هنادي كيفما العادة حاسة براسها غاتسخف من طريقة كلامو ليها واش هدا إنسان حقيقي واش هاد الهدرة كاتكون موجهة ليها ولا غايكيجبوا ليها ودنيها كتحس بيديها كيعراقو و داتها كترعد بقوة التوتر ...
كاظم هز عينو فالمراية بانلو فمها عامر شكلاط ضحك على شكلها طفولي و هز كلينيكس و حبس الطوموبيل فجنب الطريق ...
زبيدة :مالك أ ولدي ؟؟؟
التافت و شاف فهنادي اللي كانت حتى هي كتسنا شي تفسير علاش وقف فجنب طريق ..
كاظم: هنودتي قربي
هنادي بقات كتشوف فزبيدة و تارة كتشوف فيه
كاظم:*بابتسامة * غير قربي و الله ما غاناكلك
هنادي قربات شوية و هز يدو كيمسح ليها الشكلاط اللي كان فجنب فمها من آثار بيمو اللي كلات و قال
كاظم : * بابتسامة * برهوشتي
دور وجهو و ديمارا و قلع و زبيدة كيفما العادة كتحرك راسها و دورات وجهها لزاجة حابسة ضحكة كتقول واش هدا صافي ربا عليها الكبدة دغيا ياكما بغاها من اول نظرة و ما نعرف كلشي ممكن فدنيا هو كان خاصو ضروري شي انثى فحياتو و هنادي ربما عوضات داك الفراغ ندمات اللي مادارتش هاد الخطوة من شحال هادي و لكن قالت مع راسها الخير فوقتما جا ينفع ...
عم صمت رهيب فالمكان و هنادي مرفوعة ما عارفة راسها باش تبلات فساعة تخربقات حياتها كاملة خوتها دخلو للحبس تلاقات بشخص اللي غايتزوج بها و فوق من هادشي ولات كتبغيه كااع ما بقات فاهمة والو و شنو هادشي نزل عليها دقة وحدة سبحان الله العظيم ...
حبس الطوموبيل حدا الدار ديالهم فالحومة و نزل حل لمو لباب و خطا خطوات لأمام و حل لهنادي الباب بقات كتشوف فيه مدة حتى غمزها و قال
كاظم: * بابتسامة * كتسنايني نعرضك أهنودتي امم
حنات راسها بخجل و نزلات و مع الاحياء الشعبية معرووفين بالزبابل و الكواغط اللي كاتكون مليوحة فالارض ...ما كاتقبط غير تسحت ليها رجليها فقشور ديال البنان اللي كان من جيهتها ...
فالبلاصة دور يدو من مور ضهرها و جرها لعندو حتى تزدحات مع صدرو طرطقات عينيها فيه و الصدمة كانت بادية على ملاميحها بشكل كبير و زبيدة خلااااص غاتحماااق هاد نهار عيات من المفاجئات اللي كيوقعو بيناتهم حتى خافت تقوس عليهم و بدات تقرا آية الكرسي و المعوذتين باش تحميهم من العين ...
كاظم استغل الفرصة و هي قريبة ليه كيتفحص ملامحها...
عوينات صغيورين و البؤبؤ ديالهم فلون الأسود و رموش قلال و لكن جايين مع عويناتها نيفها ماشي صغير و منكَاد و لكن جاي مع ملاميح وجهها شنيفاتها اللي كانو كبيبرين و منفوخين و بقوة العضان ولا لونهم أحمر لونها أسمر جميل مييلحة و مسرااارة كيفما كنقولو ربما زينها عادي و لكن بالنسبة لكاظم ملامح وجهها فيهم شي حاجة مميزة خلات قلبو يتسارعو نبضاتو و قربها منو بهاد الشكل زاد خربق دمااغو ...
لاحظ بلي شعرها خرج من درة هز يدو بتثاقل بلا ما يحس و حشاه تحت زيف ...
هنادي حنات راسها و قالت
هنادي: شكرا
كاظم: ما كاين لاش تشكريني هدا واجب و من مسؤوليتي
زبيدة حنحنات و هنادي بعدات عليه و هو التافتت شاف فماماه
زبيدة : إوا أوليدي زيدو دغيا راه الحال ما بقاش
تقدمات لالا زبيدة بخطوات بطيئة و دقات فالباب و باين كاين صداع كثير عندهم لداخل ...
~:شكووون
زبيدة : قريب
حلات إلهام الباب و إذا بها تنصدم من شكون واقف حدا باب دارهم ...لالا زبيدة ام كاظم اللي كتسطا عليه و كتحماق عليه بانتلها هنادي من مور ضهرها و هي تحل عينيها بصدمة منين لمحات كاظم شخصيا من موراها قلبها مشا و جا و داتها بدات كترعد و ضهرات ابتسامة على شفايفها و قالت بهمس و عينيها كيشوفو فيه
إلهام: كاظم
زبيدة : أبنتي كاينة لالا فضيلة لداخل
كتهدر و عينيها على كاظم زاد زيان على آخر مرة شافتو فيها زاد صحاح و بيااض و كيبان فالواقع أحسن من صور الإنستغرام و خصوصا هي اللي طايحة فيه طيحة نييت
إلهام : اه كاينة ألالا
زبيدة : إوا أشنو غاتخلينا واقفين فالباب
إلهام كتشوف غير فكاظم اللي كان ما مسوقش ليها حاضي بعينيه هنادي اللي كانت حانية راسها ما هزاتوش من الارض
إلهام: أ لا اخالتي دخلي
دخلات زبيدة لداخل و دخلات من موراها هنادي اللي غير شافتها إلهام و هي تجرها لعندها باش تفهم ليها و تشرح ليها شنو واقع و لكن كاظم لاحظ بلي شدات ليها فدراعها و بقا مستغرب ...
هنادي: إلهام
إلهام :*كتكلم و كتشوف فكاظم* أجي بغيت نهدر معاك
كاظم : هنادي واش صديقة ديالك ؟؟؟
هنادي التافتت و شافت فيه و قالت بصوت خافت و خجول
هنادي: وي صاحبتي
تقدم بخطوات بطيئة و حيد يد إلهام من دراع هنادي و جرها حداه حتى ولات بجنبو و حط يدو على خصرها و شاف فإلهام و قال
كاظم: *بابتسامة * هنادي غادي تبقا معايا ما عندها فين تمشي و نتمنى تفهمي الوضع تشرفت بمعرفتك آنسة ...
إلهام: إلهام
كاظم: * بصوت حنون * سميتك زوينة و سمحلينا مرة أخرى غانسرقو صديقة ديالك منك
إلهام بقات مصدومة كتشوف فيه و كترمش مافاهمة حتى وزة من هادشي اللي واقع ...
قبط كاظم فيد هنادي بقوة و جرها معاه لداخل لصالون البسيط الي كاين فدار هنادي...
بدخلة باش كدخل هي و ياه كتلمح ماماها متكية و حازمة راسها و دايرة فيه طروفة د الحامض و بطاطا و و سعاد واقفة وهازة فيديها ولدها ريان و جارتهم سعدية أم إلهام جالسة حتى هي و زبيدة جالسة حدا فضيلة ام هنادي اللي مغمضة عينيها كاتبكي و تنوح و دايرة يديها على راسها 🙆♀️🙆♀️ و كتقول
فضيلة : واااميمتي أش هاد المصيبة طاحت علياااا ولادي بجوووج داتهم سطااافيط حدا باب دار و بنتي ماعرفتها فين صداااات انا بغيت غير بنيتي نشوفها اما دوك المساااخط غير يمشيو
هنادي طلقات من يد كاظم و خطات خطوات لامام بسرعة حتى وصلات حدا ماماها و قالت
هنادي: مي
فضيلة غير سمعات صوتها و هي تحبس البكا و حلات عينيها و قالت
فضيلة : هنادي
هنادي طاحت عليها عنقاتها و زيرات عليها و فضيلة بدورها حضنتها بقوة
فضيلة : يااو فيييين مشيتي ابنتي و خليتي كبدتي كتشوا خليتيني يا بنتي كي المسطية كنقول فين مشات بنتي
هنادي بعدات على ماماها و عينيها غرغروا بدموع و حطات يديها على خد فضيلة
هنادي: ما مشيت فين اميمتي هانا جيت لعندك
فضيلة : خوووتك ابنيتي كانو غايقتلوك شوفي كيف فرشخوليا التلفازة المساخط بالأعصاب انا سخطت عليهم و ما كملاش دقيقة وهما يجيو المخزن داوهم دعوة د الواليدين صعييبة يا بنتي عرفتي كن جيتي فاش كانو هنا و الله حتى يقتلوك و يجبدو ليك مسارنك يا بنيتي و نتي الي عندي بغاو يرزيوني فيك تعالي يا بنيتي تخلعت عليك تعااالي أكبيدتي
قربات ليها باش تعنقها و هي طيرها ليها بقرصة
فضيلة : هااااا اللي يركب مع طوموبيلات مع رجاال يصحابلك ما وصلوليش خباارك بغيتو طيحو ليا السكر بغيتو تقتلوني واش ناس كيولدو الولاد و انا كنولد البروصيااات و الخطيااات هااااااا اللي يمشي و يدلع فزناقي
هنادي : اااااااي لااااااا وامي عفاك لاااا
زبيدة: * كتحاول تحيد هنادي من بين يدين فضيلة * لااااا أ الحاجة لواااه وافهمي الموضوع بعدا لااا
كاظم كان واقف حدا الباب كيشوف فيهم غير لمحها كتقرصها مشا كيطير حيدها ليها من يديها و قال بصوت رجالي خشن
كاظم: باااراكة أ الحاجة
جر هنادي و دارها من مور ضهرو و فضيلة طلعاتو و هبطاتو و صغرات فيه عينيها و التافت عند زبيدة و قالت
فضيلة : شكون هدا ماتقوليليش ولدك
كاظم قال بسرعة
كاظم:ولدها و راجل بنتك الا قبلتي بيا طبعا و ثيقي بيا الا ماديتهاش انا غانخطفها و ماغايديهاش من غيري شي حد
فضيلة و زبيدة و سعاد و سعدية كلهم تصدمو من كلامو كلهم شافو فيه دقة وحدة ...عكس هنادي اللي غير سمعات كلامو هزات عويناتها بتثاقل كاتشوف فيه و كتحس بقلبها غايسكت من كلامو و عينيها ما كيشوفوش شي حد من غيرو كانها غير هي و ياه فداك صالون أش هادشي كيوقع فداتها ما فهماتش ...
إلهام اللي كانت داخلة لصالون و هي تسمع كلامو حسات بدنيا دارت بيها مية دورة و هي فبلاصتها قلبها تكسر الى ألف قطعة و تكات على الباب و حطات يديها على فمها و هبطو دموعها على خدها عرفتي تكوني كتحماقي على شي شخص من صغر و كتشوفيه كايضيع من بين يديك و من فوق هادشي غاتديه صاحبتها ديك درويشة ديال الدرب المحكورة اللي حتى واحد ما كيديها فيها صعيييبة على قلبها و عقلها يتقبلوها ما يمكنش ياك هي احسن منها فالزين و كلشي كيتمنا غير نظرة منها باش هي احسن منها باش ياخدها كاااظم شنو فهاد البنت مميز اللي غايخليه يجي و يخطبها و هو ما عمرو حتى شافها ما فهماتش شنو هادشي كيوقع و هو فين عرفها حقد و كره تولدوا فقلبها الاسود من جيهة صديقة طفولتها مثلها مثل العديد ديال البنات اللي كيحقدوا على صديقاتهم حيت عند بالها بلي خطفات ليها راجل اللي كتبغي و خانتها و لكن فحالة هنادي و كاظم فقط هو القدر اللي لعب لعبتو اما هي ما كان عندها حتى دخل و لكن هي تحفرات و تنقشات فقلبها فكرة ان هنادي سرقات ليها حبيب القلب كاااظم الشيئ اللي ممكن يولد لهنادي مشااكل كثيرة فالمستقبل و ممكن لا شكون عرف تقدر تآديها غير بعينيها و الحقد و الحسد ياك كيقولو العين علينا حق و خصوصا الا كانت عين الحقود أو الحااسد ....
خرجات إلهام من الدار و دموعها فعينيها ما قدراتش تستحمل مشات لدارهم و تكات على سريرها اللي عندها فبيتها و كتبرد غدايدها فالبكاا...
بقاو كلهم كيشوفو فكاظم اللي كان كيستنى فضيلة تنطق و تقو ليه شي حاجة دار يديه فجيبو و لوخرى حك بيها لحيتو الخفيفة اللي مزينة دقنو و قال
كاظم: ميمتي كنتسنى جوابك
فضيلة التافت و شافت فزبيدة و قالت
فضيلة : واش هدا هو ولدك اللي بغيتيه لبنتي
زبيدة:*بابتسامة صفراء* اييه ولدي أ لالا فضيلة
فضيلة ناضت من فوق سداري وقفات اونفاص ليه و ربعات يديها و قالت
فضيلة : كيفاش اولدي غاتخطفها الا ما عطيتهاش ليك مالنا ولينا فأخطر المجرمين
كاظم: غير فحالة ما ما قبلتيش أ ميمتي أما انا عارفك غاتقبلي مادام هنادي قابلة وانا قابل
فضيلة دارت يديها على شكل لكمة على شفايفها و دارت يديها على جنبها و طلات على هنادي اللي حانية راسها و واقفة من مور ضهر كاظم
فضيلة: نتي فوقاش قبلتي أديك شنيولة ؟؟ امم و بعدا فين كنتي من قبيلة ؟؟ *حولات نظراتها و شافت فكاظم* نتاا بعدا اللي عطيتي لولدي دااك ضرب كااامل مااالك اولدي معاه واخا يكون خاون ليك رزقك ما تملخوش ديك الملخة د العصا
زبيدة ناضت بسرعة باش تنقد الموقف
زبيدة: لالا فضيلة هانتي سمعيني قبيلة كاظم ولدي شاف خوها كايتعدا عليها و بغا يضربها و قال عليها كلام قبييح قال عليها كلام اللي ما غاتقبل حتى وحدة تسمعوا على راسها اوا وولدي كاظم ما كيبغيش ضلم داكشي علاش ضربوا
فضيلة دارت عند زبيدة و قالت
فضيلة : وصلووولي ناس شنو قال الله يعطيه مصيبة و جر ختو من شعرها و زدحها لارض و لكن واخا هاكاك كيبقا ولدي و كبدتي كتقطع فاش شفتو هاكاك راه عطاه العصا حتى وجهو ما بقاش كيبان و لكن صراحة هو ولدي و لكن يستااهل هاهو داوه لبوليس حيت ناس كيتشكااو منو نيت يتربااو بجوج انا عييت قهروني المخزن هو اللي غادي يقد عليهم و لكن بنتي من قبيلة فين كاانت
هنادي بدات كترعد وقفات ليها البيضة فطاس نااري و تعرف فضيلة بلي مشات معاه لدار غاتنويها عوجة و احتمال كبير ما غاتبغيش تعطيها ليه بقات غير كدعي الله فنفسها باش تفك ...
كاظم: كانت معايا ف...
زبيدة حبساتو و غمزاتو و ماخلاتوش يكمل و قالت
زبيدة : اييه أ لالا فضيلة كانت مع كاظم فطبيب حيت سخفات و بقات تماك و اتاصل بيا و مشيت لعندهم و من موراها مشينا لواحد القهوة و تماك اقتارحت عليها الفكرة و قلتلها راه ولدي غزاال ما تلقايش معاه مشكل و غايديك معاه لفرنسا و يخليك تخدمي و تقراي و هي وافقت ...
كاظم استغرب من كلام ماماه عكس هنادي اللي هزات راسها شافت فزبيدة و ابتاسمت براحة و كتقول الحمد لله اللي فهماتها اما كان كاظم غايقفرها بكلامو
فضيلة : امم اوا أش غانقولكم انا ...
بقات ساكتة و كلشي كيتسناها تنطق و كلشي متشوق يعرف شنو غاتقول واش غاتوافق ولا غاترفض ...
فضيلة : اناا ما غانزيدكم غير صلاة على النبي الا بغاتو و بغاها و غايعيشها مزيان و يخليها تكمل قريتها و يتهلا فيها انا ما عليا غير نزغرت ليها و نقولها الله يكمل بخير
ختها سعاد بالفرحة ما حسات براسها حتى طلقات تزغريتة من فمها حتى قفزاتهم كاملين فرحااات لختها حيت و اخيرا دبرات على هميزة و راجل تمناه اي وحدة خدام بدارو و طموبيلتو و من فوق هادشي غايديها لبرا واخيرا هنادي غاترتاح شوية
فضيلة : غير هو اوليدي خوتها ما كاينينش أ الله داتهوم سطاافيط خوتها كانو قبااح و لكن اولدي * سكتات مدة و كملات كلامها بحزن * كان بعدا حس راجل عندنا فدار دابا بقيت غير انا و انا غير ولية ما عندي لا حول و لا قوة عندي الله و الله احسن من كلشي الله يرضي عليك راه غير عوينة اللي بقات ليا هي هنادي الا كنتي غاديرها فعينيك مرحبا الا كنتي غات...
كاظم ما خلاهاش تكمل و هز يديها و باسها و طبطب عليها و قال
كاظم : من هاد نهار نتي ميمتي ثانية و من هاد نهار و فهاد اللحظة اللي وافقتي باش نكون راجل بنتك اعتابريني ولدك و بصح رااجل حااشا أميمتي وسمحلي على هاد الكلمة و لكن ولاداك ما كانوش رجاال كانو غير شمااايت واش اللي يقول على ختو كلاام اللي دوون المستوى كلام زنقاوي كلام ديال ناس الجهلاء اللي حقا غير مثقلين على الكرة الارضية حاشا اميمتي واش ولادك رجاال اللي يمد يدو على ختو و قبل ما تكون ختو هي بنت و البنت معروفة بضعف و ربي خلقها باش نتهلاو فيها و نحنو فيها ماشي باش نضربوها نتمنى تقطع يد كل واحد كيمد يدو على المرأة .المراة امانة فرقبتنا و ما تخلقاتش باش تهان هي تخلقات للحب أميمتي و باش نتهلاو فيها و انا بصفتي خطيب بنتك كانبغي نقولك بلي هنادي حطيتها هنا * أشار بيدو لقلبو * هنادي فقلبي اميمتي و ربي شااهد عليا غانحميها اكثر من نفسي و اللي حلات عليها فمها توصلها و غانقريها و غانخليها تخدم و شروطها موافق عليهم
فضيلة تأثرات بكلامو حتى لقات عينيها دمعو اما واحد هنادي بقوة ما تأثرات من كلامو بقات مسمرة فبلاصتها و حانية راسها و دموع الفرحة كيهبطو من عويناتها كانت عارفة ربي كبير و رحمتو وااسعة و لكن عمرها ما ضنات رحمة بلي غاتنزل فصورة إنسان اللي هو كاااظم ❤❤
فضيلة : الله يرضي عليك اولدي باينة فيك مؤدب و مخلق الله يحن عليك و الله يرحملك الواليدين و انا ثايقة فيك غانعطيك بنتي و الله يكمل ليكم بالخير
فضيلة جرات بنتها لحداها و عنقاتها جنب و هي كتمسح دموعها بيديها و قالت
فضيلة : قدام هاد ناس قولي واش نتي موافقة ولالا
هنادي ضحكات و هزات عينيها اللي جاو نيشان فعوينات كاظمين اللي كان اونفاص ليهم و بيناتهم مسافة قصيرة و قالت
هنادي: موافقة
زبيدة: اوا مبااارك و مسعوود و الله أ لالا فضيلة زعما بلا ما نشكر ليك ولدي و لكن غزال يعيشها فالنعيم و بجهد الله عمرو يحكرها و لا يظلمها حيت ولدي حقاااني و ما عزيزش عليه الضلم غير هو أ لالا فضيلة كاينة واحد القضية
فضيلة : أما هي
زبيدة : ولدي خااصو يمشي لفرنسا حيت خلا شركة ديالو و خلا غير ولد خالتو اللي شدها ليه و خاصو يمشي دغيا داكشي علاش لاكط خاصهم يديروها دغيا باش يوجدو ليها الوراق
فضيلة : شحاال كاع من دابا شهر ولا شهراين شحال؟؟
كاظم: من دابا يومين أ الحاجة
فضيلة طرطقات فيه عينيها و قالت
فضيلة : أ الله يا وليدي كي درتي ليها خليني غير نشبع منها بعدا
زبيدة : أ الحاجة و الله العلي العظيم الا عندو الخدمة و هاهي معاكم دابا شوفوها صباح و عشية
فضيلة : اوا و شنو هاد البنت ما غادير لا حنة لا عرس تمشي غير هاكاك بسكاات
زبيدة : لا أ لالا فضيلة شكون قالهالك نديرولها حنينة و نفرحوا بيها و لكن ولدي ما كيبغيش داكشي ما عندوش معاه
فضيلة : مسكيين واقيلة متدين بزااف و متشدد بااينة فيه
زبيدة : أ لااا أ لالا فضيلة ولدي ماعندوش مع الهاراج و صداع داكشي علاش
كاظم: ميمتي غدا إنشاء الله غانجي عند هنادي نديها تصور باش نصوبلها الباسبوور بعدا
فضيلة : اييه اوليدي واخا و لكن واحد القضية راه بنتي هنادي ما تعرف ديير وااالو فشغال ديال دار باش ما تقولوش ما قلتش ليكم
هنادي تصدمات من كلام مها دارت عندها و خنزرات فيها مااارضاااتش تقول هاد الكلام عليها خصووصا قدام كاظم حسات بالخنقة و البكية ...
كاظم:*بابتسامة * أ لالا مادير وااالو غير تقرا و تخدم و حنااا نشقاو عليها يالاه غير تكون فرحانة داكشي بالنسبة ليا انا ما كاينش فيه مشكل عندي خدامة فدار ما غاتلقاش مشكل و ما عنديش انا اصلن مشكل
هنادي التافتت شافت فيه حسات بفرحة كبيييرة فقلبها من كلاامو اللي خرج من فمو كي العسيلة اااح شحال تيحمقها لا فكلامو لا فتصرفاتو لا فزينو لا فعطرو لا فلباسو كلشي فيه زوييين حسات بقلبها كيخفق بسرعة و علاين يخرج من قفصها صدري و يقولو <كنحماااق عليك > مدة قصيرة اللي تعرفات عليه فيها و لكن حسات بأحاسيس اول مرة كتحس بيهم احاسيس فشكل تعلقاات به و فاش كيكون كيهدر ما كتبغيهش يسكت كلامو كيطرب الادن ديالها اما ابتسامتو تمنات كن كان غير كيبقا يضحك مع كل ابتسامة قلبها كيتزعزع من بلاصتو ...
زبيدة : إوا دابا تافقنا الله يجعل كلشي مبارك و مسعود غدا إنشاء الله بحول الله نديرو خطوبة رسمية بعدو نديرولها ليلتها بالحنة و الزغاريت بعد بعدو يضربو لاكط و بعد بعد بعدو غاتمشي
فضيلة : و الله حتى درتو لينا الزربة بالله
زبيدة : أ لالا فضيلة واش فنظرك حنا باغيين و لكن هانتي كاتشوفي ولدي راه خاصو يرجع و زيد عليها خير البر عاااجله راه الزربة فيها خيير ليهم
فضيلة : اوا إنشاء الله اختي الله يجعل كلشي مبارك و مسعود
زبيدة: إوا أسيادنا نخليوكم الله يعاونكم
فضيلة : جلسوا تشربو كاس ديال اتاي و تعشاو معانا الله يعطيك الستر
زبيدة : نتي مولات الخير خاصني نمشي باش نوجدوا مزاال تابعاني خدمة كثيييرة
زبيدة: الله يرضي عليك و لكن راه قلبي كايتقطع عليهم واخا هوما مساخيط و لكن راه كبدتي هادوك
كاظم بقا ساكت مدة و حك لحيتو و قال
كاظم: يكون خير أ الحاجة ،هنادي واحد دقيقة بغيت نهدر معاك على إنفراد إلا سمحتي
هنادي شافت فماماها باش تعطيها الإذن
فضيلة: سير أكبيدتي شوف راجل اش بغاك
كاظم حنا راسو و خرج و تبعاتو هنادي وقفو برا و تكا على طوموبيلتو و دار يدو فجيابو و هي وقفات أونفاص ليه حانية راسها فنفس الأثناء كانت إلهام كطل من السرجم باش ترتاح و تشم الهوا و تكالما و إذا بها كتشوفهم بجوج واقفين كيهدرو غمضات عينيها و عاودت فتحاتهم و مررات ريدو بجهالة كانت غاتهرسو و خرجات من فمها كلام كيبين شحال حاقدة عليها
إلهام: عمرك تحلمي يكون ليك
كاظم تنهد و حط يدو تحت ذقن هنادي و هز ليها راسها حتى تقابلو عينيها مع عينيه و قال بابتسامة
كاظم: علاش كتبقاي ساكتة مخاصمة معايا
هنادي حركات راسها بنفي و قالت
هنادي: لا حاشا غير انا ما ....
كاظم مخلاهاش تكمل و قال
كاظم: مزال مولفتيش بيا و مزال ما عرفاش عقليتي و شكون انا و مزال كتشوف فيا بحال شي حد غريب ياك
هنادي : ممكن
كاظم: و انا بغيت نعرف شخصيتك و بغيت نعرف شكون نتي شنو كاتبغي شنو ما كاتبغيش ما بغيتش تحسبيني غريب انا شخص عادي ما كنعض ما كانكل ما كنآدي انا غانولي راجلك علاش هاد الحشمة زايدة امم
هنادي : *بابتسامة* ماشي حشمانة و لكن غير حيت اول مرة نهدر مع راجل اللي غير شفتو تقلبات حياتي 180 درجة برمشة عين لحد الآن مزال ما عارفة شنو هادشي وقع
كاظم : تقلبات حياتك إيجابيا أولا سلبيا
هنادي: أكثر من إيجابيا هههه
كاظم : حمد الله بعدا اللي قدرنا نشوفو هنودة كضحك معانا
هنادي حنات راسها و حشمات عوتاني من كلامو و هو يهز وجهها بصبيعاتو
كاظم: عمرك تحني راسك خليه ديما مرفوع الله سبحانه و تعالى ما خلقش رأسك فالأعلى عبثا حني غير اللي خلقك أما المخلوق عمرك تحني راسك ليه
هنادي : علاش؟؟واش حتى نتا كنتي باغي تقرا الأدب الفرنسي
كاظم: si كنت باغي نولي دكتور اللغة الفرنسية و نقريها و لكن شاءت الأقدار نقرا هندسة ديكور و تخليت على الحلم ديالي
هنادي: و علاش اللي ما تعاودتش تقرا من جديد
كاظم:* تنهد و حرك راسو يمين شمال* عندي إلتزمات أخرى ما نقدرش ندير بزاف د الحاجات دقة وحدة *بقا ساكت مدة و كمل كلامو * أش بانلك نقرا معاك ف l'université فاش تمشي لفرنسا امم
هنادي : اوووو و الله حتى فكرة زوينة اصلن انا ما غانكون كنعرف حتى واحد و ما غانعرف فين نمشي و نجي عفاااك و الله حتى فكرة واااعرة * قبطات فدراعو و كملات كلامها بحماس* غير فكر فيها و الله حتى فكرة زوينة
كاظم دور راسو جنب و ضحك و رجع شاف فيها و قال
كاظم: عجباتك الفكرة
هنادي:و الله غير فكر فيها غاتوفر عليا شحاال من حاجة
كاظم: وانا ما عندي خدمة باش نقرا معاك أنانية كتفكري غير فراسك
هنادي ما عجبتهاش طريقة كلامو ياك هو اللي اقتارح الفكرة و علاش كيقولها نتي أنانية تغرغرو عينيها بدموع و هنادي من نوع اللي دموعها على سبة و خصوصا الا كان شي حد عندها عزيز و قالها كلام ضرها فقلبها كتردها غير على الدموع ....
هنادي : *حنات راسها * صافي سمحلي انا غير قلت ليك و صافي الا عجباتك زعما و لكن نتا عندك الخدمة اه انا كنفكر غير فراسي ممكن
كاظم حس بنبرة صوتها تبدلات غمض عينو و عاود فتحهم بسرعة و هاد المرة هز ليها راسها و بقا حاط يدو على خدودها تصدم فاش شاف دموع فعينيها
كاظم: علاااش كاتبكي؟؟
هنادي : نتا قلتي بلي انا أنانية و كنبغي غير راسي واخا انا ما قصدت واالو سمحلي غير ...
كاظم: *بابتسامة * واش نتي كاتكوني كيوت هاكا ديما ولا غير اليوم
هنادي حلات فمها فيه و قالت
هنادي: هاا ..
كاظم: نتي شكون قالك حب ذات حاجة سلبية بالعكس الا ما بغيتيش راسك ما غايبغيوكش ناس الأنانية حاجة زوينة غير ما خاصها تعدا واحد الحدود و نتي ما قلتي عيب نجي نقرا مع بنتي باش اللي هدر معاك و لا تبسل عليك نتفاهم معاه و نييت باش نشوفك واش كتقراي مزيان و لا غاتمشي تعطيها غير لتسركيل و دوري مع صحاباتك
هنادي ابتاسمت وهو عض على شنايفو و قال
كاظم: هاكا نبغيك ما عزيزش عليا البنات البكيااات
هنادي: انا هاكا دايرة ما كنقدرش نتحكم فدموعي و حتى البنات كاملين اون جينيرال دموعهم على سبة
كاظم بقا ساكت مدة و حرك راسو بنفي و تنهد و عطاها جواب اللي صدمها و جرحها فنفس الوقت جواب اللي ما كانتش متوقعاه
كاظم : مفششة قلبي ملاك كانت قوية قليل فين كانت كتبكي كانت ديما كضحك و هادشي اللي عجبني فيها نهار اللول نادرا ما كنت كنشوف دموعها حتى حملات ببنتا عاد شفتها كتبكي *بحزن* و لكن مشات و خلاتني
هنادي نار قوية شعلات فقلبها من كلامو نار الغيرة حرقاتها أصعب حاجة عند المرأة هي تقارن بينها و بين شي وحدة اخرى و الاصعب من هدا الراجل اللي بغات كايمدح فمراتو اللي ماتت معقول يكون مزال ما نساها معقول يكون حبها مزال عالق و محبوس فقلبو شنو كان مميز فهاد ملاك باش يبقا يدكرها حتى بعد ماتموت ؟؟...
هنادي: الله يرحمها و يغفر ليها ممكن نسولك واحد السؤال بسيط ؟؟
كاظم:تفضلي
هنادي: علاااش كتقولي بنتي؟؟؟واش حيت انا صغيرة عليك ولا كاين شي سبب من مور هاد بنتي
بغا يجاوب و لكن سمعو خطوات الحاجة زبيدة خارجة من دار و كتهدر مع فضيلة فباب دار
زبيدة: اوا تصبحو على خير أ الحاجة غدا إنشاء الله نجيو
فضيلة: واخا أ لالا زبيدة
التافتو عندهم هنادي و كاظم و ابتاسمو ليهم ووقفات زبيدة حدا هنادي و حطات يديها على كتفها و قالت
زبيدة :تهلاي فراسك ابنتي
كاظم : تصبحو بخير اه بعدا و غدا غانجي عندك فصباح باش تمشي تصوري باش نوجدوا لباسبور واخا
هنادي: واخا شكرا
عطاها كاظم بضهر و حل الباب لماماه و طلعات و مشا باس يد نسيبتو المستقبلية
فضيلة : الله يرضي عليك
كاظم ابتاسم ليها و خطا خطوات لامام حتى قرب حدا هنادي و قال بهمس فودنيها
كاظم: تصبحي بخير و تهلاي فراسك هنودتي
خطات خطوات لامام و غمزها و قال بصوت مرتفع
كاظم: غدا مع العشرة نلقاك واجدة
دخل و سد الباب و قلع و مشاا و دا معاه قلبها بقات غير متبعة طوموبيل بعينيها و قلبها ضرها ما سختش بكلامو بحديثو بضحكتو و بيه هو كشخص بقات غير كترمش و سهات فالفراغ ...
دخلو لداخل هنادي و ماماها ...لقاو سعاد جالسة و حاطة حداها و لدها
سعاد: مشااو
فضيلة : مشاو الله يرضي عليك اهنادي ديري ليا شي دوليبران فالكاس راه راسي غايجي قدامي نشربها و نمشي نعس باش غدا نمشي نشوف دوك المساخط.
سعاد: حتى هوما بقاو يترطاو حتى جابوها فراسهم
فضيلة: كثرو شكاوي من جيران ابنتي و حتى هوما ما كيحشمو ما كيرمشوا قهروني هاهوما جابوها فراسهم شوفي داك المجعور د حمزة قبيلة هرس تلفازة حمقوني ابنتي شيبوني حتى سخطت عليهم ويلي ما بغاو يحشموا و لكن هاااااد الكبدة متاعت اللي يشدها يشوي والديها ما عرفتهم واكلين ما عرفتهم شاربين لا حول و لا قوة الا بالله غدا خاصني نمشي نشوفهم
سعاد: ما غاتعشايش امي
فضيلة : اودي ما عندو منين يدوز نشرب دوليبران و نمشي نسهط
هنادي جابت ليها كاس ديال دوليبران و جلسات
فضيلة: إوا ابنيتي كيف جاوك دوك ناس
هنادي:مزيانين أمي
فضيلة: اوا هانتي شكون بحالك جاتك فرنسا شفتي ابنيتي راه قالوها اللوالة اليتيم و صباار ما عمر ربي يخليهم و نتي ابنتي تجمعو فيك بجوج الله يرضي عليك و الله يكمل ليك بالخير و حتى دوك ناس بااينة فيهم مزياانين
هنادي: اه أمي
فضيلة: اوا هانتي خالتك فريدة ما نساتكش جبداتك ليهم نتي اللولة عارفة ديك بنت ختها إلهام فريفرة كطير من المقلة ها باش مزيانة ثقالة ابنتي و خلاوها ماليها كلما ثقااليتي كتوزن
سعاد: امي غير المكاتيب و الحمد الله هاهو ربي جاب ليها ولد ناس و باينة فيه مربي و قاري وواعي و مثقف ماااشي بحال داك السكااايري اللي عندي اللي حاشا واش يكون راجل و زايداني ديك العكوزة كن غير داوه حتى هو فسطافيط نتهنا منو
فضيلة : اودي يا بنتي اش غانقولك الله يدير شي تاويل د الخير و الله يبعد عليها العين الخايبة خاصني نوض فالفجر نصلي و نقرا ليك سورة البقرة على الما باش فاش تفيقي شربيه راه ابنتي العين صعييبة سوليني يااانا
سعاد: اه أمي عندك الحق ما كاين ما خايب من عين الحساد الله يستر كاين اللي كتوصلو للموت الواحد يبقا يقرا الادعية و يقرا القران ما تقيسو حتى حاجة
فضيلة: لا هنادي تبارك الله عليها مرضية و كتصلي و كتقرا القرآن و حنينة و ها ربي سهل عليها خاصني نمشي نحط عظامي نركد فبلاصتي تصبحو بخير .
سعاد و هنادي: تصبحي بخير امي
انصارفت فضيلة و بقات سعاد كتشوف فهنادي و ناضت حداها و صغرات فيها عينيها و قالت
سعاد: كيفاش قضية هاد خينا اللي طاح عليك من السما راجل كاامل مكمول زعما ما كنتيش كتعرفيه من قبل
هنادي: لا اختي و الله ما كنعرفو
سعاد: امم اوا الله يجعلني نثيق غدا غاتلقاي بيه
هنادي: اه غانمشي نتصور على حسب الباسبور قالي
سعاد: هاااي هااي على ناس غايمشيو لفرنسا يا لالا اوا هانتي شنو بغيتي هاهو حلمك تحقق
هنادي:*بابتسامة* حمد الله
سعاد: اوا أشنو كيف جاك عجبك ؟؟
هنادي: ماعرفتش
سعاد: اويييلي على ما عرفتيش
هنادي: كان قبيلة كيقولي بنتي و فاش خرجنا جلس كيشكر ليا فمرتو اللي ماتت * خيبات ملامح وجهها*
سعاد: وعلاش شكرها
هنادي:*غلضت صوتها كتعوجو و حاسة بقلبها شااعلة فيه العااافية و داتها كترعد بالاعصاب* مرتي ملاااك كانت قوية و ما كانتش دمعة كطيح من عينيها و ديييما ضاااحكة
سعاد شدات فكرشها و بقات كضحك على ختها ...عكسها هي اللي حاسة بالقرودة كيلعبو فوق رااسها مكرهة لأقصى درجة
هنادي: ضحكي و زيدي ضحكي نتي اللي جا معاك ضحك اما انا زهر عندي كااافر و يهووودي مقطر راه انا كنقولك الا شربت ماء الزهر يدوز الما و يوحل الزهر
سعاد: هههه لا نتي بزاف حق الله
هنادي: *كتهدر بعصبية وااضحة على ملامح وجهها* قالك ديما ضااحكة هادي ما بقاتش مراة هادي راه ولات مهرج ولا كن غير بدلو ديك البقرة الضاحكة اللي كاينة فالفروماج و يحطوا تصويرتها ولهيلا زوينة هادي عاوتاني
حيدات شالها لاحتو و ختها كتفررك عليها بضحك و قالت
سعاد: غرتي أشعيبة
هنادي: *ابتاسمت باستهزاء و رجليها كيترعدو * ههه نغير ما لقيت منمن نغير غير من الموتى مرتو ماااتت انا اللي كاينة دابا فهاد الساعة
سعاد: ههه و ناري طحتي فيه أصاحبتي
هنادي: طحت فيه ماالو حفرة ؟؟
سعاد: اختي داك سيد راه حفرة غاااارقة يا ختي غزااال و ما نكدبوش على الله و باينة فيه حنين وواعي سعداااتك *جرات ليها خدها * هاااح و اخيرا ضحكت ليك دنيا
هنادي: لا ضحكااات ليا نيت نتزوج بواحد مازالو كيجبد ليا مرتو و يشكرها قدامي
سعاد: ههه ناري و الله حتى كتبغيه ويلي يا المصيبة عاد تلاقيتي بيه ووليتي تغيري لا نتي فتيني لهيه
هنادي تنهدات و سهات فالفراغ و بدات كتهدر بلا ما تحس
هنادي: ياختي داك سيد راه بزااف لا فهدرتو لا فضحكتو لا فشخصيتو كايعرف كيفاش يخليك تضحك واخا تكون كتبكي كيعرف كيفاش يحفزك واخا تكون فقمة الإحباط كيهتم بأدق تفاصيل اللي حتى واحد ما يقدر ينتابه ليها حنوون جدا بخلاصة و الله اختي فاش كيكون حدايا كنسا العالم و كنسا راسي واش هدا هو الحب و الله ما عرفت اللي عرفت بلي بغيتو يبقى حدايا و بجنبي
سعاد: هاي هاي على هنادي كتحب يا لالا وا هانتي واخا يبقى يدكر مرتو مرة مرة قدامك نتي كوني مراة و مرمورة حاولي تنسيه فيها ما نخافش عليك راك عفريتة غير ما كتبانش عليك
هنادي: هههه اويلي على عفريتة منين جاتني اختي غير الشنعة و صافي
سعاد: احيااااني عليك راه دوك اللي كيكوني مبوهلين كيكونو ما ساهلينيش
هنادي: بزاف على حسك أشمن مبوهلة ماشي غير اللي ساكت و داخل سوق راسو كتردوه ما كيعرفش و فهاد الوقت اختي كلشي مطور و كلشي عارف سواريه غير كاين اللي كيبيبن و كاين اللي كيخلي داكشي مستور
سعاد: اوا قالك دوز على الواد الهرهوري لااا دوز على سكوتي وا هانتي تهلاي فراسك شوية و حاولي تخلي بصمتك حتى نتي فحياتو الا كانت مرتو كاضحك ديما و قوية حتى نتي بيني ليه القوة و الضحك و جبديلو لسانو حاولي تعرفي شنو كيدير و سولي عكوزتك راه باينة فيها ضريفة قوليلها شنو كان كيعجبو فمرتو و حاولي تقلديها و لكن نتي غاتكون عندك بصمتك الخااصة فحيااتو حاولي تخليه فاش يكون معاك ينسا العااالم جبدي مواضيع على الفن على المسرح على الغنا على الموسيقى على العلم باش تباني مثقفة ما تبقايش كتجبدي دوك الموااضيع البااايخة المملة و لكن فنفس الوقت خليه يحس بسعادة معاك هدريلو على شي مواقف طراو ليك كيضحكو عاودي نكت ما تبقايش غير ساكت و حانية راس و هو اصلن ما جبدلك مرتو حتى درتي شي حاجة اللي فقصاتو
هنادي: اوووف و انا فيا قاعدة كنبكي دغياااا و كنكره راااسي فاش كنوض نبكي كانبان ليه ضعييفة
سعاد: ماشي مشكل اصلن داك السيد راه ما عمرو يقلقك و لا يبكيك ما تبقايش حتى نتي تنكديها عليه خليك ديما مبشورة راه راجل كيحماق على المراة الضحووكية الهبيلة اللي يحس بيها بحااال بنيتة صغيرة بين يديه و زيد عليها تكوني مثقفة و قوية صاافي راه يبغي ياكلك بحواايجك
هنادي: اودي اصلن هو كيبقى يقولي بنتي
سعاد: انا كن كان يوسف راجلي بحالو يقولي حتى جدة و مااعنديش ريحة د المشكل نرجعو لموضوعنا ممكن فعوط ما يقولك ختي كيبغي يعيطلك بنتي شنو فيها ربما جيتيه كيووت و صغيرة عليه بغا يناديك ببنتي باش يحسسك بالحماية و الامان او لا ربما حيت عرف مات ليك بااك و ما باغاكش تحسي بداك نقص كاين عدة فرضيات و لكن نتي ماشي سوقك نتي تقربي منو حببيه فيك نسيه فمرتو كني شي حاجة مميزة فحياتو و على حسب اقوال ماماه سيد راه من أطيب خلق الله و جد
حنون وا عنداكي تفلتي هاد الهمزة بين يديك اختي
هنادي: اووف يا ختي بين ليلة و ضحاها غانتزوج مزال ما ثايقة فهادشي و ما زال ما عارفة هاد الحياة الزوجية كيفاش دايرة و ماعرفت هادشي فين غايخرجني
سعاد: اودي الحياة الزوجية زويينة و لكن قليل اللي كتلقايه فرحان فيها ياك كيقولك الكثير متزوجون و لكن القليل من لديه شريك الحيااة
هنادي: هاااي هااي على سعاااد و اللغة العربية تمجهدتي علينا هههه
سعاد: يصحابلك لحسك انا ما قرياش حتى انا كنت أدبية و كنت كنحماق على اللغة العربية و الشعر و الروايات و لكن داك يوسف قلب ليا مخي يعطيه ضر عيفة الرجال ردني مكلخة بحاالو و دابا كنلاهي الوقت كنقرا فقصص بداارجة ما كنلقا ما ندير نتلفوا الوقت
هنادي: بسباابك تبليت بيهم
سعاد: خاصك تشكريني أحوباااي ما تنسايش بلي كيقريوك و يعلموك شنو كيوقع فالحياة الزوجية *غمزاتها * ما تحتاجيش تسولي
هنادي:هههه سفاالة و لكن ما كنقراهاش انا دوقي صعيب
سعاد: احياااني عليك نوضي تهزي بدلي حوايجك و سخني داك الروز بالحليب نتعشاو بيه نعسو هاد نهار كان طويل وقعوا فيه بزاف د الحوايج زوينين منهم خوتك تشدوا و نتي تزوجتي الله يكمل ليك بالخير أزين ديالي تستاهلي
♤♤♤♤♤♤
متكي فوق السرير ديال بيتو و لابس غير سروال د الكيطمة غري و هاز فيدو كتاب بلغة الانجليزية و داير نظارات طبية على عينيه اللي عطاوه وسامة خاااصة بيه حتى كيسمع تيليفون كيصوني طلعات نمرة مجهولة
الشيئ اللي خلا علامات الاستغراب تبان على ملامح وجهو دار الهاتف فودنيه و قال
كان غايقطع حتى سمع صوت أنثوي رقيق جدا باين أنه فيه تأثيرات من إحدى التطبيقات الخاصة بتغيير الصوت ..
~:je t'aime
كانت هادي هي اول كلمة و آخر كلمة سمعها من شخص اللي إتاصل بيه و قطع ...كاظم بقا غير كيرمش ما فهمش شكون المتصل باين انه صوت أنثى و لكن ما عمرو سمعو من قبل ما عطاش لامر أهمية قال ربما شي وحدة باغا تفلا حط التيليفون من فوق الطبلة و هو يتحل الباب التافت يشوف شكون لقا لقمان اللي كيفرنس و قال بصوت خشن غالبة عليه الضحكة
لقمان : هبط تعشا قالتلك الواليدة
كاظم حيد نظارت الطبية و هز المخدة اللي حداه شير عليه بيها جاتو لكمارة نيشان
كاظم: كتخلع فالبنت ما حشمتيش
لقمان: اصاحبي عميتيني
كاظم: حمد الله اللي ما ناضتش هرستك
لقمان: اخويا هي بكااية و خوافة بغينا نشطوا عليها ندماتنا
كاظم: آخر مرة أ لقمان
لقمان: وا ما كانش كيصحابلي هي الزوجة المستقبلية مبروك أ العشير فرحت ليك
كاظم: الله يبارك فيك * ربع يدو و بقا متكي على السرير و قال* بما ان نتا عندك مسار حاافل بالنجاحات فالزواج عطيني نصائح اخويا
لقمان بقا سااكت و فالاخير قال
لقمان: نصيحة هرب ما حد عندك الوقت مااتزوجش اخويا هادي هي النصيحة اللي غاترحمني عليها من بعد
كاظم: فين جنتي ؟؟؟
لقمان : جنتك مشاات عند ماماها دابا ما بقيتيش تقولها هنادي صاافي لقيتي البديل
كاظم سها فالفراغ و ابتاسم و قال
كاظم: هنودتي توحشتها و الله
لقمان:الله يرد بيك
كاظم:*بعصبية* بنتلك كنلوح حوايجي
لقمان: راك نيت جالس عريان
هز كاظم المخدة الثانية و شير بيها عليه و لكن هدا المرة خوا ليه
لقمان: من دابا وليتي تضربني على حسب مرتك حشوومة كاع
كاظم: تستاااهل
لقمان بقا ساكت و قال فالاخير
لقمان: دابا بيناتنا كتبغيها ا العشير و لا غير دايرها قنطرة باش تنسا بنتك و مرتك
كاظم: ما عرفتش المهم عندي عزيزة بزاف فمدة صغيرة دارت بلاصتها فقلبي
لقمان: يعني ما كتبغيهاش
كاظم مرر يدو على شعرو و تنهد بتعب
كاظم: واش غير أجي و حب أصااحبي الحب كلمة من جوج حروف و لكن معناها عمييق و انا ملاك مازال مستوطنة قلبي ضحكتها مزال لحد الان كنسمعها فودني كلامها لباسها عطرها كلشي مزال مستوطني و ما نقدرش نساها بهاد البساطة و زيد عليها الجرح دقلبي من جيهة بنتي هنادي اللي مشات و ما شفتهاش و لكن هنادي اللي غانتزوج حتى هي مزال صغيورة و كنحس بيها بحال بنتي باغي نحميها باغي نحقق ليها احلامها باغي نعيش معاها الحياة و لكن كأب كيخاف على بنتو
لقمان: و كزوج كيخاف على مرتو مزال ما عندكش فالقاموس ديك بنت ناس غاتزوج بيها و غاتعيشها معاك و غاتبقا تعاملها كأب واش أصاحبي بعقلك ولا راه طاير ليك ما غاتقرب ليها ما غاتعطيها حقوقها كزوجة واش هبلتي ولا مالك ؟؟ وهي ما فكرتيش فيها الا بغاتك و تعلقات بيك تصور معايا غاتعيشها معاك و ما غاتقيسش فيها هي لااااش مزوجاك اصلن راه اصاحبي ماشي غير حنا رجاال اللي كتكون عندنا رغبة جنسية راه حتى العيالات و شفتي الا كانت كتسطاااا عليك هي غاتجي طلبها منك و عقل عليها فين قلتها ليك و ديك ساعة قلها انا مزوج بيك غير باش نسا مرتي و بنتي واش هبيييل انا كن كنت هنادي تقوليا هاد الكلام نعطيك ضربة نتلفك على العالم
كاظم بقا سااكت كيدور كلامو فراسو
لقمان: نتا راك هبييل و مسطي و انا داير فيك راسي هبط الا غاتهبط باش تاكل و الله يحسن عوانها معاك و بعدا نتا راك غير كتهدر نهار غاتزوج بيها و تصبح عليها صباح و عشية و الله حتى تبغيها بسيف على والديك و عقل فين قلتها ليك
كاظم: *بتهكم* ياكما عجباتك ؟؟ شفتك كدافع عليها بلا قياس
لقمان: *باستهزاء* اي واحد عندو القلب و ما كيدعيش الحنية و الحنان المزيف غاتبقا فيه ديك البنت و حتى واحد ما غايرضا لديك البنيتة الصغيرة اللي عاد قالت بسم الله فدنيا تعيش مع رجل ما قادرش يعطيها حقوقها كزوجة
كاظم تقاد فالجلسة و خنزر فيه
كاظم: بحال كتقصد بكلامك بلي ما عنديش القلب و كندعي الحنية و الحنان و أن قلبي حجرة و ما كنحسش
ببنادم
لقمان: ماشي بحال كنقصد كنقصدها أخوويا ولد ميمتي و بويا الا ما قدرتيش تبغيها غير بلا ما تزوج بيها و تعدبها معاك و كنتحداك مراتك عمرك تنساااها و غاتعدب معاك هناادي مسكينة اللي دنبها انها سميتها هنادي و طاحت فواحد مريض بحالك
كاظم: لقمااااااان
لقمان: حيت كنقول الحقيقة بقا فيك الحال دنوب ديك البنت علامن ؟؟؟ غير قولي علااامن البنت غاتزوج بيك على اساس غاتبغيها و غاتلقا فيك الحنان اللي ما لقاتوش فعائلتها ماشي باش تقولها بنتي كن بغات اب كن بقات فدارهم مع مها لاش غاتزوج اصلن
كاظم ناض جلس و حط رجلو على الارض غمض عينو حط يدو على راسو حاس بيه كيضرو بكلام خوه و قلبو ألمو أكثر من هاد الهدرة ربما بدا كيبان ليه الخطيئة الي غايقترف فحق هنادي اللي دنبها ان إسمها بحال إسم بنتو اللي توفات ...
لقمان : نتاااا بغيتي تعيش دور ديال الاب و لكن سمحلي ما يمكنش هادشي يتحقق الا ما بغيتيش هنادي و قربتي منها و نعستي معاها و حملااات عمرك غاتسمع هاد الكلمة خاااصك تقرب من مرتك اللي هي هناااادي و لا عمرك تحلم تعيش دور ديال اب هاكا نتا كتبين بلي نتا اكبر أناااني فالعالم علاااش غاتعدبها معاك و الا بغاااتك اخويااا و الا بغاتك دير على الاقل هاد الاحتمال فبالك نتا الا كنتي باغي بنت اللي تحسسها بالامان كن مشيتي تبنيتي شي بنت من الميتم و عتابرها بنتك و لكن لااا نتا مرييض واحمق فدمااغك ملاااك مااتت الله يرحمها هادي خمس سنين اخويااا كنقول نهدر و لكن كنت ساكت هاد سنين على قبل كنت كنشوفك كتعدب و لكن حتى لهنا و برااكة ما غانسمحش ليك تعدب معاك ديك بنت الناس اللي تزوجتي بيها أصلن غير حيت سميتها كتشبه لسمية بنتك اللي ما عمرك شفتيها فتح عينيك اصاحبي و صااااااافي نسا المااضي ملاك مرتك مااتت و راها دابا تحت تراب حتى لامتى غاتبقا هاكا حتى لا متى من فوقاش ولا قلبك قاصح و كتشوف غير لمصلحتك ماشي هدا كاظم اللي كنعرف كااظم الحقيقي هو اللي كيشوف مصلحة بنات ناس قبل مصلاحتو كااظم اللي كيعرف بلي بنات نااس ماشي لعبة بين يدو شنو غاتخسر الا نسيتي ملاااك و بغيتيها حقااا و تقربتي منها علاش دماغك و قلبك بقا محصور فالماضي و لكن نتا اللي حاصرو بيديك و نتا اللي قادر تغير الواقع اللي كاتعيش فيه نتا قادر تبغي هناادي كزوجة و كحبيبتك و لكن نتا باغي تقنع عقلك بلي هاديك بنتك وهي راه ماشي بنتك و عمرها ما غاتكون بنتك حيت بنتك هي اللي غاتولدها مع امراة اخرى و اللي غاتكون هنادي نيت اللي خاصك تعاملها كمراااتك و تعاملها كملااااك اللي ماااتت و مااشي كبنتك اللي ما عمرك شفتيها حيت هي مررررتك ماااااشي بنتك ...
سكت حيت حس بيد لالا زبيدة تحطات على كتفو التافت عندها لقاها واقفة
لقمان: الواليدة
زبيدة: باراكة اولدي باااراااكة على خوك قلبو طاايب ما تزيدوش حتى نتا
لقمان: قلت الحقيقة واش اللي يتزوج ببنت غير حيت سميتها كتشبه لسمية بنتو واش هدا طبيعي فنظرك و نتي نيت اللي غادة تخطبيها ليه و غادة كضحكي و كتزغرتي ما فكرتيش فديك البنت اللي مسكينة قالت ربما بلي غاتزوج و راه اي بنت عارفة اش كيوقع بين راجل و المراة و حتى هي تلقاها كتفكر فشنو تلبس ليه و شنو اللي كلام اللي تقول ليه فاش يكون قريب ليها راااه مااايمكنش أ الواليدة تعيش معاه و يبقا يشوف فيها بنتو اوا صافي نييت يدخلها لمدرسة و يبقا يدير ليها كريناات و يبقا يوقف ليها فباب المدرسة و هي تقوليها بابا اوا صافي نيت و يبقاو يجييو دراري يخطبوها منو ...
زبيدة: لقمااان ما تزيدش فيه
لقمان: انا ما كنزيدش فيه أ الواليدة كانقول الحقييقة كنفيقوا راه ولدك ماشي حمق غير كيتحوومق اه فعلا ما كانتش ساهلة عليه وفاة ملاك و هي حاملة ببنتو هادي عرفناااها و لكن ماشي حتى لهاد الدرجة راه ا الحنانة خمس سنيين دازت صافي الله يجعل شي بركة كن ما كانش عندي عزيز ما نقولش ليه هاد الكلام و لكن حيت كيبقا فيا ياك شحال مشا عند الاطباء نفسانيين و لكن ما تعالجش علاااش فوقتما كيسمع سمية ملاك كيدمعو عينيه علاش فاش كيشوف شي بنت صغيرة كيقولها هنادي حيت بكل بساطة دوك الاطباء ما كيعطيوهش القاصح ولدك اميمتي محتاج هاد الهدرة اللي تفيقوا و تخليه يعرف بلي طريق اللي غادي فيها ماشي هي هاديك ..
زبيدة : اوا اش غانديرلو عييت نهدر معاه و هو غير ما كيزيد يقولك بلي هنادي بنتو و لكن اولدي راه كيتعامل معاها مزيان بحال بدا كيفتح قلبو ليها و الله قبيلة كيتعامل معاها بحال مرتو
لقمان: أ الحناااانة كتهدري على كاظم بحال ما كتعرفيهش هو حنين و ضريف مع كلشي ولكن غالبا غايكون كيشوف فيها بنتو راه نهار غايبغيها غاتشوفيه كيتعامل بشكل أخوووور
دخلات زبيدة للبيت و اتاجهت ناحيتو كان جالس و عاطيهم بضهر و قابط راسو بيدو ...
زبيدة:كاظم
وقفات اونفاص ليه و حنات على ركابيها و حيدات يديه من على راسو باش يبانلها وجهو و ادا بها تتفاجئ من دموع اللي نازلين من عينيه حطات يديها على فمها و شهقات
حل عينيه و شاف فماماه اللي جالسة فالارض و عينيها متبعين الدموع اللي كينزلو من عينيه ...
كاظم: بغيت نبقا بوحدي
زبيدة : واش اولدي تقلقتي من كلام خووك
كاظم: الحنانة عفاك ما تضغطيش عليا و ما تزيديش عليا قلبي عااامر شااعلة فيه العافية شكون انا و علاش هاكا داير و علاش مريض فعقلي و علاش و علاااش أسئلة كثيرة ما لقيت ليها جواب بغيت نموت و نرتااح و نتهنا حتى انا صاافي عييت أ الحنانة عييت تهديت عييت ما نقوي راسي و لكن واالو انا ما مزياانش انا قلبي قاصح انا اناني انا ما نسوا ما نصلاح انا موتي احسن من حياتي * بقا ساكت حتى هبطات دمعة من عينيه و كمل كلامو * كنت باغي نستغل هنادي باش نسا بنتي و مرتي واش واحد اللي يدير هاد التصرف واش مزياان اكييد لا انا غير انسان إستغلالي ..
زبيدة ناضت من الارض و جلسات حداه و عنقاتو جنب و قالت بصوت دافئ حنون تسلل لمساميعو كأنو دواء لجروح قلبو
زبيدة : نتا أحسن مخلوق و اطيب إنسان شافوه عيني قلبك صفااا من الحليب قلب حنين اخلاقك و مبادئك عااالية و ما تلقهاش فكلشي فهاد الزمان اللي قلالو فيه الرجال نتا ماشي مريض فعقلك بالعكس نتا أذكى من كلشي واش تبارك الله المهندس د العائلة و اللي عندو ثروة كتقدر بالملايين مشاء الله واش هدا احمق نتا خاصك تحمد الله على نعمة العقل اللي عطاك الله نتا اولدي ما قدر حتى واحد يفهمك كلهم باغيين يدخلولك فكرة ديال انك احمق و مسطي لدماغك صحة حيت ناس عمرهم يبغيو يشوفك احسن منهم و كيبغيو يشمتو فيك بهاد الشكل حيت بكل بساطة ما قادرينش عليك و احسن حاجة كيبغيو يآديوك بيها كيبغيو يدخلو ليك افكار غالطة لدماغك ما ديرش فبالك نتا مشكلتك الوحيدة هو ان موت مرتك اللي كنتي كتبغيها أكثر من العالم فاش مشات دات معاها العالم بالنسبة ليك و لكن نتا باش تنقد راسك خاصك تبحث على عالم جديد باش ما تبقاش فالظلام و العالم جديد اللي فتح ابوابو ليك هي هنودة بنت لالا فضيلة و باش تبغيها خاصك تشوفها بحال داك الوطن اللي فتح أحضانو ليك باش تنسا همومك بحال الوطن اللي كيعطيك بلا مقابل خاصك تشوفها بحال داك نور اللي جا بعدما كنتي فظلمة بحال الربيع اللي كيجي من مور فصل الشتاء بحال الفرج اللي كيجي بعد الصبر
كاظم حط راسو على الكتف الحنين اللي كيحس بيه قبل ما يتكلم كتف الام ديالو لالا زبيدة و قال بصوت مكسور
كاظم: خاايف ا الحنانة نفتح قلبي ليها و تضيع من يدي و لا تموت و لا توقع ليها شي حاجة تعقدت من الحب و خايف ما نتوفقش فيه خاايف ما نبغيهاش ياك كيقولك الحب كيتعاش غير مرة وحدة و ما الحب الا للحبيب الاول ما نقدرش نساها
زبيدة: و نتا شكون قالك غاتنساها نتا غاتدفن حبك ليها فقلبك و غايجي فعوطو حب هناادي اللي يقدر ينسيك فيها فمرة و تقدر تحس بطعم الحب الحقيقي معاها اوا اش قلتي غاتنسا ملاك و ما تعاودش تدكرها و هنادي ما غانقولوش ليها بلي ختاريناها حيت اسمها كيشبه لهنادي بنتك اللي ماتت فكرش ماماها لااا انا كنعتابر هادشي مكااتيب و ديك البنية كانت مكتاابة ليك غير ربي جاب السبب على هاد الطريقة و صافي كاتواعدني غاتبغيها بحال مرتك و غاتقرب منها و غاتنسا ملاك فخطرة واخا ما غاتقدرش و لكن غاتبقا تنساها تدرييجيا حتى غايجي الوقت اللي غاتمحى من بالك
كاظم ناض من كتف ماماه و بقا سااكت كيشوف فالفراغ و بعد مدة من صمته الذي لايبشر بالخير نطق
كاظم: غانساا ملاك أ الحنانة و غانفتح قلبي لهنادي و ما غانبقاش نشوف فيها بنتي اتافقنا دابا
زبيدة حطات يديها اللي كانت مزينة بعدة أسااور من ذهب على صدرها و ضحكات حتى بانت ليها ضرسة د العقل و زغرتااات حتى صمكات كااظم و خسر ملامح و جهو
زبيدة : إوا هااااكاااا نبغيك برااااافو عليك
ضماتو زبيدة لصدرها و كطبطب على ضهرو العاري
زبيدة: و ما تصورش قدااش فرحتيني انا متأكدة بلي ما غاتندمش و ما عمرها تخلى عليك بجهد الله
كاظم : نتمنى أ الحنانة
زبيدة بعدات عليه و حطات يديها على خدو و قالت
زبيدة: الله يرضي عليك أحبيبي يالاه هبط تعشاا
كاظم: غير سيري أ الحنانة بغيت نبقا بوحدي ما قادر ناكل والو
زبيدة : على خاطرك تصبح بخير
كاظم : تصبحي بخير و شكرا على كلشي شكرا على وقفتكم معايا شكرا حيت ديما كنلقاكم كتوريوني الخطأ من الصواب
زبيدة: و حنا اولدي كنديروا غير داكشي اللي خاصو يدار نتمنااو دير عقلك
ناضت زبيدة و خرجات وسدات الباب و خلات كاظم من فوق السرير ..
تكا و دار يدو على قلبو اللي حاس بيه كيألموا... علاش هاد العداب علاش هاد الحب كامل لزوجة توفات أكثر من خمس سنوات ؟؟ واش هدا كولو إخلااص ووفاء ولا مرض هوسي...
خاااصو ينسااها ملااك مشات و بقات غير هنادي اللي جا بيها القدر لأحضانو صدفة ،خااصو يبغيها و يديرها مرتو و حبيبتو و ينسا ملااك اللي ماتت و شبعات موت هنادي غاتولي مرتو ماشي بنتو خااصو يفيق خااصو يعطي لديك البنيتة الحب الكاافي و ما خاصوش يضلمها معاه حيت هو فقط عند عقد نفسية و قلبو بقا محصور فالماضي هنادي هي اللي غاتاخد بلاصة ملاك من هنا للفوق لا فقلبو لا فاحلامو لا فحياتو و كيفما قالت ماماه ملاك ما عمرو ما غاينساها و لكن غايدفن حبها فقلبو و غايجي فبلاصتها حب جديد حب مختلف و الحياة تستمر عمرها ما غاتوقف على ود الحب الاول ....
♤♤♤♤♤
الحب الأول لا يموت بل يأتي الحب الحقيقي ليدفنه حيا
-محمود درويش
♤♤♤♤
حل المجر اللي حدا راسو و جبد منو صورة ديال الزوجة الاولى ملاك و تأملها لعدة دقاائق قربها لصدرو و حطاها على قلبو و قال بصوت حزين مكسور
كاظم: كانبغيك أ ملاكي و لكن ما قادرش نستغل بنت على قبل انني نساك شنو دنبها الا كانت كتمتالك نفس الاسم اللي كنت غانسميو بيه بنتنا *تنهد و كمل كلامو * ما غانقدرش نبغيها قدك و لكن خاصني نبغيها خاصني نعطيها حقوقها كزوجة نتمنى نتوفق معاها و نقدر نساك و لو بنسبة قليلة كنبغيك أمفششة قلبي
تكا من فوق السرير و طفا الأضواء و بقا حاط صورتها على قلبو كيفما كايدير كل ليلة ولكن واش ممكن تبدل ديك صورة بحضن هنادي فالمستقبل ؟؟شكون عرف كلشي ممكن فدنيا ....
🌤🌤🌤🌤 شمس سطعت و الجو جميل هدا اليوم و فراشات قد قالت هدا فصل الصيف و صديقاتي قلنا هيا لنزهة هيا ما أجمل هذه الرحلة هيا يا أصحااب....
حاشية راسها تحت المخدة و كتسمع هاد أنشودة الأطفال اللي طاالق ريان ولد ختها فالتيليفون ديال ماماه سعاد صدعها و عصبها و طلع ليها جنووون و القرودة فوق راسها حتى هدرات من تحت المخدة
هنادي: رياان طفي داك الزبل خلينا نعسوا
ريان كينقز حداها ما مسوقش و كيغني
ريان: شمس سطعت و الجو جميل هدا اليوم
هنادي ناضت بثااقل من تحت المخدة لابسة غير صوفيطمة د صماطي فالاسود مع سروال د البيجامة فالاسود و فيه مربعات فالاحمر و شعرها طااالع فالعلالي و مغطية بإيزار عامر ورادي
هنادي: واااا الزمر و الشمس و القمر واااطفي داك الزبل خلينا نعسوا تحرك عند مك
ريان:*خرج لسانو و قال بصوت طفولي* مااابقا نعااس أطااتي هادي التسعود و ماامااا ماكايناش خرجات تشري بطاطا و قالت لي بقا مع طااتك هنادي حتى نجي
هنادي : شي يولد و شي يقابل تفوو على نهار باين من صباحو ودابا نقص داكشي الله يرضي عليك و لا سير حدا لالاك و لعب
ريان: حتى لالا ما كايناش مشاات تشوف الغوال
هنادي:*باستغراب* اينا غوال ؟؟
ريان: خالي حمزة و خالي عصام ماما قلتهالي
هنادي رجعات تكات و بقات كتشوف فالسقف ...ما كاملاش خمسة دقايق حتى سمعات دقان فباب دار
هنادي: سير حل لباب لماماك هاهي جات
ريان: انا انا انا انا ثاء ثلاث نقاط تزينني انا انا انا انا ثاء تخرج لسانك لتنطقني
هنادي مررات يديها على شعرها بقوة الفقايص اصلن كتنوض خاااسرة ما عاقلاش على العالم و ولد ختها زايدها ما كيسمعش للهدرة و كيغني من الفوق ...
لاحت عليها داك ليزار و ناضت بحوايجها و شعرها شاد ريزويات اتاجهت فإتجاه الباب و حلات الساقطة و جرات الباب على حر جهدو حتى بانت كلها و قالت بصوت مرتفع عوالة تدابز قبل ما تشوف شكون واقف
هنادي: واااش اختي نتي ماا عندك ول...
طرطقات عينيها على وسعهم منين لمحات وجهو الوسيم الجداب اللي كيخلي قلبها يدق مية ألف مرة فالثانية هو و الله حتى هو نفسو كاظم خطيبها اللي خدا قلبها و عقلها من اول نهار شافتو فيه، هو نفسو اللي ليل كاامل و هي كتفكر فكلامو و فأفعالو و ضحك غير هي و راسها واقف دابا بكامل هيبتو أمامها بتيشورت أبيض مع سروال رجالي فالاسود ديال جلد و مع نضارات شمسية فعويناتو ... بقوة الصدمة بقات غير
كتشوف فيه و ما مستوعباش شنو كتشوف ...
ما كانتش صدمتو أقل منها حيد نظارات الشمسية و طلع حاجب و هبط لاخور و بقا كيشوف فحالتها إبتداء من شعرها المشعك و وجهها المعمش و حوايجها المخربقين ديبرادور الأسود اللي كانت لابسة مبين مفاتنها الانثوية كلهم شقة د صدرها كتبان و هبط عينيه كيشوف فسروال د البيجامة اللي كانت رجل هابطة و رجل طاالعة حتى لركبتها حالتها حاالة بحال ضربها كاميو د الزبل 😂😂...
هنادي : أ...أ...أكيد كنحلم
ماحسات براسها حتى زدحات فوجهو الباب بقا هو مصدوم ما عرف باش تبلا حط يد على جنبو ولوخرى دوز بيها على وجهو و شداتو الهيستيرية ديال الضحك صورتها بديك الشعاكة و دوك الحوايج ما بغاتش تزول ليه من بالو ....
سعاد: خويا كاظم
التافت شاف بنت كتشبه لهنادي و لابسة جلابة قديمة فالخضر وهازة فيديها ميكات د الخضرة عرف غاتكون ختها ابتاسم ليها
كاظم: صباح الخير
سعاد: *بابتسامة * صباح الخير جيتي على قبل هنادي
كاظم دور وجهو جنب و غمض عينو و عاود فتحهم تفكر شكلها كيف كان و كيفاش زدحات عليه الباب غلباتو ضحكة ...حنحن و التافت شاف فيها و قال
كاظم: si جيت نشوفها باش نمشيو لعند المصور على قبل الباسبور
سعاد: اه اخويا راه تلقاها مزال ناعسة هانا نكلمها ليك
حطات ميكات د الخضرة الارض و جبدات الساروت فتحات باب الدار و قالت بلطف
سعاد:دخل تفطر اخويا
كاظم: ميرسي هانا غانساينها فالطوموبيل حتى تفطر على خاطرها و توجد
عطاها بضهر و مشا حل الباب ديال طوموبيلتو و سعاد دخلات لداخل كتنادي على هنادي
سعاد: هنااادي
هنادي كانت جالسة فالبيت صغير و كتندب و غاطرطق بالفقصة و واقفة حدا المراية كتشوف فراسها كيف كتبان و ريان حداها كينقز و كيغني بصوت مرتفع
ريان: كااان كان في الرااعي إسمو شهاب كل يوم بيرعى الاغنام بيطعمييهم الاعشاب...
هنادي هزات الصندالة من الارض و جرات ريان و كتغوت و وجهها أحمر و عينيها مجموعين فيهم الدموع
هنادي: واااا سكت سكت بااركة غير الفقصة اللي فيا ما تزيدنيش بهبالك علاااااش ما مشيتيش نتا حليتي ليه الباب يا البرهوش علاش ما كتسمعش للهدرة بسبااابك يا البرهوش تشوهت حدا خطيبي واااش كتفهم ولا ما كتفهمش
ريان: ياااا شهاااب يااااكداب تستااهل أكل الدئاب
ريان كيحرك ليها حجبانو كيفقصها و بقا كيغني ما مسوقش
على إثر غواتها اللي تسمع صداه لمساميع سعاد دخلات لعندهم للبيت لقاتها شادة صندالة باغا تضرب ريان
سعاد: رصااااي رصااي اش كاتديري
هنادي : وا تشوهت خرجت عند كااظم بهاد الحالة أختي و بسباب البرهوش د ولدك ما بغاش يحل الباب تفوووو على نهار
ضربات رجليها بالفقصة و زادت كملات عليها اختها بهدرتها
سعاد: لا واش حليتي ليه الباب بحال هاكا ؟؟ محااال اختي واش يكمل الخطوبة مشااا يفسخها ههههه
هنادي : سعاااااد خرجي نتي وولدك من حدايا قبل ما ندير فيكم شرع يدي
سعاد: وجدي رااسك راه السيد كيتسناك باش تمشي تصوري وسيري و لبسي دوك الهدارس ديالك تاني لبسي ديك الكسيوة الباج اللي شريتلك داك نهار من جوطية و ديري ديك الشدة اللي درتي ديك المرة و لبسي حويلقاتك راك غادة تصوري زعما و خارجة مع حبيب القلب و فاش تسالي عيطي ليا نديرلك شوية د الماكياج
هنادي: و دابا غير خرجو باراكة عليا غير الشوهة اللي شافني بيها واخا نلبس و ندير اللي درت غايبقا يتفكرني و انا بديك الحالة زهر أختي و الله ما عندي
خرجات سعاد و جرات معاها ولدها و خرجو و خلاو هنادي كتفقص غير هي و عضامها حلات البلاكار و هزات واحد الكسوة طويلة فالباج و دارت من فوق منها قويميجة فالخضر فيها و ريدات جاتها كتحمق اللبيسة وقفات حدا المراية اللي عندها فالبيت و قدات الدرة اللي كانت فنفس لون الكسيوة على شكل توربان كيبقا العنق كيبان و هزات واحد السنيسلة كانت شراتها من شحال هادي و ما عمرها لبساتها دارتها فعنقها جاتها مع الليبسة هي هاديك دارت نضاراتها الطبية دائرية الشكل هي عندها نظر ناقص و لكن ما كيعجبهاش تلبس نظارات كيقنطوها و لكن كتديرهم ....
حلات الباب و خرجات عند ختها اللي جالسة كتصاف القزبور و المعدنوس فالسيجور و حداها ريان كيلعب فالتيليفون ...
هزات سعاد راسها شافت فهنادي طلعاتها و هبطاتها بإعجاب
سعاد: اول مرة نشوفك مقادة كي العباد
هنادي: اودي
مشات لبسات صباطها الكحل و بغات تخرج و هي توقفها سعاد بصوتها
سعاد: بلااتي نديرلك المكيااج تسناااي
هنادي:داكشي اللي بقا خاصني غير الماكياج
سعاد : واكوني تسمعي الهدرة
ناضت سعاد و جابت صاك ديالها حلاتو و جبدات منو فوندوتان و ماسكارا و عكار فالغرونة ...
جلسات هنادي و دارتلها نيت غير داكشي اللي جبدات الشيئ اللي عطا لوجهها لمسة خاصة جات سووو كيوت
سعاد عضات على شنايفها و قالت
سعاد: اوا شفتي ما كنتيش كديري المايكاب و دابا فاش درتيه جيتي مزيونة طاح عليك السر
هنادي ناضت شافت راسها فالمراية ضحكات و عجبها وجهها اول مرة كدير المايكاب حيت أكيد خوتها كانو مانعينو عليها ...
هنادي: اوا هانتي و الله حتى جيت مزيونة ما سخيتش نخرج بغيت نبقا غير هنا كنشوف فكمارتي
سعاد: واتي سيري تخرجي راه راجل من قبيلة و هو يسااينك اويلي
هنادي: حشماانة منو و الله يالاه الله يعاون و إلا جات مي قلها راه مشات مع كاظم تصور
سعاد: واخا
حلات الباب و خرجات خطات خطوات باتجاه السيارة و هي تشوف الباب تحل عرفات كاظم اللي غايكون نزل حسات بداتها كترعد و قلبها كيضرب بقوة وقفات فبلاصتها حيت شافتو جاي لعندها كيبتاسم ليها حتى وصل لعندها و هز يدو كيشوف فساعة و قال
كاظم: تعطلتي أ هنودتي
هنادي غير سمعات صوتو داابت هزات راسها شافت فيه و قالت
هنادي: سمحلي
كاظم عض على شنايفو طلعها و هبطها و قال بصوت حنون
كاظم: ما تطلبيش السماحة القمر ديما كيتعطل
هنادي على إثر كلماتو تنهدات و حسات براسها طايرة فسما منين كيجيب هاد الكلام و علاش هاد السيد كيتعامل معاها هاكا علاش كيخليها تعلق بيه نهار على نهار اووف شحال ضريف وشحال مزيون و شحال رومانسي حمدات الله فنفسها مية الف مرة حيت رزقها بشخص بحالو كيف دير ما تبغيهش كيف دير ما تعلقش بيه كيف دير ما تغيرش من مراتو الميتة بغاتو ملكها ما كرهاتش تسد عليه فصندوق تشوفو غير هي ااخ الحب داير فيها حاالة وجودو فحياتها ولا مهم بزاااف..
هنادي: ههه ياك بعدا انا ما دخلتكش بالشعور و الماكيااج و لبساات و العطور بينتلك حقيقتي من دقة اللولة هاكاك كنصبح كل نهار باش تكون مستعد تصبح على الوحش اللي كاين فداخل ديال هاد المخلوقة اللي حداك
كاظم دوز لسانو على شفايفو و عض عليهم و قال بصوت حزين مجروح كيحاول يخفيه بابتسامة
كاظم: مستاعد نصبح على داك الوحش غير شرط ما تخلايش عليا و بقاي معايا العمر كامل حيت داك الوحش غانشوفو أحسن مخلوق على وجه الارض داك الوحش هو اللي غايخليني نضحك و نسا شحال من حاجة
هنادي استغربات من طريقة كلامو و كيفاش كيهدر بترجي باش ما تخلاش عليه و هوما مزال ما دارو فطاجين ما يتحرق خلاوها ماليها مزال كيتعاتبر غير خطيبها قالت ربما حيت ماتت مرتو تعقد من الفراق كلشي ممكن و لكن هي عمرها تخلا على شخص اللي شافت فيه حنان امها و كيحميها بحال باباها اللي عمرها شافتو ....
تنهدات و قالت
هنادي: كنظن خاصنا نمشيو تعطلنا
كاظم مد يدو بكل جنتلمانية و قال
كاظم: تفضلي
حل ليها الباب و دخلات جر سمطةو دارها ليها و هي كتشوف بعويناتها هز راسو فيها كان قريب ليها بزااف بعض سنتيمات اللي كتفرق بيناتهم ...
هنادي بان توتر فوجهها و خلاص قلبها غايوقف ريحة عطرو تغلغلات فأنفاسها كطلع نفس غير بصعوبة كتسناه يرحمها و يبعد و لكن ماشي بهاد السهولة ...
قال بصوت همس خلا قلبها يزيد يرجف بين ضلوعها
كاظم: علاش درتي le rouge à lèvre * العكار * ؟؟؟
هنادي توترات قالت ربما ما كيعجبوش .. جوباتو بصوت متقطع حيت خافت يغوت عليها ...
هنادي : ما...ما...ماشي هاكاك غير ... غير حيت غادة نتصور د..د...د..داكشي علاش درتو ماجاش معايا واقيلة ياكما ما خاصنيش نديرو
كاظم حرك راسو يمين شمال و ابتاسم و جبد.كلينيكس كان محطوط حداه فالجزء الامامي ديال طوموبيل...
حط يدو تحت ذقنها و هز ليها راسها حتى تلاقات عينيها مع عينيه و هز يدو اللي كان فيه كلينيكس و مررو على شفايفها ببطئ حتى مسحوا كاامل و هي غير كترمش فيه...
كاظم: كلما كنتي على طبيعتك كتباني جميلة أكثر
ضرب الدورة و حل الباب ديال طوموبيل طلع و دار حتى هو حزام السلامة و ديمارا و قلع و هي مازال ما استوعباتش الفعل اللي دار و الكلام اللي قال كيصدمها ...
كاظم: ما عرفتش شنو غانعيط ليك باش تجاوبيني بنتيلي ساهية
هنادي: امم ما عرفتش عيط ليا بشنو ما عجبك ما عنديش مشكل
كاظم بقا ساكت مدة كيفكر حتى قال
كاظم: راحة قلبي
دارت عندو بالعرض البطيئ و بقات كتشوف فيه عطاها إسم زوين اللي ما عمرها سمعاتو اسم اللي أسر قلبها و خلاها تزيد تغرم بيه اسم اللي كيدل بلي عندها مكانة فقلبو ..عم الصمت لثواني حتى كسروا صوت كاظم
كاظم: اسم زوين ياك
هنادي: اه إسم زوين عجبني
كاظم: *بابتسامة * و انا ما تعطينيش شي سمية من اختيارك
هنادي: ههه نعطيك سمية و لكن حنا مزال ما ...
كاظم: مازال ما تزوجنا ياك
هنادي: لا ماشي هاكاك غير كنحشم نعيط ليك بشي إسم من غير سميتك و صافي
كاظم : اوكي على راحتك كتعجبك الموسيقى
هنادي: شوية
كاظم عطاها تيليفون ديالو و قال
كاظم: ديري الاغنية اللي عجباتك
هنادي : واخا
خدات من عندو تيليفون شعلاتو و هي تبان ليها صورة إمرأة بشعر مطلوق جميلة جدا بشرة بيضاء عينيها كبار آية فالجمال و كاظم حداها و المشكل ماشي هنا المشكل فالوضعية اللي كانو فيها فصورة هي اللي ضراتها أكثر كان هزها بين يديه و مصورين حدا لاطور ايفيل و حاط شفايفو على شفايفها 💋💋 الشيئ اللي خلا ناار قوية تشعل فقلبها ما رضاااتش و ما عجبهاش الحال تشوف هاد الصورة طلعات النفس غير بزز و عينيها غرغرو بدموع حطات التيليفون و دورات وجهها لزاجة ما هدرات ما تكلمات كمداتها فقلبها و سكتات ...
كاظم نسااا بلي دايرة صورة ديالهم فواجهة الشاشة و لكن استغرب منها علاش حطات تيليفون و دورات وجهها
كاظم: راحة قلبي
هنادي مدورة وجهها و ما بغاتش دور عندو خالية دموعها يتسابقو على خدها باش يخففو البراكين اللي شاعلة فصدرها ....
كاظم وقف طوموبيل جنب و حط يدو على كتفها باش تدور عندو
كاظم: هناادي ماالك ؟؟
هنادي طلعات منها شهقة قوية كتأكد بلي كتبكي ..كاظم تصدم ما عرفش مالها ياك كانت صحة سلام شنو وقع ليها عاوتاني
كاظم: دوري شووفي فيا
هنادي دارت عندو بالعرض البطيئ و دموعها على خدها مااساهلاش على قلبها و عقلها و عينيها يتحملو يشوفو ديك صورة فواجهة الشاشة الرئيسية ديال هاتف أكثر شخص بغاتو ...
كاظم حط يدو على خدودها و قال بصوت حنون
كاظم: مالك شنو واقعلك علاش كتبكي؟؟
هنادي تكلمات بصوت غالبة عليه الشهقة د البكا
هنادي:ب..ب..بغيت ن..نسولك وج..جاوبني بصراحة
كاظم : كانسمعك اهنودتي غير قولي
هنادي بعدات عليه و مسحات دموعها و بقات ساكتة مدة حتى تهدنات و حسات براسها تكالمات و قالتو
هنادي: نتا مزال كتبغي مرتك اللي ماتت
صدماتو بجملتها خلاتو غير كيرمش فيها و ماعرف ما يقول دار يدو على ذقنو و بقا كيشوف فيها و ساكت
هنادي: ربما غير ماماك اللي بززاتني عليك
التافتت و شافت فيه و كملات كلامها
هنادي: علاش ؟؟ جااوبني الله يرحم واليديك
كاظم تنهد و حرك راسو يمين شمال و قال
كاظم: كن ما كانتش عندك مكانة فقلبي كانحلفلك بالله ما كنتش غانجي عندك هاد الصباح و ما كنتش غانخطبك من عند ماماك وكن ما كنتش باغيك ما عمرك تشوفي وجهي انا كندير الحاجة اللي مقتاانع بها و نتي كن ما كنتش مقتانع بيك كن راني كاع ما جالس حداك دابا و كنهدر معاك
هنادي بقات ساكتة كتسمع لكلامو باهتمام و قالت بعد مدة صمت ما تعداش خمس ثواني
هنادي: علاش صورتك نتا و مرتك مزال عندك فالتيليفون
كاظم بحال ضربتيه بتصرفيقة عاد عرف علاش طرحات عليه داك السؤال هز التيليفون ديالو و شعلو و بانت صورة ديالهم تنهد بتعب و بحزن و قال
كاظم: هادشي علاش تقلقتي؟؟
هنادي: بنسبة ليك عادي نشوف تصويرة مرتك الاولى ف le fond d'écran بديك الوضعية نتا و ياه اوكي ماشي مشكل خليها على راحتك الا كنتي نتا مرتاح انا ما عندي ما نقولك انا غير هنادي اللي حتى واحد ما كايديها فيها و حتى واحد ما كيهتم لمشاعرها و لكرمتها بالخصوص
كاظم أثرات فيه بهدرتها بزاف حيد السمطة و قرب ليها و ضمها لصدرو و مرر يدو بحنان على ضهرها و باسها فكتفها و قال
كاظم: الصورة غاتحيد دابا
بعد عليها و هز التيليفون ديالو و دخل لكاميرا و قال
كاظم: ضحكي باش نصورك
هنادي : صافي غير خليها ماشي مشكل اصلن عادي ولفت
كاظم قال بابتسامة
كاظم: بحال كتفششي عليا يااك امم صراحة اش بانلك نصورك و نتي عاد فايقة من نعاس غاطلع صورة زوينة اكثر
هنادي ضحكات على كلامو بلا ما تحس و منها استغل الفرصة و صورها كضحك ...
و فالبلاصة رد صورتها فواجهة الشاشة الرئيسية و عطاها التيليفون ليديها
كاظم: ما بغيتيش الموسيقى
خدات من عندو التليفون ابتاسم و ديمارا و قلع و قال
كاظم: ديك صورة كانت من شحال هادي و ما انتبهتش ليها سمحيلي جرحتك فكرامتك كانثى بدون قصد
هنادي ما جاوباتوش شعلات تيليفون و بانت ليها تصويرتها عاد بدات كتفرنس غير هي و عظامها طلقات الاغنية اللي كتعجبها
🎵🎵🎵🎵
يا مادا بيا يا نعطيك عمري
تكوني حبيبي و تبقى فجنبي
انا نبغيك ملكي ليا و حدي و نموت عليك
لكن عدياني يا وقفو ضدك
صاحبك غدرك كاع ناس عمرو ودنك
ولعبو بيك
🎶🎶🎶🎶
حبس الطوموبيل حدا البلاصة فين غايتصوروا استوديو مجهد معروف فالمدينة و تصاورو واااعرين
حل الباب و خرج و ضرب الدورة و حل ليها الباب و هي مزال كتموسق ما كتشوفش فيه منفخة عليه على قبل الصورة ...
كاظم دار يدو فجنبو و لوخرى حطها على الباب ديال طوموبيل و قال
كاظم: وصلنا ما عوالاش تنزلي
هنادي حبسات الصوت و دارت شافت فيه
هنادي: شكرا
عطاتو تيليفونو و نزلات كتقاد فحوايجها سد الباب و بقات واقفة كتساينو حتى قرب ليها و قال
كاظم: مازال مقلقة
هنادي: علااش غانتقلق؟؟ لا عادي
كاظم تنهد و قبط فيديها جرها معاه لداخل لأستوديو التصوير ...
كان أستوديو كبير كيبان من البعيد و فالاستقبال جالسة واحد البنت صابغة شعرها بالمارون و دايرة كيلو د المكياج فوجهها و ضاربة عكار احمر اراك من بعيد و غليضة و لابسة غير كسوة حد الركبة مخططة مبينة فورمتها كااملة و كتلوك المسكة ...
هنادي شافتها و عوجات فمها ما رتاحتش ليها عكسها هي اللي غير شافتهم وقفات و قالت
~: bonjour monsieur
طلقات يديها سلمات على كاظم و مدات يديها لهنادي و الابتسامة على وجهها و هنادي غير كتشوف و تخنزر ما حملتهاش و ما تسرطاتش ليها ...
كاظم: عفاك بغيت مراتي تصور على قبل الباسبور
هنادي غير سمعات كلمة مراتي من فم كاظم عضات على شنايفها بقوة الفرحة و دارت شافت فيه و مع هي قصيرة عليه كتبان كيف بنتو ...التافت و شاف فيها عرفها عجبها الحال من كلامو غير من نظرات اللي كتدير فيه و هو تعمد يقولها اصلن باش هاد خيتي اللي جالسة فالاستقبال ما تطمعش فيه و باش يفرح هنودتو وهاكا غايكون ضرب عصفورين بحجر واحد ...
كاظم حنا على ودنيها و قال بهمس
كاظم : عجبتك أ راحة قلبي امم
هنادي حنات راسها بخجل ولا وجهها احمر كيف مطيشة ...
كاظم مرر يدو بحنان على ضهرها و شاف فديك البنت اللي كطلع فيه بإعجاب و قال
كاظم: خاصها تصور ما جاوبتينيش
~: لا غير حيت مازال ما جا الولد اللي غايصورها ممكن تفضلو تنتاضروه فالكرسي على ما يجي غير واحد خمسة دقايق
كاظم دور وجهو بانلو غير كرسي واحد حك دقنو بيدو و قال
كاظم: سيري جلسي فداك الكرسي على ما يجي
هنادي : لا غير خليني واقفة
كاظم: غايضروك رجليك بالوقوف
هنادي: ونتا ؟؟
كاظم: انا هانية
هنادي : لا صافي بلاش و حتى هادو عندهم ستوديو قدو قداش و ما قادرينش يديروا الكراسى
كاظم : اجي معايا
تقدم بخطوات ثابتة فاتجاه الكرسي و هي من موراه جلس فيه وبحركة سريعة منو جرها حتى جلسات فوق رجلو و دور يديه على كرشها هي حلات عينيها على وسعهم 😲😲 ..كيفاش تجرأ يجرها و يجلسها على رجلو اويلي هاد السيد راه غايخرج ليها قلبها من بلاصتو ...
كاظم: هاكا حنا جلسنا بجوج
هنادي دارت عندو بالعرض البطيئ و قالت
هنادي: اويلي واش هبلتي غانوض حشوومة اشنو بيني و بينك
كاظم: * بابتسامة * مرتي
هنادي : اويلي على مرتك ثيقتي راسك واقيلة فين هي الوثيقة اللي كثبت بلي انا مرتك وحتى فاتحة مازال مادرناها وفين هو صدااقي
كاظم كتعجبو هدرتها و كيفاش كتهدر كيحس بقلبو كينبض بقوة فاش كتكلم شي حاجة كتحرك لدااخل فصدرو من كلماتها اللي كيفاجيو عليه همو على الاقل عكس ملااك اللي ما كانتش كتكلم بزااف ...
كاظم: نفهم من كلامك بلي ماعجباتكش البلاصة اللي صوبت ليك
هنادي: غانوض بحالي صافي انا غانوقف و نتا جلس
هنادي بغات تنوض و زاد قربها ليه و زير على كرشها حكمها مزياان بغات تغوت و هي تشوف ديك خيتي حااضياهم ابتاسمت ليها هنادي و حتى السكريتيرة بادلاتها الابتسامة الصفرة
هنادي :*كتكلم تحت سنانها و غير بشوية * كاااظم طلق عفااك
كاظم: فخبارك اول مرة نسمع سميتي من فمك
هنادي دورات وجهها شافت فيه و قالت
هنادي: دابا طلق مني و غاتسمع سميتك من فمي مدى الحياة و دابا طلق حشوومة ما قادة على دنوب طللق
خليني نوض
كاظم: بشرط
هنادي غمضات عينيها و عاودت فتحاتهم و قالت
هنادي: تشرط أسيدي غير فكنا ها العار بلا شوهة
كاظم: انا اختارعت ليك اسم اللي غانعيطلك بيه و حتى نتي اختاريلي شي اسم
هنادي: اوييلي واش حمااقيتي
كاظم تبدلات نبرة صوتو و قال بحزن
كاظم: ماشي شي حاجة جديدة انا اصلن أحمق
هنادي بقات ساكتة كتفكر فشي إسم دلع اللي غايجي مع سميتو عياات تفكر واالو ما جاها حتى إسم لبالها دازت تقريبا خمسة دقايق و هي غير كتفكر و هو مستمتع كيشوف فيها كيفاش كتفكر من جدر عقلها وهو ماهاموش اصلن الاسم اللي غاتختارعو قدما هامو انها تطلق معاه و يعرف شخصيتها الحقيقية و يتقرب منها باش يقدر يبغيها و ينسا ملاك ...
هنادي: ويليك سميتك شحاال صعيبة ما جاتني حتى فكرة
كاظم: وا غير فكري
هنادي بقات سااكتة حتى طاح عليها واحد الاسم غريب عجييب 💡💡
هنادي :*بفرحة * لقيييتو
كاظم داي ليها على هبالها و قال بفرح
كاظم: و اخيييرا راحة قلبي لقاتلي سمية
هنادي : هه خاصني ندبح حولي و نديرلك سبوع من بدا و جديد حيت لقيت ليك سمية ما دايرااش
كاظم:*كيتكلم و كيمرر يدو على ضهرها بحنان * قولي نسمع
هنادي:*خيبات ملامح وجهها * من صباح و انا نفكر ليك فالسمية و هاكا كتجازيني حرام عليك
كاظم:*بابتسامة* لا زوين غير كنضحك معاك
هنادي: وانا ماشي بحالك واعرة فإختراع الالقاب
كاظم: و الله حتى زوين دابا من نيتك تقلقتي ؟؟
هنادي: همم علاش نتقلق الواحد كيتقلق على الصحيح ماشي على ود هادشي
كاظم: شنو دابا نفهم من هدرتك بلي مزال مقلقة من الصورة اللي شفتي فالتيليفون
هنادي سكتات مدة و فالاخير قالت
هنادي: ديك صورة جرحاتني ما توقعتش غانشوفها باين كنتي كتعز مرتك و كتقدرها بزااف و ماشي بعيد تكون...
التافتت و شافت فعينيه اللي كان باين فيهم حزن كبير و ماشي اقل منها هي نيت اللي عينيها حمارو و تجمعو فيهم الدموع اللي ما قدراتش تنزلهم..
هنادي: و ماشي بعيد تكون مزال ما نسيتيها ماشي بعيد نكون انا غير طريق باش تنساها شحال قريت من قصة هاكا و لكن كنت كنقول الواقع حااجة اخرى و لكن كيبان ليا بحال القصص بحال الواقع عجيب امر هاد الحياة كنت كنقرا القصص و لقيت حتى حياتي قصة
كاظم هز صبعو الكبير و مررو على خدها و قال بهمس
كاظم: سمحيلي
هنادي:*بابتسامة * ما زال ما جاوبتينيش على سؤالي واش انا غير طريق باش تنسا مراتك و لا بصح كنعني ليك شي حاجة فحياتك
كاظم: ما تعدبينيش بحال هاكا أ هنادي صافي شووت ما باغي نسمع والو بغيت نرتاح بغيت سكاات عفاك
سمعوا صوت رجالي ألقا التحية التافتو و شافو فيه
~:سلام عليكم شكون غايتصور ؟؟
كاظم طلق من هنادي ووقفات و قالت
هنادي:انا اخويا اللي غانتصور
وقف كاظم بدورو و قال
كاظم: تصاور الباسبور عفاك.
~:اه واخا تفضلي معايا ا لالا
مشات هنادي مع المصور و بقا هو جالس هز راسو بانلو صور أزواج معلقين فالاستوديو بقا سااهي فيهم و حول نظراتو شاف فهنودة اللي جلسات فوق الكرسي باش تصور دار يدو فجيابو و بقا حاضيها و كيبتاسم عارفها مقلقة منو عارفها بدات كتبغيه عارفها بدات كتغير من مرتو ملاك اللي ماتت عارف قلبها مجروح ولكن هو خاصو يخليها فرحانة خاصو يبغيها خاصها تعرف بلي بلاصتها فقلبو كبيرة و مابقاش دايرها طريق باش ينسا ملاك لاا هو باغي يقرب منها باغي يبغيها ديال بصح و لكن دقة دقة ماغايقدرش يبغيها وهو مازال كيتفكر مرتو ملاك و لكن ما ينكرش كتعجبو كيفاش كتهدر كيعجبو دكائها كيعجبو كيفاش كتخليه يبتاسم حقا من نهار دخلات لحياتو حس بفرحة كبيرة و الابتسامة ما بقاتش كتفارق وجهو و كيحس بقلبو كيضرو فاش كتبكي علاش؟؟ شنو سبب ؟؟ معقول يكون مزال كيشوف فيها بنتو؟؟ و لا ما خفي كان أعظم من يدري ....
سالات جلسة تصوير ديال هنادي و نزلات من فوق الكرسي ..خطا خطوات ثقيلة فاتجااهها و شاف فالولد اللي صورها و قال
كاظم : بغيت ندير جلسات تصوير انا و هنادي دابا ديال الازواج
هنادي حلات عينيها على وسعهم و شافت فيه كل مرة صادمها ببلان جديد
هنادي: كيفااش
~: واخا يعني كتقصد بغيتي تاخد صورة رومانسية نتا و مرتك ياك أسيدي
كاظم: تمااامااا
~:واخا اسيدي تفضلوا معايا كاين استوديو خاص بالازواج
هنادي: كيفاااش صورة روماانسية واش باغي تحمقني
كاظم قرب حتى وقف اونفاص ليها و قرب حدا وجهها و قال بهمس
كاظم: كيموو ديالك احمق مسطي كان خاصك تعرفي هادشي من زماان
هنادي بغات تغوت و هو يحني كيقاد سيور ديال سبرديلتو اللي تحلو دارها بلعاني باش يطبق الفكرة اللي عندو فدماغو ...
دار راسو غايوقف وهو يلوي يدو على رجليها و هزها حطها على كتفو هي تصدماات تشووكات جميع علااامات الصدمة ضهرات على ملاميح وجهها بقات كتفركل بين يدو و هو مامسوقش
هنادي: كاااظم نزلني اش هادشي كتدير
كاظم: توء توء توء نتي خفيفة بزااف كي الريشة والله ما مثقلة عليا اراحة قلبي
التافتت شاف فداك الولد و قال
كاظم: فين كاين الاستوديو
داك الولد مسكين حابس الضحكة غير بزز خطا خطوات لاماام و كاظم من موراه هاز هنادي فوق كتفو و مزير عليها و هي مسكينة تخلطو عليها الاحاسيس ما عرفات لا واش تضحك و تفرح لا واش تبكي حمقهااا معاه و دوخ ليها راسها ...
حل داك الولد اللي مرافقهم الباب و دخلو لواحد الاستوديو ديال التصوير أكبر من هداك ديال برا و فيه فوطوي زوين فالاحمر و الارض فيها الورد و فيه دبدوبات محطوطين فجنب ...
كاظم ابتاسم و حطها لارض و خنزرات فيه و قدات حوايجها و عاد دارت كتستكشف المكان
~: بغيتو صورة رومانسية بزاف ولا غير شوية
هنادي: اشمن رومانسية بزااف راه اخويا غير خطيبي مزال مادرنا فطجين ما يتحرق
الولد: ديرو الوضعية اللي غاترتاحو فيها و انا غانصوركم
كاظم جر هنادي وجا هو من موراها و هي قدامو و لوا يدو الدافية على خصرها حتى تبورشات و قفزات بغات تبعد وهي تحس بانفاس ثقاال حدا ودنيها ديالو وقال كمحاولة منو أنو يهدنها
كاظم: * بابتسامة * شوووت غير صورة شوفي فالكاميرا و قولي تشييز باش يبانو سنينات الحليب اللي عند راحة قلبي
هنادي ضحكات بخجل و شافت فالكاميرا غفلها و بااسها فخدها 💋 و تلتاقطت صورة رومانسية بكل ما تحمله الكلمة من معنى...
هنادي هاد نهار كان مليئ بالصدمات بالنسبة ليها و فهاد اللحظة زاد صدمها واش باغي يحمقها هاد السيد واش باغي يخرج ليها العقل صاافي هدا الله معاه بعدات و التافتت عندو بسرعة لقاتو داير يدو فجيبو كيضحك وهي مسكينة غاتسخف بقوة الحشمة و كتقول منين كطيح عليه هاد الجرأة كاااملة كيديرها قد راسو و يكمل بالابتسامة ... ما تكدبش عجبها الحال و لكن فنفس الوقت علاش يبوسها فخدها وهوما مزال حتى مادارو خطوبة رسمية و مازال ماتزوجو عرفات دماغو غايكون مgور كيفما كنقولو عندو أفكار أجنبية ...
قربات ليه و خنزرات فيه و ضربت رجليها مع الأرض و قالت بصوت خافت تحت سنانها
هنادي: علااش ؟؟ ب..ب..بستيني
كاظم دوز لسانو على شفايفو و قرب ليها أكثر و حنا عندها شوية و قال بهمس
كاظم: هاديك ما كتعتابرش بوسة مزال تشوفي البوسان كيف داير أراحة قلبي
هنادي حلات عينيها على وسعهم انتاضرت منو انو يعتادر هو غير مازاد صدمها
هنادي: أ..أ..أش هاد الهدرة
كاظم: قلت الحقيقة و كنحاول نصحح ليك المفاهيم الخاطئة اللي عندك على البوسان و الا ما عجباتكش هدرتي اوكي غانسحبها حتى تشوفي تطبيق كيف غايكون و ديك ساعة غاتصدمي ديال بصح
هنادي طلعات نفس غير بزز و حاسة بنبضات قلبها كيتسارعو كأنهم كيرقصو على لحن موسيقي حمااسي ...
كاظم بعد عليها و مشا عند المصور كيشوف صورة اللي التاقط ليهم عجباتو و هز راسو شاف فهنادي اللي كانت مسمرة فبلاصتها مصدومة من كلامو عرفاتو غايكون جريئ و لكن ماشي حتى لهاد الدرجة ما بايناش عليه كل مرة كتكتاشف فيه حاجات جداد و كل حاجة كتزيد تعلقها به اكثر و أكثر ...
كاظم: هنودتي
هزات راسها شافت فيه
كاظم: اجي تشوفي صورة واش عجباتك
قربات فاتجااههم و شافت صورتهم اللي كانت جد رومانسية صورة بسيطة و عفوية البوسة اللي دار ليها فخدها ما توقعتهاش غاتعطي لصورة هاد اللمسة الخاصة من ديما الحاجات العفوية كاتجي زوينة من عند الله
كاظم: عجباتك؟؟
هنادي: * كتشوف فالصورة و كتكلم بفرحة ما سخاتش تحيد عينيها عليها * بزااااف
كاظم : اوكي بغيت صورة تكون كبيرة بزااف حيت غانديرها فإطار و نعلقها فداري
المصور: واخا أ سيدي
كاظم: شكرا
خرجوا من الاستوديو و يدو شابكها فيديها الشيئ اللي كيخليها تحس بالإحراج هي ما تكرهش تمشي غير هي و عظامها ما متعوداش على مثل هاد التصرفات او بالاحرى كتحس بإرتكاب الدنب حيت مازال مارابطاهم حتى علاقة شرعية الشيئ اللي كيخليها تحس بتأنيب الضمير....
وصلوا لعند البنت اللي جالسة فالاستقبال وعطاتهم الوصل فيه تاريخ اللي غايجيو فيه لصورة ديالهم و ساعة بالضبط خلصها و دار الوصل فجيبو و خرج مع هنادي حتى وصلو لحدا طوموبيل حل ليها الباب و طلعات و قاد ليها حزام السلامة و قالت بصوت خجول
هنادي: شكرا كنعرف نصايبها
كاظم : ياكما تصرفاتي كيحرجوك ؟؟؟ اولا كيقلقوك ؟؟
هنادي شافت فيه بابتسامة مصطنعة و قالت
هنادي: احم شوية
كاظم دور وجهو جنب و حك لحيتو و التافت شاف فيها و قال بابتسامة مستفزة
كاظم: هادي شخصيتي عجباتك مرحبا ما عجباتكش ..
هنادي كتصنطت ليه باهتمام و كتسناه شنو غايقول خصوصا فاش قال آخر كلمة و بقا ساكت جميع الاحتمالات السيئة طاحت ليها فبالها و حتى هو كيعرف يلعب ليها على الوتر الحساس...
طال سكوتو لعدة ثواني كيحاول يقرا شنو كيدور فبالها فهاد اللحظة عارف غاتكون تخلعات و كتسناه يتكلم لدلك قرر يرحمها و يكمل جملتو ...
قرب ليها اكثر و هي لصقات على الكرسي ديال طوموبيل كتحاول تبعد عليه ...
كاظم: الا ما عجباتكش شخصيتي شكون قالك تخطبيني نهار اللول
قال هاد الجملة و ضحك حتى بانو سنيناتو البويض المستفين بطريقة جميلة كيضحك حدا وجهها ...
هنادي بقات مسمرة كتستوعب كلامو و كتشوفو كيضحك بعد عدة ثواني عاد بدات كتضحك حتى هي بطريقة هيستيرية ...
هو سكت خلاها غير هي كضحك و كتفوج على راسها من داك البكا اللي بكاتو كتضحك من قلبها حتى كيبانو الغمزات اللي عندها فخدوها ابتسامتها شي حاجة خاصة ابتسامتها كيف شي مغناطيس كيحس بيها كتجرو ليها كيف شي مغناطيس اللي كيجدبك و ما كيخليك تشوف فحتى بلاصة شنو هادشي كيوقع ليه علاش ما بغاش يحيد عينيه عليها كيحس براسو غايحماق كيف شي سحر لحاتو عليه خلاتو جامد فبلاصتو و ما بغيش يشوف من غيرها ....
مافيقو من سهوتو غير صوتها
هنادي : ما غانمشيوش غانبقاو هنا راه فيا جوع كااع ما فطرت ديني لدار
كاظم هز صبعانو بجوج وضربها بشوية على جبهتها و قال
كاظم: علاش ما فطرتيش؟؟ باغا تقتلي راسك
هنادي: لا غير ما بغيتش نخليك تسناني
كاظم سد الباب و ضرب الدورة و طلع فبلاصة الشيفور و سد الباب دار حزام سلامة ديمارا و قلع و خيم الصمت لثواني حتى بدات كتحس هنادي بالملل و طاح عليها واحد السؤال
هنادي: شنو كنيتكم ؟؟؟
كاظم :*باستغراب *و علاش باغا تعرفي؟؟
هنادي: ما عرفتش هادشي ما طاح على بالي
كاظم:*بابتسامة * سااهر
هنادي:كاظم سااهر كنية زوينة
عاد طلعات معاها راه كيطنز عليها دورات وجهها لقاتو حابس ضحكة
هنادي حنات راسها كتلعب فصبيعاتها ما عرفاتش باش تجاوبو ..
كاظم: كاظم أمير هادي هي سميتي كااملة
هنادي: واايلي كنيتكم وااعرة
كاظم:*بابتسامة * حتى نتي قريب تولي سميتك مدام أمير
هنادي حسات برعشة زوينة سرات فداتها بصح حتى هي قريب ترجع سميتها هنادي أميير قريب تولي زوجة ديال الشخص اللي عرفات الحب معاه إحساس الفرحة و السعادة غمر قلبها ....
كاظم: ونتي ؟؟ شنو كنيتك
هنادي شداتها الكحة كنيتها من بين أكثر الاشياء اللي كتكرهها فالحياة و معقداها و مع عندها وااحد الكنية غريبة عجيبة ندمات كااع علاش سولاتو ...دورات وجهها لزاجة و دارت راسها ماسمعاتوش
كاظم: هنادي
هنادي ضربات الطم بقات غير ساكتة و كتلعب بصبعانها
كاظم: *باستغراب* واش صمااكيتي ولا مالك؟؟
هنادي : احم لا كانسمعك أ الله يا ودي
كاظم: اوا جاوبي مالك سكتي ولا كيعجبك تنخليني عندك هواية
هنادي: احم لاااا حاشاا علاش غانخلك ما تقولش ديك الهدرة
كاظم: وهي الا جاوبتي ،ولا ياكما ما كتعجبكش ؟؟؟؟
هنادي شافت أمامها و قالت بكل ثقة
هنادي: واش كاين شي حد ما غايفتاخرش بأصلو و بكنيتو كيفما كانت غير كنت ساهية داكشي علاش غير ما سمعتكش
كاظم: دابا سمعتيني ياكي
هنادي: وي
كاظم: دونك جاوبي
هنادي صرطات ريقها و غمضات عينيها و قالت
هنادي: كنيتي الفراقشي
حلات عينيها و التافتت شافت فيه لقات ملاميحو عاديين يصحابلها غايضحك عليها ساعة لقات العكس تماما حيت متعودة اللي قالتلو كنيتها كينوض يضحك و يطلع عليها طوبية ...
كاظم: مزيان
هنادي: و فين غانمشيو دابا
كاظم: فين ما بغيتي غير كوني فرحانة
هنادي:*بخجل* شكرا
كاظم: يصحابلك هادشي اللي كندير تصنع اولا غير حيت زعما هادي فترة الخطوبة كنبغي نبين ليك بلي انا مزيان
هنادي:*باستغراب* لا انا ما قلتش هادشي و كاع ما طاحو ليا فبالي هاد الافكار منين جبتي هاد الهدرة
كاظم: *تنهد * حيت ما كنبغيكش تشكريني بحال هادشي اللي كندير و لا اللي كنقول كنديروا من قلبي باش بصح نخليك فرحانة و انا هاكا داير هادي شخصيتي المرأة كنشوفها حاجة غااالية و غااالية على قلبي فاش كنت صغير تأثرت بشكل كبيير بالواليدة و حنانتها فيا و شحال صبرات معانا خلاتني نحس بقيمة أي إمراة فما بالك الا كانت هاد المراة عندها مكانة خاصة فقلبي
هنادي عضات على شنايفها و شافت فيه بفرحة زادت تاكدت بلي كاظم شخص حنون و ضريف بزاااف غايسطيها غايطير ليها العقل و كيأكد ليها فكل مرة بلي عندها مكانة فقلبو بحال كيحاول يبين ليها بلي بصح راه مراتو الاولى ناسيها بطريقة غير مباشرة كأنه كيجاوب على الاسئلة اللي عندها فبالها ...
وقف الطوموبيل حدا واحد القهى كلها زاج باينة واعرة حيد حزام السلامة و نزل ضرب دورة و حل ليها الباب كيفما العادة ..
كاظم:*حط صبعو على شفايفها * اعتابريه اعتدار على شنو وقع بيناتنا هاد الصباح أراحة قلبي
حيد صبعو من شفايفها و قالت
هنادي: إعتدارك مقبول الا كنتي غاتخلص و غاتعمر ليا كريشتي و غاتخليني نطلب اللي بغيت
كاظم :* بابتسامة * طلبي اللي بغيتي انا هنا باش نخلص
هنادي: وا عنداك غير تهرب و تخليني نغسل الماعن
كاظم دار يدو على خاصرو و قهقه بصوت رجولي عالي خشن و قال
كاظم: أفكارك كايعجبوني ما عمري شفت بحالهم كيضحكوني
هنادي: و باش ما تقولش غير مراتك الاولى اللي كانت من ديما كضحك و عندها حس فكاهي كلنا كنعرفو نضحكو
قالت هاد الجملة و نزلات و خلاتو هو مسمر فبلاصتو و مشوكي من كلامها ما توقعش منها هاد الكلام .. علاش كدكرو فمرتو الاولى ما عارفاش شحال كيحاول و يتقاتل باش تمشي صورتها و كلامها من بالو هي خاصها تنسيه فيها ما خاصهاش تزيد على أوجاعو عرفها كتغير و عرف بلي ما خاصوش يدكر مرة اخرى سمية ملاك قدامها و لكن حتى هي خاصها ترحمو و ما تبقاش دكرها لأنه ما كيقدرش يستحمل عندو كلشي قابل لنقاش الا ملاك وخايف شي نهار يجرحها داكشي علاش كيحاول يتكاالما و يبرد ماااا امكن...
زدح الباب ديال طوموبيل و دار شاف فيها و ملامح وجهو تبدلو لتخنيرة فالبلاصة الشيئ اللي لاحظاتو هناادي ...
كاظم زاد لقدام و ما هدر ما تكلم معاها ما عجبهاش الحال و لكن حتى هو معدور كلامها على ملاك كيضرو فقلبو و كيتعصب فاش كتدكر بسوء قدامو ...
دخلو لمقهى اللي كان مقهى كبير بزااف و فيها طبيلات و دايرين عليهم ليفوطاي فالاحمر بشكل مزيون بزااف بقات غير حالة فمها ديكورها مجهد و بالخصوص هي اللي ما عمرها شافت القهاوي اول مرة كتحط رجليها فشي مقهى بهاد الشكل بقات غير حالة فيها فمها حتى سمعات صوت كاظم اللي فيقها من تأملاتها ...
كاظم: تفضلي جلسي
هنادي جلسات من فوق الفوتوي و الصدمة كانت قوية منين شافتو جبد باكية د الكارو من جيبو طرطقات عينيها على وسعهم و ضربات على فخدها و قالت
هنادي: كاتكمي؟؟؟
كاظم حط يدو بجوح على الطبلة و غمض عينو و بدا كيدور بصبيعاتو على الاماكن اللي فوق الادنين ديالو كأنه كيدير مساج لراسو باش يتكالما حيت معصب لأقصى درجة كلامها اللي قالت على ملاك ما تقبلوش نهائيا ...
هنادي صرطات ريقها و سكاتو خلعها بقات غير كترمش فيه و بدا كيتندام معاها الحال على الكلام اللي قالت على مرتو ندمات حيت دكراتها ليه و هي عارفة بلي كايبغيها بزااف و هادشي باين غير من الصورة الي كان داير فشاشة الهاتف ندمات أشد ندم و لكن حتى هي معدورة نار الغيرة و الكلام اللي قالها على ملاك بقا كيحفر فقلبها ...
هنادي بغات تهدر و هي تسمع صوت رجالي
~: سلاااام شنو تبغيو تشربو
هزات عويناتها و شافت فيه و ما عرفات ماتقول حتى سمعات صوت كاظم اللي كيتكلم وهو مزال على نفس وضعيتو
كاظم: بغيت كافي نوار الا كان ممكن
حل عينو و تقاد فالجلسة و جات عينو فعينها و قال بصوت خشن مبدل على صوتو الحنون اللي موالفة كتسمع
كاظم: شوف الآنسة شنو بغات
صرطات ديك الآنسة اللي قال و شافت فنادل المقهى و قالت
هنادي: الا كان ممكن شي عصير بااارد ديال الليمون و شي ميلفاي معاه الا جات على خاطرك
النادل: كاين بزاف د الانواع د ميلفاي اينا نوع بغيتي
بقات كتفكر و كتشوف فكاظم اللي مدور وجهو لزاجة ما كيشوفش فيها و كإنتقام منو طلبات
هنادي: عطيني أغلى وحدة الا كان ممكن
نادل: واخا أ لالا ما يكون غير خاطرك
انصارف نادل المقهى و بقات هنادي كتشوف فكاظيم و كتحول نظراتها كتشوف فداك الباكية د الغارو اللي محطوطة فوق الطبلة و نطقات
هنادي: كاتكمي أ كاظم
كاظم دار شاف فيها واحد الشوفة خطييرة زعزعاتها من لداخل شوفة قااصحة و ابتاسم باستهزاء و قال
كاظم: أما احسن نكمي ولا نقول كلام نجرحك بيه ؟
هنادي: علاش غاتجرحني شنو درتلك
كاظم بقا ساكت مدة وحط يدو على قلبو و تنهد و قال
كاظم: كن حطيتي يديك على قلبي تحرقي بقوة العافية اللي شاعلة فيه نقدر نبان ليك كنضحك و لكن من لداخل الله اللي عالم بحالتي و بكلامك كتجرحيني يمكن ما كتقصديش و لكن انا كيآديني بلا قياس
هنادي: سمحلي عرفت راسي غلطت منين دكرت مرتك الاولى اوووف و لكن حتى نتا جرحتيني بكلامك البارح
كاظم بانتلو يديها محطوطة على الطبلة قرب أكثر و حشا صبعانو ما بين صبعانها و قال
كاظم: من اليوم ملاك ما نبغيهاش تجبد حتى انا ما غانعاودش ندكرها قدامك كنعتادر حتى انا غالط و جرحتك بدون قصد و هادشي اللي كيعحبني فيك صراحتك و ما بغيت يكون بيناتنا حتى جدال بخصوص موضوع ملاك من هنا للفوق عفاك
هنادي: كنواعدك أكييمو هههه
كاظم تلاشى الغضب ديالو و ضهرات ابتسامة خفيفة على ملامح وجهو و جر ليها خدها بيديه و قال
كاظم: الله يرضي عليك أ راحة قلبي
جاب نادل الطلب ديالهم و حطوا فوق الطبلة و انصارف و كاظم رد الكارو لجيبو دار بناقص رشف من فنجان القهوة و لكن هنادي حاضياه و لاحظت بلي ما دارش سكر فكاسو
هنادي: اااع كتشرب القهوة مسوسة
كاظم: J'ai le diabète * انا مريض بسكر *
هنادي : كيفاش ؟؟؟ ما تقولهاش
كاظم: هادشي اللي عطا الله الحمد لله
هنادي ضرها خاطرها و شافت فيه و قالت
هنادي: و كي وقع ليك
كاظم : من عند الله حتى واحد ما هاني فحياتو ما يمكنش يتجمعوا الفلوس و الراحة البال و صحة هادي هي الحياة الكمال لله و الحمد لله على كل حال
هنادي :*بأسف * و لكن نتا مزال صغير
كاظم: * بابتسامة * شحال تعطيني فعمري ؟؟؟
هنادي: ثمنية و عشرين عام
كاظم رشف من القهوة و حرك راسو بنفي و قال
كاظم: خمسة و ثلاثين عام
هنادي: وااايلي بيناتنا خمسطاش العام كن ولدتي بنت كن راها قدي شويرف مع راسك هههه
شربات كاسها د العصير و دورات وجهها كاتكل ميلفاي مع راسها غافلة على الجرح اللي تسبباتلو فيه للمرة الثانية بجملة {كن ولدتي بنت كن راها قدي } صرط ريقو و بقا ساهي فالفراغ و جملتها كتكرر فودنو فكراتو فنهار المشؤوم نهار الحادثة كمدها فقلبو و سكت و دماغو مرفوع حتى سمع تيليفون كيصوني جبدو و شاف شكون المتصل كان ابيل فيديو من شخص عزيز عليه بزااف ....
لمحاتو هنادي بطرف عينيها كيضحك دارت عندو و كمشات ملامح وجهها بغات تعرف شنو سبب اللي ضحكو مع التيليفون ...شربات جغمة من العصير و حطات الكاس و عينيها معاه ...
أخيرا دوز لابيل و تسمع صوت رجالي خشن من الهاتف
~: اتبااااارك الله على ولد خاالتي زيانتي بياضيتي صحيحيتي وافقك الجو د المغرب
كاظم دور وجهو جنب و ضحك و رجع شاف فيه و قال بابتسامة
كاظم: شوية
~:لااااا اصاحبي تا اشمن شوية راك وليتي زاز لوز اجي بعدا واش راك جالس فشي كافي ولا كدبت
كاظم حرك ليه راسو بابتسامة و قال
كاظم: وي جالس فكافي
~: لا تباااارك الله عليك نتا سير تطفح ليا فالمغرب و خلي المنحوس د معتز غاااارق فالخدمة حتى لراس واش ما عوالش تجي
كاظم : فين غانجي اصاحبي مزال عندي شلا ما نقضي
معتز: ياك قلتي غاتمشي غير semaine تشوف فيها خالتي زبيدة و ترجع هاااادي و توبة آخر مرة نشد ليك الشركة ديالك وا حمقااتني اخويا خدمتك صعيبة بزااف
كاظم: ماشي حتى لهاد درجة
معتز :* حط يدو على صدرو و قال * و لكن تيتيييييز و الزين اللي عندك فالشركة اخويا ما عندك غير نتا بعدا ديك السكريتيرة الغاورية اللي مخدمها معاك قبيلة جات بقويميجة فالبيض حالة ليها صدايف من الفوق و مع هي بيضة كي الحليب و عندها فائض فالإنتاج اشمنك يا ...
كاظم شاف فهنادي مسكينة ولا وجهها احمر كي مطيشة حنحن و قطع كلام معتز ما خلاهش يكمل
كاظم: معتز باركة شوووت
معتز: ماالك جالس كتسكت فيا واه خليني نعبر راه قلبي عااااامر غايطرطق و باااغي ن ..
كاظم : معتز راه ما جالسش بوحدي سد حلقك و جمع عينيك شوية حاطك تماك تخدم ماشي باش تزها
معتز : * رقق صوتو كيهدر بحال الأنثى * شكووووون هادي يا الخاااائن نسيتي شحاال دوزنا انا و ياك باش فلخر تجي تقولي هاد الهدرة يااك انا اللي كنتي مواعدني بزواج و خليتيني حااااملة بسبع شهووور ما نسمحلكش نتا وياها وريهاااليا نتف والديها داابااااا
كاظم دوز يدو على دقنو كيمووت بضحك و هنادي خلاص دارت كرااااخ بضحك كتفركل بقوة الضحك من كلامو ...
معتز مازال مكمل فهبالو
معتز : وريهااا ليا دااابا وريهااليا فينا هي و ماااتضحكش ماااتضحكش ياااك أكااظم نتا ماشي ديال هادشي سمعت صوتها كتفرنس وريليا ديك البقرة ضااحكة و ريهاليا
كاظم : معتز باركة من تبوهيل ديالك بديتي عاوتاني ما غاتسكتش
معتز : اصااحبي خلينا نشطوا شوية راه هاد الخدمة فقصااتني كيفاش قضية هاد هنادي
كاظم: عادي بغيت نتزوج
معتز : اوا اسيدي الله يجعل كلشي مبارك و مسعود و شنو دابا انا ما غانحضرش لعرس
كاظم: ماكاينش
معتز: وااايلي على العرس ما كاينش ما تقولهااش حتى بضحك اولد خالتي لاااا لاااا نقدر نعوااج ليك نقدر نمشي فيها كاااع عرفتي شنو هي تحرمنا من العرس بحال شي ولد صغير غاتحيد ليه البزولة
كاظم : معتز منين كاتجيب هاد التشبيهات الفارغة اللي لا اساس لها من صحة
معتز : اودي الله يعطينا معاكم غير شي خمسين عام ديال الحبس دابا هاد الشركات و الفلوس و ديور و حيد بالاك و فالتالي ما غاديرش لينا العرس لااش مزوج لاش
كاظم: الا درت العرس غانضطر نبقا شي شهر هنا
معتز :لااااا لاااااا اخويا شكون هاد الحمااار اللي قالك دير العرس بغيتلو القطيعة من جدر العرس فيه غير تضياع الفلوس أشوف غير ضرب الحديد ما حدو سخون و ضرب الكحل فالبيض ولا ما نعرف اش كايقولو ليها و جر مرتك و اجي قابل شركتك اخويا
كاظم:* بابتسامة * دغيا هزيتي راية البيضة
معتز : انا راه غانهز جناااوى الا ما جيتيش خلاص
كاظم: مابقاش بزاف صبر معانا شوية
معتز : تا اش غانصبر اش غانصبر و انا اخويا غير نااائب ديالك ماشي مول الشركة و الكليان كيبغيوك نتا قالك توحشوووك اما شي بنات غير كيجيو ما كيلقاوكش كيقلبو دورة اخااي حتى زينك معاااونك فالخدمة راك مطيح نص د بنات فرنسا اوووبس نسيت حدااك مرتك دوزها لينا نشوفوها ولا حااجبة بحال ناس زمان شفتك مخبعها ياكما خايف نقوس ليك عليها
هز راسو شاف فيها لقاها كتاكل فميلفاي كتبرد الفقايص اللي ركبوها من كلام معتز على البنات اللي مزعوطات فكاظم قال بابتسامة و عينو عليها
كاظم: خايف تخرج عليها
معتز : تا كيفاش نخرج عليها ياكما عاودو ليك عليا ساري كول ولا صوفيا طالوني ولا مايا خليفة انا غير معتز ولد خالتك
هنادي هزات راسها شافت فيه لقاتو كيبتاسم ليها ناضت من الفوطوي اللي كان اونفاص ليه ... كحز لجنب و جلسات حداه و دور يدو من مور عنقها ولوا أصابعو على دراعها و حط التيليفون من فوق الطبلة و ثبتو ب support اللي كايكون من اللور و هي تشوف ولد خالتو معتز اللي بقات غير حالة فيه فمها جمالو فشي شكل مبرونزي ماشي ابيض و ماشي اسمر جاي مابين و بين دقنو مزين بلحية فالمارون وودنيتو داير فيهم طوينكات جمالو غريب و لكن وسيم لابس غير تيشورت ابيض مبين عضلاتو و اللي لفت انتابهها يدو عااااامرة وشامات تصدمات بقات غير مبلقة فيه عينيها مافيقها من صدمتها غير صوتو من خلف شاشة الهاتف
معتز : هااااي هاااااي عليها طحتي قولي الزين أسمراااني و اآآآآه من الزين الأسمرااني أفين ابنت عمي صاافااا لابس عليك أ مرحباااا بيك فعائلة المفروحيين شخصيا
هنادي ابتاسمت ليه و قالت
هنادي: حمد الله أخويا يرحب بيك الخير
معتز : اتهلاااي لينا فكاظيم راه غير واااحد اللي عندنا
هنادي هبطات راسها و ضحكات ما جاوباتوش
معتز : ويينو على مراة خوياا و الحشمة شفتي اختي راه داك السيد اللي حداك نااس كيطيحوهوم عضاامهم باش يكونو معاه و ما وصلوه و بقااااي حالة فمك حتى يديوه ليك وا زيري سمطة و خرجي عينيك سمعي من خوك معتز راه باغي مصلاحتك
هنادي صدماتها هدرتو هزات راسها كتشوف فيه باستغراب
هنادي: انشاء الله يكون خير
معتز : وييينو شحال ضريفة و شحاال كيوت عجبتيني اجي كايعجبك تلعبي و تفرجي فالرسوم و تاكلي الإندومي
معتز : ههه اشوفي اختي هنادي ما قاد على صداع اعتابريني غير خوك و الا قلقك شي نهار اجي عندي مرحبااا بيك دارنا مفتوحة ليك اربعة و عشرين ساعة على اربعة و عشرين غير هو ما ضسريش بقاي تجي غير مرة فصيمانة ما عندناش مع الضياف اختي نقولها ليك من هنا
كاظم: دابا نتا كتعرض عليها و لا كتجري عليها ؟؟؟
معتز : انا غير ناشط عليها اشوف اختي هنادي راك دابا وليتي من العائلة و انا ما عنديش ختي عتابريني خوك اوكي و عندي ماما ضريفة حتى هي باغا بنيتة و ربي ما عطاهاش ليها غايعجبها الحال الا جيتي عندنا و عفاك نبقاو نلعبو انا و ياك
هنادي كتقول مع راسها واش كاظم ثايق فهاد معتز و عاطيه الشركة يقابلها ليه حيت جاها مفروح بلا قيااس وعاد زيد عليها الوشامات و الطوينكات اللي داير جاها شكلو غريب و لكن واخا هاكاك ضريف و هبيل و ضارب دنيا بركلة
كاظم: المهم هانتا تعرفتي عليها
معتز : تا هدا كيقولو ليه ناس تعارف مزال تجي لفرنسا و نتعارفو مزيان يالاه تلاح لاهيتيني على الخدمة اه اه شحال فيكم د الهدرة قطع قطع نتقاشعو أ العشير و رجع لخدمتك دغيا راني علاين نلوح حوايجي و نقولهم بق بق بق نحن نغرق رق رق اه و سلم على خالتو عسيلة بغيت نقول زبيدة و بوسها ليا بزااف بااااي بااي هنوودتو تهلاي فراسك و تهلاي فيه راه الشخص الوحيد اللي بعقلو فعائلتنا هو كاظم أما تا باقي ما تهزيهش بلقاااط
قال هاد الكلمات و قطع ... هنادي التافتت شافت فكاظم اللي كان كينتاضر تقول شي حاجة حيت سكاتها طول ...
هنادي: منين جبتو هاد الكائن ههه
كاظم حط التيليفون من فوق الطبلة التافت و شاف فيها و مزال يدو من مور عنقها ...
كاظم : ولد خالتي معتز معروف بشخصيتو المبدلة أفكارو ستيلو كلامو كولو فشي شكل حنا مولفين عليه ولكن ضرافات و رجولة صراحة حتى هو قاري معايا انا وياه قد قد عندي عزيز بزاف فاش كنجي لمغرب كنخلي ليه الشركة يقابلها
هنادي: مزياان ماعندوش خوتو
كاظم: كن كانو عندو خوتو كن خالتي خرج ليها العقل غير معتز باراكة فيه الاولاد كلهم كانت خالتي باغا البنات و لكن ربي رزقها غير بمعتز
هنادي: مسكينة ماشي مشكل فيها خير علاه نتا شحال عندك دخوالك
كاظم : عندي خالتي وحدة فخيتة و عندي خوالي واحد فكندا واحد فالمغرب عندو فيرمة وواحد فتركيا
هنادي: وعمامك ؟؟
كاظم: عمامي عندي واحد دكتور جامعي فالمغرب
هنادي تصدمات و عاد ربطات الاحداث فراسها و شافت فيه
أنا لست إبنتك أنا زوجتك الجزء الثالث
محتوى القصة
التنقل بين الأجزاء