حبك جهنم ثلوج الجزء 14

من تأليف Ikram Pancholi
2020

محتوى القصة

رواية حبك جهنم ثلوج

لمقدمة : عينيك غرغرو و كتهدري بصوت مبحوح واش توحشتيه ؟ 
بقات كتشوف بيها بقوة شوية هبطات راسها كتبكي مرضياش قدام لكاميرا .. كتفات تخشي راسها وسط ايديها كتنخصص بصوت مقهور
لمقدمة بأسى تلفات معرفات متدير حتى شار ليها لمخرج بإيدو عاد فهماتو و نطقات : مشاهدينا فاصل و نواصل 
تطقع لمباشر و تدار الإشهار داك الساعة 
لمقدمة كتنهد : آنسة ثلوج سمحي ليا فكرتك .. هادشي مغاديش اتعاود
ثلوج هزات راسها لقات الطاقم ماد ليها كلينيكس خداتو من عندهم و مسحات دموعها مع شهقات خفاف مرة مرة .. غا سكتات جات لعندها لميكاب ارتيست قادت ليها لميكاب لي خسر و مشات رجعات لبلاصتها 
لمقدمة : نكملو 

ثلوج كتسوط على وجها بإيديها باش تنفس حتى تهدنات عاد نطقات بصوت هادئ : وي نكملو 
شارت لمقدمة لمخرج باش اواصلو لبرنامج و داكشي لي كان .. بدات لمقدمة كتطرح أسئلة على لحياة لعملية ديال ثلوج و بعدات ليها على لحياة لعاطفية تحسبا لا تبكي عوتاني قدام لكاميرا 
لمقدمة : مجاوكش عروض باش تقدمي شي برنامج إخباري 
ثلوج : جاو و رفضت 
لمقدمة بفضول : علاش !

ثلوج : ولفت أنه إلا خديت شي حاجة خاص نقد بييها و تجربتي باقا كتبان ليا مكفياش باش نتاقل لهاد لمستوى 

لمقدمة : شخصيا واثقة إلا عطيتي لراسك فرصة اتنجحي 
ثلوج بابتسامة بشوشة : إلا كتاب من هنا لقدام مرحبا 
لمقدمة : ثلوج الناجي إلا خيرتك ما بين كونك أنفليونسر فالأنسطا و ما بين خدمتك لعملية شنو تختاري 

ثلوج بدات كتضحك بشوية : شوفي باش نوضح واحد لحاجة مغلوطة عند الناس .. حياتي لعملية بوحدها و كنخدم عليها درجة بدرجة و مكنتلاحش فشي حاجة مقداش عليها .. كيعجبني التحدي بيان سييغ ولكن خاص نكون واجدة ليه داكووغ .. و بالنسبة لأنسطا فين كنتقرب من الناس و كنخلق واحد لعالم وردي كيريحني .. فين نقدر نكون انا على طبيعتي ماشي كوني صحفية .. بزاف دلمرات كنزل دي فيديو كنعطي فيهم النصائح ولا شي حاجة ستعملتها و عجباتني ولا شي حاجة كتضر بالناس إلا ستعملوها كنحذرهم .. امكن لعفوية ديالي لي خلاتني نتقرب منهم .. اااه و نسيت حاجة أخرى كين لي عند بالو دوك الإشهارات و الإعلانات لي كندير لشركات كنتخلص عليهم .. كنقوليهم نو مكنتخلصش حيت مباغاش .. الأنسطا واحد لمكان لي كنشدو وقت لفراغ ديالي و ممهتماش من لفلوس لي كيدخل ليا عكس خدمتي لي كندمر عليها 

لمقدمة : و لكن لاحظنا فاش تعرفتي بزاف مابين لفلورز بداو حتى هما كيتطالعو على مقالاتك و كيطلبو منك تباني فالتيفي .. علاش رافضة تباني فيه 

ثلوج بابتسامة : ماشي أي واحد خاص ابان فالتيفي .. لي فعلا صنع شي حاجة فحياتو لي خاص إبان . شي حاجة اتلامس قلوب الناس و تجدب نضرهم
لمقدمة : و هانتي ليوم بنتي فالتيفي !
ثلوج بعفوية و مع ابتسامة جدابة : امكن حيت كنستاهل هه ! 
لمقدمة : لاحظت لي على قلبك كتقوليه 
ثلوج : وي مكنافقش .. امكن هادشي هو لي خرب ليا حياتي شحال هادا 
لمقدمة طولات فيها الشوفة و رجعات نطقات : شنو تبغي تقولي لمشاهدين و متتبعين ديالك 
ثلوج : انقولهم شكرا مرة أخرى .. و انقولهم غادي نضرب ليكم موعد مع مفاجأة مخبياها لييهم سييغ أنها اتعجبهم 
لمقدمة : متلمحيش لينا متلا ! 
ثلوج : هههه نو .. مغاديش تجرو ليا لساني غا تهناو 
لمقدمة بدات كتضحك : ثلوج عجبني لحال حيت كنتي ضيفة عندنا و سمحي لينا حيت بكيناك
ثلوج بعفوية : حتى انا فرحت حيت دوزت وقت ممتع معاك و بالنسبة لبكا عادي هههه .. كاع الناس كتبكي 
لمقدمة بتاسمت ليها و رجعات شافت فالكاميرا مباشرة : مشاهدينا هاكة انكونو وصلنا لآخر حلقتنا ملتقانا قريبا مع ضيف جديد و أسئلة جداد .. نهاركم مبروك 

ثلوج غا تسالا لبرنامج جمعات لوقفة حتى كيوقف عليها لمخرج فرحان بمجيأها : ثلوج الناجي فرصة سعيدة 
ثلوج بلباقة : و انا اسعد .. خاص نمشي شكرا على الدعوة 

ودعات الطاقم بلطف و إبتسامة بشوشة عاد خرجات من لمكان بخطوات سريعة كتشوف فساعتها ليدوية معصبة حيت تعطلات على ولادها .. وقيتة لغدا هادي و خاص اخرجو من ليكول دابا اتغداو .. غا وصلات حدا طموبيلتها قفزات على لفران لي تضرب قريب ليها 


غا وصلات حدا طموبيلتها قفزات على لفران لي تضرب قريب ليها .. تلافتت مفزوعة حاطة ايدها على قلبها مخلوعة غا بانو ليها هبطو كيتجراو من الطموبيل و الضحكة على وجهم متحمسين .. بتاسمات ليهم و تحدرات لمستواهم عنقاتهم كارزة عليهم 
ثلوج كتبوس فكلا واحد فيهم : شكون طلب جداتكم تضرب هاد لفران هممم ! 
زياد و يزيد كيدورو فعينيهم 
زياد : هو امامي 
يزيد خرج عينيه مصدوم : عنداك تيقي اماما هو و الله هو .. قال لزداتيي " لجداتي " ضربي فران واعر نخلعو ماما 
زياد حس بالخطاوي كيقربو لعندهم بعد من ثلوج و تلافت كيتبوحط : انا قلت ليك اجداتي ضربي فران .. يزيد كيكدب 
يزيد موسع عينيه : لا اماما هو لي كيكدب 
ثلوج : ششش صافي صافيي 
هزات عينيها لعندها مبتاسمة : باينة عذبوك فالطريق راه مكيسكتوش امدام سكارليت 
سكارليت بابتسامة : منوياش تحيدي هاد مدام 

تحدرات كتمسح على شعرهم بحنان : عرفتك اتعطلي و مشيت جبتهم .. قاليك والو نمشيو نشوفو ماماتنا 
ثلوج تنهدات : مساليتش بكري .. مزيان ملي جبتيهم 
بتاسمات و شافت فولادها : نمشيو نتغداو ياكو ؟
زياد بحماس : وااو ياااس مامي ياااس 
يزيد كيتنخصص : مخاصم معاك ا زياد 
زياد وسع عينيه : علاش اصاحبي ؟
يزيد كيمسح فدموعو : قلتي لماما انا كداب 
زياد شعكك ليه شعرو كيضحك : غا كاميرا كاشي هههههه
ثلوج مصغرة عينيها فيهم : وليتو كتعرفو حتى شناهيا كاميرا كاشي ؟ 
زياد كيدور فعينيه : مامي فيا زوووع " جوع "
سكارليت : طلعو ركبو نمشيو 
حلات ليهم لباب و مشاو كيتجراو ضاحكين و فيهم الجوع باغين اتغداو 
ثلوج جمعات لوقفة كتنهد : كنتمنى نبقا نشوف الضحكة على وجوهم ديما 
سكارليت طبطبات على كتفها : اكيد ديما .. اجي ركبي نمشيو نتغداو و نديوهم ليكول عاد نرجعك لطموبيلتك ركبيها و شوفي شغالك 
ثلوج : ااه حتى هادا حل 
بتاسمت ليها سكارليت و مشاو بجوج ركبو لقدام عاد تحركات الطموبيل نيشان لأقرب ماگدو مبغاتش تخسر ليهم خاطرهم و هما كيشهاو عليها الأكلات لي كتعجبهم 

سهات و هي حاطة راسها على الزاج كتشوف لبعييد .. مرتاحة نوعا ما .. حيت كلشي كيبغي ولادها و لاقيا الدعم من كاع لجيهات لا من ناحية عائلتها لي ديما كيطلو عليها و ازوروها هي و ولادها و لا من ناحية عائلة طليقها لي ممقصرينش و مزال معتابرينها وحدة منهم و كيبغيو ولادها حب أعمى و لي بغاوها تحضر .. بتاسمات فاش تفكرات أنها كتكفر حتى على لحادث لي وقع بسبب قلة تركيزها .. على الأقل حاولت تعوض واليدين لينا على فراقها بزياد و يزيد .. كيبغيوهم بحال أحفادهم و مضسرينهم بالكادوات و ديما كيطلو عليهم و حتى هي مكتمانعش مخليا ولادها متقربين من عائلة باهم و فرحانين وسطهم

زياد كيطل من الزاج : صاحبيي اجي تسووف 
طل يزيد من موراه بفضول : سنو نسووف !
زياد : داك لبنت زوينة هههههه 
ثلوج طلات عليهم مصغرة عينيها : اربيي خليو حتى تكبرو و كونو زهوانيين .. من دابا اتبداو فالتحرش .. غادي نتغداو بالخف من بعد انديكم ليكول نشوف واش منوضين ليهم الضسارة تماك .. و ياويلكم نلقا شي ضسارة 
يزيد مخشي فزياد كيدورو فعينيهم 
زياد بصوت خافت : كحلناها 
يزيد بصوت خافت : متخافس وصيت داك لولد ميقول والو لمتخيس .. قلت ليه انجيب ليك كادو و قالي انسكت 
زياد حابس الضحكة : برافو اصاحبي 
يزيد : سكت ماما كتشوف فينا .. دير راسك كنلعبو 
ثلوج كتشوف فيهم و تنهد : غا هدرو غا خبيو .. غادي نشوف هاد الضسارة لي دايرين ليا فالدار واش مطبقينها فليكول 
زياد ببرائة مصطنعة : لا اماما لا ... حنا ضريفين 
يزيد : اه اماما مكنديلو والوو 
سكارليت كتضحك و هي كتسمع ليهم 


جلسو شادين بلاصتهم ايطيرو بالفرحة .. خلاو لي كغطابل ديالهم فالطموبيل مبغاوش اهزوهم واخة عيات معاهم ثلوج .. مراضيينش تشوفهم شي بنت بالكغطابل ديال ليكول خخ 
سكارليت دموندات ليهم داكشي لي باغين و جلسو كياكلو و ثلوج كتصور فيهم و الضحكة على وجها 
سكارليت : كولي مكليتي والو
ثلوج : مفياش غا بصحتكم 
زياد فمو عامر : ماما غمغمخغخخغخ
ثلوج : زياد كنقول ليك وقيتة لماكلة مخاصش تهدر .. هاني دابا مفهمت حتى حرف زائد اقدر توحل ليك و تخنق 
يزيد كيضحك : بغيتي عينيك اخرجو اصاحبي 
زياد مراضيش : لا مبغيتهمس 
ثلوج بهدوء : داكشي علاش خاص تاكل بالشوية باش متوحلش ليك و عينيك اخرجو كيف قال يزيد
زياد : اوكي مامي 
يزيد يله ايخشي الضغمة ففمو نتابه لجيهة وحدة بقا كيشوف فيها ساهي حتى دخل الشك لثلوج .. تلافتت بعفوية باغا تعرفو فين كيشوف حتى لقاتو متبت نضراتو على عائلة صغيرة كتكون من أب و أم و جوج وليدات صغار بحالهم 
تنهدات بتدمر و رجعات كتشوف قدامها حابسة دموعها : يزيد كول احبيبي باش تمشيو تقراو 
يزيد فاق من سهوتو : اوكي مامي 
زياد : حتى حنا عندنا بابانا ا صاحبي .. غا مسافر .. ياك اماما؟
ثلوج بابتسامة شاحبة : اه مسافر بعييد 
يزيد و زياد دقة وحدة : و ايرجع ؟
ثلوج متوترة : كولو كولو هادشي برد .. و شربو لما فاش تساليو يله الأبطال ديالي .. كملو هادشي
زياد كيضحك : ماما كتقول لينا أبطال ههه
يزيد : باغا تقولبنا ناكلو هههه 
ثلوج و سكارليت كيضحكو 
ثلوج : تقاداو ليا معاكم

داز لوقت و جات لعشية .. 

حلات لباب خلاتهم دخلو كيتجاراو لصالون احطو لي كغطابل ديالهم عاد سدات لباب و تمات غادة كتقلب بعينيها : سناء مزال مجات امكن 
فهاد الأثناء سمعات لخطوات هابطين من الدروج علات عينيها بعفوية : جيتي 
هبطات كتفوه : مسخسخة .. اش داني نقرا شي تمريض كون بقيت غا فالقرية 
ثلوج كتضحك : الله استر هههه 
سناء : فينهم لولاد
ثلوج : فالصالون 
سناء : كيف داز لبرنامج ؟
ثلوج : صافا مبيهش 
سناء : حتى نعاود نتفرج فالحلقة .. ياك كيعاودوها فالليل ؟
ثلوج : اه كتعاود .. سيري عفاك شوفي لولاد انا نمشي نوجد ليهم كسكروط 
سناء : غا طلعي بدلي و غسلي انا انوجدو 
بتاسمات ليها ثلوج و طلعات فالدروج غادة لبيتها تبدل و تحيد الإرهاق ... لوقت كتبدل بزاف دلحوايج شكون كان كيقول ثلوج اتولي مفاهمة مع سناء بعدما مكانش عندها معاها و مكيتفاهموش بالمرة .. ليام تقدر تخرج لعجب .. دارت الدورة و رجعات عزيزة عليها و بقات على واليديها اخليوها تقرا و دير شي حاجة فحياتها .. أول خطوة خطات بيها هي قنعاتهم تسكن معاها فالفيلة بحجة كاينة غا بوحدها و مع لوقت قنعاتهم بقرايتها و وافقو تقرا التمريض فإكول ديال لفلوس 

كانو مجموعين كياكلو و الروبالة نايضة فالطبلة غا زياد و يزيد فيهم عشرة مشاكسين بزاف قلبو ليها راسها لور 
سناء : حشومة ماماكم عيانة و نتوما كديرو الصداع 
زياد وسع عينيه : بصح اماما ؟
ثلوج بتعب : اه احبيبي هداو و كولو مزيان باش فالعشا نطيب ليكم داكشي لي كيعجبكم .. دابا كملو هادشي و سيرو تحفضو بينما جيت نراجع معاكم .. متافقين ؟
يزيد و زياد : اوكي مامي
سمعو الصونيط فالباب ناض زياد كيتجارا حلو فرحان : واااو ماما سوفي سكون جاا 
ثلوج بفضول جمعات لوقفة : شكون ؟


قربات لعند لباب حتى كتجي عينيها عليهم بتاسمات بحب و تلاحت كتسلم عليهم 
زياد و يزيد كيتعلقو فالحاج لي هازهم عاجبهم لحال و كيضحكو
حفصة : جينا نطلو علييك شحال مشفناك 
ثلوج : مرحبا بيكم .. دخلو 
تلافتت لعند سناء غمزاتها باش تنوض تستر راسها مع لابسة غا ديباردور و سروال دالنعاس عاد دارت لعند واليديها كتوجههم لصالون 
لحاج نزلهم كيضحك : عندي ليكم مفاجأة 
زياد : وااس سي حاجة زويينة ؟
يزيد : جدي جبتي لينا سوكولا ؟
لحاج حط الشاسية وسط الطبلة و جلس كيستاراح : طلو شوفو 
ثلوج : تسناو نفرق ليكم .. متديروش لبسالة 
عطاتهم السقاطة لي كيجيب ليهم لحاج .. مضسرهم على الآخر واخدين ليه لعقل .. بتاسمات و هي كتشوفهم كياكلو فرحانين عاد دارت لعند واليديها كتجمع معاهم براحة

ثلوج : هاد ليومين انمشي لأمريكا عندي شي شغال و لولاد مشوشة عليهم معرفتش شنو ندير معاهم
لحاج : خليهم معانا
زياد مشا عنقها كيتلحبد : عفااك اماما عفااك خلينا نمسيو معااك .. عفاك اماما 
تلاح عليها حتى يزيد كيعنق و ابوس : عفااك اماما عفااك 
ثلوج : واخة .. صافيي تقجييت زياد غا طلق احبيبي باش نفهمكم 
لصقو عليها لصقة لعمة فالظلمة شوية قلبوها ليها بكاوات حتى تنهدات بتعب عاد نطقات مفرحاهم : صافي اتمشيو معايا .. باغين امريكا اتمشيو ليها غا تهنااو
لحاج : شنو اتمشي ديري فيها بعدا 
ثلوج : عندي شي حاجة دلخدمة .. هاد لمشية ضرورية 
حفصة : امتى اتمشي بعدا
ثلوج : هاد ليومين انمشي 
حفصة : فينها سناء ؟
دخلات عليهم سناء سلماات و مشات جلسات ساترة راسها و متبتة بأدب قدام لحاج 
حفصة : غادي تطولي تماك ؟
ثلوج : لا ماشي بزاف
حفصة : نصايب ليك لحلوة تديها معاك ؟ 
لحاج : لا صايبي ليها نتي كااع لفقاص و الشباكية .. راه ممكن اتعكسو معاها فالمطار بفلوسها حتى لتماك و تشري لي بغات 
زياد : ميمة حتى تصيبيها لينا هنا 
حفصة : واخة احفيدي لغزال حتى ترجعو و تلقاوني موجدة لييكم السلو و الشباكية و حتى لفقاص و غريبة .. كون هانيي 
يزيد بحماس : هادسي كامل !
حفصة : ااه و قليل فحق حفادي الزوينين 
ثلوج غا ساهية فولادها و فرحانة بييهم هما كيهدرو بحماس و هي حضياهم 

دازو يومين .. 

فيقاتهم بالسيف وهما كيتفششو عليها .. بقات معاهم حتى غسلات ليهم و بدلات حوايجهم عاد هبطاتهم لتحت العبو مع سناء تلاهيهم بينما وجدات راسها .. ماشي بزاف دلوقت حتى هبطات هازة ساكها و كاع لوراق لي اتحتاج 
زياد : انمسيو دابا اماما 
ثلوج : اه احبيبي .. اجي تفطرو بعدا 
جلساتهم افطرو بقات معاهم حتى كملو ماكلتهم عاد شافت فسناء : إلا جاتك لقنطة عيطي لمرات عمي تجي تبات معاك 
سناء : لا لا متخافيش 
ثلوج صغرات عينيها : ممم عنداك تقولي الدنيا خاوية ندير لي بغيت 
سناء كتدور فعينيها : انا ! .. ياك عرفاني مكنطيرش 
ثلوج كتطنز : داكشيي علاش كنوصيك
سكتات سناء ميلا شفايفها 
ثلوج : يلله نوضو الأبطال ديالي .. برافو كملتو فطوركم 
هبطاتهم بالشوية من فوق لكراسا عاد خرجات شداهم غا وصلات لطموبيلتها تأكدات بأن لفاليز ديجا محطوطة فالكوفر عاد ركباتهم و ركبات مكسيريا بعدما وصات سناء ترد لبال و تسد عليها 


كانت جالسة و ولادها حداها بعدما قضات جميع الإجراءات لي خاص تقوم بيها .. سهات قدامها كتنهد بتعب 
زياد : ماما أول مرة كنركب الطيارة ههه 
ثلوج بتاسمات : عجباتك ؟
هز راسو باه فرحان 
يزيد : حتى انا ماما هه 
باستهم من حنيكاتهم فرحانة بيهم : شي نهار ناكلكم انا .. غا صبرو عليا ههه 
طول الرحلة و هما كيتوجعو عليها مرة فيهم الجوع مرة باغين امشيو لطواليط .. كلا شوية مخدمين سبة من فشوشهم عليها .. رجعوها شرويطة و هي مقبلاهم على قبل ضسارتهم و مشاكساتهم لي مكتسالاش 
يزيد : ماما واس مزال بعاد ؟ 
ثلوج : لا قربنا غا نعسو شوية 
زياد : ماما واس أمريكا زوينة ؟
ثلوج ضرها قلبها فاش تفكرت شنو عاشت وسط هاد الدولة .. سكتات شحال عاد رجعات نطقات بهدوء : اه زوينة اتعجبكم غا مديروش لبسالة باش منرجعكمش لمغرب 
زياد و يزيد : نو مامي .. حنا ضريفين 
ثلوج : و على ليكول لي عند بالكم تفكيتو منها غا نساو هاد لفكرة .. مجرد مغادي نرجعو اتعوضو هاد الأيام لي غادي نجلسو فأمريكا .. متافقين 
زياد بنفخة : اوكي مامي 
ثلوج طلات على يزيد : و نتا ازوين ديالي . متافق؟
يزيد كيدور فعينيه : هنن متافق امامي
قجاتهم بالتعناق حتى هبطات الطيارة و حطات رحالها فأكبر مطار بأمريكا .. نزلات هي و ولادها جارة لفاليز مبتاسمة من برا عكس لداخل لي خاطرها مقبوط عليها .. امكن حيت جات لهاد الدولة لي شحال مزارتها من آخر سفرة ليها معودات حطات رجليها هنا 

داز لوقت فالإجراءات لقانونية حتى تخطاو كاع لمراحل عاد تهنات 
ثلوج : اااه نسييت .. كبيداتي اجيو جلسو هنا هاني جاية .. كاين الزحام و اتبقاو مجرجرين معايا 
زياد : فين غادة اماما ؟
ثلوج : انقاد شي حاجة ديال لوراق .. جلسو غا هنا اكبيداتي متمشيو فين .. اوكي؟
زياد و يزيد : اوكي مامي
جلساتهم حدا مرا كبيرة وصاتها عليهم حدما جالسة تماك و مشات بخطوات سريعة لگيشي كتسول على وراقها .. خدات وقتها تماك و مرة مرة كتلافت واخة بعاد كتشوفهم واش مزال جالسين تماك حتى كتطمأن و كترجع تزكر مع غراضها .. عطاها توقع و وقعات عاد تنفسات بهدوء مرتاحة حيت تهنات من هاد لبلان 
ثلوج بالإنجليزية : صافي كلشي مزيان ؟
بتاسمات فاش هز راسو باه عاد دارت ناوية تمشي حتى كتفاجأ بالزحام لي تراكم مقدراتش حتى تدوز من كترت المسافرين .. تعصبات و هي كتسرع بخطواتها كل همها تشوف ولادها واش بيخير ولا لا ... بقات غادة حتى كتوقف مصدومة و عقلها مرفوع فاش ملقاتش ولادها بغات روحها تخرج .. حسات بقلبها كيضرب فالمية غادي اسكت عليها .. بالخف عينيها دمعو و بدات كتبكي و تقلب بحال لهبيلة غادي تحماق باغا تشوفهم عاد ترتاح .. ولات كتقلب بين لمسافرين بحال لحمقة حتى كتسمع صوت الرصاص ... تفيكسات على وقفتها مخرجة عينيها حتى كتحس بشي جثة طاحت حداها على طولتها .. غوتات ربها لي خلقها راجعة خطوة باللور و مصدومة .. مجات فين تقبل الصدمة حتى كتسمع الرصاص عوتاني و تصاب شخص آخر كان قريب من محيطها .. حطات ايدها على فمها كتبكي و لغوات فالمطار و المسافرين كيجريو هنا و هنا و هي واقفة مصدومة حتى كتجي عينيها على واحد من لقواة لمساعدة باللباس الأسود و الجيلي على صدرو باش احميه .. مباين والو من وجهو بسباب لكاسك و النضاضر السوداء لي داخلة فنظام اللباس .. بقات واقفة كترجف و هي كتشوفو موجه السلاح لعندها .. قلبها بدا كيضرب فالمليون عند بالها ايتيري فيها دابا حتى كتصعق بالجثة لي طاحت حداها عوتاني .. الأشخاص بتلاتة كيتيري ليهم فراسهم نيشان حتى كيطيحو كومة ... بقات واقفة مخرجة عينيها كتبكي بحرقة و تغوت ولادي .. دارت بيها الدنيا كتشوف كلشي تخلط و لبوليس فكاع الجوايه و حتى لقوات لمساعدة دعماهم
حطات ايديها على راسها كتبكي بحرقة : زياااااد ....يزيييييد .. فيينكممم ؟؟؟
قشعات نفس الشخص جاي قاصدها بقلدتو الضخمة و لباسو الأسود مغطيه كامل مبيان والو .. قشعات السلاح فإيدو تخلعات راجعة باللور حتى كيقرب لعندها بهدوء كيوجهها بايدو باش تخرج بحال كاع الناس لي خرجوهم 
ثلوج كتنخصص : بغييت ولاديي عفاااك .. ولادييي إلا ملقيتهمش انحمااق .. عفاااك قول لبولييس اقلبو على ولاديي 
مرفوعة كتدور فعينيها و هو كيدل فيها بالهداوة باش تخرج بلاما انطق 
ثلوج فطريقها لبرة لمطار و هي مرفوعة كتبكي .. قشعات شدى كتجري بالجيلي و شعرها مجموع لفوق و السلاح فإيدها .. بغات تطير لعندها كترجف : شدى ولادييي.. بغيييت ولاادييي 
شدى تمات جاية لعندها مصدومة : ثلوج !!؟؟
ثلوج شافت الشخص لي غادي بيها لبرة شار لشدى باش تمشي و هي تصعر : علاااااش قلتييي ليهااا سيريي .. بغييت نسولها على ولادي .. اويلييي بغييت ولاديي 
خرجها بالسيف عليها باغا تحماق بالبكا .. غا علات عينيها ضحكات وسط دموعها و مشات كتجري لعندهم عنقاتهم مخلوعة كتبوس و تعاود بلهفة 
زياد كيضحك : ماما الأكسن اماما هههه .. واااو انا مصدوم كنسوف هادسي غا فالأفلام 
يزيد : ماما سكون هادا لي خرج معاك 
ثلوج كتمسح فدموعها : الحمدلله حيت لقيتكم .. شكون خرجكم ؟ 
زياد : لبوليس اماما .. بقاو واقفين حدانا و قالو لينا ماماكم دابا تجي 
ضحكات وسط دموعها : مزيان 
يزيد قشع الشخص لي خرج ثلوج قالب الدورة ايرجع ادخل .. وسع عينيه و مشا لعندو بحماس : واااو واش هادا لي عندك سلاح حقيقي ؟
بتاسم فاش شافو هز راسو باه : سعدااتك .. زياد اجي تسووف 
مشا زياد بحماس : وااو اصاحبي عندك سلاح حقيقي 
ثلوج تبعاتهم مخرجة عينيها : اجيو يلله نمشيو من هنا .. اجيو خليو السيد امشي 
زياد : ماما عندك تيليفونك ؟ .. عفااك اماما عطيه ليا 
تنهدات و عطاتو التيليفون كتشوفو شنو باغي اصنع 
زياد : عفااك واخة تصور معانا ؟ 
الشخص هبط لمستواهم حتى تلاحو معنقينو و خداو فوطو ليهم بتلاتة 
يزيد كيضحك : انقولها لصاحبيي .. فاش انكبر انولي بحاالك حتى انا ايكون عندي سلاح كنقتل بيه لمجرمين 
زياد : عفااك واخة نسوفو وجهك ؟
ثلوج مخرجة عينيها بإحراج عطاتهم بالظهر ناوية حتى تنعازل بولادها و تربيهم على اللصقة لي لصقو السيد 
يزيد : عفااك عفااك 
حيد النضاضر من على وجهو و هبط لكمامة من على فمو بهدوء : هانيي حيدتها 
زياد بحماس : سنو سميتك ؟ 
بتاسم مطول الشوفة فيهم : أمجاد .. أمجاد آل عمران 
زياد : واااو .. ماما عندو بحال سمية بابانا ههههه 
يزيد بحماس : حتى بابانا سميتو بحاالك .. واااو

حسات بودنيها تصمكو عليها ولات كتسمع غا طننن .. بلعات ريقها و تلافتت بالعرض لبطييء مخرجة عينيها .. بقات كتشوف فييه كيفاش مبتاسم و هو كيشوف فولادو بلاما اعير ليها شي إهتمام .. غا هز عينو لعندها حسات بقلبها ضرب فالمليون غادي انقز من بلاصتو و حتى لون بشرتها تخطف ولات صفرة كترعد بالصدمة 
زياد : سوف اصاحبيي .. عنداك اقولبك لمجرم 
أمجاد هز راسو بلا مطول الشوفة : غادي نمشي تهلا فراسك اصاحبي 
يزيد بحماس : حتى انا صاحبك ياك ؟
أمجاد بهدوء : اه حتى نتا صاحبي 
جرهم بجوج لعندو باسهم من حنيكاتهم خلاهم كيضحكو فرحانين .. عاد هز لكمامة على وجهو و رجع النضاضر لبلاصتهم 
ثلوج من كترة الصدمة بقات مفيكسية عينيها عليه غا كتشوف بحال لجماد كتحاول تلاقا جواب لهاد الأسئلة لي بداو كيدورو فراسها لكن غا جات عينيها فعينيه ملي هز راسو لعندها بلعات ريقها و كأن ذاكرتها كاملة لي ستعقلاتها ملي كانت معاه تمسحات ليها دابا 
أمجاد جمع لوقفة ببرودة مخاطبها : هاهو الشيفور ايوصلكم 
بلعات ريقها كتخبي توترها .. و هبطات عينيها لعند ولادها شدات فيهم شدة لعمة فالظلمة بسبب الأفكار المتشائمة لي بدات كتراودها خايفة ايدي ليها ولادها 
أمجاد فهم حركتها طيرة : الشيفور ايوصلكم حتى لفين غادين 
ثلوج ببرودة كتلاها مع لفاليز لي شداتها و كتقاد فحوايج ولادها كترعد من لداخل : ممم م ..مكاين لاش اناخدو طاكسي 
أمجاد ببرودة : مزيان
خلاها واقفة فبلاصتها مصدومة و مشا عاطيها بالضهر .. كيتمشى بخطوات تابتة و السلاح فإيدو 
فاقت من عالمها و عينيها مغرغرين على صوت شي واحد بالإنجليزية تلافتت لقاتو بوليسي : حيدي من هنا الآلة .. خطر عليك 
ثلوج مرعودة : ممكن نسولك شنو واقع ؟
لبوليسي : لقينا خلية إرهابية كانت ناوية تفجر لمطار و لكن لحمدلله فرقة التدخل السريع قامت بالواجب .. غا سيري من هنا عندك لولاد صغار 
هزات راسها باه كترجف من لداخل : طانكيو
زياد و يزيد لاصقين فيها : سنو واقع امامي 
ثلوج بتاسمات ليهم : وو .. و والو .. لحمدلله موقع والو من زهرنا جينا مع التفجير لي كان ايديرو الإرهاب . . ففف لحمدلله موقع ليكم والو كون حماقيت 
زياد : متخافيس اماما 
يزيد : حنى نحميوك اماما كااع متخافي 
ضحكات وسط عينيها لمغرغرين و جراتهم بالشوية ملاهية معاهم و لفاليز لي جارة حتى هي متقلا عليها .. متهنات حتى خدات طاكسي ركباتهم و عاونها الشيفور تهز لفاليز عاد ركبات و ركب هو شاد لوجهة لي قالت لييه 

حطات راسها على الزاج كتنخصص من لداخل و قلبها كيتقطع عليها طراف طراف .. كتحس براسها اتموت و روحها اتخرج .. كلما تفكرات تعاملو لبارد و كأنه عمرو شافها قلبها كيبغي اسكت .. أصعب موقف تحط فيه هو هادا . لغصة لي كتراودها كلما تفكرت حروفو لمحسوبة لي نطق بيها كتبغي تشهق بصوت عالي و تغوت بألم من لجرح لي حيى عليها .. جرح لماضي لي دفناتو فقلبها بزز عليها و حاولت تمشي خطوة لقدام .. ندمات حتى جات لهاد الدولة عوتاني معطاتها والو من غير الألم فقط .. راسها حرقها بالتفكير ياك هو مجرم ! شكايدير مع فرقة التدخل السريع ! .. راسها كالها بكترة التحليلات لي حاولت توصل ليها بدون جدوى 

الشيفور : الآلة وصلنا من قبيلة و انا كنعيط ليك .. هيهو فين مشات هادي 
زياد طل عليها : ماميي مالك 
تفزعات مخرجة عينيها عاد سرات معاها فين هي : كنت ساهية .. سس سمح ليا 
الشيفور : واش صافا ؟ يكما نمشيو لطبيب !
ثلوج متوترة : لا لا .. شكرا 
خلصاتو و نزلات حلات عليهم لباب نزلو عاد دارت باش تحل لكوفر ساعة لقات الشيفور قام بالواجب و حط ليها لفاليز .. عاودت شكراتو و جرات لفاليز متقدمة بخطواتها تجاه الأوطيل لي وقف قدامو الطاكسي .. و ولادها تابعينها كينقزو و اضحكو فرحانين بالتصويرة لي خداو و هي من تفكيرها لمرفوع مخليا تيليفونها عندهم نساتو بالمرة .. معرفاتش كيفاش حتى وقفات قدام الإستقبال كتحجز ليها غرفة و عقلها ماشي معاها 
الموظفة : عفوا واش كتسمعيني امدام ؟
ثلوج : هااا ؟ .. قلتي شي حاجة ؟
الموظفة : قلت واش بوحدك فيها ؟ 
ثلوج مرفوعة : ااااه .. لا كنقصد ماشي بوحدي .. بغيت شي شومبر كبيرة حيت معايا ولادي 
الموظفة شافت فالبيسي عندها : عندنا وحدة كبيرة .. ها الساروت 
مداتو ليها مستغربة من ملامح ثلوج : مدام خودي الساروت 
خداتو ثلوج حشمانة من راسها بسباب السهيات لي بدات كتسهى .. قادت أمورها مزيان عاد جرات لفاليز قاصدة لمصعد و ولادها تابعينها كيتصورو بالتليفون .. طول لوقت و هي ساهية كاتمة دموعها حتى وصلو لشومبر و دخلات عاد دخلاتهم و سدات لباب
زياد : واااو ماما لغرفة وااعرة 
يزيد مشا بجرية تلاح على الناموسية : واااو انا فرحان .. زياد اجي نتصورو اصاحبي 
زياد نتابه لثلوج لي جلسات فالأرض جامعة رجليها لعندها و خاشية راسها مخبياه بطرحة ايديها كتنخصص : مالك اماما ؟ 
مشا لعندها بجرية كيعنق فيها : ماما مالك 
يزيد تخلع فاش شافها فداك لوضع .. طار حتى هو من بلاصتو لعندها كيعنقو فيها بجوج مخلوعين و هي وسطهم كتبكي و تنخصص

بقات شحال و هي على نفس لوضعية كتبكي بحرقة حتى سمعاتهم كيتباكاو معاها عاد هزات راسها كتمسح فدموعها 
زياد كيتنخصص : علاس كتبكي اماما هنن
يزيد : سكون بكاك اماماتي 
باسها على خدها كيمسح فدموعها بكفوفو 
ثلوج : والو .. غا كتضرنيي الضرسة شوية و تفوت عليا .. اجييو ندوش لييكم اجييو 
جمعات لوقفة كتمسح فدموعها مع شهقات خفاف كيخرجو ليها مرة مرة .. جراتهم لحمام غسلات ليهم مزيان و دوشات ليهم حتى قنعو من لما و الصابون حيت كيعجبهم ابقاو فييه .. عاد خرجاتهم بالبينوارات ديالهم صغار على قدهم و نشفات لحمهم كتضحك معاهم مخبية حزنها وسط قلبها .. ملبساتهم و تهنات من جيهتهم حتى تهدات من التعب 
ثلوج : يلله تخشااو فالفراش انشعل ليكم التيفي تفرجو .. تسناوني ندوش و نسيفط على لماكلة متافقين ؟ 
هزو راسهم باه شافوها عيانة مبغاوش اتفششو عليها كتر .. علاقتهم بمهم قوية بزاف ميقدروش افرقوها ولا انساوها .. ضروري ادوزو أغلب أوقاتهم معاها معوضة ليهم حنان الأب و الأم و دايرة جهدها كامل باش متخصهم حتى حاجة و ميحسوش بالنقص 

مسحات دموعها و هي كتشوف فيهم كيتفرجو حالين فمهم فالروسوم كيموتو فالمضاربات و الصداع .. خلاتهم على وضعيتهم و دخلات لحمام مخشية فالجاكوزي ساهية كتفكر لبعييد و عقلها ايطرطق .. بالسيف باش ستجمعات قوتها و دوشات عاد خرجات ملفوفة فبينوار .. أول حاجة هزات لفيكس دوزات ليهم اجيبو ليهم لماكلة عاد كملات شغالها و بدلات .. مجات فين تسالي حتى سمعات الصونيط فالباب عرفاتهم ايكونو غا هما .. حلات لباب خدات الطلبية مع إبتسامة و رجعات سداتو عاد مشات لعند ولادها حطات ليهم داكشي فوق الطابلة واجد و عيطات عليهم اياكلو 
زياد : اجي تاكلي اماما 
ثلوج : مفياش احبيبي .. غا كول نتا وخووك 
يزيد : إلا مكليتيس اماما حتى حنا مغاديس ناكلو 
ثلوج بتاسمات ابتسامتها الشاحبة : غادي ناكل من بعد .. غا شبع لكريشة دابا 
هزو راسهم باه عاد ركزو مع لماكلة كياكلو و اتفرجو حتى كيسهاو متبعين مع الروسوم كون مكتفكرهم كلا شوية كون سمحو فالماكلة و كملو لفراجة جيعانين 

خلاتهم ملاهيين عاد هزات تيليفونها كتشوف فتصويرتهم بتلاتة و قلبها كيضرب فالمية سرعان مرجعات بيها الذاكرة لخلف شوية

" ثلوج ببرودة كتلاها مع لفاليز لي شداتها و كتقاد فحوايج ولادها كترعد من لداخل : ممم م ..مكاين لاش اناخدو طاكسي 
أمجاد ببرودة : مزيان
خلاها واقفة فبلاصتها مصدومة و مشا عاطيها بالضهر "
مسحات دموعها لي هبطو مع تنهيدات طالعين من لعمق .. بتدمر تحكمات فراسها و ما مسحاتش التصويرة .. ملقات شكون تفرغ عليه قلبها من غير ختها لي دوزات ليها حابسة دموعها بزز غا سمعات صوتها عينيها غرغرو : اهلان لغزالة ديالي .. وصلتي مزيان ؟ 
ثلوج كتنخصص : شفتو .. شفتو اختيي دار راسو بحاليلا عمرو عرفني .. تصرف ببرودة بحاليلا أول مرة كيشوفني 
حنان : تسنااي بالشوية عليا نفهم .. بالشوية شرحي ليا 
ثلوج : قلت ليك شفتو مكتفهميش 
حنان : واش أمجاد ؟ 
ثلوج كتبكي : اه و شكون زعما 
حنان : تسناي نهبط من الطموبيل بقاي معايا 
تنهدات ثلوج كتنخصص ساهية عاد سمعات صوت ختها : يلله جيت من الشركة .. كان عمي ساجد كيشرح ليا لبوسك ديالي .. هاني طالعة لبيت و شرحي ليا مزيان 
ثلوج : صافي بلاما نشغلك معايا .. حتى تكوني مسالية 
حنان : لا مسالية .. صافي دخلت لبيت يله هدري فين شفتيه و كيفااش هادشي 
ثلوج كتمسح فدموعها عاد بدات كتعاود ليها من الأول حتى الأخير 
حنان : كيفااش !! .. واش كتهدري بصح ؟ 
ثلوج : ااه 
حنان سمعات لباب تحل تلافتت لقاتو أزار : حبيبي اجي تسمع 
أزار باستغراب : ياك لباس 
عاودت ليه حنان بسرعة و ثلوج على لخط كتسمع و تنخصص 
أزار : واش هادشي لي باغا نسمع ؟ 
حنان وسعات عينيها : واش عارف ؟ 
خدا ليها التيليفون حاطو على ودنو : ثلوج صافا ؟
ثلوج بصوت مخنوق : الحمدلله و نتا 
أزار : صافا ..عاودات ليا حنان على لبلان علاش نتي مكنتيش عارفة لخوادري فاش خدام ؟ 
ثلوج سكتات شحال و رجعات نطقات : خدمتو بالضبط ..لا
أزار : لمهم راك عرفتيه ففرقة التدخل السريع و لكن هادشي لي انقوليك ميخرجش من هنا .. عارفو غا انا لواليد براسو معارفوش
تخلعات مخرجة عينيها : ياك لباس ؟ 
أزار كيشوف فحنان لي مستغربة : أمجاد مع لمخابرات الأمريكية .. ويااك تقولي هادشي لشي واحد 
ثلوج وسعات عينيها مصدومة : كك .. كيفااش .. واش عاد دابا ولا شنو ؟؟ ميمكنش !
أزار : قبل متزوجي بيه و هو فالمخابرات .. عند بالي قالها ليك .. لمهم هادشي ميخرجش من هنا 
ثلوج كتبلع فريقها : اأ اا اه ص..صافيي
أزار : يلله اختي نخليك دابا عندي شي غراض 
مد التيليفون لحنان و مشا لدريسينغ كيقلب على حوايجو 
ثلوج : ميمكنش 
حنان : انا باقا مصدومة .. على حساب هدرتك راه مجرم و قتال مفهمت والو اختي
ثلوج سمعات الصونيط فالباب : شي واحد كيدق فالباب انمشي نحل .. حتى لمن بعد و نهدرو 
قطعات مع ختها و جمعات لوقفة غادة جيهة لباب مرفوعة كليا 

حلات لباب بعفوية حتى كتجي عينيها على لموظفة لي واقفة بلباقة 
ثلوج : فاش نقدر نعاونك ؟ 
لموظفة : واحد لمسيو كيسول عليك .. بغاك تهبطي نتي و ولادك 
ثلوج قلبها ضرب فالمية حساتو ايخرج من بلاصتو بالتلفة مسولاتش على شكلو بقات جامدة فبلاصتها حتى مشات لموظفة .. رجعات سدات لباب مرفوعة 
زياد : ماما كملنا ماكلتنا 
يزيد : ماما اجي تاكلي نتي مكليتيس
ثلوج مرفوعة : ميمكنش 
شافت فولادها مطولة : عنداك ابغي ياخدهم ليا ؟ .. إلا خداهم ليا نحماق .. لا لا مخاصش نهبط علاش انهبط متلا ؟ .. ولكن ! إلا مهبطتش ايسحاب ليه محسوسة خاص نبين ليه مكيعني ليا والو كيف تصرف حتى هو .. خاص نرجع دقتي 
مسحات دموعها لي هبطو : اشمن دقة ولا جوج .. خاص نبعد من لمشاكيل و الأعصاب 
يزيد : ماما علاس كتهدري بوحدك 
ثلوج بشجاعة : لبسو تجاكيطاتكم .. انهبطو لتحت 
بحماس و شجاعة مشات حلات لفاليز ديالها كتلوح فالحوايج تالفة شنو تلبس و شنو متلبسش .. شداتها لبكية معرفاتش شنو تقرر فالأخير ختارت سروال جينز طاي هوت .. لبساتو مع تيشورط طايح على لكتاف و مبين فرقة صدرها .. كتفات تجمع شعرها كعكة مهمة و لفغونش على جبينها مدلية بطريقة زوينة .. ختارت حتى الصبيبيط شوية غيرات رأيها و لبسات غا كلاكيطة 
زياد بحماس : مامي حنا واجدين 
بتاسمات ليهم كتبوس فحنيكاتهم و تعاود .. قبل تشد فإيدهم هزات تيليفونها دارتو فالجيب لوراني دلجينز عاد مشات كتضحك معاهم حتى خرجو من لغرفة . . ركبو لمصعد كتبتاسم ليهم و هما كينقزو عكسها هي لي كتحس بقلبها ايسكت من كترة لخفقان 

ماشي بزاف دلوقت حتى لقات راسها لتحت شادة فزياد فإيد و يزيد فالإيد لاخرة .. تشجعات بقوة كتصرف ببرود عاد تمشات هي و ياهم تالفة كتدور فعينيها حتى كتسمع ولادها نطقو بحماس : واااو نتااا ؟؟ 
طلقو منها و مشاو لعندو كيتجاراو بشغف عنقوه فرحانين واخة عارفين ماشي باهم و لكن كيف كيقولو الدم كيجر .. و الراحة لي حسو بيها من جيهتو عمرهم حسو بيها من قبل مع شي واحد من غير ثلوج 
ثلوج كترعد من لداخل بالسيف باش تحكمات فراسها و بينات على لجانب لجامد فيها من على برى 
أمجاد جمع لوقفة شاد فيهم خلاها ساهية فيه و فالقلدة لي زادت تطراسات .. وتاتو لقاميجة مخشية فالسروال جينز و صبرديلة سبور اخر مكاين .. لمگانة فالإيد و الشعر محسن عادي مكاين لا تشاوك لا والو جاتو خطيرة .. لحظات اللحية لخفيفة لي على وجهو و حجبانو لمعقودين متبدل فيه والو من غير أنه زاد زيان و زاد تفورما على قبل .. غا عروق ايدو لي كيبانو اعطيوك لخبار

زياد كيضحك : ماما سوفي سكوون 
ثلوج هزات راسها باه مربعة ايديها : سلمو عليه و اجيو نمشيو 
أمجاد هز عينو لعندها بعفوية بحال أي شخص عادي شافو : بلاتيي شوية 
شدهم فإيدو كلا واحد من جيهة : شنو تبغيو تاكلو ؟ 
يزيد : اي حاجة زويينة 
زياد : اه اصاحبي 
ثلوج بعصبية هزات حاجبها كيفاش جاي مور ربع سنين و كأن شيئا لم يكن و كيتصرف عادي : فيين غادي بييهم ؟ 
تلافت لعندها ببرودة : ياكلو 
مشات خطفاتهم ليه من ايديه : يلله كلاو و هبطتهم 
أمجاد بهدوء كيشوف فيهم : باغين تاكلو ياك ؟ تشربو عصير ؟ 
زياد و يزيد : اااه اااه 
أمجاد هز راسو لعندها بعدما كان مبتاسم ليهم : شفتي ؟
شدهم فإيديهم و مشا غادي بيهم و هما كينقزو فرحانين 
ثلوج مسحات على شعرها : اويلييي واش حماقيت .. عطيااه لولاد هاكاك .. لا لا خااص نتصرف ببرود باش ميحسش براسو .. يلله اثلوج نتي قوية يلله 
تنفسات بعمق و مشات تبعاهم شافتو جلسهم دايرين بيه و هما كيضحكو فرحانين .. تنهدات بتدمر و جلسات دايرة رجل على رجل مقابلة معاه و التيشورط طايح على كتافها و نص فصدرها كيبان 
أمجاد بعفوية : باغا ؟ 
هزات راسها باه : لي طلبتيها ماشي مشكيل اخويا 
أمجاد بعفوية : هانية اختيي 
هز عينو لعند السيرفور طلب منو الطلبية لي باغين حتى جابها ليهم 
زياد بحماس : كيعجبني هاد لعصير .. زويين هههه 
يزيد كيضحك : و نتا اصاحبي كيعجبك 
أمجاد مسح على شعرو : وي كيعجبني 
هز عينو بعفوية لقا ثلوج كتشوف فنقطة وحدة و مربعة ايديها ساهية طول الشوفة عاد نطق : ثلوج 
فاقت من سهوتها على صوتو لي خلا قلبها اضرب .. تملكات راسها و نطقات بعفوية : وي 
أمجاد : شربيي لعصير 
شافت فيه داك الشوفة ديال واش من نيتك : اه .. شكرا اخويا 
أمجاد تلافت لعند ولادو كيشوف فيهم مبتاسم و متبع حركاتهم لمشاكسة 
زياد : علاس نتا عندك بحال سمية بابانا ؟ 
أمجاد : علاش باباكم شنو سميتو ؟
يزيد سرط الجغمة بسرعة و نطق : سميتو أمجاد آل عمران .. بحالك ..واس نتا ولد جدو ساجد ؟ 
أمجاد بتاسم : مشايفينش باباكم فالتصاور ؟ 
زياد : لا .. بابا سافر و مبقاوس تصاورو عند ماما 
يزيد : اه داكسي علاس 
ثلوج بعصبية : زياااد .. يزيييد شربووو و يلله تطلعو خااص تنعسو 
أمجاد علا عينو لعندها و رجع شاف فولادو : شربو على خاطركم 
ثلوج خرجات فيه عينيها : ولاديي انا بوحدي .. انا لي كنعرف مصلاحتهم 
أمجاد بهدوء : مافيها والو إلا شربو على خاطرهم عاد اطلعو باش انعسو 
ساطت بغضب و شافت فالجيهة لخرى متفادية الشوفة فييه .. سهات مع تفكيرها لي غادي اقتلها و دخلات فحوار داخلي بينها و بين نفسها : التيشورط طايح على لكتاف و صدري باين .. مقال والو ؟ مهزش فيا لعين كااع بحاليلا عمرو شافني .. كيهدر بعفوية اثلوج ! .. علاش حابسة لبكية دابا ويااك تبكي قداموو مخاصش تباني ضعيفة .. باينة فييه نسااك حتى نتيي خاص تحيديه من باالك و خاص تردي لبال لولادك إلا فكر اياخدهم لييك .. اصلا علاش هبطت ؟ بأشمن صفة هبطت ولادي وهبطت عندو ! .. واش بهاد السهولة نخلييه اتعرف على ولادو ؟ .. لا مخاصش نكون أنانية هو مكيستاهلش ولكن ولادي كيستاهلو اعيشو بيخير .. و لكن قال مكنعرفهمش ! علاش جا دابا شنو بغا منا ؟ .. موالف إلا شافني معرية كيخاصم و اغير ! .. ولكن دابا كلشي تبدل كلشيي .. علاش عينيك غرغرو اثلوج بقااي قوية متبكيش قدامو .. داكشي كامل لي قال ليك كدوب فكدوب لي كيبغي مغاديش اسمح فييك .. علاش قال ليا كنبغيك و مقدرتش النسا هاد
لكلمة .. كلشي كدوب حتى غيرتو كدوب و هوسو كدوب حتى حاجة من داكشي مكانت بصح 

زياد بصوت عالي شوية : ماما رااه كنهدرو معاك .. مالك ؟ 
فاقت من عالمها لمظلم على صوت ولدها تنهدات بعمق كتسوط و تلافتت بهدوء مصطنع لعندهم : وي حبيبي شنو بغيتي .. سهيت مسمعتكش 
يزيد : كان كيقول ليك اماما .. صافي كملنا لعصير يله نطلعو نعسو 
ثلوج هزات عينيها فأمجاد لقاتو كيمسح لولادو على شعرهم بهدوء هزات حاجبها و جمعات لوقفة بعصبية مكتومة : يلله اجيو 
مدات ايديها لعندهم شداتهم فإيديهم و دارت غادة حتى كيوقفها صوتو : آنسة ثلوج 
ضحكات بسخرية وسط خاطرها و لبكية باغا تخرج ليها .. تنهدات كتخبي توترها عاد تلافتت بهدوء : وي مسيو آل عمران 
جمع لوقفة خاشي ايدو فجيبو و قرب لعندها : دقيقة 
فهماتو أنه كيقصد من ملامحو لولاد ميسمعو والو .. ميلات شفايفها بميوعة و هبطات راسها لعند ولادها : حبيباتي رجعو جلسو فالطبلة .. انهدر مع لمسيو عاد نمشيو اوكي؟
هزو راسهم باه بلا اعتراض رجعو جلسو فوق الطبلة كيلعبو بيناتهم 

ثلوج بهدوء مصطنع : وي هاهي بدات الدقيقة 
أمجاد : فكرة اناخد ليك لولاد حيديها من بالك حيت مكيناش 
ثلوج ببرودة : أصلا معندكش لحق عليهم .. مقيدين فسميتي نتا شكون ؟ 
بتاسم إبتسامة جانبية : بلاما تقولي لييهم انا باهم 

ثلوج خرجات فيه عينيها مصدومة : علاش عندك بالك انقولها لييهم ؟ .. وااش عندك بالك ايلصقو فيك و اتقلو عليك ؟ .. سهرت معاهم الليالي طول هاد أربع سنوات مغاديش اغلبوني الأيام لماجية .. تعدبت باش كملت لحمالة بييهم و ولدتهم .. صبرت و صبرت باش كبرتهم مغاديش نجي دابا و نلصقهم لييك .. إلا خفتي اتقلو عليك متخافش هادشي مكاينش 
أمجاد بهدوء : مزيان 
بقات كتشوف فييه مصدومة واش نفسو هادا أمجاد لي 

قدامها : ازين يامك أمسيو .. نخليك دابا و عمرك تبقا تجي تزورهم باش ميتعلقوش بييك .. على الأقل ممعتارفش بيهم عطيهم التيقار باش اكملو حياتهم عادي 
أمجاد سكت شحال و رجع نطق : داكوغ 
تلافت لعند ولادو شير ليهم بإيدو زعما باي باي عاد قلب الدورة و مشا 
بقات واقفة كتحس بالأرض كتدور بيها و هي فحالة صدمة و عينيها خارجين ممتيقاش و مدخلاش لدماغها


بقوة مصطنعة جرات ولادها حتى طلعو لفوق عاد دخلو لشومبر ديالهم .. سدات لباب بحركة مهدودة 
زياد : ماما النعسو ؟ 
ثلوج هزات راسها باه : حيدو التجاكيطات ديالكم و نعسو .. متافقين ؟ 
هزو راسهم باه و نفدو طلبها فالحين عاد مشاو تخشاو فالفراش كيضحكو 

خلاتهم مستمتعين بوقتهم و مشات لشرفة جلسات على الأرجوحة لي كاينة تماك .. جامعة رجليها و عقلها سارح لبيعيد ساهية مع الريح لي كتدي و تجيب فشعرها بهدوء .. شوية بشوية بداو كيخرجو شهقاتها حتى بدات كتبكي بحرقة حاطة ايدها على فمها باش ميتسمعش الصوت و تخلع ولادها .. طال حالها وهي كتنخصص بعمق حتى عيات و نشوفو عينيها من الدموع عاد تنهدات بتعب و جبدات تيليفونها من الجيب لوراني.. نسات راسها كانت جالسة عليه .. بقات كتبقشش فيه بتدمر مقدراش تشوف التصويرة ديالو مع ولادها .. بغات تنسا شوية دخلات لأنسطا تشوف لجديد لقات سناء مسيفطة ليها ميساج دخلات قراتو و هي تضحك 

⁦🗨️⁩ " عرفتيي شنو .. على طبيب قرطاس لي لقيت فالسطاج .. دخت اختي دخت "

⁦🗨️⁩ ثلوج بغات تنسا شوية بدات كتجمع معاه : " نتي غا لي شفتييه عااجبك ... فينو هاداك لي كتبقاي تعاودي ليا عليه " 

⁦🗨️⁩ سناء : " شكون عصام ؟ "

⁦🗨️⁩ ثلوج : " تبركالله الناس ولاو كيقولو عصام حرفية " 

⁦🗨️⁩سناء : " ههههه راني حفضااه مزيان .. تلقايه مسكين معارفش عندو معجبة فهاد لعالم طايحة فييه .. كون غا كان فالمغرب .. مفهمتش التيتيز ديال لبلان كيكونو عايشين برا .. عرفتي شنو قلت لممرضات لي معايا فلوبيطال .. قلت ليهم عصام ايجي اخطبني و غادي نتزوجو و راه كيبغيني ههههههه "

⁦🗨️⁩ثلوج خرجات عينيها : " من نيتك ؟ .. ولا عاقو بيك كتكدبي وعلاش اصلا كتكدبي ؟

⁦🗨️⁩سناء : " فين ايعيقو بيا كنكدب حتى نتي هههه .. بغيت نجرب الإحساس لي درتي فاش قولبتي عمي على زواجك و قلتي ليهم مخطوبة و نتي ما مخطوبة موالو " 

⁦🗨️⁩ثلوج بتدمر : " سناء عفاك متبقايش تجبدي ليا هادشي .. عرفاك كتهدري بعفوية و لكن آخر مرة تجبدي ليا حياتي لقديمة .. عاودت ليك كلشي باش نفرخ لي قلبي ماشي باش نبقا نتفكرو "

⁦🗨️⁩سناء :" سمحي ليا غا ضحكت والله .. لمهم فحالة تلاقيتي راجلي فأمريكا قوليه مراتك كتسناك ههههه" 

⁦🗨️⁩ثلوج : " الله استر .. حتى نرجع لمغرب و وريني تصاور هاد عصام لي طايحة فيه و كتكدبي على الناس راك مخطوبة منو .. عرفتي و احصلك مطيحة عليه باطل و هو مكيعرفكش اصلا اتضبري عليها ابنتي .. زيري السمطة و قولي لواليديك راك ممخطوبة موالو باش ميتيقوش بصح "

⁦🗨️⁩سناء :" غا كنضحك. ..و على واليديا راك عارف كون مدرت ليهم هاد لكدبة ديال ايجي اخطبني هاد عصام كوراه زوجوني شحال هادا "

⁦🗨️⁩ثلوج :" أثرات عليك قصتي حتى وليتي كتخطبي و تزوجي فراسك هههه "

⁦🗨️⁩سناء : "خليني اختي نخضر عويناتيي .. يله نخليك دابا "

⁦🗨️⁩ثلوج بتاسمات : " تهلاي "

حطات التيليفون حداها كتضحك على حالة بنت عمها .. كتعجبها هاد السنطيحة لي كتدفع و تفتاخر على لبنات و هو داكشي كامل مكاين منو والو .. سهات كتفكر حتى هي فاش كدبات على لحاج و قالت ليه مخطوبة .. تنهدات كتفكر أيام زمان .. الأيام لي عمرها اتعاود من جديد


فاقت على صوت لمنبه .. حلات عينيها بزز طفاتو و تلافتت لعند ولادها فرحانة بيهم كتبوس و تعاود .. شوية جمعات لوقفة كتفوه بتعب .. يله بغات تمشي لحمام سمعات صوت تيليفونها تلافتت لعندو هزاتو بعدما جوبات على لمكالمة : وي ختي
تصمرات فبلاصتها مصدومة : ككك كييفااااش ؟؟؟ .. شنوو كتقوليي ؟!! وااش بصصصحح لا ميمكنننش. . اياربيي شهادشيي طاااح عليينا .. صافي صافي انا جاية لمغرب .. منقدرش نبقا جالسة هنا نتي عارفة شنو دارو على قبلي 
قطعات مع ختها مخرجة عينيها و مصدومة عقلها ماشي معاها : ياربي السلامة .. ياربيي تفاجيها من عندك ياربي 
مسحات دموعها لي هبطو و مشات بجرية قضات حاجتها فالحمام و قبل تخرج غسلات وجها مزيان و نشفاتو بالفوطة .. بتدمر حلات لباب كتقدم بخطواتها جيهت تيليفونها لي غا هزاتو صونات لرقم كتسناه اجاوب

بقات غادة جاية بتوتر مرتابكة حتى تحل لخط عاد نطقات : قوول لييهم عفاك بلاما اتسناونيي .. هما فيهم لكفاية .. منقدرش عندي أمر طارئ خااص نرجع لمغرب .. شكرا على تفهمك .. اااه واخة حتى تسيفطهم ليا فالجيمايل انطالع عليهم مزيان .. اوكي شكرا مرة أخرى

قطعات معاه كتنهج : ياربي ممتيقاش 
تلافتت لعند ولادها كتفيق فيهم : زيااد .. يزيد فييقو يلله حلو عويناتكم اوليداتي خااص نمشيو 
زياد : هننن ماما بلاس 
يزيد : بلييز مامي ... بلييز غا سوية 
ثلوج : و نوضو بااش نتهلا فييكم 
حلو عويناتهم بزز كيتفششو عليها و هي دايرة لخاطر واخة مرفوعة و عينيها مغرغرين .. بقات معاهم حتى دخلاتهم لدوش غسلات ليهم و خرجات لبساتهم بالسيف أما كون جات عليهم ابقاو ناعسين مزال .. غا سالات بدلات و جمعات لفاليز ديالها عاد خرجاتهم من الشومبر بالخاطر عطياهم وقتهم

دازو ساعات طوال .. 

وقفات بالطموبيل قدام لقصر مصدومة لدخول و لخروج لي واقع .. بتدمر نزلات و دارت حلات على وليداتها لباب خرجاتهم 
زياد : سنو واقع اماما 
يزيد بحماس شاف الناس بزاف : كينا حفلة واقيلة 
ثلوج ملقاتش كيفاش متجيبهمش معاها ولكن معندهاش حل : اجييو معايا 
دخلو لقصر و صوت لبكا فكاع لبلايص... تلفات بيها الدنيا حتى جات لعندها ختها 
حنان : على سلامتك اختي 
ثلوج مصدومة : كيفااش وقع و امتى .. صدمتيني متوقعتهاش 
حنان بصوت باكي : حتى حنا كلنا تصدمنا .. مووت با سيدي مزال متيقناه 
ثلوج بأسى : امتى مات ؟ 
حنان : لبارح بالليل 
زياد : مال باسيدي اخالتو 
يزيد : و علاس كتبكيو
هبطات لعندهم حنان باستهم مطولا عاد بعدات موحشاهم : با سيدي مشا عند الله خاص ندعيو ليه بالرحمة و لمغفرة 
زياد : يعني عمرنا انسوفو با سيدي ؟ 
حنان دموعها هبطو : لا مبقيناش غادي نشوفوه 
يزيد : يعني مغاديس ابقا العب معانا فاس نجيو عندو ؟ 
حنان متأترة : لأسف لا .. ولكن ايشوفكم من لفوق ديما ايبقا مراقبكم 
زياد : خالتو واش باسيدي مات صافي ؟ 
ثلوج دموعها هبطو على ولادها لي باينة فيهم بداو كيتأترو .. مسحات تحت عينيها بالخف و هبطات لمستواهم كتهدر بصوت هادئ باش ميتخلعوش : با سيدي مشا عند الله .. إن لله وإن إليه راجعون هادشي لي خاص نقولو 
حنان جمعات لوقفة : اجيو معايا نديكم لبيت تعلبو شوية 
و شافت فثلوج غمزاتها زعما اتطلعهم باش ميسمعوش لبكا و اطيح عليهم الضيم 
ثلوج : طلعييهم اختي 
هزات حنان راسها باه و جراتهم معاها كتسايس معاهم بالخاطر و تجاوب فيهم على قد عقلهم الصغير 

ثلوج بقات متبعة ليهم لعين بحصرة .. تنهدات على ولادها لي معندهم زهر كاع لي كيبداو اتعلقو بيهم كيمشيو و اخليوهم ..و خايفة هادشي لي اوقع مع أمجاد .. خايفة تجي الصدفة و اتعلقو بيه فالأخير ازيد بحاليلا ميعرفهمش .. فوسط تفكيرها تفكراتو لبارح .. سهات كتحلل و تستنتج زعما لبارح كان عارف جدو نعمان مات ؟ .. امكن داكشي علاش كان كيتصرف هاكاك ! ..بقات كتدور و تدور باش تلقا شي عذر و والو حاسة براسها كتكب لما فالرملة و تفكيرها لا علاقة بالمنطق لي خاص تفكر فييه .. فعز سهوتها سمعات سميتها تلافتت بعفوية حتى كتجي عينيها فعينيه 


قرب لعندها باستغراب : ثلوج ياك ؟ 
هزات راسها باه : وي .. شكون نتا .. زعما كنقصد معرفتكش 
مد ايدو صافحها : بدر الدين ولد عم أزار و أمجاد .. شفتك فالطيارة و بقيت مستغرب كنقول امكن هي 
ثلوج بلطافة : حيت امكن شايفني غا فالعرس داكشي علاش 
بدرالدين : اه داكشي علاش بقا عندي شك واش نتي نفسها .. أمجاد كاين ؟ 
ثلوج باستغراب : باش انعرف متلا ههه 
بدرالدين : سولتك حيت مراتو .. بغيت نقلب عليه ملقيتوش 
ثلوج موسعة عينيها : واش متأكد ولد عمهم ؟ ..واش مفراسك والو ! غريب هادشي
بدرالدين : شنو ايكون فراسي 
ثلوج : انا و ولد عمك مطلقين قبل ربع سنين .. جاية لخمسنين باش مطلقين دابا 
بدرالدين مصدوم : كتهدري بصح ؟ .. مفراسي والو 
ثلوج بابتسامة شاحبة : هاهي فراسك
بدر الدين توتر : كنعتادر منك مكنتش عارف 
ثلوج بلباقة : ماشي مشكيل كتوقع 
بدرالدين : ولولاد لي كانو معاك ولادكم ؟ 
ثلوج : وي التوينز ولادي بوحدي 
بدرالدين مستغرب : مشالله عليهم .. يله نخليك دابا 
ثلوج بلباقة : نسيت معزيتك .. الله اجعل محبتو بالصبر انشالله 
بدرالدين : ممشا معاك باس 
بتاسم ليها بإحترام و مشا مستغرب بحاليلا ضاربو تران عامر .. مكانش كيظن أنه إلا قطع لعلاقة مع عائلتو هنا فالمغرب ايتصدم بهاد الأخبار و اعلم الله شنو مزال معارفش .. فطريقو تلاقا عمو و باه سلم عليهم سلام حار و بعد بملامح حزينة 
ساجد : كان بغاكم التجمعو قبل ميموت .. ساعة الروح مشات عند الله 
بدرالدين طول فيه الشوفة بحاليلا كيقوليه شكون لي خلاني نخوي لبلاد : الله ارحمو 
بيازيد بأسى طبطب على كتف ولدو : توحشناك .. عاش من شافك كون مكناش كنمشيو انا و مك لعندك فأمريكا مكنتيش اتجي .. هاهو جدك مات و مشا و خلانا 
بدرالدين : مقادرش نتيق .. جدي كان صحيح و صحتو مزيان 
ساجد متأتر شاد راسو و مقويه غا بزز : كان عندو لقلب و تزاد عليه لحال 

فالجيهة لخرى ..

جالسة مكمشة فالشرفة كتبكي و تنخصص على موت جدها .. كان عزيز عليها بزاف و مزال ممتيقة فراقو ..الدنيا صعيبة فأي لحظة اقدر امشيو الناس لقراب و اخليونا .. فالأول جربات فراق حب طفولتها بعدما تعلقات بيه بزااف .. جاية لخمس سنوات باش نقطعات علاقتهم بمرة لا اتصال لا معلومات كيوصلوها علييه حتى من الأنسطا لي كانت كتطل عليه مرة مرة حيدو فخطرة .. تنهدات بتدمر كتفكر كيفاش ستجمعات قوتها و بدات من جديد بدون أي رجل فحياتها .. حتى لنهار لي كملات فيه آخر سطاج ليها و خدات شهادتها مات جدها و مكملاتش فرحتها .. فعلا الدنيا صعيبة و ضرباتها قاصحين إلا مكنتيش قوي مغاديش تكمل فيها و كيف كيقولو لحياة تستمر خاص غا لوقت لي كيداوي لجرح .. مسحات دموعها متلبكة عاد جبدات من جيبها باكية دلگارو هزات واحد حطاتو ففما عاد شعلاتو و بدات كتكمي و تنتر بحال أي واحد مولف و دخلات معاه لبلية .. سمعات الدقان فالباب خرجات عينيها و زطمات على لگارو كتخبي فيه مخلوعة .. حتى تحل لباب و تحلو عينيها معاه مجات فين تستوعب الصدمة حتى سمعات سميتها خرجات من فمو بعد خمس سنوات : تغرييد 
تلافتت بالعرض لبطييء حتى كتجي عينيها فعينيه : بب بدر 
بدرالدين بنضرات حنين و شوق : سمعت كملتي قرايتك ؟
قرب لعندها بخطوات تقال و هي مصدومة و جامدة فبلاصتها كتطلع و تهبط فيه : شكادير هنا ؟ 
تصعق من برودة تصرفها : تغريد 
غوتات وسط وجهو بغضب : خرررررج عليااااااا
هز حاجبو : تغريد ! 
تغريد بنضرات جهنمية : قلللت خرررج مكتفهمش ؟؟؟ 
قصداتو بعصبية كتدفع فيه خلاتو مصدوم ماشي هادي هي تغريد لي كان كيعرف .. البراءة و الإبتسامة مزينة وجها .. ماشي هادي هي تغريد لي واخة كتعصب عمرها توصل لهاد النضرات 

تغريد متهنات حتى خرجاتو و سدات لباب كتنهج .. بلاما تشعر بداو دموعها كيهبطو وحدة مور وحدة و باش تبرد قصدات لگارو هزات واحد شعلاتو و بدات كتكمي باش تهدن و تكالما

داز لوقت ..

لقصر كامل عمر بالعائلة و بأحفادها .. موت نعمان آل عمران خلا فاجعة بالنسبة لعائلة والأقارب و خصوصاً ولادو ساجد و بيازيد و ذهب لي حسو بالدقة و حتى ولادهم شاركو معاهم لحزن و مكانوش أقل منهم .. كلا فجيهة جالس شارد و كيتفكر لحضاتو مع جدو و شنو جمعهم من غير شدى لي مهبطة راسها بحزن شديد حيت معاشتش مع جدها بزاف دلوقت .. مكانتش كتجي لمغرب قليل غا فاش كتجي مع واليديها ادوزو الصيف و ارجعو .. دازو سنوات باش مرجعاتش حطات رجليها فهاد الأرض .. ونهار كتاب ليها تكلف بقضية فالمغرب جات لعزو جدها .. الصدمة كانت قوية عليها و بكترة ما قوية مقدراتش تبكي و لكن من لداخل قلبها كيضرها بزاف و مزال كيزيد اضرها 

فالقنت لاخر جالسة كلثوم بملامح ممحية مرة مرة كيطغا عليها لحزن .. مهدودة و ساهية كتشوف لبعيد حتى من لعزاية مكتجاوبهمش بكترة الصدمة .. آخر حاجة كانت التوقعها دابا هي موت راجلها


على برى ..

خرجات كتقلب بعينيها : زياااد .. يزيييد فييينكممم 
هزات تيليفونها صونات لختى لي جوباتها فالحين : فينهم .. قلتي ليا لحديقة ياك ؟ .. كنقلب مبانوش ليا 

كانت غادة كتدور فعينيها فحالة لا قشعاتهم حتى كتسمع صوت لبكا : صافي صافي لقيتهم
قطعات مع ختها عاد كملات طريقها كتقرب لمصدر الصوت .. غا وقفات عليهم خرجات عينيها : زياااااد 
زياد بعد خطوة للور مخرج عينيه : مدرت والو اماما 
تحدرات ثلوج لعند لوليد الصغير لي كيبكي تكون عندو تقريبا تلات سنوات : مالك اماما .. شكون بكاك ؟ 
لولد كيتنخصص هز صبعو شير لزياد : هننن ضربنيي 
يزيد : لا اماما هو لي ظلم زياد 
ثلوج خرجات عينيها فيهم : حشومة واش لجنازة ديال با سيدي و كتديرو لبسالة ؟؟؟ ماشي حشوومة 
زياد كيدور فعينيه : هو لي ظلمني اماما .. قالي عطيني لكورة نلعبو بجوج 
ثلوج : و شنو فيها إلا عطيتيها ليه ؟ 
زياد بعصبية : ميحلمش بيها 
ثلوج شافت فالولد : غادي نمشي نجيب ليك ألعاب زوينين .. صافي متبكيش .. فينها ماماك بعدا ؟ 
لولد كيتنخصص : معرفتش .. صافي تخاصمت معاك ا صاحبي 
زياد خرج عينيه : انا مصاااحبككسس .. ماما قولي ليه انا مصاحبوس
ثلوج راسها ايتفرق عليها : اوووه زياااد رجعتيي لتسطية ديالك .. شنو فيها لا عطيتيه العب معاك ..ولد صغيور تبغي تبكيه حشومة متديرش لبسالة باش منتقلقش ..واش تبغي ماماك تقلق ؟ 
زياد بميوعة : صافي انعطيه غا حيت باش متقلقيش
ثلوج : مزيان يله عطيه .. بقاو تلعبو هنا حتى نجي ليكم باش نمشيو صافي ؟ 
هزو راسهم باه و قبل تمشي بتاسمات لوليد الصغير عاد قلبات الدورة قاصدة لقصر .. مجرد مدخلات قشعات كلثوم خارجة من الصالون مشات لعندها بملامح حزينة شدات ليها فإيدها : لميمة فين غادة .. اجي تجلسي ترتاحي 
كلثوم : غا خليني ابنتي .. سيري تشربي اتاي راه محطوط مشربتيهش قبيلة 
ثلوج : مفياش .. يكما نعاونك فشي حاجة ؟ 
كلثوم : خارجة نتلقا لولدي توحشتو و نرجع 
ثلوج باستغراب : شكون ؟ 
كلثوم : أمجاد 
ثلوج بلعات ريقها .. شوية سرحات بعقلها كيفاش اتكون حالتو دابا بعدما خسر جدو أكيد ايكون متأثر .. سخن عليها راسها و نطقات بلاما تحس : صافي انمشي معاك
كلثوم فيكسات النظر فيها حتى ثلوج عاقت على راسها و عتقات لموقف : زعما الله احفظ .. لا طاح ليك طونسيو ولا شي حاجة 
كلثوم بصوت مهدود : واخة ابنتي .. شدي فيا 
شدات ليها ثلوج فدراعها غادة معاها بالشوية و بخطوات تابتة حتى قربو لباب لقصر 
كلثوم بابتسامة شاحبة : هاهو جا
هزات ثلوج راسها بعفوية غا جات عينيها فعينيه قلبها ضرب فالمية و عينيها مشاو نيشان لبنت لي جاية حداه بالكسيوة طويلة ديال للمحجبات بحزام فالخصر و لفولار فوق راسها .. بيضة و زوينة لي شافها ايحماق عليها 
محسات براسها حتى نطقات كلثوم فاش قربو لعندهم : على سلامتك اولدي .. اجي عنقني اجي 
بعدات ثلوج كترعد من لدخل خلاتو عنق جداتو مزير عليها قبل ابعد باس جبينها مطول عاد رجع خطوة باللور 
كلثوم بفضول : تبركالله شكون هاد لبنيتة 
أمجاد تلافت لعندها : الياقوت 
كلثوم : مشالله .. مرحبا بيك ابنتي
الياقوت بتاسمات ابتسامة بشوشة و رجعات هبطات راسها 
كلثوم رجعات شافت فأمجاد زعما شكون بالضبط عاد نطق بهدوء : مراتيي 
و هز ايدو شبكها مع ايد الياقوت هاد الأخيرة لي بتاسمات بخجل و هبطات راسها 
ثلوج حسات بقلبها تقطع طراف طراف من الصدمة بقات جامدة محاساش بلي داير بيها عقلها كلو مع صباعهم لي مشبكين مع بعضياتهم و كلمة مراتي كتدور فراسها ..مجات فين تستوعب الصدمة حتى سمعات نفس الصوت ديال لوليد الصغير لي كانت كتهدر معاه فالحديقة جاي كيجري لعند أمجاد تلاح عليه و كيردد كلمة " بابا "

أمجاد : فيين كنتي البطل
الياقوت هبطات راسها لعندو : سمير حبيبي فين كنتي 
سمير شير لثلوج : هاد خالتو هي لي قالت لدراري اخليوني نلعب معاهم 
الياقوت شافت فثلوج لي جامدة بابتسامة بشوشة : شكرا 
ثلوج كترعد كاملة من لداخل قلبها كتحس بيه ايسكت دابا .. نفسها تخربقات و عقلها كيضرب بأفكارو بحاليلا نايض عندها إعصار داخلي 

كلثوم عاقت بالبلان يله اتلافت لعند ثلوج لقاتها كتشوف ببرودة و عفوية 
ثلوج : لميمة نخليك دابا 
كلثوم : ملي جيتي مكليتي والو 
ثلوج سلمات عليها بلباقة : كون كان فيا الجوع كون كليت .. انخليك دابا و متزيريش على راسك خاص نكونو قويين حيت فأي لحظة كيمشيو الناس لقراب و لحياة تستمر مخاصش نوقفو فنقطة وحدة
أمجاد هز حاجبو من كلامها مع إبتسامة ساخرة 
بتاسمات بحب لكلثوم : يله بسلامة و ردي لبال لراسك 
كلثوم بامتناع : متمشيش .. بقاي حتى تعشااي على قبلي 
ثلوج بتحدي و شجاعة : انشالله .. انمشي لداري دابا عندي شي غراض إلا كتاب انرجع 
بتاسمت لكلثوم و رجعات شافت فالياقوت و ولدها كيفاش قارم عليها باينة فيه متعلق بيها بزاف : الياقوت مرحبا بييك 
الياقوت بخجل : شكرا 
ثلوج هبطات عينيها لعند سمير : رد لبال لراسك صافي 
سمير ضحك فوجها : شكرا خالتو 
الياقوت : سلم عليها .. خالتو زوينة 
بتاسمات ثلوج كتصطانع لهدوء و لقوة : باينة فيه ممولفش هه
رجعات لوضعيتها ببرودة : نخليكم دابا 

ودعاتهم بقناع مصطنع عامر أكاديب .. قناع مخبي لقهرة لي حسات بيها .. قناع مخطي على جرح قلبها لي حسات بيه تمزق و كيحرقها بحال لعافية .. إحساس تكون بارد من برا و شاعل من لداخل إحساس صعيب بزاف و باش التحكم فييه خاص تكون سميتك ثلوج 

كلثوم شافت فأمجاد مصدومة و متوقعتهاش منو و لكن معندهاش لحق تهدر : دخل اولديي توحشتك 
أمجاد شاف فالياقوت : دخلي لصالون هاني جاي ..دي معاك سمير حتى هو
الياقوت بإرتباك : و شنو انقول لعائلتك ؟ 
كلثوم : غا سيري ابنتي انا انعرفهم عليك 
هزات الياقوت راسها باه و كلها توتر .. هزات سمير و تقدمات بخطوات تابتة ناحية الصالون 

كلثوم ربعات ايديها : امتى تزوجتي ؟ 
أمجاد مسح على راسو : شحال هادا 
كلثوم : و حنى آخر من يعلم ياك اولدي ! 
وقفات عليهم آريا بعينين مدمعين غا شافت ولدها تلاحت عليه كتعنق و تبوس بشغف و حنين عاد بعدات مسخياش : توحشششتك .. متخايلش قدااش 
أمجاد باس جبينها مطول عاد بعد : حتى انا البرازيلية دياليي 
آريا : بغيت نتقلق منك و مقدرتش 
أمجاد : علاش ؟
آريا : شكون لي زاد و عمرو تلافت موراه ؟ حتى لهاد الدرجة حقدتي على هاد لبلاد ! .. قلبك قصااح بزاف 
أمجاد ببرودة : لوقت لي كتقصحك 
كلثوم شافت فآريا : سيري لصالون سلمي على مرات ولدك 
آريا : شكون حنان ؟
كلثوم : الياقوت و ولد ولدك 
آريا خرجات عينيها و رجعات شافت فأمجاد مصدومة 
أمجاد : غادي نمشي نشوف لواليد .. نخليكم 
زرب عليهم فاش باس جبينهم بجوج و مشا 
آريا : كك .. كيفااش !!
كلثوم : كيف كتسمعي .. و ثلوج مسكينة كانت معايا فاش جا .. لبنت خصصات حياتها لولادها و عطاتهم كاع وقتها أما ولدك ضربها بتزويجة و ولد كاع 
آريا : ميمكنش ولدي و كنعرفو .. تسنااي عليا نمشي نفهم منو شكايخربق .. ميمكنش متأكدة شي حاجة مهيااش .. راه كبدتي و كنحس


خرجات كاملة كترعد قاصدة ولادها لحديقة كتقلب عليهم .. كتحس بالدوخة غادي تشقلبها على وقفتها و لعرق خارج من جبينها شوية بشوية حسات بإيدها تزيرات عليها فاش هبطات عينيها لعندها لقتها جاها كلاكاج و صباعها عواجو خاص حتى تهدن عاد اترخفو عليها و ارجعو لطبيعتهم .. فطريقها تلاقات ختها 
حنان مستغربة : حبيبة مال وجهك صفر ؟ 
ثلوج كترعد : ولادي .. فينهم ولادي مغادي نزيد حتى دقيقة هناا .. بغييت ولاديي ضروري 
حنان تخلعات : مالك ؟ .. شنوو واقع فهميني 
ثلوج بعصبية : وااالو موااقع واالووو .. بغييت ولاديي زياااد يزيييد فييينكممم 
حنان : تهدنيي .. رخفيي على رااسك اناريي .. بالشوية و فهميني 
ثلوج بدات كتبكي كتشهق مرضياش : وااالووو حناان بلاماا تحمقينيي بغييت ولاديي .. حيدي من قدامي بغيت ندوز
حنان : ثلوج تهدني ..زياد و يزيد كيلعبو عاجبهم لحال خليهم معايا نتي ماشي حتى لهيه 
ثلوج كترعد و لون دوجها مخطوف تالفة : اااه انا مرييضة غااديي نمووت .. صاافيي خلييهم عندك مبغيتهمش ..مبغييت حتى حاجة تفكرني فييه 

قلبات الدورة غادة بخطوات سريعة خلات حنان حالة فمها فكلامها عرفاتها اتكون واصلة بيها لعظم و داكشي لي كان فعلا .. غا وصلات لطموبيلتها بغات تحل لباب سمعات صوت حفصة تلافتت بملامح جامدة كترعد 
حفصة : فين غادة ابنتيي .. يله جينا انا و باك نعزييو 
ثلوج هزات راسها باه زعما مزيان ..عاد ركبات و كسيرات حتى تحكو الروايض خلاتهم كيشوفو فبعضياتهم مفاهمين والو 
حفصة : معرت مالها 
لحاج بميوعة : اتكون شافت داك ولد لحرام لي كان مزوج بيها 
حفصة خرجات عينيها : اويلي سكت دابا اسمعونا .. متنساش راه بنتك مزوجة بخوه ..صافي صقل جينا نعزيو نديرو لواجب و نمشيو بحالنا 
لحاج تنهد : يله زيدي تعطلنا 

فالجيهة لخرى ..

غادة مكسيريا بأعلى سرعة ممكنة ..كتضوبل الطموبيلات ممسوقاش إلا دارت كسيدة ..مبقاتش كتشوف قدامها من غير الضباب بسباب الدموع لي تحجرو فعينيها حتى بغات تموت .. كتبكي بحرقة و شهقات عميقة .. وجها تخلط بالحمورية و عينيها تنفخو بالبكا و التنخصيص .. غا وصلات لمستشفى نزلات كترعد قاصدة نيشان لداخل .. غادة فالكولوار كتفتف ناسية حتى على لمشية كيف خاص تمشي بيها .. زادت فوثيرة دلبكا فاش لاحظت شوفات الناس ليها ملي كيدوزو من حداها لدرجة غا كيقربو جيهتها كيبعدو بحاليلا خارجة من مستشفى لمجانين .. موصلات لمكتب ديالو حتى حسات بروحها خرجات ..حلات لباب بدون مقدمات و دموعها هابطين كيجريو 

نطقات بصوت منغنغ بالبكا : أحمد 
هز راسو بعدما كان كيكتب لأحد الأقارب ديال شي مريض الدوا لي خاص اياخد ليه : ثلووج .. دخليي اجي جلسي 
وشاف فالقريب : صافي اسيدي هادشي لي خاص التاخد ليها و انشالله مغادي اكون غا لخير 
هز الراجل راسو باه و جمع لوقفة كيشكرو عاد مشا و سد موراه لباب
أحمد تلافت لعندها لقاها مزيرة على ايديها حتى لعروقة بانو : رخفيي ايدييك عاد هديي 
ثلوج نتبهات لإيدها .. تنهدات بعمق عاد رخفاتها : تزوج و ولد 
أحمد هز حاجبو : ايااه تزوج كاع ! .. فين شفتيه 
ثلوج : جدو مات و مشيت لجنازة 
أحمد : باش عرفتيه تزوج بعدا 
ثلوج كتنخصص : جاب معاه مراتو كانت لابسة الطويل و محجبة و امكن زوينة عليا كااع و عندو ولد صغير ايكون فتلت سنين .. سميتو سمير و باينة لعلاقة بيناتهم زوينة 
أحمد : مممم قلتيي جابها معاه ..اوا و نتي شنو درتي 
ثلوج شافت فيه بعينين مدمعين : تحكمت فراسي بزز باش منبكيش قدامهم .. ضغت على قلبي حتى حسيت بيه تحرق مزيان 
أحمد : جمعي لوقفة عندنا منديرو 
ثلوج بتعب : مباغا ندير والو 
أحمد بحماس : اتهزي الآلة .. نوضي نتي جاية تشكاي عليا و منلقاش ليك لحل .. يلله بلاما نهزك تيقي فيا و ديري اش كنقول 
ثلوج : اشمن حل ؟ 
أحمد كيحيد فالطابلية دالطبيب و كيلبس فالجاكيط : هانتي اتشوفي بعينيك 


كان كيسوگ و مرة مرة اتلافت لعندها كيلقاها ساهية حتى كيبدا اضحك فيها عاد كتنطق بحرف و لا جوج .. خاطرها مقبوط عليها و الدنيا كتبان فعينيها ظلمة 
أحمد وقف بالطموبيل : يلله هبطيي 
عاد حسات عليه وقف تلافتت لقاتو جابها لدارها : شكرا 
أحمد نزل و دار حل عليها تنزل حتى هي : دخلي بدلي حالتك و يلله نمشيو 
ثلوج باستغراب : فين انمشيو ؟ 
أحمد : لجنازة بحالنا بحال الناس 
ثلوج : مستحيل نحط رجلي فداك الدار بلاما تحاول معايا 
أحمد : هدرت و لي عندي قلتو .. كيف كنت كنصحك هادي خمس سنين و كتسمعي ليا خاص حتى دابا تسمعي ليا 
ثلوج بغات تنطق عارضها كيجر فيها بحماس كيحاول اخرجها من لقوقعة لي ناوية تدخل ليها .. حلات باب لفيلة و دخلات كتدور فعينيها 
أحمد : مكيناش لبنت لي معاك 
ثلوج بتدمر باغا غا تنعس : معرفتش .. اتكون مزال مدخلات 
غا كملو كلامهم سمعوها نازلة بخطوات سريعة : ثلوج ؟ جيتيي
ثلوج هزات راسها باه و طلعات لفوق 
أحمد بصوت عالي باش تسمعو : لبسيي شي حاجة مناسبة لجنازة 
سناء قربات لعندو : شنو واقع ؟
أحمد عاود ليها بالمختصر : هادشي لي كاين 
سناء مصدومة شوية حسات على راسها : بغيت نسولك إلا كان ممكن 
أحمد : اهاه مرحبا 
سناء : واش كتعرف داك لجراح لي عندو شعبية فلوبيطال 
أحمد ضحك : اه بغيتيه ؟ 
سناء : هاا .. انا ؟ لا لا غا قلت زعما .. عرفتي صافي نسا 

يله بغات تمشي و هي تقلب الدورة راجعة لعندو : عفاك إلا كنتي قريب منو قوليه ميبقاش ناشر علينا زينو فلوبيطال
أحمد : اهاه حاضر سيادتكم .. أوامر أخرى ؟
سناء كتضحك : لا هادشي لي كاين 
و قلبات الدورة غادة لكوزينة .. و لفات هاد الطبيب بكترة ما كتشوفو كيعجبها لحال حيت بسبابو بنت عمها خرجات من أزمة كبيرة و لحد الآن مزال معاها و كيوقف فجنبها فاش كتحتاجو .. تمنات حتى هي اكون عندها صديق بحالو 
سهات كتشوف لبعيد و ميلا شفايفها كتفكر : و لكن ماشي كلشي كنبغيوه اكون فحياتنا .. هاهي ثلوج لي اشوفها من بعيد ايقول فرحانة فحياتها .. عندها أحمد و مراد كاع أصدقائها و مفرحاناش .. يعني عادي نكون سيلي معندي حتى صديق ولا حبيب .. يااه زعما انبقا بايرة حياتي كاملة ؟ خاص نجمع راسي من داك لكدبة لي مطيحة على هاد عصام .. إلا مشا حتى عرف لباطل نهاري مغاديش تطلع فيه الشمس

سمعات ثلوج كتعيط ليها خرجات من لكوزينة غادة لعندها : هاني 
ثلوج بصوت تعبان : تبغي تمشي معانا 
سناء : لا غا خليني مكنقدرش على جو لعزو و لبكا 
هزات ثلوج راسها باه : ردي لبال لراسك و طيبي ليك متبقايش بالجوع 
سناء : بلاما توصيني .. سلمي ليا على التوينز 
بتاسمات ثلوج و خرجات لعند أحمد بكسيوة طويلة مناسبة لجنازة .. فلون البلومارين و شعرها مطلوق مرجعاه كامل لور من غير لفغونش لي مهبطاها على جبينها و ميكاب خفيف بغات تخبي بيه حزنها و تصطانع لقوة لي متلاها .. تقدمات بخطوات حتى ركبات حداه عاد كسيرا نيشان لقصر آل عمران 

داز لوقت .. 

نزلو بجوج عاد شاف فثلوج لي كتلون بحاليلا بغات التراجع 
أحمد : شنو قلنا ؟ .. لي بغاك بغيه و لي مبغاكش حيديه من لاليست ديالك .. هادا تحدي تحداي بيه راسك إلا مدرتيش هاكة عمرك تزيدي خطوة لقدام 
هزات ثلوج راسها باه : انحاول نكون قوية 
أحمد : اصلا نتي قوية منخافش عليك 
بتاسم ليها عاد دخلو بجوج كيسمعو فالقرآن و الناس غادة جاية و الدنيا عامرة بالعزاية .. حتى جات لعندهم آريا دخلاتهم لصالون بابتسامة كان معامرش بزاف بالناس و ممخدمينش فيه لقرآن .. خلاوه حتى اعمر و اخدموه فيه.. آريا متفاجآتش بالشخص لي مع ثلوج حيت فايتة متعرفة على أحمد كونو هو لي تبع حالتها فاش كانت حاملة و من تماك تكونات لعلاقة ديال أحمد وسط لعائلات بجوج حتى كلشي كيعرفو لا من ناحية أخلاقو ولا من ناحية خدمتو و لكاغييغ ديالو فالدومين
غا وصلو لصالون جلس و جلسات حداه متوترة خصوصاً فاش قشعات الياقوت جالسة بتبات و مهبطة راسها 
أحمد شافها فين كتشوف : هادي هي مراتو ؟
مجات فين تهز راسها باه حتى قشعاتو داخل لصالون و جاي قاصد الياقوت جلس حداها 
أحمد لاح ايدو مور ضهرها : تفرجي شغاندير 
ثلوج تلافتت لعندو : شنو ؟
أحمد بتاسم إبتسامة جانبية : متشوفيش لعندهم .. كيشوف فينا عاقد حواجبو 
ثلوج : بلاما تحاول .. فهمتك شنو باغي دير .. صافي خليه من حقو ابدا حياتو من جديد انا لي حمارة عشت على ذكرياتو كنستاهل 
أحمد : ماشي هادشي لي كنشوف
ثلوج باستغراب : شنو 
أحمد : متأكدة مزوج ؟ حالة وجهو كتبين لعكس 

كان مقابل معاهم داير رجل فوق رجل كيخنشش فالتيليفون و مرة مرة كيهز عينو لعندهم .. كيبانو ليه قراب من بعضياتهم كيهدرو بهدوء و مرة مرة كيبتاسمو مركزين مع كلامهم.. هز حاجبو و عض فمو من لداخل حتى حس بالياقوت كتهدر : أمجاد فينو سمير ؟ 
شاف لعندها : مع زياد و يزيد كيلعب معاهم
الياقوت بتاسمات : ولادك زوينين مشالله 
أمجاد : زياد راسو قاصح خاصو لخاطر عكس يزيد حاجتو ماشي ديالو .. سمير ايعجبو لحال معاهم 
الياقوت : مزيان هادشي لي بغيت 
أمجاد هز راسو باه وتلافت لعند أحمد عاقد حواجبو بلاما اشعر مشا وقف عليهم جامع ايدو على شكل قبضة 
أحمد هز راسو ملي حس بخيالو وقف عليهم : لبركة فراسك اسي آل عمران 
أمجاد عاض على كلامو : ممشا معاك باس .. يله نمشيو لصالون لي فيه الراجل .. هنا كينين غا النسا 
أحمد : لا ماشي مشكيل غا خليني حدا ...
قاطعو بحدة : لا مشكيل .. يله
ثلوج موسعة عينيها و حاجبها مهزوز : علاش واش ديرونجيناك ا مسيو 
تلافت لعندها بنضرات جهنمية هاز حاجبو : نعام ؟ 
أحمد : شوية و نمشيو .. مكين لاش نمشي لصالون لي فيه الرجال 
أمجاد بغا انطق شوية نعل الشيطان و قلب الدورة راجع لبلاصتو بلا كلمة بلا جوج .. جلس حدا الياقوت كيسوط و من على برى كيمتل لهدوء و البرودة 
الياقوت : هادي هي ثلوج ياك 
أمجاد عاض على فمو : اه هادي هي لبرهوشة 
خرجات عينيها و رجعات شافت قدامها عرفاتو ماشي حتى لهيه و مخاصش تهدر معاه دابا 

أحمد : كان شوية و افلقنيي 
ثلوج ببرودة : مزيان ملي قلتي ليا نواجه مشاكيلي .. ولي بغاني نبغيه ولي مبغانيش اعطيني التيقار .. شكرا على نصائحك 
أحمد : راك عارفة معزتك عندي .. و راحتك كتهمني باش كتحسي دابا ؟ 
ثلوج : الحمدلله عادي .. لمهم شوية و نمشيو 
أحمد : صافي لي بغيتي 
فهاد الأثناء جات حنان سلمات على أحمد و شافت فختها : اجي معايا فين جالسة ماما .. كينين حتى بنات لعائلة بغاو اشوفوك
ثلوج : شكون فيهم 
حنان : بنت عم راجلي سميتها شدى كنظن كتعرفيها .. و خواتاتو تغريد و ندى 
ثلوج جمعات لوقفة : اه مزيان .. انسلم عليهم و نمشي ..زياد و يزيد فينهم 
حنان بدات كتدور فعينيها معرفاش ختها واش ساقت لخبار ولا لا : كيلعبو مع سمير واحد لولد صغير 
ثلوج : عارفة تزوج بلاما تبقاي تقفقفي .. مزيان ملي شاف حياتو باش نشوف حياتي حتى انا 
غا كملات كلامها خرجات من الصالون تحت نضراتهم من بينهم حنان و أحمد و حتى أمجاد لي كان مراقب لفيلم من الأول

فالجيهة لخرى ..

واقف من بعيد و عينو عليها كيسوط معصب و طالعة ليه و كتزيد تطلعها ليه بتصرفاتها ناوي حتى انفارد بيها و اياخد شرع ايدو 
نطق بتبات كيفكر : غدا نهدر مع عمي .. يا نتزوجك بالخاطر يا بالسيف لمهم النتيجة هي مراتي الآلة تغريد 


نهار جديد

وقف قدام لوبيطال مفراني بالجهد .. حل لباب و نزل كيقاد لكاسكيط فوق راسو و الكاشكول على فمو منظرو كيجدب الإنتباه حيت غا بتيشورط و لكاشكول على فمو لي شافو ايقول كتضرو الضرسة 

دخل كيجر فرجليه مغوبش و كيشوف فإيدو لي مجروحة 
فطريقو تلاقا وحدة من لممرضات عاد نطق بصوت ملعتم باينة مكيعرفش لدارجة مزيان : سيلفوبلي شي ممرضة تعقم ليا لجرح 
يله بغات تنطق قاطعهم أحمد من لور : كين شي مشكيل اسيدي 
تنهد باينة فيه زربان : وقع واحد لحادث و منتابهتش لمسمار تخشا فإيدي 
الطبيب : اوووه .. إلا كان مأكسد خاص تضرب برة .. اجي معايا 
سبقو أحمد عاد تبعو بخطوات تابتة حتى دخلو لوحدة من لغرف عاد نطق : هاني انوصي لممرضة تكلف بيك
ساط كيشوف فالوقت : إلا كان ممكن قوليها تسرع شوية 
أحمد : واخة .. تسنا واحد الدقيقة
و خرج غادي كيقلب على سناء باش تعلم تضرب لبرة .. كلشي زعمات عليه إلا لبرة مكتقدرش تدگها لشي واحد .. بقا كيدور فعينيه حتى قشعها شادة لهدرة مع البنت لي كاينة فالإستقبال تنهد على حالتها و مشا لعندها 
سناء كتضحك : اااه انشالله كوني هانية .. مجرد مندير لعرس نعرضك نتي لولا
البنت : هي نوجد التكشيطة 
سناء بضحكة صفرا : اه غا بداي فالتوجااد .. يله تلحقي هههه

فيقها من سهوتها على صوتو : اجي لهنا 
تلافتت لعندو مفزوعة : وي مسيو 
مشات وقفات قدامو : داكشي لي قلتي ليا نتعلمو راه درتو كامل 
أحمد : و اجي كلمي .. خاص تحيدي لخوف من لبرة 
سناء خرجات عينيها : باغا نمشي لطواليط .. أ ا ممم م.. مرة أخرى .. اوكي ؟ .. شكرا حيت وافقتي 
يله بغات تمشي جرها من دراعها و هي كتدور فعينيها كتسوط 
أحمد : هاد لكدوب ديال التحضيري مديريهش معايا 
سناء : هننن غا نشرح لييك لا بغيتي زعما 
موقف بيها حتى لعند لغرفة لي فيها لمريض : تكلفي بيه و عقمي لجرح 
سناء : كك كيفاش 
أحمد حمر فيها : سناء؟
سناء : صافي صافي .. تهدن

قلبات عينيها و دخلات لعند لمريض متوترة : سلام 
هز عينو فيها و حرك راسو بحاليلا رد عليها التحية 
سناء قربات لعندو : شنو كيضرك بالضبط ؟ 

شاف فساعتو ليدوية و نطق بنبرة معفرة : ممكن تسرعي .. تابعني بزاف ميدار ديري شغلك 

هزات حاجبها مربعة ايديها كتسوط : خدمتي عرفاها و اصلا انا غا سطاجير تعلم كيفاش تهدر بأداب 

ساط كيتنهد : اوكي فهمنا .. يلله ديري خدمتك 

خرجات عينيها موجهة صبعها ليه : راه قلللت لييك هدر بأداااب .. و أصلا انا مبقيتش غادي نداوييك نمشي نجيب شي ممرضة تدير راسها فييك .. ولمرة لماجية تعلم كيفاش كتهدر حيت راك كتنزل من مستواك مع سناء خطيبت عصاام لمشهوور إلا معرفتيهش مزيان حيت إلا قلت ليك كنيتو تقدر تمشي كتجري لطواليط تخشا فيها متخرجش 

غوت وسط وجها حتى صقلات : صااااافييييي حبببسيييي كتهدريي بزاااف .. انا لي عقلي خاويي جااي لهاد لوبيطال 

سناء بميوعة : يلله لما و الشطابة 

بغا امشي عرضاتو موسعة عينيها فاش تفكرت أحمد و شنو طلب منها تدير : صافي صافيي رجع جلس .. نعقم ليك لجرح و سير 
ساط و رجع لبلاصتو : ديري شغلك 
خنزرات فيه و مشات هزات لمعقمات عاد وقفات عليه : شنو هادشي فإيدك يكما تضاربتي مع شي واحد طحنك 
نطق بغضب : كتهدري بزااف ممكن هاد لفهاماات تديريهم فخدمتك

سناء : باااز حتى تصرفاتك ماشي ديال واحد مهلوك 
حيد لكاشكول من على فمو كيتمتم : زمييي فممممكككك 
ميلات شفايفها و مشات هزات لبرة بلاما تشوف لعندو .. غا شداتها ضرباتها اللقوة كتفتف و هي براسها كتخاف منها 
شاف فيها بغضب : واش اداويني ولا نقلب على شكون اداوي 
تلافتت لعندو معصبة : يااااه مااالك كتخلصنيي .انا غا...
تفيكسات مخرجة عينيها و قلبها باغي اخرج من بلاصتو : عصام ؟


بقات كتشوف و كتبلع فريقها مصدومة و ودنيها كيصفرو : واش نتا عصام .. كنحلم واقيلة ماشي هو 
قربات لعندو مخرجة عينيها كتحقق فيه : هنن هو 
هز حاجبو كيطلع و اهبط فيها : شكون نتيي واش متأكدة ممرضة ؟ .. الله اعفو عليك خدمي خدمتك 
شافت فالبرة كترعد تلفات كتر ماهي تالفة .. ممتيقاش حاسة براسها غا كتحلم عقلها مقادرش استوعب .. بالسيف باش تحكمات فراسها و قربات ليه لبرة كتصفار و تخضار 

عصام عاقد حواجبو : وريني فين نضربها بلاما تبقاي تفتفي عليا 
ميلات شفايفها و خشاتها فيه حتى صعر : اااعععع وااش هاااكة كيضربو لبرة ا آنسة ؟؟؟؟ ..تفوووو ميييغد 
نتر لبرة من دراعو و رماها لبعيد حتى خرج الدم من لبلاصة لي تدگات فيها 
سناء كتمتم : سمح ليا مكنعرفش هنن 
عصام : ملي سطاجيير لااش جااية لعندي ؟؟ 
سناء كترعد هزات لمعقمات كتداوي فإيدو : أ ا اا ممم ماشي هاكة .. زعما .. هو هنن 
عصام : صافي صافيي حبسيي 
هز ايدو دار بالناقص كاع و جمع لوقفة كيسوط عاد خرج من لغرفة خلاها جامدة و الأرض كتدور بيها غا حسات على راسها خرجات تبعاتو كتجري 
قشعاتو من بعيد غادي كيخبط برجليه : مسيوو .. وقاااف مسيووو اااعععع الصمك
تبعاتو كتجري حتى عارضاتو دافعة السنطيحة : تسناا 
هبطات عينيها لعند ايدو هزاتها كتسوط عليها بالشوية : فففف كتحرقك ؟ 
علات عينيها فعينيه لي مخرجهم فيها حتى زرع فيها الرعب بحركتو 
سناء تفافات : كنقصد أ ا ممم 
نتر ايدو : صافي موقع والو .. جرح خفيف 
تخطاها و مشا 
داك الساعة تجمعو عليها لممرضات كيسولو و اعاودو 
نقزات وحدة فيهم : واش هادا هو عصام ياك ؟ 
سناء كتبتاسم إبتسامة صفرا : اه هو .. جا لعندي حيت توحشني فهمتي .. لمهم هاني مشيت بااي 
خلاتهم حالين فمهم و مشات كتجري خارجة من لمستشفى .. دورات عينيها مزيان مبقاش الأثر ديالو ..ميلات شفايفها بتدمر كتسوط : بقيت بايرة حياتي كاملة اااعععع


دازو ساعات و جا الليل ..

على الطابلة جالسين كيهدرو بعدما تعشاو مجموعين 
ثلوج علات عينيها لعند سناء بعدما كانت خدامة على لبيسي لي قدامها : مالك ساهية 
زياد كيضحك : ملي جات اماما و هي ساهية هههه 
يزيد : سناء غادي تزوجي متخافيس
مراد كيضحك : كلشي عرف سناء مخطوبة ههههههههه 
سناء بميوعة : راه أنتزوج بلاما تبقاو تشوفو فيا داك الشوفة 
ثلوج : مراد عطيني داك الضوسي نطابيه 
مد ليها لملف لي قدامو : هاهو .. خاص غا تطابيه كلشي هو هاداك 
ثلوج هزات راسها باه بلاما تشوف فيه .. تركيزها كامل مع لبيسي حتى نطقات سناء بسهوة : شفتو ليوم 
مراد كيقلب فالوراق لي قدامو : شكون ؟ 
زياد : يكما عصام ههههه 
سناء : ويلي على فضيحتي كلشي عرفني 
يزيد : راه كنقوليك اسناء متخافيس اتزوجي .. أصلا إلا ملقيتيس لعريس انا نتزوج بيك غا متخافيس 
ثلوج كتضحك : تبركالله على لبطل لمغوار 
زياد : لا اصاحبي هي كبر منك مجاتس 
يزيد : لحب معندوس سن ياك اماما 
خرجو عينيهم فزياد و يزيد 
ثلوج مصدومة : فيين كتعلمو هادشيي ؟؟؟ 
مراد : ولادك ايخرجو من الجنب 
زياد خرج عينيه بعصبية : كيفااااس من الجنب ؟؟؟ 
ثلوج : كيضحك معااكم 
جمعات لوقفة كتهبطهم من فوق لكراسا : وقيتة النعااس .. اجي نطلعكم تنعسو 
سناء : انا نطلعهم غا رجعي خدمي خدمتك 
ثلوج بتعب : اه اديري فيا خير 
طلعاتهم سناء لبيتهم و هما شادين فيها رجعوها ضحكة و كاع خبارها فراسهم 

مراد : ثلوج غادي نمشي دابا .. حتى لغدا و نتلاقاو فالوكالة 
ثلوج : بلاتي نمشي معاك لباب 
مراد : غا بقاي مكاين لاش 
هزات راسها باه و رجعات كتخدم على لبيسي مركزة 

مراد جمع وراقو و لملفات لي جاب ليها باش اخدمو عليهم بجوج .. خشا داكشي فالكغطابل عاد قصد لباب بعدما ودعها للمرة الثانية .. حل لباب و خرج قاصد لباب لخرجاني نيشان لطموبيلتو .. يله بغا احل لباب حس بكروشي قاصح نزل على فمو حتى طوش الدم .. تدهشر معرف راسو باش تبلى من غير أنه شد فمو و تلافت بالعرض لبطيء باغي اعرف شكون عطاه هاد لقبضة لقاتلة 
غا شافو خرج عينيه : نتا ؟؟ 
خنزر بنضراتو الشرسة و بدون تفكير عطاه كروشي آخر طيحو كاو عاد نطق ببرودة : هادو كنتي كتسالهم ليا 

لداخل ..

بتعب جمعات لوقفة كتكسل و تاها لجينز فالأسود مطراسي طايتها و ليهونش لي عندها حيت ستايل هوت طالع حتى لكريشة .. و من لفوق شوميزة فالگري مخططة و طايحة على لكتاف كيبان عنقها كامل و شعرها لي طوال مطلوق على راحتو .. تنهدات كتفكر تخلي لبيسي و هادشي كما هو عاد قلبات الدورة طالعة لبيتها .. مجرد محلات لباب شعلات الضو كتفوه غا تلافتت جيهت الناموسية خرجات عينيها مصدومة صدمة ثلاتية الأبعاد : نتااا ؟؟؟؟ 
تقاد فالجلسة بعدما كان متكي على ضهرو عاد نطق ببرودة : كتدخلي و تخرجي فالرجال قدام ولادي و بهاد اللباس .. تبركالله تبركالله 

بقات واقفة بحال لجماد موسعة عينيها فعينيه .. حتى من لهدرة مشات ليها ... لسانها تربط و كاع لحروف تنساو ليها بسباب الصدمة لي متوقعتهاش بالسيف باش رجعات لوعيها عاد نطقات عاضة على سنانها : شكااااديييير عندييي هنااااا ؟؟؟؟

أمجاد جمع لوقفة كيحنحن بصوتو و عينيه كيدورو : نسولك نتي لولا بعدا .. شحال من راجل كتدخلي فالنهار 

ثلوج بدا صدرها كيطلع و اهبط : شككااااادييير هناااا سوووولتككك جاااوبنيي

أمجاد رمقها بنضرة حادة : أول حاجة اتخفضي صوتك وتهدري بالشوية 

ثلوج بدات كتضحك بالفقصة و عينيها حمرين بالأعصاب : من نيتك ؟؟ .. لا وااش من نيتك كتهدر 
قصداتو بحال لعجاجة موجهة صبعها ليه : خررررج من داااارييي.. يللله خررررج بلاما نتسيف علييك 

أمجاد ربع ايديه مع ابتسامة ساخرة عاد هبط راسو شوية قريب لمستواها : بصح اتسيفي ؟ .. وريني نشووف 

شعلات بحال لعافية كترعد و تجنن فبلاصتها : قلللللت خرررررج عليااا مكتفهمش ؟؟؟ .. و كيفااش دخلتيي و بأشمن حق كتدخل لبيتييي 

أمجاد : هبطت من السما 

خنزرات فيه بحقد عاد دورات عينيها لقات لباب ديال الشرفة محلول عرفاتو دخل من تماك .. ساطت بغضب و رجعات شافت فيه : انعاود نقولييك خررج من دااارييي و إلا ...

أمجاد قاطعها بهدوء : و إلا شنووو

هزات ايدها حتى لفوق بغات تنزل عليه لحنك ساعة حكمها فآخر لحظة مخرج عينيه فيها بنضرات شرسة حتى زرع فيها الرعب و زاد كمل عليها فاش غوت وسط وجها حتى حسات براسها مشات و جات : ااااااااخررررر مرررةةة تعاااودييها البرهوووشة .. كتفهمييي ااااخررر مررةةة

ثلوج بعصبية و غضب واضح كتنتر منو باش تفك ايدها لي مزير عليها : طلللق منييي الحيوان .. اشنووو جاااي ديير عندي .. سيير عند مراااتك و ولدك .. ااااععععع طللق واااش مكتفهمش 

أمجاد ببرودة كيهدر مزير على ايدها : سولتك بعدا شحال من راجل كتدخلي على ولادي ؟ .. و بهاد اللباس مزال .. علاش محنة راسك و لبساه ولي تستقبلي الزو*** بكيلوط علاش حشمانة 

ثلوج نترات ايدها بقوة كترجف بالأعصاب : شنو ؟؟ عاااود شنو قلتيي !! .. ولادك ؟ قلتيي ولادك ؟ ههههه من نيتك كتهدر ؟ .. انا حشمت فبلاصتك ملي نطقتي بهاد لجملة 

أمجاد ببرودة : مزيان لحشمة صفة زوينة 

ثلوج كتطلع و تهبط فيه بإشمئزاز عاد مشات لعند لباب فرعاتو و وقفات مخسرة ملامح وجها : خرررررج من داااريييي 

أمجاد : باغي نشوف ولادي .. مخارجش 

ثلوج : اااااخرررر مرةةةة تقووول ولاديي .. زياد و يزيد انا لي ولدتهم و انا لي تعدبت بلاش كبرتهم و انا لي سهرت و تخلعت فاش كانو كيمرضو .. فييين كنتيي نتا ؟؟ عاد كتقول ولادي ؟ بأشمن صفة كتقولها اصلا .. خرررررج من داااريي قبل من رتاكب فييك شي جرييمة 

أمجاد ببرودة غادي افرگعها : لي عندي قلتو .. حتى نشوف ولادي عاد انمشي 

ثلوج كتنهج : كيبانلي نتا منفعاش معاك لهدرة 
مشات بخطوات مبعثرة هزات التيليفون و بدات كتصوني و تعاود 

أمجاد جلس على طرف دالناموسية متبع حركاتها : شكون هاد تعيس لحظ لي كتصوني ليه .. خليه اجي لعندي نزوق ليه كمارتو شوية 

ثلوج تلافتت لعندو بحقد : لبوليييس اجييو اديوك عليا من هناا 

أمجاد بسخرية : و انا شكون بنت ليك بوكيمون 

ساطت بغضب فاش تفكراتو من لمخزن و نيت البوليس مكيجاوبوش .. بغات تبكي و تحماق بالغوات .. كتحس بالنفس تقطعات فيها .. بلاما تعيق على راسها قلبات الدورة قصداه كترجف يله اتنطق بغضب تفاجآت بالتشقليبة لي شقلبها تحتو و بدون سابق انذار حط فمو على فمها .. وسعات عينيها على جهدهم و قلبها كيضرب فالمية مخلاتوش احرك شفايفو فوق شفايفها .. كان حاكمها و هي كتنتر غادي تجهل و قوتها مكتسوا والو قدام قوتو الروجولية و المتصلبة 

أمجاد بتاسم إبتسامة ماكرة فاش حكمها من ايديها و رجليها و هي كتنتر براسها باينة فيها واصلة لدرجة لجنون .. تنهد بعمق و سرط فمها وسط فمو متحكم فيه حتى هو .. كانت قبلة كتحمل بزاف دلمعاني .. قبلة عميقة بعد سنوات .. كيعض و امص بغضب و حقد و مرة بحنين و لطف حتى قطع فيها النفس و ترخات عاد بعد بانت ليه سخفانة مرخية و محاساش بأشنو داير بييها 

أمجاد بهدوء : نووضي من التبوحيط البرهوشة 
بدا كيضرب على حنكها بالشوية و والو حتى جمع لوقفة كيقلب بعينيه على كاس دلما .. غا قشعو مشا لعندو نيشان هزو يله بغا اتلافت حس بشي حاجة قاصحة خبطاتو لگفاه حتى طاح على طولتو مكمش عينيه بعصبية 

ثلوج لاحت الديكور لي كانت هازة فإيدها كتنهج و لعرق كيتسب من جبينها من كترة الأعصاب لي خرج فيها : خرررررج الحمااار خرررررج

بدات كتمسح ففمها بإشمئزاز و لبكية باغا تخرج ليها : شنووو مزااال كديير عندييي ...سيير عندك مرااااتك ..يللله خرررج 

أمجاد طرطق عنقو بالأعصاب مكمش عينيه .. بصعوبة حلهم كيشوف الضباب حتى وضاحت ليه الصورة و صوت غواتها فارع ليه مخو حتى هز عينو لعندها بنضرة حادة : منوياش تسكتيي ؟ 

ثلوج كترعد : خررررررررج ولا غاديي نديير شي حاجة فراسيي

أمجاد نتابه لإيدها لي تزيرات و صباعها لي عواجو خرج عينيه و جمع لوقفة : اريي نشووف إيدك 

رجعات خطوة باللور كتنهج : وااااش باااغييي تحمقنيي ..بأشششمن حق كتبوسنيي المسخ .. عييفت الرجااال ماشي رااجل أصلا .. توحشتيي معيوريي ؟ يلله خرج قبل منسممك كتر 

أمجاد بتحدي : غادي ندير راسي مسمعتش هاد عيفت الرجال ديالك و شي لاخر .. ولكن انورييك شكوون انا تفرجي دابا 

خرجات عينيها فاش بان ليها خارج من لبيت بسرعة فهمات قصدو و بلاما تشعر مشات وقفات معرضاه : ت تت تسناا . .. شنو كتقصد بكلامك ؟؟؟ 

أمجاد : باغيي ولاديي .. حيديي بلاما نخرج فيك شي كروشي 

ثلوج كتصفار و تخضار : متقدرش .. هما فسميتي بوحدي مستحيل تاخدهم 

أمجاد ببرودة : سي نقدر ... ولكن 

ثلوج : ولكن شنو ؟ 

أمجاد : حس الرجال ميدخلش على ولادي .. إلا بغيتي منطيرهمش لييك

ثلوج بتبات دورات لهدرة فراسها : اوكي متافقيين .. يله دابا خرج 

أمجاد بحدة : لي عندي قلتو .. تحملي مسؤولية أفعالك إلا وقعات شي حاجة 

خنزر فيها تخنزيرة حارة و خرج من لبيت خلاها دايخة غادة جاية فبلاصتها كتفكر و جسمها كامل كيترعد : خااص نلقا حل .. ميحلمش اياخدهم ليا بهاد السهولة .. غادي نفرجو شكون ثلوج الناجي .. كيبانلي نسا شكون انا غا تسنا عليا الشماتة لوقت بيناتنا و ولادي لحلمتي بييهم اجي قتلنيي 

سمعات شي صوت موراها : سمعتك 

تلافتت مخرجة عينيها فعينيه و عقلها ايحماق كتشوفو مزال قدامها و هي عند بالها مشا : الله اعطيك موصيبة 

أمجاد : حتى هادي اندير راسي مسمعتهاش .. نشوفو اخرتها معاك 

ثلوج بصوت حااد : سييير لعند مراااتككك سييير 

أمجاد ببرودة : هاهو غادي

ضربها ليها بتخنزيرة عاد قلب الدورة غادي بحالو خلاها موسعة عينيها كتشوف فنقطة وحدة و هدرتو كتدور فراسها شوية بشوية بداو كيهبطو دموعها وحدة مور لخرى .. و بلاما تحس هزات ايدها حطاتها على شفايفها كتحسسهم من لقبلة لي خنقها بيها قبيلة .. بعصبية نترات ايدها و بدات كتلوح فالديكورات لي قدامها و حلقها مسكتش من لغوات .. لي لقاتها قدامها كتزفها كلشي ترون لمخاد فقنت و لغطا فقنت آخر بقالها غا الناموسية جاتها تقيلة أما كون نتراتها من بلاصتها .. فعز عصبيتها سمعات لحس موراها تلافتت مخرجة عينيها حتى كتلقاها غا سناء 

سناء : ثلوج شنو واقع ؟ 
ثلوج : سدي معاك لباب 
سناء : أ ا
ثلوج بعصبية مشات سدات لباب فوجها و جلسات فالأرض كتنهج بالبكا و ايدها مشنقة عليها و صباعها عوجين بسباب لكلاكاج لي كيجيها فاش كتعصب .. بقات كتبكي شحال و صوتها كيخرج محروق و متدمر على الآخر .. بغات تهدر . بغات تخرج كاع لي فقلبها داكشيي علاش جمعات لوقفة كتمسح فدموعها عاد قصدات كاميرتها و مشات لشرفة جلسات فيها كتنخصص بعمق و لكاميرا مفتوحة قدامها 

بتاسمات بسخرية عاد نطقات : هااي گايز .. 
بغات تزيد تهدر و مقدراتش .. ملقات راسها غا هزات داك لكاميرا زفات بيها حتى تشخشخات عاد برادت كتشوف قدامها ساهية و دموعها هابطين بغزارة 

بصوت مخنوق و باكي نطقات : بأشمن حق جاااي كيحاسبنيي .. بأشمن حق كيقول ولاديي .. الله اعطيه موصيبة نتهنا منو و ميبقاش كيدور قداميي .. من نهار بان فحياتي و انا كنتعدب و حتى فاش غبر منها بقيت كنتعدب و فاش رجع مزالني كنتعدب
مسحات دموعها كتنخصص : باغي ارجع لحگرتو عوتاني و الله لكانت لييه 

بقات هاكاك كتفكر و تبكي الليل كامل حتى داتها عينيها على الأرجوحة و غفات ناعسة بلاما تحس على راسها 

داز هاد النهار و جا نهار جديد ..

وقف قدام الأوطيل بطموبيلتو عاد نزل و دخل لداخل كيدور فعينيه حتى قشعو جالس كيشرب قهوتو الصباحية 

تنهد و مشا لعندو : مكان لاش تعدب رااسك 
هز عينو لعندو : صاحبيي 
جمع لوقفة تسالم معاه عاد جلسو بجوج 
أمجاد : كيف وصلتي بعدا 
عصام : بيخير .. عجبتني لمدينة .. لبركة فراسك مقدرتش منجيش نعزي 
أمجاد تنهد : ممشا معاك باس .. لحد الآن مزال ممتيق بيلا جدي مشا و مبقاش معانا 
عصام بأسى : هادي هي الدنيا 
أمجاد : معلينا .. كيف خليتي لخدمة 
عصام : حتى انا عطاوني كونجي بحالك .. بغيت نجي لمغرب نستغل لفرصة حيت شحال مجيت ليه و منها نعزي فسي نعمان 
أمجاد : يلله معايا لقصر .. مخاصش تبقا هنا 
عصام : لا لا هانية .. غا خليني بغيت نمشي معاك غا نعزي بعدا و نرجع 
أمجاد جمع لوقفة : لي عندي قلتو 
عصام جمع لوقفة حتى هو : واخة العشير .. غا مديرش عليا أوامر لخدمة داكشي خليه فأمريكا
أمجاد بتاسم : لا راك ضيف عندي .. حتى نرجعو لخدمة عاد نهدرو 
عصام ضحك : غا متعيقش .. يله تسنا نهبط لفاليز ديالي 
أمجاد : هاهو كيتسنا 
عصام : لمغرب عندكم فيه الزين 
أمجاد : بديتي فالزهو .. باقي مسخنتي بلاصتك 
ضحك عصام و قلب الدورة طالع لشومبر ديالو اهبط لفاليز لي جاب معاه


صبحات فايقة مدوخة و عقلها مرفوع بسباب التعب و لبكا ديال لبارح .. بالسيف باش قدرات توجد ولادها لمدرسة عاد وصلاتهم هما اللولين لليكول و مشات هي لخدمتها .. دخلات بملامح حزينة نيشان لمكتب ديالها حتى وقف عليها مراد هاز لبيسي ديالو : ثلوج 

نطقات بلاما تشوف لعندو : مراد عفاك مبغيتش نهدر 

مراد : جبت ليك غا هاد لمقال تشوفيه 

هزات عينيها لعندو حتى كيمشي نضرها نيشان لفمو لي مجروح خرجات عينيها مصدومة : ماالك ؟؟ 

مراد : داك طليقك لبارح خرج فيا جوج كروشيات كان شوية و اقتلني 

وسعات عينيها : كك كيفاش ؟؟ ..واش هو لي دار ليك هاد لحالة ! 

مراد : صافي نسااي .. خلينا فالخدمة 

خدات من عندو لبيسي كترعد : و الله متبقا فييه .. ارا نشوف هاد الروينة 

مراد : صافي نسااي .. مديريش راسك فيه 

ثلوج لي فراسها فراسها : صافي غا سير دابا انا انتكلف بهادشي 

مشا مراد و خلاها كتسوط ممركزاش مع خدمتها .. غادي تحماق بالغدايد لي ركب فيها مزال مسخن بلاصتو فالمغرب و بدا فالمشاكيل .. موصلات وقيتة لغدا حتى تهدات عاد جمعات لوقفة هزات ساكها بالخف و خرجات هازة تيليفونها كتصوني لسكارليت : الوو .. اه لحمدلله و نتي صحتك مزيان ؟ .. الحمدلله هادشي لي بغيت .. عفاك واخة تردي بالك لولاد ايخرجو من ليكول دابا و خاصهم اتغداو .. ااه صافي شكرا بزاف .. لا لا عارفة داكشي علاش كنرتاح فاش كيكونو معاك .. اوكي و حتى نتي تهلاي فراسك يله نخليك و نهارك مبروك 

قطعات معاها كتنهج و تحلف على أمجاد .. بعصبية مشات لطموبيلتها ركباتها و كسيرات نيشان لقصر كتسوط .. بسرعة لبرق وصلات محاساش بالوقت .. داك الساعة نزلات و دخلات بنضرات جهنمية فطريقها تلاقات وحدة من لخدم : داك لحيوان فينو 

لخدامة باستغراب : عفواا 

ثلوج بغيظ : أمجاد آل عمران فينو ؟ .. بلاما تخبيه عليا إلا كان هنا قوليها ليا 

لخدامة مفاهمة والو كتبان ليها كتدخل و تخرج فالهدرة : راه فالصالون ...

بغات تكمل هدرتها لقاتها طارت لعند الصالون بخطوات سريعة مكتقشعش قدامها ناوية تكشكش عليه و فينما بغات توصل توصل .. باغا تندمو على لمشاكيل لي ناوي اسبب ليها بعدما غبر خمس سنوات من حياتها .. يله اتزيد بخطوة لقدام تفيكسات مخرجة عينيها من منظرهم و هما بجوج .. كيبان ليها أمجاد معنق الياقوت كيطبطب على ضهرها بهدوء عاد بعد شوية كيقاد الشال على شعرها و كيدخل لخصلات لي خارجين و الياقوت مهبطة راسها مكتبانش ليها .. كتشوفو غا هو حاضنها بجسمو كامل 

حسات بقلبها تفرتت و مبقا فيه والو .. حسات بيه تقطع لأشلاء و لقطع صغار .. حسات بمغص كبيير كيضرب تماك و نفسها تخنقات .. الدموع بداو كيهبطو بحال الشتا بلاما تحس .. بتدمر قلبات الدورة راجعة بخطواتها و ايدها على فمها كتبكي بحرقة و راسها لتحت خايفة احصلها شي واحد كتدمع حتى كتفيكسا مكمشة عينيها بألم فاش خرجات فشي حاجة قاصحة ..بعدات خطوة راجعة باللور كتألم لا من ناحية الضربة و لا من ناحية الجرح لي فقلبها .. بغات تمشي حسات بايد تحطات على خصرها فاش داخت و ترخات و صوت قريب لعندها : آنسة .. آنسة فيقيي ؟؟ 

تنهد مطول الشوفة فوجها : شكون هاد لبنت الزوينة.. هييه آنسة 

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.