سالات الطبيبة الكونطرول ديالها وخرجات وقفها سيف فالباب ..
سيف : كيدايرين الامور كولشي مزيان ..
الطبيبة : الحمد لله اموسيو صحتها مزيانة وحتا الطفل ولكن كيفما سبقت وقلت هاد الحادثة غاتأثر شوية على الحمل بحيث ان حدث صغير كيعرضها للإجهاض وخصوصا فهاد الشهور الاولى من الاحسن تبقا غير گالسة ..
سيف : واخا شكرا ..
الطبيبة : : العفو ( مداتلو ورقة ) بالمناسبة هادي تكلفة دالعلاج تقدر تفضل معايا باش تخلص ..
سيف : يمكنليك تسبقيني غانجي لريسيبسيون ..
الطبيبة : مرحبا ..
فتح الباب دخل بشوية لقاها دايرة يديها على كرشها ومحول راسها لجيهت الشرجم كتشوف فالشمس المصبحة .. تاوقف عليها ..
سيف : شنو دابا مزيان ..
دارت شافت فيه وبقات شحال كتمعن فوسط عينيه ..
شهد : علاش كاتعامل بحال هاكا معايا شنو تبدل ؟
سيف : تصرفاتك لي كيحكمو على الطريقة ديال التعامل ديالي معاك ..
شهد : وشنو زعما شفقتي عليا من اخر اكسيدون وقعاتلي ولا كيفاش ..
سيف : وشنو دخل قضية الاكسيدون فطريقتي فالتعامل كنضن كون كانت شفقة غانخلي لي تقابلك ربعة وعشرين ساعة ومانخسرش على راسي نجي عندك اولا ! ..
شهد : ( غمضات عينيها وحلاتهوم بعصبية ) سمع شتي واخا تقولي لي قلتي وتجيبلي لي جبتي ( حطات يديها جيهت قلبها ) هادا عمرو يسمحليك سمعتي وفكل مرة غانشوف فيها فعينيك غانتفكر داك الشخص المتوحش لي اداني بهضرتو ولي ستاغلني وطعني فشرفي ( هرات صبعها اتجاهو ) وعمرك عمرك تحلم بلي هاد الولد جا من حب ولا من واليدين كيبغيو بعضهوم هادا جا نتيجة خطأ ماخاسوش يدار نتيجة استغلال وانتهاش فالكرامة .. ( حركات راسها باه مغددة ) اه هادي الحقيقة ماتناس هاد الكلام واخا ..
بقات فنفس النضرات المشتعلة عينيها لي كانو بلى كحل كانو عاطيين واحد النضرة اخرى مكانش كيشوف هاد اللحضة شهد لي كيعرفها نهائيا وتفكر ان داك الكحل لي كدير كأنه كيخبع عليه خبايا العيون لي تلمسات غير الحزن فحياتها هاد العيون كانو مقهورين وحزينين وهوما ناشفين، قرب حتا تكا بيديه فوق البياص وقرب من وجها عينيه باقين فعينيها وتاهية ماحاولاتش تبعد ولا تنقص من النضرة ديالها ..
سيف : ماعمرك تفكري بلي غايجي النهار لي غادي نعتابرك فيه مرتي بصح، حيت فالنهاية كاتبقاي المرا لي بيني وبينها عقد ونهار غايسالي المدة ديالو غاترجع مت ولدي لا اكثر، ديري تانتي هاد الهضرة فبالك، واي معاملة درتها معاك فقط على ود ولدي ..
ناض وقف ودار غادي غير سد الباب التاقطات النفس ديالها مغمضة عينيها ..
شهد : ماغانضعفش مستحيل نضف هادشي فقط على ود ولدي لا أكثر ..
سيف مع الخرجة كيتللاقا بنعيمة جاراها نسرين هي ونادية مها ديال شهد ..
شاف سيف فجداتو ثم ختو ورجع شاف فنادية ..
نادية : فايقة ياك يمكن لي ندخل ..
سيف : اه طبعا تفضلي ...( فتح ليها الباب ودار عند جداتو ) دابا عاد جيتو ..
نعيمة قلبات وجها ونيسرين تنهدات وجوبات : دابا عاد ..
نعيمة : نيسرين دخلي نتي خليني غانهضر مع خوك واحد الشوية ..
نيسرين شافت فسيف قاليها بعينيه سيري دخلات للغرفة وهو شد فيها مزيدها بشوية لجيهت الكراسا ووقفو ..
نعيمة : شديك الحالة درتي لخوك ؟
سيف : لاكنتي غاتجبديلي داك الموضوع نمشي حسن حيت نلقاه دابا قدامي نعطيه قتلة كتر من اللولة ..
نعيمة : اشباواش حمقتي ولا مالك وخوك هاداك خوك ..
سيف : يكون حتا منعرف اش فملك الله تطاول على مرتي وزايدها بالمعيور اصلا الحق عليا طلقتليه بزاف ..
نعيمة : سمع هادشي لي درتي راه ماكيبشرش بالخير سمعتي وراه غادي تخلق عداوة كبيرة هنا نقولهاليك، عارف مكانتك عندي وعارف كيف مفضالك نتا من بين حفايدي كاملين، وديما ندافع عليك قدام جدك وجميع القرارات تانكون معاك فيهوم، وانا عارفك مول العقل والهمة والشان ونتا كبيرهوم ولكن هاعار ميمتك دير الخاطر وتهدن، راه كيبقا خوك واش بغيتو تداعاو فالمحاكيم وتصير قصتنا على كاع لسان الناس ..
سيف : ( شدها من كتافها بجوج ) الواليدة ( كحز وباسها من جبهتها ) عارفة مكانتك عندي لي كنديرها فوق كولشي ومربما كتر حتا من لي ولداتني، وكلمتك ديما هي اللولة دار، ونبغي نقوليك داكشي لي خايفة منو ماغايكونش سمعتي وتاجد ماغايقدر يديرلي شي حاجة، وديك الدعوة راه ماغاتكونش غابلا ماتخافي ..
نعيمة : والمهيم رد بالك عنين ولاد عمك عليك ونهار لي غادير خطأ بسيط غايتناهشو كيف الكلاب حشاك ومحال واش اعاودو يشوفو فيك خسهوم غير الفرصة ..
سيف : فيناهي عاد الفرصة الله اهديك الواليدة ( ضحك ) واش غاجي وحاربني تايديو السلطة بعدا عاد ازيدو .. ..
گالس فالكوزينة وهي واقفة عليه كديرلو فالثلج فحناكو وختها لوخرى كتلعب بالتفاحة من موراهوم ..
زينب : ( تنهدات دايرا فيها حزنات ) وي شفت وتانا تصدمت وماضنيتش نيسرين دير هادشي مخبعة على كولشي ( شافت فيه كيشوف عينيه حومر وهي ترجع لتمسكين ) هادشي غير لي فوطو ولي ماعرفناه اشنو كاين ..
زينب : انا ماقلت والو اولد عمي ولكن ( اشارت بحجبانها لتيليفون ) راه لي كيقول والحقيقة كاتبان من بعيد ماعندي لاش نكذب ..
نبيل : عرفتي لاشاف هادشي سيف غايقتلها ..
زينب : ولا اولد عني هنا فين غادي تخدم الجوكر وغادي تقولو مرحبا بيك عندي ..
نبيل : يعني ؟؟
زينب : هههههه جدي، تخيل لو أنك نتا لي غادي توصلو عاد الهضرة ماشي سيف !! وغاتدي تقولو فيناهو حفيدك الكبير لي مأمنو حياتنا !!! نتا هاكا غاضرب عصفرين بحجر واحد منو أنك غاتكسب الثقة ديال جدك انك ماكاتخبي عليه والو ومنو أنك غاتعطي القرار لجدك شنو غايعاقب نيسرين وطبعا ماغاتعرفش شي عقاب أكثر منو هو لي كيعرف مصلاحتها ..
زينب : واش كيحساب ليك غير نتا لي ماباغيش السلطة ديال سيف عليك راه حنا كاملين هاكا سيف زاد فيه بزاف ورجع كيتحكم فالحياة دالكل بمصلحة حماية الشرف دالعائلة ولكن نسا اقرب الناس ليه .. نيسرين !!!
نبيل : ( غمض عينيه مزير على يديه ) سمعي غانقوليك هاد التصاور غاتسيفطيهوم ليا وغاتمسحيهوم من تيليفونك وقدامي سمعتي شكون عندهوم من غيرك ..
زينب : الله الله معقول نسيفطهوم انا لشي واحد فالاخير كاتبقا بنت عمي وطبعا غانبغليها غير الخير داكشي باش جيت وريتهومليك حيت فالاخير غاتبقا خوها ونتا غاتعرف ليها ..
نبيل : سكتييناا دابااا ... صفطيعوم ليا وياااوييلك ازينب ويعرف شي حد على هاد الموضوع كوني أكيدة أنني غانحرقك ..
زينب : توتو ماكيجيوش معاك تهديدات سيف ..
ضرب فالرحامة تاقفزات ..
نبيل : سيف يقدر يضرب ويسمح مي أنا نقتلك ونمشي فجنازتك ..
شافت عينيه كيحومر ڤغي تخلعات ..
دينب : دابا حنا شوصلنا لهاد الهضرة ( ناضت واقفة ) واش نسيتي بلي كتهضر مع بنت عمك ولا كيفاش ..
ضحكو تاني وبقاو كيجمعو وكيهضرو فوجو تاعلى شهد اما نيسرين غير متسمع لمعاودة ديالهوم وكضحك والكارثة انها ماعارفاش راها گالسة حدا عگوزتها ..
وصلات العشية تما عاد جا ادريس وكريم ويونس طلو عليها كانت غير بوحدها ولوخرين مشاو بقاو تاهوما كيقشبو عليها ويضحكو تالشي وقت عاد مشاو بقات غير نادية وادريس معاها ..
شهد : ماما بابا صافي غير سيرو اصلا مابقا والو دابا خسني غير نعس ..
ادريس : سيف ابنتي ماكانشوفوهش كاع ياك لاباس !!
شهد : ( حمارو خذوذها ) والو ابابا عندو الخدمة بزاف هاد الايام راه لبارح بات معايا الليلة كاملة تالصباح راه ماما شافتو مين كان خرج ..
نادية : وايااه باينة عليه كان معصب الله احسن العوان راه قاتليا جداتو قبيلة هاز الحمل ديال الشركة كاملة على ضهرو ..
شهد : وي هادشي لاش واعاد داخلين فواحد الاتفاقية عاد مازادت عليهوم الشغل ..
ادريس : اوا الله اعاونو ابنتي خدمتو هي اللولة داروري .. والمهيم ماماك هاهي غاتبقا معاك انا مشيت نمشي ..
شهد : ماما تانتي سيري رتاحي اليوم النهار كامل ونتي هنا ..
نادية : ويلي عليك على انا نقدر نرتاح ونتي كاينة هنا، لا والو مانقدرش غانبات معاك هنايا ..
شهد : ماما ياماما وراسك شحال قاصح ومانقروش نقنعوك ..
نادية: صافي سير نتا انا غانبقا هنا ..
ادريس : ايوا يالاه بسلامة عليكوم .. ( سلم على شهد ونادية ومشا ) ..
نادية : ماعجبنيش هاد الكذوب لي كذبت على باك ..
شهد : وشنووو بغيتي نقوولو اماما بنتك دايرة اتفاقية مع بات ولدي وغير غانولد غانساليو هاد الزواج ..
نادية : ماالكي رااسك قاصح ياك السيد طلب منك السماح مامرة مازوج مالكي على هاد التعامل القاصح مين جبتي هادشي نتي عمرك كنتي هاكا شكون عمرليك راسك تادرتي داك الاتفااقيك ااه عرفتي وي سمع بيها بااك فرضتي على الرااجل باش يعطييك الثلث داملاكو لا نتي اكيد خرجليك العقد وخووتك الى شمعوو اشنووو غايديرو ..
شهد : ماما ماكانش عندي شي حل اخووو من غير هادا صااافي انا كنت كنقول الى عطيتو هاد الشروط ماغاديش ابغي اتزوج بيا شكون عرفني غايقبل بيهوم ومنها نيت نضمن حق ولدي ..
نادية : يااا ربي صبرني يااا ربي ..
غادي جاي فبيتو تاسمع الدقان فالباب وهي دخل الخدامة كوثر ..
كوثر : موسيو نبيل سي تاجدين كيعطليك وبغاك تكلملو ..
نبيل : واخا يمكنليك تمشي ..
خرجات وهو هز تيليفونو شاف فالتصويرة مزيان تامشا زاد جوج خطوات وهو يتم راجع لاح التيليفون فوق الناموسية عاد مشا خرج ...
كان حسن واقف جيهت الشرجم وعكازو فيدو كيف العادة ... البيرو ديالو جا كبير وواسع داير بحال داكشي ديال براف كامل خشب وفيه الرفوف عالين تالسما فيهوم كتوبة جاو فالحيط لي مور البيرو، تسمع الدقان وهو ينطق بصوتو : ادخل .. فتح نبيل الباب ودخل وسد موراه وطلع عينو شافو فين وقف قرب بشوية ووقف ..
نبيل : هنا اجدي قلتي بغيتيني ..
دار حسن بقا كيشوف فيه وطول فيه الشوفة كيتمعن فالضرابي لي فوجهو مخسر سيفتو .
حسن : كيبقات بعدا حالتك ..
نبيل : ( ضغط على سنانو ) لاباس هانتا كتشوفها ..
حسن : ( مشا تحرك لفوق البيرو جبد واحد الملف وتم راجع مدولو ) اشنو هادا .
نبيل : ( شاف فيه وشاف فالملف شدو فيدو وفتحو كيشوف الدعوة لي دفعها هاد العشية للمحكمة ) جدي ا ( قاطعو ) ..
حسن : ياكما الضرابي لي عطاك خلخلوليك عقلك مم .. رجعتي باغي تبين راسك اشنو ندير اري نرفع دعوة ؟؟ .. لعبتي فيرا قلنا ماكاين موشكيل غايدير عقلو ماخليتي مادرتي فالبيران ولاباس لي ماشافومش دوك الكلاب دالصحافة قلنا غادير عقلك وباش كملتيها بديتي تمد فيديك ورفعتي دعوة على خوك، شنو باغي تخرج فينا السكر اااه ..
نبيل : راه ( يالاه غايهضر وهو ياخد واحد التصرفيقة تادارلو حنكو ) ..
حسن : هادي باش تعلم تحط يديك عند البوليس بلا ماتشاور معايا، نتا مزال ماعارفش حنا فين ياك وغادي كيالكلب عند البولس مم، باش تعطيهوم فرصة يجبدولينا مصارنا ، يا غادي تنزل داك الدعوة، يا غادي نتيرا منك وغاتنسا شي حاجة عندها علاقة بكنية تاجدين ...
طلع نبيل مصدوم : شكاتقول اجدي ..
حسن : ( كيغوت ويرجع اهضر مبرد ) هادشي لي صالح ليك لي كيبغي يدير بلاصتو كيديرها بالهدوء والعقل ولا نتا لا ولد عمك مابغيتو تفهمو هادشي يالاه خرج عليا منهنا ..
زير على الملف لي فيدو ومشا بخطوات سريعة خرج من البيرو عينيه حومر مشا دخل لبيتو وزدح موراه الباب وهو يلوح داك الملف بجهد فالارض ومشا للكوافوز جر كاع داكشي لي فوقو بدا كيشخشخ ولي جات قدامو كيهرسها تاتسمع الدقان بجهد فالباب ..
بشرى : نبيييييل فتح فتح الباااااب فتتتح ...نبيل العار اوليديي فتتتتتتحححح ( مشات كتجري لدروج ) كوثاااااااااار ( مشات رجعات لجيهت الباب ) نبيييييل فتتتح ..
جات عائشة مرات لوسنا كتجري مين سمعات الغوات عاد خرجات نيسرين كانت فالدوش خارجة بالبينوار وهبطات تازينب وختها مروى تاحد مافهم شي حاجة ..
بقا مرجع راسو اللور مغمض عينيه وكيدور بالكرسي شويية ورجع فتح عينو كيبانولو الضواو ديال المدينة بحكم عندو حيط كامل زاج وهو جا فالطبقة العالية فالشركة ... كل ماكيدور فدماغو كلامها وكل ماكيتفكر العقد لي سناه كيتعصب، سمع الدقان وهي دخل عندو السيكريتيرة ..
السيكريتيرة : موسيو 8 دابا وكولشي خرج بحالو وانا كملت الخدمة كاملة لي عندي عندك شي خدمة قبل مانمشي !
سيف : لا يمكنليك تمشي ..
السكريتيرة : واخا اموسيو ..
مشات خرجات وبقا هو متبعها بعينو ساهي عقلو خدام هبط عينيه لواحد الورقة وهو يجبدها كانت على شكل خطاطة والوسط مكتوب المحمدي .. حطها وهز ستيلو دور على داك السمية مزيان ..
الكوميسير : سيف وصلنا داكشي لي كنا خايفين منو، خوك رفع الدعوة واعلبية البلاغ غادي يطبق غدا فالصباح يعني غادي يجير اشدوك ..
سيف : مزيان وصلات الدعوة لجدي ؟
الكوميسير : كيفما طلبتي مني سيفتهالو ..
سيف : مزيان داكشي لي بغينا تاحنا، شكرا اسي العثماني ولاكانت اي حاجة غادي نقولها ليك ..
الكوميسير : واخا اموسيو تهلا فراسك ..
سيف : كون هاني ..
قطع وبقا يدور التيليفون فيدو : هاكاك اسي نبيل بغيتي ترجل علينا شوية، مزيان مزيان ولكن كون بغيتي تكون راجل بصح كون راه سمعتي كلامي من اللول ..
حلات عينيها على شروق الشمس، دورات عينيها فالغرفة بانتليها ماماها ناعسة على الكناپي، هزات التيليفون شافت الساعة لقاتها 3 دليل، ناضت بشوية واخا كتحس بالحريق أسفل ضهرها حيدات الغطا ومشات هزات كاب ديال الصوف دارتو على كتافها وجرات الصيروم بيديها ومنها متكية على العود مشات بشوية فتحات الباب وخرجات ياللاه غاطلع عينيها وهي تقشع سيف گالس فالكراسى لي فالكلوار وهاز فيدو التيليفون كيشوف فيه نصدمات فبلاصتها وتشوكات تالاحض الوقوف ديالها وهو يعلي عينيه جات فعينيها نيشان قطب حجبانو شكادير هادي هنا، خدات نفس كتشوف فيه تاشافتو وقف وتم جاي لعندها ..
سيف : فين خارجة فهاد الليل ..
شهد : من فوقاش ونتا هنا ( عينيها بداو يعمرو بالدموع ) ..
سيف ( جرها من كتافها ) دخلي البرد عليك وقوليلي شنو باغا غانمشي نجيبوليك ..
شهد : لا بغيت نتمشا شوية عييت لداخل وضهري ضرني ..
سيف : البرد كاين بزاف ..
شهد : ماكيهمش لابسة ..
سيف : (اشار بيدو للطريق ) تفضلي ..
مارجعاتش شافت فيه ولا قالت شي هضرة زادت كتمشة بشوية جارا هاداك ديال الصيروم وتاهو غادي على حساب خطواتها وخاشي يديه فالمونطو وكيشوف فضهرها وشعرها لي كيتحرك شوية مع كل خطوة كتخطيها، وهي غادا متوترة وعينيها كل شوية تميل باش تشوف رجليه لي تابعينها من اللور وترجع دور راسها للجنب، كانو واحد المشاعر غريبة وداك الكلوار كأنه كيسجل خطوات العشق ديالهم المتضارب، وشحال خلاتهوم عزة النفس يدمرو المسمى بالحب على جال الكرامة، وكلها كيشتاق ومعطش للطرف الاخر ولكن ماكيقدرش يزعم، عينيها دمعو دمعة خفيفة على حنكها تاوقفات وهو يشوف فيها، دارت عندو وقربات بخطوات بطيئة لعندو وهو بقا واقف بهدوء بنضرات رجولية كيحاول يتمعن تصرفاتها ..
سدات على عينيها وحطات يديها على سدرو فوق المونطو لي لابس تارجع شاف فيها ..
شهد : سيف ( حلات عينيها وشاف فيه ) أنا منقدرش ..
سيف : شنو ماتقدريش ..
شهد : ( طاحت دمعة من عينيها ) مابقيتش قادا نصبر ..
سيف : ما... فاجأتو لا بل صدماتو مين زيرات يديها عليه من المونطو وتعلات على اقدام صبعانها وحطات شفايفها على دياولو، وهو باقي شاد فكتافها وبقا مدور يديه تاحاوطهوم على ضهرها .. مزيرها عندو حس بالدمعة ديال هابطة مع حنيكاتها بعدات شوية حناكها غايطرطقو بالسخونية لاباس لي الكلوار خاوي وتاحد مادايز شاف فعينيه عينيها معسلين وسلتات يديها شوية بشوية تاطلعاتهوم لحنكو وقلبها كيضرب كيضرب من ملمس جسمو ومحاوطتو ليها بطريقة رجولية كأنه حتاواها وحسات سدرها دخل بسدرو .. عينيها بداو كيزلقو من وحدة لأخرى ..
شهد : أنا كنبغيك ههه ( تخلطات ليها الابتسامة مع الدموع ) واخا جرحتيني باقا كنبغيك ماعرفتش علاش وكيفاش ولكن بغيتك .. ( تنخصصات من الدموع لي كيطيحو ) ولكن جرحك باقي هنا ( حطات يديها على قلبها ) وفكل مرة كنفكر بلي ماكايناش بلاصة ليا فقلبك ( حطات يديها على سدرو وعينيها كيطيحو منهوم الدموع ) كيبقا فيا الحال وكنزيد نتعذب كتر وكتر ( هبطات راسها ماقدراتش تصبر كتر كتنخصص بجهد .. ابتاسم ابتسامة خفيفة رجولية وزاد ضمها تاحطات راسها على سدرو مزيرة على المونطو ديالو ) منقدرش اه اهئ نتحمل نشوفك مع وحدة اخرى .. منق منقدرش ..
طلع يدو وحطهوم على راسها : ششش .. ( زاد متسلت بيدو تاوصل لتحت ديال فمها وطلع ليها راسها تاشافت فعينيه ورموشها فازگين وعينيها الواسعين حميمرين وفمها زاد تنفخ جمع حجبانو مبتاسم على شكلها ) شنو دابا أنا مكنسواش تاهاد الدرجة خليت هاد العينين ابكيو .. مم
شهد : سيف مكنضحكش اهئ اهئ ( جات تبعد وهو يجرها )
سيف : اجي لهنا فين غادا ؟ ( دور يدو على خسرها وزير عليها منو ) شنو دابا انا هادشي كامل لي كنديرو وماكانحس بوالو عليك ممم .. ( طلع يدو الاخرى حيد زغيبات من على وجها ) واش عارفة شنو وليتي بالنسبة ليا .. ( قرب وخشا وجهو فعنقها تابورشها باللحية ديالو باسها فعنقها قبلة زوينة ورجع طلع وهمس فودينها ) نتي وليتي روح سيف ..( بعد وشاف فعينيها وتحنا باس حنكها ليمن تاغمضات عنيها قلبها كيطلع ويهبط وهو كيحس بيه وهو يطلع يدو وحطها على سدرها ) هاد القلب كامل لي كينبضلي ومانكونش عارفو مم .. ( شافها كيفاش كتعض على شفايفها بتوتر تاجرها وهاد المرة هو لي قبلها وكانت اول قبلة منو ليها وهي فوعيها ومن كل قلبو جرليها شفايفها تازيرات على يدو وشداتهوم بقبضة يديداتها ورجع بعد وحط جبهتها على جبهتو ) من اليوم مابغيتش دموعك يطيحو، دموعك غاليين اكحلة العيون ...
طول الليل وهو يفكر فهضرت مو، من مور داك الصداع كانت دخلات عندو بشرى ..
بشرى : شهاد الحالة لي داير فراسك مم عجباتك هاد الشوهة لي درتي قدام عائلتك همم ماخلاو مقالو فينا مصاب يتكافا غامعا خوه همم، عييت نربي فيك لا انا لا خوك، اش دارليك سيف تاحگرتي عليه تالهاد الدرجة همم على ود مرأة وكبيرة عليك من الفوق اش بغيتي بيها همم ونتا باقا قداكك الحياة ارا ماطلاقا مع بنات على مزيناتهىم، ماجات عينيك غير عليها، صافي لقيتيها مع خوك وبيناتهوم ولد بعد لتساع من فوقاش رجعتي كاذابز على البنات، فاخر يامي يوليو ولادي يدابزو على مرأة ومطلقة من الفوق، اش دارت فيكوم تارجعتو فهاد الخالة، السحور ومايبان فوجها، ايوا اش دارت، هااا، جمع شوية راسك وشوف اش دارليك سيف، حياتو كاملة وهو يتقاتل مع ولاد عمك باش اديرليك منصب، خوووك البرهووش مخبع ليك الرئاسة ديال الشركة لي فهولاندا كاملة يا المكلخ، وزايدها كادابز معاه بلاصت ماتبوس ليه يديه ورجليه وراسو ..
بشرى : ( وهي كتحيد العقيق ديالها حدا المرايا ) خوك من شحال وهو يدافع باش تاخد الشركة لي فهولاندا وترجع المدير العام ديالها، وجدك قبل طبعا بزز عليه حيت ماغادير ارفض لسيف هاد الطلب وجد الوراق ديالك كاملين باش غير غاتشد الماستر هاد العام غادي يقدمهوم ليك، وهاكا غايكون عطاك خدمة وغاتكون ربحتي الاسهم ديالك فالشركة وترجع تانتا متحكم رئيسي وعندك كلام فالخدمة خوك ماباغيش تمشي فنفس الطريق لي غادي فيه هو مع جدك ولي مشا فيه تاباك، مابغاش تعيش مكرفس فحياتو هاهو دابا تازواجو ماقدرش يشهرو ومهددين مع عائلة الكولونيل باش مايهرش هادشي على الاقل حتا تولد الولد طبعا .. شفتي خوك شحال من حاجة كيطرقها شنو واش بغيتي تقتلو بلاصة ماتعاونو ودير يديك فخوك كاتزيد عليه، واش هادا هو ولدي لي كنعرف مم ..
نبيل : ( ناض وقف غادي ) الواليدة تصبحي على خير ..
باسليها يديها ومشا خرج ..
بقا تفكيرو كولو واش هادا سيف لي كيضن عليه بلي باغي يفرض عليه قوتو بلعكس هو كيفكرلو وهادشي كامل باش اعيش مزيان، حط راسو على لمخذة ومغمض عينيه ماعرفش راسو واش فصدمة ولا ندم ولا خيبة اما من راسو، وكيفاش وصل لداك الدرجة دالحقد، كيفاش ماغايوصلش ليها وهوما كيدورو حداه الافاعي يطلاقا بهيثم احرشو واستفزو وكيخليه احس راسو منبوذ وغير مسيّر من طرف خوه المسيطر ويطلاقا مع زينب وتبينلو بلي سيف كيمارس عليهوم السلطة وكذا، وزيد المشاكيل لي دارو مأخرا وشهد لي بغاها منرأة وفالاخير صدقات من نصيب سيف هادشي كامل خلاه ازيد احقد، ولكن السؤال واش لهاد الدرجة ماقدرش اشوف عينين خوه اشكيبينو ليه ؟
ماخلاهاش تكمل ههه معامن نتيا فتح الباب ودخلها وهي عاضة على شفايفها وحاضية مها بنص عين لافاقت غاتشوه وماكاتحملش شي حد اشرفها فبحال هاد المواقف تاحطها فوق الناموسية ومع كان غير ضوء الكمرة لي داخل من الشرجم، كانو كيبانو منهوم غير عينيها الكوحل الواسعين ..
سيف : تصبحي على خير ( حنا باسها فجبهتو ) نعسي وماتفكري فوالو ..
فاقت مها على التنخصيص ديالها ..
نادية : اويلي ابنتي شنو واقع شهد شهد ( حلات شهد عينيها وشافت فيها ) ..
شهد : ماما اهئ اهئ بغيتو ..
نادية : شكون ؟؟؟
شهد : سيف .. حلمت بيه ...
نادية : شنو حلمتي ..
شهد : حلم .... يالاه غاتنطق وهو يتفتح الباب وهو يدخل سيف ..
سيف : صباح الخير ..
نادية : صباح النور اولدي ..
قرب باسليها جبهتها عاد دار عند شهد لي كتشوف مبلطة عينيها وهو يقربليها وتحنا باسليها يديها ..
سيف : كيبقيتي مزيانة .. ( نادية كتشوف فيه متعجبة وشهد صغرات عينيها كتفكر تانطقات بجهد مصدومة دون وعي )
شهد : ماكاننش حللممم ..
سيف طلع حاجب ونزل الاخر باقي شاد فيديها مافهم والو اما نادية تاهي خبز ربي فطبكو، تاكتشوف شهد تلاحت معنقة سيف بدات نادية كتكحب واستئذنات مشات خرجات، عاد دور يدو على ضهرها وهي تبعد شوية ..
سيف : شمن حلم ( غمزها كيسولها يعني ) !!
شهد : ( ضحكات بضحكة خجولة على الحالة لي فاقت بيها وشحال كانت مخلوعة فقلبها مين حسات بحالي داكشي لي عاشتو حلم ششاف ابتسامتها حسها داخلة نيشان لأعماق قلبو بقات كتهضر وهي مهبطة عينيها ) فخبارك حسيت بحالي لي داز بينا البرح حلم ( طلعات وشافت بعينيها اللامعين فعينيه ) والله حسيت راسي غانحماق ..
سيف : غاتحماقي حيت هادشي حسيتيه حلم ولا حيت تمنيتيه حلم ..
شهد : طبعا حيت حسيته حلم ( كتلعب بيديها فيدو لي فيها الساعة ) وكون كان حلم غانتكنا مانفيقش منو ..
سيف : ( خلا ليها راحتها فديك اليد وطلع اليد الاخرى رجع ليها شعرها مور ودنيها ) كيصبحتي بعدا مزيان كيكاتحسي دابا من داك الوجع شوية ؟ ..
شهد : شوية ( طلعات عينيها فيه ) فين نعستي نتا البارح ..
سيف : فداري ..
شهد : ااه كيدارة الاجواء تما ؟
سيف : ( دار يديها على حنيكاتها الحومر ) فداري احبيبة ماشي دار جدي ..
شهد : كيفاش ؟ علاش مابقيتيش ساكن مع جدك ..
سيف : واخا ساكن مع جدي عندي داري ودابا مابقيتش حامل نرجع لداك الدار وانتي مين غاتخرجي غانديك لداري ..
شهد : ولكن ..
سيف : ( بنبرة هادئة ) شنو ولكن !!
شهد : يعني جدك ماشي غادي يتقلق وغايبقا فيه الحال حيتاش خرجتي من الدار ؟
سيف : واش كتفكري فسي تاجدين دابا ولا كيفاش ..
شهد : علاش ماخسنيش نفكر فيه كفما كان الحال كيبقا جدك ..
سيف : ( جرليها يديها ) شهد أنا عارف ماتزوجناش فواحد الظروف مناسبة ولكن هدا مكتوب الله والاهم ولدنا غايكبر بيناتنا، أنا منهنا للفوق مابقاش كتهمني تاحاجة من غير راحتكم وانكم تكونو فالامان واي واحد فكر يأذيكم ولاو فشعرة فراك حفر لراسو قبر ماغاينجاش منو، بغيتك منهنا للفوق تحيدي كاع الافكار السلبية من راسك وبقاي البنت لي شفتها اول نهار ( حط يديه على سدرها ) هاد القلب انا عارفو بيض وعارف كنتي كاديري مواقف التحدي باش تبيني بلي نتي قوية ماشي ضعيفةًولكن شكون قاليك بقلبك الكبير غاتكوني ضعيفة بلعكس نتي بهاد البرائة ديالك وبهاد الطيبوبة والملاك لي انا كنشوفو فعيني بغيتك واستحوذتي على قلبي، وداكشي لاش فبعض المواقف كتصرفي بعفويتك حيت ببساطة صعيب تخبي طبيعتك، نتي انسانة مزيانة وهادشي لي عجبني فيه وانا مفتاخر بيه ماكيهمني لا مستقبالك ولا الماضي ديالك كيهمني نهارك لي كدوزيه معايا كيداير، وهاد النهار رغم انه ميلادك غانخليه يكون الميلاد ديالنا بجوج ( قرب جرها من عنقها وباسها بوسة خفيفة على فمها تاغمضات عينيها متحسسة لملمس الشفاه ديالو لي محطوطة على فمها وبعد شوية رجع شاف فيها ) خليني نوض قبل ماندير شي فضيحة حيت طولت هاد المرة ..
رمشات فيه ورجعات هبطات عينيها بخجل ..
سيف : هاد الحشمة زوينة ولكن نقصي منها شوية مين تكوني معايا حيت كانبقا راجلك دابا ..
سرطات ريقها على إثر هاد الكلمة وتم نيت تبدلو ملامحها مين رجعو عليها الذكريات المؤلمة لي عاشتهوم مع هاد الكلمة وسهات فيهوم لددرجة ماسمعاتش تالطبيبة لي دخلات وبدات فالفحص عليها، راجلك راجلك راجلك ،،،، خالد : أنا كانبقا راجلك علاش كتحشمي هاكا ... شهد : ماعرفتش ( مهبطة راسها بخجل ) يعني ..ً خالد : شكون انا قلت .. شهد : راجلي .. خالد : يخليلي الحشومية ديالي انا ،،،، زيرات على المعصم ديال الطبيبة لي كان شاد فيديها تاطلعات الطبيبة عينيها فيها لقاتها ساهية فالصقف ودمعة سخونة خارجة من عينيها ...
خديجة : هادشي كامل بسبابها وهادا سرك لي كادافعي عليها ..
بشرى : شكون قاليك كاندافع عليها ..
خديجة : ايوا شنو ناوية تخليها مرات ولدك ..
بشرى : مستحيل غاتولد الولد وتمشي بحالها ..
خديجة : هاكا احسابلي سيف راجل ومكمول امرت خوياومامعيوب من حتا قنت، وعمرو تزوج ولا طلق وفالاخير يدي مرأة مطلقة، وكون كانت غير بنت الشان والمرشان، لا والو ...
خديجة : ( ابتاسمات ) ساهلة امرت خويا سااااهلة ماهلة قدام عينيك .. جربي وقوليليها غير فين خدام ولما لقيتيها طارت منهنا اليوم قبل غدا مانتسماش، وزايدون منها تعرفيها واش جايا على ود الزواج نيت ولا عينيها فهاد الخير ..
بشرى : زعما ماتكونش عارفة !!
خديجة : جربي حضك وهنا نعرفوًواش هاد الزواج لي مصعينا بيه زواج نيت ولا غاسايرين يقولبونا ..
ناض فالصباح لبس حوايجو وأول مادار عيط لداك صاحبو المحامي وقالو باش إسقط الدعوة وهو يخرج مشا نيشان لبيت نيسرين حل الباب لقاها حدا الكوافوز كتصايب وجها دخل وسد موراه الباب كيشوف فيها عاقد حجبانو ..
نبيل : فين غادا بالسلامة ؟
نفخات ودارت شافت فيه : شنو بغيتي انبيل ..
نبيل : لا وكتنفخي من الفوق ..
نيسرين : نبيل الى عندك شي كلام قولو ولا بغيتي دابز انا ماعنديش لكانة والله وزايدون سيف دابا غايسالي حوايجو غانمشي معاه ..
شاف فيها كيفاش كتشوف فيه غمض عينيه وزير على القبضة ديال يدو وعاود رجع شاف فيها : كلمة وحدا قلتها ودقيقة لي غاتفكري تعتبي باب هاد الدار ولا تواصلي مع هاد الحيوان تصوارك غايوصلو لسيف وديك الساعة غانخليك تحملي مسؤوليتك معاه ..
تفتح الباب بجهد بجوج دارو تاكيلقاو سيف عاقد حواجبو كيشوف فيهوم، نيسرين حسات بقلبها هبط لركابيها، ونبيل بقا غير كيشوف فيه ..
سيف : ( شاف فيهوم بجوج عاقد حجبانو ) شنو لي غادي اوصلني ؟
بقات كتشوف فدوك التقيشرات الصغيورين وهي كتبتاسم ..
شهد : ( حنات راسها جنب مبتاسمة ) مابقيتش محتاجاه وكنضن تسرعت باش درتو اول يوم ..
ليلى : واشغادي نقوليك لابغيتو نفسخوه ساهلة غانجيبليك النسخة لي عندي وقطعيهوم وصافي ههه ..
شهد : بهاد السهولة ؟
ليلى : وي بيان سيغ ماشي وثيقة داخلة فيها الدولة بحال الزواج ولا الطلاق ولا صفقة شركة هذا عقد بينك وبينو يعني باش غاتبغي تفسخيه يكفي أنك تقطعيه وماتبقا منو تانسخة وهاكا غارجع بحالي عمرو دار ..
شهد : واحا شكرا بزاف اليلى والله ..
شهد : منيتك اصاحبتنا حنا لاش صحابات غير نتسالو منك شي عراسية مور الولادة هههه ..
سيف : ( ضرب فالباب تارجع تسد وهي تقفز بلاصتها ) شوفو ماتجعرونيش طلقي شنو عندك ..
نبيل : نيسرين مصاحبة ..
غمضات نيشرين عينيها وسيف دار عند نبيل بنص عين ..
سيف : مافهمتش عاود اش قلتي ؟؟
نيسرين : ( بسرعة مشات حنات وشداتلو فيدو ) اهئ اهئ خووويااااا والللله حتااا ناوييي المعقووووول والللله العضيييممم واللله حتا ناوي المعقول اخوويا عمرو اذااني لا بعيب ولا بكلممة دييماا محتااارمني ..
غمض سيف عينيه وزير على القبضة ديالو وخدا نفس ابرد راسو عاد هضر : شكون هادا ؟؟
نيسرين : ( ناضت كتفتف وقفات قدامو وكتمسح فالدموع كترعد ) س سسميتو يوونس من م عائلة م محتارمة و ونقية ..
سيف : ( دار عينيه حمرين عند نبيل ) باش عرفتي نتا هادشي ..
نيسرين بزربة من مور سيف كادير لنبيل لا براسها ولكن هو كان جبد التيليفون او وراه، ناري وعرفتو غير وراه التصويرة بحالي شعلتي بركان لداخل تصدمً كيحقق ويعاود وخصوصا هو شادليها فيديها كيبوسها ونيسرين كضحك بطلاقة كتافا نطق بجوج كلمات ..
سيف : ش ك و ن عطاك هاد التصويرة ..
نبيل : زينب ..
تم نيت دار سيف دورة وحدة وعطا تصرفيقة لنسرين تاجات مزدوحة مع الارض تابزربة تصدم نبيل وهبط عندها للأرض كيشوف فحنكها ..
نبيل : واش هبلتي ولا مالك فينما لقيتي كضرب ..
سيف : خرج برا ..
نبيل : و
سيف : ياغادي تخرج برا يا غادي نشركك معاها ..
نبيل : ( ناض وقف ودار عينو فعينيه ) سمع انا عارف هادشي لي دارتو خطأ ولكن ماشي معناتو ضربها ..
سيف : دخل سوق راسك والمرا جايا كون مين تبغيليها الخير تمشي دفن ديك الكلبة لي عطاتك هاد التصويرة باش المرا جايا تعلمها تبع ختك الحيوان ودابا خرج عليا ..
مشا نبيل بعصبية خرج وزدح عليهوم الباب بقا سيف كيشوف فيها كتشهق فالبكا ودايرة يديها على حنكها تنهد كيدوز يدو على اللحية ديالو بعصبية ورجع شاف فيها ..
سيف : عرفتي علاش عطيتك هاد التصرفيقة ولا ماعرفتيش ممم ؟؟
بقات ساكتة كيسمع غير صوت البكا ديالها ..
سيف : حيت خليتي وحدة بحال ديك الخانزة تشفا فيك سمعتي ماشي عطيتهاليك حيت خبيتي عليا فالاخير كنت عارفك غاتكوني كتواصلي مع شي حد ولكن باش تخلي وحدة لي خاسها غير فين ضحك عليك تشفا لا فيك لا فيا لا فمك هاديك لا مانبغيهاش ..
نيسرين : ( شافت فيه ) خويا ان انا اهئ انا والله والله العضيم ماقتليها شي حاجة ولا عمرني قلتها ..
سيف : ( تنهد ورجع حنا هزها من الارض ) دوري وجهك ( دورليها حنكها ليضربها فيه كيشوف طراسي ديال يدو حمرين فيهوم ) شفتي هالي ماكانبغيوش انيسرين هالي ماكنبغييوش كاتخليني كنحرج على طوعي شفتي ..
ضرباتو لسدرو ورجعات تكات عليه كتبكي وهو بقا كيضحك تاضرباتو بجهد لسدرو وغوتات : مااااضحكششش ..
سيف : هاحنا ساكتين الالة ..
علات عويناتها كدور راسها بلا : والله ماكنت عارفة ..
سيف : وياااه وفهمنا وانا نيت خاسني العصا جاي ندوي معاك ... ( علا ليها وجها ودوا بحنية ) وبكيت هاد العوينات ماشي حشومة عليا مم !!! بقا كيقرب منها بشوية وهو كيشوف فيها بنص عين يالاه غايجي يبوسها وهي تعضو فشفايفو تابعد داير يديه على شنايفو
شهد : باش المرا جايا تعاود تشك فيا ( كتحك عينيها ) بزاف عليك انا وزايدون كيتحتبو مع بعضهوم شغانديرليهومً انا مثلا مم نتا معصب وكتبرد غدايدك فيا ..
سيف : ( ماغايجي اتولد هاد الولد تاغاتسيفطيني يا القبر يا لبرشيد وحدة فيهوم ..
شهد : بعد مني ..
سيف : هنا الالة مبعد ( دور عينيه بانولو دوك تقيشرات فصفيفر ) هاحنا تاني على التقيشرات يديتي توجديلو من دابا ( هزهوم فيدو ) دابا رجيلاتوًغايكونو قد هاكا ..
نيسرين : ( صوتها مخنوق مهبطة ريدوات دالبيت وسادا عليها الغطا ) مريضة الميمة غير سيري مافيا لي يمشي ..
نعيمة : ( تنهدات ) ايوا لي بغيتي انا مشيت نشوف مرت خوك موضي بعدا راه با يكونو حطو الغدا ..
نيسرين : مافياش ..
دورات راسها ومشات خرجات سدات عليها وهبطات قالت للشيفور باش يديها تشوف شهد ..
ليلى : هانتي جبتوليك بيدي
شهد : هه شكرا بزاف حبيبتي بغيت نديرها اليوم مفاجئة راك عارفة اليوم بليل غايدخل عام جديد وفنفس الوقت بغيت نبدا بيه حياة جديدة ..
ليلى : ههه وايضا غاتكملي 26 ..
شهد : اففف غير سكتي والله كنت نارية ندير لانيف فشي بلاصة مي هانتي كتشوفي مامكتابش ..
ليلى : تانتي فيها خير يالاه هانا غادا حبيبتي بيزو ..
شهد : باي ..
خرجات شافت شهد مزيان فالعقد مبتاسمة : ماعرفتش سيف واش عارف بلي اليوم العيد ميلاد ديالي ولا لا ..( تنهدات كتشوف فيها وهي دخل الممرضة )
الممرضة : مدام ساليتي ؟
شهد : وي عافاك جيبي معاك داك الفوطة باش ماتطريش ترجعي تخرجي ..
الممرضة : واخا ..
جابت الفوطة وحركات شهد بشوية دخلاتها للحمام باش دوشليها ..
وصلات نعيمة هبط معاها الشيفور وصلها حتالحدا السويت ..
نعيمة : شكرا اولدي اعطيك الخير ..
دخلات لسويت وردات الباب ومشات بشوية طلات مالقاتهاش مي ..
نعيمة : ايي مانعرف فين مشات ..
زادت شوية عاد كتسمع الرشاش عرفاتها غاتكون فالحمام ابتاسمات ومشات تكلس فالكرسي لي حدا البياص، حطات العكاز وبقات دور فعينيها تاكاتبانليها واحد الورقة محطوطة فوق الكوكيتة لي حدا البياص مدات غيو يديها جراتها وبدات تقرا، تاكاتخرج شهد بالبينوار فالابيض وملوية على شعوها فوطة فالغوز شادا فيها الممرضة شافت نعيمة وهي تبتاسم ..
شهد : خالتي ههه ..
نعيمة : ( طلعات عينيها شافت فيها بدون ملامح ) واش طلبتي من حفيدي يوقع على فلوسو يعطيهومليك باش اتزوج بيك ؟
أنا كحلة العيون، هاد الاسم لي ولا عزيز عليا بزاف بسباب داك الشخص لي قررت وتحديت الدنيا وتحديت راسي باش نعطي فرصة ثانية لقلبي ونبغيه، أنا عشت حياتي مزيان، واكلة شاربة، مع واليدين مثقفين وااعيين ووقاريين ومتفهمين، عمرهوم آداوني ولا خسرولي خاطري، وديما كنلقاهوم واقين جنبي ومأيدين رأيي فأهم القرارات فحياتي، ولكن عرفتو شنو لي مالقيتش، مالقيتش الوفاء فناس بغيتهوم من قلبي، فناس كون كانو طلبو روحي نعطيه ليهوم، عشت وشفت وحلمت انني غانعيش قصة حب بحالي بحال كاع الناس، ولكن نسيت نسيت بزاف بلي ماغانهربش من الواقع والحقيقة ديالنا، لي هضرة الناس وكره الحساد، من بعد ماطلقني الشخص لي بغاه قلبي اول مرة ولي نويتو رفيق دربي، علاش على أبسط حاجة اه أبسط حاجة ولي هي الولاد، نسا بلي الزواج، هو العطاء هو أنك تفهمني ونفهمك وهو أنك تنويني حياتك، واش عرفتو احساس انه يسمح فيك شي حد لي نتا معتابرو عمارت دارك ولي نتا مستاعد دير اي حاجة على قبلو على ود شي حاجة لي ماشي نتا خلقتيها فراسك !، داك الاحساس صعيب بزاف دمرني وقتلني وخلاني ندخل فكئابة وحزن دام 3 سنوات، والمحزن لي كيزيد اضرك كتر هو الضلم وهو أنك تضلمتي ..
دورات وجها لجيهت الشرجم ماسحة الدمعة لي طاحت من عينيها وهي تحط يد على فخاضها ..
نعيمة : سيري غير فين ما مشاك الله (جبدات يديها ) شوفي أبنتي أنا منهار شفت عويناتك عرفت أشنو عندك فالقلب، وعرفت الحزن لي عشتيه، أنقوليك أبنيتي كليمة وديريها بوجهي، شوفي هانتي شوفي شحال عشت وشفت، وكبدتي تحرقات مع موت ولدي، ومع ذلك بقيت شادا وبقيت فهاد الدنيا على وجه حفيداتي، راه ابنتي يكذب الكذاب ولي يقولك فهاد الدنيا راني عايش مرتاح، كل واحد تلقايه مضرور من جنب، ولو يكون بسيط، ولكن ديري فبالك الدنيا دوارة ابنتي واليوم عليه وغدا على وحداخور، والحمد لله وانا فرحانة لي ربي عيشني ووراني هاد النهار لي لاقا حفيدي بوحدة بحالك، ماعرفت اش دار من حسنة فحياتو تاطلاقا بيك، وسيف ابنتي راه تربية يدي واخا تشوفيه هاكاك قلبو بيض وخوتو وراه دارهوم فعينو وقلبو من نهار مات باه، وعمرو ضرهوم بشي حاجة غير نبيل الله اهديه وصافي، (ابتاسمات ) دابا نتي ابنتي ديري صفحة بيضة وحيدي عليك كولشي المهيم هو تبغيه ويبغيك وانا متأكدة مدام سيف تزوجك الا وانه بغاك ودارك مرات دارو، الله اسهل عليكوم والله ابعد عليكوم عينين الشر، يا ربي وتولدي بالسلامة انشاء الله وهاد الوليد اكون هو الضو ديالكوم ...
سيف : سمعي اختي انا ناشي ضدك وعمرني كنت ضدك راك عارفة هادشي الحاجة لي بغيتيها كتلقايها وهاد الراجل بغيتيه الله اجيبليك التيسير معاه انا غانوقف معاك حتا تكونو مع بعضياتكوم ( دورات وجها فرحانة ) ..
نيسيرين : بصح اخويا ؟؟؟؟
حرك راسو باه وهي تلاح عنقاتو بقا مدوز يدو على ضهرها مبتاسم ..
نيسرين : شكرا اخويا بزاف بزاف بزاف ..
سيف : أنا عيطتلو ودابا شوية غايكون هنا ولكن غادي تخليني نهضر معاه حيت كيبانلي تاهو ماعارفش صراحة ماعرفتش كيفاش ماعرفتوش بلي خوتكوم مزوجين ..
نيسرين : ( تنهدات ) راك عارف اسيف زواجك لي جا مباشر وهو لي كان ماكيبغيش ادخل فحياة خوتو داكشي باش ماجابتش الصدفة اصلا ماطاحتش علينا اما كون كانت غير دارت مثلا الخطوبة ديالكوم وكولشي كنت غانعرفها ...
وصلات طوموبيل تقابلات معاهوم ووقفات وهو يدور عندها ..
سيف : بقاي هنا تانقوليك اجي ..
حركات غير راسها شاف فيها وهبط وهي بقات كالسة فالطوموبيل قلبها كيضرب كتشوف يونس هبط تاهو من داك الطوموبيل ومشا لعند سيف تسالمو بالسيد وبقات متشوف غير سيف لي كيهضر ويونس كيسمع ومرة مرة يتحركو شفتيفو وهي كالسة على النار هي عارفة يونس فخبارو حيت هي سيفطاتلو ميساج مكتوب فيه ( شهد ختك هي مرت خويا وسيف خويا هو راجل ختك ) وتما طفات تيليفون عليه بقاو دقائق تادار سيف شاف فيها واشار ليها باش تنزل، سدات الباب ومشات بخطوات مترقبة تاوصلات حداه وطلعات عينيها شافت فيونس، سيف شاف فيهوم بجوج وهضر ..
سيف : نتي ختي، ونتا دابا راك خو مراتي، يعني من العائلة وبحال خويا، يمكن انا وختك كيفما قتليك ماتجمعناش بواحد الطريقة مناسبة ولكن الاهم اننا رجعنا مزوجين دابا وكنتسناو ولد راك عارف، عكسكوم نتوما بغيتو بعضياتكم، ومتافقين مع بعضياتكوم، وعارفين بعضياتكوم كتر مني، ( حط يدو على كتف يونس ) هادي راه امانة من الواليد عمرني وعمرني نزلت دمعة من عينيها حتاليوم على ودك باش تعرف هادشي داكشي لاش الى عطيتهاليك راه منبغيكش تقيص شعرة منها، والى مشات حتا جات وتشاكتلي منك راه ماتلوم غاراسك داك ساعة منعقلش عليك، ( نيسرين هبطات راسها كضحك ) ..
يونس : خسارة دابا هانتا غلبتيني ماتعطاتليش الفرصة باش نقوليك هاد الهضرة على شهد ...
سيف : ( ضحك ) ماتخافش مانخليكش تقولها شهد راه مراتي دابا وام ولدي ماغانديرش شي حاجة ضرها ..
يونس : شوف اخويا كيفما تانتا رجعتي ختي مراتك تانا هادشي لي ناوي مع نيسرين انشاءء الله وكيف ما اشرحتليك شهور وتلقاني عند باب داركوم ..
سيف : مرحبا بابي مفتوحة ليكوم ( طبطب على كتفو ) ومايتخافش عليك ..
يونس : لينا الشرف اسي تاجدين نتناسبو للمرة الثانية معاكوم ..
سيف مدلو كتفو وتعانقو نيسرين عضات على شفايفها ماكانتش تخايل هادشي حتا فاحلامها بقا يونس كيغمز ليها وهي تهبط راسها حشمانة واش بصح الدري لي بغاتو من قلبها هاهو كيتسالم دابا مع خوها سيف ماعارفاتش دابا واش تمشي تشكر نبيل حيت عاونها ولا تعلتبو حيتاش قال، بقا واقف معاهوم سيف ونصحهوم باش مايتلاقاوش بزاف على الاقل حتا يوصلو للخطبة باش احلو الامر مع جدو حسن مايعرفها بطريقة غير مباشرة ويصدق اينوض الصداع على والو، بقاو شحال عاد تفرقو، ركبات نيسرين مع سيف وحابسة الضحكة تادار شافها هاكاك ..
باسليها يديها وشاف فيها : نيسرين نتي راه امانة من عند المرحوم نتي راه بنتي قبل ماتكوني ختي ( دوز يديه بحنية على حنكها ) سمحيليا على هاد الضربة ..
ميلات حنكها وابتاسمات ليه عينيها مغرغرين : تانا اخويا بفضلك ماعمري حسيت بنقص ديال بابا الا فالقليل القليل نتا عمرتي داك الفراغ وزايدة وواخا ندير لي درت ماغانوفيش حقك وانا مسامحاليك على كولشي حيت نتا الوحيد لي عندك الحق تهز عليا يديك لا غير وتانا غلطت كان عليا نصارحك من الاول ..
سيف : ( عنقها ) بنت خوها ( شم ريحة شعرها ودوز يدو على ضهرها )
بصح دارها بنتو كتر من ختو حيت مين مات باهوم خلاها فكرش مو قلبو ديما كيضرو من جيهتها تزادت بلى اب عاشت بلى اب ماعرفاتش شنو المعنى ديال كلمة بابا، داكشي لاش قراها فاحسن المدارش ووفرليها احسن عيشة باش ماتحسش بالنقص حاول اوفرليها الامان يمكن دارليها داكشي لي وحتا وكان باها ماغايديروش ليها هنا كتحسي بمعنى الاخ هنا كتعرفي شنو معنى ديال كلمة اخ هو السند هو داك الحائط لي تميلي عليه ومايشكيش منك هو داك الشخص لي كيخاف عليك كتر من البؤبؤ ديال عينو هادا لي سميتو الاخ
وصل الليل كانت كطل من الشرجم وكتشوف الضواو وحتا النجوم لي كيلمعو فهاد الليلة الباردة .. جاها القنط وخصوصا تاحد ماطل عليها هاد العشية مين جات نعيمة واحد الوقيتة شداتها البكية اليوم ليلة راس العام وايضا العيد ميلاد ديالها وحتا واحد ماتجرء يسخى بليلتو ويجي ايدوزو معاها بغات تعيط لسيف او حشمات وبيديها ماعارفاش علاش ولكن لي متأكدة انها باقا ماتقدرش تزعم عليه، تفتح الباب دارت متلهفة والفرحة ففمها تاكاتلقا الممرضة وهي تدبل ابتسامتها لقاتها مدخلة الشكلاط والورد بقات مستغربة جابتهوم وحطاتهوم ..
الممرضة : هادي بمناسبة السنة الجديدة كل عام وانتي بصحة وعافية ..
شهد : ( عينيها مغرغرين ) شكرا ..
خرجات الممرضة ومشات تاجهات لداك الورد وبدات تقيس فيه ماحساتش كيفاش طاحت دمعة من عينيها، يمكن كيجي النهار لي كتولي فيه بوحدك نتي وراسك، كلسات فوق الكامة وهزات ديك البواطة دالشكلاط بقات كتشوف فيها وهي تحط يديها على كرشها ..
شهد : ( طاحت دمعة من عينيها ) شتي امامي تاواحد متفكرنا حتا بابا ماعندوش الوقت باش اجي اشوفنا تلقاه بقا مع عائلتو باش ادوز راس العام ولا مشا عند صحابو نساك بلي نتي كاينة وكاينة انا، ( غمضات عينيها وعاودات حلاتهوم ) انا ماشي موشكيل ولكن نتي ؟ نتي لاش ..
شهد : نسيتيها ياك ؟ نسيتي بلي عندك واحد الروح منك هنايا كاتسناك باش دوز معاها هاد الليلة ..
سيف : ( ابتاسمليها وهو يطلع يدو دوزهوم مورضهرها وجرها عندو تاتلصق سدرها مع سدرو ) واش كاين هادا لي كينسا روحو مم .. ( هبط راسو وباسها من فمها بوسة خفيفة بورشاتها فقلبها خلاها ترعش فكل لمسة كيحط فيها صبعانو على جزء من لحمها فكل مرة كتشم ريحتو داخل فاعماق نيفها فكل مرة كتسمع صوتو الرجولي كيهتز كيان قلبها بدون ماتحس شدات بسرعة زيرات على المونطو لي لابس وغمضات عينيها وحلات شفايفو كيخوصو فشفايفها وكمدوها بالحب ديالو بالحب لي مزال مامتيقاش واش كيبغيها ولا لا، قبلة منو كتخليها تنسا شكون هي وتنسا سميتها، رجع بعد شوية كيتفرج على هاد الملامح ديال هاد الملاك لي بلاه بيه سيدي ربي شفها كيفاش كتزير على شفايفها وطلقهوم شوية وتعاود تزيرهوم وحنيكاتها الحومر وعينيها المغمضين لي كيبانو منهوم غير رموشها الكثاف، عض على شفتيفو على هاض المنضر ورجع خطف قبلة لي كانت هاد المرة قصيرة المدة على الاولى حيت ماقدرش ماقدرش اصبر على هاد المشهد لي كهز وجولتو وعروش قلبو ...
بعد وطلع يدو بقا كيدوزهوم على حنيكاتها : نتي هي كولشي، قلبي وعقلي وروحي وكولشي بالنسبة ليا هي نتي، واش كاين شي حد غايبغي ابدا عام جديد بلى مايكون مع روحو مم .. ( دوز يديه على عينيها ومسحليها دوك الدميعات المتساقطة ) مابغيتش نشوف دموعك اكحلة العيون حيت كيخليوهوم يعطيو غلى لون القهوة لي عشقتو فعينيك ..
حنا شوية ودوز يدو من تحت فخاضها وتحت ضهرها وهزها لعندو مشا حطها فوق البياص وجاب واحد الكارطونة متربعة فتحها وهي تلقا طارط على شكل قلب كبير ومكتوبة فيها سميتها وشمعة فيها الرقم 26 ..
هز تيليفونو وطلق اغنية ( غنوا لحبيبي وقدمو له التهاني ) شافت فيه عينيها كيدمعو .. جر واحد البياص لي كياكلو عليه دوزو فوق حجرها وحط عليه لاطاغط تاشوية تفتح الباب وهي دخل الممرضة مبتاسمة مداتلو موس وجوج طباسل ولي فوغشيت .... شدهوم من عندها ومشات خرجات سد موراها الباب وجا لعندها حطهوم وهي كضحك ركبليها دوك الشمعات وهو يشوف ..
سيف : ايي نسينا البريكة !!!
شافت فيه وعلات كتافها زعما شفتي وهو يضحك ونزل خطف من عندها بوسة بزربة وجبد من جيبو بريكة وشعل بيهوم دوك الشمعات ( ومشا طفا الضو خلا غير الاضواو ديال الشريع ودالشمع لي مضويين ... كحزات شوية كلس حداهافوق البياص دور يدو على كتافها وشاف فتيليفونو باليد الاخرى ..
سيف : هانتي الالة باقا عشرة الدقايق للطناش يالاه تمناي شي امنية ..
غمضات عينيها مبتاسمة ( وهو شاف فيها كيضحك ) ورجعات حلات عينيها وشافت فيه ..
شهد : هادا احسن عيد ميلاد داز فحياتي ( قربات وباستو فففمو عاد بعدات ) هاد العام دوزتو انا وياك والعام الجاي غاندوزوه بثلاثة ..
سيف : انشاء الله احياتي وغايكون فبلاصة افضل واحسن ..
شهد : شكون كذب عليك مم قتليك هادا احسن عيد ميلاد غاندوزو فحياتي ..
دورات عينيها كضحك وملياااانة فرحة طفات على دااك الشمعة ودارت عندو خرجات لسانها كضحك وهو يجبدها باسها فجبهتها ..
سيف : سنة سعيدة حبيبتي وكل عام ندوزوه مع بعضنا ..
شهد : امين يا احسن حاجة وقعاتلي فحياتي ..
هاد الدنيا علماتني بزاف دالحوايج واهمها انني منفقدش الامل، فاي حاجة، اي فشل فحياتك، سواء خدمتك ولا قرايتك ولا علاقاتك، عتابريه بدياة لواحد النجاح باهر فالمستقبل ...
كحلة العيون ...
هزها داك الصباح جات حتا نادية ونيسرين ويونس لي بقاو كيضحكو مع شهد والاخيرة دايرة راسها مقلقة حيت ماقالوش ليها على علاقتهوم، ومشاو كاملين خرجو من المستشفى وتاجه سيف نيشان لدارو هو، كان اباغطومون فواحد الموبل دوليكس، هبطوها وطلعها سيف هازها فيدو تادخلو لدار كانت كاملة مفرشة وواسعة وكبيرة، كلاص وموديرن، بقات شهد كدور فعويناتها وتشوف هنا ولهيه ورجعات كتشوف فيه مامتيقاش بلي غاتولي تجمعهوم دار وحدة وغاتولي هادي دارها، داها سيف نيشان حطها فوق الناموسية اما نيسرين بحكم عارفة هاد الدار ديال خوها بدات كتوريها لنادية ومعاها يونس ...
حطها وبقا كيشوف فيها وهي فرحانة ..
سيف : من اليوم هاديدارنا وهادا بيتنا وهاد الفراش هو لي غايجمعنا ..
شهد : ( عينيها كيلمعو بالفرحة ) واش هاد الدار كانت ديالك ..
سيف : وي الدار لهيه ماكنتش كنكلس فيها بزاف اما هادي ديما كنكون فيها حتا وراقي كولشي كاينين هنا ..
شهد : غاتولي عندنا دارنا بوحدنا ..
سيف : (هزليها يديها وباسهوم وشاف فعينيها ) مابقيت باغي تاحاجة تقلقك لا متي ولا ولدي لي جاي فالطريق ..
شهد : غاتكون بنت هههه
سيف : ( حط يدو على كرشها لي بدات كاتبان شوية ) لي كان الموهيم إجي بالصحة والسلامة ...
حنات راسها حطات يديها على يديه فرحانة تارجع هز يد وحدة وهزليها وجها شوية وباسها من شفايفها تابعدات حناكها حوووومرر ..
شهد : ( خرجات عينيها بخجل ونطقات بشويية ) سييف باقين كاينين هنا ..
سيف : ( ضحك ورجع حنا لجيهت ودنيها ) باقي الوقت احبيبة وغانفارد بيك ..
زادت تزيرات وحلاتليها وهو كتحمممقو مين كترجع باغا غير تلوا فحرايجها ناض من حداها تاشاف نادية جايا عاد دار عندها ...
سيف : الواليدة هانتي هنا أنا غانمشي تانرجع ( غمز لشهد ) ..
ضحكات ودار تاطلاقا بيونس ونيسرين ..
يونس : فين !! .. واش غادي ؟؟
سيف : داكشي غاتمشي ..
يونس : وي غانمشي نيسرين غاتبقا هنا كيبانليا ..
نيسرين : وي ضاروري صافي غير سير ..
سيف : فليل راه غانتجمعو هنا انا عندي شي شغل مع سي حسن ..
مشاو الرجال خرجو ورجعات نيسرين دخلات عند شهد كاتبتاسم ..
نيسرين : ( تحنات عنقتها ) شكووون يخطف من عروستنا ونفيستنا نشاء الله ههه تاراحد نبرزو انا وياك احبيبتي ..
سيف دخل عند حسن للبيرو ديالو لقاه كالس كيشوف فالشرجم شافو حسن وهو يخفض الملامح ديالو ..
حسن : جيتي !
سيف : وعلاش ماغانجيش مم ؟ ( وهو كيقرب ليه )
حسن : رجعتي تبدل الديور وتبعد مراتك وولدك علينا شنو حنا ماشي عائلتك ..
سيف : ( كلس حداه كيشوف قدامو ) ماخليتيش ليا حل اجدي مابغيتيش تقبلها
حسن : ماكنتش باغيها ليك اولدي ( شد فدراعو ) انا كبرتك تاوصلتك لهاد القد وعطيتك السلطة كاملة فيديك، وباغليك مستقبل زوين وتبعد على داكشي ..
سيف : حتا دابا شنو وقع اجدي مم ياك الهدف ديالهوم الفلوس راه خداوه شنو غايكون الهدف من انني نتزوج بوحدة ماباغيهاش وغاتكون ام ولادي وانا منقدرش ندخلها تالقلبي
سيف : شوف اجدي الحياة ماشي ديما كتمشي على حساب مابغينا، متاافق معاك نتا كبرتيني وربيتيني ووفرتيلي احسن عيشة ( هز يدو باسها ودارها عند جبهتو ) ولكن كاتبقا حياتي ومسؤوليتي، ونتا داك النهار راك شفتي، هنتيني وهنتي الحرمة ديالي وام ولدي وسط دارك ، ونتا عارف بلي داك الطلاق ماشي بيديها، وهاداك ربي قدرو عليها، وشنو دابا نيسرين كون تزوج وطلق ماخسهاش تعيش نقتلوها، ولا عمتي خديجة ؟؟ .. جدي دوك الناس راه ماشي كيف احسابليك عاشرهوم وغاتشوف ماعمرهوم يأديوك ولا تسمع منهوم كلمة دالعيب وهامراتي شوف شنو درتي ليها وعمرها سمعاتك كلمة دالعيب وانا متأكد تشوفك كتموت غاتجي تعتقك .. جدي راه مابقاليكش فالدنيا بزاف حتالامتا غاتبقا بهاد القصوحية وهاد الحرام خلينا نبعدو علينا كولشي ..
شاف فيه حسن : واش اولدي كتقوليا نبعد بلى ماناخد حق باك ..
سيف : ( تنهد ) شحال هادي كنت نفكر فهادشي ولكن الواليد دابا عندي مسؤولية مرأة وولد جايين شنو ذنبهوم لادخلت انا للحبس علامن على با لي مات شهيد ومشا لقبرو ..
حسن : ( ناض واقف وشاف فيه ) سمع انا لامخدييتيش حق باك ماعندك فين تمشي سمعتي قلبي باااقي محرووق وماغايتهنا تايتدفن هاداك حداه، ولا نابقاش كيهمك دم باك لي مشا قدام عينيك
سيف : ( ناض وقف تاهو مزير على القبضة ديال يدو وعينيه حمرة ) أنا عمررننييي غااانسمححح ليهوووم سمعتييي، وماشي سكت كيعني غانسمح ليهوم ..
جرو من كتفو وشاف فيه بعينين حوومر : خسك تكون راجل وتجيي حق باااك واخا يكون لي كان هادشي تسنيناه عمرنا كامل ( درب بالعكاز ) ولدابا المحمودي عمرو يفلت بالعملة ديالو، وقريب غايدخل ( عاود درب ) وخسسسسكككك تقتتتلووووو ..( دار شاف فيه عينيه حومر ) اولى تخلى على الكنية لي عطاك باك وبدات تبانليك مكاتشرفكش شوف غير فختك لي عاشت محرومة وديك ساعة غاتمشي تقتلو بعينيك مغمضين ..( شاف فيه ورجع هدر ببرودة ) والى بغيتي تبقا حدا ولدك ومراتك، ساهلة باقاليك فرصة باش تزوج بنت حاتم ياك الشرع عطا ربعة ..
سيف : مااايمكنش نفكر نجيب وحدة فمكاان شههد هادي مااتحلمشش بيهاا ..
شهد : ( بقات كتعض فشفايفها ) ايوا لي بغيتي خودي راحتك ..
سلمو عليها ومشاو خرجو بقات غير غير هي فوسط البيت بقات كتشوف فيه وناضت بشوية مشات لكوافوز هزات وحدة من روايحو كتشمها مبتاسمة تاسمعات تيليفونها كيصوني ومشات ليه هزاتو ماعرفاتش النمرة وهي تجاوب ..
سرطات ريقها وشافت فالتيليفون وبقات كطلع النفس بخوف شكاتعني ليها هاد الهضرة وشناهو السر لي غادي ايخبيه عليها سيف ولي كولشي عارفو وحتا من مرام .. كلسات فوق الناموسية شادا فقلبها مارضاتش تقوليها شتتي الشمل .. هي عارفة بلي جات من نور مرام وبصح ماكانش كيخسها تبغي واحد خاطب ولكن فنفس الوقت هي عارفاه ماكيبغيهاش وهي جات غير سبب .. ولكن الاهم من هادشي كامل شنو الحاجة لي مخبيها سيف عليها ..
بقات كتفكر وتفكر وتفكر وافكار اديوها لافكار تاشوية سمعات الباب ديال الدار كيتفتح ... ناضت بشوية خرجات من البيت وهي تشوفو مدخل فيدو جوج دالكراطن دالبيتزا وفيدو عاوتاني واحد الميكا دالعواصر ولي صلاد شاف فيها وبتاسم ليها وهو جاي لعندها ..
سيف : حبيبة كيبقيتي مزيان .. ( وصل لعندها باسها من حنكها وعنقها وهي تجر عنقها مبورشة وحركاتلو غير راسها بالاجاب ) اجي تعشاي راه جبتليك ماتاكلي ..
مشا تقدم وهي تبعاتو بشوية من اللور دخل للكويزين وحط داكشي فوق طابل فتح دوك البيتزات وجبد الكيسان حطهوم وهو كيضحك معاها وهي مشات كلسات فالكرسي وبقات كتشوف فيه وساهية فيه وفالضحكة ديالو شافتو كيحيد المونطو وحطو فوق كرسي وكلس مقابل معاها كب ليها العصير ودور ليها البيتزا باش تاكل ... هي كتاكل وكتفكر وتشوف فعينو، قلبها كيضرب وكيضرب بسميتو لدرجة مشاعر حساتهوم معاه عمرها حساتهوم مع خالد هو فشكل هو داك الامل لي تنبع من جديد هو داك الحب لي جا فآحر المطاف هو الاب ديال الجنين لي من شحال وهي حالمة بيه، هو راجلها وهو رجع كولشي فحياتها، ماتقدرش تحيلو بعيد عليها ولا مع شي وحدة من غيرها تموت ماتقدرش ابدا هاد المرة قلبها غايخرج من بلاصتو حيت تعرض لبزاف ديال الازمات ..
سالاو ومشات للبيت دارت شافتو كيبدل حوايجو وهي تهضر ..
دخلو لدوش وهي باقا فحالة سهات حيدات حوايجها بقات غير بدو بياس وهو كذلك بقا غير بشورط دار عندها وهي كتشوف فيه من المرايا دورات شعرها من على عنقها وهو يمد يدو كيحيد حملات السدر تالاحهوم فالارض وتحركات هي طفات رشاش فالبانيو لي كان عمر ودخلات فيه وجا هو دخل موراها وتكاها على سدرو مخشية بين رجليه .. يد مدورها على كرشها ويد كيحركها على كتافها ..حطات يديها على يدو لي فوق كرشها ونطقات ..
شهد : ( بهدوء ) سيف أنا بصح بغيتك ..
سيف : عارف ...
شهد : أنا حسيت معاك لي ماحسيتوش مع خالد ..( حسات بيدو تزيات على كتافها )
سيف : شهاد الهضرة كتقولي مم ( جبدها من عنقها خاشي يدو فشعرها ) نتي دابا ديالي وملكي ومراتي سمعتي الماضي نسايه عليك وهادا لي فكرشك ولدي، ماعمرك تقولي على راسك بحال هاكا وهادي آخر مرة تجبديلي شي حاجة عندها علاقة بداك الشماتة والا غاتكون عندي معاك هضرة أخرى سمعتي ..
شافت فيه وحركات راسها باه زرب عليها وجرها لعندو نغامس فشفايفها كيجبد كل وحدة ركيتمعن فيها زاد دور يدو على ضهرها من اللور وهي مدورة يديها على عنقو ..
خرج هازها لابسة البينوار وحنيكاتها حومر وهو مدور الفوطة على نصو لتحتاني حطها فوق الناموسية وتكا حداها كيقيس فحنيكاتها وهز يديها البويض باسهوم ..
سيف : نتي احسن حاجة وقعاتلي فحياتي ..
كحزات عندو خشات راسها فسدرو وهو حيد الفوطة من شعرها وبقا كيسرحو بيدو ومرة مرة كيشم ريحتو ..
لبسات سروال واسع فالاسود مع بودي بالكول فالأبيض ودارت المونطو من الفوق طويل فالأبيض مشرط بالأسود طلقات شعرها مبوكلياه ورشات ريحتها وهزات ساكها وتسليفونها ومشات خرجات من العمارة وشدات طاكسي نيشان للكافي لي قالت ليها خديجة ..
دخلات لقاتها كتسنى فواحد الطابل .. مشات عاقدة حجبانها وصلات لعندها حيدات النضاضر ديال الشمس وكلسات ..
شهد : هانا الالة خديجة وضحلينا شنو قلتي البارح ..
خديجة : ( شافت فيها وضحكات ) تو تو تو بقيتي فيا والله معقول تكون نيتك صافية لهاد الدرجة تعيشي مع مجرم وتخليه هو راجلك ؟
ضربات على الطبلة وخرجات فيها عينيها : راك قدك قد ماما خليني محتارماك قولي لي عندك نيشان ..
خديجة : ماشي انا لي غانقول ولكن هاشنو غانوريك ( جبدات تيليفونها وخدمات واحد الڤيديو لي خرجات شهد على إثرو عينيها كان سيف واقف على الكاميوات كيهزو فالمخدرات وواحد شوية تقطع وعاود باينت واحد اللقطة لي كيطرطق فيها سيف الفردي فواحد الراجل ) راجلك احبيبتي لا اولى نقولو عائلة وطاسيلة تاجدين كاملة هاحقيقتهوم معروفين فمنطقة كتامة كنبعيو الكيف لا وماشي غير هاكاك كنصدروه لأروبا وراجلك هو الحاكي الرئيسي من مور باه لي تقتل بسباب هادشي نيت راجلي ولا خوتي الباقين ولا عمامي كولشي باقين تما كيمارسو نفس المهنة سمعتي، يعني حنا صالحين لبعضياتنا، ونتي شنو جايا وبكل تقة تزوجتي واحد منا لا وحملتي منو من الفوق وهانتي دابا عرفتي حقيقة بات ولدك كيدايرة ..
اصلا الحياة توقفات عندها، اصلا الصدمة خلات الزمن يوقف عليها . واش هادا حبيببهااا حبيبها لي دابا عاد قتل واحد حدا عينيها، شدات على قلبها لي بدا كيضرب بسرعة وعينيها لي ولاو شلال بدون ملامح ..
خديجة : سيري لدارنا وشوفي بيتو وزيدي تأكدي اعروستنا على خاطرك ( ناضت واقفة ) خليت ليك الخير ومن الاحسن تخوي دارنا لا نتي لا ولدك حيت ماعندنا مانديرو بيك ومن نهار جيتي ونتي دايرالينا غير المشاكيل، وسيف ماعندو استفادة بيك ونتي غير غادي تزيدي تخرجي على حياتو اللهم خرجي منها بكرامتك ههه حيت النهار لي غايفيض الكاس غادي اقتلك ..
مشات وخلاتها بحال جسد دون روح ماضت كتمشا وهي بحال شي سكرانة شدات طاكسي نيشان لدار تاجدين ونزلات داخلة دخال شي مومياء .. كتمشا بلى عقل وكأنها كتقلب على الشخص لي كيقوليها راكي غير كتحلمي وهادشي ماكاينش منو ..
طلعات ودخلات لبيتو، جرات المجر اللول الثاني وهي تلقا الفردي، شداتها السخفة والصدمة والوجع هزاتو فيديها كترعد ..
شهد : شش ش شنو د ددر رتي ا اسس ييف ..
بدات كطلع النفس وتهبطو بجهد تاتفتح عليها الباب دورات عينيها حومر تاكاتشوفو ومع عينيه نزلو دموعها ..
شهد : ك كذ بتي علي ليا !!!!
سيف : ( غمض عينيه عرفها عرفات ) شهد سمعني
لاحت داك الفردي فوق الناموسية وبقات راجعة باللور كتحرك راسها بلا : نتا ماكاتسواااش كيفاش قدرتي تكذب عليا ..
كيحاول اقرب ..ًسيف : شهد تكالماي انا ماكذبتش عليك ..
شهد : كذبتييي علياااا الخااااااين مستحييل تكون بات ولدي مستحيييل نفضل نقتلو فكرشي على انه يكون ولدك ..
غمض عينيه مزير على عينيه وهو يتحرك هز داك الفردي لي كانت لاحتو على ناموسية ومشا مقربليها وهي كتشوفو كيقرب والفردي فيدو وهي تخرج عينيها ..
كحلة العيون الجزء الخامس
محتوى القصة
التنقل بين الأجزاء