زهر الخايبة الجزء الثاني

من تأليف Oumaima Mega
2020

محتوى القصة

رواية زهر الخايبة

حليمة كتشوف فيهم و تضحك و كتمشى عندهم على نيتها مسكينة ...و جمعت رجليها و تربعت حداهم و تضحك 
عويشة كضحك و تشوف فيها : انا غادي نتكلف بحليمة علاه شحال عدنا من من حليمة 
فضيلة كتشوف في عويشة : و متعيقيش بزاف 
حليمة دور تشوف فيهم بجوجات : علاياش متعيقش
عويشة دايرا ضحكة صفرة ليها : مديش على فضيلة دايما تتلوح الهضرة 
في القصر دياال الحاج ....و بظبط في الكوزينة الكبيرة ديال الحاج ...الدريات لي خدامات في القصر جالسات في لرض و يقادو و يصيبو و كين لي واقفات يدورو في الطناجر ديال الغدا كل طنجرة يا طنجرة و وحدة تقاد في توشيات و تصايبهم ها الحلوة بالشكال و النواع ها العواصر بالنواع ها الفاكية محطوطة فوق الطبك و المسمن و البغرير مزال كيعجنو فيه الدريات و يهضرو 
سعيدة كتعجن و هي معصبة : منعرف شكون هادي لي طلع ليها الزهر و تسكم ليها السعد تاتخد سي العمااار 
شامة غير تسخر و تجيب الزيت و مطلعة الغوباشة : تكون زعمة شي بنت دار المخزن 
مليكة تقلب في المسمن فوق المقلة : لااا لاا سمعت لالة كلثوم تدوي و تقول بلي هي بنت مااافحالهاش 
سعيدة تدردر في الطحين و تدوي : ايوا يختارو غير وحدة فينا هنايا كابرات و نايضات على يديهم ...ياو هي الدخل لعندهم مرة كبيرة في السن الطول و لعرض و سمرا هي الكبيرة في الخدامات تما و كلمتها مسموعة فوق الخدامات : مدرا فين وصلتو ايوا طلقو يديكم ناس سيد الحاج علاين يوصلو يلاه ....حنا وراس و قطعو النفس و كملو شغالهم ....و منهم لي يجولو في الدار و يقادو في الديكور واخا راه مصاوب من عند مولانا 
الطموبيل ديال الحاج سايكها التهامي وقفت ليهم عد الباب و سيفطو طموبيل خرا باش مايعدوش يتزاحمو في وحدة 
حكيمة هازا جليلبة ديالها وافية شوية باش تجي قد حليمة ...جاوهم على غفلة فين غتلحق تشري ليها توب و لا تخيط ليها جليليبة دخلات عندهم و شافتهم مزال دايرين بيها كل وحدة شادة شيتة و تزوق فيها 
حكيمة : سالييتو ليهااا

عيشة و فضيلة شافو في حليمة و تبسمو ...حتى فاتحة غير قرمة فمها جامعة بيه الضحكة 
عويشة : ساليت لييك 
حكيمة جاية تجبد في حجبانها و ضامة يديها على الجلابة : أنشوف ....حليمة دورات راسها في حكيمة كتفرنس اش غنقوليكم يا لوليات عروسة زينة و زادها نور الحمام ردو ليها وجهها نشكيلة فنية شدو العكر و دارو ليها نقطة نقطة في خدودها و كحلو ليها عينيها مزيان من اللداخل و دارو ليها الخضر فوق عينيها حلفي عليها منبتة الخص و العكر دارو ليها داك الغوز المشعشع 
حكيمة طلعات غباشتها و كتزوي : تووووما اش درتووو(قفزتهم كاملين ) ليها توماااا مسحو ليهاااا هاد العجب من وجهها 
فضيلة كتخرج فيها عينيها : اويلي أ مي راه درنا ليها فحالا كنصيبو حنايا 
حليمة كتشوف في حكيمة : تانا عجبنيي أ مييي 
عويشة : ااه ميي جاها زوين 
فتيحة تشوف في حليمة و تضحك : هههه ااه ههه أ مي هههه واللهيلا زوين ههه جاها ....حكيمة يلاه غدوي سمعات الجيلالي يغوت على بلغتوو الصفرة طلعت غير تخنزيرة فيهم : ها جلابة ا حليمة لبيسها و توما رجعوها كيكانت متبقاش هكا تعود تخلع السيد و يزدقو جاريين عليينا ....حليمة تغبنت قدام مها بغات تهيا دير الماكياج و هي يلاه حسات بجنابها ....خلات ليها الجلابة و خرجت تجارا عند الجيلالي ...و حليمة نزلت روايسها فكعانة 
فضيلة كتنغز فيها : عدك اختي جيتي زوينة بزااف كاع دريات الدوار لا شافوك تعجبيهم 
عويشة تهي تجبد في عينيها و تنغز في في فتيحة لي كابتة الضحكة : سكتي غتفرشينا ...حليمة ضحك فرحانة غتلقا بسيدها عمار و هي دايرا المكياج الخلعة شادها و القلب عدها يضرب و يحيح ... ناضو لبسو جلالبهم ...حليمة لبست جلابت مها وبقات مضاربة معاها حتى دخلتها غير بزز واخا جاتها مضيقة عليها خواتاتها غير يشوفو فيها ويضحكو على هاد لحالة لي غادا بيها وكملتها بجلابة و خرجت من البيت ديالهم ...جيلالي جات عينو في حليمة....لي غير شافت باها ضمت يديها و نزلت راسها حشمت قدام باها 
جيلالي طلع غوباشتو : تي هادي شكون دار فيها هوكا 
حكيمة تشوف فيه : تاا زيد غنتعطلو على الشيخ سيفط طموبيلاتو هاكا من قبيلا 
جيلالي فقد الامل في خطرة فاش شاف وجهها هوكاك مخلط وديك جلابة مزيرة عليها : و فيين دريات 
خرجو بنات الحرام مزيزات و موجدات تحلفي هما لي غاديين يتخطبو جيلالي عاد ارتاح شوية لما بغاوش ليه حليمة دغيا يدفع ليه وحدة اخرى ...اما وحد حكيمة مبقات عارفة ما دير غير توكل امرها لله



خرجو من الخيمة ...و عيون جيران غير خارجة فيهم و في حليمة لي خارجة دايرا شد على راسها و حانية راسها ...و حكيمة دور تشوف في جيران و تخمس على العين و تطلب السلامة لا عينها تخرج فيهم ... جيلالي ركب القدام في الطموبيل القدامية و معاه دريات جوج و الطمنوبيل لورانية ركبت فيها حليمة مع حكيمة و فضيلة جلسو في ديك الطموبيل متييسعة من لداخل حليمة و فضيلة يدورو في عينهم و حالين فمهم في الطموبيل و حكيمة حاطة يدها فوق راس حليمة و تقرا عليها القرآن و تشوف في وجهها و تقول موحالش يقبلو بيها 
فضيلة مخرجة عينيها : طنوبييل زييينة أميي 
حكيمة غوتت عليها : متلفينييش هانا نسيت اينا سورة كنت....حليمة كيف الآمانة جالسة غير عينيها لي يتجبدو ...تحركو الطموبيلات و دارو يتمشاو في طريق في الاتجاه ديال القصر ...جيلالي يحس براسو همة و شان و هو راكب القدام في طنوبيل الكبيرة ... كتمشى طموبيل وسط الدواور و لراضي ديال الفلاحة ...و فيما يدوزو يوقفو الرجال يديرو تحية عند بالهم الحاج دايز حتى تقطعو الرجلين و بقات غير طبيعة و خرجو في وحد الطريق على ري عينيها كيبان قصر كبير و عريض و بعيييد و محوطو صوور مشبك خارج منو الجنان و الشجر مقادد تحلفي عليه قصر لمالييك ...كلشي حل فمو لمن دريات لمن والديهم و جبدو عينيهم ...العساسة لي كانو واقفين غير شافو طموبيلات الحاج حلو الباب المشبك البراني ديال الجردة اوطوماتيك 
فضيلة عينيها خرجو مجبدين و تنغز في حليمة : أربي حليمة قرصيني 
حليمة مجبدة عينيها : راه انا خاصني لي يقرصني ...لالة حكيمة غير شافت القصر دارت عند حليمة تكاد ليها في شال و ترعد : ياربي ياربي تسهل 
حليمة ضمات يديها عندها و نزلت حجبانها : جاتني الخلعة أ ميي ...فضيلة شقلبت عينيها و رجعات تكمل تمنضيرة ...دخلو للجردة ديال القصر كين غير الدنيا خضرا و النافورات طلقو الما في السما و لبيسين لي تما تحلفي عليها جنة فوق لرض و الخدامة كثار مشتين ... واقفة قدام الباب ديال القصر لي كولو رخام ...لالة كلثوم بكاندورة زينة و الدهب في ليدين و سنسلة مدهبة و شال غير حاطاه فوق راسها واقفة تسنا في ضياف ....وقفو الطموبيلات عند رجليها ...نزلو منهم الناس مشروبين غير يدورو عينيهم و يشوفو في هادشي أما وحد حليمة مبقاتش قدت تزيد وجهها تخطف و هي كتشوف هاد الخير بغات ترجع فحالاتها 
حليمة كتدوي بشوية : مي فشلو عليا ركابي 
حكيمة شادة منها تزير عليها و ضحكة من لودن تال لودن : تي زيدي متشوهيناش زيدي ....و جرتها معاها

بداو يتمشاو يفرنصو للالة كلثوم ...و البنات تجمعوو حدا بعضياتهم لالة حكيمة لي شادا من حليمة لي مبقات قدت تمشا كلها كترعد و في وجهها حالة ...كلثوم دورت عينيها للحليمة هي لولة بانت ليها مخلطة وجهها بالمكياج ولابسة ديك لحالة جبدات غير عويناتها و تفكر في عمر كيف غيشوف في هادي جيلالي كيتمشى ضاحك و داير يدو من ورا ضهرو و طالع في الدروج ديال الرخام كيتمشاو 
جيلالي حنا راسو لعدها : و كيف دايرا ا لالة كلثوم بخاير لباس وو ؟ 
كلثوم عينيها غير في حليمة لي حانية راسها : لاباس الحمدالله تفضلو مرحبا بيكم ....دخلتهم قدامها سلمات على حكيمة و سلمت على حليمة و كتشوف فيها 
كلثوم : حليمة لاباس 
حليمة غير حانية راسها تحشم صوت قليل : لاباس الحمد الله ....خواتاتها من اللور غير مخرجين عينهم في القصر دخلو ليه كيتمشاو و زرابي مفرشين في لرض و ثريات في السما كيبريو و الفراشات العصرية ...النخوة ديال مصر كيتمشاو في هاد العرض و مسرحين عينيهم حليمة من لتحت تحول في عويناتها و تشوف في الدار لكبيبرة ....و جيلالي غير يهيت في خاطرو و نايضة فيه النايضة من الحاج خلاق و باغي يتناسب معاه أما حكيمة تهيا تقول غير الله ياربي الله ...و كلثوم متقدماهم داتهم لوحد البلاصة مجهزة و مقادة الكادر ديالها مدهب الفوطويات و طابلة ديال الجاج شهوة منها و غير لحلاوي و المسمن محطوط فيها مزينها و الخدامات ديرين السبة يسربيو و منها باغين يشوفو العروسة 
الحاج كان جالس تما بعكازو يتسنا غير شافهم هو يجمع الوقفة و يدوي و فرحان : مرحبا مرحباا هههه ....تمشى عدهم و جيلالي نقز على يد الحاج يبوسها و حكيمة تهيا حليمة شافتو و تبشرت و بالامان حست و تكات على يدو تبوسها 
الحاج واقف بالسلهام ديالو : ههههه يرضي عليك ابنتيي ههه زيدي تفضلي جلسي جلسو دار داركم ...الحاج شاد حليمة بيدو عزيزة عليه في قلبو و يتمشى بيها و يتمشاو معاها ...أما دريات عينيهم في القصر باقا مطرطقة و فامهم حالين حتى قرصتهم مهم يدوزو يريحو ....جلس لحاج و حداه حليمة مجلسها في جنبو و في جنبو ليمن جلست كلثوم غير تشوف و دايرا يدها على خدها ....جلسو راجل و مرتو و بناتهم جلسو مصافات ....و الحاج يرحب بيهم و حليمة حداها حانية راسها و حشمانة 
فتيحة تكات على فضيلة : دابا خيبة النيف حليمة غتعيش هنا 
فضيلة غير طرطق في عينيها : سكتي معرفنة اش كين ....أما لالكم عويشة عارفة راسها هي زوينة جالسة ميلحة و مبشرة و في عينين ختها حليمة محمرة كتسنا غير لعريس يجي و تجبد فيه الكحل لي في عينيها و تجبدو للعندها 
الحاج طلع راسو الفوق كيبان ليه عمر كيتمشى : هاهو عماااار هابط ...حليمة جمعت يديها ضماتها عدها و قلبها يضرب و يتقبض عليها و الخلعة ركبتها و دريات حتى هما حشمو و بداو يتناغزو من لتحت حتى يبرك قدامهم و يطلعو فيه عويناتهم ...نازل عمر لباسو ديالو سبورتيف كيتبختر في المشية و على ري العين شاف الحاج جالس مع ضيافو ....بدا كيتمشى عندهم و هو جامع غوباشتو و باين معاجبوش لحال ...داير يدو في جيابو و يتمشى لعندهم حول عينو كينا كلثوم كتشوف فيه و الحاج جالسة حداه مرة كبيرة وجهها بهلوان و مرة و راجل و ثلاتة البنات زوينات مابيهمش حانيين ريوسهم ...جلس مفطح قدامهم فوق الفوطوي في جنب حليمة مفرق رجلو كيشوف في جلالي و مرتو و صوت حد من الحجر : سلام ...ردو عليه السلام يتبسمو....الدريات خطفو فيه غير نضرة دا ليهم القليب غير الحطة و تبوكيصة تعطيك الخبار ... حليمة تكوانسات وهو حداها مقدتش طلع فيه عينيها قلبها كتسمعو يضرب في ودنها..

الحاج المختار كيتبسم و يشوف في عمر : نعرفك بنسابك سي جيلالي و لالة سعيدة 
كلثوم جامعة يديها و مالت عند الحاج : لالة حكيمة الحاج حكيمة 
الحاج يحرك في رويسو : ايه ايه لالة حكيمة 
عمر باقي مطلع غوباشتو كيشوف في حكيمة و جيلالي : كنرحب بيكم ....الجيلالي و حكيمة يفرنسو و يضحكو ليه و جامعين يديهم عدهم 
جيلالي حاني ليه راسو : لهلا يخطيك ا سي عمااار 
حكيمة : ترحب بيك الجنة اسيدي ....الحاج ضحك و تفطح و عجبو الحال كلثوم غير منيشة على ولدها بان ليها هادشي مامنونش ....حليمة وجهها ولا حمر و لات كلها ترعد و قلبها يضرب ...لالياتي ثلاتة غير يتناغزو و الدودة شعلت فيهم قدامو باركين و يخطفو الشوفات فيه تحت من وليديهم و يضحكو و عويشة تبلق في عينيها 
الحاج كيشوف في عمر و يفرنص : ايوا اعمااار كيف جاتك حلييمة ...حليمة تزيرت حدا الحاج و جامعة يديها عندها 
عمر على حالتو محامل حد كيشوف في الدريات بثلاتة لي قدامو و يدوز عليهم عينو و غير الصوت ديالو باين ناوي على خزيت نبرة ديالو فحال كينهض فيهم : اينا وحدة فيهم ؟ 
الحاج جبد حجبانو : و تااا حليمة هادي لي جالسة حدايا ... عمر دور وجهو فيها نيشان و في ساعتو ناض تقاد في الجلسة و عينو خرجو في حليمة و الريق نشف ليه هو يحول عينو للحاج و هو مزال مشوكي و ناض واقف و غوت : وااش نتا حماقيتي ولا مالك ؟ ....حليمة مطلعتش عينها ولا طلعت غير جامعة يديها و نفسها تطلع و تنزل و من نبرة ديالو باين معجباتوش اما دريات قفزو من بلاصتهم وشافو فيه كيغوت ودغيا وحناو ريوسهم خافو وبداو كيبرقو في عينيهم من تحت لعين والديهم بداو يشوفو في بعضياتهم لبلان ما زادقش....الحاج مطرطق فيه عينو و كلثوم نزلت راسها لرض مخبية وجهها هادا جهدها ...عمر كان غيزيد يخرج نيابو حول عينو فيهم و بزز حتى كبح الغضب ديالو و دار جامع النفس غادي فحالو و ياوييل شي حد يجبدو دابا ...الحاج غير مطرطق فيه عينو و مخرجها 
حكيمة نغزت جيلالي و هي مجبدة عينيها و تهضر بشوية : جيلالي مبغاهاش 
جيلالي مخرج عينو : تي سكتيي (و بدا يصيح على قد جهدو ما بغيش يضيع النسوبية ) هااااانتاااا الحاج كين عويشة و فضييلة و فتيحة ...حتى هما دغيا تقادو يتبسمو قدام الحاج عندك حليمة لي شدتها البكية و تاكل في يديها اش داها تحلم بشي زواج و هي عارفة راسها كيف دايرا كون غير خلاوها في دارهم حسن ليها دبلو ملامح ديالها و قلبها ضرها و حنات عينيها و هو ينوض الحاج على وقفتو يغوت على جيلالي و يكشكش : ولاااا اسيدييي وا بغيت حليييمة(خواتاتها شافو في لحاج وغوبشو عوتاني )هي لي تكووون مرت ولدييي ...حليمة طلعات فيه عينيها لي كيتبرقو بالبراءة مسكينة بغات تقوليه يلا ما بغاش صافي ...و الحاج منقز فوق ريسهم 
كلثوم تشوف فيه : تهدن الحاج دابا تكوفر 
جيلالي يشرح ليه : رجوع الله الحاج خالي سي عماار هو يتخير 
الحاااج يدوي و يلهث و هاز العكاز يدوزو من فوق منهم : هاداااك راه دسر ولا طالع فوق ريوسنا و والله مغتكون مرتووو الا حلييمة هاااا صداااق هااااهوااا 
كلثوم كتبرد السوق : غير بشوية عليك الحاج ....بدا يجبد من قبو الرزامي ديال الفلوس و يحط فوق الطبلة و يدوي و عينين جيلالي خرجوو مع الفلوس ...حكيمة شافت الفلوس كيتحطو غطات فمها حيت كانت غادي تزغرت ...الدريات واخا كيشوفو في الفلوس مطلعين غوباشتهم في حليمة ...لي غير تشوف و مجبدة عينيها مسيكينة عارفا سي عمار معجباتوش حتى الهضرة باش تنطق معندهاش الصوت قدامهم 
الحاج حط رزمة لخرة : هااااهيا عشرة لمليووون صداااق ...شهقت حكيمة و بناتها في المبلغ ...اما جيلالي على داك الباب كيشوف في الفلوس و يديه يتحرقو : خودها الحاج حليمة بقاي مع باك الحاج ....حليمة دورات فيه راسها و خرجت عينيها في باها واش غادي يخليوها هنا 
كلثوم تجلس في الحاج : جلس ا الحاج جلس ...جلس الحاج يشوف في جيلالي : لااا دريااا تجييي بعزهاااا تجييي بعزهاااااا سيمانة جايا العرس و كلشييي على حسابيي اسيديي نوريه لباباه 
جيلاليي : عليك امان الحاج (دور عينو للحليمة ) لالة حليمة يلاه ...حليمة مطرطقة في باها عينيها و تحرك في راسها ...حكيمة جامعة يديها و تبسم ...اما خواتاتها فلموت لي مجاتهمش راه باقين حيين المهر لي تعطاها راها وزنها بالدهب ...كلثوم تبسمت نص تبسيمة تشوف و تفكر غير في ولدها لي العالم الله كون راه بخ الدم الفوق

جمع الجيلالي صداق بنتو حلال عليه يجمع و يخشي في قبو ...دريات بثلاتة بغاو يبردو غضايضهم في الحلوة و هما يشوفو في حليمة و ليني حكيمة منعاتهم ...و الحاج يتبسم و يدوي مع حليمة شاد منها بيدو ليمين يستقبل فيها و يرحب بيها عدو و يقوليها هادا القصر ديللها و هنا فين غتعود تعيش ....بلاما ندوي على السم ديال خواتاتها اما حتى ميمتها ضمات يديها عدها و دور في رويسها للقصر و كتشوف في زهر بنيتها البكية لي شداها و هي تبسم ...حتى وصلت وقيتهم رحبت بيهم كلثوم باش ياكلو كلاو لي قسم الله ...و حليمة تبشرت و فرحت واخا لي عملو سيدي عمار ما كيبشرش بلخير ...حتى وصلت وقيتهم باش يمشيو 
نطلعو لبيت عمر ...بقات ليه غير شرجم لما هرسوش ...بيسيه خبطو مع لرض تليفون هرس ديكورات برجلو و عروقو خارجيين غير يتفكرها يخرجو عروقو : واااااش تسطااا هادااا ...حتى تحل لباب و دخلات كلثوم عدو مخرجة عينيها و تندب : اويلييي ا عمر تهدن اوليدي اويليي 
عمر دار عندها صااعر و كلو حمر : وااااش شفتييييه اش دااار 
كلثوم تمشا عندو و تبغي تهدن فيه : شنوو دار جاب ليك عروسة على من زيناتها 
عمر : واااااش كضحكييي علياااا باغني نتزوج بمرا كبر منييي 
كلثوم تشد فيه و تهدن فيه و تطرطق فيه عينيها : لا اوليدييي والله باقا صغييرة غير عامرة شوية والله زوينة 
عمر خرج فيها عروقوو : انااااا مغنتزوجش بهاديييك ...هو يتحل لباب و دخل لحاج و في يدو الوراق و يتحلف : و هي لي غاديي تجوج بيها و عليا بليمين تنخرج علييك 
عمر تعصب نييت : و دييير ليي بغيتيي دابا انااا مغنتزجش بهاديك انا غادي نمشي فحاليي 
كلثوم دارت عندوو : لا هاويلييي تخرج من هنااا تخرج معاااك روحييي 
عمر قطع حويجوووو عليهم رد تروكو ديالو شرويطة : و شنوووو بغيتينييي نتزوج بهاديك 
الحاج يخرج في عينو : شو السلكوط لاخر يقطع ليا في حوايجو فاش نسني على هاد الوريقات و نتقب ليك الباسبور و ديك الساع شوف اش دير لما نخليك داير في شوانط حفييان رجليين راه مسمتيش الحاج المختار ....هو يزيد عمر يصعر و دارت كلثوم تجري عند الحاج تخرجو قبل ما يسوء الامر 
في الخيمة ديال جيلالي ....هاد السيد لي ولا غير جالس في القنات و يحسب في الفلوس و يتنهد و يقول حليمة لي عندي ....خواتاتها شدو الركنة عقدو السبنية و عقدو الغوباشة تحلفي عدهم جنازة و مقابلين مع حليمة شادا فيها حكمية 
حكيمة شادة في يدها : ههه و محسابليش سعدك هاكا زييين و غيجي زواجك من حفيد الشيخ سيدي عماار ...حليمة تشوف فيها و الضحكة شداها من الودن تال لودن و تطلع نفس و تنزلها واخا تفكر فردة سي عمار و تقول يمكن فهمت غالاط و هاهما ناسها باغينها 
حكيمة تجبد فيها عينيها و بدات في مثالها : سمعي اش كنقول و ديريه حلقة في ودنك رجليك برجلين عكوزتك سمعي هدرتها حني راس و متقوليش لا و لي قالوها ليك ديريها (حليمة غير تحرك في راسها قدامها ) سديك الحاج بوسي ليه يديه و غسلي ليه رجليه اما راجلك هاداك مومو عينيك الهدرة لي تقال في البيت و لا دار في البيت ماتخرجش تما تبقا طيعيه و سمعي هدرتو يجي حيدي ليه سباطو يضربك و مايخلي لي يضربك متخليهش يبات و لا ينعس مقلق منك يغضب عليك ربي 
حليمة حااالة معاها ودنيها و تحرك راسها بلا : لاا اميي كوني هانية 
حكيمة تجبد في عينيها : يعني هو الراجل و يدير فيك ما بغا طيبي ليه و صبني ليه حوايجو و متخليهش يتشكا و لا يشوف في برا 
فضيلة دورات راسها : واش من نيتها ميي واش مشافتش داك زين مبغاهاش 
عويشة غير تبرقق في عينيها : اويلي نندب على زين خارج من المسلسااال و تدييه حليمة 
فتيحة : لبنااات صافي عارفين هاد الهدرة كتطيحنيي و دابا مغتفيقني بصلة ما غيفيقوني سوارت 
عويشة : وا الله الله على زهر لمن كيمشي كنتفكر غير القصر و الامير لي كان فيه كتجيني الموت

أصبحنا و أصبح الملك لله ... في قصر شيخ القبايل ...نازل عمر من الفوق و غير كيتنفخ و كيتفش محامل حد محامل يشوف في حد يفكر في مستقبالو في كفة و في المهرج لي غادي يجوجوه بيها في كفة ...حط رجلو في لرض كيتمشى مبودر قنص الحاج و كلثوم كيفطرو 
كلثوم طلعت راسها و جبدات عينيها : ولدي اجي تفطر 
عمر دور راسو و لاح هضرتهم بيدو معصب : مباغيش ....و تمشا غادي خارح فحالو 
الحاج يطل عليه : لهلا يوكلو ليك نتا كابر بفلوسيي و تهز عليااا في يدددك
كلثوم دارت عندو : خليه عليك ا الحاج 
الحاج دار عندها : نوضي شوفي لدرية اش بغات و داكشي لي خاصها راه غيدوز الوقت و يخلط علينا العرس 
كلثوم : واخا صافي ا الحاج اليوم نمشي لعدهم و نهبطها معايا للمدينة 
في الواد ديال الدوار ...جالسات دريات يصبنو و على زهرهم يتحصرو و يردو القلبهم 
البنت 1 تفرك على قلبها : هاكي يا سميرة زيديك ا سميرة ضلي غير طلي راسك بالغاسول فلخر تزوجت الخايبة بسيد رجالة 
البنت 2 : انا راه ندبت حناكيي حيت شتووو و قلبي تشتت و في لخر كان للخايبة مولات الشحمة 
البنت 3 : هاعار ربي مسكتونا راه قلبي طايب 
البنت 4 :لا لااا هادي دقة السحوور مافيهاش شوفو الفقيه لي دار ليها القبول شكوناهو 
البنت 1 : السحارة لي ولدتها كان عند بالي دريوشة و متدويش و متخرجش لعيب ساعة هي لفعة في سيفت بنادم كانت تسنا الوجيبة و تلوح سحورها 
في خيمة الجيلالي ....كين غير حكيمة تالفة ماعرفة ما دير ولا شنو توجد و عرس بنتها بحفيد الشيخ قرب ...حليمة غير تغسل في الميعنات و تفكر اما خواتاتها فكل وحدة و شقاها كين لي تضرب الجفاف و لي تنصب لغدا و لي تنفض السدادر ....حتى سمعو صوت الطونبيل وقف عند باب خيمتهم ...كلشي حط شنو في يديه و حكيمة خرجات بحيشها بريشها برا الخيمة و تغوت و تفرنس : مرحبااا مرحبااا بلالة كلثووم 
فضيلة دارت عند عويشة : عنداك تكون جايا تفسخ الخطبة هههه 
عويشة : وعلى الله ...حليمة سمعتهم اش قالو و قلبها ضرها دارت عندهم و هي جامعة حجبانها و الهدرة ثقييلة في لسانها : حرااام عليكم تدعييو عليا 
فتيحة شافت فيها : غير عار ربي واش ماشفتيهش كيف مكملش فيك الشوفة و ناض مشا فحالو
حليمة ولا تناخد و شداتها البكية : علاش تتقولي ليا هوكا 
عويشة تهيا ناضت : و لحقيقة تقااال واش مشافو فيك تا شياطة ديال دوار عاد هاداك علامن كتكدبي ا حليمة راه حنا خواتاتك و باغين ليك غير الخاير ياك ا فضيلة 
فضيلة : ااه ياختي و فحال والو تكون لالة كلثوم جايا باش تقول صافي مبغاوكش تعودي تنتاحري ....هي تشوف فيهم و طلع النفس و تنزلها و عينيها بداو يدمعو حتى دخلت حكيمة فرحانة تفرنس و داخلة من وراها كلثوم دايرا نضاضر كحلين و تبسيمة في الفم كتمشى بالنخوة 
حكيمة : مرحبا بلالة كلثوم 
كلثوم تبسم : لهلا يخطيك حليمة لباس 
حليمة جمعت دموعها عندها و هي كتشوف فيها و حركات راسها و شاداها الخلعة ومشات دغيا شدت ليها يديها بغات تبوسها وهي تخطفها منها كلثوم ...
كلثوم :استغفر الله ابنيتي (و خواتاتها دايرين فحال لفاع يضحكو و يتبسمو ليها وكلثوم حطات يديها على كتاف حليمة لي غير مهبطة راسها وخايفة )مهم جيت نديك معايا للمدينة سيري لبسي حوايجك عندنا شلا حوايج ميدار ....حليمة دغيا طلعات فيها راسها وبدات لفرحة تبان عليها وكتحاول تخبي تبسيمة ديالها وحركات ليها راسها دغيا مسكينة ...

الضحكة غبرت على وجوه خواتاتها مرضاوش تاخد سيد الرجالة ...حكيمة فرحانة و دخلت مع كلثوم ترحب بيها و عينيها مطرطقين في حليمة باش تمشي تلبس جلابتها...مشات حليمة دارت لبيتها دغيا و تبعوها خواتاتها كيف ظلها غير دخلت 
حليمة بشوية تدوي و تشوف فيهم : شفتوو مجاتش تفسخ الخطوبة هما باغيينيي 
عويشة كمشت وجهها : الله يرحم بيها الوليدين ما سكتي ....و دازو من قدامها باش يلبسو جلالبهم و حليمة عدات غير بجلابيت مها كتجيها مزايرة و لحمها كيبان مدردر غليض ... عاد خرجو عند حكيمة و لالة كلثوم جالسين في الصالة 
كلثوم ناضت و هي تشوف في حليمة كتبان الجلابة ماشي ديالها : حليمة اجي لهنا ...حليمة طلعت فيها عينيها و تبسمت ليها تبسيمة زينة و كتقرب منها ....حكمية واقفة و فرحانة تهيا لابسة جلابيتها 
كلثوم تبسم تحت النضاضر و شدات يد حليمة و خشاتها في دراعها : نتي من ليوم غتبقاي حدايا دراعك في دراعي يلاه زيدي معايا ...حليمة حدرت راسها فرحانة و شدات منها و بداو يتمشاو على برا...و حكيمة تهيا تفرنس و تابعاهم ...و دوك ثلاتة الدريات تبعينهم و تفركيعة لي متفركعوش ....مشاو يركبو في الطموبيلات ديال الحاج باش يهبطو للجديدة يدهزو للالة حليمة 
في الطريق السيار لي لوجهة ديال الرباط ...كتمشى طموبيل صداع الموطور ديالها كيزعزع لرض و شكل ديالها خطير غادية موركة في الطريق ....كان كيسوق فيها سي عمر بلباس ديالو الانيق و تصريحة ديالو شعرو الخاص نضاضر في عينو كيشوف قدامو غير البرد و السماعة في الادن ديالو كيدوي و كيورك على الهدرة و غير الجلسة ديالو تدوي ليكم على الهيبة : راه خرج ليا وحد البلان ديال النم .... انا طالع لعندكم لرباط... متفكرنيش في الزمر الله يرحم باااك خلينييي سايق كنتفكر كنبغي نقلب مو هاد الزبل ...اش غنتهدن ...مهيم شي ربع ساعة نكون عندكم سير تهلا 
في الطريق للجديدة غاديين جوج طموبيلات مرسيديس كحلة ....القدامية راكبة فيها لالة كلثوم و مجلسة حداها حليمة و حكيمة تهيا جالسة حدا بنتها لعروسة و ساق بيهم مسعود تهو جدع من الخدامة ديال الحاج فحالو فحال التهامي و طموبيل لورانية جالسات فيه خوتات حليمة و مطرطقين عينيهم في الشراجم يشوفو و يتنهدو 
كلثوم مجبدة عينيها و كتدوي مع حليمة و النظاظر فوق راسها : دابا قولي ليا شنو خاصك باش نشري ليك اش باغا خاطرك ...حليمة طلعت فيها راسها تشوف فيهاو دورت عينيها عند مها اش غتحلم هاد الدريرية و هي عمر رجليها عتبت دوارهم يلاه زارت سوق الخميس مرة في حياتها 
حكيمة نقزت للهضرة : لي بغيتو ا لالة كلثون حنا مكنتشرطوش غير كسيوها صافي و هاهيا عندكم 
كلثوم جبدت حجبانها : لا لالة حكيمة خاصك تعرفي المقام ديال الحاج و حليمة غتولي كنة شيخ القبايل و خاصها تعرف مقامها و تلبس لي يوتيها و لي تسر بيه عين راجلها ...حليمة الفرحة ديالها غادا و كتكبر و كتنهد و تبسم 
حكيمة تهيا وسعت تبسيمتها : عارفاكم نتوما مالين الدار لكبيرة و حنا ماشي من مقامكم منعرفوش لهادشي 
كلثوم : ماقلتي عيب الالة حكيمة حنا لي غادي نتكلفو بكلشي انشاء الله 
حكيمة : لهلا يخطيك الالة كلثوم ...و بغات تبوس ليها يديها غير كلثوم هربت يدها 
حليمة طلعت فيها غير عينها ضامة يديها : الله يخلف عليك ا لالة ....كتبان فيهم ناس دراوش 
كلثوم حركات راسها لحليمة و هي شادة ليها من يدها : بنتي حليمة خاصك تقولي ليا مي كلثوم و هادا غير دهازك و كمالت صداقك خاصك تولي تعرفي اشنهو مقامك و معامن غتجلسي و نتي غتولي مرت من ....درية غير تشوف فيها و الفرحة تبري من عينيها و طلع نفسها و تنزلها و تحلم باشنو جايها الحاصول حليمة زهرها طايحها في ناس ملاح لي تمنى كل درية سوى بنت المدينة سوى بنت العروبية تكون بلاصتها

بعد دقايق قلال ....دخلو لمدينة الجديدة (خلاوها ماليها يا الغاديي لجديدة ديني معاااك ههه ) غير دخلة تشهيك في السياحة داخلين ودايزين على طريق ديال البحر و الطموبيلات يتمشاو حداهم ....فضيلة و فتيحة و عويشة غير حالين فامهم في الشراجم و الفرحة شاعلة في قلبهم و اخيرا جاو للمدينة ....اما حليمة و مها على داك الباب مخرجين عينيهم يشوفو في المدينة فحالا هبطو لعالم اخر كلثوم حاطة يد على يد و كتشوف عادي ... شي نص ساعة تقريبا وصلو لوحد المول كبيبر كولو بالجاج ... ووقفو قدامو نزلو بشوية عليهم مخرجات عينيهم عمرهم شافو هادشي ...نزل معاهم مسعود قلدة يحميهم هما غير وليات في المدينة رجلو برجليهم و لا كانت شي حاجة يهزوها هوا ...كلثوم شدات في دراع مرت ولدها باش تولف عليها ...و حليمة غير حالة عينيها و فمها في هاد الضواو (شتانااا بينها و بين هادا لي غيكون راجلها) حكيمة تشوف فرحانة و تمشا و بناتها للور باز لعناقهم ليما تقطعو قدما هما مطلعين ريوسهم يشوفو نزلو راسهم و شافو دريات لابسين المزير هما يتقرصو بداو يقادو في جلالبهم ...اما حتى حليمة كانت ملاهياها كلثوم بالهضرة مشاو لسانسور طلعو فيه مزاحمين مع عرض حليمة تسد الباب عليهم و مسعود مشا للدروج باش يتبعهم 
عويشة دفعت حليمة و تهضر بشوية : حليمة كحزيي لهيه 
حليمة بشوية تدوي : هادا هو حدي ...حكيمة من ورا كلثوم تهبط في حنكها قدامهم باش يسكتو غادي يشوهوها قدام كلثوم ...تحرك سانسور بيهم كانو غادي يتغاوتو كاملين غير شدو فامهم قدام كلثوم ...و لصقو في بعضياتهم مشانقين حتى طلعو للفوق خرجو كيتمشاو دوزاتهم لالة كلثوم عند وحد مول دهيبي عندو محل كبير و معروف عندو الخدامة بزاف و لالة كلثوم كليانة عندو ....دخلت عندو كيرحب بيها و وقفو عندو و تصافو قدامو ... جبد ليهم سرتلات ديال الدهب و لي غورميط و دبالج و الخلاخل و الزواهك ...كلشي مخرج عينو في هاد الخير حتى من حكيمة 
كلثوم تخير و تقلب في الدهب و تدوي : هادو ا حليمة لي غادي نختارهم انا وياك غادي تبقاي لابساهم و شي لاخر غادي يجيك في الدهاز ديالك 
حليمة دارت كتشوف فيها و مخرجة عينيها : ءءء؟!....درية تدهشرت 
حكيمة نقزت فرحانة لبنتها : ايه ايه صافي ا لالة ....دريات غير يطالو و مطرطقين عينيهم في الدهب و في حليمة مبقاوش يهدرو و لاو غير يشوفو ....بدات كلثوم تختار و توري لحليمة لي غير كتشوف ماموالفاش بهادشي ولا للناس تعطيها و حكيمة لي تخير في بلاستها ...و مول المحل بنفسو يجبد ليهم و يحط حتى عمرات ليها يدها ليمنية بدبالج ديال الدهب و ليسرية براسلي عريض و عامر و مدهب كولو دارت ليها سنسلة في عنقها ...حليمة تبسمت و هي كتشوف في دهب لي عمرت بيه و حكيمة تقرا عليها القرآن و خواتاتها رجعو يتفرجو فيها و يتنهدو لحق يتقال مكرهوش يكونو في بلاصتها ...كلثوم عطات حتى سرتلة لأم ديال لعروسة حيت من العادة ديالهم قبلتها منها لالة حكيمة فرحانة و جمعات الدهب لاخر في صندوق كبير باش تديه معاها ... خرجو من تما ضاربين السكاتة حدك كلثوم لي تدوي و تهضر بلي نكافة و كلشي

عليها فاش غيوصل وقت الحنة خاصهم يجبوها للعندها للقصر تما غادي يدار كلشي و مكين لي يعارض ...اما فرحت بطالتنا متوسعها دنيا و مرة مرة تشوف في يديها لي زيانو بالدبالج ديال الدهب ....دخلو للمحل ديال الثواب تاني ...و كلثوم طلبات من كلشي يتخير حتى من خواتاتها فرحو هما و طارو تهما يختارو عيات حكيمة تقرص و تخرج في عينيها وتقولي حشمو كياخدو و يقيسو و كلثوم جابدة عندها العروسة اشمنك يا مليفة اشمنك يا جوهارة ..ها سريات ديال العراسات و التفاصل و القفاطن ...نكلو حتى نكلو لي عجبهم و عطاو لمسعود يهز و تمشاو تانيي دخلو للمحل ديال وحد الخياطة محل كبير و فيه غير داكشي العصري و الهاي و كولو فيترينات ...ناضت مولات المحال ترحب و تهلل بلالة كلثوم .. جلساتهم في فوطوي حمر جالسين و فرحانين ...كلثوم هضرت مع الخياطة بغات حاجة زينة للعروستها ... الخياطة تبسمت و ناضت طالبة للعبار للحليمة ... و خواتاتها متكملش ليهم لفرحة غير فاش كيشوفو فيها ....دورات الخياطة عليها الميترو لقاتو قدها و حليمة حشمانة تشوف في الخياطة و تحني راسها درية غليضة بزاف ....ماعلينا خدات ليها العبارة و جبدت ليها الكطالوك تخير ... حليمة دارت تشوف في مها لي تساخرت للور متعرفش في هادشي و بقات راس في راس مع كلثوم ....خواتاتها حلفو بليمين ما يمشيو يشوفو معاهم باركا غير السم لي قلاتو ليهم في هاد الخرجة ....تخيرت مع عكوزتها و جلسو تاني 
الخياطة : صافي كوني هانية ا مدام كلشي غادي يكون واجد ليك في الوقت 
كلثوم بالنخوة مجلسة حداها حليمة : شوفي عافاك بغيتك ديري ليا دموند بنفس العرض على مضمة تكون عريضة و ثقيييلة بالدهب نتي كتعرفي مزيان شكون كنة الحاج 
الخياطة : الله يا ودي شكون ميعرفش الحاج شيخ قبايل دكالة كوني هانية الالة 
عويشة وصلت بيها العضم : دريات انا تخنقت مبقيتش قادة نشوف هادشي كولو انا غنوض فحالاتي 
فضيلة : ستنايني نخرج معاك 
فتيحة : منين راني باقا حية غير خرجو عليا صداقة ....ناضو وقفة حكيمة كانت تشوف في حليمة و دورات راسها للخانزات لي خارجات بلا حشمة بلا حيا بغات تنوض تغوت و تعض في سلكوطات و لكن حشومة قدام المرا ...
حليمة تشوف و ضحك و تحشم سعدها هادا ولات دور في المدينة و بطموبيل و تشري الدهب و تواب ...ناضو من تما يمشيو لشي محلات ديال السبابط و يشدو الطريق يرجعو للدوار 
في الرباط و ما ادراك الرباط العاصمة الادارية ديل المغرب ...في احد لي بواط بهاد المدينة ...الطموبيلات غير الهاي كلاس على برا واقفين و مصافين

في الداخل ديال لبواط ....كانو ولاد الاغنياء و المراهقين كيشطحو تحت انغام الديجيي ...و الكيسان ديال الخمر و السجائر كلشي شادهم ...في وحد الدورة ديال لي فوطوي بالكحل وسطها طابلة محطوطين فيه القراعي ديال الخمر الغاليين و الكيسان كبار ... و ديرين بها شي ربعة ديال الشباب باين عليهم الفلوس و جوج بنات حتى هما لابسين المزير و الميني بوط و الشعر و متيتزين ...هادو عشران عمر من كان كيقرا في باريس الهندسة الفلاحية ....جالس هاد الاخير مفطح و شاد كاس بيدو و باينا طالعة ليه القردة كيشرب كاس من ورا كاس بان ليا موحالش يرجع للقصر هاد ليلة ...غير عاقد دوك الحجبان عندو ميشوف في حد ميهضر حد ...و هي تلاح عليه وحدة من صديقاتو حاطة تهيا العين عليه و تضحك
رانيا : عمر مالك ؟... و حطات يديها على العضلة ديال دراعو....عمر معصب كيزير على سنانو و على الكاس في يدو و هو كيتفكر غير في الموضوع ديال حياتو ... صحابو كيشوفو فيه و معارفين مالو ...بغا يشرب الكاس لقاه خوى و عينو شبعو شراب رجع راسو للور و غمض عينو و في يدو الكاس ...رانيا كتشوف فيه و هازا ليه الهم زعمة دوزت يديها على العضلة ديالو 
في الدوار في الخيمة ديال جيلالي ...جالسة عروستنا في بيتها لايحة رجليها و تحسب في دبالجها و تشوف في البراسلي في يدها و فرحانة تحلم براسها تجوج و طلع فوق العمارية ...شوية حتى دخلو خواتاتها و دايرين تبسيمة على فمهم طلعت فيهم راسها و جمعت رجليها عندها تشوف فيهم و جاو تربعو جلسو دايرين بيها وحدة شدات يدها ليمن تحسب ليها الدبالج و وحدة دور ليها في البراسيلي و تشوف فيه ...و لخرى جلست قدامها 
حليمة : مالكم ؟ 
فضيلة تبسم و تبلحس : هادشي زيين عدك اختي 
عويشة تشوف في دبالج : انا ختك الصغيرة عطيني واحد 
فتيحة : تانا عطيني واحد شفتي لالة كلثوم شرات ليك بزااف واحد مغينقص مغيزيد 
فضيلة : تانايا واخا مغيجيش قدنا مي غير نتزينو بيه 
حليمة بدات تجبد في عينيها و تبسم : راااه مي قالت ليا متحيدييهمش اما انا نعطيكم واحد اجو معايا نسولها لكان نعطيكم واحد واحد ....ناضو جمعو الوقفة بربعة و ناضو يتمشاو فرحانات دازو عند حكيمة للكوزينة كانت محزمة بطابلية وواقفة 
حليمة دخلت عندها تلوح في رجليها : مي ميي نعطيهم واحد 
حكيمة دارت عندها : واحد ديالاش ؟... حليمة وراتها يدها و تشوف في مها : من دبالج 
حكيمة نزلت على يدها بضربة : واش تي مسطية (حليمة جمعت يدها عندها و تشوف فيها ) واش الناس غادي نعطيوهم مسطية سيري جمعي دبالجك عدك و يارباعة الشيخات سيرو تريحو بعدووو من ختكم 
في القصر ديال الحاج ....الحاج جالس في الفوطوي و شاد العكاز ديالو و في جنبو مرت ولدو كلثوم لابسة كاندورة زينة 
الحاج : شفت داك مجاش 
كلثوم دارت يدها على خدها : ماشي اول مرة يبات برا 
الحاج : واااخصو يدخل دابا راه قريب يولي عريس و راني حطيتو روشيرش في المطار منوع يعتب برا البلاد 
كلثوم تشوف فيه : عمر ميخرجش من هنايا 
الحاج : كي داز داكشي في المدينة 
كلثوم : مزيان الحمدالله حتى عروستنا كانت راضية و فرحانة 
الحاج تبسم نص تبسيمة : داكشي لي باغين نيت 
〰️〰️〰️〰️ دازت سيمانة 〰️〰️〰️〰️ 
الدنيا مقلوبة سفاها على علاها الدواور كلشي عرف بلي كنة الحاج هي حليمة بنت السبيطي ...الخزاين و الخيام تنصبو في وحد التيرة عريضة ....كل خيمة تشد في عرضها دوار ....الحوالة و البكر الدبحو اما دجاج فما عندو عداد ....الطناجر فوق العواد واقفيين و الطيابات غير ينصبو و الخدامات يقطعو في البصال و يلوحو .... سيدي عمر مرة في القصر مرة في رباط حيت لبقا تما غيطرطق خاصة فاش كيتفكر زينة السمية حليمة ... اما خيمة الجيلالي فمن نهار حط الحاج فيها رجلو مبقاتش تخوى من الخير جيلالي ولا غادي جاي مع الحاج يبوس ليه في يدو ...و دريات يصبنو و يقادو الحلوة على لالهم حليمة لي منعتها مها تحط صبعها في الشقا ....بنات الدوار غير يندبو و يهللو و يلغطو كين لي وصل بيها الحسد تدعيي عليها باش ربي مايكملش ليها ...دار الشيطان حتى عند خواتتها و فيما يشوفوها ناعسة كتبري بالدهب يتخيلو في ريسهم يقجو فيها كينوضو يجمعو وقفتهم لا يعودو يديروها 
ياو اليوم نهار الحنة ديالها في القصر ديال الشيخ القبايل ....في الجردة يا لالة مفرشة و مجهزة و الجلسة في لرض جايبين لعابات ديال حريز ينشطو الجو و يشطحو لعيالات الحاصول تعرضو كاع عيالات دواور قد الفقيرة قد لي لباس عليها ....مجهزين جلسة خضرة زينة خاصة بالبرزة ديال العروسة ....طيافر خضرين ....فيهم الحناني وسطهم خميسة دهبية و فيهم الكوليات ديال الدهب و النقرة ....و الحليب في كويسات و الثمر ...و النقاشة حتى هي واجدة ...

بداو العيالات يجيو لابسين القفاطن ببريو و يتمشاو للقصر دشيخ القبايل لي عمرها شافتو جاتها الوجيبة اليوم منها تسرح عينيها منها تعرف فين غادي يولي مقام لالة حليمة بنت السبيطي ....لي حطات رجليها تما طلع عينيها للدواو و تنهد لا لي مزوجة لا لي مخطوبة لا مادة يديها الحنة ....يدخلو و يجلسو في المخيدات لي في لرض و بز منها تصفق و لعبات حريز مزال مسخن الحلق و الطعارج باش يبداو ضربتهم ....الممون و السربايا ديالو غير منتاشرين تما كيقادو في الناس ....خرجو بنات حكيمة الثلاتة فضيلة و عويشة و فتيحة لابسين من خير الحاج و من كصة ختهم كل وحدة ضاربا قفيطين شهوة منو أنيق مخيط بالطرز الرفيع ديرين البروشينغ ومكياج زوين...حتى من المكياج جا معاهم عاهو الزين بلا زهر بحال الخيمة بلا وتاد مشاو يتبسمو للناس ... دازو فحال الرعدة على بنات الدواور....لي كيعرفوهم راه شدين يديهم على خدهم ...و لي مكيعرفوهمش كيقولو منين هادو خواتاتها العالم الله بزين العروسة ....مرة كبيرة قربت من لي حداها : تي شفت كاع بنات حكيمة خرجو شكون فيهم العروسة 
المرة الثانية : صباح الخير الالة طامو شيخ القبايل ختار حليمة الغليضة الخويبة للحفيدو 
طامو : تيي شكونهيا 
المرة : هانتي غتشوفييها ....جلسو دريات دايرين بجلسة ديال الحنا عاد خرجات حكيمة فرحانة و ترحب بهاد قوم سيدنا محمد ....بداو لعابات كيحركو يديهم و يطلقو حلاقيهم 
الحاج واقف على برا و واقف حداه الجيلالي ....الحاج غير مخرج عينو سيدي عمر مابينش من الصباح خافو غير لما يجيش حاط التليفون على ودنو و يمشي و يجي و يتحلف ... الجيلالي خايف تمشي ليه النسوبية مكرهش يعاود يأكد على الحاج وحدة من الدريات و لكن خايف الحاج لا يتعصب و خايف لعريس لما يجيش.....فيي غرفة من الغرف ديال القصر ...كانت فيها النكافة و الميكاب ارتيست و واقفة معاهم حتى لالة كلثوم و هما كيلبسو في حليمة و هي فرحانة و قلبها يضرب بالخلعة و الضحكة على فمها هادي سبعيام ما غبرت عليها 
كلثوم طلعت الغوباشة و عينيها على رجلين حليمة من لتحت كلها زغب تحلفي عليها غير غابة ...و هما يلاه مشاو لحمام الصباح و كيزيدهم الفلوس باش يجهزو للدرية ويقادوها ولكن بان ليها البلان مع هاد الناس مغاديش يكمل خاصها دخل بنفسها ....بقاو يلبسو في حليمة و يقادو ليها بحلة العرايس و و الميكاب ارتيست تقاد ليها في شعرها و وجهها و هي شداها الخلعة صدرها يطلع و ينزل و غير تشوف في الصقف و جامعة يديها عندها 
دازت ربع ساعة ...و حفلة الحنا زهات و لعبات نشطو الجو و سيدي عمر باقي مجاش ...بداو الزغاريت و الحلاقي ديال النكافات لعلالي ....و جايين مخرجين لالة حليمة من القصر ....التكشيطة لي لابسها ملكية ... عصرية حتى من المكياج داروه ليها واتاها و الدهب مزين ليها عنقها و يديها و كتمشى بشوية و نكافات محوطين بيها ...و هي تبسم و دور في عينيها و باين فيها الخلعة و السخفة و تشوف في الناس يشوفو فيها و عينهم مخرجين و تدور في عينيها و تبان ليهم يتخابرو عليها ... اما بنات الدوار بردو يديهم عليهم لي سخفت سخفت و لي ندبت ندبت ...دابا غير جالسات و يشوفو و يتنهدو ...و شي لا خر يطالو عليها ...لالة كلثوم خارجة بقفطان جوهارة هاي من مورا النكافات و داوها لجلسة جلسو يبرزوها ...و جلسوها يقادو ليها كيف الملكة و النقاشة حدا رجليها و لعبات بداو يهللو بسميتها و يشطحو قدامها و يصيحو بلي لالة البنات دات ليهم سيد الرجال ....و سي عمار ميستاهل غير المضمة و زقلي و شعر مدليي ...حليمة فرحانة منزلة راسها و عاطية يدها للنقاشة تحني ليها ....العيالات طرطقو عينيهم حتى عياو فيها و سربايا يدورو يفرقو العواصر

حكيمة واقفة تصفق فرحانة ...و فضيلة و فتيحة و عويشة ...جالسين حداها حتى هما يصفقو فوق النفس و تبسيمة صفرة و يصفقو ..و لعبات معياوش يشطحو لبنيتات جلسو تعياو يتنهدو شوية ناضو يزررو في لعبات و يشطحو ...نقاشة سلات يدين حليمة و دازت رجليها و حليمة فرحانة تشوف في ميمتها لي ترش عليها بصباعها أما عريس الغفلة مزال مبقا يبان...كلثوم تصفق و عينيها على الباب لي ملهيه ديال الجردة ....الحاج على داك الباب داير يدو من ورا ظهرو و يمشي و يجي بديك جلابة عندو و حاضي طرييق 
الحاج : ولد الحرام لباباه سلكووط لاخر عليا بلي يمين و ميجيش تا نشطب عليه الموغريب كولو و يعتب برا ولا يحط رجلوو في المطااار يتشد يتشد لباباه يتشد لوالدييه غادي يخرج عليااا ....جيلالي غير حاضيه و مخلوع لا سيد ميجيش و يمشي ليه لبلان في زيرو ...التهامي و مسعود يجيو عند الحاج يجريو يقولوليه بلي مكينش ليه لاثار ...المعروضين جالسات يصفقو شوية نوضوهم للطوابل لي مقادين بالكراسة و مصيبين باش يتفيجطو هالحومات ها البساطل ها الدجاج...و الكميرا و المصورين يصورو ... حتى كملو لحليمة النقش و هي تبسم و دور عينيها في لالة كلثوم و تحولها في مها ... هو العادات و تقاليد لي معروفة كتقول بلي خاص العريس يدخل و يتبرز حداها و هادشي في بالها نزلت مسكينة عويناتها للرض و تحاول تخلي فرحتها تابتة ... و دوزها هاد ليلة كيفما خاصها دوز عند كل عروسة واخا بلا عريس ....تعشاو الضياف و رجعو لبلايصهم و هي قدامهم بحنانيها بارزة و بداو يدورو في الهضرة بيناتهم و يسولو على العريس فين هو و بدا يكثر اللغا عليها ... خواتاتها غير مريحات جالسات حداها و ثمرة لي كلات منها ختهم ياكلو منها فوق النفس سيد رجال لي يتحلم بيه راه داتو ليهم ...كلثوم هزات التليفون ديالها كتعيط لعمر لي مكيجاوبش و تعض في قنوفتها ... حتى دازت ديك لولية على خاطرها و سي عمر مابانش ليه الاثار ...بقات غير حليمة كارمة في يدها الحنة و تشوف في جنابها ناضو العيالات يسلمو عليها و يبيضو ليها بربعمة بالخمسين درهم هادا جهدهم ...و العزبات ينزلو يلصقو حنكهم بحنكها و يقرصو فيها منها ضربة على الفقصة ديالهم منها تفايل على راسها بزهر كيف زهرها...و هي تقفز في بلاصتها و غير تشوف فيهم كيف لولة كيف ثانية ديرها ...حتى سالات ليلة الحنة على خاطرها ...و كلثوم بخداماتها تكلفو يدخلو العروسة لبيتها و مشات معاها حتى مها حكيمة ...اما حتى خواتاتها مزال شادين الجمعية برا ....عطاوهم بيت زين من البيوتة ديال القصر مأتث و مصايب تحلفي عليه بيت الملوك ....جلست فيه حليمة و الخدامة نازلين عند يديها و رجليها و يكرطو ليها في الحنة و هي جالسة فوق الناموسية 
حليمة حشمانة : حشاكم البنات ...تبسمو ليها تبسيمة صفرة 
حكيمة جلسات حداها و جمعت جلايلها و هي كتشوف في البنات : غير سيرو من هنا انا غنعرف نحيد لحنة لبنيتي يلاه ...معاودوش الهدرة ناضو حانيات راسهم يتمشاو و خرجو مع الباب 
حليمة طل عليهم و خدودها غالبينها : مي علاش جريتي عليهم 
حكيمة : مكنتسفايلش بدريات يقيسو حنة العروسة جمعي يديك و حوايجك لا يعودو يديرو ليك شي حاجة 
حليمة طلعت حجبانها بشوية : مي نسولك ؟ علاش مجاش سيدي عماار ياك فاش كتكون حنة العروسة كيكون حتى لعريس 
حكيمة خرجت فيها عينيها : شوفي ااه متكحليش لينا وجهنا مع الناس باقي مدرتي في طاجين ميتحرق بديتي بسوالاتك راه حفيد شيخ القبايل هاداك تبداي تقولي ليه فين غادي و فين جاي عمرك شفتيني انا قلت لباك فين ماشي 
حليمة حركت ليها راسها بلا : لا لاا اميي انا مكنتش نسولو غنسولك غير نتيي 
حكيمة : دابا جلسي لرض و لي عطاوها ليك قولي مرحبا ....بدات مسكينة تحرك ليه غير راسها بآااه 
أما وحد الحاج في وسط القصر واقف محيح بعكازو و كلثوم تهدن فييه : انا غنديير لباباه روشرشي في الموغرييب كلووو فيما لقاو يشدو بوووه يا و عليااا بليمييين مندوزهااا ليه و حليمة هي لي غتكون مرتو 
كلثوم شادا منوو : رجووع الله الحاج انا غنحاول نتاصل بيه الحاج تهدن تعالا ترتاح 
الحاج يحيح : راه سيفطت لييه تهاميي و مسعود و عبقادر و سليمان و سباعي بو سبعة البطاين ليوما يجيبوووو بووووه 
حكيمة : تهدن اسي الحاج راه دابا يرجع نتا عارفو ميهربش غيجي غيجي ماعيجيش ماغيجيش 
الحاج طالع فوق راسها و داك العكاز شحال خفيف في يدو : تيي هاداااك ديييب ديييييب وانااا لي نعرفووو غاديي يقتلنييي غادييي يقتلنييييي

و صباح الصباح على الدوار ...و على قصر سيد الشيخ ...في البيت ديال العروسة ....صابحة حليمة حنتها حمرا باش تعرفو القلب ديالها حنين لابسة جبادور بالبيض مخيط بدهبي وواافييي على قدها و الدبالج يتخرشو في يديها و شعرها مسبسب على ضهرها ...الكحل في عينيها ...و جالسين معاها خواتتها اما حتى مها مكيناش 
فضيلة كتشوف في حليمة : شفت لبارح مجاش سيدي عمار لليلة الحنا 
فتيحة تجبد في عينيها : صراحة كووولشييي بقا كيهضر و يدويي و يسول 
حليمة جمعت حجبانها : معرفتش يمكن مشغوول 
عويشة ناضت كتمشى : انا بعدا رااااجلي بغيتو يكون حدايا في البرزة و نتباهى بيه قدام دريات 
حليمة كتهضر بشوية : راه حفيد الحاج ماشي فحال الرجالة لخرين ... صراحة تقال واخا مقصدتش و لكن راه قصفات جبهتهم بثلاتة خلاتهم غير يشوفو فيها و يتبسمو تبسيمة صفرة 
فوتيحة : عندك الحق نييت سيدي عمار مفحالو حد ... تحل لباب عليهم و دخلت لالة كلثوم و لالة حكيمة 
كلثوم كتشوف في حليمة و تدوي : يلاه احليمة لبسي جلابيتك نمشيو 
حليمة ناضت وقفت دغيا تخرج فيها عينيها : واخا ا ميي كلثوم 
كلثوم : صربي باش يدركنا الوقت 
الحاج غير شاد واحد البورطابل حاطو في ودنو و يغوت على رجالو ملقاوش ليه عمر و هو يمشي و يجيي و محنيي فحال الدجاجة و جيلالي ماشاف نعاس مداقو حال عينو مع سي الحاج لا يطير الرزق من يدو ...و رجالو كي جدوعة واقفين ....الخزاين مزال غير يتبناو القبب ديالهم و يتفرشو بزرابيي ....و الحوالة تدبحو و تسلخو و غيبداو يتشواو ...الساحة ديال التبوريدة وجدت باش يفرجو بنادم في الخيل و تبوريدة ...و الفراقي ديال الشياخ و عبيدة الرمى و الدقيقية ...جاو على نبوري كيفما يأمر الحاج بغا كلشي مقاد و متول و حتى حد ما يتعطل و العريس زدق غايب 
الحاج وقف و دور راسو بانو ليها طنوبيلاتو مخرجين عروسة حفيدو مع مرت ولدو و دور وجهو ضاربة فيه الشمش للطموبيلات ديال البوليس لي جاو بأمرو ...ماشي هو لي يمشي للكومسارية هماا يجيو غندو ...نزل عندو وحدين سيفيل كيبان عليهم من ضباط البوليس هابطين تما في لرض ديال شيخ القبايل مهبطين كرايدهم قدامو 
البوليسي 1 : سلام اسي الحاج ...دار عندهم الحاج لقاهم جايين عندو مهبطين ريوسهم و وقفو قدامو 
الحاج بدا محيح : كتب تمااا روشيرش على داااك المسلكط لباباه فيما كان يجبدوه 
البوليسي 2 : واخا اسي الحاج ما يكون غير خاطرك وليني اينا مسلكط ؟ 
الحاج : و داااك المعفر لييي عدييي عمااار باغيي يهرب من عرسو بغيتووو ليلة يكون عندييي 
البوليسي 1 : كون هانيي اسي الحاج دابا نكتبو محضر 
أما لالة كلثوم فراكبة في طنوبيل ديالها مع حليمة و مع حكيمة و ثلاتة خلاوهم في القصر ميبقاوش غاديين بيهم خيطي بيطي فحال ضلهم ....متاجهين للحمام تركي على حساب لالة كلثوم لي في مدينة الجديدة ... شي سويعة فحال هاكاك وصلو لداك المنتجع ...كبير تبارك الله خرجو من طموبيلات و دخلو للتما ...حليمة متسول ماوالو غير تمشا و تشوف حالا فمها و يدها في دراع عكوزتها ...تمشات لالة كلثوم بالنخوة حتى وقفت عند الاستقبال و لالة حكيمة ضامة يديها و عاكسة راسها بزيف و واقفة مخرجة عينيها متفرق بنتها حتى يتكتب الكتاب و تولي ديالهم 
كلثوم : عافاك ابنتي بغيت ندير لاصيغ و الكريمات لهاد العروسة لي عندي 
البنت بابتسامة : مرحبا ا لالة تفضلي معايا ....خرجات البنت ديال الغيسيبسيون و تمشات معاهم دخلو في باب كبير رخام ديالو كحل 
البنت تبسمت : خليو معايا غير لعروسة و تفضلو للصالة 
كلثوم تبسمت ليها و دارت عند حليمة : سيري مع البنت احليمة ...حليمة خرجات فيها عينيها و دارت تشوف في مها و قلبها يضرب ماموالفاش بوحدها ...و حكيمة دير ليها بعينيها غير تمشي معاها

دارو ليها بعينيهم تمشي معاها ....شحال ترددت مسكينة تمشي بوحدها و ليني في الخر جرات رجليها مع البنت و هي كتشوف فيها و دامة يديها منقوشين و باين عليها الخوف داتها الغرفة فحال الطبية فيها جوج بنات لابسين طابليات و جميع ادوات لاصيغ و لي كريم تما 
البنت بابتسامة : لبنات هادي عروسة ...و هضرت معاهم بعينيها حتى هما حناو راسهم 
دارت عند حليمة لي كانت مطلعة عينيها للصقف : تفضلي ...حليمة قفزت و شافت فيها و طلعات عينيها شافت في لي غادي يقادو ليها ...حركات ليها راسها بايه و تقدمت عندهم و البنت خرجت من تما ...و وحدة بدات تقاد ليها الناموسية و لخرى كتهضر معاه : عفاك الالة ممكن تحيدي حوايجك 
حليمة خرجت فيها عينيها طلعت يدها شدات على صدرها : ه هاويلي لاا منقدش ؟ 
البنت جمعت حجبانها : ا لالة خاصك ضروري تحيدي حويجك باش نقدرو نديرو ليك لاصيغ 
حليمة ترجع بلور و تخنزر فيهم : لا اويلي البنات حشومة منقدش منقدش ....تقدمت عندها درية تشرح ليها و تقول هي لا بغات تحيدهم ...حتى خرجات وحدة منهم قالتها لغيسيبسيو و قالتها للالة كلثوم و حكيمة لي كانو جالسين و خداو ليهم عصير ...حكيمة ولات تنزل في حنكها و كلثوم قالت هي لي غادي تدخل ...مشات معاهم ...دخلات لقاتها واقفة كي جدعة شادة على حويجها بدوك العينين عندها تشوف في البنات 
كلثوم كتهدر بشوية و يد على يد : حليمة شنو كين ؟ حيدي حوايجك خلي لبنت دير ليك 
حليمة كتشوف فيها : مقدرتش امي كلثوم
كلثوم رفعت فيها حجبانها : حليمة ديري لي قالت ليك عليه لبنت يلاه ...حليمة مبغاتش تخسر لعكوزتها بدات تحيد في حوايجها قدامهم و منزلة راسها حشمانة حيدت جلابة و حيدت جبادور بشوية بقات غير بسليب و بودي فوقاني واسع و ياربي على طاي عندها بزاف على الغلض الزغب في رجلها كلها تحلفي لابسة سروال ...والله حتى من دوك بنات لي كيديرو لاصيغ تصدمو اما لالة كلثوم كانت تشوف فيها عادي ...طلعت و تسرحت فوق ناموسية و تشوف الفوق و بدات تحس بيديهم كيدهنو ليها لحمها و بشمع طلاوها هي نزلت عينيها تشوف فيهم واخا كرشها مدرقة عليها ...و بداو جبدة لولة تقول جبدو ليها عروق راسها و طلقاتها ليك بغوتة ...بغات تنوض تحلفت عليها كلثوم رجعت نعست ...و بداو دريات خدمتهم و هي تحلفي مرة حاملة و كتولد و تغوت حتى عينيها دمعت ..حتى سلاو ليها رجلين و مشاو ليها لمناطق الحساسة تحت يديها نضاوها و يهي مزكاهم بلغوات ...و بغاو يحيدو ليها حتى تحتها هنا استيقض الامام لي في داخل ديال حليمة و تقولي يقيسوها تما ولا يشوفوها ناضت شادة عليه عياو فيها لبنات و والو قربت منها كلثوم و فودنها خبرتها : ضروري عمر غاضي يحيد ليك حوايجك و غادي يبغي يشوفو يلقاه مزغب و طلقي ابنيتي الله يرضي عليك ...و تساخرت للور خلات درية كلها حمرة وخاشية راسها في عنقها و قلبها يضرب تقولي كتجري ...حتى طلقت ليهم و دورت وجهها لهيه وغمضت عينيها زيرت عليها باش يحيدو ليها النباتات لي معشة عندها واخا فضحتهم بغواتها...و كملو ليها لبلان بالكريمات و الحمامات ...و هي غير تشوف و تشم في الروايح ...كلثوم جلست متبسمة تشوف فيها و دايرا رجل على رجل ....اما حكيمة على برا جالسة و مغضة عليها حيت مسمعتش الهضرة كون دخلوها ليها تقرصها غادي تقاد معاهم 
لييل يا لييل و انا عمريي ليل و ليل ياليل احبيبي و انا مجاني رقاد .....ليل نزل و الضواو شعلوو و الخيام تقادو الكراسة فوطوي اسياديي ...و الثريات معلقين في الخزين ... شي ستة الوحدات فحال هاكاك كل خزانة يا خزانة على حساب ضياف الحاج لي عيط عليهم من كل دوار و من كل مدينة بعدا وحد الجيهة خاصة غير بصحاب الكومبليات و الناس هاي ...و خزانة هي لي فيها الكرسي بالمدهب الملكي ديال العروسة و العرييس هاكا عرييض و قدامو ممر عريض .....الخيالة بداو كيجريو و يضربو في البارود في السما و دقيقية منشطين الجو ....بداو الناس يجيو من كل الدواور كين غير لبسي تكشيطتك و قفطانك و سيري العرس قال قال حفيد شيخ القبايل تزوج بحليمة بنت السبيطي .....الحوالة هاكا كيتشواو قدام الناس و الطناجر عامرين دجاج كيطيب بالدغميرة ... العروسة لداخل كتجهزها النكافة و واقفة عليها مها و عكوزتها ....و ليني المصيبة حتى لدابا و باقي مبانش عريس الغفلة ...لا بوليس لقاوه لا رجال الحاج لقاوه ... غبر غبرة وحدة ...الحاج العرق لي بقا ليه غيتقطع و لا مجاش هادي هي الشوهة نييت للدرية ...

في القصر لداخل في وحد البيت ....مجلسين لالة حليمة قدام المرايا كيقادو ليها في الشدة ديال العروسة و في المكياج ديال العريسات الحاصول واخا غليوضة و حنيكاتها مطيبزييت طلع ليها السر في عرسها تضحك فرحانة واخا نويفها مقوس وليني طيبة قلبها تعكست في وجهها ناضت وقفت يقادو ليها في المدمة و يلبسوها الدهب و الثاج فوق راسها كيبري ...لابسة تكيشطة بيضة بالطرز العالي و النكافات ديرين بيها ينكفوها كيبان ليك الصدرها يطلع و ينزل و قلبها كيضرب كتسمى ليلة العمر لي كتحلم بيها اي درية سوى في الدوار سوى في المدينة ...تجهزت و جلسوها يتسناو في عريسها باش يدخلوها بارزة قدام العيون ديال الناس ....ماعلينا الخزاين عمرو و بالناس كثرو ...عيالات ورجال و الدراري الصغار واقفين يتفرجو في البارود و الخيل كيلعب و يشطح مع الدقيقية و عبدات الرما ....العزبات غير يميلو يديهم ناقشين و عينهم مكحلة و الهضرة و اللغا جيلالي باقي واقفة و يرحب بيهم و حكيمة تصفق و تميل ...خواتتها تزوقو و تجملو و في عيون لعديان طرطقو ...غير هما جاو و تصافو و جلسو مشطحو ما ضحكو كل وحدة فيهم تشوف كرسي دالعروسة و تنهد و تحسر عليه ....بداق الجوق خدام ...و كلشي يتلغى قال قال الستاتي غادي يحضر ليلة ... و الحلوة في سشيات الصغار بدات تفرق و في كل سشية كينة لويزة راه عرس حفيد الشيخ هادا مكيتعاودش ....أما على برا الدوار كينا سوق ربي للعالامين ها لبوليس بلبسة و بسيفيل ها جوندارم ها رجال الحاج الحيحة نايضة صافي على برا و لي لداخل ماسيقين الخبار 
كلثوم تمشي و تجي وسط القصر و كلها تبري بالمكياج و الزين ...غير هي خايفة لا ولدها ميجيش العرس ...و حليمة جالسة الفوق غبرت ليها الضحكة مسكينة و يديها متوثرة و كطلع عينيها و كتطلق ودنها مع النكافات لي واقفات و بداو يهضرو و يوشوشو : واقيلا لا لعريس هرب 
النكافة 2 : اناا بقات فيا العرووس كيبان فيها درويشة ....حليمة تسمع و نزلت راسها جامعة جامعة يديها عندها و غير دموعها لي عندها واخا شداتهم باش ميخسرش ليها المكياج ...و بدات تطلب في ربي في خاطرها باش على ربي يجي ....و طلعت عينيها للسما و مزيرة على اليد ديالها و كترعد
من بعد خمسة الدقايق ... تضرب الفار ديال الطموبيل في الجوقة ديال البوليس و المخزن لي على برا ...وطوموبيل جاية بشوية و الجوق و الاغاني مصدعين دنيا 
الحاج وقف و داير يدو من وراه : هاهوا جااا هاهوااا معرت فين كاان دايع ....وقفت الطموبيل حدا رجليهم و طلعو بيبانها للفوق للسما ...هو ينزل منها السي عمر قارن غوباشتو عينو حومر كيف الجمر شعرو فازك نازل على الجبهة ديالو و باين برد غدايدو في الشراب قبل مايجي للعرس ديالو و لكن راه مزال شد في راسو و جاي كيتمشى كيف السبع حول عينو للصداع بان ليه الرواج والبشار بزاف الحاج حالف حتى يشوهو هاد ليلة ....و رجع عينو للحاج لي واقف عليه فحال المرداا 
الحاج : ايوااا على السلااامة ا سيي عمااار شبعتييي دوران 
عمر مخنزر فيه مدور فيه غير عينو و الهدرة كتخرج مزيرة من فمو : الحاج بعد منييي 
الحاج : ولاااا اش غدير كاااع عاد ضربنيييي يلاه اسيديي ضربنييي (جبد فيه عينيه ) ايييه و جاي سكرااان والله لباباك و متدخل العرس دابا حتى يدوك الجدارمية نيت يحيدوك عليا من هن 
عمر حول فيه غير عينو حومر و مخنزر : اصلا حبس حبس .... و بدا يتمشى متجاوزو و الحاج دار عند الجدارمية : يااا سدنااا مرحباااا بيكم في عرس حفيدي دخلوو تفيجطووو و تنشطووو ....حتى هما جاهم على الكانة وهو دار دير يدو من ورا ضهرو و دخل يتمشى ورا حفيدو لي فقصو

كلثوم صافي وصلات بيها للعظم جمعت حجبانها مسكينة و قلبها ضرها على ولدها ...غير شافتو دخل مشات تجري عندوو و شدات من دراعو 
كلثووم : فين كنتي اولديي تخلعت عليك ...عمر داخل طالعة ليه مكيشوفش كاع في جيهتها 
الحاج داخل من وراه يغوت : هبطوو بنتيي حليمة رااه العرس واااقف سربيو ....بداو النكافااات بصلى و السلااام على قد جهدهم يغلبو البوق في الحلق و منزليين حليمة دايرين بيها و هي منزلة راسها تبسم حشمانة و فرحانة و قلبها كيضرب ....عمر دور غير راسو فيها و عينو كتشوف فيها و عاقد دوك الحجبان عندو ماحاملها ماقبلها و كلثوم تدوز يديها على دراعو و تهدن فيه ...و الحاج يشوف في حليمة و يتبسم ....حتى وقفوها قدام عمر كتبان قصيورة و حناكها غالبينها و حانية راسها و غليضة و قلبها كيضرب كتشوف غير سباطو مقاداش طلع فيه عينيها ...عمر غير عينو لي كيشوفو فيها و العضلات ديال وجهو كيتحركو بالعصاب ... كلثوم غير تحول عينيها بيناتهم : بنيتي اجيي شدي من راجلك ... حليمة تبسمت حشمانة و جابوها جنب ديالو هزات يديها يقفقفو و حطاتها على دراعو ...هو قلب وجهو عليها و زير على القبضة ديدو ....على عكسها هي لي قلبها كيضرب و بداو تانيي الزغارييت و الصلاة و السلام 
في الخزاين ...ناس جالسين معروضين يتفرجوو و تعطلو عليهم العريس و العروس حتى لوحد الدقيقة لي سكت فيها كلشي و ناصو دقيقية يلعبو بالطبالي و المزمار و الزغاريت ....كلشي ناض من بلايصو يشوفو و يخرجو في عينهم حتى دخلو عليهم ...هو الهيبة و الشان و تبوكيصة ولابس لباس سبورتيف و تخنزيرة مطلعها و هي كثلة لحم لابسة تكشيطة و شادة منو من الدراع ديالو و تشوف في الناس كتضحك و خايفة و طلع النفس و تنزلها و تحول في عينيها بين الناس .... ياو ناضو العزبات قد الصغارات قد الكبارات لي عاد جات عينيهم على الراجل لي دات ليهم ماقالو سيد الرجال حتى كان سيدهم كيتمشى مطلع خنافرو للسما ... بداو قلوبهم يتشركو و عينيهم يخرجو اما حتى خواتاتها بردوو ولاو غير جالسات و يشوفو و يدورو في عويناتهم....كثر لغا بين الدريات و رجليهم فشلو جلسو بلهلا يطريه ليهم يطلعو و ينزلو في حليمة و يبزقو في فمهم و عيون الحساد باركا تطرطق فيها مزرزرة كلها دهب و تبان كتبري... و بداو يتنهدو " الله يعطينا زهر الخايبة " "واللهيلا الله يعطينا زهر الخايبة " مكينش لي مقالتهاش فيهم وكل وحدة فيهم شدات الركنة و بداو يشوفو ... الدراري واقفين حتى هما و يهدرو و يضحكو 
الدري واحد : ههه وناااري و شتي و ها الفلوس و ها كلشي و خدا هادي 
الدري 2 : وا تزرف و تا تشوف طنوبيل عدو تقول هنا نبات 
الدري 3 : وتا هادا كي غيدير ليها ... حليمة شادة من عمر و تبسم هزت يديها ناقشين دارت باي باي لخواتاتها لي خسرو عليها ضحكة صفرة ...اما عمر كيدور غير عينو و كيشوف الدراري كيضحكو و هو مراضيش بيها حداه عينو حمرا دم كيدوزها على الناس ...عارف راسو مزرف واحد تزريفة بالعلالي كلشي عارف بيها ...جلس هو لول في داك الكرسي ديال البرزة و شبك يدو غادي يطرطق و حليمة جلسوها نكافات حداه شادا العرض ديال الجلسة 
حكيمة واقفة و مالت عند جيلالي : الله ياربي الله دري باينة مابغيهاش 
جيلالي داير يدو من وراه : و تي دوز معاه غير سيمانة لا ردوها نعطيوهم عويشة كون خداوهم بربعة كاع 
حكيمة : اويلي راه حرام الخواتات ضريرات 
جيلالي : نسيت الله يتبتنا على الشهادة ....كلثوم واقفة تصفق و وجهها مخطوف عينيها على عمر لي باين جالس على خزيت ...اما السيد الشيخ فواقف بعكازو يشطح في عرس حفيدو و فرحااان

عمر جالس نيت غير على الجمر كيدوز عينو على الناسو غير مزيد كيتعصب و يعصر في يدو و حليمة مزاحماه في الجلسة ...النكافات يقادو في العروسة و ميدوروش جيهتو و لا يدويو معاه ...و حليمة حداه كدور فيه غير القنت ديال عينها متدويه متهضرو غير تخطف فيه شوفة و تحضر عينيها غير الجلسة ديالو تعطيك خبارو جا المصور كي صور فيهم و الكميرا كدور عليهم حليمة تبسم للتصويرة و نفسها غتقطع بالفرحة على العكس ديالو هو كيخنزر في مول تصويرة باش يهبط الكميرا ... ماعلينا مدازش دقيقة صحيحة وهو غير مغوبش ناض وقف ...قلب حليمة وقف معاه و طلعات فيه عينيها مطرطقاهم فيه ...كلثوم حتى هي خرجت عينيها ...و العيالات غير يطالو و يهضرو على لباس ديل لعريس ماشي هوكا خاصو يكون لابس قالو يمكن هادو لباس ديل ناس هاي هوكا مختالف..و عويشة و فتيحة و فضيلة غير كيتنهدو ...عمر داز من قدام عينهم مغاديش يبقا في بلاصة غادي تعصبو ....الحاج كان يضحك فرحان حتى قشعو خارج و تابعاه كلثوم بشوية 
كلثوم : عمر ولديي شنو ماالك 
عمر غير خرج من الخيمة و هو ينفاجر : انااا مغادييش نبقااا في هاد الزمر جالس 
كلثوم : ولدي راه حشومة تخلي مرتك جالسة هوكاك 
حليمة جمعت ضحكتها و ولات تحول غير عينيها بين الناس لي بداو يهضرو عليها شافت في خواتاتها زعمة يعاونوها لقاتهم يقجمو و يضحكو بيناتهم حتى ميمتها و باها مبانوش ليها 
كان اسيدي جيلالي كيهوني برا الخيمة بلي مشات نسوبية الحاج 
الحاج هاز عكاز تابعهم : اتااااا فين غادييي اه رجع 
عمر وقف و دار عندو معصب و كيخرج الهضرة بين سنانو : الحاج قلب على مييي حسن ليييك 
كلثوم شدات من حنكها 
الحاج كيقرب ليه : لااااش باغييي ضربنيي يلاه ضربنيي ....عمر دور وجهو لهيه كيبخ الدم 
كلثوم تبرد السوق : تهدن الحاج عمر ولديي غير خرجها بعدا من تما و كتبو الكتاب و صافيي عيشك اوليدي على وجهي انا و ديك دريرية مدارت والو نخليوها تما بارزة وحدها 
الحاج : بز من مووو يرجع لباباه 
نرجعو عند حليمة لي نزلت عينيها لرض ماتشوف ماوالو غير تهرب من عينين النسا حتى دوات نكافة حداها : هاهو العريس رجع ...عاد طلعت حليمة عينيها مجبدين بان ليها وجهو مخلط فيه العروقة و محامل حد و تخنزيرة مسيفطها ليها نيشان ...هي تخلعت و نزلت عينيها للرض ...رجع جلس عاقدهم عليهم و طلع عينو في الحاج لي واقف ليه في الراس وموقف معاه رجالو كل قلدة يا قلدة الحاج ناوي ليه على خزيت ... و نكافات يطلو على عمر ... و كلثوم سيفطات تهامي يقول للجوق يزيد في الغنا 
عمر هدر بحدة مع دوك النكافات : و يلااه فينهو هاد العدوول و لا زمر ... قفزو كاملين حتى من حليمة كلها تزعزعت و بغات تكحز من حداه و غير عينيها لي كيطلعو فيه .....جاي العدول يجريي هاز كتابو و معاه الحاج يتمشى و حتى هو طيرا ليه مع حفيدو

جا العدول و جلس في وحد الطبلة دايرا مزوقة و حل الكلاسور ديالو تما ...نكافات نوضو حليمة بشوية عليها يقادو ليها باش تمشى و هو ناض زعفان كيفما هو و تحولو يجلسو قدام الطبلة ديال العدول باش يكتب ليهم العقد ديال الزواج ...حليمة غير حانية راسها باها لي حداها هو النايب عليها ...و عمر جالس ماهامو حد بغا ينهي هاد المهزلة و الحاج واقف عليه فحال المردة و الناس نايضين يشوفو و يشهدو على الكتب ديال الكتاب قدامهم ... يلاه غيبدا العدول يتفشش عليهم بالهدرة 
عمر عاقدهم و نبرة ديالة كينهض : سربيي فين نسنييي 
العدول شاف فيه شكون غيقدر يدوي معاه و طلع عينو في الحاج لي كان غير يتحربب عليه : عطييه يسنيييي ....حول ليه الكلاسور عمر متعطلش شد ستيلو و سنا ليه دغيا ... و حليمة معرفت واش تخلع و لا تفرح كتشوف غير بنص عين عمر كتبان فييه صعييب و كيتعصب دغيا حولو ليها الكلاسور و عطاوها تشد الستيلو واخا شدتها عوجة معرفتش ليه و بسيف درية مقاريا موالو قاليها باها دير غير كروة ...دارت غير كروة و طلقو الزغاريت فوق ريوسهم ...حليمة تبسمت فرحانة و قلبها كيزيد يضرب عينييها مكضورهمش جيهة عمر ...المهم فرحتها كملت و هي دابا مجوجة على سنة الله و رسوله ....جات كلثوم خبرت النكافات : صافي حبسو لباسي غنطلعو للعروسة لعند راجلها عمر مغاديش يبقا غادي جاي 
نكافة : واخا هاجنا غادي ندخلوها ... حليمة جالسة نوضها بشوية عليها و كلثوم ناضت تدوي مع ولدها ينوض يشد من مرتو ...عاد ناض باعصابو شدات منو و هي كتشوف فيه و متخوفة تقرب منو حيت كتبان عليه معصب ....و خرجو من الخيمة الحاصول حليمة غادا و بقا فيها الحال مطلعوهاش في العمارية لي تحلم بيها و هي عارفة بلي هادي لبسة لولة و لخرا ليها و لكن شكون غادي يقد يهدر تمشات معاهم و غير تحول في عينيها و شادة الغمة في قلبها ...و مشاو خلاو العرس باقي نايض ...سبقو ليهم الماكل و الشراب و الحوالا مشويين ...اما عروستهم حدهم شافوها في لبسة لولة ...و كيفما هي العادة كلشي غيبقا تم جالس غيتسنى في شرف العروسة لي هو السروال 
في الجناح ديال سيدي عمار ....مجهزينو على كانتهم فوق الناموسية يزار بيض و مفرشين فيه سروال مطرز بالخضر بالجناب ...تحل الباب و دخل السي عمر هو لول كيتمشى طالعة ليه ...و عاد جيبين ليه عروستو حليمة ...لي كانت مخلوعة وسط النكافات و يديها كتقفقف و ياربي تقدر الطلع النفس و تنزلها و في ليمين ديالها مها و في ليسر كينة كلثوم 
حكيمة تهضر ليها في ودنها : مديري والو هو غيدير كلشي ...حليمة مخلوعة و مخرجة عينيها و تحرك ليها في راسها بأيه 
كلثوم تبسمت : يلاه ابنتي مبروك عليك دخلي ...وقفوها قدام الباب و زيدوها تدخل عندو لبيت و ناري على قلبها غيسكت غير دخلت تسد الباب من وراها ...و هي قفزت و مجبدة عينيها دورات راسها كيبان ليها عمر حيد لفيسط ديالو و هو مطلع الغوباشة ...

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.