آريا تنهدات و زيرات على ولدها معنقاه حتى سمعاتو قطع لحس .. عرفات اتكون غا موجة الأعصاب جاتو فجرها فالبكا .. سوا الراجل سوا لمرأة إلا كانو أقوياء و ديما كنشوفو عليهم نظرة التصلب .. أكيد ايجي واحد النهار و نشوفوهم ضعاف بزااف بحال شي بيبي .. و كيبكيو بحال شي ولد صغيير
داز لوقت ..
كان حادر راسو و آريا مزال كتطبطب على ضهرو
ساجد : أمجاد صافا دابا؟
جمع لوقفة كيمسح على راسو .. فيساع عقد حواجبو : صافا
آريا : أمجاد محتاجين تفسير .. و مال حالتك كلها دم بحال هاكة
أمجاد تنهد و مشا لعند غرفة ثلوج وقف حدا الشرجم ديال الزاج كيشوف فيها .. حتى حس بيهم وقفو حداه
آريا مستغربة : شكون هاد لبنت اولديي !
أمجاد : لي خرجات فلينا بالطموبيل و بسبابها مات ولديي
آريا حطات ايديها على فمها : اوااه ؟؟! .. . فين شفتيها ؟ وكيفاش حتى هناا
ساجد بجدية : شنو سميتها ؟
أمجاد : ثلوج الناجيي
بقاو كيشوفو فييه مصدوميين لما برد ليهم فالركابيي
ساجد : واش متأكد ؟؟
آريا : اويلييي هادي هي بنت لآلة حفصة .. خاص نتاصل بيها نعلمها كانت ديما كتعاود ليا عليها مسكينة مقهورة على بنتها و كنظن معرفاش بقضية لكسيدة
جبدات آريا التيليفون باغا تاصل بحفصة حتى كتحس بيه طار من بين ايديها .. هزات راسها شافت فأمجاد : علاش اولديي ؟
أمجاد ببرودة : مبغيت حتى واحد اعرفها فيين هي
ساجد : ترجل معانا .. وليديها من حقهم اعرفو
أمجاد : مغادي نخلي حتى واحد ايديها
ساجد : علاش بالسلامة ؟
أمجاد : حيت بغيت و صافيي
آريا شافت ولدها جامع ايدو على شكل قبضة باينة فيه ايشعل مع باه تنهدات : صافيي غا تهدن .. كمل لينا اولدي علاش هي هنا ؟
أمجاد : كانت حاملة بولدي و جهدات دابا ..و حتى وجها محروق بسباب حادث
آريا : اويلييي جهدات ؟ محروقة ! .. .
قاطعها : متبقاوش تسولونيي
خلاهم واقفين و مشا .. شوية بان ليهم جاي و فإيدو كاس دلقهوة و حجبانو معقوديين
ساجد : يلله لدار بعدا بدل هاد لحالة
أمجاد : مرتاح هاكة
آريا : انا نبقا معاها متخافش اولديي ... سير بدل و اجي شوف حالتك راه كتبكيي
زرب عليه و جرو معاه . فحيين آريا تلافتت كتشوف فثلوج لي مدورين لفاصمة على وجها .. تنهدات : مفهمتش كيفااش خليتي ولديي ابكي علييك .. قصتكم قصة بجوج
تفكرات فاش قال ليها جهدات بقا فيها لحال مكرهاتش تشوف ولد ولدها .. واخة بقاو عندها تساؤلات كيفاش حتى نعسو بجوج و هي لي قاتلة ليه لينا و ولدو .. هاد لقصة جاتها فشكل !
صبح الصباح ..
حلات عينيها ببطء مطولا الشوفة فالسقف حتى كتسمع شي صوت حداها : صباح الخير
تلافتت بالشوية كتبان ليها امرأة باقا صغيرة و بسباب أناقتها تحلفي عليها فالعشرينات .. كتشعل بالنقا و الزين
بتاسمات ليها : معرفتش واش غادي تعرفيني ولكن أنا هي الأم ديال أمجاد .. كيف بقيتي شوية ابنتيي ؟
ثلوج خرجات عينيها سرعان مقلبها بدا كيخفق بالزربة حتى داز شحال عاد تهدنات و نطقات بصوت منغنغ بالبكا : بغيت نقوليك شي حاجة الآلة
آريا : لاش لآلة قوليلي آريا
ثلوج بدات كترتاح ليها : آريا سميتك زوينة
آريا : ههه كون تشوفي نتيي .. ثلوج معنا زويين
فهاد الأثناء دخل الطبيب لعندهم : لمريضة ديالنا كتبان ليا ناشطة ... خاصك تعاوني معانا و تكوني أليز باش نديرو خدمتنا اوكيي
آريا طبطبات على ايد ثلوج : هاد لبنت مهمة بزاف لولديي .. دير خدمتك و فوق خدمتك خاصها التشافا انشالله
الطبيب : أكيد .. ممكن تخرجي باش نفحصها
هزات آريا راسها باه و تلافتت لعند ثلوج بتاسمات ليها عاد مشات خرجات من لغرفة .. لقات ولدها جالس كيشوف لبعييد .. تنهدات معرفاش لمشكيل من راسو و لا ساسو ولكن لي عارفة هو ماشي لوقت دابا باش تبدا تسول
شوية خرج الطبيب و شاف فأمجاد شير ليه حتى مشا لعندو : مسيو أمجاد لمريضة بغاتك
أمجاد حس بقلبو تزير .. هز راسو باه و دخل لعندها عاد سد لباب
ثلوج كانت مدورة وجها لجنب حابسة دموعها و كتحس بأنفاسو كيقربو لعندها
أمجاد معارف ميقول : ثلووج
قرب لعندها ساكت
ثلوج شافت لعندو حتى تلاقاو عينيهم بجوج
أمجاد : شوية دابا ؟
ثلوج : بغيت نهدر معاك و خاص تسمعنيي
أمجاد ببرودة : بداي
ثلوج : مبغيتش نشوفك مزال و لا نشوف وجهك .. مبغيتش نحس بييك كاين فالبلاصة لي أنا فييها .. لولد لي كان جامعنا مشا .. صافي تاصل بالبوليس خليوهم اديوني بعدما نصح
ضحكات باستهزاء : هادي إلا صحيت
أمجاد جمع ايدو على شكل قبضة و صدرو كيطلع و اهبط : مكاين لاش .. لقضية غادي تعاود تفتح و غادي اتقدمو الدلائل لقاضي .. لغلط منكم بجوج .. انا لي غادي نتكلف بهادشي نتي صحي و صافيي
ثلوج طولات الشوفة فعينيه : و مبغيتش نشوفك
عض فمو من لداخل كيصفار و اخضار : لي بغيتي
غا كمل كلامو خرج من لغرفة جامع ايدو على شكل قبضة كيزفر و عروقو بارزين .. حتى تصح عاد اتفاهم معاها على هاد لجملة ديال مبغيتش نشوفك .. دابا لي فيها اكفيها بلاما ازيد عليها
مشات لعندو آريا كتشوف حالتو حالة : مالك اولديي ؟
أمجاد صعر : واالوو
تقلقات آريا و بغات تمشي حتى كيجرها باس ليها جبينها : سمحي لينا البرازيلية .. غا صبري عليا
آريا : مكنبغيش نشوفك معصب
أمجاد : هادشي لي عطا الله
آريا : فراسك خوك ايخطب خت ثلوج
أمجاد هز حاجبو : كيفاش .. أزار !! متأكدة ؟
آريا : اه ... قاليك منها نخلاق
أمجاد ستغرب خوه و الزواج هادشي مدخلش لراسو : مزيان الآلة ... مبغيت حتى واحد اعرف بهادشي من غيرك و لواليد
آريا : كون هانيي
فالجيهة لخرى ..
جالسة مغوبشة و مها مقابلة معاها : اجيي تفطريي .. اهديك الله
جا لعندهم لحاج : مالكم
حفصة : قاتلك مباغاش تزوج .. و مبغاتش تفطر
لحاج : اوا صافي إلا بنتي مبغاتش تزوج متزوجش .. حتى تكبر و اجي ولد الناس و تزوج
حنان خرجات عينيها كتفكر فالبكرة لي مشات ليها و شرفها لي طار : صافي قابلة
حفصة مصغرة عينيها : قابلة على شنو ؟
حنان : قابلة اماما بلاما تبقاي ت ...
قاطعها لحاج : خلي لبنت حشمانة .. بعدي منها .. هاي هاي على لفلوسة غادي تزوج حتى هي
حنان فخاطرها : كون تعرف علاش غادي نتزوج اضرك خاطرك
لحاج : فطرو .. خاص نهدر مع سي ساجد على لموضوع
حفصة : اكون خير انشالله
شافت فبنتها : هاي هاي على بنتيي غادي نفرح بيها
بتاسمات حنان بزز هي لي عارفة هاد الزواج علاش دار
دازو أيام على لحادثة ..
يلله مؤخرا باش دارت عملية التجميل للولا و بدات كتشد فراسها .. كانت جالسة على طرف دالسرير كتشوف فالشرجم و لماسك على وجها مباغا حتى واحد اشوفها بهاد لحروق لي على كمارتها .. من داك النهار لي قالت ليه سير مبغيتش نشوفك مبقات شافتو و لا حسات بوجودو .. عاد بدات كترتاح و تقاد حياتها خصوصاً فاش جاو عندها لبوليس خداو أقوالها بسباب لقضية ديال لكسيدة .. سولوها أسئلة محددة و هي جوبات عليهم عاد مشاو و مبقاوش رجعو بالمرة .. عرفات اتكون لقضية تسدات و كلشي رجع لمجراه .. مفهماتش علاش تدخل و عاونها تخرج راسها من هاد لوحلة مع لعلم قتلات ليه لمرأة لي كان ايتزوج بيها و ولدو لول و الثانيي
سمعات لباب تحل تلافتت حتى كتبان ليها لممرضة بتاسمات ليها و رجعات كتشوف لبعييد
لممرضة قربات لعندها : آنسة ثلوج شوية دابا ؟
ثلوج : لحمدلله
لممرضة : بقاو لييك جوج عمليات أخريين ... فالليل فاش تبغي تنعسي حيدي لماسك من على وجهك خاصو اتهوى فهمتي
ثلوج : مكنبغي اشوفني حتى واحد بهاد لحالة
لممرضة : أي واحد داز من هاد لمرحلة و لحمدلله دابا مزيان
ثلوج هزات راسها باه
لممرضة : شوية ايجي الطبيب افحصك اوكي .. هاني مشيت
ثلوج : اوكيي
خلاتها حتى مشات و وقفات لبسات فرجليها و خرجات مع لباب بقات غادة فالكولوار حتى لحديقة لي على برى .. قصدات كرسي تماك مشات جلسات عليه .. عجبها لحال بالنفسية الجديدة ديالها .. الأطباء قايمين بالواجب كلا مرة كيجي عندها طبيب نفسي كيبقا معاها حتى كترتاح و امشي .. مهليين فيها بالمزيان
حسات بشي واحد جلس حداها ميلات شفايفها عرفاتو غا من ريحتو
بغات تنطق حسات بيه حاوطها من خصرها و عنقها ..خرجات عينيها : شكاديير ؟ بععد منيي
تنهد تنهيدة عمييقة : شششش سكتييي
ثلوج كمشات عينيها : بععد المجررممم
رخف منها و بعد كيشوف فعويناتها لي تحت لماسك : شوية ؟
تنترات منو و تكحازات مدورة وجها مبغاتوش اشوفها فهاد لوضع و هي محروقة
أمجاد : عندي ليك شي خبار
ثلوج عطياه بالضهر : شنو
أمجاد حاوط كرشها و قربها لعندو .. شوية زرب عليها جلسها قدامو بغات التنتر حكمها مزير عليها
ثلوج تجننات : واش باغيي تسطينيي ؟
أمجاد : اه التسطية مزيانة
ثلوج وجهات صبعها ليه معصبة : شووف ..
قاطعها فاش عض ليها صبعها : شنوو الآلة سنبلة
ميلات شفايفها : سميتي ثلوج ماشي سنبلة
أمجاد : ثلوج عندي معاها لحسابات و لا جيت نهدر عليهم غادي نصدق مفرشخها هنا . الدوسي عمر .. داكشي علاش كنصبر راسي بسنبلة
أمجاد : و انا باغي نشوف لعدوة دياليي .. إلا نسيتي نفكرك
ثلوج : كتحللممم مبقا عندك باش تشدنيي
أمجاد طلع معاها بقرصة حتى غوتات من حر الألم : توحشتيي لعصة لسانك طواال
بدات كتبكييي حتى تلف و خشاها فصدرو كيطبطب عليها : ششش عامرة تبرهيش و تبوحييط
ثلوج كتنخصص : بعععد منييي
أمجاد صعر : سسكتييييي من لبكاااا ... يلله قرصيني حتى انا باش نتعادلو
هزات راسها من وسط حضنو و خشات صبعها جيهت عنقو باغا تقرصو : غاديي ندير ليك قرصة الإبتدائي
أمجاد طول فيها الشوفة : ديري نشووف
ثلوج حيدات صباعها و بغات توقف ساعة معندنا فين تنفنف شادها شدة لعما فالظلمة
تجننات : أمجااااااااااد عيقتيييي
حسات على راسها نطقات سميتو ميلات شفايفها و خفضات صوتها : بببعععدد
جمع لوقفة و وقف حتى هو هازها وسط ايديه و قاصد لمستشفى نيشان لداخل حتى لغرفتها .. كانو كاع الناس لي كيتلاقاو معاهم فالكولوار كيبقاو اشوفو فييهم
حطها على السرير بالشوية حتى دخل الطبيب : ثلوج جيت ملقيتكش ؟
أمجاد رجع خطوة لور كيطلع و اهبط و حاجبو مهزوز .. جمع ايدو على شكل قبضة كيتفرج فالفيلم
ثلوج بتاسمات ليه كترتاح لهاد الطبيب واخة هي من النوع لي كيخاف من الدوايات و جو المستشفيات ولكن خلاها تنسا أنها ماشي فدارهم و إنما ففترة علاج و غتدوز
الطبيب قرب لعندها : كيف صبحات الثلجة ديالنا
ثلوج : بيخير هه
أمجاد بقا راجع باللور حتى تكالا بالحيط و هو استغل لفرصة خلا رجل مسرحها و لاخرة على لحيط .. وقفت الشماكرية فراس الدرب خخ ... هز ايدو كيحك فلحيتو باهتمام و عينو علييهم كيبانولو منساجمين ناسينو واش كاين .. عض فمو من لداخل و كمل لفراجة حتى خرج الطبيب و تسد لباب
نطق ببرودة : عاجبك كيتلمس فيك ؟ .. و ضحكتي لييه ؟
ثلوج عرفاتو رجعات ليه النقشة عوتانيي : ماشي سوقك .. هادي حياتي معندك حتى دخل فييها ديها غا فراسك .. حتى حاجة مبقات كتربطنيي بييك باش تهدر
تقاد فالوقفة قبل امشي اقصدها جمع قبضة ايدو و خرجها فالحيط كيغليي حتى غوتات .. زفر و تلافت لعندها كيقرب و ايدو على لحيتو كيحك فيها
تنهد كيحاول اتكالما و ميبانش معصب : علاش ضحكتي لييه؟
تكات على السرير عطياه بالظهر كتدعي فييه .. كتسنا غا تشافا انشالله و تحزم لييه .. داك الساعة مستحيل تخلييه ادور بيها و لا يغوت عليها
أمجاد ببرودة : مبغيتيش تشوفي خطبة ختك ؟
ثلوج حلات عينيها : ختيي ؟؟
جلسات على السرير فدهشة : شنو كتقول ؟
أمجاد جمع لوقفة و مشا لعندها مد ليها التيليفون .. خداتو من عندو مستغربة غا شداتو وسعات عينيها من لفيديو لي قدامها .. عرفتها شي كاميرا ديال لمراقبة
فالجيهة لخرى ..
كانت جالسة حدا حفصة مقدراش تهز راسها للفوق .. ختارو لخطبة تكون كبيرة بلاش لعرس .. بغاوها تدار فحديقة دلقصر و داكشي لي كان .. مقادين جليسة على حقها و طريقها و اللمة مجموعة .. لحاج فرحان مقداه فرحة ايتناسب مع آل عمران خخ .. . كانت حاضرة حتى خالت أزار و راجلها و جدودو لبرازليين .. مكايناش غا ندى و بدر الدين لي مشاو لنيويورك غبرو .. أما أمجاد ممحسوبش ديما غابر مكاين حتى أمل أن شخصيتو تبدل شي نهار
آريا واقفة على الشغل بايديها .. هزات لبلاطو لفييه لحليب و الثمر و لخواتم عاد مشات حطاتو فوق طابلة دالزاج لي وسط الجليسة
شافت فحنان : اجيي ابنتيي باش تركبو لخواتم
أزار كيشوف فيها بنص عين .. بقا متبعها و هي كي مزنكة غادي طرطق بالحمورية حتى جلسات حداه كتقفقف
تلافت لعندها : مغاديش ناكلك متخافيش
حس بيها رجفات من هدرتو و زادت تزنكات ضحكاتو
آريا خاطبت تغريد : لفلوسة ديالنا هي لي غادي تمد ليكم لحليب و الثمر ههه .. اجي ابنتيي
ثلوج كتفرج و دموعها هابطين و هو جالس حداها محاساش بوجودو كل تركيزها مع داكشي لي كتشوف قدامها واخة مفاهمة والو كيفاش ؟ و امتى ؟ و شنو وقع ؟ ولكن لي عارفة هو توحششت عائلتها كتر و بزاف .. توحشتهم لدرجة لعمق
أمجاد : لي هازة لبلاطو ختي
ثلوج كتنخصص : مكتشبهش لييك .. هي شهبة بحال ماماك .. نتا ملامحك كحلين معرت لمن شبهتي ايكونو غا مربيينك
أمجاد هاز حاجبو : اندير راسي مسمعت والو
ثلوج : حسسن
رجعات مركزة مع لفيديو
أمجاد : لعريس هو خويا
ثلوج شافت لعندو : حسن منك
قندش و طير ليها التيليفون من ايدها : غا لي دار راسو ف **** ... للحبببسسس
حنان لهدرة مشات ليها حتى دخلو الشك غادي اتزوج بزيزونة
شد ايدها الناعمة وسط ايدو : انا صبع خاص نركب فيه لخاتم ؟
حنان شداتها الضحكة : هادا
أزار عاف من لول انا صبع غا بغا اهدرها باش تطلق شوية : اوااه .. شكرا على لمعلومة الزوينة
حنان : لعفو هه
هز راسو لعندها و تاتها لكسيوة لبيضة لي معرية من ضهرها. عطاتها جادبية زوينة .. و التاج لخفيف لي محطوط على شعرها برز ملامحها كتر و جا مع براءتها
تغريد : احم شربو لحلييب عيت بالوقفة
حنان هزات لكاس بغات تشربو صدقات مدفكاه عليه حتى شهقات و مع أزار روحو شي واحد اوسخ ليه حوايجو شعل من لداخل و لكن كمدها .. شغايدير ملقا غا يضحك ضحكة صفرا حتى تفوت هاد لمسرحية لي كيمتل عليهم بهدف ضميرو ارتاح و ميأنبوش
ثلوج مبتاسمة و الدموع فعينيها : هه كتحشم بزاف
أمجاد : داكشي لي كنشوف ختك ماشي بحالك
تلافتت لعندو هازة حاجبها : علاش كيف جيتك ؟
أمجاد : مفيك ميتلبق
ثلوج : ألف واحد اتمنانيي
أمجاد عقد حواجبو : شكون هادا ؟؟ كتعرفيي شي واحد ؟؟؟ .. شكون ؟ يكما داك الطبيب ؟ هددددرييييي
دهشرها بقات غا كتشوف فيه و فخاطرها كتقول هادا مالو حماق !
أمجاد صعر : سووولتتتك جاوبييي ؟
ثلوج : مكنعرف حتى واحد و لو نعرف نتا مالك
هز ايدو ايخمجها و فالأخير نعل الشيطان مطير ليها التيليفون .. خلاها مفيكسية و الدمعة فعينيها .. مشا جلس مقابل معاها كيسوط
شافها باقا على نفس وضعيتها لعبات ليه على لميموار : واش باغا شي فرعة ؟؟
حركات راسها بلا
أمجاد : اوا تكااي حسن ليك و ليا
تكات عطياه بالضهر و عقلها خدام مع عائلتها كيفاش حتى وقعات هاد لخطوبة .. سبحان الله فهاد لفترة لي غبرات وقعو بزاف دلحوايج لي محضرتش ليهم و لا عاشتهم معاهم
دازو ساعات ..
كانت ساهية و عينيها كيتغمضو .. هادي هي وقيتة نعاسها .. هزات راسها فرحات حيت مكاينش عاد تنهدات و حيدات لماسك من على وجها و رجعات لوضعيتها مستسلمة لنوم حتى مشات فنوم عمييق حالة فمها كتشخر شوية بسباب لعيا و حيت شاربة لبرد
فهاد الأثناء تحل لباب و دخل بخطوات ثابتة بعدما سدو .. قرب لعندها مطول الشوفة فوجها لمحروق .. ضرو خاطرو بزاف على وضعها .. تنهد و تخشا حداها عارف نعاسها ثقيل مغاديش تحس بييه .. غا تقاد فالنعسة و جرها لعندو خاشيها وسط حضنو .. رجع خصلات شعرها للور
ثلوج نطقات مغمضة عينيها و مزيرة بايديها على لبسة لمرضى : خررج .. مبغيتش تشوفني محروقة و تشفق عليا .. خررج عفااك
بقات مكمشة عينيها و دموعها كيهبطو حتى حسات بقبلة على خدها لمحروق .. حلات عينيها ببطء و جات فعينيه
نطق ببرودة : اش بان ليك نحرق وجهي حتى انا و نتعادلو ؟ ... هاكة مغاديش نشفق عليك
ثلوج : فراسك هاد لفترة خاص نكون فنفسية زوينة و نتا هااكة كتعصبنيي .. عطيني التيقار
أمجاد : عاطيك التيقار
ثلوج بسخرية : باينة تبركالله
أمجاد عقد حواجبو : دابا مالنا ؟؟
ثلوج تنهدات : والو .. إلا بقيتي مغاديش اجيني النعاس
أمجاد : مزيان باش نسهرو
ثلوج ميلات شفايفها : مباغاش نسهر معاك
أمجاد خطف بوسة على شفايفها حتى خرجات عينيها و تجننات : شكاادييير ولفتيها ... سير ولا غادي نغوت
أمجاد : غوتيي شكاتسناي
ثلوج : شوف المجرم مبغيتش نتعصب خرج و بقا بكرامتك .. واش معندكش النفس ؟
بقا ساكت مطول الشوفة فعينيها فالأخير نزل من فوق السرير و قصد لباب بلاما اهدر
ثلوج قفزات على صوت لباب فاش تسد عرفاتو تقلق .. هزات كتافها بنفخة و تقلبات لجيهة لخرى و نعسات فراحة حيت مكاينش حداها ..
فالجيهة لخرى ..
كانت مخشية فبلاصتها عاضة على شفايفها كتفكر أجواء لخطبة كيف دازت و الصور لي خداو .. مقاداها فرحة
سمعات صوت التيليفون لقاتو ميساج من عند تغريد
🗨️ فرحانة حيت غدا غادي تولي مرات خوياا
بتاسمات حنان عرفاتها كتهدر على غدا حيت ايمشيو بجوج اديرو لعقد .. تنهدات و سيفطات ليها
🗨️ لعقبة لييك احبيبة .. نفرح بييك حتى انا انشالله
كانت كتشوف فالميساج لي وصلها من عند حنان و عينيها دامعين .. بتاسمات بسخرية و سيفطات ليها قلب عاد حطات التيليفون و شافت لبعيد ساهية مع لبرد ديال الشرفة لي كيدي و اجيب فشعرها ... شوية بدات كتبكيي بلا صوت داز لوقت لقات شهقاتها كيتسمعو من بعييد .. قلبها مخنوق و كيتزير عليها كلما تفكراتو .. متنكرش أنها توحشاتو بزااف .. توحشات ريحتو . صوتو .. و جودو حداها .. عمرها كان كيحساب ليها ايجي النهار و تولي شفقة حيت كتبغييه .. واخة داك لجيست مقدراش تكرهو كتموت علييه .. كتعشقو لأبعد لحدود .. ولكن كرامتها فوق كلشي تعذب بينها و بين قلبها و متخلي حتى واحد اعرف راه كتموت ببطء .. تبكي و تقهر و متخلي حتى واحد اعرف راه كتبكيي .. هذا هو كبرياء الأنثى و الصمود ديالها
و قطع خلاها مخرجة عينيها شوية دمعو و بدات كتبكيي مفهمات والو
حطات التيليفون على جنب و تقادت ففراشها كتنخصص معجبهاش لحال شنو ذنبها إلا كانت كتحشم منو و كتمشي ليها لهدرة .. بعد صراع طويل غفات بدموعها و صوت تنخصيصها مرة مرة
دازو يومين ..
فقنت الصالون مجلسينهم بجوج فرحانين بييهم و كلشي ناشط
حفصة و لحاج كيشوفو فبنتهم لي ضاعت من يديهم و ولات مرات الراجل
لحاج تلافت عند حفصة : عنداك نكونو زربنا عليها بهاد الزواج
تغريد جالسة كتسيلفا معاهم و تحط على الأنسطا باغا تبان فرحانة و ضاربة الدنيا بركلة باش فاش اشوفها بدرالدين ميسحابش ليه جالسة كتبكي عليه و تنخصص .. بالعكس بغات تبين ليه راه فرحانة سوا بيه سوا لا
فهاد الأثناء دخل أمجاد لي كيبان مرة مرة ليهم .. بحال الزواق مكيتشدش .. قصد خوه لي وقف بدورو و تسالمو مع بعضياتهم
أمجاد : مبروك اسيديي
أزار : اوا هادشي لي بغات لوقت
أمجاد : تهلا
أزار عرفو كيهدر على حنان : ضروري
تلافت لعند حنان لي جالسة بقفطانها بحال شي أميرة وكتصور مع تغريد و اصيفطو لندى
حنحن بصوتو باش تشوف فيه ساعة مشغولة .. حتى نطق : حنان
تلافتت لعندو شافتو دار ليها إشارة باش توقف و داكشي لي كان
أزار : هادا خويا .. محضرش لخطبة
حنان شافت فأمجاد و هبطات راسها عرفاتو هو لي كانت هدرت مع ختها عليه : مشرفين أخويا
أمجاد : إلا قلقك جي لعندي .. عارف لكود ديالو
أزار هز حاجبو : من نيتك الساط
أمجاد : من ريتيي .. جلس راك عريس زعما على الأقل تأذب ليوم
أزار : هاهو جالس
جلس و جلس معاه حنان كيسوط
أمجاد قشع لحاج و حفصة .. و مشا جلس مطول فيهم الشوفة و عقلو خدام
تغريد : هههه صراحة بلا مجاملة لكونط عندك شاعل .. عندك شي جلسة تصوير هاد لويكاند ؟
حنان : كاين واحد الديفيلي .. تمشي معايا ؟
تغريد : مشات الآلة
حنان تنهدات و تلافتت لعند الزاج
تغريد : خويا تاصل بيك مؤخرا ؟
حنان بابتسامة مصطنعة : كلا ليلة كيصوني ليا باش اتطمأن .. واخة مشغول مع لمسابقة لي كاينة ففرانسا و لكن مناسينيش
تغريد : هاي هاي على لحب ياختي ههه
ضحكات حنان و تلافتت عوتاني لعند الزاج كتشوف لبعيد .. شوية بتاسماات بسخرية على كذوبها .. من نهار تزوجو عمرو قاصها و لا نعسو ففراش واحد ديما كيجي معطل و لا كيلقا شي عذر باش ميباتش معاها فنفس لبيت .. أما هاد التسافيرة ديالو حسات بيه فرح ليها حيت مكيناش معاه .. من نهار مشا للمسابقة عمرو تاصل بيها و لا خسر عليها شي ميساج .. بالمختصر مزوجة على لوراق فقط .. اسم مزوجة بلا زواج .. هادشي كيقهر و لكن عرفات السبب مور هاد التمتيلية و كتسنا غا لفرصة باش توضع حد لهاد لمسرحية.. كان باغي ضميرو ارتاح و جاب ليها الله صافيي رتاح اذن خاص تعطيه التيقار
وقف الشيفور نزل تغريد هي لولا لكليتها .. عاد كمل طريقو حتى لقدام كلية حنان .. غا وصل نزلات كتبتاسم لكل واحد بتاسم ليها .. شوية جاو عندها شي بنات بغاو اتصورو معاها خدات من عندهم التيليفون و تصورات معاهم بابتسامة بشوشة عاد كملات بخطواتها و كلها حيوية و نضرات واتقة من راسها .. علاش لا و هي دارت بلاصتها وسط لفاشن .. مجال دخلات ليه بالصدفة و لقات راحتها فيه
كانت جالسة فوق السرير كتسمع لنصائح ديالهم و شنو دير و شنو مديرش حتى خرجو كاملين بقات غا لممرضة
ثلوج : دوزت الصيف كامل هنا .. الناس كتدوزو فالسفر و انا دوزتو فالمستشفى
لممرضة : متقوليش هاكة مرحلة و دازت ولحمدلله كانت نتيجة و رجع وجهك كيف قبل
ثلوج : مزيان
لممرضة : واش مباغاش تشوفيه فالمرايا ؟ .. بعد كل عملية كنديروها لييك مكتقدريش تشوفي فيه
ثلوج : حيت عارفة وجهي مرجعش كيف كان
لممرضة مشات جاب لمرايا و مداتها ليها : خوديي شوفي وجهك .. هاد النقطة ديال لملامح سي أمجاد كان داير لينا لقوق عليها .. وقف على الشغال بإيدو و هو لي جاب أكبر خبير تجميل من أمريكا باش كمل لحالة ديالك و رجعتي بحال قبل متبدل فييك والو
ثلوج كتسمع لييها بلاما دير أي تصرف منها .. فالأخير هزات لمرايا و شافت وجها لأول مرة بعد داك لحادث لمشؤوم .. بقات ساهية كتحقق فييه .. شوية بتاسمات ابتسامتها واش بصح باقا عندها نفس لجاذبية و ضحكتها زوينة
نطقات لممرضة و قاطعت شرودها فالتفكير : ضحكتك زوينة
ثلوج عاد رتاحت و حسات براسها راه هي نفسها متبدل والو : عويناتك هه
لممرضة : على سلامتك مرة أخرى و تهلاي فراسك
ثلوج هزات راسها باه و مشات لممرضة بقات غا هي تماك ساهية .. شوية وقفات و دخلات لحمام كتشوف راسها فالمرايا كتعقل فالأول مكانتش تقدر تشوف فيها بلا ماسك .. أما دابا كتحقق فملامحها و تزيد متنكرش أنه فرحانة بزااف بزاف .. بلاما تحس هزات ايدها و حطاتها على كرشها بقات كتحسسها شحال ... حتى عرفات هاد لولد ولدها عاد مات ! . .. كانت كتحس بإحساس خيب مقالتو لحتى واحد و لا تشكات على شي واحد. . كانت كتبين ليهم عادي واخة جهدات راه نقطة فصالحها
بعد تفكير طويل فأشنو داز عليها و أخيرا جا لفرج .. بتاسماات و طلقات لما و غسلات وجها لي رجع عادي و حسن من الأول كاع .. جات لفرصة و تحيدو حتى لي بوان نواغ لي كانو معقدينها خخ .. فيها خير
تنهدات حتى كتسمع الدقان شوية تحل لباب و دخلات ممرضة حطات ليها ساشية فوق السرير و خرجات .. بقات كتشوف فيها هازة حاجبها شوية مشات قلباتها لقاتهم حوايج جداد و زوينين .. عضات على شفتها فاش عجبوها عرفاتو أيكون غا هو .. متنكرش هادشي بدا كيجيها فشكل هاد لمدة كاملة عمرها شافت وجهو و لا شمات ريحتو و لكن ديما كتسمع وجودو و قربو .. ديما كتسمع سي أمجاد جاب هادي .. سي أمجاد خلص هادشي .. سي أمجاد قالينا خاصها ترتاح
كانت غادة وسط لكولوار بحلة جديدة و مشرقة كلها حيوية و ابتسامتها كتبان من بعييد .. علاش لا و هي اتبدا ترجع فحياتها لي مشات واخة مستحيل تقدر تحيي الناس لي ماتو بسبابها .. خرجات من لمستشفى و ضربات فيها الشميسة حسات براسها بحاليلا كانت فحبس .. حيت مؤخراً مبقاتش كتبغي تخرج و لا تشوف برى
يلله اتزيد بخطوة لقدام قشعاتو واقف متكي على الرونج و لكارو فإيدو .. موتياه لقاميجة مخشية فسروال دجين و السمطة و لكاسكيط من لفوق .. السيد ولف لكاسكيط
ميلات شفايفها و دازت من الجيهة لخرى باغا تبعد منو حتى كتسمع سميتها : ثلووووووووج
تلافتت بالعرض لبطيء هازة حاجبها كيبان ليها مزال على نفس وضعيتو كينتر كلا نترة بالرزانة .. زفرات و مشات لعندو
تقابلت معاه حاطة ايديها على خصرها : بغيتي نقوليك شكرا ؟ لا مغاديش نقولها
أمجاد لاح لكارو زطم عليه و جرها من خصرها حتى تزدحات مع صدرو لعريض .. بقات كتبلع فريقها و هو كيوزع فيها الشوفة و احقق دخلها الشك
ثلوج : واش وجهي مرجعش كيف كان ؟
أمجاد : لا
قلبها ضرب فالمية حسات برجليها فشلو عليها : كيفاش لا ؟
هبطاات ايدها لايديه باش تحيدهم من على خصرها ساعة مزير معندها فين تنفنف
ثلوج بصوت باكي : واش بصح وجهي مرجعش كيف كان ؟
أمجاد حاوط عنقها بإيد حاكمها و قربها لعندو حتى ولات أنفاسو لحارة كتضرب على وجها كامل : غا شاد فييك .. باقي هو هو
ثلوج عاد رتاحت : يلله طلق منيي بغيت نمشي
عقد حواجبو : فين اتمشي ؟
تجننات : لدارنا فيين متلا
أمجاد : لا معندك فين تمشي
ثلوج شافت فيه مطولا شوية بدات كتضحك بالفقصة : من نيتك ؟ لا وااش من نيتك المجرم
أمجاد عاض على سنانو خلعها بنبرتو لحادة : اخر مرة تقولي مجرم
ثلوج تحت فمها : تصرفاتك مغاديش امحيو راك قتال
أمجاد : سمعيني شنو كتقولي
ثلوج : طللق منيي تعطلت و بغيت نمشيي
أمجاد : لا بلاصتك حدايا معندك فين تمشيي
ثلوج عصبها و معندها كيفاش تفلت من ايديه .. شوية بدات كتبكيي غادي احمقها كتحس بالحكرة و هي معاه : علاش وااش مزال باغي تعاقبني ؟ مكفاكش هاد لعقاب ؟
أمجاد : ششش سكتييي
هبط لعند شفايفها باسها جنب و بعد شوية فاش حس برجفتها .. بتاسم إبتسامة جانبية و عاود قلبها كلاها مع الطموبيل معرفاتش باش تبلات لي عارفة هو كياكل فشفايفها ممسوقش لغواتها من حر الألم .. خلطها تماك شفايفها ولاو حمرين و كيوزوزو .. كان كلا شفة كيعطيها حقها حتى ترجع حمرة .. ترفعات معرفات راسها باش تبلات حتى كتحس بالفلاش كيضرب فيهم و لكاميرات كتصور .. عاد وعات على راسها و بغات تدفعو ساعة عاد مزاد عصرها وسط صدرو لعريض و مزير على خصرها بايد .. السيد جعر عليها هاد لمدة كاملة مشافها بالسيف ميدير هادشي
السيد جعر عليها هاد لمدة كاملة مشافها بالسيف ميدير هادشي ... كان ممسوقش لعالام كتبان ليه غا هي . سخن مكرهش كون كانو فشي مكان مغلق كان مغادي اطلقها حتى تحمل بالتوام
ثلوج كتحاول تهدر وسط فمو خنقها . . ولات كتبكي و الدموع دايزين كتبغي تدفعو بحال الصخرة عيات تزيحو من صدرو ولكن والو
أمجاد عاق على راسو عيق عليها و هو ابعد شوية مخلي لمسافة قريبة من شفايفها عاد نطق بهمس : قصحتك ؟
واقف كيتسنا الضو لخضر اشعل و صباعو على الديريكسون كيلعب تماك
ثلوج ستغلات لفرصة و حلات لباب بحدر عاد هبطات طالقة رجليها لريح .. دهشراتو بقا جامد كيغلي و هو كيشوف فيها شوية نزل حتى هو و هبط كيجري موراها
متسوق لا لطموبيل لا لباب لي خلاه محلول لا لتيليفونو لي بقا تماك .. ولات كتبان ليه غا هي شعلاتو دابا
ثلوج كتجري و هو موراها خيفاه اوصل عليها : سيييير بععععد منيييي ... ماما اععععععع
كتجري و تجري و هو موراها كيعيط مرة بسميتها مرة بالبرهوشة
ثلوج شافتو ايقرب ليها ستغلات فرصة الشارع و قطعات وسط الطموبيلات كتعتر حتى كتبغي دير كسيدة .. و أخيرا قطعات عاد رتاحت نسبيا .. بغات تجري كتسمع الصداع موراها تلافتت و خرجات عينيها كيبان ليها هو شانق على شي واحد
أمجاد صاعر و وجهو حمر : علاااااش شفتييي فيهااا الزا**
مول الطموبيل باغي ابكي : مشفتش فيها اسيدي
عطاه أمجاد بكروشي حتى الجوقة تجمعات
صعر كيركل و ستين جن سابقو لقدام : والله حتى ندفن مكك حيي ليوووم .. . متشوووفش فييها كتفهم الز***
تدخلات ثلوج حاولات تجرو و هو بحال الثور اجا مشدو ولا بردو .. بقات جاراه و هو كيلهت و صدرو كيطلع و اهبط .. حتى بعدو من الشارع عاد طلقات من ايدو و شافت فيه مربعة ايديها
آريا : فاش ولدت أمجاد كنت صغيرة ممكملاش تمنطاش عام ... انا وساجد كانت علاقتنا فشكل و لكن لحب مكيشاورش ههه
ثلوج : لحب زويين ولكن بعد لمرات كيعذبك
آريا : فايت لييك بغيتي ؟
ثلوج هزات راسها باه : اه ولكن كتاشفت راسي كنت مخدوعة بشخصيتو صدمني متوقعتهاش منو
آريا : و مزال كتبغييه ؟
ثلوج : معرفتش ممكن اه
جا مع آخر كلامهم و سمع سؤال آريا .. طلعات معاه الصهدة و وجهو حمار بالأعصاب ..جمع ايدو على شكل قبضة و مشا جلس حداهم لايح ايديه على لكنباي ريحة الشمبوان كتشع من شعرو .. و حناكو حمريين كيواتيه التدواش
آريا : لا مع وقيتة لغدا اتكون جاية .. اجي نتغداو مجموعين
ثلوج : لا مبغيتش مفياش الجوع
آريا : جلسيي فبلاصتك قلت اتغداي هي اتغداي .. هاني غادة نوصيهم ازيدو طبق على قبلك
بتاسمات لثلوج و مشات فحين هاد الأخيرة جلسات كتسوط : قال ليا كلبة لكلب لاخر ... حتى تكون بوحدك و نورييك
زفرات و بقات كتدور فعينيها حمقها ديكور لقصر و الأثاث كتحس بالثراء فاش كتشوفو خخ
دورات عينيها بان ليها دايز غا هاد لمرة لابس عليه سبور و لكاسكيط فوق راسو .. خنزرات و رجعات كتشوف قدامها
شوية رجعات شافت فين هو مبقاش بان ليها ميلات شفايفها
داز لوقت ..
كانت ساهية حتى كتسمع الضحك و لهدرة تلافتت .. جات عينيها على ختها كتضحك مع بنت اتكون قدها عرفتها هي خت أمجاد الصغيرة عاقلة فاش شافتها فالفيديو .. رجعات شافت فختها مبتاسمة على التغيير لجدري لي ولات فييه ..فينها حنان دشحال هادا
جمعات لوقفة و غوتات : حنااااان
تلافتت حنان بالعرض لبطيء مصدومة حتى كيتلاقاو عينيهم غوتات من الدهشة و مشات كتجري عند ختها تلاحت عليها معنقاها و مزيرة غادي تخنقها
ثلوج كتبكي : توحشتك احبيبة
حنان كتبكي حتى هي : واش بصح نتيي هنا
بعدات كترجف : ممتيقاش والله حتى كنحس براسي كنحلم
عاودت عنقاتها مزيرة عليها و كتبكي : عرفتي شحال توحشنااك .. ماما ديما طايح عليها الضيم من جيهتك و بابا ندم على لهدرة لي خرج من فمو غا باش كيصبر راسو كيقول هي لي كانت على سبة و مشات و خلاتنا .. توحشتك اختي توحشتك كتر مكتخايليي
ثلوج كتسمع لييها و صوت شهقاتها كيتعالا : ماشي لخاطري غبرت علييكم احبيبة .. ولكن هاني معاكم دابا
بعدات حنان كتمسح فدموعها : كنت كنتسناك تشري ليا تيليفون و تعلميني لفيسبوك و الأنسطا
ضحكات ثلوج وسط بكاها : علاما فهمت و ليتي كتعرفي لهادشي
حنان تنهدات : زواجي حب من طرف واحد و ناتج على غلطة .. هادشي لي كاين
ثلوج خرجات عينيها : كيفاش ؟
حنان حدرات راسها و بدات كتعاود ليها بالتفصيل مكذبات فوالوو ثلوج غا كتسمع و مصدومة
حنان : هادشي لي وقع
ثلوج : و كيفاش حتى عرفتييه ؟
حنان بدات كتعاود ليها من اللقطة لي مشات فيها ختها من الدار حتى لفيين تلات بيهم الظروف و عاشو وسط قصر آل عمران
ثلوج عينيها غرغرو : خاص طلقيي ماشي ضروري تكوني مزوجة غا باش تاخدي سميت مزوجة
حنان جمعات لوقفة و مشات كتطل و البرد كيدي و اجيب فشعرها : لا مبغيتش نطلق حتى هو اطلب الطلاق .. متخافيش ولفت هاد لوضع ولات كتبان ليا قرايتي و الدمين لي كنسي فييه لوقت ..مستمتعة بوقتيي
سكتات و تلافتت لعند ختها مطولا الشوفة عاد رجعات نطقات بهدوء : واليدينا لحمدلله تصالحو و عايشين بيخير مرة هنا فالدار لي شرا بابا مرة فالقرية كيدوزو لويكاند تماك .. قرايتي لحمدلله بديت فيها و درت بلاصتي وسط الناس و بديت كنتشهر بصفتي مودل .. الأحلام لي كنت كنقول عمرهم ايتحققو هاني كنحقق فيهم ... عندي سمية آل عمران غادي تخليني نوصل كتر .. ختي انا وليت باغا نولي طموحة و نحقق لمستحيل لي عمري فكرت فييه .. مغاديش نجي و ندمر هادشي بسباب راجل ! اه كنبغييه و لكن هادشي مكيعنيش أنني خاص نتركن فشي قنت و نبكي .. مكيبغينيش شنو خاص نموت زعما ؟ امشي واحد و اجيو عشرة .. لي قدامك حنان وحدة أخرى متخافيش عليا نبكي و منخلي حتى واحد اشوفني كنبكي
ثلوج قاطعتها فاش عنقتها و زيرات عليها كتبكي : براافووو بيرفكت ...هادشي لي بغيت نسمع
بعدات كتمسح فدموعها : هههه فينها حنان لخوافة
حنان : مزال خوافة غا دايرة فيها زعيمة ههه
ثلوج فرحانة لختها : بالعكس تبدلتيي .. ويااك شي مرة تكوني مدمرة و تخبي عليا انا ختك و بغيت نعرف كلشي .. متافقين ؟
حنان :واخة
و عنقات ختها مسخياش
ثلوج : يلله اجي نجلسو من بعد خاص نمشي للدار
حنان : اه مزيان .. غادي نوصلك باش تعرفي فين شراو
ثلوج متحمسة : واخة
و مشاو جلسو كيشربو فالعصير لي طلعات ليهم لخدامة قبل ابداو اتعاودو
حنان مستغربة : ختيي
ثلوج كتبنن : ممم وي
حنان : فيين كتعرفيي أمجاد آل عمران ؟
ثلوج تنهدات : قصة طويييلة و لكن لحمدلله سالات
حنان : إلا كان فيك ميعاود قوليلي هاد لقصة
ثلوج : عنوان هاد لقصة #جهنم_ثلوج .. لي داز عليا ماشي قليل
حنان : شنو داز عليك ؟
ثلوج : ختك قتالة
حنان خرجات عينيها : كيفاش ؟!!
ثلوج : كتعقلي على لينا لي كنتي كتفرجي ففيديواتها على الأنسطا ؟
حنان : اه ماتت مسكينة
ثلوج : انا لي قتلتها
حنان خرجات عينيها : ختي شكاتقولي هدري مقاد
تنهدات ثلوج و بدات كتعاود لختها أهم الأحداث و حنان مصدومة و كتزيد تصدم كتر و كتر
حنان : وااش بصح كتهدري ؟
ثلوج : للاسف هاد لهدرة لي قلتها كاملة صحيحة
حنان : علاش دار فيك هادشي كامل و نتي مدرتيهاش بلعاني .. كان حادت
حنان : مزيان .. ممسلياش دابا حتى لبلاتي و نهبط خود راحتك مع عائلتك
و قطعات كتنفس بصعوبة .. جاتها لبكية و طاح عليها الضيم
ثلوج بقات غادة كتدور فعينيها حتى حسات براسها تجرات و تزدحات مع لحيط .. كانت مكمشة عينيها و حاجبها مقوس بسباب التقصيحة لي تقصحات .. غا حلات عينيها جات فعينييه
أمجاد ببرودة : شفتي ختك و نتي تنسايني ؟
ثلوج شافت فايديها لي مزير عليهم : رخف منيي بغييت نمشي
أمجاد : ماشي بهاد السهولة
ثلوج : كنكررهكككك
أمجاد ببرودة : ماشي مهم نسمع مشاعرك
جرها من دراعها بالسيف عليها و قصد بيتو دخلها ليه و زدح لباب كيسوط
ثلوج راجعة باللور و هو تابعها : واش نتاا مريييض ؟؟ من نيتك ؟؟؟ شنوو كتحاول دير بهاد التصرفات .. رااه كنمرض فاااش كنشووف كمااارتك عطيني التيقار
بقات غادة راجعة باللور حتى تكالات مع لحيط كتدور فعينيها معصبة معندها فين تكحاز مزال
أمجاد كلاها بايديه مطول الشوفة : ساليتي ؟
هزات راسها باه و هي كتبلع فريقها
أمجاد ببرودة : هاد لهدرة كولييها
ثلوج : واش عند بالك معندي عائلة ؟؟ رااك غالط اتندم على هادشي كامل
أمجاد هاز حاجبو : بصح ؟ ندميني نشووف
ثلوج تجننات : بععد خلينيي نمشيي
أمجاد : لا معندك فيين تمشي انا لي كنقرر
ثلوج : شنوو باغيي مني مزال ؟
أمجاد : باغييك نتيي
ثلوج : تبغيك لفعة انشالله
أمجاد : لسانك طوال خاصو اتقطع
ثلوج بعصبية : بعععد و لا نغوووت
أمجاد : غوتيي شكاتسناي
ثلوج : واش بعقلك ؟؟؟
بدات كتضرب فصدرو بجهالة مخليها على خاطرها كتضرب فيه و هو راجع خطوة باللور
ثلوج وجها حمار بالأعصاب : الله اعطيييك لعذااب تفرق عليااا ... ياربيي تموت و نهنا منككك مكفااكش هادشي لي دوزتيي علياا و زايدها مزال مبغيتي تدخل سوق راسك
بقات كتضرب فيه حتى طاح على ضهرو فوق الناموسية و جرها معاه جات فوقو .. بلعات ريقها و عينيهم كيشوفو فبعضياتهم
ثلوج بغات تنوض حسات براسها تقلبات و ولات تحتو كيفاش الله و اعلم
أمجاد كيدوز بايدو على خدها : اوا
ثلوج كتدور فعينيها مخلوعة من قربهم : هنن شنوو ؟
أمجاد : عوضي ليا ولدي لي مات
حط ايدو على كرشها : بغيت بيبي و دابا
ثلوج : واش نتا مريض باغي تمرضني معااك
أمجاد : لمرض زويين جربيه باش نتعادلو
ثلوج : شوف المجرم
رمقها بنضرة حادة حتى حسات براسها اتبول فسروالها .. بلعات ريقها و رجعات نطقات : أمجاد واخة تخليني نمشي؟
قرب لوجها كيحقق فيه شوية حط فمو على خدها كيتنهد بلاما احركو و هي تحتو مكمشة عينيها باغا تبكي كتحس بالحكرة فاش كيحكمها هاكة
أمجاد ببرودة : متبقايش ديري لبغفان
ثلوج وسعات عينيها : مديراش لبغفان
أمجاد هبط لعنقها كيشم فريحتها مخدر : فييك شي ريحة .. نوضي دوشي مبغيت حتى واحد اشمها
مد ايدو بكل أدب سلم على ثلوج : أول مرة كنشوفك مشرفين
ثلوج : الشرف ليا
حنان : لمهم غادي نمشي مع ختي لدار
أزار هز حاجبو : معول تبقاي .. زعما يلله جاي من السفر
حنان شافت فيه داك الشوفة ديال واش من نيتك .. تنهدات و قربات سلمات عليه من لوجه و ستغلات لفرصة نطقات فودنو : بلاش هاد لمسرحية ختي عارفة زواجنا غا على لوراق
قاطعتها بتصرفيقة تلاتية الأبعاد قبل ما تكمل كلامها .. مجات فين تستوعبها عطاتها بتصرفيقة اخرى حارة لحنك لاخر
حنان حطات ايدها على فمها مصدومة و عينيها خارجين
ثلوج دموعها بداو كيهبطو بحال الشتا تصدمات معرفات راسها باش تبلات ملقات غا الجرا .. مشات بخطوات سريعة باغا تخرج حتى كتزدح مع شي حاجة قاصحة كانت اتفقد توازنها كون مشدتهاش شي ايد خشنة من خصرها
حسات بفكها تعلا و حلات عينيها لي كيقطرو بالدموع فعينيه لي باين عليهم كيغليو
نطق بصوت جاف و حاد زعزعها : علاش كتبكييي ؟؟؟ و مال حناكك حمريين ؟؟ هددددرييييي .. شكووون بكاااك ؟؟؟
أمجاد صعر و كمش عينيه بعصبية عاد حاول اتكالما و نطق بصوت هادئ : ثلوج مبغيتش تجهلينيي هدري شنوو
دوز ايديه على خدودها و هبط باسهم ليها بجوج كانو بوسات حنان بورشاوها : كنسسمع
ثلوج كتنخصص : عفااك رخف منيي بغييت نحيد من هنا
جهل ضروري مخاص تعصبو .. زفر و شدها من ايدها مشبك صباعو مع صباعها عاد جرها بعجرفة نيشان لداخل صدرو كيطلع و اهبط غا قشع خالتو واقفة مع حنان باينة فيها مكتهدرش زويين
فيساع فهم لبلان و عقد حواجبو : سسسكااااارليييييتت
تلافتت لعندو بالعرض لبطيء حتى كتجي عينيها على ثلوج لي مخبية موراه و ايديهم لي مشابكين .. بتاسمات بسخرية و مشات لعندهم هازة حاجبها : صافيي ضحكات علييك .. خدات بلاصة بنتيي ؟؟
أمجاد ببرودة : نتيي لي ضربتيها ؟
سكارليت : اه و مكرهتش نقتلها
أمجاد ببرودة : شحال من تصرفييقة ؟
فهاد الأثناء جات آريا مستغربة : مالكم ؟
أمجاد عاض على سنانو : غادي نعاود نسول شحال من تصرفييقة ؟
أمجاد : شحاااااااااال من تصرفييييقةةةة ؟؟؟ هددددريييييي
سكارليت : جوج علا....
مخلاهاش كملات هدرتها عطاها بتصرفيقة حارة جامعة عشرة التصرفيقات فوحدة حنكها ركد عليها حساتو تشلل و كيوزوز عليها بقات مفيكسية مصدومة و عينيها مغرغرين
ثلوج تنترات من أمجاد و رجعات باللور حاطة ايدها على فمها مصدومة : ااش درتيي ؟
تخلعات كتر : علاش كدير هاكة
بانت ليها سكارليت خارجة كتمسح فدموعها بخطوات سريعة كرهات راسها : علاااااش صرفقتييهااا؟؟؟ كبر منككك و هزيتي عليها اييدك ؟؟
أمجاد : مسوووقكش فيااا
قطعاتو فاش هزات ايدها حتى لسما و صرفقاتو : عمرك مغادي تبدل
خنزرات فيه و خرجات كتقلب على سكارليت
حنان و آريا فحالة صدمة من وحدة لخرى .. بقاو غا واقفين فدهشة ياربي غا استوعبو شكايوقع
على برى...
مسحات دموعها و دورات عينيها على الله تشوفها .. غا بانت ليها جالسة مقابلة مع لبيسين و خاشية راسها وسط ايديها بقا فيها لحال .. واخة ضربتها و لكن مبغاتش أمجاد اهز ايدو عليها حشومة كبر منو
مشات لعندها بخطوات تابتة حتى جلسات حداها متوترة تهدر : كنتمنى امدام كااع متدي على هاداك لحيو... كنقصد
قاطعتها سكارليت بحقد : مبغيتش نشوف لوجه لي قتل ليا بنتيي ... سيريي من هنا الله مغاديش اسمح لييك
ثلوج مسحات دموعها لي هبطو هدرتها جرحتها بزاف : بغيتك تسمعيني عاد نمشيي
سكارليت تلافتت لجيهة لخرى كتبكي
ثلوج : كنعقل أول لقاء ليا مع لينا كان زويين بزاف .. و كانت كتوحم و فرحانة بوحمها و حتى انا دعيت معاها و تمنيت ليها لخير .. بنتك إنسانة زويينة بزاف و ضريفة كتر ما كتخايليي بالعكس مخاصكش تبكيي حيت ماتت .. امكن ربي بغاها حيت قلبها بيض .. أغلبية دالناس لي كيكونو مزيانين كيمشيو و اخليونا .. ياريت كون للقاءنا انا و بنتك تحصر غا فداك النهار و موصلش نهار لحادث
سكارليت كتمسح فدموعها : ملي هي ضريفة مكانش عليك تقتليها
ثلوج : فداك النهار كنت عشت موقف خايب بزااف وسط عائلتيي و ركبت الطموبيل و انا دايخة و الأرض كدور بيا .. كنسوق و ممركزاش و فوق هادشي زايدة السرعة .. حتى كنشوف بنتك وسط الطريق تصدمت معرفتش كيفااش نتحكم فالسرعة حيت أصلا واخة كنت غادي نضرب لفران أكيد غادي ندخل فيها ..
مسحات على شعرها غادي تحماق و مشا ركبات و كسيرات كتسوط
حنان غا كتدور فعينيها : ممكن نسول ؟
ثلوج شداها لبكية من الطريقة لي تعامل بيها معاها : لا بلاش
سكتات حنان غا كتشوف على الله تفهم شي حاجة
ثلوج مسحات دموعها لي هبطو و نطقات بلاما تشوف لعند ختها : منين خاص نمشي معرفاش
حنان : هادا هو الطريق .. الشارع لي على ليمن دوري معاه
هزات ثلوج راسها باه و زادت كسيرات مغودة
داز لوقت ..
دخلات مع لحي لفييه دارهم كيف قالت ليها حنان .. قلبها بدا كيضرب بالجهد فاش كتسرا معاها غادي تشوف واليديها .. كملات سوقانها تحت ارشادات ختها حتى قالت ليها فين بالضبط عاد سطاسيونات و نزلو بجوج
طلعات ثلوج عينيها مع لعمارة جديدة و ديكورها من على برى زويين باين هادشي جديد و يلله مبنيي
حنان : اجيي ندخلو
هزات ثلوج راسها باه و تبعات ختها كتحس براسها غريبة عليهم بالسيف و هي غبرات شهورة
طلعو فالمصعد حتى لطابق لفييه دارهم عاد خرجو منو و مشات حنان جارة ثلوج موراها حتى لعند لباب
حنان : دقيي نتيي
ثلوج شداتها لبكية : غا دقي نتي بحال بحال
حنان رجعات خطوة لور : لا راه هدرت
ضحكات ثلوج و بركات على صونيط دلباب و رجعات خطوة لور كتسنا لباب اتحل
فهاد الأثناء خرجات حفصة من للكوزينة بشعرها عريان مجموع لفوق غا بقراصة .. ولات مهلية فراسها كتر من لول علاش لا و هي تناسبت مع عائلة آل عمران عكوزة بنتها مخاصش تبان صغر منها خخ
حلات لباب عوالة على لحاج لي صونا حتى كتصدم من داكشي لي قدامها بقات غا كتشوف لسانها تربط عليها معرفات متقول و لا تخرج من فمها .. حتى من لمعلقة لي كانت فايدها طاحت ليها فالأرض بكترة السهوة لي سهات فيها
ثلوج بصوت منغنغ : متوحشتينيش
حفصة ممتيقاش راسها : واش نتيي بنتي .. بصح ؟ يااك
قربات لعندها قاصتها : لا مكنحلمش
تلاحت على بنتها عنقتها كتنخصص : بنتييي لكبدة دياليي فيين مشيتي و مسولتي فييناا .. حراام علييك
ضحكات حفصة و جرات حنان باستها من خدها : نتيي لفلوسة دياليي ههه .. دخلو دخلو نسينا راسنا فالباب
سدات لباب و داتهم معنقاهم حتى لصالون كتسول و تعاود و تعنق فثلوج ممتيقاش راسها و مقداها فرحة كتهدر و تضحك عاد رجعات ليها حياتها كيف اللول و بناتها قدام عينيها
حنان : بابا فين هو ؟
حفصة : لحاج ايكون جاي من لقرية .. فاش صونيتو سحابلي هو
ثلوج بقات غا كتشوف بلاما تنطق
حفصة : واش مزال مقلقة من باك ياك ابنتي ؟
ثلوج تنهدات : لا ممقلقاش
حفصة مسحات ليها على خدها : هاكاك نبغييك راه اعايرك و ميخلي لي اعايرك
ثلوج بتاسمات : عارفة
ورجعات عنقات مها و اخيرا تجمعت مع عائلتها و بدات كترجع حياتها كيف قبل .. بقات كتحمدالله و تشكر فيه على هاد اللحظة لي حتى واحد مغادي ابغي اتحرم منها
بعد وقت طويل قدرو اشبعو فيه من بعضياتهم .. كانت حفصة كتسول و تعاود و ثلوج كتجاوب غا على قد السؤال مبغات تعاود لييهم والو و حتى حنان فهمتها و سكتات منطقات بوالو
حفصة خاطبت حنان : راجلك مزال مجا من السفر ؟
حنان : لا جا غا هاد الصباح
حفصة و سعات عينيها : خليتييه و جيتي ؟ .. صوني ليه اجي اتغدا معانا
حنان تحرجات قدام مها .. ناضت من حداهم مبتاسمة إبتسامة صفرا .. حتى دخلات لبيت من لبيوتة و وقفات كتصوني لييه عارفاه مغاديش اجاوب
حتى كتسمع لهدرة برى عرفات ايكون باها لي جا .. خرجات مبتاسمة غا شافتو بلعات ريقها ممتيقاش : أزار ! !
حفصة : جلس اولديي ... مزيان ملي جيتي يلله كانت اتصوني لييك حنان باش تجي تغدا معانا
أزار هز عينو لعند حنان و جلس كيسوط
حنان مشات جلسات حداه بلاما تنطق
أزار شاف لعندها و هو عاض على سنانو : خاص نهدرو
حنان بصوت منخافض : فاش ؟
بلعات ريقها فاش حمر فيها : اجيي معايا
مشات حلات باب نفس لبيت لي كانت فيه قبيلة حتى دخل عاد سدات لباب
أزار عاقد حواجبو : ناوية تباتيي و لا كيفاش ؟
حنان كتفرك فإيديها : غا بالشوية علاش كتهدر هاكة
قصدها مشربن : علاش كيف كنهدر ؟
حنان كمشات عينيها : أزار خلعتينيي
أزار : خلعتك ؟ .. مزيان خاصك تخافيي
حنان عينيها غرغرو مقدراتش تحبس دموعها قدامو .. خلاتو كيشوف فيها مطول عاد جرها وسط حضنو عنقها كيطبطب على ضهرها
بقات تبعاهم حتى دخلو للمكان لخاص بالأجهزة الذكية .. تلفات6 كتقلب على لماركة لي كانت كتستعمل .. حتى حسات بأنفاسو قراب منها خرجات عينيها و تلافتت مفزوعة خايفة باها اشوفها
ساطت و مشات حلات لباب كتطل بالشوية : بغيتيني فشي حاجة اماما
دخلات حفصة عاقدة حواجبها و ايديها على خصرها : اوا عندك ماتضيفيي
ثلوج : ماما راه ...
قاطعتها بحدة : عار ربيي واش عندك شي عقل و لا لا كيفاش تخلييه ابوسك قدام لعالام
ثلوج غوبشات : راه باسني بزز
حفصة : كون مكنتيش مضسراه مغاديش ابوسك
ثلوج : بالعكس ممضسراهش اماما
حفصة : و كيفاش حتى زعم و باسك بزز
ثلوج : صافيي اماما مبغيتش نتفكر هادشي
حفصة : باك ولاو فييه عشرة دابا .. بزز باش سكتو مبغيناش نفس لكاسيطة تعاود الله اهديك علينا .. لكنتي باغاه و باغييك اجي اخطبك واش عجبااك هاد الشوهة دابا ؟؟ باك فيين ايرد وجهو فيين ؟؟؟ .. شي نهار تقتليني بفعايلك ديري عقلك
ثلوج عطاتها بالضهر كتمسح فدموعها لي هبطو
حفصة تقصدات تقصح معاها لهدرة باش دير عقلها : ديري شي حل قبل تخسرينا فمرة .. متخليش تقتي فييك تهز ا ثلوج
تنهدات و خرجات سادة موراها لباب
ثلوج تنهدات بعصبية : كيف ناوي تخرج على حياتيي غادي نخرج على حياتك .. جنيتي على راسك اسي آل عمران ماشي ثلوج لي تسكت لييك
مسحات اخر دمعة طاحت من عينيها بعجرفة و مشات جلسات كتقلب فتيليفونها الجديد كتحاول تنسيي بيه و عقلها مع هدرة باها .. كيفاش حتى غادي تقدر دير اش طلب منها .. عرفات راسها وحلات وحلة خيبة معندها حتى مخرج
فالجيهة لخرى ..
حلات لباب كتضحك .. سداتو عاد كملات بخطواتها ساهية مع الأنسطا كتقرا لكمنطير ديال لفولورز حتى كتحس بشي ايد طيرت ليها التيليفون
هزات راسها مخرجة عينيها حتى كتجي فعينيه عاقد حواجبو
أزار : فين كنتيي ؟
حنان : كنت مع تغريد فالبيت .. كنا كنتفرجو
أزار مسح على راسو كيحاول اتكالما : قلتيي مع تغريد ! معندكش شي راجل مزوجة بيه واقيلة ؟
حنان باستغراب : دابا مالك معصب .. شنو واقع ؟ .. إلا كنتي باغي تعصب عليا قولهالي باش نمشي نعس غدا قارية مع الصباح
أزار : واااش نتييي حاضية غا لبكااا لي كتعرفيي لييه .. فاش جيت متسوقتيش لك** و مشيتي مع ختك لداركم و بقيتي تماك كون ممشيتش اعلم الله واش كنتي اتباتيي مزال ... و زيداها فاش جينا غبرتيي .. واش هاد لمدة لي كنت مسافر فيها كنتي كتديري لي قالها ليك راسك و لا شنو ؟؟؟
حنان ببرودة مسحات دموعها : ساليتيي ؟
أزار مصدوم من شخصيتها : شكاتخوريي عليا دابا
حبسات تنخصيصها و مشات هزات مخدة من فوق الناموسية نيشان لكنباي حطاتها تماك و تكات خلاتو غا كيشوف و اسوط
أزار : كيبانلييي ضسرتك حتى نسيتي راسك مزوجة من غدا غادي نتسيف على مككك
ضرب رجلو مع الأرض و مشا تخشا فالناموسية كيسوط
حنان ببرودة : طفي الضو
أزار بعصبية : غاديي نجي نطفييك نتيي نييت
سكتات مجوباتوش خلاتو كيتقلا غا بوحدو
أزار تقاد على لمخدة مغوبش .. سكت شحال و رجع نطق : حنان
مجوباتوش مع لعلم راه مزال فيقة و حالة عينيها لي مغرغرين
أزار: نعستيي ؟
ناض من بلاصتو كيسوط نيشان لعندها حيد عليها لغطا لقاها مغمضة عينيها .. تنهد و هزها بين ايديه ديريكت لناموسية تكاها فبلاصتها و رجع تخشا فبلاصتو
أزار مصغر عينييه عايق بيها فايقة : اتعطيني حقي و لا ناخدو بوحدي ؟
حنان بصوت منخافض : أزار بغيت نعس قارية الصباح
أزار دورها لعندو مغمضة عينيها .. قاد عليهم لغطا و جرها لعندو : ختاري نجمع لييك و لا ناخد بالشوية بالشوية ؟
حلات عينيها و حناكها مزنكيين : زواجنا ماشي حقيقي مكاين حتى واحد معانا باش تمتل .. غا تصرف على طبيعتك
أزار رجع خصلات شعرها لور كيداعب خدها بصبعو : لا مكنمتلش .. انا راجلك و من حقي نشبع منك
حنان قلبها و لا كيضرب فالمية : أزار
تنهد : صافيي حتى تكوني باغا منبزز عليك والو
هزات راسها باه و عاود دارت عطياه بالضهر
أزار بدا كينفد صبرو : رجعي لوضعيتك لي كنتي فيها .. هاد لمرة تعطيني بالضهر نعطيك شي تصرفييقة تفيقك
ميلات شفايفها و رجعات دارت لعندو : هانيي
أزار : اوا هاكاك
حنان : تصبح على خير
أزار : تصبحي غا نتيي انا مناعسش
جاب ليها الضحكة عرفاتو علاياش كيقلب .. بعد تفكير طويل تشجعات و تخشات فيه حاطة ايدها على صدرو
أزار بحدة : ديريها من الصباح ماشي حتى نقرع راسي باش تفهميي
حنان : ششش خليني نعس
طلع وجها لعندو باسها على شفايفها حتى تقصحات عاد بعد : نعسيي فاش تفيقي فيقيني نوصلك
هزات راسها باه و من لداخل ديالها مبتاسمة .. لفراشات دايرين مبغاو فكرشها ..
صبح الصباح ..
خاشية راسها تحت لغطا كتسمع التقرقيب فالبيت مبغاتش تخرج وجها و تجي فعينيهم
حفصة مصغرة عينيها : نوضي من التمتيل .. غسليي وجهك و اجي تفطري
تقطع لحس عاد خرجات ثلوج راسها من تحت لغطا مغوبشة : ياربيي اكون داكشي دلبارح غا حلم ياربيي
جمعات لوقفة كتكسل و تعاود .. خرجات من لبيت كتجر فرجليها و شعرها مشعكك غادة كتاوب حالة فمها حتى كتشوف باها .. فيساع تقادت فالوقفة و حدرات راسها غا غبر على نضرها طارت للحمام تخشات فيه كتدور فعينيها مقدراش تشوف فوجه باها .. محملاش راسها و كلشي بسبابو هو . كون عطاها التيقار مكانش ايوقع هادشي كامل
تنهدات بضيق عاد قضات حاجتها و طرفات حالتها .. بقات كتشوف شحال فالمرايا و لفوطة على وجها كتمسح فيه عاد حطاتها و خرجات كتطلب الله ميتفركعش عليها باها عوتانيي .. طلات عليهم فالصالون بانو ليها كيفطرو
لحاج هز كاس دأتاي : اتبقاي كتطلي علينا ؟
خرجات ثلوج عينيها : كيفاش شافني !
تقدمات بخطوة لقدام كتفرنس ليهم داك الإبتسامة لغبية شافت حتى واحد متسوق ليها ميلات شفايفها عاد مشات جلسات حداهم كتدور فعينيها : صباح الخير
لحاج بحدة : اشنو قال ؟
ثلوج باستغراب : شكون قال ؟
شاف مخرج عينيه : داك خطيبك و لا معرت
وحلات ليها حتى بدات كتكحب كون معطاتهاش حفصة لما كانت اتجيف
لحاج : هي رفض داكشي علاش وحلت لييك .. رديتيني ضحكة
ثلوج : لا لا ماشي هاكة
لحاج عاقد حواجبو : و شنو بالسلامة ؟؟؟
ثلوج كتقلب على لكذبة حتى لقاتها عاد نطقات : فرح بالخبر و عجبو لحال
لحاج : هممم قلتي عجبو لحال ؟
بتاسمت ليه إبتسامة صفرا : اه عجبو
حفصة : اوا مزيان .. هي جاية شي عراسية نفرحو بييك
شافت فالحاج : هاد لمرة ايدار لعرس ماشي بحال حنان مدرنا لا عرس لا والو
مقدراتش باقي تزيد جمعات لوقفة نيشان لبيتها .. دخلات كتقلب فالبلاكار على شي حاجة تلبسها مع ديجا حفصة كانت مقادة لبيت على قبلها حتى تجي اللوقيتة و ترجع ليها بنتها .. ختارت دجين و قاميجة من لفوق كاروات لبساتهم و خشات لقاميجة فالسروال حتى بانو ليهونش و الخصر منحوت .. جمعات شعرها لفوق غا تفكراتو فاش قال ليها كيجيك حسن مطلوق ميلات شفايفها و تقابلت مع لمرايا كتجرب واش كلامو بصح و لا غا كيكدب فالأخير رجعات هزاتو كيف كان
هزات ساكها دارت فيه التيليفون و داكشي لي اتحتاج عاد خرجات لبسات سبرديلتها لي كاينة حدا لباب
لحاج حاضيها و ايديه موراه : فين غادة بالسلامة ؟
قفزات و دارت لعندو حاطة ايدها على قلبها : ا أ ممم غ
ثلوج : شراه ليا بابا لبارح كون غا ممشيناش و شرينا لبيسي جبد ليا الصداع .. لمهم هادشي قصة طويلة حتى نسالي حريرتي و نعاود لييك .. بغيتك دابا تضبري ليا فنمرة داك لمجرم من عند راجلك
حنان : ميكة على أزار دابا .. لبارح هرس ليا تيليفوني جاب الله لكارطة متهرساتش أما كنتي اتصوني غا على والو
مجرد موصلها لميساج دخلات ليه كوبات النمرة و قيدتها فالكونطاك بسمية " حيوان مفترس " عاد صونات ليه كتسوط .. بقا اصوني و اعاود و حتى واحد مكيجاوب شدتها لبكية حتى فقدات الأمل فأنه اجاوب
مسحات دموعها لي هبطو : تفوو على حالة غادي نطيح الذل على راسي و معامن ! مع الشخص لي مكنحملش فيه الشعرة .. ولكن حتى انا مغاديش نكون ساهلة حتى تقاد الأمور بعدا عاد نفكر فحل ارجع ليا حقي منو
عاودت صونات هاد لمرة عوالة ميجاوبش حتى كتصدم بالخط تفتح و نطق بصوتو لحرش : الوو
بقات ساكتة كتبلع فريقها حسات بالعرق خارج من جبينها
أمجاد : شكون معايا !
ثلوج : مم م هنن
أمجاد هز حاجبو : ثلوج !
ثلوج : اه
أمجاد : متبقايش تعيطي ليا
و قطع فوجها حتى حسات بالحرارة طالعة معاها و حناكها حمارو بالقمعة لي ضرب ليها .. بدات كتقفقف و ترعد حتى من الشدة ديال التيليفون نسات كيفاش خاص تشدو
عاودت صونات عليه هاد لمرة بسيف باش حاكمة راسها باغا تسمعو خل ودنييه حتى اكره راسو ساعة فالأخير هي لي كرهت راسها ملي عرفاتو بلوكاها
رجعات التيليفون لساك و دموعها كيطيحو بحال الشتا : ولد لحرااممم بلوكانيي
مرضاتش و مقدراتش تحبس دموعها متسرطاتش ليها بغات تحماق .. بقات شحال على نفس لوضعية كتبكي و تعاود حتى تفشات عاد جمعات لوقفة خارجة من الجردة نيشان لشارع تاخد طاكسي .. و داكشي لي كان وقفات واحد كان خاوي و ركبات فيه
الشيفور : فين الآلة
ثلوج بصوت منغنغ : كتعرف قصر آل عمران ؟!
شيفور : اه معروف
ثلوج : حطني قدام لبوابة ديالو
هز الشيفور راسو باه و ديمارا كيسمي بالله
ثلوج مسحات دموعها لي هبطو عوتانيي : والله مغادي ندوزها لييك
بدات كتنخصص غا بوحدها بالتصرف لي دار
داز لوقت ..
خلصات الطاكسي بالفلوس لي خلات ليها مها الصباح و مشات داخلة مع لبوابة بزز باش خلاوها تدخل .. بقات غادة مع لممر كتدور فعينيها على الله ابان لييها حتى كتبان ليها ختها و راجلها باين عليهم منوضينها
مشات وقفات عليهم : سلام عليكم
أزار جهل : هدريي مع ختك تفهم شوية غادي تحمقنيي
حنان مرضياش : ختيي مدرت لييه والو
أزار عقد حواجبو : ياربيي منخلطهاش ركبيي بلاما نضربك
حبك جهنم ثلوج الجزء الثامن
محتوى القصة
التنقل بين الأجزاء