النقرة الصافية الجزء الخامس

من تأليف خولة الغريب
2020

محتوى القصة

رواية النقرة الصافية

مشات جوهرة بزز كتقدر تتحرك و تحتها عاطيها الحريق كتعكر فاش كتخلف و لا تزرب .. ناض ياسيين بلا ما يهضر مع ختوا و لحق على لوخرى بالزربة هز عليها فصمت .. حتى دخلوا للكوزينة و تمات راجعة و هو يجرها و جلسها فوق الكرسي 

ياسيين: جلسي هنا 

جوهرة: لا لا غير خليني .. حشومة و الله هما أول مرة يجيوا عندي شنو غيقولوا عليا 

ياسيين:( غوت عليها ) جوهرة جلسي بلا مرض حتى نتي .. هضرت معاك صافي سدينا 

خلاها و خرج من تم جر ديك الطبلة كاملة خرجها و جمع كلشي فجووج دقايق و داه للكوزينة .. لقاها واقفة كتوجد قهوة و دوازها و باينة فيها مقلقة .. ساط و مشى عندها دور يديه على كرشها و باسها فحكنها

ياسيين: ما تفورصيش على راسك و نتي عيانة ( بزز نطقها ) sorry ما بغيتش نغوت عليك ( الكرامة ديالوا ما كتفهمش لونجلي نعم انه الرجل الاسباني الله يهديه 😂)

جوهرة: ما تقلقتش و الله أصلا عندها الحق حشومة تنوضوها و الله و هي عيانة عاد كملات الامتحانات و جاية عندي ترتاح زعما 

💫 الداخل 💫

زينب:( ندبات حنكها بغات طير عليها غير متقلة ) واش مرييضة فعقلك نتي ؟ السيدة مريييضة و وجهها صفر باينة مسااالية و حنا جايين يا حسرة نشوفوها و نريحوها شوية ماشي نكلفووها و نعذبوها

كريم: ما كنبغيش نتدخل فهاذشي و لكن عيقتي .. دابا على هاذ الحساب هي خدامة عندنا ياك ؟ لابون ديالنا !! غير حيت كتكبر بينا ؟ بالرب حتى *ودتيها مع ياسيين 

زينب:( بانفعال عصباتها ) شافتوا سااكت و هي تبدا تترطى .. و الله ابنتي حتى ياكلك مااااكلة و الله حتى ياااااكلك غير صبري تبقاو الراس فالراس و تشوفي و عنداك تقلبي علينا نفكوك ساعتها

ابتسام:( بدات تبكي و تهضر بصوت عالي نوعا ما ) هاذشي لي كتعرفوا ليه نتوما .. ما حاسينش بيا أنا راني عيااانة ما قادراش واش بزز يووه

ياسيين:( دخل هاز سينية دالقهوة لقاها كتغوت .. حط لي فيديه و قرب منها مخرج عينيها فيها و عطاها وذنوا ) عاودي نسمع شنو قلتي ؟ 

كريم:( وقف بيناتهم و دفعوا شوية عليها ) صافي اصاحبي ماشي دابا 

ياسيين:( جرها من وذنها عندوا تا غوتات و كريم كيفك ) كنقسم فمي بالله و نسمع حلقك تهز حتى نجبد حلاقمك من بلاصتهم ( غوت فوجهها ) ما تختابريش صبري .. جلسي و سدي فمك .. و الهضرة ماشي دابا ( حرك راسوا بواخا ) نتفاهموا على هاذ قلة الأداب من بعد ا لالة ابتسام !

طلق منها و سكتوا كاملين .. فاش جات جوهرة ببلاطوا دالحلوة دالدواز و كيكة دالشكلاط و تويشيات خفااف ديال السقاطة .. قادات كلشي فوق الطبلة و جلسات فبلاصتها و سااد الصمت .. تا من ابتسام جلسات فبلاصتها مكونة ما رضاتش حداها .. حتى قالت زينب بلطف

زينب: عذبناك معانا ولاهيلا جينا غير قسيم نشوفوك كي بقيتي .. و مازالين شبعانين من الغذا احبيبتي

جوهرة: ما كاين عذاب ازنووبة و لعشية هاذي ضروري من شي حاجة .. دخلتكم عندي بالفرحات

زينب: الله يكبر بيك 

كملوا العشية باش كتب الله و كل واحد قصد داروا .. حتى من ابتسام لي كانت غتجلس معاهم دارت مناقص .. خافت تبقى معاه بوحدها يعوقها اللهم تمشي عند واليديها تتكمش .. 

بعد ما خرجوا ناض ياسيين للبيت هز شيشة كبيرة فيد و الجمر و المعسل فاليد الثانية و دخل عندها للصالون فين كتتفرج .. هزات عينيها فيه بعفوية و هي تشهق بالجهد .. 

ياسيين: حلال ليك



ياسيين:( جلس حداها حاط رجل على رجل كيتسناها تهضر .. و هي كتشوف فيه و ترجع تشوف فالشيشة )

جوهرة:( بصدمة ) كتشيش !!

ياسيين:( بطنز ) كنبخر من العين .. تبخري ؟

جوهرة:( بقات ساكتة شحاال و فلخر قالت ) ياسيين علاش ما علمتينيش من قبل ؟ ياكما كتشرب !!

ياسيين: تئ ما كنشربش ! اجي عندي يالاه نوضي حدايا 

ناضت جلسات لاسقة فيه بحذر و هو رمى يديه طيرلها الشال من راسها و غلغل يديه فشعرها كيسرح الشعرة من الجذر و هو نازل حتى لتحت و يعاود من جديد .. 

جوهرة: و حتى الشيشة راه حرام اياسيين و زيد عليها مضرة بالصحة .. كفس من الكاروا بدرجاات غتخرج على صدرك هاكا

ياسيين:( عقد حواجبوا ) باش نبقاو مزيانين أنا وياك .. موضوع الشيشة ما تجبديهليش اجوهرة ! نتناقشوا فأي حاجة تال ليها لا ! سنييين و أنا كنشيش غنجي بين ليلة و نهار نقطع ! 

جوهرة: و لكن

ياسيين: جوهرة معصب بلا والو .. جاي نقاد المجاج ما تزيدينش حتى نتي ( ضربها بخفة لفخضها ) نوضي نقولك 

جوهرة:( وقفات ) نعام !

ياسيين: غنعلمك تصوبيها ( غمزها ) من ليوم نتي لي تبقاي تصوبيهالي ( شافها غتهضر و حبسها ) بلا اعتراض يالاه .. (مدلها القرعة دالشيشة التحتانية و قال ) عمريها بالما و خشي فيها هاذيك التويشية لي لاسق فيها التيو ( دارت لي قال لها فصمت و استغراب كتكتاشف شي حوايج فشششكل معاه ) دابا شعلي على دوك جوج جمرات و شدي داك الراس ديال الطين ( تسناها حتى كملات و وقف هز المعسل كيقاد فيه ) دابا كتشدي المعسل و تفرتتي فيه فالراس .. ما تبركيش عليه ! و ما تكتريش منوا و ما تقلليهش .. ديكشي نص نص .. عباار ( ضحك ) عقلي غندوزلك امتحان هه ( مدلها طرف د ورقة الألومنيوم ) غطيه و شدي هاذ ليبرة و بداي تتقبي فالورقة ( خلاها كتكمل و تلاح هو فبلاصتوا جلس و هز التيو عندوا ) ها هي وجداات .. اراي داك الفاخر معاك حتى هو 

مداتوا ليه و جلسات حداه ما عاجبهاش الوضع نهاااائيا و فنفس الوقت معععجبة و فيها الفضوول من هاذ القضية لي جديدة عليها ! كتشوف فيه بنص عين و هو كيشيش ما راهش فهاذ العالم .. الدخان دار غماامة قدامهم واخا كيضور وجهوا عليها و لكن البلاصة مجمووعة دغيا تخنقات القضية ..

باسها فحنكها و وقف بالشوية برونشا لي باف كباار فجناب التلفازة لي خدمها مع التيليفونوا طالق الويفي .. حتى تسمعات الزددددحة مجههههدة .. تهزات الداار و تحطات بالصووت .. فحين هو داز للطبلة هز معاه زلافة ديال الفواكه المجففة .. ترمى حداها كيهرمش فيهم و يشيش .. و مرة مرة يطبل بيديه و يهزهز فكتافوا بطريقة كتضحك .. 

ياسيين:( عينيه تعسلوا و شاف فعينيها لي حمااروا و بحال داخت شوية بالريحة .. حط يديه على فخضها ) اجي ندلع الحبيبة ديالي اجي عندي 

جرها عندوا و شبكها معاها بووسان و قريصات حتى طابت و وقفها كيشطح معاها و يحركها هو كيفما بغى .. راشقة ليه عليها و هي غير تابعاه حشمانة و عينيها حمااارووا تقول ضاربة لحشيش ههه .. سهاات فيه تا حسات بيه شحطها معاها للور تا تهزات و بقات تلعب موراها و قالت مغبنة 

جوهرة: ياسيين ما تبقاش تضربني تماا راه كتقسحني ففف ( حطات يديها عليها كتحكها )

ياسيين: انشووف فين مقسحة ههم نداوي حبيبي ( خلاها واقفة كتبقلل فيه و جلس فبلاصتوا .. غمزها مبسم ) اجي لهنا نقوولك

جوهرة: شنوو ؟

ياسيين: ياا أجي !! ( جلسات حداه و تكلم بهدووء ) خرجلي شي بلان فمراكش .. خصني ضروري نطلع .. نسبقوها هي لولة و موراها نديك فين بغيتي 

جوهرة: واخا ماشي مشكل حتى مراكش زوينة و عمري مشيتلها 

ياسيين: غتعجبك لا هي لا ناسها ( حط صبعوا على حنكها و حركوا بالشوية ) فاش نرجعوا .. غنبدا الخدمة نيشان .. ما بغيتكش تقنطي بووحدك فالدار ( بصراحة ) ما جبتكش خدامة عندي ا جوهرة بلعكس عايش بمبدأ ما دام شركنا حياتنا .. أي حاجة خصنا نتعاونوا فيها 

جوهرة:( تفكرات هضرة ختوا ) ما تقلقتش منها .. هي اعتابراتني بحال ختها و هضرات بعفوية .. ابتسام عندي عزيزة غتكون ما قصداتش .. بلا ما تخاصم عليها و الله

ياسيين: المهم .. بغيتي تخدمي ؟ قوليها فاش نرجعوا نضبرلك فخدمة ( شد فيديها و باسها ) تليق بهاذ اليديدات ( هز عينيه فيها و غمزها ) هاذ الرطوبية ماشي ديال تمارة 

جوهرة:( تزنكات و تبسمات حتى تهزوا لحنيكات ) هههههه 

ياسيين: و يلا بغيتي تقراي حتى هو قوليها .. ما عنديش مشكل .. غير عرفي كي ديري تسيري دارك و كفة ما تغلب على كفة 

جوهرة:( عينيها بغاو يخرجوا منهم القلووبة بلا ما تحس عنقاتوا و دفنات راسها فصدروا ) غتكون أحسن حاجة حتى انا بغيت نكمل .. ما بغيتش نخرج و بقى فيا الحال بزااف فاش جلسووني .. شكراا شكراا بزااااف ( بخجل ) احبيبي 

ياسيين:( تبسم ) يخليلي حبيبي ( باسها فوق شعرها ) فيك ما يخرج ؟ من نهار تزوجنا ما درنا خريجة اونسومبل 

جوهرة:( بفرحة ) ااه عافاك 

ياسيين: يا الله نوضي لبسي عليك 


سعادة جوهرة فهاذ اللحظة تماما كفرحة طفلة صغيرة بلبسة العيد .. خرجات عندوا بخمارها فلون الزهري الفاتح .. ركبوا فهدووء و انطالقوا بين الشوارع حتى وقف فجأة قدام الفارماسي لي ما بقى لها والو و تسد ..

ياسيين:( فتح لاسانتير و تم هابط ) غير خليك دقيقة و انا معاك

اكتفت بتحريك راسها بالايجاب حتى تم راجع هاز ساشي دالدوا .. حركات راسها باستغراب فاش مدولها .. قبل ما تسول كان نطق بنبرة عاادية 

ياسيين: ما شربتيش لبيلول قبيلة .. هاذي د ربعة و عشرين ساعة .. خوذيها دابا 

جوهرة:( خذاتها كانت وحدة فالبوشيطة كاملة .. حجمها متوسط .. بلعاتها و رجعات مدات ليه القرعة )

ياسيين: بقاي تنتابهي للكينة و شربيها بانتظام

جوهرة: كون هاني 

تبسم و هز يديها شبكها مع يديه و حطهم فوق الكسيراتور و زاد .. حتى وصل للمول نزل للباركينغ بلاصى و طلعوا بجووج كيتساراو بهدووء و مرة مرة كيهضروا بشكل عادي .. حتى دازوا قدام محل دالمجوهرات .. بقات شحال كتشوف تما بلا ما تحس ..تا زير بخفة على يديها و رجع طلق ..

ياسيين: أجي ندخلوا خوذي لي عجبك 
جوهرة:( تزنكات ) لا لا غير كنت كنشووف و صافي

ما داهاش فاعتراضها .. دخلوا مشابكين يديهم .. ياسيين كيسرح فعينيه بهدوء و جوهرة مبسمة مع البائعة بخجل 

ياسيين:( دار يديه على خصرها و زيدها قداموا .. عينيه غير عليها ) شوفي لي عجبك يجبدوهلك 

البائعة: مرحبا ا لالة .. تفضلي الكاطالوج شوفي ااخر لي موديل لي عندنا .. و يلا كان فبالك شي حاجة معينة ممكن تعطينا الشكل لي باغاه بيها و غنقادوها لك ..

بخجل وراتها جوهرة لي بغات .. كانت سنسلة فيها فراشة صغيرة كلها محجرة كتلمع و كتجذب العين .. بكثرة لي بسييطة و ساامبل بكثرة لي راااقية و كتحمق .. عطاتها معاها كورميط ديالها كيمشيوا أونسومبل .. خذاتهم بالفرحة من بعد ما جمعاتهم لها و خلص ياسيين و خرحوا من تما .. لايح يديه على كتافها و معنقها عندوا جنب .. 

كملوا دورانهم من محل لمحل و فينما عجباتها شي حاجة كياخذها لها ...

واقف ياسيين قدام بلاصة ديال التقياس داير يديه فجيبوا و كيتسناها تعيط عليه .. حتى سمع صوتها و تمشى بخفة حيد الخامية و دخل عندها .. بانت ليه واقفة بسروال دالتوب طاي هوت مع بودي دالصوف فالموطارد و فوقهم مونكو دالفورور فالبيض و فرجليها ميني بووط ..صفر باعجاب و قال

ياسيين: جاتك لبيسة هي هاذيك ( غمزها ) لي زين زين 

جوهرة: تانا عجباتني ( دوزات يديها على الفورور ) رطييطب و سخوون 

ياسيين:( مشى دماغوا بعييد .. مسح على وجهوا ) جربي لمونطوا لاخور نشوف

مد يديه حيدلها لي لابسة و شدوا و هي لبسات الثاني .. لي كان فالكحل نازل تال تحت ركبتها بشوية .. غليض و سخوون يصلاح للشتا خصوصا .. عجبهم حتى هو .. خرج خلاها تلبس حوايجها .. تا كملات و جات عندوا مثقلة .. هز عليها و مشاو للاكيس حطهم صحاااح لدرجة جوهرة تزنكات و حشمات منو .. خرجاتوا عشية خواتلوا جيابوا هههه

ياسيين:( باسها فحنكها ) بالصحة 

جوهرة: يعطيك الصحة .. شكرا و الله

ياسيين:( تبسم ) كلشي ديالك .. مرتاحة ؟ ( حركات راسها بااه ) تزيدي تشوفي شي حاجة و لا نمشيوا نتعشاو ؟

جوهرة: لا لا باركة هاذشي و بزااف 

ياسيين: اووكي .. يا الله نتعشاو ( شاف فالساعة ) هذا هو الوقت باش نرتاحوا نيت باش غذا نشدوا طريق 

جوهرة: ان شاء الله 


حط كولشي فالكوفر .. يا الله جا يركب و جا عندوا واحد الوليد صغيير هاز وريدة فيديه قال ببراءة 

... : عموو عموو عافاك شري من عندي هاذ الوردة ( شاف فجوهرة ) وريدة لأحسن وردة 

ياسيين:( حط يديه على عنقوا و دوروا عندوا بالشوية و قال مغوبش فيه بطريقة مضحكة ) هضر معايا انا البعلوك

شاف حتى عيى و خذاها من عندوا و عطاه تضويرة بزاايد باش يمشي بحالوا من سواد اليل و بردوا .. ركب و ضربها بيها لنيفها بطريقة دلوووعة حتى خذاتها من عندوا بضحيكة .. شد الطريق خاارج على المدينة ..ما عرفاتوش فين ماشي .. كان ظلاااام حاالك و برد قوي كيجيب معاه ريحة البحر حتى كتستوطن رئتهم بقوة .. 

وقف فواحد الدخيلة و شاف فنيفها لي حماار بالبرد .. 

ياسيين: نمد ليك شي جاكيط من لي شريتي لبسيه ..صاافي

حركات راسها بااه و تسناتوا جا من جهتها فتح لها الباب تا خرجات و مد يديه كيلبسها المونطوا .. تا كمل و جرها عندوا مكمشها فيه من برد لبحر لي كيسووط بالجهههد .. تمشاو بالزربة لواحد الدار صغييرة جايا فالجنب سفلية .. دق فيها مزياان حتى فتحات ليه مراه تكون فعمر الخمسينات .. شافتوا و ابتاسمات بفرحة .. دخلاتهم بالزربة .. عاد بان المكان لجوهرة بشكل وااضح .. 
بيت صغيير مقاد بالطوابل و الكراسة ديالهم .. ما فيهش شي حاجة مميزة لكن كتحس بالدفئ العائلي .. 

خرج عندهم راجل كبييير و معاه ولدوا صغيير رحبوا بيهم على الجههههد و سلموا على ياسيين بحراااارة .. خلاتهم الأم و الابن و بقى الراجل معاهم جالسين هو و ياسيين كيتبادلوا أطراف الحذيث .. حتى جا ولدوا ببلاطوا كيعمر فالطبلة بكل ما لذ و طاب من مأكولات بحرية شهية .. تما ناص السيد مخليهم جالسين براحتهم .. كأي جووج يا الله فأول زواجهم .. تا كملوا و ناضوا باش يمشيوا

جوهرة:( بهمس ) فين كتعرفهم ؟ باين عليهم كيعزوك بزاااف 

ياسيين:( ضحك و مشى بالو للصغر ) صحاب الواليد .. كنت ديما مخشي عندهم هنا .. و فينما كيخرج يصيد كيديني معاه بالفرحااات كنبقى حااضي معاه الحووتة و هي كتترطى بحال القلية فالمقلة 

جوهرة:( ضحكها ) هههه و باقي عندوا باش كيصيد ؟

ياسيين: ضرووري ( شاف فساعتوا ) واحد ثلاثة دالسوايع هكاك غتلقاي هاذ الجهة عاامرة بالصيادة و كلهم خارجين يطلبوا رزقهم .. كان كيبيع فالسوق و لكن مع الكبر عيى .. بقى هو و الحاجة مقابلين هاذ المحل و ولدهم خذا بلاصة بااه

جوهرة: مزياان الله يسهل عليهم .. كتعرف تصيد ؟

ياسيين:( ضحك و مد يديه دخلها شعرها لي زلق لها ) غير شوية و كان علاش ؟

جوهرة:( بتردد ) زعما ما تهضرش معاه يخرجنا فدورة خفيفة دابا ( دوزات لسانها على شفايفها بخفة ) و يجيب معاه حتى الصنارة ( شافتوا غوبش و بلعات الهضرة ) و لا صافي بلاش 

ياسيين:( قرب منها مغوبش و باسها بخفة كيشوف فالعوينات ) القطيطة بغات تصيد ههم مع الرجالة ضايرين عليها كي نمل ياك ( حط يديه على عنقها و زير حتى نزلات مع يديه )

جوهرة:( فاشلة و غالباها الضحكة ) ههه اححح لا لا ياسيين عنقي ففف غير بووحدنا قبل ما يجيوا و لا نبعدوا عليهم كااع 


《 كُنتُ أعلمُ ومن اللحظةِ الأولىَ .. 
بأنكَ سَتكون أعظّمْ ذنوبيِ ومع ذلكَ أَحببتُكَ بكل إيمانيِ❤ 》

طلقها كيضحك و مشى كيعيط على الحاج يشوفوا شنو يقوليه ..فحين هي طاارت هزات وردتها فرحانة بيها .. مكمشة من البرد و واقفة تتسناه حتى تم جاي ياسيين هو و ولد دوك الناس .. جروا الفلوكة بجووج نزلوها لجهة منين كيصيدوا .. و جوهرة تابعاهم بحذر .. حتى وقفوا و ركبات و تبعها ياسيين عاد الولد ... 

استقروا فوسط البحر و البرد قااسح كيضرب .. وجااههم حمااروا و تزنكووا .. و جوهرة واقفة بمساعدة ياسيين خايفة كتترعد و هو كيضحك عليها 

ياسيين: يا ودي يا ودي على لي قاتلك باغى تصيد .. نتي وقفتي حتى مقادة بقالك غير الصيد 

جوهرة:( ما داتهاش فيه فرحانة ) وا عطيني نجرب وريني 

حرك راسوا بالله يستر و تحنى بالشوية و هي شانقة عليه حتى هز الصنارة و دارلها المصيدة ( الطعم )و بدا كيقااد فيها و عطاها لها فيديها كيوريها كي دير و هي متبعاه بحمااس و مزيرة على يديه .. حيت معاونها لا تصدق جايا مغطوسة فالما .. حتى حسوو بشي حاجة تقلات و تشدات و هو يقول 

ياسيين: يا الله رخي دااباا و طلعيها بالشوية باش الخيط ما يتقطعش 

دارت لي قالها بخوف و توثر حتى طلعات حوتة صغيرة قدامها كتتركل .. صفقات بيديها بجووج بفرحة و افتخاار و كتشووف فيه بمعنى أنا درتها و قدها و قدوود .. ضحك و حط يديه على عنقها و زدحها على صدروا معنقها بقوة و غمز للولد يقلب المحرك و يرجعوا بحالهم .. و ديكشي لي كان رجعوا بحالهم كيفما دخلوا .. 

شكروهم و ركبوا فطونوبيلتهم و مشااو طالقين شوفاج يسخنوا من البرد و جوهرة الطريق كلها حاضيااه بحب .. حتى وصلوا و هز ديكشي لي شرااو و طلعوا بحالهم .. شافت فالساعة لقاتها جوج دالصباح .. استغربات و فرحات كذلك لأنها جربات حياة ليل و شافت الدنيا كي كتكون فداك الوقت .. عمرها حلمات تفوت الثمنية دالعشية فالزنقة فما بالك الجوج !

داز الوقت و كانوا مخشيين فبلاصتهم ..ياسيين نااعس بهدووء من فرط التعب .. و جوهرة حالة عينيها كتدورهم بحال المشة .. قربات منوا بالشوية و تكات على خديتوا .. كتتفكر احذاث اليوم و قلبها كيضرب بعنف شديييد بمشاعر جدييدة كتجتاحها .. يووم على يووم كتغرق فيه .. سعادتها كانت لا توصف اليوم .. دار بصمة خااصة فروحها .. أول واحد كتكون قريبة منوا لهاذ الدرجة .. أول شخص سمحاتلوا يدخل لحياتها و يفوت خطوطها الحمراء .. أول شخص كيكتاشف منحنيات جسدها العاري و يبصم عليه قبلاتوا الحارقة .. أول واحد يهتم بيها و يدافع عليها ! أول واحد يشري ليها وردة و أول واحد يخرجها و يفرح بيها بهاذ الطريقة .. و الأهم أول واحد حقق لها حلمها المجنوون .. من صغرها كتتمنى تجرب تصيد و بفضلوا عاشت اللحظة .. و ما الحب إلا للحبيب الأولي ... و لا أنت حبي السرمدي الأزلي .. لا شيئ قبلك أو لبعدك يبقى لي 🌺

عينيها برقوا بسعادة حقيقية .. فتحات شفايفها الباردين و نطقات بحراارة و بصوت خاافت بزز كيتسمع 

جوهرة: كنبغيييك 

وإذا أردت أن تُعيد إنساناً للحياة ف ضع في طريقه إنساناً يُحبه، إنساناً يؤمن به .. العقاقير وحدها لا تكفي ! 


🌞🌞 أصبحنا و أصبح الملك لله 🌞🌞

يوم جديد .. بعد روتينهم الصباحي .. لبسوا عليهم و جمعات جوهرة الفاليز فيها كااع لي ممكن يحتاجوا .. و انطالقوا فاتجاه مراكش البهجة .. داازوا سااعات طويييلة فالطريق .. كل مرة فين جالسين يرتاحوا و يرجعوا يكملوا .. كانت سفرة مرحة و متعبة فنفس الوقت .. فآخرها نعسات جوهرة موسدة يديه و عنقها عوج شوية .. ما فاقت غير على يديه كيدوزوا بالشوية على حناكها و صوتوا كيتردد لأعماقها باسمها .. 

فتحات عينيها و تكسلات بتعب .. ضورات عينيها مزيان على المكان .. حتى فتح لها الباب 

ياسيين: يا الله نزلي
جوهرة:( هبطات كتتفوه ) وصلنا ؟ فين حنا ؟
ياسيين: دخلي و تعرفي .. 

حركات راسها بااه و لحقات عليه شابكات يديها مع ديالوا و دخلوا مع باب دالخشب كبيييرة .. أول حاجة بانت لها بيسين كبيييير فالوسط .. كان الحال بدا يظلام و الضواو مزينين الجردة المقابلة مع المسبح .. دخلوا مع واحد الباب لقاو سطوان طوييل قبالتهم فيه جوج دالبنات بلباس موحد و ابتسامة مزينة فمهم .. 
هزات جوهرة عينيها فالتصميم الراائع و الثرية لي نازلة من القبة دالرياض بواحد الشكل كيهبل .. حتى سمعات البنات كيتكلموا مع ياسيين 

.... : الحمد لله على السلامة موسيو بنمسعود

ياسيين:( حرك راسوا ) الجناح ديالي واجد 

.... : أكييد .. تفضلوا و سي عبد العزيز يتكلف بلي فاليز 

ياسيين: اوكي علمي المسؤول بلي وصلت ( شاف فالساعة ) واحد الساعتين يطلع عندي للبيروا .. ( قلب عينيه لمراتوا بابتسامة ) جوهرة مشينا

جوهرة:( بضحيكة طلعات معاه و هو حاط يديه على خصرها ) هاذشي زويين بزااف .. ما كرهتش ندوور نشوف الدنيا كاملة 

ياسيين:( فتح جناحوا بالكلي و دخلها ) نرتاحوا و نعيط لشي وحدة تدورك و قوليلي كي جاتك خدمة راجلك ( بغميزة )

جوهرة:( كتسرح عينيها فالبيت باعجاب ) ههه لا لا باين العربون الصراحة تبارك الله عليك .. حنا و كيحمقونا هاذ الاجواء .. حراك الأجانب .. غيكون ممشي مزياان .. أحسن حاجة قلبتيه من رياض ل maison d'hôtes .. متشوقة نشوف لبازار 

ياسيين:( حرك راسوا بتعب ) شوية و نخرجوا يلا بغيتي نديك ليه .. نديك .. قريب من هنا ما بعيدش بزااف 

جوهرة:( بحماس ) صافي واخا .. فيا الدووخة دالطريق ( شدات راسها ) ننعس شوية و فيقني 

ياسيين: بدلي عليك و نعسي مرتاحة .. اندخل ندوش و نجي 

جوهرة: بالصحة 

💫💫 بعد مرور بضع ساعات 💫💫

واقف ياسيين مع شاب كيتناقشوا بجدية تاامة .. و على بعد سنتيميترات قليلة واقفة جوهرة حاضياهم و كتسناه يكمل معاه .. حتى سالاو و جا عندها بابتسامة 

جوهرة: امدرا ؟

ياسيين: صافي تافقنا غذا غيجي باه و نتفاهموا فالبقية .. تدخلي تشوفيه ؟

جوهرة: لا بلاش حتى تتافقوا .. و لكن باين عليه كبيير و واسع غير من هنا .. ( تمشاو على رجليهم كيهضروا )

ياسيين: وي تماما .. و لاسق فالرياض ديالي .. عليها ما بغيتش نزيد نتعطل و نضيعوا من بين يدي .. لأنوا بحال هاذ الهمزات دغيا كيطيروا و صعييب تطيح فيهم 

جوهرة: مزيان الله يسخر لك فيه و يدخلوا عليك بالهناء و التيسير

ياسيين: أميين يا ربي .. نتي لي زعمتيني كنت متردد واش ناخذوا و لا لا ( ضحك ) غنحط لي قدامي و لي مورايا فيه 

جوهرة: ماشي مشكل من القليل ربي غيعطينا الكثير .. و الفكرة لي قلتيلي غتدخلك مزياان .. و كثر من لي خسرتي كااع

ياسيين: من ديما فبالي .. غنشركهم بجووج .. فين كاين البيوت ما غتتقاسش و الجهة الثانية غنطلعها كلها بالمطاعم .. كل طابق غيكون فيه مطبخ فشكل .. و حتى الجلسة غتكون بثقافة داك البلاد .. 

جوهرة: غيجي تصمييم واااعر و تقدر تحبب حتى الناس يمشيوا لداك البلاد .. متأكدة غتنجح الفكرة .. واخا فيها خسران الفلووس بزااف و لكن من بعد غتعود بالنفع ..

تمشاو بين شوارع المدينة الحمراء .. كيبانوا من بعيد كووبل زويين بزاااف و شحال من وحدة كتسهى فيهم و فالطريقة لي كيهضر بيها معاها و فطريقتها الخجولة و الأنثوية فالرد .. 
وصلوا للبازار ديالوا لقاو مجموعة من الأجانب تما و معاهم المعلمين لي مخلي .. دخل بحالوا بحال اي زبون .. كيوري لجوهرة باش معمر المحل و يعاودلها طرائف و قصص عاشهم .. و هي كضحك معاه فرحانة .. حتى خوا البازار و خلاها واقفة كتشوف باعجاب و هو توجه عند المسؤول حط يديه على كتافوا و قال برجولية 

ياسيين: كاين شي روااج اسي محمد

المسؤول:( بنبرة قاسحة ) لي بييتييه الشرييف 

وقف كيضحك و تسالم معاه و ياسيين كيسمع ليه و هاز الكتاب لي كيقيدوا فيه الداخلة و الخارجة .. بشحال تشرات و بشحال تباعت و شحال ربحوا فيها و جمييع المعلوومات .. قلب فالوراق شوية و هزوا عندوا .. ضور عينيه فالمحل بخفة و شاف جهة الكميرات لي ضايرين بيه فالركاني كااملين .. و رابطهم مع البيسي ديالوا .. يعني واخا بعييد حاضي شغلوا بالشادة و الفادة لا لبازار لا الرياض .. كلشي كيوصلوا و مزير اللعب 


ياسيين: غذا وجدلي كاع الحسابات نتفاهموا فيهم .. يا الله تهلى

المسؤول: و عليه 

ياسيين:( خلط على جوهرة و مدلها الكتاب ) ديريه عندك فالساك تنمشيوا للهيه و فكريني فيه 

جوهرة: واخا 

ياسيين: عجباتك شي حاجة تاخذيها ( مد يديه قرصها فجنبها حتى قفزات مخرجة عينيها فيه مزنكة )

جوهرة: احح لا .. ياسيين نمشيوا لجامع الفنا 

ياسيين: زيدي و كان

مشاو كيتساراو تال جامع الفنا .. الدخاخن و الشوا على الجهد و كل جهة ضايرة بالحلقة .. ببراءة و فرحة كتجروا يتفرجوا و هو دايرلها خاطرها .. شبعات تصااور ما خلات حنووشة قروودة .. لي جا بسم الله و داك الفم غير مفتووح كتخشي فيه و تضحك .. رااشقة لهم و عاايشيين السعاادة .. تا كانوا راجعيين بحالهم و هو يتسمع صوت أنثوي كيعيط عليها بسميتها .. استغربت و ضاروا بجوج كيشوفوا شكون .. 

كانت بنت فالعشرينات من عمرها بحجاب و ملابس عصرية .. زوينة فوجهها و مقادة الحالة .. تبسمات جوهرة بود و طلقات من ياسيين مقربة منها .. سلمات عليها بحراارة و قبطات فيديها 

جوهرة: سلمى الزين .. توحشتك بزااف فين هاذ الغبوور

سلمى:( بتمياق شافت فيها و شافت فياسيين لي عاطييهم بالظهر مخليهم على راحتهم ) ايوا كن توحشتينا غتسولي فيا او لا ؟ و نتي قلبتي وجهك قلبة وحدة 

جوهرة:( بتبرير ) لا لا ولاهيلا يلا غير التيليفون فسدلي و ما بقاش بغى يخدملي و نمرتك تلفاتلي .. اما راكي فالبال ..

سلمى: ايوا ماشي مشكل ا لالة ها الصدفة جات تال بين يدينا فين نهضروا ( شافتلها فيديها و بالضبط فالخاتم ) تزوجتي ؟

جوهرة:( بفرحة ) ااه .. و لاهيلا صدفة زوينة .. و نتي استقريتي هنا .. ها نمرتي ( قيداتها لها )

سلمى: ايوا مبروك عليك واخا ما عرضتينا ما علمتينا .. اييه استقريت فمراكش جينا كاملين لهنا .. سيري بلا ما نشدك تا نهضروا من بعد و يلا هبطت للرباط نتلاقاو

جوهرة: كلشي جا بالزربة و ما درت واالو و قتلك نمرتك مشاتلي ما عندي باش نوصل ليك ..

سلمى: ما عليش سيري بلا ما نشدك تا نهضروا من بعد و يلا هبطت للرباط نتلاقاو

جوهرة: اييه علاش لا .. غير عيطيلي نعتلك الدار و مرحبا بيك احبيبتي فأي وقت 

سلمى: ربي يخليك

جوهرة: ايوا عندااك .. يا الله تهلاي و سلمي على خالتي 

سلمى:( شافت فياسيين و نطقات ) نجي نجي الله اودي علاه لي ما نجي .. مرحبا بسلامك 

تفارقوا و رجعات جوهرة عند ياسيين قبطات فيه و كملوا طريقهم كتعاودلوا عليها

جوهرة: هاذي صاحبتي سلمى .. كانت خدامة معايا فدار القرآن تما تعرفنا .. عرفتي مسكينة و شحال ضريييفة و درييوشة .. ديما كتجي غير فالدراوش عرفتي شحال قاسات مع راجلها لا فزواجهم لا فطلاقهم .. دازت منها كحلة الزغبية لا هي لا عائلتها .. و لكن دابا على ما بانلي راها كتحاول تبدا حياة جديدة فهاذ البلاد 

ياسيين: مزيان 


مشاو للرياض .. غير دخلوا للجناح بدا مجددا فبسالتوا و سلسلة من القبل لبشرتها .. الشيئ لي قادهم لعلاقة متكاملة .. أكيد بعد ما شربات مانع الحمل .. و بالرغم من أنها برات نوعا ما .. إلا أن الألم ما هدنش عليها و الحد الآن ما قدراتش تولفوا و تستحملوا .. مجرد ما كيدخلوا فيها أحاسيسها كلهم كيتبخروا و كيبقى غير الألم و الخوف و الدمووع حتى كيكمل !

ياسيين:( تقلب جيهتوا كيسووط و قال) جوهرة ديري الحل لراسك ماشي معقوول فوقما نقيسك نكملوها هاكا ( بزعفة ) واااه بزااف عيقتي

جوهرة:( مسحات الدموع من عينيها لي طايبين .. تلوات فليزار حاطة يديها على تحتها لي كيضرها و قالت بنبرة باكية ) ماشي لخاطري رااه كنتقسح بزااف .. اقسم بالله ما كنديرها بلعاني راك ما كتحسش بيا 

ياسيين:( كلمة شعلاتوا ) كن ما كنتش كنحس بيك الشريفة فينما رشقاتلي نجرك و نكمل نعطيك بالظهر .. واجباتك تديرهم بزز منك .. تعتارضي غيكون عندي معاك تصرف ااااخر و متأكد ما غيعجبكش .. أما أنا راه داير معاك مت مزياان و بقيت بالخاطر تا طبت 

جوهرة:( خشات وجهها بين كفوفها كتبكي فصمت حتى سكت و هي تقول بألم ) سمحلي و الله عافاك

ياسيين:( زفر ) كتكفريني بالله اجوهرة كنقيسك بحال يلا شادك نغتاصبك ! ما فهمتش مالك على هاذشي كاامل .. راحنا مزوجيين .. يعني هاذشي شي طبيييعي و ضرووري .. ماشي غير ليا لينا بجووووج بجووووج

جوهرة: عاارفة و الله حتى عارفة و كنحاول فووق ما كتتصور و لكن ما كنقدرش .. راه عيني كنحسهم غيخرجوا من بلاصتهم .. المووت كتشدني اياسيين .. الله يسهل عليك لما فهمني 

ياسيين: هانا صاابر اجوهرة ( زفر بقوة ) هانا صاابر و نهار يتقاضى الصبر ما تجيش تلوميني .. عرفي بلي درتيها بيديك .. و ضبري لراسك

جوهرة: لي هي ؟

ياسيين: لي هي ديري الحل لراسك .. قوليلي شي حاجة كتعجبك فالنعاس و كترتاحي فيها نبقاو نديروها .. شي حاجة ما كتقدريش عليها و ما كتعجبكش نحيدوها .. أما نبقاو هاكا راه البهلان هذا

جوهرة: واخا ( شدات فيديه ) ما يكون غير خاطرك غير ما تتقلقش عافاك .. سمحلي و الله

ياسيين: وليت كنكره كلمة سمحلي بقوة لي كنسمعها ..ا لالة ما ديريش شي حاجة علاش طلبيها و هنيني و هني مخك (دفع الغطى و ناض من تما معصب زدح باب الدووش بالجههههد تا قفزات ) المرض هذاا 


تبعاتوا من بعد ما لبسات عليها بينوارها .. ما خلاتوا حتى صالحاتوا واخا حاسة بيه باقي معصب و على نقشة غيشعل فيها .. 

و مرت الاياام .. داز أسبوع العسل فسعاادة و راحة فالنهار و فعذااب لجوهرة فليل .. إلا أنها عمرها منعاتوا على حقوا .. لكن هو لي مرة كيكمل مرة كيخليها فالنص و يسمح .. ما بقاش مستحمل الوضع و مع ذلك ما رجعش هضر فالموضووع نهاااائيا .. مخليها على خاااطرها يشووف هاذشي فين غادي يديهم ..

رجعوا للرباط و بدا الخدمة و جوهرة كتوجد لوراق لي تدفع باش تدوز باك حر .. حيت الباك ديالها قداام و ما بقاش صالح .. أيامها كتمشي بطريقة رتييبة .. تهتم بياسيين و حاجياتوا تقاد دارها و تقوم بواجباتها المنزلية .. كأي زوجة عاادية .. و الاياام كدووز عليهم بالزربة حتى فاتوا ثلاث أشهر على زواجهم .. ثلاث اشهر كأنهم ثلاثين سنة و طلعوا فمخ بعضهم .. علاقتهم بردااات لوااحد الدرجة رهييييبة .. 

ياسيين لي ما بقى كيطالبها بحتى حاجة و كيتسنى المبادرة منها و يشوف تغيير فحالها لأنوا صبر لشهر و شهراين و ما تبدل والوا فالأخير نفر ! و رجع غير معصب على أبسط حاجة كيدور فيها حتى تغرق فبلاصتها و تمشي تشبع بكى و ترجع مبتاسمة .. كتحاول ما أمكن تصلح علاقتهم ... لكن واالوو .. كتشوف زواجها كيفشل يوما بعد يووم و هما كيتفرجوا ! 

حتى واحد فيهم ما فكر و لا جا فبالوا موضوع الطبيب و تمشي جوهرة تفحص و تشووف مالها ! و حتى خوتها و أمها لي ينصحوها و يفقهوها ما بقات تعاود لهم واالو ..ديما لباس بخيير .. من نهار المشكل لي وقع أول أيام زواجهم سدات فمها ! 

صباح جديد ..ناضت جوهرة قادات لياسيين الفطوور كعادتها و جمعات ليه فاليز صغييرة .. حيت غيطلع لمراكش واحد اليوماين يوقف على البني و يحضي شغلوا لي تما شوية .. فطر بهدووء و ناض

ياسيين:( شاف فالساعة ) لبسي عليك نوصلك عند الواليدة عاد نمشي 

جوهرة: قلت نمشي لدارنا نسلم عليهم و نجلس معاهم شوية و عاد ندوز عند خالتي 

ياسيين: لي بانلك ( فتح بزطاموا و مدلها كمشة دالفلوس )خليهم معاك يلا احتاجيتي شي حاجة و خلي تيليفونك حداك ما تخلينيش كنصوني ... ااه قبل ما نوصل للرباط تكوني هنا فدارك

جوهرة:( حركات راسها بالايجاب ) كن هاني .. الله يوصلك على خير

قربات منوا و باستوا فحنكوا .. فحين هو تحنا هز الفاليز و فتح لباب و خرج بحالوا .. بقات موراه جالسة بشوية موراها جمعات الماعن بالزربة و لبسات عليها و خرجات فاتجاه دارهم .. 

كان باقي الصباح و الدنيا عامرة شوية .. دازت على واحد الجردة ديما كتختاصر بيها الطريق .. كتسرح عينيها فالدنيا لي بدات كتخضر .. و بصدفة لمحات بنت كتشبه لابتسام خت ياسيين بزاااف .. بقات واقفة فبلاصتها كتحاول تتأكد و فنفس الوقت كتنفي شكووكها فداخلها و تقول مستحيل ختوا تكون جالسة بهاذ الحميمية كاملة مع واحد و فالجردة من الفووق ! لكن غير هزات راسها و دفعات عليها الولد لي لاسق عليها .. كتضحك ببروود و تطرشوا لحنكوا بالضحك ..

تأكدات بلي هي ختوا ! شهقات حاطة يديها على فمها ! فنفس اللحظة هزات ابتسام عينيها بعفوية و جات غير فيها .. تصدمات و وقفات كتترعد هضرات معاه بالزربة و تمشات هي لعندها .. حتى وقفات حداها صففففرة الدم غيهرب منها 

ابتسام: جوهرة غير نشرح لك .. عافاك ما تقوليهاش لياسيين و الله ما كيفما فهمتي ( قبطات فيديها ) غير سمعيني الله يستر عليك .. يلا قلتيها ليه وا حق الله حتى يذبحني لا هو لا كريم ( الدموع تغرغروا فعينيها و جوهرة كتشوف فيها بلا رد ) و الله حتى يقتلوني


جوهرة:( تصدمات فيها و قالت بصوت بارد ) عارفاهم يقتلوك و مقنتة معاه فالجرادي كتتباوسوا ؟ واش حماااقيتي ؟ عاارفة رااسك شكديري و لا ما عارفاش ! راك كتخرجي على راسك بيديك

ابتسام: راني ماشي درية صغيرة عارفة شكندير و هذاك لي شفتيه كيبغيني و كنبغيه .. كيتسنى غير يخدم و يجي يطلبني من دارنا 

جوهرة:( بانفعال ) يطلبك من داركم ؟ لي كيبغي شي حد ما كيخيطش بيه الدروبة لي كيبغي ما كيبينكش قدام كلشي عاهرة ما تسوى ما تصلاح .. لي كيبغيك كيصونك و يحافظ عليك بحال لي كيحافظ على راسوا ( زيراتلها على يديها ) كنهضر معاك بحال ختي .. فيقي على راسك هذا ماشي حب ا ابتسام .. كنعزك بزاااف و ما نبغيش نشوفك فهاذ الموقف

ابتسام:( نترات يديها و نطقات بجفاء ) رغبتك ما تعلميش خويا ماشي ديريلي فيها رابعة العدوية .. انا عارفة مصلاحتي كثر منك .. يكفي تديري معايا بليزير و تسدي فمك 

جوهرة:( شافت فيها بنظرة الله يرد بيك ) هانا ساكتة و ما غنقول ليه والو و لكن الحرام عمروا يدوم .. أنا ليووم و غذا ما تعرفي شكون يشوفكم .. و حتى الراجل لي يوقف و يدافع عليك هرب و خلاك !

💫💫 ياسيين 💫💫

شاد الطريق في أمان الله .. طالق الموسيقى كيدندن معاها .. خالق جو خاص بيه .. واخا كيعيى بالطريق لي كيضرب و لكن رجعات بالنسبة ليه بحال خارج يتقدى و يرجع بكثرة لي ولف .. صونا تيليفونوا .. حنا عينيه يشووف شكوون .. ما حس غير بطونوبيل دااخلة فيه من الجهة الثانية بقووووة حتى فقد السيطرة على لووطوو و تضرب مع الباريير ( هذاك لي تيكون دالحديد فجنب الطريق .. ما عرفت شكيسميوه ) و تحكات طونوبيل مع داك الجنب مزيااااان .. جاب الله داير السمطة تضرب غير فجبهتوا شوية .. و ماشي شي حاجة لي خطييرة .. 

تحبسات الطريق و كلشي باغي يفهم شنوو واقع .. عاد الرجال لي مشاو كيشوفوا الطونوبيلات بجوج شنو واقع فيهم و واش لي راكبيين بخيير .. عاونوا ياسيين حتى نزل دايخ براسوا شوية .. و عاد خرجوا حنان من الطونوبيل لي دخلات فيه .. كلها كترجف بالخلعة ذاتها كتترعد عليها بالجههههد .. غير شافتوا ما بيه واالوا و هي تفشل للأرض كتبكي بالخلعة و كتشووف فيه باغى تهضر و ما قادراش .. تا هو لي كان عوال يحيح دبصح فاش شاف حالتها سكت و ما قال واالو .. 


ضاروا بيها الناس كيعيطيوها تشرب و يرشوها بالما تبرد من الخلعة و تسكت من البكى .. داروا معاهم الواجب و خلاوهم يتفاهموا شنو غيديروا .. حرك ياسيين لوطوا لي تعجنات من جنب و تحكات الصباغة من الجنب الثاني .. 

بعدها من الطريق و نزل كيشوف فيها و يتسناها تتحرك تا هي .. منين بانت ليه يديها كتترعد و ما قادراش تشد حتى سوارت .. خف رجليه و فتح عليها الباب 

ياسيين:( بجدية ) أراي دوك السوارت و نزلي ( مداتهم ليه و كمل ) يا الله هبطي بحالك وقفي تسنايني تما

دارت لي قالها في حين هو ركب و بقى كيحاول معاها تا ديمارات ليه و بلاصاها مور ديالوا .. نزل كيشوف فالقدام ديالها لي كلوا تعجن بالمعقوول .. تنهد و هو كيمدلها الساروت ديالها 

حنان:( ما زال الخلعة شاداها ) سمحلي بزااف ما عرفتش كي وقعلي .. ربي لطف أما كنت مشيت فيها

ياسيين: كي وقعلك ؟

حنان: كان قدامي كاميوا و بانتلي الطريق خااوية جيت نضوبل و ما عرفتش منين خرجاتلي طونوبيل يا الله هربت منها و دخلت فيك ( سكتوا بجوج حتى قالت ) أنا غريبة على المدينة جايا غير سياحة نتمنى ما تدخلش الجوندارم .. غيشدولنا غير الوقت و سير و أجي .. و أنا مكنعرف واالو فهاذ المدينة ( مداتليه لاكارط ناسيونال ديالها و كملات كلامها ) قيد الرقم ديالها عندك فحالة خفتي على راسك .. أنا نعطيك نمرتي دالتيليفون غير ندخل لمدينتي نعيطلك و نحل معاك كلشي .. و أي حاجة تقامت عليا غنحطها .. عارفة راسي أنا لي فوتيف هنا 

ياسيين:( حك لحيتوا و مد يديه خذا لاكارط ) شمن مدينة ؟ أنا براسي غير مسافر .. و ما يصلاحليش نبقى تابعك فينما مشيتي !

حنان: فالرباط ..قريب لك ؟

ياسيين:( ضحك جنب ) هي بنت المدينة .. صافي تا نزل للرباط و نهضروا .. 

حنان: واخا ( مداتليه نمرتها ) ها نمرتي فوقما كنتي عيط عليا 

ياسيين: واخا ( قيد رقم لاكارط ناسيونال عندوا و رجع مدها لها ) الله يعاون و حمد لله على السلامة

حنان: شكرا 

ركب فلوطوا ديالوا خدمها بسهوولة يا الله جا يقلع بحالوا و هو يلمحها من المرايا مقااتلة معاها ما بغاتش تزيدلها .. كلاكسونا عليها و خرجات عندوا مزنكة كاارهة راسها .. نزل الشرجم و قال

ياسيين: ياك لباس ؟

حنان:( حكات عنقها و ساطت ) ما بغاتش تزيد .. صافي ما بقاتش صالحة خصها الفوورياان .. الأعصاب دالمرض

ياسيين: سديها و دوزي ركبي ندخلك للمدينة .. راحنا فالدخلة ما بقى واالوو .. و عيطي ساعتها لديباناج تهزها .. و ديري معاهم فين تتلاقايهم 

حنان:( هزات يديها بركات على البوطون حتى تطرقات كاملة و ضارت من جهة الثانية .. ركبات و دارت السمطة .. و ضارت شافت فيه ) ما عرفتش كن ما كنتيش شنوا ممكن ندير هنا بوحدي فهاذ الخلى .. شكرا بزاااف 

ياسيين:( دار نظاظروا دالشمش و شاف قبالتوا ) مرحبا اختي .. عندك عندمن تجلسي ياك ؟

حنان: ااه ضروري .. عرفتي الرياض *** حطني غير حداه و سمحلي بزاااف على العذاب راه النحس منين كيشدك غير الله يستر مع الله يحفظ

ياسيين:( ضحكاتوا ..تبسم و قال ) هاذي تديرلك الراس .. ما تسافريش بوحدك الطريق هاذي ما تعرفي شنو يوقع و نتي بنت .. تا داك التهور دالعيالات فالسوكان نقصي منوا .. ليوم خرجات طريفة غذا لا !

حنان:( هزات حاجبها ! ) كتخشيلي الهضرة و لا جابلي الله ! 

ياسيين:( ببرود ) كل واحد و شطارتوا و كي كيفهم الأمور !

حنان: لا لا دابا نيت تأكدت ( عوجات فمها و كملات ) لا تحكرش لمراة اسي .. ااش سماك الله بعدا 

ياسيين: ياسيين 

حنان: اييه اسي ياسيين راه المراة فهاذ الوقت رجعات بحالها بحال الراجل .. يلا حنا ربعنا يدينا و عولنا عليكم .. درنا المستقبل بكري .. كن غير بقاو بعدا الرجال على من تعولي

ياسيين:( حرك يديه بالمهل ) غير بالشوية عليك .. جاب المستقبل .. و الرجال لي ما بقاوش لهضرتي ؟ بانلي دايزة من شي تجربة خايبة و باغى غير فمن تشعلي ! ريلاكس 

حنان:( قلبات وجهها لسرجم ) و نتا لي جالس عليا ..صوكان دالعيالات مالوا كي جاك ؟ هاذ العيالات لي ما عجبينكش راه المخيرة فيهم تطلعك و تنزلك على جغيمة دالما حتال قاع لبير .. انتابه !!

ياسيين:( تبسم لها باستفزاز ) جوج دالحوايج ما كيتجمعوش قلة الأدب و الانوثة ..داير فيك خير و زايداها بحلان الفم .. ما بانلكش راسك عيقتي ؟

حنان: تا الكذوب و الرجولة ما كيتجمعوش ( سهات و تفكرات ابراهيم )

ياسيين: ااش بيني و بينك نكذب عليك و لا تكذبي عليا ! ( عقد حجبانوا ) من ركبتي و نتي الرجلة والو ما بقاوش الرجال غير الذكورة .. تجربي ؟ هاذشي فاش عينك !؟

حنان:( فوهات فمها من وقاحتوا و حناكها تزنكوا فالبلاصة .. حدها شافتهم دخلوا للمدينة و هي تنطق ) نزلني 

تسناتوا يرفض ! و لكن فالبلاصة وقفلها جنب و برك على بوطون تفتحلها الباب .. نزلات و شعطاتوا بالجهد و حلات الكوفر هزات ساكها .. غير سداتوا كسيرا بالجهد من حداها

حنان: الحيواااان 


بقات مدة واقفة كتتستى فشي طاكسي تهزها و الغاذي و الجاي كيبسل عليها تا كفروها عاد ركبات .. دخلات للاستقبال و عطاتهم معلوماتها .. 

حنان:( بانولها كيشوفوا فالبيسي لي قدامهم و يرجعوا يشوفوا فيها بتوثر ) كاين شي مشكل ؟

.... 1 : سمحيلي امادموزيل فوقاش درتي الحجز ؟ حيت اسمك ما عنديش هنا 

حنان: كيفاش ما عندكش ؟ و أنا بيدي ريزيرفيت من عندكم 

.... 1 : كاين شي مشكل على الأغلب ( نغزات صاحبتها بيديها ) كلمي موسيو بنمسعود 

.... 2:( بصوت خافت ) واش نتي هبيلة .. بغيتيه يشعل فيا .. كلميه نتي نيت .. نتي لي مسؤولة على هاذشي ماشي أنا 

ياسيين:(نازل من الدروج داير يديه فجيبوا .. شافهم هكاك و فهم شي مشكل واقع ) شنو كاين ؟

حنان:( ضارت و شافتوا و هي تكحل بالعمى قربات منو ما بقى فاصل بينهم والو .. نطقات بين سنانها) من نيتك نتا الأخ تابعني تال هنا و كتسول .. سووقك ؟ واش درتي فيا خير غابقى تابعني عليه حياتي كلها

ياسيين:(هز حاجبوا ) نزلي صووتك حسن لك ( قبل ما تهضر هز يديه جنب و كحزها من عليه ) بعدي لهييه ( تهز بحركة سريعة نقز للداخل كيشوف فالبيسي و الموظفة كتشرح ليه شنو واقع .. خنزر فيها حتى عيى و قلب وجهوا .. كيضرب فوق الزاج دالكونتطوار ) ما كاينة حتى شي شومبغ تعطيوها لها ؟

.... 1: لا والو كلشي محجوز 

حنان: اييه و انا بالسلامة فين غنبات ؟ ياكما ندير خيمة قدام الباب و نعس عليكم ؟

ياسيين:( خنزر فيها ) كان نهار كحل نهار شفتك فيه .. شوفي الجناح دكريم .. عطيوه لها ( شاف فيها مكره ) شحال المدة دالاقامة ديالك هنا ؟

حنان:( تا هي ما حاملاهش ) أسبووع !

ياسيين: اووك .. خذا لكلي دالجناح .. لي معلق فجنب بوحدوا .. مدولها و خرج بحالوا مخليها معاهم كيعتاذروا منها و يوريوها شمن ايطاج .. سبقها الشاوش بالفاليز ديالها للبيت فحين هي بقات شحال مترددة واش تسول و لا لا فالأخير دارتها فيد الله و سولات 

حنان: البنات .. شكون هذا لي كان دابا هنا ... زعما ياسيين !

.... :( شافوا فيعضياتهم و نطقات وحدة منهم ) هذا الرئيس ديالنا موسيو بنمسعود

حنان:( السمية ديجا دايزة عليها فين ما عقلاتش ) ااه تا هو خدام معاكم هنا 

.... :( بهمس كيهضروا ) لا لا بالرئيس قصدت زعما مول الشي .. مول الشكارة .. هو مول هاذ الرياض و هذاك لي ملاسق معاه خدام فيه البني راك تكوني شفتيه فاش كنتي داخلة 

حنان:( تفتحوا عينيها و صفرات بلا ما تحس ) هاذشي كاامل ديالوا !؟ باقي صغير لا ؟

.... :امم ماشي غير هاذشي عندوا لي يتحرق ما يتم .. لا هنا لا فالرباط .. السيد خانز فلوس و دااير علاياش يرجع 

حنان:( حركات راسها بااه ) واخا شكرا .. ( خلاتهم و طلعات بحالها كتدور فعينيها و تدوز يديها على النقش و الأثاث ) و لاهيلا السيد صدق ملعق .. و طامع لي فجوج دريال نصلح ليه بيها طونوبيل .. بااز لبنادم وجهوا ما كيتقشرش 

دخلات لجناح كريم .. لي مخصصوا ليه ياسيين حيت كان كيطلع عندوا بزااف لتما قبل الزواج .. تلاحت فوق الناموسية و خشات راسها بين المخاذ بتعب حاسة بجسمها كاامل كيحرقها بالاكسيدون و الخلعة ديالها و الساعات الطويلة دالسفر .. غمضات عينيها و استنشقات الهواا بقوة حتى طلعات معاها ريحة عطر رجووولية قااسحة تغلغلات فالداخل ديالها 

حنان: الله على ريحة 

ناضت من تما و بدلات حوايجها و بدات كتقلب و تكتاشف الجناح و الفضول كياكل فيها .. ما لقات حتى حاجة مميزة أو خاصة من غير داك الريحة القوية لي غير كتفتحي الماريوا كتضرب فيك .. و لي هي نفسها لي فالناموسية ..


دازوا يوماين كان رجع فيهم ياسيين للرباط .. من داك النهار ما بقى شاف حنان .. أصلا ما عندوش الوقت جا محزوووم .. دخل للدار لقى جوهرة فاستقبالوا بابتسامة دافئة .. قربات منوا و باستوا فحنكوا .. تا هو سلم عليها و دخل الفاليز للبيت .. حتى تم خارج بساشي صغيير حطولها بين يديها و جلس لايح يديه موراها .. 

تبسمات فاش لقاتوا جايبلها بواط دالشكلاط لي كيعجبها .. جبدات وحدة كلاتها و هي مغمضة عينيهاا 

جوهرة: اممممنم على مذاااق حح كيسطيني ( خذات وحيدة مداتها ليه حدا فموا ) هاك 

ياسيين:( كلاها منها و عضها بالشوية فصبعها تا هرباتوا ) شنو درتي فهاذ اليوماين ؟

جوهرة: واالو مشيت عند ماما .. سلمووا عليك بزاااف .. تغذيت معاهم و فالعشية وصلوني عند خالتي بقيت معاها .. حتى عيطتيلي و جيت للدار .. 

حنات راسها كتكمل داك الشكلاط و دوز لسانها على شفايفها تمصوا بقاياه بعفوية .. و هو عينيه نااعسيين و حاضيها .. مد يديه خطفلها البواط هزها عندوا و خذا شكلاطة و هز يديه 

ياسيين: هاكي

كلما كتقرب كيبعد يديه حتى لسقات فيه و زيرها عندوا داير الشوكولا بيناتهم بجوج .. كيمص فيها و يدوز على شفايفها حتى ذابت بينهم و زاد جرها عندوا متعمق فالقبلة و متلذذ بالمذاق الحلو ففمهم .. ما طلقها حتى رجعوا بجووج كينهجوا .. حاط جبهتوا على جبهتها و عينيها ثابتين عليها

ياسيين:( بهمس ) علاش كديري فينا هاذشي اجوهرة 

جوهرة: شنو كندير ؟

ياسيين: ما بانلك كديري والو ؟ عاجبك هاذشي لي واصلين ليه ؟

يا الله غتجاوبوا و تسمع صووت التيليفون كيصوني و يعااود .. غمض عينيه بصبر و طلقها تمشي تجاوب و هو تكى على الفوطوي مغمض عينيه .. حتى حس بلمسات يديها كيدوزوا على شعروا بحنان .. فتح عينيه و تقاد معول على جلسة حواار .. 

جوهرة:( قبل ما يهضر سبقاتها ليه ) ياسيين عارفاك عياان و لكن عافاك ما تردهاش فوجهي 

ياسيين: ياكما واقعة شي حاجة ؟ شكون عيط عليك ؟

جوهرة: لا لا ما واقع والو .. عقلتي فمراكش كنت تلاقيت بواحد صاحبتي سميتها سلمى عرفتيها ؟

ياسيين:( عقد حواجبوا كيحاول يتفكر و والو ) لا 

جوهرة: المهم هي دابا جات للرباط راها فالمحطة و ما عندها حتى حد عندمن تجلس .. و عيطاتلي تجي عندي و أنا رحبت بيها .. مسكينة بووحدها و الدنيا شوية و غتظلام عليها و جات من بعييد باش تشوفني 

ياسيين: اييه و ااش المطلوب ؟

جوهرة: نوض سير جيبها من المحطة .. موحال تلقى المركوب فهاذ الوقت .. أنا نوصفها لك باش تعرفها 

ياسيين:( ضحك بالفقصة ) داكشي لي بقى نيت غير توصفيهالي ( ضرب يد مع يد ) نوضي لبسي عليك .. نوضي و كاان نشوفوا هاذشي فين غيخرجنا


واقفين حدا المحطة .. كان الظلام طاح ساعتها .. ياسيين طالعة ليه بالمعقوول .. كان عوال على سي صدق فشيئ ثاااني ..

ياسيين: فين هي هاذ صاحبتك ؟

جوهرة: ما عرفتش ما بانتليش .. أنا نعيطلها ( بقات كتصووني مدة و عاد جاوباتها .. باش تخرج تلقاهم قبالتها ) ها هي جاية ( دوزات يديها على الكوسان ) ما قلتيليش شريتي طونوبيل جديدة ؟

ياسيين: غير خديتها لكريم .. تانختار أنا شي وحدة .. أما لي عندي ما بقاتش صاالحة 

جوهرة: ااه .. و ديني معاك نختار ( هزات عينيها و بانتلها سلمى جايا ضحكات معاها و فتحات لباب سلمات عليها بحرارة و ركبات ) 

سلمى:( ركبات لوور بجلابة فالكحل و دايرة معاها شالها .. مدات يديها لياسيين ) سلام خويا صافا ؟

ياسيين:( هز عينيه فيها من المرايا و رجع حنا راسوا فالبلاصة حاط يديه على لحيتوا ) بخيير شكرا ( شاف فجوهرة ) مشينا ؟

جوهرة: ااه صافي .. على سلامتك اسلمى كي وصلتي مزيان ؟

سلمى: بخيير احبيبة لهلا يخطيك و سمحولي بزااف على هاذ العذااب 

ياسيين:( ببرود ) لواحد مسافر و عارف راسوا غيوصل فليل غيرصي أموروا قبل ماشي تال الدقيقة بدقيقتها !

سكتوا كااملين .. خصووصا سلمى لي تحرجات بالجهههد و بانت فيها .. وقف قدام كينتاكي .. شاف فجوهرة 

ياسيين: تهبطي و لا تتسنايني هنا ؟

جوهرة: نهبط نختار معاك .. سلمى تمشي ؟

ياسيين:( قاطعها ) يا الله هبطي .. غتكون دايخة بالطريق .. يا الله 

جوهرة: واخا .. نزلات عندوا قبطات فيه و دخلوا كيشوفوا فالشاشة شنو كاين كيشرحلها كل حاجة ااش فيها و هي متبعة معاه بتركيز حتى اختاروا لي بغاو و رجعوا .. غافلين أو الأصح غافلة على العينين لي متبعينهم !

خذاو لي بغاو و خرجوا جلسوا فلوطوا من بعد ما خلص ياسيين كيتسناوهم يجيبولهم لي طلبوا .. ضارت جوهرة عند سلمى كتتعاود معاها و ياسيين حاني راسوا على تيليفونوا كيدوز لوقت .. تا سمع هضرة شعلااااتوا بالمعقووول .. عقد حجبانوا كيسمع و يشووف فيهم من المرايا 

سلمى: ويلي اصاحبتي لاش مخلياه يشري العشا من الزنقة .. عرفتي انا و كن منت مزوجة و ما تساليني حلووف ما نخليه يخسر السانتيم هو لخر فماكلة الزنقة .. نشبعوا مسكين غير شهيوات 

جوهرة:( اعتابراتوا ضحك لا غير .. و قالت بمزاح ) ايوا أنا لي ديتوا .. إلا يلا كنتي حاطة عليه العين .. تدخلي فآخر يامك شريكة ههههه

سلمى: هههه و علاش مالها .. بحال وحدة بحال جووج .. تاخذ البنت يعطيوك صاحبتها معاها فابور 

جوهرة:( ضحكات و قالت بنية ) اييه ما نلقاش ما حسن منك هههه

ياسيين:( سخط بالمعقوول .. كيشوف فصاحبتها كتخشيلها الهضرة عينك عينك و حداه بلا ما تحشم .. و هي كتضحك بحال الهبيلة و ما دايا ما جايبة .. و هنا فهم بلي مراتوا دماغها ملحووس من شي حاجة سميتها حرووب النسا و لا ضريب المعاني .. ما عندهاش معااهم و ما كتعرف لهم طريق .. عندها غير نيشان .. و يقدروا يعايروها و ما تفهم واالو و تضحك لهم بحال البهلة .. ساط مغلغل و سنانوا قد خيزوا على سلمى لي جاتوا فرفااارة و منين دخلات و هي شاعلة فيها العافية .. خذا يد جوهرة بين يديه و تحنى باسها فكفها و هز عينيه فيها و تبسم لها بحنية ) و الله ما تدخل لداري و لا تشرك فراشي بنت المراة من غير الكبيدة دياسيين 


جوهرة:( تزنكااات بغات تتطرطق بالحموورية و حشماات منوا و من سلمى لي كتسمع .. لكن ما قدراتش ما تجاوبوش .. نطقات بعفوية ) تانا ما نقدرش نشركك مع حتى وحدة .. غير كنت كنضحك .. ما نقدر نخليك لا لسلمى و لا لغيرها ( ضحكات بحب و عضات على شنافتها بخجل ) لجوهرة لا غير 

تدق فنفس اللحظة السرجم و مدوا لياسيين الطلب .. استغلت سلمى انشغالوا و قالت لجوهرة

سلمى: من نيتك .. راه شرع ربي هذا و زايدون

جوهرة:( قاطعاتها بانزعاج ) سلمى ما غاديش نناقش معاك هاذشي .. يلا نتي تقبلي تدخل عليك ضرة ..أنا لا .. اييه الدين على الراس و العين و حد ما قال العكس .. و لكن تجيني تال التعدد ما نقبلوش على راسي و ما نقبلوا على حتى مراة كيفما كانت .. و ماشي غير اجي و ديروا خص شرووط هما 

سمع كلامهم واخا داير راسوا ما منتابهش معاهم .. و لكن كلوا أذان صااغية .. للحظة حس بالغروور و عجبوا الحال .. حيت بكثرة برودها و نيتها بعد المرات كيجيه لبالوا زايد ناقص عندها ..لكن دابا رضى نفسوا و كبريائوا الرجولي .. نحنح و حرك الطونوبيل تا وقفوا قدام العمارة .. نزلوا كلهم .. دخل هو لول نيشان لبيتهم مخليهم بجوج موراه ..

سلمى:( جلسات كتدور فعينيها فالدار ) تبارك الله تبارك الله على دوييرة وا عطاتك لياام اجوهرة و عطاتنا معاك .. شكون قال سي نهار ندخل لشي دار فحي الرياض .. لي كنا غير كندوزوا من حداه و نتنهدوا 

جوهرة:( ما حملاتهاش فهاذ اللحظة ) تبارك الله اختي سلمى تبارك الله راه ربي لي كيرزق .. يكفي لواحد يكون هاني فدماغوا و يفطر و يتغذا غير بالخبز و الزيتون و ما يكون خاصوا خير 

سلمى:( ابتاسمات بصفورية ) ويلي لاش تقلقتي راه غير تنضحك معاك 

جوهرة: ما تقلقتش غير شرحتلك و كيفما ربي رزقنا غيرزق غيرنا .. لواحد يبدا بالبسيط و دقة دقة تتكبر الخبزة و ربي تيسخر 

سلمى: امم وريني فين غنجلس باش نبدل عليا 

جوهرة: واخا أجي معايا .. مرحبا بيك ( فتحات واحد البيت و دخلاتها ) ها بيتك اختي ارتاحي لك على ما نوجد العشا

سلمى: لا لا و الله ما تعذبي راسك يدي من يديك .. غير نبدل و أنا معاك 

جوهرة: واخا لي عجبك 

خرجات و دخلات لبيتها يا الله سدات لباب و هي تحس بشحطة دالغذااايذ جاتها ففخضها حتى غوتات مقسحة و ضارت عندوا كتحك فيها 

ياسيين:( هز صبعوا ) غذاا كتعرفي شنو هي غذاا .. نرجع من الخدمة نلقاها هنا غنصيفطكم بجوج عند مك توانسوا تما 

جوهرة:( صدمها ) أويلي ا ياسيين 

ياسيين: راني هضرت و ديري لي عجبك تانا غندير لي قالي عقلي 

جوهرة: واش غنجري عليها ؟ اويلي فين ندير وجهي داك الساع ؟ ما ديرليش هاكا الميمة راه دوز يوماين و تمشي لراسها 

ياسيين:( بصوت عالي معصب ) جري عليها اختي جري مالكي لسان مقطووع لك .. من لول ما تعرضيش عليها و نتي عارفاني مسافر و جاي باغي الرااحة ماشي نلقى صاحبتك فوجهي فالطالعة و النازلة 

جوهرة:( طارت عندوا سدات ليه فموا كتهضر بالشوية ) المييمة ا ياسيين لما سكت .. حشوومة لبنت غتسمعك ( ساطت ) راني ما عرضتش عليها و ما عرفتهاش واش كاع جايا .. حتى صوناتلي حداك و قاتلي واش تبغي شي ضياف .. سحابني ضحك .. قتلها مرحبا .. و هي تقولي دوزوا مورايا راني جيت عندك لرباط .. تانا صدماتني و ما لقيت ما نقولها .. راه حشوومة 

ياسيين:( حيدلها يديها ) الناس كيستقبلوا الصحاب فالغذا فالعشية فشي كافي .. ماشي فالدار .. الصباح هضري معاها .. هانا نبهتك ا جوهرة 


جوهرة: صافي واخا غير بلا ما تتقلق 

ياسيين:( تنهد و جرها باسها من جبهتها ) الله يرضي عليك لما ديري عقلك

جوهرة: أميين ( تبسمات ليه ) نبدل عليا و نحط العشا .. غير جلس ارتاح 

ياسيين: عياان جيبيهلي غير لهنا 

جوهرة: واخا

بدات كتقلب على شنو تلبس .. هزات لي غتهز و عطاتوا بالظهر كتبدل و هي مزنكة حاسة بعينيه عليها .. كتزرب بجهدها تكمل دغيا .. غير سالات خرجات نيشان لدوك ميكات كتستف فالطباسل .. قادات ليه بلاطوا ديالوا هو لول و داتوليه .. عاد حطات ليهم هما ..

جوهرة: بسم الله بلا ما نعرض عليك

سلمى: ربي يخليك اختي و سمحيلي يلا تقلت عليكم .. خصني ضروري شي وراق نطلعهم 

جوهرة:( بدات هضرة ياسيين كتدور فبالها .. يلا قال الحاجة راه يديرها و حفضاتوا فهاذ المدة .. يعني بالمعقول غيسيفطها لدارهم يلا بقات معاهم سلمى و ساعتها غتكون الفضيحة فضيحتين .. قسحاات وجهها حتى عياات و قالت بأسف ) سلمى 

سلمى:( كتاكل و تدور فعينيها ما هياش هنا ) نعام

جوهرة:( حكات عنقها ) شوفي اختي سمحيلي و ما ديريهاش مني قلة الصواب .. نتي عزيزة و غالية و لكن راك عارفة أنا عاد مزوجة و راجلي ما باغيش كثرة الصحابات و الداخل و الخارج ( تنهدات ) ما عطانيش قلبي نخليك فالزنقة فليل و لكن فالصباح شوفي عندمن تبقاي .. و يلا بغيتي نهضر مع ماما كاع تبقاي معاها .. راه بالفرحات عليها .. بحالك بحال لبنات 

سلمى:( حطات الشدق و شافت فيها ) كتجري عليا اجوهرة ؟ هاذي هي صاحبتي و حبيبتي و مرحبا بيك ؟ صافي دابا فاش جينا للصح قلبتي وجهك

جوهرة:( فوهات فمها بصدمة ) انا قلبت وجهي ؟ كن قلبتوا بصح ما تكونيش معايا دابا ( تنهدات ) راه قتلك لي كاين و ما بغيتش نكذب عليك .. ماشي لخاطري ( حطات يديها فوق يد سلمى و طبطبات عليها ) و يلا كتعزيني ما غتهزيش فخاطرك مني .. 

سلمى:( حركات راسها ) واخا اختي ماشي مشكل غذا غير يصبح و نشوف فين نمشي .. واخا انا زعما عيطتلك نتي لولة و قلت ما نلقى ما حسن من جوهرة حبيبتي .. واخا عطى الله عند من نبقى .. تا دابا ما كاين مشكل اختي راحتك هي لولة .. 

كملوا ماكلتهم فصمت ما بقاوش هضروا كااع .. تا سالاو و جمعوا الطبلة بجووج و بقات جوهرة واقفة كتغسل المواعن و سلمى موراها كتهضر ما سكتاتش 

سلمى: الدار و الطونوبيل و الحالة و ما دايرلكش الغسالة دالمواعين .. مالك يا ختي عليها و على هاذ العذاب كاامل .. ويلي مالوا سقرام عليك 

جوهرة: أنا لي عمري قلتها .. كن طلبتها كن جاتني .. و الصراحة ما كاين لاش .. دار فيها جوج دالناس غتغلبني ؟

سلمى: ايوا لوااه راه تمارة قالاك واخا تكوني ساكنة بوحدك غتعياي .. بعدا دايرلك شي وحدة تتعاونك و تجمعلك الدار و لا والو ؟ و حماتك و لوايساتك كي دايرين معاك ( شافت فيها جوهرة بنظرة استغراب و هي تقول ) غير كنسول نطمن عليك .. راه عارفة ماماك ما تتسولش فهاذشي .. يلا كاين شي مشكل أنا نفيدك بعدا بتجربتي .. راك عارفة لي فاتك بنهار فاتك بحييلة 


من الحوايج زوينين فجوهرة هي سكووتية و أمورها ما كتعااودهم لحد من غير ختها .. حتى مها ما تتدي من عندها خبار .. و من نهار ضار فيها ياسيين راه حتى ختها ما بقات تقولها لا طابت لا تحرقات .. 

جوهرة:( حركات راسها و ضارت كتكمل شغالها ) عادي اختي بحال أي عائلة فهاذ الدنيا .. حتى دار ما خطاوها المشاكيل و لله الحمد .. و نتي خالتي و عمي لباس عليهم ؟

سلمى:( عوجات فمها ) بخير بخير .. يا الله نخليك الزين عيانة شوية راك عارفة تمارة دالطريق 

جوهرة: الله يبيتك فراحة الله .. 

كملات جوهرة شغالها و مشات لبيتها من بعد ما طفات الضواو .. لقات ياسيين متكي داير نظاظروا و هاز واحد ااكتاب كيقرا فيه .. رطبات يديها و طلقات شعرها يرتاح .. و تخشات فبلاصتها حداه .. بقى الصمت مخيم عليهم حتى قالت بعد تفكير 

جوهرة: بصح الهضرة لي قلتيلي قبيلة ؟ ( شافتوا قرن حجبانوا بتساؤل و كملات ) فالطونوبيل !

ياسيين:( تفوه و سد لكتاب و نظاظروا .. عاد ضار عندها .. مد صبعوا ليديها كيلعب فيهم و قال بهدووء ) كلشي بين يديك نتي .. 

جوهرة: بمعنى ؟

ياسيين: بمعنى نتي لي فيديك السوارت لكلشي .. ماشي أنا .. نتي لي يا تنجحي هاذ الزواج .. يا تديه للخراب ( فتح يديها و رسم دائرة صغيرة بصبعوا فكفها ) ربي نعم على المراة ببزاف دالحاجات ما عاطيهمش لنا .. حيت عارف تركيبتها و قوتها و صبرها لي ما عندش الراجل .. كنتمنى تفيقي قبل ما يطيحوا السوارت من بين يديك 

جوهرة:( شعوور خايب جاها .. تكونات غشاوة فعينيها و قالت بنبرة ألم ) أنا ما باغاش نخسرك اياسيين .. ما باغاش زواجنا يتفرتك .. ما باغاش نضيع السوارت لي قلتي .. علاش رجعنا هاكا فهاذ المدة لقليلة .. واش لهاذ الدرجة أنا خايبة و ماشي دالعشرة ( طاحتلها دمعة و مسحاتها بخفة ) عافاك لما قولي و ريحني و ريح قلبي لي كيحرقني كلما نشوف حالتنا لين وصلات


ياسيين: هذا هو المشكل .. شفتي هاذشي لي كتقولي هو المشكل بعينيه ( بتعب ) لو تعرفي شحال دالطريق ضربت و بلا تماارة لي دوزت تما .. فريمن عيان و ما فيا لي يهضر .. خلي النقاش من بعد .. لي نقولولك هو جلسي مع راسك و قولي هاذ الراجل لاش مزوجني ؟ نطيب ليه و نصبن و نسيق ؟ ما بانلكش هاذشي ممكن تديروا أي وحدة و نخلصها تمشي بحالها ! و تنديروا لراسي ما محتاج حد أصلا !

جوهرة:( جلسات مقادة و مسحات عينيها .. عرفاتوا علاياش كيهضر ) ياسيين راه تنخاف منك و تنتقسح ماشي لخاطري و الله ما لخاطري 

ياسيين: اييه و شنو المعمول ؟ نبقاو هاكا بحال الخووت ؟ واش عندك شي عقل كتفكري بيه و لا تتبهلي عليا هنا !! 

جوهرة:( تنهدات مدة .. ما دام جبدات الهضرة باغى تكملها و يلقاو حل ليهم بجووج ) ليلة لولة مركبة فيا الرعب .. ديما تنتفكرها فوقما بغيتي تقيصني .. بلا الحريق لي كيشدني دبصح 

ياسيين: جوهرة بلا ما نضحكوا على راسنا .. واخا نكون حكيتك بمنشار .. هاذ المدة كااملة لي دازت غتبراي فيها أو لا !

جوهرة:( تحرجات ) ما عرفتش مناش ! ما غتحسش بالحريق لي تيركبني راه المووت بعينيه 

ياسيين: شفتي نتي بالرب ما بيك شي حاجة .. غير كثرة الخنات و الفشووش على واالو .. تتقلبي لي يضور بجنابك حتى تتقادي 

جوهرة:( هزات فيه عينيها مخلوعة ) لا لا اويلي

ياسيين:( ضحكاتوا و تبسم من عينيه ) ها حنا غنشوفوا هاذ لا ديالك .. لويكاند دابا .. غير يفوت غنمشيوا للطبيب و ياا ربي ما يكوون عندك واالوو يااا ربي 

جوهرة: أصلا ما كاين لي يعرف لحمي قدي 

ياسيين:( هز راسوا تيحركوا و يتحلف و عينيه ضاحكين ) وااخا دابا نشووفوا 

جوهرة:( تنهداات بقوة بحال يلا رمات جبل من فوق كتافها .. قربات منوا بتردد و وسدات صدروا معنقاه بيديها من كرشوا ) عافاك ما تخلينيش 

ياسيين:( بقات فيه و الطريقة الأليمة لي نطقات بيها .. دوز يديه على شعرها ) ما غيوقع واالوو .. نعسي و ما تفكريش دابا

لا تترك يدي ... إن تركت أتوه 
لا تترك يدي... و أنا التي يسبح 
وجودك في شرايين روحها...
لا تترك يدي و عالمي بين يديك..
قلبي بين يديك ترامى بدون تردد.. 

صبح صبااح جدييد .. فاقت جوهرة كعادتها قبل من ياسيين كتوجد الفطوور بالأشكال و الأنواع .. ما كتنقص عليه واالو تا هو ما تيبخلش عليها .. فاق بكري متعمد ما يتلاقاش مع سلمى حيت شافها و وزنها .. ما بقاش حاملها نهااائيا .. فطر هو و جوهرة فهدووء فالوقت لي لوخرى نااعسة فيه .. تا كملوا و كانت جوهرة ودعاتوا عاد خرجات كتتفوه .. 

أما ياسيين فراه ركب فالطونوبيل لي مخلي عندوا كريم و مشى لجهة دار واليدين جوهرة .. نزل و دق عليهم .. فتحات ليه الأم لي تفاجآت من حضوروا بوحدوا .. لكن رحبات بيه و دخلاتوا للصالون مكبرة بيه .. و تسولوا على العائلة واحد واحد و الحال و الأحوال .. حتى نطق هو داخل فالموضوع 

ياسيين: الحاجة ليوم جيت عندك على جوهرة 

رحمة( الأم ): بخوف .. مالها بنتي ؟ ياكما واقع لها شي حاجة ؟

ياسيين: لا لا بخيير ( حط يديه على ركابيه .. محرج قدامها ) جوهرة حالتها ما بقاتش عاجباني .. و هاذشي لي ماشية فيه ما غيديناش أنا وياها للبر باش نكونوا واضحين الحاجة .. و ما كاين ما حسن منك نتي مها تنبهيها لأفعالها و تجبديلها وذنها شوية 


رحمة: اييه ما قلتي عيب غير قولي مالها و رجع لوور مني ليها 

ياسيين: المشكل هو ما بيها والو !!! أنا يلا هضرت متأكد ما غتسمعليش غير غادي ديرلي الخاطر و دوز مدة هضرتي غتكون تنسااات .. عليها جيت عندك نتي لي غتعرفي تفهميها و تفتحيلها عينيها 

رحمة: اهاه 

ياسيين: جوهرة الحاجة تا حد ما يقدر يقول عليها شي حاجة خايبة .. و نعم التربية و الأخلاق .. بنتك ضريفة ( حط يديه على فموا سكت شوية و رجع كمل ) حتى فاااتت لقياس .. نية حتى تغمضوا لها العينين .. أي واحد كيفما كان يجي غيديرها بيها ما عندهاش بكاج علاياش ترجع .. بحال داك الولد الصغير لي يالاه تولد .. صااافية بزاااف و هاذشي ما موكلش فهاذ الوقت 

رحمة:( تنهدات ) عارفة اولدي .. عاااارفة .. و لو ما كنتيش ولد لالة سميرة و الله ما نعطيها لك حيت عارفاها خبز ربي فطبقوا .. يا ما جاوها الخطاب غير شكون و شكون و لكن ما كناش كنقبلوا .. حيت باغيين لي يحافظ عليها و يصونها ماشي لي يتكرفس عليها .. ما عطيتها لكم حتى حيدتها من لحمي و مديتها لصاحبتي و ختي

ياسيين: ربي يكبر بيك الحاجة و تانا نهار لول قلتها و غنعاود نقولها لك دابا .. جوهرة رجعات محسوبة عليا .. عمري نتعدا عليها و لا نظلمها .. راني عاشرتها و قريتها .. و لكن هاذشي ما مسلكش .. نهار لي ما نكونش أنا و لا نتوما غيضربوها لحيووط .. ما تعرف لا تقدم و لا تأخر .. الناس ا الحاجة خااايبين فووق ما تتصوري .. و هي فبالها كلشي بحالها .. ما عارفاش يلا ما كنتي سبع ياكلوك الذياب .. و نهار طيح تا حد ما غيعقل عليها .. أبسط حاجة الصحابات يلا فاتت حتى تعمقات معاهم راه يخربوها فوق راسها و هي ما حاسة بوالو .. هاذشي غير لي قراب ليها فما بالك بالناس الثانيين

طالت مدة الحوار بيناتهم .. عطاها النقط لي بغاها تهضر مع جوهرة فيهم .. ما قالهاش بنتك ها شنو دارت و شنو دارت .. بل هضر بصفة عاامة و لكن فنفس الوقت وصلها المسج .. باش تعطي لبنتها حقها و تعلمها و تفيقها شوية بالوااقع لي عايشيين فيه .. 

ياسيين:( وقف و باسلها راسها ) سمحيلي يلا خرجات مني شي كلمة دالعيب 

رحمة: بلعكس راك هضرتي مع مييمتك .. راك ولدي دابا و ربي شاهد عليا .. راحتي هي تكونوا موالمين و مفااهمين 

ياسيين: الله يكبر بيك الحاجة .. تبقاي فراحة الله هاذ الساعة ..و سلمي على الحاج و البنات 

رحمة: بقى تتغذا معانا ماشي دخلتك هاذي 

ياسيين: مرة أخرى الحاجة .. 

خرج من عندها متنفس بارتياح و متأكد نوعا ما غتحاول بكااع الطرق توعي بنتها .. ركب فالطونوبيل و زاد مع الطريق .. كان وصل وقت الظهر .. مشى نيشان للدار .. تا دخل و هو يصونيليه كريم .. 

كريم: من نهار سلفناك داك الطونوبيل و نتا غابر .. ياك اودي لاباس الخاوة ؟ ( جا يهضر و قاطعوا )و لكن قالوها الناس .. صاحبي صاحبي حتى يزغبك الله و تسلفوا ما تبقى تشووف كمارتوا

ياسيين:( داخل كيقلب على جوهرة و كيهضر ) لو كانت الصفيحة ترد العار كن رداتوا على الحمار .. اودي يا كريم .. مسلفها لنا نص نهار ما كاامل و جاي تقرا عليا الزابوور ( لقاها فالكوزينة و تبسم .. ما حسات بيه تا قرصها فجنبها و غوتات بالخلعة )

جوهرة: اععععععع ( ضارت عندوا قابطة فقلبها لي غيسكت ) حراام عليك 

كريم: اطرطق الباااارووود يا ولاد لحرام كديروا لي بيتيز فالحضوور ديالي .. فين الهبة .. فين الاحترام و الوقار .. فين مراتي لحبيبة

ياسيين: شكون شادك أولدي 

كريم: نمرتي أنا ماا كايناش ( عض على شنافتوا ) شفتي هاذي لي غندي أناا كي غتكوووون .. و كيييي غتكوووون اصااااحبي واا pa pa pa خليني سااكت يرحم واالديك 

ياسيين: يا ودي كون أ زماني حرش و هاك وجهي بووس و طرش .. غير بين لنا 

كريم:( ضحك )وا لي مخبي شي طرشة مخبيها لحنكوا .. مهم ياسيين باغيك فواحد البلان 

ياسيين: أما هو 

كريم: خو محمد الصغير عندوا أنيف .. و لاسق عليا نمشي .. و راك عارف ما عنديش مع داك البهلان .. المهم بالرجوولة تمشي معايا ..شي ساعة هكاك و ن**** بحالنا و بلا ما تعكس اولد سميرة

ياسيين: معاياش ؟

كريم: ديك ربعة دالعشية هكاك 

ياسيين: اووك بروو 

كريم: يحفففضك 


جوهرة: كريم هذا ؟

ياسيين:( حرك راسوا بااه ) المصرفق لي بلاني بيه الله 

جوهرة:( ضحكات ) بلعكس عندي عزييز .. ضريف و حمق ههه

ياسيين: رجووولة داك السيد واخا تشوفيه هاكا .. نهار توقفي ..تلقايه هو لول فظهرك و كيعاونك .. بلا ما تطلبي .. بوحدك بعدا ؟

جوهرة: ااه مشات ( جلسات حداه ) الله يخليكم لبعضياتكم هكا يكونوا الصحاب 

ياسيين:( غمزها ) لخووت 

جوهرة: عيطاتلي قبيلة زينب بغاتني نمشي معاها لشي سونطر دبيوتي عاد تحل و قلت تا نسولك و نرد عليها .. نمشي ؟

ياسيين:( خذا خصلة من شعرها كيلعب بيها ) سير احبيبي سيير نشووف هاذ الزين كي تيخرج من الحمام ( غمزها )

جوهرة:( فرنسات ) تصالحنا ؟ تفورماطيتي فهاذ السفرة ؟ 

ياسيين:( ضحك ) أنا أصلا ما كنغضبش ا جوهرة الكحلة غا ارتاحي واحد الجلاخة منو ما كان 

جوهرة: ههههه بيضة أناا و زاايدون ما نسمحلكش تعاير راجلي الله يخليك 

ياسيين: تانا عندي جوج بيضات ا جوهرة الكحلة 🌚

جوهرة:( ضحكات حشمانة ) نتاا راك وااحد المقزدر منك ما كاان حشووومة اوييلي 

خرج عينيه فيها و مد يديه لكرشها كيهرها و هي كتضحك بالجهههههد .. الدمووع سالولها من الجنااب

جوهرة: هههههههه و لا لا يااسيين هووووف رصى قلبي غيسكت 

ياسيين:( طلق منها و طاح فوقها تيفرنس حتى هو ) هاا المقزدر لواالديك 

جوهرة: هههه مالي كذبت ديما محشمني بكلامك و لكن اللهم ضاحك و لا مخنزر ( قرنات حجبانها و غلضات صوتها معوجاه ) هضرتي راني قلتها و دخليها لدماغك مزياانة هاذي ( هزات حاجبها و حطات يديها على جنبها ) هااا مزيااانة ؟ 

ياسيين:( ضحك من قلبووا حتى الدمووع بغااو ينزلوا ليه .. حتى كيبغي يسكت و يتفكر شكلها و يرجع يضحك .. تا برد و جرها عنقها بيديه ) حلووة يا بنت النااس حلووة ( باسها بقووة فحنكها )

جوهرة:( هزات عينيها فيه ببراءة )

ياسيين: و الله ما كنبغي نغوت عليك و لكن كتشعليني بعد المرات تا كنكفر .. 

جوهرة:( سلمى دارت حقها عاد مشات 😂 ) و انا ما تتشعلنيش زعما ؟ هي تانا ندير بحالك و نبقى نغوت

ياسيين:( تبسم ) ما تجيش معاك كتبقاي بنووتة ضريفة تا فغضبتها هههه ( هز حاجبوا ) و لهلا ينزل علينا باطل تختي أنا ما تنشعل حد ما تنكمي حد .. من نهار زغبني الله و شعلت فيك العافية ما بقيت قستك .. شي حد داعي فينا ما فيهاش 

جوهرة:( ضحكها و حشمات فنفس الوقت ) ها حنا غنبداو فالبسالة عاود .. ما كتحشمش و الله

ياسيين: كيعجبني نقشب معاك .. ماشي تنضحكوا فهاذشي معناتها عقلي فيه غا هو .. تطواب و صافي .. من هاذشي كاامل كيعجبني نشوف غير هاذي باركة عليا ( جبدلها حنكها المزنك )

جوهرة: ههههههه

ياسيين: ايوا ا خوويا فوقاش تطفي عافيتي لي زاندة عليك 

جوهرة: ههههه نجيب باش نسووط ؟

ياسيين:( صغر عينيها ) لي بانلك اختي ما نتقدمش حداك ( شافها تتفرنس و دور فعينيها عرفها صافي حفاولها و بدل الموضوع ) كملتي توجاد دالوراق ؟

جوهرة: باقي شي وراق من ليسي لي كنت فيه قالولي باقي الحال .. تيقرب الوقت و نمشي ..

ياسيين: مزيان .. راه نيت باقي فيديك الوقت تال شهر 11 عاد الدفيع 

جوهرة: متتتحمسة و الله و خايفة فنفس الوقت 

ياسيين: لا لا ما كاين لاش الخلعة متأكد غتاخذي لباك ديالك بموونسيون كااع .. غير شوية دالعزيمة و الخدمة .. من دابا خصصي 3 سوايع فالنهار قراي فيها ديكشي و حاولي تتفكري لي داز قبل ما تدفعي و تبداي فالصح .. بعدا غتكملي فديكشي ديال الشريعة نيت ؟

جوهرة: لا بغيت ندفع للطب يلا كتاب و جبتوا بنقطة زوينة

ياسيين: هاي هاي على دكتورة سنينات ( شداتوا الضحكة ) غتجيبيه الزين علاه لي ما تجيبيه .. كنلعبوا هنا ؟


حطوا تغذااو و داروا القيلولة بجووج عاد فاقوا .. ياسيين كيلبس عليه باش يمشي للأنيف و جوهرة باش تمشي لبيوتي سانطر مع ختوا زينب لي ولدات تقريبا هاذي شهراين .. ولد كيحمق سماتوا سمير .. 

تفرقوا كل واحد فطريق .. زينب لي من شحاال ما هضرات مع جوهرة و لا تلاقاو بسباب لبيبي لي مكيخليها تدير واالو .. توحشاتها و عندها عزييزة فووق القيااس .. 

و ياسيين راه داز هز كريم و مشااو للقهوة فين كاين لانيف .. كيهضروا فمواضيعهم و كل واحد كيعرف جديد الثاني .. تا وصلوا و جلسوا فطبلة بوحدهم على ما يبانلهم شي حد من لي كيعرفوا

كريم:( تنهد ) ااش نقولك الواليدة كل مرة و شنوا تقول .. المهم عندي هو الولسيس ماشي خبيث .. يعني ما عندوا حتى خطر .. واخا هكاك غتدير عملية تحيدوا 

ياسيين:( بأسف ) صعييبة .. الله يكوون فعوانها و عوانكم معاها .. الصحة هي كلشي يلا مشات حتى خطاتك مشيييتي .. الله يديرلها تاويل دالخير 

كريم: أميين يا ربي أميين ( تنهد مبدل الموضوع ) و نتا الدار شفتيهم ؟ الواليدة و ابتسام و زينب بخير ؟

ياسيين: سميرة راها عايشة الحياة هي و مصطفى و مخليين الخدمة عليا .. كل مرة فمدينة ما مسوقينش .. تا زينب قبيلة شفتها خرجات هي و جوهرة .. بخير راه كتعدي مع داك الكتكوت .. و ابتسام خلاص راها فالداخلية 

كريم: علاش ما جاتش فهاذ الويكاند ؟

ياسيين: لا على ما قالولي عندها شي امتحانات و جلسات توجد تما مع البنات ..

كريم:( حك شعروا ) ااه وا خليها .. 

باقيين كيهضروا جا عندهم صاحبهم محمد كيرحب و يعاود .. نعت ليهم الطبلة فين كاين خوه و صحابوا .. لي كلهم دراري باقيين شوية صغار .. فبداية العشرينات .. سلموا عليهم و باركوا للولد لي عندوا عيد ميلاد .. و لي كمل 21 سنة .. عاد جلسوا مقابلين معاهم .. مرة يهضروا بجوج مرة ساكتيين 

محمد: يا الله ا دراري نبداو ؟

خوه: لا بلاتي تجي حبيبتي ( ضحكوا صحابوا بصوت مسمووع و هو يفرنس ) باقي تجي هي و صحاباتها عاد نبداو 

محمد: واخا لي بانلكم .. أنا معاهم لتحت كنرصي الأموور 

خوه: وااخا 

كريم:( حرك راسوا بلا حول ) ولاد و بنات هاذ الوقت بغاو يطيييروا الله يستر 

ياسيين:( بهدووء ) كلشي من واليديهم لي ما رباوهمش .. يلا هو بهاذ القد هي قداش غتكون ؟ 

سكتوا كيسمعوا بجوج كيسمعوا الحذيث لي ضاير بين الشباب .. 

.... : غتجي معاها عاليا ؟ ديك القرطاااسة لي داافعة كبيييير على البشرية !

صاحب الحفل : ما كاين قرطاسة قد حبيبتي ( عض فموا بطريقة عيفات دوك جوج لي متبعين المسرحية في صمت ) وااا طررررف يااا خوويا غير دالعضاان 

..... : هي يلا زربتي عليها ما حدك فنهارك ( غمزوا ) و تدوزلنا ندوقوا الشهد 

صاحب الحفل:( ضحك ) ديكشي لاش عوال .. 

..... :( ضربوا على كتافوا كيضحك ) ليووم تفرح القريد 

صاحب الحفل :(شافها داخلة و هو يغمزهم ) سكتوو صاحبت دعوتي ها هي جااات

ياسيين و كريم لي كاانوو تعصبووا بالمعقوول من طرييقة هضرتهم بل طلعولهم قلبهم و ندموا لاش دايرين راسهم فالبراهش و جااسين لعندهم .. لكن شي حاجة خلاتهم يضوروا و يشوفوا هاذ صاحبتوا لي كيهضر عليها قدااش و هنا كاانت الصدددمة .. ليهم بجووج بحال يلا جمعتي معاهم بتسرفييقة نااااضية ..

فاش شافوا ابتساام داخلة .. لابسة كسييوة حد الفخاض مع جاكيط فوقها و ليبة كحلة تتبين من التحت .. قابطة فصحاباتها كيضحكوا .. تا هزات عينيها جهة طبلتهم بعفوية و شافتهم .. اللون هرب منها .. كتشووف فيهم و ترجع تشووف فصاحبها لي وااقف فاتح يديه بجووج و كيعيط عليها .. شداتها الدووخة و عرفاتها هاذي هي اللخرة ليها .. خااصة فاش وقف يااسيين و قلع الجاكيط لي لابس و ضرب داك الكرسي اللوور حتى تقلب .. و مشى ليه شنق عليه و دخل فيه برااس حتى رعفووا

ياسيين: ختتتتتي ختتتتتتي الق****

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.