قطعات وجلسات كتنهد ويدها على خدها شحال وهي كتفكر من بعد ناضت هبطات لتحت عند اشراق لقاتها مطلوقة فالمسبح بوحدها كتعوم وشارت ليها بيدها قربات عندها وهزات راسها من الماء قائلة
- فاتك الوجع!
خليج : اشمن وجع !!! راه علي صاحب عماد مو مسكينة مااااتت هاد الصباح
تصدمات اشراق وبقات كتشوف فيها وقالت
- الله مسكينة الله يرحمها .... غيكون تشوا عليها ... وغير هي اللي بقات ليه مسكينة
خليج: اييوا شغادير
طلعات اشراق من الماء بسرعة : غادي نمشيو نعزيوه حشوومة اوييلي راه مو هاديك
حلات خليج عينيها: نتي بااينة باغا تشريها ليا مع عماد نيشان ... فين غنمشيو مكنعرفو حتى واحد والراجل اول نشوفوه لبارح !
اشراق: ماشي قضية اول مرة ... السيد راه مو هاديك
لبسات بينوار ومشات لتيليفونها المحطوط فوق الطبلة هزاتو كتصوني عليه لاكن لا رد
فالسيارة غاديين لابسين عبايات فالاسود بجوج والشيلان فالاسود .. وشايقة خليج سيارة كاط كاط سوداء حتى هي ... كتسول وتقلب منين دور
اشراق: راه كان قال ليا الحي عير نسيت ... المهم هادي هي البلاصة اللي قال ليا لبارح فاش كنا كنتجمعو
خليج: غنسولو وصافي
وقفات الطموبيل وهبطات الزاج لقات شاب دايز من حداها
- عفاك ... واحد الراجل سميتو علي مو ماتت هاد الصباح فين نلقاوه ؟؟
شار بيدو: كاينة اختي كنازة وحدة فهاد الحي .. غتمشي نيشان غتبان ليك الدنيا عامرة ... واش هي علامن كتقلبو معرفتش مهم كاينة كنازة وحدة
خليج: واش دفنو الميت ولا باقي؟
- باقي اختي سمعت غيجيبوها فديك ديال نقل الاموات ومن تما غيدفنوها حيت المرى كانت ناعسة فسبيطار مريضة
اشراق: ااه هي هاديك اخويا هي شكرا
خليج: شكرا
طلعات الزاج ودخلات الطموبيل مع حي شعبي بشوية بانت ليها واحد الدار كبيرة عالية والناس على برا نسا ورجال .. مخلطة الدعوة وصف ديال طموبيلات برا وحدا الباب
نزلات دايرة النضاضر لابسة كلشي كحل حتى الصباط كحل ومشاو نيشان ما تلفتوش دخلو مع الباب لقاو علي جالس فوق واحد الكرسي حاني راسو والصالونات جيهتو عامرين بالنسا ... قربات ليه اشراق بشوية وتحنات عليه حاطة ديها على كتفو كتهبط النضاضر قائلة
- علي ... البركة فراسك
هز راسو عينيه حومر شاف فيها فدهشة وقال
- اشراق!!
ردت بأسى: الله يعضم الاجر فيها ...
حرك راسو بأسى وقال: امين اختي شكرا
مدات ليه خليج يدها قائلة: البركة فراسك اخويا علي
مد يدو : مامشا معاك باس اختي
دازت اشراق حدى مرى لابسة بيجامة لايحة شال على راسها كتبكي بحرقة سنها تقريبا اربعيني وحداها الناس كيسكتوها وقالت
- البركة فراسك اختي
خليج: الله يعوض محبتها بالصبر اختي
مشاو جلسو بين العيالات مقابلين مع الباب والناس كتجي وتعزي . فجأة دخل طه مع الباب مكيهزش الراس فلعيالات ومشا عندو وقف ليه علي تعانقو قدام عينين اشراق اللي متبعة الحركات ... عزاه وبقا كيهضر معاه وخرجو لبرا حتى غابو على النضر
خليج : بصوت منخفض: اممم ... جاي يعزي !! باز
نخزاتها: سكتي راه لعزو هادا
خليج : باز لشي كمامر... دابا فين ما مشينا غنتلاقاوه
اشراق: راه تزوااااج .. صافي تزوج ومرتو مية فلمية تكون دابا حاملة .. اصلا هاديك مغتعطلش على الاولاد
وهما كيهضرو سمعو البكا برا وكلشي ناض خرج .. ناضو حتى هما خرجو لبرا فين واقف كلشي كيتسنى ااطموبيل ديال الاموات تجي حتى بانت ليهم من لبعيد جايا . . سخفات المرى فالارض اللي كانت كتبكي ووحدة اخرى بدات تكمدها فصدرهت والناس كيشدوها ... اما علي دار مغلوب عنق راجل يمكن من عائلتو كيبكي والناس كيصبروه حتى وقفات السيارة قدامهم وفتحو ليهم الكوفر .. تقلبات الدنيا كلشي بغا يشوف الميت لاكن تم منع الجميع وقربو ليها بناتها كيبكيو للكوفر وعراو ليها على وجهها ودعوها وجروهم بزز عليهم ... شدو علي داوه كيبكي للكوفر وطاح على رجليه عند راسها بقا كيبان غير راسو محني وعماد وطه والعائلة دايرين بيه وهوا شاد بيدو فواحد الحديدة مابغاش يطلق منها كيبكي فصمت ... جو مأثر خلا اشراق وخليج واقفين بعدا كيبكيو حتى هما ونوضو علي وقفوه على رجليه وغطاو على التابوت و تقدمات السيارة غادية مزراها حشد كبير من الرجال فمقدمتهم علي الابن الوحيد بين جوج بنات وخلاو موراهم نسا كتبكي وبناتها سخفانين
القرآن كيتقرا بصوت عالي كيتمسع منين ومنين ... الخيام منصوبة على برا هازة عدد كبير من الرجال فيها بولات شاعلة على برا مضوية ضلام الليل الداكن .. ولداخل جالسين النسا والصالونات عامرين كل واحد كيشوف قدامو ... بنات المرحومة اللي كانو كيطيحو وينوضو هما اللي وقفو على الكنازة وكيتسخرو فصمت وأسى ... فرقو السربايا اتاي والحلوة بأشكالها على الناس اللي برا واللي لداخل .. شربات خليج جمعة ديال اتاي وهي جالسة حدا اشراق فالصالون وقالت
- شوفي شوفي ديك البنيتة شوفي
هزات اشراق راسها تشوف بانت ليها بنية كتحمق بالزين شعرها اشقر طويل ناعم كالحرير وقصيصة على عينيها لابسة سورفيت كحلة اديداس وحداء رياضي اديداس وكتجري مور علي اللي كان غادي زربان جهة الباب وكتعيط
البنت بالفرنسية: بااباا بااابااا
رد على عجلة: جاااغيف جااغيف ..
خرج وخلاها واقفة تلفتات بأسى مارضاتش قدام الناس لاكن دارت ابتسامة للجميع كأن شيئا لم يكن وحركة بيدها ومشات جهة الكوزينة
ابتسمت اشراق وقالت: هادي استريلا بنتو .... تبارك الله ياختي شحال فننة ... شفتي على عوينات .. شفتي كي دارت فاش شافت كولشي كيشوف فيها ههه
خليج: اودي التربية ديال الغرب حيدي عليا حنا الى مشا باه خلاه موراه كيتركل ليه فالارض
اشراق: ماتزيديش فيه راه بيازيد مسكين فين عمرو تركل .. ماشي كلشي !!!
خليج: بنتو ذكية ..باينة فيها ... مارعفت فين كانت عاد بانت
رجع عماد دخل خليج ومشا لبلاصتو حدى طه اللي كيزفر من من مناخرو
- شنو كدير خليج وختها هنا واشمن علاقة ليهم بعلي؟
غمض عماد عينيه مطولا وسدهم وقال
- طه .. عفاك ماتخليش هادشي يأثر على علاقتناانا وياك ... انا علاقتي باشراق ماشي بختها ونتا عارف هادشي وعاودت ليك ... اما علي ماعارفش شنو بينو وبين اشراق منكدبش عليك ... ماعرفتش ... وماشي من حقي نسول .. وعلي راه معارفش شنو كان بينك وبين اشراق ... الى كانت هي عاودات ليه ما عرفتش . . . ولاكن مكنضنش عارف وكن عرف كان غيسولني .. لحد الساعة تصرفاتو مكدلش على انه كيعرف شي حاجة
طه: واشراق كانت عارفة باللي علي صاحبي ؟؟
حرك عماد راسو: والله اخويا معارف ... غالبا مكانتش عارفة ... ياك نتوما صافي ساليتو ! وصافي طفيو علينا هادشي كيزيد غير يمرضنا ويدير لينا لمشاكيل (تنهد بتعب)
دور طه وجهه قدامو وسكت كيسمع للقرآن ... حطو لعشا تعشاو الرجال وناضو كل واحد مشا بحالو ... توادع طه مع علي بالاحضان ومشا طلع فسيارتو سد عليه وزاد مع الطريق كيشوف قدامو مباشرة للفيلا ... طل على تيليفونو لقا عرام ديال المكالمات من نهاد وحتى وحدة مارد عليها ...دخل الطموبيل للفيلا ونزل زدح الباب ودخل لقا الضلام وكلشي مطفي ... شعل الضوء فقلب الفيلا وهوا يتفاجأ بطبلة ديال العشا مزوقة والاكل مغطي بأغطية زجاجية والشموع واقفة طافية .. وفالجنب ناعسة نهاد معدبة لابسة كسيوة حمرا قصيرة وحاطة مكياج ... قرب كيشوف فداكشي وحط السوارت على الطبلة ومشا هز ليها راسها قائلا بصوت منخفض
- نهاد ؟؟.. نهاد ؟
دورات وجهها فنوم عميق ورجليها مدلين من الفوطوي والعكر تمسح فالفراش .. حيد لافيست لاحها فالجنب وهزها ناعسة طلعها للبيت حطها فوق الناموسية تقلبات للجهة الاخرى وطلع عليها الغطا بشوية وجلس حداها على طرف الناموسية كيتنهد مهبط راسو وشاد فيه وعينيه مغمضين .
اشراق: علي ... بسلامة عليك ... غنمشيو
تلفت وهوا واقف برا شافها غادية وقال
- صافي؟ فاش جيتي واش نوصلك؟
اشراق: لا جينا فطموبيل ..شكرا ..
شافت استريالا لداخل وشارت ليها بابتسامة وقالت
- باي باااي
خرجات استريلا بابتسامة سلمات عليها وقالت
- بون وي
اشراق: بون وي ما بيل
علي: شكرا على الزيارة
اشراق: هادا واجب (صافحات يدو)
ابتاسمات ومشات جهة الطموبيل وتلفتات شافت موراها لقاتهم باقين واقفين كيشوفو فيها واستريلا حداه شادة فيه وكدير ليها باي باي .. ردات ليها اشراق نفس الحركة وطلعات فالسيارة سايقة هي اما خليج ركبات مع عماد وخرجو من الحي راجعين بحالهم
صبح الحال وتلفتات بتتاقل كتحل عينيها لقاتو لايح يدو عليها وناعس وبدات ترمش وهزات راسها بشوية شافت فيه وبقات ساهية كتأمل ملامح وجهه ودوز يدها على شعرو وعلى وجهه حتى حل عينيه وهي تجمع يدها بسرعة . رجع غمض عينو ببطئ وقال
- كملي ... مالكي خفتي نعضك ؟
هزات راسها وقالت : لحداش هادي .. نعست بزاف
تنهد وتقلب على ضهرو ويدو على جبهتو .. تلفتات شافت فيه وقالت
طه: جييت ... شفت داكشي اللي درتي ... و انا لي جبتك لبلاصتك
قالت بنرفزة: تقدر تقول ليا فين عمرك جيتي فالوقت؟؟ فين عمرك جيتي وانا فايقة كنتسنى؟ دييما كنضرب تمارة فلعشا حتى كنسخف وفاللخر كنعس
رد بسخرية: نتي كتنعسي دغيا
بقات ساكتة كتشوف فيه وقالت : بصح... خاصني نبقا نتسناك حتى للفجر ونسخن ونعاود ... انا كنحاول نصلح هاد الزواج ونتا كاع مكيهمك ... ماهامكش كاع عندك مرة فالدار ... كتسناك .. كتعيط ليك تسول فين نتا ؟ كتوجد ودير مجهود .. حتى حاجة من هادشي مكتبان ليك ... حتى من الكسوات اللي كنشري جداد ونلبسهم عمرك قلتي ليا جاتك هادي زوينة ولا هادي خايبة .
جمعات النفس مقلقة وناضت مشات للدوش شافت وجهها فالمرايا تخلعات فيه .. لعكر سايح والكحول دايع ... حلات الراشاشة كاع ودخلات تحت منها غسلات حالتها وبكات حتى شبعات على الزواج اللي خرج ليها فالصو .. ماشي هاكا تمناتو .. ماشي هادي هي الحياة اللي بغات .. ماشي هادي هي العيشة اللي تمناتها .. خرجات من الدوش ملوية على راسها فوطة ولابسة بينوار نقية وخدود وردية ... بدون مكياج هي جميلة لاكن مع الاسف مابقاش كاع كيبان ليها راسها زوينة لان الجمال مانفعها بحتى حاجة . مشافتش جيهته وجلسات قدام المرايا كدير روتين ديالها دالعناية حتى كيفاجأها وهوا موراها بقبلة على حنكها ودوز يدو على كتافها بلطافة بدون ميتكلم ودخل للحمام
ماكملاتش هضرتها حتى كان شد ليها طاكسي بصبعو خلاه واقف وطلع فطموبيل زاد وبقات هي واقفة حدا الطاكسي متبعة ليه العين كتشوف فيه والدموع محرجين فعينيها حتى كلاكصونا عليها مول الطاكسي
- ختي واش مغتمشيش؟؟؟
حركات راسها ومسحات خدها وطلعات حداه
نزلت حدا باب دارهم فحي راقي ودخلات لعمارتهم كتبكي .. بدات دق بالجهد حتى حلو ليها الباب ودخلات ضربات الصاك مع الحيط وبدات تغوت بهستيرية مافهماتهاش مها وخواتاتها اللي جاو كيجريو عندها باش تبلات ... جلسات فالارض وتحجرات كتغوت كأنه صرع وهما مخلوعين كيشدو فيها ... جرات واحد المخدة عضاتها حتى تشركات وبدات تغوت
- مغنرجعش .. والله مغنرجع ... بعدووووو منيييييييييي طلقو منيييييييييي
الام : اعوذ بالله من الشيطان الرجيم مالك اشنو اقع؟؟ نهاد !! نهاد
شدات شعرها بغات تنتفو لاكن قبطو ليها يدها وبدات تركل وهي جالسة حتى خرجو عروقها عاد قلباتها للبكا والنحيط وهما مافاهمين والو
الاخت لكبيرة: نهاد ... نهااد ... واش مع طه !! واش دار ليك شي حاجة؟؟؟
شدات فودنيها كتغوت : كون كان بااااابا حي ميوقعش ليا هاكااااا كن كان بابا باقي ميقدر حتى واحد يدير ليا هااااااكااا
شدات ليها مها يديها وقالت : راه باباك عبد لطيف كاين ... شكون اللي دار ليك شي حاجة
لبسات الام جلابتها وعيطات على الزوج ديالها اللي ربا ليها بناتها وهما صغار كونه مكيولدش .. تزوج مرة ارملة بولد وثلاتة ديال البنات كانو بحال بناتو حتى كبرو .. لاكن بقا النقص عند نهاد ومن ديما كانت كتحس بالحكرة خصوصا فاش كطيح فشي مشكل وكتلقا خوها ولا مها كيجريو معاها .. اما باها عبد الحفيض فكبر وعيا قليل فين كيشاركوه المشاكيل . لاكن هاد المرة ناضت مها نوضة وحدة عودات ليه كلشي ومشات هي وياه مباشرة لمحل الحاج الناجي ودخلو عندو لقاوه جالس
- سمع الحاج ... حنا جينا عندك نتا مول لعقل ... الملحة والطعام اللي تشاركنا عيينا نديرو بيها ... دابا غادي تهضر مع ولدك ... نهاد مابقاتش راجعة ليه صافي ... كما طلاقاو خوت يتفارقو خوت والله يسهل على كل واحد بلاااا صدع .. بلا مشاكل ... ماقادين على مشاكيل وماشي قدهم وحنا ناس مامولفينش بالصدع ... براتها تجيها ... وحقها يجيها .. والله يجيب ليه شي بنت الناس اللي تصبر عليه ..بنات الناس ماشي لعبة
بقا الحاج الناجي غير كيشوف فيهم مصدوم حال فمو مالقا ميقول .. هز تيليفون تاصل بطه وقال
- فينك؟؟؟ اجي عندي للمحل ضاروري .. انا كنتسناك
دخل بسرعة مع الباب وطلع كيجري للبيرو دخل لقا والدين نهاد جالسين كيهضرو مع الحاج .. فهم ان شي حاجة ماشي هي هاديك ولقا السلام وجلس كيشوف فيهم
رد بعفوية كيلعب الكولف : اشمن ضروف ماخلاوكش تكملي قرايتك
تنهدات: الضروف وصافي ..
رد: والضروف دابا مزيانة؟
ضحكات : مابين وبين .. نسبيا
رد بعفوية: وا رجعي كملي قرايتك شنو كتسناي
هزات كرة من الارض وقالت: كنت كنفكر ندير المحامات ... ولاكن خايبة واخا فيها الفلوس ...
تلفت : شنو الخايب فيها؟
ردت بعفوية: يجي عندك ضالم .. يحط ليك الفلوس باش دخل واحد بريئ للحبس... وانا خاصني ندافع عليه وندخلو هاداك اللي بريئ واخا انا عارفة انه مدار والو ... اولا يجي واحد مافيوزي يحط ليك صاك ديال الفلوس ويقولك خرجيني برائة ! وانا عارفة انه مجرم ... وندير ما فجهدي باش نخرجو ... الصراحة فكرت فيها وشفت الناس بزاف كيمشيو ليها على قبل الفلوس ... ولاكن منقدرش انا شخصيا . ندافع على واحد الا الى كنت متأكدة انه بريئ ... لاكن المبادئ ديالي ميسمحوش ليا نشوف فواحد بريئ كيدخل للحبس بسببي ... او نسلب واحد مسكين ارضو ونعطيها لموكلي اللي متطفل عليها فقط حيت مخلصني عليها ... وهنا مكتقدرش تعرف واش الموكل ديالك فعلا بريئ وصريح معك اولا ...يقدر يخدعك حتى نتا مثلا .. ويقدر يجيك نيشان يقولك ها شنو كاين ... يقدر يبان بريئ قدامك ونتا تجمع كافة الادلة ودافع عليه ... يعني فالحياة ديالي المهنية كاااملة اللي غندوز فهاد المهنة .. ضاروري ما غادي نتعدى او نضلم شي واحد ... هادشي الا كان غير واحد ماشي الوفااات .... (تنهدات) وفكرت ندير القضاة ... حتى هي لاكن داك الحديث كيخلعني .. قاضيان في النار.. وقاض في الجنة ... لابد ما تضلم شي واحد . الا الى كنت ماعرفتش كي داير وكتعطي فديك المهنة وعندك حدس مكيخطاش . اللهم نبعد على هادشي حسن ليا ونشوف شي حاجة تماشا مع داكشي اللي انا باغا ومرتاحة فيه في مساري ونهني راسي
قاطعاتهم استريلا باغا تشرب وابتاسم علي قائلا
- يالاه نمشيو نتغداو ... مافيكش الجوع؟
استريلا: وي فينا
علي : ههه فينا يالاه زيد
ابتاسمات اشراق ومشات معاهم جلسو فمطعم من الخشب فالهواء الطلق ... تحط ليهم السمك مشوي ومقلي وبداو كيتغداو ويتجمعو حتى وحلات شوكة لاستريلا تجيفات وهوا يزراق علي بالخلعة وقف كيهضر ويضري ليها على ضهرها واشراق كتفتف وتمد ليه الماء ... تبدل اللون ديال علي وقلبها على كرشها فوق رجليه بالزربة وجمع ليها شعرها للور كيتفتف
- واحد لاستيك فجيبي... واقيلا فشكرتها دغيا
حلات اشراق شكراة استريلا بسرعة وناضت جمعات ليها شعرها وعلي كيدوز يدو على ضهرها ورقبتها كيحركها وهي مدلية راسها كتقج .. جاو السرباية كيجريو ماعرفو مايدرو ليهم .. علي تلف رجع كيخلط الفرونسي بالعربية ويغوت تحل فمها وكيحل ليها فمها ويضرب على ضهرها حتى لاحت واحد العضم من فمها معه الدم عاد هزات راسها زرقة ومخلوعة عنقاتو وبدات كتبكي ... غمض عينيه كيدوز يدو على ضهرها ويرتاح من الخلعة لا هوا لا اشراق اللي تخلعات وناضت داها للحمام بينما دوزو السرباية جفاف حداهم وردها كيمسح ليها فمها جلسات حداهم .. مد ليها القرعة دالماء شربات وتكات على ضهرها كترتاح
اشراق بعد ارتياح : كفاش زهق ليها العضم!!!
علي: اوف... كانت غتسكت ليا القلب ... ماعرفتش .. (بالفرنسة) انا غنقشر ليك يالاه اجي تاكلي
حركات راسها بتعب بالنفي وهوا كيقشر ليها ويحط
- كولي بشوية عليك .. غير بشوية يالاه ... وشربي الماء
كحزات القدام للطبلة كيقشر ليها وجلس هوا بلا ماكلة .. كينقي ويعطيها ورجع للحوار مع اشراق
- واحد المرة وحل ليها البيض ... صفر ديال البيض مصلوق مابغاش يهبط... ناضت كتنقز مافهمتش مالها انا كنسولها وهي حالة فمها كتنقز تا هبط وقالت ليا صافي هبطتو ... اشناهوا !! البيض ..
اشراق: هههه
علي: خوافة ... مكتبغيش تمشي لا لطبيب ومكتبغيش تشرب الدوا ... باش تشرب غير سيرو خاصني معاها شي ساعتاين ولا ثلاتة ... نهار كتمرض كيدوز عندي النهار كحل
اشراق: ايوا شنو غدير ... ماعندك مادير راه مسؤولية صعيبة
تنهد كيقشر ليها لكروفيت: اصعييييبة والله مساهلة
داااابا تولدي وتجربي
تنهدات شافت قدامها ساهية وقالت : ماكتابش
هز عينو شاف فيها وقال : نتي موراك شي قيييصة نيت ... مالكي شنو واقع ليك ؟
تنهدات وقالت: حتى انا كنت ... (شافت فيديها) كنت مزوجة
خز راسو فجاة مصدوم وقال : كنتي مزوجة !!!
***
مستعدين لأحداث الجديدة؟ كنتمنى تقبلوها كمااااا هي وماتنساوش هادي راه قصة من القصص اللي كتبت ومن القصص اللي مزال غنكتب نشاء الله . كونو مع جميع الشخصيات وماشي تميزوهم على بعضياتهم ، اللي كيميز واحد على لاخر هم الافعال ماشي حيت ابطال .. انا كن جات عليا كل قصة نقتل فيها بطل ولا بطلة حتى تعودو تبغيو جميع الشخصيات الموجودة ومتعلقو بحتى وحدة معينة لمجرد انها بطلة رواية 😘 هااححح هاد القصة شحال عزيزة عليا حيت غتقلب وتشقلب وااااحد تشقليبة عمرني درتها فشي قصة و احداثها كبااااار خلينا من احداث الرسوم المتحركة والتخربيق .. أحداثها غيمسو كل واحد فيكم الحيبان وغنضيفها نشاء الله لقائمة القصص المميزة اللي عندي بحال انا احترق الجزء الاول فقط - الدخيلة - بنت الحومة - - اليتيم (الجزء الاول) - الربطة زغبية .
***
خز راسو فجاة مصدوم وقال : كنتي مزوجة !!!
قالت بالايجاب: اه ... كنت مزوجة
بقا ساكت مصدوم كيشوف فيها مطولا حتى قالت بابتسامة باردة
- علاش تصدمتي؟ ...واش عيب ولا حرام؟
رد بارتباك: لا غير فاجأتني !!!... ما ... متوقعتش تكوني مطلقة !... زعما فايت فيك الزواج
دورات راسها بميوعة وقالت: اممم ... حيت المطلقة عار على المجتمع ... ماعندها حق فحتى حاجة .. (تنهدات بالتسامة صفرا وهي نايضة) ايوا شغانديرو ؟ مجتمع فاسد وتفكيرو فاسد الله يهديه
بعدات يدها بصرامة وقالت: مشا عليا الحال ... عندي عائلة كتسول فين مشيت فين جيت وفين تعطلت .. بسلامة عليك
شافت فيه بكبرياء ومشات كملات طريقها خلاتو واقف كيشوف فيها .. حتى بعدات عاد طلقات لعنان لدموعها وجبدات تيليفون تاصلات بخليج وهي كتبكي وتشير لطاكسي صغير وقفاتو وطلعات
- الو خليج فينك؟
خليج: الو اشراق ! مالكي علاش كتبكي ؟
اشراق: فينك نتي دابا ؟
خليج : انا خرجت غير نجيب شوية ديال بتيبان لكاسكروط و غنرجع للدار علاش؟
اشراق: انا جايا عندك للمخبزة
قطعات ومسحات عينيها مباشرة للمخبزة للي كيشريو منها لقات خليج جالسة فلقهوى ديال المخبزة قدامها كاس ديال القهوى وكاغيط كبير مسدود ديال بتيبان ولخبز .. جلسات قدامها خليج كتنخصص وهزات كاس ديال الماء شربات
خليج : مالكي شنو وقع ؟ ياك لاباس؟؟؟
رن الهاتف وجبداتو لقات علي كيصوني ويعاود وطفاتو عليه فمرة
خليج: مالكي؟ شكون كيصوني؟
ردت اشراق: علي
خليج: مالكم؟ شنو وقع ؟
اشراق: حسيت براسي بحال شي حاجة رخيصة فاااسدة فات فيها الفوت اخليج
استغربات خليج: كفاش فات فيها الفوت علاش مالكي غريبة وماصدقاتش!!!... ياكما علي تبسل عليك !
ردت بنفي: لا ولاكن قلت ليه مطلقة ورد عليا بواحد الطريقة غريبة ماحملتش راسي
اشراق: قلت ليه مطلقة بقا مصدوم فيا قال ليا متوعتش يكون فايت فيك الزواج ... فايت فيا الزواج زعما فايت فيا الفوت ... ماردش عليا زعما بالهداوة على اساس انه حاجة عادية ممكن توقع ... بلعكس السيد بقا مصدوم تلف
رجعات خليج لور كتسوط من مناخرها وقالت
- ونتي بقا فيك الحال!! ديك الساعة قولي ليه اااه مطلقة و انا اللي طلقتو واللي معجبنيش نبدلو حتى نلقا اللي يعجبني فين كاين المشكل؟ كنقلب على راحتي ومزال مالقيتها فحتى قمقوم حيت حتى واحد مكشرف وحتى واحد ما مسكد وحتى واحد ماعجبني ... واللي مكيصدقش ليا كنبدلو بحالو بحال الصبابط وعادي وقلبيها ضحك .. مالكي وليتي حساسة كتر من القياس ياك ما حساب ليك المطلقة ساهلة !!! المطلقة راه اكثر وحدة تشطح الراجل على صبعها ومايديرهاش بيها اكثر من وحدة عزبة تيق بالزربة ... واش عارفة شحال من واحد تابع مطلقة كي لهبيل وهي مكتشوف فيه حتى شوفة مكمولة ... حساب ليك وحدة مطلقة غيجي يكدب عليها جوج كدبات بكنبغيك ونموت عليك تقوليه منك نخلاق هاك اللي ورايا واللي قدامي ! انوووضي والله وما طاح وناض وتمرمد وشاف الويل لا وصل ليها .. راه المطلقة عندها عزة النفس مضوووبلة حيت عاارفة كلشي طامع فيها ومكديرش تيقة اييلااااا الى بغات هي رااسها تنشط وتزها وكتشرط من لفوق حيت مجربة وعارفة اشنو هوا الزواج ... عارفة مزيااان الرجال ومكتيق فحتى واحد ... يطيح هوا وممطيحش هي! هاي هاي ... سهلتي المطلقات ههه! والله حتى كان يحساب ليا فايقة ساعة نتي والو مفضية
ربعات اشراق يديها بميوعة : مارضيييتش
خليج: وحتى انا مطلقة وعندي ولد من لفوق ... وعماد طايح مسكين حتى لودينه وباغي يعواج لاسقني نتزوج بيه .... ومو قالت ليه يانا يا هي وخرج ليها فعودها قاليها منها نخلاق وكتعيط ليا مكتخلي متقول ليا وكتعايرني بالسحارة والمطلقة وال*** وزيد وزيد وكاااع ممسوقة ليها ومابغيتش نزرب على راسي ونتزوج دابا ... وبلا منهضر ولا نتشكا ليه خارج فمو وخواتاتو طول وعرض مالقاو منين يشدوه ... بوحدو ما بزز عليه حتى واحد شي حاجة ومادرت ليه والو ... بلعكس كنقول ليه ماباغاش نتزوج دابا مزال مارتاحيت ليك ومابغيتش نعيش فالمشاكيل ديال لعكوزة واللواايسات وكرغبني وكيحاول يقنعني وخايف نبدلو ... وكنقول ليه راه كما طلقت بولد راه نبات منصبح عاقلة عليك ومعنديش انا الراجل مقدس فالقاموس ديالي .. انا دااارت ولادي ماعند الزواج باش ينفعني ... ولدي قدامي وخدمتي حتى هي وحريتي فيدي ونتصاحب معامن بغيت وحتى واحد ميبزز عليا شي حاجة ولا يفرضها . وهوا عارف هادشي و واخا هاكاك ... كنقيلو بجوج كندورو ويمشي ويعيط ليا بالليل يبات شاد الخط حتى كيديني النعاس ... واتجي نتي (عيباتها) تقولي ليا مطلقة مزمرة رخيصة ولا صولدي !!! تي نوووضي داكشي باش غيعايروك رديه لصالحك وقوليها بفمك معيلقاو باش يعايروك ... (حلات فمها) اااه مطلقة و عاجبني الحال اللي ماعجبنيش الباب الحباب اللي موراه يجي ومعامن ترشق ليا نخرج واللي ماجانيش على كانتي نسوسو وبييييخير ... زوج طلق زوج طلق حتى التبدال راه زوين
هزات خليج حاجبها: علاش حنا عندنا شي وحدة غالية فالعائلة !!! لمخيرة مشات بمليون وكاين اللي مشات ب 100 الف ريال وكاين اللي بااااقا كتسنا فلوس الصداق وولدها كياكل الحرشة ... ياك انا ونتي اللي مشينا غالين وواخا طلقنا طلقنا بالغلا ! فين بان ليك هاد الرخا اختي !!! هما اللي رخاص قابلين على الدل وعايشين فيه ... وكن غير كانو شي رجال يحمرو الوجه ! حتى كلمة زوينة فحقها ميقولها . (عيباتهم) ياك واكلة شاربة شنووو خاصك !!! شنوو خااااصك (هزات حاجبها) واش تعيشي مع واحد راس مالو غير واكلة شاااربة شنو خاصك !!! بحال الى عندو نعجة كتهضر وتولد ليه ! شنوو خاااصك!!! كيعاملها بحال الحيوان عارف غير واكلة شاربة شنو خاصك ! حتى صباح الخير الصباح ميقولها ليها .. حيدي عليا نتي وياهم كتسدو ليا الشهية ... اللهم مطلقة تيليفون عامر نوامر كل واحد يسيفط ليا صباح النور مساء الورد .. مساء الياسمين نحس براسي بشر عندي قيمة ولا بغل يصبح عليا بواكلة شاربة شنو خاصك ..تفووو
دارت اشراق يدها على خدها كتنهد وقالت
- انا تلفت ...
صغرات خليج عينيها وقالت: ونتي علاش يبقا فيك الحال من علي ! ياك ماعندك فيه سوق ويدير اللي بغا الله يجعلو ما توقف ليه فاش سمعها ... علاش مابقاش فيك الحال مللي سمعتيها من القطريات فقطر ! ماخلاو باش عايروك .. ها سراقة الرجال ها مطلقة ها مانعرف شنو وكنتي كطنشيهم .. علاش بالضبط علي اللي يالاه عرفتيه بقا فيك الحال من كليمة يمكن خرجات من فمو ماقصد بيها والو !
بقات اشراق ساكتة وتنهدات : ماشي هاكاك.... نتي عارفة ماعندي صحاب ما عندي معارف .. علي الوحيد اللي كنعرف وكنرتاح ليه وكيعجبني نخرج معاه لاهوا ولا بنتو ... داكشي علاش بقا فيا الحال حيت عزيز عليا و كنرتاح ليه فالهضرة بزاف وحتى التعامل ديالو كيريحني
ردت خليج بالايجاب: اااممم.. ايوا ملي لقيتي شي حد كترتاحي ليه علاش غتقلقي منو ... عاادي قالك شي حاجة ردي عليه حتى نتي ... حتى هوا راه مطلق وعندو بنت ودايز فيه الدوزان ... حسن تعاودي ليه كلشي راه ضروفكم بحال بحال ... غير نتي ردي البال راه الرجال خطاااار خصوصا فاش كيسمعو مطلقة وااااااااي شحال كيفرحو وكيقولو هادي هوتة جابها الله
تنهدات خليج : المهم ... ردي بالك وصافي راه الزمان غدار ... نوضي يلاه راه مي بقا ليها شوية تخرج تقلب علينا ... اتاي براااااد وجمد
ناضو بجوج رجعو للدار دارو كاسكروط مجموعين وبقاو جالسين كيطويو الماريو كامل ماتحركو لحتى بلاصة . تعشاو وكل وحدة عطات وجهها للحيط .. شعلات اشراق تيليفون لقات 3 ديال المكالمات من عند علي واستغربات ! صونا غير 3 ديال المرات !!! ما سيفط مسج ما عاود فوق ديك 3 ! بااز
خلاتو محطوط على امل يصوني واخا مغتجابوش لاكن يصوني وتقطع او طفيه هاكا ترضي غرورها لاكن تيليفون ماشعلش فيه الضوء حتى داها النعاس .
صباح جديد فلاصال صبحو خدامين ... كل وحدة كتقضي شغلها .. اما اشراق جالسة لفوق فالمطعم دايرة رجل على رجل وكتشوف تيليفون ! والو مكاينة حتى محاولة اتصال ، الشيء اللي زاد من غضبها وصغرات من نفسها وزفرات وحطات تيليفون ... دورات وجهها كتسوط وتشطح برجلها فجأة سمعات صوت
- السلام عليكم
تلفتات بسرعة وكانت المفاجأة !! واقف قدامها بابتسامة مخفية كأنه خجول من نفسه وفيدو باقة ورد ملونة وعلبة شكلاطة مربعة وردية . وقفات متفاجأة كتشوف فالورد اللي مد ليها وهي كتشدو بارتباك ...
الحلم الأسود الجزء 16
محتوى القصة
التنقل بين الأجزاء