هبطوها فالدروج بالزغاريت تاوصلات لتحت كانت الدنيا عامرة نسا من عائلتها وعائلة راجلها .. دخلوها بالصلاة والسلام وهي خذوذها حمريين والشعر شوية خارج من الشال حرير .. والحنة مزال على يديها بالخاتم ديال الذهب دزواجها وعاد الذهوبات ديالها .. كلسوها بين النسا .. كولشي كيبارك ليها .. وهي غير ترض بالابتسامة ومها كتشوف من البعيد وقاتلها التفكير والخلعة فبنتها كيفاش ماخرجش الدم قربات التسطا وكتقول يا ربي استر ويحفظ مع راجلها لا وقعات شي حاجة لبنتها تموت ليهوم هنا ..
تحط الغدا ثاني جابو هاد المرة الرزيزة بالدجاج مسقية بالمرقا ومزوقة بالبيض واللوز .. وعاد تهزات وتحط ثاني اللحم بالبرقوق .. وزينب بزز باش كتاكل صافي شداتها السخفة من لي جاي وماعرفاش وباغا تهضر مع نصر وتسولو وحشمااانة طاحت فحفرة ماتبغيهاش للعدوتها .. وعاد عكوزتها كل مرة تلقاها كتشوف فيها مطولة كون ماعتقاتش مها ولا كون سمعاتهوم كانت تشوقها قدام قوم ربي العالمين ..
كانت حاضرة تما افنان لابسة قفيطين كتلعب ومرة مرة كتجي تبوس زينب لي مسكينة غير تالفة والهضرة والو واش تخرج من فمها ..
تاخوات واحد البلاصة حداها وهي تجي متجري عائشة كلسات حداها ..
ومشات تاني كدور وتلعب مع وليدات العائلة خلات زينب كضحك وترفع على راسها دارت لقات داك البنت لي عكراتليها كتشووف فيها هبطات عينيها تاشوية كتشوفها غادا عند افنان وجراتها بقات غير كتشوف وتنهدات ..
ماداز داك الفطور عابزز ناعرفاتو كيداز بالتفكير فالحريرة لي تابعاها وقفو كولشي كيتسالم وهي تخنق بالدموع عنقات عائشة عناق حار وشوية وهي طلقها بالبكاوات ونهال تبعاتها وبسمة تاهية بقا فيها الحال حاسا وفينما شي حد كاين تما تأثر .. بقات تبكي وتعاود مابغاتش تسكت وعائشة بحالها .. تافرقاتهوم خديجة .. ورجعات عنقات نهال تاهي وسلمات على البقية .. شوية وصلات عند خديجة وهي طلعها جاراها دااتها لدارها الفوق وخلات كولشي كيتفرق لتحت وصلاتها للبيت وسدات عليهوم ..
خديجة .. سمعي راه مك قلبها غايطرطق انا عارفك عزبة وتربية يدي غاتقولي لراجلك يديك لطبيب ولا دار هاكا ولا هاكا غاتعيطيلي نقولها لباك ..
خديجة ... ( تنهدات ) ونوضي ابنتي على سلامتك راه مادخلش بيك كامل ..
زينب .. ( خبز ربي فطبگو ) كيفاش ..
خديجة .. ففف ياا ربيي قوليها لموك من قبيلة ميمتي على بنت عطاني ربي قاليك ماتقصحتش غير شوية ابنتي راه كون دخل بيك نيت راه الصعر اطلع معاك .. سوا خرج الدم ولا ماخرجش راه تحسي بيه ..
زينب .. علاش اخليني واش تانتي ماتايقاش راني بنت ولا كيفاش ..
خديجة .. ووااااا الهبيبة وكنت نفكر نديك عند الطبيبة هي تبيين ليهوم البلان ..
زينب .. نصرر اصلاا مايدييرش هاكاك ..
خديجة .. سدي داك الفم العار شوفي نتي دابا تحركي مع راجلك هو يشرحليك راك مرتو دابا ماتبقايش هبيلة اما مو غير سايسي معاها وعطيها شبر التيقار راه باينة فيها لفعة مقطعة وماتسالي تاتشوف صباحك هانا نقوليك نوضي عند راجلك وغبرو منهنا سيرو سافرو لشي مدينة
كيعيطو لخديجة تاطلات عليهوم من البالكون .. هااانييي جاياا عااينو
خديجة .. المهيم دابا نوضي غسلي حالتك وتوضاي وماتنسايش تسوليه يمكن مابغاش يدخل بيك لقاك مزيرة ولا عيانة نتي ديري بحسابك، وطلبي منو تسافر من غدا عبري من حدا عكوزتك انا اصلا مابغيتهاش تشوف صباحك، وهانتي شوفي لانزل منك الدم خبعيك صباحك هاداك تاتجبيه ليا ..
حركات ليها راسها وكحزات سلمات عليها وباستها .. الله ارضي عليك ابنتي غير جمعي راسك وتقربي لراجلك ويكون خير يالاه بسلامة خليت ليك الخير ..
جات دايرة وهي توقفها زينب وعاود عنقاتها كتبكي ..
خديجة .. شش وصافي ابنتي غايكون خير شش ..
زينب .. ماسخيتش بيك اماما ..
خديجة .. احح ابنيتي وبغيتي تشويلي قلبي وعلى كاينة شي وحدة تسخا بالكرش راك قطعتك من كبدتي وحطيتك هنا ..( مسحاتليها دموعها ورجعاتليها شعرها اللور ) الله ارضي عليك ابنتي سيري راني راضية عليك دنيا واخرة ..
ابتاسمات فرحانة وخلاتها تمشي وسدات موراها الباب ديال الدار ... رجعات هي للبالكون كتطل عليها وتشوف عائلتها تستفات فالطوموبيلات مقلعين طاحو جوج دمعات من عينيها تاكاتشوف طموبيلت نصر وقفات تسالمو هو ومهدي عاد هوما مشاو وهو جاي داخل لدار ..
مسحت دموعي بزربة وبقيت منتفتف ماعرفت شنو ندير ماما دوخاتني بهضرتها .. انا ماعرفاش اصلا كيفاش كيكون داكشي كيغانعرف واش دخل بيا ولا لا ولكن علاش قاليك هو انا وليت مراتو مدام مادخلش بيا زعما يكون كيفما قاتلي ماما شافني عيانة ومابغاش احكر ونيت انا كنت مخلوعة وماقدراش وكنت كنصبر راسي ونقول كولشي غايفوت ..
حيدت داك الزيف ومشيت للماريو جبت واحد البيجامة سروال وضوني ديالو خفيف صيفي حيدت داك الجوهرة ولبستهًم بقي طالقة شعري كنطوي فالحوايج تاكانسمع باب الدار كيتفتح ..
نصر .. زييينب ؟!! ( جاوباتو من البيت .. وي نصر ..
مشا حل الباب ودخل لقاها كتلسة فالزربية كطوي الحوايج فالماريو .. حيد صباطو ودخل ..
نصر .. حبيبة كيبقيتي مزيان ؟؟
حركاتلو راسها تحنا باسها من راسها ومشا للكوافوز حط السوارت والتيليفون وبدا كيحيد فالساعة وهو كيشووف فيها ..
نصر .. كليتي شي حاجة ..
دارت شافت فيه .. مم تغديت قبيلة لتحت معاهوم ..
نصر .. ماتبقايش كالسة هاكاك على الزربية غاتجمعي البرد ديري شي وسادة ولا شي حاجة ( جبد وسادة من فوق الناموسية وجا لعندها ) تهزي شوية ..
رجعات حنات وجها بخجل وهو قرب للماريو من الجهة الاخرى حيد داك اليتيشورت وبدا يحيد السروال وهي تخرج عينيها وهبطات راسها مزير على الحوايج لي كتطوي تاهز الفوطة دار لقاها هاكاك وهو يضحك .. الحمقة ديالي راه شفتي كولشي وباقا كتحشمي ..
ماقدراتش تشوفو ولا تجاوبو حرك يدو بشوية على شعرو ومشا دخل لددوش تاكاتسمع الرشاش وهي طل ..
جمعات دوك الحوايج وخشاتهًم وبدات تجر فالباليزات وخرجات لددار كتقلب على شي كورسي باش طلع عليه لقاتو فالكوزينة وجات هازاه حطاتو حدا الماريو باش غاتبقا طلع تحط الباليزات فوق منو .. يالاه غادا غاتجر الفاليز تاكخرج هو ملوي الفوطة على نصو .. وشافها يالاه غاتوقف فوق الكرسي باش تهز الفاليز ..
نصر .. ( عرفها شباغا دير ) صبري صبري ..
شافت فيه وهي توقف ميلوكية بداك الفوطة والما هابط مع الزغيبات ديال سدرو وفمو حمممر مع الدوش .. قرب هز داك الباليزا وحطها فوق الماريو بقات غير كاتشوف القزمة لوخرا ..
نصر .. زدي مديلي لوخرا ..
مشات ثاني جابتهالو ودارليها نفس الطريقة وهي رجعات نجيب الثالثة الصغيرة مع الدورة تاكيقرب ليها ورجع النفس ديالو كيضرب فداليها حلات عينيها فيه جات ترجع اللور وهو يدور يدو على خسرها تاحطات يديها على سدرو العاري العريض والقوي ..
نصر .. مال حبيبتي ممم شكون مقلقها ؟؟ ( وهو كيقرب لفمها غمضات عينيها وعضات على شفايفها مزيرة عليهوم حتا حط عليهوم شفايفو وجبدهومليها وهو كيزير على جنابها )
رجع قلبها يضرب ويعاود وكتحس بيه كيمص نيت شفايفها ويديه مزيرين وحدة على جنبها ووحدة على ضهرها تابدات كتحس بيهوم كيعهبطو لجيهت نصها .. تزيرات ديال بصح حتا رخف عليها وبعد كيشوف فيها كتلهت .. ابتاسم بشوية وجرها عنقها ..
نصر .. خسك تولفي احبيبة راني راجلك دابا ماشي شي حد غريب ..
تمخششات فسدرو اصلا هي كتحماق على العناق وكتحس بالراحة مين كيعنقها شي حد .. حتا بعد وهز ليها داك الڤاليز كيردها تاهية ..
غسلت وجهي شفت جيهت الباب لقيت البينوار وانا نطلق الرشاش حيدت عليا حوايجي ودوشت مزيان غسلت حتا شعري وتوضيت كيفما قالت ماما بواحد الجيل كنت شريتو .. وخرجت لويت عليا البينوار نشفت وتميت خارجة بشوية من البيت طليت لقيتو متكي فالناموسية كيشوف فالتيليفون ..
خرجات عاطياه بالضهر وصلات حدا الماريو لبسات سليبها وهي مغطية راسها وهو مرة مرة يشوف فيها تاحط التيليفون ودار بقا مركز معاها هبطات شوية البنووار ولبسات السوتيامات ورجعات لبساتو بقا كيضحك اش هاد البنت اربي كتحشم من خيالها .. لبسات بيجامة شريط وضوني تاسمعات صوتو ..
نصر .. لبسي شي حاجة طويلة غانهودو نتعشاو مع الواليدة ..
عضات على شفايفها وحيدات البينوار لبسات الجوهرة ديالها نيت ومشات لجيهت المرايا كتنشف فشعرها وتشوف من تم نيت فيه هو .. تاناض جمع الوقفة وخداليها الفوطة من يديها ..بقات غير كتشوف تابدا ينشف ليها فشعرها .. ابتاسمات مهبطة راسها بخجل ..شافها وجرها من كرشها باسها فعنقها ..
نصر .. فخبارك نتي شحال بنينة !! ماكرهتش كل دقيقة ناكلك ..
رجع كنشف فشعرها وهي زادت ضحكات كيخجلها بهضرتو ختا سالا عاد دوا .. ماعندكش شي زيف ديريه على شعرك ..
زينب .. لا غير خليه باش ينشف ..
نصر .. تأ تأ .. نتي مرات نصر وحرمتي مانبغيش تكوني كالسة بحال هاكا حدا الواليد وخوتي الذكورة .. ( جر واحد الزيف شافو تم ديالها نيت من قبيلة وقربها من يدو حطهاليها على راسها ) هاكا مزيان خلي المخبي نشوفو غير انا تافقنا ؟
زينب .. ( بقات كتردد كيفاش واش كيفرض عليها الحجاب دابا كتافات تحركلو غير راسها ) واخا ..
نصر .. يالاه ..
جرها من يديها ومشاو هابطين فالدروج تاوصلو لتحت دخل على خوتو كالسين فالصالون وباه ومو ..
نصر .. السلااام عليكم ..
الجماعة .. وعلييكوم السلام ..
مشا كلس حداهوم وزينب تابعاه كلسات حداه تاكتسمع الحاج ..
سليمان .. بنتي كيدايرة لاباس مرحبا بيك عندنا ..
زينب .. ( بحشمة ) باراكة الله فيك اعمي .. ..
ناضو العيالات كيحطو العشاء وهي كالسة كتشوف وتسمع كانو خوتو ديال نصر كيهضرو وتاهو مشارك معاهوم ومنهوم حتا باها ديال بسمة .. وكانو حتا عيالاتهوم منهوم لي نايض ومنهوم لي كالس كيهضر مع ربيعة تاكاتشوف الاخت المحترمة مولات العكر خارجة من واحد البيت بواحد البيجامة .. ايولي هادي باقا هنا اش كادير .. شافتها جات تاكلسات حدا ربيعة وهي تشوف فيا وقلبات عينيها تاكانسمع نصر حدايا ..
نصر .. سارة أفنان نعسات ..
سارة .. وي نعسات أعمي ..
نصر .. ماشفتهاش اليوم ..
سارة .. من الصباح وهي تلعب مع الدراري عيات ..
حركليها راسها ودار كيكمل هضرتو ولكن شمن علاقة هاد الانسة مع افنان صدق سميتها سارة .. مابقيت فاهمة والو واش هادي كتسكن معاهوم ولا كيفاش .. اش هاد الزهر يا ربي .. طلعات فراصي طن وانا نتفكر كلام نصر اخر مرة اذن زعما تكون ختها اويلي .. يعني هادي هي لي ماتو تاواليديها .. ناري صافي من هاد اللحضة عرفت بلي مابقا مايتعجب ..
نزل العشا وتعشات هي گالسة حداها .. كتهز اللقمة حشمانة وكل مرة يعرض عليها شي حد ونصر مرة مرة يقطع من عندو ويعطيها حتا حشمات كيدرليها بحال الما القليل بحال طفلة فعمرها ربعسنين
غير سالاو وطلعو للفوق غير دخلات حيدات الشال على شعرها وافكارها متداخلة .. شافتو كيحيد التيشورت وهي تسولو
ز ينب .. نصر واش سارة حتها ديال أفنان ؟
نصر .. وي علاش ماكنتيش عارفة
حركات راسها بلا
نصر .. ساكنين هنا مع الواليدك ومرة مرة يمشيو عند جداتهوم لوخرا
زاد مرگها باغي يحيد منها هاد الحشمة ولو غير شوية باش ماتبقاش منغالقة
زينب .. د داكشي لي كيدوروه الراجل والمرأة ليلة زواجهوم
نصر .. ( ضحك حالف ماتخرجها كرها من يديها تاقربات لعندو وحط يدو على ضهرها ) مين جبتي هاد الحشمة كاملة قوليلي ممم
حركات كتيفاتها
نصر .. نتي باغا يوقع بيناتنا شي حاجة ؟
زينب .. احم م م ا لا زعما ي
نصر .. والخلعة طلقي مني
جمعات شفايفها وشداتها البكية جات تهبط راسها حبسها
نصر .. زينب حبيبتي كبيدتي .. البارح كان قرب ايوقع ولكن كنتي مزيرة بزااف خسك ترخي راسك وتحيدي هاد الخوف ماعندكش مناش تخافي خسنا غير نسرحو الطريق وغادي يولي كيعجبك
زينب .. ش شناهو
نصر .. ( ضحك وجبدها همسليها فودنيها ) هاداك لي خايفة منو راك تاهو خايف عليك ونتي كولشي فيك صغير وعاد مزيرة من الفوق ( مع سالا عضها من الشحيمة دونيها ) راه مابقاش قاد اصبر وكيتسنا حبيبتو ترخا ليه
دابت دااااااابت السيدة مابقا فيها مايتجمع داخت وتڤنڤنات بعد وشاف فعينيها كيتزاگلو ويزلقو فجوانبها .. اشنو تافقنا ؟؟
حركات غير راسها وهي تكات على سدرو دوز يدو على شعرها وهو متكي على الناموسية .. وبقاو مدد هاكاك حتا حس بالتنفس ديالها رتاح ورجعو دقات قلبها منتضامين بقا كيرجع ليها شعرها مور ودنيها .. رتاحيتي شوية ..
حركات راسها باه .. فين تبغي نسافرو ؟
بقات غير متفاجئة من السؤال كانت باغا تقولهالو صدق هو لي سولها دابا ..
ابتاسمات لو ورجعات حيدات من فوق سدرو .. فين غادا ؟؟
زينب .. والو غير بغيت نعس عادي فالبلاصة ..
نصر .. مامرتاحاش فوق سدري ..
زينب .. لا لا بلعكس و ولكن نتقل عليك ..
مع قلتها وهي تسمع ضحكة من عندو طلعات عينيها كتشوووف فيه وبقات مسهوتة كتسمع ضحكتو الرجولية لي معبوورة وموزونة تاكاتحس براسها تجرات ورجعات تحت منو وهو فوق منها ..
نصر .. دابا نييت أش كنتسناو ( جرها باسها من فمها ) كانت أحسن ليلة معاك أحبيبة، ماعمرني وصلت لهاد الدرجة غير معاك ..
زينب .. ( غوبشات وهي تبعد شوية ) يعني كاينة شي وحدة قبل مني ..
نصر .. ( هزليها يديها وحطها على هاد القلب ) تاشي بنت المرا ماقدرات دخل لهنا من غيرك ( دوز يديه على عويناتها ) هاد العوينات سحروني ( كيدوز صبعو الكبير على الشفايف ) وهادو هبلوني ( وهو هابط كيوصف فالجسد ديالها تامرگها وحشمها نسات تاشنو سولها تاوصل لتحت ) وهادا خلاص اووفففف حمقني ازينب ..
صافي العقل طار مع الطيور جمعات عينيها معطية وجها بشعرها بالحشمة ورجع جبدها لعندو محتاريها بين دراعو .. راه وصلت لواحد الدرجة لي تقاداولي فيها صافي ومزال كنواعدك غانعيشك اميرة بين يدي لي طلبيتها تجيك تالعند رجليك غير حاجة وحدة ( دوز يدو على شعرها ) نبغي هادا يبقاليا بوحدي .. معايا لبسي لي بغيتي ولكن برا مانبغي يشوف فيك حد .. مين كنتي قبل ماعنديش الحلق ندوي معاك ولكن دابا تحت سميتي وشرفك راه عندي فعيني ونتي هي شرفي ومراتي وملكة داري .. تافقنا احبيبة ؟؟
طول الهضرة وهي مطلعة عينيها كتشوف فيه وكول ماكيدور فراسها واش باغي يبزز عليا ولا كيفاش !!
زينب .. كيفاش دابا واش انا قبل مانتزوج بيك كنت ناقصة ولا مامحتارماش راسي شنو الفرق
نصر .. لا احبيبتي كاين فرق شاسع .. مين كنتي عزبة وعند واليديك كتخرجي وتشوفي ودخلي ماكيقولك حد شي حاجة اما دابا ( باسليها يديها ) دابا راك على سميتي وراجلك كاين لي غاتوريه زينك وطلقيلو شعرك، وهادشي ماشي انا قلتو احبيبة الله سبحانه وتعالى لي قالو وقاتليك البنت تستر برا وتكون مزينة فدارها، وغير نتي لي عندي فهاد القلب وغير شعرة لا نبشاتك كنتقصح فمابالك الجمال ديالك لي ماخاس ايشوفو حتا شي واحد من غيري، ( جرا باشها ففمها ) نتي مكانتك غاااالية ازينب داكشي باش كنخاف عليك ..
زينب .. ( صافي سكتليها الحجرة مابقاتش قادرا تهضر ) انا انا كيقنطني كنت كنحطو غير على راسي ونخرج مكنقدرش نزمتو ..
نصر .. حبيبة شوية بشوية حتا تقادي بيه اليوم ماديريهيش وغدا غطي فيه نص وبعدو تغطيه كامل ( باسليها يديها ) وكنعواعدك غايجي النهار لي تقتانعي بيه راسك .. واخا !!
حركاتلو غير راسها وعاود باس على جبهتها .. يالاه نوضي جمعي الحويجات لي غاتحتاجي باش نمشيو ..
ناض خلاها غاطا فأفكارها تنهدات وناضت جبدات باليزتها بدات تجمع الحوايج وباقا مقصحة، كتحرك غابزز .. ولكن اللهم هاكا ولا تگلس مع ربيعة مافيها لي يتحشم، جمعات كاع لي غاتحتاج لي شوميز دونوي واللبسات دياولها ختارت منهوم الكساوي الطوال والفلاضي وشي سراول كيجيو الاموض واسعيد وهزات ديجا اصلا كانت تحط بعد المرات زيوفة على شعرها كيعجبها تديرهوم غير بحال موضة مي دابا غاتبقا ديرها ديما حتا ترجع تقادو عادي .. جا دخل عندها البيت مبتاسم وهي دور شافت فيه ..
زينب .. جبدليا داك الباليزا باش نجمعليك حوايجك ..
نصر .. ( ضحك قربليها ) ولات عندي المرا لي غاتجمع ليا الحوايج دابا ممم ..
حركات راسها باه ضرب فنيفها ومشا جبدليها الحوايج وبقا هو كيعاونها وهي كتختارلو من ليشوميز ديالو ولي تيشورت وكاتحاول تعقل وتحفظ حوايجو كيدايرين .. وهو كيحضحك متبعها فرحااان بيها على الاخر وكتزيد دخل لقلبو بتصرفاتها البسيطين ..
تاسالات وبدات تلبس حوايجها هو كان سبقها لبس وكتشوفو كيهز شي وراق كنلات ومشات لكوافوز كادير لميكااب وهزات زيف حطاتو على شعرها مخلية شوية خارج ومرخوف على عنقها ..
نصر .. ( طلع عينو ) صافي واجدا ؟
حركاتلو راسها داز هز الباليزات بجوج غادي وبقات هي كتجمع فالساك دالهزان ديالها تاسالات وتبعاتو خلاليها السوارت سدات الدار ودارت هابطة تاكاتشوفو واقف عند ربيعة كتهضر معاه وهي طل لعندها ..
نصر .. الواليدة أفنان معاك واخا مرة مرك غانعيط نسول عليها صافي ..
ربيعة .. وراه افنان بنتها واه ..
نصر .. ويالاه خليت ليك الخير ..
حركاتلو راسها .. ( تحت سنانها ) الله ارضي عليك اولدي ..
جرها ومشاو خارجين برا .. لا تبارك الله باين برهانك من اللول ولكن ماتهربي شاي ابنيتي .. ( طلعات عينيها لعند الطبقة الثانية ) هاديك مانوية شاي تفيق ثاني يخخ ولادي كيجيبوليا غير البلا ..
ركبو فاللوطو قلعو نيشان لأكادير كان مريزرڤي فاوطيل تما جيهت البحر .. مشات فالطريق متكية على سدرو وهو سايگ بيد وشاد فيديها باليد الاخرى ..
الطريق كلها دلع ونضراتو لي كتبن شحال هو هايم فيا وكل مرة يقول كلمات يخليني نغطس فبلاصتي، كيزيد ازوبني فييه ويدرلي الميغناس لقلبو، لأول مرة كنحس براسي أنثى بكل ما تحمل الكلمة من معنى روجلتو وخوفو وحنانو وقصوحتو لي عمرو بينها قدامي ولكن كونشوفها فتعاملو مع اشخاص اخرين كتزيد تخليني نتعلق فيه، الطريق كاملة وانا ناعسة على سدرو ويدي مشبكة مع يدوومرة يخليني نعرف مكانتي عندو ومرة يعاودلي يا ايما على خدمتو ولا على شي بلان طرالو، كيعاود بهدوء وصوتو كيدخل حرف حرف لأعماق قلبي، هادا لي ستاحق نقول عليه راجلي وانا رافعة راسي ومن ديما كنت كنقول نديه اربعيني وماخابش ضني بصح عرفت شنو ديت كيعااملني بحااال بنتو ومرة بحال عشييقتو ومرة بحاال مراتو كيخاف عليا كثر من عينيه، كيحسسسني بحال طفلة صغيرة حسو يدرليها خاطرها باش ماتقللقش من باباها، واعي وعاقل وكيعرف فين اخطي خطوتو ولا تكيتي على دراعو سدي عينيك وطيحي حيت كوني اكيدة انه وتاد وجيل ومايقدو ريح، متقل فهضرتو وتصرفاتو وردة فعلو كولشي كولشي بحالي كيفكر عاد اتدارك الموقف، كنحس ولو نوصفو حياتي كامل ومانوفيش حق نصر راجلي ..
وقفو حدا الاوطيل وهبط فيدو لي ڤاليز، ومشاو لريسيبشن خدا السوارت ديال الغرفة، وطلعو لبيتهوم كان اوطيل نقي وكبير لور وبيتهوم كبيرة وفيها بالكون كيطل على لابيسين لي اللور ولي كيطل من تم على البحر ..
عجبها الحال تابدات كضحك .. جا عنقها من اللور ويسولها كيف عادتو الصغيرة والكبيرة خاس اعرف رأيها عليه، ولاكانت شي حاجة بسيطة مقلقاها اغيرها بلا مايتردد ..
بدلات عليها الجليليبة بكسيوا خفيفة وجمعات شعرها كعكة ودارت النضاضر دالشمس .. تسناها تالبسات شاف فيها وبتاسم جرها من يديها وهبطو لريسطورون لتحت اتغداو ..
غادي شاد فيدي وفينما دزنا من حدا شي حد ابقا يشوف فينا عادي ندوزهاليهوم تانا بيدي مين كنت نخرج ونشوف شي كوبل زوين نبقا نشوف فيهوم ماشي حسد وانما لحنية لانني نعيش بحال هاكاك وهانا دابا ربي جابلي راجل كامل مكمول .. كلسنا فطابل ودرنا ضوموند وبقا كيسولني على القرايا وكيكنت دايرا مع لافاك والتكوين وانا كنعاودلو وعيني مع ثلاثة دالبنات من موراه اضحكو ويشوفو فينا لابسين المقزب وطالقين الشعورات والميكاب على الجهد .. أنا تفقصت كنقول غانوض نطير عليهوم ماحملت اشوفو فيه ابدا ..بنادم ما يحشم ما يرمش ..
لاحظ عينيها كيتزاگلو بقا صابر صابر وكيشوف كيفاش كتهضر ومرة مرة تعقد حجبانها تادار على غفلة وهوما يتبلوكاو دوك البنات خنزر فيهوم كرمو فالبلاصة ومركو وحشمو ورجع ضار عندها هي عوجات فمها وهو يضحك ..
نصر .. ( شد فيديها ) شش كالم طوا احبيبة ااو براصهوم راني ديالك احبيبة الله اهديك دوختينا عاد غايبقالينا العقل والعمر فين نمشيو عند وحدة اخرى ..
هبطات عينيها مبتاسمة وطلعات عينيها بنفخة زعمة راني انا لي مراتو وهو كيضحك ودور راسو ..
دوزات ربما أحسن وأحسن عشريام فحياتها ماخلاو مادارو العجب ركبها فتجيسكي فالبحر وعامت معاه كيعلمها العومات مرة مرة كانو كيخرجو لبرا يتعشاو فلي غيسطو ديال اكادير ويتساراو ويرجعو للاوطيل .. وهي كان خلاها 3 ايام تابرات ورجع دوز معاها ليلة ولا فالعمر وفكل ممارسة كان كيخليها تحس براسها ملكة على عروش مملكتو، تارجعات هي كتزعم تبوسو وتعنقو وترجع منها البادرة، تقربات كثر منو وكل مرة تخرج شوية من القوقعة وبعد المرات تبقا تعاود تاتحس براسها هضرات كتر من القياص وهو يسمعليها دون مايقول عييت ولا سكتي بلعكس كيسمعها حتى الاخير، ماكيخسرش من خاطرها نهائيا ولي عجبها كيوصلها، وفكل مرة اوصلها حبو بطريقة مختلفة وكلمة كنبغييك قليل فين تسمعها ولكن فالعرض كتسمع كلمات الدلع لي ماكيتقاضاوش وتصرفاتو بخوفو عليها وبحكمايتو ليها كيخليها تعرف شحال بغاها من قلبو وبكل صدق ..
اليوم كان آخر نهار عندهوم فالاوطيل ماسخاتش هوما اصلا كانو ناويين يدوزو سيمانة ومين شافها عاجبها الحال زاد كمل عشريام، ولكن عرفات عندو الخدمة وكانو كيعطلو فالتيليفونات داكشي لاش لازم عليه يرجع مابغاتش تضغط عليه، بدات كتجمع فحوايجها وتجيد لي بخودوي ديالها من الطواليط والماكياج بينما هو هبط لريسبسيون ..
لبسات حوايجها ورجعات جبدات الفاطي طواتهوم تاكتسمعو دخل ..
نصر .. حبيبة صافي كملتي ..
زينب .. وي شوفلي معاك غير المجورة لا نساو شي حاجة ..
مشا كيتأكد كيف قاتلو بدا بالكوكيتة ديالو ورجع كمل بديالها فتح اللولة تابقا كيشوف شوية قطب حجبانو شوية وجبد البواطة كدورها كيقرا فيها وهو باقي على نفس التعبير تاكيسمع صوتها كتعيط وهو يجمعها فيدو وخرج لعندها ..
زينب .. حياتي ( شافت فيه وهي متوقف شوية من على يدو فوجها ) ..
نصر .. زينب شنو هادا ؟
سرطات ريقها شحال كتشوف بلا ماتجاوب تارجع علاّ صوتو شوية مكمش عليها ... زيييينب شنوووو هادااااا
ترعدات فبلاصتها مين غوت هاكاك .. ماقدراتش تهضر بحالي اللسان تبلع قرب لعندها جوج خطوات كيشوف فعينيها نيشان هي ماقدراتش تكمل الشوفة بسرعة هبطاتهوم وتلوي فصياعها متوترة ..
الجونداغم .. ( شاف فيه الجونداغم مطول ) بانليا مابانتليكش المدام راه مادايراش الصمطة ..
دار بسرعة عندها لقاها كتبلق فيه عويناتها ..
شاف فيا واحد الشوفات حسيتو طرطق من لداخل ..
هبط من الطوموبيل وشعط الباب حتا حسيتو تزدح وشاف عند البوليسي وهضر تحت سنانو ..
نصر .. قيد المخالفة ..
جبد من جيبو البسطام وبدا كيجبد تاحطلو 500 الدرهم وبقا معاه شحال كيقيد ويتفاهمو بلي غاينقصولو النقاط من الپيرمي .. مهيم ريگل كولشي وتقيداتلو المخالفة عاد رجع طلع عندها ..
زينب .. نصر ما ..
نصر .. ( بصوت حاد ) صافي سكتيي صافي غير سكتييي دابا ماتهضرييش ..
سدات درگومها بقا فيها ميت تقيداتلو المخالفة ركبات السمطة من اليوم تبقا مركباها عمرها تحيدها .. ديمارا مكمل الطريق واحد الشوية ضرب يدو لموسيقى سكتها ورجعو غادين فالسكات هي دارت لجهة الاخرى شاداها البكية، بقاو هاكاك تاوصلو لمراكش .. رجعات كتشوف فيه مرة مرة كانلقاه باقي على حالو، تاوصلو لدار ووقف الطوموبيل ...
ونزل باى مايهضر كيجبد الباليزات .. نزلات هي موراه مشات كاتعاونو هزات واحد الصاك صغير ومشا داخلة من مور مافتح الباب وطلع نيشان طالع للفوق وتاهية تبعاتو حلات مو الباب لقاتهوم طالعين .. ايوا سبحان الله بنادم مايقول تاسلام عليكوم .. ( بقات مصغرة عينيها ) قلبي ولدي عليا صافي كلاتو بين يديها بنت الحرام رجع يدوز على مو بلا مايشوف تاكيدايرة وهو غايب عليها عشريام منعرف اش قاتلو اللفعة .. ( دخلات وزدحاتً الباب )
دخلو لدار وصليها لي ڤاليز حتا البيت وهي دخل موراه يالاه جا يمشي وهي تشدو من يديه ..
خلاها ومشا خرج وسد موراه الباب هي طاحت كالسة فوق الناموسية وهي تكا كتحس بالدوخة من الطريق والعصب لي تعصبات من راسها تاشوية بداو دموعها يطيحو مارضاتش تشوه قدامو هاكا لا بسباب الكينات ولا بسباب الجونداغم ..
بقات شحال متكية تاحيدات العيا عاد ناضت حيدات عليها دوك الحوايج ولبسات بيجامة ديال الدار وناضت كتستف الحوايج جمعات الحوايج لي خسهوم اتصبنو ديالها وديالو ومشات داتهوم لعند الماكسنة خشاتهوم ودارت اومو كان تما ورجعات دخلا لكوزينك كاتلقاها مصفرة ماكاين لا ماكالك لا والو تنهدات ورجعات للبيت كملات دوك الحوايج وخرجات للصالون كلسات حدا التلفازة مترددة واش تعيطلو ولا لا بقات هاكاك حتا لجوايه المغرب عاد تسمع سوارت الدار كيتفتح الباب دخل محمل فيدو الميكات عامرين تقابل معاها ناعسة والتلفازة هي لي مضوية الدار تنهد بقات فيه وتنادم معاه الحال خلاها هاكاك مشا حط داكشي فالكوزينة ورجع للبيت حط التيلفون والسوارت وهز ليزار رجع عندها حيت بدا البرد اصوط شوية مع هاد الخريف غطاها ونزل عند راسها باسها تاشفها تحركات وهي تشوف فيه .. ن نصر ..
نصر .. ( حنا لعندها ) حبيبة نصر روح نصر ..
ماحسات غير عنقاتو كتبكي تنهد ودار يديها مور ضهرها وقف شوية وكلس حداها .. ششش ماتبكيش ..
زينب .. سمحلي والله اهئ اهئ اخر مرة اهئ اهئ مابقيتش نشربهوم ..
نصر .. حبيبتي انا ماغوتش حيت مابغيتكش تشربيهوم انا غوت حيت معجبنيش الحال ديري شي حاجة بلى خباري ( باسها من فمها بوسة حنيينة وغير بشوية ) بحال هاد الامور انا اللول خسني نعرف حيت الولاد راه رابط بيني وبينك ماشي نتي كاديري لي فراسك وانا كندير لي فراسي راه مايمكنش ..
زينب .. سمحلي اخر مرك والله تانا مابغيتش نشربهوم ..
نصر .. ( ضحك كيشوف فيها ) ماباغاش تحيبيلي شي اميرك صغيورة بحاالك مم !؟
زينب .. ا انا قلت بباقي الحال وحنا دابا يالاه تزوجناا وباقي قدامنا الوقت ..
نصر .. حبيبتي نتي يمكن كتشوفي هاكاك حيت باقا صغيرة وانا كنشوف راسي ربعين عام باغي نشوف وليداتي واتانا نعيش معاهوم وخصوصا يكونو معاك وزوينين بحالك اشبهوك ازوينة ديالي ..
زينب .. ( حمارو خدودها مبتاسمة ) سمحلي ..
نصر .. نتي لي سمحيلي احبيبتي خليتك بلا ماكلة مين جيتي ..
حركات راسها بلا .. لي دار الذنب يستاهل العقوبة ..
ونصر .. وخسك تاكلي مزيان باش تكون عندك الصحة راه غانبداو مشروع حديد دابا وخسنا الطاقة زايدا اكبيدة ( غمزها ) ..
هبطات عينيها ممرگها كيف عادتها عاد باش نوضها مشات للكوزينة شافت اش جاب لقاتو عمر كولشي لي غاتحتاجو كامل وبدات ترتب فداكشي عاد باش جبدات اش غايخصها باش توجد العشا وهي تفكر مو مشات للبيت لقاتو دخل لدوش خلات تايكمل وتقولهالو ..
حركات راسها ومشات لبيت بقات متكية عليه راسها عينيها غرغرو ماحملاتش تقوليها هاكاك بحالي هي خطفات الراجل لخولة علاش مزال مابغاو افهمو بلي نصر بغاها هيي هي اللولة ماشاف فحتا شي وحدة من غيرها .. يكفي شنو دارو فيها ايام العرس .. ماساماتش من هضرة العائلة لي كل دقيقة يقولو وكنا غانكونو فرحانين بخولة دابا .. وراه خطب خولة هي اللولة .. ومع ذلك كاتدارك وتقول هضرة وفايتة ولي فراسها راه هو لي فراسها وهو دابا راجلها هي ماديال حتا شي حد ..
لبسات بيجامة طويلة وجمعات شعرها دارت الزيف .. عاد خرجات عندو سدو الباب وهبطو شادليها فيديها تادخلو لتحت .. كان سليمان كالس متكي كيتفرج فالتلفازة .. وأفنان حداه كتلعب بالالعاب وسارة كالسة مخشعة فالتيليفون ومو فالكوزينة ..
نصر .. السلام عليكوم ..
غير شافتو افنان ناضت كاطير لعندو تلاحت عليه .. پاااااپييييي
نصر .. اميييرتييي ..
عنقاتو تخشات فعنقو وزينب بقات كضحك ومشات باست اليد لسليمان
سليمان .. ارضي عليك ابنتي كيوصلتو مزيان ..
زينب .. لاباس الحمد لله ..
شافت فسارة ودازت ليها وسلمات عليها الاخرى منفخة قالبة عينيها .. تتهدات وكاسات كتشوف فتصر جايب افنان عينيها مدمعين كاتعتابو على غيابو لي غاب عليها ..
جابها وكلسها على حجرو حدا زينب وسلم على باه باسلو اليد ..
زينب .. بغانسيسة لاباس عليك ..
بقات كتشوف فيها افنان متكية على سدر نصر وحركاتليها راسها ابتاسمات ليها زينب وحركاتليها يديها ..
تاكيسمعو الصونيط ناضت سارة حلات كيدخلو مهدي وبسمة شافتهوم زينب ضحكات بفرحة وماضت سلمات على خوها وبسمة عنقاتها وسامو على سليمان عاد حات ربيعة مصايباليهوم الكراطان للعشا .. سلمات عليهوم وقطعو كل واحد والطرف ديالو وبسمة تشول زينب كيدوزو الكونجي بيخير ..
تاسالاو العشا وهي تنطق ربيعة نايضة ..
ربيعة .. نوضي ابنتي زينب عاونيني ..
شافت فيها زينب وهي تخطف بسمة نطقات بسرعة ..
بسمة .. ( ناضت واقفة ) اويلي اجدة خلي راها دابا باقا عروسة جديدة عيطي على القدامات هههه ..
مشاو للبيت وهي بدات تحيد عليها البيجامة الطويلة وافنان كالسة فوق الناموسية كتلعب برجيلتها ونصر برونشا التيليفون فالشارج ..
زينب .. نصر انا غانمشي نشوف الكوزينة ونرجع ..
حركليها راسو ومشات للكوزينة ضاروري تكمل كولشي عاد ترتاح ماتقدرش تخلي شي حاجة نالغدا تتفات الباقي وهزات مذكرة صغيرة كتبات فيها اش باقي ناقص حيت ماجابش الطحين وبزاف دالحوايج كولشي قيداتو تاحسات براسها كاتغفا ..
طفات الضواو ومشات للبيت سمعات السقيم شافت الضواو طافيين وهي تلقاهوم ناعسين فوق الناموسية وافنان غاافية على يدو وهو كذلك .. ابتاسمات كتشوف بحنان حسات بحالي بنتهوم لي ناعسة تما، تحركات بشوية طلعات عليها الغطا ورجعات مشات هزات الغطا من البلاكار غادا خارجة تاوصلات للصالة بدات تفرش فوق السداري تاكيشدوها شي يدين شهقات اتغوت وهو يدورها سدليها فمها ..
نصر .. شششش
بقات دور بين عينيه لي كيضربو فيهوم غير شوييية الضو دالشاريع لي داخل من الشاريع مضوي وكيخليك تشوف شنو حداك ..
بقا مدة صواني هاكاك تاهبط يدو وجبدها لعندو حط شفايفو على شفايفها سدات عينيها طالقة الغدا من يديها وهو كل شوية يزيد اجبد كثر وكثر ويزير عليها من نصها لعندو وبقا معاها وهي راجعة اللور تاكلسات على السداري وهو باقي متكي عليها حاني لعندها سدرو كيطلع ويهبط تاناغما مع ديالها .. ماقدرش اصل قبلتو عليها وكيزيد اتلدد بشفايفها تاكيحس بيديها طالعين مع يدرو مطلعين معاهوم البودي .. تابعدات شوية فمها عينيها معسلين حلاتهوم حيداتلو البودي ورجع هبط لشفايفها بسدرو العاري دورات عليه يديها ..
بعد حط جبتهو على ديالها كنهج بجهد .. بزااف ازينب بزااف ..
ماقدراتش تجااوب حيدات التيشورت ديالها ورجعات طلعات على ركابيها فوق السداري مطلعة ليه راسو تاشاف فيعينها مكالي يدو مع الحيط ..
ورجعات غمرات شفايفها بشفايفو خلاتو دور يدو على ضهرها كيفتح ليها حمالات الصدر... وهي كدوز يديها على عنقو وترجع تخشي ضفارها فشعرو كتحس بذاتو سخوونة وشااااعلة بحالها .. وحاجة وحدة كتنغل فيها .. نصر ديال زينب زييينب بوحدها
دخلات مع الفجر للدوش كدوش وتبتاسم وتعض على شفايفها ومين كتفكر على جرأة جاتها حناكها كيحماارو هادي كانت اول مرة تعبر على حبها لنصر فنعاس كانت شحص اخر غيير على زينب لي كتكون ديما غسلات داتها ودارت البينوار مع الخرجة .. كاطلاقا معاه وهي تهبط راسها حشمانة ..
نصر .. قاديتيهوم ليا هادشي كامل مخبيااه وانا ماعارفش ممم !!؟
زينب .. شش هابشوية ههه فيقنا افنان ..
نصر .. ( قرب باسها من جبتها ) رتاحي سيري نعسي حداها غاندوش نتوضا نصلي الفجر وغانمشي نعس فالصالون ..
بدا كيهر فافنان وشوية دار عند زينب تاهية وهي تشدلو يدو كضحك ..
تاناضت مشات للكويزين صايبات ليهوم الفطور ودخل عندها محمل افنان فوق كتافو .. بقات ضحك وهي كضور بواحد الشريط ويبانو فخيضاتها بووويض كيلمعو .. كلسو بحال شي اسرة صغيرة كيفطرو تاسالاو وناض نصر لبس حوايجو وخرج ..
نصر .. افنان تمشي عند جدة ولا تبقاي هنا ..
افنان .. انبقاااا مع طاااتي زينب ..
زينب بقات كضحك ..
نصر .. مرحبا ( قرب لزينب وباسها من حنكها ) حبيبة غانمشي نتحرك شوية للخدمة الى حتاجيتي شي حاجة عيطيلي، وها افنان معاك ..
زينب .. صافي ..
ابتاسم ليها ومشا خرج بقات هي افنان فالدار ..
زينب .. شنو نديرو دابا مم ؟؟
افنان .. مممم انلعبوووو ..
زينب .. ممم واخا اجي نوريك باش انلعبوًهه ..
مشات شعلات الموسيقى فالتلفازة وجهداتها ديال الاطفال وجبدات الجفاف والكراطة ناوية تخمل الدار .. حلات الشراجم كاملين وجبدات السطولة دالما بدات تكبهوم وتجري حفيانة مع افنان وهي دير بحالها مفزكة رجيلاتها كيضحكو ..
تاعيات افنان وهي تديها لصالون كلساتها حدا السداري باش ترجع دير الصابون ودوزات الجفاف تاكتسمع صونيط قطبات حجبانها ومشات حلات الباب وهي تشوف قدامها سارة ..
سارة .. ( بضحكة صفرة ) صباح الخير ..
زينب .. صباح النور ( فتحات ليها الباب ) زيديي .
سارة .. نو بغيت غير ختي جيبهالي عافاك ..
زينب .. ( بقات غير كتشوف ) راه فالصباح قاليها نصر واش تمشي بغات تبقا هنا ..
ابتاسمات ليها ومشات هابطة طلات عليها زينب تامشات وشافت فالسلك ديالها خلات ليها النص ديالو ..
زينب .. باينة عندها معاها شي موشكيل !!
خافت من داكشي لي قالت ومشات للسلك ديالها ونشرات فيه حويجاتها كانو قلال شي كولونات وتيشورتات ديال نصر .. سالات وهبطات تاوصلات ليابها بقات تشوف فالدروج حطات الشبكة ديالها وهزات التيليفون ورجعات سدات الباب وهبطات لتحت وهي دق عليها .. بقات متلبكة تاكيتفتح الباب ..
شافت فيها نجلاء هازا فيديها طفل صغير تكون فعمرو ديك عاماين ..
نجلاء .. اهلاا حبيبتي زيدي ..
ابتاسمات زينب وقالت .. لا لا غير خلي جيت نشكرك وصاافي على قبيلة ..
نجلاء .. دخلي دخلي الدار دارك ..
دورات زينب عينيها ودخلات حشمانة شافت فالدار كانت تاهية مفرشة فراش بلدي زويين لقات طور الجنة مشعولة والطالة عامرة بالالعاب وديجا شي ولد كبير شوية فعمر ثمنسنين كيلعب بواحد الطابليطً..
نجلاء سدات موراها الباب .. دخلي ازينب الدار دارك كلسي ..
نجلاء .. ( حركات راسها بلا ) انا اختي دازت عليا كحلة وكليت من عندها دقتي نييت حتا كتشوفي هانتي رجعت سادا عليا باب داري انا وولادي ومرة مرة نهبط ليها الدراري تشوفهوم وهاكاك وماتسكتش من الهضرة ..
زينب .. ( مخلوعة ) وعلاش هادشي كامل ؟؟
نجلاء .. من عند الله اختي تقولي قلبها كحل لا هيا لا بناتها ..
زينب .. ( صفارت ) واش حتا صفاء وبشرى ..
نجلاء .. بانليا مازال ماعرفتي والو( ابتاسمات وهي كتشوف فيها ) ماخلات ماخطبات لنصر ومكانش كيبغي ويقوليها نهار انبغي نخطب انمشي نجيبها بيدي، وانا منكذبش عليك نهار قاليا عبد الكريم راه نصر مشا خطب واحد البنت، عرفتها غاتكون مفقوصة والفقصة اختي ماكاتبرردش ليها سوليني انا لي مجربة ..
زينب بقات غير كتشوف ماعرفات تخلع ولا تنذب ولا تبكي ..
نجلاء .. ولكن شوفي اختي مولاها ربي والله نتي راح الحمد لله نصر بخديمتو وواخد تيقارو من غدا لابغا يهزك ويدير دارو بعيدة اما انا زهري هادا، عبد الكريم خدام مع عمي وكيصافر معاه كل خطرة للفيرمة باش كيحصدو، وانا مهار يسافر نرغب ونزاوك يديني حيت لمادانيش عارفاها دوز عليا الصراط المستقيم ..
زينب .. يا ربي الحبيب بغيت نعرف هادشي لاش ..
نجلاء .. اختي لي فقلبو شي سم راه فيه وكون ختارتني بيدها كون راه ديرلي كيالما القليل اما مين جابني ولدها ضد فهضرتها راه خرجات فيا سمها ..
زينب .. وعلاش ماكاتقوليهاش لعبد الكريم ..
نجلاء .. نهار قلتهالو كانت غاتوصل بينا للطلاق مسبتها كان ديك الساعة نعمان باقي يالاه فعمرو 3 سنين وتقلبات عليا القفة ورجعات هي المظلومة وانا الظالمة .. وصافي من تم سديت فمي وقالي عبد الكريم نكلس فداري وماتبقا تشوفني مانشوفها ..
زينب .. لا حول ولا قوة الا بالله ..
نجلاء .. اما بناتها راه الكلمة الزوينة وكولشي وهوما يظربوليك من لتحت وحشيو ليك فالمعاني وهي مرة مرة تكون مزيانة غير تجي بشرى تعمرها مزياااان وتمشي تنوض سااعرررة علييها ..
زينب .. يعني ديفو من بنتها ..
نجلاء .. انا نقوليك هي راه ماتشوفي من عندها خير ولاكن ماتقيصكش نهار تجي بنتها ترجع فرعون تقولي هزيتي وحدة وحطيتي وحدة ..
زينب .. صدمتيني اختي بهادشي والله ..
نجلاء .. اختي ماجيت شكيتليك راه طرطقت وتحبست ومابقيت لاقية لمن نقول وشفتك نتي عرفتك قلبك بيض داكشي باش نصحتك وديري تيقار من دابا ..
زينب .. باركة الله فيك انجلاء والله وبابي مفتوح ليك النهار لي بغيتي تعاودي انا كاينة هنا وانا معاك ..( قاطعها اليتيلفون لقاتو نصر ) الو .. صاڤا بيخير .. امم .. اه واخا..
ناضت على صوتو جوايه المغرب .. وقاليها تلبس حوياجها اخرجها، ناضت بسرعة لبسات حوايج سخانين شوية مع بدا يتحرك البرد .. دارت زيف وصاباتو على حقو وطريقو وهو كيلبس حداها تاخرجو هي وياه داها للمدينة السونطر بلاصة الطوموبيل وهبطو على رجليهوم كيتمشاو شوية .. شادا فيه وكاتعاودلو وهو يسمع ليها ويضحك حتا وقفها حدا لوكاسيون ديالو لي فسونطر كانت بجاج ولداخل بيرو مجهز وكولشي كالس فيه واحد الشاب .. وعاد قدامها واحد الكراج فين كيحطو الطوموبيلات ..
نصر .. هالخدمة دراجلك .. ( زينب كتشوف بابتسامة دخل سلم على داك الشاب وناض خرج بحالو بقا غير نصر وزينب تما ..
كلس فالبيرو وهز واحد التيليكوموند هبط بيه الريدو ديال المحل تاتسد عليهوم وشاف فيها باقا كتشوف ..
نصر .. اجي لهنا ..
تحركات لعندو وهو يجبدها من يديها كلسها فوق حجرو فالبيرو تابدات كضحك ..
زينب .. هادشي زويين ..
نصر .. وهادي هي الخدمة ديالي ..
زينب .. ماكاتبعيش الطوموبيلات ؟
نصر .. كنبيع لي كيفوتو عندي خمسنين، المرة اللولة كندخل الطوموبيلات وكانبقا نكريهًم مين كيفوتو خمسنين كيتباعو ..
زينب .. ااا فهمت ههه
حاطها فوق حجرو مدوز يديها على جنابها ويدو الاخرى كيشوف بيهوم البيسي كيوريها الطوموبيلات ..
زينب .. زويينين ..
نصر .. فين لي عجباتك ؟
زينب .. هاديك صياط fr لي فالبيض ..
نصر .. هادي ( رجع وراليها تصويرتها ) ..
زينب .. هادي زوينة ..
نصر .. صافي حسبيها جاتك ..
زينب .. ( بصدمة ) ااا
نصر .. ( باسها من عنقها ) حياتي كاملة وانا خدام فالطوموبيلات والزوينة ديالي ماتكون عندها حتا وحدة مايمكنش
زينب ... لا لا اوييلي ماابغييتش واللله ..
نصر .. شش اصلا كانت غادي تباع غير تهناي ..
زينب .. ( هبطات راسها حشمانة ) حشوومة ..
نصر .. ( علا ليها وجها ) هادا مابغيتوش اهبط خليه ديما الفوق وماتهبطيه لحتا شي واحد ولو ليا كيهبط فقط لله لي خلقك ..
طلعات كتشوف فعويناتو وعنقاتو عناق حار فكل مرة كيعلي من قيمتها فكل مرة كيخليها تعرف بحق راسها .. باسها فعنقها ورجعات كتشوف معاه وكيهضرليها على الخدمة وفتحليها واحد المجر فيه السوارت ديال كل طوموبيل مرقمين وعاد مجر وحداخور بالوراق كيوريها بحال صديق ديالو ماشي مراتو وحبيبتو، هو معتابرها كولشي فحياتو وعاطيها الحق انها تعرف كولشي .. بقاو تما تقريبا شي ساعة عاد باش ناضو فتح عاد الريدو وعيط للخدام ديالو هضر معاه شوية وهي بقات واقفة برا عاد جا عندها وكملو رجعو للطوموبيل وداها لواحد الريطورون واعرة فمراكش .. كلسو تما طلبو امانسي پلا تعشاو بيه .. تاسالاو ومشاو ضرب بيها تاني دويرة بالطوموبيل شاعلين الموسيقى وزديح بحالي كيعيش كعاها من أول وجديد ومابغاش تحس بلي صافي تزوجات شخص كبير صافي الحياة توقفات بلعكس غايعيش معاها الحياة بجميع الوانها ..
عاد باش رجعو تالشي طناش دليل للدار ..
دخلو كيضحكو كيقولها شي حوايج كتموت بالضحك ..
زينب .. اويلي ششش ناري ههههههه انفيقوهوم ..
يالاه دخلو وهو يهزها بين يدو تابدات تكركر حاتها الحالة ..
نصر .. لا نتي داروليك شي حاجة فداك العشا ..
زينب .. هههه حطني العااار ..
نصر .. اخليني نهزك ونتي فيك جوج كيلو طيحيليا وشكون ابردوليا ديك الساعة ..
طلقات تاني بااااخ بالضحك طالعين وهو كل مرة يقولوليها شي حاجة فتحات الباب شوية يافتهوم كيهازها وطالع بيها ..
ربيعة .. اخليها سلعة تابدات دخل ولدي مع نصاصات الليل تفو مابقا حد يحشم .. ورجعات دخلات كدعي سدات الباب ..
ناضت وجدات الفطور ناض هو فطر ومشا ودارو غايخرجو فالعشية يتقداو .. جمعات هي الفطور والبيت خرجات الغطا يتشمس غير فالبالكون ولبسات حوايجها طلعات جابت الحوايج ومع الهبطة كاطلاقا مع عكوزتها طالعة فالدروج ..
بقات زينب غير كتشوف تنهدات ودخلات لدارها طوات وحطات الحوايج فالماريو مع كتخرج من الباب تاكاتسمع ششرشلاااخ ديال الميمان بقات مقطبة حجبانها تاشوية كتشوف من تحت الباب داخل الما .. مشات بسرعة حلات الباب تاكاتشوف الميمان هابطة مع الدروج .. طلات من دورة ددروج الفوق ورجعات طلات لتحت كتلقا تانجلاء خارج كطل .. تاشوية كيتكب الما على ريوصهوم وهي ترجع زينب بسرعة للور فزگليها الشعر ..
تنهدات حلفات ماتجاوبها خلات تاداز شوية دالوقت فتحات الباب كاتلقا الميمان حدا بابها طلعات عينيها لقات درجات دالسطح نقيين كيشعلو وهي من باب دارها لتحت عند نجلاء كامل ميمان ووسخ ديال الدروج لوخرين هبطاتهوم ليها .. طلعات ليها القردة طلات على مجلاء لقاتها مسكينة تاني تاهية خلات ليها من تم لعندها بنت الحرام حافضة قوالبها طلعات هي مجففة غير دروج ديال السطح وخلات ليهوم هوما يجفو الدروج الاخرين وشتي كون كانت غير تقولها ينوضو على سعدهوم ووعدهوم ماشي تكب الما على غفلة .. جرات الجفاف والكراطة وبدات تسيق على سعدها ووعدها تاوصلات للتحت عند نجلاء ..
نجلاء .. الدعوة بيها ناالله بنت الحرام ..
زينب .. غير خليها نهار غاطلعلي القردة غانخرج فيها طول وعرض ..
نجلاء .. غيير ابعدي منها اختي هادي راه مامعاها لعب هي دابا وماكرهاتش تجري عليك تجبديها ماتفك معاك تاطلقك
تادخل نصر ماهضراتش معاه حطاتلو الغدا وهو بقا كيشوف
نصر .. مالكي ازبينب واقعا معاك شي حاجة ..
بقات تخمم واش تقول ولا تسكت ولا ماعرفات مادير ..
زينب .. والو غير راسي كيدرني شوية وصافي ..
نصر .. ( تم نيت ناض من بلاصتو بقات غير كتشوف مشا تارجع هاز فيديه كينا دالراص ) شربي هادي باش اتهدن عليك ..
حركاتلو راسها .. واش منعستيش مزيان
زينب .. لا غير درني وصافي ..
نصر .. غابشوية عليك حاولي على راسك ..
تغدا وناض جمعات داكشي وشربات الكينة ومشات لقاتو كيتفرج فالصالون ابتاسمات ومشات تحشات حداه فسداري واحد ضحك وجبدها لعندو ودارو فيلم كيتفرجو فيه تاهبط راسو لقاها نعسات .. جر عليهوم الغطا ونقس شوية من اليتيلفزيون وكمل الفراجة
تالعشية فاقت لبسو حوايجهوم ومشاو لمرجان تقدات كاع لي غايخصها من الماكلة والماعن شي فيطات صغار ديال المسيح .. ادوات دالغسسل جوج ديال الشاريوات كباار هو وحدة وهي وحدة خلصهوم وستفو كولشي فالكوفر عاد رجعو .. قاد معاها داك الليلة كولشي فالكوزينة ومرة مرة يبوسها اولا يعنقها اولى يهرها .. تاسلا وخلاها تكمل وهبط هو عند واليديه اشرفهوم بقات هي هاكاك تاعيطات مها كتسول فيها .. مابغاتش تقوليها على ربيعة حيت اخيرتها غادي تقوليها شغلك هاداك نتي لي بغيتيه نتي لي ختاريتيه فضلات تسكت وتكمدها فقلبها ..
داز شهر على زواج زينب .. بدات تولف حياتها الزوجية وعلاقتها مع نصر كل مرة كاتزيد تحسن وتزيد تبغيه كتر وكتر ماعمرو خسرليها خاطرها بلعكس كيزيد ابين ليها حبهو ليها فكل مرة .. هادي كانت من جهة ومن جهة تقهرات من معاملة مو .. كل نهار هارجاليها ببلان .. مرة تطلع تلقا حوايجها موسخين ولا طايحين فالارض .. ومرة تنوض وتلقا التشطاب حدا باب دارها وخلاص بلا النهار لي تعيط ليها وتهبط وتقوليها ديري وعاونيني راه بناتي جايين وتخليها واحلة وتمشي تگلس وهي خاس دير وتسكت مين عاوداتليها نجلاء تخلعات وخايفة تعاود لنصر ويقوليها كتكايليا من مي وكتصدق تراجع وتبينلو بلي راه عادي .. وكيفما قالت نجلاء بناتها قالو ليها ماتعرفو والو .. اجيو وابقاو احشيوليها فالمعاني وبنت خالتك وحنا ختارينها كانت كدا وكدا ونتي شفتيه نزيان وديتيه وطمعتي فييه حتا كتمرض وتنوض طلع بحالها .. مرة مرة لي تجي عندها بسمة كاتفاجي عليها ولا نجلاء لي كتزيد تشكيلليها همها وهي لي فيها كافيها .. وفالاخير خسها تبقا تبين راسها نزيانة قدام نصر وتعطيه خاطرو واخا مين كيجي كيبقا معاها والى خرج كيخرجها معاه
ناضت اليوم مقلوبة من نعاسها كانتها خاسرة بالبيان بدات كتوجد الفطور غابزز .. جا عندها عنقها وهي تبعد منو
زينب .. راسي دارني خليني
شاف فيها .. مالكي .. ؟
بعدات كتحط فوق الطبلة .. والو ماعنديش الگانة ..
نصر .. ( خلاها تاحطات وشدليها يديها ) وشنو لي مخسر لحبيبتي الخاطر ..
خطفات يديها من يديه .. نصر عافاك مافيا لي يهضر والله ..
بقا هو غير كيشوف مصغر عينيه .. زينب قوليلي شنو واقع معاك ..
عائشة .. شوفي ازينب نتي باقا فلول ديال زواجك وتبدلات عليك حياتك راه ضاروري ماكيوقع هادشي وكيقولو اول عام فالزواج كيكون صعييب داكشي لاش حاولي تحاافضيي على اعصاابك وتبردي ولا عيتي اجي دوزي هنا واحد السيمانة ولا عشريام رتااحي فيها وتهدني ونحليك الموشكيل وعاد رجعي لابغيتي ..
زينب .. صااافي اعائشة وااش انا كنقوليك كيعااملًووني بحال الجفاااف ونتي تقووليلي اول عام كيكون صعيب
زينب .. وكرررررهتتتك لاااا نتااااا لا الشااارفة دموووك
بقات ساكتة للحضة وغير جملتها لي كترددد علات عينيها كيترعدو فيه لقاتو كيشوف فيها وتعابيرو مامفهومينيش بقات كتشوف فيه والدنيا دايرا بيه ماعرفاتش مين خرجات هاد الجملة وبهاد الطريقة ..
نصر .. ( وهو كيقرب منها خطوات ) مافهمتش مزيان عاودي شنو قلتي ؟؟؟!!
بسرعة حول السورات من يد لليد لي فيها التيليفون وعلا يدو حتا خبات وجها بسرعة غوتاات كتسنا الدقة تنزل وهي تحل عينيها بسرعة كتشوف فاليد تجمعات قبضة مغمض عينيه مزير على يدو ..
نصر .. ششش ( كطبطب على ضهرها ) غير بشوية شنو باقا كتحسي براسك متروعة ..
دوراتلو غي يدو زعما الدوخة ..
مدليها قرعة دالما شرباات ورجع مسحليها بكلينيكش وتكاها عليه شادليها يديها تازيدها للطوموبيل وكلسها فبلاصتها حال الباب ..
نصر .. واش كدوخي فالطوموبيل ؟؟
حركاتلو راسها باه وهو يمسح ليها على جبهتها جبد كاغيط دار فيه شوية دالما ورجع دوزوليها شوية على عنقها وجبهتها ورجع ليها شعرها اللور ..
نصر .. شوية دابا .. ماشي موشكيل تاترتاحي على خاطرك ..
زينب .. لا شوية دابا غير يالاه نمشيو ..
نصر .. متأكدة ( حركاتلو راسها )
رجعات دارت وحنا ركبليها السمطة وسد عليها الباب ورجع لبلاصتو .. قلع غادي بسرعة ايوصل دغيا باش ماتزيدش تقيا كتر وهي كل شوية تروع ورجعات وقفاتو جوج مرات .. وهو كيحاول معاها تاوصلو لبني ملال صافي هي سخفات مارا كل مرة يقلب ليها راسها ..
نصر .. مكانش علينا نجيو ازينب مكانش علينا نجيو ..
زينب .. ( بصوت عياان ) سكت عافاك ..
حطات يديها على كرشها كتحس بوجع خفييف، حتا وقفها حدا باب الدار ..
نصر .. ( حيد الصمطة وشاف فيها ) مزيان دابا شوية ؟؟
زينب .. ( حركات راسها باه ) انا نهبط ..
نصر .. ( شدها من يديها ) حبيبتي قولي شنو واقع معاك شنو دارك واش تصرفت شي تصرف ماعجكش مم ؟؟ كاتعامل معاك الراليدة شي تعامل ماشي هو هاداك !! هضري قوليلي ازينب حالتك قطعاتني فقلبي !! شنو واقعليك
تناديك رغبة عشقي إليك الجزء الرابع
محتوى القصة
التنقل بين الأجزاء