تعانقو فالجنب وزادو وكيضحكو كدبو لكالو مكينش ليبغي ليك الخير من غير وليديك والصداقة مكيناش ايمي بقات معاها فالسراء والضراء عمرها خلاتها حتى فاش جات للخلة والماجنة فين ما لقات الفرصة كتجي عندها وتطمئن عليها ومكتخليها حتى ضحكها صداقتهم ماليها متيل من بعد نص ساعة تقريبا وصلو لدار شافت ايمي فالطبلة لقات جوج كيسان قالت بتساؤل
ايمي : طلتي دوجا سافرات واش عندك شي ضياف
حياة : واتي غير سكتي دكشي لكنت غنعود ليك موصيبة طاحت على راسي مقادوه فيل زادوه فيلة
ايمي : الله الله اش واقع
حياة : واخا واخا صايبي لينا قهوة بعدا
ايمي ديريكت للكوزينة صايبات القهوة كتسرعها مزيان والفضول قاتلها تعرف اش واقع طلعو الفوق وراتها التصاميم وبدات كتعاود ليها على أزار
سي ازار داير رجل على رجل وكيضرس تفاصيل ديال المشروع لغيدير وكيفكر كيدير اقنع حياة باش متسببش ليهم حتى شي عائق خرجات ليهم من الجنب مكانوش ضربين ليها الحساب حتى كمل هندستو اوقف كيتمشى بشوية اهو يلمح واحد المجموعة من السناجب كيهرسو البندق وكيطعمو الصغار تقدم بشوية لناحيتهم باش ميديرش الحس اخيلعهم بقا مراقبهم مودة كيفاش كيتعاونو بيناتهم وداك الحب والوئام لبيناتهم منظر تقشعر له الأبدان يالله غيتحرك اعفط على واحد الحجرة طاحت به لواحد الحفرة مضلمة تهز شوية وبقا غادي
فواحد الكوخ مضلم مكيتشاف فيه والو بقا غادي بحال شي ضرير كيسبق يديه للقدام باش اعرف فين احط رجليه كيحس براسو غادي فدوامة طويلة شحال من ساعة وهو تم جوع قااااتلو والصهد غادي وكينهج فيه العطش بزاف معارف فين هو ؟؟ ولا فين غادي ؟؟ ولا أش غيدير ؟؟ لعارف بلي خاصو يوصل لبر الأمان والسلام ندم على نهار لقرر فيه انتصر على حياة ويدير شي حاجة ضدها حاول استعمل الحيلة معاها ايروضها كتبان ليه كأسد جاااااعر فأمور كتيرة شكون سول فيه كاع ايكول غبر ولا كاين واش غيبكيو عليه الى مات واش غيبقى فيهم واش غيحسو بغيابو ضحك باستهزاء شكون غيسول فيه باه لمشغول ديما بالشركة والفلوس والابناك لكيهمو هو احطم الرقم القياسي فالمليارات تنهد تنهيدة طويلة حاس بروحو غتخرج وتكا راسو على الحيط فجاة تقلب بيه الحيط لواحد البلاصة أقل مايقال عنها خيااااااالية الربيع فكل بلاصة وقوس قزاح مزين سما الفراشات كيطيرو فكل بلاصة ولحنهم الأخااااد كيسرق قلب الواحد أحصنة وااااعرة فجميع الالوان وشعرهم طويل كيطيرو الهوا والصهيل ديالهم زاد جمال على جمال بقا مصمر عينيه فداك المنضر واش هو فالاحلام واش بصح هو فالدنيا واش كيشوف هدشي حقيقة
حياة وايمي نساو راسهم فالهضرة حياة تعاود وايمي تسمع وتحلل مع راسها وتعاونها تلقى حل
ايمي : لقيت الحل
حياة : مكاين بو حل اهزو قشاوشهم ويخرجو علي
ايمي : ولا اصحبتي من ايمتا ونتي كتصرفي بعنف غادي تخرجيه غير بسياسة
حياة : ييه وشنو هاد الحل
ايمي : ببساطة غادي تخليه ابغي الغابة ويحس بلي ممنحقوش احرم الحيوانات من السكن ديالهم
كانت كتبكي فوسط الشارع حيدات صندالتها وبدات تجري بلا عقل معارفة فين هي ولا فين غدا مرادها الوحيد هو تبعد تبعد لبلاصة ماليها حدود ميكون فيها حد تكون بوحدها جاتها هيستيرية البكاء شلال وسط خدودها تعيا ما تمسح وتكول واش بغاو احبسو رجليها دايزين بالدم ومحساش بيهم كلها فازكة كتقطر حتى ولات دنيا ضبابة فعينيها كتشوف غير تشاش
كتجري وكتمسح دموعها شعرها لصق على وجها وعينيها بزز باش كتحلهم كيبان ليها غير تشاش كلسات فلارض على ركبتها وحطات يديها على وجها كتخنصص هزات عينيها لسما وبقات كدعي
ربي لن أعترض القدر واسأل لماذا ؟ ما أريده وأرجوك أن تحققه لي هو الرحيل من هذه الدوامة المضلمة فقسما بعرشك وجلالتك لم أعد أستطيع التحمل ولا المضي قدما
نزلات راسها وهي يبان ليها واحد تيو تاع الحديد كبير ومدور معاقتش براسها اش كدير مشات تخشات فيه بغات تسد عينيها بغات تمشي من هاد دنيا بغات تنسى ومبغات تشوف حتى حاجة تكات اسرحات رجليها وحطات راسها وداتها عينيها غيبات من بعد ساعات قلال كتحل عينيها على صوت الطيور وقطرات الندى وشمس صباحية مشرقة كيبعت الامل فالنفوس بشوية عليها حتى خرجات من داك تيو لقات قدامها غير شجار والخضورية والطيور كيطيرو من هنا لهنا وقفات مستغربة واش هي مزال ناعسة واش كتحلم اش هاد البلاصة ايمتا جات لهنا شوية وهو يبان ليها واحد راجل فمقتبل العمر ايكون فأواخر العشرينات بقا كيشوف فيها حتى هو مستغرب اش كدير بنت بوحدها هنا تقدم عندها وهي مزال تحت تأتير الصدمة
مصطفى : السلام اختي
حياة : عليكم السلام خويا عفاك فين انا اش هاد البلاصة
مصطفى : هادي كيكتشوفي غابة بعيدة على المدينة شي 1000 كيلومتر
حياة : ( دارت كتشوف فكاع الجوايه حتى بان ليها شحال من تيو بحال هداك لدخلات ليه مصافين تما وهي تسولو ) هادو شكون جابهم لهنا
مصطفى : هادو انا لكنجيبهم من المدينة لهنا بالكاميو
حياة : ( عاد فهمت البلان كيفاش داير ) بغيت نرجع واش مكيدوزوش شي طاكسيات هنا
مصطفى : لا مكيدوز حد هنا تقريبا الى بغيتي تسناي حتى نكمل خدمتي ونرجعك
حياة : شحال غتبقى عاد تكمل
مصطفى : شي سيمانة بحال هكاك
حياة : واخا
فهاد الاسبوع تعودات حياة على العيشة ديال الغابة كتعتني بالاشجار والحيوانات ولات كل صباح كتفيق بنشاط والنفسية ديالها تحسنات بزاف نسات ولا نكولو تنسات داكشي لوقع معاها مصطفى مزوج وحاسبها بحال ختو عودات ليه كولشي وفتحات ليه قلبو مخبات علبه والو احتى هو مقصرش من جهدو بحال خوها الكبير كيعطيها النصائح احاول ايعاونها باش متأزمش النفسية ديالها ومرة مرة كيتعاونو على الخدمة تعلمات بزاف ولات كتبدل تدريجيا مبقاتش فيها الهضرة بزاف والضحكة غير مرة مرة أكتسهى شوية و اليوم اخر يوم فالغابة ولفات الجو ديالها الواعر والراحة والطمأنينة لفيه ولكن وصل اليوم الموعود لغتغادر فيه
مصطفى : ختي حياة يالله راه غنمشيو دابا
حياة : ( مترددة ) واخا
مصطفى : مالك احياة شفتك بحال الى مبغاش تمشي
حياة : ( هزات فيه عينيها واخا هاد المدة القصيرة لجمعتهم ولكن ضغيا كيفهمها ) بصراحة مكرهتش نبقا هنا
مصطفى : يمكن ليك تبقاي مكاين حتى مانع
حياة : ولكن بإينا صفة
مصطفى : تقدري تشدي خدمتي ولكن بشرط
حياة : ( عينيها كيلمعو وبان فيهم الامل ) موافقة غير كول
مصطفى : ( حط يدو على كتفها ) خاصك تكوني قاد ة على العيشة هنا عاد تجي تعيشي فيه كنعرف شحال من مدرب ديال الفنون القتالية باش تقدري تواجهي اي مشكل تعرضتي ليه اعلى ما تكملي غنبني ليك دارك هنا على دوقك
حياة : واخا موافقة ( دارت موراها كتشوف الغابة تنهدات براحة وخدات نفس عميق ) غنرجع فأقرب وقت أكيد
:,:,:?:,;*?:€;€¥
ايمي : هيهو افين مشيتي
حياة : اه اشنو كلتي
ايمي : ماكلت والو فين كنتي ساهية
حياة : كنفكر فالحل ولقيتو دبا يالله نمشيو
ايمي : ياربي السلامة خلعتيني زيدي نشوفو
حياة : اولا خاصني نقلب على داك العتروس فين وصل حيت غبر ليه الأثر
ايمي : معرفت فين غنوصلو معك
مشاو في تجاه الغابة كيقلبو عليه شوية بانت ليها اشارة فساعة ديالها كدل على شي حد دخل لمكانها السري خلات ايمي فبلاصتها ومشات كتجري
ايمي : وهيا مولاي عبد القادر فين مشات هادي وحيااااااة سيري الله يحرق جد طواسلي انا لتبعاك سري نيت انمشي بحالي كاع انا ( دارت تمشي ساعة رجعات تاني ) لا مغنمشيش ولكن كيندير نتبعها وهيا دايرة كي جن تفو عليك الكلبة البكورة الزعترة طعريجت عشورة وااااع ( زلقات ليها رجليها وطاحت )
من بعد دقائق قليلة فدار حياة كالسة ايمي منفخة ريشها وتكول بغات تدوي ولا تشوف جيهت حياة اما فبلاصة خرا كاينة حياة كدير شي أعشاب لرجل أزار أهو متكي مغيب على هاد العالم الله يحضر السلامة اعلم الله اش وقع ليه تاني وأشمن موصيبة طاح فيها
ايمي : دابا مشيتي كتجري باش تمشي تشوفي هاد راس طارو ومخلياني بوحدي دابا بسبابك منقدش نمشي على رجلي أخر مرة نجي لهنا عمري باقي نعتب هاد البلاصة مزال
حياة : ( تقرصات من هضرتها وباينة على ملامحها الحزن ولكن مبغاتش تبين ) صافي واخا ديري لبغيتي سمحي ليا انا لغلطت
إيمي : ( عرفات أش كالت أهي تستدرك الموقف ) ييه بغا تهناي مني ايوا والله لكانت ليك الجنية مزيان تبارك الله انا لاصقاك لاصقاك غير بلا ماتحلمي شي نهار تهناي مني
حياة : ( ضحكت بعفوية على هضرتها ايمي الداء والدواء ) ههههههه صافي مكلت والو استسلم
مشات جابت ليه بلاطو تاع الماكلة كلا حتى عمر كرشو مزيان طاح على داك البلاطو بحال الى عمرو ضاق النعمة ديك الجيلتمانية تاع صحاب العاقة مسا يديرها حتى المعلقة مكلاش بيها كفض على كمامو وبدا ينقب داز على الأخضر واليابس سترجع صحتو وعافيتو واييمي غير كتبقلل عينيها مصدومة
إيمي : واش نتا جيتي من عهد الرومان عمرك شفتي الماكلة قرن موكلش
حياة : اييييمي
أزار : ( عاد عاق براسو ) معقلتش اش وقع ليا طحت فواحد الحفرة مضلمة ومقديتش نخرج منها بقيت فيها نهار كامل من صباح حتى لدابا ( شاف فحياة ) واش نتي لعتقتيني كيفاش درتي حتى لقيتيني
حياة : ( تنهدات براحة ) كنت دايزة فالغابة وشفت حفرة تما عرفتك اطيح تما حيت نهار كامل انتا غايب
حياة : كنت دايزة من ديك الطريق ابانت ليا ديك الحفرة عرفتك اتكون طايح تما
أزار : اه شكرا ( بقا كيفكر كيفاش واش كان كيحلم يعني ديك البلاصة ليشاف غير مجرد حلم مكاين لقوس قزح لا أحصنة لاهم يحزنون تش كيوقع ليا هنا خاصني نرجع بحالي براكة علي )
حياة : واش تبغي تشرب شي حاجة
أزار : ( بقا كيشوف فيها مطول من ايمتا كتعامل معاه بلطف ) لا ما بغيت والو خاصني نمشي انحاول نصلح طموبيلتي دابا طريق اتكون مزيانة
شداتو من يدو وضوراتها مور راسها ودارت اليد الخرا على خسرو داتو معاه للغرفة فاش غينعس وهي مضورا وجها لجيهة الخرا معجبهاش الحال على اخر يامها تعاون عدوها ....هو فهمها ابقا كيشوف فيها منتبهوش حتى خرجو فالطبلة وطاحو على الفوطوي لتما طاح هو اللول وطاحت عليه حيت مزال شادة ليه فيديه بالتالي جارها معاه تلاقاو الأعين ببعضيتهم ولأول مرة يلاحظ الغموض لفيهم وداك لون الكريستالي ديالهم بقا كيشوف فيها تمعن النضر فيها عمرو ملاحظ هاد الكتلة الرائعة ديال الجمال لقدامو .....اماشي غير هو حتى الأنسة حياة تصدمات فالجمال الآخاد لفيه وفتفاحة أدم لبارزة كطلع اتهبط وشفايفو كيرتاجفو و علاش لا واش كاين شي حد اصبر إيشوف قدامو الكرز وميطمعش ادوق ..... أزار وعا على راسو وتفكر بلي هي مزوجة ضميرو ميسمحش ليه ادير شي حاجة خايبة يالله بغا يتحرك وهو يتعكل فرجليه و نطق بألم :
حياة : أي اريم توحشتك بلا قياس نتي النقطة البيضة فحياتي لعمرها تنسى ليا ولا تمشي من بالي الكية لتكويت من جهتك عمرها تبرا الحب كولو ليك نتي بوحدك ( مزال حتى مكملات هضرتها خلطات عليها ايمان )
إيمي : اهااااه الحب كولو ليها وانا اش ايبقا ليا ا
حياة : حميميقة نتي الكل فالكل
ايمي : براكة من داك التحنقيز علياش تافقنا أ
حياة : وراه ماشي لخاطري جنوني مخاملينوش ميمكنش نتصرف معاه بطريقة زوينة ونخليه ابغي الغابة
شدات حياة لاحتها على الارض وبقات كتهر فيها وكيضحكو ضحكة كتنبع من القلب وكتنسيك فكاع الجروح شكون كال بلي الصداقة مبقاتش وكاينين غير صحاب المصلاحة ..... الصداقة أسمى من الحب بحد ذاتو الى لقاك الله بشي شخص بحالك فهاديك هي الدنيا ومافيها اضحك لضحكك ويبكي لحزنك فالشدة معاك والفرحة تلقاه كيطير كتر منك ....بقاو على داك الحال حتى تفشو ونساو همهم
ازار كالس وساهي كتراودو تاني نفس الأفكار
حياة اش كدير فالغابة ؟؟؟
فين راجلها ؟؟
فين بنتها ؟؟
اواليديها علاش مكاينينش هنا يك كال تولدات هنا ؟؟؟
بقا فكرة تديه افكرة تجيبو حتى مشا بالو لديك اللقطة فاش طاحت عليه وتقابلو بجوج ومكيفصلهومش غير سينتمترات قلال
ازار ساهي فاللحضة لكانت حياة قريبة منو علاش حس بجسمو كيرتاجف وكل مرة كيمشي بالو لديك اللقطة انتافض دوك الافكار من مخيلتو هي مزوجة ميمكنش ليا نفكر فيها ولا كاع طيح فبالي اش هدشي اسيدي ربي هز الغطا عليه امشا فسبات عميق
أصبحنا وأصبح الملك لله العصافير كعادتهم منورين وزادو جمالية على الجو المشرق الصباحي تسلالات خيوط الشمس من الشرجم على ازار بدا كيحرك وجهو بإنزعاج وكيلاقي حجبانو ووجهو مكمش شوية وهو يبان واحد الضل على راسو ونعس بارتياح تاني تحيد وبدا كيكمش وجهو مرة خرا حياة بقات ساهية فملامحو الشمس الذهبية لعلا وجهو زادتو إشراق على نور مشات وقفات قدام الشمس كتحجبها عليه وهي تسد الشرجم ودرات الريدويات ومشات خرجات لقات ايمي كعاتها فايقة ناااااشطة ونازلة من الدروج بشوية عليها بقات كتلبس سبرديلتها اوصلات عليها ايمي
حياة : غنمشي نضرب دورة ونرجع خليه بلا ماتفيقيه وحرارتو نخافضات مابيه والو خاصو غير الراحة
ايمي : ناري على الخطية واخا غير سربي تلقايني وجدت كولشي
حياة : هههههه واخا هاني غادة مغديش نطعطل اصلا
هزات الكيت ودارت القب على راسها ومشات كتجري وميات فكرة وفكرة كطنطن فراسها مشات لوسط واحد الخضورية وكلسات كدير اليوغا واخا معندها عقل لشي يوغا ولا شي تركيز ولكن لفيها ممهنيها ميمكنش ليها تبقا
ريحة كتشهي وجو كيخلي بنادم ارتاح حل عينيه على أصوات غناء الطيور اول مرة ينعس مرتاح ويفيق على داك المنضر هكاك بلا حتى شي صداع والبرودية واعرة طبيعية مكاين لا لكليم ولاهم يحزنون ناض بشوية عليه وكيطل من الشرجم بقا ساهي وكيشم أكبر حجم من الهواء ليقدر ادخلو للجسم ديالو بحال الى كيتدوق المذاق ديال الهواء لماليه مذاااق تنفس بأريحية و مشا كيعرج لبرا ريحت القهوة تغلغلات للداخل ديالو مشا تابع الريحة لبرا لقا الطبلة عامرة بما لذ وطاب وعلاش لا وإيمي فينما تمشي تخلي الطابع ديالها هاوية للطبخ تبسمات بإحراج من النضرات ديالو للمكلة
إيمي : ( وااااع هذا عمرو مشاف الطعام ياك غير البارح طاح على الطبسيل كان غيكلو حتى هو ) احم احم مسيو ازار تفضل كلس
أزار : فين ماوكلي شتو كاع مابان اليوم
إيمي : نعام كيفاش
ازار : اه سمحي ليا بغيت تكول مدام حياة
إيمي : مدام حياة ؟؟؟ اه واش حياة مشات دير سبور دابا ترجع
مشات إيمي جابت أتاي وحطاتو وهزات كاس العصير كتشرب منو مبغاتش تبدا فطورها قبل ماتجي حياة بقات كتشوف فالغابة وعينيها مشاو لبعيد من ديما كتحاول تقنع حياة ترجع للمدينة ولكن علاش هي بالذات كيعجبها داك الجو ومكرهاتش تسكن فيه ولات كتسنا غير ايمتا تسالي شغالها وتجي عند حياة واش حيت توحشات حياة ولا حيت توحشات هاد البلاصة قاطع أفكارها هضرت أزار لنزلات عليها بحال الصاعقة
أزار : فين راجل حياة أبنتها شتهم مساكنينش معاها
إيمي : ( خرج ليها العصير من نيفها وكتكحب ) كح كح كح
شنو بنت حياة وراجلها كح كح كح حياة كح كح بنتها كح كح
مشات ايمي كتجري للداخل تغسل حالتها وخلات ازار مستغرب من ردة الفعل ديالها حياة غامضة بلا قياس كيحس بيها لغز صعيب القا الشيفرة ديالو تنهد تنهيدة طويلة وتكا راسو على الكرسي وسد عينيه مرخي بحال الى مكسل فالحمام.... أما إيمي فبقات كتبركم بوحدها
إيمي : اويلي هادي كالت ليه مزوجة وعندها بنت من الفوق حياة اختي منين جبتي هاد الكدوب كامل ومن ايمتا ونتي كتكدبي اش غندير انا دابا الى عاود سولني
خرجات لقاتو مسرح معلابالوش حتى هيا كلسات فبلاصتها وهزات داك الكاس تكملو و جاية حياة جيهتهم كتجري تنهدات ايمي بارتياح كالت ليهم صباح الخير وضغيا طلعات الفوق دوشات اطرفات حالتها بلا مادير واااالو كحلات عينيها بالكحل البلدي زاد عيونها أكثر جماااااالية خيط كحل على عيون كريستالية خضرا ورموش خفاف ومتوسطين مصغار ماكبار والبؤبؤة ديالهم كتشعش لبسات سروال ديال توب كحل مع شوميز فالبيض وجمعات شعرها من القدام وخلاتو مطلوق نزلات عندهم وعصافير بطنها تزقزق ....الطبلة دائرية ومحاوطينها تلاتة دالكراسة كلسات اجات عينيها على عينين ازار جات فبالهم نيشان اللقطة فاش طاحو على بعضياتهم تزنكات حياة بالحشمة ونزلات راسها عطاتها لسريط والتمرميط كتنقب من هنا وهنا فيها الجوع ديال الدنيا والدين مكاين لفورشيط لا هم يحزانون هزات واحد 4 فرمجات حطاتهم وسط مسمنة ودوراتها وبقات عض يانا تعض حتى تسالا ليها العصير وهي ضور جيهت ايمي نسات كاع واش كاي شي حد حداها ايوا هذا هو الجوع امايدير بنادم افكر فكرشو هي لولة عاد اشوف شي حاجة خرا من بعد
حياة : إيمي عطيني العصير لحداك
إيمي : ( مداتو ليها شداتو حياة ولكن ايمي مطلقاهش بقات شاداه حتى هي حتى شافت فيها حياة ولقاتها كتحلفهم فيها غير بعينيها ومن طلقاتو) واخا خودي
حياة : ( باستغراب ) شكرا
فطرو على خاطر خاطرهم فجو لايخلو من الضحك غير بين إيمي وحياة أما أزار محاملش الوضع بحال الى كالس على راسو وخا مرة مرة كيخطف نضرة فحياة الضحكة والغمزات لكيبانو فوجها وسنيناتها البويض بحال اللؤلؤ بلا هواه عينيه كيمشيو ليها نيشان أما هي كاع مكاينة فهاد العالم كدوق اتبنن وتهضر مع ايمي أفاش زوينة إيمي لكلس حداها ميمكنش ابقا قالب غوبيشتو كيضحك بزز منو سلاو فطورهم اناضو ايجمعو الطبلة ويغسلو الماعن مخاصمين على شكون فيهم دير الصبون اشكون تشلل شوية قلبوها ترياش وقلبو ديك الدار بحال الدايزة فيها شي حرب ليلقات شي حاجة كتشير بيها ايمي هازة الصندالة
إيمي : ( هزات مخدة وشيرات بيها شوية تقلب وجها لمكتبة ضحكت بشر هزات واحد الكتاب ) اهاه مبغيتيش
حياة : كووووووولشي الا كتوباتي الله يرحم من رباك
إيمي : دابا متافقين ايوا زيدي قدامي للكوزينة
زات حياة للكوزينة منفخة معاجبها حال المعكازة لخرا اهيا توقف على ايمي وشداتها من شعرها
حياة : ياك اناااااا حياة تلوي ليا ذراعي اناااا ياك
إيمي : ( شدات ليها حتى هي من شعرها ) وحق الله اما طلقيني حتى نتف ختي شعري خاسرة عليه البروديات زبالة ديال الفلوس ونتي تجيه تكمشي ليا بدوك البالات لعندك
تجمعو على دوك الميعنات حتى كملو اجمعو دار وهزات حياة شي أشاب دارتهم فالما سخون اخلاتو عطا واحد الريحة هائلة فالدار تدهل ديك الدار وما تسخا كاااااع تخرج منها طلعو بجوج للفوق ودفعاتها على النموسية
إيمي : أجي لموك من إيمتا ونتي كتكدبي
حياة : علاش ايمتا كدبت انا
إيمي : بلا ما تبوزاي علي علاش كلتي لأزار مزوجة وعندك بنت مزال من الفوق
حياة : ولكن انا مطلت ليه واااالو
ايمي : ولكن هو سول على راجلك ابنتك كيفاش زعما
حياة : اه حكا شاف ريم وتصويرتي ديال العرس لمعلقا حدا المكتبة يعني ايسحاب ليه ريم بنتي وانا مزوجة
حياة : دابا اسحاب ليه انا مزوجة وعندي بنت واااااع ههههههه مزيان نيت حسن ليه باش احتارم مرات الراجل ههههههههه
إيمي : سكتي البكرة سكتي خليني نفكر
أزار هز قشاوشو ومشا كيتمشا حتى كلس فواحد.البلاصة حمقاتو هاد الغابة غير مكتزيد تفاجئو نهار على نهار
كالس ومسرح رجلو قدامو ورد راسو اللور علاش شاغل بالو بهاد حياة علاش نهار اماطل كيفكر فاللغز ديالها والسر لمخبياه تفكر الضحكة لكانت نابعة من قلبها فاش كانت كتدابز مع ايمي عمرو شاف الضحكة ديالها حتى اليوم ياترى واش حيت مكتحملوش ولا عندها فوبية من الرجال ولا شنو قاطع افكارو يد تحطات عليه
أزار : ( دار نص دورة بعينيه) اووووه شكون شرفنا
إياد : ( كلس حداه ) اخر حاجة نتوقعها تكون فيها هيا هنا
أزار : ماشي لخاطري
إياد : ( عاد نتابه لرجلو ) ماااالك فرجليك
أزار : ( ضحك باستهزاء ) فهاد الغابة كنوض من موصيبة كنطيح فوحدة خرا غير طلب السلامة
إياد : ( تكا راسو ورجع اللور ) اخويا انا باقي باغي نعيش سالم اغانم مزال خصني نطيح أروج و بسبوستي وخلاص ياااااسو وسونا نااااري نهار نطيحهم فيا متقدني الفرحة
أزار : ( خنزر فيه بنص عين ) من نيتك داوي
إياد : خلينا من الضحك كوليا اش كدير هنا شحال وانا نقلب عليك وفاللخر نلقاك هنا
خرجات وهي محملاش راسها لقاتو مكاينش فالطبلة تنفسات بعمق انها تشد الهضرة مع الجنس الخشن أشبه بالوقوع فبئر غاااااارق ولكن كيبقا هدفها هو الأهم خاص دير أي حاجة على قبل الغابة لفتحات ليها أحضانها من بعد ماتشردات من طرف عائلتها لولداتها وحرماتها من اعز الناس ليها والشخص الوحيد لكتحس بيه قريب من قلبها وروحها
ترددات تمشي عندو كتخطي خطوة وترجع اللور قررات دير بالناقص ويالله غتزيد ترجع بحالها لمحات بيشو وساري كيلعبو هما وشي كلاب خرين وراموس كيطير من شجرة لشجرة بقات كدورها فمخها الى مشات ليها الغابة من بين يديها كيغدير تستحمل تاني هزات مونطو لاحتو على كتافها وزات تقلب عليه وراسها غينفاجر بالتفكير هاد الخطوة لغادي تخطيها صعيبة عليها بزاف واش تقدر تنجح فخطتها وتخليه ابغي الغابة ويحن فيها ويمشي ادير مشروعو فبلاصة خرا ولا غادي يبقى على قرارو بقات غادية مدة ماشي كتيرة حيت كان قريب من دار مابعيدش بزاف بدات كتسمع شي هضرة ديال جوج ديال الأشخاص ومحدها كتقرب كتزيد تسمع الهضرة لمحات شي راجل كالس مع أزار تعصبات بالبيان اكيد هضر معاه باش انفذو التخطيط ديال النشروع ديالهم كتزرب فخطواتها ووجها حمر وعروق يديها خرجو يالله غتوصل عندهم سمعات هضرة صمكاتها
أزار : اشمن أب سيمانة ومبانش ليا الأثر وفاللخر اسولني على المشروع فين وصل واش كملت التخطيط ديالو درت اكسيدون وحتى حد مسول فين كاين لهاد الدرجة حياتي رخيصة عندهم
حياة : احم احم
أزار : ( دار موراه ) ماوكلي شرفنا
إياد :( دار نفس الدورة شاف فحياة مطول ) اوووه معقلتش فين شفتك
حياة: لشافني مرة وحدة عمرو ينساني حمد الله حيت نسيتيني ومخليتكش تتفكرني
ناض كيحاول ميضغطش بزاف على رجليه شدات ليه يديه دارتها ورا عنقو اوحدة خرا دارتها فالخر ديالو تحت نضرات الاستغراب ديال ازار لمتعجب فيها كل التعجب
حياة : متفورسيش على راسك غير بشوية ( الطمع الجشع الحقد الكره اسحاب ليا غير انا لكنعاني من الوجود ديالهم فهاد الحياة ساعة حتى نتا أسي ازار بحالي مبقاش الهدف ديالي نخليك تبغي الغابة وإنما نخليك تنسا كاع الطمع ديال الدنيا ونمحي هاد النضرة ديال الحزن لكاينة فعينيك عذا وعد)
بقاو غاديين واحد المسافة والصمت يعم المكان غير شي اصوات الحيوانات وصوت خطواتهم هما لكيتسمعو...
عيناك براءة الطبيعة الجزء الثالث
محتوى القصة
التنقل بين الأجزاء