كيفما كاتعرفي الام كتلعب دور كبير فالتربية و هي الاساس الا بغيتي يطلعوا ولادك صاالحين خاصك تكوني نتي امراة صالحة بدرجة الاولى سمحلي على هدرتي تقدر تكون جاارحة بالنسبة ليك و لكن نتي بنتي قبل ما تكوني حبيبتي و اللي ضرك يضرني و كن ما كنتش كانبغيك ما غانقولكش هاد الهدرة و لكن انا كنحس بمسؤولية كبيرة اتجاهك رسول صلى الله عليه و سلم كيقول 《 كُلُّكُمْ رَاعٍ وَكُلُّكُمْ مَسْؤول عَنْ رَعِيَّتِهِ، الإِمَامُ رَاعٍ وَمَسْؤولٌ عَنْ رَعِيَّتِهِ، وَالرَّجُلُ رَاعٍ فِي أَهْلِهِ وَهُوَ مَسْؤولٌ عَنْ رَعِيَّتِهِ، وَالْمَرْأَةُ رَاعِيَةٌ فِي بَيْتِ زَوْجِهَا وَمَسْؤولَةٌ عَنْ رَعِيَّتِهَا،》 انا مسؤول عليك احبيبي و غانتحاسب عليك انا ما كنقولكش نتي ماشي مراة صالحة حيت انا عارف دماغك غايفهم الهدرة عوجة كيفما العادة و داكشي علاش خاصني نوضح ليك شنو بغيت نقصد نتي *هز يديها باسها * ضريفة و مؤدبة و حنينة و كاديري الخير فصغير و الكبير و كتهلاي فحبيبك و انا راضي عليك ابنت قلبي دنيا و آخرة و لكن حنا مسلمين و عندنا واحد الضوابط اللي خاصنا نتابعوهم فحياتنا الصلاة ماشي شي حاجة ديال اللعب ربي ما جاش وفرضها علينا على صغر يعني منين كانت عندنا سبع سنين و هي الحاجة الوحيدة اللي خاصك تاكلي عليها العصا ماشي غير هاكاك حيت هي الحاجة اللي كتميزك على داك الكافر و دليل رسول صلى الله عليه و سلم قال 《 العهد الذي بيننا وبينهم الصلاة، فمن تركها فقد كفر》 غير قولي شنو هو الفرق بينك و بين داك الكافر واخا متافق معاك غاتقولي بلي كاتعكزي و لكن ماشي خسارة فلي خلقك ربي ما محتاجش لصلاتك راه حنا كبشر ضعيف اللي كنحتاجوها و الدليل الا مشيتي لعند اي واحد ما كيصليش كتلقايه عايش واحد الحياة فشكل اولا كتلقايه ما متزنش فحياتو ما منضمش ما متصالحش مع داتو و بزاف د الامور الا مشينا غير عند الاجانب غاتلقاي نسبة الانتحار عندهم كبيرة بزاف عمرك سولتي راسك علاش انا غانقولك سبب حيت هما كيمرضو باكتئاب حاد فاش كيحسوا بلي حتى واحد ما كيبغيهوم كيحسوا بلي ما كاينش اللي يسمع ليهم كيملوا من الحياة ما كيعرفوش علاش هوما اصلن فوق الارض و الحل بسيط هو يتقربوا من الله وصلاة هي الرابط الوحيد بينك و بين اللي خلقك الا ما كنتيش كتصلي كيفاش بغيتي الله يسمعك غاتقوليلي انا كندعي اه متافق معاك و ربي عارف شنو باغا قبل حت ما تنطقي بيها و لكن الدعاء عندو شروط ماشي غير اجي و دعي نفترض مثلا طحتي فشي مشكل و محتاجة اللي يسمعلك راه ما كاين ما احسن من انكي تسجدي و تبكي على صلايتك
نورسين : ودابا انا عارفة هادشي و الله و لكن بغيت ندوام عليها ما بغيتش نقطعها هادا هو المشكل اللي عندي
جبل : سمعيني ابنتي نقولك واحد الحاجة ما خاصكش تمشي بمبدأ ان صلاة حاجة روتينية و انتي مجبرة باش ديريها لا ديري فبالك أنكي غادي تجلسي مع الله شوية اتجلسي معاه خمسة دقايق واش بزاف ؟ بطبيعة الحال ماشي بزااف على اللي خلقك و عطاك كلشي خاصك توجدي لصلاة بحاليلا غادة تلاقاي مع شي حد ملهوفة باش تشوفيه و اللي سولك فين غادية قوليلهم غادة نجلس مع ربي شوية عادي ما كدبتيش خلي هاد الاحساس عندك و فاش تسجدي قولي من قلبك انا كنبغيك أسيدي ربي قوليليه خليك معايا فالمحنة الفلانية قوليليه انا محتار فشي حاجة تشاوري معاه فاي حاجة هضري مع الله سبحانه و تعالى و خدي راحتك معاه هضري بلغتك و عيشي اللحظة راكي ما غاتلقايش اللي غايحن عليك بحالو هو اللي خلقك هو قريب ليك مني و من ماماك و باباك اوا اش غانقوليك الله يعطيك البلية د صلاة احبيبة
حبس الطوموبيل حدا الفيلا و دور وجهو شاف فيها لقا عينيها تغرغروا بدموع
جبل : اول مرة غانقولك بكي واخا ما كانبغيش نشوفك كتبكي حيت هادا اكيد احساس دنب و بما انكي مزال كاتسمعيني و تاثرتي بكلامي فالحمد الله عندك القابلية انكي تغيري و هادي حاجة مزيانة ما كاينش شي حد اللي ملاك على وجه الارض كلشي عندو دنوب و لكن ما تنسايش بلي 《خير الخطائين التوابون》
نورسين :انشاء الله كنواعدك غادي نبقى نصلي و ياربي تهديني و ندير حتى الفولار حتى هو
جبل :*دور وجهو جنب و ابتاسم و شاف فيها * أسعد نهار فحياتي غايكون هو نهار نشوفك دايراه تصوري راه من شحال هادي و انا باغا نجبد معاك هاد الموضوع و لكن الحمد الله منين جا من عندك هادي هي الدنيا و ما فيها انا ما غانفرض على بنتي حتى حاجة نهار تحسي براسك مستعدة ديريه انا غانعاونك و غانحس بيك بلي كاتبغيني ديااال بصح
نورسين : هي دابا عندك شك فيا
جبل : قلتلك راك ديما كتفهمي الهدرة عوجة انا كنشرق و نتي كتغربي *رد راسو اللور و شاف فيها * ما عنديش أدني شك فيك و لكن بحال غاتزيدي تبيني ليا بلي كتبغيني اكثر هادشي اللي قصدت ليك نهار غاديريه غاثبتي ليا بلي كاتبغيني اكثر ما انا كنبغيك
نورسين :*صغرات فيه عينيها و قالت * دابا نتا باغيني نديروا صحة و جالس كديريلي بحال البراهش بحال كتحداني
جبل :*بابتسامة * انا غانقولهلك للمرة الثانية انا ما كنفرض عليك حتى حاجةو لكن غايجي نهار اللي غاديريه انا متأكد و مقتانع بلي غادوري هاد الهدرة اللي قلتليك فراسك كيفما قدرت نبدل شوية من شخصيتك نقدرنخليك ديري شي حوايج زوينين فحياتك
نورسين : اللي كايعجبني فيك هو الدكاء ديالك و كيفاش كتقدر توصل ليا المعلومة بواحد الطريقة زوينة غير بالعقل بلا ضرب بلا سبان بلا حشيان الهضرة و هادشي اللي كيسطيني فيك
دارت فمها على شكل بيزو 💋 جبل ناض و باسها من شفايفها بوسة خفيفة و جرها من حنكها و رجع اللور و قال
جبل : و انا هادشي اللي باغي أحبيبي غير نفهمك شنو ديري و لا ما ديريش و هادشي كامل من حبي ليك و خوفي عليك ما يمكنش نشوفك غادة للهاوية و ما نهدرش
نورسين كدير فيه شوفة بريئة ديال البراهش و مع دوك الغرينات زادت كملات الباهية
نورسين : شوف دابا صلاة انشاء الله غانصليها و لكن الحجاب مازال عليه الوقت شوية أكبيدة و لكن غانديروا قريبا و الله غير هو ما زال باغا نفرح براسي و نقاد شعكوكتي
جبل تنهد و دور وجهو و شاف فزاجة و دوز يدو على لحيتو و شاف فيها
جبل : الله يهديك ابنتي هادا ما غانقولك
نورسين حطات راسها على كتفو و قبطات فدراعو و زيرات عليها
نورسين : وبلا ما تحسسني بدنب قلتلك غانديروا و لكن ماشي دابا
جبل : شكون اللي عرف واش غانبقاو عايشين فديك الوقيتة و لالا ؟ هدا هو سؤال اللي خاصك طرحي على راسك
نورسين : اوا نتمناو الخير نلقاو الخير *حطات يديها على كرشها * فيا جوع وااه منين جيت ما كليت حتى لعبة
جبل : راه كلشي واجد لداخل
نورسين حطات يديها على قلبو و شافت فيه و كدير فيه شوفات ديال الاحساس بدنب
نورسين : شوية قلبك أحبيبو ياك ما بقاش كيضرك ياك كتحسن نهار على نهار
جبل نسا هاد الموضوع كاع و خرج من بالو بقا غير ساكت و كيشوف فيها عارفها كتحس بتأنيب ضمير حيت عند بالها بلي مريض بالقلب و هي سبابو و مزال ما صارحها بالحقيقة ربما ما زال ما جا الوقت اللي يقولها راه تعالج عارفها غادي تقلق داكشي علاش قرر انو يكتفي بابتسامة خفيفة و حرك ليها راسو بالايجاب
نورسين : داكشي اللي بغيت الله يشافيك ليا أعمري ياك غاتبقا معايا ما غاتمشيش لخدمة
جبل : هادا هو المشكل
ناضت من على كتفو و هزات عينيها شافت فيه و قالت بصوت فيه نبرة حزن
نورسين : لا ما تقولهاش
جبل : راني اجلت شحال من اجتماع باش راني معاك دابا حيت عندي الخدمة مزيرة بزاااف و لقيت بلي كاينين ناس غير كاينافقو ما كايخدموش معايا من قلبهم غير كايلعبوا داكشي علاش ما غانكونش فاسبانيا تقدري تشوفيني غير بالليل
نورسين : *دلات شنايفها و ربعات يديها * كن يصحابلي القضية هاكا كن بقيت مع ماما أحسن ليا فالمغرب
جبل :*تنهد * ما تقوليش بحال هاكا على الاقل غادي تبقاي تشوفيني بالليل
نورسين : *حطات يديها على يدو و طبطات عليها و قالت بالم * متفهماك أحبيبي مصاب غير تسالي الخدمة ديالك و تلقا ناس مزيانين اللي يخدموا معاك من قلبهم اجي بعدا كيخدموا معاك العيالات ولا غير رجال
جبل :*دوز يدو على لحيتو و ابتاسم* واش عمرك شفتي شي شركة فيها غير رجال
نورسين : و كيدايرين هادالعيالات اللي كيخدموا معاك صغار كبار براهش كيرضعوا مزوجين مطلقين
جبل : *بابتسامة * والله ما كنشوف حتى كيدايرين فاش كنشوف شي بنت كنغض البصر ديالي *ضربها لنيفها * واش اللي عندو هاد تيتيز كامل غايشوف فشي وحدة أخرى الله يهديك
نورسين : اوا هاكاك الله يرضي على ولدي ها باش زوين تدي راجل ملتازم ههه نتا راه خاصني نقولك الحاج جبل
جبل : انشاء الله انا و ياك نمشيو لداك المقام و الا بغات تجي الموت غير تجي
نورسين :*بابتسامة *انشاء الله غادي تنزل معايا ولالا
جبل : لا راني قلتلك ما غاتشوفيني غير بالليل تيليفوني غايكون طافي كنخدم غير تيليفون ديال الخدمة باش ما يبقاش فيك الحال الا ما صونيتش عليك دار كلها كاميرات و اي حاجة بغيتيها غاتوصلك الشيفور كاين و الخدامة حتى هي كاينة فدار اي حاجة بغيتي موجودة
نورسين : واخا الله يعاون نتلقاو بالليل
جبل : اه قبل ما نسا دوا اللي عطاتك طبيبة غادي نصيفطوا مع الشيفور بقاي تشربيه
نورسين :واخا يالاه تهلا فراسك و الله يعاونك و يسهل عليك و الله يبعد عليك ولاد الحرام
باستو فخدو و حلات الباب و خرجات و كتديرلو باي باي حتى دخلات عاد ديمارا و مشا دقات نورسين حلات ليها الخدامة بابتسامة فطرات نورسين و طلعات تكات فبيتها
بعد مرور سبع أيام
نورسين داز عندها هاد الاسبوع ممل ديما كتفيق كتفطر و كتغدا و تعشا و تفرج لفيلم و تمشي تنعس و ديما جبل كيوصل لدار معطل كتعيا تسناه فسيجور حتى لجوج دالليل حتى كيديها نعاس عاد كيدخل هو لدار كيلقاها فسيجور و يهزها يطلعها لبيتها و كايتكا حداها واحد ثلاثة دسوايع و ينوض يمشي لخدمة عاود نورسين مرضات بقوة الي ما بقاتش كتشوفو طلع ليها دم ديال بصح جاها هاد الاسبوع ممل واخا كانت كتواصل مع ماماها و ختها و ربيع ولكن ماشي بحال جبل اللي خلا عندها فراغ كبير توحشاتو الولف صعيب و الربطة زغبية كيفما كانقولو صعيب تولف على شي حد و ما تبقاش تشوفو حداك و خصوصا الا كان شخص بحال جبيلو 😞
♤♤♤♤♤♤♤♤♤
إشتقت لشخص يوصيني دائما على نفسي
أود أن أخبره بأني أفقد نفسي عندما يغيب
♤♤♤♤♤♤♤♤♤
كانت جالسة نورسين فوق الطبلة و كاتكل المقرونية و غير صوت تقرقيب بالفورشيط اللي كايتسمع فطبسيل ملات من الجلسة بوحدها ما بقات كتلقا لا معامن تهدر لا معامن تدوي قنطات حسات بدموعها كينزلو غير بوحدهم بدات كتنش بيديها على عينيها
سمعات تيليفونها كيصوني من فوق واحد الطبلة بعيدة عليها حسات بقلبها مشا و جا أكيد غايكون هو اكيد غايكون جبل شكون من غيرو ناضت بسرعة كطير و هزات التيليفون لقات ربيع هو اللي كايتصل غمضات عينيها و عاودت فتحاتهم و دوزات لابيل
نورسين : سلام
ربيع : افيييين أ المشعككة أمشيتي لاسبانيا و نتي تنساينا ياكما تلاقيتي بماااالوما هههه
نورسين :*دوزات يديها على شعرها و قالت * اولاااا ماااالوما ماشي مغني اسباني مغني كولومبي ياك و ما سميتوش مالوما سميتو خوان لويس لوندونو أرياس باش نكونو متفاهمين و اصلن فين انا و فين مالوما داكشي اللي بقالي
ربيع : وااا سميتو شحال طويلة كي شهر واقيلة فاش كان كيدوز الامتحانات فاش كان صغير غير سميتو كتديلو ساعة د الماكانة باش يكتبها الحمد الله على سميتي ربيع السميرس دغيا دغيا كنت كنكتبها اصلن غير هي اللي كنت كنعرف نكتبها فالفرض كامل كنكتب سميتي و نتم خااارج كنت واحد الكسول مني ما كاين
نورسين : شنو بغيتي علاش معيطلي فهاد الوقت
ربيع : شفتي نتي غير اللي بغا يدير معاك صلة رحيم ياااه على بنادمة كي دايرة كن غير خريت و ما عيكتش ليك تفووو كمارة د نحس و شوفي فيا دابا نجي نتقبلك عينيك اجي بعدا قربي لهنا عينيك بحال حومر كنتي كاتبكي
نورسين : كنت كنبكي اه بصح ماشي لخاطري تقهرت مليت من الجلسة بوحدي بغيت نشوفو نطمن عليه نهدر معاه نضحك معاه كايجي غير بالليل و يمشي كايخليني ناعسة اربيع راه بزاف عليا هادشي كنحس بقلبي غايطرطق واش ما كنبقاش فيه كنحس بيه شي بعض المرات بحال كينتاقم مني على داكشي اللي درتلو كايجيني بحال مازال ما سامحني اصلن انا كولشي ما كيبغينيش منين كنت صغيرة و انا كنسمع كلمة قبيحة مشعككة ما زويناش بايرة راه حتى انا انسانة بنادم ما كيحسش بيك اربيع جبل هو الوحيد اللي قدرت نسا معاه مشاكيلي هو بوحدو اللي ما عمرو قالي شي كلمة د العيب وهاهو دابا ما كاينش راه كنحس براسي غايطرطق قلبي غايخرج من بلاصتو ما بقيتش كانكول بقوة التخمام واش انا قصرت معاه فشي حاجة باش يغبر عليا أسبوع على قدو تقدر نجيك كنزيد فيه و لكن نهار غايكون فحياتك شي حد بحالو غاتعرفني شنو كنقصد هو مشا و قطع عليا الاوكسجين الجسد كاين و الروح معاه ما خسر عليا حتى اتصال هو لخر ما عرفتش واش مخبي عليا شي حاجة ولا شنو ولاو كيجيوني وساويس لبالي كنقول ربما يكون كايعرف شي وحدة و كنوض كنعل شيطان و نستغفر الله و نمشي نصلي باش على الاقل نتهدن و نحس براحة و ما نبقاش نضلموا و لكن انا عييت أقسم بالله العلي العظيم الا حطيتي يدك على قلبي غاتحرق يديك بقوة اللي كنحس بلي شاعلة فيه العافية
ربيع :*تنهد * راه جبل ماشي لخاطرو حتى هو عدريه راه عندو الخدمة مزيرة بلا قياس و زيد عليها لقا بلي شي مسؤولين كيتلاعبو بالحسابات و كيسرقو ليه فلوسو و رزقو راه ماساهلاش انورسين حطي راسك بلاصتو واش داك تعب و سنين اللي بات كيخدم فيهم كيجي واحد و كيديهم ليك هاكاك راه ما يمكناش و زيد . عليها كيجي حتى لهنا و ... احم
نورسين : اويلييييي على كايسرقوه شكووون هاد ولاد الكلااااب الحميررررررر الله يلقيها ليهم كحلة زحلة باغيين ياخدوها باااردة الله تعطالهم فالقلب انشاء الله اجي واش جبل كيمشي حتى للمغرب
ربيع :واراه كيجي كيقاد حتى هاد الشركة هنا
نورسين :*بشك * ياك نتا اللي مسؤول عليها هو علاش غايطلع حتى لتماك ما فهمتش
ربيع : وراه عاد جا غير هاد نهار باش يريكل شي حسابات و مشا رجع
نورسين : امم يعني قريب يجي واقيلة
ربيع : اختي هدااااااي عليا بحالي بحالك ما عندي حتى فكرة على شنو كيدور فراس داك راجل عندك واش غايمشي ولا غايجي
نورسين : اجي حقا شنو درتي مع رجاء طلبتيها لزواج
ربيع : شناااااهو ديك الهيشة درتلها شاااان و المرشااان وهي جالسة نااافخة ريشها عليا صراحة كنحسد هداك اللي واخد مرة درويشة رااااضية بالقليل تحلااا معاها العيشة اما اللي واخد و لا بغا ياخد بحال هاد الهيشة ديال رجاء خلات عليه تاكل وتسرف و فصالتها كيف الخنيشة الدرويشة خفيفة على الخاطر كيف الريشة او الهيشة جعواقة تشدك معاها تبوريشة
نورسين : يالاه سير الله يعاونك
ربيع :دغيا سخيتي بعشيرك ولكن هانية تصبحي على خير
نورسين : راه راسي غايطرطق اربيع غانمشي نتسناه حتى يجي حيت عييت
ربيع : و مااالك اختي جالسة كتفقصي راسك و تبكي و تشكي راه خاصك تحمدي الله اللي لقيتيه يالاه تلاحي تصبحي بخير
قطعات نورسين و حطات التيليفون فوق الطبلة و طلعات لبيتها و طفات ضو و تكات من فوق الناموسية دازت ساعتاين وهو مزال ما جا هزات تيليفونها لقات وصلات طناش د الليل بدات كتفقد الامل و لكن سمعات صوت ديال طوموبيلتو ناضت كطير حتى ضربات رجليها مع طبلة و غوتات بالم كمداتها و مشات كتعرج و طلات من البالكون بانتلها طوموبيلتو تلقائيا ترسمات على فمها ابتسامة راحة و فرح و لكن سرعان ما تلاشات ديك الابتسامة و بانت على ملاميحها علامات الغضب حسات بخطوات طالعين فدروج مشات بسرعة تكات من فوق الناموسية و غمضات عينيها حسات بالباب تحل و سمعات خطوات ديال صباط كيقرب ليها وهي زادت فتمثيلها ضرباتها ريحة عطرو لنيفها و حسات بيه قريب ليها حسات بيديه دارو على خصرها و أنفاس ثقاااال فعنقها حسات ببوسة حارة على عنقها و هي كتزيد تزير عينيها و كتزيد تزير على المخدة باش تقن دور خايفة احساسها يخونها
جبل : ما كانش كيصحابلي كتعرفي تمثلي
سمعاتو كيصفق ما بقاتش قادرة تصبر مزال منين سمعات صوتو حسات بقلبها التافت و جاوبو قبل منها شعلات الفيوز اللي حداها و دارت عندو و بقات مدة كتشوف فيه و هو كيشوف فيها حطات يديها على لحيتو و عينيها كتسارا على وجهو بلا ما تقول حتى حاجة قربات ليه أكثر و أكثر و مركزة شوفة فعينيه و حطات شفايفها دافيين على شفايفو اللي كانو باردين و انغامسو فقبلة فرنسية ربما عبرات على شي حوايج ما كانوش غايقدروا يعبرو عليهم بالكلمات اشتياق دام سبعة ايام الكلمات ما تقدرش توصفو قداش توحشوا بعضياتهم واخا يعياو يتكلموا و لكن ربما القبلة كانت عنيفة كعنف المشاعر اللي كيحسوا بيها فهاد اللحظة كلما كيبغيو يبعدوا غير ما كيزيدوا يقربوا لبعضياتهم
القبلة دامت لثواني و تعدات لدقائق بعدو على بعضياتهم كينهجوا نورسين حطات يديها على قلبو
و قالت
نورسين : انت بخير
جبل تنهد مطولا و هز خصلة من شعرها و لواها على صبعو و قال
جبل : انتي راحتي غير كنشوفك كنولي بخير
نورسين : كي دازت صيمانة بلا بيا
جبل : عارفك ابنتي مقلقة مني عارف راسي كنت مقصر من جيهتك فهاد الاسبوع و انا متاكد غاتكوني بكيتي بلا قياس فغيابي عييت ما نحاول نعجل باش نجي عندك بكري و لكن غير ما كنزيد نغرق فالخدمة اجتماعات مؤتمرات لقاءات حفلات راه بزاف ابنتي و زيد عليها المشاكل اللي لقيت فالخدمة كانعترف بلي خسرت ليك خاطرك و لكن هانا دابا حداك ديري فيا اللي بغيتي ربي اللي كان عالم بحالتي
نورسين :و نتا علاش خليتي يتراكم عليك هادشي
جبل : باش نقدر نبقا مدة طويلة معاك و ما نبعدش مزال تقريبا الخدمة ديال عام درتها فأسبوع داكشي علاش دات ليا هاد الوقت كاامل
نورسين : ما نكدبش عليك بكيت و مليت ومن غيابك سوفريت و لكن دابا نتا كاين و هادا هو الاهم
جبل تسطح من فوق السرير و غمزها
جبل : ما توحشتينيش امم *كيلعب فخدها *
نورسين عضات على شفايفها و ناضت جلسات من فوق كرشو و فرقات رجليه و ردات شعرها جنب و الابتسامة مرسومة على شفايفها
نورسين : *ابتاسمت ابتسامة محلونة و حنات حدا و دنيها و قالت * ياكما ثقلت عليك
جبل : *ضحك و قال * نتي كيف ريشة كيف بغيتي تقلي عليا ابنت قلبي *كيحل ليها صدايف د البيجامة اللي لابسة * ما جاكش صهد امم
نورسين : *بابتسامة * وهو الحرارة فيها أنواع اينا نوع كتقصد احبيبي
جبل دور وجهو جنب و ابتاسم و عاود شاف فيها
جبل : عارفة مزيااانة اينا نوع كنقصد
جبل كمل ليها الحلان ديال الصدايف حتى بقات غير بديباردور ديال ستان فالاسود و حيد ليها الفوقاني د البيجامة و لاحو فالارض
جبل : *غمزها و قال بابتسامة * عقبة لشي لاخور حتى هو نحيدوه
نورسين :*كتدوز لسانها على شفايفها و قبطات وجهو بين يديها و حنات حتى قربات ليه تقريبا حتى الهواء ما بقاش كيدوز ما بيناتهم كتحس بانفاسو كيضربو فوجهها و قالت * كنتو كديروا الحفلات ياك
جبل استغرب من هاد سؤال اكتفى انو يحرك راسو بالايجاب
نورسين : علم الله شحال من وحدة بغات تحط يديها على هادو *كتمرر يديها على عضلات كرشو * و علم الله شحال من وحدة بغات تبوس هادو *باست عينيه و بعدات * و يعلم الله شحال من وحدة بغات تعض هادا * عضات نيفو غير بشوية و بعدات * و يعلم الله شحال من وحدة بغات تبوس هادو
باستو فشفايفو بوسة خفيفة و غطسات فعنقو و باستو فيه بغات تبعد و هي تحس بجبل قلبها بسرعة و جا من فوق منها كيحس بدقات قلبو تسارعو و يدو كيترعدو و العرق هابط مع جبينو كيحس براسو غايطرطق كتقيس بالعاني الوتر الحساس اللي هو عنقو جبل ما حس براسو حتى بدا كيبوس فيها ويدو كتسارا فانحاء جسمها حتى جردها من حوايجها تخالطوا انفاسهم و علات الاااااهات فالبيت فهاد اليلة التاحمت أجسادهم من بدا و جديد دازت ليلة جد جد حميمية ما كيشبعوش من بعضياتهم واخا يبقاو حتى لصباح بنفس وضعيتهم كن ما كانتش كتعيا نورسين كن راه بقاو هاكاك حتى لصباح كن كانو يقدرو يعطيوا لقصة حياتهم عنوان كان غايكون 《 إكتفيت بك و لا أكتفي منك 》
♤♤♤♤♤♤♤♤♤♤
يسألني قلبي عنك و يسابقني بقوة إليك
حتى دقاته تبحث عنك في بحور العشق
أيقنت درسا من حروف الابجدية إليك
تعلمت منك ألا أشتاق لشوقك بل أهيم في عشقك
يامن جعلت قلبي ينبض الا بإسمك
♤♤♤♤♤♤♤♤♤♤
جبل بعد على نورسين كيضحك و كيحك نيفو مع نيفها حس بيها عيات كيفما ديما و قال بصوت حنون
جبل : عييت بنتي ياك سمحيلي أحبيبي
نورسين حلات عينيها معسلين كتشوف فيه و ابتاسمت ليه و حركات راسها بالايجاب و تخشات فيه و عنقاتو بجهد
نورسين : عييت بغيت نعس
جبل : خاصك دوشي ابنتي و توضاي و نصليو الفجر انا و ياك
نورسين : *دلات شنايفها * و لكن عييت أعمري
جبل : بنتي انا قوية و بطلة انا غانعاونك غير نوضي ماشي على قبلي على قبل الله سبحانه و تعالى ياك قلتي بلي كاتواعديني انكي تصلي و ما تقطعيش يالاه نوض الله يرضي على بنتي
ناض جبل و لبس شورط ديال نايك و لبس لنورسين دوبياس ديالها و هزها كيبوس فيها و هي سخفانة و كتزيد تمخشش فيه كي القطيطة لقات علامن تفشش المشعككة لوخرى😂😂😂
دخلها جبل لحمام و دوش ليها غسل ليها شعرها حتى من الماساج دارولها باش يترخاو عضامها و ترتاح فاش سالاو توضاو و خرجوا من الحمام و جلسو فوق السرير كيتسناو الفجر يودن نورسين حطات راسها على فخدو و كتلعب فلحيتو و هو هاز تيليفون كيقرا القران بصوت حنين كيبورش و هي كتسمع ليه حتى سمعو الادان كيودن حتى كمل و حط التيليفون فجنب و مرر يدو على شعرها
جبل : الله يرضي على البطلة ديالي * باسها فجبهتها * عندك شي حاجة طويلة باش تصلي
نورسين حركات راسها بنفي
جبل حك لحيتو ناض و طلب منها حتى هي توقف و هز وا حد ليزار ولواه عليها كي الملحفة و مشا فرش صلايات و وقفات نورسين من موراه و قام صلاة فاش كملو جبل سلم و هز كفوفو كيقول الادعية اللي كتقال من مور كل صلاة فاش سالا دور وجهو شاف فيه و ابتاسم و هز يديها باسها
جبل : باش كتحسي
نورسين : بالراحة شعور فشكل فاش كتنوض و تصلي الفجر و يكون جبل الحبيب ديالي هو الامام فصلاتي كتقرب من الله صراحة شكرا حقا نتا قبل ما تكون راجل نتا بحال داك المعلم اللي كيرشدك لطريق صحيح كنبغيك بزاف
ناضت و باست جبينو بدفئ و بعدات و شافت فيه
نورسين : الله يخليك تاج فوق راسي
جبل ابتاسم ليها و ناض جمع صلايات و حتى هي ناضت معاه حيدات داك الايزار و مشات تحشات فبلاصتها كتحس براسها عيانة غير حطات راسها نعسات جبل تقدم بخطوات بطيئة و تحشا حداها و باس راسها و قال بهمس
جبل : الله يرزقنا درية صالحة ابنت قلبي الله يرزقني بشي بنت بحالك
عنقها و ضمها لصدرو و غفا وهي فاحضانو
⛅⛅⛅⛅⛅ أصبح يوم جديد
نورسين ضرباتها الفيقة بكري شوية دورات وجهها لقات جبل نااعس و شعويرات طايحين على عويناتو كيف شي بيبي ابتاسمت و بدا كتقيس فرموشو كتعجبها ديرلو هاد الحركة فاش كيكون ناعس
جبل : صباح الخير أزين
حل عينو غير بشوية و قالت نورسين
نورسين : صباح اللي كيبدا بوجهك هو صباح الخير
جراتو من نيفوو هو ينوض جبل كيتكسل و دوز يدو على شعرو و هز تيليفون كيشوف فيه
جبل : هادي الثمانية د صباح مع العشرة عندنا طيارة غانمشيو للمغرب
نورسين : وااايلي و عاد دابا كاتقولها كن غير قلتيهالي البارح
جبل : هاهي فخبارك دابا احبيبي
نورسين ناضت بسرعة بدات تطوي فحوايجها و دير فليفاليز دياولها و جبل ناض على سعدو ووعدو كيعاونها و هي كتنكر من فوق راسو
نورسين : و كتخلي أصاحبي حتى لدقيقة تسعين عاد كتقولها حرام عليك
كملو طويان الحوايج و هبطو ا لقاو الطبلة واجدة فطرو وصلات تسعود
جبل : خاصنا نمشيو دابا للمطار
نورسين : اوكي
ناضت لبسات حوايجها و طلعوا فطوموبيل و مشاو للمطار من بعدما قادو وراقهم حان وقت اقلاع طائرة لعد عدة ساعات حطات طائرة فالمغرب نزلو ريكلو وراقهم كيفما العادة لقا جبل الطوموبيل ديالو حدا الباب طلعوا فيها مسافة طريق وصلو حدا دار ديال ام نورسين
جبل :*دوز يدو على لحيتو * نزلي
نورسين :و نتا
جبل : انا عندي شي شغال
نورسين : و علاش جايبني عند ماما واش واقعة شي لعبة
جبل :ما واقع والو ما توحشتيش واليديك
نورسين حيدات سمطة و ضحكات
نورسين : بطبيعة الحال توحشتهم يالاه تهلا فراسك *باستو فخدو و خرجات من الطوموبيل و طلعات للعمارة د ماماها كتحس بعضامها مهلوكين بسفر دقات فالباب و هي تسمع بزاااف د الهراج عندهم لداخل حلات ليها كنزة الباب وهي تبقا غير مصدومة من كمية البشر اللي عندهم فدار شنو واقع هادا هو سؤال اللي كيطرح نفسو ؟
نورسين حلات فمها بقوة الصدمة البشر بكثرة فدار هاعمامها ها خوالها ها بنات عمامها ها بنات خوالها ما فهمت حتى وزة بقات غير مبرققة عينيها فالبشر و كلشي كايشوف فيها و يضحك حتى عنقتها كنزة كتبتاسم ليها نورسين بانت ليها فاطمة خارجة من الكوزينة بصينيةديال أتاي فاطمة شافت بنتها واقفة مدهشرة فالباب حطات ديك الصينية فوق الطبلة و قربات لعندها حتى جات اونفاص ليها و حطات فاطمة يديها على كتاف نورسين
نورسين قالت بصوت فيه نوع من الاستغراب
نورسين : شنو واقع هنا ؟
فاطمة بدات تعشق غير هي و راسها
فاطمة : صلاااااااااااا و سلاااااااام على رسول الله الا جاااه الا جاه سيدنا محمد أ الله مععععععععع جااااااااه العالي
عيالات العائلة ديالهم كلهم طلقوها بتزغريتة فاااااااااعلة تاركة تسمع صداها فالعمارة كاملة
-يووووووووي يووووووووي
نورسين دخلات و سدات الباب و كتشوف فماماها و كتحول عينيها كتشوف فداك الكم الهائل اللي عندهم فدار
نورسين : اينا عروسة عاود و الله ما فاهمة حتى وزة واش هاد نهار عرسي و انا ما فخباريش
فاطمة بغات تديها لبيت و هي تسمع عمامتها كيعيطوا ليها بااغيين يباركو ليها
- ياااااو تباااااارك الله على نويورة ديالنا ياو مبروووووك عليك ابنيتي فرحنا ليك تعالي بركي حدانا
فاطمة كتضحك ليهم ضحكة صفرة عارفاهم باغيين يجرو ليها لسانها ما عندهاش مع لوايساتها 😂😂 شدات فيد بنتها بقوة
فاطمة : ياو دابا ما مسالياش ليكم أبحرا توجد راسها راه مزال تابعها الحمام و الحنة و عاد العرس ياو توما داكشي ما حاضيين غير جمامع رشيدة كبي ليهم كويس تاع اتاي يهنيونا
فاطمة جرات بنتها لبيت و تبعاتهم كنزة
نورسين : واااا شنو واقع راه لحد الان ما فاهمة حتى وزة
فاطمة : ياااااو راه ولدي جبل دارلك مفااازازة *مفاجأة *
نورسين :*باستغراب * شنو دار ؟
كنزة : انا نشرحلك اختي نهار مشيتي لاسبانيا جبل عيط لماما و اقتارح عليها نديروليك العرس و هاد نهار ليلتك أ المصيبة كان كل ثلثيام كيطلع لهنا كيشوف واش الامور غادة مزيان و لالا كلفنا بكلشي حنا كرينا القاعة و طريطور و نكافة و المايكاب ارتيست
نورسين بقات غير مصدومة ما توقعاتش جبل غايدير ليها مفاجأة بحال هاكا فكل مرة كيصدمها من ديما حتى هي باغا تركب فالعمارية و دير عرس اسطوري و تشوف جبل بالبلدي من ديما كانت كتخايلو بالجليلبة و البليغة و لكن كانت كاتقول بلي صافي فات الحال على هادشي و دابا هوما علاين يديرو الولاد و فاتهم الطران كيفما كانقولو و لكن مع جبل ما كايناش شي حاجة مستحيلة و خصوصا هو ما يقدرش يحرمها من نهار بحال هادا عيون نورسين بقوة الفرحة كانت فيهم لمعة فشكل ما فكراتش جوج مرات هزات تيليفونها اتصلات بيه بقا كيصوني واحد الفترة
فاطمة : ياو نتي عاد هازة تيليفون تي وجدي حوايجك باش تمشي للحمام مع بنات خوالك و عمامك
نورسين جالسة كاتكل فضفارها و كتسناه على أحر من الجمر باش يجاوبها حتى سمعات صوتو فالفون
جبل : كيف جاتك المفاجأة
نورسين : شكرا
جبل : *تنهد *من الواجب ديالي هداك الا ما فرحتش بيك انا و درتلك شنو بغيتي شنو دور ديالي فهادالعالم
نورسين :*كتهظر و تجمعو دموع فحافة عينيها * أروع حاجة وقعاتلي فحياتي هي نتا ما عمري ما غانسا هادشي اللي درتي على قبلي نتا تستحق لقب 《الزوج المثالي 》 بامتياز فين راك دابا ؟
جبل : غادي نمشي عند يعقوب و من بعد غانشد طريق و نمشي عند جدي و جداتي باش نجيبوهم
نورسين : واااااو جاو يعقوب و سلمى حتى هوما
جبل : وي راه سلمى جاية عندك و حتى هوما اليوم غايكون عرسهم معانا
نورسين حطات يديها على فمها و قالت بحماس
نورسين : ماااااايمكنش وااااااو عرس ثنائي
جبل : هادا وعد كنت درتو انا و يعقوب فاش كنا صغار وهاهو كيتحقق
فاطمة : ياااااو باركة عليك من الهدرة و طلقي راسك راه ما كاينش الوقت راه الحمام كاريينو على ودك
نورسين : تهلا فراسك كنبغيك دبدوبي
قطعات عليه و حطات التيليفون فوق من الناموسية
نورسين : مالنا اختي علاش غانمشي مع داك القوم كاااامل مالي على حالي و كلهم تماك ما حاملينيش شر كيمشي من عينيهم و خصوصا داك بنات عماماتي و عمامي انا غانتحمم غير فدار مالي على حالتي
كنزة : العادات و التقاليد أختشي
نورسين : لواه التخربيق غانجلس فدارنا اصلن العروسة ما مزيانش تخرج من دارهم نهار العرس
فاطمة قربات ليها و طيراتها ليها بقرصة و قالت
فاطمة : ياااااو و الله و ما تزيدي لحمام ياحتى نوريك الوجه لاخور ابنت كرشي هااااودني منك اوا مزيااااااان تبارك الله انا كارية الحمام عالة و علم باش تمشي تكمدي عضامك و نتي *كتعوجها * لواه نتحمم فدار هاد المطوطة هادي
نورسين : و دوك المحيسيدات اللي غايمشيو معانا
فاطمة : و نتي اش حشاك فيهم هاهي ختك تمشي معاك و تقرا عليك مرة مرة اية الكرسي *جبدات واحد الخويط معلقة فيه واحد السريرة فيها الشبة و الحرمل و عقداتها ليها فيديها و حطات يديها على راسها * اوا أ ابنيتي اللي شاف فيك و ما قال تبارك الله بغيتلو العمى
فاطنة : يااااو ابنيتي انا كنعيط لعائلة كيف شي ناس كيجيو هوما و جيرانهم و قطوطهم و كلابهم يالاه هانا مشيت
نورسين و كنزة خرجوا من البيت و كنزة مكلفة هازة قوة السطولة و وحوايجهم عاونوهم بنات العائلة جات تحل نورسين الباب و هي ضرب فسلمى واقفة فالباب ما حسات براسها حتى غوتات و طارت عليها بتعنيقة
نورسين : يا ختي و الله حتى كنت كانبغي نسول فيك كنلقلك خارج تغطية عرفتك غاتكوني مع حبيب القلب
سلمى :*عوجات فمها * اشمن حبيب القلب حتى نتي ما بقيت نحملوا غير دايرة الخاطر لجبل و صافي
نورسين دورات وجهها لقات بنات العائلة طالقين ودنيهم و هي تجرها سبقوهم و هوما موراهم
نورسين : هااااويلي على ما بقيتيش حاامله واش تسطيتي
سلمى : اه اختي هادشي وقعلي غير البارح ما عرفت مالي ما بقيتش كنحمل ريحتو
نورسين :*بشك * اهاه ريحتو كتجيبلك تقية على هاد الحساب
سلمى : واه ولا كيبانلي وجهو قبيح ما عرفتش علاش ولا كيبان ليا كيف شي وحش
نورسين : واراه اليوم عندنا العرس فخبارك
سلمى : ويييه
نورسين:اوا كي غاديري ليها
سلمى : نصبر و صافي هادشي اللي غاندير اجيبعدا كيف غادة نتي مع جبل مزيان
نورسين : انا الحمد الله و لكن نتوما اللي حالتكم ما عاجبانيش و يعقوب اش كايقول
سلمى :كنقولو ريحتك خايبة كيبقى يضحك و يمشي يجيب العطر ديالو و كيزيد يرشو فالجو و كيقولي موتي بالفقصة يالاه وراه البارح عصبني حتى ما نعستش حداه
نورسين : واش نتي حمارة ولا كلبة آخر مرة ظيريها شفتي واخا تكون نايضة الحرب العالمية الثالثة بينك و بينو وياااااااك أسلمى تبقاي تبعدي عليه اكبر غلط درتيها هو هدا
سلمى : و يصحاب ليك بعد مني و جاب الما و جلس كيرشني بيه حتى نضت نعست حداه بلهلا يطريه ليا واخا ريحتو جابت ليا التقية حشاك دايرة كي جيفة
نورسين : اويلي ياكما جاك الوحم عليه
سلمى : اختي ما نعرف غير خليها على الله و صافي فين غادية نتي دابا مع هاد الرباعة
نورسين : غانمشيو للحمام داكشي ديال التقاليد
اوا خرجوا من العمارة تمشاو شوية على رجليهم حيت الحمام قريب ليهم فواحد الدرب من موراهم و البنات من موراهم كيعشقو ويزغرتوا وصلو للحمام اوا ضربوا تحميمة فاعلة تاركة حتى ولا وجهم حمر فين ماكان شي ماسك داروه دارو الماساج ما خلاو مادارو ضحكوا لعبوا غناو نشطوا مزيان مع تلاقاو غير بنات العائلة بيناتهم واخا كانو شي بنات تماك كيطلعوا و يهبطوا فنورسين و كيهدروا بيناتهم
- على حسب ما سمعت ديك الفردة ديال نورسين خدات شي رجل اعمال مشهور
- اوا اش غانقولك اختي الله يعطينا زهر الخايبات
- شوفي ياختي ما عندها لا صدر لا طرمة كيف عباد الله انا منين بلغت و انا نتبع فالوصفات حتى كبرت صدر و طرمة و لكن زهر ديلمو كااافر عندي هاد سعد ما بغا يتسكم
- واغير سكتي باينة غاتكون واخدة شي شااارف و كرشو سابقاه و سنانو طايحين ديك نورسين واحد طماعة منها ما كاين
- ياختي و الله شكون كان يقول ديك كحلة الكمارة تزوج دايرة كي دنجال تفووو كمارة د الويل ما كنتش كنحملها من شحال هادي و دابا زدت كرهتها شحال فيها ديال تبعصيص و تكبر شوفي كي دايرة كي سفود
- و لكن بنت اللدينة ها هي دبرات على رجل أعمال باينة غاتكون قلبات عليه فشي موقع ديال تعارف
- اودي كيتي انا و ياك شحال و حنا نشاطيو ما خلينا سواعدة ما خلينا اماراتيين وا فالتالي طلع معانا احسن صبع و الله ما عندنا زهر
- اودي كن كان زهر عندو زهر كاع ما يطيح من فوق الشجر ربي يفاجيها حكي حكيليا ضهري مزيان
رجعوا لدار لقاو فاطمة فالباب لابسة قميص ديال
جوهر فالبيض
فاطمة : يااااو مرحباااااا بالعرايسات دياولي
عنقات فاطمة سلمى بحكم شحال هادي ما تشاوفو
فاطمة : ياو فين غبووورك ابنتي ياسلمى كي بقا مول دار لابس عليه
سلمى : الحمد الله اخالتي كي بقيتي نتي بخير
فاطمة : ياو انا لابس ياو تنورو وجهوكم يااو بصحتكم شهيتوني فشي تحميمة ياو دخلوا ماتبقاوشااي واقفين فالباب راه جات ماماك اسلمى و جابت معاها ديك جدرة دسارة و خلاص باباك راه الفوق عند جيران
سلمى : اش مشا يدير تماك
فاطمة : الفوق دايرين رجال و هنا العيالات
دخلوا البنات كلهم و مشات نورسين و سلمى وكنزة دخلوا لبيتهم و سدوا عليهم و تسطحوا بثلاثة فوق السرير
نورسين : و الله ما متيقة بلي جبل غايدير ليا عرس
سلمى : اوا شفتي حبيبك شحال ضريف ماشي بحالي انا داكيعقوب غير هبيل و مسخر فيه الله
كنزة : علاش يعقوب ضريف مسكين
سلمى : ذفتك سايرة تشكري فيه ياكما بانلك فيه البلان
نورسين : *حطات يديها على جبينها * واااا عباد الله هنيونا هانتوما عاتنوضو دابزو عاود اصلن كنزة مخطوبة
سلمى ناضت و شافت فيهم
سلمى : بمن ؟ شكون هدا ؟
كنزة :*حطات يديها على قلبها و قالت بصوت دلوع * فهدووووشي اختي اااح طنحبوا الزعيعر ديالي
نورسين :*ضرباتها بمرفقها * نتي تجمعي و نتي تحليتي كي شيخات ياك قلتلك ثبتي و رزني مازال ما درتو فطاجين ما يتحرق
سلمى ابتاسمت باستهزاء و شافت فنورسين
سلمى : هاي هاي على نورسين و نصائح نسيتي شحال حمقتي داك جبل مسكين كاطيري يا ختي من المقلة كي الزيت
نورسين : ستري ما ستر الله توحشت جبيلو ما نعرفت شنو يكون كيدير
هزات تيليفونها كدوز تصاورو معاه و سلمى حوااالو عينيها عليه خدات من عندها تيليفون و بدات تدوز فتصاورو و كتزومي فتصاورو و تحقق فيهم و ريوكها سايلين
سلمى : يا ختي على عوينات عند راجلك
نورسين : عاديين
سلمى :لا اختي ماشي عاديين شوفي كيف جا فهاد تصويرة كيحمق
- نتوما عاد جاتكم وقت المهاودة و فكونا لبسوا الا غاتلبسوا
خداو من عندها تكاشط كيلبسهم و غايطيروا بالفرحة بجوج جاوهم وااااااااعرين بلا قياس و خصوصا نورسين بانت فيه بحال شي اميرة و مع كانت طالقة شعرها و دايرها بوكلش من لتحت و دايرة مايكاب ترابي جات كتخردل قدات ليهم نكافة تيجان فوق راسهم و الاكسيسوارات اللي كادير غير سلات ليهم سمعوا طيط طيط ديال طوموبيلات برا طلوا من السرجم لقاو جوج ديال ليموزين واقفين وحدة فالبيض و حدة فالكحل عرفوا بلي العرسان دياولنا وصلو
نورسين عضات على شفايفها و حطات يديها على قلبها اللي كان كينبض بسرعة البرق و عينيها كيبريو بدموع الفرح دخلات عندهم فاطمة و سعيدة كيعشقوا و كتعاونهم النكافة فزغاريت
وقفوا نورسين و سلمى و قبطوا فبعضياتهم تقدمات فاطمة و سعيدة لعندهم حطوا يديهم بجوج على خدودهم فاطمة مع نورسين و سعيدة مع سلمى
فاطمة :*كتهدر و دموع فعينيها * ياو تبارك الله عليك ابنيتي قل اعود برب الفلق قل اعود برب ناس الله يواتيكم الخير و الله يرزقكم الدرية صالحة و الله يخليكم ديما فرحانين و الله يبعد عليكم ولاد الحرام
نورسين عنقات ماماها و قالت
نورسين : امين اماما الله يخليك ليا
فاطمة : الله يرضي عليكم
سعيدة : تبارك الله على بنتي الغزالة الله يحفظك ليا و لراجلك
سعيدة بدورها عنقات بنتها و هي تدخل عندهم سارة البرهوشة لابسة لاغوب و دايرة غرينات مشات عنقاتهم حتى هي
سارة : اول مرة كنشوفكم جيتوا زوينين
سلمى : ياك أ جنية
سارة : اوا شنو نكدب بغيتي ندخل لجهنم و لكن واخا هاكاك المضاهر خداعة واخا نتوما زوينن من برا و لكن العقل الله يجيب
نورسين : اوا شوفيلك وا زيدي معاها
بداو كلهم كيضحكوا حتى قاطعتهم نكافة
- اوا العرسان راه جاو خاصنا نهبطوا عندهم
خرجوا من البيت و حلوا الباب و هبطوا فدروج و صوت حداءهم العالي كيتسمع فدروج و زغاريت فدروج حتى وصلو لبرا كان جبل و يعقوب عاطيينهم بضهر وواقفين بكامل اناقتهم لابسين كوستيم اسود مع غرافاط و مقادين اللحية و ريحة عطرهم كتشم على بعد أميال
سمعوا زغاريت دور جبل و يعقوب وجههم دقة وحدة بانولهم عرايساتهم اولا نقولو اميراتهم بفستانهم الابيض الوقت توقف فهاد اللحظة غير نضرات اللي كيتكلموا اجمل إحساس شكون كان يقول جبل اللي شاف بنت تحت شجرة و تعلق بيها تولي مرتو و يديروا عرس بقا جبل مصدوم كيشوف فحبيبتو و ملكة قلبو نورسين بانت كأنها لوحة مرسومة ما فيها حتى خطأ جبل ما حس براسو حتى تقدم بخطوات بطيئة ووقف حداها ما حس بعينيه حتى تغرغروا بدموع هز يديها و باسها مطولا
فمكان ليس ببعيد واقفة واحد السيارة من نوع كاط كاط فالاسود زاج فومي ما كيبينش شكون كاين لداخل كان شخص كولو وشامات فيدو و زعر و عويناتو زرقين شعرو رطب ومقادو لور لابس لباس كولو اسود كيعكس لون قلبو عندو حساب مع جبل من زمان ما عمرو نسا العصا اللي وكل ليه فالمطعم حدا امة سيدنا محمد هانو و ما خلا فيه غير اللي نسا من ديك لحظة وهو حااقد عليه مزيان و باغي يقتلو اصلن هو انسان ما فقلبو لا رحمة و لاشفقة ابتاسم بشر وهو كيشوف فيهم من بعيد شكون من غيرو 《داكوسطا 》 قال بهمس
داكوسطا : فرحانين هههههه *حط يدو من مور عنقو *غانشوفو هاد الفرحة واش غادوم مدة طويلة و لا غايكون عمرها قصير بحال عمرك أسي جبل الابراهيمي
جبل نورسين الجزء 24
محتوى القصة
التنقل بين الأجزاء