جحيم في السرير الجزء 13

من تأليف Chaimae Blm
2020

محتوى القصة

رواية جحيم في السرير

أوس عنق ولدو فرحان وهزو بين يديه مغمض عينيه كيشم ريحتو..وحل عينيه مخنزر باتجاه وليد ..أما نجلاء ذاتها كترجف حاسة براسها غطيح على طولتها حنات راسها حيت باين عليها التوتر لأبعد حد..كتحاول تبت راسها قدامو..باش مايبانش ضعفها تجاهو...
مشى وليد حيت ماعندو تا بلاصة بيناتهم اما أوس متبعو بعينيه غيقرطسو..تا غبر من قدامو...
هز عينيه فنجلاء لقاها حانية راسها...باس ولدو بالجهد..
أوس بحب:توحشتكككككك بزاااف..(طلعت عينيها فيه بحدة)..توحشتك ء ولدي الزوين...
كرم:تا أنا ء بابااا..توحستك بزااف...
أوس باسو:مواااح...الله يحفظك ليااا..
قرب باتجاه نجلاء وهي كتشوفيه مازال مامثيقاش بلي أوس قدامها وحداها دبا...
أوس بهدوء وكرم كيشوفيهم:سلام..(مد يديه يسلم عليها وهو كيشوفيها)..
نجلاء شافت فولدها قداش فرحان وفيد أوس لي ممدودة ليها...مدت ييديها وجاوباتو بصوت خافت:سلام...(بقاو كيشوفو فبعضياتهم شحاال عاد حيدت نجلاء يديها ودورت وجهها منو)..
كرم بفرحة:ستي ء مامااا باابااا زاااا هههه..(أوس كيشوفيها ونجلاء بسمت لولدها بهدوء)سنو زبتيلي ء باباا؟؟زبتيلي طوطو؟؟
أوس ضحك:ههه الطميميع هههه(نجلاء شافت فيه كفاش كيضحك مع ولدو تأثرت..خافت عينيها يفضحوها حدرت راسها)جبتلك بزااف دالحوايج...غادي نوريهم ليك من بعد..دبا حنا فالسبوع..
كرم:واخة بابييي..(عنقو فرحان بيه مسكين بحالا كان كيساينو غي ايمتا يجي)..
نجلاء وجهت لهضرة لكرم:ياله ء ولدي نمشيو نجلسو..
أوس جاوبها واخة ماكتشوفش فيه:هاهو معايا دبا..ها حنا نجيو مورااك..
نجلاء حطت يديها على خد كرم ومشات..قلبها كيضرب بالجهد..غمضت عينيها وحطت يديها على قلبها غتسخف...نفس الشوفة.. نفس النفس...نفس الملامح...تا حاجة فيه ماتبدلات...ريحتو هي التالية وصلت ليها بلا مايزيد يقرب...غي ضربت الدورة شدت فواحد الكرسي يديها كيرجفو...متكية عليه خايفة طيح...تعصبت حيت ماسحابلهاش غيوقعلها هكااا فاش تشوفو...ظنت أنها غتكون قوية ولكن غي شافتو وقرب قدامها وهضر معاها تمنات أنها ترمى فحضنو..تبكي وتسبو وتعايرو على شنو دار فيها...كانت متمنية تخشى وسطو وكرم بيناتهم..تعاتبو ولكن يكملو حياتهم بجوج.....هبطت دمعة سخونة من عينيها كانت كتنطبق عليها مقطع"كنت فاكر البعد هين..كنت فاكر اني نسيت...حضنك الدافئ الحنين بس في الاخر لقيت..اني عمري ماحقدر أنسى أحلى أيام الهوا..ولي باقي بيناا يبقى ذكرى ويضيع في الهوا....يوووم الودااع"...أغنية سمعاتها بزااف وكانت كتمنى بلي عمرها تحس بيها فشي نهار...حست احساس قبيح وقاصح صعيب أي واحد يتحملو......مسحت عينيها بزربة ونشات عليهم...تنفست بالجهد ورجعت للطبلة ديالها...
أوس شد راسو بزز..حس بالحنين والشوق ليها...تبدلت شوية...ولكن للأحسن..ولات زوينة ومثيرة كثر ملي كانت...حاول يتفكرلها كل حاجة قبيحة...باش مايضعفش ويستسلم من أول لقاء...ولكن وهي غادية قدامو حاضيها..كيملي عينيه منها..ماقادرش يحدرهم...
قطع كرم تفكيرو:بابااا..ياله نسوفو نغم..
أوس دور وجهو جيهة ولدو:واخة...ياله نمشيو ء ولدي..
مشاو باتجاه الحفلة..
مليكة غي جلست نجلاء انتابهت ليها مبدلة..قربت حداها وسولتها..
مليكة:بنتي..مالك؟؟
نجلاء شافت فماماها لونها مخطوف ومامرتاحاش:م ماما..
مليكة علات راسها تا كتشوف أوس داخل هاز كرم خرجت عينيها مصدومة...نجلاء عرفتها شافتو..دورت وجهها تأكد لقاتهم جايين...
أوس وقف عند راسهم:سلام عليكم..
مليكة وقفت مازال مامثيقاش:أ أوس!!

أوس مد يديه سلم عليها:خالتي مليكة...لاباس عليك؟؟
مليكة شافت فنجلاء لي جالسة حادرة راسها:حمدلله ء ولدي..شكرا...عاد جيتي!!
أوس حنى عينيه لنجلاء:ياله ليوم باش وصلت..
مليكة:على سلامتك...
كرم:باباا زااا عندييي هههه..
مليكة فرحت ليه:مزياان..الله يخليه ليك..
أوس:شكرا...(شاف فولدو)نمشيو نشوفو نغم؟؟
كرم:اهههه..
أوس بسم فوجه مليكة ومشى مع ولدو عند صاحبو لي مازال ماشافو ..
رشيد كيهضر مع مراتو ويضحو مع نغم لي بين يديهم تا وقف عليهم..
رشيد علا راسو لقاه قدامو تفاجئ:ء أوس!!
أوس بسم وحط كرم فالارض نيت كان تالف مع نغم...تعانقوو بجوج فرحانين...توحشو بعضياتهم...
إكرام تبلوكات بقات كتشوفيهم مبسمة...
رشيد خرج راسو:على سلامتك ء خوياا...
أوس بابتسامة:الله يسلمك...مبروك عليكم(شاف فإكرام ومدلها يديه)أهلاا إكرام لاباس عليك؟؟
إكرتم بابتسامة:حمدلله...الله يبارك فيك..
أوس طلل على نغم:اوووه لقطيطة...الله يخليها ليكم..
رشيد:آميين..(أوس رجع هز كرم)هااا بابااا جااا..
كرم باس باباه فرحان وعنقو وهما كيضحكو معاه...أوس حس باحساس زوين بزااف...ماعمرو كان غيحسووو كون بقى يهضر مع ولدو من الكاميرات..زير عليه فرحان بيه...
نجلاء جالسة فبلاصتها كتشوفيهم ساكتة...
مليكة:عاد شفتيه!
نجلاء بهدوء:آه..
مليكة شافت فيهم:كرم فرحان بزااف مع باباه..(نجلاء ساكتة كتشوفيهم)مسيكين..اخيرا جا هاد النهار..
نجلاء هادئة كتشوفيهم ماكتجاوب بوالو...تا شافت كرم جاي عندها كيجري وأوس حاضيه تا وصل عندها..
نجلاء:لحبيب ديالييي...شفتي نغم؟؟
كرم:آه سفتها...زوينة بزاااف..
نجلاء ضحكت عليه:اوه ههههه(مليكة ضحكت تاهي عليه)
أوس شافيها كفاش كضحك وهو نع صاحبو..حاضيها كفاش كدير..حس بيها ماداياهاش فيه..دور وجهو عند صاحبوو..
رشيد:ماقلتيليش راك جاي؟؟
أوس حك راسو:تالآخر لحظة عاد فكؤت نجي..ساليت مشروع ديالي تما وقررت ناخد كونجي رتاح فيه شوية من ضغط الخدمة..
رشيد بسم:وبعدا غتجلس معانا بزااف يااك؟؟
أوس:داير فبالي 15 ليوم ولكن...مازال ماقررت...
رشيد ضربو لكتفو:خليك معاناا..مازاال باغيينك تبقى..
أوس دور وجهو جيهة نجلاء وكرم:انشاءلله..
رشيد حس بيه..بسم:مرحبااا بيك والله فرحتيني...
أوس بسم بطريقتو الساحرة..جات نجلاء مع داك اللحظة..بقات تشوفيه دايخة..من ديما كان كيحمقها فاش كيضحك ودبا أكيد نفس الشي...تنهدت و عضت شنافتها كتفيق فراسها...مابغاتش تنجرف مع مشاعرها المبعثرة...حدرت راسها...
إكرام عطات لماماها البنت ومشات باغية تنشط شوية..دازت عند نجلاء هي اللولا نوضتها تشطح معاها ..
نجلاء حطت كرم لماماها وناضت هازة جلايلها كتشطح معاها فالوسط ..طلقو ليهم اغنية شعبية وعطاوها للشطيح والنشاط...
أوس شافهم كيشطحو بقى حاضي نجلاء كيشوفها كفاش كتمايل هاز العصير فيديه كيشرب ويبرد على قلبو...
رشيد شافيه مبسم:اوا شنو..شنو الجديد؟؟
أوس باستغراب:فاش؟؟
رشيد بهدوء:عندك شي وحدة فحياتك؟؟(أوس دار شافيه ورجع شاف فنجلاء بلا مايحس)..ولاا مازال بالك مع الماضي؟؟.(أوس طلع فيه حواجبو)..

نجلاء شبعت شطيح مع إكرام وكيضحكو مع لبنات...
وأوس واقف كيشرب ويشوفيها وفصاحبو:الماضي تسالا شحال هادي..من نهار سافرت..
رشيد طول فيه الشوفة:متأكد!!
أوس دور راسو وشاف بعيد..وتا صاحبو مابغاش يآنسيسطي عليه...
الحفلة نايضة فيها ونجلاء حاولت تخرج كااع الطاقة السلبية ديالها فالشطيح والضحك...مرة مرة تجر ولدها يشطح معاهم ..ومرات يمشي عند باباه يلعب معاه شوية...
إكرام قربت منها:هاهو رجع..
نجلاء غوبشت فيها:شفتو..
إكرام بسمت:باش حسيتي فاش شفتيه؟.
نجلاء عقدت حجبانها:بوالو..(دورت وجهها باش مايبانش عليها)..
إكرام عضت شنافتها كضحك:اممظ ثيقتك...
نجلاء:خلي ليلتك دوز على خير..
إكرام ضحكت:اوك اوك هههه...
...
سالات الحفلة..إكرام ودعت كااع الناس لي معاها..ونجلاء هزت لكاب ديالها دارتو عليها ونوضت ماماها باش يمشيو..
إكرام:عافااكم بقاو معاناا هاد الليلة...بلا ماتمشيو تالدبا...
مليكة:لاا مانقدرش...خصني نبات فالدار...
نجلاء بسمت:شتيي سي علي ماكيخليش مراتو تبات برا الدار...
إكرام بسمت:حشومة عليكم..قلت نباتو نتهاودو ناشطين...مازال مايتقال فهاد الليل ههه...
نجلاء قربت باستها:مرة خراا انشاءلله...
مليكة سلمت عليها وشافت فنجلاء:فين كرم باش نمشيو!!
إكرام جاوبت:راه مع باباه لداخل...
نجلاء:عافاا قولو يجي نمشيو...
إكرام بسمت:أصلا غدخلي غدخلي لداخل باش تمشي..اجي خوديه لراسك...
نجلاء صغرت فيها عينيها وإكرام مشات كضحك...
دخلو كيبان ليهم كرم ناعس عند باباه وهو مغطيه وكيشوفيه...
مليكة قربت مابغاتش بنتها تعاطى معاه:نعس!!
أوس علا راسو فيها مبسم:آه..باينة عيى بزااف..
مليكة:اه..اوا انهزو حيت غاديين..
أوس باستغراب:دباا؟؟(شاف فنجلاء كانت واقفة جنب باش ماتشوفش فيه كتساينهم يجيو عندها)..
مليكة:آه ء ولدي..تعطل لحال..
أوس ناض هازو:اوك..صافي أنا نوصلكم...
مليكة:لا ء ولدي..عندنا طوموبيل...
أوس شاف جيهة نجلاء:واخة...انا نوصلو معاكم للطوموبيل...
نجلاء سمعاتو تعصبت..سبقتهم ومليكة تنهدت:واخة ء ولدي...
خرجو على براا..نجلاء فتحت الطوموبيل ..سلمت على كلشي..وهو أوس حل لباب حط ولدو وتراجع...ونجلاء دخلت كتشير ليهم بيديها...وتا مليكة جلست لور حدا حفيدها...حركت الطوموبيل تحت أنظار الجميع...وأوس حاضيها كيحك عنقو...تا مشات من قدامهم...
أوس:تعطل لحال..غيمشيو بوحدهم..
رشيد بسم:خايف عليهم(شافيه)اممم على ولدك؟؟
أوس:تعلمت تسوق؟.
رشيد:آه..مين ولدت خدات طوموبيل وماتخافش كتعرف تسوق ههه...
أوس عض شنافتو ودخلو لداخل بجوج يهضرو...جابو ليهم القهوة..وجمعو بجوج..
رشيد بعد صمت طويل:غبتي بزااف ء صاحبي..(أوس حاني راسو) 3 سنين ماشي ساهلة..
أوس بلا مايحس:شنو تبدل فهاد 3 سنين؟.
رشيد تنهد بلعاني:بزااف دالحوايج...
أوس بجدية:بحالاش؟؟
رشيد كيحك صبعانو:ن نتا راك عارف..تا حاجة ماكتبقى على حالها..و...
أوس بقلة صبر:اوا طلقني.. هضر..
رشيد بسم:ماوقع والو...(أوس شافيه باستغراب)ماتخافش...نجلاء مادخلت تا واحد لحياتها...
أوس خنزر فيه:مالنا على هاد الضحك الباسل...
رشيد ضحك:ههه خفتي طير من يديك!!
أوس خنزر فيه:مابغيتش يترون ولدي وصافي..
رشيد دار راسو ثيقو:يمكن هادشي ماتبدلش...ولكن لي لداخل الله لي عالم بيه...(تنهد بصاح)..نجلاء عانات بزااف بعدما مشيتي...(أوس كيتصنت)ودازو بزااف دالاحداث ونتا غايب...منها طلاقكم وولادتها...فالصراحة أنا وتصدمت فيك لي ماجيتيش...قصحتي قلبك بزااف..
أوس بألم:تا أناا تقصحت ماشي غي هي...
رشيد:نتا خنتيها..وزدتي ضغطتي عليها...بطبيعة الحال أنها ماترجعلكش فداك الفترة...
أوس:كنت محتاجها بزااف خصوصا فاش....
رشيد شدو من كتفو:فهمتك...ولكن واش هادشي يستاهل تغبر هاد المدة كلها!!..
أوس بهدوء:تا أنا تجرحت..وعانيت بزاااف...اووف...بلا مانهضرو فداكشب لي داز..حيت تا واحد فينا مادارها مزيانة ..
رشيد تقاد فالجلسة:ودباا شنو بغيتي؟؟
أوس طلع عينيه فيه:بغيت ولدي...نشوفو ونشبع منو فهاد العطلة..
رشيد بجدية:متأكد؟؟(طلع فيه عينيه)متأكد باغي غي ولدك؟؟

أوس خنزر ورشيد كمل:لمهم...انا ماعندي فين ندخل بيناتكم..نتا تباركلله بعقلك ومامحتاش نبقى نقولك هادشي...مي..(على راسو فيه)..نجلاء هانتا شفتيها...تباركلله زوينة وأنيقة(أوس خنزر فيه)..وعاطية للعين...مازالة صغيرة وغيجيوها فرص بزااف...
أوس بلا تفكير:آه بحال الزا** لي كان هنا قبايلا...جالس يعمر عليها السهارج ويدخل فعروق النم...
رشيد غوبش:شكون؟؟
أوس:واحد الحيماري..كان هنا ماعمرني شفت كمارتو...
رشيد بقى يفكر:ء آه...وليد غيكون..
أوس تقاد فالجلسة معصب:وشكون هاد وليد؟؟
رشيد جاتو الضحكة عليه ونيت بغى يعصبو كماعلله يتحرك:هاداك هو لي وصل نجلاء وإكرام للسبيطار نهار كانت غتولد...(أوس تزنك وعروقو غيطرطقو)دار معانا لو جيست..وفالصراحة تا أنا شكيت فيه عجباتو نجلاء..خصوصا فاش عاودتلي إكرام كفاش كان كيشوفيها..ولاحظت تعاملو معاها...زدت تأكدت...
أوس تزير:لحيوان لي ولدو...بعدا كون غي خمجت لدينمو داك الوجه لي فرحان بيه...
رشيد شافيه بجدية:علاااش؟؟
أوس:حيت شماتة...يستاهل.. 
رشيد بسم:مافهمتش اش دار!!(أوس تعصب)ياك نتا مطلق نجلاء..(خنزر فيه بحدة)..وخليتيها مدة هادي...وقولتي بلي جاي غي على ود ولدك..دونك وليد ماقاصك فوالو!!
أوس جمع لوقفة كيهضر كارز على سنانو:اهاه...ماقلتي عيب..
رشيد وقف تالف:جلس ء صاحبي..(شد فيه وهو ينثر يديه)..
أوس:ماغنجلسش خلي داك الزا** يجي يجلس معاك...
خرج من عندو معصب...راسو غيطرطق...دخل طوموبيلتو وكسيرا باتجاه دارو .....
...
دخلت للدار...هازة ولدها فيديها وماماها موراها...حيدت صباطها بالشوية حدا الدروج وطلعت كتشم فولدها وتشوفيه وتبسم...مرة مرة تبوسو من دوك الحنيكات البيوضين لي حمارو فنعاسو.....حلت باب بيتو..ودخلاتو تحطو على فراشو...حيدت ليه لفيست بالشوية وباستو عاوتاني...جلست على ركابيها حاضياه وعينيها مدمعين...تا تحطت يد على كتفها...
نجلاء بصوت خافت حزين:شفتي شحال فرح فاش شاف باباه!! (بسمت بألم)ماكانش سحابلي غيديرلو هكاك واخة عمرو شافو...
مليكة:اوا كيبقى باباه...داك الرابط ربي لي كيزرعو فينا...تا واحد ماكيقدر يتخلى على واليديه...واخة شنو مادارو فيه...
نجلاء ناضت شافت فماماها:اه عندك لحق...ولكن أوس مايستاهلش كرم...مايستاهلوش...(بلا ماتحس بدات تبكي)شووفي...جا ليوم...سبوع د صاحبو..قدر يجي...ولكن اهئ اهئ...نهار ولدت أنا ..وكان خصو يجي يشوف كرم واخة غي نهار ماجاش اهئ اهئ...مايستاهلش ولدي مايستاهلوش 😭😭 ..
مليكة عنقتها عرفتها مقصحة بزااف:ماتبكيش ء بنتي...انا عارفة هادشي صعيب عليك..تهدني عاافااك..
نجلاء كتشهق وتهضر بالشوية:قهرني بهاد التصرف ء ماما اهئ اهئ...كرهتو كثر ما أنا كنكرهو..عمرني غنسمحلو على شنو دار فولدو...
مليكة خرجت ليها راسها:بنتي...حاولي تنساي لماضي...حيت الى بقيتي عايشة فيه غضري غي راسك...شووفي...خلي كلشي للوقت...والى ولدك تقبل باباه تا نتي تقبليه عادي...دوزي لوقت لي كيشوفيها ولدو على خير...(نجلاء مسحت عينيها كتشوفيها)لمهم تكوني مرتاحة...زعما تكوني نتي مامحتاجاش ليه...وتنساي كلشي..خصوصا شنو دوزتي معاه..
نجلاء كتشوفيها بجدية:و ولكن أنا نسيتو ء ماما....
مليكة بسمت ابتسامة راني عايقة بيك:شتي ء بنتي الى نسيتي اش داز...غتبداي من جديد وماغيبقاش يهمك لماضي فمرة ..غيولي أوس بابات ولدك وبحالا عمرك عشتي معاه...ما غيهمك لا واش جا ولا ماجاش..ماغتفكري فيه ماوالو..ماغاديش تكرهيه ولا تبغيه...داك الساع بالضبط غتعرفي راسك بلي راك نسيتيه...(نجلاء تنهدت مطولا وسكتت ماعرفت باش تجاوب...ومليكة باستها فخدها)تصبحي على خير ء بنتي...

وقف أوس بباب العمارة ديالو...كان موصي العساس يدخل لميناج ينقيوها ليه ..خرج من طوموبيلتو...ومشى باتجاه الباب...غي شافو العساس سلم عليه بزربة وخلاه يطلع.....
وصل للباب...تردد باش يحل لباب...ولكن كان خصو يحلها....دخل شعل الضو وشد لباب موراه...أول ما علا راسو تنفس من الاعماق...مدة هادي ماشاف ولا دخل لدارو ..بقى كيتمشى بهدوء..كل بلاصة كتفكرو بحاجة...مشى جلس على الكونطوار...حط يديه وبقى كيشوف فالكوزينة...كبتفكر فاش كانت نجلاء كتوجد ليه الماكلة وهو جالس تماا...اغلبية الاوقات كان كيكون معصبها ولا داير ليها شي خصلة ..عض على شنافتو مقلق من راسو..ناض وشاف جيهة الفوطوي..بسم بوحدو مين تفكر نهار مسحت ليه البروجي ديالو من لبيسي...ورجع تبت ودخل لبيت النعاس...وقف شحال فالباب...كان ضروري خصو يواجه مخاوفو...كان خصوو يرجع ويعيش فهاد الدار لي هرب منها هادي سنين...رمى رجليه لداخل..شعل الضو...كان كلشي مازال كيفما خلاه...غمض عينيه للحظة...تخيلها ناعسة فبلاصتها..قرب لجيهتها...حط يديه على خديتها...اه عارف ريحتها مابقاتش فيها ولكن مازال ريحتها فنيفو...تنهد بالجهد..كيحاول يحبس راسو ماقادش...أصعب حاجة تعيش بعيد على انسان كتبغيه لدرجة كبيرة...هادشي لي خلاه يبعد هاد المدة كلها...كان عارف فاش غيرجع غيجيه هاد الحنين كلو ..والمشكلة أنه ماكاينش أمل باش يرجعو بجوج ..شافها كفاش عايشة..كفاش كتحاول تبعدو على حياتها...دليل أنها ماعمرها غترجعو لبلاصتو لي كان فيها...ناض مقلق ودخل كيحيد حوايجو للدوش كماعلله يبرد على قلبو...
....
تكات فبلاصتها...صورتو ماغابتش عليها...كلما كتغمض عينيها باغية تنعس كتحس بلي قبالتها...حداها ومعاها....دارت لجيهة المخدة لي حداها وهي تجي فبالها "عنقاتو وتخشات فصدرو كتهضر وعينيها مشدودين:كنبغيك بزااف ء أوس...الى بعدتي عليااا نقدر نموت.....جاوبها:ماتقوليش هكاات انا عمرني غنخليك...حيت تا انا كنبغيك بزاااف..."....
بسمت باستهزاء وهضرت بصوت مبحوح:لا نتا وفيتي بوعدك...ولا أنا مت من بعدك.....
هضرة سمعتها منو هناا...فهاد لبيت ...والحيوط شاهدين عليها...علات راسها للسقف والدموع هابطين مع جناب عينيها...جرت لخدية عندها عنقتها وعطاتها للبكى....كرامتها ماكتخليهاش تعتارف..لا حدا أقرب الناس ليها ولا حتى حدا نفسها...كتقول بلي نساتو...ولكن غي بان قدامها...كيانها تخربق...حست بحالا ياله لبارح خلاها......بقات تبكي مزيرة على لمخدة...قلبها غيخرج من بلاصتو...كفاش غتقدر تخرجو من راسها ومن قلبها المذلول...لي مازال تالدبا مخبعو وماباغيش يخرجو واخة كااع داكشي لي دار فيها....
.....
خرج من الدوش لابس كيطما خفيفة سروال وكبيبط...مشى لبلاصتو...جلس كيشوف حداه...وجر لغطا وحط راسو...كانت الناموسية بحال شي جحيم بلا بيها...ماقادرش يلقى راحتو فيها...عيى يتقلب ويعاود كيقلب على النعاس...نورمالمو هادي نهار مانعس حيت تالاخر لحظة قرر يجي وخدا كونجي من عند عامر...الشي لي خلاه يبات كيجمع حوايجو...وعلى الصبح ركب الطيارة.......والو ماجاهش النعاس...ناض معصب هاز لمخدة ديالو وخرج على برا للفوطوي...البلاصة لي من ديما كتقبل عليه فأصعب أوقاتو....قاد لبلاصة وتخشى فيها...دماغو مابغاش يهنيه من التفكير...طفى الاضواء وبقى كيحاول تا داتو عينيه وغفى بلا مايحس...
أصبحنا وأصبح الملك لله...
حلت عينيها بزز..حيت ماقدتش تنعس بكري...تكسلت مزيااان...جرت تيلي غي شافتو تشوكات..
نجلاء بصدمة:اويلي 10:30 تفووو...
ناضت من بلاصتها..دخلت طرفت حالتها..وخرجت جبدت كسيوة طويلة فالباج ديال الصوف...كول مونطي وتحت الركبة...لبست بروطكان كحل وشعرها طلقاتو مع ميك اب خفيف...هبطت لتحت عارفو ماغاديش تمشي للخدمة...دازت لبيت ولدها مالقاتوش..هبطت لتحت عرفاتو غيكون فاق...خرجت باتجاه الجردة كتقلب عليه تا تسمرت فبلاصتها...

قبل ساعة...
علي:اوا نوض ء ولدي نمشيو...راه تعطلنا..
جاد:واخة ء خالي..(كيمضغ)هانا ساليت...
أحمد:ب بلا تي عليكم..
علي:لا وقت الخدمة دبا...
مليكة كانت فالكوزينة تا سمعت الدقان...حلت وهي تفاجئ:أوس!!...
أوس:سلاام خالتي مليكة..
مليكة شافت فيديه وموراه لقاتو هاز بزااف دالحوايج:سلاام...دخل ء ولدي دخل...
أوس بسم:شكرااا..(الليل كلو وهو خصو غي فوقاش يصبح الصباح باش يجي يشوف ولدو...ويعطيه الكادويات ديالو)..
جاد وعلي وقفو خارجين تا شافوه داخل عندهم..جاد تشوكا أما علي كان فخبارو...علماتو مليكة فااصرح بكري فاش فاقو..أحمد شاف لجيهة لي كيشوفو فيها..تنهد وشاف جيهة لينا لي تصدمت بقات مشوكيا كتشوفيه...اما طه حنى راسو وسكت.. 
أوس:السلام عليكم..
علي واحمد وطه:وعليكم السلام..
أوس مد يديه لكلشي...واخة ماعندوش مع جاد سلم عليه بهدوء..وقرب عند لينا لي على كرسيها...تقصح فقلبو على ودها..
أوس:كيبقيتي!!
لينا بهدوء:حمدلله..ء خويا...
أوس حل عينيه مزيان مع داك خويااا تنفس بالجهد وبسم بالخف...
أحمد:ج جلس...جلس ء ولدي..
أوس:شكرا لحاج...دبا شوية؟؟
أحمد:حمدلله...
أوس جا يجلس وهو يسمع صوت كرم لي خرج لقاه واقف غوت بأعلى جهدو بحماس:باااباااااا...
أوس دار مبسم ومش. تلاقا ليه وعنقو:صباح النور ولدي الزوين...
كرم:صباحو بابيييي مواااح..
أوس هزو فرحان بيه وكلهم كيشوفو فيهم:جيت باش نجيبلك داكشي لي شريت ليك...
كرم بفرحة:ويييي....
أوس مشى عرا طوموبيل الصفرا ديكابوطابل:وهي باش تركب فيها...
كرم حل فمووو بالجهد:وااااو...فنة واعلة..ههههه...
أوس بسم ولعبلو فشعرو:بصحتك...
جاد شاف فعلي:واقيلا نمشي انا وخالي طه..نسبقوك للخدمة!!
علي هز راسو:اه...سبقوني نتوما...
طه سمع منو ومشاو بجوج دليل أن جاد ماباغيش يتدخل فهاد الموضوع مرا خرا...
علي:جلس ء ولدي..
أوس بسم فوجهو:شكراا..(قلب بعينيه على نجلاء مابانتش ليه ماعرفها فين غتكون ومايمكلوش يسول عليها)..
كرم كان غيطير بالفرحة حيت باباه معاه..يدور يدور ويعنقو ويسولو على اللعب...وفالتالي جلس عندو وكيحل الكادويات لي جابلو كلو سعادة وفرح....
نجلاء فهاد اللحظة دخلت للجردة..غي شافت كرم جالس عند باباه وكيشوف شنو جايب ليه...الارض عامرة بالالعاب والطوموبيل..تسمرت فبلاصتها...حست بالدنيا دارت بيها...كلما كتقول غتمارس حياتها بشكل عادي كتلقاه قدامها...زيرت على يديها..ضغطت على راسها ومشات باتجاههم..
كرم بسم غي شافها:ماااميييييي هههه ازي سوفي بابا سنو زابلي...
أوس علا عينيه فيها داخ..كلما كيشوفها كتحرك رجولتو وقلبو بطريقة خطيرة...حدر عينيه عارف راسو مراقب من كلشي فهاد اللحظة...
نجلاء قربت حداهم:صباح لخير...
كرم ناض عندها عنقاتو وهزاتو:ماماااا سوووفي هههه..
نجلاء بسمت بالخف:اوووه..زوينة بزااف..بصحتك ء لحبيب ديالي...
أوس وقف وشافيها:سلاام..(مد يديه)
نجلاء بعدم اكثرات:سلام...(سلمت عليه تحت أنظار الجميع)..
برودها معاه كيخليه يشعل:سمحولي جيت بلا موعد ولكن جيت على ود كرم...لبارح شفتو فالحفلة ومالحقتش نعطيه كادوياتو..
مليكة:كرم ولدك ومن حقك تشوفو..
نجلاء بحالا ماسمعتش:ياله..غتعطيني دبا لبيزو ديالي حيت غنمشي للخدمة...هانتا مع بابيي النهار كامل..ياك فرحان؟؟
أوس مصدوم فيها وكرم جاوب بفرحة:آه فلحاااان بززااااف...
نجلاء باستو:ياله تالعشيية ونشوفك..(باسها فخدهااا وحطاتو مشى لألعابو)..انا غنسبقك للخدمة ء بابا...جاد مشى يمكن؟؟(أوس تزير وشاد راسو بزز)..
علي:اه..مشاو قبايلا...
نجلاء بسمت:اوك...صباحكم مبروك...
مشات قدام عينيه بهدوء تام..واخة لي فالقلب راه فالقلب...غي وصلت للدروج شدت فيهم قلبها غيطير من بلاصتو...كتنهج بحالا كانت كتسابق..ولكن معجبة براسها كتقد تواجه هاد المواقف...طلعت بزربة جابت الصاك ديالها ومشات للخدمة بزربة..هربانة..ماباغياش تبقى تماا حيت خايفة ضيع كلشي لي بناتو فلحظة..
أوس جلس مفقوص...مابرداتش ليه حاول يتلف مع ولدو لي فرحان وهو معاه...ولكن عقلو بقى معاها...
علي فوسط تفكيرو سولو:شحاال عوال تبقى هنا ء ولدي؟؟
أوس جاه السؤال صعيبب فهاد اللحظة بالضبط ماعرف باش يجاوب:امممم...مازال ماعرفت...كونجي قابل للتمديد....

مشات للخدمة كتسوط بوحدها...دخلت للمكتب تا كتفاجئ بباقة ورود من جديد.. غوبشت حيت توقعت أنه مايعاودهاش..هزت لكارط قراتها "كنعتاذر منك..تدخلت فأمور كثيرة...ماكانش خصني نتدخل فيها..ودرت شي حوايج ماكانش خصني نديرهم..يمكن حيت تفاجئت بيك عندك ولد صغير وكنتي مزوجة من قبل....كنعتاذر مرة خرا وكنتمنى تقبلي اعتذاري....وليد"..
نجلاء بفقصة:صافي...بقيتيلي غي نتا..تفوو. بنادم ماكيفهمش راسو.
لاحت لكارط فوق المكتب وجلست كتفرك يديها وتفكر فالروينة لي جاية...
.....
أوس لعب مع ولدو ودوز معاه وقت زوين..ناض باش يمشي...
أوس:انا خصني نمشي دبا...
كرم:حليك ء بابا حليك معايا...
أوس حنى عندو كيهضر معاه دقة دقة:دبا نرجع مرة خراا..ماتقلقش..دبا بابااا عندو لخدمة..دبا نولي نشوفك...
كرم تفهم:اوكي بابا...
أوس بسم:ياله هاي فايف(ضرب فيدي)..
كرم ضربلو فيديه عرفو عارفها عنقو وباسووو كيلعب فشعرو وناض...
أوس:نخليكم دباا...شكرا على كلشي...
علي:ماكاين تا مشكيل..ولدك هادا وضروري غتشوفو...
أوس بسم وتم غادي حبساتو لينا:خويااا...(أوس دار شافيها بلا ملامح)ممكن نهضرو شوية؟؟
أوس شافيهم ورجع شافيها وهز راسو:اوك..(قرب حداها)نجر بيك الكرسي؟.
لينة بسمت:لااا..نقدر ندبر أموري...
مشات قدامو وهو تابعها وشير لولدو ببسلامة...خرجو على برا حدا الطوموبيل ديالو ووقف كيساينها تهضر...
لينا بعد صمت:نتا عارف بلي حياتنا كانت مختالفة..والظروف لي تعرفنة بيها على بعضياتنا كانت صعيبة بزاااف...(أوس عض على شنافتو كيتفكر الماضي لي ماحاملش يتفكرو)..و ولكن...(صوتها تبح)مايمكنش يكون عندي خويااا والعلاقة بيناتنا تكون هكااا...(أوس شافيها متأثر)..نتا بوحدك لي عندي بعد بابا...خويااا لي فالصراحة عمرني تخيلتو يكون عندي...و ولكز...فرحانة(بسمت والدموع هبطو من عينيها)..فرحانة حيت نتا كاين...حيت عارفة نهار نحتاجك غلقاك...بغيت غي نطلبك تسمح لماما..(أوس عينيه حمارو ودور وجهو)هي غلطت بزااف فحياتها الله يرحمها...ولكننن...الى بغيتي تعيش مرتااح خصك تسمحلها باش تبدا صفحة جديدة فحياتك....(مدت يديها ليه وبسمت)غنكون فرحانة الى اعتابرتيني من هاد النهار ختك...حيت ماكرهتش نكونو بحال أي خوت فهاد العالم..و...كيبقى الاختيار ليك...
أوس شاف فيديها شحال عاد مد يديه ليها:خلي كلشي للوقت..(لينا تقبلت هضرتو)..لوقت كفيل يصلح كلشي....
لينا هزت راسها بالايجاب:غنكون ديمااا كنساين...
أوس شافيها مطولا ومشى:بسلامة...
لينا بهدوء:بسلامة خوياااا...
بسم بالخف وركب طوموبيلتو....تخلطو عليه العرارم..ماعرف مايدير....
وصل لعمارة بعد مدة...طلع للدار كيلقى رشيد جالس فالدروج طلع فيه وهبط..
رشيد بسم:مابغيتش نقولك هانا جاي لاتمشي تهرب فمرة هههه...
أوس بسم جنب:غنهرب منك...فاااك 😊..
رشيد عنقو مبسم:والله حتى فرحان لي جيتي...
أوس بسم:تا أنا...ياله ندخلو للدار...
دخلو بجوج جلسو فالصالون...
رشيد:الدار هي هي ماتبدلتش...بحالا عاد لبارح كنا هنا..
أوس تنهد ومشى يشرب فالكوزينة:هادا هو المشكل...
رشيد بهدوء:فين كنتي؟؟
أوس جا حداه كيجغم:كنت كنشوف ولدي..
رشيد بصدمة:مشيتي عند نجلااء؟!!
أوس بتخنزيرة:وا عند ولدي..عند ولدييييييي...
رشيد تكى جالس مرتاح:اوا هي هاديك ههههه...(أوس 🤨).

أوس تنهد داير راسو ماسمعوش:احم...لمهم..مشيت...
رشيد جر مخدة دارها على حجرو:شفتيها؟؟
أوس شافيه شحال وهضر:شفتها..
رشيد بسم:اواا...هضر ء صاحبي مالك كتقطر علياا بحالا الهضرة بالفلوس...
أوس بسم جنب:لدينمك مازاال لسانك طويل....لمهم..مشيت خديت لولدي كااع لي كادو لي كنت شاريهم ليه..
رشيد بدون اكثرات:دوز هادشي...عطينا سبب المشية الحقيقي..
أوس ماداش عليه:شافاني بحالا كحلت بالعمى(رشيد كيتصنت بجدية)..سلمت عليا بزز..وهضرت مع ولدها مزيان عجبوها اللعب..وطلباتو يجلس معايا تا ترجع من لخدمة وتشوفو...ومشااات بلا ماتقول تا كلمة...(شافيه)هادشي لي وقع...رتاحيتي!!
رشيد علا حاجبو وفمو:هادا ماكان!!..اوا طبيعي..نتا علاش مقلق راها عاملاتك مزيان؟!!
أوس حك راسو:مامقلقش..نيت هادشي لي خصو يكون...
رشيد كيحك على الدبرة:ولكن بحالا ماعاجبكش لحال حيت كتجاهلك!!(صغر فيه عينيه)..
أوس حدر راسو:نتا عارف أنا كفاش داير...راك عارف بلي ماكيعجبنيش شي حد مايعطينيش قيمتي...
رشيد:هاديك ماشي أي واحد...هادي مرااتك لي تطلقت منك...ولي عندها ولد منك...لي خنتيها(شافيه بحدة)..لي خليتيها فأصعب مراحل حياتها ومشيتي بلا رجعة...كفاش متوقع تعاملك ونتا داير فيها هادشي كامل...حمدالله لي أصلا عاملاتك هكا...
أوس تكى مخنزر فيه:نتا معايا ولا معاها؟؟
رشيد بوء كيشوف فالسما:مع الحق...والله شاهد على ما أقول هههه...
أوس تنفس معصب:انا عارف هاد الرابور من دبا ونتا طاليني بيه...ولكن الغلط ماشي فيك...لغلط فيا أنا لي جالس نهضر مع دينمك...
ناض أوس وشر عليه بخدية جات فيه ورشيد بقى يضحك:كلام الحق ماكيبغيه حد...(ناض موراه)دبا بالله عليك(أوس شافيه)..وجاوبني بصراحة..(أوس وقف حاط يديه على الكونطوار مقابلو)..ماتوحشتيهاش؟؟
أوس بقى شحال كيشوفيه ودور وجهو:تشرب قهوة؟؟
رشيد بسم كيشوفيه:دونك توحشتيها..اوك نشرب...
مشى هربان جلس فالصالون خاف يمشي يشير عليه بشي حاجة...
أوس وجد ومشى عندو جلس وعطاه الطاس ديالو:هااك..
رشيد شرب من كاسو:ودبا شنو غدير؟؟..واش غتخليها تا طير من يدك عاد تبدا تسكر وتبكي عليا بحاال الافلام؟..
أوس علا حواجبو:طير...مالها حمامة!!
رشيد:هيهيهي..سبحان الله شحال وليتي باسل ..(أوس بسم)خلينا ء صاحبي..نجلاء عزيزة علياا بزااف وفالصراحة مانحملش نشوفها مع شي حد من غيرك..
أوس غي لفكرة عصباتو:آشمن مع واحد آخور...
رشيد ضربو لكتفو:هاد الغيرة بانت...ها الحب بان..
أوس تعصب ووقف:اووووف.....آيييه ا سيدي مازال كنبغيها...وكنحماق عليها كاااع(رشيد تشلط فيه ولاخور كيغوت معصب وعروقو غيطرطقو)..بعدت هادشي كاامل حيت مقلق منها وباغي نساااها...بغيت نبعد كماعلله نبدا حياتي من جديد...بغيت نعاقب راسي حيت خنتها ونعاقبها حيت ماوقفتش معايا نهار حتاجيتها...حاولت فهاد المدة نبدا من جديد ماقديتش ء بنادم...ماقدييييييتش...واش نتا سحابلك قديت نساها؟؟...(رشيد كيتصنت بجدية)لاااا مانسيتهاش...ومازال ماكرهتش نكونو بجوج...و ولكن هانتا كتشوف...صاافي..هي تبدلت عليااا وعارفها ماغاديش تسمح...دونك ماكاين لاش نمحن راسي..نشوف ولدي ونرجع مين ما جيت..(رشيد بقى يشوفيه مشوكي حيت اخيرا خرج شنو فقلبو وكان صريح معاه)اوووف ماكتهناو تا تخرجو من بنادم حامض😠😠...

رشيد مد يديه ليه:جلس ء صاحبي...(أوس جلس كيسوط)هادشي كلو فقلبك وساكت...هضر وعبر...انا هنا باش نسمعك..حيت نتا خوياا وباغيلك غي لخير...
أوس مسح على وجهو:ماباغيش نثقول حيت عارف هادشي عمرو غيرجع كيف كاان.
رشيد بهدوء:الى نتا باغيها غتقدر ترجعها...
أوس:والى كانت نساتني؟؟
رشيد:غتكون درتي لي عليك...
أوس وقف:لأ...ماغنقدرش نتحمل بحال داك الصدمة...باش ماتبقاش تبغيني وترفضني راه غنسالي حياتي د بصاااح...
رشيد وقف حداه:علااش تأخرتي هكاا!!علاش خليتي تالدبا؟؟
أوس بألم:كنت خايف رجع...كان شوقي لولدي كيكبر نهار بعد نهار..ولكن ماقديتش رجع...خفتها ترفضني..خفت لقاها مع شي حد آخور..
رشيد:ودبا؟؟
أوس:دباا مابقيتش قاد نصبر...جاتني فرصة نجي هنا واستغليتها..قلت نجي ونجس النبض..ساعا من لول ماباينش ليااا فهادشي...
رشيد تنهد:اوووف..تا نتا ء صاحبي شحال فيك...صاافي جرب حظك وتا الى مابغاتش ماغاديش تموت...واخة أنا عندي أمل ترجعو لبعضياتكم...
أوس شافيه بجدية:علااش؟؟
رشيد بسم:نجلاء علا ماكنسمع من إكرام كيجيوها فرص وهي كترفضهم...مثلا هاد وليد ل...
قاطعو:ماتجبدليش سمية داك الزا**...
رشيد ضحك:ههه وا غي برد...زعما داك الزا** ههههه فاش قرب منها..ماعطاتوش وقت كون كانت باغية بسهولة غتلقاهم بجوج...
أوس تنفس كيشوف بعيد:ماعرفت...
رشيد:لمهم...نتا بدااا وحنا ديما فجنبك...
أوس خنزر فياا:نتا عارف نفسي هنا(شير لنيفو)دونك غي نسى...
رشيد بصدمة:واش غنبداو من لول...تفووووو....
دخل أوس كيحيد الفيست وسامح فيه...اما رشيد تزدح على لفوطوي كيدورها فدماغو....
جات لعشية...
نجلاء رجعت للدار تلاقات ولدها...جلساتو فحجرها وهو كيعاود ليها على باباه وشنو دارو..بقات تبسم ليه وفرحانة حيت أخيرا حس بالابوة شنو هي...
طلعت لبيتها بدلت حوايجها تا كتشوف تيلي كيصوني...هزاتو وجاوبت..
نجلاء:ألو الزين...
إكرام:فين غابرة!!
نجلاء:لخدمة وصافي(جلست على طرف لفراش)..
إكرام:اممم اوك...شوفي راه غدا دايرين نمشيو بيك نيك لواحد البلاصة واعرة...غنساينوك بكري اجي نتي وسي كرم نسيبي ههه..
نجلاء بسمت:غي سيروو احبيبة...مرا خراا..
إكرام:لا والله تا تجي...توحشتك ونيت باغية نفهم شنو طرا هاد الايام فغيابي..
نجلاء بتهكم:شنو غيطرا كااع هههه..
إكرام:لمهم مع 9 نتلاقاو حدا الدار ديالنا...حيت غنمشيو بالطوموبيل ديال رشيد..
نجلاء:كون غ...
إكرام:ماتزيديش فيه...اجي نبدلو الجو ء زمر ..
نجلاء تنفست بالجهد نيت محتاجة لعطلة:صاافي واخة...
إكرام فرحت:اووك بب..ياله ء دومان...
قطعت معاها وضربت فيد رشيد:لخطة نجحاااات ههههه...

أصبحناا وأصبح الملك لله..
ماضت نجلاء وجدت ولدها..لبساتو كيطما وجاكيط هزتها فيديها لايمشي يبرد لحال بزااف...لبست تاهي كيطمااا وجاكيط طويلة مع صبادري وطلقت شعرها....هبطاتو وسلمت على ماماها عاد خرجو للطوموبيل وشدو الطريق....ماجات فين دير 9 تا كانت حدا الدار...كلاكصونات وهما يهبطو إكرام ورشيد ونغم فالبوسيط ديالها...تسالمو وقادوها عاد تحركو جميع بطوموبيل رشيد...
الطريق كلها وكرم باغي يلعب مع نغم...كيطلل عليها ويشد يديداتها ولكن هي ناعسة...بقى حاضيها اما نجلاء مرة مرة تهضر مع إكرام ويتهاودو.....ماحسوش بالطريق تا وصلو لفين عوالين يدوزو النهار ..
كرم غي خرج بقى كيجري عاجباه الدنيا والجو...والنهر قدامهم..مشاو خداو طبلة من تمات والناس كلو واحد فين جالس...قادو لجلسة ديالهم وجبدو الفطور...شيرو لواحد السيرفور جابلهم براد د أتاي مع الحرشة والمسمن...وهما جبدو العصير والحلوى...حطو داكشي ومع الهوااا زوينة كلاااو تا عمرو لكريشة...سالاو جمعو داكشي..ناضو يلعبو منشطين البطولة...رشيد ضرب كورة لواحد لبلاصة ونجلاء مشات تجيبها..بزربة تبعها كرم كيضحك...فهاد اللحظة حبست طوموبيل تماا..خرج لابس حوايج رياضية فوق منهم جاكيط ..قرب عندهم ..
أوس:بلاصة زوينة...
رشيد سلم عليه سلام الرجال:شنو حنا كنتفلاو هنا!!..
إكرام بسمت:أوس..لاباس؟؟
أوس بسم وقرب يشوف نغم:حمدلله..عمووو لاباااس؟؟
فنفس اللحظة راجعة نجلاء كتجري على كرم وهو هاز كرة كيضحك..تا كيعلي راسو وشاف باباه..
كرم بلا تفكير:بااابيييي(لاح كرة ونجلاء غي شافتو تصدمت صدمة ثلاثية الابعاد) ..
أوس دار شاف ولدو جاي مافهمش..وغي شاف نجلاء موراه مشوكيا فهم بلي هادشي مدبر...
أوس تلاقا لكرم هزو:كررم الزوييين...لحبيب ديااالي...مزيان؟؟
كرم بفرحة:مزياان مزييااان ء بابااا..
نجلاء قربت ماحاملاش راسها كتخنزر فإكرام لي دورت راسها كتحك عنقها...
رشيد شافيهم:اممم جلسوو...
أوس شافيه ورجع شاف فنجلاء:شنووو واقع هنا؟؟
نجلاء بحدة:هادشي لي درتوه مازوينش فالصراحة...(مدت يديها تاخد ولدها)انا غنمشي...
كرم عنق باباه:لا بعيت نبكى مع بابااا..
أوس تصدم ونجلاء تكوانسات...
إكرام:نجلاء ..جلسي وماتزيديش فيه(غمزتها على ود ولدها)..
نجلاء تقلقت بقات كتسوط وتشوف بعيد...
أوس مخنزر ماعاجبوش كفاش دارولهم:رشيد هادو ماشي خصايل..(نجلاء خنزرت فيه وهو يكمل)راه ماكان فخباري والو...مايمشيش بالك بعيد...
كرم علا راسو فيه:ماتغوتس على ماميي..
أوس بسم بزز منو ونجلاء تكالمات كتلعب ليه بخدو:ماغوتش عليها ء لحبيب ديالي...غي ماماك فهمت غلط وصاافي..واخة ماموالفاش ليها ..
نجلاء عوجت فمها ودورت وجهها وأوس حلف فصاحبو...
أما إكرام ورشيد عاجبهم لحال مامسوقينش ليهم...
كرم:ماما...ازييي...
نجلاء شافت فيه وفأوس لي هازو:هانا ء لكبيدة ديالي...شنو بغيتي؟؟
كرم:ماتخاصمييييس مع باابااا..(صدمهااا وأوس بسم عاجباه برائتو)..
أوس بهدوء:حنا مامخاصمينش ء ولدي...
كرم بسم:اوا بوس ماما ء بابا...
نجلاء تزنكت وأوس علاا حاجبو فيه:كفااش؟؟(إكرام ورشيد شدتهم الضحكة عاجبهم لحال)..

كرم بجدية:آه بوسها ء بابا..باس تصالحو..
نجلاء شافت فأوس مشوكيا وبعدت وهز حاضيها:لااا ء ولدي..انا مامعصباش من باباك...صافي غنمشي نجلس تمااا...(شافت فيهم)اجييو نتجمعووو...
كرم شاف فباباه مبسم:هاهي ماما ماتكلكاتس هههه..ازييي نجلسووو..
أوس بسم جنب كيشوف فنجلاء:اممم ياله ء ولدي...ياله...
مشى أوس اكسبري جلس حداها تا خنزرت فيه...غي شافيها ولدها ضحكت بزربة وهو أوس يضحك من قلبو...
رشيد جلس هو وإكرام مقابلينهم:اوا هكاا الجلسة حلاات...
نجلاء طلعت عينيها فيه غتقرطسو..
رشيد بسم فوجه أوس:كيجاتك لبلاصة؟؟
أوس:مزياانة(كيبوس فولدو ويهرو فعنقو)شنو هاد الرويحة فيك...كتحمق(نجلاء شافت فيهم بجوج)..
كرم كيتهر:هههه بالاااكة ء باباااا هههههه...
نجلاء بلا ماتحس بسمت وغي شافيها أوس خنزرت ودورت وجهها جيهة إكرام كتحلف فيها...
كرم:ماما...بابا(شافو فيه)أزيو لعبوووو..
نجلاء شافت فإكرام معصبة زعما نتي درتي هادشي:ء أنا ء حبيبة فياا ديدي هنا...(شيرت لرجليها)مانقدرش لعب...لعب نتا وباباك..
كرم غوبش وأوس شافيها:نديرولو خاطرو غي شوية ..
نجلاء تعصبت ولكن فاش شافت فكرم راخي شنايفو جاوبات:اوك...لعب معاكم شوية وصاافي ..
كرم غوت بفرحة:يااااااي..
رشيد:هاك كرة ء كرم..لعب مزيااان...
كرم هزها غادي بيها وهي قدو:هههه اوكييي...
أوس ناض ونجلاء حيدت الجاكيط وحطتها على الطبلة...قربت حدا إكرام:والله لا بقات فيك...
مشات تبعتهم وإكرام عضت شنايفها عارفة راسها مقفراها معاها وغتزيد تقفرها....
مشات حداهم وأوس كيلوح كرة لولدو...كيجريو بجوج..دارت راسها كتلعب معاهم..
كرم شاف باباه غادي بكرة:مامااا خوودي كلة...هههه..
نجلاء مشات دارت راسها غتاخدها وأوس علا حاجبو فيها:اجي خوديها...
نجلاء خنزرت فيه ماجاوباتوش:كررم انا بنيتة ماكنعرفش لعب بزاااف...بابااك حسن مني ف كرة...
أوس بسم وعطاها لكرم وكرم كيجري ويضحك ماكيدير والو هههه...نجلاء شافتو كفاش كيدير هزاتو كتلعب معاه ودور بيه وهو فرحان....وهو يدوز واحد من حداهم شافيها..
الشخص:اممم الله يسخر ..
نجلاء شافت فيه ودورت وجهها وأوس مشى حداهم معصب:مالناااا!!(هاداك تلف دور وجهو)..بنادم دماغو فيه الوسخ تفووو...
هاداك مشى بحالو ونجلاء دارت غادية...وأوس كيسوط كيفرش رلسو بيديه...
لعبو شحال عاد جلسو فوق الطبلة..
رشيد:غتكونو جعتو؟؟
نجلاء ماكتجاوبش وأوس هضر:أنا بعدا جعت...ونتا ء كرم؟.
كرم بغوات:تا أنااا زعت ههه...
رشيد:اوك..نبداو نشويو اذن...اجي معايا ء أوس...
ناضو الرجال هازين فيديهم وكيشعلة العافية ولبنات فوق الطبلة معاهم نغم...اما كرم واقف حدا باباه ماكيطلقش منو...
نجلاء شافت فولدها:عاندااك فوفووو ء كرم...حظي راسك...
أوس جاوبها بهدوء:هاهو معايا ماتخافيش عليه..
نجلاء ماجاوباتوش كيف العادة...دورت وجهها وهضرت بصوت مكره:فالصراحة انا لي مانسواش ودغيا طحت فالفخ...
إكرام تنهدت:دبا علااش كتقولي هكااا!!
نجلاء كانت ماكتشوفش فيها..طلعت عينيها فيها:حيت كنثيق دغياا..وهاد الثقة ديالي لي كتخليني ديما جايباها فراسي...
إكرام بهدوء:انا غي بغيتكم تسرحو الطريق...(خنزرت فيها)ماشي ضروري تصالحو...لمهم تحاولو تعايشو مع بعضياتكم...
نجلاء بحدة:وشكون قالك أنا باغية نتعايش معاه!! نتي راك حمقة...هادا جاي عطلة وغيمشي فحالو...علااش باغياني نتعايش ونتعامل معاه الى غيولي يغبر مرة خراا!.
إكرام بابتسامة خافتة:وهادشي هو لي مقلقك؟؟
نجلاء بعصبية:اووووووووف...

أوس بهدوء:كون غي علمتيني...كتلعب من مورايااا!!
رشيد كينش على لعافية:اواا كون قلتلك كون شبعتي ميي سباااان...اللهم نديرهالك مفاجعة هههه..
أوس بسم بلا عياقة:نيت راها فاجعة لشي ناس(شاف جيهة نجلاء)..
رشيد هضر بثقة:غترطااب غي صبر...هكاا دايرين لبنااات...عزيز عليهم يندموووك على شنو مادرتي هههه...
أوس ضحك وهز ولدو مبعدو على لعافية:اجيي نشوفو لمااا ء ولدي...
هزو ومشاو قريب للنهر ونجلاء غي شافتهم خافت:فين غادي هادا عاوتاني؟؟
إكرام:بردي ء صاحبتي...راه باباه...
نجلاء علاات حواجبها:عاد تفكرو؟؟...
إكرام شافت فيهم:ماكتشوفيش قداش كرم فرحاان؟؟
نجلاء تنهدت:هادشي لي مسكتني أصلااا..(شربت قرعة الما صغيرة حداها شوية وهي يبان ليها أوس مهبط ولدو حدا لما ومرم كيرش فيه شاد فباباه)اويلي واش تسطى هاداا(تعصبت وناضت غادية جيهتهم)..
إكرام بسمت:لاحول ولا قوة الا بالله...
نجلاء مشات الاعصاب باينين عليها:شنووو كدير نتا؟؟
أوس وقف هاز ولدو مستغرب:شنوو؟؟
نجلاء بعصبية كتمسح على وجه كرم:نتا لي شنوو؟؟..حاطو قدام لمااا!! سحابلك هو قدك؟؟والى طااح ولا وقعتلو شي حاجة؟؟
أوس بهدوء:راه ولدي تا أنا...واش أنا حمق نخليه يطيح؟؟
نجلاء باستفزاز:حيت الى زلق ولا شي حاجة الله يحفظ..غياخد الاذن منك...
كرم كيشوف وأوس حطو:سير ء ولدي شنو نغم واش فاقت؟؟
كرم بهدوء:اوك بابا...
نجلاء تا شافت ولدها مشى عاد بدات تسوط عرفت راسها اش دارت ولكن واخة هكاك النفس هي النفس...
نجلاء بعصبية:سحابلك هكااا غتكرهو فيااا...ولا غيفضلك عليااا!!(قربت عندو بتحدي)غتكون غااالط وبزااف...اكيد ماغيفضلش أب سمح فيه(أوس كيتصنت ليها مزياان)..وخلاه من نهار كان فكرش ماماه....
أوس ربع يديه:آهاااه زيدي...
إكرام شيرت لرشيد:حمدلله كيهضرووو ههه...
رشيد بتمني:اوا عالله...واخة شفت الشياط ريحتو عاطية خخخ...
...
نجلاء بحدة مازالة مكملة:ماتحاولش دير راسك أب حيت نتا ما أب ما والووو...وفالصراحة نيت ماتستاهلش تكون نهائياا...
تمت غادية وهو شدها من يديها وزيرها تا قربت عندو جنب لجنب..حاولت تنثر منو وتبعد ولكن هو مزير ومخنزر فيها...
نجلاء:اممم ماتستاهلش تكون أب وماتعرفش ليها..(بقسوة)أصلا فاقد الشيء لا يعطيه...
أوس عينيه حمارو وهي عرفت راسها آش دارت ..سكتت وبقات تشوف فعينيه...زادت فيه ولكن فنظرها هادشي والو مقارنة بشنو دار فيها...طلق منها بزربة ونطق بصوت هادئ ولكن الداخل ديالو عافية..ماكيحملش يتذكر الماضي ولكن دبا ماشي غي تذكرو...دبا عايرااتو بيه...
أوس:اممم..عندك الحق(نجلاء صاقرة)..ولكن خصك تعرفي بلي ماشي كلشي بحالك خلاق ولقى واليديه بجنبو...(صدمها)..هادي حاجة ماكنختاروهاش للأسف...
نطق آخر كلمات وتراجع ومشى بحالو باتجاه الطبلة..حس بالقهرة شاداه..فكر يمشي بحالو حيت مين كيولي هكاا من الافضل يبعد...
قرب باتجاه الطبلة ونجلاء مراقباه من تمااا دايرة يديها فالجيب كتنفس بالجهد...
أوس بهدوء:أنا خصني نمشي...(تصدمو)تهلاو فراسكم..تالمنبعد ونتشاوفو...
ماخلاهمش يهضرو تم غادي..نجلاء تزيرت عرفت وصلاتها معاه للعظم..
كرم شافو غادي تبعو كيغوت:باباااااا(نجلاء من تمااا شافت ولدها كيجري موراه)فين غااادي؟.
أوس وقف وحنى عندو:غنمشي ء ولدي...
كرم حنى راسو غضباان:ماتمسيسسس...عااافاااك ء بابااا...
أوس تنهد:خصني نمشي عندي لخدمة..
كرم طلعلو الدم وتم راجع كيبكييي..أوس بقى واقف ونجلاء دارت يديها على فمها ندمانة على شنو دارت...رجعت عندهم ماحاملاش تشوف ولدها فداك الحالة...
رشيد:جلس ء صااحبي..فين غادي دبااا...ها نتا قلقتي سي كرم..
أوس تنهد ونجلاء جات عند ولدها:كرم ماالك؟؟
كرم:بابا غيمسي اهئ اهئ..
نجلاء كتمسحلو وجهو:مابغيتيهش يمشي؟؟(كرم دور وجهو بلا وهو حاني راسو وهي عنقاتو)صافيي ماغيمشيش غي ماتبكيييش...(أوس شافيها مشوكي)..

رشيد بسم:صافي تجمعو الغداا واجد..
إكرام ضحكت فوجه نجلاء لي هزت ولدها..كتمسحلو وجهو ومعنقاه...
أوس رجع بخطوات ثقال كيشوفيهم ويلوم رااسو"علااش ماقادرش نعنقهم دبااا؟..علااش ماقادرش نقرب ليها نقولها تسمحلي؟؟علاش درت هاكا فرااسي علااش؟؟..علااش خليتهم؟؟"..نظراتو كانت كلها أسى وهو كيشوفها كضحك ولدها بأي طريقة باش مايبقاش مقلق..بسم بلا مايحس كيشوفيهم وهي كتقادو فبلاصتو وتهرو باش مايبقاش عاقد غوباشتو...
حط رشيد الشوى وكيزيد ليهم..نجلاء الداخل ديالها مامرتاحش..ولكن كتحاول تفكر هاد اللحظة غي فولدها..عرفت راسها غلطت فاش غوتت قدامو ودبا كتحاول تخلي كلشي حداه نورمال باش مايتقصحش...أوس كياكل ويمد لولدوو ويوكلو بالشوية...نجلاء كتحاول تعود بأن كاين شي حد آخور عندو رابط قوي مع ولدها من غيرها...كتشوف كفاش كرم فرحان وأوس عاطيه اهتمامو..كتلاحظ بلا ماتعيق وفرحانة بزز منها لولدها..كان محروم من هاظ الاحساس واخيرا كيحس بيه...ولكن الغصة لي فقلبها أنه غيجي يوم وغيمشي بحالو...كفاش غتخلي ولدها يصبر على فراقو...تشدت ليها الشهية..كتاكل غي بزز باش ماتبينش حداهم...
إكرام انتابهت ليها ماكتاكلش:كولي ء حبيبة!!
نجلاء ساهية تا نغزتها إكرام وكلشي انتابه ليها:ءءء..
إكرام:كولي ء صاحبتي...
نجلاء ناضت:شبعت حمدلله..انا نغسل يدي ونجي...
أوس انتابه ليها تقصح فقلبو ..شافها مشات حدا النهر شلت يديها وجلست على واحد المقعد كتشوف جيهة الما...
إكرام شافت فرشيد طلعلها الدم..حسو أنهم ضغطو عليها بزااف...
كرم كلاا وشبع ناض يلعب بكرة...ومشى كيجري عند ماماه..غسلتلو يدبه وجلساتو عندها كتحاول تخرج من داك الحالة لي جاتها...
أوس شافيهم:ماكانش خصكم ديرو هكااا...انا مابغيتش يوقع هكاا..
إكرام تنهدت:تا أنا ندمت...
رشيد خنزر فيهم:ايييه ياودي على لي دايرهم فذراعي...قلبكم هشيش...شتي ماحدنا غادييين والامور غتقاد..حاولو تفهمو بلي كلشي فلول صعيب ابخي غيتقادو الامور...
إكرام شافت فيها:حظي نغم نمشي نشوفها...
مشات عندها جلست حداها:كرم..سير ء حبيبي عند بابا وعمو رشيد حظي نغم(عنقاتو)ماكنثيقش فيهم نتا بطل عليهم...
كرم ضحك:واخة طاتي..
إكرام بابتسامة وهو كيجري:يخليلي طاتي ههه..
نجلاء حظاتو غادي كتبسم...
إكرام حطت يديها عليها:نجلااء..والله ماقصدت نفيق عليك المواجع...ولكن نتي وأوس خصكم تلاقاو وتهضرو وتحلو المشاكيل..الى ماكان على ودكم غيكون على ود هاد الوليد لي عندكم...
نجلاء تنهدو كتشوف فالما:انا عارفاكم باغيين لينا الخير...كتحاولو تقادو الامور ولكن انا وأوس تسالا كلشي بيناتنا...مستحيل نثيق فيه مرة خراا..وهادشي كيخليني مانقدرش نتعامل معاه فمرة...نتي عارفة بلي انا الى ماثقتش فشي حد ماكنافقوش..
إكرام:حاولي على الاقل تواصلي معاه...ماغتخسري والو..على ود كرم..بليييز...
نجلاء شافت فيها مطولا وعاد نطقت:الوقت هو لي كيصلح كلشي...
إكرام:عندك الحق...لمهم خليك هنااا انا نجيب كاس قهوة ونجي..
نجلاء هزت راسها:اوك الزين..
إكرام ناضت وشيرت لرشيد فهمها...كان نيت جمع كلشي بقات غي الطيرموس د القهوة والكيسان...قربت حداهم...
إكرام كبت كااس وعطاتو لأوس:هاك خودو لنجلااء..
أوس باستغراب:أناا!!.
إكرام بهدوء:أنا هضرت معاها وهي ماغتقول والو...حاولو تحلو المشكل..ماحد كاين فرصة..
أوس شاف فرشيد شجعو بعينيه..خداه وساط عاد تحرك عندها...
إكرام بتوتر:ي ياااله يااله ...
رشيد هز نغم بزربة مشى كيجري...
إكرام جرت كرم:ياله كرم..غنديك للملاهي هههه..
كرم فرح:وييي...(استغرب)وبابا وماما؟؟
إكرام:غيلحقو عليناا فاش يساليو..باش يتصالحووو(غمزاتو وهو ضحك)..
كرم:اووكي ههههه...
ركبو الطوموبيل ومشاو مخليين موراهم غي العجاج...

أوس وقف شحال مور نجلاء كيشوفيها عاد تنهد وزاد حداها..علات فيه راسها تصدمت لقاتو هو...مد ليها الكاس بقات كتشوفيه..
أوس باستغراب:مابغيتيش قهوة؟؟
نجلاء وقفت مقلقة عرفت إكرام داراها بيها:انا قلت لإكرام هي تجيبهاااال...
طلت على لبلاصة لقاتها خاوية خرجت عينيها:ف ف فين مشاااو؟؟
أوس دار لقى لبلاصة خاوية تصدم تا هو:م ماعرفت..(خنزرت)..أقسم بالله واخة ماكيعجبنيش نحلف...ولكن مافخباري والو..إكرام قالت بلي نديلك القهوة..حسيت بلي نتي موافقة...
نجلاء تعصبت مشات كتجري...مالقات حد كملت لجيهة الطوموبيل مالقاتهاش..دارت يديها على وجهها الاعصاب ديال الدنيا تجمعو فيها...تبعها أوس تاهو داروها بيه...
أوس:مشااو!!
نجلاء معصبة لدرجة ماقاداش تهضر..الى هضرت غدير شي موصيبة...هزت تيلي ديالها كتصوني على إكرام ماجاوباتهاش...زادت تعصبت...شوية وهي تصافط ليها مساج"هاهو كرم معاانا..غنديوه للالعاب..نتوما هضرو وتفاهمووو...سمحيلييي بزااف بب"..نجلاء زيرت على يديها غي الدموع لي ماهبطوش ليها...ماكتحملش بحال هاد المواقف..شي حد يستغفلها ولا يضحك عليها أو يفرض عليها دير شي حاجة ماباغياهاش...
أوس شافيها:صاافي تكالمااي..ياله نتبعوهم...
نجلاء بحدة:ماغركبش معاك...
أوس كيحاول يبرد:هانتي كتشوفي ماكاين لا طاكسيات لا والو...
نجلاء معصبة:واخة نعرف ندير اوطوسطوب وماغاديش نركب طوموبيلتك..
أوس مسح على وجهو معصب:شنو هواا!!اوطوسطووب؟؟ تا نخليك تركبي فيها أنااا..
نجلاء خرجت أعصابها فيه:وشكون نتا بالسلامة باش تمنعنييي!! سوقك؟؟ شغاالك؟؟ بااا خووياااا؟؟ماكتجينيش اوا ماتدهليش فحياتي....
أوس قرب عندها بحزم:كنتي مرااتي(قصحها) ودبا نتي مامات ولدي...وانا أميد ماغاديش نعرضك للخطر كيت حيت هاد الراس عندك قاصح...
نجلاء خنزرت فيه غتاكلو:وا عباد الله خرج من حيااتي...مين جيتي وانا فالمشاكيل...ماكتعيااش..كاكتقاضاااش...ماحاملاش نشوفك بقالي غي ركب معاااك...
تمت غادية...هزها دارها على كتافو تا بدات تغوت الحمدلله لي الناس قلااال...غادي وهي كضربو لظهرو وتغوت...
نجلاء بغوااات:هبطنيييي...وااا الزمر...هبطنييي تفووو على جنس...
أوس مزير عليها مخليها ضرب...مصبر راسو وهي كترنن ليه عند راسو...حل الطوموبيل ركبها بزز..السيدة كتدافع معاه وتركل بحال شي بنت صغيرة...ماقواتش يديرلها هكااااك...وهو دخلها بالجهد وزدح لباب..سورتها بالكونطاكط تا جااا يدخل وهي حلت لباب تهرب دخل طاير جرها كضارب معاه..شد لباب وتعصب لأقسى درجة..سورت لبيباان وغوت فوجهها ..
أوس:رصااااي...مال مك مابغيتيش تحشمييي..واش باغية تبقاي هنااا تا يهجمو عليك الشمااايت!!..مال مك مابغيتي تحشمييي..
نجلاء واخة هكاك خلعها حاولت ماتبينش وهو كشاكشو خارجين:يهجمو عليااا كاااع...نتااا مالك؟(مسح على وجهو لمزنك كيشوف قدامو)دخوول الصحة...يكونو يكونو فيهم الخير عليك...(كيحاول يبرد وهي تكمل معصبة مابردتش ليها)زايدون ماتجبدليش ماماااا...اش داك نتا لييها..بقاااتلك غي هي فالحساب!!!بنادم كيدايرررر..😡😡
أوس بلا مايحس بسم هو فين وهي فين...حرك الطوموبيل كيحرك راسو ب "لاحول ولا قوة الا بالله"...

رشيد وإكرام غاديين بالطوموبيل بوحدو راكب لقدام وهي مع لوليدات لور...
رشيد:ياربي يهضرو مزيان..
إكرام:ياربي يتصالحو...
رشيد ضحك:هههه اودي بغيناهم غي يتفاهمو شوية...بهضرو ويخرجو اش فقلبهم...اما خلي الصلح دبااا..
إكرام بهدوء كتشوف جيهة كرم:اوا ماتعرف...واخة انا عارفاها غتقلق مني بزاااف(رخات شنايفها)..
رشيد بسم:الى هضرووو ماغاديش تقلق منك...غتفهم...
إكرام بهدوء:جيسبييغ(كنتمنى)....
.....
أخيرا سكتت..مابقاتش تحركت...بدات تراجع راسها...حست بلي زادت فيه شوية...مي معذورة تعصبت على جميع الجوايه...سكتت وبقات تسوط بهدوء كتشوف فالطريق وباغية ترتاح من الداخل...
أما أوس ساكت..مرة مرة يشوفيها ..كيلقاها ملغية...دماغها ماعرفت فين....شاف البلاصة لي وصلو ليها وحبس الطوموبيل مع الجنب....والغريب أنها ماعلقتش...كأنها كانت متوقعاه يديرر هكاا..
أوس حل السمطة ودار عندها:ممكن نهضرو بالعقل شوية!!(نجلاء بقات ساكتة وهو ساينها تجاوب شحال ماجاوبتش...كمل)....شنووو!!...واش إما تغوتي ولا ماتهضريش؟!!
نجلاء بهدوء:كنسمعك...
أوس حل لباب:نخرجو على برا حسن...
خرج وشاف جيهتها تا هي حلت السمطة وخرجت كتشوف فالمرتفع لي واقفين فيه..عينيها مراقبة الفراغ
..واقفة وعاطياه فرصة يهضر بلا ماتأثر عليه بعينيها ...
أوس تنهد وشاف بحالها...تنفس بالجهد:انا ماجيتش باغي نخطف ولدي منك....ولا نخليه يفضلني عليك...وماجيتش باش نديرلك مشاكيل ولا نقلقك...خصك تكوني متأكدة من هادشي و...
قاطعاتو ببرود:علاش جيتي؟؟(شافيها وهي ماشافت جيهتو)جاوبني...علااش جيتي بعد هاد المدة كلها؟؟..شنو باااغي؟؟
أوس تنهد من قلبو:بغيت ن...(دارت باتجاهو وطلعت عينيها فيه...يمكن حيت متشوقة تسمع وتفهم اش غيقول..تا هو دار جيهتها...كيهضرو والهواا بارد دالعشية ضارب فيهم شعرهم كيتحرك معاه ونيفهم ولااا حمر)ج جيت بغيت نشوفكم...(نجلاء مازالة ساكتة كتسمع)..كان عندي فضول نشوف عائلتي لي خليت هناا كفاش عايشين بلا بياااا...
نجلاء صححاتلو:لي كانت عائلتك...(دورت وجهها منو وهو كيشوفيها)..ماتنساااش...
أوس بهدوء:ولكن أنا حاس بلي مازالة عائلتي..
نجلاء بهدوء:هادي مشكلتك ماشي مشكلتي...
أوس:عندك لحق..
نجلاء بردت أعصابها:دبا شنو بغيتي!! وعلااش باغينا نهضرو وفاااش؟؟
أوس تلف...مين تحط حدا الامر الواقع ماعرف باش يبدا...
فكر شحال عاد نطق:نجلاء أنااا...
حبساتو بيديها:نساني أنا...ماتهضرش عليااا..خرجني من حساباااتك...(صدماتو)نهضرو على كرم حسن...
أوس تزير:اه..كرم...
نجلاء دارت عندو:أنا عارفة بلي باغي تشوفو كثر...وتاهو باغي يشوفك...هادشي علااش غنسهل عليك هاد القضية...فوقما بغيتي اجي للدار شوفو ماغاديش نمنعك(كتهضر بجدية وهو كيشوفيها)..ولكن الى بغيتي تخرجو خص يكون معاك شي حد من عائلتي...لحاجة لي مهمة عندي هي أنك تحاول توصليه بلي غيجي نهار ويتسالا لكونجي ديالك باش يكون مستاعد يفارقك...مابغيتش يتأزم نفسيا فغيابك...اللهم يكون متوقع تمشي...فهمتيني؟!(أوس هز راسو بآه متفهم)..لمهم..هادي هي لهضرة لي خصها تقال وقولناها..كنظن ماكاين تا مشكل!!(ساكت ماكيجاوبش)...دونك نمشيو بحالنااا..نيت لجو برد شوية...
تمت غادية شدها من يديها ودار عندها تا شافت فيه:لا ماشي غي هادشي لي خصنا نهضرو فيه...

نجلاء خنزرت فيديه وهو يزيد يجرها عندو بالشوية واخة ماعاطياهش الطوع قربها عندو تا تلاصقت معاه..
أوس بصوت هادئ:توحشتك...(نجلاء تشوكات من هضرتو)توحشتك بزااف ء نجلاء...وماعارفش شنو ندير...
نجلاء علات راسها فيه بعينين حومر:ش شوف حنا هنا باش نهضرو على كرم..حيت هو بوحدو لي كيجمعنااا...
أوس تعصب:لأ...ماشي غي هو(هز يديها حطها على قلبو)تا هذا كيجمعنااا!! وأنا متأكد(مشى يحط يديه على قلبها بعداتو...كمل هضرتو عادي)متأكد تا قلبك مازال ديالي...
نجلاء حاولت تبعدو:أوس باراكة...
أوس لصقها فيه حاط جبهتو على جبهتها:كذبينييي...ياله كذبيني!!
نجلاء كتبعدو:صاافي بليييز...
أوس علا يديه لعنقها مزيرها عندو:قوليهااا...قولي بلي توحشتيني كيفما توحشتك...
نجلاء عياات صابرة ولكن تصرفو معاها هكا حسسها بالدونية...كفاش يغيب هاد المدة كلها ويجي دبااا باغي يسمع منها هاد الهضرة..
جمعت كل طاقتها ودفعاتو معصبة كتغوت فوجهو:بااااركة....(شافيها)راني قلت باراكة مابغيتيش تفهم؟؟؟..شنووو هاد الثقة كلها(تعصبت)يااااا سلااام...غيب تا تشبع و أجي فالتالي بحالا تا حاجة ماوقعت...شنو هاد الجبروووت كامل!! ءءء؟؟؟
أوس غوت فوجهها:أنا مامشيتش بإرادتي...(شير بيديه لهيه)نتي لي بغيتيني نمشي!!
نجلاء خنزرت فيه:أنااا قلتلك سااافر؟؟.
أوس مكشكش:قولتيها بتصرفاتك...نتي مابغيتيش ترجعيلي...وخليتيني وأنا محتاجك...باش نفسرو هادشي؟؟ ءءءء؟؟
نجلاء بدات تغوت والدموع فعينيها:واش نتا مريييض!!(كيمشط فشعرو بيديه غيطرطق)واش خنتيني ومتوقع أني نسمحلك...واش سحابلك أنا لعبة فيديك...تبقى تلعب عليااا وفالتالي نرجعلك!! بنادم غااالط وماكيعتارفش...
أوس شدها من ذراعها بجوج:ولكن اعتاذرت واعتارفت بخطأي...واش يستاهل نضيعو حياتنا على ودو...
نجلاء نثرت يديها وبعداتو:كون تفكر فهادشي قبل ماديرو أصلااا..(كتحاول تنفس)اصلااا هادشي داااز دبااا وماكاين لاش نعاودوه...
أوس بحنين:ومين داز صاافي...نساوه ونتجاوزوه...
نجلاء بسمت وبدات تضحك باستهزاء:ن نساوه هههههه...نتجاوزوووه كااع؟؟(كيشوفيها مافاهمش)...اوووه..سبحان الله ماجاتش فبالي...
أوس تعصب:دبا مالنا واش غنبداو من اللول؟؟
نجلاء خنزرت فيه:لي داااز قبل ثلث سنين حاجة ...ولي عانيتو فهاد الثلث سنين حاجة خرااا..(صدماتو وهي تقرب جيهتو)الى يسحابلك غنسى بلي خليتيني وأنا حاملة بولدك وهربتي...ولاا غنسالك أنك سمحتي فيااا بلا تا ماطلقني واعتابرتيني عقبة فحياتك مخليها تا القاضي يهنيك منها...(تزير)..الجلسة(هزت صباعها كتشير ليه والدموع فعينيها)الجلسة وماحضرتيش ليهااا...ولا بلاااتي(هبطو الدموع من عينيها)نهار ولدت ولدك...ولدك..لي من لحمك ودمك ماجيتيش تا تشوفو...ماسولتيش تا واش كنا على خير انا وياه بعد الولادة....ماجيتيش حضرتي سبوعو(أوس كيجمع ففمو ماعارف باش غيجاوب)..عاماين والصرف ونتا غابر عليه..عمرك شفتيه..ونهار تولدت بنت صاحبك سبقتيها عليه..وجيتي تحظر...ءءء...هادشي كيتنسى ءءءء!! شووف راه ماكنبكيييش(مسحت عينيها)الهوااا بارد...داكشي علااش دموعي هبطووو(قصحت صوتها)أما نتا ماتستاهلش نبكي عليك...
جرها فلمح البصر لعندو وباسهااا بكل مافيه من قوة...حاولت تبعد عليه ماخلاهاش...مزير على خدودها وعنقها بيديه بجوج...وكيبوسها بحب وشوق واعتاذر وكاااع الاحاسيس الزوينة لي حاس بيهم دباااا...ما رخى منها تا شنايفها زادو حمارو وتنفخو من لبكى والبوسة ...علاات راسهت فيه وهبطت دمعة سخونة من عينيها وهو عينيه بحال الجمر...حدااا غروب الشمس كيبان بريق خااص شحال من وحدة تمنات تشوفو فعينيه...
أوس بهدوء وهو مازال شادها قريبة ليه:ماكانعرفش نهضر...ماكنعرفش نعبر...حاولت نوصل ليك شحااال من حاجة بهاد الطريقة...(تنهد بالجهد)..هكااا أنا داير...

نجلاء حيدتلو يديه كتشوفيه:صعيب نسى...(تصدم وهي تبعد عليه كتبكي)عمرني غنقدر نسى شنو عانييت فغيابك....عرفتي شحاال بكيت من مرة اهئ اهئ...شحاال تقهرت ونتا ماشي حدااياا...(مص شنايفو كيتصنت ليها)..اه قلتلك ماغنرجعش..ولكن كنت باغيااك تبقى قداامي نشووفك اهئ اهئ ماشي ضروري نقووول ء أوس...كان خصك تفهم...(حنات كتبكي وعلات راسها عاوتاني)واعدتيني عمرك تخليني...قلتلك بلي الى مشياي غنمووت...ومشيتييي...مشيتي حيت نتا باغي تمشي...(ميلت راسها دموعها هابطين كتشوفيه)مابغيتش نوقف فطريقك...تمنيت تجي من عندك نتاا...تمنيت ماتمشيش وتخليني...اه عارفة ..ماوقفتش معاك فاش ماتت ماماك...و ولكن...كنت مجروحة..مجروحة بزااف اهئ تالدبااا صورتك مع هاديك فوق مخدة وحدة كتقتلنيي...علااش عطيتيها شي حاجة من حقي😭😭..هبطت دمعة من عينيه..علااش قتلتيني بالبطيء ء أوس...أنا ماكنتش نستاهل ديرلي هكاك والله...واخة ماكنتش كنبغيك عمرني فكر نمس كرامتك بشي حاجة...حتى بعقلي عمرني خنتك اهئ اهئ...(أوس كيعض شنايفو ويشمر نيفو)..ونتا بسهولة تعصبتي مني...مشيتي عندها...شاركاتني فيك...كفاش بغيتيني نصبر على هادشي قوولي...(قرب عندها عنقها وهي كتشوفيه بألم)ومشييتييي...واخة كنتي عارفني ماغنقدرش نكمل بلا بيك اهئ اهئ..(بقات تشهق وهو كيشوفيها)كاان خصك تشوفني فاش كبرت كرشي وكنت كنمشي للطبيب..كنت ديما كلقى الحوامل مع رجالاتهم...الا أنا...لي ماجاش معاها راجلها هاد المرة كيجي مرة خراا...وأنا لأ...اهئ اهئ...درت دورات حمل علموونا كفاش نهزو لبيبي كفاش نربيوه...كنت ديما كنحس بالنقص...حيت شي مرات كيطلبو الازواج يجيو باش يتعلمو معانا ولكن أنا كنت بوحدي اهئ اهئ....تمنيت شي نهار لقاك قدامي...تجي تحيد داك الاحراج لي كنت كنحس بيه بحالا ولدي ماعندوش بااه اهئ(أوس كيسمع ليها وقلبو كيتقطع)..جات لمحكمة..لقيت راسي فالقاعة مقابلة لباب..كنساين تا أنا بحال الافلام تدخل وتبدل رأيك...ولكن ماجبتيش اهئ اهئ..خرجت مطلقة منك ونتا ماكاينش..بحالا كنت فشي حلم ونضت منو..بحالا عمرك كنتي معايا ولا قدامي ولا فحيااتي...أهئ اهئ..نهار ولدت تمنيتك أول واحد نشوفو بعدما خرجت...كان كرم صغيور بزااف هههه(ضحكت وخناينها هابطين)..تمنيتك تهزو...تختار ليه سمية وندابزوو شكون يسميه ههه..ولكن مالقيتكش...توقعت تجي فالسبوع تعرف عليه وديرها سبة باش تشوفني..ولكن...لاااا مادرتيهاش سبة...تمااا عرفت بلي مابقيت نعنيلك والو...عرفتك بديتي حياتك من جديد وأنا عمري غنكون فيها أهئ اهئ...ما جابكش الشوق لا ليا ولا لولدك...2 اعياد ميلاد ماجيتيش ..صافي..برمجت راسي على أني عمري غنشوفك...عمري غنولي نوقف قداامك...(علات راسها فيه بجدية كتبكي)علااش جيتي؟؟ 😭😭 أنا مابغيتش نولي نتفكر الهم لي داز عليااا...مابغيييتش...اهئ اهئ...(عنقها عندو بالجهد كتشهق وتبكي وهو مزير عليها عينيه حومر...بقات فيه بزاااف عندها الحق تكرهو ودير أي حاجة..علاات راسها فيه)عارفة راسي غنجرحك بشنو غنقول ولكن خصني نقولو(شافيه بجدية)..كنتي كاره ماماك حيت سمحت فيك نتا وباباك ..ولكن هانتا عاودتي فيا أنا وولدك نفس الشي...بحالك بحاالها...(تصدم)..وكتقولي نساااي..(مسحت عينيها بظهر يديها وبعداتو بالشوية عليها)..كفاااش غنسى غيي قووولي!!!..
سمحت فيه ومشات كتجري للطوموبيل ركبت ودارت السمطة..دار حاضيها مصدوم...عض شنافتو التحتانية وتبعها..دخل للطوموبيل...جبد كلينيكس عطاها مسحت وجهها وهو حرك الطوموبيل بلا هضرة بلا كلاام...شنو فايدة الهضرة وهو شايف راسو أسوء انسان على وجه الارض وشنو ماقال عمرو غيقدر ينسيها اش دار فيها....

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.