سبحان مبدل الاحوال لي يبيتها فشان ويصبحها فشان ...لي شاف دليلة وهي مصدومة من لي شافت عينيها ميتيقش بلي هي لي جارة عصمان وشاداه بيديهاا ..ومغريبش على الحب حيت كيهبل مولاه وكيتلف ليه العقل ...
دليلة ..." شافت ليه في عينيه و تتحكك تحت منو " ... واش زيانيتي و لا غا جاب ليا الله
عصمان ...." عض على شلقومتو و صغر عينيه فيها " .....عودي اش قلتي باش نتاكد
دليلة.....قلت ليك عجبتيني
عصمان .....تي مال حبك شاربة شي حاجة كيبان ليا نجلس حداك امدام منها نيت بغيتك تأكدي واش زيانيت كلو ولا لا
دليلة......" باستو في حنكو وهي حاطة يدها على صدرو "....سير خرج قالاك من لبساالة وصبر على خبزتك تطيب
باسها بوسة قوى من الاول و خرج خلاها مرتاحة ... لقى ياسر واقف ولابس سبرديلتو و غير كيتسنى فيه هوو ... لبس تا هو في رجليه وخرجو بجوج مع الباب قاصدين واحد صاحب من صحابهم القدام و لي ربي عفا عليه ...
ياسر ..." ركب في الطموبيل و شد مكان القيادة و ضار شاف في عصمان " ... فين التعويجة العشير
عصمان ..." حط يديه و سرح بخيالو شوية " ... عند المش
ياسر ..." تبسم ليه " ... ايييه نهار كبير هذا ..." ديمارا ياسر و شد الطريق ما هي الا دقائق تا كانو واقفين قداموو و دايرين يديهم ورا ضهرهم ... أما هو فغير حس بخيالهم ضحك و ضار عندهم مصغر عينو فيهم و يستفسر اش جابهم عندوو
تقدم عندو عصمان هاز حاجب و منزل خووه و غير من عينيه تعرفو ناوي على خزيت و يا ويل الدرب لنعس ...
عصمان ..." واقف مفرق رجليه و يديه ورا ضهرو طلع فيه و هبط " ... المش درتي فيها نزق و فاهم الدنيا ساعة غاا قودتيها على حبك و جلستي تحسب فيها
المش ..."رجع عطاه الضهر و دخل المحل ديالو و كمل على اش بدا " ... نحمده و نشكره ندعي ليييك برجوع الله .." رجع ضار عندوو وشد ليه في كتفووو " ... توحشت الشوفة في ديلمك
عصمان ..." حل يديه و عنقو " ... العشير القاصح توحشناااك اخويا
دخل المش و دخل معاه صحابو و عشرانو في كانو في الحلوة و المرة مجموعين ... غير هو ربي عفى عليه منهار مرتو وولدو ضربهم رموك عرف بلي ربي سيفط ليه إنذار من طريقهم ... دار محل لتربية الفراخ وكيبيع و يشري في ماكلة الحيوانات ... ريحو و حطو قدامهم اتاي مشحر و معشب ... مد لعصمان كاسو و ضار عند ياسر لي جلس و سرح رجليه
المش ..." شد ليه في فخضو و دوا " ... خباركم كلها تتوصل عندي ومبروك عليكم يا الحلاقم و نتمنى من الله ربي يعفو عليكم العشران ..." ضار لعند عصمان لي جبد گاروه و بدا يطلع النغمة لمخو " ... زريقة ربي كتب ليك الزواج اخويا رجع لطريق و متخافش
المش.." وقف و مشا لبلاصة فين حاط الفراخ و جاب معاه جوج فراخ لونهم فريد من نووعو و من الشوفة اللولة تبغيهم و يدخلو ليك الخاطر " ... ها هوما ليك العشير و كادو مني ..." ضار عند ياسر " .. مناسيكش اعشيري تا انت بكادوك غتلقاه في الطموبيل كلب من داكشي لي كيعجبك تربيه نيت على يدك
عصمان ...وشنو زعما تتسبق لينا ديك كادو و لا شنو
المش ... ونوض اخويا سير عند مدامتك و تهلى و فكر في كلامي ووقتما بغيتيني غتلقاني غير هنااا
اربي اخالتي هادو فين مشاو؟؟......قولو ليا شحال ساعة.؟؟.....واش سخرتيه على شي حاجة؟؟......وهانتي اشمن عشاا باقي وهما مزال مجااو !!
غير خرج بدلات حوايجها وخرجاات لعند هلها وناسه جلسات معاهم وصدعات ليهم راسهم بسؤالاتها عليه والحسنية غا مسايراها وفمها كيف السكر ينطق غير الحلاوة ...
والله اكبيدتي منكذب عليك ونقوليك فين مشاو........ساعاتو لله ابنتي الغايب حجتو معاه دابا يجيو مالو اول مرة يخرج.....مسخرتوشاي يمكن عندو شي شغل خرج ليه.......الا جاك جوع ناكلو حنا ونخليو ليهم
تسمع صوت الباب كيتحل ميلات الحسنية راسها لدليلة بمعنى هاهو جاا ....تم داخل ياسر هو اللول رمى سلام وجلس حدا مرتو اما عصمان....كان جاي وجايب معاه هاز قفز بفراخو ومبسم فمو غا شافتهم دليلة علات حواجبهااا مفاهمة والو
شافت فيه مرتو غا بنص عين و تتشوف في الفراخ لي ملي دخلو واحد يلحن و لاخر يغني ...
دليلة......"دوات ليه فوذنيه مكرهتش تعضو منها ".....جايب عليا ذرة براجلها ومسميها على سميتي
عصمان....."خدا يدها وباسهااا".....بغيتك تشوفيها كيفاش مهلية في راجلها وتعانديهااا
دليلة.....ياك اسيدي واخا
ضارت لعند الحسنية لي كانت غتتشوف فيهم وتضحك
دليلة ... خالتي صافي غير نحطو
الحسنية ...اييه ابنيتي غا نوضو فرقو المرام في ساع ... نوضي ا رنا تبعي ختك عاونيها ...تبعاتها رنا الكوزينة و فرقو عشاهم .. طول الجلسة و هوما قولها و ضحك عليها .. كلاو لي قسم الله و كلا تيسر لخيمتو .. الحسنية سبقتهم هي الأولى النعاس وخلات دليلة لي تكلفت بجميع الطبلة وغسيل الماعن وعصمان حداها داير فيها معونها ...وهو كل مرة مقنتها فجيه بزز باش فرقها دخل لبيتو ملي سالات تبعات لقاتو كيشوف في الفراخ و هوما يتغاوتو
دليلة......"حطات يديها على خصرها وقفات حداه مقابلين معاهم "....وا ضاسر مع راسو هاد عصماان....شفتو كينقز عليها باغي يااكلهاا
عصمان ..." ناض واقف ولايح يديه معنقها من كتفها " ... الراجل هو لي ياكل رزقو وزايدون نتي اش عرفك باغي ياكلها هاداك راه باغي يدفي عظامو بيها... كيفما بغيت ندفيهم انا
دليلة ..." دفعت ليه يديه و مشات قاصدة الماريو " ... تلوى ليك في مانطة و تحس بعضامك شوفاج ...
دليلة......" ضورات ايدها على ظهرو "...عرفتي لكذوب حرام تا انا باغاك وحراام نقوول على النعمة لااا
#صبحنا صباح لله و بدايتنا بداية مكتبها الخالق
جالس في مكان الزيارة داير رجل على ختها و عاض على فمو و من كترت الاعصاب و التوتر لي ركبوه قريب يطير جدهم من الجدر ... جالس وكاره راسو و كيشوف في جنابو و الناس حداه كلا و شكون جاي يشوف ... ما هي الا ثواني تتحد الباب و تمو داخلين المحابسية هز عينو كيقلب عليها وهي تم داخلة لابسة و منگشة تقولها معروضة لحفل خطوبة ... المسكة ديما في فمها و على وجها ابتسامة طنز بهاد المفهوم ... مطلعة حاجب و منزلة خوه و حاطة يد على خصرهاا و اليد الأخرى تتلوي بيها زغبة من شعرها ... تقدمات ليه و جرات الكرسي
سعاد..."جلسات قدامو في الكرسي و حطت تا هي رجل على ختهاا " ... وا فين ا با حسن من نهار ذفنوه ما زاروه ايوا كيف دايرا الدنيا برا عندكم شي شتا و لا صهد و سعداتك اخويا تتنفس الاوكسيجيييين .."ووركت ليه عليها" بمعنى عيييق
حسن ..." ... جيني من اللهر اسعاد وقولي ليا فاش بغيتيني ؟؟
سعاد ... رخف النفس فيك و أنت قريب تخرا باش لا منطولو الهضرة انا ويااك... سمع ا حسن كيف حطيت يدي في يديك في زمان جا وقتك تا أنت ديرهاا
سعاد ..."نزلت رجليها و هبطت راسها لتحت باش كلامها يكون خفيف و يسمعها غير هو " ... بغيتك تكون دراعي و يدي و عيني برا .. بغيتك تكون عقلي لي كيخطط و يفصل و يدبح و يسلخ ... يعني ا با حسن وجد ليا راسك و ضرب شي جوان باش يعقلك يتبت عندي بلان وبغيتك معايا فيه
حسن ..." رجع على كرسيه اللور و حط يديه على فمو متسأل " ... اش كتخربقي لالة ولاش جايباني هنا
سعاد ... باش نجيك من اللخر عصمان بغيتو يدخل الحبس مخمخ ليا في الطريقة .. وغبرو ليا على ديك لي سميتها بنتي
حسن ..." خرج عينيه فيها " ... شتتخوري نتي واس عند بالي غندير بكلامك راه اخر مرة حطيت يدي في يديك غيبت فيها شهر و الصرف في السبيطار و دابا جاية طلبي نفس الطلب ... ا سمحي ليا وكان قلبي على عنوان اخر انا وياك سالاو تخطيطاتنا
سعاد ..." لي كانت عارفاه حسكة و ديلمو من نوع لي واخا تحكيه ميخرج تعبئة هي الاخيرة " ... كلامك كولو خويه في الرملة ا عمي متخلينيش نخدم معاك خدمة القحاب يا بربي لبتي نهار في الهواء الطلق ... هزيتها فوق كري بووحدي إذا فيق معايا و لا ندخل نغرق ليك البابر و نغير اقوالي ... و بلا منقوليك نووعي اش يقدر يدير .." غمزاتو وققفت " ...انا مشيت نستنااك العمرمر
خلاتو و نهات زيارتها معاه أما هو غير خرج على برا كيسب و يلعن في نهار لي شافها فيه
للقدر كلام تاني واخا تعيا تخطط وتفصل وتقول غندير ومغنديرش وهادي بغيتها وهادي لا ... ولكن ربي الا كتب علينا الحاجة هي لي كتكوون ولو تنطابق السما مع الارض....دليلة من قبل متزوج بعصمان كانت معاه صريحة وواضحة ولاد مبغيتش نولدهم يتعذبو ويتظلمو وتا الا كانو كيخصك تبدل حياتك على قبلهم وتخلي المحيط لي داير بينا لايق ليهم .....حتى هي مكارهاتش تجيب ولد ولا بنيتة يكونو منها وفيها تهزهم بين يديها...وتكبرهم قبالة عينيها ...ولكن ملي كتفكر ما داز عليها كتكتمها في قلبهاا وكتصمم على لي فبالهااا وكتطلب الله يدير تاويل ليه وليهااا
حلات عينيها لقات راسها مثقلة بيد عصماان فوق صدرها وراسو تحت المخدة ضورات ليه وجههاا كان ناعس مهدود وظهرو عرياان ..تسللات من حداه وقادات عليه لغطى ...حلات بلاكار خدات شنو غتحتاج عاد مشات لدووش و الحشمة راكباها من ساسها لراسها من جهة حسنية لتكون سمعت تناهيد واهات ليلتهم لي مسالات تا قرب يطلع الضو ....جرات عليها لباب وحلات لمااا تحمحمات وتوضات ...وهي كتلبس في ملابس داخلية ديالها لقاات نقيطاات دم وطلع ليها دم بالمزياان....حيت مسخاتش بحضن راجلهاا ولا من رومانسيتو معاها فليل.... لبسات حوايجها وبدات كتمشط في شعرها وتنشف فيه بانت ليها ريحة عصمان حدا لمرايا هزتها شمشمتها مزيانو و بدات ترش شوية بشوية في الحمام وتشتنشق تا صدقت مخلية فيها قلل من نص رجعتها لبلاصتها وكملت شكانت كدير وخرجات ..سدات لباب ونزلات من العتبة الهزة لي غتهز راسها جا وجها في صدرو شدات على نيفها وكتغمض عينيها وتحلهم كتعگر حسات بدنيا ضارت بيها " ... واش قفص صدري هاداك و لا حجر صدري افين داخل مدرم فياا راه طاي عندي على قد الحاال ...."دوات مغددة عليه "....هرستي ليا نيفي
عصمان ..."كان لابس غاا سروال كيطنا وبيل سماطي في عز البرد ...هز يدو لوجها كيشوف مالها "... اري نشوف نيفك ماالو ...." قوس عينيه "... راه نتي عمية غادا تخرجي في عيباد الله ..."عنكش ليها شعرها "... حيدي عليا ما فيك والو غا التبوحيط
" نقزها و تم داخل لحمام وهي تضربو ريحة لي قالبة دنيا . ضار عندها متعجب " ... واقيلة ريحتي هادي واش تغالطت ليك مع جافيل وكبيتيها فبلاصتو
دليلة ..." دارت يديها على خصرها و علات حواجبها فيه " ... بحال داكشي ....ياكما بقات فيك بغيتيني نخلصها عليك هانية ماشي مشكل غا قوليا سميتها
عصمان ..." علا حاجب و نزل خووه و قرب ليها كيشمشم فيها " ......واش دابا انا غنكبر فيك ريحة غا هوو جاني عجب من امتى ولات عندك مع روايح
دليلة ..." ميقت فيه و تمت غادا لبيتهم " ...راه انا لي خاصني عقل لي واقفة معاك ..
" ما جات فين تدخل تا تبعها وساد عليهم لباب ، خشى وجهو في عنقهاا يبوس ويتنهد على بقايا عطروو لي لصقو فيها اول مرة نشم ريحتي و تعجبني ....."تقابل معاها وباسها في فمها ونطق "...دليلة ديري زوين ما حدي باقي ما دوشت
" ديري زوين ما حدي باقي ما دوشت "
دليلة ..." تاهياا زادت شعلاتو " ... مكرهتش ليك اولد الحاج غا هو شديت كونجي بلا هوايا ...."ضيق عينيه بمعنى اش سايرة تقولي "......واش مقاريش تربية الاسلامية ولا مالك
" تفكت من يديه و خرجت مخلياه كينفخ و يتفش غا بوحدو " ......
عصمان ..." طل عليها من البيت وكيغوت" ...ولاش من اللول كيتلواي عليا .....ربي ليا المساج هاد لياام حيت مباغيش نعصى الله
" بقات غادة و تضحك عليه تا خرجت فيها الحسنية "
الحسنية ... الله يخليك ديما ضاحكة ابنت گلبي غا هو دوزي ستفي الفطور في الطبلة راني موجداه ومتنستيش واحد القرعة الباربا درتها ليك شربي كويس على صباح راني شفتك صفاريتي
كمل لباسو وهو مبتاسم وملي سالا دخل لعند باااه لي لقاه مبدل و جالس طالق ما تيسر من القرأن حداه كيتسمع ليع
عصمان ..." جات عينو في باه...لقاه منزل راسو وكيحرك فيه وبفمو كيرتل مع الايات القرانية ....قرب منو وهو كيتنهد وحاس براسو مربوط من جهتو كون كان قادر يشري بيه صحة كون مبخلش عليه بيها ...ملي كيشوفو ضعيف قدامو ومقادر يدير والو بعد مكان مكيدخلوش الباب كيتعصب وكيبغي يشرك بالله لكن سرعان مكيبردوه كلمات باه " المؤمن مصاب "......
عصمان....." حنحن ختى قاد نبرة صووتو لي كان مقجوج ".... يا صطووف كيف صبحتي ا با الحنين "طبطب ليه على رجلو وجلس عندها "...
مصطفى ..." غمض عينيه برضى و على و جهو ابتسامة " ... الحمد ل لله اولد ي كي كيف بقات مرتككك شوية
عصمان ..." دار حركة بيديه 👌 " ... مخيرة سيفطاتني عندك نيت تونسنى في الطبلة وتفطر معانا
مصطفى ... غير بالص حة اوليدي مك قبل ما تخرج فطرتني عاد م مشات
عصمان ...." باس ليه راسو " ... بصحتك هي قوليا المدام ما كتخرج تتخلكي فوق السلك
مصطفى ...الله يرضي ع ليها مرأة الوقت
عصمان .... "باس على راسو" ... ربي يطول في عمرك وعمرهااا ...انا غنفطر ونمشي للمحل خاصك شي حاجة نجيبها ليك معايا
مصطفى.....جيني غا نتااا
"علا عصمان حواجبو مبتاسم ليه ومشى لبيت لجلوس لقى دليلة موجدة الطبلة و تا من الكيسان مكبوبين "......
دليلة.....فين هو عمي ؟؟
عصمان......"جلس حظاها ناشر ايديه على المخدة وليد اللخرة مدها لتلكموند شعل تلفازة ".....فطر هو والواليدة عاد مشات.....بقيتي غا نتي نستناك تفكريني "غمزها "
دليلة ..." مدت ليه الكاس و شافت فيه بقزيبة عينيها " ... عليك بصيام يا اخ عصمان
عصمان ...." خدا من عندها الكاس بنثرة "...اري اري و سكتينا ... ما جات فين تجاوبو تا صونا ليه تيلي و ووقفها بيديه " ... اجلها ا شفيق تندوي مع السيد .. " جاوب عشيرو و خووه " ... الفردة اش تم
ياسر ... الفردة كاين واحد خونا هناا كيسول عليييك
عصمان ... اييه و ما قالش ليك اش باغي
ياسر ... على نفس البلان بغى يقطع البحور ....
عصمان ..." حط الكاس لي كان هاز في يديه و صغر عينيه " سيفطو شي حد ولا لا ؟؟
ياسر......مبغاش يقول
عصمان ....." تحرك من بلاصتو " جوج دقايق انا عندك ... "قطع معاه الخط وناض قاصد الباب و كيلبس في جاكيط ديالو و سبرديلتو" ... فطري و عتقي راسك ونتي قريبة تودعي حتى نتلقاو
شد الطريق للمحل غادي خاشي يديه فجيابو حتى وصل لقى ياسر جالس مع سيد كان شاب من الشباب المولوعين بالغربة رمى عليهم سلام وجلس في كرسيه وعينو فلي جابس قدامو ...
عصمان.....شكون مصيفطك عندي
صيفطني عندك كليان درتي معاه المزيان قديم وبغى يرد ليك الصرف قاليا سيى عند سي عصمان ومغيكون غااا خاطرك
عصمان....." ضحك على كلامو وهو كيقلبها في دماغو وكيتفحص فيه مزيان.....ربع يديه ونطق ببرود "...جيتي معطل تبت من ديك الطريق شحال هادي ...
- كيفاش ثبتي غا شوف كيف دير ليا العشير
عصمان...."خبط على طبلة ".....وقتك سالا تيسر بالخاطر حسن ليك
..." ناض واقف بلا ميعاودها معاه و لا يقول ليه كلمة ... كيف خرج ضار عصمان عند ياسر لي كيفهمو غير من عينيه " ... هذا تبعو و جيب ليا خبارو الموضووع مهوااش كاينة شي قضية هنااا
"سي عصمان "...هاد الكلمة لي نطقها السخار تاع حسن خلات عصمان يقطع الشك باليقين ويتأكد بلي حفرة وباغينو يطيح فيه
زريقة عندو كود بينو وبين كليان دياولو هاكدا باش دوز الخدمة عندو مسربسة و لا صداع و مولاه عارفو دماغ وآلة حاسبة في المخ يا قاريه في السكويلة و لا قراه ليه الزمان و ليام ... و فاش كيبغي يخدم معارفو على رؤوس الأصابع وكيكون حافظهم وعارفهم... و أي واحد من هاد النوع كيكون عندو لقب و لقب عصمان هوو زريقة في الدرب أما في خدمتو لقبو عبرة و نقرة يتشلل بذهب عاد يتقال ... القنصل آي خدمة شدها عرف بلي تقدات و رجليك قطعو البحور و نشفو ...
ياسر مشا طاير تبع دري يشوف بلانو كيف غيخرج ... واش مصيفطينو صحاب الوقت و لا داير ايدو مع شي حد لناوي يغبر لعصمان شقف.. دري مبعدش بزاااف شاف درب خاوي مكخرجش و جبد تلفون هضر معاه
منيرر.. الو..
حسن... امضرا قضيتي الغراض؟..
منير.. هدااك خونا قااري صواريه مبغاش يصاوب لي قال لك مبقاش خداام و عفا عليه الله..
حسن ....هاد الهضرة معندي ماندير بهااا ليووووم تجيني خبارو قبل ما نقطع خباارك
منير.. و مالي أنا على هادشي كلو لي قلتي لي درتو بلحرف ما زدت ما نقصت
حسن ... سير عاود رجع عندو و تبكاا علييه و خليه يوااافق
منير .... أنا غنرجع و إلا مبغاااش متعرفني منعرفك..
مع قطع لقا قباط روحو واقف عليه يلاه تبت فياسر شوفة لقاه طير تلفون من بين ايديه وخلاه يبرقق و يصرط فيهم عضم ماشي ريق
ياسر.. عشيري ماشي ديالك هاد الفعايل و جيت تابعك نقاد ليك و راقيك ولكن نتا شتك غير مسخر أو لا..
منير ..." كيف سمع كلامو و التليفون لي كان في يدو و لا في يد ياسر و كيقلب فيه وجهو تخطف منو الدم " ... ما بقيت باغي والو بلادي حسن ليااا
ياسر ..." خشا التليفون في جيبو و دور راسو شاف وراه مع غيرجعو جاب ليها نطحة جيهت عينو تا تخبط مع الحيط " ... و يا و لد القحبة حفرتي قبرك بيديك في بلادك اعمي ..." شدو من كاشكول عنقو و غادي جارو تقول غير جدي و غادي ليه عند سلاخو ... كيف وصل قدام المحل كان عصمان جابد البيسي و خدام فيه ما حس غير برجلين واقفين قدامو ... جوج واقفين مقادين و الثانيين ملويين و قريب يفشلو
ياسر ..." شانق على منير وواقف مخنزر عينيه بحال العافية .. كيف هز فيه عصمان راس تكلم معاه بنبرة مغددة " ... شكك هو هداك و خونا طاح في حفرتو
منير ..." حاس بالبولة غتنزل ليه .. قدام زريقة و من لا يعرفه قاطع يدو من الرحمان و خصوصا عارف راسو كيحفر ليه فين يطيح .."... ززز ريي .." يا الله غيكمل الكلمة تا كل بشلقومتو تهزت و تحطت و دم سخون هابط مع فمو
ياسر ..." لي كان هز يديه على حلتها و قلبها على ضهرها و نزل عليه الفم تا قلب ليه العينين " ... اتا سكت و لا نرعف بوووك ..." شاف في صاحبو لي كان حاط يديه على فمو و مصغر عينيه .. غمزو و لاحو ليه ... وحط ليه تيلي فوق الطبلة " ... تكلف بييه و هاك هذا هنا غتعرف البلان منين جاااا هاد ميخي
منير ..." هز التليفون من الأرض و ناوي يسلك وقتو معاه ويبقى حي تگدم فيها و ندم وخايف ليخسر صحتو و لا حياتو ... دار ليه الكود و مدو ليه كيقفقف " ... هاك اخويا انا متايب ليك في الواليدين تگدمت و دوزها ليااا
عصمان ... " من اول ما دوا معاه ياسر في التليفون حس بشي حاجة ما هياش عارف معامن كيخدم و معامن حاط يدو ... و مكاينش شي حد ليقول زريقة ها حرفتو داكشي فور ما شاف منير شم فيه ريحة الدغل و الغدر و كان عارف مغيتعطلش بزاف باش يطيح ليه في يديه ...خدا تليفون اول حاجة دارها مشى لمساجات والمكالمات لقى سمية حسن مكسلة تما...مسح ذقنو وشافيه بتسااؤل
عصمان ....شكون هاد حسن ..."خدا كرسي قلبو وجلس عليه "...باينة فيه خاقد وهاز من جهتي بزاااف حتى جيتي لعندي....."جمع غوبلشتو وغلظ صوتو "...عرفتي اش غدير اولد مووو ...لي عندك فداك الراس حطو ليااا وبلا متبقى دور وتخيط في الهضرة ..."خبط الطبلة تا قفزو ".......شناااهو البلاااان لي كنتو ناوين عليه
منير ... " دار كيشوف في ياسر لي قرب ليه ووقف موراه وعصمان لي وقف على وقفتو قدامو و حط يديه على خصرو كيتسنى الجواب " ... و بربي ما عرفت واش كيتعرفو و لا لا انا غنقوليك كل شي اخويا زريقة الميمة لا رحمني
ياسر ..." خبطو في قرفادتو تا مشا و جا " ... غنباتو لديلمك هنااا شكون حسن
منير ..." حدر راسو الأرض و عطاها النحيط كي الولية " ... ها انت اخويا زريقة هاد خونا انا خدام عندو هو تريتور كيدير داكشي ديال العراسات و الجنازات وانا كنروندي ليه السيرڤيس و جا عندي و قاليا سير عند فلان ووهمو يقاد ليك باسبور ... ناوي يسيفطك الجناح اخويا و انا غا ولد باب الله البلاد قامعانا و المعيشة غلات بين ليا الفلوس و جيت عندك
عصمان فور ما سمع كلامو طلع ليه الدم الراس و كل ما كيسمع سميت حسن كيتفرك خليقتو و في النهار لي كان غيتعدا فيه على دليلة ... جمع يديه بقبضة و هز البيسي حتى السما و جابو فلوس في الأرض ... شاف في ياسر مغزف و حرك ليه راسو بمعنى تحرك
عصمان ..." جر منير من زغبات شعرو و غادي بيه الطموبيل لي كان ياسر ديماراها وموجد ... حل عصمان الباب اللوراني لاح فيه منير و طلع هو حدا ياسر " ...جوج كلمات نقولهم الحمار تاع بوووك غتشد تليفونك و تعيط ليه تقوليه قضيتي الغراض ونشم ريحتك بينتي ليه شي حاجة و بربي تندفن عدو ربك في بلاصتك دير معاه شي كافي تقاشعو فيها..." غوت تاا حلقو تجرح " ... طلقنااااااا
منير ..." نزل على حناكو وفخاضو بالخيط تقول غا مرأة هجالة و هرب عليها الراجل ... دار كيف قاليها عصمان بلا زيادة و لا نقصان ... خدا تليفونو و دوز الخط لحسن و كيسمعو نضف حلقو وتكلم " ... خونا طاح في شبكتك
حسن ..." كان جالس و شاد گاروه و قدامو قهوة كحلة قاطعة " ... مزززيااان اسيدي هاكا نبغيك و حلاوتك عندي مضوبلة
منير ... هي لجيتي دابا لقهوة ميموزة لي خدا الرمبا الكبيرة ... رشمتيني
حسن ..." طفى گروه و هز الكونطاكط طموبيلتو " ... دابا نكون عندك
رجع عصمان قاد جلستو و عطا اشارتو لياسر باش يتيسر ... طول الطريق وحامية فيه البيضي مغزف عليه و جامع ليه ما تأخر و تقدم من أغلاط ... خصوصا ملي كيتفكر مرتو كان معريها و ناوي يتكرفس عليها ... هز يدو كيغوت وكيخبط في الكابو لي قدامو ... و غير حس بطموبيل حبست حل الباب و خرج غادي كيزرب و كل خطوة كيدير فيها جوج ... غير بان ليه جالس و داير رجل على ختها طار عليه بكروشي جابو مقلوب هو طابلتو ... أما حسن لي معرف باش تبلى و كان باقي ما شاف شكون نزل عليه و غير دور راسو و بان ليه عصمان قدامو ... الخلعة شداتو و عينيه خرجهم و داكشي لي كان خايف منو ها هو جا ليه برجليه و طاح فيه
عصمان....." كيحيد في ساعتو وكيهلل "....شفتي انا لي بغيتي ديرهااا بيييا الكيدار لي ولدك.....قاري في المدرسة وقاري في الزنقة وقاري في الحبس وقاري تا الرجلة لعدو ربك
"هبط ليه هزو من لكود ديالو وهبط عليه بروسية ".. وملي كنبغي نرد دقتي كنردها بالوجه ماشي بالظهرر
حسن ..." ما قدرش حتى يدافع على راسو شداتو الدوخة و تا لسانو باش يهضر بالضربة لي عطاه عصمان عض فيه و حس بيه تشلل و مبقاش كيحس بيه حاول يوقف و ناض على وقفتو وواخا كيتمايل دفع الطبلة لي حداه حتى جات مشخشخة بداكشي لي كان فيها .. هز يديه و غفل عصمان لي كان ضاير عند ياسر و كيحذر فيه يقرب ليه حيت مغيعقلش عليه و غير حس بالضربة جاتو ضار عندو و عينيه مطرطقين فييه و كولو كيترعد عليه ... كان قلبو عاااامر و مغلل فيه كيضرب و حاس براسو مزال ما برد ... ياسر لي كان شاد منير من دراعو و ما قدرش يقرب و يفك عشيرو قبل ميقتلو ... القهوى ما بقات قهوى و لي كان جالس خرج بحالو لتجي فيه الدقة ... مول المحل لي كان واقف وكيغوت باش ناس تفك قبل ما يولي في خسائر هو في غنى هناا ... شاف حتى عيااا و سيفط السرباي لي خدام عندو البوسط البوليس لي كان غير حداهم ... و ما هي الا عشر دقائق كان السرباي رجع و المخزن معاه ... دخلو كيجريو و غير وصلو عندهم فاكوهم غير بزز و تمو مخرجينهم مينطين ... يا الله غيشدو ياسر تا وقفهم زريقة
عصمان ... ممعاياش الشاف
.... " ضار شاف في ياسر كيطلع فيه و يهبط و علم الدراري لي معاه يطلعهم الواشمة ... أما عصمان شاف في ياسر و دار ليه حركة بفمو معناتها جمع و طوي وفمك تسدو
فور ما طلع عصمان الفارگو عارف راسو اش كيتسناه و شنو غيطرى واحد بحالو عندو سوابق و البوليس كيعرفوه فأكيد دقتو غتكون صحيحة و ماليها مخرج ... أما حسن لي وجهو و لا خارجة إثيوبيا عين مسدودة و الثانية محلولة ما كيجي فين يبرى ليه وجهو حتى كيخسر ليه مرة اخرى ... شاف في عصمان و نزل راسو ندم علاش سمع كلام سعاد وهو من اخر فعلة ليه حلف ميحط يدو في يدها و لا يقرب لدليلة ها هو وجهو مخمج وغادي في الواشمة لي عمرو شم يحط رجلو فيها ... وصلو الكوميسارية و تمو مهبطينهم كل واحد شادينو جوج تا وصلو لعند الشاف الكبير ديالهم ... غير دخلو عندو حلو ليهم يديهم ووقفو قداموو كيشوفو فيه
...." كان راجل شوية كبير و من عينيه تعرفو معقول و معندووش لا مع تخلويض و لا كذوب " ... و باينة عليكم بعقلكم و لي شاف هاد الفورمات يقول هنا نبات علاش شخشختو السيد قهوتو
حسن ..." كان قريب يبكي ما طاحت ليه في البال لا مخزن و لا بوليس تا صدق بين يديهم و علم الله اش غيطرا ليه " ... شووف ا سيدي انا كنت مريح جالس في قهوة تنتسى السيد تا دخل عليا الأخ تيضرب فيا و يهرس
...." شاف في عصمان لي كان واقف وهاز راسو السما و على جهو ابتسامة و جامع يديه قدامو " ...و أنت اش تتقول في هادشي ا سي .. اش سماك الله
.... سميتك مغريباش نعرفوها من بعد ولكن علاش تهجمتي على الراجل
عصمان ... " حل يديه و كيدويو بصبعو " ... شماتة ا شاف شماتة حاشة واش نشبهوه براجل ... وكون ما وجهك حشمت منو ندفنو قدامك و هادشي عادي ضربتو و ضربني راه عارف راسو علاش كلا العصى
..." بقى غير كيشوف " ... ما بغيتو تقولو اش كاين و لا اش عندكم ..." ضار لعند الدري حداه لي كان خدام في المحضر " ... ولدي نزلوهم لياا التحت و الاثنين يدوزو عند وكيل الملك
حسن ..." غا سمح وكيل الملك و لا يبيض و يقرق " ... ولكن سمح ليا الشاف أنا شنوو درت باش ندوز عند وكيل الملك
... الكاميرات لي غتبين اش درتي دابا هبط راسك ونزل و هادشي كنتي تفكر فيه قبل ... " هبط راسو حسن و ليصدق ملسقين ليه كثر .. أما عصمان لي ضربها بضحكة طويلة عريضة على فمو ... وخرج سابق البوليس و عارف طريق الجيور ... غير دخلوهم مشا عصمان ريح في الكرسي لي تم و سرح رجليه و داير يديه على فمو و كيضحك "
عصمان ..." كيشوف في حسن واقف ورجليه كيترعدو " ... و الولية ملي مقادتش ديلمك على هادشي اش دخل زامل بوووك فيا
حسن ..." عرف راسو غيغرق معاه في ديك البنيقة شاف تا عيا و مشا جلس حداه " ... سمع نقوليك انا معندي تا دخل في هاد الزميطة مولاتك لي بغاتك تبنق هي سعاد منك ليها
عصمان ..." كي سمع سميتها راسو تنفخ ليه " ... وتا يا ولد الهرگمة ذكر و لا راجل و لا تا واحد فيهم ... " ناض موقفو شانق عليه " .. يا ولد القحبة انا راه عندي كي الحبس لي برا و الى دخلت بالفرحات على دراري هنا .... باش دير معايا خصايل الزوامل غنجلس مك على القرعة
حسن ..." كيشوف في راسو موصيبة و طلاهااا و سميتو و غتوسخ و من الأحسن ليه يخرج باقل أضرار " ... سمع نقوليك انا مناويش ندوز الحبس على والو و صمعتي نوسخهااا على الخوا الخاوي ... غنديرو اتفاق لي هو ضربتيني و ضربتك انا مسامح و أنت نفس الشيئ و نغبر كمارتي من هاد البلاد في مرة
فطرت و عقلت علييه شافت الروينة و القنوت خاصها تساس ...ناضت جمعت الطبلة و غسلت ماعنها هوما اللولين وطرفت الكوزينة ... خرجت مشات عند شيخهاا طلات عليه و شافت حالو و احوالو تقدمت عندو وجلست جنبو
دليلة " شدت ليه في يديه و كدوز فوق منها " عمي كيف بقيتي شوية
مصطفى ..." عويناتو ضحكو ليها وحرك ليها راسو و تكلم " .. ش شوية ا ب بننتي كيي يف ببقيتي
دليلة ... لاواه عدابك راحة غير امر و انا نفد بغيتي نعمر ليك بريريد
مصطفى ... خليك مرتاحة ابنتي و متعدبيش راسك تتجي الحسنية وعمريه في دقة ..." دات و جابت معاه ف اللغى وتگعدت باست ليه راسو و قادت ليه غطاه ... عاد خرجات البيت تجر فيه سدادر و تنفض الغبرة عليهم ... جنونها ركبوها وولات تحس براسها فيها عشرة حسات بوجع خفيف في جنبها و دخلات الكوزينة دارت الخزامة توضى بيها هزاتها و دخلات الحمام وكيف شافت الفوطة الصحية ديالها ملقات فيها والو استغربت منها و بقات غا تتشوف ... توضات و قضاة غراضها و خرجت دارت الحليب بالقرفة باش تسرحها عليها ... كملت على اش كانت كدير و مشات ترد طويجين كيف تشهاتو ما جات في ترد الغدا تا سمعت الحسنية في الباب تتعيط ليها
الحسنية ... اييه ابنيتي الله يرضي عليك ... عصمان باقي مشرف الدار
دليلة ..." تدوي معاها من الكوزينة " ... مازال اخالتي ما جا يمكن عندو خدمة بزاف
الحسنية ... ايوا الله يسهل عليه ابنيتي و يسهل على گاع وليدات المسلمين
"جالسين و مرتاحين و لي طايح فيه عصمان مكاين ليهم لا على البال و لا الخاطر ... هوو في البنيقة الراس في الراس مع حسن و ياسر لي كان عيط المحامي وواقف كيتسنى فيه على برا يخرج يقوليه اش كاين ... عقلو و قلبو واكلو على خوه ليزيد يغرق كثر و لاخر معاه عارفو مكيحملوش و باش يتحكم في راسو ممدوزش الفورماسيون عليها ... كان شاد گارو و كيبخ تا بان ليه المحامي خارج ووجهو مكيتفسرش ... طفى گاروه ووقف قدامو
ياسر ..." ربع يديه و كيتسناه يديو " ... اش تم و عصمان فين هو قول اش عندك
..." دور راسو يمين و شمال " ... لا حول الله يا رب صاحبك مكيقدرش يتفاهم بالعقل حاولت نخرجو اليوم و لكن والو ... جاتو مع السبت و الاحد يعني ميعادنا الاثنين غيدوز عند وكيل الملك .. يكون خير " قال كلامو المحامي و زاد خلفة مخلي ياسر قريب ينطح راسو مع الحيط بقوة التفكير اش غيقول لمو و لمرتو .... في الأخير دارها في يد الله و قصد دار عصمان ..." أما الحسنية لي بطى الوقت على ولدها في دخولو وقلبها كلاها و بالها ما هناها عليه
الحسنية ..." تگعدت شافت في المگانة لقاتها التلاتة " ... هاك على خدمة اشمن خدمة هادي تالدابا.." هزات تليفونها و دوزت ليه الخط مرة جوج تلاتة حتى ولا قلبها واكلها علييه و هي تحميها العيط " ... دلييييلة وااااا دلييييلة
دليلة ..." قلبها تهز و تحط اصلا نهارها كولو وهي فشكل و فور ما سمعت غوات الحسنية نقزت عندها " ... مالك اخالتي ياك لباس
الحسنية ... ولدي ممولف يغطس و ما يعلم واش معيطش ليك
دليلة ... خالتي متخلعينيش غيكون خدام و نسا معيطش ..." يا الله جات تجاوبها الحسنية حتى سمعو الدقان في الباب ... مشات الحسنية تتزرب في خطاويها حلت الباب بان ليها ياسر ...دخلاتو و سدت وراه "
الحسنية ..." شدت لياسر في يديه و كأنها تترجاه يقوليها خبار الخير " ... فين ولدي ا ياسر و اش هاد الدخلة بلا بييه شفتو ما عيط ليا و لا لمرتو
ياسر ..." ربع يديه و كيشوف فيهم بكل ثقة باش ميشكوش فيه " ... والو اخالتي غير تهدني مالك مخلوعة عصمان لباس عليه غير وصاني نقوليكم بلي خرجت ليه شي خدمة وسافر
الحسنية ... " صغرت فيه عينيها و تتشوف فيه " ... ا شووف فيا اوليدي هاد التنوعيرة لي قلتي ليا مادخلات ليا في هاد الوذن و لا في ختها
ياسر ..." شدها من كتافها وجلسها " ... زعما عمرو ما دارها و سافر بلا ميقولها ليك ..." باس ليها راسها و يديها و ناض واقف خارج " ... كوني هانية مواقع والو اخاالتي دابا يعيط ليكم .." گاع هاد الفيلم لي داز قدام عينين دليلة مهضماتوش و كيف خرج ياسر طارت هي على جلابتها و تبعاتو المحل ... ما جااا فين يجلس في كرسيه يطلع النفس و يهبطها تا وقفت عليه ... غا شافها خرج عينيه " ... ختي دليلة ياك لباس
دليلة ... سمع ا ياسر داك اسطوار قديمة لي قلتي لخالتي دوزتيها عليها و لكن مدوزش عليا ... فين عصمان
ياسر ... راه قلت ليكم اختي بلي سافر يقضي شئ خدمة و يجي بحالو
دليلة ... ياااسر راه دليلة قدااامك تفهمها قبل ما تخرج الكلمة من فمك ... ندير راسي مكلخة ونقوليك عصمان لبغى يهبط غا المدينة كيعيط و يعلمني بقا غير يسافر و ميعلمنيش ... مالو ديال راسو مثلااا خويهااا ا ياااسر خويييهااا و قوليا اشمن موووصيبة طايح فيييها عصمااااان
لي مربياه الزنقة ومقرصاه كيكون دايق حرها وقاري حروبها ...ماشي اي حاجة دووز عليه ولا يتيَّق كل متقال ليه كيكون عايق وفايق ويفهمها طاايرة فسمااا وميمكنش تضحك عليه بكلمة ولا عشرة
هكا دليلة معندهاش مع تلفاق الهضرة والكذوب فور متبعات ياسر عرفاتو قاري حسابو و كيف كيقولو ناسنا الجامع لي قريتي فيه انا لي بنيتو و بيدي نهدمو و لا نرممو ... وداكشي علاش ضغطات عليه وحمرت فيه
دليلة ..." خنزرت فييه و دوات معاه بنبرة زايدة نغزة " ... ياسر حل عينيك راه دليلة لي قداااامك تفهمها قبل ما تخرج الكلام من فمك ... يعني الا درتيها بخالتي وضمستيها بديك الاسطوانة راه مديرهاش معايا اناا ....
دليلة....."جات قداامو وعلاات حاجبهااا ".....نديك على كلامك و ندير راسي مكلخة ونتا الواعر ايواا اسي انا خووك لمدينة هي اللخرة الى بغا يهبط ليها كيعلمني ...بقا غير يحرك روايضو و يسافر وميقووولياا والو علاه مالو ديال راسو مثلا ...
ياسر......جاتو على غفلة وتليفون ديشارجااا ليه " هادشي لي لقى "...
ياسر ..." تنهد مربع يديه ومقوس عينيه عارف راسو بحالا غيخوي الما في الرملة معاها ومغيتفكش منها اللهم يخوي ليها المزيودة و يخلي بالها هاني "......اش بغيتيني نجي نقوليك اختي بلي عصمان في الحبس و لا نقوليك بلي داك ميخي ديال حسن بغى يطيحو في حفرة ويدخلو الحبس ...
دليلة......"حسات بالخلعة شدااتها ملي الحبس وحسن تجمعو ليها في كلمة وحدة خافت على عصمان وعلى راسها وعائلتها من وراه جلساات على الكرسي كتطلع النفس وتهبطها بالزربة مصدوومة "....شنو طرا و كيفاش وقع لهادشي
جلس قدامها حادر راسو وكيسرد عليها اش وقع من اول معيط ليه في التليفون حتى الوقت فاش خلاه محبوس وجا لعندهم...
ياسر......لي كاين هانا قلتو ليك !!
دليلة...."شدتها الضحكة مع الشمتة ....حسات براسها طالعاها الصهدة بحر لخبار لي خداات ، شافت جهة الباب ودوات معصبة ".....شفتي هادشي كنت متوقعاه طال زمان ولا قصار كان غيتشد حيت طريق لحراام هادا حالها وهو مكيسمعش الهضرة كيدير لي قاليه راسو
ياسر......ولكن هو عاق بلبلان ومطيحوهش في زوبية كيف بغاو ومشى لتما غير حيت ضارب معاه وسلخو
" عطاتو بظهرها وخرجات من المحل غادا معاقلاش على راسها وحاسة بجنبها مزير وصابرة عليه ...سمعات خطوات كيقربو ليهاا حتى وصلو حداها كان ياسر لي مبغاش يخليها راسهااا عارف راسها قاصح والا مشات حتى وقعات ليها شي حاجة وصاحبو لهيه مغيدوزهاش ليه على خير
ياسر.....طوموبيل حاطها في شاارع يالله ندوزو من هنااا
تبعاتو بلاما تجاوبو مشااو فين حاطها ركبات حداه حالا زاج حتال لتحت حاسة بالكربة شادااها ووجهها تزنگ وعرقات جاتها طريق طويلة دوزاتها كلهااا وهي غا كتگمگم
دليلة....."كتحلف وتعاود عينيها حمريييين "....شفتي الا مبعدش عصمان من هاد الطريق اناااا لي غنبعد علييه ....ثوبتو منها يا اما غتكون على يدي ياا اماا عمروو يشوف مزالل كماارتي حيييت منستحملش هادشي لي فيه انا دابا كل مرة نحس بييييييه
وصلو قدام مكتب المحامي لي كان كيستناهم من
ورا معيط ليه ياسر ...كان جالس في بيرو وقدامو دليلة لي غتستنطق فيه
دليلة......دابا ااستاذ شنو غنخليو داك سيد مخشي تماااا مكاينش شي حل
- تا واحد فيهم امدام مراضي يدوي وجاتنا مع الويكاند
دليلة....."ميلات راسها لجيهة تانية صاطت بسخط ورجعات شافت فيه باصرار "....شووف على معود ليا عليك عصمان بلي نتا كدير من الضييق طرييق واكيد الا قلبتيها في دماغك غيكون شي حل..اناااا بغيييتوو ليوم يبات في الداااااار شوف كيف دير وتفكر نهار تشديت انا كيفاش فاكيتو جرة يالله ايااسر
"خرجو هي وياسر نيشان لطموبيل قبل ميكسيري قالت
دليلة...... سير الكوميسارية لي فيها سبع بو لبطاين
ياسر.....اش غنديرو تمااا ؟؟
دليلة......"كتهز في شعرها لفوق وتدوي "....واقلة سيد مخشي تما بلا فطور و بلا غدا وعاد غيخصو الدخان ...
"ديمارا الطوموبيل وفسرو كيلعن حسن وسعاد والوقت الخايبة لي طيحتهم معاهم.....تحركو لكوميسارية وفطريقهم اصرات دليلة تاخد لعصمان مياكل واخا ياسر عيا ميقووليها بلي ممنوع لكن لي فراسها فراسهاا متاقت حتى تأكدات بنفسهااا
دليلة......"شدات بلاستيكة حطاتها فيطوموبيل وكتنتر ".....واش من نيتهم هادو شنو زعمة يبقى بجوع....ولكن تجي تشووف سرو هو لي كيقلب عليها تلقاه عاجبو الحال راه توحش الحبس ....غا اناا لي كنتحرگ هنا
ياسر....."جلس على طروطوار داير يديه على ركابيه "....الله يهديييك راه غا كتقوولي ....مهم اشنو دابا نمشيو بحالنا
دليلة.....لا غنبقاو هنااا تا نشووف كيف ندير ندخلو ليه هادشي
ياسر......وخالتي الحسنية لي كتسنى فدار غتكون تشوشات
مريح في البنيقة و مرجع راسو اللور و عينيه كيشوفو في السقف ... جابد گاروه يكمي و يبخر عقلو مع مرتو و اش غيكون بحالها دابا ... وعارفها أي كذبة يقولها ياسر مغدوزش عليها ... أما حسن لي مجلس و لا حط ترمتو الارض غادي جاي تا خلا راسو فاتل و حجبانو عقدهم و ناوي على خزيت معاه
عصمان ..." لاح الگارو تحت رجليه و وقف قدامو " ... مال عدو ربك دوختي ليا مخ المخيخ ديالي جلس الارض و أنت كتندب كي الولية
حسن ..." جلس و شد في راسو " ... عصمان فكرتي فلي قلت ليك ... انا باغي نخرج لخدمتي و أنت عندك مرتك و واليديك
عصمان ..." طار عليه بقجة تا خرجو عينيه " ... مرتي تعاود تجبها لسانك نحطو قدامك و نخلي تتهضر بالإشارة
حسن ..." ما فك ليه يدو من عنقو تا حس بنفسو تخنقت ... غير طلق منوو بدا يكحب تا رجع النفس " ... واش أنت تدوي غا بيديك الله يعفو عليييك من هاد الخرا ديال والو
عصمان ..." جمع يديه بقبضة و خرج صبعو وصطاني و عطاه ليه الجبهة تا خرج ليه بوقالة " ... و دابا يا وجه الگدم حكهاا باش مرا اخرى توقف قدام زريقة تحني راسك و لا ندفن الزامل تاع بوووك ... بقا هو وياه مني منك و حسن كيحاول يقنع زريقة لي ما عندو ما يخسر سوا دخل الحبس سوا خرج انو يكون اتفاق بيناتهم و يخرجو بتراضي "
حسن ..." وقف ثاني غادي جاي و مصارنو غيتحطو ليه بالخلعة ..." ... انا راه ميمكنش ندوز قدام الوكيل و نتحبس حياتي غضيع ... " ملي مسمعش حس عصمان و ما جاوبو عرف راسو غرق وهادي الأخيرة ليه
تعاشات العشية و الساعة وصلت السبعة و باقين على نفس حالهم ... حسن لي كيطلب و يرغب فيه باش يتافقو و عصمان لي حالف بحلوفو يا تيضعفو و يخرجها منو ... يا الله عصمان غيشعل گارو توقف عليهم البوليسي عالمهم بلي الشاف بغى يشوفهم بجوج ... وداكشي لي كان خرج عصمان داير يديه و راه و يتعنگر و حافظ الطريق ...أما حسن غادي في جنب البوليسي و يدوي و يشكي عليه تا وصلو قدام المكتب ... كيف وصلوو دخل اول واحد هو البوليسي لي عطا التحية لشاف و دخلهم بعد ما امرو
..." كيف شافهم واقفين قدامو ناض تا هو ووقف قدامهم " ... دابا هادشي لي كديرو فيه ممسلكمش ..." ضار شاف في عصمان " ... أنت الشريع غا سوابقك ثابعينك الى يوم البعت و مزال ما نويتي التوب
عصمان ..." نضف حلقوو و تكلم " ... لي خااف غير يروح الشاف و انا عمري نتوب مع الشمايت تخلقت راجل و غنموت راجل واخا نكون شهيد عليها و تكتب على قبري
... دابا من هاد الهضرة الخاوية السيد مول القهوة عاد خرج من عندي و مسامح ليكم على الدعوى حيت معندوش خسائر كبيرة ... داكشي علاش خرجو بتراضي الى دزتو عند وكيل الملك من تم العكاشة
حسن ..." غا سمع عكاشة بدا يدوي بيديه و رجليه " ... ا لا الشاف انا قائل نخرج بالتراضي اشمن عكاشة و لا حمام البلدي عندي خدمتي ميمكنش نضيعها
.... هادشي فكر فيه قبل ما دبر فيها ذيب و تهرس قهاوي عيباد الله
عصمان ..." كيف سمع الذيب طلقها بضحكة " ... ذيب راه غا مشيش هذا وحشومة نشبهوه بيه المش يبقى فيه الحال ...اودي خلاصة القول قابل بهاد التراضي غير طلقونا خلاص
عصمان....."حرك ليه راسو ".....طلب من الله ينقارضو بحال هاد الاشكال اشااف دوز بخيير
خرج بحال كيقاد في حوايجو داز خدا تليفونو وبزطامو ومشى جهة الباب خارج برا كيحرك في عنقو لي حس بيه مشنج وتابعو حسن كيف خرجو على براااا جرو من ذراعو مكاليه مع الحيط وشانق عليه من حواايجو جامع قبضة يديه
عصمان......يكما تسمع قلت ليهم التراضي تقوول غتفك مني...والله يا ملتك تا نوريك الحوووتة منين كتبوول
دليلة......"حطات يديها على كتف عصمان من اللور "....بان ليا مسخيتيش تخرج ازريقةةةة ؟؟
كون كان بيدينا نرجعو الوقت اللور كون تراجعنا على قرارات خدناهم في لحظة انفعال او خيارات مكانوش في بلاصتهم.....ولا حتى تعرفنا على اشخااص وتعلقنا بيهم وبغيناهم ... بزااف منااا كيجييه اوقات كيندم على شلا حوايج دار في حياتو وهادشي تماما لي واقع لدليلة وهي واقفة قدام ولاية الامن نفس المكان لي كانت فيه من شهوور ساالفة ...غير الفرق انو هي لي كانت لداخل وعصمان لي كان برا
كيستنااها ماد ايدو ليهاا وحيت كانت عاجزة شدات ليه فيها ....لو يرجع بيها الوقت اللور وتقدر تغير الاحداث لو ختارات انو عمرهاا ركباات معااه طوموبيلتوو ولا قبلات مساعدتوو ولا حتى جات لدرب سعاد وقابلاتو الحياة كانت بلا بيه صعيبة ودابا غتولي أصعب بوجودو وهي بعيدة علييه......موجات من الندم والحسرة والعجز كانت كتحس بيهم فديك اللحظة ...قلبهاا كان كيرجف من الخووف والبرد...تبدلو ملامحها للاحسن فور مشافتوو خارج بهيبتو لمولفاهاا ...بان ليها وراه الشخص لي كتلعن نهار لي بغاتو ونطقات فيه اسموو تبعاتهم بانفعال ومحسات براسها غير وهي حاطة ايدها على كتف عصماان
دليلة.......بان ليا مسخيتيش تخرج ازريقة ؟؟
عصمان....." ضرب قبضة يديه مع الحيط وطلق حسن لي حس بروحو غتخرج.... دار لعندها مخنزر فيها ".......اش جاابك هناا الالة ؟
دليلة..."متسوقاتش الحسن ولا شافت فيه همها بوحدو "....نتا لي جبتيني اسييي
عصمان......" هز ياسر ايديه من بعيد بمعنى معندي مندير......ميل راسو لعندها كيدوي تحت سنانو "........ومتجييييييش الالة واش قلتها ليك اش جابك لهاد لخرةة بلاصتك في دار ماشي هناااا
دليلة......"كتشوف ليه في يديه ".......طلق منييي حسن ليك وحتى يكوون نتا عقلك في راسك وداير بحال سياادك عاد تكون انا بلاصتي في داار ...ياكما عند راسك توحشت لكوميساريات وجيت ليهم نتاااا لي جبرتيني نجي لهنااااااا خدمتك وفعايلك هماا سباب ...
عصمان........."زير على يديه وعظ فمو زااعف....مكرهش يرعفها ولكن غير كيلعن شيطان "....زيدي قدامي الهضرة ماشي هنااا
"غادي جارها لجهة طوموبيل وهي تنتر ليه "
دليلة ......"كتدوي وتغوت"......معندي فين نزيد معاااك .....يااريت يرجع بيا زمان اللور للوقت لي جريتيني فيه من ذراعي وطلعتيني صحة معاك لطوموبيل..."تنترات منو ودفعاتو "........ونبعد عليك ونمشي في طريق مغايرة ليك....." ضرباتو لصدرو "....ولكن تااا دابا باقي الحااااال الله يهنييك
زادت قدامو تتخبط في رجليها مخلي راسو تيبرد بقى متبع ليها العين و كارز على يديه خوفو يشدها ديك الساع و يصدق مخربق ليها وجهاا خلاه بعيد وحاضيها حتى يبرد.. أما هي كانت معصبة وعقلها ترفع وغير شافت خليقة حسن زاد كمل على ما بيها ... مجرد اسمو كيفكرها بأشنو كان غيوقع ليها ... أما ملي شافت وجهو عافت راسها و داتها وليام لي كانت معاه فيها ... مبقات عارفة ما دير وجعها تزاد وقفت حدا واحد الطموبيل كتنفس بصعوبة زيرات على كرشها و الحريق كثر عليها .... شدت في الكابو ديال الطوموبيل و تتنات على ظهرها ...عصمان ملي بانت ليه فديك الحالة غضبو تحول لخوف ومحس براسو غير عند وهو واقف عليها
عصمان ..." شدها من ظهرها ويديه كيهزو في وجهها باشتشووف فيه ويطمن عليها. " ... مالك ا دليلة اش عندك
دليلة ..." نترت يديها منوو وشافت في بلاصة خرا " ... عطيني شبر ديال تيساع ازرييييييقة بعد منيييي ... ااااه " عضت على فمها مغنضة عينيها "
عصمان .... راه غنقتل ديلمك و نتبعك قولي مااالك ...." ما قدراتش تجاووبو و هو يهزها بين ذراعو غادي بيها لطوموبيل وهي تتغوت ليه في يديه "
دليلة ... وااا الزمر وااا المرض و فوتني وعطيني التيساع
" حل باب الطموبيل اللوراني و حطها وجلس حداها " ......تحرك ايااسر دينا لسبيطااار
دليلة......."كتدوي تحت سنانها ".......اشمن سبيطار ديني لدااار راه غييير وجع عااادي
عصمان......"بتسااؤل "....مفهمتش
دليلة.......معندك متفهم قلت ليييك ديني لداار
" تكات على زاج مبعدة منوو مخلياه غير كيشووف فيها ويحسبن وباغي امتى يوصل ويتفاهم معاها
مسافة الطريق ووصلو لدرب نزلت دليلة هي الاولى كتنثر وتخبط في البيبان اما عصمان بقى في سيارة داير يدو على رجليه وكيحرك فيهاا معصب
ياسر ..." ضار لعندوو " ... العشير راري وراعي راه ضلعة عوجة ... وغير من خوفها دارت عامدا بغيت ننكر ولكن كلشي يتضمس اهويا بكليمات معادها هي
عصمان ... " خرج تنهيدة من خاطرو " ... اودييي هادي عندي بووحدها جاامعاهم كاملين ..مهم تيسر نتاااا تا نتشاوفو
نزل عصمان غادي كيخطوي و رجليه تقال مسخسخ وراسو مزير ... غير دخل لقى الحسنية جالسة في الصالون و كتسنى فيه ... شافتو عليه بتعنيقة لي شافها ميقولش راه فرقها صباح "
الحسنية ..." تعنق و تبوس و تشم ليه في عنقو " ... وا مزينها دخلة عندك من داك الباب اولدي ...دغيا ساليتي الخدمة ولا شنوو
عصمان ..." باس ليها راسها " ... وفين نخليكم الحنانة ... غير ساليت الخدمة هاني قدامك
الحسنية ... ودخل اولدي ترتاح بيدما وجدت ليك ما تاكل ...
عصمان ...واخا الواليدة الله يخليك ليناا
" دخل لبيتو لقاها دايرة جلسة ولاد الدرب و عينيها بحال العافية ... مشا هز حوايجو و رجع وقف قدامها ".......نوضي وجدي ليا دووش
دليلة ..." رفعت فيه عينيها و كتشوف فيه مشمئزة خاقدة على الوضعية وقفت قدامو معليا راسها لفووق وبنظرة تحدي نطقات " ... جوج كلمات سمعهم مني اولد النااس يا انا يا خدمتك
قالو ناااس زمان وريه وريه إلا عمات ليه سير و خليه ....دليلة عيات تحكر على عصمان وتنصح فيه قالت الحيلة حسن من العار نفهمو بسياسة وبالتي هي احسن ولكن هو كان مقصح راسو وكيدير لي في دماغو.....وملي شافت الشفوي مسلكاش قررات توضع حد لراسها معاه
دليلة........زوج كلمات سمعهم مني اولد الناس ياانا يا خدمتك
دليلة..."بدات تهضر و كتحس بدوخة فيها ورغم ذلك كابرات "... شوف اعصمان ملي الدنيا حطاتك فحيااتي و أنا غادا فجنب طريق كافية خيري و شري و نهار قطعتي ليا لكارو واخا بزز مني جلست مع راسي و فكرت شفتو غير مخسرني وممربحني والو.....و أنا شحال نصحتك على طريق لبلا بعد منها و خلينا نعيشو هانيين كيف ناس واش معييتيش من فلوس الحرام ها نتا كتنوض من موصيبة و طيح فختها خرجتي من باب الحبس ووليتي كتجلس ليا حدا باابو ...
عرفتي شنو لفرق بيني وبينك انا نهار تينصحني شي حد كنعرفو راه باغي لي لخير اما نتا لا راكب دماغك وعند راسك نتا لي مطور في هاد الدنيا ...اولد الناس أنا تمرمدت حتى شبعت و قنعت و قلت الحمد لله .....
عصمااان........"داير يدييه وراااه وكيتصنط ".....دابا فرأيك هادا هو الحل
دليلة ......هو هادا حيت ماشي لي بداتو سعاد و راجلها تكملو نتا ...مهم غنخيرك إلا باغيني كيف كتقول راه يا أنا يا ديك الخدمة.. فكر و ختار و غدا نلقا عندي لخبار و إلا فات نبغي براتي توصلني الله يعاونك
عصمان....."غمض عينيه ورجع حلهم وجاوبها بلا ميفكر "....جوابي الالة غتسمعيه دابا مغتسناي گاع تال صبااح ..."قرب لوجهاا وخنزر ودوا بعصبية كيف عادتوو مكيعرفش لهداوة "....خدمتي مغاديش نخليها حيت نتي بغيتي ....ومغاديييييش نطلققققك...."رفع سبابتو في وجهها "...ماشي اناا لي تجي مراا وتلوي ليا ذراعي ، راه مداروها حتى رجاالة بشلاغمهم عاد غادي نخضع ليك نتي وتهدديني بيك.....من اللول اماما بغيتيني وانا في طريق لحرام ، مكذبتش عليك ومزوقتش ليك راسي....كنت معاك صريح وقلت ليك راني ما قتال ما شفاار ما نصااب ...ورغم ذلك كتبقى خدمتي عوجة حيت ملقيتش الخياار ،
دليلة...."ربعات يديها وبدات تحرك فراسها وهي كتكلم مقاطعة كلامو "....دابا هذاا هو اخر كلام عندك ياك !؟
دليلة......كتدوي بحالا گاع هادو لي خدامين خادمين بقرايتهم....راه عطى الله باش ترزق الله نعيشو بلي كاين نهار يكون فيه مصروف ونهار لا وهاكدااا حتى نوقفو على رجليناا
عصمان......"عطاها بظهرو وبدا يضحك مستهزء بالهضرة لي قالتها عاد ضار لعندها معلي حواجبو ..كلشي عندها ساهل ولاقية ليه الحل ".....ايوا الالة راه مول ضوو ولا تاا لما مغاديش يعقلو علينا الا قلنا ليهم هاد نهار مجبت فيه تا درهم......ودوا تاع الواليد لي خاصو يشربو طول عمرو ميمكنش يتخاد ونعطيه ليه على حسااب جيبي.....بالهضرة غتجيك نتي ساهلة ولكن محاس بالدقة غا لي هازهاا ، قلبي سينتا ابنت ناس ودعي ربي يثوب من عندو وتا الا قدر الله ودخلت الحبس مغادي يخصكم تاا خيير
دليلة ...."تنفساات بعمق وردات عليه بصووت مهدن على قبل "....غتخصني نتاا ،مغاداش نقدر نبعد عليك ونقوول هذا المكتاب ...حيث حيااتي بلا بيك اعصمان غتكون عذااب ...بالحق لمن كنعاود زابووري لوااحد مكيفهمش هادشي وكيدير غير لي فراسو........ مهم جواابك وصلني
" قالت كلمتها الاخيرة وطبطبات ليه على ذراعو وقصدات الماريو خدات مونطو منوو لاحتو عليهاا وهزات سبرديلتها كتلبس فيهاا تحت تطليعاتو كيتسنى فيهاا يشووفها اش بغات تصنع....حزمات السير ولاحت عليها كاشكول هزات صاكادو ديالها وتمات غادا خاارجة حتى وقفها كلاموو وهي وسط سيجوور
عصمان......الا عتبتي داك الباب مغاديش يعجبك الحال وغتقلبي على خزيت معااياا
دليلة....."لتافتت لعندو خاشية ايديها في جياابهااا "....مغاديش تخلعني لي بغيتي ديرو ديرو ...بنسبة ليا نتا دابا بحالك بحال اي حد في زنقة كلامك مبقاش غيمشي عليا حيت خترت
"مزال مكملتهاش حساات بحنكهاا تخدر على اثر التصرفيقة لي عطاها لحنك ولي تسمعات في دار حتى خلات الحسنية خارجة لعندهم حاطة يديها على راسهاا ملي شافت حنك دليلة مصور بصبعان ولدهااا هاد الاخيير لي كان مزال هاز يدييه عليها وعينيه معميين "
عصمان توقع اي حاجة تقولها إلا أنها تفكر طلب منو طلاق و تبعد عليه من بعد هاد الكلمة تزير قلبو و حس بي راسو تعصب ..
شاف كيف جاتها ساهلة تخرجها من فمها و تخلا عليه بدم بارد ... عمر الفرااق كان كيحل المشكل بالعكس عاد ما كيزييد يعقدو ... تعصب حتى عرووق نوااضرو خرجو و بهضرتها خلات دم يسخن فعروووقو شرح ليها وتبت راسو ...نببهها وحذرها ولكن معامن هو مع وحدة راسها قصح من صخر كدير لي فرلسهاا ومكدير اعتبار لي قدامها غادا خارجة فليل وزايداها بما بقى ليك كلام عليا ما نطق وراها بحتى الكلمة حدو هز ايدو ونزل عليها بتصرفيقة حتى تصورو صباعو فوجها
عصمان....." مسمعش اش كتقول مو ...همو لي قدامو شدها من دراعها قربها عندو وجهو فوجها..." عمرك تحلمي نطلقك راه يا امااا دفنيني و لا ندفنك ،وكلامي غنمشيه عليك وبسيف عليك
دليلة مدارات حتى رد فعل كيف جات تنتر دراااعها منو حسات بدنيا ضارت بيها عياات تكابر وفي الاخير طااحت على وقفتهااا
دليلة طايحة غاايبة عن الوعي لا حرااك ...عصمان تبدلوو فيه لوان و هو عارف مؤخرا صحتها على قد الحاال ووندم علاش مد ايديه عليها ...
في بعض الأوقات الشخص لي كيكون قدامك واخا يكون عزيز الى جرحك بكلامو عينيك يتعماو و طيح عليهم ضبابة ومكتبقاش تحكم فراسك وهادشي لي وقع ليه......متحكمش فراسو ملي قللات من قيمتو ومد يدها عليه ..تصدم ملي شافها مليوحة في الارض وخرج عينيه فيها اما الحسنية عطاتها لغوات
الحسنية ..." تحنات عندها تتخبط ليها في وجها و تبكي " ... وا هياااا بنت گلبي و حلي ليا عويناتك .." هزات عينيها في ولدها لي مازال كيستوعب كيفاش كانت واقفة تا جات طايحة قدامو" .... بغيت ليك موو عريگ تا زيد شووف ليا بنتي ماااالها
عصمان ..." نزل على ركابيه لمستوى ديالها و شد راسها حاطو بين دراعو و يخبط ليها في حناكها بشوية " ... دليلة..دليلة ...." كيمسح على راسو منرفز ".....نتي لي بغيتي هادشي نتييي
"بقى على داك الحال يدخل ويخرج في الهضرة جابو ليها البصلة و حتى الماء و ما فادش معاها ... ناضت الحسنية باش تجيب الريحة توكات على يديها تا بان ليها لون سروالها تبدل و سرد وفيه طبايع داكنين "
الحسنية ...." خرجو عينيها و خبطت فخاضها " ... عصمااااان الدم كينزل منهااا تاا باش ضربتيهااا
عصمان ..." حذر عينيه لفين تتشوف مو وهو يجمع الوقفة طلق منها مأمر مو متخليش راسها في الارض و ناض عيط لياسر في تليفون يجيب ليه الطوموبيل لباب الدار... وداكشي لي كان ناض ومنوضها معاه بين يديه قلبو مزير و مخلوع ... عام بالعرق و خوفو عليها عاد مكيزيد كيطلب الله في خاطرو يحفضها ليه ... غادي كيجري و العقل مرفووع ولكن زغاريد الخير لي وراه ديما يرضوه لبرجو
الحسنية ..." تابعاه وتتلبس في جلابيتها " ... وا وليدي حضر عقلك راه ياسر فين خليتيه ...
" ضار شاف في فمو لي كانو عينيها عايمين بدمووع ... لقى ياسر جاي لعندو كيجري
ياسر ... ياك اودي لاباس
عصمان ... " فاتو و كيهضر معاه " ... ماشي وقت الهضرة خليك مع الوليد تانجيو !!
براكا طوموبيل قدام لكلينيك هبط و هزها داخل بخطواات متساارعة و مو وراه تتجري باش تلحقو ...بانت ليه طبيبة شادة ملف في ايديها مشا قاصدها وكيغوت تا كلشي شافيه
- اجي معااياااا عفاك وغير تهدن ميكون غا الخير
" تبع الطبيبة كيجري دخلو الغرفة وحط دليلة في مكان الكشف و تكلم"
عصمان ..." شاد لدليلة في يديها و الخوف و الندم باين ليه في عينيه ووجهو " ... ممكن نعرف مناش هاد الدم ااستاذة
-واخا هاحنا غنعرفو ؟؟ شنو كتجييك السيدة
عصمان.....لمدام
- واخا اسيدي غير هو تهدن ولا خرج تسنى شوي على برا باش ندير خدمتي
عصمان...."حس بيها كتحرك في يديها وهو يحط يدو على وجها وقرب منها "....دلييلة كتسمعيني !!
- ممكن تقولي ليا باش كتحسي
دليلة ...." شدات في راسها لي ضرها بقوة الضو لي ضرب ليها في عينيها ودوات بثقالة " ... والو غير الدوخة و الحريق تحت مني وكنحس بشي حاجة غتنزل
" بدات كتكشف عليها ا و منها كتعطيها بعض الأسئلة " ... واخا قولي ليا اخر مرة جاتك لي غيگل
دليلة ... غير هاد الايام بالحق تتقطع و ترجع وهاد المرة جاتني بوجع قوي ...
- "شعلات تلفازة حداها ".... مزيان دابا عري ليا الكريشة نشووف ..." بدا يحل ليها عصمان المونطو واخا مبغاش ولكن دار لي قاليه راسو وحطات ليها الطبيبة برودوي ديال الايكو و بدات تتقلب ..واش مشداتك ترويعة ما حسيتي براسك تبدلتي ما والو
دليلة ..." بدات تلوي في عينيها " ... لا محسيت بحتى حاجة علاش ياكما عندي شي مرض
عصمان......"بقلق ".....ياك لاباس ،اش كاين
- "بتاسمات ليها " واالو باس غير جاايكم واحد الضيف هو سباب في هادشي...."شافت في عصمان "......مبروك عليك اسيدي المدام ديالك حااملة
عصمان......" حط ايدو على فمو مبتاسم جنب وكيمشي ويجي في الغرفة ممستوعبش ".......كيييفاااااش ،عودي شرحي ليا كيفاش حاملة ، "مسح على شعرو وتنهد بعمق "......شنو دابا غيولي عندي حتى انا شي ولد يعيط ليا الواليد
" حركات ليه طبيبة راسهاا كتاكد ليه مقال....ضور وجهوو لدليلة باغي يفرح كعاها وهو يلقاهاا بملامح باردة ومدايرة حتى رد فعل ....قر ليها هز ايدها وهي تنترها ليه وبغات تنوض بزز ".
"تشووكا من كلامها ووقف مفيكسي في بلاصتوو ومضيق عينيه ".....
عصمان......كييفاااااااااااااااااش !!
كتفيق قبل كلشي وتنعس ورا كلشي ....كتوحم ، كتوجع، كتراري وكتسهر الليالي، ومكتقول لا عييت ولا تهديت ......هادي هي الام بنسبة لدليلة ديك السيدة لي عاشت عمرها كاملة محروومة منهاا ، وكلمة ماما لي عمرها قالتها ولا خرجت من لسانها .. مكرهاتش حتى هي بحال بنات جيلها تولد وتسمعها منهم وتعوض في ولادها كل ما فاتها ...ولكن خايفة من الدنياا لا تدوور عليها حيت لي عضو الحنش كيخاف من الحبل
دليلة....."بملامح مصدومة كتخاطب طبيبة مكرهاتش تهرس عليها ديك تلفزة لي قداامهاا ...نطقات متاكدة من راسها وعارفة اش كيخرج فمها"........ميمكنش نكوون حاملة تأكدي ادكتوورة مزيااان انا كنشرب الفنييد حيث مبغااش لولاد نهاائياااااا
عصماان ......"تشووكا من كلامهاا ووقف مفيكسي في بلاصتو ومضيق عينيه " .....كيييفااااااااش
دلييلة......" هزات راسها فيه وجوباتو بالخف ".....كيف سمعتي
- "هزات حواجبها " ....ماشي داائماا الفنيد كيتقبلو الجسم ويقدر شي نهار تكوني زگلتي شي وحدة
دليلة........"باستهزااء " .....شفتي هضرة الطبة والكتوبة معنديش معاها ...انا امية وجاهلة وراني متاكدة كيف ما انا متاكدة بلي جالسة قدامك بلي كنت كنشربو يوميا من اول مرة دخل عليا حتال داابا ....
"متحكمش فراسو وستفزاتو وقلللات منو كيفاش كتهضر كأنها حاملة من عدوها ولا جايبة كرش في الحرام ....قرب ليها بلا ميدير بحساب لبلاصة لي هما فيها خشى يدوو حتى تحكم في شعرها وشدها منو بكل قوة منزلها الارض وكيغوت بحر جهدو ".....
عصمان......شكووون نتي وباشمن حق لي تاخدي قرار بوحدك وتبغي تحرمييني من لولاد......
-"تدخلات طبيبة تهدن الاوضاع "....اشنو كدير اسيدي تهدن الله يخليك...هادي راه مصحة ولي قدامك راه مرتك وحاملة بولدك
كلشي كيتحل بالعقل يمكن الهرمونات عندها مخربقة علاش كتقوول هاكدا
" رجعات شافت في عصمان ".....ايه هز ايدك وضرب نيت خليه يطيح على يديك حيت لي بحالك ميستاهلوش يكونو اباء ....
"ضربها بكف ايدوو حتى رعفاات ، مشات طبيبة لجهة الباب تغوت على سيكيريتي وخلاتو قرب ينطحها "
عصمان....." كيضرب في صدرو "....انا لي ولد القحبة مقطر تزوجت وحدة بحاالك ولكن تا دابا باقي الحال...الا مندمتش ديلمك رااني ماشي راجل.....
دخلات الحسنية كتجري وتجاري من ورا مسمعات صوتو ، بان ليها دم في وجه دليلة وعروق ايد ووجه ولدها باينين...معرفات باش تبلات الكومبة لي كانت في دار كملات ليها في سبيطار....مجاتش من ولدها ولا راعات ليه...لا عنقات دليلة وخنزرات فيه "
حسنية......"هزات ايدها في وجهو ".....ادوي المجعوور هاا ؟؟ هاكا ربيتك كتهز يديك على لَوْلِيَاتْ ...اش بغيتي عند البنت قوول
عصمان......." ضغط على سنانو وقاال ".....باقا مشاافت والو ......
"ضرب لبيرو برجليه وخرج ودعاوي مو عليه تابعاه ".....
الحسنية.....سير الله يعطيك غبارة اولد الحراام....هادو هما فعايلك الله يعطيك لگرد
خارج كيمسح فلحيتو سااخط ومنرفز مكيشووفش قدامو كيفاش البنت لي بغاها وصبر معاها و قاتل الدنيا عليها ، تصدمو وتبغي تحرموو من لولاد ...كلامها ليه كان كافي يعيد حساباتو ويرجع خطوة اللور ....قاطع طريقو الطبيبة، وقفاتو صحةة وبغات تشرح ليه بأي وجه كان
- "حركات راسها حايرة معاه "....غير صبر عليها شووية،ديجا حملها بان ليا صعيب غيعذبهاا ويعذبك معاها
"خلاها كتدوي راسهاا وكمل طريقو ...خرج على براااا متكى على طوموبيلتو بعد مشعل ليه جواان يهدنو ولكن بلا فايدة غير كيرجع ليه كلامها في وذنييه كيزيد شعلة فوق شعلات ...."مبغاااش لولاااااد" .....هاد الكلمة لي سمعها منها بزاف ما مرة ما زوج...وكان كيقوول غير هضرة وكان حيت الايام غتدويها ولكن طلع غالط فيها.....طفى طفيتووو في يددوووو تاا حفراات ودارهااا علامةة كل ميشووفهااا يتفكر كلامهاااا وميبقاش يحن فيها
عونتها تا جلسات ومسحات ليها وجهاا....بقات معاها حتى تهدنات عاد سقسات
الحسنية ..." شدات ليها في يدهاا " ... اويلي ابنيتي ياك لباس اش طرا بينك و بينو و شنو قالت ليكم الطبيبة تا نوضتووها شرحي لياا ؟؟!
الحسنية ..." لمعو عينيها والفرحة بانت عليها" ... الله على بنيتي ....."هزات كفوفها لسمها ".....حمدتك يا العالي خليتيني في هاد الدنيا تا سمعت لخبار لي متمنية...." مسحت دموعها لي كانو هبطو بلا متحس " وا سعدي واا فرحي ببنيتي ...و هادي خبار زينة ..."باست ليها راسها وگعدات ليها وجهها ".. ولكن مالو خارج جاعر انا لي عارفة عليه يموت على الدراري الصغار و لي لقاه في الزنقة يهزو ويبوسو و يشري ليه ... علاه كاينة شي فرحة كبر من هاددي مفهمتش علاش دار هاكدا بالحمار لاخر الله يعطيه دگة
دليلة ... " هزت راسها فيها " ... ما دعيش عليه اخالتي هو فرح انا لي مني كلشي رااني معرفتش هاد الولد كيفاش جا و كيفاش انا حاملة مفهمتش
الحسنية ... كي داير هاد الكلام تاع مفهمتش كيفاش جا تاني ؟؟
الحسنية ..." ما حساتش براسها حتى غوتت " ... طلبيييي العفووووووو طلبييييه !!! سمعي نقوليييك هاد الولد عندو ناسو وحبابو .. نهزوه بسنانها و منفرطوش فيه ... راك تتغلطي و غلطك غيرجع ليك غا نتي و ما غيضر حد قدك و خوديها من عندي و من هناااا نهار يطرا لولد شي حاجة ا دليلة نسايني و لا ضوريش تلفتي جيهتي
ما جات فين تجاوبها دليلة حتى دخلات الطبيبة على كلام الحسنية ليها ... وكيف سدات الباب وجهت كلامها ليها
الحسنية ..." وجها مكيتفسر و قالبة خليقتها على دليلة " ... أنا عدوزتهااا
-" جلسات بلاصتها وقالت " ... سمعي ا لآلة مرت ولدك ماشي الى قالت الكلام راه تتعنيه متنسايش الهرمونات لي لاعبين عليها و الوحم لي باديها ... عاد من بعد ما تخرج من عندي خاصها كي تمشي الدار تنعس على ظهرها جيت الجنين راه لي خطر و عاد صحتها ضعيفة ...هادشي لي مخلانيش الزوج ديالها نقولو قبيلة
خرجاات الحسنية عقلهاا مرفووع ،فرحتها مكملاتش بلي سمعات ...غادا وفجنابها دليلة لي كانت كثر منها غادا وهازة فيدها ورقة دوا لي كتبات ليها طبيبة ...خرجو لباركينغ فين كاينين طوموبيلات.....ضورات الحسنية عينيها تمااا ملقااتش ولدها
الحسنية......اويلي هادا فين مشى ؟ "قصدات لعساس لي على برا سقساستوو "......مبانش ليك اوليدي طوموبيل زرقة كانت هناااا
دليلة........" نطقاات مغددة "......شدي طاكسي ورجعي لداارك اخالتي.....اما انااا قادا براسي بغى غا لعب انا غنوريه كيف داير
باش ميهمك لا ليل ولا اش مخبي وديري فيها نفس ومكترضياش وتبغي تزيدي خلفة مع طريق بوحدك خاص يكون سميتك دليلة وطالعة ليك الدنيا فراسك وقلبك عامر....بلاما تفكر نطقات معصبة من ورا معرفتو خلاهم ومشى
دليلة..... شدي طاكسي ورجعي لدارك اخالتي ....ااما انا قادا براسي بغى غا لعب انا غنوريه كيف داير....
الحسنية....."كتولول وتحلف عليه في خاطرها ...".....اويلي ولدي ميمشيش ويخلينا نجيو بوحدنا في طاكسياات و الليل هادا ......"كتقلب بعينيها في شانطي "...ميديرهاش ، ميديرهاش
دليلة ... " كتعض على شفايفها مخسرة سيفتها " ... وعلاش لي ميديرهاش عليه قبة خضرة "تنهدات مخرجة الريح من جوفها ".....هاهو العساس اخالتي يشد ليك طاكسيي الله يعونك
الحسنية.....والله وبالله وديريها منتي بنتي ولا نبقى نعرفك !! تي فين باغا تمشي ينهشووك لكلاب ؟؟
" مرضخاتش لكلامها ابدا ، تكمشات في ذاتها و تمات غادا كتزرب في خطاويهاا والحسنية وراها تعيط وتجري بزز باش لحقت عليها
الحسنية ...."شدتها من ذراعها ".....ومنبقاش فيكم لا نتي ولا ولدي على اخرة عمري تمرمدووني ياااااكي
" قطع كلامهم فران سيك لي ضرب حدااهم حطت الحسنية يديها على قلبها و تنفست " ... الحسنية ....ها ولدي جااا عرفتو ميخليناش ...زيدي طلعي
دليلة ... " بعدات عليها "....معندي فين نطلع !!
عصمان ..." لي كان مهبط الشرجم و كيسمع لكلامهم " ... الحنانة ركبي نتي
الحسنية ..." حيدت درتها و لاحتها ليها على وجها ونتفت نواضرها " ... عليااا بليمين و مااااا تزيدي قدااااامي لا باقي كلامي جا على كلامك و لا الشوفة نشوفها فيييك
عصماان...."كيضرب في الفوولون ويشووف قدامو "...مي طلعي طلقينا بلا ما تفرجي فينا عباد الله راه هاد ضسارة هي لي وصلاتنا لهادشي طلعي خليني نمشي نحط راسي
الحسنية ... و مرتك فين نخليوها واش معندك نفس عليها تاا فين هي رجلة اولد كرشي... "هبط من طوموبيل و جا حدا مو كيدوي صحة و الهضرة على دليلة باش تفهم و تعرف فين وصلاتو بتصرفاتها..."
عصمان....راه ملي مقتلتهاش ولا درت ليها عادة مستديمة مبقيتش راجل .... وباش مرا تمشي كلمتها عليا راه مابقيييتش راجل .....وباش تقوليا في وجهي مبغاش لولاد راه هي لي راجل و أنا لمرا ....و طلعي الوليدة راه معندي فين نزييد كلمة !!....
لي بغا يركب راه لباب و لي مبغاش مغنطلب حد يطلع بزز راه عطا الله طاكسياات ..
دليلة...." عينيها قرطاس فيه خلاتو حتى سالا و عطاتو كلمة معودتهاااش "... راه لي راجل ميقبلش على راسو لحرام
كيف قالتها جات غادا و مخلياهم وراها طلع ليه الدم و عرق جبتهو بدا ينزل تم غادي قاصدها كيغوت ومنفاعل شدها من ذراعها وبلاما يهضر لاحها اللور وسد عليها . " الوليدة قلت ليك طلعي ...!!!
" طلعات الحسنية حداه بلاما تعاود الهضرة ....وهو اتجه لمكان السياقة كيحرك في عنقو لي حس بيه تشنج ..ركب وديمارا بلا تاا كلمةة منوو اما هي مسكتاتش
دليلة ... " كتحير غا بوحدها و تغوت و تنتر والحسنية طلب العفو و الهداية من عند الله " ... لي انيمال كيبقى انيمال وهادي بالفرنسية و سوك بيها فمك
الحسنية ...وااا يهديك الله ابنيتي و حطي قاعك ورتاحي تي تكايسي على راسك شوية راك سمعتي طبيبة ...
" بقات تغوت وهو ما تسوق وليها و لا شاف فيها خلاها على حالها ...مد يديه شعل ليه يتموسق غادي ويدندن معاها حتى وصل قدام مطعم ووقف الطوموبيل
الحسنية ...جيب لينا غا لي بان ليك اوليدي و شوف دليلة اشنو تبغي واش مشهية
دليلة ..." فمها شااعلة فيه العافية " ... ما خصني بماكلة دايرة ريجيم ...
" بلا ميجاوبها ضرب باب الطموبيل تا زعزها بيهم "
الحسنية ..." ضارت عندها " ... بقا ليا نص عمر غيسالي غا مع داك الدرگوم لي عطاكم الله اخخخ يخليها سلعة ..." دورات وجها لجيهة الشرجم منفخة... أما الحسنية بقات حاضية طريق ولدها تا بان ليها راجع حامل و محمل ... ركب في الطموبيل كسيرا نيشان الدار ... وقف الطموبيل حدا الباب و خرج هو اللول عاد تبعاتو مو جارة في يديها دليلة ... كيف دخلو الداردليلة دخلات لبيت والحسنية هزات لعشى وتوجهات الكوزينة تقادو اكا عصمان مشا لبيت لجلاس لقى ياسر مجمع مع باه غير شافهم دخلوو وهو يجمع الوقفة
دليلة.......معندو منين يدوز اعمي غير بصحة....."بتاسمات ليه وناضت من حداه لكوزينة متحججة تعمر ليه كويس اتاي غير باش تهرب من حداهم ....
عصمان كان كياكل و ممسوقش غير بانت ليه خرجات دفع الطبلة برجليه وخرج لزنقة جبد باكية تاعت الگارو يكمي و يبخ محاسش اش كيدير حتى وقفات عليه لحسنية لقاتو جالس في العتبة ...قربت مخرجة عينيها وطالبة سلاكة... سكات ولدها خالعها و في طبيعتو ضنات يريب عليه الدار و الدرب بغواتو ..
الحسنية ..." جلست حداه وحطت يديها على فخضو " ... ولدي حبيبي خبار الخير مالك
عصمان ..." ضور نص وجهو و تكلم " ... مالي مماليش مهنيييي و بيخيييير و ضارب عدو ربها دنيا بركلة
الحسنية ..." حيدت ليه الگارو من يديه و كحزت عليه البكية " ... وا حبيب گليب مو غا عطيني و ذنك و سمعني ... راه اوليدي المرأة فاش تحمل تيتحرقو ليها السلوكة ديال راسها .." باست ليه راسو " ... انا مزاوگة في وليدي لما نوض نعل الشيطان و سايس الوقت تسايس معاك ...ومتزيدش على البنت راه باغا تفشش عليه ومن خقهاا ....نوض حزرها بكليمة ولا زوج ماشي تزيد تفقصها وتبيتها منغصة
عصمان........مبقات ليا هضرة معااهاا...الا كاانت باغا تزوج بسمية وما باغا ولاد مرحباا ....متسالني من غداا نجيب لمرا تانية لي تولد ليا ...
دليلة الجزء التاسع
محتوى القصة
التنقل بين الأجزاء