- العادة شهرية هوا واحد الدم كينزل من البنات كل شهر ... وكينزل غير من البنات اللي كبارات ... داكشي علاش كنقولو بنات بالغات .. ولا بنت بالغة .. هاد هوا الفرق بين بنت صغيرة وبنت كبيرة... نتي قريبة تولي محسوبة من الكبارات
تنهد كيشوف فيها مطولا وقال : ولاكن عطيني وعد ... عمرك تمشي وتخليني
تلاحت عليه عنقاتو بقوة وقالت : مابغيتش نشوفها كاع .
دوز يدو على شعرها بحنان وهي ناعسة عليه وقال
- المهم بعدا .. تشوفيها ... وتعرفيها على الاقل ... وديك الساعة الى مابغيتيش تشوفيها مرة اخرى مانشوفيهاش انا مغاديش نبزز عليك حتى حاجة ... كتهمني راحتك الكبيدة ديالي ... وكتهميني نتي كتر من اي حاجة فهاد الدنيا (بعدها شوية شاف فيها وقال ) نتي هي الروح ديالي .. و كنبغيك كتر من نفسي ومعايا غادي تعيشي الحياة اللي كتمنايها ومعنحرمك من حتى حاجة ... طلبيها فالسما نهبطها المهم نتي تكوني فرحانة ومعايا حتى لاخر نهار فحياتي
عنقاتو بقوة مغمضة عينيها فصمت وهوا كيتنهد ويشوف فالسقف بحزن عميق .. قال بصوت ضعيف صعيب فالنطق وهوا كيمسح على شعرها
- خاصك تعرفي واحد الحاجة ابنتي ... حتى واحد فهاد الدنيا مغادي يبغيك بحالي .. مغادي يخاف عليك كما كنخاف عليك انا ... وعمرك مغتلقاي شي واحد يبغيك كتر مني واخا تقلبي الارض كلها مغتلقايش اللي يبغيك بحالي
عنقها بقوة مغمض عينيه وقال : وانا كنموت عليك وحتى حاجة مغتفرقنا انا وياك ... غتبقاي معايا وغنبقا معاك وغادي نحميك ومنخلي حتى حاجة توقع ليك .. وعمرك ماتحسي بالخوف معايا وعمرك مغادي تخافي طول ما نتي عايشة بين يدي وقدام عيني ... مغادي نسمح لحتى واحد ياخد ليا بنتي وحياتي وقلبي وروحي وكلشي فهاد الدنيا واخا يوقع اللي بغا يوقع
باستو بقوة فخدو ورد ليها البوسة فراسها حدا عينها بقوة وضمها ليه مغمض عينيه في حين واقفة اشراق حدا الباب كتنهد بأسى من بعد ما سمعات الحوار اللي دار بيناتهم ... تنهدات بعمق ودخلات عندهم بابتسامة كضحك وقالت
- هاي هاي هاي نتوما مخبيين هنا وانا كنقلب عليكم
ماردش عليها لا هوا لااتسريلا ... بقا معنقها وبقات مخبية فيه مطولا واشراق كتشوف فيهم بابتسامة وحنان وقالت
- يالاه نوضو تعشاو ... نوضو يالاه
حل عينيه بابتسامة معنقها مزير عليها وقال كيضحك
- يالاه غنحسب حد ثلاتة .. واحد جوج ثلاتة هوباا
تهز بسرعة وهي فحضنو جا جالس من بعد ما كان ناعس على ضهرو ورخاها بشوية شاف فيها وقال
- براكة ما تعامل البنت بحال الى عندها ربع سنين .. غدير عشرين عام ونتا مزال كتهزها وتغني ليها حتى تنعس ههه
عض شنايفو بسعادة وقال : ومالها نغني ليها ونهزها ... ونهزك تا نتي معاها مالكي كبرتي عليها .
نخزها لجنبها تا تهزات من بلاصتها كضحك ومشات كتجري جلسات حدا الطبلة كيتعشاو كأي اسرة سعيدة .
ضرباتها الفيقة حداه بسوميج دو نوي فالليل وناضت شافت فيه بشوية وهوا ناعس حداها ... وقفات بهدوء حفيانة مشات للصاك جبدات الخنيشة ديال الصيدلية وخرجات فصمت بدون حركة من للبيت .. شافت فالساعة لقاتها الربعة صباحا ودخلات للحمام سدات عليها .
عضات على شنايفها بقوة كتشوف فاختبار الحمل وتسنا النتيجة ويدها على جنبها حتى طلعات ليها ايجابية وهي تحل عينيها كترمش وتشوف فيه وتأكد ... عضات صبعها وبقات واقفة ساهية وقالت
هز راسو بعفوية كيدور عينيه فالدار وخشا يدو تحت التيشورط كيطبل فكرشو وقال
- استريلا ناعسة ؟
اشراق: خليها حتى تفيق على خاطرها
علي: غتمشي نتوضا ..
دخل الحمام كيجر فرجليه بزز وسد عليه في حين خرجات اشراق كيكة من الفران بدات فتقطيعها .
مسح وجهه بالفوطة وبقا ومسح على شهرو بيدو فزكو شوية ووقف كيشوف وجهه فالمرايا ويدورو بعفوية كيفكر واش يحسن ولا يدير بناقص ، تنهد وهز شيتة حك سنانو وجا يحطها حدا معجون الاسنان وهوا يطيح جا نيشان فسلة المهملات البيضاء اللي تحتو مباشرة .. تحنا على ركبو كيهزو وهوا يلقا الاختبار ديال الحمل تما ... هزو بتتاقل كيشوف فيه باستغراب وعقد حجبانو كيحقق فيه وهوا يتفاجأ وجلس وبقا جالس القرفصاء ويدو على جبهتو فصمت واليد لخرى مرخية على ركبتو فيها التيست ... دور وجهه للجنب كيعيط
- اشراااق ... اشرااااق
ردت : نعام ؟
علي: اجي ..
مسحات يدها بسربيتة بسرعة ومشات كتجر فبانطوفتها البيضاء الناصعة طلات عليه لقاتو جالس على نفس الوضعية .. هز يدو كيحرك بيها التيست وراسو مايل جيهتها ويدو على على دقنو وقال
قلب وجهو شدو بيديه بجوج وعض على شنايفو كيشوف فيه مطولا وقال بصوت هادئء كيتنهد
- حاملة اشراق ..
هبطات راسها فصمت وهوا ينوض وقف تكا على لافابو بيدو وهبط راسو كيشوف فالارض مطولا ويدو الاخرى على جنبو .. عم الصمت مطولا عاد كسر داك الصمت وقال وهوا على نفس الوضعية
- علاياش تافقنا؟
هزات كتافها كتشوف فالارض و وجهها حمر فصمت وهوا كيقول كلمة ويستكت .. هز التيست جيهتها وقال
- ها اخرت الحساب فين خرجاتنا
بدات ترمش وتبلع ريقها وتهز عينيها فيه شوية وتهرب وهو قدامها كل مرة يشوف فيه ويتنهد ..
دار يدو على جنبو وشاف فيها قائلا : فوقاش عرفتي راسك حاملة؟
ردت بصوت منخفض: عاد لبارح
هز راسو فالسما كيسوط ويشوف فالسقف مطولا ورجع شاف فيها وقال
- هاد الحمل وقع النهار اللول ... قليلة تكون عندك شهر دابا ... فوقاش مجاتكش ليغيكل
هز حاجبو كيشوف فيها : تحيده !!!... ماعندك ماتحيدي دابا اللي عطا الله عطاه ... لمدرسة اللي غادي تحيد
بلعات ريقها ساكتة ولاح هوا التيست فالسلة ومسح على راسو كيشوف فالسقف وقال
- المشكل لكبير دابا فاستريلا و واش غتقبل الفكر ولا لا وشنو غيوقع الى خرجات ليا من الجنب والمشاكيل اللي غادي نطيحو فيهم وحنا مزال عاد كنحاولو نخليوها تولف وتقبل لفكرة ... (تنهد) راه قلت ليك ماشي وقتو ... ماشي وقتو ومابغيناش ندخلو فمشاكل مع درية صغيرة مزال معارفاش وماشي حتى شي واحد كبير اللي غادي تقدر تفاهم معاه اففف
جلس شاد راسو حدا الطبلة دلفطور واستريلا حداه يالاه فايقة .. شعرها محلول وتقشيرة لابساها تقشيرة لا وكتلوى حدا علي وتفشش .. تلفت عندها جرها حداه وقال
- اجي ابابا تفطري يالاه .. فطري كاسك غيبرد
صايب ليها الخبز والفرماج وجلس كيسوط ويتنهد فيدو كاع دالقهوى وكل مرة يشوف جهة البيت ديال النعاس .
تنهد وحط الكاس وقال بهدوء : فطري يالاه .. كملي كاسك كامل
ناض جهة بيت النعاس حل الباب وهوا يتفاجأ لقاها حاطا شنطها كاملين وكتجمع حوايجها وتبكي ... سد الباب وبقا مصدوم فداكشي ومشا شد ليها يدها حدا البلاكار حيد ليها العلاقة دالحوايج وقال
- اش كديري ؟؟ حيدي هادشي من يدك
دورات وجهها كتبكي وتنخصص ونترات يدها قائلة
- غنمشي بحالي مغنبقاش هنا صافي حيد يدك
شد ليها يديها بجوج وقال : مغاتمشي لحتى بلاصة بحالك هوا هنا
هز دوك الحوايج فكمشة وحدا ردهم للماريو وهي تعاود ترجع ليهم كتجبد وتلوح فالباليزة
- مغاديش نبقا هنا علي غير بلا متصدع راسك ... خديت قراري مغنبقاش هنا ومغاديش تقدر تمنعني
شد ليها يدها بتوثر حتى هوا وقال : شوفي حيدي هادشي من يديك واجي نهضرو بعدا .
- الهضرة معاك (مسح يديه) مغادي تقضي تا لعبة ... ومغاديش نزيد نهضر ... كلمة وحدة غادي نقولها ليك فهميها والى مابغيتيش تفهميها سكتي متخلينيش نتعصب عليك ( حطي يديه على ركابيها وتحنا شاف فيها مباشرة بحدة ) بنتي اللي كنفكر فيها كنفكر فيها لمصلاحتك ولمصلاحتي باش نبقاو بجوج . فهميها كي بغيتي
بعد ومشا بنرفزة لباليزتها خدا منها الباسبور ديالها وتلفت شاف فيها وقال
- ماتهوريش ... هانا فين وصيتك .
خرج خلاها غير كتشوف ومشا لبس جاكيط ديالو وفات الباب . ناضت استريلا مستغربة لشنو ميوقع فالدار ودخلات عندها شافت لحوايج مشتتين وبدات دور فعينيها مخلوعة .. قربات من اشراق اللي مهبطة وجهها وشاداه بيديها بشوية وحطات يدها على ركبتها وقالت
- مالكي ؟؟؟ علاش...
هزات اشراق راسها بصراخ غوتات عليها ودفعاتها قائلة حتى فزعاتها
- بعدييي مني ...
رجعات استريلا اللور ويدها على قلبها مخلوعة كتشوف فيها مصدومة وخرجات كتجري هربات وتكمشات فواحد القنت فوق الكنبي معنقة المخدة وكتشوف فارجاء الدار .
اشراق : انا عيييت عيييت ماعند جدي زهر فهاد الدنيا وعلي قلب وجهه عليا قلبة خايبة كرهني فيه مابقيتش باغا نزيد حتى دقيقة فهاد الدار
خليج : وعلاش اش واقع شنو المشكل ياك لاباس؟
اشراق: طلعت حاملة وهوا ماعجبوش لحال تسيف عليا بواحد الطريقة تقولي جبتو من الزنقة .... عاد بان على حقيقتو ياختي بان دابا وضار عليا واحد الدورة ديال الزمان
اشراق: فرق كبييير بينو وبين طه ... عاد عرفت بحق طه دابا .. واخا المشاكيل واخا وقع بيناتنا الصدع عمرو قلب عليا وجهه هادا اختي غير قلت ليه انا حاملة دغيا قلب عليا وجهه بالزربة
اشراق: ماعرفتش؟؟ ماعندي ماندير حتى نشوف اش غيدير هوا
خليج : الى مابغاهش خرجي من عندو وبزز منو يسكنك بوحدك ويصرف عليك راه ولدو هاداك واش حنا كنلعبو هنا ؟ طلع تاكل لكرموس نزل شكون قالها ليك؟ ... الرجعة للمغرب نسايها ماعندك ماديري هنا الدنيا مزفتة وغتجي وتندمي .. بقاي تما ولدي تما ديري وراقك تما وجلسي ليهم على قلبهم فكندا حتى نتي وهوا الى مابغاش لهلا يردو يمشي يخرا .
اشراق : داكشي اللي غندير
خليج : عنداك يزنزن ليك الراس وتكلخي وتمي جايا ... ها ودني منك ... راه الحمارة وماكرهاتش تولد ولادها فكندا وتبقا تما ... عندك فرصة من ذهب الى ضيعتيها مانا ختك مانتي ختي سمعتي
اشراق: صافي عندك الحق ... غنجلس ونولد هنا .. مهم تيليفون بيناتنا باش ماكان غنرض عليك .
قطعات وربعات يديها كتمشي وتجي .. دخل علي للدار سد وراه الباب وتلفت شاف استريلا جالسة مكمشة ومهبطة راسها بحزن باينة عليها كانت كتبكي وسكتات .. استغرب ومشا جلس حداها دار يدو على ضهرها وقال
- مالكي علاش جالسة هنا بوحدك ؟ كنتي كتبكي؟؟
حطات يدها حدا عينها وقالت : اشراق غوتات عليا
عقد حجبانو شاف فيها وقال : غوتات عليك ؟؟ علاش؟
ردت كتبكي : مشيت عندها وقالت ليا بعدي مني
مسح وجهها وقال : صافي هادشي اللي وقع قالم بعدي مني؟
رد بقبلة فجبهتها : كضرها كرشها .. متقربيش ليها حتى تبرا وهي غتجي عندك صافي
حركات راسها بالايجاب : صافي
باسها فخدها وقال : يالاه سيري غسلي وجهك ونساي اللي وقع صافي .. يالاه سيري
ناضت مشات للحمام وناض هوا كيسوط شاد فراسو مشا للبيت .. حل الباب ودخل لقاها مكمشة فوق الناموسية وسط الروينة ديال الحوايج وشادة واحد المخدة كتعض فدفرها وساهية كتخمم .. تلفتات شافت فيه وقلبات وجهها كتزفر .. دخل بخطى بطيئة وقال
- حاولي تهدني شوية ... وخلي المشاكل بيني وبينك اوكي
دورات وجهها مجاوباتوش وتكمشات قالبة وجهها فصمت مناضتش من بلاصتها .. الوقت كولو وهي كدور وتسارا فمواقع التواصل الاجتماعي وتنشر شنو واقع ليها فلكروبات كاملين وتقابل التعاليق شنو كيقولو .
دخل عندها مرة اخرى هاز بلاطو فيه الاكل وعصير مع التمر وحطو ليها حداها وهي ناعسة شادة تيليفون فيدها شاعل والتعاليق كيطلعو .. حيدو ليها بشوية بغا يحطو حداها وهوا ينتابه لجريدة مكتوبة وطل باستغراب كيلقا منشور ديالها .
- سلام البنات انا مزوجة راجل ببنتو وعايشة معاه فكندا .. فالاول تافقنا باش نقرا وبديت القرايا وهوا اللي مكلف بجميع المصاريف .. درت الحساب بحال الناس ومصدقش وطلعت حاملة وفاش قلتها ليه هاد الصباح حيح عليا ومعجبوش الحال حيت بنتو مزال مامقتانعاش بعلاقتنا وبغا بنتو حتى تقبل وتقتانع عاد نديرو الاولاد .. انا ماعرفت مندير وهوا سمعني اللي عمرني سمعتو بحال الى هاد البيبي جايباه من الزنقة وكنحس براسي دخيلة عليه فحيانو هوا وبنتو وماعندي حتى مكانة فحياتو وماقبلش بحملي وحنا دابا فالمشاكيل ..دحت ماعرفتش شنو ندير وهوا كيفضل بنتو وحاطها فالمرتبة الاولى وانا كنحس براسي غير شايطة .. نصحوني عفاكم انا تلفت ماعرفتش اشنو غندير واحد الراس كيقول ليا خرجي من عندو وسمحي ليه فكلشي .
بقا مصدوم فداكشي اللي كتبات وبالاخص نصائح الناس اللي لقا عليهم نضرة والكل كينصحها تسمح فيه حتى يندم ويرجع يطلب السماحة او تهرب هي ولدها حتى يتمنا يشوفو و ميلقاهش وتخليه يعيش مع بنتو وتبدا حياة جديدة .
حط داك تيليفون كيتنهد حدا راسها ويفكر فداكشي اللي قرا فصمت .. تلفت من بعد شاف فيها وبدا يفيقها بشوية حتى حلات عينيها وقال
صبحات شميسة ساطعة بين الغيام فجو فبارد واشجار بيضاء مغطيها الثلج .. حلات عينيها بزز وراسها كيضرها بكثرة النعاس جرات تيليفون لقاتها ل 11 ديال النهار . دورات وجهها لقات بلاطو فيه كاس ديال الحليب و كيك وطبسيل مقطع فيه الفرماج ولحم مدخن وجبن ولخبز فشبيكة مقطع وبيضة مصلوقة .
جلسات كترمش ودور عينيها فالبيت ماسمعاتش الحس ديالهم .. حتى استرا لي مولفة دير الحس غابرة ... لقات نضرة على البيت شافتو مجموع ونقي .. ناضت بشوية سخفانة خرجات ضربات دورة لقات السكات فالدار ... لا علي لا استرا ولا استريلا .. غير كاتي اللي مجبدة فوق الفوطوي على ضهرها ناشرة يديها ورجليها كي الميت كتشخر ..
مشات غسلات وجهها وتوضات وخرجات صلاة ورجعات للفراش .. كحزات بلاصتو فين كينعس وقربات ليها البلاطو فطرات ورجعات تكات كتقرا التعاليق حتى داها النعاس من جديد .
رجعات استريلا جارة استرا كتنقز موراها وعلي بسورفيت وقرعة دالماء فيدو دخلو ومشات استريلا كتجري للبيت عند اشراق فرحانة .. حدها وصلات للباب وهي توقف تفكرات الوضع وجمعات ضحكة ودفعات الباب بشوية طلات عليها .. هزات راسها لقات علي حداها وقالت
- بااقا ناعسة !!
شدها من قب الجاكيط : اجي خليها تا تفيق .
سكتات استريلا ودخل علي للحمام خلاها كطل .. دخلات بهدوء كتقرب بحذر حتى للناموسية وحطات يدها على كتف اشراق وقالت بخفوت
- اشراق... اشراق واش باقا مريضة !
بقات كتشوف فيها واشراق ناعسة كانها عمرها نعسات ورجعات اللور كتشوف فالبيت ... مشات بخطا بطيئة جهة المرايا وبدات تشوف فالمكياج محطوط والروايح ومدات يدها بشوية كتشوف فأحمر الشفاه وهزاتو حلاتو وبدات كدور فيه فخشوع حتا تهرس طاح فالارض وهي تحل عينيها شافت موراها فاشراق وتحنات بسرعة مخلوعة هزاتو من الارض بغات تردو لاكن عجناتو بصبعها .. طل علي عليها بعفوية شافها واقفة ودخل بسرعة عندها كيوشوش حيدو ليها من يديها
- لا متقربيش لحوايجها حشومة ... شنو درتي؟
شافت فيه بخوف : والو غير طاح
خداه منها لقاه معجون كامل وقال بهدوء
- متأ... شفتي قلت ليك متقربيش للمسائل ديالها حتى تعطيك هي بيدها .
خرج شدا ليها فيدها وخرجو معاه كيحاول يصلحو لاكن حلف ميتصلح وسدو من بعد ما مسحو وحطو فجيبو .
هبط عند استريلا باسها فخدها وقال : ماتبقايش تقربي لداكي ديالها حشومة
ابتسمت وخداتو .. دفع الثمن ديالو وحطو ليها فخنيشة صغيرة وخرجها فرحانة بيه ومشا كيقلب على مبتغاه
دخل لمول كبير سرح عينو كيقلب على اسم الماركة حتى بانت ليه فالاعلى سوداء وطلع هوا واستريلا مباشرة دخل كيسول .. وقفات معاه بنت بوزرة سوداء سولاتو على مبتغاه وقال
- بغيت خو هادا الى جات على خاطرك
خداتو من عندو قلباتو كتشوف فيه وقالت
- هي اللولة اسيدي مرحبا
مشات كتقلب ليه على الرقم وهزاتو عطاتو ليه .. دفع ثمنه على عجلة وخرج بسرعة كيضحك مع استريلا ... داز لمحل حلويات اشترى بعض الحلوى ورجع فحالو للدار .
دخل بهدوء للبيت لقاها باقا ناعسة كما خلاها ومقلوبة على جهة اخرى ومشا حدا المرايا وقف وجبد احمر الشفاه من جيبو .. حيدو من العلبة ديالو وحطو بلاصة القديم ومشا خرج سد الباب موراه
بداية اسبوع جديدة ... خرج من الحمام موضي باش يصلي ودخل لبيت النعاس لقاها جالسة قدام المرايا كتقاد الشال فالصباح و لابسة حوايجها ... استغرب كيتمعن فيها وقال
- فين غادية ؟
ردت بررودة : للكلية
تعجب وقال : قلنا لكلية سالات
شافت فيه فالمراية وقالت : غادي نكمل حتى صافي منبقاش قادرة نوقف
شد لحينو كيشوف فيها وقال : رجعي تنعسي الله يهديك
هزات الريحة رشاتها وهوا كيشوف وقال
- سيري ترتاحي راه غندفع ليهم شهادة طبية فيها 15 ليوم حتى نعرفو اش غنديرو
هزات كتفها : غنمشي
شار بيدو جهة الفراش : نعلي الشيطان الصباح هادا مافينا اللي ينوض شي صداع ... سيري ترتاحي حتى لمن بعد ويحن الله
هزات احمر الشفاه ديالها بدون اهتمام لكلامو وهي تستغرب ! ماشي هادا هوا ديالها ! هادا جديد وديالها مستعمل ! حارت مافهمات والو ودارت منو فشفايفها وناضت وقفات بغات تهز الصاك وهوا يحط يدو على يدها بعدها وقال بهدوء
خرجات زدحات عليه الباب ومشات للقسم ديالها جلسات بنرفزة حلات دفاترها في انتضار الدرس . وقبل ميبدا الدرس تكات بيدها على الطاولة كترمش وتعاود حتى نعسات وغطسات فنوم عميق
حلات عينيها مخلوعة شافت كولشي خارج ماعرفاتش راسها فين هي .. تلفات والدفال نازل مع فمها والدفتر فزك .. استعوبت بسرعة ومسحات فمها من الجنب ومسحات الدفتر وناضت خرجات .. صونا ليها تيليفون وطلات لقات علي المتصل
- اشراق: الو
علي: سالتي الحصة ديالك ؟
اشراق: اه
علي: يالاه خرجي هانا حدا الباب
قطعات وخرجات دايخة بالنعاس مشات نيشان للطموبيل ركبات حداه ساكتة كتشوف قدامها .. تلفت شاف فيها وقال بهدوء
- ياكما نعستي فالقسم
شافت فيها بارتباك : علاش؟ كفاش نعست ؟
رد بعفوية : بنتي ليا فايقة !
دورات وجهها قدامها فصمت وهوا غادي سايق السيارة وكل شوية يشوف فيها . وقف قدام بناية وقال بهدوء كيحيد حزام السلامة
- يالاه نزلي
نزلات وقفات على رجليها وشافت فالمكان باستغراب وقالت
شافت فعلي اللي جالس قدامها كيسمع ويشوف فيها وهبطات عينيها
الطبيبة: اجي معايا
دخلاتها لغرفة سرية صغيرة مفروقة بالزاج والريدو وردات وطلعاتها فوق البياص في حين جالس علي مقابل معاها كيشوف فيها ناعسة وهازة رجليها ومغطية ليها الممرضة نصها . بدات الطبيبة كدير الفحص قدام علي اللي عراو ليه الريدو كيشوف كولشي عن قرب ودورات اشراق وجهها جهة الشاشة كتشوف كرشها من لداخل .. ابتسمت الطبيبة وقالت
- كيبان ليك ؟؟
ردت اشراق بابتسامة وسعادة : هوا ديك النقيطة ؟
الطبيبة: اييه هوا هاداك
تلفت اشراق بدون شعور عند علي وقالت بسعادة وصوت مرتفع
- عااالي ... شفتيه شفتيه هههه شوف شووف
ابتسم لا اراديا وحرك راسو قائلا : شفتو
كمشات اشراق يديها حدا فمها عاضة شنايفها وعينيها كيدمعو بتأثر وهي كتشوف فيه ... بسرعة طلبات من علي تيليفون ومدو ليها بدات كتصور الشاشة بسعادة .
ناضت اخيرا فرحانة لبسات حوايجها والفرحة هازاها فسابع سموات وغير كدور فبلاصتها تالفة .. رجعات جلسات قدام الطبيبة اللي كتعطيها النصائح و جبدات لفيديو اللي صوران كتشوف فيه بخشوع .. ابتسمت الطبيبة وقلبات الاتجاه جهة علي كتهضر معاه وتوصف ليه الدوا اللي خصها تاخد والاحتياطات اللي خصها دير وهوا كيتجاوب معاها . ناض وقف ودعها وشاف فاشراق قائلا
- يالاه نمشيو
وقفات بارتباك وعينيها فالفيدو شكرات الطبيبة ورجعات كتشوف الفيدو وهي خارجة قدام الناس وقالت بصوت مرتفع كضحك
- شوف شوف .. شووووف هوا هااادا... هوا ولدي
نزلات من العمارة فرحانة مقاداها فرحة ... هزات تيليفون كتعيط لمها وختها وكاع اللي عزاز عليها كتعاود ليهم وعلي سايق وكيسمع ليها حتى قطعات وقال
- مافيكش الجوع ؟؟ .. بغيتي تاكلي شي حاجة ؟ تشهيتي شي حاجة ؟
ردت بسعادة : تكهمت .. حاسة براسي كليت بزااف ههه
ابتسم وقال : واخا هاكاك غنمشي و لشي بلاصة نجلسو فيها شوية
هز يدو شاف الساعة وداها لمطعم تركي كبير .. دخلات كتسرح عينيها فالزخرفة التركية و جلسات بابتسامة وسعادة فالطولة كتشوف فالناس والاطباق كتمشي وتجي قدامها .. حلات لائحة الطعام لقاتها عامرة اسماء بدون صور ورجعات سداتها وبدات طل جالسة على طبالي اللي دايرين بيها وتشوف شنو كياكلو .. كل واحد اش حاط وجميع الطبالي عامرين طباسل ... تلفت علي وراه شاف فواحد الطاولة فين كتشوف وقال
عمرو ليها الطبلة بأشهى الاطباق ماعرفاتش منين تبدا .. بدات تنقب من كل حاجة وعلي شاد طبسيلو فيه اكلة وحدة وكاس ديال العصير كيشوف فيها غير كدوق فاللخر رجعات اللور وقالت
- تكهمت
علي: كولي كملي هادشي
اشراق : لا شبعت براكة عليا الى زدت غنردو
علي : وشنو نجمعوه ليك تا للدار ؟
اشراق: واخا حسن
علي: صافي غنجمعو ليك حتى للدار مع ديال استريلا
شار للنادي جمعو ليها وحجو ليهم شاي تركي ... ناض علي بدل البلاصة جلس حداها فوق الكنبي النزخرف باللون البرتقالي وتكا يدو وراها كيتفرج فالشارع اللي كيطلو عليه من الزاج ... تلفتات عندو بابتسامة وجبدات التيليفون كتفرج فالفيديو بسعادة وقالت
- الصراحة ماعرفتش علاش متشائم ... مسكين هاد البيبي مدار حتى حاجة ربي بغاه يجي لهاد الدنيا .
دار رجل على رجل وكحز عندها كنقها بيدو كيمسح على دراعها وقال
علي: الاللة حسبيني ختك ولا خوك كيهضر معاك نساي شكون انا ... حاولي متهضريش من فراغ .. حاولي تكون هضرتك عندها معنى والناس يسمعو ليك و بتناقشو معاك .. ماشي كتهضري من فراغ وراسك خاوي اللي سمع ليك يخليك كتهضري ميتناقش معاك كاع
ربعات يديها قائلة : راه نتا اللي كتشوفني هاكا حتى واحد مكيشوفني هاكا
تنهد كيضحك وقال : حتى واحد مغيجي يقولك صلحي ولا طوري من راسك غير اللي كيبغيك وباغي مصلاحتك وباغي يشوفك امرى مثالية
اشراق: نتا براسك فيك عيوب وماحاسش
ضحك وقال : عادي حتى واحد مكامل ... وريني عيوبي غنحاول نصلحهم ولاكن باش نبقا كنهضر وراسي خاوي ونبان وسط الناس مكلخ لا خايبة
اشراق: هي دابا انا مكلخة
علي: هي فاش حنا دابا .. كن تعمقتي فهضرتي مغاتقوليش على راسك مكلخة انا ماقصدتكش نتي .. ولاكن الى بقيتي بحال هاكا مامتبتاش معارفاش راسك شنو كتقولي وكتبغي تخلقي شي حوايج مكاينينش راه ... راه ...
اشراق: غير قولها مكلخة ودرامية و مانعرف شنو
باسها فخدها وقال : ماشي درامية ... ولاكن بصراحة كتبغي الدراما ... بلاصة متكوني قوية تواجهيني نيشان بشنو كاين وبالمنطق نتي كتميلي للدراما وكتبقاي غير تلومي راسك وتلوميني . وانا هادي انا ماعرفتش شنو .. انا ماعرفت مالي... انا غندير وغنفعل ... عرفتي شكون اللي كيفكر بهاد الطريقة ؟ غير الجاهل ... واخا نتي زعما قريتي ومتقفة و عجباتني هضرتك نهار قلتي ليا مابغيتش نبقا متبعة لقانون حيت وجهة نضرك كفاش كتشوفيها نتي عندك فيها الحق ... كنتي هنا كتفكري مزيان وهضرتك منطقية وكتشوفي بعيد .. مي فشي حوايج اخرين شفتك غير كتشيري بعد المرات وكتوصليها للقمة بحال لبارح قلتي ليا غنربي ولدي بوحدي ! طلعتي طلعة وحدة ونتي عارفة هادي هضرة خاوية مغاديش نقبلها ومع ذلك بغيتي توصليها ليا .. (تنهد) كنعيا نفهم مكنفهم والو!
ربعات يديها كتشوف قدامها بميوعة وقالت
- فبلاصت متكون فرحان كاع ممسوق
دور وجهه لجهة اخرى كيسوط وقال
- اودي اشراق الهضرة معاك خصارة .. والله تا خصارة ... نكون فرحان وانا فيا الخلعة من اللي جاي وشنو يمكن يوقع ... منين غدوز هاد الفرحة وسط الخوف اللي انا فيه ... وخوفي كبر من توقعاتك نتي اللي عايشة احلامك .. (تلفت باسى ) عرفتي الى وقعو مشاكل مع استريلا وخرجات لينا من الجنب ... عرفتي شنو غيوقع ؟ عرفتي الى تفارقنا وكل واحد شد طريقو شنو غيوقع ؟ عرفتي علاش مقادرش نفرح وكنتخيل ولدي من لحمي ودمي بعيد عليا عايش نفس العيشة اللي عاشت استريلا .. باه ماحداهش ولا كيشوفو مرى مرى ... الدراما ديالي انا هي ولادي مساكن كل واحد ناقص من جهة ... ماشي من حقي نفرح وانا عارف المصايب جايا و غنتعدب كما ولادي غيتعدبو .
دور وجهه خلاها ساهية كتفكر وقالت
- كتفكر غير بنتك ماعندك حتى اهمية فيا انا وفولدي
تلفت شاف فيها بأسى وقال: بديك النية تلقاي الله هادشي اللي غادي نقولك .(شاف فالساعة )
نوضي يالاه نمشيو ندوزو على استريلا نديوها معانا للدار
هزات صاكها ناضت غضبانة منو ونزلو ركبو فطموبيل فاتجاه المدرسة.. دخل خرج استريلا جار ليها شكارتها واشراق ساهية كتشوف فيه وركبها اللور ساكتة وكتشوف فاشراق بنص عين وبحذر والاخيرة ساهية قدامها مراهاش فهاد العالم .
جلس علي ورا العشا ببيجامة كيتنهد وجر استريلا عندو فبيجامتها قربها منو كيدي معاها ويجيب فالهضرة وقال
- اجي اجي اجي بلاتي مالكي دغيا تقلقتي .. غير كنهضرو شنو فيها الى جا ليك بيبي صغيور ضريف كيبغيك ولد باباك .. صغييور مسكين وزوين
شافت فيه باستغراب: شكون غيجيبو ليا ؟ اشراق؟
هبط راسو كيحك نيفو وقال بتوثر : وشكون غيجيبو ليك ؟ اشراق اللي تقدر تجيبو .. ولاكن راه ولدي انا وخوك نتي وكيبغيك وغادي تكوني عزيزة عليه ... كيشبه ليك وكيبغيك و ..
نترات يديها بقوة وقالت كتنهج: الاااا مابغيتوش مابغيتوووش انا مابغيتش حتى واحد يجي مابغيييييتش
مشات كتجري وعلي متفاجأ لردة فعلها ... دازت قدام اشراق اللي كانت واقفة حدا الباب كتسمع ودخلات لبيتها سدات عليها بقوة قبل ميدخل علي وبدا كيدق فلباب عليها ويعيط واشراق حاطة يدها على فمها مصدومة
علي : استريللاااا حلي مكاين والو .. حلي حنا غير كنهضرووو مكاين والو حتى حاجة مغتجي
ردت اشراق بانفعال : عااالي ... علاش حتى حاجة مغتجي علاش كتقول هادشي ؟؟ خاصها تقبل البيبي وتقبل باللي غيجيها خوها ولا ختها ولا هاد خوها ماعندوش الحق فيك
حلات استريلا الباب خرجات ووقفات قدامها كتنهج وقالت بغضب
- سيري بحااالك ... سيري خرجي من داااارنا مابغينااااش بيبي مابغييييناش ومابغيناااكش حتى نتي ... سيري بحالك خرجي من دارنا خرجييييي خرجيييييييييييييي
شدات فراسها استريلا بجنون كتغوت وضرب رجلها مع الارض وعلي كيترعد ويشد فيها قدام اشراق ويحرك ليها وجهها وهي كتبكي وتسوط فنوبة جنونية لاول مرة كيشوفها علي
عنقها بقوة وهي كتبكي وتشهق ومزيرة عليه وعلى قميجتو كترعد .. تخلع وبدا يتفتف اما اشراق بقات مصدومة .. فين هي استريلا الهادئة ؟ فين هي اللي مكيتسمعش صوتها ؟ فين هي البرائة ومثال الطفلة المربية الخلوقة .. مكانتش اشراق متوقعة ردة فعل كهذه .. دخلات للبيت تكشمات ماعرافتو اش دار .. هبطات راسها شداتو مغمضة عينيها وكتلوم راسها على لحضة غضب خرجات فيها هضرة مكانش عليها تخرجها فديك الساعة ضنا ان استريلا واخا تسمع مغيجي منها حتى رد فعل صادم بحال اللي شافت .
دخل عليها كيسوط من مناخرو بحال الرابوز وزدح الباب موراه .. هزات راسها شافت فيه ووقفات عرفاتو ناوي على خزيت .. سبقات الهضرة هي اللولة وقالت بأسف
- تعصبت فلحضة ماكنتش متوقعة استريلا تنفاعل بديك الطريقة و ..
دورات وجهها كتسوط : شحال هادي بغيت غير نعرف ردة فعلها كي دايرة ... ومقالت والو بلعكس كانت باغا ... نتا فششتيها بزااف اعلي وهاد الفشوش ديالك غادي يخرجو عليها
رد بغضب : شغلاااك نفششها ولا منفششهاش واش سوووقك ؟؟ واش نتي كبرتي وسط باك ومك طيحي من هنا يهزك باك طيحي من هنا تهزك مك بحالها هي اللي كتعيط ماما كنجاوبها انا ؟؟؟ بغيتي نربيها تربيتك ... وريني الترابي علاش كتهضري مشفتهمش ... مابان ليا ترابي تبارك الله فيك ... راسك خااااوي ... هضرت معاك باش تعرفي شنو كتخرجي مع داك الفم وشنو تقولي والوقت اللي تهضري فيه ونتي غير مزايدة فيه ... ها مناااااش كنت خايف ... ها علااااش كنهضر صباح وعشية ونتي مراكيش فهاد العالم
بقات مصدومة وغرغرو عينيها كتشوف فيه وقالت
- بزاف عليييك انا رباوني احسن تربي حسن منك نتا ... كررررهت النهار اللي عرفتك فيه والنهار اللي شفتك فيه وهضرت معاااك
حرك راسو بالنفي بصوت منخفض: انا اللي غالط ... نتي ماعليك والو ... انا اللي مني كلشي ... كنت معاك ولد الناس ونتي متستاهليش ... كان على الاقل تسمعي هضرتي وماديريش اللي فراسك مدام فكرنا نردو زواجنا حقيقة وكامل متكامل ... على الاقل كنتي تسمعي شنو كنقول ليك ...
قاطعاتو بغضب : نتا مادرتي حتى محاولة باش تشرح ليها ولا تفسر ليها طبيعة زواجنا ... عجبك الحال وبقيتي ساكت ماههرتيش و ماقلتي حتى كلمة
رد بغضب : زواجنا يالاه بداااا .. يالاه شهراين باش بدا وباش استوعبناه كفاش بغيتي نشرح ليها هادشي وحنا يالاه بدينا ... وشفتيني كنحاول نطلق الطبيعة معاك قدامها تدريجيا ماشي دقة وحدة على الاقل تولف ... ونتي جيتي درتي اللي فراسك وحنا مزال يالاه قلنا بسم الله
غوتات: مكتااااااب الله ... ماشي اناااااا
رد بعصبية : كنتي بااااغيااااا ... قلت ليك مليون مرة الاحتيااااط الزمر ديريه ولا نشوفو حل اخر على الاقل نديرو محاولة ... نتي اللي عارضتي ونتي اللي بغيتي .. شنو حساب ليك غادي ديري اللي قالك راسك وتجي تقولي ليا مكتاب الله نبقا نشوف فيك .. حساب ليك غادي تسكتيني .. ديريها قد راسك وتقولي مكتاب الله ... فكييييها دابا .. فهاد المشكل لقاااااي دابا
غززات سنانها وقالت: نتا اصلا متستاهلش هاد الولد ومتستاهلش تكون اب
رد كيشير ليها بصبعو : انا درت شي دنب اللي ربني لقاني بيك ... بوحدة جاهلة فحالك عقلها صغر من عقل بنت عندها عشر سنين ... فاشلة فحياتها ومكتعرفش تفكر وتميز بين الخيال والمنطق ... عيييت معاك تبدلي ... قلتي نقرا قلت مرحبا على الراس والعين لمصلاحتك باش تشوفي الدنيا بعينين الناس الواعية وتطلعي من هاد الجهل فاش عايشة وتحكمي دماغك ... درت معاك جميع الوسائل ونتي مزالة كما نتي عزيز عليك المشاكل وعزيز عليك الهم والنكد وكتزربي وكطيري ... جبتك من المغرب تبداي حياة جديدة وتعلمي من اخطائك وتكوني فرحانة ومرتاحة فحياتك ... ولاكن نتي لا ... ماعطيتي اهمية لحتى حاجة ... حتى لقرايا اللي كيحلم بيها اي واحد فاحسن المدارس ستهرتي بيها وكانت اخر اهتمامتك وكانت غتوصلك لبعيد وتقدري تولي حسن مني وكنت غنكون فرحان كن وصلتي ونجحتي .. وكان ولدنا ولا بنتنا غيجي فضروف حسن من هادي وغيكبر بيناتنا ... ولاكن كديري لي فراسك
مارضاتش و تعصبات بدات كترعد وقالت بغضب
- اللي كيدير الخير مكيمنش بيه .. واللي كيبغي شي واحد كيبغيه بعيوبو .. ولاكن فرق كبييير بينك وبين طه وعمرك تكون بحالو هوا اللي كان كيفهمني وكيقدرني وعاطيني قيمة وكنت عايشة معاه حسن من هاد العيشة اللي نتا كتمن عليا بيها ... صعيب عليك تفهم هادشي السي المنطق وغتبقا حياتك كلها بوحدك عايش وسط افكارك الوااااعية وكتشوف راسك ماعرفت شكون .. ندمت اللي جيت لهنا وندمت اللي عرفتك تفووووو
رجع اللور كينهج بغضب وكيشوف فيها ويطلع ويهبط باشمأزاز وقال بصوت منخفض شوية
- ماكدبتيش فحتى كلمة قلتيها .. داكشي علاش زواجك كان ناجح 100% وجيتي لهنا غير باش تقراي وجا معاك واقف حداك باش نتي تبني مستقبلك ... المستقبل اشراق والنجاح ماشي هوا الراجل كنتمنى تفهمي هادشي. (تنهد كيشوف فيها بخيبة امل ) جمعي حوايجك ماتخلي حتى حاجة موراك .. غادي تسكني بوحدك وغتبقاي تحت مسؤوليتي حتى تولدي .. ووراقك علاش جيتي غيوصلو حتى لعندك .. المدرسة مابقاتش من ليوم . واي حاجة درتيها مخالفة للقانون هنا غادي تحاسبي عليها .. متخلينيش نطبق معاك شي حوايج نتي ماشي قدهم
بغا يخرج وهي تغوت : طلقنيييي
تلفت كيشوف فيها ويطلع ويهبط بسخرية
- غادي نطلقك غير كوني هانيا . ولاكن غنوصيك على واحد الحاجة ... الى فكرتي تهربي ... ولا تخوي البلاد فهاد الفترة غادي تجيبيها فراسك ونهار تولدي عمرك تعاودي تشوفيه .
خرج خلاها واقفة مصدومة .. جلسات فطرطف الناموسية كتفكر ويدها على وجهها كتبكي
جبدات تيليفون كتعيط لخليج وكلها كتشهق بالبكا وجاوبات بسرعة
- الو خليييج
خليج : اويلي مالكي وليتي كتخلعيني شنو وقع
اشراق: انا وعلي صافي سالينا ... قالي خرجي من الدار ماعرفت فين غيسيفطني .. بنتو عرفات بالحمل ومابغاتش وهوا دابا كيهددني وخلعني .... مابقيتش قادرة نتيق اخليج خلعني وماعندي حتا واحد هنايا .. خايفة توقع ليا شي حاجة ومايسيق ليا حتا واحد الخبار
علي : ااهلا خاي عماد ... كي داير اخاي سافا كلشي بيخير ... لافامي كلشي مزيان ؟ الحمد الله اخاي الله يحفضك .. وا نهار كبير هادا اللي تفكرتينا فيه ..
بقا ساكت شوية وهي كتسمع .. اكيد خليج قالت ليه على اللي وقع .. اكيد عاودات ليه وعلى هادشي تاصل بيه . سكتات وصبعها ففمها كتسمع
- وا شغادي نقول ليك اخاي عماد... والله ماعرفت باش نبدا ليك ... داكشي طويييل
سمعات الصوت غادي وكيبعد وخرجات من البيت كطل لقاتو خرج للجردة .. حاولات تقرب شوية باش تفهم وتسمع من علي شنو كيقول وطلقات ودنها
- علي: اخويا داكشي طوييل ماعندك ماتفهم فيه ... نعلنا الشيطان اخاي و حاولنا ولاكن ما .. ماتماش ... ماعرفتش دابا هي شنو قالت ليكم بالضبط ولاكن سمع مني اخويا عماد والله ماعندي فين زيد وماشي لخاطري و وصلنا لشي مواصل كبار مابقا ما ترد .... واييه عندك الحق كيوقعو المشاكل بين الراجل والمرى ولاكن نتوما دابا معارفينش ... ماشي مشكل بغات تهضر دوزها ليا ... الو خليج ... اختي لهضرة اللي قلت لعماد غنقولها ليك .. راكم معارفين والو وماعرفتش شنو ضار بينك وبين ختك وشنو قالتك ليك هي .. اللي غنقول ليك هوا العشرة بيني وبينها مابقات عندها معنى ... شوف اختي .. فترة الوحم على راسي وعيني ولاكن توصل بيها الدرجة تقارن بيني وبين راجلها اللول هاد الهضرة مكتقالش ... كندابزو كنتعصبو نقدرو نخرجو الهضرة وندمو عليها من بعد مي تجمع بيني وبين راجلها الاول وتبقا تميز شكون حسن من لاخر انا قريب غنعطيها حريتها ترجع ليه والله يتاويهم بجوج انا غير ولد لحرام مكنسواش ومصالحش والله يعاونهم ..... شوف اخليج كنقسم ليك فمي بالله .. ماكنت ناوي نوصلو لهادشي وماراضيش عليه وحتى انا ماباغيش ولاكن ديك الهضرة اللي قالت ليا والله اختي مغادي نزيد معاها الضربة وداكشي اللي فكرشها يتزاد واللي مقسم ليه ربي فالدنيا غادي يعيشو ... باش نعل الشيطان ونرجعو زعما ... ماعمرها مغاتكون .. راه ماشي يالاه باديين فالدنيا .. راه شبنا وكتقلبو على الاستقرار ... ولاكن اختي هادشي اللي وقع واللي سمعت ليوم حل ليا عينيا على بزاف ديال الحوايج .... ماعندي مانعاود ليك راه هي تعاود ليك ..... شوف ااا خليج راه مغاديش نوصلها بسوء ... هي اللي تحمل مسؤوليتها الى تهورات اما انا مغاديش نضرها ولا نتسبب ليها فشي حاجة .. كما تلاقينا بالحسنى غنتفارفو بالحسنى ماضرني مانضرها
شافتو داخل ورجعات بسرعة للبيت سدات عليها وجلسات .
شمات ريحة الطياب فالدار والحوت كيتطبخ وريحتو عاطيا وطلات كتشم من بعيد .. شافتو هز طبسيل وتم جاي جهتها للباب .. رجعات اللور بسرعة سدات وهوا يدق جوج دقات وحط طبسيل فوق طبلة مدورة صغيرة ومشا بحالو هز طبسيل بنتو ودخل للبيت سد عليه .
حلات طلات بنص عين كتشوف وهبطات عينها لقات الطبسيل فوق الطبيلة فيه سمك منوع وسلطة حداه وهزاتو كتشوف فيه بأسى .
جلسات كتشوف فالطبسيل مطولا وتأسف على اللي وقع واللي طرا ... غرغرو عينيها وهي مهبطة راسها كتشوف فداك الطبسيل وكتهز ودير فمها ... كل لقمة حطاتها فمها كتفكرها بتعامل علي معاه من يوم عرفاتو ... من نهار عرفاتو فالمغرب ولعب معاها الكولف بوجه بشوش... نهار جاب ليها الورد للنادي كيعتاذر ... غمضات عينيها والدموع كيهبطو نهار تفكرات البلوكك اللي بلوكاه طه بدون سبب ... تنهدات فاش جات لداهم يتزوجها وكان جالس حادر راسو كيشوف قدامو راضي بالامر الواقع ... نهار تعرض ليها للمطار فاش وصلات ... وفاش مشات كتجري عندو وسط الكوميسارية عنقاتو بقوة وخرجها من المشكل ديالها ، عنقات المخدة بقوة كتبكي كتبكي وهي كتذكر العصبية ديالو فاش كان كيقريها ويسهر معاها الليل حتى تفهم وتحفظ ... واكثر حاجة اتراث عليها هي نهار نجحات فالامتحان وخرجات كتجري عندو عنقاتو بقوة وكان فرحان كأنه هوا اللي نجح .. ذكرايات كثيرة بقات كدوز قدامها وهي معبطة راسها فالضلام كتبكي والطبسيل حداها فيه الحوت بارد ..
عنقات المخدة بقوة كبيرة كتحسر على ذكرايات جميلة عاشتها معاها لاتنسى .. كان سخي لدرجة كبيرة وعمرو قصر معاها فشي حاجة .. كان حنين وحساس فعلاقتهم الحميمية وعمرو فرض عليها شي حاجة هي مابغاهاش .. وكان فاقد للسيطرة فبعض الاحيان . جات قدام عينيها اللحضة اللي ناض فيها الصدع والغوات وقارنات بينو وبين طه والطريقة باش جاوبها وخرج وهبطات راسها كتبكي وتنخصص وتشهق وتشوف فأرجاء المكان .. مكان كان شاهد على ذكرايات جميلة وكل ركن فيه كيحكي قصة .. بعدات المخدة اللي معنقة شافت فيها ورداتها لبلاصتها فين كينعس ومسحات خدها وناضت بأسف وندم شديد كتجر بانطوفتها وشعرها محلول مشدود بمقبط صغير جامع ليه الجناب .. حلات الباب وكان ضوء واحد خفيف وسط الدار .. تنهدات بعمق وفمها ناشف كتبلع ريقها بزز ووقفات حدا الباب مهبطة راسها ومكمشة يدها مترددة دق . هزاتها بزز دقات جوج دقات وبقات واقفة كتنفس بزز .. حل الباب شاف فيها باستغراب وهي مهبط راسها واقفة مزيرة ورد الباب وراه على استريلا وبقا واقف كيشوف فيها .. بدون سابق اندار حلات يديها وعنقاتو بقوة كتبكي جمداتو فبلاصتو بلا ميدير حتى حركة .. تنهد بعمق كيرمش وشعرها حدا وجهه وهبط عينيه .. بتقل كبير هز يدو موراها وحطها على ضهرها طالع بيها حتى لاكتف وعاود عنقها باليد لاخرى وزير عليها بقوة
دور وجهه حدا شعرها مغمض عينيه وعنقها بيديه بجوج كيزير على كتافها وهي كتبكي فزكات ليه حوايجو .. مسح على راسها وقال بصوت هادئ
- اجي... اجي ندخلو
عنقعا بيدو شاد فيها ودخلها للبيت كتنخصص ووجهها فازك مقادراش تنفس .. رد الباب برجلو عليهم وجلس هوا وياها فجنب الناموسية شاد ليها فيدها بأسى فصمت حتى سكتات وردات النفس وقالت بأسف شديد
- علي ... سمح ليا على داكشي اللي قلت .... سمح ليا عفاك على ديك الهضرة مكانش خاصني نقولها ليك
هبطات راسها كتبكي بأسف شديد والندم كياكل وتمنا لو يرجع الوقت اللور وميوقعش اللي وقع . بلعات ريقها كتنخصص وترجف وقالت
- انا غلطت ... غلطت وماشعرتش براسي ... ماكنتش واعية بشنو كنقول ... غلطت و مكانش خصني نقول ديك الهضرة .... كنت قاصدة نعصبك بيها ونمرضك حيت ضريتيني بهضرتك .. مالقيت باش نعايرك ... كنت باغا شي حاجة ضرك وقلت ليك ديك الهضرة ..
تنهد وشاف بأسى شديد : ومالقيتي غير ديك الهضرة ؟
شافت فيه بدموع : كنت بغيت نجرحك وصافي ... ولاكن ندمت و ماكنتش عارفة شنو كنقول... نتا ماصرفتي فيا غير الخير .. انا اللي تسرعت ... وانا اللي مني الغلط وكنعتارف بغلطي .
شد ليها فيدها بأسى وهبط راسو ساكت ملقى ميقول .. تنهدات كتنخصص وحطات يدها على راسو قائلة
- مابغيتش نخسرك اعلي ... انا مابغيتش نخسرك ... فراقنا غيكون اكبر خسارة فحياتي ... سمح ليا على كل كلمة قلتها ليه وكنواعدك عمرها تعاود .. عمرها تكرر الى كانت بصح هي السبب فطلاقنا ... قول ليا اش هي السبب ولا لا
تنهد بعمق واسف وقال : ماعليش... كنتمنى تكون اخر مرة ... حيت راه بصح جرحتيني بديك الهضرة وماكنتش باغي نسمعها منك
عنقاتو بقوة وقالت : سمح ليا ... سمح ليا بزااااف وكنواعدك عمرني نعاودها ... عمرني نعاود نقول ليك شي كلمة تجرحك والله كنواعدك اعلي
عنقها بقوة وقال : سمحي ليا حتى نتي الى قلت ليك شي هضرة قاصحة و خايبة .. مابقيتش عاقل على شنو قلت ليك ولاكن سمحي ليا حتى نتي
تنهد وقال شاد ليها فيدها : الحب راه كيجي فالاول فاش يالاه كنعرفو بعضياتنا ... ولاكن فاش كنعيشو تحت سقف واحد راه كتحول داك الحب لخوف .. تخاف عليا نخاف عليك ... تبغي لي لخير نبغي ليك الخير ... تساندني ونساندك ... ماشي الحرب ولغيرة والشك والوسواس .. ماحب هادا ما تا لعبة غير المرض ... وحنا الحمد لله مابيناتناش هادشي ... عمرك تلقاي معايا مشكل من هاد الناحية كوني هانية ... انا مشكلتي الوحيدة هي استريلا ... ونتي عارفة البنت عقلها صغير وفمك قلتي داخلة فمراهقة خصنا انا ونتي نعرفو كفاش نتعاملو معاها بلا ضد ... وكتشوفيها ماعندهاش مها والا قصرت معاها فشي حاجة ولا تعصبت عليها تقدر تشكي بيا لمدرستها .. غيجي يلقاوني مزوج وغيحيدوها ليا ويقولو ليا كتعنفها و ماتصلاحش تعيش معاك... حسي بالخوف اللي عايش فيه ... مغادير 18 لعام تا نحماق كل نهار كنسولها شنو قالو ليك فليكول شنو دارو معاك .. ونتي حاولي باللي قدرتي عليه تحافضي على علاقتنا على الاقل بشنو كنقول ليك ... راه منقدرش نخسر بنتي منقدرش واش فهمتيني
عنقاتو بحنان وقالت : صافي كون هاني من ليوم كلشي هادشي غيتبدل ... انا استريلا عزيزة عليا وحاسة بيها عندها نقص ... ولاكن ماعرفتش شنو وقع ليا مأخرا .. يمكن الوحم ..يمكن هرموناتي تبدلو
عنقها بقوة وقال : المهم حنا دابا فوا الوضع شوية مأزم ... صبري معايا حتى ندوزو هاد الازمة ونرجعو كي كنا
ابتسمت كتشوف فيه وحركات راسها بالايجاب كتشوف فعينيه .. ابتسم وقرب لشفايفها عطاها قبلة لذيذة فيهم وحدا فمها وخدها وعنقها وقال
هبط راسو كيحك فجبهتو وقال : والله ماعرفت ... ولاكن شغنديرو فنضرك ؟ غنفرقو كل واحد يعيش فدار
اشراق: ونبقا انا ساكنة بوحدي؟
رد بأسى : الى عندك شي حل اخر نديرو ماعندي حتى مشكل ... ماعرفتش الى زعما شافتو فاش يتزاد غيتبدل رأيها ولالا ... غندير اللي فجهدي باش ترضا ونشاء الله غترضا .. راه غادية وكتكبر وغادي تفهم باللي الاخ ولا الاخت نعمة ماشي نقمة ... غير صبري معايا وميكون غير لخير
تندات وقالت : صافي واخا
هبط راسو باسى وقال : حاليا غادي نسكنك بوحدك غير هنا ماشي بعيد حدايا باش تبقاي قريبة ليا ونشوفك يوميا ... على بيدمن نغير لفكرة لاستريلا حيت ماعندي حتى حل اخر .. الضد والعناد مغادي يفيد بوالو
اشراق: وغتبقا تجي عندي ولا تخليني بوحدي؟
شد ليها فوجهها : معلوم نجي عندك احبيبة ديالي ويوميا غنجي انا اصلا معمر لاستريلا الوقت ديالها كامل النهار كولو فالمدرسة ولعشيا فالنادي .. وكنخرج بكري مكنتعطلش فالخدمة ... وغنبقا ندوز عندك كل نهار نجلس معاك
اشراق: علي ... عفاك خليني فالكلية راه كاينات اللي كيقراو وحاملات انا شفتهم
علي: ومغتقدريش كي غديري فاش تولدي يالاه؟
ردت : انا حملت مع البدية ديال العام هانتا كتشوف ... يعني غادي نولد فالعطلة وحتى الشهور اللخرة غنكون جالسة فيهم وساليت لقرايا
رد : وملي تولدي شنو ديري؟
ردت : ديك الساعة يحن الله دابا خليني نفوز بهاد العام عفاك .. نقصو عليا .. عارفة صعيب وماشي ساهل ولاكن بحالي بحال اي وحدة خدامة وحاملة
تنهد كيشوف فيها وقال : اللي بغيتي ... عنداك غير توصلي للنص وتقفي ونضيعو فالشهور اللولة
اشراق: لالا والله منوقف انا عارفة راسي غنقدر نكمل .. كون هاني
حرك راسو بالايجاب وباسها : نشاء الله .. نعسي نتي رتاحي ... ليوم كان عامر وطويل مابغاش يسالي كاع .. يصبح ويفتح ( غطاها) وانا غنمسي نعس حدا استريلا مريضة وطالعة ليها السخانة
اشراق : واش مريضة بزاااف!
علي: شوية السخانة وتقدر تفيق بالليل طلب شي حاجة ... المهم رتاحي حتى لغدا ويحن الله (هبط باسها) يالاه تصبحي على خير
ابتسمت وعنقات المخدة : صبح على خير
حك ليها فشعرها كيضحك ومشا خرج سد عليها الباب خلاها مرتاحة اخيرا وكتفاها خفاف كانه جبل طاح عليها هدها وهم ونزاح
صبح الحال و خرجات اشراق من الدار بكل حزن وأسى مخلية ورائها ذكريات جميلة , ركبات مع علي فالسيارة هي وجميع شنطها ...ماهي الا مسافة قليلة حتى كانت حدا باب عمارة من العمارات اللي فالحي , هزات راسها كتنهد بعمق ودخلات ؤرا علي اللي هاز ليها الشنط , هبطات راسها فصمت وطلعات فالاسانسور حتى للدار المعلومة و دخلات كتسرح عينيها فأرجاء المكان , كانت شقة صغيرة وجميلة كتكون من بهو صغير جدا فيه طاولة بالكراسي مربعة بيضاء و مطبخ مفتوح وسط البهو ...مر صغير فيه غرفة واحدة للنوم وكبيرة بها شرفة صغيرة على الحديقة , كذلك خزانة ملابس وحمام كبير مجهز.
بعد القاء نضرة على الغرفة تبسمت بمجاملة النضر
اشراق : أمم..زوينة ومفوهة
رد بأسى: ما علينا غير نصبرو حتى يحن الله ...المهم الدار راها مجهزة و الكوزينة حتى هي والى كانت ناقصاك شي حاجة نجيبها ليك ماشي مشكل .. المهم شوفي واللي بانت ليك ناقصة نمشي نجيبها
ردت بمجاملة : كلشي بان ليا موجود حى حاجة مناقصة لحد الساعة
رد : مهم حطي حوايجك ويالاه نخرجو الى فيك ما يخرج ناخدو الفراش والغطا اللي غيخصك
ابتسم وعنقها بحرارة وخرج من الدار خلاها بوحدها...جلسات فةق الكرسي حدا الطبلة كتحك فخادها بيديها و كتسرح عينيها فالدار بحزن واسى حتى بداتك تبكي وتنخصص .
ضؤبات دورة خفيفة مسحات الرفوف ونضفات داكشي علاش قدات وستفات حوايجها كل حاجة فبلاصتها , حل باب الدتر بالسوارت ودخل خاز تغراض كثيرة لقا ريحة زوينة فالدار ولمسة نضيفة دازت من تما , حط كلشي فوق الطبلة بينما خرجات عندو من الحمام خازة منشفة فيدها طلات عليه ووقفات حدا الأغراض كتشوف شنو جاب , حط الاغطية فالجنب وبدا يجبد قائلا
علي : هادي الماكلة اللي نقصيو ... وهادا لغطا بلا متغطاي بداك لفراش لقديم ديالهم
ردت متسائلة : غتبقا تجي عندي ؟
رد كيضحك : من نيتك كتسولي واش غنجي عندك ولا لا ؟ معوم غنجي عندك يوميا ... انا اصبلا كنخدم نص النهار دالصباح واستريلا كتقرا مكتخرج حتى لشية وعندها لاصال غنبقا نعمر معاها غير لعشيات , والويكاند حتى هوا لاصال... عندنا الوقت الكافي فين نجلسو ونخرجو , واي حاجة وقعات غنكون معاك راه الدار حدا الذار
رد بعد تفكير: غادي ندسها تشوفها على الأقل تعرفها ةمن بعد الى هي مابقاتنش بغات تشوفها عادي ماعنديش مشكل
اشراق : داكشي اللي كاين :: تعرف مها على الأقل واخا صعيييب بزاااف تقبلها من بعد هاد السنين كأم مي بعدا تعرف شكون وهي حؤة ... وانا متاكدة مغاديش تعلق بيها مستحيل حيت ماكبراتس معاها ومامولفاهاش... الدراري الصغار كيبربي الكبدة على اللي ولفو من تاصغر .... راخ كاين اللي بواليديه ومامربيش عليهم الكبدة ومولف جدته ميقدرش يتفرق معاها وعندو زايد ناقص مو تكون ولا متكونش ... هادشي كيوقع وحتى استريلا متقدرش تستغنا عليك واخا يوقع اللي وقع راه نتا الكل فالكل بالنسبة ليها والام كتبقا مجرد اسم او شخص فحياتها وصافي
رد:بصح عندك الحق ... مهم اما غادي نديها ةنشوف حتى ردة الفعل ديالها واخا عارف اريانا غادي دير كنازة فاش تشوفها مي غادي نخضر معاها خوا االاول تجمع ؤاسها راسها فاش تشوفها
اشراق : حسن سبقها ليها باش ماطيحش ليك ولا تسخف ولا توقع شي حاجة ماشي هي هاديك , الصراحة كن ماخفت من استريلا ماتبغيش ولا تعصب كن مشيت معاك
رد: جلسي رتاحي نتي دابا عيانة خاصك تنقصي من الحركة شوية كما قالت ليك الطبيبة ... غدا متمشيش غادي نعطيهم شهادة طبية وحفضي فالدار وؤاجعي فالدار وشوفي شي احد معتك يسيفط ليك الدروس راجعي هنا حتى تصحي شوية
ابتسمت برضى وقالت : صافس واخا اللي بغيتي
عنقها وقال : غنمشي دابا ونتي ردي البال راسك والى كانت شي حاجة عيطي ليا (غمزها) فالليل فاش تنعس استريلا نجي عندك (باسها )
ضحكات ةقالت : انشاء الله
عطاها قبلة وهبط لكرشها باسها كيضحط وهرها وناض خرج مشا فحالو خلاها فرحانة بأخر حركة دارها كدوز يدها على كرشها بسعادة
مع منتصف الليل كانت ناعسة في امان الله ففراشها وحيدة حتى رماتها الفيقة مخلوعة على لمسة يد لطيفة وحلات عينيها بابتسمامة قائلة
ردت بتساؤل : خليتي استريلا يوحدها فالدار مخفتيش عليها ؟
رد بالنفي : لا راه داير ليها كاميرا فالدار ةالبيت كنشوفها من تيليفون .... مغيوقع ليها والو .. مرة مرة غنطل عليها ةغالبا مكتفيقش كتجي مسخسخاا من ليكول لاصال للدار
ردت فدهشة : هي كنتي كتشوفنا من الخذمة وحنا فالدار
رد كيضحك : ولاكن عمرني شفت جهة البيت فين كتكوني نتي ولا تفرجت فيك اش كديري ... فين تباني ليا كديري شي حاجة ولا باغا تبدلي ولا مهم شي حاجة ماشي هي هاديك بالخف كنقلب مكنجلسش نتمنضر فيك
ردت : حلف بالله
رد بنية حسنة : والله مكنكدب عليك ... مهم حلينا من خلينا من هادشي فاات ومشا وولفتييني ولفتك ههه
عنقها كيضحك وطفا الضوء بدا توشويش والضحك والمداعبة والغزل كالعادة
بدات الأيام كدوز عند اشراق والوحم بدا يعطي فيها جهدو , الردان والسخفة و التعب من لا شيئ , كان علي فجنبها طيلة هاد الفترة وكل ليلة يخرج من دارو لعندها يجلس معاها شوية ديال الوقت سواء بالنهار او بالليل ومحاولاتو مع استريلا لا تنتهي ,لاكن هذه الأخيرة بقات مصممة على كلامها بدون تنازل , وهاد المعكاسات مخلاتاش علي يستسلم ابدا وبقا مصر على كلامو وكل يوم يحاول بدون جدوى .
بدات بطن اشراق تبان وبدات تقرب لموعد الولادة وكل يوم كيدوز كيخليها تزيد تقرب اكثر وتخاف اكثر . ككل يوم خرجات مع علي بسورفيت وشال وطلعات معاه فالسيارة فرحانة , نزلو فمول كبير ودخلو كيتساراو بجوج ويشوفو ملابس الأطفال واغراضه اللازمة . دخلات لمحل شادة لعلي فيدو ووقفات قدام ملابس البنات كتشوف فرحانة وقالت
علي : شوف هاد اللبيسة شحال فننة كتحمق
شدها بابتسامة وقال : سخونة شوية لا ؟ ونتي غتولدي فالصيف مغتجي فين يدخل البرد تا تكون كبرات عليها
بقا ساكتة مقات حتى كلمة واريانا كتحسس شعرها ويديها ها بعيون براقة , جراتها بلطف عنقاتها وزيرات عليها بقوة كتبي وتبوس خدودها من بعد هزت راسها باسى شافت فيها باسى قائلة
سمحي ليا بنتي سمحي ليا بزاف
دور علي عينيه وربع يديه كيسوط ويشوف بميوعة فارجاء المكان , شدات اريانا فيد استريلا بكل سعادة وتمشات هي وياها جنب الحوض كيرميو الخبز والفتات للبط , كانت ردة فعل استريلا وكانها تعرفت على صديقة جديدة لا غير , تقدم علي موراهم تابع استريلا وهي كتنقز عادي كان شيئا لم يحدث بل كل شوية ترجع عند علي كتجري تعطيه وردة وتمشي تحت انضار اريانا. جلسات حداه على كرسي كتنهد وهوا متكي عى رجليه كيسوف فاستريلا جالسة وسط الربيع تلسق الورد للمونيكة , ابتسمت اريانا وقالت بارتياح
شكرا علي ... شكرا بزاف بزاف متخيلش شحال فرحانة ليوم بحالي الى يالاه خلاقيت من جديد
ردت بسعادة : نقدر نشوفها فلاصال ؟ ... ك كنواعدك غنتفرج غير من بعيد
سكت مطولا كيشوف فيها ويشوف فاستريلا وحرك راسو بالإيجاب, عنقات ريانا بنتها بقوة وباست يديها وحناكها وجرها علي من يدها داها واريانا موراهم ساهية فيهم . هزات تيليفون بسعادة عارمة و تاصلات باشراق
تنهدت اشراق اللي كانت جالسة فقلب الدار كتراجع دروسها وقالت بابتسامة
مزيان هادشي اللي كنت باغا ... دابا تولف عليك شوية بشوية كما . كما (تنهدات باسى ) كما كانت مولفة عليا ,, ومتنسايش راه بنت باها وحلات عينيها فباها ومكتعرفش كولشي .. البنت ماشي كما باقي البنات اللي عندهم اللي يريخم ويقريهم , ماكبراتش فوسط كما باقي البنات وهادشي كياثر عليها . . زيد عليها كتبع عند طبيب نفسي ديال الأطفال ولا انا لا نتي لا علي غنقدرو ناخدو بلاصة الطبيب ديالها ولا نفهمو حسن منو, ماعلينا غير نديرو كما كيقول لينا والخاطر غادي يقاد كلشي نشاء الله
طلع فالسيارة بابتسامة كيشوف فاسريلا وقال : كي جاتك ماماك ؟
ميلات شنايفها من الجناب وقالت : ماعرفتش
رد كيضحك : ماعرفتيش ؟
ردت بعفوية : عاادي
رد : تبغي تشوفيها مرة أخرى ؟
هزات كتفها: مانعرف
علي : تبغي تمشي معاها شي نهار ؟
ردت بالنفي: لا نبق معاك انا مكنعرفهاش منمشي شمعاها
شاف فيها بسعادة وقال : ني بنتي انا ما بنت حتى واحد اخر ..احمم, عرفتي شون تلاقيت
تصدم فكلامها وبقا حال فمو غير كيشوف فيها وقال : فين غتمشي وتخليني ؟
ردت كتشوف فالزاج : نتا قلتي ليا مغادي ياخدني منك حتى واحد ومغاديش تخلي حتى شي ولد يقرب ليا ولا يبغيني عقلتي ؟ حنى انا غادي نكبر ونلقا هاد الولد وغادي نمشي معاه ونخليك كما درتي مع اشراق
تعجب فيها وتخلع من كلامها ةقال : فين تعلمتي تهضري بحال هاكا :
ردت كتخز كتافها : قالي جون غنكبرو غيتزوج بيا وغنمشيو للمزرعة ديال باباه وغادي نعيشو تما مع الطيور ومع الارانب وانا قلت ليه منمشيش ولاكن غدا فاش غنمشي ليكول غادي نقوليه نمشي يالاه
عبس وتلون وجهه وقال : علاش كتخضري مع جون فهادشي وكتخليه يدوخ ليك راسك بالتخربيق ؟ غير كيكدب عليك وكيخربق عليك فالهضرة واخر مرة تهضري معاه
ردت بتهكم : لا قالي غادي يبغيني كما كيبغي باباه ماماه وكيجيب ليها ليكادو والحلوى هاكااك قال ليا
تعصب علي وضرب المقود بيدو وقال: اخخر مرة تهضري مع جوون سمعتي ومكايناش هاد الهضرة نتي كتمشي تقراي مكاين لا زواج لا مزرغة لا عصافير وغدا غنمشي معاك ليكول نشوفو هادشي كي داير
وقف السيارة حدا الدار ونزلات كتبكي ودخلات كتجري للدار بقا هوا كيشوف قدامو عرف راسو فقد اعصابو معاها ومكانش خصو ينفاعل حتى لديك الدرجة , مسح جبهتو بصبعو بنرفزة كيسوط ونزل من الطموبيل بسرعة دخل كيجري
الحلم الأسود الجزء 29
محتوى القصة
التنقل بين الأجزاء