النقرة الصافية الجزء الثاني

من تأليف خولة الغريب
2020

محتوى القصة

رواية النقرة الصافية

مرت عليهم ليلة كحلة .. سميرة طاحت بالطونسيون لي هبطلها و ياسيين لي ليل كاامل و جملة وحدة كتعاود فدماغوا .. سير أنا ساخطة عليك دنيا و آخرة يلا ما تزوجتيهاش ..
مرض فخاطروا .. بايت غير كيتقلب من جهة لجهة و كل شوية يسووط و يزفر بعصبية .. خاصوا غير معامن يشعل .. حتى صبح الحال و ناض مغير لبس حوايجوا و مشى للخدمة .. 

داز الصباح مشحووون حتى حاجة ما عاجباه خاصوا غير علاياش يغوت و ينكر .. حتى شاف راسوا عيق و ناض نعل الشيطان و بدل ساعة بأخرى .. كيدور فحلقة فارغة ما عرف فين يمشي .. غير مدوز الوقت لا غير .. تا طلع ليه الأبيل ديال زينب .. تنهد و جاوبها من بعد السلام و السؤال على الحال .. دخلات نيشان فالموضوع

زينب: وجه الله واش ما حشمتيش من ديكشي لي درتي مع ديك المراة ؟ ( ساطت معصبة ) خليتيها حتى فرحااات 

ياسيين:صبري صبري ( بلاصة جنب و هز التيليفون عندوا و قال مغذذ ) ما فهمتش هاذ اللوجيك لي عندكم بالرب ! واش أنا لي غنتزوج و لا هي ؟ راه ما قلتلهاش غنديها .. قلت غنمشي نشوفها و تما نرد عليكم 

زينب: هي هي بحال بحال !

ياسيين: عندك نتي ! ( ساط ) دابا شنو المطلوب ؟ نتزوجها حيت سميرة باغاها ايوا ؟ و نهار تطلع لها فراسها تبدا عليا طلقها و كدا و نجيبلك لالاتها و نبداو فلعب دراري الصغار ياك ! هي تزوجات بلي بغات و وقفات فوجه باها و خوتها .. ما ارتاحت تا عاشت حياتها بالطول و العرض و تجي دابا ديرلي هاذ البلانات

زينب: عرفتي ااش ؟ دير لي عجبك غير عنداك يعود عليك هاذشي من بعد بالندامة .. أما دابا تهز جي تشوف مك راك طيحتيها فالركنة بفقصتك .. حالتها حااالة و الله تا حرام هاذشي 

ياسيين:( قالها جوج كلمات سد عليها و قطع المكالمة ) هاني جاي 

💫💫💫 حنان 💫💫💫

ناضت فالصباح بكري جمعات صااكها و لبسات عليها كلشي سبوور و هبطاات كتدندن .. ركبات فطونوبيلتها و قلعات باتجااه الجيم .. 

دوزات صباحهاا بين الألات مصفية عقلها من أي حااجة ممكن تبرزطها و تعكر مزااجها .. حتى كملات على خاااطر خااطرها حااسة بوااحد الرااحة خطيييرة .. رشقاتلها تطلع لكاازا تدوز بقية يومها تماا .. شداات لوطوروط ما مسوقة لحد .. عاايشة شباابها بالطووول و العررض .. 

حنان:( هزات تيليفونها و دوزات لختها ) ألوو بب 

أسماء: حبيبتي .. صاافا ؟

حنان: طوووب دو طووب مابيل و نتيناا ؟ أنس ؟ و نااسك ؟

أسماء: اودي كيقولك الله ينجيك من المدركات .. كناا جاالسين ما بينا ما علينا حتى عيطولنا على اسمااعيل فلوبيطال

حنان:( تخلعات ) ويلي علاش ماالووا ياك لاباس ؟

أسماء: اختي كاان كيلعب فالكوورة حتى تلاواات ليه العصبة و هزوه للطبيب ( تنهدات ) مهم رااه هااز الرجل الزغبي و حبس عليه السبوور فخطرة واحد 3 أشهر و يرجع عندوا و عاد شووف تشووف 

حنان:( بقى فيها ) ناري الله يكون فعوينوا ما يستااهلش مسكيين 

أسماء: ايوا الحمد لله على كل حال 

حنان: ديكشي لي كااين .. سلمي عليه و قولوا الله يشاافيه .. أنا داابا خاارجة فالنواحي .. دومان ان شاء الله ندخل و نجي نشوفوا ( سمعات صووت موا كتنكر .. و نطقات بأسف ) و قولي لخالتي و عمي بلا ما يفقصوا راسهم مكتااب الله كيتصرف .. الله يجيب الشفاء 

أسماء: أميين احبيبتي يالاه بوون جوغني

قطعاات معاها مغبنة و كااع دااك الكاانة و الفرحة طااارت و تبخراات فالسمااء .. بقى فيهاا بجهههد و تمنات كن كاانت قريبة و كااع ما خرجات ..تمشي تشووفوا و تتطمن عليه !



قلب الدورة نيشان لعندهم .. الطريق كلها و هو ساهي .. ما حس براسوا حتى كان واقف قدام الباب .. فتحات ليه البنت لي جايباها سميرة كتعاونها .. سولها عليها .. قاتلوا راه فبيتها عيانة .. تنهد و طلع بالخف عندها .. هي لي كانت متكية فبلاصتها و حازمة راسها بزييف مزيرة عليه و دواور دبطاطة و الربيع باينين فجنب نواظرها .. وجهها صفر و باين فيها المرض .. جالسة قبالتها زينب لي حاضياه منين دخل من الباب لكبيرة .. غير حسات بيه غيفتح لباب و هي تبدا التبووحط رجعات كتمووووت و الدمووع مغرغرين فالعينين و الحااالة ..

سميرة:( كتنخصص ) ايوا شنوو غنقوولك ابنتي .. أنا هزيت يدي منوا .. يدير لي مسلكوا .. ماشي غذا بعد غذا يقولك حنا لي مبززينها عليه و هو جايبها ليا .. مالي انا لي غنتزوج بيها و لا هو ؟ غير هو يكون متأكد ديك البنية رااه جوهرة .. اسم على مسمى و غيندم عليها يلا ضيعها من بين يديه .. و غدووز الاياام و غيوقف على كلامي و يقوول الوااليدة قاالتها و فين كاان عقلي أناا !! راحنا عيالات و كنفهموا بعضياتنا و ما كايناش المراة لي كتبغي تخرب داارها .. و على ما عودتيها النهار اللول راه كتمشي .. هو غير معكس و شاد الضد و صااافي .. ااش فيها البنت و ااش عيبها ؟ يجلسوا للطبلة و يحطوا النقط على الحروف و هاكا يرتاح و يريحنا .. و لكن هو لا باغي يقتلني بالفقصة و يفضي معايا .. هي بعدا شاربة عقلها و معقوولة ما غادي يلقى معاها حتى مشكل و حتى حنا نكونوا مرتااحين فرااسناا و متأكديين من بنت النااس لي دخلناا على ولدناا .. أما يلا كان باغي شي برهوشة كطيير و يبدا تابعها من بلاصة لبلاصة و عنداك بالك .. هاذيك حاجة أخرررى .. الوااحد كيقلب على راحة البال و الهناا .. مااشي التفرفير و على أخر أيااموا يبدا يربي فيها من تا و جديد ! ايواا لا عااود لا ! ( سكتات شوية و كملات ) و حنا غير كنقولوا و بااغيين ليه غير مصلاحتوا .. فلخر يدير لي باان ليه .. الله يرضي عليكم كااااملين ! واش أنا نقدر نسخط عليه 

ياسيين:( مع هاذ الجملة فتح لباب و دخل .. قال ببرود ) قدرتي الالة سميرة قدرتي 

غير شافتوا داك الدموع داروا بيييو و تسرسبوا كااملين حتى بدات تبكي و تشهق تحلف عليها يلا ميت ليها شي حد .. حساتوا جلس حداها و جرها عندوا معنقها كيمسح على ظهرها و يسكت فيها .. ما كيحملش يقلقها و لا يشوفها كتبكي .. و تا هي عارفة هاذ القضية و ديما مزيراه بيها فاش كتوحل و ما تلقى منين تشدوا كتقلبها تبوحيط 

ياسيين: و صافي متبكيش الله يخليك ( كيمسحلها الدموع مغوبش غير كمل هز يديها و باسها ) ما بغيتش نقلقك سمحيلي على الهضرة دالبارح ( باسلها راسها ) راك عارفة معزتك عندي غير الساعة لله و صافي 

سميرة: واش انا نسخى بكبدتي اولدي .. راك فرحتي لولة و نهار السعد عندي هو لي تكون فيه مرتاااح و داير دارك و وليداتك بغيت غير مصلاحتك .. لسان ما فيه عظم اولدي ما فيه عظم .. الله يفرشك و يغطيك بالرضى لما ديرلي خاطري

ياسيين:( تبسم و قال بمزاح ) ا لالة يلا بغيتي غير العرووسة نجيبوها لك ما تكوني غير على خاطرك ( غمزها و حرك راسوا بالهداوة ) و لكن ماشي شي يرتاح شي يمرض .. نخليوا كلشي بخااطروا !

سميرة:( بعداتوا عليها جامعة يديها عندها .. قالت هازة خنافرها للسماء ) ما بغيتش أناا أي وحدة بغيت هااذيك لي رتااحيت لها و دخلات لقلبي 

ياسيين:( ضحك و هو كيضرب يد مع يد ) لا حول و لا قوة إلا بالله ( شاف فزينب لي حاطة يدها على حنكها كتشوف فمها بوجهك هذاك و لا قفاك .. و رجع شاف فسميرة ) واخا اسميرة .. وااخا 

سميرة:( توكضات ) هي أش ؟

ياسيين: هي نوضي صحي باش تبداي التوجاد للخطبة 

سميرة:( وسعات عينيهاا بفرررحة و صدددمة .. لا هي لا ختوا زينب ) ااا ربي ربي ؟ هي نفهم بلي مواافق ؟ 

ياسيين: يلا كانت فالمكتاب !

سميرة: ياك جوهرة ( كتأكد ) جوهرة ؟

ياسيين: علاش كاينة عروسة اخرى و انا ما فخباريش ؟ 

سميرة:( ضحكات و طلقاتهاا بتزغريتة دالغذااايذ .. مورااهاا قالت بذكااء ) هي قولي عجبااتك غير شحفتيناا على واالو ؟ ايوا ما دام قبلتي إذن عجباتك !

ياسيين:( جامع حجبانوا و قال بجدية ) ديجا قتلك شكون أنا لي نحكم على الواحد .. الزين هو زين الأفعال .. نهار نعرفها مزياان عاد نحكم عليها .. أما غير من شوفة لولة منقدرش نقوول !! ايوا و حنا ما علينا غير نتمناوها تكون نعم الانساانة 

سميرة: لا من ديك الجهة كون هااني ( حطات يديها على حنكها .. دوخها بجوابوا الديبلوماسي ) بعدا عمراات لك العينين ؟

ياسيين:( ضحكاتوا بلهلا يطريه ليه ) الله يهديك الواليدة .. غير هو قبل ما ديري حتى حاجة خصني نهضر معاها ضروووري نشرحلها شي حوايج و يلا واقفات نديروا معاهم الوقت للخطبة الرسمية 

ياسيين: عيطي على مها و علميها يلا بغات تخرج تتلاقاني فالعشية ( سكت شوية و كمل ) كنظن ما تبغيش تجي بوحدها .. ممكن يجي معاها شي حد من المحارم ديالها باش ترتاح 


سميرة: و لاش هاذشي ؟ هضر معاها فدارهم نيت !

ياسيين:( وقف ) ما غناخذش راحتي هكاك .. مهم علميهم و ردي عليا .. التيليفون بيناتنا 

خلاهم كيبحلقوا فيه و خرج بحالوا .. فحين زينب بقات ساااكتة سااكتة و هي تقول 

زينب: يا ختي التبوحييط كتعطيه دققققة بااااز ليك و الله ( حطات يديها على حنكها و قالت بحيرة ) هاذ المرة ياسيين حلف ما يقولي حتى كلمة ..ما فهمتش داك الولد عندك فاش كيفكر .. يعلم الله ااش كيدور فدماغوا .. لبارح لا منتزوجش و سخطي و ما عرفت ااش و ليوم موافق بكل برووودة ! فيها إن !!!

سميرة:( بلا مبالاة ) ما فيها والوا ! عادي غتلقايه جلس مع راسوا من بعد لي وقع لبارح و فكر بالخاااطر .. حتى انا غلطت فاش جبدتلوا الهضرة بيه فيه ما عطيتوش حتى فين يتنفس و يقرر دغيا خرجت فيه طول و عرض .. نوضي دابا مديلي التيليفون نعيط للحاجة رحمة قبل ما ننسى 

💫💫 فالمساء عند حنان 💫💫

واقفة مقابلة مع المرايا شااداها على طوولتها مبينة فصالتها زويينة فجلابة عصرية قصييرة فالبااج مع صااك صغيير هازاه فيديها .. طاالقة شعرها و ضاافراه جنب .. ضفيرة خفييفة مرخوووفة .. حااطة مكيااج خفيييف تقريبا ما كيباانش ! مع كلووز لامع مزين شفايفها ..

حركاتها أنثوية و هاادئة كتبان من البعيد إنسانة رااقية و باين فيها ضحوكية و مفروحة ..ماشي شي وحدة لي حدودية و متكبرة !

ابتاسمات من بعد ما تأكدات من هنداامها و هزات عطرها المفضل رشااتوا فعنقها لي مزيناه بسنسلة عصرية من الذهب الأبيض .. مكتافية بيها فقط مع كورميط خفييف فيديها .. هزات بووكي دالورد و نزلات بالشوية عليها و صووت طالونها مالي كل أرجاء الفيلا لي كانت خاااوية كلها خاايد فشغالوا غاالبا ما كيتجمعوا تال لييل .. 

ركبات فسيارتها و انطالقات جهة الكلينيك لي جالس فيه اسماعيل .. وصلات و دخلات بهدووء جهة الاستقبال .. سولاتهم عليه .. عطااوها المعلوومات و طلعات فالمصعد .. حااسة بقلبها كيضرب بكل جههههدووا خووف كبيير متملكها .. ما عرفاتش مالها ؟ لدرجة واحد العقل كيقولها سيري رجعي بحالك ! لكن واش هي حمقة ؟ حتى لقات الفرصة فين تتقرب منوا و تضيعها غير حيت خاايفة ! 

تنفسااات مغمضة عينيها و عاوداات نفس الحركة مراات عدييدة حتى ارتاحت و حلات عويناتها كتشوف فراسها و فشنو كديير و فين غيوصلها هاذشي لي غاذية فيه !

تمشاات خطوة قدام خطوة فاتجااه الغرفة ديالوا .. حتى وصلات لها طلعات النفس و نزلاتها مبتااسمة .. دقات جوج دقات خفااف و دخلات بابتساامة .. لي سرعاان ما تبدلات لنظرة استغراب .. ما كانتش متوقعة يكون معاه شخص ثاني أو بالأحرى أنثى جمييلة و عااطية لعين بحال السيدة المقاابلة معاها .. خاصة أن أسمااء غير خرجوا من عندوا و خلاوه يرتاح سيفطاتلها مسج علماتها باش يلا بغات تمشي تزوروا

اسماعيل:( شافها بقات واقفة فالباب و تقاد فالجلسة مستغرب من حضورها ! ) حنان زيدي دخلي مرحبا ؟

حنان:(شافت فيه ابتاسمات و شدات لبااب .. حطات حداه البووكي و قاالت بأسف ) غير سمعت الخبار و جيت نشوفك كي بقيتي .. فريمن بقى فيا الحال بزااف .. بالشفاء العااجل 

اسماعيل:( ضحك بابتساامة عذذذبة جميييلة ) شكرا اختي لهلا يخطيك .. 

حنان:( شافت فالبنت لي معاه و شافت فيه بمعنى عرفنا )

اسماعيل: ااه .. كوثر هاذي حنان الاخت ديال أسماء .. و كوثر ( شاف فيها بابتسامة و بادلاتوا هي بأخرى خجوولة ) my love " حبيبتي "

حنان:( لون تخطف من وجهها .. بحال يلا ضربها بتسرفيقة ..تصدمااات و كاع لي كانت مخططة ليه شافتوا قدام عينيها كيتبخر .. نحنحات من بعد ما رتبات لكلمات فحلقها ) مزيان الله يخليكم لبعضياتكم ( بخيبة أمل ) مواتيين تبارك الله


جلسات معاهم شوية كيهضروا فواضيع عادية .. حتى وقفات سلمات عليهم و قالت 

حنان: الله يجعلها أخر الأحزان يا رب .. بالشفاء خليتلك الراحة 

اسماعيل: شكرا اختي لهلا يخطيك 

خرجات من تما بخيبة أمل عكس الفرحة لي كانت جاية بيها .. ركبات فطونوبيلتها و دوزات لابيل لختها أسماء ..تسناتوا شوية غير شدلها دخلات فالموضوع نيشان 

حنان: أسماء محتاجاك .. عافاك أجي عندي أنا غنمشي للكافي لي جات جهة *** راه مشينا لها داك نهار مع ماما و بابا ..عقلتي عليها ؟

أسماء: ااه عرفتها أنا نقولها لأنس يلا بغى يخليني .. حنان واش بيك شي حاجة ؟ 

حنان: محتاجاك 

أسماء: صافي واحد ربع ساعة و هانا معاك 

💫💫 ياسيين 💫💫

واقف قدام دار ديال لالة العروسة كيتسناها و كل شوية يشوف فساعتوا .. حتى تفتحات لباب و تمات خارجة جوهرة و معاها ختها وئام .. هو لي غير شافهم نزل من طونوبيل و تقدم جهتهم شوية .. كيشوف فلباسها بصدمة .. 

ما كانش كيظن أنها من البنات لي كيلبسوا " الخمار " أول مرة يشوف شي وحدة مواتيها لهاذ الدرجة .. كانت غير لبنات كاااملين بالفعل جوهرة و وجهها منور .. ساترة و محتارمة راسها لأبعد الحدود .. هنا عرف علاش سميرة شافتها فالزنقة مرة وحدة و حمقاتها !! 

ياسيين:( بابتسامة هادئة ) السلام عليكم ( شاف فيهم بجوج ) بخير ؟

جوهرة: الحمد لله و نتا ؟

ياسيين: و لاهيلا بخير ، مشينا ؟ 

سبقهم فتح لباب لجوهرة حتى ركبات و رجع فتح لباب لختها وئام .. عاد ضرب الدورة جهتوا و تحرك من تما فصمت تااام .. حتى وصلوا لقدام مقهى عائلية و نزلوا كلهم .. و قبل ما يجلسوا كانت سبقات وئام و قالت

وئام: أنا غنجلس فهاذ الطبلة قبالتكم لهيه .. نتوما خوذوا راحتكم بلا ما نطفل عليكم هه

ياسيين: شكرا .. نجلسوا تما ؟

حركات راسها بالايجاب و شيرلها بيديه تسبقوا عاطيها مساحتها الخاصة و هو تابعها من لور .. من بعد ما جابلهم الكارسون المشروبات لي طلبوا و من بعد كلامهم العااادي و الرسمي جداا .. نحنح ياسيين و قال

ياسيين: جوهرة شحال فعمرك ؟

جوهرة:( بهدووء ) 24 سنة و نتا ؟

ياسيين: بطول العمر .. 34 سنة ( ضحك بمزاح ) شرفت 

جوهرة: لا بالعكس الله يكبرنا على طاعتوا

ياسيين: اميين يا رب ( سكت شوية و قال ) سمحيلي جبتك هاكا و لكن بغيت نجاوبك على شروطك .. و ما جاتنيش تسمعيهم من عند شي حد من غيري ( بجدية ) غنهضر معاك بصرااااحة و غنجيك نيشان باش تكوني على بال .. و القرار لول و اللخر ليك !

جوهرة: أحسن حاجة هو كلشي يكون واضح من الأول .. خير ان شاء الله ؟

ياسيين: قبل ما تاخذي جوابك .. خصكي تعرفي أجوهرة بلي أنا مريض ( حك لحيتوا و عينيه تابثين عليها كيحاول يفهم يقرا رد فعلها ) هاذشي لي غنقولولك حتى حدما عارفوا .. و بصراحة ما كنتش داير الزواج فعقلي و خصوصا هاذ الفترة .. باش منجرجر معايا حتى وحدة و لكن ( تنهد ) المهم نتمنى هضرتنا تبقى بيناتنا 

جوهرة:( خلعها و قالت بخوف ) ياك لباس ؟ 


ياسيين:( تنهد ) عندي التهاب الكبد ب .. و لي كنعرفوه كاملين بمصطلح " l'hépatite B " كاينين أسباب كثيرة باش يقدر يجيك ..ممكن غير يلا مشيتي دوزتي فالطبيب و الدم ديالك تخلط مع دم دشي حد مصاب بيه .. شخصيا ما عرفتش كيفاش حتى تصابيت بيه .. و لكن فلخر الحمد لله على كل شيئ 

جوهرة: و ما كاينش علاج ليه ؟

ياسيين: فالحالة ديالي عندي نائم يعني غير متوهج و لكن الاطباء خايفين من أنوا يفيق بالدارجة ديالنا .. ما عرفتش واش عرفت نشرحلك مزيان او لا .. لأنوا مرض خطير لا قدر الله كيسبب امراض مزمنة .. منهم التهاب الكبد و سرطان الكبد ، تشمع الكبد و غيرها .. 

جوهرة: يعني عندك باتيط " ب " نائم ؟

ياسيين: سي .. متبع طريطمون ديال الدواء و حالتي مستقرة عادية .. حاليا ما كاين حتى خطورة .. و لكن فنفس الوقت يقدر بين ليلة و نهار يتقلب كلشي ضدي .. كنسنى نهار لي ندير التحاليل و يقولولي ما بقى عندك والو .. غير ارتاح 

جوهرة:( بأسف ) ربي كبيييير و كيفما خلق الداء خلق الدواء و أكييد قادر يشفيك و يعافيك و يحفضك لأهلك 

ياسيين: أمييين يا ربي أميين .. مهم هاذ الموضوع ما فخبار حتى واحد من غير كريم ( كمل بتفسير ) كنظن غتكوني عقلتي عليه ..جا معانا لبارح .. 

جوهرة: وي عرفتوا واخا ما عقلتش عليه مزيان

ياسيين: هذاك ولد عمي و خويا و صاحبي و كلشي بالنسبة ليا ( رجع لموضوعوا ) باش ما نكذبش عليك ما كنتش كنفكر فالزواج نهائيا حتى نتأكد من حالتي الصحية .. لأنوا المرض ممكن ينتاقل لك مني و ممكن ينتاقل حتى لولادنا لا قدر الله ( بصراحة ) و لكن كاينين شي فرص كيجيونا فالحياة مكنقدروش نضيعوهم من بين يدينا .. و نتي فرصة مكتعوضش .. و كنظن مستحيل نرجع نتلاقى بشي وحدة بحالك ( جوهرة تزنكااااات فهاذ اللحظة لواحد الدرجة جابتلوا الضحكة ) يقدر يجيك بلي غير كنكذب عليك و لا كنعمر سهارج هنا .. و لكن نيشان و بلا زواق بغييتك للمعقوول و فنفس الوقت ما بغيتلكش الأدية .. ما بغيتش نضيع جوهرة بحالك معايا و ندير بحال حتى حاجة ما كاينة و مور الزواج عاد نصدمك و نحطك قدام الأمر الواقع !

جوهرة:( بصراحة قالت ) فخبارك فهاذ اللحظة كبرتي فعيني بزااااف و الله .. كن خبيتي عليا ما عرفتش كيفاش كنت غنتقبلها من بعد و لكن كون اكيد عمري كنت نسمح لك .. حيت غتسمى ضحكتي عليا ( تنهدات و قالت ) المرض شي حاجة ديال الله ماشي دالعبد ..من عندي غير الله يشافيك و لكن كيفاش ما ينتاقلش ليا المرض ؟

ياسيين: كاينة واحد الشوكة كتضرب 3 دالمرات على راس كل شهر .. غتضربيها قبل من زواج بشهر و الجوج لي بقاو فالشهراين لي موراه .. و هاكا ان شاء الله ما يوقع لك والو ..

جوهرة:( بطيبة ) أ هاه ما عنديش مشكل 

ياسيين:( شاف فيها بنظرة حنييينة أول مرة تبان فعينيه يمكن حيت بصح بكلامها و طيبتها و شخصيتها لي أول مرة يصادف وحدة بنوعها .. أثروا فيه .. هز كاس دالما و شرب منوا و قال ) اييه و ندوزوا لشروطك دابا أ لالة جوهرة 

جوهرة: همم 

ياسيين:( تبسم بهدووء ) فخبارك صدمتيني ! ما كنتش داير فدمااغي كااع ديكشي لي قلتيه .. شرووطك بساااط و لكن فنفس الوقت من أصعب ما يكون .. و ماشي أي واحد يقدر يطبقهم و كيفما قتلك فلووول غنجيك للصرااحة ( بمزاح) أراي يديك نقولك

جوهرة:(بتردد مدات يديها كتشوف شنو باغي يصنع )

ياسيين:( ضربلها فيها بخفة و قال ) بربي تا نقولك لي كااين أغراس أغراس 

جوهرة:( ضحكها ) ههههه واخا اش عندك ثاني 

ياسيين:( ضحك ) لهلا يوريك راه خصني الفوريان هههه 


ياسيين: لا دابا ندوي معاك نيشان بلا ضحك ( بجدية ) شوفي أ جوهرة عرفتي أنا و ياك مختااالفين على بعضياتنا لواحد الدرجة كبيييرة .. مغنكذبش و نقولك عادي .. لا بلعكس كان عندي تخوف من هاذ الموضوع و واش نتفاهموا .. جلست و فكرت مع راسي مزياان و لقيت غير كنخربق من لخر ... حيت نتي بنت الناس يلا ما صلاحيتيليش نتي شكون غيصلاح فنظرك ؟ حتى حد ! 

جوهرة:( بصوت رقيوق و زوين بزز كيتسمع ) ما فهمتش شنو كتقصد بالضبط .. حيث أنا لبارح قتلك حتى حد فينا ما كامل و أكيد يلا كان التعاون من جوج جهات ربي غيكمل علينا بالخير .. أو لا ؟

ياسيين: أكييد ( بتساؤل ) جوهرة ! كتعرفي عليا شي حاجة من غير سميتي و عمري ؟

جوهرة:(ضحكات ) و داركم كانوا جيران مع عائلتي هههه

ياسيين: هههه واخا ... غنعاودلك شوية على راسي منها تعرفيني و منها نجاوبك على أسئلتك ( شاف فالساعة ) باقي الحال متخافيش ما نمشي حتى نتأكد بلي دخلتي لداركم و فأمان الله 

جوهرة:( تبسمات و قالت بحماس )واخا بدا 

ياسيين: ألووغ ا لالة باش غنبدالك .. كبرت فعائلة عااادية بحال أيها الناس مرة ضاحكين مرة هاجرينوا ..كانت عندي ديك 7 سنين هكاك فاش جينا للرباط .. و لا نقولك سلا حيت مؤخرا عاد سكننا فالرباط .. المهم عشت طفولتي عااادي و لكن مراهقة جاتني صعيييبة .. كنت باغي نطير و فبالي بلي غير انا لي كنعرف الصح و حتى حد ما كيفهم قدي و كااع لي كيبغي ينصحني ما كنخليهش ..حيت كيجيبلي الله بحال يلا غيقللوا مني و غير دايريني ضحكة لا غير .. المهم دازوا لياام و كنت فالتاسعة داك العام .. كنعقل نجحت بعشرة واااقفة حيت ما كنتش كنقرا كاااع .. غير ديك شوية دالذكاء لي عطاني سيدي ربي كنسلك بيه لا غير 

جوهرة: كنتي مشاغب على هاذ الحساب 

ياسيين: طياااارة فوق لقياس فخبارك كنتفكر دابا عقل الصغر كنبغي نعلق رااسي .. شحال من واحد خرج على راسوا بيديه غير هكاك و أنا منهم .. المهم ا لالة الحاج مصطفى لي هو الواليد ديك ساع كان باقي ما دار لا محال لا جوج .. خدام فطاكسي كبير كيدي لبلايص و يترزق الله .. و الصراحة تقال داار معانا المستحييل و تقااتل دبصح واخا كان قااااسح معايا و لكن لمصلاحتي ( دوز على لحيتوا و تنهد ) المهم فاش شاف النتيجة و مشى سول عليا فالمدرسة جلسني من القرايا 

جوهرة:( خرجات عينيها ) ناااري !!! باينة كنتي مزبلها بالمعقوول !!

ياسيين: وا هو مزبلها و لكن ماشي لديك الدرجة ( ضحك ) فينما كانت شي مصيبة لسقوها فظهري غير الله يسمحلهم و صافي

جوهرة: ايوا و شنو وقع من بعد ؟

ياسيين: كانت هاذي هي التسرفيقة لي وكضاتني و رجعت شفت الدنيا من جهة أخرى .. حلف عليا الواليد ما نعاود نحط رجلي فشي مدرسة و وفى و فالبلاصة خرجني نخدم و نضرب تمارة فالزنقة باش نعرف بحق الفلووس و باش كتجي 

جوهرة:( كتسمع ليه بتأثر حاطة يديها على حنكها و مرة مرة تشرب من كاسها و هو كيهضر بصرااحة و ثقة فالنفس ..النقطة لي لاحضاتها فيه و جذبااتها )

ياسيين: كاع لخداامي لي ممكن يطيحوا لك فالبال درتهم .. فلول بديت مع مول الحانوت حاضي معاه المحل و كنتسخر للناس .. من بعد خدمت فالسواق حماال للخضرة و السلعة .. من بعد دزت للبني ..المهم اي حاجة جاتك فالبال خدمت فيها .. ضربت تماارة ديال بصصصح و دااازت علياا .. فديك الوقت كرهت الواليد لواحد الدرجة بزاااف .. حسيت بالحكرة د الدنيا و الدين .. فالوقت لي كنت كنكون ناعس فبلاصتي سخون و مكمش رجعت كنضرب لكرفي فعز البرررد .. تعاملت مع الناس بالأشكاال و الانوااع .. كاين لي كيشوفك قل منو و ينقص منك غير هكاك .. كاين لي كيبان ليه فيك البلان يستغلك لمصللحتوا و من بعد يسووسك .. كااين و كاين و كاين .. المهم الزنقة كلها ذيااب و يلا ما كنتيش سبع غياكلوك فدغمة ما كاينش التخرشيش .. ( شاف فيها لقى دموع مغرغرين فعينيها .. استغرب و قال ) مالك ؟

جوهرة:( بحال لي كانت كتسناه غير يسولها باش تطلقهم ) بقيتي فياا دوز هاذشي كامل و نتا صغيير و الله قاسحة بزاااف حرام عليهم 😭


ياسيين:( ضحكاتوا ) ههه اودي لي دازت على الراس كتنفع ( عطاها كاس دالما ) و يالاه سكتي باش نكملك 

شربات و مسحات دموعها و رجع هو الآخر كيكمل لها الهضرة 

ياسيين: فين خليناها ؟ اااه .. المهم دازوا ليام و لا نقولوا سنيين فنفس تماارة و جري عليا نجري عليك .. تحملت المسؤولية و أنا باقي صغيير ( ضحك و هو كيتفكر راسوا ) كنت كنموووت فداك للوقت الجلدة على العظم فيا غير الطولة ههه .. جا خالي عندنا فداك الوقت و بقى مع الواليد حتى قنعوا و داني معاه لفاس .. كان خدام هو ساعتها فواحد البزاار كبيير بقيت معاه كنعاونوا و مرة مرة كنضرب دورة فالمدينة لقديمة نضبر على صرفي .. خصوصا كانوا عندي اللغات و مسلك راسي فيهم ما كنلقاش شي مشكل .. هاكا دنيا غادية و حنا مقاتلين معاها حتال واحد النهار تلاقيت بواحد الميريكاني و صدق معرفة د الخال .. ديما كيجي عندوا يتقضى المسائل و كدا .. شافني و عجبتوا و لا عزيت عليه الله و علم .. داز الصيف بخير و على خير حتى للنهار لي كان غيرجع فيه لبلادوا و جا كيقلب عليا .. 

جوهرة: ايوا ؟ شنو بغى ؟

ياسيين: ها أنا جاييك .. المهم باختصار السيد بغى يدينا معاه و يكفلني خصوصا كنت باقي ما وصلت لسن الرشد .. وافقت بالفرحات علياا و بقيت كنتسناه غير فوقاش يرجع و يديني .. كاع داك الظلام و البؤس لي كنت عايش فيه فلحظة تببببخر و جا واحد النوور لي دخل الفرحة لقلبي .. ايوا هي هاذيك داز شهر شهراين حتى قطعت ليااس و قلت هاذشي ما منو وااالوو و لكن ربي حنتني و رجع .. قادلي الوراق و سين و جيم و اجي من هنا و سير من لهيه و قنع الواليدين يخليوك تمشي .. مهم دااازت ديك الفترة باش ما كتب الله .. حتى لقيت راسي ولد 17 لعام فالميريكان مع راجل ما كنعرفوا ما كيعرفني 

جوهرة : و ما خفتيش تمشي معاه ! و الله يستر كن كان ناويلك على شي نية خايبة و لا دارلك شي حاجة 

ياسيين:( حرك راسوا بااه ) ديكشي ما فكرتش فيه حتى لقيت راسي تما قدام الأمر واقع .. بلاد كتخلع ما عندي فيها حد و ما فجيبي حتى ريال تنفعني .. معايا غير الله و رضاة الواليدين لا غير .. مهم العيشة تما فيلم طويييل حتى نعاودولك شي نهار 

جوهرة: ان شاء الله .. و لقيتي فيه الخير ؟ عاونك ؟

ياسيين:( تنهد ) تأكدت بلي مستحيل شي حد فهاذ الدنيا يدير فيك الخير لله فسبيل الله .. من غير واليديك لي يقطعوا من لحمهم و يعطيوك بلا حساب .. فنظرك كن ما شافش فياا مصلاحتوا كان غيتسوق ليا ؟ أكييد لا ! و لكن عقل الصغر كان كيشوف الخارج شي حاجة لي كبيييييرة عرفتي شنو هي الميريكان لدري ديال 17 لعام .. بشااااخ !!

جوهرة: ندمتي ؟

ياسيين: لا و حتى جاك ما كانش شي حد لي خايب واخا دمر عليا تا هو و دار حقوا .. شادني من اليد لي كتوجعني و لايني علمني الحرفة و كيفاش نكون فطيين و نسلك راسي و و و 

جوهرة: حرفة ؟ علاه هو فاش كان خدام ؟

ياسيين: كااع ديكشي لي كيخص بالأثار .. كان مسخوووط و غير بالشوفة كيعرف الحاجة واش أصلية و لا مزورة .. لبلايص لي عمري حلمت نمشي ليهم ..مشيت ليهم معاه .. شفتي لوحة عااادية كتبااع فسووق غير مثلا نقولوا 50 درهم ..تقدر تكون كتسوى الملااااين الصحااح ( بامتنان )الحاجة لي كانت زوينة فيه .. هو عطاني لفرصة فين نتعلم حتى أنا .. فين نصيد عشاتي بيدي ماشي يجيبوا و يوكلولي .. 

جوهرة:( جاها هاذشي بحال الأفلام .. باغى غير تعرف الكمالة و شنو وقع حتى جالس معاها دابا و بزاااف دالاسئلة الثانيين )

ياسيين:( فهم فضولها و كمل ) دازوا سنين كان توفى فيهم جاك و بقيت بوحدي .. سلكت نفس الطريق لي مشى منها و تحكيت مع بنادم و عرفت قوالبوا بالمزيااان .. دووميين فيه الفلووس بالمعقوول خصك غير شي حوايج يكونوا فالدمااغ و تعرف كيف تعامل لا غير و الحمد لله درت بخييير و جمعت حصيصة تحت مني .. نزلت لمغرب من بعد سنييييين دالغربة ( تنهد بحرقة و قدرات تلمح لمعة خفيفة فعينيه ) شفت دارنا و خوتي ..لقيت ابتسام مزيودة و كبرات .. ما عرفاتنيش و منين غتعرفني أصلا ! و زينب لي خليتها برهووشة رجعات عزبة كبراات و ولات علاين توصلي فالطول ! 


ياسيين:( هز كاس دالما شرب منو .. شاف نظراتها الحنينة و تبسم بهدووء ) عادي ! دنيا هي هاذي .. المهم رجعات تجمعات فالاخير العائلة .. قلبي سمح للواليد بكل رضى .. فالوقت لي نهار مشيت من هنا كنت كنقوول عمري نرجع و عمري فحياتي نسمحلوا حيت عذبني و ذقت المرار ! و لكن فلخر فهمت شنو كان باغي يوصل ليا و قلبي صفى من جهتوا .. بلعكس معزتوا تزاادت أضعااف .. 

جوهرة: الله يخليهم لك 

ياسيين: أميين .. هو هذا ! ارتاحيت مدة و كان لازم نوض ندير شي مشروع علاياش نرجع من بعد .. و كان طريطور من اقتراح لواليد .. صافي اختارينا المحل و رصينا شغالنا .. و شوية بشوية الأمور تيسراات و عاد علينا بالنفع .. 

جوهرة: ما عاودتيش رجعتي للهيه ؟ و لا فكرتي فيها ! حيت الاغلبية لي كيتغربوا مدة طويلة ما كيقدروش يبقاو فالمغرب و شحال ما طالوا كيرجعوا !

ياسيين:( حرك راسوا ) فحالتي لا .. و لكن ما بقيتش مع الواليدين .. خليت ليه المحل بلي فيه و مشيت لمراكش معايا راس المال لا غير .. مراكش كانت مدينة الأحلام بالنسبة ليا ساعتها .. كنت كنشوفها هي لي غتحققلي أحلامي .. كانوا احلام بسييطة أول حاجة ندير بازار خاص بيا و عاد تبعوه أحلام اخرين .. و الحمد لله شوية بالشوية الخبزة كتكبر .. 

جوهرة: صعييبة الصرااحة و لكن ها نتا صبرتي و ربي سهل عليك .. حتى حاجة ما كتجي دقة وحدة .. و حتى حاجة ما كتوقع فحياتنا غير هكاك .. لا بد ما ربي مخبعلنا موراها شحال من حاجة زويينة .. واخا مكتبانش فلول و لكن من بعد عاد كنفهموا مزياااان 

ياسيين: ديكشي لي كاين .. و لكن حاجة وحدة ما قدراتش تبرد ليا و كانت حرقة كطلع و تنزل فحلقي .. هي لقرايا ! و كانت أصعب خطوة درت فحياتي هي نرجع ندفع باك ليبر و ندوزوا .. خذيتوا الحمد لله واخا ماشي بشي مونسيون ( ضحك ) المهم جبنا الكارطونة .. و تما تفتحوا العينين على حوايج أخرين .. و قررت نرجع نقرا .. واخا ما رضيتش فلول كااع لي فالبروموا صغار عليا .. لكن مع الوقت تعودت عاادي .. عام تابع عام حتى خديت الليسونس .. و دابا كنفكر نرجع ندفع للماستر فتخصص ديال خدمتي نيت " ثراث و تنمية " ( هز يديه و حركها بثقالة فالسما ) و هذا باختصار هو ياسيين ! 

جوهرة: ما عرفت ما نقول هه .. عشتي شي حوايج فشكل .. ايجيوا قدام حياتي لا شيئ ! أكيد غتبغي تتعرف عليا حتى أنا (حرك راسوا بااه و كملات كلامها ) انسانة عادية كبرت فوسط محافظ .. كبرت فظروف زوينة الحمد لله .. كانت حياتي مثالية تقريبا .. كاع لي كنديروا قدام عينيا كنوصل ليه .. خديت لباك فشعبة علوم و تما تفتح باب جديد قدامي لي هو لافاك .. قررت نتخصص فالدراسات الإسلامية .. كانوا الشهورة لولين صعاب عليا بحكم الدار بعيدة بزاااف على فين كنقرا و تمحنت بالمعقوول .. جاو الامتحانات لي وجدت ليهم من قلبي و سهرت لياالي .. لكن الطلبة كانوا دايرين إضراب .. رجعونا ما خلاوناش ندخلوا .. رجعوا زادونا فالوقت و رطعت ندوز و نفس الحاجة وقعات مرة ثانية ( تنهدات ) كان عالم جديد عليا عمري شفت بحال ديكشي .. المهم تقررات الدورة الاستدراكية .. فداك الوقت ماما كانت مرضات و ما قدرتش نخليها بوحدها .. قلت غيديروا إضراب عاود لكن لا دوزوا .. و صدق العام ضايع ليا .. صافي تما بابا جلسني خوفا عليا و حتى أنا ما كانش عندي اعتراض ( بحزن ) واخا من بعد ندمت ..و لكن ماشي مشكل .. السنوات الأخيرة كانوا أغلبهم كيدوزوا فدارنا و لا فدار القرأن ( بتفسير ) كنت خدامة معاهم كنتلف الوقت مع الوليدات الصغار ( بابتسامة ) حياتي هادية بزااف ما فيهاش شي حاجة دالاكشن ههه

ياسيين: هههه الأكشن خليه ليا ( بتساؤل ) من فوقاش و نتي دايرة الخمار ؟

جوهرة: الحجاب درتوا فاش كانت عندي 15 لسنة و لخمار ف 20 سنة .. يعني دابا 4 سنين 

ياسيين:( بابتسامة ) تبارك الله .. ندوزوا دابا للشروط .. أول حاجة كانت هي الصلاة ( حك لحيتوا ) مكنصليش ( جوهرة تقادات فبلاصتها بإصغاء .. فحين هو كمل كلاموا و قال بالضحك ) خوك كافر هه ( قلبها جدية ) كيفما قلتي نتي كبرتي فجو محافظ و كانت أول حاجة تعلمتيها هي الصلاة .. عكسي انا تماااماا ما ننكرش كانوا كيهضروا معانا مرة مرة و لكن كتبقى غير هضرة دايزة لا غير .. حتى من مراهقتي دوزتها بوحدي بين الأجانب .. يعني لي ينصحك و يقولك دير هاذي و هاذي لا ..ما كانش 

جوهرة: يعني مسلم بالسمية لا غير !

ياسيين: كيف بزاااف فالمجتمع ديالنا !


جوهرة: هذا ماشي عذر ! من حيث كاين بزااف هاكا صافي ما عليش !؟

ياسيين: مقلتش هذا عذر ! جوهرة .. عاودتلك على جزء من حياتي باش فاش نهضرك على هاذ النقطة بالذات تفهميني .. حيت لو تا أنا عشت مع دارنا و كنت كنسمع الأذان خمسة دالمرات فالنهار و كنشوف الناس كيمشيوا يصليوا أكيد كنت حتى أنا غنكون منهم و لكن الظروف حكمات .. و أكيد ماشي مبرر كافي .. ماشي ليك ! و إنما لله !

جوهرة: يعني عارف هاذ النقطة ! و لكن دخلتي للمغرب و ما تبدل والو أو لا ؟

ياسيين: حيث ولفت و لي مشى على واحد النهج سنييين .. صعيب بين ليلة و نهار يبدل راسوا غير هكاك .. كنت كنصلي و نقطع و الأيام غاذية .. المهم الشرط لول ما موفرش فيا .. و لكن تصدقي ؟ ( حركات راسها بمعنى شنو ) هضرتك جاتني فشكل و حركات فيا شي حاجة خلاتني نمشي و نبحث و نقرا شوية فالدين .. و قررت نبدا الصلاة و لكن هاذ المرة نيشان ( هز كتافوا ) ممكن ربي حطك فطريقي باش تفيقيني من النعاس لي كنت غاارق فيه .. 

جوهرة:( بهدوء ) خويا ياسيين راه الصلاة هي كلشي .. كاملين كنديروا الأغلاط الله يسمحلنا و لكن فرق بين واحد كيصلي و واحد لا .. هي لي كدير لفرق بين المسلم و الكافر .. تقدر تكون نتا إنسان نقي و كدير شحال من حاجة مزيانة و لكن فلخر كاع ديكشي كيتبخر حيث لي عليه الأساس ما كاينش .. 

ياسيين: عارف و حتى أنا قتلك قررت نبداها .. و أكيد ماشي باش نقنعك .. و لكن باش نصلح علاقتي بمولاي 

جوهرة:( اكتفت ب ) الله يقدرك 

ياسيين: الشرط الثاني .. شي حاجة لي عاادية و من حقك و ما طلبتيش شي حاجة ديال المستحيل .. تانا ابنت الناس ما غنتزوجش بيك و نجيبك لعندي باش نتكرفس عليك .. يلا كنت غنديرها من لول ما عندي ما ندير بشي زواج و ما كاين لاش ( بجدية ) نعطيك الامان عمر شي حاجة تخصك معايا يلا كنتي بصح بنت الناس نهزك فوق رمووش عيني .. من نهار نهاري راااجل و غنموت رااجل باش ناخذ ذنوب وحدة قوتها ما كتسوى والو قدامي .. هاذي لي عمرها تكوون .. شحال ما كنت خايب ما نديرش خصايل الشماايت !

جوهرة: و الشرط الأخير ؟

ياسيين: صداقك من حقك تتشرطي فيه لي عجبك ما عنديش مشكل 

💫💫 حنان 💫💫

دخلات لنفس القهوة العائلية فين جالسين ياسيين و جوهرة .. طلبات كافي و جلسات كتسنى ختها بأعصاب مشدوودة .. 

بعد مدة هزات ساكها و مشات لجهة الحمامات .. غسلات يديها و بردات عنقها .. حاسة براسها مخنووقة باغى تبكي و ما قادراش .. معصبة و خاصها غير معامن .. يالاه فتحات واحد من الحمامات تدخل تفتح لباب و دخلات وئام بهدووء بانلها كلشي عامر شافت فيها و قالت بأدب 

وئام: ختي سمحيلي واخا يلا ما كانش عندك شي مشكل تخليني ندخل أنا 

حنان:( طلعات و هبطات فلباسها ) ياكما ما عجبتكش أناا 

وئام:( شافت نظرات الاحتقار فعينيها .. ما حملاتش راسها و قالت بنفس نبرتها ) و ياك لباس اختي ؟ طلبتك بأدب جاوبيني بأدب ماشي تتهزي و تتحطي عليا هناا .. كن ما كنتش مريضة ما نسوقش لك 

حنان: تسوقيش ليا ؟ بنادم صووفاج 

وئام: واش cv pas نتي .. حمقة لا ؟ 

شعلات و لسقات فديط cv pas دارت من الحبة قبة و نوضوها تماا سبااط حتى صوتهم بدا كيتسمع لبراا و النااس كلهم كيطلوا بفضول يفهموا شنو واقع و شكون هاذ الجوج لي كيتعايروا .. الصوت وصل تال عند ياسيين و جوهرة .. هاذ الأخيرة لي فالبلاصة قلعاتوا صوت ختها .. رمات عينيها لطبلة فين خلاوها بانتلها خاوية و هي توقف و قالت بتوثر و خوف 

جوهرة: سمحلي نمشي نشووف وئام ..يمكن عندها شي مشكل ؟ 

قبل ما يجاوبها كانت طارت لجهة wc .. يا الله وصلات لعندهم دازت فيها حنان و خرجات معصبة من تما تلاقات فالباب أسماء داخلة كتقلب عليها و هي تفركع عليها 

حنان: كلشي منك منين عارفاه مصاحب و لا مزمر من لول ما تعمريليش راسي بيه .. حراام عليكم واش أنا منين ما جيتها ما كتصدقش .. كلشي عندوا الزهر إلا أنا .. نضحك نهار نهجروا سيمانة

طاحوا دموعها و خرجات من تما كتجري .. مخلية أسماء مبلقة فيها عينيها ما فهمات واالووو حدها تبعاتها كتعيط عليها توقف 


ياسيين:( لحق على جوهرة لقاها كتهضر مع وئام لي وجهها مزنك و باين طاير لها بالمعقوول .. شافوا فيه بجوج و هو ينطق ) ياك لباس ؟

جوهرة: واخا توصلنا عافاك مشى لحال و وئام عيانة شوية 

ياسيين: بالشفاء .. واخا تسناوني هنا .. 

مشى خلص و لحق عليهم ركبوا فصمت كل واحد فيهم فاش كيفكر .. حتى وقف قدام دارهم .. نزلات وئام سبقاتها و بقات جوهرة جالسة حداه ساكتة كتفرك يديها بتوثر ... خذات وقتها الكافي عاد قالت 

جوهرة : سمعتلك و عرفت هضرتك فين ماشية .. و كنظن دابا غتكون كتسنى جوابي ياك ؟

ياسيين: ااه ! و يلا كنتي باقى ما مستعداش تجاوبي .. خوذي وقتك و فكري على خاطرك 

جوهرة:( بلعات ريقها و هزات راسها فيه ) فكرت ! و قررت ! ( سكتات شوية و رجعات قالت ) أنا موافقة .. عطيتك ثقتي كنتمنى ما تخيبنيش و تدير بلي واعدتيني بيه ! علم الواليدة ديالك و مرحبا بيكم عندنا

قبل ما ينطق كانت فتحات لباب و مشات كتخلف حتى دخلات بحالها لدارهم مخلياه متبع لها العين بهدووء .. سمع صوت تيليفونوا و جاوب 

ياسيين: وي كريم ؟

كريم: هضرتي معاها ؟ شنو قاتلك ؟ 

ياسيين:( تنهد ) موافقة 

كريم: هااا !! دونك غير نتا معقد الأموور و صافي ( بفضول ) و شنو كانت رد فعلها على مرضك 

ياسيين:( تفكر كلامها و تبسم ) طلعات بنت الناس .. ما قالت والو ! حدها دعات معايا 

كريم:( زفر بارتياح و قال بمزاح ) وا سير اخوويا الله يعطيك السالمة و الشبة و الزعتر ... مخليني على أعصابي كنتسنى و ممرض مك معاك على واالوو .. ااش فيها كن عطيتي لأوكي من لول 

ياسيين: نكون على القرص غير يسولوني نبدا نقز فبلاصتي .. ااه زوجوهالي عفااكم عفاااكم .. و بااز اخوويا .. أصلا كان خصها ضروري تعرف ما جاتش نخبي عليها و لا نكذب !

كريم: ههههه عارف اخويا يلا كملتي دوز عندي للدار 

ياسيين: تئ .. راسي ضارني شوية انمشي لداري نرتاح ( تنهد ) باقي خصني نطلع لمراكش نوقف على الخدامة و نشوف الخدمة كي غادا 

كريم: اووك تلاح .. قبل ما طلع علمني نمشي معاك 

ياسيين: إن شاء الله !


💫💫 حنان 💫💫 

خرجات من القهوة و دمعتها سايلة على خذها ..ما عرفاتش راسها مالها بالضبط من غير أن اعصابها و نفسيتها مدمرة على الآخر و كتقلب غير فمن تبردهم .. ركبات فطونوبيلتها و حنات راسها على لفولا ساكتة حتى حسات بالباب تفتحات و ركبات ختها .. ما دارت حتى رد فعل .. كتسمع لها فصمت .. 

أسماء: جايباني كنعتر فحوايجي و دايرة لقووق فالراس لأنس خصني غير فوقاش نوصل عندك و قلبي ما عالم بيه غير الله فلخر تطرطقي بحال البوطة فوجهي قدام لي يسوى و لي ما يسواش مخلياني تابعاك بحال شويش دالهم .. من نيتك نتي ؟ منين ما باغانيش ما تعيطيش عليا 

حنان:( ميلات راسها جهتها و شافت فيها ) اسماعيل صدق مصاحب مع واحد البنت غزاالة .. باينين من عينيهم كيبغيوا بعضياتهم بزاااف 

أسماء: الصمت 

حنان: ما عرفتش علاش فواحد اللقطة تفكرتوا .. و شفتوا فخوا راجلك ( عينيها غرغروا ) توحشتوا أختي توحشتوووا .. علاش دار فيا هاذشي ؟ 

أسماء:( بعد مدة ) ياك قلتي نسيتيه ! و ما بقاش هامك ؟

حنان:( بضعف ) ما نسيتووش عرفتي شنوا كان بالنسبة ليا ؟ هو أكثر حاجة كانت زوينة فحياتي .. كيفهمني غير من عيني بلا مااا نهضر .. كيحاول يفرحني بأفعالوا و بشي حويجات بساط و لكن قيمتهم كبييرة عندي .. لقيتوا فالوقت لي ما كان حتى حد فحياتي لا نتي لا ماما لا بابا لي كل واحد مشغوول فحياتوا ! ( شهقات و حطات وجهها بين كفوفها كتبكي ) بغيت غير نفهم شنوا درتلوا خايب باش يتقلب عليا هاكا ؟

أسماء:( جابتلها البكية .. حطات يديها كتحكهم على ظهرها بمواساة ) ما يستاهلكش و الله ما يستاهلك 

حنان: عرفتي شنو ؟ كرهت جنس الرجال و ما يجي منهم .. كنت نية معاه بزااااف بغيتوا من قلبي فلخر شوفي باش جازاني ! 

أسماء: الله ينتاقم منوا و يديرلك لي فيها الخير 

حنان: عرفتي أكثر حاجة كرهتها ؟ هي ما بقيتش عارفة راسي كااع ! تبدلت بزااااف فوق لقيااس كااع وليت نعطي وقت للي يسوى و لي ما يسواش يدخل فحياتي .. عكس فاش كنت معاه .. كان مزيرني بالمعقوول و ما نقدرش نتململ .. كنت كنحس معاه بالأمان و بلي بصح باغيني ( ضحكات بقهرة ) و لي كيضحك فهاذشي كامل هو نهار تفارقنا قالي واحد الجملة ما بغاتش تنسى ليا .. 

أسماء:( شافت فيها بمعنى ااش ) 

حنان : حنان كنتي و غتبقاي حاجة زوينة دازت فحياتي .. كنتمنى تبقاي كيما عرفتك النهار لول و تعيشي حياتك بطريقتك ( شافت فيها ) ساعتها ما كنتش مستوعبة جابلي الله بحال يلا كيضحك معايا .. كن عطاني سبب مقنع نقول ااحح و بردات .. سولتوا و قلت ليه .. غتخليني ؟ بغيت غير نتأكد !

أسماء:( تنفسات بعنف و جراتها عندها عنقاتها بقوة ) صافي نسايه و الله ما يستاهل تفكري فيه و لا حتى تطيح من عينك دمعة عليه .. نتي قوية بيه و بلا بيه .. لي خلقوا خلق غيروا 

حنان: جاوبني و قال ااه و غنمشي و متأكد من شنو خليت موراي .. ( هزات عينيها فيها ) كان متأكد من تربيتوا زعما ! فخبارك ختك موراه ضااعت .. دمرني بمعنى الكلمة .. ما بقيتش عارفة راسي شكون و شنو باغى ! 

أسماء:( كتحاول تبدل الموضوع ) باش عرفتي اسماعيل مصاحب ؟ قالها لك ؟

حنان: ااه و شفتها بعيني .. موااتيين مع بعضياتهم .. فاش شفتهم رجعوا ليا كاع المواجع .. ماشي حيت عمرت راسي بيه .. حيث من لول ما كانش هامني لديك الدرجة .. و لكن موضوعوا النقطة لي فيضات الكاس .. يمكن كن بكيت من شحااال هاذي غنكون دابا مرتاحة .. زعما هاذ الدمووع يبردوا العافية لي شاعلة فقلبي ! 

**************************

ذبحني الليل .. بدونك و الله ما أقدر
وحيد و يا الهمووم أسهر .. أشووف الويل
أنادي و صوتي يرجعلي .. حبيبي وين وعدك لي
إذا دار الزمن فينا .. و إذا ضعنا و تأذينا 💔
نروح لشارع الذكرى .. اللي بفضله تلاقينا ! 
أروح و انطرك كل يوم .. يتيم من الحضن محروم
اخترعت أعذار ياما أعذار لقلبي الي ما يبطل لوم 
تعال و سكت ظنوني .. تريد تشوفك عيوني ...
تعيش شلون من دوني .. ذبحني اليل بدونك و الله ما أقدر 💔

***************************

حنان:( بقات مدة طويلة و هي كتبكي و تشكي على ختها حتى بردات و قالت ) بكيت عليه كثر من لي يستحق ( تنفسات ) ليووم دفنتوا و تهنيت .. عمري نرجع نعاود هاذ الغلطة مرة أخرى .. تعطلنا نوصلك للدار ؟ 

أسماء: أحسن حاجة غادي ديري .. ما تخلينيش نسافر و قلبي مقبووط عليك .. بقالي ثلث أيام هنا و نرجع لهيه بحالي بغيت ندوزوا هاذ ليام ضاحكين و فرحانين ( هزات تيليفونها كتعيط ) بلا ما تعذبي هو غير هنا قريب مع شي صاحبوا كيتسناني ... 

حنان: صافي واخا 

اسماء:( كملات معاه الهضرة و شافت فيها ) عمرك تربي الكبدة على ولد المراة حيت من لخر كلهم مقطرييين .. الكبدة كناكلوها ابيبي .. شفتي أنا مزوجة ماشي حتى مصاحبة و يلا دار معايا انس قد هاكا من غذا نقولوا الله يعاونك .. 


أسماء : و يلا دار معايا انس قد هاكا من غذا نقولوا الله يعاونك .. يلا بغيتي ترتاحي كوني أنانية و ما يهمكش غيتبعك بزز منوا و يدير لخاطر حيت هو لي محتاجك فحياتوا و عارف زايد ناقص عندك .. أما يلا عرفك طايحة مشات على عينيك ضبابة غيمرمد مك تمرميدة دالكلاب 

حنان: ماشي غير جاو و قالوا .. خليك دافعة كبير حيت إلا مشيتي حتى عطتيه قيمة .. غيعطي لمك ديركت للقلب ( تنهدات ) هاذي دارتلي العقل .. أصلا ما عندي ما ندير بجنسهم .. دابا عقلي كلوا مع خدمتي لا غير 

أسماء : و هكاك نبغيك الحب

تسناوه مدة قصيرة حتى بانلهم جاي جهتهم مبتاسم .. نزلوا عندوا حتى هما من بعد ما مسحات حنان دموعها واخا باين فعينيها بااكية .. عنق مراتوا جنب و سلم على حنان بلا ما يحكر و لا يسولها ... حتى قالت هي 

حنان: أنس بخير ؟ 

أنس:( ضحك ) حسن منك اسليفتي 

حنان: ههه ياك بعدا ؟ ايوا مزيان اسيدي ايوا الله يخليك ديما فرحان ما تشوفش نهار كحل فحياتك 

أنس: علاه لي عندوا هاذ الزين فداروا يكون مقلق ؟ ( شاف فأسماء لي تزنكات و غمزها )

حنان: كااينة .. غير تهلى فيها عرف راك بوحدك لي عندها فداك البلاد ( بحب ) الله يخليكم لبعضياتكم و يبارك لكم فزواجكم 

أسماء: أمييين العمر أميين و يلاقيك حتى نتي مع لي يستاهلك 

حنان:( قالت متلفة لموضوع ) يلا كان بحال انس علاش لا ؟ ما تقسميهش معايا ؟

أنس : هههه ايه علاش لا ؟ فورفي فابور .. تاخذ وحدة نعطيوك الثانية معاها كادوا ( أسماء طرطقات بالضحك فحين حنان قالت )

حنان: غير كنضحك .. الله يجعلكم فحال صوفة هادا ميهلك هادا .. الله يجعلكم فحال زبيب .. كبيرة حلوة وصغيرة حلوة .. الله يجعلكم فحال القوادس هادا يكب فهادا ههههههههه 

أنس:( تصدم رجع حممممر بقوة لي شاااد الضحكة أمااا أسماااء رااه كتفيبري فبلاصتها و تضحك بالدمووع في صمممت ) 

حنان: واا قولوا أميين مالكم خوووضر ! 

💫💫 جوهرة 💫💫

دخلات للدار فرحاااانة و علاش لا و هي داخلة فمرحلة جديدة فحياتها .. كتعيش فيها شي مسائل غراااب عليها و أول تحس بيهم ! ابتسامة جميلة مزينة ثغرها استقبلت بيها أمها و جدتها لي لقاتها عندهم هي و عمتها و مرات عمها .. استغربت من حظورهم حيت قليل فين كيجيوا لعندهم .. لكن تعاملات عاادي و رحبات بيهم .. 

دخلات لبيتها بدلات عليها و صلات صلاتها و خرجات حداهم كتسمع لهضرتهم فسكاات و كتحااول تربط لي كيتقال فعقلها و تفهم الموضووع .. 

العمة :( ضربات ففخاذها كتنكر ) داك الولد بغى يحمقني و يهبطلي النقطة يا ربي الحبييب و شغندير معاه .. غوتنا ما نفع هضرنا بالعقل ما فهم .. لاسق فيها بيديه و رجليه بحال يلا فيها الكنز ..

رحمة:( أم البنات ) ما فيها باس .. ما دام عاجباه خليوه على خاطروا ما تعرفوا ربي يكون داير ليه فيها الخير 

العمة: ياك ا مرات خويا ؟ ايوا هذا هو المضمون فيك اختي ( بانفعال ) مال ولدي ناقصاه يد و لا رجل باش ما يديهاش عزبة بحالوا بحال قرانوا 

رحمة:( بطيبة ) فهاذ الوقت لواحد كيقلب غير على راحة البال اختي .. بحال بنت بحال مطلقة بحال هجالة .. المهم تكون بنت الناس .. ما تزيريش بزااف باش ما يطجش 

العمة: هذاك بغى يطرطق ليا المرارة و غير ضد فيا راكب راسوا و منها يخلاق زعما نتاحري موتي نتي معكسة و انا معكس كثثثر منك .. واش اعباد الله كن كان فيها الخير غيطلقها الراجل لول ؟ ماشي صام حتى صام و فلخر يفطر على بصلة ! يجيب لداروا لخبز البايت ؟ و يعلم الله شنوو مدوزة !!

جوهرة:( هزات عينيها فيها ما حملاتش كلامها و بانت فوجهها )

رحمة : ما تعرفي شكون فيهم لخايب بين الراجل و المراة حد ما يقدر يحكم .. هما لي عارفين علاش تفارقوا .. يهديك الله راه حتى حنا عندنا بناتنا طلبي غير السلاكة !

الجدة:( نطقات ) المراة لي ما تجمعش دارها و تحافض عليها ما عندنا ما نديروا بيها .. بنات ليوم بغاو يطيروا .. اما فوقتنا ما كانش هاذشي لي عندكم نتوما دابا .. المراة كدوز عليها و ما كتقولش ااحح .. اما دابا غير لي فاقت من نعاس تقولك نطلق ( شافت فجوهرة و رجعات شافت فرحمة ) ما عندناش حنا لبنات لي يطلقوا .. بنتنا ما ترجع لدار باها إلا و هي مكفنة .. ما تعمريش للبنات راسهم بهاذ التخربيق !

جوهرة:( تخنقات من الجو و ناضت خرجات من تماا بعدما استئذنات منهم على أساس عيانة تدخل ترتاح )

تكات فبلاصتها كتفكر فهضرتهم حاسة بدقات قلبها تزادوا و الخوف دخل مع ضلوعها .. حسات راسها بموافقتها دخلات فالصح و بقدر لي كانت فرحانة بهاذ الخطوة بالقدر لي تخلعات لا تصدق من بعد نادمة و ما تنفعها ندامة .. لا تعود كيفما قالت عمتها خبز بايت .. داخت و الأرض ضارت بيها ما بفات عارفة ما تقدم و لا توخر .. اختارت فالأخير تستغفر مولاها هو لي قادر يدبرها احسن تدبير .. 


جالسة جوهرة فجنان كيفتح النفففس كلووا مزهههر غير كتشووفي المنننطقة كتفرررحي و نفسك تترتاااح ما تكرهيش تبقااي حيااتك كااملة تماا بين الشجر دالتفااح و الزيتوون و الخيرات لي ضاايرة بلالة جوهرة من كل جهة و طريق ..

جوهرة لي كاانت بحال شي جوهرة كتتتتلمع بمكياجها الناعم الموضوع على حرووفها المسرااارين .. بلبستها التقيييلة المزينة بالمجوهراات الغاالية .. كانت لبسة ديال عرووس " الأميرة " 

شاافت فسميرة لي جاالسة حداها و قالت بابتسامة 

جوهرة: فين مشى ياسيين ؟ شفتوا تعطل ياكما تلف علينا ؟ ننوضوا نمشييوا نقلبوا عليه لا يتوضر فهاذ الخلى ؟

سميرة : بصح تععطل ! صبري نصوني عليه و نشووف ( وقفات حاطة تيليفونها فووق وذنيها كتصوني و تعاود و جوهرة حااضياها بقلق حتى شافتها ضحكات و هي تقول بلهفة )

جوهرة: واش جاوبك ؟ راه بخير ؟

سميرة : لا رااه هو فين جاي شفتيه ؟

جوهرة:( ضارت بانلها جاي من بعييد بجلابة فالأبيض .. كيبان بحال شي ملااااك .. ابتاسمات من أعمااااق قلبهاا و وقفات بالشوية عليها كضحك مع سميرة بخجل ) انمشي نتلاقاه و نجييوا بجووج ..

تمشاات جهتوا بحال شي فرااشة .. عينيها ضاااحكين و بااينة عليها فرحاااانة .. كتشووف فيه بكككل حب ..حتى قرباات جهتووا و هو يضحك لها ضحكة غرييبة .. مدلها يدووا و قال 

ياسيين: أجي معااياا 

جوهرة:( بابتسامة ) فين ؟ راه مشى الحاال خصناا نمشييوا قبل ما يطيح الظلام و يتهولوا علينا

ياسيين:(باصرار ) غير أجي ماال رااسك قااسح

مدلها يديه كينعتلها بعينيه جهتها .. ما ارتاح حتى قبطات فيه و زادت معاه موكلة أمرها لله .. تمشااو مساافة طويييلة و كل شوية تسولوا وااش باقي ؟ راني عييت .. ما مرتاحاش يالاه نرجعوا .. و هو كيسكتها بها حناا قربناا .. غير صبري راك معاياا ما عندووا ما يوقع ! 

و فوااحد اللحظة اختفى كااع دااك الجناان .. استغربات و هي كتشووف شلال قباالتها .. ناازل بغزااارة وااحد منظر زوين بزااف بل راائع .. خصووصاا هما جاايين فالرااس ديالوا الفوق .. ضحكات بفرحة 

جوهرة: نااري هااذ البلاصة جننننة فوووق الأرررض .. هااذشي لي بغيتيني نشووفوا ؟ زوين بزاااااف

ضارت عندوا بابتساامة لي سرعاان ما تبدلات لخوووف و عينيهاا خرجووا من بلاصتهم .. كااع ديك الصوورة الجمييلة لي كاان مرسووم بيها فعينيها تبدلاااات و جاات بلاصتها صورة شيطاانية ما تقدريش تكملي فيها الشووفة بكثرة ماا كتخلع و عينيه كيخرج منهم الشششر ..

غمضااات عيينييهاا كتترعد و تعيط بصوت خاافت على يااسيين حتى تسمعاات ضحكة قوووية و دفعها بيديه بجووج من الحاافة .. حتى فقدات التواازن و طااحت و هي كتغوووت بكل حرررهاا خصووصاا فاش باانلها كااع دااك الشلااال رجع عبارة على بركان والعااافية شااخضة فيه كيتسمع صوتها كيبقبق برعب خطييير كيبووورش اللحم .. قبل ما توصلي ليها قلبك يسكت بالخووف .. عافية شاااعلة خااصها غير ماا تااكل و هي أكييد غتكوون وقوود لييهاا ..

طااحت دمعة حااارة من عييينيهاا و فااااخر لحظة حسااات بشي يد قويية جبدااتهاا .. و فالبلاااااصة فاااقت جوهرة من كاابووسهاا كلهاا عرقااااانة كتتتترجف و عينيها كيضوروا فالغرفة بخوووف .. مسحاات عينيهاا لي كاانووا داامعين .. و بدات كتردد 

جوهرة: أعوووذ بالله من الشيطان الرجييم ...أعووووذ بالله من الشيطااان الرجيييم .. 

باقي كتكررهاا و تسمع صووت أذاان الفجر .. تسنااتووا حتى كمل و نااضت توضاات و قاامت صلاتها .. بإسدالها نااصع البيااض .. دعااات من قلبهاا و رجعات تخشات فبلاصتها و قلبها مرعووود و خاايف من الحلمة .. لي برراتها بلي غير الشيطان و حيت نعسات مقلقة و خايفة من هضرة جدتها و عمتها و ديكشي تعكس فحلمتها ..

دازت عليها ليلة طويلة .. كتنعس شوية و ترجع تفيق مخلووعة .. دماغها بقى مرمجة مع الحلمة .. ما لقاتش راحتها نهائيا .. حتى شرقات الشمش فجو مغيم و باارد شوية .. ما حسات غير بمها لالة رحمة كدوز على راسها كتفيقها 

رحمة: نووضي ابنتي الله يرضي علييك ..نووض نخلي قداامك البووطة نمشي نتقداا لي خااصني .. راه عيطات عليا لالة سميرة و علماتني بعد غذا غيجيوا لعندنا نديروا خطبة رسمية 

جوهرة:( حلات عينيها منفووخين و قالت بصوت ناعس مصدوم ) بهاذ الزربة !

رحمة: ايوا خير البر عاجله منين مفاهمين .. ما كاين لاش نزيدوا نطولوا 


جوهرة:( ما لقات ما تقول ) واخا خلييني بعدا غير نصحصح و نوض نمشي معاك نعاونك .. رااه الطبيب قالك ما تهزيش الثقل اماما .. غتمشي و ترجعي مريضة بظهرك عااود

رحمة: ما غنتعدبش غير كوني هاانية رااه الحااج معااياا بطونوبيل يا الله يكفينا الوقت نسااليوا و نجييوا ..و نتي الله يرضي عليك جمعي الداار و ضربيها بحكة و غسلة للداار و لركااني .. نعول عليك و غير يجيوا خواتاتك راهم يعاونوك

جوهرة: و جدة و عمتي باقيين ؟ 

رحمة: لا مشاو لبارح مور لعشا .. بغاو يسلموا عليك ساعة لقاوك نعستي .. كنتي عيانة يمكن ؟ مهم بلا ما تزيدي تشديني بالهضرة .. نوضي ديري لي وصيتك عليه .. لبنات سيفطتهم يتسخروا ..شوية و ها حنا معاك 

جوهرة: واخا اللهم يسر !

خرجاات و خلاتها كتشووف فالسقف و قلبها مخطووف عليها ما زال الحلمة بين عينيها .. استغفرات الله و نااضت جمعات بلاصتها و غسلات وجهها و سنانها .. طفات على البوطة و داازت تحزمات للداار .. خملاااتها كلهااا .. صبن هااذي و حك هااذي و مسح لووخرى .. جبد هاذ الجنب و نفض الجنب لاخوور و هي غاادية حتى دخلوا مهاا و باهاا محملين مجملين .. لقااوهاا يا الله كملات و جلسات كترتااح .. رجعات كتقققطر بالعررق و لكن الكذوب على الله حراام الداار ولات كتتتشعل تشوفي فيها وجهك ... 

الأب:( شاف فيها و قال ) سيري ابنتي لبيتك يدخلوا المعلمين السخرة لي بقات ...

جوهرة: ااه وااخاا 

دخلات لبيتها كطير .. عااد تمووا جاايين الرجاال بديكشي الثقييل .. بقات عااسة عليهم حتى سمعااتهم خرجووا .. و هي تفتح لباب كتسلت تأكدات ما بقى حد و مشات عند مها كتشووف شنوو جاابوا ؟ 

جوهرة:( كتقلب و تهضر ) ماما شنوو غنصوبوا ؟ دزتوا عند شي طريطوور هضرتوا معاه ؟

رحمة: علاه باك بغى ؟ قالك الالة ما كاين ما حسن من مااكلة ديال الداار .. و وااش الناس معرووفين عليهم أحسن طريطور فالمدينة و حنا نجيبوا واحد أخر فعراضتهم ؟ ما جاتش ! ايوا انا قتلوا صاافي غير سكتناا انا و بناتي لي غنطيبوا ما نجيبوا حد ( وقفات شاادة ظهرها ) ميي ياا مي على الظهر و الصحة مشااااات ... اححح ا يا ربي الحبييب .. جوهرة اجي ستفي معاك هااذشي فالتلاجة كل حااجة مع ديالها .. نحيد جلابتي و نجي نعاونك .. لبنات باقي ما جاوش ؟

جوهرة: باقي .. فين سيفطتيهم ؟

رحمة: عند خالتك نعيمة .. ياخدولك شي قفطان يجي مع المنااسبة .. و يكريوا لراسهم حتى هماا .. و عااد يدوزوا عند حياة الكوافورة يعلموها بااش تخوي بعد غذاا ليك 

جوهرة: و لاش هاذشي كامل ؟ ياك غير خطبة ! أنا راه ما غادي ندير واالوو غير كوني هانية ! اويلي اماما بغيتيني نخرج عندهم مزوقة كي تعريجة يقول هااذي فرييفرة و كانت على القرص ! 

رحمة: رااه انا لي غنجي نقرررص بنتي .. وااش بااغى تحمقيني ؟ شفتيه هو كيف جاا دااك النهاار اللبااس و الرواايح و الحالة و نتي تخرجي عندوا صفرة ؟ يقوولوا غير مزوجينك بزز 

جوهرة:( بهدوء )وا ماما غير فهميني 

رحمة: نتي لي فهميني .. هاذشي لي كتهضري عليه نتي د زمااان .. أما دابا هاذشي ما موكلش !! يلا نتي قابلة تتشوهي حداه و حدا عائلتوا لي يعلم الله شكون جااي .. انا منرضاهاش ليك ( حطات يديها على حنكها ) اصلا بنتي غزااالة بلا واالوو فما بالك يلا قادات و صوبات .. تفتني قبيلة و تجيك قليلة 

جوهرة:( ضحكاتها ) هههههه و اكيد راني بنت لالة رحمة !

💫💫💫 يوم الخطبة 💫💫💫

تجمعوا العائلات بجووج بالضحك و النشاط .. صالون مجموعين فيه العيالات و صاالوون فيه الرجال .. مقابلين مع بعضياتهم .. فاصل بينهم غير خمية خفييفة .. الكل فرحان بهااذ الزوااج و ما قاداهم فرحة .. حتى قال

مصطفى:( برزانة ) ايوا اسياادنا .. منين الولاد تافقوا بيناتهم ما نزيدوهم غير الخير و البركة .. نقراو الفاتحة .. 

هزو يديه كلهم كيقراوها رجال و نسااء .. كملوا و سيفط يااسيين مسج لسميرة لي قراتوا فالبلاصة و وشوشات لرحمة .. هاذ الأخيرة لي مشات عند بنتها و نوضاتها مخرجاها ..

رحمة: اجي بنتي هنا ( فتحات باب السيجور و دخلاتها ) العريس بغى يشووفك .. 

دخل ياسيين بكومبلي فالأسود شكلوا أنيق و يسر النظر .. ماشط شعروا جنب و مخليه مبعثر بعفوية .. 

هزات راسها فيه فاش قرب منها و شمات ريحة عطروا لي طغات على الغرفة .. ابتاسم لها ابتسامة جميلة و بادلاتوا لكن سرعان ما تزنكاات من نظراتوا لي باين فيهم الإعجاب عكس النهار لول .. 
مقادة وجهها خفيف و لكن باارز حروفها .. خصوصا هي مكديروش كااع و نهار دارت بان فرق كبييير فملامحها و طااح عليها السر .. 

باينة فيها عروووسة من لباسها و قفطانها الباج لي تقول مخيط ليها .. واتاها لدرجة كل مرة تهرب عينيه لجهتها .. 

ياسيين: مبروك علينا !

جوهرة: الله يبارك فيك .. 

ياسيين:( جلس و شاف فيها ) غتبقاي واقفة ؟ 

جوهرة:( جلسات مقابلة معاه ) فاش بغيتيني ؟

ياسيين: ضروري نشوفك غير يلا بغيت شي حاجة ؟ ( سكتات و هو جبد واحد البواطة كبيرة مدها ليها ) هذا ديالك ( شافت فيها بمعنى شنو هذا ) خوذيه و غتعرفي !

جوهرة:( مدات يديها خذاتها و فتحات لبواطة .. كان smart phone .. تفتحوا عينيها و شافت فيه ) ديالي ؟ ( حرك راسوا بأه و هي تنطق بالزربة ) لا لا سمحلي ما نقدرش ناخذوا من عندك ( وقفات ترجعوا ليه و حبسها بهضرتوا )

ياسيين: راحنا زعما مخطوبين دابا و داخلين على زواج .. أي حاجة احتاجيتيها علميني ! ( كمل بتفسير ) كنبغي نهضر معاك ما كنلقى فين .. خاص نعلم سميرة و سميرة و تعلم الحاجة و عاد تعلمك ( ضحك بمزاح ) واخا نكونوا كنهربوا الكوكايين !

جوهرة:( ضحكات ) و لكن !

ياسيين: بلا اعتراض .. صافي هضرت ! راه درتلك لاكارط جديدة تما و دختلك نمرتي .. فاش نعيط جاوبيني 

جوهرة: واخا شكرا ( بقى كيشوووف فيها حتى ضحكها بقات حابسة الضحكة حتى حس على راسوا )

ياسيين :( حك عنقوا ) عرسك كي بغيتيه يكون ؟ خصك تعطيني كيفاش متخيلاه بالضبط باش نوقف عليه بيدي .. فبالي يتدار قبالت لبحر يكون شبابي لا غير .. بحال لي كيديروا أغلب الأجانب .. غيطلع واااعر .. و نهار دالحنة ديريه ساعتها تقليدي بلباسي مغربية 

جوهرة:( قاطعاتوا ) و لكن أنا ما باغاش العرس .. ما كاين لاش الصراحة !

ياسيين:( بقى غير كيشووف فيها باستغراب .. أول مرة يسمع شي بنت ما باغاش دير العرس و تفرح براسها .. عيى يحاول يفهم هاذ السيدة و لكن ما فهم فيها والو كل مرة كتصدموا بحاجة جديدة ) علاش !؟

جوهرة: ما عندها معنى .. نبقى غادة ماشية عليهم و كلشي حاضيني .. كيجيني غير تضياع وقت و الفلوس و صافي .. يلا درنا بعدا نديروا عشية دالقرأن و الطلبة .. باش ربي يسرلنا فزواجنا !

ياسيين: أخر كلام ؟ ( حركات راسها بأه فحين هو وقف ) اووك لي عجبك أنخليك دابا 

خرج مخليها بوحدها .. بعد مدة ناضت تا هي فاتجاه صاالوون دالعيالات .. رمات عينيها لجنب فين وااقف يااسيين مع ختووا زينب و كيضحك و يحرك رااسوا .. بقاات سااهية فيه بلا ماا تحس .. عجبها منظرهم و تبسمات لا إراديا ... حتى هز عينيه بعفوية و شافها متبعة ليهم العين و هو يغمزها و عض جنب على شناافتووا بلا ما ينتاابهلوا حد من غيرها هي لي تصدماااات فيه و دخلات كتتتزرب تركناات حداا امهاا مزززنكة !


تجمع الكل فصالون واحد .. من بعد ما تستروا العيالات و لي داير شي فولار راه قادوا فوق راسوا و لي بلاش راه جاالس ألييز .. 

كلشي كيشووف فجهة وحدة .. فين واقف ياسيين مع جوهرة حدااهم طبيلة صغييرة .. فيهاا زلايف دالحليب و طبسيل دالتمر مشكل و فووق منو قبة ديال الكركااع و فالجنااب لي بوااط دالخوااتم .. 

طلعات تزنيكة مع ياسيين واخاا كيبين بلي عاادي ! و لكن بااااينة فيه حشمااان .. نفس الشيئ لجوهرة ما قالت حتى ركبوا دوك الخواتم و وكلوا بعضياتهم و خذااو ليهم تصويرات خفاااف .. خفا زربا من عند زينب لي هاازة كاميرة بروفيسيونال ديال ياسيين كتصور بيها و كل مرة خارجة ليهم ببوز فشكل .. 

مرة يديروه مرة يخرج فيها خوها عينيه تحشم و هي كضحك عليه جاتها الفرصة فين تنتااقم منوا و تضيعها ؟ ابدااااا حتى ما تكونش زينب بنمسعووود هههه

تجمع كلشي و جاا وقت تقطااع لاطاغط .. لي مكتووب فيها بخط زوين .. خطبة مباركة .. جوهرة ♡ ياسيين .. هاذ الأخير لي هز مووس صغيير و مدولها بابتساامة قاداتوا مع الحلوة و حط هو يديه على ديالها جامعها بين دفئ يديه و ضغط بالشوية حتى قطعووهاا و وكلوا بعضياتهم تحت أنظار الجمييع ! 

داز الوقت بالضحك و النشاط و كلها فين مجمع .. حتى نحنح ياسيين مربع يديه كيشوف قداموا بجدية و كيرتب الكلام فدماغوا .. عاد قال 

ياسيين: الحاج عبد الله .. نتاافقوا على الأمور أو لا ؟

الأب: اييه اولدي مرحبا 

ياسيين: دابا راحنا رجعنا عائلة و حباب ما كاين ما يتخبى .. كيفما قلت لك الشريف بنتك الله يقدرني نعيشها بحال راها معاكم و حسن كااع .. ما تهز هم من جهتها ( حك لحيتوا ) و كيفما كنقولوا خير البر عاااجله .. بما أن العروسة ما باغاش العرس ما كرهتش من هنا جوج سيمانات .. نضربوا كتابنا و نديروا عشا خفيف بين العائلات و نتوكلوا على الله !

كلشي تضهشر و كااين لي هرب منوا لوون بحال جوهرة .. بقااو شووف فيا نشووف فيك و كلها كيبركم فنفسوا اويلي مااالوا على هاذ الزربة كلها ؟ راه لي زربوا مااتووا يصبروا على خبزتهم طيب !! لا لا هاذ الزربة خاااايبة !! حتى نطق سي العريس مرة أخرى 

ياسيين: هاذشي من مصلحة جوهرة طبعا .. ما جاتش نبقى داخل خارج بيها و حنا غير مخطووبين هضرت الناس غتكثر و كلها كي كيفكر .. اللهم تولي محسوبة عليا شرعا و قانونا و تبقى هي معززة مكرمة ! 

الجد:( هناا عجبووا و هز راسوا برضى تااام ) عيييين العقل اولدي من عندي ما نزيدك غير الخير .. ااش قلتي ابنتي ؟ 

ضااروا كيشوفوا فيهاا حتى حشمووها و ما لقات ما تقوول من غير ..

جوهرة: لي بانلكم اجدي .. كلامكم هو لكبير 

الجد:( ضرب يد مع يد ) ايوا الله يكمل كلشي بالخير و السيمانة لي مور هاذي ضريب صدااقكم .. الله يتمم كلشي بالخييير 

الكل : أميييين 

تحط العشااء بتااويلوا و قواامووا و مالين الدار كيرحبوا و يعاااودوا .. تحمممر وجه جوهرة و كبروا بيهاا داارهم ما خلاولها ما تقوول و كلشي لاحظ معزتها عند واليديها .. حتى من عائلة العريس عجبهم الحاال و جاوهم النسااب على الكاانة .. 

و أخيراا كمل النهاار لي كتتمناه أي بنت مع حبيب القلب .. أما جوهرة فكاانت حالة خااصة .. عمرها بغات شي حد و لا فكرات شي نهار تجرب بحال كاع لبنات فلاج ديالها .. 

كتعيش هاذشي لأول مرة مع ياسيين .. أحااسيسها مخربقة بزاااف ..بقدر لي كتحشم منوا و ما كتقدرش تطلق معاه براحتها بقدر لي دابا كتفكر كااع دوك الأحذااث و تبتااسم بفرررحة عااضة على شفاايفهاا و عيينيهاا كيبريييوا بشعوور جمييل ... 

بعينين كيلمعووا هاازة يديها كتشووف فالخااتم و تتفكروا منين لبسولها و باسلها يديها و الاحساس الزويين لي أول مرة يدخل لقلبها و لي ما عرفاتش كي دير توصفوا أصلا ! التزنيكة طاالعة معاها بحال يلا راه واقف قبالتها كيشوف فيها .. طااايح عليهاا السسسسرررر بالفرحة ! 

قاطع تأملها صوت التيليفون لي كانت دايراه فلاشارج .. هزاتوا لقات نمرة مقيدة ب ياسيين و حداها قليب .. كتعيط .. جلسات فبلاصتها و بتردد قبطاتوا ... بقات ساكتة حتى سمعات صووت رجوولي فيه بحة زويينة نطق و قال

ياسيين: زيينة البنات !

جوهرة:( تزنكااااات ) ا أاا ؟ ( بتردد ) ياسيين ؟

ياسيين:( ضحك من الطريقة لي نطقات بيها سميتوا و رد بطنز) صدقتي كتعرفي سميتي الحمد لله ( جوهرة ضربات طمم ) غير كنضحك معاك ا لالة جوهرة ( سرح حلقوا و قال ) كنتي كتسناي حد من غيري ؟ 

جوهرة: لا غير ما سحابليش و صافي ..

ياسيين: همم .. بوحدك ؟

جوهرة: ااه باش عرفتيها !

ياسيين:( ضحك .. كتجيه نية بعد المرات و لا كطنز عليه وحدة فالجووج ههه ) خليت عندكم واحد العصفوورة تجيبلي خبارك

جوهرة:( ضحكات ضحييكة خفيفة تسمعات فوذنيه دييريكت ) هههههه

ياسيين: نقطع نعيطلك ابيل فيديو ؟ ( جوهرة سكتات ) ااش قلتي ؟ ( لا رد ) ههم فهمت ! اوكي على خاطرك .. كي بقيتي بعدا ؟ ارتاحيتي شوية ؟

جوهرة: اللهم له الحمد .. و نتوما كي وصلتوا ؟ 

ياسيين: مزياان مزياان .. المهم غذاا ان شاء الله ندوز عليك خرجي عندي 

جوهرة:( خرجات عينيها و قالت بلا ما تحس ) و علااااش ؟

ياسيين: نخطفففك ! نخرجك تشري الحواايج لي خاصينك .. انا ما غنعرفش فأموركم بحالك من الأحسن تكوني معايا و تختاري بذووقك .. أو لا ؟

جوهرة: نمشي مع خالتي سميرة و ماما حسن هماا يعاونوني !

ياسيين:( تنهههد مدددة و هو ساكت و رجع قال ) واخا علمي الواليدة ديالك غذا ان شاء الله خرجوا مجموعين .. عرفي راه الوقت مزحووم 

جوهرة: واخا ان شااء الله 

ياسيين: ياا الله تصبحي على خيير 

قطعات معاه و نااضت علماات أمهاا و تاافقوا على غذاا شنوا غيديروا و فين يمشييوا الخ الخ ..أماا يااسيين راه قطع معاها و قطب حجباانووا .. بقى مدة كيشووف فيدييه و بالضبط فالخاتم .. عااد ناض كيتعكز للمااريوا .. جبد شيشة ايليكترونيك صغييرة ..

جلس طااوي رجل و مسرح الثاانية هااز الكااميرة كيتفرج فالتصااور دالخطبة و كيشيش فنفس الوقت حتى رجع البيت مغمووم .. عينيه ثاابثين على تصويرة جاات عفووية و زويينة .. كيشووف فجوهرة بابتساامة و هي حاانية راسها و هاازة غير عينيهاا فيه مع ابتساامة خفييفة و التزنييكة طااالعة مع حنييكااتها .. تبببسم حااضيهاا بعيينيه المعسلييين .. 

💫💫 يوم جديد 💫💫

واقفة جوهرة بخمارها معاها رحمة بجلابة فبلون كاسي مع فولارها و أخيرا سميرة بجلابة كذلك .. دخلوا لواحد المحل كبيير بجوج طوابق فيه من الثواب الأشكال و الأنواع غير عزل و تخير .. كاع لي يصلاح لجهاز العروس .. تقدمات سميرة دخلات و هما تابعينها كيشوفوا فالمحل .. 

سميرة: السلام عليكم سيمحمد بخير ؟

محمد:( شافها و قرب عندها ) اهلا الحاجة بخير ؟ فين غبورك لا نتي لا لالة زينب ؟ 

سميرة: الحمد لله أولدي .. زينب غير مع الثقالة و صافي .. تا دابا جبتلك مراة ياسيين تتقدا من عندك جهازها 

محمد:( شاف فجوهرة و ابتاسم و رجع ركز معاها ) مرحبا اختي .. اش خبار سي ياسيين ؟

سميرة: كيسلم عليك و يوصي فيك تتهلى 

محمد: الله اودي .. ابراهيم ابراهيم ( كيعيط للمتعلم ديالوا قالوا شنوا يجيب ليه ) انجبدلكم ثواب دلباسي شوفوا لي عجبكم و عاد نشوفوا البقية ( شاف فجوهرة بتساؤل ) شمن ستيل فبالك باغاه ؟

سميرة:( قبل ما تهضر كانت سبقاتها و قالت ) أنا ما كرهتش بحال الشكل لي لبسات صفاء حبيركوا فعرسها .. و الأغلبية ولاو يديروا هاكاك .. كيطلعوا بحال الأميرات 

جوهرة:( بهدوء ) زوينين اخالتي و لكن معريين ليدين كلهم و مزيرين .. أنا مكنلبسش ديكشي .. تكون شي حاجة سامبل مستورة و شكلها مقبول و زوين .. و خفيفة فطرز ماشي عامرة ( شافت فيها ) و ما تكونش فيها الحجر 

محمد: حتى هاكا مزيان اختاروا التواب و ساعتها تافقوا مع الخياطة على شنو ديرلكم 

سميرة: اييه و لكن الحجر راه ضروري نتي ما غاديريش ديكشي عروبي و شاغجي ... غيكون خفيف و أنيق .. عرفتي شنو بلا ما تصدعي راسك بهاذشي غير خليني أنا نقادلك كلشي و غيخرجوا فلخر كيحمقوووا .. يعجبوووك غا كوني هانية 


جوهرة:( ما قدراتش تقول لا ) لي بانلك اخالتي 

رحمة:( ضحكات بملاطفة و حطات يديها على ركبة بنتها ) و لا ضروري تاخذي بذوقك حنا ما علينا غير نصحوك و الرأي لول و اللخر ليك أو لا ا لالة سميرة ؟

سميرة: أكيد .. راني كنصحها بحال بنتي .. كن ما كنتش دايراها بحال زينب كاع ما نجيبها لهنا .. راه هاذ من عند هاذ الولد سنين و حنا كنتقداو و من هنا نيت اختارت زينب جهازها و ها هو يقولك راه كان حاضر فالعرس .. كيفاش طلعات .. ما تكون بنيتك .. واخا ما بغاتش العرس ضروري من جليسة د حنينة بيناتنا باش ربي يحن عليهم 

رحمة: تبارك الله اصلا زينب غزاالة و شنو لبسات يجي معاها ( بهدوء قربات عندها كتوشوش معاها فحين محمد عيط على العروسة ناضت عندوا كاشوف الثواب) غير جوهرة راك عارفة كتلبس الخمار و كتحشم تزير و لا تبين لحمها لشي حد 

سميرة: اييه اييه و لكن بين العيالات هانية تلبسهم .. دابا حنا غير كنقتارحوا و صافي .. نوضوا نشوفوا شنو جابلها ( وقفوا حداها )

جوهرة:( بسعادة شافت فماماها ) شوفي هاذ الثوب زوين بزاااف عجبني .. حتى لونوا يجي معاياا ياك ؟

سميرة: لا لا ابنتي هذا سامبل بزاااف ما يجيش مع عرووسة أي وحدة ديروا نتي خصك شي حاجة مميزة ليك .. حتى لون جاني باهت و نتي تبارك الله بيضة خصكي شي لون يعكس بيوضتك 

جوهرة: بصح ؟ ما زوينش ؟

سميرة: لا لا .. صبري نشووف ( بقاات كتقلب و جبدات واحد و قالت ) هذاا بعدا و بعدا يطلع عليك كيحمق ( دوزات يديها عليه ) هو لي تاخذيه ياك ؟

جوهرة:( ما قنعهاش و بقات عينيها فالثاني ) اا ما عرفتش 

سميرة: صافي ا محمد جمعولنا ( شافت فرحمة و قالت ) دابا لبسة لقينا ثوبها .. بقاو جوج ثواب نديروهم قفاطن و شي جلابة ( شافت فمحمد ) عرفتي شفت واحد الموديل حمقني .. مع البارح كنت كنقلب و انا نطيح فيه ! 

جبدات تيليفونها كتوريه و هو كيجبد و يوريهم .. أي حاجة عجبات جوهرة ما كتعجبش سميرة و العكس عاود .. دازوا ساعات و هما غارقين بين الثواب حتى كملوا و تموا خارجين ..

سميرة:( باستها فحنكها بفرحة ) عروستي الغزااالة غيطلع كلشي عليها كيحمممق دابا تشووفي فاش يتخيطوا كي يجيوا .. غير نمشي للدار نعيط للخياطة لي كنتعاملوا معاها على الله تسربينا مع صلاة على النبي كتكون مطرطقة بالبشر كيجيوها منين و منيين 

رحمة: ااه و لكن ا لالة سميرة .. جوهرة مولفة كتخيط عند واحد البنت حدانا هي لي مصوبة ليها اغلب حوايجها و راني درت معاها زعما باش نتافقوا معاها 

سميرة: ااه وا لي بغيتوا أنا ما عنديش مشكل يلا كانت هاذي مزيانة حتى هي .. لي عجبكم !

رحمة : ايوا ماشي مشكل بحال بحال 

سميرة:( قاطعاتها ) ايوا منين بحال بحال علميها باش ما تبقاش تسناكم .. هاذي ديالي راه كتخرج من يديها الذهب دابا تشوفي خدمتها و تعجبك ..

جوهرة:( تنهدات ) واخا اخالتي ديري لي بان ليك

سميرة: صافي ليلة نهضر معاها و غذا نرد عليك باش كاين ... يلا كانت مسالية ندوز عليكم نمشيوا عندها باش تاخذلك العبار 

جوهرة: صافي واخا 


توادعوا معاها هي لي مشات فين دايرة مع مصطفى يدوز موراها .. و هما شدوا طاكسي راجعين للدار .. ساكتين حتى سولاتها 

رحمة: عجبك ديكشي ؟ مقتانعة بيه و لا لا ؟

جوهرة: ماشي مشكل واش عجبوني و لا لا ( تنهدات ) صافي ما عليش .. شفتيها هي شحال كانت فرحانة و هي كتختارهم 

رحمة: و لكن نتي لي غتلبسيهم ماشي هي !

جوهرة: صافي ماشي مشكل .. أصلا ما كنحظرش للعراسات بزااف .. يلا جاوني على شهوتي هو هذاك ما كانش راه عطى الله منين نكري و لا نخيط بذوقي من بعد 

رحمة: اييه و فالحنة ؟ شنو غادي ديري !

جوهرة: ما عرفتش حتال تما و يحن الله .. 

💫💫💫💫💫💫💫💫💫💫💫💫💫💫

دازت سيمانة طايرة .. كلها و فاش غارق و خايد .. لكن أهم حاجة تهنات جوهرة من الخياطة و سير و أجي .. حدها مشات معاها خذات لها القياسات و عطات لحماتها كامل الحرية دير لي بغات .. حسن ما يبداو فشد ليا نقطع لك من لول .. صغرات عقلها و دارتلها خاطرها و خلاتلها كاع ديكشي لبلدي تكلف بيه و هي شرات الرومي و بقية الجهاز .. أما ياسيين فمن ليلة الخطبة ما بقاو هضروا .. لا هو عيط و لا هي .. 

جالسة فالكوزينة كتستارح و تشوف مع مها و خواتاتها لي واقفين كيقادوا الحلوة لي غتحط فالحنة .. سمعات تيليفونها كيصوني و ناضت بالزربة مشات هزاتوا .. لقات سميتوا طالعة .. تهز قلبها من بلاصتوا و جاوبات فالبلاصة .. 

جوهرة: ألو 

ياسيين: السلام .. صافا ؟

جوهرة: بخير و نتا ؟

ياسيين: super .. كيف غاديين مع التوجاد ؟

جوهرة: ها حنا تنكابروا 

ياسيين: همم باينة من صوتك عيانة .. مهم نخليك ارتاحي دابا .. غذا فالصباح غندوز موراك باش تمشي للطبيب .. راك عارفة 

جوهرة: صافي واخا .. 

ياسيين: يا الله ا تووت 

قطع معاها و خلاها شادة التيليفون كتنهد .. حتى فتحات مها لباب نوضاتها علماتها بلي غذا غتخرج معاه .. عطاتها الموافقة و ناضت معاها تعشاو مجموعين فجو عائلي بعدها كل واحد مشى لبيتوا ينعس .. 

💫💫 يوم جديد 💫💫

جالسين بجوج فالكلينيك .. هازة فيديها التحاليل لي قالها ديرهم .. حانية راسها و ساكتة .. بانت ليه ما مرتاحاش و بيها شي حاجة يا الله غيهضر كانوا عيطولهم على رقمهم .. وقف و دخلوا للبيروا .. جلس براحة و شرح لطبيبة شنو المطلوب هذا الأخيرة لي استئذنات منهم و خرجات مخلياهم الراس فالراس .. نقر فوق البيروا بصبعوا و قال 

ياسيين: جوهرة مالك ؟

جوهرة:( بصوت مخنوق ) والوو 

ياسيين: هزي راسك نشوف ! ( جوهرة شافت فيه عينيها مدمعين .. صدماتوا ) مالكي .. هضري ؟

طبيبة:( يالاه وقف غاذي جهتها تفتح لباب و دخلات الطبيبة هازة واحد العلبة صغيرة فيها 3 دالشوكات .. بدات كتفتح العلبة و جوهرة متبعاها )

جوهرة:( طاحت دمعة من عينيها و قبطات فيديه بلا ما تحس ) ما بغيتش الشوكة .. كنخاااف .. ما كايناش شي طريقة أخرى 

ياسيين:( ضحكاتوا لكن بقى محافظ على هدوء ملامحوا ) كتبكي على الشوكة ؟ ( حركات راسها بااه ) راه غير نغيزة خفيفة ما غتحسي بواالوو ( شاف فالطبيبة ) ياك ا دكتورة 

الطبيبة:( ضحكات ) وااه .. ما تخافيش يدي خفيفة ما تقسحيش .. اجي جلسي هنا .. 

ناضت جلسات فين قالتها و وقفات مقابلة معاها عرات ذراعها من بعد ما دور ياسيين وجهوا .. دهنات لها بيطادين .. كديرلها الدواء و تضحك معاها فحين جوهرة مكنززة على راسها .. حدها شافتها طيرات الراس و كتقادها تضرب لها غمضات على عينيها بالجهههد و دموعها نزلوا بخوف .. بقات هكاك جهد جوج دقائق حتى سمعاتها قالت 

طبيبة: صافي كملنا احبيبة غير حلي عينك 

جوهرة:( شافت فيها و حناكها فازكين بالدموع ) صافي ؟

طبيبة:( ضحكات ) صافي .. ياك ما صعيباش ؟

بادلاتها الابتسامة .. شافت فالفاصمة لي محطوطة على لحمها و هبطات الكمام متجهة لعند ياسيين ..

طبيبة: هاذ البنووتة عندك خواافة و بكااية ههه

ياسيين: ههههه ( مدلها كلينيكس مسحات دموعها ودعوها ضاربين لها موعد من بعد شهر ..دار يديه فجيبوا و شاف فيها كيضحك ) غير شوكة و خلعاتك على هاذ الحساب الشي لاخور يلا شفتيه تسخفيلي !

جوهرة:( بعدم فهم ) شمن شي ؟

ياسيين: تا تجي عندي للدار و تعرفيه ( طرطق بالضحك ) باينة غتفاهموا من ديكشي غير الله يحفظ معاك و صافي 


جالس ياسيين فالصالون مع دارهم من بعد ما وصل جوهرة بحالها .. مصطفى مكسل كيتفرج فماتش دالكورة ما معاهمش فهاذ العالم .. مقابلة معاه سميرة لي الفرحة باينة فعينيها .. كتهضر و تعاود لولدها فبن مشات و جات و ااش داارت .. باغى عشية عروستها طلع و لا فالأحلام .. و تبان جوهرة بحال اللؤلؤ كتبري فوسطهم .. كاع لي يشوفها يتبهر ببريقها .. 

ياسيين: سميرة ما بانلكش تحمستي بالزايد ؟ كالما كالما هههه

سميرة:( ميقات فيه ) سري أنا لي كنحاجيك هنا .. ياسيين ياك أنا ماماك حبيبتك ؟ 

ياسيين: ماما ؟ لواه طاطا !! ( شافها تقلقات و هو يقول ) سميتها مك الشريفة ( سكت شوية و رحع قال ) من لخر ااش بغيتي ؟

سميرة:( قبطات فيديه ) نرضى عليك حياتي كاملة .. صباح و عشية يلا سمعتي كلامي و درتي بيه ( حرك راسوا بمعنى ااش ؟ ) مور ضريب الصداق أجي نتا و جوهرة سكنوا معايا عاافى اولدي

ياسيين:( جر يديه و قال ببرود ) لا 

سميرة:(كملات كتحاول تقنعوا ) علاش لا .. ها نتا غير سمعني .. انا نهار كامل بوحدي بين الحيوط ما كنلقى معامن نتوانس و نتهاود .. و نتا براسك وقتك كلوا مشغوول فالخدمة غتخليها فدار جديدة عليها غاخاف بوحدها 

ياسيين: اييه نجيبها لك و نخليها حطوا الراس على الراس و توانسوا ياك ؟ 

سميرة: ايوا ها نتا فهمتيني دابا الله يرضي عليك 

ياسيين:( حرك راسوا ) دار جديدة عليها اليوم و لكن غذا غتعود عليها و تولي دارها .. نتي عارفاني ماشي عاد دابا .. كنت عزري و كنبغي نجلس بوحدي مرتااح طروونكيل فدماغي .. ماشي حتى تزوجت عاد نجي نسكن معاكم .. لا أنا غنرتاح لا هي .. الداخل و الخارج عليها ..تبقى النهار كلوا مخنوقة بالفولار ؟ 

سميرة: أنا قلت زعما تجي تونسني بحال كاع العرايس .. 

ياسيين: هاكا مرتاحيين كاملين .. بغيتها داري راك عارفة فين جات و بابها ديما مفتوح فوجهك 

سميرة:( حنات راسها بحزن ) صافي لي بانلك .. نتا عارف معزتها عندي قداش و ما سخيتش بيها تبقى غير حدايا و لكن لي ريحكم ديروه ..

ياسيين: سميرة ( هز حاجبوا ) لي فراس الجمل فراس جمال غا هنينا من تبوحيط .. قلت لا هي لا سالينا .. 

مصطفى: اختاريتي فين غتسافروا ؟

ياسيين: تئ ! باقي حتى نشوفها هي فين باغى و نتوكلوا ساعتها 

مصطفى: مزياانة تجيك مع راس العام مخيرة كاااع .. 

سميرة: و لاهيلا كن غير مشيتيوا معانا حتى حنا مسافرين ندوزوا العطلة لي عند ختك ابتسام فأوروبا يالاه ترتاح شوية من ستريس .. مسكينة كتقاسي .. الله يوفقها هي و وليدات المسلمين كاافة .. 

الكل : أمييين 

ياسيين: و نديوا معانا خالتي فتيحة و زكية و جارتك بديعة و بنت عمك حتى هي عاد ولدات ترتاح ليها تا هي شوية .. و الحاجة ياقوت و كريم و زينب و راجلها تا هما لا ؟ راه قتلك تحمستي فوق القياس و ما عجبكش الحال ! الرجوع الله !


سميرة:( وقفات ) أنا راه ناقصني عقل لي متبعاك .. طنااز من طراز الرفيع عمرك تتبدل .. نمشي نشوف كاسكروطي حسن ليا

ياسيين: اودي الله يخلينا فصباغتنا ( بمزاح قال ) سميرة .. فبالك شميشة هي لوحيدة لي عمرك تسمعي عليها كلمة ناقصة .. لاش فنظرك ؟ ( هز حاجبوا و قال بذكاء ) حيت كاينة فالبلاصة لي خصها تكون فيها

مصطفى:( ضحك ) من لخر قالك سيري لكوزينتك قابلي عجينتك و خليه طرونكيل 

سميرة:( ميقات فيهم و مشات ) 

مصطفى: ما تديش عليها !

ياسيين:( باستهزاء ) فين عمري ديت عليها تقول لي بغات فمها هذاك .. راه عندي عقل كيفكر .. ماشي حتى وصلت لهاذ لاج عاد تجي هي تسير ليا حياتي ! تا هاذ الزواج كن ما اقتانعتش بجوهرة و عجباتني .. واخا تبقى تهضر صباح و عشية ما نديهاش 

مصطفى: عارف .. عارف ! واش عاد غتوريني فيك .. نتا حر فحياتك كيفما حتى هي .. غير الاحترام يبقى بيناتكم .. ما تجرحها ما تجرحك راه كتمرض فخاطرها و طيح للفراش .. بحال لي وقع داك النهار

ياسيين:( بجدية ) حنا لي درناها بيدينا و وحلنا فيها دابا .. هانية هي تجرح و حنا لا ؟ وصلات تخيرني بين السخط و الزواج و نربع يدي و نحني راسي ! المهم هي تكون بخاطرها ؟ يلا على هاذ الحساب نص فالمغاربة راهم مساخط الواليدين

مصطفى:( تنهد ) راه غير كتهضر ما تقدرش ديرها .. راك باقي ما عارف معزتك عندها .. كتصبح و تمسي بيك و ففمها غير ياسيين .. تحرقات فكبدتها عليك فاش تغربتي و ما قالت دخلتي حداها و رجعات شافتك و شمات ريحتك .. راه دوزات يامات النعاس ما كتشوفوش و تفيق كتبكي و تعيط عليك ... بغات تحماااق و تشووفك .. الكبدة صعييبة .. دابا تجربها و تحس بينا 

ياسيين: الله يسمحلنا من الواليدين ( بتساؤل ) ابتسام ما غتجيش فالويكاند ؟ 

مصطفى: راه مزيرة بالامتحانات النهائية ما كتلقاش الوقت فين تحك راسها .. بقات فالداخلية تخدم مع البنات .. حتى تكمل و تجي فخطرة تحضر لضريب صداقك و نسافروا من بعد .. 

ياسيين: مزيان الله يسخر .. 


فاقت هااذ الصبااح غير كل الصباحات .. ليل كلووا و هي كتتقلب فبلاصتهاا .. فرحاااانة و فنفس الوقت خااايفة و مخنوووقة ما متيقاش بلي صااافي هاذ النهار أخر نهاار ليها مع واليديها و خواتاتها ! و لكن واخا هكااك سكتاات و بلعات الغصة فقلبها و بقات كتلف .. حتى دخلات عندها ماماها و قالت 

رحمة: نوضي ابنتي لبسي عليك ما بقالهم واالوو و يجييوا .. يا الله نووضي الله يرضي علييك 

جوهرة: واخا اماما ..

واقفة فبيتها و هاذ المرة بقميس فالبيض مخيط بالقهوي مع شاالها فووق راسها .. مكتفية فقط بكحل حاار فعينيها .. مجبدهم و مخليهم كيلمعوا من حرووريتوا .. 

سمعات صووت الهضرة و الضضضحك و هي تزير على يدييهاا كدعي من قلبها يكون لها خير فهاذ الزوااج و ربي ما يخيبهاش .. جاو عندها خرجوها خواتاتها بالصلاة على النبي و هي فنفسها كطلب زهرهاا ..

ما فتحات عينيها حتى لقات رااسها فوسط الصاالون كلشي كيسلم عليها و يعنق و هي غير مبتاسمة و عاطية لكلشي صواابووا .. حتى تفرقات الجووقة عااد باانلهاا مووولاي السلطااان جاالس بالهههمة و النخخخوة مع موولاتي جلابة جاايااه كتحمممق ..

وااتااه البلدي و بين فصاالتووا و تكلديمتووا .. ابتاسمات ليه ابتسامة خفيفة و بادلها حتى هو بمثلها محرك راسوا بثقاااالة .. حتى قالها الجد .. 

الجد: أجي ابنتي حداا رااجلك .. باش نخليوا النااس يمشييوا لشغاالهم حتى همااا 

حنات راسها بطااعة و مشات جلسات حدااه فصمت مهبطة رااسهاا .. نطقوا العدوول لي كانوا جاالسين مقابلين معاهم فالطبلة .. بالدعاء للعروسين بالتسيير و بعض النصاائح ليهم و من بعدها قال واحد فيهم 

العدول: توصلتي ابنتي بصدااقك ؟

جوهرة:( شافت فيه و شافت فياسيين بنص عين و قالت بصووت خاافت ) بااقي

العدول :( كرر موراها ) باقي !

ياسيين:( حك لحيتوا و قال باحراج ) ماشي داباا من بعد ( بصوت منخفض سمعاتوا غير هي ) خلي حتى نكونوا بوحدنا

العدول:( شاف فجوهرة باش واش تعطيه لأوكي و لا لا )

جوهرة:( تزنكات و قالت بهدووء ) لا ماشي من بعد .. بغيت صدااقي داابا و قداام كلشي 

ياسيين:( عض على شفاايفووا بفقصة و شااف فيها بديك الشوفة ديال ياااك اختي .. سخن و وذنيه تزنكوا .. قال مغذذ ) واخا أ جوهرة .. واخا !


حشماااتووا بهااذ الموقف حتى خلات وذنيه يتزنكووا و ما حملش رااسوا .. و فدااخلوا كيتحلف عليها .. نحنح و ضور عينيه عليهم كلشي كيتسنى و باغي يفهم ااش وااقع !

ياسيين:( شاف فجدها لي جالس حداه من الجهة لوخرى ) طلبات فصداقها نحفض سورة الرحمان ( جبد برية من جيبوا و حطها حداها ) هاذي باش نحلل ..

كلشي تعجب من غير أمها لي ضحكاات حيت عارفة بنتها من دييما كانت كتقولها .. سااد صمممت رهييب فااش بداا ياسيين كيعرض السورة و هو مغغغمض عينيه و متخششع فيهاا .. صوتوا فيه بحة زويينة خلات كلشي متبع معااه ..

خصووصاا جوهرة لي عينيها كيلمعووا و هي حااضيااه و حاضية ملامحوا كيفاش كيتبدلوا .. جااسة بفرحة كبييرة فقلبها و راااضية تماام الرضى .. بل مفتااخرة بيه لأنوا طبق طلبها و داار فوق جهدوا باش يخليها على خاااطرها .. حيت من لي عاودلها فهمات بينوا و بين القرآن غير الخير و الاحسان .. و باش يحاول بكل جهدوا و يحفظ السورة .. راه كيعزها و مكبر بيها !

طوول المدة و عينيها ما حيدووش عليه حتى كمل و فتح عينيه عليها مبااشرة .. نطقات بصوت خاافت 

جوهرة: جازاك الله ألف خير .. شكراا بزااف 

تبسم لها عاادي و رجع كيشووف قدااموا فاش استئنف العدول كلاموا .. 

العدول: قابلة ابنتي بالسيد ياسيين بنمسعود زوجا لك على سنة الله و رسووله ..

جوهرة:( بصوت خافت ) قاابلة

العدول: و نتا اولدي قابل على جوهرة .. زوجة ليك على سنة الله و رسوله 

ياسيين: قابل 

رجعوا سولوا الشهوود لي كانوا جد جوهرة و أب ياسيين و سينااو على عقدهم ..و بهاذا جوهرة رجعات تحت ذمة ياسيين و تم التشهير بيها أمام الملئ لي ساارعوا بالمباركات و التهااني الخاالصة ! 

ياسيين:( جرها من يديها باسها فجبهتها بحراارة و نطق بصوت شبه مسمووع ) مبروك علينا .. و عقلي مزيااان على شنوو درتي 

هزات عينيها فيه لقاتوا مخنزر فيها بطريقة جذاابة فعفعاتها .. خافت و فنفس الوقت طلعات معاها التبووووريشة من نظراتوا .. بحال يلا عاد ضربتيها بتسرفيقة و عرفات راسها بلي صاافي تزوجااات و ما بقااتش ديال رااسها .. ما نقذها من هااذ الموقف غير سمييرة لي عيطاتلهاا تجي عندهاا 

مشات تخشات حدااها بحال يلا مخبعة فيهاا .. ما بقاتش كااع ضاارت جيهتوا و لا شاافت فيه .. 

سميرة:(جبدات كوولي بحوالقوا و براسلي و خااتم ديالوا و مداتولها فالبواطتوا ) مبرووك عليك ابنتي الله يكمل عليكم بالخيير 

جوهرة:( ما توقعاتهاش ! شداتها اللقوة ) اا ما كانش عليك تعذبي راسك ا خالتي شكرااا بزاااف ( باستلها رااسها )

سميرة:( ضحكات و دوزات يديها على ظهرها ) تلبسيه بالهناا و التسيير الغزاالة .. دابا راكي وليتي وحدة من بنااتي و بلاصتك من بلاصتهم .. 

جوهرة: لهلا يخطيك اخالتي و حتى نتي بحاال ماما عزيييزة و غاالية و ربي شاااهد علياا 

سميرة:( غمضات عينيها و فتحاتهم ) كلشي كيبان من الوجه ابنتي .. الله يرضي عليك و يكملك بعقلك .. نوصيك على حااجة وحدة هو الصبببر ثم الصصبر .. الزواج ديماا فالعام لول كيدوز صعييب .. كل واحد و كي كيفكر و كل واحد باغي كلاموا هو لي يكوون .. صعييب يتوالموا جوج دالناس و يعيشوا مرتااحين من لول ضرووري شوية دالمشاكيل و الغنان مرة مرة .. و هااذوا هماا ملح العلاقة .. غير هو كووني لالة و ماالي و عرفي كيفاش تكسبيه لجهتك و تصبري حتى تديري بلاصتك .. شفتي ياسيين و الله ما نشكروا قداامك .. ماشي غير حيت ولدي .. و لكن هو حنيين و طباعوا ما قدمتهم حدااك .. غير فيه ديك الطلعة مرة مرة و الزعفة و لكن يلا عرفتي ليه تااكليه بحواايجووا 

جوهرة:( برزانة ) حتى وحدة اخالتي ما كتبغي تخرب دارها بيديها و ضروري كيفما قلتي من الصبر و هاذشي راه تعلمناه من واليدينا و ان شاء الله ربي ما يخيبني 

سميرة:( ضحكات و باستها فحنكها ) و هااذشي لاش بغييتك و ما سماوك جوهرة حتى عرفوا ااش واالديين 

جوهرة:( ضحكات بخجل ) هههههه 

هزات عينيها بعفوية و هي تلمح ياسيين كينعت لها تنووض بعينيه دارت راسها ما شافتوش حتى سمعاتوا عيطلها قدامهم 

ياسيين:جوهرة أجي واحد الدقيقة بغيتك !

كريم:( شاف فيه بنص عين ) فاش بغيتيه ابلحرايمي لاخور 

ياسيين: سووق مك 

ناض خرج من الصالون هو وياها .. قبل ما تهضر قالها ..

ياسيين: زيدي وريني بيتك 

استغربات من طلبوا .. مشات فاتجاه البيت فتحاتوا و دخلات .. يالاه دخل موراها حسات بيه دفعها على الحيط مكاليها بيديه بجووج .. قريب منها لدرجة كبييييرة .. تخلعات تا بدا صدرها كيطلع و يهبط بالجهههد .. بالغفلة لي دارلها !

ياسيين:( هز حاجبوا ) ااش بلانك نتي !

تفتح الباب بالشوية و طل كريم غير براسوا كيدور فعينيه .. شافوا مقنتها و هو ينطق بصوت خاافت مسمووع 

كريم: واااا طلق دجاجة لماليها لا تبيض و توحل فيها 

ياسيين:( دور راسوا جيهتوا و نطق عاض على سنانوا ) كرييييم 

تزدح لباب فالبلاصة مخليهم الراس فالراس


ياسيين:(حك حاجبوا و قال ) كلاتلك الفارة لسانك ؟ 

جوهرة:( تلوناات و هو كيشووف فيها هاز حااجبوا بوااااحد النظرة كتففففشل .. ما عرفات ما تقوول من غير ) علاش أنا شنو درتلك ؟

ياسيين:( ضحك على الطريقة لي قالتها بيهاا ) شوفي و كان ؟ ( تزنكاااات و بقات ساكتة .. مد يديه لحنكها و قرصها منوا مع ضحيكة خفيفة ) والو اختي أناا لي درت تداارلي ههه

جوهرة:( عضات على فمها و قالت ببراءة ) الله ينجيك 

ركز عينيه على شفايفها مدة و رجع شاف فعينيها .. حيد يد وحدة من الحيط حطها فوق جلد عنقها حتى بورشها بيديه لباردين .. جرها منها جهتوا و تحنى لعند شفايفها .. حط ديالوا فوقهم بهدووء كيدوزهم بببببطئ يالاه كيكتاشفهم و يكتاشف طعمهم ! و يديه الثانية كتداعب حنكها .. و كيتلمس فرطوبيتوا .. 

هز عينيه فيها بانتليه مخلووعة شوية و تبكي .. تبسم بهدووء و دوز ابهاموا على شنافتها التحتية و تحنى مصها لها ببطئ شدييييد حتى شهقاات و رجع طلع للفوقانية داير ليهم النووبة .. مزيرها عندوا و متحكم فيها كيف بغى .. هي لي حااسة برجليها بحال لعجين كيلعبوا تحتها .. يطلقها تجي طايحة .. كانت قبلة متميزة بالهدوووء .. باغيها تولف ماشي تخاف .. خصوصا أنها أول قبلة ليها .. هي لي مشاعرها كانوا مخربقيين .. مغمضة عينيها و مخلياه يدير فيها لي بغى .. حسات بيه عضها بالشوية فجنب شنافتها حتى فتحات فمها و زااد تعمق فالقبلة بقووة كيكتاشف تضاريس فمها بكل حرية منتاقل من قبلة عادية .. لقبلة فرنسية بامتياااز .. حتى حس بطعم الملووحية ففمووا .. حيد بالشوية من عليها و خط دالتفال فاصل بينهم ..

شاف فيها باستغراب هي لي كانت مكمشة فمها .. رجعات بالزربة للور حتى خرجات من البيت و دخلات للحمام .. شدات عليها و طلقات الما .. حانية راسها على لافابوا كتشلل فمها بكل جهدهااا مخرجة لسانها بحال باغة ترض .. و الدموع شااقيين طريقهم فحنكهاا .. حتى سمعات الدقان و صوت ياسيين كيتكرر بخوف 

ياسيين: جوهرة مالك ؟ 

جوهرة:( جاوباتوا بصوت مرعد ) انا خارجة غير سمحلي عافاك

ياسيين: خودي راحتك وايلي ! غير واش بخير ؟

جوهرة: ااه مزياان 

ياسيين: اووك أنا فالبيت !

هزات شيتة دسنانها و الدونتيفريس ... قاداتهم و بدات كتحك سنانها و ملامحها كيوحيوا لحاجة وحدة هي عايفة رااسها !

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.