دخلات لبيتها قاطعة القمعة فنفسها حتى سدات عليها وجلسات تبكي على طريقته الجديدة فالهضرة معاها حتى شبعات ... صونا ليها مرة اخرى تيليفون وهي متكية بجلابتها كتنخصص وهزاتو لقاتو كيصوني .. ضرب قلبها فالتسعين كأن الداخلية كتعيط ليها وبدات تفتف وترعد مخلوعة وتكحب كتسرح الصوت مزيان وتمسح عينيها .. قادات الجلسة بدون شعور وتوكضات عاد فتحات الخط وردت بصوت خافت وهي كتحالو تقصحو بكبرياء
- الو ؟
رد بصرامة : وجدي راسك غدا عارضة علينا ختي للغدا ... غدا مع 12 لقاك واجدة ... ومتنسايس الضوسي فعيه الصباح هوا الاول
ردت : شكون فخواتاتك؟
رد : الهام ... يالاه بسلامة
ردت : بسرعة قبل ميقطع ) بلاتي بلاتي (خفضات صوتها ) وشكون غيكون اخر ؟ واش غير حنا؟
رد بنفس النبرة : غير حنا وهما .. يالاه بسلامة عليك
قطع عليها وهي كدور فعينيها .. ناضت عند الحاجة عاودات ليها على العراضة وبدات الحاجة توصي فيها تبت وترزن عند الناس .. رجعات للبيت كتقلب بين حوايجها شنو تلبس وباش تحضر وفين جلابة دالعروسة ساعة متلقات والو .. كاع جلالب ملونين ..دارت يدها على خدها كتخمم وتسوط .. فجأة تفكرات حساب على الفايس بوك كيعرض ملابس تقليدية عصرية من تصميم وحدة معروفة وفنفس المدينة وحلاتو كتقلب عليه حتى لقات النمرة وتاصلات بيهم
بعتو ليها الجلالب وحدة تنسيها فلخرى و بعتو ليها البلاغي عاليين اكثر من رائعين بتشكيلات جميلة وبدات تقلب وتسول على الثمن حتى لقات اللي تجي معاها وختارتها هي وبلغتها والشال ديالها حتى هوا وتافقات معاهم يبعثو ليها الصباح بكري على العنوان وخلصاتها عبر الانترنت من حسابها اللي كيتحط ليها فيه لاصال الفلوس شهريا .. واخا الازمة لاكن كيوصلها نصيب لابأس بيه .
باتت اللي كامل كتكفر فهاد العراضة وكفاش غدوز وكفاش خصها تجلس وتهضر .. وضاربة حساب مضوبل لقمع علي فأي لحضة وجلست تخيل غير القمع وتخراج لعينين ديالو وتألف احداث سلبية راسها حتى تنفخ ليها الراس وناضت صلات الصلاة ديالها كتنعل الشيطان ومشات نعسات
صبح الحال وصبحات اشراق هي وباها مع النبوري فالقنصلية دفعات الضوسي ورجعات للدار بكري كتجري ... دخلت للحمام ضرباتها بفركة حتى حمار جلدها وخرجات ملوية على راسها الفوطة لقات راسها سكنات والحال مشا وبدات تنقز وطير وتغوت فين سوشوار فين لاتخوس وكل مرة طل على تيليفون واش صونا ولا لا وتنهد بارتياح . نشفات الشعر بسرعة البرق مدلية راسها القدام كتشوط وتنفخ فيه ويدها كدور كي لفرفارة فاللخر جبدات القصة القدامية فقط وجمعات شعرها لواتو وبدات تهز وتحط تالفة فالمكياج ... ماجا المكياج يتلف ليها غير فديك الساعة .. وما تفكرات مشترياتها للعروس غير دسك اللحضة .. صدقات مهبطة الباليزة وكتقلب على المساحيق اللي شرات ودهن بزربة وترش والروينة قدامها .. رن تيليفون وقفزات من بلاصتها بديباردور والشورط ديالو مشبكين هزاتو لقات علي فالخط .. عضات على شنايفها وفتحات الخط بصوت هادئ منخفض
- الو علي
رد : انا جاي ساليتي؟
ردت وهي كتشوف فديك الحالة اللي فالبيت
- صافي ساليت نتا جاي
رد : انا قريب للدار
اشراق: صافي واخا
قطعات ونقزات وسط الروينة وكلشي مقلوب زادت قلبات الدنيا .. ضربات حناكها فجأة تفكرات الجلابة وطارت على تيليفون تاصلات بيهم مخلوعة وكتغوت معصبة بدون شعور
- اختي قلتي ليا 12 تكون عندي وهادي 12 ونص فين هي الجلابة واقفة عليها داباااا ... كفاش تسيفطتيها ماوصلني والو !!! ... عاودي اختي عيطي راه مشا عليا الحال ومسافرة وجالسة كنتسنا فيها توصل ... عاودي عيطي عفاك انا كنتسنا .
حطات بالزعفة لاتخوسة وبدات تقاد وجهها بسرعة .. جوج يدين خدامي وعينها على تيليفون .. سمعات الصونيط طلات من الباب قائلة
- ماما شوفي واش الجلابة هادي
مشات لاللة نزيهة حلات لقات علي فالباب واقف وبدات ترحب بيه دخلاتو للدار اما اشراق ندبات حناكها وهربات اللور طارت على تيليفون كتغوت وتعيط على الجلابة حتى بغات تبكي بعين مكحلة وعين لا وحتى حاجة ماواجدة . قطعات وهزات ليزاكسيسوار ديالها كتشتت وتزلع .. تخبلو ليها لبراصليات مع الكروميطة وتعصبات بدات تفك فيكم على اعصابها وترعد .. حلات عليها الحاجة الباب قفزاتها وقبل ما تقول علاش جات خرجات عينيها وقالت
تنهدات الحاجة مشات ردت عليه وضدقات الحاجة اللي داخلة للطواليط نيت .. كملت التكحيلة للعين لخرى والمكياج خفيف وجات الشفار مزيان ولوات شعرها.. لبسات ليزاكسيسوار وبدات ترش فالريحة مور عنقها بسرعة ..
مسج : واش غنباتو هنا؟؟؟
طلات على المسج كتولول وتنقظ وسط دوك الشراوط مقزبة .. صونا الصونيت فالباب وخرجات راسها كتعيط بشوية لما .. ساعة سمعات الماء كيتكب فالطواليط وهي ضرب رجلها مع الارض كتولول.. ماعندها مادير هادي الجلابة وصلت .. شافت يمين يسار ومشات كتجري بالخف سلتات من حدا الصالون بديك تقزيبة ديال الشورط قصير وديباردور فالغوز بيبي وحلات الباب شوية طلات لقات بنت سبورتيف فالباب هازة كارطونة وكتهضر بالجهد واشراق كتشير بيديها وتشوش
شوو شووو صافي صافي اختي شكرا شكرا بسلامة
جرات الكارطونة عندها وريحتها كتكسر سابقاها وسدات الباب بشوية .. طلات نص طلة على الصالون لقاتو جالس عاطيها بالجنب متكي على ركابيه شاد تيليفون كيتسنا .. هز راسو كيتنهد ومع دور وجهه دازت على صباع رجليها كتسلت لاكن لحسن حضها مشافهاش وبان ليه غير لخيال .. دخلات للبيت بشوية سدات عليها لقات كيصوني عليها نيت وردت بسرعة كتنهج
- صافي هانا جايا
رد بصوت منخفض : الوحدة هادي واش معروضة لعرس ؟
اشراق : لالا انا هانا خارجة كنلبس فرجلي
رد : طلقي راسك دغيا
- واخا
قطعات وحلات ديك الكارطونة لقاتها متولة والجلابة ملفوفة فتوب ابيض ... حلاتو لقات الجلابة احسن بكثير من اللي شافت فالصورة .. لون زهري بارد بزاف بطرز فالجناب فلون غامض عليه شوية مع الوان اخرى هادية هابط والقب ونص طوق عصري والفصالة مخزانية .. حطاتها قدامها بسرعة لبساتها كتشوفها فالمرايا كيف جات .. فنح ليها اللون وجهها اكثر بدات كتبان بحال شي وردة .. جبدات ساشي من التوب حلاتو لقات صباط عالي مثلت من الامام ديكور سامبل زوين وبدات تبحلق فيه
- اويلي فين البلغة !!! علاش سيفطو ليا الصباك ؟ انا طلبت البلغة ! (تنهدات ) نكون تخالطت ليهم مع شي واحد اخر ... ولاكن غير بلاتي حتى نرجع
لبساتو جاها فرجليها وبدات دور وتشوف بسرعة صدق ليها مع الجلابة احسن بكثيير وهزها من الارض هي وفصالتها بدات تبان همة وشان .. هزات الشال حتى حطاتو على ؤاسها وقادات القصة فالجنب من لتحت و سداتو ولاحتو فجنابها وهزات صاك صغير ديالها فيدو بسنسلتو ورشات الريحة بسرعة من بعيد وخرجات كطير وتقرقب هازة تيليفون وهوا كيصوني ليها
خرجات من البيت لقاتو واقف فباب الصالة فباب حاجب الضوء على اعصابو وقميجة بيضاء فالسروال وحداء رياضي .. شعرو ممشوط واللحية كتبري كحلة وريحة باردة فدافية المهم جدابة و شاد تيليفون فيدو كيصوني عليها حتى تمات جايا كتزرب وتقرقب عندو... طلعها وهبطها بديك النضرات الحادة حتى وقفات حداه كتلفو بابتسامة خجولة ..اكيد دايرة جهدها وكثر من جهدها باش تكون فالمستوى ، وكتمنى ماتسمعش شي قمعة دمر ليها حالتها النفسية وهي لابسة الجديد . هز عينيه شافه فيها وقال بجدية
- هادي هي ساليت ؟ كنا ف12 رجعنا فالوحدة
خرجت لسانها كترمش وتسرطها بزز وتلوح الشال على كتفها وراسمة ابتسامة بزز منها كتسمح بيها الهضرة ديالو .. سكتات وبقات محافضة على هدوئها حشمات من ديك الحطة اللي ضاربة وكتسمع فوقها الهضرة ..
هز راسو قدامو فمها اللي جايا عندهم فرحانة وقال
-يالاه زيدي
الحاجة : وا رجع عندنا اولدي ماتغيبش ... بقا تجي نشوفوك الدار دارك
هبط راسو بابتسامة خفيفة : نشاء الله الحاجة .. سلمي على الحاج .
شار بيدو لاشراق تخرج وهوا كيقول اخر كلمات للجاجة وخرج موراها .. وصلات لادروج ووقفات كتهبط بشوية بداك الصباط العالي وهوا قدامها معبس
- سربي راسك مشا الحال
قالت شادة فالحيط : انا هابطة راه خفت الطالون يطيحني
زفر وهبط خلاها هابطة كتحبو حتى للتحت و مشات ركبت حداه فالطموبيل فصمت . الطريق كلها وهما ساكتين وهي شادة فصاكها قدامها وقاطعة الحس حتى وصلو لعمارة ونزل ونزلت موراه كتقاد الحالة .. هز شي كارطونة دالحلوى حطهم اللور وتم غادي وهي موراه كتقرقب .. لقات الدروج قدامها وقالت كتسوط
- عاوتاني الدروج ! افف
ماهضرش معاها واخا كيسمعها كتنكر وبقا كيطلع زيوقف وهي طالعة على مسمار كتمايل .. فجأة كانت غطيح وترجع باللور كن ماشدش ليها فدارعها ردها وهبط عندها لدرجتها كينفخ من الصبر اللي صابر .. ماحسات براسها حتى لوا يدو على خصرها بسرعة بقوة ومن الخلعة مافهماتش اشمو كاين شدات ليه فكتفو القاصح وهوا هاز الحلوة فاليد لخرى
- غنباتو هنا ساعة لهيه وساعة هنا ....
طلع بيها كيجري ناقص عليها الوزن وبدات كتجري بالطالون حاسة براسها خفيفة ومحكومة بسرعة ماعرفات فوقاش وصلات .. حتى طلق منها كيسوط وينفض دراعو وقال كيصوني فالباب
- مقاداش عليه علاش لابساه ؟
تحل الباب فديك الاثناء وبابتسامة رحبات بيهم ختو وهي طالقة الشعر ولابسة قميص وعينيها عسلية .. جميلة ومتولة وبدات تسلم عليهم وترحب بيهم هي و وليداتها اللي واقفين كيتسناو موراها
دخلت كتسلم بخجل وجات خالتو اخرى من الكوزينة كترحب عنقاتو
سلمات على اشراق ودخلو جلسو فالصالة .. جلسات صم بكم ماكتهمضر مكتنطق غير كضحك وحانية الراس اما علي رجع داك الوجه اللي كانت شافتو بيه اول مرة وبقات ساهية غير كتخمم .. شوف كيفاش كان وكفاش رجع ... ياريت كن بقينا على هاد الضحك وهاد العلاقة اللي كانت .. ولاكن انا درتها راسي .. انا نتحمل مسؤوليتي
قربات ليها لوستها كتسول على احوالها وتقدم ليها ليها الحلويات والمشروبات .. من وجهها باينة طيوبة .. وبصراحة كاع الناس اللي عرفات لحد الساعة وشافت طيوبين و كيضحكو من القلب .
فالحين تحط الغدا والدجاج محمر والشلايض وقربو ليها الطبلة حتى لعندها كيكبرو بيها .. اما الاطفال غير ساكتين وكيشوفو بابتسامة فيها .. نطقات بنية صغيرة وقالت لماماها فودنها وبدات الام كضحك بانتباه الكل
علي؛ هضري معانا نسمعوك شنو كتقولي حشمتي!
قالت الام كضحك : قالت ليك واش هاد البنت هي مرات حبيبو علي (شافت فيها كضحك ) ايييه هي هي مرات حبيبك عليك واكيجاتك
تزنك وجه اشراق وهي كتاكل شلاضة وردت البنت مهبطة راسها بخجل
الهام : ايوا صافي اويلي البنت اول مرة تجي عندنا منديرو ليها حتى سطر (شافت فالنقاشة) لاعساك اختي ديري ليها شي نقش يكون زوين راه عروستنا هادي مرت خويت الوحيد .
النقاشة مرحبا على الراس والعين
نقشات ليها النقاشة نقش كيشهي فيديها وحتى رجليها وهي مزنكة عيات فيهم تنقش غير يديها لاكن اصرو عليها وتهلاو فيها .. صايبو ليها السقية وكل مرة تجي لوستها تسقيها ليها فيها ورجليها وهي جالسة مسرحاهم فوق المخدة .. طاح الضلام و داز الوقت ورجع علي دخل لقاها ناشىة يديها ورجليها وقال
- باقي ماساليتوش ؟ اشراق .. خصنا نمشيو مشا الحال
نقزات ختو قالت : والله ماتمشيو حتى تباتو و تعشاو معانا .. راه محمد دابا وهوا هنا غيجي من الخدمة .. باغي يجلس معاك ويقصر معاك هاد الليلة ..
قالت الخالة : راه درت لعشا على حسابكم ماعندكم فين تمشيو
رد كيشوف فيهم في حيرة : عييتو راسكم وصافي ..
الهام: مكاين لا عيا لا والو .. جلس راه محمد دابا وهوا جا
ناضت اشراق بابتسامة داتها لبيت صغير هاز ناموسية و كوافوز واحد فقد وممر ديق للمرور لاكن متول .. كانت غرفة نوم الاطفال وشركو ليهم الناموسيات بجوج وقادو ليهم التفرشة ... حطات ليها الهام بيجامة بميكتها جديدة وخلاتها ترتاح وخرجات سدات الباب عليها . حلات اشراق البلاستيكة لقات سروال ناعم وبينوار ناعم فالابيض ديال العرسان ونصلات الجلابة علقاتها ولبسات البيجامة فوق الملابس الداخلية وبدات تحل الفولار .. طلقات شعرها بارتياح كدخل فيه اصابع يديها وهي تسمع جوج دقات فالباب وردت
- شكون؟
رد : علي
بسرعة بدات تجمع شعرها ولاحت عليها الفولار وهي كتردد
- بلاتي تسنا
غطات شعرها وقالت : دخل اعلي
فتح الباب دخل ورجع سدو وهوا كيشوف فالبيت الصغير وقال
- وايلي !
وقفات باستغراب وقالت : شنو ؟
رد : كي غنديرو نعسو هنا؟
تصدمات وقالت : شنو !! غنباتو هنا بجوج!!!
رد بسخرية : وشنو حساب ليك ! راه مزوجين زعما وعاطيينا البيت
طاحت جلسات وقالت اويلي !!! وكي غنديرو؟ حتى تيساع مكاينش
حد يديها على جنابو وقال : بففف ... مشكيلة هادي
فتح صدايف القميجة باين جزء من صدرو وهوا كيفكر شنو ممكن يديرو وقال
- ماعندنا مانديرو ... غادي نصبرو هاد الليلة ... ليلة وحدة وغدوز باش ما عطا الله
شافت فجنابها: وشنو المعمول؟
علي: غنعسو فوق هاد النموسية فين بغيتينا نعسو فوق بلاكار!!
سكتات كتشوف فالسرير ومشات كتنهد هزاا جوج مخدات زايدين دارتهم الوسط ومشات للقنت تكمشات وجرات عليها الغطا كتشوف فيه بنص عين وهوا كيحل السمطة دالسروال .. خرجات عينيها فيه وقالت
- شنو كدير؟
رد وهوا عاطيها بالضهر كيجها لاحها وقال ببرودة
- مكندير وااالو
هز تيليفون مقابل مع السقف تحت تركيزها هي ورجع حطو وجر واحد السجادة مطوية فالقنت طلقها حدا الباب ووقف كيصلي . هبطات مكمشة مع المخدة طلعات عليها الغطا وبقات كطل عليه .. سلم وناض دخل حداها بحوايجو عاطيها بضهرو وطفا الضو .
بقات مكمشة ساكتة شوية وهي تهز يدها تكات على ديك المخدة اللي بيناتهن وقالت بهدوء
- عااليي
رد : امم؟
اشراق: بغيت نسولك
رد : شنو؟
ردت : ودور نسولك !!
هز راسو شوية وقال : شنو كاين؟
ردت : شعل داك الفايوز
يدو شعلو وهز راسو شوية قال : شنو شي حاجة
ترددات فالاول وقالت بخجل: دابا .. شحال غادي نبقا هنا باش عاد نمشي لكندا ؟
- عييت منصبر ليك ونتا كتزيد فيه ! على اتف الاسباب مالك ياك لاباس؟ عرفتك محاملنيش بلا متزيد تبينها ليا !
علي : لا رد
قالت : كل مرة تقمعني عييت من هاد القمع واخا تكون غتديني للقمر
علي: لا رد
اشراق : صافي الى محاملنيش خليها بينك وبين راسك بلاش ما تبقا تعامل معايا هاكا ... ريحتك خانزة !! حوايجك ماعرفت كي دايرين ؟ .. هضرتك ماعرفت كي دايرة ..
حل عينيه قاطعها كيخزر فيها وقال: مغتسكتيش؟
قطعات الحس وتقلبات للجهة الاخرى عطاتو بالضهر غضبانة حتى صبح الحال .
صبح ناعس على ضهرو بارتياح قالب وجهه جتها وهي قالبة وجهها جهتو معنقة ديك المخدة ويدها مرمية على وجهه ..دور وجهه بتتاقل كيحل فعينيه لقا يدها على نيفو وهزها باشمأزاز بعدا وناض عايف كيعوج فمو خرج من البيت خلاها ناعسة .. حتى فاقت على خاطرها لقات راسها فبيت ماشي ديالها وناضت بسرعة هبطات الشال اللي وصل للنص على جبهتها وجمعات البيت كي كان ولبسات جلابتها كما فاش يالاه جات وخرجات للحمام غسلات وجهها وقاداتو وصايبات الشال ومشات لوسط الدار حشمانة لقات الكل جالس كيفطر .. صبحات عليهم وجلسات بأدب حدا علي اللي اللي مجلس ولد ختو على رجلو كيفطر ويضحك معاه
الهام : كي صبحتي؟
اشراق: مزيان ههه شكرا
رن تيليفون لعلي وفتح لخط بابتسامة وبريق فالعينين وقال
- وي ماي لايف ...
شافت فيه اشراق بسرعة مصدومة والهام كضحك معاه وهوا كيهضر فتيليفون مكاين غير حياتي حبيبة ديال كبيدة ديال توحشتك .. حتى انا توحشتك . كيهضر ويعبر بابتسامة ناسي كاع اللي جالسين حداه فاللخر ختمها وقال
- صافي انا غنجي عندك ...يالاه بيزو
قطع رد تيليفون فالجيب عادي ورجع كيضحك مع ولد ختو .. ضحكات الهام وقالت
- كدخل التناوي بهاد الهضرة
هز عينو ضاحك شاف فيها وقال : شكون ؟ انا؟
الهام : اييه وشكون انا ؟!!
رد بتساؤل : استريلا معامن كنت كنهضر ..
ردت كضحك : عرفناك مع استريلا غير هوا اشراق مسكينة غتبقا ديما تسول راسها معامن كيهضر
فطرو وناضو ودعو العائلة خرجو ... وصلات لادروج وبدات تقرقب عاوتاني .. اما هوا هبط وخلاها ناولة على البيض حتى وصلات لتحت وخرجات مع الباب لقاتو واقف كيسلم من لابيز على بنت بحالها فالعمر وكيضحك معاها وهي كتشد ليه فكتفو .. قربات اشراق بنضرات غريبة عين كبيرة عين صغيرة والضحكة ممحية ووقفات كتشوف فيهم بجوج .. رجع بنفس النبرة ديال الهضرة خطوة اللور وقال كيشير بيدو ليها
- اشراق .. مافام ... (شار للبنت ) .. ماكوزين عليا
ابتاسمات اشراق وعليا وقربات ليها سلمات عليها بابتسامة وعفوية ورجعات كضحك مع علي كأن اشراق مكايناش وهو كذلك . خلاتهم اشراق ومشات وقفات حدا طموبيل وجهها احمر وعينيها فيهم نضرة غريبة .. حكرة مثلا او تقليل منها .. ثالت بنبرة ضعيفة بزز باش خرجاتها والغصة فقلبها كترعد
- حل ليا الباب اعلي
حل ليها الباب ديال السيارة طلعات جلسات وبقا هوا كيتجمع مع عليا ويضحك وعاطيها وقت اكثر وهي مرتاحة فالهضرة معاه فالاخير ودعها بعفوية وابتسامة وطلع فالسيارة رجع للجدية وديماراها في حين بقات اشراق ساكتة ساكتة ساكتة كتشوف قدامها فجأة بدات كتبكي بوحدها وتقطعها فيها حتى خنقاتها البكية ومزالة كتحاول تقطعها . تلفت باستغراب شاف فيها وقال
- مالكي؟ علاش كتبكي؟
دورات وجهها للجهة الاخرى كتنخصص حتى شبعات وشافت قائلة بحرقة
- كما انا كنحتارمك قدام كلشي حتى نتا حتارمني قدام كلشي
استغرب : كفاش مافهمتش؟
ردت بحرقة: نتا مابغيتينيش نطيح بكرامتك قدام الناس حيت كولشي عارفنا مزوجين ... حتى انا مانبغيش تقلل مني قدام شي واحد خصوصا بنات عائلتك .. مادرتي ليا حتى اعتبار وخليتني جالسة بحال شي منبودة ونتا كضحك على خاطرك ! شنو غتقول عليا دابا هي ؟؟؟
رد بهدوء : علاش اصلا دخلتي وجلستي فطموبيل بقاي واقفة معانا اش فيها الى وقفتي جوج دقايق ؟ ماشي وحدة برانية وعادي كنتي تهضري معاها وغنمشيو بحالنا! ... نتي اصلا معارفاناش علاش كنا كنهضرو بان ليك غير وقف كنهضر ! نتي سلمتي وزدتي البنت كانت كتسول عليك قبل متهبطي وماخليتيها حتى تهضر معاك !
رمش بتتاقل وقال : شوفي الله يرحم الواليدين... هاديك راه ماشي برانية وبنت خالتي قبل كل شيء .. مغاديش ندوز نميك عليها بحال الى مكنعرفهاش غير حيت تزوجت.. واخا هادا مازواج ماتالعبة ... وهاد الزواج نيت مغاديش يخسر ليا علاقتي بعائلتي اوك.. اون بلوس شفتي مها كفاش تعاملات معاك وكفاش تهلات فيك فالدار... والبنت شحال هادي ماشفتها وجات تسلم علينا وتعرف عليك مي لقاتنا هابطين... ونتي الاللة بالنفخة الخاوية كبرتي فيها الهضرة وزدتي عندك زايد ناقص... حنا غادي نإيفيتيو هاد المشاكل كاع فخطرة... مابقا ليا والو نمشي مغانشوفك معاتشوفيني حتى تمشي لهيه .
[17/3 02:21] 🌸حسبي الله عليه توكلت ...: بدات تحسب ليه : انا فيا نفخة خاوية وانا مامصواباش وانا فيها كاع العيوب و ...
قاطعها بصرامة : فيك كاع العيوب وصابر معاك لحد الساعة اشنو بغيتي كتر؟ معيش عائلة على قدها فكدبة بسببك
سكتات من تقل الصدمة ودارت يدها على فمها قطعات فراسها النفس .. شد الفران فديك اللحضة حدا بابهم ونزلات بغضب من السيارة طلعات بحالها سدات عليها فالبيت بلا متوقف لمها اللي حلات ليها الباب وجلسات كتبكي بحرقة . فلحضة كرهات كولشي .. كرهات كندا كرهات علي .. كرهات العالم وبغات دير بناقص من كل شي .. لاكن بردات فالاخير من بعد موجةيال البكاء وقررت تصبر ماحدها مابقا ليها والو وتمشي .. تمشي تغبر على المحيط اللي مرضها وديك الساعة هضرة اخرى
مشا علي لكندا وبقات اشراق فالدار في انتضار الفيزا تخرج ... تقطع الاتصال بينها وبينو وحتى هي تحد ليها الصبر مابقاتش كتعيط ليه بالمرة .. لزمات البيت وبدات فالتوجاد للسفر الى حين خروج الفيزا .
دازت مدة والاتصال مقطوع .. للحضة شكات انه يمكن نساها وسمح فيها ، وفكل مرة كتبغي تتاصل بيه على الاقل تخلي الخط مشروك وكترجع دير بناقص . عارفة من بعد كل اتصال غتقطع كتبكي اللهم بلاش .
اخيرا .. اخيرا اخيرا تحقق الحلم .. تحقق حلم كندا وشدات الفيزا فيدعا وهي خارجة كضحك كي الحمقة من القنصلية .. كتهضر بوحدها و ضحك مع الناس فالقنصلية وهما كيبادلوها نفس الفرحة .. احساس رائع من بعد طول انتضار والخوف من الرفض وخيبة الامل . رجعات فيها الروح ومشات كتجري قاطعة الشانطي تشد طاكسي صغير رجعات بحالها كتحل وتعاود فجواز السفر .. وصلات لحومتها ونزلت قاطعة الشانطي فجأة وقفات حدا رجليها سيارة كانت غدوز فيها خلعاتها ونزل منها طه بغضب وعصبية مباشرة بلا ميهضر شد ليها فدراعها وهي مخلوعة وقال
- اجي معايا نهضر معاك...
نترات يديها كترعد وتشوف فجنابها وخيال علي كيبان ليها مرة قاطع الشانطي مرة جاي موراها مرة كيشوف فيها
- شنو بغيتي طلق مني بعد مني
جرها من دراعها : غنهضر معاك زيدي
جرها للطموبيل باش تركب لاكن الخلعة كانت قوى منها نترات يديها كتغوت وترجف حاضية جنابها
- ماتهضر معايا منهضر معاك وا طلق مني ولا نجمع عليك الناس بعد عليا
طه : اشرااااق راه مزال مسالينا انا ونتي .. غادي نمشيو نجلسو فشي بلاصة نحلو هاد المشاكل ونردك لداركم
خرجات فيه عينيها : المشاكل حليناهم (غرغرو عينيها) علاش حتى كنبدا نعيش شوية وكترجع تكحل ليا حياتي علاااش !!! واش كاينة غير انا فهاد الدنياااا؟ ياك عرستي و جريتي عليا ومشيتي كملتي حياتك عادي عمرك شفتي جيهتي واش انا كنتعدب ولا مكنتعدبش ؟ حتى بان علي عاد (شافت فجنابها) عاد راجع عندي
رد بغضب: حتى انا معايش حياتي وماعشت والو وكنت كنصبر راسي ... وشتت عشي ورجعت ليك واخا
خرجات عينيها : ماشي تمشي فاش ترشق ليك وترجع فاش ترشق ليك وكل مرة تلقاني جالسة كنتسنا فيك غير نتا تجي ! زايدون ماغاديش نرجع ليك وانا دابا مرى مزوجة مزوجة ماعندكش الحق كاع توقف ليا فطريقي
رد بغضب : تزوجتي باش تبقا حدايا انا عارف هادشي ..
قاطعاتو : غير كيكدب عليك راسك اطه ... شفتي انا كنت حمارة ... وغنبقا حمارة الى فكرت نعطيك فرصة ... انا كنعطيك السلاح باش دمرني بيدي ... عمرني شفت الحبس حتى شفتو معاك ... وليت فعينين الناس منسواش ... انا رتكبت اكبر غلط فحياتي حيت تعميت وعواريت مابقيتش كنعرف الصح من الغلط ... وكن وحدة بلاصتي عمرها تشوف فيك من بعد داكشي اللي وقع ليها كامل منك .. وواخا كاع نرجع .. عمرني مغنعيش مرتاحة وعمري نشوف الراحة حيت نتا ماضي كحل غنبقا نتفكرو وانا حداك حتى للموت ... هادشي بلا عائلتك اللي غادي تكرهني فعيشتي فكل مرة تلاقيتهم فشي بلاصة ... حشيان الهضرة والسم الفتاك ... كانو كيسمموني بلا هادشي .. اما دابا بلا منهضر
تنهد : اشراق .. اجي نمشيو نجلسو فشي بلاصة بعيدة على داركم ونهضرو ... راه شحال من حاجة مزال ماحليناها
ردت بالنفي وقالت : انا ماعندي فاش نهضر معاك ... راه سبق لينا وجلسنا وهضرنا واش غنبقاو ديما نديرو اجتماع .. من مور كل اجتماع توقع كارثة حتى توقف الفاس والراس و نجلس انا ندب ... راه ندبت ماشي عاد غندب . سمح ليا انا مغاديش نمشي معاك لحتى بلاصة ... وعلي عندو الحق ... هاد الحالة ديرها قبل مانوصلو لهاد لمواصل ... قبل ما تبدا تخرب ليا فكل مرة حاجة بنيتها بمشقة النفس
دورات وجهها غادية وهوا يرجها بقوة وقال بغضب
- مغاتمشي لحتى بلاصة (غوت ) معااااتمشيش مع علي ومغاتحركيش من هاد البلااااد ومغنخليييييكش
دورات عينيها ويدها على فمها كتشوف كاع الناس والجيران كيشوفو فيها وهو كيغوت ويسمع لكلشي.. تفقصات وبالفقصة هزات الصاك كضري وتبكي وتغوت كارهة حياتها
- بقات ليك غير حومتي تشوهني فيهاااا منين مادزت ينعتو فياااا .. بعد منيييي الله ياخد فيك الحق بعد منيييي فين ما حطيت رجلي كتهرسها ليا .. خرجتي عليااااا وفضحتيني ... سير بعد مني الله يعطيك موصيبة .. سير شوف مرتك وولدك وخليني نعيش بعد مني
بهستيرية بدات ضرب وتبكي حتى جاو الناس كيفكو وهوا كينهج .. طلع فالطموبيل مشا وجلسات هي كتبكي فوق طروطوار والناس كيعطيوها الما ... شدات للقرعة كترعد شربات منها وبدات تبكي حتى شبعات ومشات حانية الراس كتشوف بنص عين فالناس وهما كيرددو
- لا حولة ولا قوة الا بالله العلي العضيم
شدات فصدرها وحلات الباب جلسات فالدروج كتبكي .. حسات بالنفور لاول مرة والكره اتجاهه وبدات تسب فيه مكرهة لاقصى درجة كأنها عمرها رتاحت ليه فيوم من الايام .
كانت هاد الكلمة هي اللي ناقصاها باش تخوي داك الواد من الدموع وتعنق مها بقوة .. حتى الحاجة بدات تبكي وتبوس فيها واخا كانت خايبة معاها و ديما تابعاها بالمنخاز .. لاكن دابا عاد بان حنان الام الحقيقي فوداع بنتها ودخلها همها بالمعقول وبقات شاردة ومرفوعة .
جلسات اشراق كتنهد وتنخصص تاصلات بخليج تخبرها وفور ما فتخت ليها الخط قالت
عطاتها اشراق المعلومات وقطعات شافت مها اللي دايرة الشال على نيفها كتبكي فصمت .. هبطات اشراق راسها بأسى فصمت وناضت الحاجة من حداها مشات تكمدها فلكوزينة .
دخل الحاج عبد الغني فلعشية بحال العادة .. جلس ودار كاسكروط وتعجب لهاد الصمت اللي فدار .. شي مكيهضر مع شي .. استغرب لاكن ما تسوقش لقاها لصالحو وتكا على جنبو كيتسنط لعضامو .
حلات خليج الباب دخلت ودخلات قدامها بيازيد كيتمشا بزز .. طلقاتو مشا عند الحاج عبد الغني كيجري عنقو وهز الاخير عندو كيلعب معاه وجلسات هي فالطرف شادة وراق فيديها كتسول على اشراق . خرجات عندها اشراق جلسات قدامها فصمت ومدات ليها خليج الاوراق ليدها
- هاكي ها البيي ديال الطيارة .. بعد غدا مع 12 ديال الليل
تلفت الحاج عبد الغني مصدوم وقال : اشمن طيارة ؟
تنهدات خليج وقالت: عندها الطيارة بعد غدا مع 12 لكندا
الحاج: علاه خرجات ليها الفيزا !
خليج: خرجااات
الحاج : وقطعتو فالطيارة صافي!!! علاش ماقلتو ليا والو !!! (شاف فاشراق مصدوم) علاش قطعتي بلا متقولي ليا والو
هبطات راسها بأسى فصمت ودورات وجهها للجنب بدون رد
بقا هوا غير كيشوف فيهم وفالخاجة اللي واقفة حدا الباب والكل طايح عليه الضيم وقال
- مالكم مزروبين ؟ بلاتي باقي الحال
خليج: دابا قطعنا واللي عطا الله عطاه
ضرباتو اللقوة للفم بقا غير كيشوف ساكت .. اما اشراق ناضت للبيت وتبعاتها خليج لقاتها مهبطة للبالز والحوايج وكتجمع .. حلات يديها وتعصر وجهها وعنقاتها بقوة بدات كتبكي واشراق على سبة كل مرة طيح جالسة سخفانة بالبكا .. لاكن هادا ما تقدر عليها وما عندها مادير .
ربعات حداها خليج كطوي معاها وتحط فصمت كأنها كتودعها لاخر مرة وعمرات معاها الباليزات وكل ما تحتاج .. اما الحاجة مشات دارت جهدها فلكوزينة وجدات ليها شي حليوات ودخلاتهم ليها قائلة
- جمعي هاد الحلوة حتى هي ديها معاك تفطري بيها
خليج : راه الحلوة تما اماما موجودة
الحاجة : غير خليها تديها
دخل الحاج للدار من بعد ما كان خرج ودق عليهم فالبيت دخل هاز فيدو جوج قراعي ديال الزاج كبار فيهم عسل حرة وقال
- دي معاك هاد العسل داوي بيها الى ضربك البرد
شافت اشراق فخليج مصدومة فباها وشدو القراعي دخلوهم فالباليزات والحاج والحاجة واقفين عليهم كيعاونو فيهم
الحاج : درتي ليها شوية دالحلوة ؟
الحاجة : درتها
للحاج: وسلو ؟
الحاجة: مادرتوش... مكاينش باش نديرو
ناض بسرعة : انا غنمشي نجيب ليك باش ديريه ... ديري ليها فيه العشوب شوية تبقا تفطر بيهم الصباح
باتت الحاجة الليل كامل كتقلي فالطحين وتحمر وطحن فاللوز والكركاع وتصايب وتعمر في حين باقا اشراق واحلة مع شنو ندي شنو ماندي وخليج كتجمع معاها حتى صبح الحال .. نعسو ساعتاين وناضو كملو على ديك الروينة وداك جميع الحوايج .. اما الحاج مانعس ماشافو حاضي الاوراق ويوصي لا تنسا شي ورقة وكل مرة يوقع على الحاجة يطحن ليها ويغربل على سعدو ووعدو باش يساليو دغيا .
هزات اشراق حوايجها للحمام ونيشان للاصال غسلات و دازت للصالون قدات حالتها من راسها لساسها ورجعات للجميع النهار كامل طبعا من بعد ما خبرات علي على قدوم طائرتها ووصاها و وراها فين تنزل وشنو دير حتى توصل ليه
اخيرا وقفو البالز فالباب .. 3 ديال الباليزات كبار وعاد حقيبة اليد . تستف كلشي فالباب و تحط صاك الاوراق فوق الطبلة ولبسات حوايجها عبارة عن مونطو بني محطوط حداها جديد لان
[17/3 16:53] 🌸حسبي الله عليه توكلت ...: كما خبرها علي ان الجو ماشي بحال المغرب .. الجو بارد عندهم ولازم تاخد احتياطها كما يجب . هادا علاش لبست سروال جاكار مخطط بالبني وتريكو خيط نصو مخطط نصو مشبك وشال كوتشي على راسها احمر وبوط حد الركبة . وصاك احمر حداها وجلسات كتتعشا معاهم مجموعين بحضور عماد الى حين وصول الوقت اللي تخرج فيه . تعشاو فجو عائلي مليئ بالضحك والنشاط و ناضو كاملين بغاو يرافقوها للمطار .. هبطو ليها الشنط لسيارة علي ولبسو حوايجهم معاها .. هزات مونطوها فيدها وخرجات شادة وراقها وصاكها وركبو كاملين فسيارة وحدة مباشرة للمطار ... الطريق كلها والحاجة كتبكي وخليج حتى هي واشراق كتر وعماد كيضحك معاهم ويقلب ليهم الجو حتى للمطار . دخلو كاملين معاها جارين ليها الباليزات وجلسو فمقهى حتى طبعات اوراقها وبعتت الشنط للطائرة ورجعات عندهم كتبكي عنقاتهم واحد واحد ... جو حزين الكل كيعنق فيها والكل كيبوس حتى من الحاج عبد الغني بان الحزن فعينيه وبدا يدعي ما توقفش .. هزات بيازيد ضماتو بقوة كتبوس فيه وجرات باليزتها الصغيرة غادية مع عماد وكتشير ليهم بيدها اللي فيها حواز السفر والاوراق .. دوزها عماد حتى فاتت الديوانة ووقف قائلا
- طريق السلامة اشراق ... انا ممنوع عليا نفوت معاك هاد الباب .. تهلاي فراسك وسلمي على علي
اشراق: اجي عندنا نتا وخليج فالصيف عنداك ماتجيوش
رد : غنجيو نشاء الله .. ردي البال راسك (ابتسم ) بسلامة
ودعها بنضرات حنينة ... كان اخ ومرشد ليها فهاد السفرة ومساعد حتى صولات وطلعات طبعات وراقها ودازت اخيرا .. تنفسات الصعداء كأنها تجاوزات السراط وحسات براحة بعد تجاوز الديوانة اللي كتفصل بين البلدان وجلسات ساهية كتفكر دموع عائلتها .. بمجرد مرورها حاجز الديوانة حسان براسها فالغربة .. كأنها خرجات بلادها من بابو الكبير . ماهي الا لحضات حتى بدا قلبها يدق بسرعة وهي كتسمع المرشدة تتكلم عبر الاجهزة الصوتية تنادي المسافرين الى كندا لعبور البوابة والصعود الى الطائرة .. شدات الصف بحال الجميع ودازت كتشمى بسرعة كأنها هاربة دخلات الطائرة .. ضربها دفئء الطائرة والهدوء ديالها واضوائها السفرا ورحبو بييها المضيفات ودخلات عبر الممر الديق كتشوف يمين يسار فعدد الكراسي لكثيرة .. هاد المرة ركبات طائرة كبيرة عكس طائرتها لقطر اللي فيها صفوف من الجناب حاملين 3 كراسي فقط .. لاكن هادي حاملة اكثر . بدات تقلب على رقمها حتى لقاتو بجنب النافدة كما ختارت ليها خليج وخلصات عليه حتى هوا وهزات باليزتها حطاتها فبلاصتها وجلسات مربعة يديها والركاب كيدخلو ويقلبو على اماكنهم ... جلس بجانبها اجني كبير فالسن وفالصف ديالها ناس اخرين وهي كدور وتشوف وتبتاسم حتى عمرات الطائرة وطلبو منهم اطفاء الهواتف النقالة الى حين استواء الطائرة فالجو .. بحماس طفاتو ودارت حزام السلامة وبدات تشوف من النافدة فالطائرة كتخرك ودور باش تاخد مكان انطلاقتها .. دورات راسها لقات شي كيتفرج شي سد عينيه ما مسوقش وكل واحد اش كيدير ..اما هي تخلعات من انطلاقة الطائرة وسرعتها فالجري وصوتها وهي كتجري مع الارض كءنها قنبلة ستنفجر .. بدات تقرا القرآن مخلوعة وترعد حتى بدا ينقص الصوت وماحساتش بالطاىرة وهي كتودع ارض الوطن حتى بعدات على الارض تدريجيا وشيءا فشيءا بدات طلع فالسما وتصغر منضر الاراضي والبيوت فالاسفر حتى ولاو على شكل نقط صغيرة منتشرة .
غمضات عينيها بارتياح فانتضار الوصول لكندا .. قاطعات تركيزها المضيفة وهي كتقدم مشروبات للمسافرين وطعام فاش وصلو فنص الطريق وخدات من عندها اشراق البلاطو مشكورة حطاتو قدامها وبدات فتناول الطعام اللذي هوا عيارة عن ارز وسمك ومشروب غازي .. مكانتش متوقعة ان الرحلة غتكون طويلة لاكن الاكل خلاها تنسا المسافة . بعد ساعتين قدمو ليهم وجبة شاي ومرفقاته وبدات فشرب الشاي وهي كتفرج فشاشة الملتيديما اللي قدام مقعدها عليه فيلم مصري من اختيارها .. وكاين اللي كيلعب العاب وكاين اللي كيتفرج فافلام اجنبية وكاين اللي طالق موسيقى .. كل واحد حر فشاشته الموجدة قدامو .
بعد اكثر من سبع ساعات ونصف من الطيران بدات كتشوف اضواء مدينة منتيريال من السما وهي فغاية السعادة ومستمتعة بالمنضر الجميل اللي صادف الليل مع النهار حيث بدا النهار كيطلع شيئا فشيءا حتى حطت الطائرة على مطار منتيريال وناضو الركاب ومنهم هي اللي راسمة على وجهها ابتسامة متبعة بيها الركاب وشنو ما دارو كدير بحالهم . هزات شنطتها وشافت الناس كتلبس عليها ولبسات مونطو ديالها وزادت شال على راسها سخون وخرجات من باب الطاىرة تابعة الركاب ، لقات راسها وسط انبوب ضوئي مغطى مكيبين حتى حاجة من برا وكل ما درات لانها وحيدة معارفا مادير تبعات خطوات الركاب باش تعرف فين تمشي من اجل استكمال مراحل الدخول الى كندا . بعد الذخول للمطار للساحة الرسمية لقات راسها وسط اكتضاض من الناس والمكان مزدحم بالمسافرين لان المطار دولي كبير جامع اكثر نسبة من المسافرين و كانت هناك بعض الرحلات اللي وصلات فنفس الوقت الشيء اللي خلاها دوخ وتلف وتبقا دور فبلاصتها تشوف قدامها وهي فالصف معارفاه ديالمن وديال اينا طيارة
وحيت هي ماشي غبية لدرجة تبقا دور فبلاصتها شافت شرطية الحدود اللي كترشد الناس ومشات عندها هضرات معاها بالفرنسية .. ردت المرشدة بالفرنسية كانت من نوع اخر غير الفرنسية اللي كتعرف هي ! .. المهم انها شرحات ليها كونها اول مرة تصافر معارفاش فين تمشي ولا فين تعطي بالراس و عندها اقامة دائمة ولاول مرة تحط رجليها فكندا . ورشداتها الشرطية لصف طويل للناس الجدد القادمين لكندا وقفات فيه وسط الازدحام كاسنا حتى وصل دورها وعطات جواز سفرها لشرطي لحدود وسلماتو استمارة فيها توضيح للاشياء اللي جابتها معاها فالشنط واللي كانت استلماتها قبل دخولها الطائرة عمراتها وهي جالسة لحين وصولها .
كلشي جاها غريب كلشي فشكل لاكن تبعات ما طلبه منها فالاستمارة تفاديا لدفع غرامة مالية الى لقاو عندها شي حاجة زايدة من غير الاشياء اللي كتباتها فالورقة . وكانت عمرات ليهم الورقة من اللور ومن القدام حتى من العسل وسلو والفقاص دخلاتو بالتفاصيل خوفا من شي مشكل طيح فيه كما كاتبين ليها فالورقة .
وهي خارجة دازت على بوابة عطاوها كتاب خاص بالقوانين والحياة الخاصة فكندا ورحبات بيها والابتسامة عالية على وجهها وضحكات معاها على انه الطقس بارد فكندا وخاصها تكون مستعدة لداكشي .
خرجات كضحك والسعادة كتغمرها من ديك البوابة لقاعة الانتضار الكبيرة فين لقات علي وقف كيتسناها
مشات كتجري ناسية كل حاجة خايبة او دازت عليها اوشافتها وبدون شعور وبعيون براقة عنقاتو كضحك والاوراق فيدها وقالت بخال شي طفلة صغيرة
- وصلت هههه
ابتسم ابتسامة خفيفة وقال : على سلامتك
مد يديه للشنط خرجهم وهوا مكبط فجاكيط وطاقية سوداء مدلية شوية من اللور وقال
- وجدي راسك للبرد
ضحكات وهي كدور بيه من هنا ومن هنا بقا ليها شوية تنقز وكتجر باليزتها
- قالتها ليا واحد البوليسية
قال وهوا خارج من المطار : هزي الشال على نيفك .. غيضربك البرد ونتي سخونة .. طلعات الشال على نيقها وعبرات باب المطار وهي كتشوف فالجو والحداثة الكندية قدامها .. صوت الطرقان والسيارات والسما الغايمة شوية .. الرصيف والحمام واقف فوق فوهات البنية التحتية الدافية كيسخن .. تبعات علي حتى لسيارة سوداء واقفة بالجنب جميلة وفتح ليها الكوفر طلع الشنط وهي كتشوف مستمتعة بالجو .. حل ليها الباب ركبات بسرعة كضحك بوحدها ودارت السمطة .. هبطات الشال على نيفها وقالت
- البرد عندكم ههه
طلق ليها لاكليم فالسيارة وقال : حضي مع لاكليم ... هي اللي كتخرج على الناس هنا حيت كتخرج سخون كيزويك البرد نيشان ..
حركات راسها بالايجاب ودورات وجهها للجنب مستمتعة بالنضر للناس ... وحيت اول مرة تسافر لدولة غربية جاها كلشي مبدل .. كلشي غريب .. حتى من طريقة المشية ديال الناس مبدلة ... كلشي سريع وكلشي سبورتيف حتى واحد مغادي كيتمنضر من غير المسنين اللي جارين خمسة ستة دلكلاب انضف من بعض البشر اللي شافتهم هي فحياتها .
ماشي بزاف باش وقف السيارة فحي فيه بيوت صغيرة مستقلة كتحيط بيهت حدائق صغيرة ملاسقة مع بعضها وحل حزام السلامة
- على سلامتك الاللة .. هانتي فكندا
هزات عينيها بابتسامة ونزلات حتى هي كدور عينيها فالحي .. كان حي انضف من النضافة بنفسها ومرتب وموراها عمارات كبيرة كتبان عالية .. سيارات مفرقة كل وحدة واقفة حدا بابها والشارع كيشعل ، وهي كتفرج كان هوا كيهبط الشنط .. دفع باب صغير ديال الحديقة المحيطة بالبيت ودخل .. تبعاتو كضحك بوحدها جارة باليزتها وحل باب خشبي فالجنب مقنت ابييض كبير .. حدو حلو داخل سمعت استريلا كتعيط وتغوت
- اشغاااك .. اشغاك
خرج عندها كلب كبير من نوع (هاسكي) ابيض واسود مزغب كينبح ويشالي بزنطيطو نقز عليها خلعها وموراه استريلا ببيجامة مخططة خطضرا وبامطوفة مزغبة كتنقز .. قبل كاع متعنقها كان اشراق طلقات من الباليزة والصاك وخرجات كتغوت والكلب تابعها
تبعها علي كيجري ويعيط استراااا استراااا
رجعات الكلبة كتجري عندو ودور بيه وهوا كيضحك واشراق واقفة بعيدة كتنهج صفرا وهوا كيشير لها ترجع
- اجي ماتخافيش غنبعدها غير اجي
قالت من بعيد : ديها لشي بلاصة عفاك منقدرش نقرب
رد كيضحك وهوا كيداعب استرا : مكتعضش غير اجي ..
دخل استرا للدار وقربات اشراق بشوية داخلة كطل من الجردة ماسمعاتش حسها .. كانت استريلا فالباب كتسناها وتهضر بالفرنسية
- مكتعضش استرا والله ههه خفتي منها
قربات اشراق كضحك عنقاتها بقوة وقالت
- توحشتك ههه
استريلا : حتى انا ههه .. من قبيلا وانا كنتسنا
هزاتها اشراق معنقاها دخلات للدار كدور عينيها .. كان باب اخر كيخرج للجردة اللي ورا الباب .. نزافد كبيرة زجاجية كتبين ليها علي وهوا برا فالحديقة كيربط استرا حدا دارها عاد رتاحت وجلست فوق كنبة زرقاء كتسرح عينيها فالدار .. بيت صغير وعالي من الخشب بمطبخ كبير محلول على وسط الدار الفسيخ . مدخنة فالقنت وكنبات ملونة قدام تلفاز كبير .. زربية فالارض صغيرة فوق الخشب والبقية العاب و نونوسات وشبكة ديال الالعاب و ارجوحة على شكل بيضة وسطها زربية ناعمة .. قدامها سبورة بيضاء عليها اوراق ملونة ورسومات .. البيت كانه روض اطفال مليء بالحيوية والنشاط .. خرجت عندها قطة غليضة من نوع شنشيلا بيضاء كتمايل وناضت استريلا كتنقز هزاتها جتبهاتها كتمسح على راسها وقالت بلطافة
- مكتخافيش من المشيشات ؟ حتى كاتي راه مكتعضش .. ديري يدك هاكا
شدات ليها يدها حطاتها على راسها القطة
- شفتي ... ضريفة هاكي هزيها
ضحكات اشراق وهزات كاتي بحذر .. لاكن الاخيرة كانت بحال شي نونوس كما درتي ليها كتبقا وكتبغي تلعب . دخل علي وسد الباب
اشراق: مغاديش دخل لهنا ياك
رد بالنفي: مكدخلش للدار راه غير دابا تلقات ليها استريلا وصافي ... انا كنصلي اصلا كي غندير نبقا كل شوية نغسل
اشراق : ههه عرفتي خلعاتني
جلس قدامها وقال : ماغادير ليك حتى حاجة هي دابا بقات كتعاود ليها استريلا وفهمات منها شي حد عزيز عليها جا وناضت فرحانة وصافي
حيد الجاكيط علقها حدا الباب فعلاقة وسد البيبان كاملين .. فتح لكليما ومشا دخل لواحد البيت فممر صغير مقابل معاها . اما استريلا ناضت مشات كتجري وتنقز فرحانة.. اخيرا ضيف عندهم فالدار حيد عليها القنط .. دخلت لواحد البيت فنفس الممر وجات كتنقز بديك بانطوفة فيها ارنب وانف غليض طالقة الشعر هازة فيديها بيجامة مطوية وبانطوفة مااسقة بتيكيتة حطاتهم ليها حداها وقالت بسعادة
جلسات قدام الطبلة فين محطوطين طبيسلات و الوسط سلطة مشكلة ديال الخضر .. عصير وطبسيل صغير ديال ستيك لحم مشوي وخضر مبخرة و سوب فالسوبيرة ديال الخضر مع فواكه البحر .. وقف شاد المغرفة وقال
- شنو بغيتي تبداي بلاسوب؟
حركات راسها بخجل: واخا
عمر ليها الزلافة شوية وحط ليها معلقة ، بقات مستغربة لداك النضام اللي فالطبلة اللي هما نسا مكيديروهش فالدار .. حط ليها شبكة مقطع فيها الخبز و مشا هز طبسيل من لكوزينة فيه ستيك لحم اخر و غراف ديال الزاج فيه عصير اخضر من نوع خاص .. شافت فاللحم غير اللحم اللي محطوط قدامها .. هادا ستيك محمر من برا مقطع شرائح و من لوسط باقي اخضر .. حط كذلك سوبيرة صغيرة فيها نفس الحساء لاكن غرف منها لراسو ومشاركهاش نفس الطعام .. استغربات وهي كتشرب الحساء وقالت
- ديالاش ؟
رد بهدوء : مافيهش العطرية هاداك وناقص ملحة .. دوقي؟
جات استريلا موراهم هازة طبسيلها حتى هي طلعات فوق الكرسي شللاتو وحطاتو فالغسالة ومشات للبيت حيث بدات طوي لحوايج وتستف كما كانو .. لحقات عليها عليها اشراق جمعات ليها داكشي كامل بسرعة رداتو فين كان في حين جمع علي داكشي كامل وشغل الغسالة وتم غادي عطا للمشة تاكل وخرج لاسترا الاكل برا ورجع بحالو سد عليه .
اما اشراق جلسات حدا استريلا فالبيت كتوريها البوم الصور ديالها فأعياد ميلادها و المناسبات حتى داها النعاس وحطات راسها بتعب السفر نعسات . خرجات استريلا من البيت عند علي اللي متكي فوق الكنبة ويدو على راسو كيلعب بيها وقالت
- نعسات ابابا اشراق
رد : اجي ياجي خليها تنعس تا تفيق اجي
مشات عندو طلعات عليه جرها قدامو وجر غطا برجلو تغطا وغطاها وجلس كيتفرج فتلفازة هي وياها حتى تعاشات العشية وحلات اشراق عينيها لقات راسها غطسات فنوم عميق .. ناضت متسائلة على شنو واقع واخا مواقع والو وخرجات من البيت كطل لقات غير علي جالس قدام البيسي خدام فنفس البلاصة اللي كان كيفتح ليها من الكامرة .. وقفات بعيدة قدامو وقالت
- فين استريلا
شار براسو : هاهي فالجردة كتلعب
طلات عليها اشراق لقاتها هي وجوج بنات كيلعبو ومعاهم استرا كتكركب . رجعات اللور بابتسامة وقالت
رد بهدوء : عطا الله فاش ... ولاكن خاص تكوني دايرة برنامج فراسك ... شنو باغا بالضبط من كندا ... واش غتعولي على خدمة بسيطة توكلك وتبقاي عايشة على نفس النيفو
- اشراق: لا انا دايرة فبالي نقرا ونبدل من القانون للاقتصاد كاع ... نبدا من زيرو ونقرا على الاقتصاد ديالهم هنا ونبقا هنا ونخدم هنا
رد بعد تفكير: باش تقراي اقتصاد هنا وتخدمي بيه خاصك شوية دالوقت ... والقراية غتقرايها بفلوس ... وباش تقراي غالي شوية يعني غادي يكلفك بزاف
اشراق: نحاول .. نجرب ونشوف ... واش منقدرش نقرا مثلا فابور فشي جامعة ولا شي حاجة
علي: مكايناش شي حاجة سميتها القرايا فابور ... غادي تصرف ضاروري والمصاريف كتوصل اقل حاجة 6 ديال المليون فالعام .. بالنسبة للدراسات العليا . النضام التعليمي هنا كيطلب من الواحد ينفق شوية ديال المصاريف ... مهم داكشي طويل باش تقراي قانون هاد البلاد راه بزاف .. مي النضام التعليمي هنا عالي الجودة وديبلوماتها واعرين ومعروفة هي بالقرايا فين ما مشيتي . ولاكن خاصك تخسري شوية دالفلوس ... حيت فاش كتسالي القراية وتخدمي خصوصا هنا راك كتربحي اكثر تقدري توصلي حتى ل 7 8 9المليون فالشهر واكثر .
اشراق : بصح !!!!
علي: جاتك بزاف!! راه كندا كتعطي الصالير مجهد اكثر من هادشي ... مي عوتاني المعيشة غالية بزاف يعني يالاه كتوازن حياتك هنا .. لكرا تقدري تخلصي 3 مليون مثلا ... الماكلة طالعة كلشي غالي ... ولاكن واخا الغلى الناس كتخلص مزيان حتى واحد مامحتاج
سكتات بعد سماع شنو قال ورمشات قدامها فصمت .. شربات كوبها ديال القهوى وبقات جالسة حتى دخلات استريلا ونيشان من بعد الدخول للحمام طرفات وبدلات وجات كتبلحس عليها وتلوى وتعنقها بابتسامة
- احم .. اشراق.. جبتي ليا الزيت ديال الشعر؟
ضحكات اشراق وقالت : غنصابو ليك هنا ههه صافي
هزها علي من حداه على رجليه عضها من حنكها وهي كضحك وقال
- ماعييتش من الطليب اا؟ دوي؟ فين باغا توصلي بداك الشعر تزطمي فيه هاا؟
غوتات كضحك : ااااي ههههههه
جلسها على حجرو معنقها وعطاها كاس ديال الحليب ليدها وقال
ناضت باستو على خدو ومشات مع اشراق للبيت هازة كوب الحليب وناض هوا لبيتو .
تخشات فالفراش طالقة شعرها ولابسة بيجامة كيوت والحليب فيدها واشراق جلسات حداها وطفات الضوء خلات نور خفيف وبدات تقرا ليها وهي كتشرب الحليب حتى كملاتو وتقلبات على جنبها كترمش وتسمع حتى داها النعاس .
دخل فديك الاثناء علي بهدوء لقاها ناعسة وغطاها بشوية وقال بابتسامة كيشوف فيها
- كتموت بالنعاس وباغا تجلس تسهر
قالت بهدوء : باقي الحال ... ونعسات بلا عشا !
رد بالنفي كيقاد ليها المخدة : لا مولف ليها تنعس بكري مع 8 ... يالاه تشبع نعاس وتفيق اونفورم
اشراق: ماكلات والو !
علي: كلات فكاسكروط شوية العشا مكتعشاش براكة عليها غير لحليب .
اشراق: اوييلي مكتعشاش كاع !
رد بالنفي : لا ولفات هاكا .. كتاكل قبل بساعة ولا اكثر وتنعس ... فاش كتاكل وتنعس ديريكت كتصبح خاسرة
ابتسمت اشراق وناضت بهدوء
طفا عليها الضوء وخلا بولة صغيرة ضوئها كيتلون خفيفة بزاف شاعلة ورد الباب عليها بشوية وقال وهوا غادي مور اشراق
- كتعشاي ؟؟
حمار وجهها وحشمات تقول اه وقالت
- لا حتى انا مكنتعشاش
رد بعفوية : حتى انا ... الى جاك الجوع كاينة لاسوب نسخنها ليك
ردت : لا ماشي مشكل .. باقي الحال
رد بعفوية: اللي بغيتي ... الى فيك النعاس سيري ترتاحي
ردت بخجل وارتباك : واخا
رد : اجي ..
مشات موراه لبيت النعاس لقاتو بدل ليه لفراش كامل من جديد وحط ليها بطانية جديدة وقال
- يالاه تصبحي على خير
بغا يمشي وهي تقول: ياكما شديت ليك بيتك؟ ماشي مشكل نعس انا فوق الفوطوي
رد : لا ماعليش انا كيديني النعاس تما بعد المرات غير نعسي نتي
خرج وسد عليها خلاها فالبيت بوحدها .. تنهدات كتهضر بوحدها وقالت
- اويلي غنبات بلا عشا! مييييمتي حنا ولفنا المرقة والخرشوف والطزاجن الى ماتقالينا مانعسوش .. ومنعسني مع 8 دالعشية من دابا وانا نبني ونعلي حتى ل 12 دليل ! من دابا وانا فايقة منين غيدوز ليا هاد النعاس دابا منين؟
تنهدات وجلسات كتشوف فالبيت .. حتى اضواء الدار الليلة خفيفة ما عندهم بولات فالسقف مجهدين ... جميع بولات الدار خفاق كس الشمع كأنها فالسيد .
دورات عينيها فالبيت لقات حدا المكتب ديالو بعض المداليات الفضية والنحاسية والذهبية وصورة ليه وهوا صغير فلعشرينات فمبارة للملاكمة .. صورة اخرى مع مدرب حداه هاز كاس صغير وصورة اخرى وهوا فالنادي مع الدراري كيتدرب .
كأوس حاطها حداه و رسالة تقدير حتى هي فواحد الرف محطوطة مايلة وسط زجاجة و صورة اخرى ليه مع استريلا معنقاه وسط طبيعة خلابة كبيرة ملونة وحداهم استرا ..
لقات راسها مبتسمة وهي كتشوف داكشي ما كانتش ابدا متوقعة هاد المفاجأة .. لربما الانسان كيكون متواضع اكثر من اللازم الشيء اللي مكيخليش قلال الاصل يحتارموه عكس الانسان المتكبر المادح لنفسه طيفرض احترام الناس لمكانتو و ممتلكاتو وليس لشخصه و قيمة نفسه .
تنهدات ومشات فوق الناموسية تخشات وشدات تيليفون كتلعب فيه وتفرج حتى داز الوقت ماحساتش بيه . شافت الساعة لقاتها 12 والجوع يدا يدور فيها ويقلب فيها من جميع الاتجاهات .. مع الاسف الشنط بقاو برا والشنطة الصغيرة هي اللي دخلات .. اما كن دازت فسلو حتى تحجر المعدة عاد تنعس ..بدات تحك معدتها وتلوى وناضت جمعات شعرها المطلوق درات عليه شال وخرجات من البيت بصوت خافت بين الاضواء الخافتة جدا
طلات عليه بنص عين لايكون مزال فايق لاكن لقاتو طالق ديك الكنبة رجعات فحال الناموسية وقالب وجهه ناعس على كرشو .. شافت جهة الكوزينة وعضات ضفرها كتفكر كي دير دوز ليها . اويلي كي دير وهي محلولة كاملة كولشي باين؟ غا شوية دالخبز والصوبة واخا باردة مهم نسدو الجوع ! ..
بخطوات تابتة مشات ليها وحلات التلاجة بشوية كتقلب لقات الصوبة مغطية جبداتها بشوية على اعصابها حطاتها و رجعات كطل على التلاجة لقات العصير الاخضر ديالو اللي شرب منو الصباح جبداتو وردات الثلاجة بشوية .. حلات القرعة داقت من العصير وهي تقج ماقدراتش تسرطو نضرا لمداقو النييء ماعرفاتو باش مصاوب ! واش قرعة ولا خص ولا خضرة ولا شنو ! بزز باش زهقات ديك الجغمة و رداتو للثلاجة .
تلفت يتتاقل سمع حس الثلاجة كتحل وتسد و شاف فيها لقاها كتختل وتقلب وتفتف ورجع دور راسو فين كان خلاها كدور . هزات جبانية كبيرة خوات فيها الحسا كلو وردات الطنجرة خاوية للثلاجة حطاتها ديكور تعمر بلاصتها .. شافت فلميكخو اند واش تسخن ولالا ؟ ولاكن الصوبة باردة كي غادير دوز مع الحلق ! اللي ليها ليها .. حطاتها فيه شعلات عليها كدور وكطلب الله مايفيقش وبدات تردد .. كن غير نعست بلاصتو حدا الكوزينة بعدا مشافني حد ماسمعني حد ندير اللي بغيت . طفات عليها وجبداتها سخونة وهزات معاها السلطة حتى هي اللي شاطت وواحد الطرف دلكيكة حتى هوا دانون وبدات توصل لبيت النعاس شوية بشوية وسدات عليها اخيرا وجلسات ضرب هادي تنفع هادي ضر حتى سالات وخبات ادات الجريمة تحت الناموسية وطاحت نعسات كي الميت
صبح الحال وحلات عينيها على استريلا وهي كتشوش ليها تفيق .. هزات راسها دايخة لقاتها حداها لابسة لباس رسمي ازرق .. صاية مخططة وقميجة وبابيون وتريكو خيط ازرق من لفوق بخطوط فالجنب كرمز للمدرسة فاش كتقرا و جاكيط يجوج خطوط فالابيض من لفوق وليبة و حداء سبرديلة .. كتفيقها بصوت منخفض شادة المشطة وشعرها مطلوق وتشوف جهة الباب لا تحصل .. بدا علي كيعيط بخفوت عليها ويقلب وهي كتزعزع فاشراق اللي دايخة بالنعاس .
قالت وهي كتقاد الجلسة وشعرها محلول محيدة البينوار
- شنو ؟؟
ردت بخفوت كتوريها الصورة فتسليفون
- ديري ليا هادي عفاكي
رمشات مضهشرة وشدات المشطة سرحات ليها شعرها وهي قدامها ودفرات ليها شعرها جوج دفيقرات والفرقة الوسط نازلين من الجهة حتى للرقبة .. تلفتات استريلا وثالت بخفوت
ديري لي هادو
عطاتها مقيبطات الشعر زوقات ليها شعرها وقالت بابتسامة
- صافي؟
ردت على عجلة كتقيس شعرها : شكرا (باستها)
مشات كتجري جهة الباب حلاتو ورداتو واشراق جالسة كتسمع الحوار على برا ديال علي معاها بصوت خافت هادئ
- علاش فيقتيها ماخليتيهاش تنعس ام؟
استريلا: صافي نعسات
رد كيضحك: نعسات .. يالاه ابابا ها ترونسبور ديالك وصل ..سيري وكوني مجتهدة
رد على عجلة : صباح الخير ..انا غادي لخدمة وراه كلشي عندك فتلاجة الى بغيتي تفطري انا نوصل ونعيط ليك من تما
خرج سد الباب وخلاها فالدار بوحدها كدور فداك الصباح
غسلات وجهها ولاحت داك الفولار على راسها طلقاتو .. خرجات الاواني من تحت النموسية غسلاتهم و مشات للثلاجة جبدات الخبز شكلاط فرماج جبن لحم مدخن .. سخنات اللي خصو يتسخن وجلسات كتفطر على خاطرها بوحدها وتفرج فالجردة .. سطعات شوية ديال شميشة واخا الجو بارد لاكن مامنعهاش تنوض تجمع الدار .. بدات بالبهو هزاتة كامل خملاتو ومشات كتقلب على باش تمسح الارضية لقات مساحيق تحت لافابو فخزانة خاص بتنضيف البيت وخواتو على الدار كاملة مسحات بيه ورجعات كل حاجة بلاصتها .. ستفات العاب استريلا ومسحات الغبار ونقات الدنيا واخا كانت نقية وخرجات شطبات الجردة وجرات واحد تيو سقات الورد وشجيرات وهي بعيدة على استرا .. خملات غرفة الطفلة وبيت النعاس ولكوزينة رجع كلشي كيشعل والرائحة زكية .. وهي كدور تستف الاواني المغسولة فالشبكة سمعات الدقان فالباب ومشات طلات من العين السحرية لقات فتاة فالباب .. استغربات وفتحات بابتسامة .
(الحوار بالفرنسية)
- صباح النور
اشراق: صباح الخير
الفتاة: شفت الحركة فالدار قلت يمكن علي ماخدامش ليوم .. كاين؟
دخلت استريلا كتجري طاحت عليها بشكراتها عنقاتها وقالت
- حساب لي غتمشي ههه
باستها اشراق: انا معاك ماعندي فين نمشي
سد علي الباب بابتسامة وقال: قنطتي بوحدك (سرح عينو فالدار) خلينا ليك الخدمة واقيلا ههه
ردت : بلعكس غير مالقيت ماندير وصافي
مشا جهة البيت واستريلا مشات كتجري لبيتها دات شكارتها وتبعاتها اشراق عاوناتها فتغيير ملابسها للبيجامة ديال الدار وعلقات ليها البذلة فين كانت . خرج علي من بيت النعاس بشورط وتيشورط دخل للحمام وخرج فازك مشا رد عليه الباب صلى وخرج عندهم لقا اشراق حاطة لحليب وبسكويت وكيك من داكشي اللي فالثلاجة لاستريلا كدير كاسكروط .. كان لابس سورفيت رياضية وعلى راسو داقية كحلة مغطية ليه ودنيه .. مشا حدا الباب كيلبس فرجليه وقال
- انا غادي نخرج نتسخر هانتي مع استريلا حتى نجي
ردت بالايجاب وخرج لاح عليه جاكيط من لفوق ودار للجردة من برا قدام مراقبة اشراق ليه حل على استرا وركب ليها حزام فحنقها وداها معاه .. ناضت اشراق كطل عليه من الباب لقاتو مخرج الكلبة وفالشارع اللي كيفصل بينو وبين الديور واقفة نفس البنت اللي دقات عليها كتسناه بابتسامة حتى هي بسورفيت وجاكيط قصيرة دودون فالاخضر وشادة جوج كلاب صغار كياعبو قدامها ... بابتسامة سلم عليها من لابيز وهي كذلك ومشا معاها كيتبادلو اطراف الحوار فالطريق ويضحكو
عنقاتها استريلا: حتى انا كنبغييك (باستها) ديري ليا مشيطة ؟
ضحكات اشراق: ندير ليك اللي بيغيتي ههه
بعد ما سلات الماكلة جلسات اشراق كتلعب ليها فشعرها كل مرة دير ليها مشطة فشكل وتلعب معاها مشاركاها اهتماماتها حتى سمعات الحس فالجردة وناضت لاحت الشال على راسها بسرعة وطلات لقاتو داخل بأسترا جهة الجردة ربطها و وبدا يداعبها على وجهها وناض رجع للباب حلها ودخل معاه تقدية . مشات استريلا كتجري وقفات عليه وقالت
شاف فيها ببرودة وقال : 18 لعام ديال الغربة ... وعشرين سنين ديال التربية ... كافية تعلم فيها العجب
ردت باستغراب: علاش شحال فعمرك؟
رد كيطحن : 38
استغربات : عندك 38 عام
رد بسخرية : علاش شحال كيحساب ليك عندي؟
ردت : كيحساب ليا كبير زعما .. حيت صحابك كبار ... كان يحساب ليا بحالهم
هز حاجبو ببرودة: كتهضري على طه وعماد ..
بلعات ريقها وقالت : زعما ... ولاكن صدمتيني !
رد ببرودة: جيت هما على 20 عام ... 28 عام تزادت استريلا .. وراه دابا بقات شهراين ضرب 10 سنين .
خوا لاسوب جارية بزاف فطنجرة وعصر عليها حامضة كاملة وخوا منها فكوب ديال الرياضة ديالو وخطا الطنجرة وقال
- كنبان شارف ؟
ردت بالنفي: لا بلعكس ... ماباينش كاع لاج ديالك
حرك الكوب وقال : مابقاتش فالعمر .. بقات فالعقل واش كبير (حر راسو بالنفي) ولاكن اللي ما تمحن ما تكرفس ما هز المسؤولية ما داق المرار ... كفاش غادي يكبر ... كيكبر لي عاش الميزيرية ... وبكا فالغربة
اشراق: بكا؟!!!
ضحك بسخرية : وشنو حساب ليك ... شحال بكيت انا فالسنين اللولة فاش جيت ... نتحداك دابا نخليك هنا بوحدك مقطوع بيك الحبل ونشوف واش تقدري تصبري .. البنات اصلا مكيقدروش يصبرو .. حتى واحد ميعقل عليك هنا واش حساب راسك فبلادك ؟ طلب المساعدة تلقا اللي يعاونك ؟ غير الوحدة راه كتحمق ..ماشي كلشي كيقد على الغربة
رد بهدوء: عادي ..قلت ليها كل واحد عايش حياتو .. بغات تعيش فبلاصة اخرى وحنا بغينا نبقاو هنا وتفارقنا ... فاش كتبسط الامور من الاول لدري صغير وتخليه ياخد كلشي بباسطة كيكون حسن ... مي فاش كتكدب عليه وكيكتاشف الحقيقة من بعد كيفهم باللي داكشي شي حاجة كغاااف و اولناها باش ميعرفش . دابا عادي تقبلاتها ودايرة فراسها باللي اي واحد ما رتاحش فشي بلاصة يقدر يبدلها وعادي .. وممكن اي اسرة تعيش بعيدة على بعضياتها ... واخدة الامور بباسطة مامكبراهاش زعما
اشراق: ولاكن كتشوف الوليدات مع امهاتهم زعما عادي عمرها قالت شي حاجة ؟
رد بباسطة : كانت فالاول كتهضر... مي حيدت ليها داك القلب ديال مها باش متبقاش كاع تسول فيها ... واصلا معاقلاش عليها كاع راه خلاتها صغييرة باقا بيبي ...
اشراق : عمرها سولات فيها بمرة ؟؟
رد بالايجاب كيشوف فالتلفازة : جات واحد المرة كتبكي انا ندمت انا منعرف شنو ... بغيت نشوف بنتي كي دايرة .
كانت اشراق مصدومة من الحكي ديالو .. هوا براسو واخد الامور ببساطة وكيهضر عادي كانه شيء عادي
اشراق: ايوا؟؟؟ وشنو قلتي ليها
رد بسخرية والكوب فيديو : ااتمشي تتتت.... والله ماتشمها ... وعلى مافخيلها تركبو
اشراق: والى طالبات ببنتها قانونيا ؟؟
رد بسخرية : اجي وسير طلب القانون هه... متقدرش
اشراق: علاش متقدرش؟
رد : متقدرش حيت هي اللي خلاتها
اشراق: ولاكن تقدر تقول هربتي ليها بيها
رد بسخرية: وفين كنتي هادي 10 سنين ماديكلاريتيش .. وزايدون راه مسجلة باللي خرجات من البلاد ها فوقاش ها فوقاش ومادخلات حتى لهاد التاريخ للبلاد ... درت بيها ديكلاراسيو باللي خلات بيبي صغير وخوات البلاد فداك التاريخ نيت اللي خوات فيه ... حيت عارفها غدور تا تعيا وترجع كتبكي تشوف بنتها ( بسخرية) معامن هي!
اشراق بأسى : مشكيلة هادي
رد ببرودة دم : مكاين حتى مشكل ... ماعندها مادير ... اصلا فاش خلاتنا ومشات لتاجئت للجمعيات وشحال من حاجة و هما عارفين هادشي .. خلاتني مزير ماعندي كي ندير .. بيبي صغير خصو الرعاية ... وخرجت من الخدمة جلست فالدار ... بزااااافيال الحوايج نتي كيجيب ليك الله هادشي ساهل ... وكانت الدولة غتاخدها مني .. واحد الحالة بففف ... كن ما دوك الجمعيات اللي لتاجئت ليهم فالاول هما اللي وقفو معايا مللي جلست حيت الدولة كانت صافي غتديها ... جلست على قبل هادشي باش ماتديهاش ودزت فشحال من اختبار كيجيو يدقو عليا على غفلة واش كاين واش مكاينش واش كنربيها مزيان واش ناقصها شي حاجة ... وزادو الجمعية فاش شافوني شاد فيها بيدي ورجلي وجلست على قبلها قدمو بلاغ على اساس غيعاونوني هما ماديا غير نجلس نتكفل بالبنت ... كانت الى طاحت ولا مرضات كيبغي يسكت ليا القلب كنقول غيجيو يتاهموني بالاهمال . وزيد وزيد شحال من طلع وهبط وشحال من مشاكيل غير باش نشدها تبقا معايا .. وهاد القيامة كاملة عاشوها معايا الجمعيات والسلطات والروينة الكحلة وتجي تقولي هيا بغيت بنتي وتلتاجا لقانون !! ها القانون الى كانت مرى ديرها ... الى ماشدوها يحاسبوها على داكشي اللي دارت ..ماخصهاش كاع تبان ليهم راه غتجبد عليها النحل ... (سها) ااااححح باقي عاقل فاش جاو المرة الاولى داوها (تنهد) تبعتها حفيان كنجري طوموبيل غادا وانا غادي موراها بحال لهبيل... بقات ليا غير سكاتة فيدي كنت غنتسطا
الحلم الأسود الجزء 21
محتوى القصة
التنقل بين الأجزاء