برك علي على لكلاكصون بقوة وعاود برك مرة اخرى كيسوط وهي تسمح فطه ومشات كتجري للطموبيل حلاتها وطلعات قدام انضارو وزادت السيارة
بقا هوا واقف كيسوط وينفخ بغيرة ... تيليفون كيصوني ويعاود طل لقا النسيبة كتعيط وبغضب شديد ضربو مع الارض حتى مابقا فيه حتى شقف صحيح وطلع فالطموبيل ديمارا فوق منو وزاد
وقفات الطموبيل حدا مقهى ونزل علي كيبان مهدن واخا عينيه كيقولو حاجة اخرى ... نزلات حتى اشراق معاه بابتسامة مجاملة وادب وطلعو لاطيراس .. جر الكرسي يجلس كيشوف فيها بنص عين كأنها دايرة زبلة وقال بهدوء وهي قدامو واقفة
- جلسي
جرات الكرسي جلسات فهدوء حتى هي مبتسمة وطلبات عصير وهوا خدا قهوة كيشوف فيها ساهي ويلوح السكر
كسرات داك الصمت وقالت بمجاملة: سمح ليا ... لبارح ماجيتش للربعين ... راك عارف كندوزو من ازمة و .. و . بغيت نجي ولاكن ضطريت نمشي مع خليج عند الكونطابل نصححو شي وراق ........... واقيلا صافي قربتي تمشي
رد وعينيه فالكاس ويدو كدور القهوى بالمعلقة ببطئء فسهوة
- بعد غدا
قالت فدهشة : صافي دغيا !
رد على نفس الحركة : قلت ليك غنمشي مور الربعين
تنهدات : الشهر داز كيطير
قال على نفس الوضعية فهدوء: شنو بينك وبين طه ا اشراق؟
بقات ساكتة كتشوف فالكاس ديالها وقالت بتردد
- والو
رجع اللور بهدوء تو يمكن كيسطنع الهدوء وهوا كيشتت نضرو بارتياح جيهتو وقال
بقات ساكتة وصدرها كيطلع ويهبط فصمت مدة طويلة وهوا يحول نضره ليها وقال
- مالكي سكتي؟
غرغرو عينيها وقالت كتشوف فالجنب
- مكنبغيش نهضر فهادشي
علي: من حقك ... ولاكن ... طه صاحبي ... ونتي وليتي وحدة من العائلة... مبانش ليك باللي على الاقل خاصني نفهم ... باش هاكا ميوقع حتى سوء تفاهم
تنهدات بعمق طلع الجرح مع التنهيدة وقالت بتعب شفايفها ناشفين
- علي ... مافيا اللي يهضر على هادشي .... مكنبغيش حتى نجبد هاد الموضوع بيني وبين راسي .... نتا راك واقيلا دزتي من نفس التجربة وعارف علاياش كنهضر ... ديجا قلت اناا ضحية كبيرة ... غير هاد الكلمة كافية باش تفهم شنو قصدت .... والى شفتي راسك غادي دخل فالمشاكيل مع صاحبك بسببي انا كنساحب من دابا ... (ناضت وقفات) سلم بزاف على استريلا (جبدات زيت من صاكها) عطيها هاد الزيت ديال الشعر ... هادا باش واعدتها ... وشكرا بزااف على كلشي ... طريق السلامة
جلسات بأسى وهزات الماء كتنخصص شربات وهوا ساكت كيفكر
علي: هوا دابا مزوج؟
تنهدات وحركات راسها بالايجاب
شار بيدو : شربي العصير ديالك .. انا ماشي من حقي ملومك باش تكوني عارفة ..... هادي كتبقا مسألة شخصية ... تقدري تعاودي ... تقدري متعاوديش ... نتي حرة ... (شار لنفسو) انا ماعنديش دخل .. لا انا ولا غيري ... وحتى حاجة مكتسبب ليا المشاكل ... من غير الى بغيت انا تفاهمنا ... علاقتي بطه بعيدة على هادشي ... والى كان شي مشكل مغاديش تكوني سببه نتي ولا شي واحد اخر ... ومكنسمح لحتى واحد يدير ليا مشاكل فحياتي ... كما مغنكونش سبب فمشاكلك نتي ولا هوا كوني هانيا ... غنبقاو كما كنا . . . بحال عرفت بحال ما عرفتش ... مكيشكل حتى فرق و فهاد الوضع اللي حنا فيه كلشي واضح و كلشي باين .. كان زواج ... ووقع طلاق ... وتزوج مرة اخرى الوغ مكاين حتى اختلاف تفاهمنا (قال بنبرة انسانية) الله يعوضك خير ونشاء الله ميكون غير لخير من هنا لقدام ... مزالة صغيرة وباقي الوقت قدامك فين تبني حياة اسرة اخرى وتنساي الباسي .. غير مزال الجرح جديد وصافي ... غيقدام مع الوقت وتبدلي ... راه كوووولنا دزنا من نفس المرحلة... هي مرحلة ودايزة باش ما عطا الله ... بغيتي تصبري فيها صبري .... بغيتي تموتي موتي .. دايزة بغيتي ولا كرهتي .
تنهدات قائلة: كثر من هاد الصبر !
هز حاجبو وقال : بدلي البلاصة ...بدلي الحي ... سافري لبلاصة اخرى ... ماتبقايش فنفس البلاص فين عندك ذكريات وفين غتبقاي تفكري شنو داز عليك صباح وعشية ... اللي كيبغي ينسى راه كيبعد على اي حاجة تفكرو بالماضي
.. ماشي يبقا حدا الماضي عايش معاه فنفس البلاصة .... هاكا غييير كتنتاقمي من راسك
علي: اصلا غاتجي عندك لاصال غدا صدعاتني على لابيسين
اشراق: انا غدا غنكون نهار كامل غير جيبها ماشي مشكل
رد بالايجاب : نشاء الله ... يالاه نوصلك فين غادا
ردت بنفي: لالا غير خليك غنتلاقا خليج
علي: واخا ماشي مشكل
ابتاسمات ومشات خلاتو جالس... حدها هبطات تاصل بعماد كيتجمع هوا وياه فاللخر طلب يشوفو فالقهوى وجلس كيتسناه حتى وصل عندو وتراشقو بالاحضان وجلسو كيضحكو ويتجمعو على القهوة .. هضرة تدي هضرة شوية نطق علي وقال
- قول ليا اخاي عماد ... نتا دابا غتكون عارف كلشي ... شنو قصة طه مع اشراق؟ .. بدات كتعاود ليا ولاكن مافهمتش مزيان ومابغيتش نزيد نحكر عليها
تنهد عماد بعمق وقال : ااوديييي خلي داك الجمل راكد
هز علي حاجبو: هادشي كبير وبزااااف كاع كثر من اللي كنت كنتخايل
رد عماد بأسى : الصراحة مكاين منخبي عليك.... نتا دابا كتخرج مع اشراق وهي عاودات ليك شي حاجة ... وطه صاحبنا ... خاااصك تعرف شنو كيدور .... طه واشراق كانو مزوجين وطلقو
علي: عارف عارف ولاكن شنو السبب
عماد: السبب كارثة عضما
تخلع علي كبر فضولو وقال: وااايلي ! شنو وقع !
عماد راك عارف لكليكة ديالنا اللي خليتي ومشيتي ... خرج منها العجب اخاي الا من رحمي ربي .... اشراق كانت منقبة وتزوجات بطه .. ولدو ولد ولاكن نهار تولد مات ... قتلاتو ليلى
- فالاول مكانتش اشراق دايرة النقاب ... ولاكن فعرس خليج بدات كتشطح بلا حجاب وسربو ليها الفيديو كتشطح فيه من شي وحدة فعائلتها ... خرجات عليها بداك الفيديو داكشي علاش دارت النقاب....ولاكن انا الصراحة نهار عرفتها عرفتها بيه .. ماشفت وجهها حتى حيداتو ... لمهم تزوجات بطه ... كانو بيخير حتى ناضو المشاكل وحيدات داك النقاب يمكن باش تشهد فالمحكمة حيت طه كان غادي يدخل للحبس بسبب تهمة القتل ديال كمال
حل علي فمو : كمال!
عماد : وايييه ... حيت تحرش باشراق وهي مرتو وكان عيقتلو ... هادا دوسي اخر بوحدو . . . مهم كمال مات حيت لقاوه شم كتر من اقياس من مور ما ضربو طه قدام الناس .. هادشي اللي كان غيدخل طه للحبس
شد علي راسو : لالا هادشي بزاااف ... عليها اشراق كتقول ليا ضحية و مكتقدرش تهضر.... قول هادشي فيه القتيلة !! ... وليلى اشنو بينها وبينو !
عماد : بلان اخر ... كانت طايحة مع طه من مور ماشيتي نتا بشحاااال ... سبع سنين وهما طايحين بجوج فاللخر طاحت مع كمال وسمح فيها طه ... ولاكن قبل كان غيتفارق مع اشراق بسبب ليلى حيت بغا يزيدها مرى ثانية ...اشراق مابغاتش ومشات بحالها ... ولاكن عائلتها قباح ردوها بزز منها .. وقطعات عروق يدها بغات تنتاحر
عاود علي شد راسو بين يديه فوق الطبلة وغمض عينيه كيسمع فهاد الواد ديال الصدمات اللي فاض عليه وعماد تخشع فالحديث يعبر
- فاللخر تراجع طه من زواجو حيت كتاشف باللي ليلى طاحت مع كمال وحملات منو وطيحات فواحد الليلة ... وهنا ليلى حقدات بالجهد مللي ماتزوجش بيها ورجع اشراق حتى ولدات ... وديك الليلة دخلات ليلى خنقاتو ... شدو الفرملية اللي دخلاتها وعترفت وشدو ليلى فالمطار ... من تما واشراق اللور لور ... من تما وهي تبدل ... من مور موت ولدها مرضات نفسيتها ... وكملات الباقي فاش عرفات باللي ليلى قتلاتو ... كلشي مرض اخاي علي ... حتى واحد مكان يجيه النعاس فديك الوقيتة . صافي رجع كلشي زايد ناقص عند اشراق وطلقات من طه . . مرضو وصافي مابقاش داك الجو اللي كان ... مابقاتش حياتهم كما كانت ... طلقها وداتها خليج معاها لقطر ... تما بدا كيبان باللي اشراق فعلا مرضات نفسيتها ومرفوع عليها القلم ... ولكن حسب ماقالت ليا خليج ... باللي كانت كتصلي بزاف بالليل والنهار . وفاش ولدات خليج وسمات ولدها على سميت البيبي اللي مات ... عاد رجعات اشراق شوية ورباتو معاها وتقاسموه بيناتهم وبدات تحل شوية عينيها ... ساعا خليج متفاهماتش هي وهاداك وهزات ولدها وجاو بحالهم بداو داك المشروع اللي هما فيه ... ولاكن اشراق فاش رجعات كان طه صافي تزوج وحدة اخرى .. والصيبة حضرات ليه اشراق وكبتوها وخرجات حلفات ماتعاود دور جيهتو ... طه صافي مابقاش باغي يرجع ... كرهها فيه باش تنساه وكمل حياتو
بعد ما سالا عماد هز علي راسو وحل عينيه شرب الماء كيسوط
- فيلم هادا ولاهيلا فيلم .... هادشي كاامل واقع ! (صغر عينيه) واش بصح هادشي ولا طالقها عليا!
قال عماد على نيتو :: واش انا بنت ليك سيناريست اصاحبي نألف ليك كاع هاد القصة فقسم !!! معلوم هادشي وقع وحضرت ليه
حط يدو على كرشو كيسوط : تشنجات ليا المعدة اصاحبي
وقفات الطاكسي وسط الفيلات ونزلات اشراق بغضب كتقلب وتسول حتى لقات الفيلا ديالو ومشات كتصوني وتبرك بقوة حتى حلات ليها خادمة الباب مخلوعة
قال تحت سنانو بغضب: مترضيتيش يعرفوك مزوجة ومطلقة ولا مارضيتيش علي يعرفك كنتي معايا؟؟؟ قولي ليه الحقيقة علاش مخبية عليه ؟ حفتي تخسريه ؟؟ خفتي يخليك ؟ جاااوبي
ردت بغضب والدموع كتشرش : ماشي سوقك واش كتفهم ... ماشي سوقك ماشي من حقك تقرر بلاصتي ماشي منحقك تجبد اسراري لشي واحد ... واش مابغيتيش تفهم ... واش اي واحد عرفتو غتمشي تعاود ليه عليا !!!!! بعد مني خليني نختار ونقرر فحياتي ماشي من حقك توجه ليا حياتي كي بغيتي نتا .... ياك تزوجتي !!! واش انا مشيت عند مرتك عاودت ليها ؟؟؟ واش انا ضربت ليك الطر مع اللي كتعرف واللي مكتعرفش ..... علاش كتعاود عليا وعلى شي حاجة داااازت وتوسخ صورتي قدام الناس .... وتخليهم يشفقو عليا واش شكيت عليك !!! انا اسيدي مبغيت حتى واحد يعرف عليا شي حاجة ... انااااا مابغيييتش شي واحد يعرف شنو داز عليا بغييييت نبدا صفحة جدييييدة اعبااااد الله مابغيت حتى واحد يعرف داكشي اللي فات واش كتفهم وااااش كتفهم
رد بغيرة: شنو بينك وبين علي ؟ علاش بقا فيك الحال لهاد الدرجة ؟ علاش مابغيتيش يعرف شكون نتي ؟؟
ردت فصدمة وغضب : وماااالي انا كي جيتك !!! كيفاش يعرف شكون انا مالي انا مكنشرفش ولا قاتلة روح ولا كنت خارجة الطريق!!!! مالي انا واش كنبان ليك شي وحدة فاااسدة ولا كيفاش كنبان!!!!
طه : وعلاش شعلتي هاكا !!! علاش بالضبط علي ماشي شي واحد اخر ؟ واش باغا ضربيني بصاحبي !
ندبات وجهها الحمر : اويييلي يا سيدي ربي . (غمضات عينيها مطولا ) شوف ... انا غادي نفهمك باش ماتبقاش هاكا دايخ طيحساب ليك كندور بيك .... انا وعلي حالة خاااصة
ربع يديه بسخرية: اممم حالة خاصة ! مثلا!
اشراق: واخا تموووت متعرفش هاد مثلا سمعتي ... ونزيدك ... مكندور بيك مكنقلب عليك مكنسول عليك ... وغادي تفوتني عليك وتفوت عليك علي حتى هوا ولا مغيعجبك حال ... خلينا فالتيقار اطه حسن ليك متجبدنيش وديها فمرتك ماسوقك لا فيا ولا فعلي ..
رد ببرودة: وشنو غاديري ؟؟؟؟ كتهددني !!!دابا رجعت انا الطرف الشرير فهادشي ونتي الاميرة وهوا الامير !! خايفة عليه ولا شنو؟
خرجات فيه عينيها: وا فووتني .... بعد مني مرضتيني فحياتي وكرهتيني فيها ... ولا غادي نمشي عند مرتك ونجبد ليك حتى نتا الصدع سمعتي
جمعات فمها وخرجات كتنفخ وهوا كيضحك بسخرية ويردد
- غتمشي عند مرتي وتجبدي ليا الصدع ! ههه
مارداتش عليه وخرجات كتنتر من الفيلا
تسلمون يدين فوق الطبلة وقال عماد بابتسامة
- طريق السلامة ا علي ... مطولش الغيبة هاد المرة خلينا نشوفوك
ابتسم علي وقال : دير لينا شي عرس نلقاو بيه السبة
رد عماد : نشاء الله يا ربي ...(تم العناق) تهلا ليا فراسك ... وسلم ليا على استريلا ... واقيلا غدا غتمشيو ياك
علي : غادي نمشي لكازا نقرب من المطار ... نباتو تما واحد الليلة حيت الطيارة عندي مع 4 دالصباح
تم الوداع وكل واحد مشا فطريقو دايها فشغلو ... كل واحد فدراو وشنو كيدير والوقت كيجري بسرعة فائقة حتى صبح الحال وكالعادة .. النادي والعمل وجري عليا نجري عليك ... وصل علي بنتو لاصال عند اشراق بابتسامة اللي استقبلاتها بالاحضان وعلي كيشوف فيهم ويضحك
علي: ها هيا معاك حتى ندوز عليها فلعشية
اشراق: كون هاني ... ماعندك مناش تخاف عليها
علي : عارف عارف ... مهم تهلاي فراسك ... استي ... هانا مشيت حتى نرجع عندك
حركات ليه استريلا راسها ودخلت مع اشراق داتها لابيسين وعطاتها لباس السباحة ونزلاتها للماء كتلعب نص نهار ديال الصباح كامل ... رحبات بيها وحطات ليها فواكه مشكلة مشكلة وعواصر وعطاتها تغدات ... كانت استريلا بنية متبتة ومربية وغير متلهفة هادشي اللي كيزعم علي يخليها فالنادي مع اشراق ويمشي مطمن عليها لأنه عارفها لطيفة و متبتة مافيها بسالة لا مشاكل .
من بعد السباحة جلسات استريلا على رولاكس ملوية فالفوطة وشعرها فازك مطلوق ومعاها اشراق فوق الرولاكس اللي حداها دايرة رجل على رجل بلباسها المحترم وحجابها كتجمع مع استريلا وبيناتهم الطبلة عامرة بالاكل
بقات خليج كضحك وقالت : الله اودي لاللى استريلا كلها بغات الفقاص ونقولو ليها لا
اشراق: كولي لاسلاد ديالك باش نطلعو نصايبو الفقاص دغيا
اشراق : كتعجبني يا ختي كتعجبني بزاااف ... ولف ليها الخاطر وخلاها تبغيه وتحتارمو ماشي تخاف منو وهادي اهم حاجة ... خاصك طبقيها مع بيازيد ونقصي مع العصبية ديالك ... صاحبيه و خليه يبغيك وتفاهمي معاه بشوية والله حتى يولف داك الطبع ... راه ديفو منا حنا ... حنا مكنعرفوش نتعاملو مع الدراري الصغار ... كما كنحتارمو لكبير محتارمو الصغير باش يعرف معنى الاحترام حتى هوا ماشي نشرحوه ليه بالقمومة
اشراق: ديال الدار حسن ... زايدون ماشي شي حاجة شوية ديال الفقاص
بقا علي ساكت وشاف فاستريلا سكتات كأنها دارت خطأ وقال بالايجاب
- ماعليش ... ماشي مشكل بغيتي ديال اشراق وخليج
استريلا : الصمت
قلبها ضحك : وا يلاه هزي الفقاص ديالك غتخليه
هزاتو فصمت جاها تقيل وهزو عليها وناضو توادعو معاهم ... عنقوها وحتى هي عنقاتهم فصمت بابتسامة مسطنعة .. شكرهم بزاف على اللي دارو معاه وقال وهوا نازل وهما نازلين معاه
- غنوصل نعيط ليك بنمرتي ديال تما
اشراق: نشاء الله ... طريق السلامة (دارت باي باي) استريلا ... بسلامة عليك
ابتسمت بزز وخرجات شادة لعلي فيدو وهوا هاز العلب حتى قربو جهة الطموبيل وتلفت لقاها دايرة يدها على عينيها كتبكي فصمت وترعد بوحدها
تزيرات بالبكا ودورات وجهها كتنخصص وهوا يحط الحلوى بسرعة وتحنا عندها مصدوم شد ليها فكتافها بتساؤل
- علاش كتبكي شنو وقع ؟؟؟ واش مابغيتيش تمشي لكندا؟
هزات كتفها ودورات وجهها كتشهق وهوا كيشوف فيها بأسى باغي يعنقها لاكن كترفضو وقال بندم
- واش على الفقاص؟ حيت قلت ليك علاش طلبتيه منهم
تقلبات كتشهق عطاتو بالضهر وبدا يسوط فهم ان سبب بكائها على الفقاص وهوا يجرها عنقها وبدا يمسح ليها وجهها ويشرح ليها بلطف
خليج: اويييلي ملي قلت ليها لقيت ليك واحد الطموبيل صغيرة طلقي فيها يديك شحال فرحاااات ... من غدا تركب وتمشي حدا القهوى فين جالس بابا ودوز واخا تعرف سوق تريبورتور مهم تسوق ... كما كانت الطموبيل راه غتعجبها
رجع الروتين فحياة اشراق من جديد ... اللي كديرو ليوم ديرو غدا وحتى جديد مكاين ... حياتها مقسمة بين دار ولاصال فقط ... ودخلات حتى مها فالخط رجع من الضروري تخرج معاها فديك طوينيييلة اللي شراو ليها وطلق فيها يديها .. مرة دور وتقشرها مع الحيوط .. مرة طلع بيها فوق طروطوار ... مرة ترجع بيها باللور فلحدورة وتسكت ... اشراق شبعات ققايص مع لاللة نزيهة وكل مرة يسكت ليها القلب ويرجع يدق بالخلعة ... اما لاللة نزيهة عندها كلشي زوين حيت كل زبلة دارتها كتخلص عليها اشراق لخطية وتزيد المهم تعلم . فعشية من لعشيات جالسة هي والحاجة وبيازيد كيتعشاو على برا ولخرشاشة حدا المطعم فين جالسين .. صونا لاشراق تيليفون من رقم اروربي وابتسمت وفتحت الخط
- الو علي !!!!
هزات لاللة نزيهة حاجبها ووقفات المضيغ كطلع فيها وتهبط وهي كتهضر
- الحمد لله على سلامتكم .. كي وصلتو ؟ وكي وصلات استريلا ... كلشي مزيان .... الحمد لله ... ها حنا كما خليتينا ههه ... عندكم شي برد ولا شي صهد ههه .... الجو دافي ! بصااح! ... ايوا مزيااان ... تهلا فاستريلا وسلم عليها .... اه اه ضاروري غادي نهضرو صافي غادي نقيد نمرتك .... شنو عندك ؟ ايمو؟؟؟ صافي انا دابا غندخلو دابا ...: ندخلو ... بوسها ليا بزااااف بزاااف
طه : وا خليني نهضر ... نتي كتحاسبيني و مابغيتيش تعيطيني فرصة نهضر
اشراق: غنسكت (حطات يدها على فمها) هضر نتا
بقا ساكت كيشوف فيها بأسى ورجع قال
- انا من ديما متشبت بيك ... من الاول واخا المشاكيل كنت متشبت بيك ونتي عارفة هادشي ... حتى ... حتى وقع اللي وقع .. قدر الله ومشاء فعل .. وصلنا لطريق مسدود وعطيتك حقك اللي طلبتي ... نتي اللي طلبتي الفراق وقررتي تمشي ... وخليتني من موراك فقدت الامل ترجعي ... حيت اللي وقع ماشي ساهل علينا بجوج ... تخيلي شحال ونتي بعيدة ... عرفت راسي انا وياك لا رجوع فيها
اشراق: وعلاش ما سولتيش فيا ؟ ماجاكش الفضول تعرف علاش انا غبرت ديك الغبرة وشنو كانت ضروفي!... ماقدرتيش تسول فيا ولا يهزك راسك يجيبك عندي لقطر تقلب عليا .. تبين ليا باللي ماقدرتيش تبقا بوحدك بلا بيا ! علاش مالها صعيبة عليك تجي لقطر ! ولا راك مخصوص !
رد بأسى : قلت ليك فقدت الامل
اشراق: ودابا رجع الامل سبحان الله ولا شنو؟ انا ماقدرتش نفهمك ... ولا بلاتي نقول ليك ونوضح ليك داكشي اللي نتا مكتشوفوش فيك . نتا وتفكيرك مفاهمين ... كتقول اللي درتها جات معايا ومستهتر وكتستهزأ بالامور وكتبغي تنتاقم واخا غتقول ليا لا مكنبغيش نتاقم .. ولاكن ااه .. كتبغي تنتاقم ... احساسك كيبغي يرد الضربة وهادشي فهمتو ... انا حليت عيني اطه مزياااان ونتا مزال ماحليتيهم باش تفهم راسك ... نتا انسان منتقم بامتياز حتى من الناس اللي كتبغي و واخا تعيا تقلب على تفسير اخر لهادشي اللي درتي مغتلقاهش حيت انسان منتقم .. ومكتفكرش باللي راك كتنتاقم حتى من راسك ... هم الوحيد ترد الصاح وتندم الناس اللي دارو ليك شي حاجة ... وانا دابا غادي نوضح ليك ونحل ليك عينيك باش تفهم حيت مامستوعبش بانتقاماتك . اولهم ديك اللي كنكره نجبد سميتها ولاكن غادي نجبدها دابا ... شحال من مرة سممتيها بهضرتك باش تمرضها ... وضربتيها بيا فاش عرفتيها خانتك ياك ... ههه كولشي كيتفضح اطه والى شفتي بنادم ساكت .. راه ساكت باش الحياة تستمر .. ولاكن نتا خربتي كلشي بيديك ... شحال من مرة شفت فعينيك الصرف ليها فاش كانت كتجي عندكم للفيلا ... ونتا علاش ما منعتيهاش ماتجيتش ياك تزوجتي بيا !!! ونتا عارف بيلا كن منعتي ختك وهضرتي معاها فالاول مكانتش تقدر تجيبها .. ولاكن بلعكس .. سكتي وميكتي باش تمرضها فحياتها وخليتيها تشوفك ونتا مزوج بيا و سمحتي فيها ... هاكا فكرتي و مارديتيش لبال لتفكيرك وتخطيطاتك ... كتخطط ونتا ماحاسش براسك وبتخطيطات ديالك . وانا ! نتاقمتي مني بزواجك حيت مشيت وخليتك ... بغيت تبين ليا ولا بغيتي تبين راسك باللي نتا واااعر .. قوي ... ونفسك فوق نيفك ... وكملتيها بالدل اللي دليتني نهار عرسك ... باش تحطمني ودمرني ... هادشي فنضرك ماشي انتقام ! لعب الدراري الصغار! ... هادشي اطه نتقاااام ... ونتقمتي مني ومابغايش دخل هادشي راسك حيت عقلك كيضحك عليك كيبين ليك قوتك وصلابتك وصمودك وكتحدا الاحداث بما كفس .. هادشي براكة حيت مافيا اللي يبقا يتفكر شنو وقع .. هادشي شوية من بزاف
رد بهدوء: حتى حاجة من هادشي مكاينة
ردت بتهكم : كاااين ... ومكترضاش يجي شي واحد يفيقك بعيوبك ... نتا درتي كاع داكشي اللي بغيتي وكنتي اي حاجة خططتي ليها كطبقها وكلشي كيردخ ليك للأوامر ديالك ... والله يخليك .. الله يخليك متقارنش وضعك بوضعي حيت بزاااااااف عليك باش توصل للنيفو للي وصلت ليه انا فالانكسار .... لدرجة مرضت .... جبت لراسي مرض باين وواضح بسبب الانكسار ... بسبب شنو داز عليا ... نتا واش تمنيتي الموت ؟ نتا واش فقدتي عقلك مثلا ! ... ممكن تكون مرضتي وعانيتي .. لاكن نضتي باش تبدا من جديد حيت عندك قدرة ... ولاكن اللي بصح كيكون مريض وكيعاني مكتكونش عندو ابدا قدرة ينوض .. ويمشي للخدمة ... ويهضر مع الناس ... ويبدا من جديد ... انا جرحي كبر من هاد 4 سنين اللي دازت ... انا جرحي خاصو عمري كامل باش يبرا ... حيت جرحي غارف ... غارف مامكفياهش 4 سنين سمعتي
انا جرحي اعمق من انني نضحك ... ونشوف النور ... بقا غير نشوف وجهه جديد ونضحك ليه ونبدا معاه علاقة ... ونتزوج بيه ونتشارك معته الفراش ... عرفتي الفرق بيني وبينك ... هوا انا نشفت ... نشفات ليا الغريزة بسبب الجرح ... ولاكن نتا لا ... لغريزة سيطرات على الجرح وكنحييك ... وكنحسدك حيت على الاقل كتنسا العالم فواحد الثانية ومكتبقاش عاقل على حتى واحد ... عكسي انا اللي كنتممى نفقد الذاكرة باش نقدر نكمل حياتي .
بقا مهبط راسو كيشوف فيديه وهي كتهضر بدون حرج .. بدون خجل .. تصدم فكلامها والمنحو اللي مشات عليه والنقط اللي جبدات ليه .. بقا ساكت وهي كترعد قدامو ويديها كيقفقفو وكتهز كل شوية بتبوريشة كأنها فيها السخانة ..
هز عينيه: انا ممرتاحش اشراق ... مقادرش مرتاح
ردت بسخرية : راك كتشوف الراحة باللي فاش كتكون مع مراتك . بقا طول معاها المدة كثر هاكا تلاقي راحة مع راحة وطول مدة الراحة عندك ... شوف اطه ... انا راه نقزت 20 عام من حياتي فهاد ربع سنين ... يعني مشاعري بحال مشاعر راجل شيباني دا وجاب فالزمان ... وباش تفسر ليا شي حاجة اخرى مكاين لاش ... حيت كان قدامك الوقت باش تقلب عليا ... تقلب على وحدة حمقة مسكينة مرفوع عليها القلم معارفاش شكون جالس حداها ... ونتا اللي عارف وفاهم بقا حداها وفين ما مشات بقا معاها .. حيت نتا عارف شكون هي بالنسبة ليك واخا هي ماعارفاكش ... هادشي اللي كنعرف انا .. ماشي دير راسك فيا وتزيدها بانتقام من لفوق .. بحال الى كتنتاقم من واحد حمق ما مستوعبش اشنو كيوقع ! كنتي تبقا بجنبي ... حتى نتجاوز ديك المحنة اللي واخا نعيااااا نوصفها ليك مغاديش تفهمها ولا عمرك غادي تفهمها
دورات راسها كضحك: جاي دابا تقول ليا ما مرتاحش ! ...راه فعلا مخاصكش ترتاح ... علاش شكون نتا اللي ترتاح على ضهر تعاستنا حنا كاملين ... شكون نتا اللي جاي بغيتينا نريحوك ! ونسهرو على راحتك ! مافكرتيش فراحتي انا ؟ فرتحتك مرتك اللي مزوج بيها دابا قدام الله ! كتفكر غير فراحتك فعوض ما تسهر على راحة غيرك وعلى راحة الناس اللي كتبغي ... ولا نتا كطبق مقولة . انا وبعدي الطوفان!
رد باسى : مكنفكرش هاكا بلعكس ..
ردت بغضب مقاطعاه : بلعكس شنوو؟؟ شنو دنبي انا اللي سمعت داك السم نهار عرسك ونتا حدا عروستك محسسها باللي هي اميرة الكون ! شنو دنبي انا اللي قلتي ليا الله يجيب ليك ولد الناس ... وكنتمنى منعاودش نشوفك ! ... ياك جيت من قطر ... وعرفتك غتزوج .. ومفكرتش ولا درت خطوة وحدة باش نخرب ليك حياتك ... بقيت بعيدة عليك كل البعد ... ونتوما اللي تحاكيتو معايا ماشي انا ... بقا فيا الحال بزااااف ومتصورش شحال بكيت (غرغرو عينيها ) ماتصورش باش حسيت فاش عرفتك تزوجتي ... هنا عرفت باللي مالياش من غير نفسي ... نبغي نفسي ونبكي على نفسي حيت حنا ما مخيطينش مع بعضياتنا باش نبقاو متشبتين ببعضياتنا ... كل واحد كيفكر فراسو . (سكتات لمهلة وقالت) شنو بغيتي مني دابا
ردت بصرامة: هادا حكم الله اطه ... نعم علينا بالزواج ... والحلال حيت فيه يجوز ليك تاخد مني اللي بغيتي . ولاكن بعد الطلاق السي طه ... غادي تجمع يدك عندك ... حيت ماعندكش حق فيا نهائيا ... ومحرمة عليك بحالك بحال غيرك . نتا دابا بحالك بحال كاع الرجال ... ماشي مميز و يحق ليك تقيسني فهمتي . وغادي نقول ليك واحد الحاجة ... انا مغاديش نبني سعادتي على تعاسة وحدة اخرى ... ومغاديش ندخل بين جوج مزوجين كي الشيطان ونخرب حياتهم وزواجهم المقدس باش انا نتربع عليه ... ونحطم مرة اخرى ونتبادل انا وياها المشاعر ... حيت هادشي باش كنحس منبغيه لحتى وحدة اخرى ... بقا غير ناخد سعادتها ونعطيها احزاني!
تنهد وقال : مانحملينيش المسؤولية كاملة ... واخا هادشي كامل كتبغيني ... وحيت كتبغيني ماعقلتيش على ليلى وقبلتي تزوجي بيا ... حتى انا مكنفكر فحتى واحد دابا من غير سعادتي انا وياك
ضحكات بسخرية وقال: واش بعقلك ! واش واعي لشنو كتقول !!!(بصرامة) انا هنا كنهضر على شرع الله سمعتي ولا نشرح ليك باخوشيبات ! ... كنهضر على شرع الله وخراب البيوت اللي مكيبغيهش الله ... و كيخرج فمولاه طال الزمان ولا قصار ونتا باغي تعاود نفس الغلط باش هاد المرة مغاديش يخرج فيك قليل .. اللي هوا قليل بالنسبة ليك تجاوزتيه بزز ... ولاكن غادي يخرج فيك شي عجب كبر .... ليلى اسيدي ماشي هي مرتك .... نتا جيتي من الباب خطبتيني .. علاااااااااا سنة الله ورسوله .... وقبلت ... علاااااااا (هزات صبعها) سنة الله ورسوله .... ودخلت معاك فلحلال ماخربتش بيت وحدة اخرى .... وماشغليش فيها وفعلاقتك الحرمة نتا وياه .... جيتيني اولد الناس من لحلال ... قبلت بيك فلحلال ... كن كنتي مزوج بيها ! ايييه عندك الحق تحاسبني دابا ... اما علاقتك بيها الغير شرعية ماراضيش عليها الله ! كفاش بغيتيني نقدرها ونعطيها قييييمة ونكبر ليها الشان وربي ساخط على داكشي! كفاش بغيتيني نحتارم ونوقر علاقة محرمة واخا دوز عليها حتى ستين عام ! بلعكس راه ليا الاجر وقفتها حيت حراااام ابنادم حراااام .. ومن رأى منكرا فل يغيره ! ماشي نرفض حلالي باش نخلي حرامها يدوم! .... وهاد المقارنة اللي كديري بيني وبينها منسمحش ليك بيها ... انا مكنآدي حد ... مكنخرب بيوت حد ... نتا دفعتي تمن اخطائك ودفعتهم معاك واخا مدرتش فيهم يدي... ولاكن دابا ! الوضع تبدل ... ومنبغيش وحدة تبات دعي عليا الليل كامل حيت خربت ليها بيتها ... منقبلش اسيدي سمح ليا ... التوضاع كتختالف وانا وحدة كتخاف اللي خلقها وكفاني عداب الدنيا مابالك عداب الاخرة ! براكة الدنوب اللي كنجمع دابا معاك وكنجمعهم يوميا بلا منحسو ... عادي نجيو للكبائر ونبدعو فيهم باش تسلاط علينا شي دعوة ماليها حل . نتا مشيتي فواحد الطريق ... كمل فيها ... راه بنات الناس ماشي لعبة وفأران تجارب عندكم ... تجربو فيهم مشاعركم واللي ماصدقاتش ترميوها . مخلي مرتك فالدار وجاي مجمع معايا انا !
رد بسرعة : انا و نهاد غنطلقو اشراق ... بجوج راضيين على الطلاق ومفاهمين عليه
ردت بسخرية : نتا دخلتي لصدرها باش تعرفها واش راضية ! ولا نتا شفتيها رضات بيه قلتي صافي الله على راحة نعس على جنب الراحة ! واش كاينة شي مرى كترضا طلق من بعد ما استقرت ! (بالنفي) مكنضنش اسي طه ... مكنضنش واش كاينة شي مرى كطلق بسهولة ... من غير ماتحطم مشاعرها... هادشي عمركم تفهموه ... حيت نتوما رجال .. وحنا نساء ... نتوما يجوز ليكم كل شيء ... والمجتمع كيركع ليكم ... اما حنا ! المجتمع كيدوس علينا ... هادا علاش عمركم تفهمونا ... حيت عمركم مغتكونو نسا
تنهد كيشوف فيها وقال : غادي يجي واحد النهار وتعرفي باللي ماشي نتي السبب فطلاقي من نهاد
تنهدات ساهية وقالت بتعب: يمكن ربي ممكتبش لينا نكملو بجوج ... ودار لينا اسباب ... ولا يمكن بغانا نكملو بجوج ودوزنا بهاد المراحل باش نعرفو بقيمة بعضياتنا ... ما ماعرفتش ... ولاكن غادي نوكل امري لله ... هوا اللي يسير اموري
ابتسم وقال: اشراق... انا ماقدرتش نساك ... الى نتي مرضتي .. حتى انا مرضت ... ومزال مريض ... حيت اللي مات راه ولدي من صلبي ماشي لقيتو فالزنقة
غرغرو عينيها من بعد ما جبد ليها ولدها وهبطات وجهها كتبكي وهوا كيشوف فيها بأسى
- نتي حزنتي عليه ... ولاكن انا حزني كبر من حزنك .. حيت كنحمل نفسي المسؤولية ... وعمرني نسامح نفسي وضميري كيعدبني ... نتي ضميرك مرتاح ... ولاكن انا راه كنصبر راسي وصافي ... ماعرفتش فين غنعطي بالراس .... مرضت .. دخت .. لدرجة فقدت السيطرة مابقيتش كنعرف راسي شنو كندير ... وكنضلم معايا وحدين اخرين وكنزوق الدنيا باش تبان ليا مستمرة . . . ولاكن فالحقيقة ... راه مقدرتش نبدل الفصل .... باقي فنفس الفصل
تنهدات بعمق ساكتة وقلبها عامر وهي كتشزف فيه بحنين وتهبط عينيها .. بعد صمت طويل قالت مترددة
- كما قلت ليك ... منقدرش ندمر حياة مرى اخرى ... ولاكن غنتسنا قدر الله
هبطات راسها وقالت: ماعرفتش اطه ... انا فواحد الوضع مواضحش باش نعرف نجاوبك
بقا ساكت مطولا وقال : اشراق .... باقا كتبغيني؟
دورات وجهها كترمش فصمت وتمتم
- ا.. انا ... انا .. قلت ليك دابا شنو كاين ... الوضع مواضحش ... ماعندي باش نجاوبك دابا
سها فيها وقال : كن مكنتيش كتبغيني مغاديش تجلسي معايا دابا
تنهدات وقالت: انا مكنبغيك مكنكرهك ... ما حاسة بوجودك ما حاسة بغيابك ... انا ما عندي جواب احتى سؤال دابا ... حتى نشوفو ميدير الله
غمض عينيه وتكا راسو بارتياح وهي كنشوف فالجنب ساهيا والناس كتمشي وتجي برا .. ناس كتخرج من ديروها وناس سالات شغلها برا ودخلات لبيوتها بحال خليج اللي استقرت فالدار كتلاعب ولدها .. دخلات اشراق بملامح غريبة وتتاقل للدار وردات الباب موراها بهدوء .. شتغت فيهم بتتاقل ومشات نيشان للحمام توضات وقبلات راسها كتصلي صلاة الاستخارة ... ما صلاة وحدة ما جوج ... دوزات وقتها كامل فصلاة الاستخارة حتى عيات وتقال راسها ومشات نعسات .
وبحاال كل صباح صبحات فلاصال مشغولة .. وعلى غفلة خرجات لقات طه كيتسناها فالباب وهي تفاجأ ومشات عندو مستغربة قائلة
- فوقاش جيتي؟
رد بابتسامة : قبيلا شوية
ردت بالايجاب : علاش مدخلتيش؟
رد بابتسامة: ماشي مشكل ... بغيت غير نقول ليك ... ليوم رفعت الدعوة ديال الطلاق ... ودغيا غيتم الطلاق كوني هانيا من الجلسة الاولى حيت بجوج متافقين عليه
ردت بتشكيك: واش متأكد ...واش هي اللي طلبات الطلاق؟
رد تأكيد: اه هي طلباتو قبل ما ما نتلاقا بيك ... حنا بيناتنا مشاكيل من غيييرك نتي ... حنا علاقتنا مصافياش
بتشكيك: واش .. نتوما علاقتكم مصافياش ولا نتا اللي علاقتك مصافياش ... كاين فرق ... كاين فرق بين مامرتاحش و مامرتاحينش
طه: تنهد) شوفي ... انا ماجبدتش الطلاق لنهاد ... هي كرهات العيشة معايا حيت كما قلت ليك ما مفتهمينش .. يعني بوجودك نتي ولا بلا وجودك حنا عنطلقو ... ونتي ماعندك حتى دخل
بقات ساكتة كترمش وهبطات راسها وخوا يقول بابتسامة
- اخيرا غادي نتجمعو ... غادي نبداو صفحة جديدة
دورات وجهها بغات ضحك .. بانت السعادة على محياها وهي تخبيه بيدها .. ضحك كيشوف فيها بسعادة وقال
- يالاه نمشيو نتغداو بجوج ؟
بقات ساكتة كتشوف بحجل وقالت : فين ؟
رد بسعادة: فين ما بغيتي
حل ليها الباب وبقات كتشوف فيها مترددة لاكن الشوق والحنين تغلب وطلعات جلسات حداه .. فور ما شمات ريحة سيارتو اللي كانت كتشم وهي مرتو ابتهج قلبها وتحل ومشاو الجروح وسطع النور اخيرا وحسات بالراحة اللي فقدات هادي سنين
دورات وجهها للزاج براتياح كضحك من عينيها بدون سبب وهوا كذلك حتى لمطعم قريب ونزلو جلسو فطاولة بجوج ... تسدات لاشراق الشهية وتكهمات بكمية السعادة اللي غمرات قلبها فلحضة وماقدراتش تغدا لا هي ولا هوا واكتافاو بسلطة كينقبو منها .. يكفي انهم جالسين بجوج هادا فحد داتو غداء ليهم ولروحهم بجوج . ماهضرو ما تكلمو كتفاو بوجود بعضياتهم والقرب من بعض .. واخا كان الوقت قليل لاكن تغداو منو مايكفي لشفاء الجروح ورجعو بحالهم فلعشية .
حطات راسها على لمخدة بحوايجها وعنقاتها مغمضة عينيها كتكمشها عندها وتلدد بطعم السعادة اللي كيغمر قلبها حتى قاطع احاسيسها تيليفون ولقات اتصال من عند علي على موقع تيندر بالكاميرة وناضت جلسات فرحانة كضحك فتحات الخط واستقبلاتو ببهجة وهوا قدامها كيضحك بلباس البيت وموراه طابلو ازرق فالحيط معلق
قالت كضحك بكل سعادة وسرور وحناكها حومر
- هااااي
رد كيضحك مستغرب: فين غبرتي ؟ .. بنتي ليا ناشطة مع راسك
دور ليها الكاميرة وهي تبان ليها واقفة بالبيجامة طالقة الشعر قدام المرايا فالقنت وكتقيس الطول ديالو مع مؤخرتها والمشطة فيدها وعرام ديال المقابط مشتتين حداها فالارض وكتحنى عند الزيت دهن وتعاود وتقيس واش تزاد وعلي كيضحك واشراق حتى هي .. رد الكامرة جهتو وقال
- هاكا حالها مسكينة من نهار رجعات هههه...
دارت اشراق يدها على فمها كتموت بالضحك وقالت
- ويييلي هههه مسكينة بغات شعرها يطوال
علي: ديك القرعة حاطاها حداها صباح وعشية كل مرة تمشي دهن منها ... كتربع فداك القنت وتبقا مقابلة داك الشعر كدهن ليه وكل مرة تجي تسولني واش طوال (حرك راسو) كنقول ليها ااايييه طوال طواال ... ولاهيلا الى داكشي اللي مقابلة
رد بالنفي: حتى تبغي على خاطرها ... دابا هاداك هوا شغلها .. مشط ، حل ، سد ، مشط ، حل ، سد .. من نهار جينا
اشراق: البنت هي هادي .. عزيز عليها تهلا فراسها
حرك راسو بابتسامة حفيغة بمعنى عارف داكشي اللي كتقصد اشراق وبدا يسولها على الخدمة واحوالها وهي كتجاوبو بسعادة . لاحظ الفرق والفرحة فعينيها وكفاش كتهضر والسعادة الغارمة وقال بنفس الوجه البشوش باش كتهضر معاه
- اجي تنعسي براكة عليك من المرايا فهاد الليل حتى للصباح ... يالاه طفي داك الضوء واجي ابابا تنعسي الله يرضي عليك
اشراق: واقيلا نخليكم تنعسو ..
رد بارتياح : لااالا خودي راحتك
رن ليها تيليفون وهما يبرقو عينيها وقالت
- علي ... غنقطع شي حد كيصوني حتى نعاود نعيط ليك
ثال بابتسامة : اوك تصبحي على خير
فتحات الخط مع طه ودارت التيليفون فودنها بابتسامة
- ويي ... اممم ... غنعس دابا ..... لا منقدرش نتلاقا بيك غدا ... مشغولة ... من الاحسن خلي حتى تصفي حساباتك على خير و ديك الساعة الى بغيتي نتلاقاو ماشي مشكل ..... لالا هههه ... ومضغطش عليااا.... خليك حتى تسالي ال...
دخلتت عليها خليج على غفلة لقاتها كتهضر بديك الطريقة وعبسات في حين اشراق قطعات بسرعة
خليج: معامن كتهضري؟؟؟
اشراق: والو غير مع واحد البنت
هزات خليج حاجبها : واحد البنت ! من امتى وليتي ديري الصحابات بالسلامة مافخباري والو
ردت بميوعة : وانا كنسولك على عماد ولا على غيرو ولا كندخل ليك فحياتك
دورات راسها : علي! .... وفين عمرك خبيتي علي عليا ؟ كن بصح كان هوا غتجيني من الللول باا هاد دخول ولخروج فاهضرة
اشراق: اوووف وراه علي هانتي شوفي
وراتها المكالمة اللي دازت بيناتهم بسرعة وحطات تيلي
خليج : وا مااانعرف !
ناضت كتسوط بدلات حوايجها ومشات تنعس
خليج : مغتعشايش ؟
اشراق: تعشيييت
خليج: فين تعشيتي؟
اشراق: فالنادي
خليج: فالنادييي... ايوا بالصحة
بقات كتشوف فيها بتشكيك وخرجات خلاتها نعسات معنقة المخدة كتحلم
تبدلات الحياة فعينين اشراق رجعات كضحك مع اي واحد .. حتى فالخدمة مابقاتش كتزعف وتغوت ... كل حاجة كتعطيها مبررات .. وحتى لابيسين اللي عمرها عامت فيه من نهار داروه .. حيدات فيه حوايجها وطلقات شعرها الاشقر الطويل .. ونزلات للماء كنلعب بيديها بارتياح ... تسرحات فوق سطح الماء بابتسامة كتشوف فالسقف ودوز يديها بسعادة على الماء ... بحال الحوتة اللي عاد تولدات ... كتسرح فالماء وتطلع راسها بسعادة ... حتى الشهية تحلات ليها ورجعات للماكلة كأنها عمرها كلات ... تشهى هادي وتشها هادي ..لدرجة الكل تصدم فيها وفالتغيير اللي وقع ... اما خليج فكان ليها رأي ااخر فهاد التغير .. وعقلها سافر بعيد فات الجبال والصحراء وقطع البحور .. الشهية اللي تحلات لاشراق بهاد التغيير الجدري دخل الشك لخليج ومابقاتش مرتاحة .. وغير كطل عليها من بعيد وهي فالمطعم حداها كاس ديال العصير والطبلة عامرة ... بقات حاضياها وهي كتغدا وتبنن بارتياح وقررات تفركع هاد الرمانة وقصداتها نيشان جلسات قدامها فالطبلة كتشوف فيها وحجبانها معقودين واشراف كتشوف فيها بسعادة
- مالكي ههه! طلقي التغوبيشة راه حتى حاجة ماتستاهل
ردت خليج هازة حاجبها بجدية : غنسولك وجاوبيني بصراحة ... فاش سافرتي مع علي .... قرب ليك ولالا؟
خليج: هادشي اللي تبدل بين ليلة ونهار راه مكيعجبش ! هاد الايام اللخرة كتصرفي فشكل ... ماشي اشراق اللي كنعرف
اشراق: وشنو بغيتي؟ بغيتي نبكي باش نبان طبيعية ؟ ولفتيتي مغبونة !
خليج: لحمق هوا اللي كيبكي ويضحك بين ليلة ونهار .. ماشي انسان طبيعي بحالك ... (صغرات عينيها ) غادي تمشي معايا للطبيب
ردت اشراق باستغراب: علاش! واش مالكي حمقة !
خليج : غتمشي معايا للطبيب هي غتمشي معايا نحيد الشك اللي فراسي
ردت اشراق بنرفزة : فييين غنمشي اوييلي !!!
خليج: شوفي ... انا الى محيدتش الشك غادي نحماق ... نتي بنتي ليا فشكل ماشي هي هاديك
حطات اشراق الفرشيطة وناضت بنرفزة
- سديتي ليا الشهية .
ناضت من الطبلة هبطات وخلات خليج كدور فعينيها ودورها فدماغها بوحدها وهزات فرشيطة غرساتها فمطيشة بقوة وخشاتها فممها بغضب .
رن ليها تيليفون وهي نازلة مع الدروج وردت باسعادة
- وييي.... صافي غدا عندكم الجلسة ؟؟؟.... معاياش ؟ .... 11 ! مزيان ... الله يدير اللي فيها الخير ... انا لقيتني غادية للدار ندي شي سخرة لماما .... لالا من الاحسن بلاش صافي بقا غير غدا وديك الساعة الى بغيتي نتلاقاو نتلاقاو .... غدا نشوفك يالااه هههه .... يالاه باي باي .
قطعات ومشات هزات سيارة دخليج ومشات للدار دخلت التقدية للحاجة وهزات بيازيد بسعادة كتبوس فيه وتعنق وتلعب معاه وهوا كيعيط " ماما .. ماما" ليها وللحاجة ولخليج كلهم مواتو . دخلت خليج فلعشية وناضت اشراق تفاداتها باش مدخلش معاها فشي نقاش اخر .. لاكن خليج بقات حاطة العين عليها وغير حاضياها الشيء اللي ضايق اشراق اكثر .
بدلات حوايجها وجلسات بلاصتها متكية حتى جاها اتصال من كندا وفتحات الكام بابتسامة طلع ليها علي جالس قدامو طبلة فيها الماكلة .. شعرو فازك والفوطة على كتافو لابس تيشورط كحلو والفرشيطة فيدو .. ابتسمت وقالت
- انا مانسيت حتى ورقة سيدي القاضي ... (حلات الصاك ) هادي الشهادة الطبية
خدا القاضي الورقة حلها وحيد النضرات كيتنهد من بعد ماشافها وقال
- كنضن .. خاصك تفاهم مع المدام السي الناجي ... بان ليا مزال مامتافقين على حتى حاجة
رد طه بجدية : حنا مفاهمين على هادشي .. والقانون حافضو وشاربو ماء فين كاين المشكل
مد ليه القاضي الورقة وقال برزانة: عيد النضر فهادشي وتأكدو من الامور ديالكم ... ديك الساعة يمكن ليكم توصلو لشي حل .. حسب التحاليل اللي شفت ... ميمكنش ليا نحسم فالامر فالوقت الحالي ... المدام حامل والطلاق حاليا غير مستحب والطلب مرفوض الى حين توضع المدام مولودها .. رفعت الجلسة
القاضي كيهضر وطه كيشوف فالورقة غير مستوعب وفحالة ذهول وصدمة غير متوقعة
ناضت نهاد من حداه كتقرقب بالصباط رافعة راسها و خلاتو جالس على نفس الوضعية وخرجات دموعها فعينيها تعرضات ليها ختها ومها عنقوها كيتسائلو ... فجأة خرج طه موراها بغضب لقاها وسط عائلتها الصغيرة وداز مكهرب ماهضرش معاها ولا شاف جهتها ومشا مباشرة للباب لاكن تبعاتو وقفاتو وتلفت كيسوط بصرامة
نهاد: بجدية ) سمعني شنو بغين نقول اطه ... الطلاق انا رافعاه ... وفعلا باغا نطلق ومكنتأملش شي حاجة اخرى ولا حياة اخرى معاك ... هادا ماشي سبب باش نلسق فيك ... حيت عارفة شنو كيدزر عندك فراسك دابا ... هادا قدر الله وانا راضية بيه ... سواء كنتي معايا ولا ماشي معايا ...انا راضية بوضعي ... وفرحانة بحملي حيت نور ليا حياتي من جديد .. وكنتسنا فوقاش نشوف ولدي ونحضنو ... وهادشي معاعندو حتى علاقة بيك ولا بزواجنا ... حسبو مكاينش .. وغادي نستأنفو
بقا ساكت كيشوف فيها وينفخ الغضب فالداخل ديالو وقال هاز حاجبو
عماد : بلعقل اصاحبي غير بلعقل... غييير بشوية بلا متهور وتفقد اعصابك وتندم من بعد .... الى كنتي شاك فشي حاجة ماشي هي هاديك وعارف راسك مادرتي والو اه من حقك ديك الساعة تبحت ... ولاكن الى كنتي عارف راسك داير علاش فمعندك علااااش تفقص ودير فراسك هاد الحالة .... راه سخونية الراس كترجع بالبرودة ... شحال من واحد كيخرج كلمة فساعة غضب وكيندم عليها
طه : غي حيرة ) منكدبش عليك .... انا تلفت مابقيت عارف شنو ندير ... مابقيت عارف حتى حاجة وفقدت التقة فخطرة .... فقدتها اخاي عماد مابقيتش كنتيق فحتى وحدة
عماد: نعل الشيطان .. نعل الشيطان وحيد الشك من راسك غادي يخرج عليك .. نهاد بنت الناس محترمة و ..
رد بغضب: تكون كتيغيني كتر من لي كانت ليلى ؟؟؟ واخا تعيا طير متكونش بغاتني بحال ليلى مابقات لا فمظوجة ولا ما ممزوجاش .
تنهد عماد كيشووف فيه بأسى وقال
- طه ... نتا دوزتي ماضي صعيب وخايب ... وكيعدبك فحياتك وشكل ليك عقد كبيرة ... خاصك اولا تفك من الماضي وتصفي خاطرك ... باش تقدر تختار وتحدد مصير حياتك ... مخاصكش دابا تاخد حتى قرار نهائيا ... حتى تكون فكامل قواك العقلية ومرتاح وعارف راسك شنو كدير ... وحتى حاجة مامسيطرة عليك . الى كنتي شاك اخويا ... والشك غيقتلك سير حيدو ودير ليها فحص ... ولاكن نخاف من بعد الفحص ميكون حتى حاجة من هادشي اللي كتقول وديك الساعة غادي ضيف مشكل وعقدة لقائمة العقد والمشاكل اللي عندك ... وفآخر المطاف غتلقا راسك واحد بين العقد اللي عقدتي بيديك ... ساااهل نعقدو العقدة .. ولا كن صعيب نفكوها الى زيرناها بزاف . اما اشراق ... شغادي نقول ليك ... خصك حتى تفك حريرتك عاد بدا حريرتها ... اما الى خلطتي لحريرات بجوج غااادي تحماض ليك القضية
تنهد طه وقال : هادشي يبقا بيناتنا ... حتى خليج مانبغيهاش تعرفو اعماد .
عماد : لا كون هاني ... مغتعرف حتى حاجة
طه : نشاء الله يكون خير ... نشاء الله ميكون غير لخير .
جاه اتصال من عند اشراق فالهاتف وهز راسو كيسوط
- اشراق ...
عماد: بشوية عليك ... تهدن بحال اللي مواقع والو ... بشوية وحيد منك الستريس والعصبية باش تعرف راسك شنو كدير
ساط وفتح الخط بابتسامة : الو اشراق
اشراق : تسنيتك تعيط معيطتيش ... شنو درتي طلقتو؟
بقا ساكت كيشوف فعماد وتنهد بعمق وقال بهدوء
- مزال ..
اشراق: علااااش!!!
بقا ساكت متردد وقال : كاين شي مشاكل اخرى ... تمددات الجلسة
اشراق: اشمن مشاكل ياك نتوما متافقين عليه !
طه: القاضي رفض .. حيت هادشي ديال الاسرة كيطول بزاف ... تعطاتنا جلسة من دابا شهراين
قطع وعماد كيشوف وقال : ضاروري تصارحها نتا بقضية الحمل... ويااك تخبيها غادي تزيد غير تكفسها . مزر تحاليل عاود ليها كلشي واخا يخرجو كما بغاو يخرجو
رد بالايجاب كيتنهد: نشاء الله ميكون غير لخير ... الله يدير اللي فيها الخير
ناض من القهوى هوا وعماد ومشا مباشرة لدار نهاد تاصل بيها هبطات عندو طلعات معاه فالسيارة قالبة وجهها وداها بنفسو لكلينيك من اختيارو ودخلو بجوج فصمت ... هزات راسها لفوق بكبرياء وتحدي ودخلات حيث دخل معاها دارو ليها تحليل للجنين ديال بحضورو وقدام عينيه و نعسات على ضهرها فوق البياص كتشوف فالشاشة وطه حداها كيشوفو البيبي عبارة عن نقطة صغيرة كالحلزونة ... بمجرد ما بان ليها دمعو عينيها وبدات تنخصص فصمت وهوا عاقد حواجبو كيشوف ... تم الفحص بسلام وناضت خرجات خدات الادوية اللي عطاوها بابتسامة مسطنعة و حتى كلمة من كلام الدكتورة ما كتسمع ليه .. خدات ورقة الدواء وخدا هوا التحاليل وخرجو فصمت حتى واحد ما هضر مع لاخر . طلعات حداه فالسيارة ردها حدا باب دارهم وتلفتات شافت فيه بابتسامة قائلة
- فاش يخرجو النتائج ... عيط ليا رد عليا ... غنتسنا اتصالك بسلامة عليك
ماردش عليها وانطلق للمختبر في حين طلعات هي الدار ووقفات فوجه مها وخواتاتها كتشوف فيهم بصرامة
الام بخوف: شنو دابا؟
نهاد : صافي درت ليه خاطرو ... دابا جا الوقت فين نوريه ثمن الضلم شحال غالي
الاخت بخوف: خطر على صحتك انهاد هادشي اللي بغيتي ديري ... خافي على راسك وعلى الجنين راه مزال ماتبت مسكين
قالت بعينيها مغرغرين : هنا فين غنشوف القدرة الإلاهية نشاء الله ... حيت ربي الى بغا ليك شي حاجة واخا يهضرو اطباء العالم مغاديش يوقع شنو قالو . انا تايقة فالله ... والى كان هادشي فيه الخير ... راه ربي غادي يقول ليه كن فيكن ... والى مكانش فيه خير ... انا راضية بالقضاء والقدر . خيره وشره .
مباشرة للمختر ... نزل ودخل حط ليهم التحاليل وخرج هز راسو فالسما مغمض عينيه مطولا وطلع فسيارتو مباشرة بمقابلة اشراق
وقف السيارة حدا لاصال وصونا ليها .. كانت كتجمع الاوراق فالبيرو بسرعة وردت على الاتصال بلهفة
- الو.... وصلتي؟ انا جايا
قطعات كضحك وخرجات من البيرو كتجري .. قشعاتها خليج غادية فرحانة بديك الطريقة وهي تبعها حتى للباب وطلات من بعيد ... كانت الصدمة اقوى بكثيييير على خليج ... تحلو عينيها على كبرهم فاش شافتها طلعات كضحك فالسيارة معاه وزادو مع الطريق ... تكات على الحيط ويدها على قلبها
بغضب شديد جبدات تيليفون كتصوني على اشراق لاكن الاخيرة غير شافت الرقم وهي تقطع ليه الحس خلاتو كيصوني ولاحتو فالصاك .
مشاو جلسو فمقهى نقي وكل واحد شنو طلب
اشراق: متقدرش تبدل القاضي ؟
رد بالنفي: ممننوع ... كاين قوانين ممنوع علينا نختارقهم
تنهدات بعمق: عرفتي شنو تعلمت ... هوا ان العلاقات الغير شرعية كتأدي مولاها طال الزمان واا قصار ... ديما الحرام كيخرج فمولاه ... وانا خايفة يكون هاد اللقاء بيني وبينك ونتا مزال مامطلق يخرج فيا ... واخا عارفة باللي ماخاصوش يكون وفيه تهلكة 100% لاكن كنقنع راسي باللي مغادي يوقع والو نشاء الله . كن كنتي مطلق كن حسن
طه : واش انا كرهت؟؟؟ حتى كنقول تقادات من جهة وكتخرج ليا شي حاجة اخرى من الجنب
اشراق: مللي نتا بااغيني وكدير دابا المشتحيل على ودي ... علاش من اللول ما صبرتيش حتى تشوفني مرة اخرى ... ولا تحدا الصعاب واجي ردني
تنهد وقال : كنت فواحد الوضعية معارفش راسي شنو ندير ... انا كنت مبلوكي .. ماعرفتش ... يمكن كن كنتي بلاصتي غادي تفهميني .. وكنت كنضحك على راسي ونقول غادي نبدا من جديد ... تعايشت مع الوضع ... لاكن مللي كيرجع المعقول ... مكايبقاش ديك الساعة التعايش ... ما عرفتش كفاش نفسر لاكن اللي خاصك تعرفي .. هوا انا كنبغيك ... كنبغيك لدرجة مكتصورش
هبطات راسها بابتسامة ساكتة وهوا يرن الهاتف بالكاميرة من كندا وصورة علي طالعة .. قشعها طه من فوق الطبلة وقطعات اشراق الاتصال وقلبات التيايفون على وجهه
طه : مزالة كتهضري مع علي؟
ردت بابتسامة : اه .. كنهضرو مرة مرا
سكت كيسوط من مناخرو وقلب وجهه للجنب ورجع وقال
- اشراق ... حنا مابقا لينا والو ونعاودو نتزوجو وعلاقتنا مبنية على هادشي ... علي ماعندو ميدير فحياتك دابا ... وانا منقدرش نتقبلو لا كصديق ولا اخ
ردت بهدوء : ولاكن منقدرش نقطع على علي وهوا ما دار معايا غير الخير ... غنبان بنت الحرام ... زايدون مابيني وبينو والو
رد طه بجدية : انا وعلي بجوج مغتكفيناش بلاصة وحدة فحياتك ... صافي دابا نتي مابقيتيش ديال راسك ... وعلي غادي تسدي عليه فخطرة الله يعاونو نتي غتبداي صفحة جديدة ... وراجل اخر ماعندوش بلاصة فحياتك من غيري
رد بصرامة : لا مابقيتيش غتهضري معاها من هنا لفوق ... انا على قبلك كنجري باغي نتزوج بيك ليوم قبل غدا ونتي ماعندك غرض ... حتى تهضري معاه على خاطرك ! ... غتبلوكيه دابا
اشراق: لااا حشومة ..
طه : لا غتبلوكيه دابا ... مكاينش صداقة بين راجل ومرى ... هوا مطلق ونتي مطلقة علاياش كتقلبو؟ صافي تأونكاجيتي مابقا ليه مايدير عندك ... بلوكيه
اشراق: طهااا!
بصرامة : بلوكيه
افأفات ودخلات بلوكاتو .. خطف ليها تيليفون من يدها وقال
اشراق: خاصني نمشي ... الليل هادا غادي يتخلعو عليا مالين الدار
رد بالايجاب: يالاه نوصلك ... بالليل غنعيط ليك اوك
نزلو من القهوى ردها للدار ونزلات فرحانة بحال الفراشة طلعات للدار لقات خليج فالباب واقفة كتسناها ... غير شافتها اشراق وهيوز كي تران نفاديا لشي نقاش ، لاكن خليج دخلت عليها للبيت وسدات الباب بغضب وقال
لاللة نزيهة من برا : شنوووو واقع مالكم ياك لاباااس؟ سمعتو عندنا الجيران
غزات خليج سنانها وقالت : والله ما نخليك ديري اللي بغيتي سمعتي .... خليك دابا ولاكن الهضرة من بعد ... من بعد ونتفاهمو ... والله مندوزها ليك بالساهل غير بلاتي ...
خرجات بغضب من البيت لابسة سروال توني مزير وديباردور ابيض مقزب ديال الدار جامعة شعرها بقراصة وزدحات الباب بقوة خلاتها جالسة كتنفخ فالبيت بوحدها ... حيدات الشال بنرفزة والقميجة وبقات بديباردو ر من لتحت والصدر عريان وجلسات مربعة يديها كتسوط ... هزات تيليفون بعفوية دخلات واول حاجة طلعات ليها هي نمرة من كندا جديدة باعتة ميساج ودخلات مستغربة حلات المسج
- ماعرفتش علاش درتي هاكا ولاكن ماعليش .. نتي حرة ديري اللي بغيتي ، وكان حسن كن واجهتيني قبل ماتبلوكيني .. ماكنتش غادي نصدعك مرة اخرى واخا بلا ماتبلوكي . ماعليش الله يعاونك "
ميكات على المسج وهزات كتفها بلا مبالات ولاحت تيليفون فالجنب ويدها على خدها .
ردت خليج بانزعاج: لهلا يطيحو فيها (خشات لولدها المعلقة ففمو)
لاللة نزيهة : مالكم عاوتاني ؟ مالك مع ختك؟
خليج: ما ختيش اختي ... سيري سوليها هي علاش كتسوليني انا !!! سر بابا فيها هواااا اللي كيعرف ليها ... كنت غالطة فيه ... ولاكن سرها داكشي اللي كان كيدير فيها حيت عارف الى ماجمعهاش يخرجو رجليها الشواري
ردت اشراق من لداخل: نتي طفرتييييه ! نتي غير سكتي بلا منهضرو علييييك
خليج : وا قااااااالبي عليا ... قااااالبي عليااااااا نوض ليك
خليج: شووووفي ... غتزيدي كلمة وحدة غنوض لديلمك دابا مغنزيدش معاك الهضرة
اشراق : يييييها غي فراااسك ربي غاراااسك
زدحات خليج يدها مع الطبلة مفقوصة ولاللة مزيهة كتعيط ليها وهي نايضة مكشكشة .. شافت اشراق ناضت كتجري من البيت بغات تسد الباب وهي دفعو عليها بالجنب وما ادراك ما خليج هي والحديد عضمها قصح من الطوب رماتها لداخل هيا والباب ودخلت طارت عليها من داك الشعر هبطات ليها راسها وسط رجليها واشراق كتغوت ولاللة نزيهة كتجري تفك ماعرفات منين دخل بيناتهم بقات كتغوت وبيازيد بوحدو فالطبلة كيبكي وهي كتولول
- غاتقتلوووني غنسخف ليكم هنااااا
اماااا خليج ماعقلات لا على مها لا حتى واحد خشات ليها ركلة جابتها فالارض وحتى اشراق شقماتها من شعرها واخا مجبدة وناضت البونية بيناتهم وهي طير عليها جليج بعضة للكتف حتى غوتات .. شطبات بيها الارض وناضت مشنتفة كتجمع شعرها الاسود وتسوط وطلع الكولون من اللور
- يالااااه ... دابا زيدي هضري ... يالاه تنهدي
شدات اشراق فكتفها كتغوت وتسب فيها وتلوى فالارض اما خليج خرجات زدحات داك الباب ولاللة نزيهة جالسة فالركنة مكمشة شادة راسها وتندب . بقات اشراق هاكاك حتى رجعات فيها النفس وناضت كتسوط ولسوء حضها كانت عراينة غير بديباردور ودجين جاتها الضربة نيشان فاللحم .
صبح الحال وصبحات اشراق قدام المرايا كتشوف فكتفها فيه طبعة زرقا قدها قداش ودوزات عليها يدها كتردد
- الله يعطيك شي موصيبة ... بنت الحراام
دهنات ليها كريم ديال الطبايع باش تحيد ولبسات عليها القميجة وقادات حالتها وخرجات هازة صاكها مقالت حتى السلام لاللة نزيهة وجارتها اللي جالسين وسط الدار وبيازيد كيلعب قدامهم
الجارة : سعداتك عندك البنات بعدا يعاونوك
دورات لاللة نزيهة راسها حتى داخ وقالت
احححححياني على البنات ... بناقص من شي ولاد وميجي منهم بغيت غير فوقاش نتهنا من كمامرهم يخليوني نعيش حياتي بغاو يشرفوني قبل الوقت
الجارة : ااشمن ... حمدي الله ... البنات كما كان الحال حسن من الدراري ... الدراري عندي بحال البكر الى حليتي عليهم غير باب البيت تقتلك الريحة
لاللة نزيهة : الى غير بحال اشراق وخليج الله ياربي يرزقك بيهم ... باش تحمدي الله على ولادك (تنهدات) لبارح ناضو تقاتلو ليا هنا كلاو بعضياتهم
الجارة : كم تشوفي انا فاش كينوض ليا الصغير مع الكبير ... الجنااااوة والسيوفة اما الى جات غير على الشعر حمدي الله
تنهدات لاللة نزيهة وبانت ليها واحد الكبة دالشعر صغيرة لايحها البرد وهزاتها لواتها قائلة
بقا كيضحك عليها فجأة دخلات اشراق موراهم شافتهم واقفين كيشوفو فالبومادة والبنت كتلسق ليها الفاصمة فوجهها وخليج ماداه ليها من فوق الكونطوار .. قلبات اشراق عينيها بميوعة وقالت بصوت خافت لبنت اخرى فكونطوار اخر
- طحت على يدي فطواليط وزراقت ليا كلها تكبد فيها الدم ... بغيت شي حاجة نديرها ليها تمشي الطبعة
دورات خليج وجهها شافتها وهي طلع وتهبط فيها بميوعة وعماد كيشوف فيهم قائلا مخفي الضحكة
- مالكم مكتهضروش ؟ واقيلا حتى هي جات تشري الفاصمة ولدك قمشها
خليج: بجدية : يالاه نمشيو بحالنا
عماد : طايفتو باااااينة هههه
مشا كيضحك عند اشراق وقال
- اشراق
خليج: انا برا ..
تلفتات بابتسامة : عماد صافا؟
عماد : مالك مريضة ياك لاباس ؟
اشراق: زلقت فطواليط على كتفي وصافي
عماد: مالك مكتهضريش مع خليج
قلبات عينيها ودورات وجهها للكونطوار
- مكنهضرش معاها
عماد : ايوا الله يهديكم ... هانا مشيت
مشا وبقات وراتهم كتفها وجمعوه ليها بواحد الفاصمة وهبطات القميجة وخرجات طلعات فطموبيل بحيث خليج ركبات مع عماد وبقات الطموبيل فارغة هزاتها اشراق وشدات طريق للاصال
وصلات لاصال حتى وحدة مكتهضر مع لخرى ... خليج دخلات تريني باعيالات واشراق بقات جالسة كدور من قنت لقنت وتمسنجر مع طه النهار كامل حتى للعشية وهي تخرج خليج من الدوش بعد انتهاء التداريب كتنهج شعرها مجموع سفمجة فازك ولابسة لكولون كحل يباردور وفيدها لفوطة وسبرديلة فرجليها .. حصلات اشراق جالسة فالبيرو كتتمكيج وتقاد مع المرايا .. شافت حتى عيات ودفعات الباب عليها ودخلات لاحت الشكارة قدامها وجلسات قائلة بجدية
- شوفي ...
ناضت اشراق بغات تخرج وهي تجرها خليج
- جلسي غنهضر معاك
اشراق: مامسالياش
سدات خليج الباب وقالت بصرامة : جلسي للارض بلا منبداو عاوتاني يسيق لينا كلشي لخبار
ربعات اشراق يديها وجلسات : شنو ؟؟؟ هاني ؟
جلسات خليج قدامها وقالت بجدية: انا شفتك فاش طلعتي مع طه فطموبيل . . ومتكدبيش عليا ... شنو كديري مع طه
نفخات : اففف ... علاش كدخلي ليا فحياتي واش ما شي من حقي نعيش؟
خليج: من حقك تعيشي ما قلناش لا ... وراكي سافرتي مع علي و ماقلت والو .. ولاكن طه ! لااا وستين لا كايصلاحش ليه ... بنا حياتو وتزوج ونتي مزالة كتأملي على والو
اشراق: غادي يطلق وراه الدعوة فالمحكمة مابقا ليها والو
ردت خليج بسخرية: واش هوا حمق يسمح فمرتو وولدو ويتبعك نتي !
ناضت خليج كتجري هزات السوارت وخرجات من البيرو سدات على اشراق لداخل والاخيرة كضرب فالباب باغا تخرج . طرقات عليها فخطرة ونزلات كتلبس لافيست ديال لكوير وخرجات لبرا وقفات كتمشي وتجي وتسنى حتى وقفات سيارتو حدا لاصال وهي تمشي عندو بلا ميشوفها .. كان شدا تيليفون فيدو ماحسش بيها حتى حلات عليه الباب وطلعات حداه سداتها وقالت
- يالاه حيد من هنا
تلفت فدهشة : خليج!!!
طه : علاش ..شن..
خليج: حيد من حدا لاصال ويالاه لشي بلاصة بعيدة
زاد بالطموبيل كما قالت ليه ومشا وقف فواحد التيرا خاوية دسال سيارات التعليم وهي تنزل من تما
- نزل نهضر معاك
يالاه سد الباب وهي توقف قدامو مخرجة عينيها وقالت
- شنو بينك وبين اشراق؟؟؟ هاااه؟
دور وجهه فصمت ورجع قال : خليج ... داكشي كيخصني انا وياه ... بقاي بعيدة عفاك
ضحكات فالسما بحال الحمقا بالجهد وهي تختمها بغوتة جنونية وشافت فيه قائلة
- خريييتني بالضحك هادي قرن ما ضحكت بحال هاكا .. واش كتسطا عليا اطه !!! خليييك بعيدة واااعرة هادي ... نبقاو حنا بعااااد حتى ديرو شي زبلة عاد نقربو نهزوها ليكم حنا ... لا والله حتى خريت بالضحك
طه : بجدية ) اشرااااق راه مرتي بغيتي ولا كرهتي وغادي نرجعو ...
قاطعاتو كتشالي بيدها : كاااااانت مرتك الزين .. كاااااانت قبل متزوج ومرتك تحمل ههه
حل عينيه فيها مصدوم ودور وجهه وهي كطل عليه
- هضر ... نكر باللي مراتك حاملة ... شتي واخا ضحك على العاااالم مغاديش ضحك عليا انااا ... حيت انا حاللة عيني معارقاش فيك حتى لودنيا باش نميك على شحال من حاجة ..... اشراق عارفة مراتك حاملة ؟
طه: حتى انا عاد البارح عرفت ... كنقلب على شي طريقة باش نقزلها ليها بلا منصدمها
خليج : عارفها غتصدم ياك ! ومزال كدور بيها ! علاش كتخليها حتى تبرا وتنسى وكترجع تحك على الضبرة وتعطيها شحطة كتر من اللي قبلها ؟
طه: انا مكنضحكش عليها ... واش انا كرهت !! واش كرهت اخليج؟؟؟ راه ماشي بيدي راه ماكرهتش نعس ونفيق نلقا حتى حاجة من هادشي ... انا كنبغي اشراق ..كنموت عليها وغندير المستحيل باش ترجع ليا
خليج بغضب: فين كنتي هادي قرن وزمااااااار ؟؟؟ فين كنتي فاش كنا كنعانيز من هاد الزمر ديالكم كاااملين .... كنتي كتزوج وخدام على ولادك ... وفاش بنيني وساليتي بانت ليك اشراق وحليتي عينيك وقلتي اه ... بااااقي كنبغيها اجي نردها !!!! واش كضحك علينا ؟؟؟ واش مكتقدرش الضروف اللي كنعيشو فيها ؟؟؟ واش مرتك حاملة ونتا سامح فيها تابعنا حنا ؟ بلاصة ما تمشي تفرح بولدك اللي عوضك بيه الله ! و كرمك من بعد ولدك اللي مات وشاف من حالك وبغا يرزقك من عندو ... تكبرتي على النعمة وتعفرتي عليها ومترضيتيش بيها بغيتي شي حاجة اللي ماشي ديالك ! ... طامع فشي حاجة ماشي ديالك وديالك سامح فيه ! من اللول متزوجش ... من اللول بقا حر وضحي على قبلها يالاه! ولا نتوما سبحان الله مكتصبروش ! باااز . شوف اطه ... انا مابغيتش نسمع حتى حاجة منك .... غنطلب منك حاجة وحدة ... ماحد مزال فالبدية ... سير بعد وخلي عليك اشراق ... تعض راسها واحد الشوية وتنوض حسن ما تغرقها فشي حاجة ماشي ديالها وتعيشها فالاحلام وطيحها شي طيحة كبر من هاديك فاش طاحت ... هانا وصيتك ... بعد منا خلينا نعيشو كي الناس راه هادشي طلع لينا فراسنا ... بسببو تشتت لينا الشمل ... نتا عائلتك مجموعة وحنا مشتتين كل واحد عايش بوحدو .
خزرات فيه وهو كيسوط ومشات على رجليها كتنفخ حتى للشارع وشدات طاكسي
الحلم الأسود الجزء 18
محتوى القصة
التنقل بين الأجزاء