خرجات من الفيلا وسدات الباب مشات وبقا النقاش بين طه واشراق وسط الفيلا حتى تسمع الصونيت فالباب وهي توقف اشراق مخلوعة
- شكون كيصوني؟؟؟ عنداك تكون خليج تبعاتني حتى لهنا ديرها
ناض مشا لحدا الباب شاف الكامرة وقال
- عماد هادا
دارت يدها على فمها عماد !!! ... لا متحلش ليه الباب
طه : طلعي لفوق ماتبانيش ليه انا غنسيفطو بالزربة
طلعات كتجري نسات صاكها محطوط فوق الكنبة وخرج هوا لبرا .. حتى كان غادي يحل لاكن بان ليه تراجع من بعد ما صونا حتى عيا وتراجع طه حتى هوا خلاه حتى بعد حدا الطموبيل وتم طالع مع الدروج دخل للفيلا وطلع مع الدروج للاعلى يخبر اشراق .. لاكن هنا كانت الكترثة الغير متوقعة .
عماد كيهضر فتيليفون حدا السيارة .. وحداه وقفات سيارة الشرطة ونزلو منها معاهم نهاد ومها وختها .. تفاجأ عماد ونهاد كتحل ليهم الباب ودخلو للفيلا وبصوت مرتفع غوتات وسط الفيلا
بالخلعة مافهمات خليج والو ناضت كترعد وتفتف ماعرفات شنو تهز وشنو تحط نزلات كتنقز الدروج حتى لبرا وهي تبان ليها سطافيط دايزة قدام عينيها و موراهم شد عماد الفران بسرعة طلعات كتجري وديمارا كيطري وهي حداه صفرا كترعد مخلوعة قلبها غيسكت
- شنووو . شنو اللي وقع اعماد ماتخلعنيش علاش داوها واش هي تما دابا تما !!!
دخلو للكوميسارية كاملين وخليج موراهم كتجري وعماد تابعها ... تجمعو فالبيرو ديال الضابط كيتحاسبو ونهاد كتهضر بشوية جالسة على كرسي واشراق كتبكي وترعد وطه كيشرح الموقف . دخلات عليهم خليج غير شافتها اشراق عنقاتها كتبكي وترعد
- والله مادرت شي حاجة والله انا مادرت شي حاجة
ردت خليج كتقفقف: شداك ليه ياك عيييت نهضر معاك عييييت
اشراق: خرجيني غير من هادي .. خرجيني مابغيتش ندخل لحبس عفااااك
غوت الضابط : راه عندك ست شهوووور ديال الحبس ... خيانة زوجية هادي ماشي اللعب .. شنو كنتي كديري كتلعبي معاه
غوت طه حتى هوا : جمع راسك حسن ليك عرف اش كتخرج من فمك ولا نسيفطك نتا نيت فين تربا ... القانون طبقو ونتا كنهضر بشوية كتسمع راه كاملين عارفينو بلا متفرح بهاد الكرسي ... هضر نيشان حسن
رد الضابط بغضب : ماشي نتا اللي غتوريني شغلي الى كنتي قاضي قاضي عليهم فالمحكمة ماشي عليا هنا
رد طه بغضب والبوليس كيفكو : ونتا كوميسير عليهم ماشي عليا انا وصلح داك الفم الخانز السلطة ديالك ديرها على راسك سمعتي
بعدوهم البوليس وردعو عماد اللور كيهضر مع الضابط بشوية
- سمح لينا سيدي حنا ايييه راه كنحتارموك وكنقدرو المجهودات ديالك فخدمة الشعب وراه حتى هوا فنفس الميدان فخدمة الوطن عيب نوصلو لشي مواصل وحنا هدفنا واحد ولو الانسان كيطيح راه المتهم بريئ حتى تبتبت ادانته ... محتارمو بعضياتنا والقانون راه غيطبق حنا عارفينك راجل قانون وكنقدروك زفر عماد بميوعة والضابط شنت وهز خنافرو وقال
- هوا اللي يتواضع معانا شوية حنى لحد الساعة مزالين فنقاش ... اما القضية كتولاوها فالمحكمة .. ماعلينا غير نادي الواجب
عماد بمجاملة: اييه عندك الحق وكنقدرو مجهوداتكم . . صافي سوء تفاهم غادي يتحل ونبينا عليه السلام نتا مغتضرر وحنا مغنتضررو
شافت اشراق فخليج كتبكي وقالت : لالالا متخليش القضية توصل بوكيل الملك الى وصلات ليه مغاديش نتفك غادي نمشي فيها ومكاينش اللي يفكني ... عفاك فكيني هنا عفاااك ... عفاك اخليج زاللي بغيتيها نديرها والله ما نعاود ... انا اللي درتها رااسييييي (بدات تبكي)
نهاد : انا غنرفع دعوة الخيانة الزوجية ... عفاك قيد ليا محضر عندي منقول فيه
تلفت الضابط واحد بوكرش فمو رايب وجهه حالتو بحال الشمكار وقال لشرطي حداه
- انا ماخنتش انا كنت كنتناقش انا وياه تما وما دؤت حتى جريمة نتعاقب عليها ... هاد السيدة بغات دخلني للحبس بأي طريقة اسيدي انا مشيت كنتناقش معاه فقط ... بحالي بحال الخادمة اللي عندو فالدار .. نفس الوضعية وبحوايجنا ومادرت حتى شي حاجة
شاف فيها الضابط وقال: هادشي غادي يدخل فالمحضر .. ولاكن التهمة لابساك السيد حصلتي معاه مزوج فقلب دارو والسيدة كتشكي عليك كنتي طليقتو من قبل ... الوضع ديالك ماعندو علاقة بوضع الخادمة ... هاديك جات تخدم.
نهاد : انا وراجلي وصلنا للطلاق بسبب الاهمال وهاد الاهمال سببه هاد السيدة اللي دخلت حياتنا ... لاكن تراجعنا على الطلاق وانا حاملة فشهري الاول وخطر عليا هاد الجلسة اللي جالسة وهاد المشاكيل اللي كندوز منهم .. مشيت نرتاح فدارنا حيت الطبيبة نصحاتني نعس على ضهري .. حتى كنتفاجأ بهاد الطليقة ديالو فقلب داري معاه ومامعاهم حتى واحد
عماد: حناااا ماشي فيها دااابا حنا فحريرة ديال ختك اللي خصها تفك ... الليل هادا وحنا مزالين واحلين هنا
تنفسات بصعوبة كترعد وقالت : دابا شنو غيديرو ؟؟؟؟ كل واحد قال شنو عندو وهوا شهد باللي ماقربش ليها ! شنو غنديرو دابا؟؟؟
تنفس فحيرة وقال: ماعرفتش ... ختك بعدا غدوز هاد الليلة هنا باش تكوني عارفاها ماعندهاش الحق تخرج
ضربات حناكها: اوييييلي على غتبات هناااا
عماد: وا خرجيها يالاه ... يالاه لا كنتي مرى خرجيها ! وماااعندكش شي حل من غير تبتي وترزني فهمتي
دورات خليج وجهها كتبكي ودوز يدها على راسها وهي تشوف اشراق خارجة كتبكي وتغوت وتعيط ليها
بدون شعور طارت خليج على شعر اخت نهاد جراتها حتى طاحت وهما يشدوها البوليس حتى هي وغوت الضابط بصوت مرتفع
- هبطوها تا هي مع ختها تبرد لتحت هاي هااااي هاي
رد عماد بغضب : صافي ؟ رتاحيتي داابااااا؟
مشات خليج كتسبق البوليسي ماداتهاش فهضرة عماد تابعة ختها نزلهم لغرفة كبيرة جامعين فيها شلا بنات وعيالات كل وحدة مكمشة كتسنا نوبتها وسدو عليهم لداخل .. وكذلك طه بقا فالكوميسارية ماخرجش من تما وجلس عماد فالطموبيل كيسوط ويدو على خدو حتى تفرتكات القضية وخرج الكوميسير من الكوميسارية وخوا يتعرض ليه عماد كيجري
- سعادة الضابط ... سعادة الضابط
تلفت الضابط شاف فيه وقال : ياك مكاين باس
ضحك عماد وقال : مالك زربان تسنا غير نهضرو معاك واحد جوج كلمات
هز الضابط يدو وقال: ال كان غير على صاحبك انا ماعندي مندير ليه لا هوا لا االلي معاه
رد عماد بابتسامة : وا غير صبر نديرو شي قهيوة نهضرو فيها حتى الى مكانش حل نتعرفو عليك بعدا
هز الضابط حاجبو شاف جهة الكوميسارية وقال
- يالاه نحو من هنا بعدا ويحن الله
حل ليها عماد الباب وهوا كيتميع منو ورجع بتاسم فوجهه وطلع حداه كيضحك
- الخدمة ديالكم صعيييبة ولاكن كنحيييك على المجهودات ديالك السي ...
الضابط: السي الراضي
عماد : متشرفين السي الراضي ...
الراضي: ااودي راه كوولشي كنديروه فخدمة هاد البلاد وصافي
زفرات خليج كتمشي وتجي مجاوباتها وجلسات فواحد القنت كدوح براسها وتفكر شنو دير وقالت
- خصنا نفاريوها هنا قبل ميطلع الضوسي للمحكمة ... اويييلي ومي ماعيطتش ليها غتبات بلا نعاس هاد الليلة ... معارفاناش فين حنا ... اما الى وصلنا للمحكمة صافي تشوهنا غيسيق با لخبار وطررر الى ساقت العائلة لخبار فضيحتنا فضيحة ... كولشي بسببك نتي عييييت نوصي فيك عيييييت عييييييييت كاع داكشي اللي بنيناه غادي يتردم ونوليو حباسات فخر يامنا ...
حط الضابط الكاس ديالشراب وسط بار كبير والعشا منزل قدامو فالطبلة كيضرب فالحوت ولكروفيت ولكلامار مع عماد اللي معمر ليه الطبلة بالشراب ... بل حط ليه سطل ديال التلج فيه النواع والشكال ديال القراعي .. دار ليه الجلسة اللي عمرو يحلم بيها خلاها كيشكر ويعاود
- والله تا جاني وجهك عزيز وولد لخير ومابغيتش ليكم هاد تكرفيسة ... كن جات عليا نخرجهم من دابا ولاكن اصاحبي راه لكوميسارية ماشي ديال با .. المشكل دابا فمرت صاحبك اللي حصلاتهم قطي ...
الراضي: منخبيش عليك اخاي عماد ... انا راه ماعندي ممما ندير ليك دابا .... شوف مع مرت صاحبك تنازل على راجلها يخرج .... وغتبقا ديك الساعة الدرية نخرجوها سكوتي.... غا هواااا اخاي عماد راه القاضية شوية كطلع غالية .... خاصك تسكت البوليس اللي معايا فالدائرة وكدا .... خصها مصيريف فهمتيني
تنهد عماد وقال : والى مابغاتش تنازل شنو نديرو معاها ؟ مكاينش شي حل
بلع الضابط حوتة بسنسورها وقال كيمضغ : شوووف اعماد ... الحل اللي عندك هوا تفاريها معاها تنازل ليه ... فالقانون الى تنازلات ليه غادي يخرج بواحد الكفالة .. ماشي بزاف ولاكن مهم غيخلص شي لعيبة ... ولاكن الدرية كتمشي فيها لاحبس مافيها لا ان ولا حتى .... حنا فالدائرة ما حد القضية بيناتنا ماشموهاش شي بعضين ... غادي نننن .... ننسلكو الجرة ونخرجوها ولاكن كما قلت ليك ... شوية ديال العسل ندهنو بيه فام هادوك اللي معايا ... هادشي اللي نقدر ندير معاك ....شتي وهادشي هادا وراه ماشي ساهل .... راك عارف القضية باش تخرج منها راه معنكشة شوية
رجع عماد اللور كيشوووف ساهي ويديه على راسو وقال
- هي مافيهاش ..
قال الضابط ووجهه فالطباسل : والو واخا مارعت اش دير
عماد: واخا .... وهاد العسل شحال ساوي ؟
هز الضابط راسو وقال فمو عامر: شي ستااا... ولا سبعااا كاع
هز عماد حاجبو : ستلاف !!!!
رد الضابط : الااا اصاحبي ستة دلبريكات
تصدم عماد: علاش مالنا غنحررو قتال !!!! راه غا ست شهور متشي ست سنين!
الضابط: واديك الساعة نشوف مع الدراري ونرد عليك مايكون عا لخير .... فك حريرتك مع مرت صاحبك دير تنازل قبل ميطلع الضوسي لعند ااوكيل .. ديك الساعة غا كبو الما على كرشكم
صبح الحال .. وصبح الطر مضروب فعائلة طه كاملة ... وصبح باه ومو فالكوميسارية كيتجاراو مصدومين .. وطبعا تيقو الموقف اللي طاح فيه ولدهم .. لأن طلاقو من نهاد أكد ليهم السبب ... وهاكا شعلات شعلالتهم وصبحو عليه لقاو جالس كيبلاني فالبيرو ديال الضابط بوحدو حداه بوليسي اللي كيكتب المحاضر شاد واحد الكاس ديال القهوة . تهز البيرو بين الحاج وطه ... وعيا الاخير يشرح ليه الموقف لاكن الحاج ماقدرش يتيق بيه ... وطلع ليه الدم وكشكش وحيح... اما طه خلاه على خاطرو معاودش كاع صدع معاه راسو حتى دخل عماد فديك الصبحية لقا الصدع وخرجو من تما فهمو مزيان وأكد ليه انه كان حاضر لاكن بقا السؤال المطروح ... اشراق شنو كدير عندو فالدار؟ والبضبط فالبيت .... هاد السؤال اللي مالقاو ليه حتى جواب حيت لا طه لا اشراق عطاو تفسير لهاد السؤال .. اشنو كانت كدير عندو فالدار از بالاحرى الغرفة اللي هي غرفة نوم لاكن ماشي الرسمية ... غرفة نوم ثانية للضيوف . . . لاكن كتبقا غرفة نوم ... واش الرسمية او لا حتى عندها مفهوم واحد . جلس الحاج برا شاد راسو مابغاش يتقابل مع طه نهائيا ... اما عماد جلس حدا طه كيهضر معاه واستغل خرج الشرطي لبرا كيهضر فتيليفون وعاود ليه شنو طرا البارح بينو وبين الضابط وحكا ايه ليه الحوار كامل ... لاكن طه شاف فيه بغضب وقال بدون شعور
عماد : واش باغي تزيد ليلة هنا اصاحبي ؟؟؟ الى مكانش على قبلك على قبل اشراق؟
رد بغضب: انا بغيت نبات هنا كاين شي مشكل؟؟؟ انا اللي بغيت ... نتا مكانش عليك تهضر معاه نهائيا هاداك باغي يحلب من هنا ومن هنا وانا غنوريه اللعب مع اللي كبر منو شحال كيسوى . خليه حتى يجي
بابتسامة دخل الضابط فديك اللحضة وجلس فالمكتب كيحنحن وقال
- السي عماد هضرتي مع صاحبك ؟
شاف فيه طه وقال ببرودة : اه هضر معايا ... شبان ليك نتا ؟ مزيان داكشي وغادي يسلكنا ولالا ؟
رد الضابط: وغااادي يسلككم ولاكن خاص المدام ... احممم راه صاحبك فاهم
رد طه بالايجاب : واخا السي .... اش سماك الله
الضابط: الراضي ...
رد طه بتتاقل ونضرات سخرية: السي الراضي
مع ديك الكلمة الاخيرة دخل وكيل الملك عليهم فجأة بصرامة ومد يدو سلم على طه وعرف براسو بصرامة وجلس وقف الكوميسير مصدوم شاف فيه وشاف فعماد اللي بدورو مافهم والو و جلس
بدا نقاش حاد بين الضابط و الوكيل وحتى طه اللي جات نوبتو يهضر
الوكيل : امم ... عطيني الادن بالقبض عليه
رد الراضي بتوثر : مكنحتاجوش للاذن سعادة الوكيل
الوكيل: باش تدخل لدار قاضي خصك الاذن و من عند الوكيل ... عطيني الاذن ديالك
الوكيل: امم .. واخا هادا دوسي جديد ... من غير الخيانة اللي هوا متهم بيها ... اولا الضابط الراضي ... القبض ديالك عليهم فقلب دارو تم الغائه نضرا لعدم وجود امر من الوكيل الملك بيه .. ثانيا عندك تهمة ديال التهكم والافتراء على قاضي وغادي تتابع فالنيابة العامة ونشوفوك عندا لفوق فالمحكمة (مد يدو) السي الناجي ... نشوفوك على خير... واخا كان عليك تتاصل لبارح ماشي حتى لهاد الصباح وتكرفص راسك خاد التكرفيصة .
ابتسم طه وقال: ما عليش ... شكرا بزاف السي الوزاني
خرج هوا وياه لبرا كيهضرو وهوا يقرب عماد للراضي اللي وجهه صفار وقال بخفوت
- 3000 درهم اللي حطيت عليك فالبار شربتي تا تلفتي على سميتك . والى متحطيتيهاش دابا غنشهد على سبعالاف اللي طلبتي لينا .. نزوها على ماسمعتش ديالك . يالاه طلع
خرج عماد من الكوميسارية كيحسب فلوسو الزرقة على ختها ... كيحسب ويعاود لقا 100 درهم ناقصة وقال
- ولد لحرام ... والله لا خليت ليك شي ريال
تم راجع شاد الفلوس فيدو وحدا البيرو قبل ميدخل تمات جايا اشراق وخليج ... وحدة وجهها صفر بالخلعة والاخيرة الشر كيطاير من عينيها . شافهم عماد جايين وقال فرحان
- على سلامتنا ... صافي عفاو علينا غادي نخرجو بحالنا وداك الراضي هوا اللي غيمشي فيها ههه
تبدلو ملامح اشراق للفرحة وبدات تشوف فيه وفخليج اللي حتى هي برقو عينيها ودخلو للبيرو مضاو على محضر جديد وخرجو من البيرو كيتعانقو في حين واقف طه برا الكوميسارية مع باه كيهضر معاه . رجعات خليج واشراق حالتهم حالة بالليلة الكحلة اللي دوزو .. شدات خليج كضحك فعماد خارجين وهوا يتفكر 100 درهم ورجع للبيرو خلاهم برا كيتسناو فيه حدا الطموبيل واشراق ساهية بأسى كتشوف فيه وهوا كيشوف فيها حتى خرج عماد فرحان كيحسب بانتصار الفليسات حتى لحدا خليج وهي تاخدهم ليه من يديه قائلة
- اراهم ماهزيتش معايا الفلوس .. شحال هنا (بدات تحسب)
جمع الضحكة كيشوف فيها ويتمتم قائلا
- م مم .. شنو بغيتي .. بغيتي ديري بيهم
دخلاتهم فالجيب بسرعة وقالت على عجلة كدفعو للسيارة
- يالاه يالاه دغيا ماما غتكون غتسطا
طلع كيرمش للسيارة وطلعو معاه داهم واشراق متبعة لعين لطه وهوا واقف مربع يديها قدام باه كيشوف فيها بأسى حتى غبرو .
حطهم عماد حاد الدار ونزلو كيجريو مخلوعين يشوفو مهم .. قربو للدار وكانت صدمتهم اقوى من المتوقع .. سيارة باهم فالدرب واقفة خلاتهم كيشوفو فبعضياتهم بصدمة واللون مخطوف فوجهم ... طلعو كيجريو للدار ووقفو حدا الباب كيشوفو شكون فيهم تزعم ودق وتقدم اللولة ... جمعات خليج القوة ودقات الباب وقلبها كيزدح 90 مرة فالثانية . حلات ليهم لاللة مزيهة ووجها صفر نطقة ديال الدم مافيهاش وبقات كتشوف فيهم بنضرات مطفية وفمها ناشف بالخلعة ماقدراتش تهضر دارت ليهم الطريق دخلو كيترعدو لقاو الحاج جالس وسط الدار وراسو لتحت كيشوف فالارض ... هز عينيه بابتسامة كتخلع وقال
- على سلامتكم ... تبارك الله عليكم ! (بابتسامة ) كن بقيتو تما فين جايين ؟ ... لا لا تبارك الله عليكم .. هادشي اللي بقا ناقصكم ... الحبس راه وصلتو ليه
بلعو ريقهم وراسهم فالارض كينشوفو ويعرقو .. شاف فاشراق كأنه سعيد جدا الشيء اللي زاد زعزع الرعب فقلوبهم وقال
- شحال عطاك ؟
شافت فيه اشراق مصدومة وشافت فمها اللي مهبطة راسها
لحاج : مالك ... مشيتي عندو فابور؟ هضري صافي مابقا علاش نحشمو ... اللي عندو شي حاجة يقولها
ردت خليج بحذر: ر ... راغير ... غير سوء تفاهم و
خزر فيها : سكتي نتي ... سكتي يا المعلمة ديالها ... هادشي غير قرايتك اللي قريتيها وكتوريها شنو دير .. دابا انااا ... فداري مهني من صداعكم حتى كيعيطو لينا الناس ... ميخليو ما يقولو ليا ... بناتك راهم بايتين فالكوميسارية و وحدة خرجوها من دار مع واحد مزوج .... (وقف كيشوف فيهم باشمازاز وغضب كيترعد) سكنتو بوحدكم قلتو نديرو اللي بغينيا صافي ... صافي دابا مكاينش اللي يحكمكم ... (جمع القبضة ديدو فوجههم) دمكم كيطليني واخا تكونو فالمريخ سمعتو .... كيطيليني ورجعت على كبري وعلى هاد الشيب اللي فراسي نسمع الهضرة ونتعاير بترابيا ... ولاكن انا ... انا اللي غالط حسابني غادي تبعدو مغاديش كاااع توصلني ريحتكم ... وماكنتش كاااع يحساب ليا بناتي اللي ربيت غادي يجي واحد النهار نشوف عليهم اللي شفت ... (شاف فاشراق) هضري امولات الحجاب .... حيدي داك الزيف اللي ساترة بيه الفضايح غير حيديه معدية عليه وصافي ... انا بغيتكم تبقاو تما .... انا بغيتكم ماتخرجوش ... تبقاو تما حتى تموتو و نتهنا من فضايحكم فضحتوني ولاو الناس يعايروني ... ولاكن انا غادي نوريكم ... ماربيتكمش ونتوما صغار نربيكم ونتوما حلالف (جبد السمطة من السروال))
وقفات الطاكسي حدا المختبر .. نزل منها ودخل مباشرة سول على التحاليل ديالو وجلس داير يديه حدا فمو كيتسنى بتوثر ورجلو كتشطح حتى جابو ليه التحاليل شدهم بابتسامة وخرج من المختبر لبرا وبدا يشرك فالغلاف جبد الورقة وحلها بسرعة كيقرى وعينيه كيتحلو مصدوم ... فشلو يديه وطلع جلس فطموبيل مهبط راسو على المقود وكل شوية يرجع يشوف فالورقة ويتنهد بعمق . رجع تكا راسو مطولا وهز تيليفون كيصوني على نهاد
- الرقم اللذي تطلبونه مغلق او خارج التغطية . . المرجو اعادة الاتصال لاحقا
عاود عيط لمها وحتى واحد مكيرد عليه ... كذلك ختها وحتى هي مكتردش فالاخير ضطر يمشيو عندهم للدار وطلع كيدق فالباب حلات ليه امها بقات كتشوف فيه وقالت
- شنو بغيتي ؟
رد بصرامة: كلمي ليا نهاد
ضحكات بسخرية : دخل دخل .. دخل بعدا
دخل كيدور عينيه فالدار مالقا حتى واحد ..ريحة ساني كروة عاطية فالدار والنقا باينة مها كانت كتجفف .. وقف وسط الدار وقال
ردت الام ببرودة ورجعات جلسات : سير قلب عليها فسبانيا .
رد مصدوم: شنوووو!!!
ردت : مشاااات لسبانيا .... مشات عند خالها .... غير برد هاد خالها عمرك شفتيه وعمرو جا للمغرب من نهار مشا .... نهاد خاطرات براسها ...يا ربحة يا دبحة ... يا توصل بداك ترابي يا ما توصل ... (هزات صبعها) والحمد لله ...وقف معاها ربي وقطعات البحر ... بيخير وعلى خير وماعمرك تعاود تشوفها فحياتك لا هي لا داكشي اللي دات معاها ... نكرتي ونكار الخير هادشي اللي يستاهل
فالركاني مكمشين كل وحدة فركنة جامعة رجليها كتكمد الشحط ... زرقهم بالسمطة حتى رجعو هشاش وقطعو الحس كيتنهدو بزز وهوا كيمشي ويجي قدامهم ولاللة نزيهة جالسة قاطعة الحس
- جمعي عليا هاد الروينة ... غادي ترجعو تعيشو فديك الدار قدام عيني ... وتزيد شي وحدة تنهد ... غادي نبيع الدار والزمر كامل ونرجعو للجبل ... تمشيو تعيشو تما اصلا الجبل اللي يصلاح ليكم .. هزييي عليا هاد الروينة غادي نمشي نجيب الكاميو يهز الرحيل ... نجي نلقا كلشي مجموع (شاف فيهم) تكعدوووو هزو عليا هادشي
خرج من الدار خلاها مقلوبة و الروينة ... اصلا هما ماعندهمش اتات كثير والبكاج زايد .. داكشي غير خفيف ناضو كيهزوها لوسط الدار بزز منهم وحد مكيهضر مع لاخر . ترددات اشراق فالاول لاكن زعمات وقالت
- شكون اللي وصلها لبا؟؟؟ واش نتي؟؟؟
خزرات فيها الحاجة: قطعي حسك ... خنزتيها واش كيحساب ليك مكاين اللي يوصلها ليه؟؟؟ باز
ردت خليج ببغضب: وا هضري ماتبقايش ديري لينا شغل لعكايز .... هضري نيشان
غوتات لاللة نزيهة : ماتغوتيش عليا الله ينعل اللي ميحشم ... شنوووو بغيتي يقول ليه شنووو قال ليه اجي شوف معايا حريرة دبنتك اللي خرجوها البولس مع ولدي ... ياك طلقنا ياك سالينا ياك صافي شنو بغات علاش غادية عندو للدار ؟؟؟ .... باك ماعجبوش الحال ... بقا هنا غير كيشوف بغا يبكي ... بقا غير كيدي ويجيب فراسو واش هادشي اللي بغيتو لباكم ... يمسحو ليه الناس رجليهم
قطعو الحس بجوج معاودوش الهضرة وخرجو الحر فداك الرحيل وجمعهم الحاج فكاميو واحد ... حيد ليهم سوارت طموبيل وسوارت الخرشاشة ووصل كولشي للدار والاتات اللي صالح داه للمحل يبيعو
دخلو للدار اللي شحال ما دخلو ليها ... شافو فيها بحال الغرباء وجلسو كيشوفو فبعضياتهم ... حس الجد والجدة مكيضورش ... طبعا مغيضورش تما حيت مكاينش اللي يخدمهم .. يطيب ليهم .. يوكلهم ... يصبن ليهم ... يهزهم على كفوف الراحة ... خاصهم مرة تقوم بيهم ... وملي مابقاتش المرى .. اضطرو يمشيو عند واحد من ولادهم ... لاكن خسارة ... كن كانو يفهمو ميدخلوش راسهم فالمشاكيل ويكبرو الموضوع ويتدخلو فما لا يعنيهم ... هادي نتيجة التدخلات ... كرهو المرى وبناتها وماحسبوش باللي كيخرجو الزربية اللي هازاهم من الدار ... كانو يشوفو كلشي واجد ... معارفينش كفاش حتى وجد ... كانت تبان ليهم لاللة نزيهة متعرف لوالو .. وبناتها ميسواو والو ... مافخبارهمش باللي هما المعلقة اللي كتوصل ليهم الماكلة للفم ... مافهمو هادشي حتى خوات الدار .. وخواو معاها الطناجر والطباسل ... وتجمعو فيها حوايج الصابون كي الجبال ... و خماجت فيها الماكلة فالتلاجة وعطات ريحة الخنز ... شكون يمد ليهم كاس دالماء؟ شكون يفرش ليهم فين ينعسو ... شكون يوجد الفطور ويسمع الهضرة من لفوق ... كان كيبان ليهم كلشي كيتحرك بوحدو ويوجد بوحدو ولاللة نزيهة واكلة رزق ولدهم . ولاكن رزق ولدهم فمرتو وبناتو ... وفاش تقطع الرزق خلاوه ومشا يعاودو نفس الشيء مع مرت ولدهم لخرى وولادها
فالبلاصة ناضو البنات جمعو الدنيا واخا الضهر مقسوم ... خملو وسيقو ونقاو الدنيا .. على الاقل بلاصة نقية فين يجلسو ... فضلو مياكلو مايشربو غير يدرقو وجههم من قدام باهم ... وحتى لاصال ماقدرو يمشيو ليه تابعين الوقائع غير من تيليفون وقلبهم كياكلهم عليه .
طاحو نعسو سخفانين .. وباليل ناضت اشراق للطواليط بلحس ودازت قدام البيت دباها لقات الباب محلول ... وسمعات شي هضرة خلاتها ترجع من تما للبيت نيشان كتفيق خليج وتعيط
حلات خليج عينيها مخلوعة وناضت جلسات كتشوف فيها بتساؤل وقالت
- ملك شنو واقع؟ ياك لاباس؟
ردت اشراق بخوف: نوضي نوضي .. سمعت با كيقول لماما غادي نزوج خليج للمفضل ولد عمو ومغاديش نقولها ليها
خرجات خليج عينيها: مفصل!!!! اويلي شكيخربق باغي يزوجني لواحد عروبي مكيعرف حتى يهضر
اشراق: اااه قاليها هوا قابل عليها بالولد و هي صافي ولدات ولدها ... هوا مكيودلش قبل عليها ومكاين اللي يقبل عليها من غيرو
خليج: مكاين اللي يقبل عليا من غيرو !!!! ... واش با تسطى!
عماد: يسد لاصال!!! وفوقاش اختي قلتي ايت هادشي بااسلامة انا اول مرة نسمعو
خليج: دابا سير لاصال دغيا انا غنعيط ليهم تما قبل ميوصل ليهم يدير شرع يدو ... سير من بعد نفهمك ... مهم نتا راك كريتي من عندنا لاصال وكتخلصنا للشهر وصافي وحنا ماعندنا حتى علاقة بلاصال دابا رجع ديالك .. باش ميسدوش
عماد: صافي عاد فهمت انا غادي
تكمشو فالدار كل مرة يعيطو لاصال .. اما لاللة مزيهة قلبات وجهها عليهم مكتهضرش كاع معاهم .. كدوز قدامهم بحال الجارة وهما غير جلسين وكيشوفو فيها وحاضين التيليفون ... مرة دخل وحدة للبيت مرة دخل لخرى . حتى صونا عماد
خليج: الو شنورتي؟؟؟
عماد وصلت لقيتو تما ... هضرتي مع الناس اللي خدامين تما ؟ حيت سمعتهم كيقولو ليه تسنا هاهوا جاي مول الشيء
خليج: اه اه زيد ويد ايوا؟
عماد: وصلت لقيتو تما قال ليهم خرجو كل واحد يمشي بحالو وبغا يخرج الناس من لاصال والحمام ووقفتو قلت ليه سمح ليا الشريف واش كاسن شي مشكل وكدا؟ قالي انا مول الشيء صافي سدينا وسالينا اللي عندو شي دار يمشي ليها . قلت ليه سمح ليا راه انا مول هادشي ... بقا كيغوت فالاول ..هضرت معاه بشوية قلت ليه راه كريتو منعندهم هادي شهر ... كانو فميزيرية ودابا كراوه ليا وبيناتنا كونطرا وكدا مهم بقيت عليه بالهضرة مالقا ميدير وخرج معصب ... عاودي ليا دابا شنو وقع
تنهدات وبدات تعاود حتى شحفات واتممت ب..
- دابا حسم فأمري بغا يزوجني لواحد لعروبي بزز مني .. مهم لاصال ماعمرني نعاود نشوفو الى تزوجت بداك لعروبي
رد مصدوم : شناهوا!!! تزوجي !!! (بغضب) شتي .شتي اخليج ديما كنقول ليك نتزوجو برااااكة علينا من التزنديق براكة عليك من طيران ... عييييت تابعك بهاد الزواج ونتي ماعرفتش اشنو باغا ؟ كتجيبي السبة بااواليدة
- يا ربي دير ليا شي تاويل ديال الخير فهادشي يا ربي
سمعات الصدع لتحت ونزلت كتجري .. مع النزلة حلات الباب لسقات موراه بالعافية دباها اللي بخ عليها حتى هي كيغوت على صال وهما ساكتين .. هز صبعو كيتحلف عليهم وحرم عليهم السطح يشوفوه وخرج مشا للمحل ديالو خلاهم كيبرقو .
خليج بغضب: الفضيحة الى مساقوش ليها الناس لخبار ماتسماش فضيحة ... بغا كلشي يعرف شنو واقع لينا ؟؟؟ كل شوية تجي جارة كتسول على شنو واقع تفو
ردت الحاجة من الكوزينة : معارف حد شنو واقع ها العار سكتونا
اشراق: كوراه عاودها لاعائلة
الحاجة : داكشي اللي بقا نيت غير يعاود ليهم شنو وقع بفمو ... نتي منسمعش حسك بعدا المنكر فيك لاسق فيك خاصك تحشمي تشوفي فينا
اشراق: انا مادرت والو باش نحشم الباطل نزل عليا مادرت حتى حاجة
لاللة نزيهة : اسيري عطييني التيساع
ردت بلا متشعر بغضب: انا غادي نخوي ليكم هاد الدار وهاد البلاد غنمشي لكندا كااااع تهناو مني
ضحكات الحاجة : اه بقات ليك غير كندا تمشي ليها .... جبدي هاد الهضرة لباك .. جبديها وسمعي اش غيقول ليك ... كندا هي اللي غتمشي ليها للشاون
قالت كتسوط غادية للبيت: غنهاجر دابا تشوفو... والله حتى نهاجر ... غندير الهجرة وتما غنبقا (بدات تبكي) الى مادرتها راني منتسماش ، عيت نسكت ليكم وانا مدايرة والو
ردت عليها من لكوزينة : نتي غير سكتي اكبيرة المنافقين ... نتي مكدماها حتى وحدة فيكم ما فيها النفع
بقات الحاجة وخليج عطيني نعطيك اما اشراق مشات كتجري للحاسوب حلاتو بالغدايد ودخلات الموقع كتقلب وتبحث حالفة حتى ديرها واللي بغا يصرا يصرا
فهمات داكشي علاش قدات وعمرات الطلب وسيفطاتو ليهم .. واخا خدا ليها وقت طويل ودا ليها النهار باش تفهم وتبحث وتقلب لاكن دارت جهدها وتراجعات اللور . دازت العشية فصمت بحضور الحاج .. ماخرجو ما طلو على الزنقة حتى طاح الضلام وكل واحد مشا ينعس .. عسو على الحاج بالليل حاضيينو كيتسنطو ليه وفعلا جبد الموضوع مع الحاجة واشراق وخليج فالباب طالقين الودن
- الحاج : غدا نشاء الله مع العاصر غادي نشد الطريق للعروبية ... عيطت بلمفضل قلت ليه غنجي وجد ليا البلاصة ...
الحاجة : والى متبغاتش؟
الحاج: ماهي بنتي ما نا باها .. فاش يجي معايا المفضل وتقول لا ديك الساعة عليا بليمين الى مشركت ليها الورقة من الحالة المدنية
تنهدات الحاجة: لا حولة ولا قوة الا بالله
بقات اشراق كتشوف فخليج .. وخليج كتشوف فأشراق مخلوعين ... رجعو البيت كيتفتفو وهزات خليج تيليفون بسرعة تاصلات بعماد بلهفو وخوف
دارت يدها على فمها: اويييلي اعماد بغيتي ننصدم فيك ياك بغيتي نتصدم فيك .. با غدا غيمشي مع العاصر للعروبية الى مشا مشيت فيها انا
عماد: ومالو على هاد الزربة مالو ؟؟؟
خليج: شوف شنو دير اعماد .. انا غدا الى ماجيتيش غير نساني واخا تجي بلا مك مهم اجي
عماد : الوليد مقال والو ولاكن ناض صدع كبير فالدار و والواليدة سخفات لينا واحد الحالة وصلنا ليها مافيها ميتشاف
خليج: انا اللي فحالة مافيها ميتشاف دابا ..شوف .. غدا . غدا الى ماجيتيش صافي نسا شي وحدة سميتها خليج
قطعات عليه وجلسات كتبكي ويديها على وجهها وتقول في حيرة
- شنو ندير انا دابا شنو ؟ شنو ندير
اشراق بقات ساكنة مهبطة راس ماقدرات تفوه بحتى كلمة ... عارفة راسها هي اللي حرمات على راسها وعلى ختها الحرية والحياة اللي كانو عايشينها .. دابا العذاب والتوثر اللي عايشين فيه اعمق بكثير مللي كانت كتعيشو بوحدها وحياتها وحريتها بين يديها وهي معارفاش بقيمتها ولا عاطياها اهمية .. حتى تسلبات منها عاد بانو ليها المعانات والكهف المضلم ديال بصح
صبح الحال وكأنه ضلام كحل ..اسوء صباح صبحو فيه تمناو لو ماطلعش الصباح . الفجر كيأذن وهما فالزنقة متنكرين حدا طموبيلت الحاج اللي حدا الدار .. حلو الباب بشوية ولعبو ليه فيها من لداخل ومن برا .. وحتى سيارة خليج طلعو لعبو فيها باش ميفكرش يمشي فيها ... اما الخرشاشة فشو ليها الروايض ورجعو كيتسلتو حطو السورات فين كانو محطوطين ومشاز كينهجو للبيت حتى ناض الحاج والكالعادة فطر وخرج
ناضو كيطلو عليه حاضيينو ورجع معصب للدار كيغلي ويسب فاللي دار ديك الفعلة ونزل كيسوط ناوي يديهم يصايبهم .
تنفسو اخيرا الصعداء ودخلو للكوزينة كيحاولو يسلو لاللة نزيهة اللسان لاكن ما خداو منها حتى نتفة .
وهما كيشقاو كل وحدة شنو كدير رن نيليفزن فطبلية دالشقا وجاوبات فالبالكون بخفوت
- عماد!!!
رد بالنفخة : هانا جاي عند باك
برقو عينيها : لعاااار!!
عماد: قولي لباك غنجيو فلعشية مع العاصر
خليج: حلف!!! عنداك تقولبني
عماد: بصرامة) هضري مع باك عنداك يحشمنا هانا وصيتك
خليج: لالا غير كون هاني
قطعات ومشات كتجري عند الحاجة اللي كتوكل بيازيد وهوا كيغوت ويلعب ويكركر وهي كضحك معاه
- ها وليدي حبيبي هاممم ... كول هادي احبيبي كول
خليج: مااامااا ماماااا شوفي عيطي لبا داااابا يجي قوليه راه غيجيوني الخطاب ليوم
دخلت لاللة نزيهة للكوزينة لقاتهم بداو التوجاد والطيران ... دغيا شعلو الفران وبدا الطياب وبدا التوجاد .. دارت يدها على فمها كدور راسها وماحطاتش يدها معاهم .. وحتى خليج ماطلباتش منها .. مشات جبدات الصالة ولمطات وجفات ومسحات ونقات ردات الدار كتشعل .. ماجا فين يوصل الحاج حتى لقا الدار تبدلات كتغمز ليه وريحة الطياب كتعطعط من لكوزينة ... دور عينيه للصالة لقاها خاوية حساب ليه فيها الضياف ومشا للبيت عند الحاجة وتبعاتو خليج كتسلت موراه تسنط والفواطة على كرشها
الحاج: اش واقع؟ جاي شي حد؟
الحاجة: جايين عندك الخطاب ... هانتا دابا كن سافرتي كن بقيت انا مني ليهم .. جاب الله مامشيتيش ... كل توخيرة فيها خيرة
الحاج: غيخطبو شكون؟
الحاجة : خليج
دور راسو: اممم ... هي سمعاتنا شنو كنا كنقولو
هزات الحاجة يديها : تسمع ولا متسمعش ... ياك بغيتي تزوجها باللي يقبل عليها بالولد ... ها هوا جا بخاطرو ... حسن ما كنتي تجيب المفضل لهنا ويوقع الصدع وهي متبغيش وتنوض شي فضيحة ما خصناش كاع بيها وبشي مشاكل .. صافي هزها منين خفافت
الحاجة: واش خليتي فيها شي نهار ؤاه سمعااااتك دابا وناضت دارت شرع يديها غير سكت .. جايين عندك الناس دير الخاطر و صافي . ولاد ليوم كلشي كيديروه مزروب
دقو الخطاب وحل ليهم الحاج عبد الغني بالجلابة بيضاء وطريبيش بحال الرزة بابتسامة ... غير شاف عماد قدامو هاز الورد وجمع الضحكة شاف فيه باستغراب ومع ذلك رحب بيهم ... دخل حاذر راسو بالكوستيم و معاه باه راجل كبير باين عليه الوقار ولحيتو بيضاء ومعاهم مرى بالحجاب انيقة والجلابة والحجاب ابتسمت فوجههم ودخلو للصالة جلسو مع الحاج وخليج كطل عليهم وتفرنس واشراق حداها حتى هي كتفرنس .. الحاج ما فهم والو بقا غير كيشوف فيهم .. دخلات عليهم الحاجة هازة بيازيد على مزيناتو ملبسينو سالوبيت دجين وسبرديلة والشعر كحل رطب كيدور فعويناتو .. سلمات عليهم الحاجة وجلسات معاهم وبيازيد كيتركل ليها فيدها ويعرنن وطلقاتو نزل وقف مع الطبلة كيتمشا بزز ويلوح رجليه
الحاج: السي ... عماد اللي كاري من عندنا لاصال ياك؟
شاف فيه باه : شنو ؟
رد عماد بارتباك : هاه!!! ايييه السي الحاج ... ولاكن ماشي خدمتي هاديك انا مدير فلابونك
الحاج : اممم ... مزيان .
تدخلات السيدة بابتسامة : الى قبلتو علينا ... جينا نخطبو بنتكم الخاريج لعماد
عماد : احمم خليج خليج شداك للخاريج
ردت بخفوت: كي الخليج كي الخاريج حيد عليا تعلمني نتا عاد نهضر !
الحاج: مرحبا مرحبا ... الى كانو الدراري مفاهمين ... مانزيدوهم غير لخير والاحسان
وصل بيازيد لرجل عماد وكان اول مرة غيشوفو مباشرة بعد التصاور اللي وراتو خليج فتيليفون وبدا يشد ليه فرجليه وهزو كيضحك معاه ويلعب .. ناضت الحاجة خرجات لقات خليج لبسات وقادات وكحلات وريحات وواقفة قدام الصينية ديال الثمر كتسنا دخل
الحاجة امهه.. حياني عليك .. سيري دخلي عند الناس يشوفوك راه يحسابهم جايين يخطبو شي دولة
خرجات هازة البلاطو دخلاتو ليهم بابتسامة دورات عليهم التمر و حطاتو فوق الطبلة بدون ارتباك بل جاها الامر عادي وقالت بابتسامة كتعيط على بيازيد
دورات خليج وجهها ودارت رجل على رجل كتميع بفمها ويدها على شعرها وقالت بخفوت جهة اشراق
- مريضة كتموت مسكينة .. مقادراش تنوض
ابتاسمات خليج بمجاملة كتشوف فيهم ساكتة وهما كيهضرو كما العادة .. نقاش كل خطوبة ما هضرو على صداق ولا على والو بلعكس داز التعارف مزيان والمسائل الشخصية بقات بين خليج وعماد . تافقو على العقد فأقرب وقت ممكن وداز كلشي فاحسن الاحوال وركبو الخواتم وسالات الحفلة كل واحد مشا بحالو وخرجات منها خليج فرحانة كملت جموعها فتيليفون معاه في حين متكية اشراق فالبيت بالليل ويدها على خدها كتخمم فمصيرها . فجاة صغرات عينيها وجبدات تيليفونها الثاني ودخلات كتجري تيليشارجات تيندر فيه وبدات تقلب على حساب علي وتذكر شنو كان زايد حدا الاسم حتى لقاتو وبعتات ليه طلب مرافق بمسج
سلام علي لاباس عليك استريلا لاباس عليها كلشي مزيان ؟ انا تسرق ليا تيليفوني مشا ليا كلشي عاد شريت تيليفون وحتى ديك النمرة اللي مشات صافي بدلتها ودرت وحدة اخرى .. اشنو كتعاود كي داير مع الخدمة واستريلا لاباس عليها ... الحساب الاول ديال تيندر راه سمحت فيه حيت مابقيتش عاقلة على الكود ديالو هادا جديد .. عرفتك غادي تشوش وتقدر تصوني ولا شي حاجة مهم هادشي اللي وقع .
بعتات المسج و عاودات سيفطات مسج من رقمها
- كوكو علي لاباس عليك استريلا لاباس عليها هادي نمرتي الجديدة راه سيفطت ليك مسج من تيندر حسابي الجديد .. بدلت كلشي حيت مشا ليا تيليفون .
بعتاتو وجلسات قلبها كيضرب وكتعض على شايفها خايفة يشك او يعيق ويرد عليها بشي جواب محرج يزيد يأزمها كنر ما هي مأزمة . تسنات خليج حتى هي تسالي من تيليفون وتجمع معاها شوية لاكن الاخيرة شدات الهضرة خطرة وحدة وبقات اشراق متكية كل مرة طل على تيليفون . وباش ميشكش فأمرها او يبغي يتأكد من شي حاجة بلوكات تيندر فخطرة وحدة من هاتفها الاخر وبلوكات اي حاجة كتعلق بالتواصل ديالها معاه وطفات رقمها حتى هوا ..على الاقل حتى الى صونا فيه يلقاه طافي .
دها النعاس على الانتضار وخلات تيليفون حداها محطوط منسوط حتى صبح الحال وحلات عينيها بتتاقل .. تلفتات كتنهد بالهم اللي بايت معاها الليل كامل وسهات قدامها .. حولات نضرها بتتاقل للتيليفون وهي تذكر المسج ودخلات وهزات تيليفون بسرعة طلات على المسج مالقات والو ودخلات لتيندر بسرعة لقات علامة من المحادثة ديالو واصلاها .. الشيء اللي ذل على انه جاها الرد ودخلات بلهفة تشوف المكتوب
بنسواغ اشراق . الاحوال الحمد كلشي مزيان وكلشي غادي على مايرام ، ماتحتاجيش تبرري نتي كما سبق قلت ليك حرة مامجبوراش تجاوبيني ولا والو اوك ، حياتك ونتي حرة فيها.. كنعذرك عندك مشاكل فحياتك ولاكن صفي حسابك وصفي نيتك ماشي كلشي بحال بحال . كنتمنا ليك السعادة تهلاي فراسك .
وقفات ليها غصة فالحق مابغاتش تهبط ليها او تبلع وبدات كتقرا وتعاود مارضاتش و مكانتش متوقعة يعيق بيها ، مافهماتش شنو بغا يقصد بين سطور رسالتو بالضبط لاكن مابغاتش تستسلم عاد مازادت فإصرارها تصلح الوضع من بعد ما شافت ردو وكتبات ليه
- الى كنتي فاتح دابا فتح لاكام .. غنشرح ليك الوضع انا متأكدة غادي تفهمني .
بعتات المسج وهي جالسة كتشوف فيه حاضر وماردش الجواب .. زادتها مرضة اخرى على المرض اللي مريضاه بسبب موقفها اللي هي محطوطة فيه وكتشوف فيه بعينيها والعلامة ديال الوجود دياله كاينة .. عيات تسنا فالرد سادة عليها الباب حتى بغات تبكي ودخلات عليها خليج قائلة
- يالاه معايا نخرج واحد الورقة
ردت وكتفها كيتهز ويتحط وهي مخشية فالفراش
- مافياش غير سيري
خليج: وا نوضي راه الضهر هادي
تقلبات جنب مابغاتش تنوض وكل شوية طل تلقاه مزال كاين .. عيات تسنا وتفقص وتلوم راسها فالاخير ناضت جلسات لوات عليها الشال وهي يالاه فايقة ودوزات يدها على وجهها شوية صحصحاتو وبعتات الكاميرة لاكن حدفها .. عاودات بعتاتها وحدفها مرة اخرى .. فجأة خرج من الحساب فمرة سدو مابقاش كيطلع ليها وهي تزدح تيليفون بغضب وبدات كتبكي ويديها على وجهها مكمشة
جلسات اشراق كتسنى فالرد وتصوني حتى شبعات وتيليفون طافي .. دوزات النهار كامل فالدار مكتهضر مع حتى واحد حتى تعاشات العشية عاد رجعات خليج حلات الباب سخفانة وهي تعرض ليها كتجري
اشراق: مالك مكتجوبيش
قالت كتنهج قبل متجلس: حسبي الله ونعم الوكيل .. بسباااابك سرقو ليا تيليفون من ودني ... (جلسات) قيالة فالكوميسارية ... ديك الكوميسارية ترشمنا فيها صافي ولينا من العائلة ... غير دخلت كلشي بدا يسلم عليا كرهت ديك الكةميسارية ومايجي منها ... نهار نباتو فيها نهار نديكلاريو
اشراق: سرقو لك تيليفون
شارت ليها: بسباااابك ... بمسبتك مشا ليا بقيت كندور كي الحمقة فالسطافيط كنقلبو عليه فديك القنت كل مرة نازلة طالعة منها .. فاللخر نزلت حدا لاصال مشيت نشوف شنو واقع تما
رجعات للبيت وسدات عليها جبدات تيليفون ودخلت كدور وتسناه حتى دخل وني تبعت ليه كاميرة لاكن حيدها مرة اخرى وبعتات ليه مسج
- جاوبني ضاروري مهم جدا جدا جدا
سيفطات ليه الكاميرة وهي كتقاد الفولار .. تفاجآت بيها تحلات اخيرا وبان جالس قدامها عاقد حجبانو وقال وجهه كيشرب فالقهوى فالدار بتيشورط وكيهضر مع استريلا . ابتاسمات وقالت
- كي دايرة استريلا
مشافاش جهتها وهز حواجبو كيشرب من القوى ويتفرج فتلفازة وهي كتشوف فيه بأسى وقالت بتردد و خجل
- علي ... انا ... انا عارفاك مقلق مني ... وعندك الحق تقلق
صغر عينيه كيشوف فتلفازة كأنه مركز كيشرب القهوى ما دورش عينيه نهائيا
غادي نعاود ليك شي حوايج وقعو ليا ومغاديش نكدب ليك ... وقبل غادي نطلب منك السماحة هي اللولة .. سمح ليا بزاف انا غلطت فحقك ... كنتمنى تسمح ليا .
هبطات عينيها والدموع محجرين وبدات كتعاود ليه من الاول حتى للاخير بالتفصيل .. من اول يوم عرفات فيه طه للحضة اللي هي جالسة فيها قدامو .. ومنسات حتى حاجة وبصدق حكات ليه الاسباب والعلاقة والمشاكيل كاملين وبدات كتبكي فصمت .. كان فالاول مكيشوفش فيها ومكيتأثرش لاكن فاش سالات وهبطات راسها كتبكي تلفت شاف فيها وتنهد .. سكت شوية وقال بعد تفكير
مسحات عينها وقالت: انا ماستغليتهاشش باش نبرر ليك ولاكن الى جيت قلت ليك السبب طه وباللي بلوكيتك على قبلو مثلا مغاديش تفهمني ومغتفهمش طه وعلاقتي بيه فهمتي دابا علاش انا عاودت ليك قصة حياتي
رد بوضوح: كل واحد عاش ضروف فشكل فحياتو وكما نتي كتبغي طه راه بزاف دالناس كيبغيو وحدين اخرين وكتر وكاين اللي مريض مسطي كاع وكاين اللي نتاحر ... نتي .. وو.. وسمح ليا نقولها ليك مافارضاش الوجود ديالك بصفة نهائية كتخلي اللي جا يتحكم فيك ويقرر فبلاصتك .. مغاديش نكدب عليك حيت هادشي كبر رجع بين الصحاب ! نتي كان عليك تخلي علاقتك بطه فجهة (كيفسر ليها بيديه) والعلاقة اللي بيني وبينك فجهة... مكنرميش واحد الانسان باش محتافضو بواحد الانسان اخر .. عندنا علاقات فهاد الدنيا كثييرة مع ناس مزيانين مكاينش علاش نحدفوهم باش وحدين اخرين يبقاو على خاطرهم ... الى جينا نحدفو كلشي على قبل انسان واحد راه غنبقاو بوحدنا .. غتبقا حياتنا معتامدة على شخص واحد .. نهار يمشي غتمشي معاه الحياة حيت خليناه عماد لحياتنا برضانا ... وفاش غندورو نشوفو حدانا مغنلقاو حتى واحد يواسينا ولا حتى يعاتبنا . نتي درتي غلط .. تحملتي مسؤوليتو وماتقوليش ليا غلطت ... الغلاط مور غلط راه ماشي غلط ونتي حسب ما عاودتي غير غادية وكتغلطي وضربي شي بشي وتخلطي شي مع شي .. (غمض عينيه كيسوط ودور وجهه ورجع قال بهدوء) مهم ... سمحي تعصبت شوية ... ماعلينا كيوقع هادشي والاعتراف بالذنب فضيلة
ردت: فرونسي شوية .. مهم عادي حيت هنا مكنهضروش بيها مامطلقوش ليا اللسان مزيان راك عارف وديبلوم لي عندي هوا الاجازة فالقانون
رد ببرودة: القانون المغربي ماعندو باش يفيدك هنا وديبلوم ديالك مغيخدمش ليك ... باش دفعي للهجرة على الاقل يكون عندك ديبلوم اقتصاد ولا هندسة ... ديبلوم اللي يخدم ليك انتيرناسيونال .. ماشي ديبلوم دولي .. القانون ماغاديش يفيدك بشي حاجة... علاش متجلسيش تما وطوري من راسك ... شنو غادي ديري هنا؟
بقات ساكتة كتشوف فيه مطولا بنضرات غريبة وقالت :
صافي شكرا اعلي ... سمح ليا صدعتك وخديت من وقتك
رد : ماشي مشكل مرحبا
اشراق: بسلامة عليك خاصني نمشي .. شكرا على النصيحة
ابتاسمات بمجاملة وسدات الحساب ودورات وجهها كتبكي ... كتبكي على راسها اللي حنات باش طلب السماحة وعلى ردة فعله اللي وقفات ليها فالحلق ماتقبلاتهاش وحسات بالنقص .
ناضت كتخمم وتفكر بلا منحس بالوقت .. خي غارقة فتخمامها وخليج غارقة فوراقها ... جري عليا نجري حتى للنهار ديال ضريب الصداق وجمعو كلشي فنهار واحد
الزغارت فالدار .. البيت عامر وخليج جالسة بتكشيطة ولايحة شال على راسها وحداها عماد فرحان بلكوستيم كيوقع على الكتاب وحداه خليج حتى هي وقعات وبداو الزغارت والكل فرحان حتى اشراق فرحات لختها .. اخيرا تزوجات ورتاح عليها الحاج عبد الغني والحاجة نزيهة ... هزو راسهم لفوق بافتخار فرحانين وسط العائلة وهما كيحتافلو .. تحط العشا والحلوى وجا وقت المغادرة ديال العروسة مع عريسها .. وفالبيت كتلبس جلابتها البيضاء وقفات حداها اشراق قربات ليها الباليزة وقالت
- شفت مو كاع مابانت ؟
خليج: لهلا يبينها ماعندي مندير بيها هناتني باش حتى انا منمشي عندها وهي متجي عندي
اشراق: واسيري سيري تعطلتي عليهم ...بيازيد غيبقا معانا حتى دوزي شهر الكسل ديالك نتي وياه
خليج: تهلاي بلا منوصيك انا مشيت
جرات الباليزة ديالها وباها كيفرش ويغطيها بالرضى حتى خرجات وسدو الباب .. بقات الروينة كلها لاشراق مانعسات حتى جمعات الروينة كلها في حين كلشي مشا ينعس وجلسات تجمع الكوزينة .
مع موسيقى هادئة فبيت كبير .. جهدات الصوت ولوات الخصر يمين يسار وهزات شعرها فالسما بيديها كتلوى وعماد جالس فوق الناموسية حال فمو حتى دفعاتو من كتافو كضحك جابتو على ضهرو .
خرجات من الكوزينة كتمسح يديها من الماء ودازت حدا باب واليديها سمعاتهم كيهضرو ووقفات كتسنت
- الحاج : بقات غير اشراق ... نزوجوها وهاحنا تهنينا
الحاجة : ولمن غتعطيها !!! للمفضل؟
الحاج: ومالو المفضل ماشي راجل ... حسن ليها
دارت يدها على فمها داكشي للي خاقت منو طاحت فيه فعلا . دخلت لبيتها حدا بيازيد وسدات عليها الباب وجلسات كتبكي فصمت وتقلب على شي حل راسها وتخرج راسها كما خرجات خليج راسها
صبح الحال اشراق باقا فايقة حالة عينيها .. ماداقت النعاس ماشافتو .. خرجات من البيت مكتهضر مع حتى واحد مشات للحمام غسلات وجها وخرجات عند مها قائلة
- بابا باقي ناعس؟
لاللة نزيهة : مشا للمحل ... غادي نخملو الدار ونصبنو الزرابي يالاه نطلعو هادشي للسطح .. نحيدو الخوامي والطلامط من الطريق
اشراق: مافيا اللي يخمل لبارح ماجلستش من هادي لهادي
الحاجة: كلشي ترون وكلشي خاصو يرجع لبلاصتو ... باك راه غيجيب واحد الفطوي جديد غادي يدي هادا يبدلو ليه الغلاف ولا يشوف شنو يدير ليه
تنهدات اشراق : خلي حتى لغدا
الحاجة: غدا غيمشي للجبل
حلات عينيها: الجبل؟؟ علاش شنو عندو فالجبل!
الحاجة: عندو شي شغل تما
تزاد الزايد مع اشراق ومشات غبرات كتفكر وتفتف وتجمع هي والحاجة بلا عقل بلا تفكير .. النهار كامل وهي فالتخمال والروينة والعقل طاير حتى لكاسكروط وجلسو رتاحو
حطات الحاجة الكاس ديال اتاي وقالت
- ديك مو اللي مجاتش لا نهار الخطبة لا نهار ضريب الصداق .. فيها شي حاجة
ناضت لاللة نزيهة لبسات حوايجها وخرجات .. حدها سدات الباب طارت اشراق من بلاصتها بدون شعور حلات الحاسوب وجلسات قدام تيندر على امل يمد ليها علي يد المساعدة ...شكون غادي يفكها ويعاونها ؟ شكون غادي يوقف معاها فهاد الوحلة اللي ماتبغيها لحتى بنت . هنا وقفات على هضرتو مليار فالمية ملي قال ليها مخاصناش نفرطو فالناس المزيانين اللي دايرين بينا .. ومافيها باس نديرو اصدقاء ومعارف مقربين غيجي نهار نحتاجو فقط اللي يواسينا ولا اللي نشكيو عليه ونبدلو عندو الجو ومنلقاوهش . وفعلا طاحت هي فموقف لايحسد عليه ... لا اصدقاء لا اقارب لا حتى واحد كتعرفو يعاونها او يقلب معاها على حل على الاقل ... الحبل الوحيد اللي بقا ليها هوا علي واخا فكل مرة تهضر معاه كتحس بالدل والنقص .. لاكن هادا ثمن كدفعو فميبقاش فيها الحال .. هادا ماحصدات وهادا ما كتجني من ارضها . زرع الشر تحصد شر .. زرع خير تحصد خير .. عارفة انها كتحصد الشر حاليا لاكن فنفس الوقت كتصلح غلطها وكتحاول تزرع المحبة من جديد على امل تحصد محبة
لقاتو فاتح .. وكالعادة ديما فاتح يمكن ليها فاي لحضة تبعت رسالة وطلع ليه كونه مكيحديش الانترنت من الهاتف ديالو . ترددات فالاول وعضات غلى شفايفها ... كفاش غادي تعامل معاه ؟ هي لحد الساعة معارفة والو على طبعه او شخصيته .. كل ما شافت منو كيبقا تعامل عام مع جميع الناس .. سبق ليها بالخير وشافت منو وجه الخير وتفاهمات معاه ... ولاكن من بعد اللي وقع ... واش تقدر تفاهم مع وجهه الثاني ... واش تقدر تقنعه يعاونها ... وشنو هي الطريقة اللي تستعمل مادام منفعش معاه الراس المحني ووالاعتذار ؟ اشنو اللي يخليه يتعاطف معاها من جديد ويمد ليها يد المساعدة او على الاقل ينصحها بشي نصيحة او يعطيها حل للورطة اللي هي فيها . كفاش تقدر تعامل مع علي الثاني اللي يالاه عرفات وهي ماعندهاش فكرة عليه من غير الوضع الاول اللي كانو عليه .. اما دابا الوضع تبدل واكيد حتى الوجه تبدل معاه
علي ... ممكن نهضر معاك
بعد مهلة : ... انا فالخدمة اشراق
ردت وسنانها كيغززو شفايفها وقلبها كيضرب بسرعة .. متوثرة ومرتابكة وخايفة يخيب ضنها اللي هوا اصلا خايب وكتسنا شي تغير يوقع واخا الباب مسدود فوجهها
اصرت تبعت الكامرة مرة وجوج وثلاتة حتى قبلها .. لوات على راسها الشال ووجها شاحب من قلة النعاس وملامحها متعبة جدا كأنها فيها شي مرض
تفتحات الكامرة وبدات تسمع ضجيج الكلافيي والتيليفونات كل مرة كيصوني واحد .. بان ليها جالس بالجنب لابس قميجة رماضية مزيرة على عصلات صدرو ويديه وربطة عنق راخيها شوية .. شعر اسود ممشد والزاج مضبب داير بيها فالاتجاه اللي كيبان ليها والاضائة قوية . تلفت ببرودة وقال
- نعام اشراق؟
بقات ساكتة كتشوف فيه بأسى .. شوية بدات كتبكي ويديها على وجهها وهوا كيشوف فيها فصمت . زادت تفقصات مللي شافتو برك على زر قطع الصوت وهز راسو لشي واحد دخل عندو للبيرو وبدا كيهضر معاه ويقلب فالمجر ، هي فالتوش كتبكي على خاطرها شيء اللي زاد مرضها وتنخصصات حتى عيات وهبطاتها بجغمة دالماء .. وجهها حمر ونيفها كيسيل كل مرة تمسحو بمنديل . مد ملف للشخص اللي قدامو خرج وتلفت عندها قائلا بهدوء كأنه لا يهمه الامر .. ما قال حتى كلمة تواسيها او يهدىء من روعها .. كانه مولف يشوفها تبكي ورجع عندو الامر عادي!
- علي: شنو واقع اشراق؟
قالها ويدو فيها الستيلو كيكتب ويكاشي .. خدام هنا وهنا كأنه كيتعاود النكت .. لاكن شنو المعمول؟ شنو فجهدها دير ؟ تهز راسها ودير فيها عزة نفسي ؟ تقطع عليه بما انه غير مكثرت ؟ وراه دارتها من قبل وكان ردو بارد وماستافدات والو ! شنو فكل مرة تعاودها.. الغرور والعجرفة سالا وقتهم ومابقات ليهم نتيجة حاليا .. والى جربات تعاودها فهي اللي خاسرة وهي اللي يدها فالعافية ماشي هوا .
ردت بأسى مهبطة راسها : انا فمشكل كبير اعلي ... ماعندي معامن نهضر ... ولا معامن نتشاور
رد ببرودة كيشوف فالاوراق : وطه فين مشا ؟
تزيرات من ردو وبقات كتشوف فجنابها كتبلع ريقها وقالت
تلفت بهدوء شاف فيها كيحرك راسو بالايجاب وبهدوء مد يدو ماعرفاتو اش غيدير حتى قطع عليها فخطرة خلاها جالسة كتبكي وتغوت بوحدها وتعض المخاد من حر الفقصة وتنفض وجهها بالغدايد حتى عيات وتكات لور سخفانة كتبكي بوحدها وتنخصص .. حتى بردات وهي ترجع ندمامة للحاسوب .. لاكن مع الاسف لقات بلوك طويل عريض حاطو ليها وهي دير يدها على فمها مصدومة وبدات تبكي وتعصر وتلوم فراسها .. للحضة كرهاتو بتصرفها معاه وزادت ندمات على اللي جابها ليه .. لاكن تواطات وتهدنات ورجعات تلوم راسها وعلى التواضع اللي مابغاتش تواضع .. غلطات تحمل مسؤولية الغلط ... طلبات السماحة ؟ تصبر حتى ترجع المياه لمجاريها ... ماهي الوحيدة فالدنيا ماهي الكل فلكل باش الكل يرضخ لاوامرها بحال العادة ... ماشي اي حاجة شارت ليها بصبعها تنالها . وهنا تعلمات ان كاين اللي ميخسر عليها حتى كلمة .. وماشي اي واحد يصبر ليها ويهز هيبالها ويلقا ليها اعذار كأنها سيدة الكون
هبطات وجهها على المخدة كتسوط في حيرة .. استسلمات لوضعها ورجعات من جديد الحاسوب صايبات حساب جديد باسم جديد وبعتات ليه مسج
- علي انا متوثرة واعصابي تالفة مابقيت عارفة شنو ندير .. شنو نقدم ولا شنو نوخر .. كاع البيبان تسدو فوجهي بابك الوحيد هوا اللي عندي فيه الامل .. رجايت فالله وفيك نتا تكون سبب فكاكي من هاد الوحلة ... انا مريضة ومعصبة وفقدت اعصابي حيت ماعنديش حل لمشكلتي .. رجعت كنتمى الموت ولا هاد الحياة اللي وليت فيها .. سمح ليا مرة اخرى .. كنقولها ليك من قلبي وحشمانة منك والى مابغيتيش ماشي مشكل المهم ماتاخدش عليا نضرة خايبة ... انا فعلا غلطت فحقك وكنعتارف بالغلط ديالي .. ولاكن راحنا بشر كنغلطو وكنتعلمو من اغلاطنا ... سمح ليا بزااف الى طولت عليك ومغنعاودش نصدعك مرة اخرى .. كنتمنى تبقا ديك النضرة الزوينة اللي خديتي عليا نهار الاول .. هادشي اللي بغيت . اشراق
سيفطات المسج وهي مهدودة وميلات راسها للجنب كتنهد بتعب كأنها كتجري مور شي مدالية .. بقات هاكاك حتى رتاحت من تعب المحاولات ورجعات دارت يدها على خدها كتشوف فالحاسوب .. ترددات وتمنات الارض تشق بيها ولا تبع صبعها اللي غادي يندمها مرة اخرى .. لاكن تبعات صبعها وبعتات ليه الكام من جديد وهي كتقفقف بوحدها ماعرفاتها خلعة ولا حشمة ولا شنو .. مخلوعة كأنه غيخرج ليها سبع ياكلها . لاكن تفاجآت بيه فتح ليها الكامرة كيشوف فيها مباشرة من المكتب وهي تحني الراس
تنهدات كتفرد يديها وقالت : انا مابقيتش باغا نزيد هنا الضربة بغيت نجي لتما .. مابقيتش باغا نبقا هنا ... كرهت هاد البلاصة وميجي منها صافي
رد في حيرة: قلت ليك راه صعيب تجي لهنا ماشي اجي وخرجي من المغرب .. الناس راه كيموتو فالبحر ويتخنقو تحت الرموكات باش يوصلو غير سبانيا .. نتي كي درتي ليها بغيتي طيري من تما لكندا بيني وبينك محيط قدو قداش
اشراق: نحرك؟؟ المهم نجي
ضحك بسخرية وقال : تحركي !!! حركي يالاه ... الحريك ماقدو عليه حتى الرجال بشلاغمهم ..بقيتي غير نتي نتي اللي مرى !
اشراق بتعب: راه بابا غيزوجني بواحد فلعروبية بزز مني
علي: مكايناش شي حاجة بزز ... حنا فالقرن واحد وعشرين فين باقي هادشي هادا؟
اشراق: كل واحد وعائلتو وكل واحد فين كبر وكفاش كبر ومعامن كبر .. حنا طبعنا قبيح بزاف وصعيب ومكنقدروش نعصاو واليدينا ا علي ... نتا عارف شنو داز عليا ... حاولت نتاحر بسبب الضغط .. وهربت بسبب الضغط ... حتى لفوقاش غنبقا انا على هاد العيشة .. هاربة وبا ساخط عليا ... عليها مكنطفرو فحتى حاجة .. راه مكنقدرش نهز راسي فبابا واش عارف علامن كنهضر ؟ راه بابا بابا ماشي شي واحد اخر راه غير كيشوف فينا انا وخليج كيندوبو .. واخا نكونو كنطيرو راه ركب فينا واحد الخوف منو والخلعة مكنقدروش نتفنفنو قدامو واخا ماعرفت فين نوصول
دار يدو على فكو وقال : مشكييلة هادي ... هضري مع هاداك اللي باغي يتزوج بيك ... قولي ليه انا مابغيتش نتزوج بيك خليه هوا يرفض
ساطت فجنابها في حيرة : وراه كنيييمة واحد الكنييمة منو مكاين واش حساب ليك غادي نقول ليه لا غادي يقول ليا واخا .. شتي بابا دقة قديمة وهاداك دقة قدم منو .. باقين تابعين داكشي ديال زمان ... واخا متبغيش المرى كيزوجوها بزز منها .. وتنتاحر لابغات ديك الساعة .. راه جبلي جبلي من اعماق الجبل معارف كاع اش واقع فالدنيا واشمن قرن حنا ... غيديني للفران ديال الطين والكشوط نجمع الكشوط على ضهري
علي: شنو تجمعي!
اشراق: العواااد العواد على ضهري .. ومكيولدش من لفوق ! انا مابقاتش كتبان ليا البيوضة فهاد البلاصة ولات تبان ليا غير كندا صافي
رد : وشنو غادي ندير ليك انا براسي ماعندي مندير ليك ... ماعندي حتى شي حل باش نعاونك ... نتي باغا تجي لهنا بأي طريقة وتهربي من تما ... ولاكن راه ماشي غير اجي وطلع كندا والله مكنتفلا عليك
اشراق: وعلاش فالاول طمعتيني قلتي ليا اجي حتى وليت كنفكر فيها
رد فجأة: طمعتك!!! ااه بصح قلت ليك اجي . . . مثلا تبداي شي ايكول تما وتاخدي ديبلوم من جديد دفعيه هنا نعاونك عليه وتجي تكلمي هنا ... هادشي اللي قلت ليك كيطلب وقت طويل ماشي نهار ولا يوماين
اشراق : وشنو دابا مكاين حتى حل يفكني بزربة ؟
رد بالنفي: مكاين حتى حل منكدبش عليك ونطمعك بشي حاجة مكايناش
دارت يدها على خدها ودورات وجهها كتفكر وتلفتات قائلة بسرعة
وماغياج بلون ؟؟؟؟
هز حاجبو وقال : هاا؟!!!
ردت بحماس : كاع الناس كيديروه ويمشيو انا شفت بزاف ديال الناس داروه ومشاو وعايشين تما بيخييير
رد باستغراب: قليل فين كيصدق ماغياج بلون الاغلبية كيطلبو الثمن فيه ... شحال من واحد ووحدة هنا كيتفلاو على الناس وكياخدو الفلوس للناس و يزيدو باش غتعرفي نتي واش غيقطعك البحر ولالا
اشراق : كفاش؟؟!
رد : كتعرفي شي واحد كوفيونص يديرو معاك بلا ميضحك عليك
اشراق: اااه اويلي !!
علي: شكون ؟
اشراق: نتا!!!
خرج عينو فلاكام : انااا!!!! كفاش انا !!
اشراق: نتا ديرو معايا علاش انا غنقلب على شي واحد اخر مكنعرفوش ويضحك عليا !! نتا قول ليا شحال بغيتي .. نبيع حقي كاع فداك لاصال ونجي اش غيعطيني لاصال!
بقا كيشوف فيها مطولا ورجع اللور تكا على الكرسي .. هي كتهضر وهوا داير يدو على جبهته مغمض عينيه وكل كرة يشوف فيها بإحباط
- اشراق : شنو قلتي؟ شحال كيطلبو ؟
تنهد وقال : مشيتي بعييييد اشراق .. هادشي مامسلكش ..
اشراق: علاش شنو فيها ياك غير عقد عمل مثلا وصافي غير نوصل وندير لوراق نفكوه ... نتا عندك الجنسية وخدام علاش ماديرش معايا انا اللي واحلة هنا هاكا ؟ وقلت ليك نعطيك شنو كطلب ... بحال الى غنشري كونطرا من عندك
بقا ساكت كيشوف فيها وقال : كن بغيت ندير هادشي كاع منجلس فهاد البيرو نخدم ... كن راني كنطلع لبنات وكل وحدة ناخد من عندها 10 و 15 و20 .. كوراني لابااااااس عليا حسن من هاد الجلسة فالبيرو من الصباح حتى لعشية ... هادشي ديال تخرويض ماعنديش معاه اشراق نجيك نيشان
مسح على وجهه وقال : راه البنات ديال العائلة كاملين ماكرهوش يجيو لهنا ... واش عارفة الى ساقو ليا لخبار درت معاك ماغياج بلون غادي نخسر مع عمامي وخوالي والعائلة كاملة ... حاولي تفهمي هادشي وحيدي هاد الفكرة من راسك ...
بأصرار : حتى واحد ميعرف يعرف غير بابا وصافي وماما حنا مالنا ومال العائلة !! ... غير بيناتنا ومغيوقع حتى مشكل نشاء الله
سكت حتى عيا وقال : بغيتي ماغياج بلون ؟ انا غنشوف ليك شي واحد كوفيونص يديرو معاك ويجيبك مزيانة !
ردت متفاجأة : شنووو!! لالالا منقدرش نديرو مع شي واحد مكنعرفوش لا
علي: نتي بغيتي عقد صافي فين كاين المشكل
اشراق: بتردد) وشكون غادي يديرو معايا ؟ كتعرف شي واحد ؟ راه خاص يبان فأقرب وقت ليوم ولا غدا ... ولا غادي يصدمني بابا بالعدول حتى لقاهم فالدار
تنهد بنفاد الصبر: انا غنعيط للناس اللي كنعرف ونسول ونشوف .. من هنا لغدا يحن الله
ردت بالنفي : االالالالالا حشومة منقدرش .. والله كن تعرف حالتي من لداخل حتى تمرض... وحتى واحد محاس بيا
رد بهدوء: كلشي درتيه بيديك ... حسبي شحال من موصيبة طحتي فيها وشوفي شكون السبب فيها .. غتلقاي راسك نتي سبب مشاكلك .. نتي اللي كتعقدي حياتك بيديك . (تنهد) على العموم ... يكون خير نشاء
ردت بابتسامة : شكرا بزاااف سلم ليا على استريلا
رد بهدوء مرحبا بسلامك .. غنقطع دابا غنخرج نمشي
اشراق : واخا تهلا فراسك ... بسلامة .
سدات ورجعات اللور كتنهد بارتياح وهي كلها امل فعلي يخرجها من ديك الوحلة .. وحتى حلم كندا رجع غادي وكيكبر عندها ومابقات حتى حاجة كتهمها .. نهار على نهار كتزيد تشبت بحلمها اكثر .
الحلم الأسود الجزء 19
محتوى القصة
التنقل بين الأجزاء