رغم الوقت ليل الا ان الجو سخون نوعا ما .. سكون رهيب حواليه مرة مرة كيتسمع عواء الذئاب من بعيد ، جالس على كرسي مكتوف الايادي و الأرجل و عدة جروح دامية مالية جسدو الضخمة ، شي مزال كيسيل شي نشف فيه الدم و قساح ، تحت عينو مجروح شوية و فقنت شفايفو .. كان سهى شوية تا تدقات ابرة مخدر فيدو زير سنيه كرز عليهم و زئر زئير نمر جريح ، بعد عليه كيضحك ضحكات ثقيلة جلس فكرسي مقابل معاه و هو كينهج و البؤبؤ ديال عينو وساع .. شاف فيه بعيون مهسلة و لاخر مزال كيضحك مبين سنيه البيضين و رغم الشيب لي كاسي راسو مزال عضلاتو مفتولة و جسدو ضخم شاد راسو
صبح الصباح ، صباح بارد و كئيب كيف العادة .. جالسة فسريرها ساهية و ايمان كتمشط شعرها بحنان و رفق باش ماتنتفهاش ، الفاصمة مزال ملوية فيديها الرقاق ذات الانامل الطويلة الرشيقة .. تنهدات كتشوف فصبيعاتها تا حسات بقبلة على خدها موراها تعنيقة دافئة
براء: صافي نمشيو
همسة:(نطقت بصوت خافت) اه حسن
براء: اجي نهزك
همسة: لا قادرة نتمشى
تحنى عند رجليها عقد سيور السبرديلة و وقفها بالشوية مسندة عليه و فجنبها لاخر ايمان ، حست بالأرض كدور بيها و ركابيها خاويين ماحسات تا لقات راسها بين يديه عنقاتو و حطات راسها على كتفو
براء: لوحي عليها داك الكاب البرد راه برا
همسة: فيا السخانة ماعليش
براء: بغيتي تولي للفراش تاني ياك
ماجاوباتوش كتفت بالصمت و رجعت سهات فين كانت ساهية .. كتفكر ، اش دير! كيفاش تصرف؟ شنو هو الحل! فين هي همسة!! بغات ترجعها .. بغات ايام زمان ، حطها فاللوطو سندت راسها على الباب لي تسد و ركب هو فبلاصتو و ايمان جنبو .. مزال كتسمع ضحكو و نبرتو الرجولية فوذنيها ، اخ منك يا عاصم .. رغم كل شيء قلبها مزال كينبض ليك ، حطت يدها على صدرها مكمشة عينيها ماباغاش تبكي و كتقوي راسها بزز منها و كتحاول تمحي ذكرياتهم بزوج بما فيهم اول ليلة .. بدات الشتا كطيح بغزارة ، كتحسها طيح على قلبها كتطفي دوك النيران الملتهبة لي شاعلة فيه و تغسلو .. هبطات شوية الزاجة و خلات الرذاذ يوصل لوجهها ، خرجت يدها كتلعب بيها فالهوا واقفين عند الفوروج تا قفزها براء بغواتو
براء: وابلعي داك الزمر الزمر راك تمرضي
همسة: خلعتني الزمر
براء: بعدي من تما مناعتك راها على قد الحال
بقات تسوط طلعت ديك الزاجة و رجعت تركنت كتخمم ، وصلو و هبجو متابعين معاونها غي دخلو لقات فوجهها اسلام و زين الدين .. تشنجت و حست بضيق فصدرها ، بقات تلعب بعينيها هنا و لهيه ماكتشوفش فيهم فحين هوما كل واحد مين نبشها
زين: على سلامة بنت ختي .. ماتعاوديهاش ماتخليش قلوبنا محروقين عليك
اسلام:(ماصا كتفها) اخيرا نور القصر بالشميسة ديالنا
هزها تاني قالبة وجهها و طلعها لبيتها .. بقى واحد يشوف فواحد و ايمان جامهة يديها عندها و كتشوف فيهم
ايمان: هادي همسة لي نتجت بعد كلامكم و سمكم لي رميتوه بيها تحملو نتيجة اقوالكم .. وكان كنتو بحال براء لي عاتبها و ماجرحهاش وكان راها دبا محشية وسطكم مي دوماج ، بنادم فاش يتكسر خاطرو من اقرب الناس ليه صعيب يتجبر ..
دخلات مينة بابتسامتها المعهودة و قفطانها ديال موبرة سامبل فالأزرق الملكي مع بليغة ديالو .. موراها خدامة هازة بلاطو فيه كل ماهو شهي و فنفس الوقت صحي ، كانت كتكى و براء كيغطيها قربت و تحنات عليها ببوسة دخلات فحنكها
همسة: بغيت نهضر و لكن مابغيتش نتفكر الماضي .. ديك الصفحة قطعتها و كيفما بكيت تنا غايجي واحد الوقت و يبكي تا هو الدم بدال الدموع
براء: جزء مني مسامحك و جزء مزال خليه للوقت .. و نتي فهاد الفترة و خدمي على الثقة لي خسرتيها ترجعيها واخا
هززت راسها بآه و قربت ليها مينة البلاطو باش تعتق و يرجع فيها اللون .. ماهضرات ماتكلمات خلاات الخوت بزوج بيهم بيناتهم و تا همسة ماعقباتش مادام واقف فجنبها واخا غضبان عليها شوية مهم كيوجهها و كيوعيها و ينبهها باش مرة خرى فاش تخطي خطوة تخمم فيها مية مرة و مرة ، عمرات كريشتها خلاوها تكى ترجع جهدها و خرجو هو هاز البلاطو بيد و يد معنق بيها مينة
مينة: زين الدين و اسلام باينة ماعبراتهم
براء: غمامة و غادوز (تنهد) الواليد لي حريرتو حريرة
مينة: هو من حقو بصح قسح معاهت اضعاف و اضعاف ، هي المدللة فيكم .. صعيب بنادم يكون فمرتبة عالية و ينزل درجاات للتحت
براء: ضو عينيه هي همسة .. شفتيه كيفاش كان فالكلينيك بقاو غي نغيزات و يولي كولشي كيفما كان
تنهدات كتمنى يرجع كولشي كيفما كان ، نزلو و هي بقات فجناحها متكية تا حسات براسها ترخات مزيان و عضلاتها كذلك .. الظفئ سرا فجسمها عاد قدرات تحرك ، دخلات للدوش كتفكر الحادثة المشؤومة لي كانت غاتمشي فيها و وقفات مقابلة مع المرايا .. قلبات على مقص جبداتو و قطعت شعرها نقصات منو بزاف ، عمرات الجاكوزي بالما و خرجات كتقلب على بوند مضادين للماء دارتهم و رجعت دخلات كتحيد حوايجها بياسة ببياسة و تخشات فالجاكوزي مرخية و كتخمم .. فكرة تديها و فكرة تجيبها ، طلعات مينة طل عليها سمعت الحس فالدوش طاح منها النص دخلات تجري لقاتها غاطسة مخشعة تما
جلست جنبها كتلعب بشعرها القصير و ساكتة مابغاتش تهضر و تسولها
مينة: و شكون مايبغيش كبدتو
همسة: قررت نسافر
مينة: سيري فينما عجبك
همسة: غانتحول من هنا بمرة
مينة: كيفاااش!!
فين جات تسمع جوابها سمعات تعياط فهد و مشات تشوف مالو ، دوشات طرفات حالتها و خرجات مزينكة و حنيكاتها حميمرين محقون فيهم الدم .. لبسات حويجات مخلية الفوطة على شعرها و جرات بيسي كترون فيه ، بقات موودة و هي هاكاك عاد ناضت بتعب نشفات شعرها و بدات تجمع حوايجها .. كان السهيييير باينة تغداو و كولشي رجع لخدمتو ، دخلاا عليها مينة بعيونهت مدمعة ماقادرة تقول والو و نطقت همسة
همسة: تا من إيمان ماقلتهاش ليها .. غانمشي لباريس تما غانبدا من الزيرو و نستأنف حياتي لي توقفات هاد السيمانة
عطاتها بالظهر كتكمل الجميع كتبكي و مينة خرجات تا هي كتبكي و ماقالت والو ..ضورت عويناتها بآسى فالجناح كتودعو و ضارت جهة لا فاليز ديالها ، صغيرة جامعة حوايج قلالين .. تنهدت حطات وريقة مع سوارت طموبيلاتها و لي كارط كيشي و الطيلي ، كولشي خلاتو و زادت خلفة مع الطريق .. نزلات مع الدروج و شافت فيها بعينين منفوخين ، شهقت معنقاها فحين هي بادلاتها العناق ببرود .. قلبها شبه ميت و دموعها نشفو ، باست جبهة ماماها و نطقت
همسة: ايلا بغيتيني عارفة فين تلقايني
مينة: علاش هاد العناد كامل
همسة:(نزلت راسها)بابا عندو الحق فكرت فهضرتو مزياان .. من الأحسن نغبر وجهي لعل و عسى خاطرو يبرد شوية من جهتي ، ربما يحن ربما يشتاق تما ممكن يسمح لي
مينة: ماشي بنتي لي كتستسلم
همسة: بالعكس .. الحرب عاد بدات عندي .. الحرب ضد قلبي و احاسيسي ، نهار نتغلب عليهم نقدر نرجع و نحارب تاني باش نرجع بابا .. غانحاول نكسب ثقتو من جديد و نكسب رضاتو لي عندي اهم من الدنيا و مافيها
نزلو دموعها مزيرة على عينيها .. طاحت بين نارين ، من جهة راجلها و من جهة بنتها .. مابغاتش تخليها تمشي و فنفس الوقت بغاتها تحمل نتيجة اخطائها ، تعلم و عمرها تعاودها .. تنهدت رجعت عنقاتها و حطات يدها على كريشتها
مينة: خوذي دواك و ماتهمليش صحتك .. يالاه جهضتي و يالاه راجعة من الموت ، ردي البال لراسك
هززت ليها راسهت بآه و خرجات لقات الطاكسي جات كتسناها .. خلات كولشي موراها ، خلات همسة العاشقة الولهانة .. البنت المطيعة و فنفس الوقت المسخوطة .. خلات احلامها لي بناتهم و تخلات على على مشروعها و متجرها .. صفحة الماضي قطعتها و حرقتها بحال روحها ، و خذات اولى خطواتها نحو المستقبل المجهول
"اعزائي المسافرين .. الطائرة على وشك الأقلاع ، المرجو التزام امانكم و ربط احزمتكم"
فالدرجة الأولى ، جالسة فكرسيها متكياه و مقادة لاسانتوغ .. دارت الكيت فوذنيها و ساهية ، دايرة بحال الصنم .. عايشة غي هاكاك و صافي .. باااااردة بلا احاسيس بلا مشاعر ، مكتحس بتا حاجة .. وحيدة ضالة ، مشاعرها ماشي ميتة انما مدفونة و مخبية فبلاصة بعيدة .. ناعسة فسبات عميق ، النغزة لي تفيقها و تخليها تغوت و تخرجهم باش ترتاح ماكايناش .. كتخزن و ترجع لداخل و ساكتة ، تنهدت كتشوف فالسحاب و عقلها مشى لعندو تاني .. اه كتفكر فيه مرارا و تكرارا ، كتسائل فقط علاش! السؤال لي مرضها فدماغها ، ثقتها فيه تهرسات لقطع جد جد صغيرة .. تخذلات منو و تجرحات ، واش الزمان قادر يداوي الجراح !! ولا غايزيد يعمقهم و يسيل دمهم!!
🎶يا كون تشوفو حالي .. يا بعدو واش صرالي .. واه عليها كية ، جيت نحيدو من بالي .. يا ميمتي زاد هبالي .. واااه على لي بيا .. و ايلا راح لي نبغيه واشنو يبقى ليا .. و لي حب نوصيه ما يأمن للدنياا 🎶🎶 وانا لي قلت حبيبي عمرو ماينساني .. و مااا ينسااني واماينسااني .. وادار فيا كثر من لي دااروه فيا عدياني .. وامي حياني .. دادا حياااني 🎶🎶
مسندة راسها على الزاجة ديال الطاكسي ، وصلات فالليل و خرجات بعدما كملات معاملاتها و اجراءاتها .. الضواو كيضربو فيها من البوطويات واحد مور واحد و وجهها شاحب .. رهقها التفكير و عياها ، باغا تبكي و ماقادراش ، للحظة ندمات علاش سافرات و علاش بعدات .. شوية تفكرات الحرب لي غادخل ليها و خاصها تربحها ، خرجت تنهيدة عميقة مكمشة عينيها تا وقفت الطاكسي فين بغات ، نزلات منها مطلعة راسها كتشوف فداك المبنى لابسة مونطو باج و هازة ساك مربع فيدها ، حط شيفور الطاكسي فاليزتها جنبها خلصاتو و بقات واقفة كتشوف و الثلج كيطيح رقيق ، غي فبداية الشهر كانت فهاد المدينة طايرة فوق السما السابعة ، هاهي رجعات ليها هاد المرة و لكن مزدوحة لسابع أرض .. هادا هو حال الوقوع في الحب بحالا كتنقز من جرف عالي ، عقلك يقولك لا غادي تموت بينما قلبك يقولك ماتخافش غادي طير
🎶🎶مادار بحساب العشرة خلاها فيا حسرة وايلي على مكتوبي .. كي يجي يوم و نبرى.. نمحيه من بالي بمرة.. و مايبقاش محبوبي🎶 و بقيت كي شي ايسطوار مكتوبة بلا عنوان.. بابور ضايع غبحور يتسنى البر يبان🎶🎶
هاز راسو كيشوف فالقمر و النجوم ، توحشها .. شي حاجة فقلبو كتعدى معنى الشوق ليها بذاتو ، تنهد مغدد و صبرو طاال .. اش جاب مايزيد يصبرو ، خاصو يتحرك ، صافي شحال قدو يبقى مكتوف الأيادي .. سمع الباب تحل و دخل الخاطف مع رباعتو ، شار ليهم براسو باش يفكوه و داكشي لي دارو بالوقفة بركلة للوجه جاب واحد فالأرض مجبد .. واخا حاس براسو مهدود شوية و جسمو كل نهار يتحقن بالهروين ، و لكن خلاه بحال المجنون صعر صعرة وحدة واخا الجوع واخا العطش ولاو فيه عشرة .. حاس بالدود كيتمشى فلحمو ، كيحس بدماغو كياكلو لداخل ماكرهش يهرس راسو و يحيد داكشي .. مالقى غي هادوك يبرد فيهم جنونو و داكشي لي دار ، لي عطاه ضربة يعطيه عشرة .. هز الجنرال الخاطف السلاح موجهو ليه و فرمشة عين لوا يدو تا طرطقها و رماه بعيد ، و لكن واحد اخر كان موراه تيرا فيه حس بالهوا بارد كيدخل مع ضلوعو .. طاح فالأرض متشنج و رصاصة اخرى ختارقت صدرو ، عينيه تقلبو و مال بالعرض البطيء تزدح راسو جا فالأرض ..
🎶🎶كون غي فيدي حيلة .. نخمم كل ليلة .. عايش بين الحيرة و الشوق .. يا لي نتي عليا بعيدة .. بعييدة .. راني من بعدك مخنوووق🎶🎶
نزلت راسها جا داخلة للعمارة هازة الساك فيد و لافاليز فيد تا حست بقلبها تزير بحالا تعصر بين زوج يدين ، رمات لافاليز و مالت على حيط جنبها حاطة يدها على صدرها و كتنفس بزز .. شافوها الناس ضارو بيها و واحد مد ليها الما و هي عينيها كيتقلبو
...: مدموزيل .. مدموزيل ايسكو صافا مدموزيل
بقات شوية بشوية كتنفس تا نتاظم تنفسها و حست بقلبها تفاجا مابقاش مزير ، شدت ديك القريعة شربت منها رجعتها لمولاها و نحنات للفاليز
همسة: مغسي بوكو اي ديزولي
...: با كغاف مادموزيل
...: بون غيطابليسمون ما بتيت بخون سوان دو طوا
بقات تهزز راسها للناس و الناس كتمنى ليها الشفاء العاجل ، بقى داك الفرنسي الجذاب واقف جنبها ماد يديه و كيهضر
...: سي تي فو نعاونك تا توصلي لدارك كتباني عيانة بزااف
همسة:(بتاسمت من فوق خاطرها) هه وي غانوليو جيران .. بون مغسي هاهو جا السيد نخلليك دبا
زربت عليها و مشات عند البخوموتوغ ايموبليي ، سلمت عليه و دخلو لديك الريزيدونس كان فيها الاستقبال و فوطويات جنبهم لي بغى شي واحد يتسناه تما .. شدو سانسور طلعو للطابق العاشر و دخلو بين الممرات تا وقفو قدام شقة ، غي حلو ضربت فيها ريحة الجديد كولشي فيها نيو و كيشعل شعيل .. شقة صغيرة بسيطة ألوانها هادئة و اثاثها راقي ، فيها بيت النعاس فيه بالكون و دوش و كوزينة مفتوحة على سيجور و صال امونجي صغيرة .. هادا مافيها صغيورة غي على قدها ، سنات ليه الوراق و حولت ليه المبلغ و هو عطاها السوارت ديال الدار .. سدت الباب موراه بالساقطات و دخلات تكتاشفها ، واخا زوينة باردة ، ناقصاها الحيوية و الدفئ ، شعلات الشوفاج قاداتو على الحرارة لي بغات و بدات تكتاشف .. ماريو قدو قداش و ناموسية كبيرة شوية عليها كوفرلي فالأحمر الدموي .. الضواو لاصقين فالسقف فكل قنت ، جلسات قدام المرايا كتنهد و كتشوف فانعكاسها الشاحب .. واعدات راسها و خاصها توفي بوعدها ، خرجات للكوزينة كتشوف ماكانوش فيها مواعن و الثلاجة خاوية .. شعلاتها و خرجات تمشي للمول تشري باش تقضي ، جات تدخل للسانسور وقف قدامها داك الحامض كيفرنس
...: و هاحنا تلاقينا .. مرحبا بيك فالريزيدونس نورتي
امانويل:(دار يدو على خصرو كيشوف فيها شوية قرب لوذنها) ماتخافيش انا غااااااي
همسة: الله ياربي
طلعات و هبطاات فيه كتزفر و كتسوط مصدومة بالجهد .. الطولة و التجريدة و الاناقة و العضلات و اللحية ، راجل كامل مكمول خاصو غا الحنش .. حركت راسها بلا غادا تقضي شغالها واخا مسخسخة بالسفر
ايمانويل: ابلاتييي
همسة: وافرقني عليك الزمر مالك لاصق فيا بحال لحم الراس وكان ؤشوفك عاصم يسلخلك الجلد على اللحم و يفسخ اللحم.....
كانت كتهضر شوية تفكرات و حبسات هضرتها فالنص .. فين هو هاد عاصم!! دمعو عينيها نهجت و الهوا سخون كيخرج من فمها و نيفها حمار ، عطاتو بالظهر مكملة طريقها منزلة راسها و تبعها هوا خشى يدو فذراعها بزز منها
ايمانويل: شكون هاد آصم ؟؟ مالك سكتي؟؟واش فغيمون غايضربني .. بغيت غي نديؤك صاحبتي و صافي والله
همسة:( مسحت دمعة غفلاتها و نزلت) بعععدد منييي الزمر
تنترت منو غادة كتزرب و كتحس بقلبها كيخبط خبيط ، كتغامر براسها بلاما تحس مزال صحتها على قد الحال و مزالها كتنزف مرة مرة و هي كدير مجهود بدني و نفسي كثر منها .. جلست على كرسي من الكراسا لي تما و دموعها لي نشفو دارو سررر ، ماقادراش تنساه .. ماقادراش تحيدو من بالها ، مكتبغيش تفكر فيه و لكن هو مستوطن عقلها و كيانها .. قلبها كيدق بسميتوو، عروقها كيتمشاو فيهم حبو و عشقو .. تنهدات و قلبها تاني زاد خفقانو و كتحس بالبرودة سرات فأطرافها ، وقفات باغا تحرك و لكن الضبابة غشات عينيها و الأرض كتحسها دور بيها مالقات غا لحم الراس شدها و دور يدو على خصرها
حركت راسها كتنهد و رجعت سندت كتسنط لعظامها ، الشتا كطيح بغزارة و الليل طوييل يالاه قرب للمنتصف ديالو .. الغادي و الجاي بكثرة ، كلها و فين هارب من الشتا من غير العشاق لي كيلعبو تحتها فرحانين .. و تحت الغيوم مخبي القمر و النجوم ، لي ساطعين فجهة اخرى من العالم مضويين الليل بنورهم و القمر العملاق منور ديك الليلة .. استنفار شديد كيشهدو المستشفى العسكري فالبرازيل ، الرصاصة ديال الكتف ساهل حالها لوخرى لي جات جهة القلب لي موصيبة ، و لكن لمعجزة الهية و حالة ناكرة عندو القلب فاليمين ماشي فاليسار .. و فوسط العملية حل عينيه كيرمش و كيتنفس ببطئ شديد مع نطقو لحروف متقطعة
عاصم: هم.. سااه
...: زيدو لانيسطييزييي ، بنجووه مكيشدش فيه
...: كنغامرو بهادشي لي كنديرو
...: بالسيف علينا نعتقووه .. المخدرات هوما السبب هوما لي خلاو جسمو مايستقبل البنج و يغيبو
...:نضاعفو الكمية!!
...: عنداك تقتلووو .. زيد شوية بشوية
دخل جنرال شايب معاه ثلة من المحققين التابعين للمكتب الفدرالي .. وقفو على الاطباء قالو ليهم مزال ماكمل العملية و شاف مع جنبو
...: لقيتو داك الحمار
...: مزال كنقلبو عليه .. خطفو لأجل المخطط و فاش مابغاش يعتارف بغى يقتلو
...: كيفاش قدرتو توصلو ليه!! كيفاااش واحد مناااا يخون الثقة و يدير يدو مع العديان
...: قدرنا نتوصلو باتصال من عاصم .. كي دار ليها مانعرف ، فاش يفيق غانعرفو من عندو التفاصيل
هاز طيلي فيدو كيدور و لي دازت عليه كيعض شنافتو متبع ترمتها لي كتلوز ، بدا يختار اش ياخذ ليها كيشوف السايز ديالها و لوينات مغلوقين سخونين لهاد الشتا .. تحرك جهة لي بوط ختار واحد منفوخ سخيخن و عينيه فترمة وحدة خدامة تا قفزو طيلي
ايمانويل: تفوو مانحززوش حنا فخاطرنا (جاوب) الوو
فهد: كي بقات
ايمانويل: اححم مزيانة ا سيدي
فهد: رد ليها البال
ايمانويل: كون هاني خدمتي غانديرها كاملة مكمولة
قطع عليه خلاه غي يشوف فالطيلي لاخر فحين فهد تكى فبلاصتو و مينة جالسة كتشوف فيه متكية على يدها
مينة: منين طاحت عليك هاد الفكرة!
فهد: فاش قلتيها ليا قبيلة .. ماغانغلطش الغلط لول نخليها بلا مراقبة
مينة: شكون هاد ايمانويل بعدا!
فهد: ولد واحد من لي خدامين عندي كيقرى التصميم تما
مينة:(هززت راسها) و نتا
فهد: انا شنو ؟؟
مينة: ماغاتحنش على بنتك!
فهد:(تقلب عطاها بالضهر) تصبحي على خير
مينة: من ايمتا وليت تسد عليا المواضيع بحال هاكا و تعطيني بظهرك (تنهدت بحزن) تصبح على خير
تقلبت لجهتها جرات معاها بينوارها و ناضت خارجة بعيون مدمعة ، تقلب متبعها بنص عين و تنهد ناض تابعها حبسها قبل ماتخرج مدور يدو على خصرها و خاشي نيفو فعنقها .. تهز صدرها بشهقة خلات قلبو يتهز معاها و دورها لعندو خاشيها فيه
فهد: سمحيلي ماشي لخاطري .. مزال مجروح و الجرح غامق .. من بنتي تجرحت و بسكين الغذر تطعنت ، واش لخاطري نبعدها عليا و نعاملها بهاد القسوة هادي
مينة: غلطات كتعترف بغلطها و الندم كياكل فيها .. خايفة غي دير فراسها شي حاجة ، عافاك سمح ليها
فهد: مغاتعاودش للغلط لي دارت و غادي دير المستحيل باش نسمح ليها بنتي وانا عارفها .. بغيتها غي تربى شوية و تجمع شتات نفسها ، تغير من شخصيتها و تقصح قلبها ماشي الريح لي جا يديها
مينة:(هززت راسها) عندك الحق .. خليلي نمرة ايمانويل باش نبقى نسولو عليها تانا عارفاها هي ماغتعطينيش التفاصيل
فهد: و شكون قال ااتبقى تخبي عليك همم !! يالاه ترتاحي و باراكة من الفشوش راك كبرتي عليهم الفريزة نسيتي راسك فاش كتعطيني بضهرك
مينة:(فرنست تحت نيفها) كتكون داير علاش
تنهدت كتشوف فيه بعيونها اللامعة بسبب الدموع ماحسات براسها تا دخلات معاه فقبلة دوخاتها و تلفاتها على القبلة .. نعسو فأحضان بعضياتهم كل واحد كيخرج تنهيدة عمق من الأخرى و تفكيرهم كولو مع همسة و الأحداث لي وقعات و لي خذا الحيز الأكبر .. عاصم و فين غبر ...
واقفة فالدوش كتسرح شعرها و تنهد .. مور مادوزات ليلة كاملة فالكلينيك حسب اوامر الطبيب غي صبح الصباح تكعدات لبسات الحوايج لي جاب ليها ايمانويل ، كان هو رجع لدارو ينعس و لكن غي خرجات من الدوش لقاتو عند وجهها
همسة: وكان نديك تضرب فطور ماغوكان ماتاكل تا لغدا ليه فالصباح
ايمانويل: دوزي تاكلي و نتي شحال فيك بلا بلا
همسة: غي قولي شكون مسلطك عليا .. مالك لصقة تلصق بحال الماكلة بين السنان
ايمانويل: دبا انا ماكلة بين السنان .. نعلبو هادا لي يديها فيك (بدا يجمع الفطور)
همسة: صافي صافي غي جلس و نت بحال زريعة الكتان غي كطير .. يالاه لبارح جيت لمدينة جديدة نستقر فيها ضربت لصقت فيا لصقة وحدة
ايمانويل: انا غي بغيت نعاونك بنتي ليا عيانة و وحيدة و انا وحيد قلت نديرو الراس عند الراس
همسة: الله يستر
من ديما مكتآمنش بعلاقات الصداقة العميقة ديما صحابها و صحاباتها العلاقة بيناتهم سطحية ذات مصلحة فقط .. جامي شي واحد تعمق معاهت بحال لحم الراس و داها فيها ، و الاهم وقع هادشي فظرف تلاتة السوايع .. من لحظة وصولها للموبل للحظة دخولها للكلينيك ، ماعارفاش شنو تحت راسو و ماعارفاش شنو مسلطو عليها واش نيشان بغاها تكون صديقتو ولا موراه شي حاجة تا تصرفاتو لا تمت بصلة للمثلية و الشذوذ .. نفضات دوك الافكار من راسها كتفطر و تشوف فيه تا هو كيتكيف و يشرب قهيوة ، واحد اللحظة هزت راسها كتشوف تاني .. احتل جزء من تفكيرها ، ايمانويل قدر يبعدها و لو شوية على عاصم و يشغل بالها بتصرفاتو .. و هادشي لي باغا هي ، باغا يرتاح دماغها من عاصم و من الماضي ككل و تزيد خطوة للقدام .. كملو الفطور جمعو داكشي و خرجو خاشي يدو فذراعها و كيتمشى بتمختر بحالو بحالها
همسة: اوا ا داك لحم الراس ، فين غاتدينا دبا
ايمانويل: للدار باش ترتاحي شوي
همسة: خاصني حوايج
ايمانويل: نديبانيك بالماكلة هاد اليومين تا تصحي ..
... انامعااك و نتي تخافي هممم (زير يديه على كرشو) غي جربي من بعد نتي تبقاي طلبيني نضرب بيك ضورة
كسيرا بالموطور و هي كتغوت مخلوعة و مرة مرة كضحك .. وقفو قدام البحر معنقها و طبع قبلة عل خدها
علمني نسوووق
نعلم حبيبتي علاش لاا"
بقى الصدى يتردد فمسامعها تا هززها ايمانويل و شافت فيه بدمعة شاقة خدها
همسة: علاش زعما!!
فالعناية المشددة ناعس مجبد و المؤشر طالق صوتو ، ايام قليلة غايصح و يرجع كيف كان و لكن .. الادمان لي موصيبة ، كيفاش غايتغلب على ادمانو و هو بلا والو مصعور زادوه الهروين ايولي بحال شي وحش كاسر .. بدا يرمش عينيه و يبلع ريقو بصعوبة ، وقف قدامو طبيب و جنرال من الجنرالات القدام كيعاينو الحالة ديالو و الصدى ديال اصواتهم كيوصلو بعيد
...: امتا يفيق
...: ساعة ساعتين ايلا كثر
...: و داك السم!
...: خاصو شي اختصاصي فالمعالجة ديال الادمان .. المينيموم ديال مدة المعالجة هو ستة اشهر
...: موصيبة ماغايبغيش يرتب فبلاصة وحدة
...: خاصو يتحمل ضروري
...: ولاد الكلاب
زفر خرج بخطوات خفيفة تلقاو ليه رجال خرين كيسولو و يعاودو ، شاف واحد و نطق
...: بسبابو هو قدرنا نعرفو اللفعة لي وسطنا .. عاصم ضروري يصح دغيا و يرجع يشد زمام الامور بلا بيه ماعرفنا اش نديرو
...: غاياخذ اجازة مفتوحة خاصو يرتاح و يجمع راسو .. عرض حياتو و حياة عائلتو للخطر بسبب هادشي
...: كان ولا بد منو و هو لي عارض و بغى يمشي لهادشي برجلو ..
...: رجعو لبلجيكا و كملو التحريات مابغيت تا خطأ .. عاصم خليوه طرونكيل تا يبغي هو و يرجع
عطاهم بالضهر رجع لعند عاصم لقاه فايق و كيشوف فالسقف ، تبسم و قرب عندو داير يديه وراه و كيهضر بفخر
...: على سلامة القائد ديالنا
عاصم:(بصوت متعب) ادوارد!!
...: خذا جزاءو غي نعس على جنب الراحة لبارح لقاوه الرجال و عدموه
عاصم: ماتيقوش بزاف .. ماشي غي ادوارد لي بوحدو كان وسطنا متأكد باقي معانا شحال من واحد
ضغط على واحد الزر جا الطبيب كيتجارا هو و الفرمليات عاينو حالتو و عطاوه مهدئ و المورفين باش يتهدن .. الهيروين مستخلص من المورفين و اخطر منو .. تا المورفين مخدر و لكن كيتسعملوه كعلاج طبي و دواء للآلام الحادة بصح ايلا افرط فيه الواحد كيولي ليه ادمان و يبقى يقلب باش يشريه و ياكلو بالنسبة للمرضى و كابن لي كياخذو كبديل للهيروين ، حدقتي عيونو ضياقو بشكل رهيب رجعو بحال النقطة و التنفس ديالو بدا ينتاظم .. سد عينيه شوية و رجع حلهم
عاصم: جيبو ليا تلفون بنفس الرقم لي كان عندي ضروري
...: واخا و لكن كفاش قدرت تعيط لينا
عاصم: خذيتو لواحد فيهم فاش كنت نشخشخ فبوهم الكلب .. (تنهد كيبلع ريقو سد عينيه منرفز و رجع حلهم كيغوت) جيبولييي الزبلللل دغيااا مافياا لي يصبررر
قفزو عاد دبا كان نورمال مالو تقلب عليه و طلعلو الدم .. مشى يعطي اوامرو يجيبو تلفون جديد بنفس الرقم و بقى برا لايسمع شي حاجة ماتعجبوش ، اما عاصم عينيه تارة يمين تارة شمال .. عقلو عند هموستو و اشنو كدير دبا ، عمرو توقع يطيح فهاد الموقف و لكن تخلاطو للبنات و المدابزة ديالو المستمرة مع همسة نفعاتو و بزااف .. رجع عقلو لور قبل سيمانة و للاتصال لي جاه من خالو ، ماعرفوش اش بغى منو و ديك الرويجل علاش قالها ليه !! واش همسة عتارفت بحبها ليه لباها و مابغاش!! راسو ضرو بالتفكير وكان مادخلو دوك الرجال كون كمل هضرتو مع خالو و فهم اشنو بغى منو و فهم اش كاين و لكن هو حبس الهضرة بعد اول سؤال
#فلاش_باك
كان فالمكتب كيشوف شي وراق عاقد حجبانو و الأعصاب كيلعبو فدماغو .. صونا الطيلي شاف الإسم جلس على كرسيه و جاوب
عاصم: الخال
فهد: ولد ختي .. الرويجل
عاصم:(بحال شم شي حاجة ماهياش) خالي كاين مانقضيو
تحل الباب بالجهد الشيء لي خلاه يبعد الطيلي على وذنو شوية كيشوف فالرجال لي داخلين و كيهضرو
""فهد: كاين الشماتة كااااين .. وكان جيتيني راجل و طلبتيها مني ماغانترددش زوج مرات .. وكان غي ترجلت شوية""
فنفس الوقت لي نطق فهد نطق واحد من دوك الرجال
...: خاصك تمشي معانا دبا دغيا عندنا امر من الهيئات العليا
عاصم: مافهمتش
""فهد:(همسة)""
...:(فنفس الوقت) نتااا متهم
عاصم: شكااااين
""فهد: بنتي حاملة منم . فين ما كنت تحضر باش تصلحو هاد الغلطة و الحساب من بعد .. تلات بيل ليام نطلب و نرغب الشمايت يجيو و يسترو الفضيحة لي دارتها معاهم بنتي...""
...: نتا متهم بانضمامك للخلية المزعومة فتركيا و المخططات خرجو ليهم .. القمر الصناعي ديالنا فجروه
عاصم: لا لا لا مايمكنش
""فهد: شنو لي مايمكنش!!!""
...: للأسف غاتقدم للمحكمة العليا فهاد الأسبوع تفضل معانا
عاصم: ماشي اناا .. ماشي انا مولاها ...
#back
تنهد و ضغط على زر جات عندو الفرملية تجري .. غي دخلات مد ليها يدو
عاصم: تلفونك
الممرضة: هاااا
عاصم:(غوت) عطييينيييي تلفوووونك
الصمت .. صمت رهيب محيط بيها ، كتسمع فقط تكتة عقارب الساعة لي فالصالون و قطرات المطر لي كضرب فالسرجم ديالها .. مجبدة ففراشها كتشوف فالغيوم الرمادية الداكنة و كتفكر ، اسوأ اللحظات لي مرات بيهم كيدوزو فمخيلتها .. اصعب حاجة الانسان يبقى وحيد ، الوحدة كتقتل اي حاجة زوينة .. كتخليك تفكر فالسلبيات كثر من الايجابيات و كتشوف الجانب المظلم من حياتك و جهة الكأس الفارغة ، مكتشوفش الحوايج الزوينة .. النجوم لي مضوية سماك حالكة السواد ، لا .. فقط كتجردك من كل ما هو جميل و تخليك فدوامة الأحزان ، تقلبت على ظهرها كتشوف فالسقف و كتحس بالنزيف من تحتها بحال شي واد فسيلانو .. غمضت عينيها بتعب و رجعت حلاتهم ، جرات طيلي و صونات لماماها .. لي كانت كظن موحال واش تعيط ليها و تفتح قلبها كثر من السابق
مينة: حبيبتي
همسة: توحشتك (شهقت بالبكى) ندمت لي خليتكم و جيت .. ماتصوريش شحال كنعاني
مينة: ماتنسايش الأبيض .. هو نقطة النور المشعة فداك الظلام حالك السواد ، من الليل كينبعث الصباح .. و الشمس كتخرج من جوف الظلام ، خلي شمسك تشرق هادشي بيدك نتي
همسة:(تنهدت مزيرة عينيها) غانحاول ..
كملو هضرتهم بين فضفضة و نصائح من طرف مينة ما قطعات معاها تا حسات بمعدتها كتغوت بالجوع ، ناضت بتعب شديد بدلت عليها و خرجات مكمشة فالجاكيط ديالها .. دايرة ليكات و شادة بارابلوي كتشوف فالغادي و الجاي ، شحال زوينة الشتا .. كتخلي قلبك يتفاجى بلاما تحس ، تشوف هنا و لهيه .. وجوه كثيرة مختالفة ، تعابير مختلفة .. شي ضاحك شي زعفان ، شي مغوبش شي حزين ، و كاين لي البرود مكتاسي ملامحو مافيه تا تعبير .. تمشات مسافة مابيهاش و دخلات لواحد من لي بتي غيسطو لي كاينين تما طلبت اش بغات و بقات غي دور عينيها .. من هيأتها باينة وحدة غريبة على المدينة ، مكان دافئ و طوابل قراب من بعضياتهم و لي فوطوي قصلر سامحين ليك تشوف جميع الوجوه .. جدران مصبوغة بالأحمر الآجوري مزينين بلوحات و فوانيس ، و الثريات نازلة من السقف بطول متفاوت بين الوحدة و لوخرى .. بدات تاكل مخشعة مع وجبتها تا رن طلفونها كسر عليها اللحظة و جاوبت مغزفة
همسة: منين خذيت نمرتي!!!
ايمانويل: من تلفونك مالك مكلخة .. عيت ندق فينك!!
همسة: كنتغدى
ايمانويل: بلا بيا المسمومة
همسة: ياكما ولدتك و نسيتك
ايمانويل: واقولي فين نتي نجي عندك توحشتك
همسة: توحشك بقرة بعدني
قطعت عليه مغزفة و حنكها منفوخ بالماكلة .. الوحيد لي كيخرجها من مودها هو ايمانويل كيخلي اعصاب ديال اعصاب ديال اعصابها يغليو مكتكرهش تشد الخيط و تنتف زغب قلاقلو زغبة زغبة هادشي ايلا عندو بعدا
رجعت تكمل ماكلتها و كتحاول تفادا شي حاجة سميتها التفكير فعاصم ، جلست جثة ضخمة حداها زفرت بعنف و هزت موس جنبها كتهدد تحت نيفها
همسة: شكون مسلطك عليا مامخليني تا ناكل فخاطري
ايمانويل: مجوعفة كي دايرة .. غي بغيت نونسك (تكى على ظهر الفوطوي) سخفت بالجرى هووف
جاا النادل خذا طلبو تا هو و بداو سلسلة التعارف .. كتقول ماعليش غي بقى معايا ونسني و شغل بالي من التفكير ، كملو غذاهم و خرجو مخشيين تحت مظلة وحدة غاديين على رجليهم للسوبر ماركت و يدردشو
ايمانويل: ماقلتيش ليا شكون داك آصم لي هددتيني بيه لبارح
حست بالزمن وقف و الاوكسجين بالكاد ينفذ ، علاش هاد السؤال بالضبط !! خربق ليها الفيزيبلاات .. و لكن تا لإمتا غاتبقى بحال هاكا!! خاصها تواجه و تخرج ما فقلبها باش ترتاح شوية .. ماحدها هي هاكا و هي لور لور
ايمانويل:(وقف مقابل معاها كيلوح بيدو) هيهو فين مشيتي
همسة:(هزت عينها الدامعة فيه) هو لي خذا لي قلبي و خرسو لتهريسات صغاااار .. هو لي بغيتو لكل جوارحي ، شريتو غالي و هو عطاني فابور .. عاصم هو لي خذلني .. كذب عليا .. و فأمس حاجتي ليه عطاني بالضهر و خلاني فوسط جهنم بوحدي
نزلو دموعها بغزارة و هو جرها لعندو معنقها بيد كيطبطب على ظهرها بالشوية و يسكتها ، باسها ففروة راسها و شاف فيها
ايمانويل: هو بابات البيبي لي جهضتي يعني
همسة: اه هو .. لي كان يشوفو يتسنى مني بيبي يقول هادا عمرو مايخون .. و لكن بأقوى ضربة بخنجر مسموم طعن ضهري (شهقت) مكتصورش بحجم الألم لي كنحس بيه هنا فصدري ، ألم لدرجة خلى كاع داك الحب لي كنت نكنو لعاصم تحول لكره .. فقط كره
زيرت سنيها و بدات تمسح دموعها بجهالة .. علامن كتكذب ؟؟ واخا تبغي عمرها تكره عاصم .. دير لي دير جامي تكره عاصم ، كتوهم باش راسها باس تقوى و لكن العكس هي عاد مكتزيد تضعف بهاد التفكير .. بقى متبع ليها العين مع افكارو تنهد و تبعها مغطيها من الشتا ، دخلو للسوبر ماركت جارين زوج شاريويات واحد خاص بالمأكولات و لاخر لكل ماتحتاج من مستلزمات الدار .. ماكرهاتش تهز داكشي كامل تاخذو معاها ، كتحاول تبين راسها نورمال و لكن التنهيدة لي كتخرج بين الفينة و الأخرى كتعبر على كمية الألم لي هازاه فقلبها .. خذات تا بعض من صباغة الجدران و الشيتات ، حملو كولشي فسيكان رجعوهم للشاريو و خرجو جارينو
همسة: ماسوقيش قلب ليا على طخونسبوغ نوصل هادشي لداري
تلفون طافي .. كيسمع تلات رنات متتالية و كيتقطع الخط ، تعصب و عروقو زادو تنفخو ، ماشي فصالحو نهائيا هاد الأعصاب .. و تا الإدمان لاعب دور كبير فتقلب مزاجو ، بدا يطنطر فبلاصتو و كيحايد الخيط بالجهالة عينيه حوومر و الألم كيسري فذاتو كينهشو من داخل .. الم رهيب جد جد رهيب كيحس بروحو كتفصل عن جسدو ، الممرضة شافتو هاكاك هربات كتولول تعلم الطبيب ، القرعة دالسيروم زاج طاحت فالأرض تشخشخت زاد عفط عليها و زاد كمل علاما بيه .. غوت تا تطراساو العروق فعنقو و ضرب الطيلي مع الحيط تا تشخشخ .. دخلو يتجاراو الطبيب و الجينيرال شافو حالتو و خنزر الجنرال فالبروف
...: دير شي حاحة لي تهدنووو دااباااا واخا تعر ف تنعسووو الليل و النهااار
فين نزل راسو يشوف صدرو شهق من الابرة لي ختارقت عنقو و محتواها تفرغ فذاتو ، كان الطبيب لعب خفيف دق ليه مخدر قوي خلا قوتو تلاشى و يجي طايح للأرض نيشان عينيه كيتقلبو .. تعاونو عليه رجعو لبلاصتو شي كيداوي رجليه شي رجع كيخيط جرح الرصاصة ، تنهد الجنرال كيعض شنايفو داير يديه على خصرو غادي جاي تا خرج عندو الطبيب كيتنهد
...: خاصو يتعالج فأقرب وقت .. وكان النعاس يفيد تخليه ناعس تا ينساحب داك السم من ذاتو
...: لا ماشي حل .. خاصو يقاوم واخا الألم غايبقى ينهش فيه خاصو يقاوم
...: شحال كيبقاو هاد الأعراض؟
...: بين سبعيام تا لعشرة أيام .. الاختصاصيين لي كنتيق فيهم بلاتي يكونو هنا
...: بلاما نرسلوه لشي مركز معالجة الإدمان .. غايبقى معايا فالفيلا
...: و لكن..
...:(قاطعو) غايكون تحت عينيا و غاتكون حماية مشددة بلاما تعقب اسي البروفيسور
...: نصبرو غي تا يلتائمو جروحو .. غانبقاو نهدنوه ب "الترامادول" .. "المورفين" ماشي حل نخافو يرجع الادمان عليه هو
...: دير لي بان ليك .. المهم هو يتعالج دغيا
...: انسحاب السموم كيف قلت ليك عشرة ايام كافية واخا مرفوقة بالآلام يقدر يتجاوزها .. العلاج النفسي لي ممكن ، خاصو يبقى يتحكم فعصبيتو و مزاجو ...
...:(حرك راسو) غانحاولو معاه
حلات الباب و العمال بداو بدخلو و يحطو فالكراطن و لي ساشي تا سالاو كولشي خلصاتهم و خرجو ، تلاح ايمانويل فوق فوطوي كينهج و هي جلسات على ركابيها كتخل و تجبد فالديكورات و الحوايج فرحانة بيهم .. عندها متعة الشوبينغ فشكاال و خصوصا فاش كتشري الديكورات ، شافت فإيمانويل معوجة فمها و رجعت كتهز لي ساشي بلاتي عليها
همسة: اجي عاوني نستفو الماكلة فبلاصتها و نديرو مانتعشاو
ايمانويل: عاد الستة ديال العشية ابنادم
همسة: بحرا نوجدوه راني سطلة فالطياب
ايمانويل:(كيكفض كمامو) الطياب خليه لماليه نتي غا يتفي داكشي فبلاصتو و على هواك .. بلاتي بلاتي
مشى شعل تلفزة كيقلب كونيكطاها مع الويفي و طلق المزيكا على جهدها .. تخلعت و مشات تجري هازة وسادة كضربو لراسو بيد و يد كتنقص بيها
جا موراها كيتختل عاض على شنافتو رجع شعرها على وجهها و هبط راسها لتحت كيدي فيها و يجيب و مرة مرة يضربها بالوسادة لترمتها .. فشلها بالغوات و الضحك ماطلق منها تا رجعت حميمرة كتنهج و البسمة على محياها
ايمانويل: ايا دبا تحركي نستفو القشاوش
ضحكات بعيون لامعة كيستفو الطباسل فبلايصهم و الكيسان و الفناجن .. كل حاجة تحطها فبلاصة بتنظيم خاص و كل حاحة فكولوغ كيدايرة ، علقات المقالي و علقات لي طاس فبلاصتهم جنب لاباري ديال القهوة غوج .. كانت الكوزينة الوانها مخلطين بين الأحمر الدموي القاتم و رشيشات من الأبيض و الرمادي .. حلات الثلاجة ستفات الخضرة اللحوم الأسماك و العواصر و السقاطة دالشوكولا تما و فالبلاكارات شي حاجة بزاف ديال السقاطة ، هزات ملصقات فالغوز انديان على شكل وريدات و فراشات بدات تلصقهم فالكوزينة تا زوقاتها كاملة بهجاتها و بدات كتجمع فالوراق فرحانة
ايمانويل: بان التغيير
همسة: مزال باقي الديكورات .. قلب معايا فدوك الكراطن على لي فاز قلب
بداو يجبدو و يحطو حطات لي فاز ديال الزاج شفافين فأحجام متفاوتة تا تحط فيهم الورد ، و قادت طابلو صغير فيه بولات صغييورين مشعولين معلق تما و شموع تلاتة كبار فالقنت تاهوما .. تلاتة التريات صغار هابطين فوق صال امونجي تما و فوق الميكرو اوند حطات قراعي دالزاج خاصين بليباط و القطاني ، طبسيل كبير ستفات فيه ديسير بعدما غسلاتو حطاتو فزق الطويبلة و جبدات اصيصات فيهم الحبق حطاتهم فالسرجم ، دارت يديها على خصرها كتشوف و شارت ليه براسها
همسة:(شيرت عليه بوسادة) ماتجبدش بابا على فمك .. جر اىزمر الزمر و سرح الزمر فالزمر باش مايقطرش عليه الزمرررر المزمرررر
ايمانويل:(قرب لوجهها) و شحاال كتجي غزاالة فاش كتعصبي كوتو كوتو
بعد كيضحك و هي بقات مزييرة سنيها حممرة غاطرطق مالقات غا الفوطوي تااحت عليه بعضة و خرجت غوتة مكتومة بردت فيها غدايدها عاد بعدت كتنهج
همسة: والله لابقاتها فبوووك
وريدات و فراشات فأحجام مختالفة رسماتهم فالحيط الأبيض مزيناه و كاسرة البيوضية ديالو بالأحمر الدموي القاتم و رشيشات فألوان مختالفة ، عاونها رجعو تاني لي فوطوي فبلايصهم و بدات تحط لي فاز و الديكورات ، الوسيدات صغار و فورير على الجناب و الشموع فكيسان كبار كذلك فالأرض و شميعات صغار فوق الطويبلة ديال الزاج ، فينما كانت شي بلاصة خاوية تحط فيها شمعة ولا ديكور .. جرها ايمانويل جلسها فصالامونجي كيحط العشى و هي كتشوف فدارها و اللمعة لي كانت فعينيها شوية بشوية بدات تطفى
ايمانويل: مالك!!
همسة:(تنهدت) لا والو .. غي عييت و صافي (كانت تشوف جنب و حولت نظرها ليه جامعة يديها عندها) كنفكر ف أشنو ندير و باش نعمر وقتي ، موالفة الحركة و الروتين كل نهار يتبدل مانبقاش شادة قنت واحد و نفكر و نتحسر
ايمانويل: شنو كنتي كديري (جغم من كاسو)
همسة: كان عندي متجر فيه كولشي بالسمية ديالي .. يعني الماركة ديالي ، شووز .. كلوتتز ، ميك اب .. اكسيسوارات .. بزاف الحوايج
ايمانويل: و خليتي كلشي ورا ضهرك و جيتي لهنا ، بادية كولشي ا زيرو
همسة:(سهات فشمعة حداها و عينيها دمعو) ضروري كان خاصني نبعد
ايمانويل: نتي جبانة ..
همسة: عندك الحق (مسحت دمعة قبل ماتنزل و شافت فيه) انا ماشي قوية لدرجة نواجه بابا و نتحمل عواقب غلطي و نتحمل غذر اقرب شخص ليا
ايمانويل:(هضر بنبرة ثقيلة) نتي قوى كثر ماتصوري .. ماحدك واقفة على رجليك الا و نتي قوية و قادرة تواجهي و تحملي اي حاجة
همسة:(جمعت رجليها عندها و حجت ذقنهها على ركابيها) ايلا لحد الآن ماقادراش نتجاوز الماضي و مزال محبوسة فيه كيفاش غانواجه و نتحمل! .. ايلا لحد الآن كنكذب على راسي و نوهم عقلي بلي انا كارهة لي سمح فيا و خلاني كيفاش غانوقف على رجليا تاني!! مزال قلبي كيدق بسميتو أ إيمانويل .. واخا لي كاع داكشي لي دار فيا واخا الأثر البليغ لي خلاه خنجرو المسموم على قلبي مزال دماغي كيسافر لعندو .. عييت من هاد العذاب ، عييت مانكذب على راسي و لكن بين ثانية و لخرى كتلمع ذكرى لينا بزوج بحال البرق فعقلي .. اش غاندير
إيمانويل: ماعرفت مانقول (ساط هوا من فمو بعنف) خلي الجرح للزمن هو كفيل باش يداويه
همسة: واخا يداويه ماغايقدرش يمسح السيكاطريس ديالو .. الحل لي عندي هو نسعى لرضاة بابا و سماحتو ، ايلا رتاحيت من هاد الجانب غانرتاح تا من الجانب لاخر
تنهد و ناض لعندها بخطوات تقيلة عنقها جنب و حاط ذقنو على فروة راسها .. يالاه يومين باش عرفها .. يالاه يومين باش توكلت ليه مهمة يراقبها و تكون تحت عينيه و اي خطوة تخطيها توصل لفهد و لكن هاد البنت شي حاجة فيه تحركات لجهتها ، قلبو ضرو على حالتها و مالقى جهد باش يخفف عليها ..
إيمانويل:(فنفسو) كنواعدك غاتجاوزي هاد الحالة و ترجع الضحكة لوجهك الملائكي .. كنواعدك نبدل حزنك لسعادة و مأساتك لفرح .. غانسيك فشي حاجة سميتها عاصم ..
نهار على نهار و إيمانويل كيخفف على همسة داير جهد جهدو باش تنسى و تأقلم مع حياتها من جديد ، كل مرة جايب ليها كتاب قدو قداش تقراه ولا مخرجها يفوج عليها .. كانو فوق بيكالات كيتسابقو و الضحكة ديالها واصلة فين يا فين بسبب التكربيعة لي ضرب و التمرميدة لي تمرمدها فالغيس
همسة: اللقوة و الحلاقم و الضروووس و السخااانة تنفخ ليك شنايفك ترجعهم قد الطبل ماتقدر تا تحلهم ياااااربي قول امييين .. فضييييحة تفوو
ايمانويل: مال مك صمكة و من قبيلة وانا نبح
همسة: سهيت ا لحم الراس لي بلاني بيه الله سهييييييت (ضورت وجهو فين كانت تشوف) هانتا شوف لهيه
ايمانويل: شنو (هز كتافو وحرك راسو) كافي للبيع
همسة: زيد تبعني طاحت فبالي فكرة
ركبات فبيكالتها و تبعها هو كيتنهد و يقول الله يستر من افكار هاد المجنونة .. دخل لول لواحد من البوتيكات بدل حالتو كاملة عاد دخلو لواحد من الكافيات الشعبية خداو كابوتشينو و دارو الراس عند الراس
ايمانويل: قولي لينا هاد الفكرة لي طاحت فبالك شقفاتك
همسة:(ضرباتو لراسو) ماضحكش عليا الزمرررر .. هانتا شوف هاديك الكافي غانشريها انا نبدل ليها ديزاين و ندير مشروع جديد .. غاتولي كافي خاصة بشي حاجة سميتها شوكولا ، نديرو استثناء قهيوة لي بغاها و لكن المشروبات الاساسية يا حليب او شوكولا ولا موكاتشينو ، الكيك لي طخونش ميلفوي كووولشي ديال الشوكولا ولا شيء غير الشوكولا (حلت يديها لوحت بيهم) هرموون السعادة .. و غاتكون تا بيبليوطيك وسطها ، اي رواية رومنسية غانحطها فديك البيبليوطيك .. الكافي ديالي غاتكون خاصة بالعشاق ولا محبي المطالعة .. اه و الويفي ماغاندخلوش و ندير شي فونوغراف كبيير نحط فيه اسطوانات لأشهر المعزوفات لأشهر الموسيقيين (صفقت بيدها متحمسة) يااااي غاتكون سبيشل و ماكاينش منها زوج فبااغي كووولها
همسة:(علات عينيها فالسما كتشوف) Hamsa's chocolate ممم لا لا whisper of love (همسة حب) ولا تعرفف لقيتها .. Un peu D'amour (قليل من الحب)
ايمانويل: باااغفي un peu d'amour وااعرة .. دبا نقولك يالاه بحرا يقدنا الوقت باش نتفاهمو مع الفوندوغ
خلص ايمانويل و خرجو ببيكالاتهم تاني تا لفين شافت ديك الكافي ، تفاهمت مع الفوندوغ و دخلات تشوفها من الداخل ، كانت مزيانة و مصلوحة و مضوية .. ماناقصها تا حاجة و جاية فموقع بورفكت غي مولاها تزير جاتو فالطريق و بغى يبيعها ، و نهار لي حط الاعلان نهار سعدو و شافتها همسة .. بداو المعاملات و همسة كدور تشوف بعويناتها و دوز يديها على الاثاث و الطوابل ، الثريات الصغيورين لي نازلين من السقف و الديكورات البساط لي محطوطين .. جامعة يديها عندها كتنهد و دور ، عمرها ظنات تولي ماهي عليه دبا .. الدنيا صعيبة و امتحاناتها كثر ، جمع الكونطابل الوراق و جبد السيد السوارت كيمدهم لهمسة
...: مبروك عليك مدموزيل
همسة: مغسي .. بقاو غي معاملات بساط و صافي ياك
...: ااه غدا ندوز للبيرو نساليوهم
همسة: غانسيفط غي المحامي ديالي هو يتكلف
...: و عليه ، خليت ليك الراحة
هززت ليه راسها و هو خرج تابع الكونطابل فرحان غحين ايمانويل تلاح موراها بتعنيقة
ايمانويل: همسااا .. كيفاش هادي un peu d'amour و انا و ياك عارغين مزيااان علاقتك مع لاموغ كي دايرة
همسة:(تنطرت منو) ااوووف اووووووف منك
ايمانويل: غي كنسول صاف
همسة: ضروري زعما تحط ملح على الجرح (جلست فطبلة كتافها طايحين) الحب زوين .. خاصك غي تعرف معامن تعيشو و صافي ، يالاه ماحد الحال باقي نشوفو شي ديزاينر تعاوني على هاد الكافي
ناضت خرجات خلاتو متبع ليها العين و عاض على شنافتو نادم على السؤال لي طرحو ، لسانو مبري منو كيقول نسيها و هو يدور يدور و يرجع يبزلها من اول و جديد و جهودو كتمشي هباءا منثورا ... طلت عليه من برا و نطقت تا قفزاتو
همسة: واش غانباتو هناااا تحرك
ايمانويل: اللقوة
تبعها كيقلب فعينيه غي خرجو عطاها دقة للكتف فشلاتها و نقزت عليه بعضة فالعنق من لور خلاتو يتلوى
طارت بالبيكالة كضحك و هو موراها .. اشمن طينة هاد البنت رغم الاحزان لي مالية كيانها كتحاول تقاتل و تعيش كل نهار بنهارو ، قلبات على ديزاينر فالفون شافت واحد مبتدئ هو لي غاتقدر تفاهم معاه كتر مشات عندو للبيرو و ايمانويل كالعادة لاصق فيها بحال لحم الراس .. تفاهمت معاه يتلاقاو الصباح فالعنوان لي عطاتو و خرجو على وجهها ضحكة بليدة
همسة: ناري تحمست .. دبا هاداك الاثاث فين غانديرو ماشي هو لي باغا
ايمانويل: بيعيه ولا ديري غوبخيز مع من البوتيك لي غاتشري منها
همسة: لا مافهمتنيش
ايمانويل: ليه شنو
همسة: بغيت نعطيه لشي واحد يالاه بادي و لا نفرقو على لي سناك الصغار البساط مهم شي حاجة بحال هاكا
ايمانويل: شايطين على بوك الفلووس
همسة: يا على خرااا كي داير كتغددني قاااود تفووو
ايمانويل:(مشات كطنطر و تبعها كيجري) هموووس بلاتي .. تي بلاتييي واا اااجيي
ماتهنى تا عطاتو وجه تاني عاد شدو الطريق للموبل و تما كل واحد تلاح لدارو ، دخلات كتجر رجليها و بتعب تلاحت على الفوطوي .. خذات قسطها القليل من الراحة و ناضت بلا عكز خذات شاور و خرجات كتنشف شعرها ، لابسة بيجامة حريرية فالبلونكاسي و تقيشرات كدور بيهم .. طلقات موسيقى هادئة كيف عادتها و مشات للباراي هزات طاس دالقهوة كانت وجدات ، جرات الكتاب لي بداتو مؤخرا تكمل قرايتو و كارو كترجع بيه المزاج .. فين تخشعت مع القرايا سمعت الظقان و ناضت تزفر
وأشتاق الجزء الثالث
محتوى القصة
التنقل بين الأجزاء