جوهرة:( شافت التصاور و كبراتهم .. تتحقق و تعااود و لوون راه هرب منها ما بقات عارفة ما تقوول و لا تجاوب حتى حسات بسميرة جلسات حداها .. شافت فيها و حطات تيليفونها )
سميرة:( حطات يديها على ركبتها و تبسمات لها بهدووء ) ما سولتي فخالتك ما قلتي نشوف حالها و كي بقات ! هاذشي عندوا معنى واحد هو باقي شادة فخاطرك مني ههم ؟
جوهرة:( ضوراتها فعقلها و قالت ) لا أ خالتي حاشة واش نشد فخاطري منك ( كملات ببرود ) غير هو فبالي نتي لي باقي مقلقة مني حيت هزيت الذهب و خرجت بلا خبارك ما عرفتيني فين زدت !
سميرة:( هزات حاجبها ) لا صافية من جهتي و نتمنى تكون صافية حتى من جهتك .. نتفاداو المشاكل و الصداع فلخر حد ما غتجي فيه من غيرنا
جوهرة: سامحتك من زمااان أ خالتي .. حاجة وحدة بغيت نعرف أنا شنو صرفت فيك خايب باش تتاهميني هاكا .. ياك كليتها من عند بنتك و ما فتحت فمي ما هضرت ليومنا هذا .. تسترت عليها و فكيتها من خوها لي كن خليتوا راه ما يطلقها تا يقتلها و فلخر تسميت سراقة ( عينيها دمعوا )
سميرة:( تنهدات ) كنت معصبة مع ديك مسخوطة دالواليدين و دخلت للبيت لقيت سامسونيط مفتوحة و حتى حد ما كاين معانا .. و الله يسمحلي بانتلي غير فيك ( ببرود ) و ما جاتش نقول لولدي أنا لي سيفطتها لدارهم من بعد ما اتهمتك ..غنتسمى كنتفلى عليه !
جوهرة:( بقات غير كتشوف فيها ما قنعاتهاش نهاائيا هضرتها ) ياك حداك خرجت .. و منين جيتي و انا قبالتك .. ما طلعتش لفووق كااع .. ما فهمتش أنا هاذشي !!
سميرة:( بدات تعصبها ههه .. نطقات بجفاء ) واش غنبقاو نعركوا و نزيدوا فالما فنفس الموضوع حياتنا كاملة ؟ صافي ما وقع بااس ابنتي
جوهرة:(تنهدات ) ماشي مشكل الله يسامح علينا
سميرة: أميين ( ضحكات و قالت بصوت مسمووع ) هي هاذ رمضان غتشبعينا شهيوات من يديك .. تا السابع فعرسك ما درناهش كي الناس .. ما دقنا سكسو ديالك كي داير ما حزمنا لك
ياقوت( جدة ياسيين ): " ضحكات " راه ولدك حزملها فبلاصتنا .. و يلا كان غير بحال سكسو ديالك غير منااقص ابنتي
سميرة: هههه ياك الحاجة و مالوا سكسوا ديالي على من زيناتوا .. تاكلوا موراه صبيعاتكم
ياقوت:( ضحكات و شافت فجوهرة ) لا عساك ابنتي تنعقل على نهارها لول .. دارتلنا عصييدة ماشي سكسوا .. ديكشي معللك ما فيه ما يتشااف أما المرووقات تقوول عندنا البحر تما و حنا غنصيدوا الخضرة .. خيزوا كيدوز من حداك كيتسارى من جهة لجهة خصك فلووكة باش تشديه ههههه
سميرة:( تزنكات ) ايوا عقل صغر و كنا باقي ما كنعرفوا لوالوا
ياقوت: اييه ابنتي رااه غير كنضحك معاك .. و لكن بقات فالتااريخ عمرني ننسااها لا أنا لا لوايسك ( ضربات يد مع يد ) مصطفى جالس بحال القايد كيقولنا حد ما يوصلها لكوزينة .. ليووم مرااتي غتوريكم الحداكة على أصوولها .. تا جاتليه بديك القصرية و لا غير تيضور فداك العينين بحال البوومة
طرطقات بالضحك هي و جوهرة كتهضر بواحد الطريقة و تعيب فوجهها بشكل تخليك تضحكي بهيستييرية .. حتى تمات داخلة ابتسام لي منين جاو ما شافوها .. سكتات جوهرة و تزيراااات تا ما قداات و باااانت فوجهها بزاااف .. خصوصا فاش قربات منها حانية راسها و قالت بهدووء
ابتسام: جوهرة صافا ؟
جوهرة:( شافت فيه بصرامة و حركات راسها بالايجاب في صمت )
ابتسام:( زعمات و قربات قبطاتلها فيديها ) عارفاك ما حاملانيش و ما كرهتيش تقتليني .. و نستاهل الصراحة شنو ما قلتي و لا درتي فيا .. سمحيلي بزااف ما كانش خصني ندير داك التصرف معاك .. ما كنتش فالوعي ديالي
جوهرة:( جرات يديها عندها و عينيها بداو يفزكوا اتبكي و حابساها بزز ما باغاش تضعاف قدامهم .. تزنكااات و عينيها رجعوا حوووومر غيطرطقوا )
ابتسام: ما غتسمحيليش دابا ؟
ياسيين:( دخل مع هاذ الكلمة و نطق بصرامة ) علاياش غتسمحلك ؟
سميرة:( عراقت فبلاصتها و وقفات ماشية عندو ) راك عارف البنات حال و عقل .. ديك النهار ابتسام غوتات عليها و رداتلها اللومة حيت جوهرة شكمات بيها ليك (دار فيها نظرة فشكل بمعنى وضحي كثر ) حيت جوهرة كانت تلاقاتها معاه فالجردة قبل .. فهمتي ؟
ياسيين:( هز حاجبوا و شاف فجوهرة ) نعام اختي !
جوهرة: ااه شفتها و تسترت عليها .. و لكن ماشي على هاذشي طلبات مني السماحة ( بصرامة ) طلباتها .. حيت منين خرجتوا نتا و كريم طارت عليا و ضرباتني ( عينيها دمعوا و هي كتشوف فيه بخنقة )
دمعوا عينيها و هي كتشوف فيه بخنقة .. ما قدراتش تجاوبوا و لا تهضر .. تمنات لو كانت عندها الجرأة و قدرات تخرج ديكشي لي كتقول فداخلها بصمت .. و تسمعوا لهم كااملين ..
تمنات لو نيت قالت " طلبات السماحة حيت منين خرجتوا نتا و كريم طارت عليا و ضرباتني " خودلي حقي منها .. ختك حكراااتني و عمري فحيااتي حسييت بالقهرة لي حسييتها دااك النهار .. و لكن للأسف ما قدراتش و العيوون كلها عليها .. كيتسناوها تهضر .. كتشووف لا لوقت لا المكان مناسب لهاذ الهضرة .. و فعوط يتصالحوا مع بعضياتهم العافية غير ما غتزيد و فليلة الشهر الفضيل غتنووض القتيلة و فالأخير كلشي غيرجع عليها و غتبان بلي هي لي شعاالة العوافي و ما تسوى ما تصلاح !
ياسيين:( قلب وجهوا كيسووط تا دازت حداه ابتسام كطير طلعات للفوق و تبعاتها سميرة .. بقاو بثلاثة فقط .. قرب منها و قال ) شفتيها و خزنتيها عليا ؟ مخلياني بحال الحمار بيناتكم و الما دايز من تحت مني ياك ؟
الياقوت:( سرحات رجليها و جاوبات فعوطها ) ضربها اولدي لا لا و الله حتى ضربها .. و لا ااش يجيك مليح طير عليها .. ديرها فدغمة دالخبز و كولها
ياسيين:( شاف فيها بصرامة ) الحاجة
الياقوت: نتوما خليتوا فيها شي حج و لا شي رمضان ( شدات رجليها ) امييمتي رجلي احح ما بقات صحة أما نوريكم شغالكم كااملين ( طلعات لها القردة ) ما لقيتوا فوقاش تشعلوها غير هاذ ليلة وا خياار عليا .. دار بنمسعوود لي عمر الحس كان يتسمع فيها رجعات بحال دار القاضي .. ما كاين غير المصائب الكحلة و فضيحة تابعة الثانية مالنا ياك لباس ؟
ما جاوبهاش حدوا شاف فجوهرة بمعنى الهضرة ماشي دابا و هز السخرة دخلها للكوزينة .. خرج عندهم لقاها جالسة حدا جداتوا و الياقوت كتدور فراسها .. شافت فيه و عيطاتليه
الياقوت:أجي المرضي لهنا أجي
ياسيين:( مشى جلس حداها من الجهة الثانية .. عاد بانتليه جوهرة مزياان .. مع حانية راسها راه ما شافش الدموع لي تسرسبوا من عينيها .. حس براسوا برد واخا طلعات معاه العافية علاش مخبعة عليه .. و لكن تال يبكيها فليلة دالعواشر لا ! ) دابا مالك كتبكي ؟ ضربتك ؟ غوتت عليك ؟ سولتك عادي .. راه عدوويا ا جوهرة لي يديرني حماار و يكذب عليا فوجهي
جوهرة:( هزات عينيها المدمعين فيه) ما كذبتش
الياقوت : شنو بغيتيها تقولك ؟ افلان راني تلاقيت بختك و ها شنو كانت دايرة و تخويلك المزيودة كاااملة ! و نتا تمشي تخلي دار عشتها و ترجع فلخر هي العقرب دالعائلة ؟ و كلشي يدور فيها !
ياسيين:( بقى شحال سااكت و هي كتدمع فلخر ناض جرها عندوا عنقها ) و صاافي سكتي .. بلا دمووع ( بصوت خافت ) ا حمامة قلبي ( دوز يديه على حناكها السخان و مسحلها الدمووع )
جوهرة:( ضحكات ضحييكة برييئة و مع صوت منغنغ و وجهها حممر جات بحال شي بريهيشة ) هههههه
الياقوت : وا هكااك النمس .. راه ما عندها غيرك ياا وييلك تبكيها و لا تقلقها تلقااني فوجهك ( شافت فجوهرة ) غير عيطي عليا و رجعي لوور أنا نفرجك فيه
ياسيين:( جلس حداها رامي يديه على كتاف جوهرة ) ما غتوبيش نتي من المعاطيات ؟ قابلي غير تساابيحك ( شاف فلباسها و ضحك ) السيدة ملففة بالبيض كي بريوة بحال غاديين نكفنوها و باقى خصها غير معامن تشبكها
الياقوت:( ضحكات ) هايهاي ولينا قد القب قد الطويسة ! قطعتي الواد و نشفو رجليك ( هزات حاجبها ) ايوا ايلا كان الحبق راه من يدينا سبق اسي ياسيين
جوهرة:( فرنسات و شافت فيه هو لي كيضحك ) طوييسة هههه
ياسيين: علمييها ما تنسايش ديري لي عليك هاذ الشهر ههه
الياقوت: عاد توصيني ؟ أنا لالة يااقوت .. بنت القاع و الباع و الشمعة من ذراع .. نخلي عرووسة ولدي ياسيين بلا درووس ( ضحكات و ضورات راسها ) أبدااا .. بعدا نقولها لك قداموا .. يلا دارلك هاذ الحتروف قد هاكا .. أجي عندي نجبد ليه وذيناتوا .. ما كاين لي يعرف ليه قدي
الياقوت : غتوريني فيه يا بنيتي .. راني ربيتوا فصغروا و وقتوا كاامل كان كيدوزوا معايا
ياسيين:( قاطعها ) كندوزوا تنفك معاك الله يخليك .. كل مرة فين مناتفة لي .. داك المدينة القديمة د فاس .. لو تهضر تعاود على مصايبك ( شاف فجوهرة بتوضيح ) فاش نزلت خدمت مع خالي فالبزار ففاس .. كانت هي باقى ساكنة تما .. ايوا لهلا يوريك هاذ الخليقة شنو دوزات .. تا من الكوميساريات مشينا نجيبوها منهم
الياقوت:( ضحكات ) ايوا نخلي حقي ! لا عساك ابنتي بنادم يلا ما خرجتيش العين الحمرة فيه و جبتي حقك بيديك .. غيركب عليك فوق راسك و يدلي رجليه .. كووني حاارة و قد فمك قد ذراعك
ياسيين:( ضحك ) و تشوفيها هي و كليكتها ما كاين غير الحلوفة لختها و كيمشيوا معولين على خزييت ( شاف فجوهرة ) يجلسوا عليك يخرحوا مسارنك
جوهرة : هههههه
قلبوا كلامهم لجهة ثانية .. تا تحط العشا و تجمعوا عليه كاملين فصمت .. تا كملوا و ناضت جوهرة بلا خاطر طلعات لبيتهم .. يالاه بدلات عليها كان دخل ياسيين .. شافت فيه و قلبات وجهها .. تا هو شافها و طمر ساكت .. تا لبس عليه و تخشى حداها ..و بقااو سااكتين مددددة .. و هو حااس بيها باغى تهضر و لكن ما مترددة تا كتجي تدوي و تسكت .. ما قال هضرات
جوهرة: ياسيين .. نسولك ؟
ياسيين:( تقلب عندها ) على سلامتنا اختي منين هضرتي .. حزقييها و نتي من صبااح و نتي كتعصري عليا هنا
جوهرة:( بلقات فيه عينيها و ضرباتوا لسدروا ) واا باااز وااش كتحشم و لا عندك لوجه لي يستحيي
ياسيين: الحشمة خليتها ليك نتي اختي .. طلقيني مالك ماشي هي هاذيك ااش تم ( غمزها مطمر ) ابتسام شنو دارتلك ا جوهرة ؟ تكذبي راه نعاودلك الطهاارة بمووس حاافي
جوهرة:( ضحكات ) ااش غتطهر فيا هههه
ياسيين: أناا لي عاارف ااش .. خلينا ساكتين و كاان .. رمضان هذا ما فيا لي يدوش مع نصاصات ليل
ياسيين:( هز حاجبوا ) دايرة لي يحضيني و لا جابلي الله !
جوهرة: تئ و دابا جاوب
ياسيين:( حك لحيتوا و نطق بجدية ) ايوا منين وصلاتك الخبار راه ما بقى ما يتخبع .. هاذيك ضرتك ابنتي
جوهرة:( بلقات فيه عينيه و طلعات معاها صهدة وقفات مخرجة عينيها ) نعام اخوويا ؟ ( ضرباتوا لدراعوا ) و الله العجل و تكون دايرها تا نمشي عليكم لعوكاشة ( بغات تبكي ) ضحك معايا فكلشي إلا فهاذشي
ياسيين: اجي عند بابا نقوولك أجي ( جرها عندوا متبثها ) ديجا حلفتلك و غنعاودها .. و الله ابنتي جوهرة ما كاينة لي تدخل لداري و لا تاخذ بلاصتك فحياتي .. تهنيتي ؟
جوهرة:( هزات خنافرها للسما ) و شكون داك البقرة
ياسيين:( جبدلها نيفها و ضحك ) نتي لبقرة اختي ماشي هي ( شافت فيه جوهرة و هو يكمل ) شكون هو راجل البقرة ياك هو العجل ا حبيبة ؟ ياك قلتي أنا عجل ؟ ( هز حاجبوا و هي كتلعب بعينيها مزنكة ) يعني الحيوان كيعرف خوه .. غير نتي بقرة فالحلال و هي كلبة فالحرام
ضحكات من نيتها تا عينيها دمعووا .. سالاهم لها .. من لول ما شكاتش فيه ..لكن جاتها فشكل يقول ماشي يتقضى و يصدق جالس فكافي مع شي وحدة .. بغات غير تفهم .. لأنها تااايقة فيه ثقة عمية .. و عارفاه ماشي شي واحد لي كيخوون و يزيكزاكي .. خلاها تا سكتات و نطق بهدوء
ياسيين: لبنت لي كنت قتلك درت معاها أكسيدون .. عقلتي ؟ ( حركات راسها بااه ) ايوا راه هي معامن .. تلاقينا صدفة لا غير و لسقاتني نتقهوى معاها هذا ما كان .. ساليتي التحقيق ديالك
جوهرة:( ضحكات و حركات راسها بااه )
ياسيين: دابا قوليلي شكوون وصلها لك كتبقبق ؟
جوهرة: ايوا شفتي ! ديرها غير زوينة توصل توصل اودي ! ( شافت فيه بانلها ما كيضحكش بلعكس راه قارن حجبانوا كيتسناها تجاوب ) وئام شافتك قبيلة فالمول و عيطاتلي علماتني !
ياسيين:( دوز لسانوا على شنافتوا و هز تيليفونوا صونا عليها حتى جاوبات ) السلام عليكم ا لالة وئام بخير ؟
وئام:( باستغراب ) الحمد لله و نتا ؟ لقيتيني يا الله غنسول فيك .. رمضان مبارك عليك
ياسيين: بخير ! لا باينة غتسولي فيا ( ببرود ) لي يتلاقاني فالمول و يشوفني فاص ليه و ما يسولش .. عاد نتسناه يعيط ؟
وئام:( صدمها ) اا لا راه
ياسيين:( قاطعها ) واايلي على لالة وئام خفتي نخليوك بلا ذواقة و لا كيفاش !!
وئام:( حكات عنقها ) لا غير كنت مشغولة كناخذ شي حوايج عليها ما صلاحليش و صافي .. راك عارف الوقت كيزحم
ياسيين:( ميل فموا باستهزاء ) الوقت كيزحم غير فالحوايج .. أما توصلي خبارات بحال يلا مسخرة للقايد و لا لباشا هانية ياك ؟ ( وئام ضربات الطم راه صدمها .. تا هو فاش شافها ما هضراتش كمل كلاموا بجدية ) شوفي ا وئام باش نبقاو مزيانين و ما نخسر معاك ما تخسري معايا جمعي راسك من التبرهيش .. من لخر ما سووقكش .. ندوز كلشي إلا هاذ الخدمة ديال دراري دلاكريش راك كبيرة و بعقلك زعما
ما خلا فيها غير لي نسى .. غسسسسلها بالمعقوول و جوهرة حدااه كتولول ما لقات فين تدير وجهها .. تا قطع مكره و شاف فيها
ياسيين: مالنا ياك لباس ؟
جوهرة:( ضربات فحناكها ) واش نتا ما كتحشمش كااع ! واخا غير مرة وحدة فحياتك ! أوييلي على الرااجل كيهضر بدم باااارد ما مسوقش .. حشوومة و الله تا حشوومة
ياسيين:( ضربها لحنكها بالضحك تا سكتات ) هنينا من الفرييع .. ياك أنا لي هضرت ماشي نتي وا هني السووق ... نهار نجي نهضر بوجهك عاد ندبي عليا تما ( سكت شوية و رجع قال )أنا هاكا كنعطيها للواحد فااص و ما كنبقاش نتلوى و نبدل فجلدي خمسين ألف مرة فالنهار و لي كيسالني شي حاجة يحطها فوق الطبلة نفضيوها .. ااش غيوقع كااع !؟
جوهرة:( فقصهاا تاا فقصهاا بغاات تطير عليه تنتفوا و ما قدراتش فلخر عضات على سناانها و بقات تسووط )
ياسيين:( هاز تيليفونوا كيخربق فيه ما مسوقش ) طرطقي نتي كااع .. ليوم تدخل فهاذي غذا نلقاها خاشية راسها فأمورنا و ك تفتي عليك الري و مع نتي تبارك الله لواحد ما يخافش عليك ( ضرب يد مع يد ) هزنا الماا و ضربنا الضوو
جوهرة: ايواا ياا حميييد ااش نقوولك الله يرد بيك و خلاص
ياسيين:( ضحك و مشات تغووبيشة .. عيبها كيفرنس ) اييوا يااا حميييد أو فينك تمص مصييصة من هذاا .. تمصي مصيصة احبيبة ؟
جوهرة:( رمشات فيه ) اويييلي
ياسيين:( ضحك على وجهها كي تلون .. عرفها ما فهماتش شنو قصد بالضبط و لكن عرفات لموضوع سفالي .. عينيه قربوا يدمعوا ) هاذ رمضان خصنا معاه شي حل .. غبري اختي من قبالتي لا نرتاكبوا الفااحشة و المنكر على قولت ختك
جوهرة: ههههههه
ياسيين:( جرها عندوا معنقاها ) ضحكي ابنتي ضحكي و شهريلي سينيال .. ما طالعة ما طالعة
🌞🌞 يوم جديد 🌞🌞
أول أيام الشهر الفضيل .. فاقوا أهل الدار مع الفجر لقاو سميرة فايقة هي و مصطفى كتمدليه و هو كيحط و يضحكوا مقشبين .. تجمعوا كااملين .. تسحروا و تسناو الأذان غير وذن .. ناضوا صلاو جمااعة .. بقيادة مصطفى فالمقدمة .. و بعدها كل واحد تكركب لبيتوا .. ما فاقت جوهرة غير على ياسيين كيلبس حوايجوا .. شافت فيه و حكات عينيها و نطقات بصوت ناعس
جوهرة: صباح لخير فين ماشي ؟
ياسيين:( حرك راسوا بالايجاب ساكت .. تا ركب السمطة للسروال و قاد لكول .. عاد جاوبها ) نعسي ارتاحي باقي الحال .. غنمشي مع كريم لخدمتوا
جوهرة:( بابتسامة ) واخا الله يسر
رجعات غمضات عينيها باقي ما شابعة نعاس .. و خلاتوا هو نزل للتحت فصمت لقى كريم قبالتوا تا هو لابس و هاز فيديه شانطة دالجلد فالكحل .. هز يديه
ياسيين: واحد خمسة دقائق
خلاه و دخل للكوزينة على صوت التقرقيب لقى مو فايقة كتجمع مواعن السحور .. نحنح تا شافت فيه
ياسيين: فين هي لبنت لي كتعاونك ؟
سميرة: سيفطتها بحالها .. خدمتها ما بقات كتعجبني .. كثر فيها الفشووش و التشراط الخاوي
ياسيين:( حك حاجبوا ) و راضية ؟ ( يلا عقلتوا عليها هي لبنت لي كتكون مع الياقوت )
سميرة: و راك عارف اولدي رمضان هذا و كل عام كتمشي دوزوا مع واليديها و خوتها لي كيجيوا من الخارج ما جاتش نشدوها
ياسيين: يعني ما كاين حد لي يعاون ؟ فيلا على قدها ما دايرينلها تا وحدة ؟
سميرة: ايوا لوااه مالها فيلا غتغلبنا ؟ و راه تبارك الله ربعة دالعيالات و عاد نجيبولهم الخادم من الفوق .. اويلي مالنا عليها .. كل واحد يتعاون مع خووه و ها حنا بخيير
ياسيين: شكوون هاذ العيالات .. الحاجة الياقوت ؟ و لا نتي لي شوية تبداي تغوتي براسك ؟ و لا ابتسام لي ما كتنوض تال زك النهار ؟ و لا زينب لي ليل كاامل واحلة مع ولدها ما نعسات ما شافتوا ؟ و لا ياكما عوالين على جوهرة ؟ ( قلب وجهوا مغلغل ) صباحاتوا الله ( فتح بزطاموا و جبد كمشة دالفلوس قرب عندها فتحلها يديها و حطهم و رحع شدلها يديها ) عيطي على شي وحدة تجي تعاونكم .. دار عاامرة و كلها منين كيجبد بلا تزقريم د واالو
خلاها غير كتشووف و خرج من تما عند كريم لي صابحة راشقة ليه كيفرنس عكس ياسيين لي لاقي ستة فتسعوود .. زادوا بجووج .. كريم صايك و ياسيين حداه .. خرجوا على المدينة بمساافة .. تا وصل لواحد التجزئة .. فيها مكااتب البيع .. قلل السرعة و دخل بالشوية بلاصى و نزلوا بجووج .. دخلوا لواحد من المكاتب .. كانوا جالسين جوج بنات و دري .. غير شافوهم و وقفوا بابتسامة .. و كريم كيسول فيهم على الخدمة .. في حين ياسيين راه هاز واحد الكاطالوك كيقلب فيه و يشووف بهدووء .. حيت رمضان هذا ما كاين طريطور و قلييل فين كيمشي إلا يلا عيطوا ليه على شي حاجة مهمة .. لكن كيطلع لزااف لمرااكش يقابل خدمتوا تماا
💫💫 عند جوهرة 💫💫
دازت ساعة موراه عاد فاقت .. قادات أموورها عاد تمات ناازلة .. تلاقات بسميرة لابسة قمييص مطلووق على طولتوا بحال ديما .. مقطعة شعرها كااري و صابغاه فالماارون .. جايبة فولار و عااقداه على راسها و مزيرة عليه .. و كتضرب فباب بيت ابتساام و تهضر
سميرة: أناا رااه يلا ما صفيتيوها لياا راه ماا كاين لي يصفييها .. الله ينعل لي ما يحشم الخااانزة
طبلات و غيطات تا عياات قداام بيتها و فلخر زادت طالعة لها القردة لسطح تلاقات بحوهرة فالكولوار و شافت فيها
سميرة: تا خوتاتك كيديروا بحال هاذ البنت لي عطاني الله .. تصبح مطرقة عليها البيت و شادة وذنيها ..لا عين شافت لا قلب وجع ( شدات راسها ) ميييمتي راسي غيتقسم
جوهرة راه ضهشراتها ما عرفات باش تبلات .. مدات يديها قبطات فيها مزيرة عليها تا نزلوا لتحت و تكات فالفراش حدا الياقوت كتأنن و جوهرة واقفة فوق راسها ما عرفات ما ديرلها
الياقوت: غير جلسي ابنتي .. هاذي عادتها مسكيينة فهاذ لول د رمضان .. ديما قاتلها الراس .. و لكن سرها هي لي ما كتووبش على القهوة .. كتخرجها منها و تدور دور و ترجعلها
سميرة: ايوا راه ما عندي لاين عليها .. و ما كاين لي يحن عليك فهاذ الدار .. زينب مسكينة لي ما كتخليني نتململ من بلاصتي راه التربية هداتها ( جات واقفة ) نمشي نشوف ااش نوجد .. الوقت كيطيير .. شوية نسمعوا الله أكبر
جوهرة:( تدخلات ) ويلي ا خالتي راك عيانة ارتاحي .. أنا نتكلف بكلشي غير ارتاحي
سميرة: وا لوااه لوااه فين عمرها كاانت .. نخليوك بووحدك كطيري .. ما جاتش ابنتي و نتي عاامك لول لي غتصوميه معانا
جوهرة:( باعتراض ) لا اخالتي و الله ما تنووضي .. غير قوليلي شنوو ندير و ارتاحي لك حتى تولي شوية
سميرة:( شدات فراسها ) كنت باغى غير نعيط على شي بنيتة تجي تعاوننا .. ساعة الصحة لي نعول عليها مشااات .. رجلين طاحوا عليا و الشموشات على الجهد .. تال غذا و نشوف ااش ندير
الياقوت:( ضحكات ) اشرفتي ابنتي .. ما قلتها حتى أنا
سميرة: و لاهيلا الحاجة تا شرفنا .. الصحة دناس زماان فين تباان قدامنا واش لي كانوا يفطروا بالشعير كيفور و الزيت البلدية هما حنا
الياقوت: و الله ما كذبتي .. اياام زماان ما بحالهاش .. شوفي غير الخضرة د هاذ الوقت لا مذااق لا واالو .. كلشي رجع بااسل و عاامر دوايات و سخط .. كيهلكوا فينا غير بالفن ..
سميرة:( وقفات ) ايوا الله يديرلنا تاويل دالخير و صافي ( مع جوهرة ) أجي معايا ابنتي
دخلوا بجووح للكوزينة لقاتها جابدة بانيوا كبيير فالأرض و حداه واحد الفواطة علاياش تجلس .. شافت فيها و قالت
سميرة: و الله تا حشماانة منك ابنتي بالله .. هاذ العاام باقي ما درنا واالو .. لقيتيني يالاه جبدت القوام باش نخلط سلو .. مع الحاج و ياسيين كيعجبهم مع كويس دالقهوة موور ما يودن العشاء .. ما نصيبش شي عام ما نديروش لرمضان
جوهرة:( قادات شالها ) صافي ماشي مشكل أنا نخلطوا دغياا ( جاتها الكمية كبيرة لي حاطالها ) هاذشي كامل غيتصوب ؟
سميرة: ااه ابنتي .. كي شتي راه كيتنكل فرمضان و لي كيبقى كيتفرق .. على زينب و راجلها و على الحاجة الياقوت و على ياسيين تا هو .. أما حتى كريم ما عندوش معاه
جوهرة:( جلسات و بدات شغالها مركزة ) صافي غير ارتاحي أنا نصوبوا عليك
سميرة: أودي شمن رااحة تا نتي .. باقي تابعاني الحريرة ننصبها .. زعما لبارح فزكت الحمص .. و صبحت على الصباح كنجمع الدنيا باش ننصبها فخاااطري .. عندي عزيييزة و كنقاادها بالعشششق .. خصك تذووقيها من يدي
جوهرة:( بابتسامة ) ااه حتى ياسيين قالها لي .. الله يعطيك الصحة اخالتي
سميرة: اودي فينا هي هاذ الصحة ( شدات رااسهاا و بدات تغوت ) ايييييي مييييمتييي راااسيييي احححح اربيييي اجيييي ا لالة مرجانة تشوووفي بنتك تيضربوها الحيوووط .. اااخخخخ اراسي
جوهرة:( خلعاتها و هبطاتلها النقطة ولات كتقول غير عنداك طيحلي هنا ) صافي اخالتي صاافي غير سيري ارتاحي لك راك عيانة بزااف .. أنا غير نكمل هاذ سلو .. ننصب حدايا الحريرة تانا كطلعلي زوينة .. تا تكوني بصحتك و ديريها كيف كتبغيها .. غير قبلي عليا
سميرة:( باقى شادة راسها ) ويلي ابنتي نتي مولات الخير .. لقيت فيك النفع و ما لقيتوا فالمطوطة دبنتي .. بلحاق غير صبار يجي خووها و تفرجي هو لي كيعرفلها
جوهرة: ما عليش لبنات كاملين فهاذ العمر كيكونوا هاكا .. ما تزيروش عليها بزااف تا طج
سميرة: اييه عندك الصح .. و طلقي يدييك شوية ابنتي .. عطي لافوورص و عنداك شي شعرة طيحلك .. يالاه الله المعيين
خرجات من تماا و تكات حدا حماتها طالقين التلفزة كيتفرجوا و بناتها لفووق نااعسيين مخليين لمتعووسة دجوهرة غاارقة تال الوذنين و كاع ديك القوة لي جامعاها تدوز بيها نهارها .. بدات كتمشيلها و اليدين كيطيحوا عليها
تناص النهار و وذن الظهر و جوهرة راه باقي حانية على داك البانيو .. ظهرها ما بقاتش حاسة بيه كااع و اليديين طاحووا عليها .. تا بدات الدووخة تشدها .. ما كملات تا ربي غفر لها ما تقدم و ما تأخر .. وقفات كتغوت بظهرها و ذاتها كلها كتقطر بالعرق .. صهداات خصووصا بالشاال راه تخنقااات و الشمش الصباح كامل كتضرب فالكوزينة تا كتولي تغلي بالصهد
غطات داك سلوا و خلاتوا فالجنب .. تال مور لفطور و تشوفوا سميرة واش تزيد ليه العسل و لا شي قوام .. و مشات للافابوا كتغسل حالتها و تبرد وجهها و عنقها .. فتحات الفولار رجعات جمعات شعرها لي فزك لها بالعرق .. هزاتوا للفوق و عقدات الشال على جبهتها مخلية عنقها عريان تتهاوى شوية ..
تنهدات بتععععب و مشات لداك الحريرة كتجبد فالطحانة و القوام لي غتحتاج و بدات تقاد على سعدها و وعدها .. تا دخلات زينب عندها .. بكسيوة صيفية مقطعة شعرها كاري و دايرة ليه ليميش من لتحت فالغري جايها كيحمق ..عينيها منفووخين .. داخلة كتفوه و تتبسم مع جوهرة
زينب: هاي هاي على الناس دالحداكة و ديكشي .. يا ختي مالك ما تسنايني غير نفيق الشغل غيهرب
زينب:( ضحكات ) شكون كذب عليك .. أنا سانك سير سانك .. راه خليل ( راجلها ) لي بقالوا شوية و ينذب بحال لولية
جوهرة: هههه علاش ؟
زينب: ويلي سمير ( ولدها ) حرااام واش بغى يسكت .. يدي طيحهم لي بالله .. ليل كاامل و أنا هازاه كنراري بيه غير نحطوا يدوز خمسة دالدقائق و يبدا يغوت هو من جيه و باه من جييه .. حمقووووني
سميرة:( دخلات عندهم ) ا صباح لخير الخميرة لي عطاني الله
زينب:( باستها كضحك ) راسك شوية ؟
سميرة: شوية و صافي .. مرة ها هو مهدن مرة المطارق كيضربوا
زينب: بفففف وا ارتاحي .. نتي و ياسيين حرام وااش كتسمعوا للهضرة .. كل عام نفس لبلان و ما كتوبوش .. كثير شي هو
جوهرة: ااه راه سلو مغطي تما حتى تشوفيه و الحريرة هاني معاها ما بقالها والو و توجد
سميرة: ايوا ااش غنقوولك ابنتي الله يرضي عليك و صافي ، ياسيين تزوج و عرف بمن
زينب:( بلقات عينيها فيهم ) صوبتي سلو بووحدك ؟ اوييلي من نيتكم ؟ ويلي واخا تكوني روبوا ..هذاك كنتجمع عليه أنا و ماما و البنت لي تتكون معاها و كنتهدوا حراك نتي بووحدك ( ساطت ) شهاذ البهلان دالمرض ا ماما
سميرة:( ببرود ) ايوا راه قلتها لها و هي لي بغات تعدلوا .. خصوصا فاش شافت حالتي كي كانت .. أنا نحلف و هي تحلف
جوهرة:( سمعاتها و سكتات كتدور يديها فالطنجرة و هما كيهضروا )
سميرة: خليل باقي ما ناض ؟ شفتوا تعطل ما موالفاش ليه
زينب: امم راه طالعة ليه القردة تا هو ( شافت فالساعة ) ما بقى والو و يودن العصر .. راه عيط على ياسيين يمشي عندهم تا هو ما خدامش .. ايوا راه كيلبس غيتلاقاو فالجامع الجديد لي عاد تبنى هنا .. يصليوا و يدخلوا بحالهم
سميرة: اااه الله يسخر .. غنمشي نفيق داك الخانزة دختك و نتي شوفي شنو ديري لفطور باقي ما تصوب واالو
زينب: غير سيري و جلسي حدا لالة ( على الياقوت ) راه خليتلها سمير .. لا يمشي يعذبها
سميرة: واخا
خرجات و خلاتهم بجووج .. زينب كتجبد من الفريكوا شنو تحتاج و جوهرة مقابلة حريرتها و هي براسها رجعات كي الحريرة تقيسيها طيح .. تغلبات بالمعقوول .. تا انتابهات لها زينب و قالت
زينب: الزين طلعي بحالك ترتاحي راك عيتي .. أنا غنقابلها حدايا غير كوني هانية
شافت فيها بامتنان و طلعات بحالها لبيتها مهدووودة بزز دخلات توضات و صلات الظهر باش ما تجمعش عليها .. حدها كملات و طاحت فوق ناموسيتها ما حاساش بذاتها كاااع .. كلشي كيضرها باغة غير تغمض عينيها شوية .. و ديكشي لي كاان ما دوزاتش بزااف تا مشاات فسااابع نوومة
أما ياسيين فراه دوز نهاروا كامل مع كريم تا عياو و خلاو دوك لبنت و لولد تما مكلفين ما كيسدوا تال مور العصر بشوية
تحركوا فين دايرين مع خليل .. كان باقي واحد ربع ساعة للعصر .. دخلوا من بعد ما صلاو جوج ركعات كتحية للمسجد و جلسوا مع خوتهم كيسمعوا للقرآن .. حتى وذن و صلاو جماعة و خرجوا من تما .. دازوا لباتيسري شراو شي تواشي للفطور و مشاو للفيلا نيشاان
لقاو سميرة هازة ولد بنتها عندها كتراري بيه و الياقوت متكية فبلاصتها .. سلموا عليهم و دخلوا لي جابوا للكوزينة .. كانت واقفة زينب كتعمر خبيزات صغاار و حداها ابتسام كتصوب العصير .. رمى عليهم السلام و ضور عينيه كيقلب على جوهرة
زينب:( ضحكات ) ا خويا ما بقيناش نبانولك حنا .. جات لي دات لعقل و القلب ( ضورات راسها كضحك )
سميرة:( دخلات و قالت ) هي لي تخزنات علينا فبيتكم .. راها ناعسة لفوق .. لبنات نعاونكم فشي حاجة ؟
قبل ما تجاوبوا كانت سميرة دخلات و سمعاتهم قبل ما تنطق بنتها كانت قالت
سميرة: هي لي تخزنات علينا فبيتكم راها لفوق ناعسة .. لبنات نعاونكم فشي حاجة ؟
ياسيين:( غوبش ) علاش مالها ياكما عيانة ؟
سميرة: امم زينب تكلمي لجداتك ولدك راه تيبكي خصوا يرضع ( غير سمعاتها خرجات كتطير من تما .. عاد كملات سميرة هضرتها ) ايوا راك عارف رمضان هذا يمكن غلبها نهار لول .. غير خليها مرتاحة تا نحطوا لفطور و فيقها .. ها حنا مكلفين بكلشي
ياسيين:( حرك راسوا ) و شنو درتي فالمراة لي قتلك ؟
سميرة: ااش غندير لي كنعيط عليها كتقولي شادينها الناس قبل و لا ما يمكنلهاش .. كاع لي تنعرف ما مساليينش هاذ رمضان ..و راني وصيت الناس يقلبوا معايا على شي وحدة كبيرة و شاربة عقلها و درويشة .. ماشي غير نجيوا ندخلوها للدار و نسكنوها معانا و نأمنوا عليها ..
ياسيين: وا المهم غير خفي راسك و قلبي دغيا ..ما كانش أنا نهضر مع السيدة لي كدير لميناج عندنا فالمحل
سميرة: صافي باش ما كان غنعلمك ( ساطت ) أصلا ا سيدي داري و قادة بيها و ما محتاجة لي يعاوني و لا يمدلي ( شافت فابتسام ) يلا كملتي نتي من تما حيدي نوجد الطاجين لي كياكل خوك ( شدات فركبتها ) واخاا الرجليين قتلووني و لكن ما كاين عويين ااش نديروا
ابتسام: وايلي اماما على ما كاين عوين ..عطيني نقي لك الخضرة و نصوب معاك .. و ها زينب غير تكمل مع ولدها و غتجي تكمل هاذشي و ها حنا سالينا كلشي .. غير بقاي على خاطرك
سميرة: ايوا شنو نقولك لهلا يخطيكم عليا يا بنيااتي و الله يرضي عليكم كيفما كتفكروا فيا و واقفين معاونين ..
ابتسام:( باستها ) عادي الحب .. كلنا عيانين و لكن يلا ما تعاوننا راه شي ما قضيناه ..ها حنا نكملوا و نجلسوا مجموعين
شاف فيهم ياسيين بنص عين كيلعب بالكونطاكط .. و خرج من تما طالع لبيتوا .. فتحوا بالشوية و دخل كيفتح السوميج .. تا وصل للنص و لمح جوهرة ناعسة مجبدة كل رجل لايحاها فجييه .. جبهتها عرقااانة و وجهها مزززنك .. شاف فيها بهدوء و خلاها تماا .. هز حوايجوا دالدار و دخل للدوش ..
بقى مدة عاد خرج لابس عليه شوورط حد الفخاض مبين لي مووليي مخدوومين و سوفيطمة سماطي مبينة شوية من صدروا و شعيرات خفاف باينين .. مسح على شعروا الفازك و مشى جلس فالطبيلة صغيرة لي دايرين فالبيت .. هاز بيسي و نظاظروا دالبروطيكسيون .. دارهم و ركز كيطابي فالكلافي فسكاات .. مرة مرة تينحنح .. يسرح حلقوا و يرمي عينيه جهة جوهرة لي غاايبة عن الوجوود
داز لوقت بلا ما يحس تا ضروه عينيه عاد حبس ..تكسل قابط عنقوا .. مدة و هو كيحرك فيه تا تطلق عليه و مشى عند جوهرة كيحرك فيها و ينادي بسميتها .. تا بانتليه كتفتح عينيها و تتفوه . مد يديه بعفوية لجبهتها .. كانت حرارتها عادية
جوهرة: جيتي ؟
ياسيين: امم قبيلة .. ياكما عيانة ؟ نخرج ناخذلك شي دوا قبل ما يشدوا !!
تبسمات ليه و هو نزل عندهم لقاهم مجمعين على الضحك و النشااط .. حنا راسوا شادوا بين يديه حاس بالمطاارق خدامين فيه و صوتهم راه كيتسمع فقلب وذنييه دايرليه الشقيييقة .. و هذا حالوا ديما الراس كيدوزوا عليه و كيتقطع قطعة خاااايبة .. عليها كيغبر وجهوا عليهم النهار كامل تقريبا باش ما يشعل فحد و هو على سبة .. حس بشي حد جلس حداه و حط يديه فوق راسوا بلمسة حنوونة .. هز عينيه فيها و من غيرها حمامة قلبوا .. تبسم معاها و خلاها كدوز بيديها على شعروا و ديرليه مساج خفييف للفروة .. و الياقوت و زينب راهم شادينها بالمعاطية بالضحك
الياقوت: و الله و نقبطك يا الويلة حتى نغزك بسناني تغزاز الزفزوف
زينب:( قلبات عينيها و ضحكات ضحكة دالشيخات تا شاف فيها خوها و راجلها و هي تجمعها ) الا نسميك امرأة مرموقة و محزمة بالهيدورة قربي عندي لهنا و نتينا كتعطي الصبع من تحت الجلابة كي الفلوس لمرعد
الياقوت:( هزات حاجبها ) حاسبالي فراسك ماحسب الويل فيا و نتينا ماتسواشي حتى صبيع رجلي الصغيور
ناض ولدها كتبكي و هزاتوا كتسكت فيه و تضحك
زينب: نووض نتفها أولدي و عطيها علاش كتقلب ( هزات عينيها فيها ) ولدي ما رضاهاليش و جاوب فعوطي .. قالوها ناس زماان لي ولد ما ماتش ( باستوا فكرشوا تا تلوى كيضحك ) يخليلي الفلووس د ماماه
جوهرة شافت فيهم و تبسمات سااهية عجبها منظرهم و تخيلات راسها تا هي شي نهار هازة ولدها فيديها كضحك و تلعب معاه ،قمة السعااادة بالنسبة ليها .. ما باغياش شي حااجة كثييرة .. دويرة فيها هي و راجلها و وليداتها و تكون هانية فراسها هاذي الدنيا و ما فيها .. أما لباقي ما كيهمش .. تنهدات تا شاف فيها ياسيين و فعينيها لي ثابتين على ختوا و ولدها .. طبطب على يديها و حيدها من راسوا و همس لها
ياسيين: غتكوني أحسن أم فالكوون (تبسم) بريهيشة غتربي خنفووس قد صبعي صغير .. الله الله هههه
جوهرة:( بفرحة تبسمات و قالت بهمس ) زعما ما عندكش مشكل نولد ؟ ( شافتوا غوبش و شاف فيه باستفسار ) حيت نتا قلتيهالي فلول .. نسيتي ؟
ياسيين: كاين شي حد ما كيبغيش يولد ولادوا ؟ ( بهدوء ) عندي أسبابي لاش ما باغيش حاليا .. هاذشي ماشي معناه ديما .. راك ماشي صاحبتي لي غنخافك تحملي مني !!
جوهرة: لي هما ؟ تانا ماشي صاحبتك باش ما تشرحليش !
ياسيين:( جا يهضر و هز عينيه بعفوية لقى زينب واقفة عليهم و مدات ليه لبيبي .. قبطوا منها بحذر و تبسم فور ما شاف حركاتوا البريئة )
زينب: خليوه معاكم على ما نجي .. صافي ؟
ياسيين:( حرك راسوا بثقالة ) تا البراهش فرخوا و ولاو يهزونا بولدي و يحطونا بيه .. سيري يلا عندك ما تقضي سيري ( مشات كضحك )
جوهرة:( نغزاتوا فكتفوا تا شاف فيها ) عطيهلي
ياسيين:( حاط سبابتوا فذقنوا كيلعب معاه .. شاف فيها و قلب عينوا عندوا زعما كيهضر معاه ) شفتي هاذ جوهرة الكحلة بغات تزاحمنا فيك ا صاحبي ..
مدولها و رجع هز تيليفونوا كيخربق فيه متلف الوقت .. مخليها هي كتضحك و تلعب مع سمير و فينما يجي يبكي تراري بيه حتى يبدا يسكت .. حمقهاا بغات تاكلوا بالبوسان .. فحين البنات راه بداو كيوجدوا الطبلة د الفطور .. تا ناض مصطفى كيعاون مراتوا و هاذي طبيعة فيه رباها حتى فولادوا .. الدار كلشي يتعاون فيها ما كاين فرق بين بنت و ولد !
بقاو جالسين البقية ها لي كيهضر بحال الياقوت و خليل و جوهرة لي كتضحك مع لبيبي و ياسيين لي حاط رجل على رجل كيتفرج فيهم و كريم لي راه فبيتوا لي كيجلس فيه .. باقي ما نزل عندهم
بعد مدة لا بأس بها تسمع صووت الأذاان .. تجمعوا على الطبلة قالوا الدعاء 《 اللهم إني صمت على طاعتك و سأفطر على رزقك .. ذهب الظمأ و ابتلت العروق و تبث الأجر إن شاء الله 》
و فرقوا الصوم و ناضوا الرجال صلاو مخليين العيالات مجمعين و الياقوت كتضحك مع جوهرة و ترحب بيها و تعاودلها على أيام زماان
الياقوت : هذا أول فطور ليك عندنا .. زمان كنا نلبسوا العروسة و نقادوها بحال ديك البنية للصغيرة لي أول عام حق عليها الصيام .. العروسة باللبسة و الحنااني كتعشق فيديها و نديرولها الليلة نااايضة .. باش تبقى لها ذكرى زوينة فدار حباب راجلها
ياسيين:( نطق موراهم ) تا دابا نديرها للزين ديالي .. حتى حاجة ما تغلى عليها الحاجة
شافت فيه جوهرة مزنكة قدامهم و هو غمزها و جلس قدامها .. عاد غيفطر نييت .. مداتليه زلافة دالحريرة و بعدها من قداموا كيهضر معاها و وذنيه مع الياقوت لي كتدعي معاهم
ياسيين: نوو بلاش ما كنشربهاش
الياقوت: ايوا الله يخليكم لبعضياتكم و يبعد عليكم ولاد و بنات الحراام
ياسيين: أميين و يخليك تاج فوق راسنا
الكل : أميين
خدموا التلفازة قبالتهم مونساهم كيفطروا بالضحك و النشاط و قولها و ضحك عليها .. تا سالاو و وقفات ابتسام جابت بلاطوا لأمها و جلسات فبلاصتها .. مخلية سميرة واقفة كتجمع و ياسيين كيشوف فيهم حتى وحدة ما قالتلها بالكذوب أراي عليك ..
ضار شاف فجوهرة و حرك عينيه بلا ما يهضر .. تا هي ما زادتش معاه الهضرة فالبلاصة وقفات و هزات من على سميرة و ابتسام تابعاها تا هي .. تا جمعوا كلشي .. و رجعات ختوا بحالها و هي بقات تتجمع كل حاجة مع ديالها و لي غتتخبع فالتلاجة راه دارتها و لي ما عرفاتش خلاتها تا تجي سميرة و تعرف شنو دير .. خايذة فلي حداها بهدووء .. حتى حسات بالحس موراها .. ضارت لقاتوا ياسيين نيت .. مشى جهة غسالة المواعن خدمها لها .. بالي ما تعرفش .. و قال
ياسيين: ها هي غير ستفي فيها و سديها و بركي على هاذ البوطون و غتخدم .. تكملي و أجي تجلسي ( بهدوء ) و آخر مرة نشوف بحال هاذ الستون د قبيلة .. ما دام فدار وحدة تعاوني معاهم بحالك بحالهم .. حشومة كاع مراة كبيرة واقفة و نتي جالسة .. ديريها غير فبلاصة ماماك و شوفي واش تقدري تخليها ! ( زفر بحرارة )
جوهرة:( تغرغروا عينيها بالدموع و بقى فيها الحال بالجهد .. حيت بصح عيات و ماشي لخاطرها .. ما حملاتوش يلاحظ شي حاجة عليها .. هي لي كتنقص من راسها باش تخلي كلشي على خاطروا فلخر تسمع الهضرة ) أنا غير عييت
ياسيين:( هز حاجبوا ) العشية كاملة و نتي ناعسة .. ما وجدتي ما حطيتي معاهم .. عيتي من نعاس واقيلة ؟ ساهلة تحركي و غتولي نااضية
جوهرة:( طاحوا دموعها لي كانت قابطاهم .. و هزات عينيها فيه بنظرة حزن و نطقات ) واخا سمحلي
تسناتوا يهضر و يسكتها بحال عادتوا .. واخا غير يعنقها ماشي ضروري يحزرها .. لكن لقات البرد من جيهتوا .. خلاها تما و خرج بحالوا
خلاتوا تاا خرج و بكات على خااطر خااطرها .. كتبكي من أعمااق قلبها تا رجعات كلها كتررعد و النفس تخنق فيها .. عينيها حماااارووا رجعوا بحال الجمممر .. ما خرجات من تما تا جمعات الكوزينة كااملة و ردات المواعن لبلاصتهم من بعد ما مسحاتهم ..
كملات و طلعات نيشان لبيتها ما بغات تشووف حد و هي فهاذ الحالة .. خاصة كلشي مجمووع و صووت الهضرة على الجهد .. فتحات لباب و دخلات حانية راسها فسكاات .. تا سمعات صوتوا
ياسيين: واش نتي ما كتلقاي ما ديري كتنوضي تسيقي داك الوجه ؟ ( هزات راسها فيه ) الدمووع عندك بحال السلام عليكم ! مالكي على هاذ الحالة كااملة ؟
جوهرة:( بكلاموا بحال عطاها الأوكي تبدا جولة ثانية دالبكى .. هبطوا دموعها كيجريوا و قالت كتنخصص ) حيت حتى حد ما حاس بيا أنا هنا
ياسيين:( خرج فيها عينيه و قال بنرفزة ) ما تعصبينيش أ جوهرة .. جيت سولتك واش مريضة واش عيانة نجيبلك الدوا قلتي لا غير نهار لول غلبك .. عادي ارتاحي و لكن باش تحطي رجل على رجل و مراة دير من عمرك ثلاثة و لا كثر تخدم عليك .. غير حيت نتي كنتي صايمة هذا راه تبعصيص الخااوي
زادت كتبكي بالجههههد و هو كيشووف فيها قارن حجبانوا عصبااتوا لاش كتبكي بهاذ الطريقة تقول قتلها .. نفخ تا شبع فلخر مشى جرها عندوا عنقها كيدوز على ظهرها يسكتها
ياسيين:( كيبوسها فراسها ) وا صافي من الدمووع .. غير كنهضروا دابا مالك على هاذ الحالة كاملة ( ما جاوباتوش غير كتبكي .. ما عرف شنو يديرلها ) قالك شي واحد شي حاجة ؟ دارولك شي حاجة ؟ ( ساط ) جوهرة هضضري بلا مرض
جوهرة:( حركات راسها بلا و بزز نطقات ) لا غير توحشت ماما و دارنا .. أول رمضان فحياتي كاملة ندوزوا بلا بيهم
زادت كتبكي و لاسقة فيه و هو كيسكت فيها تا بردات و ما بقى كيتسمع منها واالو من غير مرة مرة شهقة خفييفة
ياسيين:( دوز على ذراعها ) نوضي نخرجك تبدلي الجو .. يالاه لبسي عليك ..
ناضت دخلات للدوش .. تصدمات من وجهها كي رجع و كي تطبع لها بنقاطي حوومر .. غسلاتوا تا برد و هزات كحول بلدي كحلات بيه عينيها لي دغيا دمعووا من حروريتوا .. خلاها تتنقز فبلاصتها .. تا بردلها و فتحات عينيها لي جاوها زوينين .. خط دالكحوول مبين لون عينيه الأخضر الصاافي مع الحموورية لي ضايرة بالبؤبؤ ديالها .. جمعات شعرها و قادات فولارها عاد خرجات عندوا لبسات دغيا و خرجوا هو شاد فيها
خرجوا ضاحكين .. علموهم بلي خارجين غيصليوا التراويح و يشوفوا شي شغال عندهم .. و ودعوهم مخليين سميرة كتميق و تشوف فابتسام و تضور فراسها .. أما هما راه يالاه ركبوا غيخرجوا و شيرلهم كريم .. لي كان واقف برا كيكمي
ركب معاهم من بعد ما طفى الكاروا كيهضروا بجوج بيهم و جوهرة ساكتة كتسمعلهم فهدووء .. تا وصلوا قدام أجونس ديال الطونوبيلات .. دخل و بلاصى و نزلوا كيهضروا
كريم: غتخاذ من عند محمود ( حرك ياسيين راسوا بااه ) و على سلامتي منين غترضلي خرشاشتي
ياسيين:( ضحك ) جاك افراج اولدي
جوهرة:( باستغراب ) شنو كنديروا هنا ؟
ياسيين:( جرها من يديها حداه ) زايغين عليا واحد جوج فرانك جاي نطبهم ( حرك يديه و قال ) دخلي اختاري لي عجباتك على ما نجي
شافت شي راجل وقف عليهم و خلاتهم كيهضروا و هي كتقلب باعجااب و تضوور من وحدة لوحدة تا لحق عليها
ياسيين: عجباتك شي وحدة ؟
جوهرة: كلشي زوين .. بلحاق ما عرفتش شمن شكل غترتاح فيه نتا ؟
ياسيين:( رمى يديه على كتافها ) ماشي ليا .. طونوبيل ليك نتي .. اختاري لي عجبك .. غير من الأفضل شوفي شي وحدة صغيرة على قدك طلقي فيها يديك على ما تعلمي و عاد بدليها ( بقات كتشوف فيه كترمش و ضحك جبدلها نيفها ) تبقاي توصلي هاذ العبد الفقير معاك .. عنداك غير دفعي عليا كبير
جوهرة: ههههه واش بصح ( عينيها بغاو يخرجوا منهم لقلووبة ) ديالي ؟ و لكن ما عنديش بيرمي !
ياسيين: غندخلك تقراي تا تاخذيه و هانتي معايا كتطلقي يديك .. تا تقبطي السوكان و يرجعلك بحال جغيمة دالما
طارت عنقاتوا بالجهههد و باستوا فعنقوا تا عوجوا مبووورش
ياسيين: كيبانلي غنتشنوها دابا نيت !
اختارت ميني كوبر صغيرة فالحمر على قدها .. و خلات ياسيين مع مول الأجونص كيتفاهموا على الثمن .. تا وقف حداها كريم .. هزات عينيها فيه و تبسمات بهدووء .. ردها عليها و شاف لجهة فين عينيها ساهيين .. بقى شحال متمعن و قال
كريم: ياسيين خويا قبل ما يكون صاحبي و لا ولد عمي .. شفتي واخا يبانلك هاكا ضارب الدنيا بركلة راه بالله ما كاين شي حد معقوول قدوا
جوهرة:( تبسمات و حركات راسها بالايجاب ) عارفة
كريم: صعييييب تهز مسؤولية و نتا صغيير بزاااف .. و كلما كبرتي مسؤولياتك كيتزادوا كثر .. عوض ينقصوا .. هاز فعنقك عائلة على قدها و خصك تفكر ليهم واحد بواحد و عاد شووف واش يبقالك الوقت لراسك ( تنهد ) واخا هكاك عمروا قال شي كلمة و لا تشكى
جوهرة:( تنهدات ) الله يعطيه القوة و يخليه لينا كاملين
كريم: ههه ياك بعدا ؟ فبالك سنييييين ما شفتوا مرتااح هاكا و بااينة من عينيه فرحاان ( فتح عينيه و رجع غمضهم ) كلشي منك نتي .. فالعادة الأم لي كتوصي العريس على بنتها .. و لكن هاذ المرة بغيت أنا لي نوصيك عليه .. حيت يستاهل يفرح و يتهنى فحياتوا
جوهرة:( تزنكات ) كن هاني فعيني بجووج
كريم:( تبسم لها و قال بمزاح فاش شاف ياسيين جاي عندهم ) يالاه براكة من التفلسيف تال الحصة الجايا ابنتي
ياسيين:( شاف فالساعة ) تئ باقي الحال .. ناخذ شي قهيوة نقاد بيها المجاج و نشووفوا فين نشدوها
جوهرة: المجاج راه مقاد عندك الله مصلي على النبي ( صغرات فيه عينيها ) عنداك تكون شيشتي ا ياسيين بالتخبية .. راه نعيق نعيق
ياسيين: عقتي بيا اختي ..وا درتها و لي عطى الله عطاه..خفت غير ماما تحصلني تديرلي العقوبة ( خمجلها وجهها بالضحك ) الله يمسخك ابنتي .. أنا تتطلعلي التبويقة غير بيك .. كاين شي حد كتضوالوا ليلتوا بنجييمة بحالك و ما تطلعش معاه الزطلة ( ضحك )
جوهرة: ههههه اييه سكتني بهاذ الكلام
ياسيين:( ضحك ) و الله احبيبي تا الزطلة تتطلع معاك من ديكشي الرفيع .. كتقول للمعسل حيد للجنب خلي لالة لبنات تدووز
خبعات وجهها مزنكة كتشووف فيه بنص عين و غير يشوف بيها ترجع تتخبع .. سالات معاه تا صووت قهقهاتوا رجعوا كيتسمعوا من بعيييد
ياسيين:( وقف فالسطوب و حط يديه على قلبوا ) واا سميرة أجي تشوفي ولدك بلاه الهوا و ما حس بيه ( ضحكات و عض هو على فموا ) ليل طال عليا و القمرة ضوات و لالة جوهرة طالعة فالعلالي كي النجمة كتشالي
جوهرة:( حشمانة و فرحانة ) هههههه زلايلي يا خويا ..
ياسيين: تنتزلل غير على الكبيدة و الشحيمة ديالي ( غمزها ) و عشاق الزين ما يتلام ا لالة جوهرة
كملوا طريقهم حتى وقف قدام واحد الجامع .. شاف فيها غالباه الضحكة
ياسيين: نزلي اختي .. نزلي نصليولنا جوج ركعات ..
و ديكشي لي كان دخلوا صلاو لي عليهم و بعدها تلاقاو قدام لوطوا .. و تحركوا من تما فاتجاه قهوة عائلية .. حدا البحر فرييجة كتفتح النفس .. اختار بلاصة بعيدة على البشر و مدرقة عليهم باش ياخذ راحتوا ..
حط التيليفون و الكونطاكط فوق الطبلة و تسرح قبالتها كيشووف فيها و هي كتلف و تقلب فعينيها تا غلباتها الضحكة و قالت
جوهرة: مالك ؟
ياسيين: قوليلي يا زينة البنات ماماك علاش توحمات .. ما خليتيلي العقل شفتك و انا نهبل ( غمزها )
جوهرة:( ضحكات و قالت متلفة الخجل لي شادها ) زوين هنا
ياسيين: نتا لي زوين احبيبي .. وا شوفي فهاذ العبد الضعيف و حني فيه
شافت فيه مزنكة و هو يصورها .. جاتها زوينة و عفوية .. مدلها تيليفونوا كتشوفها ..تا وقف عليهم الكارصون .. خذا ليه قهوة قاسحة و هي اختارت لي بغات .. جالسين مجمعين و ياسيين راه متلف حريق راسوا معاها .. و شاد فيها نييت .. تا كتبغي تطرطق بالحشمة ..
جوهرة: ياسيين
ياسيين:( حط يديه على حنكوا ) قتلتيني بياسيين ياسيين ياسيين خايفاني ننسى سميتي أختي ؟ ما كاين لا حبيبي لا كبيدتي لا والو .. ناشفة عندكم القضية
جوهرة:( ضحكات ) الأرض جااافة موووت ( تزنكات و قالت و هي حشماااانة ) أمول خيمتي
ياسيين:( قهقه بالجهد و ضرب فووق الطبلة ) و خلي موول خيمتك يسقي لك الأرض ا حبيبي .. البزبوز موجود خاصوا غير لي يقيصوا و يفيض خيروا
جوهرة:( شدات على فمها )و الله ما كتحشم تئ حشووومة .. غادي تلفني حتى على شنو باغى نقول
ياسيين: تزوجتك باش نحشم منك ( ضحك ) هضري اختي هضري و نتي غتموتيلي هنا
جوهرة:( طالع معاها السر و التزنيكة .. كاع داك البكى لي بكاتوا .. غير بقات معاه الراس فالراس رجع ضحك و تفرنيس .. حكات عنقها و قالت ) واخا نمشيوا لدارنا هاذ ليلة نباتوا فيها
ياسيين:( جمع الضحكة و جغم من كاسوا و قال ) أجي قربي لهنا ( ناضت جلسات حداه من بعد ما كانت مقابلة معاه .. ضار عندها كاامل تا ما بقى فاصل بيناتهم والو .. حط يديه على فخضها و زير ) هاني كنسمع يا الله هضري
جوهرة:( شافت فيه بمعنى شنو )
ياسيين:( قرب منها و نطحها بجبهتوا ) يا ودي نطقي يا هاذ البنت ( نعت لها بصبعوا لعينيها ) واخا هاذوا راه قايلين كلشي .. و لكن بغيت نسمع منك نتي حيت عارف الكبدة ما كتكذبش .. اش واقع ؟
جوهرة:( تزيراات و ما عرفات ما تقول و هو قبالتها عاصر عليها .. تا بغات تبكي من شوفاتوا )
ياسيين: تبكي راه بالله تا نسلخ والديك و دمعي ساعتها على خاطرك ( مسح على وجهوا فاش بقات ساكتة ) آخر مرة غنقولك مالك هاذ النهار ؟
جوهرة:( تنهدات قالبة الموضوع ) ضروري تكون شي حاجة ! والوا .. بغيت غير نباتوا فدارنا هاذ ليلة ( رمشات عينيها و قالت ممازحة ) يلا بغيتي زعما
ياسيين:(ما ضحكش بلعكس راه طلعاتلوا القردة للراس بسكاتها و هو عارفها من نوع لي كيسكت على حقوا و ما كتحملش ينوض الصداع .. فما بالك يكون بسبابها .. و هاذشي لي معصبوا كثر حيت بنادم فاش كيشوفك ساكتة راه عاد ما كيركب عليك و يدير ما عليه .. زفر بحرارة و قال بتهديد ) ما باغاش تهضري ؟ براااحتك .. و لكن نهار نسيق لخبار لشي حاجة نتي لولة غنتفاهم مع طواسلك ( تعصب ) ما فهمتش أنا ااش كنبان قدامك ؟ شماتة ؟
جوهرة:( خرجات عينيها و حركات راسها بالزؤبة بالنفي ) لا أويلي من نيتك
ياسيين: و علاااش أختي ما كتشركينيش فمشاكلك ( حرك راسوا بواخا ) بقاي تخزني فداك القلب تا طيحي على وقفتك ( دفع داك الكرسي بزعفة و ناض ) بلانات دالمرض
تبعاتوا بعينيها تا وقف فالطيراس كيسرح عينيه فالبحر قداموا .. خلاتوا بوحدوا شوية يبرد .. و عاد مشات عندوا وقفات موراه و مدات يديها شابكاتها مع ديالوا .. كتبان صغييورة مع يديه لي سوومر و هي بيضة حليب ... شاف فيها ببرود و رجع كيشوف قبالتوا كيحك فحاجبوا .. باغي يشيش و لا يكمي على الأقل باش يبرد و عارفها غتكعى .. مسبق خاطرها عليه .. ما حس غير بيها حاطة راسها على ذراعوا .. شاف فيها بنص عين و ذرعها تا تبسمات
ياسيين: غير دالعصا بالله ( حط صبعوا فوق ناظرها و نقر بالشوية تما ) دخلي لهاذ نص عقل .. بلي راك مزوجة براجل ماشي شماتة لي ما يوقفش معاك .. ما جبتكش لداري باش نتكرفس عليك .. يلا ما عاونتكش نتي بلي قدرت عليه .. لاش مزوجين الالة جوهرة ؟ و لا نتي من الناس لي عارفين فالزواج غير ليل ( تبسم فاش بانتلوا ضحكات ) لا نتي ما عارفة لا ليل لا النهار غير مقدمة و صافي
جوهرة: ههههه حرام عليك
ياسيين:( شاف فيها بنص عين ) اييه الناس ولاو بروفيسيونيل هاذ الساعة .. ما بقاوش ساهلين ( تزنكات و تخمشات فيه و كمل هو ) تخباي فيا لوالديك عنداك غير منين نشدك ما تجيش تخشاي
ضحكات و بقات معاه حتى برد و رجعوا لبلاصتهم .. جالسة حداه مرة يعنكشها مرة تنتفوا هي نيت .. تا هزات تيليفونها و بدات تتعوج و تصور و هو كيصفر و يطنز عليها .. صونا تيليفونوا .. طلعات ليه زينب .. قبطها و قال
ياسيين: البرهوشة .. ااش تما ؟
زينب:( ضحكات ) غندير لحفاد و غنبقى برهوشة فعينيك باز يا خويا .. فينكم باقي ما تجيوا ؟
ياسيين:( عوج راسوا و قال ) لاش اختي ياكما ولدتكم و خليتكم بالجووع ( بطنز ) باغيين ترضعوا ا ماما ؟ ( جوهرة قرصاتوا فذراعوا و خرجات فيه عينيها كتولول )
زينب: ههههههه لا راك فطمتينا أ ماما .. معاك بالمعقول فوقاش جايين .. واش نتسناوكم و لا لا ؟
ياسيين:( حك لحيتوا ) ما جايينش غير قضيوا .. يا الله تلاحي ( قطع معاها )
ياسيين:( ضحك ) مقطعيين لوراق اختي هاذشي لي عطى الله ( حط يديه على عنقها و نزلها لتحت جهة فخاضوا و يدو تانية كتهر فيها .. و هي كتضحك و تضرب فيه يطلقها تا تزنكات و طلعات راسها فيها الدمووع دالضحك نازلين لها من الجنب )
جوهرة: عندك الضحك دالبناية .. اححح اعنقي
ياسيين:( ضحك و قال بطنز ) جاتك الغيرة اكبيدة .. بغيتي حتى نتي ترضعي ؟ ( عض على شنافتوا ) احح على اححح و خلاص .. كتجبدي الحنش بوسكة عليك
جوهرة:( تزنكات تا تزنكات و حنات عينيها لحجروا بانلها ديكشي منفووخ .. عضات على فمها و فلتات ليها الضحكة )
جوهرة: ههههه على سبة بالله .. كلشي عندك داخل فيه ديكشي الله يستر
ضحك عليها و ناضوا دومونداو لعشا .. و هبطوا بجوج للبحر لتحت .. حيدات جوهرة من رجليها كتلعب فالماا و ياسيين بعيد عليها شوية كيشوف فيها و يضحك .. حتى رجعات عندوا فرحانة كملوا مساريتهم متلفين الوقت .. تا شاف فالساعة و قال
ياسيين:( ضحك ) خليني غير أنا نجبدولك .. أما النعاس غنعسوووا ابنتي نعسة ما شهيتك فيها ( ضحكات جوهرة بالجهد تا شاف فيها معجب و ضحك تا هو ) جاتك على قلبك ابنتي .. قولي موحشة عموو عليها باغى دارك
ياسيين:( ضحكاتوا بلهلا يكزيها ليه .. جرها عندوا كتموووت بالضحك و قال بطنز ) معلووم البنت تنسى مها و باها و ما تنساش أول تب كواها
جمعات فمها من الضحك و بلقات فيه عينيها .. حتى كتقول صافي ولفات هضرتوا و ما غتبقاش تحشم .. كيجي يطلقها كثر من راسوا و يحدهم لها مرة أخرى .. تزنكااات و هاذ المرة هو لي ضحك عليها و جرها عندوا كيطنز عليها .. تا طلعوا و جلسوا فبلاصتهم .. لقاو شي كوبل جالسين قدامهم .. شاف ياسيين فجوهرة
ياسيين: مشينا ؟ ( حركات راسها باه .. يا الله ناضوا سمعوا .. لبنت لي حداهم قالت للكارصون )
-- شي كاس دالقهوة الله يحفضك و شي عاصير للغزال .. ماشي قالك ماماه خطباتلوا .. ويتك ويتك على القطيوط
جوهرة:( عيات صابرة و تفرشخات بالضحك تا شافت فيها لبنت ) ههههههه سمحيلي اختي
--- وايلي هانية خوذي رااحتك
ياسيين:( جرها ) زيدي الشوهة ( شاف فيها بنص عين ) نتي لي بنتيلي ضرباتك الزطلة ابنتي .. داك العصير دايرينلك فيه شي حاجة ما فيهاش
ياسيين:( ضحك و قال مطمر ) هما لي كتشدهم الدودة و كيقلبوا غير فمن يبردوها .. و منين يطلع معاهم الصبع يبداو يبكيوا !! باللوجيك أي واحد لقى ويفي فابور راه عمروا يدخلوا للدار ( حرك يديه ببرودة ) دونك لي عندها شي ط*** تجمعوا عندها و لا راه غيخور فيها تا يشبع و فلخر غتزوجوا ماماه ( غمزها )
جوهرة: ايوا الله يعطيهم ما عطى لبلارج ( ضرباتوا لذراعوا ) ما تبقاش تخسر الهضرة قدامي
ياسيين: واخا ابابا .. ااش عطى لبلارج ؟
جوهرة:( ضحكات ) العين مبرقة و الرجلين فالمارج ههههه
ياسيين: خدمة الياقوت هااذي ما عندي ما نسالها ( ضحك و همسلها ) الرجلين هما لي غتهزيهم لوالديك غير بلاتي عليك .. غناكلك ماااكلة
جوهرة: وا عنداك يركب فيك السكر ( حرك حجبانوا باستفهام و ملامحوا ضاحكة .. تا هي جاوباتوا بثقة فالنفس ) حيت حلووة أنااا
ياسيين: ههههههه ما شفتي العسيلة لي كتجودي علينا بيها ( شافها ما فهمات والو و قال ) هاذشي كبير عليك ابنتي .. تال حصة الدعم ديالنا و نشرحلك
مشاو هزوا لعشا اومبورطي و خلص لي عليه و شدوا طريق لدارهم .. فتحات لباب و دخلات فرحانة و مبسمة .. بدلات عليها و خرجات عند ياسيين لي كان ستف ديكشي لي جابوا فالطباسل و جالس كيتسناها ..
تعشاو بالضحك و النشاط .. غير قولها و ضحك عليها .. منسااجمين مع بعضياتهم .. تا كملوا و وقف جرها معاه لبيتهم .. لاحها فوق الناموسية كتفرنس و هو فوقها كيطرش فيها بالضحك
ياسيين: شدي لبيرمي بعدا و فكري فيها ( هز حاجبوا ) عرفتي و تديري فيها زعاامة و تهزيها و أنا ماشي معاك .. ااش ندير فيك
جوهرة:( ضحكات ) ااش ؟
ياسيين:( تحنى هرها فرجليها تا هرباتها ) غنعلقك من كراوعك زبطة فباب لبيت ( شافها تزنكات و هو يعبها ) حشووومة ا يااسيين (غطات وجهها و هو كمل ) اهيا راه معاك كنهضر ما تهزش و أنا ماشي معاك .. غذا غنجيبهالك
ياسيين:( هز حاجبوا ) هاذ الساعة غنقيدك عند واحد الأستاذ من ديكشي الرفيع .. و أول درس ليك هو كي تشدي بواط افيطاس .. غير هذا غير كتقيسيه كيطلع لطروازيام ديريكت ما تحتاجيش تعطيه لافورص .. موطوروا نحييلة
ضحك و تحنى عندها كيقبل فيها بحراارة حتى انتاقلوا لعالمهم الخاص .. مخليها طايرة فسابع سما .. حفضلها الكود و عرف كي يتعامل مع المشكل لي عندها حتى ما بقاش كيلقى معاها إشكال نهائيا .. كيمتعها و يمتع راسوا بلا ما يتضرر حتى واحد فيهم ..
ما طلقها تا رجعات شروييطة .. تترغب و تزااوك فيه .. عاد ناضوا دوشوا و توضاو .. غير كملات حوهرة طاحت مسخسخة .. نعسات فبلاصتها .. فحين ياسيين تسنى حتى وذن الفجر صلاه و قرا شوية دالقرآن و نعس
💫💫 يوم جديد 💫💫
يوم ثاني من الشهر الفضيل .. دوزاتوا جوهرة هااادئ و فراحة .. ما كاين لي فيقها و لا هضر معاها .. تا هي ما حساتش براسها كااع .. ذاتها كلها كتضرها بحال يلا واكلة العصا ..
ناضت بالشوية عليها كتقلب على ياسيين لقاتوا فالصالون و البيسي قبالتوا .. صبحات عليه و خلاتوا بخاطروا حتى ترشقلوا و يجي هو نيت عندها ..
داز الوقت .. فطروا بجووج فهدووء .. و خرجوا شدوا طاكسي للأجونس كمل ليه الفلوس و خرجلها طونوبيلتها جديدة كتبري .. صاكها و هي حداه فرحانة كتنقز و غير حاضياه باغى تتعلم بالزربة و تحفظ كلشي .. و هو كيضحك عليها .. حتى حبسوا قدام الفيلا .. دخلوا مشابكين يديهم .. سلمووا عليهم و جلسوا ..
كريم: خذيتيها ؟ ( ياسيين حرك راسوا بااه .. فالمقابل هو ضحك و شاف فجوهرة ) مبرووك اختي تركبيها بالهنا و التيسير
جوهرة:( فرحانة ) أمييين ربي يخليك
سميرة:( باستغراب ) علاياش كتهضروا ؟ فهمونا حتى حنا نباركوا لكم و لا ما عليناش الله ؟
جوهرة: اويلي لا طونوبيل د بصح و جديييدة يالاه خرجناها من لاجونس .. دوبلفي كتبري
ابتسام:( ميقات فيها .. جاتها بحال كتفوح عليهم و لا كتخشي الهضرة .. لكن ما قدرات تقول تا حاجة فحضور خوها ) ايوا مبروك
سميرة:( شافت فياسيين ) ياك اولدي هاذي هي مك .. تشري طونوبيل على قدها لمراتك و أنا آخر من يعلم ! ياكما خفتوني نعينكم .. و لا مخبيينها بلعاني باش نبقاو فدار غفلون .. و لكن قالوها ناس زمان ولدك ولدك تا تجي ( سكتات ما كملاتش )
ابتسام:( ضحكات و كملات ) اللفعة دمرات ولدك
ياسيين:( كمش عينيه فيها حاط يديه على لحيتوا .. سرح حلقوا و قال ببرود ) ابتسام برد عليك لحمك ياك ؟( خنزر ) يلا كياكلك قوليها نتكلف بكل فرح !! (ختوا ضربات طم مزنكة فبلاصتها .. و هو كيخنزر فيها بغى يطيرها .. استغفر مولاه و شاف فموا بطنز ) جوهرة عينيها خوضر ما كتشد فيها لا عين لا مولاي بي غير هني راسك .. و نهار نكون تنسرق عاد غنخبي .. عادي يالاه توالمنا فيها و خديناها و ها هي فبالكم ..
سميرة: ( ساطت ) كن غير شريتيها لراسك بعدا و بعدا .. العيالات ااش عرفهم فالصوكان و الطرقان
ياسيين:( هز حاجبوا ) و الله ما كذبتي .. العيالات خليهم غير فكوزينتهم ما كاين لاش يخشيوا راسهم فلي ما كيعنيهمش ( حط رجل على رجل ) القضية عندكم ناشفة ! شي كاس دالقهوة العيالات .. و حطوا سلوا د هاذ العام ندوقوه لكم ولا ما ناويينش ؟
ناضت سميرة ما عاجبها حال .. حساتوا قمعها و طلعات معاها العاافية .. تبعاتها حتى ابتسام .. يالاه جات تنوض جوهرة و هو يجلسها
ياسيين: فين غادية اختي ؟
جوهرة: نعاونهم حشوومة
ياسيين: جلسي للأرض يلا عندك علاش ! ( شاف فباه لي حاضي المسرحية و ساكت .. عارف ولدوا غيكفي و يوفي ) فين هي زينب و خليل ؟
مصطفى: مشاو عند واليديه يفطروا معاهم
ياسيين:( حرك راسوا ) مزيان
《 تنجو لأنّ ضحكة شخص ما في هذا العالم الشاسع ، تخصك ♥ 》
بعد مدة تحطات السينية دالقهوة مع بلاطوا دالحلوة و طبسيل دسلوا مقاد و عاد فاكية .. خذاو كيسانهم كيهضروا و ينقبوا .. تا داق ياسيين من سلوا و هز راسوا فيهم
الياقوت:( ضحكات ) باش عرفتيها ؟ بعدا لذيذ و لا والو ؟
ياسيين:( تبسم جنب ) واايلي على كي عرفتوا ! زعما طياب سميرة غيخفى عليا ( زاد ذاق و قال ) شي حاجة مبدلة .. ما عرفتش ! المهم ماشي بحال المعتاد !
الياقوت:( شافت فجوهرة و ضحكات ) وا دابا قولنا .. شكون حسن هذا و لا ديال سميرة !
ياسيين:( ضحك ) دونك ماشي ديالها .. ياكما نتي لي صوبتيه و لا داك البرهوشة د زينب ؟ ( هز كاسوا دالقهوة كيشرب منو و يدوز بسلو ) و الصراحة د الله .. هاذ المرة مصرووع
الياقوت: ايوا راه مراتك لي خلطاتوا و عدلاتوا
ياسيين:( ضار شاف فيها موسع عينيه باستغراب .. شافت فيه بخجل من نظراتوا ليها .. خصوصا فاش مد يديه و عنقها عندو و جبدلها حنكها قدامهم كاملين ) و أناا تنقوول هاذ اللذة منين جااية .. و بسييف ما يطلع مصرووع و العسل مصوبوا بيدييه ( شاف فسميرة و حرك راسوا كيتحلف و الضحكة مرسومة على فموا ) ماك يا سميرة مووحال يسخنلك
سميرة:( بابتسامة صفرة ) ياك ! هي حنا ما تنعرفوش نصوبوه بحالها
ياسيين: بغيتي المعقول و لا ولد عموا ؟ ( شاف فجوهرة وضحك ) ما تتعرفووش ليه أختي بحال الحب .. ما كيطلعش لك هاكا ( جوهرة راه تزننننكات و السخوونية طلعات معاها من نظراتوا و التعنيقة لي دايرلها .. تا شافها كريم و ضحك )
كريم: لبنت بقااها شوية و تطرطق غتقتلها غير بالحشمة ( ضرب يد مع يد ) كنت مشهي نشووف ياسيين مزوج و لكن باش يتجمع الحيا مع قلة الحيا رااه بزااااااف
ياسيين:( ضحك و شاف فيها لقاها نيت عرااقت و نشفات فبلاصتها .. طلق منها مخليها على راحتها و قال و هو كيشرب قهوتوا ) الحشمة وقاار اسيدي .. أنا لي تزوجت فيك نتا و خوتك ارباعة الزوافرية
كريم:( شاف فابتسام لي باقي ما هضراتوا ما جاوبات و تا هو مطمر عليها .. و رجع شاف فجوهرة و لا إراديا بدا كيقارن بينهم .. مدة و نفض راسوا و تبسم ) الله يخليكم لبعضياتكم
جوهرة و ياسيين: أميين
داز الوقت مرة ضاحكين مرة مناكرين .. تا ناضت سميرة توجد العسا لي كيحطوه تقريبا تا كيقرب السحوور .. كيديروه دقة وحدة .. تبعاتها ابتسام لي بغات طرطق تا هي كثر من مها .. دخلات كتعاونها و شافت فيها بنص عين
ابتسام: شفتيها كي جالسة بحال قايدة زماانها و فرحاانة بياسيين لي ولا بحال شي بورطكلي فيديها .. ليووم طونوبيل .. غذا داار و موراها غتلوحنا لزنقة ..
سميرة:( تحت سنانها ) ما تزيديش تفقصيني تا نتي لي فيا كافيني
ابتسام:( ميقات ) منين جلسوا و هما يشكروا و يعاودوا بحال يلا ملاك جالسة معانا .. و هي كي اللفعة تتلوى و تضرب من لتحت لتحت تا تنشر سمها ( علمات فالبوطاجي حداها ) بدات بيا و عمرات ياسيين و نتي راك جاية فالطريق .. خليك سااكتة و مربعة يديك و فاش تلوحك للتوش ما تجيش تبكي .. عتقي يلا لقيتي ما تعتقي فولدك
سميرة:( شدات راسها ) كلشي مني مدخلة لفعة لقلب دااري و كنرغب و نزاوك فيه يتزوجها باش فلخر تشتتلي شكل عائلتي ( بغضب ) و الله ما تكون لها و لا تكون .. و يلا كانت شي وحدة غتخرج من هاذ الدار .. راه هي لعروسة اللفعة .. و بيديه غيلوحها بحال الكلبة و يجيب لالاها .. غير صبري عليا نفتحلوا عينيه و نبينها على حقيقتها كيما بانت قدامنا و تفرجي ساعتها
ابتسام:( هزات يديها بجوج ) و من هنا لتماا يااا ربي و فهاذ الشهر لمبارك خوذلي حقي منها ثاني و مثني .. انا بغيتها ليها فركابي طيحها فلعگابي انا بغيت ليها شوهة باللعلالي و الخيل تشالي .. قااادر يا كريييم
تحط السحور و تجمعوا عليه و بعدها كل واحد مشى لبيتوا .. كاين لي طاح فالبلاصة عياان باغي غير يرتاح ما تابعوا لا هم لا حمل فوق ظهروا يفكر ليه .. بحال جوهرة .. و كاين لي ليل كامل و هو يتقلب من جهة لجهة .. طعم النعاس ما ذاقوش .. و عقلوا غير كيفكر و يخطط .. بحال سميرة و ابتسام ..
ابتسام لي المراهقة طيراتلها العقل .. بنت منها عداااد فمجتمعنا خف من رزقها و ما لقاتش شي حدلي ينصحها و يردلها عقلها لراسها و يسمعلها نييت .. نهار على نهار كتزيد تحقد على جوهرة ظنا منها هي سبابها فهاذ الجلسة فالدار .. و لي شهراين تقريبا ما عتباتها لزنقة ..
تخنقااات بغات طرطق و فينما تشوفهم فرحانين و ضاحكين كتشعل فيها العافية و تقول شوف لي خرجات عليا كي هانية فحياتها و أنا كااع الحاجات الزوينين فحياتي بسبابها ضاعوا من يدي .. أولهم البرهوش لي كانت مصاحبة معاه .. ثانيهم مستقبلها و قرايتها و بلا ما ننسى ثقة خوها و حريتها المطلقة .. ناسية بلي هي لي دارتها لراسها و لي ما خشى يديه فغيران ما يعضوه حنوشة ..
و سميرة لي وحدة من الناس لي مستحييل يرضاو بشي حاجة تمشي عكس لي باغيين .. دائما كتبغي كلامها هو لي يكوون واخا تنطابق السما مع الأرض ! و بقرب جوهرة من ياسيين لهاذ الدرجة حسات بخطر كبييير على مكانتها عندوا .. و بلي جات لي تقلبوا عليها و تلوحها للتوش ..و زاد كلام بنتها و توسويسها ليها كل مرة .. لاقى ليها السلوكة فعقلها تا ندمات على النهار لي بغاتها لولدها ..
بعد ساعات لي كل واحد و كي دوزها صبح الصباح عليهم .. فاق ياسيين خاسر و راسوا غيتفركع باقي ما شابع نعاس و تيليفونوا بغى يطرطق بلي زابيل .. تا جاوب بصوت ناعس و بااح .. و لو ما كانش رمضان راه يسبلهم سلسبيل طاسيلتهم ههه
ياسيين: صافي أنا جاي .. ما تخليوهاش تمشي .. واحد الساعة هكاك و أنا معاها
موظفة: واخا اموسيو .. و سمحلي ديرونجيتك .. غير حيت جاية من جهة الحاج *** هاذي بنتوا و ديجا كان وقع معاهم مشكل فعرس ختها .. و طلبتي تتكلف بأي حاجة خاصة بيهم شخصيا
ياسيين: عارف .. ماشي مشكل
تنهد و لاح ليزار عليه يالاه وقف و فتحات جوهرة عينيها .. حكاتهم و تكات على الكادر داايخة .. شافها و قال
ياسيين: فيقتك !! رجعي تنعسي باقي الحال
جوهرة:( تفوهات ) و نتا فين ماشي
ياسيين: عيطولي من الخدمة .. على شي حاجة مهمة .. غير نكمل و نجي
جوهرة:( تبسمات ) واخا و ما تعطلش .. الله يسرلك
ياسيين: أميين
خلاها رجعات فنعاسها و هو دخل للدوش بقى مدة تما عاد خرج بلا حس جبد حوايجوا و هز الوراق لي غيحتاج و مشى لخدمتوا .. فهاذ الوقت راه كانت سميرة فااقت .. حازمة راسها و متكية فبلاصتها .. طلات من السرجم فاش سمعات الحس و شافتوا فاش خرج .. رجعات جلسات كتسنى راجلها ينوض هو و كريم و يخويوا الفيلا باش تاخذ راحتها .. و ما كاين لي يقولها لا طابت لا تحرقات !
و بالفعل داازوا سااعات كان كلها و فين شدها .. الياقوت عيانة كترتاح فبيتها باقي ما نزلات .. و ابتسام راه ناااعسة جابدة عليها .. و جوهرة كذلك .. من غير سميرة لي نزلات للكوزينة .. تتحرك بخفة تتخدم شغالها .. حتى وجدات لي غتوجد .. غسلات يديها و كفضات كمامها و طلعات عند جوهرة .. دقات مرة و جوج و ثلاثة حتى فتحاتلها الباب .. بعينين مبوقين ..
جوهرة: صباح الخير
سميرة:( بابتسامة ) صباح النور ابنتي .. كي صبحتي ؟
جوهرة: الحمد لله اخالتي .. و نتي كي بقيتي ؟
سميرة: ايوا كي غادي نبقى هاني على الصباح غارقة فتمارة يا بنتي و ما كاين عوين .. داك ابتسام ما تتهنى حتى تسيفطني للقبر
جوهرة: الله ينجيك و يطول فعمرك ..
سميرة:( كانت كتسناها تقول نعاونك .. فاش بانتلها سكتات مطمرة .. ضحكات هي بخفوت و قالت ) و هذا علاش جيت عندك ابنتي .. عارفاك حاارة و ذراعك نااضية .. مراة دالزمان و خلاص .. لي تتمنى كل أم لولدها
جوهرة:( تزنكات .. و قال بخجل ) ربي يخليك ا خالتوا
سميرة: و حيت بنت الأصل و الفاصل ماشي بحال الخانزة ديالي .. عارفاك ما غاديش ترديني خايبة .. جيت عندك نيشاان و ربي عالم لو ما وقفتش عليك راه ما نعذبكش معايا .. و لكن رمضان هذا راك عارفاه تيدوز قااسح فهاذ لول .. و ضروري من العويين .. و ما لقبت جهد بوحدي
جوهرة:( عياااانة و مدكدكة ما قادرة دير واالو .. لكن حشماات منها و من الطريقة لي كتهضر بيها و تشكرها .. جاوباتها بقلة حيلة ) واخا اخالتي غير نصلي و نجي
سميرة: واخا ابنتي غير سربي راك كتعرفي الشباكية كتشد وقت طوييل .. يالاه نكملوها أنا وياك
جوهرة:( صدماتها .. بلقات عينيها فيها حتى بلقاتهم و قالت بتعجب ) الشباكية !!
سميرة:( بضحكة صفرة ) ااه كي شفتي ياسيين ما كياكلش ديال الزنقة نهاااائيا .. كل عام كنصوبوها فالدار قبل ما يدخل سيدنا رمضان .. غير هاذ العام جات مع السفر و ولادة زينب .. و كثرة المشاكل .. تشطنا ما بقينا درنا والو
جوهرة: لا لا اخالتي اويلي على الشباكية فعز النهار فرمضان .. أنا راه ما عندي صحة ليها و زايدون ريحتها كتقلب ما كنقدرش عليها غنصدق مخسرة صيامي !
سميرة: ااه ايوا صافي ماشي مشكل أنا لي نتكلف .. غير ارتاحي لك .. احااح على الصحة غير تخطاك كيضربوك الحيووط ما تلقى لي يوقف فكتافك .. ولادك و ما يبقاو مسوقين لك حراك البراني
جوهرة:( بقى فيها الحال ) أنا ماشي برانية اخالتي .. و لايني راني عيانة و ما عنديش الصحة لهاذشي و أصلا ما كنعرفش مزيان ! .. يلا باغاها ديال الدار نعيط لماما تجيبلي سطيلة من عندها .. تا هي كل عام كتاخذها من عند واحد السيدة كتصوبها فالدار نقية و تتطلع معلكة غزااالة
سميرة:( نفخات ) راه يادلي قتلك ارتاحي و ما تتعذبيش راسك .. صافي سمحيلي .. داري أنا قاااادة بيها بلا عويين .. ربي لي كيعااون و يعطي القوة .. ( مشات كتهضر ) هااكيلي على نعيط لماما تجيبلي سطيلة .. على خر يامك يا سمييرة سيرتك تبقى على كل لساان ايوا خيااار عليا
بقات متبعة ليها العين كتنكر و تعااود حرام واش بغات تسكت .. تا هي بردااات قلبها .. و دخلات غسلات وجهها و توضات و صلات لي عليها .. عاد نزلات بالشوية عليها جلسات فالصالون .. شعلات التلفزة كتفرج فحديدان و تضحك راشقة ليها .. و سمييرة راه فالكوزينة كتنكر ..
تا جات حداها ببلاطوها و عجينتها .. كتورق فيها و تقادها .. و كل شوية تشكي بظهرها و راسها و تنكر على صحتها لي مشات و حد ما مسوق ليها .. تا طبخات لجوهرة راسها و دارتلها تأنييب الضميير على الجهد .. و لي فيه شي فيس راه فيه واخا تعيى تحلف و تبث راسها .. فاش كتوصل للصح تتقسح قلبها تا طيب و فلخر كيبقى فيها الشخص الثاني ..
تحنات تتعاونها فصمت .. عاد سميرة سكتاات و برداتلها الحرقة لي تطلع و تهبط فيها .. بغات تمووت بالفقصة كن وحلات فديك الشباكية هي نيت ..باقيين تيشبكوها و هو يصووني تيليفون سميرة .. مدات يديها و جاوبات
سميرة: وي زينب ( ضربات فخاذها و وقفات مخلوعة ) اويييلي وحدي .. فينك داابا فين ؟ صافي بلا بكى ابنتي هاني جاايا عندك ..الله يحد لباس .. و دابا كي بقى ؟ واخا واخا
ناضت تالفة و الدنيا صايرة بيها .. طارت لبيتها لبسات جلابتها و لوات فولارها على راسها .. و هبطات كتجري .. لقات جوهرة قبالتها مخلووعة ما فاهمة .. سولاتها بخوف
جوهرة: مالك ا خالتي ااش واقع ؟ ياك لباس ؟
سميرة: الله يكتبوا خير .. ولد زينب عياان شوية .. ما فهمت واالوا منها غير كتبكي .. غنمشي نشووفها و نوقف معاها .. و نتي راك هنا .. و كملي معاك ديكشي ابنتي
خلاتها و مشات شدات طاكسي نيشان لكلينيك لي نعتاتوا لها بنتها .. أما جوهرة راه ضرها قلبها عليهم .. و فلخر ما لقات ما تدير من غير ترجع تكمل ديك الشباكية .. لي باقي فيها النص الكبير .. ما كملاتها تا الظهر تقسم عليها .. هزات البلاطويلت دخلاتهم للكوزينة .. و عمرات المقلة بالزيت .. دارتها تسخن و بقات واقفة كتسناها باش تبدا تقلي فيها و تعسلها .. عقدات فولارها على نيفها و فمها .. عارفة الريحة ديالها غتخنقها و تسالي معاها ..
أما ياسيين من بعد ما خرج من الدار مشى نيشان للمحل .. لقى لبنت لي عيطاتلوا هي الزحيدة لي تما .. و غالبا فرمضان هاذشي لي كيديروا .. كل مرة واحد كيدوز سويعاتوا بيرمانونس ..
علماتوا بلي بنت الحاج مزال كتسناه فالبيروا الفوق .. طلع بالخف .. فتح لباب و دخل حاني راسوا .. رمى السلام و جلس فكرسيه ..يالاه هز راسوا فيها .. و هو يتفاجئ بحنان .. ما توقعهاش تكون هي .. بانت فملامحها بدورها الدهشة ..
حنان:( بضحكة استغراب ) و لاهيلا يلا بزااف على الصدف .. ديما خارجة فيك بحال عاصي ربوو
ياسيين: الحاج بخير ؟ شنو المطلوب ا مادموزيل ؟
حنان: مزيان يسول فيك الخير ( بجدية ) بوون .. الحاج دائما كيشكر سي مصطفى .. و فينما تكون عندنا شي مناسبة مستحييل يمشي عند شي حد من غيركم .. واخا المشكل لي وقع معاكم آخر مرة و لكن ما عليش !
ياسيين: ديجا هضرت مع الواليد ديالك فهاذشي .. و تحل المشكل ..و مشى بخااطر راضي ..
حنان: عارفة .. هاذشي علاش رجعت لعندكم .. عيد زواج ماما و بابا .. ف 14 فهاذ الشهر و جاي نيت مع عيد ميلادها .. يعني الفرح فرحتين .. بغينا نديرولها مفاجأة بيناتنا .. تكون شي حاجة مميزة بزااااف .. الوقت حزم ما بقاش بزااف .. و لكن عارفاكم قدها و قدود .. و طامعة فجودكم عليا
ياسيين:( هز تيليفون و دوز للبنت لي فالاستقبال ) سارة جيبيلي لي كاطالوك ديال *** و طلعي عندي دابا
داز الوقت و هو كيتافق معاها على الديكوغاسيون لي باغى و فوقاش يمشي ليكيب ديالوا باش يشوف فين غيخدموا .. عاد المأكولات و الحوايج الثانيين .. ما حسوش بالوقت كي دار دااز .. المهم تافقوا على أغلب الأموور ..تا كملوا وقفوا خارجين بجوج .. ودعوا لبنت دالاستقبال .. و يالاه جا يركب يتحرك بحالوا و هي توقفوا
حنان: سمحلي نعذبك معايا ! ( شاف فيها و حرك حجبانوا بمعنى شنو .. و كملات هي ) واخا توصلني معاك .. باقي ما شريت شي طونوبيل جديدة باش نتحرك .. و الطاكسيات راه قهرووني مع هاذ الصهد
ياسيين:( جبد لحيتوا و فتح لباب ) ركبي
طلع فبلاصتوا و تسناها تا ركبات و زاد مع طريق فسكاات ما راشقاش ليه .. حتى هي ما هضراتوش حدها نعتات ليه فين يحطها .. تا وصلها و شكراتوا .. و رجع بحالوا ..
أما جوهرة راه فالكوزينة على حالتها غامة نيفها و فمها بزز كتنفس .. باش ما تطلعش معاها ريحتها .. حيت يلا كانت كتكره شي حاجة هي ريحة الشباكية كتطيب .. كتغيلفها و كتكره نهار لي شماتها .. ما كتبقاش تضور بيها نهااائيا .. غلبها الصهد و عرقاات بلباسها و البووطة سخوونة حداها .. ذاتها راه صهداات رجعات كتفوور و ما حاساش بيها .. تا فاقت ابتسام و نزلات عندها .. شافت حالتها كي غارقة و تبسمات بهدووء
ابتسام: الله يعاونك ( شافت فيها جوهرة و غمضات عينيها و رجعات فتحاتهم كجواب .. و كملات لوخرى ) جوهرة نطلبك طليبة عاافاك !!
جوهرة: وي ؟
ابتسام: تيليفوني خسر من قبيلة و أنا معاه ما بغاش يشعلي كااع .. واخا تعطيني ديالك نتلف بيه هاذ الصهد .. غير على ما تكملي و نمدولك ( قربات و باستها فحنكها ) عاااافااااك عااااافااااك عااااافاااااك
جوهرة: واخا راه هو فوق الطبلة
ابتسام:( ضحكات ) شفتي نتي ما كاينش بحالك و الله شكرا
هزاتوا و خرجات و حوهرة رجعات لشغالها .. تتقلي من جهة و تعسل من جهة و كل شوية تقلب و تشقلب .. خايفة تقساحلها و تجي لا علاقة .. رجليها حمااروا و طاابووا بالوقووف حلقها نشف و الدوخة بدات تشدها .. تا سمعات صووت لباب تفتح .. و ياسيين كيعيط عليها ..
جوهرة: أناا هنا
ياسيين:( دخل و أول حاجة لمح هو جوهرة عاطياه بالظهر و قميصها لي ملون شوية بالدم .. عقد حجبانوا و قرب منها بالخف و قلبها عندوا .. شافها مزززنكة و مخنووقة .. طيرلها داك الشال على فمها .. نطق بخوف ) جوهرة مالك ؟ شكديري نتي هنا ؟ ( شاف فلي كتتعسل و ساط بالجهد ) واش نتووما ناقصكم عقل و لا باغيين تحمقووني ؟
جوهرة:( عيااانة مسهوووتة .. و عااد بدات تحس بالحريق فكرشها .. قبطات فيها و ماصاتها ) اففف
ياسيين:( ما بغاش يخلعها .. فهم مناش داك الدم .. حط يديه فوق يديها و دوزها على كرشها بحنان و قال ) جاتك البيريود .. طلعي بدلي عليك .. راك طبعتي
جوهرة خرجات عينيها و طاارت من حدااه .. مخلياه موراها كيطفي على البوطة و يسووط .. و من تما خرج كيقلب على سميرة .. منين ما لقاهاش صونا عليها و جاوبات
ياسيين: فينك ؟
سميرة: أنا حدا لباب .. قطع جوج دقايق و انا معاكم .. الله ياا ربي الله
و ديكشي لي كان ما كاملاش جوج دقائق كانت دااخلة .. لقاتوا فالباب ماشي جاي كيقشر فشنافتوا بعصبية .. غير شافها و نطق بحدة
ياسيين: ما غنساليوش من هاذ البلانات دالخرى ؟ غنبقى أنا وسطكم بحال لاربيطخ " الحكم " .. ما عندي شغال غير نقابلك ؟ ( هز صبعوا بتحذير ) ما تشوفينيش ساكت تديري ما عليك .. راني غير كنتسناك تفهمي راسك .. قبل ما نهز قلوعي و نق ( سكت و ساط ) مسينا على الله
سميرة:( طلعات كاطريام ) مالنا ا خويا ياك لباس ؟ ااش وااقع ؟ ما عارف لي كيمووت لا لي عياان .. جاي مشاارجي بشوية عليك لا طرطق !!
ياسيين: تنعرف لي عيان و لا كيمووت كيشد الركنة و يتصنت لعظاموا .. ماشي يحرث على عباد الله .. وجه الله واش داك البنت ما بقاتش فيك قد هاكا .. رمضان يا حسرة و كتطيبي فيها بالمهل ( بالغوات ) ااش داك تعطيها طيبلك شي حلوة و لا زعتر
سميرة:( غوتات حتى هي ) بقالك غير تهز شي زرواطة و تجي تعصيني .. ايوا لا تقصرش اولد كرشي ( شدات جبهتها ) شمن حلوة و شمن سخط .. فينما تحراف لكم اجيوا عندي .. أنا كنت مع ختك فالسبيطار .. ما عرفتهم شكيصنعوا فهاذ الدار ( ساطت ) ياسيين احتارمني حسن لك .. راها شارفة ماشي درية صغيرة .. كل واحد يتعلق من كراوعوا .. تا حد ما ضربها على يديها .. و يلا بغات تصوبها حد ما غيمعنها .. راه دارها تا هي كيما داري ... بقى تعرف الهضرة فين غادة و شنو وااقع عاد اجي هز فصوتك .. و لكن نعذرك ما بقيتيش ولدي لي كنعرف .. تهز واحد و تحط آخور
ياسيين: ففف أستغفر الله .. ماشي نتي لي قلتيلها تصوبها ؟
سميرة:( ساطت ) واش أنا كنقولوا غارقة مع ختك فالسبيطار و هو تيسول لي على البهلان .. فين ا خويا انا شفتها و لا هضرت معاها ( دازت فيه ) لا حول و لا قوة إلا بالله ( حسات بيه شدها و نترات يديها ) صافي خليني عليك سير شوف مراتك لا نكونوا قتلناها
النقرة الصافية الجزء السابع
محتوى القصة
التنقل بين الأجزاء