جحيم في السرير الجزء 12

أوس حدر راسو:جاني عرض وغنمشي نخدم تما..(مطولة فيه الشوفة وحاسة بالعافية شاعلة فيها)..و ولكن...ممكن الى رجعتيلي مانمشيش ء نجلاء...

نجلاء شافت فيه وهضرت بألم:نتا أصلا مقرر تسافر...

أوس بجدية:ونتي أصلا ماباغياش ترجعيلي...واخة شايفة حالتي هكا...وواخة عارفة بلي أنا محتاجك دبا كثر من أي وقت...

نجلاء بحدة:اوس ...صاافي باراكة...عييت من هاد الضغط وهادشي كامل...

أوس وقف مقصح راسو:صاافي..فهمت..أنا غنمشي وتهناي من صداعي فمرة...

نجلاء بعصبية:أنا ماقلتش هكااا...

أوس دار عندها:نجلاء..الى قولتيلي ماتسافرش ماغاديش نسافر...

نجلاء بألم:نتا عارف بلي أنا ماغنقدش نرجعليك...تخيل بلي انا لي خنتك كنتي غتسمحلي؟؟؟

أوس تزنك:شنو كتقولي!هادي ماشي هضرة...

نجلاء باستهزاء:شفتي...غي هضرة وعصباتك أما أنا شفتك معنقها وعريانين بجوج فوق مخدة وحدة اهئ اهئ(غطات وجهها)عمرني غنقد نسمحلك عمرني اهئ اهئ..وعمرني غنثيق فيك حيت غدرتيني مرة ونتوقع منك أي حاجة...نتا لي من نهار عرفتك ديما لبنات دايرين بيك...كفاش غنقدر نسالك...(أوس مصدوم)تنكر بلي خنتيني كثر من مرة!؟..(تزير)انا عارفة فاش تزوجنا كنتي شحال من مرة كتخليني فالدار وتمشي دير لي بغيتي...ولكن دباا لااا..الا الخيانة ء أوس اهئ اهئ...عمرني غنقد نسمحلك عليها..حيت شفتك بعيني ماشي غي حسيت...هادشي علااش الى كنتي باغي تسافر سير...ولكن قبل منها طلقني...

أوس عض على شنايفو مفقوص:الى كان هذا قرارك ماغنزيدش نضغط عليك(دموعها هبطو) وتا انا مانقدرش نبقى هنا...حيت صافي مابقى عندي حد فهاد الارض السعيدة...(تنهد بألم وقلة حيلة ورخى يديه دليل على انهزامو)..اللهم نبعد ونبدا حياتي من جديد...

خرج من لبيت وهي تلاحت على مخدتها كتبكي...اه ماباغياهش يسافر..وماحاملاش تحرم من شوفتو...ولكن خصها تجي منو...ماشي منها هي...اما باش تمنعو ولا تحبسو...كرامتها ماتسمحش ليها...بقى فيها الحال لي باغي يخليها ويخلي تا ولدو لي جاي فالطريق ولكن ...هادا مكتابهم ويمكن من الافضل ليهم...

خرج أوس ماكيشوفش قدامو...شافيهم بزربة وتا تم خارج ودار شافيهم...

أوس بصوت مجروح:تهلاو فيها...

دار ومشى بلا مايساين يجاوبوه اما علي ومليكة تأكدو بلي ماسامحاتش ليه...داك الساع طلعت مليكة عند بنتها وبقات تهدنها...كانت كتبكي بهستيرية..هي قررت هاد القرار ولكن فنظرها هو تخلى عليهم بسهولة...نسى ولاح كلشي مور ظهرو...

بمجرد ماركب أوس طوموبيلتو عيط لحسن:ألووو...انا موافق...نبداو نوجدو فكلشي من دبااا...انا غنسالي خدمتي هنا باش فأقرب وقت نسافر...

حسن بفرحة:مبروك عليك...انشاءلله تكون فرصة العمر ليك...

......

مرت أيام...الأمور عادية...نجلاء تالدبا مازال ماعرفت والو...كان عندها أمل يحي أوس شي نهار للدار ويفاجئها...كانت كتساينو...كتخيلو داخل وكتحلم بيه قدامها وكيقولها غنبقى على ودكم...الايام دازت عليها قاسية بحال الجحيم...ولكن ماكاين لا خبر لا والو....

ليوم كلشي مجموعين على الطبلة...نجلاء بدات شوية تهبط لتحت وتحرك حيت الى بقات فبيتها تحماق...تا كيسمعو الدقان ..حلت مليكة الباب...لقات راجل واقف قدامها...

الرجل:سلاام...انا عز الدين محامي سي أوس...

مليكة تلفت:ء آه...(دارت كتعيط لراجلها)عليييي عليييي..

علي جا قدامهم:سلااام..

المحامي سلم عليه:أنة عز الدين محامي سي أوس..ممكن نهضرو شوية...

علي:اه مرحبا تفضل...

دخلو للمكتب وبقى يسمعو...

المحامي:سي أوس طلب مني نخبركم بلي راه سافر لبارح(علي تصدم)..وعطاني توكيل فحالة ما لالة نجلاء طلبت الطلاق...باش المحكمة طلقها غيابي فأسرع وقت...

علي بحدة:وعلاش ماطلقهاش قبل مايسافر؟؟

المحامي:الامور كانت مرونة عندو واضطر يسافر بسرعة(جبد وثيقة وعطاها ليه)تفضل...

علي باستغراب:شنو هادي؟؟

المحامي:هادي عقد ديال أرض السي أوس لي كتبها بإسم مرتو نجلاء بن عياد...

علي خرج عينيه بصدمة:ك كفااش!!😳😳..

ناعسة فالبيت وضو الشمس الخافت داخل من الشقة ديال الريدو...هوا الصباح كيحركهم يمين وشمال وكياخد معاه خصل شعرها...تا تحلت لباب ودخل بالحس...كيزطم على طراف صبعانو ومشى باتجاه الفراش...طلع كيتشبط وحط صبيعاتو على خدها...مبسم وعاجبو لحال...تا حست بيه بدات تخبع الابتسامة ديالها وهو غوبش حيت مافاقتش...غضب وبغى يهبط وهي تجرو وطيحاتو على لفراش...كتهرو وهو كيتهز فالسما وشعرو كيتطاير معاه...كلاتلو داك الصبيعات الصغيورين البيوضين...وهو كيضحك وعاجبو لحال..

كرم:بالاااكة ء مامااا هههههههه..

نجلاء كضحك وتلعب معاه:هادي كادو على ود لي يجي مسلت عند ماماه فالصباح..

كرم:مابكيتس نزي صافي هههه..

نجلاء والضحكة فيها:ياااك ههههه..غناااكلك..اممممم همهمهم ...

كرم بدا يغوت:ميمااااااا هههههه ازيييييي ...

نجلاء نعست وطلعاتو لفوق حطاتو فوق رجليها وشدتلو يديه كتلعب معاه لفوق وهو حاس براسو طاااير فرحاان وهي كتفرح فاش كتشوفو عاجبو لحال...عارفاه كيموت على هاد اللعبة...

مليكة على برا كتعيط:كرررررم...كرررم..فين مشيتي؟؟

نجلاء وكرم سمعوها...هبطاتو بزربة وتخباو تحت ليزار:شووت ماتهضرش(مخبعين لتحت)ماديرس الصوت واخة!!

كرم دارلها علامة🤫 بقات تضحك بالشوية ..تا مليكة حلت لباب...صقرو....

مليكة بهدوء:نجلااء بنتي!!..نوضي..راه مالقيتش كرم...

قربت حداهم وحطت يديها على نجلاء تفيقها تا تهزو قد قد وغوتو بالجهد"صباح النووور" ..مليكة تخلعت مسكينة ورجعت باللور وهما بقاو يموتو بالضحك عليها...

نجلاء ناضت باستها:ههه سمحيلنا خلعناك..

كرم ناض حداهم داك قزم:سمحيلي لميما هلعتك..ماما لي كالتهالي..

نجلاء دارت يديها على خصرها:ياااك!!

كرم ببرائة:ماكنكذبس انا..لمذوب حلام..

مليكة حنات هزاتو:الله يحفظك ء لحبيب ديالي...خلعتيني ء لخوينز...قلبت عليك فالصبح مالقيتكش...

كرم بهدوء:زيت نسوف ماما..لبالح ماسفتهاس..زات معطلة..

نجلاء تنهدت ومليكة جاوبت:غي كانت فالخدمة مع باسيدك...مايبقاوش يتعطلو غي ماتقلقش ..

نجلاء خداتو من عند ماماها:مامقلقش مني!!

كرم بابتسامة:انا نسيت ثافي ..

باستو وعنقاتو كتشم ريحتو منتشية:كنحمااق عليك انا...ماما..بابا فاق ولا مازال!!

مليكة:راه خرج يجيب الكاطو لكرم...

نجلاء بسمت وشافت فولدها:شتييي...شتيي اش درتي فياا بابا ولا يبغيك كثر مني ههههه..

كرم:نووو باسيدي كيبغينا بزوز..

نجلاء حطاتو:ياله اجي نغسلو وجهها باش نهبطو نفطرو...

كرم:ااوووووكيييي...

مليكة:ماتعطلوش...لبسو وهبطو..

نجلاء وكرم معنقها:اووووكييي هههه...

لبست نجلاء حوايج الخدمة...كبيبط زرق وجيب كحلا دالجلد تحت الركبة ومزيرة مع ليبوط قصار كوحل عاليين وصاك بسمطة طويلة علقاتو على كتفها...شعرها فتحاتو مابقاش كحل..طلقاتو وقادت وجهها وعاد هزت كرم لي كان كيلعب قدامها..داتو لبيتو لبساتو حوايجو وصبادري ديالو وهبطو للجردة

غي وصلو مشى كيجري:عمتوووو...

لينا بابتسامة:لحبيب ديال عمتوو..مواااح...على رويحة يخليك ليلي ..

نجلاء بابتسامة:صباح نور لينا...

لينا:صباح لخير ء حبيبة...(شافت فيها)هاااي هاااي هاااي على الزين دالعالم..شنو هادشي كامل!!

نجلاء جرت الكرسي وجلسو حداها:عادي ء صاحبتي هههه..غي غنتلاقا بإكرام ليوم وصافي..

لينا:ههههههههه...إكرااام امممم..

نجلاء دورت وجهها منها:لاحول الله ههه..(شافت فولدها)كرم غي بالشوية عليك...

لينا شافت فيه وفيها:كيشبهلو بزاااف ياااك؟؟

نجلاء تبدلو ملامحها وبقات على حالها:آه..

لينا:مازال ماهضرتو تا مرة؟

نجلاء ببرود:وماغاديش نهضرو...

لينا:لمهم أنه بعدا ماقطعش الصلة بولدو وكل مرة يعيطلو..

نجلاء بهدوء:اممم أصلا كرم هو المهم...

جاد بالجهد:عموووووو ...

كرم ناض كيجري:عمووو زاااد...

جاد كيضحك وهما كيضحكو معاه:ولات تعجبني هاد زاد حسن من جاد هههه...

كرم عنقو وجاد هزو فوق كتافو:البطل ديالنا كرم هييييي...

كرم:اه اه هههه..

نجلاء كضحك:صباح لخير جاد..

جاد:صباح النور عليكم..(لينا بسمت ليه بهدوء وحنات راسها)لينا صافا!!

لينا:حمدلله..

مليكة:ها لفطور واجد...اجيو للطبلة..

خرج أحمد كيتعاون بعكازو بالشوية وطه معاه وعلي جايب السخرة يحطها فالطبلة..

كرم ماخلا شكون هزو وفرح بيه ولكن هو كيحماق على باسيدو..

نجلاء كلات معاهم وناضت للخدمة تمشي تقاد شغالها وعاد تمشي تلاقا بإكرام...باست ولدها وخرجت للطوموبيل فتحتها وركبت ومشات....

علي وجاد وطه كانو غيلحقو عليها فاش يساليو...

نجلاء سايقة ومركزة..شعلت موسيقى هادئة وكملت طريقها...

.......

فأمريكا وبالضبط ف ولاية نيويورك...واقف فواجهة المكتب ديالو لي كطل على ناطحات السحاب الامريكية ..كيرشف من قهوتو ويد دايرها فجيبو ..تا سمع دقات خفاف..دخلت ووقفت موراه..

سارة:هاااي أوس..

أوس دار عندها:هاااي سارة...

قربت عندو باستو فخدو:داد وونت توك تو يووو..(بابا باغي يهضر معاك).

أوس:اباوت وااات؟(علاياش)

سارة:عرفتش..

أوس بسم:سميتها ماعرفتش..

سارة ضحكت:ههه ام ترااييين(كنحاول)..نتا و بابا تبغيو نهضر عربي...بات(ولكن) اي كانت(لا أستطيع)

أوس:ههه ياا اي نووو(عارف)

خرج من المكتب وهي تبعاتو مبتسمة..تا دخلو لمكتب أخ حسن "عامر"..

أوس:سلام ..

عامر:سلام ولدي تفضل..

سارة واقفة قبالتهم كتصنت...

عامر:وصلني بلي السيمانة الجاية غتسالي المشروع لي خدام فيه...بصااح!

أوس تنهد:آه..خدا مني مجهود كبير...

عامر بابتسامة:عارف بلا ماتقول...هادشي علااش تفضل...

أوس مدا من عندو:شن.

و هادا؟.

عامر:غيفت(كادو) كيعبر على امتناني ليك ولخدمتك..

سارة بسمت وأوس جاوبو:مايحتاش ء سي عامر...هادي خدمتي وضروري نديرها...

عامر بسم:متواضع بزااف..ولكن خدمتك تستحق الشكر...من نهار بديتي معانا وحنا لفوق...فالصراحة أحسن حاجة دار خويا هي رشحك لياا...

أوس بسم:شكرا ليك...كلامك شرف ليااا...

سارة:شحال داز على خدمتك معانا ء أوس!!

أوس سكت وعامر نطق:3 سنييين..بففف الوقت كيدوز طاير...

أوس بهدوء وحاني راسو:ماشي ديما كيدوز بزربة!!

سارة جلست مقابلة مع أوس:شنو رأيكم نخرجو مجموعين ليوم!

عامر:نخرجو علاش لاا ههه..

أوس باستغراب:شنو المناسبة؟؟

سارة حكت مور وذنيها:والو..نحتافلو بالمشروع لي قريب يسالي..

أوس بسم:اوا تا يتسالي بعدا ههه..

عامر بنشاط:نحتافلو دبا ومن بعد شنو نخسرو ههه..

أوس جمع الوقفة:اووك...ياله انا نمشي نكمل خدمتي...بسلامة...

خرج أوس وعامر سول سارة:غيجي ميكاييل؟؟

سارة تبدلو ملامحها:آي دون نوووْ...(ماعرفت)

عامر طول فيها الشوفة:اوك عيطيلو وشوفيه يمشي معانا...مايمكنش تخرجي معانا وخطيبك ماشي معاك..

سارة عيبت وجهها وناضت:اوك..

خرجت طالع ليها الدم:اولويز ميكايييل ميكايييل...اوووف اوووف...

....

نجلاء دخلت للمكتب قادت خدمتها بزربة وكااع الشغال لي خصو يدار وابخي خرجت مع داك 12 شدت الطريق باش تلاقا بإكرام بالمدينة لي كانت ساكنة فيها...كل بلاصة...كل شارع خرجو فيه كدوز منو كتفكر شي حاجة دوزتها مع أوس...دايرة نظازر الشمس وهادئة...اه هادئة حيت عارفة بلي مابقاتش الهضرة تنفع...ولا البكى ولا الفقصة...أوس مشى وبدا حياتو من جديد وعمرو فكر يرجع حتى فأصعب لحظاتها...ولدت وماجاش..كان كافيه يشوف ولدو فأبيل فيديو...ويبقى يهضر معاه مرة مرة باش ماينساهش..كأنو مخليلها المساحة تعيش حياتها بحالا هو ماكاينش وعمرو غيكون...تفريطو فيها بهاد الشكل قتلها عرق بعرق...كرهت النهار لي بغاتو فيه واخة سخونية الراس رجعت عليها بالبرودة...وعارفة بلي المشاكيل لي وقعت شحال هادي بيناتهم خلاتها تخلى عليه بسهولة واخة كان محتاج ليها...مي هادشي مايعطيهش الحق يخرج من حياتها بلا رجعة...كان ممكن يبقى يحاول ويصبر ودوز داك السحابة وتنسى شوية بشوية خيانتو...ولكن هو ختار يبعد وينسى هو كلشي....

وصلت لحدا باب إكرام..كلاكصونات عليها وهي تهبط شادة فكرشها..ضحكت عليها بزااف تا دخبت وباستها..

نجلاء:ذهبت الرشاقة فخبر كان هههه...

إكرام ضربتها لكتفها:كترديهالي اهئ اهئ..ماتفقصينيش تا حاجة ما جات قدي...

نجلاء بعدم تصديق:واش من نيتك؟؟ راه حاملة وقريب تولدي..اشمن رشاقة وحوايج كتهضري عليهم!!

إكرام عوجت فمها:دبا يكرهني رشيد...الناموسية مابقاتش تكفينا بجوج...

نجلاء طلقتها بضحكة:ههههههههه...لا لااا هادي بزاااف والله..(غمزتها)وعلاش نتي أصلا ماتنعيش فوق منو معنقاه..باش مايلقاش منين يهرب هههه...

إكرام بقات تضحك:آشمن..بغيتيني نخنقو مسكين...

نجلاء:زدتي فيه..لي سمعك يقول رشيد قد الكميشة ههه..دبا خليناا فين غنمشيو؟؟

إكرام بسمت:غنمشيو ناخد كوموند وصيت عليه من تركيا عند مولات المحال لي كنعرف...ووووو ..اه...بفف وليت نسى...لمهم غنمشيو ناخد شي تكشيطة للسبوع حيت تاوحدة فلي عندي مابقات عاجباني...و ابخي نتغداو تافقنا...

نجلاء حركت الكونطاكط:اوووكيييي هههه..

إكرام:يخليه ليلي...توحشتووو..كيبقى راجل بنتي!!

نجلاء شافت فيها:صافي خطبتيه من دباا ههه!! فري عندك الحق بنادم هو لي يدبر لبنتو نيت الرجال قلالو هاد السلع بقاو غي الذكورااا...

إكرام بسمت:كيحمقني كرم تباركلله...غزيول..كيشبه فأوس بزاااف ..

نجلاء تبدلو ملامحها وإكرام عضت شنافتها..جاوبتها بهدوء:اوا ضروري..علا ماشي باباه...

إكرام بدلت الموضوع:اواا شنو..كاين شي جديد؟؟(نجلاء علات حواجبها بمعنى لاا)ولكن بيني وبينك...وليتي تيتيزة..يعطي للرجال العمى...

نجلاء هزت يديها وهي سايقة:آميييين...باش مايشوفني فيهم حد خخخخ..

لينا جالسة فالجردة كتقرا تا جات عندها مليكة:لحبيبة ديالي..تجي تقطعي معايا الخضر محتاجاك!!

لينا بسمت:واخة مرات عمي..

حركت كرسيها المتحرك ودخلت معاها..بدات تعاونها فالكوزينة..

لينا:مرات عمي!!بغيت نسولك؟؟

مليكة:واخة ابنتي سولي..

لينا:دبا أوس عمرو لا هضر ولا شاف نجلاء؟؟

مليكة حطت من يديها:اوا راك عارفة ابنتي...انا تصدمت ماكانش سحابلي غيجبدوها ل3 سنين..(تنهدت كتشوف فالفراغ)بنتي وعارفاها..راسها قاصح وكرامتها فنيفها..ولكن كتبغيه..(لينا تزيرت تفكرت همها)كتبغيه بزااف...ماقاداش تعيش بحال كااع الناس...زعمة علاش جوج كيبغيو بعضياتهم يكتاب يتفارقو...

لينا عينيها دمعو:تا انا كتبقى فيا...وأوس واخة معرفتي بيه قليلة عارفة ومتأكدة كان كيبغيها بزاااف...

مليكة بألم:كاان..دبا موحال ء بنتي...عمرو سولني عليها ولا ذكرها..غيكون بدا حياتو من جديد كيتها هي لي عايشة فالماضي بلا ماتقول...

لينا بهدوء:ماكنظنش يكون نساها ..ولكن كيف قلتي الله أعلم..

مليكة شافت فيها مطولا:اوا ونتي!!

لينا علات راسهت كتقشر خيزو:مالي أنا؟.

مليكة حطت يديها على يد لينا:انا بحال ماماك وحاسة بيك...(لينا تزيرت)الله يرحمها ا بنتي...لمهم انا عارفاك كتبغي جاد فسكات...علااش ماكتحاوليش تبداي معاه من جديد؟؟

لينا عينيها تغرغرو بالدموع:لاا ء مرات عمي...جاد يستاهل حسن مني...انا مانصلاحش ليه..(شافت فالكرسي)ندبلو بيا على آخر أيامو يدي وحدة مشللة ماتقد دير والو...

مليكة تقصحت:ماتقوليش هكا...نتي غتبراي...الطبيب قال بلي حالتك فيها أمل..خصك غي توافقي وتبداي العلاج...

لينا شافت بعيد:مانستاهلش نمشي على رجلي...هذا عقابي على كااع شنو درت فحياتي...نستاهل كثر من هادشي...

مليكة هبطو دموعها:ماتبقاي تقولي هكااا..هاداك قدر الله...لايمتا غتبقاي تلومي فراسك على داكشي لي فات...

لينا مسحت دموعها وحركت الكرسي خارجة من الكوزينة...مازال مانسات أنها تسببت فموت ماماها ومازال عاقلة على كااع فعايلها...فنظرها هذا عقاب من الله وهي راضية بيه كماعلله ترتاح نفسيتها شوية...

....

نجلاء وإكرام خرجو قضاو شغالاتهم كيختارو ويضحكو تا حست إكرام بالجوع مشاو جلسو فمطعم واعر...

إكرام:جعت جعت جعت...

نجلاء كضحك عليها:وا صاافي من الصبح تعاوديها(شيرت للكارصون)هاحنا نطلبو...

عيطولو وطلبو لي بغاو...وهما كيساينو تجي الماكلة شمت إكرام ريحة قبيحة دالكارو..

إكرام:ايييخ ايييخ...

نجلاء شماتو تاهي بقات دور فراسها:اوووف..واش بنادم ماكيعرفش يحتارم الناس لي حداه..

إكرام:اووف معدتي غتقلب بهاد الريحة..

نجلاء دارت وهو يبان ليها كيكمي موراها:خووويااا(دار شافيها)عافاااك راه لكارو لي كتكمي مجهد شوية وريحتو واصلانا بلا قياس(شيرت لإكرام لي كتحشم تجاوب على راسها)شوف معايا مرا حاملة هاد الريحة غضرها...

الراجل ببرود:ولكن لكارو حرية شخصية...

نجلاء دارت عندو فمرة واخة جالسة:حريتك كتنتهي عند حرية الآخرين...والتدخين أصلا ممنوع فهاد الاماكن المشدودة كنظن...

الراجل بسم جنب وبقى يشوفيها وهي مطلعة حواجبها فيه تا طفاه وبسم معلي حواجبو..

الراجل:دبا مزياان؟؟

نجلاء بهدوء:شكرا...

دارت عند صاحبتها غمزتها وهي تجي الماكلة كلااو مزيان خصوصا إكرام...سالاو بقاو كيرتاحو ولكن إكرام حست براسها ماشي صافا..

نجلاء شافتها كتحرك مع الكرسي:م مالك؟؟

إكرام تلفت:ماعرفتش..ن نمشيو؟؟

نجلاء شيرت تخلص:اوك...

إكرام غي وقفت شدها الحريق وهي تطوى على جوج:آهههه...

كلشي لي فالمحال تخلعو ونجلاء قفزت مشات قدامها..

نجلاء:اويلي مااالك؟؟

إكرام بدات تبكي:و وقيلا كنولد...اههههه اممممم كرشيييي....(نجلاء 😱😱😱)..

كلشي لي تما تخلعو ونجلاء شدتها الكرش بالخلعة:أويلييي...دباا!! ياك قولتي مزاال!!

إكرام غوتت:واش انااا لي غنعرف..دبا ها هي هاابطة نقولها تبقى!!😖😖 ..

نجلاء تلفت ماعرفت مادير وهو يجي داك الراجل:خصها تمشي للسبيطار دباا...

نجلاء شافت فيه:ء آه..نعيطو ل ل لراجلك اش سميتووو دالزمر..ء اه رشيد..

إكرام شادة فكرشها:آههه كرشيييي ..عنتقووني...نجلااء اهئ اهئ كنمووووت..

الراجل:أنااا نديكم...ياله معايااا..نوصلك للسبيطار..فالطريق عيطي لراجلها...

نجلاء:أ أنا موطوريزي...بلا مانمحنوك...

مدلها يديه:أناا وليد...لمهم مانضيعوش لوقت..نتي صعيب تسوقي هكاا انا نوصلكم غي ياله...

إكرام:واا سربيييونييي كنموووت اهئ اهئ كرشي...

نجلاء هزت راسها وخلصت ومشاو بزربة ركبت لور حدا صاحبتها كتهدنها ووليد سايق كيوصيها تنفس مزيان...ماتعطلش بزااف دغيا وصلو...طلعوها بزربة ونجلاء داخت تخلطو عليها...صعيب فهاد المواقف الانسان يكونطرولي راسو...

وليد:تكالماااي...شنو نعيطو لراجلها؟؟

نجلاء ضربت على جبهتها:ويلي نسيت..

وليد بسم:عادي...امور الولادة كتلف...

مشات جوج خطوات وصونات لرشيد:ألووو رشيد..شووف بلا مقدمات إكرام كتولد...سربي واجي..

رشيد وقف طافج:ك كتولد!!د دباا؟؟

نجلاء:اه..راه كنا كنتغداو تا جاها الطلق..راحنا فلوبيطال jjj..كنساينك...راها دخلت تولد...

رشيد تلف:و واخة انا جااي..

وليد وقف مع نجلاء كأنو شي صديق كتعرفو من شحال هادي:كتجيك من العائلة؟؟

نجلاء:بحال ختي..صاحبتي لعزيزة...

وليد:الله يخليهالك...

نجلاء بسمت متوترة وخايفة عليها:آميين..بعدا(شافت فيه)غنكونو عطلناك على شغالك...صافي الى بغيتي نمشي دبا غير سير وسمحلنا بزاااف وشكرا على كلشي...

وليد بسم:لاا ليوم جوغ فيغيي(عطلة) واصلا مانمشي تا نطمنو عليها...

نجلاء بسمت:اوك لي بغيتي...سمحليا واحد الدقيقة...

عيطت نجلاء لماماها علمتها بلي كاين وأنها تقدر تعطل...اما مليكة تمنات لإكرام تنوض على خير ويفكها الله بيخير...

قطعت ورجعت كدور فالكولوار كتساين يجي شي خبار..تا كيبان رشيد جاي كيجري...

رشيد بتوتر:نجلااء!!

نجلاء مشات عندو:رشيد...راها لداخل...

رشيد تالف:م ماشي وقتها دباا...قالت الطبيبة باقي شي سيمانة...شنو هاد الزربة...

وليد بسم:لبنيتة مزروبة تخرج يمكن ههه...

رشيد شافيه وفنجلاء وهي تنطق:اممم نعرفك..سي وليد هو لي وصلنا للسبيطار..فاش كنا فالمطعم دار معانا لوجيست مسكين محناه معانا...انا ماكانش ممكن نسوق فداك الحالة...

رشيد هز براسو:اه فهمت(مد يديه مبسم)انا رشيد...وشكرا بزااف خيرك فوق راسي...

وليد بتباتة:العفو...الله يفكها على خير...

نجلاء تنهدت:آميييم ياربي...

بقاو واقفين تالفين نجلاء ورشيد ماهازاهم تا دنيا تا خرج الطبيب مبسم...

مشاو تقبطو بيه:مبروووك...جاتك بنيتة كتحمق...

رشيد عينيه دمعو:ب بصاااح!!..

نجلاء دارت يديها على فمها عينيها مدمعين:مبرروك ء خوياا رشيد...مبروك عليكم..(شافت فالطبيب)و إكرام بيخير؟؟

الطبيب بسم:حمدلله..شوية ونخرجوها لبيتها...

رشيد فرح وشافيهم:و ولاات عندي بنيتة..هههه ما مثيقش..والله ما مثيق هههه حمدلله ياربي...

وليد مربع يديه:تربى فعزكم...

خرجت إكرام من لبلوك حداهم..رشيد شدلها فيديها كيضحك فوجهها:على سلامتك ء حبيبة...مبروك علينا...

نجلاء فرحانة كتبارك ليها تابعاهم..ووليد مازال ما مشى...

دخلوها للبيت..قادوها ودخل عندها رشيد شوية وهو كيبارك لمراتو...عاد دخلت نجلاء ناشطة ..

نجلاء:لحبيبة ديالي..مبروك ماتزادلك..

إكرام مسخسخة وشادة فكرشها:ربي يخليك ء حبيبة..تا نتي الله يخليلك كرم..

نجلاء بابتسامة:آمييين..

شوية ودخلو لبنيتة فالشاريو ديالها...إكرام عينيها غرغرو..عطاتهالها الممرضة وشدتها بين يديها...

إكرام بصوت دافئ:بنتي الزوينة..شحال وانا نساينك..

رشيد حنى كيبوسها بالشوية:اووو شحال صغيورة ...فوقاش غتكبر؟؟

إكرام ضحكت:هههه الله يعطيك شي عقل...مازااال شوية عاد تكبر ههه..

رشيد:هههه كتحمق..بحالك ء حبيبة...

نجلاء بسمت ورجعت بيها الذكريات لنهار ولدت كرم...

#فلاش_باك..

ناعسة على ظهرها تا حلت عينيها كتبان ليها مليكة واقفة عند راسها...

مليكة بفرحة:على سلامتك ء بنتي...على سلامتك...

نجلاء كتحرك بزز:الله يسلمك..اخخخ..

مليكة:غي بالشوية عليك ء حبيبة..راه لولادة ماساهلااش..

نجلاء:دازت عليااا والله..

مليكة كتمسح على شعرها:عارفة ء بنتي..ربي نجاك...

نجلاء:ف فين ولدي؟؟

مليكة بسمت:شوية ويجيبوه ليك...

نجلاء علات راسها فالسقف عينيها مدمعين تا جات تهضر وهو يدخل علي وطه ولينا جارينها بالكرسي...

كلهم هنؤوها وعلي باسلها راسها:مبروك عليك ء بنتي...

نجلاء بصوت مخنوق كتحاول تخبي:الله يبارك فيك ء بابا..

علي كحز خلا لوخرين يسلمو عليها ونغز مليكة:ماعيط ماسول؟؟؟

مليكة دورت راسها بالسلب:لأ..

علي:غيكون مافخبارو والو...

وهو يدخل رشيد وإكرام فرحانين وكيباركو ليهم...

مليكة شافت فعلي:لاا دبا غيكون وصلو لخبار...

وفنفس اللحظة صونا تيلي ديال علي وهو يترون..خرج بزربة من لبيت...

نجلاء شافت فباباهة باستغراب..ماعرفتش معامن كيهضر..

إكرام:فين ولي العهد ديالنا..

تحلت لباب مدخلينو..مليكة:هاهو جااا ههه..

نجلاء نسات كاع التعب والألم لي حسات بيه فالولادة..كااع تمارة والعيى لي حست بيهم..كااع الظروف القبيحة لي عاشتهم...غي تحط بين يديها هبطت دمعة من عينيها بفرح...

نجلاء شادالو صبيعاتو الصغيورين:شحال زوين..الله يحفظوو...

مليكة بسمت:الله يخليه ليك ء بنتي...تبارك الله عليه...

دخل علي قبالتها..

مشى عندها بعينين مدمعين:حفيدي الزوين..(شافيهم)دبا أنا وليت جد هههه...

طه ربت عليه فظهرو:مبروك عليك ء خوياا...

علي مد يدو وخداه من عندها كيأذن ليه فوذنيه وكلهم مبسمين كيشوفو فيه...نجلاء دموعها هابطين بهاد اللحظة المؤثرة وابتسامة مجروحة على وجهها بسبب النقص لي كاين..هو أن هاد لبيبي خلااق كأن ماعندوش بااه..واخة باباه بالحياة هاهو ماكاينش معاه...

#الواقع..

نجلاء معنقة راسها بيديها وكتشوفيهم...ماحسدتهمش ولكن حست بالفراغ لكبير لي كيخليه الراجل فبحال هاد المناسبات..كيبقى وجودو كيهون بزااف دالمصاعب...ولكن لاا...تفكرت الايام لي بكات فيهم بسباب هاد الموضوع...أن أوس عمرو فكر فيها ولا سول فيها...رجعت تنفست بالجهد وزادت عندهم..

نجلاء:اهلاا بمرات كرم ههه..(بجوج بيهم ضحكو)اجييي شنو غتسميوها؟؟

رشيد شاف فإكرام ونطق:نغم..

نجلاء بسمت:اوووه على وزن كرم ههههه...زوينة عجبتني هههه..

إكرام:اممم..نغم الزوينة...مرحبا بين بيناتنا...

دق ودخل:سلاام..

إكرام استغربت وشاف فيهم...

نجلاء:وليد...نتا مازال هنا!!

وليد بسم ودخل:بغيت نهنئ بالمولودة الجديدة ونمشي...

إكرام:شكراا بزاااف ليك ء خويا...

رشيد بسم ليه:شكرا بزااف لهلا يخطيك...

وليد:هانية..(شاف فنجلاء)شنو تبغي نرجعك لطوموبيلتك؟؟

نجلاء شافت فيهم بتهرب:م ماعرفت..بلا مانعذبك...

رشيد صونا ليه التيلي وهي تشوفيه إكرام:شكون كيصونيلك؟؟(حاضية طرافها)..

رشيد شاف فيها وفنجلاء:هادا أوس..

نجلاء تزيرت وتبدلو ملامحها..شافت فوليد:اوك..ياله حنا نمشيو دبا...(حنات باست لبيبي وإكرام ومدت يديها لرشيد)غدا نرجع نشوفكم...بسلامة..

إكرام بهدوء:باي باي الزين ديالي...

خرجت نجلاء ووليد تبعها:بسلامة...

رشيد فتح لخط مع أوس ونيشان دار بنتو فلاكام:سلااام عمو أوس..

أوس خرج عينيه بصدمة:نووو ويييي ...ههههه وليتي أب ء صاااط هههه...

نجلاء خرجت حانية راسها..ووليد غادي معاها حس بيها صافا بااا...غي وصلو للباب شافت طاكسي وهي تشير ليها..

نجلااء:طااكسي...(وليد شافيها)انا غنمشي دبااا بسلامة وشكرا على كلشي..

وليد تصدم:لاا مانخليكش تمشي بوحدك...

نجلاء بسمت:موالفة عادي..اصلا مازال لحال...ياله..بسلامة عليك...

مشات بزربة خلاتو واقف مبلوكي...ركبت فالطاكسي وهو هز طوموبيلتو وتبعها...باغي يطمن عليها ويعرف بلي وصلت لطوموبيلتها...وفري غي وصلت ركبت طوموبيلتها..قيد الماطريكيل ومشى بحالو مبسم...

أوس بعدما هضر مع صاحبو داز يهضر مع إكرام:على سلامتك ء إكرام..ومبروك عليك..

إكرام بابتسامة:الله يبارك فيك..صافي حنا غنتناسبو هههه..

أوس بسم:كفاش زعما؟؟

إكرام:غنزوج نغم بنتي لكرم ولدك ديرها فبالك هههه..

أوس طلق ضحكة من الاعمااق:هههههههههههه..علااام...كتخطبيلها من دبا!!

رشيد بضحكة:اوا شنو...خطب لبنتك وماتخطبش لولدك...

إكرام بسمت:بقات لينا غي لموافقة ديالك...اما تا نجلاء ماعندها مشكل هههه..

أوس تبدلو ملامحو مين تذكرت سميتها شافيهم بهدوء:تا انا ماعندي مشكل..لمهم نخليكم دباا غادي نخرج...

رشيد بابتسامة:واخة ء خويااا..بسلامة...

قطع معاه وإكرام شافت فيه:علااش ماعرضتيش عليه دبا للسبوع؟؟

رشيد ضرب على جبهتو:اووو نسييت..صافي غدا نهضر معاه ونعرض ليه...واخة عارفو ماغاديش يجي...

إكرام تنهدت:فالصراحة حشومة عليه...شكون يكون عندو ولد فنيون بحال كرم ويخليه...والله تا حشومة...

رشيد كيلعب بيديدات بنتو:اوا هكاك داير أوس..انسان تحرم من واليديه حياتو كلها..كفاش بغيتيه يكون أب؟..فاقد الشيء لا يعطيه..

إكرام بسمت:اجي...كبف جاك وليد؟؟

رشيد خنزر فيها:كفاش كيجاني!!

إكرام ضرباتو لكتفو:واا لااا زعما حسيت بيه عجباتو نجلاء...

رشيد علا حواجبو فيها:إكرااام...نعلي الشيطان وهنيناااا..بلا هضرة خاوية...

إكرام بسمت كتشوف بعيد:خليه...صاحبتي فنة وكتحمق تستاهل تبدا من جديد...

رشيد بجدية:عانداك تعمريلها فدماغها شي حاجة؟؟راني عارفك...

إكرام بشر:باغيها ترجع لأوس..(رشيد صقر وهي تبدل ملامحها)ء نووووض...واش من نيتك...3 سنين ا عمي...كون كان غيرجع مايجلسش هاد المدة كاملة...باز ليه قدر يبعد عليها هادشي كامل!!

رشيد كيشوف فالفراغ:تاهو تجرح فاش خلاتو بوحدو وماوقفتش معاه..احممم لمهم الله يصاوب...خلينا غي فالاميرة ديالنا دبا ههههه..

....

بعدما ساقت فالطريق وهي كتفكر فالابيل لي دار ليهم وماقدش يديرها ليها فاش ولدت..جاتها قاصحة بزااف ولكن الجيست زاد كرهها فيه..شي مرات كتقول مع بالها توحشاتو وبغات غي تشوفو...ولكن شي مرات كتمنى عمرو يرجع أولا حيت ماباغياش لبروكرام دحياتها يترون...وثانيا حيت ماعارفاش كفاش غتكون ردة فعلها فاش تشوفو...

وصلت للدار...حلت لباب وهو يجي كرم كيجري عندها طار عليها وهي هزاتو كضحك من قلبها..

نجلاء:لحبيب ديالي...

كرم:كبيدة ديالي..

نجلاء بسمت وباستو:اووووه على ريحة...(دخلت هازاه وهو نتشط كيلعب بشعرها)سلااام...

كلشي لي جالسين:سلااام..

كرم دورلها وجهها عندو باش تسمعو:م ماما..طاتي إكلاام دبا ولا عندها بيبي؟؟

نجلاء بضحكة:آه ههه وغنزوجك ليها هههه(كلشي ضحك)..

أوس لبس جاكيط الكوير ديالو..شاف فالمرايا تفكر اللحظة لي سمع سمية نجلاء...تنفس بالجهد وخرج من لبيت...هبط فالدروط وحل لباب فتح الطوموبيل وساق باتجاه السهرة...

نجلاء جلست معاهم كتوريهم تصاور نغم..عجباتهم بزااف...هزت كرم وطلعت تبدل حوايجها فلبيت...حطاتو فوق الفراش وجبدت بيجامة..

كرم كيلعب بنونوس ديالو:م مامااا..

نجلاء كتلبس بيجامتها:شنو ء عوينات ماما...

كرم شافيها ببرائة:علااس نغم باباها معاها وانا بابا ماسي هنا؟؟؟

نجلاء تكوانسات..حست بالدنيا مشات وجات بيها...دارت ببطئ ومشات عندو حاسة بيه مقلق وفنفس لوقت باغي يفهم..

نجلاء جلست ومدت يديها ليه جا جلس فحجرها:انا غنقولك علااش ء حبيب ماماه...(كتلعبلو بشعرو وهو كيشوفيها)..دبا عمو رشيد خدام هنااا داكشي علااش جاه ساهل يجي عند نغم...اما باباك عندو خدمة بعيدة...داكشي علااش صعيب عليه يجي..

كرم حنى راسو:ولكن أنا بعيت لعب معاه..

نجلاء عينيها دمعو ودارت راسها غضبانة:وانا ماتلعبش معايا؟؟(دارت يديها على وجهها وزعما كتبكي)

كرم حيدلها يديها:لأ نتي زوينة ماتبكيس..ء أنا لعب معاك ء ماماا ثاافي ثااافي..ماتبكيس!!

نجلاء بسمت زعما:اه واخة(شير لحنكها بصبعها)اوا عطيني بوسة..

كرم:مواااح..(شيرتلو للخد الثاني)مووااح..ثاافي!!

نجلاء ضحكت وعنقاتو:صاافي..(حلت عينيها)وحيت نتا زوين..انا غدا غنديك معايااا لعند نغم تشوفها هههه..

كرم صفق بيديه فرحان:وييييي..

نجلاء هزاتو:ياله نهبطو تاكل باش تنعس ء لحبيب ديالي..

كرم:اووكي اووكي..

هبطاتو لتحت قادات ليه ماكلتو...وكلاتو وطلعاتو لبيتو لي حدا بيتها كتعلمو ينعس بوحدو من الصغر...حطاتو فبلاصتو وبقات تقرا ليه قصة...قلبها مقهور وصوتها مخنوق تا حساتو نعس..باستلو راسو...وبقات كتشوفيه والدموع نازلين ليها مع خدها..كتشهق ماعارفة مادير..لولد بدا يكبر ويسول على باباه..كفاش غتقدر تخبي هادشي من بعد!! كيغادير تنقد الموقف؟؟

مسحت دموعها وشدت لباب..دازت لبيتها مسحت لميك اب وغسلت وجهها..جمعت شعرها لفوق وهبطت عندهم...لقات مليكة حطت لعشا...جلست معاهم فالطبلة ساكتة وماكتاكلش...

لينا جالسة حداها:نجلاء مالك!!

نجلاء شافت فيها:ءءء لااا والو...

مليكة:اه كنشوفك ماكتاكليش!!

نجلاء بهدوء:غي ماقديتش بزااف وصاافي...عمر كرشي فالغدا مازال ماهضمت بزاااف...

...

جالسين فنايت كلوب كيتهاودو ويضحكو..وأوس غي كيبسم بهدوء...

ميكاييل يدور ويشوف فأوس ماعندوش معاه..وتا أوس حاس بيك ماكيديهاش فيه...

عامر معنق صاحبتو لي حداه:فوقاش غتزوجو نتوماا؟؟

سارة وقفت ليها كوكاا فحلقها تا بغات تجيف...

أوس بسم وميكاييل تخلع عليها:بب ار يو اووكييي؟(واش نتي بيخير ء حبيبة)...

سارة بهدوء:ام فاين(بيخير)..

عامر:الصيف قريب كون درتلو ليها العرس..

سارة بعدم تصديق:داااد ..مزروب ولا شنو؟؟

أوس بسم جنب:نايس..تا حنا ماكرهناش نشطو شوية ههه..

سارة بحقد كتشوف:تا نتا!!

أوس شرب وبسم:يييس ههه..

ميكاييل:ماعندي تا بروبليم أنا..

عامر بابتسامة:اوا نتوكلو عالله...

صاحبة عامر:بب..شال وي دانس(نشطحو)؟؟

عامر:اوك بب!!

ناضو وأوس جالس...ميكاييل عيط ليه باه ناض يجاوب وسارة لقات مرادها..

سارة:تانتا باغيني غي ايمتا نتزوج!!

أوس ببرود كيشوف بعيد:ميكااييل كيبغيك..ونتي باغياه علاش طولو...الحب ماشي بالساهل كيتلقى..ومانصحكش ضيعيه..

سارة بهدوء:شكون قالك انا باغياه؟؟

أوس شافيها مطلع حواحبو:ساارة...بليز..اي دون كير..(ماشي سوقي شرب كاسو ورجع شافيها)ايتس يور لايف..(حياتك هاديك)

سارة قربت لحداه:فحياتك شي بنت؟؟(شافيها مخنزر)مي من نهار عرفتك عمرني شفتك مع شي وحدة...(أوس كب ليه كيدور فعينيه ماحاملش هضرتها)واش مخبيها علينا ولا شنو؟؟

أوس بجدية:شنو بالك تخلي حياتي عليك أبار.. 

سارة تزيرت:أوس انا كن...

أوس حبسها بيديه:مابغيت نسمع والو..

سارة بألم:علااش كديرلي هكاا..من نهار جيتي واحساسي بيك باين..علاش كتهرب مني(كيدور وجهو منها)نتا عارف بلي تخطبت غي زكارة فيك حيت مابغيتينيش...قلت غتندم وتحس بياا ساعا والو 😖..

أوس حدر راسو:سارة!! هضرنا وعاودنا فهادشي...انا غي حيديني من بالك وعيشي حياتك...

سارة:واش كتبغي شي وحدة؟؟

أوس كيلعب بفم الكاس بصبعانو:ماكنبغي حد...انا ماباغي تاحاجة ..بغيت نبقى بوحدي ..فهميها ..

ناض حط لفلوس ومشى بلا مايشوف موراه...وهي مسحت دموعها مفقوصة..كتبغيه ولكن عمرو عطاها شي ريق زوين...رجع ميكاييل للطبلة..لقاها ساكتة...سولها سكتت ودورت وجهها...

رجع عامر للطبلة:غتبقاو جالسين(معنق صاحبتو)نوضو تشطحو..

ميكاييل شافيه:اممم هانتا كتشوف..(شير بعينيه لسارة زعما هي ماباغياش)..

عامر شاف جيهة أوس لقاها خاوية:فين أوس؟؟

سارة حكت وذنيها:اممم جاه شي تيلي وناض...

عامر:اوك ..

ميكاييل زاد عند سارة كيهضر فوذنيها:هادشي علااش تقلقتي؟؟

سارة خنزرت فيه:واتد فاك...😠..

ميكاييل دور وجهو وهبط على كاسو معصب...

ركب طوموبيلتو...ورجع للدار....شعل الضو ودخل لبيتو...حيد الجاكيط وتكى على فراشو..تفكر حياتو كفاش كانت وكفاش ولات..تكره خيت أثرت فيه سمية نجلاء فاش سمعها من جديد...ومازال ماعارفش علاش ماقاد يدخل تاوحدة لحياتو واخة تا هو مجروح بزااف....ناض حيد حوايجو...دخل يدوش...تخشى تحت الرشاشة..حاس براسو صافا بااا...لأول مرة بعد فترة طويلة حاس بلي ناقصو راحة...كيحرك عنقو يمين وشمال ومخلي لما سخون هابط عليه...

.....

جاتها حالة من الارق...طارلها النعاس..ناضت ودازت لبيت كرم طمنت عليه لقاتو ناعس..باستو وغطاتو وخرجت...عبطت لتحت..طيبت لحليب ودارت معاه شوكولا...وبقات جالسة فكوزينة كتشربو وتفكر...أكيد أوس بدا حياتو من جديد...ضروري تكون عو صاحبتو ولا تا خطيبتو...بسمت باستهزاء..حيت نهار كان معاها وكانو عندو صحابات ودبا اكيد غتكون ويقدر يكونو تا كثر من وحدة...كملت كاسها وطلعت لبيتها كتحاول تخوي دماغها...حيت الى بقات تفكر بزااف غتحماق وأصلا هو مايستاهلش تفكيرها....

..

عندو ياله 12 وحاس بلي الليل طوال بزااف..خرج ببينوارو من الدوش وتكى على الفراش...جات فبالو لهضرة لي قالت سارة...استغرب ان كلشي ملاحظ أنو ماعمرو كانت فحياتو شي بنت مين جا لهنا...تا هو ضرباتو التوكيظة...مابقاش باغي يبقى عايش فالماضي...قرر أنه يبدا حياتو من جديد ..حيت تاحاجة ماتستاهل يدفن راسو يالحياة وهو مازال شاب...

صباح جديد...فاقت بزز راسها مدوخ...لبست وتقادات..وهبطت لتحت..لقات كرم كيلعب مع باباها...هزاتو كتهرو وهو كيضحك...

جاد:صبااحو!!

نجلاء وكرم:صباااحوو..

لينا:صباح النور..

جاد بسم:كيبقيتي ء لينا لاباس؟

لينا فرحت لي سول فيها..ونجلاء كتشوفيهم...

لينا:حمدلله بيخير...

جاد جلس وشافيها:شوفي راه مانسيتكش..راه هضرت مع الطبيب ديالك(لينا وجهها تبدل)طلب مني نديك ليه باش يدرس حالتك من جديد..

لينا تزنكت ونجلاء زربت:فكرة زوينة..وخبار واعر.. سيري عالله وشوفي...

طه شد يد بنتو فاش حسها غترفض:اه غنمشيو وغنعرفو اش كاين وانشاءلله مايكون غي لخير...

علي:اه..كلنا معاك ء بنتي تا ترجعي لصحتك وعافيتك...

لينا سكتت..ماباغياش تخيل شي حوايج وتصدم فالتالي..ولكن مافيديها مادير بغات تحاول على الاقل على وجه باباها...

....

ياله عندو 6 دالصباح...فاق بالشوية عليه..الظلام مازال كيتحيد شوية بشوية وهو كيعجبو ها

لجو...ناض لبس لكيطمة ديالو وصبادري..وهز لماا ومشى يدير فوتينغ...كان ساكن فجهة هادئة عامرة بالحدائق والمناظر الطبيعية..كيستنشق هواء نقي على الصبح وبافي الرئة ديالو تنفس من داك النيكوتين ديال الكارو....ماجات فين دير 7 تا كان شاف شروق الشمس وخيوطها الذهبية لي كتنزلها شوية بشوية على ملك الله...تنفس بأمل ورجع لدارو...هاز لباكيط فيديه...دخل نيشان للكوزينة..وجد لفطور وكلااا..عاد طلع دوش وتأنق...شوميز باج مع فيست بلوماغين وسروال نفس اللون...قاد شعرو وتعطر عاد هبط لتحت...كان لوقت نيشان..7:30 ...هز طوموبيلتو وتحرك للخدمة ...

غادي فالطريق وخاطرو ماهناه...بغى يعيط لرشيد ولكن فالطريق ممنوع لي ابيل...فكر تا يوصل للخدمة ويصونيلو...باش يكون مرتاح...

...

نجلاء ماكانتش غتمشي للخدمة حيت مواعدة كرم تديه يشوف نغم...طلعاتو لبيتو لبساتو وسلمت على كلشي عاد خرجاتو ركباتو لور ومشاو باتجاه المدينة...

أول حاجة دازت لمول الذهب...خدات كورميط على شكل حبات قهوة لنغم..

نجلاء بابتسامة:شنو ء كرم..ناخدوها لنغم؟؟زوينة ولا لا؟؟

كرم:زوينة ء ماما...عزباتني...

مول الذهب ضحك:ههه الله بحفظك..

كرم:سكراا...ياله ء ماما باس مانتعطلوس...

نجلاء ضحكت:واخة ء لحبيب ديالي..(شافت فالبائع)عافااك ديرهالي فبواط زوينة...

مول الذهب:واخة...ولدك هدا؟؟

نجلاء كتلعب ليه فشعرو:آه..

مول الذهب:الله يخليهلك..

نجلاء بابتسامة:آميين..

هزت ولدها لي كان طالس على الفيترينا وخدات البواط دارتها فالصاك..خلصت وخرجز كملو طريقهم للسبيطار....

رشيد وإكرام كيهضرو فتيلي أبيل فيديو وفيديهم نغم كتجغون تا دخلت نجلاء شادة فيديها كرم...

كرم بالجهد:هانا زيييت هههه..

رشيد علا راسو فيهم متفاجئ وإكرام بلعت ريقها:ك كرم...اهلاا...

أوس بصدمة:كرم هادا!!

نجلاء سمعت صوتو فتيلي قلبها تخطف وكرم مشى كيجري عندهم...تا شاف باباه فتيلي ..

كرم:بابيييي وحستك...

نجلاء بقات واقفة مسمرة فبلاصتها وإكرام مصدومة عاضة شنافتها...

أوس بسم:تا انا ء ولدي الزوين...توحشتك بزاااف...

نجلاء تبتت راسها ورشيد كيشوفيها..هضرت بصوت قوي ونيت باش يسمعها:أنا غنمشي نجيب لما ونجي..(أوس سمع صوتهة تصدم)هاهو كرم معاكم راه من الصباح وهو باغي يشوف نغم هههه..

إكرام:اه واخة ء حبيبة..

رشيد:كوني هانية ها هو معانا كرم..

نجلاء بسمت فوجههم وخرجت وأوس مشوكي...حس بيها كتهضر عادي صدماتو..ماتوقعهاش تكون كتعامل عادي واخة عارفاه هو لي فالابيل..

كرم نسى تيلي وكيشوف فنغم:صهيورة..

إكرام بسمت وشافت فيه:اه..دبا تكبر ء الزوين ديالي..

رشيد خدا تيلي وكحز مع الجنب بغى يبدل الموضوع:بالمناسبة...حنا عارضين عليه السيمانة الجاية..تجي تحظر السبوع..(أوس دماغو فقنت آخور)..راك عارف مادرناش عرس كبير ودبا بغينا نفرحو براسنا من جديد...

أوس تنهد:اممم..بصحتكم ولكن...

رشيد بحدة:الى ماجيتيش غنتقلق منك...ء صاحبي(شاف فكرم ونقص فصوتو)ولدك هنا كيساين غي ايمتا يشوفك..لايمتا غتخليه يتيم وباه بالحياة..(أوس مسح على وجهو)..واش باغي ترجع تلقاه كيقول بابا لشي حد آخوور..

أوس طلع عينيه بصدمة وأعصاب:ش شنوو!! هاداك راه ولدي أنا فهمتي!!

رشيد:تكالما...انا ماقصدت والو...مي راه الابوة ماشي غي بالهضرة..لبارح حسيت بيها..زوينة بزااف ء صاحبي...فاش كتهز ولدك ولا بنتك بين يديك كتحس براسك ملكتي العالم ..كتنسى اي ألم ولا حزن فحياتك و...

أوس تنفس بالجهد:ياله نخليك دباا عندي لخدمة بزااف تهلااا...

قطع معاه بزربة بلا مايطول...

ورشيد رجع حدا مراتو...

كرم كيقيس فيديدات نغم:ثافي..بابا كطع؟؟

رشيد بسملو:اه..عندو لخدمة..وقالي نبوسك اجي لهنا...

كرم مشى عندو باسو ورجع لبلاصتو ببرائة....

إكرام شافت فراجلها بلا عياقة:مابغاش؟.

رشيد دور راسو بالسلب معصب وسكت....

مين خرجت من الغرفة وهي غي ماشية..ماقاداش تفيق من الصدمة...اه شي مرات كيبغي يهضر مع ولدو ولكن عمرها خلات راسها تسمع صوتو ولا تشوفو...ديما كتبعد من الجيهة لي هو فيها...خرجت على برا تعمرو عينيها دموع ولكن مابغاتش تبكي...بقات تنش على عينيها وتحاول تكالما...مايستاهلش تفكر فيه ولا تفقص على ودو...وهي كتشم لهوا صونا ليها التيلي من عند رشيد عرفاتو سالا لأبيل..

رشيد:نجلاء فينك؟؟

نجلاء:غي حداكم هانا جاية...

رشيد:كنساينوك..

...

أوس لاح ستيلو لي حداه...قوتها حسساتو بلي ماهامها فوالو...بغى يطرطق ودماغو تزير عليه...حل المشروع وبقى خدام عليه والفكرة لي جاتو أنه يبدا يعيش حياتو طبيعي زادت ترسخت فبالو....

داز نهار عادي..خدمة وتمارة...رجع للدار معطل حيت كان باغي يسالي المشروع دغيا قنط منو...دخل دوش وخرج بالفوطة فنصو..تعطر وهو عريان...وخلا راسو ينشف...جبد كويرة كحلا وسروال نفس اللون مع كبيبط غري..صبادري بيضة وخرج من الدار باغي يرجع الايام لي ضاعت ليه....ختار أنه يمشي لشي قنت عامر وزوين وفيه لومبيونص...ومع هو تيتيز غي دخل تما الاعين طاحت عليه وبداو لبنات يشوفو فيه...مشى جلس معلي حواجبو وعاحبو راسو...تبت مخليهم هما يقلبو عليه...تا جات وحدة جلست حداه..كلشي فيها مفضوح..

هي بصوت محلون:هاااي..

أوس شرب من كاسو وشافيها:هاااي...

هي مدت يديها:جيييْن..يو؟(سميتي جيين ونتا).

أوس:أوس...

هي باستغراب:اووو..نايس نييْم..(اسم جميل)

أوس بثقة:آي نووووْ..(عارف)

بقات تجبد معاه المواضيع وهو كيحاول يسايرها...نوضاتو يشطحو ناض معاها وهي كتحلس عليه..تفكر كفاش كانت كتشطح نجلاء فداك الحفلة...المكان كيشبه لتما ولا هو بزز كيشبهو لداكشي...صورتها قبالتو ماتحيدتش...عيى يحاول يساير داك البنت ولكن والو...حيدلها يديها من عنقو...

أوس:صوري(سمحيلي)اي هاف تو غوووْ(خصني نمشي)...

خلاها واقفة بلاكة وهز كويرتو وخلص عاد خرج من تما ماكيشوفش قدامو...

ركب طوموبيلتو وغادي الطريق كلها وهو كيسترجع ذكرياتو معاها...ماعاشوش فترة طويلة مع بعضياتهم...ولكن كانت حلوة..بمرها وجمالها...ماكانش قادر يرجع للدار...حيت فهاد الفترة النوم تحرم عليه...مشى لبار آخور....جلس بوحدو...تا جا عندو لبارمان عطاه طلبو وكان كيعرفو حيت مرة مرة كيدوز تما...

لبارمان:وات هابيند(شنو واقع)!!

أوس كيشرب حاني الراس:نوثين(لاشيء)...

لبارمان حس بيه مدمر:اوك...

مشى وخلاه على خاطرو...

....

جالسة على فراشها وحاطة الدفتر على لمخدة وكتكتب فيها..."أشعر أني عدت الى نقطة الصفر...النقطة التي حاربت كي أتجاوزها...(علات راسها كتشوف فالسقف)كل الذكريات عادت إلي.. من بدايتها الى الآن...لماذا سمعت صوتك؟؟لقد حرك بي أحاسيس أخفيتها لكي أنساك...لماذا تبعثر كياني؟؟ هل لأني لازلت أخشى لقاءك؟؟؟..نعم أخشاه...أخشى أن أراك أمامي يوما مااا وأنجرف نحوك دون منازع...أخشى أن يرغمني حبك على التنازل وأنت لا تستحق تضحيتي...

ابنك هنااا بجانبي...(بسمت)يشبهك تماما...هو فقط مايجعلني أقوى كل يوم...هو من دفعني أن أكمل حياتي...وأن أتعايش معها ..(تبدلو ملامحها)يسألني دائما عنك..يسألني هل ستأتي ولا أجد ما أقول...أخشى عليه من النقص...لاسيما أنه رأى اليوم طفلة صغيرة تنعم بحب أبويها الاثنين...وهو في المقابل لم يجد سواي منذ ولادته...هل فعلا أنت قادر على العيش بدونه!!..لن أسألك عني...فلابد أنك تعيش حياتك طولا وعرضا ولم تعد تذكر حتى ملامح وجهي...لكن...ألا تشتاق إليه؟؟ألا يثير حماسك رأيته عبر شاشة الهاتف؟؟ هذا ما يجعلني أندم أني إلتقيتك...وتزوجتك وعاشرتك...لأنك فعلاا لا تستحق لا ابنك ولا أنا....."

حنات راسها على الورقة وبقات تبكي تبكيييي بالجهد...عيات تعافر أنها ماتضعفش ولكن دموعها غلبوها...من نهار شافت ولادة إكرام رجعولها كااع الاحداث لي كانت كتحاول تنساهم..النعاس مابقاتش تحلم بيه...والعافية شاعلة فقلبها...كانت كظن أنها نسات ولكن دبااا كتعذب بزاااف وماعارفاش فوقاش غيسالي هاد العذاب....

خبعت داك الدفتر فالمجر لي حداها وشداتو بالساروت...تا هي كتكتب مذكرات ديالها واقتبست هاد الفكرة من ماماها...

قادات بلاصتها وحطت راسها كتمسح دموعها...

نجلاء بقوة:غنعيش...غنقدر نعيش بلا بيك...كيفما تا نتا قادر...ومن دبا لفوق غنولي نجلاء د شحال هادي..وتمر شي حاجة غتهرسني مادام ولدي حبيبي معايااا.....

مدت يديها وطفات الضو ديال الفيوز لي قدامها...وتنهدت بالجهد عاد غمضت عينيها....

....

شرب تا عيى ومد لفلوس وخرج من تما....تعطل لحال ركب طوموبيلتو ورجع للدار أخيرا...

كان لجو هادئ فالليل...والهدوء كيقتل شي مرات...فاش ماتلقى لي يساينك ولا لي يجاوبك ولا لي يهضر معاك ويعنقك فاش ترجع كتحس براسك ماعايشش...

طلع لبيتو..نصل حوايجو وتلاح على الفراش...تا كيحس بيد محطوطة على ظهرو العريان....

أوس بصوت حنين خاشي راسو فالمخدة:توحشتك ء حبي...

هي بصوت هادئ:تا انا...

أوس بسم فاش سمعها منها ولكن ماباغيش يدور وجهو:مقصح منك بزااااااف...حيت خليتيني وسمحتي فيااا واخة محتاجك...

هي:تا نتا خليتينا ومشيتي...

أوس ببطئ:بس بابك...(كيحرك يديه ويعبر بيها وهو على كرشو)..بسبابك نتي...مشيت حيت عارف واخة نبقى تما عمرك غترجعي ليااا وهاداك كان عقاب عمرني ماكنت غنقد عليه...

هي طلعت يديها مع ظهرو وحطتها على شعرو:صاافي نسى.... وخليك معايا دبا...

أوس دار وهي تبان ليه وجهها ماصافيش..الضبابة والشعااا ماكتبانش ليه:شنو غنديرو؟؟..

هي:غنديرو داكشي لي باغياه أنا ونتا!!..

أوس بسم جنب وهو دايخ:بحالاش؟؟

هبطت عليه ولاقات راسها مع راسو وهو كيشم فريحتها...كتلعب بخدو وصبعها الصغير كتحركو على شنايفو..صوت نفسو كيتزايد...وهي كتحرك يديها على يديه المفتولين وهو هز يديه دارها أسفل خصرها...كيمررها طلوع ونزول...

أوس:عارفة بلي عمرني قست شي وحدة من غيرك!!

هي:وقدرتي؟؟

أوس:تا وحدة ماخلاتني نساك...من نهار عرفت راسي كنبغيك مابقيتش قاد نقيس شي بنت المرا...(حط يديه على وجهها وشاد تا عنقها معاه)انا كنشوفك ديما..فصباحي وفليلي..فالدار لي ماعشتيش معايا فيها...وفالحمام وفكلشي....سحابلي الى هربت منك غنقدر نساك...سحابلي الى بدلت البلاصة غنسى ملامحك ووجودك فحياتي....ولكن لاااا..مانسيتكش...كنتي معايا وفينما مشيت فهاد الثلث السنين لي ماشفتكش فيهم...علااش وقعلي هكااا!! علااش ماقديتش نخرجك من حياتي؟؟

هي بابتسامة خفيفة:حيت تا اناا بحالك..ماعمرني نسيتك...(شبكت يديها مع يديه)ماعمري شفت فشي حد من غيرك...نتا وصاافي لي كتعمر لياا عيني...

أوس قرب من شنايفها باسهم وتأوه:آه شحاال توحشتك...

هي رجعت باستو بالخف:اوا بِيْن ليااا...

قلبها تحت منو وهبط سروالو بزربة..جرها عندو وهي عاجبها لحال وفرق ليها رجليها..........

حل عينيه ذاتو كتضرب وقلبو غيطير من بلاصتو...فاق لقى راسو بوحدو فالفراش والضو دالصباح بان...كيحاول يتأكد واش كانت شي وحدة معاه بصاح...ولكن لاا لقى راسو مازال لابس سروالو... المشكل أن سروالو فازك...استحلم بيها...عض شنافتو كيمسح على وجهو معصب...عاد فهم علاش ماشافش وجهها مزياان..حيت كان حلم...وديجا هو موحشها دونك صعيب يشوف تفاصيل وجهها...ناض من بلاصتو طالع ليه الزعف...قال هضرة فالحلم كان متمني يقولها...ولكن عمرو ماغادي يقولها...حيت هي جرحاتو ودمرت علاقتهم...مشى هز الفوطة وحوايجو ودخل يدوش وهو مامصروطاش ليه..

.....

حلت عينيها لقات 8 دالصبح...تكسلت وبسمت مع الهوا الزوين لي داخل...

جلست فبلاصتها متفائلة:باينة غيكون نهار زوين...

جات تنوض من بلاصتها وهو يدخل عندها ببيجامتو:ماااميييي..

نجلاء حلت يديها:لبوكوص ديالي...

مشى كيجري عنقها تا طاحت زعما على لفراش:اووو طيحتيني...

كرم:هيهيهيهيييبي...

نجلاء باستو وكتاكل فيه:اممم شحال بنين...لذيييذ غناكلك بخبيز هههه..

كرم كيضحك:ماتاكلينيس هههه..

نجلاء هزاتو:ياله نوضو نغسلو وجهنا ونحكو سنيناتنا اوك..

كرم:اوووك..

دخلو للحمام غسلت ليه...عطاتو لابغوص وهو بدا يحك سنانو ويلعبو بجوج وهي كتوريه كفاش يحك..كيتعلم منها سالاو غسلت ليه فموو ومسحاتولو...وخلاتو جالس قبالتها كيلعب...جبدت شوميز كحلاا مع سروال غري وهزت فيست ديالو سخونة حطتها فيديها تا تكون خارجة..لبست صباط عالي كحل..وجمعت شعرها لفوق كوتشوفال...ميك اب خفيفي فاغابوبييغ مارو بارد مع آيلاينر خفيف...وفاغاجو برونز مع عكار باج خفيف...تعطرت وهزت صاك كحل بالسمطة طويلة وشدت كرم مشات لبساتو كيطما سخيخنة وهبطو لتحت...

جاد تلاقاه لتحت:كرررررم...

كرم هبط كيجري وهو يعنقو جاد هزو عندو وشير لنجلاء بي كضحك عليهم...

كرم كيتهاود:أنا لبارح مسيت عند نغم ياااله..

جاد بابتسامة:يااك..قبيحة داك نغم يااك؟؟

كرم غوبش:لااا...وينة...سرينالها أنا وماما أورميطااا..فنة فنة...

جاد ضحك:مزيااان...ولبستيهالها؟؟

نجلاء تابعاهم بابتسامة:ماتخافش مازال وقت الرشم(الذهب دالعرسان)ماجاش هههه...

لينا بابتسامة:تانتي غمضي عينيك وحليها تلقاي داك النهار جااا ههههه...

خرج كيمسح حالتو معصب كيهضر غي بوحدو:اوووف...تا النعاس مارتاحوش فيه...كرهت الفراش ولي يجي من جيهتو...تفووو...

جلسو على الطبلة كياكلو وهو محمقهم بهضوراتو...

نجلاء سالات ماكلتها..ناضت باست كرم باش تمشي وهو يصوني تيلي ديال علي...شافيهم..

علي:هذا أوس!!(نجلاء شافت فيه)باينة باغي يهضر مع كرم...

نجلاء مشات عند ولدها:بابي باغي يهضر معاك ء ولدي...سير عند باسيدك..

كرم بفرحة:وييي...

مشى كرم جلس على حجر علي ونجلاء واقفة كتشوفيه مبسمة كتحاول توصل لولدها فكرة أنها ماعندهاش مشكل مع باباه...

كرم:بااابيييي...

أوس بابتسامة:لبوكوص ديااالي...توحشتك أنااا..

كرم:تا أناا...

نجلاء شيرتلو عاجبها لحال كتشوفو فرحان...وهو ينوض جاد يمشي معاها..

كرم شافهم غاديين:باي باي ماميي...باي باي عمو زاااد...

أوس تزير..عرف جاد مازال متقرب من نجلاء حس بالعافية شخدت فيه...رسم ابتسامة على وجهو وبقى كيهضر مع ولدو...

كرم:بابيي انا سفت لبارح طوطو زوينة...بغيتك تزيبهالي...

علي شاف فمليكة وهي تألمت عليه...

أوس بسم:انشاءلله ء ولدي...شمن لون كيعجبك؟؟

علي تنهد عارف فعايل أوس كلما كيطلبلو كرم شي حاجة..كيوصي رشيد يشريها ويعطيها ليه على أنو هو شراها وصافطها ليه...

كرم كيفكر:اممم..يِيلوووْ...(أصفر)

أوس بسم:هههه اوك ء لقطيوط ديالي..جاتك...

كرم:باباا سكون زوين أنا ولا نغم؟؟

أوس تبدلو ملامحو:علااش كتسول هكااا..اكيد نتا لي زوين بزااف وأحسن ولد فالعالم...

كرم فرح:سكراا بابييي...

أوس بسم:ياله صافطلي بيزو...خصني نمشي نخدم...

كرم بسم:مواااح...باي باي...

أوس:الله يحفظك لياا...بسلامة...

قطع وحط تيلي كيمسح على راسو..كيتفكر نظرة كرم لجاد وحبو ليه...حس بالغيرة...ناض قاد قهوتو وشربها عاد مشى لخدمتو كيف العادة...

نجلاء وجاد وصلو للخدمة ..دخلو بجوج...

نجلاء:جاد عافااك قبل مانسى.. ماتغفلش على قضية لينا...راها محتاجة لدعم معنوي كبير باش توافق تعالج...هادشي علااش خليك معاها...

جاد بهدوء:بلا ماتحتاجي توصيني ء نجلاء..أنا معاها حتى تبدا داكشي...

نجلاء تنهدت:و بخصوص داكشي لي كان بيناتكم؟؟(جاد تزير وهي وقفت حدا مكتبها وكتهضر معاه)شووف...انا عارفة بلي ماخصنيش نتدخل بيناتكم...ولكن...زعما كنتو من قبل غتزوجو..مافهمتش علااش ماوليتوش فكرتو تكملو..

جاد تنفس بالجهد:أولاا ارتباطنا من قبل كان غلط ونتي عارفة هادشي(نجلاء كتهرب من هضرتو)وثانيا فاش رجعت عرضت عليها نكملو بجوج هي مابغاتش...

نجلاء بصدمة:علااش؟؟

جاد بهدوء:أنا فهمتها..هي ظنت أني زعما كنشفق عليها...

نجلاء كتبحصص فيه مربعة يديها:وزعما ماعندهاش لحق؟؟

جاد:آه عندها لحق...حيت ماعمرني بغيتها بصاااح..

نجلاء بهدوء:شفتي ء جاد..لينا كتبغيك بزاااف ونتا دبا هو الوحيد لي غيقدر يحفزها ويخليها توقف على رجليها..دونك بقى معاها...يمكن من قبل كانت أسوء خلق الله وهادشي عارفينو..ولكن دبا ندمات وعانات بما فيه الكفاية...هادشي علااش تستحق فرصة خراا..

جاد تنهد:ولكن أنا قلبي ماشي ماكينة باش نخدمو كيفما بغيت...

نجلاء:أنا ماطلبتش منك دير شي حاجة فوق طاقتك ..ولكن زعما وقف معاها واخة كأنك صديق...يمكن هادشي يعطيها طاقة ايجابية تخليها توقف على رجليها من جديد..

جاد:اوا يكون خير انشاءلله...

نجلاء بسمت:انشاءلله...ياله نتشاوفو...

دخلت لمكتبها وهو بقى شحال حاضيها عاد مشى للمكتب ديالو...كل مرة كيزيد يتأكد بلي ماعندها غرض بيه...خرج لفكرة من دماغو ولكن مازال مرة مرة كيحس بلي كانت شخص مهم فحياتو...الحمدلله غي لي ولات ثيق فيه وتعاملو مزيان فهاد العام الاخير...هادشي كان هدفو والحمدلله هاهو وصليه...

وصل أوس للخدمة بكري بزااف..دخل للمكتب ديالو خدام على لبروجي..تا دخلت عندو سارة...

أوس علا عينيه فيها باستغراب:آش كديري هنا؟؟

سارة:كنت عارفة غلقاك هنا..

أوس هز راسو مخنزر:شنو بغيتي؟؟

سارة بسمت جنب وقربت عندو:بغيت نهضرو أنا وياك...

أوس حبسها بيديه:جلسي لهيه..

سارة زادت قربت:كتخاف نقرب منك وماتقدش تسيطر على راسك!!

أوس تعصب:عرفتي شنو غديري؟؟..قو**...(صدمها)غتقربي هنا غنتفاهم معاك...

سارة تراجعت:مالك تعصبتي هكاا..برد...انا غي..

أوس:راني هضرت...خرجي من هنا...

سارة عينيها دمعو:علاش كديرلي هكا؟؟

أوس وصلت بيه للطوب:حيت دماغك ماعرفت شنو فيه..عييت نهضر ونعاود ونغنيها ليك...نتي بحال ختي الصغيرة وعمرني غنفكر فيك...سيري عيشي حياتك وخليني عليك...فهمتييي اناااا خرجيني من داك الدماغ...

سارة دموعها هبطو ومشات كتجري وهو لاح ستيلو قدامو:فاااك...بنادم مريض تفووو...

....

جالسة فمكتبها خدامة تا تفكرت إكرام..عيطت ليها سولت فيها كيبقات...وطمنت على حالها عرفتها خرجت من لوبيطال...بقات تستفسر منها على أمور السبوع والتحضيرات...وابخي ودعتها وكملت لخدمة...

....

أوس خلا تا برد هز تيلي صونا على السكريتير ديال سي عامر...عرفو جاا مشى عندو للمكتب....فالطريق ديالو شافتو سارة تلفت..بقات متوترة ماعارفة شنو دير..هزت راسها ومشات عندهم...

أوس كان ياله سلم على عامر وجلس وهي دخل بحال العجاجة...

أوس دار شافيها معلي حواجبو...

سارة:هاااي..

عامر شافيها:سارة!! شنو كاين يتك لاباس؟

أوس غي ساكت وسارة ماعرفت ماتقول:ء اممم..جيت نشوف المشروع ديالنا فين وصل...

أوس تنهد كيشوف فباباها ماكيشوفش فيها:اممم..قريب...لمهم سي عامر أنا باغي نهضر معاك فشي موضوع خاص الى كان ممكن...

سارة شافت فيهم بجوج غطيح على طولتها...

عامر:سارة...صافي خلينااا بوحدنااا...

سارة طولت فيه الشوفة بحالا كترغبو وخرجت وهو بقى مع باها بوحدهم...

خرجت دايخة ماعارفة مادير...بقات غادية جاية الكولوار غتخرح على عقلها...كرشها ضرتها ومتوقعة أن باباها مايخليش ليها....

.....

بعد مدة خرج أوس من المكتب خنزر فيها وداز وهي ماقدتش تقربلو...سكتت وتركنت كتساين تنوض شي فضيحة....

أوس دخل للمكتب ديالو يكمل خدمتو...ماسوقش ليها بمرة....

عامر عيط لسارة تجي عندو وهي تلفت...مشات عندو قلبها غيفلت...دخلت وجلست قبالتو حانية الراس...

عامر:سارة..دامشي لي درتي ماشي معقول...(سارة بلعت ريقها)..واش تا أوس وصلتي ليه...(سارة جات دافع على راسها وهو يحبسها)واش خدمة بسيطة ماقديتيش ديريرها؟؟(سارة تلفت)شوفي هاد المرة مين يكلفك أوس بشي خدمة ديريها ولا غنتقلق منك د بصااح...بحال أنا بحال أوس...

سارة مافهمتش:م مافهماش ء بابا شنو كتقول؟؟

عامر تنهد:أوس قالي طلب منك تحجزي لينا فشي اوتيل زوين من لي كتعرفي على ود الاجتماع لي عندها هاد الليلة..ونتي ماطبقتيش اش قال...(سارة تنفست بالجهد ..عاد رتاحت)لمهم ديري هادشي قبل مايعمرو كااه الاوتيلات...بلا مانتحشمو حدا العملاء...

سارة وقفت:اوك اوك داد..دبا ندير كلشي غي رتاح...

خرجت مزروبة عاجبها الحال مافرشهاش...كانت غتمشي عندو وتراجعت...اللهم سلامة ولا ندامة...

جااا الليل...مشى أوس وجد راسو فالدار للاجتماع...وبعد لحظات وصل لفين دايرين الحجز...كيساين يجيو العملاء خصوصا فاش وصل عامر وبنتو...لي ماقاداش تشوف طيهة أوس بالحشمة...وهما يدخلو ثلاثة..جوج رجال ومعاهم مراا لابسة ومقادة...جاو عندهم تسالمو وبداو يهضرو فأمور الخدمة....الاجتماع كامل وهاديك حاطة على أوس...كتساين ايمتا يساليو وتهضر معاه...لدرجة تا سارة لاحظات شوفاتها...

غي سالا الاجتماع ناضو خارجين وهي شدت فأوس شدت العمى فالظلمة...حاول يتعامل معاها مزيان على ود لخدمة ولكن هي مابغاتش تفهم راسها...سلمت عليه بالوجه..ومشات ركبت طوموبيلتها...

أوس علا حواحبو وعاد مشى ركب طوموبيلتو...مسافة الطريق تا وصل لدارو...دخل حيد لفيست وحطها..ومشى هز قرعة دالما هبط عليها...تا كيسمع الصوني فلباب...مشى يفتح مستغرب تا لقى لي دوزت معاهم الاجتماع قبالتو...تصدم مافهمش وهي قربت عندو باغية دوخو..مدت يديها غتعنقو حبسها...

أوس بصدمة:وات اريو دووين هييير؟؟(شنو كديري هنا)

قربت لعندو باغية تبوسو وهو يحبسها بهدوء:آم مارييد..(انا متزوج)..

تراجعت بصدمة:اووو... واااو...

أوس مسح على وجهو:ام صوري(آسف)..

بسمت بهدوء:ايتس اوكي(عادي)..كود باي(بسلامة)..

ضربت الدورة ومشات بحالها وهو شد لباب ومشى جلس معصب..ولا كل مرة كيتعامل بهاد الطريقة...كيرفض بنات لي كيجبو بين يديه...نورمالمو هو راجل عازب ومن حقو يقرب وينعس مع بنت خرا...مي هاهو واحل فذكريات قديمة...تعصب وهضر مع راسو"منين جبت هاد مزوج؟؟ شيييت..مازال ماخرجت من دماغي؟؟"..ناض لبيتو حاقد على الوضع...

صباح يوم جديد...

مشات نجلاء لخدمتها وهي تفاجئ بباقة ورد محطوطة على لمكتب...هزت لكارط قراتها "كان صعيب عليا لقى عنوانك..ولكن ما استسلمت حتى لقيتو...نهارك سعيد...وليد"..

نجلاء غوبشت باستغراب:وليد؟؟..

حطت لكارط وكملت خدمتها ماعاجبهاش لحال..حيت ماتوقعتش فيه يدير بحال هكا...

صونات لإكرام عاودت ليها وهي تفاجئها:آه راه نسيت جاا عندنا لوبيطال قبل مانمشيو ..ورشيد عرض عليه للسبوع...

نجلاء علات حواجبها:وايليي...

إكرام شادة بنتها فيديها وكيهضر بالتيلي:اوا هو جا دار معانا الصواب...جاب كادو لنغم ورشيد فرح بيه وعرض عليه للسبوع...

نجلاء بهدوء:اوك ..مي مايكونش رشيد عطاه فين خدمتي؟؟

إكرام:نووو مايمكنش..رشيد مايديرهاش...هادا غيكون بحث عليك حيت عاجباه وصافي ههه..

نجلاء ماعجبهاش لحال:ماعندي مانعجبو...اووف كنتعامل مزيان مع بنادم وكندم..

إكرام:وعلاش لاا ء صاحبتي...وليد راجل زوين وباينة ميسور ..دونك علااش ماتفكريش فيه؟؟

نجلاء:مابغيت نفكر فحد ..هاد الساعة ولدي كافيني...

إكرام:ولكن نتي راك مازالة صغيرة...ومن حقك تبداي حياتك من جديد...

نجلاء تنهدت:مامستاعداش دبا...لمهم نخليك عندي لخدمة بزااف..تا نتشاوفو...

إكرام:اوك بب..الله يعاونك...سييي يووو(نتشاوفو)..

قطعت نجلاء معاها وهزت البطاقة كتقراها..ورجعت خبعتها فصاكها...كملت خدمتها كتحاول نركز وتخوي دماغها...

.....

لينا جالسة كتقرا كتاب تا دخل جاد للجردة...هاز فيديه كاشكول غليظ...حطو عليها وهي دارت شافت فيه..

بسمت:شكراا...

جاد بهدوء:العفو...(جر لكرسي جلس حداها)..شنو كتقراي؟؟

لينا:أحببتك أكثر مما ينبغي...

جاد بسم جنب:حاقدة ههه..

لينا بسمت وطوات الصفحة عاد شدت لكتاب:حيت يستاهل...

جاد شافيها:شنو دارلها؟؟

لينا:متذبذب الشخصية...كل مرة بحال...

جاد هز حجبانو وراسو:اممم..اوك...لمهم دبا نتي ماتكونيش متذبذبة الشخصية!!

لينا:كفاش زعما؟؟

جاد:تبداي تعالجي!!

لينا تنهدت وشافت فيه:علااش غنتعالج؟؟انا نستاهل لي راني فيه...يمكن هكااا حسن نتعاقب فالدنيا على شنو درت...

جاد دار شدلها يديها:ليناا(شافت فيه وفيديه)لي فات مات...حنا ولاد ليوم...الى كنت عزيز عليك غي شوية...سايريني...حنا بغينا نشوفوك بيخير...

لينا تالفة:والى تعالجت ورجعت كيف كنت؟؟

جاد بسم:ماكنظنش...ولكن ء لالة واخة ترجعي هكاك ماتخافيش(شافت فيه باغية تسمع)..غنربطك فشي بيت ونبقى عليك بالعصى تا تقادي ههه..

لينا ضحكت:هههه يااك!!

جاد:ماعمرك غتولي كيف كنتي..(تبدلو ملامحها)كلشي فيك تبدل هاد المدة ..لدرجة شي مرة كنتصدم فتصرفاتك قداش زوينين...هادشي علااش أنا متأكد بلي ماغاديش ترجعي كيف كنتي غي رتاحي...

لينا بصوت خافت:علااش ثايق فيا هكا؟؟

جاد:حيت كنعرفك مزياان..وعارف بلي عانيتي بما فيه الكفاية...وفنظري تستحقي تبداي من جديد(قرب عندها)هادشي علااش غنبقى فجنبك تا تولي توقفي على رجليك من جديد انشاءلله..

لينا بسمت باعجاب وراحة نفسية:غنقدر يااك؟؟

جاد بسم:انشاءلله غتقدي...تا حاحة مابعيدة...لمهم تصبري وتعافري ومايكون غي لخير...

مرت الايام...ونجلاء كل نهار كتجيها باقة ورود من وليد..لدرجة أنها تعوذت تلقاها فاش دخل...أوس خدام على مشروعو..وعاطي لراسو الراحة...كيحاول يفكر غي فالخدمة وصافي باش يصفي ذهنو...لينا مشات هي وطه وجاد عند الطبيب..وصافطو وراقها للخاريج باش يدرسو جميع حالات العملية لي خصها دير...كان الخوف متملكها..ولكن جاد ديما فظهرها وكيشجعها....أحمد هادي مدة وهو شاد التقاعد...مرة مرة يدوز للمصنع لي تطور بزااف..كيمشي يشوف الخدمة فين وصلت وعاطي الكافية لولدو علي...وطه تا هو كيخدم معاهم ولكن ماشي دايما...جاد متكلف بالعمال والالات مع حميد أما نجلاء هي وجه المصنع..وهي لي خدامة على العلاقات العامة...كدير اشهارات وكدرس العروض لي كيجيو...وانطلاقا من قرايتها كان كتفيدهم بزاااف...

ليوم جا نهار السبوع...نجلاء كانت فبيت إكرام...كيقادو حالتهم..دات معاها القفطان ديالها..غري كيلمع شعرها طلقاتو وزيداتو لجنب واحد...قادات وجهها ميك اب تيتوريال.. وإكرام كتصاوب ليها الكوافورة والنكافة كتساينها تسالي تلبسها القفطان لول..خضر ملكي بالسقلي الاصفر...مليكة كانت لتحت مع مامات اكرام..وكرم كيلعب فالجردة مع شي وليدات تما تحت أنظار جداتو...سالاو لبنات لبسو قفاطنهم....

طلعت مامات إكرام دقت عليهم:ياله ء لبنات..كلشي جاو هبطو...

إكرام:ماما..نغم ناعسة؟؟

ماماها:ياله فاقت ..راها فيد باباها..سربي هاهو كيساينك...

إكرام تقادات وناضت:واخة..

نجلاء لبست صباط عالي اغجونطي..وهزت بوشيط صغير فيديها..جات تيتيزة مع داك العكار الحمر لي واتاها غي هي...شدت فيها وخرجو..ورشيد بسم فاش شاف مرتو..النكافات بداو يزغرتو وهبطت نجلاء موراهم كتصفق بيديها...كلشي لتحت وقفو كيشوفو فيهم والموسيقى بدات...نجلاء وقفت حدا ماماها وجرت كرم لي لابس كوستيم صغيور قدو كيصفق ويشوف فنغم لي فيد ماماها...مشاو جلسو فالبرزة ديالهم..وكااع الحاضرين تا هما جلسو كل واحد فالطبلة ديالو...بدا النشاط وصحابات إكرام محيحين..عطاوها للشطيح نجلاء ماكتبغيش تفتاتح...

دخل وليد للحفلة كيقلب بعينيه...مشى باتجاه النفيسة ورشيد...سلم عليهم وبارك ليهم ومشى جلس...نجلاء شافتو جلس قبالتها...وهو غي جلس بانت ليه بسم ليها...ناض من بلاصتو وجا عندها...

وليد مد يديه:اهلاا..لاباس عليك؟.

نجلاء:حمدلله..ونتا؟؟(مليكة كتشوفيه)..

وليد بسم:حمدلله..(شاف جيهة مليكة)هادي ماماك؟؟

نجلاء بهدوء:آه...

وليد مد يديه:سلام أنا وليد ..صديق ديال نجلاء..

نجلاء دورت وجهها بلا عياقة ماعاجبهاش عتابر راسو صديقها...اما مليكة سلمت عليه مزياان:مرحباا ولدي...

وليد شاف كرم جالس حدا نجلاء:وهذا بلا شك خوك الصغير...

نجلاء بسمت وهزاتو حطاتو على حجرها:هادا ولدي كرم...

الصدمة كانت القوية..ووليد بانت عليه بزاااف..حل فمو فيها ماقادش يتقبلها...

وليد:و ولدك!!

وليد حنحن صوتو:احم(بسم بزز)مرحباا(باس كرم)عمو لاباس؟.

كرم:لاباس(كيشوف فماماه ماعارفوش)..

وليد:ياله نخليكم دبا هانا قبالتكم..

نجلاء بسمت:مرحبا بيك...

مشى جلس قبالتهم ملامحو تبدلو..اما نجلاء ارتاحت تهنات...

مليكة زادت لوذن بنتها:شكون هاد وليد؟؟

نجلاء:هو لي وصلنا للسبيطار نهار ولدت إكرام..

مليكة:آهههه..مسكين..

نجلاء بسمت بتهكم:نيت مسكين..

مليكة:اوا مزيون الحق يتقال..

نجلاء شافت فيها ورجعت دورت راسها بمعنى ماعجبتهاش لهضرة...

مليكة شافت فيها:اوا نتي لي جاا ديري فيه العيب...

نجلاء بحدة:ماماااا...

مليكة:صافي صافيي..

بقاو جالسين كيتفرجو تا وقف كرم.. و

كرم:ماماا ازي نسطحو...

نجلاء شافت فماماها كضحك وناضت معاه هازة جلايلها من الارض..دخلو للوسط وهي كدورو وتشطح معاه وهو عاجبو لحال...كيدور فعينيه وحاضي نغم..جاو صحابات إكرام كتعرفهم نجلاء بقاو يهضرو معاها كيشطحو مجموعين وكيضحكو تا طلق منها كرم وهي شافتو غادي عرفاتو غيمشي عند ماماها...دارت كتشطح مع لبنات شادينها..زندت وعطاتها للنشاط..شوية دارت شافت جيهة ماماها لقاتها بوحدها مامعاهاش كرم..وعاود شافت جيهة إكرام مابانش ليها حداهم..استغربت وبقات تقلب عليه ماشافتوش..اعتاذرت من لبنات ومشات عند ماماها...

نجلاء:ماما فين كرم؟؟

مليكة:ماعرفت..كان معاك..

نجلاء:اوك انا غنشوفو ..

مشات كتقلب عليه بالشوية ..ضربت الدورة وهو يبان ليها واقف مع وليد ..مشات عندهم بزربة..

نجلاء:كررررم!!

كرم دار بسمليها:ماميي...

نجلاء شافت فوليد:شنو جابكم هنا؟؟

وليد بسم:شفت كرم كيلعب هنا وخفتو يطيح فلبيسين جيت عندو باش مايبقاش بوحدو...

نجلاء تنهدت:كرم..علاش جيتي هنا بوحدك ء ولدي؟

كرم:عي ء لعب ء ماما..

نجلاء بسمت فوجهو:كنقولك تبقى قدامي...

وليد:ماشي مشكل...ماوقع والو..

نجلاء بسمت:شكرا ليك...(شافت فكرم)ياله ء ولدي...

وليد حبسها:باباه ماكاينش هنا يمكن!!!(نجلاء طلعت عينيها فيه بحدة)زعما شفتك غي نتي معاه...

نجلاء:سمحلياا غنمشي نجلس عييت..

وليد عض شنافتو:فالصراحة لي عندو مرا بحالك ويخليها بوحدها..مايستاهلهاش..

نجلاء فهمت أنه استنطق ولدها دارت عندو مخنزرة فيه:هادي أمور شخصية عافااك ماتدخلش فيها...

وليد:عارف..سمحيلي ولكن فالصراحة باش يخليك ويخلي ولدو راه أكيد ماعندوش غرام دالعقل..(نجلاء تعصبت)لي عندو عائلة بحالكم خصو يديرهم فوق راسو...

نجلاء جمعت فمها غتجاوبو وهي تسمع:وتا لي كيتطفل على شي عائلة خصو العقل ولا غيجيبها فراسوو(زير على سنانو)كثر مايتخيل ..

نجلاء دارت مصدومة فاش سمعت لهضرة وهي تشوكااا...وليد تزير ماعرف مايقول...

كرم شافيه وبسم وبلا مايحس مشى كيجري عندو:باااااابااااااااا!!...

يتبع...