الحلم الأسود الجزء 15

من تأليف Ghazal trust
2020

محتوى القصة

رواية الحلم الأسود

نزلات الحاجة كتجري وهوا كيمشي ويجي بلاصتو باغي يخرج من حوايجو وقدامو لبنى وسلمى كيتناكرو 

لبنى: نتي السبب فهادشي نتي 

سلمى: غتبعدي مني ولا غنقتلك .. طلعتي ليا فراسي فرقيني عليك 

لبنى : علاش عرضتيها جاوبيني واش بغيتي تخرجي علينا ؟؟؟؟

شاف فيها طه بغضب : شكون اللي عرضتي نتي؟؟؟

ردا سلمى : ماعرفتش علامن كتهضر هاد الحمقى مافهمتش جات نيشان عندي كتغوت نتي عرضتيهم نتي خرجيهم علاالمن كتهضري الزبل علاالمن 

سكتات لبنى مابغاتش تهضر قدامو وودورات وجهها وهي جالسة شادة رجلها 

- راكي عارفة علامن 

قالت سلمى بجنون بغات طير عليها : واش باغا تحمقيني انا علااامن عرضت ؟؟؟ علاااامن بناقص من هاد العرس وميجي منو حسبي الله ونعمة الوكيل 

فديك الاثناء دخلو نهاد بالصلاة والسلام على رسول الله النكافات وهي مخلوعة قلبها كيطلع ويهبط بالخلعة وردو البال على اساس غيبدلو ليها لاكن تصدمو بالعريس وهوا واقف امها كيخزر فيها والسيدي فيدو 

- شنو هادشي؟؟؟!

ردت بنكران : شنو ؟؟ مافهمتش؟؟

رد وجهه فالجنب عاطيها ودنو: شنو قلت ليك انا؟؟ قلت ليك جمعي رجليك ولالا ؟ قلت ماتمشيش !ونتي شنو درتي ؟ طيحتي بكلمتي للارض ... ودرتي اللي بغيتي 

شافت يمين يسار بتوثر وخوف واحراج وقالت

- فين اطه انا مفهمتش علاش كتهضر ! ...

قبل متكمل الجملة وهي باتبات واقفة هز يدو بالمقلوب اللي فيها السيدي عطاها تسرفيقة حتى طاح التاج وكمل كلامو بنفس اليد كيهضر بيها والكل مصدوم 

- كتكدبي عليا! (هز حاجبو) 

تدخلات الحاجة وسلمى وناضت لبنى بسرعة والنكافات .. كاع اللي تما تدخلو بيناتهم شي شد فيها شي شد فيه كيهديو السوق

- الحاجة : نعل الشيطان ... نعل الشيطان اولدي الله يرضي عليك 

دفع الحاجة وقال: بعدي الحاجة ... بعدي خليني نتفاهم معاها 

جلسات نهاد مصدومة كتبكي شادينها النكافات الحاجة كتشير بيدها لسلمى

- سيري قولي ليهم يدفعو لعشا ... سربي خليهم يدفعو العشا قبل منتفضحو قدام الناس سيري 

خرجات سلمى كتجري واخا مفاهمة والو كتجرب


قالت نهاد شادة حنكها كتبكي: كضربني على قبلها اطه !! 

قرب ليها مصغر عينيه والسيدي فيدو وقال تحت سنانو 

- الى مخليتك تندمي على لكدوب ديالك انا ماشي راجل ... بغيتي ترديني ماشي راجل وضحكي عليا وتلعبي مور ضهري ... حساب ليك راسك نزقة ... واخا لاللة 

قالت كتشهق بالبكا : راه بلعاني دارو ليا هاكا ... نتا مابغيتيش تيق بيا ياك ... مابغيتيش كتيقهم هما ... وكتهز عليا يدك فنهار عرسي ؟ !! هما تاصلو بيا وقالو ليا اجي وبقاو كيستدرجوني حتى جابوني عندهم وضحكو عليا وعطاوني الحمام كادو ... انا مللي دارو معايا هاكاك حشمت منهم وقلت ماعليش ... ولاكن نخلص واخا غير شي تمن رمزي مللي بقاو كيلحو عليا ... هما بلعاني دارو ليا هاكا انا مامشيتش عندهم هما بقاو كيعيطو ليا 

ضحك بسخرية : عذر اقبح من ذنب ..عرفتي شنو ... انا مغنهضرش على المشية ديالك لتما ... انا دابا غنهضر على الكدوب ديالك .. ولا عرفتي شنو .. بلا منهضر عليه ... جمعو عليا هاد الروينة مابقا عرس 

وقفات بسرعة كتبكي: طه ماتفضحنيش قدام الناس ماديرش ليا ااا هاكاااا (بهستيرية) بغات تخسر ليا عرسي 

النكافات : الله يعطيك الستر اسيدي .. خلي غير هاد الليلة دوز على خير ... 

دخل الحاج الناجي كيجري مخلوع والحاجة موراه 

- طه ... طه اجي معايا .. اجي 

بغا يجرو لاكن رفض : حتى واحد ميتدخل ... صافي مابقا لا عرس لا زفت (شار بيدو ليها) نتي درتيها راسك ... وانا ماعندي ماندير بمرى كدابة ... 

نتفات شعرها بجنون : مكندكبشششش مكنكدبشششش عليك اطهاااا هما ضحكو عليااااا ... ضحكو عليااا انا ماعرضتش ليهم 

غوت بغضب والحاج ثدامو كيهدي فيه 

- مغتجيش عندك بلا عرااااضة ... مغتجيش كن ما مشيتشي عندها برجليك نتي وعرضتيها 

ردت بجنون: علاااااش كتيق بيهاااا لهاد الدرجة علااااش وكتكدبني انا 

دخل باها فديك الاثناء كيجري ومها وخوها لكبير شاف ديك الحالة وبغا ينقض على طه لاكن منعو باه وتدخلات حتى نهاد كتغوت 

- ماشي شغلك بيني وبينو .. بيني وبينوووو ماشي شغلك 

غمض طه عينيه وفمو ناشف تلفاا ليه الهضرة وهوا كيشير بيدو ويردد بعصبية

- غت. ... اح.. غتخرج من هنا بيني وبينها مادخلش ولا غنخرج غنخليها ليك


خرجو خوها من تما وسدو الباب بقا غير باها كيسول اش واقع بغضب ونهاد كتبعدو لاكن رد طه بعصبية وقال 

- سولها ... سولها شنو دارت ... جاوبيه 

الام : نعلو الشيطان .. نعلو الشيطان وخزيوه .. اش درتي ااااش درتي هضري (شافت فالحاجة) شنو واقع الحاجة ؟؟؟

الحاجة: والله ماعرفت اشنو واقع ... دابزو مافههما علاش

خرج طه عينيه وقال بغضب لباه لي كيجرو 

- خاصهم يعرفو شنو دااارت (شاف فيهم ) اسيادنا بنتكم ماشي عرضات على مرتي اللولة ... طلقتها هادي ثلت سنين والزيادة ... ومشات برجليها حتى لعندها وعرضاتها للعرس ... ودابا راه هنا فالقاعة يالاه ... لكم واسع النضر .. انا دابا مغنهضرش واللي بغيتوه ديروه 

كولشي شاف فيها مصدوم وهوا داخل مع باه لبيت اخر اك البيت فالقنت وسد عليه الباب من لداخل .. بعصبية طرطق داك السيدي كيتغدد والحاج كيهدي من روعه ... حل عليهم خوه الكبير الباب دخل حتى هوا وردو خلا واليديها كيعاتبوها وهي كتبكي ومزالة شادة فكلمتها وكترددها حتى تيقها الجميع وحسبوها سادجة ونية وفعلا دارت بيها . لاكن الحاج الناجي و الاخ الاكبر كان ليهم رأي اخر وجلسو معاه عطاوه قدرعة ديال الماء ليدو وهوا كيتعرد ويدو جامدة وكيشوف قدامو بغضب فصمت 

الحاج: راه حرب الناس هوا هادا صافي الغيرة و .... و وو لا حولة ولا قوة الا بالله العلي العضيم 

رد الاخ الاكبر: هاد العيالات خاصهم العصى ... علاش لخرى جايا حتى هي .. ماشي من لعاكزين ... هادي عرضاتها بغات تفقصها لخرى جات ترون ليها العرس 

الحاج : صافي قولو اعود بالله من الشيطان الرجيم ... العرس هادا وغادي غير نتفضحو قدام عائلتنا وعائلتهم 

هبط طه على القرعة كاملة بغضب شربها وقال 

- مغاديش نكمل ... لكتاب اللي عليه العمدة تكتب صافي العرس غير شكلي ... هي بغات هادشي تحمل مسؤوليتو 

الاخ : غير نصبرو وصافي .. صبر بقات ساعتاين ونوضو نمشيو بحالنا شغل لعيالات هوا هادا 

طه : لكدووب ... لكدوب وانا ماعندي ما عدا من لكدوب .. وتجيب طليقتي لهنا قدامي 

رد الحاج بتعب : راه اودي كن عرفات لي وقع لينا مكانتش غتجيبها .. ماعارفاش كااع شنو دزنا منو وشنو داز علينا ... هي شافتها كطليقة مشات بلعاني عرضاتها ... لاربنا لخرى لاحت ليها شي كلمة ماشي هي هاديك بقات كطلع فيها وتهبط ... فين تلقاو بعدا فين ؟؟ فين كتعرفها 

دور طه وجهه كيشوف فجنابو ويبرد اعصابو 

- حلات لاصال حدانا ومشات تسجلات فيه .. تما عرفاتها 

الحاج: متأ !!! لا الاه الا الله وصافي ... نعل الشيطان ... نوض صلي شي جوج ركعات نعل بيهم الشيطان وخلي هادشي يسالي على خير ... راه لحضة غضب وغتفوت 

بقاو معاه اصرو عليه حتى ناض دخل لمرحاض فنفس الغرفة توضا وخرج صلى ليه جوج ركعات رجعو ليه مزاجو .. فين هوا كيصلي خرج خوه بسرعة عندهم وهما كيصلحو اللي ضاع فنهاد من مكياج وشعر وقال بسرعة وصوت منخفض لمو 

- اري ليه يبدل دغيا .. شنو غادي يلبس 

تلفتات نهاد شافت فيه علاين تشهق وارتاحت نسبيا ومدات ليه الحاجة كوستيم بسرعة اسود دخلو ليه . 

فديك الاثناء خرجو السربايا بسرعة موراهم ام العروس وسلمى كيسربيو العشا ، وطاولة اشراق وخليج وعماد حسو باللي شي ماشي هي هاديك وقالت خليج كدور راسها 

- لعشا شفتو جاي كيجري باينة بغاو يسدو المطعم بالزربة 

اشراق: وحنا مالنا .. ياك معروضين .. ايوا صافي بحالنا بحال الناس 

بقات سلمى كتقلب بعينيها وتشوف فين جالسين حتى قشعاتهم ومشات جيهتهم بسرعة وقفات بارتباك وقالت فاجأتهم 

- مرحبا بيكم 

هزات اشراق وخليج راسها وردت اشراق

-سلمى!!

وقفات سلمات عليها والاخيرة كدور عينيها مخلوعة خايفة من التهمة تلسق فيها ..سلمات بسرعة وقالت بتوثر 
- مربحا 

ردت خليج : الله يكمل بلخير على خوك 

حركات سلمى راسها باحراج : امين ... شكرا

مشات سلمى كتنهد هازة هم الدنيا .. تحطات البسطيلة بلحوت وقطع السرباي القطع فالطباسل وبداو الناس كيتعشاو ومنهم خليج اللي كضحك وتردد 

- هادشي بنييييين خهه ضربي ضربي ... 

عماد: خليييييج 

خزرات فيه : ماالك ... ماشي معروضة !!!

عماد: عيقتي والله .. صافي سكتي شوية 

خشات الفرشيطة فمها وقالت بسخرية : هوا نت لسة شفت حاجة 

عماد: علاش مانمشيش نكملو السهرة فشي قنت نبدلو الجو حسن 

خليج: بتكاشطنا!!!

عماد: بلدو ونمشيو ؟

هزات كتفها كتاكل : مرة اخرى ... ضرب ضرب . ضرب ليك الكلامار مع راسك... حنا شاريين الكادو وخاسرين رزقنا ونمشيو بلا عشا!!! زوينة هادي


بتعب ونفور رمى الكوستيم حداه وقال

- ما فيا اللي يبدل 

الحاج : نعل الشيطان .. نعل الشيطان الله يرضي عليك خلينا نزلو نتعشاو مع الناس براكة غير هاد الزربة اللي درنا ليهم كولشي غيطرا ليه العجب . 

نهاد بأسى وصوت مبحوح : مابقا لا طيفور لا هودج لا دفوع 

ردت مها وهي كتمد ليها الماء تشرب : حمدي الله اللي غيهبط يتعشا ... بقا ليه غير طيفور يطلع فيه ! نتي خليتي فيها شي طيفور وشي دفوع 

سكتات نهاد وجمعو ليها شعرها مشطة وصلحو ليها المكياج ولبسوها تكشيطة خفيفة للعشا والتاج صغير وجلسات حانية راسها فصمت حتى خرج عندهم الحاج كيدير الطريق لطه ويساوي معاه لابس كوستيم لاكن كيتنفس بزز .. والاعصاب باينين على ملامح وجهه .. 

النكافة: صافي يالاه اختي 

ناضت نهاد وقفات قادوها كتشوف فيه بنص عين من تحت لتخت وهوا ابدا واش كيدور وجهه جهتها .. خرجوهم بالزغارت والحاج حداه خايف يدير ليه شي رد فعل غير طبيعي وكيساوي معاه ، لعروسة شادة فتكشيطتها بجوج يديها وهوا شاد يديه عندو ونازل معبس مكيضحكش .. 

النكافة : دورو على الناس رحبو بيهم و 

تدخل الحاج: مكاين مايدرو دابا صافي يجلسو نيشان 

هزتت اشراق عينيها هي وخليج وكانت فعينيها نضرة غريبة وصدرها كيطلع ويهبط وخليج كتشوف فيهم مهبطة راسها وقربات منها والفرشيطة فيها الماكلة فيدها وقالت 

- باااينة كبتوها لفوق شوفيه هوا كي داير... بان ليا خاصو غا معامن .. وهي مالقات فاش تشد زعما شدات فتكشيطتها! تقولي منبتاها باطوب خصها جوج يديه يهزوها . (صغرات واحد العين كتحلل) تأ ! ... شي حاجة طرات لفوق ... وبحال والو تكون شبعات بكا ... باينة فوجهها .. شوفي باه .. كيسلك ليه الطريق بالفن بحال لا مزوجينو بزز ... (حركات راسها بالنفي) لالالالا ... والله تا شبكات شي تشربيكة صحيييييحة هادي مافيهاش شك ... كمامرهم مكتبشرش بلخير .... دابا نشوفو واش دوز ليهم النعمة ولالا ؟ (نخزاتها بكتفها فهدوء ) ضربي العشا مع راسك ... وشوفي فيه خليها توقف ليه فالحلق .. بيني ليه باللي صافي مشا مع الهوا ... وكولي وضحكي ... شفتهم مشاو جلسو نيشان (غمزات ساهية فيهم) مافيهمش الصواب باااز .. مافيهم اللي يعرض على الناس ! ولا حيت حنا هنا ! 

رد عماد اللي طالق ودنو عليها حداها كيتسنط ومقرب منها فيدو فرشيطة عامرة كيدور راسو وقال 

- والله يعفووو ... لعفووووو لعفوووو راداااار راداااااار اخليج نتي واحق الرب تا راداااار


شافت فيه خليج مكمشة قنت فمها 

- ديها فطبسيلك ونتا حاضيني ... يااه مالك غير حاط عليا 

رد بنرفزة : وا نتي اللي ديها فطبسيلك شداك لطباسل الناس !! راه حشومة هادشي والله وحرام 

دارت عندو وقالت : امم .. حراام !!! واسيدي خليني .. خليني نتا راه معارف والو 

حط الفرشيطة : انا مغنتعشاش الاللة حتى تقولي ليا شنو اللي معارفش 

هزات حاجبها والفرشيطة فمها : مغتعشاش حتى تعرف !!! وراك مغتعشاش واخا تعرف حيت الموضوع طوييييل وانا باغا نتعشا ... كول كول ... كول حتى نساليو ونعاود ليك 

في حين خليج وعماد كيتناكرو اشراق واحلة ليها النعمة فالفم وساهية كتشوف فطه بخيبة امل اللي الاخير بنفسو كيشوف فجنابو مقابل معاها وكيوسع عنق الكرافاطة وكيهز عينو فيها ويرجع يشتتها ... هزات نهاد عينها شاف فيها مباشرة وفهدوء تام وراس مرفوع حطات اشراق الفرشيطة ففمها بابتسامة خفيفة وغمزاتها وكملات بكاس ديال الموناضة كتشرب .. بلعات نهاد ريقها من التوثر والغضب كتمالك اعصابها وباش تغيضها تلفتات عند طه بابتسامة حطات يدها على يدو فوق الطبلة لاكن قلب عينيه لجهة اخرى وحيد يدو وهز كاس ديال الماء ... العشا كامل واشراق متبعاهم ودايرة ليهم ازعاج ... نهاد كتاكل وكتحاول تبدل اطراف الحديث مع اللي معاها فالطبلة وطه قالب وجهه متكي بيدو على الطبلة كيشوف فنقطة وحدة وكاس ديال الماء فيدو ما كلا ما داقو ... خوه كيضحك معاه بسياسة ويمد ليه قدامو وهوا كيحرك راسو مكيدورش وجهه .. كيتنهد وساهي قدامو فصمت . حتى من التصوير شار بيدو للمصور يبعد ميصوروش . تحط الشوا وهي ضحك خليج وقالت 

- الله ... ها امعقوووول 

رد عماد بسخرية : اللي لتاهمتيه دابا عاد ماشي معقول !

خليج: انا كن حطو ليا غي دجاج محمر مدغمر نخشي يدي وسط الدجاج نجبد لكبدة ونجر الدغميرة حسن من البسطيلة عامرة شعرية 

عماد: واخا يعمرها ليك بالذهب ماتجيكش بنينة غا كولي ... نشوفو شنو تقولي على اللحم (شاف فيها كلات) ياكما خضر! 

كمشات فمها : خانز ... فيه ريحة فشكل طول عندهم فالتلاجة


تكال الشوا وطه باقي على نفس الوضعية مكيدورش وجهه .. حط الكاس وبعا ينوض لاكن شدو الحاج وقال

- فين غادي؟؟

طه : لحمام 

ناض مشا للحمام بينما الكل مهمك فالاكل وبقات اشراق متبعة ليه العين حتى قلب الدورة وشافت فنهاد بابتسامة ومسحات اطراف فمها وقالت 

- خليج ... انا غنمشي غير لحمام ونجي 

ردت خليج فمها عامر مجمعة مع عماد وناضت اشراق بابتسامة ونهاد متبعة ليها العين وعينيها خارجين .. .غادية اشراق وكتشوف فيها بتقة فالنفس كأنها كتقول ليها غادية عندو والاخيرة كتزفر فبلاصتها من الطبلة حتى دخلات اشراق للحمام فجأة لقاتو بوحدو كيغسل وجهه وهي توقف لحضة لاكن رفعات راسها وبغات دوز لطواليط حتى كتفاجأ بيه جرها من دراعها بقوة دورها وهي مصدومة فيه . 

نهاد بتوثر: غنمشي للحمام 

شداتها مها: جلسي اشمن حمام داكشي اللي بقا ليك 

ردت بارتباك : مزيرة بزااف 

- صبري لعروسة مكتنوضش من الطبلة ... جلسي للارض براكة من لفضايح 

ردت : خاصني نمشي ضاروري 

خزرات فيها مها: ينكفوك النكافات للحمام !!! قلت ليك جلسي شدي الارض كلشي جالس ونتي غتمي غادية كي عزري الدوار ... (دفعتتها بقوة) جلسي .. حنا اصلا كنتسناو فوقاش يسالي هادشي 

شداتها فبلاصتها وهي كتصفار وتخضار ودور وجهها جهة الحمام وكتشوف فطبلة دختها حتى عواج ليها العنق عاد شافت فيها ختها وشارت ليهابراسها جات عندها وشوشات ليها فودنها وحركات ختها راسها بالايجاب ومشات جيهة الحمام 

شافت فعينيه مباشرة وهوا كيشوف فيها مزير على يدها وقال 

- شنو جيتي كديري هنا؟؟

تصدمات فيه ونترات يدها بقوة وقالت 

- مرتك عرضاتني ... وانا لبيت الدعوة .. ولا نتوما مقيدتوش ليستة ديال المعروضين تعرفو شكون اللي معروض وشكون اللي ماشي معروض 

غزز سنانو كيشوف فيها وقال : جيتي ... مرحبا بيك ... جلستي .. تعشيتي ... صافي سالا العرس ... كنتمنا منعاودش نشوفك مرة اخرى 

رجعات خطوة اللور مصدومة فيه وصدرها كيطلع ويهبط وبدات تخزر فيه وقربات قائلة 

- انا اللي مابغاش نعاود نشوفك مرة اخرى ... مابغيتش نشوف خليقتك قدامي لا نتا لا هي ... كن كانت عندك العصمة فيدك وكتفكر مزيان .. ماتخليش مرتك تحط عندي رجلها فالسونطر مرة اخرى ... وتجي تحجز للحمام وتعرضنا بوجهها حمر ... (صغرات عينها) بان ليا نتوما بجوج كتشابهو ومتافقين على هادشي 

رد بانفعال وصوت كيحاول يخفضو

- ماعرفتش واش كانت كتجي عندكم ولالا .. وختاصري هاد الهضرة راسك وهزي حوايجك وسيري بحالك .... سيري بحالك اشراق وحسن كاع كن ماجيتيش 

دمعات عينها وهي كترعد فبلاصتها وقالت كضحك مع ذلك

- خفتي نخسر ليك ليلة العمر!! واش تخلعتي!!! لا متخافش انا ماجيتش نخسرها ليك ... جيت نشوف وجهه مرتك اللي عارضاني بلا حشمة بلا حيا ... اما نتا (بززز) نسييييتك وخرجتي من بالي شحال هادي ... شحال هادي خرجتك .. وكن كنت باقا كنكن ليك ولو شوية من داكشي اللي كان ! ماكانوش غيهزوني رجليا ونجي لهنا لعرسك .. امولاي السلطان 

رد بغضب : نتي اللي مشيتي .. نتي اللي هزيتي راسك وقررتي تمشي نهار الاول! شنو كيحساب ليك راسك غنبقا نبكي عليك ونتسناك تجي الوقت اللي بغيتي ! امم؟ حتى ترشق ليك !! (رد بسخرية) انا ماشي غير نسيتك ... انا مابقيتش عاقل عليك شكون نتي اصلا 

بقات ساكتة والدموع كيهبطو بوحدهم وقالت بقوة 

- عرفتي شنو هي احسن حاجة درت فحياتي ... هي مشيت وخليتك... اااه انا مشيت وخليتك ! حيت انا ماشي هي ليلى ... ومغنبقاش واقفة هنا كنبكي عليك ونسمع فهاد الهضرة بحالها .... مغنبقاش تابعاك حيت نتا تستاهل وحدة بحال نهاد وبحال ليلى ... عيفت الرجاااال .. عمرني كرهت شي حد بحال اللي كرهتك وكرهت نشوف فوجهك . . . غتشد مراتك عندك ومنعاودش نشوفها فطريقي .. ولا اقسم بالله حتى نقلب ليك حياتك لا نتا لا هي .. ومكيهمنيش نمشي فيها للحبس ولا نمشي فيها للروضة بقدر مكيهمني نريب الدنيا على راسكم بجوج .... الجيعانين ... تريكة ديال الجووووع بنتو على حقيقتكم . . الله يعطيكم الجوع كتر مللي نتونا فيه 

رد بصرامة: ساليتي؟ يالاه الله يعاون ... الله يجيب ليك معامن تلهاي 

كانت غادية لاكن وقفات مللي سمعات هضرتو وبقات سامرة فبلاصتها قاطعة النفس وكتشوف قدامها ... مسحات دمعة من عينها كتحرك راسها بالايجاب وكملات طريقها مارداتش عليه وخرجات كتقرقب .. تلفت بغضب شديد ضرب يدو مع المرايا شقها فالنص وتحنا على لافابو كيزفر باغي يغوت باغي يطج من حوايجو وهبط راسو كيبكي ويغزز سنانو واخت نهاد واقفة حاطة يدها على فمها مصدومة ورجعات بحالها كتجري


مشات قاطعة النفس كتقرقب للطبلة مهبطة راسها ومدات يدها المرعودة هزات الصاك خلعات خليج اللي جالسة كضرب فالديسير هي وعماد . حطات الاخيرة الفاكهة من يدها والموس وناضت فمها عامر كتعيط 

- اشغاااك .. اشغاك ماغك؟ 

بلعات بالزربة وناضت مسحات يدها كتفتف هزات الصاك وتبعاتها كتجري وتقرقب وعماد موراهم كيجري .. خرجو لبرا حدا الطموبيل وهي تشير اشراق بالصاك ضربات زاج الطموبيل وبدات تغوت وخليج مخلوعة كتشد فيها 

اشراق: طلقي منييييي ... الله يعطيهم كسيييدة ... الله يعطيهم شي موصيبة ضربهم ... الله يعطيهم المووووووت اااااااااااااهههىءاهىء

خليج: يالاه نمشيو صافي سكتي يالاه بحالنا 

نتراتها : مابغيتش نمشي .. طلقي مني مغنمشيش ... انا غنوريك اولد الحرام الشمااااتة 

تمات غادية كتجري بلا عقل راجعة للقاعة لاكن شدها عماد بقوة كيهدن فيها 

- صافي اشراق... صافي لحضة غضب وغدوز ... علاش من الاول جيتي حسن كن ماجيتيش

دفعاتو : طلق منييي .. طلق طلاااااق

خليج: ماطلقش .. لا شدها عنداك طلقها 

هزها كتغوت حلات ليه خليج الباب ديال الطموبيل دخلوها وزادو مع الطريق مباشرة جهة البحر ووقفو خلاوها خرجات لبرا كتنفس وتبكي بوحدها حتى شبعات وردوها للطموبيل غادي عماد وسايق بيهم حتى للدار ونزلو تعبانين طلعات اشراق وبقات خليج واقفة معاه كتنهد

شنو غدير دابا؟ غترجع للقاعة 

رد : خليت طموبيل تما .. غادي نرجع 

خليج: خلي معاك طموبيل .. مغتلقاش طاكسي دابا فهاد الليل حتى لغدا وجيبها 

رد بابتسامة : اك نشاء الله.. ردي بالك على ختك .. بانت ليا مريضة بزاف

خليج: كن هاني ... يالاه تصبح على خير 

سلمات عليه بالوجه لاكن عنقها بابتسامة تعنيقة مكانتش متوقعاها ومشا طلع فطموبيل رجع بحالو للقاعة .. دخل لقا الدنيا كتسفر .. بقا كيدور فعينيه فالقاعة وبان ليه تريتور مشا عندو 

عماد: السلام عليكم ... احم. شفت لعرس سالا بكري

تريتور: اه مور لعشا صافي سالا وكلشي مشا بحالو ... سمعنا قبيلت شوية باللي لعريس دار اكسيدو فالطريق الله يخرجعا على خير

تحلو عينين عماد فيه وقال: شنو!! فوقاش ؟؟؟ 

التريتور: دابا شوية فاش خرجو ... دار اكسيدون فالطريق 

تصدم عماد وخرج كيجري كيعيط فتيليفون للاخ الاكبر وجاوب بسرعة 

- الو انا عماد طه لاباس عليه؟؟؟ اش واقع ؟


دخل كيجري للكلينيك ويقلب لقا العائلة كاملة تما ومنهم نهاد جالسة ويدها على خدها بالجلابة بيضاء حدا مها .. وقف عماد حدا خوه كيسول مخلوع والاخير متكي بيدو على اليحط كيتنهد 

- ها نتا كتشوف ... فينا شي دعوة الله يتسر مور كل عرس كيتهز للسبيطار ... المرة اللولة تسمم .. دابا كسيدة تهزات بيه الطموبيل فالسما مابقا فيها ميتشاف

عماد: كفاش وقع ؟ شنو وقع ليه واش كان بوحدو ولا معاه شي واحد ؟

تنهد : كان بوحدو .. كان فالاول معانا فالطبلة دالعشا ... شوية ناض وعيط ليا قالي عيان غيمشي للدار ميدقرش يزيد حتى دقيقة معانا ومشا طلع فطموبيل خلانا سالينا العشا وجمعنا حوايجنا حتى كيعيطو لينا اجيو راه تقلبات بيه الطموبيل ... ماعرفناش اش هادشي والله لعضيم 

دوز عماد يديه على وجهه كيسوط وتكا على الحيط براسو شوية ورجع قال

- شنو قالو ليكم ؟ كيفاش دايرة لحالة ديالو دابا؟؟

الاخ: راه فالانعاش... عندو كسور... رجلو وعنقو ... كسيدة خايبة غير الله يحفض وصافي

جلس عماد القرفصاء كيتنهد شاد وجهه حتى هوا واحد من العائلة اللي حاضرة .. كل واحد فين شاد قنت والحاج متكي على كتفو كيتنهد واللي داز كيرتب على كتفو ... النهار كيطلع والعائلة كتقل وكتنقص حتى بقا غير الحاج واقف وعماد والاخ الاكبر .. انا نهاد خرجوها من تما كيصبروها بزز منها داوها لأن لا وجودها ولا وجودهم كاملين مغادي يغير شي حاجة . 

شرقات شمس دافية ومعاها تيليفون خليج كيصوني وهي ناعسة فسرير صغير مقابل معاها سرير اشراق .. جرات تيليفون فتحات الخط وردت بتتاقل

- اممم؟

عماد: وي خليج .. طه راه دار كسيدة لبارح .. تقلبات بيه طموبيل 

حلات عينيها فجأة وهزات راسها جالسة مصدومة وتيليفون فيدها .. شافت جهة اشراق لقاتها ناعسة عاطية وججها للحيط وردت بصوت خافت 

- ياك لاباس ؟ شنو قلتي ؟؟ دار كسيدة؟؟ كفاش؟ 

عماد: كان بوحدو البارح .. حنى دابا فلكلينيك وهوا راه فالانعاش من لبارح ... دعاوي اشراق خرجو فيه فالبلاصة 

- مكانتش معاه نهاد ؟ .... امم بوحدو ؟ متأ!! مابغيناش ليه اخويا ولاكن هادشي راه كيضر فلخاطر.... اشمن كلينيك ديتوه ليه ؟


فباب الانعاش ... مع 5 دالصباح .. كلشي ناعس وحدا بابو مواقف حتى واحد ... حتى باه مشا تكا فوق واحد الفوطوي بعيد هوا و ولدو لكبير .. تحطو يدين انثوية بيضين على البواني بشوية حلو عليه الباب وهوا ناعس فوق البياص .. كيتسمع فقط صوت الاجهزة خدامين وهوا مسطح .. تسد الباب مرة اخرى وتقدامات اشراق بخطا تقيلة كدوز يدها من البدية ديال رجلو لمغطية بليزار حتى لصدرو العاري الضمد بضمادات بيضاء وسلوكة رقاق لاسقين عليه ... على نيفو وفمو انبوب الاكسيجين وعلى راسو ضماد ابيض وبعد الجروح منضفة على وجهه .. بقات ساكتة ساهية فيه كتشوف وقفات حدا راسو من بعد ما جمعات التنهدية وبدات كتردد

- سمح ليا .... سمح ليا دعيت فيك فلحضة غضب ... مكانش عليا ندعي عليك واخا نتا تستاهل ... ولاكن كرهت راسي حيت سبب فهادشي اللي وصلتي ليه دابا ... (تنهدات بعمق) انا معرفتش علاش ... علاش جابوني رجلي عندك حتى لهنا ... علاش جيت من بعد داك السم اللي عطيتيني لبارح ... من لمفروض نكون مت بداك السم وقتلت بيه اي حاجة كتفكرني بيك .... ولاكن .. ماعرفتش ... ماعرفتش شنو كيوقع اطه .... مقادرش عقلي يستوعب .. مقادراش نتحكم فنفسي ... مقادراش نسيطر على راسي .. ونخدم عقلي ... كنحس براسي بحال الى انا ماشي اشراق ... ماشي اشراق ! .... نتا صافي .. تزوجتي .. ختاريتي المرى اللي تكمل معك حياتك ... قررتي ونسيتيني ... ولاكن انا .... انا متقدرتش نساك .. ماقدرتش ... شي حاجة جراتني من رجلي ... جراتني من رجلي فاش سمعت بهادشي ... (تنخصصات بعمق) انا عمرني نآديك ... ولا ندير ليك شي حاجة اللي ضرك ... انا ماشي هي ليلى ... ماشي ليلى .. مغاديش نلاحقك ... مغاديش نوقف فطريق اختيارك ... ولاكن منقدرش نساك .. منقدرش نحسبك غايب ... (تنهدات) ولاكن غنحاول .. وندير اللي فجهدي باش ندير كما درتي نتا ... باش نعيش حياتي ونتسنا من الايام هي تنسيني فيك 

هبطات عينيها كتبكي فصمت وشدات ليه فيدو المجروحة وبقات كتشوف فيها وتبكي

واخا قلتي ليا هضرة بحال السم ... ماقدرتش نغمض عيني .. ونشمت فيك .. ولا نتمنا ليك كتر من هادشي ... اللي كنتمنى .. هوا تكون هادي اخر مرة ... اخر مرة نشوفك فيها او نجي فيها عندك . . . مابقاش عندي الحق ... ماشي من حقي نكون هنا ... ماشي من حقي نشد ليك فيدك بحال هاكا ... هادشي رجع من حق مرى اخرى ... هي اللي تقرب منك ... وتشد ليك فيدك 

سكتات مهبطة راسها وطلقات من يدو ببطئ وتراجعات اللور غادية وكتمسح دموعها جهة الباب .. وكما دخلات خرجات وردات الباب موراها خلاتو فبلاصتو .. حل عينيه بتتاقل فالسقف بقا كيشوف فيه ساهي ورجع غمضهم


خرجات كتبكي من باب الكلينيك لابسة عباية وشال اسود .. كدور تشوف موراها وحالفة حلفة قطعية عمرها تعاود ترجع ... هادي اخر مرة غادي تلاحقو ولا توقف فطريقو .. طلعات فسيارتها السوداء ومشات بحالها قاطعة وعد ماتعاودش دل راسها ... صافي .. هوا رجع لوحدة تخرى غيرها ... هي مابقاتش ليها بلاصة فقلبو ... سميت اشراق تمحات وكما هوا ختار طريقو .. حتى هي جا الوقت فين تختار طريقها ... وتبدا من جديد .. طوي الصفحة وتحاول تعيش او تعايش .. المهم ماتكونش نسخة طبق الاصل ليلى . صافي ... كلشي سالا كأنه عمرو ماكان .. لاكن باقي عندها فالخياة ناس يستاهلو تعيش ليهم ... وكما دارت خليج وبدات من جديد .. حتى حاجة ما صعيبة او بعيدة . 

بعد مرور 6 اشهر .. 

جالسة فلاصال كتريني .. لالسة سورفيت مستورة وشال وطالعة فوق البيسيكليت كتحرك يديها ورجليها وتسوط .... جات عندها خليج لابسة كولون وديباردور وتيشورط على كتفها فوطة كتقطر بالعرق جامعة شعرها كوب شوفال وقالت كضحك 

- شوفي .. دخلت الكرش ولالا ههه ياك قلت غازي ندخلها ميجي فين يدخل الصيف حتى نحت شي فورمة خطيييرة ... 

وقفات اشراق كتنهج وقالت : حتى انا ... حتى انا بغيت نولي بحالك ..بحال هاد الفورمة وندخل الكرش 

خليج: هي الى خدمتي عليها ... انا راه كنتريني الصبااح باعيالات مع 8 فاش كتكوني نتي ناعسة ... وكنسالي كنمشي لموسكيلاسيو ... عرفتي شحال وانا خدامة عليها باش جمعت اللحم .. راه حتى شفت النجوم 

اشراق: حتى انا غادي نشوف .. (كتنهج) شي كروب نخدم معاه الصباح .. و.. و نكمل بالحديد ... والله حتى نرجع بحالك وحسن 

خليج: نوضي . تكعدي ... نوضي يالاه نوريك اش ديري 

وقفات اشراق سخفانة وقالت : شنو نديرو 

خليج: زيدي نوريك .

فالفيلا داخلة نهاد كتقرقب بالطالون والشعر مطلوق .. تلفتات يمين يسار لقاتو جالس فوق الكرسي كيشوف فيها .. حرك يدو قدامو شاف فالساعة وقال 

- شحال هادي فالساعة؟

ردت بميوعة : كنت عند ماما فالدار .. مانمشيش نشوف ماما؟

شار بيدو : مكاينش عندك راجل تشاوري معاه 

تنهدات: طه .. عيقتي والله .. شنو فيها الى مشيت 

وقف وقال : مافيها والو ... اللي فيها هوا خاصك تشاوري قبل ماتمشي 

هز لافيست ديالو على كتفو وتم خارج 

نهاد : فين غادي فهاد الليل ؟؟ 

تلفت شاف فيها بسخرية وزاد حتى لباب وهي تبعو كتجري 

- طه فين غادي معاك كنهضر!

رد بميوعة: سيري كملي الليلة مع ماماك


هزات راسها كتموت بالضحك والكاس فيدها كان غيتزلع 

رد عماد كيضحك بصوت منخفض: الشوهة معاك هههه فضحتينا 

قلبات اشراق وجهها للجنب فمها عامر كتموت بالضحك والكاس فيدها 

خليج وهي كضحك : ويلي غنموت ... غنموووت ههههههه 

ردت اشراق كتموت بالضحك : ماشفتي واااالو انا عطيتها الطموبيل وهي مشات قالت ليك نجيب حوايجي اللي بقاو عندهم فالدار ههههه 

خليج : ويلي سكتي سكتي ههههه كوراه بابا طرطق فيه شي عرق 

اشراق: مشيت معاها للدار هههه بلعاني مشات باش تبان ههههه 

عماد: باز هه كضحك على مكم 

ضرباتو خليج للكتف: وا ماعايش معانا والله حتى يهرب ليك ههههه ماما راه قالت ليك رجعات ملكة اعمال ههههه 

عماد: ملكة اعمال 

ردت اشراق كضحك : كتقول ليها ملكة اعمال ههههههه 

عماد : علام والله حتى علام 

فوسط قهوة ومطعم بالليل فالهواء الطلق كيضحكو ويتعاودو والعشا محطوط ... الدينا عامرة وقوة الهضرة كل مجموعة علاياش مجمعة .. اما هما عايشين العالم ديالهم بوحدهم .. فجأة جاه اتصال لعماد ورد 

- فين اولد الحاج 

اشراق: كضحك) شي نهار نخرجوها معانا 

خليج : ايييه هههه 

عماد: فالهاتف) هانا اولد الحاج فالكافي المعلومة وصاف .... نتا اللي غبرتي .... هانا مع الاصدقاء وصاف .. تهلا اخاي 

قطع وهي تلفت خليج قالت: شكون ؟ شي صاصبتك مسمي عليها ولد الحاج 

هز تيلي بغا ينزل ليها على الراس وقال 

- غننن .. نيتك ناقصة اللي كديريه كتنويه 

خليج: لااا خويا نيتي فنة حسن منك هههه 

وقف عليهم شاب فجأة كيضحك وقال 

- السي عماد 

تلفت عماد فجاة : اااهلااا اهلااا (وقف) اكيداااير .. لاباس عليك ... كولشي بيخير ... اش هاد لغبور 

الشاب: هانيا خاي عماد نتا كي داير . لاباس عليك ؟

تلفت بابتسامة : السلام عليكم 

مدات ليه اشراق يدها بابتسامة وخليج كذلك وعماد كيعرف

- المدام ... المستقبلية نشاء الله ... واشراق ختها ... صاحبي علي 

اشراق وخليج : متشرفين 

عماد : ريح اصاحبي ... 

رد علي كيشوف موراه : معايا الدراري مرة اخرى نشاء الله 

عماد : وا ريح نشوفو غا وجهك تبدلتي علينا 

جلس علي كيضحك حدا اشراق وقال 

- باقي نتا اخويا هوا نتا 

عماد : هوا انا هههه فوقاش جيتي ؟؟ وا غبرتيييي 

علي: شهر دابا باش جيت .. الواليدة عيانة مسكينة 

ردت خليج باسى: الله يشافيها 

علي: امين اختي 

بقات اشراق ساكتة وكتشوف فيه بنص عين ... شاب وسيم .. شعرو اسود ناعم ملامح عربية .. زينو مختالف مربي اللحية بزاف وطويلة شوية ... طويل القامة وجسم رياضي ولباس رياضي .. انيق ومأدب فهضرتو 

عماد: ياك لاباس مالها الواليدة ديالك ؟

رد باسى: جاها لكونسيغ مسكينة .. وراك عارف .. كتعاني .


ردت اشراق الله ياشفيها : تلفت شاف فيها بابتسامة : امين اختي شكرا 

خليج: واش يالاه بادي؟

حرك راسو بأسى : طول فيها ... اودي الطب فالمغرب زيرو . ماعرفوش يشخصو الحالة ديالها ... عرام ديال التحاليل وعرام ديال الدوايات وماعرفوه حتى فات الوفت ... نتاشر فالدات ديالها مسكينة 

رد عماد بأسى : لا حولة ولا قوة الا بالله ... الله يشافيها 

علي: امين اخاي عماد .. (ابتاسم) ايوا نتا ؟ شكتعاود ؟ اش كيعاودو الدراري ؟ فين شادينها؟

رد عماد كيضحك: كل واحد فين شدها ... شي تزوج شي خرج برا .. كل واحد فين شدها .. تفرتكات الجقلة اصاحبي ههه 

ضحك علي وقال: هههه وتشرفتييي اخاي عماد هه

عماد : اما نتا لا هههه الشيب ناض ليك فاللحية ... مالك على هاد الغوفالة .. نتا يا اما تكرطها كتملة يا تجمعها كاملة 

علي: هرب وجهه .. وقال كيعبر ويضحك ) عايرتني بالشيب وهوا وقار .. يا ليتك عايرتني بما هوا عار 

عماد: ههههههه هادي واعرة 

علي: ويراتي عندنا هادشي 

ردت خليج بعفوية: لالا جا زوين 

شاف فيها عماد بنضرة حادة بينما رد علي واشراق مدورة راسها ويدها على نيفها كتموت بالضحك 

علي: شكرا اختي 

تلفت بعفوية شاف فأشراق وهي كضحك وضحك معاها بمجاملة بينما وقفات خليج بارتباك 

- احم .. غنمشي للحمام ونجي 

مشات لاحمام كتجري وعماد كيخزر فيها متبع ليها العين وتلفت قال 

- دقيقة وهانا جاي .. عنداك تمشي 

علي: سير الله معاك 

بعفوية تلفت شاف صحابو فالطبلة غادين وشار بيدو بمعنى غير سيرو ورجع تلفت كيضحك شاف فأشراق وقال بأدب وابتسامة 

- عماد مغيار ياك ههه

ردت كضحك : داكشي اللي كيبان ههه

رد: خواتات نتوما؟

حركات راسها بالايجاب: امم .. خواتات 

قال بلطافة: كنبتنو صحابات


ردت اشراق بلطافة: مكنتشابهوش ههه 

رجعات خليج معصبة وعماد موراها ساخط وجلس ابتاسم بزز منو وقال 

- ايوا خاي علي ! ..شخبار البنية ... شنو سميتها نسيتها 

رد علي بلطافة: استريلا 

ردت خليج : زوينة سميتها !! شحاا من عام عندها ؟ 

علي: 10 سنين دابا 

خليج : تبااارك الله ... مابيناش عليك !!!

خزر فيها عماد مرة اخرى سكتها واشراق مقادراش تحبس الضحكة وعلي كذلك عايق فالفيلم . 

هبط راسو بابتسامة: لعقبة ليكم نشاء الله 

ردت خليج : انا عندي وليد 

قال فدهشة وعماد حاني راسو شاد فجبهتو 

- بصح!!! الله يخليه ليك 

ردت بسعادة: اميييين شكرا 

تلفت عماد وقال بغضب صامت تحت سنانو 

- تزيدي كلمة اخرى نقلب عليك الطبلة 

دورات وجهها بميوعة لجهة اخرى سكتات وبداو كيتجمعو بيناتهم فجأة وقف عليهم طه كيشوف فيهم باستغراب وعماد مصدوم كيوقف بزز .. لاكن علي دغيا وقف فرحان مد يدو عنقو وقال 

- طها!!!

هزات اشراق وخليج عيننيهم مصدومين توقفات الحركة عندهم كاملين من غير علي اللي باين انه سعيد جدا برؤية طه


دورات اشراق وجهها بالزربة وشافت فخليج وناضت فخطرة مشات للحمام سدات عليها وبقات واقفة كطل من بعيد في انتضار يمشي بحالو .. 

عماد: طه!!! ... 

ابتاسم طه وقال : ياكما خسرت ليكم لعشا ؟؟(ابتاسم) علي ! على سلامتك ؟ فوقاش جيتي 

رد علي بعفوية : شهر دابا ! نتا سافا اش كتعاود ؟ يالاه سولتو دابا قلت ليه دراري فين شادينها 

دورات خليج وجهها للجهة اخرى ودارت رجل على رجل بميوعة كتشوف فجهة اخرى وعماد مضهشر ما عارف ما يدير 

عماد: اا. ا اااجلس اخاي طه !! 

فديك اللحضة رن هاتف علي ورد بسرعة بعد شوية ورجع قال 

- دوماج .. كنت باغي نجلس معاكم ولاكن خاصني نمشي .. خاي طه ضاروري نجلسو . مد يدو لخليج وقال 

- ختي تهلاي فراسك 

قشعاتو اشراق كيسلم وبدون شعور خرجات من مخبأها مشات بسرعة للطبلة هزات صاكها قدامهم وقالت على عجلة 

- غنمشي ماما قالت ليا اجي ماعرفتش شنو بغات 

شافت فيها خليج بارتباك وتدخلات بسرعة 

- علي عفاك وصل اشراق معاك فطريقك حنا باقيين معطلين 

رد علي بابتسامة : مرحبا على الراس والعين .. يالله . الله يعاون 

دازت قدام طه اللي واقف كيشوف بعينو ورد حتى هوا 

- غنخليكم حتى انا .. عماد من بعد . 

مشا طه حتى هوا معكر ليه المزاج جهة سيارتو وخليج دايرة ابتسامة نصر من بعيد ... قشع علي ونوا كيفتح باب السيارة لاشراق اللي طلعات بابتسامة وسد الباب عليها وركب زاد


فالسيارة ...

مربعة اشراق يديها كتشوف قدامها فصمت وعلي سايق السيارة كيتجمع معاها 

- عماد وطه صاحبي من ايامات لكوليج ... غير الوقت فرقاتنا وصافي 

اشراق : علاش قررتي تخوي المغرب؟

رد بحدية وهدوء: ماشي قررت .. انا كنت خدام هنا فالاول ودرت لهجرة لكندا .. مشيت عالله حتى صدقت مستقر تما وخدام تما .. بنتي حتى هي ولفات تما ... واخا كنجيبها للمغرب الى فاتت شهر كتقول ليا توحشت صحابي بغيت نرجع 

حركات راسها بالايجاب: اممم .. الله يخليها ليك ... غتكون كتوحش حتى ماماها 

ضحك بسخرية : ماماها ... اشمن ماماها الله يهديك 

ردت باستغراب: علاش ؟؟ 

رد باستهزاء : ماماها هادي عشر سنين باش صافي سالينا انا وياها ... تزوج كاورية صعيب ! ... كلشي مباح وحنا العرب ماعندناش مع ديك صديقي ولا نتعطل مع صحابي برا حتى ترشق لي .. هي لا هاكا دايرة . . حتى مللي تفارقنا سمحات فبنتها وقالت ليا منقدرش على المسؤولية ديالها 

ردت اشراق فدهشة: اوييلي !! وصعيب عليك تربي بنت بوحدك 

تنهد وقال: صعيب وصافي ... راه ماشي غير صعيب .. خصوصا نتا فبلاد بوحدك .. عندك بيبي كيرضع معارف كي دير ليه ومامعاك حتى واحد 

ردت بأسى : وشنو درتي ؟؟

رد بعفوية: تعلمت بزز مني .. وبقيت هاكاك حتى ولفت ... اش غندير . ماعندي مندير ... كنمشي للخدمة كنخليها فلاكخيش .. وكنرجع نديها فاش كنخرج .... فالاول ماكنتش كنتحرك ... مكنخرج ما والو .. مقابلها غير هي .. هاهي خصها تاكل .. خصها تبدل .. خصها تلعب . ونتي عارفة باللي لواحد فاش كيعيش مع باه و لا مع مو كيكون عندو نقص ... وانا داك النقص كان معقدني الصراحة كنت كندير مجهود باش نوفيها حقها ومتحسش بالنقص ... ايوا بقينا هاكاك وربي واقف معانا حتى كبرات (شاف فيها وابتاسم ) رجعات كتعرف تقضي حاجتها راسها


تنهدات اشراق بعمق وقالت: اودي ... فاش كنبدا نسمع مشاكيل الناس كنقول انا ماعندي مشاكل 

رد باستغراب وابتسامة: و اشمن مشاكل عندك نتي باقيا يالاه بادية فالحياة 

ضحكت بسخرية: قول ساليت 

رد باستغراب: مالك على هاد التشاؤم اودي !! 

تنهدات بابتسامة وقلبات الموضوع : دابا نتا حياتك غتكون عامرة ... حيت عندك بنية ...(شافت قدامها ) حتى انا كن كان عندي وليد كنت غنتحدا العالم على قبلو 

شاف قدامو بابتسامة: بيان سيغ.. لوليدات شي حاجة فالدنيا ... على الاقل مكنحس براسي بوحدي فكندا 

شافت فيه: وقدرات ماماها تسمح فيها 

تنهد بعنق : اااودي .. بنادم صعيييب تفهمو ... فالاول كتكون حاجة .. من بعد كيوليو يبانو ليك حوايج اخرى 

ردت : علاش مافكرتيش تزوج مرى اخرى ؟

ضحك بسخرية : واش غير وتزوج .... بيمن غتزوج ؟ خاصك معامن بعدا ماشي اجي وتزوج وكمل حياتك !

شافت قدامها ساهية وقالت: بصح ... ماشي غير اجي وتزوج .... ماشي بحال شي وحدين ... يتزوجو ويطلقو ماعندهمش مشكل كاع 

سهى قدامو وقال : زواج اخر حاجة يفكر فيها الانسان ... حتى يلقا اللي يناسبو... واللي يفهمو ... ويبغيه .. ويحس براسو مرتاح عاد يربط ديك العلاقة بالزواج 

هوا كيهضر وهي ساهية قدامها عينيها مغرغرين بالدموع 

علي: واخا شي مرات ... مكتبقاش عارف راسك واش كنتي بصح كتحب ولا غير منامة ! 

تنهدات ومسحات قنت عينها وقالت بابتسامة

- كنتي كتبغي مرتك ؟

ضحك بسخرية : الحب اللي كان بيني وبين مرتي موحال واش شي واحد عاشو ... كان واحد الحب فشكل ... كانت بحال الاكسيجين بالنسبة ليا ... عشنا شي حوايج و دوزنا شي حوايج ميقدرش شي واحد يتخيلهم ... ونهار ولدات بنتي استريلا كانت كتولد وكتقول ليا واعدني عمرنا نتفارقو ... غنبقاو بجوج حتى نموتو ... (تنهد) فاللخر كولشي تبخر .... كنت كنقول موحال واش غنكمل بلا بيها .. واش نقدر نبدلها ... وداكشي اللي كان ... ماقدرتش نبدلها .. قررت نربي بنتي ومع الايام سمعت باللي هي مشات لسويسرا وتزوجات ... اللي بقا فيا هوا خلات اسرة ... ماخلاتنيش انا بوحدي .. خلات اسرة ومارجعاتش سولات فالاسرة ديالها ... صافي بقا عام كيطلع على عام حتى مابقاتش كاع كتأثر عليا ولا كنفكر فيها ولا مانت فحياتي من الاساس ... 

تلفتات شافت فيه وقالت: زعما الواحد يقدر ينسا ؟؟ يقدر يرجع كي كان ؟ 

حرك راسو بالنفي : ماعمرو ميرجع كي كان ... حيت التجاريب كتعلمنا وتبدلنا ... ولاكن يقدر ينسا حيت الايام كتنسينا بزز منا ... راه حتى واحد مكيموت بالحب ... غير الى هوا دار حد لحياتو وصاف اما الايام راه كترشي الحجر 

ابتسمت وقالت: دابا نتا نسيتي فمرة ؟؟؟ واخا تجي توقف حداك ما تحرك فيك حتى حاجة ؟

شاف فيها كيضحك وقال: ياكما دزتي من شي تجربة فاشلة ؟

درورات وجهها بسرعة وقالت :انا غير كنسول 

رد كيضحك: باينة فعينيك دوزتي شي مرحلة من حياتك صعيبة ... (تنهد بارتياح) ماتخافيش ... غادي تنساي غي تهناي ... (شاف فيها) عرفتي احسن احساس تقدري تعيشيه شنو هوا؟

حركات راسها بالنفي: شنو؟

رد بابتسامة : هوا فاش تخرجي من لحبس اللي نتي فيه ... متصوريش باش غتحسي ... بحال الى تولدتي من جديد ... وحسن ليك تخرجي منو ... (شار لنفسو) انا بالنسبة ليا كنفضل نعيش مع وحدة جامعني معاها شوية ديال الحب ... مرتاح وهاني ونقدر نسيطر على راسي .. على انني نكون غارق معاها فالحب وندوز حياتي مخلوع وخايف ومعدب ...


قالت بابتسامة : صافي غير هنا اعلي .. شكرا بزاف وسمح ليا عدبتك 

قال بابتسامة : ماشي مشكل هادا واجب 

قالت بلطافة: بوس ليا استريلا بزااف ... هاد البنت دخلات ليا لخاطري 

قال بسعادة: غادي تبغيها كتر فاش تشوفيها 

قالت بابتسامة : علاش لا...ههه تصبح على خير 

حلات الباب بغات تنزل لاكن قال وهوا شاد تيلي فيدو 

- اشراق ... تقدري تخلي ليا نمرتك ؟ الى كان ممكن 

تلفتات بابتسامة وقالت : معلوم 

قيدات ليه النمرة فتيليفون ديالو ونزلات هزات صاكها وطلعات للدار لقات مها واقفة ليها فالباب ويدها على جنبها 

الحاجة: شكون هاداك اللي نزلتي معاه من طموبيل ؟ كن دخلتيه للدتر حسن 

تنهدات : غييير وصلني وصافي 

الحاجة: وفين ختك؟؟؟

اشراق: هاهيا جايا ... عفاك اماما خليني نمشي نعس .. عيت وغدا فايقة الصباح .. بيازيد ناعس

ردت الحاجة بغضب: بعدي منو بزز باش نعس ... ماتقربيش ليه خليه يتسنط لعضامو راه دوشت ليه خليه يرتاح 

دخلت اشراق ماتسنطاتش ليها ومشات عندو تخشات حداه فوق النموسية بشوية باستو لاكن حل عينيه مخلوع وهي طبطب عليه بشوية 

- شووو انا اكبدية ديالي 

سكت وحط راسو على صدرها : ماماه 

عنقاتو عندها كتلعب ليه فشعرو ساهية فبيت مضلم كتفكر الحوار فالسيارة

- زعما الواحد يقدر ينسا؟؟ يقدر يرجع كي كان؟

- ما عمرو ميرجع كي كان .. حيت التجارب كتعلمنا وتبدلنا ..

- فاش تخرجي من الحبس اللي نتي فيه ... متصوريش باش غتحسي....

- كنفضل نعيش مع وحدة جامعني معاها شوية ديال الحب ... على انني نغرق معاها فالحب وندوز حياتي مخلوع وخايف ومعدب ..

تنهدات بعمق: عندك الحق ... كنتمنى حتى انا نخرج من الحبس اللي انا فيه . 

تنهدات وغمضات عينيها غرقات فنوم عميق .

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.