شاف فيها بنص عين وقال : الحاجة .. بلا مدخلي راسك فهادشي ... خليني عليك نهار يكتاب مغاديش تعارضي ولا نعارض .. خلي حياتي الشخصية بعيدة عليك ... وهني راسك من هاد الناحية بلا متفكري ليا
ضحكات خليج بسخرية وقالت : خربتي ليا حياتي !!! انا عارفاه زلال مكيسواش ... بيك ولا بلا بيك راه كيكدب ويخرج يفسد ... الله لا يسمح ليه ... عاودي ليا شنو وقع
تنهدات اشراق : دخل على غفلة لقاني جالسة ... مشيت كنجري للبيت نلبس عليا محسابش ليا غيجي ديك الساعة ... دخل عليا للبيت بدا كيتحرش بيا بزز مني ... كان بغا يتكرفس عليا وضربتو بالفيكس ديال النحاس فوق الكوافوز لودنو حتى طوش الدم وهربت للطواليط سديت عليا ... حتى جيتي نتي
تنهدات خليج وقالت: تحرش بيك من قبل ؟
حركات اشراق راسها : لا معاملتو الزايدة اللي كانت كدايقني
ساطت خليج وقالت : كنت حاسة ... كانت كتبان ليا شي حاجة ماشي هي هاديك .... واحد المرة حصلتو حدا باب البيت ديالك بالليل كيتسلت ... قالي حقا ما حقا سمعك غتغوتي ... حليت عليك الباب لقيتك ناعسة مكاين لا غوات لا والو ... كنت عارفة ... اصلا انا مليت وطلع ليا فراسي .. الى بقيت معاه غيجيب ليا شي مرض ... المهم بعدا حولت حسابي فالبنك كامل لحساب فالمغرب ماغاديش نرجع بيدي خاويين .. واخا بابا غادي يندب على يامو ويقدر يجري علينا .. صعيب جوج مطلقات عندو فالدار ... مهم درت علاش نرجع وباش نعيش انا وبيازيد وحتى نتي ... ينعل بو الرجال .. ولاد لكلاب ...
اشراق: الحمد لله ما شك فوالو قدرنا ناخدو بيازيد
خليج: نتي دابا قارية القانون ... واش يقدر ياخدو ليا؟
اشراق: لا ميقدرش .. فاش كان فقطر اللي كان صعيب عليك تخرجيه بلا الموافقة ديالو ... دابا عطاك الموافقة ميدقرش ياخدو من بلادك بلا موافقتك واخا يوقع اللي وقع
خليج: والى بغيت نطلق من المغرب ؟
خليج: تشدي محامي صحيح هوا يشد ليك القضية حتر يجيب ليك طلاقك ... والى راجلك ماحضرش فجلسة من الجلسات غادي يطلقو منو بلا ميجي ... ولاكن حتى كيدوز عام
حطت الطائرة على ارض الوطن .. وكانت الحاجة والحاج فالباب لاستقبال اشراق وخليج ... خرجو كيضحكو جارين الباليزات وتعرضو ليهم الواليدين بالاحضان والبكاء وهزو بيازيد فرحو بيه وطلعوهم للطموبيل مباشرة للدار ... دخلو كيشوفو فالحيوط موحشين الدار ... وخصوصا اشراق اللي رجع بيها الزمن اللور تفكرات ايامها السوداء من بعد الموت ديال ولدها وأزمة الطلاق ... تخنقات لاكن خغات شعورها وسلمات على الجدة و الجد وجلسو يرتاحو .. لاكن مع البدية بدات الحاجة بالاسطوانة ديالها
- ايوا نتي ماجبتي عريس ما قضيتي والو فديك قطر ؟ كي مشيتي كي جيتي؟ شوفي ختك كي فاش تزوجات .. ودارت ولادها و ...
اشراق: الشيطان هوا بنادم ... تعيطيني التيساع والى كبرات تسد فمها ... ماعنديش السوفل فين نهز شي كلمة ديال شي واحد واخا يكون شكون ما بغا يكون ... ولا غادي نهز حوايجي ونخرج من هاد الدار ... راه طلعات ليا العائلة فصحتي وغادي نطج لشي بلاصة اللي عمركم تشوفني فحياتكم ... العائلة اللي متصبركش الله ينعلها عائلة
بقات الحاجة غير كتشو فيها مصدومة وتنهدات قائلة
- لا حولة ولا قوة الا بالله العلي العضيم
خرجات من البيت خلاتها جالسة ومشات للصالة لقات الحاجة باقا كتهضر مابغاش تسكت وخليج قالبة وجهها فجأة قالت بغضب
- بلا متبقاي ضربي بيا المثل حتى انا غنطلق ... تهناااي دابا وسدي فمك شوية
تنهد طه وقال : البركة وصافي ... مكنعولش اصلا على داك الصالير
عماد : نتا بعدا راه عندك مداخيل اخرى ... انا اصاحبي شحال وانا فديك الشركة فاللخر يجيبو واحد من برا الشركة ويحطوه مدير !! ماشي تسطا ... ونتا شحال ونتا خدام تما كتسنا داك البوسط
صغر طه عينيه وقال : والله ومادرتي شي حاجة راسك .. ما طفرو ... راه الاعمال الحرة اللي كتهزك ماشي الوضيفة
رد عماد بالضحك : ويالاه سلفني شي مليار ندير بيه شي بروجي ههه
ضحك طه وقال : ماتدينيش انا نيت تبدا بيا لبروجي حسن ... راه غرقت اصاحبي فالبني شي مرات كنقول شداني ليه ... نشريها طالعة ومانوضش نبنيها .. المرض والله حتى المرض
عماد : فين وصلتي قربو يساليو ؟
تنهد ورد : راهم غاديين ..البني صعيب ماشي ساهل اعماد
دخلات مع الباب كتسوط وجلسات فطرف الكنبة لقات الحاجة كتخوي اتاي فالكاس
خليج: سخفت ... كاع المحاميين ضرت عليهم ماخليت حتى قنت ... عييت
تنهدات الحاجة وقالت : الله يهدي هاد باك ... الله يرد بيه ... دارها لينا على قد فمنا .. هانا حتى انا وليت بحالي بحالكم بقا ناقصني غير المحامي
شافت فيها خليج بسخرية وقالت : غير كيهضر ... دابا يصرو الجوع ونشوفو شنو يدير ديك الساعة ... ينوض مي لاللة طيب ليه .. حتى هادي ضارك مالك شنو ناقصك ! خلي ليه ديك الدار يدور فيها بوحدو ... هوا باغي يشوفنا مدلولين عند الرجال غير ميجبدش سميتنا شي واحد فالعائلة ولا يهضر عليه بالخايب ... واش اعباد الله حنا لخاطرنا ! وحدة كان باغي يجيب عليها الراجل الضرة حتى بغات تنتاحر كاع ... من حقها طلق ... وكملات وجملات مات ليها الولد مقتول بسبب راجلها وباغيها تبقا عندو وحتى واحد ميسيق الخبار وقالك مانقولو لحتى واحد راه مات مقتول ولا راه عندها مشاكل! واش دابا هادا بعقلو! نسدو فمنا باش نبقاو نبانو للعائلة واااعرين معايش بحالنا حتى واحد !... ايوا ووحدة راجلها كيخونها ويمشي شي نهار يجيب ليها شي مرض يلسقو فيها وكملها وجملها تحرش بختها بغا يتكرفص عليها !! كن عرف راه بغا يتكرفص على اشراق كوراه سباها فيها هي وحملها المسؤولية وقال هي اللي لاسقة فيا وجالسة معايا تما لاشغل لا مشغلة وميخلي ميقول فيها ... والبنت مسكينة مالقات فين تهرب وانا اللي ديتها معايا ... وشتي انا ختي اولا ليا من حمار وكلب حاشة السامعين الله يقطع ليهم الجدر ... كاع البنات عايشين مع خوتهم فالخليج وبيخير وعاد هي محترمة راسها عمرها حيدات الحجاب قدامو ... ومكيتسمعش كاع حسها ... شنو داه عندها يالاه ؟؟
تنهدات الام : ولاكن ابنتي راك هملتي راجلك وبقيتي مقابلة غير ختك و ...
قاطعاتها خليج بغضب : الى هملتو يخاف الله .. يخاف الله ماشي ير السبة بالاهمال ... يخاف الله راه خيانة هادي ... هوا مخاف لا من الله لا من العبد وزايدون كن هملتو كاع ما نولد معاه ..
تنهدات الحاجة وقالت : حنا مابقيناش كنعرفو دابا رجعتو نتوما اللي كتفهمو وتعرفو .. حنا نسكتو حسن
حطات يدها على فكها ساهية كتفكر وحركات راسها بالنفي
- باقي ... مابغيتش نجبد ليه حس الطلاق ... راني قلت ليه خاصك عملية فالراس ب 54 مليون ولا تموتي
خرجات الحاجة عينيها مصدومة: هيييه بغيتي تقتليني قبل الوقت الله ينعل اللي ميحشم كتبيعي فيا
تنهدات خليج وقالت : وراه نيت خاصك عملية فالراس باش تفهميني ونفهك ... راه قلت ليه هاكا باش يسيفط ليا لفلوس وماعنديش شي حل اخر ... والله مانفرقو حتى نحلبو مانخلي لوحدة اخرى فين تجي تنعس ... هوا يعرف يخون ويدير ما بغا ... ايوا هانا نوريه شكون هي خليج .. باقي العاطي يعطي غير بلاتي
خليج: اش شرك جدنا مع جدهم ... حتى السلام ماتقرايهاش عليهم مابغيناهش ... يعطيونا شبر تيساع ... عبرتي عليها خليها تبحلق ... اصلا باينة فيك من ديك العباية داخلة من الخليج غتبقا تشوف وتسول غير بينها وبين راسها ... خليها
حركات خليج راسها: لا غادي نشريو ما حسن ... تلاقيت واحد السيد عند المحامي اللي كنت عندو كيهضر على شي ارض ما ارض مضاربين عليها الورثة وبغاو يبيعو باش ما عطا الله المهم يفكو الورثة ... وبغيت ندخل عليها
ردت اشراق بخوف: عنداااكي غير دخلي بينا فشي حيط صحيح يرضنا
حركات خليج راسها: لالا راه غيبيعوها بطاطة .. اصلا انا غنشوف شي كونطابل اللي يتكلف بكلشي منطلع منهبط .. شنو بان ليك ندخلو عليها انا ونتي؟
اشراق: و .. ووشحال دايرة ؟؟؟
خليج: قالو 64 مليون ... نطيحو ليهم ونشريوها .. نبنيو فيها شي فيلا ... عرفتي فين جات بعدا !!!
اشراق : فين !
ويييلي كن تعرفي فين ! واخا تباتي تحلمي تسكني تما ماتوصليهش ... غير الفيلات اصاحبتي الحي رااااااقي الاراضي كيتباعو بالثمن ... والحي جديد يالاه كيبنيو فيه الناس وغير شكون وشكون ..
اشراق : ومالنا حنا على فيلا !!! بزاف
خليج : اويييلي واش من نيتك ! ... علاش مالكي كيحساب ايك غنسكنو فيها !!! انا كنقول ليك الحي راقي نديرو ليهم تما لاصال والحمام والصونا وندخلو موراه ماشي نمشيو نخمرو فيها انا ونتي وبا ومي
خليج : لا لا ... غنشوفو نطيحو ليهم ياكي ... ندخل انا بالنص ونتي بالنص .. مثلا انا ب 25 ونتي 25 مزيااانة لينا ماغتجيناش قاصحة بزاف ... همزة والله حتى همزة دابا تشوفي الى مطار عليها شي بروموطور يدير فيها هادشي نيت اللي بغينا حنا ... راه الارض تما كتباع الدقة عالنيف تسمعيها ترعفي ... دغيااا نبنيوها الى درنا فيها راسنا والله
جلسات حداها خليج بحماس: واغير زعمي وييييالا مطفرناهش نبيعوها ونربحو معاها المهم منضيعوش... والله منفلتها انا ... متأ!!! دابا شنو غنديرو يالاه ها حنا دخلنا للمروك اشنو غنديرو هنا نبقاو نتسناو الموت ونشفيو فينا عباد الله منستتمروش داكشي اللي جمعنا ! .. نبقاو ناكلو منهم حتى يتقاداو ونرجعو نبداو من الصييييفر حتى نلقاو راسنا شرفنا ومادرنا حتى طايلة !!!!
تافقات اشراق وخليج يزيدو خطوة للقدام .. واخا يوقع اللي وقع لازم يبقاو مستمرين .. يحققو النجاح باش يتبثو للعائلة ان الزواج بوحدو ماشي كافي ... قررو يحققو داتهم ويبرهنو لأي واحد حتاقرهم او قال فهم كلمة دللعيب ... ومنهم باهم وجدهم ... والجدة حتى هي ... اما حتى الحاجة نزيهة غضبات عندهم فالداؤ من بعد ما جرا عليها الحاج فلحضة غضب وسمع ليها كلام عمرها تنساه ونسب ليها جميع المشاكيل اللي كيمرو بيهم ولتربيتها ليهم وهز يديه كأنه ماشي واحد منهم او كينتمي ليهم .
خطوة جديدة خطاتها اشراق وخليج .. شدو طاكسي كيأها الناس الشعبية ومشاو يشوفو المنطقة والارض مع مول الارض ... لقاو المنطقة باقا جديدة جات على شارع كبير كيدي ويجيب لمركز المدينة ... المنطقة خاوية والاراضي خاوية ... بعض البقع اللي كتبنا كل وحدة فجهة والدنيا مرونة بالبني والشانطيات اللي كيفصلو بين البقع عامرين رملة ... الدنيا مقلوبة بالبني كأنهم تافقو يبنيو فعام واحد .. شي كيحفر وشي كملات ليه الفيلا وسكن وشي يالاه كيشد العبار وشي بدا الساس ... وقفو قدام البقة وسط الاراضي وسرحو عينيهم كيتافقو بجوج ومعاهم مول الارض وواحد السمسار كيحاول قدر الامكان يقحم راسو فالبيعة والشرية ... اما اشراق وخليج كيهضرو غير بلعينين بيناتهم وما معاهم حتى راجل يوقف جنبهم ... وماعندهم حتى دراية بالبيع والشرا الكبير وبالاخص هما نساء خافو يضحكو عليهم او يزرفوهم شي تزريفة يندمو عليها طول حياتهم .
- لاااالااالالا الارض ماشي شي حاااجة اصلا كتغرب فيها الشمس وغادي يقتلنا فيها غير الغمال
تنهدات خليج وقالت: ايوا شنو ؟ نديرو بناقص حتى نشوفو شي ارض اخرى ؟؟
تدخل السمسار: هاد الارض راه من غدا التباع الاللة واش دابا هادا ثمنها!!! راه ما فلوس هادي ما والو اللي غتعطيو فيها انا كن عطاها ليا كن جبت ليه الشاري من غدا
هزات فيه اشراق عينها وقالت: شدخلك السي فهاد بيعة وشرية !! بيعها ها هي باقيا عند مولاها وحنا فلوسنا باقيين فجيبنا ! اصلا بينا وبين مول الارض
خليج: شوف السي العربي ... الى بغيتي تبيع ... دير شي وقيتة من غير هادي نتفاهمو فيها ومدخلش علينا البراني .. حنا جينا عندك نيشان ماجابناش عندك سمسار .. الله يعاون
مشاو خلاوه واقف مع السمسار كيعمر ليه راسو
- شوف السي لعربي .. صبر عليا شوية انا نضبر ليك فالشاري ماتزربش ... راه الارض غلا من هاد الثمن اللي طلبتي فيها
- انا راه واكف على الشاري ماعديش الوقت خاصنا نبيعو اااقبل لا يحطوها في لميزاد وتمشي باطل ... واش انا كرهت فيه كرهت !!
بعدات اشراق وخليج ودارو مور واحد النادي تما كيتمشاو وهي تبان ليهم واحد المرى كطلب جالسة وحداها راجلها حتى هوا داير يدو على خدو ضاربة فيه الشمس وهما يتغامزو ومشاو عندهم وقفو حداهم وبقاو كيشوفو فيهم بنضرات غريبة .
كان العربي والسمسار كيهضرو حدا الارض حتى تمات المرى جايا هي وراجلها كيتمشاو ويهضرو بيناتهم على الاراضي ووقفو حدا العربي وقالو
- شكون هنا كيبيع هاد الاراضي ؟؟؟ مكاين لا مكتب لا والو ؟؟
رد العربي : ها الارض باغا تشري!!!
السمسار : راه مغيشريو ما والو هادو واش هادو لاينة عليهم حالة الشريان
رد العربي: تا سكت راه هادو يشريوك تا نيت !! تا يسحابك اللي كيلبس كيشري الارضووو!!!
رد الراجل: تما مول هاد الخير!!
العربي: ايييه انااا
الراجل: شحال هادشي!!
العربي: منيول للميترو ... الى غبيتي تشري مرحبا
المرى: وهاد الخير شحال فهاد من نيترو !
العربي: فيه 250 متر .. اش قلتي والى غبيتي تشري زمعا راه نقاظ معاك في ثمن
الراجل: هادي راه ماتجيب تا ربعين الف لميترو! ... تاهادي ارض يشريوها الناس هوكايا مشكودرة !! لالا ماهياش ارض ... تصلاح غا شي تيران تاع الكورة وصاف
العربي: مالها شنو عيبها !! على مزيناتها
المرى : لالا ... راه السيد ليه كيبيع غا بربع ثمن ! تا شمن منيلو لميترو ... زيد زيد زيد نشوفو لاخر اللي دوينا معاه يامس
الراجل: اخلينا ليكم الراحة
العربي : واجي .. شحال تعطي فيها ؟؟؟
الراجل: انا نعطيك فيها 30 مليون هادي وخسارة
عبس العربي وقال : الله يعاونك سير سير الله يسهل
الراجل: الله يعاون
يالاه فاتوه وهوا يتم جاي واحد اخر كيسول ونفس الشيء عيبها حتى رجعات تبان للعربي كحلة واللي جا كيزيد ينقص ليه حتى مابقات تسوى والو ورجعات تبان للسي العربي مساوياش وماصالحة لوالو واخا عيا السمسار يهضر .. واللي داز من تما كضرب الدورة يتخلص من عند خليج واشراق ويزيد فحالو . كعا العربي وهز تيليفون عيط لخليج وقال
- امدااام ... تي تعالي مالك داغي غضبتي !! تي تعالي نتفاهمو
ردت خليج واشراق حداها لاسقة على تيليفون
- شوف السي العربي ... انا راه منزيدك حتى سنتيم ... وزايدون لقينا الارض غزالة مولاها صافي تفاهم معانا ورخص كاع من داك الشمن اللي عطيناك حنا فالاول
رد العربي والسمسار كيجرو يسكت : تي شحاااال عطيتي فيها اجي عطيه ليا والله منخسر ليك (نتر يدو ) تا بعد مني ادعاوي لبلا ... بعد مني خنبيع ونشري مع الناس
السمسار: راه غا ضيييع فيها...
زعف العربي: تا شبغيتي عندي !! ياوالله لاشتي من عندي ريال !!! وياالاه ... اش قتلي اخيتي !!!
ردت خليج: ايوا شغنقول ليك ... انا عطيييت الكلمة
حركات اشراق راسها وكتزيد ليها وخليج كتهضر
العربي: تي غا تعالي والله منخسر ليك خاطر ... غا تعالي يالاه
خليج: ايوا شغنقول ليك ... انا راه غا جيتيني راجل مزيان ... غنطيح الكلمة مع مول الارض ونجي وصافي
العربي: يالاه نتلاقاو دابا نمشيو عند العدول اش قلتي
خليج: حنا عندنا الكونطابل السي لعربي هوا اللي غيغيز معاك الشغل .. ماعلينا غير نزيدو الله يقوي الخير
قطعات وجلسات شوية كتشاور هي واشراق ويتافقو من بعد مشا عندو حدا الارض وهوا زربان محروق لى البيع .. تافقو وخداوها بالثمن اللي بغاو وتكاتبو وجمعو وطواو وخرجو منها فرحانين نيشان عند المهندس يخرج ليهم تصميم المشروع اللي بغاو
بدا البني وبدا المشروع كيطلع .. وفنفس الوقت اجرائات خليج فالطلاق خدام عليهم المحامي ديالها اما خي مكتحطش رجليها فالمحكمة مقابلة البني هي واشراق والحاجة نزيهة شادة بيازيد وكتسنا فالحاج يهديه الله يردها للدار ميخليهاش كي عروست المنحوس ما هي مطلقة ما هي عروس .
اخيرا بعد عناء وتقصف وتقشف وريال ميخرج حتى يعرفوه في غادي كمل المشروع اخيرا وعلقو ليه بلاكة كبيرة راقية فالواجهة وديكو ولا اجمل كامل زاج من برا .
شعلو الاضواء بالليل فالمنطقة اللي عمرات فيلات وبناو حتى هما وكاين اللي سكن ... الشوارع تنقات وتزرعات فيهم اشجار .. دخلات اشراق وخليج باللباس بلدي والمكياج مع الباب امام الحضور اللي جاو يكتاشفو المشروع ... الدقايقة فالباب وهما داخلين فرحانين حتى حد ماقدهم فالفرحة .. الطموح .. العزيمة .. الارادة .. التخطيط .. الصبر .. الصمود وطعم النجاح اخيرا ليس له مثيل ... وصلو وحققو الحلم وقطعو شريط الافتتاح ودخلو كيتصورو بالسيلفيات و الموضفات ديال المشروع باللباس الرسمي لداخل ... اللي شافهم يقول من الاثريات ومولفين بالمشاريع الكبيرة ... لاكن العكس تماما .. بنات الشعب وبنات بسيطات ... حيدو من كرشهم ولحمهم وتوبهم باش طلعوه وكبروه وشافوه كما تمناو .... عاد لبسو وقادو حتى هما باش يكونو فالمستوى المطلوب . الفرحة والسعادة مالية المكان ... الحلوى كتفرق و المشروبات على الضيوف واخا مكيعرفو حتى واحد لاكن تفاجئو بالعدد ديال الناس اللي حضر ... بفضل الاشهار على المواقع التواصل الاجتماعي والحساب اللي حلو للمشروع ديالهم علنو عن الافتتاح وكان الكل في الانتضار .
بداو كيدورو ويشوفو كل بلاصة وشنو فيها ويصوروها .. بداو من لاكاف هوا الاول ... قاعة كبيرة فيها لابيسين معطى حديث وجميل .. مكان اخر فيه عرف صغيرة ديال المساج رجال ونساء بنفس البلاصة وحمامات بلدية وتركية .. "spa" وصونا وجناح للراحة مخلط رجال ونساء واخر مخصص للنسا فقط مع اضواء خافتة مريحة واصوات الموسيقة فالسقف الهادئة .. طلعو للطابق الارضي حيث يوجد مكان الاستقبال وكافيتيريال شادة من نص الفيلا حتى لخارج ديالها فالجردة ..طلعو الاعلى فين كاين لاصال كبير بجميع الالات الرياضية من اولها لاخرها ... بالزاج داير عليه وحمامات وفيستيير وخزانات بسوارتهم ... اما السطح فستغلوه كامل على شكل مطعم كبير بسقوف خشبية وزجاجية وكراسي وفوطويات كيطل على الشارع .. المنضر ديال المشروع من الخارج كيبان بحال شي شركة لو لا الزجاج اللي داير بيها كيبين الالات الرياضية لفوق من برى . فديك الساعة بداو الناس كيجيو يتسجلو واشراق وخليج فرحانين ... واخا حطو رزقهم كامل .. باعو الدار ... باعو الذهب ... باعو الفراش وباعو كلشي وخرجو كراو دار صغيورة عادية فحي شعبي .. لاكن فازو بمشروع حتى والا مدخلش فمتابعهمش لكرى ولكريدي وهادشي مريح نفستيهم نوعما ما وفرحانين بالمشروع اللي طلقو عليه اسم " K.I fitness " "كا إي فيتناس " ك . الحرف الاول من اسم خليج بالفرنسية ، وأي الحرف الاول من اسم اشراق "
خرج عماد من الفيلا كيسرح رجليه ويديه فجياب ودخل ل ك أي كيدور عينيه مباشرة للاستقبال فين استقبلوه بابتسامة
قال عماد بابتسامة : كليان جديد ... ممكن نضرب دورة نشوف ... بغيت نتسجل الى كان ممكن
ابتاسمات العاملة وقالت: واخا سيدي مرحبا بيك تفضل معايا
بدات ليه من لتحت لابيسين حتى لفوق لغيسطو ونزلات معاه قأئلة
- كنعطيو حصة ديال التدريب كغاتوي ... والى كنتي غتسجل كتخلص للعام كيكون تخفيض اقول من كل شهر بوحدو
تكا على الكونطوار من بعد ما دخلات لبلاصتها كتوريه الميزات ديالهم وهوا كيشوف وقال بلا ميتردد
- واخا مزيان ... صافي قيدي ليا تما واحد العام ...
ردت : بالسبا ولا بلا سبا؟؟
عماد : ديري ليا لباك ديال السبا اوك؟
حركات راسها: واخا مرحبا ... غيكون عندك جوج مرات سباحة فالاسبوع تختار الايام اللي بغيتي ... ومرة فالاسبوع حمام بغيتي بلدي او تركي ... ومساج مرة فالخمسطاش ليوم وكافيتيريا ... بالنسبة لغيسطو فهاداك بوحدو
حرك راسو بالايجاب : امم .. مزيان ... ماعليش ... غادي نسبق ليك واحد تسبيق دابا ... من بعد ندوز ليك شيك فاش نجي
ردت: مرحبا ... بالتسبة لصال دسبور تقدر تجي الوقت اللي بغيتي ماكاين حتى اشكال .. يا فالصباح يا فالعشية ... السبا ميكست ولا...
قاطعها قبل ميكمل وقال: ميسكت حسن ... اجي نقدر نجرب دابا ؟
حركات راسها : مربحا .. بما انك دفعتي تسبيق تقدر تجرب اي حاجة من هادو لعندك هنا ... والبنسبة للسبا فحنا عندنا كولشي الا الى بغيتي تجيب معاك نتا بينوار وفوطة وليبخودوي ديالك ... الى متبغيتيش حنا كنعطويهم ليك
حرك راسو عاجبو الحال : اوك مزيان
ردت: هاد لوفر كاينة غير فالبدية لان البروجي باقي جديد ... تقدر تعرض الاصدقاء ديالك يستافدو منو حتى هما
ضحكات وعطاتو الكرط باش يدخل ومشات معاه وحدة اخرى حتى للحمام لتحت ودخل كيجبد ويكسل عضامو ويردد
- مكانتش عالبال .. ولاكن هانية فوقما جا الخير يبنفع .. بسم الله (نصل التيشورط )
ضربها عماد بغسلة فاعلة تاركة ومساج طايلاندي من يدين اسيوية من داكشي خرج فشلان كيحل عينيه بزز لابس بينوار وكيجر بانطوفة ... تكا على الرولاكس مقابل مع لابيسين لكبير بالاضواء خافتة وسرح رجليه جابو ليه كوكتيل وليمون مقطع فطبسيل ودار يدو مور راسو كيتسنط لعضامو مغمض عينيه كيتمزك للموسيقى .
خرجات خليج من واحد الغرفة حتى هي كتفوه فبينوار ابيض وفوطة على راسها حناكها حومر وتكات حداه فوق الرولاكس .. جابو ليها سلطة مشكلة من الفواكه وكوكتيل وغمضات عينيها كتسنط لعضامها مشافتش كاع فجنابها حتى سمعات صوت حداها قال
ردت بابتسامة كترمش : شكرا ... خود شنو بغيتي ... هاد المرة على حسابي
ضحك وقال : هي اللولة ... ولاكن خاصني نرد ليك العراضة الى قبلت عراضتك ... وجات حشومة الى رفضت دابا
ضحكات وقالت: مرحبا بيك ... ونقدر نقبل عراضتك ... طبعا على حسب العراضة
ابتاسم عماد ابتسامة جانبية وقال : واخا ... على هاد الحساب قابل عراضتك
مد يدو للطبسيل اللي حطو ليه كلا منو وبدا كيتجمع مع خليج اللي بان ليها فيه البلان وعجبها وفتحات ليه الباب باش تجرو ليها حتى هي وعطاتو فرصة فين يسول ويدخل معاها فنقاشات اجتماعية .. هضرة تجيب هضرة حتى دخلو فالعلاقات الشخصية وقالت هازة كتفها
قالت وهي جالسة فالبيرو : صافي غادي نوقفو البرومو سونطر عمر .. غنزيدو نعمروه غيهربو منو الناس ...
قالت الشاب وهوا واقف: ولاكن امدام اشراق راه لكونت اللي فالفايس كاتبين عليه باللي لبرومو باقيا مطولة ..
حركات راسها وقالت: لا موديفيها وحط بوسط قول باللي السونطر عمر .. الميكست والبريفي بجوج عمرو والبرومو ضطرينا نحيدوها . مهم عرف كفاش تكتب داكشي
دخلات عليهم خليج لابسة واخد دجين وتيشورط مقزبة وسبرديلة يحلف عليها الواحد ما والدة وجامعة شعرها الفازك الاسود ... لقات السلام وتكات بيدها على البيرو وقالت
- شنو كاين؟
ردت اشراق وهي كطبع واحد الورقة بالكاشي: وقفنا داك ديل اللي كنا دايرين فلانترنت .. لاصال عامر والى زاد عمر غادي يترون ... المهم الى ضطرينا غادي نحيدو ديك لكافيتيريا لي لتحت نردوها لفوق مع لغيسطو ونستاغلو ديك البلاصة نزيدو فيها ماتيريال ونفرقو بالزاج
خليج : غادي ترون الى طلعنا لكافيتيريا لفوق .. غنخرجوها برا للجردة ونسدو بالخشب كما درنا للمطعم لفوق ... السقف بالخشب تجي حسن مع الطبيعة والخضورية ... حتى اللي فيه شي بلية يقضيها فالهواء الطلق
رد الشاب: اه داكشي اللي كاين تجي حسن
اشراق: صافي .. المهم نتا دير داكشي اللي قلت ليك وهاد الشهر الى تزادو عندنا الاقبال غادي نخويو الوسط كلو نديروه صال حتى هوا
الشاب: اوك نشاء الله ... يالله الله يعاونكم
خليج: انس الله يحفضك ديك المرايا ماتنساهاش راه شقها واحد العجل بدلها دغيا
حرك راسو : صافي غير تهناي راه وصيت عليها تجي لعشية نبدلوها
اشراق: شكرا انس
انس: يالاه الله يعاون شي حاجة عيطو ليا
خرج انس ووقفات اشراق لابسة جلابة من جلالب صيفية في قمة الروعة .. الاناقة والشياكة والصباط وقالت
- الحمد لله كنا خايفين ميدخلش لينا ... بدا كيدخل
خليج: راه غيدخل بطبيعة الحال .. وحتى بنادم كيجي يحط السيفي ديالو باغي يخدم
خليج: تافقنا الارباح تقسم للعام ماشي للشهر ... يعني حتى يدور العام عاد نصفي الحساب
اشراق: راه خاصنا طموبيل دابا ضاروري وخاصنا جوج ماشي وحدة ... وحدة ليك وحدة ليا راه مجاتش نتمرمدو فطاكسيات ... غادي ناخدهم كريدي بسمية السونطر ويتقطع حسابهم مع ليشاغج ديال السونطر ولحساب من بعد ..
اشراق: قوليها راسك .. خاصنا طموبيلات ديال لفريع ماشي غير اجي وركب .. راه حنا مالين شي ابنتي
فالباب ديال السونطر واقف الحاج عبد الغني ويديه موراه بواحد السروال ديال التوب وقميجة وبيرية على راسو كيسرح عينيه عاقد حجبانو ويدور راسو بميوعة كيتمنضر ويردد
- امممم...لاصال (بسخرية)
تمو تازلين مع الدروج كيكركرو بجوج وهما يخرجو غيه مباشرة قدامهم وشدو لفران وقفو ورجعو اللور .. دور عينيه شاف فيهم بنفس النضرة كأنهم طفروه زعما .. دخل كيدور عينيه وهما كيشوفو فالارض بحال التلاميذ مكيهزوش الراس قدامو
رد بنفس النبرة : مالكم وسعتو هاد الدخلة ... خسرتو فيها غير لفلوس (دخل كيتسارا ) قوة المرايات والزواق ... مالقيتو ماديرو بلفلوس ! ... انشوف هاد لاصال هادا اللي فضحتو بيه الدنيا
خليج : واخا بابا
زاد قدامهم وجرات اشراق خليج كتولول وقالت بصوت منخفض
- اوييييلي اش غيشوف ميييكست ميييكست غيسخط علينا كولشي مقزب لفوق .. اما الى هبط لتحت غيدفنا حيين
نترات خليج يديها وقالت : غير سكتي غتشوهينا غنشوفو كي نديرو ليه سكتي
اشراق: اويلي هادي مضربناش ليها لحساب غيقولو حالين دار الدعارة اش كيفهمو هما فشي مساج رولاكسون ولا امنسيون ولا شي باكور هندي
تلفت وقال كيطلع ويهبط : ايوا زيدو ... مالكم وقفتو
ردت اشراق بابتسامة مرتبكة : راه ..ررر.رر راه دايرين قوانين ... كاين واحد البلاصة ك.. كك .. كيترينيو فيها غير لمزوجين بعيالاتهم .. و .ووو واحد البلاصة فيها عيالات بوحدهم
قالت خليج بارتباك : اه .. كك .ك . ككلشي هنا فيه جوج جوج ... وحدة ديال المزوجين وحدة ديال اللي ماشي مزوجين
بقا ساكت كيسوف فيهم وقال: يالاه زيدو نشوفو هادشي اللي جالسين تخربقو عليا هنا
شافو فبعضياتهم كيبلعو الريق وطلعو معاه لفوق شاف لاصال .. دخل دور عينيه فالمكان لقا كل واحد اش كيديرو .. ها اللي كيجري ها اللي كيهز التقل ها اللي كيتصور مع المرايا ... دور عينيه وقال باشمأزاز
- المسخ لاحولة ولا قوة الا بالله
هبطو راسهم بجوج ساكتين وخرج من ديك البلاصة كينكر طلع للمطعم سرح عينيه وقال بزز باش خرجها وخنافرو فالسما
عماد واييه: نخارطت معاهم ... ضربتها بوااحد تحميمة اخاي شغنقولك ... و واحد المساج من داااكشي ... عندهم سيرفيس واااعر بالجهد داكشي عجبنييي ...
طه : هي رخيتي لعضيمات ههه سعداتك
عماد : لا والله تا خصك تمشي معايا المرة الجايا ... والله تا يعجبك وصرعوووه اصاحبي .. جربت غير لحمام والمساج الصراحة حطيت اعصابي عندهم تما حسااان من داك السونطر اللي كنا كنمشيو ليه وحدة تما كانت كتخرجني مقموش كامل بدفارها ... كنسهاااا تا كتجر ليا لحمي يشي قمشة كتندمني كااع
طه: خههه كان عاجبك قبل مايبان ليك هادا متنكرش الخير انكار الخير
عماد : حيد عليا .. والله كن دخلتي ليه تا يعبجك ... ولا نتي بنتي ليا ولفتي المساج عند دوك لغوريلات فسونطر لاخر يالاه كتحس بالوركة هي هاديك
ضحك وقال: هههه تفورماطيتي صافي نتا
عماد: خاصك تجربك الاصابع الاسيوية حسن من الافارقة اخاي طه ... جرب والى ماعجبكش قول ليهم يديرو ليك دوموند على افريقية تمسحك مع الزليج
طه : ههههه وصافي ..على حسابك ؟
عماد : على حسااابي ... كنهضر معاك بصح اصاحبي مع نتا كتعصب والله تا خصك دو صيونص فلاسومين
طه: لا خطر حسابك المساج ساهل .. راه كيرخي الاعصاب ونصدقو فالترويض كنجموعهم
عماد: وا مرة فخمسطاش ليوم صالح ليك ... مهم انا دابا والله مافيا اللي يدوز لشي قهوة غنمشي الدار نجبد عليها بشي نعسة عير سمح ليا ابا طه وصافي
هزات خليج كتفها : حيدي عليا تا نتي ... الطلاق مغيهربش هادا اللي غيهرب الى بقيت نتسنا الطلاق .. مهم بعدا جيتو من اللخر حتى الى كانت غتكون شي حاجة راه عارف عليا كولشي منخبي عليه ميخبي عليا .. بان ليا عجبتو
اشراق: وهوا شنو كيدير ؟
خليج: مدير وكالة فبنك المغرب
اشراق: تباارك الله .. مزيان
خليج : زين يامك ... عالله يصدق ميقولش ليا الدار .. الى مشا حتى قالها يا وييييلو نهبط ليه وجهه وكامل
حط تيلي وتلفت موراه عند نهاد اللي جالسة فوق الناموسية كدهن يديها وقال
- عماد مسااالي هه...قالك والو تمشي معايا لاصال اللي هنا
حطات العلبة ديال لكريم كضحك وقالت
- اه بصح .. قالو زوين دابا نمشي نشوف
هز حاجبو فيها وقال: غتمشي تشوفي؟ شنو غتشوفي؟
تكات على جنبها فسوميج دو نوي وقالت
- هادا قريب ليا حسن
جلس حداها وتكا على جنبو كيشوف فيها لابس بيجامة ديال الدار وقال
- مع العيالات .. اوك
نفضات الغطا عليها وقالت : عيقتي اطه والله ... بزاف على هاد الحكام كيمرض
حيد عليها الغطا على وجهها وقال : شنو باغا تمشي تمايلي قدام الرجال ! صافا با لا؟
تنهدات : وصافي صافي اسيدي العيالات اوك ... يالاه برد كتعصب غير بوحدك .. غدا غنمشي نشوف الى كان فيه الرقص الشرقي نتسجل فيه .. مع العيالات بقيتي على خاطرك
حل عينيه بابتسامة وقال: كتعصبيني حتى نتي .. مكتراعيش شوية
ردت فدهشة: يااك مكنراعيش !!
ضحك وقال: شوية وصافي
ضحكات وقالت: وابااز ليك ... كتنكر
رد بتتاقل: طفي الضوء يالاه .
تلفتات جهتها طفات ضوء وضارت عندو عنقاتو وحطات راسها على صدرو
فمطعم راقي جالسة خليج طالقة الشعر ولابسة كسيوة كتجمع هي وعماد ... مكياج وعكر حكر والروايح وموسقى هادئة كيتعشاو على نغماتها ... هز عينيه فيها بابتسامة وقال
دخلات الحاجة كتنكر: فين بقات هادي دابا حتى لهاد الوقت ؟؟؟ جوج ديال الليل هادي واش باقي شي لاصال
تنهظلت اشراق وقالت: وصاافي اماما راه كبيرة واش غتوريها شنو دير
الحاجة : اش غيقولو علينا الناااااااس
غوتات اشراق بغضب: فييين كيعرفك شي وااحد فييين ونتي جديدة فهاد الدار شكون غيهضر عليك كتعصبيييني فين ما مشيتي حاضية الناس وهما حاصيينك .. حضي راسك وخليني عليك ماشي وحدة راااها كتبرع مع راسها وانا نسمع الهضرة بلاصتها بعدي مني برحم باك
الحاجة اففففف متا... دابا الى شافها شي حد داخلة فهاد الوقت مشكيييلة
تلفتات اشراق : المشكيلة هي اللي نتي فيها دابا ... ماتعيشو ماتخليو اللي يعيش بسبب الجهل ديالكم خرجتو على شحال من وحدة تصبر باش الناس يسكتو الله يخليها سلعة ... سيري تنعسي خليها دخل وقت ما بغات ... ماراهاش كترضع صبعها
الحاجة : فييين غيديني هاد النعاس فييين ... عيطي ليها شوفي فين هي ... واش باقيين شي بنات فالزنقة حتى لهاد الوقت
سمعات الساروت كيدور ومشات نيشان للباب وقفات عليها وهي داخلة لابسة العباية من لفوق والشال والطالون كيقرقب ... جمعات الخاجة يديها عندها بجوج وقالت
ردت اشراق من البيت بصوت مرتفع: خاافي على راسك لا تموتي بالفقصة ولا يركب فيك السكر اما حنا كاع متخافي علينا
خليج : ولاهيلا ... هازة الهم ومريضة وباغا تبكي ومتشائمة
بدات خليج واشراق يوجدو اوراق السيارة ... تكلف الكونطابل بكلشي وجمع الدوسي ودوزو لخليج اللي كانت فالسونطر كتريني حتى هي .. دوشات ولبسات حوايجها ونزلات عندو خدات الملف ومشات مباشرة للبنك من بعد ما تاصلات بعماد ... استقبلها ومدات يديها ليه وجلسات قدامو بابتسامة .. فتح الملف وبداو يتناقشو عليه ويضحكو في حين خدامة اشراق على الطابق الارضي كيصلحوه وهي واقفة متبعة الخدمة .. قلبو كلشي وردوه صال اخر حتى هوا وبنيما هي مشغولة جاها اتصال من خليج فرحها وبدات ضحك بوحدها . اخيرا تقبل لكريدي وشدة الطريق بجوج بلا ميتعطلو دخلو كيشوفو السيارات الجديدة الفاخرة .. مستفين وحدة حدا وحدة كيشعلو ويبريو .. يركبو فهادي وينزلو من هادي ويطلعو فهادي وينزلو من هادي والحاجة جالسة فوق الكرسي شادة بيازيد ومتبعة ليهم العين كتشير بيدها وتوريهم الطموبيلات فاللخر ناضت حتى هي كدور معاهم وتركب وتجرب .. واحد اللحضة دارو بجوج تلفتو موراهم لقاوها جالسة فواحد الطموبيل طويلة لقادام شادة فالمقود وكضحك بوحدها وتوري لبيازيد .. نخزات اشراق خليج وبداو يتغامزو عليها ويضحكو وكملو البحث ديالهم على السيارات اللي بغاو فالاخير اقتنعو .. وحدة خدات كاط كاط والاخرى مرسيديس اخر ماكاين .. تبايعو وتشاراو وخرجو من تما مخرجين الطموبيلات وحدة مور وحدة .. السعادة هازاهم لا هما لا الحاجة معاهم راكبة القدام كضحك وشادة لبيازيد فيديه كيسفق .. ضربو دورة فالمدينة بالفرحة ودازو حدا لاصال حطو وحدة وركبو كاملين فسيارة وحدة بقيادة اشراق فاتجاه السوبر يتقداو ... وهما غاديين كيتغامزو وقفو حدا مدرسة لتعليم السياقة ونزلو .. بقات الحاجة غير كتشوف فيهم وتابعاهم بواحد الصابو والجلابة مسكينة ماعارفة والو حتى لقات راسها كتسجل فتعليم السياقة وهي دير يدها غلى فمها حشمانة بعات تخرج وكتحرك صبعها بلالا وهما كيجروها بزز منها وهي كضحك حشمانة .. تعصبات خليج مللي مابغاتش تقيد ليهم وهي تخرج عينيها عاد قبلات الحاجة وحدران الراس حشمانة ودخلوها تسجل وبقاو عليها بالهضرة ويعمرو ليها الراس حتى حمسوها وخرجو خلاوها جالسة فالصف كتفرج فالتلفزة وضحك .. نص الحصة تفاروج والنص لاخر جموع مع العيالات اللي تما معاها
رجعات ليها اشراق فالعشية ووقفات السيارة حتى خرجات عندها الحاجة وحدة اخرى .. كضحك وتكركر طلعات حداها ودارت السمطة
اشراق : ايوا تعلمتي شي حاجة ؟؟ راه غيدوزو ليكم امتحان .. الى ماحفضتيش غتسقطي
دارت الحاجة يدها على فمها : هييه! فوقاش !
اشراق: واحد الشهر ويدوزو ليكم امتحان ... (زادت سايقة السيارة حتى لواحد تيرا خاوية وحبسات ) نزلي يالاه
الحلم الأسود الجزء 13
محتوى القصة
التنقل بين الأجزاء