دخل موراها للدار مباشرة للبيت لقاها جالسة معنقة واحد نونوس ... غير شافتو دخل وهي تنوض بسرعة كتجري بواجد سبيبط ابيض وصاية قصيرة وقلبات وجهها فوق الناموسية وشعرها مدلي عليها . جلس فطرف الناموسية كيسوط مسح على وجههوتحنا عندها هزها هي ونونوس ديالها جلسها على ركابيه وهز ليها وجهها شاف فيها باسى وقال
كتغضبي على باباك ؟ ها؟ باباك اللي عمرو ميخليك ولا يخلي شي حاجة تأديك ... صافي جا جون قالك تمشي معايا غتمشي معاه وتخلي باباك كيبكي بوحدو ويعيط ليك , هادا خوا بابا اللي عزيز عليا وبابا اللي كنحماق عليه وكنبغيه ونضحي على قبلو ؟ مشات ديك الهضرة اللي كنتي كتقولي ليا دابا رجع جون حسن مني
حركات راسها بالنفي كتنخصص وقالت : لا
مسج ليها خدودها وقال شنو اللي لا؟ مابقيتيش كتبغيني ؟
عنقاتو بقوة وقالت كتبكي: لا انا كنبغيك بزاف منقدرش نخليك
باسها فخدها وقال : وشديك الهضرة كنتي كتقولي ليا قبيلا اول مرة نسمعها منك
ردت : سمح ليا بابا منعودش اخر مرة
رد باسى : الى خليتيني هي مكتبغينيش
شدات ليه وجهه باسف شديد وقالت: لا كنبغيك شوف (حطات يدو عى قلبها كما كيدير ليها هوا ) شفتي شحال كنبغيك
عنقها بقوة كيبوس راسها وماكرهش يسرطها وقال
نتي راه الحب ديالي نتي (بعدها شوية ) اجي شنو كيقول ليك دون فليكول ؟
ردت بعفوية ؟ كيقول باللي كيبغيني و..
شاف فيها باشمأزاز : كيبغيك
ردت : كيبغيني و غنكبرو نتزوجو ونمشيو للمزرعة نبقاو مع العصافير والخيل قالي نبقاو مركبو على الخيل ونمشي نتساراو و نتكون عندنا حديقة كبيرة ديال الورود نلعبو فيها وغيشري ليا بزااااف ديال الألعاب و عندهم الحمام والبابغاء وكوولشي وغادي يشري ليا واحد الكسوة حمراء وفيها الورد اخضر
رد : اه فخ بغاو ينصبوه ليك ويخليوك فالغابة ... شفتي انا غدا غدا غنمشي معاك عند داك جون نشوف علاياش كيقلب ..ااي هاي هاي العصافير قالك
ردت : ولاكن ابابا جون عزيز عليا او حتى انا كنبغيه
رد فصدمة : شناهوا
تكا راسو على رجلين اشراق مهموم فالدار كيتنهد وقال : يالاه شوف دابا فاش ولينا
حطات يدها على شعرو كتحك ليه وقال كضحك: كتبغيه كصديق وصافي مالك مكبر الموضوع
ربع يديه هز عينيه فيها وقال : صديق هه... جالس يبني ليها فالاحلام الوردية وهي كتخيل ... الى بغاتو صديق من هنا واحد ثلت سنين غيقول ليها انا كنبغيك وانا واجي ننزمرو ... كيبداو الفعايل هنا من طناش ربعطاش سطاش فهاد البلاد تفو ... تلقاه كيتفرج فافلام اباحية وعندو عادي مولف وغادي يخرج ليا على البنت هاد الزمر هادا
بقات ساكتة كتشوف فيه وقالت : هي دابا راه مافاهمة والو وجا الوقت فين تفهمها وتوريها باش توعا ... ضاروري تا هي مغادي يعجبها شي واحد شي نهار وتبقا تشوفيه رته البنت داخلة سن المراخقة ولا نتا مادزتي منو ماحسيتي بجنابك ... غير صبر دابا شوية تولي باغا دير عكار باغا تبدل الشكارة وتهز الصاك... حمد الله طاحت مع هاد جون ولا جنون مسكين كيهضر على العصافير والورد , شتي اللي قدها اعلي راه كيعرف العجب والبنات قدها راه يصدموك غا هي مسكينة معارفة والو ومعارفها محدودين ونتا معمر ليها الوقت وحاضيها كي خيالها همك الوحيد اريانا معمر ليها راسها بننوسات والكوزينات ... قدخا راه بداو كيتصاحبو والعام الجاي غطلع للاعدادي وا فكها معاها ديك , عاد غذخل للمسكي ديال بصح مالنا معارفينش الاعدادي كي داير ... ايكول ديال المراهقين جامعة الأنواع والاشكال هاللي بحال استريلا هاللي كفس من استريلا مكلخ كااع الواد اللي جا يديه مكيفهم والو , عاد ارا لينا النوع الخطير اللي كيطير واللي كثيير غالب فالاعدادي وكياثرو على لخرين الدراوش, ونتوما هنا كتااار منا حنا ... هنا غيبقاو يضحكو عليها ولا يدور بيها شي حمار يبغي يتفلا عليها ولا ياخدها تحدي بين صحابو .. قري بنتك شنو خصها دير وتكون فاهمة وواغية حسن ميج يشي واحد ولا وحدة تبين ليها طرقان اخرين هي ماعارفاهمش كاع واش كاينين ,, خصها تعرف كولشي بالخايب بالزوين ومنك نتا اللي كتيق فيك ... خلعوك غا الارانب والعصافير هه... مزال تشوف العصافير اللي غيدورو ليك براسك كي دايرين
فيها مخلوع وقال : شنو كتقولي واش انا جيت عندك كنشكي عليك ونتي كتزيدي تكملي عليا؟
دوزات يدها على شعرو بلطف وقالت : ماشي كنزيد على مابيك راه كنقول ليك هاكا باش تعرف تصرف وتعرف شنو كاين من هنا لقدام ماشي تبقا فدار غفلون حتى تجي كشي صدمة شي نهار
ردت بهدوء : أولا اخسن حاجة درتيها دابا بعدا هي عمرتي ليها وقاها ورجعات مهووسة بالتزلج , دابا خاصك تعلمها تصاحب معاها وخالي كاشي بيناتكم عادي ماديريش الحدود باش اللي كانت تجي تعاودها ليك بلا متخاف ماووالو راه ديك النهار هضرنا فخادشي وقلت ليك الخوف راه ماعندو باش ينفعك , اصفي قالت ليك كنبغي جون قول ليها مزيان ماشي تغوت عليها .. من بعد دير اللي فراسك وعلمها بالشوية وبالحيلة ماشي بالعنف والصدع . نتا كتجي حتى لبنتك وكتلف مكتبقا عارف لا ماتقدم لا متوخر
تنهد ساكت كيسمع ليها وهي كتوريه وتفهمو وطبق كلامها بالحرف على استريلا وهوا متكي حدا التلفازة داير فيلم كارتوني ليها ويهض رمعاها بشوية
شفتي ابابا الحب هنا هوا هادا اللي كيمثلو علينا هادو , الحب الحقيقي اللي كاين هوا حب الواليدين ليك , حب باباك اللي كيخاف عليك وباغي يشوف احسن وحدة فهاد العالم وفرحانة , اما هادشي ديال الحب اللي بين البنات والدراري راه غير لكدوب وحرام
ردت بعفوية : علاش حرام ؟
رد : حيت كيوقعو شي حوايج خايبين بين البنت و الولد ربي كيكون ساخط عليهم وكيغضب عليهم وهنا فكندا راه عندهم كولشي يجوز ولاكن المسلمسن بحالي وبحالك مكيتبعوش هادشي
بقات كتشوف فيه مستغربة وهوا يدور فعينيه ويفكر كفاش يشرح ليها وناض جلس ربع رجليه قدامها وشد ليها صبعها وقال
شفتي دابا البنت كتكون عندها واحد الغشاء سميتو البكرة ياك فهمتي ... كيكون رقيق وكيكون فالجهاز التناسلي ديالها , وداك الغشاء سميتو البكرة وماخصوش يتحل حيت ربي دارو ليك هدية تحافضي عليه ةتبقاي شريفة ونضيفة متخلي حتى واحد يلوت ليك شرفك ولا ياخدو منك باسم الحب فهمتي ابنتي
رد : نتي مكديريش , ولاكن غتكبري وتقدري تغلطي ... الى غلطتي غادي يتحسبو ليك الاغلاط ديالك . من الساعة اللي غتبلغي فيها وتصومي معايا كما كنصوم انا غيبداو يتحسبو ليك .. مابقا ليك والو وتصومي معايا
ردت : كنصوم معاك ديماا
رد : لالا ماشي هاكاك ماشي نهار تبغي تصةمي تصةمي نهار متبغيش متصوميش ,,, لا غتولي تصومي حيت صافي بلغتي .. شوف ابابا خاصك تقراي داك لكتاب اللي جبت ليك على البلوغ ضاروري .. غادي تقرايه وغادي نسولك شي أسئلة فيه وخاصك تجاوبيني .. قرايه كامل يالاه جيبيه نقراوه بجوج كاع باش اللي مافهمتيهاش نشرحها ليك
ناضت من حداه كتجري للبيت جابت الكتاب وجلسات حداه مكمشة . عنقها بيدو وحل لكتاب بداو من الصفحة الأولى كيقراو بجوج وكل شوية تهز راسها فيه تسول وهوا كيفسر ليها .. لاحظ انها بدات تستوعب شوية بشوية وتفهم وبفقه دهنها واخا لكتاب غليض كيحتوي على مواضيع كبيرة وكثيرة الا انه حدد ليها عدد الصفحات اللي تقرا وجلس مقابلها
فالجردة على الكرسي فنهار مشمس جلسها على رجلو والكتاب فيدو وقال بابتسامة كيشوف فعويناتها الجميلة
شوفي ابنتي , نتي بحال الوريدة زوينة وكولشي باغيها يقطفها , وحدهم يشمو ريحتها وتدبل فيديهم غيرميوها .. ولاكن الوريدة الى بقات فبلاصتها ما قطفها حتى واحد كتبقا زوينة وكتفتح وكتزيد تبهر الناس وتعطي ريحة قوية كتجدب كثر أي واحد شافها , كاين فرق بسيط بينك وبين الوردة هوا نتي تقدري تحافضي على راسك بيديك ... ولاكن الوريدة لا ماعندها عقل مسكينة ماعندها يدين دافع على راسها ... وانا كنخاف عليك ابنتي بزاف وكنشوف فيك غادية وكتكبري قدامي وريحتك كتعطي وخايف يضحك عليك شي واحد (عنقها وطل جمعها بيديه ) عيب ديري شي تصرف غير أخلاقي وحشومة تصرفي تصرفات ملايقاش بتربيتك ... الى شي نهر مافهمتيش شي حاجة ولا تلفتي ولا ماعرفتي شنو ديري ماشي مشكل اجي عند باباك غتلقايه ديما كيتسناك ويشرح ليك ويفسر ليك أي حاجة نتي محتاجاها ... ماشي عيب ديري أصدقاء ... ماشي عيب يبقا جون صديق ليك . ولاكن الى لاحضتي باللي تمادا معاك وبدا كيدبر تصرفات غير أخلاقية اجي عندي انا نوقف معاك و نحل ليك المشاكل ديالك بلا متخافي من حتى حاجة صافي ابنتي
ردت بالإيجاب: صافي فهمت ابابا
رد بابتسامة : فهمتي دابا معنى البلوغ ؟ فهمتي كفاش الحمل كيوقع للمراة البالغ مع رجل بالغ .. وفهمتي شنو كيوقع بين المرى والرجل وفهمتي معنى النزوات وشنو كتعني المراهقة ؟
ردت : فهمت ابابا
حل لكتاب وقال : شنو قالو على النزوات اللي كتمر بيها البنت فهاد السن والاحاسيس اللي كينتابوها ؟
رد : بلعكس واحد من الاعراض اللي كتبدا تبان فالاول هوا تاثير الناس عليك ونتي اثرات عليك سمنتا بزاف وسمعتي كلامها وجريتي على اشراق , ماكنتشي قوية بما يكفي باش تقاومي تاثيرها عليك ودغيا وليتي مزاجية وهانتي شفتي شنوكتبو ليك هنا اهل العلم وقالو باللي تغير المزاج بسرعة من الاعراض ديال المراهقة ... ونتي دغيا تخليتي على المبادئ ديالك وخرجتي وحدة كانت كتعاملك مزيان بلا متحشمي كاع ورميتيها برا مسكينة وهي مدارت ليك والو ومقالت ليك والو , هادا هوا الخير ؟ نتي من النوع اللي كينسا الخير ويردو بالشر ياك
ردت بسرعة كترمش : لالالا انا ماشي منهم ابابا لا ااا
ربع يديها بلا ميسكتها خلاها كتبكي والندم كياكل فيها والعافية شاعلة فصدرها وكتعصر قادامو وقال
هاكا غتبقاي ديري من خنا لقدام ؟ هاكا غتواجهي مشاكلك ؟ حتى تغلطي عاد تبطي وتندمي ؟ فين هي القوة علاش هضرنا وقلنا راه سن المراهقةة خصها قوة كبيرة نتحكمو بيها فراسنا ... شفتي شحال سن المراهقة صعيبة ؟ شفتي شحال هي ماشي ساهلة ؟ شفتي علاش خاصك تكوني دكية وقوية باش ماديريش غلط وتبكي من بعد فاش تمشي ديك النزوة ؟ فهمتي معنى النزوة دابا ؟ هاهي دازت واثرات عليك وعدباتك
هبطات راسها فالارض كتبكي بحرقة ةقالت : منعاودش ... منعاودش نستسلم ابابا اخر مرة جيب اشراق عندنا للدار غير جيبها
بقا ساكت كيشوف فيها وقال: تقدري تشوفي ليها فوجهها بحال الى مادرتي والو ؟ ... تقدر توقفي قدامها بوقاحة وتشوفي فيها ؟
ردت بالنفي كتنخصص: لا غادي نطلب منها السماحة هوا الأول
رد ببرودة : وطبعا هي غادي تسامحك حيت كتبغيك وحنينة ... ولاكن ديك الشهور ديال العداب اللي عاشت هي فالزنقة وعشتيها نتي فالدار شنو نديرو فيها ؟ كفاش غنعالجوها وكفاش نساوها ؟
ردت كتبكي : غنعطيها بيتي تاخدو و دبدوبي كاري حتى هوا
رد بابتسامة مخفية : وفين غتنعسي نتي ؟
رذت بدموع : حدا كاتي
ابتسم وجرها عندو يسكتها وعنقها بقوة كيمسح ليها دموعها وقال : الى بغيتي نعالجو داكشي اللي وقع خاصك دفعي الثمن ديالا لخطا ديالك وخاصك تعرفي باللي أي نزوة دازت وغلطتي فيها غيكون الثمن ديالها غالي ... واشراق مابغات لا بيت لا كاري .. اشراق بغات اللي يبغيها كما هي كتبغيه ةيبغي لبيبي اللي فكرشها حتى هوا ... ونتي خاصك تقبلي البيبي ديالها حيت ماعندو حتى دنب وخرجتيه هوا وماماه للزنقة ومادارو ليك والو ... بلعكس بغاوك وبغاو يعيشو معاك نتي ... ولاكن نتي واش قوية لدرجة تصلحي غلطك بهاد الشكل ؟
رن ليه الهاتف وهوا كيشوف فاستريلا ويتسنا ردها وجبد تيلي لقا اشراق على الخط ورد
قطع وناض بسرعة واستريلا كتشوف فيه مخلوعة , دخل كيجري لداخل ودخلات موراه كتسول تابعاه
شنو شنو ابابا شنوو ؟ شنو وقع ؟
رد بسرعة كيلبس : لبسي حوايجك اشراق فيها الوجع غنديوها لسبيطا ريالاه دغيا
مشات كتفتف على حوايجها لبساتهم بسرعة وخرجات دايرة تقاشر كتقلب على سبرديلتها ... زدحات وراها الباب كتجري وطلعات موراه فالطموبيل وقلع كيطير .
فتح الباب ودخل كيجري لقا الصاك ديال الجوايج مطويين وحدات أغراض أخرى ودخل كيقلب عليها ... خرجات من الحمام بسورفيت وكريشة قدامها وقالت بالم
جاني الوجع اعلي ...
شد ليها فيدها مخلوع وقال : يالاه نديك لسبيطا ريالاه
قالت : غنولد صافي كنحس بوجع الولادة ماشي الوجع اللي كيجي مرة مرة ويمشي
رد بارتباك : ياك عطاتك الموعد باش تفتحي علاش جاك الوجع دابا ؟
قالت شادة فضهرها : الحركة والمشية كل صباح هما اللي دارو ليا هاكا واقيلا
تلفتات بعفوية وتعب كترمش جهة البهو وهي تلقا استريلا واقفة حدا الباب شادة فيدها مع بعضياتهم فخجل واسى ... هبطات راسها ببطئ شافت فالارض .. نسات اشؤاق وجعها وحريقها وبقات كتشوف فيها وشافت فعلي اللي تلفت جهتها وغمزها . شدات فكرشها تنفسات مزيان ومشات بابتسامة وفرحة شافت فاستريلا اللي ماقدراتش تهز عينها فيها . جلسات حداها فوق واحد الكرسي حالة رجليها وجراتها بسعادة في حين دورات استريلا وجهها للجنب بخجل والدموع كتراكم فعينيها وتنخصيصة كطلع متابعة , حلات يديها باسف وعنقاتها بقوة كتبكي وتاسف واشراق كتمسح على شعرها بلطف وتبوسها وعلي مربع يديه واقف بعيد كيشوف فيهم . بعدد كثير من المرات طلبات استريلا السماحة وكانت اشراق احن من قلب الام معاها وكانت فرحتها كبيرة نساتها فحريقها . . بعدات شوية شافت فيها وقالت كتمسح ليها دموعها
صافي متبطيش احبيبة ديالي موقع والو غادي نساو اللي فات ونبداو صفحة جديدة (حطات ليها يدها على كرشها ) شوفي .. عندي هنا بنيتة زوينة بحالك غتشوفيها ليوم نشاء الله , وحتى هي بغات تخرج قبل الوقت باش تشوفك وتنوانس معاك ... واش قابلة بيها ؟
بقات استريلا ساكتة كتشوف فيها والدموع كيهبطو وحركات راسها بالإيجاب . هنا قرب علي وجلس القرفصاء وشد ليها فيدها وقال بحب
واش كاين شي واحد كيكره خوتو ؟ الخوت شي حاجة زوينة فهاد الدنيا ونتي جاتك بنية تمشطي ليها شعرها ودفريه ليها حسن من المونيكات اللي عندك , ومغاديش تخرجي من بيتك .. غادي نرحلو لواحد الدار كبيرة وغادي يكون عندكم بيت واحد كبير فيه ناموسية ديالك وديالها والعابها غادي تشاركيهم معاها .. غادي يولي عندك دود ديال ليزانيف فالعام ماشي غير واحد ... والدار كبيرة غتخزنا انا ونتي واياقوت واشراق وفيها حتى لابسين تعومو فيه وجردة كبيرة ..مغنبقاوش فدار صغيرة غنمشيو لفيلا
من هاد الكلام كامل اللي قال علي شدات كلمة وحدة وقالت باستغراب
ياقوت ..
ابتسمت اشراق وقالت : سميتها ياقوت
ردت استريلا : مابغيتش ياقوت بغيت واحد السمية وحدة أخرى
مدو ليها مولودتها فلبيسة زهرية كتحل عينيها بصعوبة وتشوف فاشراق ... يديها مغطيين وطريبيش ابيض ورجيلات مغطيين .. بدموع الفرحة ضماتها اشراق لصدرها وباست جبهتها وبدات تامل ملامحها البيضاء وعيونها الجميلة وبشرتها الناعمة حتى دخل علي فرحان والورد فيدو وقدامو استريلا هازة دبدوب متوسط الحجم فالزهري وشافو فيها لقاوها كتبكي وضحك فنفس الوقت ... قرب علي ليها بسعادة حط الورد حداها وهز استريلا جلسها حداهم فوق السرسر ووقف هوا حدا راس اشراق من بعد ماباس ليها راسها وقال
كي بقيتي ؟ شوية ؟
حركات راسها بالإيجاب: الحمد لله فين مشيتي؟
رد كيدوز يدو على خد المولودة بحنان : مشينا جبنا ليك لكادوه هه.. ندخلو عندك بيدينا خاويين ؟
ردت كضحك : نتوما هما احسن هدية
رد بسعادة : راه بقيت جالس حداها متحركتش حتى غسلو ليها وبدلو ليها وصورت ليك كلشي بتيليفون , وجيت معاهم حتى لهنا حطوها حداك ونتي ناعسة عاد خرجت انا واستريلا ... كنتي مخلوعة على والو... ها بنتك حداك وماوقع ليها والو.. ههحميتي السوق عليهم كتغوتي بنتي بنتي بحال اى غياكلوها ليك
اشراق : راه تخلعت وصافي والله كنت غنموت بالخلعة عرفتي كن قدرت نوض كن تبعتهم ههه ... خفت يديوها ومنعاودش نشوفها
علي: مكاينش اللي يقيسها ليك بلعكس تخلاو فيها ... انا واستريلا كنا حاضرين الوقت كامل
رد كيعض شنايفو : وشنو فيها ولدي ليا فاش تسالي ماشي دابا ... حتى تسالي لقراية
اشراق: وشحال بقات عماين ... ها عام داز
علي : من بعد ... عماين كافية تكون صوفيا كتمشى وجيبي ليا شي ولييد
ردت بسخرية : ويلى جاتك البنت يالاه
رد : نبقا نتسالك الولد احبيبة مكاين حتى مشكل ... جيبيه على خاطرك
بقات كضحك وهوا كيضحك فرحان كل شوية يطل على صوفيا ويعنق استريلا وشي مرات كيجمعهم بجوج عندو ويهض رمعاهم بجوج . عطاها البنية ترضعها ووقف حداها كيشوف فيها وقال
تنهدات وبعدات عليها الكتب وغطسات فنوم عميق في حين حط البنية فبلاصتها ناعسة ةتسرح على ضهرو مخلي الضوء الخفيف شاعل
فنص الليل ناض بسرعة بعد ماسمع صوت البنية كتبكي وهزها كيراري بيها وناص جهة اشراق اللي مافيقها لا صوت لا حتى حاجة وحطها حداها وحل ليها الصدايف جبد البزولة بشوية ... حلات عينيها مخلوعة شافت فيه وهوا يقول بصوت منخفض
غير انا بغيت نعطيها ترضع
رمشات كتشوف فيه بزز وحلات القميجة ليه وهزات يديها فالسما سخفانة خلاتو مقابل البنية حتى نعسات وردها لبلاصتها بلا متحس اشراق بوالو وغطاها
صبح الحال وصبحات اشراق ففراشها كتراجع ... حط ليها الفطور حداها فالبلاطو وجلس شاد تيليفون كيلعب فيه حتى فاقت صوفيا ومشا هزها كيضحك معاها
علي : فقتي .. صبااح النوور ... صباح الحب اجي اجي عند بابا .. اجي نشوفو شنو درتي بااينة درتي خيخي فحوايجك
تلفتات اشراق شافت فيه وقالت : جيبها نبدل ليها جيبها
حطها ليها قدامها وجاب اغراضها حطهم ليها وخرج مشا لبيت استريلا لقاها باقا ناعسة رجل فجهة ورجل فجهة أخرى , تكا حداها كيفيقها ويضحك حتى حلات عينيها وتقلبات جيهتو عنقاتو
علي : نوضي تفطري ابنتي براكة عليك من النعاس نعستي بزااف
قالت بسعادة : وفين هي الدار اللي قلتي فيها لابيسين وغادي نمشيو نرحلو ليها
حيد ليها العمش من عينيها وقال : غنرجعو من المغرب غنمشيو ليها نيشان مغاديش نجيو لهادي .. وختاري ديك الساعة البيت اللي عجبك
عنقاتو كضحك فرحانة وناضت كتهز سروالها وتجري مشات للبيت عند اشراق كتعتود ليها شنو دار بينها وبين باها ... دخل علي لقاها كترضع وهز ليكوشة خرجها لاحها ورجع جلس حداهم
قطع وحط تيلي حداها ورجع سرح رجليه وسط بناتو كيتفرج وكل شوية يعطي الرضاعة لصوفيا فاش كتحرك وتبقا تعرنن
انتهت الامتحانات وانتهت السنة الدراسية بسلام وسطعات شمس فصل الصيف بدفئها ةخيوطها الدهبية بعد طول انتضار وبعد عدة شهور ثلجية, فاول أيام فصل الصيف بدات اشراق وعلي بتجهيزات السفر الى ارض الوطن بكل فرح وسعادة وحماس وشوق كبير للقاء الاحبة و الأقارب اللي بدورهم كيتسناو وصولهم بفارغ الصبر . اول الأشياء بداو بيها هي جمع جميع الأغراضهم فالدار و خرجها علي وصلها للدار الجديدة اللي غيمشيو ليها مباشرة بعد العودة من السفر .. بقا ليهم فقط أغراض السفر اللي جمعات اشراق وحطاتهم فالبهو هما والشنط الفارغة .. ككل عشية كتهز بنتها فالحمال ديالها على صدرها بلبسيو جميلة وباندة على راسها ملونة مرة فراشة مرة وردة وسبيبيط فرجليها وتلبس هي السورفيت ديالها وتلوي عليها شالها وتخرج مع علي واستريلا لشراء بعض الهدايا للعائلة وطبعا الملابس والاغراض اللي غيحتاجوها طيلة فصل الصيف , بسعادة كبيرة عنقات اشراق علي من اللور وسط المحل التجاري كضحك وبنتها فالكروسة ديالها حداهم وقالت بلحن
عليييي ,,, غنديرو السبوع ياك
رد كيقلب وسط القميجات ديال الرجال : ماعندك ماديري بشي سبوع دابا واش نتي قدك قد السبوع
بقات تابعاه من قنت لقنت وهوا كيتهرب حتى عتارف ونقزات عليه بتعنيقة وسط المحل فرحانة وبدات تجهيزات ديال بصح خرجوه من المول شاد عرام ديال الفاكتورات كيحسب فيهم وهما قدامو كيضحكو هازين الصيكان والمشتريات ومعمرين كروسة صوفيا حتى هي وحملوك لشي فالطموبيل
طلات عليه اشراق من اللور : والله مسبدك دايرو بغيتي ولا كرهتي ههه
علي : مابقاوش عندي لفلوس
اشراق : تسلف
علي : مكنتسلفش
اشراق : ضبر راسك
شاف فيهم مصدوم فالمرايا : اوو واش عرفتي لفاكتورة شحال خرجات فيها راه واخا تبغيو تحلو بوتيك متوصلوش لداك العدد
قالت كضحك : راه ولينا تلاثة دابا بناتك بوحدهم راه ميزانية
رد كيدور راسو : والله ماواصلين ميزانيتك نتي بوحدك ... غا نتي راه سفيتي لينا الجيب
طلات عليه من اللور دوزات يدها على لحيتو وقالت بدلع : أمم ومنستاهلش ؟
بقا كيشوف فيها فالمرايا مخرج لسانو كيفرنس وقال : تستاهلي .. (غمزها ) واننن شي ولييد
هربات اللور : اويلي ماشي دابا ... ياك عاد كنتي كتشكا من المصاريف
خرج لسانو فالمرايا شاف فيها كيفرنس وقال : دري راسك غلطتي .. عمرني نتشكا غير كنضحك
ردت : لااالا الناس كيشربو حبة فالنهار انا نشرب سمطة
هز حاجبو : يااك .. دابا وليتي كتعرفي للاحتياط
ردت كضحك : راه باقا البنت صغيورة
رد كيعض شنايفو ويغمز : تخلي راسك عندك توام
اشراق : هههه المهم ... حتا نرجعو ونشوف
حل عينيه : حلفيييي
اشراق : وصافي حتى نرجعو عاااد نفكر
علي بحماس : واحديني بعدا
ربعات يديها : لا ... الى درتي ليا خاطري فهاد التسفيرة غنرجعو ندير ليك خاطرك
قال مخرج لسانو : ياااك ... واخا لالا عقلي فيها
دورات راسها للجنب كضحك وهوا غادي فالطريق وكيشوف فيها فالمرايا ويغمزها ويتبوحط عليها ويطلب غير بعينيه وهي كتهز كتافها وضحك عليه
بصوت المرشدة فالمطار اتاجهو المسافرين مباشرة فصف واحد لولوج البوابة الؤدية مباشرة لباب الطائرة وبدا كل واحد ياخد المكان ديالو فالطائرة فهدوء وانتضام الى حين عمرات كلها بالركاب وحان وقت الانطلاقة , تلفتات اشراق جالسة فمقعدها بلباس راقي وشال راقي على راسها حاطة مكياج خفيف على وجهها و رالئحة جميلو كتفوح منها .. شدات فيد علي بابتسامة وقالت بصوت هادئ
علي عرفتي شنو تفكرت ... تفكرت اول مرة نجي فيها لكندا , أصلا اول مرة نكركب فيها فطيارة فحياتي... ناري على إحساس جاني دابا غريييب ... كنتفكر فاش كنت فالمغرب ووصلو معايا المطار وركبت فالطيارة ةتلاقيتك هنا فهاد المطار .. هادشي بحال الى ةقع البارح
ابتسم وقال كيشوف فمجلة : توحشتي البلاد ؟ ... هانتي مابقا ليك والو وتكوني تما
تنهدات وعييها مغرغرين بسعادة .. فرحانة بزاف متخيلش الإحساس ديالي دابا ... كفاش جيت وكفاش غادية .. غيشوفو بنتي وغنشوفهم ... غنشوف العائلة كلها لا اللي قالها فيا زوينة لا اللي قالها فيا خايبة
دوز يدو على فخدها وقال : نساي دابا داكشي فكري فختك مك باك اللي غتلقاي اللولين فالمطار كيتسناوك ... حتى هما غتلقايهم باتو لبارح بلا نعاس ... الغربة راه صعيبة واخا العيشة فيها زوينة ولاكن راه كضحي بعائلتك ... مزال غتشوفي الإحساس اللي غيجيك ونتي راجعة اما دابا راكي فرحانة ةنتي غادية ... فاش كتكوني راجعة اللي صعيبة ... كنت فاش كنرجع كنلقا الدار كحلة ةكنمرض وكنقنط وشوية بشوية عاد كنولف على الرورتين
مابغيت نتفكر حتى حاجة دابا بغيت نتخيل غير لقائهم فالمطار وديك اللمة فالدار والجلسة فالسطح فلعشية مور العاصر على اتاي والزريعة والميمة كتنكر علينا ... الصاراحة ماكنتش كنطيق نكيرها كانت كتعصبني هي وجدي ولاكن دابا توحشتهم بزف مكرهتش ينكرو عليا شوية هه
دار يدو مور ضهرها وقال : كنت غنقول ليك نشري وشي دار فالمغرب باش فاش نمشيو لتما نجلسو فيها وحتى دراري يلقاو راحتهم
ردت بسعادة ودهشة : اهااه بصح ؟ يا سيدي كتخطط غير بينك وبين راسك زعما كتجيبني حتى اللخر عاد تقولها ليا ... أصلا الدار خاصها تكون عندك من شحال هادي ماشي حتى لدابا راهم خدامين غا فالمعامل ودارو الديور والفيرمات والعجب
رد بسخرية : هادوك راه كيضربو ليباط والروز صباح وليل ماشي لكروفيت احبي وولادهم كيقراو مع الدولة ماشي بحالك نتي واستريلا كتقراو ليا الشينوية ولاصال من لفوق خمسة دالمليون كتمشي فالشهر مكنشوفهاش
رد : المهم هوا النية نتي ديري اللي عليك وصاافي لاجات مرحبا بيها العام الثالت نشاء الله غادي تعاودي المحاولة ههه هاد الثلت سنين ديالك ديال لقرايا حملي فيها كما درتي لصوفيا
غمزها ورجع للمجلة ديالو خلاها كتفرنس بوحدها وتشوف فالزاج كتفكر وتعاود حساباتها . قرب لودنها بصوت منخفض وقال
الغربة كتبغي الوليدات باش متحسيش بيها ومتحسيش بالقنط هانا غير قلت ليك هه
حطات الطائر على ارض الوطن بعد ساعات من الطياران فالجو وخرجو المسافرين كل واحد متلهف يشوف عائلئتو ومنهم اشراق اللي كانت فقمة الساعة وهي خارجة هازة بنتها بين يديها وملبساها لبيسة صيفية وسبيبيط واستريلا قدامها بسالوبيط دجين شورط قصير وتيشورط والدفيرات فشعرها وسبرديلة بياضاء وصاكادو صغيور فضهرها وعاد علي موراهم بدجينز وتيشورط وشار عرام ديال البالز قدام وشي فوق شي , فقاعة الاستقبال وهي خارجة تابعاه قلبها اللي غيسكت بالفرحة لقات مها واقفة بجلابتها وباها وخليج معاهم باقا كما هي والفورمة رياضية ومعاهم اخت علي حتى هي الهام وراجلها .. طلقاتها خليج بواحد التغريتة وسط المطار فاعلة تاركة حتى كولشي دار عندهم كيشوف و مشات كتجري عندهم تعرضات ليها خليج اللولة عنقاتها بقوة حتى غبرات البنت بيناتهم وباو يتباوسو ويتعانقو في حين عنقات الهام علي بقوة فرحانة ةاستريلا تاهيا وبدا العناق الحار بين العائلة والبكاء واجا ماسكت لاللة نزيهة من البكا , اما السي عبد الغني مابحالو حد فالفرحة يدور لاشراق ويعنق فعلي وهما خارجين من المطار . خدات منها خليج البنية هزاتها فالسما وهبطاتها عندها كتبوس وعطاتها للاللة نزيهة اللي بقات تجر فيها بغات تحيدها ليها . ركبو كاملين كاملين فسيارة الحاج عبد الغني ومشا علي واستريلا مع الهام وراجلها فسيارتهم وانطلقو مباشرة لدار السي عبد الغنيو
مع الدخلة ديال الباب لقاو الجدة واقفة بعكازها والجد كيطل ويتسنا من السرجم .. بدا العناق الحار مجددا ودموع الفرحة كتهبط وتجمعو فالصالون كاملين ديال الدار مع اذان صلاه المغرب وصوت الضحك والقهقهة كيتسمع حتى للشارع . دخل عماد مع بيازيد للدار وطلو على الصالة لقاو العائلة كاملة مجموعة . . ناضت اشراق من بلاصتها بسرعة عند بيازيد كتبوس فيه وتعق في حين بد العناق الحار بين علي وعماد وتجمع الكل فالصالون كيتجمعو ويضحكو . اما صوفيا مابقاتش بانت كاع لاشراق كل مرة يهزها واحد , مرة عمد الجدة مرة عند الهام اخت عماد مرة عند الحاجو وخليج حتى طابو ليها حناكها بلبوسان , اما استريلا تخشات وسط الكوزينة كدور ودوق وتنقب فانواع الحلويات المغربية واللوز مقلي والبرقوق معسل وخليج كتمد ليها وتعطيها بكل فرح وسرور , حطو العشا ةتلمات العائلة على الطبلة فجو فكاهي ونشيط مكاين غير قولها وضحك عليها وشدو فلحاج عبد الغني بالمزيان كيضحكو .. اما الحاجة والحاج تيقو الضحك وكيردو بالجدية الشيئ اللي خلا الجميع كيموت بالضحك على مائدة العشاء .
انتهى العشاء وغادرت اخت علي وزوجها من بعد ما عرضات عليهم للغدا كاملين فدارها فاليوم الموالي وكتاكد على الجميع يحضر ومشات فرحانة هي وراجلها , وكدلك عماد قصر معاهم حتى تأخر الليل ومشا لدارو في حين جلسات خليج فدار باها تشبع شوقها من ختها , اما علي فخواو ليه بيت اشراق وخلج قديما وجهزوه ليه بناموسية كبيرة ودخل صلا فيه وتكا هوا واستريلا يرتاحو من عناء السفر , خلات اشراق حتى خوات الدنيا ونعس الحاج والجد تا هوا اما الجدة غير شافت لبالز غاديين للصالة عرفات القضية فيها الحلوة دالخاريج وحطات تسبيحها وناضت تبعات الشوانط للصالة وفرشات فالارض واحد الكاشة رطبة وربعات فوقها مقابلة معاهم
ربعو رجليهم كاملين فوق الزربية فالصالة بالبيجامات وحيدات اشراق الشال فوهات شعرها حداها الحاجة هازة صوفيا فيديها كتراري بيها وفرحانة بيها , حلات اشراق الشنطة الأولى ديال الكادوات عامرة حتى للفم قدامهم وبدات تجبد بشوية وتحط قدامها فالهدايا مغغطية بميكتها البض فيهم باين والبعض مغطي فكارطن وميكات وخليج حداها كتسول على كل حاجة شنو فيها . بدات بيها اشراق هي اللولة وجبدات ليها بعض الهدايا وقالت
هادو ديالك
شداتهم خليج حلاتهم لقات فيها مجموعة ديال الروائح عبارة عن قرعة ديال الريحة بزيتها وكريمها وبخاخها من ماركة عالمية وكارطونة مربعة فيها حداء رياضي وسورفيت نايك وعلبة مكياج معروفة مع العديد من المساحيق التجميلية والاغراض النساءية وقالت بسعادة
الله شحال غزالة الله يعطيك الخير ... ونيت ديك سبرديلة ديالي كلات الدق يالاه كنت غنشري وحدة ... لالا غنمشي نشري وحدة وهادي نحافض عليها
طلات الجدة على داكشي شي فهمات وشي مافهماتوش ورجعات بضهرها اللور ساكتة كتينا نوبتها , شافت فيها اشراق بنص عين كضحك وقالت وهي كتمد ليها الهدية ديالها
اشراق : هادي ديالك اميمة على الله تعجبك
شداتها الميمة عللى رجليها حلاتها لقات فيها صابو ميديكال وملابس داخلية طبية وبعض المعطرات الطبية وزيت للدهن معطرة وملابس وفولارات وبدات تشوف فيهم وتشوف فخليج
خليج : شنو بغيتي تجيب ليك رئيس كندا ؟ راه الكادو هادا واخا يكون عندك بحالو ...وراه هادوك الحوايج ديال الفرماسيان ماشي ديال الريكلام وداك الصابو راه مكيضرش فالرجلين وكاع داكشي اللي جابت ليك من لفرماسيان شبغيتي
الجدة : ايوا ما قلت والو الله يخلف
هبطات اشراق راسها ومدات ليها الة ديال الطونسيو وقالت : هادي باش متبقايش كل مرة تمشي معدبة تعبري طونسيو.. غير جلسي فادار وعبريه راسك
الجدة : الله يخلف عليك
تلفتا تخليج وقالت : هاديك راه مكتباعش عندنا يالاه واخا دوري العالم متلقايهاش كاينة فين كندا وهانتي تهلات فيك
بدات لاللة نزيهة كتغمزها وتعض فشنايفها باش تسكت ماتعصبهاش وهي تشير عليها بيدها بتمرد ونرفزة تخليها تقةل لي بغات ماتبقاس دير ليها دوك الحركات وتسكتها . حطات اشراق بعض الأغراض فالجنب شي فو شي وقالت
هادو ديال خواتاتو واولادهم
الجدة : داكشي كوولو ديالهم ؟؟؟؟
خليج بنفاد الصبر: غيتفرق عليهم وعلى وعلى ولادهم راه حشومة تجي من الخااارييج متجيب ليهم ولولادهم والو وهما لوايساتها بلعكس خصها تهلا فيهم كتر باش يتهلاو فيها راه خواتات راجلها
اشراق بهدوء : راه غير جوج خواتاتو وصافي وولادهم ماجبنا لحتى واحد اخر باش حتى واجد ميبقا فيه الحال... هما الى بغاو يعطيو ديك الساعة منهم راسهم
خليج : لواه تكشيطة .. تلميطة هاهي حلوها تشوف حل ارا داكشي لهنا
هزات الجدة راسها ـ خيااار
اشراق : صافي هادشي اللي كاين ... هادو ديال بيازيد
شداتهم خليج بكل فرح زادتهم على حوايجها وحلات ليهم اشراق الباليزة الثانية كانت عامرة سنادل فةطات دالحمام وبينوارات ومساحيق بالدوبل خوات كلشي عطاتو لمها وسدات الباليزات وقالت
هادشي اللي كاين
ردت الجدة : ايوا ماجبتيشاي لعمومك ولا عمتاتك ولا ولاد عمتاتك ولا بناتهم حتى واحد ماجبتي ليه شي حاجة
خليج : راه ماجاتش من الحج الميمة راه جات من كندا تشوفنا ماشي ترحل لينا لبلاد من تما ويالى جات تجيب لكشلي راه خصها طيارة بودها
الجدة : ويلى جاو شنو نعطيوهم ماشي حشومة
الحاجة : غنعطيهم صابونة ولا قرعة القهوى
الجدة : ناقصين صابون تعطيوهم الصابون
بدات اشراق كضحك وخليج معوجى فمها بالجنب وقالت : شنو بغيتي نعطيوهم راه ولد الناس جا يفوج ماشي يكسي العائلة حتى يمشي شي واحد فولادك وقولي ليه يجيب
اشراق : الميمة راه ماشي انا اللي كنصرف راه مكنخدم مكنردم ماجاتش نبقا نقةليه خاصني نشري لعمامي وعماماتي ولادهم كاملين
الحاجة : الى جيتي تجيبي لعمامك خاصك تجيبي لخوالك وشحال قدك ديال لفلوس
اشراق : داكشي علاش انا فكرت وقلت غنجيب للمقرين .. خوتي وخوتو وحتى جدو راه جاب ليه شي بركة اما عمومنا وخوالنا لا براكة خوتنا باش حتى واحد ميبقا فيه الحال وحتى داك الصابونات ماتعطي منهم لحتا واحد غتجبدي عليك الهضرة ... اللي حا يشوفنا مرحبا بيه حتى حنا بغينا نشوفوه واللي بغا شي حاجة أخرى ماعندنا منديرو ليه
تنهدات الجدة وناضت تنعس من بعد ماشافت الباليزات خواو وبقات غير اشراق وخليج ومها .. مدات ليها اشراق قرعة ديال الريحة وقالت
عطي هادو لعماد راه علي اللي شراهم ليه
خليج بسعادة : الله يعطيه الخير ههه
اشراق صافي الشي لاخر غير حوايجنا وحوايج استريلا وعلي
الحاجة : اللي جا عندك ابنتي قالك سلفيني ولا وعطين يقولو ماعنديش
اشراق راه نيت ماعنديش راه علي غيشري الدار وباقي تابعنا السبوع
خليج : راه دارو لعرس لبنتهم ماعردوش علينا غير عماد اللي جا عرض علينا وماما مامشاتش مشا غير بابا مع الرجال للصداقة وجا
اشراق : ماشي مشكل اللى هما ناشفين من الصواب منديروش بحالهم حنا يعاودو راسهم
خليج : اللي بغيتي ... ايوا فوقاش غتبداي توجدي
اشراق من غدا ... غيمشي علي يكري طموبيل وغنهزها ليه نمشي نشوف القاعات ونشوف كلشي
الحاجة : حتى لبعد غدا غدا راكم معروضين عند لوستك
خليج : كاينة طموبيل غنمشيو فديالي
اشراق: نشاء الله ... ايوا تصبحو على خير غنوض نعس
ناضت هزات بنتها ومشات للبيت حطاتها فبلاصتها وتخشات حدا علي اللي حال فمو ناعس واستريلا حداه حتى هي كرشها كلها عريانة والبيجامة واصلة حتى لوجهها ... بدات كضحك عليهم وقادات ليها النعسة وحوايجها وفرشات ليها فالارض حدا بنتها ونعسات
صبح الحال وصبح الكل لابس وواجد للعراضة ديال الغدا وخرجو كاملين فرحانين والحاج عبد الغني بالجلابة بيضاء ومشاو عند الهام استقبلاتهم قرحة كبيرة وكانت معاها ختها وولادهم ورجالاتهم فالدار , دخا اتشراق وخليج بجلالب وعلي وعماد بملابس عادبة كجميع الرجال والحاجة نزيهة بجلابة وصباط دومي طالون واستريلا وسط منهم فرحانة , تجمع الكل فالصالون كانها حفلة والكل فرحان والحلويات كيدورو والعصائر من بعد ضايفاتهم الهام بغدا داييزو لكلام هي وختها وديسير حلاو بيه الجلسة فاللخر حتى بدا الضلام يطيح عليهم بلا ميحسو بالوقت .. ناضت اشراق شارت لالهام بعينيها ودخلو للبيت مدات ليها الهدايا اللي جابو ليها ولختها ووليداتهم وعنقوها بسعادة شاكرين ليها وحلوهم قدمها تصدمو فالهداية الراقية اللي جابت وفرحو بيهم ورجعو للجلسة ديالهم كيتجمعو ويضحكو ويهضرو على السبوع والكل كيشارك بافكارو حتى تعاشات العشية ورجع كل واحد لدارو
بالليل تكات اشراق حدا علي كيتجمعو والبرودة داخلة عليهم من السرجم وقالت
فرحو خواتاتك الصراحة بداكشي الللي جبنا
علي : ايوا مزيان
اشراق غدا غنبدا التوجاد انا وخليج والهام حتى هي للسبوع ... غنمشيو نشوفو شنو كاين فالسوق
علي : لمن غتخلي صوفيا ؟
اشراق : صوفيا واستريلا غيبقاو مع ماما
علي : استريلا غنديها عند سميرة قالك بغات تبقا تما تلعب مع ولادها
اشراق : لا ماغتمشيش وتبقا بوحدا تما
علي باستغراب: علاش ؟
اشراق : الدار فيها الدراري وبالغين وهي بنت وسميرة الى غفلات عليهم متعرف شنو يوقع ... عرةسة وعريس ماخطات حتى دار
رد باستغراب : واييلي ؟؟؟ ولاكن ولاد سميرة مربيين زعما
اشراق : راه ماقلناش متشي مربيين اعلي وحتى سميرة الله يعمرها دار ولاكن البنت راه ماخصهاش تبقا فالدار فيها الأولاد ويتجمعو فبيت واحد يلعبو .. الى مشات سميرة للكوزينة غتعرف شنو كيوقع فالبيت ؟ والدراري حال واحوال مابقات لا فمربيين لا فماشي مربيين راه المراهقة هادي الشريف مكتعرف المربي من اللي ماشي مربي... زايدون الدار فيها راجل ولا دراري مخاصش البنت تبقا فيها والوقت خيابت ... ماتجلس تما بلا منكون انا وحتى الزنقة متلعبش فيها غتبقا هنا فالدار مع ماما وصوفيا سادة عليهم حتى نجي وغادي ترد ليها البال ولا نديها معايا كاع مالنا على هاد القرع نمشطو ليه راسو
بقا علي ساكت كيشوف قدامو كانها حلات ليه عينيه على جانب اخر وقال
وان تي تعرفي .. انا هادشي اول مرة نسمعو
اشراق : نتا مكتشوفش اش كيوقع للدرار والبنات فهاد الوقت ... ولادك متخليهم لحتى واحد يبقاو حداك ويباتو معاك راه ياما تعرضنا للتحرش وحنا صغار من اقرب الناس لينا وربي حفضنا
بنادم كبير وعقلو فففف... عساك البراهش اللي غير مدرمين
علي : صافي ديها معاك حسن فين ما مشيتي ديها معاك ماتخليهاش بوحدها
اشراق : داكشي اللي غندير ... تسارا شوية حتى هي
علي : شري ليها شي قفطان الى خرتو
اشراق : ماشي غدا حتى نمشيو لبلاصتهم راه مزال غادي نمشي نشري لماما شي حاجة تلبسها فالسبوع وليا انا ونشري ليها ديك الساعة ما تلبس حتى هي ضاروري
فقلب الدار خرجات اسريلا لابسة كسوة قصيرة وصنيديلة ةشعرها كوب شوفالوقالت كتقب بعينيها على علي
فين بابا نمشيو انا لابسة
خرجات اشراق من البيت بسروال دجينز وقميجة نازلة على مؤخرتها وشال على راسها وقالت
لا احبيبة غتمشي معايا انا غنمشيو نتساراو انا وخالتك خليج وعمتك الهام
دخلات بسرعة بدلات ليها ولبساتها وهزاتها كتبوس فيها وهي كضحك ليها فرحانة بالهزة وخرجو عند خليج اللي كتسنا لتحت وطلعو فالسيارة ومشاو مجموعين كيدورو من محل لمحل واشراق معلقة بنتها عندها .. دخلو لقصارية كبيرة كيدورو واشراق اللور كتشوف يمين يسار فالمحلات ... دخلو لمحل التنكاف وبقات هيا كدور عينيها وتشوف ودخلات هي ةاستريلا محملة بنتها لمحل ديال لبوفي وبدات دور وتشوف ... مع الدورة وهي كتسرح غينيها لقات طه واقف موراها كيشوف فيها فصدمة ويطلع ويهبط فيها وفبنتها اللي هازة, تخلعات ورجعات خطوة اللور كتشوف فيه مصدومة تالفة وكترمش ودورات عينيها لجهة أخرى باحترام .. قرب بابتسامة ودهشة وقف حداها ... باقي كما هوا ... متغير فيه حتى حاجة شوية ديال لكريشة بانت مع القميجة ..
قال بارتباك : السلام عليكم
تلفتت بارتباك عندو ةقالت : عليكم السلام
رد بابتسامة عريضة كيشوف فبنتها وقال : كي دايرة لاباس عليك ؟
رد بالإيجاب وابتسامة : مبروك عليك ... حتى انا .. جيت لهنا كنشوف ... ولدي عندو لانيف هاد الشهر
ردت بابتسامة : الله يطول فعمرو
هبط راسو بابتسامة : كي دايرة مع الحياة ؟ مرتاحة ؟
ردت بابتسامة ويدها على استريلا : الحمد لله ربي كيعوض كولشي ..ز ونتا مزيان ؟ كي دايرة المدام ؟
رد كيتنهد مع ابتسامة : الحمد لله ربي كيعوض كولشي ,,, وقريب غيتزاد عندي بنيتة
ردت متفاجاة مع ابتسامة : تبارك الله الله يجبها على خير ... والله يفك مراتك على خير وبيخير
رد بابتسامة : اميين ياربي ... غادي نخليك .. الله يكمل كولشي بيخير وعلى خير
ردت : امين والله يكمل كولشي بيخير وعلى خير عليكم
ابتسم ودوز يدو على شعر استريلا بابتسامة ومد وردة مسطنعة كانت فيدو لصوفيا مع ابتسامة شداتها بيدها وخرج خلاهم وسط المحل حتى رجعات خليج مخلوعة كتقلب وقالت
اويييلي اشراق حساب لنا تفتو علينا
خرجات مع خليج بسرعة وكتنهد بسعادة .. اخيرا تحلو جميع العقد فحياتها وحتى العقدة ديال زواجها الاول .. مشاعرها الاولى .. اتضح ليها انه مابقاوش احاسيس اتجاهه وهادا دليل كبير على انها نساتو بصفة عامة ومابقاش حتى نغزة من المشاعر اللي تكن ليه .. وكأنها كانت محتاجة لهاد الاختبار باش تأكد من صدق مشاعرهل اتجاه علي .. وواش ممكن للحنين يردها للوراء من بعد رؤية طه من جديد وتلاشي جميع الاحاسيس اتجاه علي ؟ هادا هوا اللي كانت محتاجة ليه ولقات جوابو وعرفات ان مشاعرها اتجاه علي مشاعر صادقة وليست وهمية وانما حقيقية وحب حقيقي ميحركو لا ماضي ولا حاضر ولا يغير فيه الحنين شيء
كملات التجول ديالها وقضات غرضها ورجعات للدار لقات علي يالاه جاب طموبيل وواقف حداها حدا الدار بواحد الشورط سيورو مدليين وكلاكيطة ويدو على جنبو كيحرك ليها السويركلاص اللي تكوانسا
شارت ليه بيدها كضحك وطلعات خلات معاه استريلا كالعب حداه وتعلق فيه تا كانت غتهبط ليه الشورط بالضحك وهوا يشدو بسرعة وقال
- هداااي شكديري حساب ليك داير سمطة
استريلا : واطلعني فطموبيل
علي: بلاتي غانديها تغسل عاد طلعي فيها .. اجي بعدا فين مشيتو
استريلا : مشيتا لمول
ضحك بسخرية : قيسارية زيدي ههه
استريلا : وصافي بقينا كندورو وهما كيشوفو الحوايج .. وصافي
هز راسو مصدوم كيشوف قدامو وصدرو كيطلع ويهبط ويزفر .. تزير كانه تقطع فيه النفس ورجع شاف فيها وقال بصوت مبحوح
- هوا اللي عطاها وردة
ردت بدون تركيز كدور المقود : اه
خرجات اشراق من الحمام هازة صوفيا ملوياها فبيموار بالقب ودخلات بسرعة للبيت كتجري حطاتها وجلسات مربعة كتشوف شنو تلبسها , فجاة دخل علي كيدور حداها بملامح غريبة كانه واقع فشي مشكل وكل مرة فين يوقف ويدور وهي كتشوف فيه وتلبس صوفيا ,
عقدات حواجبها باستغراب وقالت: مالك ا علي ياك لاباس شنو مدوخك
رد بالنفي وجلس بعيد عليها شاد واحد كارني دشيك كيحل فيه ويسد وقال: والو .. مكاين والو ... شريتو داكشي اللي خصكم ؟
ردت بابتسامة : عطينا العربون فكلشي ... بقات غير القاعة , الى كنتي غتشري الفيلا قبل السبوع بلاش ما نكريو قاعة نديرو فيها حسن
دور وجهه للجنب كيحرك راسو بالإيجاب بتتاقل بلا ميهضر وهي كتجمع وتلبس لبنتها .. شافت فيه بعفوية وقالت
خصك حتى نتا تخرج تشوف ليك شي جليليبة وشي بلغة تلبسهم ... أصلا مغاديش نكتر عليا اللباسي درت غير جوج صافي ... درنا مع عيساوة ودقايقية وحتى عبيدات الرمى والجوق .. هاكا ميقنطش الواحد وتكون الليلة فيها ميتشاف ... الصراحة دوك عيساوة وااعرين عرفتي على دخلة كيديرو للعروسة.. ماتقووولش ليا مغاديش طلع فالطيفور حيت مغنقبلهاش منك و...
خلاها كتهضر وناض بلا ميجاوبها هز صوفيا عنقها وباسها وهي كضحك ليه وحطها وخرج خلا اشراق غير كتشوف مافهمات والو فيه
دخلات الحاجة : مال علي جاني ماشي هوا هاداك غير معصب وداخل خارج دابزتو ؟
ردت بهدوء : راه معصب مع الدار باقي كيقلب ويشوف ومدوخو السبوع ... نتلف
الحاجة : وا رخفي عليه شوية ابنتي حتى نتي من اراا ارا ارا
اشراق : راه السبوع هادا اماما مكاين غير جبد ,,, بابا كاين ؟
الحاجة :عاد جا دابا را كيصلي
ناضت هزات البنت وهزات دفتر وستيلو وخرجات عندو لوسط الدار جلسات حداه وحلات الكتاب قائلة
بابا ... اجي شوف معايا الناس اللي نعرضو ليهم ... هانتا راه درنا عشرين طبلة .. عشرة ديالي وعشرة ديال عائلتو
الحاج : بزااف عليكم عشرين طبلة مالكم دايرين العرس ؟
اشراق : هوا فالحقيقة كنا درنا غير تمنطاش ولاكن زدنا جوج خفنا الزايد يجي وكيلقا فين يجلس .. وعاد غادي نعرضو على عائلة عماد غير هما بوحدخم راه طبلة
الحاج : شكون قالك غيجيو أصلا ؟
اشراق : دابا تشوف الى ماجاو ... غتعرضهم نتا وغادي نعرضهم انا المرة الثانية .. الى مجاوش يضبرو راسهم ديك الساعة .. ها طبلة مشات ... وا حسب خنا العائلة عندنا قداش راه عشرة يالاه يالاااه يتكافاو . انا معندي صحابات ماعندي والو هاك ها الورقة وستيلو وقيد راسك غنهبط عند علي نشوف شكيدير
نزلات خلاتو كيقيد ولقات علي جالس بوحدو فطموبيل كيشوف فتيليفون وساد عليه , حلات عليه الباب كتشوف فيه وقالت باستغراب
مالك جالس هنا بوحدك ياك لاباس ؟
مجاوبهاش وبقا ساكت كيشوف فتيليفون .. طلعات جلسات حداه وسدات الباب وقالت : راه بابا كيقيد الناس اللي غيجيو للسبوع وحتى نتا خاصك تقيدهم باش نبداو نعرضو صافي ... راه كوولشي دفعنا فيه العربون
رد ببرودة كيشوف فتيلي : شوفي داكشي مع سميرة
قات باستغرب : اويلي مالك ماتعرضش على عائلتك ؟
قلب عينيه لجهة أخرى وبقا ساكت ... مابغاتش تزيد معاه الهضرة وهزات تيلي عيطات لختو هضرات معاها وطلبات منها تعرض للمقربين ديالهم فالعائلة وقطعات كتسوط وتقول
انا جيتيني مافرحانش كاع بالسبوع ديال بنتك .. بحال الى دايرو ليها غير بزز الله يستر
نزلات كتسوط وخلاتو جالس كيشوف فيها بنص عين
تنصص الليل وهي مزالة فايقة كتمشي وتجي فوسط الدار ومها وباها واقفين حداها وكلشي مخلوع .. شادة تيليفون وكل مرة تعيط لشي واحد تسول فيه وترجع تقطع
اشراق : فين غيكون مشا فهاد الليل ؟ لا تيليفون شاعلو لا والو وحتى استريلا معاه فين غيكونو ؟ ياكما تكون وقعات ليهم شي حاجة ؟
الحاج : صبرو غيكون طفا ليه تيليفون ... مالكم مخلوعين
جلسات مهبطة وجهها باغا تبكي وقالت : يا ربي متكون وقعات ليهم حتى حاجة ياربي .. ياربي قلبي غادي يسكت
الحاجة : واغير بلاتي نتسناو شوية يكون طفا ليه تيليفون كما قال باك
رن تيليفون فيدا وكانت الهام المتصلة ووقفات اشراق بسرعة ردات مخلوعة
الو الهام ... اختي شنو كاين عرفتيه فين
الهام : ماتخافيش راه فالدار دالواليدة واستريلا معاه بلا متخلعي راه مشا رشيد كيقلب عليه تما ولقاه
الهام : صافي متخلعي والو راه غير فالدار تلقايه عيان بغا يتسنط لعضامو ولا توحش الواليدة ومشا لتما للدار مابغا يصدعو حتى واحد
اشراق : ياختي هوا مابغا يصدعو حتى واحد وحنا يخلينا مخلوعين بلا نعاس بحال هاكا ؟ راسنا كيديو ويجيب وكنقولو ياكما واقعة شي حاجة الله يستر
الهام : وصافي دا غير نعسو ماعندكم علاش تخلعو ولا تخافو .. غدا نتلاقو نشاء الله نديك عند مولات الحلوى اللي هضرنا عليها يالاه تصبحو على خير
اشراق : تصبحي على خير شكرا اختي
قطعات وشافت فواليديها قائلة : راه فالدار دمو الله يرحمها وحتى استريلا معاه
ردات الجدة من البيت والفم محيد محطوط حداها فالكاس: ثضعتو الراجل ماخليثو يثسنط لعضامو فدار يماه الله يعطيكم الفطح
الحاج : ايوا هااهوا لاباس عليه ... يالاه نوضو تنعسو تصبحو على خير
تنهدات ودخلات للبيت سدات عليها وحطات مخدة فالارض نعسات حدا بنتها بعيدا على حراراة الناموسية فشهر8
رجع فلعشية للدار ودخل بحال الضيف سلم عادي عكس الحاجة اللي تصرفات معاه عادي ماعارفة اش واقع , جلس فطرف الكنبة دور عينيه وقال : اشراق مكايناش ؟
ردت الحاجة من البيت كتبدل لصوفيا وقالت : مشاو عند مولات الحلوى هي والهام
رد : جيبي معاك صوفيا عفاك
كي خرجاتها ليه كضحك فرحانة وهوا يضحك وشدها عنقها كيبوس فيها ويهض رمعاها بسعادة ... جات عندو استريلا كتجري جلسات حداه عنقاتو وهي تعوج صوفيا فمها كتشوف فيهم وبدات تبكي وترعد بيديها وتشهق والدموع هابطين تاتخلع وعنقها بسرعة كيعيط للحاجة ويسول مالها وشنو وقع ليها وحتى واحد فيهم ما فهم مالها ... دغيا بكات ودغيا سكتات . قربات استريلا شدات ليه وجهه كتبوس وتسول على اشراق وهي تغوت صوفيا كتبكي والدموع نازلين ويديها كيترعدو وكتشوف فيهم .. ناض وقف بيها كيسكتها ودخل عند الحاجة للكوزينة معنقها وهي كتنخصص وترعد وقال
جرات استريلا علي من يدو كضحك وقالت : بابا هزني حتى انا هزني
هزها كيسوط ويشوف فصوفيا معارف اشنو ضرها .. فجاة ماحسو بيها تا لقاوها غارقة فالدموع حسي مسي .. بحر البكاء تقطع فيها الصوت وكتشهق والحاجة كتراري بيها مخلوعة وهي كدور عينيها جهة علي وترعد فيدين الحاجة .. حط استريلا بسرعة مخلوع وهي ضحك الحاجة وقالت
اااا كتغيييير ههههه كتغييير هاد فلوووسة هادي كتغييير اعباد الله
دخل هازها للبيت كيهضر معاها بغنج ويبوس وفنس الوقت كيقلب على صل
اك اشراق اللي كانت هازة اخر مرة . لقاه محطوط فوق الباليزة ومشا وقف حداه حلو وطل كيقلب لقا الوردة الزرقاء مزالة تما , خرجها كيشوف فيها ويتمعن ويدورها فيدو .. سمع صوت اشراق دخلات ولاحها فالصاك سدو وبعد من حداه بتتاقل هاز صوفيا ..
هزاتها شافت فيها مخلوعة حسابها كانت كتبكي وقالت باستغراب : خليت ليها الحليب بحال ديما علاش شرباتو كامل ؟
خرج بخطا تقيلة حتى للباب ويديه على جنابو فوق السمطة البنية ورجع عاوتاني بخطا تابتة كيدور حداها ويسرح عينيه من السرجم .. بقا ساكت شحال وهي كترضعها وضحك معاها وقال ببرودة
فين مشيتو ليوم ؟
ردت بعفوية كتمسح لصوفيا فمها : مشينا دفعنا الحلوى ديال السبوع انا والهام عند واحد السيدة فالمدينة ورجعنا
دور راسو بميوعة شاف جهتها و تحنا عند صوفيا بابتسامة وهي كترضع باسها فخدها .. مدات اشراق يدها على شعرو بحركة حنونة دوزاتها علي وهوا يبعد راسو وقال بصرامة
جمعي يدك
شافت فيه معجبة وقالت : اويلي مالك ؟
ناض خرج خلاها جالسة بوحدها غير كتشوف وتهضر مع راسها
اويلي مالو ؟ خاف نخسر ليه التسريحة ولا شنو ؟
والتيساع والجردة واسعة مكان السيارات بوحدو والدخلة بالرخام .. وقفو فقلب الفيلا وربع يديه كيشوف واستريلا طالعة نازلة مع الدروج
عجباتو الفيلا فساحاتها وشكلها الجديد ورضا عليها وتكاتب اخيرا ورجع هوا واستريلا فقط كيدورو فيها كانت فيلا حديثة مجهزة بأحدث الديكوارت والاصلاحات .. جلس فوق الكاربيع كيسرح عينيه فالجردة واستريلا كدور بلابيسين وتسول فرحانة
خرجات من البيت لابسة سورفيت وشالها وبزطامها فيدها و نزلات لقاتو يالاه وقف الروايض .. ابتسمت وقالت
- علي غادي ناخد ليك الطموبيل مكاين فاش نمشي ... خليج دات ديلها للمكانيك صربها ليها واحد من اللور
ماهضرش معاها فقط مد ليها السوارت ودارت ركبات بلاصتو وقالت
- يالاه تمشي معانا
رد : مشغول عندي مايدار
اشراق: اللي بغيتي .. انا غندوز على خليج للنادي ونمشيو .. يالاه استريلا طلعي
طلعات استريلا اللور وزادت اشراق سايقة سيارة كاط كاط ومشات دازت على خليج وهبطو للمدينة ... من حانوت لحانوت ومن قفجان لقفطان ومن تكشيطة لتكشيطة عاد لقاو داكشي اللي بغاو وخدات داكشي اللي خصها ورجعات بحالها للدار مقدية .. حطات كولشي فالبيت وتعشاو وجلسات بوحدها كتصوني عليه وهوا مكيجاوبش
صونات مرة اخرى لخواتاتو حمقاتهم عليه عاد صونا ليها هوا وفتحات الخط معصبة
- علاش كطفي تيليفونك فين كتمشي ؟ ... حتى ليوم ماغاتجيش تبات هنا ؟ ... علي مالك شنو كاين كاتمشي تغبر وكتخليني حامقة عليك ؟ ... غتبات عاوتاني تما ؟؟؟ واخا اسيدي اللي بغيتي
قطعات وحطات تيلي واستريلا فوق الناموسية كتكور .. بتسمت وقالت
- عرفتي بابا شرا واحد الدار زوييينة فيها لابيسين
اشراق : شرا الدار !!!!!
استريلا : اه كبيييرة وزوييينة
خرجات عينيها : كفاش شرا الدار كنتي معاه ؟
استريلا : كنت معاه فيها وغادي يفرشها قالي غدا غيمشي يشري ليها الفراش
هزات حاجبها : شرا الدار وغادي يمشي يفرشها ؟ تباااارك الله ... شرا كاااع !!!
دورات راسها كتشوف قدامها مصدومة وترمش .. باتت الليلة كلها كتفكر وتخمم حتى صبح الحال .
دق فالباب الصباح حلات ليه الحاجة ودخل كيسول على استريلا وصوفيا .. دخل للبيت عند اشراق لقاعا جالسة كترضع ونقزات عليه استريلا كتجري هزها باسها .. قلبات صوفيا عينيها شافتهم وهي طلق البزولة بدات كتبكي حتى حمار وجهها ومشا ليها كيضحك هزها من بين يدين اشراق وهي كتخنزر فيه
طلق منها تم غادي واشراق كتشوف فيه بتشكيك وناضت بسرعة حطات صوفيا ولاحت عليها عباية كحلة طويلة مطروزة بالزرق وشال ولبسات صندالتها مجات قدامها فير وحدة عالية وهزات صاكها ونضاضرها بسرعة وخرجات كتلوح الشال من الجناب للكوزينة وقالت
- ماما انا غنمشي مع علي دابا حضي معاك صوفيا واستريلا هانا جايا
نزلات كتقرقب وتعتر كتجري هازو العباية لقاتو زاد بطموبيل مع الحي وهي طير على باها اللي يالاه نزل من طموبيل
- عطيني سوارت هانا غنجي دابا ...
قبل ميهضر الحاج ركبات كتفتف وزادت كطير تبعاتو كتقلب بعينيها حتى بان ليها فالسطوب ... دارت نضاضرها من الشمس وعزمات تبعو فين ما مشا واخا يمشي لطرف الدنيا .
وقف فشارع كبير فالجنب وهي طلع معاه بنت زعرا فالطنوبيل كضحك قدام عينين اشراق المصدومة اللي نزل عليها جبل من الصدمات وطاحو كتافها ماقدرات تحرك رجلها .. داخت وتلفات وتأزمات ات تبكي بلا شعور وتحركات تابعاه كتبكي وتنخصص وكل مرة تفلت من كسيدة .. مرة تشد عليها طاكسي الفران مرة تشدو هيا
.. سطوبات حرقاتهم والروايض حكاتهم كانها اول مرة تسوق سيارة .. وقف حدا مقهى كبير ونزل اير نضاضرالشمس ومعاه البنت حتى هي كضحك لابسة طالون ودجينز و طالقة الشعر ودايرة النضاضر .. هزات اشراق فران امان بلغدايد ومسحات دموعها كتشهق ونزلات تبعاتو للقهوى كتقلب عليه
شافتو فالجرة ديال القهوة من الضهر حدا واحد النافورة جالس كيضحك ويضهر وهي توقف عليهم ماعرفها منين نزلات حتى نترات النضاضر من عينيها بنرفزة كتشالي بكمام العباية الواسعة وقالت
- علي ؟؟؟ شكادير هنا ؟
وقف شاف فيها مصدوم وهي كتشوف فيه وتشوف فالبنت اللي معاه وقال
- شنو كديري هنا ؟
هزات البنت عينيها فيهم مافاهمة والو وهي ترد اشراق بغضب
- اشنو كدير هناااا ؟ جاوبني ؟؟؟ شكون هاد البنت ؟
شد ليها فكتفها جرها كتنتر وزير عليها وهي كتنكر يطلق منها تا خرجها لبرا ووقف كيضحك حدا الطموبيل ومسح لحيتو وقال
ردت كتمسح دموعها : راك كتهضر مع اريانا ... وتلاقيتي بيها وانا مكايناش ... واش شكيت فيك ؟ واش تبعتك ؟ ... الى ماكنتيش كتيق فيا شغلك هادا ولاكن ربي راه كيشوف كلشي ... حسبي الله ونعم الوكيل فيك ..سير رجع كمل الجلسة ديالك مع صاحبتك وسمح ليا ...
مشات كتبكي جهة الطموبيل وهوا متبع ليها العين بأسى وحزن شديد .. دور وجهه مابغاش يبقا يشوف فيها لاكن ماقدرش ومشا تبعها بسرعة حل عليها الباب وهي كتبكي جرها من لداخل وعنقها بقوة كيبوس ليها راسها ويبوس ليها يديها ... سخفات بالبكا ومابقاوش قادين رجليها يهزوها ومابقاتش قادة حتى تخرج الهضرة .. فشلات وبقات فلسنانها كلمة وحدة
- مانويتش فيك اعلي دير هادشي مانويتش فيك ....
بقات كتقولها وتعاودها وقلبها غيسكت بالبكا .. مشا كيجري جاب ليها قرعة دالماء من الطموبيل وهي حاطة راسها على المقود فشلانة والدموع كتجري .
شربات ديك الجمغة بزز وهوا كيطلب منها السماحة ويعاود ويبرر موقفو بارتباك وبعد المرات بعصبية بدون شعور
سكت وبقات تابع اشراق هي اللي كتري وتشير بصبعها لشنو يديرو ليها فالفيلا ويتشاورو معاها ... طلعات لبيت النعاس لقاتو كبير قدو قداش وبدات تستاشر مع المصممة و توريها شنو بغات فيه واللون اللي بغات .. تدخل علي بسرعة وقال
- الى قدرتو تجيبو لينا بيت النعاس هاد العشية حسن
شافت فيه اشراق مومة وحلات فيه عينيها وهوا يرجع اللور كيشوف فيها بتساؤل ويردد بصوت منخفض
- مالي شنو قلت ؟ !
تنهدات كضحك وكملات شغلها تا صارت على لفيلا وكاملة ودازت للجردة تاهيا وخرجات مع علي باش ترجع بحالها وقالت
علي: اللي عجبك ديريه ... انا غنمشي معاهم نجيب بيت النعاس والى صلاح ليا غنجيب حتى بيت لبنات .. نباتو هنا هاد الليلة (همس فودنها ) توحشتك
دورات وجهها كضحك وقالت : الرولاكس ... حتى هوا حتى لمور السبوع ... التريتور غيجيب الطبالي ويحطهم تما فالجردة يجلسو عليهم الناس (شافت فيه) غتلبس الجلابة؟
همس فودنها مع قبلات : نلبااس الجلابة
بعدات كضحك : يالاه نمشيو صافي مشا الحال باقي تابعنا مايدار
دخل بيت النعاس للفيلا بفراشو وعلي واقف عليه حتى تركب في حين اشراق كتجري من حاجة لحاجة وتوجد والكل فرحان والدار عند مها بدات تعمر بالعائلة قبل نهار السبوع .. من واحد لواحد بدات الهضرة دلفيلا كدور وكولشي رجع باغي يمشي ليها نيشان ويسول على العنوان .. ايه علاش لا يجلسو فيها واحد اليوماين ويتمرحو واكلين شرابين والخدامة تسخر عليهم ! ولاكن خرجات ليهم خليج قطعاتها فيهم واللي نطق تقول ليه خاوية كتصلح .
اما اشراق جمعات باليزتها هي وبناتها ونزلات عند علي خلات الضايف لمها فالدار جالسين ومشات لدارها .
كان بيت النعاسو من اجمل غرف النوم الحديثة وماقصرش علي فتجهيزو من ناحية الفراش والتنسيق والديكور والاضواء .. وحتى بيت بناتو تجهز من اجمل البيوت ديال الاطفال وحط لاستريلا نونوسات فوق الناموسية وخلاها كتنقز فوقها فرحانة ... دخل لبيتو لقا اشراق كتستف حوايجها بارتياح ولابسة بينوار خفيف قصير والبلكونات مفوهة والغربي داخل والاضواء ذهبية شاعلة خافتة .. مسح عنقو بابتسامة من الماء ديال دوش اللي خدا ومشا للبياص ديال صوفيا طل عليها لقاها ناعسة ونزل باسها بشوية ومشا وقف مور اشراق عنقها وعطاها قبلة فعنقها وقال
- كبيدة ديالي؟ مرتاحة هنا ؟
ردت بابتسامة : بزااف ... تواسع والكالم ... حسن
دورها عندو وقال : شنو دابا ؟ شي ولد؟
ردت بالنفي كضحك : مور مانسالي القرايا هههه
هزات الكينة بغات تشربها وهوا يشد ليها يدها وقال
- بلاش عفاك ... الردراي الصغار زوينين
ردت كضحك : باقيي الحال
ليها يدها بترجي : بلاش الى كنتي كتبغيني ماتشربيهاش ... كملي قرايتك كما درتي مع صوفيا وانا نعاونك
شد ليها يديها اللور وقال عن قرب : خلينا نديرو وليداتنا .. ياك كتبغيني وكنبغيك .. و غنعاونك فيهم .. صافي؟
قالها وهوا كيقرب ليها ويشوف فشفايفها .. قبلها على فمها قبلة طويلة حتى طلقات من لكينة لاحتها فالارض وعنقاتو بيها بجوج على عنقها .. بعد شوية شفت فيها بحب وقال
- كنبغيك
ابتسمت وردت : حتى انا كنبغيك
هزها على وقفتها طلعها فوق السرير وتكا عليها كيقبلها بحرارة ويبوس يديها ويحل ملابسها وهي فقة السعادة معاه .
تهزو الطيافر على نغمات الف هنية وهنية فقلب الفيلا امام جميع الحضور اللي عرضو ليهم كاملين .. كانت فأبهى حلة بالحجاب ديالها والتاج على راسها شادة صوفيا فيديها وخوا حداها فالطيفور باللباس بلدي وقدامو استريلا بتكشيطة فنفس التوب والخياطة داشراق وصوفيا .. شاد ليها فيديها كير ليهم باي باي ويضحك معاها وهي فرحانة بلا ميحشم من الحضور ولا يعيرهم انتباه .. قايلو ليهم الطيافر مع بعض كيشطحو بيهم وهوا كل شوية يضحك مع اشراق ويغمز ليها وهي كتموت بالضحك وتبعو بعينيها والكل واقف كيسفق والفيلا عامرة .. المشروبات والحلويات كيتفرقو والجوق والدقايقية فدقة وحدة كيلعبو والدنيا حامية ... حطات خليج يدها على فمها وهي واقفة حدا عماد كتسفق بيديها فتكشيطة زرقاء والشعر مطلوق وبغات ترد .. تلفت شاف فيها ومشات تبعها للحمام كترد على خاطرها وهوا هازها ليها جلايلها من الارض حتى سالات وهزات راسها كضحك وحطات يدها على كرشها غمزاتو وهي يضحك تا بانو ضراسو وعنقها بقوة فرحان .. ضرباتها بتعكيرة وخرجات بحال الى هي العروسة وهوا شاد فيها وعائلتو اللي عرضو عليهم جلسين فالطبلة كاملين كيسفقو ويتفرجو .. اما الجدة فراسها كيدي ويجيب اللور .. النعاس قاتلها وحداها عرام دالبز مجبد فوق حد السداري وهي ولا بغات تنعس ... كل شوية تحل عينيها طل فين وصلو وترجع تمايل .
تحطو الطيافر فالارض وشدات لاللو نزيهة صوفيا من عند مها وجلسو استريلا فالبرزة كأنها هي العروسة ومشات شادة ليه فيدو كضحك وتسلم على العائلة وترحب هيا وياها والكل كيرمي ليها القبل
العمة لبنتها : شوفي الناس بيمن مزوجين الخرااابات
الخالة لبناتها : تعلمو ماينفعكم من لالياااتكم ... طرطقي عينيك فالفيلا لقيتييها يا وجوه الزلط
وحدة من المدعويين : ايوا راااجل ياختي واشمن راجل ... بغيت نعرف كي دارت ليه نديرو بحالها
وحدة اخرى : السعد المسكد ... بناتنا ماسكدو تاشعرهم بقا لباباهم غا الراجل يعرفو ليه ... العيالات لمكودات مدار لعام تا ولدات ليه .. لعام جاي مرحبا بيكم للسبوع عاوتاني حنا غنبقاو غا نتعرضو هادا جهدنا
وقفو الوسط مع العائلة والاحباب كيشطحو واشراق كتلعب بكتافها وعلي كيضحك هوا وعماد وكل شوية يعنقها بيدو من اللور بعفوية ولا يشد ليها فيدها .. اما لاللة استريلا جلسات حداها النقاشة كتنقش ليها وهي جالسة كي لعروسة بالشعر مطلوق بوكلي والتاج ورجليها ويديها منشورين عاجبها الحال
النهاية .... اححح ماسخينا يالاللة ماسخينا بالجمعية . تا انا ماسخيت وعارفاكم ماسخيتو ولاكن كيسالي شي فين يجي شي وشي ينسينا فشي الحيبان تهلاو ليا فراسكم كنحبكككم .. عواشر مبروكة باش ماتمناو انا ندعي معاكم من القلب الله يروقكم مانويتو والله يصلح من حالكم ويزقكم الزوج الصالح اللي تهناو بيه فحياتكم امييين ياربي امين . مودعنا في قصة اخرى احبكم ❤
الحلم الأسود الجزء 30 والأخير
محتوى القصة
التنقل بين الأجزاء