النجوم المضيئة و القمر مكتمل مزينين السما .. فجو صحو هاادي .. فغرفة هناء جالسات البنات بجوجات معاهم رحيمو الدميعات فعويناتها كاتقاد لياقوت فشعرها
هناء مرخيية كاتشوف فراسها بنظرات حزن عميييق، بقفيطن فاللون الأسود جابتولهم خياطة خاصة بيهم هي و ختها اللي لابسة قفطان آخر فاللون الأخضر الملكي .. تنهدات بقوة و شدات كلينيكس حطاتو على فمها كاتمسح العكر اللي دارتولها ماماها .. عينيها مكحلين .. دارت الكلينيكس فعينيها تمسحو و هي تسمع صوت ماماها
هناء:كتابلي نتخطب بواحد من دوك اللي طوول عمري كانكرههم اماما
رحيمو حطات يدها على كتفها كاتزفر بقوة:ماعندنا مانديرو أبنتي جدك من دييما داير هكا
هناء تنهدات بقوة و دارت جيهت باب البيت:نمشي نطل على محمد بانلي بقا فيه الحال بزااف
رحيمو تنهدات تابعاها:يلاه نمشي معاك أبنتي (مشاو مع بعضهم .. جيهت بيت محمد كان الباب مفتوح .. مع دخولهم مع تصدمو من حالة البيت كان كاامل مرووبل مررون و ياقوت قدام محمد شادالو فيدو)
هناء باستغراب؛اش طاري هنا؟؟
ياقوت شافت فيها بجدية:خوك و راك كاتعرفيه مللي كايتعصب
محمد وقف حااس بالخنقة فصدرو:خرجو
هناء قربات عندو:خويا عف...
قاطعها محمد بصوت عالي:خرجوو .. غانلبس حوايجي دابا
هناء تنهدات بقوة و شافت فختها و ماماها:زيدو نخليوه على خاطرو
ياقوت:يلاه
رحيمو:وليدي عفاك ماديرش فبالك راه غي ايامات و تفوت و غاتولف مع مرتك
محمد مجاوبهاش مشا للبلاكار ديالو كايجبد فالحوايج و يلوح موراه مغدد، البنات شافو فبعضياتهم كايتنهدو و خرجو فحالاتهم
💫بعد مرور بعض الوقت💫
البنات كايشوفو فبعضياتهم .. رجعو لبيت هناء .. ماماهم نزلات لتحت حيت جاو الخطاب .. تستقبلهم مع عبد الله و الحاج منتصر، سمعو الدقان فباب البيت و دخلات صفية مبتاسمة
صفية:لا فاش كنت غانمشي نعرض قبايلة وقفاتني خالتي رحيمو .. قالتلي الخطابة غاتكون غي بين العائلات حتى للعرس
ياقوت وقفات كاتقاد فشعرها:يلاه نشوفو هاد العرسان
هناء بتسائل:ومحمد؟
صفية:مشيت دقيت عليه .. ساد على راسو فالبيت .. قالي غي مور الباب راه جاي
هناء ومآتلها و دارو خارجات بجوج نازلات لتحت، دخلو مباشرة للصالون مخنزرات .. مدازو لا لكوزينة ماخداو اتاي ولا قهوة و لا حلوة
الحاج مختار:تبارك الله على البنيات عندك مشاء الله عليهم أعبد الله، الله يبارك فيهم
عبد الله بتاسم:ربي يحفضك ألحاج
الضريرات مخنزرات فهناء اللي مشات سلمات على الحاج مختار و رقية هي و ياقوت و دازو جلسو مشافوش جيهت العرسان
الحاج منتصر مبتاسم:كان خاصنا نديرو ليلة عندنا و ليلة عندكم على قبل بنتي سمارة حتى هي نديرولها صوابها و نجيو حتى لعندها نطلبوها من عندكم
الحاج مختار بقهقهة خفيفة؛الله يا ودي أمنتصر .. راحنا عائلة دابا و مابيناتناش هاد الشكليات .. فحال هنا فحال عندنا .. اهم حاجة البنيات درجالاتنا و غايلبسو الخواتم دابا
الحاج منتصر:ايااه عندك الحق حنا عائلة وحدة دابا .. و العرس كيفما متافقين مابقالوش بزاف
الحاج مختار تبسم:القاعة عندنا واجدة دالعراسات .. و كولشي يوجد فيوماين گااع الطريطور يتكلف .. بقا غي عقد الزواج نجمعولو وراقو و كولشي يكون هو هداك
الحاج منتصر بهدوء:من غدا عبد الله يبدا يجمع وريقات بناتو ومحمد كذلك .. ياكو ألعيال مالكم ساكتين
يعقوب تنهد كايشوف فيهم:كلامكم هو الكبير .. ماعندنا مانزيدو
الحاج مختتار:و بالنسبة للصداق؟
الحاج منتصر برزانة:ماشي مشكل .. مابيناتناشاي حنا .. اللي قدركم عليه الله...
الحاج مختار تبسم:وا عليه .. (شاف فياقوت) بنتي كي بقاتلك ديك العوينة؟
ياقوت ومآتلو براسها مبتاسمة:بخير الحمد لله
سليمان مخنزر فيها كايتفحص فيها بعينييه بدون استحياء من رااااسها لقاعها
هناء مخنزرة كاتشوف فيديها و صباعها مشتتة نضرها عن البقية.. فالمقابل عينين يعقوب و الضرات مقابلينها كايطلعوها و ينزلوها بعينيهم
يعقوب بتسائل:فين محمد، هو العروسة ولا ختي باش هي سابقاه و هو معطل؟؟
مع شنو قال علات فيه هناء عينيها مخنزرة:لزم حدك حسنلككك
الحاج منتصر؛ششششش هنااء!!
هناء شافت فيه:ماشفتيش شنو كايقول
يعقوب بنظرة ونبرة مستفزة:شنوو ماعجبكش الحال ولا!؟؟
الحاج مختار كايضحك:هههه ماعرفت كي غاتزوجو و نتوما كي القط مع الفار
هناء شافت فيه معلية حاجبها:حتى انا كانقول هكا، كييي غانتزوجو و حنا شي مكايحمل شي؟؟
الحاج منتصر بتنبييه:هناااء
رقية نطقات معاجبها حال:الحاج منتصر .. بانتلي حفيدتك لسانها سليط و ديما كاتجابه مع اللي كباغ عليها .. خاصها تحتاغمنا شوية
الحاج مختار:رقية .. البنت غا دوات ماتزيديش فيه (شاف الحاج منتصر) هضرة يعقوب صحيحة .. فينو محمد
الحاج منتصر بحدة:هنااااء زدتي فيييه .. سكتييي ماتعاودي تقولي حتى حرف
هناء شافت فيه معاجبها حال و ربعات يديها، قربات عندها ياقوت كاتهمسلها
-أعطيييه و زيديييه هههه
هناء غلباتها الضحكة .. تبسمات كاتعض شفايفها حانية عيينيها .. جات اللقطة مع نضرات يعقوب ليها .. صغر فيها عينيه .. بانتلو زوينة بشبه ميكاب و الابتسامة عندها حلوة كاثير الانتباه .. تحنحن مع صوت سليمان هامسلو
-بنات ال*حاب كايتشفاو .. هاديك البرهوشة محلف عليها انا بعدا
يعقوب عقد تخنزيرة كايشوف فياقوت كاتهمسلها و هي كاتبسم و تهمسلها حتى هي:مابقاش بزاف و حتى هاد التبسيمة مغاتقديش مزال تتبسميها
الحاج مختار:احمم .. اذن يلبسو دابا الخويتمات .. علاما يجي محمد
الحاج منتصر؛واخا مرحبا
هناء زيراات على يد ياقوت:تفوو ماكرهتش نقطع صباعي العشرة و مايلبسلييش خااتمو
ياقوت مغبنة:شوفي داك الحمار من قبايلة و هو يطلعني و يهبطني بعينيه قرب ياكلني تفووو
هناء:مكبووت مكبوووت
الحاج منتصر:بنتي هناء .. وقفي يلبسلك خطيبك الخاتم
هناء وقفات كاتعض فحنكها من لداخل مغددة .. سنانها نشروولها الحنك حتى ولات كاتمذق الدم، قربات عند يعقوب اللي وقف كايقاد الكول دقاميجتو البيضا اللي لابس .. فوقها فيست كحلة و سروال كحل .. كوستيم جااابو وسيم بزااف .. قربات عندهم رحيمو بصينية صغيرة فيها جوج بواطات دالخواتم مبتاسمة
رحيمو:الله يكملكم بالخير
يعقوب هز الخاتم اللي غايلبسو لهناء كايشوف فيه .. بانلو ثقييل محجر و زويين دالذهب .. شاف فهناء معلي حاجبو .. هي مزيرة على صباعها بيدييها بقووة و كاتفكر اللقطة اللي لبسات الخاتم دايوب قبل ايامات قلال، زفرات بقوة و شافت فيه عينيها مدمعين .. ميل معاها راسو كايرمقها بنظرة حاادة .. شاف يدها ليسرية تمداتلو
شاف فصباع يديها قليولين و صغيورين و بويوضيين كايترعدو .. شدلها يدها بيدو ليسرية و زيرلها عليها، هي صرطات ريقها صدرها كايطلع و ينزل بسررعة .. حاسة بالخاتم كايدخل فصبعها .. خشاهلها و شاف فعينيها .. بانتلو كاتشوف لبعيد مغوبشة .. تبسم باستهزاء و خدا يدها لفمو باسهالها حتى شافت فيه بالزربة قلبها قفز
يعقوب غي شافت فيه غمزها:مبروك علينا
هناء جرات من عندو يدها بالزربة و شافت فماماها اللي طلقات زغرووتة خنزرات فيها و هزات الخاتم اللي غاتلبسولو .. حطاتولو فوق يدو و رجعات لبلاصتها بالزربة كاتحك فيدها البلاصة منين باسهالها كاتمسحها .. حتى هو حرك راسو بلا حول ولا قوة الا بالله و ضرب الدورة لبلاصتو كايخشي الخاتم فوسط يدو .. الخواتم اللي سبقو خاتمها واحد دايرو فيدو ليمنيا و لاخر دارو قدام الصبع دالخاتم اللي لبسو، عندو ثلاثة دالخويتمات دالزواج حاليا جلس قدام خوه
سليمان:بايسلها يدها! ماتكون غا سحراتلك
يعقوب باستهزاء:هههه بغيت نغيضها حيت بانتلي قريبة تبكي
سليمان تأفاف و ناض مع صوت جدو اللي خبرو ينوض .. تقدم جيهت ياقوت هز الخاتم بملامح ممحية و خشاهلها فيدها عينو فعينيها .. حتى هي ماهبطاتش عينيها كاتحنزز فيه .. دار نظرة استغراب .. جاتو فحالا سابقلو شايفها، هي هزات الخاتم من عند ماماها و خشاتولو فصبعو كاتقلب عينيها
سليمان بهمس:قوليلي هادي نتي
ياقوت طلعاتو و نزلاتو بعينيها:فوقما كانشوفك كانتفكر داك الطلااب .. سبحاان الله خلق من الشبه أربعيين
قلبات الدورة هازة جلايل قفطانها و هازة راسها لفوق مبتاسمة بالجنب، سليمان دوز يدو على ذقنو كايتحلف عليها و رجع لبلاصتو .. جلس كايومئ براسو و يتحلف عليها فنفسو و هي جلسلت فبلاصتها كاتقليلو السم بحجبانها
رقية وقفات مبتاسمة و مشات هزات الصينية دالخواتم ديالت محمد و سمارة .. سمارة غي حانية راسها بقفيطن فالموڤ و الحزن مرسوم فملامحها
الحاج مختار:ايوى كولشي لبسو الخواتم بقا غي محمد و سمارة .. واش محمد باقي معطل؟
دخل محمد مع هضرتو بقميجة بيضة و سروال دالكوستيم كحل مع سميطات معلقين مع السروال و الفيست فيدو .. كايعرج ووجهو باقي فيه الضمادة على حسب الضربة دالموس
محمد:هانا مامعطلش
الحاج منتصر شاف فيه مخنزر:دوز أولدي لبس لخاطيبتك الخاتم
محمد ومالو:الله ياوديي (مشا لقدام رقية هز البواطة دالخاتم بلا مايشوف فحد، وقفات سمارة على صوت جدها اللي ومألها تتقدم عند محمد، مشات جيهتو كاتدور فعينيها .. حانية عينيها للأرض .. مداتلو يدها مكاتشوفش فيه .. حتى هو خشالها الخاتم فيدها بالزربة بلا مايعلي فيها عين، هي كذلك لبساتو خاتمو بالزربة و تفرقو كل واحد فين جلس .. شي مكايشوف فشي .. عينيهم على الخواتم اللي فيديهم و مخنزرين)
الحاج عصمان بابتسامة:طلقولينا شي تزغرييتة على هاد المنااسبة الساارة هاديي
الحاج مختار:ههههه عندك الصح .. (شاف فمراوات يعقوب) يلاهو شكاتسناو
شافو فبعضياتهم بجوجهم مغتاضاات و زغرتو تزغرييتة ملوية دبالزز
العجوزين برضى:الله يخلينا طول العمر فرحانين كيما هاكا ياكو ألعيال
هناء مميلة راسها للجنب:يااااربي صبرك
و هاكا دازتلهم الخطوبة المشحونة .. اللي دازت بأعصاب مشدوودة و حد مراضي فكلا الخطااب بعد العشاء للي داز بيناتهم كيفما العادة .. مشاو الضيوف فحالهم و بقاو غي مالين الدار شي مكايشوف فشي .. طلعو لغرفهم بالترتيب مخليين الجد كايسبح مبتاسم و قلبو كايطمئن على حفايدو بالحياة اللي بغا يرسمهالهم بالزز منهم
صباح جديد📍
بعد مرور اياامات دالتوجاد و الجراا لعقد القران و للعرس دقة وحدة .. العرس غايتدار النهار دغدا و اليوم عندهم الحنة و النقيش و الحمام دالعروسات و العقد غايجيلهم العدول حتى لواحد الخوية دالارض جات بين الفيرمات دعائلتي ماالك، عندهم الفيرمات قراب لبعضهم فحال الديور ديالهم، غا هو الفيرمات متباعدين غي بواحد القطعة ارض حد مكايستخدمها حيت بسمية العائلتان بزوج و لكن بما ان الصلح قايم و العرس بين العائلات بزوج .. فالقلاع تدارو فيها و تزوقات فحال شي قااعة ضخمة و كبييرة .. كاتوجد لليلة دالعشية احتفالا بعقد قرانهم
فالدخلة دالفيرمة دعائلة الحاج منتصر .. وقفات طموبيل ميرسيدس كحلة كاتلمع مع الشمس الساطعة و نزلو هناء و ياقوت مزنكات بالحمام اللي عاد جاو منو مع ساعة الضهر، غي نزلو وقفات سيارة اخرى مقابلة معاهم نزلات منها سمارة حتى هي مزنكة بالحمام تافقو يجلسو مع بعضهم مجموعين هاد الليلة فالفيرمة دعائلة الحاج منتصر و العرس غايتدار فالقاعة دالحاج مختار، يعني كولشي باتفاق بيناتهم و حاليا الفيرمة فيها غي العرايسات و ماماتهم و معاهم بنات الجيران كايزغرتو و يصلييو على النبي و يطبلوو فرحاناات بيهم
-صلاااااة و سلااااام على رسووول الله
-يووويوويووووويووووي
-داااتو و دااتو واللهيما خلااتووو
-يويويو يووووووي
-داااها ودااها واللهيما خلااهاااا
-يويوويوووييي
اصواات كثاار دالبنات و الزغاارد تسكت وحدة تبدا لوخرى و التصفااق والتعشاق و كاينقطو عليهم الما ورد وهوما داخلات .. حتى طلعو لفوق كاينهجوو
هناء كاتصوط:اووووف قالك داتو و داها
ياقوت معوجة فمها للجنب:تفو على سيمانة دازت كي البعر
سمارة حنحنات:احمم فين البيت اللي نمشي نرتاح فيه؟
هناء و ياقوت شافو فيها دقة وحدة .. بانتلهم حتى هي مقلقة و معاجبها حال معبسة .. يعني حتى هي فحالهم مبزز عليها هاد العرس .. تقدمو عندها مبتاسمات:أجي معانا نجلسو فبيت واحد راه كبيير
سمارة شافت فيهم مبتاسمة:احمم .. ش شكرا
ياقوت بتاسمات غمزاتها .. عينها برات شوية فيها اثر دالحمورية ولكن كاتديرلها البومادة بانتضام قريب تزولها اثر الجرحة:هانية ازيين
هناء جراتها من يدها:واخا ماتعارفناش بطريقة زوييينة .. إلا أنك كاتبانيلي ظريفة
سمارة بتاسمات:ههههه شوية و صافي
هناء تبسمات و حلات الباب دالبيت اللي غا يجلسو فيه .. مع الدخلة كاين طواالة وكادور على ليمن عااد تلقى الفراش الوااسع يتساع لثلاثة دالناس و بلاكاار كبيير لاصق فالحيط مع طبلة كبييرة فالوسط جامعة بزاف دالباليزات مواد التجميل و الثوابات و اللباسي و القفاطن و كادويات جاوهم من النساب .. مع كوافوزة لاصقة فيها المراية و مواد التجميل و الاجهزة دالسوشوارات وليبلاك و داكشي .. و البيت كولو لا من الارضية ولا الحيوط خشبية الصنع بلون قهوي غاامق زوينة
سمارة بابتسامة:زوينة عندكم الفيرمة ديالكم
ياقوت:ههه غاتولي ديالك و حنا نمشيو لديالكم
هناء تبسمات و جلسات فوق الفراش:مديلي عفاك اياقوت داك السوشوار ننشف شعري كايقنطني فازك
سمارة بتسائل:غاننقشو هنا لداخل ولا فالقاعة برا؟
ياقوت مشات هزات السوشراو من فوسط واحد المجر فديك الكوافوزة و قربات عند هناء مداتولها كاتقلب على البريز دالضو:لا النقيش هنا .. انا مابغيتش ننقش غاندير ديك الحنة غي فالصباع ههههه
سمارة بهدوء:مكاتعجبنيش انا الحنة
ياقوت بتاسمات:حتى محمد مكاتعجبوش
سمارة سمعات سيرتو علات حواجبها بزوج بعدم رضى، اما هناء فشعلات السشوار و طلقات شعرها اللي كايوصلها حد النص فضهرها قسماتو على زوج و بدات كاتنشفو
ياقوت حتى هي حيدات من راسها شال كانت دايراه على البرد و شدات فوطة كاتنشفوو مزياان و شافت فسمارة اللي جالسة مغوبشة بلا مادير والو
ياقوت:سمارة نتي مغاتنشفيش شعرك
سمارة شافت فيها بهدوء:واخا دابا
تحل الباب عليهم على غفلة .. دخلو بنات الجيران اللي جاو معاهم مع الضريرات و رقية و رحيمو كايصليو على النبي
رحيمو قربات عند بناتها بمجمر كاتدورو عليهم:تبارك الله عليكم الله يطولكم فالعمر و يكملكم بالخير ابنيااتي .. يويويووووييييي (دارت عند سمارة كاتزغرد و قربات عندها كاضحك) اجي اجي نحيد عليك العين
نطقات منى مقاطعاها؛علاش غاتديريلها داك العجب ماعرفنا تكوني ساحرة فيه .. بعدي من البنت
رحيمو شافت فيها معلية حاجبها:شغانسحر وانا دايراه لبناتي هوما اللوالة
منى:واماعرفت يكون كايشد غا فمرات ولدك المستقبلية
رقية خنزرات فيها:نتي امنى مغاديغيش عئلك خلاص؟؟
منى عوجات فمها للجنب و شافت فهناء مخنزرة:عشت و شفت البنت اللي كانت صاااحبتي يا حسرة غاتزوج براااجليي من بعد ماعرست معاه بزوج سيمانات مكاملينش .زيدي عليها كاتشوفني وكاتقلب وجهاا .. فين بقى شي عقل احماتي؟ (رقية قلبات وجهها عليها و قربات عند ياقوت كاتمتم)
-ماتخلينيش ندوي دابا حيت اللي غايخغج من فمي مغايعجبكش (تبسمات لياقوت) تباغك الله عليك ابنيتي .. غاتلبسي الئفطان الخضغ على ئبل النئيش ياك؟
ياقوت ومأتلها براسها مبتاسمة خذوذها مزنكين:اه
حياة ضحكات ضحكة عالية و قالت كاتميق و تشوف فهناء هامسة لمنى فوذنها:صراحة نتي مانخافش منك تاخذي بلاصتي مع يعقوب ولكن هادي بداك الزين و الشعر و الفورمة .. كانشك فمؤهلاتي اللي عاجبينو، شوفي غا شعرها يعطيك الخبار .. و البيوضية و الفسورية .. صراحة كاتحمق (طولات فيها الشوفة و هي كاتنشف فشعرها مكاتشوف فحد)
رحيمو بغات تجمع يدها بالمجمر و هي تجرلها يدها سمارة مبتاسمة:هانية اخالتي انا ماعنديش موشكيلة .. ماتسمعيش لهضرة من هاديك المسمومة
رحيمو تبسمات و دورات عليها المجمر فوق راسها كاضحك و تمتم بفمها بصوت خافت بدعاء العين
منى مطولة الشوفة فهناء مخنزرة:الله ينعل حسها هادي اللي تخافي منها أمرات راجلي .. كاع ضواسيها عندي ولا كان على الزين راه عنديي .. بقا على القلب و لمن كايمييل .. وانا واخا كنتي مزوجة بيه كان كايجي عندي .. دابا غا مقلق شوية على قبل شنو درتلو مع جدو و صاافي
حياة تبسمات بالجنب:ههه عمرك تاخذي بلاصتي ازين غا كاتحلمي بيها كيفما قبلتك نتي تكوني مرتو من بعدي متقبلة هادي و متأكدة حتى وحدة فيكم مغاتاخذو مني حيت انا كانعرفلو المودباس مزيااان
هناء وقفات بعدما نشفات شعرها مزيان و قربات عند ماماها مداياها فحد .. همساتلها:شنو غانلبس دابا؟
رحيمو مشات هزات قفطان بيض مخيط بالذهبي و سبنية دحياتي بيضة مزوقة بالذهبي مع شريبل ذهبي دالعرايسات:هاكي ابنيتي هادو
هناء ومأتلها:غانمشي نلبس فالحمام
مشات معلية راسها للسما مشافتش فحياة و منى اللي دازت من جنبهم .. مباغا صداع فهاد الساعة و عارفاهم مغايكونوش حاملينها كيفما محاملاهمش
داز وقت، خرجو العروسات بثلاثة من داك البيت بالصلاة و السلام و الزهر كايرشوه بيهم و الزغاريد بقفيطنات دالنقيش دالحناء هناء عندها فالبيض و الذهبي و سمارة فالبيض و الصقلي الحر .. اما ياقوت فالخضر و البيض .. نزلو لتحت ببطئ متاجهين لواحد الصالة، جلسو البنات فمطربات قدام بعضهم و جاو ثلاثة دالنقاشات عندهم بداو كاينقشولهم .. و البنات الضيفات طلقو الشعبي كايشطحو، مع بنت دالكاميرا كاتصور فيهم بالنوبة
مرى كبيرة من الحضور كاتسفق و تدوي بصوت عاالي مع موسيقى شعبية خدامة بلاشين .. كايسميو عليها .. لالة غضيفة: قالوا ناس زمان :
'' اللي مدت يدها للحنة، تمدها كلها '' يعني يالبنياات عمروو يديداتكم بالحنيينة و فرحو و نشطو فليلة عمررركم كاملاات، بنتي فررح طفي ديك الموسيقى وانا نسخنلكم الطرح بالبنديير (تطفى الشعبي اللي كان مشعول و بدات لالة غضيفة كاتطبل فواحد البندير، و البنات كايصفقو و تابعينها فإيقاعها)
حنيو للالة في دار باها 🎼 ..... يعطيها ربي زين وهمة و شاان🎼 الله يحن علينا و عليكم يا البنياات🎼🎼 و حنييييو للااالةةة حنة و حنااانييي🎼 لاالةة العرووسة فالجااه العااالي🎼🎼 يلاهو يالبنيات مع بعضنا
(بداو يغنيو مجموعات كايصفقو بيديهم و هناء و ياقوت و سمارة مبسمات كايميلو براسهم و النقاشات كاينقشولهم و يشطحو بكتافهم متبعين مع غضيفة)
🎼حنيييو للااالة حننة و حناانييي لاالة هناااء فالجاااه العااللليي🎼🎼
🎼حنيييو للااالة حنة و حنااانييي لالة ياقووتة فالجاااه العاالييي🎼🎼
🎼وحنييو للااالة حنة و حناانييي لالة سماارة فالجاااه العاالييييي🎼🎼
يويويويويويوووووووووووووييييييييييييي
الزغاريد ولاو كايتسمعو من كلا جيييه و الغنا بصوت عالي و التعشاااق و الكاميرا خدامة كاتصور .. سالاو للعروسات من يديهم مشاو لرجيلاتهم كذلك نفس الشييي .. دازتلهم العشية غا بالحييحة و النشااط ها هو شاااط، العروسات بثلاثة مبتاسمات نشطوهم بداك الغنا .. الحنة يبساتلهم فيدهم و عاودو سقاوهالهمم .. و البنات ناضو كايشطحو و ناااايضضضة💃🏻💃🏻💃🏻💃🏻💃🏻💃🏻💃🏻💃🏻💃🏻💃🏻
مع غروب الشمس🌞
ناضو النسا من الطيافر دالسفة المدفونة بالدجاج المحمر كاملات شبعانات عاجبهم الحال
رحيمو بابتسامة لرقية:العشية دازت مزيانة .. دابا يرتاحو البنات شوية و ياكلو و نخرجوهم لبرا على قبل العقد
حياة وقفات معوجة فمها و مشات خارجة عند الطيابة اللي جابوها تقادلهم الغدا و العشا ..
هناء تافأفات مامرتاحاش فالجلسة:هوووف عييت بغيت نتكا شوية و خاص نصلي العصر
ياقوت:حتى انا عييت .. دابا ناكلو و نطلعو فحالاتنا
سمارة بعياء:و باقي غاتجي الكوافورة تصايبلنا على قبل لاكط
هناء غززات سنانها محاملاش الموضوع:ماتفكرينييش
دخلات حياة بطبسيل دالسفة حطاتو فواحد المجلس قريبلهم:اجيو تاكلو ءلعروسات😏
هناء بتسائل:بغيت نحيد الحنة من يدي!!
رحيمو قربات عندها:لا ماتحيدها حتى وحدة غاتباتو بيها اليوما حتى لغدا باش تخرجلكم حميييمرة
رقية هزات شوية دالسفة فطبسيل صغير و قربات عند سمارة:اجي ابنتي نوكلك اجي (جلسات جنبها و بدات توكلها .. نفس الشي لرحيمو جلسات جنب بناتها كاتوكلهم .. حاسة بالدميعات واقفين فطرف عينيها مساخياش ببناتها بجوجات يتزوجو و يخويو عليها الدار .. سلاولهم ووقفات كاتمسح دموعها .. قربات باستهم بجوجات فجبهتهم كاتنهد)
-الله يكملكم بالخير أكبيداتي
هناء تبسمات بحزن و حنات راسها فالمقابل ياقوت عنقاتها بقوة كاتشهق و تبكي مساخيااااش بيها
بعدما سالاو النقيش .. طلعو العروسات للبيت اللي كانو مجموعات فيه .. جاو عندهم كوافورات معرووفاات فتارودانت .. هوما من صالون واحد و بنات مختالفين .. شدو كل وحدة مكيجووها و قادولهم الشعر من غير هناء اللي صاوبولها شدة خفيفة بالشال .. لبسو قفاطن كاملات دالموبرا فلون واحد الخضر الملكي ولكن الفصالة عندهم مختالفة و الخياطة كذلك .. وجدو تقريبا مع 9 دالليل .. جاو عندهم رقية و رحيمو مبتاسمات ..
رقية بتنهيدة:تباغك الله جيتو غزالات .. العدول كايتسناكم دابا
رحيمو حابسة دموعها:جيتي غزالة نتي و ختك و بنتي سمارة حتى هي
سمارة يديها حاساهم كايترعدو من الثوثر: (الصمت)
ياقوت تنهدات :يلاهو ننزلو العرسان كايتسنانونا هه😞
هناء تأفأفات و هزات قفطانها شوية:يلاهو
مشاو مجموعات نازلات لتحت .. خرجو من باب الفيرمة و تاجهو للقاعة اللي داروها فالزنقة دخلو حانيات راسهم مشاو بيهم امهاتهم مباشرة لواحد القنت مغطي .. حيت القاعة فيها النسا الاغلبية من غير هاد القنت جامع الجدين و اب هناء و ياقوت والعرسان و العدول و النسا ديعقوب .. مع جوج خادمات من عندهم
جلسو البنات كل وحدة جنب عريسها حانيات راساتهم
فالمقابل سليمان كايعبر ياقوت بعينيه .. نضرات خبث زايدينهم نضرات الاعجاب حيت جات كاتفتن بالزين و الشعر مصايب مرولي و كثير و المكيااج صاارعها وجهها كايبان كايبري مع الحنة كحلة فيديداتها البويض مقشرة شوية كاتبان حمرا، جنبو يعقوب اللي قالب عينيه على هناء .. شاف فيها غي شوفة وحدة و معاودش طلع فيها العين .. ولكن غا بديك الشوفة تصورات فعينيه .. اول مرة كايشوفها بالماكياج .. عجباتو .. اما محمد فمشاف فحد غي فيديه اللي مشابكهم و متكي بيهم على ركابيه مخنزر .. عاقد حواجبو
العدول شاف فيهم بستة و حنحن كايشوف فأول ورقة عندو دهناء و يعقوب .. و قدامها الموافقة دالنسا دياولو اللولين مسينية و كولشي
-احم احم .. بسم الله الرحمان الرحيم و الحمد لله رب العالمين .. تجمعنا اليوم باش نعقدو قران هاد البنيات هادو من هاد الوليدات .. بمشيئة الله تعالى .. قولي أولدي يعقوب مالك بن عبد السلام مالك قابل بهناء مالك .. بنت عبد الله مالك .. زوجة ليك على سنة الله ورسوله
يعقوب علا فيه حواجبو لمدة طووييلة .. تنهد عاض على فمو و شاف فهناء طلعها ونزلها بعينيه وومألو براسو:قابل
العدول تبسم و شاف فهناء:و نتي ابنتي هناء قابلة تتزوجي بهاد الراجل على سنة الله و رسوله؟؟
هناء زفرات بقووة .. شافت جيهت جدها اللي حركلها راسو بالايماء مبتاسم .. حلات فمها غاتنطق و هي تسدو ثاني جاتها ثقييلة تنطقها، تأفأفات و تمتمات بصوت خافت بالزز باش تسمع:اه
العدول تبسم؛مزياان و نتوما شاهدات؟ (الخادمات)
وماولو براسهم:اه
.. اذن بالطلب اللي قدمتوه فالمحكمة و موافقتكم نتوما و الموافقة ديال الزوجات اللوالة و الشهود كذلك .. غانطلب منكم توقعو على وثيقة الزواج .. هاك ابنتي نتي اللولة
-شدات هناء الستيلو يديها كايترعدو كاتصرط فريقها بالزز .. وقعات صباعها كايتهزهزو، شد يعقوب الستيلو من عندها بالزربة ووقع .. على اعصابو و طلعلو هادشي فمخو .. وقع و هوما يسمعو زغروتة من الخادمات مبتاسمات
هناء عضات على شفتها بقووة حسات بقلبها تقبض خصوصا بتوقييعها اذن دخلات لقفص الزوجية وولات على ذمة رجل، على ذمة يعقوب ماالك
العدول شاف فالورقة دمحمد و سمارة .. تبسم و نفس الهضرة قالها لمحمد
محمد كان سااهي ماشي فهاد العالم .. حتى قال جدو بصوت عالي
-ولدي محمد .. جاوب العدول!
محمد شاف فيه بالزربة وومألو ماشي فهاد العالم:اه واخا
العدول تبسم وشاف فسمارة نفس الشي و نفس الهضرة .. هي كانت كاتشوووف فمحمد ساهية فيه .. بانولها بزوجهم مضلومين فهاد الزواج .. شافت فالعدول اللي عاود سميتها للمرة الثانية .. ومأتلو براسها و بصوت خافت قالت:موافقة
العدول مدلهم يوقعو بعدما سول الشهود ..
سمارة وقعات بهدووء بلا مادير ردة فعل ..اما محمد فشد الستيلو بقا كايشووف فيه .. علا عينيه للحضة فسمارة .. بانتلو كاتشوف فيه .. تبسم بهدووء بانتلو بصورة جواهر .. واخا عمرو صارحها ولكن من وقت مراهقتها و هي صديقة لختو و كانو كايتبادلو نظرات الاعجاب من صغرو و هو كايتخايل هاد اللحضة معاها و فاش جا باش يوقع فعلا بانتلو سمارة فصورتها، حنا راسو لعقد الزواج ووقع مبتاسم .. مع وقع عاود شاف فسمارة و هي تبانلو فصورتها الحقيقية .. غوبش بشدةة و لاح الستيلو من يدو منرفز حاس بيدوو اللي وقع بيها متشنجالو
العدول بنفس ابتسامتو شاف فسليمان و ياقوت .. وجهلهم نفس الهضرة و بجوجهم وافقو بلا مايسهى حد فيهم .. من غير فاش جاو يوقعو .. بقاو موودة كايشوفو فعقد الزوااج .. ياقوت بقات كاتقرا سميتو وسميتها اللي مكتوبين تما عاضة على شفتها التحتية بحسسرة .. مكانتش متوقعة تتزوج زواج تقليدي بلا حب، وقعات بعد طوول تفكيير و مدات الستيلو لسليمان اللي شارك حواجبو و خطط بالزربة فالعقد
العدول:اذن مابقالي نقوليكم غي مبروك و مسعود .. بالرفاه و البنين انشاء الله ليكم كاملين
الجدين وقفو كايضحكو:مبرووك عليينا مبرووك (تعانقو مع بعضهم و دارو عند حفايدهم .. مدو لكل زوج فيهم بواطة فاللون الاحمر)
الحاج منتصر:تفضلو هادو كادوات دالعرس
الحاج مختار:عندكم ستة تما و كولكم خاصكم تلبسو داكشي
يعقوب حل البواطة باستغراب .. بانتلو غورميطة فالفضي .. عادية .. هزها كايشوف فيها و هي تبانلو فوسطها منقوش اسم هناء .. علا فيهم حاجبو وردها لبلاصتها بلا ماينطق
الحاج مختار:لا ايعقوب ماتخليهاش هكاك .. نتا لبس لمرتك ديالها و هي تلبسلك ديالتك .. ماشي غي نتا كولكم
هناء كتتصوط مخنزرة حاسة بالخنقة .. حلات بواطتها بانتلها عندها دالذهب و فيها اسم يعقوب .. علات فيه عينيها مغوبشة و مداتهالو ليدو
يعقوب شدها من عندها و لبسهالها .. حتى هي لبساتلو غورميطتو .. نفس الشي مع البقية .. لبسو لبعضياتهم الغوميطات معبسين
الحاج منتصر بابتسامة رضى:مزيااان دابا .. و خبر زوين غانقولولكم بعد ماتشاورت انا و مختار، قررنا قرار
الحاج مختار تبسم كايضرب بعكازو فاالارض و تمتم معلي راسو لفووق:حنا غانبدلو تصميم الفيرمات هادو .. و غانشركوهم حتى بهاد الارض هادي اللي حنا فيها دابا .. تقريبا مغاتبقاش مدة طوييلة و غانتجمعو فيها العائلات بجوجات
يعقوب بتسائل:مافهمتش دابا حنا غانتشاركو فالسكنة؟
الحاج منتصر:اه اولدي اول مايتسالا العرس غايبداو الاصلاحات فالفيرمة و غاتكبر كيفما كاتشوف راهم اصلا كبار و عاد بهاد القطعة الارضية
يعقوب تبعو بعينيه مخنزر .. شاف فالحاج منتصر و عبد الله كاينبههم:يدير شي حاجة لختي ماهياش مغانتفاهموش
عبد الله بهدوء:مامربيش ولدي باش يهين المرى .. من اللول معلمو كيفما يعامل خواتاتو يتعامل مع بنات الناس
يعقوب ومألو براسو:هكا مزيان .. باش نيت مانضطرش ندير تصرف مايعجببش مرتي (شاف فهناء اللي وقفات بنص عين .. حتى هي بادلاتو بنفس النظرة و خرجو بحالاتهم من تم داخلين عند النسا اللي اول مبانولهم بداو يصليو على النبي و يزغرتوولهم)
📍خارج القاعة📍
محمد غادي يديه فجيابو مخنزر محاملش راسو .. داز من قدام دارهم مشافش فيها غاادي بهدووء حتى وقف على صوت سمعو من وراه دالتهراس .. دار بالزربة مع دورتو مع بانلو شخص ملثم هاز قرعة دالمشروب فيدو و قدام رجلو بزااف دالقراعي، مشتتين مساليين .. ديك اللي فيدو دار فوسطها درة و لاح فوسطها عود ثقاب مشعولة و بالزربة لااااحها جيهت القااعة دالعرس حتى شدات العافية فالثوب اللي مبنية بييه .. زاد الثانية كذلك لاحها على جيهة لوخرى و مشا هربان .. محمد داز كولشي قدامو بالزربة .. تفافا .. تصدم و تصعق .. مشا كايجريي بكلل سرعتو باغي يشدو كايغووت بصوت عاالي
وقف كاينهج كايشوفو هرباان لبعيييد و دور عينو للقاعة بالزربة حاس بالعرق كايقطر من جبهتو، بانتلو شدات فيها العافية بزااف و صوت الغوات من فوسطها كايتسمع عااالي دالنساا و الناس كايجريو خارجين منها .. مشالها بالزربةة كاايجري كولو خوف على عائلتو
مع دخلة محمد مشا مبااشرة كاايجري للجيهة فين دارو عقد القران، بانولو يعقوب و سليمان مخرجين جدهم بالزربة و عبد الله مقاتل مع الحاج منتصر اللي كايكح بقوة مع الخيمة فيها ثووب رقييق بالزربة شدات العااافية و الذخااخن كايخنقو و اللهههبة قويةة .. الجرا و الغوات دالنسا كايتسمع عاالي هارباات من العافية خارجات .. مشا كايزرب دغيا عاون باه فجدو و خرجو بالزربة من الخيمة .. مع خرجو مع وااحد الجيهة طارت منها العاافية بقوووة و الغواات زاااد حماا .. الخلعة سيطرات على الجميييع
محمد دور عينيه عرقان كاينهج و يشوف فيهم بالو مشغول .. بانولو كاع العائلة خرجو و الضياف خارجين كايجريو .. ماعدى البنات .. همس بصوت خاافت
-البناات .. (علا صووتو فحال شي حد كان سااهي و فاق من سهوتو) باقيين لداخل
مشا باغي يدخل لداخل و هو يطييح طرف دالثوووب عاامر عاافية .. رجع اللور بالزربة و عينيه حماارو من الذخان و خوفو على خواتاتو
داخل القااعة، البنات كانو فوق الكووشات ماجاو فين ينزلو حتى حاوطاتهم العافية من كلا جيه و عاد النسا كايتداافعو و الغواات بداو كايتداحسو معاهم .. هناء حسات بالخنقة فصدرها مع الذخاان و الناس كايدفعو فييها .. عندها مشكلة فالتنفس من صغرها كايتقطع فيها و مع هادشي اللي طرا حسات بالفشلة .. كادفع فسمارة و ياقوت و تمتم كاتلهث و تنهج
هناء؛خ خرجوو .. س سربييييوووو، (دفعاتهم بقوة و هوما مخلوعات شدو فبعضياتهم هازين جلايل قفاطنهم و خرجو جيهت الدخلة دالقاعة مخليات هناء وراهم كاتكح بقوووة شادة على صدرها حتى جاتها الدوخة الدوخة الدوخة و الكحووولية والضبابة ماحسات براسها غي طاايحة فوسط العافية .. كتتكح و حاسة بالسخوونية شادة فرجليها .. العافية بدات كاتشدلها فقفطانها من لتحت)
(بانتلهاا طاايحة فالارض و العافية محاوطااها .. شهقاات بقوة مخلووعة .. بغات تمشي عندها و هي تطييحلها سماارة قدام رجلييها حااسة بالضييقة من الذخاان الكثيير .. شافت فيها حتى هي تاالفة و هي تغووت بصوت عاالييي مذعوووورة) عااااونووووناااااااااااااااااااااا
طاحت حتى هي كاتنهج حاسة بقلبها تقببض و ريحة الذخاان الكثييرة كاتخنق وعاد الضبابة مكاتبانلها واالو مع العافية الكثيييرة .. شداات على عنقهاا كاتشههق و تمتم بصوت عاالي: عاااونوونااا عااااونووووناااااا .. س سمااارةة حلي عينييك (كاتزعزعها و تدور تشوف فختها الدموع فعينيها) هناااء 😭😭😭 عاونوونااا عفااااكم😭😭😭😭
شافت لواحد الجيهة بلهفة مللي قشعات خيالات داخليين .. كانو محمد و سليمان و محمد لقاو دخلة اخرى للقاعة من غير اللولة اللي عمرااتها العافية .. مشا محمد كايجري عند ياقووت اللي رجعات كحلة من العافية كاتشهق و تبكيي شادة فسماارة
محمد بخوف:ي ياقووت .. نتي بخيير (حنا يهزها و هي تحركلو راسها بلا)
-ع عاون سماارة و و هناااء
شارت جيهت هناء بيدييها خاايفة .. مع شارتلها مع خلط عليهم يعقوب اللي غي بانتلو مشا عندها كاايجرييي .. محمد هز سماارة اللي غايبة عن الوعي،و شاف فسليمان اللي عاد كي وصل عندهم كايدوي بالزربة
-جيب ياقووت
حنا عندها سليمان بالزربة وقفها وهي رجليها فاشلين .. كاتشوف فيه بالزز حالة عينيها كاتمتم:ع عاونيي انننن (فقداات وعيها و ترخااات على طوولتها .. بالزربة شدها قبل ماطيح للارض و هزها بين يددييه خارج بيها كايجريي لبراا)
يعقوب وصل عند هناء شاد على فمو كايكح بقووة:ه هنااء كاتسمعينيي
هناء فاقدة وعيها: (الصمت)
شاف جيهت رجلييها بانتلو شادة فيها العافيية .. بالزربة هز واحد المانطيل دواحد الطببلة .. و ضرب بيه جيهت العاافية، حتى طفات العافية و حنااا هزها بالزربة و هي مرخيية محاسة بحتى حاجة حوااليها .. دار خارج بيها كاايجري و غي قرب يوصلل طاااح طرف دالثووب حاامي للخطوة اللي كان غايخطيييها، رجع اللور بالزربة معكلل بشي سلوكة ديال البيفان، طاح للأرض بقووة هو وياها ولكن لقفها بالزز باش مطاحتش من يدو .. خرج النففس حااميي من صدرو حتى بدا كايكح بقووة و عاود جمع وقففتو مزير عليها بين يدييه، ولاا حمرررر و الشخان بدا يدخل لصدرو كايخنقو، خرج بيهاا اخيييرا من هشييم النااار كايكح و ينهج .. غا وصل لبرا حيدهالو محمد من يدو بالزربة ملهوووف، و مشاا بيها جيهت واحد الطموبيل .. ركبها جنب ياقوت و ديمارا تابع سيارة سليمان اللي خدا معاه سمارة و نطالقو جيهت اقرب مصحة لييهم، مخليين وراهم البومبية جات كاتطفي العاافية و العائلة مفزووعة مشاو تابعينهم كايتجمعو فجوج سيارات اللي بقاو تما وحدة ديعقوب اللي صاك بيها على وجه السرعة و لوخرى دعبد الله اللي بدورو غادي مزرووب وراهم)
مع آخر قطرة مااء طفاات العاافية الكثييرة اللي ندالعات بطرييقة جد سرييعة فالقاعة .. مشاو رجال البومبية مخليين رجال الشرطة كايحققو فشنو طرا تما .. و من بعيييييد واقف الشخص الملثم اللي شعل العافية كايشوف بنظرة شمااتة و يتمتم بنبرة خاافتة
-هادي مجرد قرصة أذن لعائلة ماالك المثالية، هاد العائلة لاماخرجتش علييها اناا .. مانكوونش ولد الزوهرى (عينيه تضلمو بحقققد) مااااانكوووووونش
⛅صباح جدييد⛅
بعد ما مرت ثلاثة ايام على ديك الحادثة .. هناء متكية ففراش دكلينيك خاص، بلبسة طبية طوييلة و شال على راسها .. رجليها ملويين ببيندات بويض .. الحرقة درجلها كانت من الدرجة الاولى ولكن ضراتها بزااف .. كاتشوف قبالتها فجدها و مها و باها و خوها و الحاج مختار و ياقوت ورقية و يعقوب و سمارة .. اي كاع العائلة جاو يزوروها و يطمنو عليها هاد النهار، العرس تم تأجيلو حتى يتشافاو نهاائيا .. البنات خرجو قبل يومين بقات غي هناء اللي رجلها حتاجت عناية و كان خاصها تبقى ضروري فالسبيطار
الحاج منتصر شاف فيعقوب بامتنان:ولدي شحال ماشكرت فييك مغانوفيكش حقك .. فعلا نتا نقذتيلي حفيدتي العزيزة، لاكانت زادت غي شوية كانت تشد فيها العافية كااملة
يعقوب ومألو براسو مبتاسم .. يدو وحدة ملوية بواحد البانضة حيت تحرقاتلو شوية بالعافية:حفيدتك هي مرتي حاليا .. ماتحتاجش تزيد تشكرني
هناء كاتشوف فيهم:مممممم ديري هذا (شارتلها بصبعها و هي تديرها سمارة و طلعات قدامها فوق الفراش كايتفرجو فالفيلم الكارتوني اللي بدا مضيعين فيه الوقت)
🔮اليوم الموالي🔮
مع اول سويعات الصباح، خرجات هناء من الحمام دالسبيطار كاتخلف بالزز على رجلها .. لاسطمات شي صطمة ماهياش كاضرها ولكن حااليا قادة تتمشى عليها .. غادة جيهت غرفتها حيت الحمام جا خارجها، فطريقها سمعات صوت خشن من وراها دارت غي براسها لعندو .. كان مقرب عندها كايطلعها و ينزلها بعينيه
يعقوب وقف قدامها:مكاتعطيش الراحة لراسك؟
هناء بعدم اهتمام:تزيرت و حتاجيت الحمام
يعقوب حاوط بيدو على كتوفها:زيدي نعاونك بنتيلي مقصحة من رجليك
هناء تنترات منو و رجعات اللور خطوات مخنزرة:لا مامقصحاش شكرا
يعقوب جمع يدو عندو وومألها براسو:واخا .. زيدي لبسي عليك شي حاجة .. جيت ناخذكم نتي و سمارة
هناء تبسمات:بصح غانخرج اليوم؟
يعقوب ومألها براسو:انا دزت لتارودانت و قالي جدك ندوز موراك .. (حل باب البيت مللي وصلولو .. دخلو لداخل بانتلو سمارة ففراش هناء .. دور عينيه للفراش اللي وصاهم يزيدوه فالغرفة) نعستو ففراش واحد؟
هناء:اه على حسب بتنا كانتفرجو فالليل و بقينا جنب بعضنا
يعقوب باستغراب:و قدكم الفراش .. بانلي صغير
هناء بهدوء:عادي .. دابا تقدر تخرج باش نبدل عليا؟
يعقوب ومألها براسو:واخا
خرج فحالو خلا هناء مشات عند سمارة فيقاتها و هزات واحد الصويك صغير فيه عباية باش تخرج بيها من الكلينيك .. سمارة جمعات شعرها اللي تعشعككلها بالنعاس و مشات تغسل وجهها خلات هناء كاتلبس عليها العباية، لبساتها و قادات شالها مزيان .. و مشات حلات الباب
يعقوب جنب الباب مربع يديه كايتسناها .. سمع الباب تحلات شاف فيها بنص عين:صبري نعيط للطبيبة تجي تقادلك الفاصمة فرجلك قبل
هناء حركاتلو راسها بالايماء و رجعات لداخل كاتسنا .. حتى دخل مع الطبيبة اللي شرفات على حالتها .. جلسات جنبها و شداتلها رجلها كاتبدلها الفاصمة و دارتلها بومادة كاتهدنلها الحريق، دخلات سمارة عندهم بانولها على حالهم
هناء مزيرة بيديها على الفراش مرة مرة لاتقصحات كاتهرب رجلها من عند الطبيبة و هي خدامة بتركييز .. اما يعقوب فمربع يديه حاضيهم بدون ملامح
هناء شدات فيها موكية عليها و مشاو خارجين من السبيطار .. ركبو مع يعقوب فطموبيلتو .. هي فالمقاعد الخلفية و سمارة فجنبو و نطالق بالسيارة جيهت الدوار بسرعة متوسطة
♨ بعد مسافة نص الطريق بصمت حد مكايدوي و شي مكايشوف فشي♨
هناء تنهدات بقوة:هذا غايكون كايكره شي حد فعائلتنا .. يا حنا ولا نتوما
يعقوب شاف فيها من المراية دالطموبيل:عندكم نتوما اعداء كثار؟
هناء شافت فيه حتى هي:كانو عندنا وحدين ولكن مغانشكش فيهم حيت اصلا غايخافو على صحتهم
يعقوب عقد حواجبو فيها مخنزر فيها و هي مبادلاه بنظرة مستفزة .. طولو الشوفان فبعضهم من خلال المراية القدامية .. حتى تمتمات سمارة مقاطعة التواصل النظري بيناتهم
-خويا وقف هنا نفطرو عاد نمشيو فيا الجوع
يعقوب بغا يوقف و هي تنطق هناء:انا مكناكلش مللي كانكون فالطريق كاندوخ و نرد .. مغانزلش معاكم
يعقوب ومألها ببرود:اوكي (حل باب الطموبيل و نزل هو و سمارة داخلين لديك الملبنة اللي دازو من جنبها بالطموبيل .. هناء تكات براسها على زاج الطموبيل كاتشوف فالطرييق بعييد و تفكر لاكان عندهم هوما شي عدو اللي يبغي يشعل فيهم العافية .. مدة من التفكير ماخرجات بحتى نتيجة .. جاها الملل .. نقزات لجيهة الراديو شعلااتو و رجعات لبلاصتها منغمة بأغنية دالراي)
بعد ربع ساعة رجعو يعقوب و سمارة .. ركبو و شافت فيها سمارة مبتاسمة
-هاكي خويا مابغاش يخليك بلاش .. لابغيتي كولي حتى نوصلو
يعقوب شاف فيها من الزاجة القدامية و غمزها:حتى نوصلو و تعرفي
سمارة حلات الشاصي اللي فيها داكشي اللي جابو لهناء و بدات تاكل منو:اصلا حتانا ماشبعتش
هناء عقدات حواجبها باستغراب و فضول و تكونسونطرات من الطريق باغا تعرف فين غادي بيها ولكن بانلها طريق الدوار وواخا هكاك بقات مركزة فالطرييق مصغرة عينيها نااوييية على خزييت، حتى حبس الطموبيل خلاها غي حالة فمها و كاتمتم بعدم تصديق
-ش شهادشيي هذاااااا!!
هناء كاتدور عينيها فالارجاء و تمتم بعدم تصديق:ش شهاادشيي
يعقوب شاف فيها مبتاسم ابتسامة صفرة مستفزةة:عرسنا اللي تأجل هو هادشي
سمارة عاضة على شفتها التحتية بقوة:اليوم العرس؟ و ولكن مافخبارنا والو؟؟؟
هناء كاتشوف فالقاعة دالعرس دعائلة الحاج مختار و الضيوف كايدخلولها .. رغم انهم فوسط النهار .. شافت فيه باستغراب:واش العرس فالنهار؟؟
يعقوب ومألها براسو بالايجاب:ايااه .. البوليس حاضرين فالباب حاضيين معانا و غانعرسو اليوما
خرج من الطموبيل هو و سمارة .. و حل عليها الباب .. هي متفااجئة كاتشوف فالارجاء مامثيقاش ان عرسها جا بهاد السرعة و عااد مع الشخص اللي قدامها حاليا و اللي مكاتحملو مكااتقبلو .. يعني باقا مادركاتش تولف عليه و تتقبلو فحياتها .. خرجات من الطموبيل سااهية .. حتى حسات بيدين كباار حرشيين حاوطو يدها و زيرولها علييها .. جراتها بالزربة و شافت جيهتو مخنزرة
-ماتقيصش فيا
يعقوب تبسم بجانبية و قرب لوذنها همسلها باش ماتسمعوش ختو:اليوم نشوفو غانقيص فيك ولالا أمراااتي
هناء قلبها حساتو بغا يوقف بالخلعة من شنو قالها و من نبرتو خصوووصا ديك مراااتي، حسساتها بالخطر .. صرطات ريقها بالزز و مشات داخلة بالزز منها كادور فعينيها على البوليس اللي محاوطين القاعة حالين عينيهم مزيان باش ماتوقعش شي حاجة فحال اللي وقعات قبل ثلاث ليالي، دخلو لداخل القاعة طالعين مباشرة لفوق لواحد الغرفة فين يزينولهم و يلبسولهم اللباسي دالعرس
هناء بتسائل:فين غاديين؟
يعقوب شاف فيها:سؤال بليد أمراتي! واش غاتعرسي بالعباية؟
هناء خنزرات فيه كاتأفأف:اوووف عمرني شفت عرس بهاد الطريقة واش من الكلينيك للعرس .. مامدوشة مامرتاحة ماوالو .. انا مواجداش😒
يعقوب وقف بيهم هي وسمارة جنب واحد الغرفة:مزياان .. دخلي دابا من بعد ترتاحي
سمارة حلات الباب و دخلات بلا ماتزيد توقف معاهم ولا تدوي حاسة بالضلمة محاوطاها .. اما هناء فخنزرات فيه و دخلات شاعطالو البااب على وجهو
تبسم ابتسامة مغزففة مزييير على قبضة يدو حتى بيااضت و دار هابط لتحت .. مباشرة لخارج القاعة ركب فطموبيلتو و ديماارا .. باااقي الوقت للبرزة
📍فالغرفة لفوق📍
دخلات هناء و هي تلقى ياقوت مغمضة عينيها مررخية معاها كوافورة كاتقادلها مكياج ثقيل دالعرايسات فالمساحة اللي فوق عينيها و تحت حواجبها، و الشعر عندها ملوي و مجموع .. تبسمات كاتشوف فيها سااهية و هي تقفز من وحدة تقدمات عندها .. حنحنات عليها
هناء:خلعتيني
البنت بابتسامة:نتي هناء يااك .. انا اختصاصية دالميكب دالمحجبات و كاندير حتى الشدات ديال الشال زوينين للمناسبات غانتكفل بيك اليوم ..
هناء بابتسامة صفرا:متشرفين
البنت:لا كنتي واجدة اجي نبداو باش يلاه ندرك نكملك
هناء بتاسماتلها:واخا (شافت فسمارة اللي مع الدخلة شداتها واحد البنت كاتمسحلها وجهها بكلينيكس فازك بواحد الكريم و قادات واحد الماسك ديجا خلطاتو .. كاتحطولها فوجهها .. حتى هناء جلسات فواحد الكرسي و تقدمات عندها البنت اللي مختصة بيها .. كاتماصيلها وجهها حتى ترخااات و بداتلها فالماسكات و داكشي)
⏳⏳ بعد مرور وقت طويييل دالماكياج و الشعر يتقااد و العروسات ختارو جوج داللباسي للوحدة اللي عجبوهم،
ياقوت معوجة وجهها عند هناء و بنت قدامها كاتبردلها الضفار كاتلصقهوملها:ياختي و ياختي و جيتي فنيونةة
البنت تقابلات معاها كاتقادلها الشد مبتاسمالها .. الشد دالدونتيل فاللون الذهبي .. شكلو زوين بزاف و الماكياج اللي قاداتولها دالبريو فلون الشد الذهبي
مدة دازت بداو كايلبسو تكاشطهم حتى سمعو صوت الاغاني من لتحت
سمارة:بداو
مع شنو قالت تحل الباب و دخلو ربعة دالنكافاات بالصلااة و السلام و الزغاارد و رحيمو و رقية معاهم
هناء:ههههه يا للعجب غي البارح نعست مرتاحة حيت العرس تأجل و اليوم النكافات داخلين عندنا
رحيمو قربات عندها عنقاتها:على سلامتك احبيبتي
هناء بابتسامة:الله يسلمك
رحيمو تنهدات بصوت عاالي:اليوم غاتروحي لدار راجلك
هناء بعبوس:انشاء الله
جاو النكافات عندهم كايعاونوها تلبس التكشيطة هي و البنت اللي صايباتلها .. حتى سالاو لكاع البنات ووجدو من اجل البرزة .. دقائق و تسمع الدقان فباب الغرفة و دخلو العرسان بلباس جد انيق .. كوستيمات فاللون الاسود و الروايح و التحسينات
رقية بابتسامة؛دوزو تتصورو دابا عاد نزلو لتحت
النكافات مشاو مبااشرة عند محمد جروه عند عروستو و بنت دالكاميرا اللي غاتصورهم وراتهم واحد البوز
-عفاك حاوط يديك على كرشها و نتي حطي يدك على وجهو وشوفو فبعضكم مبتاسمين
النكافة قربات عندهم:اجي نعاونكم
شدات يد محمد حطاتها حول كرش سمارة اللي كانت كاترعد بالثوثر .. و هزاتلها يدها هي حطاتهالو عند وجهو .. علات فيه عينييها كاتصرط فريقها .. حتى هو بادلها النظرة بلا مايبتاسمو
البنت دالكاميرا:عفاكم بتاسمو
سمارة تبسمات ابتسامة صفرا .. حتى محمد غي جبد شفايفو بلا مايبتاسم .. عينيه فعينيها بنظرة ثااقبة وثرااتها .. لدرجة زيرات بيدها على حنكو .. ضرب فيهم فلاش الكاميرا و هو يطلق منها محمد بالزربة .. قربات عندهم البنت دالكاميرا مبتاسمة
-مزيان .. دابا عفاك علي راسك و بتاسمي كاتشوفي فالكاميرا .. غانصورك بوحدك
سمارة تبسماتلها كاتشوف فيها بهدوء .. ضرب فيها فلاش الكاميرا بلعات ريقها
قربو عندهم النكافات بالصلاة و السلام و هوما خرجو من لبيت نازلين لتحت
جات النوبة فياقوت و سليمان اللي مللي دخل ما هز عينيه من ياقوت اللي جات كيف الياقوتة .. كيف الشمييعة شااعلة .. و عاطية الضو .. جات كاتفتن زوينة كاتحمق .. قرب عندها كايحنحن
-ندير فحال اللوالة؟
البنت دالكاميرا:لا نتوما غاديرو بوز آخر .. تقابلو مع بعضكم و شابكو يديكم مع بعضهم و العروسة تشوف فالكاميرا اما العريس يشوف فيها
دارو شنو قالتلهم .. اليدين تشابكو فجو من الثوثر و التزنيكة من عند ياقوت .. صدرها كايطلع و ينزل كاتنفس بسسرعة، شافت جيهت الكاميرا بالزربة مبتاسمة .. اما سليمان فعينيه خلاهم ثابتين فيها بملامح جاامدة .. ضرب فيهم الفلاش دالكاميرا .. بغات تجبد يدها من عندو .. ولكن حساتو مزير عليها .. شافت فيه بالزربة و هو يهمسلها معسل فيها عينيه
-جيتي زوينة
ياقوت صرطات ريقها مثوثرة كاتشوف فعينيه قراب ياكلوها يعريوها .. نترات يدها من عندو بالزز و دارت عند البنت اللي صوراتها بوحدها ثاني .. خرجو مع النكافات اللي رجعو موراهم و فالخارج كاين بنات بالكاميرات كايصوروهم فيديو
بقاو فالغرفة غي هناء و يعقوب الي كانو كايتبادلو نضرات جاافة .. بلا ملامح .. الصراحة تقال .. هي عجباتو و هو عجبها .. بوكووص و زوين و الطولة و القد و السمورية الحرشة .. كاتعجب اي بنت .. ولكن عدم رضاهم على بعضهم كان عاامل كبيير باش يخليهم يتبادلو دوك النظرات الجاافة
البنت دالكاميرا:دابا بقيتو نتوما .. امممممم عرفتي غاتقربي عندو و حطي راسك على صدرو .. و شديلو فيدو بيدك .. حتى هو يشد فيدك، هناء حمحمات كادور فعينيها حواليها .. كانت الغرفة فيها غي هوما كع الكوافورات .. حتى رقية و رحيمو خرجو مع العرسان اللي سبقو .. قربات عندو ببطئ عينييها كايهربولو كل شوية، وقفات مقابلة معارفاش شنو دير .. تلفاات .. شهقات حالة فيه عينيها على مصرعيهما مللي حسات بيدييه شدوها من خصرها بقووة و لصقها فيه .. يديها تحطو على صدرو كاتشوف فيه بصدمة .. هو مبادلها بنظرة مافهماتهاش .. مكاتقرااش، حتى سمعو البنت دالكاميرا
-عرفتو شنو .. خليكم هكااك .. جاكم البوز وااعر
هناء كاترمش فيه صدرها كايطلع و ينزل بسسرعة .. حنات عينيها بالزربة مللي حسات بالفلاش ضرب فيهم .. بغات ترجع اللور حتى حسات بيدو زيرات عليها كثر و همسلها
هناء بتاسمات ابتسامة صفرا مبينة سنيناتها .. سالات و شافت فيها
-زوينة تبارك الله .. ليلونتي اللي دايرة جاو مع عينيك
هناء بهدوء؛لونهم الاصلي هو هذا، انا دايرة غي عدسات دالنظر
البنت:اووو ما شاء الله زوينة
هناء بابتسامة:شكرا
يعقوب شدلها فيدها:بقينا غي حنا .. يلاه نمشيو
هناء شافت فيه مبتاسمة بالزز:هههه نتا مولف على هاد المشية واقيلا ياك؟
يعقوب مجاوبهاش .. زير على يدها و خرجو لبرا مع صوت النكافات اللي رجعو كايتسناوهم .. نزلو لتحت على صوت الصلااة و السلاام و اغاني دالعروسة خداميين فالبيفاان، دخلو للقاعة مع الحضور لداخل .. كانو ثلاثة دالكوشات تما .. كل جوج جلسو فكوشة .. مشاو هناء و يعقوب للكوشة ديالهم و الكاميرا تابعاهم كتتصورهم .. كاتبان صورتهم نيشان فالبلازمات اللي معمرين القاعة و مرة يبانو هوما مرة يبانو العرسان اللي سبقوهم .. تقنية التصوير جد عاالية .. متبعين طريقة لاريجي
جلسو فالكوشة بجوجهم و جات النگافة كاتقاد لهناء فاللبسة ديالها و همساتلهم
-تقابطو مع بعضكم
هناء تأفأفات مجاباتهاش .. حتى حسات بيدو تحطات على يدها .. مشافتش فيه بمرة كاتشوف فالحضور و متأكدة ان النميمة خدااااامة عليهم
ياقوت جالسة متمرتاحاش خصوصا من يد سليمان اللي كاتحسس فيدها بطريقة حمييمية اكثر من اللزوم .. مخلياها تحس بالتبوريشة و السخونية فذاتها .. كايدوز صباعو على يديها بطرييقة خطييرة و كل شوية يقرب ليها حتى كاتحس بأنفاسو قرابينلها و يرجع اللور ثاني .. "لبكها"
اما سمارة و محمد يديهم غي محطوطين جنب بعضهم سمارة مبتاسمة بالزز للكاميرا اما محمد فمخنزر كيف عادتو فالحضور الكثير كايشوف غا فيديه
دازو دقائق عليهم حتى سكتو الاغنية دالعروسة و دخلو الدقة المراكشية مع الدفوووع اللي كل حاجة منها ستة .. جوج جوج للحاجة للعرووسات .. الطياااافر عاامريين بكادوات و الكوليات دالذهب الابيض و جليلبات و تكشيطات و ثوابات وصباابط وحويلقات و اي حاجة تطيح على البال تما .. حطو داكشي تحت عدسات الكاميرات و الدقة المراكشية حيحاااات مزيان حتى ناضو الحضوور كايشطحوو .. العرس كيف العادة مخلط الرجال كايطلو على النسا ولكن مفروقين كل وحدين فجنب يعني مجالسينش مخاالطيين .. خرجو الدقة المراكشية بعدما نوضوووها مزيااان .. عاد وقفو العرسان و خرجو مخليين العروسات بوحدهم .. شوية عاد طلعو مجموعات لفوق يبدلو اللباسي .. مع نزلتهم الثااانية غا وصلو لقاع الدروج و العرسان معاهم .. طبعا بدلو اللبيسات و غيرولهم فالماكياج شوية و كولشي على سنكة عشرة، طلعوهم فالعمارياات و دخلو بيهم وحدة ورا وحدة و الاغااني دالصنهااجي و الصوييري خدااميين محيحيين الجو .. و التصاور خدامين .. البنات شدو حليوات كانو فشبيكات جنبهم كايلوحو على الحضور و يشيرولهم بيديداتهم اللي باقا فيهم الحنة حمرى لوونها خرجلهم .. خصوصا سماارة اللي غاديلها للكحل .. داز العرس محيح على اصوولووو .. بالشطيح و الرديح و الحلااوي بالاشكال و الانواع و التريتور داير خدمتو على اكمل وجه .. حتى وصلو لوقت لاغوب .. نزلو بالكساوي البويض غزاالات فحال شي حمامات مضويين لي بوكي دالورد الابيض و الوردي بين يديهم و الابتسامة دبالزز ففمهم و عينيهم كايدورو فالأرجاء فالضياف
عائلة مالك الجزء الثالث
محتوى القصة
التنقل بين الأجزاء