بقااات كتشوف فيهم رجاء بصدمة ممتيقاااش شنو شااافت واااش فعلا بصح هادشي لي شااافت
أدم دفع نجلاء حتى جات مخبوطة فالأرض و كيشوف فرجااء لي دموعهااا هواااديين على خدودها كيف شتا فشهر يناير
هزاااات يديها و بداااات كتصفق و كيتعاالا صوت شهقااتها
رجاء : لا لا برااافو داااكشي علاش خليتيني نخرج باش دخل لبديل
أدم بصوت كانه كيحدرها من الكلام لي كتسمم بيه قلبو : رجاء
رجاء بنفعااال : رجااء شنوو ؟؟ اه رجااء شنو ؟؟
مشاات كتجري عندو و كضرب ليه فصدرو و تغوت
رجاء : هاادشي منسواا عندك ؟؟ شنو ولا كيعجبكم لي يتعرى ليكم و كالس تمثل عليا ديري زيف ديري هادي مديريش هادي
ادم بإنفعاااال : رجاء سكتيييييييي
على إثر غواتو طلعو كااع لي لتحت و كيشوفو فنجلاء لي مرمية بسوميجها فالأرض الكل شهق و حط يديه على فمو مصدومين من غير مها لي ضربات على راسها و كتقول يا ربي اشهاد الغباء لي فبنتها
رجاء و شهقاتها مالية لمكان : هئ هئ ديني لداارنا
ادم : رجاء نتي دباا معصبة خليك تا تهدني
رجاء : قلت ليك بغيت نمشي لدارنا
حنا راسو بأسى و فكر حسن يخليها ترتب أفكاارها
يالاه قربات فاطمة بغات تهضر و حبسها بيديه مقادرش يهضر خايف غا لتخرج ليه من فمو شي كلمة ماشي تال تما
مشا جمع ليها لحوايج د يومين فباليزة صغيرة و جرها من يديها تا نثراتها ليه و سبقاتو ركبات فطنوبيل و بعد دقائق كانو قدام دار ماين رجاء
غا وقفو حلات لباب د طنوبيل هو لي دار هز ليها باليزتها صغيرة غا وصلو قدام لباب وقفها بيديه
أدم : رجاء متأكدة ؟؟
رجاء كتخنزر فيه : باقي عندك لوجه لي يدوي معايا ؟
أدم : عارفك معصبة دبا مغنديش عليك و راني جبتك غاا تهدني و ترتااحي يومين انجي نديك
رجاء بتعفر : غاا حلم بلي غنجي معاك الا الخيانة
ادم :نتي عارفة و أنا عارف بلي مخنتكش و ميمكنش لبا ندير هادشي راه هي لي
رجاء : إييه ضحك عليا بجوج كلمات راني كنرضع صبعي
ادم : واخا مبغيتيش تسمعيني اوا بخاطرك
دارت يديها على خصرها و رافعة راسها لسما و كتطرطق فرجليها كتسنى زعما
شااف نضراتها البريئة لي كتصطانع فيها القوة و حركاتها مقدرش يحبس ضحكة تا بدا كيضحك
ادم : ههههه
رجاء : ماالك كضحك شفتي شي كلون؟
ادم : هههه لا غا شفت واحد الكتكوتة غضبانة
رجاء شافت فيه مصغرة عينيها : حاامض
ادم : نحليوه بسكر يالاه نرجعو لدار اهديك الله راه والله تا هي لي ترمات عليا
رجاء : يااك ترمات عليك و نتا عجبك الحاال مالك مدفعها ولا تجرها من شعكوكتها تدردبها مع دروج
نجلاء هنا دارت سادة على فمها عاد عرفات شنو خرجات على فمها عرفاتها كحالت كحالت للهم تعميها
نجلاء : هى هئ هئ اصلا كولشي بسبابك نتي لي بقيتي عليا ولد عمتك ولد عمتك تا شوفي كي رجعتيني حالتي حالة أياه أنا مصاحبة مع بايو تلث سنين هادي و قضينا الغرااض ياد
زهرة هنااا سداات عينيها بصدمة و حلاتهم كتمنى تكون كتحلم و نجلاء غاا شاافت شوفااتها لي ماشي تال لهيه بداات كترجع لور كتستاعد لعملية الهروب
مكاملاش جوج ثوااني بدات زهرة كتحنى لاارض و طاالقة حلوقهة هزاات لحجر و بدات تنيش عليها
زهرة : وااااااا هياا بنت الحراااااام بغااااااات تقتلني واااااااهي بنت الحراااام بغااات ضحك فيا العديااان واااا هي بنت الحراام شرشماات بيا لارض
نجلاء كتبكي و هاربة : واا بغيتو أمي و الله تا بغيتو
زهرة كتنيش بالحجر و تهضر و نجلاء هااربة بعضااامها و دافع على حبها لي بان فدقيقة
غااااااا هما داارو فيلم فالحومة غااا وكان البطلة ديالو هاد المرة هي نجلاء و بايو البزناز و يليق عنوان " الحب المشرشم " لهاد الفيلم
فداار عند نعيمة كاانو جاالسين كااملين فصاالون
رجاء : بابا مكاينش ؟؟
نعيمة : لا رااه مساافر أبنتي جاابك الله تونسيني نيت شوية
رجاء : شحاال غيكلس
نعيمة : شي 15 يوم و يجي قاليك توحش ترااب جدادو و واليديه
رجاء : اوا هيا نكلس معاك حتى يجي
ادم غا سمعها كان يلاه حط الكاس د أتاي ففمو تقج و بدا كيكحب
مشات غاديا لكوزينة و كضحك عليه غااا تفكراات فااش تحط فمو ففم ديك الماسخة لي باستو دغيا خنزرات واخا عارفة و متأكدة بلي هي لي ترمات عليه بلعاني و ليني فنظرها هو لي عطاها فرصة تقرب ليه و مال غاا دخل يكركب مها مع دروج
عمرات لكاس ديال لماء و كتخبط فالماعن
رجاء : يشرب فيه سم
مشات عطااتو شرب و هزاات عينيها كتخنزر فيه تاني
نعيمة لي شافتها كي كتشوف فيه و حنحنات
نعيمة : احم ولدي ادم هز الحلوى شفتك مكليتي والو
ادم : هاا هو قدامي اخالتي كناكل ربي يخليك
رجاء : راه غيمشي عليك الحال
نعيمة شافت فرجاء بواحد تخنزيرة كون صابت كون طيراتها من بلاصتها
ادم شاف فنعيمة : نخليك دبا أخالتي تباتي فراحة الله
ناضت رجاء من موراه هو لي باس لنعيمة يديها ودعها و غا نزلو دروج يالاه بغات تحل ليه الباب
تا زدحها مع الحيط
ادم بتخنزيرة حيث عيقات عليه : علاش كتقلبي فهاد النهار ؟؟
رجاء بقاااا كتشوف فييه ساااهية ففمو لي لونو الوردي ولا كيجدب بزاااااف أما هو كان محاافظ على تخنزيرتو و كيتسناها اشغتقول حتى دورات
يديها مع عنقو جابت ليه تبوريشة مقدرااتش تقاوم الإنجداب لي كتحس بيه من جهتو فهاد لحضة قربان راسو لعندها و دمجاات شفايفها مع شفايفو بقبلة حنينة بزاااف متصت بيها كااع غضبو و خلاتو يتجاوب معاها حتى سرعاان متفكرات بلي خلا شي وحدة اخرى تبوسو من غيرها و دفعاتو
رجاء :بعد مني متقصنيش بفمك لي قااصتو وحدة أخرى
شااف فيها ادم بصدمة دهشراتو : أنا لي منقربش ليك
حركات رجاء راسها بالإيجاب و سنطيحة عندها دخل بيها فثور : اه نتا لفاام لمشروكين معندي مندير بيهم
هنا ادم مبقاش قاد يصبر طلقها بواحد ضحكة خلاتها مغوبشة ها هي وراسها
ادم :ههههه واخا انا انبدلو باش يولي غا ديالك و نجي نبوسك
رجاء بقات كتشوف فيه تاني و غا ركزاات شوفة على نيفو دورات وجهها لجهة لوخرى باشما تشوفوش
رجاء : اصلا كااع نيفك هكاك داير طويل و رقيق كي ستيلو
رجاء : تاا والله و تشربو دردك ( كينة كيغلضو بيها البقر ) ميغلاط
ادم هز يديه لسما : ياا ربي صبر ايوب
أدم : هاني بعد غدا انرجع نديك متقلقيش ماماك و ديري عقلك
باسها فحنكها بزربة و مشااا ركب فلوطو مخليها كتنقر
رجاء : ديري عقلك بحالا بنت ليه برهوشة اوا هذا و قاليك يرجع يديني اصلا شكون قاليك انبغي نرجع معاك
طلعااات ليبتها كتشتف يااالاه بغاات تجلس فوق نموسيتها سمعات لغوات
نعيمة : رجااااااااااااااء
غا سمعات رجاء غواتها نااضت قافزة مشات عندها كتجري
رجاء : ياا شي باس مكاين أمي ؟؟
نعيمة : جلس لارض ( جلسات معوداتش معاها لهضرة )
نعيمة : قوليا نتيا كتجري على راجل بلا حشمة بلا حيا و قدام عيني هااكا ربيتك و زايداها نافخة ريشك دوي ؟؟
غاااا سمعاات رجاء كلامها طلقاات دموعها تقول كانت حاطاهم حدا عينيها كتسنى غا لي يجبدها
رجاء : هئ هئ بغيت نطلق امي بغيت نطلق
نعيمة غا سمعااتها قفزات من بلاصتها: اهيا وااش عارفة رااسك شنو كتقولي ولا لا ؟ تي عارفة عائلتنا مفيهاش لبنات لي يطلقو واش عرفتي و يسمعك باك يحيدك من الحالة المدنية فراسك
رجاء :هى هئ ادم حصلتو كيخوني
نعيمة : تي هاد الهضرة لي كتقولي راه ميمكنش تسبيها فدري محشمتيش
رجاء : سمعيني بعدا نعاود ليك دبااا ( .....)
عااوداات ليها كولشي من لول تال لخر من اول نهار لبسات نجلاء فيه تقزاب لمناتفة اشوقع فالبيت كولشي منسااات تا حرف مجاات فين تكمل كلامها تاا حسات بالقرصة ديال مها ففخضها
نعيمة : نوظي تكعدي من حدايا بن الهبيلة لوخرى معرفت راسي والدا بنت ولا قنية لقنية و كتفكر عليك تي راه بحالا كنتي كتقولي ليها نيت ها راجلي لعاجبك خوديه ديك ربحي بيه اويلي غا قولو ليا كيغندب انا على المسطية لوخرى
رجاء : و صاافي أمي زدتي فيه
نعيمة :شوفي نتي نقوليك غدااا خرجي عليا من دااري سيري الالة عند راجلك فرقينس عليك
رجاء :هئ هئ ياك امي هادشي منسواا عندك كااع هاادشي هزااه فقلبك من جهة اصلا انا عاارفة معندي زهر و لي قصدتو كيعطيني بظهر خليني بعدا غاا نرجع بكرامتي شنو غنقوليه هانا كنت غضبانة و هانا تفشيت خليه بعدا غا يجي يحزرني
نعيمة : اوا ها ودني منك و هادشي ميتعاودش مرة أخرى
الشمس غربااات معلنة على بدااية بروز القمر و السماء تلونت بلونها الأسود كتعلن على وصول وقت النوم كانت نعيمة نعسااات شبعات نعاس و وحد الهبيلة أخرى فبيتها غا كتقلب لهاد جيه و لهاد جيه حلف نعاس لازارها كفاش غتنعس فوق صوف الوسادة و هي مولفة تنعس فوق الحجرة ضخمة لي كتحتاضنها بقات سااهية مدة و شادة تليفون
رجاء : نعيط ليه ... لااا منعيطش ليه نعيط ليه .. اويلي على مالي مدلولة على مالو ميعيط هو اوا صافي
فمكااان اخر
كان حتى هو مستلقي على فراشو لي كيحس بيه خاوي بلا بيها وكلما دوز وجهو لشي بلاصة كيبان ليه خيالها و لا ضحكتها ولا شقاوتها ولا حركاتها
ناض من فوق فراشو و جلس بجلستو الرجولية فارق رجليه محس برااسو غا هاز تليفون و مدوز راقمها
عند رجاء غاا شافتو كيصوني قفزات من بلاصتها و بقوة الفرحة بغات تجاوب فالبلاصة و هي تفكر
رجاء : لا لا لا مخصنيش نجاوب دبا خليه يزيد يصوني شوية
جلسات مربعة رجليها فوق سريرها و كتلعب بيهم
حتى تقطع الخط و عاود صونو مرة أخرى
كحبات واحد الكحبة خرجات بيها صوت عبد القادر من حلقها و قادات الميزاجور على حساب البنت رجاء الكيوت و بطل تحلوين نطقات : ألوووو
جبدات نعيمة الدجاج البلدي مع ثلاجة و البصلة و العدس و المساخن إستعدادا ل رفيسة ..
أما رجاء مفروشة ف الأرض ولكصعة قدامها فيها الطحين و الماء .. دير مسمن الرفيسة ..
عند أدم ..
جالس فمكتبه ..
جالس فمكتبه ساهي معارف أش يدير ولا كيفاش يتصرف .. متأكد أنها فاهمة كلشي صحيح ومزالة شادة ضد و العكس ..
تنهد بضيق وهز سوارت السيارة و جاكيط و خرج غادي و معارف راسو فين غادي ..اش يدير باش يصالحها هو برر موقفه و أن لمشكل ماشي منه ورجاء عاد مزادت فيه وكشرات على نيابها أثناء وصول منزل أبيها ..!
سدات نعيمة على الكوكوط من بعد ما سالات كلشي .. وحتى رجاء سالات ..
واقفة نعيمة كتقاد عجينة باش ديرها ف لمقلة ورجاء جالسة على كرسي كترد نفس ..من قوة الدليك
نعيمة : وعلى لله هاد رفيسة تسخن ليك الوالدة تنوضي تولدي شي حفيد و تفرحي راجلك ..
خرجات رجااء فيها عينيها ..
نعيمة : مالكي قريبة ضريبتي نوضي ولدي و كبري ولادك معاك ..بحال ختك هدى
رجاء : إن شاء لله إن شاء لله
نعيمة : ايوا تبقاي تهضري تما تحت نيفك .. اري تلفون نعيط على فاطمة ولحاجة يجيو يتغداو
رجاء : اويييلي واش أمي تسطيتي درتي واحد دقة د رفيسة باغا تعيطي لحومة كاملة يهديك لله
شادين الضحكة بسيف مولفين مع سميرة هادشي مرة مرة ريزو كيهرب ليها ..
سميرة : اوا مع كنهتم بيهم بزاف كنت ديما العكار الفاسي و الصابون لبلدي و تحميرة كيوليو حمرين بحال هاد لون (شيرات لمخدة صالون ف لكرونة) خطيبي قال ليا غنتزوجك غير على قبلهم ماشي بحالك (هزات يديها بحال كتجننهاا ) حووو فيك
تسمع الدقان ف الباب من جديد .. ناضت كيف لعادة نعيمة تفتح كان داخل ادم مع اب رجاء ..لي رجع من السفر
تبسم ليها ادم وسلم عليها ودخلو مجموعين لصالون ..
منين دخل ادم ورجاء غير متبعة تحركاته بشوق .. شداتها لبكية تصدمات فراسها ..
سلم عليها ادم و عينيه فجيهة اخرة ..
تجبد النقاش عن حال و أحوال البادية مع سي دريس
طول الوقت ورجاء غا حاضية ادم لي مشافش فيها نهائيا .. كيتناقش مع دريس عن جميع المعلومات .. السياسية .. إقتصادية أي حاجة
تجمعو على طبلة يخطو قصرية الرفيسة
جمعات رجاء الطبلة و ادم متبع غير بنص عينيه وجلسات حدا حنان ..
جات نعيمة هازة لكصعة و الدخاخن و الريحة كتشهي ريوكها خرجو ..
فاطمة : لله لله تبارك لله عليك ا نعيمة
نعيمة : مرحبا مرحبا يالاه بسم لله
بدات رجاء كتاكل بدون شعور الدغمة لولة و الثانية و تبنن .. هزات الثالثة كتمضغ وتبنن حتى عطاها مذاق الثومة وحدة كاملة كتمضغها خسرات سيفتها و حسات بدموع غينزلو ليها أكره حاجة عندها هي ثومة
وهي الرفيسة كانت غتموت وتآكلها مشهياها بزاااف ..
حطات الفورشيط من يديها بزربة غادة ف اتجاه لدوش شادة دموعها خلات اعين لكل عليها ..
ادم(ببرود) : صافي يقادو وحدة بلا ثومة يالاه نوضي وليتي على سبة .. ياك عاد صباح هضرتي فرحانة !
رجاء : يااك
ادم (شد فيديها كينوضها) ونوضي خلاص
شد فيها منوضها يالاه جات توقف مقادة حتى ضربها الضو ف أسفل كرشها ..
رجااء : أااااااااي ..
ادم : رجاء مالك اش واقع ليك ..
رجاء : كرشي كرشي ..مقداش نوقف ..
ادم : زيدي ..واش لحريق بزااف ؟
رجاء : اهئ كنتقطع
هزها فيديه خارج بسرعة داز على الصالون كيجري و رجاء كتغوت لحريق عاطيها بجهد ..
خرجات نعيمة و فاطمة مخلوعين ..
بزربة حطها لور و ركبات نعيمة لي كتسول وتغوت ادم بحال مصمك .. نعيمة داخلة و لفرشيطة فيديها ..أما فاطمة خلاص طرف د لخبز فيديها
نعيمة : أرسوا لله كيف وقع ليك ابنتي كنتي صحة سلام ..
رجاء:اهئ ماما كرشييي
دقائق قليلة و كانو دخلو لسبيطار خاص وسط لمدينة .. نيشان دخلوها
بقاو واقفين ف لممر .. التوثر .. الضغط .. الخوف كلشي تجمع عليه
واقفين نعيمة دايرة يديها على خدها خايفة على بنتها ب بيجامتها واقفة وزيف حياتي على راسها و ريحة الرفيسة كضرب من بعيد ..
الدقائق كتمر عليه كأنه عام طوووويل عقله مبلوكي مقادرش يفكر ..
دقائق قليلة و خرج الدكتور لي شرف على حالتها حيد ليكَات الطبية من يديه وشاف ناحيتهم ..
الدكتور : نتوما عائلة هاد لبنت ؟
نطقات نعيمة بسرعة ..
نعيمة : اه اه هوما حنا أسيدي
طول شوفة فيهم ونطق ب أسف ..
نطق الدكتور ب أسف ..
د.ك : قبل كل شيء بعدا الحمد لله على سلامتها ماشي شي حاجة لي خطيرة .. غير هو كلات شي حاجة سخونة و موافقتهاش ومصالحاش ليها هي حاليا .. لأن خطر على المرأة الحاملة و خصوصا ف الأشهر الأولى من الحمل
نعيمة : حمممل !!
د.ك: اه مبروك عليكم وردو معاها لبال والحمد لله على سلامتها مرة أخرى ..
حمد لله وشكره على النعمة و الذرية لي عطاه سيدي ربي قلبه كيرفر ب الفرحة إحساس فشكل ..
فاطمة : مبروك عليكم اولدي لله على فرحة وأخيرا الدار غتعمر ب حفايدي الحمد لله الحمد لله
نعيمة : اليوم بالنسبة لينا عيد ياربي تجيبه على خير ياربي
ادم : الحمد لله ، يالاه ندخلو
دخلو لغرفة فين ناعسة رجاء كانت فاتحة عينيها وكتشوف ف سقف و الصيروم معلق لاصق فيديها ..
نعيمة : لله ابنتي على فرحة الله يفرحك دنيا و اخرة
تبسمات لها رجاء حولات نضرها ل ادم واقف كيشوف فيها و عينيه باينة فيهم الفرحة كيشوف فيها و مبتاسم وهي أيضا مبتاسمة ..
فاطمة : مبروك ابنتي الله يجعله من الذرية الصالحة يارب
رجاء : امين اخالتي .. لله يبارك فيكم
خرجو فاطمة ونعيمة لجردة يتسناو دريس و سميرة لي خرجو و خلاوهم معترفين والو ..
~فالغرفة رجاء &ادم ~
قرب لناحيتها وهو مبتاسم شاف فيها ونطق بهدوء ..
ادم :مبروك علينا ..
رجاء خنزرات فيه : مامشيتي حتى درتي لي فبالك ..
ادم تبسم ليها : مول النية كيربح ازين ..
رجاء : ياك أسيدي ..
ادم : ايمتا توصل هاد 9 شهور ونهز بنتي ولا ولدي بين يدي
رجاء : قريب قريب ليام كطير .. عاد شهوور لي دازت كنت كنقز و من دار ليسي و لمول وهاد شهر ها أنا مزوجة و حاملة ..
بايو : لا لا بصحة خااصني نمشي نشوف ساطة تعطلت عليه
خرجو مشاااو توجهو نيشااان لداار لقاااوهم مجموعين فصااالون و دخلو جلسو معاهم كيشربو اتاي و يتحدثو فرحاانيين بخبر حمل رجاء مقاادااهم فرحة
شاااف ادم بحنان قرب تاال عندها و نطق فودنيها
ادم :لاهيرجاء متخليهاش تخرج دبا
حركات حنان رااسها بالإيجاب معرفاتش علاش نااوي خووها تا شاافت فرجاء كتشوف فيها اتاكلها بعينيها
رجاء: اشقاااليك خوك ؟؟
حنان : هاانتي قلتيها خويا اوا دخلي سوق رااسك
رجاء: هااايهااي تعلمتي تقمعي ابنتي
حنان : ههههه يا شفتي نااس تطورو
عند ادم خرج لقدام لباب بان ليه صااحبو لي كان كيهضر معاه فتلي فاش كان فالمستشفى
سلم عليه و شد من عندو وااحد شاسية باالأسود بااينة فيها عااامر و وااحد الكارطونة
ادم : شكراااا منسااش لييك هاادشي
الشخص : واايلي اصاحبي كنقوليك مبيناتناش ياه
طلع ادم مباااشرة لبيت و حل شاااسي ليجاب ليه صااحبو
حل كرطونة جبد منها طورطة حطها فوق الطبلة
و جبد سبيبيطات زوينين كيوت ديال دراري صغار وحدين بزرق ووحدين بالغوز حطهم تاا هوما فوق طبلة و جبد الورد حتى هو زين بيه الطبلة من الفوق و رمااه فالارض مشاا حل الماريو جبد لحاف جديد بالبيض و دااخل فيه الذهبي و داارو لنااموسية قااد حتى الوسايد ديالو لي كانت فيهم رشمة لوسط على شكل الوشم الامازيغي و رمى حتى فوقها الورد خفف الإضااءة و ستف شموو فالأرض شعلهم و شد البوم د تصااور حطو فوقها وجبد شي صور د دراري صغار لصقهم
فالحيوط جاب سلوم صغيرة و ركب نجمات كيشعلو بالضوء فليل فالصقف و بقات ليه اخر خطوة مشا لماريو ديالها كيشوف فالكساوي لي شرى ليها فدهااز على ذوقو و جبد وحدة بالأسود و كتلمع بالبريون تصميمها سامبل و كتجي ملبوسة بتاسم هااد الكسوة بالضبط كان بغاها تلبسها غاا ليه بوحدو و حطها فوق نموسية
ياالاه حل الباب بغا يخرج تا ضرب فيها و مع قصيرة عليه جاات مزدوحة على صدرو
رجاء :أي قصحتيني
ادم : راه نتي لي دخلتي فيا
رجاء : اييه اييه
يالاه بغات دخل لبيت تا سدها
رجاء : حيد خليني ندخل
ادم : نتعشااو بعدا عاد نطلعو
رجاء : حيد بعدا بغيت ندخل لبيتو
ادم بقا كيدور فعينيه اتخصر ليه كولشي بقا كيفكر و دغيا دورها زاادحها على الباب
بتاسم و باسها فبلاصة القرصة و جرها من يديها داخل بيها للبيت دخلها هي لولة و شدها من كتافها هي لي غااا شاافت زواق لي دار فالبيت حطات يديها على فمها و شهقات
رجاء : واااو ادم هااادشي واااعر بزااااف
ادم ببتسامتو لي مكتفارقوش قرب لعندها و طبع قبلة على فمها
ادم : مبروك علينا أمراتي العزيزة
رجاء كمشات غوباشتها و بدات كتكلم مع راسها
" اشهاد لفقيه زعما واش مكيعرفش يتعنب مكاين لا حبي لا كبيدة لاصق ليا غاا فمراتي لعزيزة "
قربات لعندو بخطواات تابثة و حطات يديها على عنقو تعلات على طرااف صبااعها و باصتو بوشة هاادئة فحنكو بورشااتو ببوستها
رجاء : شكراا بزاااف حبيبة ديالي كنبغيك ❤
أدم غا بدات كلامها بدا كيطلع فيها و ينزل كتافى فقط بانه يحرك راسو بالإيماء
رجاء دغيا تقرصاات و بدات كتبكي : هئ هئ شنو دبا قمعة هادي ولا شنو نتا كعما كتبغيني
ادم دهشراتو : وااش من نيتك ا رجاء وااش لحب عندك هو يقوليك شي حد كنبغيك راه الحب بالأفعال الا غا الهضرة راه كولشي كيعرف ليها
رجاء خرجو من عينيها القلوبة :لحلوى فينهاا لحلوى ؟؟
غاا شاافتها جراات بلا مقدمات جراات كرسي و جلساات فوقو وهزات لفرشيط و بدات كل ياما تاكل تكات عليها كاملة مهزات راسها تا سالاتها بوحدها اما ادم بقا غا حاضيها و كيبتاسم اتحمقو هاد البنت
رجاء : اححح الحمد الله عااد رتاحيت
ادم :اييه و فين حقي
رجاء : و الله ما انا ولدك لي كلاه
ادم قرب ليها و باسها فعنقها : شكون قاليك غيكون غا واحد ؟
رجاء هزاات سبيبيطات لي كانو تما : جوج دري و بنت عائشة و بلال
ادم : امم ختاريتي سميات بلا بيا
رجاء : لا زعما غا قتارحت حتى نتا تقدر تسمي لي بغيتي
ادم : ليرزقنا غا الذرية الصالحة لأسماء ماشي مهمين
رجاء : اكيد ايطلعو صالحين و هوما عندهم اب فحالك
شااف فجهة الكسوة لي ختار ليها قبيلة و جرها من يديها
ادم : بغيت نشوفها كي غتجيك
رجاء : دقيقة هاني جايا
مشات لدوش تبدل فيه دغيا حيدات حوايجها و لبسااتها جااتها كيوت بزااف طلقات شعرها ولبسات سنيديلة نازلة بالاسود سامبل و فيها وريدات بالاسود كذلك شافت وجهها فالمراية و هزات عكر بالكرونة دارتو و دارت ايلاينر
و خرجات عندو غاا شاافها بقا حال فمو قرب ليها بخطى تابثة و حط يديه على حنكها كيدوز يديه الخشنة عليه ببطئ ركز شوفة فشفايفها و قرب ليها متص كاع العكر لي فيهم عاد بعد و بدا كيتأمل فوجهها مرة اخرى
ادم : شفايفك بلونهم طبيعي حسن
محسش على رااسو حتى كاان داافعها الناموسية و غاطسين فعااالمهم الخاص المليئ بالحب و المشااعر كاان موحشها بزاااف تقول مشافهاش منذ عقود و حتى هي كذلك لي الهرمونات د الحمل لاعبين دور أخر فانهم يزيدو من رغبتها خلاها تحس براسها كأنها اميرة فوسط قصرها الوردي
أصبحنا و اصبح الملك لله
فااقت رجاء لي غا حلات عينيها مبانش ليها حداها هزات سااعتها تشوف شحال و حلات فمها معاها
حنان : تي راني باقا حداك شفتك بغيتي تبداي تبكي عليا هنا اشنو اتهضري ليا دبا مع خويا
حطات رجاء يديها على قادومتها بحالا كتفكر : آمممم حزريني و نفكر
حنان :باالييييز صاافي واافقتي لعز كنت عارفاك رجولة
رجاء : ليستر زيد زيد بعدا شنو غتلبسي غدا ؟؟
حنان :مزاال مفكرت
رجاء :اوا يالاه نشوفو اشكتسنااي
أيام و أسابيع و شعور دازت ..رجااء هاا هي ليوم متقلة و فشهرهاا تااسع كرشهاا قربات توصل لفمها و بعض علامات الكنف كتزين حنيكاتها
كااان صدااع بزااااف فداار و شي دااخل شي خاارج علاش لا و ليوم العرس د حنان مدللة اخيها
لي كيعاملها فحاال الماء القليل و عمرها شافت منو العيب ها هي ليوم اتزوج بالشخص لي كتبغي
و صبر معاها و صبرات معاه عمرو طلب منها شي حاجة فالحراام و هذاا هو الحب الحقيقي كيكون حب من الدااخل سااهل باش تبغي البنت بحال حبيبتك ولكن لي صعيب انك تبغيها و تصونها بحال ختك
خرجاات رجاء من بيتها حاطة يديها على ضهرها كتمشى غاا بزز مفرقة رجليها و لابسة كسوة وااسعة بالسماوي بقات كتجر فرجليها تا وصلات لبيت حنان لي كانت وااقفة الكوافورة فوق راسها كتقااد ليها و مجموعين عليها البناات و كيهضرو و يضحكو لي كانت بيناتهم حتى سميرة و نجلاء لي طلبات سماحة من العائلة هي و مها بعدما جا خطبها بايو من دارهم .. جمع راسو من بعد ما نصحو ادم و وراه الطريق الصحيح و عاونو يدير مشروع بسيط يخدم على راسو .. و نجلاء لي كطلب من لله يسمح ليها على الفعلة لي دارت
حنان : رجااء مزااال ملبستي قفطانك ؟؟
رجاء : كتشوفيني حاالتي غاا حالة القفطان دبا
حنان : وايلي اصاحبتي ضروري تلبسي
رجاء : يكون خير إنشاء الله
سميرة : ناااري يا حنان قفرتيها موك عرفتي ليلة دخلة كي كتكون اترجع بيتك عامرة كاملها دم
نجلاء : تي رااه سناو لعقد ديك سيمانة تلقى واا قداو الغراض يااد ا سوسن
حنان : اوااااااا لهلا يحييك بوسة هي لخرا مخليتوش يقيصني بيها مزيان تبارك الله رااه خت الفقيه هادي وجهك عالله
رجاء : اممم طفرتيه زعما خفتك غااا لا تصدقي جاراه ليوم من وسط ناش تقولي ليه عطيني حقي ليحفضك راني مزروبة و نتي كطيري
الكل : هههههه
بعد دقائق و بعدما جات عائلة العريس كولشي فرح لفرح حنان كاان كولشي فالمستوى المطلوب و ادم مبخلش على ختو من تاا حااجة غااا كيشري و يحط داايرين ما فجهدهم بااش يطلع كولشي مزياان
دااارو ليهم لغدااا دجااج محمر و لحم بالبرقوق و سفة و ديسير حطو البانان و ليمون تفاح و بوعويدة كولشي موتب و منظم
وصوت الفقهاء كيتسمع آيات قرآنية
بعدما سلااو الأكل رجال مشاو بقاو غا لي من العائلة جلسو فصالون مجمعين و معاهم ادم مدوزين جماعتهم بكاس د اتاي و الفواكه الجافة
تجمعو لعياالات كاملين فبيت وااحد و العروسة مجلسينها فبلاصتها يديداتها منقوشين بالنقش الصحراوي الأصيل لي ختارتو على دوقها لابسة كسوة د العرائس بالأبيض لي كانت خاصة بالمتحجبات و وجهها مخدوم مزيان بالماكياج طااح عليها سر جاات غزاالة مشاء الله
شدو ليك العيالات الطعاارج و الكيسان الطباسل و كيشطحو و يردحو غا بيناتهم سادين عليهم البيت بشما يتسمعش صدااعهم لعند الرجال
كااانت رجاء حتى هي كتشطح بيديها لابسة قفطاان بالخزي وتااها و جا معاها و دايرة معاه زيف بالذهبي و مكتافية بمكياج هاادئ و بتسامتها لي على وجهها عااطيااها اشراقة من نوع خااص
كانت كل مرة كتعض على شفايفها بسبب الألم
هاد الشيء لي ولات كتحس بيه مؤخرا و عادي بنسبة لحواامل حتى كتشد فكرشهااا فخطراااا
مقادراش تزيد تصبر
و غوتات مخلية لكل يلتافت ليها
رجاء : أااااااااااااي أداااااااااااااااااام
كان فصاالون اخر خاص ب الرجال كيف سمع صوتها و غواتها دخل بسرعة ممسوق لحد كانت نعيمة شاداها و كدلك فاطمة .. هزها واخا تقيلة زادت ف الوزن بسبب الحمل و ثقل كرشها ..
نيشان لكلنيك فين كانت متبعة مع دكتورة مشرفة على حالتها ..
دخلوها نيشان لبلوك ..
لإحساس لثاني مرة يتكرر نهار اول لي عرف حملها ودابا غير دابا كيطلب من لله تفك على خير و مشوق يشوف إبنته ولا ولده لحد الأن معارفينش جنس الجنين خلاوها مفاجئة ..
خرجات الدكتورة و إبتسامة على محياها ..
دكتورة : الحمد لله على سلامة رجاء السي ادم مبروك ليك لوليد يتربى فعزكم ان شاء لله و يكون من الذرية الصالحة ..
عينيه خرجو من الفرحة شحال كان كيتمنى يكون عنده ولد وشحال دعا فصلاته وربي مخيبوش ..يعوض فراغ توأم ديالو و يسميه على إسمه ~يوسف~
نعيمة : الحمد لله الحمد لله لي تفگات على خير نقدرو ندخلو الدكتورة ..
الدكتورة : بطبيعة الحال غير هو متعطلوش رجاء خاصها الراحة ..
دخلو لغرفة عند رجاء دخلات فقط نعيمة و ادم و فاطمة و عينيهم كيبريو من الفرحة ..
كانت مجبدة على السرير ناعسة وجها اصفر و الصيروم معلق فيديها توجه ناحيتها ب إبتسامة قبل جبينها بحب ..وشد ليها فيديها ..كيواسيها وهي ساكتة كتشوف فيه بهدوء ..
زوجوني فقيه الجامع الجزء السادس والأخير
محتوى القصة
التنقل بين الأجزاء