حبسات المرسيدس دمحمد جنب دارهم .. نزلات هناء هي اللولة و مشات الكراسة الخلفيين حلات الباب على ياقوت اللي واحد العين عليها ضمادة بيضا مغطيالها فحال شكل القراصنة و مغوبشة نزلات شداتها من واحد الجنب .. تبعهم محمد شدها من الجنب لاخر
عبد الله شاف فرحيمو اللي حتى هي باينة معاجبهاش الحال:و المشاكيل اللي غاينوضو من بعد .. كي غانحلووهم؟ نتا عارف هناء و محمد كي دايرين و...
قاطعو السي منتصر:عارف حفايدي كي دايرين ماتحتااجش توريني شنو ندير و شنو لا، زيد عليها حاليا أكبر مشكل عندنا هو هذا اللي غايتحل .. ماديرش فبالك نتا و رحيمو .. كولشي غانتكلف بيه أنا
عبد الله صاط بحنق:و هناااء؟؟ راه اكبر مشكلة فيها؟
السي منتصر وقف بسبحتو فيديه:عبد الله .. دويت واقيلا .. ماتبقاش تناقش معايا صافييي
عبد الله تأفأف و دور وجهو للجنب معارف مايدير .. حتى رحيمو وقفات غادة جيهت الكوزينة تخبر البنات يوجدو العشا اللي غايستقبلو فيه جيرانهم
🎀 داز النهار عاادي مكاالمي، حتى للخمسة تقريبا🎀
حلات عينييها من نوم عميييق على صوت الدقان فباب البيت .. ناضت كاتحك فشعرها بتكااسل متاجهة جيهت الباب .. حلاتو .. بانتلها صفية الخادمة
هناء كاتفوه؛خير أصفية؟؟
صفية بابتسامة:ختي هناء .. الحاج باغيك تنزلي لتحت غانمشي نفيق حتى ختي ياقوت
هناء ومأتلها براسها:واخا هانا جايا (سدات الباب و دخلات مرخييية .. طولات فالنعاس .. شافت جيهت الشرجم دبيتها بانتلها الزاجة مصايبة .. تنهدات و كملات طريقها للحمام اللي عندها فالبيت .. كاع البيوتة فيهم حمامات صغيورين .. باش كل واحد ياخذ راحتو فالبيت ديالو)
خرجات من الدوش كاتشهد وجهها و يديها فازكين .. مشات جيهت البلاكار اللي عندها جبدات فوطة كاتمسح بيها، سلات و لبسات عباية الصلاة متاجهة للقبلة تصلي العصر اللي فاتها .. سلات صلاتها ووقفات كاتستغفر الله
خرجات من بيتها بعباية الصلاة .. نازلة لتحت كاتفك الربطة دالشد ديالها شوية .. خلاتو غا محطوط فوق راسها و خصلات من شعرها كايبانو من لتحت .. مشات للصالون اللي كانو جالسين فيه من قبل .. لقاتهم دايرين كاسكروط بحرشة و ملاوي و بطبوط و زيتون و زيت و عسل و زبدة و كوولشي طبيعي .. مع اتاي مشحر بالشيبة و النعناع و الزهر و قهيوة معطرةة .. ريحتها كاتشهي
جلسات فالبلاصة اللي مولفة تشدها ديما فوق واحد المطربة مبتاسمة:نهاركم مبروك .. ههههه قيلت ناعسة
ياقوت كاتضرب البطبوط و تدوي:مادرتهاش حتى أنا اللي معطوبة فعيني
محمد كايجغم من اتاي؛مسكينة الليل كولو بقات مشطونة عليك
الحاج منتصر كايشوف فصبعها اللي فيه خاتم الخطبة:و أيوب ساق الخبار لشنو طرا؟
هناء شافت فيه بهدوء:مسألة عائلية هادي ماعندو لاش يعرف، أصلا مادويتش معاه مللي مشاو .. ماطليتش على تليفوني فخطرة
محمد:حسن .. ماتدخليهش فهاد الأمور من دابا
رحيمو تنهداات تنهيدة عمييقة كاتشوف فعبد الله كايدويو غا بالعينين
الحاج منتصر بابتسامة:إيوى مزيان .. باغي ندوي معاكم نتي و خوك فمسألة ضرورية ..
محمد باستغراب:شنو هي أجدي؟
الحاج منتصر شاف فهناء اللي بدورها كاتشوف فيه باستغراب:غايجيو عندنا اليوم ضيوف يتعشاو معانا
هناء بتسائل:و شكون هادو؟
الحاج منتصر:جيراننا
محمد وقف هو و هناء دقة وحدة نطقو؛أشكاااتقوول أجديي
الحاج منتصر خنزر فيهم:جلسوو و سمعوني
هناء صدرها كايطلع و ينزل بعصبية:كيفاش كاتقولي نجلس و دوك الهمجيين يجيو يچلسو فدارنا و يشركو معانا طعامنا!!
الحاج منتصر بصرامة و حدة غوت عليها:غاتجلسييي و لا مغايعجبك حااال
هناء جلسات كاتشوف فيه مغوبشة .. و محمد كذلك مستغرب من حالة الجد و كي كايغوت عليهم .. الجد بدورو مثوثر من هاد الموضوع خصوصا العداوة القدييمة بين العائلة
الحاج منتصر بهدوء .. كايقول جوج كلمات و يسكت ععااد يكمل:غايجيو يتعشاو معانا .. و غاديين تجلسو و تضايفوهم بالصواب .. غايعتاذرو .. على تصرفهم دالبارح .. و حتى نتي و خوك تعتاذرو لبنتهم اللي ضربتوها .. هاد العداوة طلعاتلي فرااسي .. بسباابها مات خويا الله يرحمو قبل مايدير لا ولاد ولا حتى حاجة .. مات و هو كايحاول يحرق الغلة دالجيران ديالنا، هو اللي قلب على موتتو حتى شدات فيه العافية
.. مات و هو كايحاول يحرق الغلة دالجيران ديالنا، هو اللي قلب على موتتو حتى شدات فيه العافية .. من داك الوقت وانا كانفكر نحبس هاد الصداعات و هاد العداوة .. أه قديمة و هي وصية من جدودنا .. ولكن هادشي زااد عن حدوو
ياقوت وقفات معاها:زيد نمشي حتى أنا ندير الدوا اللي جبنا معانا لهاد العين
محمد:غانمشي ندير دويرة فالأرض و نجي
مشاو كولهم شي طلع شي خرج .. خلاو الجد و الأب و الأم حاضيينهم ..
دخلات ياقوت لبيتها كاتبرگم و تحيد الضمادة من عينيها
-دابا كون كانو قتلوني يقولك عتاذرو ماتعتاذرو .. أوووف انا اللي كليت الدق من عندهم (تقابلات مع المراية كاتشوف بواحد العين .. بانتلها حمرا متوورمة و أثر الجرحة فيها كبير لدرجة اللحم بيضة كاتبان من لتحت .. عبساات بشدة محاملاش راسها و شدات الدوا اللي جابت معاها الصباح كاتديرو لعينيها و للتورم اللي فيها .. سلات و شدات ضمادة جديدة صايباتها و مشات جيهت فراشها .. شدات تليفونها تصورات وحطاتها فالستوري دالواتساب و الفايسبوك .. غي حطاتها بداو يدخلو عليها الناس كايسولو و هي حاضية واحد البروفيل كاتمتم) دخل شوفها و دوي معايا بلييز بليييز
بقات كاتسنى مودة طوييييلة حتى ملات و حطات تليفونها متكية كاتشوف فالسقوف بعين وحدة و تنهد
دقاائق سمعات صوت ميساج وصلها .. هزات التليفون بملل طلات عليه و هو يبانلها اللي كانت باغاه يدوي معاها هو اللي صيفط الميساج .. تبسمات ابتساامة وااسعة و باشرات الهضرة معاه .. كايسولها على حالتها و يستفسر كي وقعلها
♟هناء فغرفتها كاتتشوف فميساجات واصلينلها مبتاسمة مزنكة .. خطيبها كايتغزل بيها و عبر عن إعجابو ليها بميساجات طواال فيهم الشعر .. كاتقرا و تبورش عاجبها الحال و العصبية اللي كانت فيها مشات .. قفزات مللي بانلها التليفون كايصوني، تحنحناات كاتقاد جلستها و جاوباتو كاتعض فإبهامها بثوثر
هناء بصوت حنيين أنثوي:ألوو
أيوب بتسائل:كي دايرة صافا؟
هناء تبسمات بخجل كاتقيص حنوكها اللي سخنوو و تجبد فواحد الخيط دواحد ليزاار قدامها:بخير الحمد لله و نتاا
هناء تبسمات كاتعض فشفايفها و قالت بخجل:اممم عرفت هههه نتا كي دوزتي نهارك؟
أيوب:عادي دابا غي درت شوية فالدوار و طلاقيت بشي صحابي و نتي خدمتي؟؟
هناء توثرات مباغاش تكذب ولكن باقي مكاينش بيناتهم شي حاجة عميييقة باش تشرحلو شنو كاين:أ أه مشيت للفيرمة عند واحد الراجل مسكين مرضولو الخيولة بسباب واحد الفيروس .. خاص ناخذلهم غدا مضاد ضروري باش يتعافاو قبل الموسم
قطعات الخط و ناضت كاتصوط محاملاش راسها بدات معاه من اللول بالكذوب، غززات سنانها و مشات لبلاكارها كاتشوف شنو غاتلبس لهاد العشا هذا اللي جا على غفلة
عائلة مالك گالسين مجموعين كاملين .. بلباس محترم .. و ملامح معبسة من عند أحفاد الجد وواليديهم اللي ملامح القلق مستوطناهم
ياقوت جبدات تليفونها حاسة بالملل .. كاتطل على الواتساب .. لقات ميساج من عند داك اللي كانت كاتسناه يراسلها، كان كايقرا معاها و جد معجبة بيه .. حتى هو باينلهاا معجب بيها و كل فترة كايطمن عليها .. ولا شي نهار مادواهاش كادير شي سطوري تقصدو بيه .. اول مكايشوفو كايرسلها ميساج .. فالميساج اللي رسلها دابا مكتوبة فيه
_دابا رتاحي و ريحي عينك حتى تبراي .. ماتشديش التليفون بزاف غايضرك_
هناء حركاتلها راسها بالنفي:مغانمشييوش .. غانمشي أنا نتي مريضة
ياقوت غوبشات فيها:واش هاد نص مرضة غاتشدولي فيها .. عفاك بغيت نمشيي
هناء:واش عاقلة شنو وقعلك البارح؟؟
ياقوت صاطت الهوى من نيفها كاتبركم:غانبقى غي معاك بليييز .. راه هادي العطلة دالصيف و فعوض مانبقى مع خالتي و بنات خالتي جيت ندوزها فالدوار، مانبقاش غي فالدار حراام والله
هناء بهدوء:غدا و يحن الله
الحاج منتصر تبسم:خوديها معاك مسيكينة تشم شوية دالهوى .. الغزواني عندو الفيرمة زويينة كاطل على الأراضي دالجيران ديالنا
الحاج منتصر خنزر فيه:نتااا باااقي غاندوي معاك على السلاح اللي هزييتييي
محمد قرن حواجبو:هوما اللي جبدونا
الحاج منتصر بحدة:بانتلي تربيتك غااادة فالخسرااان
صوت الدقان فالباب سمعوه كاملين فضل الجو المشحون اللي جمعهم .. الحاج منتصر وقف يديه مور ضهرو عاقدهم مخرج صدرو و معلي راسو فالسما كايدوي بالنفخة
-زيدو نستاقبلو الضيااف ديالنا
عبد الله وقف مع رحيمو:زيدو ألعيال و ديرو عقلكم .. خلاص طلعلي الصداع فراسي حتى أنا
محمد وقف مع هناء و ياقوت كايتأفأفو غاديين بالثقاالة، وقفو قدام الباب .. شادين الصف من الاكبر للأصغر .. حل الجد الباب بابتسامة بشوشة .. لقا قدام عينيه الحاج مختار مبتاسم بدورو
السي مختار بابتسامة:نعرفكم .. هادي مرات ولدي الله يرحمو لالة رقية، و هذا حفيدي الكبير يعقوب .. و هذا سليمان و هادي حفيدتي الصغيرة سمارة .. و هادو بجوج عرايسات حفيدي يعقوب .. (تبسملهم و هناء كاتخنزر فديك الصديقة ديالهم منى اللي حضرولها لعرسها مؤخرا .. النسا ديعقوب بجوجاتهم محجبات .. اللولة طويلة و مفورمية و بيضة كاتدور فعينيها فالدار، أما منى فهي رقيقة متوسطة الطول و حنطية البشرة .. مسرارة فوجهها .. أما واحد ياقوت فكاتشوف فالمدعو بسليمان و كاتسترجع فذاكرتها فين سابقلها شايفاه)
الحاج منتصر بابتسامة:مرحبا بيكم جميع .. تفضلو جسلو تفضلو الدار داركم (مشاو جلسو كاملين كايشوفو فبعضهم) احم .. حتانا ماعرفتكمش بعائلتي .. هذا ولدي عبد الله و مراتو رحيمو .. عندي بنتي اخرى ولكن عايشة على برا مع راجلها وولدها كبير مشاء الله .. و هذا حفيدي الكبير محمد و حفيدتي هناء و ياقوت الصغيورة
ياقوت معلية فيهم واحد العين كاتبسم و تحنحن
الحاج مختار كايشوف فيها بتحسر:بنيتي .. سمحيلي نيابة على دوك اللي ضربوك .. باينة ضربة قاصحة
ياقوت بهدوء:ماشي مشكل
هناء همسات لمحمد فوذنو:لماعتاذروش هوما اللوالة بربي لانطقت بشي حرف
محمد باستهزاء:شوفيلك القردة كادور فعينيها زعما حشمانة .. نبغيها تعتاذركم نتي و ختك
السي مختار تبسم:الله يتاويكم اوليداتي .. حفيدتي سمارة عندها شي هضرة لبنتكم الصغيرة حتى هي
الحاج مختار بهدوء:ولدي عتاذر للبنت الله يخليك .. نتا الكبير فيهم هنا راه البنت تضرات بزاف مكاتشوفش
يعقوب شاف فيه كايغزز سنانو و شاف فهناء اللي تبسماتلو ابتسامة صفرا خنزر فيها كايتمتم:أنسة ياقوت كانعتاذر منك
ياقوت بابتسامة:هانية ماشي مشكل
سمارة تنهدات بعدما تمتملها جدها بكليمات فوذنها شافت فهناء و تمتمات فوق النفس مغوبشة:حتى نتي كانعتاذر منك كنت قليلة الأداب معاكم نتي و ختك
هناء تبسمات و شافت فيها بهدوء:ماشي مشكل من الاخطاء نتعلم
الحاج منتصر لهناء:مبانلكش حتى نتي خاصك تعتاذري؟
هناء شافت فيه مغوبشة و هو كايومألها بعينيه .. صاطت بعصبية و قالت:حتى انا كانعتاذر منك .. مكانش خاصني نضربك ولكن نتي اللي قللتي الاداب و سبيتيني
سمارة بتاسماتلها ابتسامة صفرا و قلبات عينيها
الحاج منتصر:نوضو ابنتي تعانقو و صفيو الخواطر .. الدنيا فااانية و خاص نتسامحو بيناتنا
هناء شافت فجدها ماكرهاتش الارض تتشق و تبلعها وقفات بالزز كاتشوف فسمارة اللي حتى هي وقفات و تقدمو لبعضهم تعانقو تعنيقة دبالزز و رجعو لبلايصهم
الحاج منتصر:و نتا أمحمد .. مانسيتكش .. عتاذر للبنت
محمد شاف فيها معلي حاجبو نطق بكلمة وحدة بالزز منو:سمحيلي
سمارة حمحمات بثوثر .. عاد طولات فيه الشوفة .. شاب كايحمق زويون بطولة و تجريدة و لحية خفيفة و ملامح عربية حرشة عربية مائة فالمائة:ماشي مشكل🙂
الجدين شافو فبعضهم برضى .. نطق السي منتصر:مزيان اذن دابا بعدما صفينا الخواطر .. خاص نوضعو حد لهاد الصراعات و التدابيز الخاوي .. .. براكة علينا من الغوات والخصاام
سكت السي منتصر كايشوف فالسي مختار:أه عندك الحق .. حنا البارح فاش جلسنا مع بعضنا .. تافقنا باش نديرو حل جذري لهاد الخصومة و العداوة اللي بيناتنا من هذا شحاال، بسباب تافه اللي هو الفلوس .. راه المال كايمشي و يجي تدوم غي الصحة و الهنا و راحة الباال و العلاقات الطيبة، حتى واحد مكاياخذ معاه الفلوس لقبرو بالعكس كايبقاو غي ينوضو الصداع فحال اللي وقع مع جدودنا من زمان
الحاج منتصر مكمل عليه:فعلا هادشي زاد بزااف و كاتجي لحضات كانخسرو أعز انسان عندنا بسباب هاد الجدال و الخصام
الحاج مختار تنهد:الموت علينا حق و إنا لله و إنا إليه راجعون .. الله يرحم كاع دوك اللي من عائلتنا حنا .. عائلة مالك ككل
نطق عبد الله مبتاسم:هادشي اللي كاين .. حنا غاديين و نكبرو غايبقاو غي ولادنا و خاصهم يكونو قد المسؤوولية .. غايكونو عندهم ولادهم و يخافو عليهم من العداوة اللي غادة و تكبر بدون سبب
محمد قاطعهم بهدوء:و شنو الحل اللي باغيين؟؟ هاحنا تسامحنا و تفاهمنا صافي
نطقو الجدين دقة وحدة:مكافيش هادشي
الحاج مختار:فأي لحضة تقدو تعاودو تدابزو و هادشي اللي مابغيناهش ثاني
الحاج منتصر:حنا تافقنا مع بعضنا و قررنا قرار لا نقاش ولا جدال فيه
نطقو دقة وحدة؛شمن قرار (خنزرو فبعضهم مامحاملينش)
الجدين شافو فبعضهم مطوليين و رجعو شافو فحفايدهم:حنا قررنا أننا خاص نتنااسبووو مع بعضنا
نتضو الحفاد مع بعضهم دقة وحدة وقفو مخرجين عينييهم بتفااجئ و بصوت واحد قالو:شنااااهوا
الجدين شافو فبعضهم مطولين و رجعو شافو فحفايدهم:حنا قررنا أننا خاص نتناسبو مع بعضنا
ناضو الحفاد مع بعضهم دقة وحدة وقفو مخرجين عينيهن بتفاجئ و بصوت واحد قالو:شناااهواااا
ياقوت كاتصرط الريق باستغراب:ك كيفاش تتناسبوو؟؟
الحاج منتصر:يعني غايكون زواج بين عائلاتنا، بهكا غانضمنوكم نتوما مغاتزيدوش فالعداوة و حتى ولادكم غايكونو مزيانين
سليمان بحدة:نتا عااارف اشكاتقوول!
الحاج مختار بحدة؛سليمااان .. حتارم جدك الثاني
سليمان كايضغط على فكو بسنانو حتى كايبانو العضومة دحنكو مغدد
عبد الله بهدوء:باش يحبسو هاد النزاعات و نتهنى عليكم .. (سكت كايشوف فيها و فمحمد و ياقوت) موافق
سمارة مقوصة حواجبها:و شكون بالسلامة غايتزوج بلاخر .. جديي انا مستحيل نتزوج بداك ولدهم (خنزرات فمحمد اللي قلب عينيه عليها و تمتم باعتراض)
-حتى نقبل بيك أنا بعدا
هناء كاتشوف فجدها مخنزرة:جدي كاضحك معانا ياك .. نتا عارف كل واحد فينا و نمط حياتو .. انا عارفة مغانتزوجش منهم حيت ديجا مخطوبة ولكن مانقبلش ختي الصغيرة و لا خويا بتزوج بواحد منهم
الحاج مختار خنزر فيها:شهاد الوقاحة أبنتي كادوي بيها؟ حنا رااه عااائلة وحدة جدوودنا كانو خووت ولولا الصراعات اللي طراو .. كنا غاديين نكونو دابا عائلة متاحدة
يعقوب باستهزاء:هه فحال كنس هاد خيتي مكايعرفوش التفاهم .. أنا بعدا عجباتني الفكرة .. شبانلكم بنتهم الصغيرة تتزوج بسليمان غايوالمها .. هو 27 عام و هي 20 كانضن و نيت نعوضوها على الضربة اللي خدات
محمد شارك حواجبو بحدة:واش نتوما عارفين شكاتقولو .. حنا راه حياتنا هادي و خااصنا حنا نختاروها، أناا مخطط لحياتي مع انسانة أخرى مغاتجيش لحضة وحدة و كولشي يتخرب
سليمان بجدية:جدي انا الزواج هو آااااخر خطوة مقرر نديرها فحياتي .. خدمتي فتارودانت أهمم دابا
سمارة باعتراض:لا لا جدو انا قرايتي ياك عماين وانا گالسة فالدار كانتصنطلكم و فاش قبلتي هاد العام نكملها كاتقولي نتزوج، مستحيييل هادشي
الحاج مختار:غانعطييوكم مهلة من هنا لغدا فالعشية قبلتو هو هداك، الخطوبة غاتكون بعد يوماين و الزواج بعد سيمانة .. ماقبلتوشااااي غاتكون هضرة أخرى و حد منكم مايعرفنا
يعقوب بقا واقف كاينهج و يشوف فالأوضااع المتشااحنة .. مابقاش قادر مزال يبقى تما .. خرج بسرعة و هضرت الجدين كاتدور فذماغو مامتقبلهاش، هناء حتى هي خلاتهم و مشات كاتجري طالعة لبيتها فطرف عينيها مجموعين الدموع .. أما ياقوت فحاسة بقلبها باغي يوقف ..قبل لحضات كانت كاتحلم بواحد آخر يكون فحياتها و فثواني تقلب كولشي و كاع أحلامها بدات كاتبخر كاتشوف فسليمان بكرره و هو كذلك كايرمقها بعدم اهتمام
سليمان مسح على وجهو بعصبية و بلا مايقول كلمة خرج فحالو .. بقا الجد و رقية و سمارة و مراوات يعقوب كايدورو فعينيهم
الحاج مختار تبسم و شاف فمحمد:ولدي نتا غاتوافق؟
محمد شاف فيه بنظرة فاارغة و دار خارج من الدار
تنهدو الجدين بعممق و شافو فعبد الله اللي قال:قلتهالك أبا .. ولادي و عارفهم
الحاج منتصر:و حفايدي و حافضهم .. لا ماقبلوش غانعرف كي نتصرف معاهم
الحاج مختار تنهد بعمق:سمحولينا غانمشيو دابا
الحاج منتصر:جلسو مزال تتعشاو
الحاج مختار بنفي:لا حتى لغدا انشاء الله باش يجاوبونا و نحتافلو مجموعين
تسالمو و خرجو مجموعين ..سمارة ضامة يديها لعندها ومغوبشة مامتقبلاش شنو سمعات من عند جدها .. ابدا مامخططاش تقبل بهاد الزواج .. تسالات ديك الليلة بكل واحد منزوي فقنيت و كايفكرو فالقرار الحازم اللي أمروهم بيه جداواتهم.. و كاع الاحفاد نفس الفكرة كادور فذمااغهم .. مستحييل يقبلو بحاجة فحال هادي
🎈الله أكبر الله أكبر🎈
على صوت الأذان دالفجر خارجة هناء من الحمام كاتمسح فوجهها .. مانعسات ولا شافتو .. الليلة كوولها و هي شادة خاتم خطبتها و تبكي، قرار جدها حساتو ضلمها هي اللولة .. كيفاش ول البارح لبسات خاتم واحد آخر و فالليلة اللي موراها خططو يزوجوها لشخص مكاتحملووش .. ابدا فكرة مامتقبلاهاش
هزات سجادتها و تاجهات اتجاه القبلة كاتصلي بخشوع و تدعي من الله جدها يبعد فكرة انها تتزوج بواحد مزوج زوج خطرات قبلها .. يعني غاتدخل ضرة .. وهادشي كايزيييدها اصراار على انها ماتقبلش أمر جدها ليها .. سلات صلاتها الطوييلة اللي دوزات فيها ركعات كثاار و دعوات أكثر .. جمعات الصلاية كاتستغفر الله و تشوف فالساعة المعلقة على الحائط .. دوزات وقت كثير كاتصلي فيه ماحساتش براسها .. كانت تقريبا 6:30 دالصباح .. قلعات عباية الصلاة و هزات المانيطة ديالها خارجة من بيتها .. جيهت الطبقة الثانية . عندهم فحال فارماسيان صغيورة كاينة فواحد البيت . هزات منها مجموعة دالقراعي و رجعات لبيتها . حطات المانيطة فوق الفراش و بادرات فصنع المضاد اللي خاص تاخذو للفيرمة دعائلة الغزواني .. كان المفروض تاخذولهم فالنهار دالبارح ولكن الوقت مساعفهاش .. سلات على خااطرها و هزات مجموعة من المعقمات كاتعققم الحقنات اللي غاتحقن بيهم الأحصنة .. مشات جيهت البلاكار ديالها . جبدات لبسة حجابية زوينة بألوان مفتوحة لبساتها مع حجابها و هزات مانيطتها ووزرتها و قفازاتها و خرجات من البيت نازلة لتحت معبسة و طاالعالها القردة، تاجهات للكوزينة دارت حاجة خفيفة تاكلها جاعت بزاف .. جلسات تفطر و تدك اتاي مشحر عااد جمعات وقفتها خارجة فحالها
تحلات باب دار عائلة الحاج منتصر موازاة مع دار الحاج مختار .. خرجات هناء كاتقاد فشدها مخنزرة مشافتش فداك اللي غي حل الباب بانتلو ربع يديه كايطلعها و ينزلها بنظرة استهزااء حتى علات عينيها على غفلة فيه .. تقابلو عينيهم غي شافتو قرنات حواجبها بشدة و مشات جيهت الفيرمة د عائلة الغزواني مداياهاش فيه
يعقوب تبعها بعينيه و طلق ضحكة ساخرة:هه مغرورة و عاجبها راسها .. أنا اللي نصلاح لمك باش نهرسلك داك العنق (دار يديه فجيابو و مشا لسيارتو القريبة لدارهم و ديمارا فالطريق .. غادي ببطئ حاضي مشيتها و كل شوية كاتهز يدها تقاد حجابها، عض على شفتو بقوة كايشوف جيهت نصها، بانلو طابع أحمر اللون مدور و غادا فالطريق قربات لمجموعة دالشباب باينين لحد الآن مادخلو لديورهم قباح، كسييرا بسررعة حتى قطع عليها الطرييق)
هناء شهقات مخلوعة حتى طاحتلها المانيطة من يديها .. خرجات فيه عينييها بحدة:و واااش نتاا مريض ولا مااالك قاطع عليا الطريق بهاد الطرييقة
يعقوب مانطقش .. دار للكراسة اللورانيين .. بانلو كاب فالأسود خاص بيه طوييل، هزو و حل باب الطموبيل .. بغا يقرب لعندها و هي ترجع اللور كاتدوي مغددة
-شوووف ماتحاااولش تقنعني نتزوج بيك حيت مغانقبلش انا مخطووبة و كانبغي خطيبييي (هزات يدها اللي فيها الخاتم مخنزرة فيه)
يعقوب عض على حنكو من لداخل و تبسم باستهزاء .. نفض الكاب كايسرحو بين يديه حتى قفزات و تكمشات فبعضها مللي طول يديه و دورهم عليها فحالا معنقها .. حط عليها الكاب و حزموولها جيهت عنقها كايبعد عليها بشووية و هي مكوانسية ماعرفات مادير ولات غي كاتدور فعينيها و صدرها كايطلع و ينزل بثوثر و استمرار
يعقوب بنبرة اشبه للهمس و الحدة:عندي جوجات و لا بغيت ناخذ شي وحدة زايدة غاتكون غيي فوق الشبعة هه .. جاتك الدورة الشهرية على داكشي غطيتك بالكاب .. كيفما كان الحال كاتبقاي من عائلة مالك (رجع اللور كاينفض فيديه و يشوف فيها معلي حاجبو باستهزاء، هي مجبدة عينييها فيه مزنكة من شنو سمعات منوو .. حنوكها قربو يطرطقو بالحمورية .. صرطات الريق جوج مرات متتاليات و نزلات مور مانيطتها بالزربة .. بلا ماتزيد تعلي فيه عينيها قلبات طريقها راجعة فحالها .. ناوية تبدل عليها عاد تمشي)
يعقوب ركب فسيارتو كايرد شعرو اللور و يتمتم فسرو:على هاد الغرور و التكبر ديالك غانديرهالك قد فمك (ديمارا بسرعة عندو خدمة ضرورية فتارودانت مخلي الريح العجاج مكوم وراه)
🎈ياقوت فاقت مشابعاش نعااس معمشة عينيها فالسقوف .. جاها كابوس بأنها فالكوشة مع المدعو بسليمان كايتزوجو طير علييها نعاسها .. ناضت كاتصوط و تجمع فشعرها المطلوق متاجهة جيهت الطواليط و تبركم
-ناقصاني غا ديك الحلمة تفووو (غسلات وجهها غسلة خفيفة غي لواحد العين .. شافت فالمراية دالطواليط كاتقيص عينها اللي حيداتلها الضمادة بالليل حيت فالسبيطار نصحها الطبيب تخلي الجرحة تتنفس شوية .. غززات سنانها و خرجات جيهت البلاكار ديالها هزات بومادة و رجعات للطواليط مقابلة مع المراية .. دهناتها لعينيها و جبدات فاصمة قاداتهالها .. عبسات محاملاش مضهرها .. خرجات لواحد الكوافوز حلات مجر منو و جبدات لاطخوس عندها فيه ميكاب .. رجعات للدوش و دارت ميكاب خفييف مع عكر و شعرها مشطاتو و عاودات جمعاتو كاتبسم لراسها) هكا مزيان .. بففففف انا مباغاش داك الحمااار عاد عقلت فين شفتو هو اللي تزدحت معاه فالعرس .. قلييل الأدااب كي دااير .. نيت كايشبه لداك الطلاب ماكذبتش 😢 أوووف على جدوو اش غايزيدنا هاد الزمر دالزواج انا باغية معاذ .. (عضات على شفتها التحتية بقوة) اصلا مايقدرش يجبرنا على شي حاجة مباغيينهاش .. غانمشي نشوف واش سيفطلي معاذ شي حاجة (خرجات من الحمام مبتاسمة .. هزات تليفونها من تحت مخدتها .. شعلاات الويفي و دخلات للواتساب .. غي بانلها ميساج من عند المدعو بمعاذ بتاسمات و جلسات فوق الفراش كاتقراه)
-ياقوتة .. صباح الخير .. مللي تفيقي و تصحصحي بغيت ندوي معاك فواحد الموضوع عفاك
ياقوت بتاسمات كاتقيص فحنوكها اللي غاديين و يتزنكو .. صيفطاتلو صباح الخير كاتنهد و كولها شوق تعرف شنو باغي .. بانلها طلع vu و هوما يبداو دقات قلبها كايتسارعو كاتسناه شنو غايقولها حبسات النفس كاتعض على فمها مللي بانلي كايكتب، صااطت بقووة الريح من فمها حتى وصلها ميساج خلاها تعقد حواجبها بشدة و عينيها يدمعو
-صراحة أنا كاتعجبني واحد البنت بزاااف باغي نخطبها و بغيتك تدويلي معاها عفاك، حيت نتوما بنات مع بعضياتكم كانضن غاتعرفي تدوي معاها
ياقوت كاتقرا فالميساج و ترجف بلا ماتحس شهقاات متألمةة و سيفطاتلو يديها كايتزعزعو:مانقدرش أمعاذ .. مغانعرفش ندوي معاها
خرجات من الكونفيرصاصيون و طفات الويفي نايضة جيهت الشرجم .. حلااتو و تنفسااات الهووى بقوووة كاتشوف فالزنقة لتحت و ذماغها مخربق و مشوش .. طوول هاد الفترة عمرها عجباتو زعما!! .. علاش فاش كايدوي معاها كاتحسو كايشوف فيها بإعجاب و كايخاف عليها و ينصحها؟! .. علاش علقها فيه مللي كاتعجبو وحدة اخرى و باغي يخطبها؟ لاا وباغيها هي تدويلو معاها .. ضحكات باستهزاء على رووحها و سدات الشرجم شاعطااه متاجها جيهت باب بيتها .. حلاتو و نزلات لتحت كاتجري .. وقفات قدام الصالا اللي كايجلس فيها جدها ديما كاتزيير على يدييها بقووة مثوثرة
الحاج منتصر شاف فيها باستغراب:ياقوت!! بنتي مالكي؟ واش كتتبكي؟؟
ياقوت مسحات عينها ماحسات براسها غي تلاحت عليه عنقااتو كاتشهق و تمتماات بحرقة:انا مواافقة نتزوج اجدو .. صافي موافقة😭😭😭
الحاج منتصر زيير عليها فحضنو:و علاش كاتبكي هاكا ابنتي .. هذا خبار زوين .. صافي تهدني عفا بنيتي
ياقوت كاتشهق حاسة بأنها تخذلات فالشخص اللي كانت راسمة معاه مستقبلها .. كانت متشوقة قبل لحضات ضانة بأنه جا الوقت باش يعتارفلها بمشاعرو ولكن باش تكون عاجباه وحدة أخرى .. حسات بأنها تجرحات و بغات تنتاقم من راسها حيت عولات على واحد بيناتهم غي نضرات و هضرة كثيرة فالواتساب .. اصلا عمرو واعدها و هي مغاتديرش شي حاجة تخلي جدها يسخط عليها .. تراجعات من حضنو كاتمسح عينيها و تبسمات بالزز كاتمتم:مابغيتكش تتقلق مني اجدو ولكن انا من الأساس مباغاش نتزوج بيه .. حاسة بأن هادشي مبزز عليا على داكشي كانبكي
الحاج منتصر تنهد بقووة كايدور فالسبحة بيدو و يستغفر الله:ربي اللي عالم أبنيتي .. هادشي كانديرو لمصلاحتكم .. وليت خايف عليكم و باغي نتهنى عليكم قبل مانتدفن تحت الثراب .. غي غاتزوجو غاتولفو مع رجالكم نتي و ختك كوني اكيدة من هادشي
رحيمو بحسرة:هناء سمعتها خرجات الصباح بكري و خوك من البارح ماجاش
الحاج تنهد بقوة ووقف عاقد حواجبو .. مادواش بالو مشوش على باقي حفايدو، مامتأكدش واش غايقبلو ولا غايضطر يتصرف بطريقة مغاتعجبو لا هو ولا هوما
❌فمنزل الحاج مختار❌
سمارة كاتغبن وتشوف فجدها:جدوو عفااك .. مابغييتش انا من زمان كانتسنى هاد الفرصة اللي نمشي نقرا على برا فحال خوويا سليمان .. هو قرى وولا كايتضرب بيه المثال فالدوار لا هو ولا خويا يعقوب .. علاش انل غانتزوج من دابا يلاه عندي 20 عاام😭
الحاج مختار بصرامة:مغاتناقشييش معايا .. مللي تتزوجي دوي مع راجلك وانا كاع غاندوي معاه و نقولو يقريك فشي جامعة هنا فالمغريب .. علاش غاتمشي نتي حتى للميريكان؟؟ ياك سبقلنا دوينا فهادشي!
سمارة عبساات:نتا مغاتفهمنيش اجدي .. راه القراية فالميريكان واعرة و هنا نلقى خدمة وااعرةةة
الحاج بحدة:مكاينش خدمة أبنتي .. حفيدة الحاج مختار مااالك مغاتخدمش زايدون راك مامخصوصاش و عندنا شركة كبييرة و محلات كبر يعني ماتحتاجيشاي تقلبي على خدمة، اي حاجة كاتبغيها كاتوصل حتى لبين يديك
سمارة :و ديييك هناء علاش خلاوها تخدمممم اجدي☹
الحاج:هاديك خدمتها مزيانة و عاد غي فالدوار .. حنا الرجال اللي كايخدمولنا فالشركة .. و نتي لا قريتي على برا غاتبغي تخدمي فالشركة دالخشب ولا دالفروطة .. وانا يا بنتي مغانبغيلكش
سمارة تأفأفات بقوة و تمتمات:مدامو خلاو بنتهم تخدم و تقرا اذن حتى خوها غايخليني نخدم
الحاج مختار وقف:سوليه نتي و شوفي مللي غاتزوجو غاتولي تحت جناحو هو يقرر عليك ولكن طول مانتي معايا هنا فداري مكاينش قراية ولا خدمة
سمارة صااطت بقوة و مشات كاتنطر لجيهت بييتها .. فطرييقها شافت منى و حياة (الحريم ديعقوب) خنزرات فيهم و كملات طريقها
حياة بهمس:كاتوقعي يقبل يعقوب يتزوج؟
منى مخنزرة:لا قبل يزيد من مورايا مرى اخرى نقتل راسي نهار عرسو
منى خنزرات فيها:نتي ماشي هي أناا .. نتي من زماان مزوجيين و ماحملتييلوش بالوريث ولكن أناا..
قاطعاتها حياة:نتي تزوج بيك غي على قبل داكشي اللي فكرشك، كانبقى أنا الأصل .. انا مراتو اللولة و عمر يفضل وحدة اخرى عليا .. هانتي شفتي واخا راكم عرسان جدااد دوز معاك غي النهار اللولو من بعد ولا كايبات عندي .. يعني بلا ماتنغري بزااف أزوينة (مشات من قدامها خلاتها كاتعض فصباع يديها بالفقصة .. قاصت كرشها كاتزيير عليها و تمتمات)
-وحياة ولدي مانخليه يزيد يتزوج بوحدة ثااالثة 👿
🍃الفيرمة دالغزواني🍃
هناء قادات وقفتها كاتحيد القفازات البويض من يديها و الكمامة اللي عند فمها و شافت فالسي الغزواني اللي قدامها حتى هو قلع الكمامة اللي عند فمو
هناء بابتسامة:هذا واجبي .. دابا غانمشي عندي جولة على الفيرمات المجاورة .. فحص روتيني
السي الغزواني هزلها مانيطتها:يلاه ابنتي نوصلك ..
هناء بامتنان:شكرا .. (تمشاو لخارج الفيرمة و شدات من عندو المانيطة) نخليك دابا
تمشات بوحدها كاتنهد و تأفأف .. لابسة عباية فالاسود و حاسة بكرشها كاتنغزها كل شوية بحريق خفيف .. سمعات صوت من وراها كايعيط بسميتها .. دارت مستغربة و هوما ينكمشو ملامحها فيه
أيوب كايقرب عندها مبتاسم:هناء هههه .. شفتك من بعيد قلت ماتكوني غي نتي
هناء بابتسامة:ايوب لاباس عليك
ايوب وقف قدامها:لاباس و نتي
هناء ومأتلو براسها:الحمد لله
أيوب:فين غادة؟
هناء بابتسامة صفرا:غي لهنا .. عندي جولة
أيوب ومألها براسو:تبغي نمشي معاك نونسك فالطريق؟
هناء نفاتلو براسها:لا لا غانعييك معايا و صافي
أيوب حك على حاجبو بصبعو الصغير كايحمحم:اممم واخا .. على راحتك .. صونيت عليك قبايلة مجاوبتينيش
هناء بهدوء:مكانخرجش معايا التليفون و خرجت بكري شي جوج ساعات عاد ساليت دابا مع الفيرمة دالغزواني
أيوب تبسم:واخا ماشي موشكيل .. احمم صبحتي زوينة اليوم
هناء تراجعات اللور مخنزرة جامعة يديها و تمتمات بحدة:أيوب .. انا وياك غي لابسين خواتم، و مدايرينش حتى خطبة رسمية حاليا هادشي اللي درتي دابا مايتعاودش الله يخليك
هناء بصرامة:شنو مكانت نيتك ماشي دابا .. الموهيم نخليك دابا عندي خدمة (بغات تمشي و هي تقشع من بعيد محمد كايتمشى ببطئ كايعرج برجلو .. عيطاتلو بصوت عالي) محمممد
ايوب شاف باستغراب فين كاتشوف و هو يبانلو محمد حتى هو .. و هناء مشات جيهتو كاتزرب:خوياا واش صافا
محمد وقف فبلاصتو بلا مايدور عندها، غي وصلات لموراه دوراتو بيديها و هي تشهق مللي شافت فملامح وجهو حطات يدها عند فمها مجبدة فيه عويناتها
-ش شكون دار فيك هاد الحالة أخوويااا؟؟؟
محمد حط يدو على حنكو مجروح كايسيل بالدم و رجلو عاقدها من لتحت حتى هي مضروبالو من جيهت الفخض
-والو غا بغاو يگريسيوني ولاد الكلاب
هناء شدات فيه بفزع:اناري و ضربوك هاد الضرب كولو
محمد تأفأف مخنزر:اه هاد الضرب كولو و غانردو لدينمهم .. غفلوني واحد ضربني لوجهي ولاخر لفخضي و تحاماو زعما باغيين يسرقو ولكن انا كنت مخلي كولشي فالدار خديت غا سوارت الطموبيل خداوها
أيوب شد فيه من الجيهة الثانية:عاقل عليهم اخويا .. نتعاونو و نقلبو عليهم
محمد مخنزر:هادو ماشي من الدوار حيت ماعارفينيش، باينة فيهم جداد اليوم غانجمع الدراري و نقلب عليهم
أيوب شاف فهناء اللي باينة مخلوعة على خوها:هناء تهدني دابا
هناء جبدات فيه عويناتها:كيفاش نتهدن مكاتشوفوش مضروب .. خويا سربي عفاك باش نعقملك هاد الجروح
محمد بتاسم:ههههه ماتخلعيش غا جريحات و صافي
هناء غوبشات كاتفكر:و كي دارولك .. واش جاوك على غفلة؟ نتا فين كونتي؟
محمد:كنت فبلاصتنا اللي كانطلولها مرة مرة .. ديك الدويرة اللي درناها فشجرة الزيتون .. راك عارفاها بعيدة و عارفاني لا تعصبت كانبغي حتى نبرد شوية عاد نرجع، و داكشي اللي طرا البارح مرضني .. مشيت دوزت تم الليلة و فالصباح غي بغيت نركب فالطموبيل وقفو عليا بالمضاوات .. ضربت واحد فيهم ببونية و هوما يتحاماو واحد ضربني جيهت الوجه شدييت فالبلاصة وانا نحس بلحم فخضي كاتشرك .. أنا تشطنت مع الجرحات و هوما زربو خداو السوارت دالطموبيل
هناء بعصبية:ولاد الكلااب هاادو (شافت فأيوب اللي كايشوف فيها و قلباات عينيها مقادراش تطول فيه الشوفة .. معارفاش مستقبلها كي غايكون بعد القرار اللي قررو جدهم)
وصلو لقدام الدار ديالهم .. أيوب شاف فمحمد بهدوء
-الله يشافيك ألخاوا .. انا غانمشي دابا نطلاقاو عن قريب، خاص نديرو موعد دخطبة رسمية باش ندويو فالعرس ثاني
محمد شاف فيه عاض على لسانو و شاف فهناء بنص عين .. حمحم و تمتم بحيرة:انشاء الله .. زيد تشرب كويس دأتاي
ايوب:لا مرة أخرى ان شاء الله
دار غايمشي و هي تتحل باب الدار .. خرج الحاج منتصر بالسبحة فيدو و ملامح صاارمة .. نطق بهدوء:ولدي أيوب
ايوب دار شاف فيه:نعام اجدي ..
بتاسم مللي شافو، اما هناء قلبها تقبض كاتشوف فجدها و تصرط فريقها
الجد بابتسامة:دخل أولدي بغيت ندوي معاك
ايوب شاف فيه و فمحمد و هناء اللي كايشوفو فبعضياتهم بشك .. تبسم:واخا
هناء بتردد كاتشير لمحمد باغا تتلفو:جدي .. شفتي محمد خاص ندخلو نعقملو جروحو
الجد شاف فيه بانتباه عاد ردلو البال .. غا قشع حالتو عينيه وسااعو و تمتم:ولدي شطرالك؟؟
محمد تاجه للداخل كايعرج:والو ماطراالي واااالو غي جراح خفاف
الحاج منتصر تبعو بعينيه مشوش عليه مقوص حواجبو .. و هناء مشات موراه بالزربة .. قبل ماتدخل شافت فجدها بتوسل كاترغبو بعينيها مايجبدش الموضوع مع أيوب و تبعات خوها
الحاج منتصر شاف فأيوب بابتسامة:دخل أولدي مرحبا
أيوب تقدم جيهتو مبتاسم:احم .. ترحب بيك الجنة أجدي شكرا
دخل هو اللول و تبعو الحاج منتصر .. مباشرة مشاو لواحد الصالون
الحاج منتصر بصوت عالي:صفية .. جيبي أتاي .. (شاف فأيوب مبتاسم) كي داير أوليدي نتا و باباك و ماماك
ايوب ومألو براسو:بخير الحمد لله يسول فيك الخير
الحاج منتصر:احممم .. صراحة بغيت ندوي معاك فواحد الموضوع و ماتديرهاش قلة الصواب منيي، (شاف فنضرات الاستغراب من أيوب .. تقلبو ملامحو للجدية و كمل هضرتو) صرااحة .. غانطلب منك طلب و نتمنى تنفذو .. حيت هادشي مرتابط بعاائلتي باغيلها الخير و باغي الصداعات اللي بيننا و بين عائلتنا الثانية أي جيراننا يتسالاو .. اكيد غاتكون سامع على العداوة بين عائلتي ماالك
أيوب ومألو براسو مستغرب:اه فصغري سمعت بزاااف على العداوة اللي كانت نايضة .. ولكن مافهمتش انا شنو دخلني؟
الحاج منتصر علا راسو بشموخ كاينضف حلقو بالتحنحين:احمم .. حنا قررنا نعلنو صلح بيناتنا و نحبسو هاد النزاعات أولدي
ايوب تبسم بابتسامة واسعة:مزيانة هاد القضية
الحاج منتصر:ولكن باش نحبسوها و فخطرة و مايتعاودوش يتجبدو هاد الصداعات .. قررنا نتناسبو مع بعضنا
أيوب بتاسم:مزيانة هاد القضية .. اذن غايتزوج محمد من عندهم؟
الحاج منتصر حرك راسو بلا:لا اولدي .. ماشي غي محمد، غايتزوج محمد وياقوت ووو.. احم احم حفيدتي هناء حتى هي
الجد خنزر فيه:نقص من صوتك .. و لدابا مكاينش خطبة رسمية بيناتكم من غيير هضرة عااادية و خويتمات تلبسو .. غي كون هاني خاتمك غايرجعلك
أيوب كايهزهز فرجليه بعصبية:ماااشي قضية الخااااتم أجدي .. هادي قضية الكلمة اللي تعطاااتلنا و خلفتو بيييها
الجد وقف بملامح جدية و تمتم:هادشي اللي عندي اولدي .. حاليا ماعندنا بنات للزواج .. مصلحة العائلة ديالنا اهم من كوولشي
أيوب وقف معاه .. مع وقفتو مع دخلات صفية بأتاي .. حطاتو مبتاسمة و خرجات حانية راسها، مع خرجات مع غوت بصوت عالي:وهناء فخبارهاا هااادشيي علاااش ماخبراتنييش ؟؟
الجد خنزر فيه:دويييي باحتراام و نقص صووتك .. هناء عااارفة و اليوم غناخذ جوابها النهاائي اللي متأكد منو غايكووون المواافقة .. الرضى دجدها عندها أهم من كوولشيي
دخلات هناء بالزربة فيديها قطن و مغلفينلها بقفازات طبية و محمد دخل وراها حنكو فيه ضمادة و الدم ممسوح منو، و رجلو حتى هي كايعرج بيها مبدل سروالو اللي كان لابسو بواحد جدييد
هناء كادور فعينيها بينو و بين جدها كاتصرط فريقها متأكدة بأنه عرف بموضوع الزواج .. سمعات صوت ياقوت و مها و باها و الخادمات وراهم كايتمتمو بشنو وااقع
تقدم عندها صاااعر كايغوت
-نتييي غاتزووجي و مجرجرااني معاااك
هناء عضات على حنكها من لداخل تالفة:أ انااا
أيوب شدلها فذرااعها و زير علييها:نتي شنووو .. ضاااحكة عليينا أنا و عاائلتييي .. علاااش عاطييني الكلمة مللي غاتديرو معايا هااااد البلااان هذااا، صدقتيييس واااااحد القح** مكاتسواااايش
محمد قرب عندو مخنزر شدوو مزيرلو على ذراعو:طللللق منهااا و دويي باحتراام .. شهاد قلة الاداااب هادي وااش عااارف شكاتخررج من داك الفم .. راني نهرسو لدييينمك
هناء ولات كاترعد عينيها دامعين من شنو قال عليها ايوب:😭😭😭
قربات ياقوت عندها مخلوعة شداتها كاطبطب عليها مخلوعة:ختي تهدني عفاك
هناء كاتنخصص:ا انا ماشي كيفما قال عليياا 😭
محمد جر المدعو بأيوب من يدو بقوة باغي يخرجو .. هو تنترر منووو و مشا عند هنااء مشموووت جرها من شاالها كايزعزعها:نتييي راااك واحد بنت الحراام مامربيااش .. دايرة عليا انا حجاابي عفتيي .. كون كنتي هاااكاااك و مربية و بنت الناااااس و الآاااصل كنتي تصارحينيي فالصباااح بشنوو كاين ماشي مخلياااني كانخطط فعرسناا و خطوبتنا يالحمااااارةةةة كاتمشتييي فياااا هاااا (قرب عندوو محمد و عبد الله جرووه باغيين يخرجووه كل واحد شدو من جييه و هو كاايغووت صااعر نييت تعصب و تغلغل عينيه خارجيين)
هناء كاترعد قرباات عندو غوتاات علييه بصوت عاالي:انا حسسسن مننك فهمتيي .. حسن مننك .. اههههه انا مربية و كثثثر منك نتااااايااا و كانفتاااخر بتربيتييي .. شنو باغيني نخليك تطول يدييك عليا قاش بغيتي تشد فياااا!، قالوولك عليااا راني بنت السووق و مامربياااش فحااالك ولاا كيفاااش .. كانحمد الله اللي بينتييي طيينتك دااابا و كانحمد الله اللي بانتلي حقييقتك امانا كنت نتغش فيييك .. تفووو على كنننس
ياقوت و رحيمو كايجبدوها و هي كاتغوت تابعاهم جااريينو و حتى هو كايغووت و يعرعر .. حتى حلو البااب و خررجووه لبرااا دافعيينو
زدحاات البااب بقووة و داارت كاتنهج ركب فيها الاعصاب بهضرتو و إهانتو لييها .. غي سترجعات ذااتها و توازنها .. علات راسها فخوها و باها اللي بقاو معاها عينيها مدمعين .. بغات تقرب لعندهم تتشكالهم لقرار جدها فين موصلهم و هوما يسمعو الغوات من عند ياقوت و رحييمو قالو دقة وحدة و بصوت عالي خلعهم
-أش طرااا .. جدي حبيبييي (مشات جيهتو كاتجري عينيها كايتسرسبو بالدموع كاتداحس مع رحيمو و ياقوت اللي تجمعو على الحاج منتصر)
هناء شهقاات بصدمة كاتمتم بصوت عالي:جديييي
الحاج منتصر جالس فوق المطااربة شاد على صدرو كايككح و يشهق و ياقوت كاتفسخلو حواايجو من الفوق و رحيمو قدامها مخلوعات .. مشات هناء كاتجري كاتدافع معاهم شداتلو فوجهو كاتشوف فملامحو مخلوعة و تمتم
-جدي تنفس مزيان عفاك ماتضغطش على راسك .. جدي عفاك عفاااك (الدموع غالبينها .. عينيها كايتقطرو و قلبها كايفرفر، شافت فالخادمة موراها غوتاتلها) جيبييي الما و السكاار و الدوا ديااالو ..سربييي
مشات الخادمة كاتجري .. قرب محمد كايعرج عند جدو مع عبد الله مشوشين
دخلات صفية كاتجري بصينية فيها كاع اش طلبات منها هناء .. خطفاتهالها رحيمو من يدها بالزربة و حطاتها فوق المطربة قدام الجد .. هناء بالزربة خطفات كاس الما و السكر شربااتولو و هزاات الدوا ديالو بيديها كايترعدو و كاتنخصص قلبها مزيير من شنو طرالها هاد الصباح من أولو دازلها مكفس، شربات الدوا لجدها حتى بدا كايطلع النفس عااادي و كايتنهد
محمد زفر بقووة:افففف .. جدي دابا بخير؟
الحاج منتصر ومألهم براسو:بخير اوليداتي بخيير
هناء الدموع كايطيحو مسرسبين من عينيها حنوكها و نيفها حوومر كادوي بالزز:الحمد لله على سلامتك هئ هئ ماشربتييش دوااك الباارح و اليوم يااك .. راهم عندي محسوبين هنااا .. علااش كادير فيا هكااا😭
الحاج منتصر تنهد بقوة و جرها لحضنو عنقها:صاافي ابنتي غاكايمشي من باالي وصاافي ..
هناء شافت فماماها بعينيها حوومر:فاش مانكونش هناا عطيولو الدواا علاش كولشي خاص نديرو أناا .. هو ينساه و نتوما ماتنساااوش
رحيمو بهدوء:واخا ابنتي واخا .. حتانا مشالي من بالي
ياقوت تكعدات كاتمسح عينها و هي تشوف فحالة محمد شهقات:نتاا ماالك
محمد شاف فيها كايحك فشعرو:بففففف المصايب و صاافي .. هانتا كاتشوف اجدي وجه هاد العاائلة جاايبلنا غي النحس
الحاج منتصر قاد جلستو مخنزر:الزواج غايكون غايكون .. (زفر بقوة كايرتاح شاد على صدرو) بغيتكم توافقو أولادي .. ها ياقوت وافقات و هناء راني انا اللي نعرفلك مصلاحتك أبنيتي .. يعقوب هو الرجل المناسب بالنسبة ليك
هناء حاسة بالضيااع:جديي راه مزوج بجووج قبل منيي، واااش عارف شنو هي غاندخل ضرة على زوج نساااا!!! و اصلا سابقلي سمعت عليه هضرة ماشي هي هاديك .. مانقدرش عفاك عفينيي مباغاش نتزوج .. نبقى عمري كولو بلا زواج ومناخدوش هو
الجد تنهد بقووة كايزفر و يصوط بصوت عاليي:اناا عاارف شكانقول أبنتي .. وافقي الله يرضي علييك على قبلي انا و على قبل صحتي .. واش تقدي تخسريني ولا تشوفيني غضبان عليك؟
هناء كاتعض فشفايفها بقووة كاتزيير على كفف يدها:مانقدرش اجدي ولكن نتا بهاد الطريقة باغي تدفني وانا حية
الحاج منتصر:لاماقبلتوش بهاد القرار .. غدا مغاتلقاونيش هنا .. نهز راسي و نزيد ماتلقاوليش طريق مزال .. حتى قبري ماتعرفوهش لا مت
هناء تنهدات بقوة كاتشوف فخوها:و محمد اجدي .. هو راه عينو فجواهر .. واش كولنا غانتحرمو من الحياة اللي راسمينها على قبل هاد الصللح هذاااا
الحاج منتصر شاف فمحمد بجدية:ولدي عارفك مغاتخيبنييش
محمد كايغزز سناانو بقوة .. من طبيعتو ديما قلييل فالهضرة و ذماغو خداام .. كايبقى يفكر و يعاود لقراراتو و معارفش دابا شنو يدير .. فاش كايتعصب ديما كايخوي الدار و كايبات فواحد الدويرة كانو كايمشيولها هو و هناء كايلعبو فيها .. كايبات يخمم فشنو يدير ولكن دابا مقادرش يحسم قرارو .. واش يقبل بقراار جدو ولا يتبع قراارو هو اللي من زمان و هو كايخطط يخطب صاحبة هناء الوحيدة، زيير على سنانو سااكت
الجد بهدوء:زيدو فكرو مزال من هنا لليل .. و غاتعطيوني جوابكم فالعشا اللي غايتدار بيناتنا .. البارح كل واحد دلع لقنت ولكن اليوم غاتجلسو مثبتيين .. يلاهو اللي عندو شي شعل يقضيه (شاف للجنب بالنفخة مخنزر .. شافت هناء فخووتها حاايرين و خرجو من الصالون كايتوشوشو)
هناء بهمس:نتي قبلتي دغيا .. شنو طرالك؟
ياقوت تنهدات كاتفكر فهضرة معاذ و شنو قالها:ماباغاش نعصب جدي
محمد بنرفزة:مستقبلك اختييي
ياقوت بجدية:شحالما قريت فاللخر مصيري نتزوج .. دابا غانسبق زواجي و من بعد القراية
هناء تنهدات بقوةة:غانمشي ناكل شي حاجة و نطلع نرتاح فبيتي كرشي كاضرني
محمد مشا جيهت الباب و هي تحبسو بهضرتها:فين غادي؟؟
محمد شاف فيها:عندي حساب نصفيه
هناء تأفأفات:خويا سير لبيتك عطي الراحة لراسك .. حمد الله اللي ماطراتلكش شي حاجة خطييرة مناقصينش مصايب
محمد خنزر:لاماوريتهمش محمد مالك شكاايسوى .. مغاانكونش من عاائلة ماالك
مشا جيهت الباب بسسرعة شااعطو .. خلا البنات كايتشاوفو بحييرة .. هناء تنهدات طالعة لفوق و ياقوت مشات للكوزينة تتعاون معاهم على العشا .. كاتضيع وقتها باش ماياكلوهاش صباعها و تطلع تهز تليفونها تزيد تدوي مع المدعو بمعاذ و يتجرح قلبها كثر ما هو مجرووح
🔮فالطرييق السيار السرييع🔮
صايك سيارتو كايتصنط لأغنية دالراي فالراديو و جوان مبروم بين صباعو كايسف منو و يصووط فالهوى، مركب البلوثوت بين تليفونو و الطموبيل مدوز اتصال
-افيين شااادهااا
-هاني جاي دابا من تارودانت .. كانت عندي شي خدمة تم على قبل المدرسة اللي مفروض نديروها فالدوار، و نتا فين غادي اسليمان كانسمع صوت فشكل
سليمان كايسسف فجواانو و يشوف فالطريق:شاد الطرييق للشااون نريح راسي شوية
سليمان بحدة:واااخويا شغانديير .. نتزوج بديك البرهووشة .. واللهلا كانتلهاا .. ولا بغا يسخط جدي غا يسخط من زمااان انا واخدو
يعقوب بعصبية:سليماااااان .. غاتقلب الطريييق دااابا و ترجعع و غاتقببل تتزووج ببنتهم
سليمان وقف الطموبيل فوسط الطرييق مخنزر:واااش سمعت مزياان ولا كييفااش؟؟؟
يعقوب:اه سمعتي غاتزوج بالبنت و سالينا .. صحة جدي أهم من طيشك
سليمان باستهزاء:يعقووب .. هادشي نتا اللي كادييرو، نتا هو الولد اللي كاتسمع للهضرة و شاد السياسة فحياتك العملية و الشخصية .. منضمها و كاديير اللي كايقولولك علييه، مك خيراتك بين رضاها و بين سخطها باش تتزوج و خديتي اللولة باش ماتسخطش عليك و الثاانية مللي جات عند جدك وفضحااتك باللي راها حاملة منك تزوجتيها و داابا شنوو!! .. حتى الثالثة مبززة عليك .. لفوقااش هادشي؟؟؟
يعقوب بجدية:هادشي ماشي بالزز مني .. فكرت و عاودت عاد قبلت باش نتزوج .. على الأقل مايبقاش الصداع فحياتنا .. واش نبقاو ديماا محاربيين .. خلاص أناا مباقيش ناوي نزيد فهاد العداوة مناقصش حريق الراس براكة غي خدمتي
سليمان باستغراب:تا وااش من نييتك؟؟ .. خدمتك راك رديتي الدوار فحالا رانا فشي مدينة الطريق مقادة و الضو و الما و دابا مدرسة غاتبنى و الديور غي الفريع، و زيييد عليها نص الدوار مخدمو نتا .. حيااتك مزياانة واخا الصدااع نايض و العدااوة كاينة
يعقوب:تت .. نتا راك مفاهمنييش ألنم اللي غايبغيه جدي غايكون و العداوة غاتزوول ولكن طبعا ديك بنتهم غانتزوجها غا ضد فيها هيييي
سليمان:شرحلي دابا انا مافهمتكش هضرتك مرووونة؟؟
يعقوب بجدية:سمعني .. نتا غاتقبل بالزواج وانا غانقبل .. ايوى و فالاخر نديرو اللي فذماغنا و نعيشو لاڤي كي موالفيين .. اهم حاجة مانوريولهمش انهم حسن منا .. حيت على مباانليي جدهم غايقنعهم و داك الساع غانبانو حناا اللي باغيين الصداع و غانتصادعو مع جدنا .. اللهما تقبل و غدايدك خرجهم فديك بنتهم و دوز نتا كااع عطلااتك فالشاون و فالميريكان و فرانسا و دوور و جول فالدول و المدن، ولا تاخذ السخط من عند جدك و يبانو هوما حسن منك فنظر جدك حتى هوما
سليمان بدا كايقتانع شوية؛شنو دابا نقبل؟
يعقوب:طبعا غاتقبل .. انا بنتو نخليها فحياتي فحال شي كادر مهرس مانحتاجووش و نتا كذلك بنتهم تزوجها و خلييها فالدار و نتا بني حياتك اللي كاتحلم بيها .. أهم حاجة .. حنا خاص نبانو حسن منهم فهمتيني، زايدون ماعرفتي هوما يرفضوو نزدقوو حنا فووور
سليمان قلب طريقو للطريق المعاكسة:واااخا هانا رااجع
يعقوب تبسم بخبث:هادشي مكايحتاجش تفكير .. ديك العائلة مايصلاح معاها غالتهمييش و المحاربة بنفس سلاحهم
قطع عليه مكمل طريقو .. بينما يعقوب وقف الطموبيل فباب دارهم .. شاف جيهت دار الحاج منتصر، طلعها و نزلها بعينيه مبتاسم بالجنب:هه داك الغرور ديالك و النيف اللي معلياااه غانهبطولك للأرضض و نزطم علييه و نكسرلك ضهرك و نذلك باش نورييك يعقوب مالك شكوناهواا .. النخوة على الخوا مصالحااش (خرج من الطموبيل كايلعب بالسوارت فيديه و دخل لدارهم اللي شكلها نفس شكل دار العائلة الثانية و حتى هي بثلاثة دالايطاجات)
🌑المساء🌑
نازلة سمارة من بيتها بجلابة طويلة فاللون الابيض فالكمام عندها الدونتيل فالاسود و حتى من الطولة من لتحت و شعرها مطلوق على راحتو، كاتشوف جيهت خوتها اللي موجدين راسهم حتى هوما و جدها و ماماها و الضريرات الزوجات🙄
الحاج مختار خنزر فيها:و من فوقاش نتي كاتدخلي فهاد الامور؟؟
منى حنات راسها عابسة:سمحلي اجدي
يعقوب بجدية:دابا اشنو غايوقع لموافقناش؟
الحاج شاف فيه بحدة:اللي مغايقبلش ما هو حفيدي مانا جدو (ضرب بعكازو فاللرض كايشوف فيهم بثلاثة) فهمتووني
سليمان شاف فيعقوب كايتغامزو:فهمنااك
سمارة بعصبية:لمابغاليش نكمل قرايتي مغانقبلش
الحاج شاف فيها بنص عين:مللي نعطيي قرااريي بخصووصك نتي بالضبط مكايحقلكش تقولي لااا
سمارة عضات على شفتها التحتية بقووة حانية راسها معاجبها حال
الحاج تاجه جيهت الباب:يلاهو زيدو لا كنتو واجدين .. و هااد الخطرة وااياااكم شي حد يخرج لماعطيتكومش أنااا الإذن
خرج سابقهم تبعوه يعقوب و سليمان و رقية و سمارة .. اما الضريرات فخنزرو فبعضياتهم و خرجو تابعينهم محااامليينش الوضع
🔮منزل الحاج منتصر🔮
رحيمو لصفية:شوفي الدجاج واش تحمر مزيان
صفية:واخا أخالتي (مشات بالزربة .. و رحيمو دارت كاتشوف فالبسطيلة دالحوت اللي قادوها حتى سمعات صوت الدقان، تحنحنات و حيدات الطابلية اللي كانت لابساها فوق قفطانها و مشات خارجة لبرا، مع خرجتها بانولها عبد الله و الحاج منتصر غاديين جيهت الباب .. و محمد و ياقوت و هناء نازلين من الدروج بعدما وجدو راسهم
الحاج حل الباب مبتاسم:مرحباا بيكم تفضلو مرحباا
الحاج مختار تبسم:ترحب بيك الجنة اخويا .. ماتحتاجش كل خطرة تعذب راسك نتا و تفتحلنا الباب بيدك
الحاج منتصر بابتسامة:هادي المعزة أمختاار .. المعزةة .. دخلو دخلو
الحاج منتصر بابتسامة:بنتي هناء فسخات خطبتها مع داك اللي كان خاطبها
يعقوب علا حاجبو فيها .. بانتلو كاتزيررر على قبضة يدها و البكية شداتها ثاني مللي تفكرات شنو قال عليها و شنو دار .. بانتلو فحالا بقا فيها الحال قلب عينو منها و حنحن
-احمم .. حتى أنا بغيت نقولكم واحد القرار مهم
هناء شافت فيه مخنزرة و هو يغمزها .. زادت خنزرات فيه كاتمتم:تفو كي داير مكايتهضمش
يعقوب بهدوء:انا فكرت فالقرار اللي تاخذتوهلنا وو .. بانلي فصالح عائلتنا .. يعني العداوة كاتزيدنا غي مشاكيل و صداعات و صافي .. لذلك انا موافق نتزوج ببنتكم
هناء جبدات فيه عينيها حاسة بالخننقة فصدرها كاتشوف فيه و ترجع تشوف فمراواتو:م مايمكننش
قاطعو الحاج مختار:سكتوو .. حد مغايعارض مزاال .. غاتزووجو و يدييكم فوق رااسكم و بالزز منكمممم
محمد خنزر كايشوف فيه:بغيت ناخذ منك عهد حتى نتا
الحاج مختارر بتسائل:شنو
محمد:خواتاتي مايقيصوهمش ولادك بالسووء .. و ياقوت تكمل قرايتها و حتى هناء ماتحبسش خدمتها و فالمقابل بنتكم لا بغات تقرا و لا تخدم مغانمانعش .. كيفما غايعاملو خواتاتي نعامل بنتكم
وقفات رقية كتتبسم ابتسامة صفرا و مشات عند رحيمو:الحاج مكايبغيش الماكلة المالحة بزاف
رحيمو بادلاتها بابتسامة صفرا:غي تهناي كولشي على حقو و حتى حاجة مزايدة .. اجيو تجمعو مرحباا
تمشاو كاملين جيهت الصالون اللي كياكلو فيه .. كان العشا كايحطوه البنات .. تعشاو فهدووء و صمت اغلبيتهم الماكلة كاتوحلهم فحلقهم .. من غير الحاج مختار و الحاج منتصر اللي مبتاسمين برضى على موافقة حفايدهم ..
نطق ح.منتصر:اذن، غدا غاتكون خطوبة رسمية و كولكم غاتلبسو الخواتم
هناء حساات باللقمة وحلات فحلقها بدااات كاتكككح بصووت عاللي عينيها مدمعين .. حتى شافت كاس دالما تمدلها .. شداتو بالزرربة من عند اللي مدوولها و هوما يتلامسو يديهم .. شافت فيه كاتككح و هو كايومييلها براسو تشرب
رحيمو:بنتي خودي من عند يعقوب الما
هناء نتراتو من عندو و شربات منو زكفة كاتكح و تخنزر فيه و هو غي مبتاسم بطريقة استفزااتها .. حتى ناضت وقفات كاتنهج:عندي خدمة بكري غاانمشي نعس .. (بقات مخنزرة فيه و دارت غادة فحالها)
يعقوب سمع همس من عند سليمان فوذنو: عارفك دابا كاتحلف عليها و كاتقول فسرك لمعاودتيلهاش التربية مزيااان فحال هاد الزوجات اللي مقنتات لهيها ماتكونش يعقوب مالك
يعقوب شاف فيه بابتسامة و غمزو هاز كاس دالما كايشرب منو:كاتفهمني اخويا كاااتفهمني ههه
دازت ديك الليلة مشحونة عند عائلة مالك ككل .. تسالا العشاء الصامت بهدووء، بعدو مباشرة مشاو الضيوف فحالهم .. محمد ماقدرش يصبر مزال على ديك الطبلة خرج فحالو لبرا كايجمع الدراري اللي كايخدمو معاهم فالاراضي يعاونوه باش يقلبو على دوك اللي گريساوه فالليلة الماضية .. دوز العشية كولها كايقلب و يسول و مالقاش و دابا مخططين يمشيو للأرجاء دديك البلاصة اللي تحاماو عليه فيها يقدو يلقاوهم
اما ياقوتتنا فطلعات لبيتها مغبة .. بدلات الضمادة على جروح عينها و مشطات شعرها و ديماكيات وجهها حيت كانت دايراه خفيف .. لبسات بيجامتها و نعسات مباشرة .. عكس هناء اللي مللي دخلات لبيتها وهي كاتقرا فالقرآن .. حتى لنص الليل فاش بغات تنعس .. ناضت صلات صلاة الاستخارة و تكات على جنبها ناعسة و كاتفكر فكااع ديك الحياة اللي كانت كاتخططلها غاتحبسلها مع وااحد فحال يعقوب .. مزوج بزوج دالنسا و عندو نظرة دونية للنسا .. من ديما بالنسبالو النسا كايصلاحو غي للدار و الفراش و يحنيو الراس
اما فدار العائلة الثانية، سمارة عينيها و حنوكها حومر من كثرة مابكاات .. مغطية ففراشها و كاتنخصص ماحملاتش محمد .. و مامتخايلاش حياتها تكمل معاه .. هضرتو و نظراتو ليها حسسوها بإهااانة كبييرة، معارفاش شنو غادير
فبيت آخر .. گالس يعقوب بسروال كيطمة فالرمادي واسع فيه جوج خيوط كايحزموه من النص مرخوووفين .. صدرو عرياان عااامر و مكدر، مزغب شوية و عندو توحيمة بااارزة لونها قهوييي فالجهة ليمنيا دصدرو، كايشوفو مباشرة قبالتو و كايفكر بعيييد .. شيشة محطوطة قدامو كاايشيش و حياة (مراتو اللولة) كاتقادلو الجمر فيها مبتاسمة، كايخطط فذماغو كيفاش غايتزوج ببنت أعداائهم .. واخا كايبان متقبل الزواج ولكن غي ضد فهناء اما هو اول وااحد مااقتو و محاملووش، و كايخطط من دابا كيفاش يحيد منها تعجرفها الزايد عن حدو
حياة قربات عندو جلسات جنبو .. بكسوة طوييلة لاااصقة على لحمها و صدرها مفتووح باين نصو و الفتحة طوييلة من جيهت الفخاض كذلك، حطات يدها على يدو كاتدوي بصوت محلون:حياتي .. بغيت نسولك
يعقوب شاف فيها كايجر من الشييشة نفس طوييل:شنو؟ فففففففف (نفخ عليها الذخان .. حتى بدات كاتكح مرجعة راسها اللور)
يعقوب نزل عينو لصدرها كايشوف فيه عاض على فمو:عمرني دويت معاك فخصوصياتي؟؟
حياة قربات عندو كاتمحلس عليه و ترقق فصوتها:لا .. غي بغيت نعرف وصافي و حتى بلان العروسة الجديدةة، كانعرفك نتااياا كاتبغيي الزيين و هي زيينة .. زعما لاجات لهنا غتاخذ بلاصتي فقلبك و تولي هي اللولة؟
يعقوب تبسم باستهزاء كايجر من شيشتووو .. نفخ نفسس طوييل وطلقها من يدييه جار حياة للفراش كايتمتم و يشوف فصدرها:شكون قالك راك اللولة فقلبي؟؟ هه نتي غا كاتجيني على الكانة و النعاس معاك حلييلو .. اما من دييما قلبيي فيه غالواليدة بوووحدها ازين (طلع فوقها فالفراش و خشا وجهو فصدرها و عنقها و هي كاتعوج و تدلل وتحلون علييه عااجبها الحال بين يديه)
⛅جا صباح جديد⛅
فدار الحاج مختار، ناااااعس لا راه غاارق فالنعااس .. حال فمو نص حلة وواخد كاع الفراش بووحدو بطولتو و تجريدتو .. تليفونو كايصوني و يعاود و الباب دالبيت كايتدق عليه و يتعااود و هو مجايب خباار .. مشات الخادمة من قدام باب بيتو نزلات لتحت للطبلة دالفطور فين مجموعة كاع العائلة
الخادمة؛سيدي الحاج .. السي سليمان مابغاش ينوض
الحاج مختار علا حواجبو كايتنهد:عاادتو هي عاادتو داك الولد .. عمرو يدير عقلو و يكبر
يعقوب بهدوء:خاصو ياخذ شوية تالمسؤولية .. الزواج و الخدمة غاتردو مزيان
الحاج مختار شاف فيه مبتاسم:الله يرضي عليك أولدي .. نتا عمرك خيبتي ضننا فيك، (شاف فمنى مخنزر .. كايشوف فيها بشوفة ناقصة) نتي مهلية فصحتك؟
منى عينيها حمرين بقوة السهير .. باتت كاتسنى فيعقوب اللي ماطلش عليها من ليلتهم اللولة:مهلية ألحاج
الحاج مختار بهدوء:ايوى مزيان .. يعقوب نتا الشركة و مشاكيل الجماعة اللي راك فيها بزاف عليك .. وكل خوك بالشركة دالخشب ونتا شد حاجة وحدة
يعقوب بهدوء:خدمتي قاد بيها ألحاج .. لا بغا يخدم راه قاري ادارة الأعمال و الفلوس كاينين و الشركة كذلك و كولشي موجود .. راه غي ولف النعاس و التسافير .. زيادة على انه قبل مايمشي لعلى برا يقرا كان خدام فالأرض مزيان و كايرد البال لكولشي .. حتى دابا باقي رادلها البال
الحاج مختار بعدم رضى:ديك الارض أيعقوب انا وياك عارفين علاش رادلها الباال .. راني ماشي بالقروون، مخليه على خااطرو حاالياا .. النعاس و التسافير و الطييش .. زيد عليها ديك الارض و شنو زارع فيها، فوقاش غايدير عقلو راه دخل فسبعة و عشرين عام
رقية تبسمات:الحاج .. خليه على خاطغو .. هو فاش غايبغي يبدا خدمتو غادي يبداها بلا مايحتاج يئولهالو شي واحد
الحاج مختار خنزر فيها:فشووشك اللي خسرو الولد .. طاايش و ماعلابالوش .. راه داخل على مسؤولية و زواج و ولاد
تسمع صوت من وراهم فيه بحة النعاس:نفس المحاضرة دكل صباح ألحااج
قرب سليمان كايجر فرجلو و كايحك فعينييه .. حنا على راس جدو باسو و هو و ماه::صباح الخير عليكم
الحاج مختار كايشوف فيه بنص عين:نتا خلااص ماشبعتيش نعااس؟؟
سليمان تفووه مرخيي .. كايشوف فالخادمة كاتحطلو البيض قدامو:اخخخخ هاد البيض مليتو، بقاي تقاديلنا الكريب ولا البان كيك ولا شي حاجة حلوة على الصباح
الحاج مختار مخنزر:هضرتي معاك حاسبها زايدة ناقصة باش كاتجاهلها هاكا؟؟
سليمان شاف فيه معلي حاجبو:جديي .. صابح كااعي و براكة غي راني غانتزوج باللي ختاريتيها نتاا، اذن بلا ماتحكر .. فاش غايقولي هاد العقل سير خدم فالشركة غااانمشي
الحاج مختار ومألو:واااخا هاحنا غانشوفو حتى لينن غاتبقى هاكااا
يعقوب وقف:غانمشي دابا .. الله يخلف
وقفات منى معاه:يعقوب عف..
قاطعها يعقوب بيدو:مشغول .. حتى نجي
منى غززات سنانها كاتشوف فيه معصبة .. هو خرج فحالو مخنزر .. و ركب فسيارتو متاجه لتارودانت .. كل نهار عندو مشية ضرورية ليها .. اصلا الطريق ماطويلاش و دغيا كايوصلو ليها
🏮دار عائلة الحاج عصمان🏮
هناء نازلة من بيتها لتحت .. ببيجامة منزلية طويلة و شعرها مضفور راداه للجنب .. بانولها جدها و ماماها اللي كايفطرو .. مشات مباشرة لجنب جدها معلية حاجبها
هناء:شربتي الدوا؟
ح.عصمان شاف فيها:شربتو ابنتي
رحيمو بابتسامة:بقيت رادة معاه البال ليوم باش يشربو
هناء ومأتلها و جلسات قريبالو كاتشوف فجنابها:فين بابا و محمد و ياقوت؟
رحيمو تنهدات بصوت عالي:خووك راه جا حتى للصباح باينة فيه عياان و مشا ينعس .. باك مشا يطل على الفلاحة واش دايرين خدمتهم فالارض باش يسيفطو اليوم السلعة للشركة اللي فتارودانت و ختك عيطت عليها قاتلي مابغاتش
ح.منتصر بتنهيدة طوييلة:معارفينش راه هادشي على قبلكم .. انا مابقيتش باغي مزال نشوفكم كاتداابزو .. واش حتى لفوقاش نتي و خوتك تتآذاو و تآذيوهم
هناء ببرود:ايوى نتوما حسبتو السكوت علامة الرضى واخا ماقلت والو .. كيفاش زعما اجدي .. كاتحطوني اما الأمر الواقع .. مجاكش لبالك انني نهز شطايطي ماتعاودوش تشوفوني؟؟
ح.منتصر خنزر فيها:عندي الثيقة فيك ابنتي .. نتي الوحيدة اللي متأكد منها مغاتخذلنيش
هناء تأفأفات بصوت عالي كاتصوط:البارح نعست معطلة و فالصباح صبحت ناعسة .. ثلث ايام ماطلييت على الفيرمة
ح.منتصر:فاش تسالي فطورك سيري طلي عليها
هناء ومأتلو:واخا .. داكشي اللي كنت غاندير
ح.منتصر بعد تفكير طويل:بانلي نديرو واحد الحل انا و مختار باش يكون كولشي مزيان بيناتكم نتوما و رجالاتكم
هناء بتسائل:شنو؟
ح. منتصر:حتى نتلاقا مع مختار و نجبد معاه الموضوع و ندويو فيه .. الموهيم اليوما وجدو راساتكم للخويتمات .. غاتجي واحد الخياطة اللي كاتقادلكم ديما اللبيسات نتي و ختك و ماماك فالعيد .. دويت مع ماماك تصونيلها .. باش تجيبلكم شي قفيطنات زوينين
هناء ماجاوباتوش .. حنات عينيها كتاكل بسرعة و عصبية
هناء ببرود:ماتحتاجش كل خطرة تعاود هاد الهضرة .. فهمتها و حفضتها (وقفات) الموهيم دابا غانمشي ندير خدمتي (خلاتهم كايشوفو فيها و مشات طالعة لفوق)
الحاج منتصر تنهد بقوة:الله يعطيكم العقل ابنتي .. الله يعطيكم العقل
هناء دخلات لبيتها مغددة كاتبركم:قااليييك مصلاحتنا .. لواه الزمرر تفو (مشاات للبلاكار ديالها جبدات منو عباية و أولويز و شال) نخرج ندرق زلافتي من هنا حسنلي
بدلات عليها بالزربة و بدلات سروال البيجامة بكولون كحل .. لبسات العباية و الشال و صبيبيط و خرجات من بيتها .. ناوية تنزل لتحت .. حتى وقفات كاتشوف فبيت ياقوت و تفكر
ياقوت فوق فراشها مصدوومة عينيها فتليفونها خارجين .. كاتنهج .. قلبها مزييير مقبووض و ميساج قراتو اول ماحلات تليفونها حسسها بأنها تسرعاات .. عينيها محقونين فيهم الدموع و صدررها حاسة فحالا شي يد ضخخمة مزيرااالها علييه بكل قوتها حتى النفس كاطلعو بالزز .. كاتمتم بين سنانها
-الله ياخذ فيك الحق، بسباابك قلت موافقة بسباابك (كاتقرا الميساج و تعاود مامثيقاش) هادشييي كوولو جاالس كاتبرهش علياااا .. الحمااار لاااخر (سمعات صوت هناء كاتدق زاددت كاتزير و الدمووع ولاو كاينزلولها مور بعضهم) هادشي كولو و قاالك طللعة .. ههههه انا اللي حمااارة كنت بانية علييك أماال صدقتي غا برهووش (شعلات الويفي و دخلات للواتساب .. و هوما الميساجات يوصلوها منو بكثرة كايفسرلها .. زيادة على الsms اللي كان سيفطولها)
-يااقوت غي كانضحك معاك واش تقلقتيي؟؟
-cc
-ياقووت!!!
-ياقوت والله غي تشالنج بانلي فواحد الغروب و قلت نجربو معاك هالسكريين
-أنا معجب بيك نتي صراحة و كنتسنى غي الوقت المناسب نعتارفليك
-يااقووت تكونيكطاي عفاااك
غززات سناانها كاترعدد ماحساتش برااسها غيي لايحة داك التلييفون حتى تزدح مع الحييط و غووتاات كاتنتف فراسهااا
هناء برات البااب باغا تحل الباب كاتدق عليها و تعيط بسميتها و تحرك البواني بالزربة و تغوت بصوت عالي:يااقووت ماالك .. شنو هااد الصووت .. حبييبة شنو طارييلك .. ختي حلي الباب عفاااك .. ياااقوووت
ياقووت كاتشهق مكورة على بعضها فالفراش:اووووف بسباب شنو قالي قلت لجدي موافقة، صافي حياتي غاتوقف فنقطة الزييرو .. فنقطة الزييييرووووو مع واحد مكانبغييهش
هناء كادق بكل جهدها:واااياقوووت وااحلييي خلعتيني عليييك (علات صوتها كاتعيط) صفففية .. صفية عفاك جيبيلي الدوبل دالسارووت دبيت يااقوووت (رجعات كادق عليها مخلوعة و ياقوت دخلات فحالة صدمة .. جاتها الشمتة كيفاش قالت موافقة فاللخر هو غي تبرهش عليها بتشالنج تافه طير منها النعاس و خلاها ليلة كااملة كاتفكر و تعاود شنو دير بلا بيه واش تصيفطلو و تقولو ها هي غاتدويلو مع البنت ولا شنو تدير فاللخر ضاحك معاها .. و لكن مللي زادت فكرات فالامر .. بانتلها اصلا حياتها كانت غاتتوقف فهاد النقطة حيت قرار جدهم كان حااسم و كانت غاتقبل بالزز منها بالزواج فحال خوها .. ولكن مابغاتش تصرطللها شنو قالها .. جاتها قااصحة وقفات بالزز كاتشهق غادة جيهت باب البيت .. حلاتو و هي تتلاح على هناء عنقاتها بقووة كاتبكي)
هناء زيرات على ختها فحضنها بقووة كاتطبطب عليها؛شششش حبيبتي ماديريش في بالك هاكا .. هادشي مكتابلناا
ياقوت بعدات من حضنها كاتمسح عينيها:علاش تكتابلنا اختي .. وااش حناا فشمن قررن؟؟ راحنا فالقرن الوااااحد و العشرييين و قارياات و من زماان كانخططو لمستقبلنا باش يتضربلنا فالزييرو؟؟
صفية وصلات عليهم كاتجري:ها هو الساروت اختي هناء
هناء مداتهاش فيها .. جرات ختها لبيتها لداخل:اجي معايا اجي (جلساتها فوق الفراش كاتشوفلها فعينها) بكيتي بزااف حتى تفتحاتلك الجرحة بزاف
ياقوت كاتنخصص و تمسح فعينها الثانية:تشمتت اختي تشمتت
ياقوت صاطت بقوة:وااهنا فين تشمتت .. انا تأزمت و تصدمت و بسباب شنو قالي قلت لجدي راني موافقة نتزوج، و اليوم فاش طليت على التليفون .. بانلي ميساج فيه هداك غييي تشالنج شافو فشي غروب و بغا يجربو فياا
هناء كاتدهنلها البومادة معوجة فمها:قتلك برهوش
ياقوت دلات شفتها كاتهمس:شمتني الحمار لااخر .. شحال و هو كايعجبنيي😭
هناء تبسمات:بفففف الزهر جا لعندنا و كوزلنا بطرمتو
ياقوت غلباتها الضحكة:ههههه الله يعطيه موصيبة هاد الزهر
هناء مشات جابتلها ضمادة و غطاتلها بيها عينها:ايوا هادي تعلمك باش تعرفي تختاري شكون يعجبك
ياقوت بحزن:دابا مابقيتش قادرة نختار
هناء تنهدات بقوة و تبسمات باغة تفوج عليها:دابا نوضي و لوحي العكز وراك نمشيو نتساراو فالفيرمات
ياقوت بنفس حزنها:اليوم غانتخطبو و من هنا 5 ايام غانديرو العرس .. باغيين غي يتهناو مننا
هناء تنهدات بقوة و دارت كاتشوف فالجنب لاخر:بففففف براكة من هاد الحالة .. راك لا كنتي لالة و مولاتي هاد القرد هذا اللي غاتزوجي بيه تخلييه يحمااق عليييك و خااااتم بين صباعك
ياقوت ناضت كاتكسل عكزانة:شمن يحماق عليا .. لماخلييتوووش يحمااق و يتسطى و يخرجلو العقل مانكونش ياقوت، أهم حاجة فهاد الزواج هي اننا غانسكنو فدار وحدة انا ويااك😍
هناء تبسمات:هادي النقطة الايجابية فهادشي
ياقوت جبدات كريما دالشمس كادهنها فوجهها:غانوجد راسي و نمشيو
هناء:واخا نمشي نجيب مانيطتي
ياقوت ومأتلها:واخاا
بعد مرور بعد الوقت .. خرجات ياقوت وهناء مع بعضهم من الدار مشادات ووحدة تشكي للوخرى و ياقوت الشمتة كاطلعع و تنزل فيها بسباب معاذ البريهيش اللي جرب فيها التشالنج .. كل شوية تجبدو فالهضرة حتى قربات هناء تعطيها للراس بقوة ماغدداتها .. دازو للفيرمة ديالهم .. دازت على الكسيبة كااملة، وقفات قدام البقرة اللي ولداتها مؤخرا .. شافت فمولودتها كاترضع من حليبها و تبسمات
هناء:شوفي كي زوينات
ياقوت مخنزرة:بغيت نصورهم ولكن بسباب داك الحمار ضربت التليفون مع الحيط
هناء خنزرات فيها:يااااااربييي الحبييب خرجو من عقلها
ياقوت كاتغبن:اصلا هو باقي عندو 21 عاام .. البريهيش لاخر
هناء غلباتها الضحكة:ههههه الله يعطيني نفسك .. عجبك واحد فعمرو 21 عام ههههههههههه
ياقوت جمعات فمها:تفو علييك ألكلبة .. زيدي نخرجوو نمشيو للأرض .. كان كايعجبني فصغري نلقط الخوخ و الفريز
هناء كاضحك و تدور فراسها:قولي كان كايعجبك تاكلييهم .. اصلا فالصباح بابا خدا الكاميواات للشركة باش يغلفوهم و يديرولهم الطابع و يخرجوهم للسوق
ياقوت كمشات جبهتها:باباا ماصدقششش🤨
هناء جراتها خارجين من تم:شبانلك نهربو ههههه
ياقوت ضحكات:والله حتى فكرة هادي .. نمشيو عند عمتي؟؟؟
هناء تبسمات:تتسناه حتى هو يزيدها الثاانية .. مالني غي انا اللي ندخل على الضريرات؟
ياقوت تبسمات:هههه حاقدة على الوضعية اختي
جواهر قربات عندهم كاتبوسهم بلابيز مبتاسمة .. دايرة شال خفيف و جلابة:سلام البنات .. كي دايرات صافا
هناء بابتسامة كاتسلم عليها:الحمد لله و نتي احبيبة .. جا معاك الشال
جواهر رجعات اللور كاضحك مزنكة:هههههه داك النهار محمد قالي باغي يتزوج بشي وحدة محجبة ههه😉
ياقوت شافت فهناء عاضة على حنكها من لداخل:اممم ايااه
جواهر بتسائل:هنوئة كي جاك العريس؟؟
هناء شافت فيها بدون ملامح:كي الزمر
جواهر باستغراب كاتغمز فياقوت:شنو طاري؟ واش..
قاطعاتها ياقوت:غانتزوجو عن قريب اجواهر اليوم الخطوبة ديالتنا .. مرحبا بيك
جواهر تبسمات:بصااح .. حتى نتي؟؟؟
هناء عضات على شفتها التحتية و قالت:جواهر .. نتي صاحبتي الوحيدة و العزيزة و نبغيلك غي الخييير ولكن عفاك نعطيك نصيحة .. ماتعلقيش املك بزاف على خويا
جواهر باستغراب:علاش، شنو كاين؟؟
ياقوت شافت فهناء حايرة معارفة مادير:ه هو صرااحةة .. احمم .. انا وهناء و محمد غادي ننن
جواهر تشطنات:غادي ت شنوو؟ راكم شطنتوني؟؟
هناء تنهدات بقوة:صراحة اجواهر .. غانتزوجو
جواهر بلعات ريقها بالزز:ك كيفاش ز زعما؟؟
هناء شافت لورا جواهر .. كانت عاطية بالضهر لباب دارهم .. حيت سبقلي ذكرت الفيرمة قريبالهم .. جامعين فيها الكسيبة وداكشي و مكايجلسوش فيها بزاف .. بانلها محمد خارج من دارهم عيطاتلو بصوت عالي:محممد
محمد شاف جيهتهم مستغرب:شنو (تاجه لعندهم .. جواهر تزنكات كاتقاد شالها و تسناه يجي قلبها كايضرب فالتسعين .. وقف قريبلهم)
هناء بتسائل:شنو درتي البارح؟
محمد بنبرة عصبية:مالقيتهمش عييت نقلب مع الدراري .. بانلي بصح ماشي من هنا
هناء ومأتلو و شافت فجواهر:جواهر بغيت يكون محمد هنا باش تفهمي مزيان، (محمد شاف فيها متفاجئ ماتوقعهاش هي مع الشال و الجلابة .. بانتلو مبتاسمة كاتشوف فيه بنص عين) ختي جواهر صراحة حنا غانتزوجو، انا و ياقوت وو..
قاطعها محمد بعصبية:و علاش كاتقوليلها؟؟
جواهر شافت فيه بتفاجئ:و واش مخاصنيش نعرف بعرس صحاباتي؟؟
محمد مشافش فيها كايشوف غي فهناء:حنا غانتزوجو كولنا ماشي غي صحاباتك ..حتى خو صحاباتك
جواهر جبدات فيها عينيها بصدمة:ش شنووو؟؟
ياقوت حمحمات:صراحة حناا..
جواهر تراجعات اللور كاتشوف فيهم ذاتها كاترعد:م مبروك ع عليكم .. ا انا مغانقدرش نجي نحضرلكم لا الخطابة و لا العرس .. سمحولي خاصني نمشي داباا
محمد شاف للجنب الثاني كايزير على قبضة يدو بغير رضى و يهمس بنبرة خافتة:نتي اللي سمحيلي أبنت الناس
عائلة مالك الجزء الثاني
محتوى القصة
التنقل بين الأجزاء