لعبة الشطرنج الجزء الخامس

2020

محتوى القصة

رواية لعبة الشطرنج الفصل الأول ملحمة السفاحين

وصلات لروسيا بعد ساعات بعيييييييد على البلاصة لي عطاها عنوانها داك الشخص .. حيت ماكاتيق فحد .. بغات تعاود تحقن بولترا بمخدر واخا مزال مافاق ولكن ضوراتها فراسها لقات بلي يقدر يموت لها .. جبدات فاليزتها و لبسات حوايجها و جمعات شعرها و رجعات لعند بولترا ربطاتو مزيااااان واخا راه مزال سوايع هما عاد يفيق ولكن دارت احتياطها خرجاتو من تما غادا و هي جاراه غير بصعوبة حتى بعداتو من البلاصة لي حطات فيها الطائرة .. خرجات فاليزتها حطاتها حداه و غطاتهم بوراق الشجر خلات بوو حاضياه .. هزات الفلوس و تيليفونها و خرجات من تما بالزربة بقات غادا كاتجري حتى خرجات للطريق الرئيسية دارت اوطو سطوب وصلوها حتى للمدينة و بدات كاتقلب على شي لاجونص كايكريو طوموبيلات كرات وحدة و خلصاتهم كاش و كسيرات للجهة فين خلات بولترا و جراتو للطوموبيل دخلاتو و سدات عليه عاودات رجعات للطيارة و مسحات جميع البصمات ديالها شدات دوك الحوايج لي سيفطهوم لها داك الشخص كلهم حرقاتهم عاد مشات من تما .. كسيرات ديك الساعة نيشان لدارها لي كانت بعيدة ب5 ديال سوايع ديال الطريق .. وصلات و شافت فساعتها كان مابقاش ليه بزاف باش يفيق .. وصلاتو للاسانسور باش تنزل لدارها ، وصلات و بقات جاراه حتى وصلاتو لواحد البيت كان عندها خاااوي و مافيه لا شراجم لا والو .. الباب ديالها حديدية بحال الباب ديال الزنزانة .. داك البيت كان فيه بولة وحدة الوسط و 4 حديدات فالحيط مفيكسيين مزيان و لاصق فيهم سلاسل طوااال من النوع الغليض ديال الغرفة فيهم 4 ديال القيود حديدية بحال المينوط و فواحد القنت كان تما سرير صغير و فالجهة لاخرا ديال الغرفة كان فيها مرحاض و لافابو .. هادشي لي كان تما .. ماكان لا زاج لا بلاستيك لا حديد لا حتى حاجة طاحت فبالها يقدر يستغلها .. دخلاتو لتما عاوتاني غير بالجران ماوصل لروسيا حتى جرجراتو مزيان .. لبسات ليه تريكو من الفوق و بقات كادفع فجهدها حتى طلعاتو للسرير دارت ليه دوك السلاسل فيديه و رجليه .. خرجات من تما و سدات ليه بساروت و شافت فيه بنظرة تشفي شحااال و هي كاتتسنا هاد النهار لدرجة جهزات ليه زنزانة وسط دارها .. ها هو طاح بين يديها و تقدر دابا دير فيه لي بغات .. تحداها حتى خلا روحو فرحمتها تحت رحمة انثى .. خبعات الساروت عندها و خلاتو تما تحت مراقبة بوو .. مشات للكوزينة شربات الماو حطات الماكلة لبوو عاد خرجات عاوتاني تشد الطريق ديال 5 ساعات .. وصلات لاجونص رجعات لهم الطوموبيل من بعد مانظفاتها حتى هي من اي علامة توصل بنادم ليها .. مشات لاكار ديال تران و شدات القطار لي كاقربها شوية من البلاصة لي كاتسكن فيها مع العلم اقرب بلاصة كاتوصلها ليها كايخصها ساعتين ديال الطريق عاد توصل ليها 

° في النمسا °

كان ادلر غادي جاي و كاياكل فضفرانو بتوتر ملحووظ

جوزيف : ( متبعو بعينيه ) هادشي علاش معيط عليا؟ السيد راه مبحر مع راسو وسط السمراوات و نتا هنا داير عليه هاد الحالة 

ادلر : ( بغير وعي و غير كايعاود الكلمة ) دارتها .. دارتها .. دارتها ( مشا لعندو جوزيف و شدو من كتافو خرج فيه عينيه و غوووت حتى قفزوو ) داااااااااااااااارتها

جوزيف : ( حيد يديه عليه ) كاااااااالم كاااالم

مايكل : ها نتا قلتيها وا السيد راه كايزها مع راسو مع هادي لي دارتها على شواطئ هاواي و حنا جايبنا لهنا فنص الليل

ادلر : ( بنبرة جنون ) ههههههههههه لا نتوما ماكاتعرفوهاش ... ماكاتعرفوش ديك العقربة قلتها لوو قلت ليييه راها لفعة كاضور غير من تحت التبن ولكن ماتاقش بياااا هههههههههههههههههههههه رجع لكلامي دابا و بنت انا لي عندي الحق 

مايكل : ادلر شكون هادي؟؟؟؟

ادلر : ماعرفتوهاش شكون؟؟ مزال ماعرفتو شكون دارتها.؟؟ ...

مايكل : شكون؟ 

ادلر : اللفعة هي لي شاااداه عندها.

▫غير وصلات للدار ماعقلات على راسها حتى نعسات بقوة العيا مافكرات لا فماكلة لا فوالو .. الليل كامل مانعساتو و زيد عليها الحرارة لي دازت منها و الثقل ديال جسمو باش ماخلاتوش يطيح .. و شحال و هي كاتجر فيه و الحرارة ديال الشاطئ و التجذيف و شحال و هي فالطيارة و عاد سير و اجي بالطوموبيل و ماواكلاش يلاه شربات كاس ديال الما الحاصول تهدات و طاحت طيحة وحدة ترجع فيها طاقتها ماحسات براسها حتى فاقت على الضرب فقضبان الزنزانة.

▪ بدا كايحل عينيه و هو مخصر سيفتو كاتبان ليه الضبابة شوية بشوية حتى توضحات ليه الرؤية .. حس بشي حاجة حاجة مقيداه فيديه .. جلس فوق السرير و هو كايحس براسو ناعس عام ، بقا كايكتاشف البلاصة لي راه فيها بانت ليه باب الزنزانة و من الفوق يديه و رجليه مشدودين بالسلاسل .. دور وجهو على الغرفة لي فيها كانت كاتبان بحالا راه فشي سجن بالسلاسل اول حاجة فكر فيها هي اشمن سجن كاين فيه و اشمن تهمة لفقات ليه باش خلاتهم يشدوه بالسلاسل بحال شي داعشي .. كايحس بحلقو ناشف .. صوت القطرة ديال الصنبور لي كايسيل دارت ليه الحريق فالراس .. شاف فحوايجو لقاهم مبدلين بسروال و تريكو مخططين ابيض و اسود عاود تبادر فالذهن ديالو اشمن سجن لي كايشد السجناء و هما مغيبين؟ و اشمن سجن كايبدل الحوايج للسجناء ديالو؟ و فين ادلر؟ فين هو بعد و فإينا دولة كاين؟ كايحس براسو نعس بزااااف شحال داز ديال الوقت و هو ناعس؟ واش سنين؟ علاش هو هنا؟ و فين جا هاد السجن؟ الجو هنا باااااارد بزااااف .. واش غير دخلاتو للحبس و مشات بلا ماتودعو؟؟؟؟ .. علاش غاتودعو اصلا؟ اش بينو و بينها باش تودعو؟ خسر فالتحدي و ها هو خلص دخلاتو للحبس و مشات كاع هاد الافكار بقاو كايتضاربو ليه فراسو .. ناض من بلاصتو بخطوات ثقيلة متاجه لباب الزنزانة و بدا كايضرب فيها بالحديدات لي مكبلين يديه 

بولترا : ( بصوت عالي و حرش فنفس الوقت ) ادلررر .. جوزززيف .. مايكككل .. بقا كايضرب و يضرب و يضرب حتى سمع صوت خطوات جايين لجهتو كان كايتسنا هاد السجان لي غايدخل حتى تحلات باب صغيرة و ضرب فيه الضو حتى غمض عينيه .. كان ضو عادي غير ضو الدار بدات كاتوضاح ليه الصورة حتى وضاحت ليه مزيااااان و بانت ليه هي بقامتها .. كانت جامعة شعرها بشكل عشوائي لابسة سورفيط فالازرق و الابيض على لون الثلج و البحر و الما .. شعرها فازك باين فيها يلاه دوشات .. جات و هي هازة فيديها كرسي .. تفاجئ فاش شافها بل تصدم و عقلو حبس ماطاحتش ليه فبالو نهائيا بلي تقدر تكون موجدة ليه زنزانة .. ماتوقعش يشوفها نهااااائيا

▫حطات الكرسي بعيد شوية على باب الزنزانة و جلسات فيه بالمقلوب .. حطات يديها عليه و تكات راسها على يديها و عينيها مفيكسيين فيه ... بعد من الباب بخطوات ورائية و هو كايشوف فالسقف و كايضحك

جيكساو : ( بنبرة هادئة ) رتاحيتي من السفر 

بولترا : ههههههههههههههههههههههه ماكنتش عارفك كاتبغيني لهاد الدرجة .. معدبة راسك و مسفراني و موجدة زنزانة على قدها ليا .. تعدبتي شوية

جيكساو : كلشي يهون عليك

بولترا : الديكور و الاثاث و الاطلالة و الارضية ( بدا كايصفق ) ذوقك راقي ولكن كاين واحد ديفو صغير .. الروبيني

جيكساو : ( بإبتسامة ) كان صالح و انا خصرتو باش يعزف لك كل ليلة و ماتحسش بالوحدة

بولترا : ناوية تقتليني هنا؟ ولا تحبسيني؟ ولا ديري لي التعذيب؟! ( دار راسو بحالا عاد تفكر شي حاجة ) كاين خيار اخر .. ممكن تكوني باغا نتزوجو و نعيشو الحب 

جيكساو : ( بنفس النبرة ) علاش كاتقاوم احساس الخوف من المجهول

بولترا : ( بإبتسامة ) كاين شي حد غايخاف من بلاصة موالفها

جيكساو : ( ناضت من بلاصتهت و قربات للباب ) يعني عاجبك الحال هنا

بولترا : عاجباني البلاصة و عاجباني الرفقة 

بدا كايقرب للباب ديال الزنزانة حتى وصل ليها و حط يديه على قضبان الباب و هو كايشوف فعينيها ما فاق براسو حتى تصعق بالضو لي ضرباتو ليه فالحديد حتى رجع مدفوع اللور و يديه تحرقو ...


•°• واقف فالسفينة لابس سروال تجينز مع قميجة كحلة محلول ليها جوج صدايف اللولانيين و داير نظاظر ديال الشمس و التيليفون فودنيه .. هاز فيديه صورتها و على وجهو باينين ملامح الغضب غير كايسمع اش كايقول ليه المتصل و مع كل كلمة كايقولها المتصل ملامحو كايكسوها تعابير الغضب و العصبية

هالك : ( ضاغط على فكو بسنانو ) كيفاش مالقيتوش سميتها فسجل المسافرين 

المتصل : هادشي لي كاين ا سي هالك .. قلبنا فسجل الرحلات ديال اخر 24 ساعة فالسفن و الطائرات لي غادرات الولايات المتحدة ولكن مالقيناهاش . حتى من السكان المحليين وريناهم صورتها ربما يكون شي واحد وصلها بالقارب ولكن حتى واحد ماوصلها

هالك : شفتو الطائرات لي عاطيينهم تصريح باش يدوزو

المتصل : لا مزال ا سي هالك 

هالك : سولتو السكان المحليين ديال الجزيرة واحد بواحد

المتصل : سي هالك بخصوص هاد القضية كاين مشكل فالصورة حيت ماواضحاش و هادشي لي صعب علينا الموضوع 

هالك : ( كايكرز على كلماتو ) غادي تجبد ليا بلاصتها من هنا 48 ساعة .. ماجبديتهاش حسب سنانك للمرة الاخيرة حيت فاش غانلقاك غانحيدهم لك بلا لقاط 

قطع عليه و هز تصويرتها فيدو .. الصورة لي قطعها من الفيديو لي صور لها .. مالقاش شي صورة خرا من غيرها حيت فاش مشا يقلب فتسجيلات كاميرات لوطيل لقا بلي التسجيلات ديال اخر اسبوع مفقودين و حتى من التسجيلات ديال المطار ماكانتش باينة فيهم بداو التساؤلات ديالو من جهتها شكون لي كايعاونها و كيفاش قدرات توصل لتسجيلات المطار مع ان المطار حراستو اكثر من مشددة .. مايمكنش توصل لهم غير بوحدها من غير لاعاونها شي حد .. ها هو عاوتاني حتى طلاقاها ولكن غبرات بحال الشبح بدون ماتخلي اثر من موراها .. سمية مزورة و شخصية مزيفة و فين مشات حتى واحد ما عارف من غيرها و من غير لي عاونها .. عاود صونا ليه التيليفون

المتصل : سي هالك لقيت خبر جديد

هالك : لقيتوها

المتصل : لا ولكن يمكن عرفنا شكون لي عاونها .. رباس.. ... قبل مايكمل هضرتو قاطعو حيت قبل مايكمل السمية عرفو علامن غايدوي

هالك : سيفطتك تقلب لي عليها ولا على داك سكيوباط

المتصل : غير سمعني ا سي هالك .. فنفس الوقت لي ختافات فيه انسة مارلين حتى هو غبر ليه الاثر .. فاش مشيت باش نسول الموظفين ديال الاستقبال لقيت واحد الشخص حتى هو كايسول عليه و قالو ليه بلي شافو انسة مارلين مع رياس شحال من مرة فالحفل و اوقات خرين قلت ممكن تكون شي صدفة 

عقد هالك حجبانو و بقا كايرجع ذاكرتو اللور .. لاحظ بلي واقعة شي حاجة بين بولترا و جيكساو كاتجمعهم شي حاجة ولكن ماكانش عاطي اهتمام لهاد القضية و كيفاش قضية اختفاؤو حتى هو 

هالك : تبع داك لي كايسول عليه و عطيني التفاصيل ديال اش كايدير بالتدقيق 

المتصل : واخا ا سي هالك

••• من مور ما تقطعات خبار بولترا على ادلر و تأكد بلي دابا غايكون بين يدين جيكساو لي كانو مقللين من الشأن ديالها و قالو مافيدهاش .. صدر جوزيف و مايكل و حجز فأول رحلة غادا للولايات المتحدة باش يقلب عليه فجزيرة هاواي بنفسو بلا خبار حد .. جا لجزيرة هاواي و اول حاجة دارها مشا سول الاستقبال عليها ولكن كان جوابهم نفس الجواب لي عطاو لداك الشخص لي سيفطو هالك 

موظفة الاستقبال : للاسف ا سيدي ماعندنا باش نعاونوك .. التسجيلات تسرقو من غرفة المراقبة 

ادلر : نعتي لي فين كاينا غرفة المراقبة 

موظفة الاستقبال : مانقدرش ا سيدي هاديك كاتعتابر من خصوصية الفندق ... رجع باللور و دار لها بيديه اشارة زعما ماشي مشكل مع ابتسامة بلهاء

ادلر : ماشي مشكل .. غانقلب عليها راسي 

خلاها و مشا كايقلب فلوطيل شد طريق وحدة متاجه فيها لبلاصة متوقع غاتكون تما غرفة المراقبة .. كانت جنب المكتب ديال البيرو فالطابق الاول و فعلا لقاها .. كانو جالسين فيها 2 اشخاص ...


عطاهم قدر ديال الفلوس مغري لي مايقدروش يرفضوه شرط يخليوه يقلب فالكاميرات ديال التسجيل 

المراقب 1 : ماغادي تلقا والو حيت راه السجلات تسرقو 

ماكانش كايسمع ليهم حيت كان ملهي مع لوغديناطوغ سالا منو و شاف فتيليفونو بتاسم ابتسامة جانبية و ناض من الكرسي ضرب على كتف واحد من دوك جوج و خرج من تما مباشرة للغرفة ديال الغسيل و بقا كايقلب فالحوايج ديال الموظفين لي خاصهم التصبين هز لبسة ديال موظف لبسها وخرج من تما كايقلب على شي كاميرا كاتشوف فالباب لقا وحدة فواحد الكولوار .. توكد بلي ماكاين حد و مشا لجهتها طلع فوق واحد الفاز حيت كانت عااااالية مقنتة فالسقف بدا كايخربق لها السلوكة ديالها و جبد تيليفون ديجا لاصقين فيه واحد 2 سلوكة برونشاه معاها و لصقو من مور الكاميرا .. جبد تيليفونو اكتيفاه معاه كان داك التيليفون بمثابة كارط سي دي باش يسترجع فيها البيانات ديال ديك كارط ميموار و اي حاجة تسجلات فهاد الاسبوع .. اكتيفا واحد لوجيسيال كان قادو فتيليفونو و حتى فواحد لوغديناتوغ كان فغرفة المراقبة شوية بشوية بداو كايتجبدو و كايدوزو لتيليفون لي برونشاه مع الكاميرا بقا نص ساعة و هو واقف تما حتى وصلوه جميع التسجيلات .. حيد داك تيليفون من تما و رجع لغرفة الغسيل بدل حوايجو و شد شومبر باش يتفرج فدوك التسجيلات و يقدر يعرف وجهها و ايمتا خرج بولترا و كاع داكشي لي غايحتاج 

◾ دازت 12 ساعة من اخر مرة شافها فيها من الساعة لي ضرباتو بالضو مابقات بانت ليه حتى من الماكلة ماجابتهاش ليه .. تكا على داك السرير و دار يديه من مور راسو اخر همو هو اش غادير فيه .. الحاجة لي كايفكر فيها هو شنو اخرة هادشي .. سمع صوت خطوات جاية لجهة الزنزانة و ناض من بلاصتو كايترقب فوقاش غادخل و اشمن لعبة غاتلعب معاه هاد المرة .. بانت ليه داخلة بخطوات بطيئة و خاشية يديها فجيبها وقفات حدا قضبان زنزانتو ملامحها كان فيهم تعابير العبث ناض من بلاصتو و خشا يد فجيبو كايتمشا لجهتها بكل ثقة .. تقدر تخلع اي واحد ولكن هو ماكاتخلعوش بالعكس عاجبو هاد التلاعب و الاجرام لي فيها .. قرب لها بزاف حتى ولا فاصلهم غير القضبان .. شد فالباب ديال الزنزانة و زير عليها و عينيه مفيكسيين فجيكساو و الابتسامة الجانبية على فمو .. كايوريها بلي واخا تعاود تضرب بالضو ماغاديش تمنعو يدير اش باغي يدير

جيكساو : ماكاتتعلمش الدرس لي داز عليك

بولترا : ( كايضحك و يضرب فالحديدة ضربات خفيفة ) ههههههههههههههههههههههههههه اثينا اثينا اثينا .. مابقيتيش كاتصبري على فراقي باش طلي عليا كل دقيقة ...زادت قربات لعندو و تكات راسها على الحديدة 

جيكساو : كاتحس بيا 

بولترا : كيفاش مابغيتينيش نحس بيك و نتي سميتك محفورة فقلب.. بي ... فاش كان كايهضر عاودات ستغلات الفرصة ولكن هاد المرة ماضرباتوش بالضو .. حقناتو بمخدر و ماشي اي مخدر .. هاد المخدر ماكايخليهش ينعس ولكن كايشلل ليه جميع الاطراف ديال الجسم ديالو و كايخليه بحال السكران كايهلوس

جيكساو : و غانزيد نعمقها باش عمرك تلقا لها الدوا .. غاتبقا تابعاك فحياتك بحال خيالك

حيدات منو ليبرا و خلاتو شاد فالبلاصة لي تحقن فيها

بولترا : اش درتي

جيكساو : احلام سعيدة 

كان كايحس براسو مزيان شوية بدات كاتضبب ليه الرؤية و كاتعاود توضاح ... بقا كايضور راسو باش يقاوم داك المخدر .. مشا لجهة لافابو و خشا راسو تحت الما ولكن المخدر بدا كايعطي بالفعل مفعولو .. فاش حس بلي اطرافو كايتشللو عليه مشا للسرير ... مشات جابت واحد الشانطة صغيرة و عاودات رجعات .. حلات الباب و دخلات لعندو دار فيها خير كبير منين مشا برجليه للناموسية بلا ماعاد تحتاج تجرو .. جلسات حداه و حطات الفاليزا بدات كادوز يديها على جبهتو بحنان 

جيكساو : ماتخافش ماغانقتلكش 

بولترا : ( بصوت تقيل ) ايلا كنتي مسيحية طلبي من المسيح باش ماطيحيش فيدي حيت نهار لي غاطيحي بين يدي غانعدبك

جيكساو : شششش وفر الجهد ديالك مزال غاتحتاجو .. حلات الفاليزا و جبدات كاميرا علقاتها فباب الزنزانة باش تصور اش كادير فيه و رجعات جلسات حداه قطعات ليه الحوايج الفوقانيين و هزات المشرط و للمرة الثانية رجعات كاتحفر سميتها فصدرو و فنفس البلاصة .. الفرق لي كاين هو ديك المرة كان غايب ولكن دابا حال عينيه و كايشوفها كاتشرط فيه ولكن ماقادر يدير والو اطرافو مشللة و هو حاليا ماشي فوعيو .. سالات ليه و عقمات ليه الجرح و خيطاتو ليه هي هاد المرة .. حيدات ليكات و نظفات البلاصة و هزات داكشي رجعاتو لبلاصتو موراها مشات لعند بوو عطاتها ماكلتها و مشات للكوزينة قادات ليها ماتاكل و نعسات

°•° عند هالك 
وصل لدارو دوش و عاود عيط على داك الشخص باش يعرف الجديد

هالك : تبعتيه

المتصل : تبعتو ولكن كاينا شي حاجة غريبة من مور هاد الشخص

هالك : علاش اش وقع ... عاود ليه المتصل اش وقع من الوقت لي تبعو فيه حتى لدابا

المتصل : يعني كاين احتمال كبير تكون مع داك الشخص لي كايقلب عليه

هالك : قلتي سترجع التسجيلات

المتصل : وي ا سي هالك و قدر يلقا صور واضحة ليها لي ممكن يفيدونا

هالك : جيب تصاور لي خرجهم و خليهم عندك

المتصل : واخا ا سي هالك 

هالك : نتسنا خبار جديدة .. يلاه قطع عليه و هو يعاود يصوني ليه التيليفون 

المتصل 2 : هالك لقينا بلي خرجات طائرة غير مصرح بيها فهاد 24 لي دازت

هالك . و عرفتو شكون مولاها

المتصل 2 : الطائرة تابعة لواحد المافيوزي كبير وبكن ماشي هنا فين كاينا الصدمة 

هالك : اش لقيتي

المتصل 2 : داك المافيوزي كاين فروسيا و هو كاع ماخرج من روسيا هاد الاسبوع كامل يعني

هالك : ( بخبث ) هو لي عاونها باش تخرج من هنا 

●● كان ادلر جالس فالطيارة و فيديه نفس المكعب لي موالف ديما كايلعب بيه و قدامو كان حاط صورة جيكساو و كايشوف فيها ولكن عقلو كايفكر فحوايج خرين .. حط داكشي من يديه و جبد الطابليط ديالو بدا كايقلب فقائمة جميع البحيرات لي كاينين فروسيا و كايشوف اينا بحيرة غايبدا بيها .. حدد البحيرات لي غايزورهم فنهار واحد و دار عليهم علامة عاود حط الطابليط و هز صورة جيكساو كايشوف فملامحها و كايحاول يقرا تعابير وجهها باش يقدر يتعرف على شخصيتها و يعرف الكاراكطير ديالها كي داير .. ولكن فديك الصورة مالقا مايقرا حيت ملامحها خاليين من التعابير و حتى فالتسجيل نفس الشي الحاجة لي عرف من هادشي هي تصرفاتها غير متوقعة و داكشي لي غادير مع بولترا غير متوقع .. وصلات الطيارة لروسيا - مدينة سوتشي ماحجز فحتى شي فندق غير حطات الطيارة و مشا بدا البحث ديالو ... اما عند هالك منين حط جيكساو فراسو ماجلس .. حدو بدل حوايجو دوز النهار كامل و هو كايدير ابحاثو حتى وصل لراس الخيط .. لقا بلي داك المافيوزي ماعندو حتى علاقة بجيكساو و عمرو تعامل معاها و الشخص لي عاونها هو واحد من اعوانو حيت فاش قلب فضواصاه لقاه هو لي كايعطي الطيارة لمعارفو بلا خبار المافيوزي لي خدام عندو يعني كايخدم من مور ضهرو .. داكشي علاش هالك من مور ماعرف هادشي اول حاجة دارها هي شد الطيارة ديريكت لروسيا.

▫كانت واقفة من مور قضبان زنزانتو متكية عليهم و بوو فوق كتفها .. دازت 8 ديال السوايع نعسات و فاقت فيها .. فطرات فيها .. وجدات ليه الفطور ديالو فيها و هو مزال ما فاق من مور الهلوسة لي كانت شداتو نعس ولا ممكن يكون فقد الوعي ولا ممكن يكون مات .. ماتأكداتش من هادشي 

بوو : ( صوت الضبح ) 

جيكساو : ماغايموتش ا بوو 

بوو : ( صوت الضبح ) 

جيكساو : ( بقات كاتلعب بشعرها ) وجدت ليه الفطور باش يرجع صحتو ا بوو حيت ماخاصوش يموت خاصو يصح ... سمعات صوت السلاسل تحركو و قلبات عينيها لجهتو

▪ بدات كاضربو الفيقة على رنة صوتها و القليل من الالم لي كايحس بيه فصدرو .. مابقاش عاقل اش وقع من الوقت لي حس بالدنيا كاضور بيه و مشا للسرير .. ولكن قدر يعرف اش وقع و اول حاجة توقعها هي عاودات بصمات حفرات سميتها فصدرو و فوق قلبو .. حرك يديه حس بيها منملة بسبب التخدير و نفس الشي لرجليه .. اول جملة قدر يفرزها من هضرتها هي خاصو يرجع صحتو

بولترا : ( متكي مغمض عينيه و كايبتاسم ) كاتخافي عليا

جيكساو : ( هزات بوو فيديها و بدات كاتحك لها راسها بصبعانها ) تبغي نعاود لك واحد القصة 

بولترا : ايلا كانت غاتخليني نبقا كانسمع رنة صوتك لمدة طويلة ماغايكونش عندي مانع ا اثينا

جيكساو : فواحد الوقت كانو واحد 2 صيادة ضلام عليهم الحال فالغابة بقاو غاديين وسط الشجر و الليل حتى لواحد اللحظة و هما يشوفو واحد الضو .. بقاو تابعينو حتى وصلو لواحد الدار .. و من داخل ديك الدار كان كايتسمع صوت انثوي ديال شابة كاتغني بواحد الصوت ناعم .. الصياد اللول قال للثاني يدخلو لعندها حيت باينا كاينا بوحدها و هادشي عرفوه غير من صوت الراجل لي غايب من الدار ولكن الثاني عتارض الفكرة و قاليه يرجعو للقرية .. الصياد اللول صمم على هضرتو و ماتراجعش عليها و الثاني حتى هو صمم على هضرتو و ماتراجعش عليها .. تفارقو و واحد مشا و الثاني ماقدرش يقاوم غريزتو حتى لقا راسو قدام الباب ديك الدار و كايدق فيها حتى تفتحات ليه الباب و تصدم .. عرفتي شنو لقا؟ ..


عرفتي اش لقا؟ 

بولترا : ( بإبتسامة صغيرة ) وصلتي للجزء المشوق

جيكساو : لقا بنت عشرينية زوينة بزاف زينها زين الحوريات

زير بولترا على صدرو بيديه باش يحبس الحريق لي عاد ولا كايحس بيه و ناض لعندها بخطوات متثاقلة كايحس براسو كايتمشى على ارض متحركة حيت التخدير يلاه بدا كايمشي مفعولو .. وصل للقضبان و قابل عينيه مع عينيها بنظرات ديال واحد ماخايفش منها نظرات جد شجاعة .. هز يديه و و خرجها من القضبان ناحية وجهها باش يقيس بشرتها ولكن بعدات 

بولترا : ماغاتكونش بحال زينك

جيكساو : مزال ماكملت القصة

بولترا : كانظن منين وصلتي للجزء المشوق الكمالة مابقاتش مهمة 

جيكساو : مابغيتيش تعرف اش وقع من بعد؟

بولترا : طاحو فغرام بعضياتهم و كتاشف بلي هي جنية

جيكساو : ضايفاتو فدارها و طيبات ليه العشا و كلا بلا مايعرف واش تعشا بلحم الغزال ولا لحم الخروف ( ميلات راسها ) ولا لحم بنادم .. ماكتافاش غير بالعشا و طمع كتر .. طمع فلحمها كوجبة جنسية .. ولكن قبل مايوصل لمبتغاه غاب و وصلات هي لمبتغاها .. دبحاتو و سلخات لحمو بحالو بحال لي قبل منو فالأخير صدقات كانيبال .. ( رجعات قادات راسها و هضرات بنبرتها الهادئة ) هدا هو الجزء المشوق 

بولترا : قصة مزيانة ينعسو بيها الواليدين ولادهم ... عاود هز يديه و بغا يقربها لوجهها ولكن بعدات و نظراتها ماكايبشروش بالخير 

جيكساو : هدا همك؟ الزين؟ .. ماكانظنش فالقبر واش غاتلقا الزين .. مشات و خلاتو و هي كاتتوعد ليه بالعذاب فاليامات الجايين 

داز اسبوع كامل على غياب بولترا و حتى واحد ماعندو شي خبار جديدة عليه فهاد الاسبوع كانت جيكساو كاتعطيه اي حاجة فيها الفيتامينات باش يرجع صحتو دغيا و فأخر وجبة ليلية كاتنومو بيها باش كاتعالج ليه الجرح تفاديا للالتهابات لي تقدر تكون حتى وصلات لواحد الليلة لي وقعات حاجة ماكانتش متوقعاها 

▫وجدات ليه الدجاج باش يصح دغيا و دوزاتو ليه هو و دوا و الما من باب صغيرة فالقضبان بحجم بلاطو .. هزو و رجع لبلاصتو ولكن ماهضرش معاها هاد المرة .. حتى هي ستغربات حيت ماموالفاش ليه بدات كاتشوف فيه بنظرات شك ماغايكونش مل بالهضرة ولكن شي حاجة فبالو .. كلا و شرب الكينة و مشا غسل البلاطو و طبسيل و رجعهم ليها و رجع تكا فبلاصتو و راسو للحيط عاطيها بالضهر مشات من تما حطات داكشي فالكوزينة و بدات كاتحسب فالوقت لي يقدر يكون نعس فيه .. دازت ساعة هزات علبة الاسعافات و دخلات لعندو .. سدات الباب بالساروت و عطاتو لبوو لي كانت خارج الزنزانة و مشات جلسات حداه حلات العلبة و بدات كاتحل ليه القاميجة .. حيدات ليه الفاصمة القديمة و نظفات ليه الجرح و عاودات دارت ليه فاصمة جديدة سالات و يلاه بغات ترجع تسد ليه القاميجة و هي تحس بجوج يدين جروها للتحت حتى ولات الحاجة لي كاتفرقها على لحمو هما الحوايج .. و فظرف ثانية رجعها تحت منو و يديها شدهم بيديه .. قابل عينيه لي كايحاوطوهم هالات ظلام مع عينيها و بدا كايضحك بخبث شوية بشوية حتى بانو سنانو لي كان شاد بيهم الكينة لي ماشربهاش 

بولترا : ( ميل راسو و عينيه فيهم واحد النظرة خبيثة ) ديما تيقي بالشك ديالك .. حيت ماكايكدبش ا سفاحتي

ماعطاتوش الوقت لي يزيد يهضر فيه .. ماجا فين يستوعب اش وقع حتى كان طايح و مخنوق .. ضرباتو براسها بضربة قوية لنيفو ماطلقش منها و عاودات زادتو ضربة اقوى حتى طلق منها ماجا فين يستوعب حتى لقاها خانقاه بسلسلة لي مربوطين بيها رجليه و مزيرة عليه بحالا فعلا باغا تقتلو هاد المرة .. واش هادشي كامل غير حيت حاول يتقرب منها؟ .. حتى قالت صافي راه تحت رحمة يديها حتى لقات راسها مخنوقة بالقاميجة .. كل واحد فيهم باغي يعدم الثاني و كل واحد فيهم رقبتو تحت رحمة الثاني .. النفس ديالهم مابقاتش كاطلع ولكن حتى واحد فيهم ماباغي يتنازل و يخلي الثاني يتنفس 

بولترا : ( بنفس متقطعة ) ايلا كنت غانموت غاتموتي معايا 

جيكساو : ( وجهها ولا حمرر دليل على الاختناق ) ماكانخافش نموت .. كانخاف نخليك مورايا

بدات كاترخف ليه حتى ظن بلي غاتستسلم .. طلقات من السلسلة و هو ستغل الفرصة و نعسها .. بدات كاتقلب على فعلبة الاسعافات حتى لقات علاياش كاتقلب .. هزات ليبرا و ضرباتها ليه فعنقو خلاتها ليه مخشية و بدات كاتحاول ترخف ديك القميجة على عنقها فإنتظار يغيب 

بولترا : ( بإبتسامة استهزاء ) المخدر هو المهرب ديالك الوحيد 

جيكساو : وقتك مزال ماوصل باش ننسف رقبتك 

بدا كايرخف القميجة ماشي بسبب التخدير ولكن حيت ماباغيش يقتلها و فالاصل ماكانش ناوي يقتلها دار ردة فعل طبيعية لا غير .. شوية بشوية بدا المخدر كايعطي مفعولو كايحاول يقاومو ولكن بدون جدوى حتى طاح مغيب ...


هزات العلبة وعيطات لبوو عطاتها ساروت و خرجات و خلاتو تما فالارض هكاك حطاتها بشكل عشوائي و حيدات سبرديلتها و تقاشرها و هبطات للتحت تخشات فالما بحوايجها فأعماق البحيرة .. بهاد التصرف لي دار فكرها فواحد الحاجة فكرها بأول عملية قتل دارتها و هي باقا بنت صغيرة .. دارتها دفاعا عن متشردة بحالها .. دارتها حيت واحد لاباس علسه بغا يغتاصب ديك البنت .. قتلاتو بلا ماتفكر فشنو غايطرا من بعد و ها هي دابا تحولات لألة قتل لصنارة الاغنياء .. وصلات لبلاصتها المفضلة وخوات دماغها باش تمارس رياضتها 

•• فجهة خرا فروسيا ••

كانو واقفين 2 طوموبيلات كوحل فطريق خاوية و الوسط واقفين 2 رجال بجوجهم مكلضمين .. واحد متكي على طوموبيل و الثاني واقف قدامو و خاشي يديه فجيبو 

•••••••• : قالو لي كاتقلب عليا 

هالك : باغي عنوان واحد الكليانة ديالك 

•••••••• : ماكانتعاملش مع العيالات

هالك : ( خاشي يديه فجيبو ) تقدر تعتابرها خدمة صغيرة ليا كلشي بالمقابل

•••••••• : اش ضمن لك ماغانقتلكش و ندفنك هنا؟!

هالك : الكليانة ديالك لي كاتعامل معاها مطلوبة دوليا .. اش ضمن لك ماغانشكيش بيك للبوليس و تموت معفن فأبعد حبس .. تقاد داك الشخص فالوقفة و قرب لهالك حتى لودنيه

•••••••• : ( بهمس ) فضومين ديالنا الواشي كايموت مشنوق بالقرطاس .. ( رجع لبلاصتو ) رجع منين جيتي فكلا الحالتين غاتموت يا على يدي يا على يدها 

خلاه واقف و ركب فاللوطو ديالو و مشا .. طوال هاد الحديث لي ضار بيناتهم كان واحد الشخص كايتسنط عليهم بدون مايحسو .. هالك كان باغي بشدة يقتلو ولكن هاد الساعة ماشي من صالحو يبقا متبوع حيت عندو ما اهم .. يلاه جا يركب فطوموبيلتو و هو يسمع واحد الهضرة لي خلاتو يوقف و تتوسع ابتسامتو

""""""" : العنوان لي بغيتي عندي .. ضار لعندو باش يشوف شكون صاحب الصوت 

هالك : شكون نتا

""""""" : ماشي مهم شكون انا .. المهم هو شنو عندي

هالك : و شنو عندك؟

""""""" : عندي العنوان لي كاتقلب عليه 

هالك : و نتا باش عرفتي العنوان لي كانقلب عليه

"""""" : حيت عندي جميع العناوين لي تقدر تحتاجهم 

هالك : عنوان جيكساو.!

"""""" : عندي ولكن شحال غاتقدر تعطي عليه 

هالك : شحال كاطلب

"""""" : من اللكنة ديالك باين من امريكا .. باغي مليون دولار كاش

هالك : طلبتيها قليلة .. ارا العنوان و تشد فلوسك غدا

"""""" : اش بان لك نعطيه لك كادو؟ .. نشوف الفلوس و نعطيك العنوان 

هالك : ( دوز يديه على الذقن ديالو بعصبية ) تسنا ... هز تيليفونو و دوز نمرة ديال واحد الشخص باش يجيب ليه مليون دولار عطاه العنوان ديال فين كاينين و جلسو كايتسناوه .. دازت ساعتين عاد جا الشخص بالفلوس عطا لهالك الفاليزا 

""""""" : ارا لي الفلوس نشوف واش مزورين

هالك : ( العنوان ) 

"""""" : عطيني الفلوس و غانقولك فين ساكن

هالك : ( بإستغراب ) شكون.!

"""""" : جيكساو 

حط هالك الفاليزا فوق طوموبيل و خشا يديه فجيبو جبد شي حاجة و بدا كايقرب من داك لي قدامو و كايلعب بشي حاجة فيديه قرب ليه و جرو لعندو و خشا فيه موس صغير من دوك لي كايتطواو و بقا كايخشيه و يجبدو يخشيه و يجبدو تسبب ليه فقرابة 36 طعنة بيه بكل شراسة و عنف حتى خلاه جثة واقفة كلها ثقوب .. لاحو للأرض و مسح جبهتو و عاد تنهد بإرتياح برد فيه الاعصاب ديال داك المافيوزي لي ماقتلش و برد فيه اعصاب هاد تعطال لي عطلو هاد خونا بالكدوب ديالو لي كون مازلقش فالهضرة و هضر على جيكساو بصيغة الذكر كون راه نصب على هالك 

هالك : ( شاف فداك لي جاب الفلوس ) عاوني ندفن هاد جيفة فشي بلاصة فهاد الخلا 

ماكس : ماكانش خاصك تقتلو هادشي غادي ينوض لك صداع مع المافيوزي

هالك : خاصو يشكر المسيح حيت هنيتو من خائن كايخونو .. خاص نقلبو على شي واحد من رجالو يكون ضعيف يعاونا

ماكس : و يكون ديما معاه .. ماكانظنش غانلقاوها بالساهل

هالك : الحاجة الثمينة ضروري كاتكون الصعوبات باش توصل لها

دفنو الجثة فبلاصة ماكاتوصلش ليها الرجل و مشاو من تما .. دازت على هاد الحادثة شهر فهاد الشهر قدرو يلقاو واحد من المرافقين ديال داك المافيوزي لي ضعيف كان ساهل يتشرا بالفلوس كلفوه باش يتجسس على داك المافيوزي اما ادلر قلب فجميع البحيرات لي فروسيا ولكن مالقا والو مالقاش ليها الاثر نهائيا داكشي علاش رجع للنمسا باش يعاود حساباتو اما عند جيكساو كانو حوايج خرين لي واقعين .. جوعاتو 3 سيمانات و ماخلاتش ليه و لو فتات ديال الخبز باش ياكلو و عطشاتو اسبوع كامل و قطعات عليه الما .. بدات كاتستنزف ليه قوتو و طاقتو شوية بشوية .. حتى فعلا ولات قوتو كاضعاف ماشي بسبب الماكلة و انما بسبب الما ولا كايحس بواحد العطش بحالا راه فشي صحرا داكشي علاش ولا كاينعس بزااف باش مايزيدش يستنزف الطاقة لي باقا ليه و يقدر يبقا عايش لأطول فترة حتى السبور مابقاش كايلعبو ...


▪ بدا كايحل عينيه من مور مانعس النهار كامل لقاها واقفة قدامو و فيديها قرعة ديال الما 

بولترا : ( بإبتسامة ) توحشتيني ا سفاحتي

جيكساو : ماننكرش بلي بهرتيني منين باقي اللسان عندك خدام 

بولترا : فادوني البروتينات لي عطيتيني فأخر اسبوع 

جيكساو : كانظن الجسم ديالك ستهلك جميع السكريات و الكربوهيدرات لي كانو فيه فهاد الاسابيع لي دازو و لاماغلطتش غاتكون حتى نسبة البروتين فالجسم ديالك فالجسم علاين تسالي هادشي واضح من سبور لي مابقيتيش كاتلعبو و استعراض العضلات لي ساليتيه يعني الخلاصة .. الجسم ديالك كاياكل راسو و علاين تموت ناشف حتى من السوائل

بولترا : ( ببرودة ) ضوبلي الفترة و خلي الشهر شهراين بلا ماكلة و السيمانة جوج سيمانات بلا ما فاش غاتعاود تجيني الفرصة غاندير ماكتر 

جيكساو : يعني مانادمش

بولترا : نادم .. نادم حيت ماحسيتش بمذاق شفايفك ههههههههه عاقلة على نهار الجزيرة و اول قبلة لينا.! نادم حيت ماطولتش فيها

ضورات وجهها لجهة الحيط و ابتسامة الاستهزاء على وجهها .. عارفاه فيه العطش و عارفة الجهد ديالو كايتسالا ولكن كايبين العكس و عارفاه بلي باغي بشدة القرعة ديال الما لي فيديها حيت محتاج ليها ولكن نفس شي مامبينش .. عاودات شافت فيه 

جيكساو : فيك العطش؟

بولترا : ( بإبتسامة ) ايلا كنتي غاترويني من ريقك روي عطشي 

جيكساو : ريقي بحالو بحال ريق اللفعة 

بولترا : راضي بسمك و قابل بيه يدخل لذاتي ... حلات القرعة ديال الما و عاودات سولاتو 

جيكساو : تشرب.؟

بولترا : نعتابرو تعذيب.! 

خوات الما فالارض غير بشوية و عينيها مراقبينو ، كان كايشوف فالما لي محتاج ليه باش مايموتش .. كايتخوا فالارض قدام عينيه حتى سالات القرعة و لاحتها 

جيكساو : لحسو من الارض لابغيتي تشربو 

زطمات فداك الما برجليها و خرجات .. غير خرجات و هو يرجع يتكا فبلاصتو عادي كايتسنا القادم منها ولكن الحاجة لي متأكد منها هي ماغاتقتلوش دابا و ماغاتفكرش تقتلو بهاد الطريقة .. غمض عينيه كايريح ذاتو فحين جيكساو غير خرجات من عندو مشات توجد ليه ماكلة صحية باش تعوض الجسم ديالو على داكشي لي خسر حيت ماكاتظنش غاتلقاه غدا حي لا خلاتو نهار اخر بالعطش .. قادات ليه الفخوض ديال دجاج مع الفواكه و حساء ديال الخضر و قرعة ديال الما بلاستيك طبعا .. حطاتهم ليه فبلاطو و دوزاتهم ليه من تحت القضبان و تحركات من تما بلا ماتهضر معاه .. لبسات مونطو من الفوق و خرجات باش تمشي لسوبر مارشي .. يلاه بغات تركب فطوموبيل و هي تشدها واحد اليد و حطات لها منديل على نيفها 

__ العودة للنمسا __

كان جالس مايكل و جوزيف مع بعضياتهم و باين ملامح الحيرة على وجه مايكل 

مايكل : مافهمتش فين غبر ماموالفاش ليه 

جوزيف : وقعات ليه شي حاجة و هادي ماعنديش فيها الشك .. دادا حتى هي ماعندها حتى شي خبار عليه ادلر مابقاش كايبان لي بزاف 

مايكل : مانظنش واقعة ليه شي حاجة نتا عارفو ماشي شي واحد لي دغيا كادار بيه 

جوزيف : ديك المرة ادلر كانت حالتو خايبة شاك بلي مخبع علينا شي حاجة 

مايكل : لاجينا نفكرو مزيان هاد الغياب ديالو موراه شي سبب نييت و ادلر 100% عارف السبب

جوزيف : غانراقبو هاد اليامات باش نعرف اش واقع 

مايكل : عيط ليه دابا نيت و شوفو فين كاين 

جوزيف : تسنا واحد دقيقة نصوني عليه.

•°• و بعد صعوبات قدر هالك يوصل لعنوان مقرب ليها حيت ماقدرش يعرف بلاصة الدار بالضبط و هادشي كان بفضل واحد من مرافقين داك المافيوزي .. ماضيعش الوقت و مشا ديريكت للعنوان لي عطاه ليه بلاصا طوموبيلتو بعيدة و بقا مراقب الطريق لاتبان ليه .. حتى بانت ليه جاية عرفها غير بالبومة لي كانت فوق كتافها .. وجد دغيا المنوم فمنديل و مشا لناحيتها ماجات بوو فين تغوت حتى كان حط لها المنديل لي فيه المنوم على نيفها و زير عليها باش ماديرش شي ردة فعل .. ضربات فطوموبيل برجليها و بقات كاتتمشا عليها بخطوات سرييعة و تقلبات بسالطو حتى رجعات موراه و ولا شاد غير الريح قدامو .. مع ضار لعندها ضرباتو للقرفادة ولكن ماغابش كي كانت متوقعة .. حاول يشدها و بعدات 

هالك : غاتمشي معايا بالخاطر ولا بزز .. مابقا عندك فين تهربي 

جيكساو : جيتي برجليك 

هالك : زيدي معايا ماغانأذيكش .. ايلا بقيتي هنا البوليس غايقدرو يوصلو لك فأي لحظة 

جيكساو : فهاد اللحظة نتا لي غاتمشي معايا ... فالوقت لي كانت جيكساو كاتهضر معاه هزات بوو المنديل لي طاح و حطاتو فالقب ديال جيكساو لي كانت شافتها بلي هزاتو من الارض 

هالك : جيكساو تيقي بيا كيما قدرت نوصل لك غايوصلو لك البوليس .. يلاه معايا 

جيكساو : باش عرفتيها

هالك : راك مطلوبة فجميع الدول شكون لي ماغايعرفش هادشي؟ كلشي باغيك حية ولا ميتة 

جيكساو : منين جبتي عنواني

هالك : ماشي وقت هادشي 

جيكساو : ( بنبرة هادئة ) إيزاك

هالك : مابغاش يعطيني العنوان ولكن كلابو فيهم الكفاية 

جيكساو : دقيقة و نجي 

هالك : فين غادا

جيكساو : لداري نجيب حوايجي

هالك : تمشاي قدامي ...


مشات للطوموبيل حلاتها و جبدات من المجر ابرة بالخف و خشاتها من تحت الكم .. هزات سوارت و سبقاتو للدار .. حلات الباب لي كانت وسط واحد الغرفة كاتشبه لديك ديال الضو .. جات معزولة بعييد على البشر ولكن فالاصل لداخل كان باب ديال الاسانسور .. خلاتو يسبقها عاد دخلات موراه .. وصلو للدار و دخلو و هو باقي كايستكشف فالدار ماطاحتش فبالو نهائيا بلي ساكنة من تحت البحيرة .. ستغلات الفرصة ديال استكشافو للدار و ضربات ليه ابرة من مور عنقو خواتها فيه كاملة .. حيدها بزربة و ضار لعندها كايشوف فيها بغضب 

هالك : غداارة

جيكساو : ماكانش عليك تبعني 

هالك : ( بدا كايتقال لسانو ) لمصلاحتك ا جيكساو لمصلاحتك جيت ... طاح على وقفتو سدات الباب و تخطاتو .. دخلات حطات المونطو ديالها و شربات كاس ديال الما كاتشوف فين غاتحط هدا .. ماكانتش دايرة حسابها ل2 رهائن .. تحركات قبل مايفيق و جراتو من رجليه للزنزانة كان بولترا متكي حل عينيه لقاها جارة معاها شي حد 

بولترا : غير عدبتي راسك مامحتاجش للرفقة مرتاح بوحدي

جيكساو : الصمت 

بولترا : ناوية ترجعي دارك زنزانة جماعية؟ 

دخلاتو للداخل و حطاتو ربطاتو حتى هو بالسلاسل بحالو بحال بولترا و خرجات من تما اما بولترا غير شاف شكون و هو يبدا يضحك 

بولترا : ههههههههههههههههههههه شوف شكون جا يونسني ( بدا كايغوت باش تسمعو ) نسيتي ادلر .. رجع تكا و هو باقي كايضحك على هالك لي حتى هو طاح بين يديها 

__ في النمسا __ 

كان جالس ادلر فالفيلا و جوزيف و مايكل كايهضرو على بولترا و كايحاولو يجبدو منو لسانو الهضرة

جوزيف : واحد رياس غبر هاد الشهر

مايكل : توحشنا للقصاير ديالو 

ادلر : عندو شي شغال داكشي علاش غبر 

جوزيف : علاش ماهضرش مع دادا حتى هي كاتسول عليه 

ادلر : حيت الوضع حساس و ماخاصوش يهضر مع الاقرباء

مايكل : يعني الوضع خطير؟؟

ادلر : بحال هكاك ( بدا كايصوني عليه تيليفون غير شاف النمرة و هو ينوض ) و
هاني راجع 

مايكل : تبعو تبعو 

جوزيف : ششش تسنا ... تبع جوزيف ادلر لي خرج للجردة باش يهضر 

ادلر : عرفتو البلاصة؟؟ ... كيفاش تما و انا ديجا قلبت؟ ... بلاتي بلاتي قلتي بلي رادار شد الحركة من تحت ديك البحيرة بالضبط؟؟ .. صافي تسنا اليوم نيت غان** ( حس بشي حد كايراقبو و بدل الموضوع ) وي وي اليوم نيت غانكون راك عارف بلي هاديك الهدية غالية بزاف .. بيناتنا تيليفون ... قطع عليه و ضار شاف جوزيف

جوزيف : معامن كنتي كاتهضر؟؟

ادلر : كنتي كاتتسنط عليا؟ 

▫كانت واقفة و كاتشوف فمنظر الما لي لتحت و فيديها غراف ديال الخدنجل سخون من مور ما صونات على ايزاك و هضرات معاه على داك الواشي لي عطا عنوانها .. بقات كاتفكر فشنو دير فهالك و الطريقة لي تقتلو بيها مدام عرف دارها فين جات يعني مصيرو الموت .. شوية و هو يصوني عليها تيليفون 

جيكساو : ( بنبرة هادئة ) قتلتيه.!

ايزاك : ( بنبرة اكثر هدوء ) الواشي مصيرو الموت

جيكساو : مزيان

ايزاك : ماصونيتش عليك عليه .. بلاصتك عرفوها البوليس غاتتعرضي لمداهمة فأي وقت 

جيكساو : ( حطات الكاس من يديها ) ايمتا عرفوها.؟

ايزاك : هادي 8 سوايع باش عرفو بلاصتك .. جمعي حوايجك غاتلقاي الهيليكوبتر فنفس البلاصة 

جيكساو : غانرجع لك معروفك فأقرب وقت 

ايزاك : ماتحتاجيش

جيكساو : قدمتي ليا خدمة غانقدم لك خدمة .. قطعات عليه و مشات هزات عصى طوييلة فيها ابرة مخدر و رجعات للزنزانة ضرباتها فهالك لي كان باغي مغيب جات ضربها فبولترا ولكن مابانش ليها .. شافت فبلاصتو لقاتو متكي و مغطي راسو شافت جهة السلسلة ديالو لقاتها محيدة هنا تفاجئات .. حلات الباب و زادت قربات شوية .. شافت داكشي ماكايتنفسش عرفاتو هداك ماشي بولترا لي مغطي يلاه جات تخرج و هي تحس بيه دفعها للداخل و سد عليها الباب 

بولترا : كنت باغي انا لي نكون معاك لداخل ولكن خسارة جبتي معاك ضياف و انا ماعزيزش عليا ضياف 

جيكساو : مبروك 

بولترا : علاياش مبروك؟ ( ضرب فراسو و بدا كايضحك ) كاتقصدي ساروت؟ .. ماتخافيش بومتك ماغدراتكش نتي لي غدرتي راسك حيت قلبك حنين و مابغيتينيش نموت جبتي ليا فخاض دجاج .. نسيتي ماتحيدي لهم العضم

وراها العضم باش حل السلاسل و باش حل الباب .. دار ليه تعديلات صغيرة و قدر يفك راسو بيه و هادي اخر حاجة توقعاتها منو كانت محيدة ليه المعالق و محيدة ليه اي حاجة يقدر يحل بيها ولكن العضم؟؟؟ عمرها فكرات فيها

جيكساو : ( ببرود ) طريقة بدائية

بولترا : طريقة بدائية و كاتسلك ( مشات جلسات فوق نفس السرير لي كان كاينعس عليه ) ساليتي لعبك و جات نوبتي 

جيكساو : حاول تستمتع بكل لحظة فيها 

بولترا : ابتداء من وناستك مع هالك 

جيكساو : ( شافت فهالك ) ماتخافش عليا خاف على راسك 

بولترا : فهاد الموقف ماكاندعمش الحبس يكون ميكس.. مع اخر هضرة قالها و هي تتفرع الباب ديال دار ...


تسمع صوت الباب تفرعات مع تفرعات بدا هالك كايسترجع الوعي ديالو ... حدرات راسها و بتاسمات ابتسامة صغيرة شوية و هو يدخل ادلر و موراه جوزيف و مايكل فيديهم الفردي 


" Flash Back "

ادلر : كنتي كاتتسنط عليا؟

جوزيف : ( بعصبية و كايغوت ) اش مخبي علينا؟ .. نتا عارف شي حاجة على رياس و مخبي علينا

ادلر : ( ربع يديه و بتاسم ) وي عارف

جوزيف : و علاش مخبي علينا؟؟؟

ادلر : ماخبيتش .. قلت لكم عندو اشغال 

جوزيف : ادلر واش كاتتبوهل عليا؟ كلنا عارفين رياس ماكايمشي لشي بلاصة حتى كاتكون معاه فيها 

ادلر : هاد المرة مامشيتش واش عندك شي مانع؟

مايكل : ( عاد جا ) ادلر دير فبالك ممكن تكون وقعات ليه شي حاجة .. عاوننا بداكشي لي عندك باش نقدرو نعاونوه كل واحد فينا فهاد الغرفة عارف بلي رياس ماكايغبرش و يقطع الاتصال بدادا و مايطمنش عليها لمدة شهر

ادلر : واش انا قلت لكم ماكايطمنش.؟

جوزيف : ( بعصبية ) ادلرررر رياس راه خونا كاااملين ماشي غير خوك .. خونا بالروح كاملييين و انا عارف بلي شي حاجة واقعة ليه فالوقت لي كايسحابلك فيه راك كاتماطلنا .. ممكن طرا ليه شي حاجة حيت كاتماطل حتى راسك معانا

ادلر : الصمت 

جوزيف : ( كايحاول يتهدن ) سمعني ا ادلر هادشي مافيهش اللعب دير فبالك ايلا وقعات ليه شي حاجة اللوم كلو غايرجع ليك و غايكون بسببك و غايبقا تأنيب الضمير تابعك طول حياتك

مايكل : دادا ماغاتقدرش تتحمل ايلا وقعات لرياس شي حاجة .. نتا كاتعرفها كتر منا 

ادلر : بولترا كاين فروسيا 

جوزيف : اش كايدير فروسيا؟؟

ادلر : ( شد راسو بيديه ) بسببي .. بسببي كاين فروسيا كون سافرت معاه ماكانش غايوقع هادشي .. كون سافرت معاه ماكانش غايطيح فهادشي 

جوزيف : جاوبني ا ادلر اش كايدير فروسياا؟؟؟؟ عندمن مشا لروسيااا

ادلر : الصمت

جوزيف : ( بتلف اعصاب ) جاااوب 

ادلر : عند جيكساو 

مايكل و جوزيف : ( بصدمة كبيرة ) جيكساو.!!!!!

جوزيف : ( ضرب فالحيط ) كان خاصني نتوقعها .. كان خاصني نتوقع غايكون داك المجرم من مور هادشي 

مايكل : اش بينو و بين جيكساو؟؟؟ اشمن حسابات بيناتهم؟؟؟؟

ادلر : حسابهم طويل 

جوزيف : انا غادي

مايكل : فين غادي؟؟؟

جوزيف : فين غانمشي فنظرك من غير للمطار؟؟

مايكل : و فريق الدعم؟؟؟ تسنا نعيط لهم و نعطيهم العنوان باش يشدو طريق لتما .. ادلر عطيني العنوان

ادلر : ماغايمشيش معاكم فريق الدعم هاد المرة ( بنبرة مختل ) غانمشي نصفي الحساب عاد يجي وقت فريق الدعم 

جوزيف : ( بنبرة خبيثة ) و نصفي حسابي حتى هو عاد نشوفو لالقاو فريق الدعم مايجمعو فيه

مايكل : جوزيف واش باغي تخرج على خدمتك؟؟ راك عارف القانون من هاد الناحية ديال المجرمين .. ممنوع تدخل مشاكل الشخصية فبحال هاد المسائل و خاصة مع مجرم مطلوب دوليا غاينوض الصداع بزاف 

جوزيف : ( شاف فيه ) شكون غايوصل لهم الخبار ايلا مشينا غير ب3؟

مايكل : غانمشي معاكم حتى نشوفو هادشي ديالكم فين غايوصل

#Flashback_End

مايكل : رياس

بولترا : ( كايضحك و كايشوف فجيكساو ) تجمعات العائلة 

مايكل : شديتي المجرم؟؟ ولكن كنت متأكد غاتقد بيه

جوزيف : ( كايشوف فهالك بغضب ) طحتي بين يدي دابا 

هالك : ( شاد فراسو ) فين انا 

جوزيف : مرحبا بيك فضيافتنا 

مايكل : ( بإستهزاء ) هدا هو المجرم لي العالم كايقلب عليه؟! .. طايح غايب و ماعارفش راسو فين كاين خديتي الشهرة كتر من قيمتك

ادلر : ( كايضحك ) ت ت ت ت ههههههههههههههههه بلاتي نعطيكم المفاجأة .. هداك ماشي جيكساو 

جوزيف : و فين جيكساو؟

مايكل : منين هدا ماشي جيكساو فين مشا داك المجرم؟

ادلر : ( اشار بيديه لجيكساو ) كانقدم ليكم الشيطان جيكساو السفاح لي متجسد فجسد انثى 

جوزيف : ( بإستغراب ) مافهمتش وضح


ناضت من بلاصتها و شدات فقضبان الزنزانة و ميلات راسها 

جيكساو : ( بنبرة هادئة ) لي قصد انا هي جيكساو 

جوزيف : ( شاف فأدلر ) واش هادي شي نكتة من دوك النكات ديالك؟؟؟ قلتيي لينا غانجيو نشدو جيكساو فين جيكساو؟؟؟

مايكل : كون كدبتي كدبة لي نقدرو نتيقوها 

ادلر : ( كايضحك ) هههههههههههههههههههه تعجبتو؟ عادي .. حقيقة ماغايتقبلهاش عقلكم 

جوزيف : ( خشا يديه فجيبو و هضر بشك ) دابا باغي تقنعني بلي هادي هي لي حتاجزات رياس شهر كامل؟!

مايكل : نفوتو ا سيدي حنا دوك الجرائم كاملين لي دارتهم و ديك ل60 جثة لي خلات موراها و نقول تيقت .. ندير راسي مكلخ و نقول تيقتك ايوا و رياس.؟ هادي هي لي حفرات سميتها فصدرو؟ و هي لي حتاجزاتو شهر؟ و يا للمعجزة الربانية هو ماقدرش عليها ياك؟ دابا هادشي لي بغيتيني نتيق؟ بنت بهاد الوجه دارت هادشي؟ ادلر واش كانبانو لك باقيين فالعمر لي طلاقينا فيه باش نتيقو هاد التخربيق؟

جيكساو : ( بصوت كفحيح الافعى و نظرات شيطانية ) خليوني نخرج و نجلسو و نتناقشو

نبرتها و نظراتها و الطريقة باش حركات عنقها و الاسلوب باش هضرات معاهم خلا مايكل يحس بالقشعريرة و التوتر و يبقا غير متبعها بعينيه اش كادير .. مامستوعبش هادشي لي واقع هنا .. دوز يديه على وجهو بسبب التوتر الشيئ لي دغيا لاحظاتو جيكساو 

ادلر : تيق ولا ماتيقش كاتبقى هادي لي بهاد الوجه هي نفسها القتالة لي رزات العالم ف60 سياسي و رجل اعمال .. عنداك يخدعك المظهر ديالها هادي راه افعى سامة .. الشر ديال الدنيا و الدين تجسد فيها للحظة فاش كانشوف فيها كانأمن بديك القصة ديال الشيطان لي كايختار شكل انسان و يتجسد فيه

جوزيف : و نتا ا رياس مالك ساكت؟؟ قول شي حاجة .. فين مشا جيكساو 

فحين جوزيف كان غارق فبحر الاسئلة و كايهضر مع بولترا كان هو كايشوف فجيكساو و متتبع حركاتها و اش كادير عرفها بغات توتر جوزيف و مايكل عن قصد و من صمت مايكل عرف بلي فعلا وترات واحد منهم

بولترا : ( ضار لعند جوزيف ) ماستوعبتيهاش.!

جوزيف : مافهمتش هاد اللعبة لي باغيين ديروها و هاد التمويه لي باغيين ديروه ولكن عارف حاجة وحدة .. هادي ماشي جيكساو

مايكل : منين ماشي جيكساو علاش لي حتاجزها رياس مع هداك؟ و هاد الدار ديالمن؟؟ 

جوزيف : ( بدا كايضحك بكثرة الاعصاب ) ههههههه لا نتوما باغيين تحمقوني .. نتــومــا باغيين تحمقوني 

هالك : ( كايشوف فجيكساو ) علمتك و حذرتك بلي غايجيو البوليس ولكن نتي درتي لي فبالك و غدرتييني

جيكساو : ( بإبتسامة ) الغلط ماشي ديالي ايلا كنتي كاتيق بالمثل ديال دير النية و بات مع الحية

جوزيف : و شكون هداك حتى هو؟؟

ادلر : كانقدم لك المجرم الثاني لي حتى هو مطلوب عند البوليس .. المغتصب و القتال بيني وايز 

بولترا : واش هادي مابانتش لكم عائلة مثالية ( شكل يديه على شكل مسدس و اشار بيها لهالك و تيرا بيها زعما ) خاص غير نتهناو من الزيادة

مايكل : ( كايشوف فيها بنظرات فشكل ) ماكايكدبش .. نتي هي جيكساو

جيكساو : قرب نهضر معاك ( بصوت كفحيح الافعى ) علاش خايف مني؟ ماغانقتلكش عرفتي علاش؟ حيت نتا ماكاينش ضمن القائمة

هي كاتهضر و جوزيف كايحلل تصرفاتها و هضرتها و شنو قالها هالك لي راهم ناسيينو دابا و مايكل كايتسنط لها اما بولترا كان حاضي مع حاجة خرا لي ماشافها حتى حد من غيرو هو و جيكساو على ماكان كايظن .. فحين هي كاتلاهيهم بالهضرة كانت بوو كاتتمشى فالارض و ففمها الساروت غادية بيه عند جيكساو ماجا فين يسد عليها الطريق حتى سبقو ليها ادلر لي حتى هو من صباح و هو حاضيها .. يلاه كانت غاطير و هو يشدها من جناحها و حيد لها الساروت مع شدها و هو يتهز قلب جيكساو و زيرات على قضبان الزنزانة 

ادلر : فين كنتي غادا ا الشيطانة الصغيرة 

مايكل : ديالاش داك الساروت؟؟

ادلر : ديال الزنزانة مدام كانت باغا تعطيه لمولاتها

مايكل : ماغانستغربش من هادشي 

جوزيف : ( مفيكسي عينيه فجيكساو ) المجرم لي كان داير ديك الضجة كاملة و المجرم لي كايقتل بدم بارد .. المجرم لي متلف عباد الله و خالق فيهم الرعب ( بإستهزاء ) صدق مرا 

جيكساو : لحسن الحظ

جوزيف : ( كايضغط على سنانو ) عرفتي اش غاندوز عليك؟ .. غانخليك تعيشي اكفس شهور فحياتك ماتستغربيش حيت ماقلتش ايام .. غادي نخليك طلبي الموت 100 مرة فالدقيقة ستمتعي بهاد سوايع لي باقا فيهم بصحتك

ادلر : ( عينو فجيكساو ) اش بان لكم فهاد البومة؟ .. نطلقوها ولا نديوها لشي ملجئ ديال الحيوانات ( ميل راسو ) ولا نقتلها و نشويها؟! .. مع قالها جرات جيكساو القضبان لعندها حتى تسمع الصوت ديالهم 

جيكساو : ( بنبرة شيطانية ) سنيتي عليها 

جوزيف : ( وجد سلاحو هو و مايكل و وجدو المينوط و شاف فأدلر ) حل لها الباب

ادلر : ( كايبتاسم بخبث ) اوامرك 

جوزيف : ( موجه كلامو لجيكساو و هالك ) عطيو بوجهكم للحيط و يديكم فوق راسكم

شافت جيكساو فأدلر اخر شوفة و عطات بوجهها للحيط و حطات يديها فوق راسها .. شافها هالك اش دارت و دار نفس الشي .. خشا الساروت فالباب و كلشي وجد راسو باش غادي يشدوها مايكل غايتكلف بهالك و جوزيف بجيكساو .. حل الباب و مع الحلة نقباتو بوو بطريقة خااايبة حتى طلقها و هربات كان غادي يتبعها ولكن تراجع مدام مولاتها كاينا هنا مزال غاترجع زعما .. مشاو و بداو كايقربو لهم بحذر متوقعين منهم اي حركة .. غير وصلو لهم و هو هالك يهجم على مايكل الشيئ لي خلاه يتيري ليه فرجلو بسرعة حتى طاح للارض بقا كايضرب ماحكموه غير بزز هو و ادلر اما جيكساو كانت هادئة و خلاتهم يمينطوها .. مينطوهم و يلاه بغا يخرج جوزيف من الزنزانة و هو يتزدح مع بولترا و بقا شاد فيه

جوزيف : رياس مالك؟؟

بولترا : والو 

سبقهم و خرج عاد خرجو هما .. مع خرجو من تما ضربات جيكساو جوزيف برجليها لرجليه و ضارت لعندو و عاودات ضرباتو برجليها لوجهو يلاه بغات تمشي لعند ادلر و هو يجرها بولترا 

بولترا : ( بإبتسامة جانبية ) سموحات ولكن مزال ماصفينا حساباتنا انا وياها

مشا كايجري لجهة وحدة من طوموبيلات لي جاو بيها و ركبو فيها بجوج و كسيرا قبل مايوصلو لهم ...


- نهاية موسم ملحمة السفاحين -
لقائنا غدا في موسم جديد بعنوان "خلف قضبان غوانتانامو"

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.