الحلم الأسود الجزء 17

من تأليف Ghazal trust
2020

محتوى القصة

رواية الحلم الأسود

شدات الورد والشكلاط بارتباك حشمانة من راسها ومن الوقف اللي هي فيه ، وكذلك هوا كيرمش ماعرف مايقول وبقا واقف .. مع الدروج طلعات خليج يالاه بان ليها واقف بلاباس رياضي اسود وكاسكيط رمادية وابتاسمات ومشات عندهم وقفات عليهم مادة يديها 

- خليج: علي!!! مرحبا اش هاد المفاجأة 

مد يدو بابتسامة : ختي خليج ! كي دايرةة صافا ؟؟

ردت بابتسامة : الحمد لله ونتا ؟ كي دايرة استريلا

رد بابتسامة : الحمد لله شكرا 

خليج: جلس مرحبا الجو كامل ديالك .. ( على عجلة) خود راحتك 

مشات وجلسات اشراق قدامو حطات الورد كتشتت النضر وهوا كيشوف فيها بابتسامة خفيفة وقال بهدوء

- سمحي ماعرفتش شنو وقع لبارح ولاكن ... سمحي ليا الى خرجات من فمي شي كلمة جرحاتك بلا منقصد 

ردت بمجاملة: ماشي مشكل ... هادشي كيوقع .... استريلا لاباس عليها .. مجاتش معاك؟

حرك راسو: الحمد لله مزيان .. بقات مع ختي كتجمع ليها حوايجها .. نمشيو نزورو جدي ... كبر فالسن ومجاش للكنازة ... ونيت نبدلو لجو باش متقولش ليا نرجعو لكندا من دابا قبل الربعين 

قالت بالايجاب: مزيان ... اينا بلاصة غتمشيو ليها؟

علي: لأزرو 

ردت بإعجاب: هي نتا من الشلوح ديال الاطلس ! 

رد بابتسامة: اكزاكطمو ... (بهدوء ) ونتي؟ 

ردت بابتسامة : انا ن الريف ... نصي ريفي نصي جبلي 

قال بابتسامة : جبلية ولا ريفية 

هزات كتفها: بجوج ... بجوج عندهم نفس الكراكتير تقريبا وقراب كيتشابهو .. ومحافضين كثر 

حرك راسو فهدوء ويدو فوق الطبلة كياعب بسوارت الطموبيل 

دابا الحجاب اللي دايرة ... فرضوه عليك ول راسك درتيه 

قالت بهدوء: لاااالا انا اللي بغيتو ودرتو ... هاهي خليج كتمشي بشعرها عريان ... انا اصلا كنت دايرةة النقاب 

تفاجأ مرة اخرى وقال: النقاب !!

حركات راسها بالايجاب: اممم النقاب 

رد بابتسامة خفيفة : شنو السبب اللي خلاك ديرييه؟؟ .... التحرش؟

ضحكات وقالت كتشوف فجهة اخرى : شنو زعما بغيتي تقول انا زوينة لدرجة ندير النقاب باش نسلم من التحرش

- هز حاجبو : ممكن !

حركات راسها بالنفي وقالت كتنهد ساهية فجهة اخرى

- درتو حيت كان عندي سبب نديرو ... وحيدتو حيت كان عندي سبب عاود .

بقا ساهي كيشوف فيها وقال : نتي صندوق غامض عامر مفاجآت .... وعندك بزاااف ميتعاود 

تنهدات وقالت : انا عندي بزاف ميتعاود بصح ... وقصتي طويييلة بزاااف ... ولاكن كاين شي حوايج مكنبغيش نهضر عليهم حيت مكنقدرش نجبدهم ... (تنهدات بعمق) اللي نقدر نقول ليك باختصار ... (شافت فيه) هوا انا ضحية ا علي .... ضحية ديال عائلتي .... وضحية ديال البراني حتى هوا .... النقاب ستر غدر اقرب الناس ليا ... وحيدتو بسبب اقرب الناس ليا (غرغرو عينيها) انا ا علي خسرت بزااااف .... خسرت بزاااااف ... ولو لا الدعاء والعبادة ... والتقرب من الله لا كنت هويت فالهاوية وماكنتش نجلس هنا معاك دابا ... (مسحات عينها) اي حاجة زوينة فحياتي ماتت ... ولاكن كنحمد لله ونشكرو .... حيت ماغتجي حتى حاجة اخرى تأثر فيا من هنا لقدام 

بقا مستغرب كيشوف فيها ومد ليها كاس ديال الماء وقال بأسى

- صافي ماشي مشكل .. ماعليش الى مابغيتيش تهضري مكاين حتى مشكل ... ولاكن خاصك تعرفي باللي شنو ما داز علينا دروس فالحياة ... واللي مدازش عليه لقليل راه داز عليه لكتير .. وهادي هي الدنيا ماحدنا حيين وهي كتشطح فينا ... كتخلينا حتى نتيقو بيها وكتقلب علينا ... والحمد لله على كل حال ... شنو ما وقع ...وشكون ما كانو الناس اللي دازو فحياتنا راه كنتعلمو منهم وكنعيشو ونتعايشو (تلفت للجنب شاف راجل كبير لحيتو بيضة كيتغدا لابس سورفيت كحلة وقال) بحال داب داك الراجل ... غير جا وشاب ؟ ماشاب ومابياض ليه الشعر حتى راه دوز العجب فحياتو ... خايب وزوين ... ودابا الى مشيتي سولتيه غادي تلقاي عندو شحال من اسطوار ... ماشي غير وحدة .... ليسطوار الوحيدة اللي جامعة كلشي هوا انه شاب من بعد عمر طويل اللي وباقي تبارك الله كيجي لاصال ... كيعيش حياتو ... ويتعلم واخا شايب ... تقدر مثلا مااتثلا غير تسمم لكلاه فالماكلة غيربيه عمرو ياكل فالزنقة .... فهمتيني شنو بغيت نقصد ليك ؟ والله يطول ليه فالعمر 

حركات راسها بأسى ساهية فالشيباني وتنهدات بعمق قائلة 

- ماعرفتش انا واش غادي نبقا حية حتى نشيب بحالو ولالا 

رد بابتسامة : غتبداي تجي بعكازك نتي نشاء الله لهاد لاصال ... عرفتي علاش؟

قاقت بالنفي: علاش؟

رد بابتسامة: حيت مزال غادي تبدلي ... غادي ترجعي حسن من اللي كنتي ... غتعيشي حوايج حسن من اللي عشتي ... وهما اللي غيردوك حسن من اللي كنتي وغيعطيوك تفاؤل يخليك تشدي فالحياة بيديك ورجليك ... واخا الدنيا غدارة ولاكن راه فيها الزوين والخايب ... (تنهد) واصعب احساس فهاد الدنيا ... هوا تفقد والديك ...مك .. وباك .... هادو اصعب حاجة كتخلي الحياة باااسلة فعينيك .... حتى حاجة مكتعوض الواليدين اشراق .... تقدر تعوض كولشي ... الا الوالدين والخوت عمرهم مكيتعوضو 

ردت بسرعة : والاولاد؟؟؟

رد : تقدر تعوضهم الى كنتي مزال صغير ... ولاكن خاص تكون عندك الرغبة ... وحتى الى فات عليك الحال ولا مرزقكش الله ... كاين وليدات ماعندهمش واليدين كيتسناو كل نهار شي واحد يتكفل بيهم ... راه دائما ضروفنا كتكون قل من واحد اخر اللي كنبانو ليه مشاكلنا متسوى والو قدام المشاكيل اللي عايش هوا


شربات من الماء وبقات ساكتة ... حتى هوا سكت كيشوف فواحد الجهة متكي على ضهرو .. تلفتات شافت فيه لقاتو غاطس فتفكيرو ... فاش مشا عقلو دابا؟ فاش يكون كيفكر؟ باينة صدمتو مكانش متوقع مني هادشي كامل .. يمكن كان كيشوفني عادية مافكرش نكون يكون عندي ماضي . تلفت بتتاقل كيتنهد لقاها كتشوف فيه وابتاسم قائلا 

- رتاحيتي شوية؟ 

حركات راسها بالإيجاب وقالت : شوية .... انا ماعنديش اصدقاء اعلي ... عندي غير خليج ... ماعنديش معامن نخرج ونهضر ... عارفة راسي كهربت ليك الجو شوية غير سمح ليا 

رد بالنفي: لالا بلعكس خودي رااااحتك وقت ما تبغي تهضري انا معاك ... غير متعطليش بزاف حيت مابقا ليا ونمشي 

ردت كضحك: شحال بقا ليك؟

علي: ماشي بزاااف ... 20 يوم تقريبا ... مور الربعين غنمشي 

ردت قائلة: وفوقاش غترجع ؟

تنهد وقال: كنت كنجي جوج مرات فالعام تقريبا على قبل الوليدة ... دابا غطاها التراب الله يرحمها مابقا علاش نرجع ... خوتاتي كل وحدة بنات حياتها .... سييير فوقاش نجي . واش عماين ولا 3 سنين . ولا ربع سنين ...دابا الى كنت غنجي غنجي غير سياحة ونرجع بحالي 

بقات ساكتة كتشوف فيه مطولا وقالت 

- ولفتي كندا ؟

هز حاجبو: بلاد عشتي فيها سنييين طويلة ضاروري تولفها ... انا كانت كتجيبني غير الوليدة 

ردت بابتسامة: دابا مكاين اللي يجيبك لهنا ..... عندك تما صحابك ؟

رد بالايجاب: انا هنا كنحس براسي براني .. صعيب تفاهم مع الناس هنا فاش كتولف واحد المحيط ... حتى صحابي اللي كانو عندي هنا تفرتكو رجعت كنتلاقهم غير بالصدفة ... راكي شفتي عماد شفتو غير بالصدفة ... راني قلت ليك فاش كيمشيو الواليدين مكيبقا ليك مادير 

ردت : ولاكن عندك حياتك تما نتا واستريلا 

رد بالايجاب: استريلا بلادها هاديك فيه تولدات فيها كبرات فيها باينة احلامها وعندها صحابها ... حياتها كلها تما صعيب عليها تبدل البلاصة ... وولادك راه الى ولفو ليك واحد البلاصة كيجروك حتى نتا ... كيرجعو عندك دكريات تما ... صحاب ... معارف ... يعني صعيب تبدل وكتولف ... كتولي تلف فبلادك اللي نتا منها واللي شحال بينك وبينها كتبقا تالف ماعارف مادير بحال الى راك فشي بلاد اخرى .. ولاكن كتبقى بلادك تجبد حتى تعيا وكتردك ريحة التراب .


ردت بابتسامة: مزيان ... الله يعاونك 

شاف فيها مطولا بابتسامة وقال: يالاه تمشي معانا لأزرو .. غنجلسو واحد دو جوغ ونرجعو ... عمرك مشيتي ليها ؟

ت بنفي: لا عمرني مشيت ليها 

ررد قائلا: هاهيا جات فرصة تمشي ... غتعجبك واخا صغيرة ... يالاه ندوزك للحاجب وافران نتي واستريلا ... تشوفي الطبيعة وتبدلي لجو و الوجوه حتى هما 

ردت بتردد: ولاكن نتا غتمشي عند العائلة

رد قائلا: وشنو فيها راه هما نية لواحد الدرجة متصوريهاش ... بلا ميقولك عقلك غيشوفو فيك شي شوفة فشكل ... مكينويهاش كااع هاكاك غير يالاه 

بقات ساكتة كتشوف فيه بتردد وخجل 

علي: صافي جمعي حوايجك اللي يخصوك ندوز عليك غدا الصباح ... يالاه طلقيها تسرح فكي عليك العقد 

بقات ساكتة غير كتشوف وقالت: والى سولوني شكون انا ؟؟؟

شنو نقول ليهم ؟

رد بعفوية: ايييييلا سولوك .. راه ميسولوكش كاع كوني هااانيا . وزايدون غادية معانا استريلا الى سولوك قولي ليهم مرتي .. ماعارفيني وقتاش تزوجت ولا وقتاش طلقت ... عارفين غير عندي بنت ومكيسولوش اصلا ... عمرني عقلت سولوني على شي حاجة من غير استريلا انا قلت ليهم بنتي وقالو ليا مبروك ماعرفوها كي جات

بقات ساكتة كدور فعينيها وقالت: صافي واخا 

رد كيضحك: وا حلي ديك البواطة دوقينا من الشكلاط نعرفو غير كي داير هههه


فالدار جابدة الباليزة كطوي لحوايج وخليج حداها جالسة يدها على خدها حداها 

- واش نتوما غير اصدقاء!!!

اشراق: والله اختي مكاينة شي حاجة ... السيد راك شفتيه كي داير ماشي شي واحد كيفرفر ... وراه عندو بنت واش حساب ليك مكيفهمش !

خليج: غير سولتك ... ردي بالك وصافي 

اشراق: ربي راه راد ليا البال حيت مكندير حتى حاجة خايبة .... راه قلت لماما غادي نسافر حيت خصنا ماتيريال جديد 

خليج: وا ردي غير البال راسك .. 

سدات الباليزة : مارفتش الجو كي داير تما ... واش بارد ولا سخون ... ديت حوايج الربيع 

خليج: سخون الحال دابا ... ولاكن افران كتكون باردة واخا فالصيف 

اشراق : غنطيح نعس يالاه نوض الصباح 

تلاحت فالفراش : تصبحي على خير 

ناضت من حداها خليج لناموسيتها و شدات لحديث مع عماد 

صبح الحال وصبح تيليفون كيصوني على اشراق وهي واقفة كتقاد الفولار بالسبرديلة ودجين وتيششورط فوق كيمونو حد الركبة ... انيقة والصاك فالجنب بدون مكياج ... بشرة نضيفة انقى من الحليب وسنان بيضين ... رشات الريحة ونزلات جارة باليزتها لقات سيارة جيب ديال الجبال كحلة ..
نزل من القدام داير نضارات شمسية وكاسكيط وشورط ديال بالبارا رمادي وتيشورط كحلة وسبرديلة ... صبح عليها بابتسامة وفتح الكوفر حط الباليزة ومشات هي ركبات فبلاصة لقدام خاوية وتلفتات لور لقات استريلا مجبدة بسالوبيت دجين وكاسكيطة على راسها عوجة وناعسة كتشخر ... ضحكات وتلفتات لعلي اللي طلع حداها وقالت 

- نعسات 

ديمارا الطموبيل وقال: بزز باش خشيتها تما مابغاتش تنوض .. ولبارح كنقول ليها نوضي تنعسي غتفيقي بكري وهي مكتسمعش بقات سهرانا حتى لإينا وقت 

اشراق: وشكون لبسها حوايجها ههه

علي: ختي لبساتهم ليها وهي ناعسة ... مغتفيق دابا حتى نوصلو .... فطرتي ولا حتى نتي جايا بلا فطور؟

قالت بابتسامة: ماقديتش نفطر فهاد الصباح 

علي: بلاتي شوية ونوقفو فشي بلاصة فالطريق نفطرو ... 

اشراق: زوينة هاد طموبيل منين جبتيها ؟

رد كيضحك: جبتها من البلدية ههه.... مالقيتش بحالهم فالكرا وقال ليا واحد السيد راهم عند البلدية ومشيت جبتها 

اشراق: وعطاوها ليك !

علي: قلت ليهم عندي واحد المعاونة للناس فالجبل وبقيت كنخربق عليهم .. كان تما واحد خلصتو وداني لواحد البلاصة فيها من هادو بزاف 
.. هادي نقية وصحيحة هي اللي تصلاح للجبال 

اشراق: واش عائلتك فالجبل؟

حرك راسو: فالنواحي ديال المدينة ولاكن كنطلع للجبل ... جبت شيو حوايج للناس تما 

تلفتات لور: داكشي اللي كنشوف ! كنقول واش هادشي كامل غتلبسوه ! لكوفر عامر واستريلا مزاحمة وسط البكاج 

علي: شي صدقة وصافي ... شوية ديال السكر ... اتاي الصابون وشي حوايج للناس فالجبل بعاد على الحوانت 

ردت بحماس: علاش ماقلتيهاش ليا نجيب حتى انا ليهم شي حاجة

رد بعفوية سايق : ماعندي فين نزيدهم هانتي شفتي كولشي عامر ... مرة اخرى نشاء الله


وصلو لمدينة ازرو وبدات اشراق كطل من الزاج بابتسامة

- زوييينة ... الله على جو شحال نقي 

رد بابتسامة: عجباتك؟

ردت بابتسامة: بزاااف (تلفتات اللور) استريلا باقا ناعسة 

هز عينو فالزاج بابتسامة وكملو الطريق كيتجمعو

علي: عرفتي علاش سماوها ازرو؟

اشراق: لا علاش؟

علي: كل مدينة وعندها معنى 

اشراق: وازرو؟

شار بيدو لصخرة كبيرة وسط المدينة بحال الجبل ديارة وقال 

- على هاد الحجرة ... حيت مميزة بهاد الحجرة الكبيرة ... سميتها بالشلحة ازرو 

اشراق: اااه فهمت ازرو ... الصخرة زعما 

علي : هاداكشي 

كملو الرحلة خارجين على المدينة غاديين مع لابيست حتى وصلو لقرية صغيرة فيها ديور مفرقين ووقف قدام واحد الكركاعة كبيرة ووقف قائلا 

- على سلامتكم 

قدام ديك الكركاعة كانت دار كبيرة من التراب خرجات منها واحد المرى كتجري لابسة بيجامة وكولون وطابلية على كرشها وصندالة دالوردة وشدة ديال حياتي على راسها وتشير وتعيط لمالين الدار وتلوح بيدها في حين واقف علي اللور كيفيق استريلا ويجرها من الطموبيل حتى حلات عينيها 

- المرة: اااامرحباااا مرحبااا مرحبااا 

سلمات عليها اشراق هي اللولة ومشات عند علي كتعنقو وترحب والفرحة غتخرج من عينيها . من باب الدار خرجو جوج وليدات صغار بنت و ولد كيتجاراو واحد حفيان ولخرى لابسة الصندالة مقلوبة ولحوايج مكرفسين بالتراب وموراهم مرى اخرى كبيرة بالعكاز جايا كتشالي من بعيد واشمة بين حجبانها وكتعيط .. تعرض ليها علي شد فيها وعنقاتو كتبكي ودوح وهوا كيبوس ليها راسها ويديها .. فرحو باستريلا واشراق اكثر ما كانو كيتصورو . اما الاطفال بقاو واقفيين بعاد كيتخباو مور المرى ويتلواو ويطلو بنص عين ... انتبهت ليهم اشراق ولفتو انتباهها عيونهم الزرقاء بحال البحر وشعرهم الاشقر اللي واخا مشنتف طالع فالسماء وبشرتهم ناشفة وخنونة هابطة لاكن خدودهم حمراء وجمالهم كجمال الروسيات ... بقات حاللة فمها وقالت 

- ماااشاء الله ... اجي نبوسك 

تخبات البنت بسرعة مسحات لخنونة فمها لاكن على غفلة هزها علي بسرعة فالسما باسها وهي تخلع طار طرف دلخبز من يدها وبدات تغوت وتبكي وهوا شادها بزز والكل كيضحك .. اما الولد هرب للدار كيجري حفيان والسروال كيطيح موراها دجاجة كتقاقي بفلالسها كان غيزطم فيها وطارت من قدامو .


بدات اشراق كضحك وقالت : عطيني ديك زبيدة بلدية 

مد ليها الطبسيل وقال : ها زبيدة الاللة 

اشراق: ماقلتيش ليا شمو كيجيوك ؟

شار بعينو كياكل زينول كحل : هادا جدي ...

اشراق: عرفتو ..

علي: مرات جدي ... وهاديك عمتي وولادها 

اشراق: تبارك الله فنين 

علي: كاع ولاد هنايا بحال هاكاك ... بحال الى راكي فالسويد 

اشراق: مشاء الله 

تلفت علي عند استريلا شاف فيها وهي كتاكل الخبز والزيتون وناض مشا للسيارة خرج كارطونة ورجع دخلها كيضحك ويشوف فلوليدات 

- مابغيتيش تجي ... واخا 

جلس وحل ديك الكارطونة عامرة بدانون والحلويات وبقا كيشوف فيهم ويضحك وهما كيقربو شوية بشوية ويطلو حتى لقاهم جالسين حداه يديهم مور ضهرهم كيشوفو فصمت طامعين فداكشي اللي تما 

علي: يالاه بوس 

ناضو باسوه بجوج وعطاهم دانون للواحد وبيمو وقال لعمتو 

- دي هادشي خبيه ليهم 

هزات الكارطونة فرحانة وناضو موراها تبعوها كيجريو للكوزينة في حين دخلو الجيران كيطلو على شكون جا .. طبعا مللي كتبان ليه سيارة الكل كيجي فرحان كأنه جاي عند القرية كاملة وجلسو معامهم فالطبلة كيتجمعو فرحانين 

من بعد الاستراحة اللي خداو ناضت اشراق تكتاشف الجو عندهم .. وكما قال ليها علي ... حتى واحد مسولها نهائيا... بلعكس الكل فرحان بيهم ... طلات على الكوزينة مالقات حتى وا وخرجات لبرا كتمنضر حدا واحد الكرمة كبيرة عامرة كرموس ... سمعات الهضرة فالجمب ديال الدار فواحد الهبطة ومشات هبطات مور دار لقات كوري كبير فيه البكر وفجهة اخرى بلاصة ديال الكسيبة خاوية .. تما لقات استريلا واقفة كتفرج والخماس كيدبح الحولي وحداه العمة شادة ليه الرجلين ... ابتاسمات اشراق ووقفات كتفرج ... دغيا سلخوه دغيا علقوه دغيا وجدات العمة المجمر وبدات ريحة الدخاخن والشوا كتعطعط على برا حدا الدار فلعشية وهما كيفرشو الحصيرة والزربية وخرجو الططبلة وسرحو المخاد وجات الجلسة هي هاديك قدام الطبيعة . لمحات اشراق العمة هازة الشبكة وغادية جهة الكرمة ولحقات عليها طلبات منها تعطيها الشبكة وفعلا خدات الشبكة وبدات تقطف الكرموس هي و استريلا بكل سعادة وهبطو الشبكة لواحد العوينة قدامهم صغيرة غسلوه وحطوه فوق الطبلة . هزات اشراق عينيها هوا يبان ليها علي واقف فالباب كيتكسل لابس دراعية كحلة وعينيه مجبدين بالنعاس ... طلعات فيه وهبطات وقالت 

- عوضتي النعاس ههه 

رد بارتياح وهوا كيربع رجليه جلس برا 

- وايييه 

يالاه جلس جات حداه استريلا بالفرونسي 

- بابا بابا ... كاكا ! 

علي: معام!!!!


سكت كيشوف فاشراق ويتأ تأ وهي تسولو 

- مالكم ؟

حك جبهتو : بغات طواليط 

اشراق: نديها؟ ياك كاينة 

حرك راسو: كاينة راه صايبتها ليهم لمرة لي فاتت ... ولاكن المشكل مكتعرفش تجلس على ديك البلدية 

اشراق: ايوا؟ 

تنهد : نوضي اجي ... يالاه 

شدها من يدها دخلها طواليط حدها دخلات بقات كتشوف فيها وقالت 

- هنا؟؟

علي: هنا اه ...

حل ليا السالوبيت كامل حيدو ليها وسط مرحاض كبير مصايب بالسيمة وفيه بوطة كبيرة ديال الماء وجلسة بلدية .. حطو على كتفو وقال 

الحوار بالفرنسية

- جلسي هنا ديري رجليك 

عقدات حواجبها : كفاش ؟؟؟ 

قاد ليها رجليها: يالاه جلسي انا شاد فيك 

وقفات: لااا منجلسش هنا 

علي: ماتجلسيش غير بحال الى غادي تجلسي انا نشد فيك يالاه 

هز الدراعية دخلها فالشورط وعيا يشرح ويفسر ليها بزز باش جلسات ومعصبة كل مرة كتبغي تنوض كيردها حتى حطاتها وهوا يقول 

- خليك بلاتي ماتنوضيش

جبد ليها الماء بالسطيلة وعطاها وقال

- يالاه غسلي بالماء مزيان 

حطات يدها فالماء وهي مقردة وقالت 

- بارد !!

علي: مرة اخرى نسخنو ليك يالاه غير قضي 

غسلات وسالات وناضت وقفات .. جبد كلينيكس من الجيب عطاه ليها وطلع ليها السالوبيت وهي كتنكر عليه . مد ليها الصابون غسلات وخرجات كتنفخ حالفة مرة اخرى ماتعاود دخليها

خرج لبرا عندهم كيسوط فين جالسين كيشويو بولفاف و تكا على جنبو فوق مخدة . ولحسن الحظ حتى واحد مكيفهم تما لفرونسي باش هضرات استريلا من غير اشراق 

استريلا: حتى نتوما غادي تجلسو فديك لاشاص فاش تبغيو ديرو كاكا !!!!!


بقا علي ساكت كيشوف فيها شاد الضحكة وميك دار راسو مسمع والو ومادرش جهة اشراق . اما الاخيرة وقفات ليها بالضحك وقلباتها كحبة باش متفرش وبدات تكحب وكلشي كيمد ليها الماء وعلي كيشوف قدامو ويقلب الهضرة بهدوء

- حيدي الشحمة الى معجباتكش وكولي غير لكبدة 

ردت استريلا: وا قول واش حتى نت...

قاطعها كيوريها الدجاج : شوفي شوفي ديك الدجاجة شحال عندها من ولد 

هزات راسها كتفرج نسات السؤال وقلبو الهضرة ، فجأة ديك الجاجة نفسها جات قدامهم كتجري وتبقبق وموراها فروج تابعها كيجري وماشدها غير قدام عينيهم مباشرة وطلع عليها واستريلا كتموت بالضحك .. اما اشراق قلبات وجهها والدموع كيهبطو ليها بكثرة الضحك اللي شدات .. علي هز عينيه شافهم ورجع شاف قدامو في حين هزات العمة واحد الصندالة شيرات عليهم بجوج فرتكاتهم بعدو المسافة شوية ورجع الفروج شدها قدامهم واخا عيات العمة تهش وتبهش وتغزت وتشير ماوصلاتهمش واستريلا كتغوت 

- لا علاش كضربيهم خليهم ... علاش كضربوهم مكيديرو والو 

ناضت اشراق كقجوجة من حداهم دخلات لداخل وعلي غير كيرمش فاتسريلا عينيه ضاحكين .. عيا يخفي الضحكة فاللخر خرجات بزز لاكن كيحبسها 

- خلي عليك دابا دجاج شوفي الكبدة ديالك بردات 

استريلا: علاش كضربو الحيوان حرااام !

علي: كتربيه ماشي كضربو يالاه كولي

ردت بصوت خافت وحتى هوا لقا راحتو يشرح ليها فغياب اشراق في حين حتى حد مكيفهم شنو كيقولو 

- راه ضرباتو بصندالة !!! 

علي: اه حيت حشومة كيلعبو بحال هاكاك 

استريلا: خليهم يلعبو 

علي: صافي غنخليوهم يلعبو ... عنداكي تقولي شي كلمة خايبة؟

استريلا: انا قلت شي حاجة خايبة؟

علي: لا ماقلتي والو .. الى بغيتي تقولي شي حاجة قوليها فودني صافي 

حركات راسها بالايجاب : ومتعاودش دخلني لديك طواليط اوك 

حرك راسو: اوك يالاه وا كولي الكبدة ديالك 

رجعات اشراق جلسات حداهم حمراء وربعات رجليها 

العمة: نسخنو ليك 

اشراق: سخنيه 

بقات استريلا كتشوف وقالت والقطيب فيدها من بعد ما شافت القطيب سخن لاشراق وقالت 

- بابا شوف ديال اشراق سخون وديالي بارد ! 

غلباتو الضحكة وشد من عندها القطيب 
- اري لقطيب اري ههههه 

اما اشراق تزنكات بقات غير كتشوف قدامها وعلي حدا المجمر كيسخن القطيب ومدور وجهه كيضحك


جو زوين هادئ ... الضلام كيطيح وعلقو الامبة برا ... البرودة والجو زوين ... جات بنت بلدية بالبوط دخلات الكسيبة و تقدمات سلمات عليهم بالفرحة .. كانت هي حفيدت المرى المسنة زوجة الجد وعايشن كعائلة وحدة متعاونة .. وموراها وصل خوها حتى هوا دخل البكر للزريبة وروحو فلعشية فين ما كان شي واحد رجع بحالو ... حطو ليهم كاسكروط لداخل يعتقو الروح وبقات اشراق جالسة برا لابسة بيجامة طويلة وشال على راسها وحداها علي متكي على ضهرو بارتياح و استريلا مجبدة حداها موقف رجليه كيتبرد والدراعية هبطات بقا الشورط كحل عندو جياب كيبان ..كل مرة طلع على صدرو كتلعب و كتجمع هي وياه ويضحكو .. تلفت عند اشراق وقال 

- كي جاتك البادية ؟

ردت بسعادة: البادية ديالكم زوينة بزاف 

علي: غدا الصباح عنطلع للجبل ... طلعي ؟

اشراق: ااه نمشي ... بعيد بزاف؟

علي: شوية ... غيعجبوك المناضر ... ندوزو نشوفي الشلال ... الوديان .. الطبيعة زوينة 

ردت : صافي واخا 

تقلبات استريلا على ضهرها وقالت بحماس

- بابا بابا عرفتي شعر اشراق طوييييل وزوييين حد هنا 

رد بابتسامة كيلعب فشعرها واشراق كدور فعينيها : طولي حتى نتي شعرك 

استريلا: حتى انا بغيت شعري يكون حد لهنا (المؤخرة) واش غيكون عندي حتى انا 

ردت اشراق بابتسامة: حتى نتي شعرك زوين وطويل 

ردت بالنفي: بغيت بحال ديالك ... انا شفتك فاش كنتي كنبدلي حوايجك 

اشراق: بارتباك) صافي متبقايش تقطعيه غيطوال ليك 

استريلا: وريه وريه لبابا باش يشوف ... (بحماس) عرفتي ابابا انا عمرني شفت شي شعر طويل بحالو مباشرة .. شفتو عند ريبونزل ولاكن طويييل بزاف هزات بيه الامير حتى لعندها ههه (شافت فاشراق) حتى نتي غادي طلقيه باش يتعلق فيه الامير ديالك؟؟

ضحك علي كيشوف فيه وقال: القصص ماشي هما الواقع الله يهديك ههه

استريلا : عفاااكي وريه لبابا سيلتوبلي 

خرجات اشراق عينيها بارتباك لاطن تدخل علي وقال بلطافة 

- هاديك حرية شخصية ... هي ملتزمة بالححاب مكتعريهش قدام الناس 

استريلا باستغراب: ومتعريهش كااع!! واخا معانا ؟

رد : واخا معانا ... فاش غتكبري غادي تفهمي علاش هي دايراه ... وكتحيدو قدام البنات وصافي 

استريلا: بأسى )متأ!! كنت بغيت تشوفو ... دابا عمرك مغادي تشوفو 

تنهد كيشوف فيها مطولا واشراق ساكتة وجرها وشوش ليها فودنها وهي تحرك راسها بالايجاب بقات اشراق غير كتشوف .. شنو قاليها ؟ . علاش ماقلها والو قدامي؟ شنو غيكون قال ليها فودنها !


عشية كلها احراج دازت كتقتل بالضحك لاكن اشراق بقا راسها ضارها ماقدراتش تبرد ليها حتى تعرف شنو قال ليها . تحط العشا مبررع من داكشي الرفيع .. تعشاو بلا تلفازة بلا والو ودغيا ناضو ينعسو ... دخل علي كيجر الصندالة لقاها كتفرش فواحد البيت ومعاوناها حتى اشراق وقال 

- انا فرشي ليا غير هنا فالمراح باااركة 

العمة: ها البيت فرشتو ليكم 

علي: غيير فرشي لياا فالمراح فالارض تحت ديك الضواية وخليهم هما ينعسو هنا 

استريلا: نعس حداك؟

علي: كيجي الحلوف بالليل وكيدخل للدار داكشي علاش بغيت نعس فالمراح نعس عليه ميدوزش للبيت 

ضحكات اشراق اما استريلا تخلعات وقالت 

- كيدخل حتى للدار!!!!! 

علي: اه راه الدار وسط الغابة ... يقدر يدخل وحنا ناعسين 

حطات يدها على فمها : هااه!!!

خرج كيضحك خلاهم فرشو ليهم فالارض حدا بعضياتهم وحطو ليهم الماء وردو الباب عليهم .. هنا بدات استريلا بالاسئلة على الحلوف واشراق كملات ليها الباقي بالضحك وحيدات الحجاب طلقات شعرها وهي تجلس حدا استريلا وقالت 

- اجي نقول ليك ؟ شنو قال ليك باباك قبيلا فودنك ؟

استغربت : فوقاش!!

اشراق: فاش كنتو كتهضرو على الشعر ... قولي ليا شنو كنتو كتقولو ونقول ليك شنو درت لشعري باش طوال 

برقات استريلا: بصح!!! ديري لي حتا انا 

اشرااق: وا قولي لي شنو قال ليك 

استريلا: قالي ماتبقايش تهضري عليها كتحرجيها وصافي 

اشراق: صافي هادشي اللي قال؟؟

استريلا: هزات يديها ) صاافي هادشي اللي قالي ... واش بصح كنحرجك 

ابتسمت: شوية ههه 

قاصت ليها فشعرها: وشنو كديري لشعرك ؟

اشراق: بارتباك ) اا ... كندير ... كندير ااا .. واحد الزيت 

استريلا: ديري لي حتى انا 

اشراق: حتى نرجعو ونجيبو ليك صافي 

ردت بالايجاب: صافي 

طاحو نعسو وطفاو لامبا وبداو يسمعو اصوات على برا تخلعات منهم استريلا وتكمشات فاشراق حتى نعسو . لاكن فنص اللي قفزات استريلا بواحد الغوتة من وسط النعاس وتبعات ليها بصوت مرتفع " بااااابااااااااا"


قفزات اشراق حداها فالضلام وهي كتغوت ودخل عليهم علي بسرعة وسط الضلام مكيشوف والو جا كالس حداها في حين كتفتف اشراق على الشال بالزربة جراتو ودارتو عليها مخربق ودخلات عليهم العمة هازة لاكبة كضوي بيها .. تكمشات استريلا فيه كترعد مغمضة عينيها وتردد

- حلوف ... حلوف جا ابابا حلوف 

العمة: مالها شنو اللي وقع!

ردت اشراق بعد ارتياح : غير كتحلم وصافي تخلعات 

ليها علي راسها باسو وقال : مكاينش غير كتحلمي ابنتي .... مكاينش الحلوف

استريلا: لا كاين شفتو 

تنهد: مكاينش انا معاك صافي متخافيش 

عطاوها شربات وبقا شادها كيهدن فيها فالاخير لسقاتو بيتاتو حداها واشراق كدور فعينيها فصمت ... خلات ليهم العمة لامبة ومشات ردات الباب .. رجعات اشراق بلاصتها مخشية فالفولار وبقا علي ببجنبها متكي بلاصة استريلا اللي ناعسة عليه برجليها ويديها معنقاه كأنه غيهرب . تلفت عند اشراق وقال بلعربية 

- غير نعسي ... غتنعس نرجعها بلاصتها ونمشي بلاصتي 

ردت بمجاملة: ماعليش خليك راه كاين تيساع ... نحسبو راسنا فمخيم 

ضحك ورجع دور وجهه كيلعب لاستريلا فشعرها واشراق ساهية كتشوف فيهم وتنهد ... ياي علاقة عندو ببنتو ... سعداتو عندو شي حاجة ثمينة يخاف عليها فهاد الدنيا .

تنهدات وغممضات عينيها نعسات حتى فيقها صوت الفروج وحلات عينيها بتتاقل تلفتات لقات استريلا ناعسة حداها بوحدها . ناضت لبسات صندالة وتلاقات مع زوجة الجد هازة غلاي دالماء وداخلة توضا ... خلاتها الزوجة دازت قدامها للطواليط وخرجات كتجر صندالة طلات المراح لقات علي ناعس فبلاصتو


خرجات لبرا كتكتاشف حياتهم كيفاش دايرة لقات البنت مخرجة لكسيبة والولد مخرج لبغال والبكر والصباح بارد والجو نقي ... صوت الدجاج بدا وصوت الديك مطلوق والطبلة ديال لفطور صغيرة دلخشب على برا فيها ابريق من القهوة كحلة والخبز والزيت والزيتون فوق الطبلة ديال جوج دالناس ... ابتاسمات ليهم بلطافة وهما غاديين يسرحو .. اما العمة مشات لواحد النوالة وتبعاتها اشراق طلات عليها لقاتها جالسة مربعة حدا الكانون كطيب بغرير ... ابتاسمات اشراق وقالت 

- تبارك الله عليك 

ابتاسمات ليها العمة : الله يبارك فيك ... نحط ليك اتاي؟

اشراق: لالا بغيت غير نونسك ... الجو الصباح زوين بزاف 

جلسات حداها وهي كتصايب بغرير واشراق كتعاونها والدخاخن خارجة من النوالة ... تغطا البغرير وجرات العمة القصرية بدات فالمسمن كتعجن واشراق كتورق بكل سعادة حتى سالاوه وغطاوه حتى هوا تما وحطو فوق الكانون ابريق ديال الماء يغلا . 

خرجات اشراق من النوالة كتنفض حوايجها من لحموم ودخلات بشوية كان علي باقي ناعس والجد جالس كيسبح فصمت ... السكاات ... الدجاج داجل خارج والكلب فوق النوالة مجبد و المسنة جالسة مربعة حدا الباب كتمخض اللبن فواحد المزيودة ديال الجدي كتديها وتجيبها ودكر غير بوحدها فصمت ... لمحات اشراق الولد الصغير خارج كيجري حفيان هاز واحد الشبكة وتبعاتو كضحك مور الدار فالعش ديال الدجاج وبدات تفرج ... دخل وسط السياج والدجاج كيفرطط وهوا كيشدهم بسهولة ويلوحهم برا ومشا للقش جمع كاع داك البيض البلدي وخرج كيجري والسروال هابط داه للكوزينة . عند مو كيجري وهي هازة زلافة ديال لحسوة سخونة للجد وعطاتها ليه ليدو وحطات وحدة اخرى للزوجة وخرجات برا تحت انضار اشراق اللي تابعهم . جر ولدها الحمارة وهوا صغير كأنه راجل كبير جابها قدام الباب ولاحو عليها البيدوزات ودفعوها مع العقبة فالهبطة غادية كتنقز بوحدها ... لسقاتها اشراق تمشي معاها للعين وتبعو الحمارة بشوية عليهم وهي غبرات غبر ليها الاثار ... دازو حدا الداليات دالعنب ديالهم وحدا الحجل اللي كيوقف قدامهم ويطير واصوات الغابة والناس كتسرح الغنم ديالها حتى للعين لقاو لحمارة واقفة كتسنا والناس كتسقي والمياهات والغيس منضر جميل والماء بارد كيبهط من العين نيشان نقي صافي ... حطو المحكن فابيدوزة وعمروهم وردوهم فوق الحمارة وطلقوها رجعات للدار كتمايل بوحدها واشراق والعمة موراهم بشوية طالعين وكتوريها المناضر والقبائل المجاروة واتجاهات ديالها ... حياة هادئة طبيعية بدون ضوضاء ..فقط صوت الاشجار والطيور والحشائش كتحرك واصوات معارفينهاش منين جايا بالضبط ديال الغنا بالشلحة والموال كيرد الصدا 

اشراق: من جاي هاد الصوت!

العمة: شي حد راه دابا كيسرح فشي بلاصة وكيغني .... غني حتى نتي الى بغيتي 

اشراق والى سمعوني الناس

طلقات العمة حلقها على جهدو بواحد الموال اطلسي من داكشي الرفيع تعاود الصدا ديالو جوج مرات .. فجأة رد عليها صوت اخر ديال مرى بموال بحالو وبقات اشراق كضحك 

شكون هادي؟ 

العمة: ههه ايوا راه غير سمعو الصوت وردو عليه من شي بلاصة

ناضت اشراق طلقاتها بواحد التزغريتة فااعلة تاركة بقات كتسارى فالهواء الطلق خرجات طاقتها فيها كاملة وبدات تنهج 

- اربي السلامة بحال الى حيدت شي هم 

العمة: غوتي حتى تشبعي ماشافك حد 

بدات ضحك وطلقات واحد مولاي الحلوق بالريفية موال على قدو وقدودو تفرز بين الاصوات كاملين لانه غريب عليهم وكلمات غير مفهومة وهي ضحك العمة وقالت

- غادي يعرفوك ماشي من هنا ههه 

رد عليها موال بصوت نسائي وهما واقفين كيتسنطو وبدات العمة كضحك 

- هاهما ردو عليك ههه قالو ليك مرحبا بيك بالشلحة 

اشراق: بصح!! جاوبني !!!

العمة: واه جاوبوك 

بدات ضحك وعاودات موال اخر وهوا يرد عليها صوت راجل بموال جاي من بعيد لبعيد كيتعاود 

اشراق: شنو قال!!!

العمة: هههه قالك زعما ... الزين فالصوت راه داوا الجروح .. بغات تشوفو العين يرد الروح هههه 

اشراق: هاي هاي هاي الشعر هادا 

العمة: اييه راه يهزو عليك لغنى ويردو عليك فالبلاصة هههه

كملو طريقهم كيضحكو حتى للدار لقاو الحمارة فالباب ... يالاه طلعو النفس خرج علي من لداخل باين يالاه فايق .. ريحة سينيال عاطية من فمو وشعرو ممسوح بالماء بالدراعية طرافها مخشيين فالشورط والكلاكيطة وهضر مع العمة بالشلحة وضحكة مستغرب وردات عليه حتى هي كضحك وكتحرك راسها بالايجاب واشراق كتشوف فيهم بابتسامة مجاملة حسات بيهم كيهضرو عليها وبدات دور فعينيها


شافت فيها العمة كضحك وقالت : جلسي تفطري راكي عييتي 

جلسات فوق الزربية على برا من بعد مادوزات ليها الشيبانية الشطابة ديال الدوم ورشاتها بالماء وطلقات الجلسة وصلات اشراق لقاتها مقادة والشمس ساطعة .. جلس حداها علي وقال 

- هبطتي للعين ؟ 

حركات راسها : اه ... المناضر وااااعرة 

علي: معاياش فقتي؟

اشراق: مع الفجر ههه... بقيت كندور معاهم تببارك الله قضاو الشغل كامل فالصباح 

حطات ليهم العمة بغرير والمسمن و واحد الحرشة سخونة وسطها الزبدة بلدية والقهوى والحليب والبيض مصلوق والخبز ديال الشعير والزيتون والعسل بقا علي غير كيشوف فهاد الفطور كامل يغوت 

- بزااف بزااف عدبتي راسك واش غادي ناكلو هادشي كامل 

العمة: ااكولو بالصحة والراحة 

تمات الشيبانية جايا هازة اللبن حطاتو ليهم فالطبلة وكترحب وجلسات معاهم 

علي: فين الدراري يجيو يفطرو 

العمة من الداخل: غير فطر هاهما كيفطرو هنا 

علي: جيبيهم لهنا يفطرو معانا 

العمة: غيصدعوك غير فطر فخاطرك 

علي: واجيبي الدراري مالنا ياك لاباس اش غيصدعو غياكلو من فمي!!!

بقا عليها حتى جابتهم جلسو معاهم حشمانين وكياكلو حادرين العين وحشمانين يمدو يديهم ... علي واشراق كيدفعو ليهم وهما قارمين على الخبز كيشوفو مقادرين يمدو اليد ... شوية بشوية عاد بداو كيمدو والحشمة كتقطر منهم ... بلا متشعر اشراق قالت بإعجاب كبير ليهم وعينيها كيبرقو 

- نشاء الله ياربي نهار نكون كنتوحم عندكم غنجي نتوحم عليكم ههه


ضحك بعفوية وهوا كيشوف قدامو بلا ميتلفت اما هي عاد فاقت وبدات ترمش ساكتة .. خرجات استريلا بشعرها مطلوق و بانطوفتها وبيجامة كتحك عينيها 

- بابا

تلفت شاف فيها وقال: صباح الخيرات 

جرها من يدها وجلسات عليه كتفشش وعنقاتو وهوا كيحك ليها ضهرها 

- اجي تفطري اجي ... راه فيك الجوع 

خوا ليها القهوى ورد ليها شعرها لور : فطري ابنتي ... كولي هاد البيضة صايباتها ليك عميتو 

دارت قدام الطبلة كتفطر واشراق كتشوف فيها فسهوة 

- سبحان الله حتى هي عينيها بحال عينيهم تبارك الله 

ابتاسم علي بحنان كيشوف فاستريلا وباسها على خدها وقال 

- الحب ديالي انا هادي 

تلفتات عندو عنقاتو وباستو فخدو ورجعات كملات ماكلتها 

وهوا كيهضر حدا ودنها : هادي راه هي كلشي عندي... حتى حاجة ماتسبقها . ياك ابنتي 

حركات راسها بالايجاب بابتسامة واشراق ساهية كتشوف فيهم وقالت 

- الله يخليها ليك 

رد بابتسامة: امين 

عم الصمت حتى فطرو وناض جبد واحد الصاك دكونطر بوند من الطنوبيل وشي كراطن عاوناتو فيهم العمة ودخلهم للدار قائلا 

- هادو شي حوايج ليكم .. وللدراري ... وشي سلعة تقضيو بيها 

العمة : الله يكتر خيرك ... راه خيركك مغرقنا الله يعطيك ويزيدك 

تجمعو لوليدات على الحوايج بينما مشا يبدل حوايجو وبدات العمة والشيبانية يجبدو ويطلو ... الصبابط والسبرديلات والبروطكانات ديال البرد للوليدات والجواكط وتريكوات 

بكيات ديال التقاشر لكل واحد و جلابة خليضة للشد وبينوارات ليهم على البرد وشي حويجات ديال الصيف قلال لاكن الاكثر حضور هما ملابس الشتاء والبرد والكواش فرحو بيهم قد ما فرحو بيه فاش وصل.. كراطن ديال السلعة اللي يقدو يحتاجو و حتى روايح ليهم . منساهم فحتى حاجة ... قياس اللي يككفيهم ففصل الشتاء ويغطي لحمهم من البرد .. وكل جاكيطة قط البطانية فالغلض يسخنو فيهم هما وطرابش 

خرج لابس سبرديلتو وشورط وتيشورط كاسطيكة ووقف على اشراق براق

- انا غنطلع للجبل لفوق تمشي؟

اشراق: اه اه بلاتي نلبس حوايجي 

علي: راه مسااافة غنضرب بطموبيل وعاد مسافة اخرى على رجلي حيت طموبيل مكتوصلش لتما ... تقدري ؟

اشراق: ماعليش .. نمشيو نكتاشفو ... استريلا غتديها ؟

علي: اش غنديها غتسخف ليا فطريق .. غنخليها حتى نرجع 

اشراق: واخا تسناني انا جايا 

مشات بسرعة لبسات دجين وقميجة طويلة زرقاء وشال وسبرديلة ورجعات بينما وصا العمة على استريلا وطمناتو تحطها فعينيها بحال العادة ونطالق فطموبيل هوا واشراق نحو الجبال


ضربو طريق طويلة كيتجمعو على البادية باحترام وابتسامة والطموبيل كتهز وتحط فالطريق وتنقز بيهم .. جبدو مسااافة طويلة سارحين فالجبال حتى لحد الطريق ووقفات الطموبيل فالجنب ونزل هز راسو فالسما كيتأمل ويديه على جنابو كيسمع اصوات الغابة وجبل قدامو عالي كيتنمضر فيه .. نزلات اشراق سرحات عينيها وخلعها الجو الصامت واصوات الاشجار كأنها كتكلمهم وقالت 

- ناري الى وقعات لينا شي حاجة هنا ميسيق لينا حتى واحد الخبار .. 

تلفت شاف فيها بابتسامة غريبة كيفكر فشنو كيدور ليه فراسو مركز عليها وهي تبتاسم وقالت 

- مالك؟

ابتاسم وقال: كنت باغي نخلعك شوية ولاكن خفت تيقيها ويحساب ليك بصح 

جمعات الضحكة وقالت : بحالاش؟ 

قرب وقال: دابا غير انا ونتي هنا ... واخا ندير فيك اللي بغيت حتى واحد ميسيق ليك لخبار ... ونخليك هنا ونزيد لكندا 

تحلو عينيها فجأة وحطات يدها على صدرها مخلوعة واللون تخطف فيها وقالت 

- راه عندك بنت ا علي .... كما كتخاف عليها خاف عليا حتى انا !!!

بدا كيضحك عليها وقال : غير بغيت نوريك كفاش نويت نخلعك خهههه 

تنفسات الصعداء وهزات الحجر : عرفتي غنشير عليك بهاد الحجر ... كنتي غتسكت ليا القلب 

رد كيضحك: نتي سولتيني كفاش ... اصلا ما .. (رجع سكت ووقلب الهضرة) يالاه راه قدامنا هاد الجبل غادي نطلعوه 

اشراق: بتشكيك ) شنو كنتي غادي تقول ... غير قول قول

رد كيضحك ويدو على طموبيل: والله حتى بغيت نضحك معاك ولاكن ماشي وقتو غادي تخلعي 

اشراق: شنو كنتي غتقول

رد كييضحك بهدوء: كنت بغيت نقول ليك ما ندير ليك والو حتى ندخلو الجبل ههه 

تراجعات: لا انا اصلا غنتسناك هنا حتى ترجع ... شنو غنديرو فالجبل فين هما هاد الناس ؟ مكاين والو ولحوايج كي غنديرو ليهم ؟

تنهد ورد بهدوء: وا غير يالاه واش حساب ليك دابا صعيبة عليا نشدك هنا ؟ بحال هنا بحال الجبل ماحاضرين غير ملائكتك 

اشراق: بخوف) واش كتخضر بصح!

هز حاجبو: واش اللي نيتو خايبة غيقولها ليك ! نعلي الشيطان راه كنضحك معاك 

قالت بتشكيك: حلف بالله .. براس بنتك 

علي: كفاش براس بنتي ؟

اشراق: قول ليا وراس بنتي استريلا حتى كنضحك 

ضحك وقال: وراس بنتي استريلا حتى كنضحك معاك 

اشراق: حلف بالله 

- رد بجدية كأنه مرضاش تنويها فيه وقال بنص عين 

- ضحكت معاك وصافي ماتقتيش بيا نردك دابا نيت للدار ... واخا غنردك على والو مي نردك ومغنبقاش نضحك معاك 

سكتات كتشوف فيه كأنه تقلق ودور وجهه كيشوف فجهة اخرى ... سدات الباب وتقدمات قائلة كتشوف فالارض 

- صافي يالاه نكملو الطريق 

سكت ماقال والو وسد البيبان ودخلو للجبل فصمت كل واحد كيشوف قدامو فين كيزطم .


.ضربو طريق طويلة مباعدين وطالعين بين الشجر ... تلفت موراه شافها عيات وقال بلطافة 

- ترتاحي شوية؟ (مد ليها القرعة دالماء))

جلسات على واحد الحجرة سخفانة وقالت
- باقي بزاف؟

رد بالنفي : قربنا 

شربات الماء ووجها حمر مزنك كترتاح 

علي : اري يدك نجرك 

ناضت وقفات: لالا غادي نكمل راسي 

جمع يدو فصمت وخلاها حتا ناضت على خاطرها وكملو الطريق وهي سخفانة غادي وكتوقف حتى وصلو وبداو يبانو ليهم ديور مفرقين صغار وقالت 

- اوييلي باقيين غنجبدو حتى لدوك الديور

دار يديه على جنبو مسرح عينيه وقال 

- دغيا دغيا ... ماشي عقبة دابا

اشراق: الله اربي سخفت 

جاتو الضحكة وكملو حتى لدوك الديور وجلسات فوق واحد الحجرة كتنفس بينما هوا كيسلم على الناس وطلب عود ولا جوج وحضرهم ليه فالحال وتلفت قائلا عند اشراق

- ماتبقايش جالسة هنا ... اجي 

داها لواحد الدار صغيرة عبارة على بيت واحد فيه مرى بوليدلتها رحبات بيها اشد الترحيب وجلساتها فاحسن بلاصة 

علي: بقاي هنا رتاحي حتى نرجع 

اشراق: فين غادي؟

علي: غنرجع للطموبيل بالعود نطلعو داكشي اللي تما 

قالت فدهشة : غترجع على لتما !!!!! 

هبط راسو برا وخوا عليه قرعة دالماء فزك حالتو ورد الكاسكيطة ووقال

- ضاروري ... غنهبطو نجيبو داكشي.. تسنايني هنا حتى نرجع اوك 

عمر القرعة بالماء من واحد البيدوزة حدا الباب وهي كطل وهما غادين بالعودان وكيبعدو حتى غبرو . حطات ليها المرى ما لد وطاب واخا اللهجة بيناتهم صعيبة و ماقدروش يتواصلو لاكن كيفهمو بعضياتهم .. شافت اشراق حالتهم مساكن وكفاش عايشن قطعو ليها فالقلب و تأزمات على حال الاطفال و المحنة فاش هما .. ومع ذلك ضاحكين فرحانين وجمالهم ينسي الهموم . 

جبدات اشرراق من شكارتها واحد الكريم ديالها ديال الشمس مداتو للمرى كتشرح ليها بيديها على الوجه والشمس والمرى فرحانة .. شداتو بسعادة دغيا دهناتو فوجهها عاجبها الحال واشراق ساهية فيها حتى غفات عينيها . 

فيقها صوت الناس والضجيج على برا وخرجات طلات لقات علي كيفرق الصدقات على جميع الناس البعاد ولقراب والصيكان ديال كونطربوند كبار قدامو ... يعطي لكبير وصغير .. لبسات سبرديلتها وخرجات بسرعة كتفرق معاه بسعادة حتى سالاو الصدقة كاملة وكل دار عطاوها كاشة ومعاونة ولباس واحدية وجلسو على برا كيتمنضرو فالطبيعة ... تحطات ليهم قصرية ديال كسكسو بالقديد وبداو يدورو بيديهم وياكلو بلا ملاعق ويضحكو 

علي: كيفاش درتي ليها ؟؟

اشراق: دورها بحااال هاكا مالك مكتعرفش؟

علي: مابغاتش دور ليا 

اشراق: صافي بلا مترون الدنيا صعيبة عليك انا ندورهم ليك ههه 

قربات حداه كضحك كتكور وتمد ليه ليدو .. لقمة ليها لقمة ليه وهوا كيتشرط عليها .. ديري خيزو ... ديري كرعة .. حيدي اللفت ... كبري اللقمة . دوخها لاكن بقات كضحك الوقت كامل وتكور ليها وحدة ليها وحدة ليه مع الضحك .. دارت كورات ليه وحدة تابعة لخرى وقالت كضحك حتى تسدو عينيها 

حل حل ههههه 

حل فمو بسرعة خشاتها ليه ففمو دوزهم باللبن وتبعات ليه لكديد وهوا كيهرب راسو ويديها عامرين 

- اهم اهمء مكناكلوش 

اشراق: واا حل براكة من لفشوش باز 

دخلتها ليه ففمو بز منو .. عطاتو اللولة والثانية وهوا يولف رجع كيجر معاها ويتسابق عليه على شبعو ورجع الور تكا على الحيط كيتكرع 

- وا كواااري عندك !

اشراق: هههه لبنة فاليد ماشي معلقة ... دابا هما مولفين ياكلو اي حاجة باليد 

علي: اه بصح ( سكت كيشوف فيها بابتسامة وقال) شكرا 

ردت كتاكل بشهية: نزيدك ؟

حرك راسو بالنفي: لا صافي الله يخلف... نتي ماكليتي والو 

اشراق: كليييت الحمد لله ..

جمعات يديها وناضت غسلاتهم ورجعات جلسات مربعة رجليها 

- كسكسو ديالهم بنييين ماشي بحال ديالنا 

رد بمزحة: وجدي راسك تهضميه فالهبطة ... اصلا الهبطة ساهلة ماشي بحال الطلعة 

اشراق: نمشيو دابا؟

علي : قبل ميضلام علينا الحال ونبقاو فالخلا 

ناضو ودعو الجماعة وخداو قراعي عامرين وشدو الطريق على رجليهم كيضحكو


شدو الطريق في امان الله فطموبيل واشراق حداه ناعسة وهوا سايق طالق الموسيقى بصوت منخفض حتى وصل مع غروب الشمس للدار وهي تحل عينيها بالصدفة لقاتو كيحيد السمطة 

- اشراق: وصلنا ! 

علي: وصلنااا ... ايوا ؟ كلاك الديب؟

ابتسمت بمجاملة وقالت: لا 

علي: ايوا على سلامتك 

تعرضات ليه استريلا كتجري عنقاتو وهزها قائلا باسها من خدها 

- اشنو درتي فاش مشيت ؟

ردت بانزعاج : واااالو عميتو ماخلاتنيش ندير حتى حاجة بقيت غير جالسة حداها 

علي: باسها فخدها) غدا غندي بنتي لواحد لبلاصة زوينة 

عنقاتو تحت انضار اشراق اللي كتنهد بابتسامة ... يا ريت نرجعو لحضان واليدينا ... يا ريت كن ما كبرناش ... ياريت كن بقينا صغار تحت جناح الام والاب ... ياريت لو بقينا اطفال 

مشا قدامها علي والخطوات فعينيها تقال هاز بنتو وهي معنقها وكل شوية يبوسها وهي كتمخشش فيه وتعنقو ... بقا عقلها مرفوع من ديك اللحضة وهي ساهية كأنها ماحاضراش معاهم ... فجأة دخل عليها علي للبيت فين حاطين لحوايج وحل الباب لقاها ساجدة كتصلي وتراجع بقا كيشوف فيها لثواني ومشا .. سلمات ودعات وخرجات عندهم لبرا فين جالسين وجلسات حداهم متكية راسها على الحيط ساهية قدامها فصمت وقت طويل حتى هضر علي وهوا كيشوف فيها وقال بصوت هادئ 

- عيتي؟

حركات راسها وهي كتشوف فنفس النقطة بلا متكلم ولا تجاوب .. خلاها على خاطرها لاكن لاحظ حالها اللي تغير وطال تغييرو ومكتشارهمش النضرات و لا الحوار ... وحتى لعشا كلات منو شوية ورجعات اللور واخا عياو فيها ماقدراتش تكمل ... تهزات الطبلة وكل واحد شنو ناض كيدير وبقا علي واستريلا واشراق برا .. تلفت عندها كيشوف فيها وهي تلفت جيهتو .. سولها بعينيه لاكن بقات ساكتة وعاود قال بفمو 

- واش مقلقة من شي حاجة؟

جاوبات بالنفي: لا بلعكس ... الحمد لله كلشي مزيان ... زعائلتك من اطيب خلق الله

علي: ومالكي؟ تبدل المود ديالك؟

ردت بهدوء : غير عيت وصافي


صباح جديد ... صباح الوداع مع العائلة ... كيعنقو ويبوسو فرحانين واشراق كترد ليهم العناق .. ركبو فالسيارة وانطلقو راجعين بحالهم . قربات استريلا من باها وهي جالسة اللور وقالت

- بابا قلتي غتديني لديك البلاصة الزوينة !

شاف فيها فالمرايا بابتسامة وقال: ماعقلتش!

ردت : هااا!! قلتي ليا لبارح غادي تديني لواحد البلاصة زوييينة !

رد بابتسامة : رغبيني شوية 

عنقاتو من اللور واشراق كتشوف فيهم بابتسامة

- عفاااك ديني لديك البلاصة الزوينة عفاااك (باستو فحنكو) بابا حبي غتديني انا كنتيق فيك 

تلفت شاف فاشراق كيضحك وقال : نشوفو اشراق واش تبغي تمشي معانا 

ردت استريلا بسرعة : غتبغي غير يالاه 

علي: يالاه اري شي بوسة كبيرة 

قجاتو من اللور وباستو بقوة على خدو ورجعات اللور فرحانة . 

دازو على افران ونزلو تغداو فمطعم شعبي فيه الشيخات . حطو ليهم الطواجن والشلايض المغربية وكلاو فجو ديال الضحك والنشاط مع استريلا وخرجو مشاو جهة بحيرة وهوا يتلفت عند استريلا اللي غادية موراه كتنمضر والشكارة على ضهرها صغيورة وقال 

- هادي هي البلاصة 

دورات عينيها بان ليها العود وهي تنقز 

- بابا بابا العود العود 

شد ليها فيدها: اجي نركبك عليه 

داها ركبها على العود وجبد تيليفون كيصورها بسعادة وهي كضحك وتلفت عند اشراق لقاها واقف حدا عود اخر كدوز يدها عليه بلطف وقال 

- تركبي حتي نتي ؟

ردت : لالا بلاش ماشي مشكل 

رد باقناع: طلعي مالكي كتحشمي

دارت يدها على نيفها كضحك ومدات يدها شد فيها بعفوية حتى طلعات وجر العود جهة استريلا وبقاو كيتساراو حدا البحيرة وهوا كيصورهم ..دوزو وقت ممتع على برا النهار كامل ومشاو لأوتيل من الاووتيلات دافران الجميلة واشراق جالسة متوثرة فالاستقبال كتسنى شنو بغا يدير حتى رجع ليها مد ليها الساروت وقال

- ها الشومبر ديالك نتي واستريلا 

هزات استريلا راسها: انا مبقا معاك ابابا 

رد بعفوية وهظ شكارتو على كتفو وقال 

- باتي فين ما عجبك .. يالاه نطلعو 

ابتاسمات اشراق وطلعات معاهم للشومبر اللي حجز ليها ودخلات ودخلو هما للشومبر اللي قدامها . 

تكات على الناموسية مسرحة يديها كتنهد بعمق وترخات حتى شبعات وناضت دوشات ولبسات حوايجها . دقو عليها وخرجات لقاتهم فالباب كيسد بيتو 

- مافيك اللي يتعشا هه

اشراق: فيااا ههه

نزلو تعشاو وكانت امسية زوينة خفيفة على القلب مروجاها استريلا من بعد كل واحد طلع لبيتو ينعس وصبحو شادين طريق العودة فسلام وامان


فعيادة طبية نسائية واقفة خليج فالاستقبال كضحك مع الممرضات اللي كيشرحو ليها الدواء وكيفية الاستعمال ، وقفات حداها نهاد بالصدفة وجهها شاحب متعبة جامعة شعرها و لابسة جلابة انيقة زرقاء .. تلفتات بالصدفة شافت فنهاد لاكن الاخيرة ما عطاتهاش وجه وباينة فيها كتمر من ضروف قاسية ... زادت صدمة خليج وهي كتسمع الممرضة كتهضر معاها وتعطيها المواعيد 

- عندك كونترول نهار 28 نشاء الله باش وغادي ديري هاد تحليلات .. وتاخدي هاد متبت الحمل جوج مرات فالنهار .. والله يكمل عليك بلخير 

ردت نهاد : امين.. شكرا 

الممرضة: 28 مع 9 اوك ؟ 

نهاد : نشاء الله ميغسي بوكو 

بقات خليج غير كتشوف فيها وهي حنات الراس وخدات الضوسي ومشات 

الممرضة : دوك ليبيخت هما اللي كيرو ليك الحكة ... غتاخدي هاد الدواء اللي عطاتك الطبيبة باش يهبط ليك كاع دوك ليبيخط .. ورجعي من بعد ما تسالي تخيتمو باش تشوفي الالتهاب واش برا 

خليج : شكرا 

خرجات حتى هي بسرعة كتجري لحقات على نهاد ووقفات كطل عليها وهي كتركب فسيارتها وحداها امها ومشات . وذلك اشراق حتى هي ركبات فطموبيلتها وزادت بحالها . 

نهاد وهي سايقة : انا ماغاديش نقتل روح غير حيت غانطلق 

الام : وخاصك تقوليها ليه ابنتي يعرفك حاملة 

نهاد: مغاديش نقول ليه ... غيحساب ليه كنتلسق فيه . . عيطي ليه نتي علميه ... وولدي انا قادة بيه ... حسبي الله ونعم الوكيل هادشي اللي غادي نقول 

تنهدات الام: لا حولة ولا قوة الا بالله ... ما عرفنا نفرحو بهاد التيلاد ولا نحزنو 

نهاد : مابغيت لا ننعصب ولا نتفقص ولا نشوف شي واحد يعصبني ... الطبيبة عطاتني نعس على ضهري شهراين حتى يتبت الحمل مابغيت حتى شي حاجة تفقصني ولا ضرني


دخلات خليج للدار مالقات حتى واحد وتاصلات بمها 

- الو ماما ... فينك؟ ... اااه مشيتي ديري كاسكروط مع خالتي مريم ... واصافي غير خليه معاك انا مشغولة باا منجي نديه حتى ترجعو غادي يبرزطني 

سمعات الباب تحل وتلفتات بانت ليها اشراق داخلة جارة الباليزة وقطعات قائلة

- على سلاااامتك اختي ... كنا فيوماين صدقنا ف3 ايام ... كي دازت التسافيرة 

جلسات كتسوط سخفانة وكتحل الفولار: سفوني الدروج ... دازت زوييييينة والله ماسخيت 

خليج: احياااني عليك ... بنتي ليا عجباتك الجلسة مع علي وبنتو ! ما عيطتي ماسولتي 

اشراق: مكانش الريزو تما ... كنا بعاد على المدينة اصلا هما جاو فلعروبية 

خليج: ايوا... كي دازت التسافيرة ؟

اشراق: واااعرة ... عائلتو الله يعمرها دار ... تمنيت كن كنتي معايا غيعجبك الحال ... اشمن تواضع ... اشمن كرم ... اشمن اخلاق وتربية ... اودي التربية مامحتاجا لا مدارس ولا رقة ولا لباقة . . . تشوفي دوك الناس كي دايرين تستعجبي والله ... نياااااا لواحد الدرجة متصورش .. قلالو الناس بحالهم اختي ... وكيرحبو ويضايفو لا بكبيرهم لا بصغيرهم ... كتحسي بيهم باغيين من قلبك ماشي شنو عندك وشنو جايبة ولا شنو لابسة ! ومنين ما دزت الناس كيرحبو بيك ويعرضوك .. ويجي يطلو عليك ويجلسو معاك ... ما هوا تبركيك ما هوا حسد ... بلعكس كيفرحو بيك وميخليو مايحطو ليك ... الصراحة الشابو لدوك الناس اختي 

جلسات خليج بابتسامة : هاكا كيكونو الناس ديال البوادي خصوصا المناطق ديال الشلوح و الاطلس كيكونو نيا وكيحشمو ... ايوا وعلي كفاش كان معاك 

حطات اشراق صبعها على كتف خليج بسرعة وهرباتو قائلة 

- هاااه مدارها فيا ... حتى الشوفة مكيهزها فيا ... واااحد الاحترام .. واحد الاحترام ... واااحد الاحترام !!! شغنقول ليك ! كن شي واحد كن بدا يدورها فراسو ويلوح يدو غييير يجرب ... هوا اختي حتى الشوفة كييشوف فيها ويهبط عينيه . 

خليج: وراه غيكون بحالو بحال عائلتو ... دم واحد زيدي عليه عاش فكندا العقلية مفتحة زائد الاحترام والوقار 

اشراق : بتعجب) اااه اختي ... وكرييييم كريييم كريييم الصراحة ما عندي منقول ... كريم مع كاع الناس والتواضع ياكل معاك فين ما كان وينعس فين ماكان ويهضر مع الكبير ومع الصغير لا هوا لابنتو ... مكاينش داك البروتوكول وزعما جيت من كندا ولا جيت من واشنطن ويتشرط ويتكبر ... والو ! وحتى بنتو بحاااالو ... ماتهرب من الناس ما تعيف ماكلتهم ما تحتاقر ولادهم ! نعم التربية ... امااااااا ولادهم همااااا ... تباااارك الله مشاء الله واحد الزين كيقطر بحال الى راكي فالسويد !!! اشمنك يا عينين .. وحجبان وزعورية .... والبنات عندهم بحال سويديات كيديرو داك زويف حمر مسيكنات والبيجامات والطابيات وينزلو يسقيو ... وشحال كيحشمووووو ... نزلت للعين لقيتهم تما خواو ليا الطريق سبقوني انا اللولة وكيشوفو فيا بواحد الضحكة ويحدرو العين حشمانين ... عااالاااام دوك الناس كنت كنقول موحال باقي بحالهم ... اشمن مدينة !! يخخخ والله اختي الى هما اللي عايشين حنا عايشين هنا الموت البطيء ... رجالهم حروفهم كوحل كتحسي بيهم رجال ديال الصح حرشين بلا حديد بلا موسكيلاسيو

خليج: بحال علي 

ردت بعفوية : ااااااه والله اختي بحاااااالو ... كتحسي براسك معاك راااجل هاز الحمل وهاز التقل وحرش ما تخافي ما دهشي !... وحتى لوتيل اصاحبتي عطاني شومبر بووووحدي ... ماشي شي واحد اللي كيستغل الفرص زعما وديك اللعبة ديال ماقصدش ولا مارديتش البال ديال ولاد هنا ! .. صافي الاحترام الاحترام مكاينش ! كلمة وحدة


ابتسمات خليج وقالت: ياك بعدا فوجتي 

قالت بابتسامة: اااه ولاهيلا فوجت 

خليج: باينة فوجهك ... مشيتي غير هاد اليوماين ترقعتي شوية على اللي كنتي ... رجع فيك الدم 

اشراق: انا راه سراولي اللي كنت كنلبس مابقاوش كيجيو قدي ... كيجيو واااسعين عليا 

ردت خليج باسى :ضعافيتي بزاف فراسك ... تساسيتي اللي شافك يقول فيك شي مرض الله يحفض

اشراق: منساش واحد تبسل عليا فالقيصارية .. دزت من حدها وقال ليها وا مابقا فيك ميعجب . عرفتي تصدمت قلت لهاد الدرجة تبدلت ! اويلي هاكا كيشوفوني الناس !

خليج: لالا مابقيتيش كي كنتي ... شوية دابا رجعتي لاباس .... قبل كنتي ببحال الى واكلة توكال فخبارك! تدعقتي بالهم 

تنهدات : الحمد لله على كل حال ... مزيان باش نعرفو الفرق ونحسو بالنعمة ديال الصحة 

خليج: دابا مابقيتيش كي كنتي بديتي كتردي صحتك شوية .. وبان فيك الضو مور هاد تسافيرة 

اشراق: واخا هاكاك مخنوقة ... كنحس براسي مخنوووقة مطايقة حتى واحد وحتى حاجة 

خليج: خاصك تبقاي تحركي . . . كما سافرتي بدلتي الجو هاكا بقاي ديري ... ماتخليش الفراغ راسك .. تحركي خرجي سافري ماتجلسش حتى تلقاي راسك وحدة اخرى بلا متحسي ... شوفي غير هاد اليوماين اللي سافرتي فيها كفاش رجتي وبان فيك الضو وبديتي ضحكي

اشراق: ماعرفت اش ندير 

خليج: تهلا فيك علي بان ليا ؟

اشراق: تهلا مسكين ما قصرش معايا 

خليج: ايوا شتي ... راهم باقين ولاد الناس فالدنيا 

قالت اشراق بعفوية كتشوف فالجنب ساهية

- بااقين ولاد الناس اللي تعولي عليهم ... هادشي علاش كيعجبني نخرج معاهم .. فيهم الضحك والنشاط مكيبززو عليك حتى حاجة ومكيحسبوكش برانية وكيخليوك على راحتك ... يضحك معاك ويقشب معاك ويحتارمك ميتجاوزش الحدود ... عارف اش كييدير ... اصلا كن كان شي واحد خفيف وباسل منرتاحش ليه... هادشي وعاد ماتت ليه مو ومأزم .. واخا هاكاك كيضحك ليك فوجهك مكيبينش ليك الحزن ويمرضك ولا يقوي عليك قوة الشكاوي ... وداير الخاطر كتر من القياس


جلسو كيتجمعو لاكن خليج ما جبداتش لاشراق حس نهاد او شي حاجة كتعلق بيها . جبدات اشراق حوايجها صبناتهم وبدات توري لخليج التصاور اللي دارو فالغابة وفالبادية وتعرفها على العائلة وهما كيضحكو ... رتاحت من السفر و التعب ديالو ودوشات وتجمعات بعائلتها الصغيرة حتى قربات تننعس وهما يوصلوها التصاور اللي صورهم من عندو فالهاتف .. شكراتو وجاملها وسالات المحادثة . 

صباح جديد ... صباح مشمس ساطعة فيه الشمس والحرارة ، كالعادة صبحو فلاصال خدامين لاكن مأزمين .. دايزين من ازمة مالية حادة دايرين جهدهم واكثر من جهدهم ومنهمكين فالعمل حتى لخروج والدوران مابقاوش مساليين ليه . يتسلفو من هنا ويتسلفو من هنا واضطرو يبيعو سيارة من السيارات واللي هي سيارة اشراق باش يفكو الازمة وفعلا كان داكشي اللي بغاو وبيع السيارة فك ليهم الازمة عاد رتاحو وبداو يحسنو الوضع شوية بشوية ويردو المياه لمجاريها . وعشية من لعشيات خرجات اشراق كالعادة مكاين اللي يوصلها ... خليج خرجات بالطموبيل وهي تمشات على رجليها حتى سمعت لكلاكصون وتلفتات شافت سيارة موراها كحلة وقفات ونزل منها طه ... مع الننزلة نزلات السما على كتاف اشراق وخواو بيها رجليها ودق قلبها دقة بحال المدفع ووقفات بابتسامة خفات جميع المشاعر والاحاسيس قدامو ومثلات القوة وهي كتشوف باستغراب . ابتاسم ليها كأنه ماوقع والو ومد يدو سلم عليها قائلا 

- اشراق... صافا اش هاد الغبور 

ابتاسمات لاكن بقا الاستغراب من طريقتو معاها واضح على وجهها وردات ليه نفس الطريقة قائلة 

- غير مع الخدمة هاد الساعة ونتا لاباس عليك ؟ كلشي مزيان ؟ 

حرك راسو قائلا: الحمد لله على كل حال ... شحال هادي ما بنتي ليا ديما كندوز من هنا مكنشوفكش

ردت قائلة : علاش هادي هي طريقك؟

رد بابتسامة : اه .. وليت ساكن هنا حداكم 

ابتسمت : اااه مزيان 

بقا ساهي كيشوف فيها بابتسامة غريبة وقال

- لعجب ياك ... كتقولي كفاش تبدلات الوقت ... رجعنا بحال الغرباء 

دورات وجهها تنهدات بعمق وقالت : سبحان مبدل الاحوال ... يبيتها فشان .. (ابتسمت) ويصبحها فشان ... اخر مرة يمكن تشاوفنا فيها كانت فلعرس ديالك ... وقلتي ليا ديك الساعة كنتمنى نبقا نشوفك ديما وماخليتينش نمشي ورحبتي بيا وكبرتي بيا 

هبط عينيه بخجل وقبل مينطق وقفات حداهم سيارة اخرى كحلة فالجنب ونزل علي بابتسامة كيشوف فيهم بجوج وهما واقفين فالشانطي


قاطع الحوار ديالهم متفاجأ وهوا كيحيد نضارات الشمس على عينيه وقال بعفوية 

- ااهلا السي طه (مد يدو)

شاف فيه طه فدهشة غير واضحة ومد يدو تعانق هوا وياه 

- خاي علي ... اش خبارك لاباس كلشي بيخير 

علي: ها حنا اخاي 

طه: كي بقات الاحوال كلشي مزيان 

شاف علي فالارض بأسى : الحمد لله على كل حال 

تلفت لاشراق اللي مدورة وجهها كتحك نيفها ماكرهاتش تفك اللقاء بسرعة 

علي: بابتسامة ) كتعرفو بعضياتكم يمكن 

شافت اشراق فطخ وحتى هوا شاف فيها وقال هاز حاجبو

- حتى نتوما كتعرفو بعضياتكم!

قال علي كيضحك : هادشي بان ليا فشكل ! ولا الصدف كدير خدمتها 

تنهدات اشراق وشافت فالارض بخجل من طه ومن علي بجوج وشافت فتيليفون قائلة

- غنرجع لاصال واقعة شي حاجة بسلامة عليكم 

خلاتهم واقفين ومشات كتجري بينما طه متبع ليها العين ورجع شاف فعلي قاىلا

-درتي معارف جداد بان ليا 

ضحك علي وقال بعفوية : ههه مللي جابتنا الصدفة لهنا اجي نجلسو نشربو شي كاس دالقهوى 

جرو علي لنفس المطعم ديال لاصال اللي قرريب ليهم ودخل طه معاه كيهز عينيه ويقلب في حين واقفة هي كطل وجهها صفر مارضاتش وقلبها غيسكت ... من جهة علي اللي واخد عليها نضرة زوينة انها مربية وبنت الناس ومع الاسف شافها واقفة معاه الى عرف بطلاقهم غادي يشك انها كتلعب وكتمثل عليه دور الضحية ووهادشي مكروه كرها اسود عندها وكرامتها فوق كل شيء متسمحش ليها تنداس ... ومن جهة طه اللي غادي يشك فيها ويضن انها نقزات من ديك البنت المحترمة لبنت كتكون علاقات مع الرجال وبالاخص مع واحد من معارفو ... كبريائها وكرامتها اللي شحال وهي خدامة عليهم قدامو جاء اليوم اللي غادي يفهمها بالغلط ويدوس عليهم بالغلط مرة اخرى . اما هما جلسو فسطح النادي كيشربو القهوى مع ناس قلال جالسين . 

طه : استريلا لاباس عليها ؟ كبرات شوية 

ضحك علي وقال : استريلا قربت نزوجها ونتا مزال مارتي لينا شي طه صغير 

تنهد طه بأسى وقال : اااودي اخاي علي ... فاتك بزااااف فاتك 

رد علي باستغراب: ياك لاباس شنو فاتني؟

تنهد طه وقال : كان تزاد عندي ولد ... ولاكن مات الله يرحمو 

رد علي بأسى : الله يرحمو ويعوضك خير نشاء الله ... شحال دابا داز على هادشي 

طه: ربع سنين دابا .

رد علي بأسى: لا حولة ولا قوة الا بالله .

ابتسم طه وقال : ونتا مزيان ... اش كتعاود ... فين عرفتي اشراق؟

رد علي بابتسامة : ماحسابش ليا كتعرفها حتى نتا ! 

رمش طه بابتسامة مخفية كيحرك راسو بالايجاب وعلي كيشوف فيه ضاحك 

- طه ... كااانعرفها من شحال هادي .. واش عندك معاها شي علاقة 

بقا علي كيشوف فيه فصمت وقال من بعد 

- لالا غير اصدقاء وصافي .. (بدا يضحك) واش انا ديال العلاقات اصاحبي وبنتي محرمة عليا نفوت شهر فالعلاقة ههه

ضحك طه وقال: دراري كيربيو ههه ... هي غير صداقة وصافي مكاين والو 

ابتسم علي وقال مصغر عينيه: لا مكاين والو ... علاش كاين شي حاجة ؟

هبط طه عينيه وقال: لا والو ... غير سولتك 

علي: ياكما بغيتي تزيد المرى الثانية 

ضحك طه بسخرية : داكشي اللي بقا ناقصني 

قال علي بتشكيك : شي حااااجة تما .. غير هضر ... شنو عندك مع اشراق 

تردد طه وقال كيلمح: نقولو كنت كنبغيها واحد الوقت 

تفاجأ علي: وايلي!! كانت بيناتكم شي حاجة ؟ 

طه: كاانت غتكون ومكتابش 

رد علي باستغراب: نتا دابا مزوج ! وباقي كتفكر فوحدة اخرى اصاحبي ! 

رد طه بابتسامة : لالا ماشي داكشي اللي على بالك ... 

علي: وشنو؟ واش تزوجات وخلاتك ؟ ! 

طه : علاش هي معاودات ليك والو 

بقا علي ساكت ورجع قال: راني قلت ليك انا واشراق العلاقة بيناتنا فشكل ...صداقة من نوع خاص .

طه : بحالاش هاد الصداقة ؟

رد علي كيضحك: وا جاوبني نتا اصاحبي وضح ليا شنو عندك معاها .. انا اللي عارف هوا مطلقة ويمكن كانت كتبغي راجلها وماتفارقاتش معاه بخاطرها ..دازت من ضروف صعيبة هادشي اللي انا فهمتو ... نتا اللي بنتي ليا كتعرفها مزيان وعندك معاها شي حاجة 

بقا طه ساكت كيشوف فالجنب مطولا وقال بجدية 

- اشراق ... اشراق طليقتي ا علي ..


كانت الصدمة قوية على علي .. تصدم وتفاجأ فنفس الوقت ..دور وجهه سكت وطه كيشوف فيه بأسى حتى بدا يستوعب وهز يدو متسائل بصوت خفيف

- كفاش طليقتك ؟ ... يعني نتا كنتي مزوج قبل من دابا ! ... ولا نتا دابا مطلق مابقيتيش مزوج ! .... مافهمتش! 

تنهد طه وقال : كنت مزوج اشراق ... طلقنا وتزوجت مرة اخرى 

رد بالايجاب: ااه دابا عاد فهمت ... (شاف فيه بتشكيك ) الولد اللي مات ليك من من؟

بقا طه ساكت كيسوط وقال بعد تردد

- من اشراق 

زادت صدمة علي وهوا كيشوف فيه وقال 

- اشراق فايت ليها ولدات ! ... (رجع تكا اللور) هادشي فشكل ... ميمكنش !

رد طه بهدوء: شنو اللي ميمكنش؟

علي: ما قادرش نستوعب !

طه: شنو اللي ماقدرتيش تستوعب .؟ ياك نتوما اصدقاء علاش تصدمتي!

رد علي بسهولة : سي نوغمال نتصدم واخا تكون بنت جيرانا ... وهي علاش مقالتش ليا هادشي!!!

طه : ونتا علاش بقا فيك الحال ... تقول ليك ولا متقولش ليك عادي ولالا؟

هز علي عينيه عاقد حجبانو شاف فيه مطولا وقال نايض 

- عالعموم ... هادشي مخلط وانا زربان ... 

قاطعو طه وهوا واقف : مزال مسالينا الهضرة ا علي جلس 

هز علي سوارتو وقال : الهضرة دابا مغتساليش ... نخليوها لنهار اخر ... سمح ليا اخاي طه لقيتينو مزروب .. الله يعاون 

هز سوارتو وتيليفونو ونزل من تما بنضرات جدية بقا طه جالس فبلاصتو كيتنهد وهبط راسو مسح على شعرو في حين طلع علي فطموبيل وتاصل باشراق

- الو اشراق ... فينك ؟ ... خرجي عندي انا مزال حدا الباب .. خرجي مالكي مخلوعة ... يالاه انا كنتسناك متعطليش

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.