يقولون بأن الحب الأول لا يموت بل يأتي الحب الحقيقي ليدفنه حيا و يقولون أيضا “اذا احببت شخصين في نفس الوقت قم باختيار الثاني ، لانك ان كنت حقا تحب الاول لما وقعت في حب الثاني”
نعود من جديد بقصة مغايرة بعيدا عن قصص العنف و الاغتصاب و طاية حوتة و عينين زورق 🙄🙄 قصة بطابع هادئ رومانسي فكرة جديدة لم أرى مثلها في أي قصة من قبل ....
يمكن يجيكم العنوان غريب و لكن ثيقوني تعدبت باش نلقاه لان القصة بحد ذاتها غريبة فكرتها...
هي قصة من وحي الخيال و لكن صدقوني غاتحسو بيها كأنها حقيقية و ممكن توقع شكون عرف ما كاينش المستحيل فدنيا أكيد غاتساءلو علايش غادور أحداثها و غاتبغيو تلخيص عليها و لكن ما غانقول والو حتى تكتاشفوها بنفسكم و غاتفهمو بالضبط علاش عنوانها
انا لست إبنتك ....أنا زوجتك
الحاجة اللي غانقول هو أن اللي غاتقراها ما تكرهش تكون فبلاصة بطلتنا ....
هاد القصة غانهديها لأي بنت كاتبغي كتابتي لاي بنت كايعجبوها قصص الرومانسية الخيالية اللي كتحس بيهم واقعية انا كيعجبني نسرح بخيالي و أي وحدة كتبغي تعيش الخيال الرومانسي تفضل معايا وتربط الحزام ديالها حيت غانطالقو فرحلة عشق من نوع خااص
💞💞💞 تقديم:
عجيب أمر هاد الحياة واخا تعطيك السعااادة لا بد تحرمك منها ما يمكنش تعيش مرتاح ضروري من الألم ...
كنتألموا فاش كنشوفو اللي كنعشقوهم ما كاينينش فحياتنا كنتألمو فاش كنعجزوا من أننا نبوحو و نقولو لأقرب ناس لينا شنو ضارنا كنتألمو فاش كنتوحشو و كنشتاقو لشي شخص و ما كايكونش معانا كنتألمو و حنا ما عارفينش واش حنا اللي عاجزين على الكلام و لا الكلام اللي عاجز علينا ؟!!
كيقولو بأن لغة الصمت أفضل لغة للتعبير
فماذا لو عجز الصمت مثلما عجز الكلام؟؟؟
حتى واحد ما غايقدر يفهمك فاش كايكون الما فيديك و لكن الجفاف فصدرك ...
حتى واحد ما غايقدر يفهمك فاش كتبغي تهرب من الجسد ديالك و تغراق فقلبك
حتى واحد ما غايقدر يفهمك فاش كيكون النور حداك و لكن الظلام فيك
كيقولو بلي إمرأة وحدة تقدر تغني الراجل على الف مرأة ...
وألف امراة قد لا تغني الرجل عن إمراة واحدة
فبعض النساء وطن لا يخمد الحنين إليه ....
أنا لست إبنتك ...أنا زوجتك!
💞💞💞💞
سيااارة من نوع شيفرولي عالية جاي شكلها بحال كاط كاط فلون أبيض غادة فطريق بسرعة مرتفعة ...
كيسوقها شاب يكون فحدود الثلاثينات وسيم جدا شعرو رطيطب لحية خفيفة مزينة دقنو ولونو مبرونزي ملاميحو حرشين مثلو مثل أي شاب مغربي عندو الفلوس و مهلي فراسو ...
ابتسامة وااااسعة مرسومة على شفايفو الشيئ اللي خلا سنيناتو البويض المستفين بطريقة جميلة يبانو و يزيدوه وساامة على وسااامة ...
باين من ملاميحو بلي فرحااان و غايطير بالفرحة لما لاااا و زوجتو و سندو فالحياة جالسة بجنبو و أخيرا عرفو جنس الجنين اللي تكون فأحشائها إحساس لايوصف ما عرفش كيفاش يعبر على فرحتو حيت عرف بلي اول مولود ليهم غايكون أنثى شنو غايبغي من دنيا أكثر من هادشي زوجتو اللي كيحماق و يتسطى عليها غاتولد ليه نسخة مصغرة عليها ....
ولكن الغريب فالامر ان الزوجة ديالو كانت مدورة وجهها لزاجة و ما عاجبها حال و مقلقة ...
بنت مزيونة كل علامات الجمال فيها بيضة و شعرها طويل واصل حتى لظهرهاو صابغاه بالمارون عوينات كباار و مشفرين ولابسة كسيوة طويلة فالاحمر جاية معاها و كريشتها سابقاها شوية بحكم ان عندها أربعة أشهر فضروري غاتبدا تبان ...
حط يدو على كرشها و قال بحب و بحنان
~: بنتنا كاينة هنا متشوق نشوفها و نهزها بيدي غاتكون زوينة بحالك أحبيبة من ديما كنت كنقولك بغيت نسخة مصغرة عليك من ديما كنقولك بغيت بنيتة نلعب انا و ياها و نتهلا فيها و نفششها من ديما كنقولك بغيت نمشط شعر ديال بنتي بيدي و هاهو اليوم غايتحقق الحلم شنو بغيت أكثر من هادشي *هز يد زوجة ديالو باسها و عينيه مع الطريق * بغيتها تشبه ليك فكلشي حتى من الخالة اللي عندك حدا شفايفك حتى من الخط اللي عندك فيدك بغيتها تشبه ليك فحنانك و فقلبك *تنهد و كمل كلامو *بغيتها تكون نسخة مصغرة عليك بغيت نشوفك و نتي صغيرة
بقات الزوجة ديالو ساكتة و سمع شهقاتها كتعلى و كتزيد و باين بلي كتبكي تزعزع قلبو و هز يدو و دور وجهها لجيهتو و شاف عينيها عامرين دموع و وجهها
أحمر و كتبكي بحرقة ...
بقا هو غير مصدوم و كيشوف فيها تارة و تارة أخرى كيشوف فالطريق حس بقلبو كيرجف ما بين ضلوعو ما كيستحملش يشوفها كتبكي ولا مقلقة ....
منين حملات تبدلات عليه ولات عاطياها غير البكا ولات نفسيتها مزفتة ولات بحال شي بيبي صغير ولكن أصلن هو مفششها و ما كيخليش من جهدو باش تبقا فرحانة و الابتسامة مرسومة على وجهها و لكن شنو كيوقع ليها هو براسو مافهمش لدرجة أنو تكلم مع دكتورة ديالها على حالتها و فسرات ليه بلي بعض النساء ففترة الحمل كيوليو كيف شي بيبي صغير كيوليو عاطيينها غير البكا و نفسيتهوم كتولي جد كئييبة ....
مرر يدو على خدها كيمسح دموعها اللي كيحس بيهم كيف قطرات سم على قلبو ما كيستحملش يشوفهم و قال بصوت حنون كيبورش
~: مال مفششة قلبي مقلقة علاش كتبكي أحبيبي امم
دورات وجهها و بقات كتشوف فيه مدة و مسحات دموعها بيديها و دورات يديها على دراعو و حطات راسها على كتفو و صدرات منها تنهيدة و قالت بصوت فيه البحة ديال الحزن و البكاء
~: كنبغيك بزاف لدرجة مابغيتش تجي شي بنت تشاركني فيك بديت كنغير عليك من دابا اهئ اهئ
ضحك على كلامها و على حبها المتملك و على غيرتها من بنتها اللي مزال ما خرجات لدنيا و قال بصوت حنون مرة اخرى من ديما نبرة صوتو هادئة و زوينة و كتبورش البحة فصوتو خطيرة غير صوتو كيخليك طيحي فيه اما تصرفاتو كلام أخور
~: ما كاينش اللي غاتاخد بلاصتك كنقسم ليك بالله و دابا مسحي دموعك أ تاج قلبي *سكت شوية و كمل كلامو * شنو غاتسمي بنتنا أ العمر ديالي
هزات عويناتها فيه و قالت
~:غانسميها هنادي
هبط عويناتو و شاف فيها و قال
~: إن شاء الله
بالهزة باش كيهز عينيه كتبان ليه طوموبيل جاية من نفس الطريق اللي هو غادي فيها بسرعة بغا يقلب لجيهة لوخرى و هو يتساطح مع طوموبيل أخرى و بسرعة اللي كانو جايين بيها الطوموبيلات بجوج تعجنو و تسمعات بووووووووم💥💥
💔💔
كيف لي أن أشفى من حبك ؟
من يداوي جرح قلبي من بعدك؟؟
كيف لي ان أشفى من بحثي عنك ووجعي إليك؟؟
من سيوقف إدماني عن عشقك ؟
هل يمكنني أن أجد لأسئلتي جوابا؟؟؟
💔💔💔
حل عويناتو و سالت دمعة منهم تمنى لو أنه يكون كيحلم تمنى لو أن هادشي كامل كان مجرد خيال تمنى لو ان ربي ما ابتالاهش فحياتو بهاد الطريقة تمنى لو انو الوقت يرجع اللور و يشوفها و لو غير ثانية و يقبل جبينها تمنى لو أنها بقات عايشة كن راه دابا بنتو عندها خمس سنين و كن راها كتفيقو من نعاسو و تلعب معاه و يشريلها اللي بغات و يدلعها كن بقات مزال عايشة ربما غايكون عندهم جوج ولا ثلاثة ديال الابناء ياك هو عزيز عليه الاطفال صغار .....
حبيبة روحو و مفششة قلبو كيفما كان كيسميها علاش مشات وهو مزال ماشبع منها ؟؟؟ علاش مشاو و ضاعو منو أكثر الاشخاص اللي كان كيحماق عليهم مرتو و بنتو دقة وحدة علاااش هو اللي يتعدب ؟؟ علاش هو اللي يوقع ليه هادشي؟؟ كان كيتمنى لو أنه يموت هو و هوما يبقاو عايشين ولا يبقا عايش فهاد العداب اللي كايكل قلبو نهار على نهار حياتو ما بقات عندها معنى من موراهم...
أش هاد الحزن و الكآبة اللي عايش فيها واش مزال شخص اللي يبقا وفي لحبيبتو و مخلص لزوجتو حتى لهاد الدرجة ؟؟؟
حول نظراتو ليدو اللي كان هاز فيها تيشورت كان عزيز على مرتو اللي كان إسمها ملاك ...
ملاك ما كانتش مجرد زوجة بل كانت أكثر من دلك كانت هي قلبو هي روحو فقدانها ما كانش ساهل بالنسبة ليه صعيب على قلبو و عقلو يستحملو فراقها صعيب عليه يفيق كل صباح و ما يلقاهاش بجنبو صعيب عليه يبغي يعنقها و يشم ريحتها و ما يلقاهاش صعيب تكون قطعة من قلبك تحت تراب ....
قرب تيشورت ديالها اللي كان هاز فيدو لنيفو كيستنشق عبيرو كأنه كيصبر راسو بهاد الطريقة على فراقها هاكا على الاقل كيتخايلها بلي باقا حداه...
قال بصوت حزين
~: صباااح الخير أتاج قلبي
بقا ساكت مدة و تنهد و سالت دمعة من عينيه و قال بصوت متعب
~:توحشتك مشيتي و خليتي ريحة عطرك فقلبي ياك ما عمري آديتك علاش مشيتي و خليتيني تالف بلا بيك امم
كانت ناعسة بجنبو بنت صغيرة يكون عمرها فحدود الست سنوات مغمضة عويناتها و شعرها مبوكل ...
سمعات صوتو و بدات كتفتح عويناتها حتى بان لونهم اللي كان فالزيتي لون مميز جاي مع ملاميح وجهها الملائكي ..
هزات يديها بتتثاقل و حطاتها على لحيتو و قالت بصوت فيه البحة د نعاس
~: bonjouuuur
دور وجهو جنب و مسح دموعو و عاد دار شاف فيها و ابتاسم ليها بحزن و قال
~: فقتي أ الكسولة
حركات راسها كأنها كتأكد كلامو حيدات الغطا عليها و ناضت و جلسات فوق كرشو و باستو فخدو و هزات يديها و مسحات دمعة من على خدو و ميلات راسها شوية و قالت
~: ما كيجيش معاك البكا أعمو و الله
ابتاسم ليها بحب و حرك ليها راسو بالايجاب و قال
~:عاارف ابنتي و لكن ماشي بيدي *دار صبعو على فمو بمعنى شوت 🤫 و كمل كلامو * ما تقولي لحتى واحد بلي شفتي دموعي واخا * مرر يدو بحب على شعرها المبوكل و قال * خليه سر بيناتنا
~: je te promets *كنواعدك*
كن كانت مراتو عايشة كن راه بنتو قدها هز يدو بتثاقل و مررها على شعرها المبوكل و شد وجهها الصغير بين يديه و قربو لشفايفو و باس جبينها و ضمها لصدرو بقوة و غمض عويناتو و كيتخايلها كأنها بنتو اللي كانت غاتكون من لحمو و دمو و قال بصوت مايل للهمس
~:هنادي
كيزيد يضمها لصدرو و كيردد نفس الكلمة ( هنادي) ...
بعدات البنيتة صغيرة من حضنو و قالت بصوت بريئ
~: أنا سميتي جنات أعمو علاش كتقولي ديما هنادي ؟؟؟
تحل الباب ديال الغرفة و دخل شاب كيشبه لشخص اللي فالغرفة شاب طويل و صحيح و ملاميحو حرشين لحية خفيفة مزينة دقنو و ملاميحو صارمين لابس تيشورت أسود مع شورط و باينة فيه عاد فايق من نعاس قال
~: كااااظم
التافتو عندو بجوج بيهم و قفزات جنات من حضن كاظم و ناضت كطير و عنقات الشخص اللي حل الباب و قالت
جنات : بااااباااا صباح الخير
ابتاسم ليها و هزها من الارض و قال
~: كيف جاتك نعيسة حدا عمك زوينة ياك
حركات راسها بالايجاب و قالت بصوت حزين
جنات: عمو كاااظم زوين كنحمااق عليه و لكن علاش كيقوليا ديما هنادي ؟؟؟ واش ما كتعجبوش سميتي
دلات شنيفاتها و بدات كتبكي و تنخصص فحضن باباها لقمان ...
حيد كاظم الغطا عليه و حط رجلو لارض و ناض و تمشا بخطوات ثابتة حتى وصل لعند لقمان و جنات و طلق ليها يديه بحال باغيها تجي لعندو و كيقول بصوت حنون
كاظم: ما غانبقاش نقولها ليك غير ما تبكيش عفاك اجي عند عمو
هزات جنات راسها من حضن باباها و دورات وجهها و شافت فكاظم اللي كيبانو عينيه فيهم حزن عمييييق ما عندو دوا...
ابتاسمت ليه جنات و طلقات ليه يديها و خداها كاظم من بين أحضان لقمان .و هزها فيديه و باسها فخدها...
لقمان قال بصوت صارم
لقمان:جنااات
شافت فباباها و قالت
جنات : oui papa
لقمان: ياك كنقولك عمك عزيزة عليه هاد السمية شنو فيها إلا عيطلك بيها
جنات حركات راسها بنفي و قالت بصوت طفولي بريئ
جنات: انا ما كتعجبنيش انا سميتي جناااات ماشي هنااادي
كاظم كيتأملها و كيسمع صوتها الطفولي اللي كيتسلل لمساميعو كيف شي لحن حزين ما عجبوش الحال فاش قالت على أكثر سمية كتعجبو هاد الكلام عارفها مزال صغيرة و لكن هو كيشوف فيها بنتو اللي توفات قبل ما تشوف النور ديال دنيا تنهد بحزن و قال
كاظم : ماشي مشكل أ لقمان غير خليها على راحتها
لقمان كيشوف فخوه بحزن عارفو بلي مقصح بزااف حط يدو على كتفو و قال
لقمان : ما يبقاش فيك الحال راه مازال صغيرة ما عارفة والو
كاظم شاف فخوه و حرك ليه راسو بالايجاب ...عم الصمت لثواني قليلة حتى كسرو صوت جنات اللي قالت
جنات: عمو غاندوشو انا و ياك كيفما ديما ياااك
كاظم قال بابتسامة
كاظم: واخا ندوش لبنتي هن..* غمض عينو و عض على شنايفو و عاود فتحهم حيت كان غايناديها بنفس الاسم و لكن استدرك الموقف فآخر لحظة و قال * جنات * حول نظراتو و شاف فلقمان خوه و كمل كلامو * جيب ليها حوايجها
عطاه بظهر و هو يسمع لقمان كيناديه
لقمان: خوياا
التافت و شاف فيه و جنات فيديه كتلعب فلحيتو
كاظم: نعام
لقمان: غير عطيها ليا انا ندوش ليها نتا راك عيان
كاظم سكت مدة ما تعداتش خمس ثواني و قال
كاظم: بالعكس غانكون عيان الا ما خليتينيش ندوش ليها عارفني مولف بيها بزاف ما كرهتش كن عطيتوها ليا نربيها و نديها معايا لفرنسا
لقمان دوز يدو على دقنو و قال
لقمان: ما كرهتش أخويا و لكن ...
هز لقمان يدو كيحك بيها مؤخرة شعرو و هو يقول كاظم بصوت حزين
كاظم: حتى واحد ما كيسخا يعطي بنتو ياك فما بالك اللي مشات ليه و هو مازال ما هزها بين يديه ما زال ما عرف شكلها كيف داير * تغرغرو عويناتو بدموع و كمل كلامو غير بزز* مازال ما حضنها ...
لقمان : كاظم ربي كبير ما كيحيد ليك حاجة حتى كايعطيك حوايج هما خلي إيمانك بالله قوي
كاظم: كن ما كانش إيماني بالله قوي كن نتاحرت شحال هادي ما عندي ما ندير بحياة ما فيهاش مفششة قلبي و بنتي هنادي
لقمان : الله يديرلك اللي فيها الخير الله يرحمهم و يوسع عليهم المهم هانا غانجيبلك حوايجها و هبط لتحت تفطر راه الواليدة كتسول عليك
كاظم: دابا نجي على ما نكمل تدواش لبنتي
قبل جبين جنات و ضمها لصدرو و كمل طريقو و دخل لدوش و سد الباب و حطها لارض و ربع يدو و قال بصوت حنون
كاظم: يالاه حيدي حوايجك
جنات حركات راسها بنفي و قالت بصوت كولو دلع
جنات: je suis princesse je ne travaille pas ( انا أميرة ما خاصني ندير والو )
كاظم ابتاسم على شكلها طفولي ابتاسم على البراءة اللي فيها و ابتاسم على الفشووووش اللي فيها و ما كاينش أصلن اللي مفششها قدو ...
مشا طلق الما دافي باش يعمر البينوار ....
و حنى لنفس مستواها و بدا كيحيد ليها الحوايج و هي كتبتاسم حتى خلاها غير بسليب فيه الوريدات فلون الوردي و هزها و حشاها فالما دافي و هز برودويات بنكهة الفراولة كيفما كتبغيهم و دارهم ليها فالما و حط ليها ألعاب على شكل بطات صغار كتلعب بيهم ...
و حيد التيشورت اللي كان لابس بقا غير بشورط و دخل حداها و طلق ليها شعرها و دار ليها شامبو وهز مشطة و بدا كيمشط ليها شعرها و هي كتفركل و تلعب عاحبها الحال كتفرح فاش كيدوش ليها ...
كاظم هو عمها اللي كتحماق عليه و هي جد محظوظة اللي عندها عم بحالو من أطيب خلق الله حنين لدرجة ما كتصورش و مدلعها لاقصى و ابعد الحدود قلبو أبيض و أطهر من البياض نفسو كااظم إسم على مسمى ما عمرك تسمعي منو كلمة د العيب طبعو هادئ و فنفس الوقت صارم كيفرض هيبتو فالمكان ما كيتعصب غير الا وصلات ليه العظم و فاش كيتعصب كيخرج كااع داكشي اللي خازن فقلبو هادي هي نقطة اللي خايبة فيه و من غير هادشي ما كاينش...
إنسان مثالي وكامل واخا الكمال لله ضروري من العيوب و لكن فاش كاتكون الايجابيات فشي شخص كثار كتغطي على العيوب القليلة اللي فيه ...
سالا ليها و لواها ففوطة و خرج لقا لقمان حاط ليها حوايجها من فوق السرير عبارة عن ملابس داخلية و سالوبيط ديال تجين و تحت منو تيشورت فالابيض لبسهوم ليها و ناض جبد السيشوار اللي شراه على قبلها و بدا كينشف ليها شعرها و هي كتشوف فيه و تضحك انتابه ليها كتبتاسم ليه و قال بصوت حنون
كاظم: علاش كاتضحكي ؟؟؟
جنات : حيت كانبغيك بزااااف
كاظم عض على شنايفو و قال
كاظم: كانبغيك أكثر منك
جنات: قداش ؟؟؟
كاظم : * بابتسامة * قد السما و قد الارض
جنات دارت يديها على فمها كتضحك و قالت
جنات: و انا كنبغيك قد البحر ههه
كاظم تنهد و حط من يدو السيشوار و جلس على ركابيه و قبط ليها وجهها بين يدو و قال
كاظم : المحبة ابنتي ما عمرنا كنقيسوها بالبحر ولا بسما و لا بالأرض حيت الحب كلمة من جوح حروف و لكن ما كنقدروش نعبروها حيت هو كلمة عظيمة *هز يديها و حطها على قلبو و قال * الحب كيكون عندنا هنا فهاد القلب الصغير الحب هو شعور كيبدا من العمق و لكن كيتحول لدافع العطاء للحماية للقرب للإهتمام ...
جنات : ما فهمتش أعمو المهم انا كنبغيك بزااااف غانقولك واحد secret و يبقا بيناتنا
كاظم ربع يدو و مزال على نفس وضعيتو و قال بحب
كاظم: كانسمعك
قربات و حنات على ودنو و قالت بهمس
جنات:انا كانبغيك أكثر من بابا
كاظم ما حس بالابتسامة حتى شقات طريق شفايفو على هدرتها و مرر يدو بحب على خصلات شعرها و حرك راسو يمين شمال و قال
كاظم: لا ابنتي باباك خاصك تبغيه هو اللول حيت ما كاينش اللي غايبغيك و غايحميك قدو ما كاينش ابنتي ...
جنات:*دلات شنيفاتها و قالت * و لكن هو ما كيعاملنيش بحالك هو كيغوت عليا و ما كيلعبش معايا ديما
كاظم: لا ابنتي كلها و كيفاش كيعبر على المحبة ديالو باباك كايبغيك ربما أكثر مني و أكثر من اي واحد على الكرة الارضية و ماشي حيت كيغوت عليك راه كيكرهك ولا ما كيبغيكش كيغوت عليك غير لمصلاحتك واعديني تحيدي من بالك هاد الافكار
جنات : je te promets * كنواعدك*
كاظم وقف و دار ليها واحد الشدة لشعرها كن كانت ماماها ما ديرهاش ليها دار ليها غرينات من القدام على شكل سفينجات صغار و خلا شعرها من اللور مطلوق حيت كيحمقها شعر مطلوق ناضت كتجري و قفات حدا المراية و بقات كتشوف فراسها بإعجاب و عاجبها الحال
جنات: جيت بوكوصة أعمو * دارت يديها على شفايفها و صيفطات قبلة لكاظم فالهوا و قالت * merci
تحل الباب و دخل لقمان و ربع يدو كيشوف فالقردة ديال بنتو عاجبها الحال ضحك و قال
لقمان: بصحتك أ الفكيرينة
ابتاسمت و مشات كطير عنقات باباها من رجلو و قالت
جنات: papa j'ai faim *بابا فيا جوع*
لقمان: دوي لوالديك بدارجة
جنات : توحشت ماما بغيت نشوفها
لقمان: اوا نشوفو جداتك و غانديك عند مك بلا ما تفرعي ليا راسي عفا بنتي ما ناقصش
كاظم : دغيا سخيتي بينا
جنات دورات وجهها و دلات شنيفاتها بشكل طفولي وقالت
جنات: و لكن ماما غاتقلق انا بقيت هنا بزاااف و هي ما غايعجبهاش الحال
لقمان: ديك مك تمشي تعاود لراسها نتي بنتنا بجوج و الا قالت شي حاجة انا غانتفاهم معاها
قبط فيديها و جرها معاه و سد الباب و خلا كاظم كيشوف و يتنهد كتبقا فيه جنات حيت باباها و ماماها مطلقين الشيئ اللي كيأثر على نفسيتها بشكل كبير و زيد عليها لقمان قاصح ما حنينش بحال كاظم و ما كيتعاملش معاها زوين بزااف تمنى لو كان هو فعوط لقمان و عندو بنيتة من دمو و لحمو و لكن شاءت الاقدار تفارق دنيا قبل حتى ما يشوفها كان ربما غايفششها و ما عمرو يغوت عليها بحال لقمان و ما عمرو ما غايسمح فماماها و غايكونو أسرة سعيدة و لكن هادي هي الحياة ما يمكنش تعطيك كلشي مع الاسف ...
دخل للحمام و تحشا تحت دوش و طلق عليه الما دافئ و غمض عويناتو و هز راسو قريب لرشاشة و مرر يدو على شعرو الرطيطب بشكل سلس و صدرات منو تنهيدة كتعبر ربما على حزنو و على اشتياقو لزوجتو ملاك فراقها كسر قلبو و عدبو خمس سنيين و هو كيعاني و مازالو كيعاني و ما عمرو ما غايرتاح حيت جرحو ما لقاش ليه الدوا كيقولو بلي كل واحد كيتخنق خاصو الاوكسجين و لكن هاهو الاوكسجين كاين و لكن خاصو ملاااك حيت بلا بيها حتى الهوا كيخنقوا....
بعد مرور عدة دقائق خرج لاوي الفوطة على نصو و حل واحد الباب عندو فالغرفة ديالو اللي كانت كبيرة بزاف غالب عليها لون الرمادي و الابيض كيتوسطها سرير كبير و حداه فوطوي ديال الجلد فلون الاسود و مراية بشكل طولي و فالارض طابية رطيطبة فلون الابيض بيتو جد بسييط و لكن راقي كتحس بالراحة بمجرد ما كتدخل ليه ..
دخل لدريسنغ روم اللي كانت كبيرة و معلق فيها ملابس رجالية و كل حاجة فبلاصتها باينة فيه منظم بزاف ...
هز ملابس داخلية مع تيشورت أبيض و سروال فالاسود لبسهم و خرج ووقف حدا المراية كيقاد فشعرو و هز ريحتو اللي كيستخدمها أكثر من خمس سنوات بقا كيشوف فيها حتى تغرغرو عويناتو ربما عندو معاها ذكريات و رجع الماضي يزورو من بدا و جديد ...
🔙🔙 فلاش باك
كان جالس من فوق السرير فواحد البيت كبير و داير نضاراتو الطبية و هاز فيديه كتاب بلغة الانجليزية كيقراه و أكيد ما كان لابس والو من الفوق حيت من بين عاداتو ما كيعجبوش يبقا بتيشورت كيعجبو يبقا مرتاح فدارو ...
حس بخطوات بطيئة كيقربو ليه ابتاسم بخفة حيت عرف شكون غير من ريحة عطرها اللي سابقها ...
هز عويناتو وجاو فعويناتها المارون عض على شنايفو فاش شافها طالقة شعرها الحريري البني المغلوق اللي مايل لأسود و لابسة غير شورط ديال تجين حد الفخيضات مع كبيبط مشبك فالابيض حد سرة ...
تزعزع قلبو و عض على شنايفو و لاح الكتاب من يدو و طلق ليها يديه باش تجي عندو ...
قربات لعندو و طلعات فوق من كرشو و فرقات رجليها بشكل مثير و حنات ببطئ و قبطات وجهو بين يديها و قالت بهمس حدا ودنو
ملاك: happy birthday
صوتها بورشو و بقا غير كيرمش و كولو ولا عرقان ما حس براسو حتى جرها لعندو بغا يبوسها من شفايفها و هي تهرب ليه كضحك بشكل خطير خلا قلبو ينبض بقوة
ملاك: تسنا نعطيك الكادو ديالك و ديك ساعة نديرو ما أكثر
نزلات من عليه و مشات حلات المجر و جبدات منو علبة فيها عطر من نوع caron poivre من بين اغلى العطور الرجالية فالعالم و تمشات بخطوات ثابتة و صوت خلخلها اللي دايرة فرجليها كيتسمع الشيئ اللي كيخلي كاظم غير كيتنهد و كيحمد الله اللي عندو مراة بحالها كيتسطى و كيحماق عليها ...
رجعات طلعات وجلسات فوق كرشو و حيدات العطر من العلبة و رشاتو على عنقو و حنات و باستو فيه حتى تبورش و قالت بصوت حنون كيدوب الجبال
ملاك: ديما بقا دير هاد العطر حيت كايعجبني جاي مع شخصيتك القوية المتملكة الحنونة اللي مخلياني نموت فيك أ حبيبي
كاظم دور يدو على ضهرها و جرها حتى تزدحات على صدرو و جرها ليه كيقبلها بحب و بشغف فشفايفها و كينين باسمها بشكل متقطع فقلب فمها بغات تبعد من عليه و هو غير ما كيزيد يجر فشفايفها حتى حس بمداق دم ففمو عاد بعد عرف راسو غايكون قصحها ...
هز صبعو و مسح ريقو اللي كان عالق فجنب شفايفها و حط جبينو على جبينها و قال بصوت حنون
كاظم: كانواعدك غانبقا ديما نديروا ولكن خاصك تعرفي بلي أحسن كادو فدنيا هو نتي أ مفششة قلبي
🔚🔚🔚🔚 رجوع للواقع
💔💔💔
يظنون أني قد نسيتك بعد وفاتك
لا يعلمون اني اتألم بعد فراقك
هم لايعلمون أن صدى صوتك لا زال عالقا بمسمعي
لايعلمون ان صدى ضحكتك تراودني كل حين
💔💔💔
ما فيقو من دكرياتو غير صوت الباب اللي تحل دور وجهو و لقا الخدامة اللي كانت مرأة كبيرة فالعمر و قالت بصوت حنون
~صباح الخير هبط تفطر أولدي
حط العطر اللي كان هاز فيدو و تقدم بخطوات بطيئة و وقف حداها و هز يديها باسها و طبطب عليها و قال
كاظم: كي بقيتي مع الصحيحة
~نحمدوه و نشكروه اولدي الله يسول فيك الخير
كاظم: سمعت بلي قلبك ولا كيضرك
~إوا أش غانديرو ما حد الواحد كيكبر ما حد صحة كتنقص
كاظم : الا كنتي عيانة رتاحي
~ آه أولدي اليوم غانمشي عند ختي توحشتها شحال هادي ما شفتها
كاظم:* بابتسامة * سلمي عليها
~:يسلم عليك الخير أحبيبي
كاظم : الا حتاجيتي شي حاجة قوليها ليا واخا
~: شكرا اولدي الله يرضي عليك ، الحاجة ما مخلياش من جهدها الله يرحم ليكم الواليدين و الله يكثر خيركم
باس راسها و خرج ...
بقات الخدامة كتشوف فيه و كتضحك حطات يديها على دقنها و قالت
~:سير اولدي الله يعطيك الرضا شحال حنين مسيكين كيبقا فيا الله يجيب ليه شي نقرة فين يغبر نحاسو
دخلات كتجمع بيتو فحين أن كاظم هبط لتحت داير يد فجيبو و هاز السوارت ديال الطوموبيل فاليد لوخرى ....
وصل لطابق الأرضي لقا ماماه و خوه لقمان و جنات جالسين و مجموعين فالسيجور كيفطرو
كاظم: صباح الخير
جنات : هاهو عمو جااااا
التافتت عندو الام ديالو اللي كانت مرأة كبيرة فالعمر فحدود الخمسينات و لكن مهلية فراسها و باينة فيها متييولة و مسيمقة لابسة قميص د جوهرة فالغرونة مع بلغة فالكحل و دايرة زيف شفاف على راسها و خارجين منو خصلات من شعرها اللي صابغاه بالأسود
~: صباح الخير أ حبيبي
تقدم عندها بخطوات بطيئة و باس راسها و دور يدو على عنقها و قال بصوت كيدوب الحجر
كاظم : فين ما كنتي نتي أ الحنانة كيكون الخير سوى فصباح سوى فليل
~: الله يرضي عليك أ الحنين ديالي
كاظم : الله يطول ليك فالعمر أ الحنانة
~: دوز تفطر
كاظم تنهد و قال
كاظم: ما عندو منين يدوز و الله غير بالصحة
~: كن تسمع و نتا عايش غير بالهوا شوف كي ضعافيتي
لقمان : من نيتك أ الحاجة زبيدة تبارك الله عليه صحيح فصيح
زبيدة: شافو ربي و ملوكو ما شافو العبد مشرط حنوكو
كاظم ابتاسم و وقف و جر الكرسي و جلس حدا مو و كب كاس د العصير د الليمون و شاف فماماه و قال
كاظم: ياك بلا سكر
زبيدة : آه ما تخافش بلا سكر غير شرب أحبيبي
كاظم رشف من العصير و كيشوف فجنات اللي كتشرب الحليب و بقا ليها الحليب فشارب ديالها ضحك عليها و قال
كاظم: جنتي
هزات راسها و شافت فيه حيت عارفاه من ديما كيعيط ليها بهاد اللقب
جنات: نعام أ عمو
كاظم: كتباني كيف شي قطيطة
جنات كتلعب برجليها و كتبتاسم
جنات: و نتا ملاااك
على إثر كلمة {ملاك } حس بنغزة فقلبو و صدمة قوية و صداع كبير فراسو علاش حتى كايبغي ينسا و كتخرجلو شي حاجة كتفكرو فيها علاش ؟؟؟ رغم انها ما قصدات والو و لكن مساميعو غير كيسمعو هاد الكلمة كيحس بفراغ كبير و ألم مالو حدود فقلبو حس بعضلات يدو تزيرو عليه و قلبو تشنج ما بين ضلوعو ما قادرش ينساها ما قادرش ...
زبيدة شافت فيه لقاتو ساهي فالفراغ و جامع يدو على شكل لكمة و ملامح وجهو مخنزرين باين مكره ...
مدات يديها و شدات يديه بقوة حتى قفز و شاف فيها
زبيدة : فطر اولدي
كاظم حرك ليها راسو بالإيجاب و طمنها بعويناتو و لكن بقا ساهي كايشرب داك الكاس د العصير غير بزز ...
عم الصمت لثواني حتى قال كاظم
كاظم: قلبك أ الحنانة كي بقا درتي كونطرول عند الطبيب
زبيدة : درتو اولدي قالي غير ما خاصكش تبقاي تعصبي
كاظم: و علاش كاتعصبي مزال ما تزاد هدا اللي يقلق ليا الحنانة ديالي
هز يديها باسها و زبيدة كتشوف فيه و ضحك وترضي عليه و لكن قالت جملة اللي ماتوقعش شي نهار غاتقولها ليه
زبيدة : تزاااد هدا اللي يقلقني و راه جالس حدايا و انا اللي ولدتو
كاظم دار عندها بالعرض البطيئ و قال بصوت حزين
كاظم: واش كتقصديني انا ؟؟
زبيدة: و شكون من غيرك
كاظم :*بدهول* واش متأكدة أ الحنانة واش انا عمري درت ليك شي حاجة عصباتك عارفاني نتمنى نموت و ما نشفوكش مقلقة عليا
لقمان: الحمد لله بعدا ماشي أنا
زبيدة دورات وجهها و شافت فلقمان و قالت
زبيدة: نتا حريرتك بوحدها
التافتت و شافت فكاظم و كملات كلامها
زبيدة : ما كاينش اللي شاطن بالي قدك أ وليدي ياك انا ميمتك و كتعزني و كتقدرني
كاظم : هادشي ما فيهش الشك أ الحنانة آمري و انا نفد
زبيدة : بغيتك تزوج اولدي قلبي ما مهنينيش عليك بغيت نشوفك مع وليداتك قبل ما نموت ...
كاظم دار صبعو على شفايف مو و قال بصوت مكسور
كاظم: الموت لا أ الحنانة عارفاني معقد من شي حاجة سميتها الموت ما بقيتش كنستحمل هاد الكلمة الله يطول ليك فالعمر
زبيدة : اوا دابا خليتي الموضوع المهم و شديتي ليا فالموت ،انا بغيتك تزوج و تفرحني حتى انا واش انا ما بقيتش فيك من ديما كنشوفك مهموم و مغموم و مالك اوليدي عليها عااارفة كنتي كتبغي مرتك و ما ساهلاش ماتت و بنتكم فكرشها الله يرحمها و يوسع عليها فهاد النهار و لكن واش اوليدي نتا غاتبقا هاكا غير كتخمم و نتا مشاء الله عليك المخيرة فالبنات و اللي مزغرتة عليها مها و مزيودة فخرقة بيضا و اللي ما نعرف اش كايقولها راسها تمناك * هزات يديها و بدات كتعد ليه * زيين كاين الفلوس كاينة دار كاينة طوموبيل كاينة و المحنة فيك اوليدي و انا اللي مك و ما فياش الضرافة اللي فيك ، اوا اش قلتي واش كتعرف شي وحدة نمشي دروك نخطبها ليك نتا غير عزل و تخير وانا ما عليا غير نقصد باب البنت و نزوجها ليك
كاظم بقا ساكت مدة و كيشوف فيها و ما عارف ما يقول من ديما كتجبد ليه موضوع زواج ....
الموضوع اللي كيزيد على ما بيه واش حتى واحد ما قادر يحس بيه واش حتى واحد ماقادر يرحم هاد العاشق الوفي لزوجتو اللي ماتت و بنتو فكرشها كيف يدير يخونها و يتزوج من موراها كيف يدير حتى تحلالو بنت المراة من غير حبيبتو و زوجتو المتوفية ملاك ؟؟...
غمض عينو و هز صبعانو و شد بيهم راسو و بقا ساكت
زبيدة : اوا جاوبني مالك ساكت ها باش كتفقصني فوقتما نهدر معاك كتقتلني بسكات و جاااوبني عفا ولدي رحم ميمتك راه قلبي كيتقطع فاش كنشوفك بحال هاكا هاز الهم على قلبك تقول عندك ميات عام مرتك ماتت هادي خمس سنين احبيبي راك صبرتي انا عااهدي بالمراة اللي كتلبس البيض و تبقا حزنانة على الراجل اربع شهور و عشر أيام اما نتا اوليدي راه كان خاصك تزوج من شحااااال هادي كاين اوليدي اللي كيعزلو و يتخيرو المراة فثلثيام اما نتا راك صبرتي خمس سنين الله يخلف و يجعل شي براكة حتى نتا شوف حياتك و عيش بحالك بحال أيها ناس
لقمان : أ الواليدة خليه على خاطرو سيد كان كيبغي مرتو ما بغاش يتزوج نتي اش مشا ليك صافي خليه عليك حياتو هاديك يدير فيها ما بغا راه راجل تبارك الله ماشي نتي اللي غاتوريه شنو يدير
كاظم غير سمعها كتنين حل عينو بسرعة و بانتلو مو قابطة فقلبها حتى هو تقبط قلبو كب ليها الما و عطاها تشرب و طاح على ركابيه و قبط فيديها ...
عكس لقمان اللي كان جالس كيشوف فيها و يضحك عارفها كتمثل عليه ..
شربات الما و حطاتو و مزالها قابطة فقلبها و مغمضة عينيها و كتنين ...كاظم فالبلاصة رخف ليها الشال اللي دايرة باش ما تبقاش مخنوقة و باس يديها و قال بصوت مرعود
كاظم : الله يرحملك الواليدين غير ما تعصبيش ندير اللي بغيتي أ الحنانة
بمجرد ما سمعات هاد الجملة حلات عويناتها و تقادات فالجلسة و كتنهج و قالت
زبيدة : بغيتي تقتل ميمتك ياك أ وليدي بغيتو تصيفطوني بلا وقت غير بفقايصكم
كاظم : ما تقوليش هاكا أ الحنانة عارفاني بلي ما كنقدرش نشوفك مقلقة و لكن راه موضوع زواج هدرت معاك فيه مية ألف مرة و قلتلك أنا ما بغيتش نكرفس معايا بنت ناس
زبيدة : إينا تكرفيس أولدي غير قوليا إينا تكرفيس مالك غاتعيشها فالزنقة
كاظم و قف و دار يدو بجوج على خصرو و عطاهم بضهر و غمض عينو و قال
كاظم: ما غاتفهمينيش و ما عمرك ما غاتفهميني
زبيدة : إوا شرح ليا بغيتك تفهمني
فتح عينو و دار شاف فيها و مرر يدو على دقنو و قال
كاظم: ما غانقدرش نبغيها قلبي ملك لوحدة أخرى راه ما يمكنش نجيب بنت من دارهم و نعيشها معايا و ما نقيسش فيها واش فنظرك كاينة بنت المراة اللي غاتقبل على شرطي فالوراق تكون مزوجة بيا اوا و فاش ندخلو لدار شنو غايكون الموقف ديالها منين نقولها ما غانقدرش نبغيك و ما غانقدرش نلمسك و ما غانقدرش نعطيك حقوقك كزوجة شنو غايكون الموقف ديالها جاوبيني أ الحنانة واش نتي ترضاي هاد العيشة لبنت ناس
زبيدة بقات كتشوف فيه و فالاخيرة طلقاتها بواحد مولاتي ضحكة تسمع صداها فالفيلا كاملة و قالت
زبيدة : دابا هادشي اللي مخليك ما تزوجش ههه الله الله على وليدي كيفكر لبنات ناس * هزات كأس د الما و هبطات عليه شرباتو و حطاتومن فوق الطبلة و قالت * الحمد الله
وقفات بتثاقل و جات أونفاص ليه و ربعات يديها و كملات كلامها
زبيدة : باباك الله يرحمو فاش تزوج بيا ما كانش كيحمل فيا شعرة عارف هادشي و الله ما عارفوش
كاظم: الواليدة ما تقارنيش ليا الماضي و الحاضر و ما تسقطيش قصتك مع الواليد عليا انا ...
ما خلاتوش يكمل و هزات يديها على شكل سطوب ✋
زبيدة : شووووت خليني نكمل كلامي باااك الله يرحمو كان واحد المنيفخ منو ما كاين شفتي نتا و الله واخا تنفخ حتى تعيا و الله ما توصل لباك فنفاخة ديالو عرفتي شنو هي اول ليلة ليا معاه سد عليا الباب ديال البيت و خلاني كندور عينيا كيف البومة و الله ما كبرو ليا و لا حاشاها ليا ... عارف بلي زوجوني ليه غير بزز و لكن اولدي هادي هي الحياة شي بعض المرات كتطلب منك تكوني دكية و صبااارة و مرأة حرة ديال الزمان اللي تصوني دارك و ما تخليش الشيطان يلعب بيناتكم وها حنا فلخر ولينا سمينة على عسيلة ما كانش يحلا ليه نهار الا كنت مسافرة و لا فشي قنت ولا يظل يهتهت بيا و ما كاين ففمو غير لالا زبيدة وها هو مشا الله يرحمو و يوسع عليه هادي هي الدنيا أحبيبي شحال من حاجة ما كانكونوش كنحملوها و لكن غير كانديرو اول خطوة ليها كتبدا تبان لينا أحسن حاجة فالكون عطي لراسك فرصة الله يرضي عليك و ما تنساش ربي شنو قال { عسى أن تكرهو شيئا وهو خير لكم }
كاظم: و نعمة بالله أ الواليدة و لكن واش كاين بنت المرأة اللي غاتقبل بواحد مريض نفسي عندو عقد و مزال دماغو فالماضي واش كاين أ الحنانة اللي تقبل عليا
زبيدة : شحال من مرة كنقولك راك نتا ماشي مريض نفسي نتا تعالجتي و الحمد الله ساليتي الحصص مع الطبيب و قالك بلي وليتي مزيان واش كاين اولدي شي حد مريض نفسي خدام و بطوموبيل و حنين و ضريف و ما كاينش بحالو فالعالم راك نتا صحيح فصيح أولدي بلا ما تبقا تقنع راسك بشي حاجة ما كايناش
كاظم كيقولها هاكا باش يقنعها بلي ما باغيش يتزوج و لكن شنو ما قال كتلقا منين دوز ليه حار و تلبك و ما عرف مايدير و ما عرف ما يقول هز يدو و مررها على شعرو و دور وجهو جنب و كيسوط أنفاس سخوونة و كيفكر فشنو غايقولها
كاظم بقا ساكت مدة و فالاخير دور وجهو و شاف فيها و قال بحزن واضح على وجهو
كاظم: واخا قابل نتزوج
زبيدة غير سمعات هاد الجملة من فمو دارت صبعها من مور ودنيها و طلقاتها بواحد مولاتي تزغريتة تسمع صداها فالفيلا كاملة الشيئ اللي خلا الخدامة تهبط بسرعة باش تعرف شنو كاين التبركيك اللي كاين فالمغاربة ما كيقدروش يقاومو ...
~: لالا أش كاين أش واقع ؟؟؟
التافتت عندها زبيدة و قالت بفرحة
زبيدة : اجييي أ فريدة تسمعي شنو سمعت
فريدة الخدامة قربات و كتمسح يديها فواحد الزيف و قالت
فريدة : الله يسمعنا خبار الخير
زبيدة هزات يديها و حطاتهم على درعان كاظم و قالت
زبيدة : وليدي حبيبي بغا يتزوج
فريدة حتى هي ناضت كتزغرت و قالت
فريدة : مبروووك عليك أوليدي مبروووك
لقمان كان هاز التيليفون كيخندش فيه و كيسمع لحديثهم و حداه جنات كتلعب فالطابليط و بمجرد ما سمع كاظم بغا يتزوج تصدم حيت ما ثيقش بلي خوه اللي خمس سنين وهو حازن على مرتو بغا يتزوج بقا غير حال فمو فيه و لكن جاتو غريبة هاد القضية عارف خوه دكي و كيفكر مية مرة فالخطوة قبل ما يديرها و بما انه وافق الا و انه غاتكون شي حاجة فراسو ...
الفرحة كانت بادية فملامحهم بشكل كبير عكس كاظم اللي كان بادي على ملاميحو الحزن و الانكسار و قلبو كيضرو حيت عند بالو بلي هادي خيانة فحق مفششة قلبو
زبيدة : نتا غير عزل و تخير ولا قوليا شنو شروطك و كيف بغيتي هاد المرأة تكون طويلة رقيقة قصيرة غليضة عامرة اللي بغيتي فالبنات نزوجها ليك
لقمان : وااا زهر عندك أ با كاظم هههه
زبيدة التافتت و شافت فيه و قالت
زبيدة : اوا شنو يصحابلك عندي غير كاظم واحد و المخيرة فالبنات نزوجها ليه
لقمان : ياك أ الواليدة و انا
زبيدة : مالك نتا قابل بنتك و هنينا
التافتت و شافت فكاظم اللي كان ساهي فالفراغ و دماغو كيفصل و يخيط
زبيدة : اوا دوي و لا بغيتي نختار ليك على دوقي
لقمان: هو اللي غايتزوج ماشي نتي أ الحاجة
زبيدة ما داتهاش فكلام لقمان و حطات يديها على خد كاظم و قالت
كاظم : بغيت البنت تكون سميتها هنادي صافي هدا هو شرطي
زبيدة : هنادي ؟؟؟ كيفاش بغيتيها تكون سميتها هنادي
كاظم قال بصوت حنون
كاظم: بغيت البنت اللي غاتزوجيها ليا تكون سميتها هنادي بحال سمية بنتي اللي ماتت و هي فكرش ملاك
زبيدة : اويييلي يا ولدي و انا فين غانلقا ليك هاد هنادي
كاظم تنهد بحزن و قال
كاظم: ياك نتي بغيتيني نتزوج و ها انا قلت ليك شرطي
الا لقيتيها انا مستعد نتزوج بيها
دار نظارتو الشمسية فعينيه و قال
كاظم: ما تنسايش بلي ما بقاش ليا بزاف و خاصني نرجع لفرنسا الا بغيتني نتزوج خاصك تقلبي عليها بسرعة باش أ الله يوجدو ليها الوراق باش نديها معايا
زبيدة : و هدا تحدي أوليدي واش عاودولك عليا عندي كاطالوغ ديال العيالات غير قوليا اوليدي واش محرشك عليا شي حد
كاظم قرب و عنق ماماه و باس ليها راسها و قال
كاظم : سمحلي أ الحنانة و لكن هدا هو الشرط الوحيد اللي عندي و الا ما كانتش سميتها هنادي ما نقدرش ندخلها لداري على الاقل الا مشات ملاك تجي فعوطها هنادي واخا انا الفكرة د الزواج ما داخلاش لراسي بتاتا و ما باغيش نعدب معايا بنت ناس و لكن غانحاول على قبلك و على قبل صحتك باش تبقاي فرحانة غانضحي بسعادتي على قبلك أ الحنانة و ما نعاودش نسمع من فمك بلي أنا كنفقصك و لا مقلقك حيت ما كنقدرش أ ميمتي نشوفك معصبة الله يشافيك لينا
زبيدة : الله الله على وليدي الحنين ديالي
بعد و هز يديها باسها و انصارف خرج و حاس براسو غايطرطق بقوة التفكير طلع فسيارتو اللي كانت من نوع jeep ديمارا و قلع بسرعة كيفما العادة ما عارفش فين غايمشي المهم باغي يهرب من هادشي باغي يهرب من راسو باغي يصرخ و يغوت باغي علامن يحط راس باغي علامن يشكي همو ...هو عارف ماماه محال واش تلقا ليه هاد البنت اللي سميتها هنادي حيت عرف بلي هاد الاسم نادر ما غايكون حتى شي حد مسمي بنتو بيه فالمغرب و واخا يكون شي حد مسمي بنتو بهاد الاسم غالبا غاتكون صغيرة حيت هو من الاسماء جديدة و محال تلقا ليه شي وحدة فسن زواج كانت خطة زوينة منو باش ما يتزوجش و لكن ما عارفش القدر شنو مخبي ليه واش فعلا إسم هاد الفتاة ما كاينش فالمغرب؟؟؟ ...
💝💝💝
يقول الله عزوجل { وكيف تصبر على ما لم تحط به خبرا }
من الصعب جدا على الإنسان أن يفهم الحقيقة أو الحكمة الكامنة وراء كل تفصيل صغير يحدث معه
وربما لهذا السبب وعدنا الله بأجر كبير على صبرنا كما قال الله تعالى {وبشر الصابرين } ودلك لعلمه سبحانه بأن الصبر على نقيض ما نريد دون ان نعرف سبب حدوثه لن يكون سهل أبدا وفيه جهاد عظيم للنفس
فالحمد الله على نعمه و فضله بأن نرى حكمته في كل سيئة و حسنة وان نصبر لأنه الله و لأنه لا يضيعنا
# إقتباس
💝💝💝
لالا زبيدة جالسة فوق الفوتوي و حداها فريدة الخدامة كدير ليها مساج ليديها اليمنى و الغريب فالامر أن فريدة ساهية و باينة فيها بحال باغا تقول شي حاجة و لكن مترددة اما واحد زبيدة حاطة يديها على قلبها و كتنكَر غير هي و عضامها
زبيدة :*ضربات بيديها اليسرى على فخدها و قالت بصوت مرتفع * اويييييلي فين غانلقا ليه انا هاد هنادي ولا زميييري اويييلي وحدي هاد الولاد بغاو يشيبوني بغاو يفقصوني اميمتي واااخمس سنييين ووليدي صاابر وفاش بغا يتزوج قالك إلا ما كانتش سميتها هنادي والله لا حطات رجليها فداري واش هو مسطي و انا بغا يسطيني معاه * التافتت و شافت ففريدة و قالت * غير قوليلي يا ختي فريدة شنو ندير مع هاد الولاد بغاو يصيفطوني بلا وقت
فريدة بقات ساكتة مدة و ساهية فالفراغ حتى قالت زبيدة بصوت مرتفع
أنت لا تعلم إلى أي درجة الله رحيم بك لا تعلم كيف يسخر لك الأشخاص ..الصدف ...الأرواح و المفاجآت
لا تعلم كيف يصرف عنك ما تحب لشر لا تعلمه وكيف يقرب لك ما تكره لخير لا تعلمه الحمد لله على ما كان و على ما سيكون ...
هي اللي غضات البصر ديالها فاش كسرتها الظروف هي اللي بتاسمات فوجه الناس اللي خدلوها و قالو فيها شي حوايج عمرها كانت فيها هي اللي تنهدات بصمت فاش كلشي فيها كان باغي يصرخ بأعلى صووت هي اللي ما عمر الحظ وقف معاها و لكن كملات مواصلة أحلامها رغم إنهيارها في كل مرة هي اللي من بعد كل سقوط كتنوض و كتشد نفسها بنفسها كأنها كتحدى الحياة و الظروف و الخسارات و الوجع هي اللي تجاهلت دوك الكلمات القاسية اللي حاولت تحبطها و خبعتها فقلبها مع باقي الأشياء القديمة اللي هازهم هي اللي ما عمر شاف ليها شي حد فعينيها باش يعرف شحال من حرب فيهم و شحال من دمار هي اللي سكتات فاش كان البكاء واااجب💔
في إحدى أكبر الأحياء الشعبية فالمغرب المعروفة بالشمااااكرية المقطعين و الجيران الحضاية اللي حاطين على بعضياتهم و صوت الاطفال اللي كيلعبو كرة فشارع و ناس الغادية و الجاية و الصداع ...
فواحد المنزل صغير و بالضبط فالكوزينة ديالو مطلوق الما مجهد ...واحد البنت واقفة فلافابو اللي كان فيه العديد من الآواني و فيديها الحلفة ديال التيد و كتحك فالماعن مزيااان باش تشللهم ...
لابسة بيجامة منزلية خفيفة فورمتها عاااادية جدا صدرها صغير و ليهونش منعدمين مثلها مثل العديد من البنات عندها حقها فزين سميمرة و فمها صغير و عويناتها كبار شوية و كوحل وشعرها جامعاه على شكل سفنجة اللي ما حرش ما رطب جاي ما بين و بين ....
دايرة ليزوكوطور فودنيها و تيليفون فجيب سروال بيجامتها و مجهدة لأغنية على حر جهدها...
الأغنية اللي كتعجبها تسمع ليها فاش كتكون كاتغسل لماعن ديال سعد المجرد {دابا تزيان } و كتغني معاها
~: فيين زهري فيين خايف مني مالو أ الله أ الله أقلبي شحال قدك تصبار نساال عليه نساال ولا على بالو مالي مالي حالي حالي راني عييت و ما نهضر دابا تزيان دابا تجي ليام و نعيشو مزيان و نعيشوا مزيان و ياعمري واش طاري فينا و أنا و قلبي من غبينة لغبينة ...
كتغني مع كلمات الاغنية بصوتها اللي كيصلاح لكلشي الا الغنا ...كانت غافلة على الام ديالها اللي كتناديها من الصالون باش تكلم ليها حيت دايرة الكيتمان فودنيها و زيد عليها الما مطلوق
~: هناااااادي واااااهنادي
كان واحد الشخص دو ملامح مغربية بامتياز جالس فسيجور كيحل السيور ديال السبرديلة اللي لابس فرجليه طويل و سمر فوجهو و لحية خفيفة مزينة دقنو و ملاميحو حرشين من وجهو باينة فيه قاصح بزااااف ...
حيد السبرديلة من رجلو و لاحها و وقف بتثاقل و اتاجه لكوزينة ووقف من مورا ضهرها و حط يدو على كتافها باش تلتافت عندو و داكشي اللي كان بدورة باش كدور عندو كيهز يدو حتى لسما و كينزل على حنكها بطرشة تسمع صداها حتى لمساميع الام اللي كانت جالسة فالصالون كتفرج فالتلفازة ناضت بسرعة واتاجهت لكوزينة لقات بنتها شادة فحنكها و تيليفونها طايح لارض و خوها واقف عليها و كارز على يدو عرفاتو صرفقها ...
خطات خطوات مسرعة بإتجاههم ووقفات مابين بنتها اللي قابطة فحنكها و قطرات دموع كتنزل من عويناتها السوداء اللون و مابين ولدها اللي كيشوف فهنادي بشوفات قاصحين و قال بصوت حرش و خشن كخشونة قلبو بعدما هز صبعو السبابة فوجههم 👈👈 ....
~: آااااااااخر مرة نشوفك دايرة هاد الزبل فودنيييك آاااااخر مرة أ الحمااارة و فاش تكون كاتعيط ليك مك بقااااي تجاوبيها ماتبقايش تعطيها نخااالة الله ينعل حسك
مد يدو باش يزيد يضربها و هي تدفعو الأم فضيلة و قالت بصوت مرتفع
فضيلة : الله ينعل حسسك نتاااااا نيييت أ العجل ديماااا مبكيين ختكم الله يعطيكم مصيبة هااااحجر العافية الا ما تفرقو معااااهااااا ها العار بغيتو ترزيوني فبنتي و مااااسوقكمش ماااسوقكمش فيها
قال خوها حمزة بعصبية و بصوت مرتفع أكثر
حمزة : هااااديك الكلبة اللي من موراك ما كاينش اللي مضسرها قدك علااااش ما تجااوبكش و نتي كاتعيطي ليها هادي راه قلة ترااابي راه ناقص ديلمها العصااا
فضيلة كتكلم و كضرب يديها على صدرها
فضيلة : وأناااا مها هانتا قلتيها و انا مهاااااا و ما سوقكمش فبنتي نربيهااااا و لا ما نربيهااااش نتوما أش مشااا ليكم حتى تولدوهم و ديك ساااعة قتلوهم كاااع ما تعاودش تحط يدك عليها الله يعطيك البطل
دورات وجهها و عنقات بنتها هنادي اللي كتبكي بحرقة كانت محتاجة داك الحضن الدافئ ديال ماماها شحال من مرة كايخصنا غير علامن نحطو راس كنحتاجو غير اللي يطبطب لينا على كتفنا و يبوسنا فخدنا و كتحس بواحد الراحة عجيبة و خصوصا الا كان هاد الشخص هو الأم ديالك ....
هنادي زيرات على مها و كتنخصص فحضنها و يديها فازكين بالما و قلبها كينزف دم دموع القهرة و الحكرة و الظلم اللي معيشينها فيهم خوتها يوميا ما يمكنش يدوز نهار و ما تسمعش فيه كلام كيجرحها فقلبها ما يمكنش يدوز نهار بلا ضرب من خوتها و تجريح و سب و شتم مثلها مثل العديد ديال البنات اللي كيكونو عندهم إخوة من هاد النوع و ماااا اكثرهم اللي كنعتابرهم انا غير شماايت و بزاف عليهم كلمة الأخوة ....
فضيلة معنقة هنادي و كتمرر يديها على شعرها و كتحاول تواسيها بكلامها
فضيلة : صافي أ الحبيبة ديالي الله ياااخد فيه الحق الله يعطيه البطل
حمزة : يبطلها هي نيت و بقاي تفششيها حتى توحلي فيها
فضيلة : ماااسوقكش فيها أولد الحرام ماااسوقكش اه بنتي و نفششها و طرطق نتا كااع
حمزة : لااحول و لا قوة الا بالله على صباااح كي داير
فضيلة : نتا تعرف الله أ دوي كن كنتي تعرفو كاع ما تبكي هاد اليتيمة غير هاكاك و تسممها بهضرتك راه ربي كبييير و حرم ظلم على نفسو بقا غير على عبادو الله يهديكم اولدي على ختكم حنو فيها شوية
حمزة عطاهم بضهر و تمشا بخطوات ثابتة حتى وصل لحدا الباب ديال الكوزينة و هو يضرب الدورة و رجع لعندهم وتحنا و هز التيليفون ديال ختو اللي طاح فالارض فاش صرفقها ....
وقرب حدا هنادي و قال
حمزة : اليوم نشوف شنو كتقيلي ديري فهاد التيليفون وياااااربي نلقاك كديري فيه شي حاجة نيت باش نقتلك و نرتاح من صداعك
فضيلة : واااابعدو منها شوية قييلوها عليكم فعوط ما تحنوا فيها و تقولو مسكينة باها مات وهي لحيمة نتهلاو فيها نتوما غير ما كتزيدو على ما بيها بغيت شي نهار تفرحو هاد اليتيمة و تقولولها شي كلمة د الخير ولا تشريو ليها شي حاجة تفرحوها بيها واااالو حرام و دابا مصاب تحط ليها غير تيليفونها و باركة من هاد الهبال ديالكم راه زدتو فيه
حمزة : و الله يا والديها حتى نوقف ليها فالحلق شنو يصحابلك هاد التيليفون اللي كتقيل هازة زعما تكون كتقرا فيه القرآن انا ماشي جاي من راس جبل انا عااارف تحرااميات ديال البنات و انا راني كبااار منها و عارف دنيا اش فيها ماشي تجي بنت الألفااين تبغي تحسب راسها مطورة و تبيدقني راه و الله حتى نخليها تمشي على الشوك و ما تقولش أح راك مازال ما عارفانيش أ مي
فضيلة : أش كدير مسكينة كاع راه غير كتقيل كتقرا فيه
حمزة ابتاسم باستهزاء و قال
حمزة : كتقرا ههه قالك كتقرا واش كااااين شي حد كيقرا فالتيليفون ناااس راه دارو القراية فالكتوبة ماشي فالتيليفونات انا ما غانبقاش نااعس على ودني حتى تجيبليا شي عار ولا شي ولد الحرااام لدار
فضيلة هزات صبعها السبابة فوجهو 👈👈 و قالت
فضيلة : اااااااخر مرة نسمعك كتقول على ختك هاد الهدرة د الزنقة منين نتا اللي خوها كتقول هااادشي اش خليتي لناااس ما يقولو دوي يا الحماااار انا بنتي ثايقة فيها و هي بنت كتمشي غير جنب الحيط و ما عمرها دير شي حاجة اللي تمرمد ليا بيها وجهي فالتراب
سمعتي و دابا خرج من هنا
حمزة عطاهم بضهر و التيليفون ديال ختو فيدو و قال بصوت عالي
حمزة : هاهو غادي و حطو لينا نجغددوا ندركو كمااارتنا من هاد الدار
انصارف و خلا فضيلة مع هنادي اللي كتبكي و تنخصص و تقول شي ما بكاتو عياااات و ملااات من هادشي من ديما نفس الكلام نفس الهدرة نفس التصرفات عمرهم قالو كلمة د الخير عمرهم دارو معاها شي جيسط زوين من ديما هدا حالهم معاها تقول عدوتهم ماشي ختهم
كرهات حياتها كرهات عيشتها كرهات شي حاجة سميتها رجال كرهات شي حاجة سميتها الخاوة و ما يجي منها رادين ليها حياتها جحيم فجحيم ....
فضيلة قرباتها لافابو و طلقات الما و بدات كتغسل ليها و جهها
فضيلة : صافي ابنتي الله يرضي عليك و مسحي دموعك على قبلي عفااك
هنادي نطقات أخيرا بصوت غالب عليه البحة ديال الحزن و التنخصيصة ديال البكا و قالت
هنادي: و..واش ما كنبقاش فيهم أ مي شنو درتليهم باش يتعاملو معايا هاكا واخا نكون واكلة ليهم الورث ما يديروش فيا هادشي ديما الحكرة ديما الظلم واخا نكون عدوتهم هدا جهد
فضيلة : دوي غير بشوية لا يمشي يسمعك و يجي داك البغل د خوك يكمل عليك وانا أبنتي ما بقاتلي صحة خااايفة يا بنتي نموت و نخليك لهاد تسعة رهطين يااكلوك بلا ملحة
هنادي :* هزات يديها باستها و قالت * لا أ مي ما تقوليش ديك الهدرة الله يطولك فالعمر الا مشيتي نتي و الله ما نبقا فهاد الدار انا صابرة غير على قبلك
فضيلة: و الله يجيب ليك ابنتي شي ولد ناس اللي يتهلا فيك و يهزك من هنا قبل ما نموت
هنادي قبحات ملامح وجهها و قالت
هنادي :أ مي دعي معايا ربي يسهل عليا بشي خديمة زوينة ولا نمشي لخااريج و ندرق زلافتي من هاد المغرب اما رجااال كرهوني فيهم هاد الشمايت د اولادك
فضيلة ضحكات على كلام بنتها و شعلات على الغدا يسخن باش تعطي لحمزة ياكول و رجعات وقفات حدا هنادي و قالت
فضيلة : واش نتي ساايرة تمازحي معايا ولا مالك ؟؟
هنادي: كيفاش كنتمازح معاك؟؟ ما فهمتش
فضيلة: واش فنااااظرك هاد خوتك غايخليوك تخدمي
هنادي جاوباتها ببلادة
هنادي: ياك خالييني نقرا و علاش ما غايخليونيش نخدم
فضيلة هزات صبعها و دارتو ففمها و رشمات بيه الحيط و قالت
فضيلة : والله يا بنيتي ما يخليوك تخدمي دوك الولاد اللي عندي و انا عارفاهم و عقلي على كلامي
هنادي تغرغروا عويناتها بدموع و قالت
هنادي: وشنو الحل ؟؟؟ وانا اللي باغا نولي أستادة اللغة الفرنسية شنو ندير ؟؟ بغيت حتى انا نحقق حلمي و نولي شي حاجة و تكون عندي دار و طوموبيل و نديك للحج ا مي
فضيلة ربعات يديها و كتشوف فبنتها بحزن
فضيلة : ابنتي راه خوتك صعااااب و حمدي الله اللي راه هاديهم و خاليينك تقراي فلافاك اما كن راه خرجوك منين شديتي لباك غير تهناي راك غاتقراي و غاتجلسي حدا ميمتك تسناي شي ولد ناس اللي يدق باباك و يتزوج بيك عاد ترتاحي من هادوك الرهوط
هنادي : و انا ماابغيتش نتزوج أمي على اساس هادوك اللي مزوجين مطفرينو ها بنتك سعاد ديما جاية غضبانة و مزرق ليها راجلها عينيها واش هاديك عيشة أمي
فضيلة طفات على البوطة و هزات المغرفة كتغرف بيها العدس فالطبسيل و قالت
فضيلة : إوا أبنتي كلها و شنو هزات ليه مغرفتو واحد جداتي الله يرحمها و يوسع عليها كانت كتقول الزواااج بحالو بحال الحماام لي داخل قاهرو سخون باغي إمتى يتشلل و يخرج و اللي على برا باغي امتى يدخل يتحمم و يزول الوسخ و يكمد عظيماته و الزواج ابنتي هم مدروووك قد ما جلستي توصلي ليه
هنادي : انا عارفة بلي زواج سنة الحياة ولكن ماشي هو الحياة الرجل هو نصف المجتمع و انا نصف الثاني و بيه اولا بلا بيه مكملة حياتي
فضيلة دارت عندها و قالت بابتسامة
فضيلة :دابا نتي ما كرهتيش طلعي فالعمارية ههه
هنادي ابتاسمت لماماها و فضيلة حسات بفرحة كبيرة فقلبها اللي قدرات تضحكها و تنسيها فشنو دار خوها و هادشي باش زوينة هنادي قلبها زوين تقدر تكون كتبكي و بسرعة تقلبها ضحك و نشاط كأن شيئا لم يكن يمكن حيت ولفات بداكشي اللي كيديروه خوتها حتى ولا كايجيها الامر عادي ....
هنادي : علاه امي كرهنا حتى حنا نطلعو فالعمارية و نشيرو حتى حنا بيدينا و نكتبو زوجي قرة عيني فالفايسبوك و لكن زوجي مازال تالف على العنوان ولا واقيلة مازال ما بغا يكمل دينو ههه علم الله أشمن ضو أحمر شاد زماني ههه
هنادي: كن بقا با عايش ما كنتش غانكون عايشة هاد العيشة د الويل مع دوك الكنوس
فضيلة : اودي يا بنيتي راك ما عارفة والو وراه هاد الكنوس د خوتك طلعو كيشبهو غير لداك موبيك و عاد هما تلقاي معاهم السلكة على داك باك شفتي كن بقا عايش عاد اجي تفرجي حمدي الله ابنتي راه قالك ما تبدل صاحبك غير بما أكرف
هنادي كتغسل الماعن و كتهدر
هنادي : كن بقا عايش على الاقل شنو ما دار كيتسمى با ماشي بحال هاد الخوت اللي عاطيني الله كيترجلو عليا غير انا، شفتي الا ما سمحتش ليهم و الله ما عندهم فين يركَدوا فقبرهم
فضيلة : شفتي كن بقا باك عايش كن راه خرجك من القراية شحااال هادي و يزوجك لداك مهدوم الفم ديال ولد عمك بوشتة
هنادي شافت فماماها و طرطقات فيها عينيها و قالت
هنادي: واايلي
فضيلة : اوا شنو يصحابلك بعدا هاد خوتك ها أنا كنحامي عليك منهم و هازة عليك الدقة أما كن كان المرحوم ما نقدرش عليه كان ابنتي وااااعر
هنادي : اوا الله يرحمو مسكيين
هزات ماماها الطبسيل و داتو لصالون فين جالس ولدها حمزة اللي كان شاد فيديه التيليفون ديال ختو كيخندش فيه و حطاتو حداه و جابت ليه الخبز و جلسات
فضيلة : اوا هاهو الغدا فرعتيلينا راس شكوى لله
حمزة طفا التيليفون و حطو حداه و شاف فمو و قال
حمزة : كتشكي بينا لله أ مي حتى لهاد الدرجة كتكرهينا
فضيلة : اودي الله ينعل اللي ما طلعلو هاد الزمر فراس ديما كل صباح خاصنا نفيقو بكري و نعجنو و نطيبو و نسيقو نفس الحاجة كتعاود خزييت عيينا و عاد نتا كتجي بكري خاصك ديما تلقا الغدا موجود
حمزة : و ديك البقرة ديال بنتك اش كدير ؟؟
فضيلة : و نتا دوور دووور و رجع ليا لهنادي اش دارت ليك تاني ؟؟
حمزة : واالو غير راشقة ليا عليها جاتني على كااانتي
فضيلة : كوول كوول و هنينا
حمزة : اش بانلك نجلسوها من ديك لافاك و نزوجوها راه لااااصقني واحد الخوادري عليها منها نيت نتهناو عليها و منها نيت ما تقواش الهدرة عليها و يبقاو ينعتوها بالبايرة
فضيلة ضربات على صدرها بيديها و قالت
فضيلة : عرفتي و ديرها يا وليدي غير ضرب على سميتي ما نتا ولدي ما انا مك عرفتي و تمشيو تجلسوها من القراية و الله القسم حتى نخويلك هاد الدار و ندي بنتي معايا مزيااان تبارك الله حتى تكون والدها و حكم فيها ديك ساعة
حمزة : ولكن...
فضيلة : ما كاين ماااولكن سد دلقوشك (فمك) سالات الهدرة
حمزة عض على شنايفو بقوة الاعصاب اللي ركبوه فهاد اللحظة و هو يبدا يعيط ليها
حمزة : هنااادي
هنادي غير سمعاتو كيعيط ليها بدات كلها كترعد مركبين فيها الرعب خوتها شللات يديها بسرعة و مشات كطير لصالون و قالت
هنادي : نعاام
حمزة : جيبي لينا نغسلو يدينا و جيبي معاك الحار باش ندوزو هاد العدس يالاه تحركي
داكشي اللي دارت هنادي مشات كطير لكوزينة قدات ليه الهريسة فطبسيلة و جابتها ليه و مشات جابت طاس مع الغلاي ديال ميكة فلون الازرق و وقفات حداه و طلق يدو غسلها و هي تقول مو بفرحة
فضيلة : تبارك الله على بنتي هنادي اليوم هي اللي نصبات الغدا ولات حااادكة
هنادي شافت فماماها و ضحكات عكس حمزة اللي قال
حمزة : مالها صنعات نووي راه بنات صغر منها كيعجنو و كيطيبو و كيقومو بدار أحسن من هاد العجلة اللي عندك حاضية غير سريط و المريط و شي ما يشيط
هنادي خنزرات فيه و حنات راسها ما قادراش تدافع على حقها حيت عارفة الا قالت شي حاجة غاينوض يزرق ليها عينيها
فضيلة : شكون هدرك نتا انا كنهدر مع بنتي
حمزة : هادشي راه كان خاصها تعلمو من شحال هادي و خاصها تقوم باعمال دار كاملة و تريحك شوية راك حتى نتي عييتي و ضهرك ضارك
فضيلة : اوا انا اخويا باغا نفششها سوقك نتا مالك ديما حاشي كرموستك فشريط و كلمتي بكلمتك كي العكوزة
هنادي عطاتهم بضهر و خرجات وقفات حدا الباب كتلبس صندالتها ديال الميكة باش تمشي للكوزينة و هي تسمع خوها قال
حمزة : كح كح اش هاااادشي واااش هادشي مطيبينو لكلاب مالو مسوس هاكا ما تبقايش تعطي لديك المعزة تطيب كح كح يحسن عوان هاد الراجل اللي غايديها غايردها لينا فنهارها اللول لااالاااا انا كيبانلي نجلسوها من ديك لافاك و تعلم شغال دار أحسن لا تمشي تشوهنا مع الناس
هنادي كل كلمة كيقولها كتحس بيها بحال شي خنجر مسموم كيدخل لقلبها علاش عزيز عليهم يقولولها ديما كلام الللي كيجرحها واش ما كيحسوش ببنادم حتى لهاد الدرجة واش قلبهم حجرة و قاصح حتى لهاد الدرجة علاش من ديما عزيز عليهم يقولولها هاد الكلام واش ما كتهونش عليهم دموع ديال ديك اليتيمة اللي كتنزل من خدها كي جمرة علاش ما عمرهم إعتارفو بإنجازاتها شنو كان غايخسر كن شجعها و قال كلام زوين واش غاتنقص منو يد ولا رجل و لكن مع الاسف اللي قلبو كحل راه كحل ....
سمعات هنادي {اللله أكبر } صوت الآذان ديال الظهر تنهدات و سالت دمعة على خدها بسرعة و مشات لكوزينة حطات داك الطاس و اتاجهت للحمام توضات و خرجات اتاجهت لواحد البيت صغير عندهم فدار فيه نيت كتنعس فيه ثلاثة ديال سديدرات و طبيلة فالوسط و مفرش بفراش بسيط ....
هزات الجلابة ديال مها اللي كانت معلقة من مور الباب لبساتها و دارت شانها و فرشات صلاية و قامت صلاة و صلات صلاتها و فآخر ركعة بقات ساجدة على الصلاية كتناجي الرحمان و كتبكي و دموعها كيف شي واد نازلين من خدودها كاع ما حبسو كتبكي و تقول بهمس
هنادي: ياااربي الحبيب ما عنديش من غيرك بغيت نرتاااح بغيت نتهنا من هاد العيشة راه و الله ما عندي من غيرك اربي الحبيب نتا كتشوف خوتي كيفاش كيعاملوني بغيت حتى انا اللي يحس بيا و يحن فيا عييت أربي رحمني اربي راه ما بقيتش قااادرة ياك نتا الحنين الرحيم ياك نتا اللي كتلطف و تحنن القلوب انا ما بغيت والو من هاد الدنيا بغيت غير نقرا و نخدم و ندي ميمتي للحج و بغيت غير اللي يحس بيا و يتهلا فيا بحال ايها ناس واش ما منحقيش ....
عندما تضيق عليك الدنيا بهمومها و تتأخر أحلامك و تزيد عثراتك ، أجث على ركبتيك و إستقبل القبلة و إرفع كفيك إلى رب الجلالة و محقق الأحلام
ادعه بقلب خاااشع موقن بالإجابة بأن يعينك على طريق الحياة و ان يحقق لك ما تريد وان يسخر لك الأسباب التي تساعدك على النجاح و ان يزيدك قوة و صبرا على ما يواجهك من عقبات
إنك بحاجة الى ان يقف معك مدبر الكون فهو أعلم بحالك و بما يضرك و يسرك إنك بحاجة الى هدا التواصل الروحي بينك و بين ربك لتعود إليك الطمأنينة و النشاط و الهمة و الطاقة من جديد ...
# إقتباس
♤♤♤♤
سلات صلاتها و سلمات و ناضت جمعات صلاية و حطاتها فوق السداري و جلسات لارض على زربية و بقات ساهية فالفراغ كتفكر فكلام خوها و خايفة لا يديرها بصح و يمشي بجلسها من لافاك و تجلس فدار فخطرة و كاع دوك الاحلام ديالها غايتبخروا حتى هي عندها أحلام عندها طموح باغا تخرج باغا تلبس باغا تماكي باغا تخدم باغا تسافر حتى هي بحال البنات منين حلات عينيها و هي فدارهم الا خرجات كتمشي لسوق ولا لسويقة مع مها ولا للعروبية ديالهم من غير هادشي ما كاينش ما عمرها شافت حتى البحر بحال عباد الله و الا مشاو حتى جلسوها فدار غاتبقا عاطياها غير لتصبان و الطياب و التجفاف و الشقا و هي هادشي اللي ما باغاش...
كاتحس براسها غايتطرطق بقوة التفكير و كتفكر فكلام ماماها اللي قالت ليها واخا تقراي و الله لا حلمتي تخدمي نااري على حصلة يعني غاتبقا فدار سوى قرات سوى خرجات جلوسها فدار ما عندها منو هروب أش هاد الزهر اللي عندها و زيد عليها خوتها و السبان و المعيار يعني غاتولي حياتها جحيم فجحيم تمنات كن ما تزادتش كاع ولا تزاد فهاد العداب ...
تحل الباب وهو يدخل خوها حمزة اللي كان هاز فيدو تيليفونها قفزات من بلاصتها و تقادات فالجلسة و حنات راسها و لاح عليها التيليفون لوجهها و قال بصوت خشن كيفما العادة
حمزة : حاااضية سواريك لمك تيليفونك نقي و لكن واخا تخبي ففعايلك حتى تعياي غايجي الوقت و تفرشي أه و غير ديريها زوينة خبااارك توصل توصل
زدح الباب و خرج و هزات تيليفونها مسكينة و بقات كتشوف فيه تشق ليها من جنب بديك الزدحة اللي تزدح فاش كانت فالكوزينة و هي عاد شراتو مازال تا ما فرحات بيه و غير مها اللي جمعات ليها الفلوس باش تشريه أما خوتها و الله ما عطاوها السنتيم ما عرفاتش علاش دموعها هبطو واخا ماباغش تبكي و لكن شي مرات فاش كيكون قلبك عامر الدموع كيبداو يهبطوا راسهم بحال داك الكاس اللي كيبقا يعمر قطرة قطرة و لكن كايجي الوقت اللي كيفيض ....
خرجات من البيت و سمعات دقان فالباب خطات خطوات بطيئة فاتجاه الباب ديال برا و فتحاتو و هي تلقا ختها اللي كانت لابسة جلابة فالبلوسيال و دايرة زيف على راسها يكون عمرها فحدود الثلاثينات سمرة بحال ختها و حريفاتها عاديين و باينة فيها مكرهة و كتمضغ فالمسكة ...
هنادي : سعاااد
سلمات عليها هنادي و دخلات لصالون لقات مها جالسة اما خوها حمزة خرج لخدمتو حيت كيسوق الطاكسي ديما كيجي يتغدا و كيرجع ...
سعاد: مي لابس عليك
سلمات عليها و جلسات حدا فضيلة حيدات الزيف على راسها و بدات كتنش بيه
فضيلة : نحمدوه و نشكروه وا غبور هادي كي بقا راجلك ومولا دارك وولدك
فضيلة : علاه فاش كنتي تبكي عليه و تقولي منو نخلاق ماشتيهش بلي ماشي راجل حتى لدابا
سعاد بقات ساكتة و شوية ناضت كتبكي و تشكي عليهم حتى هي قلبها طااايب
سعاد : واش لخاطري أمي غير قولي ليا واش اللي كان عايش مع دوك الحمير و الضبوعة ديال اولادك و كيقيلو يمسحو فيا رجليهم كيف شي جفاف بحال جالسة ليهم على قلبهم واش هادوك يصبر عليهم شي حد طججوني ولاد الحرام داكشي علاش شديت بيديا و سناني فأول راااجل قصد بابي واخا عارفاه زهواااني و عينو زااايغة و مقشاااش أمي و كيسكر و كيضربني و صااابرة امي و لكن راه تهديت و فاش كنجي لهنا نغضب كنعاود نشوف دوك ولادك كندير بناقص و نهرب لداري شي بعض المرات كنقول اللهم يوسف راجلي ولا دوك الوحوش اللي معيشة معاك فهاد الدار أما انا كن جات عليا من زمااان نتطلق و نهني مخي و نجي لدار با
فضيلة : اوا أ بنيتي هادشي اللي عطا الله خوتك صعاب و قباح و انا براسي مكرهيني فعيشتي و حتى ختك مسيكينة عاد هاد صباح طرشها حتى خلا ليها ليطراس فحنكها
سعاد: الله يعطيه تشتيتة فهاد النهار شكون فيهم بعدا حمزة ولا داك صعصع ديال عصام ؟
فضيلة : أ باركة ما دعي فخوك
سعاد التافتت و شافت ففضيلة و قالت
سعاد: إوا يا ختي بااااز ليك مزال كدفعي عليهم
فضيلة : الكبدة ابنتي ما عندي ما ندير حتى هوما ولادي
سعاد خيبات وجهها و قالت
سعاد: اشمن ولاد الله يدك فيهم وتاد الله يعطيهم مصيبة ديما مبكيينها
هنادي : اودي ولفت أختي
سعاد حطات يديها على كتف ختها و كتشوف فيها بحنان و قالت
سعاد: هانتي أختي غير صبري و اول راجل دق باباك وياااك ترفضيه واخا انا تحشات ليا منين ديت داك السكايري الواحد ما خاصو يهز رجلو حتى يعرف فين غايحطها بعدا
فضيلة ضرباتها لراسها و قالت
فضيلة : كوني تحشمي
سعاد: اودي اللي عايش مع داك السكايري فين غايبقا يحشم تا نتي الله يهديك
هنادي : اختي انا ما بغيت زواج بغيت نخدم و نكون راسي و ندير دار و طوموبيل و ندي مي للحج و نسافر و ندور العالم
سعاد حطات يديها على صدرها و طلقاتها بواحد مولاتي ضحكة حتى مشات دار و جات حتى طاحو ليها الدموع من عينيها و هنادي مسكينة كاع ما فاهمة علاش كضحك بهاد الشكل ...
سعاد: هههه شنااااهو تخدمي ههههه *قبطات فكرشها * اااي أ مي كرشي ههه ويلي كنموت * مسحات دموع اللي تجمعو فعينيها بقوة الضحك و كملات كلامها * واش نتي بالعقل و لا بلا عقل
فضيلة: وراه داكشي اللي لقيتيني كنقولها راه الحل الوحيد اللي عندك باش تخرجي من هاد الدار هو تزوجي و انا ابنتي خاايفة عليها من دوك الرهوط يمشيو يديرولها شي حاجة و انا ما كيناش فدار ولا نموت راهم ياكلوها بلا ملحة و هادشي مسكينة ما كتهدر مع دراري و داخلة سوق راسها اما كن حتى حصلو عليها شي حاجة كن راه تمشي فيها
سعاد عنقات ختها جنب و بقات كتمرر يديها على دراعها و قالت
سعاد: أنا راني كنت كنقرا المحاسبة عامين فليسطيا و فاش شديت ديبلوم و قلتلهم بغيت نخدم شدوني هردوني عصا ولاد الكلاب و قالك حنا ما عندناش البنات كيخدموا دماغهم متزمت لأقصى درجة الله يلكَيها ليهم هادشي كامل أحبيبة اللي نتي عايشة فيه حتى انا دوزتو الحل الوحيد باش تخرجي و تسافري و تكملي قرايتك هو طيحي فشي ولد ناس اللي يقدرك و يديرك فعينو و ياااربي يكون أختي سعدك أحسن من سعدي من ديما كندعي معاك حيت انا عارفة غوانتانامو اللي غايكونو دايرين ليك فدار
هنادي حسات بالدموع نزلو من عينيها حيت عارفة بلي الأمر جدي يعني بلا ما تحاول تحقق شي حاجة معاهم أحلامها بااااح و الحلم ديال أنها تلبس الطابلية البيضا و تقري اللغة الفرنسية و دوران و الخروج عمرها تحلم بيه مع خوتها يعني الزواج هو الحل اللي بقا ليها وهي شكون اللي ضمن ليها راجل غايكون مزيان و لا غايكون بحال يوسف راجل ختها سعاد اللي ديما كيضربها و كيسكر و كيقمر و كيخونها و هي صااابرة غير باش ما تطلقش و ترجع لدار عند الوحوش ديال خوتها حقا هي فورطة كبيرة كن كانت فشي عائلة متفتحة كن راه حتى هي كتماكي و تلبس و تدير ما بغات بحال البنات اللي كتشوف فالجامعة كن حتى هي كانت غاتعيش أحسن من هاكا و لكن مع الأسف محيطها كيفرض عليها شحال من حاجة تمنات كن ما تزادتش فوسط هاد العائلة تمنات كن ما خرجاتش لهاد العالم شنو الفائدة من انها تزاد وتعيش هاد العداب و زيد عليها يتيمة الأب بزاف عليها حتى هي مازال صغيرة و ما قادراش تستحمل و قلبها طااااب و لكن ما عارفاش بلي الله سبحانه و تعالى كيدبر ليها امورها فسر و هي ما عارفاش و القادم أفضل بإذن الله ...
♤♤♤♤
تدبير الله لك أفضل من تدبيرك
فقد يمنعك ما تهوى ليختبر صبرك
فأرِه الصبر الجميل
يريك عن قريب ما يسرك
♤♤♤♤
مسحات دموعها و ناضت من حضن أختها كتمسح دموعها
فضيلة: ابنيتي باااركة من البكا راه طيبتي عينيك و الله ابنيتي الا كنقيل ندعي معاك ربي يديرلك مسلك د الخير
وصافي أ الحنينة ديالي أجي جلسي حدايا تعالي
سعاد كتشوف فختها و كتأسف على حالتها و التافتت عند فضيلة و قالت
سعاد: و الله حتى كتبقا فيا أمي الحاجة زوينة فحياتها هي سميتها ههه شكون سماها بعدا عمري سولتك
فضيلة بابتسامة
فضيلة : اوا كنا من شحال هادي كنتفرجو فواحد المسلسل هندي و كانت البطلة سميتها هنادي و كانت زويينة و انا كنت ديك ساعة حاملة بختك اوا و باك قالي الا كانت بنت نسميوها هنادي و داكشي اللي كان
سعاد : و قبلوها فالحالة المدنية
فضيلة: اوا فعوط ما نسميوها هند سميناها هنادي ما قالو لينا والو قبلوها فالحالة المدنية
هنادي : عرفتي أمي ما عمرها قرات معايا شي بنت سميتها هنادي من ديما كانكون متميزة فالقسم و كايعقلو عليا الأساتدة حيت كاتعجبهم سميتي و من ديما كايقولو ليا شنو كاتعني سميتك حيت كتعجبهم
فضيلة : اوا شفتي هاهي نفعاتك سميتك شكون بحالك هه
سعاد: هههه و بحال والو تجيب ليك شي راجل
فضيلة : ههه تي كيفاش تجيب ليها راجل نتي بانليا حمقك داك السكايري د راجلك حتى وليتي دخلي و تخرجي فالهدرة
سعاد حلات صاكها و عطاتها واحد الحويلقات سامبل اللي كايكونو دايرين و كبار حطاتهم ليها فيديها و هنادي غاطير بالفرحة عنقاتها و قالت ليها
هنادي: شكراا أختي لهلا يخطيك
سعاد كتشوف فيها و تنهد حطات يديها على خدها و قالت
سعاد: كن كانو عندي الفلوس نشريلك ما أحسن منهم
هنادي : لا اختي غير هادو باراكة عليا شكرا بزاف
سعاد: غايجيوك زوينين
هنادي كتكلم بحماس و بفرحة بادية على ملاميحها البريئة
هنادي: اه غانديرهم فاش غانمشي لافاك
سعاد طرطقات فيها عينيها و قالت
سعاد: كيفاش واش غاتحيدي زيف واش هبلتي ولا مالك
هنادي : ألااا اويلي بغيتيهم يقتلوني غاندير واحد الشدة ولاو كيديروها البنات شفتها فالفايسبوك كيقولو ليها توربان كتجي زوينة بغيت حتى انا نفرح براسي شوية و نبان حتى انا بحال البنات
سعاد جاوباتها بحزن
سعاد: و الله يدير اللي فيها الخير سيري تلبسي حوايجك و ديريها نشوف كيف غاتجيك ههه
ناضت هنادي للبيت لبسات كسيوة طويلة فالاسود مع سميطة ديالها فالمارون و مشات للحمام و دارت شال أحمر فوق راسها و قادات ديك الشدة اللي شافت اللي كيبقا العنق كيبان فيها واخا ما بغاتش تقاد ليها بقات ديرها و تعاود حتى صدقات عاد إرتاحت و دارت الحوالاق اللي جابت ليها ختها فودنيها عجبها راسها بقات كتبتاسم مع المراية و حفيرات الزين باينين فخدودها جات سوو كيوت ....
سمعات دقان فالباب صرطات ريقها و بدات كلها كترعد غالبا ما غايكونش حمزة حيت عاد جا و مشا إذن غايكون عصام ولكن هو كايكون فالخدمة أش غايجيبو ؟؟؟
سمعات الباب تحل و سمعات صوتو
عصام: الوااااليدة كاين شي غدا
فضيلة : راه ختك غاتمشي لافاك تغدا معاها
عصام : واخا
هنادي فالحمام صرطات ريقها و بقات كتشوف وجهها فالمراية و علامات الخوف بدات كتبان على ملاميحها و كتفكر واش تخلي هاد الشدة اللي دارت فراسها ولا تحيدها و لكن ما فيها والو أصلن الكول د الكسوة طالع على عنقها ما عندو ما يقول و زايدون عجبها راسها ...
مافيقها من سهوتها غير صوت ماماها اللي كتناديها
فضيلة : هنااااادي راه مشا الحال اجي تغداي باش تمشي
خرجات من الحمام و طفات الضو و اتاجهت لصالون بخطوات بطيئة كترمي خطوة و ترجع اللور خايفة من عصام لا يمشي يقولها شي حاجة و اخيرا دخلات لصالون و ألقات التحية
هنادي: سلااام عليكم
سعاد و فضيلة شافو فيها بإعجاب و قالت سعاد
سعاد: هاي هاي على زين واتاتك ديك شدة بقاي ديما ديريها نيت راه صهد
عصام خوها اللي كان صحيح و طويل و أسمر شوية و قرع و باينة فيه صعيب أكثر من حمزة كان حاني راسو كايكل فالعدس ...التافت و شاف فيها و الخبز ففمو كايمضغو بشوووية طلعها و هبطها و رمقها بنظرات كن كانو قرطاااس كن قتلها من زمان صرط داك الخبز و قال بصوت هادئ
عصام: غاتحيدي دااااك الزبل اللي دايرة و لا غانوض نهرس لديلمك كمارتك
فضيلة : ماالها اش فيها راه مستورة و لابسة بحال البنات بقا ليكم غير حوايجها دخلو ليها فيهم واااعيقتو عليها داكشي اللي خلاه داك الحمار د خوك تكملو ليها نتا
عصام حاني راسو و كايكل غير بشوية و مبرررد و قال
عصام: راني مزال كندوي غير بفمي و ما باغيش نوض نمد يدي تاااقاو شري و خليني أ مي نربيها راه هاد بنتك بداااو كيتحلو ليها العينين و زايدون شكون شرا ليها داك الزبل اللي دايرة فودنيها
سعاد: انااا اللي شريتهم لختي مالكم معاها خليوها عليكم اللي دارتها ما كتعجبكومش حتى هي مازال صغيرة البنت فعمرها عشرييين عام ماشي مية عااام خليوها تعيش شوية راكم خانقينها واش ما كتبقاش فيكم
عصام ضرب على الطبلة بيدو حتى قفزات هنادي من بلاصتها و قال
عصام: بدلي داكشي اللي دااايرة
هنادي طاحو دموعها من بدا و جديد كانت حاسة بيه ما غايبغيش هما اصلن خصهم غير علايش يعايروها و يجرحوها ..حنات راسها و خرجات من البيت و مشات للحمام كتشهق و خناينها هابطين وجهها ولا حالة غسلات وجهها مزيان و حيدات دوك الحوالاق و دارت شدة حجاب عادية و بقات كتشوف فراسها فالمراية و قالت بشوية
هنادي: الله ياخد فيكم الحق ياااربي تعطيني شي هزة يااااربي ما بقيتش قادرة مااابقيتش هادا الله اربي الحبيب هادا الله حتى انا بنادم من لحم و دم و قلبي ماشي من الحديد رحمني اربي رحمني
سمعات دقان فالباب عرفات غاتكون صاحبتها إلهام بنت جيرانهم اللي كتقرا معاها صديقتها مند الطفولة ... خرجات من الحمام و حلات الباب ووجهها عامر دموع باينة فيها باكية غير شافتها إلهام شهقات و قالت
إلهام: ويلي مالكي
هنادي ما جاوبتهاش حدها قالت ليها
هنادي : تسنايني هانا جاية
دخلات لداخل و هزات صاكها و خرجات و هي تسمع صوت عصام
عصام: هنااااادي
غمضات عينيها و عاودت فتحتهم بقوة الفقايص كرهات سميتها بسباابهم ...
دخلات لعندو و شاف فيها و قال
عصام: نعاااود نشوفك درتي ديك الشدة ديال الطيبات ديال الحمام * هز الخبز و كمل كلامو * و حق هاد النعمة حتى نشريلك الِخمار و غاديريه بسيف على حسك ديك ساعة نيت باش نرتاحو
فضيلة كتشوف فبنتها بقلة حيلة و قالت
فضيلة : أجي أبنتي تاكلي و سيري
هنادي كتهدر بصوت غالبة عليه الشهقة د البكا
هنادي: ما بغيتش أمي عطيني غير الفلوس نتغدا فلافاك
فضيلة جبدات واحد السريرة صغيرة عندها فصدرها ساعة ما لقات فيها غير درهم شافت فعصام و قالت
فضيلة : عفاك أولدي الا عندك شي خمس دراهم عطيها لختك
عصام حشا يدو فجيبو تهزات ليه نيت خمسة دراهم و لاحها ليها لأرض كان بإمكانو يحطها ليها فوق الطبلة و لا يعطيها ليها ليديها ولكن كيعجبهوم يدلوها...
خوتها معقدين لأقصى درجة مازال عندهم ديك النظرة ديال أن البنت فدار كتجيب غير العار و أن البنت ما عندها حتى فائدة فالمجتمع و ان البنت مديورة باش تشقى و تصبن و تربي مثلهم مثل العديد من المغاربة اللي مع الأسف مزال عندهم هاد الافكار رجعية ....
حنات بتثاقل و هزاتها من الأرض و وقفات وعطاتهم بضهر و خرجات من دار لقات صاحبتها إلهام اللي كانت بيوضة و شعرها طويل و عويناتها كبار و مشفرين مزيونة و كلشي طامع يتزوج بها فالدرب و لكن هي ما مسوقة لحد كانت لابسة كبيبط خفيف فالاسود مع سروال تجين و طالقة شعرها و هازة الصاكادو فضهرها مع نظارات شمسية من فوق شعرها رطيطب اللي كانت طالقاه كيوصل ليها حتى لنص فضهرها
إلهام: بكاوك دوك الحمير عاوتاني تفووو الله ياخد فيهم الحق الشكوى بيهم لله
هنادي بقات كتشوف فإلهام لمدة من زمن و فالأخير دورات يديها على دراع اإلهام و تكات راسها على كتفها و خطات خطوات لأمام و دموع من عينيها سايلين ... إلهام عرفات بلي غوتو عليها خوتها كيفما العادة و هدا هو حالها كتفضل انها تبكي على انها تهدر فموضوع خوتها حتى إلهام ما حكرتش عليها عارفاها غاتعاود ليها كلشي فاش غاتبكي و تفش قلبها ...
إلهام: نشدو طاكسي حيت تعطلنا
هنادي حركات راسها بالنفي حيت عندها غير الفلوس باش تغدا ...كملو طريقهم و الصمت هو سيد الموقف و وهنادي كتفكر فهاد الحياة المزفتة اللي عايشاها مع دوك الشمايت د خوتها دازو من جيهة المحطة فين كاينين الطاكسيات و من الزهر كان خوها واقف مع صاحبو فيصل اللي كان شاب عادي و رقيوق ووجهو مخسر و هاز كارو فيدو كيكميه و مربع يدو كيساينو طاكسي يعمر و من الزهر قشعوهم و هو يقول فيصل لحمزة
فيصل :ختك هاديك ياك
حمزة حيد الكارو لفيصل من يدو و بقا متبع إلهام بالعين و الابتسامة شقات ملامح وجهو و نتر نتيرة و صاط دخان و قال
حمزة : اودي ديك مي الله يهديها قالك خليها تكمل قرايتها راني هدرت ليها عليك و ما بغاتش
فيصل : اشوف أخويا نعيشها أميرة غير زوجني ليها راك عارفاني كنتجوانطا عليها
حمزة: و صافي أصاحبي راه هدرنا راني عوال نجلسها من القراية و نعطيها ليك
فيصل حط يدو على صدرو و قال
فيصل : يحفظك أ العشير
حمزة : اصلن ما عندها ما تجلس دير فديك لافاك كتعلم ليا غير التسلكيط و التقح***
فيصل : وا خويا واخا هاكاك رخفو عليها ديما طالعة كتبكي
حمزة التافت و خنزر فيه و قال
حمزة: بنتيلي بحال عنييبة مع راسك
فيصل : لا أخويا راه القلب عندي هشيييش و كتبقا فيا ديك اليتيمة
حمزة :خليها باش تطلع حرشة و مراة ديال زمان
فيصل : هاكاك راكم كتطلعوها كارهة الرجال و العالم
حمزة : حتى تزوج بيها و حن فيها انا قلبي قاصح ما فيهش المحنة
قربوا يوصلو لافاك و كان واحد الكراسى فطريق طلقات هنادي من إلهام و جلسات حاسة براسها سخفانة و عيانة و حلقها ناشف و طريق خاوية ما قدراتش تكمل
إلهام: مالك أختي
هنادي شدات راسها بيديها و قالت
هنادي: عييت أختي و الله حتى عييت
إلهام جلسات حداها و عنقاتها جنب و باست على راسها و قالت
إلهام: دابا يحن مولانا
حسو بشي حد واقف عليهم إلهام هزات راسها بانتلها مرأة كبيرة فالعمر بجلابة بيضة و دايرة زيف على راسها فنفس اللون و وجهها أبيض يشع نورا حسات هنادي حتى هي بشي حد واقف عليهم هزات راسها و شافت فيها و قالت
هنادي: بغيتي شي حاجة أ شريفة
قالت المرأة بصوت حنون
~: انا ما بغيت والو بغيت غير نقولك ما تبقايش تبكي أبنتي من قبيلة و انا حاضياك فاش كنتي جاية مع صاحبتك و كاتباني ليا مهمومة جيت غير نقولك الله يفاجيها عليك و ما تقنطيش من رحمة د سيدي ربي راه كبير و رحمتو واسعة و ما كيسد باب حتى كايحل بيبان هوما غير ثيقي بيه و دعيه راه هو اللي قادر يهد الجبال و يلين الحديد.و يسخر ليك أي حاجة بغيتيها غير *حطات يديها على قلبها و كملات كلامها * هدا خاصو يكون عامر بالله { ألا بذكر الله تطمئن القلوب } {ومن يتوكل على الله على الله فهو حسبه } { أفوض أمري إلى الله فهو بصير بالعباد } ديما فاش تنوضي فالصباح قولي هاد ثلاثة أدعية أبنتي فاش كتكون عندنا شي قضية و كنمشيو لشي محكمة أكيد كنفوضو شي محامي باش تربحي القضية فما بالك الا كل نهار فصباح فوضتي الله فأمرك
قالت هاد الكلمات و مشات و خلات هنادي و إلهام مستغربين كيشوفو فبعضياتهم و لكن وقع كلماتها كان عندهم تأثير عظيييم على قلب هنادي كأنها كانت محتاجة تسمع هاد الكلام ربما تكون رسالة من الله ليها...
ياك الله سبحانه و تعالى من ديما كيصيفط لينا رسائل اللي كتفيقنا و كتخلينا نزيدو نصبرو و نعرفو أن فرج الله قريب ...
♤♤♤
ورسائل الله تأتينا من بين الحين و الآخر
تأتي على شكل موقف دعوة رسالة
كلمة عابرة لا تلقي لها بالا
تأتي لتخبرك بأن الله هو وليك
ولا ولي لك سواه و أنه بكل شيئ عليم
# إقتباس
♤♤♤
ماحسات براسها حتى خرجات من فمها دعاء عجبها و ربما لامس قلبها من كلام الإمراة العجوز
هنادي: أفوض أمري إلى الله فهو بصير بالعباد
💝💝💝
طوموبيل jeep واقفة فجنب طريق حدا واحد المقبرة و بالضبط من فوق واحد القبر مكتوب عليه { ملاك بناني } تماك بالضبط حاط راسو كاظم على القبر و هاز التراب اللي فوق منو حاطو على نيفو ربما بهاد الطريقة كيحس بلي كيشم ريحتها الي توحشها و عينو مضببين بدموع وواقف على راسو واحد الراجل كيقرا سورة يس على قبرها فاش سالا عطاه شي بركة ليدو و قالو داك الراجل اللي ولا حافظوا بقوة ما كيجي لقبرها ...
الراجل: الله يخلف عليك و الله يرحمها اولدي و يوسع عليها ضيقة القبور * حط يدو على كتف كاظم و كمل كلامو * الحياة أولدي غاتبقا مستمرة و ما كاتوقفش عند شخص واحد و السعادة اولدي ما كتموتش مع الناس عارف بلي المرحومة اللي نتا دابا جالس حدا قبرها زوجة ديالك و اللي كيعجبني فيك أولدي هو الوفاء و الإخلاص ديالك لهاد المراة ما يمكنش يدوز نهار اللي ما تزورهاش فيه الله يرضي عليك الرجال بحالك قلالك غير هو كيبان ليا فيك مغموم الحياة غاتستمر سوى عشتيها بالم و بحزن سوى عشتيها بفرح و حب داكشي علاش نتمنى تعيشها بأمل و حب فعوط الحزن و الله يجيب ليك شي بنت ناس اللي تداوي قلبك و روحك
قال هاد الكلمات و مشا و خلا كلماتو فأذن كاظم اللي ربما ما عارهومش إهتمام و لكن يمكن مع مرور الوقت يؤثرو فيه حيت شي كلام تقدر ما تستوعبوش فدقة الاولى و لكن غير كتفكرو كيأثر فيك ربما أكثر من اللي كان غايأثر فيك فاش سمعتيه ...
كاظم حط راسو على قبرها و قال بصوت حزين مجروح مكسور جميع علامات الحزن بادية عليه
كاظم: توحشتك * تنهد و كمل كلامو * يا ريت كن كنتي عايشة يااا ريت كن بقيتي معايا و بجنبي شكون اللي كان كيحس بيا من غيرك شكون اللي كان كيفرحني من غيرك شكون اللي كان كيعرف الحزن الي كايكون مخبي فعيني واخا الضحكة على وجهي نتي أنانية متتي و رتاحيتي من هاد العداب و خليتيني انا كنموت فالنهار ألف مرة غيابك علمني نبكي بحال شي طفل صغير سمحات فيه الام ديالو و اختافت مع الزحام غيابك علمني نسهر و انا كنشوف فتصاورك غيابك خدا مني روحي و لكن نتمنى تكوني نتي بخير واخا انا من نهار غبتي الخير ما بقاش عارف طريقي * بقا ساكت مدة و رجع كمل كلامو و قال * اليوم الواليدة إقتارحت عليا نتزوج و لكن ما عارفاش بلي ما نقدرش نبغي شي حد بحالك شكون هاد بنت المراة اللي غاتحلالي من غيرك أمفششة قلبي ...
سكت مدة و كمل كلامو و دمعة نزلات على خدو
كاظم: ما يمكنش تحلا ليا من غيرك شي وحدة كنقسم ليك بلي خلقني و خلقك بلي ما بقيتش قادر نعيش بلا بيك حتى دموعي ما بقاوش قادرين يواسيوني و لكن ما تخافيش قلت لواليدة بلي البنت اللي بغيت نتزوجها خاص تكون سميتها هنادي بحال الإسم ديال بنتنا و عارف بلي عمرها تلقا شي بنت بهاد الاسم ...من غير ملاك و هنادي حتى بنت المرأة ما تقدر تحط رجليها فداري هاد الأسماء مقدسة بالنسبة ليا و ثيقي بيا حتى الا لقاتها غانعاملها بحال بنتي حيت هنادي بنتي و ملاك مرتي ....
# أنا لست إبنتك...أنا زوجتك
ناض و باس راس ديال القبر ديالها و بقا مدة حاط شفايفو عليه و فالاخير وقف و قال بهمس
كاظم: الله يرحمك اتاج قلبي
دار و تمشا بخطوات بطيئة و كيمسح دموعو بيدو حتى وصل لطوموبيل ديالو و حلها و دخل و ديمارا و زاد... مد يدو و شعل الراديو باش يخرج من هاد الجو د الكآبة اللي كيعيش فيه و هي تطلق أغنية اللي ربما زادت كملات على أوجاعو شحال خايبة فاش كتكون باغي تهرب من شي حاجة و فأول فرصة كتلقا راسك غير ما زدتي تعمقتي فيها ...
💔💔
والله ما يسوى
أعيش الدنيا دونك
لا ولاتسوى
حياتي بهالوجود
دامك إنت إللي
رحلت وكيف أبا صبر
على البعاد وكيف
بنثر هالورود
على البعاد وكيف
بنثر هالورود
ما وعدت إنك
تقاسمني المحبة
وتبقى لي حب
ولدروبي دليل
بس حسافة الموت
كان أقرب وأرحم
حسبي الله
وحده نعم الوكيل
حسبي الله
وحده نعم الوكيل
_حسين الجسمي/والله ما يسوى
💔💔
صدرات منو تنهيدة عميقة توحشها بزااااف راه ما ساهلاش تكون كتحماق على مرتك و تموت غيابها خلا فراغ كبير فحياتو و قتل قلبو خمس سنيين و ماقدرش ينساها ولو ثانية ...
هز التيليفون ديالو و دوز رقم ديال واحد الشخص اللي كيقصدوا كلما حس براسو توحش كلامها كيقصدوا كلما توحش يشوفها فالواقع واخا هو غير كيصبر راسو بهاد الطريقة أما ملاك مشات و ما عمرها ترجع و هاد الشخص هو الأخت ديال ملاك اللي كتشبه ليها بزاف جوديا...
دار سماعات البلوثوث فودنو و بقا كايناتظر يسمع صوتها اللي كيشبه لصوت ملاك كينتاضرها تجاوب على أحر من الجمر غير باش يتفكر صوت حبيبتو و ماهي الاثواني قليلة حتى سمع جوابها
جوديا: salut
كاظم: جوديا
جوديا بفرحة قالت
جوديا: كااااااااااظم اووووومايكاد توحشتك بزاف شحال هادي ما عيطتي ليا
كاظم : على أساس نتي كاتعيطي
جوديا: نو نو نو شحاال عيطتلك البارح و ما جاوبتينيش توحشتك و الله حتى خليتي بلاصتك فرنسا خاوية بلا بيك كي بقات طاتي زبيدة و لقمان كلشي مزياان كلشي صافا البلاد المغرب كلشي هو هدااك
كاظم: وي كلشي مزيان حمد الله * باستغراب * شفتك فرحانة شنو واقع
جوديا :*بدلع* علااش ما بغيتينيش نفرح
كاظم :*حك دقنو و قال بابتسامة * لا غير بنتيلي فرحانة زيادة عن اللزوم و كتكلمي بواحد الطريقة فشكل ...
جوديا: و لكن ما غانجيش عندكم اليوم غانمشي عند شي صحاباتي
كاظم: إدن من اللول جاية تساراي ماشي جاية لعندنا
جوديا: نوو و الله حتى جاية نشوفك و بغيت نقولك شي حاجة
كاظم: يكون خير و ردي البال لراسك واخا الله يرضي عليك
جوديا: بيزوووو باي
فصالون مغربي كبير مفرش على حقو و طريقو و فوسط منو طبيلة د الخشب كلها منقوشة بنقش واااعر محطوط فوق منها صينية ديال أتاي ... جالسة أم كاظم لالا زبيدة و حداها الخدامة فريدة و هازين فيديهم كويسات ديال أتاي و زبيدة ساهية كتفكر و فريدة حداها نطقات
فريدة: إوا يالالا أش بانلك تمشي تخطبيها
زبيدة : هادشي كامل عايشة فيه ديك البنيتة مسكينة فريدة : اييه ألالة إلهام بنت ختي صاحبتها روح بروح و كتعاود ليها هنادي كاااع داكشي اللي كيدوز عليها مع طاسيلتهم عندها خوتها صعاااب معيشينيها الحرااااير
زبيدة : *متقات و قالت * يا ختي و شحال بقات فيا هاد البنيتة فكراتني فراسي حتى انا كانو عندي واحد خوتي صعاب و المشكل انا فاش تزوجت لقيت حتى الراجل صعيب راه عاد رطبتو اما هي الا تزوجت بكاظم كاع ما غاتلقا معاه المشكل ضرافات يديرها فوق راسو
فريدة : وييه سيدي كاظم مرضي و ما تلقاش بحالو
زبيدة : غزال الله يبعد عليه العين الخايبة كن غير تبعد عليه ديك لصقة د خت مراتو و ديك النسيبة عندو و ديك طاسيلة د مراتو ما عنديييش معاهم واخا تغطسيهم ليا فالعسل وااالو ما كيدوزوش ليا مراتو حقا كانت ضريفة و زوينة و لكن شي حاجة فيها ما كانتش كتدخل ليا لخاطري
فريدة حنات راسها و قالت بحزن و بهمس
فريدة : اوا الله يرحمها الا رحموها فعايلها
زبيدة : نعام قلتي شي حاجة
فريدة : ما قلت والو ألالا قلت الله يهدي ما خلق
زبيدة : و فوقاش غاتمشي عند ختك
فريدة : اليوووم ألالة غانمشي عندها فالعشية
زبيدة : وشحال ديال طريق بيناتكم
فريدة : ماشي بزاف كنمشي غير بالطاكسي
زبيدة : واش عايشة حتى هي هنا فنفس المدينة ديالنا
فريدة : ااه ألالا حتى هي هنا فنفس المدينة
زبيدة بفرحة قالت
زبيدة: إواااصااافي مزياااانة القضية اليوم نمشيو عندهم فالعشية نهضرو معاهم والا وافقو نرجعو نديرو معاهم خطوبة بشكل رسمي
فريدة : و إلا ما وافقاتش ألالا
زبيدة حطات يديها على صدرها و قالت
زبيدة : هادي زبيييدة و أجرك على الله نخليهم يوافقو بلهلا يطريه ليهم ما تخاافيش البنت غاتوافق بجهد الله واخا نعرف ندير ليهم السماوي و السحور ههه
فريدة ضحكات و ناضت و قالت
فريدة : إوا الله يدير اللي فيها الخير ألالا
زبيدة : كيفما فاجتيها عليااا يا ختي يا فريدة الله يفاجيها عليك
فريدة : ما درت غير داكشي اللي خاصني ندير نتمناو من ربي يتبت الغرس و توافق
زبيدة : لا تخافيشاااي بجهد الله غاتوافق و الضحكة واصلة عند ودنيها راه وليدي كاااظم هدا واخا نعرف نجلس ليهم عند العتبة ديال الباب
فريدة : اوا يكون خير إن شاء الله وانا نعاونك نبركو فيهم حتى يوافقو
زبيدة : أجي بعدا هاد البنت كيف دايرة وصفيها ليا
فريدة : بحالها بحال أي بنت عندها حقها د الزين سميمرة و كدير دريرتها و داخلة سوق راسها ما صمكة ما عورة ما عرجة كتسمع كتشوف بصحيحتها الله يخليها لميمتها
زبيدة : امم اليوم نتوكلو على الله و نمشيو ندويو مع مها صاوبي شي مسكوتة و شي حرشة و شي طرحة د الملاوي نديوهم فيدينا نديرو معاهم كاسكروط و نجبدوا ليهم الموضوع و منها نيت حتى انا نشوف مرأة ولدي
فريدة : اوا الله يجيبنا فصواب أ لالا
زبيدة :أميين و الله يرحملك الواليدين اوا هانتي سبحان الله هو يصحابلو ما غانلقاوش ليه هاد هنادي قول هي صدقات غير من العائلة شوفي المكاااتيب
فريدة : إوا راه الحاجة الا مكتابة مكتاابة حنا غير كنديرو السبب و ربي كيكمل
زبيدة : داكشي اللي كاين
سمعو الباب ديال برا تحل عرفوه غايكون كاظم اللي رجع
فريدة : نحط الغدا دابا ألالا
زبيدة : إييه باش نتغدا أنا وولدي أما لقمان محال يجي غايدي جنات لماماها و عندو الخدمة
فريدة : واخا ألالا
هزات الصينية و خرجات ما هي الاثواني قليلة حتى دخل لعندها كاظم و ابتاسم ليها واخا الحزن بادي على ملاميحو بشكل كبير و حتى زبيدة بادلتو الابتسامة تقدم عندها بخطوات ثابتة وواثقة فنفس الوقت حنا على يديها باسها و قبل راسها
زبيدة: الله يرضي عليك الله يغطيك و يفرشك بالرضا يا وليدي
كاظم: فينا هي هنادي
زبيدة عرفاتو كيقصد جنات ديما كيعيط ليها هنادي
زبيدة: داها لماماها راه فرعاتلو راسو بتيليفونات
كاظم رد راسو اللور و غمض عويناتو و تنهد باينة فيه عيااان
زبيدة: مالك أ حبيبي
كاظم: كنت عند مفششة قلبي ملاك
زبيدة : ودااابا تجي اللي تنسيك فيها حتى نتا
كاظم حل عينو و تقاد فالجلسة ما عجبوش الحال فاش قالت ماماه هاد الكلام كن كان شي حد أخور يسمعو خل ودنيه كلشي عندو قابل لنقاش الا ملاك مرتو قال بصوت خشن
كاظم: ما كاينااش أ الحنانة بنت المرأة اللي غاتقدر تنسيني فيها و الله ما كاينة و مازال ما تزادتش
زبيدة : *دارت يديها على دقنها و قالت * اوا أوليدي ما عرفتي المكتاب أش قال ما عرفتي تزوج شي مرأة تنسيييك فريحة ملاك و ما يجي منها
كاظم :*دار يدو على قلبو و قال بصوت حزين * و ما الحب الا للحبييب الأول داكشي اللي كنت نحس بيه مع ملاك إستثنائي مختالف أ الواليدة ما كاينش بحالو فالعالم و هو شعور اللي كاتحس بيه غير مرة فالعمر و ما كيتكررش
زبيدة : خلااص عليا من ديك الهدرة د المسلسلات و الافلام ما فهمتش أنا شنو كان عاجبك فيها اييه الله يرحمها و يوسع عليها فهاد النهار كانت ضريفة و حنينة و كنتو كتبغيو بعضياتكم ما نكروش ولكن اولدي كانت فشي شكل شي بعض المرات ما كانتش كتعامل معاك مزيان و نتا كنتي داير ليها كي الما القليل شحال من مرة رفعات صوتها عليك حدانا على حوايج بساااط يعني ما كانتش كتحتارمك شحال من مرة خرجات بلا شوارك عقلتي نهار دابزتو و ما خلات ما قالت ليك و نتا ما كنتي داير ليها واالو عمرو يتنسا ليا شحال عايرتك داك نهار و قالتلك سبان اللي ما عمرك سمعتيه و نتا كتعنق فيها و تبوس و تقولها سمحيليا و جايب ليها الكادو من الفوق شحال من مرة كانت تقيل تضحك مع التيليفون و نتا ما جايب خبار ماعمرها تفكرات عيد ميلادك من ديما نتا اللي داير ليها الشان و المرشان وهي منفخة عليك تقول شنو كسباات و عقلتي نهار اللي قالتلك طلقني و السبب حيت ما خليتيهاش تلبس داك التقاازب ديالها و حيت ما بغيتيهاش تمشي لعيد ميلاد صاحبتها وبزاااف أوليدي هادشي ماشي دق السحور هادي راه نيت موكلاك مخ الضبع
كاظم تعصب من كلام زبيدة و رفع نبرة صوتو شوية
كاظم: الحناانة هادشي كامل اللي قلتيه وقع فاش كانت حاملة و كانت نفسيتها مبدلة و انا هادشي نسيتو من الأسااس حيت انا كنبغييها أ الحنانة و كنبغييييها فهمتيها ولا لا
زبيدة : لااالاااا اوليدي هادشي وقع قبل ما تحمل غير لقاتك حتى نتا على قد يديها و صافي
كاظم تقاد فالجلسة و عض على شنايفو بقوة كيبرد فيهم الفقصة اللي ركبات فيه زبيدة بهدرتها ما باغيش يتهور و يقول شي كلمة يجرح ماماه بيها
كاظم: كيفاااش لقاتني على قد يديها واش انا كنرضع صبعي وااش انا ما عنديش العقل كيف كنبان ليك ما فهمتش بالله أ الحنانة أصلن من اللول ملااك ما كنتيش كاتحمليها واخا ما عمرها أداتك ولا دارتلك شي حاجة وهادشي كامل اللي قلتيه كانت كتآديني بيه أنا يعني خلي الموضوع بيني و بينها أ الحنانة و آخر مرة نسمع عليها هضرة بحال هاكا أ الواليدة حيت أقسم لكي يمينا الا كنحس بقلبي كيتقطع فاش كنسمع عليها كلام بحال هاكا و بالضبط منك نتي أ الحنانة سدي الموضوع عفاك
زبيدة : كيفاش الموضوع بينك و بينها راك أ وليدي ما عارفاش انا باش كنت كنحس فاش كنت نشوفها كتغوت عليك و نتا ساكت ليها راه اعدى حاجة عند الواليدين هي يشوفو مرأة ولدهم ما كتحتارمش ولدهم و كتنهض فيه قدامهم ...
كاظم : الحنانة عفاك باركة راه قلبي طايب الله يرحملك الواليدين ما تكمليش عليا جاي نرتاح كنترجاك باراكة
زبيدة : خليني حتى انا نخوي قلبي رااه عامر واااه عييت نقول نسكت و ما نهضرش ولكن راه بزاف هاد الهبال اللي داير على هاد ملاك ولا مفششة قلبك اللي خلقها خلق غيرها
كاظم وقف و بغا ينصارف حيت حاس براسو غاينفاجر و قلبو غايطرطق بهاد الهدرة اللي كيسمع من ماماه على حبيبة قلبو و المشكل ما يقدرش يقول شي حاجة حيت كيخاف يقول شي كلمة ما هياش لمو و يصدق فشي طاب و شي ماطاب اللهم يبدل ساعة بأخرى ...
كاظم شاف فماماه بنظرة إنكسار و قال
كاظم: رسول صلى الله عليه و سلم قال {اذْكُرُوا مَحَاسِنَ مَوْتَاكُمْ وَكُفُّوا عَنْ مَسَاوِئهِمْ) صافي أ الحنانة اللي فات مات ما تحكيش على دبرة الله يرحم الواليدين
زبيدة وقفات و ربعات يديها و تكلمات بصوت هادئ
زبيدة: لااا اولدي أنا ميييمتك و اللي ضرك يضرني و عارف معزتك عندي قداااش عارف بلي ما نقدرش نخسر ليك ولكن أولدي صااافي الله يجعل شي بركة عرفناك كتبغيها و لكن ربي بغاها و داها و زايدون ماعرفتي الخير فين كاين ربما هاد الموت ديالها فيها الخير ليك و الله سبحانه و تعالى عارف اللي يليق ليك و اللي ما يلقيش ليك سمعتيني حتى نتا عطي فرصة لراسك و فتح قلبك من بدا و جديد
كاظم دار يدو بجوج على خصرو و قال بصوت حنون و مكسور فنفس الوقت
كاظم: لمن غانفتح قلبي أ الحنانة غير قوليلي لمن وهو تقفل من نهار مشات من دنيا
كاظم: نهار تلقاي بنت تكون سميتها هنادي أنا موجود نتزوج بها من غيرها ما كاينش أ الحنانة
قال هاد الجملة و خطا خطوات لأمام باش يخرج من الصالون ...زبيدة سكتات مدة و قالت بصوت كيتحدا كلامو
زبيدة: لقيتها أولدي لقيت هنادي
كاظم تشلات الحركة ديالو و بقا واقف فبلاصتو مدة كيستوعب كلام الأم ديالو و جملة 《لقيت هنادي 》 كتكرر فمساميعو بوتيرة سريعة ما مصدقش أنها لقاتها بهاد السرعة ما مصدقش أنه صافي قريب يحقق الأمنية ديال الأم ديالو حيت بما أنها لقاتها فأكيد راه غاتخطبها ليه و يتزوج بها كان كيظن بلي عمرها تلقاها و لكن كلشي تضرب ليه فزيرو ... تخالطت الأحاسيس و المشاعر اللي كيحس بيهم حيت من جيهة تحقق حلم الأم ديالو و بهادا غاتكون راضية عليه و من جيهة حزن حيت فاش غايتزوج غايخون مراتو اللي ماتت و من جيهة أخرى فرح حيت وأخيرا غاتكون فحياتو بنت كتمتالك نفس الإسم ديال بنتو اللي توفات قبل ما تزاد و هاكا غايحس بيها كأنها بنتو واخا ما عمرو شاف هاد البنت و لكن بمجرد ما عرف أن إسمها غايكون نفسو إسم بنتو حس بمشاعر فشي شكل إتجاهها أحاسيس كايحس بيهم أي اب اتجاه بنتو إحساس الحماية إحساس الخوف عليها إحساس الحب الصادق ليها إحساس العطاء بدون مقابل أحاسيس فشي شكل تكونات فقلبو حس براسو بدا كيبادلها أحاسيس و هو مازال ما شافها واش هاد الإنسان طبيعي ؟؟؟...
بطبيعة الحال لا حيت أصلن هو مريض نفسي و سنين و هو كيتعالج عند الأطباء النفسيين و لكن بدون جدوى واش ممكن هنادي تقبل تزوج بشخص غايشوف فيها بنتو ؟؟؟ ممكن آه و مممكن لا و لكن حتى واحد ما عرف المكتاب أش فيه و الأسرار اللي ممكن تكشف مع مرور الوقت واش فعلا غايبقى كيشوف فيها بنتو ولا غايتبدل كلشي مع مرور الوقت من يدري ....
زبيدة : كاااظم شتك ما جاوبتينيش واااا وليدي و معاك دااوية
كاظم ضهرات إبتسامة جميلة على شفايفو التافت عند مو حيت كان عاطيها بضهر تقدم بخطوات ثابتة ووقف حداها و قال
زبيدة طرطقات فيه عينيها و تصدمات من كلامو و جاوباتو
زبيدة: اينا بنتك أولدي وا هادي راه غاتكون مراتك إن شاء الله الا كتاب
كاظم عض على شنايفو و حرك راسو بنفي و قال
كاظم: ربي كبير أ الحنانة مشات ملاك و جات بنتي هنادي
زبيدة هبطات خدها بيديها و قالت
زبيدة : واش أوليدي داوي من نيتك واش حماقيتي ؟؟
كاظم : قلتلك أنا مريض نفسي و نتي ما صدقتيش و دابا غانتزوج باش نرضيك و لكن عمري غانتعامل معاها كأنها زوجة غانتعامل معاها كأنها بنتي اللي ماتت كانقسم ليك بلي غانحميها أكثر من نفسي و لكن عمري نشوف فيها مرتي حيت انا هاكا داير هادشي اللي داير فيا الله فاش ماتت ملاك دات عقلي و قلبي معاها
زبيدة صرطات ريقها و جلسات ما عرفات ما تقول ليه من غير أن عويناتها تغرغروا بدموع حيت ما عرفات مادير معاه بدا كيبان ليها مسطي واخا هو يسطي قبيلة بقا فيها بزاف عارفاه مقصح من جيهة بنتو اللي ماتت ...
هو كيحمااااق و يتسطى على الدراري صغار و نهار حملات مرتو كان فرحان بزاف و عجبو الحال و فاش ماتت ملاك و بنتو دقة وحدة مرض فعقلو و موتهم أثر عليه بزاف لدرجة الا سمع سمية ملاك كيحيا جرحو من جديد و فاش كيشوف بنيتات صغار كيتغرغرو عويناتو بدموع حيت كيشوف فيهم هنادي ....
كاظم لمح آثار دموع فعينين الأم ديالو ...جثا على ركبيه و شد يديها بين يديه و باسهم و بقا مدة على هاد الوضعية و فالأخير هز عويناتو و هز يدو حطها على خد زبيدة و قال
كاظم: أنا بخير أ الحنانة و لكن شنو ذنبي الا ماتت بنتي و انا مزال ما شفتها أي حاجة كتفكرني فيها كنبغيها حتى من سميتها ؛ مع الاسف ممكن نظلم معايا هاد البنت اللي غانتزوج بيها و لكن تأكدي بلي غانشوف فيها بنتي و غانبغيها و لكن ما نقدرش نعيش معاها كزوج حيت أنا كنشوف غير ملاك اللي كتستحق تكون مرتي و مشات يعني دور ديالي كزوج سالا دعي معايا نتوفق فالدور ديالي كأب
زبيدة ابتاسمت ليه و اليد اللي كان حاطها على خدها هزاتها و باستها و قالت
زبيدة : و حتى لإمتى غاتبقى تشوف فيها كأنها بنتك أولدي ؟؟؟ شوف عارفة داكشي اللي دزتي منو ماشي ساهل و لكن واخا هاكاك حاول تقرب منها و هاد البنت واش فنظرك غاتصبر لهادشي ديالك انا بغيت نزوجك باش نشوف ولادك أولدي و ما عرفتي هاد البنت تقدر تنسيك فمرتك و ما عرفتي الا قربتي ليها تولد ليك و تعيش حياة أحسن من لي كنتي غاتعيشها مع ملاك
امم أش قلتي
كاظم بقا ساكت و كيشوف فماماه ما باغيش يخسر ليها خاطرها و بعد مدة من التفكير ما تعداتش ثواني قليلة فالأخير لقا الحل اللي يرضي ماماه واخا هو عارفو عمرو يكون ...
كاظم: كنواعدك أ الحنانة الا قدرات تنسيني فملاك و حسيت بمشاعر العشق الحقيقي معاها والا قدرت نبغيها أكثر من ملاك و إلا حسيت من جيهتها بإحساس الزوج لزوجتو من غير إحساس الأب لبنتو كنواعدك غانعطيها حقها كزوجة * تغرغروا عينيه بدموع و كمل كلامو * و غانسا مفششة قلبي
زبيدة حسات بفرحة كبيرة من كلامو باست راسو و قالت بصوت حنون
زبيدة : إوا هااااكااا نبغيك أولدي أنا متأكدة غاتنسيك فيها و يكون خير إن شاء الله
دخلات فريدة لصالون و قالت
فريدة : لالا راه حطيت الغدا
التافتت عندها زبيدة و قالت
زبيدة : واخا ها حنا جايين
انصارفت فريدة و ناض كاظم جلس حدا زبيدة و عنقها جنب و حاس براسو باغي يخوي قلبو بدا كيتكلم و ساهي فالفراغ
كاظم : نقدر نجيك أ الحنانة مريض فعقلي و كتقولي كنبالغ و كنزيد فيه و لكن ثيقي بيا العشق و الحب اللي كان فقلبي من جيهة ملاك كبيير و كبيير بزاف واخا ربما فبعض الأحيان كانت كتعامل قبيح و ما كانتش كتسمع لهضرتي و لكن ثيقي بيا كنت كنشوف حتى عيوبها حاجات زوينين كان قلبي غااارق فحبها و حبها قتل الإناث فعيني ما بقيت كنشوف حتى وحدة من غيرها ربما حيت هي أول حب و بغيتها من أول نظرة و عشقت طريقة هضرتها ابتسامتها كلشي فيها كنت كانبغيه و لكن شاءت الأقدار تفارق دنيا و نتمنى أن جرح اللي فقلبي يبرا انا اللي قتلتهم بيدي أ الحنانة أنا اللي هبطت عيني و ماشفتش طريق قتلت بنتي و مرتي دقة وحدة انا قتال أ ميمتي بسبابي بسبابي وقع هادشي و هاد العداب اللي أنا فيه نستاهلو حيت أنا ما مزيانش * شاف فماماه و لقا دموعها هابطين و كمل كلامو * حتى الا تعلقت بهاد البنت خايف نخسرها خايف تضيع مني ها علاش كنت كنتهرب من زواج أ الحنانة حيت وليت معقد من الموت و خايف الا بغيت و فتحت قلبي لشي وحدة تموت ولا تمرض و لا يوقع ليها شي حاجة حيت صافي يعني الا قدر الله و تعاودت نفس تجربة راني نموت و نقتل راسي بيدي حيت ما بقيتش قادر
زبيدة مسحات دموعها من عويناتها و حطات يديها على فخدو و قالت
زبيدة : غير جرب أولدي و الا لقيتي راسك ما قادرش تقرب منها و لا ما قادرش تبغيها انا بيدي نطلقها منك و و نقلب ليها بيدي على راجل اللي يستاهلها و نتهلا فيها و نعوضها و كنواعدك أولدي عمري ندكرلك زواج على فمي و لكن جرب أحبيبي ما عرفتي تعلق بيها أكثر من ملاك و تقدر تنساها و نتا أحبيبي ماشي قتال هداك مكتاب الله كايتصرف غير ربي كيدير سبب و صافي ما تبقاش تلوم راسك شوف كيف ضعافيتي بقوة التخمام فين هوما العضلات الشحمية اللي كنت مربي يا وليدي ههه
كاظم ابتاسم على كلام ماماه و قال
كاظم: الله يخليك ليا أ الحنانة * قبل يديها و راسها و كمل كلامو * كنبغيك بزااف و كن ما نتي ما عرفتش شنو كان غايصرا فيا نتي أكبر نعمة فحياتي
زبيدة شافت فيه و قالت
زبيدة : اوا على حسب كلامك نتا كاتبغي غير مفششة قلبك اما حنا محااال واش خلات لينا شي بلاصة فداك القلب
كاظم هز راسو و شاف فسقف و ابتاسم بطريقة خطيرة برزات وسامتو بشكل زوين حنا راسو و شاف فيها و قال
كاظم: نتي كانبغيك أكثر من كلشي و الله بلاصتك ما يعوضها حد و الدليل هاهي ملاك ماتت و نتي دبرتي ليا فبنت أخرى و لكن نتي الا مشيتي شكون يعوضك أ الحنانة غير قوليلي شكون ؟؟.
زبيدة حطات راسها على صدرو و قالت
زبيدة : داك لسان عندك حلو و داكشي باش كتعجبني نتا واحد اللحلاح منك ما كاين قلبك هشيش يا وليدي و رجال بحالك قلال و ياربي تكون هاد هنادي كتستاهلك و ما تعصبكش ليا و تسمع لهضرتك يا ربي تنسيك فهمك أنا بغيت تكون هنادي كي الدوا غير تحطها على الجرح يبرا
كاظم : إن شاء الله بعدا كيف درتي لقيتيها بهاد السرعة
زبيدة ناضت من على صدرو و تقدات فالجلسة و قالت
زبيدة : معاك زبييييدة و أجرك على الله
كاظم جاوبها بابتسامة
كاظم: مشاء الله عليك شيطان كيصفق ليك
زبيدة ضرباتو لضهرو و قالت بصوت عالي
زبيدة : يااااك أوليييدي رديتيني بحال الشيطاان اوا الله يخلف عليك و الله يجازيك بخير
كاظم ناشط على مو توحش هاد الجو اللي كيخلقوه بيناتهم ماماه عندو أغلى من دنيا و ما فيها و ما كيبغيش يقلقها و كيعجبو ينشط و يطلع عليها الطوبية داكشي علاش هي مقربة ليه أكثر من لقمان ...
كاظم: حاشا أميمتي بغيت نقصد بلي نتي دماااغ و دكية واش اللي ترطب قلب الواليد الله يرحمو اللي كان أقصح من الحجر غاتكون ساهلة
زبيدة عجبها الحال من كلام ولدها كيعجبها اللي يعتارف بدكائها و فطنتها و كايعجبها اللي يمدحها
زبيدة : إوا هاكاك حجاب الله عليا *دارت يديها حدا عينين كاظم و قالت * خمسة فعينيك فسيكفيكهم الله و هو سميع العليم
قصة أنا لست إبنتك أنا زوجتك
محتوى القصة
التنقل بين الأجزاء