كانت لابسة بيجامة قصيرة حد ركبة و غير سميطات مع كلاكيطة و صابغة ضفيراتها بالاسود و يديداتها بنفس اللون و مخرجة زبل و طالقة شعرها الاسود حطاتو فالطارو الكبير المخصص لللأزبال و التافتت و نفضات يديها من داك ميكة اللي كانت هازة هزات عويناتها و تلاقات مع عيون لقمان اللي كان ساهي فيها طلعاتو و هبطاتو بعويناتها عرفاتو شكون بسمية و الكنية و عرفات عائلتو كاملة ما هي من ديما حاضية تصاور عائلتهم فالانستغرام الشيئ اللي خلاها تعرفهم بصغيرهم بكبيرهم ضهر شبح ابتسامة على ملامح وجهها الشيئ اللي خلا قلب لقمان يرتافعو نبضاتو ...
جاها زوين مباشرة أحسن من تصاور طويل و صحيح و باينة فيه شخصية و من عائلة كاتعرفها مزياان بانلها حال فيها فمو الشيئ اللي خلاها ثيق فراسها و تزعم على الخطة اللي طاحت ليها فراسها و اللهم عضة من الفكرون و لا يمشي هارب الا مشا كاظم يعوض بلاصتو لقمان هادشي اللي قال ليها راسها فهاد اللحظة ...
خطات خطوات بإتجاهو الشيئ اللي خلا لقمان يتصدم و يتشوكا كأنه ما مصدقش بلي راه قاصداه و جاية لعندو ..وصلات لحداه و قالت بصوت أنثوي رقيق
إلهام: سلام
لقمان استغرب بعض الشيئ و ريحة عطرها تغلغلات فنيفو مزياان عجباتو بزاااف ما كرهاش تبقا غير واقفة حداه ما شبعش من ريحتها حنحن و قال
لقمان : سلام
إلهام: نتوما اللي وقع ليكم المشكل مع داك شمكار ياك
لقمان: اه حنا
إلهام: الحمد الله على سلامتكم كي بقات هنادي أكيد غاتكون تخلعات
إلهام: المهم أخويا نخليك دابا و الحمد لله اللي شدوه فالحبس تصبح على خير
عطاتو بضهر باش تمشي بحالها و هي تسمع صوتو كايناديها غمضات عينيها و عاودت فتحاتهم بإنتصار كأنها هادشي اللي كانت باغية من اللول ...التافتت عندو و قالت ببراءة
إلهام : نعام أخويا بغيتي شي حاجة
لقمان بقا ساكت مدة و مرر يدو على لحيتو و قال
لقمان : غاتكوني غدا حتى نتي ياك
إلهام:* ببلاهة * فين غانكون ؟؟؟
لقمان : احم فالحنة ديال صاحبتك هنادي
إلهام تنهدات و حنات راسها و قالت بحزن
إلهام : أنا وياها مؤخرا دابزنا و محال واش يعرضو علينا
لقمان : زعما نتوما بنيتات كبار ماشي ديال هادشي
إلهام : الغلط كايوقع و ما نكرهش صراحة نتصالح معاها
لقمان : صراحة نتوما ماشي ديال دباز بجوج بيكم بنيتات زوينات و مؤدبات ما جاياش معاكم
إلهام بحزن
إلهام : محال واش تسامح ليا حيت أديتها بكلامي و جرحتها بلا قياس و لكن كنت معصبة و انا اصلن مريضة و غير لحظة غضب الله يسمح ليا منها ما عنديش الوجه اللي يشوف فيها
لقمان : كاتعتارفي بلي الغلط منك
إلهام : الاعتراف بالخطأ فضيلة أسي ...
لقمان تنهد و قال بلا مايشعر
لقمان: سميتي لقمان و نتي أ آنسة
إلهام بصوت دلووع
إلهام: سميتي إلهام و فاش كيدلعوني زعما كيعطوليا إيلي
قالت هاد الكلمات و هزات خصلات من شعرها كتلويهم ما بين صبعانها الشيئ اللي ثار لقمان بشكل كبير و عض على شنايفو كيحس بقلبو كيتلوا مع دوك خصلات شعرها شكلها مثير لأقصى درجة و زينها خطيير و حتى عقلها خطاااار فالتحرميات ...
لقمان : إلهام سميتك زوينة بزاف مشاء الله اسم على مسمى
إلهام: شكرا أسيدي لقمان
لقمان حط يدو على قلبو و صاط أنفاس سخونة من نيفو و قال
لقمان : سيدي و سيدك رسول الله
إلهام حنات راسها بخجل و قالت بصوت أنثوي نااعم
إلهام : تصبح على خير أسيدي لقمان
عطاتو بضهر و هي تسمع صوتو كيناديها
لقمان : إلهام
وقفات و عضات على شنايفها و دارت لعندو و قالت بابتسامة
إلهام: نعام أسيدي لقمان بغيتي شي حاجة
لقمان قال بلا ماشعر
لقمان : بغيتك نتي
إلهام : ك.كيفاش ..؟؟
لقمان عاد إستوعب شنو قال و رجع صحح كلامو
لقمان : بغيتك نتي زعما دخلي معايا و نصالحك مع هنادي
إلهام : حشماانة منها أخويا ما نقدرش
لقمان : انا معاك أ إلهام و هنادي قلبها بيض غاتسامحك غير ثيقي فيا
إلهام بقات كتشوف فيه شوية ناضت كدمع و كتحاول تعصر عينيها باش ينزلو دموعها الشيئ اللي خلا لقمان يتصدم و قرب ليها و حط يدو على كتفها و قال ...
لقمان : إلهام علاش كاتبكي ؟؟؟
إلهام : كنبكي حيت كنت غانفقد صديقة بحالها انا حقا ما نسوااش و تنادم معايا الحال اهئ اهئ
لقمان حاوطها بيدو و حطات راسها على كتفو و كتحاول ما امكن تلصق فيه حيت حسات بلي تزعط فزينها الشيئ اللي خلاها تفشش و تنفخ ريشها عليه هزات عويناتها اللي كان لونهم مارون كبااار و مشفرين مزيونين خلاو لقمان يدوخ من جماالهم سلباتلو العقل بزينها ...
إلهام : اه هنودة قلبها بيض غاتسامح ليا اصلن ما نقدرش نتفارق عليها
لقمان : برافو عليك هاكا نبغيك
ابتاسم لقمان بطريقة زوينة أضفات على ملاميح وجهو وسامة خطيرة خلات إلهام تسهى فيها معقول يكون حب جديد كايتكون فقلبها إتجاهو أو هي مجرد خطة من خططها القدرة ؟؟؟ ....
واقف كاظم حدا الباب ديال الحمام و هاز حاجب و منزل لاخور و قال
كاظم: كيفاش قضيتك نتي زعما ؟؟؟
هنادي: مالي شنو درت
كاظم: باغا تلاقاي بمعتز face-à-face ما فهمتش واش عجبك ولا كيفاش ؟؟؟
هنادي: سي نورمال شخص تافه بحالو غايعجبني انا اصلن كنتفاهم مع الاشخاص التافهين من عند الله
كاظم حك لحيتو و قال بصوت رجولي قااصح
كاظم: مزيان برافو على هاد الحساب فحالة ما جا غاتبقاي لاصقة فيه
هنادي كتهضر بعفوية على نيتها غير دارية بالعصبية اللي متملكة كاظم فهاد اللحظة ...
هنادي: ممكن نهدر معاه عادي حيت كايبقا من عائلتكم علاش؟؟؟
كاظم مرر يدو على لحيتو و ما عارفش علاش تعصب ممكن يكون بدا يغير عليها ؟؟؟ و الغيرة هي من علامات الحب الحقيقي الصادق معقول تكون هنادي تربعات على عرش قلبو و ملكاتو ؟؟؟ ...
كاظم: ما تهدريش معاه معتز ماشي ديال الهدرة
هنادي قطبات حجبانها و قالت باستغراب
هنادي:واش كتهدر من نيتك راه ولد خالتك هداك
كاظم: سالينا الهدرة
هنادي بقات ساكتة مدة عاد دارت ليها طن فراسها بلي سيد غااير من ولد خالتو ابتاسمات بلا ما تعيق و قالت
هنادي: بحال كتغير من معتز لاا
كاظم : من حقي او لا
هنادي حابسة ضحكة و قالت
هنادي: ولكن و الله حتى ناس بحالو ضريفيين و كيووت و من ديما باغا نتلاقا بشخص بحالو
كاظم : اهاااه ناس بحالو ضرييفيين و كيوت مزيااان مزياان
كاظم دور وجهو و شعل ضو و قال
كاظم: شكرا حيت وريتيني الحمام
دخل و سد فوجهها الباب بقات غير مصدومة ما عرفات باش تبلات و فنفس الوقت عجبها الحال اللي غار عليها حيت الغيرة هي أكثر برهان كيبين بلي شخص بصح كتعني ليه و زواج بلا غيرة كيف الخبز بلا خميرة خلاوها ماليها 😹😹 بلا غيرة ما كتكونش واحد الحلاوة فالعلاقة بين الراجل و المراة الغيرة بحال ديك رشة د الملحة اللي كتبنن طعام و لكن فحدود ماشي الغيرة المرضية ....
♤♤♤♤♤
الغيرة في الحب تجعلنا كالأطفال لا يرضينا سوى الامتلاك
♤♤♤♤♤
حركات هنادي راسها يمين شمال و حاسة بفرحة عااارمة فقلبها لما لا وهي ستحظى بعاشق يحبها و متيم بها و يموت في هواها علاش ما تفرحش و هي غاتولي قريبا مدام أمير زوجة كاظم أمير السيد اللي حقا كتعتابرو أمير قلبها و ملك روحها و تاج فوق راسها عضات على شنيفاتها فاش تفكرات كلامو الحلو و لحظة إعترافو ليها فالبيت صغير فاش قالها {je t'aime } كلمة بسيطة و لكن أثرها عمييق و عميق بزااف سواء على قلبها و على روحها و على عقلها ...
خطات خطوات لامام باش تلتاحق لكوزينة عند ختها اللي كتغسل فالماعن وهي تسمع دقات فالباب دارت و حلات الباب و الابتسامة على وجهها اللي تلاشاات فالبلاصة سرعان ما لمحات إلهام واقفة حدا لقمان و كتبكي بقات كترمش فيهم بجوج ما فهمتش شنو واقع و اول سؤال طاح على بالها إلهام شنو كدير مع لقمان ؟؟ وشنو علاقتها به ؟؟؟ أسئلة كثيرة طاحو فبالها بمجرد ما لمحتها و لكن مع الاسف ما لقات ليهم جوااب ما فيقها من سهوتها غير صوت لقمان اللي قال بابتسامة ..
لقمان : هنادي ختي غانطلبك طلب و ما ترديهش ليا فوجهي
فنفس الاثناء خرج كاظم من الحمام اللي كان حدا الباب شاف خوه واقف استغرب خصوصا منين شاف حداه إلهام اللي فايت شايفها و عارفها صديقة هنادي ...
كاظم: لقمان مازال ما مشيتي
لقمان : سبحان الله كنت غانمشي و لكن غانبقا حتى ندير واحد الخير
هنادي مزالها مصدومة و عينيها مشاو ديريكت لإلهام فالبلاصة تفكرات الكلام اللي سمماتها بيه و الكلام الجارح اللي قالتلها يااخسارة عشرة سنين و عشرة طفولة تضرب فالزيرو و فجأة يوليو غرباء ...
لقمان التافت و شاف فإلهام اللي كانت حانية راسها و دموع نازلة من خدها ...
لقمان : هادي إلهام صديقة هنادي تلاقيتها صدفة و قالت بلي مخاصمة مع هنادي و ندمانة و بغات ترجع لصاحبتها ...
كاظم : و نتا شنو دورك فالقصة ؟؟؟
لقمان حنحن و مرر يدو على لحيتو و قال
لقمان : انا فاعل خير أخويا ما بغيتش جوج صحابات زوينات بحالهم يتخاصمو
كاظم حول نظراتو لالهام طلعها و هبطها بعويناتو عرفها عجباتو ما هو عارف لقمان عينو زااايغة شوية و فينما كانت شي بنت جميلة و بمواصفات معينة كيحل فيها فمو ابتاسم بخفة و دار شاف فهنادي اللي باينة فيها مصدومة و مكرهة فنفس الوقت مرر يدو على ضهر هنادي بحنان و قال بصوت حنون
كاظم: راحة قلبي نتي بخير ؟؟؟
هنادي التافتت شافت فكاظم و صرطات ريقها بصعوبة و دموع تجمعو فحافة عويناتها و قالت بصوت مكسور
هنادي:ما بغيتش نشوف وجهها و ما بغيتش نهدر معاها عفاك قولها تمشي بحالها ما كاين لاش نعقد الامور ما باغاش نرجع لصاحبة تقدر تغدرني و تطعني فضهري من الغباء ندخل لفعة لقلب داري و انا عارفاها مسمومة
إلهام بمجرد ما سمعات كلماتها بدات تدمع و هزات راسها شافت فهنادي و قالت بسرعة
إلهام: عفاك أهنادي ختي و الله حتى ندمت ما عرفتش كيفاش قلت داك الكلام الله يرحملك الواليدين عفاااك اختي سمحي ليا والله ما قصدات نجرحك
هنادي التافتت و شافت فإلهام و قالت بصوت مجروح و نزلات دمعة من عينيها كتجري
هنادي: شكون قالك انا ما مسامحاكش انا مسامحاك واليديا ما رباونيش على الحقد و الحسد و الغيرة الحمد الله قلبي ابيض و ما كنحقد على حتى واحد غانخليك منك اللي خلقك هو يتكلف بيك المهم العشرة بيناتنا هدا هو حدها شفتك فطريق غانقولك سلام و لكن باش نرجعو كيف كنا سمحيلي ما نقدرش الكاس فاش كيتهرس ما عمرو يرجع كيف كان ..
هنادي قالت هاد الكلمات و حنات راسها كتبكي و تشهق الشيئ اللي خلا قلب كاظم يتزعزع من مكانو ما عندو ما اعدى يشوف دموعها كيتعصب حط راسها على صدرو ما كيبغيش يخلي العالم يشوفو دموعها كيبغيها تبكي فحضنو باش حتى واحد ما يتشفى فيها هادشي اللي كيقولو عقلو ...
هنادي بدورها هزات يديها و حطاتها على الشوميز اللي لابس و بالضبط حدا صدرو و زيرات عليه كأنها كتبرد فقايصها فيها و دموعها سيالة على خدها ما بغاتش تحبس أصعب إحساس هو هدا اللي كتحس بيه هنادي ما بغاتش تخسر صديقة طفولتها و فنفس الوقت ما بغاتش ترجع معاها يعني خسراتها للأبد أصعب حاجة هي طلع صاحبتك اللي كنتي دايراها فمقام ختك ما تسواش و تحسدك و تحقد عليك على قبل رااجل ...
إلهام بحال ضربتيها بتصرفيقة من الكلام اللي قالت هنادي ربما شعرات بتأنيب ضمير ربما عرفات بلي خسرات صداقة واخا يتجمع مال دنيا كلها ما يساويهاش ربما حسات بمدى خبثها و بمدى قساوة قلبها الأسود ربما عاد عرفات شنو دارت و شنو قالت ربما عاد حسات بعظمة ذنب اللي ارتاكبت فهاد الإنسانة بسبب شخص ما كيعرفش حتى سميتها و ما عارفش حتى واش كاينة على كوكب الارض شنو كانت غاتخسر لو فرحات لصاحبتها و قالت ليها كلام د الخير شنو كانت غاتخسر ؟؟ شافت إلهام فكاظم مدة و كيفاش ضامها لصدرو ما عرفاتش علاش ندمات على شنو دارت ...كل إنسان فيه الشر و الخير كاين اللي كيغلب خيرو على شرو و كاين اللي العكس و هادشي اللي وقع لإلهام مع الاسف غلب شرها على خيرها كلنا بني آدمين و كلنا نخطئ و لكن خيرنا اللي كيعترف بغلطو و كيندم و كيحاول ما أمكن يصحح الخطأ اللي دار ...سالت دمعة من خد إلهام و هاد المرة ما كانتش مزيفة بل كانت حقيقية فرحات لصديقتها اللي ارتابطت بشخص بحال كاظم غايقدرها و هي عارفاه إنسان طيب ماتنكرش بلي كان كيعجبها و لكن ربما غير إعجاب مراهقة و لكن دابا فهاد اللحظة تغير الوضع هي اللي كانت عارفة هنادي شحال قاست مع خوتها و شحال عانات مسكينة و هي يتيمة من الفوق صرطات ريقها و قالت بصوت حزن
إلهام : سمحيلي أختي هنادي ما غاديش تعاودي تشوفيني مرة أخرى و لكن الهدرة اللي غانقولك هي انا فرحت ليك من قلبي تستاهلي أ حبيية
قالت هاد الكلمات و عطاتهم بضهر و مشات كتجري لدارهم... لقمان بقا متبعها بعينو و تنهد و دار شاف فهنادي و قال
لقمان: الا فهمت شي حاجة الله يعطيني تشتيتة
كاظم : واش نتا بعقلك أصاحبي هاد التصرفات ماشي دياولك شي حاجة ما سوقكش فيها علاش كتخشي فيها نيفك
لقمان : وانا بغيت ندير زعما الخير
كاظم : دير الخير فراسك و دخل سوق راسك هانتا دابا بكيتي ليا مرتي و فنهار الخطوبة ماشي حرام عليك
لقمان : اودي عارف ديلمي منحوس حنا زعما عجباتنا البنت و طايتها ناضية أساط قلت ما عرفتي ألقمان تكون هاديك هي فارسة أحلامك
هنادي سمعات هدرتو و ضحكات بلا ما تحس و بعدات على كاظم كتمسح دموعها
لقمان : هاااا ياك بكيتها و ضحكتها ما كتسالني ما كنسالك يلاه تهلا أساط هانا مشيت
كاظم ابتاسم و قال
كاظم : شي بعض المرات ما كنثيقش بلي كنتي مزوج و عندك بنت دماغك مزال مبررهش أ صاحبي
لقمان : و ما تندمناش أ العشير برب الجليل الا كنت باغي نصالح هاد الكتكوتات حتى صدقنا مبكيين ليك راحة قلبك
هنادي : صافي ما وقع والو أخويا لقمان هانية
لقمان : هانا ثاني على خويا لقمان أشوف أختي بلا ما تبكي الا كانت ما كتستاهلش تبقى معاك لوحي الزمر بلا ما تبقاي محمقة راسك هو هدا تصبحي على خير هانا مشيت
عطاها بضهر و هي تعيط ليه هنادي خلات كاظم مستغرب كيشوف فيها علاش كتعيط على خوه ...
هنادي: لقمان
لقمان التافت و قال بابتسامة
لقمان : ههه ما سخيتيش بيا
هنادي: هه تبغي نعطيك نمرتها
لقمان : توء ما عندي ما ندير بعدوتك خايف تبقاو ترايشو و نصدق منوض نحل على راسي انا فارسة أحلامي طااح بها الفرس و راه جاية دابا فوق الفكرون و تلقاها تالفة على طريق مزال باغي نبقا سيليبيخييير يالاه تصبحو على خير هانا مشيت
انصارف لقمان و طلع فطوموبيلتو لقا جنات نعسات و شبعات نعاس دار ليهم باي باي بيديه و قلع مشا بحالو ...
خلا كاظم فالباب حدا هنودتو اللي تنهدات و بغات تدخل وهو يحط يدو على خدودها بجوج و قال بصوت حنون
كاظم : حبيبي مزالة مقلقة ؟؟؟
هنادي حركات راسها بنفي و قالت
هنادي: لاا ما مقلقاش
كاظم : شحال من مرة كانقولك دموعك غاليين ما طيحيهومش على رخيص آخر مرة واخا
هنادي : حاااضر ما نعاودش ولكن شي حوايج فوق طاقتي ...
سمعو الكلام ديال زبيدة و فضيلة قريب ليهم و هي تبعد عليه و حنات راسها بخجل ...
زبيدة : اوا هانتي أ لالا فضيلة كلشي غايكون هو هداك ما تهزي الهم حتى لحاجة نتوما ما عليكم غير تجيو
خرجو و حل كاظم الباب لماماه طلعات و بقات هنادي و فضيلة واقفين حدا الباب كيتسناوهم يمشيو ...
هنادي عضات على شنيفاتها منين شافتو كيقاد السمطة لماماه مثل هاد المعاملة كيديرها غير مع زبيدة و هنادي و هدا إن دل على شيئ يدل على حبو و تقديرو ليهم بجوج شحال كيعجبها حنانو و اهتمامو بأدق التفاصيل كتحس براسها طايرة من فوق السحاب فاش كيكون قدامها و كتشوفو بعويناتها اللي ما كيسخاوش بيه ...
سد الباب و بدورة باش كيدور كيشوفها ساهية فيه و حالة فيه فمها كيفما العادة ابتاسم بخفة و خطا خطوات باتجااههم الشيئ اللي خلا هنادي و فضيلة تضهر علامات الاستغراب و التساؤل على وجههم لدلك قالت فضيلة ....
فضيلة : نسيتي شي حاجة اولدي
كاظم : numéro ديال هنادي ما عنديش
فضيلة : اه عطيه ابنتي نمرتك هانا مشيت
دخلات فضيلة و خلات كاظم مع هنادي اللي جبد تيليفونو من جيبو و عطاه ليها ..
كاظم: سجلي نمرتك
هنادي خدات من عندو تيليفون و شافت فيه و قالت بابتسامة
هنادي: ما كانعطيش نمرتي مزوجة أخااي
كاظم ضحك من قلبو حتى تسدو عويناتو و قال
كاظم : و غير شوفي كيديري راني كنبات فايق كنحلم بيك و كتباني ليا فمنامي علاش ما بغيتيش ترحميني
هنادي رمشات عويناتها بسرعة و قالت
هنادي: سمحلي أخاي ما نقدرش نخون حبيبو ديالي
كاظم رمش عويناتو بسرعة كأنه ما مثيقيش شنو قالت ليه ياك قالت {حبييبو ديالي } حاس بقلبو كاينبض بقوة و نفس طلعها بصعوبة وودنيه تصمكو بقات غير كلمة {حبيبو ديالي }كتكرر ليه فودنيه اول مرة كيسمعها كتناديه بشي لقب رومانسي ما صدقش لذلك قال بصوت حنون.....
كاظم : سعدات الحبيبو ديالك بيك
هنادي ما قالت حتى كلمة و لكن قلبها لداخل و أعضاءها كاملة كانت قايمة حفل زفااف بقوة الفرح من كلماتو و علاقتهم اللي غادية فمنحى أكثر من جيد شنو تبغي أكثر من هادشي ....
💓💓💓💓
عشقك كسكرات الموت، يدبّ في أوصالي فتختنق أنفاسي وتتمزق روحي ويتركني ما بين الموت والحياة فاقدة لإحساسي. الحبيب ليس من يبهرنا من اللقاء الأول، بل من يتسلل داخلنا دون أن نشعر، وكأنك فجأة تكتشف، أنه هو الهواء الذي تتنفسه.
كاظم ابتاسم و جر خدها بخفة و انصاارف طلع للطوموبيل ديالو ديمارا و قلع خلا غير العجااجة من موراه ....
🌤🌤🌤🌤🌤🌤 أصبح يوم جديد
الصّباح زائر جميل، يأتي فى موعده كلّ يوم، فخير ما نستقبله به هو أن نحمد الله، لأنّه أحيانا بعد ما أماتنا، ونجيب حيّ على الفلاح ليكون خير بداية لكلّ صباح.
# إقتباس
كانت الساعة تشير الى الثامنة صبااحا ...
جالسة فالارض ديال بيتها و لابسة جلابة ديال ماماها مع زيف على راسها و هازة القرآن كتقرااه بتمعن حتى شافت الباب ديال بيتها تحل هزات عويناتها لقات ماماها فضيلة اللي ابتاسمت ليها و قالت
فضيلة : صباح الخير أبنتي
خطات فضيلة خطوات باتجاه هنادي اللي سدات المصحف و حطاتو من فوق السداري ... جلسات حداها فضيلة فالارض و قالت
فضيلة : الله يرضي عليك ابنتي هاد نهار فقتي بكري بقوة الفرحة
هنادي :ههه ما جانيش نعاس الليل كامل و انا نتقلب فالفراش
فضيلة : حتى انا ابنيتي بحالك كانفكر فيك دابا غاتمشي و تخليني فرمشة عين
هنادي: لا أ مي حاشا شكون قالهالك
فضيلة : زربو علينا صراحة الخطبة و الحنة و صافي غايديك معاه
هنادي: وهو صراحة زربو ولكن كاظم عندو الخدمة أمي داكشي علاش
فضيلة : إوا الله يسر ليه أبنتي صراحة ولد نااس و ما تلقايش ما احسن منو ولكن غاتخوي عليا دار كنتي مونساني ها خوتك مشاو نتي غاتمشي و انا غانبقا بوحدي فهاد الدويرة اييه و لكن هادي هي سنة الحياة ما عندك مادير
هنادي هزات يديها و باستها و قالت
هنادي: إنشاء الله غانبقى نجي ديما نشوفك و الحمد لله كاين التيليفون نبقا نهضر معاك فواتساب و انشاء الله قالك كاظم غايديك للحج أ لالة شنو بغيتي ؟؟ و نجيبك انشاء الله لعندي لفرنسا الا كتاب ماشي غانغبر فخطرة
فضيلة ابتاسمات و حطات يديها من مور كتفها وقالت
فضيلة : اوا الله يجيبنا فصواب و الله يكمل ليك بخير ابنتي تستاهلي حتى نتي صبرتي و ها داكشي اللي كنت نقوليك تحقق ياك ديما كنقولك صباار و اليتيم ما عمر ربي ينساهم
هنادي: و نعم بالله كنشم ريحة د الملاوي صوبتيهم
فضيلة : اه صوبتهم فصباح بكري نضت مع الفجر عجنت طرحة و طيبتهم و رجعت نعست
فضيلة : اييه عاوناتني مسكينة اوا اش دير حتى هي الله يحن عليها من داك السكايري
هنادي: واش ما غايجيش معانا
فضيلة : تي فين غايجي حجارو تشدو يشوهنا مع نساب لااالااا اصلن خدام و حتى سعاد ما باغاش تشوف وجهو يالاه نوضي باش تفطري
انصارفت فضيلة لكوزينة و ناضت هنادي سلتات ديك الجلابة و حيدات زيف و دارت نضاراتها طبية مشات للحمام و وقفات حدا المراية كتشوف فراسها بتمعن بدات كتضهر ابتسامة خفيفة على ملامحها هزات المشطة و طلقات شعرها المتوسط الطول و بدات كتمشط فيه و كتذكر كلامو و ضحك غير هي و راسها
🔙🔙🔙
هنادي: أصلن على زين شعري
كاظم مرر لسانو على شفايفو و حك لحيتو و قال بابتسامة
كاظم: علاش وصفيه ليا
هنادي : عادي ماشي يصحابلك مسبسب حرير شعري غير على قد الحال
كاظم : بغيت نتأكد من السلعة ديالي دابا قبل ما نديها عري شعرك نشوفو لا تمشي تصدقي بلا شعر و نصدق مقولب
هنادي : ههههه عندي شعر غير هو أكيد ماشي شي شعر اللي يحمر الوجه المهم الحمد لله عليه كاين اللي ما عندوش
كاظم: واخا تكوني بلا شعر انا قابل عليك
🔚🔚🔚 نهاية الفلاش باك
عضات على شنيفاتها و حمارو حنيكاتها بمجرد ما تذكرات كلمااتو تسمع سرسار فالباب جمعات هنادي شعرها بسرعة و خرجات من الحمام ...
فضيلة تكلمات من الكوزينة
فضيلة : أ صبااار هنادي حلي الباب أبنتي
بالحلة باش كتحل الباب كتحط يديها على فمها بقوة الصدمة من داكشي اللي شافت ما ثاقتش بقات غير مسمرة فبلاصتها ....
كاظم كان واقف بكامل أناقتو لابس قويميجة فالمارون مع سروال أسود و نظارات شمسية و المفاجأة كان هاز دبدوب متوسط فيدو اليمنى فلون البني و فبطن الدبدوب كاين قلب أبيض مكتوب فيه بالعربية {راحة قلبي } بخط أحمر جميل و فيدو اليسرى بوكي د الورد أبيض جميل و من موراه واقفين جوج بنيتات طالقين شعرهم و مزيونين فوجهم لابسين كسيوات حد الركبة و ريحة د العطور كتشم منهم على بعد مية الف كيلومتر و دايرين مايكاب خفيف جاي مع ملامح وجهم المهم من ناس ديال كيلي ميني ...
هنادي مزال كتستوعب شنو هادشي كتشوف حتى نطقات بنت من البنات اللي كانو من وراء كاظم و قالت
~: bonjour ma chérie * حطات يديها على كتف كاظم و كملات كلامها * elle est très belle
كاظم ابتاسم و قال بصوت حنون
كاظم : صباح الخير أ حبيبتي
هنادي صرطات ريقها بصعوبة و رمشات عويناتها بسرعة و ابتاسمت ليهم و قالت
هنادي: احم صباح الخير نهار كبير هدا دخلو تفضلو
حلات الباب و دخل كاظم هو اللول و تبعوه دوك البنيتات الزوينات اللي سلامو على هنادي و دخلو لداخل ...
حط كاظم داكشي اللي كان هاز فسيجور و التافتت كيشوف فهنادي ...
كاظم : حبيبي لابس عليك
قفزو صوت فضيلة اللي خرجات من الكوزينة كتعقد فدرتها ..
فضيلة : مرحبااا بنسيبي مرحبا
قربات فضيلة حداه و هز يديها باسها و باس راسها و هي غير كترضي عليه سلامات حتى على البنيتات اللي معاه و قالت ...
فضيلة : مرحبااا مرحبااا دخلو تفطرو
كاظم : و الله ما كرهت أ ميمتي و لكن مزروب غانمشي دابا جيت غير باش ندي هنادي لصالون و جبت بنات خالتي معايا
فضيلة : مرحباا بيهم اوا دخلو تفطرو و سيرو
كاظم: انا شبعان المهم الا بغاو هما يفطرو انا غانساينهم فطوموبيل على ما يلحقو عليا
هنادي هزات داك دبدوب اللي جاب ليها من فوق السداري و باستو و عنقاتو ...
هنادي: كاايحمق كانتسطى على هاد الدباديب شكرا بزاااف و مكتوبة فيه راحة قلبي من الفوق وااعر بزااف و الله لهلا يخطيك
كاظم جرها من خدها و قال بابتسامة
كاظم: عارفك بريهيشة داكشي علاش جبتو ليك هداك هو صداقك
هنادي: هههه من نيتك دااوي
كاظم : غير ضاحك المهم هانا مشيت على ما تلحقو عليا
هنادي:واش هدوك البنياتات خوت وليد ؟؟؟
كاظم : si خوتو قمر و سمر توأم ماشي حقيقي
هنادي: كيووت ضرييفين بزاف
كاظم غمزها و قرب لودنيها و قال بهمس
كاظم: واخا يضرافو و يزيانو حتي يعياو ما يوصلوش لراحة قلبي
قال هاد الكلمات و خرج كيضحك عاجبو الحال و خلا هنادي مسكينة حالة فمها كيفما العادة كتبتاسم حتى سمعات صوت فضيلة
فضيلة : هناااادي واا هنادي
التاحقت بيهم لصالون و جلسات معاهم و ناضت فضيلة لكوزينة حطات الفطور و جلسو فطرو كان الكلام قليل بيناتهم حتى التاحقت سعاد و ولدها سلمو و جلسو و شافت فهنادي بمعنى شكون هادو...
هنادي: *بابتسامة * هادي سمر و لوخرى قمر بنات خالة كاظم و خوت وليد
سعاد بقات مصدومة ما توقعاتش يكون وليد عندو خواتاتو بهاد الجمال ابتاسمت ليهم و قالت
سعاد: مرحبا بيكم
قمر : ميرسي حبيبة ، هنادي خاصنا نوضو حيت خالتو زبيدة وصاتنا باش ما نتعطلوش و فنفس الوقت كوكي غايكون من قبيلة و هو كيساينا فطوموبيل ...
هنادي : احم هاا مزيان سعاد نوضي تلبسي حوايجك باش تمشي معانا حتى نتي
ريان : وانا أماما
سعاد : واخاا * شافت فولدها * نتا غاتبقا مع جداتك
خرجات هنادي و سعاد لبسو حوايجهم و خبعات داك دبدوب فحوايجها
سعاد: هاد السيد عندك غزاال
هنادي: الله يخليه ليا و خلاتها خالتي زبيدة فسيكفيكهم الله و هو سميع العالم خمسة فعينيك
سعاد: هههه ياك أختي اجي بعدا و شنو غاتلبسي
هنادي: و قالك كلشي مكلفين بيهم هوما انا مالي ما عليا غير نمشي
سعاد : اوا زيدي قدامي
خرجو من البيت سعاد لبسات جلابتها فالغرونة جديدة عندها جاتها مزيونة و هنادي عندها بحالها فزيتي سامبل و فيها طريزة فجنيب مزيونين اصلن عاد خيطوهوم قادات هنادي شدة اللي كدير على شكل توربان و دارت حويلقاتها و لبسات صبيبيط ديالها .... فحين سعاد قدات زيفها بشكل عادي و طلات على قمر و سمر و قالت
سعاد: يالا بنا يا بنات ههه
قمر و سمر ناضو بعد ما سلمو على لالة فضيلة خرجو من الدار و فضيلة هازة ريان فيديها اللي كيبكي على ماماه سعاااد ...
طلقاتها سعاد بتزغريتة فاعلة تاركة فالزنقة حتى جيران كلهم بداو يطلو من السراجم ... خرج كاظم من الباب و حل الباب ليهم بكل جنتلمانية طلعات قمر و سمر و سعاد اللور و اما هنودة طلعات للقدام حدا كاظم اللي همس فودنيها بابتسامة ...
كاظم:يخليلي جليلبة
هنادي ابتاسمت بخجل و طلعات و سد الباب و مشا لمكان القيادة و ديمارا و قلع خلا غير العجاجة من موراها و جيران كيطلو من السراجم كيبرككو فديورهم هدا هو حال الاحياء الشعبية ...
قمر: كوكي عرفتي البيوتي سانتر اللي كانمشيو ليه راه جا فسونطر ville
دخلو لبيوتي سانتر لقاو حقا جواد كينتاضرهم حيت عارف عندو عروسة هاد نهار ابتاسم ليهم و قال ..
جواد: مرحبا بعروستنا تعطلتو شوية
قمر : غير مع الطريق
سلام عليهم كاملين بالوجه و قال
جواد: العروسة تجلس هنا تفضل باش نبداو
جلسات هنادي فالكرسي و قال
جواد: غاتقادي شعرك ولا غير وجهك
هنادي: وي غانقاد كلشي
جواد: تبارك الله حريفاتك زوينين غانطلعك غزالة واخا نتي ما تحتاجيش
سعاد: ربي يخليك أخويا
جواد: نتي ختاها
سعاد : ايييه انا خت العروسة
جواد: حتى نتوما غاتقادو وجهكم
قمر : وي بطبيعة الحال
جواد : جلسو هنا غانعيط على البنات يقادو ليكم
سعاد: واخا مرحبا
جواد صبغ لهنادي شعرها بالبني المفتووح و دار ليها الكيراتين الشيئ اللي عطا لشعرها رطوبة و نعومة هاائلة و نقص ليها منو شوية و منين تسرح عاد بان طولو مزيان وصل ليها حد نص فضهرها جاها اللون مع وجهها كيسطي عطاها جمال خااص خلات قمر و سمر و سعاد يحلو فيها فمهم ...
جواد: هاشعرك قاديناه كيف جاك أ لالا هنادي
هنادي كتشوف فراسها بإعجاب و كتقيس فشعرها كأنها ما مصدقاش...
سعاد : تبارك الله جاك وااعر أصاحبتي
قمر: وي بزااف تبارك الله الكولور جات مع وجهك
سمر : مشاء الله خمسة و خميس عليك لا نمشيو نعينوك
جواد: و دابا جا وقت نقادو ليك وجهك
هنادي: عفاك ما يكاب خفيف
جواد : واخا ما يكون غير خاطرك
دور لكرسي لجيهتو و بدا كيقاد ليها وجهها بإحترافية فحين ان سمر و قمر سعاد حتى هما كانو بنات خدامين مع جواد فصالون كيقادو ليهم وجههم و شعرهم ...
كمل جواد للعروسة هنودة بعد عليها و شاف لوك ديالها كاامل جات واااعرة بزااف رغم انه دار ليها مايكاب طبيعي و لكن مشاء الله دائما الحاجة البسيطة كتكون إستثنائية و فهاد اللحظة حقا كتنطابق عليها مقولة {تنازل الجمال عن الجمال لجمالك فزاد جمالك عن الجمال جمالا} ...
بطبيعة الحال كلشي انباهر بجمالها ابتدء من سعاد و قمر و سمر مرورا بجواد و الفتيات اللي خدامين معاه ....
سعاد : مشاااء الله الله يحفظك من العين أحبيبة
خداو سيلفي مجموعين بالتيليفون ديال سعاد و عيطات قمر للقمان يجي لعندهم حيت وصاتهم زبيدة باش ما يعيطوش لكاظم فاش يكونو جايين ....
داكشي اللي كان بعد مرور عدة ساعات تحل الباب ديال صالون و دخل لقمان لكامل أناقتو داير نظارات شمسية على عويناتو كانو كلهم مجموعين و جالسين كيتحدثو غير شافوه دارو لعندو اللي بقا مشوكي و مصدوم من كمية الجمال اللي كيشوف قدامو ابتداء من هنادي لبنات خالتو لسعاد كلهم جاو فنين .. لقمان حيد نضيضرات من عويناتو و قال
لقمان :هااي هااي هاااي اش هادشي تبااارك الله و معدرهم المكياج لا دين له توما طلعتو قرطاسات
قمر : ياك بعدا
لقمان : أ لالا الله يجعل كلشي مبارك و مسعود
سلم عليهم كاملين و خرجو من صالون و سعاد و سمر و قمر كيزغرتو حتى ثقبو للقمان طبل ديال ودنيه ديمارا و قلع فاتجاه الفيلا ديالهم حتى كيسمع تيليفونو كيزنزن من نمرة مجهولة حطو فودنو و قال ...
لقمان: ألو شكون معايا
~:......
بمجرد ما عرف شكون حبس الطوموبيل و بقا مصدوم كيشوف فيهم فيا ترى شكون إتاصل بلقمان ؟؟؟ وشكون عرف يقدر يقلب هاد الشخص أحداث القصة رأسا على عقب 😈😈...
قمر: لقمان مالك وقفتي شكون عيطلك
هنادي : واش أخويا كاين شي مشكل ؟؟؟
لقمان قطع تيليفون و ضرب دوميتور و مرر يدو على وجهو و قال
لقمان : مااايمكنش أعباااد الله ما يمكنش
سمر : اويلي على ما يمكنش تا دوي قول لينا مالك
سعاد : اويلي شنو واقع انا جمد ليا الما فركابي
هنادي جميع الافكار سلبية طاحت ليها على بالها و أولهم ان كاظم وقعات ليه شي حاجة ضربات بيديها على وجهها و قالت
هنادي: عنداك يكون كاااظم واقعة ليه شي حاجة
سعاد: لقمااان جاوبنا اخويا شوف كيف ولينا كنترعدو غير حنا و عضامنا
لقمان طلع نفس و عاود هبطو و قال
لقمان : ما واقع والو غير تهدنو و هنيونا الله يرحم الواليدين
هنادي : ياك كاظم ما واقعة ليه والو
لقمان : كاظم راه عند الكوافور كيقاد حالتو ما واقعة ليه وااالو راه بخير و على خير هادشي اللي وصلني دابا كفس و طلس
قمر : اويلي ياكما خالتي زبيدة واقعة ليها شي حاجة
لقمان : و مال دماغكم عوج و لااا ولااا ما واقعة لحتى واحد شي حاجة غير تهناو
هنادي عاد تنفست الصعداء و قالت بفضول
هنادي: و شكون اتاصل بيك باش وقفتي الطوموبيل
لقمان : احم اودي دابا تعرفي ما بقاش بزاف و نوصلو
كلهم جاهم الفضول يعرفو مال لقمان و شنو سبب اللي خلاه يتوتر منين جاه داك الاتصال المشؤوم كلهم كيتسناوه يوصل على أحر من الجمر الفضول اللي فيهم غايقتلهم و حتى لقمان ما بردهمش ماقال والو خلا راسهم يضرهم ...
وأخيرا حبس الطوموبيل بسرعة حتى مشاو و جاو ...
قمر: لقمان اويلي مالك غير بشوية
هنادي هزات راسها كتشوف فين هما لقات المطار قدامهم قبحات ملامح وجهها و سرعان ماشافت واحدالشخص ما خافيش عليها شكلو لابس جلابة و طريبيش أحمر فوق راسو و داير نضارات شمسية و حداه دقايقية حلات عينيها على وسعهم ما بقات فاهمة والو و زادت تاكدات بلي هو من صوت سمر اللي قالت بصوت مرتفع
سمر : معتتتتتتز
حلات الباب و خرجات كتجري هي و قمر عاد التافت لقمان و شاف فهنادي و قال
لقمان: هدا ولد خالتي معتز هو اللي جا باش يحضر و شوف شنو جايب معاه دقايقية أعباد الله حدا المطار، خالتي اللي اتاصلت بيا راها معاه حمقها مسكينة شي نهار يطيح فيها السكر المهم اختي غاتصبري معانا شوية راه معتز فيه تبرزيط شوية و غير الله يدوز هاد الحنة على خير و بخير هاداك عندو شي افكار خطاار ما يطيحوش على الجن الازرق ردي معاه البال
سعاد : هههه نااري جايب دقايقية حدا المطار و مسطي و هبيل برب الجليل
هنادي: هههه لا ماشي حتى لهاد الدرجة ماشي هو لول ولا لخر اللي يجيب دقايقية حدا المطار و عادي ما فيها والو مسكين فرحان بولد خالتو و الله حتى ضريف فايت ليا هدرت معاه
لقمان : و دابا انا واش قلت ليك مسموم سمعي واحد القصة كانت وقعات لينا معاه و حكمي واش هداك بعقلو و لا هارب ليه ديال بصح ... واحد نهار جا للمغرب عندنا بحال هاد نهار دكرنا سمن و العسل المهم فاش كاندكرو سميتو كنقولو ديما دكرنا سمن و العسل حيت فغيمون جن عفريت مسطي هبيل هااارب ليه ديال بصح كان واحد العرس ديال صاحبنا و عشيرنا مشينا حضرنا ليه كيف شي ناس و كان نيت معانا كاظم و المشكل هو ما مشاش معانا جا لدار ما لقاناش لقا غير الواليدة استقبلاتو و رحبات بيه و كلشي غادي مزيان في امان الله و حفظه سول الواليدة قاليها فين كاظم و لقمان قالتلو راه مشاو لواحد العرس المهم ما علينا قالها واالو عطيني العنوان ديال العرس بغيت نمشي نشط معاهم و كدا الواليدة مسكينة على نيتها عطاتو العنوان اوا يا لالا فنظرك شنو مشا دار ؟؟
هنادي : شنو دار ؟؟
لقمان : مشا شرا قرعة ديال شراب و جا للعرس ومع كان لابس شوميز بيضة حل ليها صدايف من الفوق و دخل و فيدو القرعة دشراب و بدا كيرعرع فوسط العرس و فنظرك شنو كيقول ؟؟
هنادي متبعة معاه القصة و قالت
هنادي: اهاه شنو قال ؟؟
لقمان : مشا حتى لعند العريس فين جالسين فالبرزة و هبط على ديك القرعة د شراب و هرسها حتى ناض كلشي من بلاصتو و بدا كيغوت و يقول و الله ما تدي مرااتي شحال و انا وياها باش تجي نتا فلخر تديها بااطل قالو درتيليا سحوور لحبيبتي و اليوم غانقتلك و دابا واش هدا بعقلو
هنادي ضربات على حنكها قالت بصدمة
هنادي: اوييلي واش من نيتو
لقمان : و ييه عرفتي حشمنا حدا صاحبنا و حنا براسنا ما فهمناش شنو جا كيدير فالعرس و لكن كاظم هو اللي ناض و حل المشكل و داه لدار و تفاهم معاه و هو كيموت بضحك ما مسوقش كان غايفرتك ليهم شمل ولد اللدينة ما كيحشمش و هادشي غير شوية من بزااف
سعاد: هارب هاد سيد بالله
شافو لقمان كيشير ليهم بيديه باش يخرجو عندو
لقمان : يالاه نسلمو عليه راه غايحمقنا
نزل لقمان من طوموبيل و تبعاتو هنادي و سعاد و دقايقية كيطبلو و معتز كيشطح مع قمر و سمر و ناس مجوقين كيتفرجو فيه كاين اللي كيصور كاين اللي كيصفق معاهم كلها و شنو كيدير اما ماماه فخيتة اللي كانت لابسة جليلبة فصفر و معرية شعرها اللي صابغاه بالاسود ملاميحها كيشبهو لزبيدة ختها بزااف غير هي كتبان فيها مزال صغيرة واقفة حداهم و مربعة يديها كتشوف فولدها المسطي اللي غايخرج ليها العقل شي نهار ....
معتز قابط فيد سمر و فيد قمر و كيشطح و كيغني ما مسوقش لبشر
معتز : هدااا يا العود هداا سرجتو ما بغا يهدا هدا يا العود هدا وكلتو ما بغا يهدا هداا يا العاود هدا سرجتو ما بغا يهدا أيواااااا هي جاااية كتجري هي جاية كتجري عينيها فداك العزري هي جاااية زرباانة عينيها فيا انا ياو جاية لابسة الحمر ياو جاية لابسة الاحمر شافتني و هي تعتر ....
وصل عندهم لقمان اللي كانت بادية على ملاميحو العصبية عكس هنادي و سعاد اللي كايضحكو ...
معتز طلق من يد قمر و سمر و شاف فدقايقية و دار ليهم بيدو حركة بمعنى حبسو و داكشي اللي دارو رجع شاف فجوقة اللي كانت و قال بصوت مرتفع
معتز : يالاه أسيادنا اللي عندو شي داار يمشي ليها ما حشمتوش جايين للمغرب باش تشوفو عائلتكم ولا جيتو تزهااو
كلشي إنصارف كايضحك على كلامو ... لقمان خطا خطوات بطيئة فإتجاه فخيتة تعانقو و سلم عليها حيت شحال هادي ما شافها ...
فخيتة : لقمان صافا اولدي
لقمان : الحمد الله على سلامتكم مفاجأة زوينة هادي
فخيتة : كلشي من تحت راس داك العفريت
طلق لقمان من فخيتة و تعانق مع معتز عناق رجولي وهو يقول معتز بصوت أنثوي رقيق
معتز : اااي لقماانينو حوبي i miss you
لقمان هبط عليه بضربة لضهرو و بعد عليه و قال بابتسامة
لقمان: ما زال ما بغا يعفو عليك الله من هاد الحموضة
معتز : ما تديش عليا قبل ما نجي شفت واحد الفيديو ديال ادومة و أثر فيا
لقمان ضربو لقرفادتو و قال
لقمان : أسيدي عندك الكانة و الخاطر تفرج لداك التخربيق
هنادي و سعاد مشاو كيسلمو على فخيتة اللي ابتاسمت ليهم و دخلو ليها لخاطرها و كتعامل معاهم كانها كتعرفهم من زمان خصوصا مع هنادي اللي عرفات بلي هي مراة كاظم مررات يديها على دراع هنادي و قالت بصوت حنون ...
فخيتة : تبارك الله و صلى على النبي على عروستنا
معتز سمع صوت ماماه التافت و حيد نضاراتو شمسية و علقهم فالجلابة اللي كان لابس و طلع و هبط فهنادي و أشار بصبعو لناحيتها و قال بصوت مرتفع خلا كلشي يشوفو فيه
معتز : ما تقولوش لياااا هادي هي العروسة
لقمان : وي هاديك هي هنادي مراة كاظم
خطا خطوات ناحيتها و ربع يدو و هبطها بعينيه و عاود طلعها حتى وصل لعينيها و ربع يدو و كيدير فيها شي شوفات خلات هنادي تتوتر و كتنتاضر منو ينطق و يقول شي حاجة ...
معتز : ماااا يمكنش و مااا يمكنش
فخيتة : شنو اللي ما يمكنش أولدي مالك عاوتاني
معتز : و ماا يمكنش يتزوج بها كااظم
هنادي صرطات ريقها بصعوبة حشمها حتى قالت سعاد بعصبية
سعاد: علاه ماالها ناقصاها يد ولا رجل
معتز ما داهاش فكلام سعاد وقف بجنب هنادي و عنقها جنب بقات هنادي غير مصدومة كتشوف سيد واخد راحتو معاها طرطقات فيه عينيها وهو يقول بعدما حط يدو على صدرو ...
معتز : ما تزوجيش بكااظم نتي زوينة وهو خيبووع تزوجي بيا انا أش بانلك
معتز : المبوهل هو نتا بزااف عليك انا سيدك ولد لالاك نعطيك طرش و نزيدك لا ما جاتش زوينة القافية انا لالاك بنت سيدك نعطيك طرش و نزيدك انا وردة مسقية و نتا خرية مطلية انا نجمة فالسما و نتا خرية فالما
لقمان شاف ففخيتة و قال
لقمان : الا ضربتو ما تشدينيش
معتز : اش هاد قلة الادب باغي تضرب ولد خالتك و اكبر منك من الفوق
صونا للقمان تيليفون و دوز الخط و حطو فودنو و هو يتسمع صوت زبيدة بشكل مرتفع ..
زبيدة : أ فينكم اولدي تعطلتو
لقمان : هااحنا جاايين فطريق
زبيدة : نااس اولدي كلشي كيساين و كاظم تعصب حيت عيا يتسنا و مزال ما جيتوش و ناس كلهم كيساينو هنادي توصل و مزال خاصها تلبس ربعة د العشية هادي وااه
لقمان : صافي غانجيو دابا
زبيدة : اوا يلاه طلقونا للفراجة الله يوصلكم على خير
قطع الخط و رد التيليفون لجيبو و قال
لقمان : خاصنا نمشيو ناس كيساينو تعطلنا
فخيتة : مزيان نيت نديروها ليهم مفاجاة
لقمان شاف فمعتز و قال
لقمان : لا مفاجاة زوييينة نيت
معتز : واشوف فيا راني مزوق
لقمان : كي الحمار الوحشي
معتز شاف فهنادي و قال بترجي
معتز : عفاك شاركي معايا فالبرانك
هنادي: مانقدرش
معتز طلق منها و بعد و قال
معتز : مزروبة تزوجي الله يستر
لقمان : قمر و سمر شدوا طاكسي باش تمشي معانا خالتي
قمر : اه واخا حنا غانمشيو فطاكسي
معتز : العز و نصر لمول القصر هي حتى انا غانمشي معاكم
لقمان: حتى نتا غاتمشي مع سمر و قمر ما فيا اللي تزيدني حريق راس ما ناقصش
معتز : شناااهو برب الجليل حتى نمشي معاكم و حبذااا تعطيني نسوق
لقمان: باش تقلب منا فشي قنت تبت لارض
سعاد و هنادي غير كيشوفو بعيوناتهم و يضحكوا ...انصارفو سمر و قمر شدو طاكسي و تاما باقي مشاو طلعو فطوموبيل ديال لقمان ...معتز طلع لقدام و سعاد و هنادي و فخيتة طلعو اللور ...لقمان ديمارا و انطالق فاتجاه الفيلا ديالهم و قال ..
هنادي و سعاد غير كيشوفو فبعضياتهم و خصوصا الكلام اللي كيقولو بيناتهم كتبان فيهم مفاهمين و عائلة متفتحة ما عمرها ضنات غاتكون شي عائلة فالبلد السعيد اللي عايشة فيه بهاد العقلية حاجة جديدة بالنسبة ليها الشيئ اللي خلاها تستغرب من طريقة كلامهم خصوصا فاش شافت فخيتة كتهضر مع ولدها على البنات اللي كيعرف كيجيب ليها راسها فعالم واحد أخور حيت البنت اللي تربات فوسط عائلة محافظة أكيد غايجيها هاد ناس غرباء ....
معتز التافت و شاف فماماه و قال
معتز : ما نسمحش ليك تقولي كيسمحو فيا انا اللي ما كنعطيهمش وقت صححي المفردات دياولك الله يخليك
فخيتة : و بعدا عندك سنطيحة تكدبني البنت اللي تصاحبت معاك كتحمقها و تخليك
لقمان: عقلتي أ خالتي هديك البنت اللي قطع ليها شعرها حيت ما عجبوش
معتز : اوا عييت فيها تقطعو ما بغاتش و انا ما عجبنيش غفلتها و طيرتو لوالديها
فخيتة : انا راه شهمني حمقني باك مات و خلا ليا انا فريع راس
معتز : انا هو الورث اللي بقا ليك من لواليد
فخيتة : و ورث غزاال نيت
لقمان : أكيد درتي شي حاجة فحياتك باش ربي رزقك بهاد المختل عقليا
معتز : كانت كتخون الواليد
فخيتة : اوا الله يمسخك ما بقيتي تحشم
معتز : اوا شنو فاش كنت صغير و كتعطيني نرضع لبزولة ماشي خيانة لواليد
لقمان: دابا خلينا من هاد تحوميق ديالك ياك و قولي علاش جبتي دقايقية حدا المطار
معتز : اوا اللي جا من شي بلاد و دخل لمغرب كيتعرضو ليه بدقايقية
لقمان: اوا الا ربحتي فشي مسابقة ولا الا شرفتي المغرب و هزيتو رايتو فشي لعيبة ماشي نتا ما كانعرفوكش حتى شكون و فارع لينا راسنا بدقايقية
معتز : جبت دقايقية نفرح براسي مالي ما منحقيش *التافت و شاف فهنادي اللي كضحك مسكينة على كلامو * ياك أختي هنادي من حقي نفرح براسي
هنادي قالت بابتسامة
هنادي: من حقك فرحليا مع راساتك
معتز : ما عرفتش علاش حاس بيك نتي غاتكوني عشيرتي
فخيتة : أهياااا بعد من البنت
معتز : هاني مبعد شفتيني لاصق فيها
فخيتة : حتى نكون ما كنعرفكش *شافت فهنادي و كملات كلامها * ويااك ابنتي عندك تضسريه عليك راه ما كيحشمش انا مبرية منو الا دار ليك شي حاجة
معتز رمش عينو بسرعة و حول صوتو الى صوت أنثوي رقيق و قال
معتز : ماامي علاااش كتقولي انا خاايب
سعاد: واللي قال عندك العقل الله يعطيهلو
معتز : ختك اهنادي كتبان فيها مسمومة
فخيتة : معتززز واش باغي طرطق ليا مرارتي سد حلقك
لقمان: أه حقا وشكون بقا مقابل شركة ديال كاظم
معتز : مزيان تبارك الله هو اللي مولاها جا يعرس ليا مع راسو و انا خاليني وااحل فيها مااسوقيش
فخيتة : اللي عساك اولدي راه خلا شي ولد مكلف بيها كيعرفو حتى كاظم و جا
معتز : هناادي دابا ما تزوجيش بيا بروجولة
لقمان: معتز را غانضربك بعد من البنت
معتز : شوف هي كيف كضحك و عاجبها الحال انا راه واخا احمق راني بعقلي كااظم معقد ما عندك ما ديري بيه سيد كان مزوج و كدا و نتي مزال صغيرة خاصك راجل يكون ما مزوجش ماشي تديه هجااال حشومة كااع
معتز : هااا حيت بغيت نقولها حقيقة كااظم بغيتو تسكتوني
لقمان : يالاه قول نسمعو هاد الحقيقية
معتز رقق صوتو و حط يدو على فمو و قال
معتز : ما نقدرش نقول حشومة
هنادي بابتسامة قالت بعدما ربعات يديها
هنادي: غير هدر ما تحشمش حتى انا بغيت الماضي ديال كاظم
معتز التافتت وشاف فهنادي و قال بصوت رقيق
معتز : و ما يبقاش فيك الحال
هنادي: لا بطبيعة الحال
معتز : هادشي راه دازو عليه سنين
هنادي: ههه ماشي مشكل غير نطق
معتز: واعديني الا عرفتي سر ما تفارقيش معاه
هنادي ضربات فخدها بيديها و قالت
هنادي: ودابا هدر خلص راك فقصيتيني
معتز رمش عويناتو بسرعة و دلا شنيايفو و قال بعد مدة صمت بصوت يشبه صوت الاناث
معتز : انا و ياها كنا كنبغيو بعضياتنا
هنادي طرطقات فيه عينيها و قالت بصوت مرتفع
هنادي: ما تقوليش gay *مثلي*
لقمان حبس الطوموبيل حدا الفيلا و دار شاف فيها و قال
لقمان: برب الجليل اليوم كاظم يعلقك من شفارك يوريك gay بشحاااال كطيح
معتز : لاااا العار و نتا تقولها ليه و الله حتى غير ضااحك أختي هنادي سيد راه سيد رجال شمن gay انا واش قلت شي gay هنادي اللي قالتها هي اللي خاصو يتفاهم معاها
لقمان : أ رصا فين غادي خلي حتى تجي الواليدة و تشوفك و تفاجئ
تسمعو زغاريييت ديال نكافات و زبيدة خرجات من الفيلا وهوما موراها كيزغرتو حلات الباب ديال طوموبيل وقالت
زبيدة: ختي ...
زبيدة : وااااش فخيتة هااادي
نزلات فخيتة من طوموبيل و طارت على زبيدة بتعنيقة فااعلة تاركة حتى طاحو دموعهم بجوح توحشو بعضياتهم بلا قياس صعيب يكون عندك خوتك فالغربة كتبقا بلاصتهم كبيرة فحياتك و كانت أحلى مفاجأة بالنسبة لزبيدة هي تشوف ختها جات تحضر لحفل حنة أو الحفل البسيط ديال كاظم ...
زبيدة بعدات على فخيتة و الابتسامة على وجهها واخا دموع هبطو من عويناتها ...
زبيدة : نهااار كبير هدا يا العفريتة ناااري وشحال توحشتك تعالي حبييني تعاالي
عاودت عنقات ختها كتشم ريحتها اللي توحشاتها ما شبعتش منها حتى سمعات صوت ديال معتز اللي نزل من طوموبيل و قال بصوت مرتفع
معتز : خالتي عسييلة
بعدات زبيدة على فخيتة و التافتت شافت فمعتز و ضحكات و قالت
زبيدة : ياا العفريت حتى نتا جيتي نهار كبير هدا
عنقها معتز و باس كتفها و قال
معتز : يخليلي العسيلة ديالي توحشتك أ زوبيدة
زبيدة بعدات عليه كتضحك
زبيدة : حتى انا توحشتكم و الله مفاجاة زينة هادي
معتز : ما بغيناش نخليو كاظم بوحدو فهاد الليلة بغينا كلنا نحضرو و بيني و بينك جيت غير على قبل دجاج
زبيدة : هههه ياك أ العفريت
فخيتة : تلاهيتي معانا و نسيتي عروستك
زبيدة طلات على هنادي اللي كانت مزالها جالسة فطوموبيل
زبيدة : هااااي هااي على لالة البنات
نزلات هنادي بتثاقل من طوموبيل و الخلعة و الرجفة شاداها و التوتر و ما عارفاش كيفاش غاتصرف و شنو غاتقول من غير الابتسامة اللي مرسومة على ثغرها ...
سلمات عليها زبيدة و باستها من حنيكاتها و عنقاتها و دوك نكافات اللي كان من موراها طلقو تزغريتة فاااعلة تاركة تسمع صداها فالفيلا كااملة ....
جراتها معاها دخلاتها و سعاد من موراها... عيساوة كانو فالدخلة ديال الباب غير شافوها بداو يطبلو و زغاااريت و نااس لداخل كثاااار ....
تصدمات هنادي بداك الكم الهائل ديال عباد الله كاين فيهم اللي من عائلتها اللي كان باين ملامح الغضب على وجههم حيت اكيد تعرضو فنهارهم الشيئ اللي ما عجبهمش و نص الكبير فيهم ما جاش عكس عائلة كاظم اللي كان بااين فيهم نااس د الفلوس كاين اللي لابس المينيات كاين اللي لابس القفطاان و التكاشط المهم كلشي مزوز و مقاد الحالة ...
دخلات زبيدة هنادي و طلعاتها للفوق ما خلات حتى واحد يشوفها ولا يهدر معاها ...طلعاتها لبيت ديالها فين كانت الكوافورة اللي غاتقاد ليها وجهها الا تخسر ليها المايكاب و نكاافة اللي غير شافوها دخلات من الباب حمااوها زغااريت ...
جلسات هنادي من فوق الناموسية غير كتشوف بعويناتها و كتضحك و قالت زبيدة و الابتسامة على وجهها غاطير بالفرحة لما لا و ولدها اللي كانت فاقدة فيه الامل انه عمرو يتزوج ولا ينسا الماضي ها هو اليوم ثبت ليها العكس و غايتزوج ببنت كيف الوردة و من فوق هادشي كاامل كايبغيها و هادشي لاحظتو غير من معاملتو ليها...
زبيدة : دابا غاتلبسي قفطان فالاخضر و غانحنيو ليك و من بعد غاتلبسي لاغوب فالبيض حيت غير حفل بسيط ولدي ما عزيزيش عليه الصداع و لكن الا بغيتي تلبسي تكااشط راه كلشي موجود اختاري نتي أبنتي اللي بغيتي
هنادي حركات راسها بنفي و قالت بابتسامة
هنادي: دير اخالتي الحاجة اللي غاتريح كاظم انا ما عنديش مشكل
زبيدة بابتسامة قالت
زبيدة: الله يرضي عليك ابنتي هادشي اللي كايعجبني فيك دايرة قيمة لولدي و كتبغيه الله يتاويكم للخير و حتى هو راه ما ناسيكش داير ليك واحد المفاجاة من داكشي رفيع
زبيدة : ماماك راها لتحت مع ضيافها راه جابت ليك شوانطك لهنا
هنادي على إثر هاد الجملة حسات بغصة فقلبها ما قدراش تخايل بلي صافي حان وقت الرحيل و غاتبعد على ماماها اللي لطالما وهي معاها عاشت معاها عشرين عام على قدها وهي دابا فرمشة عين تخطبات و غاتزوج و غاتطير لفرنسا اللي كانت كتبان ليها غير فأحلامها حلم كانت كتشوفو صعيب يتحقق ولكن مع كل سجدة كانت كتديرها كتدعي الله يحقق ليها هاد الحلم ...حتى حاجة ما مستحيلة مع الله و لكن اللي أثر فيها هو فراق ماماها و الاخت ديالها سعاد اللي جالسة قبالتها كتشوف فيها و حتى هي حاسة بقلبها كيضرها لما لا وهي كتشوف ان أختها صغيرة اللي عاشت معاها الحلوة و المرة و شهدات على معاناتها و شهدات على خطواتها الاولى و شهدات على اول سنة خرجات ليها ففمها كيف دير على فراقها وهي كتعتابرها بنتها و ما عمرها إعتابراتها ختها تلاقاو عويناتهم بجوج و كل وحدة فيهم صدرات منها تنهيدة كأن كل وحدة عارفة بلي بعد لحظات غاتودعهم و غاتبدا حياة جديدة بعيدة عليهم و هادي هي سنة الحياة اللي ما منها هروب واخا تطول و تدوم العشرة لا بد من الفراق ...
انصارفت زبيدة و خلات النكافات و الكوافورة مع هنادي ...
هنادي: واش نلبس دابا
نكافة اللي كانت امراة بيضة و طويلة و متيولة لابسة قفطان فالاحمر مختلف على لوخرين حيت هي المعلمة نورمال...
نكافة: غاتعري شعرك ولالا
هنادي بأسف قالت
هنادي: مانقدرش
سعاد: وعلاش ؟؟؟ ياك صوبتيه و جاك كيحمق علاش ما باغاش تعريه
هنادي: البارح هدرت مع كاظم فهاد الموضوع و قالي ديري درتك و ما تعريش شعرك
نكافة : ما فيها والو صراحة غير بغا يعكس ليك هانا بناتي كلهم دايرين الدرة و فعرسهم حيدوها بغاو يفرحو براسهم
هنادي: وييه و لكن كاظم راجلي ما بغاش
الكوافورة تدخلات فالحوار و قالت
الكوافورة : عري درة نشوف شعرك أحبيبة
حيدات درة و تطلق شعرها المسبسب اللي دارت ليه لون جا مع لون بشرتها بشكل خطيير و مثيير فنفس الوقت جات مزيونة تبارك الله كتحمق جميلة لدرجة ان حروف اللغة الثمانية و العشرين مايقدروش يوصفوا جمالها حقا ماكدبش اللي قال نصف جمال المرأة شعرها كيفتن بشكل كبيير ....
وهادشي كان واضح فملامح الأشخاص المحيطين بيها اللي انباهرو بالجمال الأسمراني و زادت كملاتها بضحكة اللي ترسمات على ثغرها و قالت ببراءة
هنادي: مالكم كتشوفو فيا ماجانيش زوين واقيلة
الكوافورة : لااا تبارك الله غزاال جاك كيحمق [ كتمرر يديها على شعرها و كملات كلامها ] صلاة على النبي شكون صوبو ليك
هنادي: جواد تقدري تكوني كتعرفيه
الكوافورة: الله ياودي شكون اللي ما كيعرفوش خدمتو متقونة المسخوط و لكن راه صرعو ليك و حتى المايكاب اللي دار ليك غزال
النكافة : لا تبارك الله عليك زينة الله يكمل ليك بالخير
هنادي: شكرا لهلا يخطيكم
سعاد غير كتقرا المعودتين و آية الكرسي خايفة يقوسو ليها على ختها ...
هنادي التافتت و شافت فسعاد و قالت
هنادي : ونتي شنو غاتلبسي
سعاد: غانهبط عند الواليدة نقولها فين دارت ليا قفطاني جديد اللي خيطت
هنادي : صافي واخا و قلها طلع عندي فاش تكمل
سعاد: واخا
انصارفت سعاد و خلات هنادي مع نكافة اللي جبدات ليها قفطان أخضر اللي غاتلبس قفيطين مزيون ستايلو عصري داكشي ديال الفريع لما لا و هي أحسن نكافة فالبلاد أكيد لالا زبيدة ما غاتجيبش ليها شكون ما كان ...
انبهارت هنادي بجمال و روعة داك القفطان اللي غاتلبس حقا ما عمرها شافت بحالو موديل جديد عليها و هي نيت شحال هادي ما لبسات القفطان ان لم نقل عمرها لبساتو منين كانت صغيرة و منين كانت كتحضر لبعض حفلات زفاف اللي كتقام فالعروبية و ديما كانت كتمشي بالعصري لأن الام ديالها بطبيعة الحال ما عندهاش الفلوس باش تكري ليها كي البنات و من ديما كانت كتحس بالحكرة و هي كتشوف بنات لابسين قفاطن و تكاشط فالعرس عكسها هي و لكن كلشي داز و هاهي غاتلبس أحسن و اروع قفطان ممكن تشوفو عينيها و من فوق هادشي كامل غاتكون هي أميرة الحفل شنو بغات أكثر من هادشي و اول حاجة طاحت على بالها هي الله كبيير و ما كينسا حتى واحد لذلك خرجات من فمها جملة كتعبر على امتناتها و شكرها لهاد نعم اللي عايشة فيهم ....
هنادي: حمد الله
ما فيقها من سهوتها غير صوت النكافة اللي قالت
نكافة : لبسيه أبنتي غايجيك زوين عجبك بعدا
هنادي: زوين بزااف
نكافة : و على الله يجي على عبارك فاش هدرات معايا زبيدة قالتلي عروستي رقيقة ههه واخا قلتلها خاصها تقيس قالتلي كلشي جا مزروب ما صلاحش ليها تجيبك و نتمناو يجي على عبارك راه جبت ليك القفطان المخير عندي
نكافة : اييه كنعرفو انسان ضريف و مزيااان و خدمت ليه فعرسو لول مع مراتو اللولة الله يرحمها و يوسع عليها
هنادي : وكيف داز عاوديليا عليه
كتلبس فالقفطان و كتسمع لنكافة اش كتقول
نكافة : داز زوين داروه فقاعة كبييرة كان عرس أسطوري ما خلاو دجاج ما خلاو بساطل ما خلاو حلاوي على الاشكال و الاصناف دقايقية عيساوة اللعبات الحيدوس كلشي جابوه لداك العرس تبارك الله
هنادي صرطات ريقها بصعوبة و حسات بغصة فقلبها كيفاش عروستهم الاولى دايرين ليها عرس أسطوري وهي دايرين ليها حفلة صغيرة بقا فيها الحال شوية و لكن ما بغاتش تبين نورمال واي وحدة فبلاصتها كان غايبقى فيها الحال ... قالت
هنادي: مزيان قول خسرو فيه بزاف
نكافة : علاه غير خسرو فيه و سكتي حطوا دم جوفهم وكلشي خرج من جيب ولد لالا زبيدة و المشكل العروسة اللي كانت باغا هادشي و مع لقات الولد كيبغيها تفششات عليه حتى ما لقات
هنادي وقفات حدا المراية اللي كانت بطول كتقاد القفطان الاخضر اللي لبسات و لحقات عليها النكافة كتقاد ليها و دارت ليها المضمة و كملات كلامها
نكافة : و لكن ما نكدبش عليك الولد ما كانش عاجبو الحال و لكن كان مسلك طرح حيت مرتو الاولى كاانت منفخة و مكبرة بلا قياس ماشي بحالك نتي أبنتي ضرافات ...
هنادي: شكرا ربي يخليك
نكافة : و تبارك الله شوف كيف جيتي صلاة على النبي طاحت عليك الملحة
هنادي كتشوف فراسها بإعجاب فالمراية جات أميرة تبارك الله واتها الاخضر و مع لون بشرتها جاها كيهبل و خصوصا مع شعرها المطلوق و المسرح على طولو و القصيصة اللي هابطة على عويناتها جات فنيونة و سووكيوت الكوافورة و البنات اللي خدامين مع النكافة كلهم كيشوفو فيها بإعجاب ما كرهوش يكونو مكانها شي غاير منها شي غير باغي يكون فبلاصتها كل واحد و شنو كيقولو عقلو ...
نكافة : جاك القفطان طويل شوية و لكن مع طالون تجي نتي هي هاديك باش نديرو ليك الاكسسوارات
هنادي مررات يديها على شعرها و طرحات سؤال على نكافة
هنادي: شكون اللي أحسن انا ولا مراتو لولة
نكافة ضحكات و قالت
نكافة : ههه كلها و زينو ولكن ما نكدبش عليك مراتو لولة حرااام واش طاحت عليها الملحة جات باسلة ماشي بحالك صلاة على النبي و كانت زايداها بنفخة على الخوا عاقلة كانت باغا تلبس واحد لاغوب مقزبة ولكن كاظم ما خلاهاش اوا و تشوفي الحيحة اللي دارت و ناضت كتبكي و قالتلو نتا ما بقيتيش كتبغيني مسكين داك نهار حماقتو
هنادي: هه قولي دابزو نهار العرس
نكافة : وييه ابنتي وعاد زيد الحاجة زبيدة ما كانتش باغاها غير ولدها اللي كان مبززها عليها و باش كملاتها و جملاتها فالتالي فاش حطو العشا الطبلة د العروسة دورات فيها غير عائلتها و خلات عائلة كاظم غير كتشوف هي جلسات مها و باها وخوتها و خوالها و مسكينة غير زبيدة بوحدها اللي جلسات و لكن كانو غير كيسلكو عرفو كاظم كيبغيها ما بغاوش يحكرو على أبسط الأشياء
فوقتما كتقول نكافة بلي كاظم كيبغيها كتحس بغصة فقلبها و كتحس بودنيها كيصوطو و نفس كطلعها غير بصعوبة نورمال نار الغيرة لاعبة عليها ...
هنادي : اوا ها كلشي داز الله يرحمها
نكافة : هاداكشي اللي كاين و حتى نتي بنت ناس و ربي طيحك فنقرة صااااافية أبنتي الله يخليكم لبعضياتكم
هنادي :*بابتسامة * ربي يخليك شكرا
نكافة : اوا كيف جاك القفطان
هنادي كتشوف فراسها و دارت جنب كتشوف كيف جاها من اللور جاها زوين و مع عبارها بحال تفصل و تخيط ليها
نكافة مدات ليها صباط طالون فالاسود لبساتو جا مع رجيلاتها ووقفات مقادة و ردات شعرها اللور و عضات على شنيفاتها ما سخاتش تحيد من حدا المراية حتى قالت ليها نكافة ...
نكافة : اجي ابنتي نديرو ليك الاكسسوارات مع لبيسة
مشات هنادي تبعاتها و قدات ليها الاكسسوارات خواتم و سنسيلة حويلقات بغات تدير ليها تاج و قالت
نكافة : واش غاديري الزيف
هنادي بعد تفكير و بعد صمت دام عدة ثواني قالت بكل ثقة بالنفس
هنادي: ما غانديرهاش
نكافة ضحكات و قالت
نكافة : هههه ياك قلتي راجلك قالك ديريها
هنادي: انا غانهدر معاه غير ديري تاج
الكوافورة : على هاد الحساب نقاد ليك شي مشيطة
هنادي: لاا غير خليه ليس أحسن
الكوافورة : حتى ليس جاك واعر
دارت ليها النكافة التاج من فوق راسها و ثبتوه ليها مزيان ...
الكوافورة : العكار اللي دار ليك جواد جاك خفيف بزااف غانديرلك غرونة عرفتي كيف غايطلع معاك وااعر
هنادي قالت بابتسامة
هنادي: واخا ديري اللي بان ليك أحبيبة
الكوافورة مسحات ليها داك العكار الخفيف اللي كان داير ليها جواد و دارت ليها عكاار غرونة مغلوق جااها خطيييييييييير برز شنيفاتها بشكل رهيب كيف يدير الواحد ما يتغرمش فجمالها البسيط و الرائع فنفس الوقت ...
الكوافورة : وااااو عرفتي اليوم راجلك ما يعرفكش تبارك الله عليك
طلقوها نكافات بتزغريتة فاعلة تاركة تحل الباب و دخلات لالا زبيدة و لالا فضيلة اللي بقاو واقفين حدا الباب مصدومين كيشوفو فيها وقفات و ابتاسمت ليهم ...
زبيدة : تباااااارك الله عليك
فضيلة ما صدقاتش بلي هاديك بنتها تبدلات عليها بزااف قربات ليها و عنقاتها بجهد حتى طاحو دموعها و قالت بصوت فيه بحة حزن
فضيلة : الله يحفظك من العين ابنتي
بعدات عليها و شدات فدرعانها بجوج و قالت
فضيلة : الله يكمل ليك بالخير
هنادي هزات يد فضيلة باستها
فضيلة : الله يرضي عليك ابنتي الحبيبة ...
فنفس الاثناء تسمعو خطوات رجاالية طالعين فدروج و كان باين شكون مولاهم أكيد كاظم ومن لا يعرفه ...
خرجو كلهم من الغرفة و تلاقاوه طالع بكامل اناقتو لابس كوستيم أسود و مقاد لحية و شعرو بطريقة خطيرة عطاتو وسامة لاتوصف اما ريحة عطرو تخليك طيحي فيه بلا هواك ...نكافات و الكوافورة بقاو غير حالين فيه فمهم... هز راسو بانولو خارجين من البيت و قال بصوت حنون موجه كلامو لزبيدة
كاظم: الحنانة شنو واقع مالكم خارجين واش مزال ما غاتبداو ولا كيفاش ؟؟
زبيدة : لا غانبداو دابا غير بغيناك تشوف عروستك و تاخد راحتك معاها فالهدرة و حنا من دابا شوية غانجيو عندك [غمزاتو ]
كاظم ضهرات ابتسامة خفيفة على ملاميحو و دور وجهو جنب حك دقنو و رجع شاف فيها و قال بصوت حنون
كاظم : الله يخليك ليا أ الحنانة ديما كتفهميني
عنقها و باس ليها راسها و باس راس فضيلة اللي باركت ليه و رضات عليه و انصارف الجميع ...
قرب هو بخطوات مسرعة لجيهة الباب و حط يدو على البوانيي و فتحوا بسرعة متشوق ايمتا يشوف راحة قلبو و هنا كانت صدمة ثلاثية الابعاد منين جات عينو فعينيها تربط الكلام فلسانو و حتى هي ما كانتش أقل منو طلعاتو بإعجاب بلا ما تعيق ماحس براسو حتى سد الباب بسرعة و تقدم عندها بخطوات بطيئة و حاس بأنفاسو ثقالو عينو ما كرهوش يبقاو غير مفيكسيين عليها كيطلعها و يهبطها بإعجاب و مع كل نظرة قلبو كيتسارعو نبضاتو حتى شك فأنه باغي يخرج من صدرو اش هاد الجمال اللي ماقدرش يتحملو قلبو ؟؟ ما حس براسو حتى جرها من يدها و ضربات فصدرو تصدمات من حركتو السريعة اللي قام بيها و لكن ماقدرش ما يعنقهاش ما قدرش ما يضمهاش لصدرو ما قدرش ما يشمش ريحة عطرها ماقدرش ما يمررش يدو على شعرها الرطيطيب اللي سطاه ...ضمها بقوة حتى خنقها و حشا راسو فعنقها كانها هي الوطن اللي ما كرهش يضمو و يبقا ساكن فيه هز يدو مررها على شعرها الحريري ... هنادي حتى هي ما قدراتش تقاوم أحاسيسها و قلبها اللي كيملي عليها شنو دير هزات يديها بتثاقل و حطاتها على ضهرو و زيرات عليه ...طال العناق لمدة دقائق و فالاخير قرر أنه يبعد و يشوف صورة وجهها الملائكي الذي يشع نورا ...
تلاقت عينو مع عينيها للمرة الثانية و هاد المرة حط يدو بجوج على خدودها حتى رجع وجهها كامل بين يدو و قال بصوت حنون بورش هنادي كاملة
كاظم : باغا تقتليني أحبيبي
مع هاد الجملة قرب و باسها فراسها و بقا مدة حاط شفايفو على جبينها و هي مغمضة عويناتها حتى بعد و قال وصبعان يديه كيمررهم بحنان على خدها ....
هنادي ابتاسمت على كلماتو الجميلة المضحكة فنفس الوقت و قالت بصوت خجول
هنادي: شكرا [سكتات مدة و كملات كلامها ] شكرا حبيبي
كاظم حط يدو على جبينها و قال بصوت حنون
كاظم : فخبارك بلي نتي دخلتي لحياتي و رونتيها شنو درتي فيا حتى رديتيني مدمن عليك لهاد الدرجة لدرجة ان قبيلة فاش مشيتي حسيت بثواني أيام و دقائق كأنها شهور اما ساعات ما نهدروش عليهم هادوك كيدوزو بستة و ستين كشيفة
هنادي ابتاسمت و بعدات عليها و قالت بصوت طفولي بريئ و رمشات عويناتها بشكل سريع خلات دقات قلبو يتخربقو
هنادي: كيف جيتك ؟؟؟
كاظم سكت مدة و دار يدو على جنبو و تحولو ملامح وجهو لتخنزيرة
كاظم: فين درة اللي قلتلك ديري ؟؟؟؟
هنادي قربات ليه و شدات فيديه و دلات شنيفاتها و غبنات وجهها و قالت بصوت أنثوي
هنادي: عفااك خليني نعري شعري بليييز كيمو بليييز
كاظم : لا هي لااا
هنادي: حرام عليك ما بقيتش فيك شوف كيف جيت زوينة عفاااك عفااااك
كاظم طلع حاجب و نزل لاخور و تمشا بخطوات مسرعة و جلس من فوق السرير و طلع فيها و هبط و جات على بالو خطة شريرة سكت مدة و فالاخير نطق و قال
كاظم : نخليك تعريه و لكن بشرط
هنادي طرطقات فيه عينيها و قربات ليه جلسات حداه و شدات فيدو و قالت بفرحة
هنادي: تشرط احبيبي غير تشرط
كاظم قرب ليها حتى ما بقا ليه والو و يدخل فوجهها و حط يدو على شنايفو و دار فيها نظرة شريرة و قال
كاظم : بوسيني نخليك
هنادي: كيفاش بوسيني ؟؟؟
كاظم : ياك دابا انا وياك مزوجين بالفاتحة امام الله و رسوله يعني بلا ما تقولي ليا مازال ما خطبتيني ولا ما نعرف اش و اليوم غانديرو لاكط راه العدول من دابا شوية غايجي ما عندك حتى عذر أراحة قلبي
هنادي قالت بخجل و حنات راسها
هنادي: ولكن ما نقدرش كنحشم حشومة عليك
كاظم ابتاسم بشر و قال
كاظم: ربحتك على هاد الحساب دونك غاتديري درة
هنادي دلات شنيفاتها بصبيانية و قالت
هنادي: حرام عليك
كاظم : بوسيني و نخليك ما بسيتينيش راك عارفة اش كيتسناك أحبيبي
هنادي بقات كتشوف فيه مدة و هو كيشوف فيها مدة و قالت بصوت خجول
هنادي: غمض عينيك ما نقدرش نبوسك ونتا كتشوف فيا
كاظم غمض عينو وقال
كاظم : يالاه هاانا مصاب غير ديريها
هنادي بقات مترددة مرة كتشوف فشنايفو مرة كتعوج فمها فالاخير توكلت على الله و قربات حطات شفايفها على شفايفو بسرعة و بغات تبعد و هو يحط يدو من مور شعرها و حل عينو و ابتاسم و قال
كاظم: هاكا كتكون البوسة
حط شفايفو على شفايفها بحنية و باحترافية فنفس الوقت حتى خلا شفايفها مابين شفايفو وكيمص فيهم كأنهم حلوة لديدة ما كتشبعش منها خصوصا ان العكار اللي كانت دايرة كان فيه رائحة الفراولة أكثر فاكهة كيحماق عليها الشيئ اللي زاد جننو على شفايفها ما بغاش يطلق منها كيقبلها بحب و بشغف كبير لا يوصف خشا يدو ما بين خصلات شعرها بقوة اللي مابغاش يبعد عليها منتشي لاقصى درجة كأن شفتيها قنينة خمر ...
❤💋❤
ارجوك اسألي شفتيك
بأي نار حرقتني..
كيف من نفسي سرقتني
وبأيي قيدٍ أسرتني!
❤💋❤
بدات كتنين كأنها باغا تبعد من عليه و لكن هو لصق فشفايفها ما بغاش يتفاك منهم بحال دارو ليه الصمغ فيهم حطات يديها على صدرو كدفعو عاد فاق سيد و ما طلق من شفايفها غير بالكشايف و شكون هدا اللي كيسخا بشفايف بنكهة الفراولة ؟؟؟...
بعد عليها و حط جبينو على جبينها ونفس كيطلعو بوتيرة سريعة كأنه كينهج تحلف عليه كأنه كان فسباق ماراتون و حتى هي كانت بحالو نفس كطلعو بوتيرة سريعة مزالها مصدومة من هادشي اللي دار و حنيكاتها إحمروا خجلا ولاو كيف شي وريدة تشهى تحطاه غير فيديك ....
كاظم : رحمييني أحبيبتي شنو هادشي كنحس براسي بحال دخلت لعالم أخور و ترفعت علاش مفيقاني ؟؟؟
هنادي: تخنقت
كاظم ابتاسم و ضمها لصدرو و قبل راسها بحب و قال
كاظم: برا و الباس عليك أبنتي
هنادي بعدات عليه حيت خافت يتخربق ليها شعرها مررات يديها عليه كأنها كتقادو و طلقات لسانها ليه و قالت بصوت طفولي
هنادي: غلبتك يعني غانخلي شعري عرياان
كاظم : نتي ربحتيني و لكن اللي خلقك أبنتي واش الا حيديتها غاتربحيه ولا غاتخسريه
هنادي تزيزنات زمتها فهادي بقات غير كتصرط ريقها و ترمش و كتشوف فيه....
كاظم: جاوبي مالك سكتي حياتك كاملة و نتي كديري زيف جيتي حتى لهاد نهار و غاتعكسي
هنادي : ولكن غير هاد نهار
كاظم حرك راسو بنفي و قال
كاظم: السيئة اللي ممكن تجمعي هاد نهار تقدر تضربلك كلشي فالزيرو و مالك على حالك ديري زيف ديالك أصلن نتي زوينة فكل حالتك
هنادي بدات كتدور هدرتو فراسها و فالاخير حطات يديها على خدها و تكات عليهم بوجهها بشكل كيووت و قالت
هنادي: بصح انا زوينة فكل حالتي
كاظم : جمالك آية من أول شوفة تسحري بشوفتك كنسا الأحزان و الهم اللي مورايا [ شد فيديها و قال بصوت حنون بورشها كاملة ] منلي كتكون يديك فيديا كيرتاح البال و كتولي نفسي هانية [مرر يدو على خدها ] حبك غالي أبنتي فيه الدوا لدايا و كلشي يهون منلي كاتكوني حدايا [ جر نيفها بصبعانو بشكل طفولي و قال ] شنو ندير ليك دابا
سؤال فلسفي صعيب أنو يجاوب عليه عرفها قصدات ملاك سؤال اللي كيعصبوا ولكن حاول يبرد باش ما يتعصبش وقال بصوت رجولي طاغية عليه الخشونة ...
كاظم: فوقتما كنبغي نديباسي ديك المرحلة كاتجي و تفكريني أبنتي ما كنبقاش فيك ؟؟
هنادي تغرغروا عينيها بدموع وحنات راسها كتلعب فصبعانها بتوتر وهو حاضيها كيتسناها دير شي رد فعل ...فالأخير قالت وهي مزالها على نفس وضعيتها
هنادي : متفهمة أن مراتك الأولى كانت كتعني ليك و ربما كنتي كتبغيها بزاف ولدرجة لا تتصور و بما أنك بقيتي خمس سنين بلا زواج فهاذا كيعني قيمتها و معزتها بالنسبة ليك عارفة مرضتك بهاد الأسئلة اللي ما كيتقاداوش على ملاك و لكن انا براسي ما عارفاش علاش كنطرح هاد الأسئلة [هزات راسها و شافت فيه و قبطات فيدو و كملات كلامها ]كنبغيك أكاظم بزاف و ما باغاش قلبك يزاحمني فيه شي حد بغيتك ففترة قصيرة آه ما نكرش ماكاملاش حتى يوماين باش تلاقينا و كلشي داز بسرعة البرق و هاحنا دابا كنتزوجوا ولكن فيك جانب زوين حنوون بزاف إهتمامك بماماك وكيفاش كتعاملها شخصيتك القوية اللي كتفرضها فأي بلاصة تعامل ديال عائلتك معاك هادشي كامل خلاني نشوف فيك ونلمس فيك شي حوايج اللي انا كنت مفتاقداهم شي حاجة مميزة طوشااتني كأنثى هاد الكلام غاتبقا ديما تسمعوا من فمي حيت ما نقدرش ما نعبرش ليك على شنو عندي هنا [حطات يديه على قلبها ] ما عمري كنت متوقعة أنني غانحظى بشخص مثالي واخا الكمال لله و لكن حتى عيوبك انا كنشوفهم حاجة زوينة و كيقولك اللي غايبغيك ما غايبغيش إيجابياتك غايبغي سلبياتك هوما اللوالة [حطات يديها على خدو ] عارفة كلامي غايصدمك و لكن واخا تكون مزال كتبغي ملاك أنا غانبغيك رسول صلى الله عليه وسلم فاش ماتت خديجة رضي الله عنها و تزوج بعائشة كان ديما كيدكرها أمامهم رغم أنه كان كيبغي عائشة بزااف ...
كاظم بقا غير كيشوف فيها وكيرمش صدماتو بكلامها اللي ما كانش متوقعو بتااتاا ربما بكلماتها لمس فيها واحد الجانب زوين ألا وهو النضج ربما اللي كان مفتاقدو فملاك من ديما كلماتها كيأثرو فيه بشكل كبير ما عرفش علاش ؟؟ كأنها كتلقي عليه سحر خااص ...
هنادي: شفتي شحال انا ضريفة [نزلت دمعة من عينيها بسرعة كتجري ] ربما نكون كنحس بالغيرة ونارها صعيبة كتحرق ولكن مانقدرش ماشي بيدي حتى عائشة رضي الله عنها كانت كتغير من خديجة واخا كانت ميتة سمحلي الا قلقتك شي نهار نتمنى نكون إمراة حرة ديال زمان كيفما كتقول مي على قبلك غانحاول ندير أي حاجة باش ترضي عليا و تنساها [سكتات مدة و رجعات كملات كلامها ]حاجة وحدة اللي ما نحملاهش هي الخيانة ما نقدرش نسامح عليها أكاظم نتا بغيتي تعرف شخصيتي و شنو اللي كايعجبني و شنو اللي ما كيعجبنيش و هانتا عرفتي عفاك ما تخونش ثقتي فيك ...
كاظم صاط أنفاس سخونة وغمض عينو وحط جبينو على جبينها حل عينو بثاقل وقال بصوت حنون
كاظم: ماتقدريش تخايلي قداش كتفرحيني بكلامك وما تقدريش تخايلي قداش انا راضي عليك وما تقدريش تخايلي قداش قلبي كيبغيك وما تقدريش تخايلي شحال أنا محتاج ليك شنو درت فحياتي باش رزقني ربي بيك وتيقنت بلي نتي أجمل رزق جاني من عند الله نتي دليل ديال محبة ربي ليا ملاك اه هي مراتي اللولة و كنبغيها حقا ولكن منين دخلتي لحياتي ولات عندها معنى باش نكون أنا وياك مفاهمين أحبيبتي نتي فيك حوايج مختالفة على ملاك خلاتني نعشقك كإبنة أولا وهادشي بحكم صغر سنك وانا كنحس بشعور الأبوة معاك حيت... [ ماعرفش علاش سكت حيت كان غايزڭم يقولها الحقيقة ولكن تراجع فآخر لحظة بمجرد ما تذكر كلام زبيدة و فكر أنها تقدر مايعجبهاش الحال و كتمها فنفسو...تنهد و كمل كلامو ] حيت نتي عشتي يتيمة وانا هنا باش نعوض داك الفراغ ونكون باباك و حبيبك و صاحبك وخوك و اللي بغيتيها أنا موجود... مسحي ديك دمعة اللي نزلات من عينيك ما كيعجبونيش البنات البكيات ولكن نتي فاش كتبكي الحاجة الوحيدة اللي كنبغي نديرها هي نبوسك...
هنادي مسحات دموعها كضحك و كتنش بيديها على عينيها باش ما يضيعش المايكاب ...
قال كاظم بإبتسامة محاولا تلطيف الجو ...
كاظم : عناايبي مع راسي ياك
هنادي إبتسامتها تحولات لضحكة هيستيرية خلات قلبو يضرب بقوة وداتو ترعد بسرعة وعينيه يسهاو فيها وودنيه يتصنتو بإصغاء لصوت ضحكتها كأنه لحن موسيقي رائع يطربها ...
كاظم قرب ليها حتى خشا وجهو فيها وهز يدو كيلعب بشنيفاتها حتى كيردهم على شكل kiss 💋💋
كاظم: ضحكتك شي نهار غاتسكت ليا القلب فخبارك
هنادي ابتاسمت بخجل وحركات راسها بنفي وبعدات و قالت
هنادي: ونتا راك سكتيه ليا من زمااان
كاظم فرح لكلماتها اللي بينو ليه بلي ولات مطلوقة معاه صدامتو فتحاتلو قلبها بشكل كاامل و بدات كتضهر شخصيتها الحقيقية شيئا فشيئا الشيئ اللي خلاه يشعر بسعادة لأنها بدات كتصرف بعفوية حداه و هادشي اللي كيعجبو ...بقا ساكت مدة كيتأمل فوجهها الجميل و طلتها الرائعة كالقمر ...ماحس براسو حتى جرها و خداها بين أحضانو وضمها لصدرو اللي حسات بيه كيطلع و ينزل بصعوبة قربها منو كيخلي إعدادات جسدو تخربق واش هدا كامل عشق بدا كيحس بيه من جيهتها ؟؟؟ من يدري...
مرر يدو بحنان على ضهرها وحشا راسو فعنقها، كيتنهد و كيتنفس بثقاالة كل نفس كيطلعو كيعطيه حقو الشيئ اللي كيخلي داتها تبورش كااملة و كملها بكلماتو اللي خلاتها هي بدورها توتر و تحس بمشاعر و أحاسيس رائعة ...
كاظم : أنا غير واحد كان مجروح فالقلب وفروح انا بحال شي واحد مات حتى جيتيني من بعيد و حييتيني من جديد انا وليت معاك واحد ثاني ما بقيتش كنعرف راسي خربقتيلي ليا البراميطير د قلبي سكرت بغرامك أ راحة قلبي و مابغيتش نفيق أنا بخلاصة وليت مدمن عليك [ختم كلماتو بقبلة فعنقها خلاتها تقفز من مكانها هاد نهار صدمها بالمعقول ما بقات عارفة مادير ولا كيف تصرف و لا كيف تهدر داكشي علاش كمل كلماتو اللي كتطيح على قلبها كيف قطرات الماء و كتحيي قلبها بعد سنوات من الجفاف وهو مزال على نفس وضعيتو ] أجمل دولة كنعيش فيها حدودها هما أحضانك وقانونها هو حبك وشمسها عينيك و قمرها شفايفك و شعبها كيتكون من كاظم فقط و الملكة ديالو هنادي [كمل كلامو و كيمرر يدو على ضهرها بحنان ] نتي قلتي ما بغيتيش نخون ثقتك وانا غانقولك ما تخلينيش حيت بلا بيك ما بقيتش قادر نعيش الا مشيتي عليا نقدر نحماق خايف نبغيك بزاف و فاش تمشي نحماق و خايف ما نبغيكش و نضيع فرصة أنني نحب أجمل ملاك على وجه الأرض انا عايش حالة لاتوازن منين عرفتك و حياتي غادة مزيان الا قلبي اللي ولا فحالة فوضى انا كنخاف من نهايات و خايف نخسرك معقد من الفراق و من الموت داكشي علاش ما تخلينيش واخا يوقع بيناتنا اللي وقع ما عمرك ديريها نقتلك و نقتل راسي معاك ...
بعدات عليه هنودة و ابتاسمت و حركات راسها بنفي
هنادي : حتى نكون مسطية باش نخليك ماعمري نديرها و ما عمري غانديرها واش كاينة شي وحدة بعقلها غا تسمح فواحد بحالك [حطات يديها على خدو و كملات كلماتها ] نتا بحال طااكوس و بحال بسيطلة و بحال نوتيلا الحياة دونك محااال تعيشها هههه
كاظم هز راسو كيشوف فسقف كيضحك برزانة بطريقة خطيرة هبط راسو وغمزها بطريقة خلات قلبها يتهز من مكانو تلفها ، قال بابتسامة
كاظم : عنابة من درجة طاكوس
هنادي: مانوصلش ليك و لكن ما تحكرنيش راني أدبية و الا تغزلت بيك نصدمك أبيبي
كاظم حط نيفو على نيفها وعم صمت لثواني غير صوت انفاسهم اللي كيتسمعوا و قال بصوت حنون
كاظم: ما نكرهش
هنادي سكتات مدة وكتفكر فشي شعر وما لقات غير واحد القصيدة اللي قريبة لقلبها بزاف وحافظاها عن ضهر قلب ديال قيس بن الملوح ...
هنادي: لو كانَ لي قلبان لعشت بواحدٍ وأفردتُ قلباً في هواكَ يُعذَّبُ لكنَّ لي قلباً تّمَلكَهُ الهَوى لا العَيشُ يحلُو لَهُ ولا الموتُ يَقْرَبُ كَعُصفُورةٍ في كفِّ طفلٍ يُهِينُها
تُعَانِي عَذابَ المَوتِ والطِفلُ يلعبُ فلا الطفل ذو عقلٍ يرِقُّ لِحالِها ولا الطّيرُ مَطلُوقُ الجنَاحَينِ فيذهبُ
تحل الباب بسرعة بعدات هنادي فالبلاصة على كاظم و هزات عينيها تشوف شكون واقف لقات معتز بجلابتو و طربوشو و هاز فيدو طربوكة بقا واقف مسمر كيشوف فيهم ...
كاظم غمض عينو و عاود فتحهم ما عجبوش الحال و عرف شكون بلا ما يدور حيت عارف معتز هو اللي فيه هاد القاعدة دار عندو بالعرض البطيئ و قال
كاظم : لاش ناس دايرين الباب ؟؟
معتز : باش نحلو و ندخل
كاظم دور وجهو جنب و ابتاسم و رجع شاف فيه و قال
كاظم : ما فراسكش بلي أنا و مراتي هنا بوحدنا من قلة الادب دخل بلا ما تدق
معتز : ياك بعدا ما لقيتكمش فشي وضعية فشكل غير كنتي حاط عليها نيفك دابا هادي فيها شي حاجة حتى انا نجي نحط عليك نيفي شنو فيها غير قولي شنو فيها ؟؟
هنادي ابتاسمت بخجل و قالت
هنادي: هانية أمعتز دخل مرحبا بيك
معتز دخل و سد الباب و خطا خطوات فإتجاههم حتى وقف حدا راسهم و ديك طربوكة فيدو و قال و عينو على هنادي كيطلعها و يهبطها بإعجاب شديد و قال
معتز : با كاظم دبرتي على سلعة نقية
كاظم جر هنادي و خبا وجهها فصدرو و حط يدو من مور شعرها و زير عليها و قال بصوت رجولي خشن
كاظم : جمع عينيك و لا نخسر أنا و ياك
معتز : داير ليا فيها راك مغيااار زعما
كاظم قال بصوت رجالي خشن
كاظم: غانوض نخلي دار بوك
معتز : هنادي أصلن عشيرتي
كاظم طلع حاجب و هبط لاخور و قال
كاظم : من نيتك أولد العبد
معتز : تشرملتي أعشيري
كاظم : برب الجليل حتى نوريك وجه عمرك شفتيه وقلب ستة تسعود كيفاش عشيرتك رد البال لشنو كتخرج على فمك
هنادي شداتها ضحكة و صدمة من كلامو عمرها سمعاتو كيهضر بهاد الشكل القااصح و هو أصلن مربي فأحياء راقية منين غايجيب هاد المفردات سؤال حيرها بعض الشيئ بغات تبعد عليه وهو يزير عليها هزات فيه راسها و قالت
هنادي: كاظم طلق مني خنقتيني
كاظم : باغا تمنضري فمعتز ثبتي لأرض
هنادي طرطقات فيه عينيها و قالت
هنادي: كاظم واش باغي تجلطني طلق مني راك والله حتى خنقتيني
معتز كيموت بضحك حط رجلو من فوق الناموسية و دار طربوكة على رجلو لوخرى و بدا يطبل و يغني غير هو و راسو باش يزيد يفقص كاظم ...
أنا لست إبنتك أنا زوجتك الجزء السادس
محتوى القصة
التنقل بين الأجزاء