دليلة الجزء العاشر والأخير

دازو ايام على عطيني نعطيك وشد ليا نقطع ليك ...من بعد ديك ليلة لي سمعات فيها متقال عليها ولات حاطاه سطل بلا تقرقيب وهو كذلك....لي خصت في دار كيحضرها ولي عرفها بغاتها كيجيبها بلاماا يحاشيها ليها ، كلامها مزال واحل متهضمش ليه.... اما هي تصرفاتو ونخال لي ولا عاطيها حلقموهااا وحررو عيشتهاا ....الحسنية ولات في صف دليلة تحيط وتبيط بيهاا في المقابل هازة شوكتها على ولدها حاضياا معاه ليعصبهاا ويتلاقا هو و الوحم عليهااا

.....

كانو جوايه ربعةة دلعشية وقت القيلوولة صقيل في الدار معادو هو لي كان واقف في الكوزينة راخي رجل ورجل الثانية موقفها على الصح ومقابل مع ثلاجة يهز قرعة الماا يشرب بحكم الحال بدا يدفى ...خل القرعة هبط عليهاا ورجعها لبلاصتهاا وضار تكى على البوطاجي هاز تليفون مدوز الخط لياسر 

عصمان ..." متسناش بزاف حتى سمع صوتو " ... الفردة فين غاطس ؟؟

ياسر ..." لي كان جالس في المحل خدام وممخليش غياب عصمان يبان" ... الفردة غارق في الخدمة اخويا اش تماا ؟؟

عصمان ..." مسح على شعرو وخفض صوتو" ... خوي ليا العشرة المحل باغيه في واحد الغراض ...

ياسر .... باغيه دابا و لا ضروكة 

عصمان ... ضروكة باغي نخوي عقلي وشي لاخور راني عامر والحال عالم بيه غير مولانا ...دير لي قلت ليك وغبر هاد لعشية .. 

ياسر ......وااعليه اصحبي خوك طالب عليها 

قطع معاه ورجع حط تليفون على وذنو كيدوي بثقاالة 

عصمان ..." كيحك على لحيتو منعس عينيه " ... قشور الليمون هانية ......" بتاسم جنب وهز راسو الفوق " .. ياك الزين ايوا هي الى بنتي وجيتي لبلاصتناا المعتادة....صاافي مزياانة مهم غتلقاي الباب دخلي وخليه تنجي وراك ونسدو ....هادشي لي كيعجبني فيك ديما موجودة...."رجع شعرو اللور "....يالله سبقيني 

..." ضرب البوطاجي ضربة خفيفة وخشى تليفون في جيبوو غادي لبيت لجلاس كيصفر ...بدل حواايجو ولبس سبرديلتو رجع لمرايا كيقاد في شعرو ويريح في راسوو وهو كيدندن معلابالوش بالقلووب لي شعلل ....تيسر لفين غاادي مخلي وراه وحدة كضرب يد في ختها .....قاليك مكتقضي على لمرا غير لمرا وهاد الاخيرة كيفماا كان طبعها وجنسهاا غتكون من نوع لي تقتليها ولا تنخليهاا....تا وحدة مترضى على راجل لي مزوجاه واخا تكوني محاملة فيه الشعرة انو يخليها في الدار ويلعب ورا ظهرها العشرة .

فاقت من نعاس لكحانةة غادا قاصدة الكوزينة حفيانة تشرب حتى شافتو قدامها بطولتو وتجريدتوو وبصوورتو لي زادت حلات في عينيها وحمها جاها عليه ولكن عزة نفسها دارتها ليها.....ساهية فيه حتى سمعات كلامو لي كان بحال خنجر تخشى فينا...ولكن كيبقى هو بحال گاع رجال همهم غير فبين رجليهم ....نسات الماء وعطشهاا ودخلات لبيت لبسات عليهاا ...تسناتو تاا خرج وتبعاتو ناوية على خزيت وعلى الشووهة ليه وليها

راجلك ملي يكون في دار ديالك وملي يكون في زنقة راه ديال ناس ....والا فات حتى كان كيبغيك وخانك غترجع اللومة ليك حگا مفرطة فيه وخنقتيه......وحتى الا كان كلشي منو ولقيتيه مع وحدة وربعة مكيقولوش عليه زايغ وتابع شهوتو ، كيقولو دارو بيه بنات لحرام وتلفووه على مراتو ودارو الحاصوول هادشي غير شوية من بزاف ديال الهضرة الخاوية لي ضسرو بيهاا رجال وزادتهم گراد .....وانا ونتي وهي قاليك غا حطي يديك على خدك ونذبي حظك......لكن دليلة جات من تالي ومبقى عندها ماتخسر وغير السبة راه كتقلب ليه عليهاا....تبعاتو هو سابقها وهي ورااه بلاما يعيق بيها...باغا تشدو بالدليل والبرهان باش متخلي ليه فين يهضر ....

خلاتو حتى دخل وطرق عاد قربات حاطة وذنيها كتصنط ...سمعات سكات عند بالهااا خدامين فجأة وهو يتحل الباب على مصراعيه جاات مخبووطة في صدر عصماان ...هزات راسها كتحك فيه وتقلب بعينيها وتشوف في جنابها ووراهاا مبان ليها حد 

عصمان....." "....ياك لاباس الحاجة ، ياكما تالفة ليك شي حاجة هنااا ..

دليلة ..." كانت كتطلع النفس غا بزز ،ووجهًا حمر و عينيه غيطرطقو بقوة الفقصة.... " ...وملي نتاا اسيدي باغي تخويو عطيني براتي وسقي بيه تا جرادي الله ينعل لي فاق ليك من نعاس

عصمان ..." جرها من يديها لايحها الداخل و طرق الباب موراهااا ." ... لاش تابعاني اش باغااااا 

دليلة ..." بدات تغوت وتشالي بيديها في الهوا " ......باغا نفرج فيك الغادي والبادي الى غدرتيني و انا باقاااا على ذمتك تتسمع !! عطيني براتي ودير لي بغيتي مديرنيش بحال رجل كرسي مهرس عندك في دار 

عصمان .... "حيد التريكو لي كان لابس حتى بقى عريان " ... معاك و لا مسالي انا وياك غندير لي بغيت ...بغيتي و لا كرهتي ، ولا ياكما كتغييري عليا ومتقدريش تشووفيني مع غييرك 

دليلة ..." وذنيها بداو كيصفرو وقلبها تزير " ......هااء نغيير عليك ، شووف فيا مزياان على زينك وزروقية عينيك ...على رزانتك وحصاانتك ..فيق ليك من نعاس رااك بنتي ليا حلمتي وتيقتيه 

عصمان....." غمزها ".....يالله تسناايها حتى تجيي وبيني ليا صحة كلامك...

دليلة....."حسات بقلبها كيضرب....غمضات عينيها وحلاتها مخنزرة فيه وقبل متعطيه بظهرها قالت ".....لعدووول لي جمعنا يفرقناا ، نتلقاو في المحكمة 

قبل متوصل الباب كان معنقها من خصرها شادها من يديها بزوج ومزير علييهم ، خشى فمو في عنقها وتكلم 

عصمان......غاديين نتفاارقو ونبعد عليك ولكن في حاالة وحدةة إما تموتي نتيي ولا انااا غير هادشي مكااينش..." دورها لعندو وكلاها بايديه مع الحيط ".....ربي كتبك ليا نهار خلاقيتي وغييرك مبقااش يحلالي 

" حرارة انفاسو خلاتهاا تغمض عينيها وتعض على شفايفهاا متحكمة في راسهاا مبغاش تضعف قدام عينيه ولا تتأثر بكلامو عارفة الا شافت فييه مشاات عند الله "...

دليلة......." شافت فجهة تانية "......بعد مني اعصمان وخليني عليييك

عصماااان ......"ضرب يديه مع الحيط حتى خرجات عينيها " .....جاايبك هناااا بالحيلة باش ندويو ماشي باش نخليك واش كتسمعي يالله تركني وتعالي نهضروو !!

مكانش ليها لا على البال ولا على الحسبان انو يكون داير ليها الحيلة باش يستفرض بيهاا ....شحال وهي كتهرب من مواجهتو وليووم هاهي طااحت في شبكتو

دليلة........" زادت زوج خطوات لقدام مربعة يديها".....كلامنا سالا داك نهاار مبقى ميتقااال

عصمان ..." ربع يديه كيشوفيها كيفاش واقفة وتتهضر " ... راه قلت ليك شحال هادي ونعاود نقولها ليك راك واخدة راجل ماشي شماتة لي نخلي كلام مرأة يمشي عليااا دابا غتگعدي تركني و تهضري بحال شي ناس عندهم العقل ماشي خرية في بلاصتو

دليلة.....حشاك اراجل ، بغيتيني نتركن واخا ..."مشات لكرسي جلسات فيه ودارت رجل على ختهاا "...ارا معندك !!علاش داير ليا هاد الفيلم التركي وجايبني تال هنااا ؟؟ باغيني نجرب نار الغيرة ، ايواا راك غالط مجاياش هنا حيت كنغير ، جيت حيت مباغاش نتشمت وكان.

عصمان ..." جاب كرسي قلبو و جلس عليه مقابل معاها " ...كون مغرتيش مكنتيش تبعيني وكون ما متأكد العافية تشعل فيك ملقاكش حاطة وذنك على الحيط و تسنطي و النتيجة هاني جبتك المحل بسياسة قالييك نتشمت تا نكون معارفكش....دابا حلي وذنيك وسمعي ليا حيت باااغي نسدو هاد الموضوع داكشي علاش فضلت نجيبك هنا باش ندويو في راحتنا و بلا ما الحسنية دير ليا فيها عسكري و انا ناوي نقتل العدو

دليلة....."رفعات حواجبها لفووق وخسرات عليه خمسة لحروف "....كنسمع !!

عصمان ... " تنهد و هز عينوو فيها " ... داك الولد لي فكرشك علاش ما باغاهش عطيني سبب مقنع من غير ديك الهضرة الخاوية ديالك حيت ابنت الناس منضمنش ليك راسي شنو ندير

دليلة ......."تنهداات بألم حادرة عينيها الارض ".... خاايفةة ، "بغى يتكلم وقطعاتو "....خايفة نجيب دليلة خرا لهاد الدنياا....تورث مني قلة الزهر ويجرا فيها مجراا فيا ، ولا نولد ولد يكون نسخة منك و يكمل على طريقك 

خايفة نجيب ولاد يقهرهم كلام ناس ويقولو ليهم ماماكم بنت لحرام وباكم خدام فيه ....

عصمان...... هادشي لي تتقولي فيه غير تخربيق "دوا بانفعال ".. دابا واش نتي طلعتي تتشبهي لمك ... ابدا مانتي طلعتي كي مك خارجة الطريق و لا انااااا طلعت كي بااا لي كان يتمشى جنب الحيط ...

دليلة...." بالغوات وقفات وقالت "...أنا مكنتش باغا لولااد اعصمان ...لو كان جاو فظرووف اخرا كنت غنفرح كيف اي بنت ولكن اي وحدة فبلاصتي مغتقبلش تولد و دير تريكة مع واحد رجل برا ورجل لداخل أنا عاارفة هاد طريق فين غتوصلك داكشي علاش مغنسمحش لعاطفتي و قصوحية راسك نجيب دري يتكرفص فهاد دنيا واش فكرتي نهار دخل الحبس شكون يكون واقف جنبي.... أنا مقدااش عليه بوحدي 

عصمااان......." وقف قبالتها كيحاول يتهدن قد ما يقدر "...و شكون قالك أنا غنخلي ولدي بوحدو ....معرفتش علاش سبقتي لعصى قبل لغنم ....أنا قاد بيه غنوفر ليه لي يحتاج وتاشي مغاديش يخصو و إلا نتي ماقاداش عليه غير ولديه و نجيب لي تربيه ولكن باش تفكريتحيديه ولا متولديهش هادي هي لي عمرها تكون ليك

دليلة......ههههه شنوو شنو عاود اش قلتي نولدو و و تعطيه لوحدة خرا شكون؟ ؟ 

شي قحبة من قحبات الموقف هااا؟؟ 

"خبطات على صدرو "...راه ماشي دليلة لي تخلي طرف منها بين ادين شماايت و حتى الا فكرت نولدو راه عمرك تحلم تشوفو نبات ما نصبح واخا تقلب علي بالفتيلة ووالقنديل متلقااانيش و راك مزال يمكن معارفنيش....وتا دابا انا غنجيك من اللخر......بغيتي هادشي لي فكرشي نقي طريقك وحيااتك مبغيتيش غتحصد مزرعتي والله يجعل ذنووبك على راسك 

لي ايدو في العافية ماشي بحال لي ايدو في الما وهادشي عصمان عارفو مغيحتاج شي حد يقريه ليه ولكن ملقلش البديل ، فاش كيكونو عندك مسؤوليات كثيرة والايد قصيرة كتقصد الطريق الساهلة لي كدوقك الشهد والا مشيتي حتى غمستي فيه مكتبقاش ترضى بقل منوو ....عمرو كانت في نيتو يبدل حرفتو حيت الزواج والولاد مكانوش عندو في البال حتى شاافهاا وتقلب ليه كلشي.....داكشي علاش خاصو يخمم مية تخميمة وتخميمة قبل ميخلي طريق العوجة حيث الا بغى يبدا من زيرو خاصو راس لمال باش يبدا مشرووع يسترزق منو و لي يأمن بيه حياة عائلتو وولادو لانو بطبعو مكيرضااش بالقليل وايدو مثقووبة ومتعود ياكل ويوكل ....

هضرة دليلة من نهارها دارها في بالو منساهااش حيت عارف من حقها تعيش مرتاحة وتخاف عليه وعلى راسهااا الشيء لي مخليه مسايس معاها لكن عثبو الوحيد عليها انو تقرر بلا بيه وتربط شي بشي وتشدو من الايد لمقصح منها

دليلة....بغيتي هادشي لي فكرشي نقي طريقك وحياتك مبغيتيش غتحصد مزرعتي والله يجعل ذنووبك على راسك ...!!

عصمان......"رجع اللور وهز ايديه لفوق ".....عرفتي شكون هادا لي قداامك ؟؟ "هز حاجبو"...قدامك واحد راسو قصح من الجبال مكيتهرس ومكيمشيش بتهديد ، والا مشى حتى كفر كيكفر فخطرة ، راني مزال لداابا مباغيش نخرجك من هنا " اشار لقلبو "....داكشي علاش مسايس معااك وعاذرك ف متضغطيش علياا ومتورينيش اش غندير ...باغا حياة طبيعية من حقك ولكن داكشي كيجي بشوية بشوية ماشي فدقة وكيكون بتراضي وتفاهم ماشي بتهديد كون كنت ملي كيمشيو بالعين الزرگة متلقاينيش خدام تاع راسي 

"تنهد باغي يكالمي راسو عاد رجع كمل ".. صبري ابنت الناس على خبزتك تاا طييب وراه مكتعاود غا صلاة على نبي ولد ولا بنتي نهزهم بسناني "هز صبعو بتهديد "...ولاخر مرة نسمع منك انك تبعديه عليا ماشي انا لي نسمح في دمي وواخا تمشي لتلث لخالي نجييبك وديك سااع انااا لي غنحرمك منوو ها وذني منك...

خرج وخلاها في المحل طلعات ليه دم بهضرتها كان ناوي يصفي لخواطر ساعة عكرات ليه دمو وفوراتو ، سدات لباب ومشات من وراه كتزرب لي فيها ممهنيها متحشم حتى يخسر ليها كمارتها ، متنكرش بلي كلامو خلعها شوية حيت عارفاه مكيدويش من فراغ 

دليلة......قد كلامك اسي عصمان عارف اش كتقوول 

مداهاش فيها ومجوبهاش خلاها غادا في جنبو وتدوي بوحدها اما وهو كيهز في يدو وراسو رامي سلامو على صحااب وجيران حتى تم قاصدو ولد دربهم نازل لعندو كيجري 

- زريقة !! زرييقة !! تكلم 

عصمان..."شدو من ذراعو بتسااؤل "....اش كاين شنو واقع 

- خالتي حسنية كتغوت في دار وقالت ليا سير كلمو ليا من خدمة...

الخوف يقدر يحس بيه فحالة وحدة الا تأذى شي حد كيبغيه.....ملي سمع الولد وعقل على راسو حتى جرا يشوف اش كاين ، غادي وكيطلب في سرو ميكوون واقع لباه حتى حاجة دليلة بدورها تخلعات وقلبهاا بدا كيرجف تبعاتو بالحق مقدراتش تلحق عليه كان سرع منها وصلات حدا الباب الدار كتسمع صوتو مزلزل دنياا

كيف دار وصل معرفش لقى مو وااقفة في الباب وتنذب حناكها صافي قال لي خفت منو هو لي وقع ...با وصاحبي وخويا وقعات ليه شي حاجة تخطى مو وخلاها تهلل ودخل نيشان لبيتو ملقاهش مشى لبيت لجلاس لقاه في بلاصتو جاالس 

مصطفى.......مرتك م كااينااش اولدي 

عصمان......" طلع النفس من اعماقو وزفر بجهد ".....اااااااااااه "تلاح على باه عنقو وباس ليه يديه "......

الحسنية.....دليلة مكاينلش اعصمان صافي بقيتي تا طججتيهااا 

عصمان......." جمع الوقفة وعرووق وجهو كانت باينة من شدة الغضب ".......لواليداااا وااش باغا تصيفها لديلمي دليلة معاايا هاهيا جااااايااا دايرة گنازة على والو 

الحسنية......" جلست على وقفتها هابطة على الكاس تاع الما گرگراتو عاد جوباات "....اميمتي على ياامي وباش غنعرفها معاك اولدي ونتوما قاطعين لكلام كل واحد فيكم كيشوف فجيه انا حليت عيني لقيت جلابتها مكاينة ولبيت خاوي قلت صافي مشات وحرماتني من حفيدي ...

دليلة...." كانت واقفة برا البيت فهمات من هضرة لحسنية بلي الموضوع كيدور عليها...بللات شفايفها ودخلات لعندهم لقاتها هي جالسة وحداها مصطفى وجهو صفر بالخلعة مقادرش يتكلم اما عصمان واقف عليهم داير يدو ورا گفاه "... سمحي ليا اخالتي مقلتش ليك غنمشي عندو ..."بلعات ريقها وكملت "....غير بغيت ندوي معاه وكون كان يسحابلي غتخلعي منديرهاش 

الحسنية...."ناضت لعندها جراتها من يدها وجلستها حداها معنقاها ومدوزة ايدها على ظهرها كتمرر عليه طلوع ونزول بحنية "....راك كنتي عزيزة وغالية وملي دابا هازة ليا حفيدي فكرشك تزادت معزتك ، الا مخفت عليكم علامن بغيتونو نخاف " تغرغرو عينيها وحطات ايدها على خدها مخلية دمعتها شاقة طريقها 

الحسنية قلبها كبير والا مشات تا ولفات لفراق يجيها صعيب...من نهار عرفتها حاملة وهي تصلي وتدعي معاها باش ربي يخلي شملها مجموع مع ولدها ويطول ربي فعمرها حتى تشووف ولاد وليداتو وحالها حال أي أم باغا تشووف ولادها فاحسن الاحوال ومهنين مع عيالاتهم "

عصمان......"جلس حداها خاشيها فحضنو "......عقلي وقف الواليدة ودنيا ولات كتبان قدامي كحلة فكرة تطرا ليك شي حاجة نتي ولا لواليد مكنبغيش تا نديرها فدماغي ..." باس في راسها بقوة ".....الله يخليك ليا اعمارة الداار ، ومتديش على ولدك الا غوت عليك راه مَّشْكَلْ وربي لعالم بياا ...

الحسنية....."هزات ايدو وباستو في كفها ، وخدات ايد دليلة دارت ليها نفس شي وشابكتهم بزووج "...الله يهديكم على بعضيااتناا ، كنشووفكم هاكدا كنمرض 

عصمان......." سحب ايديه وجلس قفازي قدام مو "....مالنا الواليدة كيف بنا ليك ...باا صطووف دوي مع مرتك 

مصطفى ...حط ايدو على فمو وحرك ليه راسو بمعنى منك ليهاا 

الحسنية.......مالك ممديهاش في مرتك لي شافك ميقوولش هادا هو لي كون متزوج بيها يجهل 

عصماان....."قوس عينيه ".... اش بنت ليك داابا لايحها ولا جايب عليها لمرا، صافي هاديك راه سرات ليا مع دم ولات هي الفوودكاا والكوكايين ، لحشيش والهروين ديالي تاا وحدة مبقات تحلى ليا من غييرهاا " شاف في دليلة لقاها منزلة راسها لتحت كتعض على شفايفها "....غا خليها على الله جري على ولدك وسببي ليه امِّي 

الحسنية......"جراتو من وذنيه "....هي الا راضيتيهااا وباراكا متفقص فيها ...

عصمان...." كان منزل راسو الارض مخلي موو دير مبغات "....واخا الالة نراضيها ودير تا حاجة اخرا غاا رضي عليا اميمتي " ضرب على ركابيه ومشى لحدا دليلة قبل يديها وباسها في جبهتها ونزل لحناكها وهو يغمز الحسنية ونطق ".....نزيد ولا باراكا ؟؟

الحسنية شافت في راجلها وعطاوها الضحك اما دليلة هزات ايديها وعطاتو بمرفقهاا لكرش 

عصماان........هانتي شهدي لبغو عندها كيداير تي راااااني مزوج زوووفري 

الحسنية.......الله يدوم عليكم الضحكة اوليداتي ويبعد عليكم شر خلقو ...

عصمان....." بتاسم جنب "....امين الواليدة ، مهم نخليكم عندي شي غرااض

خرج عصمان وخلعت الحسنية رجعات عليها بالراحة اما دليلة دخلات لبيتها لي مهزهاش ،عقلها مرفووع كلام يديها وكلام يجيبهااا كتحس براسها مرة ظالمة مرة مظلومة ومرات مغلوب على امرها ، لقطران لي ذوقو ليها الماضي تلاقا مع الوحم ولعبو علييهاا حتى مبقاتش عارفة شنو باغا ، عصمان بنسبة ليها دنيا وما فيها داكشي علاش كتهددو باش تحافظ عليه مشكلتها واضح مكتحزرش ومعندهاش مع تلحليل كتجي نيشان وهادشي لي خالق ليها مشكيل معاه شي باغي فرض رأيو على شي حتى كيشعلو بينهم لعوافي ....حطات راسها على المخدة تفكر في حريرتها وهي تخوونها عينيهاا وغفااات مفاقت غير على صوت الحسنية كتفيق فيها 

الحسنية......دليلة بنتي فيقي باراكا عليك !!

دليلة....."كتمسح في عينيها "...هاني اخالتي محسيت براسي حتى داتني عيني 

الحسنية......غير من لحمالة ، يالله نوضي الله يرضي عليك وجدي ليا راسك راه عيطاات ليا رناا عارضة علينا لعشى 

دليلة...." تقادات في الجلسة "....شحال دابا في الساعة اخالتي ؟؟

الحسنية......تمنية دلعشية. "عطاتها بظهرها غادا الباب ".....يالله لبسي عليك انا نعاون عمك يلبس ونمشيو ، عصمان راه غيخلط علينا 

دليلة...."قصدات الماريو "....واخا هي اللولة ...

لبسات سيرفيت وسبرديلة جمعات شعرها الفووق بعدما غسلات وجهها ، خلات وجهها على طبييعتو من ديما معندهاش مع ماكياج بزاف وزاد دابا معندها خاطر ليه تا لعكر لي كتموت عليه مقرباتش ليه....ملي وجدت خرجات لعندهم لقاتهم كيتسناوها خدات الكرسي المتحرك وهي لي جراتو بعمها والحسنية حداها غادين ويقرقبو ناب حتى وصلو 

في دار رنا و ياسر كان بيت الجلاس عامر بدليلة و الحسنية و حداهم مولات الدار لي كانت لابسة گندورة بعدما وجدت عشاهاا جالسين كيتعاودو ويتسناو ياسر وعصمان... مدازش بزاف الوقت حتى تم داخل هاد الاخير حامل و محمل في يديه من ديسير للحلوة گلاصي حتال العصير دخل التقدية الكوزينة ورجع عندهم ...تحنو باس لمو راسها وجلس حداها 

الحسنية ..."شدت ليه في ركبتو و تكلمت " ...فين كنتييي اوليدي و فين ياسر ؟؟

عصمان ..." شد ليها في كتفها " ... غير شي غراض الحنانة ياسر كيبلاصي ها هو غيدخل ...

ما جات فين تنوض رنا تشوفو حتى تم داخل مع الباب لاح عليهم السلام و شاركهم في الجلسة ... تجمعت العائلة و مكاين غير قولها و ضحك عليها ... دليلة الوحيدة لي شادة الركنة و تمعس في يديها تا حبست فيهم الدم ... ناضت رنا و عيطت ليها تعاونها منها تحاول تعرف منها اش عندها 

رنا....."خدات من يدها الكيسان ونطقات ".....مالك اصحبتي بنتي ليا ماشي هي هاديك 

دليلة......" تخراج لعينين تعطيه عشرة لزيرو "....ويلي مالي نعلي شيطان غير لعيا وصافي وليت باغا غا نعس ....يالله زيدي نحطو راني مت بجوع 

هربات من نظراتها وتساؤلاتها لي معندها ليهم جواب ...

تحط لعشى على حقو طريقو و تا حاجة ما نقصاه ... كملو وناضت رنا جمعت الدنيا و غسلت ماعنها ... رجعت من الكوزينة محملة في يديها حلوة گلاصي ... بيها باش اللسان يحلى و الجلسة توعار ... 

رنا ..." حطت الصينية و الطباسل و جلست حدا مها " ... ماما عندي ليكم واحد الخبار 

الحسنية ..." من بعد مشاكل ولدها ومرتو ولات تسمع هاد المقدمات قلبها كيتكمش " ... خبار الخير ابنيتي اشنو عندك خلعتيني ؟؟

رنا ..." شافت في ياسر لي غمزها وضحك وضارت عند مها " ... انا حاملة اميمتي قريب نرجعك نتي والواليد جد وجدة هههه 

الحسنية ..." طارت عليها بتعنيقة و طاحو دموعها على خدها ...شدات في قلبها و معنقة صدرها " ... اش بغيت يا ربي من هاد الدنيا مازال غا ولدي وبنتي غيفرحوني بحفايد الحمد الله يا ربي حمدتك وشكرتك لي عيشتيني تا شفت هاد النهاار 

رنا ... الحمد الله يا ربي "شافت في دليلة لي كانت عينيها عليهم " ... دليلة تزوجنا في دقة وحدة وغنولدو في دقة وحدة ههه

عصمان ..." ناض عندها عنقها و باسها " ... البرهوشة كبرتي و غترجعينا خال مبرووك عليك ابنتي ...

" ضار لعند صاحبو لي وقف و تعانق معاه " ... مبرووك عليكم الفردة كلمة بابا من دابا 

ياسر ....." ربت على كتافو "....شووف خيرنا ميدييه غييرنا ههه 

دليلة ....."سلمات عليها ورجعات بلاصتها "....مبروك عليك اختي !!

رنا ..... الله يبارك فيك يا ربي و تشوف وليدك ولا بنتك على خير .....مهم ان شاء الله الى كان ولد غنسميه ريان و الى بنت نسميها رميساء "قالت وغمضت عين كتسنى جواب ياسر ".

ياسر ..." طلع فيها حاجب و نزل خوه " ... اييه الالة و متاخديش رأيي و لا شنووو 

رنا ..." شافت فيه بتمييقة " ... مالك كنتي معدب عليه ... شوفي ادليلة اختي واياك تخلي عصمان هو لي يسمي ليييك .." ضارت عند مها و باها لي كانت فرحتهم ما بحالها فرحة " ... واش كاينة و لا لا قولو ليا 

مصطفى ..." شاف الفوق داعي ربي يوفق ليه وليداتو " ... الله يوقف معاكم ابنيتي و يخليكم ديما فرحانين گاع سميات زينين ...

رنا فرحتها مكانت عاطياها لحد لاهيا لا راجلها ملي زفات عليهم الخبر وهي تمنى وتحلم وتعاود ليهم من نهار شكات بلي حاملة حتى تأكدات 

رنا....."كتشرب في العصير بشهية وتدوي ".....عرفتي اماما قسما بالله الا دخلي لعيادة وتسمعي لعيالات تحمدي الله على نعمة لولاد لي عطانا الله ....وحدة مسكينة عشر سنين وهي تسوااني ومجاب مجااب الله .....اما واحد السيدة عينيها تنفخو من لبكى قالت ليك مكانتش باغا تحمل ايوا غير ولدات مشبعاتش حتى من ريحتو وماات ومن تم لدابا مبقات ولدت غتسطى كتندم فراسهاا "رنا غير كتدوي حيت معندها علم برفض دليلة لداكشي لي فكرشهاا "

الحسنية.........الله ياربي الله ابنيتي الله يفك حزاام كل وحدة ويرزقها الذرية الصاالحة

كلام رنا كان بحال سم ونتاشر في جسم دليلة من اول معلنات على حملهاا وهي تتشوفيهم كيفاش فرحانين عكس نهار سمعت خبر حمالتها كيفاش نكدتها عليهم...حسات انو قصات عليهم و على راسها ...ودابا كلام رنا التالي كمل ليها الباهية وخلاها خاطة يديها على كرشها بدون شعور ... لاحت عينيها في عصمان و سهات في فرحتو على ختو واخا ابتسامتو كانت ناقصة بقات تتفكر وتعاتب في نفسها ...

" علااش كنت انانية وكبرت فيه الفرحة "....

... رجعات هزت عينيها فيه لقات نساحب خرج على برا يكمي ليه على الله العروق ديال راسو يقدرو يحبسو من الخبيط و يفكر فيها و في مشكلتهم ... مع حط الگارو في فمو و نتر نترتو و هز راسو السما ... حس بيها واقفة موراه وهو يتلكم 

عصمان....." مباغيش يشووف فيها ".....دخلي غيضربك البرد وتمرضي !!

حاسة بشوكة واحلة ليها في حلقها ومقادراش تبلع ريقها.....عرقات ونفسها ضيااقت....كتطلع النفس وتهبطها بصعووبة ...شافها مجوباتوش وهو يدوور لعندها رمى الگارو وعفط عليه فور مبانت ليه حالتها ماهياش 

عصمان....."متهونش عليه يشووفها في ذيك الحالة ويزيد يقصح قلبو شدها من يدها وايديه كيمسحو على جبينها "....مااالك ؟؟ واش ضاراك شي حاجة 

دليلة....."موعات براسها حتى ترمات فحضنو كتشهق بالبكى ".....ضارني قلبي اعصماان. اهء اهء ديني لدار عفاك 

ملي تجي تحط راسك على الوسادة وتقلب على النعاس مكتلقاهش....تلقائيا كتبدا تخمم فشنو درتي وتصنفو واش زوين ولا خايب....كتلوم راسك وتعاتبها على اخطاائك هادي مكانش خاصني نديرها وهاد الكلام مكانش خاصني نقوولو، علاش جرحت هاذا وعلاش تخاصمت مع هاديك ،قليل فينا لي يقدر ينعس مرتاح بلاما يفكر في نهارو وشنو داز فيه .

دليلة لاول مرة غتصنف مع النوع اللول وغتحس بغلطهاا ، لعشى خلاهاا تندم على شحال من حاجة قالتها وبغات ديرها ، حسات براسها كانت انانية وكتفكر غير في راسها ....اول مترمات في حضن عصمان كانت محتاجة تبكي،،، بكات ومحبستهاش اما هو كتفى يطبطب على ظهرها بلاما يتكلم ، ستاجب لرغبتها وجابها لدار بعد معلم موو وباه لي قررو يباتو لعند رنا ....رجع هو وياها وصلها حتال بيتها وخرج لبيت لجلاس مخليها على خاطرها.....كانت ناعسة على ظهرها وكتشووف في السقف عينيها حمرين تبكي وتمسح وتعاود قلبها طاايب حاسة براسها هي سبب البعد بينها وبينو ، لسانها وصلهم لطريق مسدود خافت يبعدو عليها الحبس ومدارتش حساب لساانهاا،خوفها من انها تخسرو وطمعها في حيااة مقادة بحال بنات جيلها خلاهاا تقوول انا ثم انا ثم من بعد الطوفان وهو محاتو....لغات شي حاحة سميتها نجلسو بزوج فوق طبلة ونتاقشو ونتافقو لجئات لطريقة لي خسراتو بيها وخير دليل هو في بلاصة وهي فبلاصة،مسحات وجهها ووقفات من فووق سرير باغة تمشي لعندوو مقادراش تصبر بعيد عليه ، قبل متخرج ستقرت عينيها على لفريخات...عصمان وقرق سطيلة هاد الاخيرة لي كانت حاضنة على بيضتها وتغرد ...دليلة مفهمات والو ومعندهاش دراية بعالم طيوور، دارت شنو شافت حجة وخرجات لعندو 

فدووك الاثناء هو كان ناعس فوق سداري ولايح عليه لحاف،مگعد ظهرو بمخدة وكيف العادة الگارو في ايديه ، كيتفرج في ناسيونال جيووغرافي ولا هي لي كتفرج فيه...كان مجهدها على الاخر باش صوت التلفازة يطغى على صوت بكااها عارف راسو غيضعاف ويمشي لعندها لكن هو مصمم يوريها خطئها بطريقتو ، سمع باب البيت تحل معاروش اهتمام.....حتى لمحها جايا في اتجاه ديالو زرقة عينيها كانت وسط بركة حمرا من دم.....فمها حمر ونيفها كذلك شافت فيه بانت ليها ملامحو باردة... متسوقش لوجودها في البيت هزات حوااجبها لفوق وقربات حتال لعندو تحنات مخلية شعرهاا طايح على وجهوو...حطات عينيها فعينيه ومدات ايديها خدات الگارو من فوق شفايفو دارت بين صبعانهاا ...كان مقوس عينيه وكيستناها اش دير.....صاط دخانو وقال 

عصمان......."داير فيها ممأثرش وهو مكرهتش يلوح كلشي من وراه ويديرها بين يديه "....خاصااك شي حاجة ؟؟

دليلة........" طفات الگارو في طفاية ودارت لعندو وقالت بصوت باح "....اجي معايا بغيتك تشووف لفريخات معرت شنو داكشي عندهم

عصمان...."رفع حاجبو بتسااؤل" .....اش بغى يكوون عندهم ؟؟

دليلة....."ربعات ايديها وزادت في نبرة صوتها مأفأفة "....الا جيتي معايا غتشووف بعينيك 

استسلم ليها ومشى معاها غادي سابقها حفيان وهي تابعاه ، دخل لبيت مشى حدا القفز شاف شنو كاين وهو يبتاسم جنب ...دار لعندها لقاها وراه قريبة ليه صوت انفاسها سمعهم ، عينيها مترفعوش من عليه... ميل راسو دوا بتبااث داير فيها ممهزوزة منو تا شعرة وهو ربي لي عالم بيه ميمكنش تكون قريبة ليه وميضعاافش كيبقى رااجل .....دار يديه وراه عض على شفتو وقال 

عصمان.......الالة مابيهم والو غير قرق سطيلة فرحات عصمان وفرخات ليه هادا مكاان....

"رجع عطاها بظهرو وشاف فيهم وقال، شووفي كيفاش حتى هما فرحانين وعايشين لحضتهم ...تا هي فرحانة حيت بيضاات وهو كثر منها شووفي كيفاش كينقز باغي يحمييها حلي عينيك مزيان ادليلة فيهم وتعلمي غا منهم خاطيك بنادم ..."جرها من يديها ورجعها قابلها قدام الفراخ " ... شوفي قرق سطيلة عصمان تاع بصح اش كدير باش تخليه معاها .. "ضور راسو ليها " اودي دوووماااج .. 

تم غادي متجه لباب خارج فحاالو وهي تحبس عليه الباب متكية عليه و ممخلياهش يدوز " ...

عصمان...."بلاما يشووف فيها ".. دليلة هبطي يديك و خليني ندوز فحالي نمشي نحط راسي حيت مصدع بجهد 

دليلة ..."رفعت حواجبها فيه وباغا تخرج دوك جوج كلمات وتخويهم عليه " ... بلاصتك هنا حدايااا ونعاسك هنايا .."اشارت لناموسية " ... وراحتك خاصها تكون فجنبي ومعايا ...."هزات ليه يديه حطاهم فوق كرشها " .......تا انا باغاه وتا انااا الا هزيتو في ايدي غنفرح بيه بحال رنا وبحال قرق سطيلة وگاع كثر منهم عرفتي علاش حيت اعصمان غياخد عينيك و غياخد نيفك و غياخد منك كل شي ..." قربات منو حتى لصقات كرشها عليه وتمخشات فيه "....ندمت على شنو قلت ليييك و شنو درت معاك عارفة عزيت عليك الفرحة وكبرتها فيك ولكن عذرني عقلي كان مرفوع و الخوف مسيطر عليا ... " هزات عينيها فيه "......قول شي حاجة متبقاش سااكت

عصماان....."شاف الفوق وتنهد "......مخليتي ليا منقوول كتساليهم لديلمي انا بعداا حال وعقل وكل مرة واش كيخرج داك الفم عندك مرة كينطق بشهد ومرة بالقطراان ...

دليلة......." وقفات فوق رجليه وتعاللت على صبااعها مدورة ايدها على عنقو ".....انا عارفة فمي مقالش ليك لقليل داكشي علاش انا غنخليه يطلب منك سمااح 

"بتاسمت جنب وحطاات فمها على فموو كتبووس فيه بكل حنية ، البادرة كانت منهااا ومعندعاش اشكال ، عارفة راسها غالطة تطلب سماحة حيت هاظا عصمان ماشي اي حد...متقدر تعيش بلا بيه ولفات عليه ودات على الحياة معاه ...تبوس وتعاود كتعلم وتجرب في فمو وهو صابر مخليها تدير مبغات

فمها رجع حمر وفمو مخلات كيف دارت ليه حتى سخفات وبعدات عليه لقاتو باقي مفيكسي شووفة فيها ..خنزرات وضرباتو لكتافو "

دليلة.....متزيدش فيه وتدفع كبير ، درتها قد راسي وعتاذرت صافي نزل كواريك

عصمان....."ربع يدييه "...ايوا والا عودتي مرة اخرة فقتي مع صباح وبديتي عوتاني في ديسك حشاكم ديالك...

دليلة....."علات حواجبها "....اهاه ايوا سمع نقوووليك راه انا فكرتي مغاداش تغير ، حاجة وحدة غنعطيك وقت ومغاداش ندخل شي فشي ، حيت كلامك على صح انا ماشي هي سعاد ومختار ماشي هو بااك.....مغاداش نكون انانية وندير كيفها نختار راسي ونلغي لي فكرشي بالعكس غنتمناه يكون هو شفايا من لياام لي دوزت نعوض فيه طفوولتي لي ضااعت وگاع مراحل حياتي لي معقلتش عليهم ....ببساطة باغا نشووف فيه راسي

عصمان......." حط ايدو على حنكها كيمرر عليه "........غنعوضو بزوج بينا ماشي غير نتي ،ايوا تا انا كنواعدك الالة لي بغيتيها هي لي غتكوون ولكن كلشي كيجي بوقتو زوين يعني مديريش ليا فيها علال القلدة وتبيني عليا بادرك حيت غتجيبيها فراسك 

دليلة......"عوجات فمها ".....اودي جبتها فيه نهار تزوجتك 

عصمان....."جرها من خصرها هزها لعندو " .....دابا علاش كتقلبي هاا شنو باغا ؟؟

دليلة......."دورات رجليها عليه "..باغا حقي الشرعي ولا يااكما الما مقطووع نتسناك تا تشارجيه ، نوعنك بشي كويس العصير 

عصمان......."حطها فووق ناموسية ورجليها مزال ملوية عليه ....نصل تريكوه ونزل غلييها كيشووف منين يبداا ".....داير ابوونمو ازين خافي غا على راسك نتي لتطفاه قبل متشعلي ...

دليلة ......"جراتو لعندها وغمزاتو ".....جرب وحكم 

كانت ليلة ماشي بحال گاع الليالي بنسبة ليه ، حيت فكل مرة كيلمس جسد معشوقتو كيحس بيها اول مرة.....دليلة بنسبة ليه ماشي بحال گاع نساا واخا كتملك عينين بحالهم وانف وفم كيفهم لكن كانت غييرهم كتشبه لرااسهاا فقط ...خفض راسو كيقبل فيها بشوق كأنو شحال مشاافهاا ....بحنية عكس شخصيتو .....بتناهيد عاشقة طالعة خصيصا ليهاا ....اما هي كانت مغمضة عينيها وعايشة معاه في عالمو الخاص لي بنسبة ليها جنة فوق الارض...دورات ايديها على خصرو مزيرة عليه ، كتحرك جسدها بتوازي مع حركات ايديه ......تنهدات من قلبها وحلات عينيها فيه باغا تعيش معاه الحب وهي شاايفاه ....باغا تحفظ ملامح وجهوو ملي كتكون بين يديه ، باغا تشووفو فكل حالاتو معصب ، ضاحك ، وعاشق ...

في خضم نظراتها كان هو ملهي فجمال وبريق عينيهاا...عض على شفايفو راسم على محيااه علامات رضى ونزل يداعب فمها من جديد ، بتاسمت ليه وكانت سبق منو جراتو من فمو لعندها وبدات كتبووس فيه من جمييع نوااحي ....فصلات قبلتها كتنهج وقالت بعدما طوقات عنقو وعينيها مزال مستقرين على عينيه ".....عرفتي الا توحشت لگارو فين غنلقااه ؟؟

عصمان......." حاط يدو على ناموسية مكالي بيها باش ميرميش بثقلو عليها ...والايد لوخرا كيمررها على وجهاا رافع حاجبو بتساؤل "......فين امدام ؟؟

دليلة ....."حطات صبعها على شفايفو كتقيس فيهم ".....هناااا !! ..." ضحكات على هبالها وقالت بلا حشماا " ....فينما نشووفك كتكيف غنتلاح عليك هاديك هي نترثي انااا ومغندير بحساب لا لبلاصة ولا معامن نتااا رد بالك !! 

عصماان......"بعد شعرها من على عنقها وخشى وجهو فيه كيبوس وفنفس الوقت كيدوي ".....شفيييق دير عقلك 

دليلة ......" باثارة بعداتو عليها جا ناعس على ظهرو ...طلعات فوق من كرشو وبدات كتمرر ايديها على صدرو وكتضحك ".....على العقل خليتيه ليااا بعدا 

عصماان....." طلق ضحكة من اعماقو ودار يدو ورا راسو وتكلم ".....وحدة في زوج يا اماا الحمل صاط ليك في مخك ولا بدلووك ليا مافيهااش 

دليلة......مزاااال مشفتي والوو 

"تمات طالعة مع صدرو كتقبل فيه وتشعر عليه بطريقتها ، نعومة يديها خدراتو وجنناتو ، كانت كل قبلة اول لمسة منها كتعتاذر فيهم منو على الايام لي عيشاتهم ليه ...حطات ايديها على قلبو وكتبات سميتها وقالت 

- عصماان كنبغيييك !!

مكديرش فيها عزة نفسي فهاد الامور ولا كتقول هو لي راجل خاصو يعتارف اما انا مرا انوثثي وشخصيتي مكتسمحليش وديك الهضرة دوالو ، دليلة مع عصمااان عاد عرفات معنى ديال الحب ، ملي بعدات عليه هاد ليام بدات كتقلب عليه في منامها وفي خيالها ، تأثيرو عليها كان كبير ومضرباتش ليه لحسااب ، داكشي علاش لي حسات بيه فديك اللحظة قالتو ليه

بدون زياادة ولا نقصاان 

دليلة....." كتبات حروف اسمها بصباعها على قلبو ".....عصمان كنبغيك ....

عصمان....."كان خاصو يتگعد ويسمع مزياان ".......عودي اشنو قلتي ؟؟

دليلة......." دارت ايدها على فمها وصرخاات باعلى صووووتها "........واااااا كنبغيييييييييييييك 

عصمان......" رفع حوااجبو باستسلام ".....بلاتي بلاتي....."ناض عرياان لبيت مشا جاب تليفونو ورجع لعندهاا ، فااااتح تسجييل صووت ".....عاودي عاودي اش قلتي ، خليني نسجلها ونديرها ديسك حيااتي ...

دليلة......"حطات ايدها على يديه وقربات تليفون لفمها وغناتها ليه ".......شكون لي يبغييك انااا ، ويموووت عليك اناااا ، يعشق فييك اانااا ....."باستو ففمو وكملات ".....قسما بالله ايلا غير انا ومكاينش غيري انااا

"لاح تليفوونو الارض وجااوبها بتطبيييق ، رجع كيفتاارس فيهاا من جديد ولكن هاد المرة كانو لمساتو مخلطين بهمسات بنكهة الاعترااف "....

عصمان ......انا بتسطيتك وتزوفريت ديالك سكنتيني وملكتيني ، فت لحب معاك بدرجاات ، وليت كنشووفك غاا نتياااا ....شتي دااابا خليني من الاقواال وخليني نصرف ليك حبي بالافعااال 

شابك ايديه مع ايدها ورجع تملكها من جديد ،كأنهم روحين بجسد وااحد 

~~~~~

حلات عينيها ساخطة من اشعة الشمس لي زعجات نعاسها.....هزات راسها بان ليها عصمان ناعس على كرشو بأريحية جسمو العاري واخد فوق نص في ناموسية ...تفكرات ليلتهم وتفكرات كلامهاا وحلفات لخلاتو هاني ....بداات كتضرب على ظهروو وتفيق فييه حتى حل عينيه 

عصمان......." كيتفوه"..

رجعي رتاحي عااد نعسنااا ابنتي 

دليلة......" كتدوي مخنزرة " .....شنوو وكلتوني في لعشى حتى خليتك ستغليتيني وقربتي مني هاا دوي 

عصماااان........" ضرب ناموسية بزعف وقاال ".....غنقتلك ونمشي على ديلمك لحبس ونهني كري مبقيت باغي لا حب لا خراااا 

ناض من ناموسية غادي كيسب وهي لاوية لحاف وتابعاه دايرة يديها على خصرهااا 

هزات لحاف لاوياه عليها وتابعاه تضحك على ردة فعلوو كتبغي تعصبو وربي كبير ... وقف قدام الماريو كيجبد في الحوايج و يخسر في الهضرة محايرش ... حتى حس ببرودة بيديها لي تحطو عليييه وعنقوه من ظهرو

دليلة ..." عضاتو من ضهرو و دوات غالبة عليها الضحكة " ... غير سايرة نتمازح مع حبي لي سلطو عليا الله 

عصمان ..." حط يديه على خصرو و طلع حاجب ومنزل خوه وضار عنها مصغر عينيه " ........نتي غااا صعري ملاي وقولي ليا شادا فيك باراكا غلوقت شاادا فينااا ، هاد المرة نسلخ حبك 

دليلة........دقة فيااا دقة فييك 

عصماان......." باش جبينهااا "....وتقدي عليا بعداا ؟؟

دليلة ..." تعلات على صباع رجليها حتى طاح ليها ليزار " ... قادة عليك وفايتاك لهيه ..." هبطت عينيها لفمو و قربات ليه تا خلاتو تيتسنى بوستها و عضات على فمهاا و ضحكات عاطياه بظهرها 

عصمان ..." جرها لعندو كرشو على ظهرهاا كيبووس فيه قبل ميقلبها لعندو ويكمل على لي بداه .....وقف راسو بزز قبل ميسخن الطرح حيت فكر بلي خاصو يخرج يجيب مو و باه " ... فكك مني غير با صطووف و الحسنية مخاصنيش نتعطل عليهم ..."هز راسو في الساعة لي فلحيط "..... الوليد دواه هنا مخاصوش يفوت ليه الوقت .....

دليلة ..."خشات وجها في عنقو و باستو في تفاحة ادام " ... انا ليك في أي وقت ...

" طلق منها غير بالكشايف لا هو ساخي بيها و لا هي ملات منوو ... لبس سروالو و مشا سابقها الكوزينة وهو كيتكلم بصووت مرتفع باش تسمعو 

عصمان........وجدي ليا دوش بينما وجدت ليك تفطري 

قبل مدير شنو بغى لبساات عليها عاد لحقات عليه باش تعاونو لكن قبل شعلات شووفو ووجدات ليه الدوش عاد مشات لعندو... لقاتو حاط المقراج و كيوجد في ليقامة اتاي ...واحد كوايفي بحالو الدكة متخطاه 

دليلة ... غير حيد اودي انا نكمل الفطور ..

عصمان ..." قرب معنقها من خصرهااا و خشا نيفو في شعرها " ... هاد الريحة تتخلي مخي يدوخ بلا تبويقة 

دليلة ... انا هي تبويقتك و منسمح لحتى حاجة دوخك من غيري ... ودابا حيد خليني ندير الفطور في ساع و سير دوش ليك 

عصمان ..." هز يديه باستسلام مع تنهيدة طالعة من القلب " ... ها هو غادي الالة ..

" دخل كيدوش وهو فرحان كيصفر ويدندن وعاجبو الحال....لبس حوايجو وخرج لعندها لقاها موجدة الفطوور وكتسنى فيه ، جا حداها وكبات ليها وليه .....فطرات بشهية وشبعات على عكسو هو لي نقب شوية 

دليلة ..." ضارت عند عصمان عادة ليه يديه حاطاهم على كرشها " ... عصمان بغيت هاد صباح يتعاود كل نهار وهاد الفرحة متهرسها حتى حاجة....مطالباش بزااف طالبة غا نعيش معاك هانية مهامني لا فلوس ولا ديوور ولا طوموبيلات...."حطات راسها على كتفو "....نتا كل هميي 

عصمان ..." وقفها وقابلها معاه وشد ليها وجهها بين يديه " ......ودابا تعلمتي تهضري.... "حنحن وقال "......تا انا واعدتك وقلت ليك بلي داكشي لي شاغل بالك غيجي وقت و يبقى غير تعاويدة غير رناحي ليا وفكري فراسك وفلي فكرشك ...

" هز الگارو باغي يشعلو وهو يلقاها حاضيااه وراسة ابتسامة جانبية ...تفكر حضرتها وهو يكمشو و فرتو قدامها " ... وتاا هاد الهم غنحيد مو و أي حاجة ضرك ما عندي ما ندير بعدو ربها 

" ضحكات بانتصار حيت لاول مرة تخدم السياسة وتفكر بعقلها ...طبع قبلة جنب فمها وخرج يجيب باه اماا هي جمعات الطبلة ودخلات تدوش متمنية تدووم فرحتهااا 

لكن واش الحيااة داائما كتكوون بلون وااحد ؟؟

تبدلو ليام وتبدلو الأشهر وتبدلات معاهم تا دليلتنا.....كرشها برزات ولجسمهاا زينااات علاش لا وهي فشهرها السادس ....الايام دازو عليها كلمح البصر محساتش بيهم ...معضم وقتها دوزاتهم في داارها مقاتلة مع الوحم وعصمان هاد الاخير لي جاها عليه وحررات العيشة فيه مرة باغاه وتانية كارهاه ، تارة معنقااه ، وتارة اخرى بظهرها عاطياااه...لكن رغم ذلك كانت كل مرة كتزيد تبغيه ومكرهااتش وسط من قلبها تخبيه...اما هو كانت بهبالها مطيحاه فيها ومسطياه، صحيح كطلع ليه دم بالحق دغيا غينسى ويرجع يحزر وهي تفشش وتمختر ....دار بالو عليها ولي شافها يجيبها ليهاا ، كان مرة الا لقى عقلها هارب يرجعو ليها وفبزاف المرات كيسايس ويتسطى معاهاا ويعيش لهبال هو وياها

....شغلات بالو وغيرات حالو ولا عقلو برا ولداخل معاها ، راد البال لماكلتها ولصحتها خايف عليها وعلى لي فكرشها عارف اول تجربة ليها ومعارفة متقدم ولا تأخر فيهاا ....واخا الحسنية مكانتش كتخليها وكل مرة تعاود ليها وتنصح فيها لكن تاهو مكانش مخلي من حقو ومصمم يقابلها بنفسو

~~

حسات بسخونية والعرق كيتكون على جبينها ....حلات عينيها كتفوه كانت حداش دصباح هادي هي وقيتها ....شميسة كانت حارة والجو سخووون ، ناضت بزز كتمشى اول حاجة دارتها طوات ليزار وعدلات لفراش ، تمشات حتى الكوافوز خدات مقبط هزات بيه شعرها لفووق ....على الله تبرد شوية ....مشات بلاكار خدات گندورة من گنادر لي تصاحبات معاهم هاد الفترة.. مع لكرش والصيف مكاينش محسن منهم....خدات حوايجها واش غتحتاج خرجات علقاتهم في الحمام لقات الدنيا صاقلة عصمان وعارفاه في خدمتو وخالتها مية في ميتين غتكون خارجة كيف عادتها مع با مصطفى يشم لهوا كيف كل صباح ...دخلات تدوش منها تبَّرد ومنهاا توضى ، غسلات ولبسات ....خدات في يديها كاس اتاي صيك وجلسات قدام لمرايا تنشف في شعرها بالفووطة....طباعها متغيروش عكس وجهاا ونفسها ...شافت راسها في انعكااس المرااة ، لقات قدامها دليلة مغايرة على لي كانت قبل.....هادي منورة وعينيها كيلمعو ...ولوخرا كاان باهتة وبريقها طافي ......هادي عندها لي يخاف عليها ولي تعيش على قبلو.....عكس السالفة كانت كتخاف على راسها وعايشة ليه ...لي قدامنا كانت كتنبض بالحياة ودليلة لي خلاتنا كانت ميتة فعز شبابها فرق كبير بيناتهم .....حطات ايدها على كرشهااا وتنهيدتها رجعات تبسيمة ،دقات قلبها كيضربو بجهد كل مكيقرب الوقت ،شوقهاا ليه كيضااعف .....من اول مرة حسات بيه كرووح كتحرك وسط روحهاا ،تعلقات بيه وبغاتو امتى يجي لدنيا تهزو وتحضنو ،تشمو وتبوسو،تلعب فشعرو وتعرف لون عينو.... 

ولدها وفلذة كبدها وثمرة حبهاا هي وعصماان لي من نهار عرفو جنسو وهما كيوجدو ليه وكيضااربو على شنو يسمييوه ...ضحكات بصوت عالي وحطات ايدها على حناكها ورجعات تفكرات نهار عرفو فيه اش عندها 

ناعسة في البياص و معرية على كرشها...عينيها كانو على عصمان فين كيشوف ، اما هو كان كارز على يدها بتأثر ومتبث عينو في فم الطبيبة مزاحوش عليها باغي يتسناها اش غتنطق .....نفسو فولد بحال بزاف......راجل يحمل اسمو من بعدو يلبسو تووني ويلعب معاه الكرة ...يتصاحب معاه ويتسابق هو وياه.......اما بطلتنا مكانش عندها مشكل في جنس المولود معادا حاجة وحدة عندها فيها مشكيل فديك اللحظة وهي علاش يشووف في طبيبة ولا تا يحضيها.....

دليلة...."جراتو من لكول ديال تريكو حتى قربات وذنيه لعندها "......اشنو عجبك فمها ؟؟ بان ليك ملحم عندك فين تشد وتعض...مبقاش مقنعك فمي !!؟ 

عصمان....." همس في وذنيها بلاما تسمعهم وتدي خبارهم تاهيا ".....غير هاد المرة ديري عقلك 

دليلة....."قرصاااتو من يديه "....قووليا عجبك ولا لا ؟؟

" تدخلات الطبيبة ونهات حوارهم لي مسمعاتوش بكلامهاا "

- شنو باغي اموسيو عصمان...

دليلة...."حطات مرافقها على سرير وتكعدات... قبل ميدوي ضرباتو لصدرو بخفة وجوبتها وهي كتلعب فشعرها "......شكون حامل انا ولا هو. ..

-حدقات فيها الطبيبة بعدم فهم "....المفروض سؤالك يكون صاد لعندي حيت انا لي مثقلة ومعذبة ولا لا اعصماان ؟؟

عصمان......"حاط يدو على فمو ومقوس عينيه كيحرك ليها فراسو بمعنى زيدي واري معندك ، لقنت لي مشات ليه تشوهم فيه ،تا طبيبة مكملات معاها شهر مقاد ،حنحن وتكلم كيطنز "......سولي لمدام اش حب الخاطر واشنو بغات وعطيها ادكتورة 

- "ختاصرت كلامها في جملة وحدة وناضت لمكتبها "......عندكم ولد مبروك عليكم

عصمان......"ضرب يد في ختها وغوت باعلى صووت "........هوووووووولياااااااااا 

دليلة......." بغات تخبي فرحتها ولكن مقدراتش ، خدات بابيي مسحات كرشها ووقفات ".....تا مالك تماركا شي بيت 

عصمان ....." واخد راحتو لعيادة تقول ملكو...جرها من يدها دارها ورا ظهرها وهادي هي حركتو المعتادة نزل لفمها طبع قبلة خفيفة وقال "......ومعجبكش هاد لبيت لي ماركيينا...." جلس قفازي ونزل باس كرشهااا ".......ولديييي زوين 

- "جالسة في مكانها وكتدون في ورقة الدوا "........ختاريتو ليه سمية ..

دليلة .... غنسمييه قيس 

عصمان......." حقق فيها شووفة "....وفين غنلقى ليه ليلى ..." رجع تكلم بامتناع ".......سمية جاتني رطبة معجبتنيش خاصو شي سمية حرشة باس يخرج بحال بااه 

- " بدات تضحك ".......كنوافقك الرأي اموسيو عصماان ، " مدات ليه كتاب فيه الاسماء "....هادا يقدر ينفعك 

دليلة ....." سااطت باعلى صوت ونثراتو من عندها ورجعات خابطاه ليها فوق البيرو ".......دخلتي لينا مع العظام ادكتوورة ، كنظن مهمتك سالات ملي نطقتي عندكم ولد اولا ....

" لاحت عليها دوك الكلمات وخرجات مخلية عصمان كيتاسف ....هز لكتاب واوغدونونص وتبعها ،لقاها حدا طوموبيل مربعة يديها وكتمشي وتجي غا شافتو قاصدها وهي تغلب عليه بالهضرة تمسكن حتى تمكن

دليلة ....."كتهز ايدها في الهوا وتدوي ".....شفتي كون خليتها على راحتها، لقاها مجلساك حداها في لبيرو ودايرة رجل على ختهااا وتافق معاك على سبووع اش غدير فيه داك نوع انا لي كنعرفو......" بحلقات فيه وذبلات عويناتها وهو غا حاضيها ".....عصمااان نبدلو طبيبة ؟؟ 

~~~~

رجعها من لي فات صووت دقان في الباب ..جمعات ابتسامتهاا وجمعات شعرها بفوطة وناضت بشوية عليها كرشها سابقاها غادا الباب ....مع حلاتو مع كانت الصدمةة.. الايام زوينة لي دوزات قدرات تنسيهاا فكلشي وللاسف حتى فهاد النهار لي مشا ليها من البال ....

دليلة......" حطات ايدها على كرشها وحسات بالخووف فور مشافتهاا ....حاولت تتغلب هلى صدمة وتنطق بتباات "....باشمن وجه جاايا هناااا ؟؟

- بعداااا نقوولو ليك بصحة دوش وتاا لي قبل من دوش ...غمزتها ودفعات لباب ودخلات بثقة في النفس .....كانت لابسة كسوة بالاسود حد الركبة ، فتحة صدرها وقوامها كاان واضح وباين ،مقادة وجهاا على اصوولو لي شاافهاا يقووول كانت مسافرة سياحة وعاد رجعات... 

واثقة من نفسها ومتعجرفة... كتمشى بخطى ثابتة تحت من فساتنا الاسود كسواد قلبهاا ، مكتكنش ولا هازة من جهة بنتها حتى ذرة حب ، دخلات البيت وجلسات بكل أريحية فوق السدااري كأنها من اهل البيت ، هزات عينيها في دليلة لي كانت واقفة قبالتها وكلها استفسارات ....... نظرات الشفقة والحصرة مقابل نظرات الكره والحقد الغليل من الام لبنتهااا كأن لي قدامها عدوتها

او اي وحدة من شارع ...شوفاتها مكتوحيش اطلاقا بلي توحمات بيها وهزاتها تسع شهوور.......طلعات فيها ونزلات ودققات النظر في كرشها وضحكات باستهزااء

سعااد......." شابكات ايدها بزوج وجمعات بيهم ركبتها ".....كون مبنتي نتي في طريقي وتسلطتي عليا كنت انا لي غنكون حاملة منو ماشي نتي ؟؟ بالحق برافو عليك طلعتي بنت مك وخديتي مني حاجات اول فرصة طاحت بين يديك "شيرات ليها على كرشها " ... ستغليتيهاا ...

دليلة ..." صغرت عينيها وجوبات" ... نقدر نكون بنتك وهازة دمك و سميتك فوق ضهري تا نهار يدفنوني ... ولكن عمري نكون كنشبه ليك حيت انا ونتي دايرين كيف البيض ولكحل وكيف النقى و اللقى "غمزاتها "

سعاد.........."وقفات قدامها وكتشووف فيها بتحدي ".....لساانك مزاال طويل عند بالي قطعو ليك وقادك بالحق راك مساهلاش ...." نزلات ايدها حطاتها على كرشها ".......شحال باقي ليك وتولدييه ؟؟

دليلة ..." نترت ليها يديها من كرشها ورفعت صبعها في وجها بتهديد " ... تعاودي تحطي يديك عليا ميعجبك حال تتسمعي ..." بدات تسفق بيديها بطريقة تتقوليها منعقلش عليك " ... نعصى الله ونسى راك مي و دابا الباب هاد الدار نقية بلا متوسخيها ا السعدية 

سعاد....."عوجات فيها فمها ورجعات جلسااات في بلاصتها ممسوقاش ومبردة"....لكلام لي جايا نقوولو ليك مزال مخرجتوو ...

دليلة....."قاطعات كلامها بالغوات "......هضرتك وفريها ليك مباغا نسمع منك والو ، الحاجة الوحيدة لي باغا منك حاليا هي تعطيني تيساع وتخليني عليييك ، ودابا خرجي قبل ميجي شي حد

سعاد.......اووووووف "صاطت منفخة ".....عصمان ومجايش دابا ،مو باه راهم كيتشمشو في جريدة ، ودابا سمعيني مزياان حيت شحال وانا كنستنى هاد نهار وكنحسب ليه راه كثر من شهر وانا برا مقابلاكم من بعيد وباغا لفرصة وملي جات لعندي غتحلي ودنيك معايا وتمعي ليا 

دليلة....."رفعات حاجبها "......اااش بغيتي ؟؟

سعاد.........بغيت عصمااااان "قالتها بابتسامة كبيرة على فمهاا "

دليلة......"حطات ايد على كرشها ولوخرا على جنبها وعطاتها لضحك حتى دمعات.....مسحات جناب عينيها ، وعدلات صووتها وجوبتهاا بنغمة تهديد ".......حقي انا وسمحتليك فيه هاانية ، ولكن هوو "حركات راسها بنفي " طلب ديالك غاالي هاد المرة ....

"بغات تجاوبها وهي توقفها بيديها بمعنى تسناي مزال عندي منقوول ليك ".......فاش تزوجت بيه ماشي حيت بغيتو ، لا زكارة فيك خديتو، كان زايد ناقص في حيااتي وجودو كعدمو.....ولكن دابا " تنهدات وبدات كتدوي عليه بطريقة ستفزااتها بيها وعصباتها وخلات برودية دمهاا ترجع سخونية "......دابا هو راجلي ، وحبيبي وبات ولدي ومنقدرش نتفرق عليه ولا ننعس بعيد عليه ... "حطات ايدها على بلاصة الضربة ".....واش مكفاكش طعنتيني في ظهري ، جايا دابا بوجهك حمر تطلبي حيااااتي

سعاد.......هيييييه ، باراااكا " وقفات مشربنة حتى عروق جبهتها باانووو "......عرفتي هادا لي كتقوولي عليه حيااتي وحبيبي الق** بغيتو قبل متباني ، جيتي وحذرتك متقربيش منو ، واش درتي نتي مكفاكش قلبتيه عليا تزوجتي بيه ودابا بوجهك حمر كتعودي ليا شنو هو بنسبة ليك وكتفقصي فييااا.... ايوا سمعيني مزيان ، نتي رااك غير غصن من هاد الشجرة ، الا غيااابي حَّلى ليك الجوو وخلاك ديري مبغيتي....." أشارت لنفسها "....هانا رجعت خلفي ومن دابا ودعي دوك الليالي "قربات قداام وجهاا وقالت كارزة على سنانها ".....حيت يا يكون ليا ، يا لا انا لا نتيا

دليلة......" بصووت عالي "....مكنخافش اسعاد ومكنتهددش والمخير في خيلك سرجييه ،

سعاد....."حطات ايدها على حنكها وطبطبات عليه لكن سرعان مبعدات ليها ايدها "......كيخصك تخافي حيت عارفاني قد فمي قد ذرااعي ، عمري قلت لحاجة ورجعت عليها 

دليلة......"ربعات ايديها وسولاتها ترضي فضوولها "....اش فجهدك مديري

سعاد........قادرة نخليه يدخل منين خرجت انااا...وعرفتي ملي يخرج غتكوني نتي ديك ساع شختي تعقلي عليه ولا لا ..اما هو غيكوون لي مضسرو ومزيغوو حفى ودَّلى 

دليلة....."تسلل لخوف لقلبهااا ومبيناتش ، بقات لابسة قناع القوة قدامها وجوبات بجبرووت "....سوقك خاوي اسعدية وكون كان فيديك كورااه شحاال هادي درتيها ، ساعتك سالات طريق لي جابتك ترجعك...

سعاد....." باستهزاء "....منديش عليك حيت كون كنتي تعرفيني غتخافي ، قبل منمشي غنفكرك في واحد النقطة يمكن ناسياها ، " قربات لوذنها ودوات بصوت منخفض ".....كنا كنخدمو بزوج ، كليان انا لي كنجيبهم ليه يعني سواارت حبسو في يدي ....

" بعدات عليها وقوسات عينيها".....شفتك لونك تخطف ، " مسحات على كرشهاا "......تقليقة غتضر ليا بولد حبي تهلاي ليا فيه متشوقة امتى نشدو بين يدي 

دليلة......." تناسات كلشي وشدات غا في كلمة ندخلو لحبس ...."......هانتي كتبغيه هاناي باغا تحبسيه ...

سعاد....."تنهدات "....معنديش الخيار حيت اهون ليا نشووفو مخشي بين ربعة لحيوط محبووس على تكوني نتي مخشية بين يديه بزووج ..." لاحت شعرها في الهوى "...يالله قااودي ، ورجعي دوشيلي بنتي ليا عرقتيي ....

" بعتات ليها بوسة في الهوى خرجات مع الباب مخلية دليلة واقفة فبلاصتها مقاداش تحرك من صدمة ، بلا حشمة جايا باغا راجل بنتها بات حفيدها بالحق اش غتسنى من وحدة بحالها عندها كيف لحلال كيف لحراام مكتفرقش بينهم عايشة حيااة بوحدها وكدير لي قاليه راسها......دخلات لبيتها تركناات تكذب الا قالت متخلعاتش ، تزير عليها راسها وشدها لوجع ، معرفات مدير واش تدخل كلام مها لراسها على محمل الجد، ولا تعتابرو تهديد كتضغط بيه عليهاا ...صونا ليها تليفون كان عصمان على الخط هادا حالو كل مرة وتانية خلصو ضروري يسول عليها وحيت عارفة الا مجوباتوش يحضر عندها كان خاصهاا ترد عليه 

دليلة ....."بصووت خافت "....صباح الخير

عصمان......"كان سايق فرحان ".....شفتك لا برية لا تليفون ،مولفة غا تفيقي سر سر فينك معامن اش تمااا 

دليلة........غير عياانة وصافي وقلت نهنيك شوية من نگيري 

عصمان......"جمع غوباشتو "....حبسي عند عياانة وقوولي ليا مالك اش عندك....

دليلة ......"بصووت طفولي "....وااالو غا ثقلت ومبقيتش قادا نتحرك ولا نهز ولدك....

عصمان......."ضحك برجولية " .....صافي شوية انا جاي نهزك نتي وياه ونهرب بيك ولواحد بلاصة عندي ليك شي حاجة...

دليلة......"وسعات عينيها "....اشناهياااا ؟؟

عصمان......لبسي عليك وملي نمشيو غتعرفي اش عندي ليك ، مهم لي عارف بلي غتفرحي 

ناعسة فووق السداري لابسة تيشورط ديالو قاهرها الصهد و سالة معاها ... كرشها لفمها و الغلض كمل عليها ما بقات تقدر تحرك و لا تململ حررات على ياسر العيشة و ندماتو على النهار لي فكر فيه يتزوج ... أما ياسر بعد ما كمل خدمتو ورجع الدار غير دخل مشى الصالون نيشان ... لقاها حالة الشرجم و طالقة عليها الفرفارة وحاطة حداها طبسيل ديال الحامض واكلاه و مشيطة منو وسارحة عجول لاخرة ... كان هاز في يديه الفريز و الكاكي حطهم فوق الطبلة و بقى كيشوف في هاد الخليقة تقول غا لايحها البحر ... مشا سد عليها الشرجم و طفى الفرفارة و تحنى عليها 

ياسر ..." حاط نيفو على وجها مغمض عينيه و مستمتع بنفسها و بالهدوء لي نازل عليها " ... اخخخ يا ربي كون تبقاي غا هكا مهدنة وناعسة تيجيب الله ناكلك و منشيطك 

رنا ..." بدات تتكسل شوية بوشة تا حلات عينيها فيه غير شافتو وهي تعطيها البكا و بالغوات " 

ياسر ..." تخلع و ما عرف راسو باش تبلى ولا يقلب فيها و يسول " ... ا رسول الله مالك رنا دوي معايا باش تتحسي ..." تحنى عليها هزها" انا غنديك السبيطار متخافيش 

رنا ... ولاااااااا قهرني الصهد و مبقيتش قادة نوووض و الصهد الصهد الصهد 

ياسر..." رجع حطها في بلاصتها وجلس حداها شااد راسو حاس بدمو نشف كل مرة مخرجاها منو خلعة " ... واش ا بنت الناس باغا تصفيها لجد مي وا حوايجي وليت تنخرج الزنقة قالبهم... وليت غادي وراجع في نفس الوقت تبتي يا هاد المرأة 

رنا ..." ناضت شنقت عليه و طلعت فوق منو و مع لابسة غير تيشورت ديال و من التحت يجيب الله جابتها ليه مع وقفت الضهر " ... متهضرش و متكلمش اصلا أنت مول هادشي ديما اجي نعنقك تا كنلقى راسي وااالو حوايجي ناشرهم في الارض ... وحلتيني في راسي تا ما بقيت قادة نتحرك لقيتيني بنت الناس و تفليتي عليا 

ياسر ..." غير سمع كلمت تفليتي عليا وهو يقرصها من اللور تا عضاتو من حنكو و تگعد " ...نوضي نوضي ديري شي حاجة تلهاي بيها قالت ليك تفليتي علياا استغفر الله نووضي طيبي لينا ما نتغداو انا غندوش ونجي ..." تم غادي البيت النعاس و كيشهد " ... يااا ربي تعطيني الصبر حتى يجي الفكاك 

رنا ..." هزت الخناشي وتمت داخلة الكوزينة وتنگر " ... وراه قالوهااا غير تتجيبونا من دار وليدينا و تبقاو تنفخو علينا ..." بدات توجد و تهضر وتغوت غا بوحدها ردات طاجينها يطيب و حطت يديها على البوطاجي حتى تمت جايا عندها الكلبة ديال ياسر تتغوت .. تحنات عليها غا بزز عنقتها وعطاتها البكا تا دخل عليها ياسر لقى داك المنظر قدامو "

ياسر ..." طرطق عينيه فيهااا و تحنى هزها و حك الكلبة راسها و ضار عند رنا شادها من خصرها و كيهضر " ... مال السالبة ليا العقل ما بقى عندها لا خاطر لا والو غير تتبكي 

رنا ..." مسحت دموعها " ... ما عرفتش مالي كنحس بقلبي غيطرطق و باغا غير نبكي 

ياسر ..." تحنى باسها من فمها " ... هاد الشنايف عندك تنفخو .."كحزها عليه وهبط عينيه لرجليها لقاهم منفوخين " ... حتى رجليك تنفخو هادشي خلعني ومغنتسناش حتى الأسبوع الجاي باش دوزي غذا في الصباح نمشيو عند الطبيبة ..."داها البيت الجلاس وجلسها " ... رتاحي احبيبتي هناا 

رنا .." مدت رجليها على طبلة وكل رجل لاحتها لقنت " ... الطاجين ا ياسر غيتحرق 

ياسر ... بفففف انا غنشوفو غير خليك اودي جالسة و متحركيش 

رنا ..." لقاتها من جنايتها " ... ومد مد معاك ديك تليكوموند وقاد ليا طبسيل مشكل من ديسير جيبو ليا ندوز ليه الوقت راه الملل ..." وهزات خنافرها السما لاقية علامن تفشش وتا هو مخسرش ليها و لي في خاطرها دارو ليها وهو كيشطح 

على غير عادتها رااكبة حدااه حاطة يديها على خدهاا مكتكلمش ، عينيها كانو تايهين فلي وقع ليها فكل مكتبغي تحرك فمها وتعاود ليه كتفكر كلامو نهار عرفها غتناازل .... 

" تحملي مسؤووليتك فلي غيوقع من بعد حيت مغنعقلش عليك " ......

ياريت يرجع الوقت اللور وتشهد ضدها ، ياريت كون حطات جمرة على قلبها ومتنازلاتش ليها......لي حن تمحن ودليلة هي سباب راسها في عذابو لدرجة حفرات قبر حياتها بيديهاا

نعلات الشيطان وحاولات تكذب راسها وتقنعو بزز بلي مهاا غير بووق وداوي وبلي معندها مدير ليهم.....حسات بايدو تحطات على كتافهااا ،دارت لعندو لقاتو كيشووف فيها بتمعن ...

عصمان....." مرة يشوف فيها مرة في طريق "...فيك شي حاجة مبدلة ...؟؟

دليلة......" كتبغي تغمق عليه بالهضرة ".....بياضيت ، غلاضيت ، زيانيت ...

عصمان.........." رفع حاجبو متبتها ".....مخك خاطرك مغير،دليلة مخبية عليا شي حاجةة ...اش واقع معاك 

دليلة......"هربات وجهها لزاج كتشووف وراه ".....راك عارف مع هرمونات كل نهار وخاطرو صافي شوية نولي لاباس 

عصمان.........حتى منكونش عارفك مزيااان ، تي مال هاد الهرمونات حاطين عليك غااانتي قوولي اش كاين 

دليلة.......واش نْكَوَّن شي حاجة بزز 

"خلاها على خاطرها مبغاش يحكر....سكتات شوية ورجعات تلفاتو بهضرتها ".....مقلتيش ليا فين غادي بيا اخويا ....."قالتها وهي حاطه ايدها على يدو 

عصمان....."خدا يدها لعندو باسها وبقى حاطها على فمو وكيدوي ".....من دابا نعلمك بغيتي تعنقيني ولا تبوسيني ولا شي حاجة اخرا ، نوقف هنا وخودي راحتك سبقي گاع داكشي قبل متفضحينا قدام ناس ....

دليلة ....."دليلة هزات حواجبها كتفكر "....نفهم بلي هادشي لي غدير ولا غادي بيا ليه غيعجبني لدرجة غيخليني نسييييح

عصمان......."عض على قنانفو "..........هاد الكلمة بالضبط لي كنت كنقلب عليها وفلتات ليا ،غتسيحي امرتي 

ركن سيارتو بعد موصل لوجهتو ، نزل هو اللول كيقاد في حوايجو سد الباب ودار لعندها كانت مزال مقاتلة مع سمطة تحيد فيها وتقاد في عبايتهاا لي رَّغَّم عليها تلبسهاا نزلات لعندو شدها من خصرها وغادي كيشرح ليهاا 

عصمان........الالة حنا هناا جايين عند وااحد تريتوور ، مبدئيا هادشي لي غنقوول ليك ملي ندخلو تفهمي كلشي ....

مجوباتوش حيت كانت ملهية كدور عينيها في البلاصة لي مغريباش عليها فايتة جايا ليها وخارجة منها مكبلة ومحگورة وبلا خاطر 

السمطة كدور والبزيم كيفلق ...الحقيقة صعيبة والواقع كيقلق ، يقدر اليوم يكون ليك ولكن لا بد غيجي شي نهار ويكون عليك, الظالم عمرو كيطفرو والمظلوم غيجي نهار لي يتخاد ليه بحقو.....شكون يقوول ليام دوز وترجعها لبلاصة لي خرجات منها مظلومة ومحگورة ومكبلين ليها يديها....تاهموها ورجعو اللور مخلين الناس ينعتوها بشفارة وهي غير بنت باب الله زهرهاا ضورها بالغدارة ....لكن ربي كبير كيخلص واحد على قد نيتو ، وسعدااتك افاعل الخير .......

شادها من خصرها ومقربها ليه ، كيشير بيديه في الهوا وهو كيوريها في المكام ، عند بالو اول مرة تحط رجليها فيه ، فضلات متقوول ليه والو حيت عارفاه متسرع ومكيتفاهكش بالسياسة 

دليلة......."قوسات عينيها "....نفهم بلي باغي يبيع حيت دخل فأزمة مالية وواقف على لفلوس

عصمان ......"مرر ايديه على جنابها "....تماما ، عيط ليا عشيري كنت موصيك على شي هوتات بحال هادو وملي جيت وشفت بلاصة عجباتني نقية وباغي يبيعها عامرة وتا ثمن مزياان قلت نتوكل على الله ومنها نيت نديرو شي حاجة كتفهمي فيها 

دليلة......." وقفات مقابلة معاه وجراتو من لحيتو " ......كتفكر وتخطط ورا ظهري ...."ضرباتو لصدرو ".....

عصمان......"حط يديه متبتها فين حطات ايدها ".....بغيت زعمة حتى انا نكون رومانسي ونفااجئك 

دليلة....."عضات على شفايفها "......رومانسيتك راني ذايقاها كل ليلةة 

عصمان....."حنحن وقاد حوايجو "......صافي سكتينا حيت غنسرح ونشعل وتوحلي فيا راني وصييتك زعمة....."جرها من يديها ".....زيدي الموصيبة قدامي سيد كيستنى 

دخلو لمكتب جلسات بأريحية فوق الكرسي وقداامها عصمان ، الكل كان كيتسابق لخدمتهم ، على وجهها مرسومة ابتسامة رضى هزت راسها كعربون شكر للبنت لي قدمات ليها العصير شافت الاجواء وتفكرات راسهاا واياماتهاا ، أما الشخص لي كان جالس قدامها فكرها في الظلم لي تعرضات ليه ...

- مرحباا بيكم ولا منحتاجش نرحب حيت البلاصة غتولي ليكم 

عصمان......"جغم من قهوتو وحط الكاس فوق البيرو متكلم بحماس".....بقية فلووسي واجدين ومعايا ، جا لوقت لي نسينيوْ

- ميكون غاا خاطرك اسي عصمان هاهماا !!

غير ساكتة وكتشووف فيه بتعجب ، اول مرة قصداتو تخدم كانت لعين عندو زايغة وصدرو منفوخ .....لساانو لي تاهمها بيه بلا حشمة بلا حية هاهو دابا مصوب وعارف كيف يخليه يتكلم....راسو لي كان هازو بتعالي وبتباهي نزلو حشمان من نفسو ، تصدم ملي شافهاا وعرفهاا بلي هي غتولي من اصحاب المكان..... حط قدامهم لوراق عصمان جلس نص جلسة على الكرسي قراهم بتمعن ومدهم ليها.....تنهدات وهي كتشووف سميتها جنب اسموو دخلها معاه شريكة فرح قلبها وحمدات الله حيت لي سعات ليه كيتحقق بتوالي قدام عينيها 

لكلام وقف فحلقهاا ملقات متقوول ، رجعات ليه لوراق تحنى يوقع تحت نظرااتهاا لكانو جامعين ليه بزاف ديال الحب ....مد ليها ستيلو ستغلات الفرصة وشكراتو بعينيهاا.....طبطب على يديها وهز ليها راسو باش توقع ، وفدقيقة صك الملكية ولا باسمائهم بزوج .....

عصمان....." مد ليه فلوسو "....ها لكمالة حسبهاا بنفسك وشووف واش هي هاديك ؟؟

- مضاهراش على وجهك الشفرة اسي عصمان....

دليلة......" تكلمات باستهزاء ".....عندك زوج متيقش فيهم في هاد الحياة ، المظااهر والزمان حيت كيتگلبو 

كلامها كان كلو معاني وفهمو مزياان....وقف كيبلع في ريقو سلم على عصماان ورجع بارك ليه....توجه لعند دليلة يسلم عليه لاكن جمعات ايدها عندها 

دليلة......"بصرامة "...سمحليا مكنسلمش على الذكورة 

تخطف منو اللور بغى ينساحب من حداها بهدوء لاكن قبل ميكمل خطوتو وقفاتو بكلامها لي كان بينو وبينهاا 

دليلة....." تكلمات مربعة يديها ".....شفتي الدنيا شحال غدارة ، شكون يقوول سي التريتور لي كان كيقوول يا أرض انهدي معليكي قدي يجيه سيزي ،

- "قاطعها بتاسف ".....واخا لي عطى الله عطاه ولكن خاصني نعتاذر منك ،ظلمتك !!

دليلة......." وقفات كلامو في النص "....ظلمتيني وها ربي خدا ليا حقي منك ، لبنت لي تاهمتيها بشفرة بسبابها غتخرج من ازمتك

اعتذاارك دابا معندو باش يفيدني صحيح كنت بسبابك غنتحبس ظلم ولكن الحمد لله ربي مكينسى حد ...خليت ليك الراحة ومدييرش فبالك 

"هزات ايدها الفووق "....

هادا حال الدنياااا 

ملي ركبو في سيارة وهي كتعبر على فرح ديالها وكتشكرو بطريقتها ....مرة ببوسة مرة بتعنيقة ...مرة تجر ايدو لعندها تضمها ليها مرة تحطها على كرشها 

دليلة ......" نطقات سميتو ملح نة "....عصمااااااااان 

عصمان ...."عنكش شعرها "......الرووح ديال عصماان مالك اش كااين ياكما فيا جوع ولا دختي نوقفو نرتاحو 

دليلة....."حركات راسها بنفي "....لا هادي ولا ديك...."تكات على جنبها وحطات ايدها على خدها مقابلة معاه ".....علاش دخلتيني معاك في الوراق شريكة ، ماشي لهاد درجةة 

عصمان......"باش يسكتها كان خاصو يوقف طوموبيل جنب طريق ويتقابل معاها ويتكلم بجدية "....لسببين ،الاول انو مكاينش الفرق بيناتنا ، وقبل منديرك شريكتي في الخدمة راكي شريكة حياتي وكون مبنتي في طريقي مكنتش غندير هادشي ولا نفكر في ملتو وسبب تاني " حط يدها على خدوو بعد مقبلها في كفها "....ماشي وقتو داابا 

دليلة..........اااااه " خرجاتها من اعمااقها "...عصمااان عتق عتق عتق "خرج عينيه فيها كيتفحصها وهي تكمل ليه بعد ما باستو بقوة ".....شفييق فحبك كيغرق

ديمارا سيارتو مشابكين الايدين ،وكيتغزلو في بعض بطريقتهم مدات يدييها لراديو تشعلو وفجأة تغير مودها وختفات الابتسامة لي كانت كتشع من وجهاا

{ شرعت السلطات بعمالة الدار البيضاء الكبرى تحت إشراف السيد عامل و قائد الملحقة الإدارية بمنطقة *** في تنزيل مخطط الدار البيضاء مدينة بدون صفيح بالبدء في عملية الهدم بمساعدة من سكان الحيز، وذلك بعد إجراء عملية الفرز و القرعة و الانتقاء، لتباشر بعدها، عملية اتخاذ الاجراءات الإدارية، التي خصص لها شباك وحيد و جند لها عدد من الموظفين و أعوان السلطة، تحت إشراف السلطة المحلية و على رأسهم الكاتب العام لعمالة الدار البيضاء..}

عصمان....."مد ايدو طفاه "......نتي مزيان 

دليلة...."بتلعثم "....ها. اه اه مزيان مديرش فبالك ..

عصمان....."مركز مع طريق وكيدوي "......تبغيي نمشييو لتم !!

كتافات بالصمت مقدرات ترفض ولا تقبل ، فهمها وحس بيهاا كتبقى قلبها بيض ومكتعرفش تحقد والمختار باها اكيد غيجي فبالهاا وغتبغي طمن عليه واخا يوقع لي يوقع ، بلاما يزيد يحكر وبلاما يستنى جوابها حيت باين من عينيها قصد طريق الكارياان لي حساتها طوييلة ،طول طريق وهي كتساائل بينها وبين راسها لفين وصلت حاالتو...حست بطوموبيل وقفات وهزها الحنين

حلات الباب ونزلات واقفة كتشووف تقول غا لبارح خرجات ، مازال نسا جالسين وعلى النميمة مجمعين....وولاد الدرب في جناب زناقي مقنتين....حسات بظل عصمان حداها ، تلقائيا دخلات ايدها في ذراعو وتحركو ، ولمرا لي دازت من حداها تبقى حالة فمهاا فيها ، بسيف زيانت والحمالة بدلاتها ، وايام القهرة تمحاو من على جبهتهااا وصلات قدام براكتهم ، بابها كان غا محطوط تاحاجة فيه مبقاات نافعة من غير رقم 18 ، جنبو عصمان للحيط ودق قبل ميدخل ويجر وراه دليلو...الحال مزال على ماهو عليه ومكفس كثر مكان ....ريحة الگارو والحشيش والوسخ عاطية من الدخلة ....دخاان كان حاجب عليهم رؤية بزز باش قدرات تشووفو جالس في القنت.. بقاو فيه غا سنان وتغووفل ...

دليلة....."طلقت من عصمان وتقدمت لعندو ".....المختاار !!

المختار ..." كان نصو فوق نص سداري و النص الثاني فوق الضص كرشو عريانة و شعرو مغوفل ... و شاد الگارو و مغبرها عليه .. كيف سمع سميتو من صوت كيعرفو مزيان تبسم ابتسامة استهزاء و تكلم " ... المخ طار هذا معناه اش جابك عندي 

دليلة....."جلسات قفازي حدااه ".....شفتك بووحدك ، لي عمرتي بيها بلاصتي مكاينااش

المختار ..." كحب على جوج المرات صدرو تقول غير طارو و متقوب حالتو كانت متعحب ، ناض جلس عادي و شافيها " ... دوام الحال من لا موحال و شي كيجي و شي كيمشي و الدنيا غادة

دليلة....."تنهدات مأسفة على حالتو كيبقى اقرب ليها من مها وكيبقى فيهاا واخا گاع لي دار ليها ".....سمعت بلي غيريبوو ؟؟ اش ناوي دير.

المختار ..." نتر نترة طويلة و سرط دخانها عاد تكلم " ... واش عند الميت ميدير قدام غسالو جاو غيريبو راهم غيريبو صوت الضعيف مكيتسمعش ،هي نتي مجاياش تسولي عليا جايا عينيك في النمرة والبقعة لي غتعطى ليا ، غا هني راسك فلوس معنديش و انا ليهم بت هنا نبت مخارجش

دليلة....."جمعات الوقفة معارفة مدييير ولا شنو تقوول ليه "......المخزن هادا المختار ممعاهش اللعب... عند بالك غيحيرو فيك ، يخرجوك صحة 

المختار ... "طول فيها الشوفة و شاف كرشها لي خارجة عرفها حاملة " ......خرجي دخان ميصلاحش ليك !!

مكرهاتش تقووليه اجي معايا ، تجمع ليه حواايجو ومتخليهش وراها ،شافها عصمان غير كدور في الباراكا وكتعض على فمها ،جاا لعندهاا بعد مكان مبعد لتيساع وغا كيشووف بعينيه 

عصمان....."شدها من ذراعها بزوج "....لي كتشووفيه مويان ديريه متفكريش بزاف انا معااك فأي حاجةة

المختار ...." رد البال لعصمان ،جمع الوقفة وجا حداهم بعد مطفى لگارو "....هي باقي معاها معليكش 

عصمان....."على قبلها مصبر رااسو ،كرز على يديه ونطق ".....المختاااااااار ، مزال مبغيتي يعفو عليك الله من لگاروو

المختار.....فات فيا لفووت ،" مشى لفوق البوطة خوا ليه دكة وقال "...بغيت نقوليكم لش تشربو ولكن لعوينة سادة مكاينش لما ،والبوطة مسالية اتاي من ول بارح كنسكح فيه بارد 

دليلة....."دمعو عينيها بلاما تحس ، وشدات ليه فيديه ".....المختار يالله معايا

المختار....." رجع لبلاصتو تكمش "..... ملي تخرجو رجعو الباب كيف لقيتووه 

كانت شاكة فيه غيرفض هي لي كتحس بيه من جهتو هو مكيحسش بيه ، "

عصمان....."شتف تقليقة بانت في عينيها ".....صحة نديه ،نجمعو مرابع غاا نطقي 

دليلة....." وقفاتو "......لا لا خليه مغاديش يبغي انا عارفاه مكيفرقش براكتوو ، واخا تعطيني شي حاجة تاع الفلوس 

" ديك ساع هشى يدو في جيبو وجبد بلاما يحسب ،مدهم ليها وداتهم ليه حطاتهم في يدوو "....

دليلة......بغيتك معايا المختار فكر وغنرجع ليك ، وغتبقى بااا واخا متبغينيش يكفي انك ماذيتينيش بزااف ..." شاف فبيت لي كان ليها وقالت ".....واخا خرجتيني من هاد البيت وعزيتيه فيا ولكن انا مساامحاك حيت لي درتيه فيا نتا اهون ملي دارتو فيا هي ...تهلى فراسك !!

خرجات مدمرة من عندو بقى فيها وغاضتها حالتو ، لامت راسهاا حيت لوقت لي هي عايشة بخير وشايطة عليها النعمة هو كان مشداگها ...دليلة معرفاتش تكره المختار عياات تخرجو من قلبهاا وفتالي خسرات ،فكل مرة بالها كان كيصد عندو كانت كتفكر قصدا نهار خرجها لزنقة وفضل مرا عليها..حاولات تناساه ولو شوية لكن مقدراتش .....تفكرات حلفتها نهار توعدات ليه بلي واخا تشووفو كيموت قدامها متعقلش عليه بالحق لكلامها مطبقاتش ، دم لي جامعها بيه وشنو كتكن ليه كان قوى منهاا......كيبقى شدها بين يديه لحمة ومنكرهااش ، معاملتو القاسية كانت نعمة كثر ماهي نقمة بنسبة ليها،حيت بفضل تعاملو معاها طلعاتو بنفسها ومراا تضااهي بزاف الرجاال،مشهد لي داز قدامها قدر يغير خاطرهااا ويكتم على قلبهااا ، وخلاها طريق كلها مقاداش تجاوب في الكلام مع عصمان ،مبغاش يضغط عليها وخلاها على خاطرهاا ، غير دخلو مع لباب سلمات وتسلتات لبيتها تحججات بالعيا ونعاس وتخبات تحت لحاف كتصنط لدماغها وبقات هاكداك حتى غفاات.....مرت ساعات عاد دخل عندها قرب منها لقاها نااعسة على ظهرها كرشها سابقاها وفمها محلول.....تلاح حداها وشرع في 

نثر قبلات متفرقة على وجهها لي كان بارد ، مد يديه وخشى صبعانو وسط شعرها كيلعب بيه ، نعاسها خفيف بدات تحرك بعدما حسات بيه حلات عينيهاا صحةة مقااداش تحرك ....

عصماان......"جرها من نيفها "...تي اش قضيتك شفتك وليت تبغي نعاس كثر مني

دليلة......."كتسل وتاوب".....اش بغيتي عندي لاش مفيقني 

عصمان ......" وقف حيد عليها الغطى ولاحو في الارض "....تگعدي تاكلي ، يمكن راك نعستي بلا مدوقي النعمة 

دليلة....."ناضت من بلاصتهاا كتجمع في شعرها "....شحال ساعة دابا ؟؟

عصمان ......"هز تليفونو من فوق الرف ".....لعصر هادا يالله نوضي حنا في البيت ....

~~~~~

في مكان اخر كان سعاد جالسة و ناشرة رجليها فدار ماشي ليها ،وقفات قدامو عريانة قصدات الماريو تتقلب على ما تلبس 

سعاد ... " مخيبة سيفتها و تهضر وتميق " مرتك ذوقها شحال عروبي 

-" ناض عندها لسق عليها كيبوس في عنقها " ... نتي هي الحلاوة ديالي 

سعاد..." دفعاتو عليها و جلسات قدام المراية كتهز المكياج تقاد و تصايب وتهز الروايح ترش وتريح راسها "

-سعاد أي حاجة هزيتيها رجعيها لبلاصتها عندي المدام مجهدة ..وعايقة وفايقة راه متعقلش عليا 

سعاد ..." رجعات داكشي لبلاصتو وناضت عندو في كان جالس وريحات ليه فوق رجليه " ... و صافي متصدعش ليا راسي بهاد التخربيق ..." شدات ليه على حنكو و تحنات تبوس ليه فمو " ... بغيتك تجي معايا 

-" كان ساهي معاها في داكشي لي كدير " ... فين اعمري نتي غا نعتي وانا نلوح راسي لعافية فدام

سعاد ..." ناضت كتلبس حوايجها " ... نوض جمع عليا باعرك بعدا ولبس حوايجك وغتعرف..."

حرك ليها راسو بالإيجاب وناض مشا لبس و قاد الفراش خرج هو وياها مسلتين من الدار و بلا ميشوفهم شي حد من جيران ... غير طلعو في الطموبيل وهو يدور عندها " 

-" ضار عندها وقربها ليه كيبوس فيها " ... اححح مازال ما شبعت منك و دابا قولي ليا البلاصة 

سعاد ..." هبطت صبعها على صدرو بتلحوين " ... زيرو كاط ..

" داكشي لي كان غير سمع منها المكام تحرك ديك الساع شاق طريقو كي الدمدومة معارف لاش غادة بيه... تقول دايرا ليه تنويم مغناطيسي و كتحركو على صباعها كيف بغات ... غير وصلو الدرب وقفاتو في البلاصة فين هي باغا ... ضار عندها وشافيها بمعنى اشنو بغيتي هناا ... وحيت هي من النوع لي مكيعطلش الواحد و لا يخليه يفكر بزاف جبدات ورقة من صاكها مداتها ليه 

سعاد ..." رجعات شعرها اللور و عينيها تحولو لقوة وتحدي وطغيان " ... هاد الورقة غتعطيها لشي دري صغير يوصلها لدار زريقة و بالأخص في يد مرتو ...ومتنساش مع تدويره لدري لي غتسيفطو 

دار لي قالت ليه و بالحرف ما زاد ما نقص من عندو و كيف وصا الدري الورقة وصلات فيد دليلة لي شداتها بين يديها و كتسفسر ديالمن و غير حلاتها قرات العبارات لي خلاوها تهز بالخوف ... محساتش تا كان عصمان وراها خاطف الورقة من يديها 

عصمان ..." حلها و قراها بصوت مرتفع" ... يا غتخليه ليا ، يا مغتكون لا انا لا نتيا..

" ضار شافيها مقندش " ... شنو هادشي ؟؟

تمنات ملي تجبد سيرة مها تهز راسها بافتخاار وتقوول دارت المستحيل على قبلي ، كتگْلَع الحاجة لراسها وتعطيني ، دايراني بنتها وصحبتها وختها وحبيبتها ، كتبكي وتضحك معايا ،في الحلوة والمرة ديما تلقاها حدايا ....ولكن للاسف سميتها مكتذكر الا فشي موصيبة بتوقيعهاا ...مكفاهاش هدداتها برجليها صيفطات ليها مرسوول تفكرهااا 

شد لورقة بين يديه قراها بالجهر ، وكمشها مقندش "

عصمااان....شنو هادشي ؟! اش كيعني فهميني

دليلة......" حسات بحلقها نشف ، حركات ليه راسها بنفي وقالت "....ورقة ومخطين فيها شنو غتكون كتعني ، والو يمكن غالطة ولا شي حاجة ولا دراري كيلعبو .

عصمان......." مزاحها لخاوي معندوش ليه لگانة ، رفع من حدة صوتو ورجع قال من جدييد "......مدوووخييش عليا راك قلت ليك شنو هادشي , دراري الا بغاو يلعبو ماشي علياا وبهاد الزبل ... " وقف قدامها شدها من ذقنها هازه ليها عينيها لي كتهربهم منو "....اصلا من صباح الله ونتي ماهياش وفينما نسولك تلواي عليا بالهضرة وكندوزها بجغمة لما وكنقوول هانية مباغيش نحكر ولكن دابا لااا " طلق منها ورفع الورقة قدام وجهها وغوت "....واااش عارفة الالة شنو كيعني هادشي رااه تهديد

" مقداات تقول ليه والو ، بقات تعض في شفايفهاا بألم وتدور في عينيها تم حتى جنناتو ، شدها من كتفها مزير عليها حتى تأوهات " .....رااااه دااوي معااك ماشي مع الحيط 

دليلة........."سلماتها في يد الله "...مولاتها هي سعااد صافي تهنيتي .... " بعدات ايديه من ذراعها وعطاتو بظهرها غادا لبيت بزز مقاداش تمشى " ....

الحسنية....... " خارجة من لبيت تجري ملي سمعت لغوات كثر ".....مالكم اش كاين ؟؟ قلت نخليكم ساعة زدتو فيه 

عصماان ......."جرها لعندو حابسها ممنتاابهش لحالتها ، كانو معمين ليه لعينين "....كيفاش سعاد فين شفتيهاا وامتى ..." سكت شوية وضيق عيننيه كانو تفكر شي حاجة،رجع شافيها وخنزر "......بلاتي بلاتي ، صافي باينة خرجات من الحبس ، "باستفهام "....واش جات لعندك هنااا ؟

دليلة......"معندو باش يفيدها الهروب اللهم ديرها فيد الله و تقول ليه اش كاين "....وجلسات في صالون ، وهدداتني بلي غتصيفطك لحبس الا متفرقتش منك ، حيت عندها عليك دليل لي يغرقك 

عصمان....."ضرب يد بختها وضرب الورقة مع الحيط "....بنت الخانزة ، الله يلعن**** جا لقلب داااري وكتهدد في مرتي "دار لعندها وغوت في وجهاا ".....علااااااش مقلتيهاش ليا ديك ساع هاا ؟ 

الحسنية...."بدات تخبط في فخاضها "....گلتهاليك قبل اوليدي قلت ليك راها لفعها تعضك تعضك معندك بخدمة معاها ونتا راسك قاصح 

عصمان......"وقف مو بايدو لي تهزت "...الواليدة الله يهديك اش عند عدو ربها مدير ، الله يلعن لمخير فقبيلة مهاا ,انا غنوريها وهاد الحبس هو لي غنمشي ليه على ودهاا 

"دخل لبيت صاعر قاصد لماريو ياخد ميلبس ، تبعاتو مو تطلب فيه وترغب ، اما هي ربعات ايدها وتكات على الحيط بقلة حيلة كتشووف في حياتها لي غتهدم قدام عينيها من جديد بعدما رمماتها ولتاني مرة على يد مهاا ، رجعات عندها الحسنية وشداتها من دراعها تطلب وتزاوگ فيها تدخل تحبسو ولكن مقدراتش باشمن وجه غتوقف قبالتو وشنو غتقووليه يكفي انها هي سباب هي لي تنازلات ليها باش تخرج من الحبس ودخلو بلاصتها ،مسمعتش ليه ووقفات ضدو وتحداتو بقات واقفة فبلاصتها بملامح جامدة عكس ذاتها لي كانت كتصبب بالعرق ، حطات ايدها على جناابها وعضاات على فمهاا بألم 

دليلة......"بصووت خافت ".....بغات تخرج ليا على حيااتي

الحسنية....."كتحرك فيها ".....انا مزاوگة ابنتي لما دوي معاه 

دليلة......"بدات تنفس بصعووبة ، غمضات عينيها كتصنط لوجع لي كيقطع فيها ، هزات راسها لفوق كتناجي مولاها ، مبقاش عندها الجهد لي تدوي ولا توقفو بيه ، خرج من حداها طاير مخلي غاا صهدو ....عيات تصبر وصبر تقا نزلات الارض وغوتاات باعلى صووت ".......

دليلة........."مغمضة عينيها وكارزة على حوايجهااا ".....اااااااااااااه

غواتها خلاه يوقف ويرجع كيجري ، لقاها طايحةة وحسنية طايحة حداها تقلب فيها ، تحنى لعندها بخوف خدا وجها بين يديه ، كيسول فيهاا "

عصماان......"كيرجع ليها شعرها اللول ويمسح في جبينها ".....دلييلة ماااااالك دويي !!

دليلة....."حاطة ايدها على كرشها وكتبكي "....عصمان عتقني كنتقطع ، ولدي اعصماان ولدي ....

وقف كيمسح على راسو ويخبط رجليه مع الخيط ويتحلف على لي كان سباب 

الحسنية.....تا هز معايا الدرية نديوها لطبيب

حاول يتهدن بزز منو ، هزها بين ذراعو ونقلها على وجه السرعة لعيادة فين متبعة ، في طريق الوجع خف وقلال ولكن هادشي ممنعوش انو يطمئن عليها كثر ، دخلو على وجه السرعة ، كلشي مركز مع الشاشة ومع الطبيبة شنوو غتقوول

- مداام معاطياش لراسك الراحة ، الوالدة عند بدات كتحل وهادشي صعيب عليك ونتي فأزاخر شهرك السادس

دليلة ....."شدات ليها فيدها بخوف ".....شنو معنى ديال هادشي 

- معناه تقدري تولدي على سبع الشهوور الا معطيتيش لراسك الراحة ، من ديما كنحدرك قوة الحركة وزربة مكاين لاش

عصمان....."بتعصب "....الا كاان الحيط كيسمع تاهيا غتسمع 

الحسنية.....ودابا ابنيتي مكاينش شي حل ؟؟

- صعيب الحاجة ولكن نتمناو خيير مهم معليها غير بالراحة ثم الراحة ثم الراحة

خوفو على صحتها وصحة ولدو خلاه ينفذ أوامر طبيبة ويوفر ليها الراحة لي مكتسعاش ليهاا....حاول فلياام لي توالات داك اليوم انو يخصص ليها وقت كثر ويقابل شغلو بتليفوون ، سيغتو انه كان كيوجد لافتتاح المشرووع ولي كيتزامن مع عيد ميلاد دليلة حجة وزيارة يحتفل بيهم بزوج....كانت هادي التفاتة منو باش يخليها فمود زوين ومنها نيت ينسيها ويتلفها على موضووع مها لي شاغل بالها واخا طمنها وشرح ليها بلي تهديد سعاد خاوي ومعندو ساس غير لجئات ليه باش ترعبهاا الا انهاا مكانتش مرتاحة خاطرها كان مضيق وقلبها مزير......

لكلام لي كان كيبرد بيه عصمان دليلة مبردوش حيت الحاجة الوحيدة لي غتشفي غليلو هي يلقاها ويتحاسب معاها بنفسو ، قلب عليها المدينة سفاها على علاها...جميع البلايص المشبووهة لي ممكن تكون فيهم قصدهم ومكانش ليها الاثر ورغم ذلك مملش كان واجد وداير بحسابو وواخد احتياطاتو الكافية باش يحمي عائلتوو حيت عارفها ممكن تضرب ضربتها فأي وقت ...

وصل يوم الافتتاح لي وجداات ليه على اصولو ، كانت تمنية دالعشية ، واقفة دليلة قدام لمراية كتضيف لعكر القريب لقلبهاا....متألقة بقفطان بلون سماوي مطروز بصم ...طالقة شعرها الاسود لي زاد طوولو وزاد جماليتها كثر ....لكحل عطى نظرة حادة لعينيها وخلاها تبان في حلى بهية اكثر واكثر....جا من وراها عصمان وطبع قبلة اسفل عنقها كان بدورو متألق على غير العادة باوسكار في الاسود ...مرجع شعرو اللور ومرتب لحيتو ..مزين ايدو بساعة فخمة من. واصبعو بخاتم منقووش باسمها

...مد ايدو لجيبو وجبد منها بوااطة حمرة كبيرة تحت نظرات دليلة الفضوولية ، قوسات عينيها وخطفاتها من عندو معندها صبر تسناه يكمل على خاطرو 

دليلة......."معاقرة معاها باش تحلها "....اش هادشي ؟؟

عصمان......"خاشي يديه في جيبو "......كملي على خدمة يديك الالة وشووفي بعينيك 

مع حلاتو مع شهقاات ...لقات اونسووبل كيضم سنسلة وحلقات ديالها بالاضافة لگورميط والخاتم ....علات حواجبهاا بإعجااب وزربانة بدات تلبس ...وصلات لسنسلة وهي تمدها ليه مع طبع قبلها جنب فمو كعربون شكر "

دليلة.......الله يخليك ليا ابات ولادي "مدتها ليه ".....هاك كمل حسنتك وسدها ليا ....

"حرك ليها راسو وخداها من عندها ركبها ليها "

عصماان.....عجبااتك ؟؟

دليلة........"عندها شن طن "...واخا معنديش مع هادشي بزااف ولكن زوينة ، ايوا باشمن مناسبة ...

عصماان......"قاد ليها شعرهاا بيديه بزوج ".......صبري على خبزتك تطيب الحاجة 

في حالتها عادي تنسى يوم بحال هادا ، حيت عمرها حتافلت بيه ولا عودو ليها عليه هو فقط رقم مكتووب على عقد ازديااد وبطاقة التعريف ....عكس عصمان لي من نهار عرفو سجلو في دماغو وحفرو ....هديتو لولة ليها كانت هي انو دخلها شريكة معاه في المشروع اما الاحتفال بيه فهادي مفاجئة منو ليها باش تقاد من نفسيتها 

شابك يدو مع ايديها وخرج على برا فين موقف طوموبيل لي كتضم كل من واليديه ووختو وصااحبووو ، عون مرتو حتى تركب وتوجه لمكان سياقة قااصديين حفلتهم

~~~~~

الحال هو الحال ناعسة نعست الحرام وواكلة من ماكلتو... مسرحة رجليها و مرتاحة و لي شافها يقول هادي مولات الدار و السيد مدخلها درة على مرتو الاولى ... كانت عايشة الدور و الاستغلال ديالها لي كانت طاغية بيه عليه أما هو فكان زهواني عيفة رجال مستغل غياب مرتوو ومدخلها كيمارسو الرذيلة فوق فراشها.....كانت عريانة وفوسط علاقتها الحميمة معاه قلباتو على ضهرو و طلعت فووق منوو

سعاد ..."خشات نيفها تحت عنقوو وتكلمات " ... كتبغيني 

..." لي كان طاير في السما و شاداه رعشة الإثارة و لي جا على فمو كيلوحو و كيف خلاوها ولاد الشعب غير تسربيه خلاص "... كنموت انا كنموت .." رجع تبتها مزيان و كملو على لي بقا ليهم حتى حبسو بجوج في دقة وحدة ... هو كينهج في جيه وهي كضحك في جيه .. خلاتو تا خدا نفسوو وجراتو عندها تلعب لعبتها لي في بالها و لي مخططة ليها 

سعاد ... ملي كتبغيني إذا غادي تعاوني وتكون معايا يد وحدة 

...." خشى يدو تحت ضهرها و لسقها معاه " ... نتي تأمري و انا نفد قلتها ليك و نعاود نقولها بروحي نفديك غير ململي هاد شليقمات .." و تحنى باسهم ليها "

سعاد ..." تفكات من يديه و مشات لصاكها جبدات منو كلي يوس بي ورجعات حداه " ... إذا احبييي بغيت هادي توصلو ليا البوليس بطريقتك الخاصة 

..."خداه من عندها و بقى كيشوفيها و مد يدو لسروال لي مليوح في الارض وخشاه فيه " ... كوني هانية وعد رجال ..." عنقاتو ورجعت طلعت فوق منوو ناوية تشلل ليه الركابي وكيف غتبدا معاه في الثاني تسمع الباب تحل على جهدو 

ستة وعشرين سنة مشات من حياتها بلاما تحس بيها ولا تتذوق طعمها ...الا رجعنا اللور ودزنا عليهم عام عام غلقاو بلي عمَّرها طفات شمعة امل ولا تمنات امنية ، ابدا واش حصلت على هدية ميلادها ولا شي حد تفكرها وتمنى ليها السعادة في يوم مولدها ...لدرجة هي بنفسها محاتو مع احلامها ودفناتهم في روضة منسية

وكرسات حياتها لراسها وكان همها الوحيد تخدم وتجيب درهم الحلال حيت فلوس الجفاف حسن من فلوس الرجلين فوق الكتاف...."وصبر جميل "....دليلة صبرات وربي كافاها ليوم هي وشخص لي ختارتو يختم معاها حياتها بمشروع حلمات بيه وتمناتو 

"زريقة تريتوور "..الاسم لي ختارو هو وياها وشافوه مناسب ليهم ، تقاسمو فرحتهم مع حبابهم وجيرانهم لي كانو معمرين القاعة متنغمين مع الموسيقى ومتلذذين بما لذ وطاب ، عصمان مبخلش عليهم بحتى حاجة قوم كلشي من طقطق لسلام وعليكم ونوى انو مشروعو يكون لناس لي عندهم وتا لي معندهم ....

وصلو القاعة عاون عصمان باه وجلسو فلبلاصة المخيرة اما الحسنية لبلاصة لي دوز عليها ترش عليها لملحة وترقيهاا....رنا ودليلة رحيلهم كان ثقيل ونفسهم مقطوعة الا مجريتيهم ميتجرو ....جا ياسر شد في مرتوو وداها حداا اما دليلة ستغلات الفرصة وبدات تكتاشف المكان منين جديد شنو تزاد واشنو خاص....تحطات ايدو على خصرهاا وهبط لوذنها باش تقدر تسمعوو....

عصماان.......كيف جااك هادشيي !!

دليلة........"بغات تشد فيه ".....باينة معاونك شي وحدة ومورياك مافيهااش 

عصمان ......"هز ليها راسو بالايجاب وغادي هو وياها لقدام ومحاول عليها "...ما خاب من استشار ، وكتبقاو نتونا لعيالات ذووقك زايد علينا داكشي علاش تا انا هنيت راسي ودرت ليا مسااعدة باش الا تلفت توجهني 

دليلة....."طلقات منو وحطات يدها على خصرها "......شناااااااهوااااا !! وانا اشنو بنت ليك كنفهم غاا لفراش ولا كيفاش ؟؟

عصمان....."حط ليها يدو على فمها عارف معندهاش لحباسات ولي جات على لسانها تخرجها "....غاةضاحك معاك اشفيق ، نتي هي مساعدتي .. "حط ايدو على كرشهاا "..غا بلزي لينا نتي البعلوك وولي بخير وديك ساع رجلي على رجلك لهنااا...

دليلة....." بشوفات حارين ".....سميتو وسام ماشي بعلووك ...

عصمان ....." قابلها قدامو معيب فيها "...منين جبتي هاد سمية تاني...كل مرة سمية فشكل ؟؟

دليلة ....."جراتو من يديه كتلوي ليه في صباعو وتهز في كتافها "...ياك انا لي هزيت رجلي عليه ...وانا لي مثقلة بيه...وانا لي غندك ليباري على قبلو وغنشرگ كرشي عليه ...نسميه لي بغيت ، تا لولدة تانية وضبر راسك معاها

عصمان....."عنقها وباسها فراسها "....واخا الالة تا دابا دويتي 

ماشي غا هي لي كانت محررة في عصمان الوقفة ، في جهةة لوخرا كانت رناا حاضيااه وناوية ليه على خزيت ...

كان كيشوف فلبلاصة لي عجباتو تمارة لي ضرب عليها وجا عليها ديكوور محس غاا بصووتها المرعد في وذنيه 

رانيا.. "كتعض على فمها وتدوي "....زويينة يااك !!

ياااسر.."بلااما يضور باقي كيشوف في القاعة".. اااااه كتحمق أول مرة نشوف شي وحدة فحالها جا معاها هادشي 

رانيا .... "هدوء ما قبل العاصفة "...بصاااااح و هي نخطبها ليك 

ياسر ..." سمع نخطبها ليك و دار لعندها عاقدهم "...شكون هي ؟؟

رانيا ..."كتهضر تحت سنانها"... هاديك لي لابسة لكروونة و عاااجبها شعرها ملي دخلت وهي تحير بيه ، بحالا غا هي لي عندها هاهو حسن منو " بدات كتلعب فيه في الهوا ياسر كيحاول يحبس ضحكة و لكن مقدرش خرجات ليه و هي غتاكل جنابها بلفقصة قرب عندها وقال "

ياسر..."كيرد شعرها اللور "... انا هضرت غير على القاعة احبيبتي..."لوا زغبات على صبعو "....متفقصيش ليا تخرج بنتي معصبة 

رانيا..."بقنفاحة دوات "... ممممم القاعة ووالله يجعلني نتييق 

بعد سااعة على وصوولهم تكلم عصمان بعينيه مع واحد من الخدامة لي عندو ولي فهموو شنو قاليه بلاما يتكلم....كثر اللغى والشوشرة بين الحضور من ورا منقصو الاضواء ، شي كيشووف فشي مفاهمنين والو جات الحسنية كتجري لعند عصمان لقات دليلة كتستنطق فيه 

الحسنية......واش اوليدي هاد الخسران كامل وشريتي بولات رخاص دغيا تحرگو ؟؟

ابتسامتو الجانبية لي كان راسم خلات دليلة حاطة يدها على حنكها وكتحاول تفهم سببها للحظة شككات في الامر لكن سرعان متيقنات ملي لمحات حلوة بطقات جايا في اتجاه فين واقفة و تحطات قدامها والاكثر من ذلك كانو صورها عليها ، زيرات على قفطانها بيديها مصدومة تفكرات تاريخ اليوم وتنهدات ، مكانتش متوقعة نهائيا شنو كتشوف قبالتها كسر صمتها عصمان 

عصمان....."قبل جبينها وقال "...كل عام ونتي معايا ...

دليلة......"قوسات عينيها وضرباتو لصدو بقبضة يديها "...ياك الغدار وخبيتي عليا ومعلمتينيش ندير بحساب الحلوة خليتيني كناكل تا مبقى عندي فين نزيد ...

" يالله غيبدا يأفاف وهي تجرو من يديه كتمخشش فيه ".....بلاما تعصب شكرا ديالي نخليها ليك من بعد تنكونو بوحدنا " ختمات كلامها بغمزة "

الحسنية......الله يطول فعمرك ابنيتي ، كيفنا كيفك مسقنا لخبار تال دابا اما نجيبو ليك كادو 

دليلة....." عنقاتها " ...كادوك هاهو حداايا من غيرو منك ميعجبنييش ،

نظمو لوقفتهم ياسر ورنا غناو معاها وطفاو شمعتها وتمناو ليها سنة سعيدة ، 

استمر الحفل لكن بلا عصمان وعائلتو بحكم توصيات طبيبة ، رجعو كاملين لدار حتى من رنا وياسر حيت تاهيا حالتها ماتقلش على دليلة....

دخلات لبيت تحيد شنو لابسة باش ترتاح كثر ، كانت فرحانة بمفاجئة عصمان....اول مرة شي حد يتفكر عيد ميلادها ويحسسها بأهمية هاد النهار....ستغرقات في تبدال وقت طويل تذكرات فيه اعيادها السالفة كتقلب ضمنهم على شي ذكرى باقة مرسخة عندها ولكن مكتلقى والو من غير انو هو نفسو النهار لي ولداتها فيه مها ولاحتها لمختار بلاما تشوف فوجهها ، الحاصوول سعاد مخلية بصمة بالخايب في حياة بنتها من اول مفتحات عينيهاا لحد السااعة لدرجة انها جاامي تنسى تاريخ ولادتهااا واخا دير لدارت 

"صوت الباب كيتضرب بجهد خلا كلشي قاصدو قافز ومن بينهم هي حاطة ايدها على قلبها لي حساتو غيوقف اول مسمعات الرد على سؤاال عصماان 

عصمااااان....."كيغوت معصب من حدة الخبيط باش كيتضرب لباب ".....شكوووووون تمااا ؟؟ قال ملامو وغادي قاصدو يحل 

- البووليس حل الباب !!

داخلة مرفووعة العقل حاضرة الجثة.......معارفة باش كتحس الحاجة الوحيدة لي كانت كتشعر بيها انو شي حاجة كتموت فداخل ديالها ......وذنيها مصمكين كانت كتسمع الاصوات بعاد بزااف حاسة براسها غايبة على الوجود غادا بلا عقل كتقلب بعينيها على مكانها باش تتأكد ....جا حداها عصمان جرها من يدها ضاغط عليها لكن محسااتش .....

دليلة ......" كدور في راسها وتنهج ".....منين قالو لينا نمشيو اعصماان هااا ؟؟

عصمان....."صاط باعلى صوت وجابها قدامو شادها من وجهها "......تهدني ، صافي لي وقع وقع ، فكري فراسك 

دليلة......"خدات ايدها دوزاتها على وجهها بتعب وقالت بصوت كيقطع في القلب "......ممكتوباش عليا الفرحة اعصمان 

" عطاتو بظهرها وكملات على طريقها وهو وراها بانت ليها من بعيد الغرفة لي كتقلب عليها...تقلات خطواتها ، حاولات تجبر راسها وتخفي ملامح الحزن ولكن مقدراتش حيت المشاعر مكتجيش بإرادتنا ، وصلات قدام مستودع الاموات ، زيرات على يديها لي كانو كيترعدو ومثلات القوة ودخلات.....كلام السيد لي مكلف تماا مدخلش لمسامعها فقط حركات ليه راسها ومدات ليه ايديها بمعنى وريني ....

حل ثلاجة حفظ الموتى وخرج ليها جثة تحت ملامحها الباردة كبرودة المكان ، قربات منها وبالضبط لوجهها لقات نصفو مفقوود ، عضات على فمهااا كردة فعل اما دموعها فديك اللحظة كانو ميتين كَمَوْت رووحها

~~~~~فلاش باك ~~~~

ديرها غا زينة توصل توصل ، جييران متخفى عليهم حاجة وهما من نوع لي عزيز عليهم الخير غيىر شافو راجل لمرا قوى دخل خرج عيطو لمرتو لجات وحصلاتو فوق فراشها مع مرا غيرها.....سعااد جلاخا وهادي لي واقفة قدامها دير منها خمسة ومربعة يديها كانت كثر منهااا ومترضهاش على راسها وعندها كيف رباح كيف الخسارة....اما راجل عارف مرتو اش كتسوى طركق عينيه كيزقزق هز حوايجو وخرج يجري متلفتش وخلاهم بزوج ..

سعاد ..." شدت في راسها وطلقاتها بضحكة كتلبس حوايجها" ... اوووه الخيانة الزوجية شفتك گاع ما عيطتي البوليس 

-" مشات تلاحت تا شداتها من راسها مرة قوية بحالها متخلعهاش سعاد ولاو تكون قبح منها لسانا " ... غالطة في روحك برشا حقاش حقي ناخدو بيدي .."تمت مخرجاها جاراها من شعرها تا لاحتها في المرح " 

سعاد ..." بدورها ماشي ساهلة ووخا العيب فيها تخرج عينيهااا....عاد مدوزة الحبس وعارفة حروب الدنيا و المقاتلة معاها ...كلشي عندها قريب داكشي علاش هزات فاز كان في جنبها و سيفطاتو عليها كون مهبطاتش الراس يجيها فيه " ... خانزة بحالك تمد يديها عليا ... الى مكتعرفينيش نعرفك براسي ونقوليك شكون انا ولو كان في يدك راجلك ميخونكش يا عيفت العيالات 

-" رجعت تلاحت عليها ضرب و تعيط على لي يضرب معاها وكل وحدة فيهم تتعطي في جهدها للخرى تا لقاو راسهم خرجو البالكون وحماوها لغوات تجمعو الناس عليهم التحت و شي كيطل من دارو و شي كيصور من الشانطي وشي كيعيط لبوليس..."

سعاد ... كلبة تاعت الخلا سيري حكمي راجلك هو الاول عاد حسي براسك وازنة و عندك قيمة 

-راجلي يبقى راجلي معندناش المراة لي تخرب روحها و بيت هلها على قبيل هاد الحكاية .. انتي شرموطة و الراجل كيف كنقولو عنا وعنكم فاس و محراث 

سعاد ..." طلع ليها الدم دورت راسها لقات الناس تجمعت و الشوهة كبرت سخن فيها الدم و هي تهز يديها حتى ساط فيها البرد و نزلت ليها على الحنك ... أما تانية معرفتش كيفاش و لا حتى اش طرا عينيها معميين و روحها تتحرقها ... دفعت سعاد حتى زلقات ليها رجليها جات طايحة من البالكون لي كان في طبقة الرابعة للتحت قدام الناس غارقة في دماياتها ميتةة

~~~~

بقات واقغة مسمرة قدام جثتها كتعاتبها غير بعينيها...متوقعاتش نهايتها تكون بهاد الشكل مقتوولة على يد زوجة عشيقهاا ....حطات ايدها على حلقهاا حاسة بشي حاجة واحلة فيه وكتذبحهاا ، جا وراها عصماان لي مقدرش يشووفها فداك الشكل ...

عصمان...."بغى يخرجها ولكن مبغاتش ".....يالله نخرجو براكة عليك 

دليلة......"تملصات منو "...لا بلاتي ، عندي ليها شي هضرة خليها تسمعها مني واخا مغاداش تقدر تجاوبني ، هبطات راسها لعندها وقالت .".....سعااد كيف حياتك كيف موتك مصممة تنغصي عليا فرحتي بأي شكل وعازاها فيااا ، وحالفة حتى تخلي هاد اليوم تكون بصمتو عندي خاااااايبة ......"ضحكات بوجع " ......حلفتي حتى تخلي اثر ابدي ليك عندي نبقى نتفكرك بيه طول حياتي وواخا نبغي ننساك مغاديش نقدرش ، مغاديش نقدر برافو عليك ربحتي 

اكيد مغتنساهاش حيت غادرت الحياة في نفس النعار لي ولداتها فيه ....كل مرة غتبغب تحتفل بهاد التاريخ المكتوب على شهادة ميلادها غيجي بين عينيهاا تاريخ المكتوب على شااهد قبر السيدة لي ولداتها وغتنغص عليها فرحتها وغتحس بألم في اعمق نقطة في صدرهاا......وهادي هي لي كتسمى بالهدية الأبدية لي لخصات هداايا گاع السنين